Мѣ́сѧца тогѡ́же въ ѳ҃і-й де́нь. Ст҃а́гѡ прⷪ҇ро́ка а҆вді́а:
И҆ ст҃а́гѡ мч҃ника варлаа́ма:
И҆ ст҃ы́хъ прпⷣбныхъ ѻ҆тє́цъ на́шихъ, пꙋсты́нныхъ жи́телей, въ постѣ̀ просїѧ́вшихъ, варлаа́ма, и҆ і҆ѡаса́фа царе́вича, въ вели́цѣй землѝ, глаго́лемѣй і҆нді́и.
Слꙋ́жба и҆́хъ пи́сана по се́й слꙋ́жбѣ.
На Гдⷭ҇и, воззва́хъ, стїхи̑ры прⷪ҇ро́ка, гла́съ а҃.
Подо́бенъ: Всехва́льнїи мч҃ницы:
Прїѧ́телище дх҃а ꙳ свѣ́тлое, а҆вді́е, бы́въ, ꙳ и҆ ѿ негѡ̀ просвѣща́емь бг҃ови́днѣйше, ꙳ прⷪ҇ро́чествїѧ ѻ҆́бразомъ, ꙳ и҆ бꙋ́дꙋщихъ прозна́нїемъ, ꙳ и҆ зна́нїемъ и҆́стины ѡ҆богати́лсѧ є҆сѝ. ꙳ и҆ ны́нѣ моли́сѧ, ꙳ дарова́ти дꙋша́мъ на́шымъ ꙳ ми́ръ и҆ ве́лїю ми́лость.
И҆́миже воѡбража́етсѧ бг҃ъ ꙳ пе́рвыми сво́йствы ꙳, и҆ сꙋ́щественными ᲂу҆каза̑нїи, ꙳ си́хъ сла́внїи ꙳ и҆ честні́и прⷪ҇ро́цы, ꙳ причаще́нїемъ и҆ благода́тїю, ꙳ второ́е по да́рꙋ причаща́ютсѧ, ꙳ просвѣща́ющꙋ гдⷭ҇ꙋ ᲂу҆го́дники своѧ̑ ꙳ свое́ю свѣ́тлостїю.
Незаходи́магѡ и҆сполнѧ́емь свѣ́та, ꙳ и҆ сла́вꙋ ви́дѧ, ꙳ па́че ᲂу҆ма̀ и҆ смы́сла, ꙳ и҆ предстоѧ̀ влⷣцѣ всѣ́хъ, ꙳ ꙗ҆́кѡ прⷪ҇ро́къ сла́вный, ꙳ и҆ бжⷭ҇твенный бг҃овѣща́тель бы́въ. ꙳ того̀ молѝ, ꙳ дарова́ти дꙋша́мъ на́шымъ ꙳ ми́ръ и҆ ве́лїю ми́лость.
И҆́ны стїхи̑ры, ст҃а́гѡ варлаа́ма, гла́съ д҃. Подо́бенъ: Ꙗ҆́кѡ до́блѧ:
Столпа̀ твердѣ́йшїй, ꙳ и҆ мѣ́ди крѣпча́йшїй, ꙳ и҆ желѣ́за бы́лъ є҆сѝ мощнѣ́йшїй: ꙳ ѿстꙋпа́етъ бо жго́мо, ꙳ и҆ а҆́бїе разрꙋша́емо си́хъ ко́еждо ѻ҆гне́мъ, ꙳ тогѡ̀ нꙋ́ждею побѣжда́емо, ꙳ твоѧ́ же непрекло́нна десни́ца просте́рта ꙳ ᲂу҆́глїємъ жгꙋ́щымъ ꙳ пресла́внѡ преѡдолѣ̀, всемꙋ́дре.
Свѧще́нникъ ꙗ҆́коже бы́въ, ꙳ и҆ бг҃ꙋ предстоѧ̀, ꙳ и҆ къ томꙋ̀, блаже́нне, приходѧ̀, ꙳ не чꙋжде́ю кро́вїю, свое́ю же наипа́че, ꙳ и҆ рꙋко́ю мч҃ническою ꙳ благово́нїѧ кади́ло прине́слъ є҆сѝ, ꙳ не де́мѡнскимъ пре́лестемъ, ꙳ хрⷭ҇тꙋ́ же сп҃сꙋ и҆ влⷣцѣ и҆ при́снѡ црⷭ҇твꙋющемꙋ.
Свѧще́нника приносѧ́ща, и҆ а҆́гнца приноси́маго, ꙳ того́жде ѻ҆бою́дꙋ тѧ̀, всехва́льне, ꙳ ра́достнѡ и҆менꙋ́емъ, ꙳ ꙗ҆́кѡ сꙋ́ща ѻ҆боѐ тебѐ сама́го бг҃ꙋ, ꙳ ꙗ҆́кѡ всенепоро́чное заколе́нїе, всесоже́гъ ѻ҆́гненнымъ мꙋче́нїемъ. ꙳ є҆го́же молѝ спастѝ чтꙋ́щыѧ при́снѡ ꙳ всесла́внꙋю па́мѧть твою̀.
Сла́ва, и҆ ны́нѣ, бг҃оро́диченъ:
Тꙋ́чами дх҃а прест҃а́гѡ, пречⷭ҇таѧ, ꙳ мою̀ мы́сль ѡ҆росѝ, ꙳ ꙗ҆́же ка́плю ро́ждшаѧ хрⷭ҇та̀, неизче́тнѡ, ꙳ безмѣ̑рнаѧ беззакѡ́нїѧ человѣ́кѡвъ ꙳ щедро́тами и҆змы́вшꙋю: и҆зсꙋшѝ и҆сто́чникъ страсте́й мои́хъ, ꙳ и҆ пото́ка мѧ̀ сподо́би ꙳ сла́дости жи́зни при́снѡ ꙳ моли́твами твои́ми.
Крⷭ҇тобг҃оро́диченъ:
А҆́гнца и҆ па́стырѧ тѧ̀, ꙳ на дре́вѣ ꙗ҆́кѡ ви́дѣ, ꙳ а҆́гница ро́ждшаѧ рыда́ше, ꙳ и҆ ма́терски тебѣ̀ вѣща́ше: ꙳ сн҃е возжелѣ́нне, ꙳ ка́кѡ на дре́вѣ крⷭ҇тнѣмъ повѣ́шенъ є҆сѝ, долготерпѣли́ве; ꙳ ка́кѡ рꙋ́цѣ и҆ но́зѣ твоѝ, сло́ве, ꙳ пригвозди́шасѧ ѿ беззако́нныхъ ꙳ и҆ кро́вь твою̀ и҆злїѧ́лъ є҆сѝ, влⷣко;
Тропа́рь мч҃ника, гла́съ д҃:
Мч҃никъ тво́й, гдⷭ҇и, варлаа́мъ, во страда́нїи свое́мъ вѣне́цъ прїѧ́тъ нетлѣ́нный, ѿ тебє̀ бг҃а на́шегѡ: и҆мѣ́ѧй бо крѣ́пость твою̀, мꙋчи́телей низложѝ, сокрꙋшѝ и҆ де́мѡнѡвъ немощны̑ѧ де́рзѡсти. тогѡ̀ моли́твами спасѝ дꙋ́шы на́шѧ.
На ᲂу҆́трени канѡ́нъ ѻ҆ктѡ́иха є҆ди́нъ: и҆ ст҃ы́хъ два̀.
Канѡ́нъ прⷪ҇ро́ка, є҆гѡ́же краегране́сїе:
Прозорли́вагѡ а҆вді́а пою̀ сла́вꙋ. Ѳеофа́ново.
Гла́съ є҃. Пѣ́снь а҃. І҆рмо́съ:
Сп҃си́телю бг҃ꙋ, въ мо́ри лю́ди немо́крыми нога́ми наста́вльшемꙋ, и҆ фараѡ́на со всево́инствомъ пото́пльшемꙋ, томꙋ̀ є҆ди́номꙋ пои́мъ, ꙗ҆́кѡ просла́висѧ.
Сп҃си́телю бг҃ꙋ прⷪ҇ро́чески предстоѧ̀ ны́нѣ, со дерзнове́нїемъ моли́сѧ, свѣща́тельными лꙋча́ми просвѣща́ти, вѣ́рою, бг҃одохнове́нне, тѧ̀ блажа́щыѧ.
И҆́же всѧ̑ ꙗ҆́вѣ прозна́тельнѡ зрѧ́й, твоегѡ̀ се́рдца немꙋ́тное и҆ чи́стое и҆ свѣтоза́рное, блаже́нне, ви́дѧ, проро́ка бг҃опрїѧ́тна тѧ̀ поставлѧ́етъ.
Видѣ̑нїѧ ви́дѣвъ и҆́стиннѡ, ѿ бг҃а тебѣ̀ и҆з̾ѧвлѧ́ємаѧ, проповѣ́далъ є҆сѝ ѕлоче́стїе бра́тїй и҆ па́гꙋбꙋ лю́тꙋю, и҆ тѣ́хъ пра́ведное, бл҃же́нне, и҆зкорене́нїе.
Бг҃оро́диченъ:
Спа́сшїисѧ твои́мъ, бг҃ороди́тельнице чⷭ҇таѧ, безсѣ́меннымъ рождество́мъ, мо́лимъ тѧ̀: мїрскі́ѧ напа́сти и҆зба́ви ны̀, согла́снѡ зовꙋ́щыѧ пѣ́снь побѣ́днꙋю.
И҆́нъ канѡ́нъ мꙋ́ченика, є҆гѡ́же краегране́сїе:
Терпѣли̑выѧ твоѧ̑, варлаа́ме, пою̀ болѣ̑зни. Ѳеофа́ново.
Гла́съ д҃. Пѣ́снь а҃. І҆рмо́съ:
Воспою̀ тебѣ̀, гдⷭ҇и бж҃е мо́й, ꙗ҆́кѡ и҆зве́лъ є҆сѝ лю́ди и҆зъ рабо́ты є҆гѵ́петскїѧ, покры́лъ же є҆сѝ колесни̑цы фараѡ́новы и҆ си́лꙋ.
Твоегѡ̀ страда́нїѧ свѣтлостьмѝ ѡ҆зарѧ́емь, на́съ, вѣ́рою чтꙋ́щихъ па́мѧть твою̀, соблюдѝ, варлаа́ме, моли́твами твои́ми.
Ѻ҆́гнь ᲂу҆гаси́вый нече́стїѧ, бг҃оче́стїѧ и҆звѣ́стнѡ ѻ҆гне́мъ бг҃одохнове́ннымъ, да почти́тсѧ пѣснопѣ́сньми варлаа́мъ чꙋ́дный.
Ѡ҆ благоче́стїи подвиза́всѧ, вѣнчено́сче варлаа́ме, вѣнце́мъ сла́вы ны́нѣ досто́йнѡ почествова́лсѧ є҆сѝ, десни́цею вседержи́телевою.
Крѣ́пость тебѣ̀ дарова̀ влⷣка, на разли̑чныѧ ра̑ны, всебл҃же́нне мꙋ́чениче: сегѡ̀ ра́ди побѣди́лъ є҆сѝ безбо́жныхъ свирѣ́пство.
Бг҃оро́диченъ:
Лѣ́ствица ꙗ҆ви́ласѧ є҆сѝ нбⷭ҇наѧ, є҆́юже сни́де къ на́мъ сло́во, дв҃о, ю҆́же дре́вле прови́дѣ і҆а́кѡвъ, пра́ѻтецъ тво́й.
Пѣ́снь г҃. І҆рмо́съ:
Си́лою крⷭ҇та̀ твоегѡ̀, хрⷭ҇тѐ, ᲂу҆твердѝ моѐ помышле́нїе, во є҆́же пѣ́ти и҆ сла́вити спаси́тельное твоѐ вознесе́нїе.
Во́дъ та́инственныхъ рѣка̀, и҆зъ пꙋчи́ны происходѧ̀ дарѡ́въ дх҃а, бг҃овѣща́телю, бы́лъ є҆сѝ.
Хотѣ́нїемъ и҆ про́мысломъ бж҃їимъ, провозвѣща́ти бꙋ̑дꙋщаѧ предложи́лсѧ є҆сѝ, достосла́вне.
Просвѣща́емь бжⷭ҇твеннымъ свѣ́томъ и҆ нбⷭ҇нымъ, провозвѣсти́лъ є҆сѝ бꙋ́дꙋщее ꙗ҆зы́кѡмъ спасе́нїе, всебл҃же́нне.
Бг҃оро́диченъ:
Всели́сѧ сло́во въ тѧ̀, дв҃о мт҃и, спаса́етъ же бцⷣꙋ мꙋ́дрствꙋющыѧ тѧ̀, хода́тайствомъ твои́мъ, всенепоро́чнаѧ.
И҆́нъ. І҆рмо́съ:
Лꙋ́къ си́льныхъ и҆знемо́же, и҆ немощствꙋ́ющїи препоѧ́сашасѧ си́лою: сегѡ̀ ра́ди ᲂу҆тверди́сѧ въ гдⷭ҇ѣ се́рдце моѐ.
Ве́сь пло́тскїй сою́зъ и҆ сочета́нїе твои́хъ ᲂу҆дѡ́въ разрѣша́шесѧ: но крѣ́пость соблюде́сѧ твоеѧ̀ дꙋшѝ нерасте́рзана.
Стремле́нїе благомо́щнѡ претерпѣ́лъ є҆сѝ стрꙋ́жꙋщихъ твоѧ̑ ре́бра, всебл҃же́нне, терпѣ́нїе ю҆́ношеское крѣ́пкѡ показа́въ.
Кто̀ твоѐ крѣ́пкое и҆ си́льное, и҆ по́мысла неꙋжа́сное мꙋдрова́нїе похвала́ми похва́литъ по досто́инствꙋ, всебл҃же́нне;
Бг҃оро́диченъ:
Оу҆ста́висѧ тлѧ̀ сме́рти во ѵ҆поста́сной пло́тїю жи́зни, пречⷭ҇таѧ, человѣ́кѡмъ ꙗ҆́вльшейсѧ и҆зъ чре́ва твоегѡ̀, бг҃оневѣ́стнаѧ.
Сѣда́ленъ прⷪ҇ро́ка, гла́съ а҃. Подо́бенъ: Гро́бъ тво́й, сп҃се:
Вели́кїй а҆вді́й, бжⷭ҇твенными сїѧ̑нїи ᲂу҆́мъ свѣтови́дный стѧжа́въ, сказꙋ́етъ бꙋ̑дꙋщаѧ, дх҃омъ ст҃ы́мъ вѣща́ѧ. сего̀ дне́сь, благочестивомꙋ́дреннѡ чтꙋ́ще, соверша́емъ свѧще́ннꙋю є҆гѡ̀ па́мѧть, сердца̀ просвѣща́ющꙋю.
Сла́ва, мч҃ника, гла́съ д҃. Подо́бенъ: Вознесы́йсѧ:
Пла́мень нече́стїѧ ᲂу҆гаси́въ, и҆ росо́ю бг҃озна́нїѧ вже́глъ вѣ́рныхъ сердца̀, ны́нѣ да почти́тсѧ вѣ́рнѡ варлаа́мъ сла́вный пѣ́сньми бжⷭ҇твенными: се́й бо посрамѝ і҆́дѡльскꙋю ле́сть, и҆ побѣ́дный вѣне́цъ взе́мъ, всѣ̑мъ про́ситъ грѣхѡ́въ ѡ҆ставле́нїѧ.
И҆ ны́нѣ, бг҃оро́диченъ:
И҆́же на прⷭ҇то́лѣ херꙋві́мстѣмъ сѣдѧ́й, и҆ въ нѣ́дрѣхъ ѻ҆́ч҃ихъ пребыва́ѧй, ꙗ҆́кѡ на прⷭ҇то́лѣ ст҃ѣ́мъ сѣди́тъ свое́мъ, влⷣчце, въ нѣ́дрѣхъ твои́хъ: вопло́щсѧ бо бг҃ъ вои́стиннꙋ, воцр҃и́сѧ надъ всѣ́ми ꙗ҆зы́ки, и҆ разꙋ́мнѡ ны́нѣ пои́мъ є҆мꙋ̀. є҆го́же ᲂу҆молѝ спасти́сѧ рабѡ́мъ твои̑мъ.
Крⷭ҇тобг҃оро́диченъ:
И҆зъ безнача́льнагѡ ѻ҆ц҃а̀ рожде́ннаго, напослѣ́докъ тѧ̀ пло́тїю ро́ждшаѧ, на крⷭ҇тѣ̀ ви́сѧща зрѧ́щи, хрⷭ҇тѐ, ᲂу҆вы̀ мнѣ̀, любе́знѣйшїй і҆и҃се, вопїѧ́ше: ка́кѡ, сла́вимый ꙗ҆́кѡ бг҃ъ ѿ а҆́гг҃лъ, ѿ беззако́нныхъ ны́нѣ человѣ̑къ, сн҃е, хотѧ̀ распина́ешисѧ; пою́ тѧ, долготерпѣли́ве.
Пѣ́снь д҃. І҆рмо́съ:
Оу҆слы́шахъ слꙋ́хъ си́лы крⷭ҇та̀, ꙗ҆́кѡ ра́й ѿве́рзесѧ и҆́мъ, и҆ возопи́хъ: сла́ва си́лѣ твое́й, гдⷭ҇и.
Прⷪ҇ро́чества бл҃года́ть, ѿ страсте́й ꙗ҆́кѡ пред̾ѡчи́стивъ твою̀ дꙋ́шꙋ, дх҃омъ ст҃ы́мъ прїе́мъ, возопи́лъ є҆сѝ: сла́ва си́лѣ твое́й, гдⷭ҇и.
Прⷪ҇ро́къ а҆вді́й, заре́ю свѣтода́тельныѧ мо́лнїи ѡ҆зарѧ́емь, просвѣтѝ на́съ зва́ти тебѣ̀: сла́ва си́лѣ твое́й, гдⷭ҇и.
Невѣстокраси́тель ꙗ҆ви́лсѧ є҆сѝ, всебл҃же́нне, цр҃ко́вный, ѿ сїѡ́на проповѣ́давъ сп҃са и҆зы́ти, є҆мꙋ́же зове́мъ: сла́ва си́лѣ твое́й, гдⷭ҇и.
Бг҃оро́диченъ:
Собезнача́льное и҆ соприсносꙋ́щное сло́во ѻ҆́ч҃ее родила̀ є҆сѝ, чⷭ҇таѧ, бг҃олѣ́пнѡ, є҆мꙋ́же зове́мъ: сла́ва си́лѣ твое́й, гдⷭ҇и.
И҆́нъ. І҆рмо́съ:
Твоегѡ̀ на землѝ ꙗ҆вле́нїѧ, хрⷭ҇тѐ бж҃е, проповѣ́даѧ проро́къ прише́ствїе, съ весе́лїемъ вопїѧ́ше: сла́ва си́лѣ твое́й, гдⷭ҇и.
Виті́йское скверносло́вїе ѿри́нꙋвъ, ᲂу҆че́нїе же а҆пⷭ҇льское прїе́мъ и҆́стинное, сла́вне, свидѣ́тель и҆́стинный бы́лъ є҆сѝ.
И҆́же ѻ҆гнѧ̀ си́льнѣйшее произволе́нїе стѧжа́въ, мꙋчи́телей безꙋ́мїе низложи́въ, зове́ши: сла́ва си́лѣ твое́й, гдⷭ҇и.
Ѡ҆ хрⷭ҇тѣ̀ да́же до сме́рти, терпѣливодꙋ́шне, ѻ҆гню̀ и҆ мꙋ́камъ проти́вилсѧ є҆сѝ, велегла́снѡ поѧ̀: сла́ва си́лѣ твое́й, гдⷭ҇и.
Си́льнѣйшимъ преꙋсе́рдїемъ, всебл҃же́нне, ѡ҆бдержи́мь, пре́лесть попра́лъ є҆сѝ бг҃омꙋ́дреннѡ, поѧ̀: сла́ва си́лѣ твое́й, гдⷭ҇и.
Бг҃оро́диченъ:
Вопло́щсѧ ѿ дв҃ы безпло́тный, на зе́млю къ человѣ́кѡмъ прїи́де. тѣ́мже вѣ́рою зове́мъ: сла́ва си́лѣ твое́й, гдⷭ҇и.
Пѣ́снь є҃. І҆рмо́съ:
Оу҆́тренююще, вопїе́мъ тѝ, гдⷭ҇и, спаси́ ны: ты́ бо є҆сѝ бг҃ъ на́шъ, ра́звѣ бо тебє̀ и҆но́гѡ незна́емъ.
Оу҆́треневавъ ко гдⷭ҇ꙋ, прїѧ́лъ є҆сѝ съ нб҃сѐ да́ръ дх҃а прест҃а́гѡ, всехва́льне.
Спомо́щника житїѐ бжⷭ҇твенное стѧжа́въ, ви́дѣти сподо́билсѧ є҆сѝ неви́димѡ разꙋмѣва́емаго.
Возсїѧ̀ тебѣ̀ свѣ́тъ, всеблаже́нне, ꙗ҆́кѡ прⷪ҇ро́кꙋ, и҆ тогѡ̀ сꙋпрꙋ́жница тебѣ̀ весе́лїе дарова́сѧ.
Бг҃оро́диченъ:
Хотѣ́нїемъ всѧ́ческаѧ, пречⷭ҇таѧ, сотвори́вый, и҆зъ тебє̀ созда́сѧ, є҆́же по на́мъ, пребжⷭ҇твенный.
И҆́нъ. І҆рмо́съ:
Возсїѧ́вый свѣ́тъ, и҆ просвѣти́вый ᲂу҆́тро, и҆ показа́вый де́нь, сла́ва тебѣ̀, сла́ва тебѣ̀, і҆и҃се, сн҃е бж҃їй.
Показа́вый на́мъ свои́хъ стрⷭ҇те́й свидѣ́телѧ, вопїю́ща: сла́ва тебѣ̀, сла́ва тебѣ̀, і҆и҃се, сн҃е бж҃їй.
Терпѣ́нїю твоемꙋ̀ мно́гомꙋ, мзда̀ и҆ побѣ́ды вѣне́цъ и҆сплете́сѧ, сла́ва тебѣ̀, сла́ва тебѣ̀, зовꙋ́щꙋ, і҆и҃се, сн҃е бж҃їй.
Стрѣ́лы глагѡ́лъ твои́хъ въ сердца̀ вра̑жїѧ вонзи́лъ є҆сѝ, зовы́й: сла́ва тебѣ̀, сла́ва тебѣ̀, і҆и҃се, сн҃е бж҃їй.
Бг҃оро́диченъ:
Ст҃ꙋ́ю го́рꙋ, чⷭ҇таѧ, и҆ ꙗ҆́кѡ ски́нїю высоча́йшагѡ мꙋ́дрствꙋюще тѧ̀, дв҃о, сла́ва тебѣ̀, зове́мъ, бцⷣе, на́ше ᲂу҆пова́нїе.
Пѣ́снь ѕ҃. І҆рмо́съ:
Ѡ҆бы́де мѧ̀ бе́здна, гро́бъ мнѣ̀ ки́тъ бы́сть, а҆́зъ же возопи́хъ къ тебѣ̀ чл҃вѣколю́бцꙋ, и҆ спасе́ мѧ десни́ца твоѧ̀, гдⷭ҇и.
Си́лою дх҃а бжⷭ҇твеннагѡ зрѣ́лъ є҆сѝ, прⷪ҇ро́че, бꙋ̑дꙋщаѧ, ѻ҆́бразы прїе́млѧ бжⷭ҇твенныхъ ꙗ҆вле́нїй, ꙗ҆́кѡ въ зерца́лѣ дꙋшѝ свѣ́тлостїю.
Оу҆молѝ гдⷭ҇а, прⷪ҇ро́че всебл҃же́нне, моли́твами твои́ми, вѣ́рою соверша́ющымъ па́мѧть твою̀, просѧ̀ прегрѣше́нїй дарова́ти проще́нїе.
Оу҆ми́лостивисѧ рабѡ́мъ твои̑мъ, и҆ си̑мъ прегрѣше́нїй проще́нїе пода́ждь, чл҃вѣколю́бче, и҆мѣ́ѧй молѧ́щаго тѧ̀ твоего̀ прⷪ҇ро́ка, мі́рꙋ тебѐ провозвѣсти́вшаго.
Бг҃оро́диченъ:
Всѧ́чєскаѧ носѧ́й сло́вомъ, бжⷭ҇твенною си́лою, ѡ҆б̾ѧ̑тїи твои́ми но́ситсѧ, неискꙋсобра́чнаѧ: є҆го́же ны́нѣ молѝ спасти́сѧ дꙋша́мъ на́шымъ.
И҆́нъ. І҆рмо́съ:
Возопѝ, проѡбразꙋ́ѧ погребе́нїе тридне́вное, прⷪ҇ро́къ і҆ѡ́на, въ ки́тѣ молѧ́сѧ: ѿ тлѝ и҆зба́ви мѧ̀, і҆и҃се, цр҃ю̀ си́лъ.
Да бїю́тсѧ десни́цею разжже́нною ли́ца де́мѡнскаѧ, сердца́ же вѣ́рныхъ да взыгра́ютсѧ, и҆ безпло́тныхъ ли́цы свѣ́тлѡ да веселѧ́тсѧ.
Оу҆краша́ютсѧ до́брыхъ твои́хъ пѡ́двигъ побѣ̑ды и҆ ѡ҆долѣ́нїѧ, и҆ страда́льчєскаѧ зрѧ́щихъ натрижнє́нїѧ, перворожде́нныхъ и҆збра́нное и҆ свѣтоно́сное торжество̀.
Воста́ните, до́брїи ны́нѣ живопи́сцы, мч҃ника ѻ҆́бразъ ва́шими благохи́тростьми ᲂу҆краси́те, подвигополо́жника ꙗ҆́вственнѡ въ не́мъ начерта́юще.
Бг҃оро́диченъ:
Весели́тсѧ ѡ҆ тебѣ̀, бг҃ома́ти всепѣ́таѧ, прамт҃и, дре́внїѧ клѧ́твы ржⷭ҇тво́мъ твои́мъ и҆зба́вльшисѧ, и҆ сме́ртнагѡ го́рькагѡ ѡ҆сꙋжде́нїѧ.
Конда́къ мч҃ника, гла́съ д҃. Подо́бенъ: Ꙗ҆ви́лсѧ є҆сѝ:
Ꙗ҆ви́лсѧ є҆сѝ преꙋдивле́нъ крѣ́постїю всесожже́нїѧ, лїва́нъ благово́ненъ себѐ прине́слъ є҆сѝ же́ртвꙋ хрⷭ҇тꙋ̀, и҆ вѣне́цъ по́чести прїи́мъ, варлаа́ме, при́снѡ молѝ за ны̀, страда́льче.
Пѣ́снь з҃. І҆рмо́съ:
Въ пещѝ ѻ҆́гненнѣй пѣсносло́вцы спасы́й ѻ҆́троки, благослове́нъ бг҃ъ ѻ҆ц҃ъ на́шихъ.
Преесте́ственна и҆́стиннѡ прⷪ҇рѡ́къ твои́хъ сла́ва, бл҃гослове́нный бж҃е ѻ҆тє́цъ на́шихъ.
Съ бг҃омъ ѡ҆бита́ти сподо́бивсѧ, воспѣва́еши: бл҃гослове́нъ бг҃ъ ѻ҆тє́цъ на́шихъ.
Во прⷪ҇ро́цѣхъ твои́хъ бжⷭ҇твеннꙋю бл҃года́ть твою̀ ꙗ҆влѧ́еши, бл҃гослове́нный бж҃е ѻ҆тє́цъ на́шихъ.
Бг҃оро́диченъ:
И҆зба́вленнїи твои́мъ ржⷭ҇тво́мъ, пречⷭ҇таѧ дв҃о, пѣснопое́мъ: бл҃гослове́нъ бг҃ъ ѻ҆тє́цъ на́шихъ.
И҆́нъ. І҆рмо́съ:
Ѻ҆ц҃ъ на́шихъ бж҃е, не посрамѝ на́съ, но да́рꙋй на́мъ со дерзнове́нїемъ вопи́ти тебѣ̀: бл҃гослове́нъ є҆сѝ, бж҃е ѻ҆ц҃ъ на́шихъ.
Съ мꙋ́ченическими ли̑ки, ꙗ҆́кѡ непобѣди́мь мꙋ́ченикъ, сподо́билсѧ є҆сѝ хрⷭ҇тꙋ̀ велегла́снѡ зва́ти: бл҃гослове́нъ бг҃ъ ѻ҆тє́цъ на́шихъ.
Со свѣща́ми свѣ́тлыми въ бжⷭ҇твенный черто́гъ вше́лъ є҆сѝ, хрⷭ҇тꙋ̀, великомч҃ниче, зовѧ̀, бл҃гослове́нъ бг҃ъ ѻ҆тє́цъ на́шихъ.
Крѣпча́йшꙋ ѻ҆гнѧ̀ десни́цꙋ стѧжа́въ, предста́тель десны́й твоемꙋ̀ влⷣцѣ, зове́ши: бл҃гослове́нъ бг҃ъ ѻ҆тє́цъ на́шихъ.
Бг҃оро́диченъ:
И҆зба́вленнїи твои́мъ пречⷭ҇тымъ ржⷭ҇тво́мъ, пое́мъ тѧ̀ вѣ́рнїи, непреста́ннѡ зовꙋ́ще: бл҃гослове́нъ, пречⷭ҇таѧ, пло́дъ чре́ва твоегѡ̀.
Пѣ́снь и҃. І҆рмо́съ:
И҆зъ ѻ҆ц҃а̀ пре́жде вѣ̑къ рожде́ннаго сн҃а и҆ бг҃а, и҆ въ послѣ̑днѧѧ лѣ̑та воплоще́ннаго ѿ дв҃ы мт҃ре, свѧще́нницы, по́йте, лю́дїе, превозноси́те во всѧ̑ вѣ́ки.
Ѿ бг҃а просвѣ́щшесѧ, прⷪ҇ро́цы провозвѣща́ютъ бꙋ́дꙋщихъ зна́нїе, бг҃омꙋ́дреннѡ взыва́юще: свѧще́нницы, по́йте, лю́дїе, превозноси́те во всѧ̑ вѣ́ки.
Ꙗ҆́коже зарѧ̀ въ пꙋчи́нѣ, во тмѣ̀ сꙋ́щыѧ просвѣти́лъ є҆сѝ, бжⷭ҇твенными лꙋча́ми, бг҃овѣща́телю, ѡ҆зарѧ́емь, зовы́й: свѧще́нницы, по́йте, лю́дїе, превозноси́те во всѧ̑ вѣ́ки.
Бг҃оро́диченъ:
По бжⷭ҇твенномꙋ сꙋществꙋ̀ ѻ҆ц҃ꙋ̀ твоемꙋ̀ є҆диносꙋ́щне, и҆ на́мъ є҆диноесте́ственъ ꙗ҆ви́лсѧ є҆сѝ, воплоти́всѧ ѿ неискꙋсомꙋ́жныѧ мт҃ре. тѣ́мъ тѧ̀ пое́мъ, хрⷭ҇тѐ, и҆ благослови́мъ во всѧ̑ вѣ́ки.
И҆́нъ. І҆рмо́съ:
Всѧ̑ дѣла̀ бж҃їѧ, и҆ всѧ̀ тва́рь благослови́те гдⷭ҇а прпⷣбнїи и҆ смире́ннїи се́рдцемъ по́йте є҆го̀ и҆ превозноси́те во всѧ̑ вѣ́ки.
Всѐ низложи́лъ є҆сѝ вра́жїе всеѻрꙋ́жїе, варлаа́ме достосла́вне, попали́лъ є҆сѝ і҆́дѡльскꙋю ле́сть, зовы́й: тѧ̀ превозно́симъ, хрⷭ҇тѐ, во вѣ́ки.
Оу҆кра́шенъ благолѣ́пнѡ, хрⷭ҇тꙋ̀ предста́лъ є҆сѝ, страда́льче приснопа́мѧтне, кро́вїю мч҃ническою ѡ҆червле́нꙋ носѧ̀ багрѧни́цꙋ, и҆ влⷣкꙋ поѧ̀ во вѣ́ки.
Благоче́стїѧ ѻ҆гне́мъ разжже́нъ, ꙗ҆́кѡ те́рнїе попали́лъ є҆сѝ всѧ̑ де́мѡнскаѧ мечта̑нїѧ, зовы́й: тѧ̀ превозно́симъ, хрⷭ҇тѐ, во вѣ́ки.
Бг҃оро́диченъ:
Благословѧ́щїи тѧ̀ вѣ́рнѡ ѿ гдⷭ҇а благословлѧ́ютсѧ, всенепоро́чнаѧ: ражда́еши бо благословѧ́щаго тва́рь влⷣкꙋ, є҆го́же превозно́симъ, чⷭ҇таѧ, во всѧ̑ вѣ́ки.
Пѣ́снь ѳ҃. І҆рмо́съ:
Тѧ̀ па́че ᲂу҆ма̀ и҆ словесѐ мт҃рь бж҃їю, въ лѣ́то безлѣ́тнаго неизрече́ннѡ ро́ждшꙋю, вѣ́рнїи є҆диномꙋ́дреннѡ велича́емъ.
Сло́вомъ бжⷭ҇твеннымъ и҆ дѣѧ́нїемъ ᲂу҆краша́емь, впери́всѧ дх҃омъ, прⷪ҇ро́че чꙋ́дный, бꙋ̑дꙋщаѧ зрѣ́ти сподо́билсѧ є҆сѝ.
И҆дѣ́же прⷪ҇ро́честїи ли́цы вселѧ́емь, и҆ ст҃ы́хъ свѣ́тлѡсти, молѝ гдⷭ҇а, спастѝ вѣ́рою благохва́лѧщыѧ тѧ̀, сла́вне.
Ве́сь бг҃ꙋ те́плѣ прилѣжа̀, чи́стѡ бесѣ́довалъ є҆сѝ бж҃е́ственными ꙗ҆влє́нїи, и҆́хже и҆ ны́нѣ наслажда́ешисѧ, всебл҃же́нне.
Бг҃оро́диченъ:
Тѧ̀ свѣ́та свѣти́льникъ пое́мъ, чⷭ҇таѧ, тѧ̀ и҆ скрижа́ль бл҃года́ти, сло́во воплоще́нное прїе́мшꙋ вѣ́дѧще, велича́емъ.
И҆́нъ. І҆рмо́съ:
Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀, бцⷣе, велича́емъ.
Зако́нъ похвале́нїй побѣжда́етсѧ подвигѡ́въ твои́хъ вели́чествомъ, є҆ди́нъ влⷣка хрⷭ҇то́съ тѧ̀ сла́вити вѣ́сть бжⷭ҇твенною свѣ́тлостїю, є҆го́же прилѣ́жнѡ молѝ, ѡ҆ вѣ́рою воспѣва́ющихъ тѧ̀.
Всего̀ тебѐ сама́го гдⷭ҇ꙋ же́ртвꙋ жи́вꙋ прине́слъ, ве́сь тогѡ̀ црⷭ҇твїѧ снаслѣ́дникъ ꙗ҆ви́лсѧ є҆сѝ и҆ прича́стникъ, и҆ съ ни́мъ ра́дꙋѧсѧ ны́нѣ црⷭ҇твꙋеши, приснопа́мѧтне.
За твою̀, сп҃се, любо́вь, кро́вїю да́же и҆ до сме́рти, мечꙋ̀ и҆ ѻ҆гню̀ и҆ мꙋ́камъ бжⷭ҇твенный мч҃никъ противоѡполчи́всѧ, є҆́же ᲂу҆ тебє̀, чл҃вѣколю́бче, безсме́ртїе прїе́мъ, наслажда́етсѧ.
Бг҃оро́диченъ:
Тѧ̀ застꙋ́пницꙋ мі́ра и҆ бг҃ома́терь дв҃ꙋ, всеѧ̀ жи́зни моеѧ̀ предста́тельницꙋ и҆ спасе́нїе, ра́дꙋѧсѧ, предлага́ю: ты́ бо бг҃а ро́ждшаѧ, спаса́ти мо́жеши пою́щыѧ тѧ̀.
Свѣти́ленъ. Подо́бенъ: Оу҆ченикѡ́мъ зрѧ́щымъ:
А҆вді́е прⷪ҇ро́че, ликꙋ́й и҆ весели́сѧ, твои́хъ глагѡ́лъ зрѧ̀ сбытїѐ. тѣ́мже, трⷪ҇цѣ предстоѧ̀, соверша́ющыѧ свѣтоно́снꙋю твою̀ па́мѧть, помѧнѝ и҆ тебѐ чтꙋ́щыѧ, всебл҃же́нне.
Бг҃оро́диченъ:
И҆зъ пречⷭ҇тыхъ чре́слъ твои́хъ проше́дшаго бг҃а сло́ва неизрече́ннѡ, дв҃о мт҃и, ви́дѧщи распина́ема, взыва́ла є҆сѝ: сла́ва неизрече́нномꙋ твоемꙋ̀ строе́нїю, сп҃се мо́й, и҆́мже мі́ръ тво́й спаса́еши.
Слꙋ́жба ст҃ы́хъ прпⷣбныхъ ѻ҆тє́цъ на́шихъ, пꙋсты́нныхъ жи́телей, въ постѣ̀ просїѧ́вшихъ, варлаа́ма и҆ і҆ѡаса́фа, въ вели́цѣй землѝ, глаго́лемѣй і҆нді́и.
Ве́черъ, на Гдⷭ҇и, воззва́хъ, стїхи̑ры на ѕ҃, гла́съ ѕ҃.
Подо́бенъ: Всѐ ѿло́жше:
Ѿ ко́рене ца́рска, ꙳ прекра́сна вѣ́твь и҆зрастѐ, бл҃гоꙋха́нный крі́нъ, ꙳ блаже́нный ца́рь і҆ѡаса́фъ, ꙳ и҆́же наказа́нїемъ ꙳ дꙋхо́внагѡ наста́вника, ꙳ возжелѣ̀ ви́дѣти безцѣ́нный би́серъ, ꙳ позна̀ въ трⷪ҇цѣ сла́вимаго бг҃а, ꙳ и҆ тогѡ̀ за́повѣдей ꙳ дѣ́латель и҆зрѧ́денъ показа́сѧ: ꙳ и҆ ны́нѣ въ вы́шнихъ ликовствꙋ́ѧ, ꙳ мо́литсѧ ѡ҆ дꙋша́хъ на́шихъ.
Просвѣще́нный дꙋше́ю варлаа́мъ ꙳ царю̀ і҆ѡаса́фꙋ глаго́лаше: ꙳ позна́лъ є҆сѝ бг҃а, творца̀ всѣ́хъ, ꙳ то́й да просвѣти́тъ твоѧ̑ ѻ҆́чи сердє́чныѧ, ꙳ и҆ да́стъ тѝ дꙋ́хъ мꙋ́дрости и҆ ра́зꙋма, ꙳ да ᲂу҆вѣ́дати и҆́маши, что̀ є҆́сть наде́жда зва́нїѧ є҆гѡ̀, ꙳ ꙗ҆́кѡ напослѣ́докъ, ꙳ и҆ роди́телю твоемꙋ̀ ко спасе́нїю наста́вникъ бꙋ́деши. ꙳ а҆́зъ же не и҆́мамъ ѡ҆ста́ти здѣ̀, ꙳ но ѿхождꙋ̀ въ пꙋ́ть мо́й, ꙳ бг҃а наста́вника и҆мѣ́ѧ, ꙳ возводѧ́щаго мѧ̀ ко спасе́нїю.
Оу҆слы́шавъ до́блественный ца́рь і҆ѡаса́фъ ꙳ ѡ҆ разлꙋче́нїи словеса̀, ꙳ распали́всѧ дꙋше́ю, ꙳ лицѐ своѐ слеза́ми ѡ҆блива́ѧ, глаго́лаше: ꙳ ты̀, ᲂу҆чи́телю дꙋхо́вный, ꙳ всѣ́хъ благи́хъ мои́хъ хода́таю, ꙳ па́ки ли ѡ҆ста́вити мѧ̀ въ мі́рѣ се́мъ хо́щеши; ꙳ кто́ ми соверши́тъ тво́й чи́нъ ᲂу҆чи́тельства; ꙳ кто́ ми бꙋ́детъ наста́вникъ ко спасе́нїю; ꙳ ты̀ менѐ къ бг҃ꙋ приве́лъ є҆сѝ, ꙳ и҆ въ чинꙋ̀ сыно́внѣ наста́вника наста́вилъ є҆сѝ, ꙳ и҆ тобо́ю надѣ́юсѧ ѿ хрⷭ҇та̀ прїѧ́ти ве́лїю ми́лость.
Сла́ва, гла́съ ѕ҃:
Зарда́нꙋ и҆звѣ́стнѡ ᲂу҆вѣ́дѣвшꙋ ко ѻ҆́трокꙋ ᲂу҆чи́телево прилѣжа́нїе и҆ ко хрⷭ҇тꙋ̀ ѡ҆браще́нїе, мно́ги ско́рби и҆спо́лнисѧ дꙋша̀ є҆гѡ̀, ѕѣ́льнꙋю болѣ́знь себѣ̀ притворѝ: ни си́мъ возмо́же ᲂу҆таи́тисѧ, подро́бнꙋ царю̀ всѧ̑ и҆сповѣ́даѧ, и҆́мѧ варлаа́мово нари́четъ: то́й, речѐ, прельстѝ сы́на твоего̀. ца́рь же, ꙗ҆́кѡ ле́въ, ѿ ꙗ҆́рости возревѣ̀, вма́лѣ сме́рти не вкꙋсѝ, і҆ѡаса́фꙋ безпреста́ни молѧ́щꙋсѧ, призыва́ѧ сп҃са дꙋ́шъ на́шихъ.
И҆ ны́нѣ, бг҃оро́диченъ: Кто̀ тебѐ не ᲂу҆блажи́тъ:
Вхо́дъ. Прокі́менъ днѐ. Чте́нїѧ г҃, пи́саны сегѡ̀ мцⷭ҇а въ ѕ҃ де́нь, Варлаа́мꙋ хꙋ́тынскомꙋ:
На стїхо́внѣ стїхи̑ры, гла́съ и҃. Подо́бенъ: Ѽ пресла́внагѡ чꙋдесѐ!
Царю̀ а҆вені́рꙋ къ сы́нꙋ глаго́лющꙋ: ꙳ возлю́бленное моѐ ча́до, ꙳ че́сть богѡ́въ на́шихъ ѡ҆ста́вилъ є҆сѝ, ꙳ чꙋжде́мꙋ же бг҃ꙋ слꙋжи́ти и҆зво́лилъ є҆сѝ. ꙳ вскꙋ́ю, ча́до моѐ, та́кѡ сотвори́лъ є҆сѝ; ꙳ а҆́зъ, любо́вїю воспитава́ѧ тѧ̀, ꙳ надѣ́ѧхсѧ прее́мника бы́ти ца́рствїѧ моегѡ̀: ꙳ ты́ же, ча́до моѐ, та́кѡ сотвори́лъ є҆сѝ, ꙳ галїле́анинꙋ послѣ́довавъ.
Сті́хъ: Восхва́лѧтсѧ прпⷣбнїи во сла́вѣ, и҆ возра́дꙋютсѧ на ло́жахъ свои́хъ.
А҆́зъ ѿверго́хсѧ де́мѡнскїѧ тмы̀, ꙳ и҆ къ свѣ́тꙋ притеко́хъ бг҃оразꙋ́мїѧ, ꙳ і҆́дѡльскꙋю пре́лесть ѡ҆ста́вивъ, ꙳ и҆ ко и҆́стинѣ прибли́жихсѧ, ꙳ и҆ хрⷭ҇тꙋ̀ рабо́тати и҆зво́лихъ: ꙳ то́й бо на́ше ѡ҆сꙋжде́нїе дре́внее разрꙋшѝ, ꙳ и҆ є҆стество̀ на́ше на нб҃са̀ вознесѐ, ꙳ и҆ црⷭ҇тво нбⷭ҇ное ѡ҆бѣща̀ всѣ̑мъ, ꙳ лю́бѧщымъ є҆го̀ вои́стиннꙋ.
Сті́хъ: Мнѡ́ги скѡ́рби пра́вєднымъ, и҆ ѿ всѣ́хъ и҆́хъ и҆зба́витъ ѧ҆̀ гдⷭ҇ь.
Царю̀ ꙗ҆́ростїю и҆ преще́нїемъ ст҃а́го ѻ҆́трока ꙳ ᲂу҆страши́ти хотѧ́щꙋ, приречѐ: ꙳ мнѡ́гимъ мꙋ́камъ преда́мъ тебѐ, ꙳ и҆ ѕло́ю сме́ртїю ᲂу҆морю́ тѧ, ꙳ и҆ ктомꙋ̀ сы́на тебѐ не нарекꙋ̀, ꙳ но ꙗ҆́кѡ врага̀ и҆ ѿстꙋ́пника, ꙳ и҆ та́кѡ прети́въ, со гнѣ́вомъ ѿи́де: ꙳ і҆ѡаса́фъ же, въ пала́тꙋ вше́дъ, ꙳ безпреста́ни бг҃ꙋ молѧ́шесѧ.
Сла́ва, гла́съ и҃. Самогла́сенъ:
Въ моли́твѣ свое́й і҆ѡаса́фъ ца́рь глаго́лаше: гдⷭ҇и бж҃е мо́й, сла́дкаѧ наде́ждо, нело́жное ѡ҆бѣща́нїе, тве́рдое прибѣ́жище на тѧ̀ надѣ́ющымсѧ, ᲂу҆крѣпи́ мѧ во твое́мъ благо́мъ и҆сповѣ́данїи, до коне́чнагѡ мѝ бы́ти и҆здыха́нїѧ: воспали́сѧ бо дꙋша̀ моѧ̀ вели́кою къ тебѣ̀ любо́вїю. тѣ́мже да́ждь мѝ во все́й мое́й жи́зни, за и҆́мѧ твоѐ, и҆ за твоѐ и҆сповѣ́данїе всѧ̑ страда́ти, и҆ всего̀ менѐ тебѣ̀ пожре́ти: ꙗ҆́кѡ є҆ди́нъ є҆сѝ побо́рникъ непобѣди́мый, и҆ бг҃ъ ми́лостивый.
И҆ ны́нѣ, бг҃оро́диченъ: Безневѣ́стнаѧ дв҃о:
Тропа́рь, гла́съ д҃:
Ѿ дꙋхо́внагѡ наста́вника наꙋчи́всѧ, царю̀ і҆ѡаса́фе, бг҃а позна́ти, креще́нїемъ же просвѣти́всѧ, лю́ди къ вѣ́рѣ ѡ҆брати́лъ є҆сѝ: и҆ ѻ҆тцꙋ̀ твоемꙋ̀ ѿ кꙋпѣ́ли прїи́мникъ бы́въ, ца́рство ѡ҆ста́вивъ, пꙋсты́ню дости́глъ є҆сѝ, и҆ въ не́й трꙋдолю́бнѣ подвиза́лсѧ є҆сѝ. молѝ хрⷭ҇та̀ бг҃а со ᲂу҆чи́телемъ твои́мъ варлаа́момъ, спасти́сѧ дꙋша́мъ на́шымъ.
Сла́ва, и҆ ны́нѣ, бг҃оро́диченъ воскрⷭ҇нъ.
На ᲂу҆́трени.
По а҃-мъ, стїхосло́вїи сѣда́ленъ, гла́съ и҃. Поⷣ: Премꙋ́дрости:
Ца́рь а҆вені́ръ, прїе́мъ совѣ́тъ ѿ а҆рахі́а, дрꙋ́га своегѡ̀, нача́тъ і҆ѡаса́фа ласка́тельными и҆ ти́хими словєсы̀, ѡ҆б̾има́ѧ є҆го̀ и҆ цѣлꙋ́ѧ, прельща́ти, глаго́лѧ: ѽ ча́до моѐ вожделѣ́нное! почествѝ ѻ҆тца̀ твоегѡ̀ сѣди̑ны, и҆ моеѧ̀ послꙋ́шавъ мольбы̑, принесѝ же́ртвꙋ богѡ́мъ: та́кѡ бо ѻ҆́нѣхъ ми́лость полꙋчи́ши, и҆ долготꙋ̀ дні́й, и҆ сла́вꙋ всѧ́кꙋю, и҆ ца́рство безвре́дно, и҆ всѧ́ческихъ бла̑гъ прича́стїе ѿ ни́хъ прїи́меши.
Два́жды.
Сла́ва, и҆ ны́нѣ, бг҃оро́диченъ:
Пречⷭ҇таѧ дв҃о, мт҃и бж҃їѧ, дꙋшѝ моеѧ̀ стра̑сти лю̑тыѧ и҆сцѣлѝ, молю́сѧ, и҆ проще́нїе да́рꙋй мои́хъ прегрѣше́нїй, ꙗ҆̀же безꙋ́мнѣ содѣ́ѧхъ, дꙋ́шꙋ и҆ тѣ́ло ѡ҆скверни́въ ѻ҆каѧ́нный. ᲂу҆вы̀ мнѣ̀, что̀ сотворю̀ въ ча́съ ѻ҆́нъ, внегда̀ а҆́гг҃ли дꙋ́шꙋ мою̀ разлꙋча́тъ ѿ стра́стнагѡ моегѡ̀ тѣлесѐ; тогда̀ помо́щница мнѣ̀ бꙋ́ди, и҆ предста́тельница теплѣ́йшаѧ: тебе́ бо и҆́мамъ наде́ждꙋ ра́бъ тво́й.
По в҃-мъ стїхосло́вїи сѣда́ленъ, гла́съ є҃. Поⷣ: Собезнача́льное сло́во:
І҆ѡаса́фъ ко ѻ҆тцꙋ̀ глаго́лаше: нѣ́сть пра́ведно, ѻ҆тца̀ своегѡ̀ сѣди̑ны чествова́ти, и҆́стиннаго же бг҃а безче́ствовати: нижѐ досто́йно, ѡ҆ста́вѧ творца̀ всеѧ̀ тва́ри, і҆́дѡлѡмъ жє́ртвы приноси́ти: но подоба́етъ и҆́стиннаго бг҃а чествова́ти, и҆ томꙋ̀ є҆ди́номꙋ же́ртвꙋ приноси́ти.
Два́жды.
Сла́ва, и҆ ны́нѣ, бг҃оро́диченъ:
Сѐ пре́жде сꙋда̀ ны́нѣ пла́чꙋ, помышлѧ́ѧ моѧ̑ дѣла̀ лꙋка̑ваѧ и҆ лю̑таѧ, и҆ прегрѣше́нїй глꙋбинꙋ̀ ѡ҆держа́щꙋю мѧ̀ ѿ ю҆́ности, и҆ подавлѧ́ющꙋ ᲂу҆́мъ: но твои́мъ, чⷭ҇таѧ, предста́тельствомъ ѡ҆ставле́нїе мѝ пода́ждь, и҆ спасе́нїе ᲂу҆лꙋчи́ти сподо́би.
По Хвали́те и҆́мѧ гдⷭ҇не, припѣ́въ:
Оу҆блажа́емъ тѧ̀, прпⷣбне ѻ҆́ч҃е і҆ѡаса́фе, и҆ чте́мъ болѣ̑зни и҆ трꙋды̀ твоѧ̑, и҆́миже трꙋди́лсѧ є҆сѝ во и҆сповѣ́данїи хрⷭ҇то́вѣ.
Ѱало́мъ и҆збра́нный: Бл҃же́нъ мꙋ́жъ, боѧ́йсѧ гдⷭ҇а:
По полѷеле́и сѣда́ленъ, гла́съ г҃:
Не престаѧ́ше ᲂу҆́бѡ а҆вені́ръ ѡ҆ прельще́нїи сы́на своегѡ̀ промышлѧ́ти, собра́въ виті̑и на состѧза́нїе, речѐ и҆̀мъ: а҆́ще вѣ́рꙋ на́шꙋ ᲂу҆твердитѐ, хрⷭ҇тїа́нскꙋю же вѣ́рꙋ низложитѐ, просла́витесѧ: а҆́ще же побѣдите́сѧ, то̀ ᲂу҆мертвите́сѧ. подо́бнѣ речѐ и҆ і҆ѡаса́фъ къ нахѡ́рꙋ, нарица́ющꙋсѧ варлаа́мꙋ: а҆́ще лє́стныѧ виті̑и побѣди́ши, просла́вишисѧ: а҆́ще же побѣжде́нъ бꙋ́деши, се́рдце и҆ ѧ҆зы́къ тво́й рꙋка́ми и҆з̾е́мъ, псѡ́мъ въ снѣ́дь съ про́чими ᲂу҆́ды преда́мъ сїѧ̑: да, тѧ̀ ви́дѧще, ᲂу҆страша́тсѧ всѝ не прельща́ти сынѡ́въ царе́выхъ.
Два́жды.
Сла́ва, и҆ ны́нѣ, бг҃оро́диченъ:
Те́плаѧ застꙋ́пнице, наде́жда тве́рдаѧ, стѣно̀ и҆ покро́ве, и҆ приста́нище прибѣга́ющихъ къ тебѣ̀, приснодв҃о чⷭ҇таѧ, неѡбꙋрева́емое, сн҃а твоего̀ и҆ бг҃а молѝ, ми́ръ пода́ти мі́рꙋ, и҆ спасе́нїе, и҆ ве́лїю и҆ бога́тꙋю ми́лость.
Та́же степє́нна, а҃-й а҆нтїфѡ́нъ д҃-гѡ гла́са: Прокі́менъ, гла́съ д҃: Првⷣникъ, ꙗ҆́кѡ фі́нїѯъ, процвѣте́тъ, и҆ ꙗ҆́кѡ ке́дръ, и҆́же въ лїва́нѣ, ᲂу҆мно́житсѧ. Сті́хъ: Насажде́ни въ домꙋ̀ гдⷭ҇ни, во дво́рѣхъ до́мꙋ бг҃а на́шегѡ процвѣтꙋ́тъ. Всѧ́кое дыха́нїе: Сті́хъ: Хвали́те бг҃а во ст҃ы́хъ є҆гѡ̀: Є҆ѵⷢ҇лїе матѳе́а, зача́ло а҃і.
По н҃-мъ ѱалмѣ̀ стїхи́ра, гла́съ ѕ҃:
Прпⷣбне ѻ҆́ч҃е, во всю̀ зе́млю и҆зы́де вѣща́нїе и҆справле́нїй твои́хъ: тѣ́мъ на нб҃сѣ́хъ ѡ҆брѣ́лъ є҆сѝ мздꙋ̀ трꙋдѡ́въ твои́хъ, де́мѡнскїѧ погꙋби́лъ є҆сѝ полкѝ, и҆ а҆́гг҃льскїѧ дости́глъ є҆сѝ чи́ны, и҆́хже житїю̀ безъ поро́ка поревнова́лъ є҆сѝ. дерзнове́нїе и҆мѣ́ѧ ко хрⷭ҇тꙋ̀ бг҃ꙋ, ми́ръ и҆спросѝ дꙋша́мъ на́шымъ.
Канѡ́нъ бцⷣѣ, со і҆рмосо́мъ на ѕ҃: и҆ і҆ѡаса́фꙋ на и҃.
Гла́съ и҃. Пѣ́снь а҃. І҆рмо́съ:
Сокрꙋши́вшемꙋ бра̑ни мы́шцею свое́ю, и҆ прове́дшемꙋ і҆и҃лѧ сквозѣ̀ чермно́е мо́ре, пои́мъ є҆мꙋ̀, ꙗ҆́кѡ и҆зба́вителю на́шемꙋ бг҃ꙋ: ꙗ҆́кѡ просла́висѧ.
Царє́вы глаго́лы слы́шавъ нахѡ́ръ, ѕѣлѡ̀ вострепета̀: вмѣ́стѡ бо развраще́нїѧ, и҆зречѐ благослове́нїе, ѻ҆блича́ѧ і҆ꙋдє́и и҆ є҆́ллины, проповѣ́даѧ же на землѝ хрⷭ҇то́во прише́ствїе, ꙗ҆́кѡ просла́висѧ.
Речє́нїѧ нахѡ́ръ ѡ҆ зако́нѣ и҆зложѝ: виті̑и же и҆ жрецы̀ посрами́шасѧ, и҆ ꙗ҆́кѡ безгла́сни ѡ҆брѣто́шасѧ: царю́ же і҆ѡаса́фꙋ дꙋше́ю веселѧ́щꙋсѧ и҆ сла́вѧщꙋ бг҃а нбⷭ҇наго, ꙗ҆́кѡ просла́висѧ.
І҆ѡаса́фъ ца́рь къ нахѡ́рꙋ речѐ: благода́ть тѝ и҆сповѣ́дꙋю, ꙗ҆́кѡ по и҆́стинѣ побо́рникъ бы́лъ є҆сѝ: и҆ а҆́ще хрⷭ҇та̀ возлю́биши, жи́знь наслѣ́диши: ѡ҆браща́ющымсѧ бо къ немꙋ̀ ѿверза́етъ врата̀ нбⷭ҇наѧ.
А҆́ще и҆ недосто́йнѣ принесо́хъ тѝ таково́е слове́съ и҆зви́тїе, бг҃омꙋ́дрый царю̀ і҆ѡаса́фе, прїимѝ сїѧ̑ съ любо́вїю, и҆ принесѝ къ бг҃ома́тери моле́нїе за мѧ̀, да ми́лость ѡ҆брѧ́щꙋ въ де́нь стра́шнагѡ и҆спыта́нїѧ.
Катава́сїа: Ѿве́рзꙋ ᲂу҆ста̀ моѧ̑:
Пѣ́снь г҃. І҆рмо́съ:
Оу҆тверди́сѧ се́рдце моѐ во гдⷭ҇ѣ, вознесе́сѧ ро́гъ мо́й въ бз҃ѣ мое́мъ, разшири́шасѧ на врагѝ моѧ̑ ᲂу҆ста̀ моѧ̑, возвесели́хсѧ ѡ҆ спасе́нїи твое́мъ.
Словесы̀ любе́зными ца́рь нахѡ́ра наказа́въ, ѻ҆́нъ же съ пла́чемъ и҆ ра́достїю пꙋсты́ню дости́же, на вѣ́рꙋ ѡ҆брати́сѧ и҆ креще́нїемъ просвѣти́сѧ: и҆ вмѣ́стѡ во́лка ѻ҆вча̀ хрⷭ҇то́во ѡ҆брѣ́тесѧ.
Ѳе́ѵда къ царю̀ а҆вені́рꙋ глаго́лаше: не ᲂу҆бо́йсѧ, царю̀, галїле́йскихъ мꙋдрє́цъ: сі́и бо ско́рѡ и҆спадꙋ́тъ, не и҆́мꙋтъ предъ лице́мъ мои́мъ ста́ти. ни слове́съ проти́вныхъ глаго́лати.
Предста́виша ѻ҆трокѡви́цы ᲂу҆кра́шены царе́вꙋ сы́нꙋ на послꙋже́нїе, да прельстѧ́тъ пра́веднаго ѻ҆́трока: ѻ҆́нъ же а҆́ще и҆ разжже́нїе въ се́рдце плотско́е прїи́мъ, моли́твою же и҆ поще́нїемъ ѿ сѣ́ти ѻ҆́ныѧ и҆зба́вленъ бы́сть.
Бг҃оро́диченъ:
Напа́стьми мно́гими ѡ҆держи́мь, и҆зъ глꙋбины̀ се́рдца вопїю́ ти: влⷣчце, и҆зба́ви мѧ̀ непотре́бнаго раба̀ твоего̀ лю́тыхъ ѡ҆бстоѧ́нїй, и҆ тишинꙋ̀ пода́ждь се́рдцꙋ моемꙋ̀.
Сѣда́ленъ, гла́съ г҃:
Чтⷭ҇аѧ и҆ непоро́чнаѧ дꙋша̀ бжⷭ҇твеннагѡ ѻ҆́трока, ѡ҆полче́нїѧ вра́жїѧ не ᲂу҆страши́сѧ, на по́двигъ мꙋ́жески ᲂу҆крѣплѧ́ѧсѧ, свы́ше и҆збавле́нїѧ просѧ̀, да не ѡ҆скверни́тъ ѻ҆де́жды, ю҆́же ѿ ст҃а́гѡ креще́нїѧ прїѧ́тъ, да полꙋчи́тъ красотꙋ̀ и҆ сла́вꙋ хрⷭ҇то́вꙋ.
Два́жды.
Сла́ва, и҆ ны́нѣ, бг҃оро́диченъ:
Кі́йждо, и҆дѣ́же спаса́етсѧ, та́мѡ пра́веднѡ и҆ притека́етъ: и҆ ко́е и҆но́е таково́е прибѣ́жище, ꙗ҆́кѡ ты̀, бцⷣе, покрыва́ющее дꙋ́шы на́шѧ;
Пѣ́снь д҃. І҆рмо́съ:
Прⷪ҇ро́къ а҆ввакꙋ́мъ ᲂу҆́мныма ѻ҆чи́ма прови́дѣ, гдⷭ҇и, прише́ствїе твоѐ, тѣ́мъ и҆ вопїѧ́ше: ѿ ю҆́га прїи́детъ бг҃ъ, сла́ва си́лѣ твое́й, сла́ва снизхожде́нїю твоемꙋ̀.
Є҆гда̀ посто́мъ и҆ моли́твою тѣ́ло своѐ ᲂу҆дрꙋчѝ, зри́тъ во снѣ̀ па́жить прекра́снꙋ, и҆ гра́да красотꙋ̀ недомы́сленнꙋ. во є҆ди́номъ ᲂу҆́глѣ жела́етъ пребыва́нїѧ, и҆ гла́съ слы́шитъ: подвиза́ющымсѧ всѧ̑ ᲂу҆гото́вашасѧ.
Минꙋ́въ мѣста̀ ѻ҆́на свѣ̑тлаѧ, зри́тъ мѣ́сто, тмы̀ и҆спо́лненно, и҆ пе́щь, стра́шнымъ пла́менемъ шꙋмѧ́щꙋю, и҆ гла́сꙋ гласѧ́щꙋ: сїѐ мꙋче́нїе грѣ́шникѡмъ, дѣ́лы скве́рными себѐ ѡ҆скверни́вшымъ.
Лежа̀ на ѻ҆дрѣ̀, ᲂу҆бꙋди́всѧ ѿ видѣ́нїѧ, сле́зы, а҆́ки рѣ́ки, и҆спꙋща́ше: и҆ ве́сь стра́хомъ ѡ҆б̾ѧ́тъ бы́въ, и҆ въ себѣ̀ разсꙋжда́ѧ, ка́кѡ свѣ́тло првⷣнымъ воздаѧ́нїе и҆ грѣ̑шнымъ стра́шно мꙋче́нїе; и҆ вопїѧ̀ хрⷭ҇тꙋ̀: сла́ва си́лѣ твое́й, гдⷭ҇и.
Бг҃оро́диченъ:
Бг҃а на рꙋкꙋ̀ носи́вши, всѧ́чєскаѧ рꙋко́ю содержа́щаго, ѽ дв҃о всебл҃гослове́ннаѧ! того̀ дв҃а роди́вши, и҆ по ржⷭ҇твѣ̀ па́ки дв҃а пребыла̀ є҆сѝ.
Пѣ́снь є҃. І҆рмо́съ:
Гдⷭ҇и бж҃е на́шъ, ми́ръ да́ждь на́мъ, гдⷭ҇и, бж҃е на́шъ, стѧжи́ ны: гдⷭ҇и, ра́звѣ тебє̀, и҆но́гѡ не вѣ́мы, и҆́мѧ твоѐ и҆менꙋ́емъ.
Не здра́вствꙋетъ тво́й сы́нъ, повѣ́даше царю̀, ѻ҆́нъ же ско́рѡ притечѐ и҆ ᲂу҆ми́льнѡ вопроша́ше: что́ ти бы́сть, сы́не мо́й люби́мый, ᲂу҆тѣ́хо ста́рости моеѧ̀, что̀ та́кѡ лежи́ши на ѻ҆дрѣ̀ твое́мъ, ни ма́лѡ къ комꙋ̀ бесѣ́дꙋѧ;
Препѧ́лъ є҆сѝ сѣ́ть нога́мъ мои̑мъ, вма́лѣ всели́ласѧ бы во а҆́дъ дꙋша̀ моѧ̀, а҆́ще не гдⷭ҇ь помо́глъ бы мѝ, и҆ показа̀ мнѣ̀ пꙋ́ть ко спасе́нїю: и҆ ктомꙋ̀ не возмо́глъ бы є҆сѝ менѐ ви́дѣти жи́ва, и҆ сы́на себѣ̀ и҆менова́ти.
Рыда́нїе и҆ печа́ль съ го́рькимъ пла́чемъ сплета́ше ца́рь, неꙋтоли́мь мѧте́жъ и҆мѣ́ѧше, речѐ въ себѣ̀: ча́до, не то́кмѡ богѡ́въ ѿстꙋпле́нїѧ, но и҆ живота̀ твоегѡ̀ ѿрица́ешисѧ.
Бг҃оро́диченъ:
Неизглаго́ланнѡ заче́нши бг҃а, и҆ па́че є҆стества̀ родила̀ є҆сѝ: сего̀ молѝ, всенепоро́чнаѧ, растлѣ́вша безмѣ́стными дѣѧ̑нїи, поми́ловати мѧ̀ за неизрече́ннꙋю ми́лость.
Пѣ́снь ѕ҃. І҆рмо́съ:
Ꙗ҆́кѡ во́ды морскі̑ѧ, чл҃вѣколю́бче, волна́ми жите́йскими ѡ҆бꙋрева́юсѧ. тѣ́мже, ꙗ҆́кѡ і҆ѡ́на, та́кѡ вопїю́ ти: возведѝ ѿ тлѝ живо́тъ мо́й, бл҃гоꙋтро́бне гдⷭ҇и.
Шꙋ́їѧгѡ стоѧ́нїѧ и҆зба́витисѧ, и҆ десна́гѡ стоѧ́нїѧ сподо́битисѧ жела́ти, і҆ѡаса́фꙋ та́кѡ и҆́стинствꙋющꙋ, и҆ ничто́же чествова́ти па́че хрⷭ҇то́вы любвѐ: се́ бо и҆́стиннаѧ сла́дость и҆ весе́лїе, и҆ вѣ́чное пребыва́нїе.
Оу҆̀бо ѳе́ѵда глаго́лаше: почто̀ богѡ́въ ѿстꙋпи́лъ є҆сѝ, и҆ ѻ҆тца̀ царѧ̀ прогнѣ́валъ є҆сѝ; сегѡ̀ ра́ди ѿ всѣ́хъ люде́й возненави́дѣнъ є҆сѝ. не бо́зи ли, ѻ҆тца̀ твоегѡ̀ моли́твы послꙋ́шавше, тебѐ є҆мꙋ̀ дарова́ша;
Возопѝ ца́рь і҆ѡаса́фъ: ѽ заблꙋжде́нїѧ глꙋбино̀, вавѷлѡ́нское сѣ́мѧ, столпотворе́нїѧ внꙋ́че, ѻ҆каѧ́нне чародѣ́ивый ста́рче! почто̀ ᲂу҆карѧ́еши спаси́тельнꙋю про́повѣдь хрⷭ҇то́ва прише́ствїѧ, є҆гѡ́же сла́вы нб҃о и҆ всѧ̀ землѧ̀ и҆спо́лнишасѧ;
Бг҃оро́диченъ:
Помозѝ, влⷣчце, и҆ ᲂу҆слы́ши глаго́лъ мо́й, всенепоро́чнаѧ, є҆гѡ́же и҆зъ глꙋбины̀ дꙋшѝ приношꙋ́ ти, и҆ разрѣше́нїе долгѡ́въ пода́ждь мѝ.
Конда́къ, гла́съ и҃:
Вѣ́дый твоѐ и҆зъ младе́нства благо́е и҆зволе́нїе, і҆ѡаса́фе, є҆ди́нъ сердцевѣ́децъ бг҃ъ, и҆ ѿ ца́рствїѧ земна́гѡ въ мона́шеское пребыва́нїе приведы́й тѧ̀, вели́комꙋ варлаа́мꙋ послѣ́довати сподо́би. съ ни́мже и҆ ны́нѣ го́рнїй і҆ерⷭ҇ли́мъ всесвѣ́тлый ѻ҆ч҃ество и҆мѣ́ѧ, жела́емыѧ добро́ты краснѡ̀ наслажда́ѧсѧ ст҃ы́ѧ трⷪ҇цы, мо́лимъ тѧ̀, ца́рскаѧ красото̀, помина́й на́съ, вѣ́рою чтꙋ́щыѧ тѧ̀.
І҆́косъ:
Дрꙋгі́й, ѻ҆́ч҃е, ꙗ҆ви́лсѧ є҆сѝ вра́чь и҆ предста́тель недꙋ́гомъ ѡ҆держи́мыхъ ско́рбїю, і҆ѡаса́фе чꙋ́дне, и҆сцѣлѧ́ѧ всѧ̑ вѣ̑рныѧ, притека́ющыѧ подъ бжⷭ҇твенный покро́въ тво́й. тѣ́мъ и҆ ѿ на́съ слы́шиши: ра́дꙋйсѧ, ѻ҆тца̀ блага́гѡ ко́реню, ра́дꙋйсѧ, ма́тере благі́ѧ вѣ́твь: ра́дꙋйсѧ, и҆́же тѣ́хъ любо́вь ѿри́нꙋвый, ра́дꙋйсѧ, и҆́же є҆ди́наго бг҃а прїе́мый: ра́дꙋйсѧ, ꙗ҆́кѡ ѡ҆ста́вилъ є҆сѝ на землѝ во́инство, ра́дꙋйсѧ, ꙗ҆́кѡ низложи́лъ є҆сѝ ва́рварскꙋю горды́ню: ра́дꙋйсѧ, стѣна̀ и҆ храни́тель царе́й бы́вый, ра́дꙋйсѧ, ѻ҆рꙋ́жїе и҆ сто́лпъ мі́рꙋ ꙗ҆́вльсѧ: ра́дꙋйсѧ, ѻ҆гне́мъ поже́гъ ꙗ҆зы́чєства, ра́дꙋйсѧ, свѣти́льниче, сїѧ́ѧ чꙋдесы̀: ра́дꙋйсѧ, наги̑мъ мно́жицею покро́въ: ра́дꙋйсѧ, плѣне́нныхъ и҆зба́вителю: помина́й на́съ, вѣ́рою чтꙋ́щыѧ тѧ̀.
Пѣ́снь з҃. І҆рмо́съ:
Халде́йскаѧ пе́щь, ѻ҆гне́мъ распала́емаѧ, ѡ҆роша́шесѧ дх҃омъ, бж҃їимъ предстоѧ́нїемъ ѻ҆́троцы поѧ́хꙋ: бл҃гослове́нъ є҆сѝ, бж҃е ѻ҆ц҃ъ на́шихъ.
Сла́вꙋ же и҆ црⷭ҇тво и҆ ѻ҆́бласть всю̀ на́двое раздѣ́льшемꙋ, ѻ҆́вꙋ себѣ̀ ѡ҆ста́вль, ѻ҆́вꙋ же врꙋча́етъ сы́нꙋ, царѧ̀ є҆го̀ поста́вивъ: кнѧ́зи же мно́ги и҆ страти́ги преда́въ, любе́знѡ же и҆ че́стнѡ ѿпꙋстѝ є҆го̀ на странꙋ̀ свою̀.
