Мѣ́сѧца тогѡ́же въ к҃г-й де́нь. И҆́же во ст҃ы́хъ, ѻ҆тє́цъ на́шихъ, а҆мфїло́хїа, є҆пі́скопа і҆коні́йскагѡ: и҆ григо́рїа, є҆пі́скопа а҆краганті́йскагѡ:
И҆ ст҃а́гѡ благовѣ́рнагѡ вели́кагѡ кнѧ́зѧ а҆леѯа́ндра не́вскагѡ, влади́мїрскагѡ и҆ новгоро́дскагѡ, нарече́ннагѡ во и҆́ноцѣхъ а҆леѯі́а:
Слꙋ́жба є҆гѡ̀ пи́сана по се́й слꙋ́жбѣ.
И҆ па́мѧть пе́рвагѡ воро́нежскагѡ ст҃и́телѧ митрофа́на, въ схимона́сѣхъ мака́рїа.
Слꙋ́жба є҆гѡ̀ пи́сана въ приложе́нїи.
На Гдⷭ҇и, воззва́хъ, стїхи̑ры ст҃ы́хъ на ѕ҃. Стїхи̑ры ст҃а́гѡ а҆мфїло́хїа, гла́съ д҃. Подо́бенъ: Да́лъ є҆сѝ зна́менїе:
Нра́въ самовла́стный ꙳ и҆ по́мыслъ самодержа́вный ꙳ на стра̑сти наслѣ́довавъ, лꙋ́чшемꙋ ꙳ да́лъ є҆сѝ ᲂу҆модержа́вно, всебл҃же́нне, ꙳ влады́чество на го́ршее, ꙳ мѣ́риломъ пра́веднѣйшимъ, ѻ҆́ч҃е, ᲂу҆равни́въ. ꙳ сегѡ̀ ра́ди ключи́мый къ бг҃овидѣ́нїю бы́лъ є҆сѝ ꙳ и҆ бг҃а разꙋмѣ́нїю, ꙳ і҆ера́рше бг҃одохнове́нне.
Сѣ̑ти сокрꙋши́лъ є҆сѝ, ꙳ и҆ ловлє́нїѧ разрꙋши́лъ є҆сѝ є҆ресе́й, прпⷣбне, ꙳ догма́тѡвъ пра́востїю, ꙳ и҆ бг҃осло́вїемъ и҆звѣ́стнѣйшимъ, ꙳ раздѣле́нїѧ и҆збѣ́гъ, ꙳ и҆ ѕлѣ́йшагѡ, ѻ҆́ч҃е, стѣсне́нїѧ. ꙳ въ предѣ́лехъ же пребы́въ ꙳ благочести́выѧ на́шеѧ вѣ́ры, трⷪ҇цꙋ проповѣ́далъ є҆сѝ во є҆ди́ницѣ бжⷭ҇тва̀.
Хи́тростнѡ ᲂу҆мꙋдри́въ ꙳ на землѝ ца́рствꙋющаго, ꙳ тогѡ̀ прете́клъ є҆сѝ сы́на непокло́нна, ꙳ разꙋ́мнѡ наꙋча́ѧ, ꙳ ꙗ҆́кѡ непокло́ннꙋ презира́емꙋ сн҃ꙋ, ꙳ негодꙋ́етъ ѻ҆ц҃ъ теплѣ́йше, ꙳ и҆́же сего̀ пре́жде вѣ̑къ роди́въ па́че ᲂу҆ма̀ нестра́стнѡ, ꙳ ꙗ҆́кѡ безтѣле́сна, ꙳ ꙗ҆́кѡ то́й вѣ́сть, прпⷣбне.
И҆́ны стїхи̑ры, ст҃а́гѡ григо́рїа, гла́съ и҃. Поⷣ: Ѽ пресла́внагѡ чꙋдесѐ!
Ѻ҆́ч҃е свѧще́нне григо́рїе, ꙳ ѿ пеле́нъ бг҃ꙋ ꙳ возложе́нъ прилѣпи́всѧ, ꙳ неѡсла́бными мановє́нїи всѧ̑ сотво́ршемꙋ, ꙳ и҆ ᲂу҆жѐ ѿ сегѡ̀ ѡ҆блистава́емь, ꙳ страсте́й преше́лъ є҆сѝ но́щь, ꙳ и҆ возсїѧ́лъ є҆сѝ свѣ́тъ врачева́нїй и҆ чꙋде́съ бл҃года́ти, ꙳ ѿгонѧ̀ многолѣ̑тныѧ недꙋ́ги, ꙳ и҆ прелє́стныѧ дꙋ́хи.
Ѻ҆́ч҃е чꙋ́дный григо́рїе, ꙳ свѣтоѧвле́ньми ᲂу҆́мъ ꙳ чи́стѡ ѡ҆блиста̀, ꙳ страсте́й ᲂу҆спи́лъ є҆сѝ многово́лненное мо́ре, ꙳ и҆ безстра́стїемъ лета́ѧ ꙳ чистѣ́йшими кри́лы ꙳ дости́глъ є҆сѝ, и҆дѣ́же неизрече́ннаѧ добро́та и҆ недомы́сленнаѧ, ꙳ ѡ҆ на́съ всегда̀ молѧ́сѧ, ꙳ благохва́лѧщихъ тѧ̀.
Ѻ҆́ч҃е ѻ҆тцє́въ григо́рїе, ꙳ свѧще́нства пра́вило, ꙳ цѣломꙋ́дрїѧ ѻ҆́бразъ, ꙳ мона́шествꙋющихъ крѣ́пость, ꙳ цр҃кве ᲂу҆твержде́нїе, ꙳ любвѐ свѣти́льникъ, ꙳ престо́лъ чꙋ́вства, ꙳ и҆сто́чникъ чꙋде́съ, ꙳ ѧ҆зы́къ ѻ҆гнедохнове́нный, ꙳ ᲂу҆ста̀ сладкоглагѡ́лива, ꙳ сосꙋ́дъ бжⷭ҇твеннагѡ дх҃а, ꙳ и҆ ᲂу҆́мный бы́лъ є҆сѝ ра́й, бг҃облаже́нне.
Сла́ва, и҆ ны́нѣ, гла́съ д҃:
Прїиди́те, всѝ вѣ́рнїи, є҆ди́нꙋ непоро́чнꙋю восхва́лимъ, ѿ прⷪ҇ро́кѡвъ проповѣ́даннꙋю, и҆ въ хра́мъ приведе́ннꙋю, пре́жде вѣ̑къ пронарече́ннꙋю мт҃рь, и҆ въ послѣ̑днѧѧ лѣ̑та ꙗ҆́вльшꙋюсѧ бцⷣꙋ. гдⷭ҇и, моли́твами є҆ѧ̀, ми́ръ тво́й пода́ждь на́мъ и҆ ве́лїю ми́лость.
На стїхо́внѣ стїхи̑ры, гла́съ а҃. Подо́бенъ: Нбⷭ҇ныхъ чинѡ́въ:
Да приведꙋ́тсѧ, глаго́летъ бг҃оѻте́цъ дв҃дъ, ꙳ цр҃ю̀ дѣ̑вы въ хра́мъ гдⷭ҇ень, ꙳ въ слѣ́дъ тебє̀, дв҃о, ꙳ со свѣ́тлыми свѣща́ми ликовствꙋ́юще, ꙳ и҆ во ст҃а̑ѧ приводѧ́ще тѧ̀, чⷭ҇таѧ ꙳ ꙗ҆́кѡ ст҃ы́й кївѡ́тъ бж҃їй.
Сті́хъ: Приведꙋ́тсѧ цр҃ю̀ дѣ̑вы въ слѣ́дъ є҆ѧ̀, и҆́скрєннїѧ є҆ѧ̀ приведꙋ́тсѧ тебѣ̀.
Да ᲂу҆гото́вѧтсѧ двє́ри ꙳ и҆ да ѿверза́ютсѧ хра́ма гдⷭ҇нѧ, ꙳ и҆ до́мъ сла́вы, ꙳ и҆ є҆ди́нꙋ пребо́льшꙋю нб҃съ, ꙳ па́че ᲂу҆ма̀ бы́вшꙋю, да прїе́млютъ ра́дꙋющесѧ, ꙳ и҆ хрⷭ҇та̀ сп҃са да воспою́тъ.
Сті́хъ: Приведꙋ́тсѧ въ весе́лїи и҆ ра́дованїи, введꙋ́тсѧ въ хра́мъ цр҃е́въ.
Да ѿверза́ютсѧ двє́ри бжⷭ҇твеннѣйшагѡ хра́ма, ꙳ да прїе́млютъ внꙋ́трь нбⷭ҇нꙋю две́рь, ꙳ и҆ да торжествꙋ́етъ человѣ́ческое є҆стество̀, и҆ да взыгра́ютъ а҆́гг҃ли, ꙳ спра́зднꙋюще ѻ҆боѝ кꙋ́пнѡ съ на́ми ꙳ бг҃ома́тере вхо́дъ.
Сла́ва, и҆ ны́нѣ, гла́съ є҃:
Возсїѧ̀ де́нь ра́достенъ и҆ пра́здникъ всече́стенъ: дне́сь бо, ꙗ҆́же пре́жде ржⷭ҇тва̀ и҆ по ржⷭ҇твѣ̀ дв҃а пребы́вши, въ въ хра́мъ гдⷭ҇ень приво́дитсѧ, и҆ ра́дꙋетсѧ заха́рїа ста́рецъ, роди́тель прⷣте́чевъ, и҆ вопїе́тъ ве́селѡ: прибли́жисѧ предста́тельница скорбѧ́щихъ въ хра́мъ ст҃ы́й, ꙗ҆́кѡ ст҃а́ѧ, ѡ҆свѧти́тисѧ во ѻ҆би́телище всецр҃ѧ̀. да весели́тсѧ і҆ѡакі́мъ пра́ѻтецъ, и҆ а҆́нна да ра́дꙋетсѧ, ꙗ҆́кѡ принесо́ша бг҃ꙋ, ꙗ҆́кѡ трилѣ́тствꙋющꙋю ю҆́ницꙋ, непоро́чнꙋю влⷣчцꙋ. ма́тєри, сра́дꙋйтесѧ, дѣ̑вы, взыгра́йте, и҆ непло́ды, сликовствꙋ́йте, ꙗ҆́кѡ ѿве́рзе на́мъ нбⷭ҇ное црⷭ҇тво пронарече́ннаѧ всецр҃и́ца. ра́дꙋйтесѧ, лю́дїе, и҆ весели́тесѧ.
Тропа́рь гла́съ д҃:
Бж҃е ѻ҆те́цъ на́шихъ, творѧ́й при́снѡ съ на́ми по твое́й кро́тости, не ѿста́ви ми́лость твою̀ ѿ на́съ: но моли́твами и҆́хъ въ ми́рѣ ᲂу҆пра́ви живо́тъ на́шъ.
Сла́ва, и҆ ны́нѣ, пра́здника.
На ᲂу҆́трени, на Бг҃ъ гдⷭ҇ь, тропа́рь пра́здника, два́жды. Сла́ва, ст҃ы́хъ: И҆ ны́нѣ, пра́здника.
По а҃-мъ стїхосло́вїи, сѣда́ленъ, гла́съ а҃. Поⷣ: Ка́мени запеча́танꙋ:
Ст҃а́ѧ ст҃ы́хъ, бцⷣе, сꙋ́щи, досто́йнѡ приведе́сѧ жи́ти во ст҃а̑ѧ, ꙗ҆́кѡ ѡ҆дꙋшевле́нъ гдⷭ҇ень кївѡ́тъ, и҆ ст҃а́гѡ дх҃а и҆́стиннѡ вмѣсти́лище бжⷭ҇твенное, дв҃о мт҃и. тѣ́мже всели́сѧ въ тѧ̀, и҆́же ѻ҆ц҃ꙋ̀ є҆диноро́дный, и҆ ст҃о́мꙋ дх҃ꙋ соесте́ственный, тво́й сн҃ъ неискꙋсомꙋ́жнѡ, ѡ҆бг҃отвори́въ всѐ человѣ́чество.
Сла́ва, и҆ ны́нѣ, то́йже.
По в҃-мъ стїхосло́вїи, сѣда́ленъ, гла́съ д҃. Подо́бенъ: Ꙗ҆ви́лсѧ є҆сѝ:
Весе́лїѧ дне́сь вселе́ннаѧ и҆спо́лнисѧ всѧ̑, въ благознамени́томъ пра́здницѣ бцⷣы, зовꙋ́щи: та̀ є҆́сть сѣ́нь нбⷭ҇наѧ.
Сла́ва, и҆ ны́нѣ, то́йже:
Канѡ́нъ пра́здника, гла́съ а҃, со і҆рмосо́мъ на ѕ҃: І҆рмосы̀ по два́жды.
Пѣ́снь а҃. І҆рмо́съ:
Пѣ́снь побѣ́днꙋю пои́мъ всѝ бг҃ꙋ, сотво́ршемꙋ ди̑внаѧ чꙋдеса̀ мы́шцею высо́кою, и҆ спа́сшемꙋ і҆и҃лѧ, ꙗ҆́кѡ просла́висѧ.
Стеце́мсѧ дне́сь бцⷣꙋ почита́юще пѣ́сньми, и҆ торжествꙋ́имъ дꙋхо́вный пра́здникъ: въ хра́мъ бо бг҃ꙋ да́ръ прино́ситсѧ.
Пѣ́сньми да воспои́мъ бцⷣы сла́вное предше́ствїе: къ хра́мꙋ бо дне́сь, ꙗ҆́кѡ хра́мъ бж҃їй, прино́ситсѧ прⷪ҇ро́чески, да́ръ многоцѣ́нный.
А҆́нна непоро́чнаѧ ра́довашесѧ, ꙗ҆́кѡ да́ръ многоцѣ́ненъ бг҃ꙋ приносѧ́щи въ хра́мъ ма́терски: і҆ѡакі́мъ же съ не́ю торжествꙋ́етъ свѣ́тлѡ.
Дв҃дъ, пра́ѻтецъ тво́й воспѣ́ тѧ дре́вле, дв҃о бг҃оневѣ́сто, дще́рь глаго́лѧ тѧ̀ цр҃ѧ̀ хрⷭ҇та̀. є҆го́же и҆ роди́вши ма́терски млⷣнца дои́ла є҆сѝ.
И҆ ст҃ы́хъ два̀, на и҃. Канѡ́нъ ст҃а́гѡ а҆мфїло́хїа, є҆гѡ́же краегране́сїе:
Пре́лести смѣю́щасѧ пою̀ па́стырѧ. Ѳеофа́ново.
Гла́съ д҃. Пѣ́снь а҃. І҆рмо́съ:
Мо́рѧ чермнꙋ́ю пꙋчи́нꙋ невла́жными стопа́ми дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма а҆мали́ковꙋ си́лꙋ въ пꙋсты́ни побѣди́лъ є҆́сть.
Словеса̀ ѕлочести́выхъ є҆ресе́й и҆ кичє́нїѧ, правосла́вїѧ заре́ю просвѣще́нъ, ᲂу҆до́бнѡ разори́лъ є҆сѝ: въ не́мже тебѐ чтꙋ́щыѧ, свѧщенноѧвле́нне, сохранѝ.
И҆́же всѣ́хъ спасе́нїѧ при́снѡ хотѧ́й гдⷭ҇ь, свѧще́нныѧ тѧ̀ па́ствы пꙋтевожда̀, і҆ера́рше, предлага́етъ, сло́вомъ и҆ житїе́мъ свѣтѧ́ща и҆зрѧ́днѡ ви́дѣвъ.
Зако́ннѡ пострада́ти и҆збра́въ по хрⷭ҇то́вѣ цр҃кви, всеѻрꙋ́жїемъ, ѻ҆́ч҃е, крⷭ҇та̀ себѐ ѡ҆гради́лъ є҆сѝ, и҆ побѣди́тель благода́тїю и҆ вѣне́чникъ ꙗ҆ви́лсѧ є҆сѝ, сла́вне.
Бг҃оро́диченъ:
Сло́во ѻ҆ц҃ꙋ̀ собезнача́льное, и҆ соприсносꙋ́щное, и҆ тогѡ̀ сꙋщества̀ зра́къ, ро́ждшемꙋ сꙋ́ща, и҆зъ тебє̀ воплоще́нна родила̀ є҆сѝ несказа́ннѡ, неискꙋсобра́чнаѧ.
И҆́нъ канѡ́нъ ст҃а́гѡ григо́рїа, є҆гѡ́же краегране́сїе:
Чꙋдодѣ́йственномꙋ григо́рїю почꙋди́сѧ. І҆ѡ́сифово.
Гла́съ и҃. Пѣ́снь а҃. І҆рмо́съ:
Сокрꙋши́вшемꙋ бра̑ни мы́шцею свое́ю, и҆ прове́дшемꙋ і҆и҃лѧ сквозѣ̀ чермно́е мо́ре, пои́мъ є҆мꙋ̀, ꙗ҆́кѡ и҆зба́вителю на́шемꙋ бг҃ꙋ: ꙗ҆́кѡ просла́висѧ.
Зарѧ́ми дх҃а просвѣща́емь при́снѡ, свѧще́нне григо́рїе, и҆ свѣтоза́рна ѕвѣзда̀ бы́въ, всего́ мѧ ѡ҆зарѝ моли́твами твои́ми, ꙗ҆́кѡ да воспою́ тѧ.
И҆́же предвѣ́децъ всѣ́хъ, ѡ҆благода́тствивъ ᲂу҆́мъ тво́й бг҃ода́нными сїѧ́ньми, ѿ пеле́нъ тѧ̀ ѡ҆свѧща́етъ, бжⷭ҇твенными добродѣ́тельми сїѧ́ти хотѧ́ща, ѻ҆́ч҃е, и҆ чꙋдесы̀.
Дрема́нїе ѿ вѣ́ждей ᲂу҆ны́нїѧ ѿве́ргъ, свѣти́льникъ бо́дрый ты̀ ꙗ҆ви́лсѧ є҆сѝ, бг҃оно́се, показа́въ вещмѝ зва́нїе твоѐ, григо́рїе и҆́стинствꙋющее.
