29-й день

Святы́я преподобному́ченицы Феодо́сии де́вы

Преподобномученица Феодосия

Свята́го и блаже́ннаго Иоа́нна, Христа́ ра́ди юро́диваго, У́стюжскаго чудотво́рца

Блаженный Иоанн, Христа ради юродивый, Устюжский чудотворец

Пра́зднование Пресвяте́й Влады́чице на́шей Богоро́дице в честь ико́ны Ея́, имену́емыя «Спору́чница гре́шных»

Икона Божией Матери Споручница грешных

Стихи́ры святы́я, глас 8.

Подо́бен: О, пресла́внаго чудесе́:

Заре́ю де́вства сия́ющи,/ Феодо́сие честна́я,/ и порфи́рою кров́е/ муче́ния, всему́драя, обагре́ною,/ све́тло оде́яна,/ и в преми́рный Христо́в черто́г все́льшися,/ отрокови́це веенепоро́чная,/ лику́еши с чи́нми а́нгельскими,/ вои́стинну неразори́мое ликова́ние, сла́вная.

Му́ченице де́во,/ всехва́льная Феодо́сие,/ Христа́ вседу́шно возжела́вши,/ муче́ния претерпе́ла еси́ ра́ны,/ до́блественне ураня́ема за твоего́ Рачи́теля/ и стру́жема ногты́ по ре́бром./ О, по́двигов твои́х тве́рдаго противле́ния,/ и́миже на зе́млю вои́стинну/ низве́ргла еси́ го́рдаго.

Добро́тою души́ же и телесе́/ укра́шена све́тло,/ Христу́ пренесла́ся еси́,/ сла́вы венце́м жела́ющи от Него́ увязти́ся,/ Феодо́сие, му́ченице всесла́вная,/ и Ца́рствия я́ве диади́му, вои́стинну многоце́нну,/ досто́йно прия́ти твоему́ верху́,/ неве́ста нетле́нная я́вльшися, всему́драя.

Стихи́ры Богоро́дицы, глас и подо́бен то́йже:

Ра́дуйся, душ просвеще́ние,/ согреша́ющих проще́ние, неради́вых исправле́ние./ Ра́дуйся, утеше́ние и ра́дость, скорбя́щих Помо́щнице./ Ра́дуйся, Блага́я, немощны́х душ исцеле́ние./ Ра́дуйся, примире́ние к Бо́гу и Хода́таице,/ Серафи́м всех я́ко су́щи святе́йши, Чи́стая.

Плоть от крове́й Твои́х прие́м, Преве́чный Бог/ Тя Предста́тельницу показа́ челове́ком, Чи́стая./ Те́мже изба́ви рабы́ Твоя́ от вся́кия беды́ и обстоя́ния/ и се́тей лука́ваго врага́/ и сия́ния причасти́тися сподо́би избра́нных,/ вся сла́вящия и покланя́ющияся Тебе́.

Спаси́ мя, Влады́чице Пречи́стая,/ Я́же Спа́са Христа́ неизрече́нно ро́ждшая:/ Тя бо еди́ну стяжа́х Предста́тельницу,/ и необори́мую сте́ну, и покро́в, и ра́дование,/ и души́ моея́ Боже́ственное утеше́ние./ Ты у́бо мя изба́ви неусыпа́ющаго че́рвия/ и огня́ ве́чнующаго, Ма́ти Христа́ Бо́га.

Сла́ва, и ны́не:

Да гла́сы велича́ю Тя/ ра́достными, Чи́стая,/ и сла́влю пучи́ну человеколю́бия Твоего́,/ от бед спаси́/ и изми́ мя душетле́нных стрел/ неви́димаго и вселука́ваго врага́:/ Тя бо предлага́ю на него́, Богоневе́сто,/ ору́жие тве́рдо и непобеди́мо,/ Ма́ти Христа́ Бо́га.

Крестобогоро́дичен:

Что́ зри́мое виде́ние,/ е́же Мои́ма очи́ма ви́дится, о Влады́ко!/ Содержа́й всю тварь, на Дре́во воздви́жен быв,/ и умира́еши, всем дая́й жизнь,–/ Богоро́дица, пла́чущися, глаго́лаше,/ егда́ узре́ на Кресте́ возноси́ма/ из Нея́ неизрече́нно возсия́вшаго Бо́га и Челове́ка.

Тропа́рь, глас 4:

Доброде́тель благоприя́тно, му́ченице, пости́гла еси́,/ Христо́во прия́телище бы́вши чи́стое/ и Свята́го Ду́ха дом возлю́блен;/ отню́дуже посрами́ла еси́ врага́, борю́щаго род челове́ческий,/ до́бре страда́вшая,/ и посе́кла еси́ Копрони́ма, Феодо́сие, мече́м ве́ры,/ и к черто́гу Небе́сному преста́вилася еси́, ра́дующися./ Тебе́ ве́рою чту́щим/ при́сно проси́ ве́лия ми́лости.

Кано́н, его́же краегране́сие: Феодо́сии му́ченицы пою сла́ву. Глас 4.

Песнь 1

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав, Изра́иль/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Бог тебе́, Феодо́сие, бысть путь страда́ния,/ на Крест во́лею возше́дый, низложи́в мучи́теля,/ я́коже пти́це, наруга́тися, от му́ченик соде́ла.

Благомо́щно, Феодо́сие всечестна́я, на земли́ разори́ла еси́ нача́льника пре́лести,/ кре́пко пострада́вши, прехва́льная,/ и сла́вы вене́ц я́ко победоно́сица, му́ченице, прия́ла еси́.

Дре́вле велехва́льство име́вый, ны́не низложи́ся,/ твоему́ терпе́нию, му́ченице, прирази́вся:/ Креста́ бо си́лу восприе́мши, посрами́ла еси́ безме́рно того́ шата́ющася.

Богоро́дичен: Лука́вно прельсти́ мя змий, взят плене́нна, обожи́тися жела́ние ми вложь;/ Тобо́ю же, Пречи́стая, призва́н быв, обожи́хся непреме́нно вои́стинну.

Песнь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Жела́ние Боже́ственное, Феодо́сие,/ тя че́стну показа́ неве́сту, Христо́ву му́ченицу,/ Того́ Крест возлюби́вшую.

Пло́ти тлетво́рное оста́вльше, о честна́я, промышле́ние,/ Животворя́щим Ду́хом живе́ши, Феодо́сие пресла́вная.

Уврачу́й мой ум, Богодарова́нною твое́ю, честна́я, благода́тию,/ и ду́шу, страстьми́ разсла́бленную, исцели́.

Богоро́дичен: Возста́вила еси, о Чи́стая, па́дший мой зрак,/ ро́ждши Нача́льника, Влады́чице, всех нас воскресе́ния.

Ин конда́к, глас 4:

Боже́ственная па́мять твоя́, Феодо́сие,/ днесь возсия́вши,/ яви́ся ми́рови я́ко со́лнце,/ сказу́ющи житие́ твое́./ Ты бо воздержа́нием плотска́я двиза́ния разо́рши/ и страда́ния кро́вию уневе́стилася еси Христо́ви./ Те́мже хва́лящия тя изба́ви от вся́ких зол,/ да зове́м ти:/ ра́дуйся, ма́ти преподо́бная.

Седа́лен, глас 8.

Подо́бен: Прему́дрости:

Крове́й твои́х струя́ми всю кре́пость лука́ваго диа́вола/ я́ко вои́стинну погрузи́вши, сла́вная,/ прешла́ еси́ невре́дно мук всевели́кую пучи́ну/ ив земли́ святе́й я́ве всели́лася еси́,/ по́честь трудо́в досто́йно прие́мши,/ черто́га вхо́да Небе́снаго сподо́билася еси́, Феодо́сие прехва́льная./ Моли́ Христа́ Бо́га грехо́в оставле́ние пода́ти/ чту́щим любо́вию святу́ю па́мять твою́.

Богоро́дичен:

Небе́сную дверь и киво́т,/ пресвяту́ю го́ру, све́тлый о́блак воспои́м,/ неопали́мую купину́, слове́сный рай, Е́вы воззва́ние,/ вселе́нныя всея́ вели́кое сокро́вище,/ я́ко спасе́ние в ней соде́лася ми́рови и оставле́ние дре́вних согреше́ний./ Сего́ ра́ди вопие́м Ей:/ моли́ся Сы́ну Твоему́ прегреше́ний оставле́ние дарова́ти/ благоче́стно покланя́ющимся Всесвято́му Рождеству́ Твоему́.

Крестобогоро́дичен:

А́гнца, и Па́стыря, и Изба́вителя А́гница зря́щи на Кресте́,/ восклица́ше, пла́чущи и, го́рько рыда́ющи, вопия́ше:/ мир у́бо ра́дуется, прие́мля Тобо́ю избавле́ние,/ утро́ба же Моя́ гори́т, зря́щи Твое́ распя́тие, е́же терпи́ши за милосе́рдие ми́лости./ Долготерпели́ве Го́споди, ми́лости бе́здно и исто́чниче неисчерпа́емый,/ умилосе́рдися и да́руй согреше́ний оставле́ние/ ве́рою пою́щим Боже́ственныя стра́сти Твоя́.

Песнь 4

Ирмо́с: Вознесе́на Тя ви́девши Це́рковь на Кресте́,/ Со́лнце пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Шата́яся, мучи́тель ра́нами устраши́ти кре́пость твоего́ терпе́ния хотя́ше окая́нный:/ ты же, прехва́льная, – сла́ва Бо́гу моему́, – взыва́ла еси́.

Богода́нным и Боже́ственным именова́нием/ проуве́денно обогати́лася еси́, му́ченице страстоно́сице:/ да́ние⁷⁶ бо была́ еси́ Бо́жие, нас веселя́щее,/ ве́рою тя и любо́вию почита́ющия.

Укра́шеною, Богому́драя Феодо́сие, му́ченическою кро́вию твое́ю,/ омоче́ною оде́яна оде́ждею,–/ теку́ во след Тебе́, – любо́вию Жениху́ твоему́ взыва́ла еси́.

Богоро́дичен: Воплоще́нно Сло́во, Чи́стая Де́во,/ боголе́пно родила́ еси́ и пребыва́еши Де́ва./ Те́мже немо́лчными гла́сы, ра́дуйся, Тебе́, Влады́чице,/ ве́рою несумне́нною взыва́ем.

Песнь 5

Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Ми́ро излия́вшееся, Христа́ возлю́бльши, отрокови́це,/ богому́дренно после́довала еси́ Сему́, пе́сньми сла́вящи.

Ве́чную жизнь вре́менною измени́ла есть,/ кро́вию ма́лою Небе́сное Ца́рство му́ченица насле́дова.

Источа́ют, я́ко исто́чницы, му́ченическия мо́щи цельбы́ неду́гующим/ и душе́вныя неду́ги ве́рою исцеля́ют.

Богоро́дичен: Кто мо́жет Твое́ сказа́ти та́инство, Всенепоро́чная?/ Зижди́теля бо, невмести́маго все́ми, во чре́ве Твое́м вмести́ла еси́.

Песнь 6

Ирмо́с: Пожру́ Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

По Тебе́ со тща́нием смерть приима́ше Феодо́сия му́ченица,/ преще́ния мучи́телей не убоя́вшися,/ Твое́й стра́сти уподо́бився, Христе́, во́льней.

Удо́бно Кресто́м Твои́м жены́ укрепи́вшеся,/ главы́ змие́в, я́коже предре́кл еси́, Спа́се, попира́ют, Твое́ю любо́вию уязвля́емы/ и Боже́ственным Твои́м жела́нием.

Богоро́дичен: Всю Тя, Голуби́цу соверше́нну и предобру́, издале́ча обре́т,/ крин и удо́льный цвет, о Богома́ти,/ Жени́х мы́сленный в Тя всели́ся.

Конда́к, глас 2.

Подо́бен: Вы́шних ища́:

Труда́ми живо́т нетру́дный дости́гла еси́,/ кро́вию же Копрони́ма удави́ла еси́, му́ченице,/ скве́рнаго врага́ Христо́вы Це́ркве, всеблаже́нная Феодо́сие,/ и с Вы́шними ра́дуешися во́инствы,/ чту́щия па́мять твою́ покрыва́ющи.

Песнь 7

Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Тя, богода́нными укра́шену, му́ченице, добро́тами, ве́рою зря́ще,/ пе́сньми све́тло Жениху́ твоему́ взыва́ем:/ благослове́н еси́ в хра́ме сла́вы Твоея́, Го́споди.

С де́вами свещено́сицами в Небе́сный, му́ченице, ны́не черто́г,/ ра́дующися, со Христо́м возшла́ еси́, взыва́ющи:/ благослове́н еси́ в хра́ме сла́вы Твоея́, Го́споди.

Богоро́дичен: На престо́ле превознесе́нне седя́й,/ престо́л Тя на земли́, Де́во, богоподо́бен обре́т, почи́л есть:/ благослове́на Ты в жена́х еси́, Пренепоро́чная Влады́чице.

Песнь 8

Ирмо́с: Ру́це распросте́р, Дании́л/ львов зия́ния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:/ благослови́те, вся дела́ Госпо́дня, Го́спода.

Разреши́вшися соу́з плотски́х, Феодо́сие честна́я,/ возлете́ла еси́, ра́дующися, к светообра́зному черто́гу, неве́стнически лику́ющи,/ и муче́ния червле́ною кро́вию блеща́щися, и вопию́щи:/ благослови́те, вся дела́ Госпо́дня, Го́спода.

В черто́зе Небе́снем жи́ти сподо́билася еси́ све́тло, Феодо́сие честна́я,/ ве́чнующее благосла́вие обре́тши, всеприснопа́мятная,/ и му́жества твоего́ плодо́м вои́стинну обогати́вшися, вопию́щи:/ благослови́те, вся дела́ Госпо́дня, Го́спода.

