Источник

В 31-й день

Святых апостол Стахи́я, Ампли́я, Апе́ллия, Аристову́ла, Нарки́сса, Урва́на и свята́го мученика Епима́ха

На Го́споди, воззвах: стихиры апостолов, глас 1.

Подо́бен: Всехва́льнии мученицы:

Во всю протече́ зе́млю/ ваше спаси́тельное веща́ние,/ Господни апо́столи,/ сиянием благодати озаря́ющее всех сердца, сла́внии,/ и разоря́ющее пре́лести омрачение./ Темже молитеся/ дарова́ти душа́м нашим мир и ве́лию милость.

Стахи́й всеблаженный,/ Христов проповедник и апостол,/ и Апе́ллий чудный, и Аристову́л,/ Урва́н, Ампли́й, и Боже́ственный Нарки́сс,/ Троицу Всесвяту́ю пропове́давше,/ язы́ки просветиша и от рабо́ты изба́виша,/ яже верою вси ублажи́м.

Свети́льницы Христовы пресве́тлии,/ сосу́ди чисте́йшии,/ всю зарю Ду́ха верою вмести́вше,/ церко́внии столпи́, Небеса преславная,/ славу Божию пове́дающе./ Того моли́те дарова́ти душа́м нашим мир и ве́лию милость.

И́ны стихиры мученика, глас 4.

Подо́бен: Я́ко до́бля:

Дохновением Духа Свята́го, Епима́ше,/ жили́ще яви́лся еси Боже́ственно, славне,/ и, от Него де́йство прие́м врачева́ний,/ боля́щим богатно здравие подава́еши,/ при́сно зову́щим:/ Иисусе Жизнода́вче,/ Ты еси весе́лие же, и сла́ва Твоих мучеников, и похвала́.

Дерзновением пропове́дал еси истину, славне,/ я́ко Христов воин зако́ннейший,/ не убоя́вся судя́щаго ярости зве́рския,/ поклонение бого́м не су́щим повеле́вша,/ егoже посрами́л еси Богодухнове́нными твоими словесы́, страстоте́рпче,/ и проповедал еси всем Су́щаго над всеми Бога нашего.

Я́ко кра́сны но́ги твоя, муче́ния украси́шася/ путь проити́ невозвратно/ и, убо скончав течение твое́, веру соблюл еси/ и венец от руки Владычни прия́л еси./ Егoже моли от тли и бед изба́витися/ верою творя́щим пречестну́ю память твою́.

Сла́ва, и ны́не, Богоро́дичен, подобен тойже:

В землю низве́ржен бых, грехи́ умертви́хся,/ душевными страстьми́ и телесными,/ темже тьмою покрыва́юся отчаяния./ Но воздви́гни мя ны́не, к жизни нетленней наставля́ющи мя/ и Вышнему Отечеству, иде́же глас чист пра́зднующих,/ Пресвятая Богоневесто.

Крестобогоро́дичен:

А́гнца и Пастыря Тя на Древе я́ко виде,/ А́гница рождшая рыдаше и ма́терски Тебе́ веща́ше:/ Сы́не Возжеле́нне, како на Древе Кре́стнем пове́шен еси, Долготерпели́ве?/ како руце и но́зе Твои, Сло́ве, пригвозди́шася от беззаконных/ и кровь Твою́ излия́л еси, Владыко?

Тропа́рь, глас 3:

Апостоли святи́и,/ моли́те Милостиваго Бога,/ да прегрешений оставле́ние/ подаст душа́м нашим.

Сла́ва, мученику, глас 4

Мученик Твой, Го́споди, Епимах,/ во страдании своем венец прият нетленный от Тебе́, Бога нашего:/ имеяй бо крепость Твою́,/ мучителей низложи,/ сокруши и демонов немощныя дерзости./ Того моли́твами/ спаси́ души на́ша.

И ны́не, Богоро́дичен или́ Крестобогоро́дичен.

НА У́ТРЕНИ

Един канон Окто́иха. И святых два.

Канон апостолов, егoже краегране́сие: Верно похвалю Божия слуги́. Иосиф. Глас 1.

Песнь 1

Ирмо́с: Твоя победи́тельная десни́ца/ Боголе́пно в кре́пости просла́вися:/ та бо, Безсме́ртне,/ я́ко всемогу́щая проти́вныя сотре́,/ изра́ильтяном путь глубины́ новосоде́лавшая.

Верою почитающия вашу, священнии благоглаголивии, память/ и торжествующия радостно,/ страсте́й мглы изба́вите и вечныя радости причастники соделайте.

Стопа́м последующе Христа, воплоще́ннаго за милосердие, пребогатии,/ Сего же повелением Богоначальным служа́ще,/ яви́стеся всех заблуждших наставницы к благочестию.

Стахи́я и Ампли́я мудраго, и Урва́на, Апе́ллия же, и Нарки́сса, и Аристову́ла,/ Христовы ученики бывшия,/ верою сошедшеся, до́лжно ублажи́м.

Богоро́дичен:

Явственную го́ру Божию, киво́т святый и трапе́зу,/ ста́мну же всезлатую, чистую Иисусову палату,/ Благословенную в жена́х ублажи́м.

Ин канон мученика. Глас 4.

Песнь 1

Ирмо́с: Воспою́ Тебе́, Го́споди Боже мой,/ я́ко изве́л еси люди из рабо́ты еги́петския,/ покры́л же еси колесни́цы фарао́новы и си́лу.

Воспою Тебе́, Го́споди Боже мой,/ я́ко показал еси нам память мученика, озаря́ющу всяческая,/ я́ко един Многомилостив.

Воспою Тебе́, Го́споди Боже мой,/ я́ко непобеди́ма Твоего показал еси мученика,/ поборника в мученицех на безбожие.

Воспою Тебе́, Го́споди Боже мой,/ я́ко дарова́нии Божественными Твоего страдальца украси́л еси, Епима́ха,/ и честию венчал еси.

Богоро́дичен:

Воспою Тебе́, Го́споди Боже мой,/ я́ко безсе́менно из утро́бы Девы родился еси,/ Еяже ради и спасаеши вся, я́ко един Многомилостив.

Песнь 3

Ирмо́с: Едине ве́дый челове́ческаго существа́ не́мощь/ и ми́лостивно в не вообра́жся,/ препоя́ши мя с высоты си́лою,/ яже вопи́ти Тебе́, Святый:/ одушевле́нный хра́ме неизреченныя славы Твоея́, Человеколюбче.

Я́ко клас многоплоден, мудре, явился еси,/ словом зна́ния, гладом та́ющия веры пита́я, Стахи́е Богоблаженне,/ и пи́щи лучшия причастники благодатию соде́лав/ силою Духа.

Мре́жею язы́ка, благоестественно взем, уловил еси из глубины́ лести, апостоле,/ и принесл еси Божественно пищу пришедшему, Нарки́ссе,/ спасти заблуждшаго, Царю́ и Владыце тва́ри.

Потекл еси, я́коже звезда от востока, устреми́вся и Вретани́йския гра́ды постигл еси,/ Христово проповедуя Евангелие и просвещая благодатию, блаженне Аристову́ле,/ верно приемлющия слово твое́.

Богоро́дичен:

Черто́г светоносен Христов и престол высочайший, Богородительнице,/ яви́лася еси, Всенепорочная:/ в Тебе́ бо Един почи́в, на́ша отъят труды́/ и будущую достойным угото́ва осла́бу.

Ин

Ирмо́с: Лук си́льных изнемо́же/ и немощству́ющии препоя́сашася силою:/ сего ради утверди́ся в Господе се́рдце мое.

Суровство́ нечестивых омрачи́л есть,/ всехвальным Крестом хваля́ся,/ непобедимый венценосец Христов, мученик Епима́х.

Славу презре́в привре́менную и к подвиго́м совлекся,/ радовашеся Богомудрый и наследник Христов,/ мученик Епима́х.

Богоро́дичен:

Радуйся, Мати Приснодево,/ Бога Слова во чреве Твое́м вместившая и рождшая воплощеннаго/ я́ко Бога ку́пно и Человека.

Конда́к мученику, глас 4.

Подо́бен: Явился еси:

Многообразныя раны претерпел еси/ и венец прием от Христа Бога,/ Емуже о нас молися, блаженне Епимаше,/ верно совершающих память твою́, да спасет души на́ша.

Седален апостолов, глас 1.

Подо́бен: Гроб Твой, Спасе:

Протече́ зе́млю честно́е ваше вещание, просвещающее ду́ши неверных человек, апостоли славнии,/ священными хода́тайствы вашими./ Тем днесь радостно совершаем всечестную и светозарную вашу память,/ верно веселящеся.

Сла́ва мученика, глас 3.

Подо́бен: Божественныя веры:

Столп одушевле́н, Истины свидетель был еси во страдании,/ невидимыя враги́ победив видимыми мучители, всеизрядне,/ от Христа венец прием./ Темже зовем ти:/ не престай моляся, славне,/ дарова́ти нам велию милость.

И ны́не, Богоро́дичен:

Божественнаго естества не отлучи́вся, плоть быв во чреве Твое́м,/ но Бог вочелове́чився и пребысть,/ Иже по рождестве Матерь Тя, Деву, я́ко прежде рождества, сохранив Всенепорочную,/ един Господь./ Того прилежно моли даровати нам велию милость.

Крестобогоро́дичен:

Нескве́рная А́гница, Слова, Нетленная Дева, Мати,/ на Кресте зря́щи повешена, из Нея без болезни прозябшаго,/ ма́терски подобно рыдающи, вопияше:/ увы Мне, Чадо Мое, како стра́ждеши волею,/ хотя избавити от страсте́й безчестия человека.

Песнь 4

Ирмо́с: Го́ру Тя, благода́тию Божиею приосене́нную,/ прозорли́выма Авваку́м усмотри́в очи́ма,/ из Тебе́ изы́ти Израилеву/ провозглаша́ше Святому,/ во спасение наше и обновление.

Облиста́в на земли́ правды Солнце,/ я́коже лучи та́инственныя происпусти́ я́ве,/ Стахи́я же и Нарки́сса, Урва́на и Ампли́я, Аристову́ла и Апе́ллия,/ сущих во тьме просвещающия.

Крепостию Божественнаго укрепляемь Духа,/ живущия во тьме сы́ны показал еси света, Ампли́е апостоле,/ совершая чудес дела́ преславная и упраждня́я де́монов полки́.

Вод Боже́ственных испо́лнен,/ потекл еси я́коже струя, Урва́не, спаси́тельная,/ го́рькия и непи́тныя во́ды отгоняя,/ и напаяя благодатию благоче́ствующих, преблаженне, полноту́.

Богоро́дичен:

Яви́лася еси Ангелов преиму́щи, Владычице./ Оным бо Страшнаго во утробе несказа́нно вмести́ти сподобилася еси/ и на руках носи́ти я́коже Младенца дней же и лет древне́йша.

Ин

Ирмо́с: Твоего на земли́ явления, Христе Боже,/ пропове́дая пророк пришествие,/ с веселием вопияше:/ сла́ва силе Твое́й, Го́споди.

Безбожных неради́в преще́ния, к по́двигом ополчи́ся,/ дерзновенно вопия, благославный Епима́х:/ сла́ва силе Твое́й, Го́споди.

Земная оплева́в, смертию Царство насле́дова славный Епима́х,/ верно вопия:/ сла́ва силе Твое́й, Го́споди.

Иже со Отцем и Духом славословимаго в Вышних/ добропобедный Епима́х на три́знищи Господа всем неве́дущим пропове́да.

Песнь 5

Ирмо́с: Просвети́вый сиянием/ пришествия Твоего, Христе,/ и освети́вый Крестом Твоим мира концы,/ сердца́ просвети́ светом Твоего Богоразумия/ православно поющих Тя.

Пастыря добраго Богоизбра́нныя о́вцы/ посреди волко́в от Него я́ве по́слани быша,/ сия́ укроща́юще и приводяще ко ограде мысленней верою.

Великий тя Андрей Византи́и поста́ви епископа,/ иже та́мо верно плавающия, Стахи́е священнейше,/ и управляющаго к приста́нищем тихим Божественною благодатию.

Я́коже многоце́нен камень, тя имя́ше, краеугольный, Иракли́йская честна́я Церковь,/ укрепля́юща, Апе́ллие блаженне, сию́ словом Истины./ Тем достойно почитаем тя.

Богоро́дичен:

Зачала́ еси па́че слова Слово и родила́ еси, Всепетая,/ Егoже Отец из чрева роди́ прежде веко́в, Чистая./ Темже я́ко Сего Матерь Тя до́лжно ублажаем.

Ин

Ирмо́с: Просвеще́ние Твое́, Го́споди, низпосли́ нам,/ и от мглы прегреше́ний разреши́ ны, Бла́же,/ Твой мир да́руяй.

Защити́вся благодати оружием Креста,/ нечестивым вопияше мученик:/ меч же и огнь не отсече́т мя Христовы любве́.

Благославный Епима́х, суди́щу предстоя́ беззако́ннующих,/ вопияше благоде́рзостне:/ земли́ и Небесе́ бо́зи несотворшии, нечести́вии да погибнут.

Благославный Епимах, от Бога вдохну́вся,/ Отца, Слова и Свята́го Духа во едином естестве́/ неве́дущим Троицу проповеда.

Богоро́дичен:

Кто изрещи́ возможет Рождества Твоего, Чистая,/ па́че слова преславный образ,/ естеством бо Бога воплоще́нна па́че слова родила́ еси.

Песнь 6

Ирмо́с: Обы́де нас после́дняя бе́здна,/ несть избавляяй,/ вмени́хомся, я́ко о́вцы заколе́ния,/ спаси́ люди Твоя, Боже наш:/ Ты бо крепость немощству́ющих и исправление.

Моря́ язы́ков возмутивше Божественными восхождении,/ спасо́сте древле в го́рцем мо́ри пото́пльшияся/ и приведо́сте Изба́вителю спасшияся, Богоблаженнии.

Милости Воли́теля Бога проповедал еси/ и ле́сти свободи́л еси, Боже́ственный Нарки́ссе, ду́ши благочестивых,/ великий быв афи́нян председатель и насади́тель садо́в кра́сных, Богоблаженне.

Боже́ственный Урва́н, слово жизноточное и благодать врачеваний источи́в,/ привлече́ люди к просвещению Божественнаго разума,/ я́ко подражатель Воплотившагося и мир Спасшаго.

Богоро́дичен:

Поем Тя, Еюже оправди́хомся,/ иже пе́рвее осужде́ннии, и совокупи́хомся невещественным служителем, и рая́ сподо́бихомся,/ в жена́х благословенная, Богорадованная.

Ин

Ирмо́с: Возопи́, прообразу́я погребение тридне́вное, пророк Иона,/ в ки́те моля́ся:/ от тли изба́ви мя, Иисусе, Царю Сил.

Оста́ви яже в мире и мир Епима́х,/ и тело му́кам мужественно предаде́ за Владыку,/ и Христов наследник бысть.

Упраздни́ и́долов лесть Епима́х и славы сподобися истинныя,/ прие́м врачеваний благодать, от нихже вси ве́рнии почерпаем.

Приобщи́вся Христовым страсте́м Епима́х/ силою распеншагося плотию Христа Бога/ и венцы славы от Него я́ко верен прия́т.

Богоро́дичен:

Моли о рабе́х Твоих, Дево Богородице,/ из Тебе́ воплощшагося Бога нашего,/ я́ко Тя и едину Предстательницу нашу ве́мы.

Конда́к апостолов, глас 8.

Подо́бен: Яко начатки:

Я́ко священная сокровища Всесвята́го Духа/ и Солнца Славы сияния, по долгу воспои́м мудрыя апостолы,/ Апе́ллия, Урва́на же и Аристову́ла,/ Ампли́я, Нарки́сса и Стахи́я,/ яже благодать собра́ Бога нашего.

Песнь 7

Ирмо́с: Тебе́ у́мную, Богородице, пещь/ разсмотряем, ве́рнии,/ я́коже бо отроки спасе́ три превозносимый,/ мир обнови, во чреве Твое́м всеце́л,/ хвальный отцев Бог и препрославлен.

Терпением напа́стей изба́вистеся врага́, искушающаго вы,/ ту́чами же слова животнаго, славнии апостоли, весь угаси́сте пламень ле́сти, зовуще:/ хвальный и превозносимый отец наших Боже, благословен еси.

Пресветло и изрядно совещал еси/ и совершенно твоя, Аристову́ле, ученики, блаженне, наказа́л еси,/ я́ко Ипостасную Мудрость имея, тя наказу́ющу хвальнаго возвещати/ отцев Бога и препрославленна.

Верных священное совокупление священнейшими гла́сы блажи́т тя, Апе́ллие,/ кончи́ну бо блаже́нну имел еси, житие же Ангельское,/ поя́ всегда хва́льнаго отцев Бога и препрославленна.

Богоро́дичен:

Изба́ви ны от напастей, и скорбе́й, и печалей различных,/ и язы́ков нашествия, Владычице Всепетая,/ я́ко да Тя славим и Сыну Твое́му взываем:/ хвальный отец наших Боже, благословен еси.

Ин

Ирмо́с: Авраа́мстии иногда́ в Вавилоне о́троцы/ пе́щный пла́мень попра́ша, пе́сньми взыва́юще:/ отец наших Боже, благословен еси.

Со огне́м лесть попирая мужески,/ Распе́ншемуся добропобедный вопияше Епима́х:/ отец наших Боже, благословен еси.

Не убояся пла́мене, ниже́ звере́й ди́виих, ниже́ мук непобеди́мый Епима́х, зовы́й:/ отец наших Боже, благословен еси.

Со Отцем Слова и Всесвята́го Духа не ве́дущим Епима́х проповедуя, взываше:/ отец наших Боже, благословен еси.

Богоро́дичен:

Неопа́льною купино́ю и росодательною пе́щию/ Ты пронаписавшаяся, Мати Чистая,/ несказа́нно бо родила́ еси воплощеннаго Христа Бога, Благословенная.

Песнь 8

Ирмо́с: В пещи́ о́троцы Изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те вся дела́ Госпо́дня Го́спода,/ пойте и превозноси́те во вся веки.

В мире, я́коже молния, яви́стеся, Боговидцы, попаля́юще убо лесть,/ поющия же, сы́ны дне показу́юще, и вопию́щия:/ благословите вся дела Господня Господа,/ пойте и превозносите во вся веки.

Сладкою со́лию твоих, Ампли́е, учений ле́сти гни́лость очи́стил еси./ Темже, чтуще тя, поем:/ благословите вся дела Господня Господа,/ пойте и превозносите во вся веки.

Да поется Стахи́й славный и Ампли́й, Апе́ллий же и Нарки́сс,/ Урван же и всемудрый, вопия́й верно, Аристову́л:/ благословите вся дела Господня Господа,/ пойте и превозносите во вся веки.

Богоро́дичен:

Тя и сте́ну, и прибежище, и ле́ствицу,/ к высоте преводя́щу человечество, Всенепорочная Чистая, ве́дяще, зовем:/ благословите вся дела Господня Господа,/ пойте и превозносите во вся веки.

Ин

Ирмо́с: Во о́бразе Ангела,/ я́вльшагося в пещи́ огненней песнословцем/ Христа Бога, пойте, отроцы,/ священницы, благословите,/ людие, превозносите во вся веки.

Победителя ле́сти показавшаго и беззаконных муже́й, венцено́сца Епимаха,/ пойте, отроцы, священницы, благословите,/ людие, превозносите во вся веки.

Врача́ страсте́й и неду́гов, нам Даровавшаго, лю́тых, страстоно́сца Епимаха,/ пойте, отроцы, священницы, благословите,/ людие, превозносите Его во веки.

На земли́ память Епимаха, возвеличившаго Христа/ и Тем исцели́вшаго различныя неду́ги,/ свяще́ннии, пойте и превозносите Его во веки.

Богоро́дичен:

Неизреченно и безсеменно заченшую и рождшую Деву Христа Бога нашего,/ пойте, дети, священницы, благословите,/ людие, превозносите Ю во веки.

Песнь 9

Ирмо́с: Образ чистаго Рождества Твоего/ огнепали́мая купина́ показа́ неопальная,/ и ны́не на нас напа́стей свире́пеющую угаси́ти, мо́лимся, пещь,/ да Тя, Богородице,/ непрестанно величаем.

Да земныя концы́, исполненныя пре́лести борца́ и наполненныя омраче́ния безбожия,/ бла́гости светом озари́ши зна́ния/ Твоя спаси́тельныя зари́, Щедре,/ сим послал еси.

Явился еси тезоиме́нно, славне, спаси́тельный клас, пшеницу требующим нося́щь,/ утверждение Богоразумия подаю́щую и гла́да у́мнаго изима́ющую,/ верою тя и любовию, священнопроповедниче, поющим.

Уста́ Божия быв, ри́торов язы́ки неглаго́ливы показал еси/ и из горта́ни вра́жия, Аристову́ле, извлекл еси ду́ши,/ и привел еси Господу спасе́ны, соверше́нны познанием.

Небеса́ убо бы́ша Боговидна живуща, Божии апостоли,/ и́же на земли́ чисто вас чтущия и искренно выну блажа́щия,/ причастники вечныя сподо́бите све́тлости.

Богоро́дичен:

Но́сиши вся Носящаго и млеко́м пита́еши всем пищу Подающаго./ Ве́лие и стра́шно, еже па́че ума́, Твое́ таинство,/ кивоте честна́го священия, Дево Богородице,/ тем Тя верою ублажаем.

Ин

Ирмо́с: Тя, невместимое Слово во утро́бу вместившую,/ Небе́с простра́ннейшую и Херувимов сла́внейшую,/ Богородице Чистая, песньми величаем.

Ты я́ко возлюбил еси совершенно и умре́ти за уме́ршаго нас ради Христа./ Темже от Него в Вышних вво́инился еси, мучениче,/ Егoже со Отцем и Духом песньми величаем.

Ты я́ко на земли́ Спаса Бога испове́дал еси пред нечестивыми мучители верно;/ ны́не в вышних от Него пред Ангелы, свидетелю Епима́ше,/ и от Отца и Духа славою венчался еси.

Богоро́дичен:

Тя, светоносный облак, и Чистую и славную Деву и Матерь Божию,/ Моисею я́вльшуюся та́инственно на горе́ Сина́йстей неопали́мую купину́,/ в пе́ниих величаем.

Светилен.

Подо́бен: Жены́, услы́шите:

Боже́ственный Аристову́л и Стахи́й пребогатый, и Апе́ллий Богомудрый, и Нарки́сс,/ и Ампли́й, и Урва́н, всемудрый,/ ны́не от нас да почту́тся я́ко Христовы апостоли,/ и́миже мир от ле́сти многообразныя избавися.

Сла́ва, и ны́не, Богоро́дичен:

Яви́лася еси преиму́щи Херувимов, Всепетая,/ Седя́щаго бо на сих ра́менах, Пречистая Отроковице,/ на объятиих Твоих носи́ла еси и Младенца млекопи́тала еси./ Егoже прилежно моли о нас, поющих Тя, Богородицу воистинну.

В той же день. Преподобных Спиридо́на и Никоди́ма, просфорников Печерских, в Ближних пещерах почивающих

Тропа́рь, глас 4:

Хлебы́ прино́сныя руками своими творя,/ псалмопение непрестанное усты своими/ я́ко жертву хвалы приноша́ше Го́сподеви,/ со честны́м Никоди́мом, блаженне Спиридо́не,/ с ни́мже молися Христу Бо́гу о душах наших.

Конда́к, глас 3:

Да явиши разжженную твою́ ко Господу любовь,/ чудне Спиридо́не,/ разжегшуюся зело пещь/ мантиею своею заграждаеши/ и да покажеши источник вод дарований Духа в тебе́ живущ,/ одеждею своею, нося воду,/ угашаеши пламень огненный,/ тем, я́ко имея дерзновение ко Господу,/ со блаженным Никоди́мом/ молися присно о нас, поющих тя.


Источник: Минея - М. : Издат. совет Русской Православной Церкви, 2002-. 12 том. / Минея октябрь. - 2002. – 948 с. ISBN 5-94625-041-8

Комментарии для сайта Cackle