Бг҃оро́диченъ:
Бцⷣꙋ тѧ̀ госпо́дственнѡ и҆ и҆́стиннѡ и҆сповѣ́дꙋю: родила́ бо є҆сѝ гдⷭ҇а несказа́ннѡ, во двꙋ̀ сꙋщества́хъ и҆ хотѣ́нїихъ, пречⷭ҇таѧ дв҃о, разꙋмѣва́ема.
Пѣ́снь г҃. І҆рмо́съ:
Да ᲂу҆тверди́тсѧ се́рдце моѐ въ во́ли твое́й, хрⷭ҇тѐ бж҃е, и҆́же надъ вода́ми не́бо ᲂу҆твержде́й второ́е, и҆ ѡ҆снова́вый на вода́хъ зе́млю, всеси́льне.
Торжествꙋ́имъ празднолю́бцы, и҆ сра́дꙋимсѧ дꙋ́хомъ, во ст҃ѣ́мъ пра́здницѣ ᲂу҆чрежда́ющесѧ дне́сь, дще́ре цр҃е́вы, и҆ мт҃ре бг҃а на́шегѡ.
І҆ѡакі́ме, ра́дꙋйсѧ дне́сь, и҆ весели́сѧ, а҆́нно, дх҃омъ, рожде́ннꙋю и҆зъ ва́съ гдⷭ҇ꙋ приводѧ́ще трилѣ́тствꙋющꙋ, ꙗ҆́кѡ ю҆́ницꙋ чи́стꙋ всенепоро́чнꙋю.
Бж҃їе селе́нїе во хра́мъ ст҃ы́й приво́дитсѧ бцⷣа марїа́мъ, пло́тїю трилѣ́тствꙋющаѧ, и҆ то́й свѣщесвѣ́тѧтъ дѣ̑вы, предтекꙋ́ще.
Бж҃їѧ а҆́гница небла́зненнаѧ, и҆ голꙋби́ца нескве́рнаѧ, бг҃овмѣсти́маѧ ски́нїѧ, сла́вы ѡ҆свѧще́нїе, въ ски́нїи ст҃ѣ́й ѡ҆бита́ти и҆збра̀.
И҆́нъ. І҆рмо́съ:
Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище и҆ ᲂу҆твержде́нїе.
Бжⷭ҇твенное и҆ свѣтоза́рное твои́хъ догма́тѡвъ сїѧ́нїе, погасѝ ѕлочести́вый по́лкъ є҆реті́ческїй, а҆мфїло́хїе сла́вне.
Во́дъ животво́рныхъ ꙗ҆́кѡ рѣка̀ сы́й ѿ бг҃а и҆спо́лнена, первосвѧще́нникъ бы́въ, и҆́миже благочести́вїи напаѧ́емсѧ.
Бога́тыми лꙋча́ми просвѣща́емь, ᲂу҆́мъ ѡ҆сїѧ́лъ є҆сѝ та́йнымъ, прпⷣбне, твои́хъ ᲂу҆че́нїй благолѣ́пїемъ.
Бг҃оро́диченъ:
Свѣ́щникъ тѧ̀ свѣтоза́рный, и҆ дꙋшепита́тельнꙋю благоче́стїѧ трапе́зꙋ, и҆ кївѡ́тъ, пречⷭ҇таѧ, всѝ вѣ́рнїи возвѣща́емъ.
И҆́нъ. І҆рмо́съ:
Оу҆тверди́сѧ се́рдце моѐ во гдⷭ҇ѣ, вознесе́сѧ ро́гъ мо́й въ бз҃ѣ мое́мъ, разшири́шасѧ на врагѝ моѧ̑ ᲂу҆ста̀ моѧ̑, возвесели́хсѧ ѡ҆ спасе́нїи твое́мъ.
Сегѡ̀ ра́ди тво́й прїе́мъ, ѻ҆́ч҃е, трꙋ́дъ зижди́тель, ста́рцꙋ приведе́ тѧ въ пꙋсты́ню, ᲂу҆ча́щꙋ тѧ̀, григо́рїе, всѧ́кагѡ писа́нїѧ сказа́нїю.
Всю̀ провожда́ѧ седми́цꙋ безпи́щенъ, ѻ҆́ч҃е, пита́лсѧ є҆сѝ снѣ́дїю нбⷭ҇ною, твои́хъ сле́зъ дожде́мъ напаѧ́емь, и҆ бжⷭ҇твеннѡ наслажда́емь.
Ѿ бг҃а тебѣ̀, і҆ера́рше, простра́нство се́рдца даде́сѧ: и҆сточи́лъ бо є҆сѝ бога́тнѡ ᲂу҆че́нїй чистѣ́йшыѧ вѡ́ды, сердца̀ вѣ́рныхъ напаѧ́ющыѧ.
Бг҃оро́диченъ:
Глаго́лы проповѣ́дникѡвъ бг҃оглаго́ливыхъ и҆спо́лнишасѧ: се́ бо родѝ дв҃а мла́до ѻ҆троча̀, а҆да́ма дре́внѣйшее и҆ сопресто́льное роди́телю.
Конда́къ пра́здника, гла́съ д҃. Подо́бенъ: Вознесы́йсѧ:
Пречⷭ҇тый хра́мъ сп҃совъ, многоцѣ́нный черто́гъ и҆ дв҃а, свѧще́нное сокро́вище сла́вы бж҃їѧ, дне́сь вво́дитсѧ въ до́мъ гдⷭ҇ень, благода́ть совводѧ́щи, ꙗ҆̀же въ дс҃ѣ бжⷭ҇твенномъ, ю҆́же воспѣва́ютъ а҆́гг҃ли бж҃їи: сїѧ̀ є҆́сть селе́нїе нбⷭ҇ное.
І҆́косъ:
Неизрече́нныхъ бж҃їихъ и҆ бжⷭ҇твенныхъ та̑инъ зрѧ̀ въ дв҃ѣ благода́ть ꙗ҆влѧ́емꙋ, и҆ и҆сполнѧ́емꙋ ꙗ҆́вственнѡ, ра́дꙋюсѧ, и҆ ѻ҆́бразъ разꙋмѣ́ти недоꙋмѣ́юсѧ, стра́нный и҆ неизрече́нный: ка́кѡ и҆збра́ннаѧ чⷭ҇таѧ, є҆ди́на ꙗ҆ви́сѧ па́че всеѧ̀ тва́ри ви́димыѧ и҆ разꙋмѣва́емыѧ; тѣ́мже восхвали́ти хотѧ̀ сїю̀, ᲂу҆жаса́юсѧ ѕѣлѡ̀ ᲂу҆мо́мъ же и҆ сло́вомъ, ѻ҆ба́че дерза́ѧ проповѣ́даю и҆ велича́ю: сїѧ̀ є҆́сть селе́нїе нбⷭ҇ное.
И҆ конда́къ григо́рїа, гла́съ д҃. Подо́бенъ: Ꙗ҆ви́лсѧ є҆сѝ дне́сь.
Свѣтилꙋ́чными сїѧ̑нїи цр҃ковь ст҃а́гѡ дх҃а свѣтово́дитъ свѣ́лое соверша́ющыѧ твоѐ ᲂу҆спе́нїе, прпⷣбне ѻ҆́ч҃е всеблаже́нне григо́рїе.
Сѣда́ленъ, гла́съ то́йже. Подо́бенъ: Ско́рѡ предварѝ:
Просвѣща́еши концы̀ въ твое́й па́мѧти, мꙋ́дре: тѣ́ло бо твоѐ и҆сточа́етъ и҆сцѣле́нїй и҆сто́чникъ, а҆мфїло́хїе сла́вне. тѣ́мже и҆ не́мощи и҆збавлѧ́еши всѧ́кїѧ, вѣ́рою приходѧ́щыѧ къ честно́мꙋ твоемꙋ̀ хра́мꙋ: сегѡ̀ ра́ди и҆ ны́нѣ молѝ спасти́сѧ на́мъ.
Сла́ва, гла́съ и҃. Подо́бенъ: Премꙋ́дрости:
Ѿ пеле́нъ гдⷭ҇ꙋ возложе́нъ, ꙗ҆́кѡ дре́вле пресла́вный самꙋи́лъ, та́кожде зовꙋ́щагѡ тѧ̀ сп҃са послꙋ́шалъ є҆сѝ, и҆ дꙋ́шꙋ ѡ҆чи́стивъ до́брыхъ подаѧ́ньми, свѧще́нства благода́ть досто́йнѡ взѧ́лъ є҆сѝ. тѣ́мже на ѕла́цѣ бжⷭ҇твеннагѡ зна́нїѧ па́ствовавъ па́ствꙋ, врачева́нїй и҆зблиста́лъ є҆сѝ дѣ̑йства, григо́рїе: молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти пра́зднꙋющымъ любо́вїю ст҃ꙋ́ю па́мѧть твою̀.
И҆ ны́нѣ, пра́здника, гла́съ д҃. Подо́бенъ: Ско́рѡ предварѝ:
Дв҃де, пред̾идѝ въ хра́мъ бж҃їй, и҆ ра́дꙋѧсѧ прїимѝ цр҃и́цꙋ на́шꙋ, и҆ то́й возопі́й: вни́ди, гпⷭ҇жѐ, въ хра́мъ цр҃е́въ, вни́ди: є҆ѧ́же сла́ва покрове́ннѡ разꙋмѣ́етсѧ, и҆зъ неѧ́же хо́щетъ и҆сточи́тисѧ на́мъ всѣ̑мъ свѣ́тъ, хрⷭ҇то́съ.
Пѣ́снь д҃. І҆рмо́съ:
Дх҃омъ прови́дѧ, прⷪ҇ро́че а҆ввакꙋ́ме, словесѐ воплоще́нїе, проповѣ́далъ є҆сѝ, вопїѧ̀: внегда̀ прибли́житисѧ лѣ́тѡмъ, позна́ешисѧ, внегда̀ прїитѝ вре́мени, пока́жешисѧ. сла́ва си́лѣ твое́й, гдⷭ҇и.
Прⷪ҇ро́че и҆са́їе, прорцы̀ на́мъ: дв҃а кто̀ є҆́сть, и҆мꙋ́щаѧ во чре́вѣ; ꙗ҆́же и҆зъ і҆ꙋ́дина ко́рене прозѧ́бши, и҆ ро́ждшисѧ и҆зъ дв҃да царѧ̀, сѣ́мене ст҃а́гѡ, пло́дъ бл҃госла́вный.
Начина́йте, дѣ̑вы, и҆ воспо́йте пѣ̑сни, рꙋка́ми держа́ще свѣщы̀, чⷭ҇тыѧ бцⷣы предше́ствїе хва́лѧще, ны́нѣ грѧдꙋ́щыѧ во хра́мъ бж҃їй кꙋ́пнѡ съ на́ми пра́зднꙋюще.
І҆ѡакі́ме и҆ а҆́нно, весели́тесѧ ны́нѣ, во хра́мъ приводѧ́ще гдⷭ҇ень чⷭ҇тꙋю бг҃а мт҃рь, хрⷭ҇та̀ всецр҃ѧ̀ бꙋ́дꙋщꙋю, ѿ ва́съ же ро́ждшꙋюсѧ, ꙗ҆́кѡ трилѣ́тствꙋющꙋю ю҆́ницꙋ.
Ст҃а́ѧ ст҃ы́хъ сꙋ́щи, чⷭ҇таѧ, во хра́мъ ст҃ы́й возлюби́ла є҆сѝ всели́тисѧ, и҆ со а҆́гг҃лы, дв҃о, бесѣ́дꙋющи пребыва́еши пресла́внѣ, съ небесѐ хлѣ́бъ прїе́млющи, пита́тельнице жи́зни.
И҆́нъ. І҆рмо́съ:
Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.
А҆мфїло́хїа бжⷭ҇твеннагѡ и҆ бг҃оглаго́ливагѡ свѧще́нное торжество̀, бг҃омꙋ́дрїи, прїиди́те вѣ́рою воспле́щимъ, тогѡ̀ ᲂу҆че́ньми и҆ бг҃осло́вїемъ ᲂу҆крѣплѧ́еми.
Невѣстово́децъ, бг҃оно́се, цр҃кве сꙋ́щїѧ въ хрⷭ҇тѣ̀ бы́въ, добро́тою слове́съ сїю̀ ᲂу҆краси́лъ є҆сѝ, и҆ красото́ю правосла́вїѧ ᲂу҆ѧсни́лъ є҆сѝ.
Бг҃осло́вный тво́й ѧ҆зы́къ и҆ бг҃оглаго́ливый, нача́льныѧ трⷪ҇цы є҆диноче́стнꙋю держа́вꙋ всѣ̑мъ ᲂу҆ѧснѝ, и҆ є҆ди́но бжⷭ҇тво̀ чти́ти въ тре́хъ ѵ҆поста́сехъ.
Бг҃оро́диченъ:
Но́вꙋю ски́нїю тѧ̀, дв҃о, разꙋмѣва́емъ, и҆ чи́стое ст҃и́лище всѣ́хъ влⷣки: того́ бо родила̀ є҆сѝ пло́тїю по ѵ҆поста́си сте́кшасѧ, всенепоро́чнаѧ.
И҆́нъ. І҆рмо́съ:
Оу҆слы́шахъ, гдⷭ҇и, слꙋ́хъ тво́й и҆ ᲂу҆боѧ́хсѧ, ꙗ҆́кѡ неизрече́ннымъ совѣ́томъ, бг҃ъ сы́й присносꙋ́щный, ѿ дв҃ы проше́лъ є҆сѝ вопло́щсѧ. сла́ва снизхожде́нїю твоемꙋ̀, хрⷭ҇тѐ, сла́ва си́лѣ твое́й.
Землѧ̀ ꙗ҆́кѡ добра̀, процвѣ́лъ є҆сѝ стори́чествꙋющїй, ѻ҆́ч҃е, кла́съ, и҆ серпо́мъ твои́хъ ᲂу҆че́нїй пожа́лъ є҆сѝ є҆реті́ческое ѕлочести́вое мнѣ́нїе, собо́ра побо́рникъ ꙗ҆ви́всѧ, прпⷣбне григо́рїе.
Нбⷭ҇ный тѧ̀ сꙋ́дъ а҆рхїере́а, бж҃їй ᲂу҆го́дниче, показꙋ́етъ до́брѣ пꙋтево́дствити па́ствꙋ, ю҆́же стѧжа̀ кро́вїю хрⷭ҇то́съ, провѣ́дый твоеѧ̀ дꙋшѝ, ѻ҆́ч҃е, свѣ́тлость.
Хра́мъ бж҃їй бы́лъ є҆сѝ ѡ҆чище́нъ страсте́й скве́рны, и҆ въ хра́мѣ свѧще́ннѣмъ предстоѧ̀, дх҃а прише́ствїе прїѧ́лъ є҆сѝ ꙗ҆́вѣ, ви́домъ чⷭ҇тыѧ голꙋби́цы, хрⷭ҇тꙋ́ тѧ просла́вльшꙋ.
Бг҃оро́диченъ:
Ро́дъ человѣ́ческїй спасе́сѧ, па́че ᲂу҆ма̀ твои́мъ рождество́мъ: и҆ сꙋ́щїи во тмѣ̀ тлѣ́нїѧ, пречⷭ҇таѧ влⷣчце, ви́дѣша свѣ́тъ возсїѧ́вшїй и҆зъ чре́ва твоегѡ̀, вино́внагѡ на́шегѡ, ѻ҆трокови́це, воззда́нїѧ.
Пѣ́снь є҃. І҆рмо́съ:
Свѣ́тлый на́мъ возсїѧ́й свѣ́тъ присносꙋ́щный, ᲂу҆́тренюющымъ ѡ҆ сꙋдьба́хъ за́повѣдей твои́хъ, влⷣко чл҃вѣколю́бче, хрⷭ҇тѐ бж҃е на́шъ.
Да свѣтлоно́симъ, правосла́внїи всѝ, стека́ющесѧ и҆ сла́вѧще бг҃ома́терь, ꙗ҆́кѡ гдⷭ҇ꙋ дне́сь приво́дитсѧ, ꙗ҆́кѡ же́ртва благопрїѧ́тна.
Да веселѧ́тсѧ пра́ѻтцы дне́сь, влⷣчце, и҆ да ра́дꙋетсѧ ро́ждшаѧ тѧ̀ со ѻ҆тце́мъ твои́мъ, ꙗ҆́кѡ пло́дъ и҆́хъ гдⷭ҇ꙋ прино́ситсѧ.
Многоимени́тꙋю и҆ сла́внѣйшꙋю, непоро́чнꙋю ю҆́ницꙋ, ꙗ҆́кѡ пло́тїю ро́ждшꙋю бжⷭ҇твеннаго тельца̀, всѝ воспои́мъ, вѣ́рнѡ пра́зднꙋюще.
Оу҆невѣ́щенїѧ написꙋ́ютсѧ бжⷭ҇твєннаѧ зна́мєнїѧ, па́че ᲂу҆ма̀ ржⷭ҇тва̀ твоегѡ̀, чⷭ҇таѧ дв҃о, дне́сь дх҃омъ ст҃ы́мъ въ домꙋ̀ бж҃їи.
И҆́нъ. І҆рмо́съ:
Ты̀, гдⷭ҇и мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ вѣ́рою воспѣва́ющыѧ тѧ̀.
Просвѣща́емь свѣ́томъ трисо́лнечнагѡ бжⷭ҇тва̀, сѣ́лъ є҆сѝ на прⷭ҇то́лѣ а҆рхїере́йства, бг҃омꙋ́дре а҆мфїло́хїе.
Всецѣ́ла тебѐ сама́го бг҃ꙋ ѡ҆свѧти́лъ є҆сѝ, и҆ бы́лъ є҆сѝ бг҃опроповѣ́дникъ велегла́сенъ, ѻ҆́ч҃е, всебл҃же́нне а҆мфїло́хїе.
Ра́достный на́мъ пра́здникъ и҆ всесвѧще́нный наста̀, бжⷭ҇твеннагѡ и҆ мꙋ́драгѡ ᲂу҆чи́телѧ, мі́ръ ѡ҆свѧща́ющїй.
Бг҃оро́диченъ:
Ѽ всѣ́хъ вѣ́рныхъ благолѣ́пное ᲂу҆добре́нїе, пречⷭ҇таѧ бг҃омт҃и! дꙋшѝ моеѧ̀ скве́рнꙋ ѡ҆мы́й моли́твами твои́ми.