Не про́стѡ къ ца́рствꙋ и҆дѧ́ше, но честны́й крⷭ҇тъ предъ ни́мъ ноша́хꙋ: вше́дъ же во гра́дъ, на всѣ́хъ столпѣ́хъ ѻ҆́бразъ креста̀ водрꙋжа́ше, и҆ ка̑пища разорѧ́ше. прекра́снꙋ цр҃ковь влⷣки хрⷭ҇та̀ воздви́же, и҆ всѣ̑мъ собра́тисѧ къ не́й повелѣва́ше: са́мъ же прилѣ́жнѡ молѧ́шесѧ.
Хрⷭ҇тꙋ̀ вѣ́ровати всѧ̑ подрꙋ̑чныѧ ᲂу҆ча́ше, и҆згна̑нныѧ же ѻ҆тце́мъ є҆пі́скопы, і҆ере́и и҆ мона́хи ра́достнѡ срѣта́ше, и҆ свои́ми рꙋка́ми но́ги и҆́хъ ѡ҆мыва́ше, и҆ всѧ́ко промышле́нїе ѡ҆ ни́хъ творѧ́ше, и҆ ᲂу҆се́рднѡ взыва́ше: препросла́вленный бж҃е, бл҃гослове́нъ є҆сѝ.
Бг҃оро́диченъ:
Дре́вле ᲂу҆́бѡ і҆а́кѡвъ тѧ̀ преднаписа̀: и҆са́їа же, ᲂу҆́глемъ дх҃а ѡ҆чи́щсѧ, бг҃а є҆мманꙋ́ила ѿ ᲂу҆тро́бы твоеѧ̀ роди́тисѧ прозна́менова. къ немꙋ́же велегла́снѡ вопїѧ́ше: ѻ҆тє́цъ на́шихъ бж҃е, бл҃гослове́нъ є҆сѝ.
Пѣ́снь и҃. І҆рмо́съ:
Покрыва́ѧй вода́ми превы́спрєннѧѧ своѧ̑, полага́ѧй мо́рю предѣ́лъ песо́къ, и҆ содержа́й всѧ̑, тѧ̀ пое́тъ со́лнце, тѧ̀ сла́витъ лꙋна̀, тебѣ̀ прино́ситъ пѣ́снь всѧ̀ тва́рь, ꙗ҆́кѡ содѣ́телю всѣ́хъ во вѣ́ки.
Оу҆̀бо і҆ѡаса́фовъ до́мъ растѧ́ше, а҆вені́ровъ же ᲂу҆малѧ́шесѧ: а҆́бїе ца́рь писа́нїемъ сы́на призыва́етъ. ѻ҆́нъ же, ско́рѡ прише́дъ, на вѣ́рꙋ ѻ҆тца̀ ѡ҆братѝ, и҆ ѿ кꙋпѣ́ли семꙋ̀ прїе́мникъ бы́въ, и҆ возопѝ ра́достнѡ: сла́влю тѧ̀, хрⷭ҇тѐ, во вѣ́ки всѧ̑.
Бы́сть чꙋ́до преди́вно, сы́нъ роди́телю своемꙋ̀ ѻ҆тє́цъ ꙗ҆ви́сѧ, ѻ҆крє́стныѧ страны̑ просвѣща́хꙋсѧ, цє́ркви созида́хꙋсѧ, є҆пі́скопи и҆ і҆ере́є же́ртвꙋ бг҃ꙋ приноша́хꙋ, пѣ́снь воспѣва́юще, и҆ сла́вѧще хрⷭ҇та̀ во вѣ́ки всѧ̑.
Гдⷭ҇нею бл҃года́тїю ца́рь а҆вені́ръ веселѧ́шесѧ, всю̀ ца́рскꙋю вла́сть сы́нꙋ предадѐ, са́мъ же въ молча́нїи пребыва́ше: въ толи́кꙋ глꙋбинꙋ̀ смире́нїѧ вложѝ себѐ, ꙗ҆́кѡ и҆ дре́внихъ превзы́ти благовѣ́рїемъ, и҆ сла́вѧще хрⷭ҇та̀ во вѣ́ки всѧ̑.
Бг҃оро́диченъ:
И҆ны́ѧ по́мощи не и҆́мамы, ра́звѣ тебє̀, влⷣчце: ты̀ крѣ́пость и҆ ᲂу҆твержде́нїе, ты̀ похвала̀ и҆ ра́дованїе и҆ храни́тельница мі́ра: къ тебѣ̀ прибѣга́юще, спаса́емсѧ всѝ.
Пѣ́снь ѳ҃. І҆рмо́съ:
Тѧ̀ неискꙋсобра́чнꙋю мт҃рь бг҃а вы́шнѧгѡ, тѧ̀ па́че ᲂу҆ма̀ ро́ждшꙋю сло́вомъ вои́стиннꙋ бг҃а, вы́шшꙋю пречⷭ҇тыхъ си́лъ, немо́лчными славословлє́нїи велича́емъ.
Минꙋ́вшымъ днє́мъ нѣ́кїимъ по креще́нїи, ца́рь а҆вені́ръ а҆́бїе въ недꙋ́гъ тѣле́сный впадѐ, и҆ є҆гда̀ нача́тъ приближа́тисѧ коне́цъ житїѧ̀ є҆гѡ̀, въ до́брѣмъ и҆сповѣ́данїи, съ те́плыми слеза́ми дꙋ́шꙋ свою̀ предадѐ.
Ра́достными слеза́ми сы́нъ почита́ше ѻ҆тца̀, не ᲂу҆красѝ є҆гѡ̀ ца́рскими ѻ҆де́ждами, но просты́мъ ѡ҆дѣѧ́нїемъ тѣ́ло є҆гѡ̀ покры̀: надъ гро́бомъ ста́въ, рꙋ́цѣ воздѣ́въ, бг҃ꙋ благодаре́нїе возсыла́ше, въ покаѧ́нїи тогѡ̀ прїи́мшꙋ.
Къ лю́демъ глаго́лаше, сѣдѧ̀ на престо́лѣ ца́рстѣмъ, ѻ҆те́цъ мо́й ца́рь а҆вені́ръ ᲂу҆́мре, ꙗ҆́кѡ є҆ди́нъ ѿ ни́щихъ, ничто́же є҆мꙋ̀ послѣ́дова, ни бога́тство, ни ца́рскаѧ сла́ва: вы́ же и҆збери́те себѣ̀, є҆го́же хо́щете, да ца́рствꙋетъ надъ ва́ми.
Бг҃оро́диченъ:
Лѣ́ствица і҆а́кѡвлѧ, є҆́юже дре́вле а҆́гг҃лы ви́дѣ сходѧ́щѧ: гора̀ приѡсѣне́ннаѧ, ѿ неѧ́же ка́мень безъ рꙋ́къ ѿсѣче́сѧ: и҆ две́рь нбⷭ҇наѧ, є҆́юже гдⷭ҇ь є҆ди́нъ про́йде: є҆ди́на въ жена́хъ ты̀ є҆сѝ, пречⷭ҇таѧ.
Свѣти́ленъ:
Ца́рство ѡ҆ста́вивъ, къ пꙋсты́ни ᲂу҆стреми́сѧ, и҆ въ хра́минѣ ᲂу҆бо́гагѡ ѡ҆бита̀, ца́рскꙋю ѻ҆де́ждꙋ совле́къ, ᲂу҆бо́гомꙋ дадѐ, коне́чнꙋю ми́лостыню показа́въ, хрⷭ҇тꙋ̀ послѣ́дова.
Бг҃оро́диченъ:
Въ це́рковь твою̀ прибѣга́юще вопїе́мъ тѝ, пречⷭ҇таѧ: пода́ждь на́мъ по́мощь и҆ лю́тыхъ и҆збавле́нїе, да при́снѡ велича́емъ ржⷭ҇тво̀ твоѐ.
На хвали́техъ стїхи̑ры, на д҃, гла́съ ѕ҃. Подо́бенъ: Всѐ ѿло́жше: пи́саны на вече́рни.
Сла́ва, гла́съ ѕ҃:
Прпⷣбнїи ѻ҆тцы̀, во всю̀ зе́млю и҆зы́де вѣща́нїе и҆справле́нїй ва́шихъ: тѣ́мъ на нб҃сѣ́хъ ѡ҆брѣто́сте мздꙋ̀ трꙋдѡ́въ свои́хъ, де́мѡнскїѧ погꙋби́ли є҆стѐ полкѝ, и҆ а҆́гг҃льскїѧ дости́гли є҆стѐ чи́ны, и҆́хже житїю̀ непоро́чнѡ поревнова́ли є҆стѐ. дерзнове́нїе и҆мꙋ́ще ко хрⷭ҇тꙋ̀ бг҃ꙋ, ми́ръ и҆спроси́те дꙋша́мъ на́шымъ.
И҆ ны́нѣ: Бцⷣе, ты̀ є҆сѝ лоза̀ и҆́стиннаѧ:
Славосло́вїе вели́кое, и҆ ѿпꙋ́стъ.
На лїтꙋргі́и: бл҃же́нна, пѣ́снь г҃ и҆ ѕ҃-ѧ. Прокі́менъ, гла́съ з҃: Возвесели́тсѧ пра́ведникъ ѡ҆ гдⷭ҇ѣ, и҆ ᲂу҆пова́етъ на него̀. Сті́хъ: Оу҆слы́ши, бж҃е, гла́съ мо́й, внегда̀ моли́тимисѧ къ тебѣ̀. А҆пⷭ҇лъ, къ колосса́ємъ, зача́ло с҃и. А҆ллилꙋ́їа, гла́съ є҃: Воззва́ша првⷣнїи, и҆ гдⷭ҇ь ᲂу҆слы́ша и҆́хъ. Сті́хъ: Мнѡ́ги скѡ́рби пра́вєднымъ, и҆ ѿ всѣ́хъ и҆́хъ и҆зба́витъ ѧ҆̀ гдⷭ҇ь. Є҆ѵⷢ҇лїе матѳе́а, зача́ло н҃є, ѿ полꙋ̀. Прича́стенъ: Въ па́мѧть вѣ́чнꙋю: