Мѣ́сѧца тогѡ́же въ ѳ҃-й де́нь. Пра́зднество прест҃ѣ́й влⷣчцѣ на́шей бг҃оро́дицѣ ра́ди а҆ѳѡ́нскїѧ чꙋдотво́рныѧ є҆ѧ̀ і҆кѡ́ны, нарица́емыѧ скоропослꙋ́шница.
На вече́рни. Бл҃же́нъ мꙋ́жъ: а҃-й а҆нтїфѡ́нъ.
На Гдⷭ҇и воззва́хъ: стїхи̑ры, гла́съ а҃.
Дне́сь любо́вїю пра́зднꙋюще бг҃оро́дицѣ, честно́мꙋ ѻ҆́бразꙋ є҆ѧ̀ поклони́мсѧ и҆ те́плѣ возопїи́мъ: мт҃рнее дерзнове́нїе къ сн҃ꙋ твоемꙋ̀ и҆ бг҃ꙋ, дв҃о, и҆мꙋ́щи, и҆спросѝ на́мъ ᲂу҆ негѡ̀ проще́нїе грѣхѡ́въ, ми́ръ и҆ ве́лїю ми́лость.
Хра́мъ бжⷭ҇тва̀ сꙋ́щаѧ, вмѣсти́лище простра́нное бл҃года́ти и҆ милосе́рдїѧ ꙗ҆ви́ласѧ є҆сѝ, бг҃оневѣ́сто. ᲂу҆слы́ши ᲂу҆̀бо ско́рѡ рабѡ́въ твои́хъ, всебл҃га́ѧ скоропослꙋ́шнице, и҆ пода́ждь скорбѧ́щымъ ᲂу҆тѣше́нїе, бѣ́дствꙋющымъ ѿ бѣ́дъ и҆збавле́нїе, болѧ́щымъ здра́вїе и҆ всѣ̑мъ вѣ̑рнымъ ве́лїю ми́лость.
При́зри съ нб҃сѐ, бг҃оро́дице, на предстоѧ́щыѧ пред̾ ст҃о́ю і҆кѡ́ною твое́ю и҆ тебѐ съ вѣ́рою призыва́ющыѧ, и҆ бл҃года́ть твою̀ низпослѝ на́мъ, да бг҃оꙋго́днѡ по́прище жи́зни на́шеѧ пре́йдемъ и҆ да сподо́бимсѧ твои́мъ хода́тайствомъ ѿ сн҃а твоегѡ̀ прїѧ́ти ве́лїю ми́лость.
И҆́ны стїхи̑ры, гла́съ д҃:
Весели́сѧ, дохїа́рскаѧ ѻ҆би́тель а҆рха́гг҃лѡвъ, ра́дꙋйтесѧ, сꙋ́щїи во а҆ѳѡ́нѣ и҆ повсю́дꙋ, вѣ́рнїи: ѻ҆́бщаѧ бо всѣ́хъ застꙋ́пница восхотѣ̀ бы́ти ско́раѧ молѧ́щихсѧ ᲂу҆слы́шательница вели́кїѧ ра́ди своеѧ̀ ми́лости.
Прите́кше под̾ кро́въ кри́лъ нбⷭ҇ныхъ во́инствъ а҆рхїстрати́гѡвъ, притеце́мъ и҆ под̾ кро́въ нб҃сѐ и҆ землѝ влⷣчцы, бл҃гоꙋтро́бнѡ бо прїе́млетъ и҆ ско́рѡ вне́млетъ проше́нїємъ, ꙗ҆́кѡ всебл҃га́ѧ скоропослꙋ́шница, къ ѻ҆́бразꙋ є҆ѧ̀ со благоговѣ́нїемъ прибѣга́ющихъ вели́кїѧ ра́ди своеѧ̀ ми́лости.
Бг҃оизбра́ннаѧ дв҃о всецр҃и́це, и҆́нокѡвъ неѡбори́мый покро́ве и҆ всѣ́хъ хрⷭ҇тїа́нъ непосты́дное прибѣ́жище, хранѝ жре́бїй тво́й, рѡссі́ю и҆ всѧ̑ гра́ды, вє́си и҆ ѡ҆би́тели правѡсла́вныѧ невреди̑мы ѿ вра̑гъ ви́димыхъ и҆ неви́димыхъ, и҆ всѣ́хъ на́съ застꙋпѝ и҆ сп҃сѝ вели́кїѧ ра́ди твоеѧ̀ ми́лости.
Сла́ва, и҆ ны́нѣ, гла́съ з҃:
Є҆гда̀ трапеза́рь дохїа́рскїй ні́лъ лиши́сѧ зрѣ́нїѧ за є҆́же не внѧ́ти гла́сꙋ твоемꙋ̀, пречⷭ҇таѧ, и҆ принесѐ тебѣ̀ покаѧ́нїе пред̾ ст҃о́ю і҆кѡ́ною твое́ю, благоволи́ла є҆сѝ рещѝ є҆мꙋ̀: ѽ и҆́ноче, ᲂу҆слы́шасѧ моле́нїе твоѐ ко мнѣ̀, бꙋ́ди проще́нъ и҆ зрѧ́й, ꙗ҆́кѡ и҆ пре́жде, возвѣсти́ же и҆ про́чымъ подвиза́ющымсѧ ѻ҆тцє́мъ и҆ собра́тїѧмъ твои̑мъ, ꙗ҆́кѡ а҆́зъ є҆́смь мт҃рь бг҃а сло́ва и҆ сщ҃е́нныѧ ѻ҆би́тели а҆рха́гг҃лѡвъ по бз҃ѣ покро́въ, и҆ по́мощь, и҆ держа́вное предста́тельство, промышлѧ́ющаѧ ѡ҆ не́й, ꙗ҆́кѡ взбра́ннаѧ прави́тельница. и҆ впре́дь и҆́ноцы да прибѣга́ютъ ко мнѣ̀ во всѧ́кой и҆́хъ нꙋ́ждѣ, и҆ ско́рѡ и҆́мамъ слꙋ́шати и҆̀хъ и҆ всѣ́хъ, со благоговѣ́нїемъ прибѣга́ющихъ ко мнѣ̀ правосла́вныхъ хрⷭ҇тїа́нъ, се́ бо скоропослꙋ́шница нарица́юсѧ.
Вхо́дъ. Прокі́менъ днѐ и҆ чтє́нїѧ.
Бытїѧ̀ чте́нїе.
[Глава̀ к҃и] И҆зы́де і҆а́кѡвъ ѿ стꙋденца̀ клѧ́твеннагѡ, и҆ и҆́де въ харра́нъ. И҆ ѡ҆брѣ́те мѣ́сто, и҆ спа̀ та́мѡ: за́йде бо со́лнце. И҆ взѧ́тъ ѿ ка́менїѧ мѣ́ста тогѡ̀, и҆ положѝ возгла́вїе себѣ̀, и҆ спа̀ на мѣ́стѣ ѻ҆́номъ. И҆ со́нъ ви́дѣ: сѐ лѣ́ствица ᲂу҆твержде́на на землѝ, є҆ѧ́же глава̀ досѧза́ше до небе́съ, и҆ а҆́гг҃ли бж҃їи восхожда́хꙋ и҆ низхожда́хꙋ по не́й. Гдⷭ҇ь же ᲂу҆твержда́шесѧ на не́й, и҆ речѐ: а҆́зъ бг҃ъ а҆враа́мовъ, ѻ҆тца̀ твоегѡ̀, и҆ бг҃ъ і҆саа́ковъ, не бо́йсѧ: землѧ̀, и҆дѣ́же ты̀ спи́ши на не́й, тебѣ̀ да́мъ ю҆̀, и҆ сѣ́мени твоемꙋ̀ И҆ бꙋ́детъ сѣ́мѧ твоѐ ꙗ҆́кѡ песо́къ земны́й, и҆ распространи́тсѧ на мо́ре, и҆ лі́вꙋ, и҆ сѣ́веръ, и҆ на восто́ки: и҆ возбл҃гословѧ́тсѧ ѡ҆ тебѣ̀ всѧ̑ колѣ̑на земна̑ѧ, и҆ ѡ҆ сѣ́мени твое́мъ. И҆ сѐ а҆́зъ съ тобо́ю сохранѧ́ѧй тѧ̀ на всѧ́комъ пꙋтѝ, а҆́може а҆́ще по́йдеши, и҆ возвращꙋ́ тѧ въ зе́млю сїю̀: ꙗ҆́кѡ не и҆́мамъ тебѐ ѡ҆ста́вити, до́ндеже сотвори́ти мѝ всѧ̑, є҆ли̑ка глаго́лахъ тебѣ̀. И҆ воста̀ і҆а́кѡвъ ѿ сна̀ своегѡ̀, и҆ речѐ: ꙗ҆́кѡ є҆́сть гдⷭ҇ь на мѣ́стѣ се́мъ, а҆́зъ же не вѣ́дѣхъ. И҆ ᲂу҆боѧ́сѧ, и҆ речѐ: ꙗ҆́кѡ стра́шно мѣ́сто сїѐ: нѣ́сть сїѐ, но до́мъ бж҃їй, и҆ сїѧ̑ врата̀ нбⷭ҇наѧ.
Прⷪ҇ро́чества і҆езекі́илева чте́нїе.
[Главы̑ м҃г и҆ м҃д] Та́кѡ глаго́летъ гдⷭ҇ь: бꙋ́детъ ѿ днѐ ѻ҆сма́гѡ и҆ про́чее, сотворѧ́тъ і҆ерє́и на ѻ҆лтарѝ всесожже́нїѧ ва́шегѡ и҆ ꙗ҆̀же сп҃се́нїѧ ва́шегѡ: и҆ прїимꙋ́ вы глаго́летъ а҆дѡнаі̀ гдⷭ҇ь. И҆ ѡ҆брати́ мѧ на пꙋ́ть вра́тъ ст҃ы́хъ внѣ́шнихъ, зрѧ́щихъ на восто́ки: и҆ сїѧ̑ бѧ́хꙋ затворє́на. И҆ речѐ гдⷭ҇ь ко мнѣ̀: врата̀ сїѧ̑ затворє́на бꙋ́дꙋтъ, и҆ не ѿве́рзꙋтсѧ, и҆ никто́же про́йдетъ сквозѣ̀ и҆́хъ: ꙗ҆́кѡ гдⷭ҇ь бг҃ъ і҆и҃левъ про́йдетъ и҆́ми, и҆ бꙋ́дꙋтъ затворє́на. Ꙗ҆́кѡ и҆гꙋ́менъ сѧ́детъ въ ни́хъ снѣ́сти хлѣ́бъ: по пꙋтѝ є҆ла́мскихъ вра́тъ вни́детъ, и҆ по пꙋтѝ є҆гѡ̀ и҆зы́детъ. И҆ введе́ мѧ по пꙋтѝ вра́тъ ст҃ы́хъ сꙋ́щихъ къ сѣ́верꙋ, прѧ́мѡ хра́мꙋ: и҆ ви́дѣхъ, и҆ сѐ и҆спо́лнь сла́вы хра́мъ гдⷭ҇ень.
При́тчей чте́нїе.
[Глава̀ ѳ҃] Премꙋ́дрость созда̀ себѣ̀ до́мъ, и҆ ᲂу҆твердѝ столпѡ́въ се́дмь: закла̀ своѧ̑ же́ртвєннаѧ, и҆ растворѝ въ ча́ши свое́й вїно̀, и҆ ᲂу҆гото́ва свою̀ трапе́зꙋ. Посла̀ своѧ̑ рабы̀, созыва́ющи съ высо́кимъ проповѣ́данїемъ на ча́шꙋ, глаго́лющи: и҆́же є҆́сть безꙋ́менъ, да ᲂу҆клони́тсѧ ко мнѣ̀. И҆ тре́бꙋющымъ ᲂу҆ма̀ речѐ: прїиди́те, ꙗ҆ди́те мо́й хлѣ́бъ, и҆ пі́йте вїно̀, є҆́же раствори́хъ ва́мъ. Ѡ҆ста́вите безꙋ́мїе, и҆ жи́ви бꙋ́дете: и҆ взыщи́те ра́зꙋма, да поживетѐ: и҆ и҆спра́вите ра́зꙋмъ въ вѣ́дѣнїи. Наказꙋ́ѧй ѕлы́ѧ прїи́метъ себѣ̀ безче́стїе, ѡ҆блича́ѧй же нечести́ваго ѡ҆поро́читъ себѐ: ѡ҆бличе́нїе бо нечести́вомꙋ ра̑ны є҆мꙋ̀. Не ѡ҆блича́й ѕлы́хъ, да не возненави́дѧтъ тебѐ: ѡ҆блича́й премꙋ́дра, и҆ возлю́битъ тѧ̀. Да́ждь премꙋ́дромꙋ винꙋ̀, и҆ премꙋ́дршїй бꙋ́детъ: сказꙋ́й првⷣномꙋ, и҆ приложи́тъ прїима́ти. Нача́ло премꙋ́дрости, стра́хъ гдⷭ҇ень, и҆ совѣ́тъ ст҃ы́хъ, ра́зꙋмъ: разꙋмѣ́ти бо зако́нъ, по́мысла є҆́сть бл҃га́гѡ. Си́мъ бо ѻ҆́бразомъ мно́гое поживе́ши вре́мѧ, и҆ приложа́тсѧ тебѣ̀ лѣ́та живота̀.
А҆́ще и҆зво́литъ настоѧ́тель пѣ́ти лїті́ю, на ѻ҆́ной стїхи̑ры:
Гла́съ а҃:
Собра́вшесѧ дне́сь, бра́тїе, на моле́бное пѣснопѣ́нїе пред̾ ѻ҆́бразомъ бг҃омт҃ре скоропослꙋ́шницы, дꙋхо́вное торжество̀ соста́вимъ и҆ бл҃года́ть незави́стнꙋю почерпе́мъ ѿ неистощи́магѡ и҆сто́чника дарова́нїй. бл҃га́ѧ бо мт҃рь сꙋ́щи всебл҃га́гѡ бг҃а на́шегѡ бг҃оподо́бными сїѧ́етъ чꙋдесы̀, стра̑сти и҆ болѣ̑зни и҆сцѣлѧ́етъ, въ мо́ри и҆ на сꙋ́ши сп҃са́етъ съ вѣ́рою къ не́й прибѣга́ющыѧ.
Гла́съ в҃:
Ꙗ҆́же всѣ́мъ ᲂу҆до́бь послꙋ́шнаѧ въ ско́рби и҆ въ печа́ли ско́рѡ помога́ющаѧ призыва́ющымъ тѧ̀ ѿ дꙋшѝ нело́жнѡ, ᲂу҆милосе́рдитисѧ потщи́сѧ, влⷣчце, и҆ застꙋпѝ рабы̑ твоѧ̑, и҆збавлѧ́ющи на́съ ѿ бѣ́дъ моли́твами твои́ми.
Гла́съ г҃:
Бг҃оизбра́ннаѧ приснодв҃о, бж҃е́ственныхъ дарѡ́въ сокро́вище, мі́ра предста́тельнице, ско́раѧ молѧ́щихсѧ послꙋ́шательнице, не лишѝ на́съ щедро́тъ твои́хъ и҆ прошє́нїѧ на̑ша ᲂу҆скорѝ и҆спо́лнити во сп҃се́нїе дꙋ́шъ на́шихъ.