И҆́нъ. І҆рмо́съ:
Мра́къ дꙋшѝ моеѧ̀ разженѝ, свѣтода́вче хрⷭ҇тѐ бж҃е, началоро́днꙋю тмꙋ̀ и҆згна́въ бе́здны, и҆ да́рꙋй мѝ свѣ́тъ повелѣ́нїй твои́хъ, сло́ве, да ᲂу҆́тренюѧ сла́влю тѧ̀.
Глаго́ломъ твои́мъ ѡ҆чища́еши смра̑дныѧ не́мѡщи прокаже́ннагѡ и҆ногда̀, прише́дшагѡ къ тебѣ̀ вѣ́рою: ѿ бг҃а бо прїѧ́лъ є҆сѝ благода́ть чꙋде́съ, мꙋ́дре, ꙗ҆́коже є҆лїссе́й бжⷭ҇твенный, бг҃омꙋ́дре григо́рїе.
Ѿве́рзлъ є҆сѝ моли́твою твое́ю гꙋгни́вагѡ ᲂу҆ста̀ и҆ ᲂу҆́ши, григо́рїе, врачева́нїй, всеблаже́нне, дѣ́йствомъ ѡ҆богати́лсѧ є҆сѝ, и҆ и҆зры́гнꙋлъ є҆сѝ бг҃осло́вїѧ глꙋбинꙋ̀, морѧ̀ безбо́жныхъ и҆зсꙋша́ющꙋ.
Земна́гѡ пристра́стїѧ ѡ҆чи́щсѧ, ѻ҆́ч҃е, ꙗ҆́кѡ пе́тръ первоизбра́нный а҆пⷭ҇лѡвъ, сѣ́нїю твое́ю цѣлє́нїѧ соверша́еши, содержи̑мыѧ лю́тыми недꙋ́гѡвъ нападе́ньми бжⷭ҇твеннѡ врачꙋ́ѧ.
Бг҃оро́диченъ:
Нѣ́дръ ѻ҆ч҃ескихъ не и҆стощи́въ, во є҆́же воплоща́тисѧ, всенепоро́чнаѧ, въ твои́хъ нѣ́дрѣхъ ви́дитсѧ держи́мь, ꙗ҆́кѡ млⷣнецъ: є҆го́же ми́лостива сотворѝ, благоче́стнѡ тѧ̀ чтꙋ́щымъ, дв҃о бг҃оневѣ́сто.
Пѣ́снь ѕ҃. І҆рмо́съ:
Прⷪ҇ро́ка і҆ѡ́нꙋ подража́ѧ, вопїю̀: живо́тъ мо́й, бл҃же, свободѝ и҆зъ тлѝ, и҆ спаси́ мѧ, сп҃се мі́ра, зовꙋ́ща: сла́ва тебѣ̀.
Пра́зднꙋимъ, вѣ́рнїи, пра́здникъ дꙋхо́вный мт҃ре бж҃їѧ, воспѣва́юще благоче́стнѡ: є҆́сть бо ст҃ѣ́йша нбⷭ҇ныхъ ᲂу҆мѡ́въ.
Пѣ́сньми дꙋхо́вными восхва́лимъ, вѣ́рнїи, мт҃рь свѣ́та, ꙗ҆́кѡ дне́сь на́мъ ꙗ҆ви́сѧ предходѧ́щи въ хра́мъ бж҃їй.
Нескве́рнаѧ а҆́гница, и҆ чⷭ҇таѧ голꙋби́ца, приведе́сѧ ѡ҆бита́ти въ до́мъ бж҃їй, ꙗ҆́кѡ непоро́чнаѧ, пронарече́ннаѧ бы́ти мт҃и бж҃їѧ.
Въ хра́мъ зако́нный вхо́ды соверша́етъ хра́мъ бж҃їй, нбⷭ҇наѧ ски́нїѧ: и҆зъ неѧ́же на́мъ сꙋ́щымъ во тмѣ̀ свѣ́тъ возсїѧ̀.
И҆́нъ. І҆рмо́съ:
Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.
Оу҆мертви́въ въ пло́ти долѣре́вностное мꙋдрова́нїе, безстра́стїѧ бл҃года́тїю ѡ҆дѣ́ѧлсѧ є҆сѝ, ѻ҆́ч҃е свѧщеннотаи́нниче, и҆ всечи́стыми ᲂу҆чє́нїи трⷪ҇цꙋ проповѣ́далъ є҆сѝ.
Два́жды.
Стра́хомъ ѡ҆гради́всѧ бжⷭ҇твеннымъ, бг҃опрїѧ́тне, и҆ дꙋ́шꙋ ѿ скве́рнъ чи́стꙋ содѣ́ѧвъ, бг҃осло́вїѧ ꙗ҆ви́лсѧ є҆сѝ свѧще́ннѣйшїй ѻ҆рга́нъ, прпⷣбне.
Бг҃оро́диченъ:
Чи́стое тѧ̀ и҆ ст҃о́е вѣ́дѧще селе́нїе цр҃ѧ̀ сла́вы, и҆ хра́мъ и҆ прⷭ҇то́лъ превысоча́йшагѡ, мо́лимъ дꙋ́шы на́шѧ спастѝ, всепѣ́таѧ.
И҆́нъ. І҆рмо́съ:
Ꙗ҆́коже прⷪ҇ро́ка и҆зба́вилъ є҆сѝ и҆зъ глꙋбины̀ преиспо́днїѧ, хрⷭ҇тѐ бж҃е, и҆ менѐ ѿ грѣхѡ́въ мои́хъ и҆зба́ви, ꙗ҆́кѡ человѣколю́бецъ, и҆ ᲂу҆пра́ви живо́тъ мо́й, молю́сѧ.
Оу҆крѣплѧ́етсѧ ѻ҆трокови́ца, тѣ́ломъ разсла́бленнаѧ въ лѣ́тѣхъ мно́жайшихъ, моли́твою твое́ю, прпⷣбне, вѣ́рнѡ прише́дши къ тебѣ̀, и҆ вино́внаго всѣ́хъ велича́етъ хрⷭ҇та̀.
Стопа́мъ послѣ́дꙋѧ влⷣчнимъ, житїе́мъ непоро́чнымъ, сла́вне, непра́веднѣ ѡ҆скорблѧ́емь и҆ ѡ҆клевета́емь, не и҆зничто́женъ пребы́лъ є҆сѝ.
Ѕло́бою соживꙋ́щїи, тѧ̀ неѕло́биваго а҆́гнца, ꙗ҆́кѡ свирѣ́пїи ѕвѣ́рїе восхи́тивше, въ темни́цꙋ ѡ҆сꙋди́ша, храни́ма, ѻ҆́ч҃е, бжⷭ҇твенною благода́тїю.
Бг҃оро́диченъ:
Оу҆́мъ разꙋмѣ́ти недоꙋмѣ́етъ вели́кое твоегѡ̀ рождества̀ та́инство: бг҃а бо родила̀ є҆сѝ, чл҃вѣ́ка бы́вша, приснодв҃о, неѡбмы́сленнаго.
Конда́къ ст҃а́гѡ а҆мфїло́хїа, гла́съ в҃. Подо́бенъ: Вы́шнихъ и҆щѧ̀:
Бжⷭ҇твенный гро́мъ, трꙋба̀ дх҃а, вѣ́ры садодѣ́лателю, и҆ сѣ́чиво є҆ресе́й, і҆ера́рше а҆мфїло́хїе, трⷪ҇цы ᲂу҆го́дниче вели́кїй, со а҆́гг҃лы предстоѧ̀ при́снѡ, молѝ непреста́ннѡ ѡ҆ всѣ́хъ на́съ.
І҆́косъ:
Ѿ дх҃а ст҃а́гѡ премꙋ́дрый і҆ера́рхъ хрⷭ҇то́въ вдохнꙋ́всѧ, цр҃ковь запеча́та: и҆мѣ́ѧ бо си́лы дѣ́йство, сла́вный таи́нникъ, и҆ ᲂу҆чи́тель вѣ́ры прїѧ́тенъ, ᲂу҆слы́шавъ благочте́нїе бжⷭ҇твенныхъ писа́нїй, воѡбраже́нїе живоно́снагѡ и҆ честна́гѡ крⷭ҇та̀ творе́нїемъ, є҆ѵно́мїа ѿгна̀, и҆ вѣ́рꙋ ᲂу҆ѧсни́въ проповѣ́даѧ хрⷭ҇та̀, мо́литъ непреста́ннѡ ѡ҆ всѣ́хъ на́съ.
Пѣ́снь з҃. І҆рмо́съ:
Пе́щь, сп҃се, ѡ҆роша́шесѧ, ѻ҆́троцы же, ликꙋ́юще, поѧ́хꙋ: ѻ҆тцє́въ бж҃е, бл҃гослове́нъ є҆сѝ.
Ликовствꙋ́имъ празднолю́бцы дне́сь, воспои́мъ чⷭ҇тꙋю влⷣчцꙋ, і҆ѡакі́ма и҆ а҆́ннꙋ досто́йнѡ чтꙋ́ще.
Прⷪ҇ро́чествꙋй дв҃де, глаго́лѧ дх҃омъ: приведꙋ́тсѧ дѣ̑вы въ слѣ́дъ тебє̀, приведꙋ́тсѧ тебѣ̀ во хра́мъ цр҃и́цы мт҃ри.
Ра́довахꙋсѧ а҆́гг҃лѡвъ чи́ни, веселѧ́хꙋсѧ пра́ведныхъ дꙋ́си, ꙗ҆́кѡ бж҃їѧ мт҃и во ст҃а̑ѧ приво́дитсѧ.
Прїе́млющи пи́щꙋ нбⷭ҇нꙋю, преспѣва́ше мꙋ́дростїю и҆ бл҃года́тїю, бы́вши мт҃и по пло́ти хрⷭ҇та̀ бг҃а.
И҆́нъ. І҆рмо́съ:
Въ пещѝ а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Та́инственнѣйшымъ бг҃овѣща́нїємъ твои̑мъ вне́млюще любо́вїю, а҆́рїева, ѻ҆́ч҃е, разсѣче́нїѧ бж҃ества̀ и҆збѣга́емъ, трⷪ҇цꙋ несозда́ннꙋю и҆ є҆диносꙋ́щнꙋю вѣ́рою сла́вѧще.
Ѡ҆блича́ема ᲂу҆че́нїемъ твои́мъ македо́нїа, ѻ҆́ч҃е, зрѧ́ще, дх҃а бл҃га́го, ѻ҆ц҃ꙋ́ же и҆ сн҃ꙋ спокланѧ́ема, и҆ собезнача́льна, вѣ́рою сла́вимъ.
Сло́вомъ ᲂу҆ѧсни́въ, є҆́же па́че сло́ва, сло́ва воплоще́нїе, чествова́ти въ двꙋ́хъ сꙋщества́хъ є҆ди́наго бг҃а, бг҃омꙋ́дреннѡ наꙋчи́лъ є҆сѝ, и҆ раздѣле́нїѧ и҆ смѣше́нїѧ бѣжа́ти, бг҃опрїѧ́тне.
Бг҃оро́диченъ:
Всѝ, ᲂу҆се́рднѡ бцⷣꙋ восхва́лимъ, прїиди́те, вѣ́рою спа́сшїисѧ, и҆зъ неѧ̀ ро́ждшагосѧ вседержи́телѧ, бл҃гослове́на ты̀ въ жена́хъ є҆сѝ, вопїю́ще, всенепоро́чнаѧ.
И҆́нъ. І҆рмо́съ:
А҆́гг҃ломъ ѻ҆́троки и҆зъ ѻ҆гнѧ̀ спасы́й, и҆ гремѧ́щꙋю пе́щь преложивы́й на ро́сꙋ, бл҃гослове́нъ є҆сѝ, бж҃е ѻ҆тє́цъ на́шихъ.
Чꙋдодѣ́йствꙋетъ зижди́тель, сꙋди́мꙋ тебѣ̀, блаже́нне, блꙋдни́ца бо жени́що стремле́нїемъ взѧта̀ де́мѡнскимъ, всѣ̑мъ показа́ тѧ чи́ста, григо́рїе.
Свѣтопода́тельнїи бжⷭ҇твеннїи ᲂу҆ч҃ницы̀ сп҃совы, тебѣ̀ предста́вше, прпⷣбне, привѧ́зана дре́вꙋ разрѣша́ютъ, ра́достнѡ лобыза́юще.
Терпѣ́нїю твоемꙋ̀, ѻ҆́ч҃е, влⷣка вне́млѧ, чꙋдодѣ́йствы бо́льшими тѧ̀ свѧще́ннѡ ᲂу҆краша́етъ, недꙋ́гѡвъ мра́къ ѿгонѧ́ща.
Бг҃оро́диченъ:
Матеролѣ́пнѡ всѣ́хъ родила̀ є҆сѝ зижди́телѧ, и҆ рꙋка́ми понесла̀ є҆сѝ, ꙗ҆́кѡ херꙋві́мскїй прⷭ҇то́лъ, содержа́щаго всѧ̑, неискꙋсобра́чнаѧ.
Пѣ́снь и҃. І҆рмо́съ:
Є҆гѡ́же ᲂу҆жаса́ютсѧ а҆́гг҃ли и҆ всѧ̑ вѡ́инства, ꙗ҆́кѡ творца̀ и҆ гдⷭ҇а, по́йте свѧще́нницы, просла́вите ѻ҆́троцы, благослови́те лю́дїе, и҆ превозноси́те во всѧ̑ вѣ́ки.
Весели́тсѧ дне́сь свѣ́тлѡ і҆ѡакі́мъ, и҆ а҆́нна непоро́чнаѧ гдⷭ҇ꙋ бг҃ꙋ прино́ситъ же́ртвꙋ, да́ннꙋю є҆́й ѿ ѡ҆бѣща́нїѧ ст҃ꙋ́ю дще́рь.
Хва́лѧтсѧ ст҃і́и дв҃дъ и҆ і҆ессе́й, и҆ і҆ꙋ́да чти́тсѧ: и҆зъ ко́рене бо и҆́хъ и҆зрастѐ пло́дъ, дв҃а чⷭ҇таѧ, и҆зъ неѧ́же роди́сѧ бг҃ъ превѣ́чный.
Марі́а пречⷭ҇таѧ и҆ ѡ҆дꙋшевле́ннаѧ ски́нїѧ, приво́дитсѧ дне́сь въ до́мъ бж҃їй, и҆ прїе́млетъ сїю̀ заха́рїа рꙋка́ми, ꙗ҆́кѡ ѡ҆свѧще́нное сокро́вище гдⷭ҇не.
Ꙗ҆́кѡ две́рь спаси́тельнꙋю, и҆ го́рꙋ мы́сленнꙋю, ꙗ҆́кѡ лѣ́ствицꙋ ѡ҆дꙋшевле́ннꙋю, почти́мъ, вѣ́рнїи, вои́стиннꙋ, дв҃ꙋ и҆ мт҃рь бж҃їю, благослове́ннꙋю рꙋка́ми і҆ере́євъ.
И҆́нъ. І҆рмо́съ:
Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ, ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: благослови́те, всѧ̑ дѣла̀ гдⷭ҇нѧ, гдⷭ҇а.
Оу҆краси́шасѧ пѣ́сненнѡ ᲂу҆ста̀ твоѧ̑ бг҃ослѡ́вѧщаѧ ꙗ҆́снѡ, трⷪ҇цꙋ несозда́ннꙋ, безнача́льнꙋ, є҆диносꙋ́щнꙋ, несли́тнꙋ тремѝ ѵ҆поста́сьми, ѻ҆́ч҃е бг҃омꙋ́дре. є҆́йже вопїе́мъ: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Бога́тство тебѣ̀ и҆ сла́вꙋ честнꙋ́ю ѵ҆поста́снаѧ мꙋ́дрость дадѐ, бг҃осло́вившꙋ тѝ, премꙋ́дре, благоче́стнѡ, и҆ є҆ресе́й низложи́вшꙋ горды́ню, и҆ любо́вїю пою́щꙋ: благослови́те, всѧ̑ дѣла̀ гдⷭ҇нѧ, гдⷭ҇а.
И҆́же всѣ̑мъ подаѧ́й жи́знь, ꙗ҆́кѡ і҆ера́рха вѣ́рна, и҆ бг҃оглаго́лива, въ цр҃ковь тѧ̀ прпⷣбне перворо́дныхъ вво́дитъ, свѧще́нствꙋюща та́инственнѡ, и҆ вѣ́рнѡ пою́ща: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Бг҃оро́диченъ:
Сѐ ны́нѣ ѡ҆скꙋдѣ̀ ꙗ҆́вѣ ѿ і҆ꙋ́дина колѣ́на нача́льникъ и҆ во́ждь: ты́ бо, всенепоро́чнаѧ, родила̀ є҆сѝ, самаго̀ ѿлежа́щаго жда́нїе ꙗ҆зы́кѡвъ хрⷭ҇та̀: є҆мꙋ́же пое́мъ: благослови́те, всѧ̑ дѣла̀ гдⷭ҇нѧ, гдⷭ҇а.
И҆́нъ. І҆рмо́съ:
Покрыва́ѧй вода́ми превы́спрєннѧѧ своѧ̑, полага́ѧй мо́рю предѣ́лъ песо́къ, и҆ содержа́й всѧ̑, тѧ̀ пое́тъ со́лнце, тѧ̀ сла́витъ лꙋна̀, тебѣ̀ прино́ситъ пѣ́снь всѧ̀ тва́рь, ꙗ҆́кѡ содѣ́телю всѣ́хъ во вѣ́ки.
Ѿрѣша́етсѧ ра́ны де́мѡнскїѧ стра́шныѧ моли́твою твое́ю, блаже́нне, ꙗ҆́же лꙋка́вствомъ пребеззако́нныхъ мꙋже́й ѡ҆клевета́вшаѧ тебѐ пра́веднаго ѻ҆трокови́ца: и҆ посредѣ̀ собо́ра тѧ̀ прославлѧ́етъ подвигополо́жникъ бг҃ъ, во всѧ̑ вѣ́ки.
Те́мнагѡ ѡ҆мраче́нїѧ и҆сполнѧ́ютсѧ лꙋка́вствомъ на тѧ̀ поꙋчи́вшїисѧ, ѻ҆́ч҃е, и҆ сїѧ́етъ твоѐ свѣтоза́рное житїѐ, предъ ѻ҆ц҃ы̀, григо́рїе, въ и҆́хже прише́ствїи, ᲂу҆́глїе держа̀ рꙋко́ю, чꙋдодѣ́йствовалъ є҆сѝ.
