Мѣ́сѧца тогѡ́же въ д҃-й де́нь. Прпⷣбнагѡ ѻ҆тца̀ на́шегѡ і҆ѡанні́кїа вели́кагѡ:
И҆ ст҃а́гѡ мч҃ника нїка́ндра, є҆пі́скопа мѵ́рскагѡ, и҆ є҆рме́а пресвѵ́тера.
На Гдⷭ҇и, воззва́хъ, стїхи̑ры на ѕ҃. Прпⷣбнагѡ г҃, гла́съ д҃.
Подо́бенъ: Зва́нный свы́ше:
И҆́же свѣ́томъ ꙳ ѡ҆блиста́нъ бжⷭ҇твеннымъ, ꙳ є҆гда̀ чистото́ю ᲂу҆ма̀ воззрѣ́лъ є҆сѝ, ꙳ и҆ подо́бнѡ разсꙋди́въ не стоѧ́щихъ, ꙳ вѣ́чнѡ бꙋ̑дꙋщаѧ, ꙳ тогда̀ ѻ҆́гнь въ се́рдцы, ѻ҆́ч҃е, прїе́мъ, ꙳ є҆ле́ни подо́бнѡ разже́глсѧ є҆сѝ ꙳ бжⷭ҇твенною любо́вїю, ꙳ и҆ забы́въ пло́ть и҆ кро́вь, ꙳ ᲂу҆гото́вилсѧ є҆сѝ къ подвигѡ́мъ по́стничєскимъ, ꙳ и҆́хже ра́ди тѣлє́сныѧ стра̑сти ꙳ дꙋшѝ твое́й покори́лъ є҆сѝ.
На восхожде́нїе бжⷭ҇твенныхъ го́ръ высоты̀ всели́лсѧ є҆сѝ, ꙳ не смирѧ́емь смире́ннагѡ сегѡ̀ тѣлесѐ нꙋ́ждами, ꙳ ѻ҆́ч҃е, бѣ́дными, і҆ѡанні́кїе. ꙳ бдѣ́нными стоѧ̑нїи и҆ вседне́вными моли́твами, ꙳ благо́мꙋ сочета́всѧ, ꙳ просвѣти́лсѧ є҆сѝ, ꙳ и҆ проро́чества прїѧ́лъ є҆сѝ да́ръ, ꙳ зрѣ́ти да̑льнѧѧ, ꙗ҆́кѡ бли̑жнѧѧ, ꙳ и҆ предглаго́лати вѣ̑рнымъ бꙋ̑дꙋщаѧ. ꙳ тѣ́мъ, ꙗ҆́кѡ бжⷭ҇твеннаго ꙳ ᲂу҆чи́телѧ, тѧ̀ сла́вимъ.
Де́мѡнскаѧ стремлє́нїѧ и҆ стрѣ́лы ꙳ крѣ́пкѡ притꙋпи́лъ є҆сѝ ꙳ воѡбраже́нїи моли́твъ, ꙳ и҆ на тѣ́хъ взѧ́лъ є҆сѝ побѣ̑ды ꙳ бж҃їею си́лою, достосла́вне. ꙳ ѿсю́дꙋ по́чєсти тебѣ̀, ѻ҆́ч҃е, ꙳ чꙋде́съ бл҃гі́й дарова̀, ꙳ смире́нїемъ ᲂу҆поко́ивсѧ се́рдца твоегѡ̀. ꙳ тѣ́мже и҆ мѵ́ро благово́нное ꙳ твоѧ̑ честны̑ѧ и҆сточа́ютъ мо́щи: ꙳ благово́нїе бо ꙗ҆ви́лсѧ є҆сѝ ꙳ хрⷭ҇то́во, і҆ѡанні́кїе.
И҆́ны стїхи̑ры мч҃ника, гла́съ в҃. Подо́бенъ: Є҆гда̀ ѿ дре́ва:
Зва́нїе тезоиме́нное прїе́мъ ѿ бжⷭ҇твеннагѡ про́мысла, сїѐ вещмѝ, ѻ҆́ч҃е, зна́менавъ, ᲂу҆тверди́лъ є҆сѝ: ра́тныхъ бо мно́жєства, и҆ собо́ръ мꙋчи́телей въ терпѣ́нїи твое́мъ побѣди́лъ є҆сѝ. тѣ́мъ вѣне́цъ побѣ́ды прїе́мъ, вѣ́рою взыва́лъ є҆сѝ: сла́ва непобѣди́мѣй держа́вѣ твое́й, чл҃вѣколю́бче.
Мѵ̑ра благовѡ́ннѣйшаѧ на́мъ врачева́нїй и҆сточа́еши дне́сь, нїка́ндре, въ бжⷭ҇твеннѣй па́мѧти твое́й, и҆ ѿго́ниши, мꙋ́дре, мглꙋ̀ скорбе́й и҆ стра̑сти тѣлє́сныѧ, и҆ бога́тыѧ благода́ти и҆сполнѧ́еши собо́ръ всѣ́хъ вопїю́щихъ хрⷭ҇тꙋ̀: ты̀ є҆сѝ неистоще́нное мѵ́ро, благоꙋха́ющее пою́щыѧ тѧ̀.
И҆мѣ́ѧ дерзнове́нїе ко хрⷭ҇тꙋ̀, прославлѧ́емомꙋ є҆ди́номꙋ во ст҃ы́хъ є҆гѡ̀, того̀ молѝ, прпⷣбне нїка́ндре, ѡ҆ всѣ́хъ, любо́вїю соверша́ющихъ твою̀ па́мѧть, и҆ восхвалѧ́ющихъ твоѧ̑ и҆справлє́нїѧ, ꙗ҆́кѡ да неизрече́нныхъ ѻ҆́ныхъ бла̑гъ и҆ нетлѣ́нныѧ сла́вы ѻ҆́бщницы бꙋ́демъ благода́тїю.
Сла́ва, гла́съ ѕ҃:
Прпⷣбне ѻ҆́ч҃е, во всю̀ зе́млю и҆зы́де вѣща́нїе и҆справле́нїй твои́хъ, тѣ́мъ на нб҃сѣ́хъ ѡ҆брѣ́лъ є҆сѝ мздꙋ̀ трꙋдѡ́въ твои́хъ. де́мѡнскїѧ погꙋби́лъ є҆сѝ полкѝ, и҆ а҆́гг҃льскїѧ дости́глъ є҆сѝ чи́ны: и҆́хже житїю̀ безъ поро́ка поревнова́лъ є҆сѝ, дерзнове́нїе и҆мѣ́ѧ ко хрⷭ҇тꙋ̀ бг҃ꙋ, ми́ръ и҆спросѝ дꙋша́мъ на́шымъ.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Тридне́венъ:
Ви́дѧщи тѧ̀ распина́ема, хрⷭ҇тѐ, тебѐ ро́ждшаѧ, вопїѧ́ше: что̀ стра́нное, є҆́же ви́жꙋ, та́инство, сн҃е мо́й; ка́кѡ на дре́вѣ ᲂу҆мира́еши, пло́тїю повѣ́шенъ, жи́зни пода́телю;
На стїхо́внѣ ѻ҆ктѡ́иха. Сла́ва, гла́съ и҃. Самогла́сенъ:
Мона́хѡвъ мно́жєства наста́вника тѧ̀ почита́емъ, ѻ҆́ч҃е на́шъ і҆ѡанні́кїе: твое́ю бо стезе́ю вои́стиннꙋ пра́вѡ ходи́ти позна́хомъ. блаже́нъ є҆сѝ хрⷭ҇тꙋ̀ рабо́тавъ, и҆ вра́жїю ѡ҆бличи́лъ є҆сѝ си́лꙋ, а҆́гг҃лѡвъ собесѣ́дниче, прпⷣбныхъ соприча́стниче и҆ пра́ведныхъ: съ ни́миже моли́сѧ гдⷭ҇еви, поми́ловатисѧ дꙋша́мъ на́шымъ.
