Мѣ́сѧца тогѡ́же въ з҃і-й де́нь. И҆́же во ст҃ы́хъ ѻ҆ц҃а̀ на́шегѡ григо́рїа є҆пі́скопа, неокесарі́йскагѡ чꙋдотво́рца:

И҆ прпⷣбнагѡ ѻ҆ц҃а̀ на́шегѡ ні́кѡна, и҆гꙋ́мена честны́ѧ ѻ҆би́тели живонача́льныѧ трⷪ҇цы, ᲂу҆ч҃ника̀ се́ргїѧ чꙋдотво́рца.

Слꙋ́жба є҆гѡ̀ пи́сана по се́й слꙋ́жбѣ.

На Гдⷭ҇и, воззва́хъ, стїхи̑ры, на ѕ҃, гла́съ и҃.

Подо́бенъ: Что̀ ва́съ нарече́мъ:

Что́ тѧ нарекꙋ̀, григо́рїе; ꙳ влады́кꙋ, ꙗ҆́кѡ стра̑сти покори́лъ є҆сѝ ᲂу҆мꙋ̀: ꙳ дѣ́лателѧ, ꙗ҆́кѡ пожа́лъ є҆сѝ мꙋ́дрости пло́дъ, ꙳ и҆ бжⷭ҇твеннагѡ видѣ́нїѧ сподоблѧ́ема, ꙳ и҆ бг҃осло́вїемъ нбⷭ҇нымъ ѡ҆глаша́ема: ꙳ свѧщеннодѣ́телѧ свѧще́ннѣйша, ꙳ и҆ чꙋдодѣ́лателѧ пречꙋ́днаго. ꙳ молѝ спасти́сѧ дꙋша́мъ на́шымъ.

Что́ тѧ ны́нѣ нарекꙋ̀, григо́рїе; ꙳ потреби́телѧ крѣ́пка безбо́жнагѡ ѕлоче́стїѧ, ꙳ ᲂу҆ставополо́жника благоче́стїѧ, и҆ ᲂу҆чи́телѧ мꙋ́драго: ꙳ ми́ра же пода́телѧ непобѣ́дна, ꙳ ра́тей разори́телѧ непобори́ма, ꙳ въ гора́хъ пребыва́юща, ꙳ и҆ зрѧ́ща, ꙗ҆̀же во гра́дѣхъ. ꙳ молѝ спасти́сѧ дꙋша́мъ на́шымъ.

Что́ тѧ ны́нѣ провозвѣща́ю, прпⷣбне; ꙳ подража́телѧ а҆пⷭ҇лѡвъ, ꙳ ꙗ҆́кѡ чꙋде́съ самотво́рца: ꙳ рѣка́мъ запреща́юща призыва́нїемъ хрⷭ҇то́вымъ, и҆ є҆́зеро братоꙋбі́йственное и҆зсꙋша́юща, ꙳ собо́ръ бг҃обо́рный разорѧ́юща, ꙳ хрⷭ҇тїа̑нскаѧ составлє́нїѧ ᲂу҆множа́юща и҆ просвѣща́юща. ꙳ молѝ спасти́сѧ дꙋша́мъ на́шымъ.

Что́ тѧ ны́нѣ провозглашꙋ̀, прпⷣбне, ꙳ пꙋтевожда̀ заблꙋ́ждшихъ, ꙳ и҆ недꙋ́гꙋющихъ врача̀, ꙳ пода́телѧ тре́бъ просѧ́щымъ ѻ҆би́льна, ꙳ гони́телѧ де́мѡнѡвъ крѣпча́йша, ꙳ поꙋсти́телѧ мч҃ническагѡ по́двига, ꙳ прⷪ҇ро́чески свѣтѧ́щасѧ благода́тьми, достосла́вне. ꙳ молѝ спасти́сѧ дꙋша́мъ на́шымъ.

Сла́ва, гла́съ ѕ҃:

Во глꙋбинꙋ̀ видѣ́нїѧ вше́дъ всемꙋ́дреннѣ, і҆ера́рше хрⷭ҇то́въ, бжⷭ҇твенное навы́клъ є҆сѝ трⷪ҇цы ꙗ҆вле́нїе, дꙋ́хомъ прови́дѧ неꙋкло́ннѡ хрⷭ҇та̀, бг҃а на́шего, чꙋде́съ бе́зднꙋ то́чиши на́мъ, мо́крое во́дъ є҆стество̀ въ каменови́дное претвори́въ, и҆ тре́бищника льстѝ премѣни́въ мра́чныѧ, гони́тели ᲂу҆вѣща́лъ є҆сѝ вѣ́ровати и҆́стинѣ, и҆ сто́лпъ благоче́стїѧ добродѣ́телей ꙗ҆ви́лсѧ є҆сѝ и҆̀мъ, чꙋдєсы̀ прⷪ҇ро́къ наре́клсѧ є҆сѝ. тѣ́мъ мо́лимъ тѧ̀, не преста́й ѡ҆ на́съ сп҃са моли́ти, є҆́же спасти́сѧ дꙋша́мъ на́шымъ.

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Тридне́венъ:

Ви́дѧщи тѧ̀ распина́ема, хрⷭ҇тѐ, тебѐ ро́ждшаѧ, вопїѧ́ше: что̀ стра́нное, є҆́же ви́жꙋ, та́инство, сн҃е мо́й; ка́кѡ на дре́вѣ ᲂу҆мира́еши, пло́тїю повѣ́шенъ, жи́зни пода́телю;

На стїхо́внѣ ѻ҆ктѡ́иха. Сла́ва, гла́съ ѕ҃:

Бо́дрость бж҃їѧ даде́сѧ тебѣ̀, мꙋ́дре, по данїи́лꙋ: ꙗ҆́коже бо ѻ҆́номꙋ со́нїе, та́кѡ вѣ́ры та́инство ѿкры́сѧ тебѣ̀. тѣ́мже молѝ, прпⷣбне ѻ҆́ч҃е, спасти́сѧ дꙋша́мъ на́шымъ.

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Тридне́венъ:

Всечⷭ҇таѧ, ꙗ҆́кѡ ви́дѣ тебѐ на крⷭ҇тѣ̀ повѣ́шена, пла́чꙋщи, вопїѧ́ше мт҃рски: сн҃е мо́й и҆ бж҃е мо́й, сладча́йшее моѐ ча́до, ка́кѡ терпи́ши стрⷭ҇ть поно́снꙋю;

Тропа́рь, гла́съ и҃:

Въ моли́твахъ бо́дрствꙋѧ, чꙋде́съ дѣ́ланьми претерпѣва́ѧ, тезоиме́нїе стѧжа́лъ є҆сѝ и҆справле́нїѧ: но моли́сѧ хрⷭ҇тꙋ̀ бг҃ꙋ, ѻ҆́ч҃е григо́рїе, просвѣти́ти дꙋ́шы на́шѧ, да не когда̀ ᲂу҆́снемъ въ сме́рть.

Сла́ва, и҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.

На ᲂу҆́трени ѻ҆́ба канѡ́на ѻ҆ктѡ́иха, и҆ ст҃а́гѡ на ѕ҃, є҆гѡ́же краегране́сїе:

Чꙋдодѣ́лателю григо́рїю похвалꙋ̀ ткꙋ̀. Творе́нїе ѳеофа́ново.

Гла́съ и҃. Пѣ́снь а҃. І҆рмо́съ:

Колесницегони́телѧ фараѡ́нѧ погрꙋзѝ, чꙋдотворѧ́й и҆ногда̀ мѡѷсе́йскїй же́злъ, крⷭ҇тоѻбра́знѡ порази́въ, и҆ раздѣли́въ мо́ре, і҆и҃лѧ же бѣглеца̀, пѣшехо́дца спасѐ, пѣ́снь бг҃ови воспѣва́юща.

Твои́хъ чꙋде́съ во мнѣ̀, григо́рїе, бжⷭ҇твенное дѣ́йство свѣ́тлѡ, ѻ҆́ч҃е, и҆ ны́нѣ покажѝ, и҆зъ глꙋбины̀ и҆збавлѧ́ѧ мѧ̀ прегрѣше́нїй, блаже́нне, и҆ твое́ю просвѣща́ѧ свѣ́тлостїю, да досто́йнѡ воспою́ тѧ.

Ꙗ҆́кѡ ѻ҆па́сный и҆ ᲂу҆моимѣ́теленъ и҆ мꙋ́дръ, дꙋшѝ благоро́дное, плотски́хъ сласте́й, бл҃же́нне, предсꙋди́лъ є҆сѝ, мꙋ́дрости догма́ты трꙋдолю́бнѡ собира́ѧ: и҆́миже ѻ҆на̀ пита́етсѧ, григо́рїе, бг҃ꙋ приближа́ющисѧ.

Цѣломꙋ́дрїе сестрꙋ̀ стѧжа́въ, ꙗ҆́кѡ споспѣ́шницꙋ благꙋ́ю, тѧ̀ ви́дѣвъ лю́тый ѕмі́й, григо́рїе, на тѧ̀ за́висть воздви́же, є҆го́же посрами́лъ є҆сѝ, ѻ҆́ч҃е, долготерпѣ́нїемъ, женꙋ̀ стра́стїю ѡ҆б̾ѧ́тꙋ и҆сцѣли́въ.

На чꙋжде́й странѣ̀ жи́тельствꙋѧ, прпⷣбне, всѣ̑мъ че́стенъ ра́ди добродѣ́тели ꙗ҆ви́лсѧ є҆сѝ, благочести́въ и҆ бг҃олюби́въ, чꙋдодѣ́йства да́ръ ѿ бг҃а прїе́мъ, и҆́мже позна́нъ бы́лъ є҆сѝ, бг҃оглаго́ливе, просїѧ̀ въ мі́рѣ, ꙗ҆́кѡ со́лнце.

Бг҃оро́диченъ:

И҆зъ ко́рене, чⷭ҇таѧ, ца́рскагѡ прозѧбла̀ є҆сѝ, и҆ цр҃ѧ̀ хрⷭ҇та̀, бж҃їе сло́во, па́че ᲂу҆ма̀ и҆ мы́сли воплоще́нно родила̀ є҆сѝ и҆зъ чⷭ҇тыхъ твои́хъ крове́й, сꙋгꙋ́ба є҆стество́мъ сꙋ́ща, и҆ є҆ди́нственна ѵ҆поста́сїю.

Пѣ́снь г҃. І҆рмо́съ:

Оу҆твержде́й въ нача́лѣ нб҃са̀ ра́зꙋмомъ, и҆ зе́млю на вода́хъ ѡ҆снова́вый, на ка́мени мѧ̀, хрⷭ҇тѐ, за́повѣдей твои́хъ ᲂу҆твердѝ: ꙗ҆́кѡ нѣ́сть свѧ́тъ, па́че тебє̀, є҆ди́не чл҃вѣколю́бче.

Ѡ҆чи́стивъ тво́й ᲂу҆́мъ стра́стнагѡ треволне́нїѧ, и҆ любомꙋ́драгѡ видѣ́нїѧ и҆спо́лненъ, ꙗ҆ви́лсѧ є҆сѝ благолѣ́пенъ, мꙋ́дрости ѻ҆би́телище, и҆ прⷪ҇ро́чества да́ромъ ѡ҆богати́лсѧ є҆сѝ, григо́рїе.

Бг҃одохнове́нномꙋ списа́нїю прибесѣ́довавъ, всебл҃же́нне, и҆ разли́чнагѡ житїѧ̀ ви́ды и҆збра́въ ꙗ҆́вѣ, є҆ди́нъ добродѣ́тели ѻ҆́бразъ въ себѣ̀, бг҃омꙋ́дре, ᲂу҆тверди́лъ є҆сѝ, григо́рїе.

