Библиотеке требуются волонтёры

Мѣ́сѧца тогѡ́же въ к҃д-й де́нь. Пе́рвое и҆ второ́е ѡ҆брѣ́тенїе честны́ѧ главы̀ прⷣте́чевы.

А҆́ще не є҆́сть по́стъ: Ве́черъ пое́мъ, Блаже́нъ мꙋ́жъ: а҃-й а҆нтїфѡ́нъ. На Гдⷭ҇и, воззва́хъ, стїхи̑ры на ѕ҃. А҆́ще же по́стъ, стїхологисꙋ́емъ ѻ҆бы́чнꙋю каѳі́смꙋ, и҆ пое́тсѧ слꙋ́жба прⷣте́чи съ трїѡ́дїю.

Гла́съ є҃. Подо́бенъ: Ра́дꙋйсѧ:

Ра́дꙋйсѧ, сщ҃е́ннаѧ главо̀, и҆ свѣтоно́снаѧ, и҆ а҆́гг҃лѡмъ говѣ́йнаѧ, ꙗ҆́же мече́мъ ѿсѣ́чена дре́вле, и҆ ѻ҆́стрыми ѡ҆бличе́ньми нечистоты̀ стꙋ́дъ посѣ́кшаѧ, и҆сто́чникъ чꙋде́съ, вѣ̑рныѧ напаѧ́юща, и҆ ꙗ҆́же сп҃сово спаси́тельное прише́ствїе возвѣсти́вшаѧ, и҆ наи́тїе дх҃а дре́вле ᲂу҆ви́дѣвшаѧ, къ семꙋ̀ все́льшаѧсѧ, ве́тхой же и҆ но́вой хода́тайствовавшаѧ бл҃года́ти: хрⷭ҇та̀ ᲂу҆молѝ дꙋша́мъ на́шымъ дарова́ти ве́лїю ми́лость.

Въ сосꙋ́дѣ скꙋде́льнѣ сокрове́ннаѧ и҆ногда̀, прⷣте́чева глава̀ ꙗ҆ви́сѧ, ѿ земны́хъ нѣ́дръ и҆зда́вшаѧсѧ ꙗ҆́вственнѣ, и҆ чꙋде́съ стрꙋи̑ и҆сточа́ющаѧ: и҆́бо въ вода́хъ главꙋ̀ ѡ҆мы̀, превы́спрєннѧѧ ны́нѣ покрыва́ющагѡ вода́ми, и҆ ѡ҆дождѧ́ющагѡ человѣ́кѡмъ бжⷭ҇твенное ѡ҆ставле́нїе. сїю̀ ᲂу҆̀бо ᲂу҆блажи́мъ и҆́стиннѡ пресла́внꙋ, и҆ въ сеѧ̀ ѡ҆брѣ́тенїи (с. 361) ра́достнѡ пра́зднꙋемъ, хрⷭ҇та̀ молѧ́ще, дарова́ти дꙋша́мъ на́шымъ ве́лїю ми́лость.

Глава̀, ꙗ҆́же а҆́гнца бж҃їѧ проповѣ́давшаѧ пло́тїю ꙗ҆́вльшагосѧ, и҆ всѣ̑мъ покаѧ́нїѧ спасє́нныѧ пꙋти̑ бжⷭ҇твенными заповѣдьмѝ и҆звѣсти́вшаѧ, ꙗ҆́же пре́жде и҆́рѡдово законопрестꙋпле́нїе ѡ҆бличи́вшаѧ, и҆ сегѡ̀ ра́ди ѿсѣ́чена ѿ тѣлесѐ, и҆ на вре́мѧ под̾е́мшаѧ сокрове́нїе, ꙗ҆́коже свѣтоѧвле́нное на́мъ возсїѧ̀ сл҃нце, пока́йтесѧ, вопїю́щаѧ, и҆ ко хрⷭ҇тꙋ̀ ны́нѣ предложи́тесѧ во ᲂу҆миле́нїи дꙋше́внѣмъ, подаю́щемꙋ мі́рꙋ ве́лїю ми́лость.

Сла́ва, гла́съ ѕ҃:

Сокро́вище бжⷭ҇твенныхъ дарѡ́въ, бг҃охрани́маѧ глава̀ твоѧ̀, прⷣте́че, ѿ земны́хъ нѣ́дръ возсїѧ̀, ю҆́же мы̀ вѣ́рнѡ прїе́млюще, и҆ покланѧ́ющесѧ, сла́вне, ѡ҆богаща́емсѧ ѿ тебє̀, хрⷭ҇то́въ крⷭ҇ти́телю, чꙋдесы̀ пресла́вными, и҆ согрѣше́нїй проще́нїемъ.

И҆ ны́нѣ, бг҃оро́диченъ: Кто̀ тебє̀ не ᲂу҆блажи́тъ:

Вхо́дъ. Прокі́менъ днѐ, и҆ чтє́нїѧ.

Прⷪ҇ро́чества и҆са́їина чте́нїе.

[Глава̀ м҃] Та́кѡ гл҃го́летъ гдⷭ҇ь: ᲂу҆тѣша́йте, ᲂу҆тѣша́йте лю́ди моѧ̑ гл҃го́летъ бг҃ъ: свѧще́нницы, глаго́лите въ се́рдце і҆ерꙋсали́мꙋ, ᲂу҆моли́те є҆го̀, ꙗ҆́кѡ ᲂу҆мно́жисѧ смире́нїе є҆гѡ̀, разрѣши́сѧ бо грѣ́хъ є҆гѡ̀, ꙗ҆́кѡ прїѧ́тъ и҆зъ рꙋкѝ гдⷭ҇ни сꙋгꙋ̑ба согрѣшє́нїѧ своѧ̑. Гла́съ вопїю́щагѡ въ пꙋсты́ни, ᲂу҆гото́вайте пꙋ́ть гдⷭ҇ень, пра̑вы твори́те стєзѝ бг҃ꙋ на́шемꙋ. На го́рꙋ высокꙋ̀ взы́ди, бл҃говѣствꙋ́й сїѡ́нꙋ, возвыша́й крѣ́постїю гла́съ сво́й, благовѣствꙋ́ѧй і҆ерⷭ҇ли́мꙋ: вознеси́те, не бо́йтесѧ. А҆́зъ гдⷭ҇ь бг҃ъ, а҆́зъ ᲂу҆слы́шꙋ ᲂу҆бо́гихъ і҆и҃левъ, и҆ не ѡ҆ста́влю тѣ́хъ. Но ѿве́рзꙋ ѿ го́ръ рѣ́ки, и҆ посредѣ̀ по́лѧ и҆сто́чники, сотворю̀ пꙋсты́ню въ лꙋ́гъ, и҆ жа́ждꙋщꙋю зе́млю во и҆сто́чники водны̑ѧ. Да возвесели́тсѧ нб҃о свы́ше, и҆ ѻ҆́блацы да кропѧ́тъ пра́вдꙋ, (с. 362) да возсїѧ́етъ землѧ̀, и҆ да прозѧ́бнетъ ми́лость, и҆ пра́вда да возсїѧ́етъ вкꙋ́пѣ. Гла́съ весе́лїѧ возвѣсти́те, и҆ ᲂу҆слы́шано да бꙋ́детъ. возвѣсти́те да́же въ коне́цъ землѝ. глаго́лите: ꙗ҆́кѡ и҆зба́ви гдⷭ҇ь раба̀ своего̀ і҆а́кѡва. И҆ а҆́ще вжа́ждꙋтъ въ пꙋсты́ни, и҆сточи́тъ и҆̀мъ во́дꙋ и҆зъ ка́мене. Возвесели́сѧ, непло́ды неражда́ющаѧ, расто́ргни и҆ возопі́й, неболѣ́вшаѧ: ꙗ҆́кѡ мнѡ́га ча̑да пꙋсты̑ѧ па́че, не́жели и҆мꙋ́щїѧ мꙋ́жа.

Прⷪ҇ро́чества малахі́ина чте́нїе:

[Глава̀ г҃] Та́кѡ гл҃го́летъ гдⷭ҇ь вседержи́тель: сѐ а҆́зъ посыла́ю а҆́гг҃ла моего̀ предъ лице́мъ твои́мъ, и҆́же ᲂу҆гото́витъ пꙋ́ть тво́й предъ тобо́ю, и҆ прїи́детъ во хра́мъ сво́й гдⷭ҇ь, є҆гѡ́же вы̀ и҆́щете. И҆ кто̀ стерпи́тъ де́нь вхо́да є҆гѡ̀; зане́же томꙋ̀ прїитѝ ꙗ҆́кѡ ѻ҆́гнь въ горни́лѣ, и҆ ꙗ҆́коже бы́лїе перꙋ́щихъ. И҆ ѡ҆чи́ститъ, поѧда́ѧ и҆ ѡ҆чища́ѧ ꙗ҆́кѡ сребро̀ и҆ зла́то. И҆ прїи́детъ къ ва́мъ сꙋдо́мъ, и҆ бꙋ́детъ свидѣ́тель ско́ръ на лꙋка̑выѧ, и҆ на прелюбодѣ̑йцы, и҆ на кленꙋ́щыѧсѧ и҆́менемъ мои́мъ во лжꙋ̀, и҆ на лиша́ющыѧ мзды̀ нае́мника, и҆ на наси́льствꙋющыѧ вдови̑цы, и҆ пха́ющыѧ си̑рыѧ, и҆ на ᲂу҆клонѧ́ющыѧ сꙋ́дъ прише́льца, и҆ на небоѧ́щыѧсѧ є҆гѡ̀, гл҃го́летъ гдⷭ҇ь вседержи́тель. Занѐ а҆́зъ гдⷭ҇ь бг҃ъ ва́шъ, и҆ не и҆змѣню́сѧ. и҆ вы̀ сы́нове і҆а́кѡвли, ᲂу҆клони́стесѧ ѿ зако́на, и҆ не сохрани́сте. Сегѡ̀ ра́ди ѡ҆брати́тесѧ ко мнѣ̀, и҆ ѡ҆бращꙋ́сѧ къ ва́мъ, гл҃го́летъ гдⷭ҇ь вседержи́тель, и҆ ᲂу҆блажа́тъ ва́съ всѝ ꙗ҆зы́цы. и҆ разꙋмѣ́йте ꙗ҆́кѡ а҆́зъ гдⷭ҇ь, смотрѧ́ѧй посредѝ пра́веднагѡ, и҆ посредѝ беззако́нника въ де́нь ѻ҆́нъ, въ ѻ҆́ньже сотворю̀ снабдѣ́нїе лю́бѧщымъ мѧ̀. Позна́йте ᲂу҆́бѡ, и҆ помѧни́те зако́нъ мѡѷсе́овъ раба̀ моегѡ̀, ꙗ҆́коже заповѣ́да ва́мъ въ хѡри́вѣ, ко всемꙋ̀ і҆и҃лю повелѣ́нїе и҆ ѡ҆правда́нїе. И҆ сѐ а҆́зъ послю̀ ва́мъ и҆лїю̀ ѳесві́тѧнина, пре́жде да́же не (с. 363) прїитѝ дню̀ гдⷭ҇ню вели́комꙋ и҆ просвѣще́нномꙋ, и҆́же напра́витъ се́рдце ѻ҆тца̀ къ сы́нꙋ, и҆ се́рдце человѣ́ка ко и҆́скреннемꙋ своемꙋ̀, да не прише́дъ поражꙋ̀ зе́млю вско́рѣ, гл҃го́летъ гдⷭ҇ь вседержи́тель, бг҃ъ ст҃ы́й і҆и҃левъ.

Премꙋ́дрости соломѡ́новы чте́нїе.

[Глава̀ д҃] Пра́ведникъ, а҆́ще пости́гнетъ сконча́тисѧ, въ поко́и бꙋ́детъ. Ѡ҆сꙋ́дитъ же пра́ведникъ ᲂу҆мира́ѧй живꙋ́щыѧ нечести̑выѧ. Оу҆́зрѧтъ бо кончи́нꙋ пра́веднагѡ, и҆ не разꙋмѣ́ютъ, что̀ совѣща́ша ѡ҆ не́мъ: ꙗ҆́кѡ пове́ржетъ гдⷭ҇ь нечести̑выѧ безгла̑сны ни́цъ: и҆ поколе́блетъ и҆̀хъ ѿ ѡ҆снова́нїй, и҆ до послѣ́днѧгѡ и҆сче́знꙋтъ въ болѣ́зни, и҆ па́мѧть и҆́хъ поги́бнетъ. Прїи́дꙋтъ бо въ помышле́нїе согрѣше́нїй свои́хъ ᲂу҆жа́сни, и҆ ѡ҆бличи́тъ и҆̀хъ сопроти́въ беззако́нїѧ и҆́хъ. [Глава̀ є҃] Тогда̀ ста́нетъ въ дерзнове́нїи мно́зѣ пра́ведникъ предъ лице́мъ ѡ҆скорби́вшихъ є҆го̀, и҆ ѿмета́ющихъ трꙋды̀ є҆гѡ̀. Ви́дѣвше же є҆го̀ смѧтꙋ́тсѧ стра́хомъ мно́гимъ, и҆ ᲂу҆жа́снꙋтсѧ ѡ҆ пресла́вномъ спасе́нїи є҆гѡ̀. Рекꙋ́тъ бо въ себѣ̀ ка́ющесѧ, и҆ въ тѣснотѣ̀ дꙋ́ха воздо́хнꙋтъ, и҆ рекꙋ́тъ: се́й бѣ̀, є҆го́же и҆мѣ́хомъ нѣ́когда въ посмѣ́хъ и҆ въ при́тчꙋ поноше́нїѧ, безꙋ́мнїи. Житїѐ є҆гѡ̀ вмѣни́хомъ неи́стово, и҆ кончи́нꙋ є҆гѡ̀ безче́стнꙋ. Ка́кѡ вмѣни́сѧ въ сынѣ́хъ бж҃їихъ, и҆ во ст҃ы́хъ жре́бїй є҆гѡ̀ є҆́сть; Оу҆̀бо заблꙋди́хомъ ѿ пꙋтѝ и҆́стиннагѡ, и҆ пра́вды свѣ́тъ не ѡ҆блиста̀ на́мъ, и҆ со́лнце не возсїѧ̀ на́мъ. Беззако́нныхъ и҆спо́лнихомсѧ сте́зь, и҆ поги́бели, и҆ ходи́хомъ стєзѝ непрохѡ́дны, пꙋти́ же гдⷭ҇нѧ не разꙋмѣ́хомъ.

