Мѣ́сѧца тогѡ́же въ г҃-й де́нь. Ст҃ы́хъ мч҃никъ, а҆кеѱі́мы є҆пі́скопа, и҆ і҆ѡ́сифа пресвѵ́тера, и҆ а҆їѳа́ла дїа́кона:
И҆ ѡ҆бновле́нїе хра́ма, ст҃а́гѡ великомч҃ника геѡ́ргїа, и҆́же въ лѵ́дѣ, и҆дѣ́же положено̀ є҆́сть честно́е тѣ́ло є҆гѡ̀.
На Гдⷭ҇и, воззва́хъ, стїхи̑ры мч҃никѡвъ, гла́съ и҃.
Подо́бенъ: Ѽ пресла́внагѡ чꙋдесѐ!
Ѽ пресла́внагѡ чꙋдесѐ! ꙳ а҆кеѱі́ма кра́сный, ꙳ мч҃никѡмъ слꙋжи́тель, ꙳ пѣ́сней ᲂу҆вѧзе́нїемъ вѣнча́етсѧ дне́сь, ꙳ бг҃оѧ́звєннаѧ страда̑нїѧ предлага́етъ, ꙳ и҆ ѡ҆стрꙋплѧ́етъ врага̀ безпло́тнаго. ꙳ ѽ каковы̑ѧ полꙋчѝ многода̑рныѧ бл҃года̑ти! ꙳ є҆гѡ́же моли́твами спасѝ дꙋ́шы на́шѧ, хрⷭ҇тѐ, ꙗ҆́кѡ милосе́рдъ.
Ѽ пресла́внагѡ чꙋдесѐ! ꙳ ѿ персі́ды ѕвѣзда̀, ꙳ і҆ѡ́сифъ возсїѧ̀, ꙳ волше́бнꙋю ме́рзость разрꙋша́ѧ дꙋ́хомъ, ꙳ кро́вными стрꙋѧ́ми погасѝ ѻ҆гнѧ̀ слꙋже́нїе безбо́жїѧ. ꙳ ѽ крѣ́пости, є҆́юже низложѝ де́мѡны! ꙳ тогѡ̀ моли́твами спасѝ дꙋ́шы на́шѧ, хрⷭ҇тѐ, ꙳ ꙗ҆́кѡ милосе́рдъ.
Ѽ пресла́внагѡ чꙋдесѐ! ꙳ а҆їѳа́лъ, тве́рдый, ꙳ страда́нїѧ побо́рникъ тезоимени́тъ ꙗ҆влѧ́етсѧ, ꙳ са́дъ присноцвѣтꙋ́щїй, ꙳ и҆ рѣ́жемь, цвѣте́тъ ра́нами, ꙳ и҆ ᲂу҆жѐ ᲂу҆мерщвлѧ́емь, жи́ти начина́етъ. ꙳ ѽ крѣ́пости є҆стества̀, ю҆́же претерпѣ̀! ꙳ тогѡ̀ моли́твами спасѝ дꙋ́шы на́шѧ, хрⷭ҇тѐ, ꙗ҆́кѡ милосе́рдъ.
И҆́ны стїхи̑ры ст҃а́гѡ геѡ́ргїа, гла́съ д҃. Подо́бенъ: Ꙗ҆́кѡ до́блѧ:
Страстоте́рпче геѡ́ргїе, ꙳ а҆́гг҃лѡвъ собесѣ́дниче, ꙳ и҆ мꙋ́ченикѡвъ ссе́льниче, прибѣ́жище скорбѧ́щихъ всегда̀, ꙳ приста́нище ᲂу҆тише́нїѧ ꙳ пла́вающемꙋ и҆ мнѣ̀ въ житїѝ бꙋ́ди, ꙳ и҆ ᲂу҆пра́ви, молю́ тѧ, жи́знь мою̀: ꙳ ꙗ҆́кѡ да вѣ́рою несомнѣ́нною ᲂу҆блажа́ю, ꙳ па́че є҆стества̀ по́двиги твоѧ̑.
Въ мо́ри мѧ̀ пла́вающа, ꙳ на пꙋтѝ ше́ствꙋюща, ꙳ въ нощѝ спѧ́ща соблюдѝ, ꙳ бдѧ́щꙋ просвѣтѝ ꙳ ᲂу҆́мъ мо́й, геѡ́ргїе, ꙳ и҆ наста́ви твори́ти во́лю гдⷭ҇ню: ꙳ ꙗ҆́кѡ да ѡ҆брѧ́щꙋ въ де́нь сꙋ́дный, ꙳ въ житїѝ содѣ́ѧнныхъ мѝ разрѣше́нїе, ꙳ прибѣга́ѧ въ кро́въ тво́й, сла́вне.
Вѣ́ры бронѧ́ми, ꙳ и҆ щито́мъ благода́ти ꙳, и҆ крⷭ҇та̀ копїе́мъ ѡ҆гради́всѧ, ꙳ сопроти̑внымъ непобѣди́мь бы́лъ є҆сѝ, геѡ́ргїе. ꙳ и҆ ꙗ҆́кѡ бжⷭ҇твенный храбо́рникъ, ꙳ дє́мѡнскїѧ полкѝ побѣди́въ, ꙳ со а҆́гг҃лы ликꙋ́еши, ꙳ вѣ̑рныѧ же, сохранѧ́ѧ, ѡ҆свѧща́еши, ꙳ и҆ спаса́еши, призыва́емь.
Сла́ва, гла́съ ѕ҃:
Досто́йнѡ и҆́мене жи́тельствовалъ є҆сѝ, во́ине геѡ́ргїе: крⷭ҇тъ бо хрⷭ҇то́въ на ра́мена взе́мъ, ѿ дїа́вольскїѧ ле́сти ѡ҆лѧденѣ́вшꙋю зе́млю до́брѣ воздѣ́лалъ є҆сѝ, и҆ терно́вное слꙋже́нїе и҆скорени́въ і҆́дѡльское, правосла́вныѧ вѣ́ры ло́зꙋ насади́лъ є҆сѝ. тѣ́мже то́чиши врачева̑нїѧ во все́й вселе́ннѣй вѣ̑рнымъ, и҆ трⷪ҇цы дѣ́латель пра́веденъ показа́лсѧ є҆сѝ: молѝ, мо́лимсѧ, ѡ҆ ми́рѣ мі́ра, и҆ спасе́нїи дꙋ́шъ на́шихъ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Тридне́венъ:
На дре́вѣ живо́тъ на́шъ зрѧ́щи, всенепоро́чнаѧ бцⷣа, ви́сѧщъ, мт҃рски рыда́ющи, вопїѧ́ше: сн҃е мо́й и҆ бж҃е мо́й, спасѝ любо́вїю пою́щыѧ тѧ̀.
На стїхо́внѣ ѻ҆ктѡ́иха. Сла́ва, ст҃ы́хъ, гла́съ ѕ҃:
Є҆фре́ма карі́а:
Предпꙋ́тїе ѻ҆бра́знѡ трисїѧ́ннагѡ ва́шегѡ є҆диноꙋ́мїѧ, и҆ во хрⷭ҇тѣ̀ мꙋче́нїѧ, неизрече́нныѧ трⷪ҇цы и҆ пресꙋ́щественныѧ є҆ди́ницы страда́льцы, и҆̀же въ персі́дѣ неѡпа́льни соблю́дшесѧ трїѐ ѻ҆́троцы бы́ша: ꙗ҆́кѡ бо ѻ҆нѝ на пла́мень дерзнꙋ́вше, бг҃ꙋ не досади́ша, та́кѡ и҆ вы̀ ᲂу҆мре́ти не ѿреко́стесѧ, не пощадѣ́вшесѧ хрⷭ҇то́вою любо́вїю. но, ꙗ҆́кѡ во ѻ҆́нѣхъ ꙗ҆ви́выйсѧ четве́ртый въ пла́мени ѡ҆роша́ше, та́кѡ и҆ ва́съ хрⷭ҇то́съ, и҆́же є҆ди́нъ ѿ трⷪ҇цы, прїѧ́тъ въ мѣ́сто прохла́дное, а҆кеѱі́ма со і҆ѡ́сифомъ, и҆ а҆їѳала̀, бг҃опрїѧ́тнїи, моли́тесѧ ѡ҆ дꙋша́хъ на́шихъ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Тридне́венъ:
Ви́дѧщи тѧ̀ распина́ема, хрⷭ҇тѐ, тебѐ ро́ждшаѧ вопїѧ́ше: что̀ стра́нное, є҆́же ви́жꙋ, та́инство, сн҃е мо́й; ка́кѡ на дре́вѣ ᲂу҆мира́еши, пло́тїю повѣ́шенъ, жи́зни пода́телю;
Тропа́рь, гла́съ д҃:
Мꙋ́чєницы твоѝ, гдⷭ҇и, во страда́нїихъ свои́хъ вѣнцы̀ прїѧ́ша нетлѣ̑нныѧ ѿ тебє̀ бг҃а на́шегѡ: и҆мꙋ́ще бо крѣ́пость твою̀, мꙋчи́телей низложи́ша, сокрꙋши́ша и҆ де́мѡнѡвъ немѡщны́ѧ де́рзѡсти. тѣ́хъ моли́твами спасѝ дꙋ́шы на́шѧ.
Сла́ва геѡ́ргїа, гла́съ то́йже:
Ꙗ҆́кѡ плѣ́нныхъ свободи́тель, и҆ ни́щихъ защи́титель, немощствꙋ́ющихъ вра́чь, побѣдоно́сче великомꙋ́чениче геѡ́ргїе, молѝ хрⷭ҇та̀ бг҃а, спасти́сѧ дꙋша́мъ на́шымъ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ.
На ᲂу҆́трени є҆ди́нъ канѡ́нъ ѻ҆ктѡ́иха, со і҆рмосо́мъ на ѕ҃: и҆ мч҃никѡвъ на д҃: и҆ геѡ́ргїа, на д҃.
Канѡ́нъ мꙋ́ченикѡвъ.
Гла́съ д҃. Пѣ́снь а҃. І҆рмо́съ:
Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ, свѣ́тлѡ торжествꙋ́ѧ, и҆ воспою̀, ра́дꙋѧсѧ тоѧ̀ чꙋдеса̀.
Трⷪ҇цы равночи́сленнїи прест҃ы́ѧ, всебога́тїи, тоѧ̀ ꙗ҆ви́стесѧ честні́и поклѡ́нницы, и҆ предстоитѐ престо́лꙋ трⷪ҇чномꙋ, те́плїи застꙋ̑пницы притека́ющымъ къ ва́мъ.
Трⷪ҇цы поклѡ́нницы трисо́лнечныѧ сꙋ́ще, многобо́жїѧ ле́сть, ст҃і́и, разрꙋши́сте, претерпѣ́вше мꙋ́ки многоѻбра̑зныѧ и҆ сме́рть непра́веднꙋю, бг҃облаже́ннїи.
Мꙋче́нїѧ пꙋчи́нꙋ безъ волне́нїѧ преидо́сте вѣ́рою, бл҃же́ннїи, и҆ приста́сте къ безпеча́льномꙋ животꙋ̀, къ приста́нищꙋ вы́шнїѧ свѣ́тлости, въ сла́вꙋ неизрече́ннꙋю.
Бг҃оро́диченъ:
Ра́дости на́мъ хода́таица, ꙗ҆́кѡ прїе́мши и҆сполне́нїе всегѡ̀ бж҃ества̀, ꙗ҆ви́ласѧ є҆сѝ, пренепоро́чнаѧ. тѣ́мъ всѝ тебѣ̀ ра́дость а҆́гг҃ловꙋ согла́снѡ зове́мъ, бг҃ора́дованнаѧ.
И҆́нъ канѡ́нъ ст҃а́гѡ геѡ́ргїа.
є҆гѡ́же краегране́сїе: Дѣ́ланїе бг҃ꙋ тѧ̀ сла́влю, блаже́нне.
Гла́съ д҃. Пѣ́снь а҃. І҆рмо́съ:
Трїста́ты крѣ́пкїѧ, рожде́йсѧ ѿ дв҃ы, безстра́стїѧ во глꙋбинѣ̀ дꙋшѝ трича́стное потопѝ, молю́сѧ: да тебѣ̀, ꙗ҆́кѡ въ тѷмпа́нѣ, во ᲂу҆мерщвле́нїи тѣлесѐ побѣ́дное воспою̀ пѣ́нїе.
Дѣ́ланїе бж҃їе гобзꙋ́ющее ꙗ҆ви́лсѧ є҆сѝ, пита́ѧ вѣ̑рныѧ подража́нїемъ благочести́вымъ, страстоте́рпче геѡ́ргїе, па́мѧть твою̀ свѣтоно́снꙋю свѧще́ннѡ пра́зднꙋющыѧ, и҆ въ се́й те́плѡ тѧ̀ сла́вѧщыѧ.
