Минея. Сентябрь

 Во 4-й деньВ 5-й деньВ 6-й день 

В 5-й день

Святаго проро́ка Заха́рии, отца́ честна́го Иоа́нна Предте́чи

Ве́чер

На Го́споди, воззва́х: стихи́ры на 6, глас 4.

Подо́бен: Дал еси́ зна́мение:

Масть име́я на себе́,/ ри́зу же святу́ю,/ приснопа́мятне Заха́рие,/ я́ко А́нгел, Бо́гу послужи́л еси́,/ хода́тайствуя Соде́телю, и зда́нию, блаже́нне,/ и сказа́ния Я́ве Боже́ственнаго Ду́ха прие́мля./ Тем тя ублажа́ем/ и свято́е твое́ днесь соверша́ем торжество́,// Спа́са сла́вяще.

Отроча́ ви́дел еси́, ро́ждшееся от Отрокови́цы,/ Заха́рие богодохнове́нне,/ Отцу́ Собезнача́льно,/ и своему́ предъявле́нно проро́чествуеши отроча́ти:/ проро́к бу́деши и́стинно,/ Сего́ стези́ уготовля́я./ С ни́мже тя ублажа́ем/ и честно́е твое́ торжество́ свяще́нно пра́зднуем,// богоно́се пребога́те.

Храм жив и одушевле́н/ Боже́ственнаго Ду́ха был еси́/ и посреде́ хра́ма, сла́вне,/ Бо́гу служа́ чи́стым се́рдцем,/ непра́ведно закла́н был еси́,/ му́ченически соверша́я боже́ственное тече́ние твое́, достосла́вне./ Тем в Небе́сный храм вшел еси́/ кро́вию свое́ю,// прося́ очище́ния душа́м на́шим.

Сла́ва, глас 8. Самогла́сен. Иоа́нна Мона́ха:

Свяще́нства законнаго оде́ян и́стинно оде́ждею,/ по чи́ну Ааро́нову служи́л еси́/ и, предстоя́ в хра́ме,/ а́нгельский зрак я́ве ви́дел еси́, преблаже́нне./ Тем твое́ преставле́ние вси пою́ще до́лжно, Заха́рие,/ пе́сньми восхваля́ем тя,/ по ста́рости израсти́вша Иоа́нна сла́внаго:/ моли́ за ны ми́лостиваго Бо́га,// спасти́ся нам.

И ны́не, Богоро́дичен или́ Крестобогоро́дичен, глас то́йже.

Подо́бен: О, пресла́внаго чудесе́:

Что зри́мое виде́ние,/ е́же мои́ма очи́ма ви́дится, о Влады́ко,/ Содержа́й всю тварь,/ на Дре́во воздви́жен быв,/ и умира́еши, всем дая́й жизнь?/ Богоро́дица пла́чущи глаго́лаше,/ егда́ узре́ на Кресте́ возноси́ма/ из Ней неизрече́нно возсия́вшаго/ Бо́га и Челове́ка.

На стихо́вне Окто́иха.

Сла́ва, глас 2. Анато́лиево:

Я́ко чист иере́й во Свята́я Святы́х вшел еси́/ и, оде́ждею свяще́нною оде́ян,/ непоро́чно Бо́гу служи́л еси́,/ я́коже Ааро́н законополага́я/ и я́ко Моисе́й водя́ коле́на Изра́илева, звонце́в в чи́стом зна́мении./ Те́мже и убие́н был еси́,/ но кровь твоя́ пра́ведная спаса́тельное нам исцеле́ние бысть/ и, я́ко ми́ро благово́нное,/ слу́хи отверза́ет к ше́ствию ве́чныя жи́зни./ Заха́рие треблаже́нне,/ Крести́теля Иоа́нна роди́телю и Елисаве́ти сопру́жниче,/ приле́жно моли́ о душа́х на́ших.

И ны́не, Богоро́дичен или́ Крестобогоро́дичен, глас то́йже.

Подобен: Егда́ от Дре́ва:

Егда́ нескве́рная Агница ви́де Своего́ Агнца,/ на заколе́ние, я́ко Челове́ка, во́лею влеко́ма,/ пла́чущи глаго́лаше:/ безча́дствовати Мя ны́не тщи́шися, Христе́, Ро́ждшую Тя./ Что сие́ сотвори́л еси́, Изба́вителю вся́ческих?/ Оба́че воспева́ю и сла́влю Твою́ ю́же па́че ума́ и слова/ кра́йнюю бла́гость, Человеколю́бче.

Тропа́рь, глас 4:

Свяще́нства оде́ждею обложе́н, прему́дре,/ по зако́ну Бо́жию всесожже́ния прия́тна священноле́пно приноси́л еси́, Заха́рие,/ и был еси́ свети́льник и зри́тель та́йных,/ зна́мения в тебе́ благода́ти нося́ я́вственно, всему́дре,/ и, мече́м убие́н быв в хра́ме Бо́жии,/ Христо́в проро́че, с Предте́чею моли́// спасти́ся душа́м на́шим.

На у́трени

О́ба кано́на Окто́иха без му́ченичнов.

И святаго на 6. Творе́ние Феофа́ново. Глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м.

Па́мять, проро́че, твою́ восхвали́ти/ Ду́ха благода́ть молю́ помощи́ мне твои́м хода́тайством, взыва́я:/ Изба́вителю Бо́гу на́шему воспои́м.

Житие́ твое́ непоро́чно обре́теся,/ свяще́нства украси́ся оде́ждею и проро́чества светоно́сными сия́нии,/ богоглаго́ливе, блаже́нне.

Зако́нным венце́м главу́ украси́в, Заха́рие,/ яви́лся еси́ священноявле́нен, вопия́:/ Изба́вителю Бо́гу на́шему пои́м.

Богоро́дичен: Поди́ра оде́ждею, я́ко Ааро́н, оде́ян,/ ю́же от ко́рене Иессе́ева прозя́бшую Отрокови́цу прия́л есй,/ Изба́вителя во чре́ве носи́вшую.

Песнь 3

Ирмо́с: Ты еси́ Утвержде́ние/ притека́ющих к Тебе́, Го́споди,/ Ты еси́ Свет омраче́нных,// и пое́т Тя дух мой.

Егда́ кади́ло сложе́ния приноси́л еси́, архиере́е,/ тогда́ Предте́чи прия́л еси́ провозвеще́ние.

Ми́ром свяще́ния свяще́нствовати тя пома́за, я́ко Ааро́на,/ тем виде́ния Ангелова сподо́бился еси́.

У́тро, провозвеща́ющее вселе́нней Тя, Со́лнца Разу́мнаго, Спа́се,/ Заха́рия Иоа́нна роди́л есть.

Богоро́дичен: Упра́ви житие́ мое́, Богороди́тельнице Всечи́стая и жизнь,/ я́же Заха́риин дом уясни́вшая.

Седа́лен, глас 8.

Подо́бен: Повеле́нное:

Свяще́нствовав Бо́гу по зако́ну/ и проро́чествовав Христа́ из Де́вы, Заха́рие, воплоще́нна от Ду́ха Свя́та,/ яви́лся еси́ вселе́нней столп све́тел,/ с высоты́ Пра́вды Восто́ка, весь мир осия́юща и в путь ми́рен направля́юща но́ги на́ша,/ ре́кл еси́, спаса́юща род наш.

Сла́ва, и ны́не, Богоро́дичен:

Я́же Непреме́ннаго Бо́га поро́ждшая,/ пременя́емое при́сно се́рдце мое́ грехо́м и ле́ностию, прило́гми льсти́ваго,/ утверди́, Блага́я, моли́твами Ма́терними Твои́ми,/ я́ко да и аз благода́рно сла́влю Тя, Богороди́тельнице Мари́е,/ поми́луй ста́до Твое́, е́же стяжа́ла еси́, Всенепоро́чная.

Крестобогоро́дичен:

Сы́на Твоего́ и Бо́га Кресто́м, Де́во, соблюда́еми при́сно,/ де́монския прило́ги побежда́ем и кова́рствия,/ госпо́дственно Тя Богоро́дицу и и́стинно пою́ще,/ и любо́вию, вси ро́ди, ублажа́ем, Чи́стая, я́коже прорекла́ еси́./ Тем согреше́ний нам оставле́ние моли́твами Твои́ми да́руй.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́// и просла́вих Твое́ Божество́.

Проро́к Твой, Влады́ко, о́бразы зако́нными ве́рно служа́ше Тебе́/ и благода́ти сподо́бися усмотри́ти Твою́ и́стину.

Све́том Свет прия́л еси́, мра́чнейшим ты ясне́йший, преблаже́нне:/ зако́ном бо и благода́ть ны́не тебе́ приложи́ся.

Бо́гу предстоя́й, боже́ственный Гаврии́л,/ благовеству́я, яви́ тебе́, блаже́нне, глас Сло́ва и Предте́чу.

Богоро́дичен: Чи́стое жили́ще Соде́тель, Де́во, тва́ри обре́т Тя, всели́ся,/ Елисаве́тино разреши́вый непло́дство.

Песнь 5

Ирмо́с: У́тренююще, вопия́м Ти:/ Го́споди, спаси́ ны,/ Ты бо еси́ Бог наш,// ра́зве Теба́ ино́го не ве́мы.

Кида́рь положи́ся на главе́ твое́й, о проро́че,/ в начерта́нии имущ и́стинное Боже́ственное свяще́ние.

Ра́дуется тварь рождество́м твои́м, архиере́е,/ ты бо прозя́бл еси́ покая́ния пропове́дника.

Укра́шено твое́ житие́ препроводи́в,/ за́поведи бо вся Госпо́дня с Елисаве́тою соверши́л еси́.

Богоро́дичен: Направля́ется к пе́нию язы́к твой, богоглаго́ливе,/ Неискусобра́чную бо во чре́ве нося́щу ви́дел еси́.

Песнь 6

Ирмо́с: Ри́зу мне пода́ждь све́тлу,/ одея́йся све́том, я́ко ри́зою,// Многоми́лостиве Христе́ Бо́же наш.

Зако́на служа́й се́ни,/ яви́ся и благода́ти пропове́дник,/ Спа́се наш, сподо́бися бо ви́дети Твое́ воплоще́ние.

Су́дными словесы́ укра́шься,/ Сло́во присносу́щное, Плоть нося́що,/ Заха́рие свяще́нне, прия́л еси́.

Яви́лся еси́ внутрь хра́ма, служа́ Бо́гу,/ тайнниче богодухнове́нне,/ иере́й быв досточу́ден.

Богоро́дичен: Спа́са, Богома́ти, во утро́бе, Де́во, носи́щи, Сло́ва Безнача́льнаго,/ Елисаве́ти позна́лася еси́ проро́чице.

Конда́к, глас 3.

Подо́бен: Де́ва днесь:

Проро́к днесь и свяще́нник Вы́шняго,/ Заха́рия предложи́, Предте́чев роди́тель,/ трапе́зу своей па́мяти,/ ве́рный пита́я, питие́ бо пра́вды всем раствори́в,/ сего́ ра́ди скончава́ется,// я́ко боже́ственный таи́нник Бо́жия благода́ти.

И́кос:

Зако́на молча́нием иера́рх связа́ся Ангела гла́сом,/ А́нгела прие́м Христо́ва прише́ствия, проро́ка и таи́нника,/ с Елисаве́тию непло́дною и целому́дренною,/ и Того́ Рождество́м обнови́ся благода́ть и избавле́ние/ и примире́ние на́ше всеми́рное./ Сего́ пропове́да А́гнца, и Соде́теля,/ и естеству́ Обнови́теля, от неплодныя утро́бы плод подаю́ща,/ Сы́на же, я́вльшася из Де́вы,/ я́ко боже́ственный таи́нник Бо́жия благода́ти.

Песнь 7

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь преложи́ша, вопию́ще:// благослове́н еси́, Го́споди Бо́же, во ве́ки.