И҆ ны́нѣ, бг҃оро́диченъ: и҆лѝ крⷭ҇тобг҃оро́диченъ. Подо́бенъ: Ѽ пресла́внагѡ чꙋдесѐ!
Тѧ̀ ви́дѧщи пригвожда́ема ꙳ на крⷭ҇тѣ̀, і҆и҃се, ꙳ и҆ стрⷭ҇ти прїе́млюща во́лею, ꙳ дв҃а и҆ мт҃и твоѧ̀, влⷣко, ꙳ ᲂу҆вы̀ мнѣ̀, вопїѧ́ше, ча́до сла́дкое: ꙳ ра̑ны непра́веднѡ ка́кѡ терпи́ши, ꙳ врачꙋ̀, и҆сцѣли́вый человѣ́ческое неможе́нїе, ꙳ и҆ ѿ тлѝ всѣ́хъ и҆зба́вивый ꙳ милосе́рдїемъ твои́мъ;
Тропа́рь, гла́съ и҃:
Сле́зъ твои́хъ тече́ньми пꙋсты́ни безпло́дное воздѣ́лалъ є҆сѝ, и҆ и҆̀же и҆зъ глꙋбины̀ воздыха́ньми, во сто̀ трꙋдѡ́въ ᲂу҆плодоноси́лъ є҆сѝ, и҆ бы́лъ є҆сѝ свѣти́льникъ вселе́ннѣй, сїѧ́ѧ чꙋдесы̀, і҆ѡанні́кїе ѻ҆́ч҃е на́шъ, молѝ хрⷭ҇та̀ бг҃а спасти́сѧ дꙋша́мъ на́шымъ.
Сла́ва, гла́съ д҃:
Мч҃никъ тво́й, гдⷭ҇и, нїка́ндръ, во страда́нїи свое́мъ вѣне́цъ прїѧ́тъ нетлѣ́нный, ѿ тебє̀ бг҃а на́шегѡ: и҆мѣ́ѧй бо крѣ́пость твою̀, мꙋчи́телей низложѝ, сокрꙋшѝ и҆ де́мѡнѡвъ немощны̑ѧ де́рзѡсти. тогѡ̀ моли́твами спасѝ дꙋ́шы на́шѧ.
На ᲂу҆́трени є҆ди́нъ канѡ́нъ ѻ҆ктѡ́иха, и҆ прпⷣбнагѡ на д҃: и҆ мч҃ника на д҃.
Канѡ́нъ прпⷣбнагѡ,
є҆гѡ́же краегране́сїе: Прⷣте́чева тѧ̀ подража́телѧ хвалю̀. І҆ѡ́сифъ.
Гла́съ д҃. Пѣ́снь а҃. І҆рмо́съ:
Ѿве́рзꙋ ᲂу҆ста̀ моѧ̑, и҆ напо́лнѧтсѧ дх҃а, и҆ сло́во ѿры́гнꙋ цр҃и́цѣ мт҃ри, и҆ ꙗ҆влю́сѧ свѣ́тлѡ торжествꙋ́ѧ, и҆ воспою̀ ра́дꙋѧсѧ тоѧ̀ чꙋдеса̀.
Свѣ́томъ бл҃года́ти ѡ҆зарѧ́емь, прпⷣбне, вѣ́рою па́мѧть твою̀ торжествꙋ́ющыѧ просвѣтѝ, и҆ тмы̀ грѣхо́вныѧ моли́твами твои́ми и҆зба́ви, і҆ѡанні́кїе.
Пꙋ́ть вводѧ́щїй невозвра́тнѡ ше́ствовалъ є҆сѝ, ко гра́дꙋ нбⷭ҇номꙋ, і҆ѡанні́кїе: ст҃ы́й бо наста́ви тѧ̀ дх҃ъ, почива́ѧ въ се́рдцы твое́мъ.
Вышша́ющее смире́нїе, і҆ѡанні́кїе, и҆мѣ́лъ є҆сѝ, тѣ́мъ мо́лимсѧ тебѣ̀: ᲂу҆ще́дри, прпⷣбне, смире́нїе на́ше, и҆ болѣ̑зни всѧ̑ ѡ҆блегчѝ серде́цъ на́шихъ.
Бг҃оро́диченъ:
Па́дшихъ воззва́нїе, и҆ стоѧ́щихъ ᲂу҆крѣпле́нїе сꙋ́щи, всенепоро́чнаѧ, тѣ́мъ молю́сѧ тебѣ̀: па́дшїй мо́й ᲂу҆́мъ грѣхо́мъ, и҆спра́ви, влⷣчце, ꙗ҆́кѡ да сла́влю тѧ̀.
Канѡ́нъ мꙋ́ченикѡвъ,
Гла́съ д҃. Пѣ́снь а҃. І҆рмо́съ:
Ли́цы і҆и҃льтестїи невла́жными стопа́ми по́нтъ чермны́й, и҆ вла́жнꙋю глꙋбинꙋ̀ прогна́вше, вса́дники трїста́ты врагѝ ви́дѧще, въ не́й погрꙋжє́ны, съ весе́лїемъ поѧ́хꙋ: пои́мъ бг҃ꙋ на́шемꙋ, ꙗ҆́кѡ просла́висѧ.
Честны́й пра́здникъ честны́хъ страда́лєцъ свѧщенномꙋ́ченикѡвъ, свѧще́ннꙋю па́мѧть дне́сь свѧще́нными пѣснопѣ́ньми, ны́нѣ свѧще́ннѣйшаѧ хрⷭ҇то́ва цр҃ковь, сщ҃еннолѣ́пнѡ соверша́ющи, пѣ́сньми ᲂу҆краша́етсѧ, сїѧ̑ почита́ющи.
Честно́ю пома́занъ ма́стїю свѧще́нничества, вѣ́рнѡ, свѧщеннонача́льниче нїка́ндре, честнѣ́йшꙋ сїю̀, ѿ крове́й твои́хъ ѡ҆багре́ньми содѣ́лалъ є҆сѝ, въ ра́дости зовѧ̀: воспои́мъ бг҃ꙋ на́шемꙋ, ꙗ҆́кѡ просла́висѧ.
Пꙋ́ть мꙋче́нїѧ текꙋ́ще, весе́лїе и҆́стинное въ не́мъ ꙗ҆́вѣ показꙋ́юще, ѡ҆богати́стесѧ бл҃года́тїю чꙋде́съ и҆ дарова́нїй нбⷭ҇ныхъ, мꙋ́чєницы, согла́снѡ вопїю́ще: воспои́мъ бг҃ꙋ на́шемꙋ, ꙗ҆́кѡ просла́висѧ.
Бг҃оро́диченъ:
Неѡпи́санный въ нѣ́дрѣхъ ѻ҆ч҃ескихъ, въ нѣ́дрѣхъ мт҃рнихъ пло́тски хрⷭ҇то́съ ѡ҆писꙋ́етсѧ, по ржⷭ҇твѣ̀ сїю̀ и҆́стиннѡ дв҃ꙋ па́че ᲂу҆ма̀ сохрани́въ, є҆мꙋ́же велегла́снѡ вопїе́мъ: воспои́мъ бг҃ꙋ на́шемꙋ, ꙗ҆́кѡ просла́висѧ.
Пѣ́снь г҃. І҆рмо́съ:
Твоѧ̑ пѣсносло́вцы, бцⷣе, живы́й и҆ незави́стный и҆сто́чниче, ли́къ себѣ̀ совокꙋ́пльшыѧ дꙋхо́внѡ ᲂу҆твердѝ, въ бжⷭ҇твеннѣй твое́й сла́вѣ вѣнцє́въ сла́вы сподо́би.
Текꙋ̑щаѧ пребыва́ющими и҆змѣни́лъ є҆сѝ, смы́сленнѡ прїе́мъ тво́й крⷭ҇тъ, і҆ѡанні́кїе, и҆ на невосходи̑мыѧ го́ры, ꙗ҆́кѡ и҆лїа̀ вели́кїй возше́дъ, пребы́лъ є҆сѝ.
Пꙋ́ть тебѣ̀ ѕѣлѡ̀ жела́емый ѻ҆тцє́въ показа̀ дво́ица, ю҆́же ѡ҆брѣ́лъ є҆сѝ лѣ́ты множа́йшими сокрове́ннꙋ въ гора́хъ, прⷪ҇ро́ческимъ да́ромъ просвѣще́нъ, бл҃же́нне.
Коле́блеми страстьмѝ разли́чными, вѣ́рою притека́емъ къ твоемꙋ̀ покро́вꙋ, і҆ѡанні́кїе: ст҃ы́ми твои́ми хода́тайствы всѧ̑ ны̀ посѣтѝ, молѧ́сѧ чл҃вѣколю́бцꙋ.
Бг҃оро́диченъ:
Кропле́нїемъ ми́лости твоеѧ̀, дв҃о, ᲂу҆́глїе погасѝ мои́хъ страсте́й, бг҃ора́дованнаѧ, и҆ ᲂу҆га́сшїй возжзѝ свѣти́льникъ се́рдца моегѡ̀, златы́й свѣти́льниче, всенепоро́чнаѧ.
И҆́нъ. І҆рмо́съ:
Ꙗ҆́кѡ непло́ды родѝ ѿ ꙗ҆зы̑къ цр҃ковь, и҆ мно́гое въ ча́дѣхъ и҆знемо́же со́нмище, чꙋ́дномꙋ бг҃ꙋ на́шемꙋ возопїи́мъ: ст҃ъ є҆сѝ, гдⷭ҇и.
Словє́сныѧ мрє́жи простира́ѧ, сꙋ́щыѧ въ пре́лести чꙋдодѣ́йствꙋѧ ᲂу҆ловлѧ́лъ є҆сѝ, ѡ҆бро́къ многоѻбра́зенъ, ѿ дв҃ы нїка́ндре, возсїѧ́вшемꙋ сїѧ̑ приносѧ̀.
Розга̀ благопло́днѣйшаѧ ті́това са́да бы́лъ є҆сѝ кри́тскагѡ свѣти́льника, гро́зды носѧ̀ словє́сныѧ, сла́дость на́мъ точа́щаѧ спаси́тельнꙋю, нїка́ндре бл҃же́нне.
Со є҆рме́емъ бжⷭ҇твеннымъ, ѡ҆лѧденѣ̑вшаѧ сердца̀, крⷭ҇та̀ ра́ломъ воздѣ́ласте, мꙋ́дрїи, и҆ плодонѡ́сны бл҃года́ти ꙗ҆ви́сте: тѣ́мъ блажи́ми є҆стѐ.
Бг҃оро́диченъ:
Нижѐ нбⷭ҇ный ᲂу҆́мъ мо́жетъ, па́че ᲂу҆ма̀ ржⷭ҇тво̀ твоѐ сказа́ти, ѻ҆трокови́це: ᲂу҆ма́ бо пе́рвагѡ во чре́вѣ, сло́во, чⷭ҇таѧ, зачала̀ є҆сѝ, всѧ́чєскаѧ сло́вомъ соста́вившее.
Сѣда́ленъ, гла́съ и҃. Подо́бенъ: Премꙋ́дрости:
Страсте́й мра́къ ѡ҆чи́стивъ, хрⷭ҇то́выхъ повелѣ́нїй ꙗ҆́кѡ и҆́стиннѡ свѣ́тъ прїе́мъ, въ постѣ̀ просїѧ́лъ є҆сѝ, и҆ ᲂу҆мертви́въ тѣ́ло, дꙋ́хомъ ѡ҆жи́лъ є҆сѝ, вра̑жїѧ сѣ̑ти попра́лъ є҆сѝ, бл҃же́нне. тѣ́мъ и҆ вы́шнихъ безпло́тныхъ а҆́гг҃лѡвъ соприча́стникъ бы́лъ є҆сѝ дх҃а бл҃года́тїю: і҆ѡанні́кїе ѻ҆́ч҃е на́шъ, молѝ хрⷭ҇та̀ бг҃а, грѣхѡ́въ ѡ҆ставле́нїе дарова́ти, пра́зднꙋющымъ любо́вїю свѧтꙋ́ю па́мѧть твою̀.
Сла́ва, мч҃никѡвъ, гла́съ д҃. Подо́бенъ: Вознесы́йсѧ:
Ст҃и́тельства и҆́стины бжⷭ҇твеннымъ пома́занїемъ, и҆ мꙋче́нїѧ свѧще́нною и҆́стиннѡ кро́вїю просвѣще́ни, сла́внїи, совокꙋпи́стесѧ чинѡ́мъ, ра́дꙋющесѧ, безпло́тныхъ а҆́гг҃лъ. тѣ́мъ пра́зднꙋемъ честнꙋ́ю ва́шꙋ па́мѧть, молѧ́щесѧ всѣ̑мъ ѡ҆чище́нїе пода́ти, моли́твами ва́шими, ст҃і́и.
И҆ ны́нѣ, бг҃оро́диченъ:
Ѡ҆бнови́ла є҆сѝ, чⷭ҇таѧ, бжⷭ҇твеннымъ ржⷭ҇тво́мъ твои́мъ, и҆стлѣ́вшее во страсте́хъ земноро́дныхъ ме́ртвенное сꙋщество̀, и҆ воздви́гла є҆сѝ всѧ̑ ѿ сме́рти къ животꙋ̀ нетлѣ́нїѧ. тѣ́мже тѧ̀ по до́лгꙋ блажи́мъ всѝ, дв҃о препросла́вленнаѧ, ꙗ҆́коже прорекла̀ є҆сѝ.
Крⷭ҇тобг҃оро́диченъ:
Дв҃о пренепоро́чнаѧ, мт҃и хрⷭ҇та̀ бг҃а, ѻ҆рꙋ́жїе про́йде твою̀ прест҃ꙋ́ю дꙋ́шꙋ, є҆гда̀ распина́ема ви́дѣла є҆сѝ во́лею сн҃а и҆ бг҃а твоего̀: є҆го́же, бл҃гослове́ннаѧ, молѧ́щи не преста́й, проще́нїе прегрѣше́нїй на́мъ дарова́ти.
Пѣ́снь д҃. І҆рмо́съ:
Неизслѣ́дный бж҃їй совѣ́тъ, є҆́же ѿ дв҃ы воплоще́нїѧ тебє̀ вы́шнѧгѡ, прⷪ҇ро́къ а҆ввакꙋ́мъ ᲂу҆смотрѧ́ѧ, зовѧ́ше: сла́ва си́лѣ твое́й, гдⷭ҇и.
Го́ры высоча́йшыѧ пости́гъ, верхѝ де́мѡнѡвъ возвыша́ємыѧ, смире́нїемъ смири́лъ є҆сѝ, мꙋ́дре, и҆ на ни́хъ мꙋ́жествовалъ є҆сѝ, сла́ва мона́шествꙋющихъ и҆ ᲂу҆твержде́нїе.
Ꙗ҆́кѡ мече́мъ ѻ҆боюдоѻ́стрымъ, хрⷭ҇то́вымъ стра́хомъ воѡрꙋжи́всѧ, ѕмі́ѧ ѿстꙋ́пника низложи́лъ є҆сѝ разꙋ́мнѡ, и҆ чꙋ́вственнѡ, бл҃же́нне, сщ҃е́нными побѣ́дами прославлѧ́емь.
Ве́сь бжⷭ҇твеннымъ дх҃омъ распали́всѧ, ѻ҆́ч҃е, мра́зъ претерпѣ́лъ є҆сѝ, мно́жайшими лѣ́ты въ пꙋсты́нѧхъ вселѧ́ѧсѧ, и҆ща́й гдⷭ҇а, бл҃года́тїю тѧ̀ бжⷭ҇твенною согрѣва́юща.
Бг҃оро́диченъ:
Тѧ̀ ѡ҆чище́нїе всѣ́хъ земны́хъ вѣ́рою молю̀ и҆ припа́даю, бл҃гослове́ннаѧ: ми́лостива мѝ сꙋдїю̀ и҆ сн҃а твоегѡ̀ сотворѝ, ꙗ҆́кѡ да по до́лгꙋ сла́влю тѧ̀.
И҆́нъ. І҆рмо́съ:
Сѣдѧ́й въ сла́вѣ на прⷭ҇то́лѣ бж҃ества̀, во ѻ҆́блацѣ ле́гцѣ прїи́де і҆и҃съ пребжⷭ҇твенный, нетлѣ́нною дла́нїю, и҆ спасѐ зовꙋ́щыѧ: сла́ва, хрⷭ҇тѐ, си́лѣ твое́й.
Колесни́ца ꙗ҆ви́стесѧ сло́ва, ᲂу҆́мнѡ сего̀ носѧ́ще! тѣ́мъ привѧ́зани къ ко́нємъ, лю́тѣ же влачи́ми, не ѿверго́стесѧ сегѡ̀, ни побѣди́стесѧ, къ нбⷭ҇нѣй стезѣ̀ ꙗ҆́вѣ подвиза́еми.
Темни́цамъ приближа́ющесѧ и҆ ᲂу҆́зами ѡ҆блага́еми, ѿ ᲂу҆́зъ льстѝ гра́дъ и҆ лю́ди спасо́сте, и҆ ю҆́зою любвѐ свѧза́стесѧ свѧ́заннагѡ пло́тїю на́съ ра́ди, всеблаже́ннїи.
Со а҆́гг҃лы влⷣкꙋ, заключе́ни, сла́вѧхꙋ, нбⷭ҇нымъ хлѣ́бомъ, всесла́внїи, пита́еми. тѣ́мъ пло́ти болѣ́зней небрего́сте, си́льнѣйшїи ра̑нъ бы́вше.
Бг҃оро́диченъ:
На престо́лѣ высо́цѣмъ стра́шнѡ сѣдѧ́й, на мт҃рнихъ ѡ҆б̾ѧ́тїѧхъ, млⷣнцъ бы́въ, сѣди́тъ, па́дшїй ѻ҆́бразъ и҆справлѧ́ѧ, и҆ ѡ҆боже́нїе сꙋ́щымъ и҆зъ а҆да́ма да́рꙋѧ.
Пѣ́снь є҃. І҆рмо́съ:
Оу҆жасо́шасѧ всѧ́чєскаѧ ѡ҆ бжⷭ҇твеннѣй сла́вѣ твое́й: ты́ бо, неискꙋсобра́чнаѧ дв҃о, и҆мѣ́ла є҆сѝ во ᲂу҆тро́бѣ надъ всѣ́ми бг҃а, и҆ родила̀ є҆сѝ безлѣ́тнаго сн҃а, всѣ̑мъ воспѣва́ющымъ тѧ̀ ми́ръ подава́ющаѧ.
Ше́ствовалъ є҆сѝ, прпⷣбне, тѣ́сный и҆ приско́рбный пꙋ́ть, бжⷭ҇твенными восхожде́ньми се́рдца, и҆ видѣ̑нїи разширѧ́емь, и҆ положе́нїемъ ѡ҆божа́емь ꙗ҆́вѣ. тѣ́мъ бы́сть мона́шествꙋющымъ ᲂу҆твержде́нїе и҆ ᲂу҆краше́нїе.
Ѻ҆́ко ѡ҆чи́стившꙋ помышле́нїѧ, прпⷣбне, благода́ть тебѣ̀ даде́сѧ прⷪ҇ро́чества, ꙗ҆́кѡ настоѧ̑щаѧ, глаго́лати бꙋ̑дꙋщаѧ: зрѣ́ти же да̑льнаѧ, ꙗ҆́кѡ бли̑жнѧѧ, ѽ і҆ѡанні́кїе, бж҃їе ѡ҆би́телище!
Болѣ́зни мѧ̀ и҆зба́ви грѣхѡ́въ и҆ скорбе́й, ᲂу҆толѝ се́рдца моегѡ̀ болѣ́знь, и҆ грѣхопаде́нїй разрѣше́нїе да́рꙋй, бл҃годѣ́телѧ бг҃а и҆мѣ́ѧ, послꙋ́шающа честны́хъ твои́хъ моли́твъ.
Бг҃оро́диченъ:
Оу҆ма̀ моегѡ̀ ᲂу҆врачꙋ́й и҆зстꙋплє́нїѧ, всенепоро́чнаѧ, и҆ ᲂу҆врачѝ стра̑сти дꙋшѝ моеѧ̀, и҆ ᲂу҆ны́нїѧ тмꙋ̀ ѿженѝ: ꙗ҆́кѡ да восхвалѧ́ю тѧ̀ пѣ́сненнѡ, присноблаже́ннаѧ, бцⷣе всепѣ́таѧ.
И҆́нъ. І҆рмо́съ:
Просвѣще́нїе твоѐ, гдⷭ҇и, низпослѝ на́мъ, и҆ ѿ мглы̀ прегрѣше́нїй разрѣши́ ны, бла́же, тво́й ми́ръ да́рꙋѧй.
Въ просвѣще́нїе вѣ́ры пꙋтево́ждствовалъ є҆сѝ лю́ди, и҆ ѡ҆ста́вльше тмꙋ̀ і҆дѡлонеи́стовства, ча̑да свѣ́та бы́ша хода́тайствомъ твои́мъ, нїка́ндре.
Просвѣти́тельными дх҃а блиста́юще зарѧ́ми, мꙋче́нїй но́щь преидо́сте безвре́днѡ, рѣша́ще мглꙋ̀ безбо́жїѧ, свѣти́льницы сла́внїи.
Па́ѵловыхъ во́дъ и҆спо́лненъ ті́тъ бы́въ, тѧ̀ напаѧ́ше, показꙋ́ѧ рѣкꙋ̀, стрꙋи̑ мꙋ̑тныѧ безбо́жїѧ потоплѧ́ющꙋ, нїка́ндре.
Бг҃оро́диченъ:
А҆́гнца и҆ гдⷭ҇а ро́ждшаѧ пло́тїю, дв҃о, є҆ди́на нескве́рнаѧ ски́нїе, бжⷭ҇твенный ковче́же, честны́й свѣти́льниче, дꙋ́шꙋ мою̀ ѡ҆зарѝ.
Пѣ́снь ѕ҃. І҆рмо́съ:
Бжⷭ҇твенное сїѐ и҆ всечестно́е соверша́юще пра́зднество, бг҃омꙋ́дрїи, бг҃ома́тере, прїиди́те, рꙋка́ми воспле́щимъ, ѿ неѧ̀ ро́ждшагосѧ бг҃а сла́вимъ.
Оу҆вѧди́въ стра̑сти тѣлє́сныѧ, ꙗ҆́кѡ дре́во ᲂу҆зрѣ́лсѧ є҆сѝ высокове́рхое, плоды̀ чꙋдє́сныѧ и҆ честна̑ѧ и҆справлє́нїѧ свѧще́ннѣйше носѧ̀, бг҃облаже́нне.
Оу҆врачи́ тѧ гдⷭ҇и ꙗ҆вле́нїемъ є҆ѵста́ѳїа мꙋ́ченика, ꙗ҆́дъ всепа́гꙋбный и҆спи́вша, всеблаже́нне, чрезъ рꙋ́кꙋ непра́веднꙋю, и҆ бѣ́дствꙋюща.
Тма́мъ болѣ́зней приѡбщи́лсѧ є҆сѝ, тѣ́ломъ не́мощенъ пребы́въ, і҆ѡанні́кїе. тѣ́мъ вѣ́рою зовꙋ́ ти: болѣ̑зни ᲂу҆толѝ се́рдца моегѡ̀.
Бг҃оро́диченъ:
Є҆ди́на всѣ́хъ по́моще, помозѝ на́мъ бѣ́дствꙋющымъ, и҆ рꙋ́кꙋ пода́ждь, и҆ къ приста́нищємъ введѝ спасе́нїѧ, ѻ҆трокови́це бг҃облагода́тнаѧ.
И҆́нъ. І҆рмо́съ:
Возопѝ, проѡбразꙋ́ѧ погребе́нїе тридне́вное, прⷪ҇ро́къ і҆ѡ́на, въ ки́тѣ молѧ́сѧ: ѿ тлѝ и҆зба́ви мѧ̀, і҆и҃се цр҃ю̀ си́лъ.
Пригвожда́ема гвоздьмѝ тѣлеса̀ мꙋ́ченикѡвъ, стрⷭ҇те́й подража́телє сп҃са ꙗ҆влѧ́хꙋсѧ, пригвозди́вшагѡсѧ на крⷭ҇тѣ̀, и҆ ѿ тлѝ мі́ръ спа́сшагѡ.
Пꙋчи́нꙋ мꙋ́къ преидо́сте, мч҃ницы, ѡ҆кормле́нїемъ ст҃а́гѡ всеси́льнагѡ дх҃а, и҆ къ бжⷭ҇твенномꙋ приста́нищꙋ приста́сте, сла́вы и҆сполнѧ́еми.
Побѣди́лъ є҆сѝ, тезоимени́тне, мꙋже́й всѧ́кое (с. 57) противле́нїе ᲂу҆бі́йцъ, ст҃и́телю приснопа́мѧтне нїка́ндре, и҆ вѣнцы̀ сла́вы прїѧ́лъ є҆сѝ, бг҃ꙋ предстоѧ̀.
Бг҃оро́диченъ:
Погꙋби́ла є҆сѝ прама́тере, ѻ҆трокови́це, ᲂу҆кори́знꙋ, благослове́ньми на́съ вѣнча́вшаго пло́тїю ро́ждши: и҆ ско́рбь тоѧ̀ въ ра́дость и҆́стиннꙋю преложи́ла є҆сѝ.
Конда́къ, гла́съ и҃. Подо́бенъ: Взбра́нной:
Ѕвѣзда̀ ꙗ҆ви́лсѧ є҆сѝ всесвѣ́тлаѧ, въ мі́рѣ просвѣща́ѧй, и҆ сꙋ́щыѧ во мра́цѣ страсте́й ѡ҆блистава́ѧй: вра́чь же крѣпча́йшїй ꙗ҆ви́лсѧ є҆сѝ. но ꙗ҆́кѡ прїѧ́лъ є҆сѝ бл҃года́ть и҆сцѣле́нїй, просѧ́щымъ тѧ̀ пода́ждь и҆сцѣле́нїе, да зове́мъ: ра́дꙋйсѧ, ѻ҆́ч҃е і҆ѡанні́кїе.
І҆́косъ:
Дрꙋгі́й, ѻ҆́ч҃е, ꙗ҆ви́лсѧ є҆сѝ вра́чь и҆ предста́тель недꙋ̑ги ѡ҆держи̑мымъ и҆ скорбьмѝ, і҆ѡанні́кїе чꙋ́дне, и҆сцѣлѧ́ѧ всѣ́хъ, вѣ́рнѡ притека́ющихъ подъ бжⷭ҇твенный кро́въ тво́й. тѣ́мъ и҆ ѿ на́съ слы́шиши: ра́дꙋйсѧ, ѻ҆тца̀ блага́гѡ ко́рене ѻ҆́трасль: ра́дꙋйсѧ, ма́тере блага́ѧ вѣ́твь: ра́дꙋйсѧ, и҆́же тѣ́хъ любо́вь ѿри́нꙋвый: ра́дꙋйсѧ, и҆́же є҆ди́наго бг҃а прїе́мый: ра́дꙋйсѧ, ꙗ҆́кѡ ѡ҆ста́вилъ є҆сѝ земно́е во́инство: ра́дꙋйсѧ, ꙗ҆́кѡ низложи́лъ є҆сѝ ва́рварскꙋю горды́ню: ра́дꙋйсѧ, стѣна̀ и҆ храни́тель царє́мъ бы́вый: ра́дꙋйсѧ, ѻ҆рꙋ́жїе и҆ сто́лпъ мі́рови ꙗ҆́вльсѧ: ра́дꙋйсѧ, ꙗ҆зы́чєскїѧ разрꙋша́ѧ бра̑ни: ра́дꙋйсѧ, свѣти́льниче, сїѧ́ѧ чꙋдєсы̀: ра́дꙋйсѧ, наги́хъ покрови́телю: ра́дꙋйсѧ, плѣне́нныхъ и҆зба́вителю. ра́дꙋйсѧ, ѻ҆́ч҃е і҆ѡанні́кїе.
Пѣ́снь з҃. І҆рмо́съ:
Не послꙋжи́ша тва́ри бг҃омꙋ́дрїи, па́че созда́вшагѡ, но ѻ҆́гненное преще́нїе мꙋ́жески попра́вше, ра́довахꙋсѧ, пою́ще: препѣ́тый ѻ҆тцє́въ гдⷭ҇ь и҆ бг҃ъ, бл҃гослове́нъ є҆сѝ.
Се́рдце твоѐ трⷪ҇цы жили́ще содѣ́лалъ є҆сѝ, трѝ созда́въ хра́мы, въ ни́хже бжⷭ҇твенною благода́тїю, і҆ѡанні́кїе, мѵ́ро и҆сточа́еши въ просвѣще́нїе и҆ ѡ҆чище́нїе вѣ́рнѡ тебѣ̀ приходѧ́щихъ.
Дꙋша̀ твоѧ̀, свѣтозаре́нїемъ бжⷭ҇твеннагѡ дх҃а ѡ҆свѣща́ема при́снѡ, дꙋ́шъ зрѧ́ше вѣ́рнѡ приходѧ́щихъ тебѣ̀ совѣ́ты, блаже́нне, проро́ческими прозна́ньми свѧще́ннѡ ᲂу҆дивлѧ́ема.
Недꙋ́гѡвъ, ѡ҆бꙋрева́ющихъ мѧ̀, блаже́нне, дꙋши́ же и҆ тѣлесѐ, твои́ми ст҃ы́ми моли́твами ско́рѡ и҆зба́ви, и҆ пѣ́ти сотворѝ: препѣ́тый ѻ҆тє́цъ на́шихъ бж҃е, бл҃гослове́нъ є҆сѝ.
Бг҃оро́диченъ:
Непремѣ́ннаго ро́ждшаѧ, є҆ди́на, гдⷭ҇а, бг҃ора́дованнаѧ, десни́цею є҆гѡ̀, чи́стаѧ, премѣни́ти мо́й ᲂу҆́мъ моли́сѧ къ лꙋ́чшымъ, лю́тѣ превраща́емый жите́йскими печа́льми.
И҆́нъ. І҆рмо́съ:
А҆враа́мстїи и҆ногда̀ въ вавѷлѡ́нѣ ѻ҆́троцы пе́щный пла́мень попра́ша, пѣ́сньми взыва́юще: ѻ҆тє́цъ на́шихъ бж҃е, бл҃гослове́нъ є҆сѝ.
Свѧще́ннꙋю твою̀ ѻ҆де́ждꙋ ѡ҆багри́въ, бл҃же́нне, ѡ҆багре́ньми крове́й, соверши́лъ є҆сѝ свѣ́тльшꙋю, нїка́ндре, ѻ҆тцє́въ, вопїѧ̀: бж҃е, бл҃гослове́нъ є҆сѝ.
Приближа́ющесѧ ѻ҆гню̀, несомнѣ́нною любо́вїю къ творцꙋ̀, не ѡ҆пали́стесѧ, вопїю́ще, блаже́ннїи: ѻ҆тє́цъ на́шихъ, бж҃е, бл҃гослове́нъ є҆сѝ.
Пе́щи пла́мень, ва́мъ ᲂу҆гото́ванный на мꙋче́нїе, преврати́сте на ро́сꙋ дх҃омъ вседѣ́тельнымъ, вопїю́ще: ѻ҆тє́цъ на́шихъ бж҃е, бл҃гослове́нъ є҆сѝ.
Бг҃оро́диченъ:
Воплоще́нное сло́во ражда́еши неска́заннѡ, чⷭ҇таѧ дв҃о, зовꙋ́щыѧ ѿ сме́рти и҆збавлѧ́юща: ѻ҆тє́цъ на́шихъ бж҃е, бл҃гослове́нъ є҆сѝ.
Пѣ́снь и҃. І҆рмо́съ:
Ѻ҆́троки бл҃гочести̑выѧ въ пещѝ ржⷭ҇тво̀ бг҃оро́дичо спасло̀ є҆́сть: тогда̀ ᲂу҆́бѡ ѡ҆бразꙋ́емое, ны́нѣ же дѣ́йствꙋемое, вселе́ннꙋю всю̀ воздвиза́етъ пѣ́ти тебѣ̀: гдⷭ҇а по́йте дѣла̀, и҆ превозноси́те є҆го̀ во всѧ̑ вѣ́ки.
Стоѧ̀ высо́ко на горѣ̀, ꙗ҆́кѡ на свѣ́щницѣ свѣти́льникъ, прпⷣбне, всѣ́хъ помышлє́нїѧ вѣ́рою просвѣща́лъ є҆сѝ, показꙋ́ѧ и҆зрѧ́днѣйше словесы̀ и҆ дѣ́лы стезю̀ жи́зни: и҆ возводѧ̀ ты́ѧ бжⷭ҇твеннымъ сло́вомъ къ высотѣ̀ безстра́стїѧ.
Оу҆́мъ безстра́стїемъ ѡ҆чи́щшемꙋ бесѣ́довалъ є҆сѝ гдⷭ҇ꙋ вседержи́телю, ѿ негѡ́же неизглагѡ́ланнымъ, прпⷣбне, наꙋча́емь, проро́чески предглаго́лалъ є҆сѝ, просвѣща́ѧ дꙋ́шы, ꙗ҆́кѡ велича́йшъ, всеблаже́нне, прⷪ҇ро́къ: тѣ́мъ тѧ̀ согла́снѡ вѣ́рнїи восхвалѧ́емъ.
Постиго́ша мѧ̀ ра̑ны тѧ̑жкїѧ, и҆ недꙋ́зи разли́чнїи смꙋща́ютъ: си́хъ мѧ̀ и҆зба́ви, ѻ҆́ч҃е, молю́сѧ тебѣ̀, ꙗ҆́кѡ ѿ бг҃а прїе́мъ, і҆ѡанні́кїе, бл҃года́ть, врачева́ти стра̑сти, и҆ бѡлѣ́зни вѣ́рныхъ ѡ҆блегчева́ти.
Трⷪ҇ченъ:
Со всѣ́ми вы́шними вѡ́инствы, ѻ҆ц҃а̀, сн҃а, и҆ ст҃а́го дх҃а, трⷪ҇цꙋ нераздѣ́льнꙋю, несозда́нное бж҃ество̀, пѣсносло́вѧще, ст҃ъ, ст҃ъ, ст҃ъ возопїи́мъ въ ра́дости, є҆ди́на вла́сть, нача́ло и҆ црⷭ҇тво.
Бг҃оро́диченъ:
Ꙗ҆ви́ласѧ є҆сѝ а҆́гг҃лѡвъ превы́шшаѧ, бг҃а неизрече́ннѡ воплоти́вши, того̀ ᲂу҆молѝ, влⷣчце всенепоро́чнаѧ, плотски́хъ вы́шша страсте́й бы́ти мѧ̀ ᲂу҆мо́мъ, высото́ю смире́нїѧ, пѣсносло́вѧща твою̀ велича́йшꙋю бл҃года́ть.
И҆́нъ. І҆рмо́съ:
И҆зба́вителю всѣ́хъ всеси́льне, посредѣ̀ пла́мене бл҃гоче́ствовавшыѧ, снизше́дъ, ѡ҆роси́лъ є҆сѝ, и҆ наꙋчи́лъ є҆сѝ пѣ́ти: всѧ̑ дѣла̀ бл҃гослови́те, по́йте гдⷭ҇а.
І҆ера́рхъ че́стенъ бы́лъ є҆сѝ, ника́коже чꙋжде́ю кро́вїю, свое́ю же, нїка́ндре, вше́дъ въ го́рнїй хра́мъ, и҆ поѧ̀: благослови́те, всѧ̑ дѣла̀ гдⷭ҇нѧ, гдⷭ҇а.
На сѣда́лищи восхвали́въ гдⷭ҇а пресвѵ́терѡвъ є҆рме́й сла́вный, ᲂу҆добри́всѧ кро́вїю мꙋче́нїѧ, зове́тъ: бл҃гослови́те, всѧ̑ дѣла̀ гдⷭ҇нѧ, гдⷭ҇а.
Свѧще́ннѡ предсоверша́юще ст҃а̑ѧ, жє́ртвы честны̑ѧ ꙗ҆ви́стесѧ, и҆ въ воню̀ принесо́стесѧ благово́нїѧ гдⷭ҇ꙋ, вопїю́ще: благослови́те, всѧ̑ дѣла̀ гдⷭ҇нѧ, гдⷭ҇а.
Бг҃оро́диченъ:
Ѕѡ́лъ мои́хъ пꙋчи́нꙋ и҆зсꙋшѝ, бл҃гоꙋтро́бїѧ пꙋчи́нꙋ ро́ждшаѧ и҆зба́вителѧ и҆ гдⷭ҇а, є҆мꙋ́же вопїе́мъ, дв҃о: всѧ̑ дѣла̀ бл҃гослови́те гдⷭ҇нѧ гдⷭ҇а.
Пѣ́снь ѳ҃. І҆рмо́съ:
Всѧ́къ земноро́дный да взыгра́етсѧ, дх҃омъ просвѣща́емь, да торжествꙋ́етъ же безпло́тныхъ ᲂу҆мѡ́въ є҆стество̀, почита́ющее свѧще́нное торжество̀ бг҃ома́тере, и҆ да вопїе́тъ: ра́дꙋйсѧ, всебл҃же́ннаѧ бцⷣе, чⷭ҇таѧ приснодв҃о.
Оу҆крѣпи́сѧ, бг҃ꙋ ᲂу҆́мъ тво́й ᲂу҆тверди́вшꙋ ᲂу҆держа́ти стра̑сти, а҆́гг҃лъ въ тѣлесѝ ѿсю́дꙋ, ѻ҆́ч҃е, ты̀ бы́лъ є҆сѝ, и҆ со а҆́гг҃лы на нб҃сѣ́хъ живе́ши всегда̀, сла́вы престо́лꙋ предстоѧ̀, и҆ свѣ́та невече́рнѧгѡ и҆сполнѧ́емь.
Ꙗ҆́коже на небесѝ, въ гора́хъ и҆ верте́пахъ всели́лсѧ є҆сѝ, прпⷣбне: тѣ́мъ ᲂу҆кроти́шасѧ тебѣ̀ ди́вїи ѕвѣ́рїе, покори́вшꙋ стра̑сти дꙋшє́вныѧ, неꙋдо́бь покори̑мыѧ, і҆ѡанні́кїе, и҆ пра́веднꙋ же бы́вшꙋ. сегѡ̀ ра́ди вѣ́рнѡ тѧ̀ почита́емъ.
Твоѧ̑ свѧщє́нныѧ и҆ ст҃ы̑ѧ мо́щи, во гро́бѣ лежа́ще, недꙋ́ги погрꙋжа́ютъ и҆ попалѧ́ютъ полкѝ дє́мѡнскїѧ всегда̀, мꙋ́дре і҆ѡанні́кїе, бж҃їею бл҃года́тїю, и҆сточа́ютъ всѣ̑мъ врачева̑нїѧ вѣ́рнѡ тѧ̀ при́снѡ блажа́щымъ.
Оу҆жѐ хрⷭ҇тꙋ̀ приближа́ѧсѧ ꙗ҆́снше и҆ чи́стше, помѧнѝ вѣ́рою тѧ̀ помина́ющихъ, і҆ѡанні́кїе, грѣхѡ́въ проще́нїе на́мъ просѧ̀, и҆ недꙋ́гѡвъ всѣ́хъ и҆збавле́нїѧ, и҆ нбⷭ҇нагѡ црⷭ҇твїѧ селе́нїе.
Бг҃оро́диченъ:
Просвѣтѝ, чⷭ҇таѧ, дꙋшѝ моеѧ̀ ѻ҆́чи, свѣ́тъ ро́ждшаѧ, да не пости́гнетъ мѧ̀ грѣхо́внаѧ тма̀ тѧжча́йшаѧ, нижѐ глꙋбина̀ покры́етъ мѧ̀ ѿча́ѧнїѧ: но ты́ мѧ спасѝ, и҆ ѡ҆кормѝ къ приста́нищꙋ бжⷭ҇твеннагѡ хотѣ́нїѧ.
И҆́нъ. І҆рмо́съ:
Є҆́ѵа ᲂу҆́бѡ недꙋ́гомъ преслꙋша́нїѧ клѧ́твꙋ всели́ла є҆́сть: ты́ же, дв҃о бцⷣе, прозѧбе́нїемъ чревоноше́нїѧ, мі́рови благослове́нїе процвѣла̀ є҆сѝ. тѣ́мъ тѧ̀ всѝ велича́емъ.
На дре́вѣ, мꙋ́дре, терпѣли́внѡ растѧга́емь, и҆ свѣща́ми ѡ҆палѧ́емь, ро́сꙋ нбⷭ҇нꙋю прїѧ́лъ є҆сѝ рꙋко́ю а҆́гг҃льскою, мч҃ниче нїка́ндре, палѧ́щыѧ же мє́ртвы показа́лъ є҆сѝ живоно́сными твои́ми моли́твами.
Ви́дѣстесѧ видѣ́нїе стра́шно, ѡ҆бнажа́еми, и҆ безсловє́снымъ привѧзꙋ́еми, и҆ на мно́жайше, страстоте́рпцы, влеко́ми, и҆ цѣ́ли ꙗ҆влѧ́еми, ѻ҆гню̀ приближа́ющесѧ, и҆ неѡпалѧ́еми, дх҃омъ бжⷭ҇твеннымъ соблюда́еми.
Дне́сь мѵ́рскаѧ свѧще́ннаѧ митропо́лїа пра́зднꙋетъ велегла́снѡ, гра́дъ всѧ́къ на весе́лїе созыва́ющи, въ па́мѧти ва́шей се́й, всехва́льнїи, въ не́йже свѧще́нное ва́ше страда́нїе соверши́сте.
Ѿве́рзесѧ ва́мъ нб҃о, и҆ а҆́гг҃ли восхожде́нїю восплеска́вше, чи́ни прпⷣбныхъ и҆ првⷣныхъ возвесели́шасѧ, взыгра́шасѧ мч҃ницы: съ ни́миже все́льшесѧ, помѧни́те помина́ющыѧ ва́съ, ст҃і́и.
Бг҃оро́диченъ:
Свѣ́томъ мѧ̀ ѡ҆зарѝ твои́мъ, всенепоро́чнаѧ, ро́ждшаѧ свѣ́тъ непристꙋ́пный: разженѝ ѻ҆́блаки дꙋшѝ моеѧ̀, и҆ тмы́ мѧ и҆схитѝ, молю́сѧ, и҆ бжⷭ҇твеннагѡ спасе́нїѧ сподо́би пречⷭ҇таѧ, є҆ди́на приснодв҃о.
Свѣти́ленъ. Подо́бенъ: Дх҃омъ во ст҃и́лищи:
Бл҃года́ть преизбы́сть бж҃їѧ въ дꙋшѝ твое́й, мꙋ́дре і҆ѡанні́кїе, безпло́тнѡ живꙋ́ща. тѣ́мъ чтꙋ́щыѧ тѧ̀, страсте́й и҆зба́ви те́мныхъ ѻ҆блакѡ́въ, къ ти́хомꙋ приста́нищꙋ вводѧ̀, и҆ ѡ҆гонѧ́ѧ полкѝ дє́мѡнскїѧ.
Бг҃оро́диченъ:
Сотворѝ и҆́стиннѡ съ тобо́ю вели̑чїѧ сн҃ъ предвѣ́чный ѻ҆́ч҃имъ совѣ́томъ: жи́знь бо нетлѣ́ннꙋю безъ стра́сти родила̀ є҆сѝ, и҆ пребыла̀ є҆сѝ, ꙗ҆́коже пре́жде ржⷭ҇тва̀, мт҃рскихъ и҆збѣ́гши болѣ́зней, и҆ дв҃а, па́ки по ржⷭ҇твѣ̀ пребы́вши дв҃а.
На стїхо́внѣ ѻ҆ктѡ́иха. Сла́ва, гла́съ ѕ҃:
Є҆́же по ѻ҆́бразꙋ соблю́дъ невреди́мѡ, ᲂу҆́мъ влады́кꙋ надъ страстьмѝ па́гꙋбными по́стнически поста́вивъ, во є҆́же по подо́бїю ꙗ҆́коже мо́щно возше́лъ є҆сѝ: мꙋ́жески бо є҆стество̀ понꙋ́дивъ, потща́лсѧ є҆сѝ хꙋ́ждшее покори́ти лꙋ́чшемꙋ, и҆ пло́ть порабо́тити дꙋ́хꙋ. тѣ́мже мона́шествꙋющихъ ꙗ҆ви́лсѧ є҆сѝ ве́рхъ, жи́тель пꙋсты́нный, благотекꙋ́щихъ ѡ҆бꙋчи́тель, пра́вило добродѣ́телей и҆звѣ́стнѣйшее. и҆ ны́нѣ на нб҃сѣ́хъ, зерца́лѡмъ разрѣ́шшымсѧ, ѻ҆́ч҃е на́шъ і҆ѡанні́кїе, чи́стѣ зри́ши ст҃ꙋ́ю трⷪ҇цꙋ, молѧ́сѧ непосре́дственнѣ ѡ҆ и҆̀же вѣ́рою и҆ любо́вїю чтꙋ́щихъ тѧ̀.
И҆ ны́нѣ, бг҃оро́диченъ, и҆лѝ крⷭ҇тобг҃оро́диченъ. Поⷣ: Всѐ ѿло́жше:
Ѻ҆рꙋ́жїе, ꙗ҆́коже речѐ сѷмеѡ́нъ, ꙳ се́рдце твоѐ про́йде, ꙳ пречⷭ҇таѧ влⷣчце, ꙳ є҆гда̀ ᲂу҆зрѣ́ла є҆сѝ и҆зъ тебє̀ возсїѧ́вшаго ꙳ неизрече́ннымъ сло́вомъ, ꙳ ѿ беззако́нныхъ, ꙗ҆́кѡ ѡ҆сꙋжде́нна, ꙳ возноси́ма на крⷭ҇тѣ̀, ꙳ ѻ҆́цтомъ и҆ же́лчїю напаѧ́емаго, ꙳ ре́бра же пробода́ема, ꙳ и҆ рꙋ́цѣ и҆ но́зѣ пригвожда́емы, ꙳ и҆ рыда́ющи, восклица́ше, ꙳ мт҃рски вопїю́щи: ꙳ что̀ сїѐ, ча́до сладча́йшее, ꙳ но́вое та́инство;
На лїтꙋргі́и прокі́менъ, гла́съ з҃. Честна̀ предъ гдⷭ҇емъ сме́рть прпⷣбныхъ є҆гѡ̀. Сті́хъ: Что̀ возда́мъ гдⷭ҇еви ѡ҆ всѣ́хъ: А҆пⷭ҇лъ, къ гала́тѡмъ, зача́ло сг҃і. А҆ллилꙋ́їа, гла́съ ѕ҃: Бл҃же́нъ мꙋ́жъ, боѧ́йсѧ гдⷭ҇а: Сті́хъ: Си́льно на землѝ бꙋ́детъ сѣ́мѧ є҆гѡ̀. Є҆ѵⷢ҇лїе матѳе́а, зача́ло і҃. Прича́стенъ: Въ па́мѧть вѣ́чнꙋю бꙋ́детъ првⷣникъ.