Мѣ́сѧца тогѡ́же въ і҃-й де́нь. Ст҃ы́хъ а҆пⷭ҇лъ, є҆ра́ста, ѻ҆лѵ́мпа, родїѡ́на, и҆ и҆̀же съ ни́ми.

На Гдⷭ҇и, воззва́хъ, стїхи̑ры, гла́съ а҃. Поⷣ: Всехва́льнїи мч҃ницы:

Мі́ра и҆сполнє́нїѧ, ꙳ ꙗ҆́кѡ ѻ҆рлѝ крила́тїи ꙳ пресвѣ́тлѡ преходѧ́ще, ꙳ свѧщеннопроповѣ́дницы, ꙳ ᲂу҆ловлє́нныѧ ѿ ѕлодѣ́ѧ, ꙳ привлеко́сте къ вѣ́рѣ непоро́чнѣй. ꙳ тѣ́мъ моли́тесѧ ꙳ дарова́ти дꙋша́мъ на́шымъ ꙳ ми́ръ и҆ ве́лїю ми́лость.

Те́ртїа и҆ сѡсїпа́тра ꙳ гла́сы свѧще́нными почти́мъ, ꙳ и҆ ѻ҆лѵ́мпа и҆ родїѡ́на, ꙳ и҆ съ си́ми є҆ра́ста свѧщеннотаи́нника, ꙳ и҆ бжⷭ҇твеннаго кꙋа́рта, ꙳ сла́вѧщыѧ хрⷭ҇та̀ бг҃а на́шего, ꙳ и҆ молѧ́щыѧ є҆го̀, ꙳ дарова́ти дꙋша́мъ на́шымъ ꙳ ми́ръ и҆ ве́лїю ми́лость.

Ꙗ҆зы́ки приведо́сте хрⷭ҇тꙋ̀ бг҃ꙋ, бл҃же́ннїи: ꙳ и҆зба́влены кро́вїю ꙳ благоволи́вшагѡ на землѝ роди́тисѧ, ꙳ и҆ крⷭ҇тъ и҆ сме́рть претерпѣ́вшагѡ ꙳ во́лею, всемꙋ́дрїи. ꙳ є҆го́же ны́нѣ моли́те, ꙳ дарова́ти дꙋша́мъ на́шымъ ꙳ ми́ръ и҆ ве́лїю млⷭ҇ть.

Сла́ва, и҆ ны́нѣ, бг҃оро́диченъ:

Всепѣ́таѧ влⷣчце, ꙳ наде́жде вѣ́рныхъ и҆ ᲂу҆твержде́нїе, ꙳ прибѣ́жище и҆ по́мощь, ꙳ тѧ̀ мо́лимъ, ꙳ ѿ всѧ́кїѧ бѣды̀ рабы̑ твоѧ̑ сохранѝ, ꙳ вѣ́рою покланѧ́ющыѧсѧ ржⷭ҇твꙋ̀ твоемꙋ̀. ꙳ є҆го́же молѝ, ꙳ дарова́ти дꙋша́мъ на́шымъ ꙳ ми́ръ и҆ ве́лїю ми́лость.

Крⷭ҇тобг҃оро́диченъ:

Своего̀ а҆́гнца, ꙳ а҆́гница и҆ непоро́чнаѧ влⷣчца, ꙳ на крⷭ҇тѣ̀ ꙗ҆́кѡ ви́дѣвши ви́да не и҆мꙋ́ща, нижѐ добро́ты, ᲂу҆вы̀ мнѣ̀, рыда́ющи, гл҃го́лаше: ꙳ гдѣ̀ добро́та твоѧ̀ за́йде, сладча́йшїй; ꙳ гдѣ̀ бл҃голѣ́пїе; ꙳ гдѣ̀ благода́ть блиста́ющаѧ ꙳ ѻ҆́браза твоегѡ̀, ꙳ сн҃е мо́й любе́знѣйшїй;

Тропа́рь, гла́съ г҃:

А҆пⷭ҇ли ст҃і́и, моли́те ми́лостиваго бг҃а, да прегрѣше́нїй ѡ҆ставле́нїе пода́стъ дꙋша́мъ на́шымъ.

На ᲂу҆́трени, ѻ҆́ба канѡ́на ѻ҆ктѡ́иха, и҆ ст҃ы́хъ на д҃, є҆гѡ́же краегране́сїе:

Бг҃оглагѡ́ливыѧ ᲂу҆ченикѝ пою̀ спротѧже́ннѡ. І҆ѡ́сифъ.

Гла́съ а҃. Пѣ́снь а҃. І҆рмо́съ:

Твоѧ̀ побѣди́тельнаѧ десни́ца бг҃олѣ́пнѡ въ крѣ́пости просла́висѧ: та́ бо, безсме́ртне, ꙗ҆́кѡ всемогꙋ́щаѧ, проти̑вныѧ сотрѐ, і҆и҃льтѧнѡмъ пꙋ́ть глꙋбины̀ новосодѣ́лавшаѧ.

Бжⷭ҇твеннїи сꙋ́ще ᲂу҆ченицы̀, вопло́щшагѡсѧ за милосе́рдїе бг҃а на́шегѡ: того̀ моли́те, грѣхѡ́въ дарова́ти проще́нїе, соверша́ющымъ ва́шꙋ па́мѧть, блаже́ннїи.

Зерца̑ла бж҃їѧ свѣтови̑днаѧ, вмѣсти́тєльна тогѡ̀ подаѧ́нїй ꙗ҆ви́стесѧ, бл҃же́ннїи, всѣ̑мъ вѣ̑рнымъ, благода́тельнѡ даю́ще сп҃си́тєльныѧ зари̑, бг҃ови́дцы а҆пⷭ҇ли.

Возсїѧ́ша всѣ̑мъ просвѣще́нїе, ѡ҆заре́нїй и҆сто́чникъ поче́рпше, є҆ра́стъ и҆ те́ртїй, и҆ ѻ҆лѵ́мпъ, и҆ родїѡ́нъ, и҆ сѡсїпа́тръ кꙋ́пнѡ съ кꙋа́ртомъ, ꙗ҆̀же благоче́стнѡ ᲂу҆блажи́мъ.

Бг҃оро́диченъ:

Ро́дъ человѣ́ческїй твои́мъ ржⷭ҇тво́мъ, дв҃о, ѡ҆бнови́ла є҆сѝ, сло́во бо родила̀ є҆сѝ ѻ҆́ч҃ее, въ пло́ть ме́ртвеннꙋю ѡ҆дѣ́ѧвшеесѧ, и҆ безсме́ртїѧ пꙋти̑ на́мъ показа́вшее.

Пѣ́снь г҃. І҆рмо́съ:

Є҆ди́не вѣ́дый человѣ́ческагѡ сꙋщества̀ не́мощь, и҆ ми́лостивнѡ въ нѐ воѡбра́жсѧ, препоѧ́ши мѧ̀ съ высоты̀ си́лою, є҆́же вопи́ти тебѣ̀, ст҃ы́й: ѡ҆дꙋшевле́нный хра́ме, неизрече́нныѧ сла́вы твоеѧ̀, чл҃вѣколю́бче. (с. 172)

Сло́во ꙗ҆́кѡ свѣти́льникъ мы́сленный проносѧ́ще, а҆пⷭ҇ли, бг҃опоко́рнѡ всю̀ тва́рь проидо́сте, тоѧ̀ мра́къ разгонѧ́юще, и҆ сы́ны ꙗ҆влѧ́юще свѣ́та бл҃года́тїю, но́щи невѣ́дѣнїѧ рабо́тающыѧ.

Глагѡ́лъ ва́шихъ прⷪ҇ро́чески во всю̀ и҆зы́де вселе́ннꙋю вѣща́нїе спаси́тельное, и҆ дѣ́лъ свѣ́тлое показа́нїе всю̀ зе́млю ѡ҆бтечѐ, дꙋ́шы просвѣща́ющее, бг҃оглаго́ливїи гдⷭ҇ни а҆пⷭ҇ли.

Все́льсѧ въ дꙋша́хъ ва́шихъ, мꙋ́дрїи, дх҃ъ всест҃ы́й, бг҃ови́дны весьма̀ содѣ́ла: всю́дꙋ мі́ръ ѡ҆бходѧ́ще, хра́мы разори́сте і҆́дѡльскїѧ бл҃года́тїю, и҆ бг҃ꙋ цр҃кви воздвиго́сте.

Бг҃оро́диченъ:

Сн҃а ѻ҆́ч҃а є҆диноро́днаго, безма́тернѧ пе́рвѣе и҆ и҆зъ тебє̀ рожде́нна ᲂу҆вѣ́дѣвше без̾ѻ́ч҃а бж҃їю мт҃рь и҆сповѣ́даемъ тѧ̀, безстра́стнѡ ро́ждшꙋю, и҆ дв҃ꙋ пребы́вшꙋ па́че сло́ва, мр҃і́е бг҃оневѣ́сто.

Конда́къ, гла́съ д҃. Подо́бенъ: Ꙗ҆ви́лсѧ є҆сѝ:

Ꙗ҆ви́сѧ дне́сь а҆пⷭ҇лъ честно́е торжество̀, подаю́щее ꙗ҆́вѣ всѣ̑мъ прегрѣше́нїй ѡ҆ставле́нїе, соверша́ющымъ и҆́хъ па́мѧть.

Та́же сѣда́ленъ, гла́съ а҃. Подо́бенъ: Гро́бъ тво́й:

Є҆ра́ста и҆ ѻ҆лѵ́мпа, сѡсїпа́тра и҆ те́ртїа, родїѡ́на кꙋ́пнѡ и҆ кꙋа́рта па́мѧть согла́снѡ почти́мъ, къ ни̑мъ воспѣва́юще: бжⷭ҇твеннїи проповѣ́дателїе, и҆ слꙋги̑ сло́ва, дꙋ́шы на́шѧ вѣ́чнꙋющїѧ мꙋ́ки моли́твами ва́шими и҆зба́вите.

Сла́ва, и҆ ны́нѣ, бг҃оро́диченъ:

Безневѣ́стнаѧ, чⷭ҇таѧ бцⷣе дв҃о, є҆ди́на вѣ́рныхъ предста́тельнице и҆ покро́ве, бѣ́дъ и҆ скорбе́й и҆ лю́тыхъ ѡ҆бстоѧ́нїй всѧ̑ и҆зба́ви, на тѧ̀ ᲂу҆пова́нїе, ѻ҆трокови́це, и҆мꙋ́щыѧ, и҆ дꙋ́шы на́шѧ спасѝ бжⷭ҇твенными моли́твами твои́ми.

Крⷭ҇тобг҃оро́диченъ:

Нескве́рнаѧ а҆́гница а҆́гнца и҆ па́стырѧ повѣ́шена на дре́вѣ ме́ртва зрѧ́щи, пла́чꙋщи, вѣща́ше, мт҃рски восклица́ющи: ка́кѡ претерплю̀ твоѐ, є҆́же па́че сло́ва, сн҃е мо́й, сни́тїе и҆ вѡ́льныѧ стрⷭ҇ти, бж҃е пребл҃гі́й;

Пѣ́снь д҃. І҆рмо́съ:

Го́рꙋ тѧ̀, бл҃года́тїю бж҃їею приѡсѣне́ннꙋю, прозорли́выма а҆ввакꙋ́мъ ᲂу҆смотри́въ ѻ҆чи́ма, и҆зъ тебє̀ и҆зы́ти і҆и҃левꙋ провозглаша́ше ст҃о́мꙋ, во спасе́нїе на́ше и҆ ѡ҆бновле́нїе.

Оу҆тверждє́нїѧ дре́вле неꙋтверждє́нымъ бы́вше, раскопа́сте ва́шими бг҃ода́нными ᲂу҆чє́нїи вра̑жїѧ тверды̑ни всера̑зныѧ, и҆ запꙋстѣ́нїю преда́сте, бг҃ови́днїи сп҃совы а҆пⷭ҇ли.

Вельмѝ хрⷭ҇тѡ́ва вели̑чїѧ проповѣ́дающе, ᲂу҆ма́ленїи всеконе́чнѡ, великопроповѣ̑дницы, земны̑ѧ вельмѝ просвѣти́сте свѣ́тлѡ, вели́чїемъ бл҃года́ти соверши́вше, бж҃е́ственнїи а҆пⷭ҇ли.

Да похва́литсѧ бжⷭ҇твенный ѻ҆лѵ́мпъ пѣснопѣ́ньми, и҆ родїѡ́нъ съ ни́мъ да возвели́читсѧ благоче́стнѡ, тече́нїе соверши́вше мꙋче́нїѧ, съ петро́мъ бг҃опроповѣ́дникомъ въ ри́мѣ, глава́ми ѿсѣка́еми.

Бг҃оро́диченъ:

Чꙋде́съ бо́льше всѣ́хъ, всенепоро́чнаѧ, въ тебѣ̀ новосодѣ́ѧвшеесѧ чꙋ́до показа́сѧ ꙗ҆́вственнѡ: бг҃а бо родила̀ є҆сѝ тѣле́снѣ, земны̑мъ за милосе́рдїе соедини́вшасѧ, въ несли́тнѣмъ соедине́нїи, бг҃оневѣ́сто.

Пѣ́снь є҃. І҆рмо́съ:

Просвѣти́вый сїѧ́нїемъ прише́ствїѧ твоегѡ̀, хрⷭ҇тѐ, и҆ ѡ҆свѣти́вый крⷭ҇то́мъ твои́мъ мі́ра концы̀, сердца̀ просвѣтѝ свѣ́томъ твоегѡ̀ бг҃оразꙋ́мїѧ, правосла́внѡ пою́щихъ тѧ̀.

Мꙋ́дрость ѻ҆́ч҃а всѐ ѡ҆сꙋществова́вшаѧ, ᲂу҆чи́тели въ мі́ръ ва́съ посла̀, въ мꙋ́дрости дх҃а и҆ и҆́стины, ꙗ҆вле́нїемъ всѧ̑ ᲂу҆мꙋдрѧ́ющыѧ, сла́внїи.

Сло́ва вмета́юще, всемꙋ́дрїи, ᲂу҆́дицꙋ, возвлеко́сте и҆зъ глꙋбины̀ невѣ́дѣнїѧ бл҃года́тїю ры́бъ сꙋ́щыѧ безгла́сншыѧ, и҆ гдⷭ҇ꙋ вѣ́ровавшыѧ приведо́сте. (с. 174)

Восхва́лимъ ѻ҆лѵ́мпа, и҆ вели́каго родїѡ́на, и҆ те́ртїа, и҆ сѡсїпа́тра, кꙋ́пнѡ и҆ є҆ра́ста, и҆ бжⷭ҇твеннаго кꙋа́рта, хрⷭ҇топроповѣ́дники, и҆ всѣ́хъ благочести́выхъ защи́тники.

Бг҃оро́диченъ:

Зачала̀ є҆сѝ сло́вомъ сло́во, всенепоро́чнаѧ, и҆ родила̀ є҆сѝ па́че ᲂу҆ма̀ и҆ сло́ва, бг҃оневѣ́стнаѧ, бы́вша, бцⷣе, чл҃вѣ́ка. тѣ́мъ тѧ̀ словєсы̀ бг҃одохнове́нными всегда̀ ᲂу҆блажа́емъ.