Егда́ глас вопию́щаго прии́де от непло́дныя,/ па́че естества́ твоего́ язы́ка у́зы разреши́, зва́ти:/ благослове́н еси́, Го́споди Бо́же, во ве́ки.

Люби́мич роди́ся Женихо́в от непло́дове,/ Рождество́ Де́вы провозвеща́я Я́ве Предте́ча ве́рою зову́щим:/ благослове́н еси́, Го́споди Бо́же, во ве́ки.

Весь был еси́, Заха́рие, боже́ственный орга́н Ду́ха, треблаже́нне,/ и проро́ка твое́ провозвеща́ше отроча́,/ благослове́н еси́, зову́ща, Го́споди Бо́же, во ве́ки.

Богоро́дичен: Зако́на исполне́ние Тя, Отроковце,/ глави́зну всего́ проро́чествия Заха́рия зря, позна́ше, вопия́:/ благослове́н, Пречи́стая, Плод Твоего́ чре́ва.

Песнь 8

Ирмо́с: На горе́ святе́й просла́вльшася/ и в купине́ огне́м При́сно де́вы/ Моисе́ови та́йну я́вльшаго/ Го́спода по́йте// и превозноси́те во вся ве́ки.

И́стины показа́ся проро́к,/ Христо́вы бо стези́ Иоа́нн предгряды́й угото́ва Предте́ча,/ блаже́нне иера́рше,/ Его́же превозно́сим во вся ве́ки.

Вити́йствуя, благослови́л еси́ Влады́ку, спасе́ние нам пода́вшаго,/ от Дави́да возсия́вшаго нам пло́тию Го́спода сла́вы,/ Его́же превозно́сим во вся ве́ки.

Дарова́ний вели́ких сподо́бися, богоявле́ние,/ Предте́чу роди́в, проро́ков всех вы́шшаго,/ Го́спода пою́ща и превознося́ща во вся ве́ки.

Богоро́дичен: Иера́рх ку́пно и богопропове́дник, Заха́рия/ Де́ве и Ма́тери, Го́спода нося́щей тва́ри, ра́дуяся, поклони́ся,/ Юже превозно́сим во вся ве́ки.

Песнь 9

Ирмо́с: Вои́стину Богоро́дицу/ Тя испове́дуем,/ спасе́ннии Тобо́ю, Де́во Чи́стая,// с безпло́тными ли́ки Тя велича́юще.

Испо́лнился еси́ вдохнове́ния Уте́шителева / и благослови́ти нача́т Го́спода,/ священнотаи́нниче богому́дре и богоблаже́нне.

Глаго́лов исхожде́ния Арха́нгеловых узре́в,/ богоглаго́ливе прехва́льне,/ к благослове́нию язы́к а́бие подви́гнул еси́.

Страда́ния венцы́ и свяще́нства/ и просвеще́нием проро́чества украси́лся еси́,/ о Заха́рие преблаже́нне и богоглаго́ливе!

Богоро́дичен: Све́та су́щи прия́телище,/ просвети́, Де́во, помраче́нную ду́шу мою́ страстьми́/ и кроме́шния мя тьмы изба́ви моли́твами Твои́ми.

Свети́лен.

Подо́бен: Све́те неизме́нный:

Пе́рвее гла́сом Ангела умолча́л еси́ в невхо́дных/ за хотя́щее бы́ти прозябе́ние из тебе́ гла́са вопию́щаго/ и ны́не молчи́ши о́наго ра́ди,/ пред невхо́дными заколе́н быв, Заха́рие.

Богоро́дичен: Свет из Све́та возсия́в, Сло́ве, пре́жде денни́цы безле́тно,/ Свет из Ма́тере под ле́том непреме́нно проше́л еси́,/ сия́нии светолу́чными концы́ ми́ра просвеща́я, я́ко Свет ми́ра.

На стихо́вне Окто́иха.

Сла́ва, глас 8:

Же́ртвы принося́ по зако́ну, Заха́рие,/ ро́ждшемуся Бо́гу прине́ся еси́ святу́ю твою́ ду́шу/ во Свята́я Святы́х,/ свя́та преставле́ния/ ору́жием самово́льным,// в преддве́рии святи́лища, я́ко а́гнец, закала́емь.

И ны́не, Богоро́дичен или́ Крестобогоро́дичен.

Подо́бен: Го́споди, а́ще и на суди́щи:

Го́споди,/ егда́ Тя, Со́лнца Пра́вды,/ со́лнце ви́де/ на Дре́ве пове́шена,/ лучи́ скры,/ и луна́ свет во тьму преложи́,/ Всенепоро́чная же Твоя́ Ма́ти// утро́бою уязвля́шеся.

На литурги́и

Блаже́нны Окто́иха, на 4, и проро́ка, песнь 3-я на 4. Проки́мен, глас 7: Возвесели́тся пра́ведник о Го́споде// и упова́ет на Него́. Стих: Услы́ши, Бо́же, глас мой: Апо́стол ко Евре́ем, зача́ло 314. Аллилу́йя, глас 7: Свет возсия́ пра́веднику: Ева́нгелие от Матфе́я, зача́ло 96. Прича́стен: В па́мять ве́чную бу́дет пра́ведник:

И́на слу́жба

того́же свята́го проро́ка Заха́рии и святы́я и пра́ведныя Елисаве́ти, пое́мая, иде́же храм их

Ве́чер

Блаже́н муж: 1-й антифо́н.

На Го́споди, воззва́х: стихи́ры проро́ка на 4 и святы́я на 4, глас 1.

Подо́бен: Небе́сных чино́в:

Его́же исхо́ди искони́ дней ве́чных,/ Сего́ воплоща́емаго во утро́бе Деви́ческой ви́дела еси́,/ егда́ Ма́терь Го́спода своего́ нарекла́ еси́/ Де́ву, целова́вшую тя,/ с Не́юже моли́ся, пра́ведная Елисаве́то,// да спасе́т ду́ши на́ша.

Благослове́н Плод есть чре́ва Деви́ческа,/ исполня́яй вся́ческая,/ восклица́ла еси́, преблаже́нная Елисаве́то,/ Ду́хом Бо́жиим дви́жима, та́ко глаго́лала еси́;/ в ле́снех у́бо тя почита́юще,// в Тро́ице сла́вимаго Бо́га велича́ем.

Глаго́ланное от Го́спода к Деви́це бысть,/ я́ко роди́т Иису́са,/ спаса́ющаго лю́ди Своя́ от грех их,/ бу́дет соверше́ние глаго́ланным к Ней,/ веща́ла еси́ Ду́хом Святы́м, Елисаве́то,// досто́йно у́бо тя похва́льными венцы́ венча́ем.

Сла́ва, проро́ка, глас 8.

И ны́не, Богоро́дичен, глас то́йже: Царь Небе́сный:

Вход. Проки́мен дне и чте́ния три.

Бытия́ чте́ние (глава́ 18):

Яви́ся Бог Авраа́му у ду́ба Мамври́а,/ седя́щему пред две́рьми се́ни своея́ в полу́дне,/ воззре́в же очи́ма свои́ма, и узре́,/ и се Трие́ Му́жи стоя́ху пря́мо ему́./ И ви́дев Я, притече́ в сре́тение Им от две́рий се́ни своея́,/ и поклони́ся до земли́, и рече́:/ Го́споди, а́ще обрето́х благода́ть пред Лицо́м Твои́м, не мини́ раба́ Твоего́,/ да принесе́тся вода́, и омы́ются но́ги Ва́ша,/ и прохладите́ся под ду́бом, и принесу́ хле́бы, да я́сте./ И посе́м минете́ на путь Свой, его́же ра́ди соврати́стеся се́мо к рабу́ Своему́./ И ре́ша: та́ко сотвори́, я́коже глаго́ла./ И потща́вся Авраа́м в сень к Са́рре, и рече́ ей:/ ускори́ взя́ти три спу́ды муки́ чи́сты и сотвори́ потре́бники./ И тече́ Авраа́м в кра́вы, и поя́ теле́ц млад и добр,/ и даде́ и рабу́, и ускори́ пригото́вити е./ И взя ма́сло и млеко́ и теле́ц, е́же пригото́ва, и поста́ви пред Ни́ми, и ядо́ша./ Сам же стоя́ше пред Ни́ми под дре́вом,/ и реко́ста к нему́: где Са́рра, жена́ твоя́?/ Он же, отвеща́в, рече́: се в се́ни./ И рече́: се обра́щься прииду́ к тебе́, о вре́мени сем в часе́,/ и роди́т сы́на Са́рра, жена́ твоя́./ Са́рра же услы́ша пред две́рьми се́ни, су́щи за ним./ Авраа́м же и Са́рра ста́ра бе́ста, жи́вши дни мно́ги,/ и мину́ла бя́ше Са́рры же́нская не́мощь. И посмея́ся Са́рра, глаго́лющи в себе́:/ не у́бо бы́ло ми досе́ле, се муж мой стар./ И рече́ Госпо́дь ко Авраа́му: что я́ко посмея́ся Са́рра, к себе́ глаго́лющи:/ и а́ще пра́во рожду́, аз бо состаре́хся?/ Еда́ не́мощно есть от Бо́га вся́ко сло́во?/ В сие́ вре́мя возвращу́ся, и бу́дет Са́рре сын.

Суде́й Изра́илевых чте́ние (глава́ 13):

Бя́ше муж во Апса́ре от пле́мене Да́нова, и́мя же ему́ Мано́е,/ и жена́ ему́ бя́ше непло́ды и не ражда́ше./ И яви́ся Ангел Госпо́день к жене́ и рече́ к ней:/ се у́бо ты непло́ды и не роди́ши,/ се бо зачне́ши и роди́ши сы́на, и ны́не снабди́ у́бо./ Не пий вина́, ни сике́ра и не яждь нечи́сто ничто́же, я́ко се ты в утро́бе прии́меши и породи́ши сы́на./ И желе́зо на главу́ его́ не взы́дет, я́ко назоре́й Бо́гови бу́дет сие́ отроча́ из чре́ва./ И сей на́чнет спасти́ Изра́иля из рука́ иноплеме́нник./ И вни́де жена́ и рече́ му́жеви своему́, глаго́лющи:/ челове́к Бо́жий прии́де ко мне, и о́браз его́, я́ко о́браз А́нгела Бо́жия, стра́шен зело́,/ и вопроша́х его́: отку́ду еси́? И и́мене своего́ не пове́да ми,/ и рече́ ми: се ты во утро́бе зачне́ши и роди́ши сы́на./ И ны́не не пий вина́, ни олови́ны, и не яждь ничто́же нечи́сто,/ я́ко назоре́й Бо́гу бу́дет о́трочищ, от утро́бы до дне сме́рти его́./ И помоли́ся Мано́е к Го́сподеви, и рече́:/ о Го́споди! Челове́к Бо́жий, его́же Ты посла́, да прии́дет к нам и нака́жет ны, что сотвори́м отроча́ти ражда́ющемуся./ И послу́ша Бог моли́твы Мано́евы. И прии́де па́ки А́нгел Бо́жий к жене́./ Сия́ же седя́ще на селе́, Мано́е же, муж ея́, не бя́ше с не́ю./ И потща́ся жена́, и, те́кши ско́ро, пове́да му́жу своему́, и рече́ к нему́: се яви́ся ми муж, и́же приходи́ в день он ко мне./ И воста́в, и́де Мано́е в след жены́ своея́, и прии́де к му́жу,/ и рече́ ему́: ты ли еси́ муж, глаго́лавый к жене́ мое́й?/ И рече́ А́нгел: аз есмь./ И рече́ Мано́е: ныне у́бо да прии́дет сло́во твое́, что есть суд отроча́те и что есть творе́ние его́?/ И рече́ А́нгел Госпо́день к Мано́еви: от сего́, е́же глаго́лах жене́, да сохрана́тся от всего́;/ и от всего́, е́же исхо́дит из виногра́да, да не яст,/ и вина́ и сике́ра да не пие́т, и всего́ нечи́ста да не яст,/ и все, ели́ко запове́дах, сие́ да снабди́т./ И рече́ Мано́е ко А́нгелу Бо́жию: да тя пону́дим и сотвори́м пред тобо́ю ко́злище от коз./ И рече́ А́нгел Бо́жий к Мано́еви: а́ще мя ну́диши, и не ям хле́ба твоего́./ Но а́ще сотвори́ши всесожже́ние Го́сподеви, то вознеси́ е./ Не ве́дяще бо Мано́е, я́ко А́нгел Госпо́день есть./ И рече́ Мано́е ко А́нгелу Госпо́дню: что есть и́мя твое́, да егда́ сбу́дется сло́во твое́, просла́вим тя?/ И рече́ ему́ Ангел Госпо́день: почто́ се вопроша́еши и́мене моего́? Се же есть чу́дно./ И взя Мано́е ко́злищ от коз и тре́бу, и вознесе́ на ка́мень Го́сподеви, и сотвори́ чу́дно./ Мано́е же и жена́ его́ гляде́ста. И бысть, егда́ пла́мень взы́де вы́ше олтаря́ до небеса́,/ и взы́де А́нгел Госпо́день в пла́мени олтаря́./ Мано́е же и жена́ его́ смотря́ста, и падо́ста ниц на земли́.