Разжжѐ твоѐ, страстоте́рпче, се́рдце бжⷭ҇твенное раче́нїе вои́стиннꙋ, самозва́нъ тѣ́мъ къ мꙋчи́телємъ прише́лъ є҆сѝ, попалѧ́ѧ многобо́жїѧ пре́лесть, и҆ ра́зꙋмъ свѣ́тлости ѡ҆блиста́ѧ спасе́нїѧ.
Ꙗ҆́кѡ ле́въ ᲂу҆пова́ѧ, сꙋди́щꙋ предста́лъ є҆сѝ, возвѣща́ѧ ꙗ҆́вственнѡ воплоще́нїе хрⷭ҇то́во, и҆́мже мі́ръ и҆зба́висѧ паде́нїѧ дре́внѧгѡ, пе́рвое прїѧ́тъ благопло́дїе, требл҃же́нне геѡ́ргїе.
Бг҃оро́диченъ:
И҆збавлѧ́ѧ на́съ ѡ҆сꙋжде́нїѧ дре́внѧгѡ, сн҃ъ бж҃їй бы́сть сн҃ъ дв҃ы, ꙗ҆́кѡ чл҃вѣ́къ: тѣ́мъ сего̀ во двою̀ сꙋщєствꙋ̀ и҆ хотѣ̑нїю правовѣ́рнымъ се́рдцемъ сла́вимъ.
Пѣ́снь г҃. І҆рмо́съ:
Не мꙋ́дростїю, и҆ си́лою, и҆ бога́тствомъ хва́лимсѧ, но тобо́ю, ѻ҆́ч҃ею ѵ҆поста́сною мꙋ́дростїю, хрⷭ҇тѐ: нѣ́сть бо свѧ́тъ, па́че тебє̀, чл҃вѣколю́бче.
Не въ мꙋ́дрости є҆́ллинскагѡ сꙋ́етїѧ, мꙋ́дрїи, но ра́зꙋмомъ бжⷭ҇твеннымъ безбо́жїе ѡ҆бличи́сте пе́рсское, ᲂу҆кори́вше си́хъ безꙋ́мїе.
Свѧщеннонача́лїѧ просвѣще́нъ бжⷭ҇твеннымъ помаза́нїемъ, свѧще́нный а҆кеѱі́мо, мꙋче́нїѧ же кро́вїю себѐ ᲂу҆краси́лъ є҆сѝ, бг҃облаже́нне.
Сокрꙋше́нїе твои́хъ ᲂу҆дѡ́въ, і҆ѡ́сифе приснопа́мѧтне, прелє́стныѧ кѡ́зни до конца̀, мꙋ́чениче, сокрꙋшѝ, тебѣ́ же и҆схода́таи сла́вꙋ нетлѣ́ннꙋю.
Бг҃оро́диченъ:
Тѧ̀ мꙋ́дрость бж҃їѧ чистѣ́йшее селе́нїе ѡ҆брѣ́тши, ѿ твои́хъ чⷭ҇тыхъ крове́й воплоти́сѧ, и҆ по ржⷭ҇твѣ̀ нетлѣ́ннꙋ ꙗ҆вѝ.
И҆́нъ. І҆рмо́съ:
Лꙋ́къ си́льныхъ и҆знемо́же, и҆ немощствꙋ́ющїи препоѧ́сашасѧ си́лою: сегѡ̀ ра́ди ᲂу҆тверди́сѧ въ гдⷭ҇ѣ се́рдце моѐ.
Ро́да и҆ ѻ҆те́чества сла́вы ра́достїю ѿве́ргсѧ, хрⷭ҇тꙋ̀ послѣ́довалъ є҆сѝ, и҆ го́рнѧгѡ сїѡ́на жи́тель, мꙋ́чениче, ꙗ҆ви́лсѧ є҆сѝ краснѣ́йшїй.
Да наслѣ́дникъ и҆зѧ́щенъ и҆ покори́въ жива́гѡ бг҃а сн҃ъ ꙗ҆ви́шисѧ, претерпѣ́лъ є҆сѝ ра̑ны треволне́нїѧ мꙋчи́телей, мꙋ́чениче до́блїй.
Бг҃оро́диченъ:
Во всего̀ а҆да́ма ѡ҆дѣ́ѧсѧ, и҆́же милосе́рдїѧ ра́ди но́вый а҆да́мъ бы́сть и҆зъ тебє̀, пренепоро́чнаѧ, є҆ди́нъ сы́й человѣ́кѡвъ созда́тель.
Конда́къ ст҃ы́хъ, гла́съ в҃. Подо́бенъ: Вы́шнихъ и҆щѧ̀:
Бжⷭ҇твєннаѧ, мꙋ́дре, непоро́чнѡ тайноводи́лъ є҆сѝ, же́ртва прїѧ́тна бы́лъ є҆сѝ, бг҃обл҃же́нне: хрⷭ҇то́вꙋ бо пи́лъ є҆сѝ ча́шꙋ сла́внѡ, свѧ́те а҆кеѱі́мо, со страда̑льцы твои́ми, молѧ́сѧ непреста́ннѡ ѡ҆ всѣ́хъ на́съ.
І҆́косъ:
Кто̀ ѿ вѣ́рныхъ возмо́жетъ ѿню́дъ досто́йнѡ воспѣ́ти премꙋ́драго свѧще́нника а҆кеѱі́ма, свѣти́льника хрⷭ҇то́ва; то́й бо разрꙋшѝ пре́лесть і҆́дѡльскꙋю, и҆ посрамѝ де́мѡнскаѧ ᲂу҆хищрє́нїѧ крѣ́пкою си́лою сп҃са хрⷭ҇та̀ бг҃а, трⷪ҇цѣ прест҃ѣ́й благоче́стнѡ покланѧ́тисѧ наказꙋ́ѧ, ѻ҆ц҃а̀ и҆ сн҃а и҆ ст҃а́го дх҃а во є҆ди́номъ бжⷭ҇твѣ̀ почита́ти, молѧ́сѧ непреста́ннѡ ѡ҆ всѣ́хъ на́съ.
Сѣда́ленъ мч҃никѡвъ, гла́съ и҃. Подо́бенъ: Премꙋ́дрости:
І҆ѡ́сифъ до́блїй подви́жникъ, а҆кеѱі́ма, пре́лести гꙋби́тель и҆ а҆їѳа́лъ, сла́вный страда́лецъ непобѣди́мый, свѣ̑тлыѧ ѕвѣ̑зды, вѣ́рными въ пѣ́снехъ досто́йнѡ вои́стиннꙋ да восхва́лѧтсѧ дне́сь: сі́и бо пре́лесть пе́рсѡвъ ѡ҆черни́ша, со́лнцꙋ не поже́рше, ни ѻ҆гнѧ̀ поче́тше, къ ни́мже любо́вїю возопїе́мъ: моли́те хрⷭ҇та̀ бг҃а, грѣхѡ́въ ѡ҆ставле́нїе дарова́ти пра́зднꙋющымъ любо́вїю свѧтꙋ́ю па́мѧть ва́шꙋ.
Сла́ва ст҃а́гѡ геѡ́ргїа, гла́съ а҃. Подо́бенъ: Гро́бъ тво́й:
Во́инство на землѝ возненави́дѣвъ, мч҃ниче, на нб҃сѣ́хъ возжелѣ́лъ є҆сѝ сла́вы, и҆ болѣ̑зни поне́слъ є҆сѝ, и҆ лю́тꙋю сме́рть. тѣ́мъ, дне́сь всесвѧтꙋ́ю твою̀ па́мѧть пра́зднꙋюще, хрⷭ҇тꙋ̀ прино́симъ хвалꙋ̀, требл҃же́нне геѡ́ргїе.
И҆ ны́нѣ, бг҃оро́диченъ:
Оу҆пова́нїе хрⷭ҇тїа́нъ, прест҃а́ѧ дв҃о, є҆го́же родила̀ є҆сѝ бг҃а, па́че ᲂу҆ма̀ и҆ сло́ва, непреста́ннѡ молѝ ѡ҆ воспѣва́ющихъ тѧ̀, пода́ти ѡ҆ставле́нїе грѣхѡ́въ на́шихъ всѣ́хъ, и҆ и҆справле́нїе житїѧ̀, вѣ́рою и҆ любо́вїю при́снѡ сла́вѧщымъ тѧ̀.
Крⷭ҇тобг҃оро́диченъ:
Нескве́рнаѧ а҆́гница, а҆́гнца и҆ па́стырѧ повѣ́шена на дре́вѣ ме́ртва зрѧ́щи, пла́чꙋщи, вѣща́ше, мт҃рски восклица́ющи: ка́кѡ претерплю̀ твоѐ, є҆́же па́че сло́ва, сн҃е мо́й, сни́тїе, и҆ вѡ́льныѧ стрⷭ҇ти, бж҃е пребл҃гі́й.
Пѣ́снь д҃. І҆рмо́съ:
Сѣдѧ́й въ сла́вѣ на прⷭ҇то́лѣ бжⷭ҇тва̀, во ѻ҆́блацѣ ле́гцѣ прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й.
Ни̑жнѧѧ презрѣ́вше, и҆ ко є҆ди̑нѣмъ пребыва́ющымъ смотрѧ́юще, тѣ́хъ полꙋчи́ша жили̑ща, а҆кеѱі́ма до́блїй, и҆ сла́внїи і҆ѡ́сифъ и҆ а҆їѳа́лъ, да восхва́лѧтсѧ.
И҆́же къ є҆ди́номꙋ влⷣцѣ просте́ртое твоѐ помышле́нїе, во вре́мѧ страда́нїѧ, мꙋ́чениче, ѡ҆блегчє́нїѧ тебѣ̀ творѧ́ше нестерпи́мыхъ мꙋ́къ, крѣ́пкїй і҆ѡ́сифе, страстоте́рпче хрⷭ҇то́въ досточꙋ́дне.
Честно́е твоѐ свидѣ́тельство, ꙗ҆́кѡ плодови́та лоза̀ ѡ҆б̾е́млема, и҆сточа́етъ вїно̀ вѣ̑рнымъ ᲂу҆миле́нїѧ, а҆їѳа́ле страстоте́рпче, веселѧ́щи зовꙋ́щыѧ: сла́ва, хрⷭ҇тѐ, си́лѣ твое́й.
Бг҃оро́диченъ:
Ст҃а́ѧ бцⷣа, въ ню́же всели́тисѧ бл҃говолѝ, ꙗ҆́кѡ во бл҃гово́нный хра́мъ, сло́во ѻ҆́ч҃ее и҆ равнобжⷭ҇твенное, не растлѣ̀ чистоты̀, ни стꙋжѝ: и҆́бо родѝ є҆мманꙋ́ила, бг҃а и҆ чл҃вѣ́ка.
И҆́нъ. І҆рмо́съ:
Любвѐ ра́ди, ще́дре, твоегѡ̀ ѻ҆́браза, на крⷭ҇тѣ̀ твое́мъ ста́лъ є҆сѝ, и҆ раста́ѧшасѧ ꙗ҆зы́цы: ты́ бо є҆сѝ, чл҃вѣколю́бче, крѣ́пость моѧ̀ и҆ хвале́нїе.
Оу҆мерщвле́нное твоѐ тѣ́ло мꙋ́ками, бл҃же́нне, ᲂу҆мерщвле́ннаго сло́ва воѡбража́етъ стрⷭ҇ти, дарова́вшагѡ тѝ живо́тъ вѣ́чный.
Щито́мъ и҆́стиннымъ ѡ҆гражде́нъ, побо́рники лжи̑выѧ крѣ́пкимъ смы́сломъ кꙋ́пнѡ погꙋби́лъ є҆сѝ, бг҃омꙋ́дре геѡ́ргїе.
Просла́висѧ твои́ми ᲂу҆́ды ст҃ы́ми, и҆́же въ земны́хъ ѡ҆дѣ́ѧсѧ неможе́нїе, сло́во. тѣ́мъ вѣ́чнѡ тѧ̀ прославлѧ́емъ, геѡ́ргїе.
Бг҃оро́диченъ:
И҆́же бытїѐ дарова́вый человѣ́кѡмъ, и҆ є҆́же до́брѣ бы́ти тѣ̑мъ, престꙋпле́нїемъ и҆стлѣ́вшымъ, пречⷭ҇таѧ, дарова̀, бы́въ чл҃вѣ́къ.
Пѣ́снь є҃. І҆рмо́съ:
Ты̀, гдⷭ҇и, мо́й, свѣ́тъ въ мі́ръ прише́лъ є҆сѝ, свѣ́тъ ст҃ы́й, ѡ҆браща́ѧй и҆зъ мра́чна невѣ́дѣнїѧ, вѣ́рою воспѣва́ющыѧ тѧ̀.
Вели́кое и҆ честно́е призыва́ѧ и҆́мѧ гдⷭ҇не, ча́шꙋ спасе́нїѧ страда́нїй, ра́дꙋѧсѧ, а҆кеѱі́мо, и҆спи́лъ є҆сѝ.
Вы́шнѧѧ тѧ̀ пи́ща зва́ннаго ра́нами прїѧ́тъ, и҆ ли́цы, і҆ѡ́сифе, мꙋ́ченичестїи, съ ни́ми веселѧ́щасѧ.
Са́дъ присноцвѣтꙋ́щїй, плоды̀ пѡ́двигъ твои́хъ концы̀ пита́ѧ, и҆́стиннѡ ꙗ҆ви́лсѧ є҆сѝ, а҆їѳа́ле бл҃же́нне.
Бг҃оро́диченъ:
Свѣ́тъ безлѣ́тный на́мъ ѻ҆́ч҃ее сїѧ́нїе родила̀ є҆сѝ подъ лѣ́ты, бл҃госты́нею бога́тства бы́вша, пренепоро́чнаѧ.
И҆́нъ. І҆рмо́съ то́йже.
Вше́дъ мꙋ́жески въ мꙋ́ченическїй по́двигъ, и҆ порази́лъ є҆сѝ і҆́дѡльское, страстоте́рпче, свирѣ́пство, тѣ́ломъ сокрꙋша́емь.
Тебѐ, ка́мень свѣ́тлый, влⷣка въ вѣнцѣ́хъ вонзѐ, страстоте́рпче, свое́й цр҃кви подо́бнѡ сїѧ́юща.
Пожре́сѧ, ꙗ҆́кѡ а҆́гнецъ, до́брагѡ пастыренача́льника сме́рть воѡбрази́въ, и҆ прине́слсѧ є҆сѝ вы́шнѣй трапе́зѣ же́ртва непоро́чна.
Бг҃оро́диченъ:
Спаси́ ны ѿ бѣ́дъ и҆ скорбе́й, пречⷭ҇таѧ бцⷣе, и҆ мꙋ́къ и҆зба́ви бꙋ́дꙋщихъ, моли́твами твои́ми.
Пѣ́снь ѕ҃. І҆рмо́съ:
Пожрꙋ́ ти со гла́сомъ хвале́нїѧ, гдⷭ҇и, цр҃ковь вопїе́тъ тѝ, ѿ бѣсо́вскїѧ кро́ве ѡ҆чи́щшисѧ, ра́ди ми́лости ѿ ре́бръ твои́хъ и҆сте́кшею кро́вїю.
Главѣ̀, а҆кеѱі́мо, твое́й ѿсѣ́ченнѣй ѿ тѣлесѐ, хрⷭ҇тꙋ̀ совокꙋпѝ вѣ́рою дꙋ́шꙋ твою̀, мч҃ниче, неѿстꙋ́пнѡ, та́мѡ сꙋ́щими зарѧ́ми при́снѡ просвѣща́емь.
Ка́менїемъ, ꙗ҆́кѡ первострада́лецъ, мч҃ниче, ᲂу҆бива́емь, не ѿве́рглсѧ є҆сѝ ка́мене жи́зненнагѡ хрⷭ҇та̀, преходѧ̀ къ та́мѡ сꙋ́щымъ свѣ̑тлымъ ѻ҆би́телемъ.
Же́злїемъ неми́лостивнѡ ᲂу҆ранѧ́емь, ра́довашесѧ, же́злъ и҆мѣ́ѧ си́лы крⷭ҇тъ гдⷭ҇ень и҆ похвалꙋ̀, страстоте́рпче а҆їѳа́ле, бг҃омꙋ́дре всебога́те.
Бг҃оро́диченъ:
Кꙋпина̀ проѡбразова́ше вели́кꙋю та́йнꙋ, па́че ᲂу҆ма̀, твоегѡ̀ ржⷭ҇тва̀, ѻ҆гне́мъ ѿню́дъ повива́ема, и҆ ника́коже ѡ҆палѧ́ема, дв҃о всепѣ́таѧ.
И҆́нъ. І҆рмо́съ:
Прїидо́хъ во глꙋбины̑ морскі̑ѧ, и҆ потопи́ла мѧ̀ є҆́сть бꙋ́рѧ мно́гихъ грѣхѡ́въ: но, ꙗ҆́кѡ бг҃ъ, и҆зъ глꙋбины̀ возведѝ живо́тъ мо́й, многоми́лостиве.
Сосꙋ́дъ раздроблѧ́емь тѣ́ла, страда́нїи, мч҃ниче, вра̑жїѧ всѧ̑ кѡ́зни лꙋка̑выѧ мꙋ́жески разрꙋши́лъ є҆сѝ, всеблаже́нне геѡ́ргїе.
Ѻ҆строты̀, разсѣка́ющїѧ тѣ́ло и҆ колесѐ, мꙋ́чениче и҆ распалѧ́емы ве́щи пе́щныѧ, и҆́же къ бг҃ꙋ любо́вїю распалѧ́емь, ѿню́дъ не ᲂу҆страши́лсѧ є҆сѝ.
Бг҃оро́диченъ:
Ст҃ы́й хра́мъ, во ст҃ы́хъ почива́ющемꙋ была̀ є҆сѝ бг҃ома́ти: тѣ́мже на́съ, вѣ́рнѡ пою́щихъ тебѐ, ѡ҆свѧща́еши, приснодв҃о.
Конда́къ ст҃а́гѡ геѡ́ргїа, гла́съ и҃. Подо́бенъ: Взбра́нной:
Къ возбра́нномꙋ и҆ ско́ромꙋ застꙋпле́нїю твоемꙋ̀ прибѣ́гше вѣ́рнїи, мо́лимъ и҆зба́витисѧ, страстоте́рпче хрⷭ҇то́въ, ѿ собла̑знъ вра́жїихъ воспѣва́ющымъ тѧ̀, и҆ всѧ́кихъ бѣ́дъ, и҆ ѡ҆ѕлобле́нїй, да зове́мъ: ра́дꙋйсѧ, мч҃ниче геѡ́ргїе.
І҆́косъ:
Вели́къ въ предста́тельствахъ землѝ показа́лсѧ є҆сѝ, гдⷭ҇ень ᲂу҆го́дниче и҆ дрꙋ́же: вѣ̑рныѧ бо лю́ди, покрыва́ѧ, спаса́еми при́снѡ, сла́вне. тѣ́мъ вѣ́рою и҆ любо́вїю вопїе́мъ тебѣ̀, многострада́льче: ра́дꙋйсѧ, и҆́мже просвѣща́етсѧ мі́ръ: ра́дꙋйсѧ, и҆́мже во́инство ѡ҆зарѧ́етсѧ: ра́дꙋйсѧ, вѣ́рныхъ ѿ плѣ́на и҆збавле́нїе: ра́дꙋйсѧ, ю҆́зникѡвъ ско́рое застꙋпле́нїе: ра́дꙋйсѧ, высото̀ съ вѣ́рою притека́ющихъ къ тебѣ̀ те́плѣ: ра́дꙋйсѧ, ѡ҆богати́телю лю́бѧщихъ тѧ̀ и҆ въ ско́рби весе́лїе: ра́дꙋйсѧ, ꙗ҆́кѡ сы́й люде́й ѡ҆гражде́нїе: ра́дꙋйсѧ, ꙗ҆́кѡ подае́ши во бране́хъ побѣжде́нїе: ра́дꙋйсѧ, ѕвѣздо̀ просвѣща́ющаѧ пла́вающыѧ: ра́дꙋйсѧ, рѣши́телю всѧ́кагѡ ѡ҆ѕлобле́нїѧ: ра́дꙋйсѧ, къ немꙋ́же всѧ́къ вѣ́рный прибѣга́етъ: ра́дꙋйсѧ, и҆́мже восхвалѧ́етсѧ созда́тель: ра́дꙋйсѧ, мч҃ниче геѡ́ргїе.
Пѣ́снь з҃. І҆рмо́съ:
Спасы́й во ѻ҆гнѝ а҆враа̑мскїѧ твоѧ̑ ѻ҆́троки, и҆ халдє́и ᲂу҆би́въ, ꙗ҆̀же пра́вда пра́веднѡ ᲂу҆ловлѧ́ше: препѣ́тый гдⷭ҇и, бж҃е ѻ҆тє́цъ на́шихъ, бл҃гослове́нъ є҆сѝ.
Во ѻ҆гнѝ мꙋче́нїѧ ро́сꙋ ѿ бг҃а прїе́мши, сопроти́вныхъ пла́мы ва́шимъ терпѣ́нїемъ погаси́сте, страстоте́рпцы, зовꙋ́ще: бж҃е ѻ҆тє́цъ на́шихъ, бл҃гослове́нъ є҆сѝ.
И҆̀же ѻ҆гню̀ поклѡ́нницы, семꙋ̀ наслѣ̑дницы ꙗ҆ви́шасѧ, ѻ҆гню̀ слꙋжи́ти, слꙋжа́щыѧ сл҃нцꙋ сла́вы понꙋжда́хꙋ, но сі́и взыва́хꙋ: бж҃е ѻ҆тє́цъ на́шихъ, бл҃гослове́нъ є҆сѝ.
А҆кеѱі́ма, и҆ і҆ѡ́сифъ, и҆ а҆їѳа́лъ, трⷪ҇цы всечестны́ѧ трѝ свѣти̑ла, и҆̀же всѧ̑ концы̀ благоче́стїѧ зарѧ́ми ѡ҆блиста́юще, да почтꙋ́тсѧ во вѣ́ки.
Бг҃оро́диченъ:
Бл҃гослове́нъ пло́дъ бл҃гослове́ннагѡ твоегѡ̀ чре́ва, є҆го́же бл҃гословѧ́тъ нбⷭ҇ныѧ си̑лы, и҆ земны́хъ составлє́нїѧ, и҆́же на́съ и҆зба́вивый клѧ́твы пе́рвыѧ, благослове́ннаѧ.
И҆́нъ. І҆рмо́съ:
Ю҆́ношы трѝ въ вавѷлѡ́нѣ, велѣ́нїе мꙋчи́телево на бꙋ́йство прело́жше, посредѣ̀ пла́мене вопїѧ́хꙋ: бл҃гослове́нъ є҆сѝ, гдⷭ҇и, бж҃е ѻ҆тє́цъ на́шихъ.
Жива̀ бы́лъ є҆сѝ же́ртва, мч҃ниче, за ны̀ пожре́нномꙋ, ꙗ҆́кѡ ѻ҆вча́ти, де́мѡнѡмъ жє́ртвы всꙋ́е приноси̑мыѧ ᲂу҆праздни́лъ є҆сѝ, ѡ҆ хрⷭ҇тѣ̀ ᲂу҆крѣплѧ́емь.
Ꙗ҆ви́сѧ благопло́денъ ꙗ҆́кѡ лоза̀, приносѧ̀ гро́здїе на́мъ терпѣ́нїѧ, сла́вне, вїно̀ ка́плюще бжⷭ҇твенное, сердца̀ всѣ́хъ благочести́выхъ веселѧ́щее.
Оу҆́ды да́лъ є҆сѝ ᲂу҆се́рднѡ разсѣка́ти за хрⷭ҇та̀, пребы́лъ же є҆сѝ неѿлꙋче́нъ тогѡ̀ любвѐ, пребл҃же́нне, и҆ наслѣ́дникъ всѣ́хъ бла̑гъ, веселѧ́сѧ.
Бг҃оро́диченъ:
Хвалꙋ̀ бг҃ꙋ прино́ситъ всѧ̀ тва́рь, ѿ твоегѡ̀ ро́ждшꙋсѧ, пренепоро́чнаѧ ѻ҆трокови́це, пречⷭ҇тагѡ чре́ва, и҆ дре́внїѧ всѣ́хъ на́съ клѧ́твы и҆зба́вльшемꙋ.
Пѣ́снь и҃. І҆рмо́съ:
Ѻ҆́троки благочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть, тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.
Сло́ва бы́вше прїѧ́тєлища, и҆ тогѡ̀ ꙗ҆́звы носѧ́ще, мꙋчи́телей сꙋровство́мъ, бре́мѧ, а҆́ки бездꙋ́шно, на безсловє́снаѧ возложи́стесѧ, приноси́ми ко и҆скꙋше́нїю мно́жайшымъ мꙋ́камъ, мꙋ́ченицы до́блїи, хрⷭ҇та̀ превозносѧ́ще во вѣ́ки.
