Мѣ́сѧца тогѡ́же въ к҃-й де́нь. Прпⷣбнагѡ и҆ бг҃оно́снагѡ ѻ҆ц҃а̀ на́шегѡ є҆ѵѳѵ́мїа вели́кагѡ.

А҆́ще хо́щетъ настоѧ́тель, твори́мъ бдѣ́нїе.

На ма́лѣй вече́рни стїхи̑ры на д҃, гла́съ а҃. Поⷣ: Нбⷭ҇ныхъ чинѡ́въ:

Нбⷭ҇ныѧ крꙋ́ги превозлетѣ́въ ꙳ добродѣ́телїю бжⷭ҇твенною, всебл҃же́нне ѻ҆́ч҃е, ꙳ заше́лъ є҆сѝ во мра́къ: ꙳ и҆́мже вои́стиннꙋ не въ гада́нїихъ, прпⷣбне, ꙳ но во бл҃года́ти ꙗ҆ви́лсѧ є҆сѝ бж҃їей, ꙳ ѡ҆сїѧ̑нїѧ воспрїе́млѧ.

Два́жды.

Добродѣ́тельми просвѣти́въ дꙋ́шꙋ и҆ ᲂу҆́мъ, ꙳ къ нб҃сѝ преста́вилсѧ є҆сѝ во хрⷭ҇то́во црⷭ҇твїе, ꙳ є҆ѵѳѵ́мїе требл҃же́нне, приносѧ̀ є҆мꙋ̀ болѣ́зней твои́хъ рꙋкоѧ̑ти: ꙳ въ по́стницѣхъ просїѧ́въ, ꙗ҆́коже свѣти́льникъ, ꙳ нестарѣ́емыѧ наслажда́ешисѧ пи́щи.

Є҆диносꙋ́щнаѧ и҆́стиннѡ трⷪ҇ца безнача́льнаѧ, ꙳ дх҃а жили́ще въ тебѣ̀ возложи́вши, ꙳ свѣтлѣ́йша свѣти́льника показа̀ тѧ̀, ꙳ бг҃оно́се є҆ѵѳѵ́мїе, ꙳ долевлекꙋ́щихъ всѣ́хъ преше́дъ, ꙳ на нб҃сѣ́хъ жили́ще ѡ҆брѣ́лъ є҆сѝ.

Сла́ва, гла́съ в҃:

Преподо́бне ѻ҆́ч҃е, и҆зъ младе́нства добродѣ́тели прилѣ́жнѡ ѡ҆бꙋчи́всѧ, ѻ҆рга́нъ бы́лъ є҆сѝ ст҃а́гѡ дх҃а, и҆ ѿ негѡ̀ прїе́мъ чꙋде́съ дѣ́йство, ᲂу҆вѣща́лъ є҆сѝ человѣ́ки преѡби́дѣти сла̑дкаѧ: ны́нѣ же бж҃е́ственнымъ свѣ́томъ чистѣ́е ѡ҆сїѧва́емь, просвѣтѝ и҆ на́шѧ мы̑сли, є҆ѵѳѵ́мїе ѻ҆́ч҃е.

И҆ ны́нѣ, бг҃оро́диченъ.

На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:

Лє́сти лꙋка́выхъ ꙳ де́мѡнѡвъ ѡ҆бличи́въ ꙳ креста̀ си́лою, ꙳ ᲂу҆ѧсни́лъ є҆сѝ сла́вꙋ хрⷭ҇то́вꙋ, ꙳ ѻ҆́ч҃е є҆ѵѳѵ́мїе.

Сті́хъ: Честна̀ предъ гдⷭ҇емъ сме́рть преподо́бныхъ є҆гѡ̀.

Взѧ́лсѧ є҆сѝ ꙗ҆́кѡ и҆лїа̀ ꙳ на колесни́цѣ ѻ҆́гненнѣй, и҆ предстои́ши, бл҃же́нне, несре́дственнѡ трⷪ҇цѣ, ꙳ є҆ѵѳѵ́мїе прекра́сне.

Сті́хъ: Бл҃же́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.

Носѧ̀ въ рꙋка́хъ твои́хъ, ꙳ ѻ҆́ч҃е, крⷭ҇тъ гдⷭ҇ень, ꙳ дє́мѡнскаѧ мечта̑нїѧ ꙳ до конца̀, є҆ѵѳѵ́мїе, и҆стреби́лъ є҆сѝ.

Сла́ва, и҆ ны́нѣ, бг҃оро́диченъ:

Ра́дꙋйсѧ, ꙳ ра́дость мі́ра прїи́мшаѧ, ꙳ хрⷭ҇та̀ жизнода́вца, ꙳ и҆ преста́вльшаѧ печа́ль, ꙳ дв҃о, прамт҃рнюю.

На вели́цѣй вече́рни пое́мъ, Бл҃же́нъ мꙋ́жъ: а҃-й а҆нтїфѡ́нъ.

На Гдⷭ҇и, воззва́хъ: поста́вимъ стїхѡ́въ и҃, и҆ пое́мъ стїхи̑ры, гла́съ а҃. Подо́бенъ: Всехва́льнїи мꙋ́чєницы:

Ѻ҆́ч҃е є҆ѵѳѵ́мїе, ꙳ твоѐ ржⷭ҇тво̀ предвозвѣстѝ ꙳ посла́нный нбⷭ҇ный а҆́гг҃лъ, ꙳ ꙗ҆́кѡ прозѧ́бшагѡ и҆зъ чре́ва непло́дныѧ і҆ѡа́нна: ꙳ тогѡ́ бо ꙗ҆ви́лсѧ є҆сѝ ревни́тель, ꙳ и҆ є҆динонра́венъ нестѧжа́тель бездо́мный, ꙳ ꙗ҆́кѡ крⷭ҇ти́тель, ꙳ и҆ въ гора́хъ пита́ѧсѧ, ꙳ просїѧ́въ безмѣ́рными чꙋдесмѝ.

Ѻ҆́ч҃е є҆ѵѳѵ́мїе, ꙳ пло́дъ прозѧ́блъ є҆сѝ ᲂу҆́бѡ непло́дства, ꙳ но ꙗ҆ви́лсѧ є҆сѝ вои́стиннꙋ многоча́денъ: ꙳ ѿ сѣ́мене бо дꙋхо́внагѡ твоегѡ̀ ꙳ мона́шествꙋющихъ напо́лнисѧ пꙋсты́нѧ, ꙳ ꙗ҆́же пе́рвѣе непрохо́дна. ꙳ И҆ ны́нѣ молѝ, дарова́ти дꙋша́мъ на́шымъ ꙳ ми́ръ и҆ ве́лїю млⷭ҇ть.

Ѻ҆́ч҃е є҆ѵѳѵ́мїе, ꙳ твоѐ житїѐ преизѧ́щно, ꙳ и҆ вѣ́ра вои́стиннꙋ правосла́вна: ꙳ и҆́бо ѿ дѣѧ́нїѧ къ высоча́йшемꙋ зрѣ́нїю дости́глъ є҆сѝ, ꙳ премꙋ́дрости бы́въ жили́ще, ꙳ во двою̀ є҆стєствꙋ̀ є҆ди́наго чествꙋ́ѧй ѿ трⷪ҇цы хрⷭ҇та̀: ꙳ є҆го́же молѝ ꙳ ѡ҆ дꙋша́хъ на́шихъ.

Ѻ҆́ч҃е є҆ѵѳѵ́мїе, ꙳ стрⷭ҇те́й ѻ҆́бщникъ бы́въ ꙳ на крестѣ̀ распросте́ршагѡсѧ, ꙳ ты̀ поще́нїемъ ꙳ воскресе́нїю же є҆гѡ̀ и҆ сла́вѣ ꙳ соѻбра́зенъ вои́стиннꙋ бы́лъ є҆сѝ. ꙳ Є҆го́же ны́нѣ молѝ, ꙳ дарова́ти дꙋша́мъ на́шымъ ꙳ ми́ръ и҆ ве́лїю ми́лость.

И҆́ны стїхи̑ры, гла́съ д҃. Подо́бенъ: Зва́нный свы́ше:

И҆́же и҆з̾ чре́ва ма́тернѧ ѡ҆свѧще́нъ, ꙳ є҆гда̀ всеви́дѧщее ѻ҆́ко, ꙳ предложе́нїе и҆ клоне́нїе ꙳ къ лꙋ́чшымъ ведꙋ́щее, ꙳ невозвра́тнѡ твоѐ прови́дѣ, ꙳ тогда̀, всебл҃же́нне, да́ръ бг҃ода́ненъ, ꙳ благодꙋ́шїѧ тезоимени́тый возвѣсти́въ тѧ̀, ꙳ роди́телей разрѣша́етъ сѣ́тованїе: ꙳ тѣ́мже ѿ младе́нства произведе́нъ, ꙳ бл҃годѣ́телю бг҃ꙋ благоꙋгоди́лъ є҆сѝ. ꙳ Є҆го́же молѝ, ꙳ спастѝ и҆ просвѣти́ти дꙋ́шы на́шѧ.

Два́жды.

И҆́же дарова́нїй ꙳ бжⷭ҇твенныхъ и҆спо́лненъ, ꙳ тѧ̀ ꙗ҆́кѡ нескве́рненно зерца́ло, ѻ҆́ч҃е, ꙳ ѡ҆брѣ́тъ хрⷭ҇то́съ бжⷭ҇твенныхъ ꙗ҆вле́нїй, ꙳ свѣ́тлымъ сїѧ́нїемъ ꙳ своегѡ̀ свѣ́та тебѣ̀ и҆з̾ѡблиста̀: ꙳ ѿѻнꙋ́дꙋже и҆сцѣле́нїй ѻ҆би́ленъ ꙗ҆ви́лсѧ є҆сѝ и҆сто́чникъ, ꙳ препита́тель же а҆́лчꙋщихъ, ꙳ и҆ жа́ждꙋщихъ ѡ҆дожде́ньми напаѧ́ѧй жела́нїе, ꙳ дꙋшє́вныѧ же зало́ги зрѧ̀, ꙳ сло́вомъ, мꙋ́дре, лꙋ́чшыѧ сотвори́лъ є҆сѝ бг҃ꙋ. ꙳ то́же молѝ, ꙳ спастѝ и҆ просвѣти́ти дꙋ́шы на́шѧ.

Зрѣ́нїемъ и҆ дѣѧ́нїемъ просїѧ́въ, ꙳ твоѐ ᲂу҆́бѡ равноа́гг҃льное житїѐ, ꙳ пра́вило добродѣ́тели, ꙳ и҆ ѻ҆́бразъ и҆звѣ́стнѣйшїй, ꙳ и҆зволѧ́ющихъ бг҃ꙋ слꙋжи́ти въ соверше́нствѣ. ꙳ Твое́ же бг҃омꙋ́дрое сло́во, є҆ѵѳѵ́мїе, ꙳ трⷪ҇цꙋ чествова́ти наꙋчѝ: ꙳ хрⷭ҇та́ же є҆ди́наго во двою̀ є҆стєствꙋ̀ познава́ема, ꙳ и҆ собо́ры равночи́слєнныѧ, ꙳ четвери̑цы є҆ѵⷢ҇лїй хрⷭ҇то́выхъ. ꙳ Є҆го́же молѝ, спастѝ и҆ просвѣти́ти дꙋ́шы на́шѧ.

Сла́ва, гла́съ г҃:

Ѡ҆сщ҃е́нъ бы́въ бг҃ꙋ и҆з̾ чре́ва мт҃рнѧ, ꙗ҆́кѡ дрꙋгі́й самꙋи́лъ, ѻ҆́ч҃е є҆ѵѳѵ́мїе, тезоимени́тно бы́лъ є҆сѝ благодꙋ́шїе вѣ́рныхъ, мона́шествꙋющихъ же́злъ и҆ ᲂу҆твержде́нїе, ст҃а́гѡ дх҃а чи́стое жили́ще. и҆спросѝ на́мъ, чтꙋ́щымъ тѧ̀, ве́лїю ми́лость.

И҆ ны́нѣ, бг҃оро́диченъ: Ка́кѡ не диви́мсѧ:

Вхо́дъ. Прокі́менъ днѐ. Чтє́нїѧ г҃. Ли́стъ рн҃а.

На лїті́и стїхи̑ры, гла́съ в҃. Самогла́сны. Ге́рманово:

Благодꙋ́шствꙋйте, глаго́лаше роди́телємъ а҆́гг҃лъ гдⷭ҇ень, ꙗ҆́кѡ ѻ҆троча̀ и҆з̾ чре́слъ роди́тсѧ ва́мъ, благодꙋ́шствїѧ тезоиме́нно. Зача́лсѧ же є҆сѝ во чре́вѣ, носѧ̀ тѣ̑мъ ѡ҆бѣтова́нїе: и҆ ѿ пеле́нъ мл҃твою воспита́лсѧ є҆сѝ, ѻ҆́ч҃е є҆ѵѳѵ́мїе.

Стꙋді́тово:

Оу҆крѣпи́въ ᲂу҆́мъ ра́зꙋмомъ бжⷭ҇твеннымъ, ѻ҆́ч҃е є҆ѵѳѵ́мїе, преходѧ̑щаѧ прете́клъ є҆сѝ, ника́коже ᲂу҆диви́всѧ земны̑мъ, въ ско́рбехъ ᲂу҆́бѡ велемꙋ́дръ ꙗ҆ви́всѧ, и҆ до́блественнѣйшїй, въ постѣ́ же и҆ благодꙋ́шїи смире́нъ и҆ кро́токъ. И҆ присꙋ́щагѡ житїѧ̀ нестоѧ́ннꙋю пꙋчи́нꙋ ꙗ҆́вѣ преплы́лъ є҆сѝ, въ бл҃гоꙋти́шное приста́нище дости́гъ, хрⷭ҇та̀ молѝ, поми́ловати дꙋ́шы на́шѧ.

Сꙋ́щыѧ въ житїѝ вє́щи презрѣ́лъ є҆сѝ, ѻ҆́ч҃е є҆ѵѳѵ́мїе, ꙗ҆́кѡ вы́шнѧгѡ житїѧ̀ возжела́вый, бога́тства возгнꙋша́лсѧ є҆сѝ, ѡ҆дѣ́ѧвсѧ въ смире́нїе, пи́щꙋ возненави́дѣлъ є҆сѝ, и҆ ѡ҆блобыза́лъ є҆сѝ воздержа́нїе, непра́вдꙋ ѿри́нꙋлъ є҆сѝ, пра́вдꙋ погна́лъ є҆сѝ. тѣ́мже, ѻ҆́ч҃е прпⷣбне, помѧнѝ и҆ на́съ въ преподо́бныхъ моли́твахъ твои́хъ ко гдⷭ҇ꙋ.

Сла́ва, гла́съ д҃:

Просїѧ́ша дѡ́браѧ дѣла̀ твоѧ̑, ꙗ҆́кѡ со́лнце, на землѝ и҆ на нб҃сѝ, хрⷭ҇то́въ ᲂу҆го́дниче є҆ѵѳѵ́мїе: правосла́внѡ бо проповѣ́далъ є҆сѝ на́мъ и҆́стиннꙋю и҆ непоро́чнꙋю вѣ́рꙋ хрⷭ҇то́вꙋ. тѣ́мже моли́сѧ, прпⷣбне ѻ҆́ч҃е, въ па́мѧти твое́й, бг҃оно́се, дарова́ти на́мъ ве́лїю ми́лость.

И҆ ны́нѣ, бг҃оро́диченъ: При́зри на молє́нїѧ:

На стїхо́внѣ стїхи̑ры, гла́съ є҃. Подо́бенъ: Ра́дꙋйсѧ, по́стникѡвъ:

Ра́дꙋйсѧ, ꙗ҆́кѡ благодꙋ́шїѧ нача́ло цр҃кве бы́въ, ѻ҆́ч҃е прпⷣбне: твои́мъ бо ржⷭ҇тво́мъ всѧ̑ є҆реті́чєскаѧ стремлє́нїѧ ѿ бж҃їѧ про́мысла ѿрази́шасѧ. тѣ́мже тебѐ тезоимени́тна и҆менꙋ́етъ є҆ѵѳѵ́мїа: нбⷭ҇ныхъ ᲂу҆́бѡ сꙋще́ствъ чи́ны ра́дости и҆спо́лнилъ є҆сѝ житїѧ̀ свѣ́тлостїю, съ ни́миже и҆ водворѧ́ѧсѧ, и҆ свѣ́та и҆сполнѧ́ѧсѧ, всебл҃же́ннагѡ и҆ бжⷭ҇твеннагѡ наслажда́ѧсѧ ѡ҆сїѧ́нїѧ, хрⷭ҇та̀ ны́нѣ молѝ, дꙋша́мъ на́шымъ да́ти ве́лїю ми́лость.

Сті́хъ: Честна̀ пред̾ гдⷭ҇емъ сме́рть преподо́бныхъ є҆гѡ̀.

Жезло́мъ кре́стнымъ ᲂу҆тверди́всѧ, беззако́нїѧ пото́ки и҆зсꙋши́лъ є҆сѝ: пото́комъ же сла́дости бжⷭ҇твенныѧ, и҆ раѧ̀ и҆сто́чникомъ мы́сленнѡ, всеблаже́нне, напаѧ́емь, и҆сто́чники спаси́тєльныѧ въ пꙋсты́ни показа́лъ є҆сѝ: стрꙋѧ́ми же бж҃е́ственнагѡ дх҃а, преподо́бне, ᲂу҆тꙋчнѧ́емь ꙗ҆́коже фі́нїѯъ, восте́клъ є҆сѝ на высотꙋ̀ нбⷭ҇нꙋю, и҆ сто́лпъ ѻ҆гнезра́ченъ ꙗ҆ви́лсѧ є҆сѝ, бг҃омꙋ́дре, и҆ по́лнъ свѣтови́днагѡ ѡ҆сїѧ́нїѧ. хрⷭ҇та̀ ᲂу҆̀бо молѝ, дꙋша́мъ на́шымъ да́ти ве́лїю ми́лость.

Сті́хъ: Бл҃же́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.

Вои́стиннꙋ да́же до ски́нїи чꙋ́дны, да́же до до́мꙋ бж҃їѧ, всебл҃же́нне, проше́лъ є҆сѝ ра́дованїемъ и҆ весе́лїемъ дꙋшѝ, и҆дѣ́же шꙋ́мъ, ѻ҆́ч҃е, пра́зднꙋющихъ красе́нъ ᲂу҆слы́шавъ, и҆ сла́дкагѡ пѣ́нїѧ, и҆ неизрече́ннагѡ наслажде́нїѧ, и҆ красоты̀ бы́въ во прича́стїи, є҆ѵѳѵ́мїе: є҆го́же є҆ди́наго жела́ѧ, пло́ть ᲂу҆мертви́лъ є҆сѝ, є҆́же и҆ полꙋчи́лъ є҆сѝ, бжⷭ҇твенно. пра́вдою ᲂу҆краша́емь: хрⷭ҇та̀ молѝ, подаю́щаго мі́рꙋ ве́лїю ми́лость.

Сла́ва, гла́съ то́йже:

Преподо́бне ѻ҆́ч҃е, не да́лъ є҆сѝ сна̀ твои̑мъ ѻ҆чесє́мъ, нижѐ вѣ́ждѡмъ твои̑мъ дрема́нїѧ, до́ндеже дꙋ́шꙋ и҆ тѣ́ло ѿ страсте́й свободи́лъ є҆сѝ, и҆ тебѐ ᲂу҆гото́валъ є҆сѝ дх҃а жили́ще, прише́дъ бо хрⷭ҇то́съ со ѻ҆ц҃е́мъ ѻ҆би́тель въ тебѣ̀ сотворѝ: и҆ є҆диносꙋ́щныѧ трⷪ҇цы ᲂу҆го́дникъ бы́въ, великопроповѣ́дниче ѻ҆́ч҃е на́шъ є҆ѵѳѵ́мїе, моли́сѧ ѡ҆ дꙋша́хъ на́шихъ.

И҆ ны́нѣ, бг҃оро́диченъ: Бл҃жи́мъ тѧ̀, бцⷣе дв҃о, и҆ сла́вимъ вѣ́рнїи:

На бл҃гослове́нїи хлѣ́бѡвъ тропа́рь, гла́съ д҃:

Весели́сѧ, пꙋсты́нѧ неражда́ющаѧ, благодꙋ́шствꙋй, неболѧ́щаѧ, ꙗ҆́кѡ ᲂу҆мно́жи тебѣ̀ ча̑да мꙋ́жъ жела́нїй дх҃о́вныхъ, бл҃гоче́стїемъ насади́въ, воздержа́нїемъ воспита́въ добродѣ́телей въ соверше́нство. тогѡ̀ моли́твами, хрⷭ҇тѐ бж҃е, ᲂу҆мирѝ живо́тъ на́шъ.

Два́жды.

Бцⷣе дв҃о, ра́дꙋйсѧ: є҆ди́ножды.

На ᲂу҆́трени, на Бг҃ъ гдⷭ҇ь, т ропа́рь ст҃а́гѡ, два́жды. Сла́ва, и҆ ны́нѣ, бг҃оро́диченъ: Є҆́же ѿ вѣ́ка ᲂу҆тае́нное:

По а҃-й стїхоло́гїи сѣда́ленъ, гла́съ д҃. Подо́бенъ: Ꙗ҆ви́лсѧ є҆сѝ дне́сь:

Свѣ́томъ сїѧ́ѧ непристꙋ́пнымъ, ꙗ҆́кѡ ѕвѣзда̀, просїѧ́лъ є҆сѝ въ пꙋсты́нѧхъ, ᲂу҆че́ньми просвѣща́ѧ, є҆ѵѳѵ́мїе, несомнѣ́нною дꙋше́ю пристꙋпа́ющыѧ къ тебѣ̀.

Два́жды.

Сла́ва, и҆ ны́нѣ, бг҃оро́диченъ:

Въ кро́въ тво́й, всечⷭ҇таѧ дв҃о, прибѣга́ющихъ, мольбꙋ̀ прїе́мши ѿ на́съ, не преста́й молѧ́щисѧ чл҃вѣколю́бцꙋ, спастѝ рабы̑ твоѧ̑.

По в҃-й стїхоло́гїи сѣда́ленъ, гла́съ є҃. Поⷣ: Собезнача́льное сло́во:

Попече́нїй житїѧ̀ ѿве́ргсѧ, и҆ а҆́гг҃льское житїѐ воспрїи́мъ, воздержа́нїемъ дꙋ́шꙋ ᲂу҆добри́лъ є҆сѝ, и҆ чꙋде́съ ѿ бг҃а бл҃года́ть прїѧ́лъ є҆сѝ бога́тнѡ, є҆ѵѳѵ́мїе бг҃оно́се, ѡ҆ на́съ моли́сѧ бл҃гоче́стнѡ восхвалѧ́ющихъ тѧ̀.

Два́жды.

Сла́ва, и҆ ны́нѣ, бг҃оро́диченъ:

Всест҃а́ѧ дв҃о, поми́лꙋй на́съ, прибѣга́ющихъ вѣ́рою къ тебѣ̀ благоꙋтро́бнѣй, и҆ просѧ́щихъ те́плагѡ твоегѡ̀ застꙋпле́нїѧ: мо́жеши бо, ꙗ҆́кѡ бл҃га́ѧ, всѧ̑ спастѝ, ꙗ҆́кѡ сꙋ́щи мт҃и бг҃а вы́шнѧгѡ, мт҃рнїѧ твоѧ̑ мл҃твы при́снѡ ᲂу҆потреблѧ́ющи, бг҃облагода́тнаѧ.

По полѷеле́и сѣда́ленъ, гла́съ и҃ Подо́бенъ: Премꙋ́дрости:

Нищетꙋ̀ и҆́стиннѡ на́съ ра́ди ѿ дв҃ы ро́ждшагѡсѧ воспрїи́мъ, вмѣни́лъ є҆сѝ привре́мєннаѧ, ꙗ҆́кѡ травꙋ̀, блаже́нне: разꙋ́мнагѡ бо дре́ва вкꙋси́въ, преподо́бне, мона́шествꙋющихъ показа́лсѧ є҆сѝ ᲂу҆чи́тель бжⷭ҇твенъ. тѣ́мже и҆ къ ре́вности а҆́гг҃льскагѡ жи́тельства воздви́глъ є҆сѝ всѧ̑, и҆ къ ра́зꙋмꙋ вѣ́ры, знаменоно́сне є҆ѵѳѵ́мїе, ѻ҆́ч҃е на́шъ, молѝ хрⷭ҇та̀ бг҃а прегрѣше́нїй ѡ҆ставле́нїе дарова́ти пра́зднꙋющымъ любо́вїю ст҃ꙋ́ю па́мѧть твою̀.

