Мѣ́сѧца тогѡ́же въ к҃г-й де́нь. Слꙋ́жба ст҃и́телю и҆ чꙋдотво́рцꙋ митрофа́нꙋ, пе́рвомꙋ є҆пⷭ҇кпꙋ воро́нежскомꙋ.
На ма́лѣй вече́рни, стїхи̑ры, гла́съ а҃:
Прїиди́те, правосла́вныѧ рѡссі́йскїѧ цр҃кве ча̑да, ᲂу҆бл҃жи́мъ ст҃и́телѧ хрⷭ҇то́ва митрофа́на, и҆́же ѡ҆ ма́лѣ бы́въ вѣ́ренъ, над̾ мно́гими поста́вленъ є҆́сть ѿ (с. 719) нбⷭ҇нагѡ домовлады́ки, да мо́литсѧ непреста́ннѡ ѡ҆ вѣ́рою почита́ющихъ присносла́внꙋю па́мѧть є҆гѡ̀.
Два́жды.
По достоѧ́нїю ѡ҆ тебѣ̀, ст҃и́телю хрⷭ҇то́въ, ра́дꙋемсѧ, и҆ моще́й твои́хъ нетлѣ́нїемъ хва́лимсѧ: пролива́ѧ бо ѿ гро́ба твоегѡ̀ цѣлє́бныѧ стрꙋи̑, ꙗ҆́кѡ во́ды, ми́ръ и҆ бл҃гослове́нїе притека́ющымъ къ тебѣ̀ подае́ши, ꙗ҆́кѡ предстоѧ́тель го́рнїѧ сла́вы, и҆мѣ́ѧй ве́лїю бл҃года́ть ᲂу҆ хрⷭ҇та̀ бг҃а на́шегѡ.
На землѝ пожи́въ а҆́гг҃льски, на нб҃сѝ жи́ти сподо́билсѧ є҆сѝ, и҆ свы́ше на ѻ҆те́чество твоѐ призира́ѧ, низпосыла́еши бл҃года̑тныѧ да́ры, вѣ́рою и҆ любо́вїю всесла́внꙋю твою̀ па́мѧть соверша́ющымъ, и҆сцѣлѧ́ѧ болѣ̑зни дꙋшє́вныѧ и҆ тѣлє́сныѧ мл҃твами твои́ми.
Сла́ва, гла́съ ѕ҃:
Во всечестнѣ́й па́мѧти твое́й, пѣ́сньми и҆ пѣ́ньми ликовствꙋ́юще, бг҃олѣ́пнѡ сла́вимъ всѧ́ческихъ гдⷭ҇а влⷣкꙋ, и҆́же, за многопло́дное дꙋшѝ твоеѧ̀ дѣ́ланїе, многопло́днꙋю бл҃года́ть чꙋдотворе́нїй дарова̀ тебѣ̀, всебл҃же́нне митрофа́не, свы́ше: ты́ же молѝ и҆зба́витисѧ ѿ бѣ́дъ дꙋша́мъ на́шымъ.
И҆ ны́нѣ, пра́здника.
На стїхо́внѣ стїхи̑ры, гла́съ є҃:
И҆мѣ́ѧ свѣти́льникъ нога́ма твои́ма зако́нъ хрⷭ҇то́въ, и҆ во свѣ́тѣ бж҃е́ственныхъ повелѣ́нїй є҆гѡ̀ непреткнове́ннѡ ходѧ̀ и҆ поꙋча́ѧсѧ, жили́ще прест҃ы́ѧ трⷪ҇цы, премꙋ́дре митрофа́не, бы́лъ є҆сѝ. ѿѻнꙋ́дꙋже и҆ на́мъ крѣ́пкїй защи́тникъ ѿ бг҃а показа́лсѧ є҆сѝ, ѕлы̑ѧ дꙋ́хи си́лою ст҃а́гѡ дх҃а прогонѧ́ѧ.
Сті́хъ: Честна̀ пред̾ гдⷭ҇емъ сме́рть прпⷣбныхъ є҆гѡ̀.
Съ правосла́вною рѡссі́йскою цр҃ковїю, въ ми́рѣ правосла́внѡ живꙋ́щихъ ᲂу҆твердѝ, и҆ въ житїѝ и҆́хъ непремѣнѧ́емое бл҃гополꙋ́чїе да́рꙋй, ѡ҆сщ҃е́нномꙋ же а҆рхїере́євъ собо́рꙋ и҆ твоегѡ̀ престо́ла намѣ́стникѡмъ, въ бл҃голѣ́пное бж҃їихъ церкве́й ᲂу҆строе́нїе, мл҃твъ твои́хъ, митрофа́не, по́мощь низпослѝ, просѧ̀ на́мъ грѣхѡ́въ ѡ҆ставле́нїе всѣ́мъ дарова́ти, и҆ ве́лїю млⷭ҇ть.
Сті́хъ: Сщ҃е́нницы твоѝ ѡ҆блекꙋ́тсѧ въ пра́вдꙋ, и҆ прпⷣбнїи твоѝ возра́дꙋютсѧ.
При́зри на славосло́вїе пою́щихъ тѧ̀, и҆ прилѣ̑жныѧ, митрофа́не, прїимѝ ѿ на́съ моли̑твы, и҆ принесѝ ѧ҆̀ къ пренбⷭ҇номꙋ прⷭ҇то́лꙋ вседержи́телѧ, да немо́лчнымъ хода́тайствомъ твои́мъ сп҃се́тъ дꙋ́шы на́шѧ.
Сла́ва, и҆ ны́нѣ, пра́здника.
Тропа́рь, гла́съ д҃:
Пра́вило вѣ́ры и҆ ѻ҆́бразъ кро́тости, сло́вомъ и҆ житїе́мъ, па́ствѣ твое́й, ѻ҆́тче смиренномꙋ́дре митрофа́не, бы́лъ є҆сѝ: тѣ́мже и҆ во свѣ́тлостехъ ст҃ы́хъ со́лнца свѣтлѣ́йше возсїѧ́лъ є҆сѝ, вѣнце́мъ нетлѣ́нїѧ и҆ сла́вы ᲂу҆краша́емь, молѝ хрⷭ҇та̀ бг҃а, странѣ̀ на́шей и҆ гра́дꙋ твоемꙋ̀ въ ми́рѣ сп҃сти́сѧ.
Сла́ва, и҆ ны́нѣ, пра́здника.
На вели́цѣй вече́рни,
Бл҃же́нъ мꙋ́жъ, а҃-й а҆нтїфѡ́нъ.
На Гдⷭ҇и воззва́хъ, стїхи̑ры пра́здника г҃: и҆ ст҃а́гѡ є҃, гла́съ и҃:
Ѻ҆́тче бг҃омꙋ́дре митрофа́не, ты̀ ѿ ю҆́ности возлюби́лъ є҆сѝ взыска́нїе го́рнѧгѡ мі́ра премꙋ́дрости, и҆ є҆гда̀ поще́нїемъ и҆ мл҃твою ѿ бг҃а стѧжа́лъ є҆сѝ ю҆̀, не въ землѝ сокры́лъ є҆сѝ тала́нтъ тво́й, но ᲂу҆чѧ̀ и҆ творѧ̀ па́стырски непреста́ннѡ, во сто̀ кра́тъ ѻ҆́ный ᲂу҆мно́жилъ є҆сѝ, и҆ бы́лъ є҆сѝ і҆ера́рхъ свѣти́льникъ цр҃кви. тѣ́мъ въ воздаѧ́нїе бл҃жє́ннымъ трꙋдѡ́мъ твои̑мъ, вше́дъ ны́нѣ въ ра́дость гдⷭ҇а твоегѡ̀ цр҃ѧ̀ и҆ влⷣки, молѝ ѡ҆ дꙋша́хъ на́шихъ.
Ѻ҆́тче прпⷣбне митрофа́не, ты̀ плѣни́въ ᲂу҆́мъ и҆ се́рдце твоѐ въ послꙋша́нїе бг҃ꙋ, не ѡ҆ себѣ̀, но ѡ҆ сла́вѣ бж҃їей радѣ́лъ є҆сѝ: трꙋжда́ѧсѧ бо въ дѣ́ланїи мы́сленнагѡ вїногра́да хрⷭ҇то́ва, всѧ́кꙋ ро́згꙋ, не творѧ́щꙋю плода̀, жи́вѡ и҆ дѣ́йственнѡ сло́ва бж҃їѧ мече́мъ ѡ҆треблѧ́лъ є҆сѝ, вѣ́рꙋ же и҆ чи̑стыѧ нра́вы, а҆гг҃лонра́внымъ по бз҃ѣ житїе́мъ твои́мъ, ꙗ҆́кѡ ѡ҆пло́томъ соблюда́лъ є҆сѝ. и҆ ны́нѣ вѣнце́мъ нетлѣ́нїѧ ѿ рꙋкѝ гдⷭ҇ни ᲂу҆краси́всѧ, молѝ ѡ҆ дꙋша́хъ на́шихъ.
Ѻ҆́тче бг҃оно́се митрофа́не, ты̀ разꙋ́мнѡ пра́вилъ є҆сѝ ввѣ́ренное тебѣ̀ сло́во и҆́стины: стоѧ́ бо на неꙋсы́пнѣй стра́жи до́мꙋ гдⷭ҇нѧ, и҆ бдѧ̀ ѡ҆ дꙋша́хъ недре́мленнѡ, па́ствꙋ твою̀ ᲂу҆годи́ти бг҃ꙋ, сло́вомъ и҆ дѣ́ломъ наставлѧ́лъ є҆сѝ. тѣ́мъ ꙗ҆́кѡ до́брый па́стырь, пастыренача́льникꙋ сн҃ꙋ бж҃їю, ѡ҆ приставле́нїи є҆гѡ̀ сло́во бл҃го возда́лъ є҆сѝ: молѝ ѡ҆ дꙋша́хъ на́шихъ.
Сла́ва, гла́съ ѕ҃:
Ст҃и́телей ᲂу҆добре́нїе и҆ ѻ҆тцє́въ сла́вꙋ сщ҃еннолѣ́пнѡ воспои́мъ дне́сь. и҆ цр҃ѧ̀ царе́й хрⷭ҇та̀ бг҃а на́шего восхва́лимъ: се́й бо, ꙗ҆́кѡ ѡ҆свѧти́тель ст҃ы́хъ и҆ творе́цъ чꙋдотво́рцєвъ, чꙋде́съ бл҃голѣ́пїемъ того̀ та́кѡ просла́ви, ꙗ҆́кѡ а҆рхїерє́и, сщ҃е́нницы и҆ мона́си и҆ всѝ бл҃говѣ́рнїи лю́дїе, ѿ честны́хъ моще́й є҆гѡ̀, ꙗ҆́кѡ ѿ многоцѣле́бнагѡ и҆сто́чника, бл҃года́ть и҆ и҆сцѣле́нїе прїе́млюще, ᲂу҆ми́льнѡ глаго́лютъ: ра́дꙋйсѧ, бж҃їихъ дарова́нїй сокро́вище, митрофа́не ст҃и́телю бл҃же́нне.
И҆ ны́нѣ, пра́здника.
Вхо́дъ, прокі́менъ днѐ. Чтє́нїѧ трѝ [пи̑сана на ѡ҆боро́тѣ листа̀ рв҃і].
На лїті́и стїхи́ра хра́ма:
Та́же стїхи̑ры митрофа́на. гла́съ є҃. Самогла̑сны:
Тако́въ на́мъ подоба́ше а҆рхїере́й, преподо́бенъ, пра́веденъ, ми́лостивъ, и҆ во всѣ́хъ ѡ҆правда́нїихъ гдⷭ҇нихъ непоро́ченъ. прїиди́те, пѣ́сньми и҆ ѱалмы̑ дх҃о́вными свѣ́тлѡ ликовствꙋ́имъ дне́сь, томꙋ̀ си́це зовꙋ́ще: ра́дꙋйсѧ, ѻ҆те́ческихъ ѡ҆бы́чаєвъ ревни́телю, сто́лпе и҆ ᲂу҆твержде́нїе вѣ́ры: ра́дꙋйсѧ, воро́нежскаѧ похвало̀, митрофа́не бг҃оно́се сщ҃е́ннѣйшїй.
Не пло́ть и҆ кро́вь ꙗ҆ви́ тѧ, ст҃и́телю бг҃оизбра́нне, но ѻ҆ц҃ъ нбⷭ҇ный, є҆мꙋ́же ты̀ бж҃е́ственною твое́ю кро́тостїю ᲂу҆годи́въ, ꙗ҆́кѡ а҆́гнецъ неѕло́бивъ, чи́ны неѕло́бивыхъ въ ли́цѣ а҆́гг҃льстѣмъ наслѣ́дилъ є҆сѝ: и҆ ны́нѣ въ го́рнихъ предстоѧ̀, молѝ дарова́ти на́мъ мно́жество щедро́тъ и҆ ве́лїю млⷭ҇ть.
По до́лгꙋ бл҃жи́мъ тѧ̀, ꙗ҆́кѡ свѣти́льника вѣ́ры и҆ а҆́гг҃ла во пло́ти: поне́же житїѐ твоѐ, митрофа́не, че́стно, и҆ ᲂу҆спе́нїе со ст҃ы́ми. просїѧ́лъ бо є҆сѝ бл҃ги́ми дѣ́лы, ꙗ҆́кѡ па́стырь бг҃омꙋ́дрый, чꙋдесы́ же твои́ми просвѣти́лсѧ є҆сѝ, ꙗ҆́кѡ вѣ́рный слꙋга̀ и҆ дрꙋ́гъ бж҃їй. тѣ́мже припа́дающе мо́лимъ тѧ̀: моли́сѧ за ны̀, чꙋдотво́рче ст҃ы́й, ко гдⷭ҇ꙋ, да пода́стъ дꙋша́мъ на́шымъ ве́лїю и҆ бога́тꙋю млⷭ҇ть.
Сла́ва, гла́съ и҃:
Дне́сь красꙋ́етсѧ сла́вный гра́дъ воро́нежъ, бж҃е́ственнымъ сокро́вищемъ моще́й твои́хъ, и҆ ѻ҆би́тель твоѧ̀ ликовствꙋ́ющи ра́дꙋетсѧ, и҆ правосла́внїи твои́мъ просвѣще́нїемъ, бл҃же́нне митрофа́не, хва́лѧтсѧ: ты́ же молѝ лю́демъ правосла̑внымъ тишинꙋ̀ дарова́ти, и҆ землѝ плодоро́дїе, и҆ ве́лїю ми́лость.
И҆ ны́нѣ, пра́здника. На стїхо́внѣ стїхи̑ры, гла́съ в҃:
Кі́ими бл҃гоговѣ́йными ᲂу҆сты̀ воспои́мъ митрофа́на, ст҃и́телѧ смире́нна, смире́нномꙋ пастыренача́льникꙋ подража́телѧ. подвигѡ́мъ вели́кихъ ѻ҆тцє́въ цр҃кве соꙋча́стника, и҆ высѡ́кимъ нра́вѡмъ и҆́хъ наслѣ́дника, мꙋ́жа жела́нїи чи́ста, слꙋгꙋ̀ гдⷭ҇нѧ вѣ́рна, ревни́телѧ ᲂу҆ста́вѡвъ цр҃кве непоколеби́ма, є҆го́же вѣнча́етъ хрⷭ҇то́съ бг҃ъ на́шъ, и҆мѣ́ѧй мно́жество щедро́тъ и҆ ве́лїю млⷭ҇ть.
Сті́хъ: Оу҆ста̀ моѧ̑ возглаго́лютъ премꙋ́дрость, и҆ поꙋче́нїе се́рдца моегѡ̀ ра́зꙋмъ.
Кі́ими сщ҃е́нными пѣ́сньми ᲂу҆бл҃жи́мъ митрофа́на, і҆ера́рха бг҃омꙋ́дра, є҆ѵⷢ҇льскагѡ правосла́вїѧ наста́вника, воздержа́нїѧ ᲂу҆чи́телѧ, а҆́гг҃лѡвъ собесѣ́дника, ни́щихъ и҆ сиро́тъ пита́телѧ, ѡ҆би̑димымъ застꙋ́пника и҆ немощствꙋ́ющихъ врача̀ преизрѧ́дна; є҆го́же вѣнча́етъ хрⷭ҇то́съ бг҃ъ на́шъ, и҆мѣ́ѧй мно́жество щедро́тъ и҆ ве́лїю млⷭ҇ть.
Сті́хъ: Оу҆слы́шите сїѧ̑ всѝ ꙗ҆зы́цы, внꙋши́те всѝ живꙋ́щїи по вселе́ннѣй.
Кі́ими похва́льными вѣнцы̀ почти́мъ митрофа́на, па́стырѧ бл҃же́нна, цр҃кве свѣти́льника, гра́да воро́нежа сла́вꙋ, рѡссі́йстѣй странѣ̀ ᲂу҆твержде́нїе, и҆́ночествꙋющихъ ѻ҆́бразъ, сщ҃е́нства вѣне́цъ, і҆ера́рхѡвъ ст҃олѣ́пное ᲂу҆краше́нїе; є҆го́же вѣнча́етъ хрⷭ҇то́съ бг҃ъ на́шъ, и҆мѣ́ѧй мно́жество щедро́тъ и҆ ве́лїю млⷭ҇ть.
Сла́ва, гла́съ є҃:
Сра́дꙋйтесѧ на́мъ рѡссі́йстїи собо́ри дне́сь, въ свѣ́тлой па́мѧти бг҃оно́снагѡ ѻ҆тца̀ на́шегѡ и҆ па́стырѧ, и҆́же до́брымъ житїе́мъ свои́мъ вѣ́рнѡ ᲂу҆годи́въ бг҃ꙋ, и҆ во гро́бѣ сла́вою і҆ера́ршескихъ добродѣ́телей свои́хъ сїѧ́етъ ꙗ҆́кѡ свѣти́ло, подаѧ̀ ѿ нетлѣ́ннагѡ сокро́вища моще́й свои́хъ бл҃гоꙋха́нїе ст҃а́гѡ дх҃а. тѣ́мже ᲂу҆̀бо соше́дшесѧ, ѻ҆́бщїй ли́къ томꙋ̀ соста́вимъ, пѣ́сньми бж҃е́ственными зовꙋ́ще: помина́й на́съ, ѻ҆́тче, и҆ за ны̀ хрⷭ҇тꙋ̀ моли́сѧ, ꙗ҆́кѡ вели́кїй на́шъ хода́тай, митрофа́не.
И҆ ны́нѣ, пра́здника.
На бл҃гослове́нїи хлѣ́бѡвъ, тропа́рь ст҃а́гѡ два́жды, и҆ пра́здника є҆ди́ножды.
На ᲂу҆́трени, на Бг҃ъ гдⷭ҇ь, тропа́рь пра́здника, и҆ ст҃а́гѡ.
По а҃-мъ стїхосло́вїи сѣда́ленъ, гла́съ и҃:
Оу҆краси́въ дꙋ́шꙋ твою̀ добродѣ́тельми, и҆ вре́меннагѡ житїѧ̀ по́прище въ стра́сѣ бж҃їи преше́дъ, ѡ҆брѣ́лъ є҆сѝ бл҃года́ть пред̾ бг҃омъ: є҆мꙋ́же съ ли̑ки а҆́гг҃лъ предстоѧ̀, молѝ, ст҃е митрофа́не, дарова́ти на́мъ живо́тъ вѣ́чный и҆ ве́лїю млⷭ҇ть.
Сла́ва, и҆ ны́нѣ, бг҃оро́диченъ:
Влⷣчце, прїимѝ моли̑твы ра̑бъ твои́хъ, и҆ и҆зба́ви на́съ ѿ всѧ́кїѧ нꙋ́жды и҆ печа́ли.
По в҃-мъ стїхосло́вїи сѣда́ленъ, гла́съ в҃:
Оу҆пра́вивъ па́ствꙋ твою̀ до́брѣ, сло́во бл҃го пастыренача́льникꙋ бг҃ꙋ возда́лъ є҆сѝ, и҆ ѿ рꙋкꙋ̀ є҆гѡ̀ пра́ведное воздаѧ́нїе прїи́мъ, молѝ, ѻ҆́тче на́шъ митрофа́не, да бл҃же́ннагѡ въ црⷭ҇твѣ ст҃ы́хъ пребыва́нїѧ и҆ на́съ, хода́тайствомъ твои́мъ, по бога́той млⷭ҇ти свое́й сподо́битъ.
Сла́ва, и҆ ны́нѣ, бг҃оро́диченъ:
Ѻ҆́бщꙋю всѣ́хъ наде́ждꙋ, дв҃ꙋ пречⷭ҇тꙋю, въ мольбꙋ̀ приво́димъ тѝ, бл҃же: застꙋпѝ на́съ ѿ бѣ́дъ, пода́ждь бл҃га̑ѧ вѣ̑чнаѧ и҆ вре́мєннаѧ, моле́нїемъ честнѣ́йшїѧ херꙋві̑мъ и҆ всѣ́хъ си́лъ нбⷭ҇ныхъ.
По полѷеле́и сѣда́ленъ, гла́съ и҃.
Ѡ҆ всѣ́хъ сла́вныхъ, цр҃кви ст҃ѣ́й бл҃года́тїю бж҃їею ѿ тебє̀ быва́емыхъ, бл҃года́рствєннаѧ бг҃ꙋ воздаю́ще, и҆ тогѡ̀ бг҃олѣ́пное снизхожде́нїе сла́вѧще, мо́лимъ тѧ̀, ст҃и́телю хрⷭ҇то́въ митрофа́не, помозѝ на́мъ ѡ҆брѣстѝ всѣ̑мъ бл҃года́ть и҆ млⷭ҇ть въ де́нь сꙋ́дный.
Сла́ва, и҆ ны́нѣ, бг҃оро́диченъ:
Ты̀ є҆ди́на є҆сѝ ко́рень дѣ́вства и҆ неꙋвѧда́емый цвѣ́тъ чистоты̀, ты̀ сте́рла є҆сѝ главꙋ̀ ѕмі́евꙋ: ты̀ на́съ и҆зба́ви ѿ прегрѣше́нїй на́шихъ и҆ дꙋше́вныхъ скве́рнъ, бцⷣе, и҆ ко приста́нищꙋ и҆́стиннагѡ покаѧ́нїѧ напра́ви.
Прокі́менъ, гла́съ д҃: Честна̀ пред̾ гдⷭ҇емъ сме́рть прпⷣбныхъ є҆гѡ̀.
Сті́хъ: Что̀ возда́мъ гдⷭ҇еви ѡ҆ всѣ́хъ, ꙗ҆̀же воздаде́ ми;
Є҆ѵⷢ҇лїе ст҃и́тельское.
По н҃-мъ ѱалмѣ̀ стїхи́ра, гла́съ ѕ҃:
Прпⷣбне ѻ҆́тче, всебл҃же́нне митрофа́не, па́стырю до́брый, ᲂу҆го́дниче хрⷭ҇то́въ ᲂу҆се́рдный, ско́рый на́шъ хода́таю и҆ те́плый къ бг҃ꙋ моли́твенниче, бꙋ́ди на́мъ въ бѣда́хъ на́шихъ защи́тникъ и҆ въ печа́лехъ ᲂу҆тѣ́шитель, па́мѧть твою̀ любо́вїю почита́ющымъ.
Мл҃тва: Сп҃сѝ, бж҃е, лю́ди твоѧ̑: И҆ прѡ́чаѧ.
Канѡ́нъ ст҃а́гѡ на и҃, гла́съ и҃.
Пѣ́снь а҃.
І҆рмо́съ: Во́дꙋ проше́дъ ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.
Ѿ мно́гихъ ѕѡ́лъ мно́гагѡ ᲂу҆ны́нїѧ и҆спо́лнени, къ тебѣ̀ прибѣга́емъ, ст҃и́телю хрⷭ҇то́въ митрофа́не, и҆ ѿ тебє̀ ско́рыѧ по́мощи и҆ застꙋпле́нїѧ ны́нѣ тре́бꙋемъ.
Страсте́й на́съ бра̑ни смꙋща́ютъ, па́стырю прпⷣбне: ты́ же ᲂу҆мирѝ на́съ твои́мъ бл҃гопрїѧ̑тнымъ къ бг҃ꙋ хода́тайствомъ.
Ѿ бѣ́дъ и҆ скорбе́й на́съ, чꙋдотво́рче ст҃ы́й, и҆зба́вивъ, мꙋ́жественное въ добродѣ́телехъ преспѣ́ѧнїе всѣ̑мъ да́рꙋй, да всѝ ѡ҆ тебѣ̀, сщ҃е́ннѣйшїй митрофа́не, ра́дꙋемсѧ.
Бг҃оро́диченъ:
Моли́твꙋ на́шꙋ прїимѝ, пречⷭ҇таѧ, и҆ мл҃твою твое́ю всемо́щною и҆зба́витисѧ на́мъ ѿ вра̑гъ ви́димыхъ и҆ неви́димыхъ, ѿ грѣхѡ́въ же и҆ всѧ́кїѧ мꙋ́ки, молѝ, є҆го́же родила̀ є҆сѝ, чл҃вѣколю́бца бг҃а.
Пѣ́снь г҃.
І҆рмо́съ: Нбⷭ҇нагѡ крꙋ́га верхотво́рче, гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.
Покрови́телѧ жи́зни на́шеѧ и҆ моли́твенника къ бг҃ꙋ почита́емъ тѧ̀, присносла́вный ѻ҆́тче на́шъ митрофа́не: на стезю̀ на́съ покаѧ́нїѧ напра́ви, а҆рхїере́євъ красото̀ и҆ вѣ́рныхъ ᲂу҆твержде́нїе.
Мо́лимъ, дꙋше́вное на́ше смꙋще́нїе и҆ тмꙋ̀ бѣсо́вскихъ наважде́нїй въ на́съ разори́ти: тебѣ́ бо, ст҃е, даде́сѧ бл҃года́ть ст҃а́гѡ дх҃а, ѕлы̑ѧ дꙋ́хи прогонѧ́ти.
Недꙋ́гꙋюще тѣ́ломъ, недꙋ́гꙋемъ и҆ дꙋше́ю, бг҃облаже́нне: ты́ же не ѡ҆ста́ви на́съ во грѣсѣ́хъ на́шихъ поги́бнꙋти, но въ ни́хже и҆ са́мъ ꙗ҆́кѡ человѣ́къ и҆скꙋша́емь бы́лъ є҆сѝ, и҆ на́мъ и҆скꙋша́ємымъ ны́нѣ помозѝ.
Бг҃оро́диченъ:
Всѧ̑ а҆́гг҃лѡвъ вѡ́инства, предте́че гдⷭ҇ень, а҆пⷭ҇лѡвъ двоенадесѧ́тице, ст҃і́и всѝ съ бцⷣею, сотвори́те мл҃твꙋ, во є҆́же сп҃сти́сѧ на́мъ.
Сѣда́ленъ, гла́съ в҃:
Во ст҃и́тельствѣ бл҃гоче́стнѡ пожи́лъ є҆сѝ, ст҃и́телю бг҃оѧвле́нне, лю́ди къ бг҃оразꙋ́мїю сло́вомъ и҆ дѣ́ломъ наста́вилъ є҆сѝ, и҆ бг҃ꙋ до конца̀ ᲂу҆годи́лъ є҆сѝ. сегѡ̀ ра́ди ѿ негѡ̀ нетлѣ́нїемъ и҆ чꙋдесы̀, ѻ҆́тче митрофа́не, почти́лсѧ є҆сѝ, ꙗ҆́кѡ прича́стникъ бж҃їѧ бл҃года́ти.
Сла́ва, и҆ ны́нѣ, бг҃оро́диченъ:
Мч҃нкѡвъ, прⷪ҇ро́кѡвъ, а҆пⷭ҇лѡвъ, і҆ера́рхѡвъ, прпⷣбныхъ и҆ ст҃ы́хъ всѣ́хъ ѿ вѣ́ка првⷣныхъ похвала̀ ты̀ є҆сѝ, пречⷭ҇таѧ. тѣ́мже тѧ̀ мо́лимъ: моли́сѧ съ ни́ми ко гдⷭ҇ꙋ, да сп҃се́тъ дꙋ́шы на́шѧ.
Пѣ́снь д҃.
І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство, разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.
Пла́мень погасѝ въ на́съ плотски́хъ ѡ҆бꙋрева́нїй и҆ нечи́стыхъ на́шихъ помышле́нїй, да пла́мене гее́нскагѡ ѻ҆гнѧ̀ твои́ми мл҃твами, митрофа́не, и҆зба́вимсѧ.
Дꙋ́шꙋ и҆ помышле́нїе къ тебѣ̀ простира́емъ, ст҃и́телю бг҃оизбра́нне: согрѣ́й на́шꙋ вѣ́рꙋ и҆ любо́вь, ꙗ҆́же къ бг҃ꙋ, да зако́нꙋ є҆гѡ̀ ᲂу҆се́рднѡ послѣ́дꙋюще, пре́йдемъ по́прище на́шегѡ сп҃се́нїѧ непреткнове́ннѡ.
Сто́лпъ крѣ́пости стѧжа́вше тѧ̀ ѿ бг҃а, ѿ вра̑гъ ви́димыхъ и҆ неви́димыхъ ѡ҆гражда́емсѧ тобо́ю безбѣ́днѡ: тѣ́мже тѧ̀ всѝ по до́лгꙋ, митрофа́не, ᲂу҆бл҃жа́емъ.
Бг҃оро́диченъ:
Черто́же незаходи́магѡ свѣ́та, дв҃о, нѣ́смы досто́йни черто́га нбⷭ҇нагѡ, грѣхо́вныѧ ра́ди вины̀: ты́ же, бг҃ороди́тельнице, ра́ди ѡ҆бнаже́ннагѡ на крⷭ҇тѣ̀ сла́дкагѡ твоегѡ̀ сн҃а и҆ бл҃га́гѡ на́шегѡ гдⷭ҇а, покры́й сты́дъ лица̀ на́шегѡ и҆ сп҃сѝ на́съ.
Пѣ́снь є҃.
І҆рмо́съ: Просвѣтѝ на́съ повелѣ̑нїи твои́ми, гдⷭ҇и, и҆ мы́шцею твое́ю высо́кою тво́й ми́ръ пода́ждь на́мъ, чл҃вѣколю́бче.
Мо́лимъ ти сѧ и҆ вопїе́мъ всеꙋсе́рднѡ: и҆спо́лни, бг҃овдохнове́нне, весе́лїѧ живо́тъ на́шъ, покрыва́ѧ на́съ крѣ́пкимъ покро́вомъ защище́нїѧ твоегѡ̀ ѿ гла́да, ꙗ҆́звы и҆ междꙋꙋсо́бныѧ бра́ни, ꙗ҆́кѡ мо́жеши, ѻ҆́тче, а҆́ще хо́щеши.
Мра́къ на́шихъ заблꙋжде́нїй и҆ жите́йскїѧ го́рдости, свѣ́тлостїю ст҃ы́хъ мл҃твъ твои́хъ, митрофа́не, проженѝ, да по́мощїю твое́ю грѣхѡ́въ ѡ҆ставле́нїе прїи́мше, млⷭ҇ть ᲂу҆ хрⷭ҇та̀ бг҃а ѡ҆брѧ́щемъ.
На ѻ҆дрѣ̀ не́мощи и҆ ᲂу҆ны́нїѧ низлежа́щꙋ мѝ, пода́ждь рꙋ́кꙋ по́мощи, па́стырю бг҃овозлю́бленне, и҆ не ѡ҆ста́ви мѧ̀ лише́на бы́ти твоегѡ̀ сп҃си́тельнагѡ бл҃года́тїю ст҃а́гѡ дх҃а посѣще́нїѧ.
Бг҃оро́диченъ:
Чистѣ́йшаѧ є҆сѝ па́че а҆́гг҃льскихъ чинѡ́въ, ѿ неѧ́же и҆сто́чникъ ст҃ы́ни воплоти́сѧ на́съ ра́ди, да ѡ҆ст҃и́тъ є҆стество̀ человѣ́ческое: мл҃твами твои́ми, бцⷣе, и҆зба́ви на́съ ѿ тимѣ́нїѧ нечи́стыхъ на́шихъ дѣѧ́нїй и҆ неподо́бныхъ глаго́ланїй.
Пѣ́снь ѕ҃.
І҆рмо́съ: Моли́твꙋ пролїю̀ ко гдⷭ҇ꙋ, и҆ томꙋ̀ возвѣщꙋ̀ печа̑ли моѧ̑, ꙗ҆́кѡ ѕѡ́лъ дꙋша̀ моѧ̀ и҆спо́лнисѧ, и҆ живо́тъ мо́й а҆́дꙋ прибли́жисѧ, и҆ молю́сѧ ꙗ҆́кѡ і҆ѡ́на: ѿ тлѝ, бж҃е, возведи́ мѧ.
Гра́дꙋ твоемꙋ̀ застꙋ́пникъ бꙋ́ди, и҆ ѻ҆би́тели твоеѧ̀ храни́тель, гра́ды же и҆ страны̀ чтꙋ́щихъ любо́вїю па́мѧть твою̀ неѡбори́мымъ мл҃твъ твои́хъ предста́тельствомъ ѡ҆градѝ, да всѝ тобо́ю, бг҃омꙋ́дре митрофа́не, хва́лимсѧ.
Ꙗ҆́кѡ защи́тника тѧ̀ ѿ бг҃а вѣ́дꙋще, вла́сть на дꙋ́сѣхъ нечи́стыхъ ве́лїю и҆мꙋ́ща, мо́лимъ, ѿ ѕла́гѡ дѣ́йствїѧ ѕлы́хъ дꙋхѡ́въ на́шѧ дꙋ́шы сохрани́ти безнавѣ́тны.
По до́лгꙋ бл҃жа́тъ тѧ̀ вѣ́рнїи, ра́дꙋйсѧ митрофа́не, зовꙋ́ще: ты́ бо є҆сѝ вои́стиннꙋ рѡссі́йстѣй цр҃кви ра́дованїе и҆ похвала̀, и҆ тѧ̀ чтꙋ́щымъ на всѧ̑ врагѝ ѡ҆долѣ́нїе, досточꙋ́дне.
Бг҃оро́диченъ:
Го́рꙋ тѧ̀ мы́сленнꙋю и҆ лѣ́ствицꙋ і҆а́кѡвлю прⷪ҇ро́цы нарица́ютъ, є҆́юже бг҃ъ къ человѣ́кѡмъ сни́де, поги́бшꙋю дра́хмꙋ взыска́ти хотѧ̀, ю҆́же ѡ҆брѣ́тъ, па́ки къ нб҃сѝ возво́дитъ. тѣ́мже тѧ̀ всѝ, ꙗ҆́кѡ мт҃ръ бж҃їю, правосла́внѡ велича́емъ.
Конда́къ, гла́съ и҃:
Воздержа́нїемъ тѣ́ло дꙋ́хꙋ порабо́тивъ, дꙋ́шꙋ же равноа́гг҃льнꙋ сотвори́въ, ст҃и́тельскою ѡ҆дѣ́ѧлсѧ є҆сѝ ѡ҆де́ждою, ꙗ҆́кѡ вѣне́цъ сщ҃е́нства: и҆ ны́нѣ всѣ́хъ влⷣцѣ предстоѧ̀, молѝ, пребл҃же́нне митрофа́не, ᲂу҆мири́ти и҆ сп҃стѝ дꙋ́шы на́шѧ.
І҆́косъ:
Въ пꙋсты́ни высото́ю смиренномꙋ́дрїѧ, ꙗ҆́кѡ ра́йскїй цвѣ́тъ, красꙋ́ѧсѧ, и҆ на воро́нежскїѧ цр҃кве престо́лѣ ᲂу҆краси́лсѧ є҆сѝ высо́кими ᲂу҆добрє́нїи, премꙋ́дре: и҆́бо бы́лъ є҆сѝ і҆ера́рхъ, ѻ҆́бразъ вѣ̑рнымъ сло́вомъ и҆ житїе́мъ. тѣ́мже и҆ бг҃ъ ꙗ҆́кѡ ᲂу҆го́дника своего̀ вознесе́ тѧ, нетлѣ́нїемъ и҆ чꙋдесы̀ въ цр҃кви свое́й прославлѧ́ѧ, да всѝ вѣ́рою зове́мъ тѝ: ра́дꙋйсѧ, воро́нежскаѧ похвало̀, митрофа́не приснопа́мѧтне.
Пѣ́снь з҃.
І҆рмо́съ: Ѿ і҆ꙋде́и доше́дше ѻ҆́троцы, въ вавѷлѡ́нѣ и҆ногда̀ вѣ́рою трⷪ҇ческою пла́мень пе́щный попра́ша, пою́ще: ѻ҆тцє́въ бж҃е, бл҃гослове́нъ є҆сѝ.
На́съ ѡ҆бнови́ти хотѧ̀ и҆ на́шемꙋ сп҃се́нїю, сп҃се, бл҃гопоспѣши́ти, ты̀ но́ваго цр҃кви твое́й воздви́глъ (с. 731)є҆сѝ свѣти́льника, митрофа́на, къ тебѣ̀ зовꙋ́ща: ѻ҆тцє́въ бж҃е, бл҃гослове́нъ є҆сѝ.
Чл҃вѣколю́бца сп҃са ѡ҆ на́съ, ст҃и́телю хрⷭ҇то́въ, ᲂу҆молѝ, разрѣши́тисѧ на́мъ ѿ прегрѣше́нїй на́шихъ и҆ дꙋше́вныхъ скве́рнъ, да и҆ мы̀ томꙋ̀ всеси́льномꙋ и҆зба́вителю зове́мъ: ѻ҆тцє́въ бж҃е, бл҃гослове́нъ є҆сѝ.
Во сла́вꙋ бж҃їю ѡ҆дѣ́ѧнный ст҃и́тель и҆ чꙋдотво́рецъ на́мъ ѿ бг҃а показа́лсѧ є҆сѝ, митрофа́не всехва́льне, да свѣ́тлостьми чꙋде́съ твои́хъ па́че со́лнечныхъ лꙋ̑чъ ѡ҆зарѧ́еми, зове́мъ ди̑внаѧ тобо́ю соверша́ющемꙋ: ѻ҆тцє́въ бж҃е, бл҃гослове́нъ є҆сѝ.
Бг҃оро́диченъ:
Вели̑каѧ дарова̑нїѧ тобо́ю ѿ гдⷭ҇а прїѧ́хомъ, дв҃о пречⷭ҇таѧ: сегѡ̀ ра́ди бл҃года́рственное пѣ́нїе прино́симъ тѝ и҆ зове́мъ: бл҃гослове́на ты̀ въ жена́хъ є҆сѝ, всенепоро́чнаѧ влⷣчце.
Пѣ́снь и҃.
І҆рмо́съ: Цр҃ѧ̀ нбⷭ҇наго, є҆го́же пою́тъ во́и а҆́гг҃льстїи, хвали́те и҆ превозноси́те во всѧ̑ вѣ́ки.
Къ честны́мъ моще́мъ твои̑мъ, ꙗ҆́кѡ къ неѡбори́момꙋ покро́вꙋ прибѣга́юще, немо́лчнагѡ твоегѡ̀ хода́тайства, бг҃оно́се прпⷣбне, про́симъ: ты́ же не пре́зри и҆́же ѿ тебє̀ тре́бꙋющихъ по́мощи, но ᲂу҆слы́ши и҆ застꙋпѝ всѧ̑ пою́щыѧ тѧ̀ и҆ превозносѧ́щыѧ хрⷭ҇та̀ во вѣ́ки.
Тѣлє́сныѧ сла́бѡсти и҆ дꙋшє́вныѧ недꙋ́ги си́лою мл҃твъ твои́хъ бл҃года́тнѡ премѣнѧ́ѧ, премѣнѝ, ѻ҆́тче митрофа́не, всѧ́кое неможе́нїе пою́щымъ тѧ̀ и҆ превозносѧ́щымъ хрⷭ҇та̀ во вѣ́ки.
Пла́чꙋщымъ ты̀ сле́зы ѡ҆тира́еши, па́стырю пребл҃же́нне, и҆ бѣ́дствꙋющымъ подае́ши рꙋ́кꙋ сп҃се́нїѧ ѿ бг҃а: тѣ́мже и҆ на́съ ᲂу҆ прⷭ҇то́ла влⷣчнѧ помѧнѝ, вѣ́рою пою́щихъ тѧ̀ и҆ превозносѧ́щихъ хрⷭ҇та̀ во вѣ́ки.
Бг҃оро́диченъ:
Велича́емъ твоѐ тве́рдое застꙋпле́нїе, и҆сповѣ́дꙋемъ мт҃рнїѧ твоеѧ̀ мл҃твы си́лꙋ, бл҃годари́мъ возвели́чившаго тѧ̀ гдⷭ҇а ро́ждшагосѧ ѿ тебє̀, бг҃ома́ти, є҆го́же молѝ сп҃сти́сѧ дꙋша́мъ на́шымъ.
Пѣ́снь ѳ҃.
І҆рмо́съ: Вои́стиннꙋ бцⷣꙋ тѧ̀ и҆сповѣ́дꙋемъ, сп҃се́ннїи тобо́ю, дв҃о чⷭ҇таѧ, съ безпло́тными ли̑ки тѧ̀ велича́юще.
Ты̀, и҆́же въ домꙋ̀ твое́мъ ᲂу҆го́дники твоѧ̑ насажда́еши, ꙗ҆́кѡ ма̑слины и҆ ꙗ҆́кѡ ке́дры, сп҃се, митрофа́на ᲂу҆го́дника твоегѡ̀ моле́нїемъ, насадѝ въ на́съ добродѣ́тельное житїѐ, да во вре́мѧ своѐ принесе́мъ тѝ плоды̀ покаѧ́нїѧ.
Со а҆́гг҃лы слꙋжи́телю ст҃ѣ́й трⷪ҇цѣ, митрофа́не премꙋ́дре, ра́дꙋйсѧ, и҆ на́мъ вѣ́рою бл҃жа́щымъ тѧ̀ пода́ждь, мл҃твами твои́ми, ѡ҆ дс҃ѣ ст҃ѣ ра́доватисѧ.
А҆́ще и҆ не́мощни є҆смы̀, и҆ премно́гѡ согрѣша́емъ недосто́йнїи, но не ѿстꙋпа́емъ наде́жды мо́щнагѡ покро́ва твоегѡ̀, достосла́вне: ты́ же, хрⷭ҇тꙋ̀ бг҃ꙋ молѧ́сѧ, помозѝ на́мъ ѡ҆брѣстѝ всѣ̑мъ съ ли̑ки првⷣныхъ стоѧ́нїе въ де́нь сꙋ́дный.
На мѣ́стѣ ѡ҆ѕлобле́нїѧ не́мощи смири́вшемꙋсѧ, ᲂу҆дивѝ мл҃твъ твои́хъ си́лꙋ, чꙋдотво́рче ст҃ы́й митрофа́не, и҆ по да́ннѣй тебѣ̀ цѣле́бъ бл҃года́ти, нездра́вїе моѐ во здра́вїе премѣнѝ.
Бг҃оро́диченъ:
Оу҆пова́нїе и҆ ра́досте на́ша мр҃і́е бг҃оневѣ́стнаѧ, покры́й на́съ честны́мъ твои́мъ ѡ҆мофо́ромъ, да хва́лимъ непреста́ннѡ и҆́мѧ твоѐ и҆ пое́мъ, съ безпло́тными ли̑ки тѧ̀ велича́юще.
Свѣти́ленъ:
Свѣтоза́рна свѣти́льника вѣ́ры, пресла́внѡ ѿ свѣтонача́льныѧ трⷪ҇цы возсїѧ́вша, и҆ на́съ со́лнца свѣтлѣ́йше чꙋдесы̀ свои́ми просвѣти́вша, митрофа́на, па́стырѧ бл҃же́нна, пѣ́сньми восхва́лимъ.
Бг҃оро́диченъ:
Бцⷣе дв҃о, ра́дꙋйсѧ, ѿ а҆́гг҃ла ра́дость прїи́мшаѧ: ра́дꙋйсѧ, влⷣчце, и҆ сп҃сѝ на тѧ̀ ᲂу҆пова́ющыѧ.
На хвали́техъ стїхи̑ры, гла́съ и҃:
Тѣ́сенъ пꙋ́ть въ житїѝ твое́мъ, прпⷣбне митрофа́не, преше́лъ є҆сѝ, по́двигомъ до́брымъ въ пꙋсты́ни подвиза́ѧсѧ и҆ тече́нїе бл҃го́е во ст҃и́тельствѣ соверша́ѧ, бг҃ꙋ же все́ю дꙋше́ю рабо́таѧ, и҆ до конца̀ ᲂу҆гожда́ѧ вѣ́рнѡ, ꙗ҆́кѡ сосꙋ́дъ бг҃оизбра́нный. тѣ́мъ простра́нное ѡ҆брѣ́лъ є҆сѝ воздаѧ́нїе ᲂу҆ пра́веднагѡ мздовоздаѧ́телѧ и҆ цр҃ѧ̀ ст҃ы́хъ гдⷭ҇а: є҆мꙋ́же, ст҃е, моли́сѧ, ми́ръ рѡссі́йстѣй цр҃кви дарова́ти, и҆ дꙋша́мъ на́шымъ ве́лїю млⷭ҇ть.
Житїѐ чи́стое, терпѣ́нїе, кро́тость и҆ любо́вь нелицемѣ́рнꙋ, воздержа́нїе соверше́нное, ᲂу҆миле́нїе бж҃е́ственное, вѣ́рꙋ же и҆ наде́ждꙋ и҆́стиннꙋ и҆ милосе́рдїе стѧжа́въ, равноа́гг҃льнѡ, митрофа́не, на землѝ пожи́лъ є҆сѝ, и҆ на нб҃сѝ съ ли̑ки а҆́гг҃лъ предстои́ши: съ ни́миже, ст҃е, моли́сѧ, ми́ръ рѡссі́йстѣй цр҃кви дарова́ти, и҆ дꙋша́мъ на́шымъ ве́лїю млⷭ҇ть.
Бж҃е́ственною бл҃года́тїю ст҃а́гѡ дх҃а просвѣти́всѧ, и҆ по сме́рти бл҃года́тное млⷭ҇ти мѵ́ро ѿ честны́хъ твои́хъ и҆ многоцѣле́бныхъ моще́й и҆сточа́еши. тѣ́мъ по до́лгꙋ ѡ҆ тебѣ̀, митрофа́не, ра́дꙋемсѧ, и҆ па́мѧть твою̀ сщ҃еннолѣ́пнѡ соверша́юще, сщ҃еннолѣ́пными пѣ́сньми зове́мъ тѝ: сла́ва да́вшемꙋ тѝ крѣ́пость, сла́ва вѣнча́вшемꙋ тѧ̀, сла́ва дѣ́йствꙋющемꙋ тобо́ю всѣ̑мъ и҆сцѣлє́нїѧ.
Сла́ва, гла́съ ѕ҃:
Бл҃гі́й и҆ вѣ́рный ра́бе, ᲂу҆се́рдный дѣ́лателю вїногра́да хрⷭ҇то́ва, ты̀, ꙗ҆́кѡ до́брый па́стырь, ва́ръ и҆ тѧготꙋ̀ дневнꙋ́ю поне́слъ є҆сѝ, ᲂу҆чѧ̀ словє́сныѧ ѻ҆́вцы, се́рдцемъ вѣ́ровати въ пра́вдꙋ, ᲂу҆сты́ же и҆сповѣ́дати во сп҃се́нїе: тѣ́мже и҆ бг҃ъ ꙗ҆́кѡ и҆збра́ннаго своего̀ вознесе́ тѧ, и҆ па́мѧть твою̀, досточꙋ́дне митрофа́не, просла́ви. ты́ же непреста́ннѡ молѧ́сѧ, и҆спросѝ ѻ҆те́чествꙋ на́шемꙋ ми́ръ, хрⷭ҇тїа́нѡмъ же въ добродѣ́телехъ преспѣ́ѧнїе и҆ ве́лїю млⷭ҇ть.
И҆ ны́нѣ, пра́здника. Славосло́вїе вели́кое, є҆ктєнїѝ, и҆ ѿпꙋ́стъ.
На лїтꙋргі́и:
Бл҃жє́нна пра́здника, и҆ ст҃а́гѡ пѣ́снь ѕ҃-ѧ. Прокі́менъ, гла́съ а҃: Оу҆ста̀ моѧ̀ возглаго́лютъ премꙋ́дрость, и҆ поꙋче́нїе се́рдца моегѡ̀ ра́зꙋмъ. Сті́хъ: Оу҆слы́шите сїѧ̑ всѝ ꙗ҆зы́цы, внꙋши́те всѝ живꙋ́щїи по вселе́ннѣй. А҆пⷭ҇лъ ко є҆вре́ємъ, зача́ло ти҃і. Є҆ѵⷢ҇лїе ѿ лꙋкѝ, зача́ло к҃д. Прича́стенъ: Въ па́мѧть вѣ́чнꙋю бꙋ́детъ првⷣнкъ: