30-й день

Свята́го священномученика Зино́вия, епископа Еге́йскаго, и святыя мученицы Зинови́и, сестры его

Празднование Пресвято́й Богоро́дице иконы ради Ея Озеря́нския

Свята́го праведнаго Стефа́на Милу́тина, короля Ба́ньскаго, Се́рбскаго

На Го́споди, воззвах: стихи́ры, глас 4

Подо́бен: Я́ко добля:

Мучения кровию одежду твою́́, Зино́вие, обагри́в, славне,/ совершил еси́ священнейшу благода́тию,/ с неюже вшел еси́, я́ко мудр архиерей, во свята́я святых;/ жертва непорочна, тебе́ ради пожершемуся,/ и совершенное приношение пречисто принеслся еси́, священнейше.

Стру́жему телеси,/ души́ светлейшая добро́та, показовашеся красне́йши,/ священномучениче Зино́вие, Богому́дре пребогате,/ иерархов добро́та, страдальцев хвала,/ чудес же присный источник,/ духо́в нечистых прогони́тель,/ Христов Боже́ственный поборник.

Спострада́ти тебе́ произволи сестра/ единомудренная тебе́, Зинови́я, премудре,/ яже единокровная твоя́,/ ко́нобов бо вре́ния му́жески претерпеваше,/ огня́ преще́ние и ну́ждную смерть./ Темже улучи́ с тобо́ю венцы победы и Вышнее Царство,/ священнотаинниче Зино́вие.

Сла́ва, глас 6. Иоа́нна мона́ха:

Песненный лик воспле́щим днесь,/ о мучениколюбцы,/ в памяти всеблагочести́вых страдалец Зино́вия и Зинови́и,/ си́и бо Троицы быша поборницы/ и на три́знищи мужески невидимаго врага/ честно́ю своею кровию удавиша,/ и победы венец славно прияша./ Темже к ним возопии́м:/ сопру́же святый,/ Господу благословенная двоице и просвещенная,/ Спаса моли́ о душах на́ших.

И ны́не, Богоро́дичен или́ Крестобогоро́дичен.

Подо́бен: Тридневен:

На Древе Жизнь нашу зря́щи, Всенепоро́чная Богородица, ви́сящу,/ матерски рыдающи, вопияше:/ Сы́не Мой и Боже Мой,/ спаси́ любо́вию пою́щия Тя.

Тропа́рь, глас 4:

Мученицы Твои, Го́споди,/ во страданиих своих венцы прияша нетленныя от Тебе́, Бо́га нашего,/ имуще бо кре́пость Твою́,/ мучителей низложиша,/ сокрушиша и демонов немощныя дерзости,/ тех моли́твами/ спаси́ души на́ша.

Сла́ва, и ны́не, Богоро́дичен или́ Крестобогоро́дичен.

НА У́ТРЕНИ

Оба кано́на Окто́иха и святы́х на 4.

Иосиф. Глас 8.

Песнь 1

Ирмо́с: Песнь возсле́м, лю́дие,/ чу́дному Бо́гу нашему,/ свободившему Израиля от работы,/ песнь победную поюще и вопиюще:/ поим Тебе́, Единому Влады́це.

Престо́лу предстоя Христову я́ко иерей благоприятен и мученик изряднейший,/ Зино́вие треблаженне,/ яже любо́вию честву́ющия твою́́ па́мять светоносную,/ житейских избави соблазнов.

Зарею просвещаемь, мудре, Трисолнечнаго Сияния,/ мглу разорил еси́ е́ллинскаго злословия и, светом твои́х словес вся просветив,/ ны́не прешел еси́ к незаходимому сиянию.

Угль явле́н мысленный,/ огне́м вжигаемь Божественнаго Духа, всех сердца вжегл еси́ к желанию Боже́ственному, священнотаинниче,/ и прелесть попали́л еси́ вся́ку.

Богоро́дичен: Ра́дуйся, пресвятый храме, руно Богоросное,/ запечатанный источниче, безсмертия струя./ Паству Твою́, Влады́чице, сохрани от всех сопротивных невоева́ну.

Песнь 3

Ирмо́с: Страх Твой, Го́споди,/ всади в сердца раб Твоих/ и бу́ди нам утверждение,/ Тя во истине призывающих.

Миром пома́зания духовнаго пома́зан, Зиновие,/ священствовал еси́, я́ко А́нгел,/ мученическими при кончине украси́вся венцы.

Душ прирадение прием,/ возде́ланием Божественным, преподо́бне, плодоносны сия́ показа́л еси́,/ те́мже Госпо́дни радости сподо́бился еси́.

Сестра единокровная твоя́ тебе́ единомудренна показася,/ Зинови́я священнейшая,/ спострада́ти бо тебе́ произво́ли и с тобо́ю насладитися славы вечныя.

Богоро́дичен: Троицы Единаго родила́ еси́, в человечество облекшася,/ Пресвята́я Ма́ти Де́во:/ Eгoже моли́ спасти́ Тя воспева́ющия.

Седа́лен, глас 1.

Подо́бен: Гроб Твой:

Миром честны́м пома́зан, явился еси́, преблаже́нне, иерей Бо́га Вы́шняго,/ Имже укрепляемь, иерарше Зино́вие,/ мученик был еси́ и сограждани́н А́нгелов./ Темже днесь, всесвяту́ю па́мять творяще, пое́м тя.

Сла́ва, и ны́не, Богоро́дичен:

Безневестная Чи́стая Богоро́дице Де́во,/ едина верных Предстательнице и покрове,/ бед и скорбе́й, и лю́тых обстоя́ний всех изба́ви,/ на Тя упование, Отроковице, имущих,/ и ду́ши на́ша спаси́ Божественными моли́твами Твоими.

Крестобогоро́дичен:

Зрящи Тя, Христе́, Всенепоро́чная Мати,/ мертва на Кресте простерта, вопияше:/ Сы́не Мой, Собезначальне Отцу́ и Духу,/ что неизреченное Твое́ сие́ строение,/ имже спасл еси́ пречистых рук Твоих, Щедре, создание.

Песнь 4

Ирмо́с: Всел еси́ на ко́ни, апостолы Твоя́, Го́споди,/ и приял еси́ рукама Твоима узды́ их,/ и спасе́ние бысть ежде́ние Твое́/ верно поющим:/ сла́ва си́ле Твое́й, Го́споди.

Возвы́шен явился еси́ страдании честны́ми, священнейше,/ и приял еси́ венцы победы, мудре, и вечное получил еси́ радование,/ тем тя почитаем, о́тче иерарше Зино́вие.

На Древе Простершемуся волею подобяся, воздвигся,/ не ужаслся еси́, Зиновие, и тления, славне, и умерщвления дебельства́ совлеклся еси́, отче,/ священников похвало.

Душа твоя́ крепкая де́монская утверждения низложи́,/ ка́пища же разседо́шася, тверде́йшею верою твое́ю потребляеми,/ Зиновие славне, священномучеников похвало.

Богоро́дичен: Странным Твоим Рождеством от Бо́га устранившияся к Нему́ присвоила еси́, Всепетая./ Темже велегласно Тя вси сла́вим и вопие́м Ти верою:/ радуйся, земнородных воззвание.

Песнь 5

Ирмо́с: Вску́ю мя отринул еси́/ от лица Твоего́, Свете незаходимый,/ и покрыла мя есть чужда́я тьма, окаяннаго,/ но обрати мя и к свету заповедей Твоих/ пути моя направи, молюся.

Женское естество Духом укрепи́ся и попра́, и́же в раи́ праматерь древле запе́ншаго,/ и Божественныя славы на Небесех сподо́бися,/ девством и страданьми сияющи.

Тучеро́ден облак быст язык твой,/ я́ко одождя́ющь благоче́стия дождь,/ и верных сердца́ напаяющь/ и к благоплодию священнодейственне путеводя́щь добродетельных, Зино́вие, деяний.

Девства зарями сластолюбия тьму отгна́ла еси́/ и светом страданий безбожия нощь потребила еси́,/ Зинови́е мученице, Иисусова красная невесто, жилище Божественнаго Духа.

Богоро́дичен: Греха тяжким всегда обложе́н есмь бре́менем, Пречистая,/ и вопию Ти: сие́ ходатайством Твоим Боже́ственным облегчи́,/ Ты бо еси́ Предстательница грешников препрославленная,/ Избавителя и Спаса рождши.

Песнь 6

Ирмо́с: Молитву пролию́ ко Господу/ и Тому возвещу печали моя,/ я́ко зол душа моя исполнися/ и живот мой аду приближися,/ и молюся, я́ко Иона:/ от тли, Боже, возведи мя.

Молитва Божественныя души́ твоея́ прията бысть, я́ко кадило, отче:/ в воню бо благовония, преблаже́нне, страданий, Зино́вие, потекл еси́,/ Возсия́вшаго от Жены и всю тварь Просвещшаго.

Кровию страдания, блаже́нне, освятил еси́ зе́млю,/ дух же на Небеса возшед, первородных Церковь Божественне уясни́, Зино́вие,/ иерархов и мучеников светлая похвало.

Утесни́л еси́ нечестие, блаже́нне, пространством истиннаго благоче́стия/ и пути́, в сие́ ведущия, заблуждшим людем показа́л еси́,/ и спасл еси́ люте потопляемыя прелести вода́ми.

Богоро́дичен: Украси́ ду́шу мою, Де́во,/ безобразием страсте́й одержимую,/ и помышленьми истиннаго покаяния окаянное се́рдце мое утверди,/ и спаси́ мя, на Тя несомненно, Де́во, надеющагося.

Конда́к, глас 8.

Подо́бен: Яко начатки:

Истины свидетели и благоче́стия проповедники,/ двоицу досто́йно почтим в Богодухновенных песнех,/ Зино́вия вку́пе с мудрою Зинови́ею,/ купно жившия и отшедшия/ и мучением приимшия венец нетленный.

И́кос:

До́бляго и великаго Зино́вия песньми и пении восхва́лим/ с доброю девою и нескверною Зинови́ею,/ сущею сострадалицею,/ я́ко низложи́ша вражия свере́пства/ и и́дольское безбожие обличиша,/ веру же Христову уясниша./ Темже радостно прияша ны́не венец нетленный.

Песнь 7

Ирмо́с: Отроцы еврейстии в пещи/ попраша пламень дерзновенно/ и на ро́су огнь преложиша, вопиюще:/ благословен еси́, Го́споди Боже, во веки.

Течении кровными погаси́в, всеприснопамятне, огнь безбожия,/ чудесы нас всегда орошаеши дожде́м, Зино́вие,/ Владыку благословящия:/ благословен еси́, Го́споди Боже, во веки.

В Боже́ственный мрак вшед, Невидимаго, я́ко мощно, видел еси́,/ ду́шу и ум просвещающа твою́́, мучениче,/ благочестивомудренно поющаго:/ благословен еси́, Го́споди Боже, во веки.

Дает тебе́ честь Владыка, пострадавшу твердо/ и низложившу козни вражия, и поющу велегласно:/ благословен еси́, Го́споди Боже, во веки.

Богоро́дичен: Место, Де́во, яви́лася еси́ священия,/ из негoже Бог явися, освящая ны верою, песнопою́щия:/ благословен, Пречистая, Плод Твоего́́ чрева.

Песнь 8

Ирмо́с: Богоглаголивии отроцы в пещи́,/ со огне́м пламень попирающе, пояху:/ благословите дела Господня Го́спода.

Не убоялся еси́ меча, иерарше,/ не устрашился еси́ бед, не ужаслся еси́ смерти,/ безсмертныя тя славы показующия причастника.

Священнодейственник таин показался еси́/ и, себе освятив, жертва благовонна был еси́,/ и Вышния трапезы, Зино́вие, достоин.

Чудодействы сияя, иерарше,/ мученическими лучами светло облистал еси́/ и мрак прелести до конца отгнал еси́.

Богоро́дичен: Не земледеланный Грозд заченши,/ источающь вино, Де́во Мати,/ оставления страсте́й мя пиянства измени, молюся.

Песнь 9

Ирмо́с: Устрашися всяк слух/ неизреченна Бо́жия снизхождения,/ я́ко Вышний волею сни́де даже и до плоти,/ от Девическаго чрева быв Человек./ Темже Пречи́стую Богоро́дицу, ве́рнии, величаем.

Стоял еси́ пред суди́лищи, пресла́вне, мучителей,/ воплощение светлым гласом проповедуя Вседержителя/ и страдания Его́, Крест, и смерть, и Воскресение,/ имже спасе ны я́ко Человеколюбец.

О чудесе! како с плотию безплотныя враги́ победи́;/ како низложи́ немощию многокозненнаго;/ како с Небе́сными служители совокупитися земны́й подвигся;/ егóже чтуще, благоче́стно величаем.

Телеса, мученицы честни́и, ранам различным различне предасте,/ взирающе к вечному блаженству,/ братскою бо любо́вию друг другу свя́зани, мученическими добро́тами просветистеся,/ те́мже ублажаетеся.

Память днесь ваша, светозаре́нием сияющи Духа, всем просия́,/ чудес благода́ть облистающи и врачеваний ре́ки обильно точа́щи,/ юже пра́зднующе, блажи́м вы, Христовы мученицы.

Богоро́дичен: Просвети, Двере светла, се́рдца моего очи, молюся,/ далече отгоня́ющи греха́ тьму тяжчайшую от окаянныя моей души́,/ да величаю Тя, да сла́влю Тя, да любо́вию Тя пою, Всепетую.

Свети́лен.

Подо́бен: Жены́ услышите:

О чудесе! како пе́рстнии, зла́ти естеством, явишася,/ ибо ни огнь, ниже́ меч, ниже звере́й зу́бы,/ ни муки, ни раны сих повредиша,/ но в плоти безплотнаго низложивше,/ Господу о нас мо́лятся.

Сла́ва, и ны́не, Богоро́дичен:

Страшно предстательство Твое́, Марие Богокрасная,/ и страшна́ Твоя́ сла́ва всей земли, Богоро́дице,/ Тобо́ю бо ны́не хвалимся,/ Тя и Ходатаицу имуще к Сыну и Зижди́телю Твое́му,/ и неусыпною молитвою Твое́ю спасаемся вси.

Священномученик Зиновий, епископ Эгейский, и сестра его Зиновия

НА ВЕЛИ́ЦЕЙ ВЕЧЕ́РНИ

На Го́споди, воззва́х: поставим стихов 8 и пое́м стихи́ры во глас 8:

Твоим благодеянием и чудесем, Влады́чице,/ оскудения несть и не будет;/ веко́м бо многим преходящим и христианскому язы́ку во вся страны мира разселя́ющуся,/ повсюду но́ва зна́мения от Твоих святы́х икон умножаются,/ и человеческая сердца умиления исполняются./ Убо и днесь на Твое́ славосло́вие собранныя люди благослови,/ и тех приими́ смиренныя молитвы,/ и прощение согрешений на́ших у Сы́на Твоего́́ испроси, Милосердая Мати.

Арха́нгел Гаврии́л, от негoже Пречи́стую Де́ву восхваляти научи́хомся,/ да предстанет ликостоянию нашему,/ вку́пе же пра́ведная Елисавет с нами да возгласи́т:/ благословена еси́ в жена́х, Богоро́дице, и Твоего́́ чрева Плод благословен есть,/ Eгoже умоли, Влады́чице,/ дарова́ти душам нашим мир и велию ми́лость.

Зрак лица Твоего́, о Влады́чице,/ си́це вопиет людем:/ приидите, христолюбцы и пра́веднии,/ духо́вную жажду сердец ваших славосло́вием Бо́га утоли́те;/ прииди́те, гре́шнии и малове́рнии, своих очес к Нему́ возвести́ не сме́ющии,/ и Моего предста́тельства пред Ним проси́те дерзновенно,/ несть бо греха, Мою ми́лость от кающихся отгонящаго;/ приидите, и надежду спасения вам возвращу/ и даруя душа́м ва́шим велию ми́лость.

Твоего́ милосердия неизсле́димую бездну ве́дуще, Влады́чице,/ аще и язвы грехов многих носим,/ пред Твоим чудотворным образом умиленно себе повергаем/ и в покаянии Тебе́ вопием:/ аще и ни единаго глагола ко оправданию дел на́ших и́мамы,/ но Твоих чудотворений памятию сердца́ на́ша слезами покаяния согреваем,/ ея́же ради подаждь нам согрешений прощение/ и душам нашим велию ми́лость.

Сла́ва, и ны́не, глас 2:

От перваго Христова чудесе,/ еже на бра́це в Кане Галилейстей,/ Богородичо предстательство о людех наче́нся,/ до Втораго и страшнаго не престанет пришествия./ О, милости неизрече́нныя!/ О, снизхождения благоутробнаго!/ Како Чи́стая Голуби́ца смрадных грешников не возгнушается?/ Како тех воздыхания ма́терски приемлет?/ Дерзайте убо, братие, и моления ваша к Ней умножайте;/ есть бо наше защище́ние Пресвята́я Дева,/ егóже врази одолети не могут,/ я́ко Тоя́ послушает Христос Бог и Спас душ на́ших.

Пареми́и Богоро́дичны.

Бытия чтение (глава́ 28):

Изы́де Иа́ков от студенца кля́твеннаго и и́де в Харра́нь./ И обре́те ме́сто и спа та́мо, за́йде бо со́лнце./ И взят от ка́мения ме́ста того́ и положи́ возгла́вие себе,/ и спа на месте оном, и сон ви́де:/ и се ле́ствица утвержде́на на земли́, ея́же глава́ досяза́ше до Небе́с, и А́нгели Божии восхожда́ху и низхожда́ху по ней,/ Господь же утвержда́шеся на ней и рече́:/ Аз Бог Авраа́мов, отца твоего, и Бог Исаа́ков, не бо́йся;/ земля́, иде́же ты спи́ши на ней, тебе́ дам ю́ и се́мени твое́му./ И будет се́мя твое́, я́ко песо́к земны́й,/ и распространи́тся на мо́ре и ли́ву, и се́вер, и на восто́ки,/ и возблагословя́тся о те́бе вся коле́на земна́я и о се́мени твое́м./ И се Аз с тобо́ю, сохраня́яй тя на вся́ком пути́, а́може аще по́йдеши,/ и возвращу́ тя в землю сию, я́ко не и́мам тебе́ оставити,/ до́ндеже сотворити Ми вся, елика глаго́лах тебе́./ И воста́ Иа́ков от сна своего́ и рече́:/ я́ко есть Госпо́дь на месте сем, аз же не ве́дех./ И убоя́ся, и рече́:/ я́ко стра́шно ме́сто сие,/ не́сть сие, но дом Бо́жий и сия́ врата́ Небесная.

Пророчества Иезекиилева чтение (главы́ 43–44):

Та́ко глаго́лет Госпо́дь:/ будет от дне осма́го и про́чее,/ сотворят иереи на олтари́ всесожже́ния вашего, и яже спасе́ния ва́шего, и прииму́ вы, глаго́лет Адонаи́ Господь./ И обрати́ мя на путь врат святы́х вне́шних, зря́щих на восто́ки, и сия́ бя́ху затворе́нна./ И рече́ Господь ко мне́:/ врата сия́ затворе́на будут и не отве́рзутся,/ и никто́же про́йдет сквозе́ их,/ я́ко Господь Бог Израилев про́йдет и́ми, и будут затворе́на./ Я́ко Игу́мен ся́дет в ни́х сне́сти хле́б, по пути́ Ела́мских врат вни́дет и по пути его изы́дет./ И введе́ мя по пути врат святых, су́щих к се́веру, пря́мо храму, и ви́дех,/ и се испо́лнь славы храм Го́сподень.

При́тчей чте́ние (глава́ 9):

Прему́дрость созда себе дом и утверди́ столпо́в седмь./ Закла́ своя же́ртвенная и раствори́ в ча́ши своей вино, и угото́ва свою трапе́зу./ Посла́ своя рабы́, созыва́ющи с высо́ким пропове́данием на чашу, глаго́лющи:/ и́же есть безу́мен, да уклони́тся ко мне./ И тре́бующим ума́ рече́:/ прииди́те, яди́те мой хлеб и пи́йте вино, еже раствори́х вам./ Оста́вите безу́мие, и жи́ви будете,/ и взыщи́те ра́зума, да поживете́, и испра́вите разум в ве́дении./ Наказу́яй злыя, прии́мет себе безчестие:/ обличаяй же нечести́ваго, опоро́чит себе́, обличе́ния бо нечести́вому, ра́ны ему./ Не облича́й злых, да не возненави́дят тебе́,/ облича́й прему́дра, и возлю́бит тя./ Даждь прему́дрому вину́, и премудрший бу́дет;/ сказу́й пра́ведному, и приложи́т приима́ти./ Начало премудрости – страх Го́сподень, и совет святы́х – разум:/ разуме́ти бо закон, по́мысла есть блага́го./ Сим бо о́бразом многое поживе́ши время, и приложа́тся тебе́ ле́та живота́.

На лити́и стихи́ра, глас 1:

Подоба́ше Озеря́нскому Владычицы нашея образу/ посреде великаго гра́да Харькова утверди́тися,/ да множество людей Тоя́ подножию покланятися навыкнут/ и жития своего́ исправлению науча́тся,/ сказанию зде бывших исцелений внемлюще/ и о милосердии Пресвятыя Богоро́дицы помышляюще;/ к Нeйже и ны́не возопиим, глаголюще:/ о Пречистая Де́во и Мати,/ Твоих рабов моления не отве́ржи,/ но немощи на́ша предстательством Твоим исцели,/ от нужд моли́твами Твоими нас изведи/ и даруй нам прежде конца покаяние.

На стихо́вне стихи́ры, глас 2.

Подо́бен: До́ме Евфра́фов:

Что дивишися, человече,/ разсече́нную обре́т не́когда икону, что смущаешися,/ паки бо силою Божиею сию сраще́ну у́зриши.

Стих: Помяну́ и́мя Твое́/ во вся́ком роде и роде.

Из до́му человека того образ Владычицы паки нощию исчезает/ и по у́тру в дубраве древесней обретается,/ идеже вчера косою усече́ся.

Стих: Слы́ши, Дщи, и виждь,/ и приклони́ у́хо Твое́.

О, превелие чудо!/ разсече́нная икона паки зрится сраще́на,/ к нейже рука человеческая прикоснутися не можа́ше.

Сла́ва, и ны́не, глас 8:

Молитвы вознося и благодарныя изливая слезы,/ селяни́н Богородичну обре́т икону,/ сию ко иерею приносит,/ и радости вси лю́дие исполняются/ и исцелений многих пред святынею сподобляются;/ тако бо Господь Свою Пречи́стую прослави Матерь,/ и новое жительство христиан верою укрепи,/ и место пребывания святыни в род и род прослави.

Тропа́рь, глас 3:

Твоего́ предста́тельства увере́ние/ и милосердия Твоего́́ явление/ икона Озерянская нам, Влады́чице, показася;/ пред неюже души на́ша в молитве изливаем/ и верою Тебе́ вопием:/ воззри, Милосердая, на люди Твоя́,/ вся скорби на́ша и печали утоли́,/ утеше́ние благое в сердца на́ша низпосли/ и спасе́ние вечное душам нашим, Пречистая, испроси.

НА У́ТРЕНИ

На Бог Господь: тропа́рь, два́жды.

Сла́ва, и ны́не: и паки то́йже.

По 1-м стихосло́вии седа́лен. глас 2:

Икону Владычицы, своею косо́ю разсеченную, узре́в, смиренный муж/ сию в дом свой прерадостно вносит,/ во у́трие же паки на месте обретения ея сраще́нную приемлет,/ и чудо Богоро́дицы всем проповедует.

Сла́ва, и ны́не, то́йже.

По 2-м стихосло́вии седа́лен, глас 3:

Возлюбила еси́ нищету смиренную, о Влады́чице,/ и святыню Твою́ тру́днику убо́гому вручи́ла еси́;/ той же сию це́ркви лю́дстей преда́в, со апо́столом вся богатя́й явися;/ с нимиже и на́шего не отвержи моления.

Сла́ва, и ны́не, то́йже.

По полиеле́и седа́лен, глас 6:

Ку́ю похвалу принесем Ти, Богоро́дице?/ Кое ли сплетем Ти славосло́вие?/ Зане́, кроме́ трудов или подвигов на́ших/ посреде гра́да сего источники исцелений источила еси́ пред Твое́ю иконою молящимся людей;/ ихже и днесь услыши молитвы, и на благая деяния, Пречистая, всех настави.

Сла́ва, и ны́не, то́йже.

Проки́мен и Ева́нгелие Богоро́дице о́бщии.

По 50-м псалме́ стихи́ра, глас 8:

О, дивнаго чудесе!/ оскудевшей во дни на́ша вере, чудеса́ от Богородичныя не оскудевают иконы,/ ниже́ умолкают благодарнии исцеленных гла́си./ К сим и на́ша приобщим благодарения, братие,/ и победы над страстьми у Владычицы испросим/ и душам нашим ве́лия ми́лости.

Канон, глас 3.

Его́ же краестрочие: Блаженно чрево, носившее Тя, и сосца, яже еси́ ссал. Ирмо́с по два́жды, тропари́ на 8.

Песнь 1

Ирмо́с: Песнь новую поим, лю́дие,/ от Девы Рождшемуся во спасе́ние наше/ едино Сотворшему с Небе́сными земна́я,/ я́ко прославися.

Богородице Пречистая,/ молитву смиренных сердец на́ших приими,/ па́че же Сама научи нас, о нихже подоба́ет просити/ и и́миже словесы пети Тя, Пренепорочную.

Людие Божии сытости похвале́ Твое́й не и́мут, Богоро́дице,/ но умиленным славосло́вием чудес Твоих при́сно питающеся,/ велие утеше́ние тем приемлют.

Ангели Твою́ чистоту воспева́ют, Влады́чице;/ нам же, человеком, помози́ Твое́ заступление при́сно помина́ти/ и чудеса́ от святыя иконы Твоея́ пове́дати.

Житие́ трудолюбивое провождая,/ на делание изы́де препро́стый муж,/ внезапу же изображение Бо́жия Ма́тере зрит, косою его разсече́нное,/ и сие со благоговением в дом свой приносит.

Еще спящу человеку тому,/ свята́я икона Владычицы разсече́нная чудесно срастеся и паки на место явления своего́ пренесе́ся,/ еже ви́девше, лю́дие Божию Матерь прославиша./ С ними и наши, о Влады́чице, молитвы приими́ милостивно.

Катавасия по уставу.

Песнь 3

Ирмо́с: Лук сокрушил еси́ вражий/ и щиты́ стерл еси́ крепостию, Владыко Христе́,/ утверждение наше;/ Свят еси́, Го́споди.

Несомне́нныя веры испо́лнен, иерей Феодор/ всеблагоговейно икону Владычицы в новосозда́ннем поставляет храме,/ и множества людей тамо притекати абие навыко́ша;/ днесь же святыня сия́ пред очесы нашими зрится/ и умиления сердца́ на́ша исполняет.

Не остави нас, Богоро́дице,/ нечистыми страстьми́ вла́ятися,/ не остави в беззакониях на́ших погибнути,/ но молящихся Тебе́ житие свое́ испра́вити научи/ и Твое́ милосердие воспети достойно.

О́ному иерею Феодору/ Богородица наставница бысть;/ Ея бо ра́ди чудотворнаго образа оби́тель и́ноков устро́и/ и сам во А́нгельстем образе житие свое́ скончава́ет./ Потщимся убо, о братие, тоя́же иконы покло́нницы,/ себе саме́х в волю Божию при́сно предава́ти.

Человеков молитвы/ и А́нгелов славосло́вие, Влады́чице, приемлющи,/ и моего убогаго не отврати́ моления, скорбь души моея утоля́ющи,/ па́че же терпение в ско́рбех при́сно мне подающи.

Седа́лен, глас 5:

Молитв, яже о нас, присное устремление,/ и грешных прибежище несумне́нное,/ и праведнаго гнева Бо́жия отклоне́ние позна́хом Тя, Богоро́дице Де́во;/ убо и на нас долготерпение Твое́ простри́, и грехом нашим прощение испроси,/ и во благих прошения на́ша исполни, Пречистая.

Сла́ва, и ны́не, то́йже

Песнь 4

Ирмо́с: Стра́нна и неизрече́нна Рождества Твоего́́ тайна;/ услышах слух Твой и убояхся,/ и, веселяся, вопию Ти:/ си́ле Твое́й сла́ва, Человеколюбче.

Различных исцелений чудеса́ от новоявле́нныя Твоея́ иконы, Влады́чице,/ абие во окре́стных страна́х слышана быша и Святогорския пусты́ни настоятеля болящаго на обещание подвиго́ша,/ иже, здравие получив, ко храму Твое́му пешеше́ствует/ и оби́тель и́ноков со иереем Феодором тамо устроя́ет.

Естество́ земны́х тварей от подобнаго себе ражда́ется;/ тако и оби́тель Озерянская от Святогорския начало прият чудеса́ Твоя́ досто́йно воспевати./ Ны́не же обители Куря́жская и Покровская сей блаженный жребий прия́ша;/ мы же, величая Тя, Твое́му о́бразу со умилением покланяемся, Влады́чице.

Влады́чице Пречистая,/ ели́ка просим днесь от Тебе́ прия́ти,/ сия́ от чудотворныя Твоея́ иконы нам подаждь,/ и немощно́е наше произволение утверди, и Небесных благ желание в сердца́ на́ша всели.

О́ный муж явления иконы Твоея́, Богоро́дице,/ во время делания звания своего́ сподо́бися;/ тако бо Господь смиренныя возвышает./ Убо и от нас помыслы гордыни и зависти отжени́, Влады́чице,/ и вы́шния по́чести будущия жизни желати нас научи, Пречистая.

Нашему спасению бу́ди, Богоро́дице, ходатаица и наставница,/ но и телесныя ну́жды и болезни на́ша исцели;/ зане́, маловерни и нетерпеливи суще, по́мыслы уныния в беда́х на́ших вла́емся/ и наипа́че терпения дар у Бо́га просити требуем.

Песнь 5

Ирмо́с: На земли́ Неви́димый яви́лся еси́/ и челове́ком во́лею сожи́л еси́ Непостижи́мый,/ и к Тебе́ у́тренююще,/ воспева́ем Тя, Человеколюбче.

Огнь веры в людех Твоих, возжже́ Твоя́, Богоро́дице, икона;/ егда́ бо вскоре губительная язва на страну нашу на́йде,/ молящиися пред чудотворным образом Твоим всегда исцеля́хуся./ Мы же, тех пра́внуцы суще,/ благодарную па́мять о сем те́пле сохраняем.

Сей убо губительней я́зве прешедшей,/ чрез сто и па́че лет другая пределы Российския земли посети трикраты;/ ужасом же смяте́ннии лю́дие к подножию святыни Бо́жия Ма́тере паки припа́даху/ и, икону Владычицы во град Харьков приносяще,/ от недуга того исцеле́ние приима́ху.

Иже в беда́х сущии человецы, ве́дите,/ я́ко близ вас избавление верное обрета́ется,/ аще токмо с верою сие призывати будете, сице глаголюще:/ о Влады́чице, помози и прости нас грешных,/ о нас милосердовавши.

Ве́мы, Влады́чице, вемы,/ я́ко веры исполненная моли́тва Тобо́ю не отщети́тся;/ но сицевы́я веры лености ради нашея не стяжа́хом, аще и стяжати возжеле́хом./ Темже и вопием:/ веруем, Пречистая, помози на́шему маловерию!

Широкий путь жития зле возлюби́хом, Богоро́дице,/ к погибели сыны своя влекущий и веру их сокрушающий;/ но пред святою Твое́ю иконою предстояще, покаяние о сем приносим/ и помощи Твоея́ смиренно просим,/ во еже на путь спасения обрати́тися.

Песнь 6

Ирмо́с: Селе́ния Ио́на,/ еже в преиспо́днем а́де,/ есте́ственный о́браз быв, вопия́ше:/ возведи́ от тли живо́т мой, Человеколюбче.

Естественнаго исцеления отча́явся,/ увещанию же духовнаго отца своего́ повину́яся,/ сухорукий некий муж ко иконе Владычицы пешиим издале́ча притече́ хождением;/ и моли́тва веры болящаго исцели, и бысть рука его здрава,/ душа же хваления Твоего́, Богоро́дице, исполнися.

Еже ко временному житию потребное вма́ле полезно есть,/ но па́че сих о сухости сердец на́ших восплачем, о братие,/ и исцеления страстей на́ших просити потщи́мся,/ греховное житие́ свое́ ока́явше и Горних даро́в тепле возжеле́вше.

Твоея́ милости сподо́бися хро́мый,/ во оби́тель Твою́, Богоро́дице, привезе́нный/ и пред святою иконою Твое́ю усердную вознесы́й молитву,/ и́же абие исцеле́ние от неду́га своего́ прия́т/ и пе́ший в дом свой радостно возвратися.

Ядом страстей извраще́на ми душа,/ и но́зе мои по пути спасения ходити не возмо́гут,/ аще не Твоим, Пречистая, предстательством благода́тную обрящу помощь,/ во еже на путь правый устреми́ти души моея шествие.

Испо́лни ужаса виде́ние иконы Твоея́, о Влады́чице,/ бесну́ю некую девицу,/ бесу на хулы́ сию подвиза́ющу;/ обаче вознесе́нное церковию моление, па́че же Твоего́́ предста́тельства сила,/ абие беса от девы той изгна/ и здраву бывшую на славосло́вие подви́же.

Конда́к, глас 5:

Не отри́ни, о Милосердая Мати,/ слез и воздыханий на́ших,/ но прошения на́ша милостивно прии́мши,/ пред иконою Твое́ю молящихся людей веру укрепи,/ умилением сердца их исполни и крест земнаго жития носи́ти им помози́;/ ели́ка бо хо́щеши, мо́жеши.

И́кос:

Егда Святыя Владычицы нашея икона/ во град Харьков на ко́еждо лето приноша́шеся или паки во ближнюю оби́тель изношашеся,/ тогда гра́да сего лю́дие, ко провождению святыни устремля́хуся,/ благода́тным исполня́хуся умилением и покаяние теплое о гресех своих приноша́ху./ Но сицево́е покая́нное умиление и па́мять чудес, от святыни нашея бываемых,/ при́сно в душах на́ших подоба́ет храни́ти нам, о братие,/ и на святу́ю Богоро́дицы икону взира́ющим глаголати:/ крест земнаго жития носи́ти нам помози,/ ели́ка бо хо́щеши, мо́жеши.

Песнь 7

Ирмо́с: Го́рдый мучи́тель, но дете́й бысть игра́лище./ Я́коже бо персть, попра́вше седмери́чный пла́мень, поя́ху:/ благословен еси́, Го́споди Боже отец на́ших.

Связаннаго мя страсте́й наси́льством/ па́че бесны́я тоя́ девы окаява́ю аз;/ та́я бо неволею власти его предана́ бывши, му́ку приима́ше,/ аз же волею бесо́вское исполняю хотение./ Но, о Влады́чице, Твоего́́ Сы́на волю творити научи мя.

Огради́, Влады́чице, мое помышление,/ да не хуло́ю или зло́бою во власть демоном предам свою душу,/ но сию непрестанныя потщу́ся исполня́ти молитвы, глаголя:/ предстательством Матере Твоея́ от лукаваго избави мя,/ Го́споди.

Свяще́нною водою пред чудотворным Богоро́дицы образом окропле́н быв, исцеле бесны́й человек,/ и́же прежде вся люди беснова́ньми своими зело́ устраша́ше,/ по сих же со благоговением и тихостию души благодарение о чудеси́ Влады́чице принесе́./ С ним и нас, о Всеблагая, услыши молящихся Тебе́.

Церковь, в нейже икона Твоя́ пребывает, Богоро́дице,/ врачебница неду́гов телесных и душевных является,/ веры же учительница и неверия явная обличительница.

Аще тех человек исцеле́нных толи́каго не и́мам упования и веры,/ но покаяния моего ради исцели, Всеблагая, души моея беснование,/ и тихость смиренномудрия подаждь моему сердцу.

Песнь 8

Ирмо́с: Веще́ственнаго огня пламень/ Невещественным увяди́ша Богозри́мии о́троцы и поя́ху:/ благословите вся дела Господня Го́спода.

Язык человеческий не возможет изрещи́,/ коли́кую души на́ша любовь и умиление вмещают к Тебе́, о Всеблага́я, ниже́ бо словесы́, ни пе́сньми насытится возмо́гут,/ но сия́ слезами радости пред святынею Твое́ю восполняют.

Жены́ не́кия две ослепшия юныя дще́ри,/ от земных враче́в никоея́же пользы получившия,/ внеза́пу пред иконою Богоро́дицы прозре́ша,/ и от того дне даже до старости здравы пребывающа,/ сию икону почитати знае́мыя увещава́ху.

Ева́нгелием Христовым обеща́нная ве́рным чудеса́ видим зде умножа́ющася;/ убо и жи́ти евангельски потщимся, братие,/ да не преще́ние, Тиру и Сидону Христом предрече́нное, наши нечувственныя постигнет ду́ши.

Един по единому приходят се́мо ве́рнии,/ исцеления им бывшая от иконы Богоро́дицы испове́дающе/ и сию златом и самоцветным ка́мением украшающе;/ те́мже и душы наши златом доброде́телей украси́м,/ да милостей Пречистыя достойни яви́мся.

Славу Бо́жией Ма́тери воздаваше исцеле́нная отрокови́ца,/ уже смерть прия́ти имущая,/ но по внезапней от иконы сея исцелении па́мять о чудеси до старости хранившая/ и вся драгоценныя ря́сны своя на ризу образа сего приложи́вшая.

Песнь 9

Ирмо́с: Сла́дкою пречистаго Твоего́́ Рождества/ стрело́ю уязвле́ни, Чи́стая,/ Твое́й достожела́нней добро́те дивя́щеся,/ песньми А́нгельскими досто́йно Тя я́ко Матерь Божию величаем.

Иже почитания Богоро́дицы отпа́дшии,/ посрамитеся, еретицы́,/ умиле́нное пение Той, от православных возносимое, слышаще;/ па́че же в чувство пришедше, к на́шему сопричти́теся молению,/ да вку́пе Чистую возвеличаем.

Святым Свои́м апостолом обетова́ше Спас,/ я́ко всяк, ближнему своему́ ми́лость во имя ученика Его́ творя́й,/ своея не погуби́т мзды./ Сицевы́я, о братие, сугубо сподо́бите́ся,/ аще во имя Матере Госпо́дни в де́лех братолюбия подвизатися будете,/ моление Влады́чице при́сно принося́ще.

Се ро́ди земнии ублажают Тя, Влады́чице, я́коже прорекла еси́,/ и Тобо́ю возносит смиренныя сердцем Христос/ и алчущия благ всяческих исполняет,/ богатя́щияся же и гордыя посрамля́ет./ Темже новый Израиль милости Твоя́, человечеству дарова́нныя, воспоминает/ и Тя, Пречистая, величает.

Аз един, па́че всех грешен сый,/ аще и чудесем Твоим, Богоро́дице, умиляюся,/ но жития своего́ додне́сь не испра́вих;/ обаче, я́коже су́ху руку молящемуся испра́вила еси́,/ сице изсохшую мою исцели душу,/ да Тя непрестанно величаю.

Людей мольбы и славословия,/ пред чудотворным Твоим образом и на вся́ком месте возноси́мыя,/ благоутробно, Влады́чице, приими,/ и, у́зами Твоея́ любве души на́ша пророчески связавши,/ сия́ в Небесное привлецы́ Царство,/ и тамо Твое́му лицу поклони́тися сподо́би.

Свети́лен.

Подо́бен: Жены́, услы́шите:

Образ Богоро́дицы Озерянский,/ чудесно при корени древе́с явився/ и мно́гими исцеленьми прославився,/ днесь на молитву люди призывает./ Зри, о душе моя, Матере Бо́жия милосердие безмерное,/ и одеяние твое́ просвети,/ и от скверных дел отвратися наве́ки.

На хвалитех поставим стихов 4, и пое́м стихи́ры во глас 4, повторяюще первую:

Святыя Твоея́ иконы поклонение, о Влады́чице,/ ду́ши на́ша умиляет и радует,/ моли́тва же, пред нею возноси́мая, сон от очес на́ших отгоняет/ и памятию милости Твоея́ сердца́ человеческая любве ко всем исполняет;/ в нейже утверди нас Твоим предстательством/ и подаждь рабом Твоим мир и велию ми́лость.

Святых А́нгелов чи́ни и человеков собори/ Твое́ заступление прославляют, Пречистая Де́во,/ Единородный же Сын Твой и Бог наш сие с любо́вию прие́млет/ и от молитв Матере Своея николи́же отврати́тся;/ яже и о нас грешных днесь вознеси, Всепетая.

Аще и мно́гими отсту́пствы/ сынове рода на́шего гнева Твоего́, Влады́чице, достойни яви́шася,/ но па́че воззри́ на веру верных и терпение;/ и я́коже Господь грады согрешившыя ради десяти праведник пощадити обетова́ше,/ тако и Ты, о Богомати, немногих ради смиренных Твоих раб многогрешный род наш помилуй,/ и к Сыну Твое́му о всех нас предста́ни,/ да подаст душам нашим мир и прегрешений отпуще́ние.

Сла́ва, и ны́не, глас 2:

Днесь Владычицы чудотворная икона прославляется,/ днесь ве́рнии на молитву пред нею отвсю́ду собираются,/ днесь и малове́рнии по́мыслми покаяния озаряются,/ силы Небесныя о сла́ве Пречистыя радуются,/ мы же, я́ко А́нгелом научихомся, тако вопие́м:/ радуйся, Благодатная, Господь с Тобою,/ благословена Ты в жена́х,/ благословено Твое́ к нам милосердие,/ благословен Плод чрева Твоего́, сла́ва Тебе́.

Славословие великое и отпуст.

На Литургии служба вся Богоро́дице.

Молитва ко Пресвятей Богоро́дице

Суеты́ житейския возни́кше и ума своего́ по́мыслы во едино собравше, ко Твое́й, Богоро́дице, иконе очи душ и телес на́ших воздвиза́ем и Тебе́ взываем сице: не остави, Пречистая, нас, немощных, во грехах на́ших растле́тися, не попусти злому демону ду́ши наши от Сы́на Твоего́́ в дебри страстей отгна́ти, но помози нам Того заповеди при́сно па́мятовати, да ниже́ блудным возбеше́нием себе предае́м, ниже друг друга зло́бою угрызаем, но я́коже днесь святыни Твое́й предстояще, о исправлении жития на́шего ревностию распаля́емся, тако и от храма Твоего́́ в до́мы своя отшедше, сие доброе наме́рение сохранити потщимся.

По сих же и телесныя на́ша ну́жды утоли, и горести Твоея́ молитвою исцели, Всепетая. Вемы, я́ко подоба́ше нам па́че вся сия́ благодушне претерпевати и то́чию о терпении в ско́рбех Го́спода проси́ти; но поне́же изнемогают в печалех души на́ша и помыслы уныния нашу колеблют ве́ру, сего ради в сокрушении сердец к Тебе́ сице взываем. Я́коже безчисленныя болящия страдальцы исцелила еси́ и скорбящия уте́шила еси́, тако и нас, пред чудотворною Твое́ю иконою припа́дающих и в скорби Тебе́ молящихся, услыши, и всех прошения во благое исполни, болящим здравие, скорбящим утеше́ние подающи, во вражде сущим мир от Бо́га низпосылающи, сомня́щимся же веры утвержде́ние.

Услыши грешныя рабы Твоя́, Пречистая, воздвигни нас на благодарственное Тебе́ славосло́вие, да умно́жится вера людей Твоих, да прославится в них Твое́ заступление, да та́ко Царствие Сы́на Твоего́́ посреде нас утвердится; Емуже подоба́ет всякая сла́ва, честь и поклонение со Безначальным Его́ Отцем, и Пресвятым, и Благим, и Животворящим Духом, ны́не, и присно, и во веки веков. Аминь.

Икона Божией Матери Озерянская

Тропа́рь, глас 3:

Ты на земли вседу́шно Христа́ возлюби́в/ и Того заповеди соблюда́я,/ я́ко река, благоутро́бием изсохших нищетою богатно напоил еси́/ и люди своя снабдел еси́,/ и рака мощей твои́х благоухания цельбы всем подает,/ сего ради, святе, молим тя,/ изпроси́ душа́м нашим велию ми́лость.

Конда́к, глас 4:

Явился еси́ от ко́рене блага́го/ о́трасль преславная отечеству своему́ и прародителем своим,/ новообра́зен подобник бываеши/ и людем свои́м являешися утварь прекрасная.