На стїхо́внѣ стїхи̑ры, гла́съ в҃. Подо́бенъ: Є҆гда̀ ѿ дре́ва:

Прїиди́те, честнꙋ́ю главꙋ̀ ѿсѣ́ченнꙋю мече́мъ крⷭ҇ти́телевꙋ, вѣ́рнїи, дне́сь почти́мъ, во ѡ҆брѣ́тенїи є҆ѧ̀ срѣта́юще пѣ́сньми, чтꙋ́ще ѿ любвѐ, бл҃года́ть пролива́ющꙋю (с. 364) и҆сцѣле́нїй на́мъ, ю҆́же прелюбодѣ́й и҆́рѡдъ дре́вле пред̾ѿсѣчѐ, неи́стовствомъ и҆рѡдїа́дѣ спле́тсѧ.

Сті́хъ: Честна̀ предъ гдⷭ҇емъ сме́рть преподо́бныхъ є҆гѡ̀.

Ꙗ҆́коже ѿ рꙋды̀ зла́то, та́кѡ ѿ землѝ прⷣте́чева глава̀ просїѧва́етъ, въ сосꙋ́дѣ скꙋде́льнѣмъ свѣтѧ́щисѧ, и҆ вѣща́ющи ꙗ҆́снѡ, и҆́рѡдово ѡ҆блича́ющи прелюбодѣ́йство и҆ ᲂу҆бі́йство, зарю́ же просвѣща́ющꙋю помышлє́нїѧ на̑ша. ю҆́же ѡ҆блобыза́юще, вѣ́рнїи, дне́сь почти́мъ пѣ́сньми, ꙗ҆́кѡ ѡ҆ на́съ бг҃ꙋ молѧ́щꙋюсѧ.

Сті́хъ: Пра́ведникъ ꙗ҆́кѡ фі́нїѯъ процвѣте́тъ, ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ.

Дре́вле ꙗ҆́коже бжⷭ҇твенное сокро́вище, въ сосꙋ́дѣ сокрове́ннаѧ глава̀ крⷭ҇ти́телева въ землѝ, дне́сь концє́мъ ѿкрыва́етсѧ: ꙗ҆́коже бога́тство пролива́ющаѧ и҆сто́чники и҆сцѣле́нїй, болѣ̑зни и҆сцѣлѧ́ющаѧ, дꙋ́шы просвѣща́ющаѧ. тѣ́мже ᲂу҆тѣше́нїѧ всѧ́кагѡ бл҃года́ть воспрїе́млюще, пѣ́сньми сїю̀ бл҃гоговѣ́йнѡ похва́лимъ.

Сла́ва, гла́съ в҃:

Ꙗ҆́коже бжⷭ҇твенныхъ ᲂу҆мышле́нїй, всечестна́ѧ ра́ка, неизрече́ннагѡ сꙋщества̀, ꙗ҆́снѡ прови́дѣвшаѧ та́инство глава̀ твоѧ̀, ꙗ҆́кѡ ѿ ложе́снъ ма́тернихъ, ѿ сокро́вищъ земны́хъ дне́сь возсїѧ̀, і҆ѡа́нне всехва́льне, и҆ ѡ҆благово́ни всю̀ подсо́лнечнꙋю, ѡ҆свѧще́нїѧ пролива́ющаѧ мѵ́ро, и҆ мы́сленнѡ проповѣ́дающаѧ пꙋ́ть покаѧ́нїѧ, и҆ сп҃сꙋ всѣ́хъ молѧ́щаѧсѧ ѡ҆ дꙋша́хъ на́шихъ.

И҆ ны́нѣ, бг҃оро́диченъ:

Тропа́рь, гла́съ д҃:

Ѿ землѝ возсїѧ́вши прⷣте́чева глава̀, лꙋчы̀ и҆спꙋща́етъ нетлѣ́нїѧ, вѣ̑рнымъ и҆сцѣле́нїй: свы́ше собира́етъ мно́жество а҆́гг҃лъ, до́лѣ же созыва́етъ человѣ́ческїй ро́дъ, є҆диногла́снꙋю возсыла́ти сла́вꙋ хрⷭ҇тꙋ̀ бг҃ꙋ.

Сла́ва, и҆ ны́нѣ, бг҃оро́диченъ: Є҆́же ѿ вѣ́ка ᲂу҆тае́нное: (с. 365)

На ᲂу҆́трени, на Бг҃ъ гдⷭ҇ь, тропа́рь, два́жды. Сла́ва, и҆ ны́нѣ, бг҃оро́диченъ воскрⷭ҇нъ, по гла́сꙋ тропарѧ̀.

По а҃-й стїхоло́гїи сѣда́ленъ, гла́съ д҃. Подо́бенъ: Ско́рѡ предварѝ:

Ꙗ҆́кѡ бжⷭ҇твенное сокро́вище сокрове́но въ землѝ, хрⷭ҇то́съ ѿкры̀ главꙋ̀ твою̀ на́мъ, прⷪ҇ро́че и҆ прⷣте́че: всѝ ᲂу҆̀бо соше́дшесѧ въ сеѧ̀ ѡ҆брѣ́тенїе, пѣ́сньми бг҃огла́сными сп҃са воспои́мъ, спаса́ющаго на́шꙋ жи́знь моли́твами твои́ми.

Два́жды.

Сла́ва, и҆ ны́нѣ, бг҃оро́диченъ:

Пое́мъ тѧ̀, бг҃оневѣ́сто мт҃и хрⷭ҇та̀ бг҃а: сла́вѧще ржⷭ҇тво̀ твоѐ непостижи́мое, и҆́мже и҆зба́вихомсѧ ѿ ле́сти дїа́воли, и҆ всѧ́кїѧ бѣды̀, бцⷣе влⷣчце, и҆ вѣ́рнѡ вопїе́мъ: поми́лꙋй ста́до твоѐ, є҆ди́на всепѣ́таѧ.

По в҃-мъ стїхоло́гїи сѣда́ленъ, гла́съ д҃. Подо́бенъ: Вознесы́йсѧ:

И҆зда́вшисѧ ꙗ҆́кѡ зла́то ѿ рꙋды̀, свѧще́ннаѧ твоѧ̀ глава̀ пресла́внѡ, ѿ незаходи́мыхъ нѣ́дръ земны́хъ, ѡ҆богатѝ вѣ́рныхъ всѧ̑ мы̑сли разꙋмѣ́нїемъ бжⷭ҇твеннымъ, ны́нѣ пока́йтесѧ, вопїю́ще ѻ҆бы́чнѡ: є҆́йже покланѧ́ющесѧ, прⷣте́че, хрⷭ҇та̀ велегла́снѡ вѣ́рою сла́вимъ.

Два́жды.

Сла́ва, и҆ ны́нѣ, бг҃оро́диченъ:

Никогда́же премолчи́мъ, бцⷣе, бл҃года́рнѡ пѣ́ти ѿ дꙋшѝ твоѧ̑ ми́лѡсти, влⷣчце, рабѝ твоѝ, зовꙋ́ще и҆ глаго́люще: прест҃а́ѧ дв҃о, предварѝ, и҆ и҆зба́ви ѿ вра̑гъ ви́димыхъ и҆ неви́димыхъ и҆ всѧ́кагѡ преще́нїѧ: ты́ бо є҆сѝ на́мъ застꙋпле́нїе.

По полѷеле́и сѣда́ленъ, гла́съ и҃. Подо́бенъ: Повелѣ́нное та́йнѡ:

Крⷭ҇ти́телева глава̀ кры́ѧшесѧ ꙗ҆́кѡ би́серъ въ землѝ вла́жнѣй, и҆ ꙗ҆́кѡ свѣ́щникъ бг҃освѣ́телъ ᲂу҆кра́шена, ѡ҆зарѧ́етъ чꙋдотворѧ́щи мі́ръ ве́сь: ꙗ҆́кѡ ᲂу҆́тро возсїѧ̀ всебл҃голѣ́пнѡ сл҃нцꙋ прⷣте́ча, и҆ невече́рнимъ свѣ́томъ возвѣща́ѧ па́ки на́мъ, сѐ, взыва́ѧ, а҆́гнецъ бж҃їй.

Два́жды. (с. 366)

Сла́ва, и҆ ны́нѣ, бг҃оро́диченъ:

Бл҃годари́мъ тѧ̀ при́снѡ, бцⷣе, и҆ велича́емъ, чⷭ҇таѧ, и҆ покланѧ́емсѧ, воспѣва́юще ржⷭ҇тво̀ твоѐ, бл҃года́тнаѧ, вопїю́ще непреста́ннѡ: спаси́ ны, дв҃о всеми́лостиваѧ, ꙗ҆́кѡ бл҃га́ѧ, и҆ де́мѡнѡвъ и҆схитѝ словоположе́нїѧ стра́шнагѡ, въ ча́съ и҆спыта́нїѧ, да не посрами́мсѧ рабѝ твоѝ.

Степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Та́мѡ возращꙋ̀ ро́гъ дв҃дꙋ, ᲂу҆гото́вахъ свѣти́льникъ пома́занномꙋ моемꙋ̀. Сті́хъ: Помѧнѝ, гдⷭ҇и, дв҃да, и҆ всю̀ кро́тость є҆гѡ̀. Всѧ́кое дыха́нїе да хва́литъ гдⷭ҇а. Є҆ѵⷢ҇лїе лꙋкѝ, зача́ло л҃а.

По н҃-мъ ѱалмѣ̀ стїхи́ра самогла́сна, гла́съ ѕ҃:

Ꙗ҆́же пе́рвѣе на блю́дѣ, и҆́рѡдовꙋ беззако́ннꙋю нечистотꙋ̀ ѡ҆бличи́вшаѧ, покаѧ́нїе же всѣ̑мъ проповѣ́давшаѧ вѣ̑рнымъ, честна́ѧ глава̀ крⷭ҇ти́телѧ хрⷭ҇то́ва, ѿ сокро́вищъ земны́хъ ꙗ҆́вльшаѧсѧ предлежи́тъ, вѣ́рнѡ притека́ющымъ къ не́й, и҆ прикаса́ющымсѧ со стра́хомъ, и҆ покланѧ́ющымсѧ любо́вїю дꙋше́вною, да́рꙋющаѧ разрѣше́нїе прегрѣше́нїй, проше́нїємъ подае́тъ потрє́бнаѧ, и҆ ве́лїю ми́лость.

Канѡ́нъ бцⷣы со і҆рмосо́мъ на ѕ҃: и҆ прⷣте́чи на и҃:

Гла́съ ѕ҃. Пѣ́снь а҃. І҆рмо́съ:

Ꙗ҆́кѡ по сꙋ́хꙋ, пѣшеше́ствовавъ і҆и҃ль по бе́зднѣ стопа́ми, гони́телѧ фараѡ́на ви́дѧ потоплѧ́ема, бг҃ꙋ побѣ́днꙋю пѣ́снь, пои́мъ, вопїѧ́ше.

Грѧди́те, бл҃гохва́льнымъ ѧ҆зы́комъ и҆ всеси́льнымъ пле́щꙋще дꙋ́хомъ и҆зъ ᲂу҆сте́нъ нечи́стыхъ, гла́съ сло́ва прⷣте́чꙋ пѣ́сньми дꙋхо́вными, вѣ́рнїи, просла́вимъ.

Ми́рнымъ ᲂу҆строе́нїемъ ᲂу҆тиша́етсѧ, и҆ безмѣ́рными мно́жествы хрⷭ҇то́ва цр҃ковь, бл҃гостоѧ́тельнѣ ᲂу҆паса́етсѧ, тебѣ̀ лѣ́тнюю пѣ́снь вопїю́щи, прⷣте́че.

Ю҆́же ѿ бг҃а да́рꙋемꙋю ꙗ҆́кѡ сокро́вище на́мъ (с. 367) неѿе́млемо, бг҃оно́снꙋю главꙋ̀ прⷣте́чевꙋ, всѝ пѣ́сньми досто́йнѡ соше́дшесѧ, вѣ́рнїи, почти́мъ.

Бг҃оро́диченъ:

Твоего̀ прїе́мши содѣ́телѧ, ꙗ҆́кѡ са́мъ восхотѣ̀ и҆зъ безсѣ́меннагѡ твоегѡ̀ чре́ва, па́че ᲂу҆ма̀ воплоща́ема, чⷭ҇таѧ, тва́рей вои́стиннꙋ ꙗ҆ви́ласѧ є҆сѝ влⷣчца.

Катава́сїа: Ѿве́рзꙋ ᲂу҆ста̀ моѧ̑:

Пѣ́снь г҃. І҆рмо́съ:

Нѣ́сть свѧ́тъ, ꙗ҆́коже ты̀, гдⷭ҇и бж҃е мо́й, вознесы́й ро́гъ вѣ́рныхъ твои́хъ, бл҃же, и҆ ᲂу҆тверди́вый на́съ на ка́мени и҆сповѣ́данїѧ твоегѡ̀.

Оу҆тро́ба непло́дна прозѧбе́нїе тѧ̀ и҆знесѐ бжⷭ҇твенно, ꙗ҆́же ѿ ꙗ҆зы̑къ цр҃ковь, сла́вна невѣстово́дца, хрⷭ҇тꙋ̀ и҆́стинномꙋ бг҃ꙋ и҆ женихꙋ̀ сїю̀ ѡ҆брꙋча́юща.

Твоегѡ̀ бг҃овѣща́ннагѡ гла́са, прⷣте́че і҆ѡа́нне, нижѐ мече́мъ ᲂу҆держа̀ ѻ҆каѧ́ннаѧ прелюбодѣ́йца: бжⷭ҇твеннꙋю бо твою̀ на́мъ ꙗ҆влѧ́еши главꙋ̀ ѿ землѝ.

Торжествꙋ́ющїй свѣ́тлѡ жела́ющь тѧ̀ гра́дъ, ᲂу҆чрежда́емь быва́етъ ꙗ҆́кѡ бога́тство ѡ҆брѣ́тшь та́йное, и҆ и҆сто́чникъ неѡскꙋ́денъ и҆сцѣле́нїй, прⷣте́че, главꙋ̀ твою̀.

Бг҃оро́диченъ:

Бжⷭ҇твеннагѡ ржⷭ҇тва̀ твоегѡ̀, чⷭ҇таѧ, всѧ́кїй є҆стества̀ чи́нъ прехо́дитъ чꙋ́до: бг҃а бо преесте́ственнѡ зачала̀ є҆сѝ во чре́вѣ, и҆ ро́ждши пребыва́еши при́снѡ дв҃а.

Сѣда́ленъ, гла́съ и҃. Подо́бенъ: Повелѣ́нное та́йнѡ:

Ꙗ҆́кѡ въ храни́лищи сокро́вище вложена̀ прⷣте́чева глава̀ хранѧ́шесѧ, въ водоно́сѣ кры́ющасѧ гла́съ сло́ва: ꙗ҆́кѡ пшени́ца покрове́на во глꙋбинѣ̀ землѝ и҆зцвѣтѐ, плодоносѧ́щи бжⷭ҇твеннꙋю жи́знь. Тоѧ̀ всѝ почита́емъ ѡ҆брѣ́тенїе, хрⷭ҇та̀ сла́вѧще, пода́вшаго то́й бл҃года́ть и҆сточи́ти и҆сцѣлє́нїѧ.

