Мѣ́сѧца тогѡ́же въ ѕ҃і-й де́нь. Ст҃ы́хъ мꙋ́чєникъ, саві́на и҆ па́пы.
На Гдⷭ҇и, воззва́хъ, стїхи̑ры, гла́съ и҃. Поⷣ: Что̀ ва́съ нарече́мъ:
Что́ тѧ и҆менꙋ́емъ, сла́вне; ꙳ во́ина си́льнаго цр҃ѧ̀ и҆ бг҃а, ꙳ безпло́тныхъ ѕлоче́стїе низло́жша мꙋ́жески, ꙳ свѣти́льника, мы́сленный свѣ́тъ ѡ҆блиста́юща, ꙳ і҆́дѡлѡвъ гꙋби́телѧ преси́льна, ꙳ и҆ подви́жника прете́плаго, ꙳ и҆ страда́льца зако́ннѣйшаго. ꙳ Молѝ спасти́сѧ дꙋша́мъ на́шымъ.
Что́ тѧ ны́нѣ, саві́не, пронарече́мъ; ꙳ рѣкꙋ̀ воды̀ живо́тныѧ, ꙳ лїю́щꙋ на́мъ широтꙋ̀ дх҃о́внꙋю, ꙳ ᲂу҆тѣснє́нымъ въ лю́тыхъ, ꙳ наводне́нїе и҆сцѣле́нїй неизживꙋ́щее, ꙳ ча́шꙋ, пи́во ст҃о́е пролива́ющꙋю, ꙳ чꙋдодѣ́телѧ и҆́стиннѣйша, ꙳ безпло́тныхъ равноче́стнаго. ꙳ Молѝ спасти́сѧ дꙋша́мъ на́шымъ.
Что́ тѧ провѣща́емъ, ст҃ы́й; ꙳ заблꙋ́ждшихъ наста́вника и҆лѝ моли́твенника грѣ́шникѡвъ, ꙳ врача̀ сꙋ́щымъ въ лю́тыхъ ѡ҆бꙋрева́ємымъ и҆́стиннаго, ꙳ бл҃гоꙋха́ненъ раѧ̀ крі́нъ че́стенъ, ꙳ нача́токъ мꙋ́ченикѡвъ и҆ ᲂу҆твержде́нїе, ꙳ и҆сто́чника чꙋде́съ приснотекꙋ́щаго, ꙳ подви́жника до́блѧго. ꙳ Молѝ спасти́сѧ дꙋша́мъ на́шымъ.
Сла́ва, и҆ ны́нѣ, бг҃оро́диченъ:
Комꙋ̀ ᲂу҆подо́биласѧ є҆сѝ, ѻ҆каѧ́ннаѧ дꙋшѐ, ꙳ къ покаѧ́нїю ника́коже возни́чꙋщи, и҆ ѻ҆гнѧ̀ не ᲂу҆жаса́ющисѧ, ѕлы́хъ ѡ҆жида́ющагѡ; ꙳ воста́ни, и҆ є҆ди́нꙋ къ застꙋпле́нїю ско́рꙋю призовѝ, и҆ возопі́й: ꙳ дв҃о мт҃и, молѝ твоего̀ сн҃а и҆ бг҃а на́шего ꙳ и҆зба́вити мѧ̀ ѿ сѣ́ти льсти́вагѡ.
Крⷭ҇тобг҃оро́диченъ:
А҆́гница а҆́гнца ꙗ҆́кѡ ви́дѣ ꙳ на дре́вѣ просте́рта во́лею крⷭ҇тнѣмъ, ꙳ вопїѧ́ше мт҃рски, ꙳ болѣ́знꙋющи съ пла́чемъ. ꙳ сн҃е мо́й, ꙳ что̀ стра́нное сїѐ видѣ́нїе; ꙳ всѣ̑мъ живо́тъ даѧ́й ꙗ҆́кѡ гдⷭ҇ь, ꙳ ка́кѡ ᲂу҆мерщвлѧ́ешисѧ, долготерпѣли́ве, ꙳ земны̑мъ подаѧ̀ воскресе́нїе; ꙳ сла́влю твоѐ мно́гое, бж҃е мо́й, снизхожде́нїе.
Канѡ́нъ, є҆гѡ́же краегране́сїе: Страда́льчески саві́на восхвалю̀ любо́вїю. Кѵ́ръ ѳеофа́на.
Гла́съ и҃. Пѣ́снь а҃. І҆рмо́съ:
Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.
Нетлѣ́ннагѡ и҆ бжⷭ҇твеннагѡ пребыва́нїѧ, и҆ непости́жныхъ наслажда́ѧсѧ ны́нѣ бла̑гъ, саві́не съ мꙋ́ченики, бг҃омꙋ́дре, восхвалѧ́ющыѧ тѧ̀ спаса́й.
Же́ртвꙋ хвале́нїѧ хрⷭ҇тꙋ̀ себѐ ѡ҆свѧща́ѧ, къ страда́нїємъ терпѣли́внѡ, въ пꙋсты́нѧхъ ᲂу҆дали́лсѧ є҆сѝ, саві́не, по́стническими ѡ҆бꙋча́ѧсѧ по́двиги.
Цвѣтцы̀ наслади́всѧ дꙋхо́вными, ра́й ꙗ҆ви́лсѧ є҆сѝ ᲂу҆кра́шенъ добродѣ́тельми, ѡ҆б̾е́млемь мече́мъ мꙋче́нїѧ, и҆ снѣ́дь бг҃ꙋ познава́емь.
Бг҃оро́диченъ:
Ѿбѣжѐ сме́ртное сѣ́тованїе: живо́тъ бо и҆зъ ᲂу҆тро́бы твоеѧ̀ во ѵ҆поста́си бг҃ъ про́йде несказа́ннѡ, бцⷣе, ѡ҆бновлѧ́ѧй, дв҃о, є҆стество̀ на́ше.
Пѣ́снь г҃. І҆рмо́съ:
Ты̀ є҆сѝ ᲂу҆твержде́нїе притека́ющихъ къ тебѣ̀, гдⷭ҇и, ты̀ є҆сѝ свѣ́тъ ѡ҆мраче́нныхъ, и҆ пое́тъ тѧ̀ дꙋ́хъ мо́й.
Хра́мъ содѣ́лавъ чⷭ҇тꙋю твою̀ дꙋ́шꙋ, прїѧ́лъ є҆сѝ въ ню̀ бг҃а, и҆ хра́мы дє́мѡнскїѧ, ѽ саві́не, низложи́лъ є҆сѝ.
Два́жды.
Ми́лостива ра́ди ми́лости бг҃а ѡ҆брѣ́тъ, стрⷭ҇те́мъ є҆гѡ̀ подража́тель бы́лъ є҆сѝ, преда́телю ᲂу҆ченикꙋ̀ бы́вшꙋ.
Бг҃оро́диченъ:
Бг҃а ро́ждши, всеѧ̀ тва́ри влⷣчце, ꙗ҆́кѡ вои́стиннꙋ є҆ди́на бцⷣа, превы́шшаѧ ꙗ҆ви́ласѧ є҆сѝ.
Сѣда́ленъ, гла́съ и҃. Подо́бенъ: Премꙋ́дрости:
Свѧза́всѧ любо́вїю и҆зба́вителѧ, ꙗ҆́звы многоѻбра̑зны и҆ растерза̑нїѧ претерпѣ́лъ є҆сѝ, ст҃е, мꙋ́жественнымъ мꙋдрова́нїемъ: въ рѣкꙋ́ же вве́рженъ бы́въ, коне́цъ ст҃ы́й въ не́й прїѧ́лъ є҆сѝ, и҆ бога́тство многоцѣ́нно всѣ̑мъ пода́лсѧ є҆сѝ, и҆сточа́ѧ и҆сцѣлє́нїѧ, и҆ рѣша́ѧ недꙋ́ги вѣ́рнѡ притека́ющымъ къ тебѣ̀, саві́не блаже́нне. Молѝ хрⷭ҇та̀ бг҃а прегрѣше́нїй ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть твою̀.
Сла́ва, и҆ ны́нѣ, бг҃оро́диченъ:
Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безъ сѣ́мене ро́ждшꙋю бг҃а пло́тїю, всѝ ᲂу҆блажа́емъ ро́ди человѣ́честїи: ѻ҆́гнь бо всели́сѧ въ тѧ̀ бж҃ества̀, и҆ ꙗ҆́кѡ младе́нца млеко́мъ пита́еши зижди́телѧ и҆ гдⷭ҇а. Тѣ́мъ а҆́гг҃льскїй и҆ человѣ́ческїй ро́дъ, досто́йнѡ сла́вимъ прест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти покланѧ́ющымсѧ вѣ́рою прест҃о́мꙋ ржⷭ҇твꙋ̀ твоемꙋ̀.
Крⷭ҇тобг҃оро́диченъ:
А҆́гнца и҆ па́стырѧ, и҆ и҆зба́вителѧ а҆́гница зрѧ́щи на крⷭ҇тѣ̀, восклица́ше пла́чꙋщи, и҆ го́рькѡ рыда́ющи, вопїѧ́ше: мі́ръ ᲂу҆́бѡ ра́дꙋетсѧ, прїе́млѧй тобо́ю и҆збавле́нїе, ᲂу҆тро́ба же моѧ̀ гори́тъ, зрѧ́щи твоѐ распѧ́тїе, є҆́же терпи́ши за милосе́рдїе ми́лости. Долготерпѣли́ве гдⷭ҇и, ми́лости бе́здно и҆ и҆сто́чниче неисчерпа́емый, ᲂу҆милосе́рдисѧ, и҆ да́рꙋй согрѣше́нїй ѡ҆ставле́нїе вѣ́рою пою́щымъ бж҃е́ствєнныѧ стрⷭ҇ти твоѧ̑.