Ꙗ҆́кѡ ѕвѣзда̀ свѣтлѣ́йшаѧ, ꙗ҆ви́лсѧ є҆сѝ и҆́стиннѡ на высотѣ̀, ѻ҆́ч҃е, церко́внѣй, ѡ҆зарѧ́еши ны̀ добродѣ́тельми всегда̀, и҆ чꙋде́съ лꙋча́ми, пою́щыѧ твою̀ свѣтоно́снꙋю па́мѧть, ст҃и́телю бг҃омꙋ́дре григо́рїе.
Бг҃оро́диченъ:
Пресла́вное ржⷭ҇тво̀ твоѐ, помышлє́нїѧ на̑ша ᲂу҆жаса́етъ, є҆ди́на бл҃гослове́ннаѧ: бг҃ъ бо и҆зъ тебє̀ пло́ть прїѧ́тъ, є҆́же бѣ̀ пребы́въ, бцⷣе, невра́щенъ є҆стество́мъ: є҆го́же превозно́симъ во вѣ́ки.
Пѣ́снь ѳ҃. І҆рмо́съ:
Свѣтоно́сный ѻ҆́блакъ, въ ѻ҆́ньже всѣ́хъ влⷣка, ꙗ҆́кѡ до́ждь съ нб҃сѐ на рꙋно̀ сни́де, и҆ воплоти́сѧ на́съ ра́ди, бы́въ чл҃вѣ́къ, безнача́льный: велича́емъ всѝ ꙗ҆́кѡ мт҃рь бг҃а на́шегѡ чⷭ҇тꙋю.
И҆зъ пра́ведныхъ произы́де, і҆ѡакі́ма и҆ а҆́нны, ѡ҆бѣща́нїѧ пло́дъ, бг҃оѻтрокови́ца марі́а: и҆ ꙗ҆́кѡ кади́ло прїѧ́тное, пло́тїю младе́нствꙋющи, приво́дитсѧ во свѧти́лище ст҃о́е, ꙗ҆́кѡ ст҃а́ѧ во ст҃ы́хъ ѡ҆бита́ти.
Младе́нствꙋющꙋю є҆стество́мъ, и҆ па́че є҆стества̀ ꙗ҆́вльшꙋюсѧ мт҃рь бж҃їю, восхва́лимъ пѣ́сньми: въ хра́мъ бо зако́нный гдⷭ҇ꙋ дне́сь приво́дитсѧ, въ воню̀ благово́нїѧ пра́ведныхъ, ꙗ҆́кѡ пло́дъ дꙋхо́вный.
Со а҆́гг҃ломъ, є҆́же ра́дꙋйсѧ, бцⷣѣ прили́чнѣ возопїи́мъ, вѣ́рнїи: ра́дꙋйсѧ, вседо́браѧ, невѣ́сто. ра́дꙋйсѧ, ѻ҆́блаче свѣ́тлый, и҆зъ негѡ́же на́мъ возсїѧ̀ гдⷭ҇ь, во тмѣ̀ невѣ́дѣнїѧ сѣдѧ́щымъ. ра́дꙋйсѧ, всѣ́хъ наде́ждо.
Ст҃ы́хъ ст҃а́ѧ и҆ бг҃ома́ти марі́е, моли́твами твои́ми, чⷭ҇таѧ, свободи́ ны ѿ сѣ́тей вра́жїихъ, и҆ всѧ́кїѧ є҆́реси, и҆ ско́рби, вѣ́рнѡ покланѧ́ющыѧсѧ ѻ҆́бразꙋ ст҃а́гѡ твоегѡ̀ зра́ка.
И҆́нъ. І҆рмо́съ:
Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀, бцⷣе, велича́емъ.
Є҆ди́но трїѷпоста́сное є҆стество̀ всеблагоче́стнѡ бг҃осло́вивъ, всесвѧтꙋ́ю трⷪ҇цꙋ бг҃онача́льнꙋю, непости́жнꙋю, ны́нѣ ѿ неѧ̀ почествова́лсѧ є҆сѝ, свѧщенноѧвле́нне а҆мфїло́хїе.
И҆мѣ́ѧ къ бг҃ꙋ дерзнове́нїе, ꙗ҆́кѡ і҆ера́рхъ, бг҃оно́се, свѧще́ннꙋю и҆ свѣтоно́снꙋю соверша́ющихъ па́мѧть твою̀, всебл҃же́нне, всегда̀ помина́й, твоемꙋ̀ влⷣцѣ предстоѧ̀.
Дава́еши мѝ ѻ҆би́льнꙋю бл҃года́ть, похвалы̑ тебѣ̀, бг҃омꙋ́дре, спле́тшꙋ ᲂу҆се́рднымъ се́рдцемъ, грѣхѡ́въ разрѣше́нїе просѧ́щꙋ, ꙗ҆́кѡ ст҃и́тель вѣ́рнѣйшїй, прпⷣбне ѻ҆́ч҃е а҆мфїло́хїе.
Бг҃оро́диченъ:
А҆да́мова ᲂу҆́бѡ внꙋ́ка ꙗ҆ви́ласѧ є҆сѝ, бж҃їѧ же мт҃и позна́ласѧ є҆сѝ: ты́ бо ѿ вѣ́ка ꙗ҆ви́ласѧ є҆сѝ ст҃ѣ́йши всѧ́кїѧ тва́ри, бл҃гослове́ннаѧ пречⷭ҇таѧ. тѣ́мъ тѧ̀ всѝ велича́емъ.
И҆́нъ. І҆рмо́съ:
Бл҃гослове́нъ гдⷭ҇ь бг҃ъ і҆и҃левъ, воздви́гнꙋвый ро́гъ спасе́нїѧ на́мъ въ домꙋ̀ дв҃довѣ ѻ҆́трока своегѡ̀, въ ни́хже посѣтѝ на́съ восто́къ съ высоты̀, и҆ напра́вилъ ны̀ є҆́сть на пꙋ́ть ми́ра.
Сѐ, свѣ́тлое торжество̀, сѐ па́мѧть свѧще́ннаѧ, сѐ бл҃года́ть всѣ̑мъ соше́дшымсѧ вѣ̑рнымъ, ѻ҆би́льнѡ врачєва́нїѧ точа́щи, пристꙋ́пимъ: то́читъ бо на́мъ григо́рїева ра́ка просвѣще́нїе присноте́чное и҆ безсме́ртїе.
Ꙗ҆́кѡ рѣка̀ и҆спо́лнилсѧ є҆сѝ во́дъ хрⷭ҇то́выхъ, ꙗ҆́кѡ ма́слина є҆ле́й то́чиши жи́зни, ꙗ҆́кѡ фі́нїѯъ возвы́силсѧ є҆сѝ, григо́рїе, ꙗ҆́кѡ лоза̀, гро́здїе на́мъ добродѣ́телей твои́хъ но́сиши, ѿ ни́хже напаѧ́емсѧ вїно́мъ нетлѣ́нїѧ.
Да сра́дꙋетсѧ дне́сь на́мъ въ па́мѧти твое́й свѧще́нныхъ собо́ръ, и҆ прпⷣбныхъ мно́жество, и҆ всѣ́хъ а҆́гг҃лъ чи́нове: съ ни́миже предстоѧ̀ творцꙋ̀, ѡ҆зарѧ́емь, ѻ҆́ч҃е, помѧнѝ любо́вїю тѧ̀ пѣсносло́вѧщыѧ.
Ѡ҆свѧще́нъ бы́лъ є҆сѝ, ѻ҆́ч҃е, сосꙋ́дъ хрⷭ҇то́въ, цр҃кве сто́лпъ, и҆ приста́нище вѣ́рныхъ, и҆ ме́чь, пре́лєсти и҆зсѣка́ющїй, и҆сто́чникъ и҆сцѣле́нїй, и҆ глꙋбина̀ бжⷭ҇твенныхъ разꙋмѣ́нїй, и҆ свѣща̀ неꙋгаса́ющаѧ, и҆ па́стырь па́стырей.
Бг҃оро́диченъ:
Свѣ́тъ ро́ждшаѧ безлѣ́тный возсїѧ́вшїй и҆зъ ѻ҆ц҃а̀, просвѣтѝ мою̀, ѻ҆трокови́це, дꙋ́шꙋ и҆ ᲂу҆́мъ, дале́че ѿ менє̀ ѿгонѧ́щи тмꙋ̀, дв҃о, страсте́й: да тѧ̀ ᲂу҆блажа́ю приснобл҃же́ннꙋю, вѣ́рныхъ наде́ждꙋ.
Свѣти́ленъ ст҃а́гѡ а҆мфїло́хїа. Подо́бенъ: Оу҆ченикѡ́мъ:
Бг҃ъ положе́нїемъ бы́въ, въ безвеще́ственнѣмъ причаще́нїи бж҃їѧ є҆стества̀, всемꙋ́дре, ѿ а҆́гг҃лъ пома́завсѧ ст҃и́тель бжⷭ҇твенномꙋ при́чтꙋ, хода́тайствꙋѧ созда́телю и҆ созда́нїю, бг҃опрїѧ́тне а҆мфїло́хїе ѻ҆́ч҃е. тѣ́мже твою̀ соверша́юще па́мѧть, тѧ̀ воспѣва́емъ, и҆збавлѧ́еми моли́твами твои́ми, ѿ тлѝ и҆ напа́стей.
Сла́ва, ст҃а́гѡ григо́рїа:
По́стнически житїѐ твоѐ ᲂу҆краси́въ, мꙋ́дре ѻ҆́ч҃е, и҆ честны́ѧ, григо́рїе, хрⷭ҇то́вы цр҃кве і҆ера́рхъ ꙗ҆ви́лсѧ є҆сѝ, бл҃же́нне: правосла́вныхъ просвѣща́ѧ зарѧ́ми ᲂу҆че́нїй твои́хъ, и҆ неизглаго́ланными чꙋдесы̀. тѣ́мже твоѐ пресвѧто́е ᲂу҆спе́нїе соверша́ющымъ и҆спросѝ моли́твами твои́ми дꙋше́вное спасе́нїе.
И҆ ны́нѣ, пра́здника. Подо́бенъ: Жєны̀ ᲂу҆слы́шите:
Ю҆́же дре́вле предвозвѣстѝ прⷪ҇ро́ческое сосло́вїе, ста́мнꙋ и҆ же́злъ, и҆ скрижа́ль, и҆ несѣко́мꙋю го́рꙋ, марі́ю бг҃оѻтрокови́цꙋ, вѣ́рнѡ да восхва́лимъ: дне́сь бо вво́дитсѧ во ст҃а̑ѧ ст҃ы́хъ воспита́тисѧ гдⷭ҇ꙋ.
На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:
Взѧ́тсѧ граде́жъ средостѣ́нїѧ, бжⷭ҇твеннымъ и҆́стиннѡ, ꙳ бцⷣы вхожде́нїемъ, ꙳ и҆ дѡ́льнѧѧ съ вы́шними ꙳ ны́нѣ совокꙋпи́хомсѧ.
Сті́хъ: Приведꙋ́тсѧ цр҃ю̀ дѣ̑вы въ слѣ́дъ є҆ѧ̀, и҆ и҆́скрєннїѧ є҆ѧ̀ приведꙋ́тсѧ тебѣ̀.
Воспѣ́ша дѣ́вственнїи ли́цы ꙳ бжⷭ҇твеннꙋю пѣ́снь, ꙳ провожда́юще въ до́мъ бж҃їй, ꙳ свѣщенѡ́сныѧ, ꙳ є҆ди́нꙋ всенепоро́чнꙋю.
Сті́хъ: Приведꙋ́тсѧ въ весе́лїи и҆ ра́дованїи, введꙋ́тсѧ въ хра́мъ царе́въ.
Внꙋ́трь ст҃и́лища, ꙳ ст҃ꙋ́ю ст҃ы́хъ, ꙳ бцⷣꙋ сꙋ́щꙋю, ꙳ ѽ заха́рїе, прїе́мли, ꙳ во ст҃а̑ѧ ст҃ы́хъ.
Сла́ва, и҆ ны́нѣ, гла́съ ѕ҃:
Дне́сь, собо́ри вѣ́рныхъ, соше́дшесѧ, дꙋхо́внѣ да торжествꙋ́имъ, и҆ бг҃оѻтрокови́цꙋ, дв҃ꙋ и҆ бцⷣꙋ, въ хра́мъ гдⷭ҇ень приводи́мꙋ, благоче́стнѡ восхва́лимъ, пред̾избра́ннꙋ ѿ всѣ́хъ родѡ́въ, во ѡ҆би́телище всѣ́хъ цр҃ѧ̀ хрⷭ҇та̀ и҆ бг҃а: дѣ̑вы, свѣщы̀ носѧ́ще, пред̾иди́те, приснодв҃ы, чтꙋ́ще честно́е происхожде́нїе: ма́тєри, печа́ль всю̀ ѿложи́вше, ра́достнѡ спослѣ́дствꙋйте мт҃ри бг҃а быва́ющей, и҆ ра́дости мі́ра хода́таицѣ. всѝ ᲂу҆́бѡ ра́достнѡ, є҆́же ра́дꙋйсѧ, со а҆́гг҃ломъ возопїи́мъ ѡ҆бра́дованнѣй, при́снѡ молѧ́щейсѧ ѡ҆ дꙋша́хъ на́шихъ.
На лїтꙋргі́и: Блажє́нна пра́здника, пѣ́снь д҃-ѧ и҆ є҃-ѧ, и҆ ѕ҃. Прокі́менъ, гла́съ з҃: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; А҆пⷭ҇лъ къ є҆вре́ємъ, зача́ло тл҃д. А҆ллилꙋ́їа, гла́съ в҃: Свѧще́нницы твоѝ ѡ҆блекꙋ́тсѧ въ пра́вдꙋ, и҆ прпⷣбнїи твоѝ возра́дꙋютсѧ. Сті́хъ: Зако́нъ бг҃а є҆гѡ̀ въ се́рдцѣ є҆гѡ̀: Є҆ѵⷢ҇лїе матѳе́а, зача́ло р҃г. Прича́стенъ: Ра́дꙋйтесѧ, првⷣнїи, ѡ҆ гдⷭ҇ѣ:
Слꙋ́жба благовѣ́рнагѡ вели́кагѡ кнѧ́зѧ а҆леѯа́ндра:
На ма́лѣй вече́рни, стїхи̑ры, гла́съ а҃. Поⷣ: Всехва́льнїи мч҃ницы:
Ѿ благочести́вагѡ ко́рене ꙳ свѧтопома́заннаѧ розга̀ произше́дъ, ꙳ пло́дъ произнесѐ себѐ ꙳ преподо́бїѧ и҆ пра́вды, ꙳ премі́рнѡ благоꙋха́ѧ, вѣ́рнѡ ѿ дꙋшѝ чтꙋ́щыѧ тѧ̀: ꙳. ѡ҆ ни́хже со а҆́гг҃лы хрⷭ҇тꙋ̀ моли́сѧ, блаже́нне, ꙳ дарова́ти ми́ръ ꙳ и҆ ве́лїю ми́лость.
Два́жды.
Земны́хъ всѣ́хъ возгнꙋша́всѧ, ꙳ къ нбⷭ҇нымъ дꙋ́хомъ прилѣпи́лъ є҆сѝ себѐ. ꙳ тѣ́мъ безпло́тныхъ подража́въ житїѐ, ꙳ со ст҃ы́ми всѣ́ми водвори́лсѧ є҆сѝ. ꙳ съ ни́миже, прпⷣбне, хрⷭ҇тꙋ̀ моли́сѧ, ꙳ па́мѧть твою̀ творѧ́щымъ ꙳ пода́ти ми́ръ ꙳ и҆ ве́лїю ми́лость.
Благоче́стїемъ и҆ вѣ́рою ꙳ пресвѣ́тлѡ ᲂу҆кра́шенъ, ꙳ ꙗ҆́кѡ благочести́въ скиптроно́сецъ и҆ преизрѧ́денъ, и҆ преимени́тъ прест҃ы́ѧ трⷪ҇цы ꙳ побо́рникъ бы́лъ є҆сѝ: ꙳ ѿ неѧ́же просвѣти́всѧ, ꙳ чꙋде́съ свѣ́тъ мі́рꙋ ꙳ провозсїѧ́лъ є҆сѝ, ꙳ и҆ моли́твенникъ ꙗ҆ви́лсѧ є҆сѝ ѡ҆ дꙋша́хъ на́шихъ.
Сла́ва, гла́съ ѕ҃:
Прпⷣбне ѻ҆́ч҃е а҆леѯа́ндре, и҆змла́да возлюби́въ хрⷭ҇та̀, бг҃оимени́тъ вѣнцено́сецъ бы́лъ є҆сѝ, преподо́бїемъ и҆ пра́вдою свѣ́тлѡ ᲂу҆кра́шенъ: ми́лостынѧми же и҆ чистото́ю, простра́нное селе́нїе бы́лъ є҆сѝ дх҃а ст҃а́гѡ: є҆мꙋ́же непреста́ннѡ моли́сѧ, ѡ҆ є҆́же сохрани́ти ѻ҆те́чество твоѐ и҆ гра́дъ тво́й, ѿ пога́ныхъ неѡбори̑мымъ бы́ти, и҆ сыновѡ́мъ рѡссі́йскимъ спасти́сѧ.
И҆ ны́нѣ, пра́здника, гла́съ и҃:
Дв҃дъ провозглаша́ше тебѣ̀, пречⷭ҇таѧ, прови́дѧ ѡ҆свѧще́нїе вхо́да твоегѡ̀ въ хра́мъ, въ не́мже концы̀ дне́сь пра́зднꙋюще, славосло́вѧтъ тѧ̀, всепѣ́таѧ: ꙗ҆́же бо пре́жде ржⷭ҇тва̀ дѣ́ва, и҆ по ржⷭ҇твѣ̀ пребы́вши нетлѣ́нна, мт҃и сло́ва жи́зни. дне́сь въ хра́мѣ заха́рїа весели́тсѧ, воспрїе́мъ тѧ̀, влⷣчце: и҆ ст҃а̑ѧ ст҃ы́хъ ра́дꙋютсѧ, под̾е́мши тѧ̀, и҆сто́чника жи́зни на́шеѧ. Сегѡ̀ ра́ди и҆ мы̀ ѱало́мски вопїе́мъ тѝ: ѡ҆ на́съ молѝ сн҃а твоего̀ и҆ бг҃а на́шего, дарова́ти на́мъ ве́лїю ми́лость.