Украси́лася еси́ тезоимени́тством я́ве, Феодо́сие честна́я:/ Бо́жие бо да́ние нам изря́дно даде́ся, всему́драя,/ даро́в па́че ума́ воздаю́щи ре́ки, ве́рою пою́щим:/ благослови́те, вся дела́ Госпо́дня, Го́спода.

Богоро́дичен: Вои́стинну ро́ждши Бо́га,/ вои́стинну Пречи́стая Ма́ти нарекла́ся еси́ Бо́гу,/ и́стинно нося́щи, по ко́емждо рожде́нии, Богоиме́нство./ Те́мже Тя, ве́рнии, сла́вим, Богоро́дицу, богому́дренно, Всенепоро́чная Влады́чице.

Песнь 9

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́,/ тем, веселя́щеся, Тя, Богоро́дице, велича́ем.

Разреши́ плени́цы согреше́ний благоче́стно тя воспева́ющих/ твои́ми мольба́ми, Богому́драя Феодо́сие, му́ченице прехва́льная,/ Бо́гу Вседержи́телю, предстоя́щи, всечестна́я.

Е́вы прама́тере жела́ние худо́жно прия́т, воззре́нием к Бо́гу обоже́на/ и бы́вши Боже́ственным прича́стием бог./ Те́мже тя, всеблаже́нная Феодо́сие, велича́ем.

Весь сла́дость есть твой Жени́х, страстоте́рпице,/ весь душе́вное утеше́ние, Феодо́сие му́ченице, Христо́с,/ Его́же ны́не наслажда́ющися, твои́ми моли́твами нас помина́й.

Богоро́дичен: Пло́тию приити́ восхоте́в, украси́вый вся сло́вом/ в Тя всели́ся, еди́ну, Святе́йшу всех, обре́т,/ и Богоро́дицу показа́ и́стинную, Ма́ти Де́во.

Преподобномученица Феодосия жила в VIII веке. Она родилась по усердной молитве родителей и после их смерти воспитывалась в константинопольском женском монастыре в честь святой мученицы Анастасии. Святая Феодосия приняла постриг в женской обители после того как раздала бедным оставшееся от родителей имущество. Часть денег употребила на написание икон Спасителя, Божией Матери и мученицы Анастасии. Когда воцарился Лев Исавр (717–741), жестокий гонитель иконопочитателей, он издал приказ повсеместно уничтожить святые иконы. В Константинополе существовали тогда ворота, называвшиеся «медными», а над ними уже более 400 лет находился медный образ Спасителя. В 730 году лжепатриарх-иконоборец Анастасий приказал снять образ. Православный народ, во главе которого была преподобномученица Феодосия с другими инокинями, бросился на защиту иконы и опрокинул лестницу вместе с воином, исполнявшим приказ. Лжепатриарх Анастасий, боясь, что волнения усилятся, известил о случившемся императора. По приказу последнего воины перебили всех инокинь, а преподобномученицу Феодосию, как самую ревностную защитницу икон, заключили в темницу. В течение недели ей каждый день наносили по сто ударов, а на восьмой день повели вдоль города, жестоко избивая по пути. Один из воинов начал бить мученицу и нанес ей смертельную рану, от которой мученица тотчас скончалась. Тело святой преподобномученицы, брошенное на землю, было с благоговением погребено христианами в монастыре Диокритис в Константинополе. Место погребения преподобномученицы Феодосии прославилось многочисленными исцелениями больных.

Литература:

1. Святитель Димитрий, митрополит Ростовский. Жития святых. Т. 9. М., 1908.

2. Филарет (Гумилевский), архиепископ Черниговский. Жития святых, чтимых Православной Церковью. Май. СПб., 1885.

3. Дестунис С. Жития святых. Май. СПб., 1892.

4. Настольная книга священнослужителя. Т. 3. М., изд. Московской Патриархии, 1979.

НА ВЕЧЕ́РНИ

На Го́споди, воззва́х: стихи́ры, глас 4.

Подо́бен: Зва́нный свы́ше:

Егда́ Боже́ственная благода́ть/ возсия́ в се́рдцы твое́м, прему́дре Иоа́нне,/ тогда́ вся, я́же в пло́ти, мудрова́ния оста́вил еси́/ и к све́ту Богоразу́мия прите́кл еси́;/ невозвра́тно, Христу́ после́дуя,/ от твоего́ оте́чества ко гра́ду У́стюгу ше́ствие сотвори́в,/ и е́же по Христе́ жи́тельство в нем изво́лил еси,/ и мно́гим о́браз к доброде́тели исправле́нием твоего́ жития́ положи́в, Богоблаже́нне./ Те́мже и венце́м нетле́ния Христо́с Бог,/ Ему́же порабо́тал еси́, венча́ тя,/ Его́же моли́ спасти́ и просвети́ти ду́ши на́ша.

Егда́ раче́ние и Боже́ственное жела́ние возсия́/ в души́ твое́й, свя́те,/ тогда́ преле́стная вся, я́же в ми́ре, мудрова́ния оста́вль,/ и, к Вы́шним жела́я, Вы́шняя взыска́л еси́./ Отону́дуже и дар прозре́ния,/ не от челове́к, ни челове́ком,/ но от Вы́шняго про́мысла прии́м,/ мно́гим ра́ди доброде́тельнаго жития́ позна́н был еси́,/ еще́ жив сын,/ и по преставле́нии чудеса́ творя́ пресла́вная/ си́лою Христа́, Бо́га на́шего:/ Его́же моли́ спасти́ и просвети́ти ду́ши на́ша.

Егда́ Боже́ственное зва́ние/ прии́де на тя, Богому́дре,/ тогда́, Святы́м Ду́хом подвиза́емь,/ возни́кл еси от мирска́го сладостра́стия к све́ту Богоразу́мия/ и оте́ческия сла́вы и любве́ избежа́ти потща́лся еси́./ Бога́тство у́бо и сла́ву я́ко не су́щая презре́л еси́/ и, еди́наго возлюби́в, и́стиннаго живота́ Христа́ Бо́га на́шего,/ крест твой взем,/ Того́ живоно́сным стопа́м после́довал еси́./ Его́же моли́, Иоа́нне досточу́дне,/ спасти́ и просвети́ти ду́ши на́ша.

И́ны стихи́ры, глас 2.

Подо́бен: Ки́ими:

Ки́ими похва́льными венцы́ увязе́м преподо́бнаго?/ Блаже́нству венца́, благоче́стия исправле́ние,/ Це́ркве све́тлое украше́ние,/ исто́чника Боже́ственных исцеле́ний неизчерпа́емаго,/ излива́ний духо́вных реку́,/ зе́млю У́стюжскую мно́гих чуде́с веселя́щую тече́нием,/ Иоа́нна до́бляго,/ предста́теля на́шего и храни́теля,/ моля́щася Христу́ Бо́гу/ дарова́ти душа́м на́шим мир и ве́лию ми́лость.