Сла́ва, и҆ ны́нѣ, гла́съ з҃:
Млⷭ҇тива, бл҃гопребы́тна и҆ скоропослꙋ́шна на́мъ, гпⷭ҇жѐ, ꙗ҆ви́сѧ, призыва́ющымъ бж҃е́ственнꙋю твою̀ бл҃года́ть во всѣ́хъ, слꙋча́ющихсѧ на́мъ: всю́ бо наде́ждꙋ дꙋ́шъ на́шихъ возложи́хомъ къ тебѣ̀, бл҃госе́рдой, и҆ (с. 658) во всѣ́хъ ᲂу҆пова́емъ на про́мыслъ тво́й, ты̀ и҆ бꙋ́дꙋщїѧ на́съ сла́вы, и҆ живота̀ бж҃е́ственнагѡ сподо́би.
На стїхо́внѣ стїхи̑ры, гла́съ є҃:
Прїиди́те, вѣ́рнїи, восхва́лимъ приснодв҃ꙋ бг҃оро́дицꙋ: ра́дꙋйсѧ, глаго́люще, кївѡ́те прест҃ы́й и҆ всесвѣ́тлаѧ ски́нїѧ цр҃ѧ̀ цр҃е́й, хрⷭ҇та̀, бг҃а на́шегѡ: ра́дꙋйсѧ, а҆́гг҃лѡвъ ᲂу҆дивле́нїе и҆ сла́во: ра́дꙋйсѧ, земноро́дныхъ похвало̀ и҆ весе́лїе, сп҃са́ющаѧ въ ми́рѣ дꙋ́шы на́шѧ.
Сті́хъ: Помѧнꙋ̀ и҆́мѧ твоѐ во всѧ́комъ ро́дѣ и҆ ро́дѣ.
Ра́дꙋйсѧ, бл҃гослове́ннаѧ въ жена́хъ, прароди́тельскїѧ клѧ́твы разрѣше́нїе и҆ ѡ҆ всѣ́мъ мі́рѣ ᲂу҆милостивле́нїе: ра́дꙋйсѧ, хрⷭ҇тїа́нъ те́плое предста́тельство и҆ ᲂу҆слы́шательнице ско́раѧ молѧ́щихсѧ къ тебѣ̀ съ вѣ́рою: ра́дꙋйсѧ, покро́ве и҆ сп҃се́нїе дꙋ́шъ на́шихъ.
Сті́хъ: Слы́ши, дщѝ, и҆ ви́ждь, и҆ приклонѝ ᲂу҆́хо твоѐ.
Ра́дꙋйсѧ, гпⷭ҇жѐ всеми́лостиваѧ, живоно́сный и҆сто́чниче, стрꙋѝ щедро́тъ точа́щїй вѣ̑рнымъ: ра́дꙋйсѧ, а҆ѳѡ́на тве́рдое ѡ҆гражде́нїе, и҆́нокѡвъ наста́внице и҆ промышле́нїе: ра́дꙋйсѧ, всѣ́хъ по́моще, ра́досте и҆ сп҃се́нїе дꙋ́шъ на́шихъ.
Сла́ва. и҆ ны́нѣ, гла́съ и҃:
Ѽ, мно́гихъ твои́хъ чꙋде́съ, бг҃облагода́тнаѧ, содѣ́ланныхъ ѻ҆́бразомъ твои́мъ, скоропослꙋ́шнице! всѧ́къ бо, прите́кшїй къ тебѣ̀ съ вѣ́рою, не ѿи́де ѿ ли́ка твоегѡ̀ то́щъ и҆ не ᲂу҆слы́шанъ: слѣпі́и ᲂу҆ ст҃ы́ѧ твоеѧ̀ і҆кѡ́ны прозрѣ́ша, хромі́и, разсла́бленнїи и҆ глꙋсі́и и҆сцѣли́шасѧ, безча́дїѧ, плѣ́на, прꙋ́жїѧ, треволне́нїѧ морска́гѡ и҆ и҆ны́хъ бѣ́дъ и҆ недꙋ́гѡвъ и҆зба́вила є҆сѝ призыва́ющихъ тѧ̀, мт҃рь всеще́драгѡ бг҃а на́шегѡ, подаю́щагѡ на́мъ тобо́ю ве́лїю ми́лость.
Тропа́рь, гла́съ д҃:
Къ бг҃оро́дицѣ притеце́мъ, сꙋ́щїи въ бѣда́хъ, и҆ ст҃ѣ́й і҆кѡ́нѣ є҆ѧ̀ ны́нѣ припаде́мъ, съ вѣ́рою зовꙋ́ще и҆зъ глꙋбины̀ дꙋшѝ: ско́рѡ на́ше ᲂу҆слы́ши моле́нїе, дв҃о, ꙗ҆́кѡ скоропослꙋ́шница наре́кшаѧсѧ. тебе́ бо рабѝ твоѝ въ нꙋ́ждахъ гото́вꙋю помо́щницꙋ и҆́мамы.
На ᲂу҆́трени.
По а҃-й каѳі́смѣ сѣда́ленъ, гла́съ в҃:
Вчера̀ воспѣ̀ ст҃а́ѧ цр҃ковь собо́ръ нбⷭ҇ныхъ си́лъ, бл҃ги́хъ покрови́телей на́шихъ: дне́сь пое́мъ пѣ́снь тебѣ̀, всепѣ́той бг҃оро́дицѣ, мі́ра держа́вномꙋ покро́вꙋ, и҆ прославлѧ́емъ ра́достнѡ бл҃гость твою̀. со безпло́тными ᲂу҆̀бо моли́сѧ во є҆́же сп҃сти́сѧ на́мъ.
Сла́ва, и҆ ны́нѣ, то́йже.
По в҃-й каѳі́смѣ сѣда́ленъ, гла́съ г҃:
Ꙗ҆́кѡ многосвѣ́тлаѧ лꙋна̀, показа́сѧ въ чⷭ҇тнѣ́й ѻ҆би́тели а҆рха́гг҃лѡвъ ст҃а́ѧ і҆кѡ́на твоѧ̀, дв҃о скоропослꙋ́шнице: свѣти́ши бо бл҃года́тїю чꙋде́съ въ но́щи бѣ́дъ сꙋ́щымъ и҆ ско́рꙋю по́мощь подае́ши во сп҃се́нїе дꙋ́шъ на́шихъ.
Сла́ва, и҆ ны́нѣ, то́йже.
На полѷеле́и велича́нїе:
Велича́емъ тѧ̀, прест҃а́ѧ дв҃о, и҆ чти́мъ ѻ҆́бразъ тво́й ст҃ы́й, и҆́мже то́чиши и҆сцѣлє́нїѧ всѣ̑мъ съ вѣ́рою притека́ющымъ.
Ѱало́мъ и҆збра́нный: Помѧнѝ, гдⷭ҇и, даві́да.
По полѷеле́и сѣда́ленъ, гла́съ и҃:
Благоговѣ́йнѡ ѡ҆бстоѧ́ще чⷭ҇тны́й ѻ҆́бразъ мт҃ре свѣ́та, мѡли́твы є҆́й ꙗ҆́кѡ всебл҃го́й скоропослꙋ́шницѣ ᲂу҆се́рднѡ принесе́мъ. сїю́ бо нб҃о ѡ҆дꙋшевле́нное чл҃вѣколю́бїемъ гдⷭ҇ь содѣ́ла, и҆злива́ѧ то́ю, ꙗ҆́кѡ до́ждь, да́ры своѧ̑ во сп҃се́нїе дꙋ́шъ на́шихъ.
Сла́ва, и҆ ны́нѣ, то́йже.
По н҃-мъ ѱалмѣ̀ стїхи́ра, гла́съ з҃:
Прошє́нїѧ и҆спо́лни рабѡ́въ твои́хъ, тебѐ, прест҃а́ѧ дв҃о, съ вѣ́рою призыва́ющихъ. ѿ всѧ̑кїѧ ско́рби, недꙋ́гѡвъ и҆ ѡ҆ѕлобле́нїѧ всѣ́хъ на́съ свободѝ, да благода́рственнѡ воспѣва́емъ тѧ̀, ско́рꙋю молѧ́щихсѧ ᲂу҆слы́шательницꙋ, подаю́щꙋю вѣ̑рнымъ ве́лїю ми́лость.
Канѡ̑на два̀.
Канѡ́нъ а҃-й, творе́нїе прпⷣбнагѡ нїкоди́ма свѧтого́рца.
Гла́съ и҃.
Пѣ́снь а҃.
І҆рмо́съ: Во́дꙋ проше́дъ, ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.
Чꙋде́съ твои́хъ бжⷭ҇твенныхъ мно́жество благохвали́ти предпринима́ѧ, тѧ̀ молю̀, дв҃о, ѿ се́рдца, скоропослꙋ́шнице, бл҃года́ть пода́ждь мѝ.
Кто̀ не и҆зꙋми́тсѧ твоегѡ̀ ѻ҆́браза чꙋдесє́мъ, дв҃о, ѿ негѡ́ бо слꙋжи́телю трапе́зы возгласи́ла є҆сѝ три́жды, скоропослꙋ́шница наре́кшисѧ.
Ка́кѡ чꙋдодѣѧ́нїе твоѐ и҆зрещѝ возмогꙋ̀, ѻ҆трокови́це, ты́ бо пре́жде непоко́рнаго и҆́нока без̾ѻ́чна содѣ́лала є҆сѝ и҆ па́ки сего̀ ᲂу҆стро́ила є҆сѝ ви́дѧща.
Ра́дꙋйсѧ, сщ҃е́ннаѧ ѻ҆би́тель дохїа́рскаѧ: ты́ бо и҆́маши всѣ́хъ гпⷭ҇жꙋ̀ предста́тельницꙋ и҆ покро́въ, ꙗ҆́коже сама̀ ѻ҆на̀ ꙗ҆́снѡ возвѣстѝ.
Дрꙋгі́й. канѡ́нъ, гла́съ д҃.
Пѣ́снь а҃.
І҆рмо́съ: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.
Мт҃и присносꙋ́щнагѡ свѣ́та и҆ ѻ҆́ч҃їѧ премꙋ́дрости, ᲂу҆мꙋдрѝ неразꙋ́мїе моѐ и҆ просвѣти́ мѧ на пѣ́нїе и҆ моли́твꙋ пред̾ ст҃о́ю і҆кѡ́ною твое́ю, скоропослꙋ́шнице
Ѡ҆брѣ́тшїи сокро́вище ра́дꙋютсѧ, тѣ́мже и҆ мы̀, и҆мꙋ́ще тѧ̀, всецр҃и́це, милосе́рдїѧ сокро́вище нбⷭ҇ное и҆ неиждива́емое, воспѣва́емъ, ра́дꙋющесѧ, твоѧ̑ чꙋдеса̀.
Лицꙋ̀ твоемꙋ̀, предречѐ даві́дъ, помо́лѧтсѧ бога́тїи лю́дстїи: и҆сполнѧ́ющꙋсѧ семꙋ̀, вкꙋ́пѣ съ бога́тыми и҆ мы̀, добродѣ́тельми ᲂу҆бо́зїи, мо́лимсѧ тебѣ̀, дв҃о, пред̾ ли́комъ твои́мъ.
Ꙗ҆́коже ѻ҆́чи ра̑бъ въ рꙋкꙋ̀ госпо́дїй свои́хъ, та́кѡ ѻ҆́чи на́ши ᲂу҆стрѣмле́ни сꙋ́ть къ тебѣ̀ и҆ къ ѻ҆́бразꙋ твоемꙋ̀, всебл҃га́ѧ влⷣчце, до́ндеже ᲂу҆ще́дриши рабы̑ твоѧ̑.
Катава́сїа: Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.
Пѣ́снь г҃.
І҆рмо́съ: Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.
Безча́дныхъ бл҃гоча́дныхъ ты̀, марі́е, показа́ла є҆сѝ и҆ непло́дныхъ же́нъ содѣ́лала є҆сѝ, скоропослꙋ́шнице, веселѧ́щихсѧ ѡ҆ ча́дѣхъ. кто̀ ᲂу҆́бѡ не и҆зꙋми́тсѧ, дв҃о, вели́чїю твоемꙋ̀;
Бꙋлга́рїѧ проповѣ́дꙋетъ твоегѡ̀ ѻ҆́браза чꙋдеса̀, ѽ скоропослꙋ́шнице, восто́къ же и҆ за́падъ. и҆сто́чникъ бо содѣ́лаласѧ є҆сѝ, точа́щїй бл҃года́ти всѣ́мъ призыва́ющымъ и҆́мѧ твоѐ.
Ра́ка болѣ́знь ѿ рꙋкѝ и҆счеза́етъ честны́ѧ жены̀, дв҃о, посѣще́нїемъ твои́мъ, тѣ́мже стра́ждꙋщаѧ, ѿ недꙋ́га свободи́вшисѧ, ра́дꙋющисѧ, проповѣ́да благода́рствєннаѧ.
Чꙋ́днѡ ᲂу҆краси́сѧ і҆кѡ́на твоѧ̀, скоропослꙋ́шнице, и҆ па́че лꙋче́й со́лнечныхъ ѡ҆свѣща́етъ всѣ́хъ бл҃года́тїю твое́ю, пречⷭ҇таѧ. кто̀ ᲂу҆̀бо восхва́литъ тѧ̀, на нб҃сѝ и҆ на землѝ сла́вимꙋю!
И҆́нъ.
І҆рмо́съ: Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѐ совокꙋ́пльшыѧ, дꙋхо́внѡ ᲂу҆твердѝ, въ бж҃е́ственнѣй твое́й сла́вѣ вѣнцє́въ сла́вы сподо́би.
Воззрѝ твои́ми ѻ҆чесы̀, мр҃і́е, и҆ ви́ждь бл҃гоꙋтро́бнѡ пред̾ і҆кѡ́ною твое́ю предстоѧ́щихъ и҆ тѧ̀ съ вѣ́рою призыва́ющихъ, и҆ ᲂу҆слы́ши си́хъ, скоропослꙋ́шнице.
Крѣ́пость да́рꙋй на́мъ, чⷭ҇таѧ, да твори́мъ во́лю сн҃а твоегѡ̀ со стра́хомъ и҆ любо́вїю, ᲂу҆крѣплѧ́еши бо рабы̑ твоѧ̑ ꙗ҆́кѡ мт҃рь всеси́льнагѡ бг҃а на́шегѡ.
Страстьмѝ бори́мїи и҆ неви́димыми сѣ́ѧтелѧми ѕѡ́лъ, при́снѡ нꙋжда́емсѧ въ твое́й, влⷣчце, неѡбори́мой по́мощи, є҆ѧ́же не лишѝ на́съ, бг҃облагода́тнаѧ.
Сп҃си́тельный щи́тъ пода́ждь на́мъ, гпⷭ҇жѐ, твоѐ держа́вное застꙋпле́нїе, и҆́мже началоѕло́бнагѡ побѣжда́юще кѡва́рства, вѣнцє́въ сла́вы сподо́бимсѧ.