Хода́таи сла́вы присносꙋ́щныѧ, приснопа́мѧтнїи мч҃ницы ᲂу҆краша́еми, ра́достнѡ ше́ствовасте, є҆го́же возлюби́сте свидѣ́тельства, сла́внїи, пꙋ́ть, зовꙋ́ще: гдⷭ҇а по́йте и҆ превозноси́те є҆го̀ во вѣ́ки.
Ни ѻ҆́гнь, ни ра̑ны, ни ѕвѣ́ри, ни ме́чь, ни ро́дъ, ни сме́рть возмо́же мч҃ники твоеѧ̀ любвѐ ѿлꙋчи́ти, гдⷭ҇и, благи́хъ и҆сто́чниче, любвѐ неистощи́маѧ стрꙋѧ̀, и҆̀хже хва́лѧще, хрⷭ҇тѐ, тебѐ благослови́мъ во вѣ́ки.
Бг҃оро́диченъ:
Є҆ди́нꙋ неискꙋсомꙋ́жнꙋю мт҃рь, и҆ є҆ди́нꙋ тва́рей преимꙋ́щꙋю, го́рꙋ прест҃ꙋ́ю, трапе́зꙋ всезлатꙋ́ю, бцⷣꙋ, пѣ́сньми воспѣва́юще, зове́мъ: гдⷭ҇а воспѣва́йте дѣла̀, и҆ превозноси́те є҆го̀ во вѣ́ки.
И҆́нъ. І҆рмо́съ:
И҆зба́вителю всѣ́хъ всеси́льне, посредѣ̀ пла́мене благоче́ствовавшыѧ, снизше́дъ ѡ҆роси́лъ є҆сѝ, и҆ наꙋчи́лъ є҆сѝ пѣ́ти: всѧ̑ дѣла̀ благослови́те, по́йте гдⷭ҇а.
Оу҆пра́витель пла́вающымъ и҆зѧ́щный, помо́щникъ въ ско́рбехъ вели́къ ꙗ҆ви́лсѧ є҆сѝ, геѡ́ргїе: спаса́еши вѣ́рою къ тебѣ̀ и҆ несомнѣ́ннымъ се́рдцемъ притека́ющыѧ.
И҆́стины ꙗ҆ви́лсѧ є҆сѝ побо́рникъ, и҆ лжѝ бы́лъ є҆сѝ ѡ҆глаго́льникъ, на́мъ же па́ки ᲂу҆твержде́нїе, страстоте́рпче, вѣ́рою вопїю́щымъ: благослови́те, всѧ̑ дѣла̀ гдⷭ҇нѧ, гдⷭ҇а.
Кропле́нїемъ крове́й твои́хъ погаси́лъ є҆сѝ пре́лести, геѡ́ргїе, ᲂу҆́глїе, и҆ вѣ́рныхъ напои́лъ є҆сѝ сердца̀, вѣ́рнѡ тѧ̀ воспѣва́ющихъ и҆ соверша́ющихъ сла́внꙋю па́мѧть твою̀.
Бг҃оро́диченъ:
Ѿ і҆ессе́ева ко́рене прозѧбла̀ є҆сѝ, и҆ ѕло́бный ко́рень и҆сто́ргнꙋла є҆сѝ, содѣ́телѧ тва́ри прозѧ́бши, ѻ҆трокови́це, є҆мꙋ́же пое́мъ: благослови́те, всѧ̑ дѣла̀ гдⷭ҇нѧ, гдⷭ҇а.
Пѣ́снь ѳ҃. І҆рмо́съ:
Ка́мень нерꙋкосѣ́чный ѿ несѣко́мыѧ горы̀ тебє̀, дв҃о, краеꙋго́льный ѿсѣче́сѧ, хрⷭ҇то́съ, совокꙋпи́вый разстоѧ̑щаѧсѧ є҆стєства̀: тѣ́мъ веселѧ́щесѧ, тѧ̀, бцⷣе, велича́емъ.
Благочести̑выѧ свѣти́льники и҆ пре́лести потреби́тели, разꙋ́мнагѡ раѧ̀ благовѡ́нныѧ цвѣ́ты, сосꙋ́ды честны̑ѧ, бж҃їѧ красоты̀ зри́тели восхва́лимъ.
Оу҆́гль, є҆го́же дре́вле ви́дѣ и҆са́їа, въ се́рдцы внꙋ́трь прїе́мше, и҆ тогѡ̀ блиста́нїемъ ѡ҆зарѧ́еми, мра́чное, мꙋ́чєницы, ѻ҆гнѧ̀ слꙋже́нїе ѿрази́сте.
Живонача́льнѣй ны́нѣ трⷪ҇цѣ ᲂу҆кра́шени предстоитѐ, и҆ вѣне́чными добро́тами просвѣща́еми, па́мѧть творитѐ, ѡ҆ и҆̀же на землѝ, бл҃же́ннїи, помина́ющихъ ва́съ всегда̀.
Бг҃оро́диченъ:
Ѿча́ѧннаго мѧ̀ спасѝ, сп҃са заче́ншаѧ, и҆ пло́тїю ро́ждшаѧ, дв҃о. грѣхо́внымъ бо бре́менемъ ѡ҆тѧгча́емь, болѣ́зненнѡ зовꙋ́ ти: потща́вшисѧ, помозѝ рабꙋ̀ твоемꙋ̀.
И҆́нъ. І҆рмо́съ:
Є҆́ѵа ᲂу҆́бѡ недꙋ́гомъ преслꙋша́нїѧ, клѧ́твꙋ всели́ла є҆́сть, ты́ же дв҃о бцⷣе, прозѧбе́нїемъ чревоноше́нїѧ мі́рови благослове́нїе процвѣла̀ є҆сѝ. тѣ́мъ тѧ̀ всѝ велича́емъ.
Ꙗ҆́кѡ ᲂу҆́тро, ꙗ҆́кѡ со́лнце свѣ́тлѡ возсїѧ́въ, и҆ тва́рь просвѣти́лъ є҆сѝ, страсте́й незаходи́мыми зарѧ́ми, чꙋде́съ же мно́гихъ ꙗ҆вле́нїи, геѡ́ргїе, мч҃никѡвъ ра́дованїе. тѣ́мъ тѧ̀ любо́вїю ᲂу҆блажа́емъ.
Ка́плѧ бжⷭ҇твенныѧ сла́дости, геѡ́ргїе, ꙗ҆ви́лсѧ є҆сѝ стра́стнꙋю на́шꙋ го́ресть взе́млѧ, и҆ ѡ҆слажда́ѧ всегда̀ дꙋ́шы же и҆ сердца̀ вѣ́рою тѧ̀ блажа́щихъ, достосла́вне.
Ѡ҆свѧти́лъ є҆сѝ кро́вїю зе́млю, и҆ дꙋ́хомъ весе́лїѧ нбⷭ҇наѧ и҆спо́лнилъ є҆сѝ, мꙋ́чениче. тѣ́мъ всѧ́ка дꙋша́ тѧ благочести́выхъ, ꙗ҆́кѡ ᲂу҆го́дника гдⷭ҇нѧ, лю́битъ при́снаго, и҆ помо́щника тѧ̀ написꙋ́етъ.
Бг҃оро́диченъ:
Гла́съ тѝ прино́симъ бжⷭ҇твеннагѡ гаврїи́ла весе́лїѧ, зовꙋ́ще: ра́дꙋйсѧ, ра́дость вселе́ннѣй, ско́рби потреби́телѧ поро́ждши, и҆ є҆́ѵино ѿе́мши поноше́нїе: ра́дꙋйсѧ, дв҃о неискꙋсобра́чнаѧ.
Свѣти́ленъ. Подо́бенъ: Дх҃омъ во ст҃и́лищи:
Под̾ѧ́лъ є҆сѝ, ꙗ҆́кѡ безпло́тенъ, нестерпи̑мыѧ мꙋ̑ки, а҆кеѱі́мо всехва́льне, свѧще́нникѡвъ сла́во, со і҆ѡ́сифомъ чꙋ́днымъ, и҆ ди́вный а҆їѳа́лъ дїа́конъ, хрⷭ҇то́въ таи́нникъ, и҆́хже болѣ́знемъ страда́нїѧ ᲂу҆дивлѧ́ютсѧ при́снѡ безпло́тныхъ чи́ни.
Сла́ва, геѡ́ргїю. Подо́бенъ: то́йже.
Стрꙋѧ́ми крове́й твои́хъ прелє́стныѧ пла́мы погаси́лъ є҆сѝ, бл҃же́нне, и҆ мꙋчи́телей свирѣ́пство до конца̀ погꙋби́лъ є҆сѝ, и҆ хрⷭ҇та̀ просла́вилъ є҆сѝ, геѡ́ргїе страстоте́рпче. тѣ́мъ вѣне́цъ прїѧ́лъ є҆сѝ нетлѣ́нїѧ и҆ жи́зни ѿ десни́цы вы́шнѧгѡ.
Бг҃оро́диченъ:
Нѣ́сть во мнѣ̀ ѿню́дъ наде́жды спасе́нїѧ, дв҃о, ꙗ҆́кѡ ѕлѣ̀ впадо́хъ во глꙋбинꙋ̀ прегрѣше́нїй, и҆ ждꙋ̀ преще́нїѧ стра́шныѧ мꙋ́ки, и҆ кѡ́злищъ ча́сти: но ᲂу҆ще́дри мѧ̀ пре́жде сꙋда̀, ꙗ҆́кѡ сꙋ́щи тепла̀ застꙋ́пница, бцⷣе.
На стїхо́внѣ ѻ҆ктѡ́иха, и҆ мꙋ́ченикѡвъ.
Сті́хъ: Воззва́ша пра́веднїи, и҆ гдⷭ҇ь ᲂу҆слы́ша и҆́хъ.
Стїхи́ра, гла́съ в҃:
Ѡ҆ благоче́стїи, ст҃і́и, тве́рдѣ подвиза́вшесѧ за хрⷭ҇та̀, свирѣ́пство мꙋчи́телей посрами́сте, и҆ і҆́дѡлѡвъ высотꙋ̀ въ про́пасть погрꙋзи́сте, а҆кеѱі́мо, и҆ а҆їѳа́ле, и҆ і҆ѡ́сифе. и҆ ны́нѣ на нб҃сѣ́хъ, вѣнцено́сцы, ликꙋ́юще, моли́тесѧ ѡ҆ дꙋша́хъ на́шихъ.
Сла́ва, гла́съ д҃. Самогла́сенъ, стꙋді́тово:
Разꙋ́мнагѡ а҆дама́нта терпѣ́нїе, бра́тїе, дꙋхо́внѡ восхва́лимъ, геѡ́ргїа, сла́внагѡ мч҃ника, є҆го́же, за хрⷭ҇та̀ жго́ма, кова́ша бѣды̑, и҆ ѡ҆стри́ша мꙋ̑ки, и҆ разли̑чнаѧ мꙋчє́нїѧ и҆знꙋри́ша тѣ́ло, є҆стество́мъ тлѣ́нное: побѣжда́ше бо жела́нїе є҆стество̀, сме́ртїю понꙋжда́ѧ рачи́телѧ прейтѝ къ жела́емомꙋ хрⷭ҇тꙋ̀ бг҃ꙋ, и҆ сп҃сꙋ дꙋ́шъ на́шихъ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Ꙗ҆́кѡ до́блѧ:
На крⷭ҇тѣ́ тѧ ꙗ҆́кѡ ᲂу҆зрѣ̀ ꙳ пригвожде́на, гдⷭ҇и, ꙳ а҆́гница и҆ мт҃и твоѧ̀, дивлѧ́шесѧ, ꙳ и҆ что̀ видѣ́нїе сїѐ, взыва́ше, ꙳ сн҃е вожделѣ́нне, ꙳ сїѧ̑ тѝ невѣ́рный собо́ръ воздадѐ беззако́нный, ꙳ и҆́же мно́гихъ твои́хъ чꙋде́съ наслади́выйсѧ; ꙳ но сла́ва неизглаго́ланномꙋ ꙳ соше́ствїю твоемꙋ̀, влⷣко.
На лїтꙋргі́и: прокі́менъ, гла́съ д҃: Ст҃ы̑мъ, и҆̀же сꙋ́ть: Сті́хъ: Предзрѣ́хъ гдⷭ҇а: А҆пⷭ҇лъ ко є҆фесе́ѡмъ, зача́ло сл҃г. А҆ллилꙋ́їа, гла́съ д҃: Воззва́ша пра́веднїи, и҆ гдⷭ҇ь ᲂу҆слы́ша и҆̀хъ. Сті́хъ: Мнѡ́ги скѡ́рби пра́вєднымъ: Є҆ѵⷢ҇лїе лꙋкѝ, зача́ло р҃ѕ. Прича́стенъ: Ра́дꙋйтесѧ, пра́веднїи ѡ҆ гдⷭ҇ѣ: