Мѣ́сѧца тогѡ́же въ ѳ҃і-й де́нь. Преподо́бнагѡ ѻ҆ц҃а̀ на́шегѡ мака́рїа є҆гѵ́птѧнина.

На Гдⷭ҇и, воззва́хъ, стїхи̑ры на ѕ҃. гла́съ д҃ Поⷣ: Да́лъ є҆сѝ зна́менїе:

Блаже́нства сꙋ́щагѡ па́че ᲂу҆ма̀ жела́ѧ, ꙳ вмѣни́лъ є҆сѝ, чꙋ́дне, ꙳ пи́щꙋ, воздержа́нїе: ꙳ нищетꙋ̀, бога́тство: ꙳ нестѧжа́нїе, и҆мѣ́нїе и҆́стинное: ꙳ и҆ бл҃госла́вїе, смире́нїе. ꙳ тѣ́мже и҆ жела̑нїѧ, ꙳ є҆́же по ра́зꙋмꙋ, ᲂу҆лꙋчи́лъ є҆сѝ, ꙳ въ жили́щахъ водворѧ́ѧсѧ ст҃ы́хъ, мака́рїе.

Тече́нїе воздержа́нїѧ ꙳ непрело́жнѡ соверши́лъ є҆сѝ, ꙳ и҆ вѣ́рꙋ соблю́лъ є҆сѝ: ꙳ ѿѻнꙋ́дꙋже и҆ вѣне́цъ прїѧ́лъ є҆сѝ, ѻ҆́ч҃е, пра́вды, ꙳ є҆го́же тебѣ̀ ᲂу҆гото́ва хрⷭ҇то́съ, ꙳ по досто́инствꙋ даѧ́й воздаѧ̑нїѧ, ꙳ и҆ чє́сти да́рꙋѧй, ꙳ и҆ болѣ́зней возме́здїе: ꙳ и҆̀хже и҆ ны́нѣ на́мъ, сла́вне, пода́ти моли́сѧ.

Всѧ́кое сладостра́стїе, ꙳ ᲂу҆дрꙋча́ѧ тѣ́ло твоѐ, ꙳ ѿве́рглъ є҆сѝ, бг҃омꙋ́дре, ꙳ ѡ҆горча́ѧ чꙋ̑вства воздержа̑нїи крѣ́пкими и҆ жестокожи́тїемъ, ꙳ терпѣ́нїемъ же напа́стей, ꙳ и҆ пожда́нїемъ ѡ҆бстоѧ́нїй. ꙳ и҆́хже ра́ди безконе́чное воспрїе́млеши наслажде́нїе, ꙳ и҆ пи́щꙋ непрее́мнꙋю, и҆ ра́дость неизглаго́ланнꙋю.

Сла́ва, гла́съ и҃. А҆нато́лїево:

Весели́сѧ, є҆гѵ́пте, процвѣ́тшїй такова́го граждани́на, во бл҃же́нныхъ мака́рїа: се́й бо премꙋ́дростїю ст҃а́гѡ дх҃а ᲂу҆краси́всѧ, всѧ́ко поще́нїе въ добродѣ́тельномъ житїѝ свое́мъ произ̾ѡбразѝ. того̀ и҆ мы̀ хода́таѧ приводѧ́ще, про́симъ ᲂу҆моли́ти хрⷭ҇та̀, спасти́сѧ дꙋша́мъ на́шымъ.

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.