Ки́ими смире́нными устна́ми воспое́м блаже́ннаго?/ Ди́внаго в житии́, Безпло́тным сожи́теля,/ просла́вленнаго в чудесе́х Бо́гом,/ столпа́ Це́ркве недви́жимаго,/ предста́теля су́щих в беда́х и ско́рбех,/ в путь ше́ствующих прави́теля,/ си́рых и оби́димых засту́пника,/ больны́х врача́ безме́здна,/ моля́щася Го́сподеви/ дарова́ти нам ве́лию ми́лость.

Прииди́те, ве́рных собо́ри,/ псало́мски восплещи́те рука́ми,/ печа́льных утеше́ние, неду́жных исцеле́ние,/ блаже́ннаго Иоа́нна воспева́юще,/ похвалу́ земли́ У́стюжския,/ церко́вное украше́ние,/ реку́ ми́лости вои́стинну,/ Боже́ственнаго Христо́ва смире́ния ревни́теля,/ подаю́щаго ми́рови ве́лию ми́лость.

Сла́ва, глас 8:

Я́ко тече́ние до́бре сконча́вшему,/ и ве́ру соблю́дшему непоро́чную,/ и враги́ безпло́тныя терпе́нием твои́м попра́вшему,/ возложи́ся на честны́й твой верх побе́ды вене́ц пресве́тел/ от руки́ Вседержи́теля Бо́га,/ Его́же ра́ди мир и су́щая в нем су́етства преоби́дел еси́./ Тем и свята́я твоя́ чи́стая душа́ на Небеса́ востече́, ра́дующися,/ пра́ведных же ли́цы срето́ша тя, веселя́щеся,/ и Небе́сная селе́ния све́тло восприя́ша,/ блаже́нное же и честно́е те́ло твое́ на земли́ пребыва́ет нетле́нно,/ ве́рным подава́я исцеле́ние./ Те́мже ве́рою пра́вою/ и те́плым жела́нием свято́му твоему́ гро́бу припа́дающе,/ Богому́дре Иоа́нне,/ про́сим испроси́ти у Христа́ Бо́га на́шего/ гра́ду твоему́ непоколеби́му и безмяте́жну пребы́ти/ от наве́т вра́жиих и пога́нскаго наше́ствия,/ во́инству побе́ды на враги́,/ умире́ния же ми́ру/ и спасе́ния душа́м на́шим.

И ны́не, Богоро́дичен: Царь Небе́сный: или́ пра́здника.

Вход, проки́мен дне и чте́ния 3 (зри 23 мая)

На стихо́вне стихи́ры, глас 4.

Подо́бен: Я́ко до́бля:

Све́тло возсия́ла есть, я́ко со́лнце,/ светоза́рная па́мять твоя́,/ луча́ми мно́го облиста́ющи/ твои́х доброде́тельных дея́ний,/ всеблаже́нне Иоа́нне,/ и озаря́ющи ве́рных ра́зумы све́том чуде́с твои́х./ Сию́ у́бо пра́зднующе,/ ра́достно тя сла́вим и ве́рою ублажа́ем,/ уго́дниче Христа́, Бо́га на́шего:/ Его́же моли́ от тли и бед изба́вите/ ве́рою пра́зднующий всечестно́е твое́ успе́ние.

Стих: Возвесели́тся пра́ведник о Го́споде/ и упова́ет на Него́.

Земны́й А́нгел и Небе́сный челове́к/ яви́лся еси́, блаже́нне,/ исто́чник умиле́ния, ми́лости тече́ние,/ струя́ исцеле́ний, Иоа́нне досточу́дне,/ ма́слина Бо́жия, вои́стинну плодови́та,/ еле́ем трудо́в твои́х просвеща́я ве́рно хва́лящия тя./ Моли́ Человеколю́бца/ от бед изба́вити любо́вию чту́щия па́мять твою́.

Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.

Ра́зум твой, преблаже́нне,/ Боже́ственным све́том сия́я,/ теле́сных страсте́й превзы́де,/ неприме́сен до́льним нося́ о́браз,/ и, вообража́я себе́ доброде́тельми Боже́ственными,/ показа́ся весь светообра́зен споспеше́нием Ду́ха Пресвята́го,/ Иоа́нне прему́дре, пра́ведных похва́ло,/ с ни́миже моли́ Христа́, Бо́га на́шего,/ от бед изба́вити пою́щия тя.

Сла́ва, глас 2:

От нече́стия во благоче́стие прише́дый,/ све́том разу́мным от Бо́га просвеще́н быв,/ возненави́дел еси́ оте́ческую любо́вь/ и возлюби́л еси́ и́стинную ве́ру Христо́ву./ Гра́да на́шего я́ко дости́гнув,/ в нем чи́стым и непоро́чным житие́м/ Го́сподеви угоди́л еси́/ и мно́гия лю́ди удиви́л еси́ чудесы́,/ Богоблаже́нне Иоа́нне./ Но ны́не име́я дерзнове́ние ко Влады́це всех Бо́гу,/ моли́ о и́же ве́рою творя́щих всечестну́ю твою́ па́мять/ и притека́ющих со усе́рдием к чуде́сному гро́бу твоему́,/ изба́витися страсте́й душе́вных же, вку́пе и теле́сных,/ и вся́ческих бед, и искуше́ний/ и спасти́ся душа́м на́шим.

И ны́не, Богоро́дичен или́ пра́здника.

Тропа́рь, глас 5:

Нагото́ю теле́сною и терпе́нием/ обнажи́л еси́ вра́жия кова́рствия,/ облича́я неподо́бное его́ дея́ние,/ зе́льне стражда́ со́лнечный вар/ и ну́ждныя вели́кия сту́дени мра́за,/ и огня́ не чул еси́,/ Бо́жиею по́мощию покрыва́емь,/ Иоа́нне прему́дре,/ моли́ о ве́рою творя́щих па́мять твою́ че́стно/ и усе́рдно притека́ющих к ра́це моще́й твои́х,/ изба́витися от бед и паде́ния избежа́ти.

Сла́ва, и ны́не, Богоро́дичен или́ пра́здника.

НА У́ТРЕНИ

Тропа́рь пра́здника, два́жды. Сла́ва, свята́го. И ны́не, пра́здника.

По 1-й стихоло́гии седа́лен, глас 8.

Подо́бен: Прему́дрости:

От ю́ности, я́ко свети́льник, возсия́л еси́, блаже́нне,/ зе́льным воздержа́нием умертви́в плотска́я взыгра́ния,/ тем и на высоту́ восте́кл еси́ Богоразу́мия, пресла́вне,/ пожи́в в ми́ре богоуго́дно,/ посрами́л еси́ бесо́вская ополче́ния, Иоа́нне всеблаже́нне./ Сего́ ра́ди вопие́м ти:/ моли́ Христа́ Бо́га согреше́ний оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

В ти́ну впад грехо́в, и несть мне постоя́ния,/ лю́те потопи́ мя бу́ря прегреше́ний,/ но, я́ко ро́ждши Сло́ва, еди́наго Человеколю́бца,/ на мя, раба́ Твоего́, при́зри/ и изба́ви мя вся́каго греха́, и страсте́й душетле́нных,/ и вся́каго озлобле́ния лука́ваго уби́йцы./ Богоро́дице Неискусому́жная, моли́ Христа́ Бо́га грехо́в оставле́ние да́ти ми,/ Тебе́ бо наде́жду и́мам, раб Твой.