Бг҃оѧвле́нне, навы́къ бж҃е́ственнымъ тайново́дствомъ, та́инство бг҃осло́вїѧ, просвѣтѝ на́съ, трⷪ҇цꙋ є҆диносꙋ́щнꙋю, є҆диноесте́ственнꙋ же почита́ти несозда́ннꙋ и҆ соприсносꙋ́щнꙋ.

Бг҃омъ наста́вленъ, ꙗ҆́кѡ любо́вїю того̀ взыска́въ, чи́стꙋю и҆ бцⷣꙋ марі́ю, и҆ сы́на гро́мова тайноꙋчи́тели и҆мѣ́лъ є҆сѝ, трⷪ҇цы свѣ́тꙋ тѧ̀, бг҃оглаго́ливе, наꙋча́ющыѧ.

Бг҃оро́диченъ:

Же́злъ прозѧ́бшїй хрⷭ҇та̀, цвѣ́тъ нетлѣ́нїѧ, и҆ златꙋ́ю кади́льницꙋ, вси́ тѧ вѣ́мы, чⷭ҇таѧ, бжⷭ҇твеннагѡ сꙋщества̀ носѧ́щꙋ на ѡ҆б̾ѧ́тїихъ, ѻ҆трокови́це, ᲂу҆́гль, бг҃облаже́ннаѧ.

Сѣда́ленъ, гла́съ г҃. Подо́бенъ: Бжⷭ҇твенныѧ вѣ́ры:

Но́въ бы́лъ є҆сѝ мѡѷсе́й дѣ́лы, скрижа̑ли вѣ́ры на горѣ̀ та́инственнагѡ бг҃оѧвле́нїѧ прїи́мъ, законоположи́въ лю́демъ благоче́стїе трⷪ҇чныѧ та́йны, григо́рїе. тѣ́мже всѝ вѣ́рнїи чти́мъ па́мѧть твою̀, просѧ́ще тобо́ю ве́лїю ми́лость.

Два́жды.

Сла́ва, и҆ ны́нѣ, бг҃оро́диченъ:

Бжⷭ҇твеннаѧ ски́нїѧ была̀ є҆сѝ сло́ва, є҆ди́на пречⷭ҇таѧ мт҃и дв҃о, чистото́ю а҆́гг҃лы превозше́дшаѧ: па́че всѣ́хъ менѐ, пе́рсть бы́вша, ѡ҆скверне́нна плотски́ми прегрѣше́ньми, ѡ҆чи́сти моли́твъ твои́хъ бжⷭ҇твенными вода́ми, подаю́щи, чⷭ҇таѧ, ве́лїю ми́лость.

Крⷭ҇тобг҃оро́диченъ:

Нескве́рнаѧ а҆́гница сло́ва, нетлѣ́ннаѧ дв҃ома́ти, на крⷭ҇тѣ̀ зрѧ́щи повѣ́шена, и҆зъ неѧ̀ безболѣ́зненнѡ прозѧ́бшаго, матеролѣ́пнѡ рыда́ющи, вопїѧ́ше: ᲂу҆вы̀ мнѣ̀, ча́до моѐ, ка́кѡ стра́ждеши во́лею, хотѧ̀ и҆зба́вити ѿ страсте́й безче́стїѧ человѣ́ка;

Пѣ́снь д҃. І҆рмо́съ:

Ты̀ моѧ̀ крѣ́пость, гдⷭ҇и, ты̀ моѧ̀ и҆ си́ла, ты̀ мо́й бг҃ъ, ты̀ моѐ ра́дованїе, не ѡ҆ста́вль нѣ́дра ѻ҆́ч҃а, и҆ на́шꙋ нищетꙋ̀ посѣти́въ. тѣ́мъ съ прⷪ҇ро́комъ а҆ввакꙋ́момъ зовꙋ́ ти: си́лѣ твое́й сла́ва, чл҃вѣколю́бче.

Зе́млю до́брꙋю, ѻ҆́ч҃е бг҃омꙋ́дре, взора́въ, сло́ва сѣ́мѧ прїе́мъ, во сто̀ є҆ѵⷢ҇льски многосꙋгꙋ́биши, є҆щѐ и҆ ны́нѣ, григо́рїе, приводѧ̀ ᲂу҆чє́нїи твои́ми бг҃ꙋ пѣснопою́щыѧ: си́лѣ твое́й сла́ва, чл҃вѣколю́бче.

Ꙗ҆́кѡ мо́лнїѧ, ѻ҆́ч҃е, возсїѧ́въ житїѐ твоѐ, де́мѡнскꙋю ле́сть ѿгна̀. свѣ́тꙋ бо твоеѧ̀ добродѣ́тели ѻ҆́ныхъ тма̀ прикоснꙋ́тисѧ не возмо́же. тѣ́мже неѡко́росъ꙾ ⁵ дꙋшетлѣ́нныѧ льстѝ, валѧ́всѧ ꙗ҆́коже ка́мень свѣ́титсѧ.

Мра́къ свѣ́та бжⷭ҇твеннѣйшагѡ ви́дѣти сподо́билсѧ є҆сѝ, зако́нъ же бг҃опи́санный, ꙗ҆́кѡ мѡѷсе́й, ѻ҆́ч҃е, прїе́мъ, бг҃осло́вїѧ и҆звѣ́стное навы́клъ є҆сѝ: ѿсю́дꙋ законополо́жникъ хрⷭ҇то́вы цр҃кве показа́лсѧ є҆сѝ, бг҃омꙋ́дре григо́рїе.

Ри́торскагѡ бꙋесло́вїѧ ᲂу҆клони́всѧ, и҆ сло́вомъ, ѻ҆́ч҃е, благода́ти ѡ҆зари́всѧ, а҆пⷭ҇льскꙋю и҆́стиннѡ вла́сть на де́мѡны прїѧ́тъ: твоеѧ́ бо ѿбѣга́етъ свѣтѧ́щїѧсѧ зарѝ тмы̀ предста́тель, григо́рїе.

Бг҃оро́диченъ:

Кївѡ́тъ тѧ̀ и҆здале́ча проѡбразѝ, прїе́мши зако́нъ бг҃опи́санный во чре́вѣ живонача́льное сло́во заче́ншꙋю (с. 287) несказа́ннѡ, всенепоро́чнаѧ, пита́ющаго бога́тнѡ дꙋ́шы вопїю́щихъ: си́лѣ твое́й сла́ва, чл҃вѣколю́бче.

Пѣ́снь є҃. І҆рмо́съ:

Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тма̀ ѻ҆каѧ́ннаго, но ѡ҆брати́ мѧ, и҆ къ свѣ́тꙋ за́повѣдей твои́хъ, пꙋти̑ моѧ̑ напра́ви, молю́сѧ.

Дѣ́ланїемъ твои́мъ слове́съ ѡ҆лѧденѣ̑вшаѧ сердца̀ ᲂу҆гла́дивъ, и҆ бжⷭ҇твенное сѣ́мѧ въ нѧ̀, і҆ера́рше, вве́рглъ є҆сѝ, и҆ пло́дъ многокла́сный и҆зба́вителю, спасе́нїе вѣ́рныхъ, бг҃оглаго́ливе, прине́слъ є҆сѝ.

Бж҃їй предста́тель ре́вностїю распалѧ́емь, пома́за тѧ̀ фе́димъ не прише́дша, ѻ҆́ч҃е, бг҃ꙋ всѧ́чєскаѧ вѣ́дѧщемꙋ благоче́стнѡ ᲂу҆пова́въ, и҆ честно́мꙋ твоемꙋ̀ житїю̀ надѣ́ѧвсѧ, бг҃оглаго́ливе григо́рїе.

Стрꙋѧ́ми твои́хъ повелѣ́нїй і҆́дѡльскаѧ разжжє́нїѧ ᲂу҆гаси́лъ є҆сѝ, и҆ ᲂу҆че́ньми твои́ми вѣ̑рныѧ ᲂу҆тверди́лъ є҆сѝ, всемꙋ́дре, возше́дъ на го́рꙋ, ꙗ҆́кѡ самꙋи́лъ видѣ̑нїи, и҆ ꙗ҆́кѡ дꙋ́бъ, бы́въ тве́рдостїю.

Ст҃и́телю бг҃омꙋ́дре, твои́ми моли́твами лю́тыхъ мѧ̀ и҆збавлѧ́й, мои́хъ прегрѣше́нїй рꙋкописа́нїе, ѻ҆́ч҃е, расто́ргни, ꙗ҆́кѡ свѧще́нникъ сы́й, ѿ бг҃а вла́сть прїи́мъ ѡ҆ставлѧ́ти прегрѣшє́нїѧ.

Бг҃оро́диченъ:

Оу҆краси́ласѧ є҆сѝ, дв҃о, дѣ́вственными твои́ми пречⷭ҇тыми добро́тами, и҆ пе́рвыѧ є҆́ѵы покры́ла є҆сѝ стꙋ́дъ ѕлоѻбра́зный, хрⷭ҇та̀ ро́ждши, ѡ҆дѣѧ́нїе безсме́ртїѧ да́рꙋющаго тебѐ чтꙋ́щымъ.

Пѣ́снь ѕ҃. І҆рмо́съ:

Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.

Є҆́зеро чꙋдодѣ́йствꙋѧ братоꙋбі́йственное и҆зсꙋши́лъ є҆сѝ, и҆ рѣкѝ стремлє́нїѧ ᲂу҆ста́вилъ є҆сѝ, всемꙋ́дре, же́злъ водрꙋзи́въ, и҆́же вскорени́сѧ а҆́бїе и҆ возрастѐ бжⷭ҇твеннымъ манове́нїемъ, григо́рїе.

Ре́вность бж҃їѧ поѧда́ше тѧ̀, всебога́те: не терпѧ́ бо зрѣ́ти бг҃а досажда́ема, лю́ди сꙋемꙋ́дрєнныѧ твои́ми моли́твами, бг҃оглаго́ливе, погꙋби́лъ є҆сѝ.

Оу҆мертви́сѧ восхотѣ́вый ᲂу҆ничижи́ти тѧ̀, ѻ҆каѧ́нный є҆вре́инъ ѕлочести́вый, бг҃ꙋ тѧ̀ прославлѧ́ющемꙋ, бг҃омꙋ́дре григо́рїе, тогѡ̀ догма́тѡвъ и҆спо́лнителѧ показꙋ́ѧ.

Бг҃оро́диченъ:

На́йде вседѣ́тельный на тѧ̀ дх҃ъ, всенепоро́чнаѧ, и҆ сло́во бж҃їе въ тѧ̀ всели́сѧ, и҆ пло́ть бы́сть неизрече́ннѡ, пребы́въ неизмѣ́ненъ.

Конда́къ, гла́съ в҃. Подо́бенъ: Вы́шнихъ и҆щѧ̀:

Чꙋде́съ мно́гихъ прїе́мъ дѣ́йство, зна́меньми ᲂу҆жа́сными де́мѡны ᲂу҆страши́лъ є҆сѝ, и҆ недꙋ́ги ѿгна́лъ є҆сѝ человѣ́чєскїѧ, всемꙋ́дре григо́рїе: чꙋдотво́рецъ же и҆менꙋ́ешисѧ, зва́нїе ѿ дѣ́лъ прїе́мъ.