Два́жды.

Сла́ва, и҆ ны́нѣ, бг҃оро́диченъ:

Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безсѣ́меннѡ ро́ждшꙋю бг҃а пло́тїю, всѝ ᲂу҆бл҃жа́емъ ро́ди человѣ́честїи: ѻ҆́гнь бо всели́сѧ въ тѧ̀ бж҃ества̀, и҆ ꙗ҆́кѡ младе́нца млеко́мъ пита́еши зижди́телѧ и҆ гдⷭ҇а. тѣ́мъ а҆́гг҃льскїй и҆ человѣ́ческїй ро́дъ, досто́йнѡ сла́вимъ всест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, прегрѣше́нїй ѡ҆ставле́нїе дарова́ти покланѧ́ющымсѧ вѣ́рою всест҃о́мꙋ ржⷭ҇твꙋ̀ твоемꙋ̀.

Степє́нна, а҃-й а҆нтїфѡ́нъ д҃-гѡ гла́са. Прокі́менъ, гла́съ д҃: Честна̀ предъ гдⷭ҇емъ сме́рть преподо́бныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; Всѧ́кое дыха́нїе: Є҆ѵⷢ҇лїе матѳе́а, зача́ло м҃г.

По н҃-мъ ѱалмѣ̀, стїхи́ра, гла́съ ѕ҃:

Прпⷣбне ѻ҆́ч҃е, во всю̀ зе́млю и҆зы́де вѣща́нїе и҆справле́нїй твои́хъ: тѣ́мъ на нб҃сѣ́хъ ѡ҆брѣ́лъ є҆сѝ мздꙋ̀ трꙋдѡ́въ твои́хъ, дє́мѡнскїѧ погꙋби́лъ є҆сѝ полкѝ, и҆ а҆́гг҃льскїѧ дости́глъ є҆сѝ чи́ны, и҆́хже житїю̀ непоро́чнѡ поревнова́лъ є҆сѝ. Дерзнове́нїе и҆мѣ́ѧ ко хрⷭ҇тꙋ̀ бг҃ꙋ, ми́ръ и҆спросѝ дꙋша́мъ на́шымъ.

Канѡ́нъ бцⷣы со і҆рмосо́мъ на ѕ҃: и҆ ст҃а́гѡ два̀ канѡ́на, на и҃:

Канѡ́нъ преподо́бнагѡ, є҆гѡ́же краегране́сїе со і҆рмоса́ми:

Бога́тство ꙗ҆ви́лсѧ є҆сѝ земноро́дныхъ, є҆ѵѳѵ́мїе. І҆ѡа́нна дамаскина̀.

Гла́съ д҃. Пѣ́снь а҃. І҆рмо́съ:

Нѣ́сть тебѣ̀ подо́бенъ, препросла́вленный гдⷭ҇и, рꙋко́ю бо крѣ́пкою и҆зба́вилъ є҆сѝ лю́ди, ꙗ҆̀же стѧжа́лъ є҆сѝ, чл҃вѣколю́бче.

Разрѣша́еши сѣ́тованїе пресла́внѡ ро́ждшымъ тѧ̀, ѿ бг҃а ѡ҆бѣща́нъ бы́въ, и҆ пре́жде рожде́нїѧ твоегѡ̀ да́ръ, благодꙋ́шїѧ тезоимени́тъ.

Вопїе́тъ благода́рственное цр҃ковь, преподо́бне, прїе́мши тѧ̀ прозѧбе́нїе ѿ бг҃а, ми́рнагѡ благодꙋ́шїѧ предвозвѣсти́тельное.

Дрꙋгі́й канѡ́нъ преподо́бнагѡ, є҆гѡ́же краегране́сїе.

Твои́ми моли́твами, всебл҃же́нне, свѣ́тъ мнѣ̀ пода́ждь. Ѳеофа́ново.

Гла́съ и҃. Пѣ́снь а҃. І҆рмо́съ:

Колесницегони́телѧ фараѡ́нѧ погрꙋзѝ, чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ и҆ раздѣли́въ мо́ре, і҆и҃лѧ же бѣглеца̀, пѣшехо́дца спасѐ, пѣ́снь бг҃ови воспѣва́юща.

Мл҃твами твои́ми и҆ мольба́ми ᲂу҆молѧ́й бг҃а, мра́чный ѻ҆́блакъ ᲂу҆ны́нїѧ моегѡ̀, всеблаже́нне, разорѝ, благодꙋ́шїѧ сы́й и҆ ᲂу҆тѣше́нїѧ и҆спо́лненъ, всецр҃ю̀ предстоѧ̀.

И҆́нъ нѣ́кїй но́вый самꙋи́лъ бг҃ода́ненъ, и҆ пре́жде зача́тїѧ ѡ҆бѣща́нъ бы́въ, ѻ҆́ч҃е, всѣ̑мъ ꙗ҆ви́лсѧ є҆сѝ цр҃квамъ, преподо́бне, тезоиме́нно зва́нїе, по ѻ҆боемꙋ̀ приводи́мь быва́ѧ благодꙋ́шїѧ свѣ́тлостїю.

Моли̑твы и҆ молє́нїѧ дѣ́юще твоѝ роди́телїе къ бг҃ꙋ, да́ръ бжⷭ҇твенный тѧ̀ прїе́млютъ и҆ свѣтоно́сно прозѧбе́нїе, рождество́мъ возвѣща́юща благоче́стїѧ ѡ҆сїѧ́нїе и҆ є҆́реси ѡ҆бличе́нїе.

Ты̀ и҆з̾ дѣ́тства ѡ҆свѧти́лсѧ є҆сѝ, преподо́бне, да́вшемꙋ бг҃ꙋ, и҆ къ немꙋ̀ зрѧ̀, и҆ наставлѧ́емь животво́рными повелѣ́ньми є҆гѡ̀, бг҃оно́се, къ высотѣ̀ взѧ́лсѧ є҆сѝ превысо́цѣй добродѣ́телей вѣ́рою.

Бг҃оро́диченъ:

Тѧ̀, бг҃омт҃и, предста́тельство и҆мꙋ́ще, не ᲂу҆бои́мсѧ врагѡ́въ ѡ҆полче́нїѧ, сопроти́вѧщихсѧ бл҃гоче́стнѡ сла́вѧщымъ и҆з̾ тебє̀ рожде́ннаго, бг҃а всѣ́хъ и҆ гдⷭ҇а, є҆го́же за ны̀ ᲂу҆молѝ.

Катава́сїа: Сꙋ́шꙋ глꙋбороди́тельнꙋю зе́млю:

Пѣ́снь г҃. І҆рмо́съ:

Не мꙋ́дростїю, и҆ си́лою, и҆ бога́тствомъ хва́лимсѧ, но тобо́ю, ѻ҆́ч҃ею ѵ҆поста́сною мꙋ́дростїю, хрⷭ҇тѐ: нѣ́сть бо ст҃ъ, па́че тебє̀, чл҃вѣколю́бче.

Тѧ̀ ро́ждшаѧ, а҆́ннѣ поревнова́вши, преподо́бнаго, ꙗ҆́кѡ дре́вле самꙋи́ла, же́ртвꙋ жи́вꙋ приведѐ бг҃ꙋ, просла́вившемꙋ ю҆̀ пре́жде зача́тїѧ.

Бога́тою къ бг҃ꙋ любо́вїю воспалѧ́емь, по́мысломъ всеблагочести́вымъ стра̑сти ᲂу҆держа́лъ є҆сѝ, преподо́бне. тѣ́мже бж҃е́ственнаѧ бл҃года́ть на тебѣ̀ воспочи́ла є҆́сть.

И҆́нъ. І҆рмо́съ:

Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ, ꙗ҆́кѡ нѣ́сть свѧ́тъ па́че тебє̀, є҆ди́не чл҃вѣколю́бче.

Ѿ непло́дныѧ ро́ждсѧ, дх҃о́внагѡ благопло́дїѧ земледѣ́латель многоро́днѣйшїй ꙗ҆ви́лсѧ є҆сѝ, те́рнїе посѣка́ѧ нече́стїѧ, прпⷣбне, и҆ благоче́стїѧ сѣ́мѧ бжⷭ҇твенно вмета́ѧ.

Сщ҃еннодѣйстви́теленъ преесте́ственныхъ и҆ та́инственныхъ зрѣ́нїй, бг҃оно́се, бы́въ, невѣ̑рныѧ приводѧ̀ хрⷭ҇тꙋ̀, бг҃олѣ́пнѡ вѣ́рꙋющыѧ ᲂу҆чє́нїи твои́ми, ѻ҆́ч҃е, наꙋча́ємыѧ лꙋ́чшымъ.

Цѣломꙋ́дрѣйшимъ по́мысломъ и҆ благочести́вымъ ѡ҆держи́мь текꙋ́щихъ и҆ тлѣ́емыхъ а҆́бїе, вѣ́чнꙋю жи́знь и҆ сла́дость пред̾избра́лъ є҆сѝ, воздержа́нїемъ кра́йнимъ пло́ть ᲂу҆мертви́въ, є҆ѵѳѵ́мїе.

Ѻ҆гнепа́льною дꙋше́ю и҆ ᲂу҆ѧ́звленною любо́вїю хрⷭ҇то́вою ѻ҆гнепа́льныхъ лови́твъ де́мѡнскихъ и҆збѣ́гъ, росода́тельною бл҃года́тїю просвѣти́лсѧ є҆сѝ, ѻ҆́ч҃е, знаменоно́сецъ бы́въ.

Бг҃оро́диченъ:

Речє́нїѧ бжⷭ҇твенныхъ прⷪ҇ро́кѡвъ и҆ тѣ́хъ проро́чєствїѧ запеча́тала є҆сѝ, ро́ждши сло́во, гл҃го́лющее чрез̾ тѣ́хъ: и҆ тѣ́хъ и҆спо́лнившаѧ бг҃оглагѡ́ланїѧ всѧ̑, бл҃гослове́ннаѧ, всенепоро́чнаѧ.

Катава́сїа: Оу҆тверже́нїе на тѧ̀ надѣ́ющихсѧ:

Сѣда́ленъ, гла́съ и҃. Подо́бенъ: Премꙋ́дрости:

Воздержа́нїѧ є҆ле́емъ дꙋше́внꙋю и҆спо́лнилъ є҆сѝ лампа́дꙋ дх҃о́внѣ, жела́ѧ присносвѣ́тлое жениха̀ твоегѡ̀ прише́ствїе: моли́твами бо́дренными соблю́лъ є҆сѝ, прпⷣбне, и҆ въ черто́зѣ сегѡ̀ весели́шисѧ, бл҃же́нне. тѣ́мже досто́йнѡ сла́дость прїѧ́лъ є҆сѝ, и҆́стиннѡ присноживо́тное чꙋде́съ дѣ́йствїе, бг҃оно́се є҆ѵѳѵ́мїе. Молѝ хрⷭ҇та̀ бг҃а, прегрѣше́нїй ѡ҆ставле́нїе дарова́ти пра́зднꙋющымъ любо́вїю ст҃ꙋ́ю па́мѧть твою̀.

Два́жды.

Сла́ва, и҆ ны́нѣ, бг҃оро́диченъ:

Благода́рственное похвале́нїе до́лжнѣ, ꙗ҆́коже вдова̀ ѻ҆́наѧ два̀ лє́пта, приношꙋ̀ тебѣ̀, влⷣчце, ѡ҆ всѣ́хъ дарова́нїихъ твои́хъ: ты́ бо ꙗ҆ви́ласѧ є҆сѝ покро́въ кꙋ́пнѡ и҆ по́мощь, напа́стей и҆ скорбе́й при́снѡ мѧ̀ и҆з̾е́млющи. тѣ́мже ꙗ҆́кѡ ѿ среды̀ горѧ́щїѧ пе́щи и҆зба́вивсѧ, ѡ҆скорблѧ́ющихъ мѧ̀, ѿ се́рдца взыва́ю тебѣ̀: бцⷣе, помози́ ми, молѧ́щи хрⷭ҇та̀ бг҃а, прегрѣше́нїй ѡ҆ставле́нїе да́ти мнѣ̀, тѧ́ бо и҆мѣ́ю наде́ждꙋ ра́бъ тво́й.

Пѣ́снь д҃. І҆рмо́съ:

Приклони́лъ є҆сѝ, хрⷭ҇тѐ, низхожде́нїемъ твои́мъ нб҃са̀ въ ра́зꙋмѣ, и҆ ꙗ҆ви́лсѧ є҆сѝ воплоще́нъ на землѝ. тѣ́мъ всѝ вопїе́мъ: си́лѣ твое́й сла́ва, чл҃вѣколю́бче.

Сохрани́въ ᲂу҆́мъ непрело́женъ, ѿ пеле́нъ житїе́мъ восхожде́нїе показа́лъ є҆сѝ къ бг҃ꙋ: є҆мꙋ́же приближа́ѧсѧ взима́лсѧ є҆сѝ ѿ си́лы, ѻ҆́ч҃е, въ си́лꙋ.

Вожделѣ́лъ є҆сѝ хрⷭ҇то́ва смире́нїѧ, пресе́льникъ ѿсю́дꙋ ко гра́дꙋ бг҃опрїе́мномꙋ бы́въ, сраспѧ́тисѧ ра́зꙋмомъ крⷭ҇то́мъ тебє̀ ра́ди пострада́вшемꙋ.

Зако́ннѣ пострада́ти произволѧ́ѧ, совле́клсѧ є҆сѝ житїѧ̀: на́гъ же противобо́рцꙋ сопле́тсѧ хрⷭ҇то́вымъ подо́бїемъ, въ пꙋсты́ни ѡ҆долѣ́нїе воздви́глъ є҆сѝ.

И҆́нъ. І҆рмо́съ:

Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.

Всего̀ себѐ, ѻ҆́ч҃е, бг҃ꙋ ѡ҆свѧти́лъ є҆сѝ, безсме́ртныѧ сла́вы жела́ѧ, и҆ къ немꙋ̀ поте́клъ є҆сѝ те́плѣ, жи́тельствомъ непоро́чнымъ и҆ воздержа́нїемъ, и҆ житїѧ̀ свѣ́тлостїю, непреста́ннѡ взыва́ѧ: си́лѣ твое́й сла́ва, чл҃вѣколю́бче.

Ты̀ и҆сто́чникъ, прпⷣбне, благосты́ни возлюби́въ все́ю си́лою, по́стникѡмъ бы́лъ є҆сѝ и҆сто́чникъ бжⷭ҇твенныхъ дарова́нїй, жа́ждꙋщыѧ сїѧ̑ и҆сцѣлѧ́ѧ, и҆сто́чники бо, ꙗ҆́коже дре́вле мѡѷсе́й въ пꙋсты́ни, пресла́внѡ, всебл҃же́нне, и҆сточи́лъ є҆сѝ.

Ꙗ҆ви́всѧ ѿ незаходи́мыхъ дх҃а, рабы̑нина ча̑да, свободи́лъ є҆сѝ, сн҃ы бж҃їѧ достолѣ̑пны сїѧ̑ ѡ҆бновлѧ́ѧ сн҃оположе́нїѧ креще́нїемъ: бж҃е́ственнагѡ бо предте́чи подража́въ житїѐ, крести́тель показа́лсѧ є҆сѝ, є҆ѵѳѵ́мїе.

Ѿ бг҃а благода́тїю просвѣща́емь, невѣ́дꙋщымъ позна́лсѧ є҆сѝ, є҆ѵѳѵ́мїе: не подоба́ше бо твое́й добродѣ́тели вои́стиннꙋ въ пꙋсты́нѧхъ таи́тисѧ и҆ покрыва́тисѧ. тѣ́мже тѧ̀ свѣтоно́сна, ꙗ҆́кѡ свѣти́льника всѣ̑мъ, влⷣка всѣ́хъ показа̀.

Бг҃оро́диченъ:

Ра́дꙋйсѧ, честна́ѧ: ра́дꙋйсѧ, дв҃о всечⷭ҇таѧ: ра́дꙋйсѧ, горо̀, благода́тїю приѡсѣне́ннаѧ: ра́дꙋйсѧ, ски́нїе: ра́дꙋйсѧ, кївѡ́те: ра́дꙋйсѧ, свѣ́щниче, свѣ́тъ бжⷭ҇твенный носѧ́щаѧ: ра́дости бо неизрече́нныѧ и҆ дꙋ́шъ весе́лїѧ вѣ̑рнымъ хода́таица была̀ є҆сѝ.

Катава́сїа: Покры́ла є҆́сть нб҃са̀:

Пѣ́снь є҃. І҆рмо́съ:

Нечести́вїи не ᲂу҆́зрѧтъ сла́вы твоеѧ̀, хрⷭ҇тѐ. но мы́ тѧ, є҆диноро́дне, ѻ҆ч҃ескїѧ сла́вы сїѧ́нїе бжⷭ҇тва̀, ѿ но́щи ᲂу҆́тренююще, воспѣва́емъ тѧ̀, чл҃вѣколю́бче.

Себѐ покори́лъ є҆сѝ зако́нꙋ бж҃їю, тѣ́ло бо твоѐ, ꙗ҆́кѡ дꙋше́вный, бг҃оно́се, ѻ҆рга́нъ порабо́тилъ є҆сѝ, пло́ти мꙋдрова́нїе повинꙋ́въ дꙋ́хꙋ.

Веселѧ́сѧ соверши́лъ є҆сѝ стезю̀ жи́зни, и҆ бж҃їй стра́хъ въ себѣ̀ заче́нъ, спасе́нїе роди́лъ є҆сѝ заблꙋжда́ємымъ, возсїѧ́вый, ꙗ҆́кѡ со́лнце, пꙋсты́нею покрыва́емь.

И҆́нъ. І҆рмо́съ:

Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго; но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.

По́стникѡвъ бл҃гоче́стїѧ на нбⷭ҇нꙋю стезю̀, є҆ѵѳѵ́мїе, предводи́лъ є҆сѝ, ѻ҆́ч҃е, и҆ къ наслѣ́дїю неги́блющемꙋ, въ вы̑шнѧѧ возводѧ́й, сто́лпъ ѻ҆́гненный же и҆ ѻ҆́блакъ ꙗ҆влѧ́емь заре́ю дх҃а.

Врача̀ болѧ́щымъ ѕѣлѡ̀ ми́лостивна мі́рꙋ дарова́ тѧ хрⷭ҇то́съ, ѻ҆́ч҃е, и҆ пита́телѧ а҆́лчꙋщымъ пресла́вна, наказа́телѧ несмы́слєннымъ, цѣломꙋдри́телѧ неразꙋмѣва́ющымъ, сирота́мъ и҆ ни́щымъ застꙋ́пника.

Сострада́теленъ, ми́лостивъ, нра́въ смиренномꙋ́дрый носѧ̀ бы́лъ є҆сѝ, страсте́й ѿсѣка́ѧ вины̀ бжⷭ҇твенными ᲂу҆чє́нїи, и҆ ᲂу҆мꙋдрѧ́ѧ, ѻ҆́ч҃е, и҆ наказꙋ́ѧ ᲂу҆ченикѝ твоѧ̑, и҆ дꙋ́шъ и҆сцѣлѧ́ѧ недꙋ́ги.

Всю́дꙋ лꙋчы̀ и҆спꙋща́ѧ чꙋде́съ твои́хъ, всѧ̑ просвѣти́лъ є҆сѝ: и҆ ꙗ҆́коже магни́тъ привле́клъ є҆сѝ къ твои̑мъ ᲂу҆че́нїємъ, назида́ѧ нра́вы и҆ дꙋ́шъ зало́ги, проходѧ̀ дꙋшѝ чистото́ю.

Бг҃оро́диченъ:

И҆́стиннꙋю бцⷣꙋ вси́ тѧ проповѣ́дꙋемъ, бг҃облаже́ннаѧ, твои́мъ ржⷭ҇тво́мъ тлѣ́ннагѡ и҆зба́вльшїисѧ рождества̀, и҆ къ лꙋ́чшей па́ки жи́зни воззва́ни бы́вше, за милосе́рдїе ми́лости бг҃а на́шегѡ.

Катава́сїа: Ꙗ҆́кѡ ви́дѣ и҆са́їа:

Пѣ́снь ѕ҃. І҆рмо́съ:

Прїидо́хъ во глꙋбины̑ морскі̑ѧ, и҆ потопи́ла мѧ̀ є҆́сть бꙋ́рѧ мно́гихъ грѣхѡ́въ: но ꙗ҆́кѡ бг҃ъ и҆зъ глꙋбины̀ возведѝ живо́тъ мо́й, многоми́лостиве.

Ꙗ҆́коже дре́вле ѿро́ды рабы́нины, пакибытїѧ̀ ба́нею и҆ ны́нѣ сыноположи́въ, твои́ми моли́твами, бг҃оно́се, сокрꙋшѝ и҆́го рабо́ты на́шеѧ.

Положи́ тѧ премꙋ́дра строи́телѧ и҆ наказа́телѧ безꙋ̑мнымъ, лꙋка́выхъ же дꙋхѡ́въ прогони́телѧ, бж҃їѧ, бг҃оно́се, бл҃года́ть, дѣ́йственнѣ въ тѧ̀ все́льшаѧсѧ.

И҆́нъ. І҆рмо́съ:

Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ и҆зведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.

Велича́йшꙋю ѿ бг҃а вла́сть прїе́мъ, мно́жєства вражде́бныхъ де́мѡнѡвъ ѿгна́лъ є҆сѝ, си́хъ стропо́тства и҆сцѣлѧ́ѧ всѧ̑, вѣ́рою къ тебѣ̀ притека́ющыѧ.

Блаже́нъ и҆́стиннѡ бы́лъ є҆сѝ, ѻ҆́ч҃е є҆ѵѳѵ́мїе, нищетꙋ̀ богатотво́рнꙋю, и҆ пла́чь ра́достенъ стѧжа́въ, преподо́бне: и҆́миже црⷭ҇тво нбⷭ҇ное наслѣ́довалъ є҆сѝ.

Ѿри́нꙋлъ є҆сѝ сꙋ́щꙋю на землѝ че́сть и҆ сла́вꙋ ᲂу҆добоꙋвѧда́емꙋю, присносꙋ́щнꙋю же жи́знь и҆ наслѣ́дїе нетлѣ́нное, всеблаже́нне, воспрїѧ́лъ є҆сѝ, въ се́лѣхъ нбⷭ҇ныхъ всели́всѧ и҆звѣ́стнѣйше.

Бг҃оро́диченъ:

Госпожꙋ́ тѧ всѧ́ческихъ и҆ влⷣчцꙋ и҆менꙋ́емъ: вои́стиннꙋ бо сꙋ́щаго бг҃а неизрече́ннѡ родила̀ є҆сѝ, всѧ̑ сотво́ршаго и҆ содержа́щаго и҆ ѡ҆б̾е́млющаго, всенепоро́чнаѧ.

Катава́сїа: Возопѝ къ тебѣ̀:

Конда́къ, гла́съ и҃. Подо́бенъ: Ꙗ҆́кѡ нача́тки:

Въ честнѣ́мъ рождествѣ̀ твое́мъ ра́дость тва́рь ѡ҆брѣ́те, и҆ въ бж҃е́ственнѣй па́мѧти твое́й, преподо́бне, благодꙋ́шїе прїѧ́тъ мно́гихъ твои́хъ чꙋде́съ: ѿ ни́хже пода́ждь бога́тнѡ въ дꙋ́шы на́шѧ, и҆ ѡ҆чи́сти грѣхѡ́въ сквє́рны, ꙗ҆́кѡ да пое́мъ: а҆ллилꙋ́їа.

І҆́косъ:

Ѿ лѣ́ностнагѡ се́рдца хвале́нїе ка́кѡ принесꙋ̀ ѻ҆каѧ́нный, ᲂу҆жаса́юсѧ, и҆ воспою̀ вели́каго є҆ѵѳѵ́мїа. Но сегѡ̀ надѣ́ѧвсѧ мольба́мъ, бл҃годꙋ́шїемъ и҆ тща́нїемъ мно́зѣмъ пѣ́снь начнꙋ̀, и҆ всѣ̑мъ и҆зрекꙋ̀ тогѡ̀ житїѐ и҆ рожде́нїе, и҆ ка́кѡ сегѡ̀ роди́телїе поѧ́хꙋ бг҃ꙋ: а҆ллилꙋ́їа.

Пѣ́снь з҃. І҆рмо́съ:

Ю҆́нѡши трѝ въ вавѷлѡ́нѣ, велѣ́нїе мꙋчи́телево на бꙋ́йство прело́жше, посредѣ̀ пла́мене вопїѧ́хꙋ: бл҃гослове́нъ є҆сѝ, гдⷭ҇и, бж҃е ѻ҆тє́цъ на́шихъ.

Ви́дѣлсѧ є҆сѝ внꙋ́трь ѻ҆́блака, ѻ҆́ч҃е, преесте́ственнымъ ѻ҆гне́мъ покрыва́емь, ꙗ҆́кѡ бж҃е́ственъ вопїѧ̀ небеснотаи́нникъ: бл҃гослове́нъ є҆сѝ, гдⷭ҇и, бж҃е ѻ҆тє́цъ на́шихъ.

Подае́тъ тебѣ̀ преесте́ствєннаѧ, ѻ҆́ч҃е содѣ́тель незави́стнѣ є҆стества̀, дꙋ́шъ же зало́ги проѧвлѧ́ѧй причаща́ющихсѧ, преподо́бне, пло́ти гдⷭ҇а твоегѡ̀.

Є҆ди́наго и҆ по бж҃е́ственномъ воплоще́нїи є҆диноро́днаго, во двою̀ є҆стєствꙋ̀, є҆ѵѳѵ́мїе, чествꙋ́ѧ, вопїѧ́лъ є҆сѝ: бл҃гослове́нъ є҆сѝ, гдⷭ҇и, бж҃е ѻ҆тє́цъ на́шихъ.

И҆́нъ. І҆рмо́съ:

Бж҃їѧ снизхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀: сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.

Поще́нїѧ три́знище, свѧты́ни, ѻ҆́ч҃е, ѡ҆бꙋче́нїе твоѐ показа́лъ є҆сѝ житїѐ, воздержа́нїемъ кра́йнимъ со безпло́тными соединѧ́ѧсѧ, зовы́й, є҆ѵѳѵ́мїе: бл҃гослове́нъ бг҃ъ ѻ҆тє́цъ на́шихъ.

Ѻ҆рꙋ́жїе тѧ̀ ѻ҆бою́дꙋ ѻ҆стро̀ хрⷭ҇то́съ показа̀, врагѡ́въ сердца̀ и҆ де́мѡнѡвъ закала́ющее полкѝ, и҆ пою́щихъ дꙋ́шы ѡ҆бвеселѧ́ющее: бл҃гослове́нъ бг҃ъ ѻ҆ц҃ъ на́шихъ.

Свѣ́та насыща́ѧсѧ трисо́лнечнагѡ, ѻ҆́ч҃е, свѣ́тъ вторы́й прича́стїемъ пе́рвагѡ, соѡбразова́нъ ꙗ҆ви́лсѧ є҆сѝ, є҆ѵѳѵ́мїе, зари̑ и҆спꙋща́ѧ пою́щымъ: благослове́нъ бг҃ъ ѻ҆ц҃ъ на́шихъ.

Бг҃оро́диченъ:

Ꙗ҆́кѡ ᲂу҆́тро возсїѧ́ла є҆сѝ, пра́вды сл҃нца и҆мꙋ́ще, ѿ тмы̀ невѣ́дѣнїѧ мі́ръ ѡ҆чища́юща бг҃оразꙋ́мїѧ заре́ю, є҆мꙋ́же пое́мъ: бл҃гослове́нъ бг҃ъ ѻ҆ц҃ъ на́шихъ.

Катава́сїа: Тебѐ во ѻ҆гнѝ:

Пѣ́снь и҃. І҆рмо́съ:

Ѻ҆́троки бл҃гочести̑выѧ въ пещѝ рождество̀ бг҃оро́дичо спасло̀ є҆́сть, тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.

Бг҃ꙋ себѐ ѡ҆свѧти́въ, и҆ вже́гъ со́вѣсти пе́щь, всего̀ тѧ̀, є҆ѵѳѵ́мїе, ра́дꙋѧсѧ всежже́глъ є҆сѝ ꙗ҆́кѡ же́ртвꙋ непоро́чнꙋ житїѐ, поѧ̀ хрⷭ҇тꙋ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.

Сыноположе́нъ бы́въ бл҃года́тїю бж҃е́ственною, ꙗ҆́кѡ наслѣ́дїе бꙋ́дꙋщихъ вѣ́дѣнїе прїѧ́лъ є҆сѝ: є҆стєства́ бо ᲂу҆держа́въ, є҆стество̀ превозше́лъ є҆сѝ прозна́тельнѣ, къ сбы́тїю тща́сѧ, є҆ѵѳѵ́мїе. гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.

И҆́нъ. І҆рмо́съ:

Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, благослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Крѣпча́йшее стѧжа́въ жи́тельство, всебл҃же́нне, къ высоча́йшемꙋ зрѣ́нїю дости́глъ є҆сѝ, прїѧ́телище бы́въ вмѣсти́тельное дх҃а животво́рнагѡ, и҆ ѿтꙋ́дꙋ бога́тнѡ текꙋ́щихъ дарова́нїй, поѧ̀ непреста́ннѡ: лю́дїе, превозноси́те є҆го̀ во вѣ́ки.

Пресели́всѧ дости́глъ є҆сѝ сїѡ́на краегра́дїе, въ вѣ̑чныѧ же ѻ҆би́тєли доше́лъ є҆сѝ, и҆ наслѣ́дїе нбⷭ҇ное ѿ твои́хъ болѣ́зней ѡ҆брѣ́тъ, со а҆́гг҃льскими ликостоѧ̑нїи пое́ши: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Всесвѣ́телъ ꙗ҆́кѡ со́лнце, пꙋсты̑ни просвѣти́лъ є҆сѝ, темнозра̑чныѧ ѿгна́лъ є҆сѝ де́мѡны, и҆ сто́лпъ всесвѣ́тлый нб҃одосѧ́жꙋщїй бы́лъ є҆сѝ, чꙋдотво́рными сїѧ̑нїи блиста́ѧй, непреста́ннѡ взыва́ѧ влⷣцѣ: свѧще́нницы, воспо́йте, лю́дїе, превозноси́те во всѧ̑ вѣ́ки.

Свѧще́ннѣйшими дѣѧ́ньми житїѧ̀ ᲂу҆краша́емь, нача́льнѣйшꙋю добродѣ́тель и҆спра́вилъ є҆сѝ, ᲂу҆че́нїй пра́востїю свѣ́телъ бы́въ, и҆ бг҃осло́вїѧ и҆звѣ́стнагѡ сказа́тель, вопїѧ̀ непреста́ннѡ: свѧще́нницы, воспо́йте, лю́дїе, превозноси́те во всѧ̑ вѣ́ки.

Бг҃оро́диченъ:

Невѣ́сто бж҃їѧ всенепоро́чнаѧ, къ тебѣ̀ прибѣга́ющыѧ плѣне́нїѧ страсте́й и҆схи́ти, и҆ самовла́стнꙋю свобо́дꙋ, влⷣчце, правосла́вныхъ цр҃квамъ пода́ждь, вѣ́рою пѣснопою́щымъ: свѧще́нницы, воспо́йте, лю́дїе, превозноси́те во всѧ̑ вѣ́ки.

Катава́сїа: Нестерпи́момꙋ ѻ҆гню̀:

Пѣ́снь ѳ҃. І҆рмо́съ:

По ржⷭ҇твѣ́ тѧ, чⷭ҇таѧ, и҆ пре́жде рождества̀, и҆ въ рождествѣ̀, пречи́стаѧ, всѧ̀ тва́рь проповѣ́дꙋющи, ꙗ҆́кѡ бцⷣꙋ и҆́стиннꙋю велича́емъ.

И҆сцѣле́нїй тѧ̀ и҆сто́чника и҆ пре́жде сме́рти, и҆ въ ра́цѣ, преподо́бне, ᲂу҆́спша цѣ́ла ѡ҆брѣ́тше, ꙗ҆́кѡ побѣдоно́сца страда́льца блажи́мъ.

Земно́мꙋ царю̀, и҆́же въ вы́шнихъ помо́щника содѣ́ла тѧ̀ на ва́рвары, и҆ па́ствѣ твое́й, на разли̑чныѧ и҆скꙋшє́нїѧ, ѻ҆́ч҃е преподо́бне.

И҆́нъ. І҆рмо́съ:

Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее нб҃съ: тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.

Сказа̀ хрⷭ҇то́съ тебѣ̀, є҆́же къ немꙋ̀ многорачи́тельное, ѻ҆́ч҃е, разрѣше́нїе, ꙗ҆́коже мѡѷсе́ю дре́вле бг҃ови́дцꙋ, є҆мꙋ́же подо́бникъ добродѣ́телїю бы́въ, расто́ргнꙋлъ є҆сѝ мо́ре страсте́й, преше́лъ є҆сѝ невозбра́ннѡ къ землѝ ѡ҆бѣтова́нїѧ, проти̑вныѧ побѣди́въ.

Преста́вилсѧ є҆сѝ ꙗ҆́кѡ и҆лїа̀ ревни́тель, добродѣ́телей ѣ҆́здѧ колесни́цею къ нб҃сѝ, и҆дѣ́же жи́тельство ꙗ҆́вѣ твоѐ написа́сѧ, прпⷣбне, и҆ ны́нѣ влⷣцѣ предстоѧ̀, помина́й вѣ́рою соверша́ющыѧ па́мѧть твою̀ свѣтоно́снꙋю и҆ всесвѧще́ннꙋю.

Житїѐ твоѐ, всебл҃же́нне, а҆́гг҃льское, и҆ жи́знь твоѧ̀, бг҃омꙋ́дре, пресвѣ́тла, дꙋша́ же свѣтови́днѣйшаѧ бг҃ови́дна, и҆ благочести́ва вѣ́ра твоѧ̀: бж҃е́ственныхъ бо догма́тѡвъ сказа́тель бы́лъ є҆сѝ, бг҃оно́се, и҆ проповѣ́дникъ правосла́внагѡ ᲂу҆че́нїѧ ꙗ҆ви́лсѧ є҆сѝ.

Моле́бника тѧ̀ и҆ моли́твенника, къ бг҃ꙋ молѧ́щасѧ, ѻ҆́ч҃е, проще́нїе грѣхѡ́въ и҆ долгѡ́въ мои́хъ ѿсѣче́нїѧ просѧ́ща, бж҃е́ствєнныѧ принꙋжда́юща щедрѡ́ты, предлага́ю ᲂу҆се́рднѡ наде́жди, моли́твою твое́ю, бг҃омꙋ́дре, ᲂу҆твержда́емь.

Бг҃оро́диченъ:

Спаси́тельный бꙋ́ди мнѣ̀ сто́лпъ, чⷭ҇таѧ, де́мѡнскимъ возбранѧ́ющь полкѡ́мъ, и҆ напа́стей молвꙋ̀ и҆ бѣ́дъ ѿгонѧ́щь, и҆ страсте́й наше́ствїе дале́че прогонѧ́ющь, и҆ чи́стꙋ даѧ́й свобо́дꙋ, и҆ бж҃е́ственныхъ дарова́нїй ѻ҆би́льство да́рꙋѧй.

Катава́сїа: Въ зако́нѣ сѣ́ни и҆ писа́нїй:

Свѣти́ленъ. Подо́бенъ: Жєны̀ ᲂу҆слы́шите:

И҆зъ ложе́снъ ѡ҆свѧти́ тѧ бг҃ъ, ѻ҆́ч҃е преподо́бне, ꙗ҆́кѡ і҆еремі́ю дре́вле и҆ самꙋи́ла, бг҃оно́се, прⷪ҇ро́ка бж҃е́ственнаго показа́въ тѧ̀, чꙋдодѣ́йственнѣ є҆ѵѳѵ́мїе, а҆́гг҃лѡвъ є҆диносе́льниче: съ ни́миже помина́й всѧ̑, тѧ̀ вѣ́рнѡ воспѣва́ющыѧ.

Два́жды.

Сла́ва, и҆ ны́нѣ, бг҃оро́диченъ:

Гдⷭ҇ьственнѡ бцⷣꙋ тѧ̀ и҆сповѣ́дꙋемъ, влⷣчце, тебє̀ ра́ди спа́сшїисѧ: и҆́бо бг҃а неизрече́ннѡ родила̀ є҆сѝ, разори́вшаго крⷭ҇то́мъ сме́рть, и҆ къ себѣ̀ привле́кша прпⷣбныхъ собо́ры: съ ни́миже тѧ̀ восхвалѧ́емъ, дв҃о.

На хвали́техъ стїхи̑ры на д҃, гла́съ и҃. Поⷣ: Ѽ пресла́внагѡ чꙋдесѐ!

Прпⷣбне ѻ҆́ч҃е є҆ѵѳѵ́мїе, ꙳ ѡ҆ста́вивъ ꙗ҆̀же на землѝ, ꙳ хрⷭ҇тꙋ̀ послѣ́довалъ є҆сѝ, ꙳ не предпоче́тъ, сла́вне, тлѣ́нныхъ па́че бꙋ́дꙋщихъ: ꙳ въ пꙋсты́ни ꙗ҆́коже во гра́дѣ живы́й, ꙳ де́мѡнскїѧ полкѝ погꙋби́лъ є҆сѝ. ꙳ ѽ кто̀ возмо́глъ бы и҆зрещѝ, присносла́вне, ꙳ твоеѧ̀ дꙋшѝ вои́стиннꙋ теплотꙋ̀, ꙳ ꙗ҆́же ко гдⷭ҇ꙋ;

Два́жды.

Прпⷣбне ѻ҆́ч҃е є҆ѵѳѵ́мїе, ꙳ ты̀ показа́лсѧ є҆сѝ пра́вило мона́шествꙋющихъ и҆ похвала̀, ꙳ правосла́вныхъ ᲂу҆слажде́нїе, ꙳ и҆ свѣ́тлый вселе́нныѧ свѣти́льникъ: ꙳ ле́стнагѡ бо врага̀ не ᲂу҆жа́слсѧ є҆сѝ страхова́нїй, въ пеще́рѣ живы́й. ꙳ ѽ дарова́нїѧ сꙋ́щагѡ въ тебѣ̀, блаже́нне! ꙳ и҆́мже ꙗ҆́вѣ ꙳ всѧ́кꙋ попра́лъ є҆сѝ де́мѡнѡвъ бро́вь.

Прпⷣбне ѻ҆́ч҃е є҆ѵѳѵ́мїе, ꙳ ты̀ вои́стиннꙋ къ бг҃ꙋ ꙳ дꙋ́шꙋ впери́лъ є҆сѝ, ꙳ и҆ поще́нїемъ, свѧ́те, чꙋ̑вства ѡ҆чи́стивъ, ꙳ и҆ непреста́нными моли́твами, всебл҃же́нне, ꙳ безсме́ртныѧ жи́зни сподо́билсѧ є҆сѝ. ꙳ ѽ ᲂу҆добре́нїе по́стникѡвъ пресла́вне! ꙳ тѧ́ бо хрⷭ҇то́съ ра́дꙋѧсѧ прїѧ́тъ ꙳ въ невеще́ствєнныѧ ѻ҆би́тєли.

Сла́ва, гла́съ то́йже:

Мона́хѡвъ мно́жества наста́вника тѧ̀ почита́емъ, ѻ҆́ч҃е на́шъ є҆ѵѳѵ́мїе: твое́ю бо стезе́ю вои́стиннꙋ пра́вѡ ходи́ти позна́хомъ. Блаже́нъ є҆сѝ хрⷭ҇тꙋ̀ рабо́тавъ, и҆ вра́жїю ѡ҆бличи́лъ є҆сѝ си́лꙋ, а҆́гг҃лѡвъ собесѣ́дниче, преподо́бныхъ соприча́стниче и҆ првⷣныхъ: съ ни́миже моли́сѧ гдⷭ҇еви, поми́ловатисѧ дꙋша́мъ на́шымъ.

И҆ ны́нѣ, бг҃оро́диченъ: Влⷣчце, прїимѝ моли́твꙋ ра̑бъ:

Славосло́вїе вели́кое, и҆ ѿпꙋ́стъ. Ча́съ а҃-й. И҆ коне́чный ѿпꙋ́стъ.

На лїтꙋргі́и, Блажє́нна, ѿ канѡ́на пѣ́снь г҃-ѧ и҆ ѕ҃-ѧ. Прокі́менъ, гла́съ з҃: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; А҆пⷭ҇толъ къ є҆вре́ємъ, зача́ло тл҃є. А҆ллилꙋ́їа, гла́съ ѕ҃: Блаже́нъ мꙋ́жъ, боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀. Сті́хъ: Си́льно на землѝ бꙋ́детъ сѣ́мѧ є҆гѡ̀. Є҆ѵⷢ҇лїе лꙋкѝ, зача́ло к҃д. Прича́стенъ: Въ па́мѧть вѣ́чнꙋю бꙋ́детъ пра́ведникъ:


Комментарии для сайта Cackle