В 28-й день

Святыя великомученицы Параске́вы, нареченныя Пя́тницы

В той же день. Святых мученик Тере́нтия и Неони́лы и чад их: Сарви́ла, Фо́та, Феоду́ла, Иера́кса, Ни́тта, Ви́ла, Евни́кии и преподобнаго отца нашего Стефа́на Савваи́та, творца канонов

В той же день. Святителя Дими́трия, митрополита Ростовскаго

В той же день. Святителя Арсе́ния, архиепископа Се́рбскаго

В той же день. Преподобнаго И́ова Поча́евскаго, чудотворца

НА ВЕЧЕ́РНИ

На Го́споди, воззвах: стихиры на 6: и на утрени канон преподобныя на 6. Аще ли настоятель изволит пети полиелей, тогда поем: Блажен муж: 1 антифон.На Го́споди, воззвах: стихиры на 8, глас 4.

Подо́бен: Дал еси знамение:

Рим тя предлагает,/ я́ко огра́д, цве́ты благовонныя,/ Параске́во многострадальная,/ верных смы́слы облаговонствуя/ воня́ми добродетельными,/ и смрад страстны́й отгоняя,/ благодатию, славная, всегда,/ мучеников добро́та,/ дев похваление и чудес пучи́на.

Я́ко сла́ва многоценна всем да́стся/ от Христа Бога нашего,/ в Риме пострада́вши/ и в нем бы́вши, славная мученице,/ де́монская лукавствия от человек отгоняющи/ заступле́нием твоим./ Тем тя вси блажи́м/ и святыя твоя стра́сти днесь похваляем,/ Параске́во многострадальная.

Соблюда́ема силою Христовою,/ всеславная Параске́во,/ болезней телесных небрегла́ еси,/ к подвиго́м вмести́лася еси,/ му́жеским смыслом/ женскую слабость отвергши,/ упованием укрепи́вшися,/ восприя́ла же еси с пе́рвенствующими/ озаре́ние, прехвальная.

Ве́рнии, сошедшеся,/ хва́ляще тя любовию,/ блажи́м по́двиги твоя и стра́сти, мученице Параске́во./ Христа, Жениха твоего,/ умоли́ от бед и напа́стей изба́вити ны/ твоими моли́твами.

От твоих крове́й/ трудолю́бно истинную чашу испила́ еси,/ желающи по Христе, Женисе́ твое́м, во след потещи́,/ прехвальная мученице Параске́во,/ я́ко ла́стовица доброгла́сная,/ песнь воспева́ющи ко всех Творцу, Христу Бо́гу,/ о пра́зднующих память твою́.

Твои роди́телие Христовы стра́сти почитающе,/ знамени́таго дне тезоимени́ту тя нареко́ша,/ воспита́на же бывше, и на стра́сти дерзну́ла еси,/ и ра́ны претерпе́вши,/ в темни́це, а́ки в черто́зе све́тле, лику́ющи,/ вопия́ла еси:/ никогдаже отлучу́ся Тебе́, Го́споди,/ но посли́ ми помощь Твою́/ и спаси́ мя великия ради Твоея́ милости.

Сла́ва, глас 6:

Одесну́ю Спаса, я́коже поет Дави́д, предста́ Царица,/ и твоя душа, я́ко ря́снами испещре́на златы́ми,/ и жертву себе представила еси Господу твое́му, я́ко кади́ло благовонно,/ принесла еси кровь пло́ти твоея́, мученице прехвальная Параске́во,/ молися о нас Владыце Христу Бо́гу, да спасет души на́ша.

И ны́не, Богоро́дичен или́ Крестобогоро́дичен: Видящи Тя распинаема: (зри страницу 400)

Аще поеши полиелей, пой Богоро́дичен воскресен: Кто Тебе́ не ублажит: Вход. Прокимен дне. И чтения.

Пророчества Исаиина чтение (глава 43):

Тако глаго́лет Госпо́дь:/ вси язы́цы собра́шася вку́пе, и соберутся кня́зи от них, кто возвести́т сия́ в них?/ Или́ я́же от нача́ла, кто слы́шана сотвори́т вам?/ Да приведу́т свиде́тели своя́ и оправдя́тся, и да услы́шат, и да реку́т истину./ Бу́дите Ми свидетели, и Аз свиде́тель, глаголет Господь Бог и о́трок, егoже избра́х./ Да познаете и веруете Ми,/ и разуме́ете, я́ко Аз есмь:/ прежде Мене́ не бысть ин бог, и по Мне не будет./ Аз есмь Бог и несть, ра́зве Мене, спаса́яй./ Аз возвести́х и спасо́х, уничижи́х и не бе в вас чу́ждий./ Вы Мне свиде́тели, и Аз Господь Бог,/ и еще от начала Аз есмь, и несть от рук Моих избавля́яй./ Сотворю, и кто отвратит то?/ Си́це глаголет Господь Бог, избавля́яй вас Святый Израилев.

Прему́дрости Соломоновы чтение. Праведных ду́ши в руце́ Божией: (зри страницы 791– 792)

Прему́дрости Соломоновы чтение. Пра́ведницы во веки живут: (зри страницы 791)

На литии стихиры, глас 5

Подо́бен: Радуйся:

Радуйся, Господня а́гнице,/ уподо́бльшися честне́й и блаже́нней успе́шно страсти Безсмертнаго на Кресте,/ мирски́я стра́сти разорившаго,/ источниче, источающий, я́ко во́ды, чудеса́,/ иста́явшая сердца́, немощны́х дарова́нием исцелений напаяющи,/ страстоте́рпице пребогатая./ Де́рзость разруши́ла еси и́дольскую немощну́ю,/ Небе́снаго черто́га насле́довавши жили́ще./ Христу моли́ся/ дарова́ти душа́м нашим мир и велию милость.

Идеже веселящихся есть жили́ще,/ идеже свет невечерний,/ в дому́ Бога Живаго, посреде́ ски́нии дивныя,/ идеже лик празднующих, чистая,/ веселием, свещу́ иму́щи све́тлу, недрема́нну./ Тем наслаждающися Вышняго Божества/ и отту́ду богатно сияющи светлостьми́,/ Христу молися/ даровати душам нашим мир и велию милость.

Ви́дяще силы Небесныя пло́тию стра́ждущую Содетеля ради Параске́вы/ и Его силою крепля́щуся, глаголюще:/ се, и девы на земли́ просла́виша Господа./ Человецы же, трепетом одержи́ми, ужаса́хуся,/ и, уди́вльшеся, песньми прославля́ху, глаголюще:/ о́ле чудесе!/ дева врага́ победи́/ и молится Милостивому Владыце за мира спасение,/ да подаст мир и велию милость.

Радующися, предстала еси иге́мону, мученице до́бляя Параске́во,/ ясно веру проповедающи,/ строга́ния мно́га мужески претерпела еси,/ мучителя посрами́вши, Христу уневе́стилася еси./ Емуже предстоящи, молися/ за честву́ющия тя и верою творя́щия память твою́.

Радуйся, агнице вседо́бляя,/ Агнцу и Пастырю прине́сшися жертва,/ огне́м всесожега́ема,/ я́ко огне́м любве́ разже́гшися по Христе, Женисе твое́м./ Пла́мень угаси́вши и́дольскаго су́етства,/ и свещу́ неуга́сну душевную соблю́дши,/ и чудесными светлостьми́ тмы ополчения де́монов страдальчески победи́вши,/ и вошла еси со Христом в чертог Небесный./ Молися о творящих память твою́ даровати нам мир и велию милость.

Сла́ва, глас 6:

Посрами́ся лукавый враг, от девы побеждаем,/ я́ко прама́терь содея дерзновенну ко греху./ От Девы бо родившееся Слово Отчее/ непреложно и несказанно,/ я́коже весть Един Сам,/ клятву разруши́ Адама и Евы/ Христос Бог,/ венчавый достойно Параске́ву мученицу,/ и тоя́ ради дарует миру очищение и велию милость.

И ны́не, Богоро́дичен:

На стиховне стихиры, глас 4.

Подо́бен: Я́ко до́бля:

Обагре́нии кро́вными/ спасения одежду себе, всехвальная, обагри́вши/ и убели́вшися Духом, Господу обручи́лася еси, Безсмертному Царю,/ соблюдающему тя непорочну и нетленну во веки веков в черто́зех Небесных,/ я́ко деву преудо́брену и нетленну.

Стих: Святым, иже суть на земли Его,/ удиви Господь, вся хотения Своя в них.

К ра́нам приобщи́вшися, и со огне́м бра́вшися,/ и плотска́я влаче́ния претерпе́вши,/ и коно́бная вре́ния до́блественне пренесши,/ и непобежде́на бысть мыслию, и истука́нным не пожре́,/ но прекло́нши Бо́гу вы́ю,/ ме́чным усече́нием, венец нося́щи, на Небеса взы́де.

Стих: Терпя́, потерпе́х Господа, и внят ми,/ и услы́ша молитву мою.

Каплями кро́вными обагри́вшися, возсияла еси проявле́нно, я́ко солнце,/ и отгна́ла еси, всехвальная, безбожия тьму благодатию,/ мученице Параске́во,/ и верныя просвети́ла еси, чтущия твоя до́блественныя подвиги/ и память светлую, и светоносную, и всеспаси́тельную.

Сла́ва, глас 8:

Сия глаголет Параске́ва к мучителю:/ вра́же нечестивый, иге́моне,/ что неи́стовствуеши на христианы?/ ни царства у тебе́ отъя́х, ни гра́да твоего разори́х,/ но бу́ими словесы́ увеща́ти мя помышляеши./ Аз тебе́ небрегу́, ни твоих безумных глагол,/ плоти бо не щажду́ за Христа моего,/ зане́ Он любит мя и Царство мне да́рует,/ к Нему пойду и Того буду невеста,/ и Той мене спасет от рук враг моих,/ и дарует ми жизнь вечную.

И ны́не, Богоро́дичен или́ Крестобогоро́дичен.

Подо́бен: О преславнаго чудесе:

Не терплю, Чадо, ви́дящи Тя, на Древе усну́вша,/ бодрость всем подающаго./ Я́ко да древле преступления плодо́м,/ сном погибельным усну́вшим,/ Божественную и спаси́тельную бодрость пода́си,/ Дева глаго́лаше, плачущи, Юже величаем.

Тропа́рь, глас 4:

Премудрая и всехвальная Христова мученица Параске́ва,/ му́жескую крепость прии́мши,/ же́нскую же не́мощь отве́ргши,/ диа́вола победи́ и мучи́теля посрами́,/ вопию́щи и глаго́лющи:/ прииди́те, тело мое мече́м ссецы́те и огне́м сожги́те,/ аз бо, радующися, иду́ ко Христу, Жениху моему./ Тоя́ моли́твами, Христе Боже,/ спаси́ души на́ша.

Сла́ва, ин тропа́рь

Ин тропа́рь святыя великомученицы Параскевы, глас 8:

Иже веруя и мужеством душевным, тезоименитне,/ диавола посрамила еси/ и мучительское прещение и раны доблественне победила еси,/ мученице Параскево, вопия:/ мечем сосецайте и огнем сожизайте тело мое,/ я́ко да, радуюся, прииду Жениху моему Христу Бо́гу./ Eгoже моли спастися душам нашим.

И ны́не, Богоро́дичен или́ Крестобогоро́дичен.

НА У́ТРЕНИ

На Бог Госпо́дь: тропа́рь святей, два́жды. Сла́ва, и ны́не, Богоро́дичен или́ Крестобогоро́дичен..

По 1-м стихословии седален, глас 4.

Подо́бен: Скоро предвари́:

Жениха́ возлюби́вши, Творца и Бога, жениха́ тле́ннаго оставила еси,/ мученице честна́я Параске́во;/ и, радующися, претерпела еси му́ки и растерза́ния, и о́гненное томле́ние./ Темже и венец нося́щи, к Божественному чертогу возшла́ еси,/ испроша́ющи всем грехо́в оставления.

Сла́ва, и ны́не, Богоро́дичен:

Дево Всенепорочная,/ Яже Пресущнаго Бога ро́ждшая,/ со страстотерпицею Того непрестанно моли́/ оставление прегрешений и исправление жития́ да́ти нам прежде конца,/ верою и любовию поющим Тя по до́лгу, едина Всепетая.

По 2-м стихословии седален, глас 4.

Подо́бен: Вознесыйся:

Жениха твоего, Христа, возлюби́вши/ и свещу́ твою́ светло украси́вши,/ добродетельми просия́ла еси, славная./ Темже возшла еси в Небесный чертог/ и, венец страдания прии́мши,/ от бед избави нас, совершающих, Параске́во, память твою́.

Сла́ва, и ны́не, Богоро́дичен:

По Бозе во Твой, Богородице, Покров Боже́ственный прибегаю,/ смиренный, припадая, молюся:/ помилуй, Пречистая, я́ко превзыдо́ша главу́ мою греси́,/ и боюся, Владычице, му́ки, и трепе́щу./ Моление сотвори, Чистая, к Сыну Твое́му,/ от сих изба́вити мя.

По полиелеи седален, глас 8.

Подо́бен: Премудрости:

Уневе́стившися Господу благолепно,/ я́коже дар, кровь и заколе́ние Тому принесла́ еси,/ страстотерпице отрокови́це Параске́во,/ и чертог Боже́ственный достойно улучи́ла еси,/ просвещения неизреченнаго непрестанно исполняема./ Темже святую и честну́ю память твою́ творяще духовно,/ Спаса прославляем и верно взываем ти:/ моли Христа Бога грехо́в оставление подати/ честву́ющим любовию святую память твою́.

Сла́ва, и ны́не, Богоро́дичен:

Я́ко Деву и едину в жена́х/ Тя, без Семене рождшую Бога плотию,/ вси ублажа́ем ро́ди человечестии:/ Огнь бо всели́ся в Тя Божества/ и я́ко Младенца дои́ши Зижди́теля и Господа./ Тем Ангельский и человеческий род/ достойно славим пресвятое Рождество твое́/ и согласно вопие́м Ти:/ моли Христа Бога прегрешений оставление дарова́ти/ покланяющимся верою пресвятому Рождеству Твое́му.

Степенна, 1-й антифон 4-го гласа. Прокимен: Дивен Бог во святых своих, Бог Израилев.

Стих: В це́рквах благословите Бога, Господа от источник Израилевых. Вся́кое дыхание: Евангелие от Матфея, зачало 62.

По 50-м псалме стихира, глас 1:

С Вышними чи́нми причта́лася, славная,/ мир оста́вльши и Христа возжеле́вши, Параске́во всечестная,/ проси нам мира и велия милости.

Канон Богоро́дицы со ирмо́сом, на 6, глас 8: Воду прошед, я́ко сушу: И святыя, два канона, на 8. Глас 4

Песнь 1

Ирмо́с: Отве́рзу уста́ моя,/ и наполнятся Духа,/ и слово отры́гну Царице Матери,/ и явлюся, све́тло торжествуя,/ и воспою, ра́дуяся, Тоя́ чудеса́.

Светом Божественным освети́вшися свыше,/ мрак отжени́ неразумия моего/ и подаждь ми моли́твами твоими, Параске́во, благодать,/ воспевати твоих, мученице, чудес мно́жества.

Солнца светле́йши, я́ко истинно возсия́ла еси у́тро,/ утверждение Церкве бывши Христовы,/ озари́ла еси луча́ми по́двигов, мученице Параске́во,/ твоими чудесы́ мира концы́.

Жениха, Безсмертнаго Христа, возлюби́вши,/ я́ко ве́рою Того стра́сти о́бщница показалася еси/ и восприяла еси вечное Царство/ и венец нетленный, мученице Параске́во славная.

Богоро́дичен:

Дево Всенепорочная, Христа родившая,/ и Сего в ложесна́х понесла еси, истинноимени́тая,/ разреши́ мрак души́ моей и просвети́ мя, да пою Тя.

Ин канон. Глас 8.

Песнь 1

Ирмо́с: Пои́м Го́сподеви,/ прове́дшему люди Своя́ сквозе́ Чермно́е мо́ре,/ я́ко Един сла́вно просла́вися.

Пои́м Господеви,/ прославльшему память мученицы,/ и приводя́щу земны́я ли́ки к похвале́нию днесь.

Славу презре́ла еси, о бога́тстве неради́вши,/ честна́я мученице Параске́во,/ на страсть себе вдала́ еси.

Возжела́ Владыка/ твоея́ добро́ты, мученице,/ в Небесный чертог всели́ тя.

Богоро́дичен:

Род Ада́мов/ па́че ума́ блаженства Тобою рай отве́рст обре́тше, Богородице,/ достойно хвалим Тя.

Катавасия: Отве́рзу уста́ моя:

Песнь 3

Ирмо́с: Лук сильных изнемо́же,/ и немощству́ющии препоя́сашася силою:/ сего ради утверди́ся в Господе сердце мое.

Па́лицами неми́лостивно бие́ма, радовашеся, лы́стом сокруша́емым и косте́м вку́пе,/ приснопамятная мученица Параске́ва, вопиющи:/ ничтоже мя разлучи́т от любве́ Твоея́, Христе.

Уста́ нечести́вых, глаго́лющая беззаконие на преподобнаго,/ и язык велере́чив загради́шася,/ мученица Параске́ва вопияше, Спаса проповедающи.

Крове́й твоих кропле́нии безбожия огнь погаси́ла еси,/ многострада́льная мученице Параске́во,/ и верных ра́зумы просветила еси.

Богоро́дичен:

Глаголы благочести́вно исполняются Иса́иины:/ Дева бо родила есть во плоти Жизнодавца Христа,/ Спаса душ наших.

Ин

Ирмо́с: Ты еси утверждение/ притекающих к Тебе́, Го́споди,/ Ты еси свет омраче́нных,/ и поет Тя дух мой.

Ты еси утверждение мое, Го́споди, глаго́лаше мученица,/ Ты же и заступление,/ и к Тебе́ прибего́х, Царю мира.

Яви́лася еси на суди́щи, мужеу́мну ду́шу иму́щи,/ и врага́, я́ко нехра́бра су́ща,/ победила еси, всехвальная.

Души́ моея́ зе́ницы исцели́,/ всехвальная мученице, моли́твами твоими/ и ум мой упра́ви.

Богоро́дичен:

Подаждь нам помощь/ моли́твами Твоими, Пречистая,/ советы отрева́ющи лю́тых обстоя́ний.

Седален, глас 8.

Подо́бен: Премудрости:

Крове́й твоих струя́ми, мученице Христова,/ пото́ки нечестия изсуши́вши, всехвальная Параске́во,/ одожде́нием же благодати слове́сныя напая́еши бразды́,/ в нихже прозяба́еши клас веры./ К сему же, славная, и по смерти яви́лася еси, точа́щи жизнь мучения ради,/ страстотерпице всехвальная./ Моли Христа Бога дарова́ти душа́м нашим велию милость.

Сла́ва, другий седален, глас 4.

Подо́бен: Скоро предвари́:

Посто́м украси́вши чистоту́ душевную,/ луча́ми страдания просвещаеши верныя,/ мученице многострада́льная Параске́во./ Тем твой святый и светоносный день/ верою совершающе, благочестно вопием:/ я́ко имея дерзновение ко Господу, моли спастися нам.

И ны́не, Богоро́дичен:

Обнови́ла еси, Чистая, Божественным Рождеством Твоим/ истле́вшее во страсте́х земнородных ме́ртвенное существо/ и воздвигла еси вся от смерти к жизни нетления./ Темже Тя по до́лгу блажи́м вси, Дево Препрославленная,/ я́коже прорекла еси.

Крестобогоро́дичен:

На Кресте́ Тя возвы́шена я́ко узре́ Пречистая Мати Твоя, Слове Божий,/ ма́терски рыдающи, веща́ше:/ что новое и странное сие́ чудо, Сы́не Мой,/ како, Жизнь всех, вкушаеши смерть,/ оживи́ти мертвыя хотя́, я́ко Милосерд.

Песнь 4

Ирмо́с: Седя́й в сла́ве на Престоле Божества/ во о́блаце ле́гце,/ прии́де Иисус Пребоже́ственный/ нетленною дланию и спасе́ зову́щия:/ сла́ва, Христе, силе Твое́й.

Уязви́вшися любовию Христовою,/ ополчения мучительская крепостию твое́ю умертви́ла еси,/ благодать источаеши присноживо́тную:/ страсте́й ради мздовоздая́ние, восприяла еси, Параске́во,/ мучениц Христовых добро́та.

Превозше́дши вся любовию Христа, Жениха твоего,/ плотску́ю любовь возненави́девши,/ крепко болезненная страдания претерпела еси, мученице Параске́во, вопиющи:/ не разлучи́ мене, Христе, от желания/ Твоего мучения подвиг совершити.

Отве́ргши мира суету́ всю,/ Бо́гу Единому прилепи́лася еси, Параске́во мученице,/ и болезни страдания претерпевши,/ невесто Божия, мужеу́мная.

Богоро́дичен:

Сни́де, я́ко дождь на руно́, во утро́бу Твою́ Господь,/ я́коже рече́ дре́вле пророк, Всенепорочная,/ Eгoже во двух Существах родила́ еси,/ Емуже взываем:/сла́ва силе Твое́й, Го́споди.

Ин

Ирмо́с: Услышах, Го́споди,/ смотре́ния Твоего та́инство,/ разуме́х дела́ Твоя,/ и просла́вих Твое́ Божество.

Услы́шавши, Го́споди,/ мученица Параске́ва заповеди Евангельския,/ просла́ви Твое́ Божество.

Не принесла́ еси отню́д жертвы де́моном ме́рзским,/ жертву жи́ву себе Господу вдала́ еси.

Крепко на суди́щи ста́вши, вопияше мученица:/ со Христом, Женихом моим, распну́ся/ и возцарствую с Ним.

Богоро́дичен:

Очищение наших да́руй согрешений, я́ко Безгрешен,/ и умири́ люди Твоя, я́ко Благ,/ моли́твами Рождшия Тя.

Песнь 5

Ирмо́с: Ты, Го́споди, мой свет/ в мир пришел еси,/ Свет Святый, обраща́яй из мра́чна неве́дения/ верою воспева́ющия Тя.

Свет незаходимый всели́ся в души́ твое́й,/ да доброде́телию сия́еши,/ озаря́я тебе́ непрестанно сла́вящия.

Струю́, мученице Параске́во, нечестиваго безбожия изсуши́ла еси:/ тече́нии кро́вными, непра́ведно проливаемыми,/ огнь пре́лести погасила еси.

Ум иму́щи прозра́чен, пророческаго да́ра сподо́билася еси,/ хотящая бы́ти всем я́ве предглаго́лала еси,/ Параске́во многострадальная.

Богоро́дичен:

Мати Божия, души́ моея зло́бу исцели,/ родившая Бога Слова неизреченно./ Сего ради вси ро́ди блажа́т Тя.

Ин

Ирмо́с: У́тренююще, вопие́м Ти,/ Го́споди, спаси́ ны:/ Ты бо еси Бог наш,/ разве Тебе́, ино́го не ве́мы.

У́тренюющи, мученица вопия́ше Параске́ва:/ ничто́же мя разлучи́т любве́ Христовы.

Божественную мученицу мнев ослабе́ти,/ смех сам яви́ся проны́рливый.

Просвещение подаждь мне, всехвальная,/ и многомяте́жный мой ум просвети́/ моли́твами твоими.

Богоро́дичен:

Низложи́ непрестаю́щую бурю страсте́й,/ Христа Рождшая,/ ко́рмчию и Господа.

Песнь 6

Ирмо́с: Пожру́ Ти со гла́сом хвале́ния, Го́споди,/ Церковь вопие́т Ти,/ от бесо́вския кро́ве очи́щшися,/ ради милости от ребр Твоих/ истекшею Кровию.

Возсиявши из Ри́ма,/ я́ко солнце светлое, святая мученице,/ мрак де́монский от человек отгоняющи мольбами твоими,/ Параске́во многострадальная.

Исцеления прие́млют приходя́щии прикосновением к ра́це моще́й твоих,/ кровоточи́вии и прокаже́ннии очищаются,/ отбегают де́монския полки́,/ призыванием свята́го твоего имени.

Утреневала еси ко Христу, невечернему Солнцу,/ и Того светлостьми́ ду́шу, Богомудрая,/ и сердце озарила еси, Параске́во честна́я,/ и к Свету Троическому, радуяся, прешла́ еси.

Богоро́дичен:

Исцели души́ моея́ страсти, Всенепорочная,/ безстрастия рождшая Источник,/ и отжени́ томи́тельство,/ непрестанно смуща́ющее сердце мое.

Ин

Ирмо́с: Ри́зу мне пода́ждь све́тлу,/ одея́йся светом, я́ко ри́зою,/ Многомилостиве Христе Боже наш.

Ри́зою мя с Небесе́ приоде́й, Го́споди, вопияше Параскева,/ Иже о́блаки небеса́ одева́яй, Многомилостиве.

Я́коже из ро́ва Дании́ла услы́ша Господь,/ тако и тебе́, в темни́це молящейся, исцеление подавает.

Мучи́телеву гордость низложи́ла еси,/ сама же, невреди́ма пребывши,/ на му́ку дерзну́ла еси.

Богоро́дичен:

Слово Божие Тя земны́м показа́ Небесную лествицу:/ Тобою бо к нам сни́де.

Конда́к, глас 3.

Подо́бен: Дева днесь:

Всесвятое и непорочное мучение прине́сши,/ я́ко ве́но пречестно́е, безсмертному Жениху Христу,/ Ангельское ликостоя́ние возвесели́ла еси/ и победила еси де́монския ко́зни./ Сего ради тя че́стно верою чтим,/ мученице Параске́во многострадальная.

Икос:

Кто изглаголет силы Господня;/ или кто пове́сть страдания твоя и доброде́тели, мученице;/ или кий язык воспети возможет по достоинству./ Темже и аз, недостойный, воспе́ти покушаюся,/ хвалити же и славити Владыку Жизнодавца,/ давшаго тебе́ на три́знищи крепость/ мучителей не убоятися, исповедающей Истиннаго Бога./ Сего ради тя чтим верою и любовию,/ мученице Параске́во многострадальная.

Песнь 7

Ирмо́с: Спасы́й во огни́ Авраа́мския Твоя о́троки,/ и халде́и убив,/ яже правда пра́ведно уловля́ше,/ препетый Го́споди,/ Боже отец наших, благословен еси.

Голуби́це, кри́ла иму́щи злата́я и оружием храни́ма крестным,/ ага́ряны же, в нощи граду твое́му прибли́жившияся, отгна́ла еси,/ спа́сши верныя от убийства, мученице Параске́во, поющия:/ препетый отец наших Боже, благословен еси.

Многообра́зныя болезни претерпевши Христа ради, мученице Параске́во,/ неболезненный у Него обрела́ еси покой/ и, радующися, взываеши:/ препетый отец наших Боже, благословен еси.

Коль непобеди́м твой разум, Параске́во честна́я,/ я́ко от начальников ли́ка мучителей мук не убоялася еси./ С нимиже бра́вшися, скончалася еси я́ко служительница тайны Божественныя славы, поющи:/ препетый отец наших Боже, благословен еси.

Богоро́дичен:

Благословен Плод благословеннаго Твоего чрева,/ Eгoже благословят Небесныя Силы и человечестии собори восхваляют,/ нас избавльшаго клятвы древния, Благословенная, поющих:/ препетый отец наших Боже, благословен еси.

Ин

Ирмо́с: От Иудеи дошедше о́троцы,/ в Вавилоне иногда/ верою Троическою пламень пе́щный попраша, поюще:/ отцев Боже, благословен еси.

Яви́шася па́че ума́ чудеса Божественныя мученицы,/ во ю́нотстве девства победи́ мучителя, зовущи:/ отец наших Боже, благословен еси.

Блудя́щих загради́ла еси богомерзская уста́,/ среди суди́ща ста́вши, Бога исповедала еси, взывающи:/ отец наших Боже, благословен еси.

Забы́вши женскую немощь,/ мужественно укрепи́вшися терпением,/ стра́ждущи, вопия́ла еси:/ отец наших Боже, благословен еси.

Богоро́дичен:

Из Деви́ческу боку́ вопло́щся,/ явился еси на спасение наше./ Тем Твою́ Матерь ве́дуще Богородицу,/ благодарно взываем:/ отец наших Боже, благословен еси.

Песнь 8

Ирмо́с: Отроки благочестивыя в пещи́/ Рождество Богоро́дичо спасло́ есть,/ тогда у́бо образу́емое,/ ны́не же де́йствуемое,/ вселенную всю воздвиза́ет пе́ти Тебе́:/ Господа пойте дела/ и превозноси́те Его во вся веки.

Божественными светлостьми́ Солнца мысленнаго просвети́вшися,/ мученице всехвальная Параске́во,/ нощь претекла́ еси безбожия, поющи единомыслием души́:/ Господа воспевайте дела и превозносите Его во веки.

Я́ко а́гница, я́ко Нескве́рная ю́ница,/ я́ко Божественная голуби́ца, я́ко самовольное заколение,/ привела́ся еси, мученице Параске́во, Зижди́телю твое́му/ и, я́ко жертва непоро́чна, принесла́ся еси, согласно поющи:/ Господа пойте дела и превозносите Его во веки.

Све́тлу себе от крове́й ри́зу мучением обложи́ла еси,/ Параске́во, до́бляя мученице,/ совле́кшися истинно тленнаго со грехи́ человека, радостно воспева́ющи:/ Господа пойте дела и превозносите Его во веки.

Богоро́дичен:

Во след Тебе́ теко́ша жены́, мира сладково́ннаго ве́дуще, Всечистая Богоневесто,/ Едина Неискусобрачная,/ из утро́бы Твоея́ возсиявшаго Единороднаго Сына, Христа Бога,/ и с Тобою царствуют истинно, песнословяще Его во веки.

Ин

Ирмо́с: Царя Небе́снаго,/ Eгoже поют во́и Ангельстии,/ хвали́те и превозноси́те во вся веки.

Царя Христа Бога,/ Eгoже испове́да дева мученица Параске́ва,/ воспева́ющи: хвалите и превозносите Его во веки.

За любовь Божественныя Троицы/ огнь безбожия погасила еси, вопиющи:/ превозносите Христа во веки.

По́двиги, иже к Бо́гу,/ тьмы начальника низложи́ла еси, поющи:/ превозносите Христа во веки.

Богоро́дичен:

Проти́вных прило́га на ны угаси́ и́скры, Дево,/ я́ко да поем Господа и превозно́сим Его во веки.

Песнь 9

Ирмо́с: Всяк земноро́дный/ да взыграется, Духом просвещаем,/ да торжествует же Безплотных умо́в естество,/ почитающее священное торжество Богоматере,/ и да вопиет:/ радуйся, Всеблаженная/ Богородице, Чистая Приснодево.

В Небесный чертог все́льшися, дево Параске́во всечестная,/ и невидимых добро́т разу́мно наслади́вшися,/ восприи́мши неизрече́нную светлость,/ просвети́ поющия и величающия тя.

Венец восприяла еси на главе́ твое́й, Параске́во доблеу́мная,/ я́ко скончавши течение и сохранивши веру непоколеби́му,/ праведных чи́ни радостно тя прия́ша./ Тем ны́не ублажаем тя.

Подае́ши исцелений ка́пли требующим, я́ко от источника,/ всебогатая мученице Параске́во,/ уставляющи то́ки неду́гов и страсте́й отгоня́щи зной,/ сердца́ благочестивых напаяющи ко благоплодию Боже́ственных деяний.

Богоро́дичен:

Мудрости Вместилище, па́че ума́ лучшаго, яви́лася еси,/ Отроковице Всенепорочная,/ одушевле́н же престол и дверь./ Тем я́ко Царицу Тя возлю́бльше, девы во след Тебе́ приведо́шася, Богоотроковице.

Ин

Ирмо́с: Воистинну Богородицу/ Тя исповедуем,/ спасении тобою, Дево чистая,/ с Безплотными ли́ки Тя величающе.

Воистинну тезоимени́та назва́лася еси, Параске́во,/ подо́бящися страсте́м Христовым,/ с Небе́сными во́инствы лику́ющи.

Постигла еси конец мучения/ многими страстьми́ и боле́зньми твоими,/ со Ангелы Христа сла́вящи на Небесех, всечестная.

Дерзновение иму́щи ко Спасу и Владыце,/ моли за поющия твою́ память,/ мученице славная Параске́во.

Богоро́дичен:

Пе́сньми Тя поем, Богоблагодатная,/ и немо́лчно Тебе́, радуйся, прино́сим,/ Ты бо источи́ла еси всем нам веселие.

Светилен.

Подо́бен: Жены́, услы́шите:

Я́ко ши́пок красне́йший от терно́внаго прозябла́ еси ко́рене, дево Параске́во,/ оброше́нием, мученице, священнаго страдания обагри́вшися кровию./ И ны́не Божественную твою́ память творящия любовию/ спасай ны от бед.

Сла́ва, и ны́не, Богоро́дичен:

Стоя́ще о́крест Тебе́ девы Богомудрыя, Богородительнице Марие, я́ко Царице ро́дом,/ Твое́му Сыну приведо́шася невестоле́пно, Пречистая, я́ко Царю всяческих,/ Eгoже, Мати Дево Отроковице, о нас моли.

На хвалитех стихиры, глас 4.

Подо́бен: Я́ко до́бля:

Девство нетленно, мучение всечудно/ Христу принесла еси, всечестна́я дево Параске́во,/ низложи́ла еси шатание пре́лести безбожныя силою Крестною,/ му́жественным разумом./ Темже вся Христова Церковь празднует святую твою́ память.

Твое́му страданию, дево мудрая, и сопротивлению, и неодолению/ ли́цы Ангельстии, блаженная Параске́во, я́ве удиви́шася,/ како му́жественным сплете́нием врага́ неви́димаго разрази́ла еси/ и победы венец от руки́ Жизнодавца богатно прия́ла еси.

Огне́м опаля́ема,/ о́гненною мудростию пламень угаси́ла еси естественный/ и, свещу́ неугаси́му душевную соблю́дши,/ вошла еси со Христом, Женихом твоим, в чертог Небесный./ Чудесными и́скрами стра́сти умертвивши,/ и де́монскии полки́ страдальчески победи́ла еси.

Ины стихиры, глас 1.

Подо́бен: Небесных чино́в:

В Небесныя дворы́ всели́лася еси, мученице Параске́во,/ кровьми́ твоих страда́ний,/ в виде́нии ликостояний причислилася еси ра́вно, всехвальная.

Мучи́теля посрами́ла еси, о му́ках небре́гши,/ и звере́й рыка́ния не устраши́лася еси,/ иму́щи Христа Помощника твоего, всехвальная.

Радующися, текла́ еси, прехвальная Параске́во,/ тща́щися конец мучения прия́ти, дево всехвальная,/ и Христу уневе́стившися та́мо, поминай ны, всегда честву́ющия тя.

Сла́ва, глас 6:

Пе́сньми да почестви́тся Христова мученица,/ подобает бо ей вся́кое хвалосло́вие:/ хвала́ми бо испле́тши свой венец,/ той непрекло́нней су́щи и тве́рдей,/ мно́гу мучителей злобу низложи́./ Тем, в боле́знех стра́ждущи, вопияше:/ Ты мне, Го́споди, бу́ди помощь и не оста́ви мене́.

И ны́не, Богоро́дичен или́ Крестобогоро́дичен.

Подо́бен: Все отло́жше:

А́гнца Своего А́гница Нескве́рная дре́вле/ и Непорочная Владычица/ на Древе Крестнем я́ко узре́, матерски восклица́ше и, дивя́щися, вопияше:/ Чадо Сладчайшее, что зрение сие новое и преславное;/ како сонм безблагодатный суди́щу Пила́тову предаде́ Тя/ и осуждает на смерть, Жизнь всяческих;/ но воспева́ю Твое́ неизрече́нное, Слове, снизхожде́ние.

На стиховне, сла́ва, глас 4:

Крест, я́ко ору́жие держа́вно, Параске́во мученице, держа́щи рука́ми,/ веру, я́ко щит, надежду, я́ко броню́, любовь, я́ко лук,/ мучителей томле́ние победи́вши му́жески,/ и де́монов кова́рствия упраздни́ла еси Божественною силою,/ во главу́ же усекнове́на бывши, лику́еши во Христе,/ не преста́й молящися о душах наших.

И ны́не, Богоро́дичен или́ Крестобогоро́дичен.

Подо́бен: Я́ко до́бля:

На Кресте́ Тя я́ко узре́ пригвожде́на, Го́споди,/ А́гница и Мати Твоя дивля́шеся/ и, что виде́ние сие́, взыва́ше, Сы́не Вожделение,/ сия Тебе́ неве́рный собор воздаде́ беззаконный,/ многих Твоих чудес наслади́выйся;/ но сла́ва неизглаго́ланному сошествию Твое́му, Владыко.

Славословие великое. И отпуст.

На Литургии: Блаженна от канона перваго, песнь 3-я, и втораго канона, песнь 6-я. Прокимен, глас 4: Дивен Бог во святых Своих, Бог Израилев. Стих: В церквах благословите Бога, Господа от источник Израилевых. Апостол к Коринфяном, зачало 181. Аллилуия: Терпя, потерпех: Евангелие от Луки, зачало 33. Причастен: В память вечную:

На Го́споди, воззва́х: стихиры мучеников, хлас 4.

Подо́бен: Я́ко до́бля:

Многообра́зным му́кам мужески приобщи́вшеся,/ вражия возношения низложи́сте,/ испове́дающе, блаженнии, пред мучители Явльшагося нас ради дебельство́м плоти,/ и пречистыя страсти претерпевши волею,/ и источи́вша миру просвещение и безстрастие.

С Тере́нтием возсия́ Неони́ла славная,/ Ни́тта же и Сарви́л чуднии,/ Фот же и Иера́кс с сими законно пострадавше/ и огнь мучений Божественною росою Духа угаси́вше/ и быша столпи́ благочестия, и благоприятныя жертвы, и приношения пречиста.

Я́ко многосветлое солнце,/ с луною совоку́плься Неони́лою,/ родил еси, о Терентие, лик звезд седмочи́слен,/ мученическою кровию обагри́вшихся,/ и светлое испущающих сия́ние,/ вселившихся же в невечерний покой,/ идеже всех страда́лец стада́ све́тло ликовству́ют.

Ины стихиры преподобнаго, глас 8.

Подо́бен: О преславнаго чудесе:

Отче Богоносне Стефа́не,/ Божественным смы́слом ум укрепи́в светле́йше,/ ярость же мужеством, целомудрием желание,/ правдою же всю силу души́ управил еси./ Мудролю́бнейше колесни́цу прекрасну добродетелей состро́ил еси,/ на нюже всед, радуяся, возшел еси к высоте́, славне.

Отче Богоносне Стефа́не,/ Богословием ум просвети́л еси, преподобне,/ я́коже копиено́сную ярость/ простира́я на хульныя, отче, еретики́,/ возжелев пищи вышния,/ еяже сподо́бился еси причасти́тися, чудне,/ предстоя́ Престолу Всецаря и Вседержителя.

Отче Богоносне Стефа́не,/ воздержанием ум утучня́я всегда,/ к Первовино́вному востещи́ сотворил еси,/ и отвергл еси мира смуще́ние, и молвы́ оттря́с,/ ума́ чистотою сраствори́вся, всемудре, с желанием, воистинну крайним,/ Богомудре преподобне.

Сла́ва, и ны́не, Богоро́дичен. Подобен тойже:

Девства сосу́д/ и чистое Божие и красное жили́ще,/ молю Тя, всечестно́е,/ душу мою уте́ши,/ озло́бленную ядом змии́ным и умерщвле́ную преступле́ньми,/ я́ко да сла́влю Тя,/ верныя вся возвеличившую, Богора́дованная.

Крестобогоро́дичен, подобен тойже:

Что зримое виде́ние,/ еже Моими очесы́ видится, о Владыко,/ содержа́й всю тварь,/ на Древо воздви́жен быв,/ и умираеши, всем дая́й Жизнь,/ Богородица, пла́чущи, глаго́лаше,/ егда узре́ на Кресте́ возноси́ма,/ из Нея неизреченно возсиявшаго/ Бога и Человека.

Тропа́рь, глас 4:

Му́ченицы Твои, Го́споди,/ во страданиих своих венцы́ прияша нетленныя от Тебе́, Бога нашего:/ имуще бо крепость Твою́,/ мучителей низложиша,/ сокрушиша и де́монов немощны́я де́рзости,/ тех моли́твами/спаси́ ду́ши на́ша.

Сла́ва, тропа́рь Стефа́на, глас 5.

Воздержанием житие украси́ и страсти умертвив,/ посрамил еси вражия прилоги, отче Стефа́не,/ и преложися к Бо́гу, чудотворец показася,/ в вечней славе со Ангелы ликуя,/ с ними же моли поми́ловати ду́ши на́ша.

И ны́не, Богоро́дичен или́ Крестобогоро́дичен.

НА У́ТРЕНИ

Канон Окто́иха един, и святых два.

Канон мучеников. Глас 4.

Песнь 1

Ирмо́с: Отве́рзу уста моя,/ и наполнятся Духа,/ и слово отры́гну Царице Матери,/ и явлюся, све́тло торжествуя,/ и воспою, радуяся, Тоя чудеса.

Глубиною обуреваем греха, Человеколюбче,/ к единой пучи́не благоутробия Твоего/ взираю очесы́ моего се́рдца,/ окорми́ и спаси́ мя страстоте́рпец моли́твами.

Незаходимое вас Солнце звезды показа на тверди Церкве Своея,/ озаряющия сиянием по́двиг,/ мученицы прехвальнии, сея́ исполне́ние.

Веры побо́рницы, Церкве утвержде́ние,/ Тере́нтий быст, Нитта́ же, Сарви́л, Феоду́л, Ие́ракс, Неони́ла,/ и Ви́л чу́дный, Евни́кия же и Фо́т.

Богоро́дичен:

Радости нам Хода́таица, я́ко приемши полноту́ всего Божества́,/ яви́лася еси, Всенепорочная./ Темже вси Тебе́, еже радуйся,/ со А́нгелом согласно зовем, Богорадованная.

Ин канон преподобнаго. Глас 8.

Песнь 1

Ирмо́с: Пои́м Господеви,/ прове́дшему люди Своя сквозе́ Чермно́е море,/ я́ко Един славно прославися.

Всю мою мрачную, отче, мглу уныния/ светом Божественным разори,/ Божественную благодать пода́в, Стефа́не, пети память твою́.

Единый тебе́ добродетелей иску́с ве́дом,/ мирски́я бо всеконечно зло́бы не приял еси,/ от младенства Бо́гу, Стефа́не, возложе́н.

Всего Христу Спасу ты тебе́ сама́го привед воздержательно,/ заколение све́тло благоприятно,/ безсмертнаго жития, славне, был еси причастник.

Положи духовная молния столп тя всесве́тел,/ прие́мша достояние службы та́инственныя,/ вся верныя озаря́ющая.

Богоро́дичен:

Пречистая Богородице, всех радосте,/ Яже Бога в Твое́й утробе вмести́вши, Нескве́рная,/ изба́витися от враг моли́ся поющим Тя.

Песнь 3

Ирмо́с: Не мудростию, и силою, и богатством хвалимся,/ но Тобою, О́тчею Ипоста́сною Мудростию, Христе:/ несть бо свят,/ па́че Тебе́, Человеколюбче.

Я́коже солнце со многосветлою луною,/ соединяем Неони́ле славный Тере́нтий,/ породи́ звезд седмочисленный лик мучеников Христовых.

Сокрушение твоих уде́с, страдальче Тере́нтие,/ пре́лести ко́сти, я́коже прах, истни́,/ тебе́ же исхода́таи славу неизглаго́ланную.

Златы́ми впери́вшися крилы́, Евники́е,/ беззаконных лове́ц коварствия избе́гла еси/ и внутрь вселилася еси чертога мысленнаго.

Богоро́дичен:

Тя Мудрость Божия чистейшее селение обре́тши,/ от Твоих чистых крове́й воплотися,/ и по Рождестве нетленну показа́.

Ин

Ирмо́с: Страх Твой, Го́споди,/ всади́ в сердца́ раб Твоих/ и буди нам утверждение,/ Тя во истине призывающих.

Скверня́щих в житии человеческия ду́ши избежавши тя, Стефа́не, плотски́х,/ очисти пусты́ня изде́тска/ Божественным промышлением.

Небесное иму́щии житие́, по́стницы тя приемше,/ утверди́ша, блаженне, страхом Господним к мудрости Божественней.

Отце́в повинуяся учением премудрости,/ страх Божий, я́ко основание положил еси/ твоего небесоподо́бнаго, отче, жития.

Богоро́дичен:

Безсе́менно зачала́ еси, Богоневесто, Спаса и Господа,/ избавляющаго ны от тли,/ Тя воистинну песносло́вящия.

Конда́к Стефана, глас 4.

Подо́бен: Вознесыйся:

Насадил еси добродетелей рай/ и напои́л еси то́ками слез твоих,/ я́ко жизни, всеславне, древо получив,/ спаси́ моли́твами твоими от тли стадо твое́,/ избави от обстоя́ний те́пле чту́щих тя, Стефа́не,/ тя бо предстателя велича́йша, мудре,/ вси верою и любовию стяжа́хом.

Седален мучеников, глас 8.

Подобен: Премудрости:

Я́ко зве́зды солнцу световидны, Тере́нтию,/ дети священныя я́ве совозсиява́ют и тварь просвещают,/ мужескими по́двиги доблественно сия́юще, многобожия нощь разоряют;/ ихже с веселием ублажаем верою, я́ко сущия угодники Божия, и возопиим:/ страстотерпцы всехва́льнии, моли́те Христа Бога грехо́в оставле́ние пода́ти/ чту́щим любовию святую память вашу.

Сла́ва, преподобнаго, глас 5.

Подо́бен: Собезначальное Слово:

Воздержанием житие́ украси́в и страсти умертви́в,/ попрал еси вражия прило́ги, отче Стефа́не,/ и, преложи́вся к Бо́гу, чудотворец показался еси,/ в вечней славе со Ангелы ликуя./ С нимиже моли непрестанно поми́ловатися нам.

И ны́не, Богоро́дичен:

Теплая Предста́тельнице и непобедимая,/ упование изве́стное и непостыдное,/ стено́, и покро́ве, и приста́нище прибегающим к Тебе́,/ Приснодево Чистая,/ Сына Твоего и Бога моли́ со Ангелы/ мир да́ти миру, и спасение,/ и ве́лию милость.

Крестобогоро́дичен:

На Кресте зря́щи Тя, Христе, Мати Твоя,/ волею посреде́ разбойников ви́сяща,/ растерза́ющися утробою ма́терски, глаго́лаше:/ Безгрешный Сы́не,/ како неправедно на Кресте, я́коже злодей, пригвожден еси,/ человеческий род хотя́ оживи́ти,/ я́ко Благоутробен.

Песнь 4

Ирмо́с: Вознесена Тя ви́девши Церковь на Кресте,/ Солнце праведное,/ ста́ в чи́не своем,/ достойно взывающи:/ сла́ва силе Твое́й, Го́споди.

Окормля́еми дла́нию всесильною,/ мук пучи́ну немо́кренно преидоша,/ до́ндеже достиго́ша в приста́нище тихое Вышняго Царствия, мученицы.

Возвышаемаго державою нече́стия гордаго мучителя,/ веры оружии, мученицы всехва́льнии, низложи́сте, пою́ще:/ сла́ва силе Твое́й, Го́споди.

Седмобра́тный лик страстотерпцев с двои́ми родители,/ непорочная жертва Тебе́, тех ради чудно поже́ршемуся,/ я́ко овча, Владыко Христе, приведо́шася.

Богоро́дичен:

Иже волею всяческая создавый,/ зи́ждется хотя́ из Тебе́ па́че сло́ва,/ спасая, Неискусобра́чная, верою зову́щия:/ сла́ва силе Твое́й, Го́споди.

Ин

Ирмо́с: Услышах, Го́споди,/ смотре́ния Твоего та́инство,/ разуме́х дела Твоя/ и прославих Твое́ Божество́.

Законом Божественным Духа все покорил еси плотско́е мудрование/ и словом безсловесная стремле́ния страсте́й отгна́л еси, мудре Стефа́не.

Ты ярости во́лны на врага вооружил еси, Стефане,/ к Единому же Рачителю желание, Бо́гу, простерл еси.

Светлый свет узре́л еси ты безстрастия, преподобне Стефане,/ совле́кся мглы темныя страсте́й, благодатию наставляемь.

Во уме ты будущая помышляя,/ возгнушался еси мимотекущих безслове́сия./ Темже вся наследовал еси болезньми присносу́щая.

Богоро́дичен:

Бога, Eгoже родила́ еси, Чистая Дево,/ Сего умоли́, рабо́м Твоим дарова́ти согрешений проще́ние/ и противных избавле́ние.

Песнь 5

Ирмо́с: Ты, Го́споди, мой свет/ в мир пришел еси,/ Свет Святый, обращаяй из мрачна неве́дения/ верою воспева́ющия Тя.

Тя, Го́споди, крепость стяжа́вше мученицы,/ терза́ния, и раны, и огнь, и смерть му́жески преоби́деша.

О дети священныя!/ О Богоприятная заколе́ния!/ О совокупле́ние, разорившее ко́зни многоплете́нныя врага борющаго!

Побе́дами главу́ безсмертными венча́ла еси,/ победи́вшая зми́я, Еву победи́вшаго, Евники́е добродево.

Богоро́дичен:

Свет безлетный нам, Отчее Сияние родила́ еси,/ под летом благости богатством бы́вша, Всенепорочная.

Ин

Ирмо́с: Просвети нас повелении Твоими, Го́споди,/ и мышцею Твое́ю высокою/ Твой мир подаждь нам,/ Человеколюбче.

Являешися, я́ко светильник, с Небес поющим тя,/ отгоня́ дел омраче́ние/ и Божественнаго вообража́я дея́ния осия́ние.

Бо́дренну молитву и стояние всено́щное,/ рук приле́жное воздеяние стяжа́л еси, отче,/ и источники слез, Стефа́не.

Нов истинно пусты́ни явился еси/ све́тел светильник, о Стефане,/ просвеща́я во тьме держи́мыя злых.

Богоро́дичен:

Моли присно Сына Твоего и Бога нашего,/ Неискусобра́чная Марие Чистая,/ низпосла́ти нам верным милость.

Песнь 6

Ирмо́с: Пожру́ Ти со гла́сом хваления, Го́споди,/ Церковь вопиет Ти,/ от бесовския кро́ве очищшися,/ ради милости от ребр Твоих/ исте́кшею Кровию.

Простре́ти немилостивно повелев мучитель/ и к колесе́м привяза́ти многообра́зными ви́ды му́ченики,/ но посрами́ся,/ непобеди́мы ты́я ви́дев.

Звере́м в снедь пре́дани бывше,/ показа́сте я кротчайшия овец непрестанными ва́шими моли́твами/ и вре́да от тех никакоже прии́сте, святи́и.

Сарви́л, Неони́ла, Фот и Феоду́л,/ Вил, Иера́кс, Евни́кия же и Нитта́ Боже́ственный с Тере́нтием,/ я́ко до́блии, благоче́стно да восхва́лятся, мученицы.

Богоро́дичен:

Купина преобразоваше великое та́инство,/ еже па́че ума, Твоего Рождества,/ огне́м всюду окружа́ема и никакоже опаля́ема, Дево Всепетая.

Ин

Ирмо́с: Ио́ну в ки́те, Го́споди,/ единаго всели́л еси,/ мене же, связаннаго мре́жами вра́жиими,/ я́ко от тли онаго, спаси́.

Ты рука́ми, ви́ден был еси, Стефа́не, се́рне подавая пищу,/ душевныя бо стра́сти отря́с,/ над ди́виими животными, я́коже пе́рвее во Еде́ме Адам, царствовал еси.

Путетворя́ Христу селение твоея́ в клети́ души,/ чре́во твое́, Стефане, и язык удержа́в,/ и плотски́я сла́сти до конца умертви́л еси.

Победительными венча́лся еси венцы́, Стефане, по́стничества,/ де́монов бо полки́ победил еси/ и помышлений и страсте́й прило́ги низложил еси, блаженне.

Богоро́дичен:

Па́че ума воплоще́ннаго Господа во чреве Твое́м/ сотвори Твоим рабо́м милостива быти/ Твоими моли́твами, Чистая,/ я́ко да страшнаго избавимся муче́ния.

Конда́к, мучеников, глас 4.

Подо́бен: Вознесы́йся:

Му́ченическая честна́я память прии́де днесь, веселящи всяческая,/ Тере́нтия премудраго и подру́жии его./ Те́пле убо стеце́мся, да прии́мем исцеление,/ си́и бо благодать прие́мше от Духа Свята́го/ исцеля́ти недуги и болезни душ наших.

Песнь 7

Ирмо́с: В пещи́ Авраа́мстии о́троцы перси́дстей,/ любовию благочестия па́че,/ не́жели пла́менем опаля́еми, взыва́ху:/ благослове́н еси в храме славы Твоея́,/ Го́споди.

В пещь муче́ний вве́ржени бывше, мученицы,/ ро́су с Небесе́ обрето́сте терпе́нием, благодарно взыва́юще:/ благословен еси в храме славы Твоея́, Го́споди.

Вкорене́но душевное иму́щи мудрова́ние на ка́мени непреложныя веры Христовы,/ безбо́жных свере́пства трус,/ мученицы молитвою творя́ще, низложи́ша.

Пове́шени бывше и по ре́бром крепко стру́жеми,/ о́цтом люте́йшим же и огне́м сожигаеми, блаженнии,/ всю попали́сте вещь ле́стную, славнии.

Богоро́дичен:

Одева́яй небо о́блаки, Пречистая, Тя небо показа́ на земли,/ из Тебе́ облече́ся во всего человека/ и обожа́ет мя за милосердие безчи́сленное.

Ин

Ирмо́с: О́троки оросивый в пещи́/ и Деву сохрани́вый Рождшую Тя по рождестве,/ благослове́н еси, Боже отец наших.

Воистинну Нетле́нныя тя Троицы благодать обре́тши, сосу́д, Стефа́не, избра́н,/ я́коже жела́ше, в тебе́ упоко́ися,/ и дарова́нии обогати́, и врача́ душевных страсте́й показа.

Таи́нниче пресветлаго Богоначалия, зрителю славы неизреченныя Божия причаща́яйся,/ подаждь нам просвеще́ние, творящим верою память твою́,/ угодниче Христов, преблаженне Стефа́не.

Воду Моисе́йски в земли невла́жней, жа́ждущу твое́му ученику, Стефа́не,/ твоим жезло́м начерта́в, источи́л еси, преподобне,/ песнопоя́ Христу Вседержителю:/ благослове́н еси, Боже отец наших.

Богоро́дичен:

Подоба́ше безсе́менно Воплоще́нному из Тебе́ проити́, Марие Чистая,/ па́че солнца я́вльшися Чистая и Нескве́рная,/ на объя́тиих бо носи́ла еси, Благословенная, Бога Вседержителя.

Песнь 8

Ирмо́с: Ру́це распросте́р Дании́л,/ львов зия́ния в ро́ве затче́,/ огненную же силу угаси́ша, доброде́телию препоя́савшеся,/ благоче́стия рачи́тели,/ о́троцы, взыва́юще:/ благословите вся дела Госпо́дня Господа.

На огнь дерзну́ша, светом Божественнаго Духа просвещаеми,/ коно́бов вре́ния³² показаша неде́йственна,/ Боже́ственный хлад с Небесе́ Боже́ственнии мученицы прие́мше,/ ихже по достоянию, ве́рнии, восхва́лим.

Ангелов явися множество, на три́знищи ясно укрепля́юще вас, всехва́льнии мученицы,/ и болезни отъе́млюще;/ с нимиже отроко́в песнь взыва́ете:/ благословите вся дела Госпо́дня Го́спода.

Бо́дро име́я к Бо́гу о́ко, Сарви́ле, се́рдца твоего,/ оче́с терпе́л еси избоде́ние,/ облича́я мучителя, безбожия мглою одержи́маго./ Тем вси тя, я́ко дне сына, ублажа́ем.

Богоро́дичен:

Отчим благоволением Сына во утробе прия́ла еси,/ осени́вшу Божественному Духу, Пречистая,/ и рождши я́ко пе́рвее Пречиста пребыла́ еси;/ к Немуже непрестанно молися избавитися всем, Дево, тли и озлобле́ния.

Ин

Ирмо́с: Мусики́йским орга́ном согласу́ющим/ и людем безчисленныя покланяющимся образу в Деи́ре,/ три о́троцы не повину́вшеся,/ Господа воспеваху/ и славосло́вляху во вся веки.

Повину́лся еси, блаженне, Господу, пребыва́нием жития́ непоро́чнаго,/ и, отту́ду укрепи́вся,/ враги́ покоря́еши под но́зе твои и сокрушаеши,/ на ты́я болезньми, я́ко оружии, до́блествовав.

Единообра́зно житие имея, Истины слово показа/ и обы́чай прост и прав, нелука́в нрав, Боголюби́в разум./ Темже тя пою́ще, Христа превозно́сим во веки.

Вседушно, отче, возлюби́л еси Бога, пли́щей³³ отврати́лся еси,/ непрохо́дныя же обходя́ пусты́ни,/ наслажда́лся еси Единаго Рачи́теля твоего,/ Eгoже ради уме́ты вменя́л еси вся.

Богоро́дичен:

Известно ве́дящии Тя, Деву и Божию Матерь, па́че слова,/ пое́м Тя всеблагоче́стно, верою песнопою́ще:/ Господа пойте и превозноси́те Его во веки.

Песнь 9

Ирмо́с: Камень нерукосе́чный/ от несекомыя горы́, Тебе́, Дево,/ краеуго́льный отсечеся,/ Христос, совокупивый разстоящаяся естества./ Тем, веселящеся, Тя, Богородице, величаем.

Рай яви́стеся, среде́ жизни древо имущ,/ источник же, пролива́ющ капли исцелений/ и река, истинно испо́лнена, святии, Боже́ственных вод Духа.

Столпи́ Христовы Це́ркве/ и тиша́йшая пристанища су́щих в пучи́не лю́тых обурева́емых, мученицы яви́стеся,/ и мира пита́телие, и Ангелов сожи́тельницы.

В Небесных се́лех с радостию живете́,/ добро́ты недомысленныя вкупе сматря́юще и наслажда́ющеся истиннаго обожения,/ венцено́сцы великоимени́тии.

Богоро́дичен:

Яже Небес ши́рши и Херувимов святейши, всея же твари вку́пе честне́йши,/ Бога, Eгoже родила́ еси,/ о нас моли, Богороди́тельнице, чту́щих Тя.

Ин

Ирмо́с: Чистую славно почти́м,/ людие, Богородицу,/ Огнь Божества прии́мшую во чреве неопально,/ пе́сньми величаем.

Те́сный путь шествовал еси,/ егoже ничтоже в мире истинно ну́жднейше,/ сего ради во Еде́м вшел еси, пространное поко́ище.

Ти́х явился еси, о Стефа́не,/ на Небесех бо венце́м славы венча́лся еси, блаженне, достойно,/ поя́ Венча́вшаго тя.

Чудно житие твое́ проси́я, благовонно,/ я́ко шипо́к в ве́рте, и я́ко све́щник на возду́се,/ светови́дно озаря́я, всеблаженне, честву́ющия тя.

Богоро́дичен:

Деву вси и Пречистую, ве́рнии, Богородицу,/ неизреченно носи́вшую во утро́бе Бога и Спаса,/ в песнех величаем.

НА ВЕЧЕ́РНИ

На Го́споди, воззва́х: стихиры, глас 6:

Украси́в Твою́ ду́шу добродетельми,/ и преше́д по́прище временныя жизни во стра́се Божии,/ обрел еси благодать пред Богом,/ святе Дими́трие:/ и ны́не, предстояй Престолу Господа славы,/ моли спастися душам нашим.

Еще сый в теле,/ распали́лся еси серафи́мскою к Бо́гу любовию,/ ны́не же по отшествии от временныя жи́зни,/ совле́кся уз телесных/ и, наслаждаяся сладости ра́йския,/ наипа́че соделался еси обита́лищем любве́ Божественныя;/ и, подражая Христа Спаси́теля,/ Eгoже ны́не лице́м к лицу́ зри́ши,/ сострада́й бедности человечества,/ и буди о наших не́мощех ко Господу хода́тай,/ да изба́вившеся от них,/ избе́гнем и временных зол, и вечныя смерти.

Пастырю добрый,/ усердный подража́телю Пастыреначальника, Сына Божия,/ услы́ши нас грешных,/ призывающих в помощь твое́ всесильное хода́тайство,/ и моли о нас Всемилостиваго Бога,/ да избе́гнем всяких зол и напастей,/ и да улучи́м вечное блаженство,/ во еже ку́пно с тобою, святителю Димитрие,/ славити и воспевати Божество,/ силу и единовластие Пресвятыя Троицы.

Сла́ва, глас тойже:

Похвала́ми ублажи́м святителя Дими́трия,/ иерарха великаго, Златоуста Российскаго,/ иже ре́вностию по Господе Бо́зе Вседержителе поощряем,/ непрестанно облича́л возмущающих тишину и Православие Христовы Це́ркве/ и, соделався сосу́д избра́н Всесвята́го Духа,/ причте́н яви́ся ли́ку друго́в Божиих./ Темже тебе́ почитаем, святителя Христова,/ и усердно молим:/ буди о нас заступник и хода́тай ко Триипостасному Бо́гу,/ наста́ви нас на путь спасения/ и даруй улучи́ти от Господа Вседержителя/ мир душам нашим, и велию милость.

И ны́не, Богоро́дичен, глас тойже: Кто тебе́: Вход, прокимен дне, и чтения 3 святительская (зри страницы 135–138).

На литии стихиры, глас 7:

Отче Дими́трие,/ иерарше великий, Российское светило,/ приими похвалы, от усердия нашего тебе́ по силе приноси́мыя,/ и бу́ди теплый предстатель/ и молитвенник о душах наших.

Отче Дими́трие,/ мечу́ на ерети́чествующих обою́ду о́стрый,/ отсецы́ от Христовы Це́ркве суему́дренныя пле́велы/ и сохрани ю непорочну и чи́сту,/ да в безопасном ея пристанище/ убегнем от козней губителя древняго.

Сла́ва, глас тойже:

Святителю Дими́трие,/ моли Человеколюбца Бога,/ да изба́вит нас от всяких бед и напа́стей,/ и да да́рует нам Живот вечный.

И ны́не, глас тойже:

Богородице Дево,/ упование христиан,/ покрый и соблюди нас Твоими к Сыну Твое́му и Бо́гу моли́твами/ от всякия нужды и печали.

На стиховне стихиры, глас 8:

Прииди́те, Российскии Це́ркве сы́нове,/ прииди́те, ублажим учителя нашего,/ иже в жизни своей нас наставля́я,/ по смерти же назира́я,/ печется я́ко пастырь добрый о душах наших.

Стих: Уста́ моя возглаголют премудрость/ и поучение сердца моего разум.

Богодухновенный орга́н Всесвята́го Духа,/ обличитель суему́дренных расколов,/ великий святитель Дими́трий,/ источающий струю́ благодати Божия от многоцелебных мощей своих,/ хода́тайствует непрестанно и молится Бо́гу о душах наших.

Стих: Праведник, я́ко фи́никс, процветет,/ и я́ко кедр, иже в Ливане, умно́жится.

Твое́ заступле́ние получивше, святителю Дими́трие,/ благодарни есмы́ душею и сердцами и молим тя усердно:/ подкрепи́ нашу веру к Бо́гу и наста́ви нас на стезю́ Его заповедей,/ да Богоугодно поживше в веце сем, наследуем блаженство пра́ведных.

Сла́ва, глас тойже:

Благи́й ра́бе и верный,/ умно́живый тала́нт, вруче́нный тебе́ от Владыки твоего,/ научи́ и нас последовати достохвальному примеру твое́му,/ да не с лукавыми раба́ми осу́димся,/ но да сподобимся радости вечныя.

И ны́не, Богоро́дичен гласа.

Тропа́рь, глас 8:

Правосла́вия ревни́телю и раско́ла искорени́телю,/ Росси́йский целе́бниче и но́вый к Бо́гу моли́твенниче,/ списа́ньми твои́ми бу́их уцелому́дрил еси́;/ цевни́це духо́вная, Дими́трие блаже́нне,/ моли́ Христа Бога спасти́ся душа́м нашим.

НА У́ТРЕНИ

По 1-м стихословии седален, глас 1:

Гра́ду Росто́ву и всем единозе́мным росси́яном/ показался еси учитель и наставник,/ словесы́ и делами показу́я путь ко спасению,/ Дими́трие всеблаженне:/ и приял еси от Бога венец почестей,/ угото́ванный лю́бящим Его./ Темже днесь всесвятую память твою́ празднующе,/ прославляем Бога, прославляющаго святыя Своя.

Сла́ва, и ны́не, Богоро́дичен:

Неискусомужная Мати Емману́илева,/ моли Сына Твоего и Бога нашего,/ да да́рует нам прощение согрешений наших/ и мир душам нашим.

По 2-м стихословии седален, глас 1:

Упра́вив паству твою́ добре, святе Дими́трие,/ получил еси мзду твою́ от Мздовоздая́теля, Христа Бога нашего,/ Eгoже моли непрестанно,/ да и мы сподобимся причте́ны быти к лику Его лю́бящих.

Сла́ва, и ны́не, Богоро́дичен:

Под твое́ покровительство прибегаем, Богородице Дево,/ и на Тя все упование наше возложи́вше,/ молим хода́тайствовати за нас у Престола Сына Твоего/ теплыми Твоими моли́твами.

По полиелеии седален, глас 8:

Просиял еси добродетельным житием твоим, святителю Дими́трие,/ украша́яся красото́ю нрава, воздержанием и милосердием,/ златослове́сными же твоими учении украша́я Христову Церковь./ Темже, приснопамятне, предстоиши Престолу Вседержителя:/ моли Христа Бога, даровати грехов оставление/ празднующим любовию всечестную память твою́.

Сла́ва, и ны́не, Богоро́дичен:

Тя стяжа́хом молитвенницу теплую к Сыну Твое́му и Бо́гу нашему,/ не оста́ви нас, Всепетая Владычице,/ но избавля́й всегда рабы́ Твоя/ от всякия ну́жды и печали.

Степенна: 1-й антифон 4-го гласа. Прокимен, глас 4: Уста́ моя возглаголют премудрость,/ и поучение сердца моего разум. Стих: Услышите сия, вси язы́цы: Вся́кое дыхание: Евангелие святительское.

По 50-м псалме стихира самогласна, глас 8:

Благи́й ра́бе и верный,/ умноживый талант, вруче́нный тебе́ от Владыки твоего,/ научи и нас последовати достохвальному примеру твое́му,/ да не с лукавыми раба́ми осу́димся,/ но да сподобимся радости вечныя.

Канон Богоро́дицы со ирмо́сом на 6

и другий канон свята́го на 8, глас 6.

Песнь 1

Ирмо́с:Яко по су́ху, пешешествовав Израиль/ по бездне стопа́ми,/ гонителя фараона/ видя потопля́ема,/ Бо́гу победную песнь/ пои́м, вопияше.

Со ангельскими чиноначалиями предстояй Святей Троице,/ великий иерарше Дими́трие, моли о нас грешных,/ да полу́чим грехов оставление.

Постничеством и воздержанием всяким порабо́тивый тело духу,/ и тем соде́лавый нетление и цельбоносную силу и бре́нному веществу твое́му,/ научи и нас, отче святый, Бо́гу, а не мамо́не работати.

Управля́я паству, вверенную тебе́ от Началопастыря Христа,/ и отгоняя душевредных волко́в от Христовы огра́ды твоими Богодухновенными учении,/ назира́й и ны́не, святителю Дими́трие, да не како суему́дренныя расколы возмутят тишину церковную,/ но па́че моли Человеколюбца Бога,/ да вскоре вси едиными усты́ и единым сердцем восхва́лим Его благоутробие.

Богоро́дичен:

Избра́нну и Всечи́сту разумев Тя/ Сын Божий, Всенепорочная, Сын Твой бысть,/ сыно́в сотвори́ благодатию, Богородицу Тя чтущия.

Песнь 3

Ирмо́с: Несть свят,/ я́коже Ты, Го́споди, Боже мой,/ вознесы́й рог верных Твоих, Блаже,/ и утверди́вый нас на камени/ исповедания Твоего.

Утверди́вся на ка́мени веры Христовы,/ тверд пребыл еси во исповедании Православия/ и злоче́ствующих непрестанно обличал еси.

Облича́я, моля́, советуя,/ не преставал еси призывати заблуждших ове́ц от Христова стада,/ аще и не вси послу́шаша гласа твоего.

Сыно́в Це́ркве, непоколебимо пребывших во объятиях ея, ободря́л еси,/ и мы, со сладостию внимая учению твое́му, вопием:/ несть свят па́че Бога нашего.

Богоро́дичен:

Избавляющаго человеки преслушания/ и Кровию Своею омывшаго первородный грех Адамов,/ Чистая и Всенепорочная, родила́ еси.

Седален, глас 8:

Исцеления и чудеса, истекающая от чудоточных моще́й твоих, святителю Дими́трие,/ радуют верных сердца́ и возбуждают любовию пети тебе́:/ радуйся, отче, Российская похвало́.

Сла́ва, и ны́не, Богоро́дичен:

Едина истинная христиан Покровительнице,/ всяких лю́тых обстояний, бед и скорбе́й нас избави,/ и мольбами Твоими спаси́ души на́ша.

Песнь 4

Ирмо́с: Христос моя сила,/ Бог и Господь,/ Честна́я Церковь/ Боголепно поет, взывающи,/ от смысла чи́ста о Господе празднующи.

Измла́да воспи́тан в до́брем научении,/ остроту́ ума́ твоего не на суему́дренная у́мствования обрати́л еси, святителю Дими́трие,/ но на созидание и утверждение православных, на обличение же и обуздание еретиков:/ темже и явился еси достойный апостольскаго престола наместник.

Неистощи́мое врачевство́ источают многоцелебнии святии мощи твои,/ и иже верою к ним притекающии/ обретают от злых избавление.

За любовь, юже ко Христу имел, прославился еси даром чудес и исцелений,/ сего ради покланя́емся тебе́ и молим тя, я́ко угодника и друга Божия,/ да помяне́ши нас во святых твоих к Бо́гу молитвах.

Богоро́дичен:

Моли о нас Человеколюбца Бога, Пресвятая Владычице,/ да не помяне́т беззаконий наших,/ но да сотворит с нами по милости Своей.

Песнь 5

Ирмо́с: Божиим светом Твоим, Блаже,/ у́треннюющих Ти ду́ши любовию озари́, молюся,/ Тя ведети, Слове Божий,/ Истиннаго Бога,/ от мрака греховнаго взыва́юща.

Сохрани́, святителю Христов,/ отечество твое́ ненаве́тно от врагов/ и даруй на сопротивных победу и одоление.

Огради нас, угодниче Божий Дими́трие,/ от всех козней лукаваго диавола,/ да не преткновенно возмо́жем преити́ путь жития́ сего/ во исполнении заповедей Божиих.

Разжени́, отче Дими́трие, тьму греховную от душевных оче́с наших/ и просвети́ нас познанием воли Божия,/ да во свете за́поведей Его совершим до́бре течение наше.

Богоро́дичен:

Дево Непорочная, ро́ждшая Свет истинный,/ облиста́й нам свет Богове́дения во спасение наше.

Песнь 6

Ирмо́с: Житейское море,/ воздвиза́емое зря напа́стей бурею,/ к тихому пристанищу Твое́му прите́к, вопию́ Ти:/ возведи от тли живот мой,/ Многоми́лостиве.

Воззри́ милосердным о́ком, святителю Христов,/ на волнение греховное, нас обуревающее,/ и упра́ви плавание наше в тихое пристанище милосердия Божия.

Бу́ди нам добрый кормчий, отче Дими́трие,/ и не остави нас погибнути во греха́х наших,/ но в нихже сам, я́ко человек искушаем был, помози́ и нам, искушаемым.

Святе Дими́трие,/ бу́ди о нас заступник и хода́тай ко Многомилостивому Бо́гу,/ да возведет от тли живот наш.

Богоро́дичен:

Устна́ми и сердцем величаем Тя, Матерь Божию:/ Ты же, примирившая Бо́гу весь род человеческий,/ не отри́ни нас от Твоего заступления.

Конда́к, глас 4:

Звезду́ Росси́йскую, от Киева возсия́вшую,/ и чрез Но́вград Се́верский в Ростов дости́гшую,/ всю же страну́ сию уче́ньми и чудесы́ озари́вшую,/ ублажи́м златослове́снаго учи́теля Дими́трия:/ той бо всем вся написа́, яже к наставле́нию,/ да всех приобря́щет, я́коже Павел, Христу/ и спасе́т правове́рием души на́ша.

Икос:

Пра́ведным о ка́ющихся на Небеси́,/ нам же, грешным, на земли́ о тебе́, пра́ведниче Дими́трие,/ подоба́ет возра́доватися:/ я́ко новаго тя к Бо́гу моли́твенника о нас стяжа́хом,/ егoже достойными похвала́ми ублажа́юще,/ си́це от радости зове́м:/ радуйся, Росто́вская похвало́, и всея России похвале́ние.

Песнь 7

Ирмо́с: Росода́тельну убо пещь/ соде́ла Ангел/ преподобным отроко́м,/ халде́и же опаляющее веление Божие мучителя увеща́ вопи́ти:/ благословен еси, Боже отец наших.

Христова ради смирения, образ смирения явился еси, святе Дими́трие,/ и мне подаждь не в гордости, но во смирении взывати:/ благословен еси, Боже отец наших.

Воздержанием покори́л еси тело духу твое́му, святителю Дими́трие,/ подаждь и мне в воздержании пожи́ти, да нескверными устна́ми воззову́:/ благословен еси, Боже отец наших.

Учениями твоими, отче Дими́трие, управля́еши мысли на́ша,/ и мы, подражая тебе́, воспеваем Бо́гу:/ благословен еси, Боже отец наших.

Богоро́дичен:

Безначальнаго Бога зачала́ еси во чреве Твое́м,/ Пречистая Дево,/ Eгoже пою́ще, зове́м:/ благословен Бог отец наших.

Песнь 8

Ирмо́с: Из пла́мене преподобным ро́су источи́л еси,/ и праведнаго жертву водою попали́л еси:/ вся бо твори́ши, Христе, то́кмо еже хотети,/ Тя превозносим во вся веки.

Ты был еси строитель спасения нашего, отче Дими́трие,/ вопия́ всем послу́шающим учения твоего:/ превозноси́те Христа во веки.

Богомудрый иерарше, всеблаженне Дими́трие, ми́лостивою и человеколю́бною к нам любовию моли́ о нас Человеколюбиваго Бога,/ Eгoже превозно́сим во вся веки.

Зловредное мудрова́ние раскольников испровергл еси, святе Дими́трие,/ верныя же наставил еси пребы́ти твердым во и́стинней вере,/ превозноси́те, вопия, Христа во веки.

Богоро́дичен:

Преестественное и чу́дное Рождество Твое́, Дево,/ воспеваем благочестно,/ превознося́ще Христа во вся веки.

Песнь 9

Ирмо́с: Бога/ челове́ком невозможно видети,/ на Негoже не смеют чи́ни Ангельстии взира́ти:/ Тобою же, Всечистая, явися человеком/ Слово воплоще́нно,/ Eгoже величающе,/ с Небе́сными во́и/ Тя ублажаем.

Наслажда́яся, отче, вечныя жизни,/ о нейже усердно подвизался еси,/ моли и нам дости́гнути о́ныя.

Аще и пресели́лся еси от нас на Го́рняя, святителю Дими́трие,/ оба́че ду́хом пребываеши с призывающими тя,/ науча́я и укрепляя ходи́ти по стезе́ спаси́тельных заповедей Божиих.

Яви́лся еси благочестия светильник всесветлый,/ ри́тор изя́щнейший и православных архиереев удобрение:/ тем тя сердечною любовию достойно величаем.

Богоро́дичен:

Богородице Дево,/ Eгoже родила́ еси Человеколюбца Бога,/ моли со святителем Дими́трием,/ да спасет ду́ши на́ша.

Светилен:

Вождь спасения явился еси нам, отче Дими́трие,/ златозарными словесы́ твоими уча́ и наказу́я:/ и ны́не не престава́й озаря́ти сердца́ наши/ светом истиннаго Богове́дения.

Богоро́дичен:

Владычице Милостивая,/ моли Сына Твоего о нас грешных,/ да изба́вимся вечныя тли и всякия ско́рби,/ и да получим вечная блага́я:/ вся бо мо́жеши, ели́ка хо́щеши.

На хвалитех стихиры, глас 8:

Чистоту сердца, ума правость/ и кротость нрава прови́дев,/ Сердцеведец Бог возводит тя на престол архиерейства,/ пома́зав тя и совершив на сие великое звание:/ ты же, прияв корми́ло, направил еси паству твою́/ в пристанище Божественнаго хотения,/ Дими́трие всеблаженне.

Вняв словесе́м сына громова,/ распали́л еси себе любовию:/ Бога бо всеконечно, а ближняго, я́ко сам себе, возлюби́л еси./ Темже и Господь возлюби́ тя, святе Дими́трие,/ милостивне преклоняяся на твоя прошения:/ и ны́не, име́яй дерзновение, моли непрестанно о душах наших.

Сла́ва, глас тойже:

Прииди́те, ве́рнии,/ прииди́те, лю́бящии Божественную славу,/ прииди́те, восхва́лим Ангела земна́го и Небе́снаго человека,/ великаго святителя Дими́трия:/ той бо источает нам струи́ Божия милосердия/ и молится о душах наших.

И ны́не, Богоро́дичен:

Владычице, приими́ молитву раб Твоих/ и изба́ви нас/ от всякия ну́жды и печали.

Славословие великое и отпуст.

Молитва святителю Димитрию

О всеблаженный святителю Димитрие, великий угодниче Христов, Златоу́сте Российский, услыши нас грешных, молящихся тебе́, и принеси молитву нашу к Милостивому и Человеколюбцу Бо́гу, Емуже ты ны́не в радости святых и с лики Ангел предстоиши! Умоли Его благоутробие, да не осу́дит нас по беззакониям нашим, но да сотворит с нами по милости Своей. Испроси нам у Христа и Бога нашего мирное и безмятежное житие, здравие душевное и телесное, земли благоплодие и во всем вся́кое изобилие и благоденствие, и да не во зло обратим благая, да́руемая нам от Щедраго Бога, но в славу Его и в прославление твоего заступления. Даруй нам Богоугодно прейти́ поприще временныя жизни; избави нас воздушных мытарств и настави нас на путь, веду́щий в селения праведных, идеже пра́зднующих глас непрестанный, зря́щих Божия Лица́ неизреченную добро́ту. Церковь же Святую от расколов и ересе́й сохрани, верных укрепи, заблуждающих обрати и всем даруй вся, яже ко спасению и славе Божией подобающая; Отечество твое́ сохрани от врагов ненаветно, но поборай оружие Крестоноснаго воинства; и подаждь нам всем твое́ архипастырское и святое благословение, да оным осеняеми, избавимся от ко́зней лукаваго и избегнем от всякия беды́ и напа́сти. Услыши моление наше, отче Димитрие, и моли непрестанно о нас Всесильнаго Бога, сла́вимаго и покланяемаго в Триех Ипоста́сех, Емуже подобает всякая сла́ва, честь и держава во веки веков. Аминь.

Аще хощет настоятель, творит бдение

НА МА́ЛОЙ ВЕЧЕ́РНИ

Стихиры, глас 1.

Подо́бен: Небесных чинов:

Из мла́да возраста Бога в себе нося́, отче Арсе́ние,/ де́монския полки́ огнем молитвенным пожегл еси, блаженне./ Наставил еси, мудре, стадо словесных овец на па́жить духовную/ и к Бо́гу привел еси.

Девства тезоимени́тый, Сербский светильник,/ чудодейством сияя, великий отче Арсе́ние,/ всех нас созываеши в память твою́/ торжество совершати духовное,/ воспевати Спаса Христа.

Доброде́тели верх и верных основание,/ апостолов сла́ва, иерархов хвала́,/ сербское утверждение, великий отче Арсе́ние,/ всех призываеши све́тло праздновати/ всечестную память твою́.

Сла́ва, глас 4:

Евангельских источник словесы́ твоими, святителю отче Арсе́ние,/ людей твоих сердца́ напоил еси,/ и семя благочестия в них моли́твами твоими возрасти́л еси,/ и сия́ принесл еси Христу плод изря́ден./ И ны́не, предстоя у Него с ли́ки апостол и иера́рхов,/ и нас поминай, и сохрани от всякаго озлобле́ния,/ я́ко в мире совершати память твою́.

И ны́не, Богоро́дичен: Богородице, всех Царице:

На стиховне стихиры, глас 2.

Подо́бен: Доме Евфрафов:

Ума владыку на стра́сти поста́вив,/ плотолюбием не порабо́тився,/ Ангельски чистотою, отче Арсе́ние, пожил еси.

Стих: Блаже́н муж, боя́йся Го́спода,/ в за́поведех Его восхо́щет зело́.

Архиереев похвала и священников сла́ва,/ правило монашествующих, отче Арсе́ние,/ радуйся, Це́ркве утверждение великое.

Стих: Свяще́нницы Твои́ облеку́тся правдою,/ и преподо́бнии Твои возра́дуются.

Услы́ши моления раб твоих, архиере́е, отче Арсе́ние,/ и слез не премолчи́,/ и сердечная прошения подавай лю́бящим тя.

Сла́ва, глас 4:

Подобает Сербскому роду Арсе́ния везде имети архиерея,/ я́ко не́кую у́тварь царскую и сокровище некра́домо,/ всем подаю́ща богатство, спасения проповедание,/ и вся собирающа к соединению пе́сней благолепных,/ к немуже возопим:/ архиере́е и наста́вниче, Христа Бога моли о душах наших.

И ны́не, Богоро́дичен: Избави ны от нужд наших:

Тропа́рь, глас 8: Милости наставниче: Писан на велицей вечерни. Сла́ва, и ны́не, Богоро́дичен: Иже нас ради Рождейся от Девы: И отпуст.

НА ВЕЛИ́ЦЕЙ ВЕЧЕ́РНИ

Блажен муж: На Го́споди, воззвах: аще бдение, поем стихиры на 8; аще ли ни, поем на 6, глас 5

Подо́бен: Радуйся:

Радуйся, преосвященне архиерее,/ доброе обре́т Христово подобие,/ имже возшел еси на высоту учений распложда́я,/ делы добродетелей совершая,/ и си́ми колесницу огненную восхождения твоего сотворив,/ к широте́ Божия града достигл еси./ Небесный человече, земный Ангеле,/ Арсе́ние отче священне,/ Христа Бога моли душам нашим дарова́ти мир и велию милость.

Радуйся, освящение отче архиере́е,/ деяния добродетелей твоих,/ Небесных каса́ющеся, подсо́лнечную просвещают,/ и к Божественней высоте вознося́щеся,/ умныя зари облистающе,/ столп добродетелей возвы́шши выспрь,/ Божественнаго твоего зра́ка возводя́щ./ Небесный человече, земный Ангеле,/ Арсе́ние освященне,/ Христа Бога моли/ дарова́ти душам нашим мир и велию милость.

Радуйся, Богоглаголивая главо́, Свята́го Духа глаголы вещающи,/ трубо́ Ангельская, всем воздаяние глася́щи,/ архиере́ев ссельниче, грешащих заступниче,/ теплая уте́ха притекающим к тебе́,/ и сим возводя́щися, Небе́снаго зра́ка прие́м,/ обновил еси, я́ко орел, юность твою́,/ учением ча́да твоя просвещая,/ Небесный человече, земный Ангеле,/ Арсе́ние пресвященне,/ Христа Бога моли даровати душам нашим мир и велию милость.

Сла́ва, глас 6. Самогласен:

Возсия́ всесветлая днесь иерарха память,/ верныя просвещающи и та́ки неоскудно благоухания точащи,/ в нейже собравшеся, цветы добропесненными главы́ своя увя́зше,/ просвещеннаго Арсе́ния хвалами почтим/ и сего освященней главе́ радость возгласи́м:/ радуйся, Божественная ластовице, всем глася́щи путь покаяния./ Радуйся, благовонием ра́ки твоея́ яви́вый житие твое́./ Радуйся, надежде всех хвалящих тя./ Освящение Арсе́ние, молися о душах наших.

И ны́не, Богоро́дичен: Кто Тебе́ не ублажит:

Вход. Прокимен дне. Чтения три святительская (зри страницы 135–138)

На литии стихиры самогласны, глас 2:

Сербская пречестная Церковь, созывающи нас, ликовству́ет,/ тем, веселящеся с духовными твоими ча́ды,/ тебе́ предстояще и с любовию почитающе тя,/ песньми и пении зове́м:/ архиере́е Арсе́ние, моли спастися душам нашим.

Изво́лив лучшая,/ су́щия же в житии́ вещи преобидел еси,/ и Горнее житие возлюбил еси,/ оде́явся в смирение,/ мученически показал еси подвиг страдания телесными по́ты,/ райское наслаждение восприял еси,/ и в светлости святых бога́тно вселился еси./ С нимиже Христу предстоя́, пресвященне отче Арсе́ние,/ моли спастися душам нашим.

Глас 6:

Церковное светило вси ве́мы Боговидное/ и душ спаси́теля, Христова иерарха Арсе́ния./ Сей убо чудодействы сия́я и Богословием украшаем,/ Христова стада достоин бысть, досточудный пастырь,/ милостив и благоуветлив,/ и всего мира концы просвети.

Сла́ва, глас 8:

Преславно прославися Святая Церковь,/ в нейже стекаются вси ве́рнии, духовная твоя чада,/ неисцельных страсте́й приемлют исцеления/ о имени твое́м, святителю отче Арсе́ние:/ моли спастися душам нашим.

И ны́не, Богоро́дичен: Безневестная Дево:

На стиховне стихиры, глас 2.

Подо́бен: Ки́ими похвальными:

Ки́ими пе́сненными добро́тами воспои́м архиерея Христова,/ уста́ тихая и Евангелия Его проповедника светла,/ церковнаго хранителя и заступника земли Сербстей,/ православному воинству нашему поборника;/ егoже моли́твами врагов шатание Христос низложи́,/ име́яй велию милость.

Стих: Священницы Твои облеку́тся правдою,/ и преподобнии Твои возра́дуются.

Ки́ими похвальными венцы увязе́м иерарха,/ священства венца́, благочестия управление,/ Церкве светлое украшение,/ источника Боже́ственных исцелений неисчерпа́емаго,/ проли́тие дарований духовных,/ реку́ многих чудес, землю Сербскую веселящу течением,/ Арсе́ния, добраго предстателя нашего и хранителя.

Стих: Блаже́н муж, боя́йся Господа,/ в за́поведех Его восхо́щет зело́.

Ки́ими украшенными гла́сы воспои́м иерарха,/ дивнаго в чудесе́х Арсения,/ безплотных сожителя, освяще́ннаго от пеле́н,/ столпа́ Церкве неподви́жима,/ веселие земли́ Сербския, правды правило,/ оби́димых заступника, немощных врача безмездна;/ егoже ради дарова́ Христос Церквам соединение, мир и велию милость.

Сла́ва, глас 6:

Небе́снаго Царствия во благодать/ у́зкою стезе́ю вшел еси пространства;/ райская обитель, прии́мши тя, наследника сотвори́,/ и глаголы уст твоих хва́лящи, и житие добродетелей цвету́щее,/ и своея красоты́ о́бщника тя устро́и,/ пресвященная же ра́ка благоуханием испо́лнися./ Мы же светоносную память любезно празднуем,/ святителю отче Арсе́ние,/ моли спастися душам нашим.

И ны́не, Богоро́дичен: Творец и Избавитель мой:

На благословении хлебов тропа́рь, глас 8:

Милости наставниче и благоутробия сокровище,/ еже всем отве́рзл еси,/ правоверия учителю и архиереев Боже́ственное удобрение,/ отче наш, иерарше Арсе́ние,/ нищих был еси заступник:/ тем моли Христа Бога,/ просветити души на́ша, да не когда усне́м в смерть.

НА У́ТРЕНИ

По 1-м стихословии седален, глас 3.

Подо́бен: Божественныя веры:

Великое солнце всея́ Сербския страны,/ добродетелей твоих сиянии/ и чудес светлостьми просветив твоя чада верная,/ и истребил еси страсте́й омрачение, святителю отче Арсе́ние,/ Христа Бога моли даровати нам велию милость.

Сла́ва, и ны́не, Богоро́дичен:

Божественнаго естества не отлучи́вся,/ плоть быв во чреве Твое́м: но Бог вочеловечився и пребысть,/ Иже по рождестве Матерь Тя Деву, я́ко прежде Рождества,/ сохрани́в Всенепорочну, Един Госпо́дь:/ Того прилежно моли даровати нам велию милость.

По 2-м стихословии седален, глас 3.

Подо́бен: Божественныя веры:

Образы просиял еси Богоразу́мия, заре́ю облистал еси Сербское достояние/ и ча́да твоя наставил еси словесы́ твоими, нищелюбие и любовь источи́л еси./ Авраа́мову страннолюбию подобяся, отче Арсе́ние,/ Христа Бога моли даровати нам велию милость.

Сла́ва, и ны́не, Богоро́дичен:

Божественная ски́ния была еси Сло́ва,/ Едина Пречистая Мати Дево, чистотою Ангелы превозшедшая,/ па́че всех мене, персть бывша, оскверне́на плотскими прегреше́ньми,/ очисти молитв Твоих Божественными вода́ми,/ подающи, Чистая, велию милость.

По полиелеи седален, глас 2.

Подо́бен: Повеленное:

Гряди́те, вси ве́рнии, воистину уви́дим чудо дивно,/ тленна бо я́ко нетленна зря́ще Божественнаго смотрения, в разум приводя́ща/ сего свята́го архиерея песньми воспоим,/ Божественная деяния, яже о нем видяще, рцем:/радуйся, отче, земли Сербския, отец и учитель./ Моли Христа Бога грехов оставление даровати чтущим любовию святую память твою́.

Сла́ва, и ны́не, Богоро́дичен:

Повеле́нное тайно прием в разуме, в кро́ве Ио́сифове тщанием предста́ Безплотный,/ глаголя Неискусобрачней:/ Приклонивый схожде́нием Небеса вмещается неизменно весь в Тя./ Eгoже и ви́дя в ложесна́х Твоих прие́мша ра́бий зрак,/ ужаса́юся звати Тебе́:/ радуйся, Невесто Неневестная.

Степенна, 1-й антифон, 4-го гласа. Прокимен: Честна пред Господем смерть преподобных Его.

Стих: Что воздам Господеви о всех: Евангелие от Иоанна, зачало 36.

По 50-м псалме стихира, глас 6:

Преподобне отче и преблаженне,/ священный пастырю добрый,/ Первопастыря Христа угодниче,/ положи́вый ду́шу за сербское достояние:/ ты ны́не, архиере́е Арсе́ние блаженне,/ испроси у Господа даровати нам велию милость.

Канон Богоро́дицы со ирмо́сом, на 6.

И свята́го на 8. Глас 6.

Песнь 1

Ирмо́с: Помощник и Покровитель/ бысть мне во спасение,/ Сей мой Бог,/ и просла́влю Его,/ Бог отца моего,/ и вознесу Его:/ сла́вно бо прославися.

Боже Спа́се мой, отве́рзи мои устне́ и язык мой уясни́,/ я́ко да воспою память иерарха Твоего,/ егoже на земли́ удиви́л еси славно сла́вити Тя:/ славно бо прославися.

Иже превышняя держа́щи, в Небесная се́ла водворя́ше тя мудрость Божия,/ де́тели дарова́ний тебе́ воздающи,/ Горних все́льника сотворя́ет, Господу поюща:/ славно бо прославися.

Божественная краси́лища, веселя́ще священнаго твоего зра́ка,/ в вышняя вселяют поко́ища,/ к Божественней трапе́зе, Господу поюща:/ славно бо прославися.

Богородичен:

Окова́нных Свободителя, Богородице, и те́мных Просветителя чрево Твое́ пречистое вмести./ Eгoже рождеством и́дольския ле́сти свобо́ждшеся,/ Истинную навыко́хом воспевати Божию Матерь.

Катавасия: Отверзу уста моя:

Песнь 3

Ирмо́с: Утверди́, Го́споди,/ на ка́мени заповедей Твоих/ подвигшееся сердце мое,/ я́ко Един Свят еси и Господь.

Просвещение де́тели твоея́ Боже́ственных каса́яся,/ от земны́х к памяти возводит вышняго желания,/ преводя́ от тли в Жизнь неконечную.

Память твоя пребывает, святителю,/ и кротость сердца твоего в род и род,/ сей уподобля́еми, Божественныя твоея́ славы насыща́ющеся,/ достойно тя воспеваем.

Пре́йде сень закона, изнемо́гши,/ де́лом благовествования твоего,/ Христос Истина, сия́ющи, вся просвещает,/ верою память твою́, святителю, празднующия.

Богоро́дичен:

Света Божественнаго Заря́ из чрева Твоего просия́, верных благоухающа:/ Сего благовоние получи́вше,/ омраче́ния свободи́хомся Тобою, Богородице Пречистая.

Седален, глас 4.

Подо́бен: Вознесыйся:

Днесь иерарха память возсия́ нам, солнцеобразно луча́ми сияющи,/ света явление всем простирает,/ и всем велегла́сно вопие́т и глаголет:/ прииди́те, желаемых насладимся.

Сла́ва, и ны́не, Богоро́дичен:

Теплое заступление сущих в беда́х, и Помощницу нашу,/ и к Бо́гу пременение, Еюже тли изба́вихомся,/ Богородицу ве́рнии ублажаем.

Песнь 4

Ирмо́с: Услы́ша пророк пришествие Твое́, Го́споди,/ и убоя́ся,/ я́ко хощеши от Девы роди́тися/ и человеком явитися, и глаго́лаше:/ услышах слух Твой и убояхся,/ сла́ва силе Твое́й, Го́споди.

Возсия́вый свет и Просвеще́й утро,/ показа тя день, освященне отче Арсе́ние,/ учением Божества Его, вся к свету Того возводящаго./ Имже просвещаема духовная твоя чада, память твою́ празднуем.

Жити́я архиерейства твоего о́бразы, соперника не иму́ще,/ без свидетелей обличают тя:/ плотска́я бо духовным покори́в,/ отхождением своим в Небесная всели́ся,/ идеже ликовству́я, преблаженне Арсе́ние, светом Божественным просвети́ любовию поющия тя.

Чуде́с, ихже сподобился еси от Владыки твоего, преподобне, зря́ще,/ Божественная твоя чада, духовныя сладости насыщаемся,/ тя предстателя иму́ще к Нему,/ причастия Божественнаго сподоби нас улучити, молимся.

Богоро́дичен:

Чрево девственное носит,/ Еде́мская дверь отверзается,/ а́бие верных со́нмы дерза́юще входят,/ Истинную Богородицу верно восхваляют,/ Рожде́нному от Нея зову́ще:/ сла́ва силе Твое́й, Го́споди.

Песнь 5

Ирмо́с: Мир мног лю́бящим Тя, Христе,/ и нощь просвещения в пи́щи словес Твоих:/ сего ради от но́щи у́тренююще,/ просим милости от Тебе́, Человеколюбче.

Вседетельная и всемогущая мудрость, и сила Владычня,/ столпа́ истинна тя пресвященнаго сотво́рши, дом создала есть,/ Божественныя ограды Его наполня́ющ и ерети́ческая шатания прогоняющ,/ Арсе́ние преблаженне, тем тя восхваляем.

Возсия́в от Небес благолепие Вышняго,/ приме́сом святительства обло́ж тя, Небесныя трапе́зы состо́льника сотвори́,/ ны́нешняго же подателя верным показа́, священне, вопиюща:/ про́сим милости от Тебе́, Человеколюбче.

Светоли́тия Божественнаго испо́лнившися,/ пресвященная твоя глава́ сладости языка удержати не возможе́:/ аще бо и в землена́я сни́де, но духом в Небесная достиже́,/ отче Арсе́ние, мир испроси душам нашим.

Богоро́дичен:

Пра́дедняя кля́тва разреши́ся и прама́терняя болезнь исцели́ся,/ Пречистая, чрева Твоего Рождеством:/ безсеменно бо заче́нши, Слово родила́ еси./ Емуже прилежно молися спасти ны.

Песнь 6

Ирмо́с: Возопи́х всем сердцем моим/ к Щедрому Бо́гу,/ и услы́ша мя/ от а́да преисподняго,/ и возведе́/ от тли живот мой.

Божественныя славы путешествия де́лы явля́юще,/ земна́я проводят с веселием, Небесная же радуются,/ приемлюще духом пресвященнаго Арсе́ния.

Благословен плод Богоприятный,/ Божественнаго Духа де́тельми сияя, и преисподняя мрачи́т,/ в торжество иерарха собирающияся просвещает воистину:/ грядите, ве́рнии, просветимся.

Гра́днаго шествия течение провосхища́я, ведяй предстоит Арсе́ний, зовы́й:/ грядите, чада, стра́ху Господню научи́теся, я́коже рече́ Госпо́дь:/ я́ко кро́ток есмь и сми́рен сердцем, и обря́щете покой душа́м вашим.

Богоро́дичен:

Искони́ пророчествия о Тебе́ прореко́ша, ны́не же на Тебе́ испо́лнишася, Пречистая:/ ов бо Тя руно́ пронарече́, на негoже сни́де Слово Божие,/ ны́не же Ты, Дево, родила́ еси Господа.

Конда́к, глас 2:

Подо́бен: Вышних ища́:

В пи́щи слове́с твоих, Богоносе Арсе́ние,/ разумно ча́да твоя питая,/ язы́ком хваля, устна́ми же пение принося́, вещанием зовы́й:/ Христе, Ты еси Свет неизреченный.

Икос:

Сладкое твое́ вещание в послу́шество приходит,/ громо́вными о́бразы простираяся, в добропослуша́ние ну́дит,/ неизрече́нныя радости о́бщники увещава́я:/ прииди́те, чада, глаго́ля, возвеличите Господа со мною./ Eгoже сладости насыщающеся, в Небесная села водвори́мся/ и светлости сподо́бимся, вещанием зову́ще:/ Христе, Ты еси Свет неизреченный.

Песнь 7

Ирмо́с: Неизреченное чудо,/ в пещи́ Изба́вивый преподобныя о́троки из пла́мене,/ во гро́бе мертв бездыха́нен полагается/ во спасение нас поющих:/ Избавителю Боже,/ благословен еси.

Аще и земна́я превосходит, Вы́шним каса́яся,/ благодатию духовною с сими совокупля́яся,/ неизрече́нныя радости наполняет,/ сыны света сотворяет, поющия:/ благословен Бог отец наших.

Житейская унывают и Божественная красу́ются,/ Небесная торжествуют, архиерейский твой дух приемлюще,/ земна́я попра́вша и в Небесных лику́юща, с веселием поя́ху:/ отец наших Боже, благословен еси.

Де́тели Божественнаго твоего духа разширя́юще вхо́ды,/ Божественная чада твоя ведут в Живо́т./ ихже, желающе, просим: моли о нас, пресвященне Арсе́ние.

Богоро́дичен:

Дверь Тя заключе́нную нарече́ пророк, Чистая,/ юже никтоже про́йде, токмо Бог Един,/ отверзая нам паки еде́мския вхо́ды,/ верно сла́вящим Тя, Богородице.

Песнь 8

Ирмо́с: За зако́ны оте́ческия/ блаже́ннии в Вавило́не юноши предбе́дствующе,/ царю́ющаго оплева́ша повеление безу́мное,/ и, совоку́плени имже, не свари́шася огне́м,/ Держа́вствующему достойную воспева́ху песнь:/ Господа пойте дела/ и превозносите во вся веки.

Светом Божественным озаря́ема, благоуханием цвету́щи,/ священная память твоя, Арсе́ние, просвещает верныя, созывающи вопи́ти:/ Господа воспевайте дела и превозноси́те Его во веки.

Желаемых сы́тости Божественная твоя чада наполнится прося́ще,/ благоукраше́нною твое́ю памятию прохлажда́еми,/ и, веселящеся, верно поют Просла́вльшаго память твою́, иерарше, взывающе:/ Господа воспевайте дела и превозносите Его во веки.

Память твоя вечная, архиерее, кротость и смирение сердца твоего возвещающи,/ в то́же собира́еми, просвещения Божественнаго хода́тайством твоим/ надеющеся получи́ти желаемых, веселием зовуще:/ Господа пойте дела и превозносите Его во веки.

Богоро́дичен:

Неоску́дныя то́ки милосердия источающи призывающим Тя, Владычице,/ и песньми хва́лящих Тя, Чистая,/ не оста́ви молящихся Тебе́, Царствия Сына Твоего сподоби, вопиющия верою:/ Господа воспевайте дела и превозносите Его во веки.

Песнь 9

Ирмо́с: Стра́нствия Владычня/ и безсмертныя трапе́зы/ на Горнем месте, высо́кими умы́,/ ве́рнии, прииди́те, наслади́мся,/ возшедша Слова,/ от Слова научи́вшеся, Eгoже величаем.

Тече́ньми премине́ землена́я твоя жизнь,/ и Небе́снаго тя селения не оста́ви,/ ибо не потче́ся нога́ пло́ти твоея́,/ дремания дух тебе́ не одоле, храня́щу тя Бо́гу./ Темже моли за ны Господа, пресвященне отче Арсе́ние.

Небе́снии ли́цы радуются, мы же, землени́и, славословим,/ де́монская крепость исчезе́, пресвященнаго твоего духа выспрь ви́дяще водворяема в Небесная селения,/ о хва́лящих тя моли, священне Арсе́ние.

Отцу, и Сыну, и Святому Духу верою покланя́емся,/ Тричи́сленное Единство сла́вяще и с любовию воспева́юще, глаголем:/ моли́твами иерарха Твоего Арсе́ния, помилуй и сохрани вся ны.

Богоро́дичен:

Древним преступлением введе́ в па́губу пра́баба естество земно́е:/ Рождества же Твоего чревоноше́нием, Пречистая, па́ки к Бо́гу примири́хомся./ Eгoже сла́вяще, Тебе́, Дево, величаем.

Светилен.

Подо́бен: Небо звездами:

Святителю преста́вльшуся, собра́шася наро́ди погребсти́ тело его,/ Ангели же веселящеся, приима́ху душу его,/ вселя́юще во святые дворы́.

Сла́ва, и ны́не, Богоро́дичен:

Державным Твоим Покровом/ от враг наве́та рабы́ Твоя сохрани́, Чистая, вся ны невре́дны:/ Тя бо стяжа́хом Едину прибежище в ско́рбех.

На хвалитех стихиры на 4, глас 4.

Подо́бен: Я́ко до́бля:

Мимоте́к земна́я, Вышних достигл еси/ и со Ангельскими ли́ки водворя́ешися,/ Троицы проповедник яви́вся./ Ейже предстоя со дерзновением,/ за ны молися прилежно, Арсе́ние преподобне,/ сопрестольниче архиереев и похвала.

От чувственна твоего жития́ на Небеса возводи́ма,/ со святыми сияюща пресветло, Горе́ вселя́ема,/ тя земная славословят и Небесная радуются:/ с нимиже Христу предстоя,/ молися о нас, Арсе́ние,/ сопрестольниче архиереев и похвала преподобных.

Наи́тием Свята́го Духа,/ освященная твоя глава́, иерарше, чу́вственным зра́ком прозря́щи,/ язы́чными струя́ми со архиереи изво́ли сла́вити/ в Троице Едино Божество:/ Ейже предстоя, Арсе́ние, моли о нас,/ сопрестольниче архиереев и похвала.

Сла́ва, глас 6:

Превзы́де память твоя, Богоносе иерарше Арсе́ние,/ па́че чувственнаго света сияющи,/ пречу́дная бо сотворил и дивная приял еси,/ правыми пути́ шествовав, преславная наследовал еси./ В нейже ликующе, духовная чада/ в Небесная се́ла моли́твами твоими водворяются,/ и веселятся, тебе́ предстоя́ще,/ и торжествуют твое́ кра́сное успе́ние,/ тобою прося́ще получи́ти от Христа велию милость.

И ны́не, Богоро́дичен: Богородице, Ты еси лоза:

Славословие великое. И отпуст.

На литургии: блаженна от канона свята́го, песнь 3-я и 6-я. Прокимен, глас 1: Уста́ моя́ возглаго́лют премудрость, и поучение се́рдца моего ра́зум. Стих: Услы́шите сия́ вси язы́цы: Апостол ко Евреом, зачало 318. Аллилуия, глас 2: Уста́ праведнаго поуча́тся премудрости: Стих: Закон Бога его в сердце его, и не запнутся стопы́ его. Евангелие от Луки, зачало 24. Причастен: В память вечную:

НА МА́ЛОЙ ВЕЧЕ́РНИ

На Го́споди, воззва́х: стихиры, на 4, глас 7:

Явися день благоволения Божия/ и праздник веселия:/ стецемся убо, ве́рнии, на го́ру Поча́евскую/ и воспои́м всеблаженнаго И́ова,/ честну́ю память того совершающе.

Дрема́ния ве́ждома,/ ниже́ сна очи́ма твоима дал еси, преподобне,/ бо́дренными моли́твами и постническим житием Господеви угождая,/ темже радостно совершаем память твою́, всечестне.

Приидите, ве́рнии, на святую гору Поча́евскую,/ идеже угодник Божий/ подвизася в житии своем/ и от силы в силу восхожда́ше,/ и тому ны́не помо́лимся,/ да во обителех Небесных водворився,/ мо́лится ко Господу о спасении душ наших.

Не может град укрытися, верху́ горы́ стоя́,/ ты же, преподобне,/ аще и в те́мней каменней пещере/ почива́еши нетленным телом твоим,/ обаче всех призываеши на гору Поча́евскую/ светлаго ради праздника твоего,/ моля́ Христа Бога спастися душа́м нашим.

Сла́ва, и ны́не, Богоро́дичен, глас 6:

Всесвятая Богородице,/ во время живота моего не остави мене,/ человеческому предстательству не вве́ри мя,/ но Сама́ заступи и помилуй мя.

На стиховне стихиры, глас 6:

Память Твою́ днесь пра́зднующе,/ преподобне отче наш И́ове, вопие́м ти:/ со Ангелы предстоя в дерзнове́нии мно́зе,/ о всех нас, отче, моли́ся ко Владыце Христу.

Стих: Блажен муж, бояйся Господа,/ в заповедех Его восхо́щет зело.

Утро и день све́тел,/ твой праздник явися,/ просвещая на́ша сердца́,/ верою хва́лящих честныя твоя подвиги,/ отче наш Иове.

Стих: Честна пред Господем/ смерть преподобных Его.

Я́ко солнце на земли,/ обре́т всечестну́ю икону Божия Матере/ на горе́ Поча́евстей,/ всесветлая звезда тоя́ показался еси;/ темже и нас, поющих тя,/ светом Богоразумия озари́,/ моли́твами Богоро́дицы, И́ове отче наш.

Сла́ва, и ны́не, глас тойже:

Все упование мое/ на Тя возлагаю, Мати Божия,/ сохрани мя под кро́вом Твоим.

Тропа́рь, глас 4:

Многострада́льнаго пра́отца долготерпе́ние стяжав,/ Крести́телеву воздержанию уподобляяся,/ Божественныя же ревности обою́ приобщаяся,/ тех имена́ достойно прияти сподобился еси/ и истинныя веры был еси пропове́дник безбоя́знен;/ темже монахов множества ко Христу привел еси,/ и вся люди в Православии утвердил еси,/ И́ове преподобне отче наш,/ моли́ спасти́ся душа́м нашим.

Сла́ва, и ны́не: Еже от века утаенное:

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихиры на 8, глас 1:

Прииде день памяти твоея́, И́ове преславне,/ и Волынская земля радости исполня́ется,/ я́ко твоим научением во Православии утверди́вшися/ и твоими по́двиги благочестию научи́вшися,/ на твоя же молитвы упова́ющи:/ и́миже, отче преподобне, испроси ми́рови мир/ и душа́м нашим велию милость.

Во славней памяти твое́й, угодниче Христов,/ монашестии собори ликовствуют/ и о Богоугоднем житии ре́вностию распаляются,/ твоим же нетле́нным моще́м покланяющеся,/ я́ко живущему ти с нами восклицают:/ отче И́ове, милостиве и Богоуветливе,/ испроси у Господа ми́рови мир и душа́м нашим велию милость.

Кто не подивится твое́му долготерпели́вому житию́,/ отче преподобне,/ во трие́х бо обителех твоя преславная дея́ния проповедашася,/ пост же, и слезы, и бдение,/ в пещере себе заключе́ние/ и во всем себе непощаде́ние,/ но ко братии любовь ми́лующая,/ та́тем прощение/ и всем людем доброе научение.

Ины стихиры, глас 2:

Ки́ими похвальными венцы/ увязе́м преподобнаго И́ова,/ веры Православныя учителя и ратобо́рца,/ Боже́ственных Писаний глаша́тая,/ отеческих же Преданий списа́теля,/ но и тяжких служб исполнителя,/ земли копанием и древе́с сажде́нием/ себе смирявшаго и всем образ послуша́ния бывшаго;/ сего ны́не нетленною славою/ венчает Христос Бог наш,/ имеяй велию милость.

Ки́ими достойными благодареньми прославим И́ова,/ Поча́евскую похвалу и всея страны Российския украшение,/ той бо моли́твами своими Небесный свет в пещеру низведе́,/ той и по преставлении своем с Небесе является/ и молитву возносит о напа́ствуемых людех,/ тамо бо славою венчает его Христос Бог наш,/ имеяй велию милость.

Ки́ими умиле́нными слезами/ сокруши́м растле́нная сердца́ на́ша,/ зряще И́ова нетленное тело,/ еже по смерти, аки живо, сохраняется,/ но во вре́мя жития его, аки мертво, пребываше,/ посто́м и бдением изнуряемо,/ того убо подвиго́м подража́ти потщимся,/ да и нас во грядущем житии́ помилует Христос Бог наш,/ имеяй велию милость.

Сла́ва, глас 3:

Твоим словесе́м, Го́споди,/ после́довав, И́ов преподобный/ вся кра́сная мира сего во уме́ты вменил есть/ и, о ю́ности своей неради́в,/ измла́да монашескому послуша́нию вдаде́ся,/ темже де́монския ко́зни победив,/ адама́нт кре́пок православнаго благочестия явился есть,/ всю же страну сию своими по́двиги просвещает,/ того моли́твами ду́ши на́ша пощади́/ и да́руй нам по́мысл добрый/ еже прежде конца покаяния.

И ны́не, Богоро́дичен: Како не дивимся:

Вход, и чтения три преподобническая (зри страницы 791– 792).

На литии стихира храма и свята́го две, глас 8:

Приидите, вси слове́нстии собори,/ прославим общаго спасения рачи́теля/ и е́реси безбоязненнаго обличителя,/ нищих питателя и грешников кроткаго вразуми́теля,/ Павлову ревность о людех яви́вшаго/ и дерзновение велие ко Господу стяжа́вшаго,/ той бо и по преставлении своем боля́щия исцеляет/ и дерзнове́нная нашествия ва́рвар отгоня́ет,/ нас же умиле́нными по́мыслы исполняет/ и мо́лится присно о спасении душ наших.

Сла́ва, глас 2:

Днесь ликует твоя Лавра,/ преподобне отче И́ове,/ и вси людие твоя мо́щи лобызати подвизаются,/ де́мони твоея́ благодати трепещут,/ и Ангели о твое́м заступлении радуются./ Мы же непрестанно вопием:/ утверди твоими моли́твами православных веру,/ житие наше исправи/ и спасение испроси́ душа́м нашим.

И ны́не:

Все упование мое/ на Тя возлагаю, Мати Божия,/ сохрани мя под кровом Твоим.

На стиховне стихиры, глас 5:

Радуйся, священная главо́, И́ове,/ Волы́нския страны́ украшение,/ ту́ю бо зри́ши в Православней вере утверждаему,/ тебе́, я́ко живу, сущу молящуюся/ и заступления на де́моны просящую,/ ейже буди заступник необоримый/ и о всем мире моли́твенник.

Стих: Честна пред Господем/ смерть преподобных Его.

Радуйся, священная главо́,/ преподобне Иове,/ звездо от Га́лицкия земли́ к востоку пришедшая/ и немощны́х ду́ши обо́дрившая,/ во смирении своем дерзновению проти́ву ереси люди российския наставившая/ и к Небесному Царствию приведшая,/ егoже и нас сподоби предста́тельством твоим/ и о всем мире буди молитвенник.

Стих: Блажен муж, бояйся Господа,/ в за́поведех Его восхо́щет зело.

Радуйся, священная главо́,/ над Волынскою страною Господем вознесе́нная,/ ейже повину́шася князи и лю́дие,/ мы же, духовная твоя чада,/ се́рдцем сокруше́нным к тебе́ припа́дающе,/ просим ко одолению страсте́й твоея́ по́мощи,/ в ско́рбех благодушия,/ и о сме́ртном часе́ памяти непрестанныя,/ и о всем мире молитв твоих,/ И́ове преподобне.

Сла́ва, глас 8:

Монахов множества наставника тя почитаем, отче наш И́ове,/ твое́ю бо стезе́ю воистинну право ходити позна́хом./ Блажен еси, Христу работав,/ и вражию обличил еси силу,/ Ангелов собесе́дниче,/ и преподобных соприча́стниче, и праведных,/ с ни́миже моли́ся Господеви/ помиловатися душа́м нашим.

И ны́не, Богоро́дичен: Безневестная Дево:

Тропа́рь, глас 4: Многострадальнаго праотца долготерпение стяжав: два́жды (писан на малой вечерни) и Богородице Дево: единожды.

НА У́ТРЕНИ

На Бог Господь: тропа́рь преподобному, два́жды. Сла́ва, и ны́не, Богоро́дичен:

По 1-й кафизме седален, глас 4:

Званию Господню после́довав, родительский дом оставил еси/ и от теснаго жития́ на тесне́йшее преходил еси,/ но сердце твое́ вся, притекающия к тебе́, не тесно вмеща́ше,/ темже духовная чада твоя умно́жишася и о Господе возвеселишася,/ Eгoже моли, отче наш Иове, спастися верою чтущим святую память твою́.

Сла́ва, и ны́не, Богоро́дичен:

Обновила еси, Чистая, Божественным Рождеством твоим/ истлевшее страстьми́ земноро́дных мертвенное существо́/ и воздвигла еси вся от смерти к жизни нетления./ Темже Тя по долгу блажим вси, Дево Препрославленная, я́коже прорекла еси.

По 2-й кафизме седален, глас 5:

Пеще́рнаго затворника и бденнаго молитвенника почти́м, преподобнаго И́ова,/ от младенства до старости себе смирявшаго и Святую Церковь прославльшаго,/ та́ти и злоде́и к покаянию приведшаго и те́пле моля́щася о душа́х на́ших.

Сла́ва, и ны́не, Богоро́дичен:

Ужасно чудо зача́тия и несказа́нен образ рождества/ в Тебе́ познася, Приснодево Чистая,/ ужасает мой ум и удивляет помышление:/ сла́ва Твоя, Владычице, всем простреся во спасение душ наших.

Псалом избранный преподобному.

По полиелеи седален, глас 8:

Па́стырскую мудрость смиренномудрием стяжав, многим был еси учитель:/ мона́хом отец, и скорбящим уте́шитель, и молитвы Иису́совы неумолка́яй орга́н./ Темже мощей нетлением прослави тя Мздовоздая́тель Господь,/ Eгoже непрестанно моли прегрешений оставление даровати/ чтущим любовию святую память твою́.

Сла́ва, и ны́не, Богоро́дичен:

Небесную дверь и кивот, всесвятую гору, светлый о́блак воспои́м,/ неопали́мую купину́, словесный рай, Евы воззвание, вселенныя всея великое Сокровище,/ я́ко спасение в Ней соделася миру и оставление древних согрешений./ Сего ради вопием Ей:/ молися Сыну Твое́му прегрешений оставление даровати/ благочестно покланяющимся всесвятому Рождеству Твое́му.

Степенна, 1-й антифон 4-го гласа. Прокимен, глас 4: Честна пред Господем/ смерть преподобных Его. Стих: Что воздам Господеви о всех, яже воздаде ми. Евангелие от Матфея, зачало 43

По 50-м псалме стихира, глас 6:

Преподобне отче,/ во всю землю изыде вещание исправлений твоих,/ тем на Небесех обрел еси мзду трудов твоих,/ демонския погубил еси полки/ и Ангельския достигл еси чи́ны,/ ихже житию без порока поревновал еси,/ дерзновение имея ко Христу Бо́гу,/ мир испроси душам нашим.

Канон Богородице на 6 и преподобному на 8, по азбуце.

Канон преподобному и Богоносному Иову, Поча́евскому чудотворцу, глас 8.

Песнь 1

Ирмо́с: Посеченный несеко́маго пресече,/ и виде солнце землю, ю́же не виде;/ лютаго врага вода потопи́,/ и непроходи́мое про́йде Изра́иль;/ песнь же воспевашеся:/ Го́сподеви пои́м, славно бо просла́вися.

Ангела земнаго и Небе́снаго человека, И́ова преподобнаго, Волы́нскую похвалу,/ достойно воспети помози́ ми, Слове Божий,/ презира́я моя прегрешения и подава́я слово усто́м моим.

Был еси, преподобне, вои́стинну миру свети́льник пресветел, всем путь спасения показу́яй;/ темже и мне буди помощник,/ во еже прославити житие твое́ и умиле́ние стяжа́ти.

В дому́ роди́телей твоих пе́рвее познал еси Господа, Ио́ве славне,/ и, о́трок сый, разум соверше́н показал еси, егда монашеское житие изво́лил еси,/ вся же житейская прови́дев, Единаго Бога возлюбил еси.

Горе́ очи твои и душу вознося́, во обители Уго́рництей братию в Богоуго́днем житии́ скоро превозше́л еси,/ ху́ждша всех себе́ помышля́я и тем лучший Иису́су явля́яся,/ ста́рцем же и ю́ным образ быв прелюбе́знейший.

Добре тя на диа́волы во́инствовавша помышля́я, преподобне,/ своея́ стыжду́ся лености и множества грехов моих ужаса́юся:/ но твоими, святе, моли́твами да́руй ми жела́ние благо́е,/ во еже прочее время жития моего в покаянии сконча́ти.

Богоро́дичен:

Я́ко Божия Мати дерзнове́ние иму́щи к ро́ждшемуся из Тебе́/ Единоро́дному Слову, и Отцу Собезнача́льному, и Соесте́ственному Духу моля́щи не преста́й от бед спасти́, Всенепорочная,/ Тя, Богородицу, славящия.

Катавасия по уставу.

Песнь 3

Ирмо́с: Утверди́ся сердце мое во Господе,/ вознесе́ся рог мой в Бозе моем,/ разшири́шася на враги моя уста моя,/ возвесели́хся о спасении Твое́м.

Есть во мне, отче преподобне, добраго исправле́ния жела́ние,/ но искуше́ния лености побежда́ти не навыко́х, увы мне./ Обаче на помощь твою́ надеяся, уныния помыслы отгоня́ю,/ на твоя же взираю славныя подвиги.

Желе́зо наречеся род твой, И́ове преподобне, крепость души́ твоея́ предуказу́я;/ в пещере же ка́менне заключи́вся, я́ко зла́то сокрове́но, освятил еси место по́двиг твоих/ и го́ру Поча́евскую, я́ко стену ме́дяну, проти́ву врагов Православия явил еси.

Зело углуби́шася помышле́ния твоя яже о Небеснем Царствии,/ егда, еще отрок сый, Ангельский образ восприял еси;/ темже и священник быв Бо́гу ве́рен,/ даже ны́не моле́ния о людех возно́сиши, Иове преподобне.

Земля Га́лицкая ю́ностию твое́ю славится, и Ду́бенская обитель му́жеския подвиги твоя благовеству́ет,/ обитель же Поча́евская старостию твое́ю хва́лится и блаженною кончи́ною веселится,/ вся же вселенная о чудесе́х твоих радуется и ликовствует.

Иже подаеши блага́я всем, моля́щимся тебе́, и мене́ припа́дающа не отри́ни, святче,/ но, покая́ние мое зря, даждь ми жития́ исправле́ние, ревность же вдохни́,/ еже подражати твоим Боголюбивым дея́нием.

Богоро́дичен:

Умерщвленный мой ум Животным действом из Тебе́, Явльшимся миру, воздвигни, Чистая,/ и к жизни настави,/ Яже смерти двери разоршая Едина Рождеством Твоим.

Седален, глас 8:

Днесь исполня́ется радости обитель Поча́евская, твое́ Боголюби́вое житие́ прославля́ющи;/ днесь христоимени́тии лю́дие ревностию спасения просвещаются, зряще нетлением прославленныя мощи твоя, преподобне;/ днесь греховныя отгоня́ются страсти, и по́мыслы покая́ния ду́ши на́ша объемлют,/ в нихже утверди всех, преславне, верно почитающих память твою́.

Сла́ва, и ны́не. Богоро́дичен:

Я́ко Всенепорочная Невеста Творца́, я́ко Неискусомужная Мати Изба́вителя,/ приятелище я́ко сущи Уте́шителя, Всепетая,/ беззакония мя суща скверное оби́телище и де́монов игра́лище в разуме бывша,/ потщися от тех злодейства мя избавити и светлое жилище доброде́телей соверши, Светоносная Нетленная,/ отжени облак страсте́й, и Вышняго причастия сподоби, и Света невечерняго моли́твами Твоими.

Песнь 4

Ирмо́с: Пророк Авваку́м у́мныма очи́ма/ провиде, Го́споди, прише́ствие Твое́,/ тем и вопияше:/ от ю́га приидет Бог./ Сла́ва силе Твое́й, сла́ва снизхожде́нию Твое́му.

И́ове преподобне, о всех моли́твенник буди теплый, твое́му заступлению верующих,/ свое же окаява́ющих житие́ и на Божие милосердие упова́ющих,/ аще и прельще́ньми жития́ сего вда́ющихся.

Кто от человек не подиви́тся долготерпеливому житию́ твое́му, отче,/ кто ли не прославит твоея́ о Православии ревности,/ ты бо, я́ко адама́нт крепок, еретико́м противостал еси,/ и истинныя веры пропове́дание словесы́ же и писа́ньми всем препо́дал еси.

Льва рыка́юща и и́щуща поглотити ду́ши спасаемых молитвою твое́ю победил еси, отче,/ но и тому служащия люди в покая́ние приводил еси,/ та́ти милосе́рдием твоим постыжда́я и вразумляя, грабители же обличе́ньми устраша́я/ и вся науча́я спаси́тельному покая́нию.

Мрак души́ моея, отче, предста́тельством твоим разсей/ и светом заповедей Господних просвети́ мое окая́нное сердце,/ да и аз, твоим учеником последуя, тех части лише́н не пребуду,/ Твою́ восхваляя святую память.

Богоро́дичен:

Бога, из тебе́ воплоще́ннаго, моли́, непреложно,/ Еже бе пребывша и естественно Равна Отцу, и Духу Сопрестольна,/ прощение прегрешений и душ спасение поющим Тя верою дарова́ти.

Песнь 5

Ирмо́с: Мрак души́ моея разжени́, Светода́вче Христе́ Боже,/ началоро́дную тьму изгна́в бе́здны,/ и даруй ми свет повеле́ний Твоих, Слове,/ да, у́тренюя, сла́влю Тя.

Наш еси вои́стинну предстатель и чудотворец пресветлый,/ взываше Диони́сий, обретый мо́щи твоя, тлению непричастны./ Мы же, сия лобыза́юще, вопием:/ наших скверн не возгнуша́йся, угодниче Божий, но твоими моли́твами сия очи́сти.

Оправда́нием Божиим от юности, отче, научаемь,/ суеты́ житейския уклони́тися крепко возжелал еси, безмолвие же возлюбил еси:/ обаче велению Христову не противля́яся, притекающия к тебе́ Пра́вому испове́данию и Ева́нгельскому житию́ научал еси.

Предстатель явился еси и по преставлении твое́м стра́ждущим и скорбящим челове́ком:/ тако бо тя видеша людие, из гроба твоего исходя́ща и со Ангелы посреде церкве моля́щася./ О, чудо преславное воистинну! О, радость верным и утверждение!

Рачитель быв Небе́снаго Царствия, о своем тамо вхожде́нии известву́ешися/ и кроме́ боле́зни и страха пресельник являешися лучшия жизни,/ братии же твоея́ учитель и упова́ние.

Сопутник житию́ моему буди, отче Иове,/ молитвою твое́ю огражда́й многомяте́жную мою душу/ и введи ю в Небесное Царство, твоими умиленную подвиги,/ Христу же покаянныя принося́щую слезы.

Богоро́дичен:

Тя стену иму́ще и предста́тельством Твоим соблюда́еми,/ Твое́ю Божественною славою хва́лящеся, Тя блажим:/ Ты бо, Всечистая, душа́м нашим источа́еши веселие и радование.

Песнь 6

Ирмо́с: Ио́ну в ки́те, Го́споди,/ единаго всели́л еси,/ мене же свя́зана мре́жами вра́жиими,/ я́ко от тли о́наго, спаси́.

Твердое упова́ние на предста́тельство твое́ возлагаю, преподобне, и верою молю́ся:/ даждь ми страсте́й лю́тых одоле́ние, смерти же непреста́нную память/ и блаженства желание грядущаго ве́ка.

Утвержда́ется тобою, преподобне, Святая Церковь,/ ересь же вся́кая посрамляется, обличе́ние иму́щи твоя многоцеле́бныя мо́щи,/ и жития́ твоего столе́тняго труды́, и болезни, и сле́зы, и пост, и плоти от косте́й отпаде́ние.

Фарао́на мысленнаго побеждаше И́ов преподобный,/ послуша́нию всегда прилежа и обурева́емым на помощь приходи́ти не отрица́яся:/ и тако три обители учением своим просветив и по́двиги многими прославив,/ веселя́ше Спаса всех, Человеколю́бца.

Христову смире́нию подражаше И́ов,/ егда нача́льство я́ко служе́ние всем прият и, игу́мен сый, в тяжких слу́жбах подвиза́шеся,/ бра́тии же бя́ше образ кротости, и трудолю́бия правило, и о молитве при́сное напомина́ние.

От скве́рных изба́ви мя страсте́й твоими моли́твами,/ тех одоле́ние мне подавая Божественныя помощи при́сным призыва́нием,/ и на себе́ ненаде́янием, и брата моего неосужде́нием.

Богоро́дичен:

Вознесла́ еси всеистинно падшее челове́ческое существо́ во зра́це Божественнем,/ и Отца в равенстве видимаго Сына Неизменнаго, Богомати, без семене во чреве поноси́вши.

Конда́к, глас 4:

Подо́бен: Явился еси днесь вселенней:

Явился еси Истинныя веры столп,/ Евангельских же заповедей ревни́тель,/ гордыни обличе́ние, смиренным же предста́тель и науче́ние:/ темже и ублажа́ющим тя грехов отпущение испроси́/ и обитель твою́ невредиму сохрани,/ Иове отче наш,/ Многострада́льному подобный.

Икос:

Отверзи уста твоя, пеще́ро каменная, и рцы нам, колькра́ты токи слез И́овлих омочи́лася еси,/ ка́ко того воздыхания твоих стен не расторго́ша,/ ка́ко Свет Боже́ственный тебе́ не сожже́,/ ка́ко Ангели бде́нным подвиго́м И́овлим диви́шася, теми бо освяти́ся земля Га́лицкая и Волы́нская;/ мы же, сия вся помышляюще, слеза́ми умиления очи наши исполняем:/ есть бо преподобный Иов угодник дивный, Многострадальному подобный.

Песнь 7

Ирмо́с: На по́ли Деире/ иногда́ мучитель пещь поста́ви на мучение Богоно́сных,/ в нейже трие́ о́троцы песносло́вяху Единаго Бога,/ тро́ично воспева́ху, глаго́люще:/ отцев Боже, благословен еси.

Люди православныя, тя блажащия, преподобне И́ове,/ укрепи на враги и о Церкви мирная глаголи в сердце их,/ всем единомыслие испроси у Бога, и друг ко другу любовь, и о Православии ревность.

Чашу жития́ Твоего пити, Го́споди, не могу аз, окая́нный,/ боя́знию скорбе́й обуреваемь и страстей сплетаемь тернием, обаче молюся:/ И́ова, Твоего угодника, моли́твами помилуй мя/ и помози́ ми греховную отрясти ле́ность.

Широкий путь, поги́бель души преднося́щий, возненави́дев, И́ове преподобне,/ в тесней пещере заключился еси и те́снаго пути жизни в начальстве твое́м не уклони́лся еси,/ день и нощь в молитве и трудех пребывая и научение здравое всем приходя́щим к тебе́ подавая.

Щедр был еси нищим, ка́ющимся же милостив и науче́ния требующим учитель кро́ток,/ Божественныя же мудрости любитель и Ева́нгельских за́поведей пропове́дник,/ книг же Боже́ственных изда́тель и е́реси безбоязненный обличитель.

Богоро́дичен:

Марию Пречистую и Всесвятую восхвалим:/ То́ю бо благодать нам источа́ется па́че ума даро́в, я́ко от потока Божественныя благости,/ Юже благочести́вым по́мыслом ны́не ублажаем.

Песнь 8

Ирмо́с: Покрыва́яй вода́ми превыспренная своя,/ полага́яй морю преде́л песо́к/ и содержа́й вся,/ Тя пое́т со́лнце, Тя сла́вит луна́,/ Тебе́ прино́сит песнь тварь/ я́ко Соде́телю всех во веки.

Е́дущим и иду́щим во обитель твою́ безчисленным людем, ко твоим же моще́м припа́дающим,/ буди дарова́ний духовных пода́тель, телесных же боле́зней целитель/ и пред Спасом теплый о всех предста́тель,/ И́ове, земли Волы́нския славо и украше́ние.

Юноша те́лом, но старец умо́м в начале мона́шескаго жития твоего был еси, отче:/ состаре́вся же плотию, ю́ношескую бодрость в трудех явля́л еси,/ земли копа́нием и древес насажде́нием образ всем смиренному́дрия подава́я.

Явле́ние твое́ со Ангелы вкупе смиренную деву ужасаше,/ здравие же ученику твое́му подава́ше и вся люди на славосло́вие Богови воздвиза́ше,/ Истинную же утверждаше в них веру и ерети́ческая отрева́ше нападе́ния.

Фимиа́мом молитв твоих и мене облагоуха́й, Иове преславне,/ моих грехов злосмра́дие тем отгоняя и упование на Господа вселяя в мою смра́дную душу,/ да благодатию Божиею очища́емь, воспою твое́, преблаженне, крепкое заступле́ние.

Богоро́дичен:

Богороди́тельнице Всечи́стая, души моея язвы и греховныя стру́пы очи́сти,/ исто́чником омыва́ющи сущим из ребр Сына Твоего, и поте́кшими из тех, очища́ющи, струя́ми:/ к Тебе́ прибегаю и Тя призываю, Богоблагодатную.

Песнь 9

Ирмо́с: Благослове́н Господь Бог Изра́илев,/ воздви́гнувый рог спасения нам/ в дому́ Дави́дове, Отрока Своего,/ в нихже посети́ нас Восто́к с высоты/ и напра́вил ны есть на путь мира.

Иссо́пом благодати Божия окропи́ сердца́ на́ша, И́ове преподобне,/ твоим святым моще́м покланяющихся, да твоея́ ре́вности о вере причасти́вшеся,/ ко исполнению заповедей Христовых добре потщи́мся.

Псаломски взывати к Бо́гу на земли не преставал еси, и девства твоего сосу́д соблюл еси:/ темже на Небеси райския воспеваеши ны́не песни со Ангелы и всеми святыми,/ люди же, на земли трудящияся, от Вышних назира́еши.

О, коли́ка жития́ твоего нетленная красота, о, ко́лика по смерти твое́й чудеса и исцеления!/ Се бо земная оставив, воистинну стори́цею Небесная блага еще в житии́,/ па́че же во грядущем, по глаголу Христову стяжал еси.

О, ко́лико грехов наших мно́жество!/ Но сия превосхо́дит твоих молитв кре́пость, ихже не лиши нас, отче преподобне И́ове,/ дру́же Христов и святых всех соприча́стниче,/ церковный столпе и о душа́х человеческих предста́телю тепле́йший.

Богоро́дичен:

Зачала еси, Дево, без семене, вся́ческая созда́вшаго Сло́во Бо́жие, кроме́ хотений плотски́х,/ и без истления родила́ еси, без боле́зней ма́терних./ Тем Тя, Богородицу, и язы́ком, и се́рдцем испове́дающе, велича́ем.

Светилен.

Подо́бен: Свете неизменный:

И́ов преподобный днесь да восхва́лится/ я́ко Христо́в во́ин и о людех моли́твенник,/ веры проповедник, е́реси обличи́тель и Це́ркве украше́ние.

Сла́ва и ны́не:

Тя песньми немо́лчными ублажа́ем, Дево,/ я́ко от Тро́ицы Единаго родила́ еси, Богоро́дице,/ и носи́ла еси на Боже́ственных объя́тиих Пресу́щественное Слово, невра́щно и неизме́нно.

На хвалитех стихиры на 4, глас 4:

Просия́ша подвизи твои/ во стране Га́лицтей, отче И́ове,/ темже Православия ревни́тели/ в зе́млю Волы́нскую тебе́ глаша́ют,/ и обитель Ду́бенская/ твоим преподобным житием украшается,/ но того совершение/ Поча́евская Ла́вра приемлет,/ вся же страна сия уче́ньми твоими просвещается.

Братолюби́вое твое́ се́рдце, преподобне,/ мона́хов мно́жества на го́ру Поча́евскую привлече́,/ ихже спасения был еси ревни́тель;/ темже и мы апостольский глагол ве́дуще,/ я́ко никогда́же престае́т духо́вная любы́,/ твое́му чудесному попече́нию ду́ши на́ши вверя́ем,/ яже приведи́ ко Иису́су Человеколю́бцу.

Не сме́яше тле́ние косну́тися/ ме́ртваго телесе́ твоего, преподобне,/ еже чрез все житие́ умерщвлял еси,/ душа же твоя, живущи со Ангелы,/ вся притека́ющия к тебе́ в свою любовь прие́млет./ Темже и на́ша ду́ши приведи ко Иису́су Человеколю́бцу.

Сла́ва, глас 8:

Не довле́ют словеса́ на́ша к восхвале́нию подвиг твоих,/ преподобне И́ове:/ кто бо изочте́т твоих добродетелей полноту́,/ кто уразумеет безмо́лвное твое́ к Бо́гу собеседование,/ но не отри́ни твоя певцы и духовныя ча́да,/ твоего заступления просящия,/ и о твое́м святем житии умиляющияся,/ и во твое́й памяти веселящияся.

И ны́не: Владычице, приими:

Славословие великое. Ектении и отпуст.

На Литургии: служба вся преподобническая.

ЗРИ: Ведомо буди, я́ко память преподобнаго И́ова соверша́ется в день блаженныя кончины его, октября в 28 день, и в день обретения святых мощей его, августа в 28 день, егда во святей Поча́евской Лавре святыя мощи его изно́сятся в великую церковь. Аще убо память преподобнаго случится в неделю, соверша́ем всю службу его по 3-й главе Типикона; аще же в субботу, по 15-й от зри неизме́нно. Трети́цею же творим память преподобнаго И́ова мая в 6-й день. В сей день на повече́рии поем службу свята́го И́ова Многострада́льнаго, про́чее же совокупля́ем службу преподобнаго с Триодию, я́коже во главе Иоа́нна Богосло́ва указа́ся, еже зри месяца того́жде во 8-й день.