В 6-й день

Воспомина́ние бы́вшаго чудесе́ в Колосса́ех, е́же есть в Хо́нех, от Архистрати́га Михаи́ла.

И свята́го му́ченика Евдокси́я и и́же с ним пострада́вших.

И преподо́бнаго отца́ на́шего Архи́ппа

Ве́чер

По обы́чном стихосло́вии, на Го́споди, воззва́х: стихи́ры на 6, глас 4.

Подо́бен: я́ко до́бля:

Трисо́лнечнаго Божества́ предста́тель светле́йший,/ Михаи́ле явля́яся Архистрати́же,/ с го́рними Си́лами зове́ши, ра́дуяся:/ Свят еси́, о́тче,/ Свят еси́, Собезнача́льное Сло́во,/ Свят еси́ и Святы́й Ду́ше,/ Еди́на сла́ва,/ Еди́но ца́рство и естество́,// Еди́но Божество́ и си́ла.

И вид твой о́гнен,/ и добро́та чу́дна,/ Михаи́ле Первоа́нгеле,/ невеще́ственным бо естество́м прехо́диши концы́,/ исполня́я повеле́ния всех Творца́,/ си́лен в кре́пости твое́й познава́емь/ и исто́чник исцеле́ний/ храм твой соде́ловая,// зва́нием твои́м святы́м почита́емый.

Творя́й А́нгелы Твоя́, я́коже писа́ся, ду́хи/ и служа́щия Тебе́ пла́мень о́гненный,/ посреде́ чино́в пе́рвенствующа/ показа́л еси́, Го́споди,/ Твои́х арха́нгельских/ Михаи́ла Архистрати́га,/ Твои́м манове́нием повину́ющася, Сло́ве,/ и песнь Трисвяту́ю// со стра́хом возглаша́юща сла́ве Твое́й.

Сла́ва, глас 6. Самогла́сен. Византи́ево:

Сра́дуйтеся нам, вся а́нгельская чинонача́лия,/ первостоя́тель бо ваш и наш предста́тель,/ вели́кий Архистрати́г,/ в дне́шний день в честне́м его́ хра́ме,/ пресла́вно явля́яся, освяща́ет./ Те́мже, по до́лгу воспева́юще, тому́ возопии́м:/ покры́й нас кро́вом крил твои́х,// велича́йший Михаи́ле Арха́нгеле.

И ны́не, Богоро́дичен, глас то́йже:

Сра́дуйтеся нам, вся де́вственных ликостоя́ния,/ Предста́тельница бо на́ша, и Хода́таица, и покро́в,/ и вели́кое прибе́жище,/ в дне́шний день в честне́м Ея́ и Боже́ственнем пра́зднестве/ скорбя́щия утеша́ет./ Те́мже по до́лгу воспева́юще Сию́, возопии́м:/ покры́й ны боже́ственным предста́тельством Твои́м,// Пречи́стая Богоро́дице Влады́чице.

На стихо́вне Окто́иха.

Сла́ва, и ны́не, глас 8. Самогла́сен. Иоа́нна Мона́ха:

Я́ко чинонача́льник, и побо́рник,/ и А́нгелов началово́ждь, Архистрати́же,/ вся́кия ну́жды и ско́рби,/ неду́гов и лю́тых грехо́в свободи́/ ве́рно воспева́ющия и моля́щия тя, сла́вне,/ я́ве, я́ко невеще́ствен, Невеще́ственнаго зря/ и непристу́пным све́том Влады́чния сла́вы осия́емь./ Той бо человеколю́бно Плоть нас ра́ди от Де́вы прия́т,// спасти́ восхоте́в челове́чество.

Тропа́рь, глас 4:

Небе́сных во́инств Архистрати́же,/ мо́лим тя при́сно мы, недосто́йнии,/ да твои́ми моли́твами огради́ши нас/ кро́вом крил невеще́ственныя твоея́ сла́вы,/ сохраня́я нас, припа́дающих приле́жно и вопию́щих:/ от бед изба́ви нас,// я́ко чинонача́льник вы́шних Сил.

Слу́жба му́ченика Евдокси́я пое́тся на повече́рии.

Кано́н му́ченика, глас 8.

Песнь 1

Ирмо́с: Во́ду проше́д, я́ко су́шу, и египетскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м.

И́же сла́вы жела́юще страда́льческия,/ прииди́те, восхва́лим вели́каго во страда́льцех Евдокси́я вси,/ в кимва́лех дави́дски торжеству́юще.

Изы́де повеле́ние нечести́вое в весь мир,/ не служи́ти Живо́му Бо́гу, но и́долом,/ ты же, му́чениче, Небе́сному Бо́гу твоему́ служи́л еси́.

Тезоимени́те, сло́во благочести́вых, Евдокси́е му́чениче,/ испове́дал еси́ Христа́ Бо́га су́ща Безнача́льна/ посреде́ суде́й непра́ведных, уязвля́ющих тя.

Богоро́дичен: Чи́ни Тя Ангел и челове́к, Ма́ти Безневе́стная, хва́лят непреста́нно,/ Зижди́теля бо их, я́ко Младе́нца, на рука́х Твои́х носи́ла еси́.

Песнь 3

Ирмо́с: Утвержде́н в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко несть свят, па́че Тебе́,// Еди́не Человеколю́бче.

Я́коже а́гнец, на заколе́ние приве́лся еси́, Евдокси́е му́чениче,/ не пререку́я, ни вопия́, всеблаже́нне,/ Учи́теля твоего́ Христа́ житие́ подража́я,/ и сего́ ра́ди сла́ву прия́л еси́ безконе́чную.

И́дольским служи́телем, страда́льче, возглаша́л еси́:/ Бог мой живе́т во ве́ки,/ ва́ши же бо́зи дела́ рук челове́ческих суть,/ па́дше не востаю́т, истука́нни су́ще, безду́шнии.

Хи́трости вра́жия низложи́л еси́, страда́льче,/ утве́рждь твой ум на ка́мени Це́ркве Христо́вы./ Тем и взыва́л еси́:/ жизнь тле́нную оставля́ю за су́щую ве́чную жизнь.

Богоро́дичен: Соприсносу́щный Отцу́ и Сопресто́льный Бог Сло́во,/ обнови́ти восхоте́в родонача́льника,/ по Ипоста́си того́ из Тебе́, Чи́стая, восприя́ше,/ Святе́йшу всех Тя, Богома́ти, обре́т.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́// и просла́вих Твое́ Божество́.

Пре́лесть обличи́л еси́/ ну́дящих тя отврещи́ся Жи́зни безконе́чныя/ и жизнь су́етную возлюби́ти.

Ураня́емь, ра́довался еси́,/ закла́вшагося ра́ди Сло́ва пло́тию ра́ди нас,/ мучи́телем же взыва́л еси́:/ я́ко недосто́йна суть моя́ страда́ния.

Бо́зи, и́мже слу́жите, уста́ иму́ще, не веща́ют,/ Евдокси́е, взыва́л еси́,/ и́мже подо́бни да бу́дут творя́щии ты́я.

Богоро́дичен: Очище́ние нам да́руй неве́дений, я́ко Безгре́шен,/ и умири́ мир Твой, Бо́же,/ моли́твами Ро́ждшия Тя.

Песнь 5

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,// Человеколю́бче.

Ты моя́ кре́пость, Евдокси́е, вопия́л еси́,/ пло́тию пострада́вый Христе́ Бо́же,/ утверди́ мене́, се бо стражду́ му́чимь.

Ты сокро́вище проше́ний еси́, Христе́ Бо́же,/ не пре́зри мене́, вопия́л еси́ в му́ках,/ Евдокси́е терпеливоду́шне.

Меча́ и огня́ не бою́ся, Евдокси́й вопия́ше к мучи́телю:/ се бо и́мам Бо́га, Кре́пость кре́пкую,/ Ему́же служу́.

Богоро́дичен: Исцели́, Чи́стая, страсте́й мои́х неможе́ние,/ посеще́ния Твоего́ удосто́ивши,/ и здра́вие мольба́ми Твои́ми пода́ждь ми.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся, / к Тебе́ бо возопи́х, и услы́ши мя,// Бо́же спасе́ния моего́.

Ни меч, ниже́ огнь разлучи́т мя любве́ Христо́вы,/ ва́ша же преще́ния я́ко де́тская глумле́ния вменя́ю,/ Евдокси́е, вопия́л еси́ ве́рою, жре́ти принужда́ющим.

О́наго ужаса́юся огня́ негаси́маго муча́щаго,/ жи́зни же жела́ю неотъе́млемыя,/ мучи́телю, Евдокси́е, взыва́л еси́:/ се те́ло уязвля́й, не служу́ и́долом твои́м.

Бо́зи, и́мже ты кла́няешися, сребро́ и зла́то суть,/ уста́ и́мут, и не глаго́лют,/ у́ши не слы́шат, но́ги не хо́дят,/ мой же Бог Вседе́тель есть, взыва́л еси́.

Богоро́дичен: Да изба́вимся лю́тых прегреше́ний моли́твами Твои́ми, Богороди́тельнице Чи́стая,/ и да улучи́м, Пресвята́я, Боже́ственное сия́ние/ из Тебе́ неизрече́нно воплоще́ннаго Сы́на Бо́жия.

Седа́лен, глас 8.

Подо́бен: Прему́дрости:

Небе́сное бога́тство собра́в и ни́щим сие́ прине́с, расточи́л еси́,/ и дал еси́ а́лчущим хлеб твой,/ и, сего́ ра́ди жизнь нетле́нную стяжа́в, Христо́вым испове́данием просия́л еси́;/ те́мже, му́жествовав и зако́нно пострада́в,/ вене́ц прия́л еси́ от Бо́га трудо́в твои́х, страстоте́рпче Евдокси́е,/ моли́ Христа́ Бо́га, грехо́в оставле́ние дарова́ти/ честву́ющим любо́вию святу́ю па́мять твою́.

Песнь 7

Ирмо́с: От Иуде́и доше́дше о́троцы,/ в Вавило́не иногда́/ ве́рою Тро́ическою пла́мень пе́щный попра́ша, пою́ще:// отце́в Бо́же, благослове́н еси́.

Отроко́в поревнова́в терпе́нию, Евдокси́е прему́дре,/ о́бразу ле́стному не поклони́л еси́ коле́н,/ но взыва́л еси́ ве́рою те́плою:/ отце́в на́ших Бо́же, благослове́н еси́.

По́мощь стяжа́в непобе́дную благода́ти, му́чениче Евдокси́е,/ тве́рдо ополче́ния вра́жия низложи́л еси́/ и, победи́в, взыва́л еси́:/ отце́в на́ших Бо́же, благослове́н еси́.

Распала́емь, му́чениче, любо́вию Боже́ственнаго жела́ния, Евдокси́е,/ пристра́стия привре́меннаго я́ве возгнуша́лся еси́, возме́здие прие́мля,/ и взыва́л еси́:/ отце́в на́ших Бо́же, благослове́н еси́.

Богоро́дичен: Ле́стию па́дшаго восхоте́в обнови́ти, Преблаги́й Бог/ от Де́вы воплоща́ется и ражда́ется и обожа́ет челове́чество.

Песнь 8

Ирмо́с: Седмери́цею пещь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,// лю́дие, превозноси́те во вся ве́ки.

Язв пучи́ну преплы́л еси́, сла́вне,/ и в приста́нище жи́зни дости́гл еси́, Евдокси́е,/ вене́ц терпе́ния прие́м,/ и со Ангелы немо́лчно зове́ши:/ де́ти, благослови́те, свяще́нницы, воспо́йте,/ лю́дие, превозноси́те во вся ве́ки.

Сквозе́ огнь и во́ду проше́дша, блаже́нне, в поко́й тя Христо́с изведе́,/ в не́мже, ра́дуяся, со Ангелы, му́чениче му́дре, пое́ши немо́лчно Тро́ице песнь:/ де́ти, благослови́те, свяще́нницы, воспо́йте,/ лю́дие, превозноси́те во вся ве́ки.

Ты мы́сленнаго погуби́л еси́ зми́я, по́мощию Небе́снаго Царя́, сла́вне,/ и, побе́ды вене́ц терпе́ния прие́м,/ со безпло́тными немо́лчно взыва́вши:/ де́ти, благослови́те, свяще́нницы, воспо́йте,/ лю́дие, превозноси́те во вся ве́ки.

Тро́ичен: Трисве́тлое Божество́, во Еди́ной сия́ющее зари́, от Еди́наго Триипоста́снаго Естества́,/ Роди́теля Безнача́льна, Единоесте́ственна же Сло́ва Отцу́ и Сца́рствующаго Единосу́щнаго Ду́ха,/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.

Песнь 9

Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бысть простра́ннейшее Небе́с./ Тем Тя, Богоро́дицу,// А́нгелов и челове́к чинонача́лия велича́ют.

Устраши́шася а́нгельская во́инства, и челове́честии собо́ри удиви́шася,/ я́ко, тле́нно естество́, страда́льче, име́я и то́чное,/ безплотныя де́моны показа́л еси́ окая́нны и не́мощны и ве́рою Тро́ице взыва́л еси́, служа́:/ Трисия́нный Све́те, Ты еси́ сла́ва моя́.

Блаже́н ты, му́чениче, в ро́ды родо́в просла́вився, Евдокси́е,/ я́ко, пло́ти ника́коже пощаде́в Христа́ ра́ди,/ но му́ки претерпе́л еси́ и не поклони́лся еси́ истука́нным./ Те́мже тя чи́ни а́нгельстии, оде́ждею нетле́ния оде́явше, венча́ша.

Ве́рою соверша́ющих, му́чениче, страда́ний твои́х па́мять, Евдокси́е,/ к Бо́гу твои́ми моли́твами от вся́каго наве́та вра́жия исхити́, да не похва́лится на ны,/ я́ко му́ченик бо мо́жеши, прие́м от Вы́шняго страда́ний воздая́ние.

Богоро́дичен: Яви́лася еси́, о Де́во, Ма́ти Бо́жия, па́че естества́ ро́ждши пло́тию Бо́га Сло́ва,/ Его́же Оте́ц от се́рдца Своего́ отры́гну пре́жде всех веко́в, я́ко Благ,/ Его́же ны́не и теле́с превы́шша разумева́ем, а́ще и в те́ло облече́ся.

Стихи́ры му́ченика, глас 1.

Подо́бен: Небе́сных чино́в:

Тезоимени́тное твое́ зва́ние, му́чениче Евдокси́е,/ доброде́тельми благода́ть Спа́са прия́л еси́,/ и житие́м благосла́вия страда́льческаго/ благоде́рзостно премени́л еси́,/ и, со Ангелы лику́я на Небесе́х,/ досто́йно ны́не просла́вился еси́.

Отсече́нием вы́и ве́ры ра́ди,/ Небе́сным венце́м венча́л еси́ главу́ твою́,/ Евдокси́е преблаже́нне,/ те́мже нас, соверша́ющих па́мять твою́,/ не преста́й моли́твами твои́ми ко Христу́ помина́ти,/ му́чениче сла́вне.

Преоби́дев бога́тство и привре́менную жизнь,/ Моисе́йски вмени́л еси́/ па́че мирска́го благосла́вия, Евдокси́е,/ носи́ти поноше́ние Христо́во,/ Боже́ственную похвалу́,// прибли́жився му́кам и напа́стем да́же до кро́ве, сла́вне.

Сла́ва, и ны́не, Богоро́дичен:

Прегреше́ний пучи́ною обурева́емь,/ к ти́хому приста́нищу Твоея́ пречи́стыя́ мольбы́,/ Богоро́дице, прибе́г, взыва́ю Ти:/ спаси́ мя, держа́вную Твою́ просте́рши десни́цу// рабу́ Твоему́, Пренепоро́чная.

Крестобогоро́дичен. Подо́бен:

У Креста́ предстоя́щи Сы́на и Бо́га Твоего́/ и долготерпе́ние Того́ смотря́ющи,/ глаголаше, пла́чущи, Ма́ти чи́стая:/ увы́ Мне, Ча́до Сладча́йшее,/ что сия́ стра́ждеши непра́ведно, Сло́ве Бо́жий,// да спасе́ши челове́чество?

На у́трени

О́ба кано́на Окто́иха без му́ченичнов и Арха́нгела кано́н на 6, его́же краегране́сие: Пе́рваго пою́ безтеле́сных умо́в. Ио́сиф. Глас 4.

Песнь 1

Ирмо́с: Отве́рзу уста́ моя́,/ и напо́лнятся ду́ха,/ и сло́во отры́гну Цари́це Ма́тери,/ и явлю́ся све́тло торжеству́я,// и воспою́, ра́дуйся, Тоя́ чудеса́.

Боже́ственными светлостьми́ облистава́емь всегда́,/ ум мой озари́, е́же воспе́ти тя, Архистрати́же го́рних во́инств,/ всех утвержде́ние притека́ющих к тебе́.

Ум Пребезнача́льный/ преми́рнаго чинонача́льника показа́ чи́на тя, пресла́вне Архистрати́же,/ и свет су́щих во тьме, и Боже́ственное украше́ние Це́ркве Своей.

Умо́в предваря́я Небе́сных в Ду́се,/ до́льним же, всеизря́днейшее, Михаи́ле, да́лся еси́ огражде́ние, и утвержде́ние,/ и ору́жие, враги́ закала́ющее и потребля́ющее.

Богоро́дичен: Де́во Всенепоро́чная, я́же Ангелов благоле́пие, челове́ков по́моще,/ Ты мне помози́, морепла́вающему/ и в бу́ри греха́ при́сно впа́дающу и бе́дствующу.

Песнь 3

Ирмо́с: Не му́дростию и си́лою/ и бога́тством хва́лимся,/ но Тобо́ю, о́тчею Ипоста́сною Му́дростию, Христе́,// несть бо свят па́че Тебе́, Человеколю́бче.

Кре́постию боже́ственною, воево́до Ангелов всехва́льне,/ обхо́диши всю зе́млю, от лю́тых ны изыма́я,/ призыва́ющия твое́ боже́ственное и́мя.

Я́ко боже́ствен пропове́дник, я́ко предста́тель ве́рных непосты́ден,/ заблу́ждших путево́ждь и наказа́тель был еси́,/ Бо́жий Архистрати́же богови́днейший.

Боже́ственнаго сия́ния чи́стшее зерца́ло был еси́,/ явле́ния честна́го све́тло прие́м Ду́ха,/ Михаи́ле Первоа́нгеле досточу́дне.

Богородичен: Невеще́ственныя умы́ Соста́вивый во́лею/ в веще́ственное Твое́ чре́во всели́ся хоте́нием, Всенепоро́чная,/ пло́тию зримь Незре́нный.

Седа́лен, глас 8.

Подо́бен: Прему́дрости:

Небе́сных чино́в наста́вник, служи́тель же сла́вы Боже́ственныя/ досто́йно быв повеле́нием Зижди́теля Твоего́,/ Христиа́ном еси́ хода́тай спаси́тельный, невеще́ственною твое́ю сла́вою земны́я назира́я./ Те́мже по до́лгу благохва́лим тя вси, боже́ственное твое́ днесь воспева́юще торжество́,/ Михаи́ле Архистрати́же, моли́ Христа́ Бо́га/ грехо́в оставле́ние дарова́ти пра́зднующим любо́вию боже́ственная твоя́ чудеса́.

Сла́ва, ин седа́лен, глас 1.

Подо́бен: Лик а́нгельский:

Лик а́нгельский Архистрати́га име́я, боже́ственнаго Михаи́ла,/ с ним Святе́й Тро́ице немо́лчное приноша́ет песнопе́ние,/ из не су́щих бо Соде́тель вся́ческих/ во́инства огнезра́чных чино́в Сло́вом приведе́.

И ны́не, Богоро́дичен:

Упова́ние христиа́н, Пресвята́я Де́во,/ Его́же родила́ еси́ Бо́га, па́че ума́ же и сло́ва,/ непреста́нно моли́ с вы́шними Си́лами/ пода́ти оставле́ние грехо́в на́ших всех и исправле́ние жития́/ ве́рою и любо́вию при́сно Тя сла́вящим.

Крестобогоро́дичен:

Нескве́рная А́гница, А́гнца и Па́стыря пове́шена на Дре́ве ме́ртва зря́щи,/ пла́чущи веща́ше и Ма́терски восклица́ющи:/ ка́ко претерплю́ Твое́ еже́ па́че сло́ва, Сы́не Мой, сни́тие/ и во́льныя Стра́сти, Бо́же Преблаги́й?

Песнь 4

Ирмо́с: Седя́й в сла́ве на Престо́ле Божества́,/ во о́блаце ле́гце/ прии́де Иису́с Пребоже́ственныи́/ нетле́нною дла́нию/ и спасе́ зову́щия:// сла́ва, Христе́, си́ле Твое́й.

Ум сый Пе́рвый, соста́вил еси́ боже́ственный умы́ хоте́нием,/ нача́льника посреде́ сих Михаи́ла соде́ла,/ всеблаже́нным прича́стием просвеща́ема и у́мными богонача́лии облиста́ема.

Пе́ние свято́е со Престо́лы и Нача́лы, и Си́лами, и Властьмя́,/ и Свяще́нными Госпо́дьствы возглаша́вши Тро́ице,/ пресла́вне Михаи́ле, спаса́я ны, пою́щия тя.

Велича́ем всех Творца́ же и Го́спода,/ за благоутро́бие да́вшаго обхране́ние велича́йшее и необори́му сте́ну и забра́ло,/ Михаи́ла нам, светоза́рнаго Архистрати́га.

Богоро́дичен: Мы́сленно, Де́во, Твоего́ Рождества́ пресла́вное ска́зоваше дре́вле священноявле́нный,/ Ду́хом го́ру присе́нную ви́дя Тя ясне́йше,/ из Нея́же Святы́й прии́де Бог воплоща́емь.

Песнь 5

Ирмо́с: Нечести́вии не у́зрят сла́вы Твоея́, Христе́,/ но мы Тя, Единоро́дне,/ Оте́ческия сла́вы сия́ние Божества́,/ от но́щи у́тренююще,// воспева́ем Тя, Человеколю́бче.

Яви́лся еси́ предводя́щ дре́вняго Изра́иля,/ повеле́нием Су́щаго из Иа́кова,/ челове́ком я́вльшагося дебельство́м те́ла,/ Михаи́ле безтеле́сный, А́нгелов Архистрати́же.

Невеще́ственными сия́нии обожа́емь при́сно, прича́стием богонача́льным,/ и нам осия́ние светода́тельное подава́вши, Первоа́нгеле, пресла́вно удивля́емь.

Украси́ся благода́тию боже́ственный твой храм,/ в той бо прише́д, враче́вств пучи́ну его́ показа́л еси́,/ Михаи́ле Первоа́нгеле, и страсте́й потреби́теля.

Богоро́дичен: У́мных А́нгелов Тя показа́ Бог вы́шшую,/ всели́вся в Твоя́ ложесна́, Чи́стая, Всенепоро́чная,/ Его́же моли́ всегда́ уще́дрити пою́щия Тя.

Песнь 6

Ирмо́с: Возопи́, прообразу́я погребе́ние тридне́вное,/ проро́к Ио́на, в ки́те моля́ся:// от тли изба́ви мя, Иису́се, Царю́ Сил.

Ра́дуется ве́рных мно́жество, благохва́лящее тя,/ и сла́вит Всесвята́го Сло́ва,/ совоку́пльшаго земны́я со А́нгелы, Михаи́ле, Свое́ю бла́гостию.

Во́инства Изра́илева спасл еси́, явля́яся/ и́ боже́ственная подая́ повеле́ния, Архистрати́же,/ враги́ низложи́л еси́ и в коне́ц сия́ истреби́л еси́.

Я́ко ви́де тя Иису́с Нави́н, поклони́ся,/ вопроси́в честна́го твоего́ и свята́го и́мене, нача́льниче А́нгелов,/ благогове́нием и стра́хом держи́мь.

Богоро́дичен: Блаже́ни лю́дие, при́сно блажа́щии Тя, Блаже́нная,/ я́же Бо́га Блаже́ннаго ро́ждшая,/ земны́я за милосе́рдие неизрече́нным едине́нием обожи́вшаго.

Конда́к, глас 2:

Архистрати́же Бо́жий,/ служи́телю Боже́ственныя сла́вы,/ А́нгелов нача́льниче и челове́ков наста́вниче,/ поле́зное нам проси́ и ве́лию ми́лость,// я́ко безпло́тных Архистрати́г.

И́кос:

Рекл еси́, Человеколю́бче, в Писа́ниих Твои́х,/ мно́жеству ра́доватися А́нгелов на Небеси́ о челове́це еди́ном ка́ющемся, Безсме́ртне./ Те́мже мы, и́же в беззако́ниях, Безгре́шне Еди́не Сердцеве́дче,/ Тя моли́ти всегда́ дерза́ем, я́ко Благоутро́бнаго,/ уще́дрити и низпосла́ти недосто́йным умиле́ние, Влады́ко, подая́ нам проще́ние,/ о всех бо нас мо́лится Тебе́ безпло́тных Архистрати́г.

Песнь 7

Ирмо́с: Спасы́й во огни́ авраа́мския Твоя́ о́троки/ и халде́и уби́в,/ я́же Пра́вда пра́ведно уловля́ше,/ препе́тый Го́споди,// Бо́же оте́ц на́ших, благослове́н еси́.

Усмотри́в, Дании́л ви́де купностоя́ща тя, блаже́нне,/ и умудря́юща того́ в Хова́ре,/ виде́ние, е́же ви́де, Гаврии́ле молниезра́чне,/ Михаи́ла чинонача́льника тому́ явля́юща.

А́нгелов наста́вники, богови́дныя и светоно́сныя, Михаи́ла и Гаврии́ла,/ на́ша благи́я уте́шители и предста́тели, и храни́тели,/ восхва́лим ве́рою велегла́сно.

Красе́н и всеблаголе́пен и богови́ден сый,/ вождь па́че ума́ невеще́ственных духо́в был еси́, Михаи́ле светоза́рнейше,/ с ни́ми у́бо о всех нас моли́ся.

Богоро́дичен: Ума́ Вели́каго и́стинно Сло́во Присносу́щное, Де́во,/ в Тя неизглаго́ланно и стра́шно всели́вшася ви́дя,/ возопи́ Гаврии́л Арха́нгел:/ ра́дуйся, Престо́ле Высоча́йшаго, Благослове́нная.

Песнь 8

Ирмо́с: Изба́вителю всех, Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:// вся дела́, благослови́те, по́йте Го́спода.

Мы́сленных безтеле́сных чинонача́льник, моли́твенник челове́ков спаси́телен,/ боже́ствен Бо́жий служи́тель, Михаи́ле, показа́лся еси́, поя́ непреста́нно:/ вся дела́, благослови́те, по́йте Го́спода.

Свети́льника два всесве́тлая, Михаи́ле и Гаврии́ле Арха́нгели,/ Трисве́тлаго Божества́ сия́ньми тварь просвеща́ющии, лю́тых мглу отгоня́ете.

Я́ко до́брии ко́рмчии, Арха́нгели,/ ко приста́нищу Боже́ственныя во́ли душе́вный кора́бль мой спаса́йте,/ от бу́ри грехо́в па́дший и бе́дствующий.

Богоро́дичен: Невестокраси́тель боже́ственный Арха́нгел, предста́в,/ приглаша́ще Тебе́, е́же ра́дуйся, Неве́сто Бо́жия Безневе́стная,/ А́нгелов сла́во и челове́ков спасе́ние и огражде́ние.

Песнь 9

Ирмо́с: Е́ва у́бо неду́гом преслуша́ния/ кля́тву всели́ла есть;/ Ты же, Де́во Богоро́дице,/ прозябе́нием чревоноше́ния ми́рови благослове́нне процвела́ еси́.// Тем Тя вси велича́ем.

Се благоле́пие твоего́, Арха́нгеле, боже́ственнаго хра́ма,/ осия́ющее светоза́рным твои́м прису́тствием, чуде́с мо́лнии испуща́ет/ и тьмы неду́гов всегда́ отгоня́ет Боже́ственною благода́тию.

Я́ко сопру́г красе́н и ле́потен су́ще,/ Влады́чним повеле́нием су́щим на земли́ слу́жите, Арха́нгели,/ от лю́тых изыма́юще и всем просвеще́ние посыла́юще спаси́тельное Боже́ственным Ду́хом.

Днесь ра́дуются с на́ми безтеле́снии боже́ственнии у́ми,/ воспева́ема ви́дяще сего́ от всех, вели́каго и све́тлаго Архистрати́га,/ и любо́вию с на́ми пра́зднуют, Жизнода́вца велича́юще.

Боже́ственная дво́ице и светоза́рна,/ Арха́нгели Михаи́ле всече́стне и Гаврии́ле препросла́вленне,/ Тро́ице Честне́й предстоя́ще, прегреше́ний вины́ и му́ки хва́лящия вас изба́вите.

Богоро́дичен: Глас Тебе́ боже́ственнаго Гаврии́ла прино́сим ра́достно и взыва́ем:/ ра́дуйся, раю́, дре́во посреде́ жи́зни име́яй, Пречи́стая,/ пресла́вная Сло́ва пала́то;/ ра́дуйся, Де́во Всенепоро́чная.

Свети́лен:

Я́коже дре́вле погрузи́л еси́ реки́ безчи́нная ше́ствия и шуме́ния, Архистрати́же сла́вы,/ та́ко и ны́не, Арха́нгеле, язы́ков горды́ню и де́монов свере́пства потреби́,/ я́ко да по до́лгу тя чтим в пе́снех досто́йно.

Богоро́дичен: Почита́ют Рождество́ Твое́ безпло́тных чи́ни:/ ра́дости бо земна́я Ты напо́лнила еси́ еди́на./ Тем Тя, Всенепоро́чную, ве́рнии, сла́вим, в пе́ниих славосло́вяще,/ Свет бо су́щим во тьме возсия́ла еси́,/ я́ко у́тренний возсия́вший день.

На хвали́тех стихи́ры на 4, глас 1.

Подо́бен: Небе́сных чино́в:

А́нгельски в ми́ре торжеству́юще,/ на Престо́ле сла́вы Бо́гу седя́щему/ возопии́м песнь:/ Свят еси́, Отче Небе́сный,/ Свят еси́, Соприсносу́щное Сло́во,// Свят еси́, и Ду́ше Всесвяты́й.

Небе́сным пе́рвенствуяй в дерзнове́нии мно́зем/ и предстоя́ Престо́лу стра́шному в сла́ве,/ самови́дче неизрече́нных,/ спаса́й ны, Михаи́ле Архистрати́же,/ су́щия в ну́ждах бед и напа́стей,// моли́твами твои́ми, мо́лимся.

Безпло́тных Ангелов пе́рвый еси́ вои́стину/ и служи́тель Боже́ственнаго светозаре́ния о́наго,/ самови́дец же и таи́нник,/ спаси́ ны, Михаи́ле Архистрати́же,/ ле́тно честву́ющия тя благоче́стно// и пою́щия Тро́ицу ве́рно.

Сла́ва, глас то́йже. Самогла́сен:

Чинонача́льник вы́шних Сил Михаи́л,/ первостоя́тель боже́ственных чино́в,/ днесь нас к торжеству́ созва́,/ и́же всегда́ с на́ми ходя́й/ и сохраня́яй вся от вся́каго диа́воля обстоя́ния./ Прииди́те у́бо, празднолю́бцы и христолю́бцы,/ цве́ты доброде́телей взе́мше,/ чи́стыми по́мыслы и со́вестию благостоя́нною Арха́нгелов собо́р почти́м,/ той бо, непреста́нно Бо́гу предстоя́/ и Трисвяту́ю песнь воспева́я,// мо́лит спасти́ся душа́м на́шим.

И ны́не, Богоро́дичен или́ Крестобогоро́дичен.

Подо́бен: Всехва́льнии му́ченицы:

Ору́жие про́йде,/ о Сы́не,/ Де́ва глаго́лаше,/ на Дре́ве я́ко ви́де Христа́ пове́шена,/ Мое́ се́рдце растерза́ется, Влады́ко,/ я́коже дре́вле Симео́н Мне прорече́,/ но воста́ни и спросла́ви, Безсме́ртне,/ Ма́терь и Рабу́ Твою́,// молю́ся.

На стихо́вне Окто́иха.

Сла́ва, Арха́нгела, глас 5:

Иде́же осеня́ет благода́ть твоя́, Арха́нгеле,/ отту́ду диа́воля прого́нится си́ла,/ не терпи́т бо све́та твоего́ ви́дети спады́й денни́ца./ Тем мо́лим тя,/ огнено́сныя его́ стре́лы, я́же на ны дви́жимыя,/ угаси́ хода́тайством твои́м,/ избавля́я нас от собла́знов его́,// достохва́льный Михаи́ле Архистрати́же.

И ны́не, Богоро́дичен, или́ Крестобогоро́дичен, глас то́йже.

Подо́бен: Ра́дуйся:

А́гнца Своего́ А́гница иногда́ зря́щи/ к заколе́нию тща́щася,/ усе́рдно после́доваше, сия́ вопию́щи Ему́:/ ка́мо и́деши, Ча́до Мое́ Сладча́йшее, Христе́?/ Чесо́ ра́ди ско́рое тече́ние сие́, Долготерпели́ве, тече́ши неле́ностно?/ Иису́се Вожделе́йнейший Безгре́шный,/ Многоми́лостиве Го́споди,/ даждь Мне сло́во, Рабе́ Твое́й,/ Сы́не Мой Вселюбе́знейший,/ не пре́зри, Ще́дре, молча́, Тя стра́нно Ро́ждшую,/ Бо́же Всеще́дрый,// да́руяй ми́ру ве́лию ми́лость.

На литурги́и

Блаже́нны Арха́нгела, пе́снь 3-я и 6-я. Проки́мен, глас 4: Творя́й Ангелы Своя́ ду́хи// и слуги́ Своя́ пла́мень о́гненный. Стих: Благослови́, душе́ моя́, Го́спода: Апо́стол ко Евре́ем, зача́ло 305; Аллилу́йя, глас 5: Хвали́те Го́спода, вси Ангели Его́: Стих: я́ко Той рече́, и бы́ша: Ева́нгелие от Луки́, зача́ло 51. Прича́стен: Творя́й Ангелы Своя́ ду́хи:

Моли́тва

О святы́й Михаи́ле Арха́нгеле, светлообра́зный и гро́зный Небе́снаго Царя́ воево́до! Пре́жде Стра́шнаго Суда́ осла́би ми пока́ятися от грехо́в мои́х, от се́ти ловя́щих изба́ви ду́шу мою́ и приведи́ ю к сотво́ршему ю Бо́гу, седя́щему на Херуви́мех, и моли́ся о ней приле́жно, да твои́м хода́тайством по́слет ю в ме́сто поко́йное. О гро́зный воево́до Небе́сных Сил, предста́телю всех у Престо́ла Влады́ки Христа́, храни́телю тве́рдый всем челове́ком и му́дрый ору́жниче, кре́пкий воево́до Небе́снаго Царя́! Поми́луй мя, гре́шнаго, тре́бующаго твоего́ заступле́ния, сохрани́ мя от всех ви́димых и неви́димых враг, па́че же подкрепи́ от у́жаса сме́ртнаго и от смуще́ния диа́вольскаго и сподо́би мя непосты́дно предста́ти Созда́телю на́шему в час стра́шнаго и пра́веднаго Суда́ Его́. О всесвяты́й вели́кий Михаи́ле Архистрати́же! Не пре́зри мене́, гре́шнаго, моля́щагося тебе́ о по́мощи и заступле́нии твое́м, в ве́це сем и в бу́дущем, но сподо́би мя та́мо ку́пно с тобо́ю сла́вити Отца́ и Сы́на и Свята́го Ду́ха во ве́ки веко́в. Ами́нь.

Воспоминание чуда Архистратига Михаила, бывшего в Хонех. Во Фригии, около города Иераполя, в местности, называемой Херотопа, находился храм во имя Архистратига Михаила; рядом с храмом истекал целебный источник. Храм этот был сооружен усердием одного из жителей города Лаодикии в благодарность Богу и святому Архистратигу Михаилу за исцеление его немой дочери водой источника. Архистратиг Михаил, явившись в сонном видении отцу немой девицы, еще не просвещенному святым Крещением, повелел ему привести больную к целебному источнику, где девица должна была получить дар речи, испив воды из источника. Девица действительно получила при источнике исцеление и начала говорить. После этого чуда отец с дочерью и все его семейство крестились и усердием благодарного отца был воздвигнут храм в честь святого Архистратига Михаила.

Множество людей – не только христиан, но и язычников – приходили к источнику за исцелением; находясь под впечатлением от свершавшихся чудес, многие из язычников отрекались от идолов и обращались к вере во Христа.

В храме святого Архистратига Михаила в продолжение многих лет исполнял пономарское служение благочестивый человек по имени Архипп. Проповедью о Христе и примером собственной богоугодной жизни он множество язычников обратил в христианство. Язычники в своем озлоблении на христиан вообще, и в первую очередь на Архиппа, который никогда не отлучался от храма, задумали одновременно и уничтожить храм, и погубить Архиппа. С этой целью они соединили две нагорные реки в одно русло и направили их течение на храм. Святой Архипп усердно молился Архистратигу Михаилу о предотвращении бедствия. Тогда по его молитве около храма явился Архистратиг Михаил; ударом своего жезла он открыл в горе широкую расселину и повелел водам бурлящего потока устремиться в нее, так что храм остался невредимым. Увидев такое дивное чудо, язычники в страхе бежали, а святой Архипп и собравшиеся христиане прославили Бога и благодарили святого Архистратига Михаила за оказанную помощь. Место же, где совершилось чудо, получило название Хоны, что значит «отверстие», «расселина».

Избавленный от смерти совершившимся чудом, святой Архипп неотлучно оставался при храме, дожил до 70 лет и мирно скончался. Христиане похоронили его в Хонех, на месте подвигов святого, там, где он удостоился быть свидетелем преславного чуда Архистратига Михаила. В «Житиях святых» протоиерея И. Бухарева указано, что святой Архипп жил в IV веке.

Святые мученики Евдоксий, Зинон, Макарий ( 31.1 или 312) и дружина их приняли мученическую смерть за Христа при императоре Максимиане Галерии, соправителе императора Диоклитиана. Святой Евдоксий занимал высокую должность военачальника в императорских войсках. Он был христианином, так же как и его друг святой Зинон и его домоправитель Макарий.

После издания императором Диоклитианом грозного эдикта о предании смерти христиан, отказавшихся принести жертву идолам, многие христиане, в том числе знатные люди и сановники, бежали в разные страны со своими семьями, чтобы избежать мучений и смерти. Тогда и святой Евдоксий со своей супругой святой Василиссой и всей семьей, оставив высокую должность и бросив свое имущество, скрылся в пределах Мелетины Армянской. Правитель Мелетины послал воинов разыскивать Евдоксия. Встретив однажды самого Евдоксия, одетого в бедную одежду, и не узнав его, они стали его расспрашивать о местонахождении военачальника Евдоксия. Святой, не открывая себя, пригласил воинов в свой дом, накормил их и предоставил ночлег. Встречу свою с воинами святой Евдоксий расценил как призыв от Господа, побуждающий его на мученический подвиг. Утром он открыл своим гостям, что он и есть тот, кого они ищут. Благодарные за гостеприимство, воины обещали скрыть от гонителей обнаруженное ими убежище святого Евдоксия, однако тот не согласился ценой пусть даже такого благородного со стороны воинов обмана купить себе жизнь. Сделав все распоряжения по дому и убедив свою супругу не плакать о нем, а, наоборот, отмечать день его мученической смерти как праздник, он надел на себя воинскую одежду и ушел вместе с воинами к правителю. Его супруга Василисса и его друзья, святые Зинон и Макарий, издали следовали за святым Евдоксием.

Увидев перед собой Евдоксия, правитель пробовал уговорить его принести жертву идолам и этим сохранить себе жизнь, высокое положение и имущество. Святой Евдоксий твердо отказался от всего, обличив безумие тех, кто поклоняется бездушным истуканам. Воинский пояс – знак его начальнической власти – он снял с себя сам и бросил в лицо правителю. Стоявшие тут же воины, тайные христиане, последовали его примеру, а их было более тысячи человек. Смущенный правитель запросил императора, как ему поступить, и получил приказание – начальников пытать, прочих же отпустить. Святого мученика Евдоксия подвергли длительным истязаниям, а затем повели на казнь. Следуя за мужем, святая Василисса плакала, плакал и друг мученика святой Зинон. Святой Евдоксий снова просил жену не плакать, а радоваться, что он удостоился мученического венца, и просил ее похоронить его тело в месте, называемом Амимна. Плачущему Зинону святой Евдоксий предсказал, что они в одно время предстанут в Царствии Небесном. Воодушевившись этими словами, Зинон во всеуслышание исповедал себя христианином, за что немедленно был приговорен к смерти. Сначала отрубили голову Зинону, а затем святой Евдоксий сам подставил свою голову под меч.

Святая Василисса взяла тело своего мужа и похоронила его там, где он ей заповедал. За этот поступок святую привели к правителю; она стремилась разделить участь своего супруга и без всякого стеснения обличала и правителя, и его ложных богов – идолов; однако правитель разгадал ее намерение и, не став мучить, прогнал от себя. Уходя, святая сказала ему, что Бог видит ее желание и исполнит его. Через семь дней святой Евдоксий явился своей жене и велел передать своему другу и домоправителю Макарию, что он со святым Зиноном ожидают прихода к ним Макария. Последний немедленно пошел к правителю, исповедал себя христианином, был приговорен к смерти и обезглавлен. Много других христиан, в том числе и воинов, тоже приняли в это время мученическую смерть.

В тот же день – празднование Киево-Братской иконе Божией Матери. Прежде она была местной в Борисоглебской церкви в г. Вышгороде, где она чудесно явилась в 1654 году. В 1662 году, во время войны России с Польшей (1659–1667), городу был нанесен большой урон от воевавших на стороне поляков крымских татар. В том числе был разорен и местный храм святых страстотерпцев Бориса и Глеба, а его святыни были отданы на поругание. Однако Промысл Божий сохранил чудотворную икону Божией Матери, которую своевременно вынесли из храма и пустили по Днепру, а мощи святых сокрыли под спудом. Река вынесла святыню к берегу Подола в Киеве, где она была с радостью принята православными и с подобающими почестями перенесена в Братский монастырь. Там она и оставалась в течение долгого времени. В описи церковного имущества Киево-Братского монастыря, сделанной в 1907 году, приводится ее описание: «Божией Матери Братской на деревянном бляте с серебляною на весь блят пестропозлащеного щитою и с накладными на оной серебряными вызолоченными и Богоматери и Младенца Иисуса коронами. На короне у Богоматери разноцветных камушков больших 23 и одна посередине звезда, усеянная разными маленькими светлыми камушками, а у Младенца Иисуса на короне больших камушков разноцветных 11…». Известно, что существовала «Песнь о чудотворной Киево-Братской иконе Богоматери», составленная вскоре после 1692 года. Празднования Киево-Братской иконе Божией Матери совершаются трижды в году: 6 сентября, 10 мая и 2 июня. Все они посвящены чудесному явлению святой иконы в 1654 году. Подлинник иконы не сохранился. Писанная с нее «мера в меру» икона находится ныне в Киевском монастыре Покрова Божией Матери.


Источник: Минея. - М. : Издат. совет Русской Православной Церкви, 2002-. 12 том. / Сентябрь. А. - 2003. – 924 с. ISBN 5-94625-051-5

Комментарии для сайта Cackle