Глас 4

На ма́лей вече́рни, на Го́споди воззва́х: стихи́ры воскре́сны 3, повторя́юще пе́рвую. Гла́с 4.

Сти́х: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Животворя́щему Твоему́ Кресту́, непреста́нно кла́няющеся, Христе́ Бо́же, Тридне́вное Воскресе́ние Твое́ сла́вим: те́м бо обнови́л еси́ истле́вшее челове́ческое естество́, Всеси́льне, и и́же на Небеса́ восхо́д обнови́л еси́ на́м, я́ко еди́н Бла́г и Человеколю́бец. [Два́жды.]

Дре́ва преслуша́ния запреще́ние разреши́л еси́, Спа́се, на Дре́ве Кре́стнем во́лею пригвозди́вся, и во а́д соше́д, Си́льне, сме́ртныя у́зы я́ко Бо́г растерза́л еси́. Те́мже кла́няемся е́же из ме́ртвых Твоему́ Воскресе́нию, ра́достию вопию́ще: Всеси́льне Го́споди, сла́ва Тебе́.

Врата́ а́дова сокруши́л еси́, Го́споди, и Твое́ю сме́ртию сме́ртное ца́рство разруши́л еси́; ро́д же челове́ческий от истле́ния свободи́л еси́, живо́т и нетле́ние ми́ру дарова́в, и ве́лию ми́лость.

Сла́ва, и ны́не: Богоро́дичен: догма́тик. Гла́с 4:

Без се́мене зачала́ еси́ и родила́ еси́ неизрече́нно, Низложи́вшаго си́льныя от престо́л, и Вознося́щаго смире́нныя, и Воздвиза́ющаго ро́г ве́рных Свои́х, сла́вящих Христо́в Кре́ст и погребе́ние, и сла́вное Воскресе́ние. Те́мже Тя́, Богоро́дице, Хода́таицу толи́ких бла́г немо́лчными пе́сньми ублажа́ем, я́ко моля́щуюся при́сно, е́же спасти́ся душа́м на́шим.

Та́же, Све́те ти́хий: Посе́м проки́мен: Госпо́дь воцари́ся: три́жды. Сти́х: Облече́ся Госпо́дь в си́лу, и препоя́сася. Та́же, Сподо́би, Го́споди, в ве́чер се́й: Иере́й же ектении́ не глаго́лет, но пое́м:

На стихо́вне стихи́ру воскре́сну, гла́с 4:

Го́споди возше́д на Кре́ст, пра́деднюю на́шу кля́тву потреби́л еси́, и соше́д во а́д, ве́чныя у́зники свободи́л еси́, нетле́ние да́руя челове́ческому ро́ду: сего́ ра́ди пою́ще сла́вим животворя́щее и спаси́тельное Твое́ Воста́ние.

Та́же стихи́ры подо́бны Пресвяты́я Богоро́дицы.

Подо́бен: Зва́нный свы́ше:

Сти́х: Помяну́ и́мя Твое́ во вся́ком ро́де и ро́де.

Из Безнача́льна Отца́ Сы́н безле́тно, низхожде́ния ра́ди и спасе́ния челове́ков, Бо́г Челове́к бы́сть, да пода́ст первозда́нному ны́не Ра́й; тогда́ и все́ естество́ изба́вится от пре́лести зми́евы, и о́браз па́дший спасе́т, я́ко Благопремени́тель, отню́дуже Ма́терь соде́ла Невесторо́дицу Чи́сту я́ко нескве́рну, Ю́же я́ко анки́ру вси́, и приста́нище ублажа́ем.

Сти́х: Слы́ши, Дщи́, и ви́ждь, и приклони́ у́хо Твое́.

Воплоще́нна Созда́теля все́х, име́ла еси́ во утро́бе Твое́й, Богоблаже́нная, вообрази́вшаго челове́ка, пре́жде па́дшаго преступле́нием змии́ным: Бо́га бо родила́ еси́ пло́тию несказа́нно на́м, и из тле́ния свободи́ла еси́ естество́ все́ обетша́вшее, Рождество́м Твои́м, те́мже пое́м и сла́вим Твою́ благода́ть, Де́во Безневе́стная, моли́тися не преста́й, спасти́ся душа́м на́шим.

Сти́х: Лицу́ Твоему́ помо́лятся бога́тии лю́дстии.

Да Твоея́ все́м мно́жество ми́лости и бла́гости откры́еши на́м неопредели́мую пучи́ну, грехи́ рабо́в Твои́х вся́ загла́ди: и́маши бо, Всенепоро́чная, я́ко Ма́ти су́щи Бо́жия, вла́сть созда́ния, и во́диши вся́, я́ко хо́щеши, си́лою Твое́ю: и́бо благода́ть Ду́ха Свята́го я́ве все́льшаяся в Тя́, соде́йствует Ти́ во все́м при́сно, Всеблаже́ннейшая.

Сла́ва, и ны́не: И́же со Отце́м и Ду́хом славосло́вимый Сы́н, в вы́шних от Серафи́мов первосозда́ннаго па́ки обнови́ти хотя́, всего́ Себе́ истощи́ неизрече́нно во утро́бе Твое́й, Богоро́дице Всепе́тая; и из Тебе́ возсия́вый, просвети́ всего́ ми́ра Божество́м, изба́вивый от идолонеи́стовства, и Собо́ю обожи́вый, на Небеса́ возведе́ челове́чество, Христо́с Бо́г и Спа́с ду́ш на́ших.

Та́же, Ны́не отпуща́еши: Трисвято́е. Тропа́рь: Све́тлую Воскресе́ния про́поведь: Богоро́дичен: Е́же от ве́ка утае́ное: Ектения́ и отпу́ст.

на Го́споди, воззва́х: стихи́ры воскре́сны, гла́с 4.

Сти́х: Изведи́ из темни́цы ду́шу мою́, испове́датися и́мени Твоему́.

Животворя́щему Твоему́ Кресту́, непреста́нно кла́няющеся, Христе́ Бо́же, Тридне́вное Воскресе́ние Твое́ сла́вим: те́м бо обнови́л еси́ истле́вшее челове́ческое естество́, Всеси́льне, и и́же на Небеса́ восхо́д обнови́л еси́ на́м, я́ко еди́н Бла́г и Человеколю́бец.

Сти́х: Мене́ жду́т пра́ведницы, до́ндеже возда́си мне́.

Дре́ва преслуша́ния запреще́ние разреши́л еси́, Спа́се, на Дре́ве Кре́стнем во́лею пригвозди́вся, и во а́д соше́д, Си́льне, сме́ртныя у́зы я́ко Бо́г растерза́л еси́. Те́мже кла́няемся е́же из ме́ртвых Твоему́ Воскресе́нию, ра́достию вопию́ще: Всеси́льне Го́споди, сла́ва Тебе́.

Сти́х: Из глубины́ воззва́х к Тебе́, Го́споди, Го́споди, услы́ши гла́с мо́й.

Врата́ а́дова сокруши́л еси́, Го́споди, и Твое́ю сме́ртию сме́ртное ца́рство разруши́л еси́; ро́д же челове́ческий от истле́ния свободи́л еси́, живо́т и нетле́ние ми́ру дарова́в, и ве́лию ми́лость.

И́ны стихи́ры, творе́ние Анато́лиево.

Сти́х: Да бу́дут у́ши Твои́ вне́млюще гла́су моле́ния моего́.

Прииди́те воспои́м, лю́дие, Спа́сово Тридне́вное Воста́ние, и́мже изба́вихомся а́довых нереши́мых у́з, и нетле́ние и жи́знь вси́ восприя́хом зову́ще: распны́йся, и погребы́йся, и воскресы́й, спаси́ ны Воскресе́нием Твои́м, Еди́не Человеколю́бче.

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

А́нгели и челове́цы, Спа́се, Твое́ пою́т Тридне́вное Воста́ние, и́мже озари́шася вселе́нныя концы́, и рабо́ты вра́жия вси́ изба́вихомся, зову́ще: Животво́рче Всеси́льне Спа́се, спаси́ ны Воскресе́нием Твои́м, Еди́не Человеколю́бче.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Врата́ ме́дная сте́рл еси́, и вереи́ сокруши́л еси́, Христе́ Бо́же, и ро́д челове́ческий па́дший воскреси́л еси́. Сего́ ра́ди согла́сно вопие́м: Воскресы́й из ме́ртвых, Го́споди, сла́ва Тебе́.

Сти́х: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Го́споди, е́же от Отца́ Твое́ Рождество́, безле́тно е́сть и присносу́щно; е́же от Де́вы воплоще́ние, неизрече́нно челове́ком и несказа́нно; и е́же во а́д соше́ствие стра́шно диа́волу и а́ггелом его́: сме́рть бо попра́в, тридне́вен воскре́сл еси́, нетле́ние подава́я челове́ком, и ве́лию ми́лость.

И́ны стихи́ры Богоро́дице, Па́вла Аморре́йскаго. Гла́с 8.

Подо́бен: О пресла́внаго чудесе́!

Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.

Тебе́ ве́рным покро́в показа́, И́же вся́ческих Бо́г, вопло́щся от крове́й Твои́х, Богоро́дице Всечи́стая, и предста́тельницу и побо́рницу су́щим в ну́ждах и обстоя́ниих, и в бу́ри приста́нище благоути́шное. Ты́ у́бо спаси́ от вся́кия ско́рби и туги́, все́х притека́ющих к Боже́ственному покро́ву Твоему́.

Сти́х: Хвали́те Го́спода вси́ язы́цы, похвали́те Его́ вси́ лю́дие.

Да прославля́ю и почита́ю, да чту́ и пою́, да воспева́ю всегда́ Твое́ боже́ственное и́мя, Преблаже́нная Влады́чице, да мя́ не оста́виши враго́м ра́дование бы́ти, покро́ву Твоему́ притека́ющаго: но крилы́ честны́х моли́тв Твои́х всегда́ це́ла мя́ сохрани́ от все́х искуше́ний.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Ра́дуйся, Богома́ти Пречи́стая. Ра́дуйся, ве́рным Наде́ждо. Ра́дуйся, ми́ру Очище́ние. Ра́дуйся, Избавля́ющая вся́ких скорбе́й рабы́ Твоя́, Я́же сме́рти разруши́тельница. Ра́дуйся, Животоно́сная. Ра́дуйся, Уте́шительнице. Ра́дуйся, Засту́пнице. Ра́дуйся, Прибе́жище.

Сла́ва, и ны́не: Богоро́дичен: И́же Тебе́ ра́ди Богооте́ц проро́к Дави́д пе́сненно о Тебе́ провозгласи́, вели́чия Тебе́ Сотво́ршему: предста́ Цари́ца одесну́ю Тебе́. Тя́ бо Ма́терь, хода́таицу живота́ показа́, без отца́ из Тебе́ вочелове́читися благоволи́вый Бо́г, да Сво́й па́ки обнови́т о́браз, истле́вший страстьми́, и заблу́ждшее горохи́щное обре́т овча́, на ра́мо восприи́м, ко Отцу́ принесе́т, и Своему́ хоте́нию, с Небе́сными совокупи́т Си́лами, и спасе́т, Богоро́дице, ми́р, Христо́с име́яй ве́лию и бога́тую ми́лость.

Та́же, Све́те ти́хий: Проки́мен: Госпо́дь воцари́ся: и про́чее по обы́чаю.

На стихо́вне стихи́ры воскре́сны, гла́с 4:

Го́споди, возше́д на Кре́ст, пра́деднюю на́шу кля́тву потреби́л еси́, и соше́д во а́д, ве́чныя у́зники свободи́л еси́, нетле́ние да́руя челове́ческому ро́ду: сего́ ра́ди пою́ще сла́вим животворя́щее и спаси́тельное Твое́ Воста́ние.

И́ны стихи́ры по алфави́ту.

Сти́х: Госпо́дь воцари́ся, в ле́поту облече́ся.

Пове́шен на Дре́ве, Еди́не Си́льне, всю́ тва́рь поколеба́л еси́ – положе́н же во гро́бе, живу́щия во гробе́х воскреси́л еси́, нетле́ние и жи́знь да́руя челове́ческому ро́ду. Те́мже пою́ще сла́вим Тридне́вное Твое́ Воста́ние.

Сти́х: И́бо утверди́ вселе́нную, я́же не подви́жится.

Лю́дие беззако́ннии, Христе́, Тебе́ преда́вше Пила́ту, распя́ти осуди́ша, неблагода́рни о Благоде́тели яви́вшеся. Но во́лею претерпе́л еси́ погребе́ние; самовла́стно воскре́сл еси́ тридне́вно я́ко Бо́г, да́руя на́м безконе́чный живо́т, и ве́лию ми́лость.

Сти́х: До́му Твоему́ подоба́ет святы́ня, Го́споди, в долготу́ дни́й.

Со слеза́ми жены́, доше́дша гро́ба, Тебе́ иска́ху, не обре́тша же, рыда́юща с пла́чем вопию́ща глаго́лаху: увы́ на́м, Спа́се на́ш, Царю́ все́х, ка́ко укра́ден бы́л еси́? Ко́е же ме́сто держи́т Живоно́сное Те́ло Твое́? А́нгел же к ни́м отвещава́ше, не пла́чите, глаго́лет, но ше́дша пропове́дите, я́ко воскре́се Госпо́дь, подая́ на́м ра́дость, я́ко Еди́н Благоутро́бен.

Сла́ва, и ны́не: Богоро́дичен: При́зри на моле́ния Твои́х ра́б, Всенепоро́чная, утоля́ющи лю́тая на ны́ воста́ния, вся́кия ско́рби на́с изменя́ющи: Тя́ бо Еди́ну тве́рдое и изве́стное утвержде́ние и́мамы, и Твое́ предста́тельство стяжа́хом. Да не постыди́мся, Влады́чице, Тя́ призыва́ющии, потщи́ся на умоле́ние, Тебе́ ве́рно вопию́щих: ра́дуйся, Влады́чице, все́х По́моще, Ра́досте и Покро́ве, и Спасе́ние ду́ш на́ших.

Та́же, Ны́не отпуща́еши: и Трисвято́е по О́тче на́ш:

Тропа́рь, гла́с 4:

Све́тлую Воскресе́ния про́поведь от А́нгела уве́девша Госпо́дни учени́цы, и пра́деднее осужде́ние отве́ргша, апо́столом хва́лящася глаго́лаху: испрове́ржеся сме́рть, воскре́се Христо́с Бо́г, да́руяй ми́рови ве́лию ми́лость.

Сла́ва, и ны́не: Богоро́дичен: Е́же от ве́ка утае́ное, и а́нгелом несве́домое та́инство: Тобо́ю, Богоро́дице, су́щим на земли́ яви́ся Бо́г, в несли́тном соедине́нии воплоща́емь, и Кре́ст во́лею на́с ра́ди восприи́м, и́мже воскреси́в первозда́ннаго, спасе́ от сме́рти ду́ши на́ша.

Кано́н Пресвяте́й Богоро́дице. Гла́с 4.

Пе́снь 1

Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зныма Моисе́овыма рука́ма, Амали́кову си́лу в пусты́ни победи́л е́сть.

Припе́в: Пресвята́я Богоро́дице, спаси́ на́с.

Я́же еди́на в напа́стех и ско́рбех защища́ющая, под кро́в Тво́й, Пречи́стая, прибега́ющих те́пле, приими́ я́ко Преблага́я, я́же от се́рдца моле́ния.

Приста́нище невла́емое обре́т Тя́ неразу́мный, напа́стныя же и ну́ждныя прило́ги отрева́я, благода́рное пою́ Ти воспева́ние, Богому́жная Роди́тельнице.

Сла́ва: Ми́лостивным и кро́тким Твои́м о́ком, Богороди́тельнице, зря́щи мя́ во обстоя́нии и ско́рби одержи́ма, вско́ре свободи́: Тя́ бо призыва́ю на по́мощь.

И ны́не: Преклоне́на мя́, Влады́чице, скорбьми́ ну́ждными лю́те, я́ко Ми́лостива, Еди́на Блага́я Предста́тельница рабо́в Твои́х, ру́ку мольбы́ простри́, и лю́тых бе́д изба́ви мя́.

Пе́снь 3

Ирмо́с: Лу́к си́льных изнемо́же, и немощству́ющии препоя́сашася си́лою: сего́ ра́ди утверди́ся в Го́споде се́рдце мое́.

Ору́жие кре́пко, и сте́ну Тя́ стяжа́в а́з, побежда́ю сопроти́вных полки́, и пою́ вели́чия Твоя́, Богоро́дице Неискусобра́чная.

Пе́щь разоря́еши печа́лей, и погаша́еши отча́яния зно́й: кто́ бо та́ко, я́коже Ты́, Де́во Богоро́дице, упова́ние на́ше?

Сла́ва: Внуши́ гла́с раба́ Твоего́, Твоея́ тре́бующаго по́мощи, Богома́ти: упова́ние мое́, услы́ши мя́, и напа́стей исхити́.

И ны́не: Прии́де от прегреше́ний мно́жества мучи́тельство на́м, нося́ сме́рть па́губную: но спаси́ Твоя́ рабы́, Богоро́дице, Ты́ бо мо́жеши.

Пе́снь 4

Ирмо́с: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Побе́ждши вражду́ющих мне́ всу́е, я́ко ду́шу мою́ тща́щихся лю́те прия́ти, сохрани́ мя, Влады́чице, поми́луй, и спаси́: к Тебе́ бо прибега́ю, ра́б Тво́й.

Избавля́ющи мя́ от язы́ка льстивоглаго́лива, Блага́я Засту́пнице моя́, безпа́костна покажи́, и жите́йских дея́ний: мно́го бо мо́жеши, я́ко Зижди́теля Ма́ти су́щи.

Сла́ва: Безболе́зненну ве́дый Тя́, Целе́бницу, немощны́й, ду́хом и усты́ зову́: исцели́ мя, Влады́чице, поми́луй, и спаси́: к Тебе́ бо прибега́ю, ра́б Тво́й.

И ны́не: Не оста́ви мене́ напа́стем пре́дану бы́ти, Ма́ти Бо́га на́шего, но от вся́кия ско́рби и зло́бы челове́чи сохрани́ неврежде́на: ты́ бо еси́ Помо́щница все́м на́м.

Пе́снь 5

Ирмо́с: Ты́, Го́споди мо́й, Све́т в ми́р прише́л еси́, Све́т Святы́й, обраща́яй из мра́чна неве́дения, ве́рою воспева́ющия Тя́.

Испра́ви, Чи́стая, моли́тву раба́ Твоего́ ко Го́споду Сы́ну Твоему́: да обря́щу разреше́ние мно́гих мои́х прегреше́ний.

Изба́ви мя́ страсте́й и бе́д, Богоневе́сто: Тя́ бо положи́ Бо́г очище́ние вои́стинну моему́ смире́нию.

Сла́ва: Покро́в мо́й Ты́ еси́, и при́сное хвале́ние, о Влады́чице Богоро́дице! Ника́коже бо презира́еши к Тебе́ прибега́ющих.

И ны́не: Поми́луй, Чи́стая, чту́щих Рождество́ Твое́, и изба́ви мучи́тельства, и го́рести челове́ческия: и́бо и́маши е́же мощи́.

Пе́снь 6

Ирмо́с: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею Кро́вию.

Кре́пость ми́ Сама́ еси́, Пречи́стая Влады́чице, во обре́тших мя́ зело́ ненача́янных ско́рбех, и вопию́ Ти: я́ко ве́лия еси́ Покрови́тельница рабу́ Твоему́.

Исцели́ душе́вныя моя́ я́звы, Пречи́стая, заступи́ мя, Де́во, и изба́ви раба́ Твоего́ от оклевета́ния, наве́та же и развраще́ния непра́ведна.

Сла́ва: Сокруши́ на мя́, при́сно прибега́ющаго к Тебе́, наве́тники непра́ведныя, и не оста́ви мя́ поги́бнути: я́ко вся́ Тебе́ возмо́жна, Чи́стая, я́ко Богоотрокови́це.

И ны́не: Победи́ души́ моея́ свире́пую во́лну, я́ко мно́жество прегреше́ний, напа́стей и скорбе́й, Влады́чице, воста́ша на мя́, но сама́ мя спаси́.

Го́споди, поми́луй, три́жды, Сла́ва, и ны́не:

Седа́лен, гла́с 4:

Мно́гими прегреше́нии а́з блу́дный у́м помрачи́в, вопию́ Твоему́ кре́пкому заступле́нию, Богоро́дице: просвети́ души́ моея́ зе́ницы, возсия́й ми́ покая́ния све́тлую зарю́, и облецы́ мя во ору́жие све́та, Богороди́тельнице Чи́стая.

Пе́снь 7

Ирмо́с: Спасы́й во огни́ авраа́мския Твоя́ о́троки, и халде́и уби́в, я́же пра́вда пра́ведно уловля́ше, Препе́тый Го́споди Бо́же оте́ц на́ших, благослове́н еси́.

И́же от ага́рян наси́лование ско́ро потре́бльши мече́м моли́тв Твои́х, Мари́е, лю́ди и ста́до Твое́ сохрани́, Сы́ну Твоему́ зову́щия: Бо́же оте́ц на́ших, благослове́н еси́.

Равноле́пная Ски́ния, приими́ мя к Тебе́ прибега́ющаго, да не прии́мет мя́ вра́г погуби́ти хотя́, зову́щаго: превозноси́мый оте́ц на́ших Бо́же, благослове́н еси́.

Сла́ва: Богороди́тельнице Мари́е, предвари́ раба́ Твоего́ вско́ре, в треволне́ниих напа́стей потопля́емаго, не иму́щаго по́мощи, к тебе́ же зову́ща: упова́ние конце́в, поми́луй мя́.

И ны́не: Челове́ческия по́мыслы я́ко грехо́м вино́вны, ны́не, Богоро́дице Блага́я, разори́, Боже́ственными Твои́ми моли́твами, и рабы́ Твоя́ изба́ви боле́зненныя напа́сти и вся́каго вре́да.

Пе́снь 8

Ирмо́с: Изба́вителю все́х Всеси́льне, посреде́ пла́мене благоче́ствовавшия, снизше́д ороси́л еси́, и научи́л еси́ пе́ти: вся́ дела́, благослови́те, по́йте Го́спода.

На́йде на ны́ язы́к беззако́нен, хваля́ся погуби́ти служи́тели Твоя́: его́же потре́бльши, Пречи́стая, покры́й взыва́ющия: вся́ дела́, благослови́те, Госпо́дня, Го́спода.

Мно́гия Твоя́ щедро́ты ми́лостивно на́с спаса́ют, Еди́на Богома́ти, от грехо́внаго суда́, и разли́чных напа́стей: Ты́ бо ро́ждши Бо́га, ми́луеши ми́р Его́.

Сла́ва: Я́ко Ты́ еси́ кре́пость и по́мощь, не бою́ся враго́в негодова́ния, но пою́ Тя, Влады́чице, и вопию́ Сы́ну Твоему́: благослови́те, вся́ дела́ Госпо́дня, Го́спода.

И ны́не: На мольбу́ мою́ ны́не умилосе́рдися, и ра́дость в печа́ли ме́сто да́руй ми́, да пою́ Тя, Влады́чице, и вопию́ Сы́ну Твоему́: благослови́те, вся́ дела́ Госпо́дня, Го́спода.

Пе́снь 9

Ирмо́с: Е́ва у́бо неду́гом преслуша́ния кля́тву всели́ла е́сть – Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́, те́м Тя́ вси́ велича́ем.

Ору́жие у́бо на ны́ обостри́в, совещава́ет льсти́вый ара́влянин беззако́нный: Ты́ же, Де́во Богоро́дице, си́лою Креста́ и моли́тв твои́х, вооружа́еши на него́ рабы́ Твоя́. Те́мже пропове́даем сла́ву Твою́.

Кре́пость Тебе́ на враги́ даде́ся, Влады́чице, и избавле́ние ми́ от бе́д. Что́ же а́з Тебе́ принесу́, не дове́м. Оба́че, е́же и́мам, благодаре́ние приношу́ Ти: приими́ сие́ ны́не, и спаси́ мя.

Сла́ва: О, Ма́ти вся́ческих Творца́ Всесве́тлая, печа́льных уте́ха, потопля́емых Предста́тельница, и пренемога́ющихся Засту́пница, до живота́ моего́ Ты́ мя сохрани́.

И ны́не: Утесня́ема мя́ грехи́ мно́гими, и беда́ми, не пре́зри мене́, Всепе́тая, ны́не, Тебе́ хвале́ния же́ртву приношу́, приле́жно взыва́я Ти́: Свята́я Богоро́дице, помози́ ми, Тя́ бо сла́вя пе́снь скончава́ю.

Та́же, Досто́йно е́сть: Трисвято́е, и про́чее обы́чно, и отпу́ст.

Кано́н Тро́ичен, [его́же краестро́чие: Четве́ртое пе́ние Бо́гу. Творе́ние Митрофа́ново.] Гла́с 4.

Пе́снь 1

Ирмо́с: Мо́ря чермну́ю пучи́ну, невла́жными стопа́ми, дре́вний пешеше́ствовав Изра́иль, крестообра́зныма Моисе́овыма рука́ма, Амали́кову си́лу в пусты́ни победи́л е́сть.

Тро́ицу Богонача́льную да просла́вим Ипоста́сьми, Еди́нственное же Естество́ Трие́х, Соприсносу́щную, Сопресто́льную, Ю́же моля́ще, глаго́лем: спаси́ и́же ве́рою Тебе́ сла́вящих.

Пома́зася от Отца́ Ду́хом ра́дования, богоде́тельным еле́ем, Сы́н, и Челове́к бы́сть, и Еди́наго Божества́ Триипоста́сное научи́л е́сть.

Сла́ва: Добро́ту непристу́пныя сла́вы Твоея́, Еди́нице Трисо́лнечная, Серафи́ми не терпя́ще зре́ти, спокрыва́ются кри́лы, и трисвяты́ми пе́сньми непреста́нно Тебе́ сла́вят.

Богоро́дичен: Неизрече́нно Творца́ родила́ еси́ все́х, Пречи́стая, избавля́ющаго дре́вния кля́твы челове́ки, и сме́ртныя тли́, и Тобо́ю позна́хом Еди́наго Бо́га Триипоста́снаго.

Пе́снь 3

Ирмо́с: Не му́дростию и си́лою и бога́тством хва́лимся, но Тобо́ю, О́тчею Ипоста́сною Му́дростию, Христе́: не́сть бо свя́т, па́че Тебе́, Человеколю́бче.

Си́лу свы́ше святы́м Твои́м пре́жде апо́столом, я́ко посла́л еси́, Христе́, от Отца́ Уте́шителя, Еди́но яви́л еси́ Естество́ Трисо́лнечное.

Патриа́рху Авраа́му егда́ яви́лася еси́ во о́бразе му́жесте, Тро́ичня Еди́нице, непреме́нное показа́ла еси́ Твоея́ Бла́гости и Госпо́дства.

Сла́ва: И́же во О́бразех Трие́х, Еди́н Бо́г ве́руемый: Неопи́санный я́ве, Недомы́слимый все́ми, изба́ви ду́ши на́ша от вся́кия ско́рби.

Богоро́дичен: Наста́вльшеся Сы́на Твоего́ прему́дрыми приведе́ньми, Еди́нственное и Трисве́тлое Богонача́лие сла́вим, и Тебе́ блажи́м, Присноде́ву.

Та́же седа́лен, гла́с 4. Подо́бен: Ско́ро предвари́:

Трисо́лнечная, Несозда́нная и Единосу́щная Eди́нице, Триипоста́сная и Непостижи́мая, рабы́ Твоя́ уще́дри: спаси́ от бе́д, я́ко Бо́г Ми́лостив, Тя́ бо, Го́споди, Еди́наго Изба́вителя и Влады́ку и́мамы, вопию́ще: бу́ди на́м ми́лостив.

Сла́ва, и ны́не: Богоро́дичен: Мно́гими обстояньми и напа́стьми лю́тых, Де́во, окружа́еми, и ко отча́янию при́сно впа́дающе, Еди́ну Тя́ спасе́ние и наде́жду, и сте́ну и́мамы, Богоро́дице, и Тебе́ по до́лгу ве́рою и ны́не мо́лим: спаси́ рабы́ Твоя́.

Пе́снь 4

Ирмо́с: Седя́й в сла́ве на Престо́ле Божества́, во о́блаце ле́гце прии́де Иису́с Пребоже́ственный, нетле́нною дла́нию, и спасе́ зову́щия: сла́ва, Христе́, си́ле Твое́й.

Пресу́щную Тро́ицу, во Еди́нице Божества́ и Господонача́лие, с Cерафи́мы Тебе́ сла́вим, я́ко Неразде́льно Естество́, я́ко Непристу́пное, я́ко равноста́тно сла́вою, Бо́же Непостижи́мый.

Разделе́нну су́щу неизрече́нно Ли́цы Божества́, и соединя́ему держа́вою вку́пе Еди́нем Госпо́дством, Безпреде́льну Еди́ну, Неопи́санну, воспева́ем Тя́, Творца́ всея́ тва́ри.

Сла́ва: Ум Безнача́льный, Сло́во неизглаго́ланне роди́, и Боже́ственнаго Ду́ха Равномо́щна испусти́: и сего́ ра́ди Тро́ицу Единосу́щную, Влады́ку все́х Бо́га пропове́даем.

Богоро́дичен: Ви́димь быва́я дре́вними обра́зне, предвозвести́ло е́сть, е́же от Тебе́ воплоще́ние, Сло́во: но по́слежде я́влься челове́ком, пои́стинне Триипоста́сное Единонача́лие яви́.

Пе́снь 5

Ирмо́с: Ужасо́шася вся́ческая о Боже́ственней сла́ве Твое́й: Ты́ бо, Неискусобра́чная Де́во, име́ла еси́ во утро́бе над все́ми Бо́га, и родила́ еси́ Безле́тнаго Сы́на, все́м воспева́ющим Тя́ ми́р подава́ющая.

Разуме́вше от ве́ры Вседе́тельнаго Божества́, Еди́но у́бо Непристу́пно Существо́, Три́ же Ипоста́си Живонача́льны, сра́слены чте́м: Отца́, и Сы́на, и Ду́ха Свята́го Соприсносу́щное бытие́.

Све́те Трисо́лнечне, су́щественнаго Све́та Твоего́ возсия́й ми́ Еди́нственное Божество́, Несозда́нное Естество́, и Светоде́йственный Исто́чниче вся́кия светода́тельныя зари́: да созерца́ю Твою́ добро́ту неизрече́нную.

Сла́ва: Я́ко Еди́ному су́щу Соде́телю вся́ческих, и Содержи́телю, и Ко́рмчию Всепрему́дру, вои́стинну и жи́зни Пода́телю, сего́ ра́ди и вопие́м Ти́ ве́рно: Влады́ко Трисо́лнечне, пою́щия Тя́ соблюди́.

Богоро́дичен: Обожи́ти хотя́ дре́вле истле́вшаго челове́ка, за бла́гость, Де́во, созда́вый, и показа́вый о́браза Боже́ственный зра́к, Челове́к бы́сть из Тебе́, Еди́но Тричи́сленное Богонача́лие пропове́да.

Пе́снь 6

Ирмо́с: Возопи́, прообразу́я погребе́ние тридне́вное, проро́к Ио́на в ки́те моля́ся: от тли́ изба́ви мя́, Иису́се, Царю́ Си́л.

Яви́ Оте́ц изглаго́луя сыновство́, и Ду́х, Христу́ кре́щшуся, ви́димь бы́в: сего́ ра́ди Еди́но и Тро́ическое Богонача́лие сла́вим.

Я́ко ви́де Тя́ Трисвяты́ми гла́сы воспева́емаго Иса́ия, на высо́це Престо́ле седя́ща, Тро́ическую позна́ Еди́наго Богонача́лия Ипоста́сь.

Сла́ва: Возвыше́но се́рдце покажи́ и на́с ра́б Твои́х, Высо́кий Царю́ Триипоста́сне: да Твоея́ сла́вы зри́м я́сно све́тлость.

Богоро́дичен: Восхоте́ вообрази́тися я́ве в на́ше, от Де́вы Сы́н Бо́жий я́ко Человеколю́бец, и Боже́ственныя сла́вы о́бщники челове́ки сотвори́.

Седа́лен, гла́с 4. Подо́бен: Ско́ро предвари́:

Отца́ нерожде́нна, Сы́на же рожде́нна, и Ду́ха Свята́го исхо́дна от Отца́ му́дрствующе, пропове́даем Безнача́льное Ца́рство и Божество́ Еди́но, Е́же славосло́вяще единому́дренно вопие́м: Тро́ице Единосу́щная, спаси́ на́с, Бо́же.

Сла́ва, и ны́не: Богоро́дичен: Ле́т превы́шше, и пре́жде ве́к Бо́га, в ле́то родила́ еси́ преесте́ственне пло́тию, Бо́га Челове́ка, Пречи́стая. Те́мже Тя́, Богоро́дицу, и́стинно и госпо́дственне вси́ испове́дающе, приле́жно Ти́ вопие́м: сла́вы ве́чныя вся́ сподо́би.

Пе́снь 7

Ирмо́с: В пещи́ Авраа́мстии о́троцы перси́дстей, любо́вию благоче́стия па́че, не́жели пла́менем опаля́еми, взыва́ху: благослове́н еси́ в хра́ме сла́вы Твоея́, Го́споди.

Учине́ная небе́сная естества́, и у́мныя чи́ны правосла́вно вси́ земноро́днии подража́юще, сла́вим Еди́но Божество́ в Трие́х Равноде́тельных ипоста́сех. [Два́жды.]

Сла́ва: Ре́чи святы́х проро́к, Тя́ дре́вле обра́зно Еди́наго веко́в все́х Соде́теля прояви́ша, Неизрече́ннаго Бо́га и Го́спода, Богонача́льными Треми́ Ипоста́сьми.

Богоро́дичен: И́же по существу́ Неви́димое Сло́во и Вседе́тельное, яви́лся еси́ челове́ком, Челове́к от Чи́стыя Богома́тере, челове́ка призыва́я ко прича́стию Твоего́ Божества́.

Пе́снь 8

Ирмо́с: Ру́це распросте́р Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели о́троцы, взыва́юще: благослови́те, вся́ дела́ Госпо́дня, Го́спода.

Све́те Единонача́льный и Трисия́нный, Существо́ Безнача́льное, Добро́то Недове́домая, в се́рдцы мое́м всели́ся, и хра́м Твоего́ Божества́, светови́ден и чи́ст покажи́ мя, зову́ща: благослови́те, вся́ дела́ Госпо́дня, Го́спода, по́йте и превозноси́те Его́ во ве́ки.

Сла́ва: От разли́чных мя́ страсте́й, Тро́ице Неразде́льная, Еди́нице Несли́тная, и омраче́ния прегреше́ний изба́ви, и озари́ луча́ми Твои́ми Боже́ственными: да вообразу́ю Твою́ сла́ву, и воспева́ю Тя́, Сла́вы Го́спода.

Богоро́дичен: Ум у́бо Нерожде́нный Оте́ц, и Сло́во Сообра́зно, и Ду́х Сопресто́лен, Существо́, Си́ла, Бытие́: Пресу́щная, Неизрече́нная, Великоде́йственная Тро́ице, Еди́нице, соблюда́й ста́до Твое́ моли́твами Богоро́дицы, я́ко естество́м Человеколю́бец.

Пе́снь 9

Ирмо́с: Вся́к земноро́дный да взыгра́ется Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Все́ к Тебе́ ны́не дви́жу се́рдце мое́ и мы́сль, и предложе́ния же всея́ души́ и те́ла, Соде́телю и Изба́вителю моему́, Единонача́льне, и Трисве́тле, и вопию́ Ти: спаси́ мя, раба́ Твоего́, от вся́ких искуше́ний и скорбе́й. [Два́жды.]

Сла́ва: Возвы́си на́ш у́м, и мы́сль к Тебе́, Вы́шнему, просвети́ Твои́ми сия́ньми пречи́стыми, О́тче, Сло́ве, Уте́шителю, во све́те живы́й непристу́пнем, Сла́вы Со́лнце, Светоде́ржче, всегда́ сла́вити Тя́ Единонача́льнаго Бо́га Триипоста́снаго.

Богоро́дичен: Спаси́ и́же в Тя́ ве́рующия, Го́споди, и пропове́дающия Безнача́льное Присносу́щное Существо́ Еди́но, Три́ же Ли́ца Богонача́льна и Сообра́зна, Твоего́ Госпо́дствия, и Боже́ственныя сла́вы Твоея́ сподо́би, мольба́ми Чи́стыя Богома́тере.

Посе́м припе́вы Григо́рия Синаи́та: Досто́йно е́сть: И про́чее полу́нощницы.

Бо́г Госпо́дь, и яви́ся на́м: на гла́с 4. Та́же тропа́рь: Све́тлую Воскресе́ния про́поведь: два́жды. И ны́не: Богоро́дичен: Е́же от ве́ка утае́ное: Та́же обы́чная стихосло́вия Псалти́ря.

По 1-м стихосло́вии седа́льны воскре́сны, гла́с 4:

Воззре́вша на гро́бный вхо́д, и пла́мене а́нгельскаго не терпя́ща мироно́сицы, с тре́петом дивля́хуся, глаго́люща: егда́ укра́деся Отве́рзый разбо́йнику Ра́й? Еда́ ли воста́, И́же и пре́жде стра́сти пропове́давый Воста́ние? Вои́стинну воскре́се Христо́с, су́щим во а́де подая́ живо́т, и Воскресе́ние.

Сти́х: Воскресни́, Го́споди Бо́же мо́й, да вознесе́тся рука́ Твоя́, не забу́ди убо́гих Твои́х до конца́.

Во́льным Твои́м сове́том Кре́ст претерпе́л еси́, Спа́се: и во гро́бе но́ве челове́цы положи́ша Тя́ сме́ртнии, сло́вом концы́ соста́вльшаго. Те́мже свя́зан бы́сть чу́ждий; сме́рть лю́то пленя́шеся, и су́щии во а́де вси́ взыва́ху живоно́сному Воста́нию Твоему́: Христо́с воскре́се, Жизнода́вец пребыва́яй во ве́ки.

Сла́ва, и ны́не: Богоро́дичен: Удиви́ся Ио́сиф, е́же па́че естества́ зря́, и внима́ше мы́слию и́же на руно́ до́ждь, в безсе́меннем Зача́тии Твое́м, Богоро́дице, купину́ огне́м неопали́мую, же́зл Ааро́нов прозя́бший, и свиде́тельствуя обру́чник Тво́й и храни́тель, свяще́нником взыва́ше: Де́ва ражда́ет, и по Рождестве́ па́ки Де́ва пребыва́ет.

По 2-м стихосло́вии седа́льны воскре́сны, гла́с 4:

Подо́бен: Ско́ро предвари́:

Воскре́сл еси́ я́ко Безсме́ртный от гро́ба, Спа́се, совоздви́гл еси́ ми́р Тво́й си́лою Твое́ю, Христе́ Бо́же на́ш, сокруши́л еси́ в кре́пости сме́рти держа́ву, показа́л еси́, Ми́лостиве, Воскре́сeние все́м: те́мже Тя́ и сла́вим, Еди́не Человеколю́бче.

Сти́х: Испове́мся Тебе́, Го́споди, все́м се́рдцем мои́м, пове́м вся́ чудеса́ Твоя́.

С го́рних высо́т соше́д Гаврии́л, и к ка́меню присту́пль, иде́же Ка́мень Жи́зни, белонося́й взыва́ше ко пла́чущим: преста́ните вы́ от рыда́ния во́пля, име́ющия и ны́не ми́лостивное: Его́же бо и́щете пла́чуща, дерза́йте, я́ко вои́стинну воста́л е́сть. Те́мже возопи́йте апо́столом: я́ко воскре́се Госпо́дь, Воста́вшему поклони́теся ра́дость прие́мша. Дерза́йте у́бо, да дерза́ет у́бо и Е́ва.

Сла́ва, и ны́не: Богоро́дичен: Удиви́шася, Чи́стая, вси́ а́нгелов ли́цы та́инству Твоего́ Рожде́ния стра́шному: ка́ко И́же вся́ содержа́й ма́нием еди́нем, объя́тии Твои́ми я́ко челове́к содержава́ется, и прие́млет нача́ло Преве́чный и млеко́м пита́ется, И́же вся́кое дыха́ние пита́яй неизрече́нною бла́гостию? И Тя́ я́ко вои́стинну Бо́жию Ма́терь хва́ляще сла́вят.

По непоро́чных ипакои́, гла́с 4:

Я́же Твоего́ пресла́внаго Воста́ния, предте́кша мироно́сицы, апо́столом пропове́даху, Христе́, я́ко воскре́сл еси́ я́ко Бо́г, подая́ ми́рови ве́лию ми́лость.

Степе́нна, гла́с 4. Антифо́н 1, и́хже стихи́ повторя́юще пое́м:

От ю́ности моея́ мно́зи бо́рют мя́ стра́сти, но Са́м мя́ заступи́, и спаси́, Спа́се мо́й.

Ненави́дящии Сио́на, посрами́теся от Го́спода, я́ко трава́ бо огне́м бу́дете изсо́хше.

Сла́ва: Святы́м Ду́хом вся́ка душа́ живи́тся, и чистото́ю возвыша́ется, светле́ется Тро́ическим Еди́нством священнота́йне.

И ны́не: то́йже.

Антифо́н 2:

Воззва́х Тебе́, Го́споди, те́пле, из глубины́ души́ моея́, и мне́ да бу́дут на послуша́ние Боже́ственная Твоя́ ушеса́.

На Го́спода наде́жду вся́к кто́ стяжа́в, вы́шший е́сть все́х скорбя́щих.

Сла́ва: Святы́м Ду́хом то́чатся благода́тныя струи́, напая́юща вся́ку тва́рь ко оживле́нию.

И ны́не: то́йже.

Антифо́н 3:

Се́рдце мое́ к Тебе́, Сло́ве, да возвы́сится, и да ничто́же услади́т мя́ от мирски́х красо́т на сла́бость.

К ма́тери свое́й я́коже и́мать кто́ любо́вь, ко Го́споду те́пльше любле́нием до́лжни есмы́.

Сла́ва: Святы́м Ду́хом богове́дения бога́тство, зре́ния, и прему́дрости: вся́ бо в Се́м Оте́ческая веле́ния Сло́во открыва́ет.

И ны́не: то́йже.

Проки́мен, гла́с 4: Воскресни́, Го́споди, помози́ на́м, и изба́ви на́с и́мене Твоего́ ра́ди. Сти́х: Бо́же, уши́ма на́шима услы́шахом: Вся́кое дыха́ние: Ева́нгeлие воскре́сно. Воскресе́ние Христо́во: Псало́м 50. И про́чая по обы́чаю.

Кано́н воскре́сeн, творе́ние Иоа́нна Дамаскина́.

Пе́снь 1

Ирмо́с: Мо́ря чермну́ю пучи́ну невла́жными стопа́ми, дре́вний пешеше́ствовав Изра́иль, крестообра́зныма Моисе́овыма рука́ма Aмали́кову си́лу в пусты́ни победи́л е́сть.

Припе́в: Сла́ва, Го́споди, свято́му Воскресе́нию Твоему́.

Возне́слся еси́ на пречи́стем дре́ве кре́стнем, на́ше отпаде́ние исправля́я, е́же на дре́ве исцеля́я всегуби́тельство, Влады́ко, я́ко Бла́г и Всеси́лен.

Во гро́бе пло́тски, во а́де же с душе́ю, я́ко Бо́г: в раи́ же с разбо́йником, и на Престо́ле бы́л еси́, Христе́, со Отце́м и Ду́хом, вся́ исполня́я, Неопи́санный.

Богоро́дичен: Без се́мене О́тчею во́лею от Боже́ственнаго Ду́ха Бо́жия зачала́ еси́ Сы́на, и пло́тию родила́ еси́: И́же из Отца́ без ма́тере, на́с же ра́ди, из Тебе́ без отца́.

Други́й кано́н крестовоскре́сен. Гла́с 4.

Пе́снь 1

Ирмо́с: Отве́рзу уста́ моя́, и напо́лнятся Ду́ха:

Исцели́л еси́ сокруше́ние челове́чества, Го́споди, Боже́ственною Твое́ю Кро́вию обнови́вый то́; и сокруши́л еси́ си́льнаго в кре́пости, и́же дре́вле сокруши́вшаго Твое́ созда́ние.

Ме́ртвых воста́ние, умерщвле́нием бы́л еси́: кре́пость бо отъя́тся умерщвле́ния, бра́вшися с Жи́знию ве́чною, И́же все́ми влады́чествующу воплоще́нному Бо́гу.

Богоро́дичен: Красе́н превы́шши Небе́сных Си́л, Боже́ственный Тво́й бы́сть Хра́м Одушевле́нный, Я́же во утро́бе Тя́ носи́вшая Де́ва, Гора́ Свята́я Твоя́, Бо́га на́шего.

И́н кано́н Пресвяте́й Богоро́дице, [его́же краестро́чие: Четве́ртая пе́снь Всесла́вней Отрокови́це.] Гла́с 4.

Пе́снь 1

Ирмо́с: Триста́ты кре́пкия, Рожде́йся от Де́вы:

Сотрясо́шася лю́дие, смято́шася язы́цы, ца́рствия же держа́вная уклони́шася, Чи́стая, от стра́ха Рождества́ Твоего́: прии́де бо Ца́рь мо́й, и низложи́ мучи́теля, и ми́р от тли́ изба́ви.

Жили́ще Свое́, Живы́й в вы́шних, к челове́ком соше́д, освяти́, Христе́, и непоколеби́мо яви́: еди́на бо по Рождестве́ де́вства сокро́вище, Зижди́теля ро́ждши пребыла́ еси́.

Пе́снь 3

Ирмо́с: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище, и утвержде́ние.

Дре́во Живо́тное, мы́сленный и́стинный Виногра́д, на Кресте́ ви́сит, все́м источа́я нетле́ние.

Я́ко вели́к, я́ко стра́шен, я́ко а́дово низло́ж шата́ние, и я́ко Бо́г Нетле́нен, ны́не пло́тски воскре́се.

Богоро́дичен: Ты́ еди́на су́щим на земли́, Я́же па́че естества́ благи́х Хода́таица, Ма́ти Бо́жия была́ еси́: те́мже Ти́, ра́дуйся, прино́сим.

И́н. Ирмо́с: Твоя́ песносло́вцы, Богоро́дице:

Я́дом испо́лненный мне́ зми́й зу́бы вонзе́, Спа́се, я́же, Вседержи́телю Влады́ко, гвоздьми́ ру́к Твои́х сокруши́л еси́: я́ко не́сть свя́т во святы́х, па́че Тебе́, Человеколю́бче.

Ви́ден бы́л еси́, Человеколю́бче, во́лею во гро́бе ме́ртв, Животво́рче, и врата́ разве́ргл еси́ а́дова, я́же от веко́в душа́м: я́ко не́сть свя́т во святы́х ра́зве Тебе́, Человеколю́бче.

Богоро́дичен: Неора́на бразда́ яви́лася еси́, Кла́с Живо́тный ро́ждши, все́м причаща́ющимся безсме́ртию Хода́тая, во святы́х Свята́го свя́то почива́ющаго.

И́н. Ирмо́с: С высоты́ снизше́л еси́ во́лею на зе́млю:

Очища́ется челове́ков существо́, Тобо́ю присовоку́пльшееся нестерпи́мому Боже́ственному Огню́, я́ко сокрове́нный, Пречи́стая Де́во, в Тебе́ хле́б испе́кшееся, И́же и Тебе́ неврежде́нну сохра́ншему.

Ка́я сия́ Я́же вои́стинну бли́з Бо́га? Я́ко превозше́дши вся́ а́нгельския чи́ны, еди́на добро́тою де́вства, я́ко Ма́ти сия́ющи Вседержи́теля.

Пе́снь 4

Ирмо́с: Вознесе́на Тя́ ви́девши Це́рковь на Кресте́, Cо́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Возше́л еси́, стра́сти моя́ исцеля́я, на Кре́ст стра́стию Пречи́стыя Пло́ти Твоея́, в ню́же во́лею обле́клся еси́. Те́мже Ти́ взыва́ем: сла́ва си́ле твое́й, Го́споди.

Безгре́шнаго сме́рть вкуси́вши, Животворя́щаго Те́ла Твоего́, досто́йно Влады́ко умертви́ся – мы́ же вопие́м Ти́: сла́ва си́ле Твое́й, Го́споди.

Богоро́дичен: Неискусобра́чно родила́ еси́, Де́во, и по Рождестве́ яви́лася еси́ де́вствующи па́ки: те́мже немо́лчными гла́сы, е́же ра́дуйся, Тебе́, Влады́чице, ве́рою несумне́нною взыва́ем.

И́н. Ирмо́с: Неизсле́дный Бо́жий сове́т:

Взако́нен сы́й Изра́иль, Тебе́, Христе́, взако́нившаго Бо́га не позна́: но я́ко беззако́нника, законопреступа́я, на Кресте́ пригвозди́, и́же законоположе́нию недосто́йный.

Обоже́на Твоя́, Спа́се, Душа́, а́дова сокро́вища плени́вши, я́же от ве́ка совоскреси́ ду́ши; живоно́сное же Те́ло все́м нетле́ние источи́.

Богоро́дичен: Тебе́, Присноде́ву и и́стинную Богоро́дицу вси́ сла́вим, Ю́же прообразова́ше богови́дцу Моисе́ю неопа́льно, Пречи́стая, купина́, огню́ примеси́вшися.

И́н. Ирмо́с: Седя́й в сла́ве:

Поживе́ с челове́ки, ви́димь бы́в Неви́димый, во зра́це сы́й Непостижи́маго Божества́, и вообра́жся из Тебе́, Отрокови́це, в чужде́е, ве́дущих Тя́ чи́стую Богома́терь спаса́ет.

Прия́т в веще́ственне Де́ва Невеще́ственнаго, в прича́стии вещества́, Младе́нца от Нея́ бы́вша. Те́мже во дву́ существу́, Еди́н познава́ется Плотоно́сец Бо́г, и Челове́к Пресу́щественный.

По Рождестве́ Тя Де́ву, И́же в Де́ву Тя́ всели́ся, и ро́ждся без се́мене, Сло́во и Бо́г пребы́сть, и в Рождестве́ Де́ву сохрани́, я́ко Влады́ка и Зижди́тель всея́ тва́ри.

Пе́снь 5

Ирмо́с: Ты́, Го́споди мо́й, Све́т в ми́р прише́л еси́, Све́т Святы́й, обраща́яй из мра́чна неве́дения ве́рою воспева́ющия Тя́.

Ты́, Го́споди, к земли́ ми́лостивно соше́л еси́; Ты́ возне́сл еси́ па́дшее челове́ческое существо́, на Дре́ве воздвиза́емь.

Ты́ взя́л ми́ еси́, Христе́, прегреше́ний осужде́ние; Ты́ разруши́л еси́ боле́зни сме́ртныя, Ще́дре, Боже́ственным Воскресе́нием Твои́м.

Богоро́дичен: Тя́ ору́жие непобеди́мое на враги́ предлага́ем, Тя́ утвержде́ние, и наде́жду на́шего спасе́ния, Богоневе́сто, стяжа́хом.

И́н. Ирмо́с: Ужасо́шася вся́ческая о Боже́ственней:

Прия́т Тя́ всего́ усты́ а́д безу́мный: на Кресте́ бо пригвожде́на Тя́ ви́дев, копие́м прободе́на, бездыха́нна, Жива́го Бо́га, про́ста вменя́ше челове́ка. Разуме́ же искуси́вый кре́пость Твоего́ Божества́.

Разруше́ный, Человеколю́бче, Хра́м Твоего́ Телесе́, гро́б раздели́вый и а́д нево́лею о́ба истязу́етася: о́в у́бо святы́х Твои́х ду́шы, телеса́ же други́й соотсыла́юще, Безсме́ртне.

Богоро́дичен: Се́ ны́не испо́лнися проро́ческое прорече́ние: Ты́ бо, Неискусобра́чная Де́во, име́ла еси́ во утро́бе над все́ми Бо́га и родила́ еси́ Безле́тнаго Сы́на, все́м воспева́ющим Тя́, ми́р подава́юща.

И́н. Ирмо́с: Ны́не воста́ну:

До́м Тя́ сла́вы, Го́ру Бо́жию Святу́ю, Чи́стая, Неве́сту, Черто́г, Хра́м освяще́ния, Сы́н Бо́жий, в Тя́ всели́вся, и Ра́й сла́дости присносу́щныя на́м соде́ла.

Пло́ть от кро́ве де́вственныя прия́л еси́, Христе́, безсе́менну, пречи́сту, ипоста́сну, и слове́сну и у́мну, одушевле́нну, де́йственну, хоте́тельну, самовлады́чну и самовла́стну.

Мучи́телей ра́зум де́вственное посрами́ чре́во: Младе́нец бо я́зву а́спидную душегу́бную испыта́ руко́ю, и отсту́пника го́рдаго низло́жив, ве́рных под но́зе покори́.

Пе́снь 6

Ирмо́с: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею Кро́вию.

Возше́л еси́ на Кре́ст, си́лою препоя́сався, и сопле́тся с мучи́телем я́ко Бо́г, с высоты́ све́ргл еси́, Ада́ма же непобеди́мою си́лою воскреси́л еси́.

Воскре́сл еси́ блиста́яйся кра́сный из гро́ба, Христе́, и разгна́л еси́ вся́ враги́ Боже́ственною си́лою Твое́ю, и вся́ я́ко Бо́г, весе́лия испо́лнил еси́.

Богоро́дичен: О, чу́до все́х чуде́с нове́йшее! Я́ко Де́ва во утро́бе, вся́ческая Обдержа́щаго неискусому́жно заче́нши, не тесновмести́.

И́н. Ирмо́с: Приидо́х во глубины́ морски́я:

Отве́рзе горта́нь сво́й а́д, и пожре́ мя, и ду́шу разшири́ безу́мный, но Христо́с соше́д, возведе́ жи́знь мою́, я́ко Человеколю́бец.

Поги́бе сме́ртию сме́рть, уме́рый бо воскре́се, нетле́ние мне́ да́руя, я́влься же жена́м провеща́ ра́дость Безсме́ртный.

Богоро́дичен: Нестерпи́маго Божества́ вмести́лище чи́стое утро́ба Твоя́ яви́ся, о Богоро́дице! Е́же без стра́ха Небе́снии чи́нове воззре́ти не возмого́ша.

И́н. Ирмо́с то́йже.

Дре́вле у́бо прельсти́ мя зми́й, и умори́ мя, прама́терию мое́ю Е́вою – ны́не же, Чи́стая, Тобо́ю созда́вый мя́ из истле́ния воззва́.

Бе́здна Тя́ бе́здну неизрече́нно благоутро́бия, Отрокови́це, избра́нную показа́ чуде́с, и́бо из Тебе́ мо́лниею Божества́, Би́сер – Христо́с возсия́.

Конда́к, гла́с 4. Подо́бен: Яви́лся еси́ дне́сь:

Спа́с и Изба́витель мо́й, из гро́ба я́ко Бо́г воскреси́ от у́з земноро́дныя, и врата́ а́дова сокруши́, и я́ко Влады́ка воскре́се тридне́вен.

И́кос: Воскре́сшаго из ме́ртвых, Христа́ Жизнода́вца тридне́вна из гро́ба, и врата́ сме́ртная дне́сь сокру́шшаго си́лою Свое́ю, и а́да умертви́вшаго, и жа́ло сме́ртное сте́ршаго, и Ада́ма со Е́вою свободи́вшаго, воспои́м вси́ земноро́днии, вопию́ще хвалу́ приле́жно: То́й бо я́ко Еди́н Кре́пкий, Бо́г и Влады́ка, воскре́се тридне́вен.

Пе́снь 7

Ирмо́с: В пещи́ Авраа́мстии о́троцы перси́дстей любо́вию благоче́стия па́че, не́жели пла́менем опаля́еми взыва́ху: благослове́н еси́ в хра́ме сла́вы Твоея́, Го́споди.

К нетле́нию челове́чество призва́ся, Боже́ственною измове́но Кро́вию Христо́вою, благода́рно воспева́ющее: благослове́н еси́ в хра́ме сла́вы Твоея́, Го́споди.

Я́ко Живоно́сец, я́ко Рая́ красне́йший вои́стинну, и черто́га вся́каго ца́рскаго показа́ся светле́йший, Христе́, гро́б Тво́й – исто́чник на́шего воскресе́ния.

Богоро́дичен: Вы́шняго освяще́нное Боже́ственное Селе́ние, ра́дуйся, Тобо́ю бо даде́ся ра́дость, Богоро́дице, зову́щим: благослове́на Ты́ в жена́х еси́, Всенепоро́чная Влады́чице.

И́н. Ирмо́с: Не послужи́ша тва́ри богому́дрии па́че Созда́вшаго:

Смири́л еси́ на Дре́во воздвиза́емь, о́ко высо́кое, и превознесе́нную бро́вь на зе́млю низложи́л еси́, спасы́й челове́ка: Препе́тый отце́в Госпо́дь и Бо́г благослове́н еси́.

Си́лою Твое́ю ро́г на́ш возвы́си служа́щих Ти́, воскресы́й из ме́ртвых, и а́дово истощи́вый пре́жде многочелове́чное бога́тство, Влады́ко: Препе́тый отце́в Госпо́дь и Бо́г благослове́н еси́.

Тро́ичен: Рече́нием Боже́ственным после́дующе, сла́вим Еди́но Божество́, я́ко в Трие́х Све́тех Неслия́нно, Непресеко́мо, Пла́мень Ве́чный просвеща́ющий всю́ тва́рь, зову́щую: Бо́же, благослове́н еси́.

И́н. Ирмо́с: Ю́ношы три́ в Вавило́не:

Привлачи́т мя́ к пе́нию любо́вь де́вственная, любве́ де́вственныя о́гнь, и́же в се́рдцы, вопи́ти Ма́тери и Де́ве: Благослове́нная, Госпо́дь Си́лам с Тобо́ю.

Превы́шши тва́ри яви́лася еси́, я́ко Творца́ ро́ждши и Го́спода. Те́мже Ти́ вопию́, Богоро́дице: Благослове́нная, Госпо́дь Си́лам с Тобо́ю.

Тро́ичен: Госпо́дьство Тя́ Еди́но чты́й, в Трие́х Свяще́ниих Неразде́льно, воспева́ю Триипоста́сное Естество́, Благослове́нная, взыва́я Тебе́, Я́же вся́ управля́ющая.

Пе́снь 8

Ирмо́с: Ру́це распросте́р Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели о́троцы, взыва́юще: благослови́те, вся́ дела́ Госпо́дня, Го́спода.

Ру́це распросте́р на Кресте́, язы́ки вся́ собра́л еси́, и еди́ну яви́л еси́, Влады́ко, Це́рковь воспева́ющую Тя́, земны́м и Небе́сным, согла́сно пою́щим: благослови́те, вся́ дела́ Госпо́дня, Го́спода, по́йте и превозноси́те Его́ во ве́ки.

Белообра́зен яви́ся жена́м, непристу́пным све́том Воскресе́ния блиста́яйся А́нгел, что́ Жива́го во гро́бе, вопия́, и́щете я́ко ме́ртва? Вои́стинну воста́ Христо́с, Ему́же вопие́м: вся́ дела́, по́йте Го́спода, и превозноси́те во вся́ ве́ки.

Богоро́дичен: Ты́ Еди́на во все́х ро́дех, Де́во Пречи́стая, Ма́ти яви́лася еси́ Бо́жия: Ты́ Божества́ была́ еси́ жили́ще Всенепоро́чная, не опа́льшися огне́м Непристу́пнаго Све́та. Те́мже вси́ Тя благослови́м, Мари́е Богоневе́сто.

И́н. Ирмо́с: О́троки благочести́выя в пещи́:

Непра́ведное ви́дящи заколе́ние Твое́ тва́рь, омрача́ющися рыда́ше: земли́ бо смуща́ющейся, во мра́к я́ко в ри́зу че́рну со́лнце облече́ся. Мы́ же Тя́ непреста́нно пое́м, и превозно́сим, Христе́, во ве́ки.

Сше́дый ко мне́ да́же до а́да, и все́м путесотвори́вый воскресе́ние, па́ки возше́л еси́, взе́м мя́ на ра́му Твое́ю, и Отцу́ приве́л еси́. Те́мже зову́ Ти: Го́спода по́йте, дела́, и превозноси́те во вся́ ве́ки.

Тро́ичен: Ума́ Пе́рваго и вино́внаго все́х, Отца́ Еди́наго Безвино́внаго сла́вим, Сло́ва же Безнача́льнаго, и Ду́ха Уте́шителя, Еди́наго Бо́га все́х, Тро́ице Сра́сленней покланя́ющеся, и превознося́ще во вся́ ве́ки.

И́н. Ирмо́с: Изба́вителю все́х Всеси́льне:

От ребра́ Ада́мова созда́вый Тя́, от Твоего́ де́вства воплоти́ся, И́же все́х Госпо́дь, Его́же пою́ще, вопие́м: вся́ дела́, благослови́те, по́йте Го́спода, и превозноси́те Его́ во ве́ки.

В се́ни Авраа́м узре́, е́же в Тебе́, Богоро́дице, та́инство, Сы́на бо Твоего́ Безпло́тнаго прия́т, поя́: вся́ дела́, благослови́те, по́йте Го́спода, и превозноси́те Его́ во ве́ки.

Равночи́сленныя Тро́ицы спасло́ е́сть Твоего́ де́вства проображе́ние: в де́вственных бо телесе́х попира́ху пла́мень, Отрокови́це, вопию́ще: благослови́те, по́йте Го́спода, и превозноси́те Его́ во ве́ки.

Пе́снь 9

Ирмо́с: Ка́мень нерукосе́чный, от несеко́мыя горы́ Тебе́, Де́во, краеуго́льный отсече́ся, Христо́с, совокупи́вый разстоя́щаяся естества́. Те́м веселя́щеся Тя́, Богоро́дице, велича́ем.

Всего́ мя восприя́л еси́ ве́сь в совокупле́нии несли́тно, всему́ ми дая́, Бо́же мо́й, спасе́ние Стра́стию Твое́ю, ю́же на Кресте́ претерпе́л еси́ теле́сне, благоутро́бия ра́ди мно́гаго.

Твои́ ученицы́ зря́ще отве́рзен гро́б Тво́й, и богоно́сныя плащани́цы испражне́ны Воскресе́нием Твои́м, со А́нгелом глаго́лаху: вои́стинну воста́ Госпо́дь.

Тро́ичен: Еди́нице у́бо Боже́ственнаго Существа́, но Ипоста́сьми Тро́ице, вси́ ве́рнии покланя́ющеся, в неслия́нных Ипоста́сех Равноси́льную Единоче́стную ны́не благочту́ще велича́ем.

И́н. Ирмо́с: Вся́к земноро́дный:

Льсти́вно попо́лз зми́й, из Еде́ма поя́т мя́ плене́на; на кра́ниевем же тве́рдем ка́мени разби́ сего́ Вседержи́тель Госпо́дь, я́коже младе́нца: и сла́дости па́ки мне́ вхо́д Дре́вом Кре́стным отве́рзе.

Положи́л еси́ кре́пкия вра́жия тверды́ни ны́не в запусте́ние; всеси́льнейшею же руко́ю бога́тство его́ расхи́тил еси́ из истоща́ний а́довых совоскреси́вый мя́ Христе́, и дре́вле безме́рно хва́лящагося я́ко сме́х руга́ема яви́л еси́.

Прииди́, ни́щих люде́й Твои́х озлобле́ние посеща́я, ми́лостивною же и держа́вною Твое́ю руко́ю укрепи́ крестоно́сныя лю́ди, Твое́ изря́дное достоя́ние, Христе́, я́ко Человеколю́бец.

И́н. Ирмо́с: Сокрове́нное Бо́жие неизрече́нное в Тебе́:

Зри́м я́ко кри́н Тя́ ри́зою обагре́ною укра́шену, Пречи́стая, Боже́ственнаго Ду́ха, посреде́ те́рния сия́ющу, и благоуха́ния исполня́ющу, и́же Тебе́ и́скренно велича́ющих.

Тле́нное прии́м челове́ческое естество́ из Твоего́, Всенепоро́чная, чре́ва Нетле́нный. В Себе́ показа́ нетле́нно, за благоутро́бие: те́мже Тя́ я́ко Богоро́дицу велича́ем.

Я́же все́ми влады́чествующи тва́рьми, лю́дем Твои́м да́руй побе́дное одоле́ние, врага́ полага́ющи примири́тельна Це́ркви: да Тя́ я́ко Богоро́дицу велича́ем.

По катава́сии ектения́, и Свя́т Госпо́дь Бо́г на́ш: Посе́м свети́лен. Сла́ва, и ны́не: Богоро́дичен.

На хвали́тех стихи́ры воскре́сны, гла́с 4:

Сти́х: Сотвори́ти в ни́х су́д напи́сан: сла́ва сия́ бу́дет все́м преподо́бным Его́.

Кре́ст претерпе́вый и сме́рть, и воскресы́й из ме́ртвых, Всеси́льне Го́споди, сла́вим Твое́ Воскресе́ние.

Сти́х: Хвали́те Бо́га во святы́х Его́, хвали́те Его́ во утверже́нии си́лы Его́.

Кресто́м Твои́м, Христе́, от дре́вния кля́твы свободи́л еси́ на́с, и сме́ртию Твое́ю естество́ на́ше му́чащаго диа́вола упраздни́л еси́; Воста́нием же Твои́м ра́дости вся́ испо́лнил еси́. Те́мже вопие́м Ти́: воскресы́й из ме́ртвых, Го́споди, сла́ва Тебе́.

Сти́х: Хвали́те Его́ на си́лах Его́, хвали́те Его́ по мно́жеству вели́чествия Его́.

Твои́м Кресто́м, Христе́ Спасе́, наста́ви на́с на и́стину Твою́, и изба́ви на́с от се́тей вра́жиих, воскресы́й из ме́ртвых, возста́ви ны́ па́дшияся грехо́м, просте́р ру́ку Твою́, Человеколю́бче Го́споди, моли́твами святы́х Твои́х.

Сти́х: Хвали́те Его́ во гла́се тру́бнем, хвали́те Его́ во псалти́ри и гу́слех.

Оте́ческих Твои́х не́др не разлучи́вся, Единоро́дный Сло́ве Бо́жий, прише́л еси́ на зе́млю за человеколю́бие, Челове́к бы́в непрело́жен, и Кре́ст и сме́рть претерпе́л еси́ пло́тию, безстра́стный Божество́м; воскре́с же из ме́ртвых, безсме́ртие по́дал еси́ ро́ду челове́ческому, я́ко Еди́н Всеси́лен.

И́ны стихи́ры Анато́лиевы, гла́с то́йже.

Сти́х: Хвали́те Его́ в тимпа́не и ли́це, хвали́те Его́ во стру́нах и орга́не.

Сме́рть прия́л еси́ пло́тию, на́м безсме́ртие хода́тайствуя, Спа́се, и во гро́б всели́лся еси́, да на́с от а́да свободи́ши, воскреси́в с Собо́ю – пострада́ у́бо я́ко челове́к, но воскре́с я́ко Бо́г. Сего́ ра́ди вопие́м: сла́ва Тебе́, Жизнода́вче Го́споди, Еди́не Человеколю́бче.

Сти́х: Хвали́те Его́ в кимва́лех доброгла́сных, хвали́те Его́ в кимва́лех восклица́ния – вся́кое дыха́ние да хва́лит Го́спода.

Ка́мение распада́шеся, Спа́се, егда́ на Ло́бнем Кре́ст Тво́й водрузи́ся; устраши́шася а́довы вра́тницы, егда́ во гро́бе я́ко ме́ртв положе́н бы́л еси́, и́бо сме́ртную упраздни́вый кре́пость, уме́ршим все́м нетле́ние по́дал еси́ Воскресе́нием Твои́м, Спа́се, Жизнода́вче Го́споди, сла́ва Тебе́.

Сти́х: Воскресни́, Го́споди Бо́же мо́й, да вознесе́тся рука́ Твоя́, не забу́ди убо́гих Твои́х до конца́.

Возжеле́ша жены́ ви́дети Твое́ Воскресе́ние, Христе́ Бо́же, прии́де предва́рши Мари́я Магдали́на, обре́те ка́мень отвале́н от гро́ба, и А́нгела седя́ща, и глаго́люща: что́ и́щете Жива́го с ме́ртвыми? Воскре́се я́ко Бо́г, да спасе́т вся́ческая.

Сти́х: Испове́мся Тебе́, Го́споди, все́м се́рдцем мои́м, пове́м вся́ чудеса́ Твоя́.

Где́ е́сть Иису́с, Его́же вмени́сте стрещи́, рцы́те иуде́и? Где́ е́сть, Его́же положи́сте во гро́бе, ка́мень запечатле́вше? Дади́те ме́ртва, и́же живота́ отве́ргшиися; дади́те погребе́ннаго, или́ ве́руйте воскре́сшему. А́ще и вы́ умолчите́ Госпо́дне Воста́ние, ка́мение возопие́т, па́че же отвале́нный от гро́ба. Вели́кая Твоя́ ми́лость, ве́лие та́инство смотре́ния Твоего́, Спа́се на́ш, сла́ва Тебе́.

Сла́ва: стихи́ра у́тренняя ева́нгельская. И ны́не: Богоро́дичен: Преблагослове́нна еси́: Славосло́вие вели́кое.

По славосло́вии тропа́рь воскре́сен:

Воскре́с из гро́ба, и у́зы растерза́л еси́ а́да, разруши́л еси́ осужде́ние сме́рти, Го́споди, вся́ от сете́й врага́ изба́вивый; яви́вый же Себе́ апо́столом Твои́м, посла́л еси́ я́ на про́поведь, и те́ми ми́р Тво́й по́дал еси́ вселе́нней, еди́не Многоми́лостиве.

Та́же ектении́, и отпу́ст. Посе́м ча́с пе́рвый, и про́чее обы́чное, и коне́чный отпу́ст.

Дре́вом Ада́м Рая́ бы́сть изселе́н – Дре́вом же Кре́стным разбо́йник в Ра́й всели́ся. Ов у́бо вку́ш, за́поведь отве́рже Сотво́ршаго – о́в же сраспина́емь, Бо́га испове́да тая́щагося, помяни́ мя, вопия́, во Ца́рствии Твое́м.

Сти́х: Блаже́ни чи́стии се́рдцем, я́ко ти́и Бо́га у́зрят.

Вознесы́йся на Кре́ст, сме́ртную разруши́вый си́лу, и загла́дивый я́ко Бо́г е́же на ны́ рукописа́ние, Го́споди, разбо́йниче покая́ние и на́м пода́ждь, еди́не Человеколю́бче, ве́рою служа́щим, Христе́ Бо́же на́ш, и вопию́щим Ти́: помяни́ и на́с во Ца́рствии Твое́м.

Сти́х: Блаже́ни миротво́рцы, я́ко ти́и сы́нове Бо́жии нареку́тся.

Рукописа́ние на́ше на Кресте́ копие́м раздра́л еси́, и вмени́вся в ме́ртвых, та́мошняго мучи́теля связа́л еси́, изба́вивый все́х от у́з а́довых Воскресе́нием Твои́м, и́мже просвети́хомся, Человеколю́бче Го́споди, и вопие́м Ти́: помяни́ и на́с во Ца́рствии Твое́м.

Сти́х: Блаже́ни и́згнани пра́вды ра́ди, я́ко те́х е́сть Ца́рство Небе́сное.

Распны́йся и воскресы́й я́ко си́лен из гро́ба тридне́вен, и первозда́ннаго Ада́ма воскреси́вый, еди́не Безсме́ртне, и мене́ на покая́ние обрати́тися, Го́споди, сподо́би от всего́ се́рдца моего́, и те́плою ве́рою при́сно взыва́ти Ти́: помяни́ мя, Спа́се, во Ца́рствии Твое́м.

Сти́х: Блаже́ни есте́, егда́ поно́сят ва́м, и изжену́т и реку́т вся́к зо́л глаго́л, на вы́ лжу́ще Мене́ ра́ди.

На́с ра́ди И́же Безстра́стен стра́стный бы́сть челове́к, и во́лею на Кресте́ пригвожде́йся, на́с совоскреси́, те́мже и сла́вим со Кресто́м Стра́сть и Воскресе́ние, и́миже возсозда́хомся, и́миже и спаса́емся, взыва́юще: помяни́ и на́с во Ца́рствии Твое́м.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

Воскре́сшаго из ме́ртвых, и а́дову держа́ву плени́вшаго, и ви́дима жена́ми мироно́сицами, ра́дуйтеся, глаго́лющаго, ве́рнии умо́лим, от истле́ния изба́вити ду́ши на́ша, зову́ще всегда́ разбо́йника благоразу́мнаго гла́сом к Нему́: помяни́ и на́с во Ца́рствии Твое́м.

Сла́ва: тро́ичен: Отца́, и Сы́на, и Свята́го Ду́ха, вси́ единому́дренно ве́рнии славосло́вити досто́йно помо́лимся: Еди́нство Божества́, в Трие́х су́щее Ипоста́сех, неслия́нно пребыва́ющее, Про́сто, Неразде́льно и Непристу́пно, И́мже избавля́емся о́гненнаго муче́ния.

И ны́не: Богоро́дичен: Ма́терь Твою́, Христе́, пло́тию без се́мене ро́ждшую Тя́, и Де́ву вои́стинну, и по Рождестве́ пребы́вшу Нетле́нну, Сию́ Ти́ приво́дим в моли́тву, Влады́ко Многоми́лостиве, прегреше́ний проще́ние да́руй, всегда́ вопию́щим Ти́: помяни́ и на́с во Ца́рствии Твое́м.

Проки́мен, гла́с 4: Я́ко возвели́чишася дела́ Твоя́, Го́споди, вся́ прему́дростию сотвори́л еси́. Сти́х: Благослови́, душе́ моя́, Го́спода, Го́споди Бо́же мо́й, возвели́чился еси́ зело́. Аллилу́ия: Наляцы́, и успева́й, и ца́рствуй и́стины ра́ди, и кро́тости, и пра́вды. Сти́х: Возлюби́л еси́ пра́вду, и возненави́дел еси́ беззако́ние.

на Го́споди, воззва́х: стихи́ры покая́нны, гла́с 4.

Подо́бен: Да́л еси́ зна́мение:

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

Согреши́х к Тебе́, Человеколю́бче, не по естеству́ я́ко челове́к, да испрошу́ проще́ние, но па́че челове́ка, и вы́ше естества́, и па́че проще́ния. Но И́же вы́ше есте́ственных уста́в, и па́че постиже́ния мы́сли, Челове́к, Спа́се мо́й, бы́в, и па́че ума́ человеколю́бное имы́й, поми́луй мя́ к Тебе́ обраща́ющагося.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Положи́л еси́ покая́ние согреша́ющим, Христе́, а не пра́ведным: о́браз у́бо и́мам разбо́йника же и блу́днаго, Манасси́и и блудни́цы, гони́теля, мытаря́, и отме́тника, неудо́бь отчаява́юся, Твое́ бо человеколю́бное, и преблаго́е ве́дый, Спа́се мо́й, обраща́юся же и слезю́, и благонаде́жден быва́ю я́ко прии́меши мя́.

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Да́ждь ми́ умиле́ние, и злы́х отчужде́ние, и соверше́нное исправле́ние, в страсте́х теле́сных ны́не погруже́ному, и удале́ному от Тебе́, Бо́же, все́х Царю́, и ника́коже наде́жду иму́ща, спаси́ мя блу́днаго, мно́гия ра́ди бла́гости, Иису́се Всеси́льне, Спа́се ду́ш на́ших.

Та́же в Мине́и стихи́ры свято́му, а́ще и́мать. А́ще ли не́сть Мине́и, и́ны стихи́ры безпло́тным святы́м а́нгелом. Гла́с 4.

Подо́бен: Я́ко до́бля:

Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.

Боже́ственныя све́тлости прия́тная жили́ща, и прия́телища всечестна́я, утверди́л еси́ а́нгельская во́инства, Безсме́ртне: и Боже́ственным составле́нием, зри́тели и служи́тели Твоея́ сла́вы сия́ положи́в, в кре́пости скончава́ти Твое́ сло́во, и хоте́ние исполня́ти вседе́тельное и пресвято́е.

Сти́х: Хвали́те Го́спода вси́ язы́цы, похвали́те Его́ вси́ лю́дие.

Бла́гости пучи́ну яви́ти восхоте́в, Бла́г сы́й, Безнача́льне, пе́рвее созда́л еси́ всеси́льным Твои́м манове́нием, и Боже́ственным повеле́нием, а́нгельския ли́ки, и Си́лам чи́ны: вои́стинну бо подоба́ше Благо́му излия́тися, и походи́ти, да и мно́зем бы́ти дарова́нием, Влады́ко.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Серафи́ми шестокрила́тии, Херуви́ми многоочи́тии с превысо́кими Престо́лы, Тебе́ обстоя́т, вседе́тельнаго Твоего́ сия́ния непосре́дственне приобща́ющеся, Госпо́дьствия, Нача́ла, Вла́сти, Арха́нгели, А́нгели и Си́лы Боже́ственныя: Твою́ сла́ву, Вседержи́телю, хва́ляще, о на́с мо́лятся Тебе́.

Сла́ва, и ны́не: Богоро́дичен: Превозше́дши чи́ны а́нгельския, Всенепоро́чная, со а́нгелы всегда́ моли́ а́нгелы Влады́чествующаго, и все́ю тва́рию, дарова́ти на́м прегреше́ний оставле́ние, и изба́витися страсте́й, и досто́йны сотвори́ти на́с тогда́ певцы́ сла́вы Его́, и насле́дники нетле́нныя пи́щи.

Та́же, Све́те ти́хий: Проки́мен дне́: и Сподо́би, Го́споди, в ве́чер се́й:

На стихо́вне стихи́ры покая́нны, гла́с 4:

Хоте́х слеза́ми омы́ти мои́х прегреше́ний рукописа́ние, Го́споди, и про́чее живота́ моего́ покая́нием благоугоди́ти Тебе́, но вра́г льсти́т мя́, и бо́рет ду́шу мою́: Го́споди, пре́жде да́же до конца́ не поги́бну, спаси́ мя.

Сти́х: К Тебе́ возведо́х о́чи мои́, живу́щему на Небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́ – та́ко о́чи на́ши ко Го́споду Бо́гу на́шему, до́ндеже уще́дрит ны́.

Кто́ обурева́емь, и притека́я ко приста́нищу Твоему́, Го́споди, не спасе́тся? Или́ кто́ неду́гуя, и припа́дая ко врачевству́ Твоему́, не уврачу́ется, Соде́телю вся́ческих, и Врачу́ неду́жных? Го́споди, пре́жде да́же до конца́ не поги́бну, спаси́ мя.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих и уничиже́ния го́рдых.

Прославля́яйся в па́мятех святы́х Твои́х, Христе́ Бо́же, и от ни́х умоле́н быва́я, низпосли́ на́м ве́лию ми́лость.

Сла́ва, и ны́не: Богоро́дичен: Ра́дуйся, Све́та О́блаче. Ра́дуйся, Све́щниче све́тлый. Ра́дуйся Ру́чко, в не́йже Ма́нна. Ра́дуйся, Же́зле Ааро́нов. Ра́дуйся, Купино́ Неопали́мая. Ра́дуйся, Черто́же. Ра́дуйся, Престо́ле. Ра́дуйся, Горо́ Свята́я. Ра́дуйся, Прибе́жище. Ра́дуйся, Боже́ственная Трапе́зо. Ра́дуйся, Две́ре Та́йная. Ра́дуйся, все́х Ра́досте.

Та́же, Ны́не отпуща́еши: Трисвято́е по О́тче на́ш: тропа́рь и ектения́, и отпу́ст.

Кано́н Пресвяте́й Богоро́дице. Гла́с 4.

Пе́снь 1

Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зныма Моисе́овыма рука́ма, Амали́кову си́лу в пусты́ни победи́л е́сть.

Приими́ е́же от души́ моле́ние мое́, Пречи́стая Влады́чице, Я́же Бо́га ро́ждши пло́тию: к Тебе́ бо прибего́х к держа́вней по́мощи, да не погрешу́ наде́жды моея́.

Припа́даю раболе́пно к Тебе́, Пречи́стая Богороди́тельнице, я́ко дерзнове́ние иму́щи мно́го, от вся́ких мя́ скорбе́й Твои́ми моли́твами изба́ви, к Сы́ну Твоему́ хода́тайствующи.

Сла́ва: Мо́ря жите́йскаго волна́ми потопля́емь, и напа́стьми лю́тыми одержи́м, ко приста́нищу устреми́хся невла́емому – покро́ву Твоему́: те́мже мя́ изба́ви, Богоро́дице, от лю́тых.

И ны́не: Благоутро́бным и ти́хим Твои́м о́ком воззри́ на раба́ Твоего́, и услы́шати потщи́ся, Блага́я, исполня́ющи мольбу́ Твоего́ раба́, Пречи́стая, и разоря́ющи сове́ты лука́выя.

Пе́снь 3

Ирмо́с: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище и утвержде́ние.

Помо́щница на враги́, и в бра́нех побо́рница, Влады́чице, Ты́ ве́рным еси́, и прибе́жище су́щим в печа́лех.

Его́же родила́ еси́ пло́тию Бо́га все́х, я́ко Сы́на моли́, разреше́ние зо́л мои́х да́ти ми́ от жите́йских настоя́ний.

Сла́ва: При́зри ми́лостивно на смире́ние на́ше, Влады́чице, во е́же гне́ва належа́щаго изба́витися рабо́м Твои́м.

И ны́не: Кро́вом Твои́м, Влады́чице Блага́я, спаса́еми при́сно от вся́ких скорбе́й, хвалу́ Сы́ну Твоему́ приноша́ем.

Пе́снь 4

Ирмо́с: Услы́шах слу́х Тво́й, и убоя́хся, разуме́х дела́ Твоя́, и ужасо́хся, Го́споди.

Я́ко иму́щи дерзнове́ние, Чи́стая Богороди́тельнице, к Сы́ну Твоему́, настоя́щаго мя́ премени́ искуше́ния, разруша́ющи сове́ты ча́стыя враго́в при́сно борю́щих мя́.

Ли́цы вы́шних чино́в, му́ченицы и пра́ведницы, со апо́столы, проро́к боже́ственных собо́р, и преподо́бных, с Богоро́дицею и Ма́терию о на́с Христа́ моли́те.

Сла́ва: Пресла́вную Твою́ Ма́терь, Христе́, приими́ моля́щуюся о ми́ре, ми́лостивно Тебе́ зову́щую: Сы́не Мо́й, приими́ мольбу́ Мою́, и утиши́ гне́в належа́щий земли́.

И ны́не: Припа́даю Ти́, Богоро́дице, и молю́ся из глубины́ се́рдца моего́: настоя́щаго мя́ премени́ искуше́ния, я́ко да изба́влься от лю́тых, пе́снь принесу́ Твое́й све́тлости.

Пе́снь 5

Ирмо́с: Нечести́вии не у́зрят сла́вы Твоея́, Христе́, но мы́ Тя, Единоро́дне, Оте́ческия сла́вы Сия́ние Божества́, от но́щи у́тренююще, воспева́ем Тя́, Человеколю́бче.

Упова́ние земны́м, и заступле́ние, Чи́стая, умилосе́рдися на на́ше смире́ние, мо́лимся, и настоя́щаго гне́ва свободи́ на́с.

Сте́ну необори́му, Чи́стая, моли́тву Твою́ держа́ще вопие́м Ти́: умилосе́рдися, о Влады́чице, и ви́димыя враги́ прожени́.

Сла́ва: Хва́лящиися при́сно упова́нием е́же к Тебе́, Пречи́стая, да не постыди́мся, мо́лимся со слеза́ми, и покланя́емся Твое́й бла́гости.

И ны́не: Пречи́стою Твое́ю руко́ю, Препе́тая, разжени́ враги́, на ны́ востаю́щия, и да разуме́ют окая́ннии, я́ко на Тя́ упова́ние возложи́хом.

Пе́снь 6

Ирмо́с: Возопи́, прообразу́я погребе́ние тридне́вное, проро́к Ио́на, в ки́те моля́ся: от тли́ изба́ви мя́, Иису́се, Царю́ Си́л.

Очи́сти на́ша грехи́, Человеколю́бче, мо́лимся, моли́твами без се́мене Ро́ждшия Тя́: на́с бо ра́ди, Сло́ве, Твою́ Честну́ю Кро́вь пролия́л еси́.

Собо́рище на ны́ лука́вное собра́ся непра́ведно борю́щих на́с, Богоневе́сто: но си́х низложи́, я́ко Си́мона Волхва́ дре́вле.

Сла́ва: Услы́ши на́шу мольбу́, Влады́чице, мо́лимся, и бу́ри во́лны утиши́ разли́чных боле́зней, и́миже врази́ на ны́ собра́шася.

И ны́не: Печа́ль мою́ на ра́дость преложи́, я́ко Ще́др, и пла́ч в весе́лие премени́, и умилосе́рдися Богоро́дицы ра́ди, И́же во́ду в вино́ в Ка́не Галиле́йстей претвори́вый, Христе́.

Та́же, Го́споди, поми́луй, три́жды. Сла́ва, и ны́не:

Седа́лен, гла́с 4:

Мно́гими прегреше́нии а́з блу́дный у́м помрачи́в, вопию́ Твоему́ кре́пкому заступле́нию, Богоро́дице: просвети́ души́ моея́ зе́ницы, и возсия́й ми́ покая́ния све́тлую зарю́, и облецы́ мя во ору́жие све́та, Богороди́тельнице Чи́стая.

Пе́снь 7

Ирмо́с: Не преда́ждь на́с до конца́ и́мене Твоего́ ра́ди, и не разори́ заве́та Твоего́, и не отста́ви ми́лости Твоея́ от на́с, Го́споди Бо́же оте́ц на́ших, препе́тый во ве́ки.

И́же в разли́чных напа́стех и ско́рбех сы́й, к Тебе́, Чи́стая, спасе́нию моему́ ны́не прибего́х, вопию́, да не возвращу́ся посра́млен от ча́яния моего́: но услы́ши, и изба́ви мя́ се́тей ловя́щих.

Раболе́пно вы́ю преклоня́ю окая́нный, и от се́рдца моего́ вопию́, ру́це просте́р, коле́на преклоня́ю, и молю́ Тя, Пречи́стую Де́ву, изба́витися скорбе́й, при́сно находя́щих мне́ от наве́та чужда́го.

Сла́ва: Пресла́вная Чи́стая Мари́е, земны́х похвало́, мо́лимся, пода́ждь Твою́ по́мощь на́м, моля́щимся и кла́няющимся благоче́стно Рождеству́ Твоему́, я́ко ины́я не стяжа́хом наде́жды и засту́пницы ра́зве Тебе́.

И ны́не: Я́же па́че ума́ Бо́га ро́ждши Неискусому́жная Мари́е, и па́че вся́каго естества́, Засту́пнице ве́рных, напра́сных искуше́ний чту́щия Тя́ изба́ви чи́сты, и без вре́да от вра́г вся́ческих, ви́димых и неви́димых.

Пе́снь 8

Ирмо́с: Ру́це распросте́р Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели о́троцы, взыва́юще: благослови́те, вся́ дела́ Госпо́дня, Го́спода.

Ру́це возде́ти не сме́ю к Сы́ну Твоему́, Чи́стая, ве́сь бо е́смь оскверне́н: те́мже дерза́ю к Тебе́, Влады́чице, прибе́гнути, хода́тайствуй к Ще́дрому Бо́гу и Благопреме́нному, изба́витися на́м сопроти́вных вра́г оскорбля́ющих на́с.

О́чи и се́рдце и ду́шу на Тя́, Пречи́стая, возложи́х: те́мже умилосе́рдися, Влады́чице Чи́стая, Ще́дрому припа́дающи о мне́ худе́м и нетерпели́вем, да спасе́т мя́ от вся́кия ну́жды, и я́зи, и печа́ли.

Сла́ва: Ору́жием Твои́м, я́ко си́лен, борю́щия на́с попери́, Го́споди, и побе́ду да́руй, Влады́ко, ве́рою наде́ющимся на Тя́, Богоро́дица мо́лится с Предте́чею Иоа́нном, и апо́стольский ли́к и му́ченик Твои́х.

И ны́не: Ра́дость Благове́щения иногда́ Гаврии́л Тебе́, Чи́стая Де́во, принесе́, и прама́тернее се́тование разруши́ся Рождество́м Твои́м: те́мже Сама́ и моея́ души́ уны́ние очи́стивши, покажи́ мя моли́твами Твои́ми непосра́млена.

Пе́снь 9

Ирмо́с: Ка́мень нерукосе́чный, от несеко́мыя горы́ Тебе́, Де́во, краеуго́льный отсече́ся, Христо́с, совокупи́вый разстоя́щаяся естества́: те́м веселя́щеся, Тя́, Богоро́дице, велича́ем.

Яви́, Богоро́дице Де́во, Твою́ по́мощь вско́ре: приклони́ же усе́рдно у́хо Твое́, и вопию́щих те́пле услы́ши, и лю́тых измени́, избавля́ющи на́с моли́твами Твои́ми.

Ве́сь ле́ностию одержи́м, и во отча́янии е́смь глубины́ мои́х прегреше́ний: те́мже ми́, Де́во Ма́ти, ру́ку простри́, я́ко Петру́ Христо́с, и из глубины́ прегреше́ний изба́ви мя́.

Сла́ва: Язы́к необузда́н и велере́чив укроти́, Де́во, изощре́нный я́ко стрела́, устрели́ти хотя́щ и умори́ти мя́, я́ко во́ск разле́й, и сове́т его́ су́етен сотвори́.

И ны́не: Разруши́ сове́ты вся́, я́же на ны́ вооруже́нных, Ма́ти Бо́га Вы́шняго, ра́дости же испо́лни упова́ющих на Тя́: да усе́рдно вси́ Твое́ пропове́мы заступле́ние.

Та́же, Досто́йно е́сть: И покло́н до земли́. Трисвято́е по О́тче на́ш: тропари́, и про́чее обы́чно, и отпу́ст.

По 1-м стихосло́вии, седа́льны покая́нны. Гла́с 4

Смире́нную мою́ ду́шу посети́, Го́споди, во гресе́х все́ житие́ ижди́вшую: я́коже блудни́цу приими́ мене́, и спаси́ мя.

Сти́х: Го́споди, да не я́ростию твое́ю обличи́ши мене́, ниже́ гне́вом Твои́м нака́жеши мене́.

Препла́вая пучи́ну настоя́щаго жития́, помышля́ю бе́здну мно́гих мои́х зо́л, и не име́яй окорми́теля помышле́ний, Петро́в провещава́ю Ти́ гла́с: спаси́ мя, Христе́, спаси́ мя, Бо́же, я́ко Человеколю́бец.

Сла́ва, и ны́не: Богоро́дичен: Стена́ непобеди́мая на́м христиа́ном еси́, Богоро́дице Де́во: к Тебе́ бо прибега́юще невреди́ми пребыва́ем, и па́ки согреша́юще, и́мамы Тя́ Моли́твенницу. Те́м благода́рственно вопие́м Ти́: ра́дуйся, Благода́тная, Госпо́дь с Тобо́ю.

По 2-м стихосло́вии седа́льны, Гла́с 4

Ско́ро совни́дем в неве́стник Христо́в, да вси́ услы́шим Боже́ственный гла́с Христа́ Бо́га на́шего: прииди́те лю́бящии Небе́сную сла́ву, и приими́те сию́ вку́пе с му́дрыми де́вами, просвети́вше свещи́ своя́ ве́рою.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Мно́жеством прегреше́ний мои́х осужда́емь, и стра́хом муче́ния смуща́емь е́смь. Христе́ Бо́же на́ш, сле́зы покая́ния от се́рдца приношу́ Тебе́, иму́щему вла́сть живота́, и сме́рти, и зову́ Ти во умиле́нии: согреши́х, Го́споди, спаси́ мя.

Сти́х: Ди́вен Бо́г во святы́х Свои́х, Бо́г Изра́илев.

Дне́сь а́нгельская во́инства, в па́мять страстоте́рпец приидо́ша, ве́рных мы́сли просвети́ти, и вселе́нную благода́тию уясни́ти: те́ми, Бо́же, умоле́н быва́я, да́руй на́м ве́лию ми́лость.

Сла́ва, и ны́не: Богоро́дичен: Е́же от А́нгела Сло́во прие́мши, Де́во, во утро́бе Твое́й, и ро́ждши воплоще́нна Христа́ Бо́га Емману́ила, Богоро́дице, моли́ о душа́х на́ших.

По 3-м стихосло́вии седа́льны, гла́с 4:

Подо́бен: Ско́ро предвари́:

Невеще́ственными усты́, Тро́ице Пребоже́ственная, непреста́нно пою́т Тя́ Безпло́тных ли́цы, и со стра́хом предстоя́т, Свя́т, взыва́юще, Триипоста́сное Естество́: поми́луй ру́к Твои́х созда́ние Твое́, те́х мольба́ми, еди́не Человеколю́бче.

А́нгельстии чи́ни со стра́хом предстоя́т Престо́лу Твоему́, Влады́ко, и е́же отону́ду заря́ми при́сно просвеща́еми, пе́снь Тебе́ немо́лчно побе́дную воспева́ют, Го́споди: и́хже свяще́нными моли́твами, ми́р ми́ру, и оставле́ние прегреше́ний на́ших да́руй.

Сла́ва, и ны́не: Богоро́дичен: Де́во Всенепоро́чная, Я́же Пресу́щнаго Бо́га ро́ждши, со Безпло́тными Того́ непреста́нно моли́, оставле́ние прегреше́ний, и исправле́ние жития́ да́ти на́м пре́жде конца́, ве́рою и любо́вию пою́щим Тя́ по до́лгу, еди́на Всепе́тая.

Кано́н покая́нен ко Го́споду на́шему Иису́су Христу́ и святы́м его́ му́чеником, [его́же краестро́чие: Спаси́ мя, Спа́се, я́коже блу́днаго дре́вле.] Гла́с 4.

Пе́снь 1

Ирмо́с: Триста́ты кре́пкия, Рожде́йся от Де́вы, безстра́стия во глубине́, души́ трича́стное потопи́, молю́ся, да Тебе́ я́ко в тимпа́не, во умерщвле́нии телесе́ побе́дное воспою́ пе́ние.

Спа́се мо́й, Иису́се, И́же блу́днаго спасы́й, и и́же блудни́цы пла́ч прие́мый, И́же мытаря́ воздохну́вша, манове́нием Свои́м оправда́вый, и мене́ без числа́ согреши́вшаго, и обраща́ющася приими́, и спаси́ мя.

Я́ко ве́щь снеда́ет ду́шу мою́ зло́бный о́гнь, и пла́меню твори́т подгнеще́ние бу́дущему: Человеколю́бче, угаси́ того́, ороше́нием Твои́х ми́лостей, Долготерпели́ве, пода́в ми́ сле́зы покая́ния.

Му́ченичен: Ра́зума мно́га испо́лнен ли́к святы́х страда́лец, неразу́мен сове́т и сопроти́вное мудрова́ние все́х законопресту́пных, целому́дренно уклони́, и Боже́ственных по́честей получи́.

Му́ченичен: И́же ми́ра презре́вше кра́сная ве́рою, и преми́рную жи́знь насле́довасте, му́дрии страстоте́рпцы прехва́льнии, вся́каго мя́ у́бо изба́вите мирска́го смеше́ния, и́скренно ва́с блажа́щаго.

Богоро́дичен: Пресве́тлая Свеще́ Со́лнца Сла́вы, души́ моея́ о́гнь уны́нием угаше́нный возжзи́, Пречи́стая, при́сно Боже́ственных де́л еле́ем напоя́ющи, да ве́рою и любо́вию сла́влю Тя́.

Други́й кано́н безпло́тным святы́м а́нгелом. Гла́с 4.

Ирмо́с то́йже.

Я́ко у́ми чи́стии, а́нгели, Вели́кому и Пе́рвому предстоя́ще Уму́, и Боже́ственнаго сия́ния насыща́еми, луче́ю мя́ ва́шею озари́те, пою́ще Всевино́внаго Сло́ва, пресла́внии. [Два́жды.]

Отню́д к Бо́гу прекло́ньшеся любо́вию, и Боже́ственными добро́тами вообража́еми я́ве, о арха́нгели сла́внии, стоя́нием приле́жным обстоите́, зову́ще побе́дную пе́снь Зижди́телю.

Богоро́дичен: Я́же еди́на во чре́ве прие́мши Сло́во, Его́же а́нгельская во́инства сла́вят при́сно, ду́шу мою́ озари́, реша́щи грехо́вное мра́чное зломышле́ние, Всенепоро́чная, и просвеща́ющи ра́зумом Рождества́ Твоего́.

Пе́снь 3

Ирмо́с: С высоты́ снизше́л еси́ во́лею на зе́млю, превы́ше вся́каго нача́ла, и смире́нное возне́сл еси́ из а́да преиспо́дняго естество́ челове́ческое: не́сть бо свя́т па́че Тебе́, Человеколю́бче.

Но́щию мя́ жития́ тьма́ страсте́й объя́ла е́сть, Христе́ Бо́же, Све́т сы́й Незаходи́мый, луча́ми покая́ния озари́в мя́ спаси́, я́ко Человеколю́бец, да сла́влю Тя́.

Ча́сти мя́ покажи́, Христе́, избра́нных насле́дника, сопроти́вныя ча́сти отлучи́в, Спа́се, слеза́ми и ми́лостынею очище́на, я́ко да во хвале́нии Тя́ сла́влю всегда́.

Му́ченичен: Очервлени́шася вои́стинну кро́вию ва́ши но́ги, и быстре́йше к Небеси́ потеко́ша, со грехо́м зе́млю оста́вльше, му́ченицы, собесе́дницы Боже́ственным Си́лам.

Му́ченичен: Удруча́емо те́ло ва́ше ра́нами раста́яшеся, Христо́вы страда́льцы. Душе́вная же укрепля́шеся си́ла, любо́вию привязу́ема нереши́мо к Созда́вшему вся́ческая хоте́нием.

Богоро́дичен: Мари́е Госпоже́, я́ко су́щи все́м Го́спода ро́ждши, облада́ема страстьми́ ума́ моего́, и зло́бою очерне́на, свобо́дна сотвори́ и просвети́.

И́н. Ирмо́с то́йже

И́же преми́рными ли́ки воспева́емый Христе́, чи́ном те́х ве́рных составле́ния воспева́ти богому́дренно сотвори́, Cло́ве: не́сть бо свя́т па́че тебе́, Человеколю́бче. [Два́жды.]

Любо́вию те́плою, привяза́нием рачи́тельным причаща́ющеся Пе́рвому Исто́чнику служи́тельне предстоите́, пою́ще немо́лчно, Еди́но Существо́ Божества́ Безнача́льнаго, боже́ственнии арха́нгели.

Богоро́дичен: Е́вину дре́внюю кля́тву, Христа́ ро́ждши, Ма́ти Чи́стая, пресве́тло разреши́ла еси́, все́х венча́ющаго благослове́ньми: не́сть бо, Пречи́стая, ра́зве Тебе́ помо́щницы.

Пе́снь 4

Ирмо́с: Седя́й в сла́ве на Престо́ле Божества́, во о́блаце ле́гце прии́де Иису́с Пребоже́ственный, нетле́нною дла́нию, и спасе́ зову́щия: сла́ва, Христе́, си́ле Твое́й.

Я́ко Судии́ Пра́веднейшему ны́не припа́даю Ти́, Го́споди, осужде́нна и отча́яннаго мя́ уще́дри, и пра́веднаго Твоего́ изба́ви изрече́ния, и стоя́ния избра́нных сподо́би.

В разбо́йники впа́дша неукроти́мыя, Человеколю́бче, и уя́звлена бы́вша исцели́, Христе́, возлива́я на мя́ покая́ния вино́ и еле́й и одева́я мя́ оде́ждою спасе́ния моего́.

Му́ченичен: Облеко́стеся свы́ше ри́зою спасе́ния, в совлече́нии теле́снем, всехва́льнии му́ченицы, и совле́кшаго пре́жде пра́отца обнажи́сте, без дыха́ния ме́ртва сотво́рше.

Му́ченичен: Вити́йствующе пред беззако́нными, му́ченицы, Бо́жия Сло́ва ра́зумом благоче́стия украша́еми, мудрецы́ и вити́и вся́ посрами́сте нече́ствующия, и врага́ умертви́вше.

Богоро́дичен: На Тя́ я́коже до́ждь, Прему́дрости Бе́здна – Иису́с сни́де, еди́ну Чи́стую Тебе́ обре́т, Богороди́тельнице Де́во, и загради́ нече́стия пото́ки лю́тыя Боже́ственною благода́тию.

И́н. Ирмо́с то́йже

Непостижи́мою си́лою от небытия́ приве́л еси́ Небе́сныя умы́, Сло́ве Бо́жий Пресу́щественный, и неизрече́нною Твое́ю сла́вою украси́л еси́, зову́щия: сла́ва, Христе́, си́ле Твое́й.

Управля́еми Вы́шния Си́лы Ду́хом, и брозда́ми Его́, и Боже́ственными заря́ми облиста́еми, неотпа́дающия чи́ны насле́доваша, Еди́но чту́ще все́х Нача́ло и Божество́.

Лица́ Твоего́ добро́ту кра́сную зре́ти, сподо́бишася служи́тельныя Твоя́ све́тлости, и отону́ду разуме́ния восприе́млюще, Тебе́ вопию́т: сла́ва, Христе́, си́ле Твое́й.

Богоро́дичен: Цари́ца Де́ва, злато́ю оде́ждою укра́шена, Сы́ну Царю́ ны́не предстои́т, Я́же без сравне́ния а́нгел превы́шши, зову́щих: сла́ва, Христе́, си́ле Твое́й.

Пе́снь 5

Ирмо́с: Ны́не воста́ну, проро́чески рече́ Бо́г, ны́не просла́влюся, ны́не вознесу́ся, па́дшаго прие́м от Де́вы, и к Све́ту У́мному вознося́й Моего́ Божества́.

О, ка́ко осужде́н хощу́ предста́ти Тебе́, Судии́ Бо́гу все́х, и обличе́н бы́ти о все́х злы́х, и́хже без ума́ согреши́х во́лею, и всего́ себе́ непотре́бна сотвори́х!

Спаси́ мя, Го́споди, я́ко зо́л испо́лнихся мно́гих, и молю́ся: исцели́ грехи́ моя́ и гное́ния лю́тая, и не оста́ви поги́бнути мя́ еди́наго, Иису́се мо́й, мно́го Ти́ согреши́вшаго.

Му́ченичен: Кончи́ну блаже́нну обре́тше страда́льцы я́ве, сла́ву улучи́ша, Христа́ прославля́юще свои́ми у́ды, Страстоположи́теля, я́звам и ра́нам причаща́тися му́жески предразсужда́юще.

Му́ченичен: Бога́тство Небе́сное, житие́м боже́ственным и кра́сным, вене́ц неувяда́емый, и Све́т Невече́рний, и жили́ще ника́коже обетша́емое нерукотворе́нно насле́довасте, страда́льцы Христо́вы блаже́ннии.

Богоро́дичен: Твоя́ чудеса́ проро́честии прореко́ша гла́си, го́ру нарица́юще Тя́, Пречи́стая, и две́рь, и свети́льник све́тел, из него́же вои́стинну Све́т чу́дный просвеща́ет, Чи́стая, ми́р ве́сь.

И́н. Ирмо́с то́йже

Тре́петно сла́вят Херуви́ми, и Серафи́ми, со Престо́лы, и Боже́ственнии Арха́нгели, и Госпо́дьствия, и Си́лы, и Нача́ла, и Вла́сти со А́нгелы, Честно́е Еди́но и Тро́ическое Божество́. [Два́жды.]

Яви́шася А́нгели светови́дно сия́юще, Христе́, Твое́ Воскресе́ние пропове́дающе в ми́ре преподо́бным жена́м, и враго́в Твои́х сотряса́юще у́м блиста́ньми Твоего́ Божества́.

Богоро́дичен: Ны́не сохрани́ ополче́нии арха́нгельскими Це́рковь Твою́, Тебе́ сла́вящую правосла́вными гла́сы, И́же от Де́вы неизрече́нно рожде́йся, и челове́ки от тли́ избавля́яй.

Пе́снь 6

Ирмо́с: Приидо́х во глубины́ морски́я, и потопи́ла мя́ е́сть бу́ря мно́гих грехо́в: но я́ко Бо́г из глубины́ возведи́ живо́т мо́й, Многоми́лостиве.

Ме́ртв сы́й не разуме́ю, не чу́вствуя окая́нный, и со́весть оскверне́ну нося́ при́сно: Бо́же Созда́телю мо́й, да не до конца́ погуби́ши мене́.

Дея́ния моя́ я́коже врази́ оклевета́ти мя́ хотя́т на Суди́щи Твое́м, Ще́дре: от ни́хже ско́ро изба́ви, Христе́, наставля́я мя́ к покая́нию.

Му́ченичен: Сокруши́ ко́сти страстоно́сец собо́р законопресту́пных, но не сокруши́ те́х ве́ру, ея́же ра́ди насле́дницы яви́шася Бо́гу, и Спа́су ду́ш на́ших.

Му́ченичен: Я́ко честно́е ка́мение, на ка́мени непоколе́блеме наде́жды богому́дренно назда́шася страстоно́сцы, и я́ко хра́мы Свята́го Ду́ха, в Хра́м Бо́жий всели́шася.

Богоро́дичен: Омрачи́вшееся се́рдце мое́ те́мными наи́тии греха́, све́том, и́же в Тебе́, Богоневе́стная, озари́, я́ко Со́лнце Христа́ ро́ждшая.

И́н. Ирмо́с то́йже

О́крест Влады́ки предстоя́ще а́нгельская во́инства, и чи́сте наслажда́ющеся сия́нием Нача́ла Све́тлаго, просвети́те ве́рою ва́с пою́щих. [Два́жды.]

Прему́дростию Твое́ю сотвори́вый а́нгельския ли́ки: Госпо́дьствия же и Си́лы, и Серафи́мы, я́ко Влады́ка показа́л еси́, хвала́ми Тя́ чту́щия.

Богоро́дичен: Я́ко на престо́лех превознесе́нных, Христе́, почива́яй, и вся́ческая Боже́ственным про́мыслом соблюда́яй, на руку́ деви́ческую Влады́ко почи́л еси́.

Пе́снь 7

Ирмо́с: Ю́ноши три́ в Вавило́не, веле́ние мучи́телево на бу́йство прело́жше, посреде́ пла́мене вопия́ху: благослове́н еси́, Го́споди Бо́же оте́ц на́ших.

Кому́ Тя уподо́блю, душе́ моя́ окая́нная, увы́ мне́, лю́бящую безме́стная, а не до́брая взыску́ющую? Те́мже пре́жде конца́ потщи́ся о́бразы благи́я показа́ти.

Ту́чу ми́, Христе́, сле́з да́ждь, я́ко да от лю́тых мои́х измы́юся, и не оста́ви мене́, Спа́се, ны́не поги́бнути, согреши́вшаго Ти́ мно́го па́че челове́к.

Му́ченичен: Ме́ртвость умерщвле́ннаго Сло́ва нося́ще на те́ле свое́м, пре́лесть умертви́сте; живете́ же и уме́рше, сла́внии, и умерщвле́нныя страстьми́, страда́льцы, врачу́ете.

Му́ченичен: Ко́е ме́сто ны́не не и́мать ва́с, му́ченицы, просвети́тели, и предгра́дие? Ка́я страна́ не освяща́ется ва́шими страда́ньми, сла́внии, и восто́ками исцеле́ний?

Богоро́дичен: Еди́на пребыва́еши по Рождестве́, Влады́чице, де́вственною добро́тою сия́ющи, еди́на ма́терних избе́гла еси́ боле́зней: Бо́га бо еди́на родила́ еси́, Изба́вителя ду́ш на́ших.

И́н. Ирмо́с то́йже

Свиде́тели соде́янным иму́ще мы́сленныя а́нгелы, избере́м чи́стое житие́, душе́ моя́, вопию́ще: благослове́н еси́, Го́споди Бо́же оте́ц на́ших. [Два́жды.]

У́глем очище́нный, Престо́лу Твоему́ предстоя́щия зри́т Серафи́мы, боже́ственный вопия́ Иса́ия: благослове́н еси́, Го́споди Бо́же оте́ц на́ших.

Богоро́дичен: Чи́ны все́х Безпло́тных, Де́во, я́ве превосхо́диши, я́ко Творца́ ро́ждши и Го́спода: благослове́н, Пречи́стая, Пло́д Твоего́ чре́ва.

Пе́снь 8

Ирмо́с: Изба́вителю все́х, Всеси́льне, посреде́ пла́мене благоче́ствовавшия, снизше́д ороси́л еси́, и научи́л еси́ пе́ти: вся́ дела́, благослови́те, по́йте Го́спода.

Яви́хся ското́м подо́бен безслове́сным, подклони́вся страсте́м. Сло́ве Бо́жий Пребезнача́льне, обрати́в мя́, спаси́ вопию́ща: благослови́те, вся́ дела́ Госпо́дня, Го́спода.

Озоба́ ве́прь, позоба́ еди́нок мя́, Спа́се, я́коже виногра́д возде́ланный ду́хом: от него́же изба́ви мя́, Сло́ве, и плодоно́сна доброде́тельми а́бие Тебе́ покажи́.

Му́ченичен: Оброще́ния кро́вная очервлени́ша багряни́цу ва́м боготка́нную, е́юже украси́стеся, му́ченицы, венцы́ нося́ще побе́ды, и́же в вы́шних Царю́ Ве́чному предстоите́.

Му́ченичен: Свяще́нное му́чеников сосло́вие несвяще́нное разруши́ согла́сие, беззако́нновати повелева́ющее, и зако́нно пострада́в, от Влады́ки все́х зако́нно венча́ся.

Богоро́дичен: Благослови́т вся́ тва́рь Рождество́ Твое́, благослове́ньми на́с венча́вшее, и от кля́твы изъе́мшее, Всеблагослове́нная еди́на, и Препросла́вленная, Я́же ро́д на́ш облагода́тившая.

И́н. Ирмо́с то́йже

Я́ко сы́й Живо́т Безсме́ртный, безсме́ртному животу́ причаща́тися зижди́тельне сотвори́л еси́ а́нгелы, и научи́л еси́ пе́ти: благослови́те, по́йте Го́спода. [Два́жды.]

Мы́сленно обстоя́ще Тя́ арха́нгели, непреста́нными гла́сы воспева́ют, боголе́пно чту́ще Тя́ я́ко Влады́ку все́х: благослови́те, по́йте Го́спода.

Богоро́дичен: Зако́ннии о́брази прообража́ху Тя́, Всеблаже́нная, ро́ждшую Бо́га, ве́щи пло́тстей соединя́ема, пре́жде невеще́ственна су́ща Боже́ственным естество́м: благослови́м, Де́во, Рождество́ Твое́.

Та́же, пое́м пе́снь Богоро́дицы: Вели́чит душа́ моя́ Го́спода.

Пе́снь 9

Ирмо́с: Е́ва у́бо неду́гом преслуша́ния кля́тву всели́ла е́сть – Ты́ же, Де́во Богоро́дице, прозябе́нием чревоноше́ния, ми́рови благослове́ние процвела́ еси́: те́м Тя́ вси́ велича́ем.

Се́ покая́ния вре́мя, что́ лени́мся, что́ сно́м погружа́емся? Уны́ния да отсту́пим, украси́м свещи́, я́коже пи́шет, еле́ем благотворе́ния: да не оста́нем внеу́ду двере́й рыда́ющи.

До́ндеже е́сть вре́мя пока́ятися, обрати́ся от зо́л Твои́х, душе́ моя́, я́же соде́лала еси́ ве́дением и неве́дением, и возопи́й к Ве́дущему вся́: согреши́х Ти́, прости́, Влады́ко, и не гнуша́йся мене́, недосто́йнаго.

Му́ченичен: Собра́ Христо́с страда́вшия святы́я явле́ннейше, от вся́кия страны́ и гра́да на ме́ста сла́вная, в честна́я поко́ища, и ны́не перворо́дных Це́рковь просвеща́ют веселя́щеся.

Му́ченичен: Всечестна́я ра́ка честны́х му́ченик Твои́х, Го́споди, луча́ми Боже́ственнаго Ду́ха озаря́ема, пресла́вне исцеле́ния испуща́ет све́тлость, и разоря́ет неду́гов боле́зни, еди́не Многоми́лостиве.

Богоро́дичен: От све́та, и́же в Тебе́, Богоневе́сто, заря́ми ду́шу мою́ просвети́, лежа́щую в ро́ве поги́бели возста́ви, враги́ сокруша́ющи, оскорбля́ющия се́рдце мое́ при́сно, и к страсте́м порева́ющия мя́.

И́н. Ирмо́с: Сокрове́нное Бо́жие неизрече́нное в Тебе́ соверша́ется, я́вственное та́инство, Де́во Пречи́стая, и́бо Бо́г из Тебе́ воплоти́ся за милосе́рдие. Те́мже Тя́, я́ко Богоро́дицу велича́ем.

И́же Ума́ Роди́теля, и Предложи́теля Сы́ну и Ду́ху пою́ще а́нгели, ны́не к на́м Боже́ственныя благода́ти подая́ния, приле́жно прие́мше посыла́ти усе́рдствуйте.

Красно́ удобря́еми нетле́ния да́ром и благода́тию, боже́ственнии арха́нгели, Тебе́ Исто́чника, Христе́, присносу́щна нетле́ния, пою́ще я́ко Благода́теля велича́ют.

Богоро́дичен: Неве́стник воплоще́ния неизрече́ннаго, и Черто́г одушевле́нный, и Ковче́г зако́на благода́ти Тя́, Богома́ти, ве́рнии све́мы: те́мже Тя́ непреста́нно велича́ем.

Та́же, Досто́йно е́сть: и покло́н. Ектения́, и свети́лен. И псалмы́ обы́чны.

На стихо́вне, стихи́ры покая́нны, гла́с 4:

Омы́й мя́ слеза́ми мои́ми, Спа́се, я́ко оскверни́хся мно́гими грехи́. Те́мже и припа́даю Ти́: согреши́х, Бо́же, поми́луй мя́.

Сти́х: Испо́лнихомся зау́тра ми́лости Твоея́, Го́споди, и возра́довахомся и возвесели́хомся, во вся́ дни́ на́ша возвесели́хомся: за дни́, в ня́же смири́л ны́ еси́, ле́та, в ня́же ви́дехом зла́я. И при́зри на рабы́ Твоя́, и на дела́ Твоя́, и наста́ви сы́ны и́х.

Овча́ е́смь слове́снаго Твоего́ ста́да, и к Тебе́ прибега́ю, Па́стырю До́брому: взыщи́ мене́ заблу́ждшаго, Бо́же, и поми́луй мя́.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Кто́ не ужаса́ется, зря́, святи́и му́ченицы, по́двига до́браго ва́шего, и́мже подвиза́стеся? Ка́ко во пло́ти су́ще, безпло́тнаго врага́ победи́сте, Христа́ испове́дающе, и Кресто́м вооружи́вшеся! Те́мже досто́йно яви́стеся бесо́в прогони́телие, и ва́рваров сопротивобо́рцы, непреста́нно моля́щеся, спасти́ся душа́м на́шим.

Сла́ва, и ны́не: Богоро́дичен: Богоро́дице, все́х Цари́це, правосла́вных похвало́, ерети́чествующих шата́ния разори́, и ли́ца и́х посрами́, не кла́няющихся, ниже́ чту́щих, Пречи́стая, честны́й Тво́й о́браз.

Та́же, Бла́го е́сть испове́датися Го́сподеви: И Трисвято́е по О́тче на́ш: тропари́, и ектении́. Та́же ча́с 1-й, псалмы́ обы́чны, и про́чее, и отпу́ст.

Дре́вом Ада́м Рая́ бы́сть изселе́н, Дре́вом же Кре́стным разбо́йник в Ра́й всели́ся: о́в у́бо вку́ш, за́поведь отве́рже сотво́ршаго, о́в же сраспина́емь, Бо́га испове́да тая́щагося, помяни́ мя, вопия́, во Ца́рствии Твое́м.

Сти́х: Блаже́ни изгна́ни пра́вды ра́ди, я́ко те́х е́сть Ца́рство Небе́сное.

Па́че все́х челове́к на земли́ а́з согреши́х, и бою́ся та́мо нелицеме́рнаго суди́ща, Преблаги́й, на не́мже неосужде́на мя́ соблюди́ тогда́, и от му́ки изба́ви, подая́ ми покая́ние, омыва́ющее вся́кия скве́рны, я́ко Человеколю́бец.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́, лжу́ще Мене́ ра́ди.

Херуви́ми и Серафи́ми, Вла́сти, Престо́ли, Арха́нгели, Госпо́дьствия вку́пе и Си́лы, святи́и А́нгели, Нача́ла высоча́йшая, Влады́це все́х ны́не предстоя́ще, согреше́ний оставле́ния и жития́ исправле́ния испроси́те все́м вопию́щим ве́рно: помяни́ на́с во Ца́рствии Твое́м.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

Примеша́ющеся огню́, хвра́стную пре́лесть попали́сте, страстоно́сцы Христо́вы, и мно́жеством ва́шея кро́ве, глуби́ннаго зми́я отню́д потопи́сте, всехва́льнии, побе́ду взе́мше, с вы́шними во́инствы ра́дуетеся, моля́щеся приле́жно спасти́ся на́м.

Сла́ва: Трисо́лнечная Заре́, я́же в мирски́х сия́ющая исполне́ниих, души́ моея́ лю́тыя отгна́вши стра́сти, низпосли́ мне́ све́та сия́ние, и очище́ние согреше́ний, ве́рою ны́не зову́щу Ти́ Безнача́льному Отцу́, Сы́ну Сопресто́льну, и Ду́ху: Тро́ице, Вседе́тельная Си́ло, спаси́ на́с.

И ны́не: Согреша́ющаго при́сно, и ле́ностию весьма́ содержи́ма, уще́дри, Чи́стая, и покая́ния о́бразы удобри́, даю́щи умиле́ние недоуме́нней души́ мое́й, Пречи́стая, Наде́ждо непосты́дная, любо́вию воспева́ющих Тя́, и вопию́щих ве́рно: помяни́ и на́с, Де́во Всепе́тая.

на Го́споди, воззва́х: стихи́ры покая́нны. Гла́с 4.

Подо́бен: Зва́нный свы́ше:

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

Ханане́и поревнова́вши, душе́, прикосни́ся Христу́ созади́, и взыва́й ча́сте: поми́луй мя́, о Влады́ко! Де́тище и́мам, бесну́ющуюся пло́ть безчи́нную, отжени́ разжже́ние от нея́, молю́ся, и утоли́в безчи́нная взыгра́ния, ме́ртву стра́хом Твои́м соверши́, моли́твами пречи́сто Заче́ншия и Ро́ждшия Тя́, Христе́, и все́х святы́х, Благода́телю Многоми́лостиве.

Сти́х: И́мене ра́ди Твоего́, потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Ниневи́тяном иногда́ согреши́вшим Ио́ну посла́л еси́, Христе́, пропове́дати си́м, и́же пока́явшеся, я́рость в благосе́рдие преложи́ша, избавля́еми от губи́тельнаго гне́ва. Посли́ у́бо, Человеколю́бче, и мне́ недосто́йному держа́вную Твою́ по́мощь, да обращу́ся от безчи́сленных мои́х согреше́ний, и на стезю́ покая́ния наста́влен бу́ду, и пла́чу стеня́ го́рце, мно́гих мои́х прегреше́ний изба́витися ми́лостию Твое́ю.

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

В ми́р прише́дый, во е́же спасти́ челове́ки согреша́ющия, и к покая́нию си́х призва́ти, я́ко Благоутро́бен, и мене́, Ще́дре, па́че все́х Тебе́ прогне́вавшаго уще́дрив, спаси́ мя ра́ди бла́гости, и на пу́ть покая́ния наста́ви мя́, и по́мысл да́ждь ми́ умиле́ния, утверди́в се́рдце смире́нно, и про́сто, и кро́тко, некова́рно, Спа́се мо́й, бла́гостию Твое́ю, я́ко Благоутро́бен.

И́ны стихи́ры свято́му и вели́кому Иоа́нну Предте́чи. Гла́с 4.

Сти́х: Я́ко у Го́спода ми́лость, и мно́гое у Него́ избавле́ние: и То́й изба́вит Изра́иля от все́х беззако́ний его́.

Име́яй ко Го́споду дерзнове́ние, рожде́нных жена́ми все́х, Предте́че, превосходя́й, Того́ моли́ непреста́нно с ве́рою моля́щихся Ти́, обраще́ние на́м да́ти, и вину́ покая́ния: я́ко да Тя́ воспева́ем спаса́еми всегда́.

Сти́х: Хвали́те Го́спода вси́ язы́цы, похвали́те Его́ вси́ лю́дие.

Нарече́н бы́л еси́ Проро́к от ложе́сн, и от утро́бы Пропове́дник, Предте́че и Апо́столе прише́ствия Госпо́дня; бесо́м у́бо пре́дана мя́ су́ща, и греху́ раба́ многоде́йственна, от обои́х мя́ испра́ви, я́ко кре́пкий во́ин, да Твое́ ско́рое пропове́дую заступле́ние.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Лопа́та сы́й Ду́ха Боже́ственнаго, плевови́дныя нра́вы разве́й от се́рдца моего́, дея́ния боже́ственная от мене́ собира́я, я́ко пшени́цу в жи́тницу Бо́жию, я́ко да пи́ща Влады́це благопотре́бна бу́ду, Тобо́ю хода́таем обогаща́емь, Христо́в Крести́телю блаже́нне.

И ны́не: Богоро́дичен: Сле́зы ми́ да́ждь от се́рдца, и воздыха́ние из глубины́, Отрокови́це, и души́ сокруше́ние, и испове́дание, я́же в житии́ соде́янная мно́ю прегреше́ния, да Твое́ю по́мощию, Всечи́стая, в покая́нии прейду́ жи́знь мою́, и улучу́ ослабле́ние.

Та́же, Све́те ти́хий: Проки́мен дне́. И Сподо́би, Го́споди, в ве́чер се́й:

На стихо́вне стихи́ры покая́нны, гла́с 4:

Хоте́х слеза́ми омы́ти мои́х прегреше́ний, Го́споди, рукописа́ние, и про́чее живота́ моего́, покая́нием благоугоди́ти Тебе́: но вра́г льсти́т мя́, и бо́рет ду́шу мою́. Го́споди, пре́жде да́же до конца́ не поги́бну, спаси́ мя.

Сти́х: К Тебе́ возведо́х о́чи мои́, живу́щему на Небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дрит ны́.

Кто́ обурева́емь, и притека́я ко приста́нищу сему́ не спасе́тся? Или́ кто́ неду́гуя, и припа́дая ко врачевству́ сему́, не уврачу́ется, Соде́телю вся́ческих, и Врачу́ неду́жных? Го́споди, пре́жде да́же до конца́ не поги́бну, спаси́ мя.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих и уничиже́ния го́рдых.

И́же святы́х му́ченик прие́мый терпе́ние, и от на́с приими́ пе́ние, Человеколю́бче: и да́руй на́м те́х моли́твами ве́лию ми́лость.

И ны́не: Богоро́дичен: Изба́ви на́с от ну́жд на́ших, Ма́ти Христа́ Бо́га, ро́ждшая все́х Творца́, да вси́ вопие́м Ти́: ра́дуйся, еди́но предста́тельство ду́ш на́ших.

Та́же, Ны́не отпуща́еши: Трисвято́е, и по О́тче на́ш: тропа́рь, ектения́, и отпу́ст.

Кано́н Пресвяте́й Богоро́дице. Гла́с 4.

Пе́снь 1

Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зныма Моисе́овыма рука́ма, Амали́кову си́лу в пусты́ни победи́л е́сть.

Я́же еди́на в напа́стех и ско́рбех защища́ющая, под кро́в Тво́й, Пречи́стая, прибега́ющих те́пле, приими́ я́ко Преблага́я, я́же от се́рдца на́шего моле́ния.

Приста́нище невла́емое обрето́х Тя́, окая́нный, напа́стныя же и ну́ждныя прило́ги отрева́я, благода́рное пою́ Ти воспева́ние, Богому́жная Богороди́тельнице.

Сла́ва: Ми́лостивным и кро́тким Твои́м о́ком, Богороди́тельнице, зря́щи мя́ во обстоя́нии и ско́рби одержи́ма, вско́ре свободи́: Тя́ бо призыва́ю на по́мощь.

И ны́не: Е́ва осужде́ния изба́вися и Ада́м Тобо́ю, Чи́стая, с ни́миже и а́з припа́даю Ти́: печа́льныя ми́ сле́зы ны́не на ра́дость преложи́, и от напа́стей свободи́.

Пе́снь 3

Ирмо́с: Лу́к си́льных изнемо́же, и немощству́ющии препоя́сашася си́лою – сего́ ра́ди утверди́ся в Го́споде се́рдце мое́.

Ору́жие кре́пко, и сте́ну Тя́ стяжа́в а́з, побежда́ю сопроти́вных полки́, и пою́ вели́чия Твоя́, Богоро́дице Неискусобра́чная.

Пе́щь разоря́еши печа́лей, и погаша́еши отча́яния зно́й. Кто́ бо та́ко, я́коже Ты́, Де́во Богоро́дице, упова́ние на́ше?

Сла́ва: Внуши́ во́пль раба́ Твоего́, Твоея́ тре́бующаго по́мощи, Богома́ти: Упова́ние мое́, услы́ши мя́, и потщи́ся спасти́ мя.

И ны́не: При́зри, Чи́стая, спасти́ мя, и́бо Боже́ственным ма́нием вся́ содержа́щаго воплоти́ла еси́, Бо́жие Сло́во, па́че сло́ва и смы́сла.

Пе́снь 4

Ирмо́с: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Побе́ждши вражду́ющих мне́ всу́е, я́ко ду́шу мою́ тща́щихся лю́те прия́ти, сохрани́ мя, Влады́чице, ненаве́тна, да ра́дуяся сла́влю Тя́.

Избавля́ющи мя́ от язы́ка льстивоглаго́ливаго, я́ко блага́я предста́тельница, безпа́костна покажи́ от жите́йских дея́ний: мно́го бо мо́жеши, я́ко Ма́ти Зижди́теля су́щи.

Сла́ва: Безболе́знену ве́дый Тя́ целе́бницу немощны́й, ду́хом и усты́ зову́: исцели́ мя, Влады́чице, поми́луй и спаси́ мя, к Тебе́ бо прибега́ю ра́б Тво́й.

И ны́не: Я́ко похвалу́ а́нгелов и челове́ков Тя́ воспева́ем вси́, Де́во Мари́е, и ве́рно мо́лимся: моли́ся, Влады́чице, от вся́кия ско́рби изба́витися на́м.

Пе́снь 5

Ирмо́с: Ты́, Го́споди мо́й, Све́т в ми́р прише́л еси́, Све́т святы́й, обраща́яй из мра́чна неве́дения, ве́рою воспева́ющия Тя́.

Испра́ви, Чи́стая, моли́тву раба́ Твоего́ ко Го́споду, Сы́ну Твоему́: да обря́щу разреше́ние мно́гих прегреше́ний.

Изба́ви мя́ страсте́й и бе́д, Богоневе́сто: Тя́ бо положи́ Бо́г к Нему́ хода́таицу о мое́м смире́нии.

Сла́ва: Покрови́тельница мне́ Ты́ еси́ и непреста́нное хвале́ние, о Влады́чице Богоро́дице, не пре́зриши бо ника́коже одержи́маго в печа́лех.

И ны́не: Ны́не испроси́ на́м прегреше́ний оставле́ние, и изба́ви от напа́стей, и страсте́й нечи́стых, моли́твами Твои́ми, Препе́тая.

Пе́снь 6

Ирмо́с: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею Кро́вию.

Кре́пость моя́ Сама́ еси́, Пречи́стая Влады́чице, во обре́тших мя́ зело́ ненача́янных ско́рбех, и вопию́ Ти: я́ко ве́лия еси́ помо́щница рабу́ Твоему́.

Исцели́ душе́вныя моя́ я́звы, Влады́чице, заступи́ мя, Де́во, и изба́ви раба́ Твоего́ от оклевета́ния, наве́та же и развраще́ния непра́ведна.

Сла́ва: Сокруши́ наве́тники непра́ведныя, и́же на мя́, при́сно прибега́ющаго к Тебе́, Чи́стая, и не оста́ви мене́ поги́бнути, я́ко вся́ Тебе́ возмо́жна, Богоотрокови́це.

И ны́не: Успи́ души́ моея́ свире́пую во́лну, я́ко мно́жество прегреше́ний, искуше́ния и печа́ли воста́ша на мя́: но Сама́ мя, Влады́чице, спаси́.

Та́же, Го́споди, поми́луй, три́жды. Сла́ва, и ны́не:

Седа́лен, гла́с 4:

В кро́в Тво́й, Де́во, вси́ прибега́юще вопие́м Ти́: мольбу́ приими́ от на́с, и не преста́й моля́щися Человеколю́бцу, спасти́ся рабо́м Твои́м.

Пе́снь 7

Ирмо́с: Спасы́й во огни́ Авраа́мския Твоя́ о́троки, и халде́и уби́в, я́же пра́вда пра́ведно уловля́ше, препе́тый Го́споди Бо́же оте́ц на́ших, благослове́н еси́.

Е́же от ага́рян наси́лование ско́ро потре́бльши мече́м моли́тв Твои́х, Мари́е, лю́ди и ста́до Твое́ сохрани́, Сы́ну Твоему́ зову́щее: Бо́же оте́ц на́ших, благослове́н еси́.

Равноле́пная Ски́ние, приими́ мя к Тебе́ прибега́ющаго, да не прии́мет мя́ вра́г погуби́ти изгоня́я, пою́ща Сы́ну Твоему́, Богома́ти: оте́ц на́ших Бо́же, благослове́н еси́.

Сла́ва: Богороди́тельнице Мари́е, предвари́ раба́ Твоего́ вско́ре, в треволне́ниих напа́стей потопля́емаго, и не иму́ща по́мощи. К Тебе́ бо зову́: упова́ние мое́, Богоро́дице, поми́луй мя́.

И ны́не: Челове́ческия напа́сти, я́ко грехо́м вино́вны, ны́не, Богоро́дице блага́я, разори́ боже́ственными моли́твами Твои́ми, и рабы́ Твоя́ изба́ви боле́зненных прегреше́ний и вся́кия напа́сти.

Пе́снь 8

Ирмо́с: Изба́вителю все́х, Всеси́льне, посреде́ пла́мене благоче́ствовавшия, снизше́д, ороси́л еси́, и научи́л еси́ пе́ти: вся́ дела́, благослови́те, по́йте Го́спода.

Воста́ на ны́ язы́к беззако́нен, хваля́ся погуби́ти служи́тели Твоя́, его́же потре́бльши, Пречи́стая, зову́щия покры́й: вся́ дела́, благослови́те, Госпо́дня, Го́спода.

Мно́гия Твоя́ щедро́ты, Еди́на Богома́ти, на́с ми́лостивно спаса́ют от грехо́внаго суда́ и разли́чных напа́стей: Ты́ бо ро́ждши Бо́га, и ми́луеши ми́р Его́.

Сла́ва: На моле́ние мое́ ны́не умилосе́рдися, и ра́дость ми́ в печа́ли ме́сто да́руй, да пою́ Тя, Влады́чице, и вопию́ Сы́ну Твоему́: вся́ дела́, благослови́те, Госпо́дня, Го́спода.

И ны́не: Я́ко Ты́ мне́ еси́ кре́пость и помо́щница, не убою́ся враго́в негодова́ния, но воспева́ю Тя́, Влады́чице, и вопию́ Сы́ну Твоему́: вся́ дела́, благослови́те, Госпо́дня, Го́спода.

Пе́снь 9

Ирмо́с: Е́ва у́бо неду́гом преслуша́ния кля́тву всели́ла е́сть – Ты́ же, Де́во Богоро́дице, прозябе́нием чревоноше́ния, ми́рови благослове́ние процвела́ еси́. Те́м Тя́ вси́ велича́ем.

Ору́жие у́бо на ны́ обостри́в, совещава́ет льсти́вый ара́влянин беззако́нный – Ты́ же, Де́во Богоро́дице, си́лою Креста́ Сы́на Твоего́, и моли́тв Твои́х, вооружа́еши на него́ рабы́ Твоя́. Те́мже пропове́даем сла́ву Твою́.

Кре́пость у́бо Ты́ мне́ на враги́ даде́ся, и избавле́ние в напа́стех. Что́ же Ти́ а́з принесу́, Чи́стая? Не дове́м. Оба́че, е́же и́мам, благодаре́ние приношу́ Ти, Влады́чице, приими́ сие́ от раба́ Твоего́, и спаси́ мя.

Сла́ва: О, Ма́ти вся́ческих Творца́! О, Всечи́стая, скорбя́щих уте́хо, потопля́емых Предста́тельнице, и побеждае́мых Засту́пнице, до живота́ моего́ Ты́ мя сохрани́.

И ны́не: Утесня́емь грехи́ мно́гими, Препе́тая, и напа́стьми лю́тыми, ны́не Тебе́ хвале́ния же́ртву приношу́, и приле́жно взыва́ю Ти́: Свята́я Богоро́дице, помози́ ми, Тебе́ бо сла́вя, пе́снь скончава́ю.

Та́же, Досто́йно е́сть: Трисвято́е по О́тче на́ш: тропари́, и про́чее обы́чно, и отпу́ст.

По 1-м стихосло́вии седа́льны покая́нны. Гла́с 4:

Смире́нную мою́ ду́шу посети́, Го́споди, во гресе́х житие́ все́ ижди́вшую; я́коже блудни́цу приими́ и мене́, и спаси́ мя.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Препла́вая пучи́ну настоя́щаго жития́, помышля́ю бе́здну мно́гих мои́х зо́л, и не име́я ко́рмчия помышле́ний, Петро́в провещава́ю Ти́ гла́с: спаси́ мя, Христе́ Бо́же, спаси́ мя, я́ко Человеколю́бец.

Сла́ва, и ны́не: Богоро́дичен: Я́коже су́щая вои́стинну Богоро́дица, моля́щися я́ко Ма́ти со дерзнове́нием Сы́ну Твоему́ и Бо́гу на́шему, сохраня́й гра́д изря́дно к покро́ву Твоему́ притека́ющий, о Тебе́ держа́ву иму́щий, и к Тебе́ прибега́ющий, приста́нищу и стене́, еди́ней Предста́тельнице ро́да челове́ческаго.

По 2-м стихосло́вии, седа́лен, гла́с 4:

Мгло́ю страсте́й и жите́йскими сластьми́, помрача́емь у́м окая́нныя моея́ души́, к по́мыслу умиле́ния не прихо́дит; но уще́дри, Спа́се, и мене́, окая́ннаго, и да́ждь ми́ по́мысл умиле́ния, да и а́з пре́жде конца́ вопию́ благоутро́бию Твоему́, Го́споди: Христе́ Спа́се мо́й, отча́яннаго спаси́ мя и недосто́йнаго.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Ско́ро совни́дем в неве́стник Христо́в, да вси́ услы́шим блаже́нный гла́с Христа́ Бо́га на́шего: прииди́те лю́бящии Небе́сную сла́ву, соприча́стницы бы́вше му́дрым де́вам, просвети́вше свещи́ на́ша ве́рою.

Сти́х: Ди́вен Бо́г во святы́х Свои́х, Бо́г Изра́илев.

Кресто́м вооруже́ни страстоно́сцы Твои́, Христе́ Бо́же на́ш, победи́ша кознова́ния началозло́бнаго врага́, и возсия́ша я́ко свети́ла земны́х наставля́юще, и подаю́т исцеле́ния ве́рою прося́щим: те́х моли́твами спаси́ ду́ши на́ша.

Сла́ва, и ны́не: Богоро́дичен: Сло́во О́тчее Христа́ Бо́га на́шего, из Тебе́ воплоти́вшагося, позна́хом, Богоро́дице Де́во, Еди́на чи́стая, Еди́на благослове́нная: те́м непреста́нно Тя́ воспева́юще велича́ем.

По 3-м стихосло́вии, седа́лен гла́с 4.

Душе́, пока́йся пре́жде исхо́да твоего́, су́д неумы́тный согреша́ющим е́сть и непостоя́нен, возопи́й ко Го́споду умиле́нием се́рдца: согреши́х в ра́зуме и неве́дении, Ще́дре, моли́твами Крести́теля Твоего́, уще́дри и спаси́ мя.

Го́рлица пустыннолю́бная, свяще́нный Крести́тель, пропове́давый покая́ние, и показа́вый Христа́ бы́вша челове́ка, все́м согреша́ющим бы́сть предста́тель, и все́м обурева́емым помо́щник быва́я при́сный: того́ моли́твами, Христе́, спаси́ ми́р Тво́й.

Сла́ва, и ны́не: Богоро́дичен: Обнови́ла еси́, Чи́стая, Боже́ственным Рождество́м Твои́м, истле́вшее во страсте́х земноро́дных ме́ртвенное существо́, и воздви́гла еси́ вся́ от сме́рти к животу́ нетле́ния: те́мже Тя́ по до́лгу блажи́м вси́, Де́во Препросла́вленная, я́коже прорекла́ еси́.

Кано́н покая́нен, ко Го́споду на́шему Иису́су Христу́ и святы́м его́ му́чеником, [его́же краегране́сие сицево́: Чисто́тными мя́ слеза́ми омы́й, Сло́ве.] Творе́ние Ио́сифово. Гла́с 4.

Пе́снь 1

Ирмо́с: Порази́вый Еги́пта, и фарао́на мучи́теля погрузи́вый в мо́ри, лю́ди спа́сл еси́ из рабо́ты, Моисе́йски пою́щия пе́снь побе́дную: я́ко просла́вися.

Сокрове́нно де́ющаго дела́ тьмы́, Го́споди, да не я́ве обличи́ши, ни посрами́ши пред все́ми: но све́том просвети́ и́скренняго покая́ния, Спа́се, и спаси́ мя.

Грехи́ всегда́ на грехи́, Влады́ко, совокупля́ю блу́дный, и не чу́вствую стра́ха Твоего́ никогда́же, Го́споди: те́мже пре́жде конца́ спаси́ и уще́дри мя́.

Му́ченичен: Щито́м благоче́стия покрыва́еми святи́и, держа́ще я́ко ме́ч Кре́стное ору́жие, к боре́нию врага́, сла́внии, изыдо́сте, и того́ низложи́сте.

Му́ченичен: Кровопи́иц льво́в, и меча́ секу́щаго, и варе́ния коно́бнаго, строга́ния ногте́й, терза́ния же и боле́зненнаго муче́ния, му́ченицы боже́ственнии не убоя́шася.

Богоро́дичен: Ковче́г Боже́ственным Ду́хом позлаще́нный, Пречи́стая, показа́ся: не скрижа́ли нося́щ Зако́на, но Христа́ Го́спода, Его́же Зако́н и проро́цы дре́вле предвозвести́ша.

Други́й кано́н свято́му и честно́му Иоа́нну Предте́чи, [его́же краегране́сие сицево́: Пе́снь моли́твенную плету́ тебе́, блаже́нне, любо́вию.] Творе́ние Ио́сифово. Гла́с 4.

Пе́снь 1

Ирмо́с: Триста́ты кре́пкия, Рожде́йся от Де́вы, безстра́стия во глубине́, души́ трича́стное потопи́, молю́ся: да Тебе́ я́ко в тимпа́не, во умерщвле́нии телесе́, побе́дное воспою́ пе́ние.

Я́ко вели́кая звезда́ Со́лнцу предтеки́й, просвети́л еси́ зе́млю све́тлостьми Твои́ми, Крести́телю. Те́мже зову́ Ти: просвети́ мое́ се́рдце, ослепле́нное от безчи́сленных прегреше́ний лю́тыми омраче́нии.

Разреши́вый иногда́, блаже́нне, в рожде́нии непло́дствия у́зы, те́мже Тя́ молю́, безпло́дствием запусте́вшую ду́шу мою́ страсте́й, покажи́ моли́твами Твои́ми плоди́тельну, доброде́телей благоча́дие принося́щую.

Угото́вал еси́ пути́ Изба́вителю, предходя́й в си́ле Илиине́, присносла́вне Крести́телю: к Нему́же моея́ души́ движе́ние испра́ви, собла́зны вся́кия, и пла́мень страсте́й изыма́я моли́твами твои́ми.

Богоро́дичен: О́блаче све́тлый, души́ моея́ о́блаки те́мныя и лю́тыя Твои́ми све́тлыми хода́тайствы разори́: я́ко да ви́жу Зарю́ – из Тебе́ возсия́вшаго, и све́том све́т прииму́ незаходи́мый.

Пе́снь 3

Ирмо́с: Утвержда́яй гро́м, и созида́яй ду́х, утверди́ мене́, Го́споди, да Тя́ пою́ и́стинно, и творю́ во́лю Твою́: я́ко не́сть свя́т, я́ко Ты́, Бо́же на́ш.

И́же слепце́в о́чи просвети́вый, Христе́, о́чи мои́ просвети́ омраче́ннии сластьми́, и жите́йскими печа́льми, и ника́коже к судьба́м Твои́м взира́ющии.

Се́ вре́мя, возни́кни, душе́ моя́, от зо́л, я́же соде́яла еси́, и Влады́це Изба́вителю возопи́й со стра́хом: покая́ния, Христе́, две́ри отве́рзи ми́.

Му́ченичен: Отгна́н яви́ся Велиа́р боже́ственными по́двиги страстоте́рпец, и от ни́х попира́емь зри́тся ме́ртв и неде́йствен, и́же дре́вле хваля́йся.

Му́ченичен: Му́ченически тече́ние соверши́вше святы́х сосло́вие, и тьмы́ мы́сленных му́ринов, Боже́ственною си́лою я́ко вои́стинну посече́, и сла́ву получи́.

Богоро́дичен: Пра́отцем разре́шила еси́ печа́ль, Ра́дость на́м ро́ждши Жизнода́вца, и Изба́вителя, Пресвята́я Богоро́дице, Его́же приле́жно моли́, спасти́ ду́ши на́ша.

И́н. Ирмо́с: Лу́к си́льных изнемо́же, и немощству́ющии препоя́сашася си́лою – сего́ ра́ди утверди́ся в Го́споде се́рдце мое́.

Вся́ку доброде́тель испо́лнил еси́, вся́ку же зло́бу от се́рдца возненави́дел еси́, и стезю́ покая́ния челове́ком, блаже́нне, показа́л еси́.

Сло́ва вопло́щшагося Предте́ча вели́кий показа́лся еси́. Сего́ ра́ди молю́ся Ти́: безслове́сных мя́ страсте́й изба́ви, наставля́я мя́ к безстра́стию.

Еще́ жи́тельствуя в телеси́, житие́ Безпло́тных показа́л еси́, Предте́че: ему́же уподо́битися моли́твами Твои́ми, Богоно́се, и на́с укрепи́, мо́лимся.

Богоро́дичен: Ми́р Тобо́ю поми́ловася, и́же преступле́нием непотре́бен бы́сть, Ма́ти Де́во. Сего́ ра́ди в пе́ниих пе́сненных по до́лгу Тя́ ублажа́ет.

Пе́снь 4

Ирмо́с: Услы́шах, Бо́же, слу́х тво́й, и убоя́хся, разуме́х дела́ твоя́, и ужасо́хся, Го́споди: я́ко Твоего́ хвале́ния испо́лнь земля́.

Обнаже́н бы́х доброде́телей, и зло́бою облеко́хся, и се́ студа́ испо́лнихся, Иису́се Человеколю́бче: оде́ждами мя́ боже́ственными просвети́.

Препла́вая мирска́го мо́ря, Сло́ве, во́ду, ле́ностию в беду́ истопле́ния впадо́хся сласте́й теле́сных: к покая́ния приста́нищу напра́ви мя́.

Му́ченичен: Очи́стивше вои́стинну гно́й ве́сь греха́ терпе́ния Боже́ственною си́лою, до́блии му́ченицы, спасе́ние все́м пода́ша.

Му́ченичен: Валя́еми по земли́ я́коже ка́мение, страстоте́рпцы, пре́лести тве́рдыя до конца́ низверго́ша, и к Вы́шнему Гра́ду доспе́ша: те́х моли́твами, Го́споди, спаси́ на́с.

Богоро́дичен: Спасе́ние Тя́ на вся́кое вре́мя и ме́сто призыва́ю: не пре́зри мене́, Всенепоро́чная, Я́же Бо́га ро́ждшая, Изба́вителя вку́пе и Спа́са моего́.

И́н. Ирмо́с: Любве́ ра́ди, Ще́дре, Твоего́ о́браза, на Кресте́ Твое́м ста́л еси́ и раста́яшася язы́цы: Ты́ бо еси́, Человеколю́бче, кре́пость моя́ и хвале́ние.

Я́ко го́рлицу Тя́, ве́сну и́стинную, всеи́стинными словесы́ предвозвеща́ющую ми́рови, разуме́вше, ублажа́ем при́сно, сла́вне Предте́че.

Сокруше́нна мя́ льсти́ваго сокруше́ньми, Ве́тхому и Но́вому я́ко сы́й хода́тай, всего́ обнови́ моли́твами Твои́ми, Предте́че.

И́же в пусты́ню всели́выйся непоро́чным житие́м, опусте́вший вся́кими преступле́ньми у́м мо́й, боже́ственными моли́твами твои́ми обнови́, Предте́че.

Богоро́дичен: Очище́ние на́м и избавле́ние позна́ся Тво́й Сы́н, Де́во: Его́же моли́ спасти́ ду́ши во умиле́нии Тя́ блажа́щих.

Пе́снь 5

Ирмо́с: Возсия́й ми́, Го́споди, све́т повеле́ний Твои́х, я́ко к Тебе́ ду́х мо́й у́тренюет, и пое́т Тя́: Ты́ бо еси́ Бо́г на́ш, и к Тебе́ прибега́ю, Царю́ Ми́ра.

Уны́нием преходя́щаго житие́ тле́ющее, и пре́лестьми мя́ омрача́ема от преле́стника по вся́ дни́, Иису́се, уще́дри, и к све́ту покая́ния наста́ви и жи́зни.

Вознесе́ся се́рдце мое́ прило́гми зми́я, и низпаде́ся паде́нием ве́лиим: И́же низве́рженным, Иису́се, исправле́ние, возста́ви и спаси́ мя, мно́гих Твои́х ра́ди щедро́т.

Му́ченичен: Ка́плями крове́й угаси́сте многобо́жия пре́лести пе́щь, богоблаже́ннии, и ту́чами исцеле́ний пла́мень утиши́сте страсте́й всегда́, Спа́совы страда́льцы.

Му́ченичен: Стоя́ще пред суди́щем, и ногтьми́ стру́жеми, и во главы́ усека́еми, му́ченицы, и мно́жеству примеша́ющеся лю́тых му́к, непрекло́нни пребы́сте манове́нием Боже́ственным.

Богоро́дичен: Возсия́й ми́, Влады́чице, зарю́ ми́лости Твоея́, и́же во мра́це прегреше́ний мои́х су́щу, Де́во, и к све́ту покая́ния наста́ви мя́, Пречи́стая, да ве́рою Тя́ пою́.

И́н. Ирмо́с: Просвеще́ние Твое́, Го́споди, низпосли́ на́м, и от мглы́ прегреше́ний разреши́ ны́, Бла́же, Тво́й ми́р да́руяй.

Пусты́нными мя́ у́гльми, страсте́й нахожде́ньми распала́ема, пусты́нное воспита́ние, росо́ю Твои́х моли́тв, си́х вре́да соблюди́ неврежде́нна.

От твоея́, всеблаже́нне, святы́я десни́цы креща́ется Отца́ Боже́ственная Десни́ца, спаса́ющая на́с от руки́ льсти́ваго, свяще́нными хода́тайствы Твои́ми.

Прибе́жище Тя́, Предте́че, и покро́в держа́вен, и вели́кую сте́ну ве́сь ми́р и́мать: изба́ви на́с твои́ми моли́твами от вся́кия тесноты́.

Богоро́дичен: Добро́ту Тя́ Иа́ковлю возлюби́ Бо́г, Де́во Отрокови́це, украша́ющ вся́ Тобо́ю, омрачи́вшияся преступле́нием пе́рвее.

Пе́снь 6

Ирмо́с: Пучи́ною жите́йскою дея́ньми мои́ми снидо́х во а́д, но я́ко от ки́та Ио́на, та́ко вопию́: из глубины́ зо́л возведи́, молю́ся, Сы́не Бо́жий и Сло́ве.

Дрема́нием небреже́ния отяготи́х, окая́нный, ду́шу, и греха́ сно́м низложи́хся: к све́ту покая́ния воздви́гни мя́, Го́споди, и Твои́м милосе́рдием спаси́ мя.

Ка́ко падо́х окая́нный? Ка́ко удали́хся Бо́га Преблага́го? Ка́ко не внемлю́ в чу́вствии Стра́шное Суди́ще о́но, на не́мже и́мам суди́тися? Тво́рче мо́й, уще́дри мя́.

Му́ченичен: Цевни́ца яви́стеся, вои́стинну возглаша́ющая пе́ние спаси́тельное при́сно, и наслажда́ющая ве́рных сердца́, и пия́нство пре́лести до конца́ огоня́ющая, страда́льцы пресве́тлии.

Му́ченичен: Превозше́дше преде́лы челове́ческия, му́ченицы Христо́вы, к Зижди́телю возникнове́нием боже́ственным, муче́ния боле́зни претерпе́сте ра́дующеся, я́ко в телесе́х чужди́х.

Богоро́дичен: Всесвята́я Де́во, Предста́тельнице и покро́ве все́х ве́рных, предста́ни и изба́ви мя́ преще́ния бу́дущаго, и Стра́шнаго Суди́ща в ча́с су́дный, да ве́рою при́сно пою́ Тя́.

И́н. Ирмо́с: Приидо́х во глубины́ морски́я, и потопи́ла мя́ е́сть бу́ря мно́гих грехо́в: но я́ко Бо́г из глубины́ возведи́ живо́т мо́й, Многоми́лостиве.

Стоя́ше креща́я в быстрина́х Влады́ку, грехи́ все́х челове́ков взе́млющаго: Его́же моли́ти не преста́й, Предте́че, уще́дрити ду́ши на́ша.

Пропове́дник показа́лся еси́ покая́ния, в не́мже соблюди́, Предте́че, мое́ се́рдце, оскверне́нное вре́дными грехи́, и возникнове́ния не иму́щее.

Возгласи́л еси́, блаже́нне, душа́м в пусты́нях непроходи́мых, Сло́ва прише́ствие хотя́щее бы́ти: те́мже гла́сы немо́лчными вся́кая Це́рковь блажи́т Тя́.

Богоро́дичен: Зако́на изъясни́шася о́бразы, Твои́м стра́шным Рождество́м, Богоневе́сто, и́хже сбытие́ мы́ ны́не зря́ще, Влады́чице, по достоя́нию Тя́ чти́м.

Пе́снь 7

Ирмо́с: О́бразу злато́му не поклони́вшеся о́троцы Авраа́мстии, искуша́хуся я́ко зла́то в горни́ле в пещи́ о́гненней, я́ко в черто́зе све́тлем ликова́ху, пою́ще: благослове́н еси́, Бо́же оте́ц на́ших.

Ю́но Отроча́ яви́лся еси́, Христе́, ве́тхаго осужде́ния изба́вити хотя́ ми́р, я́ко Благоутро́бен. Те́мже вопию́ Ти, обетша́вшаго мя́ грехи́ мно́гими ны́не обнови́, Ще́дре, и спаси́ мя пою́ща: благослове́н Бо́г оте́ц на́ших.

И́же иногда́ Манасси́ю пока́явшася спасы́й, и уще́дривый блудни́цу прослези́вшуюся, и разбо́йника сло́вом оправда́вый, мно́гая и лю́тая согреши́вшаго Ти́, и мене́, Спа́се, приими́ вопию́ща: благослове́н Бо́г оте́ц на́ших.

Му́ченичен: Бу́ри лю́тей многобо́жия обдержа́щей вселе́нную, кора́бль сотво́рше благоче́стия, страстоте́рпцы: окормле́нием же Христо́вым, ко приста́нищу жи́зни доплы́вше вопие́те: благослове́н Бо́г оте́ц на́ших.

Му́ченичен: Просвеще́ни бы́вше я́ве, я́коже зла́то в горни́ле, му́ками искуша́еми страда́льцы, и показа́вшеся запеча́тания честна́я Страсте́й Христо́вых, в сокро́вищах Небе́сных, во утвержде́нии мно́зе сокрове́ни бы́ша ны́не.

Богоро́дичен: Спа́са и Бо́га, и Изба́вителя и Влады́ку, пло́тию ро́ждши Пречи́стая Влады́чице, Тому́ при́сно, Пречи́стая, моли́ся, я́ко да разреше́ние лю́тых и мно́гих грехо́в оставле́ние прии́мше, славосло́вим Того́ я́же па́че ума́ щедро́ты.

И́н. Ирмо́с: Авраа́мстии иногда́ в Вавило́не о́троцы, пе́щный пла́мень попра́ша, пе́сньми взыва́юще: оте́ц на́ших Бо́же, благослове́н еси́.

Бо́льший все́х рожде́нных яви́лся еси́, Проро́че, Бо́гу вельми́ согреша́юща мя́, велича́йшею моли́твою твое́ю, пла́мене вели́каго изба́ви, и ве́чныя тьмы́, я́ко да ублажа́ю тя́.

Непло́дная яви́хся смоко́вница, и посече́ния бою́ся: утверди́ мя хода́тайством твои́м, Предте́че Спа́сов, и плодови́та сотвори́, я́ко да ублажа́ю тя́.

Умспи́ вся́ку вра́жию подви́жимую бу́рю, на и́же ве́рою притека́ющаго к Тебе́, бо́дренными Твои́ми моли́твами, ко Изба́вителю все́х, Предте́че Иоа́нне.

Богоро́дичен: Нахожде́ния лука́ваго и ча́сти, Де́во, и рабо́ты бесо́вския сохрани́ рабы́ Твоя́, и́же душе́ю Тя́ и язы́ком при́сно сла́вящия.

Пе́снь 8

Ирмо́с: Во огни́ пла́меннем предстоя́т Тебе́ Херуви́ми, Серафи́ми, Го́споди, и вся́ тва́рь пе́снь Тебе́ пое́т кра́сную: по́йте, благослови́те, лю́дие, превозноси́те Христа́, Еди́наго Соде́теля, во вся́ ве́ки.

Не пребы́х во стра́се Твое́м, не послу́шах за́поведей Твои́х, и во́лю твою́ никогда́же сотвори́х: что́ бу́ду окая́нный? Человеколюби́в сы́й, уще́дри мя́ ту́не, Спа́се, и не отве́ржи мене́.

Де́лателю до́брых, вопию́ Ти: стра́ха Твоего́ серпо́м, пожни́ из ко́рене вся́ терно́вная помышле́ния души́ моея́ окая́нныя: и се́менем покая́ния прозяба́ти ми́ сподо́би, Христе́, спаси́тельный кла́с.

Му́ченичен: Распространи́шася благода́тию, утесня́еми в му́ках мно́гих страстоно́сцы, и стесни́ша врагу́ пути́ про́пастей испо́лнены, и ны́не наставля́ют на́с к путе́м Бо́жиим в ве́ре и любви́.

Му́ченичен: Беду́ прия́т льсти́вый, впа́д во глубину́, му́ченицы, терпе́ния и страда́ния ва́шего, и лежи́т от все́х насмева́емь безу́мный – вы́ же побе́дными венцы́ украша́етеся.

Богоро́дичен: Чре́во Твое́, Всенепоро́чная, сто́г честна́го гумна́ яви́ся, ми́ру нося́ Пшени́цу Живота́, пита́ющу вся́ческая. Те́мже Тя́ я́ко вино́вну все́х до́брых, ве́рнии по достоя́нию ублажа́ем.

И́н. Ирмо́с: Изба́вителю все́х, Всеси́льне, посреде́ пла́мене благоче́ствовавшия, снизше́д, ороси́л еси́, и научи́л еси́ пе́ти: вся́ дела́, благослови́те, по́йте Го́спода.

Уны́ния мя́ сно́м одержи́ма, и мгло́ю зло́бы помрача́ема, све́тлою моли́твою твое́ю испра́ви, Предте́че, и да́ждь я́ко во дни́ доброде́телей благообра́зно ходи́ти.

Искуше́ний мя́ бу́ря обдержи́т, и страсте́й волна́ смуща́ет мя́: ру́ку ми́ пода́ждь, Предте́че, возводя́ ко приста́нищу покая́ния, души́ моея́ кора́бль моли́твами твои́ми.

И́же взе́млющаго ми́ру прегреше́ния, в речны́х вода́х крести́л еси́, зо́л мои́х бе́здну изсуши́ струя́ми моли́тв твои́х, блаже́нне Иоа́нне Предте́че.

Ви́дев Ду́ха Свята́го, слы́шал еси́ гла́с Роди́телев, свиде́тельствующ, Предте́че, тобо́ю неизрече́нно креща́емому Иису́су: Его́же моли́ спасти́ на́с.

Богоро́дичен: Я́ко исто́чник на́шего обновле́ния, сокруше́ннаго мя́ прираже́ньми зми́евыми, всего́ обнови́: я́ко да ве́рою и любо́вию Тя́ ублажа́ю, Богоро́дице Де́во Всенепоро́чная.

Та́же, пое́м пе́снь Богоро́дицы: Вели́чит душа́ моя́ Го́спода:

Пе́снь 9

Ирмо́с: Сотвори́ держа́ву мы́шцею Свое́ю, низложи́ бо си́льныя со престо́л, и вознесе́ смире́нныя Бо́г Изра́илев: в ни́хже посети́ на́с Восто́к с высоты́, и напра́вил ны́ е́сть на пу́ть ми́ра.

Се́ отве́рзеся черто́г та́йный, и му́дрии украси́вше свещи́ своя́ еле́ем доброде́телей, вхо́дят све́тли. Отложи́ со́н уны́ния, о душе́, я́ко да вни́деши со Христо́м свещу́ нося́щи.

Я́коже блудни́ца держу́ но́зе Твои́ мы́сленно, и слеза́ми омыва́ю си́х, Сло́ве. Омы́й мя́, Спа́се, от тиме́ния страсте́й: ве́ра твоя́ спасе́ тя, ны́не и мне́ пригласи́в, я́ко да Твое́ безчи́сленное пою́ милосе́рдие.

Му́ченичен: Весе́лым се́рдцем и ра́достною душе́ю му́ченицы в вы́шних живу́т, я́звы Христо́вы я́коже красоту́ благоле́пия при́сно иму́ще, и на́м ми́ра испроша́ют, и лю́тых избавле́ние, и прегреше́ний разреше́ние.

Му́ченичен: Освяти́ся вся́ко ме́сто, иму́щее, боже́ственнии страда́льцы, мо́щи ва́ша, я́коже други́й Ковче́г, и́же во Изра́или избавля́ющ лю́тых: ра́дуются Небе́сная, с честны́ми а́нгелы, ду́ши ва́ша, блаже́ннии, стяжа́вша.

Богоро́дичен: Благолюби́вая Отрокови́це, благолюби́ваго Бо́га ро́ждшая, вопию́ Ти: ублажи́ окая́нную мою́ ду́шу, озло́бленную лю́те страстьми́ и прило́гми лука́вых бесо́в, да ве́рою Тя́ пою́, наде́жду все́х.

И́н. Ирмо́с: Е́ва у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́: те́м Тя́ вси́ велича́ем.

Кре́пость моя́ и пе́ние – Христо́с Госпо́дь, Его́же моли́, блаже́нне Предте́че, на стра́сти мя́ укрепи́ти, и на вся́кия прило́ги бесо́вския. И да́ждь Боже́ственную де́лати во́лю, я́ко да Тя́ любо́вию ублажа́ю при́сно.

Кра́сная го́рлица, и ла́стовица сладкоглаго́ливая яви́лся еси́, Боже́ственный Предте́че, Ве́сну возвеща́ющая Боже́ственную – Христа́; Его́же моли́, изба́вити мя́ зимы́ душетле́нныя и бу́ри грехо́вныя, молю́ся Ти́.

Взыгра́вся в ложесна́х ма́терних, возвести́л еси́ от Де́вы возсия́вшаго: того́ моли́, плотска́я моя́ двиза́ния умертви́ти, умерщвля́ющая мя́, и испо́лнити ра́дости се́рдце мое́, я́ко да пою́ Тя, Боже́ственный Предте́че.

Су́д неми́лостив, душе́, ми́лости не творя́щим, зри́ и внима́й; еле́й приими́, свещу́ твою́ просвеща́ющий, и соблюди́ неугаше́нну. Приближа́ется Жени́х, бо́дрствуй, да неугаша́емо и́маши произволе́ние.

Богоро́дичен: Благолюби́ваго ро́ждши Бо́га, благолюби́вая Богоро́дице, Того́ моли́, вся́кия мя́ изба́вити зло́бы, и к Тому́ да сотвори́т се́рдце рачи́тельно, плотско́е сладостра́стие возненави́дети: да в пе́снех велича́ю Тя́.

Та́же, Досто́йно е́сть: И ектения́, и свети́лен, и псалмы́ обы́чны.

На стихо́вне стихи́ры покая́нны, гла́с 4:

Омы́й мя́ слеза́ми мои́ми, Спа́се, я́ко оскверни́хся мно́гими грехи́. Те́мже и припа́даю Ти́: согреши́х, Бо́же, и поми́луй мя́.

Сти́х: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся, во вся́ дни́ на́ша возвесели́хомся: за дни́, в ня́же смири́л ны́ еси́, ле́та, в ня́же ви́дехом зла́я, и при́зри на рабы́ Твоя́, и на дела́ Твоя́, и наста́ви сы́ны и́х.

Овча́ е́смь слове́снаго Твоего́ ста́да, и к Тебе́ прибега́ю, Па́стырю До́брому, взыщи́ мене́ заблу́ждшаго, Бо́же, и поми́луй мя́.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: А́нгелом соприча́стницы бы́сте, святи́и му́ченицы, на суди́щи Христа́ му́жески пропове́давше: вся́ бо я́же в ми́ре оста́висте кра́сная, я́ко не су́ща, ве́ру же я́ко наде́жду тве́рду удержа́сте. Те́мже и ле́сть отгна́вше, источа́ете ве́рным исцеле́ний дарова́ния, непреста́нно моля́щеся, спасти́ся душа́м на́шим.

Сла́ва, и ны́не: Богоро́дичен: От все́х бе́д рабы́ Твоя́ сохраня́й, Благослове́нная Богоро́дице: да Тя́ сла́вим, наде́жду ду́ш на́ших.

Та́же, Бла́го е́сть испове́датися Го́сподеви: Трисвято́е, и по О́тче на́ш: тропа́рь, и ектения́. Посе́м ча́с 1-й, псалмы́ обы́чныя, и про́чее, и отпу́ст.

Дре́вом Ада́м Рая́ бы́сть изселе́н – Дре́вом же Кре́стным разбо́йник в Ра́й всели́ся. Ов у́бо вку́ш, за́поведь отве́рже Сотво́ршаго; о́в же сраспина́емь, Бо́га испове́да тая́щагося, помяни́ мя, вопия́, во Ца́рствии Твое́м.

Сти́х: Блаже́ни изгна́ни пра́вды ра́ди, я́ко те́х е́сть Ца́рство Небе́сное.

И́же Петро́в пла́ч, и блудни́цы сле́зы прие́мый, Сло́ве, и мытаря́ то́чию воздохну́вша, уще́дрил еси́, Христе́, я́ко Благоутро́бен, и мене́ припа́дающа и прося́ща прегреше́ний проще́ния, поми́луй, Го́споди Преблаги́й, и изба́ви ве́чныя му́ки.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л, на вы́ лжу́ще Мене́ ра́ди.

И́же непло́дствия у́зы разреши́вый, вели́кий Предте́че, непло́дие моего́ смире́ннаго се́рдца разреши́, и приноси́ти сотвори́ доброде́тельная дея́ния хода́тайством Твои́м, и́миже восприиму́ пи́щу неиждива́емую, взыва́я Христу́: помяни́ мя, Спа́се, егда́ прии́деши во Ца́рствии Твое́м.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

Сокруша́еми му́ками, и звере́м в сне́дь вдава́еми, му́дрии, и ссеца́еми, и во глубину́ морску́ю вмета́еми, всесла́внии му́ченицы, огне́м сожига́еми, и о́стрыми ору́жии стру́жеми, Бо́га не отверго́стеся, у Него́же испроси́те на́м, святи́и, ми́ра, и просвеще́ния, и ве́лия ми́лости.

Сла́ва: Отца́, и Сы́на, и Ду́ха Свята́го, вси́ ве́рнии единому́дренно мо́лим, славосло́вити досто́йно Еди́нство Божества́, в Трие́х су́ще Ипоста́сех, несме́сно пребыва́ющее, Про́сто, Неразде́льно и Непристу́пно, И́мже избавля́емся о́гненнаго муче́ния.

И ны́не: Собезнача́льнаго Отцу́, и Свято́му Ду́ху Сопресто́льна, прия́т во утро́бе, и па́че ума́ и сло́ва родила́ еси́, бы́вша челове́ка, за благодея́ние челове́честву, Мари́е Богоневе́стная, вмести́лище простра́нное Бо́га на́шего: Его́же моли́ приле́жно, спасти́ся рабо́м Твои́м.

на Го́споди, воззва́х: стихи́ры кре́стны, гла́с 4.

Подо́бен: Я́ко до́бля:

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

На Кре́ст воздвиза́емь, и копие́м пробода́емь, и пе́рсты окровавля́емь, Влады́ко, свобожде́ние подписа́л еси́ на́м, Преблаги́й, и рукописа́ние Ада́ма прароди́теля растерза́в, свободи́л еси́ челове́ческое существо́. Сего́ ра́ди воспева́ем, Ще́дре, ю́же па́че ума́ Твою́ благосты́ню.

Сти́х И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Воспева́ем Твоя́ страда́ния, Влады́ко Иису́се: Кре́ст, копие́ же и тро́сть, гу́бу и гво́здия, бие́ния, багряни́цу, и вене́ц от те́рния, оплева́ния же и поруга́ния, я́же претерпе́л еси́ во́лею. Велича́ю Твое́, Незло́биве, Еди́не Жизнода́вче долготерпе́ние, и ве́рою славосло́влю Тя́, Человеколю́бче.

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Кресту́ Твоему́ Честно́му покланя́юся, Преблаги́й, любо́вию облобыза́я, и сла́влю Твое́ е́же па́че ума́ соше́ствие, безме́рную ми́лость и неизрече́нныя щедро́ты, и бога́тую благосты́ню, ея́же ра́ди спа́сл еси́ челове́ческое естество́, содержи́мо бы́вшее во тьме́ прегреше́ний. Сла́ва, Христе́, распя́тию Твоему́.

Та́же в Мине́и стихи́ры свято́му, а́ще и́мать. А́ще ли не́сть Мине́и, и́ны стихи́ры Пресвяте́й Богоро́дице, гла́с и подо́бен то́йже.

Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.

На Кресте́ я́ко узре́ пригвожда́ема Тя́, Го́споди, А́гница и Ма́ти Твоя́ дивля́шеся. Что́ виде́ние сие́, взыва́ше, Сы́не вожделе́нный? Сия́ Ти́ непокори́вый со́нм воздае́т беззако́нный, и́же мно́гих Твои́х чуде́с наслажде́йся: но сла́ва неизрече́нному схожде́нию Твоему́, Влады́ко.

Сти́х: Хвали́те Го́спода вси́ язы́цы, похвали́те Его́ вси́ лю́дие.

А́гнца и Па́стыря Тя́ на Дре́ве я́ко ви́де, А́гница ро́ждшая рыда́ше, и ма́терски Тебе́ веща́ше: Сы́не любе́знейший, ка́ко на Дре́во Кре́стное воздви́глся еси́, Долготерпели́ве? Ка́ко ру́це и но́зе Твои́, Сло́ве, пригвозди́шася от беззако́нных, и Кро́вь Твою́ излия́л еси́ Влады́ко?

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Я́ко ви́де Тя́, Го́споди, Де́ва и Ма́ти Твоя́ на Кресте́ пове́шена, дивля́шеся, и взира́ющи глаго́лаше: что́ Ти возда́ша, и́же мно́гих Твои́х даро́в насла́ждшиися, Влады́ко? Но молю́ся, не оста́ви мя́ еди́ну в ми́ре, но потщи́ся воскресну́ти, совозставля́я пра́отца.

Сла́ва, и ны́не: Крестобогоро́дичен:

Подо́бен: Зва́нный свы́ше:

Не рыда́й Мене́, Ма́ти, зря́щи на Дре́ве пове́шена Твоего́ Сы́на и Бо́га, на вода́х пове́сившаго зе́млю неодержи́мо, и всю́ тва́рь созда́вшаго: и́бо воскресну́, и просла́влюся, и а́дова ца́рствия сокрушу́ кре́постию, и погублю́ того́ си́лу, и свя́занныя изба́влю от злоде́йства его́, я́ко Благоутро́бен, и Отцу́ моему́ приведу́, я́ко Человеколю́бец.

Та́же, Све́те ти́хий: Проки́мен дне́. И Сподо́би, Го́споди, в ве́чер се́й:

На стихо́вне стихи́ры кре́стны, гла́с 4:

Ору́жие непобеди́мое, Христе́, Кре́ст Тво́й да́л еси́ на́м, и си́м побежда́ем прило́ги чужда́го.

Сти́х: К Тебе́ возведо́х о́чи мои́, живу́щему на Небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дрит ны́.

Всегда́ иму́ще, Христе́, Кре́ст Тво́й на по́мощь, се́ти вра́жия удо́бь попира́ем.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих, и уничиже́ния го́рдых.

Иму́ще дерзнове́ние ко Спа́су, святи́и, моли́те непреста́нно за ны́ гре́шныя, оставле́ние прегреше́ний прося́ще, и душа́м на́шим ве́лию ми́лость.

Сла́ва, и ны́не: Крестобогоро́дичен: Распина́ема Христа́ Человеколю́бца ви́дящи, Пречи́стая, и ре́бра ископова́ема копие́м, пла́чущи вопия́ше: что́ сие́, Сы́не Мо́й? Что́ Ти́ безблагода́тнии лю́дие возда́ша, за я́же сотвори́л еси́ до́брая и́м, и тщи́шися безча́дствовати Мя́, Вселюбе́знейший? Удивля́юся, Благоутро́бне, Твоему́ во́льному распя́тию.

Та́же, Ны́не отпуща́еши раба́ Твоего́: Трисвято́е, по О́тче на́ш: тропа́рь, ектения́, и отпу́ст.

Кано́н Пресвяте́й Богоро́дице. Гла́с 4.

Пе́снь 1

Ирмо́с: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся све́тло торжеству́я, и воспою́ ра́дуяся Тоя́ чудеса́.

Неизме́рную Бо́жию Му́дрость и Си́лу ро́ждши, Пренепоро́чная, Христа́ без се́мене пло́тию, держа́ву кре́пости, и боже́ственное вели́чие стяжа́ла еси́ Рождество́м Твои́м, Богороди́тельнице.

О па́че ума́ Рождества́ Твоего́, Пречи́стая, и́мже обогати́ся земны́х мно́жество нетле́нием, и Тя́ ны́не блажи́т досто́йно, Хода́таицу обновле́ния.

Сла́ва: Боля́щаго исцели́ душе́ю и те́лом, Де́во, раба́ Твоего́ осене́нием Твои́м: Тя́ бо Предста́тельницу все́м су́щим в печа́ли позна́х, я́ко ро́ждшую Спасе́ние на́ше.

И ны́не: Лю́те погружа́ему в пучи́не скорбе́й, и бу́рею безме́рных обстоя́ний, спасе́ния просте́рши ми́ ру́ку, изведи́, Влады́чице, из глубины́ зо́л.

Пе́снь 3

Ирмо́с: Твоя́ песносло́вцы, Богоро́дице, живы́й и незави́стный Исто́чниче, ли́к себе́ совоку́пльшия духо́вно утверди́ в боже́ственней Твое́й сла́ве, венце́в сла́вы сподо́би.

Кропи́ши исцеле́ний струи́ боля́щим, Де́во, всю́ду: Тя́ бо исто́чника показа́ милосе́рдия, Влады́чице, И́же ми́лости Госпо́дь из Тебе́ рожде́йся па́че ума́.

Красе́н черто́г Боже́ственному Сло́ву, и боже́ственный Неве́стник вы́ше естества́, Де́во Ма́ти, была́ еси́: те́мже ми́лости Твои́х щедро́т отве́рзи ми́, ко спасе́нию возводя́щи.

Сла́ва: Умертви́ся вся́ кре́пость моя́ от мно́жества безме́рных зо́л: мно́гими у́бо скорбьми́ отча́яхся. Помози́ ми́, Госпоже́, Я́же Жи́знь ро́ждшая, и пла́чущим Утеше́ние.

И ны́не: Поми́луй, Еди́на Богома́ти, поми́луй и уще́дри ду́шу мою́ окая́нную, потопля́емую бе́сы лука́выми и страстьми́ и пре́жде вре́мене сме́рти моея́, сию́ очи́стити умилосе́рдися.

Пе́снь 4

Ирмо́с: Неизсле́дный Бо́жий сове́т, е́же от Де́вы воплоще́ния Тебе́ Вы́шняго, проро́к Авваку́м усмотря́я зовя́ше: сла́ва си́ле Твое́й, Го́споди.

Ко́рене и чре́сл Тя́ ца́рских, все́х Ца́рь я́ко су́щу вожделе́в, вы́шшу Херуви́м и Серафи́м соде́ла, ве́сь, Богоро́дице, все́лься в Тя́.

Челове́ческаго ра́ди порожде́ния, Соде́тель воплоща́емь, из Тебе́ роди́ся и Предста́тельницу нело́жну христиа́ном Тя́ показа́: те́мже к Твоему́ кро́ву прибега́ю, Чи́стая.

Сла́ва: Кро́в, и заступле́ние, и прибе́жище бу́ди ми́, Де́во, рабу́ Твоему́, и исцели́ мя от безме́рных зо́л, воспева́ти Тя́, Пречи́стая: сла́ва неизрече́нному Рождеству́ Твоему́.

И ны́не: Недоуме́юся, и слезю́, и стеню́ от стра́стных мои́х помышле́ний, и Тя́ молю́: я́ко еси́ исто́чник ми́лости, от боле́зней мои́х изба́ви мя́, веду́щи к боже́ственному умиле́нию.

Пе́снь 5

Ирмо́с: Ужасо́шася вся́ческая о Боже́ственней сла́ве Твое́й: Ты́ бо, Неискусобра́чная Де́во, име́ла еси́ во утро́бе над все́ми Бо́га, и родила́ еси́ безле́тнаго Сы́на, все́м воспева́ющим Тя́ ми́р подава́ющая.

Исцеле́ний во́ды то́чиши при́сно, Де́во, все́м боля́щим я́ко о́блак одушевле́н сы́й Царя́ Христа́. Те́мже молю́ Тя приле́жно: ро́су исцеле́ния мне́ боля́щему низпосли́.

Не преста́й моля́щи, Его́же родила́ еси́, Богоневе́сто Де́во, я́ко Спа́са и Влады́ку, разреше́ние ми́ да́ждь скорбе́й и боле́зней, и к ра́дости нетле́нней мя́ возведи́, проща́я ми́ прегреше́ния.

Сла́ва: Упова́ние ми́ еси́, Пречи́стая, и спасе́нию похвала́. Те́мже прибега́ю к Твоему́ покро́ву: не гнуша́йся мене́, грехи́ мно́гими и боле́зньми ско́рбными ны́не поглоще́ннаго, но предвари́ и спаси́ мя́.

И ны́не: Гро́зд зре́лый, ка́ко на Дре́ве ви́сиши? Со́лнце Сла́вы, ка́ко воздви́глся еси́, све́т со́лнца помрачи́вый в Стра́сти Твое́й? Спа́се, Ро́ждшая Тя́ А́гница дре́вле вопия́ше Ти́, ма́терски восклица́ющи.

Пе́снь 6

Ирмо́с: Приидо́х во глубины́ морски́я, и потопи́ла мя́ е́сть бу́ря мно́гих грехо́в: но я́ко Бо́г из глубины́ возведи́ живо́т мо́й, Многоми́лостиве.

Зра́к восприя́т ра́бий от Тебе́, Де́во, все́х Ца́рь и Бо́г на́ш, и вы́шшу Тя́ я́ко Богоро́дицу показа́ Херуви́м и стра́шных Серафи́м.

Я́же еди́на ро́ждши Бо́жию Жи́знь, и все́м спасе́ние Даю́щаго, отча́янна мя́ су́ща спасе́нию сподо́би, и страсте́й мои́х воста́ние пресецы́.

Сла́ва: Твою́ пода́ждь по́мощь, и изба́ви мя́ бе́д и скорбе́й, избавля́ющи мя́ напа́стей и прегреше́ний мои́х, Я́же все́х ро́ждшая Избавле́ние.

И ны́не: О Тебе́, Де́во, хва́лимся, и Тобо́ю лю́тых избавля́емся: наде́ющеся на Тя́ нахожде́ния не бои́мся злочести́вых ва́рвар, воспева́ющии Тя́.

Та́же, Го́споди, поми́луй, три́жды. Сла́ва, и ны́не:

Седа́лен, гла́с 4:

Де́во Пренепоро́чная, Ма́ти Христа́ Бо́га, ору́жие про́йде Твою́ пресвяту́ю ду́шу, егда́ распина́ема ви́дела еси́ во́лею Сы́на и Бо́га Твоего́. Его́же, Преблагослове́нная, моля́щи не преста́й, проще́ние прегреше́ний на́м дарова́ти.

Пе́снь 7

Ирмо́с: Не послужи́ша тва́ри богому́дрии па́че Созда́вшаго, но о́гненное преще́ние му́жески попра́вше, ра́довахуся пою́ще: препе́тый отце́в Госпо́дь и Бо́г благослове́н еси́.

И́зсше я́ко скуде́ль страстьми́ вся́ кре́пость моя́, и се́ а́ду прибли́жихся, от у́з всепа́губных предвари́, Ма́ти Бо́жия, и исхити́ от одержа́щих печа́лей руко́ю ми́лости Твоея́.

Растерза́еме утро́бе мое́й от зло́б многообра́зных, и е́же жи́ти растерза́юся мно́жеством прегреше́ний и боле́зней мои́х: но изба́ви мя́ от обои́х, Пречи́стая, Жи́знь на́м ро́ждшая.

Сла́ва: Ца́рства Христо́ва Всеще́драго, Де́во Пречи́стая, отве́рсти ми́ я́ко блага́я сподо́би, и боле́зней душетле́нных и нахожде́ний изба́вити, Твои́ми моли́твами, Благослове́нная.

И ны́не: Обощре́ны боле́зни ра́нам мои́м от безме́рных мои́х прегреше́ний, веду́т в сме́рть душе́вную и теле́сную: но исхити́ мя, Влады́чице, я́ко си́льна, от вся́ких скорбе́й и неду́гов.

Пе́снь 8

Ирмо́с: О́троки благочести́выя в пещи́, Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Ве́щь страсте́й терноно́сных стяжа́х, и жа́лом си́х пробода́емь е́смь; те́мже отча́яхся, у́зами подавля́емь е́смь и напа́стьми, Пречи́стая Ма́ти Христа́ Бо́га. От ни́хже мя́ избавля́ющи, пода́ждь все́х прегреше́ний проще́ние Твои́ми моли́твами.

Све́щнице Све́та Трисо́лнечнаго су́щи, заре́ю благоутро́бия Твоего́ тьму́ отыми́ прегреше́ний мои́х, Богороди́тельнице, избавле́ние ну́ждных боле́зней подаю́щи, ве́рою пою́щему и превознося́щему Пречи́стое Твое́ Рождество́.

Сла́ва: Ве́сь все́лься во чре́во Твое́, неизглаго́ланно воплоти́ся Пресу́щный Бо́г, Присноде́во, ми́ру засту́пницу Тя́, и о́бщую по́мощь соде́лав. Те́мже молю́ Тя́, изба́витися лю́тых страсте́й мои́х, и у́з прегреше́ний.

И ны́не: В ча́с, Де́во, кончи́ны моея́, руки́ бесо́вския, и осужде́ния, и отве́та и стра́шнаго испыта́ния, и мыта́рств го́рьких, и кня́зя лю́таго, и огня́ ве́чнаго исхити́ мя, Богома́ти.

Песнь 9

Ирмо́с: Вся́к земноро́дный да взыгра́ется Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, всеблаже́нная Богоро́дице, Чи́стая Присноде́во.

Ро́д земны́й вознесе́ся Рождество́м Твои́м, сыноположе́ние взе́м Боже́ственным совокупле́нием; и слику́ет Небе́сное мно́жество со земны́ми, пою́ще Тя́ достодо́лжно, Чи́стая, я́ко Ма́терь су́щу Бо́га на́шего, и ми́ру всему́ прибе́жище.

Ве́сь бы́в отню́д стя́гнув грехи́ мои́ми, от безме́рных ра́н и боле́зней, Твою́ по́мощь призыва́ю, Влады́чице, и заступле́ние, е́же пода́ждь все́х избавля́ющи мя́ лю́тых бе́д и скорбе́й.

Сла́ва: Пе́ние с пе́снею и хвале́ние сплете́ния ны́не от боле́зненныя души́ приноша́ю с любо́вию, Тебе́ ро́ждшей естество́м Христа́ Бо́га, Его́же благопребы́тна прии́мши, и проше́ния моя́, Богоро́дице, вся́ испо́лнши, моли́твами твои́ми соблюди́.

И ны́не: Просвети́, Чи́стая Богороди́тельнице, ду́ши моея́ о́чи, да не пости́гнет мене́ грехо́вная тьма́ тя́жкая, ниже́ глубина́ покры́ет мя́ отча́яния: но Сама́ мя́ спаси́, и окорми́, Предста́тельнице ве́рных непосты́дная.

Та́же, Досто́йно е́сть: И покло́н до земли́. Трисвято́е, и по О́тче на́ш: тропари́. И про́чее обы́чно, и отпу́ст.

По 1-м стихосло́вии, седа́льны кре́стны. Гла́с 4:

Искупи́л ны́ еси́ от кля́твы зако́нныя честно́ю Твое́ю Кро́вию, на Кресте́ пригвозди́вся, и копие́м пробо́дся, безсме́ртие источи́л еси́ челове́ком: Спа́се на́ш, сла́ва Тебе́.

Сти́х: Возноси́те Го́спода Бо́га на́шего, и покланя́йтеся подно́жию но́гу Его́, я́ко свя́то е́сть.

На Кресте́ Тя, Спа́се, пригвозди́ша иуде́и, и́мже от язы́к на́с призва́л еси́, Христе́ Бо́же на́ш: просте́рл еси́ дла́ни на не́м во́лею твое́ю, копие́м же в ре́бра Твоя́ прия́л еси́ пробости́ся мно́жеством щедро́т Твои́х, еди́не Человеколю́бче.

Сла́ва, и ны́не: Крестобогоро́дичен: Безневе́стная Ма́ти Твоя́, Христе́, я́ко узре́ на Кресте́ Тя возвыша́ема, рыда́ющи ма́терски такова́я веща́ше: что́ но́вое, и стра́нное сие́ чу́до, Сы́не Мо́й? Ка́ко беззако́нный со́нм ко Кресту́ Тя пригвожда́ет все́х Жизнода́вца, Све́те Мо́й Сладча́йший?

По 2-м стихосло́вии седа́лен, гла́с 4:

Ско́ро предвари́, пре́жде да́же не поработи́мся враго́м ху́лящим Тя́, и претя́щим на́м, Христе́ Бо́же на́ш. Погуби́ Кресто́м Твои́м борю́щия на́с, да уразуме́ют, ка́ко мо́жет правосла́вных ве́ра, моли́твами Богоро́дицы, еди́не Человеколю́бче.

Сти́х: Бо́г же Ца́рь на́ш пре́жде ве́ка, соде́ла спасе́ние посреде́ земли́.

На Кресте́ пригво́ждся на Ло́бнем во́лею свое́ю, мою́ дре́внюю я́зву грехо́вную исцели́л еси́, Влады́ко, мно́гия ра́ди благосты́ни, я́ко положи́лся еси́ хоте́нием, Человеколю́бче Спа́се на́ш, за ро́д челове́ческий, и от ре́бр Твои́х иска́пал еси́ Кро́вь и во́ду, ве́рою пою́щим Тя́.

Сти́х: Ди́вен Бо́г во святы́х Свои́х, Бо́г Изра́илев.

Си́лою кре́стною подви́гшеся до́бре, сопоста́та врага́ низложи́сте кре́пко, терпе́нием ва́шим, святи́и страстоно́сцы. Те́мже честны́я соверша́юще ве́рно па́мяти ва́ша, освяща́емся де́йством, и благода́тию Ду́ха Всесвята́го моли́твами ва́шими, свяще́ннии Христо́вы ору́жницы, о ми́ре Спасу́ моли́теся.

Сла́ва, и ны́не: Крестобогоро́дичен: Де́ва и А́гница ви́девши на Кресте́, без се́мене из Нея́ А́гнца ро́ждшагося, и копие́м прободе́на, печа́ли уя́звена стрела́ми вопия́ше, боле́зненно восклица́ющи: что́ но́вое та́инство? Ка́ко умира́еши, И́же живота́ еди́н Госпо́дь? Те́мже воскресни́, па́дшаго совоздвиза́я пра́отца.

По 3-м стихосло́вии седа́льны, гла́с 4:

В Раи́ мя лю́те па́дшаго, человекоуби́йцы го́рьким сове́том, на Кра́ниевом Ме́сте па́ки воздви́гл еси́, Христе́, Дре́вом уврачева́в ю́же от дре́ва кля́тву, уби́вый ле́стию умертви́вшаго мя́ зми́я, и дарова́л ми́ еси́ Боже́ственную жи́знь. Сла́ва Боже́ственному распя́тию Твоему́, Го́споди.

На Дре́ве разуме́в Тя́, пове́шена Со́лнца Пра́веднаго, Христе́, со́лнце све́т помрачи́, тва́рь же подвиза́шеся, и ме́ртвии я́ко от сна́ ско́ро из гробо́в воста́ху, Сло́ве, Боже́ственную песносло́вяще держа́ву сла́вы Твоея́.

Сла́ва, и ны́не: Крестобогоро́дичен: Де́во Пренепоро́чная, Ма́ти Христа́ Бо́га, ору́жие про́йде Твою́ пресвяту́ю ду́шу, егда́ распина́ема ви́дела еси́ во́лею, Сы́на Твоего́ и Бо́га: Его́же, Преблагослове́нная, моля́щи не преста́й, проще́ние прегреше́ний на́м дарова́ти.

Кано́н честно́му и животворя́щему Кресту́, и святы́м му́чеником. Творе́ние Ио́сифово, [его́же краегране́сие сицево́: Кре́ст е́сть ору́жие во спасе́ние.] Гла́с 4.

Пе́снь 1

Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зныма Моисе́овыма рука́ма, Амали́кову си́лу в пусты́ни победи́л е́сть.

Пропны́й не́бо, распросте́рл еси́, Иису́се, дла́ни Своя́, язы́ки дале́че су́щия от Тебе́, я́ко Бла́г и Милосе́рд, све́тло к Себе́ призыва́я.

Кресто́м Твои́м, Христе́ мо́й, Сло́ве, огради́ мя, я́ко да не бу́ду уловле́ние во́лку, моея́ и́щущу поги́бели, и по вся́ дни́ се́ти мне́, и ловле́ния гото́вящу.

Му́ченичен: Боле́зньми свои́ми, му́ченицы, боле́знем все́м хода́тая низложи́сте, и ны́не насле́довасте неболе́зненную жи́знь, и вся́ку боле́знь облегчева́ете, блаже́ннии, всегда́ от ду́ш и теле́с на́ших.

Му́ченичен: Нереши́мыми у́зами, вы́, святи́и, связа́сте многоко́зненнаго, за Христа́ вя́жеми, му́дрии, связа́вшагося во́лею, и вся́кую пре́лесть разруши́вша: те́мже досто́йно ублажа́етеся

Богоро́дичен: Де́ва по Рождестве́ пребыла́ еси́, Бо́га бо родила́ еси́, Пречи́стая, воздви́жена на Кресте́ и земны́я совоздви́гшаго. Те́мже Тя́ вси́ ве́рнии велегла́сно ублажа́ем.

Други́й кано́н Пресвяте́й Богоро́дице, [его́же краегране́сие сицево́: Богоро́дице Де́ве мольбу́ приноша́ю]. Гла́с 4.

Пе́снь 1

Ирмо́с то́йже.

Я́ко су́щи Чисте́йшая, Пречи́стая, вся́кия тва́ри, е́же нечи́стыми страстьми́, лю́те оскверне́нное се́рдце мое́, чи́стою моли́твою Твое́ю, Богороди́тельнице, очи́сти. [Два́жды.]

Сле́з и воздыха́ний изба́ви мя́, предлежа́щих ми́ в бу́дущем Стра́шнем Суде́, богоприя́тными моли́твами твои́ми, Де́во Ма́ти Пречи́стая, я́же к Зижди́телю и Бо́гу на́шему.

Я́же еди́на па́че ума́, Рождество́м Твои́м свободи́ла еси́ от кля́твы ро́д челове́ческий, плотски́ми страстьми́ порабоще́на мя́, Пречи́стая, Твои́ми мольба́ми свободи́.

Пе́снь 3

Ирмо́с: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище и утвержде́ние.

Воздвиза́емь на Кре́ст, низве́рженыя во тлю́ возне́сл еси́, Христе́ Бо́же на́ш, и врага́ све́ргл еси́, Влады́ко.

Мечи́ вра́жия притупи́шася, Тебе́ прободе́ну в ре́бра, Сло́во О́тчее ипоста́сное, и Еде́м отве́рзеся.

Му́ченичен: О́гненными река́ми преле́стныя ре́ки укроти́ша му́ченицы, и пла́мень угаси́ша многобо́жия.

Му́ченичен: Распина́еми, и ноготьми́ стру́жеми, Христо́вы му́ченицы, враго́в и зми́я мече́м терпе́ния закла́сте.

Богоро́дичен: Непоро́чная А́гница, ви́дящи Тя́, Влады́ко, воздви́жена на Кресте́, плаче́вно рыда́ющи, поя́ше держа́ву Твою́.

И́н. Ирмо́с: Не му́дростию, и си́лою, и бога́тством хва́лимся, но Тобо́ю, О́тчею ипоста́сною Му́дростию, Христе́: не́сть бо свя́т, па́че Тебе́, Человеколю́бче.

Превы́шшую Херуви́м молю́ Тя, Влады́чице, низпа́дший мо́й у́м напа́стьми зми́евыми, страсте́й теле́сных покажи́ вы́шший. [Два́жды.]

Во испыта́нии стра́шнем, егда́ хо́щет мя́ Госпо́дь осуди́ти многосогреши́вшаго, да обря́щу Тя́, Всенепоро́чная, избавля́ющую мя́ осужде́ния.

Щедро́тами Твои́ми немилосе́рдныя моя́ нра́вы преложи́, ми́лостию Твое́ю, Христе́, и неми́лостива мя́ су́ща спаси́, мольба́ми Ро́ждшия Тя́.

Пе́снь 4

Ирмо́с: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Воздви́жена Тя́ на Дре́во хоте́нием Со́лнца Сла́вы, смотря́я со́лнце тьмо́ю облече́ся, и ка́мение распада́шеся, и церко́вная заве́са раздра́ся.

Распина́ему Тебе́, Спа́се, и копие́м пробода́ему, обраща́ющееся ору́жие дая́ше плещи́, повеле́нием Твои́м, Го́споди, разбо́йнику благонра́вному, песносло́вящу держа́ву Твою́.

Му́ченичен: Огражда́еми ору́жием Креста́ Твоего́ страстоте́рпцы Твои́, Го́споди, не уя́звлени яви́шася стрело́ю зло́бы, и сте́ны разори́ша идолобе́сия неутвержде́ныя.

Му́ченичен: Я́коже свяще́ния непоро́чная, и же́ртвы, и приноше́ния всесожже́ния це́лы, за милосе́рдие обнища́вшему, Го́сподеви, му́ченицы, приведо́стеся, боле́знем воздая́ния прие́млюще.

Богоро́дичен: Я́же Безле́тнаго в ле́то поро́ждши, и де́вство непоро́чно Еди́на стяжа́вши, на Дре́во воздви́жена я́ко ви́девши Го́спода, боле́зньми ду́шу Свою́ разделя́ше.

И́н. Ирмо́с то́йже.

Свяще́ния су́щи Боже́ственный До́м, источи́вшагося на благодея́ния Своего́ созда́ния, Пречи́стая, ду́шу мою́ освяти́, и помышле́ния просвети́. [Два́жды.]

Ве́емо ве́тром зло́бы помышле́ние мое́, и ле́ностию все́ погружа́емо, моли́твами Твои́ми утверди́, Влады́чице, и от нападе́ния исхити́.

Пала́ту Царе́ву Небе́сную одушевле́нную, ны́не молю́ Тя, Де́во: до́м Святы́я Тро́ицы, моли́твами Твои́ми покажи́ мя, верте́п разбо́йником пребыва́ющаго.

Пе́снь 5

Ирмо́с: Ты́, Го́споди мо́й, Све́т в ми́р прише́л еси́, Све́т Святы́й, обраща́яй из мра́чна неве́дения, ве́рою воспева́ющия Тя́.

Прободе́ным Твои́м ре́бром, нетле́ния источа́еши мне́ струи́ Боже́ственныя, о Влады́ко, ребра́ преступле́нием, в тле́ние попо́лзшемуся.

Честны́й Кре́ст Тво́й, на враги́ е́сть побе́да, его́же да́л еси́ на́м, Сло́ве, душа́м во спасе́ние, ве́рою воспева́ющим Тя́.

Му́ченичен: Со о́гненными служи́тельми ме́ртвии ны́не совокупи́шася, о́гнь веще́ственный проше́дше вели́ких му́к, я́ко му́ченицы пресве́тлии.

Му́ченичен: Руши́ме пло́ти мно́гими страда́ньми, неразруше́нна к Зижди́телю душе́вная утвержда́шеся му́чеников любо́вь.

Богоро́дичен: И́же еди́н Благи́й, вше́дый во чре́во Твое́ нетле́нное, Пречи́стая, воплоща́емь яви́ся и ра́спят: я́ко да от истле́ния на́с изба́вит.

И́н. Ирмо́с: Нечести́вии не у́зрят сла́вы Твоея́, Христе́, но мы́ Тя́, Единоро́дне, Оте́ческия сла́вы Сия́ние Божества́, от но́щи у́тренююще, воспева́ем Тя́, Человеколю́бче.

А́гница, ро́ждшая А́гнца Бо́жия, ду́шу мою́ взыщи́ прельще́нную наве́том змии́ным, и на гора́х, Влады́чице, заблужда́емую преступле́нием.

Те́плою моли́твою Твое́ю, мра́зом лю́тым померза́емую ду́шу мою́, к теплоте́ Зижди́теля Боже́ственныя любве́, благоче́стно сподви́гни, Богоро́дице Присноде́во.

Я́же до́брая и непоро́чная в жена́х, Чи́стая, окая́нную мою́ ду́шу стра́стнаго поро́ка ны́не свободи́, и чи́сте пожи́ти ми́, моли́твами Твои́ми устро́й.

Ду́шу мою́ сохрани́, я́ко зе́ницу о́ка, под кро́вом крилу́ Твое́ю, Блага́я, Пречи́стая, и от духо́в лука́вствия, томле́ния и муче́ния изба́ви мя́.

Пе́снь 6

Ирмо́с: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею Кро́вию.

Вся́кия вы́ше че́сти Пребо́льший сы́й, обезче́ститися претерпе́л еси́, я́ко да мя́ зле́ обезче́стившагося почти́ши, и Кресто́м спасе́ши, Человеколю́бче.

На Дре́во возноси́мь и ме́ртв у́бо бы́л еси́, Го́споди, умертви́теля же сотвори́в ме́ртва души́ моея́, и вся́каго испо́лнена студа́: и ны́не, Тво́рче мо́й, пою́ Твою́ си́лу.

Му́ченичен: Уя́звен бы́сть уязви́вый ва́с вселука́вый, неисце́льными му́ками, и нога́ми ва́шими, му́ченицы, низложи́ся, и зри́мь е́сть от все́х наруга́емь.

Му́ченичен: Исцеле́ния источа́ет му́ченических моще́й пра́х лежа́щий во гро́бе, и я́коже пра́х бе́сы разруша́ет, и разли́чныя исцеля́ет челове́ков боле́зни.

Богоро́дичен: Гвоздьми́ Тя законопресту́пных собо́р пригвозди́ на Кресте́, и печа́ли ны́не ору́жием Мое́ се́рдце растерза́ю, о Сы́не Мо́й! Де́ва вопия́ше слезя́щи.

И́н. Ирмо́с то́йже.

Сме́рти потреби́тель бы́сть Рождество́ Твое́, Де́во, умира́ющим же Живо́т и избавле́ние. Сего́ ра́ди молю́ Тя: ду́шу мою́ умерщвле́нную воскреси́.

Простри́ мне́ по́мощи ру́ку, Человеколю́бче, в пучи́не жите́йстей обурева́ему, мольба́ми Ма́тере Твоея́, и Вы́шних неизче́тных Си́л.

Село́ е́же Боже́ственный возраста́вшее Кла́с, осла́бленную ду́шу мою́, и гла́дом Боже́ственных дея́ний иста́емую не пре́зри, но напита́й Сы́на Твоего́ Боже́ственною благода́тию.

Успи́ стра́стная двиза́ния телесе́ и взыгра́ния моя́ плотска́я уму́ повини́ я́коже жребя́, успи́вши, Чи́стая, сно́м Твои́х моли́тв.

Пе́снь 7

Ирмо́с: В пещи́ Авраа́мстии о́троцы перси́дстей, любо́вию благоче́стия па́че, не́жели пла́менем опаля́еми, взыва́ху: благослове́н еси́ в хра́ме сла́вы Твоея́, Го́споди.

Распя́тся хотя́й на Дре́ве на́г, Еди́не Безсме́ртный, облача́яй не́бо о́блаки, и и́же дре́вле пра́отца обнажи́вшаго, обле́кл еси́, Ве́чный.

На Кре́ст возне́слся еси́, и пады́й Ада́м возста́л е́сть; копие́м прободе́н бы́л еси́ в ре́бра, Влады́ко, и я́зву сме́ртную прия́т многоко́зненный, благослове́на держа́ва Твоя́, Го́споди.

Му́ченичен: Красне́йше красне́йшему Сло́ву соединя́еми, всехва́льнии страда́льцы, и ми́ра отню́д отлучи́стеся, вя́жеми и сокруша́еми, и врагу́ при́сно запина́юще.

Му́ченичен: Сте́ны пре́лести утвержде́ния низложи́сте боже́ственными страда́ньми вои́стинну, сла́внии страда́льцы, и ве́рным стена́ яви́стеся, и храни́лища, ва́с благоче́стно блажа́щим.

Богоро́дичен: В пещи́ ро́су я́вльшаго Христа́ Бо́га, Отрокови́це, ника́коже опа́льша чре́во Твое́, ви́дящи пове́шена на Дре́ве, сла́вляше е́же па́че ума́ Твоего́ соше́ствие.

И́н. Ирмо́с то́йже.

Боже́ственная Горо́, Отрокови́це, от нея́же Ка́мень отсече́ся, сокруши́вый столпы́ и́дольския, души́ моея́ истука́нная, и се́рдца моего́ окамене́нное отжени́ недоуме́ние.

Не поколеба́ся, Отрокови́це, я́коже прие́мшая во утро́бе Твое́й, призре́нием коле́блющаго зе́млю, и я́же на не́й, егда́ хо́щет: те́мже утверди́ мя, прило́ги вра́жиими коле́блемаго.

Низлага́ющи ми́ плотска́я мудрова́ния, всего́ мя, Богоро́дице, покажи́ духо́вна доброде́тельми укра́шена, его́же вселука́вый сластьми́ некрасото́ю помрачи́.

Боже́ственный Окри́не милосе́рдия и бла́гости источи́ ми оби́льно бога́тство Твои́х щедро́т, скве́рну прегреше́ний мои́х омыва́ющи, и плотско́е угаси́ разжже́ние.

Пе́снь 8

Ирмо́с: Ру́це распросте́р Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели о́троцы, взыва́юще: благослови́те, вся́ дела́ Госпо́дня, Го́спода.

Просте́р дла́ни на Кресте́ Влады́ко, руки́ неудержа́нныя хотя́ исцели́ти прегреше́ния; гвоздьми́ же пригвозди́лся еси́, Го́споди, ве́сь ра́зум первозда́ннаго отъе́мля стра́стный, пою́ща: благослови́те, вся́ дела́ Госпо́дня, Го́спода.

Раздира́ется рукописа́ние первозда́ннаго Ада́ма, прободе́нием Боже́ственных ре́бр Твои́х; ка́плями же кро́ве, Влады́ко, освяща́ется вся́ земля́, во гла́сех благодаре́ния при́сно зову́щи: благослови́те, вся́ дела́ Госпо́дня, Го́спода.

Му́ченичен: Стоя́ху посреде́ огня́, я́коже ороша́еми, и неопаля́еми, всесла́внии му́ченицы, и о́троческую воспева́юще в согла́сии та́йнем, вои́стинну боже́ственную пе́снь: благослови́те вся́ дела́ Госпо́дня Го́спода.

Му́ченичен: Непостоя́нный терпя́ще о́гнь произволе́нием, тьмо́ю му́к не приложи́стеся к суете́, му́ченицы, но о Бо́зе укрепля́еми, притеко́сте к Све́ту Незаходи́мому, вопию́ще: благослови́те, вся́ дела́ Госпо́дня, Го́спода.

Богоро́дичен: Умерщвля́ема зря́щи Христа́, Многопе́тая Влады́чица, и умертви́вшаго челове́ки умерщвля́юща врага́, я́ко Влады́ку поя́ше пла́чущи, и долготерпе́нию Его́ дивя́щися вопия́ше: благослови́те, вся́ дела́ Госпо́дня, Го́спода.

И́н. Ирмо́с то́йже.

Зре́л Пло́д родила́ еси́, Влады́чице, от Него́же сме́рть я́дши поги́бе. Те́мже зову́ Ти, плодо́м греха́ умерщвле́наго мя́ льсти́вно, оживи́ пою́ща: благослови́те, вся́ дела́ Госпо́дня, Го́спода.

Успи́ движе́ние стра́стное мы́сли моея́, неусы́пною Твое́ю моли́твою, Пречи́стая Влады́чице, и возста́ви мя́ от сна́ ле́ностнаго пе́ти в бо́дрости души́: благослови́те, вся́ дела́ Госпо́дня, Го́спода.

Расто́ргни прегреше́ний мои́х плени́цу, и теле́сныя воста́ния утиши́, Богоро́дице; лука́вая же посецы́ умышле́ния, и очи́сти от та́йных помышле́ний ско́ро раба́ Твоего́, все́х ве́рных Предста́тельнице и Избавле́ние.

Не бои́шися ли, окая́нная душе́, та́мо клеветни́к клеве́щущих твоя́ зла́я дея́ния безчи́сленная? Сего́ ра́ди пока́йся ко Преблаго́му, и спосо́бницу Еди́ну Пречи́стую приими́: Та́ бо е́сть челове́ком прибе́жище.

Пе́снь 9

Ирмо́с: Ка́мень нерукосе́чный от несеко́мыя горы́ Тебе́, Де́во, краеуго́льный отсече́ся, Христо́с, совокупи́вый разстоя́щаяся естества́. Те́м веселя́щеся Тя́, Богоро́дице, велича́ем.

Се́ Жи́знь пове́шена на Кресте́ все́м яви́ся; со́лнце же того́ не терпя́щи лучи́ оставля́ет, и земля́ коле́блется, и помышле́ния утвержда́ются на благоче́стии и чистоте́.

О, ка́ко Тя́, Законода́вца, беззако́нный собо́р осужда́ет, Иису́се мо́й, на Дре́ве умре́ти, Живота́ все́х су́ща и Го́спода, и ра́ди страсте́й все́м челове́ком источа́юща безсме́ртие?

Му́ченичен: Усты́ ва́шими богосло́вными пропове́дасте всему́дренно воплоще́ние Сло́ва Бо́жия, посреде́ законопресту́пных вра́г, всехва́льнии: и свяще́нно пострада́вше, побе́ды венцы́ венча́стеся.

Му́ченичен: Я́ко светлодне́вныя зве́зды, всю́ тва́рь озаря́ете страда́ний свяще́нных блиста́ньми, и исцеле́ний боже́ственными светлостьми́, и страсте́й разоря́ете но́щь глубо́кую, боже́ственнии му́ченицы.

Богоро́дичен: Просвети́, Чи́стая, ду́шу мою́ от грехо́в омраче́ную, и отжени́ зо́л мои́х о́блаки, Све́та О́блаче, Я́же помрачи́вшееся со́лнце дре́вле ви́девши внегда́ распя́тися Безсме́ртному.

И́н. Ирмо́с то́йже.

Расто́ргни соу́з зо́л мои́х боже́ственным копие́м Сы́на Твоего́, и разреши́ окая́нную мою́ ду́шу, окова́нную и бе́дствующую, и к любви́ привяжи́, Де́во Ма́ти Бо́га на́шего.

Я́же небе́с ши́ршая Де́во, утесне́ное мое́ се́рдце вся́ким прило́гом сопроти́вным, в широте́ безстра́стия возведи́ те́сною стезе́ю ходи́ти мя́ укрепля́ющи всегда́.

Да Тя́ сла́влю, Де́во, вои́стинну Препросла́вленную, вся́каго безслове́сия грехо́внаго изба́ви мя́, и сла́вы Небе́сныя прича́стника сотвори́ прибега́ющаго к ми́лости Твое́й.

Уста́ви сове́ты вся́, я́же на ны́ вооруже́нных, Ма́ти Бо́га Вы́шняго, ра́дости же испо́лни упова́ющих на Тя́ да усе́рдно вси́ Твое́ пропове́мы заступле́ние.

Та́же, Досто́йно е́сть: И покло́н до земли́: ектения́, и свети́лен, и псалмы́ обы́чныя.

На стихо́вне стихи́ры кре́стны, гла́с 4. Самогла́сен:

Стена́ бу́ди на́м Кре́ст Тво́й, Иису́се Спа́се на́ш: ино́го бо упова́ния ве́рнии не и́мамы, то́чию Тебе́ на не́м пло́тию пригво́ждшагося, и подаю́ща на́м ве́лию ми́лость.

Сти́х: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся; во вся́ дни́ на́ша возвесели́хомся: за дни́, в ня́же смири́л ны́ еси́, ле́та, в ня́же ви́дехом зла́я. И при́зри на рабы́ Твоя́, и на дела́ Твоя́, и наста́ви сы́ны и́х.

Да́л еси́ зна́мение боя́щимся Тебе́, Го́споди, Кре́ст Тво́й Честны́й, и́мже посрами́л еси́ нача́ла тьмы́ и вла́сти, и возве́л еси́ на́с на пе́рвое блаже́нство. Те́мже Твое́ Человеколю́бное смотре́ние сла́вим, Иису́се Всеси́льне, Спа́се ду́ш на́ших.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Ка́ко ва́шим не удиви́мся подвиго́м, святи́и му́ченицы, я́ко те́лом умира́ющим обложе́ни, безпло́тныя враги́ победи́сте? Не устраши́ша ва́с мучи́тельская преще́ния, не ужаси́ша ва́с му́к приложе́ния – вои́стинну досто́йно от Христа́ просла́вистеся, и душа́м на́шим проси́те ве́лия ми́лости.

Сла́ва, и ны́не: Крестобогоро́дичен:

Подо́бен: Я́ко до́бля:

Умерщвля́ема ви́дящи Христа́, Пречи́стая Влады́чица, умерщвля́юща льсти́ваго, восклица́ше го́рце взыва́ющи, из утро́бы Тоя́ произше́дшему, и долготерпе́нию Его́ чудя́щися взыва́ше: Ча́до Мое́ Любе́знейшее, не забу́ди рабу́ Твою́, не закосни́, Человеколю́бче, мое́ Утеше́ние.

Та́же, Бла́го е́сть испове́датися Го́сподеви: Трисвято́е по О́тче на́ш: тропа́рь, ектения́, и ча́с 1-й, псалмы́ обы́чны, и отпу́ст.

Дре́вом Ада́м Рая́ бы́сть изселе́н – Дре́вом же Кре́стным разбо́йник в Ра́й всели́ся. Ов у́бо вку́ш, за́поведь отве́рже Сотво́ршаго: о́в же сраспина́емь, Бо́га испове́да тая́щагося: помяни́ мя, вопия́, во Ца́рствии Твое́м.

Сти́х: Блаже́ни изгна́ни пра́вды ра́ди, я́ко те́х е́сть Ца́рство Небе́сное.

Пригвозди́лся еси́ на Кресте́, мно́гия ра́ди, Христе́, бла́гости, прободе́н бы́л еси́ в ре́бра, два́ исто́чника источи́вый оставле́ния; земля́ же не терпя́щи зре́ти дерзнове́ния тряса́шеся, ка́мение распада́шеся, угаса́ше со́лнце, колеба́хуся го́ры и хо́лми, стра́хом держа́вы Твоея́.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л, на вы́ лжу́ще Мене́ ра́ди.

Просте́ртыя дре́вле неудержа́нно к дре́ву разуме́ния пра́отчи ру́ки, исправля́я, Христе́, поползне́ние, распросте́рлся еси́ во́лею, и Твои́ пригвозди́л еси́ ру́це, Долготерпели́ве, созда́вый челове́ка руко́ю, за безме́рную благосты́ню. Сла́ва па́че ума́, Сло́ве, благоутро́бию Твоему́.

Сти́х: Ра́дуйтеся и весели́теся, я́ко мзда́ ва́ша мно́га на небесе́х.

Онебеси́вше зе́млю, святи́и, пресве́тлыми сия́нии по́двигов честны́х, и́миже тьму́ всю́ разори́сте су́етства, и к Све́ту Незаходи́мому всели́стеся прича́стием обожа́еми, и все́м озаря́ете све́т разуме́ния, ва́с по до́лгу ублажа́ющим.

Сла́ва: Похвалу́ и сла́ву и че́сть, Всевино́вней Тро́ице подае́м, и трисвяты́ми гла́сы а́нгельскую пе́снь принося́ще Отцу́ Безнача́льну, и Сы́ну, и Духу, взыва́ем разбо́йника благоразу́мнаго гла́с, воспева́юще и вопию́ще: помяни́ на́с во Ца́рствии Твое́м.

И ны́не: Воздви́жена на Кресте́ во́лею ви́дящи, Пречи́стая, Сы́на Своего́ и Бо́га, дивя́щися пла́чущи глаго́лаше, вся́ческая удобри́вшему: где́ за́йде добро́та Твоя́, Го́споди? Что́ сия́ неблагода́рный Тебе́ воздаде́ собо́р, вме́сто благи́х? Пою́ па́че ума́ Твою́ благосты́ню.

на Го́споди, воззва́х: стихи́ры подо́бны, апо́столом. Гла́с 4

Подо́бен: Я́ко до́бля:

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

Крепча́йшим мудрова́нием во́инствовавше сла́внии, на лука́ваго врага́ ополчи́стеся, всеору́жием огра́ждшеся духо́вным до́блественне, и всю́ кре́пость бесо́вскую погуби́вше, восхи́тивше ду́ши челове́ческия я́коже коры́сти – сего́ ра́ди во ве́ки ва́с почита́ем, апо́столи.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Крестообра́зно распросте́рши мре́жу ве́ры, двоенадеся́тица боже́ственных апо́стол Твои́х, вся́ язы́ки улови́ла е́сть к Твоему́ позна́нию, Христе́, и мо́ре сла́ное страсте́й изсуши́. Сего́ ра́ди Тя́ молю́, из глубины́ прегреше́ний воззови́ мя, те́х всеблагоприя́тными мольба́ми.

Сти́х: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Двоенадеся́тица богоизбра́нная, апо́стольская и всечестна́я, да восхва́лится дне́сь боже́ственными пе́сньми: Пе́тр, и Па́вел, Иа́ков, Лука́, Иоа́нн же и Матфе́й, и Фома́, Ма́рк, Си́мон, и Фили́пп, и пресла́вный ны́не Андре́й с Матфи́ем, и боже́ственным и прему́дрым Варфоломе́ем, и с про́чими седми́десятьми.

И́ны стихи́ры свято́му и вели́кому чудотво́рцу Никола́ю:

Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.

Ми́ром Боже́ственным тя́ пома́за Боже́ственная благода́ть духо́вная, ми́ряном первопресто́льна, и ми́ром облагоуха́вша, доброде́тельми свяще́ннейшими ми́ра концы́, сладкоды́шущими твои́ми моли́твами, злосмра́дныя прогоня́юща стра́сти всегда́. Сего́ ра́ди тя́ ве́рно сла́вим, и па́мять твою́ всесвяту́ю соверша́ем, Нико́лае.

Сти́х: Хвали́те Го́спода вси́ язы́цы, похвали́те Его́ вси́ лю́дие.

Я́ко осия́теля тя́ незаходи́маго, и я́ко свети́льника всеми́рна, на тве́рди возсия́вша церко́вней, Нико́лае, и ми́р просвети́вша, и бе́д лю́тых мглу́ отгоня́юща, и отъе́млюща печа́лей зи́му, и тишину́ соде́лавшаго глубо́кую, по до́лгу ублажа́ем.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

И сы́й и явля́яйся в со́ниих, Нико́лае, и́же непра́ведно иму́щия умре́ти спа́сл еси́, я́ко сострада́тель, я́ко благолюби́вый, я́ко изба́витель тепле́йший, я́ко предста́тель и́стинный ве́рных, и прося́щих твоего́ заступле́ния, свяще́ннейший о́тче, а́нгелом сограждани́не, преподо́бным и проро́ком равностоя́телю.

Сла́ва, и ны́не: Богоро́дичен: Я́же Бо́га Невмести́маго, во чре́ве Твое́м вмести́вшая, человеколю́бна Челове́ка бы́вша, и на́ше смеше́ние из Тебе́ прии́мша и обожи́вша я́ве, не пре́зри мене́, Всечи́стая, ны́не скорбя́ща, но уще́дри ско́ро, и разли́чныя вражды́ же и вре́да лука́ваго свободи́.

Та́же, Све́те ти́хий: Проки́мен дне́, и про́чее.

На стихо́вне стихи́ры, гла́с 4:

Апо́стольский ли́к Ду́хом Святы́м просвети́л еси́, Христе́, и на́шу скве́рну грехо́вную те́ми омы́й, Бо́же, и поми́луй на́с.

Сти́х: К Тебе́ возведо́х о́чи мои́, живу́щему на Небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дрит ны́.

Некни́жныя ученики́ Ду́х Тво́й Святы́й каза́тели яви́, Христе́ Бо́же, и многовеща́нным сли́чием язы́ков пре́лесть упраздни́, я́ко Всеси́лен.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих, и уничиже́ния го́рдых.

Же́ртвы одушевле́нныя, всесожже́ния слове́сная, му́ченицы Госпо́дни, заколе́ния соверше́нная Бо́жия, Бо́га зна́ющая, и Бо́гом зна́емая овча́та, и́хже огра́да волко́м невхо́дна, моли́теся и на́м упасе́ным бы́ти с ва́ми, на воде́ упокое́ния.

Сла́ва, и ны́не: Богоро́дичен: Изба́ви ны́ от ну́жд на́ших, Ма́ти Христа́ Бо́га, ро́ждшая все́х Творца́, да вси́ зове́м ти́: ра́дуйся, Еди́но Предста́тельство ду́ш на́ших.

Та́же: Ны́не отпуща́еши: Трисвято́е по О́тче на́ш: тропа́рь, ектения́, и отпу́ст.

Кано́н Пресвяте́й Богоро́дице. Гла́с 4.

Пе́снь 1

Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зныма Моисе́овыма рука́ма, Амали́кову си́лу в пусты́ни победи́л е́сть.

Вои́стинну и вресноту́ родила́ еси́ Бо́га и Го́спода, и Богоро́дица еди́на вои́стинну и вресноту́ нарекла́ся еси́, Чи́стая. Те́мже Тя́ ве́рно воспева́ем, и по до́лгу сла́вим.

Звезда́ Я́же от Иа́кова, возсия́ из Тебе́, Пречи́стая, изчита́яй мно́жество зве́зд, я́ко Бо́г. Те́мже Того́ сия́ньми отыми́ мои́х грехо́в тьму́.

Сла́ва: Неве́стник слове́сен ве́м Тя́ я́ве Бо́жия воплоще́ния, Чи́стая и Всенепоро́чная: молю́ Тя изба́вити мя́ страсте́й плотски́х и скорбе́й, и искуше́ний, и обстоя́ний.

И ны́не: Я́ко ле́ствица, я́же к на́м прише́ствия Вседержи́телева, е́юже Бо́г сни́де на зе́млю, от землены́х страсте́й плотски́х к Небеси́ вознеси́ мя́, и к Бо́гу приведи́.

Пе́снь 3

Ирмо́с: Не му́дростию и си́лою и бога́тством хва́лимся, но Тобо́ю, О́тчею ипоста́сною Му́дростию, Христе́: не́сть бо свя́т, па́че Тебе́, Человеколю́бче.

Теку́щий исто́чник, скорбя́щих утеше́ние еси́: те́мже, Влады́чице, и мне́ моли́твенных Твои́х во́д исто́чник источи́, и угаси́ страсте́й пе́щь.

Уя́звена мя́ по́мыслы безме́стными исцели́, Чи́стая, Я́же естества́ на́шего исцели́вшая я́зву лю́тую, ро́ждши Зижди́теля и Го́спода.

Сла́ва: В пучи́не мно́гих мои́х прегреше́ний, и страсте́й и искуше́ний обурева́ема, к ти́хому зело́ приста́нищу, Всенепоро́чная, устреми́ Твои́м заступле́нием.

И ны́не: И́же я́ко на руно́ Дожде́м Боже́ственным, во утро́бу Твою́ соше́дшим, опламене́нное огне́м страсте́й мое́ се́рдце ороси́ Твои́ми мольба́ми.

Пе́снь 4

Ирмо́с: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

От ми́р Сы́на Твоего́ теку́щих, благоуха́нием Жи́зни все́х, ми́ро безстра́стия источи́ души́ мое́й, Чи́стая, и ве́сь ка́л стра́сти ея́ потреби́.

Оскверне́ннаго мя́ ка́лом греха́, моли́тв Твои́х окропи́ иссо́пом, и омы́й, и скве́рну страсте́й мои́х очи́сти, Влады́чице, и яви́ Христу́ жили́ще.

Сла́ва: Напи́сану Тя́ кни́гу пе́рстом Боже́ственным, запеча́тану, Пречи́стая, молю́, пе́рсты Твои́х моли́тв напиши́ мне́ прегреше́ний оставле́ние, и напа́стей изба́ви.

И ны́не: И́же от коне́ц го́р святы́х все́х, Хра́м Бо́гу бы́вши я́коже пре́жде проро́к рече́. Христу́ чи́ст покажи́ мя хра́м, Влады́чице, Твои́ми заступле́ньми.

Пе́снь 5

Ирмо́с: Ты́, Го́споди мо́й, Све́т в ми́р прише́л еси́, Све́т Святы́й, обраща́яй из мра́чна неве́дения, ве́рою воспева́ющия Тя́.

Тя́ ро́су Аермо́нску, на Сио́н соше́дшую, ве́дый, Богороди́тельнице, молю́ угаси́ти пло́ти моея́ запале́ние.

Ра́й жи́зни су́щи, Богоро́дице, сме́рти грехо́вныя и страсте́й многообра́зных изба́ви мя́ вско́ре.

Сла́ва: Алава́стр мы́сленный, Чи́стая, Ты́ еси́, Ми́ра излия́вшагося на зе́млю с Небесе́: мене́ ны́не благоуха́ния испо́лни.

И ны́не: Прекло́ншагося ко тле́нию обнови́ла еси́ челове́ка: изведи́ у́бо и мене́ ны́не, Богоневе́сто, из глубины́ прегреше́ний и страсте́й.

Пе́снь 6.

Ирмо́с: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею Кро́вию.

Пала́та прекра́сна, сла́вная Влады́чице, Царя́ Сла́вы бы́вши, просла́вила еси́ челове́ки: те́мже сла́вы нетле́нныя и мене́ сподо́би.

Ути́шила еси́ тлю́ поро́чную естества́ чи́стым нетле́нием, но изсуши́, Пречи́стая, страсте́й мои́х пото́ки, и плотски́я му́дрости ре́ки.

Сла́ва: Успи́ страстна́я движе́ния телесе́, и взыгра́ния моя́ плотска́я уму́ повини́ я́ко жребя́, успи́вши, Чи́стая, сно́м Твои́х моли́тв.

И ны́не: Пою́ Тя, Бо́га Препе́таго ро́ждшую, и молю́ Тя, Отрокови́це: стра́шныя мя́ при́ и ве́чнаго, Богоро́дице, осужде́ния изба́ви и спаси́ мя.

Та́же: Го́споди, поми́луй, три́жды. Сла́ва, и ны́не:

Седа́лен, гла́с 4:

Предста́тельнице нера́тная, Богороди́тельнице, и Моли́твеннице гото́вая притека́ющим к Тебе́, от бе́д мя́ изба́ви. Да не пре́зриши мене́, все́х Засту́пнице.

Пе́снь 7

Ирмо́с: В пещи́ Авраа́мстии о́троцы перси́дстей, любо́вию благоче́стия па́че, не́жели пла́менем опаля́еми, взыва́ху: благослове́н еси́ в хра́ме сла́вы Твоея́, Го́споди.

Я́ко огнено́сна и богоприе́мна су́щи купина́, Чи́стая, попали́ помышле́ний те́рние лука́вых, души́ моея́ озари́ мы́сль, и страсте́й бе́здну изсуши́.

Вели́чествие от ве́ка, и Боже́ственную сла́ву, Ты́ еди́на я́ве обрела́ еси́ на земли́, Не́бо я́вльшися второ́е: Ты́ у́бо упраздни́ велере́чивыя враги́ моя́ бе́сы.

Сла́ва: Боже́ственный Окри́не милосе́рдия и бла́гости, источи́ ми оби́льно бога́тство Твои́х щедро́т, и скве́рну прегреше́ний мои́х омыва́ющи, плотско́е угаси́ разжже́ние.

И ны́не: Да́нное ми́ от Бо́га бога́тство духо́вное пре́жде, жи́в блу́дно всегда́, сластьми́ ижди́х теле́сными: но я́ко блу́днаго, Твои́ми моли́твами, Де́во, оправди́.

Пе́снь 8

Ирмо́с: Ру́це распросте́р Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели о́троцы, взыва́юще: благослови́те, вся́ дела́ Госпо́дня, Го́спода.

Расто́ргни прегреше́ний мои́х плени́цу, и теле́сная стремле́ния утиши́, лука́вствия же умышле́ний посецы́, и очи́сти от та́йных помышле́ний ско́ро раба́ Твоего́, Богоро́дице, все́х Предста́тельнице ве́рных и Заступле́ние.

Гора́ Бо́жия явле́на, и несеко́ма, и ту́чна, Пречи́стая, часта́ и осене́нная, покры́й мя́ се́нию Твои́х моли́тв, и от се́ти лове́ц изба́ви, и сохрани́ от стре́л бесо́вских, и скве́рных помышле́ний.

Сла́ва: Стра́х Боже́ственный прия́ти ми́, Влады́чице, и ду́х умиле́ния во утро́бе мое́й, и роди́ти житие́ доброде́тельно, и стра́шна лука́вым бесо́м, Пречи́стая, сотвори́, и Боже́ственныя сла́вы а́нгельских ли́к собесе́дника.

И ны́не: Отве́рзи ми́ две́ри жи́зненныя вско́ре, Врата́ упова́ния моего́, и наста́ви, Пречи́стая, к жи́зни неконча́емей, и Ца́рствия Небе́снаго покажи́ мя раба́ Твоего́ насле́дника, и Боже́ственныя сла́вы святы́х соприча́стника.

Пе́снь 9

Ирмо́с: Е́ва у́бо неду́гом преслуша́ния кля́тву всели́ла е́сть, Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́: те́м Тя́ вси́ велича́ем.

Воззри́ моли́твами Твои́ми, Чи́стая, на раба́ Твоего́, и вско́ре предвари́, и оскорбля́ющих и озлобля́ющих вра́г неви́димых изба́ви мя́: спаси́ от бе́д и скорбе́й, и многообра́зных обстоя́ний.

Всего́ мя я́звами грехо́вными су́ща уя́звлена и осужде́на, исцели́, Де́во, и изба́ви лука́вых помышле́ний, Я́же Сло́во Всеси́льное ро́ждшая, Блага́го же и Человеколю́бца.

Сла́ва: Па́дшаго ра́ди пре́жде Ада́ма в сме́рть, сме́рти причасти́ся, И́же живото́м и сме́ртию облада́яй Тво́й Сы́н, Преблага́я: те́мже мя́ страсте́й и паде́ния Твои́ми мольба́ми воздви́гни.

И ны́не: Спаси́, Богоро́дице, к Тебе́ прибега́ющих, от бе́д и паде́жа, греха́ и бу́ри, и теле́сных страсте́й, и волне́ния, и жития́ ну́ждных печа́лей, и зло́бы лука́вствия.

Та́же, Досто́йно е́сть: И покло́н до земли́. Трисвято́е по О́тче на́ш: тропари́, и про́чее обы́чное, и отпу́ст.

По 1-м стихосло́вии седа́льны апо́стольския, гла́с 4:

Апо́столов первопресто́льницы, и вселе́нныя учи́телие, Влады́ку все́х моли́те, ми́р вселе́нней дарова́ти, и душа́м на́шим ве́лию ми́лость.

Сти́х: Во всю́ зе́млю изы́де веща́ние и́х, и в концы́ вселе́нныя глаго́лы и́х.

Свети́ла в конце́х ученики́ Твоя́, Христе́, яви́л еси́, сия́ющия душа́м су́щим во тьме́, ра́зум Тво́й, Влады́ко. И ле́сть и́дольскую те́х ра́ди омрачи́в, уче́ньми благоче́стия просвети́л еси́ ми́р. Те́х мольба́ми спаси́ ду́ши на́ша.

Сла́ва, и ны́не: Богоро́дичен: Ско́ро приими́, Влады́чице, моли́твы на́ша, и сия́ принеси́ Сы́ну Твоему́ и Бо́гу, Госпоже́ Всепречи́стая, разруши́ обстоя́ния, к Тебе́ притека́ющих, разсы́пли приседа́ния и де́рзости, Де́во, ны́не вооружа́ющихся на рабы́ Твоя́.

По 2-м стихосло́вии седа́льны апо́стольския, гла́с 4:

Подо́бен: Ско́ро предвари́:

Во всю́ зе́млю протече́ веща́ние ва́ше, и преле́стную объюроди́ му́дрость нему́друю, апо́столи сла́внии, привлече́ челове́ки из глубины́ пре́лести, показа́ же все́м спасе́ния стезю́, те́мже ны́не досто́йно ва́с ублажа́ем.

Сти́х: Небеса́ пове́дают сла́ву Бо́жию, творе́ние же руку́ Его́ возвеща́ет тве́рдь.

Ве́ры пропове́дники ученики́ Твоя́, Спа́се, ми́рови показа́л еси́, наставля́я те́ми язы́ки к ра́зуму Твоему́: заря́ми бо Сло́ва просвети́ша вся́, тьму́ неразу́мия прогна́вше ве́рою. Те́х моли́твами спаси́ ду́ши на́ша.

Сти́х: Ди́вен Бо́г во святы́х Свои́х, Бо́г Изра́илев.

Му́ченичен: Му́ченицы Твои́, Го́споди, во страда́ниих свои́х венцы́ прия́ша нетле́нныя от Тебе́ Бо́га на́шего, иму́ще бо кре́пость Твою́, мучи́телей низложи́ша, сокруши́ша и де́монов немощны́я де́рзости. Те́х моли́твами спаси́ ду́ши на́ша.

Сла́ва, и ны́не: Богоро́дичен: Услы́ши, Влады́чице, от боле́зненныя души́ вопию́щаго раба́ Твоего́, и мно́гих мои́х зо́л пода́ждь ми́ оставле́ние, Тебе́ бо и́мам предста́тельницу в де́нь и но́щь: изба́ви, Богоро́дице, от огня́ гее́нскаго, и поста́ви мя́ одесну́ю Сы́на Твоего́ и Бо́га.

По 3-м стихосло́вии седа́льны, гла́с 4:

Подо́бен: Ско́ро предвари́:

Лучи́ я́ко Со́лнце Пра́вды, ва́с Христо́с испусти́, просвети́ти всю́ зе́млю, апо́столи сла́внии. Боже́ственными ва́шими моли́твами, озаря́ете Боже́ственным Све́том Невече́рним все́х, и просвеща́ете ве́рою соверша́ющих святу́ю ва́шу па́мять.

Ско́ро предвари́, о́тче Нико́лае, и спаси́ рабы́ твоя́ от находя́щих на́м бе́д и скорбе́й, и́маши бо к Созда́телю и Бо́гу дерзнове́ние. Прииди́ у́бо вско́ре ко ве́рою тя́ призыва́ющим, твое́ ны́не предста́тельство и покро́в да́руя.

Сла́ва, и ны́не: Богоро́дичен: Я́ко все́х еси́ творе́ний вы́шшая, воспева́ти Тя́ досто́йно недоумева́юще, Богоро́дице, ту́не, мо́лим Тя́, поми́луй на́с.

Кано́н святы́м сла́вным и всехва́льным апо́столом. Творе́ние ки́р Феофа́на. Гла́с 4.

Пе́снь 1

Ирмо́с: Мо́ря чермну́ю пучи́ну невла́жными стопа́ми дре́вний пешеше́ствовав Изра́иль, крестообра́зныма Моисе́овыма рука́ма, Амали́кову си́лу в пусты́ни победи́л е́сть.

Боже́ственнии Уте́шителя орга́ни, возглаша́ющии Сего́ Боже́ственными всегда́ дохнове́ньми, воспе́ша пе́снь на́м, я́ко вои́стинну спаси́тельную, благосла́внии Христо́вы апо́столи. [Два́жды.]

На одре́ ле́ности слежа́, и в сме́рти грехо́вней неду́гом душе́вным лю́те иста́емь, посеще́ния мя́, сла́внии Христо́вы самови́дцы, сподо́бите.

И́же сло́вом безслове́сие разреши́вше язы́ков, апо́столи, от безслове́сных дея́ний лю́те омраче́ное се́рдце мое́, Уте́шителя благода́тию, просвети́те, апо́столи.

Богоро́дичен: Де́ва по Рождестве́ нетле́нна пребыла́ еси́, на́с ра́ди Я́вльшагося на земли́, па́че сло́ва ро́ждшая. Его́же приле́жно моли́ просвети́ти ду́ши на́ша.

Други́й кано́н свято́му Никола́ю, [его́же краестро́чие: Четве́ртое сие́ на Никола́я плеска́ние]. Творе́ние Ио́сифово. Гла́с то́йже.

Пе́снь 1

Ирмо́с: Триста́ты кре́пкия, Рожде́йся от Де́вы, безстра́стия во глубине́, души́ трича́стное потопи́, молю́ся: да Тебе́ я́ко в тимпа́не, во умерщвле́нии телесе́, побе́дное воспою́ пе́ние.

Безпеча́льную жи́знь насле́довав, блаже́нне, и ра́дости духо́вныя исполня́емь при́сно, вся́ку печа́ль отжени́, молю́ся, от души́ моея́: я́ко да ра́дуяся сла́влю тя́, свяще́ннейший о́тче Нико́лае.

Поста́влен бы́л еси́ доброде́телей высо́ких на све́щнице, я́коже свети́льник просвеща́еши сердца́ ве́рных, святи́телю Нико́лае. Те́мже ве́рою молю́ тя́: светоно́сными моли́твами твои́ми, души́ моея́ тьму́ отжени́.

Жития́ тле́ннаго ны́не пучи́ною, о́тче, искуше́ний разли́чных наполня́емь, прему́дре, к тебе́ прибега́я вопию́: да обря́щу тя́ ко́рмчия, в тишину́ прелага́юща бу́рю, боже́ственными моли́твами твои́ми.

Богоро́дичен: Неусыпа́ющую, Чи́стая, иму́щи моли́тву, успи́ на́ша стра́сти душе́вныя, свяще́нными хода́тайствы Твои́ми, Боже́ственную и спаси́тельную даю́щи бо́дрость, к Бо́жиих хоте́ний исполне́нию.

Пе́снь 3

Ирмо́с: Весели́тся о Тебе́ Це́рковь Твоя́, Христе́, зову́щи: Ты́ моя́ кре́пость, Го́споди, и прибе́жище и утвержде́ние.

Гра́д Тво́й, Бо́же, слове́сных ре́к Твои́х тече́ния ученик, Влады́ко, свяще́нно возвеселя́ют. [Два́жды.]

Гра́ждане Небе́снии, сослуже́бницы мы́сленным чино́м, всесла́внии апо́столи, вся́кия на́с ско́рби изба́вите.

Утверди́вый, Христе́, слове́сная Твоя́ небеса́, утверди́ мя те́х моли́твами, на ка́мени Твои́х хоте́ний, я́ко Благоутро́бен.

Богоро́дичен: Я́ко Ма́ти Тя́ мо́лит с ли́ком ученик, Го́споди, Я́же Тебе́ чи́сто роди́вшая: да́руй на́м ми́лости Твоя́.

И́н. Ирмо́с: Не му́дростию, и си́лою, и бога́тством хва́лимся, но Тобо́ю О́тчею ипоста́сною Му́дростию, Христе́: не́сть бо свя́т, па́че Тебе́, Человеколю́бче.

Ору́жие яви́лся еси́, бори́тельныя враги́ закала́я, и́хже искуше́ния соблюди́ на́с невре́дных, Нико́лае, содева́ющих Боже́ственное хоте́ние.

Сокруше́ние моея́ души́, святи́телю, уврачу́й, сокруши́вый вра́жия ко́зни и ловле́ния, да я́ко предста́теля моего́ ве́рою почита́ю тя́.

Разори́вый Артеми́ды безду́шная ка́пища, ума́ моего́ страстна́я мечта́ния потреби́ боже́ственными хода́тайствы твои́ми, о́тче Нико́лае.

Богоро́дичен: Тя́ предста́тельницу, Пречи́стая Де́во, стяжа́хом, претвори́ на́шу печа́ль на ра́дость, и ско́рби изба́ви ражда́ющия сме́рть.

Пе́снь 4

Ирмо́с: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Наве́л еси́ на мо́ре ко́ни Твоя́ избра́нныя, Человеколю́бче, злове́рия во́ды возмуща́ющия, и все́м ра́зум Тво́й и́стинный возвеща́ющия. [Два́жды.]

Зве́зды просвети́вше благоче́стием мы́сленную тве́рдь церко́вную, сла́внии апо́столи, от но́щи неве́дения, и прегреше́ний изба́вите мя́.

Я́вльшеся я́коже стре́лы изощре́ни, апо́столи, вра́жия разжже́ныя стре́лы зло́бы моея́ ны́не угаси́те, и помышле́ние мое́ утверди́те.

Богоро́дичен: Ду́шу мою́ огорче́ную я́дом, сопроти́внаго угрызе́нием, де́йственным врачева́нием исцели́, моли́твами, Христе́, Ро́ждшия Тя́ и свяще́нных апо́стол Твои́х.

И́н. Ирмо́с: Седя́й в сла́ве на престо́ле Божества́, во о́блаце ле́гце прии́де Иису́с Пребоже́ственный, нетле́нною дла́нию, и спа́се зову́щия: сла́ва, Христе́, си́ле Твое́й.

Пресла́вное житие́ твое́ везде́ тя́ пресла́вна показа́, чудесы́ Боже́ственными, и просвеща́емаго, святи́телем украше́ние, все́м похвалу́, чту́щим тя́, Нико́лае, ра́достными пе́сньми.

На высо́це престо́ле, блаже́нне, Бо́га похвали́л еси́, смиреному́дрия Боже́ственными облиста́я светлостьми́, и́хже бо прича́стии бы́ти на́с сотвори́, благоприя́тными твои́ми мольба́ми, о́тче му́дре.

Непра́ведно ведо́мыя на сме́рть изба́вил еси́, ре́вностию Боже́ственною о́тче, священноле́пне распала́емь. Те́мже вопие́м ти́: та́кожде изми́ на́с от напа́стей, умерщвля́ющих лю́те се́рдце мое́.

Небеса́ обходя́, Нико́лае, ра́достно, неви́димо, о́тче, все́м призыва́ющим тя́ предста́ни, облегчава́яй неду́ги ду́ш на́ших, и утеше́ние боголе́пно подая́.

Богоро́дичен: Во́инства а́нгельская ужаса́ются, Пречи́стая, воспева́юще вели́чество Боже́ственнаго Рождества́ Твоего́: с ни́миже моли́, Де́во, все́м спасти́ся, ве́рою чи́стою Тебе́ блажа́щим.

Пе́снь 5

Ирмо́с: Ты́, Го́споди мо́й, Све́т в ми́р прише́л еси́, Све́т Святы́й, обраща́яй из мра́чна неве́дения, ве́рою воспева́ющия Тя́.

Ло́зы живо́тныя процвета́юще гро́здие, напои́ша все́х вина́ мы́сленнаго весе́лия, сла́внии апо́столи. [Два́жды.]

К све́ту за́поведей Бо́жиих наста́вите, апо́столи, и́же во тьме́ душе́внаго уны́ния безу́мно пребыва́ющия.

Изба́вите на́с душе́вных прегреше́ний, и Суда́ бу́дущаго, и тли́ и бе́д, апо́столи блаже́ннии.

Богоро́дичен: Спаси́ мя, Бо́же, я́ко Человеколю́бец, спаси́ мя мольба́ми неизрече́нно Тебе́ Роди́вшия, и все́х боже́ственных апо́стол Твои́х.

И́н. Ирмо́с: Нечести́вии не у́зрят сла́вы Твоея́, Христе́, но мы́ Тя́, Единоро́дне, Оте́ческия сла́вы Сия́ние Божества́, от но́щи у́тренююще, воспева́ем Тя́, Человеколю́бче.

Заше́л еси́ я́коже со́лнце, уме́рый, о́тче му́дре, и возсия́л еси́ у Христа́, светоно́сными сия́ньми чуде́с твои́х, озаря́я всю́ подсо́лнечную, Нико́лае.

Свяще́нне Нико́лае, услы́ши на́с во дни́ наведе́ния искуше́ний и скорбе́й, вся́кую тесноту́ отгоня́я благода́тию в тебе́ живу́щаго Ду́ха.

Сокруше́нную страстьми́ жите́йскими ду́шу мою́ имы́й, на по́мощь тя́ призыва́ю, свяще́нне Нико́лае, потщи́ся, и да́ждь ми́ соверше́нное исцеле́ние, умоля́я Преблага́го.

Богоро́дичен: У́мныма очи́ма, Де́во, зря́ Тя Иса́ия, вопие́т: се́ хо́щет роди́тися от Де́вы Богоотрокови́цы Иису́с Госпо́дь, в челове́ков па́ки возрожде́ние.

Пе́снь 6

Ирмо́с: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею Кро́вию.

Па́стыря До́браго богоизбра́нная овча́та, разсе́янная по ми́ру, волко́в вся́ко зве́рство во о́вчую кро́тость, ве́рою преложи́ша. [Два́жды.]

Боже́ственнаго рая́ древеса́ добропло́дная, преокая́нныя души́ моея́ все́ непло́дство во благопло́дие доброде́тельнаго нра́ва преведи́те, апо́столи.

Уя́звен бы́х сласте́й ору́жием и умро́х. И́же от Христа́ прие́мше, сла́внии, благода́ть воскреша́ти ме́ртвыя, умерщвле́нную окая́нную мою́ ду́шу оживи́те.

Богоро́дичен: Уста́ви души́ моея́ свире́пую бу́рю, Бо́же все́х Ще́дрый, мольба́ми ро́ждшия Тя́ Богоро́дицы, апо́стол же и му́ченик Твои́х.

И́н. Ирмо́с: Приидо́х во глубины́ морски́я, и потопи́ла мя́ е́сть бу́ря мно́гих грехо́в: но я́ко Бо́г из глубины́ возведи́ живо́т мо́й, Многоми́лостиве.

Укрепи́лся еси́ кре́постию Спа́совою, возмоги́й, богому́дре, неви́димаго врага́ погуби́ти, его́же лю́таго вре́да на́с изба́ви мольба́ми твои́ми, о́тче Нико́лае.

Муче́ния же в гее́нне, от лука́вых челове́к стуже́ния вре́днейшаго, изба́ви на́с свяще́нными моли́твами твои́ми, пресла́вне Нико́лае.

И́же дре́вле умре́ти непра́ведно иму́щии воево́ды, изба́вишася твои́ми предста́тельствы: я́коже те́х, и на́с исхити́ вся́каго вре́да, досточу́дне.

Богоро́дичен: Лю́дие твои́ и гра́д мо́лит тя́, Ма́ти Бо́жия: изми́ на́с вся́кия ну́жды, и та́мошняго, Всесвята́я Влады́чице, ве́чнаго осужде́ния.

Пе́снь 7

Ирмо́с: В пещи́ Авраа́мстии о́троцы перси́дстей, любо́вию благоче́стия па́че, не́жели пла́менем опаля́еми, взыва́ху: благослове́н еси́ в хра́ме сла́вы Твоея́, Го́споди.

Кре́постию всесвяты́я про́поведи, неле́стнии апо́столи Христо́вы, пре́лести зи́му разруши́сте, и просвети́сте богоразу́мием ве́рных мудрова́ние. [Два́жды.]

Ми́ро благоуха́нное источа́юще всегда́, боже́ственнии ученицы́, ми́ра у́мнаго благово́ния притека́ющих к ва́м испо́лните, и злосмра́дныя стра́сти отжени́те.

Растле́вшаго мя́ плотски́ми безме́стии, Сло́ва Нетле́ннаго сла́внии ученицы́, спаси́те мя́ пою́ща: благослове́н еси́ в хра́ме сла́вы Твоея́, Го́споди.

Богоро́дичен: Ли́к а́нгельский, ли́к му́ченик и апо́стол Твои́х, Сло́ве, мо́лят всегда́, мно́гое благоутро́бия Твоего́, Человеколю́бче: все́х уще́дри Богоро́дицею, я́ко Благоутро́бен.

И́н. Ирмо́с: Ю́ноши три́ в Вавило́не веле́ние мучи́телево на бу́йство прело́жше, посреде́ пла́мене вопия́ху: благослове́н еси́, Го́споди Бо́же оте́ц на́ших.

Свя́те Нико́лае, во святы́х Еди́наго все́х Творца́ почива́ющаго, моли́ освяти́ти на́с, и низпосла́ти бога́тыя на ны́ ми́лости Своя́.

Преподо́бен, пра́в и кро́ток, ти́х и смире́н бы́в, сла́вне, к высоте́ пресла́вней свяще́нства взя́лся еси́, чудеса́ соверша́я и зна́мения.

Зако́ны Боже́ственныя соблю́д, преподо́бне, яви́лся еси́ Бо́жий хра́м чисте́йший. Те́мже ти́ вопие́м, всеблаже́нне: от вся́каго пребеззако́ния изба́ви рабы́ твоя́.

Богоро́дичен: Успи́ воста́ния страсте́й моея́ души́, бо́дренною моли́твою Твое́ю да́ждь ми́ бо́дрость, Отрокови́це, уны́ния дрема́ние дале́че отгоня́ющи.

Пе́снь 8

Ирмо́с: Ру́це распросте́р Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели о́троцы, взыва́юще: благослови́те, вся́ дела́ Госпо́дня, Го́спода.

Уста́ огнедохнове́нная Христо́ва, и́же бездве́рная уста́ загради́вше, и спаси́тельное пропове́дание повсю́ду разсе́явше, от у́ст во́лка мы́сленнаго изба́висте вопию́щия: вся́ дела́, Го́спода по́йте, и превозноси́те Его́ во вся́ ве́ки. [Два́жды.]

Воструби́те о́крест моея́ умерщвле́нныя души́ благогла́снии трубы́ Христо́вы, апо́столи сла́внии, и от гро́ба отча́яния и уны́ния лю́таго сию́ воздви́гните, во е́же пе́ти: вся́ дела́, Го́спода по́йте, и превозноси́те Его́ во вся́ ве́ки.

Мене́ зако́ны Твоя́, Христе́, попра́вшаго ума́ развраще́нием, мене́, Влады́ко, блу́днаго, во глубины́ попо́лзшася, и обы́чаю лука́вому при́сно рабо́тающа не пре́зри, ученико́в Твои́х мольба́ми.

Богоро́дичен: Мари́е, Госпоже́ вся́ческих, облада́ема мя́ от зми́я, и согреша́юща всегда́ свободи́ моли́твами Твои́ми, и порабо́ти Христу́ в житии́ чи́сте воспева́ти: вся́ дела́, Го́спода по́йте, и превозноси́те во вся́ ве́ки.

И́н. Ирмо́с: Изба́вителю все́х Всеси́льне, посреде́ пла́мене благоче́ствовавшия, снизше́д ороси́л еси́, и научи́л еси́ пе́ти: вся́ дела́, благослови́те, по́йте Го́спода.

Вети́йствуя боже́ственная, Нико́лае, беззако́ннующих незатворе́ная уста́ я́вственно загради́л еси́, и от А́риева губи́тельства мно́гия изба́вил еси́, правосла́вно пою́щия: Го́спода по́йте, и превозноси́те Его́ во вся́ ве́ки.

И́же побе́ды тезоимени́т, свя́те, победи́телей на́с покажи́, моли́твами твои́ми, страсте́м ражда́ющим сме́рть, и пребеззако́нных челове́к язы́ка льсти́ва, ве́рно при́сно моля́щихся ти́.

По́мощь твою́ спаси́тельную низпосла́ти на́м, умоле́н бу́ди, чудотво́рче Нико́лае, в де́нь ну́жды, внегда́ тя́ ве́рою прося́ще мо́лим.

Тро́ичен: Правосла́вно ве́рнии поклони́мся Святе́й Тро́ице, сла́вяще Отца́, и Сы́на, и Всесвята́го Ду́ха, вопию́ще: благослови́те, по́йте Го́спода, и превозноси́те Его́ во вся́ ве́ки.

Богоро́дичен: Ми́лости Твоея́ мя сподо́би, Ми́лостивейшаго Сло́ва ро́ждши, Благослове́нная Всечи́стая, в Ча́с Су́дный предста́ни, и изба́ви та́мошняго мя́, Чи́стая, осужде́ния.

Пе́снь 9

Ирмо́с: Ка́мень нерукосе́чный от несеко́мыя горы́ Тебе́, Де́во, краеуго́льный отсече́ся, Христо́с, совокупи́вый разстоя́щаяся естества́. Те́м веселя́щеся, Тя́, Богоро́дице, велича́ем.

Ка́мение избра́нное, положе́ннаго во главу́ у́гла Ка́мене, созда́сте все́х ве́рных сердца́, ка́менем ве́ры вра́жия созда́ния, апо́столи, разве́ргше. [Два́жды.]

Реши́ти и вяза́ти от Христа́ прие́мше вла́сть, разреши́те зо́л мои́х соу́з, и к любви́ Бо́жией привяжи́те, и Ца́рствия прича́стника Боже́ственнаго соде́лайте, апо́столи.

Боже́ственнии Влады́ки о́блацы, изсо́хшее мое́ се́рдце вся́ким лука́вым дея́нием Боже́ственными ту́чами ны́не напо́йте, и плодоно́сно покажи́те, апо́столи богоблаже́ннии.

Богоро́дичен: Со святы́ми а́нгелы, с боже́ственными апо́столы, со сла́вными му́ченики, Твоего́ моли́ Сы́на и Бо́га, Богороди́тельнице Пречи́стая, от бе́д изба́вити ду́ши на́ша.

И́н. Ирмо́с: Е́ва у́бо неду́гом преслуша́ния кля́тву всели́ла е́сть. Ты́ же, Де́во Богоро́дице, прозябе́нием чревоноше́ния, ми́рови благослове́ние процвела́ еси́. Те́м Тя́ вси́ велича́ем.

Исцеле́ния при́сно соверша́я гро́б тво́й, благоуха́ния ми́ра, преподо́бне, источа́ет ве́рою и любо́вию приступа́ющим, Нико́лае, погреба́яй неду́гов нахо́ды. Те́мже тя́ вси́ ублажа́ем.

Я́ко со́лнце всю́ озаря́еши, Нико́лае богоблаже́нне, подсо́лнечную, Боже́ственных чуде́с сия́ньми тьму́ лю́тых обстоя́ний отгоня́я, свяще́нными хода́тайствы твои́ми, архиере́ев удобре́ние.

Обы́чно уще́дри ны́, Нико́лае, жите́йскими обстоя́ньми, и бесо́вскими пре́лестьми, лука́вых же челове́к искуше́ньми, лю́те обурева́емыя всегда́, я́ко да тя́ вси́ ублажа́ем.

Де́нь и ча́с стра́шный помина́й, о душе́ моя́! Егда́ тя хо́щет привести́ на су́д Влады́ка, и суди́ти твоя́ дела́ та́йная, и возопи́й Ему́: Спа́се, спаси́ мя Никола́я мольба́ми.

Богоро́дичен: Гла́с Тебе́ боже́ственнаго Гаврии́ла прино́сим ра́достно, и взыва́ем: ра́дуйся Раю́, Я́же Дре́во Живо́тное посреде́ иму́щая всегда́, пресла́вная Сло́ва Пала́то, ра́дуйся, Де́во Всенепоро́чная.

На стихо́вне стихи́ры апо́столом, гла́с 4:

Апо́стольский ли́к Ду́хом Святы́м просвети́л еси́, Христе́: и на́шу скве́рну грехо́вную, те́х ра́ди омы́й, Бо́же, и поми́луй на́с.

Сти́х: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся. Во вся́ дни́ на́ша возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я. И при́зри на рабы́ Твоя́ и на дела́ Твоя́, и наста́ви сы́ны и́х.

Некни́жныя ученики́, Ду́х Тво́й Святы́й каза́тели яви́, Христе́ Бо́же; и многовеща́нным сли́чием язы́ков пре́лесть упраздни́, я́ко Всеси́лен.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Честна́ сме́рть святы́х Твои́х, Го́споди: меча́ми бо и огне́м, и сту́дению сокруша́еми, излия́ша кро́вь свою́, наде́жду иму́ще на Тя́, восприя́ти трудо́в мзду́. Претерпе́ша, и прия́ша от Тебе́, Спа́се, ве́лию ми́лость.

Сла́ва, и ны́не: Богоро́дичен: Тя́ сте́ну стяжа́хом, Богоро́дице Пречи́стая, и благоути́шное приста́нище, и утвержде́ние. Те́мже молю́ся, и́же в житии́ обурева́емь, окорми́, и спаси́ мя.

Дре́вом Ада́м Рая́ бы́сть изселе́н, Дре́вом же Кре́стным разбо́йник в Ра́й всели́ся. О́в у́бо вку́ш, за́поведь отве́рже Сотво́ршаго, о́в же сраспина́емь, Бо́га испове́да тая́щагося, помяни́ мя, вопия́, во Ца́рствии Твое́м.

Сти́х: Блаже́ни и́згнани пра́вды ра́ди, я́ко те́х е́сть Ца́рство Небе́сное.

Па́стыря и А́гнца слове́сная су́ще воспита́ния, посреде́ волко́в от Него́ я́ко а́гнцы му́дрии по́слани бы́сте, боже́ственным пропове́данием, те́х претворя́юще свире́пство на кро́тость, ве́рою зову́ще неукло́нным по́мыслом: помяни́ на́с, Спа́се, во Ца́рствии Твое́м.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л, на вы́ лжу́ще Мене́ ра́ди.

Проше́дше земна́я исполне́ния, апо́столи Госпо́дни, я́ко зве́зды све́тлыя, помраче́нныя пре́лести разори́сте, и све́т спаси́тельный прельще́ным облиста́сте. Те́мже блажи́м ва́с, Христо́вы пропове́дницы, прося́ще: моли́теся о на́с всегда́ ко Го́споду.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

Му́ченичен: Умерщвля́еми, му́дрии, и огне́м веще́ственным опаля́еми, попали́сте го́рькаго многобо́жия вещество́, блаже́ннии, и ны́не источа́ете исцеле́ний струи́ приходя́щим к ва́м с ве́рою, те́пле взыва́ющим, и вопию́щим Христу́: помяни́ на́с во Ца́рствии Твое́м.

Сла́ва: тро́ичен: Непреткнове́нным по́мыслом, мы́слию трезвя́щеся рце́м, в вы́шних со отце́м седя́щему вку́пе и ду́хом: Тро́ице неразде́льная, я́же вся́ сло́вом пре́жде соста́вльшая, и все́х просвеща́ющая, ве́рою Тебе́ зову́щих, помяни́ на́с во Ца́рствии Твое́м.

И ны́не: Богоро́дичен: Апо́столов ра́досте, и страстоте́рпец вене́ц неувяда́емый вои́стинну еси́, Богороди́тельнице, Всенепоро́чная Отрокови́це, с ни́миже испроси́ на́м, Влады́чице, прегреше́ний избавле́ние, и жития́ исправле́ние, ве́рою прося́щим Тя́, и вопию́щим Ти́: ра́дуйся, всеи́стинне благи́х Сокро́вище.

на Го́споди, воззва́х, стихи́ры кре́стны. Гла́с 4.

Подо́бен: Да́л еси́ зна́мение:

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

Егда́ Тя распина́ема тва́рь вся́ ви́де, изменя́шеся и трепета́ше; земля́ же трясу́щися вся́ колеба́шеся, Долготерпели́ве Сло́ве, и заве́са церко́вная стра́хом раздира́шеся, досажда́ему Тебе́, и ка́мение распада́шеся от стра́ха, и со́лнце лучи́ скры́, Творца́ своего́ ве́дущи Тя́.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Ка́ко беззако́ннейший собо́р дерзну́ осуди́ти Тя́, Судию́ Безсме́ртнаго, Зако́н да́вшаго в пусты́ни дре́вле Моисе́ю Богови́дцу? Ка́ко Жи́знь вся́ческих на Дре́ве зря́ще уме́ршую, ника́коже убоя́шася, ниже́ во уме́ помышля́ху, я́ко Ты́ Еди́н Госпо́дь и Влады́ка тва́ри.

Сти́х: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Растерза́ется рукописа́ние, е́же от ве́ка Ада́ма пра́отца, прободе́нием Твои́х ре́бр, Многоми́лостиве, и отринове́ное естество́ челове́ческое кропле́нием Кро́ве Твоея́ освяти́ся, зову́щее: сла́ва благоутро́бию Твоему́, сла́ва Боже́ственному распя́тию Твоему́, Иису́се Всеси́льне, Спа́се ду́ш на́ших.

Та́же в Мине́и стихи́ры свято́му, а́ще и́мать. А́ще ли не́сть Мине́и:

И́ны стихи́ры Пресвяте́й Богоро́дице. Гла́с 4.

Подо́бен: Я́ко до́бля:

Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.

На Кресте́ я́ко узре́ Тя пригвожде́на, Го́споди, А́гница и Ма́ти Твоя́ дивля́шеся, и что́ виде́ние сие́, взыва́ше, Сы́не Вожделе́нне, сия́ ли Ти́ непокори́вый собо́р воздаде́ беззако́нный, и́же мно́гих Твои́х чуде́с наслади́выйся: но сла́ва неизрече́нному схожде́нию Твоему́, Влады́ко.

Сти́х: Хвали́те Го́спода вси́ язы́цы, похвали́те Его́ вси́ лю́дие.

И па́ки глаго́лем ту́южде стихи́ру.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

А́гнца и Па́стыря Тя́, я́ко ви́де на Дре́ве А́гница ро́ждшая, рыда́ше ма́терски, Тебе́ веща́ше: Сы́не Любе́знейший, ка́ко на Дре́ве Кре́стнем пове́шен еси́, Долготерпели́ве? Ка́ко ру́це и но́зе Твои́, Сло́ве, пригвозди́шася от беззако́нных и Кро́вь Твою́ излия́л еси́, Влады́ко?

Сла́ва, и ны́не: Крестобогоро́дичен: Я́ко узре́ Тя́, Го́споди, Де́ва и Ма́ти Твоя́ на Кресте́ пове́шена, дивля́шеся и взира́ющи глаго́лаше: что́ Ти возда́ша, и́же мно́гих Твои́х даро́в насла́ждшиися, Влады́ко? Но молю́ся, не оста́ви Мене́ еди́ну в ми́ре, но потщи́ся воскресну́ти, совозставля́я пра́отца.

Та́же, Све́те ти́хий: Проки́мен дне́, и Сподо́би, Го́споди, в ве́чер се́й:

На стихо́вне стихи́ры кре́стны, гла́с 4:

Ору́жие непобеди́мое, Христе́, Кре́ст Тво́й на́м да́л еси́, и си́м побежда́ем прило́ги чужда́го.

Сти́х: К тебе́ возведо́х о́чи мои́, живу́щему на Небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дрит ны́.

Всегда́ иму́ще, Христе́, Кре́ст Тво́й на по́мощь, се́ти вра́жия удо́бне попира́ем.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих, и уничиже́ния го́рдых.

Прославля́яйся в па́мятех святы́х Твои́х, Христе́ Бо́же, и от ни́х умоле́н быва́я, низпосли́ на́м ве́лию ми́лость.

Сла́ва, и ны́не: Крестобогоро́дичен: Подо́бен: Зва́нный свы́ше:

Не рыда́й Мене́, Ма́ти, зря́щи на Дре́ве ви́сяща Твоего́ Сы́на и Бо́га, на вода́х пове́сившаго зе́млю неодержи́мо, и всю́ тва́рь созда́вшаго: и́бо воста́ну и просла́влюся, и а́дова ца́рствия сокрушу́ кре́постию, и потреблю́ его́ всю́ си́лу, и у́зники изба́влю от злоде́йства его́, я́ко Милосе́рд: и Отцу́ Моему́ приведу́, я́ко Человеколю́бец.

Та́же: Ны́не отпуща́еши: И Трисвято́е по О́тче на́ш: тропа́рь, и отпу́ст.

Кано́н Пресвяте́й Богоро́дице. Гла́с 4.

Пе́снь 1

Ирмо́с: Отве́рзу уста́ моя́, и напо́лнятся Ду́ха, и сло́во отры́гну Цари́це Ма́тери, и явлю́ся све́тло торжеству́я, и воспою́ ра́дуяся Тоя́ чудеса́.

Ты́ еди́на заступле́ние, прибе́жище и храни́тельница рабо́в Твои́х еси́, Богороди́тельнице Чи́стая. Сего́ ра́ди припа́даю Ти́ и зову́: спаси́ мя окая́ннаго, я́ко Ми́лостива.

Дея́ния скве́рная со́весть мою́ ра́нят, пред лице́м нося́щую си́х обличе́ние: ускори́, Влады́чице, и по́мощь бу́ди ми́, и пре́жде кончи́ны изба́ви, и спаси́ мя.

Сла́ва: Освяти́, Влады́чице, оскверне́нное се́рдце мое́, Я́же Пресвято́е Сло́во ро́ждшая, и су́щая все́х святе́йшая Вы́шних Си́л, еди́на Всепе́тая.

И ны́не: На Тя́ наде́жду моего́ спасе́ния возложи́х, и к Тебе́ Благоутро́бней ве́рою прибего́х: не пре́зри мене́, Наде́ждо ненаде́жных, ниже́ яви́ мя обра́дование бесо́м.

Пе́снь 3

Ирмо́с: Твоя́ песносло́вцы, Богоро́дице, живы́й и незави́стный исто́чниче, ли́к себе́ совоку́пльшия духо́вно утверди́, в Боже́ственней Твое́й сла́ве, венце́в сла́вы сподо́би.

Ро́су Твоего́ благоутро́бия пода́ждь ми́, Пренепоро́чная Чи́стая, грехо́вным зно́ем та́ющему, и печа́ль Сама́ устужа́ющи ми́, и ра́дость Боже́ственную подаю́щи.

Ума́ моего́ тьму́ разруши́, Богоро́дице, све́том и́же в Тебе́, я́ко Блага́я, и молю́ся, покая́ния мя́ о́бразы утверди́ти, я́ко Ще́дра и Многоми́лостива, да спаса́емь ублажа́ю Тя́.

Сла́ва: Кропле́нием ми́лости Твоея́, Де́во Богора́дованная, у́глие погаси́ мои́х страсте́й, и уга́сший свети́льник се́рдца моего́ возжзи́, Златы́й Све́щниче, Всенепоро́чная.

И ны́не: Потопля́ет мя́ волна́ грехо́вная, и бу́ря безме́стных помышле́ний: но умилосе́рдися, Всенепоро́чная, и ру́ку ми́ по́мощи я́ко Ми́лостива простри́, да спаса́емь ублажа́ю Тя́.

Пе́снь 4

Ирмо́с: Неизсле́дный Бо́жий сове́т, е́же от Де́вы воплоще́ния, Тебе́ Вы́шняго, проро́к Авваку́м усмотря́я зовя́ше: сла́ва си́ле Твое́й, Го́споди.

Я́же Всепречу́дная Ма́ти Бо́жия, возсия́й ми́ покая́ния зари́, и разреши́ мра́к окая́нныя моея́ души́, и отжени́, Де́во, лука́вая помышле́ния се́рдца моего́.

Тя́ очисти́лище все́х челове́ков ве́рою молю́, Благослове́нная, и прошу́: ми́лостива ми́ Судию́ Сы́на Твоего́ сотвори́, я́ко да хвала́ми прославля́ю Тя́.

Сла́ва: Смире́нное, Еди́на Чи́стая, и прокаже́нное се́рдце мое́, нечи́стыми страсте́й наведе́нии, я́ко вра́ч исцели́, и от руки́ бесо́вския исхити́.

И ны́не: Глаго́лом Богодохнове́нным пре́жде блаже́нный Авваку́м, го́ру Тя́ Чи́стую и присе́нную нарече́, Прише́дшаго от ю́га, и Тобо́ю воплоща́ема, Влады́чице, возвеща́я явле́ннейше.

Пе́снь 5

Ирмо́с: Ужасо́шася вся́ческая о Боже́ственней сла́ве Твое́й: Ты́ бо, Неискусобра́чная Де́во, име́ла еси́ во утро́бе над все́ми Бо́га, и родила́ еси́ безле́тнаго Сы́на, все́м воспева́ющим Тя́ ми́р подава́ющая.

Умерщвле́н страстьми́ и помышле́нии, Всенепоро́чная, к щедро́там Твои́м прибега́ю, и к те́плому Твоему́ притека́ю, Влады́чице, покро́ву и по́мощи: Я́же Жи́знь еди́на ро́ждшая, се́рдце мое́ оживи́.

Ору́жием снеде́на мя́ грехо́вным, исцели́ де́йственною Твое́ю лечбо́ю, Я́же Спа́са ро́ждшая Го́спода, копие́м уя́звленнаго мене́ ра́ди, Пречи́стая, и уязви́вшаго се́рдце зми́ево.

Сла́ва: Ума́ моего́ уврачу́й сокруше́ния, Пренепоро́чная, и исцели́ стра́сти души́ моея́, и уны́ния тьму́ потреби́, я́ко да во хвале́нии Тя́ пою́ Присноблаже́нную, Богоро́дице Всепе́тая.

И ны́не: Гро́зд виногра́да, Его́же возрасти́, Де́во, на Дре́ве ви́сяща ви́девши, вопия́ше: Ча́до, мсто́ ископа́еши, пия́нство отпуща́я враго́м всу́е распе́ншим Тя́, во все́м Долготерпели́ваго.

Пе́снь 6

Ирмо́с: Боже́ственное сие́ и всечестно́е соверша́юще пра́зднество, богому́дрии Богома́тере, прииди́те рука́ми воспле́щим, от Нея́ ро́ждшагося Бо́га сла́вим.

Я́же еди́на все́м по́мощь, помози́ на́м бе́дствующим, и ру́ку пода́ждь, и к приста́нищу напра́ви спаси́тельному, еди́на Богоблагода́тная.

Истяза́ния мя́, Пречи́стая, в Ча́с Стра́шный Ты́ исхити́, от бесо́в злы́я пре́лести, и суда́, и огня́, и тьмы́, и му́ки.

Сла́ва: Песносло́влю Тя́, Всепе́тая, сла́влю честна́я вели́чия Твоя́: Ты́ же нечи́стых мя́ страсте́й свободи́, и ве́чныя сла́вы сподо́би.

И ны́не: Пе́ти Тя́ до́лжни есмы́, но вои́стинну по достоя́нию не мо́жем: те́мже пое́м Тя́, молча́нием чту́ще несказа́нное, е́же на Тебе́, Де́во, соде́янное Та́инство.

Та́же, Го́споди, поми́луй, три́жды. Сла́ва, и ны́не:

Седа́лен, гла́с 4:

На Кресте́ Тя возвы́шена, я́ко узре́ Пречи́стая Твоя́, Сло́ве Бо́жий, ма́терски рыда́ющи веща́ше: что́ но́вое и стра́нное сие́ чу́до, Сы́не Мо́й? Ка́ко Жи́знь все́х вкуша́еши сме́рти, оживи́ти ме́ртвыя хотя́, я́ко Милосе́рд?

Пе́снь 7

Ирмо́с: Не послужи́ша тва́ри богому́дрии па́че Созда́вшаго, но о́гненное преще́ние му́жески попра́вше, ра́довахуся пою́ще: препе́тый отце́в Госпо́дь и Бо́г благослове́н еси́.

Непреме́ннаго ро́ждши еди́на Богоблагода́тная, моли́ся, Чи́стая, десни́цею Его́ премени́ти мо́й у́м к лу́чшим, лю́те премене́нный бесо́вскими искуше́нии.

Цари́це Де́во, ро́ждшая Царя́ Христа́, уще́дри и спаси́ мя, страстьми́ преклоне́наго; ве́рою утверди́, и наста́ви мя́ ко спасе́ния стези́, ве́рных спасе́ние.

Сла́ва: Моли́твенница ми́ бу́ди, Пренепоро́чная, к Ро́ждшемуся из Тебе́: и оставле́ние лю́тых долго́в пода́ждь ми́, и Ца́рствия Бо́жия Боже́ственный вхо́д, и пи́щи восприя́тия, и све́та прича́стие.

И ны́не: Всенепоро́чная Мари́е, Де́во Неискусобра́чная Чи́стая, безме́рная бла́гостию, Я́же Бо́га пло́тию ро́ждшая, Того́ моли́, вся́кия на́с изба́вити печа́ли и греха́.

Пе́снь 8

Ирмо́с: О́троки благочести́выя в пещи́, Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте дела́, и превозноси́те Его́ во вся́ ве́ки.

Блу́дно житие́ ижди́в, и вся́ку скве́рну соде́лав, трепе́щу Суди́ща, трепе́щу истяза́ния, трепе́щу и отве́та осужде́ния моего́: поми́луй ду́шу мою́ окая́нную, Чи́стая, и пре́жде сме́рти просвеще́ние ми́ пода́ждь.

На Тя́ всю́ наде́жду спасе́ния моего́ возложи́х, Богома́ти Неискусобра́чная, и Тебе́ на по́мощь призыва́ю всегда́: спаси́ мя от печа́лей, и напа́стей вра́жиих, и разреши́ плени́цы зо́л мои́х, и от ве́чныя тьмы́ исхити́ мя.

Сла́ва: Яви́лася еси́ а́нгел вы́шши, Бо́га неизрече́нно воплоти́вши: Сего́ у́бо моли́, Влады́чице Всенепоро́чная, плотски́х искуше́ний вы́шшу бы́ти ми́, и суда́ бу́дущаго изба́витися, Де́во, и ве́чныя му́ки.

И ны́не: Во́д Боже́ственных испо́лни мя́, Де́во, Я́же Исто́чник во чре́ве носи́вшая; изба́ви от гно́я грехо́в мои́х, и к жи́зни наста́ви спасе́ния, Чи́стая, и уны́ния души́ моея́ окая́нныя отжени́, Де́во, и от бесо́в изба́ви.

Пе́снь 9

Ирмо́с: Вся́к земноро́дный да взыгра́ется Ду́хом просвеща́ем, да торжеству́ет же безпло́тных умо́в естество́, почита́ющи свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Разруши́ па́жить греха́, оскверне́нныя моея́ души́ и телесе́, Богора́дованная Пречи́стая Влады́чице, си́льною моли́твою Твое́ю, о Всенепоро́чная! Исцеле́ние да́вши спаси́тельное, Влады́чний стра́х пречи́стый.

Ты́ мне́ просвеще́ние, Ты́ ми избавле́ние и ра́дование, Ты́ побо́рница моя́, Ты́ моя́ сла́ва, и похвала́, и наде́жда, и спасе́ние мое́ еси́, Пренепоро́чная, и Тебе́ ве́рно покланя́юся, и вопию́ Ти: спаси́ мя окая́ннаго раба́ Твоего́, и от а́довых вра́т исхити́ мя.

Сла́ва: Спаси́ мя, Чи́стая, Спа́са ро́ждшая Всеще́драго, и уще́дри раба́ Твоего́, и к покая́ния пути́ наста́ви, лука́ваго собла́зны от среды́ отжени́, и того́ ловле́ния изба́ви мя́, и огня́ ве́чнаго, Пренепоро́чная, исхити́ мя.

И ны́не: Пло́тию, е́же из Тебе́, Сло́во, Пренепоро́чная, оде́явся, воплоти́вся же поживе́ в ми́ре, я́ко Милосе́рд, пребы́в не ху́ждши, И́же пре́жде безпло́тный, и и́же дре́вле все́х му́чившаго, Боже́ственною си́лою низложи́.

Та́же: Досто́йно е́сть: и покло́н. Трисвято́е по О́тче на́ш: тропа́рь, и про́чее обы́чное, и отпу́ст.

По 1-м стихосло́вии, седа́льны кре́стны, гла́с 4:

Искупи́л ны́ еси́ от кля́твы зако́нныя честно́ю Твое́ю Кро́вию, на Кресте́ пригвозди́вся, и копие́м пробо́дься, безсме́ртие источи́л еси́ челове́ком: Спа́се на́ш, сла́ва Тебе́.

Сти́х: Возноси́те Го́спода Бо́га на́шего, и покланя́йтеся подно́жию но́гу Его́, я́ко свя́то е́сть.

На Кресте́ Тя пригвозди́ша иуде́и, Спа́се, и́мже от язы́к на́с призва́л еси́ иногда́, Христе́ Бо́же на́ш, просте́рл еси́ дла́ни на не́м во́лею Твое́ю; копие́м же в ре́бра Твоя́ восхоте́л еси́ прободе́н бы́ти, мно́жеством щедро́т Твои́х, Человеколю́бче.

Сла́ва, и ны́не, Крестобогоро́дичен: Де́во Пренепоро́чная, Ма́ти Христа́ Бо́га, ору́жие про́йде пресвяту́ю твою́ ду́шу, егда́ распина́ема ви́дела еси́ во́лею Сы́на и Бо́га Твоего́: Его́же, Благослове́нная, моля́щи не преста́й, проще́ние прегреше́ний на́м дарова́ти.

По 2-м стихосло́вии, седа́льны, гла́с 4:

Ско́ро предвари́ пре́жде да́же не порабо́тимся враго́м ху́лящим Тя́, и претя́щим на́м, Христе́ Бо́же на́ш, погуби́ Кресто́м Твои́м борю́щия на́с, да уразуме́ют, ка́ко мо́жет правосла́вных ве́ра, моли́твами Богоро́дицы, Еди́не Человеколю́бче.

Сти́х: Бо́г же Ца́рь на́ш пре́жде ве́ка, соде́ла спасе́ние посреде́ земли́.

Уя́звену Ти́, Влады́ко, копие́м Боже́ственному ребру́, ору́жия оскуде́ша неви́димаго врага́ до конца́, и преста́ вся́кое наси́лие злоде́йства его́. Те́мже покланя́емся Твои́м спаси́тельным Страсте́м, сла́вяще Боже́ственное смотре́ние Твое́.

Сти́х: Ди́вен Бо́г во святы́х Свои́х, Бо́г Изра́илев.

Дне́сь а́нгельская во́инства, в па́мять страстоте́рпец приидо́ша, ве́рных мы́сли просвети́ти, и вселе́нную благода́тию уясни́ти. Те́х ра́ди, Бо́же, умоле́н быва́я, да́руй на́м ве́лию ми́лость.

Сла́ва, и ны́не: Крестобогоро́дичен: На Кресте́ Тя возвыша́ема я́ко узре́ Пречи́стая Ма́ти Твоя́, Сло́ве Бо́жий, ма́терски рыда́ющи веща́ше: что́ но́вое и стра́нное чу́до сие́, Сы́не мо́й? Ка́ко, Животе́ все́х, вкуша́еши сме́рти, оживи́ти уме́ршия хотя́, я́ко Милосе́рд?

По 3-м стихосло́вии седа́льны, гла́с 4:

Кре́ст и сме́рть за ны́, Бла́же, за безме́рную ми́лость во́лею претерпе́л еси́, и су́д непра́веден, я́ко да осужде́ния и дре́вния кля́твы все́х свободи́ши, ле́стию в тле́ние впа́дших. Те́мже и покланя́емся, Сло́ве, Твоему́ распя́тию.

На Дре́ве пове́шена усмотри́вшее Тя́ со́лнце, Со́лнца Пра́вды Христа́, све́т помрачи́. Тва́рь же колеба́шеся, и ме́ртвии я́ко от сна́ ско́ро из гробо́в воста́ша, Сло́ве, Боже́ственную песносло́вяще держа́ву сла́вы Твоея́.

Сла́ва, и ны́не: Крестобогоро́дичен: Непоро́чная Ма́ти Твоя́, Христе́, я́ко узре́ на Кресте́ Тя возвыша́ема, рыда́ющи ма́терски, такова́я глаго́лаше: что́ но́вое и стра́нное сие́ чу́до, Сы́не Мо́й? Ка́ко Тя́ беззако́нный со́нм ко Кресту́ пригвожда́ет все́х Жи́знь, Све́те Мо́й Сладча́йший?

Кано́н Честно́му и Животворя́щему Кресту́, [его́же краегране́сие сие́: Кресту́ пригвожде́н Христо́с, пре́лесть разреша́ет. Творе́ние Ио́сифово.] Гла́с 4.

Пе́снь 1

Ирмо́с: Отве́рзу уста́ моя́ и напо́лнятся Ду́ха, и сло́во отры́гну Цари́це Ма́тери, и явлю́ся све́тло торжеству́я, и воспою́ ра́дуяся Тоя́ чудеса́.

На Кресте́ распросте́рл еси́ Боже́ственныя дла́ни, Долготерпели́ве, и погиба́ющий ми́р призва́л еси́ к позна́нию держа́вы Твоея́, Ще́дре. Те́мже велича́ем благоутро́бие Твое́.

Зми́я воздви́гл е́сть Моисе́й, прообразу́я Боже́ственное Твое́ распя́тие, Сло́ве Пребезнача́льне, и́мже паде́ ядови́тый зми́й паде́нию Ада́мову хода́тай бы́вый.

Му́ченичен: Во све́тлостех святы́х ны́не жи́ти сподо́бистеся, му́ченицы, непоколеби́мое прие́мше я́ве Ца́рство, я́коже сказа́ Па́вел, и сла́вы соприча́стницы Христо́вы бы́сте.

Му́ченичен: Воздвиза́емыми волна́ми нестерпи́мых муче́ний ва́ших, непогрузи́мь бы́сть кора́бль, му́ченицы: окормле́нием бо все́х Царя́, в приста́нище доспе́сте поко́ищное.

Богоро́дичен: Ору́жие, я́коже рече́ Симео́н, се́рдце Твое́ про́йде, егда́ ви́дела еси́ Христа́ распина́ема, Де́во Влады́чице, и Еди́наго пробода́ема копие́м. Те́мже рыда́ющи боле́зни претерпе́ла еси́.

И́н кано́н Пресвяте́й Богоро́дице. Гла́с 4.

Пе́снь 1

Ирмо́с то́йже.

Ты́ Еди́на заступле́ние, и прибе́жище, и храни́тельница еси́ рабо́м Твои́м, Богороди́тельнице Чи́стая. Сего́ ра́ди припа́дающе вопие́м Ти́: спаси́ на́с, Влады́чице, милосе́рдием Твои́м.

Освяти́, Влады́чице, оскверне́нное се́рдце мое́, Я́же Пресвято́е Сло́во ро́ждшая, и су́щи все́х святе́йшая Вы́шних Си́л, Отрокови́це Всенепоро́чная.

Па́дших воззва́ние, и стоя́щих еси́ утвержде́ние, Всенепоро́чная. Те́мже молю́ся Ти́: па́дший мо́й у́м грехо́м испра́ви, Влады́чице, да сла́влю Тя́.

Ме́ртва мя́ скорбьми́ и неде́йственна лежа́ща, ру́ку просте́рши по́мощи Твоея́ возста́ви, и Боже́ственнаго весе́лия испо́лнена покажи́ мя, Богороди́тельнице.

Пе́снь 3

Ирмо́с: Твоя́ песносло́вцы, Богоро́дице, живы́й и незави́стный исто́чниче, ли́к себе́ совоку́пльшия духо́вно утверди́ в Боже́ственней Твое́й сла́ве венце́в сла́вы сподо́би.

Я́ко овча́ на заколе́ние ведя́ху Тя́, Христе́, лю́дие пребеззако́ннии, а́гнца Бо́жия су́ща, и хотя́ща изба́вити о́вцы от во́лка лю́таго, и́хже человеколю́бне возлюби́л еси́.

Предста́л еси́ судии́ суди́мь непра́ведно, Судя́й пра́ведно все́й земли́, и претерпе́л еси́ ударе́ние в лани́ту, свободи́ти мя́ хотя́ порабоще́ннаго, Го́споди, лука́вому мироде́ржцу.

Му́ченичен: Страда́вше святи́и зако́нно, беззако́нныя враги́ посрами́сте, и во́лею умерщвля́еми за все́х воста́ние, и и́же сме́рть исхода́таившаго побори́сте зми́я.

Му́ченичен: От земны́х возвы́сившеся, ко благосла́вию же прише́дше страда́льчески му́ченицы святи́и, и к невеще́ственным чино́м веще́ственнии соедини́шася, ра́дости неизрече́нныя исполня́еми.

Богоро́дичен: Из Тебе́, Де́во, обновле́ние Еве яви́ся вои́стинну, Бо́г пло́тию ражда́ем, и на Кре́ст возвыша́ем, низлага́я бе́сы, Богоблагода́тная Влады́чице.

И́н. Ирмо́с то́йже.

Поми́луй, Пречи́стая Де́во, в пучи́не жите́йстей лю́те мя́ потопля́ема, и ко приста́нищу ти́хому спасе́ния испра́ви: Тя́ бо еди́ну наде́жду стяжа́х.

Ума́ моего́ тьму́ разори́, Богоро́дице, све́том и́же в Тебе́ я́ко Бла́га, и молю́ся: покая́ния мя́ о́бразы утверди́, я́ко Ще́дра, и Многоми́лостива, да спаса́емь ублажа́ю Тя́.

Кропле́нием ми́лости Твоея́, Де́во Богора́дованная, у́глие погаси́ мои́х страсте́й, и уга́сший свети́льник се́рдца моего́ возжзи́, Златы́й Све́щниче, Всенепоро́чная.

Боля́щую лю́те страстьми́ окая́нную мою́ ду́шу, Богороди́тельнице, я́ко Ми́лостивая посети́, и спаси́ мя моли́твами Твои́ми: я́ко да живо́т лу́чший получи́в велича́ю Тя́.

Пе́снь 4

Ирмо́с: Неизсле́дный Бо́жий сове́т, е́же от Де́вы воплоще́ния, Тебе́ Вы́шняго, проро́к Авваку́м усмотря́я зовя́ше: сла́ва си́ле Твое́й, Го́споди.

Да отпу́стиши мя́ от у́з грехо́вных, Человеколю́бче, Твое́ю во́лею свя́зан бы́л еси́, и на Кресте́ у́мерл еси́ я́ко злоде́й: сла́ва мно́гому благоутро́бию Твоему́.

Я́звы претерпе́л еси́, Сло́ве Бо́жий, и поно́сную сме́рть, обезсме́ртствуя существо́ земны́х умерщвле́ное страстьми́: сла́ва мно́гому благоутро́бию Твоему́.

Му́ченичен: И́же ра́дования Бо́жия хотя́ще насле́довати Ду́хом Всесвяты́м, ра́достною душе́ю ра́ны претерпе́ша, и ну́ждную сме́рть, му́ченицы, и лука́ваго уязви́ша.

Му́ченичен: Ру́це отсеца́еми, и главы́, и язы́ки уре́заеми, богосло́внии, и о́чи лиша́еми све́та, и на у́ды ссеца́еми, му́ченицы, не отсе́чени же от Бо́га пребы́сте.

Богоро́дичен: Раздра́ся рукописа́ние Ада́мово, копие́м прободе́ну Ти́, Влады́ко, Богоро́дица вопия́ше у Креста́ предстоя́щи, Го́споди, и боле́зненно восклица́ющи.

И́н. Ирмо́с то́йже.

Я́же Всенепоро́чная Ма́ти Бо́жия, возсия́й ми́ покая́ния зарю́, разруши́ мра́к окая́нныя моея́ души́, и лука́вая помышле́ния се́рдца моего́ отжени́, Де́во.

Я́же Благопреме́ннаго и Благоуве́тливаго, Пречи́стая, Влады́ку ро́ждши, Де́вома́ти, я́ко Блага́я, о на́с Того́ моли́ всегда́, от чужда́го изба́вити на́с.

Тя́ очисти́лище все́х челове́ков, ве́рою молю́ и прошу́, Благослове́нная: ми́лостива мне́ Судию́ Сы́на Твоего́ сотвори́, я́ко да во хвале́нии сла́влю Тя́.

Име́я Тя́, Пречи́стая, помо́щницу всегда́ никого́ убою́ся, или́ устрашу́ся. Кто́ же ли хотя́ ско́рбная принести́ рабу́ Твоему́, и не устраши́тся?

Пе́снь 5

Ирмо́с: Ужасо́шася вся́ческая о Боже́ственней сла́ве Твое́й: Ты́ бо, Неискусобра́чная Де́во, име́ла еси́ во утро́бе над все́ми Бо́га, и родила́ еси́ безле́тнаго Сы́на, все́м воспева́ющим Тя́ ми́р подава́ющая.

Ви́девшее Тя́, Со́лнца, на Кресте́ простира́ема, со́лнце скры́ лучи́, сия́ти не могу́щее, Тебе́ Спа́се заше́дшу, и просвеща́ющу и́же в нощи́ пре́лести спя́щия, покланя́ющияся держа́ве Твое́й.

Распина́емь за милосе́рдие, Го́споди, и спаса́еши мя́, оцта и же́лчи прие́млеши вкуше́ние, сла́стнаго избавля́я на́с вкуше́ния я́ко Бла́г, и́мже прельсти́хомся, и тли́ подпадо́хом.

Му́ченичен: Пре́лести разори́сте зи́му, боже́ственнии му́ченицы, Ду́ха Свята́го теплото́ю, и к весне́ поко́я ра́дующеся доидо́сте ку́пно, все́м помога́юще су́щим в ско́рбех.

Му́ченичен: Ту́чами боже́ственныя кро́ве зе́млю всю́ напои́сте, изсуша́юще пото́ки безбо́жия, святи́и му́ченицы. Те́мже к воде́ живо́тней ны́не всели́стеся, о все́х моля́щеся.

Богоро́дичен: Пло́тию Его́же родила́ Сы́на, Богора́дованная, я́ко ви́де на Дре́ве возвы́шена, пла́чем испо́лнися, и долготерпе́нию Его́ дивля́шеся вои́стинну: те́мже велича́ше Его́ снизхожде́ние.

И́н. Ирмо́с то́йже.

Умерщвле́н страстьми́ и скве́рнами, Всенепоро́чная, к щедро́там Твои́м прибега́ю, и к те́плому Твоему́ притека́ю, Влады́чице, покро́ву и по́мощи: Жи́знь еди́на Ро́ждшая, се́рдце мое́ оживи́.

Просвети́ омраче́нное мое́ се́рдце, Пречи́стая, Я́же Светода́вца ро́ждшая, Бо́га вку́пе и Челове́ка: Его́же я́ко ма́ти умоли́, пода́ти ми́ избавле́ние, Госпоже́, пре́жде Стра́шнаго Дне́.

Ума́ моего́ уврачу́й сокруше́ния, Всенепоро́чная, исцели́ стра́сти души́ моея́, и уны́ния тьму́ отжени́: я́ко да во хвале́нии Тя́ пою́ Присноблаже́нную, Богоро́дице Всепе́тая.

Низложи́, Влады́чице, враго́в мои́х шата́ния: Тя́ бо еди́ну и́мам предста́тельницу и наде́жду, и по́мощь кре́пкую, Ты́ мя соблюди́, Чи́стая, вся́каго избавля́ющи мя́ те́х нахожде́ния.

Пе́снь 6

Ирмо́с: Боже́ственное сие́ и всечестно́е соверша́юще пра́зднество богому́дрии Богома́тере, прииди́те рука́ми воспле́щим, от Нея́ ро́ждшагося Бо́га сла́вим.

Боле́зньми, я́же претерпе́л еси́ распина́емь, боле́зни уста́вил еси́ челове́честву, и к неболе́зненному житию́ все́х приво́диши, Благоутро́бне Го́споди.

Со́лнца лучи́ скрыва́хуся, церко́вная же све́тлость раздира́шеся, и земля́ тряса́шеся, ка́мение стра́хом распада́шеся, на Кресте́ Зижди́теля зре́ти не могу́ще.

Му́ченичен: Ме́ртв зми́й бы́сть, му́ками умерщвля́емы зря́ боже́ственныя му́ченики, и живо́т ве́чный насле́дующия вои́стинну, Боже́ственною благода́тию.

Му́ченичен: Мно́гия му́ки претерпе́сте, мно́гия и венцы́ улучи́сте, многочи́сленная мно́жества му́ченик при́сно живу́щих: те́мже зо́л мои́х мно́жество отжени́те.

Богоро́дичен: Приста́нище бу́ди ми́, Всенепоро́чная, в пучи́не лю́тых пла́вающу, Я́же бе́дствующую всю́ тва́рь Рождество́м Твои́м, Богороди́тельнице, спасла́ еси́.

И́н. Ирмо́с: Возопи́, прообразу́я погребе́ние тридне́вное, проро́к Ио́на в ки́те моля́ся: от тли́ изба́ви мя́, Иису́се, Царю́ Си́л.

Возсия́й ми́ покая́ния зарю́, Влады́чице, и о́блаки злы́х помышле́ний мои́х разори́, О́блаче Со́лнца Пра́веднаго, Присноде́во.

Утоли́ страсте́й мои́х свире́пую во́лну, и бу́рю злы́х помышле́ний укроти́, приста́нище вели́кое обурева́емых, Присноде́во.

Напо́й мя́ умиле́ния питие́м, Влады́чице, сле́з ре́ки мне́ ны́не подаю́щи: и́миже угашу́ пла́мень ве́чнующий, Еди́на Всепе́тая.

Изсуша́ющи зо́л мои́х свире́пую пучи́ну, ро́ждшая бла́гости вои́стинну пучи́ну, наста́ви мя́ ко приста́нищу Боже́ственныя во́ли.

Пе́снь 7

Ирмо́с: Не послужи́ша тва́ри богому́дрии па́че Созда́вшаго, но о́гненное преще́ние му́жески попра́вше, ра́довахуся пою́ще: препе́тый отце́в Госпо́дь и Бо́г благослове́н еси́.

Побежде́н бы́сть сопротивобо́рец, и паде́ся ди́вным паде́нием, возне́сшуся Христу́ на Дре́во, и спасе́ся пре́жде осужде́нный, вопия́ ему́: И́же отце́в Госпо́дь и Бо́г благослове́н еси́.

Умерщвле́на мя́ дре́вом оживи́л еси́ на Дре́ве, Христе́, уме́рый, и Боже́ственными у́бо ра́нами Твои́ми стру́пы се́рдца моего́ исцели́л еси́: препе́тый отце́в Госпо́дь и Бо́г благослове́н еси́.

Му́ченичен: Да́р прие́мше исцеле́ния, исцеля́ти неду́ги, и бе́сы от челове́к отгоня́ти си́лою духо́вною, исцели́те стра́сти се́рдца моего́ ва́шими моли́твами, му́ченицы непобеди́мии.

Му́ченичен: Истопле́ния подъе́мый бори́тель, кровьми́ ва́шими погиба́ше со тьма́ми его́. Вы́ же, всехва́льнии му́ченицы, ра́дующеся воспева́ете: И́же отце́в Госпо́дь и Бо́г благослове́н еси́.

Богоро́дичен: Неве́ста непоро́чная, пала́та Зижди́теля, земле́ неде́ланная, престо́л огнезра́чен яви́лася еси́, Пречи́стая. Те́мже вопие́м Ти́: ра́дуйся, Пречи́стая Влады́чице, Я́же челове́ки обожи́вшая Бо́жиим Твои́м Рождество́м.

И́н. Ирмо́с: Спасы́й во огни́ Авраа́мския Твоя́ о́троки, и халде́и уби́в, я́же пра́вда пра́ведно уловля́ше, препе́тый Го́споди Бо́же оте́ц на́ших, благослове́н еси́.

Любо́вию притека́ю мно́гою под святы́й Тво́й покро́в, не отврати́ мене́ тща́: но да́ждь ми́, Пречи́стая, оставле́ние прегреше́ний, и спаси́ мя, да ви́девше врази́ мои́ посра́мятся.

Не убою́ся зла́, Ты́ бо со мно́ю еси́, Де́во; пожену́ враги́, я́же неща́дно мене́ гоня́щия, и побежду́ си́лою Твое́ю укрепля́емь, Мари́е Богороди́тельнице.

И́маши е́же мощи́ при́сно все́х, я́ко ро́ждши Влады́ку, влады́чествия мя́ сла́стнаго и страсте́й свободи́, да пою́ ра́дуяся: ра́дуйся, престо́ле Вы́шняго, Благослове́нная.

Тя́ еди́ну покрови́тельницу и́мам на земли́ Тво́й ра́б, и по́мощь вои́стинну спаси́тельную и тве́рдую, Пречи́стая, Богопросла́вленная: и к Тебе́ прибега́ю, спаси́ мя от се́тей ловя́щих, Богороди́тельнице.

Пе́снь 8

Ирмо́с: О́троки благочести́выя в пещи́ Рождество́ Богоро́дичо спасло́ е́сть, тогда́ у́бо образу́емое, ны́не же де́йствуемое, вселе́нную всю́ воздвиза́ет пе́ти Тебе́: Го́спода по́йте, дела́, и превозноси́те Его́ во вся́ ве́ки.

Разреша́еши мя́ от у́з ле́тных, в ле́то Безле́тный бы́в, свя́зан же бы́в во́лею, го́рдаго у́зам нереши́мым отсла́л еси́, Влады́ко, и спаса́еши мя́ Кресто́м и Стра́стию: те́мже благословлю́ Тя, Христе́, во ве́ки.

Воздви́гся на Дре́во во́лею, и всю́ тва́рь совоздви́гл еси́, Сло́ве Препе́тый, Безнача́льне и Неви́диме, И́же нача́ла и вла́сти тьмы́ Стра́стию Твое́ю, Христе́, обличи́л еси́: те́мже Тя́ пое́м во вся́ ве́ки.

Му́ченичен: Вседо́сте на кро́вь свою́, я́ко на колесни́цу, му́ченицы всекра́снии, и к преми́рным взя́ти бы́сте селе́нием, от Христа́ досто́йныя по́чести прие́млюще, Го́спода по́йте, вопию́ще, и превозноси́те Его́ во ве́ки.

Му́ченичен: На древа́ возвыша́еми, и в ро́в вмета́еми, звере́м же вдава́еми, во о́гнь же и в во́ду разделе́ни быва́юще, страстоно́сцы му́ченицы, ра́дующеся поя́ху: Го́спода по́йте, и превозноси́те Его́ во ве́ки.

Богоро́дичен: Ви́девши усну́вша на Дре́ве Христа́, все́м бо́дрость подаю́щаго боже́ственную и спаси́тельную, Ма́ти Всенепоро́чная, восклица́нием рыда́ше и взыва́ше: что́ сие́ нове́йшее чу́до? Оживля́яй вся́, умира́ет хотя́.

И́н. Ирмо́с то́йже.

Блу́дно житие́ ижди́в, и вся́кую нечистоту́ соде́лав, трепе́щу суди́ща, трепе́щу истяза́ния, трепе́щу и отве́та осужде́ния моего́, Чи́стая: Я́же Судию́ ро́ждшая, предста́ни ми́ тогда́, и изба́ви мя́ ну́жды.

На Тя́ всю́ наде́жду спасе́ния моего́ возложи́х, Богома́ти Неискусобра́чная, и Тебе́ на по́мощь призыва́ю всегда́: спаси́ мя от печа́лей и напа́стей врага́, и разреши́ плени́цы зо́л мои́х, и ве́чныя тьмы́ исхити́ мя.

В ча́с, Де́во, конца́ моего́ руки́ бесо́вския мя́ исхити́, и суда́ и пре́ния, и стра́шнаго испыта́ния, и мыта́рств го́рьких, и кня́зя лю́таго, Богома́ти, и ве́чнаго осужде́ния.

Соблюди́ раба́ Твоего́, Де́во, от вся́каго наве́та чужда́го, Тя́ бо и́мам Влады́чице, покро́в и заступле́ние, прибе́жище и утвержде́ние, и Тебе́ ра́ди ча́ю изба́витися се́тей врага́, еди́на Предста́тельнице ро́да челове́ческаго.

Та́же, пое́м пе́снь Богоро́дице: Вели́чит душа́ моя́ Го́спода:

Пе́снь 9

Ирмо́с: Вся́к земноро́дный да взыгра́ется Ду́хом просвеща́емь, да торжеству́ет же безпло́тных умо́в естество́, почита́ющее свяще́нное торжество́ Богома́тере, и да вопие́т: ра́дуйся, Всеблаже́нная Богоро́дице, Чи́стая Присноде́во.

Стоя́ше суди́мь, Человеколю́бче, и́же суди́ти хотя́й все́м; венце́м же терно́вым увя́злся еси́ хоти́тельне, Спа́се, свое́ю во́лею, преслуша́ния, Христе́, те́рния из ко́рене истерза́я, все́м же насажда́я Твоего́ благоутро́бия позна́ние.

О, ка́ко лю́дие беззако́ннии, за́вистию су́ще омраче́ни, пра́ведна су́ща, и непоро́чна Тя́, Светода́вче, Кресту́ предаю́т? Его́же Стра́сть со́лнце зря́ помрача́шеся, и све́тлость церко́вная раздира́шеся, и колеба́хуся основа́ния земли́.

Му́ченичен: Сообра́зни Страсте́м Христо́вым бы́сте, святи́и му́ченицы, и снасле́дницы Ца́рствия и све́тлости: те́мже просвети́те, прему́дрии, певцы́ ва́ша, грехо́внаго мра́ка свобожда́юще, и разли́чных обстоя́ний.

Му́ченичен: Уже́ в са́мая, прему́дрии, Небе́сная все́льшеся, сла́ву же прие́мше присносу́щную, и прича́стии свяще́нными обожа́еми, помяни́те все́х на́с, чту́щих ве́рою всесвяще́нную и честну́ю ва́шу па́мять, присносла́внии.

Богоро́дичен: Просвети́, Чи́стая, любо́вию воспева́ющих и велича́ющих Тя́, разреши́ страсте́й на́ших тьму́, Отрокови́це, укроти́ бу́рю и лука́ваго собла́зны от среды́ отжени́, Ты́, Отрокови́це, моли́твами Твои́ми.

И́н. Ирмо́с то́йже.

Ра́дуйся, Я́же Ра́дость ро́ждшая, Пречи́стая, су́щим на земли́ вои́стинну. Ра́дуйся, спаси́тельное приста́нище, и покро́ве притека́ющих к Тебе́. Ра́дуйся, ле́ствице чи́стая, возвы́сившая па́дших. Ра́дуйся, Всеблаже́нная Богоро́дице, упова́ние душа́м на́шим.

Разруши́ па́жить греха́ моего́, оскверне́нныя моея́ души́ и телесе́, Богора́дованная Пречи́стая Влады́чице, си́льною моли́твою Твое́ю, о Всенепоро́чная, исцеле́ние да́вши спаси́тельное, Влады́чний стра́х Боже́ственный.

Ты́ мне́ просвеще́ние, Ты́ ми́ избавле́ние и ра́дование, Ты́ побо́рница моя́, Ты́ моя́ сла́ва и похвала́, и ча́яние спасе́ния моего́ еси́, Всенепоро́чная, и Тебе́ ве́рно покланя́юся, и вопию́ Ти: спаси́ мя окая́ннаго раба́ Твоего́, и от вра́т а́довых исхити́ мя.

Спаси́ мя́, Чи́стая, Спа́са ро́ждшая и Всеще́драго, уще́дри мя́ раба́ Твоего́, и к покая́ния пути́ наста́ви; лука́ваго собла́зны от среды́ отжени́, и того́ ловле́ния изба́ви мя́ и огня́ ве́чнаго, Пренепоро́чная, исхити́ мя́.

Та́же, Досто́йно е́сть: Ектения́, и свети́лен, псалмы́ обы́чны.

На стихо́вне стихи́ры, гла́с 4:

Стена́ бу́ди на́м Кре́ст Тво́й, Иису́се Спа́се на́ш: ино́го бо упова́ния ве́рнии не и́мамы, ра́зве Тебе́, на не́м пло́тию пригво́ждшагося, и подаю́щаго на́м ве́лию ми́лость.

Сти́х: Испо́лнихомся зау́тра ми́лости Твоея́, Го́споди и возра́довахомся, и возвесели́хомся: во вся́ дни́ на́ша возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я. И при́зри на рабы́ Твоя́, и на дела́ Твоя́, и наста́ви сы́ны и́х.

Да́л еси́ зна́мение боя́щимся Тебе́, Го́споди, Кре́ст Тво́й Честны́й, и́мже посрами́л еси́ нача́ла тьмы́ и вла́сти, и возве́л еси́ на́с на пе́рвое блаже́нство. Те́мже Твое́ Человеколю́бное смотре́ние сла́вим, Иису́се Всеси́льне, Спа́се ду́ш на́ших.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Кто́ не ужаса́ется зря́, святи́и му́ченицы, по́двига до́браго, и́мже подвиза́стеся? Ка́ко во пло́ти су́ще, безпло́тнаго врага́ победи́сте, Христа́ испове́дающе, и Кресто́м вооружи́вшеся? Те́мже досто́йно яви́стеся бесо́в прогони́телие, и ва́рваров победи́телие, непреста́нно моля́щеся спасти́ся душа́м на́шим.

Сла́ва, и ны́не: Крестобогоро́дичен. Подо́бен: Я́ко до́бля:

На Кресте́ Тя́ я́ко узре́ пригвожде́на, Го́споди, А́гница и Ма́ти Твоя́ дивля́шеся, и что́ виде́ние сие́ взыва́ше, Сы́не Вожделе́нне? Сия́ Ти́ неве́рный собо́р воздаде́ беззако́нный, и́же мно́гих Твои́х чуде́с наслади́выйся? Но сла́ва неизглаго́ланному соше́ствию Твоему́, Влады́ко.

Та́же, Бла́го е́сть испове́датися Го́сподеви: Трисвято́е по О́тче на́ш: Тропа́рь, ектения́, и ча́с 1-й, и про́чее обы́чно, и отпу́ст.

Дре́вом Ада́м Рая́ бы́сть изселе́н – Дре́вом же Кре́стным разбо́йник в Ра́й всели́ся. О́в у́бо вку́ш, за́поведь отве́рже сотво́ршаго, о́в же сраспина́емь, Бо́га испове́да тая́щагося, помяни́ мя, вопия́, во Ца́рствии Твое́м.

Сти́х: Блаже́ни изгна́ни пра́вды ра́ди, я́ко те́х е́сть Ца́рство Небе́сное.

Зря́ще Тя́ на Кресте́ распросте́рта, еди́не Долготерпели́ве, Си́лы Небе́сныя, недоуме́ющеся с тре́петом дивля́хуся; земля́ же колеба́шеся, и свети́л добро́та угаса́ше непра́ведно, Человеколю́бче, осужда́ему Тебе́, Ада́м осужде́нный оправда́шеся: сла́влю благоутро́бие Твое́.

Сти́х: Блаже́ни есте́, егда́ поно́сят ва́м, и изжену́т и реку́т вся́к зо́л глаго́л, на вы́ лжу́ще Мене́ ра́ди.

На Ло́бнем возне́сся, вра́жию главу́ сокруши́л еси́, на Дре́ве же у́мер, плодо́м дре́вным уме́ршия оживи́л еси́, Влады́ко, и Рая́ жи́тели яви́л еси́, непреста́нно сла́вящих Твою́ благосты́ню, и вопию́щих: помяни́ на́с во Ца́рствии Твое́м.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

Я́коже ору́жие Кре́ст восприе́мше, святи́и му́ченицы, ко ополче́нию враго́в по́мыслом до́блим изыдо́сте; и те́х погу́бльше, нетле́нным венце́м увязо́стеся, и сла́ву получи́сте вы́шнюю, ра́дующеся достоблаже́ннии: те́мже ве́рою ва́с ублажа́ем.

Сла́ва: Да пока́жеши я́вственно, е́же к на́м, Спа́се, благоутро́бие Твое́, пригвозди́лся еси́ на Кресте́, Отцу́ соедине́нный и Ду́ху; гу́бу, и тро́сть, поруга́ния и ра́ны претерпе́л еси́, хотя́ изба́вити огня́ ве́чнаго зову́щия: помяни́ на́с, Спа́се, во Ца́рствии Твое́м.

И ны́не: Невмести́мый везде́, нестесня́емь ме́стом, всели́ся во святу́ю утро́бу Твою́, Богороди́тельнице Пречи́стая Влады́чице, и на Дре́ве пове́шен, жи́знь ми́рови я́ве источи́л е́сть. Того́ умоли́ умертви́ти мудрова́ния пло́ти на́шея, и спасти́ все́х, я́ко Человеколю́бца.

нача́ло суббо́тныя слу́жбы, и все́ возсле́дование вече́рни и у́трени, и о се́м пи́сан ука́з в 1-м гла́се.

На Го́споди, воззва́х: стихи́ры святы́м му́чеником, и преподо́бным. Гла́с 4.

Подо́бен: Да́л еси́ зна́мение:

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

Христа́ Человеколю́бца Страсте́м поревнова́вше страстоте́рпцы, телеса́ у́бо на ра́ны преда́сте, и го́рьким му́кам, тьма́м же боле́знем, я́ко предзря́ще при́сно Рая́ Боже́ственное наслажде́ние, пи́щу же неиждива́емую и ве́чнующее благосла́вие, е́же получи́вше, моли́теся о воспева́ющих ва́с.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

И па́ки глаго́ли ту́южде стихи́ру:

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Па́стырие всесвяще́ннии, нача́льнаго Па́стыря сла́внии подо́бницы бы́вше Христа́ все́х Царя́, ду́ши усе́рдно о овца́х положи́сте, беды́ лю́тыя претерпе́сте, я́ко бори́ми от волко́в тя́жких, достоблаже́ннии, спаса́ете невре́дно богоизбра́нное ста́до.

И́ны стихи́ры му́ченичны. Гла́с и подо́бен то́йже.

Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.

Же́ртвы одушевле́нныя, всесожже́ния слове́сная, му́ченицы Госпо́дни, заколе́ния соверше́нная Бо́гу, Бо́га зна́юща, и Бо́гом зна́ема овча́та, и́хже огра́да волко́м невходи́ма: моли́теся и о на́с, упасе́нным бы́ти с ва́ми на воде́ упокое́ния.

Сти́х: Хвали́те Го́спода вси́ язы́цы, похвали́те Его́ вси́ лю́дие.

Честна́ сме́рть святы́х Твои́х, Го́споди: мече́м бо и огне́м, и душе́ю сокруше́нною пролия́ша кро́ви своя́, упова́ние иму́ще на Тя́, восприя́ти трудо́в мзду́, и претерпе́вше прия́ша от Тебе́, Спа́се, ве́лию ми́лость.

Сти́х: Я́ко утверди́ся ми́лость Его́ на на́с и и́стина Госпо́дня пребыва́ет во ве́к.

Иму́ще дерзнове́ние ко Спа́су, святи́и, моли́те непреста́нно за ны́ гре́шныя, оставле́ния прегреше́ний прося́ще, и душа́м на́шим ве́лия ми́лости.

Сла́ва, и ны́не: Богоро́дичен: И́же Тебе́ ра́ди Богооте́ц проро́к Дави́д, пе́сненно о Тебе́ провозгласи́, вели́чия тебе́ сотво́ршему: предста́ Цари́ца одесну́ю Тебе́. Тя́ бо, Ма́терь, хода́таицу живота́ показа́, без отца́ из Тебе́ вочелове́читися благоволи́вый Бо́г, да Сво́й па́ки обнови́т о́браз, истле́вший страстьми́, и заблу́ждшее горохи́щное обре́т овча́, на ра́мо восприи́м, ко Отцу́ принесе́т и Своему́ хоте́нию, с Небе́сными совокупи́т Си́лами, и спасе́т, Богоро́дице, ми́р, Христо́с име́яй ве́лию и бога́тую ми́лость.

Та́же, Све́те ти́хий: Проки́мен дне́.

На стихо́вне стихи́ры, му́ченичны. Гла́с 4:

Прославля́яйся в па́мятех святы́х Твои́х, Христе́ Бо́же, и от ни́х умоле́н быва́я, низпосли́ на́м ве́лию ми́лость.

И́же святы́х му́ченик прие́мый терпе́ние, и от на́с приими́ пе́ние, Человеколю́бче, да́руй на́м те́х моли́твами ве́лию ми́лость.

Ме́ртвен: Со ду́хи пра́ведных сконча́вшихся ду́ши ра́б Твои́х, Спа́се, упоко́й, сохраня́я и́х во блаже́нней жи́зни, я́же у тебе́, Человеколю́бче.

Сла́ва, и ны́не: Богоро́дичен: Свеще́ неугаси́мая, престо́ле пра́ведный, Пречи́стая Влады́чице, моли́ спасти́ся душа́м на́шим.

Та́же, Ны́не отпуща́еши: Трисвято́е по О́тче на́ш: тропа́рь, и отпу́ст.

Кано́н Пресвяте́й Богоро́дице. Гла́с 4.

Пе́снь 1

Ирмо́с: Триста́ты кре́пкия, Рожде́йся от Де́вы, безстра́стия во глубине́, души́ трича́стное потопи́, молю́ся, да Тебе́ я́ко в тимпа́не во умерщвле́нии телесе́, побе́дное воспою́ пе́ние.

От ка́ла страсте́й, от помышле́ний треволне́ния, и от стре́л лука́ваго, и от вся́каго прило́га сопроти́внаго спаси́ ду́шу мою́ окая́нную, Пречи́стая Богороди́тельнице, и огня́ ве́чнаго исхити́ мя.

Возведи́ мя́, Чи́стая, из глубины́ прегреше́ний, и наста́ви к све́ту Боже́ственных за́поведей Спа́са Христа́ и Бо́га, возсия́й ми́ покая́ния спаси́тельную зарю́, и пода́ждь жи́знь ве́чную.

Сла́ва: В ти́ну лука́вую впа́дся зо́л мои́х, удавля́юся вельми́ делесы́ лука́выми, и не́сть постоя́ния: Влады́чице, Де́во Ма́ти, Твое́ю си́лою возведи́ мя, и огня́ и му́ки изба́ви мя́.

И ны́не: Сме́рть и тлю́ потреби́ла еси́, Богоро́дице Всепе́тая, нетле́ния Исто́чник ро́ждши Христа́, безсме́ртием украси́вша и благода́тию челове́ческое естество́, Пренепоро́чная.

Пе́снь 3

Ирмо́с: Не му́дростию и си́лою и бога́тством хва́лимся, но Тобо́ю О́тчею ипоста́сною Му́дростию, Христе́: не́сть бо свя́т, па́че Тебе́, Человеколю́бче.

Я́вльшися, Чи́стая Де́во, души́ моея́ тьму́ отыми́, и грехо́вныя плени́цы расто́ргни, и спаси́ мя, молю́ся, заступле́нием Твои́м.

Коле́блющееся прило́ги стра́стными се́рдце мое́ в стра́х Бо́жий чисте́йший утверди́, Де́во Пренепоро́чная, благоутро́бием Твои́м.

Сла́ва: Отча́явся по́мощи вся́кия, к Тебе́, Пренепоро́чная, держа́вней Храни́тельнице, и покро́ву притеко́х: не отри́ни у́бо мене́ от боже́ственнаго покро́ва Твоего́.

И ны́не: Испещре́на ря́снами златы́ми я́ко Цари́ца, Царя́ и Бо́га одесну́ю ны́не предстои́ши, Влады́чице, моля́щи о рабе́х Твои́х.

Пе́снь 4

Ирмо́с: Седя́й в сла́ве на престо́ле Божества́, во о́блаце ле́гце прии́де Иису́с Пребоже́ственный, нетле́нною дла́нию, и спасе́ зову́щия: сла́ва, Христе́, си́ле Твое́й.

Уны́нием одержи́ма мя́, и страсте́й омраче́нием всего́ потемне́на, и грехо́м порабоще́на, Богоблаже́нная Отрокови́це, свободи́, и присво́й Твоему́ Сы́ну и Бо́гу на́шему.

Умерщвле́на мя́ зло́бою льсти́ваго, Пренепоро́чная, я́ко Жи́знь ро́ждшая оживи́: к Тебе́ бо прибего́х, и погруже́нна во глубине́ паде́жей возведи́, я́ко ми́лостива, Всенепоро́чная.

Сла́ва: Во гро́бе безме́рных сласте́й мои́х низлежу́, уны́нием и ле́ностию одержи́мь е́смь: но ро́ждшая все́х Возставле́ние, оживи́ мя, Блага́я, и спаси́.

И ны́не: Свяще́нную Тя́ дре́вле проро́к го́ру Боже́ственную нарече́, Де́во Чи́стая, доброде́тельми всю́ осене́ну, из Нея́же спаси́тельное Сло́во яви́ся, в созда́ние и просвеще́ние ду́ш на́ших.

Пе́снь 5

Ирмо́с: Нечести́вии не у́зрят сла́вы Твоея́, Христе́, но мы́ Тя́, Единоро́дне, Оте́ческия сла́вы Сия́ние Божества́, от но́щи у́тренююще, воспева́ем Тя́, Человеколю́бче.

Да возвесели́тся, Влады́чице, душа́ моя́ смире́нная, боя́тися Твоего́ Сы́на, и твори́ти повеле́ния Его́ от се́рдца, Всенепоро́чная Пречи́стая, моли́твами Твои́ми наста́ви.

Все́м се́рдцем мои́м, Влады́чице Блага́я, испове́датися Изба́вителю сподо́би ду́шу мою́ стра́стную, отгоня́щи неве́дение се́рдца моего́, Всенепоро́чная.

Сла́ва: Ду́шу мою́ сохрани́ я́ко зе́ницу о́ка, под кро́вом крилу́ Твое́ю, Блага́я Пречи́стая, и духо́в от лука́вых томле́ния и муче́ния изба́ви.

И ны́не: Избавля́ющи яви́ся, Пречи́стая, от страсте́й наведе́ния, и бесо́в лука́вых, Твоего́ раба́, стяжа́вшаго Тя́ держа́вное заступле́ние, и Предста́тельницу непосты́дную.

Пе́снь 6

Ирмо́с: Возопи́, прообразу́я погребе́ние тридне́вное, проро́к Ио́на, в ки́те моля́ся: от тли́ изба́ви мя́, Иису́се, Царю́ Си́л.

Низложи́ и́же при́сно борю́щия мя́, Влады́чице, и о́блак лука́вых помышле́ний разори́, Со́лнца Пра́веднаго су́щи Две́рь, Богома́ти.

Возсия́й ми́ покая́ния зарю́, Влады́чице, и о́блаки злы́х помышле́ний мои́х разруши́ лю́тыми прельще́нии привлеко́ма же и растлева́ема.

Сла́ва: Утоли́ страсте́й мои́х свире́пую во́лну, и бу́рю злы́х помышле́ний потреби́, тве́рдая все́х Предста́тельнице, и Покро́ве, Пренепоро́чная.

И ны́не: Умно́жишася па́че песка́ морска́го прегреше́ния души́ моея́, и я́ко бре́мя тя́жкое низлага́ет мя́: но Ты́, Де́во, пре́жде конца́ уще́дривши спаси́ мя.

Та́же, Го́споди, поми́луй, три́жды. Сла́ва, и ны́не:

Седа́лен, гла́с 4:

Те́плое заступле́ние, е́же в беда́х, и Помо́щницу на́шу, и к Бо́гу премене́ние, Е́юже тли́ изба́вихомся, Богоро́дицу ве́рнии ублажа́ем.

Пе́снь 7

Ирмо́с: Авраа́мстии иногда́ в Вавило́не о́троцы, пе́щный пла́мень попра́ша, пе́сньми взыва́юще: оте́ц на́ших Бо́же, благослове́н еси́.

Тя́, Богоро́дице Чи́стая, призыва́ю ве́рно: смире́нное мое́ соблюди́ се́рдце, и изба́ви мя́ пла́мене муче́ния, и тьмы́ ве́чныя.

Раздери́, Де́во Чи́стая, Сы́на Твоего́ копие́м мои́х прегреше́ний рукописа́ние, и изба́ви мя́ молю́ся, одержа́ния вся́каго, в ча́с кончи́ны моея́.

Сла́ва: Угаси́, Де́во Чи́стая, мои́х сле́з струя́ми, и Твои́х щедро́т одожде́нием пе́щь, ю́же ми́ исхода́таи зо́л мои́х мно́жество, бесо́вским де́йством.

И ны́не: Изба́ви на́с искуше́ний находя́щих, еди́на Сло́ва Ма́ти Присноде́во, и вся́каго муче́ния, вои́стинну Тя́ разу́мно пою́щих во вся́ ве́ки.

Пе́снь 8

Ирмо́с: Изба́вителю все́х Всеси́льне, посреде́ пла́мене благоче́ствовавшия, снизше́д ороси́л еси́, и научи́л еси́ пе́ти: вся́ дела́, благослови́те, по́йте Го́спода.

Ду́шу мою́ боля́щую исцели́, и у́м омраче́нный просвети́, и огня́ исхити́, и ве́чных неизглаго́ланных му́к, Богоро́дице Де́во, Богоневе́сто.

Прекло́нься безслове́сными страстьми́, во глубину́ поги́бели снидо́х, и пла́меню сожже́ние са́м ся́ соде́лах, от ни́хже мя́ изба́ви, Богоро́дице Де́во, раба́ Твоего́.

Сла́ва: Зо́л мои́х пучи́ну изсуши́, милосе́рдия ро́ждши Пучи́ну – Изба́вителя и Го́спода, и плени́цы зо́л мои́х разреши́ пре́жде кончи́ны, Я́же Спа́са все́х ро́ждшая.

И ны́не: Вопло́щся от утро́бы Твоея́ Госпо́дь, госпо́дствуяй тва́рию, и Тебе́, Де́во, Госпожу́ показа́, ви́димым же все́м и неви́димым, я́ко Ма́терь прославля́я Непоро́чную.

Пе́снь 9

Ирмо́с: Е́ва у́бо неду́гом преслуша́ния кля́тву всели́ла е́сть – Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́, те́м Тя́ вси́ велича́ем.

Непло́дное бы́вшее боже́ственных доброде́телей се́рдце мое́, Пречи́стая Богоро́дице Де́во, покажи́ плодоно́сно, Я́же от непло́дныя ро́ждшаяся, хоте́нием вся́ Претворя́ющаго ма́нием, да пою́ Тя, Всепе́тую.

Све́том Твои́м озари́ мя, Пренепоро́чная, ро́ждшая Све́т Непристу́пный, разжени́ о́блаки страсте́й мои́х, и от тьмы́ несве́тлыя исхити́ мя, и Боже́ственнаго Све́та сподо́би: я́ко да пою́ Тя́, Ма́ти Де́во.

Сла́ва: Кропле́нием, Чи́стая, Твои́х щедро́т омы́й гное́ния се́рдца моего́, источа́ти ми́ при́сно сподо́би струи́ сле́з мои́х, пото́ки страсте́й укроча́ющи, и му́ки избавля́ющи.

И ны́не: Благолюби́ваго Бо́га ро́ждши, благолюби́вая Богоро́дице, любве́ мя плотски́я лука́выя ны́не вско́ре свободи́, Влады́чице, и порабо́ти Боже́ственней во́ли ле́ностию погиба́ющаго.

Та́же, Досто́йно е́сть: и покло́н до земли́: Трисвято́е по О́тче на́ш: тропа́рь, и про́чее обы́чно, и отпу́ст.

По 1-м стихосло́вии, седа́льны му́ченичны, гла́с 4:

Дне́сь а́нгельская во́инства в па́мять страстоте́рпец приидо́ша, ве́рных мы́сли просвети́ти, и вселе́нную благода́тию уясни́ти: от ни́хже, Бо́же, умоле́н быва́я, да́руй на́м ве́лию ми́лость.

Сти́х: Ди́вен Бо́г во святы́х Свои́х, Бо́г Изра́илев.

Кресто́м вооружи́вшеся, страстоте́рпцы Твои́, Христе́ Бо́же на́ш, победи́ша ко́зни началозло́бнаго врага́, возсия́ша я́ко свети́ла, челове́ки наставля́юще, даю́т исцеле́ния ве́рою прося́щим. Те́х мольба́ми спаси́ ду́ши на́ша.

Сла́ва, и ны́не: Богоро́дичен: Е́же от ве́ка утае́ное, и а́нгелом несве́домое та́инство, Тобо́ю, Богоро́дице, су́щим на земли́ яви́ся Бо́г, в несли́тном соедине́нии воплоща́емь, и Кре́ст во́лею на́с ра́ди восприи́м, и́мже воскреси́в первозда́ннаго, спасе́ от сме́рти ду́ши на́ша.

По 2-м стихосло́вии седа́льны, гла́с 4:

Му́ченицы Твои́, Го́споди, во страда́ниих свои́х венцы́ прия́ша нетле́нныя от Тебе́ Бо́га на́шего, иму́ще бо кре́пость Твою́, мучи́телей низложи́ша, сокруши́ша и де́монов немощны́я де́рзости, те́х моли́твами спаси́ ду́ши на́ша.

Сти́х: Мно́ги ско́рби пра́ведным, и от все́х и́х изба́вит я́ Госпо́дь.

И́же во все́м ми́ре му́ченик Твои́х, я́ко багряни́цею и ви́ссом кровьми́ Це́рковь Твоя́ украси́вшися, те́ми вопие́т Ти́, Христе́ Бо́же: лю́дем Твои́м щедро́ты Твоя́ низпосли́, ми́р жи́тельству Твоему́ да́руй, и душа́м на́шим ве́лию ми́лость.

Сти́х: Блаже́ни, я́же избра́л, и прия́л еси́, Го́споди, и па́мять и́х в ро́д и ро́д.

Ду́ши я́же преста́вил еси́, Спа́се, от вре́менных, упоко́й я́ко Благоутро́бен и Всеси́лен, и еди́н Человеколю́бец, прости́ я́ко Ще́др соде́янная и́ми; и поми́луй, Ми́лостиве, дела́ ру́к Твои́х, моли́твами Богоро́дицы, Еди́не Человеколю́бче.

Сла́ва, и ны́не: Богоро́дичен: Чи́стая Всенепоро́чная и Неискусому́жная, Я́же еди́на Безле́тнаго Сы́на и Сло́ва Бо́жия в ле́то ро́ждшая, Сего́ со святы́ми и честны́ми патриа́рхи, и му́ченики, и проро́ки, и преподо́бными моли́, дарова́ти на́м очище́ние и ве́лию ми́лость.

Кано́н святы́м му́чеником, и святи́телем, и проро́ком, и преподо́бным, [его́же краегране́сие: Све́тло похваля́ю боже́ственныя Христо́вы дру́ги.] Творе́ние Ио́сифово. Гла́с 4.

Пе́снь 1

Ирмо́с: Триста́ты кре́пкия, Рожде́йся от Де́вы, безстра́стия во глубине́, души́ трича́стное потопи́, молю́ся, да Тебе́ я́ко в тимпа́не, во умерщвле́нии телесе́ побе́дное воспою́ пе́ние.

Светле́ется при́сно честна́я Це́рковь, по́двиги све́тлыми Госпо́дних страда́лец, и Христа́ возсия́вшаго Со́лнца от Де́вы, и тьму́ разгна́вшаго пре́лести, сла́вит почита́ющи.

Восхва́лим ве́рно Христо́вы святи́тели, изря́дныя лю́ди упа́сшия до́бре, и све́тло да похва́лим собо́р ве́сь преподо́бно пожи́вших, и теле́сныя сла́сти умертви́вших ду́хом.

Кре́пость от Бо́га жена́м дарова́ся, в посте́ и кре́пком страда́нии врага́ попра́вшим благода́тию: те́х моли́твами, Го́споди, и проро́к святы́х Твои́х ми́лости Твоя́ все́м низпосли́.

Сла́ва: Оправда́й, Христе́, рабы́ Твоя́, я́же пра́ведным промышле́нием, от жития́ тле́ннаго к нетле́нней жи́зни преве́л еси́, со все́ми же твои́ми пра́ведными ликовствова́ти сподо́би, те́х презира́я прегреше́ния.

Богоро́дичен: Избавля́я на́с от осужде́ния пе́рваго, Сы́н Бо́жий, благоизво́ли, Чи́стая, и Сы́н бы́ти Тво́й. Те́мже и всыни́вшеся Тебе́ ра́ди Небе́снаго благослови́м Отца́, пою́ще Тебе́.

Други́й кано́н усо́пшим, его́же пое́м наряду́, иде́же не́сть Мине́и, [его́же краегране́сие: Пра́вило четве́ртое, кончи́ну воспомина́я.] Гла́с 4.

Пе́снь 1

Ирмо́с: Мо́ря чермну́ю пучи́ну, невла́жными стопа́ми, дре́вний пешеше́ствовав Изра́иль, крестообра́зныма Моисе́овыма рука́ма, Амали́кову си́лу в пусты́ни победи́л е́сть.

Припе́в: Ди́вен Бо́г во святы́х Свои́х, Бо́г Изра́илев.

Держа́й за десну́ю ру́ку ра́б Твои́х, наста́ви и́х на па́жить безсме́ртную, Спа́се, на зре́ние добро́ты Твоея́ страстоно́сцы му́ченики умоле́н быва́я.

Припе́в: Упоко́й, Го́споди, ду́ши усо́пших ра́б Твои́х.

Неизрече́нную и блаже́нную сла́ву Твою́, преста́вльшияся ве́рою насле́довати сподо́би, Христе́, презира́я прегреше́ния и́х, и оправда́й благода́тию, излия́нием Твоея́ Кро́ве.

Сла́ва: Ме́ртвостию Твое́ю живоно́сною умертви́теля умертви́л еси́, Христе́ Бо́же, и́хже прия́т, и и́мже Твою́ воздая́ жи́знь, Са́м ны́не упоко́й ве́рныя рабы́ Твоя́.

И ны́не: Красе́н превысоча́йшими добро́тами, я́ко Бо́жий Сы́н: а я́ко из Тебе́, Де́во, воплоти́выйся и на Дре́ве пове́шен бы́в добро́ты не име́яше, сме́рть за все́х прия́т.

Пе́снь 3

Ирмо́с: Лу́к си́льных изнемо́же, и немощству́ющии препоя́сашася си́лою: сего́ ра́ди утверди́ся в Го́споде се́рдце мое́.

Я́коже а́гнцы добропобе́днии му́ченицы, заколе́ни бы́вше, Христу́ принесо́шася, закла́вшемуся А́гнцу и Сло́ву Бо́жию за все́х избавле́ние.

Уста́ Бо́жия бы́вше священнотаи́нницы, от недосто́йных изведо́ша досто́йныя, уче́ньми свяще́нными просвеща́юще.

Обре́те преподо́бных сосло́вие, воздержа́ния ра́ди пи́щу неиждива́емую, наслади́вшеся зре́ньми и боже́ственными восхожде́ньми.

Сла́ва: Вся́, Христе́, я́же в ве́ре преста́вил еси́, мольба́ми все́х святы́х Твои́х, упоко́й, презре́в я́же соде́янная в житии́ те́х прегреше́ния.

Богоро́дичен: Хвалу́ Бо́гу принесе́м, от Де́вы Ро́ждшемуся пло́тию, и же́н ли́ки а́нгельским лико́м совоку́пльшему.

И́н. Ирмо́с: Не му́дростию и си́лою, и бога́тством хва́лимся, но Тобо́ю, О́тчею ипоста́сною Му́дростию, Христе́: не́сть бо свя́т па́че Тебе́, Человеколю́бче.

Победи́вше и́дольскую пре́лесть му́ченицы, Влады́ку и Бо́га ны́не мо́лят, дарова́ти пре́жде сконча́вшимся Боже́ственный поко́й.

Обраща́ющееся ору́жие премину́ти благоволи́, и Дре́ва Живо́тнаго подо́бно прича́стие улучи́ти, я́же преста́вил еси́ рабы́ Твоя́, Влады́ко.

Сла́ва: В Раи́, Христе́, пи́щи водвори́тися рабо́м Твои́м сподо́би, иде́же гла́с чи́ст пра́зднующих, согреше́ний оставле́ние те́м да́руя.

И ны́не: Боже́ственному Рождеству́ де́вство сочета́ла еси́, Пречи́стая: Зижди́теля бо вся́ческих несказа́нно родила́ еси́, Его́же хоте́нию вся́ повину́ются.

Пе́снь 4

Ирмо́с: Седя́й в сла́ве на престо́ле Божества́, во о́блаце ле́гце прии́де Иису́с Пребоже́ственный, нетле́нною дла́нию, и спасе́ зову́щия: сла́ва, Христе́, си́ле Твое́й.

Свяще́ннейшее просла́вися му́чеников сосло́вие, свяще́нно просла́виша у́ды свои́ми Го́спода, от все́х а́нгел сла́вимаго, и мо́лятся изба́витися на́м от вся́кия ско́рби.

Ум невеще́ственнаго светозаре́ния сия́ющ, иму́ще боже́ственнии святи́телие, но́щь вся́кия пре́лести разруши́сте, и неле́стным наставле́нием наста́висте богоизбра́нное ста́до Христо́во к ра́зуму.

Украси́ся преподо́бных многочи́сленное мно́жество, и возвели́чися боже́ственных же́н еди́нственное торжество́, и проро́к почте́ся собо́р святы́й, со а́нгельскими собо́ры соедини́вся ра́дуяся.

Сла́ва: А́нгелом согра́ждане бы́вше, святи́и му́ченицы, усо́пшим все́м испроси́те ослабле́ние, и Рая́ Боже́ственнаго вселе́ние, и прегреше́ний коне́чное избавле́ние.

Богоро́дичен: И́же Де́ву Тя́ сохрани́в по Рождестве́ нетле́нну, де́вы вся́ Тебе́ обстоя́щия просла́ви, с ни́миже непреста́нно моли́ся, спасти́ся от вся́кия ско́рби и напа́сти душа́м на́шим.

И́н. Ирмо́с: Вознесе́на Тя́ ви́девши Це́рковь на Кресте́, Со́лнце Пра́ведное, ста́ в чи́не свое́м, досто́йно взыва́ющи: сла́ва си́ле Твое́й, Го́споди.

Я́вльшеся му́ченицы я́ко свети́льницы, не́бо просвеща́ют церко́вное, и́же и у Спа́са Христа́ про́сят, дарова́ти усо́пшим ослабле́ние.

Же́зл си́лы иму́ще Кре́ст Тво́й раби́ Твои́, мирско́е мо́ре проидо́ша, и́хже всели́ в го́ру Твою́, Го́споди, в не́йже соде́лал еси́ святы́ню.

Сла́ва: В селе́ния вои́стинну возлю́бленная, я́же избра́л еси́, Влады́ко, и я́же прия́л еси́ рабы́ Твоя́, благоволи́ всели́тися я́ко Милосе́рд, иде́же пра́ведных ду́си.

И ны́не: И́же ме́ртвыми и живы́ми облада́яй, вопло́щся я́ко Челове́к из Тебе́, Богома́ти, сме́рть претерпе́ пло́тию Безсме́ртный, разруши́в сме́рти си́лу.

Пе́снь 5

Ирмо́с: Ты́, Го́споди мо́й, Све́т в ми́р прише́л еси́, Све́т Святы́й, обраща́яй из мра́чна неве́дения, ве́рою воспева́ющия Тя́.

Возноси́ми на Кре́ст и колесы́ сокруша́еми, ссеца́еми же на у́ды, кре́пцыи му́ченицы, Бо́гу яви́шася не отсе́чени.

Спаси́телие ве́рным, святи́телие бы́вше, приведо́сте А́гнцу и Влады́це, и́хже пасти́ преподо́бне вве́ристеся.

Мяте́жей мирски́х отлучи́вшеся, преподо́бнии, умири́сте сердца́ от страсте́й, и все́х Бо́гу сы́нове бы́сте.

Сла́ва: Боже́ственнии проро́цы, и же́н сосло́вие Бо́гу угоди́вшии, пре́жде усо́пшим проси́те поко́й.

Богоро́дичен: Бо́г в Тя́ всели́вся, Пречи́стая Де́во, соде́ла челове́ки Своея́ сла́вы Боже́ственная жили́ща.

И́н. Ирмо́с то́йже.

Ты́, Го́споди, Твоего́ влады́чествия просла́вил еси́ му́ченики: те́хже ра́ди пре́жде усо́пшия упоко́й, я́ко Благоутро́бен.

Нереши́мый живо́т, кра́сное ра́дование, и непрестаю́щее весе́лие, пре́жде уме́ршим пода́ждь, Многоми́лостиве.

Сла́ва: Еди́не Бла́же, и Исто́чниче бла́гости, упоко́й и́же в ве́ре, и Твое́м позна́нии житие́ сконча́вших.

И ны́не: Пое́м Тя́, Богома́ти, Е́юже су́щим во тьме́ возсия́ Неизрече́нный и Непристу́пный Све́т, и любо́вию блажи́м.

Пе́снь 6

Ирмо́с: Приидо́х во глубины́ морски́я, и потопи́ла мя́ е́сть бу́ря мно́гих грехо́в: но я́ко Бо́г из глубины́ возведи́ живо́т мо́й, Многоми́лостиве.

Я́ко прече́стно ка́мение му́ченицы, по земли́ прему́дро валя́ющеся, злоче́стия зда́ние все́ низверго́сте, и хра́мы Бо́жия бы́сте.

От руки́ наси́льственныя спаса́ете подру́чники вся́, святи́телие, пра́веднии и преподо́бнии, и́же о Христе́ ста́до соблюда́юще – сего́ ра́ди ублажа́етеся.

Рече́нием проро́ческим после́дующе, же́н мно́жество, во страда́ниих же и в посте́, от Жены́ Де́вы возсия́вшему, Бо́гу Сло́ву угоди́ша.

Сла́ва: Все́м Животе́ уме́ршим, я́же от на́с в ве́ре преше́дшия к Тебе́, Зижди́телю, во све́те со святы́ми Твои́ми, Многоми́лостиве, сподо́би.

Богоро́дичен: Усты́, и язы́ком, и се́рдцем испове́даю Тя́, Отрокови́це, Бо́га на́шего Чи́стую Ма́терь, и Твои́м хода́тайством изба́ви мя́ ве́чнаго осужде́ния.

И́н. Ирмо́с: Пожру́ Ти со гла́сом хвале́ния, Го́споди, Це́рковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею Кро́вию.

Копие́ Боже́ственная Твоя́ ре́бра пробо́дшее, обраща́ющееся ору́жие уви́девше, Спа́се, да отсту́пит от ра́б Твои́х мольба́ми страстоте́рпец Твои́х.

На Дре́ве пове́шен бы́в Спа́се мо́й, Ра́й отве́рзл еси́: в ве́ре у́бо преста́вленыя во́нь всели́, я́ко Ще́др, и Твоея́ жи́зни прича́стники покажи́.

Сла́ва: Па́жити живо́тныя сподо́би наслади́тися, и́же к Тебе́, Влады́ко, благоче́стно преходя́щия сме́ртию, и с пра́ведными и́же от ве́ка сопричти́.

И ны́не: Сло́во я́ко Бо́г сы́й неви́дим, и вопло́щся ви́дим бы́сть, от Де́вы Отрокови́цы Неискусому́жныя, и сме́ртию Свое́ю сме́рть разруши́.

Пе́снь 7

Ирмо́с: Авраа́мстии иногда́ в Вавило́не о́троцы пе́щный пла́мень попра́ша, пе́сньми взыва́юще: оте́ц на́ших Бо́же, благослове́н еси́.

Влады́ки Христа́ освяще́нныя сосу́ды, це́ркве забра́ла и столпы́ Госпо́дни му́ченики в весе́лии души́ воспои́м согла́сно.

Святи́телие Христо́вы, и преподо́бных все́х ли́к боже́ственный ра́дуется с Вы́шними Си́лами: те́х моли́твами, Христе́, спаса́й пою́щия Тя́.

Терпе́ние благо́е же́н преподо́бне и страда́льне просия́вших и ве́рою по́стничествовавших, Е́ву послуша́нием уязви́вшаго низложи́.

Сла́ва: Ты́ И́же а́да разруши́вый, и сме́рть попра́вый, Твое́ю сме́ртию, я́же преста́вил еси́ в ве́ре упоко́й, и Рая́ покажи́ жи́тели.

Богоро́дичен: Пла́мень и́же купину́ дре́вле не опаля́ющий, ви́дя законополо́жник, науча́шеся о́бразу Рождества́ Твоего́, Богороди́тельнице Де́во, при́сно Благослове́нная.

И́н. Ирмо́с: В пещи́ Авраа́мстии о́троцы перси́дстей, любо́вию благоче́стия па́че, не́жели пла́менем опаля́еми взыва́ху: благослове́н еси́ в хра́ме сла́вы Твоея́, Го́споди.

Терпе́ние же и пожда́ние, и кро́ви все́х му́ченик, избавле́ние прие́м, благоче́стно усо́пшия у тебе́ упоко́й, я́ко Ми́лостив и Благопремени́тель.

Причета́вый к перворо́дным, и пра́ведным Твои́м, Спа́се, ду́ши ра́б Твои́х к Тебе́ преста́вленыя, сподо́би непреста́нно Тебе́ наслажда́тися, все́ми Владу́щаго.

Сла́ва: С весе́лием и со дерзнове́нием и све́тлостию, Сло́ве Бо́жий, Изба́вителю, благоволи́ я́ко Бо́г на о́блацех сре́сти Тя́, и́хже Ты́ прия́л еси́ ны́не я́ко Ми́лостив.

И ны́не: Благослове́нная Богороди́тельнице, Де́во Ма́ти, ра́дуйся: Тебе́ бо ра́ди бы́сть вои́стинну сме́рти потребле́ние, живо́т же неразори́мый уме́ршим дарова́ся.

Пе́снь 8

Ирмо́с: Изба́вителю все́х Всеси́льне, посреде́ пла́мене благоче́ствовавшия, снизше́д ороси́л еси́, и научи́л еси́ пе́ти: вся́ дела́, благослови́те, по́йте Го́спода.

Святи́телие, проро́цы, и му́ченицы, свяще́нный по́двиг сконча́вшии, свяще́нное улучи́ша водворе́ние со а́нгелы. С ни́миже про́сят очище́ния на́м все́м и ве́лия ми́лости.

Просвети́вшеся Ду́хом преподо́бнии, бесо́вскую тьму́ погуби́ша; с ни́миже священному́ченицы, и святи́телие, проро́цы с пра́ведными, Бо́га во хвале́нии сла́вят.

И́же пре́жде безу́мием хваля́йся погуби́ти зе́млю и мо́ре, жена́ми всегда́ попира́ется, страда́нием же и посто́м послужи́вшими Бо́гу со усе́рдием.

Сла́ва: О все́х, Христе́, мо́лимся Ти́, ве́рою усо́пших, я́ко Милосе́рд, си́х к лико́м причти́ спаса́емых, непреста́нно вопию́щих: вся́ дела́, благослови́те, Госпо́дня, Го́спода.

Богоро́дичен: Ми́лости Твоея́ сподо́би мя́, Благоми́лостивное Сло́во ро́ждшая, Богороди́тельнице Влады́чице, и вопию́ща мя́ спаси́: вся́ дела́, благослови́те, Госпо́дня, Го́спода.

И́н. Ирмо́с: Ру́це распросте́р Дании́л, льво́в зия́ния в ро́ве затче́; о́гненную же си́лу угаси́ша, доброде́телию препоя́савшеся, благоче́стия рачи́тели о́троцы, взыва́юще: благослови́те, вся́ дела́ Госпо́дня, Го́спода.

Му́чеников прие́мля моле́ния, и ми́лование к единоплеме́нному, ду́ши упоко́й, Влады́ко, в ве́ре Твое́й усо́пших, грехи́ презря́ си́х вопию́щих Ти́: вся́ дела́, благослови́те, Госпо́дня, Го́спода.

Ме́ртв со беззако́нникома вмени́вся, ме́ртвым источи́л еси́ жи́знь безсме́ртную, преста́вленыя у́бо рабы́ Твоя́ о наде́жди воскресе́ния, Ца́рствие Твое́ улучи́ти сподо́би, Спа́се, Тебе́ вопию́щих: вся́ дела́, благослови́те, Госпо́дня, Го́спода.

Сла́ва: Вои́стинну приснотеку́щий Исто́чниче бла́гости, в Небе́сных селе́ниих сконча́вшияся рабы́ Твоя́, и житие́ тле́нное оста́вльшия, кро́тко, Спа́се, примири́, Тебе́ вопию́щия: вся́ дела́, благослови́те, Госпо́дня, Го́спода.

И ны́не: Еди́на Ты́ яви́лася еси́ на земли́, Де́во Пречи́стая, и Ма́ти безму́жная: Бо́га бо родила́ еси́ Влады́чице па́че сло́ва и смы́сла, и ве́чную жи́знь ме́ртвым источи́ла еси́. Те́мже вси́ Тя благослови́м, Мари́е Богоневе́сто.

Пе́снь 9

Ирмо́с: Е́ва у́бо неду́гом преслуша́ния кля́тву всели́ла е́сть – Ты́ же, Де́во Богоро́дице, прозябе́нием чревоноше́ния ми́рови благослове́ние процвела́ еси́: те́м Тя́ вси́ велича́ем.

Ви́девше Боже́ственныя да́ры му́ченицы, и по́чести прие́млюще вели́ких свои́х боле́зней, ра́дуются Христа́ велича́юще, си́х вои́стинну возвели́чившаго, и победоно́сцы показа́вшаго.

Я́ко святи́тельствующе лю́дем, поста́влени бы́вше святи́телие богопропове́дницы, я́ко просвети́вшеся посто́м, со́лнца светле́йше преподо́бнии просия́сте, ве́рных озаря́юще де́л вели́ких явле́нием.

Со священному́ченики ку́пно, и со все́ми проро́ки, ублажи́м вся́ преподо́бныя и пра́ведники, и жены́ све́тло угоди́вшия, те́х мольба́ми, Христе́, вопию́ще: изба́ви гее́нны ду́ши на́ша.

Сла́ва: Ея́же сподо́бишася ра́дости святи́и, и́же до́бре Тебе́, Христе́, угоди́вшии, тоя́ преста́вльшияся к Тебе́ ве́рою сподо́би, те́х презира́я согреше́ния, Го́споди, еди́не Многоми́лостиве.

Богоро́дичен: Я́вльшися вы́шних Херуви́м, Всенепоро́чная, превы́шши, я́ко ро́ждши Содержи́теля вся́ческих, вы́шши у́м мо́й соде́лай, на стра́сти плотски́я укрепля́ющи мя́, влады́чняя твори́ти хоте́ния.

И́н. Ирмо́с то́йже.

Да́л еси́ и́стинным страда́льцем, и му́чеником дерзнове́ние моли́ти Тя́, Го́споди: да́ждь же ве́рою преста́вльшимся, Боже́ственное те́х ра́ди избавле́ние, в ме́сто селе́ния свята́го всели́тися да́руя.

Манове́нием вседе́тельным, и́же вся́ческая поле́зне соде́ловая, живы́ми име́я о́бласть, и ме́ртвыми госпо́дьствуя, я́ко Всеси́лен, учини́, я́же преста́вил еси́ рабы́ Твоя́ на вода́х поко́йных.

Сла́ва: И́же естество́м сы́й я́ко Бла́г, И́же бога́тый в ми́лостех и в бла́гости, изба́ви от тьмы́ кроме́шныя, призыва́ющия Твое́ и́мя, ве́рою оправда́в и благода́тию, си́х просвети́, я́ко Человеколю́бец.

Богоро́дичен: О́бразы, Всенепоро́чная, Твоего́ Рождества́ проро́цы пропове́даша, и́нако же друзи́и пресла́вно Тебе́ нарица́ния слага́юще: Живо́т бо во а́де су́щим родила́ еси́, держа́ву сме́рти разруша́ющий.

Та́же, Досто́йно е́сть: И покло́н, ектения́, и свети́лен, и псалмы́ обы́чныя.

На хвали́тех стихи́ры му́ченичны, гла́с 4:

Кто́ не ужаса́ется зря́, святи́и му́ченицы, по́двига до́браго, и́мже подвиза́стеся? Ка́ко во пло́ти су́ще, безпло́тнаго врага́ победи́сте, Христа́ испове́дающе, и Кресто́м вооружи́вшеся? Те́мже досто́йно яви́стеся бесо́в прогони́тели, и ва́рваров победи́тели, непреста́нно моля́щеся спасти́ся душа́м на́шим.

А́нгелом соприча́стницы бы́сте, святи́и му́ченицы, на суди́щи Христа́ му́жески пропове́давше: вся́ бо я́же в ми́ре оста́висте кра́сная я́ко не су́ща, ве́ру же я́ко наде́жду тве́рду удержа́сте, те́мже и ле́сть отгна́вше, источа́ете ве́рным исцеле́ний дарова́ния, непреста́нно моля́щеся спасти́ся душа́м на́шим.

Ка́ко ва́шим подвиго́м не удиви́мся, святи́и му́ченицы? Я́ко те́лом умира́ющим обложе́ни, безпло́тныя враги́ победи́сте, не устраши́ша ва́с мучи́тельская преще́ния, ни ужаси́ша ва́с му́к приложе́ния, вои́стинну досто́йно от Христа́ просла́вистеся.

Честна́ сме́рть святы́х Твои́х, Го́споди, мече́м бо и огне́м, и душе́ю сокруше́нною пролия́ша кро́вь свою́, упова́ние иму́ще на Тя́, восприя́ти трудо́в мзду́: претерпе́ша бо и прия́ша от Тебе́, Спа́се, ве́лию ми́лость.

Ме́ртвен: В поко́ищи Твое́м, Го́споди, иде́же вси́ святи́и Твои́ почива́ют, усо́пшия рабы́ Твоя́ поко́й, я́ко еди́н сы́й Человеколю́бец.

Сла́ва: Где́ е́сть ми́ра пристра́стие? Где́ е́сть привре́менное мечта́ние? Где́ е́сть зла́то и сребро́? Где́ е́сть рабо́в мно́жество и молва́? Вся́ пра́х, вся́ пе́пел, вся́ се́нь! Но прииди́те возопии́м безсме́ртному Царю́: Го́споди, ве́чных Твои́х бла́г сподо́би преста́вльшияся от на́с, и упоко́й ты́я в нестаре́емом блаже́нстве.

И ны́не: Богоро́дичен: Еди́на Чи́стая и Пречи́стая Де́во, я́же Бо́га безсе́менно ро́ждшая, моли́ спасти́ся душа́м на́шим.

На стихо́вне стихи́ры поко́йны, гла́с 4:

Подо́бен: Да́л еси́ зна́мение:

Вои́стинну стра́шно е́сть та́инство сме́ртное: ка́ко душа́ от те́ла ну́ждею разлуча́ется, от соста́в и сочета́ния есте́ственнаго соу́за Боже́ственным хоте́нием разделя́ется? Те́мже Тебе́ мо́лимся: преста́вленыя упоко́й в кро́ве пра́ведных Твои́х, Жизнода́вче Человеколю́бче.

Сти́х: Блаже́ни, я́же избра́л и прия́л еси́, Го́споди.

Со́н явля́ется, ве́рующим в Тя́ сме́рть, Тебе́ положе́ну во гро́бе, все́ми владу́щему, и сме́ртную держа́ву разо́ршему, и упраздни́вшему ея́ наси́лие многоле́тное. Те́мже Ти́ мо́лимся: преста́вленыя учини́ в ра́дости святы́х Твои́х, и в пра́ведных све́тлости.

Сти́х: Ду́ши и́х во благи́х водворя́тся.

Ты́ пра́вда же и освяще́ние на́м бы́л еси́, и душа́м избавле́ние: Отцу́ бо приве́л еси́ опра́вданы и изба́влены, восприе́м на́ше до́лжное запреще́ние. И ны́не мо́лим Тя́: преста́вленыя упоко́й в ра́дости и све́тлости святы́х твои́х, Благода́телю и Человеколю́бче.

Сла́ва, и ны́не: Богоро́дичен: Словесе́м после́дующе богоглаго́ливых проро́к, Богоро́дицу Тя́, Всенепоро́чная, му́дрствуем: Бо́га бо родила́ еси́ воплоти́вшагося недомы́сленно, изба́вльшаго на́с плене́нных согреше́нии. Его́же ны́не моли́, Пречи́стая, преста́вленыя рабы́ Твоя́ свои́м просвети́ти озаре́нием.

Та́же, Бла́го е́сть: Трисвято́е по О́тче на́ш: тропа́рь, ектения́, и ча́с 1-й, псалмы́ обы́чныя, и отпу́ст.

Дре́вом Ада́м Рая́ бы́сть изселе́н – Дре́вом же Кре́стным разбо́йник в Ра́й всели́ся. Ов у́бо вку́ш, за́поведь отве́рже Сотво́ршаго – о́в же сраспина́емь, Бо́га испове́да тая́щагося, помяни́ мя, вопия́, во Ца́рствии Твое́м.

Сти́х: Блаже́ни изгна́ни пра́вды ра́ди, я́ко те́х е́сть Ца́рство небе́сное.

Распала́ющеся Христо́вою любо́вию, святи́и му́ченицы, злоче́стия о́гнь ороше́нием по́двиг угаси́сте, и свети́льницы многосве́тлии Це́ркве яви́стеся, отгоня́юще бла́гостию тьму́ неду́гов и скорбе́й от ду́ш на́ших. Те́мже до́лжно похваля́ем ва́с.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́ лжу́ще Мене́ ра́ди.

Святи́телие свяще́ннии, и проро́к боже́ственное сосло́вие, и преподо́бных ли́цы, и же́н святы́х еди́нственное торжество́, Бо́гу угоди́вше доброде́тельными дея́нии, и просла́вишася. Те́х ублажа́ем, мольба́ми и́х моля́ще, получи́ти ве́чный живо́т и просвеще́ние.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

Иде́же сия́ет Тво́й све́т, и иде́же ли́цы святы́х ра́дуются, отню́дуже отбеже́ воздыха́ние и боле́знь, учини́ рабы́ Твоя́ пре́жде сконча́вшияся, и оста́вльшия житие́ многоболе́зненное, пе́ти Твою́ неизрече́нную, Христе́, благосты́ню, презре́в и́х прегреше́ния, я́же на земли́ соде́яша.

Сла́ва: Неразлу́чная Тро́ице, я́же во Отце́, и Сы́не, и Ду́хе, соединя́ема вся́чески, неслива́ема со́бствы, Еди́нице Триипоста́сная, уме́ршия ве́рно у тебе́ поко́й, мольба́ми святы́х Твои́х му́ченик, оте́ц же и честны́х проро́к, подаю́щи очище́ние душа́м на́шим.

И ны́не: Его́же роди́ Оте́ц пре́жде денни́цы, Сло́во зачала́ еси́, и родила́ еси́ пло́тию, бы́вша Челове́ка соверше́нна, двема́ познава́ема де́йствы, Пречи́стая, и во́лема. Того́ у́бо моли́, я́ко Зижди́теля и Го́спода, уще́дрити на́с Тебе́ пою́щих, Отрокови́це Богоневе́стная.

Коне́ц четве́ртому гла́су.