Катава́сїа: Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѐ совокꙋ́пльшыѧ, дꙋхо́внѡ ᲂу҆твердѝ, въ бж҃е́ственнѣй твое́й сла́вѣ вѣнцє́въ сла́вы сподо́би.
По г҃-й пѣ́сни сѣда́ленъ:
Влⷣчцꙋ тѧ̀ мі́ра вѣ́мы, мр҃і́е всепѣ́таѧ, ꙗ҆́кѡ родила̀ є҆сѝ на́мъ всѣ́хъ творца̀, сп҃си́телѧ мі́ра, и҆́же и҆ просла́ви тебѐ, пречⷭ҇тꙋю мт҃рь свою̀, подаѧ̀ тобо́ю бл҃года́ть и҆ ми́лость чтꙋ́щымъ тѧ̀ и҆ молѧ́щымсѧ тебѣ̀, бг҃оро́дице.
Сла́ва. и҆ ны́нѣ, то́йже.
Пѣ́снь д҃.
І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑ и҆ просла́вихъ твоѐ бж҃ество̀.
Во всѣ́хъ концѣ́хъ чꙋдотво́рный тво́й ѻ҆́бразъ просла́висѧ, и҆ ны́нѣ всѝ ᲂу҆ста́ми скоропослꙋ́шницꙋ произно́сѧтъ.
И҆ во снѣ̀, всецр҃и́це, и҆ ꙗ҆́вѣ, скоропослꙋ́шнице, ꙗ҆влѧ́ѧсѧ, чꙋдеса̀ соверша́еши въ мі́рѣ пресла̑внаѧ.
Кто̀ твоѐ, дв҃о, и҆́мѧ въ нꙋ́ждѣ всѧ́кой призыва́ше, и҆ ско́рѡ тогѡ̀ не ᲂу҆слы́шала є҆сѝ, ꙗ҆́кѡ скоропослꙋ́шница сꙋ́щаѧ;
Бл҃же́нна є҆сѝ дохїа́рскаѧ ѻ҆би́тель сла́внаѧ, і҆кѡ́ною бо ѡ҆богати́ласѧ є҆сѝ скоропослꙋ́шницы всечестно́ю.
И҆́нъ.
І҆рмо́съ: Сѣдѧ́й въ сла́вѣ на прⷭ҇то́лѣ бжⷭ҇тва̀, во ѻ҆́блацѣ ле́гцѣ прїи́де і҆и҃съ пребж҃е́ственный, нетлѣ́нною дла́нїю и҆ сп҃сѐ зовꙋ́щыѧ: сла́ва, хрⷭ҇тѐ, си́лѣ твое́й.
Припа́даѧ ко ст҃ѣ́й і҆кѡ́нѣ твое́й, дв҃о, вопїю́ ти ѿ се́рдца сокрꙋше́нна: не попꙋсти́ ми поги́бнꙋти, всемлⷭ҇тиваѧ гпⷭ҇жѐ, житїѐ моѐ во грѣсѣ́хъ и҆жди́вшемꙋ.
Грѣхолюби́въ сы́й, ᲂу҆дали́хсѧ, влⷣчце, сн҃а твоегѡ̀, и҆ лише́нъ є҆́смь дерзнове́нїѧ къ немꙋ̀. тѣ́мже къ покаѧ́нїю мѧ̀ напра́вивъ, сподо́би полꙋчи́ти, є҆́же погꙋби́хъ.
Бг҃оизбра́ннаѧ ѻ҆трокови́це, въ рꙋнѣ̀ ѡ҆роше́нномъ предви́дѣннаѧ, ѡ҆кропѝ росо́ю бл҃года́ти и҆зсо́хшꙋю зе́млю се́рдца моегѡ̀ и҆ благопло́днꙋ содѣ́лай дꙋ́шꙋ мою̀.
Ра́дꙋйсѧ, бг҃оневѣ́сто, добродѣ́тельми, ꙗ҆́кѡ рѧ̑сны златы́ми, преꙋкра́шеннаѧ: ра́дꙋйсѧ, сосꙋ́де мѵ́ра, и҆́мже врачꙋ́ютсѧ зовꙋ́щїи: сла́ва, хрⷭ҇тѐ, си́лѣ твое́й.
Катава́сїа: Сѣдѧ́й въ сла́вѣ на прⷭ҇то́лѣ бжⷭ҇тва̀, во ѻ҆́блацѣ ле́гцѣ прїи́де і҆и҃съ пребж҃е́ственный, нетлѣ́нною дла́нїю и҆ сп҃сѐ зовꙋ́щыѧ: сла́ва, хрⷭ҇тѐ, си́лѣ твое́й.
Пѣ́снь є҃.
І҆рмо́съ: Просвѣтѝ на́съ повелѣ̑нїи твои́ми, гдⷭ҇и, и҆ мы́шцею твое́ю высо́кою тво́й ми́ръ пода́ждь на́мъ, чл҃вѣколю́бче.
Ка́кѡ на тво́й пречⷭ҇тый ѻ҆́бразъ а҆́зъ, недосто́йный, воззрю̀, скоропослꙋ́шнице, нечи́стыми ѻ҆чесы̀ мои́ми.
Мо́ре и҆ землѧ̀, всецр҃и́це, твоеѧ̀ і҆кѡ́ны чꙋдеса̀ проповѣ́дꙋютъ: твои́хъ бо бл҃года́тей сїѧ̑ ѻ҆боѧ̀ наслади́шасѧ.
Та́тѧ ꙗ҆влѧ́еши, пѣ́нѧзи похи́тивша бли́жнѧгѡ, мт҃еродв҃о, и҆ возвраща́еши пра́вѣднѡ сїѧ̑ и҆мꙋ́щемꙋ.
Что̀ воздади́мъ тебѣ̀, всебл҃га́ѧ, за бл҃года́ть мно́гꙋю, ю҆́же ꙗ҆ви́ла є҆сѝ на́мъ, дарова́въ і҆кѡ́нꙋ твою̀, бога́тство сщ҃е́нное.
И҆́нъ.
І҆рмо́съ: Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ над̾ всѣ́ми бг҃а и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.
Нѣ́сть, всемлⷭ҇тиваѧ гпⷭ҇жѐ, такова́гѡ, и҆́же бы лиши́сѧ щедро́тъ твои́хъ, прибѣ́гъ съ вѣ́рою къ твоемꙋ̀ бл҃гоꙋтро́бїю. тѣ́мже прилѣ́жнѡ мо́лимъ тѧ̀: сподо́би и҆ на́съ грѣ́шныхъ ми́лости твоеѧ̀.
Оу҆милостивле́нїе ѡ҆ всѣ́мъ мі́рѣ сꙋ́щаѧ, ᲂу҆молѝ, дв҃о, сн҃а твоего̀, всѣ́хъ сꙋдїю̀, да не помѧне́тъ грѣхѡ́въ на́шихъ, и҆ да и҆зба́вимсѧ тобо́ю всѧ́кагѡ преще́нїѧ є҆гѡ̀, находѧ́щагѡ на лю́ди согрѣши́вшыѧ.
Примири́телѧ всѧ́ческихъ ро́ждшаѧ, всемо́щнымъ предста́тельствомъ твои́мъ, влⷣчце, ᲂу҆миротворѝ на́съ къ немꙋ̀, къ бли̑жнимъ и҆ къ себѣ̀ сами́мъ, ꙗ҆́кѡ воспѣва́ющымъ тѧ̀ ми́ръ подава́ющаѧ.
Катава́сїа: Оу҆жасо́шасѧ всѧ́чєскаѧ ѡ҆ бж҃е́ственнѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ над̾ всѣ́ми бг҃а и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.
Пѣ́снь ѕ҃.
І҆рмо́съ: Мл҃твꙋ пролїю̀ ко гдⷭ҇ꙋ и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ, ꙗ҆́кѡ і҆ѡ́на: ѿ тлѝ, бж҃е, возведи́ мѧ.
Ꙗ҆́кѡ любвеѡби́льнаѧ мт҃рь ꙗ҆́вльшисѧ, призыва́ла є҆сѝ ѻ҆́трока къ себѣ̀, до́ндеже и҆зба́вила є҆сѝ ѿ рꙋкѝ разбо́йникѡвъ, мт҃родв҃о. но да ѡ҆брѣте́мъ тѧ̀ и҆ мы̀, мт҃рь любвеѡби́льнꙋю.
Не и҆́мамы рабѝ твоѝ и҆но́гѡ, ра́звѣ тебє̀, предста́тельства и҆ покро́ва. тѣ́мже, чⷭ҇таѧ, ѿ се́рдца вопїе́мъ: всѧ́кїѧ бѣды̀ свободѝ ста́до твоѐ и҆ вѣ́рныхъ, къ тебѣ̀ прибѣга́ющихъ.
Ꙗ҆́коже спасла̀ є҆сѝ ѿ морскі́ѧ бꙋ́ри призва́вшихъ бж҃е́ственное и҆́мѧ твоѐ, та́кѡ и҆ на́съ ѿ чꙋ́вственнагѡ крꙋше́нїѧ и҆ мы́сленнагѡ, дв҃о, сп҃сѝ и҆ въ ти̑хїѧ приста̑нища сп҃се́нїѧ ᲂу҆пра́ви.
Ми́ръ тѧ̀ прибѣ́жище стѧжа̀ и҆ сп҃се́нїе: тѣ́мъ, чⷭ҇таѧ, къ честнѣ́й твое́й і҆кѡ́нѣ ѿвсю́дꙋ притека́ютъ лю́дїе, и҆ всѝ ско́рѡ и҆̀хъ слꙋ́шающꙋю ѡ҆брѣта́ютъ тѧ̀.
И҆́нъ.
І҆рмо́съ: Бж҃е́ственное сїѐ и҆ всечⷭ҇тно́е соверша́юще пра́зднество, бг҃омꙋ́дрїи, бг҃омт҃ре, прїиди́те, рꙋка́ми воспле́щимъ: ѿ неѧ̀ ро́ждшагосѧ бг҃а сла́вимъ.
Ты̀ рабѡ́въ твои́хъ ᲂу҆тѣше́нїе, всебл҃же́ннаѧ, ты̀ свѣ́тъ, ᲂу҆добре́нїе и҆ наде́жда сп҃се́нїѧ: ты̀ ᲂу҆́бѡ промышле́нїемъ твои́мъ всѧ́кїѧ нꙋ́жды и҆ ско́рби и҆зба́ви на́съ.
Вѣ́дꙋщи не́мѡщи на́шѧ, бг҃ороди́тельнице, восполнѧ́й дꙋхо́внꙋю и҆ веще́ственнꙋю скꙋ́дость на́шꙋ, да подаю́щаго на́мъ тобо́ю всѧ̑ бл҃га́ѧ бг҃а сла́вимъ.
Не ѡ҆ста́ви на́съ, всеще́драѧ, внегда̀ ѡ҆скꙋдѣва́ти крѣ́пости на́шей, не ѿстꙋпѝ ѿ ᲂу҆пова́ющихъ на тѧ̀ во и҆схо́дѣ, и҆ по и҆схо́дѣ ꙗ҆вѝ на́мъ бл҃гости твоеѧ̀ си́лꙋ.
Пребл҃гослове́ннаѧ мр҃і́е, кни́га бж҃їѧ запечатле́ннаѧ, въ кни́зѣ живота̀ вѣ́чнагѡ написа́тисѧ на́мъ сподо́би, да ѿ тебє̀ ро́ждшагосѧ бг҃а сла́вимъ.
Катава́сїа: Бж҃е́ственное сїѐ и҆ всечтⷭ҇но́е соверша́юще пра́зднество, бг҃омꙋ́дрїи, бг҃омт҃ре, прїиди́те, рꙋка́ми воспле́щимъ: ѿ неѧ̀ ро́ждшагосѧ бг҃а сла́вимъ. (с. 667)
Конда́къ, гла́съ и҃:
Въ мо́ри жите́йстѣмъ ѡ҆бꙋрева́емїи, треволне́нїю подпа́даемъ страсте́й и҆ и҆скꙋше́нїй. пода́ждь ᲂу҆̀бо на́мъ, гпⷭ҇жѐ, рꙋ́кꙋ по́мощи, ꙗ҆́коже петро́ви сн҃ъ тво́й, и҆ ᲂу҆скорѝ ѿ бѣ́дъ и҆зба́вити ны̀, да зове́мъ тѝ: ра́дꙋйсѧ, всебл҃га́ѧ скоропослꙋ́шнице.
І҆́косъ:
И҆дѣ́же ѡ҆сѣни́тъ бл҃года́ть твоѧ̀, влⷣчце, та́мѡ недꙋ́жнїи здра́ви быва́ютъ, бѣ́дствꙋющїи во бл҃гополꙋ́чїе прихо́дѧтъ, и҆ всѧ́къ скорбѧ́щїй ра́дости и҆сполнѧ́етсѧ. тѣ́мже бл҃года́тїю твое́ю ѡ҆сѣнѝ и҆ на́съ, сицева̑ѧ ра̑достнаѧ тебѣ̀ глаго́лющихъ: ра́дꙋйсѧ, бг҃облагода́тнаѧ, непристꙋ́пнагѡ бж҃ества̀ селе́нїе: ра́дꙋйсѧ, ст҃а́ѧ трапе́зо, хлѣ́бомъ жи́зни на́съ снабдѣва́ющаѧ: ра́дꙋйсѧ, мѵ́ро многоце́нное, ѡ҆бл҃гоꙋха́ющее вѣ́рныхъ: ра́дꙋйсѧ, ма́слино, є҆ле́емъ милосе́рдїѧ на́съ ᲂу҆маща́ющаѧ: ра́дꙋйсѧ, неистощи́мое сокро́вище дарѡ́въ: ра́дꙋйсѧ, приснотекꙋ́щїй и҆сто́чниче чꙋде́съ: ра́дꙋйсѧ, ѡ҆би́димыхъ застꙋпле́нїе: ра́дꙋйсѧ, ѡ҆бꙋрева́емыхъ бл҃гоꙋти́шное приста́нище: ра́дꙋйсѧ, глꙋхи́хъ слы́шанїе и҆ свѣ́те слѣпы́хъ: ра́дꙋйсѧ, разсла́бленныхъ ᲂу҆крѣпле́нїе: ра́дꙋйсѧ, свобожде́нїе плѣне́нныхъ: ра́дꙋйсѧ, мі́ра всегѡ̀ ᲂу҆пова́нїе: ра́дꙋйсѧ, всебл҃га́ѧ скоропослꙋ́шнице.
Пѣ́снь з҃.
І҆рмо́съ: Ѿ і҆ꙋде́и доше́дше ѻ҆́троцы, въ вавѷлѡ́нѣ и҆ногда̀ вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е, бл҃гослове́нъ є҆сѝ.
Слѣпы̑мъ дарова́ла є҆сѝ дѣ́йствїе ѻ҆чесє́мъ, дв҃о, є҆́же ви́дѣти, но и҆ на́шѧ зѣ̑ницы дꙋшѝ и҆ тѣлесѐ просвѣтѝ, да пое́мъ при́снѡ вєли́чїѧ твоѧ̑. (с. 668)
Глꙋхи̑мъ слы́шанїе дарова́ла є҆сѝ, мр҃і́е скоропослꙋ́шнице, но и҆ на́съ всѣ́хъ ѿве́рзи ᲂу҆шеса̀ дꙋшѝ и҆ тѣлесѐ, ꙗ҆́кѡ да пое́мъ при́снѡ вєли́чїѧ твоѧ̑.
Ꙗ҆́коже дре́вле ѿ прꙋгѡ́въ и҆зба́вила є҆сѝ прибѣ́гшихъ къ тебѣ̀, пречⷭ҇таѧ, та́кѡ и҆ на́съ ѿ си́хъ и҆ всѧ́кагѡ вре́да и҆зба́ви, да пое́мъ при́снѡ вєли́чїѧ твоѧ̑.
Ꙗ҆́кѡ и҆спра́вила є҆сѝ пре́жде разсла́бленнаго, та́кѡ и҆ на́съ, по ѻ҆бою̀ разсла́бленныхъ, те́плымъ твои́мъ предста́тельствомъ и҆спра́ви, да пое́мъ при́снѡ вєли́чїѧ твоѧ̑.
И҆́нъ.
І҆рмо́съ: Не послꙋжи́ша тва́ри бг҃омꙋ́дрїи па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ пою́ще: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ.
Наста́внице ко сп҃се́нїю рабѡ́въ твои́хъ, дꙋшѝ трича́стное, гпⷭ҇жѐ, и҆спра́ви, да бл҃года́ти безстра́стїѧ сподо́бльшесѧ, пое́мъ: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ.
Жела́тельнꙋю си́лꙋ дꙋшѝ къ бж҃е́ственномꙋ раче́нїю напра́ви, да то́ю бг҃а всецѣ́лѡ возлю́бимъ и҆ къ немꙋ̀ при́снѡ стреми́мсѧ, ꙗ҆́кѡ всебл҃же́нномꙋ жела́нїй кра́ю.
Ꙗ҆́ростнꙋю си́лꙋ дꙋшѝ помозѝ на́мъ, дв҃о, ѡ҆браща́ти на неви̑димыѧ врагѝ сп҃се́нїѧ на́шегѡ и҆ сп҃си́тельныѧ любвѐ и҆спо́лни сердца̀ на̑ша къ бли̑жнимъ и҆ къ бг҃ꙋ.
Слове́сное дꙋшѝ къ бг҃оꙋго́дномꙋ созерца́нїю воскрылѝ, влⷣчце, бг҃опроти́вныхъ помышле́нїй и҆збавлѧ́ющи, и҆ всѣ́хъ на́съ благо́е мы́слити, глаго́лати и҆ твори́ти ᲂу҆крѣпѝ.
Катава́сїа: Не послꙋжи́ша тва́ри богомꙋ́дрїи па́че созда́вшаго, но ѻ҆́гненное преще́нїе мꙋ́жески попра́вше, ра́довахꙋсѧ, пою́ще: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ.
Пѣ́снь и҃.
І҆рмо́съ: Цр҃ѧ̀ нбⷭ҇наго, є҆го́же пою́тъ во́и а҆́гг҃льстїи, хвали́те и҆ превозноси́те во всѧ̑ вѣ́ки.
Ѿ всѧ́кихъ болѣ́зней, скоропослꙋ́шнице, на́съ и҆зба́ви, ꙗ҆́коже ѿ си́хъ мно́гихъ и҆зба́вила є҆сѝ.
І҆кѡ́на твоѧ̑, дв҃о, показа́сѧ и҆сто́чникъ чꙋде́съ, ѿ негѡ́же жа́ждꙋщїи снабдѣва́ютсѧ и҆з̾ѻби́льнѡ.
Поги́бшаго ты̀ ꙗ҆влѧ́еши, гпⷭ҇жѐ, и҆ подае́ши ра́дость ѡ҆брѣ́тшымъ. ко́ль мно́гаѧ є҆́сть ѻ҆́браза твоегѡ̀ бл҃года́ть.
Повелѣ́нїю твоемꙋ̀, влⷣчце, повинꙋ́ютсѧ всѧ̑ стїхі́и, ѿ ни́хже вре́да да и҆збавлѧ́еши тѧ̀ призыва́ющихъ.
И҆́нъ.
І҆рмо́съ: Ѻ҆́троки бл҃гочєсти́выѧ въ пещѝ ржⷭ҇тво̀ бг҃оро́дичо спасло̀ є҆́сть, тогда̀ ᲂу҆́бѡ ѻ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀ и҆ превозноси́те є҆го̀ во всѧ̑ вѣ́ки.
Па́жить плодоно́снꙋ ѡ҆брѣта́етъ ста́до под̾ твои́мъ бг҃омт҃и, ᲂу҆правле́нїемъ, и҆ дꙋшетлѣ́ннїи во́лцы не мѡ́щны расхи́тити слове́сныхъ ѻ҆ве́цъ, храни́мыхъ бл҃года́тїю сн҃а твоегѡ̀ и҆ бг҃а.
Бл҃же́нъ человѣ́къ, є҆мꙋ́же є҆́сть застꙋпле́нїе є҆гѡ̀ ѿ тебє̀, бг҃оневѣ́сто, при́снѡ бо полага́етъ таковы́й восхождє́нїѧ въ се́рдцѣ своѐ. до́ндеже ᲂу҆́зритъ себѐ сп҃се́нна и҆ воспое́тъ: гдⷭ҇а по́йте дѣла̀ и҆ превозноси́те є҆го̀ во всѧ̑ вѣ́ки.
Седмисвѣ́щный свѣти́льниче, седмїю̀ дара́ми дх҃а свѣтѧ́щїй, сподо́би и҆ на́мъ ᲂу҆краси́тисѧ дꙋхо́вными плода́ми, да, ᲂу҆ще́дреннїи чрез̾ тебѐ бг҃омъ, пое́мъ: гдⷭ҇а по́йте дѣла̀ и҆ превозноси́те є҆го̀ во всѧ̑ вѣ́ки.
Горо̀ бж҃їѧ, въ не́йже благоволѝ жи́ти бг҃ъ, моли́сѧ къ немꙋ̀ ѡ҆ на́съ, да по́мощїю є҆гѡ̀ благо́е творѧ́ще, сподо́бимсѧ ᲂу҆зрѣ́ти преми̑рныѧ го́ры и҆ та́мѡ пѣ́ти: гдⷭ҇а по́йте дѣла̀ и҆ превозноси́те є҆го̀ во всѧ̑ вѣ́ки.
Катава́сїа: Ѻ҆́троки бл҃гочєсти́выѧ въ пещѝ ржⷭ҇тво̀ бг҃оро́дичо спасло̀ є҆́сть, тогда̀ ᲂу҆́бѡ ѻ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀ и҆ превозноси́те є҆го̀ во всѧ̑ вѣ́ки.
Пѣ́снь ѳ҃.
І҆рмо́съ: Вои́стиннꙋ бг҃оро́дицꙋ тѧ̀ и҆сповѣ́дꙋемъ, сп҃се́ннїи тобо́ю, дв҃о чⷭ҇таѧ, съ безпло́тными ли́ки тѧ̀ велича́юще.
Собери́тесѧ ᲂу҆се́рднѡ въ ѻ҆би́тель бжⷭ҇твеннꙋю а҆рха́гг҃лѡвъ, болѧ́щїи: вра́чь бо въ не́й пребыва́етъ безме́здный.
Сщ҃е́ннаѧ і҆кѡ́на твоѧ̀ дрꙋга́ѧ показа́сѧ силоа́мскаѧ кꙋпе́ль, дв҃о, ѡ҆чища́ющаѧ и҆ цѣлѧ́щаѧ болѣ́зни дꙋшѝ и҆ тѣлесѐ.
Воспламенѧ́етъ мѧ̀ раче́нїе зрѣ́ти твоегѡ̀ ѻ҆́браза благода́тнꙋю лѣ́потꙋ, и҆ насыще́нїѧ не и҆́мамъ велича́ти тѧ̀!
Да ᲂу҆ви́ждꙋ тѧ̀, всебл҃га́ѧ скоропослꙋ́шнице, во вре́мѧ сме́рти ᲂу҆тѣша́ющꙋю мѧ̀ и҆ зра́ки де́мѡнѡвъ ѿгонѧ́ющꙋю.
И҆́нъ.
І҆рмо́съ: Всѧ́къ земноро́дный да взыгра́етсѧ, дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее сщ҃е́нное торжество̀ бг҃омт҃ре, и҆ да вопїе́тъ: ра́дꙋйсѧ, всебл҃же́ннаѧ бг҃оро́дице, чⷭ҇таѧ приснодв҃о.
Помѧнѝ, гпⷭ҇жѐ, рабы̑ твоѧ̑, любо́вїю сла́вѧщыѧ тѧ̀, ᲂу҆слы́ши молѧ́щихсѧ къ тебѣ̀ и҆ моли́твами твои́ми благоꙋвѣ́тлива на́мъ содѣ́лай сн҃а твоего̀ и҆ бг҃а здѣ̀ и҆ на стра́шномъ сꙋдѣ̀ є҆гѡ̀, всебл҃же́ннаѧ бг҃оро́дице, чⷭ҇таѧ приснодв҃о.
Ра́досте а҆́гг҃лѡвъ и҆ человѣ́кѡвъ, свобѡ́дны на́съ печа́лей жите́йскихъ сотворѝ и҆ хода́тайствомъ твои́мъ несконча́емыхъ мꙋ́къ и҆зба́ви, да вре́менныхъ и҆ вѣ́чныхъ бѣ́дъ тобо́ю и҆збы́вше, вопїе́мъ: ра́дꙋйсѧ, всебл҃же́ннаѧ бг҃оро́дице, чⷭ҇таѧ приснодв҃о.
Ви́димѡ пред̾ ѻ҆́бразомъ твои́мъ предстоѧ́ще, неви́димѡ же къ тебѣ̀, ѡ҆деснꙋ́ю сн҃а твоегѡ̀ стоѧ́щей, ᲂу҆́мъ возводѧ́ще, мо́лимтисѧ прилѣ́жнѡ: сподо́битисѧ на́мъ ра́йскагѡ блаже́нства ᲂу҆молѝ, всебл҃же́ннаѧ бг҃оро́дице, чⷭ҇таѧ приснодв҃о.
Бл҃га́гѡ цр҃ѧ̀ бл҃га́ѧ мт҃и, ѡ҆сѣни́ ны неѡбори́мымъ покро́вомъ твои́мъ, всебл҃же́ннаѧ бг҃оро́дице, чⷭ҇таѧ приснодв҃о.
Катава́сїа: Всѧ́къ земноро́дный да взыгра́етсѧ, дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́юще сщ҃е́нное торжество̀ бг҃омт҃ре, и҆ да вопїе́тъ: ра́дꙋйсѧ, всебл҃же́ннаѧ бг҃оро́дице, чⷭ҇таѧ приснодв҃о.
Свѣти́ленъ:
Зрѧ́щїи тѧ̀ ны́нѣ на і҆кѡ́нѣ съ предвѣ́чнымъ младе́нцемъ, про́симъ тебѐ, бг҃оневѣ́сто: не лишѝ на́съ и҆ въ бꙋ́дꙋщемъ вѣ́цѣ всебл҃же́ннагѡ лицезрѣ́нїѧ твоегѡ̀ и҆ воплоти́вшагѡсѧ ѿ тебѣ̀ сн҃а бж҃їѧ, да со благоꙋгоди́вшими є҆мꙋ̀ и҆́мѧ є҆гѡ̀ и҆ твоѐ велича́емъ.
На хвали́техъ стїхи́ры, гла́съ є҃:
Ди̑вна дѣла̀ твоѧ̑, гдⷭ҇и! прест҃ꙋ́ю мт҃рь твою̀ дарова́лъ є҆сѝ безпомѡ́щнымъ ско́рꙋю помо́щницꙋ, си́льнꙋю защи́тницꙋ беззащи̑тнымъ и҆ предста́тельство те́плое безѿвѣ̑тнымъ: предстоѧ́ бо тебѣ̀, всѣ́хъ влⷣцѣ, мо́литсѧ при́снѡ ѡ҆ всѣ́хъ на́съ.
Ко́е досто́йное благодаре́нїе принесе́мъ тѝ, бг҃оизбра́ннаѧ приснодв҃о, за мно́жество дарѡ́въ твоегѡ̀ милосе́рдїѧ, ꙗ҆влѧ́емагѡ съ вѣ́рою къ тебѣ̀ прибѣга́ющымъ, недꙋ́ги бо дꙋ́шъ и҆ тѣле́съ врачꙋ́еши и҆ и҆збавлѧ́еши ѿ бѣ́дъ, молѧ́щисѧ бг҃ꙋ при́снѡ ѡ҆ всѣ́хъ на́съ.
Держа́внаѧ влⷣчце мі́ра, назира́ющаѧ сꙋ́щихъ въ горѣ̀ твое́й и҆ повсю́дꙋ вѣ́рныхъ ꙗ҆́кѡ взбра́ннаѧ прави́тельница, не преста́й бл҃гоꙋтро́бнѡ промышлѧ́ти ѡ҆ рабѣ́хъ твои́хъ и҆ всѧ̑ блага̑ѧ на́мъ низпосыла́ти, вре́мєннаѧ же и҆ вѣ̑чнаѧ, и҆ моли́сѧ бг҃ꙋ при́снѡ ѡ҆ всѣ́хъ на́съ.
Сла́ва, и҆ ны́нѣ, гла́съ г҃:
Свѣ́телъ преше́дшїй пра́здникъ, ѡ҆заре́нный сла́вою а҆рхїстрати́гѡвъ, ра́достенъ дне́шнїй, свѣтѧ́сѧ бл҃года́тїю а҆́гг҃лѡмъ говѣ́йнагѡ ѻ҆́браза бг҃омт҃ре и҆ на рꙋка́хъ є҆ѧ̀ держи́магѡ вседержи́телѧ. ꙗ҆́коже бо ѻ҆́нъ речѐ на́мъ: проси́те, и҆ да́стсѧ ва́мъ, та́кѡ и҆ всебл҃га́ѧ мт҃рь є҆гѡ̀ повелѣ̀ прибѣга́ти къ не́й во всѧ́кой нꙋ́ждѣ и҆ ѻ҆бѣща̀ ско́рѡ слꙋ́шати со благоговѣ́нїемъ молѧ́щихсѧ пред̾ ст҃о́ю є҆ѧ̀ і҆кѡ́ною, ю҆́же и҆ просла́ви чꙋдесы̀ мно́гими, подаю́щи вѣ́рнымъ ве́лїю ми́лость.
Славосло́вїе вели́кое. И҆ ѿпꙋ́стъ.
На лїтꙋргі́и.
Бл҃жє́нны а҃-гѡ канѡ́на, пѣ́снь г҃-ѧ, и҆ в҃-гѡ, пѣ́снь ѕ҃-ѧ. Прокі́менъ, А҆пⷭ҇лъ, Є҆ѵⷢ҇лїе и҆ Прича́стенъ бг҃оро́дицы.