Царств пе́рвых чте́ние (глава́ 1):

Воста́вши Анна по яде́нии их, и́де в Сило́м и ста пред Го́сподем./ Или́й же, жрец, седя́ше на престо́ле при пра́зе две́ри хра́ма Госпо́дня./ И та умиле́нною душе́ю поклони́ся Го́споду и, пла́чущи, пропла́ка./ И помоли́ся моли́твою к Го́споду, глаго́лющи:/ Адонаи́ Го́споди Елои́ Савао́ф, а́ще, призря́, при́зриши на смире́ние рабы́ Твоей,/ и помяне́ши мя, и да́си рабе́ Твое́й се́мя му́жеско, то дам е пред Тобо́ю в дар до дне сме́рти его́,/ вина́ и пия́нства не пие́т, и желе́зо не взы́дет на главу́ его́./ И бысть, егда́ умно́жи моля́щися пред Го́сподем, Или́й же, жрец, взира́ше на уста́ ей./ И та глаго́лаше в се́рдцы свое́м, то́кмо устне́ ея́ двиза́стеся, а глас ея́ не слы́шашеся./ И мня́ше ю Или́й пия́ну су́щу. И рече́ ей Или́й:/ доко́ле пия́на еси́? Отыми́ вино́ твое́ и иди́ от ме́ста Госпо́дня./ И отвеща́ Анна, и рече́: ни, господи́не мой, но жена́ в же́сток день аз есмь,/ вина́ и пия́нства не пих, но излия́х пред Го́сподем ду́шу мою́./ Не даждь рабы́ твоей дще́рем поруга́ния,/ я́ко от мно́жества уны́ния моего́/ и от мно́жества се́тования моего́ стоя́х да́же досе́ле./ И отвеща́ Или́й, и рече́ к ней:/ иди́ с ми́ром, Бог Изра́илев даст ти вся́ко проше́ние твое́, его́же про́сиши от Него́./ И рече́ Анна: да обря́щет раба́ твоя́ благода́ть пред очи́ма твои́ма./ И и́де жена́ путе́м свои́м, и вни́де во оби́тель свою́, и яде́ с му́жем свои́м и пи, и лице́ ея́ не испаде́ ктому́./ И у́треневаша зау́тра,/ и поклони́шася Го́сподеви, и идо́ша путе́м свои́м./ И вни́де Елкана́ в дом свой во Ексармафе́м,/ и разуме́ Елкана́ жену́ свою́ Анну./ И помяну́ ю Госпо́дь, и зача́т,/ и бысть во вре́мя дний, и роди́ Анна сы́на/ и нарече́ и́мя ему́ Саму́ил,/ я́ко от Го́спода Бо́га Савао́фа испроси́х его́.

На лити́и стихи́ра хра́ма.

И святы́я, глас 6:

Иоа́нн, ви́дев Иису́са:/ се А́гнец Бо́жий, возопи́,/ исполня́яй Иса́иино прорече́ние;/ коне́ц проро́ком есть сын твой, Елисаве́то,// досто́йно у́бо тя да ублажа́ют лю́дие.

Сына твоего́ десни́це/ главу́ преклони́ Иису́с,/ Госпо́дь госпо́дствующих сый/ и Влады́ка владе́ющих:/ ве́лия сла́ва твоя',// достохва́льная Елисаве́то.

Облича́ше велехва́льныя фарисе́и,/ глаго́ля к ним:/ порожде́ния ехи́днина,/ сотвори́те плоды́ досто́йны покая́ния,/ глас сый вопию́щаго в пусты́ни,/ и почита́шеся учи́тель:/ такова́ сы́на ма́ти еси́,// Елисаве́то свята́я.

Сла́ва, глас 6:

За́поведи Бо́жия храня́щи,/ плод, все́льшийся в тя, живы́я ве́ры,/ приноси́ла еси́, богому́драя Елисаве́то:/ ки́ими тя досто́йными пе́нии,/ ки́ими досто́йными похвала́ми// увенча́ем, ве́рнии?

И ны́не, Богоро́дичен, глас то́йже: Творе́ц и Изба́витель мой, Пречи́стая:

На стихо́вне стихи́ры, глас 1:

Мно́гих досто́йна еси́ хвале́ний,/ богому́драя Елисаве́то,/ пра́ведною имену́емая сло́вом Бо́жиим,/ в за́поведех Госпо́дних ходи́вшая,// ми́лостию Бо́жиею подвиза́ема.

Стих: Честна́ пред Го́сподем/ смерть преподо́бных Его́.

Нелицеме́рную любо́вь к Бо́гу,/ нелицеме́рную любо́вь к бли́жним име́ла еси́,/ в за́поведех Госпо́дних ходя́щи,/ многосла́вная Елисаве́то:/ плод се ве́ры твоея́ бысть.// Тем, торжеству́юще, ублажа́ем тя.

Стих: Блаже́н муж, боя́йся Го́спода,// в за́поведех Его́ восхо́щет зело́.

Непло́дней и заматоре́вшей,/ пресла́вный плод чре́ва дарова́ся тебе́/ от Всеще́драго Бо́га,/ покая́ния пропове́дник./ Тем тя ублажа́юще,// всеси́льную ми́лость Бо́жию велича́ем.

Сла́ва, проро́ка, глас 2.

И ны́не, Богоро́дичен, глас то́йже: О, чудесе́ новаго:

Тропа́рь, глас 2:

Пра́ведных Твои́х Заха́рии и Елисаве́ти,/ Го́споди, па́мять пра́зднующе,/ те́ми мо́лим Тя:// спаси́ ду́ши на́ша.

На у́трени

На Бог Госпо́дь: тропа́рь святы́х два́жды.

Сла́ва, и ны́не, Богоро́дичен.

Но 1-м стихосло́вии седа́лен, глас 4.

Подо́бен: Удиви́ся Ио́сиф:

Ве́лие человеколю́бие Свое́, е́же к земноро́дным, Всеблаги́й Бог и́мать,/ на тебе́ показа́, Елисаве́то,/ я́ко пра́ведну тя бы́ти со Заха́рием по неизрече́нней бла́гости Свое́й изво́ли./ Ка́я благодаре́ния Тебе́, Ми́лостиве, ка́я пе́ния принесе́м,/ гре́шнии раби́ Твои́, Влады́ко?

Сла́ва, и ны́не:

Свы́ше наше́дшаго Ду́ха Свята́го осене́нием зачала́ еси́, Де́во Всенепоро́чная,/ и родила́ еси́ пре́жде век Су́щаго,/ да торжеству́ет тварь, хва́лящи Тя и пресла́вное Рождество́ Твое́ велича́ющи,/ и да пое́т, ра́достию духо́вною веселя́щися,/ Изба́вителя душа́м на́шим роди́вшая, еди́на Благослове́нная.

По 2-м стихосло́вии седа́лен, глас 4.

Подо́бен: Удиви́ся Ио́сиф:

Всера́достное дарова́ние А́нне непло́дной Саму́ил бысть,/ всера́достное дая́ние и тебе́, пра́ведная Елисаве́то, благода́ти тезоимени́тый./ Ди́вная ми́лость Твоя́ к челове́ком, Бо́же,/ сла́ва мно́гим щедро́там Твои́м, сла́ва благоутро́бию Твоему́!

Сла́ва, и ны́не, Богоро́дичен:

Ма́ти неискусобра́чная,/ Престо́л херуви́мский показа́ся утро́ба Твоя́ Бо́га непристу́пнаго,/ Ты бо еди́на вмести́лище еси́ Бо́жие, Бо́га ро́ждши воплоще́ннаго,/ от всех грехо́в избавля́ющаго рабы́ Своя́./ Тем досто́йно есть се́рдцем и устна́ми ублажа́ти Тя.

Велича́ние:

Велича́ем вас,/ святи́и пра́веднии Заха́рие и Елисаве́то,/ и чтим святу́ю па́мять ва́шу,/ вы бо мо́лите о нас// Христа́ Бо́га на́шего.

Избра́нный псало́м:

Благослове́н Госпо́дь Бог Изра́илев, я́ко посети́ и сотвори́ избавле́ние лю́дем Свои́м./ И воздви́же рог спасе́ния нам в дому́ Дави́дове, о́трока Своего́./ Кля́тся Госпо́дь Дави́ду и́стиною и не отве́ржется ея́./ Та́мо возращу́ рог Дави́ду, угото́вах свети́льник пома́занному Моему́./ Си́льно на земли́ бу́дет се́мя его́./ Род пра́вых благослови́тся./ Служи́ти Ему́ в преподо́бии и пра́вде пред Ним вся дни живота́ на́шего./ И ты, отроча́, проро́к Вышняго нарече́шися,/ преды́деши бо пред Лицо́м Госпо́дним, угото́вати пути́ Его́,/ да́ти ра́зум спасе́ния лю́дем Его́/ во оставле́ние грехо́в их, милосе́рдия ра́ди ми́лости Бо́га на́шего./ Напра́вити но́ги на́ша на путь ми́ра./ Госпо́дь лю́бит пра́ведники,/ благоволи́т Госпо́дь в боя́щихся Его́ и во упова́ющих на ми́лость Его́./ Хвало́ Изра́илева, на Тя упова́ша отцы́ на́ши, упова́ша, и изба́вил еси́ их./ Сей род и́щущих Го́спода, и́щущих Лице́ Бо́га Иа́ковля./ Блаже́ни вси боя́щиися Го́спода, ходя́щии в путе́х Его́./ Весть Госпо́дь пути́ непоро́чных, и достоя́ние их во ве́ки бу́дет./ Блаже́ни лю́дие, и́мже Госпо́дь Бог их./ Хвали́теся вси пра́вии се́рдцем./ Пра́вым подоба́ет похвала́.

Сла́ва, и ны́не: Аллилу́йя: три́жды.

По полиеле́и седа́лен, глас 4.

Подо́бен: Удиви́ся Ио́сиф:

В повеле́ния Бо́жия процвета́юще со преблаже́нным Заха́рием,/ Бо́жиею руко́ю подвиза́ема, дще́рей Ааро́новых о́трасле,/ всехва́льная Елисаве́то, моли́ Преблаго́го Влады́ку,/ да прино́сим и мы, гре́шнии, добр плод живы́я ве́ры.

Сла́ва, и ны́не, Богоро́дичен:

Еди́на Роди́тельница Бо́гу, еди́на Присноде́во, Пречи́стая Богоневе́сто,/ я́ко родила́ еси́ Де́вою и пребыва́еши нетле́нна./ Тем Тя А́нгел и челове́к чинонача́лия велича́ют.

Степе́нна, 1-й антифо́н 4-го гла́са. Проки́мен, глас 4: Святы́м, и́же суть на земли́ Его́,// удиви́ Госпо́дь вся хоте́ния Своя́ в них. Стих: Ди́вен Бог во святы́х Свои́х, Бог Изра́илев. Вся́кое дыха́ние: Ева́нгелие от Луки́, зача́ло 2, е́же чте́тся на Рождество́ Предте́чи, его́же нача́ло: Бысть во дни И́рода, царя́ Иуде́йска: Коне́ц: Призре́ отъя́ти поноше́ние мое́ в челове́цех.

По 50-м псалме́ стихи́ра, глас 1:

Глаго́ланное от Го́спода к Деви́це бысть: (зри страни́цу 146).

Кано́н Богоро́дице со ирмосо́м на 6 и проро́ку на 4.

И святе́й на 4, глас 8.

Песнь 1

Ирмо́с: Сокруши́вшему бра́ни мы́шцею Свое́ю/ и прове́дшему Изра́иля сквозе́ Чермно́е мо́ре,/ пои́м Ему́, я́ко Изба́вителю на́шему Бо́гу,// я́ко просла́вися.

И́стинную любо́вь име́ла еси́ к Бо́гу, боголюби́вая Елисаве́то, за́поведи Его́ храня́щи./ Сей бо и́стинно лю́бит Бо́га, и́же за́поведи Его́ соблюда́ет,/ боголюби́вую у́бо тя хвала́ми возвели́чим.

Благода́тию спасе́ни, доброде́тельми угожда́ти и́мамы Бо́гу,/ я́коже и Елисаве́ть во всех за́поведех Госпо́дних ходи́ без поро́ка,/ ю́же досто́йно пе́сньми да ублажи́м.

Де́йствуяй вся во всех, Бо́же,/ и в блаже́нной Елисаве́ти вееси́льную ми́лость Твою́ явля́л еси́:/ о всех де́лех Твои́х благодаре́ние Тебе́ прино́сим.

Богоро́дичен: Исаа́ка Са́рра ро́ждши непло́ды, ра́довашеся:/ Тебе́, Де́вствующей и ро́ждшей Го́спода Иису́са,/ па́че ра́доватися подоба́ет, Пречи́стая.

Катава́сия: Крест начерта́в:

Песнь 3

Ирмо́с: Утверди́ся се́рдце мое́ в Го́споде,/ вознесе́ся рог мой в Бо́зе мое́м,/ разшири́шася на враги́ моя́ уста́ моя́,// возвесели́хся о спасе́нии Твое́м.

Пра́ведну тя с Заха́рием, блаже́нная Елисаве́то, Дух Святы́й в Писа́нии нарече́:/ бе́ста пра́ведна пред Бо́гом, глаго́ля./ Месси́я же Пра́вда нам есть от Бо́га, Месси́ею у́бо оправда́на была́ еси́./ Кто похва́льными пе́сньми тя не возвели́чит?

Не оправди́тся пред Го́сподем всяк живы́й,/ ты же пра́ведна была́ еси́, приснопа́мятная Елисаве́то;/ Госпо́дь Иису́с освяще́ние всем есть,/ свя́ту тя да восхваля́ет всяк.

Ди́вен во святы́х, Бо́же,/ пресла́вными и в блаже́нней Елисаве́ти удиви́лся еси́,/ песнь благода́рственную прино́сим Тебе́, Всеще́дрому.

Богоро́дичен: Непло́ды в ста́рости ро́ждши Са́рра,/ ма́ти су́щи, ублажа́шеся./ Тя, Ма́терь и Де́ву, Пречи́стая,/ досто́йно восхвали́ти недоуме́ем.

Конда́к, и́кос и седа́лен проро́ка.

Сла́ва, седа́лен святы́я, глас 4:

Воплоти́вшуся уже́ Месси́и, пе́рвую тя благове́стницу слы́шим,/ егда́ к целова́вшей тя богоизбра́нней Отрокови́це со у́жасом глаго́лала еси́:/ отку́ду мне се, да прии́де Ма́ти Го́спода Моего́ ко мне?/ Восхваля́юще у́бо тя, вопие́м:/ ра́дуйся, зерца́ло, та́йны Бо́жия нам явля́ющее.

И ны́не, Богоро́дичен:

Богоро́дицу Тя испове́дуем, Влады́чице,/ Сы́ном Твои́м, ро́ждшимся от Тебе́, спа́сшийся гре́шнии раби́,/ Бо́га бо непостижи́мо родила́ еси́,/ Кро́вию Свое́ю очища́ющаго нас от вся́каго греха́/ и в ра́йское весе́лие приводя́щаго,/ Его́же с Тобо́ю восхваля́ем, веселя́щеся.

Песнь 4

Ирмо́с : Проро́к Авваку́м у́мныма очи́ма/ прови́де, Го́споди, прише́ствие Твое́,/ тем и вопия́ше:/ от ю́га прии́дет Бог.// Сла́ва си́ле Твое́й, сла́ва снизхожде́нию Твоему́.

Жена́ су́щи Заха́риина, во всех за́поведех без поро́ка ходи́ла еси́;/ ины́я же де́вы бы́ша, и еле́я доброде́телей не име́яху:/ лу́чше зва́ние твое́ па́че де́вства о́нех,/ всяк во́зраст да сла́вит тя.

Па́вел, ве́рных обруча́я Христо́ви, и бра́чных де́вою чи́стою нарече́, глаго́ля:/ обручи́х вас Еди́ному Му́жу, де́ву чи́сту;/ кольми́ па́че, во всех за́поведех ходи́вшую, тя к му́дрым де́вам Бог сочета́, богому́драя Елисаве́то,/ досто́йно у́бо тя восхваля́ем.

Я́ко столп о́гненный и о́блак путь ше́ствующему к земле́ обетова́нней Изра́илю,/ та́ко ходи́вшую в за́поведех Госпо́дних дво́ицу, блаже́ннаго Заха́рию и Елисаве́ту,/ во о́браз богоугожде́ния нам предъяви́л еси́, Бо́же;/ неизрече́нно человеколю́бие Твое́ есть, Всеси́льный Влады́ко.

Богоро́дичен: Исаа́ка рожде́ние от безча́дныя ма́тере поноше́ние отъя́т/ и возвели́чи сла́вою,/ Ро́ждшееся от Тебе́ Свя́то пе́рвейшую сла́ву принесе́ Тебе́, Пречи́стая Де́во и Ма́ти:/ всяк земноро́дный да сла́вит Тя.

Песнь 5

Ирмо́с: Го́споди Бо́же наш, мир даждь нам,/ Го́споди Бо́же наш, стяжи́ ны,/ Го́споди, ра́зве Тебе́ ино́го не ве́мы,// и́мя Твое́ имену́ем.

Его́же Бог А́нгелом у Малахи́и нарече́, глаго́ля:/ се Аз посыла́ю Ангела Моего́ пред Лицо́м Твои́м,/ сего́ ты, непло́дная, родила́ еси́, Елисаве́ть,/ досто́йными у́бо тя венча́ем похвала́ми.

Глас вопию́щаго Бо́га/ рожде́нное от тебе́, всечестна́я Елисаве́то, есть./ Тем, я́ко уста́ Бо́жия, кто не восхва́лит тя?

Я́ко от ка́мене иногда́ непло́дна во́ду лю́дем Твои́м источи́л еси́, Бо́же,/ та́ко от непло́дныя Елисаве́ти покая́нию пропове́дателя дарова́л еси́:/ вся пресла́вная Твоя́, Всеси́льный Влады́ко.

Богоро́дичен: Сугу́б плод, Ио́сифа и Вениами́на, Рахи́ль непло́ды име́,/ почита́ется плодоро́дием,/ Ты же Еди́наго Ипоста́сию, сугу́ба естество́м родила́ еси́, Де́во,/ неизрече́нная сла́ва Твоя́, Ма́ти Емману́илева.

Песнь 6

Ирмо́с: я́ко во́ды морски́я, Человеколю́бче,/ волна́ми жите́йскими обурева́юся,/ те́мже, я́ко Ио́на, та́ко вопию́ Ти:/ возведи́ от тли живо́т мои,// благоутро́бне Го́споди.

Во утро́бе твое́й сый Иоа́нн, Елисаве́то свята́я,/ ви́дев Спа́са своего́, и взыгра́ся младе́нец./ Блаже́нна суть ложесна́ твоя́, я́вльшая младе́нца,/ позна́вшаго Спасе́ние свое́, Иису́са.

Ду́хом Святы́м укрепля́ема проти́во всех хоте́ний,/ сы́на своего́ Иоа́нном именова́ла еси́, преблаже́нная Елисаве́то,/ всяк да хва́лит тя, орга́н Свята́го Ду́ха.

Твоему́ от Де́вы рождеству́ недомы́слимому/ от неплодныя Елисаве́ти зача́тие, а́ки подо́бие, яви́л еси́, Бо́же:/ сла́ва держа́вней прему́дрости Твое́й.

Богоро́дичен: Вениами́н, рожде́нный Рахи́лиею,/ ма́терь свою́ умертви́ в рожде́нии,/ рожде́нное от Тебе́ Сло́во Живо́т есть всем и́стинный:/ Его́же умоли́, да наде́ющийся Нань,/ живо́т и́мамы ве́чный.

Конда́к, глас 4:

Я́ко луна́ полна́,/ свет пра́вды от мы́сленнаго Со́лнца, Месси́и, прия́ла еси́/ и во всех за́поведех Госпо́дних с Заха́рией ходи́ла еси́,/ боговозлю́бленная Елисаве́то./ Досто́йными у́бо тя пе́сньми ублажа́юще,/ всеще́драго Све́та, проевеща́ющаго всех,// Го́спода велича́ем.

И́кос:

Я́коже на двои́х скрижа́лех иногда́ за́поведи Своя́ изобрази́ Бог,/ та́ко благода́тию Свое́ю вас просвети́,/ блаже́нный Заха́рие со Елисаве́тою,/ я́ко в за́поведех Его́ ходи́ти вам без поро́ка:/ досто́йно у́бо восхваля́юще вас,/ всеще́драго Све́та, просвеща́ющаго всех,/ Го́спода велича́ем.

Песнь 7

Ирмо́с: Халде́йская пещь, огне́м распала́емая,/ ороша́шеся Ду́хом,/ Бо́жиим предстоя́нием,/ о́троцы поя́ху:// благослове́н еси́, Бо́же оте́ц на́ших.

Благодари́ти Бо́га учи́ши нас, богому́драя Елисаве́то,/ глаго́лющи о рожде́нии твое́м:/ та́ко ми сотвори́ Госпо́дь;/ Бо́гом науче́на еси́ учи́тельница.

Его́же Ангел внутрь олтаря́ Иоа́нном бы́ти объяви́ Заха́рии,/ того́ ты, рожде́ннаго от тебе́, всем лю́дем,/ Бо́гом наставля́ема, та́кожде именова́ла еси́:/ Ангелом подо́бен язы́к твой, приснопа́мятная Елисаве́то.

Я́ко не́бо ма́нною обремени́в Бог, о́ную лю́дем в пусты́ни низпусти́,/ та́ко от блаже́нныя Елисаве́ти Иоа́нна, благода́ти веща́теля, нам дарова́:/ ве́лия ма́лость Твоя́ к челове́ком, Бо́же.

Богоро́дичен: Са́рра, ро́ждши Исаа́ка, о́браз Иису́сов:/ ра́дость ми сотвори́ Госпо́дь, глаго́лаше;/ Образова́ннаго Исаа́ком ро́ждшая и де́вствующая,/ па́че ра́дуйся, Всепе́тая Ма́ти Де́во.

Песнь 8

Ирмо́с: Покрыва́яй вода́ми превы́спренняя Своя́,/ полага́яй мо́рю преде́л песо́к и содержа́й вся,/ Тя пое́т со́лнце, Тя сла́вит луна́,/ Тебе́ прино́сит песнь вся тварь,// я́ко Соде́телю всех во ве́ки.

Я́коже о Це́ркви Свое́й рече́ Бог:/ вся кра́сная, бли́жняя моя́, и поро́ка несть в тебе́,/ та́ко без поро́ка ты еси́, пра́ведная Елисаве́то,/ Госпо́дь бо Иису́с освяще́ние ве́рным Свои́м есть,/ всю кра́сную тя велича́ем.

Во всех за́поведех Госпо́дних ходи́вшую зря́ху тя лю́дие,/ ту́не благода́тию Бо́жиею оправда́нную, достоблаже́нная Елисаве́то:/ досто́йно у́бо есть ми́лость Бо́жию сла́вити в тебе́.

Пе́рвая пропове́дница соверша́емаго та́инства Твоего́ Елисаве́ть бысть, Иису́се,/ егда́ рече́, я́ко Госпо́дь Сый и Бог,/ благослове́н Плод чре́ва деви́ческаго еси́, де́ло се Прему́дрости Твое́й./ Сла́ва человеколю́бию Твоему́!

Богоро́дичен: Саму́илово рожде́ние непло́дной ма́тери свое́й сле́зы от о́чию отре́ и ра́дость принесе́,/ ро́ждшийся от Тебе́ Госпо́дь всему́ ми́ру ра́дость сотвори́./ Пе́сньми Тя непреста́нно, о Де́во Ма́ти, велича́ем.

Песнь 9

Ирмо́с: Чу́жде ма́терем де́вство,/ и стра́нно де́вам деторожде́ние;/ на Тебе́, Богоро́дице, обоя́ устро́и́шася./ Тем Тя, вся племена́ земна́я,// непреста́нно велича́ем.

Ве́рующи прише́дшаго Месси́ю бы́ти Го́спода своего́/ и за́поведи Госпо́дни храня́щи, благоугоди́ла еси́ Ему́, Елисаве́то./ Моли́ у́бо Всеблаго́го Влады́ку всех восхваля́ющих Тя спасти́ся душа́м.

Иже за́поведи Бо́жия сохраня́ет,/ того́ возлюби́ти и яви́тися ему́ обещава́ется Бог;/ в за́поведех Его́ ходившая, те́мже Бо́гом возлю́блена еси́, Елисаве́то,/ моли́ Всеблаго́го о правосла́вных христиа́нех,/ да и возлю́бят Бо́га, и возлю́блени бу́дут благоутро́бием Его́.

И непло́дна, и заматоре́вшая Елисаве́ть, ю́жика Мари́ина, роди́:/ Ты возвели́чил еси́ ми́лость Твою́ с не́ю, Бо́же,/ от Тебе́ вся́ко дая́ние бла́го,/ сла́ва неизрече́нным щедро́там Твои́м.

Богоро́дичен: От ю́ности кре́пок явля́лся Сампсо́н,/ сла́ва непло́дней ма́тери свое́й бысть;/ в ро́ждшемся от Тебе́ Иису́се все исполне́ние есть Божества́ теле́сне:/ сла́внейшую Тя всех святы́х велича́ем, Де́во Пречи́стая.

Свети́лен проро́ка.

Сла́ва, святыя.

Подо́бен: Не́бо звезда́ми:

Ма́терей непло́дных сла́ва,/ гре́шником о́браз доброде́телей ты была́ еси́,/ за́поведи Госпо́дни храня́щи, блаже́нная Елисаве́то:/ сла́вим бла́гость Бо́жию, на тебе́ явля́емую.

И ны́не, Богоро́дичен.

На хвали́тех стихи́ры, глас 1:

Непло́дную и заматоре́вшую Елисаве́ть/ плодоро́дием благослови́л еси́, Бо́же,/ да яви́ши всеси́льную бла́гость Твою́/ и нас, изсыха́емых на всяк день от грех,/ благода́тию Твое́ю уще́дри,/ да бу́дем дре́во добропло́дное, Всеми́лостиве.

Пра́ведна бе́ста пред Тобо́ю,/ но Твое́ю благода́тию, Ще́дре,/ и в за́поведех Твои́х хожда́ху/ без поро́ка дво́ица приснопа́мятная,/ вся сия́ ми́лость Твоя́, Влады́ко,/ сла́ва благоутро́бному милосе́рдию Твоему́.

Бог, де́йствуяй в вас и е́же хоте́ти, и е́же де́яти блага́я,/ достоблаже́нная дво́ице,/ и насле́дники вас Ца́рствия сотвори́/ ра́ди вели́кия Своея́ ми́лости:/ сла́ва Тебе́, Всеми́лостивому Влады́це.

Сла́ва, глас 6:

Бо́лий в рожде́нных жена́ми/ имену́емый от Прему́дрости Ве́чныя,/ от непло́дныя тя произы́де,/ боголюби́вая Елисаве́то;/ да сра́дуемся, ве́рнии, приснопа́мятней,/ Благода́теля велича́юще.

И ны́не, глас 4:

Пева́емый от Серафи́м и от Херуви́мов Носи́мый,/ престо́л избра́л еси́ прекра́сный,/ утро́бу Чи́стыя Богоотрокови́цы./ Тем благода́рственное возсыла́ем Ти:/ сла́ва Тебе́, Еди́не Человеколю́бче,/ сла́ва Тебе́, Иису́се Пресла́дкий,/ сла́ва Тебе́, Всеупова́ние на́ше,/ сла́ва Тебе́, Спасе́ние ве́рных,/ сла́ва благоутро́бному смотре́нию Твоему́.

Славосло́вие вели́кое. И отпу́ст.

На литурги́и

Блаже́нны проро́ка, песнь 3-я на 4, и святыя, песнь 6-я на 4. Проки́мен, Апо́стол и Ева́нгелие по Уста́ву. Прича́стен: Ра́дуйтеся, пра́веднии, о Го́споде:

Святой пророк Захария и святая праведная Елисавета были родителями святого Пророка, Предтечи и Крестителя Господня Иоанна.

Святой Захария, сын Варахии, был священником в Иерусалимском храме; святая праведная Елисавета происходила из рода Ааронова и была сестрой святой Анны, матери Пресвятой Богородицы. Оба они были праведны, как указано в святом Евангелии, «поступая по всем заповедям Господним беспорочно» (Лк. 1, 6). Супруги были неплодны, что считалось в те времена великим наказанием Божиим.

Во время служения в храме Захария получил утешительную весть от Ангела, что его престарелая и неплодная жена родит ему сына. Усомнившись в возможности исполнения предсказанного Ангелом, Захария получил следующее знамение: он оставался нем вплоть до рождения святой Елисаветой сына – великого Иоанна, Предтечи и Крестителя Господня. Об этом событии подробно говорит в своем Евангелии евангелист Лука (см.: Лк. 1, 5–25). Святой пророк Захария предсказал своему сыну: «И ты, младенец, наречешься пророком Всевышнего, ибо предыдешь пред лицем Господа приготовить пути Ему» (Лк. 1, 76).

Услышав от волхвов о рождении Мессии, нечестивый царь Ирод замыслил уничтожить в Вифлееме и его окрестностях всех младенцев от двух лет и младше, предполагая, что в числе их будет убит и родившийся Мессия. На это время праведная Елисавета вместе с младенцем Иоанном скрылась от угрожавшей опасности в пещере, избежав тем самым преследования со стороны воинов Ирода.

Святой Захария исполнял тогда чреду служения в храме и на вопрос о том, где находится его сын, отвечал, что ныне он служит пред Господом и не знает, где находится его сын. Тогда Ирод повелел убить святого Захарию, что и исполнили воины, заклав его между жертвенником и алтарем (см.: Мф. 23, 35).

Праведная Елисавета скончалась через 40 дней после своего супруга, а святой Иоанн, хранимый Господом, пребывал в пустыне до дня своего явления Израильскому народу.

В тот же день.

Преподобному́ченика Афана́сия, игу́мена Бре́стскаго

На Ма́лей вече́рне

На Го́споди, воззва́х: стихи́ры, глас 6.

Преподо́бне о́тче Афана́сие,/ воздержа́нием и моли́твою Бо́гу прилепля́яся,/ стра́сти и невоздержа́ния пло́ти твоея умертви́л еси́/ и раб яви́лся еси́ Спа́са Вседержи́теля./ Те́мже почита́ем па́мять твою́ всечестну́ю.

Пе́рвее по́двигом твои́м/ в житии́ земно́м Бо́гови угожда́я,/ страда́нием второ́е му́ченически житие́ твое́ сконча́л еси́./ Тем тя венча́ за сугу́быя по́двиги/ Христо́с Человеколю́бец/ и Спас душ на́ших.

Сла́ва, глас 6:

Восхва́лим днесь пе́сньми страда́льца,/ земли́ на́шея преподобному́ченика Афана́сия./ Сей бо, измла́да Христа́ возлюби́в,/ неле́ностно веле́нием Его́ угожда́я,/ во утвержде́ние ве́ры Правосла́вныя стране́ на́шей послужи́./ Ны́не же, во оби́тели Небе́сныя прия́тый,/ мо́лит Христа́ Бо́га// поми́ловати ду́ши на́ша.

И ны́не, Богоро́дичен, глас то́йже:

Ра́дуйся, звезде́ светоза́рная,/ Свет, пре́жде де́нницы от Отца́ возсия́вший, неизрече́нно ро́ждшая,/ Того́ сия́нием озари́ ду́ши на́ша,// спя́щия во тьме и се́ни сме́ртней.

На стихо́вне стихи́ры, глас 4.

Про́мыслом Бо́жиим/ и челове́ческим избра́нием/ во игу́мена оби́тели Бересте́йския/ поста́влен был еси́, преподобному́чениче,/ и, я́ко па́стырь преизря́дный,/ вруче́нное ти Бо́гом ста́до во и́стине наста́вил еси́./ Наста́ви и нас, ве́рно чту́щих па́мять твою́,// ка́ко в ве́ре и́стинней утверди́тися.

Стих: Честна́ пред Го́сподем// смерть преподо́бных Его́.

Земна́я отри́нув,/ Небе́сная себе́ уготовля́я,/ я́ко страда́лец за и́стину, Небе́сныя сла́дости вкуси́л еси́, страстоте́рпче./ Сея́ сла́дости испроси́ и нам у Христа́, Спа́са на́шего,// я́ко моли́твенник о душа́х на́ших.

Стих: Блаже́н муж, боя́йся Го́спода,// в за́поведех Его́ восхо́щет зело́.

Днесь соше́дшеся ве́рнии твои́/ в прославле́ние па́мяти твоей, преподобному́чениче,/ ра́дости и весе́лия испо́лнишася./ Житие́м бо твои́м пра́ведным/ и в ве́ре Правосла́вней тве́рдым стоя́нием/ не то́кмо и́стинный нам путь к Небеси́ указу́еши,/ но и ны́не, я́ко предста́тель наш пред Го́сподем,// мо́лишися о спасе́нии душ на́ших.

Сла́ва, и ны́не, Богоро́дичен, глас то́йже.

К покро́ву Твоему́ прибега́ем,/ Де́во Богоро́дице,/ и мо́лим Тя: ско́ро на по́мощь нам,/ ве́рно чту́щим Тя, предвари́/ и от враг ви́димых и неви́димых изба́ви,/' Ты бо еси́ заступле́ние на́ше.

Тропа́рь пи́сан на вели́цей вече́рни.

На Вели́цей вече́рни.

На Го́споди, воззва́х: стихи́ры, глас 8:

Ду́шу твою́ и те́ло от страсте́й очи́стив,/ Ду́ха Святаго жили́ще был еси́/ и, кра́сная ми́ра от ю́ности твоея́ презре́в,/ ра́дуяся после́довал еси́ Христу́./ Сего́ ра́ди сла́ву ве́чную восприя́в,/ Тому́, я́ко предста́тель наш, моли́ся/ дарова́ти мир ми́ру// и душа́м на́шим ве́лию ми́лость.

Мно́гим по́двигом плоть твою́ умерщвля́я,/ украше́ние и́ноков яви́лся еси́,/ преподобному́чениче,/ до́бре сих к Небеси́ наставля́я./ Те́мже ны́не, во тьме грехо́вней су́щия, ны просвети́/ и, я́ко дерзнове́ние име́яй ко Го́споду, Спа́су на́шему,// Того́ моли́ спасти́ся душа́м на́шим.

Столп непоколеби́мый ве́ры Христо́вы/ и и́стинный ревни́тель оте́ческих преда́ний был еси́ в житии́ твое́м,/ преподобному́чениче,/ бо́дренно стоя́ за святу́ю Правосла́вную ве́ру./ Ра́зум наш просвети́/ и нас, ве́рно чту́щих па́мять твою́, в ве́ре утверди́// ко спасе́нию душ на́ших.

В же́ртву Бо́гу себе́ само́го принося́,/ в се́рдце твое́м храни́л еси́ о́браз Христа́, Агнца непоро́чна,/ вда́вшаго Себе́ на закла́ние за грехи́ ми́ра,/ и, Тому́ подража́я,/ сла́дце преда́л еси́ ду́шу твою́ в ру́це Бо́жии./ Христо́вых страда́ний о́бщниче,// Того́ моли́ спасти́ся душа́м на́шим.

Сла́ва, глас 8:

Ева́нгельски Го́спода Бо́га возлюби́в,/ украси́л еси́ ду́шу твою́ доброде́тельми духо́вными,/ о́браз подража́телен быв ве́рному ста́ду твоему́,/ и, я́ко свети́льник, стоя́й на све́щнице,/ мно́гия благоразу́мием обогати́л еси́,/ пострада́в же за и́стину Христо́ву да́же до кро́ве,/ благода́ти чудотворе́ния сподо́бился еси́./ Не забу́ди и нас, убо́гих, во благода́ти твое́й,/ да прославля́юще Го́спода,/ дарова́вшаго тебе́ такова́я,// спасе́м ду́ши на́ша.

И ны́не, Богоро́дичен, глас то́йже: Царь Небе́сный:

Вход, проки́мен. Чте́ния три му́ченическая (зри страницы 562–563).

На лити́и стихи́ры, глас 2:

Прииди́те, ве́рнии,/ па́мять преподобному́ченика Афана́сия почти́м,/ я́ко многоце́нный би́сер духо́вный,/ украси́вший сия́нием ве́ры и благоче́стия страну́ на́шу./ Моли́твенно притеце́м к страстоте́рпцу за ве́ру Правосла́вную святу́ю,/ учи́телю воздержа́ния, исто́чнику умиле́ния,/ челове́ку Небе́сному и А́нгелу земно́му,/ печа́льнику земли́ на́шея,/ и сле́зно тому́ возопие́м:/ наста́ви нас ве́рою правове́рною восхваля́ти Го́спода// ко спасе́нию душ на́ших.

Мо́щи твоя́, преподобному́чениче, по успе́нии твое́м/ исто́чник исцеле́ний притека́ющих к тебе́ явля́юще,/ немо́лчно свиде́тельствуют о сла́ве твое́й,/ наставля́юще нас на путь,/ и́же есть к животу́ и благоче́стию,/ и веща́юще:/ возлюби́те Го́спода и обря́щете сла́ву ве́чную/ и поко́й со избра́нными,/ его́же да улучи́м твои́ми моли́твами,// свя́те Афана́сие.

Сла́ва, глас 2:

Ревну́я о ве́ре Правосла́вней,/ возскорбе́л еси́ печа́лию ве́лиею,/ я́ко ве́ра сия́ от неправове́рных попира́ется,/ и, во дни ско́рби твоея́ моля́ся пред ико́ною Пречи́стыя Влады́чицы,/ все упова́ние возложи́л еси́ на заступле́ние Ея́./ В час же те́плых моли́тв твои́х,/ услы́шав глас Влады́чицы, от святы́я ико́ны исходя́щ,/ и внима́я веле́ниям его́,/ не то́кмо все житие́ твое́ земно́е пре́дал еси́ на защище́ние ве́ры праоте́ческия,/ но и гоне́ния мно́гия претерпе́л еси́ за ню,/ непреста́нно по́мощию Влады́чицы укрепля́емь./ Вознеси́, свя́тче, моли́твы твоя́// ко Пресвяте́й Влады́чице.

И ны́не, Богоро́дичен, глас 6:

Защище́ние и покро́в еси́ Христиа́ном,/ Влады́чице Богоро́дице,/ осени́ и нас покро́вом Твои́м, лю́те стра́ждущих,// да непреста́нно славосло́вим милосе́рдие Твое́.

На стихо́вне стихи́ры, глас 4:

Ра́дуйся, преподобному́чениче Афана́сие,/ сосу́де Бо́жий избра́нный,/ от ю́ности бо Христа́ возлюби́в,/ гла́сом веле́ния Его́/ Це́ркви Правосла́вней служи́ти призва́н был еси́/ и, Тому́ порабо́тав в по́те лица́ твоего́,/ све́том и́стинныя ве́ры лю́ди наста́вил еси́./ Те́мже и ны́не моли́твами твои́ми/ испроси́ у Светода́теля Христа́/ ми́ра и утвержде́ния Це́ркве на́шея/ и просвеще́ния душ на́ших.

Стих: Честна́ пред Го́сподем/ смерть преподо́бных Его́.

Ра́дуйся, нача́льниче мона́хов,/ Про́мыслом Бо́жиим к сему́ предука́занный,/ жре́бием бо Боже́ственным/ поста́влен был еси́ во игу́мена оби́тели Бересте́йския,/ да возвели́чиши люде́й правосла́вных/ достохва́льным житие́м в правове́рии/ и сла́вным стоя́нием во Правосла́вии святе́м./ Ты же, прия́в жезл игу́менства,/ сотворя́л еси́ во́лю Посла́вшаго тя на по́двиг сей./ Сего́ ра́ди и мы к тебе́ возопие́м:/ о́тче наш Афана́сие,// благоустро́й на́ша дома́шния оби́тели моли́твами твои́ми.

Стих: Блаже́н муж, боя́йся Го́спода,// в за́поведех Его́ восхо́щет зело́.

Блажи́м тя, преподобному́чениче Афана́сие,/ зане́ све́том Небе́снаго ра́зума просветле́н был еси́/ в дея́ниих па́стырства твоего́ и защище́ния и́стины,/ виде́ние бо чу́дно узре́л еси́,/ ви́дев полки́ во́инства Небе́снаго,/ побежда́ющий гони́тели Це́ркве и́стинныя Христо́вы,/ и, я́ко муж богобоя́зливый, упова́нием на Бо́га себе́ ополчи́в,/ возста́л еси́ проти́ву враго́в ве́ры Правосла́вныя,/ не устраши́вся ни темни́цею, ни у́зами,/ ни муче́ниями, ни сме́ртию,/ но вся сия́ претерпе́в,/ вене́ц побе́дный от Бо́га восприя́л еси́./ Сего́ ра́ди мо́лим тя:/ моля́ Христа́ Бо́га/ огради́ти Це́рковь на́шу от наве́тов вра́жиих.

Сла́ва, глас 4:

Отче Афана́сие,/ пострада́в за испове́дание ве́ры,/ ра́дость пресве́тлую и пречестну́ю сла́ву насле́довал еси́/ и Вы́шняго гра́да Иерусали́ма и ве́чных благ сонасле́дник яви́лся еси́./ Страсте́й победи́телю,/ во́ине за ве́ру вели́кий, страстоте́рпче Христо́в,/ свети́льниче многосве́тлый страны́ на́шея,/ всех нас, соверша́ющих свяще́нную па́мять твою́,/ помина́й моли́твами твои́ми,/ да просла́вим Спа́са на́шего,/ тебе́ просла́вившаго,/ Еди́наго во святы́х Свои́х Бо́га на́шего.

И ны́не, Богоро́дичен, глас то́йже: При́зри на моле́ния Твои́х раб, Всенепоро́чная:

Тропа́рь, глас 2:

Блаже́н еси́, о́тче наш Афана́сие,/ я́ко ве́рно пожи́л еси́,/ стоя́ бо́дренно за святу́ю Правосла́вную ве́ру,/ со умиле́нием при́сно поя́ неседа́льное Пречи́стей,/ запове́дуя никому́же наруша́ти Правосла́вныя ве́ры святы́я,/ пострада́в за свиде́тельство и́стины да́же до сме́рти./ Мы же, чту́ще святы́ню твою́,/ со дерзнове́нием взыва́ем ти:/ о́тче наш, преподобному́чениче Афана́сие,// похвало́ и украше́ние на́ше.

На у́трени

На Бог Госпо́дь: тропа́рь свята́го, два́жды. Сла́ва, и ны́не, Богоро́дичен.

По 1-м стихосло́вии седа́лен, глас 6:

Житие́м твои́м земны́м А́нгелом безпло́тным уподо́бился еси́, преподобному́чениче,/ врага́ бо прего́рдаго смири́в, крестоноше́ние Бо́гови уго́дно соверши́л еси́./ Те́мже днесь, почита́юще па́мять твою́, мо́лимся:/ моли́ спасти́ся душа́м на́шим.

Сла́ва, и ны́не, Богоро́дичен:

Бо́га Сло́ва породила́ еси́,/ заче́нши во чре́ве безсе́менно, неискусобра́чная Де́во,/ Того́ моли́ о душа́х на́ших.

По 2-м стихосло́вии седа́лен, глас 6:

Грозд духо́вный на олта́рь Боже́ственный прине́сл еси́ себе́, преподобному́чениче,/ тве́рдым стоя́нием за ве́ру Правосла́вную и безстра́стным испове́данием ея́./ Те́мже па́мять твою́ при́сно пе́сньми восхваля́ем ве́рно.

Сла́ва, и ны́не, Богоро́дичен:

Ка́ко не диви́мся богому́жному Рождеству́ Твоему́, Пречестна́я?/ Ужа́сно бо чу́до зача́тия и несказа́нен о́браз Рождества́ в Тебе́ показа́ся./ Рожде́ннаго Тобо́ю моли́ прости́ти прегреше́ния на́ша.

Велича́ние:

Ублажа́ем тя,/ преподобному́чениче Афана́сие,/ и чтим святу́ю па́мять твою́,/ наста́вниче мона́хов// и собесе́дниче А́нгелов.

Псало́м избра́нный: Услы́шите сия́, вси язы́цы:

По полиеле́и седа́лен, глас 4.

Подо́бен: Яви́лся еси́:

В поще́нии иску́сен быв, во страда́нии просия́л еси́/ и просвети́л еси́ ве́рныя твои́ми по́двиги, блаже́нне Афана́сие,/ те́мже тя вси согла́сно велича́ем.

Сла́ва, и ны́не, Богоро́дичен:

Наде́ждо непосты́дная наде́ющихся на Тя,/ еди́на ро́ждшая па́че естества́ пло́тию Христа́ Бо́га на́шего,/ Того́ со святы́ми преподобному́ченики моли́ пода́ти вселе́нней очище́ние прегреше́ний/ и всем нам пре́жде конца́ жития́ исправле́ние.

Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем,/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 6:

Возлю́блен быв Бо́гом от чре́ва ма́терня,/ я́ко пе́стун гра́да Небе́снаго,/ взыска́н был еси́ Им/ и, Тому́ житие́м твои́м сла́вным угоди́в,/ всем тре́бующим по́мощи твоея́/ чудотво́рный пода́тель яви́лся еси́./ Спаса́й нас, я́ко предста́тель наш,// чудотво́рче Афана́сие.

Кано́н, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м.

Моисе́й иногда́, кре́стным зна́мением во́ды раздели́в,/ проше́д со изра́ильтяны сквозе́ Чермно́е мо́ре и земна́го обетова́ния дости́же,/ ты же, преподобному́чениче, крестоноше́нием плоть твою́ умертви́в,/ земли́ обетова́ния дости́гл еси́, в не́йже пра́вда живе́т.

Изба́вителю и Бо́гу на́шему воспева́вши ны́не песнь побе́дную,/ просвеще́н сый Боже́ственнаго и светоза́рнаго Спа́са благода́тию,/ омраче́нную ду́шу мою́ моли́твами твои́ми, свя́те Афана́сие, озари́,/ да пою́ Бо́гу моему́ сла́вно.

Я́ко свяще́нника, и я́ко испове́дника, и я́ко страда́льца за ве́ру Христо́ву украше́ннаго,/ чту́ще па́мять твою́, прехва́льне, пои́м Го́сподеви:/ сла́вно бо просла́вися во святы́х Свои́х.

Богоро́дичен: От ви́димых и неви́димых враго́в изба́ви мя, Ро́ждшая всех Влады́ку,/ и бу́рю страсте́й мои́х ути́ши, да пою́ Бо́гу моему́:/ сла́вно бо просла́вися.

Песнь 3

Ирмо́с: Небеснаго кру́та/ Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний Кра́ю, ве́рных Утвержде́ние, // Еди́не Человеколюбче.

В Боже́ственней любви́ благода́тию Ду́ха Святаго утвержде́н,/ благоче́стно пожи́л еси́, утвержда́я слове́сное ста́до твое́ на па́житех живоно́сных/ и в Небе́сную огра́ду мно́гия ввел еси́.

На ка́мени ве́ры но́ги ве́рных твои́х водрузи́в,/ поколеба́л еси́ основа́ние сопроти́вных/ и спасл еси́ лю́ди твоя́ от порабоще́ния вра́жия.

Тверды́нею ве́ры себе́ украша́я,/ жела́ний кра́я дости́гл еси́/ и Це́ркве Зижди́телю благоприя́тен яви́лся еси́.

Богоро́дичен: Недоуме́ют вси язы́цы, ка́ко Небе́снаго кру́га Верхотво́рец,/ в творе́ниих невмести́мый, в ложесна́ Твоя́ воплощаемь всели́ся, Всенепоро́чная,/ на спасе́ние нас, ве́рно воспева́ющих Тя.

Седа́лен,глас 6:

Му́ки му́жественно претерпе́в, к неболе́зненней жи́зни себе́ уготовля́я,/ научи́л еси́ нас терпе́нием стяжа́ти ду́ши на́ша./ Те́мже днесь Христо́ва Це́рковь, пра́зднующи святу́ю па́мять твою́, све́тло ра́дуется.

Сла́ва, и ны́не, Богоро́дичен:

Преукраше́нная Боже́ственною сла́вою,/ Херуви́мов и Серафи́мов превышши еси́, Пренепоро́чная,/ те́мже Тя по до́лгу вси ро́ди ублажа́ют.

Песнь 4

Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра о́тча/ и на́шу нищету́ посети́в./ Тем с проро́ком Авваку́мом зову́ Ти:// си́ле Твое́й сла́ва, Человеколю́бче. Весели́ся, пра́ведниче, о Го́споде,/ побе́ду ти на враги́ безпло́тныя дарова́вшем,/ Тому́ со дерзнове́нием вопие́ши:/ Ты моя́ кре́пость, Го́споди,/ Ты моя́ и си́ла,/ не оста́ви милосе́рдием Твои́м, Ще́дре, притека́ющих к Тебе́.

Споспешеству́ющу ти Владыце,/ прия́л еси́ от Него́ за по́двиги твоя́ дар неду́ги теле́сныя исцеля́ти/ и многоболе́зненныя стра́сти врачева́ти зову́щих Христу́ Бо́гу:/ си́ле Твое́й сла́ва, Человеколюбче.

Рачи́тель Госпо́день измла́да был еси́,/ ору́жие бо кре́стное на ра́мена взем, неукло́нно ше́ствовал еси́,/ путь спасе́ния себе́ тем уготовля́я./ Се́го ра́ди ми́ра моли́твенник яви́лся еси́ пресве́тел,/ Богу́ поя́ песнь побе́дную.

Богоро́дичен: Песносло́вим Тя, Влады́чице, Ра́дость всему́ ми́ру ро́ждшая,/ Того́, я́ко Бла́га, моли́, Всенепоро́чная, пре́зрети беззако́ния досто́йно Ему́ вопию́щих:/ си́ле Твое́й сла́ва, Человеколю́бче.

Песнь 5

Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,// ра́зве Тебе́, ино́го не ве́мы.

Не дал еси́ очесо́м твои́м сна и ве́ждом дрема́ния, у́тренююще взыва́я:/ Го́споди, посети́ Твои́ми щедро́тами Це́рковь Твою́,/ ю́же стяжа́л еси́ честно́ю Твое́ю Кро́вию.

Словесы́ твои́ми, му́дре, заблу́ждших облича́я,/ сою́зом ве́ры связа́л еси́ вруче́нное ти ста́до слове́сное/ и ны́не охраня́вши нас от ве́тров тлетво́рных уче́ний, науча́я воспева́ти Го́сподеви:/ спаси́ ны, Ты бо еси́ Бог наш, ра́зве Тебе́, ино́го не ве́мы.

Блаже́нно житие́ твое́ на земли́ и кончи́на безсме́ртна,/ сего́ ра́ди нетле́нная бога́тства стяжа́л еси́, преподо́бне о́тче,/ и просвеща́вши притека́ющих к тебе́ чудесы́.

Богоро́дичен: я́ко одушевле́нный черто́г, восприя́вший Царя́ ца́рствующих,/ и я́ко престо́л Влады́чень, Мари́ю Пренепоро́чную в пе́снех возвели́чим.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:// от тли, Бо́же, возведи́ мя.

Печа́ль ве́лия обдержи́т мя, поне́же лю́те окаля́х ду́шу грехми́ и оде́жду нетле́ния разори́х,/ ты же, свя́тче, наста́ви мя, ка́ко умоли́ти Го́спода,/ да очи́стит мя от тли страсте́й мои́х.

Укрепле́н быв ра́зумом Боже́ственным,/ облича́л еси́ отмета́ющихся и́стинныя ве́ры Христо́вы, я́ко пребезу́мных./ Те́мже Небе́сныя две́ри тебе́ отверзо́шася, блаже́нне,/ воспева́ющу Христа́ во вся ве́ки.

Сла́дости Небе́сныя и пресве́тлыя ра́дости испо́лнен еси́,/ предстоя́ Тро́ице Свято́й, Ду́хом очище́нный./ Су́щия ны во тьме и со́ни сме́ртней моли́твами твои́ми не попусти́ а́ду прибли́зитися.

Богоро́дичен: Ма́ти Всепе́тая, ми́ру всему́ Искупле́ние от кля́твы законныя роди́вшая,/ ны́не на́ша моле́ния прие́млющи, моли́ спасти́ся всем нам.

Конда́к, глас 4:

Мона́шескаго жития́ украше́ние и му́чеников красоту́/ яви́л себе́ житие́м твои́м, Афана́сие,/ и, я́ко со́лнце пресве́тлое,/ лю́дем правосла́вным возсия́л еси́./ Те́мже и Христо́с да́ром чуде́с обогати́ тя,/ да чту́ще пресве́тлую па́мять твою́, зове́м ти:// помина́й ста́до твое́ моли́твами твои́ми, преподо́бне.

И́кос:

Я́ко во́лнами вод мно́гих, обурева́ется Це́рковь Правосла́вная,/ коле́блема ло́жными уче́нии и кова́рными ухищре́нии враг ея́./ Ве́руем и упова́ем ку́пно с тобо́ю, преподобному́чениче,/ я́ко врата́ а́дова не одоле́ют ей, и мо́лим тя:/ испроси́ у Го́спода вели́кия ми́лости,/ да низпо́слет нам в дни испыта́ний на́ших кре́пость ду́ха и тве́рдое стоя́ние во и́стине Правосла́вия,/ да не яви́тся кто из бра́тии на́шея сын поги́бели.

Песнь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:// отце́в Бо́же, благослове́н еси́.

Муче́ния терпя́, опаля́емь веще́ственным огне́м,/ ду́шу твою́ огне́м невеще́ственным ороси́л еси́,/ я́коже трие́ о́троцы, посреде́ пла́мене взыва́я:/ отце́в Бо́же, благослове́н еси́.

Я́ко росо́ю живоно́сною, смире́нием твои́м и безстра́стием/ пещь я́рости беззако́ннующих мучи́телей твои́х угаси́л еси́, преподобному́чениче:/ чудя́хуся бо, зря́ще тя посреде́ муче́ний моля́щася за враги́ твоя́.

Мужеством му́ченическим чре́сла твоя́ препоя́сав/ и житие́м твои́м подви́жническим, я́ко ри́зою светоза́рною, себе́ украси́в,/ восте́кл еси́ на трапе́зу Госпо́дню, я́коже избра́нный, поя́:/ благослове́н еси́, Бо́же оте́ц на́ших.

Богоро́дичен: я́коже бо купина́, ю́же ви́де Моисе́й, не сгара́ше опаля́ема,/ та́ко Де́ва неопа́льно пребыла́ еси́, Пра́вды Со́лнце во чре́ве заче́ншая./ Того́ моли́ спасти́ся душа́м на́шим.

Песнь 8

Ирмо́с: Царя́ Небеснаго,/ Его́же пою́т во́и Ангельстии,// хвали́те и превозноси́те во вся ве́ки.

Неусы́пна тя и́мамы моли́твенника, во́лны страсте́й утиша́юща,/ печа́ли утоля́юща и лю́тых вся́ческих нас избавля́юща, вопию́щих:/ благослови́те, вся дела́ Госпо́дня,Го́спода.

Мудрова́ния врага́ прего́рдаго в себе́ уби́в,/ уму́ Боже́ственному приобщи́лся еси́/ житие́м твои́м чи́стым и ума́ све́тлостию, зовы́й непреста́нно:/ благослови́те, вся дела́ Госпо́дня, Го́спода.

Изря́днаго уго́дника Христо́ва пе́сньми благохва́льными почти́м,/ я́ко испо́лнена я́ве благода́ти и Боже́ственными сия́ньми преукра́шена,/ Изба́вителю Бо́гу вопию́ща:/ де́ти, благослови́те, свяще́нницы, воспо́йте, лю́дие, превозноси́те во вся ве́ки.

Богоро́дичен: Ра́дуйся, Благода́тная, Госпо́дь с Тобо́ю, веща́ Ти Арха́нгел Гаврии́л:/ из Тебе́ бо произы́де Отроча́ Предве́чно,/ за милосе́рдие неизрече́нное превозноси́мый отце́в Бог благослове́нный.

Песнь 9

Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв Челове́к.// Те́мже Пречи́стую Богоро́дицу, ве́рнии, велича́ем. Коленопреклоне́нно непреста́нно поя́ неседа́льное Пречи́стей, взыва́л еси́:/ ра́дуйся, ми́ру Путеводи́тельнице, па́че А́нгел Небе́сных украше́нная,/ украси́ мя красото́ю Твое́ю, да несра́млен явлю́ся пред Го́сподем мои́м.

Дивя́ся твоему́ снизхожде́нию во дни ю́ности моея́,/ молю́ тя, не оста́ви мене́, преподобному́чениче, во дни ста́рости моея́/ и по сме́рти мое́й взыщи́ мене́, да моли́твами твои́ми очище́н,/ очесы́ духо́вными узрю́ черто́г Небе́сный в день стра́шнаго суда́ Госпо́дня.

Помяни́ ны́не, свя́тче Бо́жий, и всех ве́рою к тебе́ притека́ющих,/ и, от душе́вных страсте́й избавля́я, защити́ ны от бед и обстоя́ний,/ и спасе́ния Боже́ственнаго бу́ди нам хода́тай.

Богоро́дичен: Стра́нное и пресла́вное чу́до ви́дим о Тебе́, Богоизбра́нная Влады́чице,/ я́ко ми́ра Вседержи́тель, Себе́ ума́лив, плоть от Тебе́ прие́млет/ и, пита́я Пло́тию Свое́ю пречи́стою, к животу́ ве́чному приво́дит лю́ди Своя́.

Свети́лен.

Подо́бен: Жены́, услы́шите:

Страда́нием пе́рвое до́бре искуси́вся,/ второ́е же посто́м тече́ние боже́ственное соверша́в, на Небеса́ возше́л еси́,/ Христу́ предстои́ши, Афана́сие, о́тче преподо́бне,/ за нас моли́ся те́пле, пою́щих тя.

Богоро́дичен: Ра́дость неизрече́нную ро́ждши, Го́спода,/ ра́дости нас Небе́сныя прича́стники сотвори́,/ всех Тебе́ почита́ющих, Пречи́стая, благода́ть и́стинну,/ от души́ вопию́щих Ти:/ не забу́ди Твоя́ рабы́, Благослове́нная Мари́е.

На хвали́тех стихи́ры, глас 6:

Преподо́бне о́тче,/ хотя́ всем се́рдцем Бо́гу благоугожда́ти,/ по́двигом до́брым до конца́ подвиза́лся еси́/ и я́ко зла́то, в горни́ле очище́но, яви́лся еси́,/ сия́яй красото́ю духо́вною ча́дом твои́м,/ и́хже житие́м твои́м, я́ко не́кою небовосхо́дною ле́стницею,/ на высоту́ доброде́телей возводя́,/ велеле́пно восхваля́ти Го́спода научи́л еси́./ Помина́й нас, о́тче Афана́сие, в моли́твах твои́х,/ да и мы не то́кмо в житии́ сем,/ но и ку́пно с тобо́ю на Небеса́х/ восхва́лим просла́вльшаго тя Го́спода.

Недоуме́ет ум наш,/ ки́ими похва́льными словесы́ возвели́чим Творца́,/ дарова́вшаго нам в тебе́ исто́чник исцеле́ний,/ пресве́тлую ра́дость,/ ору́жие от наве́тов вра́жиих,/ неусы́пнаго стра́жа страны́ на́шея/ и моли́твенника к Бо́гу о душа́х на́ших./ До́блестне воспева́я со ли́ки Небе́сными хвалу́ Бо́гу,/ научи́ и нас пе́ти и превозноси́ти Его́// во вся ве́ки.

Преподо́бне о́тче Афана́сие,/ я́ко дре́во светлоплодови́тое,/ ве́лий плод духо́вный прине́сл еси́/ Це́ркви Святе́й Правосла́вней,/ ве́рное ста́до твое́ в и́стине укрепля́я,/ отпа́дшия вразумля́я и коле́блющияся утвержда́я;/ зане́ ны́не от плода́ Небе́снаго пита́ешися,/ утверди́ и нас в ве́ре и и́стине,/ да и мы в чистоте́ духо́вней и во благоче́стии поживе́м,// непреста́нно славосло́вяще Спа́са на́шего.

Сла́ва, глас 6:

Любве́ ра́ди Христо́вы,/ преподобному́чениче Афана́сие,/ ве́лия труды́ и злострада́ния претерпе́л еси́/ во благоустрое́ние Це́ркве Его́ Святы́я./ Я́ко адама́нт бо тве́рдый,/ не то́кмо тве́рдо стоя́л еси́ за и́стину,/ но, я́ко испове́дник,/ неуста́нно облича́я хули́тели Правосла́вныя ве́ры/ и предрека́я им гнев Бо́жий,/ претерпе́л еси́ за сие́ злострада́ния,/ темни́цу, поруга́ния и му́ченическую кончи́ну./ Сего́ ра́ди вшел еси́ в ра́дость Го́спода твоего́/ и ны́не, в селе́ниих Небе́сных водвори́лся,/ воспева́вши со А́нгелы Го́сподеви песнь хвале́бную./ Испроси́ нам у Го́спода ве́лия ми́лости,/ да и мы в бу́дущем ве́це// воспое́м ку́пно с тобо́ю хвалу́ Бо́гу.

И ны́не, Богоро́дичен, глас то́йже:

Богоро́дице, Ты еси́ лоза́ и́стинная,/ возраста́вшая нам Плод Живота́,/ Тебе́ мо́лимся:/ моли́ся, Влады́чице, со святы́ми апо́столы,/ поми́ловати ду́ши на́ша.

На Литурги́и слу́жба преподобному́ченическая.

Моли́тва

О вели́кий уго́дниче Христо́в, святы́й преподобному́чениче Афана́сие! К тебе́ мы, гре́шнии и смире́ннии, я́ко к те́плому на́шему засту́пнику и ско́рому помо́щнику, моли́твенно прибега́ем и из глубины́ се́рдца взыва́ем: при́зри на ны ско́ро и умоли́ Человеколю́бца Бо́га, да не осу́дит нас, гре́шных, по беззако́нием на́шим, но да сотвори́т с на́ми по вели́кой Свое́й ми́лости. Охрани́ нас свои́м заступле́нием от облежа́щаго ны суему́дрия и неправове́рия и, я́ко па́стырь до́брый, упаси́ заблу́ждшия о́вцы ста́да Христо́ва и во дворы́ Госпо́дни сия́ всели́. Огради́ нас от собла́знов, ересе́й и раско́лов и наста́ви тве́рдо в ве́ре Правосла́вней подвиза́тися. Потщи́ся, ско́рый о нас предста́телю, благоприя́тным твои́м хода́тайством умоли́ти Го́спода, да низпо́слет нам ти́хое и богоуго́дное житие́, уврачу́ет Свое́ю благода́тию на́ша боле́зни, душе́вныя и теле́сныя, согре́ет на́ша сердца́ любо́вию друг ко дру́гу и сотвори́т ны братолю́бны и единомы́сленны. Испроси́ та́кожде у Го́спода и всего́ потре́бнаго для жития́ на́шего теле́снаго: земли́ плодоро́дие, благорастворе́ние возду́хов и ми́рное устрое́ние. Страну́ на́шу, ве́си и гра́ды охрани́ моли́твами твои́ми от огня́, пото́па, тру́са, вра́жескаго наше́ствия и вну́тренних нестрое́ний. Утверди́ в нас па́мять сме́ртную, да и мы, во и́стиннем покая́нии и чи́стем све́дении со́вести на́шея предста́вше ко Го́споду, сподо́бимся десна́го стоя́ния и со все́ми святы́ми воспое́м сла́ву Отцу́ и Сы́ну и Свято́му Ду́ху во ве́ки веко́в. Ами́нь.

Преподобномученик Афанасий Брестский (Филиппович) родился ок. 1597 года в благочестивой христианской семье; по происхождению был белорус. Он получил хорошее образование: знал греческий, латинский, польский языки, обладал большой начитанностью в богословской и исторической литературе, о чем свидетельствует сохранившийся Диариуш (дневник) святого.

В молодые годы святой Афанасий некоторое время преподавал в домах польского шляхетства. В 1627 году он принял постриг от игумена Иосифа в Виленском монастыре Святого Духа. В1632 году инок Афанасий был рукоположен во иеромонаха и назначен наместником Дубойской (Дубовской) обители под Пинском.

Время жизни и подвигов святого Афанасия совпало с трудным для России периодом: западнорусские земли были временно захвачены польско-литовским государством – Речью Посполитой, православное население этих земель подвергалось гонениям и притеснениям со стороны униатов.

Святой Афанасий по особому благословению Божией Матери самоотверженно отстаивал Православие в пределах исконно русской земли. С 1638 по 1648 год святой Афанасий исполнял послушание игумена Брестского Симеоновского монастыря.

Он претерпел много обид и издевательств от униатов, подвергался незаконным наказаниям, трижды испытал тюремное заключение, направлялся властями в Киев для духовного суда над ним, но Промыслом Божиим был вновь возвращен в свою обитель.

В течение десяти лет подвижник неустанно, находясь в среде злобно настроенных к нему лиц, вел непрерывную борьбу за Святое Православие, верность которому засвидетельствовал мученической кончиной.

Попытки сломить духовную целеустремленность святого не имели успеха. Тогда над ним был устроен суд, решением которого за проклятие унии преподобномученик был приговорен к смертной казни. Святой Афанасий мученически скончался ранним утром 5 сентября 1648 года.

Память святого празднуется дважды: 5 сентября – день преставления, 20 июля – день перенесения мощей.

В той же день

Свята́го благове́рнаго кня́зя Гле́ба, во свято́м Креще́нии Дави́да, по пло́ти бра́та Бори́са, во свято́м Креще́нии Рома́на, сы́на кня́зя Влади́мира Ки́евскаго, во свято́м Креще́нии Васи́лия

Тропа́рь, глас 4:

Му́чениче Госпо́день,/ прославля́емь ве́ры твоея́ ра́ди,/ кня́же Гле́бе,/ тружда́ющимся бы́стрый помо́щник/ и немощны́м наде́жда еси́,/ ты бо неду́ги врачу́еши притека́ющим к тебе́ с ве́рою./ Те́мже и мы ве́рою мо́лимся:/ от бед изба́ви нас,/ чту́щих любо́вию па́мять твою́.

Конда́к, глас 2:

Днесь земля́ ублажа́ется, напи́вшися кро́ве твоея́,/ и храм освяща́ется, прии́м те́ло твое́,/ святы́й мучениче кня́же Гле́бе./ Во́лею бо страда́ния твоя́ в ничто́же вмени́в,/ от моще́й твои́х, благоуха́ния испо́лненных,/ ве́рным подае́ши освяще́ние// и всему́ ми́ру ве́лию ми́лость.

Святой благоверный князь Глеб, во святом Крещении Давид (†1015), – один из первых русских мучеников- страстотерпцев. Он пострадал вместе со своим братом, благоверным князем Борисом (во святом Крещении Романом). После убийства святого Бориса Святополк послал к его младшему брату Глебу гонца с ложным известием о болезни уже скончавшегося к тому времени их отца, великого князя Владимира, для того, чтобы коварно убить возможного претендента на Киевский престол. Обман удался, и Глеб с небольшой дружиной поспешил в Киев. Предупреждение брата Ярослава, застигшее его у Смоленска, не остановило святого, который сам был воспитан в правилах христианской веры и не мог предположить такого злодейства со стороны их брата Святополка. Недалеко от Смоленска ладья убийц настигла ладью Глеба, который не сопротивлялся, а только кротко молил пощадить его совсем еще юную жизнь. Однако по приказу хладнокровных убийц собственный повар Глеба перерезал ему горло. Но смертельные раны мученик вменил в ничто ради Господа.

Тело князя было погребено в пустынном месте недалеко от Смоленска, «между двумя колодами», т. е. в простом деревянном гробу. В 1019–1020 годах могилу святого Глеба разыскал его брат Ярослав, и тело, оказавшееся нетленным, было перенесено в Вышгород Киевский и погребено рядом со святым князем Борисом. У их гробницы стали происходить чудеса. Мощи братьев были перенесены в церковь святителя Василия Великого. Митрополит Киевский Иоанн составил службу князьям-страстотерпцам и установил им совместное празднование 24 июля, которое и свершается с 1-й половины XI века. Два древнейших жития XI века: «Чтение», написанное преподобным Нестором, и «Сказание» с именем монаха Иакова – показывают, что Русская Церковь издревле почитала братьев- страстотерпцев, которые постоянно оказывали молитвенную помощь своей родной земле, особенно в годину тяжелых испытаний.


 Во 4-й деньВ 5-й деньВ 6-й день