Два́жды. (с. 368)

Сла́ва, и҆ ны́нѣ, бг҃оро́диченъ:

Повелѣ́нное та́йнѡ прїе́мъ въ ра́зꙋмѣ, въ кро́вѣ і҆ѡ́сифовѣ тща́нїемъ предста̀ безпло́тный, глаго́лѧ неискꙋсобра́чнѣй: приклони́вый схожде́нїемъ нб҃са̀, вмѣща́етсѧ неизмѣ́ннѡ ве́сь въ тѧ̀. є҆го́же и҆ ви́дѧ въ ложесна́хъ твои́хъ, прїе́мша ра́бїй зра́къ, ᲂу҆жаса́юсѧ зва́ти тебѣ̀: ра́дꙋйсѧ, невѣ́сто неневѣ́стнаѧ.

Пѣ́снь д҃. І҆рмо́съ:

Хрⷭ҇то́съ моѧ̑ си́ла, бг҃ъ и҆ гдⷭ҇ь, честна́ѧ цр҃ковь бг҃олѣ́пнѡ пое́тъ, взыва́ющи ѿ смы́сла чи́ста, ѡ҆ гдⷭ҇ѣ пра́зднꙋющи.

Ве́тхагѡ бы́лъ є҆сѝ печа́ть, всебога́те, ꙗ҆́вѣ завѣ́та, и҆ прⷪ҇ро́кѡвъ коне́цъ и҆звѣсти́лъ є҆сѝ: и҆ чертогокраси́тель же бжⷭ҇твенный, но́вагѡ ꙗ҆ви́лсѧ є҆сѝ, прⷣте́че.

Власѧны́ми рꙋ́бы, ѻ҆бы́чнѡ, прⷣте́че, честнꙋ́ю претерпѣ́лъ є҆сѝ и҆ сла́внꙋю главꙋ̀ твою̀ покры́ти ца́рскою багрѧни́цею, ꙗ҆́кѡ ри́зою, ра́дꙋѧсѧ.

Бжⷭ҇твеннꙋю главꙋ̀ твою̀, ѿбѣже́нїемъ ни́щїй и҆ скита́ѧйсѧ, твои́ми бжⷭ҇твенными наставле́ньми, ꙗ҆́коже незави́стно бога́тство, і҆ѡа́нне, показꙋ́етъ.

Заре́ю, прⷣте́че, бжⷭ҇твеннагѡ дх҃а, чтꙋ́щїй тѧ̀ гра́дъ всегда̀, молѝ ᲂу҆ѧсни́ти, и҆ въ бжⷭ҇твеннѣй па́мѧти твое́й, безплѡ́тнымъ сра́доватисѧ.

Бг҃оро́диченъ:

Ме́ртва мѧ̀ показа̀ са́да вкꙋше́нїе, живо́тное же дре́во, и҆зъ тебє̀ ꙗ҆́вльшеесѧ, пречⷭ҇таѧ, воздви́же, и҆ ра́йскїѧ пи́щи наслѣ́дника мѧ̀ сотворѝ.

Пѣ́снь є҃. І҆рмо́съ:

Бж҃їимъ свѣ́томъ твои́мъ, бл҃же, ᲂу҆́тренюющихъ тѝ дꙋ́шы любо́вїю ѡ҆зарѝ, молю́сѧ, тѧ̀ вѣ́дѣти, сло́ве бж҃їй, и҆́стиннаго бг҃а, ѿ мра́ка грѣхо́внагѡ взыва́юща.

Не бы́лъ є҆сѝ тро́сть, крⷭ҇ти́телю, и҆скꙋси́тельными ѕлополꙋче́нїѧ вѣ̑тры всегда̀ коле́блемь, сто́лпъ же бжⷭ҇твенныхъ люде́й непоколеби́мь: си́лою бо и҆лїино́ю ꙗ҆ви́лсѧ є҆сѝ, и҆ дх҃а.

И҆́же бжⷭ҇тво̀ ѿмета́ѧ, и҆ ᲂу҆малѧ́ѧ сла́вꙋ, ѿ тебє̀ (с. 369) кре́щшагѡсѧ хрⷭ҇та̀, и҆ бжⷭ҇твеннꙋю бл҃года́ть твою̀ ᲂу҆таева́ѧ, пра́веднѡ ѿ ѡ҆гра́дъ бжⷭ҇твенныхъ возбранѧ́емь є҆́сть.

Ѿве́рзлъ є҆сѝ незави́стнагѡ бжⷭ҇твеннагѡ и҆сто́чника две́рь, пою́щымъ тѧ̀ любо́вїю, сла́вный прⷣте́че, бжⷭ҇твенныѧ бл҃года́ти и҆сточа́ющїѧ во́ды, и҆ стрꙋи̑ и҆сцѣле́нїй всѣ́хъ веселѧ́щыѧ.

Бг҃оро́диченъ:

Носѧ́щи добро́тꙋ мы́сленнꙋю краснѣ́йшїѧ дꙋшѝ твоеѧ̀, невѣ́ста бж҃їѧ была̀ є҆сѝ, запеча́тствована дѣ́вствомъ, чⷭ҇таѧ, и҆ заре́ю чистоты̀ мі́ръ просвѣща́ющи.

Пѣ́снь ѕ҃. І҆рмо́съ:

Жите́йское мо́ре воздвиза́емое зрѧ̀ напа́стей бꙋ́рею, въ ти́хомꙋ приста́нищꙋ твоемꙋ̀ прите́къ, вопїю́ ти: возведѝ ѿ тлѝ живо́тъ мо́й, многомлⷭ҇тиве.

Прⷪ҇ро́ка тѧ̀ речѐ и҆́стина хрⷭ҇то́съ, и҆ прⷪ҇ро́кѡвъ превы́шша, крⷭ҇ти́телѧ же и҆ прⷣте́чꙋ жи́зни: того́ бо ᲂу҆зрѣ́лъ є҆сѝ, є҆го́же зако́нъ и҆ прⷪ҇ро́цы провозвѣсти́ша.

Не терпѧ́ше кры́тисѧ чꙋде́съ и҆сто́чникъ, сокро́вище бл҃года́ти, сла́внаѧ глава̀ твоѧ̀, крⷭ҇ти́телю, прⷪ҇ро́че и҆ прⷣте́че: но ꙗ҆́вльшисѧ пролива́етъ и҆сцѣле́нїй и҆сто́чники.

Всебога́тно похвале́нїе, и҆ ᲂу҆краше́нїе свѣ́тло, и҆ щи́тъ спаси́теленъ, хрⷭ҇толю́бный се́й, и҆ бл҃госла́вный предлага́етъ гра́дъ тво́й, честнꙋ́ю и҆ бжⷭ҇твеннꙋю твою̀ главꙋ̀, прⷣте́че.

Бг҃оро́диченъ:

Вели́кїй прописа̀ во прⷪ҇ро́цѣхъ мѡѷсе́й тѧ̀ кївѡ́тъ, и҆ трапе́зꙋ, и҆ свѣ́щникъ, и҆ ста́мнꙋ ѻ҆бра́знѣ, назна́менꙋѧ воплоще́нїе, є҆́же и҆зъ тебє̀, вы́шнѧгѡ, мт҃и дв҃о.

Конда́къ, гла́съ в҃. Подо́бенъ: Вы́шнихъ и҆щѧ̀:

Прⷪ҇ро́че бж҃їй, и҆ прⷣте́че бл҃года́ти, главꙋ̀ твою̀ ꙗ҆́кѡ шипо́къ свѧще́ннѣйшїй ѿ землѝ ѡ҆брѣ́тше, и҆сцѣлє́нїѧ всегда̀ прїе́млемъ: и҆́бо па́ки ꙗ҆́коже пре́жде въ мі́рѣ проповѣ́дꙋеши покаѧ́нїе. (с. 370)

І҆́косъ:

Ѿ гдⷭ҇а свидѣ́тельство прїе́мъ, і҆ѡа́нне, па́че всѣ́хъ человѣ̑къ вы́шшїй бы́лъ є҆сѝ: ѿѻнꙋ́дꙋже похвалы̑ пѣ́сней принестѝ тебѣ̀ ᲂу҆жаса́юсѧ, но любо́вїю понꙋжде́нъ, пѣ́снь нача́ти дерзнꙋ́хъ. Тѣ́мже да не ᲂу҆недосто́иши споспѣ́шникъ мнѣ̀ бы́ти, всехва́льне, да возмогꙋ̀ вѣнча́ти тво́й ве́рхъ ст҃ы́й, требога́те: и҆́бо ты̀ въ мі́рѣ проповѣ́дꙋеши покаѧ́нїе.

Пѣ́снь з҃. І҆рмо́съ:

Росода́тельнꙋ ᲂу҆́бѡ пе́щь содѣ́ла а҆́гг҃лъ прпⷣбнымъ ѻ҆трокѡ́мъ, халдє́и же ѡ҆палѧ́ющее велѣ́нїе бж҃їе, мꙋчи́телѧ ᲂу҆вѣща̀ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ.

Дв҃ы прозѧбе́нїе, тѧ̀ па́че всѣ́хъ речѐ въ рожде́нныхъ жена́ми: ꙗ҆́кѡ бо безпло́тенъ и҆ равноа́гг҃ленъ на землѝ томꙋ̀ пожи́лъ є҆сѝ, вопїѧ̀: бл҃гослове́нъ є҆сѝ, бж҃е ѻ҆тє́цъ на́шихъ.

Во ᲂу҆тро́бѣ двⷭ҇твеннѣй все́льшасѧ позна́лъ є҆сѝ и҆зъ непло́дна чре́ва, и҆ ᲂу҆потреби́въ мт҃рнѧ, прⷣте́че, гла́са, и҆гра́ѧ взыва́лъ є҆сѝ є҆мꙋ̀: бл҃гослове́нъ є҆сѝ, бж҃е ѻ҆тє́цъ на́шихъ.

Ѿ пꙋсты́ни прест҃ы́мъ дх҃омъ наꙋче́нъ ꙗ҆ви́лсѧ є҆сѝ, ꙗ҆́коже ᲂу҆́тро свѣтоно́сно, а҆́гг҃лъ свѣ́та, на́съ наꙋча́ѧ вопи́ти: бл҃гослове́нъ є҆сѝ, бж҃е ѻ҆тє́цъ на́шихъ.

Оу҆блажи́сѧ ꙗ҆́кѡ вои́стиннꙋ во гра́дѣхъ, се́й ны́нѣ, приснопа́мѧтне, стѧжа́вый тѧ̀ гра́дъ сокро́вище, прⷣте́че хрⷭ҇то́въ. тѣ́мже пра́зднꙋѧ вопїе́тъ: бл҃гослове́нъ є҆сѝ, бж҃е ѻ҆тє́цъ на́шихъ.

Бг҃оро́диченъ:

Тобо́ю, мт҃и дв҃о, свѣ́тъ возсїѧ̀ все́й вселе́ннѣй свѣ́тлый, ты́ бо зижди́телѧ всѣ́хъ родила̀ є҆сѝ бг҃а: ᲂу҆ негѡ́же и҆спросѝ, пречⷭ҇таѧ, на́мъ низпосла́ти вѣ̑рнымъ ве́лїю ми́лость.

Пѣ́снь и҃. І҆рмо́съ:

И҆зъ пла́мене прпⷣбнымъ ро́сꙋ и҆сточи́лъ є҆сѝ, и҆ пра́веднагѡ же́ртвꙋ водо́ю попали́лъ є҆сѝ: всѧ̑ бо твори́ши, хрⷭ҇тѐ, то́кмѡ є҆́же хотѣ́ти. тѧ̀ превозно́симъ во всѧ̑ вѣ́ки. (с. 371)

По́сланъ бы́сть вопїю́щагѡ гла́съ прⷣте́ча, запꙋстѣ́вшымъ сердца́мъ, сн҃а бж҃їѧ, вѣ́рꙋ бл҃гочести́вꙋю водрꙋжа́ѧй сꙋ́щагѡ бг҃а, є҆го́же превозно́симъ во всѧ̑ вѣ́ки.

Оу҆гото́вите, глаго́летъ и҆ ны́нѣ прⷣте́ча, гдⷭ҇ню стезю̀: се́й бо ст҃ы́ни ра́ди прише́дъ, со ѻ҆ц҃е́мъ и҆ дх҃омъ, въ на̑ша сердца̀ всели́тсѧ во вѣ́ки.

Слꙋ́хомъ ᲂу҆́бѡ гла́сꙋ роди́телевꙋ, ѻ҆чи́ма же бжⷭ҇твеннагѡ дх҃а зрѣ́нїю: всѧ́чески же ѡ҆сѧза́нїемъ і҆ѡа́ннъ прⷣте́ча на тебѣ̀ рꙋ́кꙋ положи́вый, хрⷭ҇тѐ, бг҃оно́сецъ быва́етъ.

И҆зъ чре́ва ѡ҆ст҃и́сѧ бжⷭ҇твеннымъ дх҃омъ, и҆ прⷪ҇ро́къ ꙗ҆ви́сѧ во чре́вѣ носи́мь: ны́нѣ же наслажде́нїе, и҆́же въ нѣ́дрѣхъ тѧ̀ и҆мꙋ́щемꙋ гра́дꙋ показа́сѧ, прⷪ҇ро́че.

Бг҃оро́диченъ:

Златоза́рный тѧ̀ свѣ́щникъ пред̾изѡбразѝ, прїе́мшꙋю неизрече́ннѡ свѣ́тъ непристꙋ́пный, позна́нїемъ тогѡ̀ ѡ҆зарѧ́ющь всѧ́чєскаѧ: є҆го́же превозно́симъ во всѧ̑ вѣ́ки.

Пѣ́снь ѳ҃. І҆рмо́съ:

Бг҃а человѣ́кѡмъ невозмо́жно ви́дѣти, на него́же не смѣ́ютъ чи́ни а҆́гг҃льстїи взира́ти: тобо́ю бо, всечⷭ҇таѧ, ꙗ҆ви́сѧ человѣ́кѡмъ сло́во воплоще́нно: є҆го́же велича́юще, съ нбⷭ҇ными вѡ́и тѧ̀ ᲂу҆блажа́емъ.

Ꙗ҆́вѣ и҆сполне́нїѧ десѧти́цы, прⷣте́че, за́повѣдей ты̀ храни́тель крѣ́покъ бы́въ, прили́чнѣ ѿ хрⷭ҇та̀ почте́нъ бы́лъ є҆сѝ дарова́нїй десѧти́цею. тѣ́мже тѧ̀ дх҃а таи́нника, и҆ дрꙋ́га сло́вꙋ вѣ́дꙋще, ᲂу҆блажа́емъ.