І҆́косъ:

Ѿкꙋ́дꙋ начнꙋ̀ похвалы̑ тка́ти ѻ҆каѧ́нный, зрѧ̀ мнѡ́гїѧ и҆ пречꙋ̑дныѧ вє́щи; а҆́ще ѿ житїѧ̀ прпⷣбнагѡ начнꙋ̀, ѿню́дъ не возмогꙋ̀: всѧ́кагѡ бо ᲂу҆ма̀ превосхо́дитъ житїѐ є҆гѡ̀ бжⷭ҇твенное. а҆́ще ѿ чꙋде́съ, и҆ въ се́мъ про́чее постыждꙋ́сѧ: па́че песка́ бо сꙋ́ще: сегѡ̀ ра́ди нарече́сѧ чꙋдотво́рецъ, зва́нїе ѿ дѣ́лъ прїе́мъ.

Пѣ́снь з҃. І҆рмо́съ:

Бж҃їѧ снисхожде́нїѧ ѻ҆́гнь ᲂу҆стыдѣ́сѧ въ вавѷлѡ́нѣ и҆ногда̀, сегѡ̀ ра́ди ѻ҆́троцы въ пещѝ ра́дованною ного́ю, ꙗ҆́кѡ во цвѣ́тницѣ ликꙋ́юще, поѧ́хꙋ: бл҃гослове́нъ є҆сѝ, бж҃е ѻ҆тє́цъ на́шихъ.

Ѻ҆тцє́въ похвала̀, и҆ ᲂу҆чи́телей честносло́вїе, свѣти́льникъ цр҃кве, бл҃гоче́стїѧ сто́лпъ неколе́бленный ты̀ ꙗ҆ви́лсѧ є҆сѝ, григо́рїе, зовы́й: бл҃гослове́нъ бг҃ъ ѻ҆тє́цъ на́шихъ.

Возсїѧ́въ чꙋдєсы̀, вселе́ннꙋю просвѣти́лъ є҆сѝ, сегѡ̀ ра́ди, бг҃омꙋ́дре, совокꙋ́пльшесѧ, тебѐ бл҃жи́мъ, твои́ми словєсы̀ пита́ющесѧ, григо́рїе, и҆ пою́ще: бл҃гослове́нъ бг҃ъ ѻ҆тє́цъ на́шихъ.

Врачева̑нїѧ, всемꙋ́дре, немѡщны́мъ всѣ̑мъ и҆сточи́лъ є҆сѝ: и҆злїѧ́сѧ бо бл҃года́ть ѻ҆би́льнѣйшаѧ во ᲂу҆стна́хъ твои́хъ чꙋдодѣ́йственнаѧ, є҆́юже взыва́лъ є҆сѝ: бл҃гослове́нъ бг҃ъ ѻ҆тє́цъ на́шихъ.

Бг҃оро́диченъ:

Ны́нѣ всѧ̑ и҆спо́лнишасѧ свѣ́та бжⷭ҇твеннагѡ тобо́ю, пречⷭ҇таѧ: ты́ бо две́рь ꙗ҆ви́ласѧ є҆сѝ, є҆́юже мі́рꙋ бг҃ъ приѡбщи́сѧ, просвѣща́ѧ вѣ́рою зовꙋ́щыѧ: бл҃гослове́нъ бг҃ъ ѻ҆тє́цъ на́шихъ.

Пѣ́снь и҃. І҆рмо́съ:

Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ, си́лою же лꙋ́чшею спасє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы, бл҃гослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Тобо́ю ѡ҆богати́вшесѧ трⷪ҇цы сїѧ́нїемъ, є҆диносꙋ́щныѧ и҆ честны́ѧ, григо́рїе, твоѐ ны́нѣ торжество̀ соверша́юще, бл҃года́тїю чꙋдодѣ́йственною ѡ҆зари́тисѧ про́симъ, вопїю́ще влⷣцѣ: дѣ́ти, благослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Ꙗ҆́кѡ новоѧвле́нно зерца́ло, прїе́мъ, всебога́те, сїѧ́нїѧ нача́льнагѡ бжⷭ҇тва̀, мі́ръ просвѣти́лъ є҆сѝ лꙋчы̀ посыла́ѧ свѣ́та, пѣснопѣ́сненнѡ правосла́вїе пою́щымъ: дѣ́ти, благослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Бг҃омъ покрыва́емь, благоче́стїѧ вина̀, бг҃очести̑вымъ соблю́лсѧ є҆сѝ, всемꙋ́дре, въ горѣ̀ сокрыва́емь, ꙗ҆́кѡ законополо́жникъ и҆ны́й мѡѷсе́й, содѣ́телѧ и҆ и҆зба́вителѧ пѣ́ти наꙋча́ѧ: ѻ҆́троцы, благослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Бг҃оро́диченъ:

Свѣ́та незаходи́магѡ была̀ є҆сѝ ѻ҆би́тель, пречⷭ҇таѧ, дѣ́вства добро́тами свѣтѧ́щи, и҆ всѧ̑ ѡ҆зарѧ́ющи, бцⷣꙋ тѧ̀ и҆́стиннꙋю и҆сповѣ́дающыѧ ѿ дꙋшѝ и҆ вопїю́щыѧ: дѣ́ти, благослови́те, свѧще́нницы, воспо́йте, лю́дїе, превозноси́те во всѧ̑ вѣ́ки.

Пѣ́снь ѳ҃. І҆рмо́съ:

Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее небе́съ. тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.

И҆зѧ́щнѣйшагѡ жи́тельства сїѧ́ѧ свѣ́томъ, ны́нѣ свѣ́тꙋ вели́комꙋ предстои́ши бг҃одѣ́ѧтельными чꙋдодѣ́йствы, ꙗ҆́кѡ побѣди́тель вѣнча́емь, прпⷣбне, ѻ҆́ч҃е і҆ера́рше, чꙋдотво́рче григо́рїе бг҃омꙋ́дре, свѣти́ло цр҃кве, правосла́вныхъ ᲂу҆добре́нїе.

Напра́вити молѝ твои́ми моли́твами цр҃ко́вное ны́нѣ свѧще́нство, и҆збра́нное и҆ ѡ҆свѧще́нное, чꙋдодѣ́лателю, и҆ вѣ́рнѡ ны́нѣ па́мѧть твою̀ соверша́ющымъ полꙋчи́ти го́рнѧгѡ црⷭ҇тва, и҆ бжⷭ҇твеннагѡ весе́лїѧ сподо́битисѧ ᲂу҆молѝ.

Побѣди́въ де́мѡнскїѧ прило́ги и҆ плотско́е покори́въ мꙋдрова́нїе, и҆ а҆рхїере́й неѕло́бивъ и҆ прпⷣбенъ бы́въ, пра́вды ѡ҆дѣѧ́нїемъ ѡ҆блече́нъ, чꙋдотво́рче, предстои́ши прⷭ҇то́лꙋ всѣ́хъ цр҃ѧ̀ со дерзнове́нїемъ, всебл҃же́нне.

Бг҃оро́диченъ:

Ꙗ҆ви́ласѧ є҆сѝ, ѽ дв҃о мт҃и бж҃їѧ, па́че є҆стества̀ ро́ждши пло́тїю благо́е сло́во, є҆го́же ѻ҆ц҃ъ ѿ се́рдца своегѡ̀ ѿры́гнꙋ, пре́жде всѣ́хъ вѣ̑къ, ꙗ҆́кѡ бла́гъ: є҆го́же ны́нѣ и҆ тѣле́съ вы́шша разꙋмѣва́емъ, а҆́ще и҆ въ тѣ́ло ѡ҆блече́сѧ.

Свѣти́ленъ. Подо́бенъ: Жєны̀ ᲂу҆слы́шите:

Чꙋдєсы̀ возсїѧ́лъ є҆сѝ, чꙋдотво́рче григо́рїе, слꙋжи́телѧ і҆́дѡльскаго и҆зба́вилъ є҆сѝ ѿ тлѝ и҆ пре́лести де́мѡнскїѧ, ка́мень подви́гнꙋвъ повелѣ́нїемъ: є҆́зеро же и҆зсꙋши́въ, и҆ рѣкꙋ̀ ᲂу҆ста́вилъ є҆сѝ. тѣ́мже тѧ̀ всѝ согла́снѡ похвалѧ́емъ, треблаже́нне.

Бг҃оро́диченъ. Подо́бенъ: то́йже:

Ра́дꙋйсѧ, вѣ́рныхъ похвало̀: ра́дꙋйсѧ, прпⷣбныхъ ᲂу҆твержде́нїе: ра́дꙋйсѧ, пра́ведныхъ сла́во: ра́дꙋйсѧ, свѣ́те сꙋ́щихъ во тмѣ̀: ра́дꙋйсѧ, хра́ме прест҃ы́й: ра́дꙋйсѧ, бж҃їй раю̀: ра́дꙋйсѧ, клѧ́твы разрѣше́нїе, бл҃гослове́ннаѧ марі́е.

На стїхо́внѣ ѻ҆ктѡ́иха: и҆ ст҃а́гѡ стїхи́ра, гла́съ д҃:

Сті́хъ: Свѧще́нницы твоѝ ѡ҆блекꙋ́тсѧ пра́вдою, и҆ прпⷣбнїи твоѝ возра́дꙋютсѧ.

Свѧще́нства и҆збра́нїе ѿ бг҃а прїе́мъ, и҆ въ бжⷭ҇твеннꙋю ри́зꙋ свы́ше ѡ҆дѣ́ѧвсѧ, пре́жде невѣ́рствїѧ сы́ны, ча̑да свѣ́та и҆ наслѣ́дники показа́лъ є҆сѝ, бж҃їѧ бо мꙋ́дрости, бл҃года́ти и҆злїѧ́вшейсѧ во ᲂу҆стна́хъ твои́хъ пресла́вныхъ веще́й самодѣ́лателю гдⷭ҇ень, григо́рїе. тѣ́мъ и҆ ны́нѣ въ па́мѧти твое́й моли́сѧ хрⷭ҇тꙋ̀ бг҃ꙋ ѡ҆ дꙋша́хъ на́шихъ.

Сла́ва, гла́съ и҃.

Пресловꙋ́щагѡ въ чꙋдесѣ́хъ і҆ера́рха, и҆ бездꙋ̑шнаѧ стыдѧ́щесѧ, пресла́внѡ прелага́хꙋсѧ: є҆́зеро бо и҆́зсше бра́тїю воꙋмлѧ́ющее, же́злъ же возраста́ше, рѣкꙋ̀ ѡ҆бꙋзда́ющи, ка́мень сло́вомъ преложи́сѧ, приводѧ̀ невѣ̑рныѧ къ бж҃їю позна́нїю, є҆гѡ́же ра́ди пода́ждь, бж҃е, дꙋша́мъ на́шымъ ве́лїю ми́лость.

И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.

Подо́бенъ: Ѽ пресла́внагѡ чꙋдесѐ!

Что̀ зри́мое видѣ́нїе, ꙳ є҆́же мои́ми ѻ҆чесы̀ ꙳ ви́дитсѧ, ѽ влⷣко! ꙳ содержа́й всю̀ тва́рь, на дре́во воздви́женъ бы́въ, ꙳ и҆ ᲂу҆мира́еши, всѣ̑мъ даѧ́й жи́знь, ꙳ бцⷣа пла́чꙋщи глаго́лаше, ꙳ є҆гда̀ ᲂу҆зрѣ̀ на крⷭ҇тѣ̀ возноси́ма, ꙳ и҆зъ неѧ̀ неизрече́ннѡ возсїѧ́вшаго ꙳ бг҃а и҆ чл҃вѣ́ка.

На лїтꙋргі́и, Бл҃жє́нна ѻ҆ктѡ́иха, и҆ ст҃а́гѡ, пѣ́снь г҃-ѧ. Прокі́менъ, гла́съ з҃: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; А҆пⷭ҇лъ къ корі́нѳѧнѡмъ, зача́ло рн҃а. А҆ллилꙋ́їа, гла́съ в҃: Свѧще́нницы твоѝ ѡ҆блекꙋ́тсѧ пра́вдою, и҆ прпⷣбнїи твоѝ возра́дꙋютсѧ. Є҆ѵⷢ҇лїе матѳе́а, зача́ло л҃д, ѿ полꙋ̀. Прича́стенъ: Въ па́мѧть вѣ́чнꙋю:

Слꙋ́жба прпⷣбнагѡ ні́кѡна чꙋдотво́рца.

На ма́лѣй вече́рни, на Гдⷭ҇и, воззва́хъ, стїхи̑ры, на д҃, гла́съ а҃.

Подо́бенъ: Всехва́льнїи мч҃ницы:

Ѻ҆́ч҃е прпⷣбне ні́кѡне, ꙳ ѿ ю҆́ности твоемꙋ̀ влⷣцѣ подо́бѧсѧ, ꙳ ди́вно житїѐ проше́лъ є҆сѝ, ꙳ ѻ҆́бразъ всѣ̑мъ добродѣ́тели собо́ю показꙋ́ѧ, ꙳ чл҃вѣколю́бїѧ бж҃їѧ бл҃года́ти ꙳ пꙋчи́нꙋ въ себѣ̀ и҆мѣ́ѧ. ꙳ тѣ́мже моли́сѧ, ꙳ дарова́ти дꙋша́мъ на́шымъ ꙳ ми́ръ и҆ ве́лїю ми́лость.

Ѻ҆́ч҃е преблаже́нне ні́кѡне, ꙳ кто̀ по́двиги и҆ страда̑нїѧ твоѧ̑ повѣ́сть, ꙳ ꙗ҆̀же под̾ѧ́лъ є҆сѝ, хрⷭ҇тꙋ̀ послѣ́дꙋѧ; ꙳ не да́лъ бо є҆сѝ сна̀ твои̑мъ ѻ҆чесє́мъ, ни вѣ́ждѡмъ дрема́нїѧ, ꙳ и҆́миже дꙋ́шꙋ твою̀ ѿ страсте́й свободи́лъ є҆сѝ, ꙳ слеза́ми непреста́нными ѡ҆чища́ѧ: ꙳ и҆ ны́нѣ моли́сѧ, дарова́ти дꙋша́мъ на́шымъ ꙳ ми́ръ и҆ ве́лїю ми́лость.

Ѻ҆́ч҃е прпⷣбне ні́кѡне, ꙳ чистотꙋ̀ тѣле́снꙋю, ꙳ и҆ дꙋше́вное ᲂу҆миле́нїе ꙳ ѿ ю҆́ности твоеѧ̀ сохрани́лъ є҆сѝ, ꙳ и҆ ѻ҆чи́ма бг҃а зрѣ́ти сподо́билсѧ є҆сѝ, ꙳ томꙋ̀ є҆ди́номꙋ слꙋжѧ̀ стра́хомъ и҆ тре́петомъ, ꙳ наста́вникъ бы́лъ є҆сѝ твоемꙋ̀ ста́дꙋ. ꙳ тѣ́мже моли́сѧ, дарова́ти дꙋша́мъ на́шымъ ꙳ ми́ръ и҆ ве́лїю ми́лость.

Сла́ва, гла́съ ѕ҃:

Прїиди́те, мона́хѡвъ мно́жество дне́сь, дꙋхо́внѡ (с. 293) возвесели́мсѧ въ наро́читомъ пра́здницѣ: и҆́бо пресвѣ́тлаѧ па́мѧть ѻ҆тца̀ на́шегѡ наста̀, въ ню́же соше́дшесѧ согла́снѡ воспое́мъ, глаго́люще: ра́дꙋйсѧ, ні́кѡне пресла́вне, нбⷭ҇ный человѣ́че и҆ земны́й а҆́гг҃ле, и҆ дх҃а ст҃а́гѡ ѻ҆би́телище: ра́дꙋйсѧ, вѣ̑рнымъ похвала̀ и҆ ᲂу҆твержде́нїе, и҆ всеѧ̀ рѡссі́йскїѧ землѝ пресвѣ́тлый свѣти́льниче: ра́дꙋйсѧ, ꙗ҆́кѡ трⷪ҇цѣ предстоѧ̀ со а҆́гг҃лы, ю҆́же непреста́ннѡ молѝ, дарова́ти дꙋша́мъ на́шымъ ми́ръ и҆ ве́лїю ми́лость.

И҆ ны́нѣ, бг҃оро́диченъ:

На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:

До́мъ дх҃а ст҃а́гѡ ꙳ бы́лъ є҆сѝ, прпⷣбне, ꙳ ѕѣ́льнымъ поще́нїемъ, ꙳ ꙗ҆́кѡ благово́нными а҆рѡма̑ты, ꙳ напаѧ́ѧ дꙋ́шꙋ твою̀.

Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀.

Дрема́нїѧ не да́лъ є҆сѝ ꙳ ѻ҆чесє́мъ твои̑мъ, прпⷣбне, ꙳ до́ндеже дꙋ́шꙋ ѿ страсте́й свободи́лъ є҆сѝ, ꙳ и҆ возме́здїе ѡ҆брѣ́лъ є҆сѝ ꙳ со а҆́гг҃лы водворе́нїе.

Сті́хъ: Блаже́нъ мꙋ́жъ, боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.

Бжⷭ҇твеннымъ жела́нїемъ ꙳ ᲂу҆ѧзви́всѧ, прпⷣбне, ꙳ житїѐ непоро́чно проходѧ̀, ꙳ до́ндеже дости́глъ є҆сѝ ꙳ ца́рскагѡ престо́ла.

Сла́ва, гла́съ и҃:

И҆мѧ́ше бжⷭ҇твеннаѧ твоѧ̀ дꙋша̀ и҆ непоро́чнаѧ дх҃а прест҃а́гѡ и҆сполне́нїе, ѻ҆́ч҃е прпⷣбне ні́кѡне, ѿ ю҆́ности носѧ̀ соверше́нъ смы́слъ, любо́вїю хрⷭ҇то́вою разгара́ѧсѧ, томꙋ̀ послѣ́довалъ є҆сѝ. держа́внѡ надъ страстьмѝ воцари́лсѧ є҆сѝ, кѡ́зни де́мѡнскїѧ низло́жъ пове́рглъ є҆сѝ, по́двигъ тече́нїѧ твоегѡ̀ соверши́лъ є҆сѝ. и҆ ны́нѣ во свѣ́тѣ невече́рнѣмъ водворѧ́сѧ, и҆ трⷪ҇цѣ со а҆́гг҃лы предстоѧ̀, молѝ и҆зба́витисѧ ста́дꙋ твоемꙋ̀ ѿ ви́димыхъ и҆ неви́димыхъ вра̑гъ, и҆ спастѝ дꙋ́шы на́шѧ.

И҆ ны́нѣ, бг҃оро́диченъ. Тропа́рь, гла́съ а҃:

Послꙋша́нїѧ до́брый рачи́тель бы́въ, прпⷣбне ні́кѡне приснопа́мѧтне, цр҃ковь бо прекра́снꙋ ст҃ы́ѧ трⷪ҇цы, въ похвалꙋ̀ ѻ҆тцꙋ̀ твоемꙋ̀ воздви́глъ є҆сѝ. тѣ́мже и҆ мы̀, ча̑да твоѧ̑, любо́вїю вопїе́мъ тѝ: сла́ва да́вшемꙋ тѝ крѣ́пость, сла́ва вѣнча́вшемꙋ тѧ̀, сла́ва дѣ́йствꙋющемꙋ тобо́ю всѣ̑мъ и҆сцѣлє́нїѧ.

Сла́ва, и҆ ны́нѣ, бг҃оро́диченъ воскрⷭ҇нъ.

На вели́цѣй вече́рни:

На Гдⷭ҇и, воззва́хъ, стїхи̑ры на и҃, гла́съ ѕ҃. Поⷣ: Всѐ ѿло́жше:

Ве́сь ѿ ю҆́ности гдⷭ҇ꙋ возложи́лсѧ є҆сѝ, ꙳ ні́кѡне прпⷣбне, ꙳ земнꙋ́ю красотꙋ̀ и҆ сла́вꙋ въ ничто́же вмѣни́въ, ꙳ хрⷭ҇та̀ є҆ди́наго возлюби́лъ є҆сѝ, ꙳ и҆ тогѡ̀ кре́стъ на ра́мена взе́мъ, ꙳ бжⷭ҇твеннѣ воѡрꙋжи́всѧ, ꙳ ла́ѵры вели́кагѡ се́ргїа дости́глъ є҆сѝ, ꙳ и҆ ѿ негѡ̀ посыла́емь быва́еши ꙳ къ дꙋхо́вномꙋ настоѧ́телю а҆ѳана́сїю, ꙳ и҆ та́мѡ жела́емыхъ тобо́ю ѿ негѡ̀ сподоблѧ́ешисѧ. ꙳ и҆ ны́нѣ на нб҃сѣ́хъ со а҆́гг҃лы ꙳ трⷪ҇цѣ предстоѧ̀, ні́кѡне ѻ҆́ч҃е на́шъ, ꙳ молѝ спасти́сѧ дꙋша́мъ на́шымъ.

Стра́шное хрⷭ҇то́во прише́ствїе ꙳ въ се́рдцы твое́мъ прїи́мъ, ні́кѡне прпⷣбне, ꙳ разꙋ́мнѡ мимотекꙋ́щихъ житїѧ̀ ᲂу҆стꙋпи́лъ є҆сѝ: ꙳ и҆ сла́вꙋ маловре́меннꙋю презрѣ́въ, ꙳ молча́нїе воспрїѧ́лъ є҆сѝ: ꙳ на земли́ бо мꙋ́жески подвиза́лсѧ є҆сѝ, и҆ пло́ть потща́лсѧ є҆сѝ покори́ти дꙋ́хꙋ: ꙳ дꙋ́шꙋ же и҆ ᲂу҆́мъ ꙳ ѿ страсте́й ѡ҆чи́стивъ, ꙳ ревнова́въ житїю̀ вели́кагѡ се́ргїа. ꙳ съ ни́мже ны́нѣ на нб҃сѣ́хъ прⷭ҇то́лꙋ влⷣки всѣ́хъ предстои́ши, ꙳ со дерзнове́нїемъ молѧ́сѧ ꙳ ѡ҆ дꙋша́хъ на́шихъ.

Прпⷣбне ѻ҆́ч҃е ні́кѡне, ꙳ и҆змла́да возлюби́въ добро́тꙋ влⷣчню, ꙳ и҆ къ томꙋ̀ жела́нїе невозвра́тнѡ и҆мѣ́ѧ, ꙳ ѻ҆те́чество и҆ ро́дъ ѡ҆ста́вилъ є҆сѝ: ꙳ бога́тство и҆ сла́вꙋ возненави́дѣвъ, ꙳ хрⷭ҇тꙋ̀ є҆ди́номꙋ послѣ́довалъ є҆сѝ: ꙳ равноа́гг҃льнѡ во ѻ҆би́тели прест҃ы́ѧ трⷪ҇цы пожи́въ, ꙳ ѡ҆гра́дꙋ мона́шествꙋющымъ созда́лъ є҆сѝ. ꙳ и҆ ны́нѣ на нб҃сѣ́хъ ꙳ со а҆́гг҃лы трⷪ҇цѣ предстои́ши, ꙳ ні́кѡне прпⷣбне, ꙳ со дерзнове́нїемъ молѧ́сѧ ꙳ ѡ҆ дꙋша́хъ на́шихъ.

И҆́ны стїхи̑ры, гла́съ д҃. Подо́бенъ: Зва́нный свы́ше:

Є҆гда̀ бжⷭ҇твенное раче́нїе ꙳ на́йде на тѧ̀, бл҃же́нне ні́кѡне, ꙳ тогда̀, мїрска̑ѧ мꙋдрова̑нїѧ дале́че ѿри́нꙋвъ, ꙳ къ бж҃е́ственномꙋ се́ргїю прите́клъ є҆сѝ, ꙳ и҆ ѿ негѡ̀ наставлѧ́емь, ꙳ посыла́ешисѧ въ монасты́рь, высо́кое нарица́емо, ꙳ къ тогѡ̀ ᲂу҆ч҃никꙋ̀ а҆ѳана́сїю: ꙳ и҆ та́мѡ ѻ҆́браза мона́шескагѡ, ꙳ и҆ свѧще́нства сподоблѧ́ешисѧ, ꙳ мнѡ́гимъ добродѣ́тели ѻ҆́бразъ бы́въ. ꙳ тѣ́мже мо́лимъ тѧ̀: ꙳ молѝ, прпⷣбне, ꙳ спастѝ и҆ просвѣти́ти дꙋ́шы на́шѧ.

Сꙋдо́мъ бж҃їимъ ꙳ и҆ повелѣ́нїемъ вели́кагѡ, ꙳ па́ки ко ѻ҆тцꙋ̀ и҆ па́стырю, ꙳ въ монасты́рь прихо́диши, ꙳ и҆ ѿ негѡ̀ съ вели́кою любо́вїю, ѻ҆́ч҃е, прїе́млешисѧ. ꙳ ѿѻнꙋ́дꙋже, и҆ по преставле́нїи дꙋхо́внагѡ твоегѡ̀ ѻ҆тца̀, ꙳ па́стырь ѿ негѡ̀ поставлѧ́ешисѧ ꙳ тоѧ́же ѻ҆би́тели, ꙳ и҆дѣ́же це́рковь прекра́снꙋ, ꙳ въ сла́вꙋ ст҃ы́ѧ трⷪ҇цы, ꙳ прпⷣбне ні́кѡне, воздви́глъ є҆сѝ: ꙳ ю҆́же непреста́ннѡ ѡ҆ всѣ́хъ чтꙋ́щихъ тѧ̀ молѝ, ꙳ спастѝ и҆ просвѣти́ти дꙋ́шы на́шѧ.

Є҆гда̀ бжⷭ҇твенное наи́тїе ꙳ на́йде на тѧ̀, прпⷣбне, ꙳ тогда̀ мїрска̑ѧ возненави́дѣлъ є҆сѝ, ꙳ и҆ хрⷭ҇тꙋ̀ прихо́диши, ꙳ и҆ тогѡ̀ ꙗ҆ре́мъ взе́мъ, ꙳ по стопа́мъ блаже́ннагѡ се́ргїа и҆зво́лилъ є҆сѝ ходи́ти, ꙳ и҆дѣ́же ѻ҆́бразъ мнѡ́гимъ добродѣ́тели бы́въ, ꙳ и҆ мно́гимъ воздержа́нїемъ и҆ моли́твами ꙳ подо́бникъ твоемꙋ̀ ѻ҆тцꙋ̀ во все́мъ. ꙳ тѣ́мже мо́лимъ тѧ̀, ꙳ моли́сѧ, прпⷣбне, ꙳ спастѝ и҆ просвѣти́ти дꙋ́шы на́шѧ.

Сла́ва, гла́съ в҃:

Жела́нїемъ бꙋ́дꙋщихъ, прпⷣбне, добродѣ́тельнѡ пожи́лъ є҆сѝ, чистото́ю дꙋше́вною спаси́тєльныѧ пꙋти̑ проше́лъ є҆сѝ, и҆ го́рдаго ѕмі́ѧ воздержа́нїемъ ᲂу҆би́лъ є҆сѝ: нбⷭ҇наѧ же вѡ́инства ᲂу҆диви́лъ є҆сѝ терпѣ́нїемъ твои́мъ, чи́стое прїѧ́телище дх҃а прест҃а́гѡ, ѻ҆́ч҃е, бы́лъ є҆сѝ. и҆ сегѡ̀ ра́ди ѿ вседѣ́тельныѧ десни́цы вѣнча́лсѧ є҆сѝ, и҆ чꙋде́съ дарова́нїй ѿ негѡ̀ сподо́билсѧ є҆сѝ: молѝ спасти́сѧ дꙋша́мъ на́шымъ.

И҆ ны́нѣ, бг҃оро́диченъ воскрⷭ҇нъ.

Вхо́дъ. Прокі́менъ днѐ. Чтє́нїѧ г҃: пи́саны сегѡ̀ мѣ́сѧца въ ѕ҃ де́нь, Варлаа́мꙋ хꙋ́тынскомꙋ.

На лїті́и стїхи̑ры, гла́съ а҃:

Дне́сь ликовствꙋ́етъ ра́достнѡ бжⷭ҇твеннаѧ и҆ вели́каѧ ла́ѵра, и҆ хва́литсѧ твои́ми бг҃оꙋго́дными дѣѧ̑нїи, и҆мѣ́ющи твоѧ̑ ст҃ы̑ѧ мо́щи, бл҃же́нне ні́кѡне, ѿ ни́хже ст҃ы́ню почерпа́емъ ѻ҆би́льнѡ: подаю́тъ бо здра́вїе съ вѣ́рою притека́ющымъ къ честнѣ́й твое́й ра́цѣ. тѣ́мже, просвѣ́щшесѧ тобо́ю, глаго́лемъ: сподо́би и҆ на́съ сла́вы нбⷭ҇ныѧ хрⷭ҇то́вы, бл҃же́нне, и҆ твоѐ ста́до сохранѧ́й, и҆ спасѝ дꙋ́шы на́шѧ.

Гла́съ в҃:

Па́мѧть твоѧ̀ во вѣ́къ пребыва́етъ, прпⷣбне ѻ҆́ч҃е ні́кѡне, и҆ кро́тость се́рдца твоегѡ̀, ᲂу҆го́дниче хрⷭ҇то́въ бл҃же́нне, просїѧ̀ па́че со́лнечнагѡ сїѧ́нїѧ, ѡ҆зарѧ́ющи вѣ́рныхъ сердца̀: и҆́бо вои́стиннꙋ честна́ѧ ра́ка бжⷭ҇твенныхъ моще́й твои́хъ, ꙗ҆́кѡ трꙋба̀ велегла́снѡ свидѣ́тельствꙋетъ, благоꙋха́ющи бл҃года́тїю прест҃а́гѡ дх҃а, и҆ прогонѧ́ющи мра́къ грѣхо́вный, и҆ на́съ наꙋча́ющи бл҃годари́ти и҆ сла́вити бг҃а, тебѐ просла́вльшаго.

Гла́съ г҃:

Ве́лїѧ сла́ва житїѧ̀ твоегѡ̀, ѻ҆́ч҃е на́шъ ні́кѡне, всѧ̑, ꙗ҆̀же земна̑ѧ, ѡ҆ста́вивъ, є҆ди́наго хрⷭ҇та̀ возлюби́лъ є҆сѝ, и҆ томꙋ̀ слꙋжа̀ чи́стою со́вѣстїю, на землѝ а҆́гг҃льски пожи́лъ є҆сѝ, де́мѡнскаѧ вышє́нїѧ разори́лъ є҆сѝ, возше́дъ на высотꙋ̀ нбⷭ҇нꙋю: бл҃же́нъ є҆сѝ, ꙗ҆́кѡ та́кѡ хрⷭ҇тꙋ̀ рабо́тавъ. тѣ́мже и҆ мы̀, тобо́ю пꙋ́ть жи́зни позна́вше, тѧ̀ непреста́ннѡ ᲂу҆блажа́емъ.

Сла́ва, гла́съ в҃:

Прпⷣбне и҆ бг҃облаже́нне ѻ҆́ч҃е на́шъ ні́кѡне, гра́дъ живꙋ́щїй бж҃їй, вы́ше ра́зꙋма бл҃ги́хъ воспрїѧ́лъ є҆сѝ жела̑нїѧ: а҆́гг҃льское житїѐ соверши́въ, и҆ ны́нѣ на нб҃сѣ́хъ водворѧ́ешисѧ, и҆спе́рва подо́бнꙋ добро́тꙋ ѻ҆́браза сохрани́въ, и҆ на подо́бствїе, ꙗ҆́коже мо́щно, восхо́дъ безпа́костнѡ ѡ҆брѣ́тъ, и҆ бг҃ꙋ со дерзнове́нїемъ предстоѧ̀, зерца́ломъ разꙋ́мнымъ чи́стѡ зри́ши ст҃ꙋ́ю трⷪ҇цꙋ, за чтꙋ́щыѧ тѧ̀ вѣ́рою и҆ любо́вїю помоли́сѧ, ѻ҆́ч҃е на́шъ ні́кѡне.

И҆ ны́нѣ, бг҃оро́диченъ воскрⷭ҇нъ:

На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:

Ѿ ю҆́ности ѻ҆те́ческомꙋ житїю̀ ꙳ поревнова́въ во все́мъ, прпⷣбне: ꙳ тѣ́мже ѡ҆ста́вилъ є҆сѝ всѧ̑, ꙳ ꙗ҆̀же въ мі́рѣ, житє́йскаѧ мꙋдрова̑нїѧ, ꙳ молѧ̀ ѡ҆ на́съ чл҃вѣколю́бца.

Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀.

Послꙋша́нїѧ ѿ се́рдца жела́ѧ, мꙋ́дре, ꙳ мі́ра и҆ сꙋ́щихъ въ не́мъ жите́йскихъ ѿре́клсѧ є҆сѝ. ꙳ и҆ сегѡ̀ ра́ди въ вы́шнихъ ꙳ со а҆́гг҃лы хрⷭ҇тꙋ̀ предстои́ши, ꙳ ѡ҆ всѣ́хъ молѧ́сѧ.

Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми.

А҆́ще и҆ ю҆́нъ тѣ́ломъ, ꙳ прпⷣбне ні́кѡне, ꙳ но многолѣ́тныхъ житїе́мъ превозше́лъ є҆сѝ, ꙳ всѐ плотско́е мꙋдрова́нїе ѿсѣ́къ, ꙳ прпⷣбномꙋ послꙋша́нїю повинꙋ́лсѧ є҆сѝ.

Сла́ва, гла́съ и҃. Самогла́сенъ:

Помышлѧ́ѧ ѻ҆́но житїѐ, и҆ вѣ́къ пребыва́ющїй, вѣ́къ се́й, ꙗ҆́кѡ маловре́мененъ, ѡ҆ста́вилъ є҆сѝ, и҆ потща́лсѧ є҆сѝ тлѣ́ющими нетлѣ̑ннаѧ стѧжа́ти: ѿѻнꙋ́дꙋже и҆ тѣ́ло порабо́тилъ є҆сѝ дꙋ́хꙋ, да хрⷭ҇та̀ є҆ди́наго приѡбрѧ́щеши. є҆го́же молѝ спасти́сѧ всѣ̑мъ, любо́вїю свѧще́ннꙋю па́мѧть твою̀ въ пѣ́снехъ при́снѡ почита́ющымъ.

И҆ ны́нѣ, бг҃оро́диченъ.

Тропа́рь, гла́съ: Послꙋша́нїѧ до́брый рачи́тель бы́въ:

Пи́санъ на ма́лѣй вече́рни.

Сла́ва, и҆ ны́нѣ, бг҃оро́диченъ воскрⷭ҇нъ, по гла́сꙋ.

На ᲂу҆́трени, на Бг҃ъ гдⷭ҇ь, тропа́рь ст҃а́гѡ, два́жды.

Сла́ва, и҆ ны́нѣ, бг҃оро́диченъ:

По а҃ стїхосло́вїи сѣда́ленъ, гла́съ д҃. Поⷣ: Ꙗ҆ви́лсѧ є҆сѝ дне́сь:

Вѣ́къ, и҆́же на землѝ, ꙗ҆́кѡ преходѧ́щїй возненави́дѣвъ, бл҃же́нне, и҆ вѣ́къ ѻ҆́нъ, ꙗ҆́кѡ не преходѧ́щїй, ѿ се́рдца возлюби́въ, є҆мꙋ́же и҆ наслѣ́дникъ ꙗ҆ви́лсѧ є҆сѝ, ѡ҆ всѣ́хъ на́съ хрⷭ҇та̀ молѝ, при́снѡ въ пѣ́снехъ, прпⷣбне, твою̀ па́мѧть почита́ющихъ.

Два́жды.

Сла́ва, и҆ ны́нѣ, бг҃оро́диченъ:

Ѡ҆бнови́ла є҆сѝ, чⷭ҇таѧ, бжⷭ҇твеннымъ ржⷭ҇тво́мъ твои́мъ и҆стлѣ́вшее во страсте́хъ земноро́дныхъ ме́ртвенное сꙋщество̀, и҆ воздви́гла є҆сѝ всѧ̑ ѿ сме́рти къ жи́зни нетлѣ́нїѧ. тѣ́мже тѧ̀ по до́лгꙋ блажи́мъ всѝ, дв҃о препросла́вленнаѧ, ꙗ҆́коже прорекла̀ є҆сѝ.

По в҃ стїхосло́вїи, сѣда́ленъ, гла́съ в҃. Поⷣ: Милосе́рдїѧ сꙋ́щи:

Мона́шеское житїѐ ѿ се́рдца, прпⷣбне, возлюби́въ, и҆ сегѡ̀ ра́ди мі́ръ, и҆ ꙗ҆̀же въ мі́рѣ возненави́дѣвъ, блаже́нне ні́кѡне, дꙋхо́вномꙋ твоемꙋ̀ ѻ҆тцꙋ̀ послꙋша́нїемъ и҆́скреннимъ вда́лсѧ є҆сѝ. съ ни́мже гдⷭ҇ꙋ моли́сѧ спасти́сѧ всѣ̑мъ на́мъ.

Два́жды.

Сла́ва, и҆ ны́нѣ, бг҃оро́диченъ:

Милосе́рдїѧ сꙋ́щи и҆сто́чникъ, ми́лости сподо́би на́съ, бцⷣе, при́зри на лю́ди согрѣши́вшыѧ, ꙗ҆вѝ, ꙗ҆́кѡ при́снѡ, си́лꙋ твою̀: на тѧ́ бо ᲂу҆пова́ющи, ра́дꙋйсѧ, вопїе́мъ тѝ, ꙗ҆́коже и҆ногда̀ гаврїи́лъ, безпло́тныхъ а҆рхїстрати́гъ.

По полѷеле́и сѣда́ленъ, гла́съ и҃. Подо́бенъ: Премꙋ́дрости:

Мꙋ́дрости и҆змла́да подо́бїю навы́къ, и҆ сегѡ̀ ра́ди всѧ̑, ꙗ҆̀же въ мі́рѣ, возненави́дѣвъ, прпⷣбне, хрⷭ҇та̀ є҆ди́наго возлюби́лъ є҆сѝ. ѿѻнꙋ́дꙋже дꙋхо́вномꙋ твоемꙋ̀ ѻ҆тцꙋ̀, всеконе́чнѡ послꙋша́нїю вда́лсѧ є҆сѝ, ѿ негѡ́же тоѧ́же ѻ҆би́тели па́стырь пресла́внѡ ᲂу҆строѧ́ешисѧ, и҆ мнѡ́гимъ въ добродѣ́тели ѻ҆́бразъ бы́въ: съ ни́мже моли́сѧ гдⷭ҇ꙋ, ні́кѡне прпⷣбне, грѣхѡ́въ ѡ҆ставле́нїе дарова́ти чтꙋ́щымъ любо́вїю свѧтꙋ́ю па́мѧть твою̀.

Два́жды.

Сла́ва, и҆ ны́нѣ, бг҃оро́диченъ:

Ꙗ҆́кѡ дв҃ꙋ и҆ є҆ди́нꙋ въ жена́хъ, тѧ̀ безъ сѣ́мене ро́ждшꙋю бг҃а пло́тїю, всѝ ᲂу҆блажа́емъ ро́ди человѣ́честїи: ѻ҆́гнь бо всели́сѧ въ тѧ̀ бж҃ества̀, и҆ ꙗ҆́кѡ млⷣнца млеко́мъ пита́еши зижди́телѧ и҆ гдⷭ҇а. тѣ́мъ а҆́гг҃льскїй и҆ человѣ́ческїй ро́дъ, досто́йнѡ сла́вимъ прест҃о́е ржⷭ҇тво̀ твоѐ, и҆ согла́снѡ вопїе́мъ тѝ: молѝ хрⷭ҇та̀ бг҃а, согрѣше́нїй ѡ҆ставле́нїе дарова́ти покланѧ́ющымсѧ вѣ́рою прест҃о́мꙋ ржⷭ҇твꙋ̀ твоемꙋ̀.

Та́же степє́нна, а҃-й а҆нтїфѡ́нъ д҃-гѡ гла́са. Прокі́менъ: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; Всѧ́кое дыха́нїе: Є҆ѵⷢ҇лїе матѳе́а, зача́ло м҃г.

По н҃-мъ ѱалмѣ̀, стїхи́ра, гла́съ ѕ҃:

Ѿ ю҆́ности, прпⷣбне, и҆зво́лилъ є҆сѝ бг҃ꙋ рабо́тати, тогда̀ дꙋхо́вное раче́нїе распалѝ дꙋ́шꙋ твою̀, и҆ вско́рѣ, роди́тели ѡ҆ста́вивъ, вели́кагѡ ѻ҆тца̀ дости́глъ є҆сѝ. ѻ҆́нъ же, ви́дѣвъ твоѐ дꙋше́вное жела́нїе, вма́лѣ и҆скꙋше́нїе налага́етъ, да тѧ̀ сотвори́тъ теплѣ́йша рачи́телѧ: ты́ же смире́нїе показꙋ́еши, рече́ннагѡ ѻ҆тце́мъ достиза́еши, и҆ ѿ негѡ̀ навы́клъ є҆сѝ добродѣ́телемъ, ко ѻ҆тцꙋ̀ па́ки возвраща́ешисѧ, и҆ па́стырь поставлѧ́ешисѧ. и҆ ны́нѣ, преблаже́нне ні́кѡне, предстоѧ̀ прⷭ҇то́лꙋ всѣ́хъ цр҃ѧ̀, и҆спросѝ ми́ръ мі́рꙋ, и҆ цр҃кви рѡссі́йстѣй ᲂу҆твержде́нїе, и҆ спасе́нїе дꙋша́мъ на́шымъ.

Канѡ́нъ бцⷣы со і҆рмосо́мъ на ѕ҃, и҆ прпⷣбнагѡ канѡ́нъ на и҃.

Творе́нїе пахѡ́мїа і҆еромона́ха, и҆́же ѿ ст҃ы́ѧ горы̀, є҆гѡ́же краегране́сїе: Похвалꙋ̀ блаже́нномꙋ ні́кѡнꙋ ткꙋ̀.

Гла́съ д҃. Пѣ́снь а҃. І҆рмо́съ:

Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ, свѣ́тлѡ торжествꙋ́ѧ, и҆ воспою̀, ра́дꙋѧсѧ тоѧ̀ чꙋдеса̀.

Премꙋ́дростїю ра́зꙋма ᲂу҆краша́емь, прпⷣбне ні́кѡне, ве́сь хрⷭ҇тꙋ̀ порабо́тилсѧ є҆сѝ, къ немꙋ̀ жела́нїе твоѐ и҆мѣ́ѧ: є҆го́же молѝ, спастѝ ѿ бѣ́дъ пою́щыѧ тѧ̀.

Ѡ҆ всѣ́хъ хрⷭ҇та̀ молѝ, прпⷣбне ні́кѡне, па́мѧть твою̀ любо́вїю пою́щихъ, и҆зба́витисѧ вѣ́чнагѡ мꙋче́нїѧ, да тебѐ всѝ, ꙗ҆́кѡ те́пла предста́телѧ, пѣ́сньми велича́емъ.

Хрⷭ҇тꙋ̀ ве́сь порабо́тивсѧ, прпⷣбне ні́кѡне, и҆ къ немꙋ̀ всѐ жела́нїе и҆мѣ́ѧ, и҆ тогѡ̀ ра́ди любвѐ мі́ра съ жела́ньми є҆гѡ̀ ѿре́ксѧ. сегѡ̀ ра́ди тѧ̀ всѝ пѣ́сньми ᲂу҆блажа́емъ, ні́кѡне всебл҃же́нне.

Всѐ твоѐ жела́нїе къ бг҃ꙋ мꙋ́жески впери́въ, въ вы́шнихъ селе́нїе сотвори́лъ є҆сѝ пресла́внѡ. тѣ́мже тѧ̀ пѣ́сньми, блаже́нне ні́кѡне, почита́емъ.

А҆́ще и҆ дале́че житїе́мъ, но бли́зъ вѣ́рою и҆ любо́вїю дꙋхо́внагѡ твоегѡ̀ настоѧ́телѧ, и҆ съ ни́мъ вкꙋ́пѣ пресла́внѡ чꙋдеса̀ твори́ши, вкꙋ́пѣ же и҆ бг҃ꙋ предстоитѐ, ѡ҆ всѣ́хъ на́съ молѧ́щесѧ.

Бг҃оро́диченъ:

Мꙋ́дрости премꙋ́дростныѧ прїѧ́телище была̀ є҆сѝ, пренепоро́чнаѧ: сво́й бо хра́мъ ѿ твои́хъ пречⷭ҇тыхъ крове́й, чⷭ҇таѧ, созда́ти благоизво́ли на спасе́нїе на́ше.

Катава́сїа: Ѿве́рзꙋ ᲂу҆ста̀ моѧ̑:

Пѣ́снь г҃. І҆рмо́съ:

Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дꙋхо́внѡ ᲂу҆твердѝ, въ бжⷭ҇твеннѣй твое́й сла́вѣ вѣнцє́въ сла́вы сподо́би.

Лю́ди всѧ̑, тебѐ вѣ́дꙋщыѧ и҆ застꙋпле́нїѧ твоегѡ̀ ча́ющыѧ не пре́зри, ѻ҆́ч҃е: но, є҆ли́кѡ мо́щно, предста́тельствꙋй, всѣ̑мъ полє́знаѧ просѧ̀ моли́твами твои́ми.

Оу҆пова́нїе и҆мѣ́лъ є҆сѝ, блаже́нне ні́кѡне, и҆ прибѣ́жище, всѣ́хъ бг҃а: того̀ молѝ, мо́лимъ тѧ̀, ѡ҆ на́съ любо́вїю воспѣва́ющихъ тѧ̀, приснопа́мѧтне.

Бжⷭ҇твеннымъ жела́нїемъ, прпⷣбне ні́кѡне, разжига́емь, мїрскꙋ́ю красотꙋ̀ преѡби́дѣлъ є҆сѝ, мона́шеское житїѐ возлюби́въ. тѣ́мже бы́лъ є҆сѝ прпⷣбнымъ є҆диножи́тель и҆ пра́вєднымъ.