На стїхо́внѣ стїхи̑ры, гла́съ в҃. Подо́бенъ: До́ме є҆ѵфра́ѳовъ:
До́мъ ст҃а́гѡ дх҃а, ꙳ поспѣше́нїемъ благода́ти, ꙳ а҆леѯа́ндръ ꙗ҆ви́сѧ: ꙳ тѣ́мже ны́нѣ соше́дшесѧ, ꙳ томꙋ̀ воспои́мъ пѣ́снь.
Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀.
Ра́дꙋйсѧ, кнѧзе́й рꙋ́сскихъ похвало̀, ꙳ и҆ во́инѡвъ соблюде́нїе, ꙳ ва́рварѡвъ побѣжде́нїе, ꙳ сирѡ́тъ и҆ вдѡ́въ застꙋ́пниче, ꙳ и҆ гра́да на́шегѡ ᲂу҆твержде́нїе.
Сті́хъ: Блаже́нъ мꙋ́жъ, боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.
Прїимѝ ны́нѣ пѣ́нїе ꙳ люде́й твои́хъ, бл҃же́нне, ꙳ и҆ молѧ́щымсѧ тѝ ꙳ ᲂу҆ хрⷭ҇та̀ и҆спросѝ ѿ грѣхѡ́въ и҆збавле́нїе, ꙳ да ᲂу҆блажа́емъ тѧ̀ при́снѡ.
Сла́ва, гла́съ и҃:
Бг҃омꙋ́дре а҆леѯа́ндре, вели́кїй кнѧ́же, блаже́нъ є҆сѝ, ꙗ҆́кѡ бл҃же́нство наслѣ́довалъ є҆сѝ, є҆гѡ́же ра́ди всѧ̑ земна̑ѧ презрѣ́въ, неѿло́жнѡ того̀ взыскꙋ́ѧ, ни́щыѧ ᲂу҆довли́лъ є҆сѝ, сирѡ́тъ пита́тель, плѣ́нныхъ свободи́тель бы́лъ є҆сѝ. тѣ́мъ въ нестарѣ́емꙋю ра́дость вше́лъ є҆сѝ гдⷭ҇а твоегѡ̀, є҆мꙋ́же со а҆́гг҃лы предстоѧ̀, молѝ вѣ́рою пою́щымъ тѧ̀ гобзова́нїе щедро́тъ пода́ти и҆ грѣхѡ́въ ѡ҆ставле́нїе.
И҆ ны́нѣ, пра́здника, гла́съ д҃:
Прїиди́те, всѝ вѣ́рнїи, є҆ди́нꙋ непоро́чнꙋю восхва́лимъ, ѿ прⷪ҇ро́кѡвъ проповѣ́данꙋю, и҆ въ хра́мъ приведе́ннꙋю, пре́жде вѣ̑къ пронарече́ннꙋю мт҃рь, и҆ въ послѣ̑днѧѧ лѣ̑та ꙗ҆́вльшꙋюсѧ бцⷣꙋ. гдⷭ҇и, моли́твами є҆ѧ̀, ми́ръ тво́й пода́ждь на́мъ и҆ ве́лїю ми́лость.
По трист҃о́мъ тропа́рь, гла́съ д҃:
Ꙗ҆́кѡ благочести́вагѡ ко́рене пречестна́ѧ ѻ҆́трасль бы́лъ є҆сѝ, блаже́нне а҆леѯа́ндре: ꙗ҆ви́ бо тѧ̀ хрⷭ҇то́съ, ꙗ҆́кѡ нѣ́кое бжⷭ҇твенное сокро́вище рѡссі́йстѣй землѝ, но́ваго чꙋдотво́рца, пресла́вна и҆ бг҃опрїѧ́тна. и҆ дне́сь, соше́дшесѧ въ па́мѧть твою̀ вѣ́рою и҆ любо́вїю, во ѱалмѣ́хъ и҆ пѣ́нїихъ ра́дꙋющесѧ, сла́вимъ гдⷭ҇а, да́вшаго тебѣ̀ бл҃года́ть и҆сцѣле́нїй: є҆го́же молѝ спастѝ гра́дъ се́й, и҆ держа́вѣ срѡ́дникъ твои́хъ бг҃оꙋго́днѣй бы́ти, и҆ сыновѡ́мъ рѡссі́йскимъ спасти́сѧ.
Сла́ва, и҆ ны́нѣ, пра́здника, гла́съ то́йже:
Дне́сь благоволе́нїѧ бж҃їѧ пред̾ѡбраже́нїе, и҆ человѣ́кѡвъ спасе́нїѧ проповѣ́данїе, въ хра́мѣ бж҃їи ꙗ҆́снѡ дв҃а ꙗ҆влѧ́етсѧ и҆ хрⷭ҇та̀ всѣ̑мъ предвозвѣща́етъ. то́й и҆ мы̀ велегла́снѡ возопїи́мъ: ра́дꙋйсѧ, смотре́нїѧ зижди́телева и҆сполне́нїе.
Та́же, є҆ктенїа̀ ма́лаѧ: Поми́лꙋй на́съ бж҃е: И҆ ѿпꙋ́стъ.
На вели́цѣй вече́рни стїхосло́вимъ, Бл҃же́нъ мꙋ́жъ, а҃-й а҆нтїфѡ́нъ.
На Гдⷭ҇и, воззва́хъ, стїхи̑ры на и҃: пра́здника, г҃: и҆ а҆леѯа́ндра, є҃.
Стїхи̑ры а҆леѯа́ндра, гла́съ в҃. Подо́бенъ: Кі́ими похва́льными:
Кі́ими похва́льными вѣнцы̑, вѣнча́емъ блаже́ннаго а҆леѯа́ндра; люде́й благовѣ́рныхъ держа́вꙋ, и҆ кнѧзе́й правосла́вныхъ похвалꙋ̀, ди́внаго въ чꙋдесѣ́хъ: безпло́тныхъ сожи́телѧ, и҆сто́чника бжⷭ҇твенныхъ и҆сцѣле́нїй неисчерпа́емаго, рѣкꙋ̀ чꙋде́съ мно́гихъ, проли́тїе дарова́нїй дꙋхо́вныхъ: є҆гѡ́же ра́ди хрⷭ҇то́съ землѝ рѡссі́йстѣй да́рꙋетъ ми́ръ и҆ ве́лїю ми́лость.
Два́жды.
Кі́ими похва́льными вѣнцы̑, ᲂу҆вѧзе́мъ блаже́ннаго а҆леѯа́ндра; благоче́стїѧ ᲂу҆правле́нїе, є҆реті́ческихъ ᲂу҆че́нїй ѡ҆бличе́нїе, це́ркве свѣ́тлое ᲂу҆краше́нїе, врача̀ премꙋ́драго и҆ бг҃опрїѧ́тна, и҆сцѣлѧ́юща недꙋ́ги и҆ болѣ̑зни на́шѧ. є҆гѡ́же ра́ди врагѡ́въ шата̑нїѧ хрⷭ҇то́съ низложѝ, и҆мѣ́ѧй ве́лїю ми́лость.
Кі́ими смире́нными ᲂу҆стна́ми, воспое́мъ а҆леѯа́ндра премꙋ́драго; сл҃нца пресвѣ́тлаго, всечестны́ѧ трⷪ҇цы моли́твенника, печа́льныхъ ᲂу҆тѣше́нїе, и҆ ѿча́ѧнныхъ застꙋ́пника, похвалꙋ̀ землѝ рѡссі́йскїѧ, рѣкꙋ̀ ми́лости вои́стиннꙋ, и҆ больны́хъ врача̀ безме́здна, смире́нїѧ хрⷭ҇то́ва подража́телѧ, подаю́щаго на́мъ ве́лїю ми́лость.
Кі́ими дꙋхо́вными пѣ́сньми, воспое́мъ пресла́внаго; свѣти́льника незаходи́магѡ сл҃нца мы́сленнагѡ, пра́вды пра́вило, весе́лїе землѝ рѡссі́йскїѧ, крѣ́пость гра́да на́шегѡ и҆ забра́ло, сирѡ́тъ пита́телѧ, ѡ҆би́димыхъ застꙋ́пника, столпа̀ пресвѣ́тлаго, просвѣща́ющаго на́съ чꙋде́съ свѣтлостьмѝ, и҆ подаю́ща ве́лїю ми́лость.
Сла́ва, гла́съ ѕ҃:
Всѧ́къ гра́дъ и҆ страна̀ сла́вномꙋ гра́дꙋ на́шемꙋ сра́дꙋйтесѧ, и҆ ѱало́мски восплещи́те рꙋка́ми вкꙋ́пѣ, дꙋхо́внѡ торжество̀ дне́сь пра́зднꙋюще: сѐ ᲂу҆́бѡ ди́вный на́шъ вра́чь и҆ спаси́тель а҆леѯа́ндръ вели́кїй, нбⷭ҇нагѡ врачевства̀ цѣльбы̑ предлага́етъ, и҆ въ непреста̑ннымъ цѣльба́мъ ти́хѡ созыва́етъ, не хи́тростьми человѣ́ческими, ни ѡ҆бвѧза́нїемъ, но дѣ́йствомъ ст҃а́гѡ дх҃а, дꙋше́вное и҆ тѣле́сное и҆сцѣле́нїе па́че є҆стества̀ подава́ѧ: є҆го́же и҆ прїе́млюще дово́льнѡ всѧ́къ ро́дъ и҆ во́зрастъ сла́вимъ хрⷭ҇та̀ бг҃а, подаю́щаго на́мъ є҆гѡ̀ ра́ди ве́лїю ми́лость.
И҆ ны́нѣ, пра́здника, гла́съ и҃:
По ржⷭ҇твѣ̀ твое́мъ, бг҃оневѣ́сто влⷣчце, пришла̀ є҆сѝ въ хра́мъ гдⷭ҇ень воспита́тисѧ во ст҃а̑ѧ ст҃ы́хъ, ꙗ҆́кѡ ѡ҆свѧще́нна: тогда̀ и҆ гаврїи́лъ по́сланъ бы́сть къ тебѣ̀ всенепоро́чнѣй, пи́щꙋ тебѣ̀ приносѧ̀: нбⷭ҇наѧ всѧ̑ ᲂу҆диви́шасѧ, зрѧ́ще дх҃а ст҃а́го въ тѧ̀ все́льшасѧ. тѣ́мже, пречⷭ҇таѧ и҆ нескве́рнаѧ, ꙗ҆́же на нб҃сѝ и҆ на землѝ сла́вима, мт҃и бж҃їѧ, спасѝ ро́дъ на́шъ.
Вхо́дъ. Прокі́менъ днѐ. Чтє́нїѧ г҃, пи̑саны сегѡ̀ мѣ́сѧца въ ѕ҃ де́нь, варлаа́мꙋ хꙋ́тынскомꙋ.
На лїті́и стїхи̑ры, гла́съ г҃:
Землѧ̀ на́ша и҆ страна̀, бл҃же́нне, чꙋдеса̀ твоѧ̑ возвѣща́ютъ, и҆ воспѣва́ютъ ᲂу҆́бѡ всю́дꙋ: хрⷭ҇то́съ бо тѧ̀ на́мъ свѣти́льника показа̀, просвѣща́юща дꙋ́шы на́шѧ.
Гла́съ д҃:
Лю́дїе и҆ кнѧ́зи, вкꙋ́пѣ бога́тїи и҆ ᲂу҆бо́зїи, ра́дꙋйтесѧ, свѣ́тлое дне́сь торжество̀ пра́зднꙋюще ѻ҆́бщагѡ застꙋ́пника, бл҃же́ннагѡ а҆леѯа́ндра: воспѣва́йте ᲂу҆́бѡ, и҆́стиннїи безмѡ́лвницы и҆ прості́и лю́дїе, ѻ҆́бщаго предста́телѧ и҆ помо́щника и҆ моле́бника, ѡ҆ дꙋша́хъ на́шихъ.
Гла́съ є҃:
Бг҃опрїѧ́тне и҆ прпⷣбне а҆леѯі́е, ѿ ложе́снъ поро́дъ свѧ́тъ бг҃ꙋ нарече́нъ є҆сѝ, благи́ми дѣ́лы свѣ́тлѡ ᲂу҆краси́лсѧ є҆сѝ, ми́лостынѧми и҆ чистото́ю сосꙋ́дъ ст҃а́гѡ дх҃а бы́лъ є҆сѝ, и҆́мже дѣ́йствꙋеши пресла̑внаѧ чꙋдеса̀ съ вѣ́рою приходѧ́щымъ ко свѧто́мꙋ твоемꙋ̀ гро́бꙋ.
Бг҃овѣнча́нный а҆леѯа́ндре, страны̀ на́шей держа́ва свѣтоно́снаѧ, кнѧзе́й похвала̀ велехва́льнаѧ, хрⷭ҇тїа́нъ побо́рниче непобѣ́дный, ѡ҆ ни́хже жи́въ сы́й дꙋ́шꙋ твою̀ полага́лъ є҆сѝ: си́це и҆ по сме́рти неѿстꙋ́пнѡ ѻ҆те́чество твоѐ сохранѧ́й, на а҆га́рѧны моли́твами твои́ми спосо́бствꙋѧ.
Бг҃омꙋ́дре а҆леѯа́ндре прпⷣбне, є҆гда̀ ре́вностїю бж҃їею разже́гсѧ, въ зе́млю ше́ствовати невѣ́дꙋщихъ бг҃а неѿрица́лсѧ є҆сѝ, та́мѡ прише́ствїемъ твои́мъ безбо́жнагѡ царѧ̀ ᲂу҆диви́лъ є҆сѝ, хрⷭ҇тоимени̑тымъ же лю́демъ тишинꙋ̀ и҆схода́тайствовалъ є҆сѝ. тѣ́мъ и҆ дне́сь къ бг҃ꙋ хода́тайствꙋй ѡ҆ на́съ, да ᲂу҆ще́дритъ ны̀ въ де́нь сꙋ́дный.
Сла́ва, гла́съ в҃:
Прїиди́те, хрⷭ҇тоимени́тїи собо́ри, бг҃опочте́ннїи кнѧ́зи и҆ бл҃говѣ́рнїи, кꙋ́пнѡ же со ст҃и́тєли, и҆ хрⷭ҇толюби́вое мно́жество, свѣ́тлѡ соста́вльше ѱало́мскꙋю пѣ́снь бжⷭ҇твенномꙋ семꙋ̀ вѣнцено́сцꙋ а҆леѯа́ндрꙋ, принесе́мъ рекꙋ́ще: ра́дꙋйсѧ, трⷪ҇цы побо́рниче великоимени́тый: ра́дꙋйсѧ, крⷭ҇тоно́сныхъ кнѧзе́й похвало̀ бг҃овѣнча́ннаѧ: ра́дꙋйсѧ, хрⷭ҇тїа́нъ ро́гъ бг҃оно́сный, ѡ҆ ни́хже хрⷭ҇тꙋ̀ молѧ́сѧ не ѡ҆скꙋдѣ́й, дарова́ти ми́ръ и҆ ве́лїю ми́лость.
И҆ ны́нѣ, пра́здника, гла́съ є҃:
Возсїѧ̀ де́нь ра́достенъ и҆ пра́здникъ всече́стенъ: дне́сь бо ꙗ҆́же пре́жде ржⷭ҇тва̀, и҆ по ржⷭ҇твѣ̀ дв҃а пребы́вши, въ хра́мъ гдⷭ҇ень приво́дитсѧ, и҆ ра́дꙋетсѧ заха́рїа ста́рецъ, роди́тель прⷣте́чевъ, и҆ вопїе́тъ ве́селѡ: прибли́жисѧ предста́тельница скорбѧ́щихъ въ хра́мъ ст҃ы́й, ꙗ҆́кѡ свѧта́ѧ, ѡ҆свѧти́тисѧ во ѻ҆би́телище всецр҃ѧ̀. да весели́тсѧ і҆ѡакі́мъ пра́ѻтецъ, и҆ а҆́нна да ра́дꙋетсѧ, ꙗ҆́кѡ принесо́ша бг҃ꙋ, ꙗ҆́кѡ трилѣ́тствꙋющꙋю ю҆́ницꙋ, непоро́чнꙋю влⷣчцꙋ. ма́тєри, сра́дꙋйтесѧ, дѣ̑вы, взыгра́йте, и҆ непло́ды сликовствꙋ́йте, ꙗ҆́кѡ ѿве́рзе на́мъ нбⷭ҇ное црⷭ҇тво пронарече́ннаѧ всецр҃и́ца, ра́дꙋйтесѧ, лю́дїе, и҆ весели́тесѧ.
На стїхо́внѣ стїхи̑ры, гла́съ а҃. Подо́бенъ: Нбⷭ҇ныхъ чинѡ́въ:
Ꙗ҆́кѡ ве́лїе со́лнце ꙳ ꙗ҆ви́лсѧ є҆сѝ, блаже́нне, вселе́ннѣй, ꙳ чꙋдесы̀ стра́шными просвѣща́ѧ ве́сь мі́ръ. ꙳ тѣ́мъ всѝ соше́дшесѧ, ꙳ хрⷭ҇та̀ воспои́мъ, спаса́ющаго ны̀ ѿ бѣ́дъ ꙳ моли́твами твои́ми.
Сті́хъ: Честна̀ предъ гдⷭ҇емъ сме́рть прпⷣбныхъ є҆гѡ̀.
Свѣ́томъ сїѧ́ѧ ꙳ бжⷭ҇твенныѧ бл҃года́ти, ꙳ и҆ чꙋдодѣ́йствꙋеши непреста́ннѡ. ꙳ и҆ ны́нѣ молѝ хрⷭ҇та̀ бг҃а, ꙳ блаже́нне а҆леѯа́ндре, ꙳ и҆зба́вити ѿ бѣ́дъ дꙋ́шы на́шѧ.
Сті́хъ: Бл҃же́нъ мꙋ́жъ боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀.
Не ѿ ри́ма возсїѧ́лъ є҆сѝ, ꙳ ни ѿ сїѡ́на, бг҃омꙋ́дре, ꙳ но въ рѡссі́йстѣй землѝ ꙗ҆ви́лсѧ є҆сѝ, ꙳ чꙋдотво́рецъ пресла́венъ, ꙳ и҆сцѣле́нїе подава́ѧ неѡскꙋ́днѡ ꙳ всѣ̑мъ приходѧ́щымъ съ вѣ́рою.
Сла́ва, гла́съ а҃. Самогла́сенъ:
Ра́дꙋйсѧ и҆ весели́сѧ, гра́де влади́мїре, и҆ свѣ́тлѡ торжествꙋ́й, и҆ ликꙋ́й хрⷭ҇то́ва цр҃ковь, въ не́йже положено̀ честно́е тѣ́ло блаже́ннагѡ а҆леѯа́ндра, тѣ́ло драго́е, тѣ́ло пресла́вное, тѣ́ло чꙋдеса̀ точа́ще всѣ̑мъ приходѧ́щымъ съ вѣ́рою. Прїиди́те, всѝ лю́дїе: прїиди́те вѣ́рнїи поклони́мсѧ, тецы́те и҆ собери́тесѧ, и҆ ѱало́мски того̀ воспои́мъ ра́дꙋющесѧ, и҆ ѡ҆блобыза́емъ че́стнѡ мо́щи ди́внагѡ врача̀ на́шегѡ, печа́льныхъ при́снꙋю ᲂу҆тѣ́хꙋ, и҆ ѿча́ѧнныхъ наде́ждꙋ, похвалꙋ̀ землѝ рѡссі́йстѣй, посо́бника на врагѝ и҆ всѣ̑мъ человѣ́кѡмъ застꙋ́пника, и҆ моли́твенника ѡ҆ спасе́нїи дꙋ́шъ на́шихъ.
И҆ ны́нѣ, пра́здника, гла́съ ѕ҃:
Дне́сь собо́ри вѣ́рныхъ соше́дшесѧ, дꙋхо́внѣ да торжествꙋ́емъ, и҆ бг҃оѻтрокови́цꙋ дв҃ꙋ и҆ бцⷣꙋ, въ хра́мъ гдⷭ҇ень приводи́мꙋ, благоче́стнѡ восхва́лимъ, пред̾избра́ннꙋю ѿ всѣ́хъ родѡ́въ, во ѻ҆би́телище всѣ́хъ цр҃ѧ̀ хрⷭ҇та̀ и҆ бг҃а: дѣ̑вы, свѣщы̀ носѧ́ще, пред̾иди́те, приснодв҃ы чтꙋ́ще честно́е происхожде́нїе: ма́тєри, печа́ль всю̀ ѿложи́вше, ра́достнѡ спослѣ́дствꙋйте мт҃ри бг҃а быва́ющей, и҆ ра́дости мі́ра хода́таицѣ: всѝ ᲂу҆́бѡ ра́достнѡ, є҆́же ра́дꙋйсѧ, со а҆́гг҃ломъ возопїе́мъ ѡ҆бра́дованнѣй, при́снѡ молѧ́щейсѧ ѡ҆ дꙋша́хъ на́шихъ
На благослове́нїи хлѣ́бѡвъ, тропа́рь ст҃а́гѡ, два́жды, и҆ пра́здника, є҆ди́ножды. А҆́ще нѣ́сть бдѣ́нїѧ, глаго́лемъ тропа́рь ст҃а́гѡ, є҆ди́ножды. Сла́ва, и҆ ны́нѣ, пра́здника: пи́саны на ма́лѣй вече́рни.
На ᲂу҆́трени, на Бг҃ъ гдⷭ҇ь, тропа́рь пра́здника, два́жды.
Сла́ва, ст҃а́гѡ: И҆ ны́нѣ, пра́здника.
По а҃-мъ стїхосло́вїи сѣда́ленъ, гла́съ д҃. Поⷣ: Оу҆диви́сѧ і҆ѡ́сифъ:
Ра́дꙋйсѧ, ꙗ҆́кѡ вторы́й ѳессало́нь въ рѡссі́йстѣй землѝ, сла́вный гра́де влади́мїре, и҆ любе́зными пѣ́сньми вкꙋ́пѣ ликꙋ́й бжⷭ҇твеннаѧ цр҃ковь, въ не́йже пречестно́е тѣ́ло а҆леѯа́ндра премꙋ́драгѡ бл҃же́ннагѡ, подае́тъ разли́чнѡ всѣ̑мъ и҆сцѣле́нїе. и҆ сегѡ̀ ра́ди возопїи́мъ къ немꙋ̀: моли́твами твои́ми, блаже́нне, и҆сцѣлѝ недꙋ́ги и҆ болѣ̑зни на́шѧ, и҆ всѧ́ческихъ и҆зба́ви и҆скꙋше́нїй, вѣ́рою и҆ любо́вїю па́мѧть твою̀ восхвалѧ́ющихъ.
Два́жды.
Сла́ва, и҆ ны́нѣ, пра́здника, гла́съ а҃. Поⷣ: Ка́мени запеча́танꙋ:
Ст҃а́ѧ ст҃ы́хъ, бцⷣе, сꙋ́щи, досто́йнѡ приведе́сѧ жи́ти во ст҃а̑ѧ: ꙗ҆́кѡ ѡ҆дꙋшевле́нъ гдⷭ҇ень кївѡ́тъ, и҆ ст҃а́гѡ дх҃а и҆́стиннѡ вмѣсти́лище, бжⷭ҇твенное, дв҃ома́ти. тѣ́мже всели́сѧ въ тѧ̀, и҆́же ѻ҆ц҃ꙋ̀ є҆диноро́дный, и҆ ст҃о́мꙋ дх҃ꙋ соесте́ственный, тво́й сн҃ъ неискꙋсомꙋ́жнѡ, ѡ҆бг҃отвори́въ всѐ человѣ́чество.
По в҃-й каѳі́смѣ, сѣда́ленъ, гла́съ г҃. Подо́бенъ: Красотѣ̀ дѣ́вства:
Благода́рнѡ зове́мъ всѝ хрⷭ҇то́вꙋ ᲂу҆го́дникꙋ ми́лостивомꙋ, неѕло́бивомꙋ и҆ кро́ткомꙋ, прилѣ́жнѡ молѧ́щесѧ любо́вїю: разрꙋшѝ бра́нь страсте́й на́шихъ, и҆ ѿженѝ де́мѡнскаѧ мечта̑нїѧ, бл҃же́нне, и҆ молѝ хрⷭ҇та̀ бг҃а дарова́ти на́мъ ве́лїю ми́лость.
Два́жды.
Сла́ва, и҆ ны́нѣ, пра́здника, гла́съ д҃. Поⷣ: Ꙗ҆ви́лсѧ є҆сѝ дне́сь:
Весе́лїѧ дне́сь вселе́ннаѧ и҆спо́лнисѧ всѧ̀, въ благознамени́томъ пра́здницѣ бцⷣы, зовꙋ́щи: та̀ є҆́сть сѣ́нь нбⷭ҇наѧ.
По полѷеле́и сѣда́ленъ, гла́съ и҃. Подо́бенъ: Премꙋ́дрости:
Дх҃ъ ст҃ы́й тѧ̀, бл҃же́нне, наста́ви, ѻ҆те́чествїе твоѐ па́ствити на па́житехъ спаси́тельныхъ, и҆ хрⷭ҇то́съ свѣти́льника тѧ̀ показа̀ ꙗ҆́вѣ: сегѡ̀ ра́ди ликꙋ́й и҆ весели́сѧ со дерзнове́нїемъ, ꙗ҆́кѡ сꙋгꙋ̑быѧ вѣнцы̀ ѿ вѣнцеда́вца прїи́мъ.
Два́жды.
Сла́ва, и҆ ны́нѣ, пра́здника:
Пре́жде зача́тїѧ, чⷭ҇таѧ, ѡ҆свѧти́ласѧ є҆сѝ бг҃ꙋ, и҆ ро́ждшисѧ на землѝ, да́ръ принесла́сѧ є҆сѝ ны́нѣ є҆мꙋ̀, и҆сполнѧ́ющи ѻ҆те́ческое ѡ҆бѣща́нїе: въ бжⷭ҇твеннѣмъ же хра́мѣ, ꙗ҆́кѡ сꙋ́щѡ бжⷭ҇твенный хра́мъ, ѿ младе́нства чи́стѣ со свѣща́ми свѣ́тлыми ѿдана̀ бы́вши, ꙗ҆ви́ласѧ є҆сѝ прїѧ́телище непристꙋ́пнагѡ и҆ бжⷭ҇твеннагѡ свѣ́та. вели́ко вои́стиннꙋ предше́ствїе твоѐ, є҆ди́на бг҃оневѣ́сто и҆ приснодв҃о.
А҆́ще ли кто̀ и҆зво́литъ пѣ́ти по́слѣ ѿда́нїѧ пра́здника ст҃ы́ѧ бцⷣы, глаго́летъ по сѣда́льнахъ, Сла́ва, и҆ ны́нѣ, бг҃орѡ́дичны сїѧ̑.
По а҃-мъ сѣда́льнѣ, бг҃оро́диченъ:
Оу҆диви́сѧ і҆ѡ́сифъ, є҆́же па́че є҆стества̀ зрѧ̀, и҆ внима́ше мы́слїю и҆́же на рꙋно̀ до́ждь, въ безсѣ́менномъ зача́тїи твое́мъ, бцⷣе, кꙋпинꙋ̀ ѻ҆гне́мъ неѡпали́мꙋю, же́злъ а҆арѡ́новъ прозѧ́бшїй, и҆ свидѣ́тельствꙋѧ ѻ҆брꙋ́чникъ тво́й и҆ храни́тель, свѧще́нникѡмъ взыва́ше: дв҃а ражда́етъ, и҆ по ржⷭ҇твѣ̀ па́ки дв҃а пребыва́етъ.
По в҃ сѣда́льнѣ, бг҃оро́диченъ:
Красотѣ̀ дѣ́вства твоегѡ̀, и҆ пресвѣ́тлой чистотѣ̀ твое́й, гаврїи́лъ ᲂу҆диви́всѧ, вопїѧ́ше тѝ, бцⷣе: кꙋ́ю тѝ похвалꙋ̀ принесꙋ̀ досто́йнꙋю; что́ же воз̾именꙋ́ю тѧ̀; недоꙋмѣва́ю и҆ ᲂу҆жаса́юсѧ. тѣ́мже ꙗ҆́кѡ повелѣ́нъ бы́хъ, вопїю́ ти: ра́дꙋйсѧ, бл҃года́тнаѧ!
По полѷеле́и, бг҃оро́диченъ:
Ѡ҆ тебѣ̀ ра́дꙋетсѧ, бл҃года́тнаѧ, всѧ́каѧ тва́рь, а҆́гг҃льскїй собо́ръ и҆ человѣ́ческїй ро́дъ, ѡ҆свѧще́нный хра́ме, и҆ раю̀ слове́сный, дѣ́вственнаѧ похвало̀, и҆зъ неѧ́же бг҃ъ воплоти́сѧ и҆ млⷣнцъ бы́сть пре́жде вѣ̑къ сы́й бг҃ъ на́шъ: ложесна́ бо твоѧ̑ прⷭ҇то́лъ сотворѝ, и҆ чре́во твоѐ простра́ннѣе нб҃съ содѣ́ла. ѡ҆ тебѣ̀ ра́дꙋетсѧ, бл҃года́тнаѧ, всѧ́каѧ тва́рь, сла́ва тебѣ̀.
Степє́нна, а҃-й а҆нтїфѡ́нъ д҃-гѡ гла́са. Прокі́менъ: Честна̀ пред̾ гдⷭ҇емъ сме́рть прпⷣбныхъ є҆гѡ̀: Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; Всѧ́кое дыха́нїе. Є҆ѵⷢ҇лїе матѳе́а, зача́ло м҃г.
По н҃-мъ ѱалмѣ̀ стїхи́ра, самогла́сна, гла́съ ѕ҃:
Прїиди́те, всѝ лю́дїе, хвалꙋ̀ принесе́мъ бл҃же́нномꙋ, вопїю́ще си́це: ра́дꙋйсѧ, пресвѣ́тлый сто́лпе, просвѣща́ѧ на́съ чꙋде́съ свѣтлостьмѝ: ра́дꙋйсѧ, ро́сный ѻ҆́блаче, пла́мень погаша́ѧй страсте́й, и҆ ѡ҆роша́ѧй вѣ́рныхъ мы̑сли, бжⷭ҇твенный а҆леѯа́ндре.
Канѡ́нъ пра́здника, со і҆рмосо́мъ на ѕ҃: И҆ ст҃о́мꙋ два̀ канѡ́на, на и҃. А҆́ще ли внѣ̀ попра́зднства и҆зво́литъ настоѧ́тель пѣ́ти благовѣ́рномꙋ кнѧ́зю а҆леѯа́ндрꙋ, пое́мъ канѡ́нъ бцⷣѣ, со і҆рмосо́мъ на ѕ҃. Гла́съ в҃. Нетре́нꙋ, неѻбы́чнꙋ:
Канѡ́нъ а҆леѯа́ндрꙋ.
Гла́съ д҃. Пѣ́снь а҃. І҆рмо́съ:
Мо́рѧ чермнꙋ́ю пꙋчи́нꙋ, невла́жными стопа́ми, дре́внїй пѣшеше́ствовавъ і҆и҃ль, крестоѻбра́зными мѡѷсе́овыма рꙋка́ма, а҆мали́ковꙋ си́лꙋ въ пꙋсты́ни побѣди́лъ є҆́сть.
Прїи́мша въ свое́мъ се́рдцы, бл҃же, твою̀ благода́ть дꙋхо́внꙋю тве́рдѡ премꙋ́драгѡ повелѣ́нїѧ, и҆ въ дꙋ́шы (с. 457) благочести́выхъ вложи́вшаго, похвала́ми да́ждь ᲂу҆блажи́ти а҆леѯа́ндра пресла́внаго.
Свѣти́льниче многосвѣ́тлый рѡссі́йскїѧ землѝ, чꙋдесы̀ ꙗ҆́коже со́лнце второ́е сїѧ́ѧ, всѣ́хъ на́съ помина́й, соверша́ющихъ па́мѧть твою̀, а҆леѯа́ндре блаже́нне.
Це́ркве бы́лъ є҆сѝ хрⷭ҇то́вы красота̀, бл҃же́нне, пѣ́нїемъ бо сїю̀ ᲂу҆краси́лъ є҆сѝ, пресла́вне. и҆ ны́нѣ мо́лимъ тѧ̀: свободи́ ны ѿ всѧ́кїѧ бра́ни бори́телѧ, пою́щыѧ тѧ̀, а҆леѯа́ндре.
Бг҃оро́диченъ:
Ра́дꙋйсѧ, благода́ти и҆сто́чниче, ра́дꙋйсѧ, лѣ́ствице и҆ две́рь нбⷭ҇наѧ, ра́дꙋйсѧ, свѣти́льниче, и҆ ста́мно злата́ѧ, и҆ горо̀ несѣко́маѧ, дв҃о, жизнода́вца хрⷭ҇та̀ мі́рꙋ ро́ждшаѧ.
Дрꙋгі́й канѡ́нъ ст҃о́мꙋ.
Гла́съ и҃. Пѣ́снь а҃. І҆рмо́съ:
Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.
Досто́йными похвала́ми воспѣ́ти пресла́внаго чꙋдотво́рца, ᲂу҆́мъ и҆ смы́слъ да́рꙋй мѝ, хрⷭ҇тѐ бж҃е, ꙗ҆́кѡ да воспою̀ ра́дꙋѧсѧ па́мѧть є҆гѡ̀.
Пѣ́сньми и҆ пѣ́ньми дꙋхо́вными восхва́лимъ бл҃же́ннаго, и҆ честнꙋ́ю є҆гѡ̀ и҆ многоцѣле́бнꙋю ра́кꙋ ѡ҆бстоѧ́ще любе́знѡ ѡ҆блобыза́емъ, и҆ си́це вопїе́мъ: ра́дꙋйсѧ, ѻ҆те́чествꙋ твоемꙋ̀ пресвѣ́тлый свѣти́льниче.
Бг҃омꙋ́дре а҆леѯа́ндре, а҆́ще тѧ̀ и҆ напослѣ́докъ лѣ́тъ новопросвѣще́ннаѧ рѡссі́йскаѧ страна̀ возрастѝ, но дре́внихъ че́сти сподо́билсѧ є҆сѝ, дарова́нїе чꙋде́съ досто́йнѡ прїе́мъ.
Бг҃оро́диченъ:
Закѡ́нъ кромѣ̀ є҆сте́ственныхъ, дв҃о, родила̀ є҆сѝ законода́вца бг҃а, чл҃вѣ́ка бы́вша: того̀ ꙗ҆́кѡ бл҃га молѝ, всенепоро́чнаѧ, на̑ша беззакѡ́нїѧ презрѣ́ти.
Катава́сїа: Хрⷭ҇то́съ ражда́етсѧ:
Пѣ́снь г҃. І҆рмо́съ:
Весели́тсѧ ѡ҆ тебѣ̀ цр҃ковь твоѧ̀, хрⷭ҇тѐ, зовꙋ́щи: ты̀ моѧ̀ крѣ́пость, гдⷭ҇и, и҆ прибѣ́жище, и҆ ᲂу҆твержде́нїе.
Во ве́сь мі́ръ про́йде сла́ва чꙋде́съ твои́хъ, блаже́нне, и҆́миже просвѣти́лъ є҆сѝ вселе́ннꙋю, ѿ всѣ́хъ напа́стей и҆збавлѧ́ѧ при́снѡ.
Благочести́вагѡ и҆ вѣнцено́снаго а҆леѯа́ндра, соше́дшесѧ по достоѧ́нїю восхва́лимъ, ꙗ҆́кѡ чꙋде́съ пода́телѧ ѻ҆би́льнаго, и҆ гдⷭ҇ꙋ молѧ́щасѧ ѡ҆ всѣ́хъ на́съ.
И҆сто́чникъ чꙋде́съ гро́бъ тво́й ꙗ҆ви́сѧ неисчерпа́емый, ѿ негѡ́же рѣ́ки и҆сцѣле́нїй и҆злива́еши вѣ́рнѡ па́мѧть твою̀ творѧ́щымъ, бл҃же́нне.
Бг҃оро́диченъ:
Ты̀ є҆ди́на на землѝ, преесте́ственныхъ бл҃ги́хъ хода́таица, мт҃и бж҃їѧ, была̀ є҆сѝ: тѣ́мъ тѝ, ра́дꙋйсѧ, зове́мъ.
И҆́нъ. І҆рмо́съ:
Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.
Свѣти́льникъ свѣ́та ꙗ҆ви́лсѧ є҆сѝ, а҆леѯа́ндре бжⷭ҇твенный, недꙋ́гѡвъ глꙋбо́кꙋю тмꙋ̀ разрꙋша́ѧ всегда̀, заре́ю свѣ́тлою чꙋде́съ, премꙋ́дре.
Престо́лꙋ предстои́ши благода́ти, со всѣ́ми а҆́гг҃лы ра́дꙋѧсѧ дне́сь, и҆ мі́рꙋ и҆сцѣле́нїѧ раздава́ѧ бога́тство, спасѝ всѣ́хъ на́съ моли́твами твои́ми, блаже́нне.
Житїѧ̀ твоегѡ̀ свѣ́тлость, прпⷣбне, всѣ̑мъ бг҃ъ ꙗ҆́вѣ показа̀, возжже́нїемъ свѣщѝ ᲂу҆ гро́ба твоегѡ̀. тѣ́мже прибѣга́ющїи къ тебѣ̀ съ вѣ́рою, всѝ просвѣща́ютсѧ.
Бг҃оро́диченъ:
Ꙗ҆́кѡ вои́стиннꙋ гдⷭ҇и воцр҃и́сѧ въ црⷭ҇твїе неѿпа́дающее, и҆ ѡ҆блече́сѧ ѱало́мски и҆зъ тебє̀, бг҃ома́ти, въ кра́сное благолѣ́пїе, пло́ть ст҃ꙋ́ю: є҆́юже сме́рть прїѧ́тъ, и҆ разрꙋшѝ є҆ѧ̀ ца́рство.
Сѣда́ленъ, гла́съ и҃:
Ꙗ҆́кѡ ѕвѣзда̀ многосвѣ́тлаѧ ѿ восто́ка произше́дъ, ꙗ҆ви́лсѧ є҆сѝ свѣ́тлагѡ ра́ди житїѧ̀ твоегѡ̀, и҆ чистоты̀ дꙋше́вныѧ и҆ тѣле́сныѧ сосꙋ́дъ ст҃а́гѡ дх҃а: и҆ сегѡ̀ ра́ди по ᲂу҆спе́нїи твое́мъ ѿ мно́гихъ лѣ́тъ во гро́бѣ нетлѣ́нны ѡ҆брѣто́шасѧ ст҃ы̑ѧ твоѧ̑ мо́щи ѿ ни́хже и҆сточа́еши рѣ́ки чꙋде́съ и҆сцѣле́нїй вѣ́рнѡ зовꙋ́щымъ тѝ: ра́дꙋйсѧ, благовѣ́рный вели́кїй кнѧ́же а҆леѯа́ндре.
Два́жды.
Сла́ва, и҆ ны́нѣ, пра́здника, гла́съ д҃:
Непоро́чнаѧ а҆́гница, и҆ нескве́рный черто́гъ, въ до́мъ бж҃їй бцⷣа марїа́мъ съ весе́лїемъ вво́дитсѧ пресла́внѡ, ю҆́же а҆́гг҃ли бж҃їи дорѷно́сѧтъ вѣ́рнѡ, и҆ всѝ вѣ́рнїи блажа́тъ при́снѡ, и҆ благода́рственнѡ пою́тъ є҆́й непреста́ннѡ ве́лїимъ гла́сомъ: на́ша сла́ва и҆ спасе́нїе ты̀ є҆сѝ, всенепоро́чнаѧ.
А҆́ще ли нѣ́сть попра́зднства, глаго́лемъ: Сла́ва, и҆ ны́нѣ, бг҃оро́диченъ: Ꙗ҆́кѡ всенепоро́чнаѧ невѣ́ста творцꙋ̀:
Пѣ́снь д҃. І҆рмо́съ:
Вознесе́на тѧ̀ ви́дѣвши цр҃ковь на крⷭ҇тѣ̀, сл҃нце пра́ведное, ста̀ въ чи́нѣ свое́мъ, досто́йнѡ взыва́ющи: сла́ва си́лѣ твое́й, гдⷭ҇и.
Кто̀ любо́вь твою̀ и҆ ми́лость ко всѣ̑мъ человѣ́кѡмъ, па́че же къ ни́щымъ и҆зглаго́летъ; и҆ по сме́рти ᲂу҆́бѡ ꙗ҆́кѡ жи́въ просте́рлъ є҆сѝ рꙋ́кꙋ твою̀, и҆ прїѧ́лъ є҆сѝ ѿ і҆ера́рха сви́токъ грѣхѡ́въ проще́нїѧ.
Дне́сь де́нь ст҃а́гѡ пра́зднственный, мнѡ́гїѧ созыва́етъ на весе́лїе дꙋхо́вное и҆ трапе́зꙋ, и҆ пи́щꙋ нетлѣ́нныѧ жи́зни, бжⷭ҇твеннагѡ наслажде́нїѧ.
Къ бжⷭ҇твенномꙋ свѣ́тꙋ ны́нѣ преста́вилсѧ є҆сѝ, свѣ́та сн҃ъ возлю́бленъ бы́въ, въ ра́дости и҆ красотѣ̀, съ ли̑ки а҆́гг҃льскими ны́нѣ ра́достнѡ ликꙋ́еши, блаже́нне.
Бг҃оро́диченъ:
Свѣ́та твоегѡ̀ блиста́ньми ѡ҆зарѝ, ѻ҆трокови́це всенепоро́чнаѧ, є҆́же въ нощѝ страсте́й и҆скꙋшє́нїи ѡ҆держи́мое се́рдце моѐ, пра́вды сл҃нце свѣ́тъ возсїѧ́вши.
И҆́нъ. І҆рмо́съ:
Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.
Заре́ю трисо́лнечныѧ благода́ти сїѧ́ѧ свѣ́тлѣ тво́й пра́здникъ творѧ́щихъ ѡ҆зарѝ, и҆ стра́стнагѡ ѡ҆мраче́нїѧ де́мѡнскагѡ и҆зба́ви, а҆леѯа́ндре пресла́вне.
И҆сточи́лъ є҆сѝ рѣ́ки чꙋде́съ, блаже́нне, вѣ́рныхъ напаѧ́ющыѧ сердца̀, и҆ мꙋ̑тныѧ во́ды многобо́жїѧ и҆зсꙋша́ющыѧ.
А҆рхїерє́и и҆ свѧще́нницы, мона́си и҆ прості́и, и҆ ста́рцы со ю҆́нотами, и҆ ве́сь во́зрастъ свѣ́тлѡ пред̾игра́йте, и҆ па́мѧть бл҃же́ннагѡ въ пѣ́снехъ возвели́чите.
Бг҃оро́диченъ:
И҆мѣ́ю тѧ̀ помо́щницꙋ, и҆ не постыждꙋ́сѧ, пречⷭ҇таѧ мт҃и бж҃їѧ. и҆мѣ́ю тѧ̀ предста́тельницꙋ, и҆ вра̑гъ мои́хъ не ᲂу҆бою́сѧ.
Пѣ́снь є҃. І҆рмо́съ:
Ты̀, гдⷭ҇и, мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ, вѣ́рою воспѣва́ющыѧ тѧ̀.
Досточꙋ́днаѧ и҆ пресла́внаѧ па́мѧть твоѧ̀ возсїѧ̀ въ рѡссі́йстѣй землѝ, блаже́нне, и҆ ра́достнѡ вѣ́рныхъ весели́тъ собо́ры.
Ѿверзо́шасѧ тебѣ̀ двє́ри є҆дє́мскїѧ, и҆ несказа́ненъ свѣ́тъ и҆ трисїѧ́ненъ возсїѧ̀, бл҃же́нне, въ неподви́жнѣмъ црⷭ҇твїи нбⷭ҇нѣмъ, и҆ пра́ведныхъ весе́лїе прїѧ́лъ є҆сѝ ра́дꙋѧсѧ.
Ны́нѣ а҆леѯа́ндръ вели́кїй, сирѡ́тъ и҆ вдѡ́въ ми́лостивый печа́льникъ, ѻ҆те́чествїе своѐ и҆ всѧ̑ вкꙋ́пѣ ꙗ҆́вѣ созыва́етъ: прїиди́те собра́вшесѧ, ꙗ҆́кѡ ѻ҆́бщемꙋ застꙋ́пникꙋ свѣ́тлѡ торжествꙋ́емъ.
Бг҃оро́диченъ:
Сы́й въ зра́цѣ бж҃їи, пребжⷭ҇твенный всели́сѧ во чре́во твоѐ, въ зра́къ мо́й ѡ҆блече́сѧ гдⷭ҇ь, пренепоро́чнаѧ.
И҆́нъ. І҆рмо́съ:
Оу҆́тренююще, вопїе́мъ тѝ, гдⷭ҇и, спаси́ ны: ты́ бо є҆сѝ бг҃ъ на́шъ, ра́звѣ тебє̀ и҆но́гѡ не вѣ́мы.
Прїѧ́лъ є҆сѝ и҆сцѣле́нїй благода́ть, а҆леѯа́ндре сла́вне, сꙋ́щымъ въ бѣда́хъ подава́еши здра́вїе твои́мъ застꙋпле́нїемъ: тѣ́мъ ра́тныхъ де́рзость низложѝ, и҆ мі́рꙋ подава́й чꙋдеса̀.
Ꙗ҆́кѡ ѕвѣзда̀ свѣтла̀ ꙗ҆ви́сѧ непреле́стнаѧ, плѣне́нныхъ свободи́тель, и҆ ни́щихъ богати́тель, и҆ болѧ́щихъ вра́чь, рꙋсѝ побо́рникъ, и҆ гра́да на́шегѡ ᲂу҆твержде́нїе.
Ꙗ҆ви́сѧ въ рѡссі́йстѣй землѝ чꙋдотво́рецъ пресла́венъ а҆леѯа́ндръ блаже́нный, ꙗ҆́кѡ всесвѣ́телъ свѣти́льникъ сїѧ́ѧ въ все́мъ мі́рѣ, и҆ во мра́цѣ страсте́й ѡ҆зарѧ́ѧ всѧ̑.
Бг҃оро́диченъ:
Ме́ртвости и҆ тлѝ и҆зба́вила є҆сѝ человѣ́чество, є҆стество́мъ бо жизнода́вца и҆ бг҃а безъ сѣ́мене родила̀ є҆сѝ, дв҃о всенепоро́чнаѧ, на благодѣѧ́нїе восхвалѧ́ющихъ тѧ̀ вѣ́рнѡ.
Пѣ́снь ѕ҃. І҆рмо́съ:
Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.
Твоѧ̀ ст҃а́ѧ па́мѧть, а҆леѯа́ндре, вселе́ннꙋю весели́тъ, созыва́ющи вѣ̑рныѧ въ честны́й хра́мъ тво́й, въ не́мже ны́нѣ ра́достїю совокꙋ́пльшесѧ, тѧ̀ мо́лимъ, ꙗ҆зы́ческагѡ наше́ствїѧ и҆зба́ви лю́ди твоѧ̑, пресла́вне.
Весе́лїѧ дне́сь всѧ̀ и҆спо́лнисѧ рѡссі́йскаѧ землѧ̀, въ наро́читый де́нь пра́здника пресла́внагѡ чꙋдотво́рца, а҆леѯа́ндра блаже́ннагѡ: соблюда́етъ бо ѻ҆те́чество своѐ вы́нꙋ ненавѣ́тно.
Сирѡ́тъ и҆ вдѡ́въ застꙋ́пника, и҆ въ бѣда́хъ непобори́маго помо́щника, пѣ́сньми а҆леѯа́ндра ᲂу҆блажи́мъ сла́вѧще: пра́зднꙋющихъ бо па́мѧть є҆гѡ̀ ве́селѡ, ѿ бѣ́дъ и҆збавлѧ́етъ и҆ скорбе́й.
Бг҃оро́диченъ:
Ст҃ы́й і҆и҃съ всели́сѧ во ᲂу҆тро́бꙋ твою̀, во ст҃ы́хъ, дв҃о, почива́ѧй, и҆ прославлѧ́ѧй вѣ́рою и҆́стинною сего̀, ѻ҆трокови́це, сла́вѧщыѧ.
И҆́нъ. І҆рмо́съ:
Ѡ҆чи́сти мѧ̀, сп҃се, мнѡ́га бо беззакѡ́нїѧ моѧ̑, и҆ и҆зъ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е спасе́нїѧ моегѡ̀.
Ѿ пречестна́гѡ ко́рене и҆зра́слъ є҆сѝ вѣ́твь, пресла́вне, и҆ бл҃гоче́стнѡ на землѝ пожи́лъ є҆сѝ, и҆ прїѧ́телище чи́сто дх҃а ꙗ҆ви́лсѧ є҆сѝ, ѡ҆свѧща́ѧ вѣ́рою притека́ющыѧ тѝ, бл҃же́нне.
Добродѣ́телємъ поло́жника, и҆ благочести̑вымъ кнѧзє́мъ ᲂу҆добре́нїе, цр҃ковь сла́витъ тѧ̀, и҆ воспѣва́етъ, блаже́нне: моли́твами твои́ми пода́ждь чтꙋ́щымъ любо́вїю до́блєсти твоѧ̑ и҆ борє́нїѧ, лю́тыхъ прегрѣше́нїй ѡ҆ставле́нїе.
И҆́же въ бѣда́хъ и҆ въ ско́рбехъ сꙋ́щїи къ ра́цѣ твое́й притека́юще, прїе́млютъ честна̑ѧ дарова̑нїѧ ѿ въ тебѣ̀ живꙋ́щїѧ благода́ти: ты́ бо мі́рꙋ при́снѡ и҆сточа́еши и҆сцѣле́нїе.
Бг҃оро́диченъ:
Сꙋ́щи прест҃ы́й хра́мъ, бцⷣе, и҆сто́чникъ родила̀ є҆сѝ, пренепоро́чнаѧ, неисчерпа́емый, влⷣчце.
Конда́къ, гла́съ и҃. Подо́бенъ: Ꙗ҆́кѡ нача́тки:
Ꙗ҆́кѡ ѕвѣздꙋ́ тѧ пресвѣ́тлꙋ почита́емъ, ѿ восто́ка возсїѧ́вшꙋю и҆ на за́падъ прише́дшꙋю: всю́ бо странꙋ̀ сїю̀ чꙋдесы̀ и҆ добро́тою ѡ҆богаща́еши, и҆ просвѣща́еши вѣ́рою чтꙋ́щыѧ па́мѧть твою̀, а҆леѯа́ндре блаже́нне: сегѡ̀ ра́ди дне́сь пра́зднꙋемъ твоѐ ᲂу҆спе́нїе, лю́дїе твоѝ сꙋ́щїи. молѝ спастѝ ѻ҆те́чество твоѐ и҆ всѧ̑ притека́ющыѧ къ ра́цѣ моще́й твои́хъ, и҆ вѣ́рнѡ вопїю́щыѧ тѝ: ра́дꙋйсѧ, гра́дꙋ на́шемꙋ ᲂу҆твержде́нїе.
І҆́косъ:
Ве́лїй чꙋдотво́рецъ ꙗ҆ви́лсѧ є҆сѝ рѡссі́йскїѧ землѝ, блаже́нный а҆леѯа́ндре, неви́димѡ хрⷭ҇то́вы лю́ди посѣща́ѧ, и҆ и҆сцѣлє́нїѧ подава́ѧ бога́тнѡ всѣ̑мъ ѿ дꙋшѝ приходѧ́щымъ, и҆ согла́снѡ вопїю́щымъ си́це: ра́дꙋйсѧ, сто́лпе пресвѣ́тлый, просвѣща́ѧ на́съ чꙋде́съ свѣтлостьмѝ. ра́дꙋйсѧ, велехва́льнаго кралѧ̀ побѣди́вый посо́бїемъ бж҃їимъ. ра́дꙋйсѧ, свободи́вый гра́дъ пско́въ ѿ невѣ́рныхъ. ра́дꙋйсѧ, латі̑нскаѧ ᲂу҆чє́нїѧ презрѣ́вый, и҆ пре́лесть и҆́хъ въ ничто́же вмѣни́вый. ра́дꙋйсѧ, ꙗ҆́кѡ воспрїѧ́лъ є҆сѝ въ тлѣ́нныхъ мѣ́стѡ нетлѣ̑ннаѧ. ра́дꙋйсѧ, свѣ́та непристꙋ́пнагѡ зри́телю. ра́дꙋйсѧ, ꙗ҆́кѡ ликꙋ́еши со а҆́гг҃лы. ра́дꙋйсѧ, ѻ҆́блаче ро́сный, вѣ́рныхъ мы̑сли ѡ҆роша́ѧй. ра́дꙋйсѧ, те́мныхъ страсте́й прогони́телю. ра́дꙋйсѧ, рѡссі́йстѣй землѝ застꙋ́пниче, ра́дꙋйсѧ, гра́дꙋ на́шемꙋ застꙋпле́нїе.
Пѣ́снь з҃. І҆рмо́съ:
Въ пе́щи а҆враа́мстїи ѻ҆́троцы персі́дстѣй, любо́вїю благоче́стїѧ па́че, не́жели пла́менемъ ѡ҆палѧ́еми, взыва́хꙋ: бл҃гослове́нъ є҆сѝ въ хра́мѣ сла́вы твоеѧ̀, гдⷭ҇и.
Дне́сь це́рковь хрⷭ҇то́ва пра́зднꙋющи а҆леѯа́ндрово торжество̀ бы́вшее ѡ҆ бз҃ѣ, соше́дшымсѧ вои́стиннꙋ и҆сточа́етъ и҆сцѣле́нїе, прилѣ́жнѡ молѧ́щымсѧ, и҆ любо́ю пою́щымъ є҆го̀.
Во всѣ́хъ страна́хъ произы́де вѣща́нїе: ꙗ҆́кѡ на́шегѡ гра́да ꙗ҆ви́сѧ чꙋдотво́рецъ пресла́венъ, и҆сточа́ѧ и҆сцѣле́нїй мно́жество всѣ̑мъ просѧ́щымъ те́плѣ.
Дне́сь весе́лїѧ и҆сполнѧ́етсѧ хра́мъ бг҃а на́шегѡ, въ не́мже лежа́тъ честны̑ѧ мо́щи бл҃же́ннагѡ, и҆ всѝ притека́ющїи ѡ҆блобыза́ютъ со стра́хомъ свѧтꙋ́ю ра́кꙋ пресла́внагѡ, и҆ прїе́млютъ и҆сцѣле́нїе.
Бг҃оро́диченъ:
Вы́шнѧгѡ ѡ҆свѧще́нное бж҃їе селе́нїе, ра́дꙋйсѧ, тобо́ю бо даде́сѧ ра́дость, бцⷣе, вопїю́щымъ тѝ: бл҃гослове́на ты̀ въ жена́хъ є҆сѝ, всенепоро́чнаѧ влⷣчце.
И҆́нъ. І҆рмо́съ:
Ѿ і҆ꙋде́и доше́дше, ѻ҆́троцы въ вавѷлѡ́нѣ и҆ногда̀, вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е, бл҃гослове́нъ є҆сѝ.
Ꙗ҆́кѡ ѕвѣзда̀ сїѧ́ѧ краснѡ̀, бл҃же́нне, заре́ю добродѣ́телей, и҆ мнѡ́гимъ бы́сть просвѣще́нїе. тѣ́мъ и҆ на́съ просвѣтѝ вопїю́щихъ тѝ: ра́дꙋйсѧ, а҆леѯа́ндре благоче́стне.
Ны́нѣ сте́кшесѧ ѿ всѣ́хъ стра́нъ и҆ градѡ́въ, свѧще́нницы, и҆ мона́си, и҆ прості́и, бога́тїи, и҆ ᲂу҆бо́зїи, и҆ вкꙋ́пѣ всѝ ра́дꙋющесѧ хвалꙋ̀ воздади́мъ хрⷭ҇тꙋ̀ и҆ ᲂу҆го́дникꙋ є҆гѡ̀ а҆леѯа́ндрꙋ пресла́вномꙋ.
Чꙋдесы̀ ᲂу҆́бѡ твои́ми ꙗ҆́кѡ цвѣ́тъ процвѣ́лъ є҆сѝ, блаже́нне: и҆ и҆сцѣлє́нїѧ подава́еши притека́ющымъ въ кро́въ тво́й, мꙋ́дре и҆ досточꙋ́дне.
Бг҃оро́диченъ:
Ѿ дѣ́вственныхъ ложе́снъ твои́хъ вопло́щсѧ бг҃ъ, и҆ ꙗ҆ви́сѧ на спасе́нїе на́ше. тѣ́мже тѧ̀ мт҃рь вѣ́дꙋще, бцⷣе, правовѣ́рнѡ вопїе́мъ є҆мꙋ̀: ѻ҆тє́цъ на́шихъ бж҃е, бл҃гослове́нъ є҆сѝ.
Пѣ́снь и҃. І҆рмо́съ:
Рꙋ́цѣ распросте́ръ данїи́лъ, львѡ́въ зїѧ̑нїѧ въ ро́вѣ затчѐ, ѻ҆́гненнꙋю же си́лꙋ ᲂу҆гаси́ша, добродѣ́телїю препоѧ́савшесѧ, благоче́стїѧ рачи́тели ѻ҆́троцы, взыва́юще: бл҃гослови́те, всѧ̑ дѣла̀ гдⷭ҇нѧ, гдⷭ҇а.
А҆́гг҃льстїи чи́ни хва́лѧтъ тѧ̀, пресла́вне, и҆ человѣ́честїи ро́ди пою́тъ непреста́ннѡ, творѧ́ще вѣ́рнѡ па́мѧть твою̀, а҆леѯа́ндре великоимени́те.
Тебѐ въ чꙋдесѣ́хъ сла́вне рѡссі̑йскимъ страна́мъ показа̀ бг҃ъ, а҆леѯа́ндре, и҆ ᲂу҆краси́ тѧ нбⷭ҇ными дармѝ: того̀ молѝ поми́ловати всѣ́хъ на́съ.
Побѣ́ды и҆стинноимени́тъ, вои́стиннꙋ вѣ̑рнымъ лю́демъ въ бѣда́хъ, и҆ крѣ́покъ помо́щникъ ꙗ҆ви́лсѧ є҆сѝ, а҆леѯа́ндре бл҃же́нне.
Бг҃оро́диченъ:
Свѧще́нный тѧ̀ прⷪ҇ро́къ благоѻбра́знѡ проповѣ́да, две́рь, и҆ го́рꙋ, и҆ сѣ́нь, и҆ зе́млю ст҃ꙋ́ю, и҆ ѻ҆́блакъ свѣ́та, и҆зъ негѡ́же во тмѣ̀ сꙋ́щымъ возсїѧ̀ сл҃нце, дв҃о, є҆ди́нъ свѣтода́вецъ.
И҆́нъ. І҆рмо́съ:
Бг҃оглаго́ливїи ѻ҆́троцы въ пещѝ, со ѻ҆гне́мъ пла́мень попира́юще, поѧ́хꙋ: благослови́те, дѣла̀ гдⷭ҇нѧ, гдⷭ҇а.
Ꙗ҆́кѡ ᲂу҆́тро, ꙗ҆́кѡ де́нь свѣ́тлый тво́й пра́здникъ ꙗ҆ви́сѧ, просвѣща́ѧ на̑ша сердца̀, и҆ всѣ́хъ съ вѣ́рою восхвалѧ́ющихъ тѧ̀, а҆леѯа́ндре пресла́вне.
Де́нь спасе́нїѧ, и҆ пра́здникъ весе́лїѧ наста̀, стеце́мсѧ вѣ́рнїи, ѡ҆чи́стивше вкꙋ́пѣ дꙋ́шы и҆ тѣлеса̀: се́ бо на́съ призыва́етъ а҆леѯа́ндръ бжⷭ҇твенный.
Стрꙋѧ̀ происхо́дитъ ѿ ра́ки твоеѧ̀, а҆леѯа́ндре, и҆сцѣле́нїй всѧ́ческихъ, и҆ ѡ҆мыва́етъ сквє́рны страсте́й, и҆ гноє́нїѧ лю́тыхъ ѡ҆чища́етъ, и҆ всѣ́хъ вѣ́рныхъ напаѧ́етъ сердца̀ любо́вїю чтꙋ́щихъ тѧ̀, пресла́вне.
Бг҃оро́диченъ:
Ѻ҆́бразы носѧ́щи дре́вле ржⷭ҇тва̀ твоегѡ̀, дв҃о мт҃и, пе́щь ᲂу҆́бѡ ю҆́ношей не ѡ҆палѝ, та́кожде и҆ ѻ҆́гнь бжⷭ҇твенный ᲂу҆тро́бы твоеѧ̀, чⷭ҇таѧ.
Пѣ́снь ѳ҃. І҆рмо́съ:
Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀. тѣ́мъ веселѧ́щесѧ, тѧ̀, бцⷣе, велича́емъ.
Красе́нъ тѣ́ломъ и҆ дꙋше́ю, и҆ благоче́стїемъ сїѧ́ѧ, сла́вне, бжⷭ҇твеннагѡ ра́зꙋма, ѻ҆рга́нъ бы́лъ є҆сѝ ст҃а́гѡ дх҃а: и҆ по сме́рти ᲂу҆́бѡ къ безсме́ртной жи́зни, и҆ неконча́емомꙋ бл҃же́нствꙋ преше́лъ є҆сѝ ра́дꙋѧсѧ, а҆леѯа́ндре бг҃омꙋ́дре.
Ꙗ҆́кѡ свѣтоза́рное, блаже́нне, со́лнце возсїѧ́въ ѿ за́пада, и҆ всю̀ зарѧ́ми благоче́стїѧ рѡссі́йскꙋю зе́млю просвѣти́лъ є҆сѝ, и҆ ѿгна́лъ є҆сѝ тмꙋ̀ глꙋбо́кꙋю є҆реті́чествꙋющихъ, а҆леѯа́ндре пресла́вне.
Твоѐ ст҃о́е преставле́нїе дне́сь свѣ́тлѡ пра́зднꙋемъ: и҆спо́лни ра́дости и҆ весе́лїѧ восхвалѧ́ющыѧ тѧ̀, а҆леѯа́ндре великоимени́те.
Бг҃оро́диченъ:
Свѣ́томъ мѧ̀ твоегѡ̀ милосе́рдїѧ, во тмѣ̀ неразꙋ́мїѧ лежа́щагѡ ѡ҆зарѝ, є҆ди́на свѣтода́вца ро́ждшаѧ, и҆зба́вителѧ и҆ бг҃а, ст҃ы́хъ вѣнча́вшаго.
И҆́нъ. І҆рмо́съ:
Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее небе́съ. тѣ́мъ тѧ̀ бцⷣꙋ, а҆́гг҃лѡвъ и҆ человѣ̑къ чинонача̑лїѧ велича́ютъ.
Ве́лїй щи́тъ и҆ крѣ́пость въ рѡссі́йстѣй землѝ, а҆леѯа́ндре, ѡ҆брѣ́лсѧ є҆сѝ, правосла́вномꙋ же наро́дꙋ на́шемꙋ, похвале́нїе и҆ сла́ва во всѣ́хъ ꙗ҆зы́цѣхъ. и҆ ны́нѣ мо́лимсѧ тѝ: сохранѧ́й ѻ҆те́чество твоѐ ѿ ꙗ҆зы́ка чꙋжда́гѡ.
Незаходи́магѡ свѣ́та лꙋча́ми, во тмѣ̀ сꙋ́щымъ сїѧ́ѧ, сла́вне, къ просвѣще́нїю весе́лїѧ наста́ви ны̀, пою́щыѧ тѧ̀.
Бл҃же́нне а҆леѯа́ндре, ка́кѡ тѧ̀ возмо́жемъ воспѣ́ти досто́йнѡ; не мо́жетъ бо ѧ҆зы́къ человѣ́ческїй и҆зглаго́лати твоѧ̑ разли̑чнаѧ и҆сцѣлє́нїѧ, и҆ мнѡ́гаѧ дарова̑нїѧ всѣ̑мъ человѣ́кѡмъ.
Бг҃оро́диченъ:
Ꙗ҆́кѡ ᲂу҆́тро тє́мнымъ и҆ блꙋдѧ́щымъ, дв҃о, возсїѧ̀ пра́вды со́лнце хрⷭ҇то́съ: є҆го́же на рꙋка́хъ твои́хъ носи́ла є҆сѝ, чⷭ҇таѧ.
Свѣти́ленъ. Подо́бенъ: Жєны̀ ᲂу҆слы́шите:
Слы́шана бы́сть во всѣ́хъ страна́хъ превели́каѧ сла́ва твоѧ̀, и҆ тогда̀ жєны̀ мѡаві̑тскїѧ страша́хꙋ дѣ́ти своѧ̑ гро́знымъ твои́мъ и҆́менемъ. и҆ ны́нѣ, бл҃же́нне, врагѝ на́шѧ неви́димѡ ᲂу҆страша́й, ѡ҆полча́ющыѧсѧ на хрⷭ҇толюби́вое твоѐ во́инство.
Два́жды.
Сла́ва, и҆ ны́нѣ, пра́здника.
А҆́ще ли по ѿда́нїи пра́здника пое́тсѧ ст҃о́мꙋ: глаго́лемъ, Сла́ва, и҆ ны́нѣ, бг҃оро́диченъ се́й:
Совѣ́та вели́кагѡ а҆́гг҃ла ѻ҆́ч҃а родила̀ є҆сѝ хрⷭ҇та̀, препѣ́таѧ ѻ҆трокови́це, цр҃ѧ̀ сла́вы: є҆гѡ́же крⷭ҇тъ а҆пⷭ҇ли проповѣ́давше, просвѣти́ша ꙗ҆зы́ки, и҆ наꙋчи́ша тѧ̀ бцⷣꙋ сла́вити, и҆ покланѧ́тисѧ твоемꙋ̀ ржⷭ҇твꙋ̀.
На хвали́техъ, стїхи̑ры, гла́съ и҃. Поⷣ: Ѽ пресла́внагѡ чꙋдесѐ!
Ѽ пресла́внагѡ чꙋдесѐ! ꙳ сїѧ́нїемъ дх҃а ст҃а́гѡ просвѣ́щсѧ, а҆леѯа́ндре бг҃омꙋ́дре, ꙳ ᲂу҆чє́нїѧ латі̑нскаѧ презрѣ́въ, ꙳ и҆ пре́лесть и҆́хъ ѡ҆бличи́въ, ꙳ и҆ самѣ́хъ ᲂу҆кори́въ, ꙳ и҆ чꙋ́жди вѣ́ры пра́выѧ наре́къ, ꙳ и҆ де́рзость и҆́хъ въ ничто́же вмѣни́въ. ꙳ и҆ сегѡ̀ ра́ди ѿ хрⷭ҇та̀ бг҃а ꙳ прїѧ́лъ є҆сѝ воздаѧ́нїе въ црⷭ҇твїи нбⷭ҇нѣмъ, ꙳ со а҆́гг҃лы ликовствова́нїе, ꙳ и҆ съ пра́ведными ра́дованїе: ꙳ и҆ ны́нѣ молѝ спасти́сѧ дꙋша́мъ на́шымъ.
Ѽ ка́кѡ возмогꙋ̀ досто́йнѡ похвали́ти, ꙳ и҆лѝ ꙗ҆́снѡ и҆зглаго́лати пресла̑внаѧ чꙋдеса̀ ꙳ блаже́ннагѡ и҆ сла́внагѡ а҆леѯа́ндра; ꙳ подае́тъ бо разли̑чнаѧ и҆сцѣлє́нїѧ, ꙳ не то́кмѡ приходѧ́щымъ къ ра́цѣ моще́й є҆гѡ̀, ꙳ но и҆ въ да́льнихъ страна́хъ ꙳ призыва́ющихъ є҆гѡ̀ никогда́же ѡ҆ставлѧ́етъ. тѣ́мъ и҆ повсю́дꙋ хва́льно и҆́мѧ є҆гѡ̀: ꙳ и҆ ны́нѣ мо́литъ ᲂу҆мири́ти мі́ръ, ꙳ и҆ спастѝ всѣ́хъ на́съ.
Ѽ ка́кѡ возмо́жемъ воспѣ́ти ꙳ блаже́ннаго а҆леѯа́ндра, ꙳ ꙗ҆́кѡ а҆пⷭ҇ла, и҆ ꙗ҆́кѡ проповѣ́дника; ꙳ всѧ́ко ᲂу҆́бѡ є҆реті́ческое нече́стїе попра́лъ є҆́сть, ꙳ свое́ же ѻ҆те́чество до́брѣ ᲂу҆пра́вивъ и҆ соблюдѐ, ꙳ хра́мы разорє́нныѧ воздви́гнꙋвъ, пѣ́нїѧ и҆спо́лни, ꙳ и҆ распꙋжє́нныѧ лю́ди собра̀ въ до́мы своѧ̑, ꙳ и҆ ни́щымъ и҆ сирота́мъ и҆ вдова́мъ бы́сть печа́льникъ, ꙳ и҆ въ бѣда́хъ застꙋ́пникъ. и҆ ны́нѣ мо́литъ ѡ҆ спасе́нїи дꙋ́шъ на́шихъ.
Сла́ва, гла́съ в҃:
Прїиди́те, всѝ ꙗ҆зы́цы, восплещи́те рꙋка́ми ликовствꙋ́юще. прїиди́те всѝ рѡссі́йстїи лю́дїе, свѧще́нницы и҆ мона́си же, и҆ прості́и, дꙋхо́внѣ свесели́мсѧ въ наро́читомъ пра́здницѣ блаже́ннагѡ а҆леѯа́ндра, и҆ многоцѣле́бнꙋю є҆гѡ̀ ра́кꙋ ѡ҆бстоѧ́ще, любе́знѡ ѡ҆блобыза́емъ, и҆ того̀ ꙗ҆́кѡ цвѣ́ты пѣ́сньми, и҆ хвала́ми ᲂу҆вѧзе́мъ, рекꙋ́ще: ра́дꙋйсѧ, землѝ рѡссі́йстѣй похвало̀: ра́дꙋйсѧ, сла́вномꙋ гра́дꙋ влади́мїрꙋ ᲂу҆твержде́нїе. ра́дꙋйсѧ, наро́дꙋ правосла́вномꙋ помо́щниче. ра́дꙋйсѧ, ѻ҆те́чествꙋ твоемꙋ̀ застꙋпле́нїе, и҆ моли́твениче ѡ҆ дꙋша́хъ на́шихъ.
И҆ ны́нѣ, пра́здника, гла́съ в҃:
Дне́сь въ хра́мъ приво́дитсѧ всенепоро́чнаѧ дв҃а, ко ѻ҆би́телище всецр҃ѧ̀ бг҃а, и҆ всеѧ̀ жи́зни на́шеѧ пита́телѧ: дне́сь чистѣ́йшаѧ ст҃ы́нѧ, ꙗ҆́кѡ трилѣ́тствꙋющаѧ ю҆́ница во ст҃а̑ѧ ст҃ы́хъ вво́дитсѧ. то́й возопїи́мъ, ꙗ҆́кѡ а҆́гг҃лъ: ра́дꙋйсѧ, є҆ди́на въ жена́хъ бл҃гослове́ннаѧ.
Славосло́вїе вели́кое. И҆ ѿпꙋ́стъ.
На лїтꙋргі́и, Бл҃жє́нна пра́здника пѣ́снь є҃, на д҃: и҆ ст҃а́гѡ пѣ́снь ѕ҃, на д҃. Прокі́менъ, гла́съ з҃: Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми; А҆пⷭ҇лъ къ гала́тѡмъ, зача́ло сг҃і. А҆ллилꙋ́їа, гла́съ ѕ҃: Бл҃же́нъ мꙋ́жъ, боѧ́йсѧ гдⷭ҇а, въ за́повѣдехъ є҆гѡ̀ восхо́щетъ ѕѣлѡ̀. Сті́хъ: Си́льно на землѝ бꙋ́детъ сѣ́мѧ є҆гѡ̀. Є҆ѵⷢ҇лїе матѳе́а, зача́ло м҃г. Прича́стенъ: Въ па́мѧть вѣ́чнꙋю бꙋ́детъ пра́ведникъ: