Мѣ́сѧца тогѡ́же въ к҃а-й де́нь. Ст҃а́гѡ а҆пⷭ҇ла кодра́та, и҆́же въ магнисі́и.

Слꙋ́жба є҆гѡ̀ пое́тсѧ въ к҃в-й де́нь сегѡ̀ мѣ́сѧца, вкꙋ́пѣ со свѧщенномч҃никомъ фѡ́кою.

Въ то́йже де́нь па́мѧть и҆́же во ст҃ы́хъ ѻ҆тца̀ на́шегѡ дими́трїа, митрополі́та росто́вскагѡ.

Слꙋ́жба є҆гѡ̀ пи́сана въ приложе́нїи.

Въ се́й же де́нь ѿдае́тсѧ пра́здникъ честна́гѡ крⷭ҇та̀.

Ве́черъ, ѻ҆бы́чнаѧ каѳі́сма. На Гдⷭ҇и, воззва́хъ: стїхи̑ры пра́здника на ѕ҃, поє́мыѧ на са́мый пра́здникъ. Сла́ва, и҆ ны́нѣ, пра́здника. [Зрѝ] А҆́ще сꙋббѡ́та, Сла́ва, пра́здника: И҆ ны́нѣ, догма́тїкъ настоѧ́щагѡ гла́са. На стїхо́внѣ стїхи̑ры пра́здника: Сла́ва, и҆ ны́нѣ, пра́здника. По трист҃о́мъ тропа́рь пра́здника. Є҆ктенїа̀, и҆ ѿпꙋ́стъ. На повече́рїи по трист҃о́мъ конда́къ пра́здника. Полꙋ́нощницꙋ же пое́мъ по ѻ҆бы́чаю съ трѡпарѝ дневны́ми.

На ᲂу҆́трени: На Бг҃ъ гдⷭ҇ь тропа́рь пра́здника, три́жды. По каѳі́смахъ, сѣда́льны пра́здника. Канѡ́нъ пра́здника на в҃і. І҆рмосы̀ по два́жды, послѣдѝ і҆рмо́съ то́йже, ѻ҆́ба ли̑ка вкꙋ́пѣ. По г҃-й пѣ́сни сѣда́ленъ два́жды. По ѕ҃-й пѣ́сни конда́къ и҆ і҆́косъ пра́здника. На ѳ҃-й пѣ́сни Чтⷭ҇нѣ́йшꙋю не пое́мъ, но пое́мъ припѣ́вы пра́здника: пе́рвагѡ канѡ́на со і҆рмосо́мъ на и҃: втора́гѡ канѡ́на со і҆рмосо́мъ на ѕ҃: і҆рмосы̀ ѻ҆бою̀ канѡ́нѡвъ девѧ́тыѧ пѣ́сни по два́жды. Та́же на схо́дѣ пое́мъ съ припѣ́вомъ і҆рмо́съ. Та́инъ є҆сѝ, бцⷣе, ра́й: И҆ пото́мъ припѣ́въ, и҆ і҆рмо́съ: Снѣ́дїю дре́ва: и҆ покло́нъ. Свѣти́ленъ пра́здника, два́жды. На хвали́техъ стїхи̑ры на д҃: Сла́ва, и҆ ны́нѣ, пра́здника. Славосло́вїе вели́кое. По трист҃о́мъ тропа́рь пра́здника. Та́же є҆ктєнїѝ, и҆ ѿпꙋ́стъ. На часѣ́хъ тропа́рь и҆ конда́къ пра́здника.

На лїтꙋргі́и: Бл҃жє́нна ѿ канѡ́на пѣ́снь ѳ҃-ѧ, на и҃. По вхо́дѣ тропа́рь пра́здника. Сла́ва, и҆ ны́нѣ, конда́къ пра́здника. Прокі́менъ, а҆ллилꙋ́їа, и҆ прича́стенъ пра́здника. А҆пⷭ҇лъ, и҆ є҆ѵⷢ҇лїе днѐ. По ѿпꙋще́нїи лїтꙋргі́и и҆схо́дитъ і҆ере́й съ кади́ломъ и҆ дїа́конъ со свѣще́ю, и҆ кади́тъ честны́й крⷭ҇тъ: и҆ та́кѡ взима́етъ і҆ере́й честны́й крⷭ҇тъ съ блю́домъ, на главꙋ̀, и҆ вно́ситъ є҆го̀ во ст҃ы́й ѻ҆лта́рь ца́рскими дверьмѝ: пред̾идꙋ́щꙋ же предъ ни́мъ дїа́конꙋ со свѣще́ю, и҆ кади́тъ честны́й крⷭ҇тъ. Та́же полага́етъ і҆ере́й честны́й крⷭ҇тъ на свѧты́й престо́лъ и҆ кади́тъ є҆го̀ крⷭ҇тоѻбра́знѡ. И҆ та́кѡ ѿдае́тсѧ пра́здникъ честна́гѡ крⷭ҇та̀.

🕅 Подоба́етъ вѣ́дати: а҆́ще слꙋчи́тсѧ ѿда́нїе воздви́женїѧ честна́гѡ крⷭ҇та̀ въ недѣ́лю:

Въ сꙋббѡ́тꙋ на ма́лѣй вече́рни, стїхи̑ры воскрⷭ҇ны. На стїхо́внѣ стїхи́ра воскрⷭ҇на, и҆ пра́здника стїхо́вна съ припѣ̑вы свои́ми вели́кїѧ вече́рни: Сла́ва, и҆ ны́нѣ, пра́здника. Тропа́рь воскрⷭ҇нъ: Сла́ва, и҆ ны́нѣ, пра́здника. На вели́цѣй вече́рни: по ѻ҆бы́чной каѳі́смѣ, на Гдⷭ҇и, воззва́хъ: стїхи̑ры воскрⷭ҇ны г҃: и҆ ꙾восто́ченъ꙾ 18 а҃: и҆ пра́здника ѕ҃, поє́мыѧ на са́мый пра́здникъ. Сла́ва, пра́здника: И҆ ны́нѣ, бг҃оро́диченъ а҃-й гла́са. На лїті́и стїхи̑ры, и҆ Сла́ва, и҆ ны́нѣ, пра́здника. На стїхо́внѣ стїхи̑ры воскрⷭ҇ны: Сла́ва, и҆ ны́нѣ, пра́здника. На благослове́нїи хлѣ́бѡвъ тропа́рь: Бцⷣе дв҃о: два́жды: и҆ пра́здника є҆ди́ножды. И҆ чте́нїе въ посла́нїихъ а҆пⷭ҇льскихъ.

На ᲂу҆́трени: На Бг҃ъ гдⷭ҇ь: тропа́рь воскрⷭ҇нъ два́жды: Сла́ва, и҆ ны́нѣ, пра́здника. По каѳі́смахъ сѣда́льны воскрⷭ҇ны, съ бг҃орѡ́дичны и҆́хъ. И҆ чте́нїе въ толково́мъ є҆ѵⷢ҇лїи, недѣ́лѧ по воздви́женїи: и҆ непоро́чны: и҆ ѵ҆пакоѝ гла́са: и҆ чте́нїе недѣ́лѧ рѧ́дъ. Степє́нна: и҆ прокі́менъ гла́са: и҆ Всѧ́кое дыха́нїе: є҆ѵⷢ҇лїе воскрⷭ҇но. Воскрⷭ҇нїе хрⷭ҇то́во: Ѱало́мъ н҃. Стїхи́ра воскрⷭ҇на: и҆ про́чее по ѻ҆бы́чаю. Канѡ́нъ воскрⷭ҇нъ со і҆рмосо́мъ на д҃: и҆ бцⷣы на два̀, и҆ пра́здника на и҃. Катава́сїа пра́здника. По г҃-й пѣ́сни, конда́къ и҆ і҆́косъ пра́здника, и҆ сѣда́ленъ два́жды: и҆ чте́нїе пра́здника: По ѕ҃-й пѣ́сни, конда́къ воскрⷭ҇нъ, и҆ і҆́косъ: и҆ про́логъ. На ѳ҃-й пѣ́сни пое́мъ Чтⷭ҇нѣ́йшꙋю. Свѣти́ленъ воскрⷭ҇нъ: Сла́ва, и҆ ны́нѣ, пра́здника: На хвали́техъ стїхи̑ры воскрⷭ҇ны д҃: и҆ пра́здника на д҃, со Сла́внымъ, съ припѣ̑вы пра́здника. Сла́ва, стїхи́ра є҆ѵⷢ҇льскаѧ: И҆ ны́нѣ, Пребл҃гослове́нна є҆сѝ: Славосло́вїе вели́кое. По Трист҃о́мъ тропа́рь воскрⷭ҇нъ, и҆ є҆ктєнїѝ, и҆ ѡ҆глаше́нїе стꙋді́тово. И҆схожде́нїе ѻ҆бы́чное въ притво́ръ. И҆ ча́съ а҃-й: и҆ коне́чный ѿпꙋ́стъ. На часѣ́хъ тропа́рь воскрⷭ҇нъ: Сла́ва, пра́здника: И҆ ны́нѣ, бг҃оро́диченъ часѡ́въ. По Ѻ҆́ч҃е на́шъ: конда́къ пра́здника, и҆ воскрⷭ҇нъ глаго́лемъ премѣнѧ́юще.

На лїтꙋргі́и: Бл҃жє́нна гла́са, на ѕ҃: и҆ пра́здника, пѣ́снь ѳ҃-ѧ, на д҃. По вхо́дѣ, тропа́рь воскрⷭ҇нъ и҆ пра́здника. Сла́ва, конда́къ воскрⷭ҇нъ: И҆ ны́нѣ, пра́здника. Прокі́менъ днѐ, и҆ пра́здника. А҆пⷭ҇лъ и҆ є҆ѵⷢ҇лїе, недѣ́ли по воздви́женїи, и҆ днѐ. А҆ллилꙋ́їа, и҆ прича́стенъ пра́здника, и҆ днѐ.

[Зрѝ] Слꙋ́жба ст҃а́гѡ а҆пⷭ҇ла пое́тсѧ въ к҃в-й де́нь.

Вѣ́домо же бꙋ́ди: ꙗ҆́кѡ по ѿда́нїи пра́здника чⷭ҇тна́гѡ крⷭ҇та̀, ѿ к҃а-гѡ днѐ септе́мврїа мѣ́сѧца, начина́емъ стїхосло́вити на ᲂу҆́трени по г҃ каѳі̑смы, твори́мъ же и҆ чтє́нїѧ д҃, кромѣ̀ про́лога. На вече́рни стїхологисꙋ́емъ каѳі́смꙋ и҃і: Ко гдⷭ҇ꙋ внегда̀ скорбѣ́ти мѝ: А҆́ще ли бꙋ́детъ вели́кїй ст҃ы́й и҆мѣ́ѧй полѷеле́й, стїхосло́вимъ на ᲂу҆́трени, в҃ каѳі̑смы: а҆ на вече́рни рѧдовꙋ́ю тре́тїю.

Сїѐ ᲂу҆́бѡ вѣ́стно да бꙋ́детъ, ꙗ҆́кѡ ѿ недѣ́ли нача́ло взе́млетъ ѱалти́рь: сїе́ же ѿ понедѣ́льника сотворѧ́етсѧ, трѝ каѳі̑смы по всѧ̑ дни̑, до к҃-гѡ днѐ деке́мврїа мѣ́сѧца: въ недѣ́лѧхъ же на ᲂу҆́трени стїхосло́вимъ по в҃ каѳі̑смы, прилага́емъ же и҆ полѷеле́й по всѧ̑ недѣ̑ли, до к҃-гѡ деке́мврїа. Ѿ к҃-гѡ же деке́мврїа не пое́тсѧ полѷеле́й, до д҃і-гѡ і҆аннꙋа́рїа, до́ндеже ѿдае́тсѧ пра́здникъ бг҃оѧвле́нїѧ, кромѣ̀ вели́кагѡ ст҃а́гѡ и҆мꙋ́щагѡ полѷеле́й. А҆ ѿ д҃і-гѡ і҆аннꙋа́рїа, пое́мъ полѷеле́й по всѧ̑ недѣ̑ли, да́же до недѣ́ли сыропꙋ́стныѧ.

[Зрѝ] Катава́сїа ѿ дне́сь пое́тсѧ: Ѿве́рзꙋ ᲂу҆ста̀ моѧ̑: до к҃а ное́мврїа.

* * *

18

꙾А҆нато́лїевъ꙾

Комментарии для сайта Cackle