Пѣ́снь д҃. І҆рмо́съ:
Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бжⷭ҇тво̀.
Ꙗ҆́кѡ а҆́гнѧ води́мо, мꙋ́чениче, на же́ртвꙋ, ника́коже провѣща́лъ є҆сѝ, влⷣцѣ твоемꙋ̀ подо́бѧсѧ, є҆гѡ́же ра́ди и҆ сме́рть пренебре́глъ є҆сѝ.
Цѣломꙋ́дрїемъ ᲂу҆краша́емь, и҆ съ си́мъ живы́й, строга̑нїѧ и҆ ра̑ны тве́рдымъ ᲂу҆мо́мъ твои́мъ терпѣ́въ, врагѝ, саві́не, низложи́лъ є҆сѝ.
Плотски́ми твои́ми ᲂу҆́ды, мч҃ниче, хрⷭ҇та̀ просла́вивъ, прїѧ́лъ є҆сѝ съ пра́ведныхъ дꙋ́хи весе́лїе бжⷭ҇твенное и҆ непогиба́ющее.
Бг҃оро́диченъ:
Наслажда́ющесѧ, пречⷭ҇таѧ, твои́хъ дарова́нїй, тебѣ̀ благода́рственное воспѣва́емъ пѣ́нїе, вѣ́дꙋще тѧ̀ бг҃ома́терь.
Пѣ́снь є҃. І҆рмо́съ:
Просвѣтѝ на́съ повелѣ̑нїи твои́ми, гдⷭ҇и, и҆ мы́шцею твое́ю высо́кою тво́й ми́ръ пода́ждь на́мъ, чл҃вѣколю́бче.
Тѧготꙋ̀ строга́ньми пло́ти твоеѧ̀ ѿло́жь, дꙋ́шꙋ ᲂу҆ѧсни́въ, впери́лъ є҆сѝ, бж҃їй саві́не, къ бж҃е́ственномꙋ и҆ и҆́стинномꙋ наслажде́нїю.
Два́жды.
Да сла́дости пото́къ, и҆ нетлѣ́нїѧ добро́тꙋ ѡ҆брѧ́щеши, пресла́вне, текꙋ́щꙋю мі́ра ꙗ҆́вѣ ѡ҆плева́лъ є҆сѝ.
Бг҃оро́диченъ:
Оу҆мертвѝ, чⷭ҇таѧ, стрⷭ҇те́й мои́хъ взыгра̑нїѧ, тлѣ́нїѧ и҆збавлѧ́ющи мѧ̀, и҆ безстра́стїѧ спасе́нїе мнѣ̀ подаю́щи.
Пѣ́снь ѕ҃. І҆рмо́съ:
Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ.
Ника́коже ѡ҆ привре́менныхъ бре́гъ, ꙗ҆́коже въ чꙋжде́й пло́ти претерпѣ́лъ є҆сѝ ꙗ҆́звы, свѧза̑нїѧ, терза̑нїѧ, жжє́нїѧ, и҆ кончи́нꙋ бл҃же́ннꙋю прїе́мъ, ѿ хрⷭ҇та̀ вѣнцє́въ сла́вы, саві́не, ᲂу҆лꙋчи́лъ є҆сѝ.
Два́жды.
Во́дъ ꙗ҆́кѡ вои́стиннꙋ и҆спо́лнисѧ живото́чныхъ хрⷭ҇то́ва цр҃ковь, и҆зъ глꙋбины̀ рѣ́чныхъ во́дъ, тѧ̀ и҆сто́чника чꙋде́съ ѡ҆богати́вшисѧ, ѡ҆брѣ́тши же себѣ̀ би́серъ, саві́не, многоцѣ́ненъ.
Бг҃оро́диченъ:
И҆спра́вила є҆сѝ па́дшее сꙋщество̀, твои́мъ ржⷭ҇тво́мъ, бцⷣе дв҃о, зижди́телѧ и҆ влⷣкꙋ ро́ждши, на́шѧ не́мѡщи поне́сшаго, и҆ спа́сшаго ны̀ ѿ тлѝ сме́ртныѧ стрⷭ҇тїю свое́ю.
Конда́къ, гла́съ в҃. Подо́бенъ: Твє́рдыѧ:
Бжⷭ҇твєннаѧ прозѧбє́нїѧ, цвѣ́тъ неꙋвѧда́ющїй, розга̀ многопло́днаѧ, бг҃оно́се саві́не, и҆̀же вѣ́рою чтꙋ́щихъ па́мѧть твою̀, весе́лїѧ твоегѡ̀ и҆спо́лни, и҆ моли́сѧ непреста́ннѡ ѡ҆ всѣ́хъ на́съ.
Пѣ́снь з҃. І҆рмо́съ:
Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.
Да сла́вꙋ нетлѣ́ннꙋю прїи́меши, сла́вꙋ ѡ҆плева́лъ є҆сѝ житїѧ̀, сла́вы ра́ди бж҃їѧ наслажда́ѧсѧ въ мꙋ́кахъ, саві́не, зовы́й непреста́ннѡ: бж҃е, бл҃гослове́нъ є҆сѝ.
Два́жды.
Ма́нїемъ бжⷭ҇твеннымъ влⷣки ѿве́рглъ є҆сѝ безбо́жныхъ ме́рзость, бж҃е́ственнꙋю ꙗ҆́вѣ и҆збра́въ мꙋ́дрость, саві́не, поѧ̀ непреста́ннѡ: бж҃е, бл҃гослове́нъ є҆сѝ.
Бг҃оро́диченъ:
Спасѐ мі́ръ, бцⷣе, ѿ ᲂу҆тро́бы твоеѧ̀ вопло́щшеесѧ сло́во бжⷭ҇твенное, є҆го́же почита́юще пое́мъ тѧ̀, вопїю́ще: благослове́нъ, пречⷭ҇таѧ, пло́дъ твоегѡ̀ чре́ва.
Пѣ́снь и҃. І҆рмо́съ:
Мꙋсїкі̑йскимъ ѻ҆рга́нѡмъ согласꙋ́ющымъ, и҆ лю́демъ безчи́слєннымъ покланѧ́ющымсѧ ѻ҆́бразꙋ въ деи́рѣ, трѝ ѻ҆́троцы не повинꙋ́вшесѧ, гдⷭ҇а воспѣва́хꙋ и҆ славословлѧ́хꙋ во всѧ̑ вѣ́ки.
Прекриве́нъ бы́въ мꙋчи́телей сꙋровствы̀, хрⷭ҇то́вою же любо́вїю и҆спра́вленъ, неѿе́млемо ѡ҆брѣ́лъ є҆сѝ та́мѡ безстра́стїе, саві́не, поѧ̀ пѣ́снь гдⷭ҇еви: тѧ̀ превозно́симъ во всѧ̑ вѣ́ки.
Два́жды.
Оу҆краси́лсѧ є҆сѝ, мч҃ниче, воздержа́нїемъ, ᲂу҆ѧсни́лсѧ є҆сѝ страда́нїй лѣ́потою, и҆ просїѧ́лъ є҆сѝ ꙗ҆́коже ѕвѣзда̀ зовꙋ́щымъ: по́йте гдⷭ҇а, всѧ̑ дѣла̀, и҆ превозноси́те во всѧ̑ вѣ́ки.
Бг҃оро́диченъ:
Дѣ́вства просїѧ́ла є҆сѝ заре́ю, мы́сленнагѡ бо сл҃нца ѻ҆́блакъ была̀ є҆сѝ мт҃и бж҃їѧ, ᲂу҆гаси́вшагѡ і҆́дѡльскагѡ пе́щь неи́стовства: є҆го́же превозно́симъ во всѧ̑ вѣ́ки.
Пѣ́снь ѳ҃. І҆рмо́съ:
Вои́стиннꙋ бцⷣꙋ тѧ̀ и҆сповѣ́дꙋемъ спасе́ннїи тобо́ю, дв҃о чⷭ҇таѧ, съ безпло́тными ли́ки тѧ̀ велича́юще.
Оу҆стреми́всѧ любо́вїю всѣ́хъ бг҃а, рѣчны̑ѧ во́лны попра́лъ є҆сѝ, въ нетлѣ́нїѧ приста́нище дости́гъ, мꙋ́чениче сла́вне.
Два́жды.
Ѡ҆снова́нїе вѣ́рꙋ и҆мѣ́ѧ сп҃совꙋ, прилѡ́гъ безбо́жныхъ не ᲂу҆страши́лсѧ є҆сѝ, но и҆зъ глꙋбины̀ къ тишинѣ̀ жи́зни ᲂу҆стреми́лсѧ є҆сѝ.
Бг҃оро́диченъ:
Ꙗ҆́кѡ стѣ́нꙋ тѧ̀ и҆ покро́въ, и҆ ꙗ҆́кѡ предста́тельницꙋ є҆ди́нꙋ, чⷭ҇таѧ, и҆ спасе́нїе и҆мꙋ́ще, ѿ бѣ́дъ и҆ прегрѣше́нїй, при́снѡ и҆збавлѧ́емсѧ.