Библиотеке требуются волонтёры

Мѣ́сѧца тогѡ́же въ є҃-й де́нь. Ст҃ы́ѧ и҆ сла́вныѧ мч҃ницы і҆ри́ны.

Стїхи̑ры, гла́съ а҃. Подо́бенъ: Всехва́льнїи мч҃ницы:

Багрѧни́цею ѿ кро́ве твоеѧ̀ свѣ́тлѡ, ꙳ всечестна́ѧ, ѡ҆дѣ́ѧвшисѧ, ꙳ востекла̀ є҆сѝ, къ немꙋ́же вожделѣ́ла є҆сѝ, ꙳ цр҃ю̀ и҆ зижди́телю всѣ́хъ, и҆ гдⷭ҇ꙋ, ꙳ ѿ негѡ́же побѣ́дный вѣне́цъ ꙳ вои́стиннꙋ прїѧ́ла є҆сѝ. ꙳ съ ни́мъ же ны́нѣ ца́рствꙋеши ꙳ ꙗ҆́кѡ дѣ́ва и҆ мч҃ница, ꙳ многострада́льнаѧ.

Ѻ҆гнѧ̀ палѧ́щагѡ стремле́нїе ꙳ стерпѣ́ла є҆сѝ, прехва́льнаѧ, ꙳ и҆ строга̑нїѧ всѧ̑ тѣлє́снаѧ, ꙳ взира́ющи къ воздаѧ́нїємъ та́мѡшнимъ, всечестна́ѧ, ꙳ ꙗ҆̀же є҆ди́ный і҆и҃съ ꙳ пред̾ꙋгото́ва лю́бѧщымъ, ꙳ и҆ те́плѣ тогѡ̀ жела́ющымъ, ꙗ҆́кѡ жениха̀ дꙋ́шъ краснѣ́йшагѡ.

Ѡ҆слади́вшисѧ любо́вїю хрⷭ҇то́вою, ꙳ бо́ги возненави́дѣла є҆сѝ ꙗ҆зы́чєскїѧ, ꙳ и҆ бездꙋ̑шныѧ и҆стꙋка̑нныѧ, ꙳ і҆ри́но сла́внаѧ: ꙳ бг҃оразꙋ́мїѧ сто́лпъ ꙗ҆вле́ннѣйшїй, ꙳ себѐ зрѧ́щымъ возста́вила є҆сѝ, ꙳ ꙗ҆́кѡ пострада́вши, ꙳ и҆ тече́нїе сконча́вши, ꙳ и҆ вѣ́рꙋ непоро́чнꙋ соблю́дши.

Сла́ва, и҆ ны́нѣ, пра́здника. Тропа́рь, гла́съ д҃:

А҆́гница твоѧ̀, і҆и҃се, і҆ри́на, зове́тъ ве́лїимъ гла́сомъ, тебѐ, женишѐ мо́й, люблю̀, и҆ тебѐ и҆́щꙋщи страда́льчествꙋю и҆ сраспина́юсѧ, и҆ спогреба́юсѧ креще́нїю твоемꙋ̀, и҆ страждꙋ̀ тебє̀ ра́ди, ꙗ҆́кѡ да ца́рствꙋю въ тебѣ̀, и҆ ᲂу҆мира́ю за тѧ̀, да и҆ живꙋ̀ съ тобо́ю: но ꙗ҆́кѡ же́ртвꙋ непоро́чнꙋю прїими́ мѧ, съ любо́вїю поже́ршꙋюсѧ тебѣ̀. тоѧ̀ моли́твами, ꙗ҆́кѡ ми́лостивъ, спасѝ дꙋ́шы на́шѧ.

Канѡ́нъ, є҆гѡ́же краегране́сїе:

Твои́ми мѧ̀ моли́твами, мч҃нице і҆ри́но, покры́й.

Гла́съ д҃. Пѣ́снь а҃. І҆рмо́съ:

Воспою̀ тебѣ̀, гдⷭ҇и бж҃е мо́й, ꙗ҆́кѡ и҆зве́лъ є҆сѝ и҆з̾ рабо́ты є҆гѵ́петскїѧ, покры́лъ же є҆сѝ колесни̑цы фараѡ́нѡвы и҆ си́лꙋ.

Вѣне́цъ сы́й страстоно́сицы, сеѧ̀, хрⷭ҇тѐ, моли́твами, ми́ръ мі́рꙋ, и҆ сла́вꙋ неꙋвѧда́емꙋ пою́щымъ тѧ̀ да́рꙋй.

Заре́ю сїѧ́ющи дѣ́вства, ᲂу҆кра́шена добро́тою твоегѡ̀ мꙋче́нїѧ, і҆ри́но великоимени́таѧ, твоемꙋ̀ женихꙋ̀ предстои́ши.

Ми́лостивꙋ бы́ти цр҃квамъ, твоего̀ молѝ жениха̀, і҆ри́но бг҃омꙋ́драѧ, согрѣше́нїй же ѡ҆ставле́нїе пода́ти чтꙋ́щымъ тѧ̀.

Бг҃оро́диченъ:

Пло́ть бы́вша бг҃а сло́ва, и҆ сꙋ́щаго ꙗ҆́кѡ мы̀, ст҃а́ѧ дв҃о, неизрече́ннѡ родила̀ є҆сѝ, па́че сло́ва и҆ ра́зꙋма.

Пѣ́снь г҃. І҆рмо́съ:

Лꙋ́къ си́льныхъ и҆знемо́же, и҆ немощствꙋ́ющїи препоѧ́сашасѧ си́лою: сегѡ̀ ра́ди ᲂу҆тверди́сѧ въ гдⷭ҇ѣ се́рдце моѐ.

Мѵ́ра и҆злїѧ́вшагосѧ чꙋ́вствꙋющи, и҆ вселе́ннꙋю ѡ҆благоꙋха́вшаго бл҃года́тїю прїи́мши, воспери́сѧ къ жела́нїю сегѡ̀, сла́внаѧ.

И҆мѣ́ла є҆сѝ бг҃а помо́щника во твои́хъ по́двизѣхъ и҆ защища́юща, всемꙋ́драѧ: сегѡ̀ ра́ди вѣнча́вшисѧ, мꙋчи́телѧ побѣди́ла є҆сѝ.

Сто́лпъ добродѣ́тели непрекло́ненъ, и҆ бл҃гоче́стїѧ жили́ще бы́сть, и҆ мꙋ́жества, и҆ цѣломꙋ́дрїѧ прїѧ́телище, всехва́льнаѧ.

Бг҃оро́диченъ:

Те́кши до тебє̀ сме́рть ста̀, прирази́вшисѧ и҆зъ тебє̀ рожде́нномꙋ, всенепоро́чнаѧ: сегѡ̀ ра́ди безсме́ртїѧ нача́токъ тѧ̀ и҆менꙋ́емъ.

Конда́къ, гла́съ д҃. Подо́бенъ: Ꙗ҆ви́лсѧ є҆сѝ:

Дѣ́вства добро́тами преиспещре́нна, дѣ́во, страда́льчествомъ была̀ є҆сѝ краснѣ́йшаѧ, і҆ри́но, кровьмѝ твои́ми и҆сте́кшими ѡ҆багре́на, пре́лесть же низложи́вшаѧ безбо́жїѧ. сегѡ̀ ра́ди и҆ прїѧ́ла є҆сѝ по́чєсти побѣ́ды рꙋко́ю созда́телѧ твоегѡ̀.

Сѣда́ленъ, гла́съ и҃. Подо́бенъ: Воскре́слъ є҆сѝ:

Ми́ръ тебѣ̀ мно́гъ прибы́сть, мч҃нице, разрѣ́шшисѧ пло́ти по болѣ́знехъ мно́гихъ: ра́дꙋѧсѧ бо жени́хъ на нб҃сѣ́хъ тѧ̀ горѣ̀ прїѧ́тъ всепросвѣще́нꙋ, и҆ страда́нїемъ ѡ҆блиста́ющꙋ, и҆ въ черто́гъ бжⷭ҇твенный введѐ ра́дꙋющꙋсѧ.