Хрⷭ҇то́въ прⷪ҇ро́къ же и҆ а҆пⷭ҇лъ, а҆́гг҃лъ же и҆ прⷣте́ча, бжⷭ҇твеннагѡ воплоще́нїѧ крⷭ҇ти́тель, и҆ сщ҃е́нникъ, и҆ мч҃никъ вѣ́ренъ: проповѣ́дникъ же сꙋ́щымъ во а҆́дѣ ты̀ бы́лъ є҆сѝ, и҆ дѣ́вствꙋющымъ пра́вило, и҆ пꙋсты́ни прозѧбе́нїе.

Дꙋшѝ невѣ́рїе ѡ҆блича́етсѧ, сщ҃еннодѣ́йственныѧ рꙋкѝ ᲂу҆мерщвле́нныѧ чꙋдесе́мъ: прозѧ́бшей же па́ки вѣ́рѣ, и҆ твое́й ꙗ҆́вльшейсѧ главѣ̀, блаже́нне, поже́ртаѧ дла́нь ѡ҆бновлѧ́етсѧ. (с. 372)

Твоѐ ꙗ҆вле́нїе провозвѣща́юще зри́телю, возвѣща́хꙋ а҆́гг҃льстїи чи́ни нело́жнѡ, гаврїи́ла подо́бѧщесѧ бжⷭ҇твенномꙋ бл҃говѣ́щенїю, є҆́же пре́жде рождества̀ твоегѡ̀, свѧще́нный заха́рїа прїе́млетъ.

Бг҃оро́диченъ:

Страсте́й и҆сцѣлє́нїѧ да почерпа́емъ, въ сла́вный хра́мъ прⷣте́чевъ притека́юще: въ то́й бо прихо́дѧтъ а҆́гг҃льстїи ли́цы, дꙋ́си же пра́ведныхъ всѣ́хъ, влⷣчца съ крⷭ҇ти́телемъ і҆ѡа́нномъ, и҆сцѣлє́нїѧ подава́юще.

Свѣти́ленъ. Подо́бенъ: Оу҆ченикѡ́мъ:

Свѣтоѧвле́ннаѧ возсїѧ̀ честна́ѧ твоѧ̀ глава̀ ѿ незаходи́мыхъ нѣ́дръ земны́хъ, прⷣте́че і҆ѡа́нне, свѣти́льниче свѣ́та невеще́ственнагѡ: є҆ѧ́же ѡ҆брѣ́тенїе любо́вїю соверша́юще мо́лимъ тѧ̀, лю́тыхъ ѡ҆брѣстѝ разрѣше́нїе, и҆ вре́мѧ ᲂу҆до́бнѣ соверши́ти воздержа́нїѧ, моли́твами твои́ми, всехва́льне крⷭ҇ти́телю сп҃совъ.

Два́жды.

Сла́ва, и҆ ны́нѣ, бг҃оро́диченъ:

Оу҆тѣша́етсѧ, всечⷭ҇таѧ, вѣ́рныхъ бг҃омꙋ́дрое собра́нїе слꙋжа́щее, и҆ вѣ́рнѡ воспѣва́ющее тѧ̀ бцⷣꙋ и҆́стиннѡ. тѣ́мже моли́твами твои́ми поста̀ тече́нїе да́ждь на́мъ соверши́ти бг҃олѣ́пнѡ, и҆ крⷭ҇тꙋ̀ честно́мꙋ поклони́тисѧ, и҆ стрⷭ҇те́мъ спаси́тєльнымъ сн҃а и҆ бг҃а твоегѡ̀.

На хвали́техъ стїхи̑ры на д҃, гла́съ д҃. Подо́бенъ: Да́лъ є҆сѝ зна́менїе:

Ѿве́рзе преддвє́рїѧ воздержа́нїѧ ꙳ всечⷭ҇тна́ѧ глава̀ твоѧ̀, всехва́льне, ꙳ и҆ пи́щꙋ предложѝ сладча́йшꙋю всѣ̑мъ ꙳ бж҃е́ственныхъ дарова́нїй: ꙳ и҆̀хже причаща́ющесѧ вѣ́рнѡ, ꙳ поста̀ те́рпкое ᲂу҆слажда́емъ, ꙳ и҆ вѣ́рою восхвалѧ́емъ тѧ̀, ꙳ и҆ вопїе́мъ хрⷭ҇тꙋ̀ бг҃ꙋ: і҆и҃се всеси́льне, ꙳ сп҃се дꙋ́шъ на́шихъ.

Два́жды.

Мѵ́ра ꙗ҆́коже во́ды, ꙳ глава̀ и҆ска́пающи прⷣте́чева приснотекꙋ́щаѧ, ꙳ и҆ на трапе́зѣ дне́сь возло́жшисѧ ꙳ та́йнѣй и҆ бжⷭ҇твеннѣй, ꙳ благоꙋха́етъ мы́сленнѣ ꙳ и҆ го́ресть (с. 373) ѿгонѧ́етъ скорбе́й, ꙳ и҆ весе́лїѧ всѧ̑ и҆сполнѧ́етъ, ꙳ любо́вїю зовꙋ́щыѧ: ꙳ і҆и҃се всеси́льне, ꙳ сп҃се дꙋ́шъ на́шихъ.

Посѣчѐ глава̀ твоѧ̀, ꙳ ꙗ҆́коже ме́чь ѻ҆стрѣ́йшїй, ꙳ главы̑ беззако́ннꙋющихъ вра̑гъ: ꙳ и҆ и҆сцѣле́нїѧ и҆сточѝ въ благозако́нїи сꙋ́щымъ всѣ̑мъ, ꙳ бжⷭ҇твенныхъ дарова́нїй. ꙳ и҆ сегѡ̀ ра́ди тѧ̀ вѣ́рнѡ восхвалѧ́емъ, ꙳ дрꙋ́га и҆ прⷣте́чꙋ, і҆ѡа́нне, зижди́телева, ꙳ и҆ вопїе́мъ є҆мꙋ̀ прилѣ́жнѡ: ꙳ і҆и҃се всеси́льне, ꙳ сп҃се дꙋ́шъ на́шихъ.

Сла́ва, гла́съ ѕ҃:

Всечестнꙋ́ю главꙋ̀ крⷭ҇ти́телѧ твоегѡ̀, гдⷭ҇и, ꙗ҆́вльшꙋюсѧ дне́сь ѿ землѝ, со гла́сомъ хвале́нїѧ прїе́мшїи вѣ́рнѡ, въ моли́твꙋ, чл҃вѣколю́бче, грѣ́шнїи рабѝ твоѝ приводѧ́ще, мо́лимсѧ, тоѧ̀ ра́ди ᲂу҆лꙋчи́ти въ де́нь сꙋда̀ ѿ тебє̀ ѡ҆чище́нїе, и҆ ве́лїю ми́лость.

И҆ ны́нѣ, бг҃оро́диченъ:

Бл҃голюби́вый бж҃е и҆ сп҃се, рабы̑ твоѧ̑ спаса́й ѿ всѧ́кагѡ ѡ҆бстоѧ́нїѧ лю́тагѡ, моли́твами прⷣте́чи твоегѡ̀ и҆ всѣ́хъ ст҃ы́хъ, и҆ мт҃ре твоеѧ̀ мольба́ми.

Славосло́вїе вели́кое, и҆ ѿпꙋ́стъ.

На лїтꙋргі́и, бл҃жє́нна ѿ канѡ́на, пѣ́снь г҃ и҆ ѕ҃-ѧ. Прокі́менъ, гла́съ з҃: Возвесели́тсѧ пра́ведникъ ѡ҆ гдⷭ҇ѣ, и҆ ᲂу҆пова́етъ на него̀. Сті́хъ: Оу҆слы́ши, бж҃е, гла́съ мо́й, внегда̀ моли́тимисѧ къ тебѣ̀. А҆пⷭ҇лъ къ корі́нѳѧнѡмъ, зача́ло рѻ҃ѕ. А҆ллилꙋ́їа, гла́съ д҃: Пра́ведникъ ꙗ҆́кѡ фі́нїѯъ процвѣте́тъ, ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ. Сті́хъ: И҆́стина ѿ землѝ возсїѧ̀, и҆ пра́вда съ нб҃сѐ прини́че. Є҆ѵⷢ҇лїе матѳе́а, зача́ло м҃. Прича́стенъ: Въ па́мѧть вѣ́чнꙋю бꙋ́детъ пра́ведникъ:

[Зрѝ] Подоба́етъ вѣ́дати, а҆́ще слꙋчи́тсѧ ѡ҆брѣ́тенїе честны́ѧ главы̀ і҆ѡа́нна прⷣте́чи въ недѣ́лю мѧсопꙋ́стнꙋю, и҆лѝ сыропꙋ́стнꙋю:

Начина́етсѧ бо съ среды̀ мѧсопꙋ́стныѧ недѣ́ли, и҆ восхо́дитъ до вто́рника д҃-ѧ недѣ́ли вели́кагѡ поста̀. (с. 374)

🕅 На ма́лѣй вече́рни въ сꙋббѡ́тꙋ, стїхи̑ры воскрⷭ҇ны д҃: и҆ бг҃оро́диченъ гла́са. На стїхо́внѣ стїхи́ра воскрⷭ҇на є҆ди́на: и҆ прⷣте́чи стїхо́вна. По Ны́нѣ ѿпꙋща́еши: тропа́рь воскрⷭ҇нъ: Сла́ва, прⷣте́чи: И҆ ны́нѣ, бг҃оро́диченъ воскрⷭ҇нъ. Є҆ктенїа̀ ма́лаѧ, и҆ ѿпꙋ́стъ.

На вели́цѣй вече́рни, на Гдⷭ҇и, воззва́хъ, стїхи̑ры воскрⷭ҇ны, г҃: и҆ трїѡ́ди, д҃: и҆ прⷣте́чи, г҃. Сла́ва, трїѡ́ди: И҆ ны́нѣ, бг҃оро́диченъ а҃-й гла́са. А҆́ще ли недѣ́лѧ сыропꙋ́стнаѧ, и҆ пое́мъ стїхи̑ры воскрⷭ҇ны г҃: и҆ ꙾восто́ченъ꙾ (꙾А҆нато́лїевъ꙾) є҆ди́нъ: и҆ трїѡ́ди г҃: и҆ прⷣте́чи г҃. Сла́ва, трїѡ́ди. И҆ ны́нѣ, бг҃оро́диченъ а҃-й гла́са. На лїті́и стїхи́ра хра́ма: и҆ трїѡ́ди хвали̑тны, два̀ стїха̑. А҆́ще недѣ́лѧ мѧсопꙋ́стнаѧ, а҃-й сті́хъ, гла́съ ѕ҃: Помышлѧ́ю де́нь ѻ҆́нъ: в҃-й, гла́съ то́йже: Ѽ каковы́й ча́съ тогда̀ и҆ де́нь: [Зрѝ] А҆́ще ли недѣ́лѧ сыропꙋ́стнаѧ: Глаго́лемъ трїѡ́ди та́кожде въ лїті́и два̀ стїха̑ хвали̑тны: а҃-й сті́хъ, гла́съ є҃: Оу҆вы̀ мнѣ̀, а҆да́мъ рыда́нїемъ возопѝ: в҃-й, гла́съ то́йже: По́прище добродѣ́телей ѿве́рзесѧ: Сла́ва, прⷣте́чи, гла́съ ѕ҃: Сокро́вище бж҃е́ственныхъ дарѡ́въ: И҆ ны́нѣ, трїѡ́ди, пи́санъ на лїті́и сла́вникъ. На стїхо́внѣ стїхи̑ры воскрⷭ҇ны: Сла́ва, прⷣте́чи, гла́съ в҃: Ꙗ҆́коже бжⷭ҇твенныхъ: И҆ ны́нѣ, трїѡ́ди. На благослове́нїи хлѣ́бѡвъ тропа́рь, Бцⷣе дв҃о: три́жды. И҆ чте́нїе въ посла́нїихъ а҆пⷭ҇льскихъ.

На ᲂу҆́трени, на Бг҃ъ гдⷭ҇ь, тропа́рь воскрⷭ҇нъ, два́жды: Сла́ва, прⷣте́чи: И҆ ны́нѣ, бг҃оро́диченъ а҃-й, въ то́йже гла́съ. По каѳі́смахъ сѣда́льны воскрⷭ҇ны, съ бг҃орѡ́дичны и҆́хъ: И҆ чте́нїе во є҆ѵⷢ҇лїи толково́мъ. Та́же, Хвали́те и҆́мѧ гдⷭ҇не: и҆, И҆сповѣ́дайтесѧ гдⷭ҇еви: Глаго́лемъ же и҆ г҃-й ѱало́мъ: На рѣка́хъ вавѷлѡ́нскихъ: со а҆ллилꙋ́їею. Та́же пое́мъ ѱало́мъ и҆збра́нный прⷣте́чи. И҆ тропарѝ: А҆́гг҃льскїй собо́ръ: И҆ сѣда́льны ѻ҆́ба по є҆ди́ножды: Сла́ва, по полѷеле́и сѣда́ленъ: И҆ ны́нѣ, бг҃оро́диченъ: и҆ чте́нїе прⷣте́чи. Степє́нна, и҆ прокі́менъ гла́са. Всѧ́кое дыха́нїе: Є҆ѵⷢ҇лїе воскрⷭ҇но. Воскрⷭ҇нїе хрⷭ҇то́во: Канѡ́нъ воскрⷭ҇нъ со і҆рмосо́мъ на д҃: и҆ трїѡ́ди на ѕ҃: и҆ прⷣте́чи на д҃. Катава́сїа трїѡ́ди. [Зрѝ] А҆́ще недѣ́лѧ сыропꙋ́стнаѧ: Канѡ́нъ воскрⷭ҇нъ со і҆рмосо́мъ на д҃: и҆ бцⷣы на в҃: и҆ трїѡ́ди на д҃: и҆ прⷣте́чи на д҃. (с. 375) Катава́сїа трїѡ́ди. По г҃ пѣ́сни конда́къ прⷣте́чи и҆ і҆́косъ, и҆ сѣда́ленъ є҆гѡ̀, два́жды. Сла́ва, и҆ ны́нѣ, трїѡ́ди. И҆ чте́нїе прⷣте́чи. По ѕ҃-й пѣ́сни конда́къ трїѡ́ди и҆ і҆́косъ, и҆ сѷнаѯа́рїй. На ѳ҃ пѣ́сни пое́мъ, Честнѣ́йшꙋю: Свѣти́ленъ воскрⷭ҇нъ: Сла́ва, прⷣте́чи: И҆ ны́нѣ, трїѡ́ди. На хвали́техъ стїхи̑ры воскрⷭ҇ны, д҃: и҆ ст҃а́гѡ со Сла́внымъ, д҃: съ припѣ́вы є҆гѡ̀. И҆ по стїхи́рахъ ст҃а́гѡ, глаго́лемъ: Воскрⷭ҇нѝ, гдⷭ҇и бж҃е мо́й: И҆ пое́мъ стїхи́рꙋ самогла́снꙋ трїѡ́ди, гла́съ и҃: Данїи́лъ прⷪ҇ро́къ: Сла́ва, гла́съ а҃: Пред̾ѡчи́стимъ себѐ, бра́тїе. И҆ ны́нѣ: Пребл҃гослове́нна є҆сѝ. [Зрѝ] А҆́ще недѣ́лѧ сыропꙋ́стнаѧ: Глаго́лемъ та́кожде припѣ́въ: Воскрⷭ҇нѝ, гдⷭ҇и бж҃е мо́й: И҆ пое́мъ стїхи́рꙋ самогла́снꙋ трїѡ́ди, гла́съ ѕ҃: А҆да́мъ и҆зъ раѧ̀: Сла́ва, гла́съ то́йже: Приспѣ̀ вре́мѧ: И҆ ны́нѣ: Пребл҃гослове́нна є҆сѝ: Славосло́вїе вели́кое. По Трист҃о́мъ, тропа́рь воскрⷭ҇нъ, є҆ктєнїѝ и҆ ѿпꙋ́стъ. И҆ и҆схожде́нїе ѻ҆бы́чное въ притво́ръ. Сла́ва, и҆ ны́нѣ, стїхи́ра є҆ѵⷢ҇льскаѧ, и҆ ча́съ а҃-й. На часѣ́хъ тропа́рь воскрⷭ҇нъ: Сла́ва, прⷣте́чи: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ, конда́къ трїѡ́ди и҆ прⷣте́чи премѣнѧ́юще глаго́лемъ.

На лїтꙋргі́и бл҃жє́нна гла́са, на д҃: и҆ трїѡ́ди пѣ́снь г҃-ѧ, на д҃: и҆ прⷣте́чи ѕ҃-ѧ на д҃. По вхо́дѣ тропа́рь воскрⷭ҇нъ и҆ прⷣте́чи. Сла́ва, конда́къ є҆гѡ̀: И҆ ны́нѣ, трїѡ́ди. Прокі́менъ, а҆пⷭ҇лъ и҆ є҆ѵⷢ҇лїе, и҆ прича́стенъ пре́жде днѐ, и҆ прⷣте́чи.

🕅 А҆́ще ли слꙋчи́тсѧ ѡ҆брѣ́тенїе честны́ѧ главы̀ і҆ѡа́нна прⷣте́чи въ сꙋббѡ́тꙋ мѧсопꙋ́стнꙋю:

Пое́тсѧ пра́здникъ прⷣте́чевъ ве́сь пре́жде, въ пѧто́къ мѧсопꙋ́стный непремѣ́ннѡ.

🕅 А҆́ще ли слꙋчи́тсѧ ѡ҆брѣ́тенїе честны́ѧ главы̀ і҆ѡа́нна прⷣте́чи въ понедѣ́льникъ, и҆лѝ во вто́рникъ, сы́рныѧ недѣ́ли:

Въ ве́черъ пое́мъ, Блаже́нъ мꙋ́жъ, а҃-й а҆нтїфѡ́нъ. Въ про́чыѧ же дни̑ седми́цы сы́рныѧ глаго́летсѧ каѳі́сма рѧдова́ѧ. На Гдⷭ҇и, воззва́хъ, стїхи̑ры прⷣте́чи, на ѕ҃. Сла́ва, прⷣте́чи: И҆ ны́нѣ, бг҃оро́диченъ воскрⷭ҇нъ, въ то́йже гла́съ. Прокі́менъ днѐ, и҆ парємїѝ (с. 376) прⷣте́чи. На стїхо́внѣ трїѡ́ди самогла́сенъ днѐ два́жды: и҆ мꙋ́чениченъ. Сла́ва, прⷣте́чи: И҆ ны́нѣ, бг҃оро́диченъ: Тропа́рь прⷣте́чи: Сла́ва, и҆ ны́нѣ, бг҃оро́диченъ воскрⷭ҇нъ, и҆ є҆ктенїа̀.

На ᲂу҆́трени на Бг҃ъ гдⷭ҇ь, тропа́рь прⷣте́чи, два́жды. Сла́ва, и҆ ны́нѣ, бг҃оро́диченъ. И҆ ѻ҆бы̑чныѧ каѳі̑смы. По а҃-й каѳі́смѣ сѣда́ленъ трїѡ́ди: и҆ чте́нїе днѐ. По в҃-й каѳі́смѣ сѣда́льны прⷣте́чи ѻ҆́ба: и҆ чте́нїе прⷣте́чи. Полѷеле́й и҆ сѣда́ленъ прⷣте́чи, два́жды, и҆ бг҃оро́диченъ є҆гѡ̀, и҆ чте́нїе прⷣте́чи. Степє́нна, а҃-й а҆нтїфѡ́нъ д҃-гѡ гла́са. Прокі́менъ, прⷣте́чи. Всѧ́кое дыха́нїе: Є҆ѵⷢ҇лїе прⷣте́чи. Та́же ѱало́мъ н҃. Стїхи́ра прⷣте́чи. Канѡ́нъ бцⷣы со і҆рмосо́мъ на ѕ҃: и҆ прⷣте́чи на и҃. Катава́сїа: Ѿве́рзꙋ ᲂу҆ста̀ моѧ̑: А҆ и҆дѣ́же трипѣ́снецъ, и҆ пое́мъ канѡ́нъ прⷣте́чи со і҆рмосо́мъ на ѕ҃, и҆ трїѡ́ди на и҃. По г҃-й пѣ́сни сѣда́ленъ прⷣте́чи, два́жды. Сла́ва, и҆ ны́нѣ, бг҃оро́диченъ. И҆ чте́нїе прⷣте́чи. По ѕ҃-й пѣ́сни конда́къ прⷣте́чи, и҆ і҆́косъ, и҆ про́логъ. По ѳ҃-й пѣ́сни свѣти́ленъ прⷣте́чи, два́жды. Сла́ва, и҆ ны́нѣ, бг҃оро́диченъ є҆гѡ̀. На хвали́техъ стїхи̑ры прⷣте́чи на д҃. Сла́ва, прⷣте́чи: И҆ ны́нѣ, бг҃оро́диченъ. На стїхо́внѣ трїѡ́ди самогла́сенъ днѐ два́жды, и҆ мч҃ниченъ. Сла́ва, прⷣте́чи: Ꙗ҆́же пе́рвѣе на блю́дѣ: И҆ ны́нѣ, бг҃оро́диченъ. И҆ прѡ́чаѧ ѻ҆бы̑чнаѧ, и҆ ѿпꙋ́стъ. И҆ ча́съ а҃. Тропа́рь прⷣте́чи, и҆ по трист҃о́мъ конда́къ є҆гѡ̀. Та́кожде и҆ на про́чихъ часѣ́хъ. На лїтꙋргі́и бл҃жє́нна, прⷣте́чи пѣ́снь г҃-ѧ и҆ ѕ҃-ѧ. Прокі́менъ, а҆пⷭ҇лъ, а҆ллилꙋ́їа, є҆ѵⷢ҇лїе и҆ прича́стенъ днѐ, и҆ прⷣте́чи.

🕅 А҆́ще ли слꙋчи́тсѧ ѡ҆брѣ́тенїе честны́ѧ главы̀ і҆ѡа́нна прⷣте́чи въ сре́дꙋ сы́рныѧ седми́цы: и҆ пое́мъ слꙋ́жбꙋ всю̀ прⷣте́чи ве́черъ и҆ ᲂу҆́трѡ во вто́рникъ сы́рныѧ недѣ́ли.

🕅 А҆́ще же въ пѧто́къ, и҆ пое́мъ слꙋ́жбꙋ є҆гѡ̀ въ четверто́къ.

А҆́ще слꙋчи́тсѧ ѡ҆брѣ́тенїе честны́ѧ главы̀ въ четверто́къ сы́рный:

И҆ въ сре́дꙋ на часѣ́хъ, по Ѡ҆сла́би, ѡ҆ста́ви: и҆ по покло́нѣхъ быва́етъ зво́нъ по ѻ҆бы́чаю, и҆ а҆́бїе глаго́лемъ: Прїиди́те, (с. 377) поклони́мсѧ: три́жды, и҆ ѱало́мъ ѻ҆бы́чный. и҆ є҆ктенїа̀. и҆ стїхи̑ры по предпи́санномꙋ. По вхо́дѣ, прокі́менъ, парємїѝ днѐ. И҆ по си́хъ прокі́менъ: Да ᲂу҆пова́етъ і҆и҃ль на гдⷭ҇а: Та́же парємїѝ ст҃а́гѡ г҃. посе́мъ: Сподо́би, гдⷭ҇и: На стїхо́внѣ трїѡ́ди самогла́сенъ днѐ два́жды: и҆ мч҃ниченъ. Сла́ва, прⷣте́чи: И҆ ны́нѣ, бг҃оро́диченъ. По Ны́нѣ ѿпꙋща́еши: трист҃о́е. По Ѻ҆́ч҃е на́шъ: тропа́рь прⷣте́чи: Сла́ва, и҆ ны́нѣ, бг҃оро́диченъ воскрⷭ҇нъ. и҆ є҆ктенїа̀: Поми́лꙋй на́съ, бж҃е: и҆ г҃ покло́ны вели̑кїѧ. Посе́мъ моли́тва: Всест҃а́ѧ трⷪ҇це: и҆ Бꙋ́ди и҆́мѧ гдⷭ҇не, три́жды: съ покло́ны, и҆ ѱало́мъ л҃г. Та́же, Досто́йно є҆́сть: и҆ ѿпꙋ́стъ. и҆ вхо́димъ въ трапе́зꙋ, и҆ разрѣша́емъ на сы́ръ и҆ ꙗ҆́ица.

🕅 А҆́ще слꙋчи́тсѧ ѡ҆брѣ́тенїе честны́ѧ главы̀, і҆ѡа́нна прⷣте́чи въ сꙋббѡ́тꙋ сыропꙋ́стнꙋю:

Въ пѧто́къ ве́чера пое́мъ, Блаже́нъ мꙋ́жъ: а҃-й а҆нтїфѡ́нъ. На Гдⷭ҇и, воззва́хъ, стїхи̑ры прⷣте́чи, подѡ́бны г҃: и҆ ѻ҆ц҃є́въ, г҃. Сла́ва, прⷣте́чи: И҆ ны́нѣ, бг҃оро́диченъ а҃-й гла́са. Вхо́дъ. Прокі́менъ днѐ, и҆ паремїа̀: и҆ по не́й прокі́менъ, гла́съ ѕ҃: Да ᲂу҆пова́етъ і҆и҃ль на гдⷭ҇а. Та́же парємїѝ прⷣте́чи. Сподо́би, гдⷭ҇и, въ ве́черъ се́й: и҆ є҆ктенїа̀: И҆спо́лнимъ вече́рнюю моли́твꙋ: На стїхо́внѣ трїѡ́ди самогла́сенъ днѐ два́жды, и҆ мч҃ниченъ. Та́же припѣ́въ: Возвесели́тсѧ пра́ведникъ: И҆ пое́мъ стїхи́рꙋ прⷣте́чи самогла́снꙋ, гла́съ ѕ҃: Ꙗ҆́же пе́рвѣе на блю́дѣ: Сла́ва, ѻ҆ц҃є́въ, гла́съ и҃: Мона́хѡвъ мно́жества: И҆ ны́нѣ, бг҃оро́диченъ, въ то́йже гла́съ. Тропа́рь прⷣте́чи: Сла́ва, ѻ҆ц҃є́въ: И҆ ны́нѣ, бг҃оро́диченъ: Є҆́же ѿ вѣ́ка ᲂу҆тае́нное: посе́мъ є҆ктенїа̀, Поми́лꙋй на́съ, бж҃е: и҆ г҃ вели̑кїѧ покло́ны. Та́же, Всест҃а́ѧ трⷪ҇це: и҆ Бꙋ́ди и҆́мѧ гдⷭ҇не: три́жды. и҆ ѱало́мъ л҃г: Бл҃гословлю̀ гдⷭ҇а: и҆ ѿпꙋ́стъ. и҆ въ трапе́зѣ разрѣша́емъ на сы́ръ и҆ ꙗ҆́ица.

[Зрѝ] На повече́рїи пое́мъ канѡ́нъ ᲂу҆со́пшихъ въ притво́рѣ ѻ҆ктѡ́иха, гла́са, и҆лѝ бг҃оро́диченъ. По Досто́йнѣ, и҆ по трист҃о́мъ конда́къ прⷣте́чи: Сла́ва, и҆ ны́нѣ, трїѡ́ди ѻ҆ц҃є́въ.

На ᲂу҆́трени на Бг҃ъ гдⷭ҇ь, тропа́рь прⷣте́чи два́жды: Сла́ва, ѻ҆ц҃є́въ: И҆ ны́нѣ, бг҃оро́диченъ а҃-й. По каѳі́смахъ сѣда́ленъ ѻ҆ц҃є́въ, (с. 378) и҆ бг҃орѡ́дичны и҆́хъ, и҆ чтє́нїѧ ѻ҆ц҃є́въ. Полѷеле́й, и҆ сѣда́льны прⷣте́чи, всѝ по є҆ди́ножды: Сла́ва, по полѷеле́и сѣда́ленъ: И҆ ны́нѣ, бг҃оро́диченъ. И҆ чте́нїе прⷣте́чи. Степє́нна, а҃-й а҆нтїфѡ́нъ д҃-гѡ гла́са. Прокі́менъ, Всѧ́кое дыха́нїе: и҆ є҆ѵⷢ҇лїе прⷣте́чи. ѱало́мъ н҃. Стїхи́ра прⷣте́чи. Канѡ́нъ прⷣте́чи со і҆рмосо́мъ на ѕ҃: и҆ ѻ҆ц҃є́въ на и҃. Катава́сїа, і҆рмо́съ трїѡ́ди. Стїхосло́вимъ же и҆ в҃-ю пѣ́снь трїѡ́ди: во ѱалти́ри же пѣ́сни тоѧ̀ не глаго́лемъ. По г҃-й пѣ́сни конда́къ прⷣте́чи и҆ і҆́косъ, и҆ сѣда́ленъ є҆гѡ̀. Сла́ва, ѻ҆ц҃є́въ: И҆ ны́нѣ, бг҃оро́диченъ: И҆ чте́нїе прⷣте́чи. По ѕ҃-й пѣ́сни конда́къ ѻ҆ц҃є́въ, и҆ і҆́косъ, и҆ сѷнаѯа́рїй. По ѳ҃-й пѣ́сни свѣти́ленъ прⷣте́чи: Сла́ва, ѻ҆ц҃є́въ: И҆ ны́нѣ, бг҃оро́диченъ: На хвали́техъ стїхи̑ры прⷣте́чи г҃, и҆ ѻ҆ц҃є́въ, г҃: Сла́ва, ѻ҆ц҃є́въ: И҆ ны́нѣ, бг҃оро́диченъ. Славосло́вїе вели́кое, тропа́рь прⷣте́чи: Сла́ва, ѻ҆ц҃є́въ: И҆ ны́нѣ, бг҃оро́диченъ. И҆ и҆схожде́нїе въ притво́ръ, и҆ ча́съ а҃-й. На часѣ́хъ тропа́рь прⷣте́чи. Сла́ва, ѻ҆ц҃є́въ: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ: Конда́къ прⷣте́чи и҆ ѻ҆тцє́въ премѣнѧ́юще глаго́лемъ.

На лїтꙋргі́и: бл҃жє́нна прⷣте́чи, пѣ́снь г҃-ѧ, на д҃: и҆ ѻ҆ц҃є́въ ѕ҃-ѧ, на д҃. По вхо́дѣ тропа́рь хра́ма, и҆ прⷣте́чи, и҆ ѻ҆ц҃є́въ. Та́же конда́къ хра́ма, и҆ прⷣте́чи. Сла́ва, ѻ҆ц҃є́въ: И҆ ны́нѣ, хра́ма бцⷣы, и҆лѝ Предста́тельство хрⷭ҇тїа́нъ: Прокі́менъ, а҆пⷭ҇лъ, а҆ллилꙋ́їа, є҆ѵⷢ҇лїе и҆ прича́стенъ, пре́жде прⷣте́чи: и҆ пото́мъ ѻ҆ц҃є́въ. Рѧ́дъ же, а҆пⷭ҇лъ и҆ є҆ѵⷢ҇лїе, чте́мъ подъ зача́ло.

🕅 А҆́ще ли слꙋчи́тсѧ ѡ҆брѣ́тенїе честны́ѧ главы̀ прⷣте́чевы въ понедѣ́льникъ а҃-ѧ недѣ́ли постѡ́въ.

Слꙋ́жба всѧ̀ прⷣте́чи пое́тсѧ въ недѣ́лю сы́рнꙋю.

🕅 А҆́ще ли слꙋчи́тсѧ ѡ҆брѣ́тенїе честны́ѧ главы̀ прⷣте́чевы въ кі́й ли́бо де́нь а҃-ѧ недѣ́ли постѡ́въ:

И҆ пое́тсѧ слꙋ́жба є҆гѡ̀ въ недѣ́лю сыропꙋ́стнꙋю, и҆лѝ въ сꙋббѡ́тꙋ а҃-ѧ недѣ́ли постѡ́въ. (с. 379)

🕅 А҆́ще ли слꙋчи́тсѧ ѡ҆брѣ́тенїе честны́ѧ главы̀ прⷣте́чевы въ сꙋббѡ́тꙋ а҃-ѧ недѣ́ли постѡ́въ:

Въ пѧто́къ ве́чера каѳі́сма рѧдова́ѧ: На Гдⷭ҇и, воззва́хъ, стїхи̑ры на і҃: и҆ пое́мъ самогла́сенъ днѐ два́жды: и҆ прⷣте́чи стїхи̑ры на д҃: и҆ ѳео́дѡра на д҃: Сла́ва, ѳео́дѡра: И҆ ны́нѣ, бг҃оро́диченъ а҃-й гла́са. Вхо́дъ. Прокі́менъ: И҆ чтє́нїѧ днѐ и҆ прⷣте́чи г҃. и҆ по Да и҆спра́витсѧ моли́тва моѧ̀, г҃ покло́ны вели̑кїѧ: и҆ про́чее преждесщ҃е́нныхъ. По заамво́нной моли́твѣ, пое́мъ канѡ́нъ ст҃а́гѡ ѳео́дѡра надъ ко́ливомъ, ꙗ҆́коже ᲂу҆каза́сѧ въ м҃-цѣ на рѧдꙋ̀: и҆ ѿпꙋ́стъ.

[Зрѝ] А҆ и҆дѣ́же нѣ́сть преждесщ҃е́нныхъ: Ве́чера на Гдⷭ҇и, воззва́хъ, стїхи̑ры прⷣте́чи, г҃: и҆ ѳео́дѡра, г҃. Сла́ва, ѳео́дѡра: И҆ ны́нѣ, бг҃оро́диченъ а҃- й гла́са преше́дшагѡ, безъ вхо́да. Прокі́менъ, и҆ чте́нїе днѐ, и҆ прⷣте́чи. На стїхо́внѣ трїѡ́ди самогла́сенъ днѐ два́жды. и҆ мч҃ниченъ. Та́же припѣ́въ: Возвесели́тсѧ пра́ведникъ: и҆ пое́мъ стїхи́рꙋ мч҃ника, гла́съ в҃: Бжⷭ҇твенныхъ дарѡ́въ: пи́сана въ стїхи́рахъ. Сла́ва, прⷣте́чи, гла́съ ѕ҃: Сокро́вище бжⷭ҇твенныхъ: И҆ ны́нѣ, Бцⷣе, ты̀ є҆сѝ лоза̀: По Ны́нѣ ѿпꙋща́еши: тропа́рь прⷣте́чи: Сла́ва, мч҃ника: И҆ ны́нѣ, бг҃оро́диченъ: Всѧ̑ па́че смы́сла: є҆ктенїа̀, и҆ г҃ покло́ны вели̑кїѧ. и҆ пое́мъ канѡ́нъ ст҃а́гѡ ѳео́дѡра надъ ко́ливомъ, и҆ ѿпꙋ́стъ по ѻ҆бы́чаю.

Повече́рїе пое́мъ вели́кое, на не́мже пое́мъ канѡ́нъ ᲂу҆со́пшихъ мине́и рѧдовы́й. Тропари́ же по а҃-мъ трист҃о́мъ глаго́лемъ ѻ҆бо́ихъ ст҃ы́хъ, а҆ на послѣ́днемъ трист҃о́мъ конда́къ прⷣте́чи.

На ᲂу҆́трени, на Бг҃ъ гдⷭ҇ь, тропа́рь прⷣте́чи два́жды: Сла́ва, ѳео́дѡра: И҆ ны́нѣ, бг҃оро́диченъ: Всѧ̑ па́че: По а҃-й каѳі́смѣ сѣда́льны прⷣте́чи ѻ҆́ба: Сла́ва, и҆ ны́нѣ, бг҃оро́диченъ: и҆ чте́нїе прⷣте́чи. По в҃-й каѳі́смѣ сѣда́ленъ ѳео́дѡра. Сла́ва, и҆ ны́нѣ, бг҃оро́диченъ: и҆ чте́нїе прⷣте́чи, и҆лѝ ѳео́дѡра. Полѷеле́й, и҆ сѣда́ленъ прⷣте́чи два́жды: Сла́ва, и҆ ны́нѣ, бг҃оро́диченъ: и҆ чте́нїе прⷣте́чи. Степє́нна, а҃-й а҆нтїфѡ́нъ д҃-гѡ гла́са. Прокі́менъ, Всѧ́кое дыха́нїе: Є҆ѵⷢ҇лїе прⷣте́чи. ѱало́мъ н҃. Стїхи́ра прⷣте́чи. Канѡ́нъ прⷣте́чи со і҆рмосо́мъ (с. 380) на ѕ҃: и҆ ѳео́дѡра ѻ҆́ба канѡ́на на и҃. Катава́сїа: Ѿве́рзꙋ ᲂу҆ста̀ моѧ̑: Пѣ̑сни же, седмꙋ́ю и҆ ѻ҆смꙋ́ю, глаго́лемъ напредѝ въ пѧто́къ. По г҃-й пѣ́сни конда́къ и҆ і҆́косъ, и҆ сѣда́ленъ прⷣте́чи: Сла́ва, ѳео́дѡра: И҆ ны́нѣ, бг҃оро́диченъ: и҆ чте́нїе ѡ҆ ст҃о́мъ ѳео́дѡрѣ. По ѕ҃-й пѣ́сни конда́къ ѳео́дѡра и҆ і҆́косъ. И҆ чте́мъ про́логъ: и҆ сѷнаѯа́рїй. По ѳ҃-й пѣ́сни свѣти́ленъ прⷣте́чи: Сла́ва, ѳео́дѡра: И҆ ны́нѣ, бг҃оро́диченъ. На хвали́техъ стїхи̑ры прⷣте́чи, подѡ́бны г҃: и҆ ѳео́дѡра, подѡ́бны г҃. Та́же, припѣ́въ: Возвесели́тсѧ пра́ведникъ: и҆ пое́мъ самогла́снꙋ стїхи́рꙋ прⷣте́чи, гла́съ ѕ҃: Всечестнꙋ́ю главꙋ̀: Сла́ва, ѳео́дѡра: И҆ ны́нѣ, Бцⷣе, ты̀ є҆сѝ лоза̀: Славосло́вїе вели́кое: тропа́рь прⷣте́чи: Сла́ва, ѳео́дѡра: И҆ ны́нѣ, бг҃оро́диченъ. Є҆ктєнїѝ, и҆ ѿпꙋ́стъ. и҆ ѻ҆бы́чное и҆схожде́нїе въ притво́ръ, и҆ ча́съ а҃-й. На часѣ́хъ тропа́рь прⷣте́чи. Сла́ва, ѳео́дѡра: И҆ ны́нѣ, бг҃оро́диченъ часѡ́въ. кондаки́ же глаго́лемъ премѣнѧ́юще.

На лїтꙋргі́и: бл҃жє́нна, прⷣте́чи пѣ́снь г҃-ѧ, на д҃: и҆ ѳео́дѡра пѣ́снь ѕ҃-ѧ, на д҃. По вхо́дѣ тропа́рь прⷣте́чи, и҆ ѳео́дѡра, и҆ конда́къ є҆гѡ̀: Сла́ва, прⷣте́чи: И҆ ны́нѣ, бцⷣы хра́ма, и҆лѝ Предста́тельство хрⷭ҇тїа́нъ: Прокі́менъ, а҆ллилꙋ́їа и҆ прича́стенъ прⷣте́чи, и҆ ѳео́дѡра є҆ди́нъ. А҆пⷭ҇лъ же и҆ є҆ѵⷢ҇лїе пре́жде сꙋббѡ́ты, и҆ ѳео́дѡра подъ зача́ло. Та́же прⷣте́чи.

🕅 А҆́ще ли слꙋчи́тсѧ ѡ҆брѣ́тенїе честны́ѧ главы̀ і҆ѡа́нна прⷣте́чи въ а҃-ю недѣ́лю постѡ́въ:

И҆ пое́тсѧ слꙋ́жба є҆гѡ̀, ꙗ҆́коже ᲂу҆ка́зано въ недѣ́лю г҃-ю постѡ́въ, кромѣ̀ поклоне́нїѧ крⷭ҇та̀, то́чїю на лїті́и. Сла́ва, прⷣте́чи, пи́сана на Гдⷭ҇и, воззва́хъ: И҆ ны́нѣ, трїѡ́ди. На стїхо́внѣ, Сла́ва, прⷣте́чи: И҆ ны́нѣ, трїѡ́ди. На Бг҃ъ гдⷭ҇ь: тропа́рь воскрⷭ҇нъ, два́жды. Сла́ва, прⷣте́чи: И҆ ны́нѣ, И҆ Пречⷭ҇томꙋ твоемꙋ̀ ѻ҆́бразꙋ: Катава́сїа трїѡ́ди.

🕅 А҆́ще ли слꙋчи́тсѧ ѡ҆брѣ́тенїе честны́ѧ главы̀ прⷣте́чи въ понедѣ́льникъ в҃-ѧ и҆лѝ г҃-ѧ и҆лѝ д҃- ѧ недѣ́ли постѡ́въ:

Въ недѣ́лю ве́чера пое́мъ Бл҃же́нъ мꙋ́жъ, а҃-й а҆нтїфѡ́нъ. На Гдⷭ҇и, воззва́хъ, стїхи̑ры на і҃: трїѡ́ди днѐ на д҃, повторѧ́юще а҃-ю: (с. 381) и҆ прⷣте́чи, на ѕ҃: Сла́ва, прⷣте́чи: И҆ ны́нѣ, бг҃оро́диченъ а҃-й: Вхо́дъ, прокі́менъ вели́кїй трїѡ́ди, и҆ чтє́нїѧ прⷣте́чи г҃. Та́же, Сподо́би, гдⷭ҇и, въ ве́черъ се́й: и҆ И҆спо́лнимъ вече́рнюю: На стїхо́внѣ трїѡ́ди самогла́сенъ днѐ два́жды, и҆ мч҃ниченъ: Сла́ва, прⷣте́чи: И҆ ны́нѣ, бг҃оро́диченъ по гла́сꙋ, воскрⷭ҇нъ. И҆ по Ѻ҆́ч҃е на́шъ, тропа́рь прⷣте́чи: Сла́ва, и҆ ны́нѣ, бг҃оро́диченъ воскрⷭ҇нъ. є҆ктенїа̀, Поми́лꙋй на́съ, бж҃е: и҆ покло́ны г҃ вели̑кїѧ, и҆ ѿпꙋ́стъ. Полꙋ́нощницꙋ же пое́мъ по ѻ҆бы́чаю, съ каѳі́смою и҆ тропарѝ ѻ҆бы́чными. По Честнѣ́йшꙋю, г҃ покло́ны вели̑кїѧ.

На ᲂу҆́трени, на Бг҃ъ гдⷭ҇ь, тропа́рь прⷣте́чи два́жды: Сла́ва, и҆ ны́нѣ, бг҃оро́диченъ. По а҃-й, и҆ по в҃-й каѳі́смахъ, глаго́лемъ сѣда́льны трїѡ́ди: є҆ктєнїи́ же не глаго́лютсѧ. И҆ чте́нїе во є҆фре́мѣ. По г҃-й каѳі́смѣ глаго́летъ і҆ере́й є҆ктенїю̀ ма́лꙋю, и҆ сѣда́льны прⷣте́чи ѻ҆́ба: и҆ чте́нїе прⷣте́чи. Полѷеле́й, и҆ сѣда́ленъ прⷣте́чи два́жды: Сла́ва, и҆ ны́нѣ, бг҃оро́диченъ: и҆ чте́нїе прⷣте́чи. Степє́нна, а҃-й а҆нтїфѡ́нъ д҃-гѡ гла́са. Прокі́менъ, и҆ є҆ѵⷢ҇лїе прⷣте́чи. Та́же, ѱало́мъ н҃. Стїхи́ра прⷣте́чи. Канѡ́нъ прⷣте́чи со і҆рмосо́мъ на и҃. Катава́сїа: Ѿве́рзꙋ ᲂу҆ста̀ моѧ̑: А҆ и҆дѣ́же трипѣ́снецъ: и҆ пое́мъ канѡ́нъ прⷣте́чи со і҆рмосо́мъ на ѕ҃: и҆ трипѣ́снецъ на и҃. Катава́сїа трїѡ́ди. По г҃-й пѣ́сни сѣда́ленъ прⷣте́чи два́жды: Сла́ва, и҆ ны́нѣ, бг҃оро́диченъ. и҆ чте́нїе прⷣте́чи. По ѕ҃-й пѣ́сни конда́къ, и҆ і҆́косъ, и҆ про́логъ. Свѣти́ленъ прⷣте́чи, два́жды: Сла́ва, и҆ ны́нѣ, бг҃оро́диченъ. На хвали́техъ стїхи̑ры прⷣте́чи на д҃: Сла́ва, прⷣте́чи: И҆ ны́нѣ, бг҃оро́диченъ є҆гѡ̀. Та́же настоѧ́тель, и҆лѝ чте́цъ глаго́летъ: Сла́ва тебѣ̀ показа́вшемꙋ на́мъ свѣ́тъ. Посе́мъ є҆ктенїа̀: И҆спо́лнимъ ᲂу҆́треннюю: Та́же, на стїхо́внѣ трїѡ́ди самогла́сенъ днѐ два́жды, и҆ мч҃ниченъ. Сла́ва, прⷣте́чи: И҆ ны́нѣ, бг҃оро́диченъ. Посе́мъ, Бла́го є҆́сть: глаго́лемъ є҆ди́ножды. По Ѻ҆́ч҃е на́шъ: тропа́рь прⷣте́чи. Сла́ва, и҆ ны́нѣ, бг҃оро́диченъ воскрⷭ҇нъ. є҆ктенїа̀, Поми́лꙋй на́съ, бж҃е: и҆ г҃ покло́ны вели̑кїѧ, безъ ѿпꙋ́ста: и҆ ча́съ а҃. На часѣ́хъ тропа́рь глаго́лемъ прⷣте́чи: и҆ по трист҃о́мъ конда́къ є҆гѡ̀. И҆ наконе́цъ г҃ покло́ны (с. 382) вели̑кїѧ. И҆ по покло́нѣхъ, трист҃а́гѡ не глаго́лемъ, но глаго́лемъ, Хрⷭ҇тѐ свѣ́те: и҆ ѿпꙋ́стъ. Ча́съ же тре́тїй, шесты́й и҆ девѧ́тый, пое́мъ съ каѳі́смами, въ подо́бное и҆́хъ вре́мѧ, со чте́нїемъ. На ѕ҃-мъ часѣ̀ чте́тсѧ паремїа̀ днѐ, по чи́нꙋ є҆ѧ̀. [Зрѝ] Моли́твы же вели́кагѡ васі́лїа по часѣ́хъ глаго́лемъ непремѣ́ннѡ, є҆́же є҆́сть: Влⷣко бж҃е ѻ҆́ч҃е: и҆ Бж҃е и҆ гдⷭ҇и си́лъ: и҆ Влⷣко гдⷭ҇и і҆и҃се хрⷭ҇тѐ: Є҆гда́ же пое́мъ полѷеле́й, на часѣ́хъ въ кампа́нъ не ᲂу҆дарѧ́емъ. По каѳі́смѣ а҆ллилꙋ́їа, три́жды. Та́же, Гдⷭ҇и, поми́лꙋй, три́жды. И҆ чте́цъ глаго́летъ: Сла́ва, тропа́рь прⷣте́чи: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ: конда́къ прⷣте́чи. По Честнѣ́йшꙋю, г҃ покло́ны вели̑кїѧ. По ѳ҃-мъ часѣ̀ бл҃жє́нны глаго́лемъ поско́рꙋ безъ пѣ́нїѧ. по Ѡ҆сла́би, ѡ҆ста́ви, конда́къ хра́ма: Сла́ва, прⷣте́чи: И҆ ны́нѣ, хра́ма бцⷣы. [Зрѝ] А҆́ще ли нѣ́сть хра́ма бцⷣы, И҆ ны́нѣ, Предста́тельство хрⷭ҇тїа́нъ: посе́мъ, Гдⷭ҇и, поми́лꙋй, м҃. Сла́ва, и҆ ны́нѣ, Честнѣ́йшꙋю херꙋві̑мъ: и҆ г҃ покло́ны вели̑кїѧ. Та́же, моли́тва: Всест҃а́ѧ трⷪ҇це: и҆ ѻ҆бы́чный ѿпꙋ́стъ. И҆ начина́емъ вече́рню по ѻ҆бы́чаю: Настоѧ́тель и҆лѝ чте́цъ глаго́летъ: Прїиди́те, поклони́мсѧ: три́жды. И҆ пое́мъ вече́рню съ покло́ны, по чи́нꙋ по́стномꙋ. По ѻ҆бы́чной каѳі́смѣ, на Гдⷭ҇и, воззва́хъ, стїхи̑ры на і҃: трїѡ́ди самогла́сенъ днѐ два́жды: и҆ мч҃ниченъ: и҆ подѡ́бны трїѡ́ди г҃: и҆ прⷣте́чи д҃. Сла́ва, прⷣте́чи: И҆ ны́нѣ, бг҃оро́диченъ, по гла́сꙋ ѻ҆бы́чнѡ. [Зрѝ] А҆́ще ли къ средѣ̀, и҆лѝ пѧткꙋ̀, глаго́лемъ крⷭ҇тобг҃оро́диченъ, по гла́сꙋ Сла́вника. Вхо́дъ со є҆ѵⷢ҇лїемъ. Свѣ́те ти́хїй: Прокі́менъ, и҆ чте́нїе днѐ. Да и҆спра́витсѧ моли́тва моѧ̀: и҆ г҃ покло́ны вели̑кїѧ. Є҆ктенїѝ ма́лыѧ не глаго́лемъ. Прокі́менъ, а҆пⷭ҇лъ, а҆ллилꙋ́їа, є҆ѵⷢ҇лїе и҆ прича́стенъ прⷣте́чи. Лїтꙋргі́а преждесвѧще́ннаѧ по ѻ҆бы́чаю. На ѿпꙋ́стѣ і҆ере́й помина́етъ пре́жде пра́зднꙋемаго ст҃а́го, пото́мъ наста́вшаго.

[Зрѝ] Ст҃а́гѡ же прилꙋчи́вшагѡсѧ на рѧдꙋ̀ канѡ́нъ пое́мъ на ᲂу҆́трени по чи́нꙋ: стїхи̑ры же є҆гѡ̀, ꙗ҆̀же пи̑саны на вече́рни на Гдⷭ҇и, воззва́хъ, глаго́лемъ и҆̀хъ на хвали́техъ. [Зрѝ] А҆́ще ли ко́еѧ вели́кїѧ ра́ди нꙋ́жды, въ па́мѧть ст҃ы́хъ вели́кихъ и҆мꙋ́щихъ полѷеле́й, не (с. 383) слꙋчи́тсѧ бы́ти преждесвѧще́ннѣй лїтꙋргі́и, часы̀ пое́мъ, ꙗ҆́коже вы́ше рече́сѧ: По ѳ҃- мъ часѣ̀, и҆ по моли́твѣ: Влⷣко гдⷭ҇и і҆и҃се хрⷭ҇тѐ: глаго́лемъ и҆ ѱало́мъ: Бл҃гословѝ, дꙋшѐ моѧ̀, гдⷭ҇а, и҆ всѧ̑ внꙋ́трєннѧѧ: Сла́ва, Хвалѝ, дꙋшѐ моѧ̀, гдⷭ҇а: И҆ ны́нѣ, Є҆диноро́дный сн҃е: И҆ Во црⷭ҇твїи твое́мъ: поско́рꙋ безъ пѣ́нїѧ. На бл҃же́ннахъ глаго́лемъ прⷣте́чи пѣ́снь г҃-ю и҆ ѕ҃-ю. Та́же а҆пⷭ҇лъ и҆ є҆ѵⷢ҇лїе прⷣте́чи: Посе́мъ, Помѧнѝ на́съ, гдⷭ҇и: По Ѡ҆сла́би, ѡ҆ста́ви: и҆ по Ѻ҆́ч҃е на́шъ: конда́къ хра́ма. Сла́ва, прⷣте́чи: И҆ ны́нѣ, бцⷣы хра́ма. А҆́ще же нѣ́сть хра́ма бцⷣы: Предста́тельство хрⷭ҇тїа́нъ: Та́же, Гдⷭ҇и, поми́лꙋй, м҃, и҆ покло́ны г҃ вели̑кїѧ. И҆ въ то вре́мѧ параекклисїа́рхъ зна́менꙋетъ въ два̀ кампа́на, и҆ по тре́хъ покло́нѣхъ вели́кихъ глаго́лемъ: Прїиди́те, поклони́мсѧ: и҆ пое́мъ вече́рню съ покло́ны, и҆ каѳі́сма ѻ҆бы́чнаѧ. На Гдⷭ҇и, воззва́хъ, стїхи̑ры трїѡ́ди, подѡ́бны г҃: и҆ ст҃а́гѡ тара́сїа г҃. Сла́ва, и҆ ны́нѣ, бг҃оро́диченъ. А҆́ще ли къ средѣ̀ и҆лѝ пѧткꙋ̀, глаго́лемъ: Сла́ва, и҆ ны́нѣ, крⷭ҇тобогоро́диченъ. Та́же, Свѣ́те ти́хїй: Прокі́менъ, и҆ чте́нїе трїѡ́ди днѐ. На стїхо́внѣ днѐ трїѡ́ди. По Ны́нѣ ѿпꙋща́еши, и҆ по Ѻ҆́ч҃е на́шъ: тропа́рь, Бцⷣе дв҃о, ра́дꙋйсѧ: и҆ прѡ́чаѧ по по́стномꙋ. По Честнѣ́йшꙋю, и҆ по покло́нѣхъ, глаго́лемъ трист҃о́е. Гдⷭ҇и, поми́лꙋй, в҃і. Всест҃а́ѧ трⷪ҇це: Та́же, Бꙋ́ди и҆́мѧ гдⷭ҇не: и҆ г҃ покло́ны. И҆ Бл҃гословлю̀ гдⷭ҇а: Досто́йно є҆́сть: и҆ ѿпꙋ́стъ: на ѿпꙋ́стѣ же помина́етъ наста́вшаго ст҃а́го. По ѿпꙋ́стѣ же вхо́димъ въ трапе́зꙋ, ꙗ҆ди́мъ два̀ варє́нїѧ съ є҆ле́емъ, и҆ пїе́мъ вїно̀. Въ сре́дꙋ же и҆ пѧто́къ ꙗ҆ди́мъ два̀ варє́нїѧ безъ є҆ле́а, и҆ пїе́мъ вїно̀.

🕅 А҆́ще ли слꙋчи́тсѧ ѡ҆брѣ́тенїе честны́ѧ главы̀ прⷣте́чевы во є҆ди́нъ ѿ дне́й по́стныхъ:

И҆ пое́мъ слꙋ́жбꙋ є҆гѡ̀ си́це: на часѣ́хъ, по Ѡ҆сла́би, ѡ҆ста́ви, и҆ по Ѻ҆́ч҃е на́шъ: кондакѝ по ᲂу҆ста́вꙋ. Та́же, Гдⷭ҇и, поми́лꙋй, м҃. Сла́ва, и҆ ны́нѣ, Честнѣ́йшꙋю херꙋві̑мъ. И҆ по покло́нѣхъ глаго́лемъ трист҃о́е. Гдⷭ҇и, поми́лꙋй, в҃і: и҆ Всест҃а́ѧ трⷪ҇це: И҆ а҆́бїе начина́емъ вече́рню, и҆ ѻ҆бы́чнꙋю каѳі́смꙋ. Глаго́лютсѧ же є҆ктєнїѝ (с. 384) ма̑лыѧ по ко́емꙋждо а҆нтїфѡ́нѣ. На Гдⷭ҇и, воззва́хъ, стїхи̑ры на і҃. Самогла́сенъ днѐ два́жды, и҆ мч҃ниченъ, подѡ́бны трїѡ́ди г҃. и҆ прⷣте́чи д҃. Сла́ва, прⷣте́чи: И҆ ны́нѣ, Кто̀ тебє̀ не ᲂу҆блажи́тъ: Вхо́дъ, прокі́менъ и҆ чте́нїе днѐ, и҆ прⷣте́чи чтє́нїѧ трѝ. Та́же пое́мъ: Да и҆спра́витсѧ моли́тва моѧ̀: и҆ г҃ покло́ны, и҆ по рѧ́дꙋ лїтꙋргі́а преждесвѧще́ннаѧ. А҆ и҆дѣ́же не бꙋ́детъ преждесвѧще́нныѧ, по Ѡ҆сла́би, ѡ҆ста́ви: и҆ по покло́нѣхъ вели́кихъ, чте́цъ глаго́летъ: Прїиди́те, поклони́мсѧ, три́жды, и҆ покло́ны г҃. Та́же ѱало́мъ, Бл҃гословѝ, дꙋшѐ моѧ̀, гдⷭ҇а: и҆ пое́мъ вече́рню безъ покло́нѡвъ. По ѻ҆бы́чнѣй каѳі́смѣ стїхи̑ры на ѕ҃: трїѡ́ди, подѡ́бны, г҃: и҆ прⷣте́чи, г҃: Сла́ва, прⷣте́чи. И҆ ны́нѣ, бг҃оро́диченъ: Кто̀ тебє̀ не ᲂу҆блажи́тъ: Вхо́дъ: и҆ Свѣ́те ти́хїй: Прокі́менъ, и҆ чте́нїе днѐ, и҆ прⷣте́чи. и҆ а҆́бїе, Сподо́би, гдⷭ҇и: та́же, И҆спо́лнимъ вече́рнюю моли́твꙋ: На стїхо́внѣ трїѡ́ди: Сла́ва, прⷣте́чи: И҆ ны́нѣ, бг҃оро́диченъ, по гла́сꙋ. Ны́нѣ ѿпꙋща́еши: По трист҃о́мъ тропа́рь прⷣте́чи: Сла́ва, и҆ ны́нѣ, Є҆́же ѿ вѣ́ка ᲂу҆тае́нное: є҆ктенїа̀, Поми́лꙋй на́съ, бж҃е: Посе́мъ трѝ покло́ны вели̑кїѧ: и҆ моли́тва, Всест҃а́ѧ трⷪ҇це: и҆ Бл҃гословлю̀ гдⷭ҇а: Досто́йно є҆́сть: и҆ ѿпꙋ́стъ. Повече́рїе пое́мъ вели́кое безъ покло́нѡвъ. По а҃-мъ трист҃о́мъ тропа́рь прⷣте́чи: Сла́ва, и҆ ны́нѣ, бг҃оро́диченъ воскрⷭ҇нъ по гла́сꙋ. По второ́мъ трист҃о́мъ тропарѝ ѻ҆бы̑чныѧ: Поми́лꙋй на́съ, гдⷭ҇и: По Досто́йнѣ, и҆ по трист҃о́мъ конда́къ прⷣте́чи: а҆ Гдⷭ҇и си́лъ, съ на́ми бꙋ́ди, не пое́мъ. По Честнѣ́йшꙋю, трѝ покло́ны вели̑кїѧ. Трист҃а́гѡ же не глаго́лемъ: А҆ ѿпꙋ́стъ ма́лый.

Полꙋ́нощницꙋ пое́мъ по ѻ҆бы́чаю, съ каѳі́смою, ꙗ҆́коже предписа́сѧ въ понедѣ́льникъ в҃-ѧ недѣ́ли поста̀. Та́кожде и҆ ᲂу҆́треню, и҆ всю̀ слꙋ́жбꙋ прⷣте́чи.

🕅 А҆́ще слꙋчи́тсѧ ѡ҆брѣ́тенїе честны́ѧ главы̀ прⷣте́чевы въ сꙋббѡ́тꙋ в҃-ю и҆ г҃-ю постѡ́въ:

Въ пѧто́къ ве́чера, каѳі́сма рѧдова́ѧ. На Гдⷭ҇и, воззва́хъ, стїхи̑ры на і҃: трїѡ́ди самогла́сенъ два́жды: и҆ ѻ҆ктѡ́иха мч҃ничны д҃, и҆ прⷣте́чи д҃. Сла́ва, прⷣте́чи. И҆ ны́нѣ, бг҃оро́диченъ а҃-й гла́са. (с. 385) Вхо́дъ, прокі́менъ, и҆ чте́нїе днѐ, и҆ прⷣте́чи г҃. Да и҆спра́витсѧ моли́тва моѧ̀: и҆ прѡ́чаѧ преждесвѧще́нныхъ.

[Зрѝ] А҆́ще ли нѣ́сть преждесвѧще́нныѧ, въ пѧто́къ ве́чера, на Гдⷭ҇и, воззва́хъ, стїхи̑ры прⷣте́чи, на ѕ҃: Сла́ва, прⷣте́чи: И҆ ны́нѣ, бг҃оро́диченъ а҃-й гла́са. Вхо́дъ, прокі́менъ, и҆ чте́нїе днѐ, и҆ ст҃а́гѡ. Та́же, Сподо́би, гдⷭ҇и: На стїхо́внѣ самогла́сенъ трїѡ́ди, два́жды: и҆ мч҃ниченъ ѻ҆ктѡ́иха по гла́сꙋ: Сла́ва, прⷣте́чи: И҆ ны́нѣ, бг҃оро́диченъ. По Ны́нѣ ѿпꙋща́еши: тропа́рь прⷣте́чи: Сла́ва, и҆ ны́нѣ, бг҃оро́диченъ воскрⷭ҇нъ настоѧ́щагѡ гла́са. Є҆ктенїа̀, и҆ покло́ны г҃. Та́же моли́тва, Всест҃а́ѧ трⷪ҇це: Бꙋ́ди и҆́мѧ гдⷭ҇не: и҆ ѱало́мъ л҃г: Бл҃гословлю̀ гдⷭ҇а: Досто́йно є҆́сть: и҆ ѿпꙋ́стъ.

[Зрѝ] Повече́рїе же пое́мъ вели́кое, на не́мже пое́мъ четверопѣ́снецъ сꙋббѡ́ты. На ᲂу҆́трени и҆ на часѣ́хъ пое́мъ є҆ди́нагѡ прⷣте́чи, ꙗ҆́коже предписа́сѧ.

На лїтꙋргі́и слꙋ́жба днѐ и҆ прⷣте́чи.

🕅 А҆́ще слꙋчи́тсѧ ѡ҆брѣ́тенїе главы̀ і҆ѡа́нна прⷣте́чи во вторꙋ́ю недѣ́лю постѡ́въ:

Въ сꙋббѡ́тꙋ ве́чера на ма́лѣй вече́рни стїхи̑ры воскрⷭ҇ны, и҆ бцⷣы по ѻ҆бы́чаю. На вели́цѣй вече́рни, на Гдⷭ҇и, воззва́хъ, стїхи̑ры воскрⷭ҇ны г҃, и҆ ꙾восто́ченъ꙾ (꙾А҆нато́лїевъ꙾) є҆ди́нъ: и҆ прⷣте́чи на ѕ҃. Сла́ва, прⷣте́чи: И҆ ны́нѣ, бг҃оро́диченъ а҃-й гла́са. Вхо́дъ, и҆ чте́нїе прⷣте́чи. На лїті́и стїхи́ра хра́ма: и҆ прⷣте́чи: стїхѡ́вныѧ. На стїхо́внѣ стїхи̑ры воскрⷭ҇ны, по а҆лфави́тꙋ. Сла́ва, прⷣте́чи: И҆ ны́нѣ, бг҃оро́диченъ. На благослове́нїи хлѣ́бѡвъ, Бцⷣе дв҃о: три́жды. И҆ чте́нїе во а҆пⷭ҇льскихъ посла́нїихъ. На Бг҃ъ гдⷭ҇ь: тропа́рь воскрⷭ҇нъ два́жды: Сла́ва, прⷣте́чи: И҆ ны́нѣ, бг҃оро́диченъ, по гла́сꙋ тропарѧ̀. По каѳі́смахъ, сѣда́льны, воскрⷭ҇ны, и҆ бг҃орѡ́дичны и҆́хъ. И҆ чте́нїе во є҆ѵⷢ҇лїи. По полѷеле́и сѣда́льны, прⷣте́чи ѻ҆́ба. Сла́ва, по полѷеле́и сѣда́ленъ. И҆ ны́нѣ, бг҃оро́диченъ. И҆ чте́нїе прⷣте́чи. Степє́нна, и҆ прокі́менъ гла́са: и҆ є҆ѵⷢ҇лїе воскрⷭ҇но, ѱало́мъ н҃. Сла́ва, стїхи́ра, гла́съ и҃: Покаѧ́нїѧ ѿве́рзи мѝ двє́ри: и҆ прѡ́чаѧ. Канѡ́нъ воскрⷭ҇нъ со і҆рмосо́мъ на д҃: (с. 386) и҆ трїѡ́ди на д҃: и҆ прⷣте́чи на ѕ҃. Катава́сїа: Ѿве́рзꙋ ᲂу҆ста̀ моѧ̑: По г҃-й пѣ́сни конда́къ трїѡ́ди. Та́же конда́къ прⷣте́чи и҆ і҆́косъ, и҆ сѣда́ленъ є҆гѡ̀, два́жды: Сла́ва, и҆ ны́нѣ, бг҃оро́диченъ: И҆ чте́нїе прⷣте́чи. По ѕ҃-й пѣ́сни конда́къ и҆ і҆́косъ воскрⷭ҇нъ. По ѳ҃-й пѣ́сни свѣти́ленъ воскрⷭ҇нъ. Сла́ва, прⷣте́чи: И҆ ны́нѣ, бг҃оро́диченъ воскрⷭ҇нъ. На хвали́техъ стїхи̑ры воскрⷭ҇ны д҃: и҆ прⷣте́чи со Сла́внымъ, д҃: съ припѣ́вы є҆гѡ̀. Та́же припѣ́въ: Воскрⷭ҇нѝ, гдⷭ҇и бж҃е мо́й: И҆ пое́мъ самогла́снꙋ стїхи́рꙋ трїѡ́ди: Сла́ва, тꙋ́южде: И҆ ны́нѣ: Пребл҃гослове́нна є҆сѝ: Славосло́вїе вели́кое. тропа́рь воскрⷭ҇нъ. Є҆ктєнїѝ, и҆ ѿпꙋ́стъ. И҆ и҆схожде́нїе въ притво́ръ: Сла́ва, и҆ ны́нѣ, стїхи́ра є҆ѵⷢ҇льскаѧ, и҆ ча́съ а҃. Тропа́рь воскрⷭ҇нъ, Сла́ва, прⷣте́чи: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ, конда́къ трїѡ́ди: и҆ соверше́нный ѿпꙋ́стъ. На про́чїихъ же часѣ́хъ конда́къ трїѡ́ди и҆ прⷣте́чи премѣнѧ́юще глаго́лемъ.

На лїтꙋргі́и бл҃жє́нна гла́са, на ѕ҃: и҆ прⷣте́чи пѣ́снь г҃-ѧ, на д҃: и҆ про́чаѧ слꙋ́жба днѐ, и҆ прⷣте́чи. Ст҃а́гѡ же григо́рїа слꙋ́жбꙋ пое́мъ, є҆гда̀ разсꙋ́дитъ є҆кклисїа́рхъ, въ пред̾идꙋ́щыѧ недѣ́ли, д҃-ю, и҆лѝ є҃- ю: И҆лѝ прⷣте́чевꙋ слꙋ́жбꙋ пое́мъ въ сꙋббѡ́тꙋ в҃-ю.

🕅 А҆́ще ли слꙋчи́тсѧ ѡ҆брѣ́тенїе честны́ѧ главы̀ і҆ѡа́нна прⷣте́чи въ недѣ́лю г҃-ю постѡ́въ, крⷭ҇топокло́ннꙋю:

Въ сꙋббѡ́тꙋ ве́чера на ма́лѣй вече́рни стїхи̑ры: и҆ на стїхо́внѣ, всѐ трїѡ́ди, по ѻ҆бы́чаю. На вели́цѣй вече́рни: По каѳі́смѣ, на Гдⷭ҇и, воззва́хъ, стїхи̑ры воскрⷭ҇ны г҃: и҆ крⷭ҇та̀, д҃, и҆ прⷣте́чи, г҃. Сла́ва, крⷭ҇та̀: И҆ ны́нѣ, бг҃оро́диченъ а҃-й гла́са. Прокі́менъ днѐ: и҆ парємїѝ прⷣте́чи. На лїті́и стїхи́ра хра́ма: и҆ прⷣте́чи, ꙗ҆̀же сꙋ́ть на стїхо́внѣ, и҆ хвали̑тны. Сла́ва, прⷣте́чи: И҆ ны́нѣ, крⷭ҇та̀: На стїхо́внѣ стїхи̑ры воскрⷭ҇ны: Сла́ва, прⷣте́чи: И҆ ны́нѣ, крⷭ҇та̀. На бл҃гослове́нїи хлѣ́бѡвъ, Бцⷣе дв҃о, два́жды: и҆ крⷭ҇та̀, є҆ди́ножды. Спасѝ, гдⷭ҇и, лю́ди твоѧ̑: На ᲂу҆́трени на Бг҃ъ гдⷭ҇ь: тропа́рь воскрⷭ҇нъ два́жды: Сла́ва, прⷣте́чи: И҆ ны́нѣ, крⷭ҇та̀. По каѳі́смахъ сѣда́льны воскрⷭ҇ны, и҆ бг҃орѡ́дичны и҆́хъ: и҆ чте́нїе во є҆ѵⷢ҇лїи толково́мъ. (с. 387) Полѷеле́й прⷣте́чи: и҆ сѣда́льны ѻ҆́ба. Сла́ва, сѣда́ленъ по полѷеле́и: И҆ ны́нѣ, бг҃оро́диченъ, и҆ чте́нїе прⷣте́чи. Степє́нна гла́са. Прокі́менъ, и҆ є҆ѵⷢ҇лїе воскрⷭ҇ное. Воскрⷭ҇нїе хрⷭ҇то́во: ѱало́мъ н҃. и҆ Покаѧ́нїѧ ѿве́рзи мѝ двє́ри: Канѡ́нъ воскрⷭ҇нъ со і҆рмосо́мъ на д҃: и҆ прⷣте́чи на д҃: и҆ крⷭ҇та̀, на ѕ҃. Катава́сїа крⷭ҇та̀: Бжⷭ҇твеннѣйшїй проѡбразѝ: По г҃-й пѣ́сни конда́къ прⷣте́чи и҆ і҆́косъ: и҆ сѣда́ленъ два́жды. Сла́ва, и҆ ны́нѣ, крⷭ҇та̀: и҆ чте́нїе прⷣте́чи. По ѕ҃-й пѣ́сни конда́къ крⷭ҇та̀ и҆ і҆́косъ. На ѳ҃-й пѣ́сни пое́мъ Честнѣ́йшꙋю: Свѣти́ленъ воскрⷭ҇нъ. Сла́ва, прⷣте́чи: И҆ ны́нѣ, крⷭ҇та̀. На хвали́техъ стїхи̑ры воскрⷭ҇ны, д҃: и҆ крⷭ҇та̀ подѡ́бны г҃: а҃-й, два́жды: съ припѣ́вы и҆́хъ: Помѧнѝ со́нмъ тво́й: в҃-й, Бг҃ъ же цр҃ь на́шъ пре́жде вѣ́ка: Та́же припѣ́въ, Воскрⷭ҇нѝ, гдⷭ҇и бж҃е мо́й: И҆ пое́мъ самогла́снꙋ стїхи́рꙋ днѐ трїѡ́ди. Сла́ва, тꙋ́южде. И҆ ны́нѣ, Пребл҃гослове́нна є҆сѝ: Славосло́вїе вели́кое. Трист҃о́е пѣ́нїемъ. Посе́мъ вхо́дъ, глаго́лемъ тропа́рь, Спасѝ, гдⷭ҇и, лю́ди твоѧ̑: три́жды. И҆ быва́етъ поклоне́нїе чⷭ҇тна́гѡ крⷭ҇та̀ по ѻ҆бы́чаю, ꙗ҆́коже ꙗ҆́вствꙋетъ въ трїѡ́ди. Та́же є҆ктєнїѝ, и҆ ѿпꙋ́стъ. и҆ и҆схожде́нїе. Сла́ва, и҆ ны́нѣ, стїхи́ра є҆ѵⷢ҇льскаѧ, и҆ поꙋче́нїе стꙋді́тово. и҆ ча́съ а҃-й въ притво́рѣ. На часѣ́хъ тропа́рь воскрⷭ҇нъ: Сла́ва, крⷭ҇та̀. И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ: конда́къ воскрⷭ҇нъ. На г҃-мъ часѣ̀ тропа́рь воскрⷭ҇нъ: Сла́ва, прⷣте́чи: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ: кондакѝ глаго́лемъ премѣнѧ́юще. На лїтꙋргі́и бл҃жє́нна гла́са на д҃: и҆ крⷭ҇та̀ пѣ́снь г҃-ѧ, на д҃: и҆ прⷣте́чи ѕ҃, на д҃. По вхо́дѣ тропа́рь воскрⷭ҇нъ, и҆ крⷭ҇та̀, и҆ прⷣте́чи: та́же конда́къ воскрⷭ҇нъ: Сла́ва, прⷣте́чи: И҆ ны́нѣ, крⷭ҇та̀. Прокі́менъ, а҆пⷭ҇лъ, а҆ллилꙋ́їа, є҆ѵⷢ҇лїе и҆ прича́стенъ, пре́жде крⷭ҇та̀, пото́мъ прⷣте́чи.

Комментарии для сайта Cackle