По 2-й стихоло́гии седа́лен, глас 4:

Я́ко в дому́ вои́стинну, на ме́сте пу́сте,/ посреде́ безу́мных челове́к всели́вся, Богому́дре Иоа́нне,/ вся́ко озлобле́ние претерпева́я,/ до́брыя де́тели, я́коже фимиа́м благово́нен и же́ртву благоприя́тну, Бо́гу прине́сл еси́./ Те́мже, дерзнове́ние стяжа́в к Нему́,/ моли́ дарова́ти очище́ние согреше́ний/ ве́рою хва́лящим святу́ю па́мять твою́.

Сла́ва, и ны́не, Богоро́дичен:

Неискусобра́чная Неве́сто, Присноде́во, с пра́ведными восхваля́ем Тя,/ я́ко Тобо́ю вели́чие сотвори́ нам днесь/ Сын Твой и Бог Преве́чный от Отца́,/ И́же в ложесна́х Твои́х вмести́тися изво́ли,/ да от ле́сти свободи́т род наш.

По полиеле́и седа́лен, глас 8.

Подо́бен: Прему́дрости:

Я́ко врача́ прему́дра и уго́дника Госпо́дня богоприя́тна восхва́лим,/ чуде́сному твоему́ гро́бу прикаса́ющеся, Богому́дре:/ соше́дшеся же любо́вию и ве́рою,/ во псалме́х и пе́ниих возра́дуемся, сла́вяще Христа́,/ такову́ю благода́ть тебе́ дарова́вшаго исцеле́ний, Иоа́нне всеблаже́нне./ Его́же моли́ согреше́ний оставле́ние дарова́ти/ ве́рою и любо́вию пра́зднующим всечестну́ю па́мять твою́.

Сла́ва, и ны́не, Богоро́дичен:

Я́ко Де́ву и еди́ну в жена́х,/ Тя, без се́мене ро́ждшую Бо́га пло́тию,/ вси ублажа́ем, ро́ди челове́честии:/ О́гнь бо всели́ся в Тя Божества́,/ и я́ко Младе́нца млеко́м пита́еши Зижди́теля и Го́спода./ Тем, а́нгельский и челове́ческий род, досто́йно сла́вим пресвято́е рождество́ Твое́/ и согла́сно вопие́м Ти:/ моли́ Христа́ Бо́га согреше́ний оставле́ние дарова́ти/ покланя́ющимся ве́рою пресвято́му рождеству́ Твоему́.

Степе́нна, 1-й антифо́н 4-го гла́са. Проки́мен: Возвесели́тся пра́ведник о Го́споде: Стих: Услы́ши, Бо́же, глас мой: Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 4:

Челове́че Бо́жий и ве́рный ра́бе, уго́дниче Христо́в,/ соверши́телю Того́ Боже́ственных повеле́ний,/ му́же, ди́вный в чудесе́х,/ сто́лпе и утвержде́ние гра́да на́шего У́стюга,/ Ца́рствия насле́дниче,/ Богоблаже́нне Иоа́нне,/ дерзнове́ние име́я ко Христу́ Бо́гу,/ непреста́нно моли́ о душа́х на́ших.

Кано́н Богоро́дицы или́ пра́здника, со ирмосо́м на 6 и свята́го на 8. Творе́ние Феофа́ново. Глас 4.

Песнь 1

Ирмос: Мо́ря чермну́ю пучи́ну/ невла́жными стопа́ми,/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Прича́стием, е́же к Бо́гу, преподо́бне, был еси́ свет/ и к Нему́ отлучи́лся еси́, Иоа́нне блаже́нне,/ жела́ний кра́йних, благи́х наде́жд твои́х, о́тче, исполне́ние прия́л еси́.

Жела́нием су́щим к Бо́гу распала́емь, мир оста́вил еси́/ и Спу́тника обре́л еси́, Христа́, о́тче Иоа́нне сла́вне,/ с Ни́мже стезю́ проше́л еси́ спаси́тельную, ра́дуяся.

Обогати́тися и́миже, ника́коже искуша́емыми, возжела́в,/ бога́тство, и сла́ву вре́менную, му́дре, и пи́щу мимотеку́щую,/ мирско́е достоя́ние доблему́дренне отри́нул еси́.

Богоро́дичен: Кра́сную, избра́нную, всечестну́ю и непоро́чную разуме́в Тя,/ Бо́жие Сло́во всели́ся в Тя/ и, ро́ждся из Тебе́, сы́ны сотвори́ благода́тию,/ Богоро́дицу чту́щия Тя.

Песнь 3

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Усе́рдно мы́слей совлече́ся дея́нием,/ побежда́я вра́жия полки́ Боже́ственным посо́бием Ду́ха.

Ра́нами Боже́ственными, и воздержа́нием, и бие́нием/ страсте́й мирски́х, о́тче Иоа́нне, избе́гл еси́.

Умори́ша врага́ по́стницы Твои́, Иису́се,/ умерщвле́ния ра́достно, Влады́ко, Твоего́ живоно́снаго возжеле́вше.

Богоро́дичен: Избавля́ющи челове́ки преслуша́ния и лю́таго паде́ния,/ всему́ вино́внаго, Чи́стая и Всенепоро́чная, родила́ еси́.

Ин конда́к, глас 1:

Иоа́нне прему́дре,/ земны́я сла́вы не возлюби́в,/ того́ ра́ди я́ко неи́стов ся творя́,/ жела́я Ца́рство Небе́сное насле́довати,/ ударе́ния и укоре́ния прие́мля,/ наготу́ и зной терпя́,/ тем ны́не со А́нгелы лику́еши,/ моли́ Христа́ Бо́га о душа́х на́ших.

Седа́лен, глас 5:

Согла́сием Боже́ственным озаря́емь,/ в пути́ веду́щия Боже́ственным сия́нием ходи́в ве́рно,/ о́тче пра́ведне Иоа́нне, враго́в отбе́г прило́гов,/ сын же све́та и дне яви́лся еси́, Иоа́нне Богоблаже́нне.

Сла́ва, и ны́не, Богоро́дичен:

Ма́ти Бо́жия Пречи́стая,/ град христиа́нский изба́ви и лю́ди Твоя́, обы́чно зову́щия,/ проти́витися враго́м и го́рдым мы́слем посо́бствуй, да вопие́м Ти:/ ра́дуйся, Благослове́нная.

Песнь 4

Ирмо́с: Вознесе́на Тя ви́девши Це́рковь на Кресте́,/ Со́лнце пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Соедини́вся к стези́ пра́ведне и богоно́сне,/ в Боже́ственный град вшел еси́, преподо́бне Иоа́нне,/ спаси́тельным сия́нием обогати́вся.