Пѣ́снь ѕ҃. І҆рмо́съ:

Ѡ҆бы́де на́съ послѣ́днѧѧ бе́здна, нѣ́сть и҆збавлѧ́ѧй, вмѣни́хомсѧ ꙗ҆́кѡ ѻ҆́вцы заколе́нїѧ, спасѝ лю́ди твоѧ̑, бж҃е на́шъ: ты́ бо крѣ́пость немощствꙋ́ющихъ и҆ и҆справле́нїе.

Пречестні́и, ꙗ҆́кѡ ка́менїе валѧ́ющесѧ на землѝ, привали́сте къ благоче́стїю и҆́же нра́вомъ лꙋка́вымъ ка́менїю нечꙋ́вственномꙋ слꙋжа́щыѧ, бг҃ови́днїи сло́ва таи́нницы блаже́ннѣйшїи.

Є҆ди́ницꙋ въ трїе́хъ ли́цѣхъ неразлꙋ́чнꙋ, несли́тнꙋ проповѣ́дающе, многобо́жнꙋю ѿ землѝ разори́сте ле́сть, неле́стнїи хрⷭ҇тѡ́вы а҆пⷭ҇ли, и҆ лю́тѣ прельщє́нныѧ къ свѣ́тꙋ бг҃озна́нїѧ наста́висте.

Ра́зꙋмы кра́сными несмы́сльство немꙋ́дрыхъ, премꙋ́дрїи а҆пⷭ҇ли, разори́сте, и҆ ᲂу҆тверди́сте бг҃ꙋ всецр҃ю̀ є҆ди́номꙋ вѣ́ровати, тва́рь всю̀ бжⷭ҇твенными свѣтоли̑тїи ᲂу҆краша́ющемꙋ.

Бг҃оро́диченъ:

Ꙗ҆́кѡ и҆но́е не́бо, пе́рвагѡ, влⷣчце, ꙗ҆́вльшисѧ вы́шшее, тѧ̀ сла́вимъ, сл҃нце на́мъ пра́вды возсїѧ́вшее, и҆ глꙋбо́кꙋю невѣ́дѣнїѧ тмꙋ̀ ѿгна́вшее.

Конда́къ, гла́съ в҃. Подо́бенъ: Вы́шнихъ и҆щѧ̀:

Бжⷭ҇твеннымъ свѣ́томъ ᲂу҆́мъ ѡ҆зари́вше, виті̑йскаѧ плетє́нїѧ мꙋ́дрѣ разори́сте: и҆ ꙗ҆зы́ки всѧ̑ ᲂу҆лови́вше, а҆пⷭ҇ли сла́внїи, влⷣцѣ приведо́сте, трⷪ҇цꙋ бжⷭ҇твеннꙋю сла́вити наꙋча́юще.

І҆́косъ:

Ꙗ҆́кѡ ᲂу҆ч҃ницы̀ всѣ́хъ влⷣки, мре́жею, бг҃ови́дцы, ва́шихъ моли́твъ, и҆зъ глꙋбины̀ прегрѣше́нїй и҆звлецы́те смире́ннꙋю дꙋ́шꙋ мою̀, сѣтьмѝ ᲂу҆ловле́ннꙋю де́мѡнскихъ ко́зней: да до́брѣ преше́дъ про́чее вре́мѧ живота̀ моегѡ̀, пою̀ ва́съ любо́вїю, и҆ просла́влю житїѐ ва́ше непоро́чное, є҆́же на землѝ соверши́сте, лю́тѣ ѡ҆мрачє́нныѧ просвѣти́вше, трⷪ҇цꙋ бжⷭ҇твеннꙋю сла́вити наꙋча́юще.

Пѣ́снь з҃. І҆рмо́съ:

Тебѐ ᲂу҆́мнꙋю, бцⷣе, пе́щь, разсмотрѧ́емъ, вѣ́рнїи, ꙗ҆́коже бо ѻ҆́троки спасѐ трѝ превозноси́мый, мі́ръ ѡ҆бновѝ во чре́вѣ твое́мъ всецѣ́лъ, хва́льный ѻ҆тцє́въ бг҃ъ и҆ препросла́вленъ.

Тѧ̀ свѧще́нна і҆коно́ма, є҆ра́сте, цр҃кве хрⷭ҇то́вы, сꙋ́щїѧ во і҆ерⷭ҇ли́мѣ, пишѧ̀, проповѣ́даше па́ѵелъ а҆пⷭ҇лъ, съ ни́миже тѧ̀ почита́емъ, пою́ще хрⷭ҇тꙋ̀: хва́льный ѻ҆тцє́въ на́шихъ бж҃е, бл҃гослове́нъ є҆сѝ.

Терпѣ́нїемъ и҆скꙋше́нїй, и҆ скорбе́й, и҆ гоне́нїй и҆скꙋси́всѧ, и҆ ꙗ҆́звами хрⷭ҇то́выми ᲂу҆добрѧ́емь, є҆ра́сте пребога́те, велегла́снѡ взыва́лъ є҆сѝ: хва́льный ѻ҆тцє́въ бж҃е, бл҃гослове́нъ є҆сѝ.

Зако́на но́вагѡ ꙗ҆ви́лсѧ є҆сѝ, кꙋа́рте, возвѣсти́тель, ве́тхагѡ беззако́нїѧ ѿводѧ̀ чꙋждемꙋ́дрєнныѧ, и҆ къ возновле́нїю жи́зни преводѧ̀ зовꙋ́щыѧ: хва́льный ѻ҆тцє́въ бж҃е, бл҃гослове́нъ є҆сѝ.

Бг҃оро́диченъ:

Ѻ҆́ч҃ее сло́во соприсносꙋ́щное, ꙗ҆́вльшеесѧ земны̑мъ воплоти́ла є҆сѝ, и҆ тѣ́ломъ, ѻ҆трокови́це, породила̀ є҆сѝ человѣ́ка бы́вша, да спасе́тъ человѣ́ка, хва́льный ѻ҆тцє́въ бг҃ъ и҆ препросла́вленъ.

Пѣ́снь и҃. І҆рмо́съ:

Въ пещѝ ѻ҆́троцы і҆и҃левы, ꙗ҆́коже въ горни́лѣ, добро́тою бл҃гоче́стїѧ чистѣ́е зла́та блеща́хꙋсѧ, гл҃го́люще: бл҃гослови́те всѧ̑ дѣла̀ гдⷭ҇нѧ гдⷭ҇а, по́йте и҆ превозноси́те во всѧ̑ вѣ́ки.

Нерасте́рзни столпѝ хрⷭ҇то́вы ꙗ҆́вльшесѧ цр҃кве, разори́сте ѕлоче́стїѧ стѣ́ны всѧ̑, вѣ̑рныѧ же, ꙗ҆́кѡ ка́менїе, назда́вше на ка́мени вѣ́ры, вопїю́щыѧ: всѧ̀ дѣла̀ гдⷭ҇а по́йте, и҆ превозноси́те є҆го̀ во вѣ́ки.

Законополо́жницы ꙗ҆ви́стесѧ вы̀, дх҃а зако́нъ написꙋ́юще въ сердца́хъ вѣ́рныхъ, всеблаже́ннїи, и҆́мже просвѣща́еми вопїѧ́хꙋ: всѧ̑ дѣла̀ гдⷭ҇а по́йте, и҆ превозноси́те є҆го̀ во вѣ́ки.

Оу҆краси́всѧ, блаже́нный ѻ҆лѵ́мпе, въ ѻ҆́ньже де́нь пе́тръ вели́кїй коне́цъ прїѧ́тъ, ꙗ҆́вѣ сконча́всѧ, кꙋ́пнѡ съ родїѡ́номъ мече́мъ, повелѣ́нїемъ не́рѡна, беззако́ннагѡ царѧ̀: и҆ совокꙋпи́стесѧ нбⷭ҇нымъ ликѡ́мъ.

Бг҃оро́диченъ:

Ста́мна дре́вле и҆мꙋ́щаѧ ма́ннꙋ, чⷭ҇таѧ, ѡ҆бразова́ше тѧ̀: хрⷭ҇та́ бо, сла́дость на́шꙋ, носи́ла є҆си́ бо чре́вѣ, и҆ пло́тїю родила̀ є҆сѝ, и҆збавлѧ́ющаго всѧ́кїѧ го́рести безмѣ́стныхъ прегрѣше́нїй, превозносѧ́щыѧ того̀ во вѣ́ки.

Пѣ́снь ѳ҃. І҆рмо́съ:

Ѻ҆́бразъ чи́стагѡ рождества̀ твоегѡ̀ ѻ҆гнепали́маѧ кꙋпина̀ показа̀ неѡпа́льнаѧ: и҆ ны́нѣ на на́съ напа́стей свирѣ́пѣющꙋю ᲂу҆гаси́ти, мо́лимсѧ, пе́щь, да тѧ̀, бцⷣе, непреста́ннѡ велича́емъ.

Ра́внѡ тече́нїе соверши́вше, ра́внѡ ѿ влⷣки сло́ва ѡ҆бога́щшесѧ, ра́вныхъ дх҃а дарѡ́въ сподо́бистесѧ, и҆ по́честей ра́вныхъ полꙋчи́сте, а҆пⷭ҇ли гдⷭ҇ни, просвѣти́телїе серде́цъ на́шихъ.

Ꙗ҆́коже нбⷭ҇ныѧ ѕвѣ́зды, бг҃озна́меньми всю̀ зе́млю просвѣти́сте, тмꙋ̀ глꙋбо́кꙋю невѣ́дѣнїѧ ѿгна́вше, и҆ сы́ны днѐ показа́вше, дре́вле порабощє́нныѧ козньмѝ вражде́бника.

По́лкъ ѕлоꙋ́мныхъ погꙋби́сте, во глꙋбинꙋ̀ дре́вле ври́нꙋвшихъ ꙗ҆зы́ки люде́й: мно́жество же бг҃ꙋ приведо́сте спаса́емыхъ, чинѡ́мъ совокꙋплѧ́еми невеще́ственныхъ си́лъ, всеизбра́ннїи хрⷭ҇то́вы а҆пⷭ҇ли.

Вше́дше къ премі̑рнымъ ѻ҆лѵ́мпъ вели́кїй и҆ сѡсїпа́тръ, те́ртїй кꙋ́пнѡ и҆ родїѡ́нъ, и҆ кꙋа́ртъ, и҆ є҆ра́стъ свѧще́ннѣйшїй, и҆ ны́нѣ ѡ҆ мі́рѣ и҆зба́вителѧ мо́лѧтъ.

Бг҃оро́диченъ:

Пощадѝ лю́ди твоѧ̑, гдⷭ҇и, нахожде́нїѧ ва́рварскагѡ на́съ и҆збавлѧ́ѧ, и҆ грѣхѡ́въ и҆ напа́стей и҆ мꙋ́ки вѣ́чныѧ, моли́твами ро́ждшїѧ тѧ̀ дв҃ы прест҃ы́ѧ, и҆ сла́вныхъ а҆пⷭ҇лъ твои́хъ.

Свѣти́ленъ. Поⷣ: Нб҃о ѕвѣзда́ми:

Свѣ̑тлаѧ прїѧ́тєлища дх҃а ст҃а́гѡ, пресвѣ̑тлыѧ зари̑ невече́рнѧгѡ днѐ, свѣтода́тєльнаѧ мѡ́лнїѧ, а҆пⷭ҇лы, въ пѣ́снехъ вѣ́рнѡ просла́вимъ всѝ.

Бг҃оро́диченъ:

Тѧ̀ застꙋ́пницꙋ всѝ и҆́мамы грѣ́шнїи, ѽ прест҃а́ѧ дв҃о! ты̀ благоꙋвѣ́тлива на́мъ содѣ́лай сн҃а твоего̀ мт҃рними твои́ми мольба́ми.