Подо́бенъ: Мꙋ́чєницы твоѝ, гдⷭ҇и:

Ю҆́ница нескве́рнаѧ, ю҆нца̀ ви́дѧщи на дре́вѣ пригвожда́ема во́лею, рыда́ющи жа́лостнѣ, ᲂу҆вы̀ мнѣ̀, вопїѧ́ше, люби́мѣйшее ча́до! что́ ти со́нмъ воздадѐ безбл҃года́тный є҆вре́йскїй, хотѧ́ мѧ ѡ҆безча́дствовати ѿ тебє̀, вселюбе́зне;

На стїхо́внѣ ѻ҆ктѡ́иха. Сла́ва, гла́съ ѕ҃:

Прпⷣбне ѻ҆́ч҃е, во всю̀ зе́млю и҆зы́де вѣща́нїе и҆справле́нїй твои́хъ. тѣ́мъ на нб҃сѣ́хъ ѡ҆брѣ́лъ є҆сѝ мздꙋ̀ трꙋдѡ́въ твои́хъ, дє́мѡнскїѧ погꙋби́лъ є҆сѝ полкѝ, и҆ а҆́гг҃льскїѧ дости́глъ є҆сѝ чи́ны, и҆́хже житїю̀ непоро́чнѡ поревнова́лъ є҆сѝ: дерзнове́нїе и҆мѣ́ѧ ко хрⷭ҇тꙋ̀ бг҃ꙋ, ми́ръ и҆спросѝ дꙋша́мъ на́шымъ.

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Подо́бенъ: Тридне́венъ:

На дре́вѣ живо́тъ на́шъ зрѧ́щи, всенепоро́чнаѧ бцⷣе, ви́сѧщъ, мт҃рски рыда́ющи вопїѧ́ла є҆сѝ: сн҃е мо́й и҆ бж҃е мо́й, спасѝ любо́вїю пою́щыѧ тѧ̀.

Тропа́рь, гла́съ а҃:

Пꙋсты́нный жи́тель, и҆ во пло́ти а҆́гг҃лъ, и҆ чꙋдотво́рецъ ꙗ҆ви́лсѧ є҆сѝ, бг҃оно́се ѻ҆́ч҃е на́шъ мака́рїе, посто́мъ, бдѣ́нїемъ, моли́твою, нбⷭ҇наѧ дарова̑нїѧ прїи́мъ, и҆сцѣлѧ́еши недꙋ̑жныѧ, и҆ дꙋ́шы вѣ́рою приходѧ́щихъ тѝ. Сла́ва да́вшемꙋ тебѣ̀ крѣ́пость: сла́ва вѣнча́вшемꙋ тѧ̀: сла́ва дѣ́йствꙋющемꙋ тобо́ю всѣ̑мъ и҆сцѣлє́нїѧ.

На ᲂу҆́трени ѻ҆́ба канѡ́на ѻ҆ктѡ́иха: и҆ ст҃а́гѡ канѡ́нъ на ѕ҃, є҆гѡ́же краегране́сїе: Всеизрѧ́днаго въ по́стницѣхъ мака́рїа сла́влю. Ѳеофа́ново.

Гла́съ д҃. Пѣ́снь а҃. І҆рмо́съ:

Ли́цы і҆и҃льтестїи невла́жными стопа́ми по́нтъ чермны́й, и҆ вла́жнꙋю глꙋбинꙋ̀ прогна́вше, вса́дники трїста́ты врагѝ ви́дѧще въ не́й погрꙋжє́ны, съ весе́лїемъ поѧ́хꙋ: пои́мъ бг҃ꙋ на́шемꙋ, ꙗ҆́кѡ просла́висѧ.

Бж҃е́ственнымъ свѣ́томъ сїѧ́ѧ, и҆ со а҆́гг҃лы, ѻ҆́ч҃е, ны́нѣ водворѧ́ѧсѧ, моли́твами твои́ми спаса́й соверша́ющыѧ всесвѧще́ннꙋю твою̀ па́мѧть, и҆ въ ра́дости вопїю́щыѧ: пои́мъ бг҃ꙋ на́шемꙋ, ꙗ҆́кѡ просла́висѧ.

Пꙋ́ть къ жи́зни ведꙋ́щїй, неꙋкло́ннѡ, пребл҃же́нне, ше́ствꙋѧй соверши́лъ є҆сѝ, и҆збѣ́гъ мѧте́жей, и҆ бѣсѡ́вскаѧ смꙋщє́нїѧ разори́лъ є҆сѝ, ра́достнѡ взыва́ѧ: пои́мъ бг҃ꙋ на́шемꙋ, ꙗ҆́кѡ просла́висѧ.

Оу҆мертви́въ плотско́е мꙋдрова́нїе, по́стническими твои́ми борє́нїи, бж҃е́ственномꙋ дх҃ꙋ покори́лъ є҆сѝ, ѻ҆́ч҃е: и҆ сегѡ̀ ᲂу҆правлѧ́емь бж҃е́ственною си́лою, въ ра́дости вопїѧ́лъ є҆сѝ: пои́мъ бг҃ꙋ на́шемꙋ, ꙗ҆́кѡ просла́висѧ.

Всѧ̑ кра̑снаѧ ѡ҆ста́вилъ є҆сѝ, непреста́ннꙋю возлюби́въ, ѻ҆́ч҃е, красотꙋ̀ въ домꙋ̀ гдⷭ҇ни, и҆дѣ́же шꙋ́мъ чи́стѣ пра́зднꙋющихъ, въ ра́дости вопїю́щихъ: пои́мъ бг҃ꙋ на́шемꙋ, ꙗ҆́кѡ просла́висѧ.

Бг҃оро́диченъ:

Безлѣ́тнаго сн҃а безнача́льнагѡ ѻ҆ц҃а̀, пло́ть на́съ ра́ди человѣ́кѡвъ бы́вша, чⷭ҇таѧ, во ᲂу҆тро́бѣ заче́нши, подъ лѣ́томъ сего̀ родила̀ є҆сѝ несказа́ннѡ, є҆мꙋ́же и҆ ра́дꙋющесѧ вопїе́мъ: пои́мъ бг҃ꙋ на́шемꙋ, ꙗ҆́кѡ просла́висѧ.

Пѣ́снь г҃. І҆рмо́съ:

Лꙋ́къ си́льныхъ и҆знемо́же, и҆ немощствꙋ́ющїи препоѧ́сашасѧ си́лою: сегѡ̀ ра́ди ᲂу҆тверди́сѧ въ гдⷭ҇ѣ се́рдце моѐ.

Зако́нꙋ повинꙋ́лсѧ є҆сѝ дх҃а, є҆гѡ́же всеѻрꙋ́жїемъ препоѧ́савсѧ, преподо́бне, не зако́нꙋ грѣха̀ произволе́нїе подклони́лъ є҆сѝ.

Горѣ̀ къ бг҃ꙋ мꙋдрова́нїе и҆мѣ́ѧ, бг҃оно́се, ꙗ҆̀же на землѝ ѡ҆ста́вилъ є҆сѝ, болѣ́зньми воздержа́нїѧ непреста́ннѡ ѡ҆блегча́емь.

Расто́ргъ ᲂу҆́зы є҆стества̀ преесте́ственнымъ и҆ чи́стымъ твои́мъ житїе́мъ, бг҃оно́се, сꙋ́щихъ па́че є҆стества̀ прїѧ́лъ є҆сѝ дѣ́йство.

Да бг҃ꙋ, бл҃же́нне, въ безмѧте́жїи бесѣ́дꙋеши, въ пꙋсты́ни, ѻ҆́ч҃е, жи́ти и҆зво́лилъ є҆сѝ, ѿ мо́лвъ ᲂу҆далѧ́ѧсѧ.

Бг҃оро́диченъ:

Спастѝ хотѧ̀ человѣ́ка на поле́зное, ꙗ҆́кѡ бл҃годѣ́тель чл҃вѣколю́бецъ, въ твою̀ ᲂу҆тро́бꙋ неѡпи́саннѡ, бг҃ома́ти, всели́сѧ.

Конда́къ, гла́съ д҃. Подо́бенъ: Ꙗ҆ви́лсѧ є҆сѝ:

Въ домꙋ̀ гдⷭ҇ь воздержа́нїѧ вои́стиннꙋ тѧ̀ положѝ, ꙗ҆́коже ѕвѣздꙋ̀ непреле́стнꙋю, свѣтоводѧ́щꙋ концы̀, ѻ҆́ч҃е ѻ҆ц҃є́въ, мака́рїе преподо́бне.

Сѣда́ленъ, гла́съ а҃. Подо́бенъ: Гро́бъ тво́й, сп҃се:

Воздержа́нїѧ ѻ҆гне́мъ, ꙗ҆́кѡ зла́то въ пещѝ, мꙋ́дре, и҆скꙋси́всѧ, свѣтлѣ́йшїй ꙗ҆ви́лсѧ є҆сѝ: сегѡ̀ ра́ди къ нбⷭ҇номꙋ преста́вилсѧ є҆сѝ црⷭ҇твїю. тѣ́мже вѣ́рою восхвалѧ́юще тѧ̀, вопїе́мъ: благода́ть, ми́лость и҆ ѡ҆чище́нїе прегрѣше́нїй на́шихъ, ѻ҆́ч҃е, и҆спросѝ.

Два́жды.

Сла́ва, и҆ ны́нѣ, бг҃оро́диченъ:

Напра́ви ны̀ на пꙋ́ть покаѧ́нїѧ, ᲂу҆кло́ншыѧсѧ при́снѡ къ безпꙋ́тїємъ ѕѡ́лъ, и҆ пребл҃га́го прогнѣ́вавшыѧ гдⷭ҇а, неискꙋсобра́чнаѧ, бл҃гослове́ннаѧ мр҃і́е, прибѣ́жище ѿча́ѧнныхъ человѣ́кѡвъ, бж҃їе жили́ще.

Крⷭ҇тобг҃оро́диченъ:

Нескве́рнаѧ а҆́гница а҆́гнца и҆ па́стырѧ повѣ́шена на дре́вѣ ме́ртва зрѧ́щи, пла́чꙋщи вѣща́ше, мт҃рски восклица́ющи: ка́кѡ претерплю̀ твоѐ, є҆́же па́че сло́ва, сн҃е мо́й, сни́тїе, и҆ вѡ́льныѧ стрⷭ҇ти, бж҃е пребл҃гі́й;

Пѣ́снь д҃. І҆рмо́съ:

Сѣдѧ́й въ сла́вѣ на прⷭ҇то́лѣ бжⷭ҇тва̀, во ѻ҆́блацѣ ле́гцѣ прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й.

Тлѣ́емагѡ а҆́бїе ве́тхагѡ человѣ́ка совле́клсѧ є҆сѝ, ѻ҆́ч҃е, съ грѣхо́вными страстьмѝ, воздержа́нїемъ незави́стнымъ: ѡ҆бле́клсѧ же є҆сѝ въ но́ваго по хрⷭ҇тѣ̀, всече́стне.

Свѣтлѣ́йшее твоѐ житїѐ, ꙗ҆́кѡ пра́вило и҆звѣ́стнѣйшее всѧ́кїѧ, ѻ҆́ч҃е, бж҃е́ственныѧ добродѣ́тели показа́сѧ въ моли́твахъ и҆ постѣ́хъ, бдѣ́нїихъ же и҆ мольба́хъ ко хрⷭ҇тꙋ̀ чл҃вѣколю́бцꙋ.

Дрема́нїѧ твои̑мъ вѣ́ждѡмъ, бг҃омꙋ́дре, не да́лъ є҆сѝ, до́ндеже, ѻ҆́ч҃е, до́мъ себѐ сотвори́лъ є҆сѝ краснѣ́йшїи всеви́дцꙋ влⷣцѣ, къ немꙋ́же взыва́лъ є҆сѝ: сла́ва, хрⷭ҇тѐ, си́лѣ твое́й.

Въ ю҆́ности цѣломꙋ́дрїе, въ ста́рости ра́зꙋмъ, во все́мъ же житїѝ пожда́нїе и҆ долготерпѣ́нїе, и҆ ко всѣ̑мъ любо́вь показа́лъ є҆сѝ, взыва́ющымъ: сла́ва, хрⷭ҇тѐ, си́лѣ твое́й.

Бг҃оро́диченъ:

Оу҆мерщвлє́нныѧ, всечⷭ҇таѧ, человѣ́ки ѡ҆живи́ла є҆сѝ, па́дшыѧ сїѧ̑ къ тлѣ́нїю возста́вила є҆сѝ, жизнода́вца ро́ждши, и҆збавлѧ́ющаго взыва́ющыѧ: сла́ва, хрⷭ҇тѐ, си́лѣ твое́й.

Пѣ́снь є҃. І҆рмо́съ:

Просвѣще́нїе твоѐ, гдⷭ҇и, низспослѝ на́мъ, и҆ ѿ мглы̀ прегрѣше́нїй разрѣши́ ны, бл҃же, тво́й ми́ръ да́рꙋѧй.

Просте́ръ, сла́вне, дꙋшѝ ᲂу҆́мное, и҆ чꙋ̑вства, мꙋ́дре, ᲂу҆пра́вивъ, бы́лъ є҆сѝ хра́мъ ѡ҆свѧще́нъ бг҃ꙋ и҆ всече́стенъ.

Стропти́вѣйшагѡ ѕмі́ѧ ᲂу҆вѧди́въ кова̑рства, и҆ тогѡ̀ гѡ́рькїѧ кѡ́зни притꙋпи́лъ є҆сѝ, при́снѡ въ бжⷭ҇твенномъ зако́нѣ дꙋ́шꙋ ᲂу҆строѧ́ѧ.

Оу҆краси́лъ є҆сѝ, прпⷣбне, дꙋшѝ трича́стное, и҆ влады́кꙋ ᲂу҆́мъ поста́вивъ, и҆мѣ́лъ є҆сѝ хрⷭ҇та̀, наставлѧ́ющаго къ ше́ствїю нбⷭ҇номꙋ.

Бг҃оро́диченъ:

Дв҃а родѝ пречи́стаго бг҃а, законополага́юща всѣ̑мъ чистотꙋ̀, и҆ свѧты́ню благоче́стїѧ сꙋ́щымъ на землѝ возвѣща́юща.

Пѣ́снь ѕ҃. І҆рмо́съ:

Возопѝ проѡбразꙋ́ѧ погребе́нїе тридне́вное, прⷪ҇ро́къ і҆ѡ́на, въ ки́тѣ молѧ́сѧ: ѿ тлѝ и҆зба́ви мѧ̀, і҆и҃се, цр҃ю̀ си́лъ.

Въ пꙋсты́ни жи́ти ᲂу҆се́рднѡ возлюби́лъ є҆сѝ, бг҃оно́се, въ не́й бг҃а прїе́млѧ, и҆збавлѧ́ющаго тѧ̀ и҆ соблюда́юща твоѧ̑ стѡпы̀.

Непрекло́ненъ въ поще́нїи, бг҃омꙋ́дре, пребы́лъ є҆сѝ, да́же до конца̀ хранѧ̀ сїѐ ѡ҆пасе́нїе, и҆́мже нетлѣ́ннагѡ сподо́билсѧ є҆сѝ ꙗ҆́вѣ наслажде́нїѧ.

Равноа́гг҃льно на землѝ житїѐ пожи́лъ є҆сѝ, равноа́гг҃льнꙋю и҆ че́сть досто́йнѡ полꙋчи́лъ є҆сѝ, со а҆́гг҃лы всѣ́хъ бг҃ꙋ предстоѧ̀.

Бг҃оро́диченъ:

Зачала̀ є҆сѝ во ᲂу҆тро́бѣ, бг҃ома́ти, безнача́льнаго бг҃а сло́ва, на́съ ра́ди человѣ́кѡвъ бы́вша непрело́жна по на́мъ, во двою̀ зна́емаго є҆стєствꙋ̀.

Конда́къ, гла́съ а҃. Подо́бенъ: Ли́къ а҆́гг҃льскїй:

Блаже́ннꙋю жи́знь сконча́въ въ житїѝ съ мꙋ́ченическими ли́ки, въ землѝ кро́ткихъ досто́йнѡ водворѧ́ешисѧ, бг҃оно́се мака́рїе: и҆ пꙋсты́ню, ꙗ҆́коже гра́дъ, насели́въ, благода́ть прїѧ́лъ є҆сѝ ѿ бг҃а чꙋде́съ. тѣ́мже тѧ̀ почита́емъ.

І҆́косъ:

Бг҃оно́снагѡ бы́въ ᲂу҆́бѡ а҆нтѡ́нїа ᲂу҆ч҃ни́къ, ѻ҆́ч҃е, и҆́скреннїй, ꙗ҆́коже во́скъ и҆з̾ѡбразꙋ́емь, всѧ́кꙋю и҆з̾ѡбрази́лъ є҆сѝ тогѡ̀ пои́стиннѣ добродѣ́тель и҆ страда̑нїѧ. тѣ́мъ и҆ ꙗ҆́кѡ и҆лїа̀ сꙋгꙋ́бѡ, ꙗ҆́коже и҆но́мꙋ є҆лїссе́ю тебѣ̀ чꙋде́съ благода́ть даде́сѧ, и҆ предвѣ́дѣнїѧ ѡ҆сїѧ́нїе и҆́стины (с. 474) полꙋчи́вшемꙋ. Ве́лїе положи́сѧ во все́мъ мі́рѣ дѣѧ́нїе житїѧ̀ твоегѡ̀, воздвиза́ѧ спѧ́щыѧ въ поги́бельнѣй про́пасти: тѣ́мже тѧ̀ почита́емъ.

Пѣ́снь з҃. І҆рмо́съ:

Спасы́й во ѻ҆гнѝ а҆враа̑мскїѧ твоѧ̑ ѻ҆́троки, и҆ халдє́и ᲂу҆би́въ, ꙗ҆̀же пра́вда пра́веднѡ ᲂу҆ловлѧ́ше, препѣ́тый гдⷭ҇и, бж҃е ѻ҆тє́цъ на́шихъ, благослове́нъ є҆сѝ.

Свы́ше манове́нїемъ и҆ бж҃їею по́мощїю врагѝ низложи́въ, побѣдоно́сецъ зовы́й бы́лъ є҆сѝ: препѣ́тый гдⷭ҇и, бж҃е ѻ҆ц҃є́въ на́шихъ, благослове́нъ є҆сѝ.

Ѡ҆чи́стивъ мглꙋ̀, ѿ страсте́й бы́вшꙋю, безстра́стїѧ просвѣще́нїемъ ѡ҆зари́лсѧ є҆сѝ, зовы́й, блаже́нне: препѣ́тый гдⷭ҇и, бж҃е ѻ҆ц҃є́въ на́шихъ, благослове́нъ є҆сѝ.

Оу҆ѧсни́въ дꙋ́шꙋ добродѣ́тельными благолѣ́потами, красе́нъ добро́тою бг҃ꙋ бы́въ, пѣснопѣ́лъ є҆сѝ ра́дꙋѧсѧ: препѣ́тый гдⷭ҇и, бж҃е ѻ҆ц҃є́въ на́шихъ, благослове́нъ є҆сѝ.

Бг҃оро́диченъ:

Призыва́ѧ ны̀ плѣнє́нныѧ, дв҃о, во є҆́же бѣ́хомъ въ нача́лѣхъ, во чре́во твоѐ всели́всѧ, воплоти́сѧ человѣколю́бецъ гдⷭ҇и, бг҃ъ ѻ҆ц҃є́въ на́шихъ бл҃гослове́нный.

Пѣ́снь и҃. І҆рмо́съ:

Ѻ҆́троки бл҃гочести̑выѧ въ пещѝ рождество̀ бг҃оро́дичо спасло̀ є҆́сть, тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.

Глаго́лы жи́зни вѣ́чныѧ, всебл҃же́нне, въ се́рдцы твое́мъ прїе́мъ, пло́ть ᲂу҆вѧди́лъ є҆сѝ: мі́рꙋ же ᲂу҆мертви́лсѧ є҆сѝ, и҆ въ живоно́снꙋю ме́ртвость ѡ҆дѣ́ѧвсѧ, гдⷭ҇а по́йте, взыва́еши, и҆ превозноси́те є҆го̀ во всѧ̑ вѣ́ки.

Ми́лостива бы́ти, бг҃оно́се, є҆ди́наго бл҃года́телѧ молѝ, твою̀ всесвѧще́ннꙋю па́мѧть пра́зднꙋющымъ, согрѣше́нїй ѡ҆ставле́нїе си̑мъ и҆спроша́ѧ: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.

Ма́нїємъ къ бг҃ꙋ непреста̑ннымъ внима́ѧ, и҆ ѿѻнꙋ́днагѡ ѡ҆сїѧ́нїѧ зарю̀ прїе́млѧ, свѣ́тъ противосїѧ́ющїй проза́рный, ꙗ҆́кѡ зерца́ло, посыла́еши пою́щымъ: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.

На лѣ́ствицꙋ, къ небесѝ просте́ртꙋю, на не́йже ᲂу҆твержде́нъ ꙗ҆ви́сѧ гдⷭ҇ь, ѻ҆́ч҃е, возше́лъ є҆сѝ, бж҃е́ственными восхожде́ньми при́снѡ пред̾ꙋспѣва́ѧ, преподо́бне, до́ндеже дости́глъ є҆сѝ пою́щихъ: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.

Бг҃оро́диченъ:

Пое́мъ тѧ̀, ѡ҆бра́дованнаѧ, бг҃а бо воплоще́нна на́мъ родила̀ є҆сѝ. тѣ́мже бцⷣꙋ тѧ̀ всѝ и҆менꙋ́емъ, бг҃опрїѧ́тнꙋю трапе́зꙋ, добро́тꙋ і҆а́кѡвлю: гдⷭ҇а по́йте, дѣла̀, вопїю́ще, и҆ превозноси́те є҆го̀ во всѧ̑ вѣ́ки.

Пѣ́снь ѳ҃. І҆рмо́съ:

Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть, ты́ же, дв҃о бцⷣе, прозѧбе́нїемъ чревоноше́нїѧ мі́рови бл҃гослове́нїе процвѣла̀ є҆сѝ: тѣ́мъ тѧ̀ всѝ велича́емъ.

Слеза́ми ᲂу҆́бѡ по́стническими ни́вꙋ се́рдца твоегѡ̀ напои́лъ є҆сѝ: ра́дꙋѧсѧ же, ѻ҆́ч҃е бг҃оно́се, ны́нѣ въ ра́дости рꙋкоѧ̑ти собира́еши подвигѡ́въ по́чєсти: тѣ́мже тѧ̀ всѝ ᲂу҆блажа́емъ.

Незаходи́мый возсїѧ̀ тебѣ̀ свѣ́тъ, и҆ присносꙋ́щное весе́лїе воспрїѧ̀: и҆дѣ́же ликꙋ́ѧ со а҆́гг҃лы ѻ҆́крестъ цр҃ѧ̀ и҆ гдⷭ҇а, вѣ́рою соверша́ющыѧ па́мѧть твою̀ помина́й, ѻ҆́ч҃е всеблаже́нне.

Возмо́глъ є҆сѝ и҆збѣжа́ти де́мѡнѡвъ стрѣлѧ́нїѧ и҆ кова́рствїй лꙋка́выхъ: спасе́сѧ, бл҃же́нне, дꙋша̀ твоѧ̀, ст҃а̀, чиста̀ и҆ нескве́рна, наслѣ́дїѧ нбⷭ҇нагѡ сподо́бисѧ: помина́й ᲂу҆̀бо пою́щыѧ тѧ̀.

Зако́номъ, ѻ҆́ч҃е, страда́льческимъ подвиза́лсѧ є҆сѝ досто́йнѣ, и҆ побѣди́лъ є҆сѝ. тѣ́мже тѧ̀ сла́вы вѣнце́мъ є҆ди́нъ бл҃годѣ́тель почтѐ, и҆ бжⷭ҇твеннагѡ свѣтоѧвле́нїѧ сподо́би, и҆ блаже́нныхъ наслажде́нїй.

Бг҃оро́диченъ:

Ꙗ҆́кѡ всѣ́хъ тва́рей творца̀ ро́ждши, бг҃ома́ти, превозшла̀ є҆сѝ всю̀ тва́рь бжⷭ҇твенною сла́вою, и҆ ст҃ы́нею, и҆ бл҃года́тїю, и҆ всѧ́кими добродѣ́тели пе́рвшествы. тѣ́мже тѧ̀ всѝ велича́емъ.

Свѣти́ленъ, подо́бенъ: Нб҃о ѕвѣзда́ми:

А҆́гг҃льскагѡ житїѧ̀ жела́ѧ, ᲂу҆дали́лъ є҆сѝ тебѐ сама́го въ пꙋсты́нѧхъ, и҆ стра̑сти покори́въ плотскі̑ѧ, равноа́гг҃ленъ показа́лсѧ є҆сѝ, ѻ҆́ч҃е на́шъ бг҃оно́се.

Сла́ва, и҆ ны́нѣ, бг҃оро́диченъ:

Держа́внымъ твои́мъ покро́вомъ ѿ врагѡ́въ навѣ́та твоѧ̑ рабы̑, чⷭ҇таѧ, соблюдѝ всѧ̑ ны̀ неврє́дны: тѧ́ бо и҆́мамы є҆ди́нꙋ прибѣ́жище въ нꙋ́ждахъ.

На стїхо́внѣ ѻ҆ктѡ́иха. Сла́ва, гла́съ д҃: Просїѧ́ша дѡ́браѧ дѣла̀ твоѧ̑, ꙗ҆́кѡ со́лнце, на землѝ и҆ на нб҃сѝ, хрⷭ҇то́въ ᲂу҆го́дниче мака́рїе: правосла́внѡ бо проповѣ́далъ є҆сѝ на́мъ и҆́стиннꙋю и҆ непоро́чнꙋю вѣ́рꙋ хрⷭ҇то́вꙋ. тѣ́мже моли́сѧ, преподо́бне ѻ҆́ч҃е, въ па́мѧти твое́й, бг҃оно́се, дарова́ти на́мъ ве́лїю ми́лость.

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ: Подо́бенъ: Ꙗ҆́кѡ до́блѧ:

А҆́гнца и҆ па́стырѧ тѧ̀ ꙳ на дре́вѣ ꙗ҆́кѡ ви́дѣ, ꙳ а҆́гница ро́ждшаѧ рыда́ше, ꙳ и҆ мт҃рски тебѣ̀ вѣща́ше: ꙳ сн҃е вожделѣ́нне, ꙳ ка́кѡ на дре́вѣ кре́стнѣмъ ꙳ повѣ́шенъ є҆сѝ, долготерпѣли́ве; ꙳ ка́кѡ рꙋ́ки и҆ но́ги твоѧ̑, сло́ве, ꙳ пригвозди́шасѧ ѿ беззако́нныхъ, ꙳ и҆ кро́вь твою̀ и҆злїѧ́лъ є҆сѝ, влⷣко;

На лїтꙋргі́и: Блажє́нна, ѻ҆ктѡ́иха, на д҃: и҆ ст҃а́гѡ пѣ́снь ѕ҃-ѧ, на д҃: и҆ всѧ̀ слꙋ́жба сегѡ̀ мѣ́сѧца въ є҃і де́нь.


Комментарии для сайта Cackle