Единообра́зен, преподо́бне Иоа́нне, смы́слом Богоно́сным, блаже́нне, быв,/ Боже́ственными повестьми́ и Боже́ственною оде́ждею оде́ялся еси́.

Се́рдце твое́, скрижа́ль очище́ну, Свята́го Ду́ха благода́ть обре́тши, о́тче,/ написа́ соверше́нно безстра́стие, ве́ру и любо́вь нелицеме́рну.

Богоро́дичен: Седя́й на престо́ле превознесе́нне Херуви́мстем,/ я́ко престо́л, Тя име́я, на руку́ Твое́ю почи́,/ Мари́е Богоневе́сто, пресла́вный Бог.

Песнь 5

Ирмо́с: Ты, Го́споди, мой Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Пресве́тлую зарю́ прии́м, Иоа́нне,/ я́ко со́лнце, яви́лся еси,/ бесо́вскую тьму отгоня́я, достоблаже́нне.

Твои́м жела́нием, Христе́, окрили́вся, блаже́нный Иоа́нн/ жела́ние теле́сное, я́коже изгре́бие мирско́е, му́дре оттрясе́.

Си́лою Боже́ственною ду́шу укрепи́в,/ в мир Го́рний всели́лся еси́,/ свободи́вся страсте́й, о́тче Богому́дре Иоа́нне.

Богоро́дичен: Рече́ния проро́к соверши́шася:/ Де́ва роди́ Бо́га Сло́ва,/ вы́ше естества́ и сло́ва пребы́вши Де́вою.

Песнь 6

Ирмо́с: Пожру́ ти со гла́сом хвале́ния, Го́споди,/ Це́рковь вопие́т Ти:/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Ум твой весь к Бо́гу простира́я, непреста́нными поуче́нии,/ плотски́я любве́ не пощаде́л еси́,/ благи́м хода́тайством, Иоа́нне, присвое́ния.

Ни скве́рныя вражды́ прия́т, блаже́нне, посреди́ тебе́ ми́ра живу́щу,/ чи́стыми же па́че мольба́ми очища́еши скве́рны душе́вныя/ притека́ющих к ра́це моще́й твои́х.

Ты, плотски́х мудрова́ний вы́шши по́мысл име́я,/ не уязви́лся еси́, посреди́ жен обнажа́емь/ безстра́стия бо оде́ждею, Иоа́нне, обле́клся еси́.

Богоро́дичен: Усты́, и по́мыслом, и се́рдцем, Пречи́стая,/ Тя, Богоро́дицу, пропове́даю:/ Тобо́ю бо Бо́гу примири́хомся,/ отринове́ннии преступле́нием пе́рвее пра́отца.

Конда́к, глас 8:

Вы́шния красоты́ жела́я,/ ни́жния сла́дости теле́сное яде́ние тща́тельно оста́вил еси́,/ нестяжа́нием су́етнаго ми́ра возлюби́л еси́ а́нгельское житие́,/ преходя́ сконча́вся, Иоа́нне блаже́нне,/ с ни́миже моли́ Христа́ Бо́га непреста́нно о всех нас.

И́кос:

Ка́ко возмогу́ гре́шный и скве́рный аз, вку́пе душе́ю и те́лом,/ исписа́ти су́щее во пло́ти равноа́нгельное житие́ твое́ и пресла́вная чудеса́,/ а́ще у́бо мно́зи прему́дрии не дости́гнут испове́дати/ мно́гаго твоего́ терпе́ния, и смире́ния,/ и те́плыя ко Христу́ любве́?/ Но оба́че наде́яся на твое́ беззло́бие, о блаже́нне, си́це вопию́ ти:/ ра́дуйся, пресве́тлая звездо́, от ю́га возсия́вшая и к восто́ку прише́дшая;/ ра́дуйся, возненави́дивый оте́ческую любо́вь,/ Христа́ же еди́наго, над все́ми су́щаго Бо́га, всем се́рдцем возлюби́вый/ и Тому́ невозвра́тным жела́нием после́довавый./ Ра́дуйся, бу́йственное и юро́дственное, е́же по апо́столу, жи́тельство избра́вый;/ ра́дуйся, премени́вый тленная и настоя́щая наде́ждею бу́дущих благ./ Ра́дуйся, дре́внему И́ову уподо́бивыйся терпе́нием;/ ра́дуйся, страстоте́рпче Христо́в непобеди́мый,/ при́сно победи́вый диа́вола твои́м смире́нием./ Ра́дуйся, я́ко дре́вний он Ла́зарь ни́щий,/ почива́я ны́не в ло́нех Авраа́млих;/ ра́дуйся, и́же по отше́ствии ми́ра сего́ су́щим в беда́х и искуше́ниих гото́в обрета́яся предста́тель/ и засту́пник гра́ду на́шему У́стюгу./ Ра́дуйся, везде́ призыва́ющия тя бы́стро предваря́яй;/ ра́дуйся, Богому́дре Иоа́нне.

Песнь 7

Ирмо́с: В пещи́ авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.

Содержи́м сый ко Христу́, преподо́бне о́тче Иоа́нне, Боже́ственною любо́вию други́х спасти́,/ и́хже ра́достно спасл и изба́вил еси́, вопия́:/ благослове́н Бог оте́ц на́ших.

С Небесе́ тебе́ пода́нную, о́тче Иоа́нне, прии́м пи́щу,/ се́ю препита́в всех, благопоко́рно прие́млющих твоя́ повеле́ния,/ и́миже до́лу влеку́щий грех оставля́ху, блаже́нне.

После́довав оте́ческим преда́нием, о́тче Иоа́нне му́дре,/ па́губу отри́нути запове́дал еси́, зовы́й Бо́гу:/ благослове́н Бог оте́ц на́ших.

Богоро́дичен: Вы́шняго освяще́нное Боже́ственное селе́ние, ра́дуйся:/ Тобо́ю бо даде́ся ра́дость, Богоро́дице, зову́щим:/ благослове́на Ты в жена́х еси́, Всенепоро́чная Влады́чице.

Песнь 8

Ирмо́с: Ру́це распросте́р, Дании́л/ львов зияния в ро́ве затче́;/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели о́троцы, взыва́юще:/ благослови́те, вся дела́ Госпо́дня, Го́спода.

Всесве́тлая звезда́, су́щих в тиме́нии страсте́й приводя́ к животу́,/ твори́ти Боже́ственныя за́поведи и нечи́стыя целому́дренно жи́ти,/ отго́ниши лю́тыя неду́ги, вопия́:/ благослови́те, по́йте и превозноси́те Его́ во ве́ки.

Ты цел умо́м в кро́ве чу́дных, му́дре,/ мно́гих улови́л еси́ юро́дствовати Го́спода ра́ди,/ ве́дый наруга́емь бы́ти, вопия́, честне́йший Иоа́нне блаже́нне:/ благослови́те, по́йте и превозноси́те Его́ во ве́ки.

Соверше́н еди́н свои́х су́щих сла́вяй Госпо́дь,/ прославля́я тя, преподо́бне, ко гро́бу твоему́ притека́ющия исцеля́ет, светлослове́ньми зову́щия:/ благослови́те, по́йте и превозноси́те Его́ во ве́ки.

Богоро́дичен: Избавля́яй нас возсия́ из Тебе́ Госпо́дь, Де́во Чи́стая,/ Его́же моли́, Влады́чице, просвети́ти пою́щия Тя/ и обстоя́щая нас изба́вите, пою́щих:/ благослови́те, по́йте и превозноси́те Его́ во ве́ки.

Песнь 9

Ирмо́с: Ка́мень нерукосе́чный/ от несеко́мыя горы́, Тебе́, Де́во,/ краеуго́льный отсече́ся,/ Христо́с, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.

Всем се́рдцем Тро́ице усе́рдно предложи́вся,/ и́же от Нея́ лучу́ богоде́льно прии́м,/ светови́ден быв, со А́нгелы лику́еши.

Жела́нием Боже́ственным приедини́вся и воздержа́нием просве́щся,/ ча́емых ве́чных благ во прича́стии быв,/ Богоблаже́нне Иоа́нне, и наслажде́нии.

Твоя́ боле́зни и по́ты во вселе́нней сла́вятся,/ ты же Небе́сною сла́вою пита́яся, Иоа́нне,/ нас непреста́нно помина́й.

Богоро́дичен: Спаси́ мя, всех ро́ждши Изба́вителя и Благоде́теля,/ разори́вши души́ моея́ о́блак, Све́та о́блаче, Свята́я Влады́чице,/ си́льна соде́лай на стра́сти, борю́щия мя.

Свети́лен:

Сове́та удали́лся еси́, бе́гая, нечести́вых сожи́тельства,/ Христу́ же, над все́ми Бо́гу на́шему, непоро́чным житие́м угоди́л еси́, Иоа́нне,/ Его́же ны́не моли́ о нас, рабе́х твои́х,/ ве́рою пра́зднующих всечестну́ю па́мять твою́, Богому́дре Иоа́нне.

Богоро́дичен:

Му́дрость Ипоста́сную, и Сло́во Пресу́щное,/ и Врача́ всех поро́ждши, Де́во,/ стру́пы и я́звы души́ моея́ исцели́, лю́тыя и многовре́менныя,/ и уста́ви се́рдца моего́ страстна́я помышле́ния.

На хвали́тех стихи́ры на 4, глас 4.

Подо́бен: Дал еси́ зна́мение:

Дал еси́ при́тчу терпе́ния и му́жества,/ Преблаги́й Го́споди,/ пра́веднаго Иоа́нна и многочуде́снаго,/ доброде́тельми, и словесы́, и де́лы сия́юща,/ целому́дрием украша́ема и кро́тостию./ Тем Твое́ неизрече́нное смотре́ние сла́вим,/ Иису́се Всеси́льне и Спа́се душ на́ших.

Пра́веден и незло́бив,/ и́стинен же, и непоро́чен, и ве́рен,/ уклоня́яся от вся́кия зло́бныя ве́щи,/ показа́лся еси́, Иоа́нне блаже́нне,/ просвеще́н доброде́тельми и благоче́стием сия́я,/ тем тя ублажа́ем/ и свято́е твое́ и честно́е днесь пра́зднуем успе́ние,/ ра́дующеся, Богому́дре.

Целому́дрием и благове́рием,/ я́ко багряни́цею многоце́ннаго, оде́явся, Иоа́нне,/ пра́вдою же и кро́тостию, я́ко Боже́ственным венце́м, увя́злся еси́,/ со стра́ждущими Христа́ ра́ди ца́рствовати возжеле́л еси́./ И ны́не Царю́ сил предстои́ши,/ Иису́су Всеми́лостивому и Спа́су душ на́ших.

Сла́ва, глас 8:

Доброде́телей твои́х, Богому́дре Иоа́нне,/ исправле́ния уясни́ша ве́рных сердца́:/ кто бо, слы́ша безме́рное твое́ смире́ние и терпе́ние,/ не удиви́тся ко всем кро́тости и беззло́бию,/ к скорбя́щим ми́лованию/ и к су́щим в беда́х ско́рому поможе́нию,/ к пла́вающим немяте́жному приста́нищу/ и в путь ше́ствующим благо́му поспеше́нию?/ Вся боголе́пно предвари́л еси́, досточу́дне./ И ны́не неувяда́емым венце́м венча́лся еси́/ от руки́ Вседержи́теля Бо́га,/ Его́же моли́ спасти́ся душа́м на́шим.

И ны́не, Богоро́дичен или́ пра́здника.

Славосло́вие вели́кое и отпу́ст.

На Литурги́и слу́жба преподо́бническая.

Моли́тва

О святы́й блаже́нный Иоа́нне! Припа́дающе, смире́нно мо́лимтися: приими́ на́ше ма́лое моле́ние и умоли́ Всеми́лостиваго Го́спода Бо́га на́шего, да проба́вит ми́лость Свою́ нам, гре́шным, и да да́рует нам вся, я́же к животу́ и ко спасе́нию благопотре́бная. О уго́дниче Христо́в! а́ще и зело́ недосто́йни есмы́, оба́че ду́хом сокруше́нным и се́рдцем смире́нным па́ки припа́дающе, мо́лимтися: предста́тельством твои́м ко Го́споду сохрани́ страну́ на́шу, да́руя ей на вся враги́ побе́ду и одоле́ние, град твой У́стюг и вся гра́ды и ве́си Росси́йския соблюди́ от вся́каго зла и от вся́кия напа́сти, губи́тельства, гла́да, тру́са, пото́па, огня́, меча́, наше́ствия иноплеме́нников и междоусо́бныя бра́ни, от вся́кия боле́зни и от вся́каго обстоя́ния, да всегда́ пое́м и велича́ем всесвято́е и великоле́пое И́мя Бо́жие и твое́ ми́лостивое о нас предста́тельство, во ве́ки веко́в. Ами́нь.

Блаженный Иоанн, Христа ради юродивый, Устюжский чудотворец, родился в селе Пухово близ Стараго Устюга от благочестивых родителей Саввы и Марии. С юных лет он отличался строгой постнической жизнью, по средам и пятницам ничего не ел, а в остальные дни питался хлебом и водой. «Почему ты, сынок, постишься в такие юные годы?» – спросила его мать. «Чтобы избавиться от грехов», – ответил отрок. «Какие же могут быть у тебя грехи?» – удивилась мать. «Безгрешен один только Бог, – сказал святой Иоанн. – Не будем насыщать плоти, чтобы она не стала врагом нашим».

Вскоре его родители переехали в город Орлец на реке Юг, в 40 верстах от Устюга. Овдовев, мать святого приняла постриг в Троицком Орлецком монастыре с именем Наталия. Отрок Иоанн начал безмолвствовать, а затем подвизался в юродстве. Перейдя в город Устюг, он поселился в построенной для него хижине и проводил ночи в непрестанной молитве. Днем же, в разодранном рубище и босой во всякое время года, ходил по улицам города, отдыхая иногда на куче навоза и смиренно перенося насмешки и обиды от неблагочестивых горожан.

Блаженный Иоанн тщательно скрывал свой молитвенный подвиг, избегая людской молвы. Однажды зимой, войдя в свою хижину, он с воздетыми руками стал молиться. Через некоторое время блаженный Иоанн подошел к русской печи и размешал в ней раскаленные угли, затем он оградил себя крестным знамением и со словами: «Знаменася на нас свет лица Твоего, Господи!» – лег на них. Некий человек по имени Григорий, который наблюдал за святым из соседнего помещения, испугался и вбежал к нему. Блаженный Иоанн сошел с печи и, строго посмотрев на незваного гостя, сказал: «Не смей никому говорить об этом до моей смерти!» Обещание было выполнено.

Святой Иоанн постоянно терпел голод и жажду, но ничего ни от кого не брал. Если он и одевался, то обычно в ветхую одежду. Еще при жизни он удостоился от Бога дара чудотворения. Жена Устюжского князя Феодора Красного Мария жестоко страдала от горячки. Она послала к блаженному своего слугу с просьбой помолиться о ней. Не успел посланец подойти к навозной куче, на которой сидел святой Иоанн, как блаженный воскликнул: «Здравствуй, добрый князь Феодор с княгиней своей!» Когда слуга вернулся домой, княгиня была уже исцелена.

Блаженный Иоанн преставился 29 мая 1494 года, сравнительно молодым. Он был погребен близ Устюжского собора. У мощей святого Иоанна происходило немало чудесных исцелений. Через некоторое время после его кончины благочестивый гражданин Устюга Феодор Тутыгин по данному им обещанию Господу и святому Иоанну построил над мощами блаженного храм в честь Происхождения Честных Древ Креста Господня.

Служба святому Иоанну Устюжскому написана в XVI веке. В 1564 году по воспоминаниям знавших его людей было составлено его житие, а несколько позже – похвальное слово. Святой Иоанн особо прославился заступничеством при нашествии врагов. Благодаря его молитвам русское войско одержало победу над польско-литовскими захватчиками под Дмитровом в 1610 году; в 1613 году жители Устюга не только защитили свой город от поляков, но и разбили их. В благодарность святому Иоанну устюжане построили храм, освященный в его честь.

Литература:

Юродство о Христе и Христа ради юродивые Восточной и Русской Церкви. М., 1902.

(Службу зри 7 марта)

Тропа́рь, глас 4:

Умолка́ет ны́не вся́кое уны́ние/ и страх отча́яния исчеза́ет,/ гре́шницы в ско́рби се́рдца обрета́ют утеше́ние/ и Небе́сною любо́вию озаря́ются све́тло:/ днесь бо Ма́терь Бо́жия простира́ет нам спаса́ющую ру́ку/ и от Пречи́стаго о́браза Своего́ веща́ет, глаго́лющи:/ Аз Спору́чница гре́шных к Моему́ Сы́ну,/ Сей дал есть Мне за них ру́це слы́шати Мя вы́ну./ Те́мже, лю́дие, обремене́ннии грехи́ мно́гими,/ припади́те к подно́жию ико́ны Ея́, со слеза́ми вопию́ще:/ Засту́пнице ми́ра, гре́шным Спору́чнице,/ умоли́ Ма́терними Твои́ми моли́твами Изба́вителя всех,/ да Боже́ственным всепроще́нием покры́ет грехи́ на́ша/ и све́тлыя две́ри ра́йския отве́рзет нам,/ Ты бо еси́ предста́тельство и спасе́ние ро́да христиа́нскаго.

Конда́к, глас 1:

Честно́е жили́ще бы́вшее/ неизрече́ннаго естества́ Боже́ственнаго/ вы́ше сло́ва и па́че ума́/ и гре́шным еси́ Спору́чница,/ подава́еши благода́ть и исцеле́ние,/ я́ко Ма́ти всех Ца́рствующаго:/ моли́ Сы́на Твоего́/ получи́ти нам ми́лость в День су́дный.

Икона Божией Матери Споручница грешных (2-е празднование 7 марта) названа так по первой строке стиха, сохранившегося на самой иконе: «Аз Споручница грешных к Моему Сыну. Сей дал Мне за них руце слышати Мя выну. Да тли иже радость выну Мне приносят, радоватися вечно чрез Меня испросят».

По содержанию стиха и изображения Божией Матери и Богомладенца икона, вероятно, была написана в юго-западных областях России в XVII веке. Однако прославление ее началось в 40-е годы XIX века. К этому времени чудотворный образ Божией Матери Споручница грешных находился в Николаевском мужском Одрине монастыре Орловской епархии. Стоял он между другими иконами в обветшавшей часовне. Сама икона потускнела и была покрыта пылью, так что даже нельзя было прочесть надписи.

В 1843 году многим жителям в сновидениях было открыто, что этот образ наделен чудотворной силой. По молитвам перед этой иконой первым был исцелен мальчик, страдавший недугом. Святой образ был очищен и торжественно перенесен в монастырскую церковь. Вскоре от иконы последовали другие чудесные знамения. В Одрином монастыре в честь иконы Споручница грешных было решено построить большой трехпрестольный храм. Для сбора средств на монастырь и для того, чтобы заказать ризу на чудотворную икону, в Москву был послан один иеромонах из числа братии. Он остановился в доме благочестивого и странноприимного отставного подполковника. По окончании своего пребывания в Москве иеромонах в знак благодарности подарил гостеприимному москвичу точную копию с чудотворной иконы, которая по истечении продолжительного времени стала проявлять благодатные свойства: светиться, источать целительное миро.

В 1848 году чудотворный список иконы был передан в дар в московский храм во имя Святителя Николая. Вскоре жители Хамовников, где находилась Никольская церковь, стали наблюдать странное явление: в ночные часы окна алтаря храма начинали светиться. Как было установлено, необычайно яркое свечение исходило от иконы Божией Матери Споручница грешных. Тысячи москвичей приходили в эти дни к храму, чтобы самим удостовериться в Божием знамении.

По прошествии некоторого времени свечение прекратилось, однако началось новое явление: на иконе в самых разных местах стали проступать капли целебной влаги. Стоявший у чудотворного образа священнослужитель постоянно протирал икону тканью, части которой раздавал народу. Последовали исцеления от различных болезней. Особенно Божия Матерь помогала через Свой чудотворный образ умиравшим от холеры, свирепствовавшей в Москве в 1848 году. Кроме того, были известны исцеления от врожденной глухоты, слепоты и многих других недугов. В 1872 году в Николо-Хамовническом храме был освящен придел в честь иконы Божией Матери Споручница грешных, в иконостасе которого и до настоящего времени хранится этот чудотворный образ.

Литература:

1. Сказание о чудотворной иконе Божией Матери Споручницы грешных. М., 1882.

2. Снессорева С. Земная жизнь Пресвятой Богородицы и описание святых чудотворных Ее икон. СПб., 1898.