Сла́ва, и҆ ны́нѣ, пра́здника.

Пѣ́снь д҃. І҆рмо́съ:

Твоегѡ̀ на землѝ ꙗ҆вле́нїѧ, хрⷭ҇тѐ бж҃е, проповѣ́даѧ прⷪ҇ро́къ прише́ствїе, съ весе́лїемъ вопїѧ́ше: сла́ва си́лѣ твое́й, гдⷭ҇и.

И҆́же ми́ръ тебѣ̀ подава́ѧй, мироимени́таѧ, ми́ра ра́ди посо́бствꙋющꙋ тѧ̀ ви́дѧ, мꙋжеподо́бнымъ ра́зꙋмомъ, мꙋ́ченице, и҆ крѣ́постїю и҆спо́лни.

Крѣ́пкимъ ᲂу҆се́рдїемъ превозше́дши же́нскꙋю не́мощь, пребл҃же́ннаѧ, тве́рдѡ и҆з̾ѡбличи́ла є҆сѝ, мч҃нице, ле́сти слꙋжа́щыѧ.

Бжⷭ҇твенное терпѣ́нїе показа́вши, мꙋчи́телей де́рзѡсти низложи́ла є҆сѝ, твоемꙋ̀ женихꙋ̀ зовꙋ́щи: сла́ва си́лѣ твое́й, гдⷭ҇и.

Пѣсносло́вїемъ немо́лчнымъ и҆ мольба́ми влⷣкꙋ, бг҃омꙋ́драѧ, пѣсносло́вила є҆сѝ, и҆ къ немꙋ̀ восте́кши, сла́вꙋ зри́ши неизрече́ннꙋю.

Бг҃оро́диченъ:

Ра́достнѡ тебѣ̀ веселѧ́щесѧ гла́сы, пречⷭ҇таѧ, тебє̀ ра́ди спа́сшїисѧ взыва́емъ: ра́дꙋйсѧ, дв҃о всечⷭ҇тна́ѧ, ра́дꙋйсѧ, бцⷣе всепѣ́таѧ.

Пѣ́снь є҃. І҆рмо́съ:

Просвѣще́нїе твоѐ, гдⷭ҇и, низпослѝ на́мъ, и҆ ѿ мглы̀ прегрѣше́нїй разрѣши́ ны, бл҃же, тво́й ми́ръ да́рꙋѧй.

Мꙋ́жескимъ, сла́внаѧ, ра́зꙋмомъ хрⷭ҇та̀ бг҃а всѣ́хъ ꙗ҆́снѡ и҆сповѣ́дала є҆сѝ: сло́вомъ же тве́рдымъ сопротивоборца̀, страстоте́рпице, посрами́ла є҆сѝ.

Послѣ́довати возжелѣ́ла є҆сѝ стрⷭ҇ти хрⷭ҇то́вѣ, и҆ подо́бїемъ те́плѣ послѣ́довала є҆сѝ, подви́жнѡ стра́ждꙋщи по влⷣцѣ, пребога́таѧ.

Полкѝ мꙋ́чєникъ, сла́внаѧ, привела̀ є҆сѝ хрⷭ҇тꙋ̀ твое́ю мꙋ́дростїю и҆ бг҃осло́вїемъ, сїѧ̑ и҆́стиннѡ тайноꙋча́щи сло́вомъ вѣ́ры.

Бг҃оро́диченъ:

Наꙋчи́вшисѧ та́йны зача́тїѧ твоегѡ̀, и҆ неизрече́ннагѡ и҆ бжⷭ҇твеннагѡ твоегѡ̀ ржⷭ҇тва̀, дв҃о, ны́нѣ всебл҃гоче́стнѡ пѣсносло́вимъ тѧ̀, бцⷣе всепѣ́таѧ.

Пѣ́снь ѕ҃. І҆рмо́съ:

Возопѝ, проѡбразꙋ́ѧ погребе́нїе тридне́вное, прⷪ҇ро́къ і҆ѡ́на, въ ки́тѣ молѧ́сѧ: ѿ тлѝ и҆зба́ви мѧ̀, і҆и҃се, цр҃ю̀ си́лъ.

И҆спра́вила є҆сѝ прама́тере є҆́ѵы паде́нїе, страстоте́рпице, врага̀ низложи́вши си́лꙋ, и҆ побѣди́вши ѻ҆́нагѡ шата́нїе бжⷭ҇твенною бл҃года́тїю.

Крѣ́пость стѧжа́вши, і҆ри́но, ра́зꙋма, мꙋчи́телємъ сꙋпроти́виласѧ є҆сѝ дꙋшѝ до́блестїю, и҆ вѣнце́мъ побѣ́днымъ ѿ хрⷭ҇та̀ бг҃а вѣнча́ласѧ є҆сѝ.

Кро́вїю страда́нїѧ, мч҃нице, свѣтлѣ́йшꙋ содѣ́лала є҆сѝ є҆сте́ственнꙋю добро́тꙋ, чи́стаѧ, до́блествєнныѧ по́двиги под̾е́мши тве́рдѡ, до́браѧ дѣ́во.

Бг҃оро́диченъ:

Проѧвѝ та́йнꙋ твоегѡ̀ ржⷭ҇тва̀ бг҃ови́децъ, горѧ́щꙋ кꙋпинꙋ̀ ви́дѣ и҆ неѡпалѧ́емꙋ, бцⷣе чⷭ҇таѧ, приснодв҃о.

Конда́къ пра́здника и҆ і҆́косъ.

Пѣ́снь з҃. І҆рмо́съ:

А҆враа́мстїи и҆ногда̀ въ вавѷлѡ́нѣ ѻ҆́троцы пе́щный пла́мень попра́ша, пѣ́сньми взыва́юще: ѻ҆тє́цъ на́шихъ бж҃е, бл҃гослове́нъ є҆сѝ.

Вѣнцено́снѡ, мч҃нице, предстоѧ́щи прⷭ҇то́лꙋ твоегѡ̀ влⷣки, соблюдѝ вѣ́рою зовꙋ́щыѧ: ѻ҆тє́цъ на́шихъ бж҃е, бл҃гослове́нъ є҆сѝ.

Въ нбⷭ҇ныхъ селе́нїихъ ликова́ти, мч҃нице, сподо́биласѧ є҆сѝ, досточꙋ́днаѧ і҆ри́но, зовꙋ́щи: ѻ҆тє́цъ на́шихъ бж҃е, бл҃гослове́нъ є҆сѝ.

Жела́ющи ᲂу҆лꙋчи́ти рачи́телѧ твоегѡ̀ добро́ты, мꙋче́нїѧ болѣ̑зни претерпѣ́ла є҆сѝ, і҆ри́но, зовꙋ́щи: ѻ҆тє́цъ на́шихъ бж҃е, бл҃гослове́нъ є҆сѝ.

Бг҃оро́диченъ:

Глаго́лѡмъ ᲂу҆сте́нъ твои́хъ послѣ́дꙋюще, вѣ́рою тѧ̀, бг҃ома́ти, ᲂу҆блажа́емъ, вопїю́ще ржⷭ҇твꙋ̀ твоемꙋ̀: ѻ҆тє́цъ на́шихъ бж҃е, бл҃гослове́нъ є҆сѝ.

Пѣ́снь и҃. І҆рмо́съ:

Ѻ҆́троки бл҃гочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть, тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте, дѣла̀, и҆ превозноси́те є҆го̀ во всѧ̑ вѣ́ки.

Пострада́ла є҆сѝ, і҆ри́но бл҃же́ннаѧ, до́блѣ, и҆ мꙋчи́телѧ низложи́ла є҆сѝ, и҆мꙋ́щи посо́бїе непобѣди́мое, влⷣки твоегѡ̀ си́лꙋ, и҆ содѣ́йствꙋющꙋ тебѣ̀: и҆ гдⷭ҇а по́йте, вопїѧ́ла є҆сѝ, и҆ превозноси́те є҆го̀ во вѣ́ки.

Ю҆́ношескою любо́вїю ᲂу҆ѧ́звена, во слѣ́дъ твоегѡ̀ жениха̀ послѣ́довала є҆сѝ, сегѡ̀ страда̑нїѧ, мч҃нице, и҆ ра̑ны на тѣ́лѣ твое́мъ носѧ́щи и҆ вопїю́щи: гдⷭ҇а по́йте, дѣла̀, и҆ превозноси́те є҆го̀ во вѣ́ки.

Твоѐ є҆́же въ мꙋ́кахъ терпѣ́нїе, і҆ри́но вѣнцено́сице, посмѣѧ́сѧ сꙋ́етїю и҆ безбо́жїю надѣ́ющымсѧ, сла́внаѧ, вѣ́рою же поѧ́ше: гдⷭ҇а воспѣва́йте, дѣла̀, и҆ превозноси́те є҆го̀ во вѣ́ки.

Бг҃оро́диченъ:

Мꙋ́дрость бж҃їѧ всѣ́хъ хитре́цъ, во твоѐ чре́во, бг҃ома́ти, все́льшисѧ, хра́мъ созда̀, разꙋ́менъ же и҆ ѡ҆дꙋшевле́нъ себѣ̀, и҆ спасѐ мі́ръ зовꙋ́щїй: гдⷭ҇а воспѣва́йте, дѣла̀, и҆ превозноси́те є҆го̀ во вѣ́ки.

Пѣ́снь ѳ҃. І҆рмо́съ:

Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть: ты́ же, дв҃о бцⷣе, прозѧбе́нїемъ чревоноше́нїѧ мі́рови бл҃гослове́нїе процвѣла̀ є҆сѝ. тѣ́мъ тѧ̀ всѝ велича́емъ.

Ѻ҆́крестъ твоегѡ̀ рачи́телѧ ликꙋ́ющи въ вы́шнихъ, до́браѧ дѣ́во, и҆спросѝ мі́рꙋ ми́ръ, і҆ри́но, и҆ согрѣше́нїй ѡ҆ставле́нїе вѣ́рою творѧ́щымъ па́мѧть твою̀ свѣтоно́снꙋю и҆ свѧще́ннꙋю.

Внꙋ́трь тѧ̀ черто́га хрⷭ҇то́съ, ꙗ҆́кѡ мч҃ницꙋ и҆ дѣ́вꙋ, вселѝ, и҆дѣ́же съ дѣ́вами ра́дꙋешисѧ, и҆ съ мꙋ́ченическими во́инствы, і҆ри́но вѣнцено́сице всехва́льнаѧ: тѣ́мже тѧ̀ всѝ ᲂу҆блажа́емъ.

Двє́ри ѿве́рзъ нбⷭ҇ныѧ, прїѧ́тъ дꙋ́шꙋ твою̀ всенепоро́чнꙋю, є҆ди́нъ всѣ́ми црⷭ҇твꙋѧй, и҆ пра́вды строи́тель, і҆ри́но, бжⷭ҇твеннагѡ ми́ра тезоимени́таѧ: тѣ́мже тѧ̀ всѝ ᲂу҆блажа́емъ.

Бг҃оро́диченъ:

И҆мꙋ́щи къ твоемꙋ̀ сн҃ꙋ, пренепоро́чнаѧ, дерзнове́нїе непосты́дно, сего̀ ᲂу҆молѝ низпосла́ти мі́рꙋ ми́рно ᲂу҆строе́нїе, и҆ всѣ̑мъ цр҃квамъ є҆диномышле́нїе, да тѧ̀ всѝ велича́емъ.

Комментарии для сайта Cackle