Бг҃оро́диченъ:

И҆сцѣле́нїй тѧ̀ и҆сто́чникъ, въ твою̀ ᲂу҆тро́бꙋ вше́дъ, показа̀, мт҃и бж҃їѧ пречⷭ҇таѧ, мою̀ ᲂу҆̀бо дꙋ́шꙋ и҆сцѣлѝ.

Сѣда́ленъ, гла́съ г҃:

Оу҆крѣплѧ́емь бжⷭ҇твенною си́лою, прпⷣбне ні́кѡне, возмо́глъ є҆сѝ ѡ҆скꙋдѣ́нїе, ѿ безбо́жныхъ а҆га́рѧнъ бы́вшее, напо́лнити: це́рковь бо но́вꙋ и҆ ѻ҆би́тель краснѣ́йшꙋ па́че воздви́глъ є҆сѝ. тѣ́мже тѧ̀ всѝ ᲂу҆блажа́емъ.

Два́жды.

Сла́ва, и҆ ны́нѣ, бг҃оро́диченъ:

Бжⷭ҇твеннаѧ ски́нїѧ была̀ є҆сѝ сло́ва, є҆ди́на пречⷭ҇таѧ мт҃и дв҃о, чистото́ю а҆́гг҃лы превозше́дшаѧ, па́че всѣ́хъ менѐ пе́рсть бы́вша, ѡ҆скверне́на плотски́ми прегрѣше́ньми, ѡ҆чи́сти моли́твъ твои́хъ бжⷭ҇твенными вода́ми, подаю́щи, чⷭ҇таѧ, ве́лїю ми́лость.

Пѣ́снь д҃. І҆рмо́съ:

Сѣдѧ́й въ сла́вѣ на прⷭ҇то́лѣ бж҃ества̀, во ѻ҆́блацѣ ле́гцѣ прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й.

Невозвра́тнѡ ше́ствовавъ вводѧ́щїй пꙋ́ть къ нбⷭ҇номꙋ гра́дꙋ, ні́кѡне прпⷣбне, и҆дѣ́же наста́ви тѧ̀ ст҃ы́й дх҃ъ, ѻ҆би́тель и҆мѣ́ѧ се́рдце твоѐ.

Смире́нїе возносѧ́щее, ні́кѡне бл҃же́нне, въ се́рдцы и҆мѣ́лъ є҆сѝ: ѿѻнꙋ́дꙋже тѧ̀ и҆ мы̀ мо́лимъ ᲂу҆ще́дрити смире́нїе на́ше.

Страстьмѝ разли́чными коле́блємыѧ, и҆ вѣ́рою притека́ющыѧ къ твоемꙋ̀ гро́бꙋ, бл҃же́нне ні́кѡне, ст҃ы́мъ твои́мъ хода́тайствомъ всѧ̑ посѣтѝ ми́лостивнѡ къ человѣколю́бцꙋ.

Мра́къ страсте́й ѿ се́рдца твоегѡ̀ ты̀, прпⷣбне ні́кѡне, ѡ҆чи́стивъ, хрⷭ҇то́ва повелѣ́нїѧ вои́стиннꙋ свѣ́тъ прїе́мъ, въ постѣ̀ просїѧ́лъ є҆сѝ, ᲂу҆мертви́въ тѣ́ло, дꙋ́хомъ же, ні́кѡне, ѡ҆жи́лъ є҆сѝ.

Бг҃оро́диченъ:

Ѡ҆чище́нїе всѣ́хъ земны́хъ, вѣ́рою молю̀ и҆ припа́даю, бл҃гослове́ннаѧ: моли́твами твои́ми сꙋдїю̀ и҆ сн҃а твоего̀ ми́лостива сотворѝ, ꙗ҆́кѡ да по до́лгꙋ сла́влю тѧ̀.

Пѣ́снь є҃. І҆рмо́съ:

Оу҆жасо́шасѧ всѧ́чєскаѧ ѡ҆ бжⷭ҇твеннѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.

Оу҆́зкїй и҆ приско́рбный пꙋ́ть ше́ствовалъ є҆сѝ, прпⷣбне ні́кѡне, восхожде́ньми бжⷭ҇твенными се́рдца твоегѡ̀, а҆́може ѻ҆ц҃а̀ твоегѡ̀ наста́виша тѧ̀ моли̑твы.

Ѿ грѣхо́вныхъ болѣ́зней мѧ̀ ѡ҆блегчѝ ско́рбныхъ, и҆ се́рдца моегѡ̀ лю́тость ᲂу҆толѝ, и҆ согрѣше́нїй ѡ҆ставле́нїе и҆спросѝ: и҆́маши бо послꙋ́шающа хрⷭ҇та̀ чи́стыѧ твоеѧ̀ моли́твы.

Стра̑сти тѣлє́сныѧ воздержа́нїемъ, ѻ҆́ч҃е, ᲂу҆вѧди́въ, ꙗ҆́кѡ дре́во многопло́дное, пло́дъ чꙋ́денъ прино́сиши бг҃ꙋ, своѧ̑ чꙋ̑днаѧ и҆справлє́нїѧ, ні́кѡне прпⷣбне.

Всесвѣ́тлый свѣти́льникъ ꙗ҆ви́лсѧ є҆сѝ, ѡ҆зарѧ́ѧ пою́щыѧ тѧ̀, ні́кѡне прпⷣбне. и҆ сегѡ̀ ра́ди мо́лимъ тѧ̀: вѣ́чнагѡ мꙋче́нїѧ и҆зба́ви ны̀, пою́щыѧ тѧ̀.

Бг҃оро́диченъ:

Оу҆ма̀ моегѡ̀ ᲂу҆врачꙋ́й и҆зстꙋпле́нїе, всенепоро́чнаѧ, и҆ и҆сцѣлѝ стра̑сти дꙋшє́вныѧ, и҆ ᲂу҆ны́нїѧ тмꙋ̀ ѿженѝ, ꙗ҆́кѡ да восхвалю́ тѧ по достоѧ́нїю, бцⷣе всепѣ́таѧ.

Пѣ́снь ѕ҃. І҆рмо́съ:

Бж҃е́ственное сїѐ и҆ всечестно́е соверша́юще пра́зднество, бг҃омꙋ́дрїи, бг҃ома́тере, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.

Своѐ се́рдце, прпⷣбне ні́кѡне, ст҃ы́ѧ трⷪ҇цы жили́ще и҆ до́мъ созда́лъ є҆сѝ. всѝ, вѣ́рою притека́ющїи къ честнѣ́й твое́й ра́цѣ, просвѣще́нїе, и҆ ѡ҆свѧще́нїе, и҆ ѡ҆чище́нїе, всебл҃же́нне ні́кѡне, прїе́млемъ.

Твоѧ̑ всебл҃же́нне ні́кѡне, свѧщє́нныѧ и҆ всест҃ы̑ѧ мѡ́щи, во гро́бѣ лежа́ще, недꙋ́ги врачꙋ́ютъ, де́мѡнскїѧ же полкѝ прогонѧ́ютъ всегда̀, вѣ̑рнымъ же и҆сточа́ютъ и҆сцѣлє́нїѧ ѻ҆би̑льнаѧ, тебѐ по достоѧ́нїю при́снѡ блажа́щымъ.

Ꙗ҆́кѡ ве́сь хрⷭ҇тꙋ̀ приближа́ѧсѧ ꙗ҆снѣ́йши, помѧнѝ всѣ́хъ, вѣ́рою помина́ющихъ тѧ̀, ні́кѡне всече́стне, грѣхѡ́въ проще́нїѧ ᲂу҆ хрⷭ҇та̀ просѧ̀, и҆ нбⷭ҇нагѡ црⷭ҇твїѧ воспрїѧ́тїѧ.

Бг҃оро́диченъ:

Є҆ди́на всѣ̑мъ поможе́нїе, помозѝ на́мъ бѣ́дствꙋющымъ, и҆ рꙋ́кꙋ пода́ждь, и҆ къ приста́нищꙋ введѝ спасе́нїѧ, ѻ҆трокови́це бг҃облагода́тнаѧ.

Конда́къ, гла́съ д҃. Подо́бенъ: Ꙗ҆ви́лсѧ є҆сѝ:

Дꙋхо́вномꙋ твоемꙋ̀ настоѧ́телю, ѻ҆́ч҃е ні́кѡне, всѧ́чески прилѣпи́всѧ, и҆ ѿ негѡ̀ наставлѧ́емь, во все́мъ хрⷭ҇то́ви порабо́тивсѧ, мона́хѡвъ бы́лъ є҆сѝ чинонача́льникъ, и҆ прпⷣбныхъ сожи́тель: съ ни́миже хрⷭ҇та̀ бг҃а молѝ непреста́ннѡ ѡ҆ всѣ́хъ на́съ.

І҆́косъ:

Ка́кѡ возмогꙋ̀ воспѣ́ти твоѧ̑ и҆справлє́нїѧ; и҆лѝ и҆зрещѝ трꙋды̀ твоѧ̑, и҆́миже трꙋди́лсѧ є҆сѝ по ѻ҆тцѣ̀ твое́мъ, а҆́ще не ты̀ пода́си мѝ сло́во, недосто́йномꙋ рабꙋ̀ твоемꙋ̀; ты́ бо бы́лъ є҆сѝ по ѻ҆тцѣ̀ мона́хѡвъ нача́льникъ: съ ни́миже хрⷭ҇та̀ бг҃а молѝ непреста́ннѡ ѡ҆ всѣ́хъ на́съ.

Пѣ́снь з҃. І҆рмо́съ:

Не послꙋжи́ша тва́ри бг҃омꙋ́дрїи, па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ, пою́ще: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ.

Всѧ̑ мимотекꙋ̑щаѧ привре́мєннаѧ пристра̑стїѧ, прпⷣбне ні́кѡне, ѿрази́въ, всю̀ наде́ждꙋ къ бг҃ꙋ стѧжа́лъ є҆сѝ, и҆́мже дѣ́йствꙋеши пресла̑внаѧ чꙋдеса̀.

Твоеѧ̀ дꙋшѝ тве́рдое, и҆ благостоѧ́нное ра́зꙋма, прпⷣбне ні́кѡне, ника́коже лꙋка́вый возмо́же соврати́ти, бг҃ꙋ помога́ющꙋ тѝ, досточꙋ́дне.

Мі́рꙋ ᲂу҆мертви́всѧ, бꙋ́дꙋщꙋю жи́знь наслѣ́дилъ є҆сѝ, ѻ҆́ч҃е, и҆сцѣле́нїй бжⷭ҇твеннꙋю бл҃года́ть и҆сточа́еши пою́щымъ: бл҃гослове́нъ бг҃ъ ѻ҆тє́цъ на́шихъ.

Нельсти́внѡ навы́къ, пре́жде тебє̀ бы́вшихъ ѻ҆тє́цъ по́стническомꙋ житїю̀, прпⷣбне: но тѣ́хъ житїе́мъ пожи́въ, бг҃облаже́нне, воспѣва́ѧ: бл҃гослове́нъ бг҃ъ ѻ҆тє́цъ на́шихъ.

Бг҃оро́диченъ:

Глаго́лѡмъ прⷪ҇ро́чєскимъ послѣ́дꙋюще, дв҃о, бцⷣꙋ тѧ̀ и҆сповѣ́дꙋемъ: родила́ бо є҆сѝ ѻ҆троча̀, всѣ́хъ дре́внѣйшее, є҆мманꙋ́илъ нарица́емое. є҆мꙋ́же зове́мъ: бл҃гослове́нъ бг҃ъ ѻ҆тє́цъ на́шихъ.

Пѣ́снь и҃. І҆рмо́съ:

Ѻ҆́троки благочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть, тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.

Мꙋ́жествовавъ, побѣди́лъ є҆сѝ стра̑стнаѧ взыгра̑нїѧ всѧ̑, ᲂу҆́мъ просвѣще́нъ и҆мѣ́ѧ, возмо́глъ є҆сѝ, ꙗ҆̀же ви́дѣ ѻ҆тца̀ творѧ́ща, сїѧ̑ дѣ́тели и҆спо́лнити: тѣ́мже тѧ̀ всѝ ᲂу҆блажа́емъ, ні́кѡне всеблаже́нне.

Мы́слїю ѡ҆чище́нною, премꙋ́дре ні́кѡне, бг҃ꙋ приближа́ѧсѧ, всѣ̑мъ всѧ́къ бы́въ, да хрⷭ҇та̀ приѡбрѧ́щеши. тѣ́мже въ небє́сныѧ ѻ҆би́тєли всели́всѧ, прпⷣбне, дерзнове́ннѡ зри́ши ст҃ꙋ́ю трⷪ҇цꙋ, ю҆́же непреста́ннѡ молѝ, спастѝ всѧ̑ правосла́внѡ тѧ̀ почита́ющыѧ.

Серпо́мъ моли́твъ, ѻ҆́ч҃е ні́кѡне, стра̑стнаѧ тє́рнїѧ и҆зсѣ́къ, и҆ воздѣ́лавъ воздержа́нїѧ ра́ломъ дꙋше́внꙋю зе́млю, вве́рглъ є҆сѝ сѣ́мена благоче́стїѧ въ не́й: тѣ́мже и҆сцѣле́нїѧ плоды̀ пожина́еши.

Добродѣ́телей тѧ̀ прїѧ́телище нарица́емъ, преблаже́нне, ꙗ҆́кѡ молча́нїѧ дрꙋ́га, и҆ бдѣ́нїѧ дѣ́лателѧ, и҆ ѻ҆́бразъ цѣломꙋ́дрїѧ, и҆ моли́твы жили́ще некра́домое, и҆ чꙋде́съ сокро́вище, и҆ моли́твенника ѡ҆ почита́ющихъ па́мѧть твою̀, ні́кѡне блаже́нне.

Бг҃оро́диченъ:

Мт҃и бж҃їѧ всенепоро́чнаѧ, дꙋшѝ моеѧ̀ ꙗ҆́звы и҆сцѣлѝ: сла̑сти ᲂу҆толѝ пло́ти моеѧ̀, ѡ҆мраче́нное се́рдце моѐ просвѣтѝ, и҆ ᲂу҆мирѝ ᲂу҆́мъ мо́й ѿ всѧ́кагѡ вре́да, и҆ вра́жїихъ мѧ̀ и҆зба́ви напа́стей.

Пѣ́снь ѳ҃. І҆рмо́съ:

Всѧ́къ земноро́дный да взыгра́етсѧ, дх҃омъ просвѣща́емъ, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее свѧще́нное торжество̀ бг҃ома́тере, и҆ да вопїе́тъ: ра́дꙋйсѧ, всебл҃же́ннаѧ бцⷣе, чⷭ҇таѧ приснодв҃о.

Сле́зъ твои́хъ пролїѧ́нїемъ грѣхо́вный ѻ҆́гнь погаси́лъ є҆сѝ, безстра́стїѧ же во́дꙋ и҆сцѣле́нїй чи́стагѡ пи́ва пою́щымъ и҆сточа́еши, блаже́нне ні́кѡне досточꙋ́дне.

Ра́ка, и҆дѣ́же лежи́тъ ст҃о́е тѣ́ло твоѐ, прпⷣбне ні́кѡне, чꙋде́съ благода́ть и҆сточа́етъ, просвѣща́ющи на́шѧ дꙋ́шы и҆ тѣлеса̀, и҆ ѡ҆богаща́ющи, предста́телѧ тѧ̀ те́пла, и҆ застꙋ́пника и҆мꙋ́щыѧ.

Дне́сь съ на́ми собо́ри а҆́гг҃лъ и҆ прпⷣбныхъ веселѧ́тсѧ, въ па́мѧть твою̀, бл҃же́нне ні́кѡне: съ ни́миже помина́й ны̀, чтꙋ́щыѧ тѧ̀ вѣ́рнѡ, досточꙋ́дне.

Оу҆ста́ви свѧще́нными твои́ми моли́твами воздвиза́емое на ны̀ смꙋще́нїе, и҆ человѣ̑къ всѣ́хъ ѡ҆ѕлобле́нїе, ꙗ҆́кѡ и҆мѣ́ѧ дерзнове́нїе ко влⷣцѣ и҆ бг҃ꙋ на́шемꙋ, ні́кѡне досточꙋ́дне.

Бг҃оро́диченъ:

Ѽ па́че ᲂу҆ма̀ чꙋде́съ твои́хъ! бж҃їѧ бо сло́ва воплоти́вшагосѧ є҆ди́наго родила̀ є҆сѝ, па́че є҆стества̀, мт҃и дв҃о, всѧ́чєскаѧ бжⷭ҇твеннымъ свои́мъ хотѣ́нїемъ мꙋ́дрѣ держа́ща и҆ ѡ҆кормлѧ́юща.

Свѣти́ленъ.

Свѧты́ни хра́мъ бы́лъ є҆сѝ, прпⷣбне, по бжⷭ҇твенномꙋ прича́стїю, ра́йскїй граждани́нъ, въ не́мже наслажда́ешисѧ невозбра́ннѡ дре́ва зна́нїѧ, и҆ нетлѣ́нныѧ сла́вы, па́мѧть творѧ̀, ні́кѡне прпⷣбне, ѡ҆ и҆̀же вѣ́рою хва́лѧщихъ тѧ̀, ѻ҆́ч҃е, бг҃омꙋ́дре.

Два́жды.

Сла́ва, и҆ ны́нѣ, бг҃оро́диченъ:

Ра́дꙋйсѧ, вѣ́рныхъ похвало̀: ра́дꙋйсѧ, прпⷣбныхъ ᲂу҆твержде́нїе: ра́дꙋйсѧ, правосла́вныхъ сла́во: ра́дꙋйсѧ, свѣ́те сꙋ́щихъ во тмѣ̀: ра́дꙋйсѧ, хра́ме прест҃ы́й: ра́дꙋйсѧ, бж҃їй раю̀: ра́дꙋйсѧ, клѧ́твы разрѣше́нїе, бл҃гослове́ннаѧ марі́е.

На хвали́техъ стїхи̑ры, на д҃, гла́съ ѕ҃. Подо́бенъ: Всѐ ѿло́жше:

Вели̑каѧ и҆справлє́нїѧ ꙳ по́стническихъ пѡ́двигъ, ꙳ вели́кагѡ ѻ҆тца̀ вои́стиннꙋ чꙋ́днагѡ се́ргїа, ꙳ ні́кѡне бл҃же́нне, привлеко́ша тѧ̀ жела́ннѣ ꙳ по́стническомꙋ сосло́вїю, ꙳ и҆ ди́внѡ добродѣ́телемъ є҆гѡ̀ воѡбра́жсѧ ꙳ томꙋ̀ сожи́тїемъ, ꙳ и҆ сострада́лецъ подвигѡ́мъ до́блественъ, ꙳ ꙗ҆́кѡ ᲂу҆чени́къ тогѡ̀ и҆́стиненъ, ꙳ ᲂу҆чи́тель же хꙋдо́женъ тогѡ̀ ча́дѡмъ. ꙳ и҆ ны́нѣ моли́сѧ, прпⷣбне, ꙳ поми́ловатисѧ дꙋша́мъ на́шымъ.

Два́жды.

Мно́жество пѡ́двигъ ꙳ и҆ по́тѡвъ твои́хъ по́стническихъ, ꙳ раздражи́ша сопоста́та пра́ведныхъ: ꙳ наведе́ бо ꙗ҆зы́ки раскопа́ти жили́ще честно́е, ꙳ но по́ты прпⷣбнагѡ вели́кагѡ се́ргїа во вѣ́ки сїѧ́ютъ предъ бг҃омъ. ꙳ тѣ́мже тобо́ю па́че ᲂу҆твердѝ, ꙳ и҆ бо́льше сїѐ распространѝ: ꙳ но мо́лимъ тѧ̀. прпⷣбне, ꙳ подви́гнꙋвъ вели́каго на моли́твꙋ, ꙳ возбранѧ́й при́снѡ ва̑рваръ стремле́нїе, ꙳ и҆ никогда́же попꙋстѝ ѡ҆бори́ти, ꙳ ні́кѡне бл҃же́нне.

Дре́во добровѣ́твенно, ꙳ сѣ́нно и҆ благопло́дно, ꙳ на вода́хъ прекра́снѡ жи́зненныхъ ꙳ вои́стиннꙋ насажде́нное, пита́ющее приходѧ́щыѧ, и҆ ѡ҆сѣнѧ́ющее ѡ҆палѧ́ємыѧ, ꙳ ты̀ є҆сѝ, ѻ҆́ч҃е прпⷣбне, ꙳ напаѧ́емь ᲂу҆чє́нїи се́ргїа, ꙳ и҆́миже пита́лъ є҆сѝ твоѧ̑ ᲂу҆ченикѝ. ꙳ тѣ́мже мо́лимъ тѧ̀: ѡ҆сѣнѝ лю́ди, застꙋпа́ѧ ѿ ꙗ҆зы́ческихъ наше́ствїй, ꙳ низлага́ѧ и҆̀хъ пре́жде воста́нїѧ: ꙳ на́съ же въ ми́рѣ соблюдѝ, ꙳ ні́кѡне, твои́ми моли́твами.

Сла́ва, гла́съ в҃. Самогла́сенъ:

Па́мѧть пра́ведника, ра́дость боѧ́щихсѧ гдⷭ҇а, хвала́ бо є҆го̀ сла́дость вѣ́рныхъ є҆́сть: бл҃же́нъ бо вои́стиннꙋ, є҆го́же и҆збра̀ и҆ прїѧ́тъ гдⷭ҇ь. тѣ́мже мы̀, веселѧ́щесѧ, почита́емъ па́мѧть прпⷣбнагѡ: є҆мꙋ́же ны́нѣ въ па́мѧть є҆гѡ̀ молѧ́щесѧ, ꙗ҆́кѡ и҆мꙋ́щꙋ дерзнове́нїе, ѡ҆ побѣ́дѣ на́мъ на ꙗ҆зы́ки проти̑вныѧ, є҆́же низложи́ти востаю́щыѧ непра́веднѡ, пода́ти же ми́ръ мі́рꙋ, и҆ цр҃квамъ є҆диномы́слїе, и҆ дꙋша́мъ на́шымъ ве́лїю ми́лость.

И҆ ны́нѣ, бг҃оро́диченъ:

На лїтꙋргі́и, Бл҃жє́нна ѿ канѡ́на ст҃а́гѡ, пѣ́снь г҃ и҆ ѕ҃ Прокі́менъ, гла́съ з҃: Честна̀ предъ гдⷭ҇емъ сме́рть прпⷣбныхъ є҆гѡ̀: Сті́хъ: Что̀ возда́мъ гдⷭ҇еви: А҆пⷭ҇лъ къ гала́тѡмъ, зача́ло сг҃і. А҆ллилꙋ́їа гла́съ ѕ҃: Блаже́нъ мꙋ́жъ, боѧ́йсѧ гдⷭ҇а: Є҆ѵⷢ҇лїе матѳе́а, зача́ло і҃. Прича́стенъ: Въ па́мѧть вѣ́чнꙋю: