Глас 5

на Го́споди, воззва́х: поста́вим стихо́в 4 и пое́м стихи́ры воскре́сны осмогла́сника 3, повторя́юще 1-ю, гла́с 5:

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Честны́м Твои́м Кресто́м, Христе́, диа́вола посрами́л еси́, и Воскресе́нием Твои́м жа́ло грехо́вное притупи́л еси́, и спа́сл еси́ ны от вра́т сме́ртных: сла́вим Тя́, Единоро́дне.

Воскресе́ние дая́й ро́ду челове́ческому, я́ко овча́ на заколе́ние веде́ся, устраши́шася сего́ кня́зи а́дстии, и взя́шася врата́ плаче́вная. Вни́де бо Ца́рь Сла́вы Христо́с, глаго́ля су́щим во у́зах, изыди́те, и су́щим во тьме́, откры́йтеся.

Ве́лие чу́до, неви́димых Соде́тель, за человеколю́бие пло́тию пострада́в, воскре́се, Безсме́ртный. Прииди́те оте́чествия язы́к, Тому́ поклони́мся: благоутро́бием бо Его́ от пре́лести изба́вльшеся, в трие́х ипоста́сех еди́наго Бо́га пе́ти навыко́хом.

Сла́ва, и ны́не: Богоро́дичен: Боголе́пную и честну́ю Отрокови́цу почти́м, Пречестну́ю Херуви́мов: Соде́тель бо все́х вочелове́читися восхоте́вый, в Ту́ю всели́ся неизрече́нно. О, стра́нных веще́й, и пресла́вных та́инств! Кто́ не удиви́тся о се́м внуши́вый, я́ко Бо́г Челове́к быва́ет, и преложе́ние в Не́м не бе́? И де́вства врата́ про́йде, и умале́ние в Не́м не оста́вися, я́коже проро́к глаго́лет: челове́к сия́ не про́йдет когда́, то́кмо еди́н Госпо́дь Бо́г Изра́илев, име́яй ве́лию ми́лость.

Та́же, Све́те ти́хий:

Посе́м проки́мен: Госпо́дь воцари́ся: три́жды. Сти́х: Облече́ся Госпо́дь в си́лу, и препоя́сася.

Та́же, Сподо́би, Го́споди, в ве́чер се́й:

Иере́й же ектении́ не глаго́лет, но пое́м на стихо́вне стихи́ру воскре́сну, гла́с 5:

Тебе́ воплоще́ннаго Спа́са Христа́, и Небе́с не разлучи́вшася, во гла́сех пе́ний велича́ем, я́ко Кре́ст и сме́рть прия́л еси́ за ро́д на́ш, я́ко Человеколю́бец Госпо́дь, испрове́ргий а́дова врата́, тридне́вно воскре́сл еси́, спаса́я ду́ши на́ша.

И́ны стихи́ры подо́бны Пресвяте́й Богоро́дице, гла́с 5:

Подо́бен: Ра́дуйся по́стником:

Сти́х: Помяну́ и́мя Твое́ во вся́ком ро́де и ро́де.

Ру́це простира́ю к Тебе́, и скве́рнеи устне́ отверза́ю к моле́нию, и преклоня́ю серде́чное коле́но, и у́мно нога́м Твои́м пречи́стым ны́не прикаса́юся, Чи́стая, и припа́даю к Тебе́: боле́зни моя́ исцели́, ле́тныя моя́ мно́гия и неисце́льныя бла́гостию Твое́ю исцели́ стру́пы. Изба́ви от ви́димых враго́в и неви́димых, облегчи́, Отрокови́це, тяготу́ ле́ности моея́, я́ко да Тя́ пою́ и сла́влю, Е́юже обре́те ми́р ве́лию ми́лость.

Сти́х: Слы́ши, Дщи́, и ви́ждь, и приклони́ у́хо Твое́.

Ра́дуйся, Сы́на Бо́жия несказа́нно заче́ншая, Всенепоро́чная, и Сего́ ро́ждшая, пло́ть по на́м вои́стинну от крове́й Твои́х прии́мшаго, ду́шу у́мную же и самовла́стную иму́щаго: неоску́дно бо во Ада́ма обле́кшагося, ми́лости ра́ди и бла́гости неизрече́нныя. Отону́дуже во двою́ естеству́ на́м возвеща́ется, обои́х показу́яй в Себе́ де́йство Христо́с. Его́же моли́ душа́м на́шим да́ти ве́лию ми́лость.

Сти́х: Лицу́ Твоему́ помо́лятся бога́тии лю́дстии.

Ра́дуйся, добро́то Иа́ковля, ю́же избра́ Бо́г, ю́же возлюби́, две́ре спаса́емых, пламеноно́сная клеще́, кля́твы разреше́ние, Всеблагослове́нная, чре́во Боговмести́мое, па́дших возведе́ние, святе́йшая Херуви́мов, и тва́рей преиму́щая, неудобозри́мое виде́ние, слы́шание нове́йшее, неизрече́нное глаго́лание, колесни́це Сло́ва, о́блаче, из него́же возсия́ Со́лнце, и мене́ озаря́я, и су́щим во тьме́ подая́ ве́лию ми́лость.

Сла́ва, и ны́не: Богоро́дичен: Я́же о Тебе́ проро́чествия, испо́лнишася, Де́во Чи́стая: о́в у́бо от проро́к две́рь Тя́ прорече́, во Еде́ме на восто́к зря́щую, ю́же никто́же про́йде, то́чию Зижди́тель Тво́й, и всего́ ми́ра; о́в же купину́ огне́м жего́му, я́ко в Тебе́ обита́ О́гнь Божества́, и неопали́ма пребы́сть; и́н го́ру святу́ю, от нея́же отсече́ся Ка́мень краеуго́льный, кроме́ ру́ки челове́ческия, и порази́ о́браз мы́сленнаго Навуходоно́сора. Вои́стинну ве́лие и пресла́вное, е́же в Тебе́ та́инство е́сть, Богома́ти. Те́мже Тя́ сла́вим: Тобо́ю бо бы́сть спасе́ние душа́м на́шим.

Та́же, Ны́не отпуща́еши: Трисвято́е по О́тче на́ш: Тропа́рь: Собезнача́льное сло́во: Богоро́дичен: Ра́дуйся, две́ре Госпо́дня непроходи́мая: Ектения́. И отпу́ст.

на Го́споди, воззва́х: поста́вим стихо́в 10 и пое́м стихи́ры воскре́сны, гла́с 5:

Сти́х: Изведи́ из темни́цы ду́шу мою́, испове́датися и́мени Твоему́.

Честны́м Твои́м Кресто́м, Христе́, диа́вола посрами́л еси́, и Воскресе́нием Твои́м жа́ло грехо́вное притупи́л еси́, и спа́сл еси́ ны́ от вра́т сме́ртных: сла́вим Тя́, Единоро́дне.

Сти́х: Мене́ жду́т пра́ведницы, до́ндеже возда́си мне́.

Воскресе́ние дая́й ро́ду челове́ческому, я́ко овча́ на заколе́ние веде́ся; устраши́шася Сего́ кня́зи а́дстии, и взя́шася врата́ плаче́вная. Вни́де бо Ца́рь Сла́вы Христо́с, глаго́ля су́щим во у́зах, изыди́те, и су́щим во тьме́, откры́йтеся.

Сти́х: Из глубины́ воззва́х к Тебе́, Го́споди, Го́споди, услы́ши гла́с мо́й.

Ве́лие чу́до, неви́димых Соде́тель, за человеколю́бие пло́тию пострада́в, воскре́се Безсме́ртный, прииди́те оте́чествия язы́к, Тому́ поклони́мся: благоутро́бием бо Его́ от пре́лести изба́вльшеся, в трие́х ипоста́сех еди́наго Бо́га пе́ти навыко́хом.

И́ны стихи́ры Анато́лиевы, гла́с то́йже.

Сти́х: Да бу́дут у́ши Твои́, вне́млюще гла́су моле́ния моего́.

Вече́рнее поклоне́ние прино́сим Тебе́, Невече́рнему Све́ту, на коне́ц веко́в, я́ко в зерца́ле пло́тию возсия́вшему ми́рови, и да́же до а́да низше́дшему, и та́мо су́щую тьму́ разруши́вшему, и све́т Воскресе́ния язы́ком показа́вшему: Светода́вче Го́споди, сла́ва Тебе́.

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

Нача́льника спасе́ния на́шего, Христа́ славосло́вим: Тому́ бо из ме́ртвых воскре́сшу, ми́р от пре́лести спасе́н бы́сть. Ра́дуется ли́к а́нгельский, бе́гает де́монов пре́лесть, Ада́м пады́й воста́, диа́вол упраздни́ся.

Сти́х: И́мене ра́ди Твоего́, потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

И́же от кустоди́и науче́ни быва́ху от беззако́нник, покры́йте Христо́во Воста́ние, и приими́те сре́бреники, и рцы́те я́ко на́м спя́щим, из гро́ба укра́ден бы́сть ме́ртвый. Кто́ ви́де, кто́ слы́ша, мертвеца́ укра́дена когда́, па́че же пома́зана и на́га, оста́вльша и во гро́бе погреба́льная своя́? Не прельща́йтеся, иуде́е, навы́кните рече́нием проро́ческим, и уразуме́йте, я́ко То́й е́сть вои́стинну Изба́витель ми́ра, и Всеси́льный.

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Го́споди, а́д плени́вый, и сме́рть попра́вый, Спа́се на́ш, просвети́вый ми́р Кресто́м Честны́м, поми́луй на́с.

И́ны стихи́ры, Богоро́дице, Па́вла Аморре́йскаго, гла́с 5:

Подо́бен: Ра́дуйся:

Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.

Престо́л Херуви́мский вои́стинну, я́ко превы́шши тва́рей бы́вши: в Тебе́ бо Бо́жие Сло́во, на́ш зра́к назда́сти хотя́, всели́ся, и проше́д с пло́тию из Тебе́, Всечи́стая. Кре́стную же стра́сть на́с ра́ди восприя́т, и Воскресе́ние я́ко Бо́г дарова́, изме́ншемуся на́шему осужде́нному естеству́. Те́м я́ко Соде́телю, Сы́ну Твоему́ мо́лимся, Богома́ти, улучи́ти проще́ние и ми́лость в Ча́с Су́дный.

Сти́х: Хвали́те Го́спода вси́ язы́цы, похвали́те Его́ вси́ лю́дие.

Что́ Твою́, Богороди́тельнице Чи́стая, нареку́ це́рковь Богосла́вную? Вертогра́д Еде́мский имену́ю, и Но́ев, Чи́стая, ковче́г прореку́, спа́сший Бо́гу ца́рское свяще́ние, ве́сь свя́т язы́к, Христа́ Бо́га на́шего собо́р; Моисе́ову же киво́ту уподобля́ю Тя́, в не́мже очисти́лище и же́зл прозя́бший, в не́мже све́щник и ру́чка, кади́льница всезлата́я, во́ньже прибега́ет вся́к ве́рный, и испроша́ет ве́лию ми́лость.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Еди́на безнаде́жным наде́ждо, безпомо́щным гото́вая по́моще, ми́лости ро́ждшая Воли́теля Иису́са, мою́ поми́луй ны́не не́мощь, Чи́стая, и пода́ждь ми́ помысло́м умиле́ние. Струя́ми сле́з са́мых согреше́ний мои́х, непобеди́мую потопи́ пучи́ну; отжени́ безме́рных мои́х страсте́й бу́рю, и испо́лни тишины́ Боже́ственныя смуще́нное се́рдце мое́, Христа́ моля́щи, пода́ти ми́ согреше́ний соверше́нное оставле́ние.

Сла́ва, и ны́не: Богоро́дичен: В Чермне́м мо́ри, Неискусобра́чныя Неве́сты о́браз написа́ся иногда́. Та́мо Моисе́й, раздели́тель воды́ – зде́ же Гаврии́л, служи́тель чудесе́. Тогда́ глубину́ ше́ствова немо́кренно Изра́иль – ны́не же Христа́ роди́ безсе́менно Де́ва. Мо́ре по проше́ствии Изра́илеве, пребы́сть непрохо́дно – Непоро́чная по Рождестве́ Емману́илеве, пребы́сть Нетле́нна. Сы́й, и пре́жде Сы́й, явле́йся я́ко Челове́к, Бо́же, поми́луй на́с.

Та́же,С ве́те ти́хий: Проки́мен: Госпо́дь воцари́ся: И про́чее по обы́чаю.

На стихо́вне стихи́ры воскре́сны, гла́с 5:

Тебе́, воплоще́ннаго Спа́са Христа́, и Небе́с не разлучи́вшася, во гла́сех пе́ний велича́ем, я́ко Кре́ст и сме́рть прия́л еси́ за ро́д на́ш, я́ко Человеколю́бец Госпо́дь, испрове́ргий а́дова врата́, тридне́вно воскре́сл еси́, спаса́я ду́ши на́ша.

И́ны стихи́ры по алфави́ту.

Сти́х: Госпо́дь воцари́ся, в ле́поту облече́ся.

Прободе́ным Твои́м ре́бром, Жизнода́вче, то́ки оставле́ния все́м источи́л еси́, жи́зни и спасе́ния; пло́тию же сме́рть восприя́л еси́, безсме́ртие на́м да́руя; всели́в же ся во гро́б на́с свободи́л еси́, совоскреси́в с Собо́ю сла́вно я́ко Бо́г. Сего́ ра́ди вопие́м: Человеколю́бче Го́споди, сла́ва Тебе́.

Сти́х: И́бо утверди́ вселе́нную, я́же не подви́жится.

Стра́нно Твое́ распя́тие, и е́же во а́д соше́ствие, Человеколю́бче, е́сть: плени́в бо его́, и дре́вния ю́зники совоскреси́в с Собо́ю сла́вно я́ко Бо́г, Ра́й отве́рз, восприя́ти сего́ сподо́бил еси́. Те́мже и на́м сла́вящим Твое́ Тридне́вное Воста́ние, да́руй очище́ние грехо́в: Рая́ жи́тели сподобля́я, я́ко Еди́н Благоутро́бен.

Сти́х: До́му Твоему́ подоба́ет святы́ня, Го́споди, в долготу́ дни́й.

На́с ра́ди пло́тию Стра́сть прии́мый, и тридне́вен из ме́ртвых воскресы́й, плотски́я на́шя стра́сти исцели́, и возста́ви от прегреше́ний лю́тых, Человеколю́бче, и спаси́ на́с.

Сла́ва, и ны́не: Богоро́дичен: Хра́м и Две́рь еси́, Пала́та и Престо́л Царе́в, Де́во Всечестна́я, Е́юже Изба́витель мо́й, Христо́с Госпо́дь, во тьме́ спя́щим яви́ся, Со́лнце сы́й Пра́вды, просвети́ти хотя́, я́же созда́ по о́бразу Своему́ руко́ю Свое́ю. Те́мже, Всепе́тая, я́ко ма́терне дерзнове́ние к Нему́ стяжа́вшая, непреста́нно моли́ спасти́ся душа́м на́шим.

Та́же, Ны́не отпуща́еши: Трисвято́е по О́тче на́ш:

Тропа́рь, гла́с 5:

Собезнача́льное Сло́во Отцу́ и Ду́хови, от Де́вы ро́ждшееся на спасе́ние на́ше, воспои́м ве́рнии и поклони́мся, я́ко благоволи́ пло́тию взы́ти на Кре́ст, и сме́рть претерпе́ти, и воскреси́ти уме́ршия сла́вным Воскресе́нием Свои́м.

Богоро́дичен: Ра́дуйся, Две́ре Госпо́дня непроходи́мая; ра́дуйся, Стено́ и Покро́ве притека́ющих к Тебе́. Ра́дуйся, необурева́емое Приста́нище, и Неискусобра́чная, ро́ждшая пло́тию Творца́ Твоего́ и Бо́га. Моля́щи не оскудева́й о воспева́ющих, и кла́няющихся Рождеству́ Твоему́.

глаго́лет иере́й: Благослове́н Бо́г: И мы́: Сла́ва тебе́, Бо́же на́ш, сла́ва Тебе́. Царю́ небе́сный: Трисвято́е по О́тче на́ш: Го́споди, поми́луй, 12 раз. Сла́ва, и ны́не: Прииди́те поклони́мся: три́жды. Псало́м 50, и про́чее обы́чно.

Посе́м кано́н Пресвяте́й Богоро́дице, гла́с 5:

Пе́снь 1

Ирмо́с: Коня́ и вса́дника в мо́ре Чермно́е, сокруша́яй бра́ни мы́шцею высо́кою, Христо́с истрясе́. Изра́иля же спасе́, побе́дную пе́снь пою́ща.

Припе́в: Пресвята́я Богоро́дице, спаси́ на́с.

Пе́снь Ти́ по достоя́нию приноси́ти, Влады́чице, недоуме́ем вси́: сла́ва бо па́че все́х Твоя́. Но оба́че, Богоневе́сто, не омерзи́ моле́ние приноси́мое со стра́хом и любо́вию Тебе́.

Вси́ к воде́ Твоего́ неоску́днаго исто́чника, Богоро́дице Де́во, притека́ем зову́ще: еди́на Ра́досте ро́ду на́шему, Пречи́стая, испроси́ ми́р це́рквам Твои́м.

Сла́ва: Положи́ Тя приста́нище су́щим в беда́х, Чи́стая, Бо́г, И́же от Тебе́ благоволи́вый восприя́ти пло́ть. Те́мже Ти́ припа́дающе взыва́ем: да́руй Твои́м рабо́м Твою́ по́мощь.

И ны́не: Облегче́ние Твоя́ моли́тва, Де́во Пречи́стая, Твои́м рабо́м да бу́дет, страсте́й отгна́ние, грехо́в разруше́ние, и вся́ческих боле́зней, Богороди́тельнице, очище́ние.

Пе́снь 3

Ирмо́с: Водрузи́вый на ничесо́мже зе́млю повеле́нием Твои́м, и пове́сивый неодержи́мо тяготе́ющую, на недви́жимем, Христе́, ка́мени за́поведей Твои́х, Це́рковь Твою́ утверди́, Еди́не Бла́же и Человеколю́бче.

Ты́ еси́ земноро́дных упова́ние, и по́мощь и ра́дость, покро́в и прибе́жище, Влады́чице Ма́ти Живота́. Те́мже Тя́ мо́лим: Твою́ по́мощь низпосли́ все́м пою́щим Тя́, Пречи́стая.

Неду́гующии, и напа́стьми лю́тыми одержи́мии, Вседе́телю Ще́дрый, И́же вся́ческих Бо́же, Пречи́стую Се́нь Твою́ Ма́терь, Спа́се, на мольбу́ Ти́ приво́дим: разреши́ плени́цы прегреше́ний на́ших.

Сла́ва: Все́х Содержи́теля и Зижди́теля и Го́спода ро́ждшая еди́на, и де́вствующи, и́же вои́стинну Тя́ Бо́жию Ма́терь сла́вят, спасе́ние, Богоневе́сто, пода́ждь свы́ше рабо́м Твои́м.

И ны́не: Во́д животво́рных мя́ испо́лни, Влады́чице, Боже́ственную Во́ду ми́рови источи́вшая; и беззако́ний мои́х лю́тыя пото́ки и се́рдца моего́ во́лны Боже́ственною Твое́ю тишино́ю укроти́.

Пе́снь 4

Ирмо́с: Боже́ственное Твое́ разуме́в истоща́ние, прозорли́во Авваку́м, Христе́, со тре́петом вопия́ше Тебе́: во спасе́ние люде́й Твои́х спасти́ пома́занныя Твоя́ прише́л еси́.

Я́ко все́х вы́шшу су́щую тва́рей, Тя́ Бо́г су́щим на земли́ дарова́, е́же к Нему́ хода́тайствы вино́вну, Богоро́дице Препе́тая.

Це́рковь Тя́ Бо́жию ве́дуще, Де́во Ма́ти, приле́жно мо́лимся Тебе́ чту́щии: не затвори́ рабо́м Твои́м, Богоро́дице, Твоея́ ми́лости двере́й.

Сла́ва: Тя́ вси́ Бо́жию ве́дуще преукра́шену вои́стинну оде́жду, Ма́ти Браконеиску́сная, и́же Тя́ чту́щии про́сим, во оставле́ния оде́жду облецы́ на́с.

И ны́не: Ми́р в Рождестве́ Твое́м, Пречи́стая, ве́сь испо́лнися ра́дости, отне́леже, е́же ра́дуйся, вели́кий Тебе́, Де́во Ма́ти Мари́е, свы́ше Гаврии́л возгласи́.

Пе́снь 5

Ирмо́с: Одея́йся све́том я́ко ри́зою, к Тебе́ у́тренюю, и Тебе́ зову́: ду́шу мою́ просвети́ омраче́нную, Христе́, я́ко Еди́н Благоутро́бен.

Вои́стинну наказу́емся, не по ра́венству же до́лга согреше́ний на́ших: но, о Де́во Ма́ти Пречи́стая, отврати́ ве́сь гне́в Сы́на Твоего́ от на́с.

Еди́наго изве́дшаго све́т от тьмы́, Чи́стая, Бо́га ро́ждши неискусобра́чно, приле́жно моли́ Его́, низпосла́ти Боже́ственный Све́т рабо́м Твои́м.

Сла́ва: От каже́ния моли́твы Твоея́, Чи́стая, и Боже́ственная Неве́сто от Лива́на, Ю́же Соломо́н прорече́, рабы́ Твоя́, Ма́ти Зижди́теля, благоуха́й.

И ны́не: Ты́ Пра́вду же и Избавле́ние на́м ро́ждши, Христа́ без се́мене, свобо́дно соде́яла еси́, Богоро́дице, от кля́твы естество́ пра́деднее.

Пе́снь 6

Ирмо́с: Неи́стовствующееся бу́рею душетле́нною, Влады́ко Христе́, страсте́й мо́ре укроти́ и от тли́ возведи́ мя́, я́ко Благоутро́бен.

Богоро́дице Влады́чице, ро́ждшая Соде́теля, Твои́м рабо́м испроси́ оставле́ние: и держа́вны на́с воздви́гни, во е́же пе́ти Тя́.

Бу́ди на́м по́мощь Твои́м рабо́м, Влады́чице Чи́стая, ве́рно моля́щим Тя́, я́ко Ми́лостива: и держа́вны на́с воздви́гни, во е́же пе́ти Тя́.

Сла́ва: По достоя́нию иму́щи, е́же мощи́, Влады́чице Чи́стая, Твои́м ми́лостивным о́ком при́зри, и от тли́ на́с Твоя́ рабы́ возведи́.

И ны́не: Непреста́нно точа́щи щедро́т струи́, Блага́я, прося́щим, одожди́ и мне́ све́т за́поведей Твоего́ Сы́на, Пренепоро́чная.

Та́же, Го́споди, поми́луй, три́жды.

Сла́ва, и ны́не: седа́лен, гла́с 5.

Всесвята́я Де́во, поми́луй на́с прибега́ющих ве́рою к Тебе́, Милосе́рдой, и прося́щих те́плаго Твоего́ заступле́ния: мо́жеши бо все́х спасти́, я́ко Блага́я су́щи Ма́ти Бо́га Вы́шняго, ма́терними Твои́ми моли́твами при́сно объе́мши, Де́во Богора́дованная.

Пе́снь 7

Ирмо́с: Превозноси́мый отце́в Госпо́дь пла́мень угаси́, о́троки ороси́ согла́сно пою́щия: Бо́же, благослове́н еси́.

Неизсле́дная Бо́жия Му́дросте, Христе́, рабы́ Твоя́ уще́дри, Ро́ждшия Тя́ ра́ди, непреста́нно пою́щия: Бо́же, благослове́н еси́.

Твою́ бла́гость мо́лим, Го́споди, я́зву исцели́ Ро́ждшия Тя́ ра́ди со стра́хом пою́щих: Бо́же, благослове́н еси́.

Сла́ва: О́ком ми́лостивным Твои́м, Богома́ти, при́зри и изба́ви рабы́ Твоя́ вся́каго обстоя́ния, ве́рою пою́щия: Бо́же, благослове́н еси́.

И ны́не: Зло́ де́лающе, Влады́чице, от Тебе́ отпадо́хом: но обрето́хом, Пречи́стая, а́бие по́мощь Твою́, внегда́ зва́ти: Бо́же, благослове́н еси́.

Пе́снь 8

Ирмо́с: Из Отца́ пре́жде ве́к рожде́ннаго Сы́на и Бо́га, и в после́дняя ле́та воплоще́ннаго от Де́вы Ма́тере, свяще́нницы по́йте, лю́дие, превозноси́те во вся́ ве́ки.

Влады́чице на́ша, благи́х Пода́тельнице, рабо́м Твои́м да́руй страсте́й исцеле́ние, я́ко да непреста́нно пое́м Тя́, Де́во, и превозно́сим во ве́ки.

Неизглаго́ланно, Чи́стая, Изба́вителя ро́ждши, несказа́нно дои́ла еси́, Де́ва пребы́вши. Его́же у́бо моли́ о пою́щих Тя́, и славосло́вящих во вся́ ве́ки.

Сла́ва: Тебе́, све́тлому Изба́вителя све́щнику, прекра́сный спле́тше ли́к пое́м: вся́ дела́ Госпо́дня, по́йте непреста́нно Де́ву Мари́ю, и превозноси́те Ю во ве́ки.

И ны́не: Чи́стая А́гнице, Де́во Ма́ти Отрокови́це, чи́ста мя́ сотвори́ от страсте́й теле́сных, я́ко да льсти́ваго изба́влюся се́тей, песносло́вя Тя́, Богора́дованная.

Пе́снь 9

Ирмо́с: Иса́ие лику́й, Де́ва име́ во чре́ве, и роди́ Сы́на Емману́ила, Бо́га же и Челове́ка, Восто́к И́мя Ему́. Его́же велича́юще, Де́ву ублажа́ем.

Соверша́ется пе́ние у́бо, наде́жда же, Влады́ко Христе́, непрехо́дна, я́же к Тебе́, Соде́телю, я́коже и благода́ть Твоя́, но отобою́ду си́лу кре́пку дава́й рабо́м Твои́м, моли́твами Ро́ждшия Тя́.

Неду́гующим си́ла, и боля́щим бли́з Ты́, Чи́стая, еси́, я́ко и́стинная Ма́ти Жи́зни. Те́мже к Тебе́ прибега́юще, премене́ние все́х ско́рбных обрето́хом, Влады́чице, и кро́вом Твои́м спасо́хомся.

Сла́ва: Тво́й Боже́ственный ви́дяще обра́зно, Влады́чице, зра́к, зри́м Тя́ в не́м я́коже я́ве, вся́ко ненави́дяще ерети́к безу́мие на земли́. Ему́же припа́дающе исцеле́ние прие́млем.

И ны́не: Исцеле́нием бе́здну, и благода́тем пучи́ну, Чи́стая, позна́хом Тя́ мы́ гре́шнии. Те́мже Ти́ мо́лимся: от ну́ждных все́х изми́, Еди́на Пречи́стая, притека́ющих к покро́ву Твоему́.

Та́же, Досто́йно е́сть: Трисвято́е по О́тче на́ш: Конда́к, и про́чее обы́чно, и отпу́ст.

Кано́н Святе́й и Живонача́льней Тро́ице, [его́же краестро́чие: Пра́вило пя́тое Све́ту Трисо́лнечному.] Творе́ние Митрофа́ново, гла́с 5

Пе́снь 1

Ирмо́с: Коня́ и вса́дника в мо́ре Чермно́е, сокруша́яй бра́ни, мы́шцею высо́кою Христо́с истрясе́, Изра́иля же спасе́, побе́дную пе́снь пою́ща.

Припе́в: Пресвята́я Тро́ице Бо́же на́ш, сла́ва Тебе́.

Держа́ву Еди́нственнаго и Трисо́лнечнаго зра́ка воспева́юще вопие́м: у́м на́ш озари́, Бо́же Всеси́льне, и к Твое́й, Влады́ко, возвы́си сла́ве неизрече́нней.

Горе́ Тя а́нгельская удобре́ния у́мная немо́лчно пою́т трисвяты́ми пе́сньми, Еди́ницу Тричи́сленную, и Тро́ицу Сообра́зну, Пресу́щественну, Всеси́льну.

Сла́ва: Боже́ственное питие́ Твоея́ любве́, сладча́йшее, светоде́йственное, души́ мое́й пода́ждь, Тро́ице Еди́нице Светонача́льная, и Боже́ственное умиле́ние чисти́тельное, Влады́ко Многоми́лостиве, всея́ тва́ри.

И ны́не: Богоро́дичен: Я́коже на руно́ сни́де без шу́ма с Небесе́, Де́во, До́ждь в ложесна́ Твоя́ Боже́ственный, и спасе́ все́ изсо́хшее челове́ческое естество́, Пречи́стая.

Пе́снь 3

Ирмо́с: Водрузи́вый на ничесо́мже зе́млю повеле́нием Твои́м, и пове́сивый неодержи́мо тяготе́ющую, на недви́жимем, Христе́, ка́мени за́поведей Твои́х, Це́рковь Твою́ утверди́, Еди́не Бла́же и Человеколю́бче.

Умы́слив у́мная существа́, соста́вил еси́ певцы́ непреста́нныя Твоего́ Божества́, Трисве́тлый Бо́же и Вседе́телю. Но и бре́нных и земноро́дных приими́ моле́ние и мольбу́, я́ко Благоутро́бен.

И́же вся́каго по естеству́ премене́ния неприя́тен, изменя́емым на́м и пою́щим, неизсле́димый исто́чник Твоея́ бла́гости, согреше́ний да́ждь проще́ние, и спасе́ние, я́ко Благоутро́бен.

Сла́ва: Отца́ и Сы́на, и Ду́ха сла́вим, в непреме́ннем зра́це Божества́ Тебе́ Еди́нственнаго и Трисия́ннаго Го́спода все́х, я́коже проро́цы, и апо́столи от Тебе́ я́ве научи́шася.

Богоро́дичен: Яви́лся еси́ Моисе́ю в купине́, я́ко А́нгел Сове́та Вели́каго Вседержи́телева, Твое́ е́же от Де́вы проявля́я воплоще́ние, Бо́жий Сло́ве, и́мже на́с претвори́л еси́, и на Небеса́ возве́л еси́.

Го́споди, поми́луй, три́жды.

Седа́лен, гла́с 5. Подо́бен: Собезнача́льное сло́во:

Ми́лостива еси́, Тро́ице Неразде́льная: ми́луеши бо все́х, я́ко Всеси́льная и Всеще́дра, Сострада́тельна и Многоми́лостива. Те́мже прибега́ем к Тебе́, и́же грехми́ мно́гими отягча́еми взыва́юще: очи́сти Твоя́ рабы́, и изба́ви все́х вся́кия му́ки.

Сла́ва, и ны́не: Богоро́дичен: Всесвята́я Де́во, поми́луй на́с прибега́ющих ве́рою к Тебе́ Благоутро́бней, и прося́щих те́плаго Твоего́ ны́не заступле́ния: мо́жеши бо я́ко Блага́я все́х спасти́, я́ко су́щи Ма́ти Бо́га Вы́шняго, ма́терния Твоя́ моли́твы при́сно употребля́ющи, Богоблагода́тная.

Пе́снь 4

Ирмо́с: Боже́ственное Твое́ разуме́в истоща́ние, прозорли́во Авваку́м, Христе́, со тре́петом вопия́ше Тебе́: во спасе́ние люде́й Твои́х, спасти́ пома́занныя Твоя́ прише́л еси́.

Та́йно науча́ется Еди́наго Госпо́дьства Трисве́тлому Дании́л, Христа́ Судию́ узре́в ко Отцу́ иду́ща, и Ду́ха проявля́юща виде́ние.

Бре́нными пою́щих Тя́ усты́, Пресу́щественнаго Бо́га, Тро́ична ипоста́сьми, Еди́нственна же естество́м, сла́вы а́нгельския сподо́би.

Сла́ва: Еди́ну вла́сть, и Еди́но госпо́дьство, в Трие́х сво́йствах неразлу́чно сла́вим: О́тче, и Сы́не, и Ду́ше, просвети́ ны́ рабы́ Твоя́.

Богоро́дичен: Гора́ ча́стая и присе́нная, ю́же ви́дев пре́жде Авваку́м, из нея́же про́йде Святы́й, неудо́бь зри́мое Рождество́ явля́ше Твоего́, Де́во, Зача́тия.

Пе́снь 5

Ирмо́с: Одея́йся све́том я́ко ри́зою, к Тебе́ у́треннюю, и Тебе́ зову́: ду́шу мою́ просвети́ омраче́нную, Христе́, я́ко Еди́н Благоутро́бен.

И́же за бла́гость созда́вый челове́ка, и по о́бразу Твоему́ сотво́рь, во мне́ обита́й, Трисве́тне Бо́же мо́й, я́ко Бла́г и Благоутро́бен.

Ты́ мя наста́ви, Еди́нице Трисо́лнечная, к стезя́м Боже́ственным спасе́ния, и Твоего́ сия́ния испо́лни, я́ко естество́м Бо́г Неисчетноси́лен.

Сла́ва: Све́т Неразде́льный Еди́наго естества́, разделе́нный начерта́ньми, Трисия́нный, Невече́рний, мое́ се́рдце луча́ми Твои́ми озари́.

Богоро́дичен: Я́ко ви́де Тя́ дре́вле, Чи́стая Пренепоро́чная, проро́к, зря́щая врата́ к Све́ту Незаходи́мому, а́бие Тя́ позна́ Бо́жие Жили́ще.

Пе́снь 6

Ирмо́с: Неи́стовствующееся бу́рею душетле́нною, Влады́ко Христе́, страсте́й мо́ре укроти́, и от тли́ возведи́ мя́, я́ко Благоутро́бен.

Трисве́тлое су́ще Богонача́лие ипоста́сне, Еди́нственна еси́, я́ко сообра́зна и равноде́тельна, и по существу́ и хоте́нию.

Дово́льно изъяви́ проро́к, поя́ Отцу́ Твоему́ Све́ту: у́зрим Ду́хом, Све́т Сы́на, Еди́наго Бо́га Трисо́лнечнаго.

Сла́ва: Несоста́вно существо́ в Трие́х сво́йствех, Еди́ну вла́сть и держа́ву имы́й: Те́м бо состои́тся тва́рь вся́ческая, и обновля́ется.

Богоро́дичен: Прегреше́ний избавле́ние и бе́д, Влады́ко Бо́же, Еди́нственне и Трисве́тне, низпосли́ Твои́м певце́м, моли́твами Богома́тере.

Го́споди, поми́луй, три́жды.

Седа́лен, гла́с 5. Подо́бен: Собезнача́льное Сло́во:

Трисо́лнечный Све́т славосло́вим, и Про́стей Тро́ице ны́не поклони́мся, я́ко просвети́ на́с и поми́лова, и изба́ви от тли́ ве́сь ро́д челове́ческий, избавля́ющи от пре́лести и́дольския ве́сь ми́р, и Ца́рство на́м подаде́.

Сла́ва, и ны́не: Богоро́дичен: Недоуме́вся от все́х, к Тебе́ прибего́х к Наде́жди все́х, и Прибе́жищу гре́шных и смире́нных, зовы́й: согреши́х, и пребыва́ю в злы́х, нечу́вствуя окая́нный. Поми́луй мя́, пре́жде конца́ обрати́ мя, и изба́ви вся́кия му́ки, недосто́йнаго.

Пе́снь 7

Ирмо́с: Превозноси́мый отце́в Госпо́дь, пла́мень угаси́, о́троки ороси́ согла́сно пою́щия: Бо́же, благослове́н еси́.

Я́ко имы́й бе́здну ми́лости, Го́споди, и пучи́ну неизче́тну щедро́т, поми́луй Еди́наго Тя́ пою́щих, Трисве́тлаго Бо́га все́х.

Необмы́слимаго, Еди́нственна и Трисве́тла, Бо́га Тя́ и Го́спода пою́ще вопие́м Ти́: пода́ждь Твои́м рабо́м очище́ние грехо́в.

Сла́ва: Ра́вно ипоста́си во Еди́ной держа́ве чту́ще разделя́ем нераздели́мо существо́, Бо́га Отца́, и Сы́на, и Пресвята́го Ду́ха.

Богоро́дичен: О́трасль прозябла́ еси́, Отцу́ Собезнача́льную, Цве́т Божества́, О́трасль Соприсносу́щную, Де́во, даю́щую жи́знь все́м челове́ком.

Пе́снь 8

Ирмо́с: Тебе́, Вседе́телю, в пещи́ о́троцы, всеми́рный ли́к спле́тше, поя́ху: дела́ вся́кая, Го́спода по́йте, и превозноси́те во вся́ ве́ки.

Да Еди́наго откры́еши дре́вле я́ве Госпо́дьства Тро́ичную Ипоста́сь, яви́лся еси́, Бо́же мо́й, во о́бразе челове́ков Авраа́му, пою́щу Твою́ держа́ву Еди́нственную.

Ты́ мя к Твои́м благоде́тельным луча́м взира́ти сподо́би, Све́те Непристу́пный, О́тче Ще́дрый, и Сло́ве, и Ду́ше, е́же благоугожда́ти Тебе́ при́сно, Го́споди все́х.

Сла́ва: Свя́т Оте́ц Бо́г Преве́чный, Свя́т же Сы́н из Отца́ рожде́н, Свя́т же и Животворя́щий Ду́х, исходя́ из Отца́, Сы́ном же явля́емь.

Богоро́дичен: Облиста́ла еси́ на́м от Трисо́лнечныя Сла́вы, Еди́наго, Всепе́тая, Христа́ Го́спода, все́х тайнонауча́юща Еди́ному Богонача́лию в Трие́х Ли́цех, пе́ти во ве́ки.

Пе́снь 9

Ирмо́с: Иса́ие лику́й, Де́ва име́ во чре́ве, и роди́ Сы́на Емману́ила, Бо́га же и Челове́ка, Восто́к и́мя Ему́: Его́же велича́юще, Де́ву ублажа́ем.

Глаго́лания челове́ческая по достоя́нию, Безнача́льная Еди́нице, не мо́гут пе́ти Тя́: оба́че я́коже мо́щно дерза́юще от ве́ры, Богонача́льная, Сопресто́льная Тро́ице, сла́ву прино́сим Твое́й держа́ве, и хвалу́.

Равноста́тною сла́вою, Тя́ Единонача́льнаго Трисве́тлаго Бо́га сла́вят Херуви́ми и Серафи́ми пречи́стыми усты́. С ни́миже и на́с гре́шных приими́, Го́споди, Твою́ держа́ву велича́ющих.

Сла́ва И,са́ия Тя́ ви́де на Престо́ле херуви́мсте, и Серафи́мы стоя́щия о́крест Тебе́, кри́лы ли́ца закрыва́ющия, и вопию́щия: Свя́т, Свя́т, Свя́т, Трисвяты́й Бо́же, сла́вимый в Трие́х Сво́йствех.

Богоро́дичен: Я́ко Чи́стая и Непоро́чная и Де́ва, родила́ еси́ Сы́на, избавля́ющаго на́с от искуше́ний, Бо́га Неизме́нна: но и ны́не оставле́ние на́м прегреше́ний да́ти Сего́ моли́.

Посе́м припе́вы Григо́рия Синаи́та, Досто́йно е́сть: И про́чее полу́нощницы, пи́сано в конце́ кни́ги сея́.

Бо́г Госпо́дь, и яви́ся на́м: на гла́с 5, и глаго́лем тропа́рь воскре́сный: Собезнача́льное Сло́во Отцу́: два́жды. Сла́ва, и ны́не, Богоро́дичен: Ра́дуйся, Две́ре Госпо́дня Непроходи́мая: Та́же, обы́чная стихоло́гия Псалти́ря.

По 1-м стихосло́вии седа́льны воскре́сны, гла́с 5:

Кре́ст Госпо́день похва́лим, Погребе́ние Свято́е пе́сньми почти́м, и Воскресе́ние Его́ препросла́вим, я́ко совозста́ви ме́ртвыя от гро́б я́ко Бо́г, плени́в сме́рти держа́ву, и кре́пость диа́волю, и су́щим во а́де све́т возсия́.

Сти́х: Воскресни́, Го́споди Бо́же мо́й, да вознесе́тся рука́ Твоя́, не забу́ди убо́гих Твои́х до конца́.

Го́споди, ме́ртв наре́клся еси́, умертви́вый сме́рть, во гро́бе положи́лся еси́, истощи́вый гро́бы; горе́ во́ини гро́ба стрежа́ху, до́ле от ве́ка ме́ртвыя воскреси́л еси́. Всеси́льне и Непостижи́ме Го́споди, сла́ва Тебе́.

Сла́ва, и ны́не: Богоро́дичен: Ра́дуйся, Свята́я Горо́ и Богопрохо́дная; ра́дуйся, Одушевле́нная Купино́ и Неопали́мая. Ра́дуйся, Еди́на к Бо́гу ми́рови Мо́сте, преводя́й ме́ртвыя к ве́чному животу́. Ра́дуйся, Нетле́нная Отрокови́це, неискусому́жно ро́ждшая Спасе́ние ду́ш на́ших.

По 2-м стихосло́вии седа́льны воскре́сны, гла́с 5:

Го́споди, по Тридне́внем Твое́м Воскресе́нии, и апо́столов поклоне́нии, Пе́тр вопия́ше Ти́: жены́ дерзнове́ние прия́ша, а́з же убоя́хся. Разбо́йник богосло́вяше, а́з же отверго́хся. У́бо призове́ши ли мя́ про́чее ученика́ бы́ти? Или́ па́ки пока́жеши мя́ ловца́ глуби́ннаго? Но ка́ющася приими́ мя, Бо́же, и спаси́ мя.

Сти́х: Испове́мся Тебе́, Го́споди, все́м се́рдцем мои́м, пове́м вся́ чудеса́ Твоя́.

Го́споди, посреде́ осужде́нных пригвозди́ша Тя́ беззако́ннии, и копие́м ребро́ Твое́ прободо́ша, о Ми́лостиве! Погребе́ние же прия́л еси́, разруши́вый а́дова врата́, и воскре́сл еси́ тридне́вно. Притеко́ша жены́ ви́дети Тя́, и возвести́ша апо́столом Воста́ние: Превозноси́мый Спа́се, Его́же пою́т а́нгели, Благослове́нный Го́споди, сла́ва Тебе́.

Сла́ва, и ны́не: Богоро́дичен: Неискусобра́чная Неве́сто Богороди́тельнице, Я́же Е́вину печа́ль радостотвори́вшая, воспева́ем ве́рнии и покланя́емся Тебе́, я́ко возвела́ еси́ на́с от дре́вния кля́твы: и ны́не моли́ непреста́нно, Всепе́тая, Пресвята́я, во е́же спасти́ся на́м.

Ипакои́, гла́с 5:

А́нгельским зра́ком у́м смуща́юща, и Боже́ственным Воста́нием душе́ю просвеща́емы, мироно́сицы апо́столом благовествова́ху: возвести́те во язы́цех Воскресе́ние, Го́споду соде́йствующу чудесы́, подаю́щему на́м ве́лию ми́лость.

Степе́нна, гла́с 5. Антифо́н 1.

И́хже стихи́ повторя́юще пое́м:

Внегда́ скорбе́ти мне́, Дави́дски пою́ Тебе́, Спа́се мо́й: изба́ви ду́шу мою́ от язы́ка льсти́ваго.

Пусты́нным живо́т блаже́н е́сть, Боже́ственным раче́нием воскриля́ющимся.

Сла́ва: Святы́м Ду́хом одержа́тся вся́, ви́димая же с неви́димыми: Самодержа́вен бо сы́й, Тро́ицы Еди́н е́сть нело́жно.

И ны́не: то́йже. Антифо́н 2:

На го́ры, душе́, воздви́гнемся, гряди́ та́мо, отню́дуже по́мощь и́дет.

Десна́я Твоя́ рука́, и мене́, Христе́, каса́ющися, от ле́сти вся́кия да сохрани́т.

Сла́ва: Свято́му Ду́ху богосло́вяще рце́м: Ты́ еси́ Бо́г, Живо́т, Раче́ние, Све́т, Ум; Ты́ Благосты́ня, Ты́ ца́рствуеши во ве́ки.

И ны́не: то́йже. Антифо́н 3:

О ре́кших мне́, во дворы́ вни́дем Госпо́дня, ра́дости мно́гия испо́лнен бы́в, моли́твы возсыла́ю.

В дому́ Дави́дове стра́шная соверша́ются: о́гнь бо та́мо паля́ вся́к сра́мный у́м.

Сла́ва: Свято́му Ду́ху живонача́льное досто́инство, от Него́же вся́кое живо́тно одушевля́ется, я́ко во Отце́, ку́пно же и Сло́ве.

И ны́не: то́йже.

Проки́мен, гла́с 5: Воскресни́, Го́споди Бо́же мо́й, да вознесе́тся рука́ Твоя́, я́ко Ты́ ца́рствуеши во ве́ки. Сти́х: Испове́мся Тебе́, Го́споди, все́м се́рдцем мои́м. Вся́кое дыха́ние: Сти́х: Хвали́те Бо́га во святы́х Его́:

Ева́нгелие у́треннее рядово́е.

Воскресе́ние Христо́во ви́девше, поклони́мся Свято́му Го́споду Иису́су, Еди́ному Безгре́шному. Кресту́ Твоему́ покланя́емся, Христе́, и свято́е Воскресе́ние Твое́ пое́м и сла́вим: Ты́ бо еси́ Бо́г на́ш, ра́зве Тебе́ ино́го не зна́ем, и́мя Твое́ имену́ем. Прииди́те, вси́ ве́рнии, поклони́мся свято́му Христо́ву Воскресе́нию: се́ бо прии́де Кресто́м ра́дость всему́ ми́ру. Всегда́ благословя́ще Го́спода, пое́м Воскресе́ние Его́: распя́тие бо претерпе́в, сме́ртию сме́рть разруши́.

Псало́м 50: Поми́луй мя́, Бо́же:

Сла́ва: Моли́твами апо́столов, Ми́лостиве, очи́сти мно́жества согреше́ний на́ших.

И ны́не: Моли́твами Богоро́дицы, Ми́лостиве, очи́сти мно́жества согреше́ний на́ших.

Та́же, гла́с 6: Поми́луй мя́, Бо́же, по вели́цей ми́лости Твое́й, и по мно́жеству щедро́т Твои́х, очи́сти беззако́ние мое́.

Посе́м стихи́ра:

Воскре́с Иису́с от гро́ба, я́коже прорече́, даде́ на́м живо́т ве́чный, и ве́лию ми́лость.

Спаси́, Бо́же, лю́ди Твоя́:

И возгла́с: Ми́лостию и щедро́тами и человеколю́бием:

Кано́ны: Воскре́сный на 4, Кре́стовоскре́сный на 3, Богоро́дичен на 3, Мине́и на 4. А́ще же пра́зднуется святы́й, на 6. Кре́стовоскре́сный на 2 и Богоро́дицы на 2.

Кано́н воскре́сен, гла́с 5

Пе́снь 1

Ирмо́с: Коня́ и вса́дника в мо́ре Чермно́е, сокруша́яй бра́ни мы́шцею высо́кою, Христо́с истрясе́, Изра́иля же спасе́, побе́дную пе́снь пою́ща.

Припе́в: Сла́ва, Го́споди, свято́му Воскресе́нию Твоему́.

Тебе́ терноно́сный евре́йский со́нм, любве́, Благоде́телю, к Тебе́ не сохра́нь ма́терния, Христе́, венча́, родонача́льника разреша́юща терно́вное запреще́ние.

Воздви́гл еси́ мя па́дшаго в ро́в, прекло́нься, Жизнода́вче, Безгре́шне, и моея́ злосмра́дныя тли́, Христе́, претерпе́в неискуше́нно, Боже́ственнаго существа́ ми́ром мя́ облагоуха́л еси́.

Богоро́дичен: Разреши́ся кля́тва, печа́ль преста́: Благослове́нная бо и Благода́тная, ве́рным ра́дость возсия́, Благослове́ние все́м конце́м цветонося́щи – Христа́.

Други́й кано́н, кре́стовоскре́сен.

Пе́снь 1, гла́с то́йже.

Ирмо́с: Спаси́телю Бо́гу:

И́же во́лею на Кресте́ пригвожде́нному пло́тию, и дре́вняго осужде́ния и́же дре́вом па́дшаго свобо́ждшему, Тому́ Еди́ному воспои́м: я́ко просла́вися.

И́же из гро́ба мертвецу́ воскре́сшу Христу́, и па́дшаго совозста́вившу, и соседе́нием Оте́ческим украси́вшему, Тому́ Еди́ному воспои́м: я́ко просла́вися.

Богоро́дичен: Пречи́стая Ма́ти Бо́жия, из Тебе́ вопло́щшемуся, и от не́др Роди́теля не разлу́чшемуся Бо́гу, непреста́нно моли́ся, от вся́каго обстоя́ния спасти́, и́хже созда́.

И́н кано́н Пресвяте́й Богоро́дице [его́же краестро́чие: Све́т ро́ждшая, просвети́ мя, Де́во.].

Пе́снь 1, гла́с то́йже.

Ирмо́с: Коня́ и вса́дника в мо́ре Чермно́е:

Све́та все́льшагося в Тя́, Пречи́стая, и просве́щшаго ми́р луча́ми Божества́, Христа́ моли́, просвети́ти вся́ пою́щия Тя́, Ма́ти Де́во.

Я́ко украша́ема добро́тою доброде́телей, Благода́тная, добротво́рное благоле́пие луче́ю Ду́ха, подъя́ла еси́, Всечи́стая, вся́ческая удобри́вшаго.

Тебе́ дре́вле прообразу́ющи купина́ в Сина́и, не опали́ся, Де́во, огню́ присовоку́пльшися: Де́ва бо родила́ еси́, и Де́ва пребыла́ еси́, па́че смы́сла, Ма́ти Де́во.

Катава́сия: Отве́рзу уста́ моя́:

Пе́снь 3

Ирмо́с: Водрузи́вый на ничесо́мже зе́млю повеле́нием Твои́м, и пове́сивый неодержи́мо тяготе́ющую, на недви́жимем, Христе́, ка́мени за́поведей Твои́х, Це́рковь Твою́ утверди́, Еди́не Бла́же и Человеколю́бче.

Же́лчь у́бо и́же из ка́мене ме́д сса́вшии, в пусты́ни чудоде́йствовавшему Тебе́ принесо́ша, Христе́; о́цет же за ма́нну возблагодея́ние Ти́ возда́ша о́троцы Изра́илевы неблагода́рнии.

И́же дре́вле светови́дным о́блаком покрыва́еми, Живо́т во гро́бе Христа́ положи́ша, но самовла́стно воскре́с, все́м ве́рным подаде́ та́йно осеня́ющее свы́ше Ду́ха сия́ние.

Богоро́дичен: Ты́, Ма́ти Бо́жия, несочета́нно родила́ еси́, И́же от Нетле́нна Отца́ возсия́вшаго, кроме́ боле́зней ма́терних. Те́мже Тя́, Богоро́дицу, воплоще́нна бо родила́ еси́ Сло́ва, правосла́вно пропове́дуем.

И́н. Ирмо́с: Си́лою Креста́ Твоего́, Христе́:

Воскре́сл еси́ от гро́ба, Христе́, тли́ сме́ртныя изба́вль воспева́ющих, Жизнода́вче, во́льное Твое́ распя́тие.

Пома́зати ми́ром Те́ло Твое́ мироно́сицы, Христе́, тща́хуся, и не обре́тша возврати́шася, воспева́ющя Твое́ Воста́ние.

Богоро́дичен: Моли́ непреста́нно, Чи́стая, воплоще́ннаго из боку́ Твое́ю, изба́вити от ле́сти диа́воли, воспева́ющия Тя́, Де́ву Чи́стую.

И́н. Ирмо́с: Водрузи́вый на ничесо́мже:

Ле́ствица, Е́юже к на́м сни́де Вы́шний, истле́вшее естество́ испра́вити, Ты́ я́вственно, Чи́стая, все́м ны́не ви́дена была́ еси́, Тобо́ю бо Преблаги́й ми́рови причасти́тися благоволи́.

Е́же дре́вле предуста́вленное, Де́во, та́инство, и пре́жде ве́к прови́димое вся́ ве́дущему Бо́гу, ле́том ны́не напосле́док в ложесна́х Твои́х, Всенепоро́чная, коне́ц прие́м яви́ся.

Разреши́ся кля́твы дре́вния осужде́ние Твои́м хода́тайством, Де́во Пречи́стая: из Тебе́ бо Госпо́дь я́влься, все́м благослове́ние я́ко Преблаги́й источи́, Еди́на челове́ком удобре́ние.

Пе́снь 4

Ирмо́с: Боже́ственное Твое́ разуме́в истоща́ние, прозорли́во Авваку́м, Христе́, со тре́петом вопия́ше Тебе́: во спасе́ние люде́й Твои́х спасти́ пома́занныя Твоя́ прише́л еси́.

Я́же от Ме́рры горча́йшия во́ды, я́ко во о́бразе проначерта́я Пречи́стый Кре́ст Тво́й, Бла́же, грехо́вное умерщвля́ющ вкуше́ние, дре́вом услади́л еси́.

Кре́ст за дре́во разу́мное, за сла́дкую же пи́щу же́лчь, Спа́се мо́й, прия́л еси́, за тле́ние же сме́рти Кро́вь Твою́ Боже́ственную излия́л еси́.

Богоро́дичен: Кроме́ у́бо сочета́ния зачала́ еси́ нетле́нно во чре́ве, и без боле́зни родила́ еси́, и по Рождестве́ Де́ва, Бо́га пло́тию ро́ждши, сохрани́лася еси́.

И́н. Ирмо́с: Услы́шах слу́х си́лы Креста́:

Я́ко водрузи́ся на земли́ на Ло́бнем Кре́ст, сокруши́шася вереи́ и вра́тницы ве́чнии, и возопи́ша: сла́ва си́ле Твое́й, Го́споди.

Я́ко сни́де Спа́с к свя́занным я́ко ме́ртв, совоскресо́ша с Ни́м и́же от ве́ка уме́ршии, и возопи́ша: сла́ва си́ле Твое́й, Го́споди.

Богоро́дичен: Де́ва роди́, и ма́терских не позна́, но Ма́ти у́бо е́сть, Де́ва же пребы́сть. Ю́же воспева́юще, ра́дуйся, Богоро́дице, взыва́ем.

И́н. Ирмо́с: Боже́ственное Твое́:

Се́рдцем и умо́м, душе́ю же и усты́ испове́дую всеблагоче́стно Тя́ Богоро́дицу вои́стинну, Чи́стая, спасе́ния пло́д объе́мля, и спаса́юся, Де́во, моли́твами Твои́ми.

Созда́вый от не су́щих вся́ческая, от Тебе́, Чи́стыя, созда́тися я́ко Благоде́тель благоволи́, на спасе́ние ве́рою и любо́вию Тя́ пою́щих, Всенепоро́чная.

Пою́т Твое́ Рождество́, Всенепоро́чная, преми́рнии ли́цы, спасе́нию ра́дующеся, и́стинную Богоро́дицу му́дрствующих Тя́, Де́во Нескве́рная.

Тя́ Же́зл Иса́ия именова́, от Него́же прозябе́ на́м Кра́сный Цве́т, Христо́с Бо́г, на спасе́ние ве́рою и любо́вию притека́ющих к покро́ву Твоему́.

Пе́снь 5

Ирмо́с: Одея́йся све́том я́ко ри́зою, к Тебе́ у́тренюю, и Тебе́ зову́: ду́шу мою́ просвети́ омраче́нную, Христе́, я́ко Еди́н Благоутро́бен.

И́же сла́вы Госпо́дь в несла́вне зра́це, на Дре́ве обезче́щен во́лею ви́сит, о Боже́ственней мне́ сла́ве несказа́нно промышля́я.

Ты́ мя преобле́кл еси́ в нетле́ние, Христе́, тли́ сме́ртныя неистле́нно пло́тию вку́ш, и возсия́в из гро́ба тридне́вен.

Богоро́дичен: Ты́ пра́вду же и избавле́ние на́м ро́ждши Христа́ без се́мене, свобо́дно соде́яла еси́ от кля́твы, Богоро́дице, естество́ пра́отца.

И́н. Ирмо́с: У́тренююще вопие́м Ти́:

Просте́рл еси́ дла́ни, Спа́се на́ш, на дре́ве, вся́ призыва́я к Себе́, я́ко Человеколю́бец.

Плени́л еси́ а́д, Спа́се мо́й, Твои́м погребе́нием, и Твои́м Воскресе́нием ра́дости вся́ испо́лнил еси́.

Воскре́с от гро́ба тридне́вно, Жизнода́вче, и все́м источи́л еси́ безсме́ртие неги́блющее.

Богоро́дичен: Де́ву по Рождестве́ воспева́ем Тя́, Богоро́дице: Ты́ бо Бо́га Сло́ва пло́тию ми́рови родила́ еси́.

И́н. Ирмо́с: Одея́йся све́том:

Вси́ проро́цы Тя́ я́ве предвозвести́ша хотя́щую бы́ти Бо́жию Ма́терь, Богоро́дице Чи́стая: еди́на бо обрела́ся еси́, Чи́стая, соверше́нна, Непоро́чная.

Све́тел о́блак Тя́ живо́тныя воды́, на́м Ту́чу Нетле́ния, Христа́, одожди́вший отча́янным, Чи́стая, познава́ем.

Я́ко бли́з всю́ Тя до́бру и непоро́чну, запечатле́нну де́вством чи́сте возлюби́, в Тя́ Всели́выйся Бо́г, я́ко Еди́н Благоутро́бен.

Пе́снь 6

Ирмо́с: Неи́стовствующееся бу́рею душетле́нною, Влады́ко Христе́, страсте́й мо́ре укроти́, и от тли́ возведи́ мя я́ко Благоутро́бен.

В тле́ние попо́лзся родонача́льник, Влады́ко Христе́, преслу́шаннаго бра́шна вку́ш, и к животу́ возведе́н бы́сть Стра́стию Твое́ю.

Живо́т низше́л еси́ ко а́ду, Влады́ко Христе́, и тле́ние растле́вшему бы́в, тле́нием источи́л еси́ Воскресе́ние.

Богоро́дичен: Де́ва роди́, и ро́ждши пребы́сть чиста́, на руку́ нося́щаго вся́ческая, я́ко вои́стинну Де́ва Ма́ти поне́сшая.

И́н. Ирмо́с: Обы́де мя́ бе́здна:

Просте́рл еси́ дла́ни Твои́, собира́я дале́че расточе́нная язы́к Твои́х собра́ния, Христе́ Бо́же на́ш, живоно́сным Кресто́м Твои́м, я́ко Человеколю́бец.

Плени́л еси́ сме́рть, и врата́ а́дова сокруши́л еси́, Ада́м же свя́занный разреше́н бы́в, вопия́ше Тебе́: спасе́ мя десни́ца Твоя́, Го́споди.

Богоро́дичен: Купину́ Тя неопали́му, и го́ру и ле́ствицу одушевле́ну, и врата́ небе́сная досто́йно сла́вим, Мари́е сла́вная, правосла́вных похвало́.

И́н. Ирмо́с: Неи́стовствующееся бу́рею:

И́же всему́ Вино́вный, и е́же бы́ти все́м Пода́вый, я́ко вино́вну имя́ше воплоща́емь, е́же по на́м, Тя́, Богома́ти Всенепоро́чная.

Исцеле́ний, Влады́чице, душепита́тельный точа́щий исто́чник ве́рно притека́ющим к покро́ву Твоему́ благосла́вному, ве́мы Тя́, Всенепоро́чная.

Спасе́нию вино́вна Жизнода́вца родила́ еси́ на́м, ве́чное избавле́ние да́рующаго, и́стинную Богоро́дицу Тя́ пропове́дающим.

Конда́к, гла́с 5. Подо́бен: Собезнача́льное сло́во:

Ко а́ду, Спа́се мо́й, соше́л еси́, и врата́ сокруши́вый я́ко Всеси́лен, уме́рших я́ко Созда́тель совоскреси́л еси́, и сме́рти жа́ло сокруши́л еси́, и Ада́м от кля́твы изба́влен бы́сть, Человеколю́бче. Те́мже вси́ зове́м: спаси́ на́с, Го́споди.

И́кос: Услы́шавша жены́ А́нгеловы глаго́лы, отложи́ша рыда́ние, ра́достны бы́вша и тре́петны, у́жас бо ви́деша, и се́ Христо́с прибли́жися к ни́м, глаго́ля, е́же ра́дуйтеся, дерза́йте, Аз ми́ра победи́х, и у́зники свободи́х, потщи́теся у́бо ко ученико́м, возвеща́юща и́м, я́ко варя́ю вы́ во гра́де Галиле́йстем, е́же пропове́дати. Те́мже вси́ Тебе́ зове́м: спаси́ на́с, Го́споди.

Пе́снь 7

Ирмо́с: Превозноси́мый отце́в Госпо́дь пла́мень угаси́, о́троки ороси́, согла́сно пою́щия: Бо́же, благослове́н еси́.

Пло́тию обло́жся я́коже на у́дице льще́ния, Боже́ственною Твое́ю си́лою зми́я низвле́кл еси́ возводя́ вопию́щия: Бо́же, благослове́н еси́.

Земли́ непрохо́дное осуществова́вый составле́ние, во гро́бе покрыва́ется пло́тию Невмести́мый. Ему́же вси́ пое́м: Бо́же, благослове́н еси́.

Богоро́дичен: Еди́ну у́бо ипоста́сь во двою́ естеству́, Всенепоро́чная, родила́ еси́ Воплоще́ннаго Бо́га. Ему́же вси́ пое́м: Бо́же, благослове́н еси́.

И́н. Ирмо́с: В пещи́ о́гненней песносло́вцы:

И́же Дре́вом Кре́стным и́дольскую пре́лесть разреши́вый, благослове́н Бо́г оте́ц на́ших.

Воскресы́й из ме́ртвых, и су́щия во а́де совоздви́гнувый, благослове́н Бо́г оте́ц на́ших.

Твое́ю сме́ртию, Христе́, сме́ртную разо́рь держа́ву, благослове́н Бо́г оте́ц на́ших.

Богоро́дичен: И́же от Де́вы ро́ждся, и Богоро́дицу Сию́ показа́вый, благослове́н Бо́г оте́ц на́ших.

И́н. Ирмо́с: Превозноси́мый отце́в:

Неопределе́нный пребы́в Непрело́жен, пло́ти по ипоста́си соедини́ся, я́ко Благоутро́бен, в Тебе́ Пресвяте́й: И́же Еди́н благослове́н Бо́г оте́ц на́ших.

Неве́сту Тя́ Всенепоро́чную, Богоро́дице Влады́чице, согла́сно сла́вим и Престо́л Зижди́теля Твоего́. Ему́же вси́ пое́м: Бо́же, благослове́н еси́.

Ма́ти все́х Царя́, очи́щшися ду́хом Де́во, была́ еси́, Тебе́ Созда́вшаго. Ему́же вси́ пое́м: Бо́же, благослове́н еси́.

Спасе́ мя Госпо́дь, Богома́ти Пречи́стая, оде́ждею пло́ти из Тебе́ оде́явся. Ему́же вси́ пое́м: Бо́же, благослове́н еси́.

Пе́снь 8

Ирмо́с: Тебе́, Вседе́телю, в пещи́ о́троцы, всеми́рный ли́к спле́тше поя́ху: дела́ вся́кая, Го́спода по́йте, и превозноси́те во вся́ ве́ки.

Ты́ о во́льней спаси́тельныя стра́сти помоли́лся еси́ ча́ши, я́коже нево́льней: два́ хоте́ния, двема́ бо по коему́ждо но́сиши существо́ма, Христе́, во ве́ки.

Твои́м вседе́тельным схожде́нием, а́д, Христе́, пору́ганный изблева́ вся́, я́же дре́вле ле́стию умерщвле́нныя, Тебе́ превознося́щия во вся́ ве́ки.

Богоро́дичен: Тя́ я́же па́че ума́ богому́жне сло́вом Ро́ждшую Го́спода, и де́вствующую, вся́ дела́, Де́во, благослови́м, и превозно́сим во вся́ ве́ки.

И́н. Ирмо́с: Из Отца́ пре́жде ве́к:

И́же на Кресте́ во́лею дла́ни просте́ршаго, и у́зы сме́ртныя разруши́вшаго Христа́ Бо́га, свяще́нницы по́йте, лю́дие превозноси́те во вся́ ве́ки.

И́же я́ко Жениха́ из гро́ба возсия́вшаго Христа́ Бо́га, и мироно́сицам я́вльшагося, и ра́дость те́м провеща́вша, свяще́нницы по́йте, лю́дие превозноси́те во вся́ ве́ки.

Богоро́дичен: Херуви́м превы́шши яви́лася еси́, Богоро́дице Чи́стая, во чре́ве Твое́м, И́же на те́х носи́маго поне́сши. Его́же со Безпло́тными челове́цы славосло́вим во вся́ ве́ки.

И́н. Ирмо́с: Тебе́ Вседе́телю в пещи́:

Преста́ ны́не я́же пра́отчая печа́ль, ра́дость прие́мши Ти́ Богома́тери. Те́мже непреста́нно пое́м Тя́, Де́во, и превозно́сим во вся́ ве́ки.

Пое́т с на́ми Безпло́тных собо́р, Де́во, Рождество́ Твое́ непостижи́мое, еди́н ли́к соста́вльше любо́вию, и превознося́ще Его́ во ве́ки.

Струя́ прозра́чная безсме́ртия, Отрокови́це, из Тебе́ изы́де, И́же все́х Госпо́дь, скве́рну омыва́я ве́рою Тя́ пою́щих, и превознося́щих во вся́ ве́ки.

Боже́ственный вои́стинну, и светоно́сный Престо́л, и Скрижа́ли благода́ти испове́дуем Тя́, Сло́во, Де́во, О́тчее я́ко прие́мшую. Его́же превозно́сим во вся́ ве́ки.

Та́же, пое́м пе́снь Богоро́дицы: Вели́чит душа́ моя́ Го́спода: С припе́вом: Честне́йшую Херуви́м:

Пе́снь 9

Ирмо́с: Иса́ие лику́й, Де́ва име́ во чре́ве, и роди́ Сы́на Емману́ила, Бо́га же и Челове́ка, Восто́к и́мя Ему́. Его́же велича́юще, Де́ву ублажа́ем.

Па́дшаго челове́ка восприя́л еси́, Влады́ко Христе́, из ложе́сн деви́ческих всему́ совоку́плься, греху́ же ни еди́ному прича́щся, всего́ от истле́ния Ты́ свободи́л еси́ Пречи́стыми Твои́ми Страстьми́.

Богото́чною Кро́вию истоще́нною, Влады́ко Христе́, от Твои́х пречи́стых Ре́бр и животворя́щих, же́ртва у́бо преста́ и́дольская, вся́ же земля́ Тебе́ хвале́ния же́ртву прино́сит.

Богоро́дичен: Не Бо́га Безпло́тна, ниже́ па́ки челове́ка про́ста произведе́ Чи́стая Отрокови́ца, и Нескве́рная: но Челове́ка соверше́нна, и нело́жно соверше́нна Бо́га. Его́же велича́ем со Отце́м же и Ду́хом.

И́н. Ирмо́с: Тя́ па́че ума́:

Тебе́ И́же на Кресте́ Стра́сть подъе́мшаго, и а́дову си́лу сме́ртию сокруши́вшаго, ве́рнии правосла́вно велича́ем.

Тебе́ из гро́ба тридне́вно воскре́сша, и а́д плени́вшаго, и ми́р просвети́вшаго, ве́рнии единому́дренно велича́ем.

Богоро́дичен: Ра́дуйся, Богоро́дице, Ма́ти Христа́ Бо́га, Его́же родила́ еси́, моли́ прегреше́ний оставле́ние дарова́ти, ве́рою пою́щим Тя́.

И́н. Ирмо́с: Иса́ие, лику́й:

От чи́стых крове́й Твои́х усыри́ся пло́ть преесте́ственно все́х Соде́телю, Единоро́дному Сы́ну Роди́телеву, не от му́жа, без се́мене же у́мна и одушевле́нна, Богоро́дице Присноде́во.

Обходи́мое уста́вила еси́ сме́рти неудержи́мое стремле́ние, ро́ждши пло́тию вои́стинну па́че ума́ Жи́знь ве́чную. Е́йже прило́жся усты́ го́рькими а́д упраздни́ся, Пресвята́я Ма́ти Де́во.

На престо́ле седя́ Сы́н Тво́й Влады́чне, ря́сны Тя́ златы́ми боже́ственных доброде́телей све́т сия́ющу, одесну́ю поста́ви Себе́, Чи́стая, дая́ че́сть я́ко ма́тери Тебе́, Всенепоро́чная.

Па́че ума́ Рождество́ Твое́, Богома́ти: без му́жа бо зача́тие в Тебе́, и деви́чески рожде́ние бы́сть, и́бо Бо́г е́сть рожде́йся, Его́же велича́юще, Тя́, Де́во, ублажа́ем.

По катава́сии ектения́ ма́лая. Та́же, Свя́т Госпо́дь Бо́г на́ш. Ексапостила́рий у́тренний.

На хвали́тех стихи́ры воскре́сны, гла́с 5:

Сти́х: Сотвори́ти в ни́х су́д напи́сан, сла́ва сия́ бу́дет все́м преподо́бным Его́.

Го́споди, запеча́тану гро́бу от беззако́нников, проше́л еси́ из гро́ба, я́коже роди́лся еси́ от Богоро́дицы; не уразуме́ша, ка́ко воплоти́лся еси́, безпло́тнии Твои́ а́нгели; не чу́вствоваша, когда́ воскре́сл еси́, стрегу́щии Тя́ во́ини. Обоя́ бо запечатле́стася испыту́ющим, яви́шася же чудеса́ кла́няющимся ве́рою та́инству, е́же воспева́ющим, возда́ждь на́м ра́дость и ве́лию ми́лость.

Сти́х: Хвали́те Бо́га во святы́х Его́, хвали́те Его́ во утверже́нии си́лы Его́.

Го́споди, вереи́ ве́чныя сокруши́в, и у́зы растерза́в, от гро́ба воскре́сл еси́, оста́вль Твоя́ погреба́льная, во свиде́тельство и́стиннаго тридне́внаго Твоего́ погребе́ния, и предвари́л еси́ в Галиле́и, в пеще́ре стрего́мый. Ве́лия Твоя́ ми́лость, Непостижи́ме Спа́се, поми́луй и спаси́ на́с.

Сти́х: Хвали́те Его́ на си́лах Его́, хвали́те Его́ по мно́жеству вели́чествия Его́.

Го́споди, жены́ теко́ша на гро́б, ви́дети Тя́ Христа́ на́с ра́ди пострада́вшаго, и прише́дша, обрето́ша А́нгела на ка́мени седя́ща, стра́хом отва́льшемся, и к ни́м возопи́ глаго́ля: воскре́се Госпо́дь, рцы́те ученико́м, я́ко воскре́се от ме́ртвых, спаса́яй ду́ши на́ша.

Сти́х: Хвали́те Его́ во гла́се тру́бнем, хвали́те Его́ во псалти́ри и гу́слех.

Го́споди, я́коже изше́л еси́ от запеча́таннаго гро́ба, та́ко вше́л еси́ и две́рем заключе́ным ко ученико́м Твои́м, показу́я и́м теле́сная страда́ния, я́же подъя́л еси́, Спа́се Долготерпели́вый. Я́ко от се́мене Дави́дова я́звы претерпе́л еси́ – я́ко Сы́н же Бо́жий, ми́р свободи́л еси́. Ве́лия Твоя́ ми́лость, Непостижи́ме Спа́се, поми́луй и спаси́ на́с.

И́ны стихи́ры Анато́лиевы.

Сти́х: Хвали́те Его́ в тимпа́не и ли́це, хвали́те Его́ во стру́нах и орга́не.

Го́споди, Царю́ веко́в, и Тво́рче все́х, на́с ра́ди распя́тие и погребе́ние пло́тию прии́мый, да на́с от а́да свободи́ши все́х: Ты́ еси́ Бо́г на́ш, ра́зве Тебе́ ино́го не ве́мы.

Сти́х: Хвали́те Его́ в кимва́лех доброгла́сных, хвали́те Его́ в кимва́лех восклица́ния – вся́кое дыха́ние да хва́лит Го́спода.

Го́споди, пресия́ющая Твоя́ чудеса́ кто́ испове́сть? Или́ кто́ возвести́т стра́шная Твоя́ та́инства? Вочелове́чивыйся бо на́с ра́ди, я́ко Са́м восхоте́л еси́, держа́ву яви́л еси́ си́лы Твоея́: Кресто́м бо Твои́м разбо́йнику Ра́й отве́рзл еси́, и погребе́нием Твои́м вереи́ а́довы сокруши́л еси́, Воскресе́нием же Твои́м вся́ческая обогати́л еси́: Благоутро́бне, Го́споди, сла́ва Тебе́.

Сти́х: Воскресни́, Го́споди Бо́же мо́й, да вознесе́тся рука́ Твоя́, не забу́ди убо́гих Твои́х до конца́.

Мироно́сицы жены́ гро́ба Твоего́ дости́гша, зело́ ра́но иска́ху Тебе́ ми́ры пома́зати, Безсме́ртнаго Сло́ва и Бо́га; и А́нгела глаго́лы огласи́вшася, возвраща́хуся ра́достию, апо́столом возвести́ти я́ве, я́ко воскре́сл еси́, Животе́ все́х, и по́дал еси́ ми́рови очище́ние и ве́лию ми́лость.

Сти́х: Испове́мся Тебе́, Го́споди, все́м се́рдцем мои́м, пове́м вся́ чудеса́ Твоя́.

Богоприя́тнаго гро́ба ко иуде́ом стра́жие глаго́лаху: о, ва́шего суему́дреннаго сове́та! Стрещи́ Неопи́саннаго покуси́вшеся, всу́е труди́стеся, сокры́ти Воскресе́ние Распя́таго хотя́ще, я́сно показа́сте. О, ва́шего суему́дреннаго собо́рища! Что́ па́ки сокры́ти сове́туете, е́же не кры́ется? Па́че же от на́с услы́шите, и ве́ровати восхощи́те бы́вших и́стине. А́нгел молниено́сец с Небесе́ соше́д ка́мень отвали́, его́же стра́хом ме́ртвостию содержи́ми бы́хом, и возгласи́в крепкоу́мным мироно́сицам, глаго́лаше жена́м: не зрите́ ли страже́й умерщвле́ния, и печа́тей разреше́ния, а́дова же истоща́ния? Почто́ побе́ду а́дову Упраздни́вшаго, и сме́ртное жа́ло Сокруши́вшаго, я́ко ме́ртва взыску́ете? Благовести́те же ско́ро ше́дша апо́столом Воскресе́ние, без стра́ха зову́ща: вои́стинну воскре́се Госпо́дь, име́я ве́лию ми́лость.

Сла́ва: стихи́ра у́тренняя ева́нгельская. И ны́не: Преблагослове́нна еси́: Славосло́вие вели́кое.

Та́же, тропа́рь воскре́сен:

Дне́сь спасе́ние ми́ру бы́сть, пое́м Воскре́сшему из гро́ба, и Нача́льнику жи́зни на́шея: разруши́в бо сме́ртию сме́рть, побе́ду даде́ на́м, и ве́лию ми́лость.

Та́же, ектении́. И отпу́ст.

Разбо́йник на кресте́ Бо́га Тя́ бы́ти ве́ровав, Христе́, испове́да Тя́ чи́сте от се́рдца, помяни́ мя, Го́споди, вопия́, во Ца́рствии Твое́м.

Сти́х: Блаже́ни чи́стии се́рдцем, я́ко ти́и Бо́га у́зрят.

И́же на Дре́ве Кре́стнем жи́знь процве́тшаго ро́ду на́шему, и изсуши́вша ю́же от дре́ва кля́тву, я́ко Спа́са и Соде́теля согла́сно воспои́м.

Сти́х: Блаже́ни миротво́рцы, я́ко ти́и сы́нове Бо́жии нареку́тся.

Сме́ртию Твое́ю, Христе́, сме́ртную разруши́л еси́ си́лу, и совоздви́гл еси́ и́же от ве́ка уме́ршия, Тя́ пою́щия и́стиннаго Бо́га и Спа́са на́шего.

Сти́х: Блаже́ни и́згнани пра́вды ра́ди, я́ко те́х е́сть Ца́рство небе́сное.

На гро́б Тво́й, Христе́, прише́дша жены́ честны́я, иска́ху Тя́, Жизнода́вче, миропома́зати, и яви́ся и́м А́нгел вопия́: воскре́се Госпо́дь.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л, на вы́ лжу́ще Мене́ ра́ди.

Распе́ншу Ти ся, Христе́, посреде́ двою́ осужде́нною разбо́йнику, еди́н у́бо ху́ля Тя́, осужде́н бы́сть пра́ведне – други́й же испове́дая Тя́, в Ра́й всели́ся.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

Ко апо́столов ли́ку прише́дша жены́ честны́я, возопи́ша: Христо́с воскре́се, я́ко Влады́це и Соде́телю Тому́ поклони́мся.

Сла́ва: тро́ичен: Тро́ице Неразде́льная, Еди́нице Вседе́тельная и Всеси́льная, О́тче, Сы́не и Святы́й Ду́ше, Тебе́ пое́м и́стиннаго Бо́га и Спа́са на́шего.

И ны́не: Богоро́дичен: Ра́дуйся, одушевле́нный Хра́ме Бо́жий и Врата́ Непроходи́мая; ра́дуйся, неопали́мый и огнеобра́зный Престо́ле; ра́дуйся, Ма́ти Емману́ила, Христа́ Бо́га на́шего.

Проки́мен, гла́с 5: Ты́, Го́споди, сохрани́ши ны́, и соблюде́ши ны́ от ро́да сего́ и во ве́к. Сти́х: Спаси́ мя, Го́споди, я́ко оскуде́ преподо́бный.

Аллилу́ия: Ми́лости Твоя́, Го́споди, во ве́к воспою́, в ро́д и ро́д возвещу́ и́стину Твою́ усты́ мои́ми.Сти́х: Зане́ ре́кл еси́: в ве́к ми́лость сози́ждется, на Небесе́х угото́вится и́стина Твоя́.

на Го́споди, воззва́х, стихи́ры покая́нны, гла́с 5:

Подо́бен: Ра́дуйся по́стником:

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

Пла́чу и се́тую го́рце, смотря́я стра́шное Сло́ва воздая́ние, от де́л не имы́й отве́та и ма́ла проти́ву вине́, окая́нный. Те́мже молю́ся: пре́жде да́же не пости́гнет мя́ конца́ моего́ безме́стное, пре́жде пожа́тия сме́ртнаго, пре́жде Суда́ Стра́шнаго, пре́жде хотя́щу ми́ осужде́ние прия́ти, иде́же о́гнь негаси́мый, и тьма́ кроме́шняя, иде́же че́рвь, и скре́жет, и снеда́ет согреши́вшия, согреше́ний ми́ да́руй избавле́ние, Христе́ мо́й, и ве́лию ми́лость.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Зако́ны Твоя́ и писа́ния презре́в, за́поведи Твоя́ отверго́х окая́нный, Бо́же мо́й, Соде́телю мо́й, ка́ко избе́гну про́чее та́мошняго, Спа́се, муче́ния? Те́мже пре́жде конца́ моего́, Спа́се, проще́ние ми́ да́руй, сле́з ту́чу, и́стинное умиле́ние подая́, я́ко Бо́г Преблаги́й дале́че от мене́ отгоня́я полки́ бесо́вския, и́щущих низвести́ мя́ во а́дову про́пасть. Те́мже молю́ся Ти́, да не ру́ку Твою́ оты́меши от мене́ всемо́щную.

Сти́х: От стра́жи у́тренния до но́щи, о стра́жи у́тренния да упова́ет Изра́иль на Го́спода.

Увы́ мне́! Ка́ко омрачи́хся умо́м? Ка́ко удали́хся от Тебе́, и рабо́тах окая́нный греху́ и сла́сти пло́тстей себе́ всего́ стра́стный изда́х, жи́вшей во мне́ стра́стнем? И ны́не ожида́ю моего́ е́же от жития́ исхо́да, и хотя́щаго томле́ния бы́ти. Го́споди Преблаги́й, пода́ждь ми́ сле́зное покая́ние, и разреше́ние безчи́сленных прегреше́ний мои́х. Ве́рно Тя́ молю́, подаю́щаго ми́рови ве́лию ми́лость.

И́ны стихи́ры безпло́тным. Подо́бен то́йже.

Сти́х: Я́ко у Го́спода ми́лость, и мно́гое у Него́ избавле́ние: и То́й изба́вит Изра́иля от все́х беззако́ний его́.

Таи́нницы Богонача́лия честни́и, Трисве́тлаго и Единосу́щнаго Божества́, и́же пе́снь непреста́нно безпло́тными гла́сы и язы́ки о́гненными принося́ще, на́ша моле́ния и моли́твы принеси́те, я́же от усте́н скве́рных возсыла́ем, и оставле́ние прегреше́ний испроси́те: ве́сть бо не́мощь на́шу Оболки́йся в ню́, и ми́лостив сы́й естество́м, моле́ния прии́мет ва́ша о рабе́х согреши́вших быва́емая, подая́й ми́рови ве́лию ми́лость.

Сти́х: Хвали́те Го́спода вси́ язы́цы, похвали́те Его́ вси́ лю́дие.

Все́ а́нгельское мно́жество е́же Влады́це моему́ приближа́ющееся, и Того́ Боже́ственному престо́лу предстоя́щее со стра́хом, и исполня́еми неизрече́нным све́том, мене́ во тьме́ грехо́вней заблу́ждшаго наста́вите к све́ту спаси́тельному, повеле́нием Бо́га ще́драго, тьму́ отжени́те мра́чную и чужду́ю кова́рных бесо́в, заступле́нием и благода́тию ва́шею: не терпи́т бо све́та прише́ствию, но отгоня́ется.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

А́нгели све́тлии Бо́жии, предстоя́ще престо́лу благода́ти Боже́ственному, смире́ние су́щее и просвеще́ние и́стинное от Све́та Боже́ственнаго восприе́млюще, на́с назира́йте с Небе́с, человеколю́бцы, в бу́ри лю́тых держи́мых, и бе́дствующих, и во тьме́ спя́щих. Прииди́те у́бо, о арха́нгели! На́м в по́мощь, и сете́й изба́вите на́с злонача́льнаго врага́: к ва́шему бо кро́ву прибега́ем вси́, прехва́льнии.

Сла́ва, и ны́не: Богоро́дичен: Престо́л Херуви́мский вои́стинну, я́ко превы́шши а́нгел бы́вши, в Тя́ бо Боже́ственное Сло́во всели́ся, Чи́стая, на́ш о́браз обнови́ти хотя́; из Тебе́ проше́д Плотоно́сец я́ко Милосе́рд, Кре́ст и Стра́сть на́с ра́ди прия́т, и воскресе́ние я́ко Бо́г дарова́. Те́мже я́ко премени́вшую на́с осужде́ннаго естества́, Созда́телю ве́рою благодаря́ще мо́лимся, улучи́ти Твои́ми моли́твами прегреше́ний проще́ние, и ве́лию ми́лость.

Та́же, Све́те ти́хий: Проки́мен дне́ и Сподо́би, Го́споди, в ве́чер се́й:

На стихо́вне стихи́ры покая́нны, гла́с 5:

Го́споди, согреша́я не престаю́, человеколю́бия сподобля́емь не разуме́ю: одоле́й моему́ недоуме́нию, Еди́не Бла́же, и поми́луй мя́.

Сти́х: К Тебе́ возведо́х о́чи мои́ живу́щему на Небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дрит ны́.

Го́споди, и стра́ха Твоего́ бою́ся, и зло́е творя́ не престаю́. Кто́ на суди́щи судии́ не бои́тся? Или́ кто́ уврачева́тися хотя́, врача́ прогне́вает я́коже а́з? Долготерпели́ве Го́споди, на не́мощь мою́ умилосе́рдися, и поми́луй мя́.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих и уничиже́ния го́рдых.

О земны́х все́х неради́вше, и на му́ки му́жески дерзну́вше, блаже́нных наде́жд не погреши́сте, но Небе́сному Ца́рствию насле́дницы бы́сте, прехва́льнии му́ченицы. Иму́ще дерзнове́ние к человеколюби́вому Бо́гу, ми́ру умире́ние испроси́те, и душа́м на́шим ве́лию ми́лость.

Сла́ва, и ны́не: Богоро́дичен: Стра́шно и пресла́вно, и ве́лие та́инство, Невмести́мый во чре́ве вмести́ся, и Ма́ти по Рождестве́ па́ки пребы́сть де́вою: Бо́га бо роди́ из нея́ воплоще́нна. Тому́ возопии́м, Тому́ пе́снь рце́м, со а́нгелы воспева́юще: Свя́т еси́, Христе́ Бо́же, И́же на́с ра́ди вочелове́чивыйся, сла́ва Тебе́.

Та́же, Ны́не отпуща́еши раба́ Твоего́ Влады́ко: Трисвято́е по О́тче на́ш: Тропа́рь свято́му. Сла́ва, и ны́не: Богоро́дичен во гла́с тропаря́, ектения́, и отпу́ст.

Кано́н моле́бный Пресвяте́й Богоро́дице, гла́с 5:

Пе́снь 1

Ирмо́с: Коня́ и вса́дника в мо́ре Чермно́е, сокруша́яй бра́ни мы́шцею высо́кою Христо́с истрясе́, Изра́иля же спасе́, побе́дную пе́снь пою́ща.

Чу́до в Тебе́ соверша́ется, Де́во, вои́стинну ужа́сно, я́ко во утро́бе Твое́й ника́коже вмести́маго име́ла еси́, и несказа́нно родила́ еси́, Присноде́вою пребы́вши.

Одожди́ ми, Влады́чице, прегреше́ний оставле́ние, Я́же До́ждь Небе́сный прише́дший к Тебе́, неизглаго́ланно вмести́ла еси́, и Де́вою пребыла́ еси́ по Рождестве́ непости́жнем.

Сла́ва: Еди́на благослове́нная и Богора́дованная, Я́же Ра́дость челове́ком ро́ждшая неизрече́нную, печа́ли отыми́ души́ моея́ молю́ся, и возвесели́ се́рдце мое́.

И ны́не: Ве́сь жела́ние и сла́дость жи́зни, И́же от Тебе́ возсия́вый за премно́гую бла́гость, Де́во Пренепоро́чная. Его́же моли́ спасти́ мя́, непреста́нно ны́не Тя́ сла́вящаго.

Пе́снь 3

Ирмо́с: Водрузи́вый на ничесо́мже зе́млю повеле́нием Твои́м, и пове́сивый неодержи́мо тяготе́ющую, на недви́жимем, Христе́, ка́мени за́поведей Твои́х, Це́рковь Твою́ утверди́, Еди́не, Бла́же и Человеколю́бче.

Преидо́ша се́нем законотвори́мая: Законода́вца бо Христа́ родила́ еси́, Пречи́стая, благода́ть очище́ния и просвеще́ния на́м взако́нившаго, и от кля́твы изъе́мшаго, Де́во Всенепоро́чная.

Роди́ся от Тебе́, Чи́стая, Бо́г воплоща́емь, и пло́тию ви́ден бы́сть, И́же пре́жде неви́димый. Сего́ у́бо моли́ приле́жно, Отрокови́це, от ви́димых и неви́димых вра́г мя́ изба́вити, све́тло Тя́ сла́вящаго.

Сла́ва: Страсте́й мя́ лю́та обурева́ет волна́, лука́вых духо́в глубина́ одержи́т мя́, грехо́вная бу́ря смуща́ет ми́ се́рдце: Богороди́тельнице, Ты́ мя утверди́, све́тло Тя́ пою́щаго.

И ны́не: Боже́ственнаго Гаврии́ла чинонача́льника иму́ще, благогове́йно, е́же ра́дуйся, ве́рою приво́дим согла́сно, Неискусобра́чней Ма́тери Богоро́дице ве́рно. Е́юже бе́д же и скорбе́й, и неду́г избавля́емся.

Пе́снь 4

Ирмо́с: Боже́ственное Твое́ разуме́в истоща́ние, прозорли́во Авваку́м, Христе́, со тре́петом вопия́ше Тебе́: во спасе́ние люде́й Твои́х, спасти́ пома́занныя Твоя́ прише́л еси́.

Истка́вшая вну́трь от крове́й Твои́х деви́ческих, не́бо о́блаки, Де́во, Одева́юща оде́ждею нетле́ния, пре́жде ле́стию обнаже́ннаго мя́ облецы́.

Утро́ба Твоя́, Де́во, пала́та свята́ Царя́ и Бо́га несказа́нна бы́сть, в ню́же всели́вся, це́ркви на́с соде́ла.

Сла́ва: Уще́дри ще́дра су́щи преокая́нную мою́ ду́шу, Богороди́тельнице Всенепоро́чная, ю́же от страсте́й и греха́ лю́те очерне́вшую и оцепене́вшую.

И ны́не: Нетле́ннаго Ца́рства возсия́ла еси́, Ски́петро, от ко́рене Иессе́ова, и ражда́еши Отроча́ безму́жно, Чи́стая, Ада́мова и Дави́дова Бо́га, вку́пе и Зижди́теля и Го́спода.

Пе́снь 5

Ирмо́с: Одея́йся све́том я́ко ри́зою, к Тебе́ у́тренюю, и Тебе́ зову́: ду́шу мою́ просвети́ омраче́нную, Христе́, я́ко Еди́н Благоутро́бен.

Пребыва́еши по Рождестве́ Де́ва нетле́нна, истле́вших все́х челове́к к жи́зни приво́диши, и нетле́нием осиява́еши, Пренепоро́чная.

Но́во родила́ еси́ я́ко мла́дя, Пречи́стая, Предве́чнаго от Отца́ безле́тно возсия́вшаго, Его́же о ми́ре моли́, Богоневе́сто.

Сла́ва: Да обря́щу Тя́ помо́щницу, Де́во, изыма́ющу мя́ в ча́с пре́ния су́днаго, егда́ на Суди́щи предста́ну от Тебе́ Ро́ждшагося.

И ны́не: Вся́ Бли́жняя Моя́ до́бра, и непоро́чна от Лива́на, Де́во Богоневе́сто – Святы́м Ду́хом в Тебе́ проуве́деся воплоще́ние Сы́на Бо́жия.

Пе́снь 6

Ирмо́с: Неи́стовствующееся бу́рею душетле́нною, Влады́ко Христе́, страсте́й мо́ре укроти́, и от тли́ возведи́ мя, я́ко Благоутро́бен.

Неискусому́жно родила́ еси́, Богоро́дице, Емману́ила, на́ше смире́ние уще́дрившаго: те́мже приснодо́лжно Тя́ сла́вим.

Па́че ума́ Безле́тнаго, па́че сло́ва Зижди́теля Пресвята́я родила́ еси́, избавля́ющаго вся́кия тли́, Богоро́дицу Тя́ пою́щих.

Сла́ва: Блага́го ро́ждши Благоде́теля и Зижди́теля, Пресвята́я Влады́чице благолюби́вая, ду́шу мою́ озло́бленную ублажи́.

И ны́не: Но́вое Тебе́ похвале́ние, и дре́внее прино́сим, Всечи́стая: лу́чше бо не и́мамы к похвале́нию, ра́зве, ра́дуйся, е́же с Гаврии́лом Тебе́ воспева́ем.

Та́же, Го́споди, поми́луй, три́жды. Сла́ва, и ны́не:

Седа́лен, гла́с 5: Себе́ пре́жде суда́ ны́не пла́чу, помышля́я моя́ дела́ лука́вая и лю́тая, и прегреше́ний глубину́ одержа́щую мя́ от ю́ности, и подавля́ющу у́м: но Твои́м, Чи́стая, предста́нием, оставле́ние ми́ пода́ждь, и спасе́ние улучи́ти сподо́би.

Пе́снь 7

Ирмо́с: Превозноси́мый отце́в Госпо́дь, пла́мень угаси́, о́троки ороси́, согла́сно пою́щия: Бо́же, благослове́н еси́.

Изба́ви мя́, Пречи́стая, зла́го уны́ния, и страсте́й омраче́ния, и осужде́ния ве́чнующаго: я́ко да ве́рою Тя́ сла́влю.

Умертви́ стра́сти моя́, Я́же Жи́знь ро́ждшая; воздви́гни мя́, Богоневе́сто, лежа́щаго из гро́ба нечу́вствия, да любо́вию Тя́ сла́влю.

Сла́ва: Пло́тию обложе́на Бо́га безпло́тнаго, Пренепоро́чная, родила́ еси́, на́с избавля́ющаго, со стра́хом пою́щих: Бо́же, благослове́н еси́.

И ны́не: Исцеле́ние безме́здно, чи́стую Твою́ моли́тву обре́тше, Де́во, про́сим пою́ще, души́ благопремене́ния, и телеси́ здра́вия.

Пе́снь 8

Ирмо́с: Тебе́, Вседе́телю, в пещи́ о́троцы, всеми́рный ли́к спле́тше поя́ху: дела́ вся́кая, Го́спода по́йте, и превозноси́те во вся́ ве́ки.

Две́ре Све́та, покая́ния ми́ две́ри светоза́рныя отве́рзи, показу́ющи вся́к пра́вый пу́ть пра́вды, вводя́щ в Боже́ственныя во́ли вхо́ды.

Но́во на земли́ Де́во Ма́ти Отроча́, Отцу́ собезнача́льнаго Сы́на родила́ еси́, за милосе́рдие неизрече́нное уподо́бльшагося на́м, истле́вшим под грехо́м.

Сла́ва: Вся́ избра́нна, вся́ преукра́шенна, Бо́г Ю́же возлюби́, Ю́же избра́, яви́лася еси́, Де́во, при́сно Препросла́вленная. Те́мже Тя́ пое́м, Чи́стая, во ве́ки.

И ны́не: Вся́ Чи́стая, и Боже́ственныя сла́вы испо́лнена, Бли́жняя Моя́, рече́ Ду́х Бо́жий, Тя́ провозвеща́я, Пречи́стая, Ю́же пе́сньми воспева́ем пою́ще: Тебе́ подоба́ет ра́доватися Бо́га Челове́ка ро́ждшей.

Пе́снь 9

Ирмо́с: Иса́ие лику́й, Де́ва име́ во чре́ве, и роди́ Сы́на Емману́ила, Бо́га же и Челове́ка, Восто́к и́мя Ему́. Его́же велича́юще, Де́ву ублажа́ем.

Твои́х притека́телей, Всечи́стая, не отри́ни ны́не воздыха́ния, но воззри́ на ны́ су́щих в ско́рбех, пла́ч преложи́ на ра́дость, и умиле́ние в весе́лие, в пе́снех Тя́ пою́щих.

Основа́ние еси́ недви́жимо, Спа́са ро́ждши, Чи́стая, на вода́х зе́млю Боже́ственными веле́нии основа́вшаго, на не́мже на́с све́тло Тя́ блажа́щих утверди́ти моли́ся.

Сла́ва: Па́че ума́ Рождество́ Твое́, Богоро́дице, без му́жа бо зача́тие в Тебе́, и де́вственно Рождество́ Твое́ бы́сть, и́бо Бо́г е́сть Рожде́йся, Его́же велича́юще, ро́ждшую Тя́ ублажа́ем.

И ны́не: Стра́шен еси́, Го́споди, и кто́ у́бо тогда́ постои́т преще́ния Твоего́, Христе́, Еди́не Царю́, су́д творя́щу Ти́? Те́мже пощади́, и спаси́ мя, Спа́се, Ро́ждшия Тя́ благоприя́тными мольба́ми.

Та́же, Досто́йно е́сть: И про́чее обы́чно, и отпу́ст.

По 1-м стихосло́вии седа́льны покая́нны. Гла́с 5:

Судии́ седя́щу, и а́нгелом предстоя́щим, трубе́ глася́щей, и пла́мени горя́щу, что́ сотвори́ши, душе́ моя́, ведо́ма на су́д? Тогда́ бо лю́тая тебе́ предста́нут, и та́йная Твоя́ облича́тся согреше́ния. Те́мже пре́жде конца́ возопи́й Судии́: Бо́же, очи́сти мя́, и спаси́ мя.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Вси́ побди́м, и Христа́ усря́щим со мно́жеством еле́я, и свеща́ми све́тлыми, я́ко да черто́га вну́трь сподо́бимся. И́же бо вне́ двере́й обрета́яйся, безде́льно Бо́гови воззове́т: поми́луй мя́.

Сла́ва, и ны́не: Богоро́дичен: Святе́йши Херуви́м, и вы́шши Серафи́м, Пречи́стая, Богоро́дицу Тя́ вои́стинну испове́дающе, и́мамы гре́шнии Засту́пницу, и обрета́ем во вре́мя напа́стей спасе́ние. Те́мже не преста́й о на́с моля́щи, Держа́во и Прибе́жище душа́м на́шим.

По 2-м стихосло́вии, седа́льны, гла́с 5:

Душе́, я́же зде́ вре́менна, та́мошняя же ве́чна. Зрю́ Суди́ще и на престо́ле Судию́, и трепе́щу отве́та. Про́чее со тща́нием обрати́ся: су́д непроща́емь.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

На одре́ слежу́ согреше́ний мно́гих, окра́даемь е́смь в наде́жди спасе́ния моего́, и́бо со́н моея́ ле́ности хода́тайствует души́ мое́й му́ку. Но Ты́, Бо́же, рожде́йся от Де́вы, воздви́гни мя́ к Твоему́ пе́нию, да сла́влю Тя́.

Сти́х: Ди́вен Бо́г во святы́х Свои́х, Бо́г Изра́илев.

Му́ченичен: Сия́ет дне́сь страстоте́рпец па́мять, и́мать бо и от Небе́с зарю́: ли́к а́нгельский торжеству́ет, и челове́ческий ро́д спра́зднует. Те́мже мо́лятся Го́сподеви поми́ловатися душа́м на́шим.

Сла́ва, и ны́не: Богоро́дичен: Со а́нгелы небе́сная, с челове́ки земна́я, во гла́се ра́дования, Богоро́дице, вопие́м Ти́: ра́дуйся, Две́ре небе́с простра́ннейшая. Ра́дуйся, Еди́на земноро́дных спасе́ние. Ра́дуйся, Чи́стая, Обра́дованная, ро́ждшая Бо́га воплоще́нна.

По 3-м стихосло́вии, седа́лен, гла́с 5:

Подо́бен: Собезнача́льное сло́во:

Безслове́сными мя́ страстьми́ преклоне́ннаго, и блу́дно житие́ мое́ ижди́вша, призови́, Спа́се, я́коже блу́днаго, и приими́, и объя́тия оте́ческая за милосе́рдие щедро́т распростри́ ми, и моли́твами Безпло́тных дре́вней че́сти сподо́би.

Сла́ва, и ны́не: Богоро́дичен: Те́плая Предста́тельнице и непобеди́мая, упова́ние изве́стное и непосты́дное, стено́ и покро́ве и приста́нище прибега́ющим к Тебе́, Присноде́во Чи́стая, Сы́на Твоего́ и Бо́га моли́ со а́нгелы, умире́ние да́ти ми́рови, и спасе́ние, и ве́лию ми́лость.

Кано́н, [его́же краегране́сие си́це: Мно́го Ти́ согреши́вшаго уще́дри, Сло́ве.] Творе́ние ки́р Ио́сифа, гла́с 5

Пе́снь 1

Ирмо́с: Пои́м Го́сподеви, сотво́ршему ди́вная чудеса́ в Чермне́м мо́ри, пе́снь побе́дную, я́ко просла́вися.

Мно́гими лестьми́ извлеко́ма, и прельща́ема, Христе́, чу́ждаго, обрати́ и уще́дри мя́, я́ко Всеси́лен.

И́же глуха́го у́ши отве́рзый, Христе́, души́ моея́ огло́хнувшая ушеса́ отве́рзи, молю́ся. Я́ко да Твоя́ словеса́ внуша́ю.

Му́ченичен: Новоявле́нныя зве́зды су́ще, му́ченицы, Со́лнца Пра́веднаго Христа́, тьму́ отжени́те от серде́ц на́ших.

Му́ченичен: Разжже́нныя стре́лы Боже́ственными у́гльми Свята́го Ду́ха страда́льцы я́вльшеся, стре́лы сокруша́ют вся́ зми́евы.

Богоро́дичен: Две́ре Боже́ственныя сла́вы, покая́ния ми́ две́ри отве́рзи, и от вра́т а́довых исхити́, молю́ся, смире́нную мою́ ду́шу.

Други́й кано́н безпло́тным.Творе́ние Феофа́ново, [его́же краегране́сие: Пе́ние а́нгелом пя́тое.] Гла́с 5

Пе́снь 1

Ирмо́с: Коня́ и вса́дника в мо́ре Чермно́е, сокруша́яй бра́ни мы́шцею высо́кою, Христо́с истрясе́, Изра́иля же спасе́, побе́дную пе́снь пою́ща.

Таи́нницы Богонача́лия светода́тельнаго, и Того́ луча́ми первоявле́ннаго сия́юще, све́том просвети́ти ду́шу мою́, а́нгели, Влады́ку умоли́те. [Два́жды.]

Иму́ще дерзнове́ние, я́ко престо́лу высо́кому предстоя́ще вси́, благочести́вне пою́щих ва́с, бе́д изба́вите предста́телие чи́на Небе́снаго, о архистрати́зи!

Богоро́дичен: Разреши́ся кля́тва, и печа́ль преста́: благослове́нная бо и благода́тная, ве́рным Ра́дость возсия́, Благослове́ние все́м конце́м цветонося́щи – Христа́.

Пе́снь 3

Ирмо́с: Над язы́ки Бо́г воцари́ся, Бо́г седи́т на престо́ле святе́м Свое́м, и пое́м ему́ разу́мно я́ко Царю́ и Бо́гу.

Ты́, И́же ни еди́ному хотя́й поги́бнути, Благи́й Го́споди, погиба́ющаго уще́дри, и спаси́ мя, ма́нием, Всеще́дре, ми́лости Твоея́.

Я́же в ве́дении и не в ве́дении согреши́х к Тебе́, Христе́ Го́споди, вся́ ве́дящему прихожду́ и припа́даю Ти́, приими́ мя я́коже блу́днаго.

Му́ченичен: Да живу́щий гре́х умертвите́, му́ченицы, и ме́ртва врага́ пока́жете, о ме́ртвости теле́сней блаже́ннии неради́сте.

Му́ченичен: Испещре́ни страда́ньми, му́ченицы, и оде́ждами кро́вию оброще́нными украша́еми, все́х Царю́, венцено́сцы, предстоите́.

Богоро́дичен: Де́во Ма́ти, Я́же Бо́га вопло́щшая, гла́сы приими́ вопию́щих Ти́ всегда́, и изба́ви на́с от разли́чных обстоя́ний.

И́н. Ирмо́с: Водрузи́вый на ничесо́мже зе́млю повеле́нием Твои́м, и пове́сивый неодержи́мо тяготе́ющую, на недви́жимем Христе́, ка́мени за́поведей Твои́х, Це́рковь Твою́ утверди́, Еди́не Бла́же и Человеколю́бче.

И́же сло́вом ликова́ния Вы́шним Си́лам прему́дро составле́й, Твою́ бла́гость неисчетноси́льну показу́яй, си́х предста́тельствы Це́рковь Твою́ утверди́, Еди́не Бла́же и Человеколю́бче. [Два́жды.]

Украша́я неизрече́нною све́тлостию а́нгелы, Христе́, и те́ми утвержда́я Це́рковь Твою́, Милосе́рде, окая́нную мою́ ду́шу те́ми просвети́, молю́ся Ти́, Влады́ко, не помина́я мои́х безчи́сленных грехо́в.

Богоро́дичен: Ты́ Ма́ти Бо́га несочета́нно была́ еси́, безпло́тныя ли́ки просвеща́ющаго, еди́но Богонача́лие в трие́х пе́ти непреста́нно свяще́нствиих, и госпо́дьствиих, Пречи́стая Де́во Всепе́тая.

Пе́снь 4

Ирмо́с: Дела́ смотре́ния Твоего́, Го́споди, ужаси́ша проро́ка Авваку́ма: изше́л бо еси́ на спасе́ние люде́й Твои́х, спасти́ пома́занныя Твоя́ прише́л еси́.

Дела́, я́же в житии́ соверши́х, су́ть лука́ва и лю́та: от ни́хже, Христе́ Бо́же мо́й, изба́ви мя́, покая́ние и́скреннее подая́ ми.

Вся́ку за́поведь честну́ю уничижи́х, стра́х Тво́й отри́нух, Христе́, и бою́ся неизбе́жнаго Твоего́ Суди́ща, в не́мже да не осу́диши мене́, Благоутро́бне.

Му́ченичен: Реме́ньми отвсю́ду вои́стинну протяза́еми, и ра́нами изнуря́еми зе́льне, и ноготьми́ стру́жеми, Сло́ве, страда́льцы Твои́, ве́рою ра́довахуся.

Му́ченичен: Поколеба́ти ва́с, страда́льцы, от Боже́ственнаго стоя́ния, не возмо́же вся́чески лука́вый – те́мже мно́гим коле́блемым, до́блии утвержде́ние Боже́ственное показа́стеся.

Богоро́дичен: Воплоща́ется от чи́стых крове́й Твои́х Госпо́дь, покая́ние чту́щим Тя́ подава́я, Всепе́тая, Твои́м благи́м хода́тайством, я́ко Благоутро́бен, и Еди́н Человеколю́бец.

И́н. Ирмо́с: Боже́ственное Твое́ разуме́в истоща́ние, прозорли́во Авваку́м, Христе́, со тре́петом вопия́ше Тебе́: во спасе́ние люде́й твои́х, спасти́ пома́занныя Твоя́ прише́л еси́.

А́нгельския соста́вил еси́ све́тлости, богоде́тельными луча́ми благопода́тливе просвети́л еси́, я́ко си́лен в кре́пости, сло́во Твое́ испо́лнивый, Человеколю́бче. [Два́жды.]

Земна́я теле́с мудрова́ния отложи́м, ве́рнии, житию́ подо́бящеся безпло́тных чино́в, и у́м впери́м ду́хом.

Богоро́дичен: Бу́ди ми́, Предста́тельнице Пренепоро́чная, прибежище и приста́нище, страсте́й бу́рю отгоня́щи, Я́же а́нгельския ли́ки, добро́тою без сравне́ния побе́ждшая.

Пе́снь 5

Ирмо́с: Све́те и́стинный, Христе́ Бо́же, к Тебе́ у́тренюет ду́х мо́й от но́щи, яви́ на мя́ лице́ Твое́.

Воспряни́, о душе́, воспряни́ от сна́ тя́жкаго, моего́ лю́таго греха́, и покая́ния све́том озари́ся.

Обнови́м ду́шу прилежа́нием, и умиле́ния ту́чами напои́мся, я́ко да прозябе́м покая́ния кла́с.

Му́ченичен: У́гльми любве́ наостри́вшеся, небокова́ннии ме́чеве, страстоте́рпцы яви́стеся, враго́в ссеца́юще полки́.

Му́ченичен: Непорабоще́ни от врага́ бы́сте, порабо́тисте сего́, страстоте́рпцы, и бли́жнии Христу́ яви́стеся дру́зи.

Богоро́дичен: Де́во в жена́х благослове́нная, Твоя́ ми́лости пода́ждь лю́дем Твои́м: Ми́лостиваго бо яви́лася еси́ Ма́ти.

И́н. Ирмо́с: Одея́йся све́том, я́ко ри́зою, к Тебе́ у́тренюю, и Тебе́ зову́: ду́шу мою́ просвети́ омраче́нную, Христе́, я́ко Еди́н Благоутро́бен.

Обходя́ще всея́ земли́ концы́, Влады́чняя благодея́ния ве́рным прино́сите, и сохраня́ете, всесла́внии арха́нгели. [Два́жды.]

Словеси́ Твоему́ повину́ющеся, Сло́ве Бо́га и Отца́, Небе́снаго чинонача́лия сла́вная украше́ния, Твоея́ све́тлости све́том озаря́ются.

Богоро́дичен: Все́ мое́ жела́ние к Тебе́ предста́ви, я́же па́че сло́ва, жела́ния Сла́дость роди́вшая, Тебе́ Богоро́дицу, Чи́стая, ве́дущим.

Пе́снь 6

Ирмо́с: От ки́та проро́ка изба́вил еси́, мене́ же из глубины́ грехо́в возведи́, Го́споди, и спаси́ мя.

Не́сть в житии́ се́м греха́, его́же а́з еди́н не сотвори́х окая́нный, Еди́не Безгре́шне, уще́дри мя́.

Ве́трилом усе́рдия впери́мся, и ко приста́нищу спасе́ния покая́нием предвари́м вси́, я́ко да спасе́мся.

Му́ченичен: Пропове́дников, апо́столов и му́чеников страда́нием озаря́ется тва́рь. И́миже и на́с просвети́, Человеколю́бче.

Му́ченичен: Сосу́ды вмести́вшия Зарю́ Боже́ственную, и честна́я светоли́тия му́ченики вси́ почти́м.

Богоро́дичен: Де́во, ве́рным Предста́тельнице, изба́витися от вся́каго греха́ рабо́м Твои́м моли́ Го́спода.

И́н. Ирмо́с: Неи́стовствующееся бу́рею душетле́нною, Влады́ко Христе́, страсте́й мо́ре укроти́, и от тли́ возведи́ мя, я́ко Благоутро́бен.

Священноукраша́еми а́нгельстии собо́ри избра́ннии, светода́тельными сия́нии просвеща́етеся, богоде́тельным озаре́нием я́ве соверша́еми. [Два́жды.]

Трисве́тлыми заря́ми бога́тно преукраша́еми а́нгели и арха́нгели, богозра́чно окая́нную мою́ ду́шу просвети́те ва́шими моли́твами.

Богоро́дичен: Зачала́ еси́, Пречи́стая, все́х Зижди́теля и Бо́га, Его́же с тре́петом зря́т ра́дующеся, всеблагогове́йно предстоя́ще а́нгели.

Пе́снь 7

Ирмо́с: Благослове́н еси́ Бо́же, ви́дяй бе́здны, и на престо́ле сла́вы седя́й, препе́тый и пресла́вный.

Благослове́н еси́, Бо́же, И́же за благоутро́бие ка́ющихся все́х прие́мля, препе́тый и пресла́вный.

Исцели́, благоутро́бне Христе́, мно́гия моя́ стра́сти, И́же мое́ све́дый неможе́ние, препе́тый и пресла́вный.

Му́ченичен: Си́лою Боже́ственною укрепи́ся ли́к страстоте́рпец, враги́ победи́ вопия́: препе́тый и превозноси́мый во ве́ки.

Му́ченичен: Укрепи́вый прему́дрыя страстоте́рпцы, Сло́ве, претерпе́ти многоплете́нныя му́ки, моли́твами и́х уще́дри все́х.

Богоро́дичен: Благослове́н еси́, Бо́же, И́же во чре́во Деви́че всели́вся, и спа́сл челове́ка, препе́тый и превозноси́мый во ве́ки.

И́н. Ирмо́с: Превозноси́мый отце́в Госпо́дь пла́мень угаси́, о́троки ороси́ согла́сно пою́щия: Бо́же, благослове́н еси́.

Неисчетноси́льную Христо́с явля́я кре́пость, ва́с, архистрати́зи, поста́вил е́сть, научи́ воспева́ти: Бо́же, благослове́н еси́. [Два́жды.]

И́же мно́жество безчи́сленное безпло́тных чино́в украша́яй бла́гостию, ве́рных составле́ния сподо́би пе́ти Тя́: Бо́же, благослове́н еси́.

Богоро́дичен: Страстьми́ коле́блема, Де́во, Ты́ ны́не утверди́ мя, Я́же все́м источи́вшая ве́рным безстра́стие, ве́рою пою́щим: Бо́же, благослове́н еси́.

Пе́снь 8

Ирмо́с: Творца́ тва́ри, Его́же ужаса́ются а́нгели, по́йте лю́дие, и превозноси́те во вся́ ве́ки.

Ме́ртва преступле́нием бы́вша мя́, Го́споди, оживи́, да Тя́ сла́влю во вся́ ве́ки.

Просвети́в мя́ покая́нием, тьмы́ грехо́вныя изба́ви, Го́споди, да Тя́ сла́влю во вся́ ве́ки.

Му́ченичен: Страстоте́рпцы му́ченицы, пла́мень пре́лести попра́ша, ро́су с Небесе́ прие́мше пресла́вно.

Му́ченичен: Я́коже земля́ ту́чная, святи́и, кла́с вои́стинну стори́чествующ, подвигополо́жнику Христу́ плодоноси́сте.

Богоро́дичен: Из Тебе́ Бо́г возсия́, Всепе́тая Де́во, и богоразу́мием просвети́ омраче́нныя.

И́н. Ирмо́с: Тебе́, Вседе́телю, в пещи́ о́троцы, всеми́рный ли́к спле́тше поя́ху: дела́ вся́кая, Го́спода по́йте, и превозноси́те во вся́ ве́ки.

Привлача́т мя́ ны́не а́нгельстии собо́ри, пе́ти пе́сньми и серде́чным жела́нием, с ни́миже пою́: дела́ вся́кая, Го́спода по́йте, и превозноси́те Его́ во ве́ки. [Два́жды.]

Слуги́ Пресвяте́й и Трисо́лнечней Зари́, спасти́ся моли́те ве́рою пою́щим: Го́спода воспева́йте, дела́, и превозноси́те Его́ во ве́ки.

Богоро́дичен: Две́ри Све́та, Де́во Ма́ти Отрокови́це, све́том Твои́м озари́ ве́рою пою́щих: Го́спода воспева́йте, дела́, и превозноси́те Его́ во ве́ки.

Пе́снь 9

Ирмо́с: Тя́ блаже́нную в жена́х, и благослове́нную Бо́гом, челове́ческий ро́д, пе́сньми велича́ем.

Ми́лостив бу́ди ми́, Го́споди, без числа́ безу́мно согреши́вшему, и Твоего́ Ца́рствия, Сло́ве, сподо́би мя́.

Я́коже ниневи́тяны спа́сл еси́ дре́вле пока́явшияся, Еди́не Спа́се, и на́с пою́щих Тя́ спаси́ ми́лостию Твое́ю.

Му́ченичен: Пло́ть преда́вше вся́ческим я́звам, неуя́звлену спасли́ есте́ ду́шу, страстоте́рпцы Госпо́дни, Боже́ственныя сла́вы прича́стницы.

Му́ченичен: Днесия́тельныя зве́зды, на земли́ все́х озаря́ющи ду́ши, страстоно́сцы, все́х Го́спода яви́стеся.

Богоро́дичен: Но́сиши я́коже престо́л о́гненный ма́нием вся́ Нося́щаго, и сосце́ма пита́еши, Де́во, все́х Пита́ющаго.

И́н. Ирмо́с: Иса́ие лику́й, Де́ва име́ во чре́ве, и роди́ Сы́на Емману́ила, Бо́га же и Челове́ка, Восто́к и́мя Ему́. Его́же велича́юще, Де́ву ублажа́ем.

Чино́м нача́льницы бы́вше а́нгельским, пресве́тлый Михаи́ле, и ты́ Гаврии́ле, Боже́ственнаго Воплоще́ния всеи́стинный пропове́дник бы́в, все́х сохраня́йте пою́щих ва́с, сла́внии. [Два́жды.]

И́же бога́тыми дарова́ньми преизлива́яй своя́ сокро́вища, И́же чи́ны приведы́й а́нгельския, с ни́ми же прише́д я́ко Судия́, и все́х Ца́рь, спаси́ мя, Влады́ко, прибега́ющаго к ми́лости Твое́й.

Богоро́дичен: У́мне А́рха́нгели, Вла́сти, Престо́ли, Херуви́ми, Си́лы и Серафи́ми, А́нгели све́тлии, Нача́ла и Госпо́дьствия, Твоему́ Сы́ну, Пренепоро́чная Чи́стая, с тре́петом слу́жат, Богоро́дице Всеблаже́нная.

На стихо́вне стихи́ры покая́нны, гла́с 5:

Мно́жества прегреше́ний мои́х пре́зри, Го́споди, И́же от Де́вы рожде́йся, и вся́ очи́сти грехи́ моя́, мы́сль мне́ подая́ обраще́ния, я́ко Еди́н Человеколю́бец, молю́ся, и поми́луй мя́.

Сти́х: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся: во вся́ дни́ на́ша возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я. И при́зри на рабы́ Твоя́, и на дела́ Твоя́, и наста́ви сы́ны и́х.

Увы́ мне́, кому́ уподо́бихся а́з? Непло́дней смоко́внице. И бою́ся прокля́тия с посече́нием. Но, Небе́сный Де́лателю, Христе́ Бо́же, олядене́вшую ду́шу мою́ плодоно́сну покажи́, и я́ко блу́днаго сы́на приими́ мя, и поми́луй мя́.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Благослове́но во́инство Небе́снаго Царя́: а́ще бо и земноро́днии бе́ша страстоте́рпцы, но а́нгельское досто́инство потща́шеся дости́гнути, о телесе́х неради́ша, и страда́ньми Безпло́тных сподо́бишася че́сти. Те́мже моли́твами и́х, Го́споди, низпосли́ на́м ве́лию ми́лость.

Сла́ва, и ны́не: Богоро́дичен: Обра́дованная, хода́тайствуй Твои́ми моли́твами, и испроси́ душа́м на́шим мно́жество щедро́т, и очище́ние мно́гих прегреше́ний, мо́лимся.

Та́же, Бла́го е́сть испове́датися Го́сподеви: Трисвято́е по О́тче на́ш: Тропа́рь свято́му, а́ще и́мать; а́ще ли ни́, глаго́лем тропа́рь дне́. Та́же ектения́, и ча́с 1, и про́чее обы́чно. И отпу́ст.

Разбо́йник на Кресте́ Бо́га Тя́ бы́ти ве́ровав, Христе́, испове́да Тя́ чи́сте от се́рдца, помяни́ мя, Го́споди, вопия́, во Ца́рствии Твое́м.

Сти́х: Блаже́ни и́згнани пра́вды ра́ди, я́ко те́х е́сть Ца́рство Небе́сное.

Душетле́ннии разбо́йницы, на пути́ жите́йстем сре́тше уязви́ша мя́: но к Твоему́ благоутро́бию ны́не притека́ю, исцели́, Христе́, и спаси́ мя, молю́ся.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́ лжу́ще Мене́ ра́ди.

Небе́снии ли́цы песносло́вят Тя́ все́х Бо́га: те́х, Влады́ко, свяще́нными хода́тайствы, мно́гая ми́ пре́зри зла́я, и спаси́ мя, молю́ся.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

А́нгельским лико́м сочисля́еми, Христо́вы страда́льцы, и исполня́еми просвеще́ния невече́рняго, смра́дныя стра́сти се́рдца моего́ потреби́те.

Сла́ва: А́нгельски земноро́днии, в вы́шних пое́мому Бо́гу, воспои́м трисвяту́ю пе́снь: Свя́т еси́, Пребезнача́льне О́тче, Сы́не со Ду́хом.

И ны́не: Я́же А́нгелом ра́дость во Твое́й утро́бе восприе́мши чи́стая, се́тующую лука́выми де́лы, ду́шу мою́ испо́лни ра́дости, к све́ту наставля́ющи мя́.

на Го́споди, воззва́х, стихи́ры покая́нны, гла́с 5:

Подо́бен: Ра́дуйся по́стником:

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

Увы́ мне́ прогне́вавшему Тя́, ми́лостиваго Бо́га моего́ и Го́спода! Коли́жды обеща́хся пока́ятися, Христе́, и ло́ж обрето́хся несмы́сленный! Пе́рвую у́бо креще́ния окаля́х оде́жду, заве́т же мо́й, и́же к Тебе́, оста́вих; и второ́е сие́ па́ки завеща́ние, е́же испове́дах Ти́ пред а́нгелы и челове́ки, о́бразом плаче́вным оде́ян, его́же отложи́в про́чее, Спа́се, до конца́ не оста́ви мене́ поги́бнути.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Кото́рый отве́т, душе́ окая́нная, обря́щеши в Де́нь Су́дный? Или́ кто́ тя осужде́ния огня́ ве́чнаго, и про́чих муче́ний изба́вит? Никто́же, а́ще не ты́ сама́ уми́лостивиши Благоутро́бнаго, зла́я твоя́ оста́вльши дея́ния, и благоуго́дно стяжа́вши житие́, пла́чущи на вся́к де́нь твои́х безме́рных согреше́ний, я́же на вся́к ча́с согреша́еши де́лом, и сло́вом, и помышле́нием, Христа́ моля́щи, пода́ти тебе́ соверше́нное си́х проще́ние.

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Да не содержи́т мене́, Спа́се, грехо́вный обы́чай влеки́й, ниже́ да облада́ет мно́ю бе́с, при́сно боря́, и низводя́ к во́ли свое́й. Но исхити́ мя того́ влады́чествия, кре́пкою Твое́ю руко́ю, Всеси́льне, и воцари́ся во мне́ Ты́, Человеколю́бче. Всего́ же Твоего́ бы́ти мя́ сподо́би, и жи́ти по во́ли Твое́й, Сло́ве, име́ти поко́й в Тебе́, и обрести́ ми очище́ние и спасе́ние и ве́лию ми́лость.

И́ны стихи́ры Предте́чи, гла́с и подо́бен то́йже.

Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.

Всего́ прекло́ншася в зе́млю, и сокруши́вшася неисце́льно уврачу́й, Предте́че Христо́в и му́чениче, прибега́ющаго ве́рою в боже́ственный покро́в тво́й, блаже́нне; те́мже и Дне́ Стра́шнаго мя́ исхити́, во́ньже хощу́ пред суди́щем ста́ти, и му́кам отда́тися, молю́ся Ти́, та́мошняго стоя́ния изба́ви мя́ тогда́, я́ко имы́й дерзнове́ние непосты́дно, му́дре, моля́ Подаю́щаго ми́рови ве́лию ми́лость.

Сти́х: Хвали́те Го́спода вси́ язы́цы, похвали́те Его́ вси́ лю́дие.

Свети́льник Ты́ Со́лнца, му́дре, сы́й, Предте́че Христо́в, пресве́тлейший, во тьму́ низпа́дшуся безме́рных зо́л, облиста́й ми́ зарю́ све́та, молю́ Тя, и воздви́гни из ро́ва грехо́внаго, наставля́я мя́ гла́сом Твои́м сла́дким, и́же отцу́ дре́вле гла́с разреши́вый рождество́м твои́м, ны́не мо́й испра́ви гла́с, молю́ Тя, я́ко да ве́рою и любо́вию славосло́влю Человеколю́бца Бо́га и Спа́са, подаю́щаго ми́рови ве́лию ми́лость.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Боже́ственный хра́м бы́л еси́ Бо́га Живода́вца все́х, блаже́нне проро́че, и Предте́че, и пропове́дниче, живу́щаго име́л еси́ в се́рдцы, Его́же моли́ при́сно во святы́й тво́й хра́м прибега́ющих, и тебе́ чту́щих, Иоа́нне пребога́те, хра́мы Ду́ха бы́ти, мо́лимся, и к Бо́гу прибли́житися. Я́ко да твое́ почита́ем в пе́снех заступле́ние, и те́плую моли́тву, от Него́же бо́льши все́х челове́к свиде́тельствовался еси́, досточу́дне.

Сла́ва, и ны́не: Богоро́дичен: Ве́сь от младе́нства яви́хся, грехи́ неосла́бно де́лая: уязви́хся лю́те умо́м, и обы́чаем мно́гим в не́м пребы́в любо́вию. И ны́не се́туя пла́чу лю́тыя моея́ пре́лести, и зла́го обы́чая и безу́мия, и души́ моея́ поги́бели. Влады́чице, не пре́зри мене́ зле́ погиба́ющаго, но уще́дривши, вся́каго нахожде́ния и страсте́й изба́ви Твои́м заступле́нием, я́ко да поне́ на ста́рость пока́юся Бо́гу.

Та́же, Све́те ти́хий: Посе́м проки́мен, и ектения́. Та́же, Сподо́би, Го́споди, в ве́чер се́й:

На стихо́вне стихи́ры покая́нны. Гла́с 5:

Го́споди, согреша́я не престаю́, человеколю́бию сподобля́емь не разуме́ю: одоле́й моему́ недоуме́нию, Еди́ный Бла́же, и поми́луй мя́.

Сти́х: К тебе́ возведо́х о́чи мои́ живу́щему на Небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дрит ны́.

Го́споди, стра́ха Твоего́ бою́ся, и зло́ творя́ не престаю́. Кто́ на суди́щи судии́ не бои́тся? Или́ кто́ исцели́тися хотя́, врача́ прогне́вает, я́коже а́з? Долготерпели́ве Го́споди, на не́мощь мою́ умилосе́рдися, и поми́луй мя́.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих, и уничиже́ния го́рдых.

Му́ченичен: Щито́м ве́ры обо́лкшеся, и о́бразом Кре́стным себе́ укре́пльше, к му́кам му́жески вда́шася, и диа́волю горды́ню и ле́сть низложи́ша святи́и Твои́, Го́споди. Те́х мольба́ми я́ко всеси́лен Бо́г, ми́рови ми́р низпосли́, и душа́м на́шим ве́лию ми́лость.

Сла́ва, и ны́не: Богоро́дичен: Утоли́ боле́зни многовоздыха́ющия души́ моея́, утоли́вшая вся́ку сле́зу от лица́ земли́. Ты́ бо челове́ком боле́зни отгоня́еши, и гре́шных ско́рби разруша́еши: Тебе́ бо вси́ стяжа́хом наде́жду и утвержде́ние, Пресвята́я Ма́ти Де́во.

Та́же, Ны́не отпуща́еши раба́ Твоего́, Влады́ко: Трисвято́е по О́тче на́ш: Тропа́рь свято́му. Сла́ва, и ны́не: Богоро́дичен во гла́с тропаря́. Посе́м, ектения́, и отпу́ст.

Кано́н Пресвяте́й Богоро́дице, гла́с 5:

Пе́снь 1

Ирмо́с: Коня́ и вса́дника в мо́ре Чермно́е, сокруша́яй бра́ни мы́шцею высо́кою, Христо́с истрясе́, Изра́иля же спасе́ побе́дную пе́снь пою́ща.

Припе́в: Пресвята́я Богоро́дице, спаси́ на́с.

Ду́х сокруше́н пода́ждь ми́, Блага́я, смире́ние се́рдцу, уму́ же чистоту́, и житию́ исправле́ние, и прегреше́ний оставле́ние, и сле́з исто́чники, Пренепоро́чная.

Ви́ждь мою́ беду́ и умиле́ние, и дре́вних прегреше́ний исцели́ стру́пы, и вре́мя ми́ покая́ния да́руй и грехо́в испове́дание.

Сла́ва: Себе́ пла́чу пре́жде исхо́да моего́, помышля́я зо́л мои́х бе́здну, Всенепоро́чная. Те́мже молю́ся Ти́: Сы́на Твоего́ умоли́, изба́вити мя́ му́ки.

И ны́не: Иму́щи покая́ния вре́мя, отступи́ от вся́кия зло́бы, душе́ моя́, и Зижди́телю Твоему́ со слеза́ми возопи́й: Бо́же мо́й, спаси́ мя мольба́ми Ро́ждшия Тя́.

Пе́снь 3

Ирмо́с: Водрузи́вый на ничесо́мже зе́млю повеле́нием Твои́м, и пове́сивый неодержи́мо тяготе́ющую, на недви́жимем, Христе́, ка́мени за́поведей твои́х, Це́рковь Твою́ утверди́, Еди́не Бла́же и Человеколю́бче.

Страсте́й мои́х нача́льницы объя́ша мя́, Пречи́стая, и е́же по о́бразу и по подо́бию сотворе́ннаго мя́ Бо́жию испо́лниша студа́: но си́х вре́да изба́ви мя́, во умиле́нии пою́щаго Тя́.

Лука́вно вра́г улови́ти мя́ тщи́тся, ве́чнующаго пла́мене попале́ние показа́ти мя́ хотя́, Пречи́стая: но сего́ кова́рствия и сове́ты разори́, да Тя́ сла́влю ра́дуяся.

Сла́ва: В ро́в преиспо́дний льсти́вно мя́ положи́ша мно́гих согреше́ний врази́ пра́ведных: я́ко безпомо́щен же ны́не, и уя́звлен ве́сь, призыва́ю моли́тву Твою́, Влады́чице Пренепоро́чная, спаси́ мя.

И ны́не: В ле́ности жи́знь ижди́х окая́нный, ны́не к сме́ртным две́рем прибли́жихся, и вра́жиих наве́т ужаса́яся, вопию́ Ти: искуше́ний си́х изба́ви мя́, да Тя́ сла́влю спаса́емь.

Пе́снь 4

Ирмо́с: Боже́ственное Твое́ разуме́в истоща́ние, прозорли́во Авваку́м, Христе́, со тре́петом вопия́ше Тебе́: во спасе́ние люде́й Твои́х, спасти́ пома́занныя Твоя́ прише́л еси́.

Уязви́хся стрела́ми грехо́вными, и всего́ телесе́ ра́ну ны́не обношу́. Те́мже зову́ Ти, Пречи́стая: Твои́х моли́тв ско́ростию я́звы души́ моея́ исцели́.

Поми́луй, Чи́стая, рабы́ Твоя́: Тебе́ бо хода́таицу к Бо́гу стяжа́хом, и мо́лимся изба́витися вся́кия ну́жды и ве́чнующаго муче́ния.

Сла́ва: Наде́жда и щи́т и утвержде́ние Ты́ мне́ еси́, Блага́я, и лю́тых избавле́ние, и просвеще́ние души́ мое́й, и хвала́, и стена́, и держа́ва.

И ны́не: Блу́дно расточи́х бога́тство до́брых де́л, е́же ми́ Христо́с я́ко Бла́г дарова́: да не пре́зриши у́бо мене́, Пречи́стая Отрокови́це, гла́дом погиба́ющаго.

Пе́снь 5

Ирмо́с: Одея́йся све́том, я́ко ри́зою, к Тебе́ у́тренюю, и Тебе́ зову́: ду́шу мою́ просвети́ омраче́нную, Христе́, я́ко Еди́н Благоутро́бен.

Ви́ждь, Влады́чице, не́мощь смире́нныя моея́ души́, и пло́ти моея́ изнеможе́ние, и ума́ моего́ плене́ние, и ненаде́жнаго спаси́ мя.

Бо́га, Его́же родила́ еси́, моли́ всегда́, спасти́ все́х на́с, Богоро́дицу Тя́ испове́дующих, и славосло́вящих Рождество́ Твое́, Пречи́стая.

Сла́ва: Кто́ не блажи́т Тебе́ Всенепоро́чную? Творца́ бо всего́ ми́ра Спа́са Христа́ и Еди́наго Влады́ку несказа́нно родила́ еси́.

И ны́не: Струи́ мне́ низпосли́ сле́з, Пречи́стая, и́миже скве́рны и вра́ски грехо́в мои́х омы́в, пою́ мно́жество Твоея́ бла́гости.

Пе́снь 6

Ирмо́с: Неи́стовствующееся бу́рею душетле́нною, Влады́ко Христе́, страсте́й мо́ре укроти́, и от тли́ возведи́ мя, я́ко Благоутро́бен.

Во глубину́ вверго́хся прегреше́ний и беззако́ний: но простри́ ру́ку Твою́, Всенепоро́чная, и от а́да возведи́ мя неча́яния.

Мно́жество ве́си согреше́ний, и по́мысл смуща́ющих мя́: те́мже ускори́, и изба́ви мя́ си́х, Пречи́стая.

Сла́ва: Пощади́ мя раба́ Твоего́, Влады́ко Христе́, мольба́ми чи́сто Ро́ждшия Тя́, егда́ хо́щеши суди́ти ми́ру, его́же созда́л еси́.

И ны́не: Во глубину́ низвлече́ся прегреше́ний, Влады́чице Чи́стая, душа́ моя́, сне́дь бы́вши бесо́м: те́мже ненаде́жно спаси́ мя.

Го́споди, поми́луй, три́жды. Сла́ва, и ны́не:

Седа́лен, гла́с 5: Подо́бен: Собезнача́льное сло́во:

Души́ моея́ стра́сти многоболе́зненныя, и пло́ти моея́ неду́ги вско́ре исцели́, ума́ моего́ блуже́ния уста́ви, Пренепоро́чная, и в тишине́ по́мысла моли́твы принести́ чи́сты Царю́ вся́ческим, сподо́би, Богоро́дице, и испроси́ти согреше́ний оставле́ние.

Пе́снь 7

Ирмо́с: Превозноси́мый отце́в Госпо́дь пла́мень угаси́, о́троки ороси́ согла́сно пою́щия: Бо́же, благослове́н еси́.

Егда́ прииму́ во у́м мо́й безме́стных мои́х дея́ний мно́жество прегреше́ний, Всенепоро́чная, бою́ся и ужаса́юся: от ни́хже мя́ твои́ми моли́твами свободи́, Де́во.

Че́рвь неусы́пный, и о́гнь неугаси́мый, истаява́ет мя́ всегда́, и снеда́ет мою́ ду́шу, да не прииму́ си́х иску́са, Пресвята́я Богоро́дице.

Сла́ва: Тьмы́ кроме́шныя, и стра́шнаго муче́ния, раба́ Твоего́ изба́ви мя́, Де́во Всенепоро́чная, вопию́ща Сы́ну Твоему́: Бо́же, благослове́н еси́.

И ны́не: Пло́ть у́бо оскверни́х сра́мными страстьми́, у́м же помрачи́х скве́рными мы́сльми: но уще́дри, Чи́стая, и спаси́ мя, непотре́бнаго раба́ Твоего́.

Пе́снь 8

Ирмо́с: Тебе́, Вседе́телю, в пещи́ о́троцы всеми́рный ли́к спле́тше, поя́ху: дела́ вся́кая, Го́спода по́йте, и превозноси́те во вся́ ве́ки.

Тебе́, Богоро́дице, немощно́е смире́нныя моея́ души́ приношу́, и се́рдца моего́ неможе́ние, и ума́ моего́ пре́лесть возвеща́ю, Твоея́ по́мощи прося́, Де́во.

Ми́лостив бу́ди Твои́м рабо́м, Сло́ве, моли́твами Ро́ждшия Тя́, и спаси́ пою́щия: вся́ дела́ Госпо́дня, Го́спода по́йте, и превозноси́те Его́ во ве́ки.

Сла́ва: И́же Воли́теля Ро́ждшая ми́лости, поми́луй все́х ве́рою пою́щих: вся́ дела́ Госпо́дня, Го́спода по́йте, и превозноси́те Его́ во ве́ки.

И ны́не: Изба́ви мя́ кроме́шныя тьмы́, и неусыпа́ющаго че́рвия, Блага́я Де́во: Ты́ бо родила́ еси́ Творца́ ми́ру. Вся́ бо ели́ка хо́щет, и твори́т Твои́ми моли́твами.

Пе́снь 9

Ирмо́с: Иса́ие лику́й, Де́ва име́ во чре́ве, и роди́ Сы́на Емману́ила, Бо́га же и Челове́ка, Восто́к и́мя Ему́. Его́же велича́юще, Де́ву ублажа́ем.

Бо́га, Его́же родила́ еси́ неизрече́нно, Влады́чице Чи́стая, моли́ приле́жно, изба́вити на́с от бе́д и скорбе́й, и бу́дущаго Суда́ Стра́шнаго, и све́тлости святы́х Его́ сподо́би.

Па́че все́х согреши́х, преслу́шав Твоя́ за́поведи, Христе́, животво́рныя, и уподо́бихся безслове́сным ското́м: но Твоея́ Ма́тере, Сло́ве, моли́твами, непока́янна от жития́ не исто́ргни мене́.

Сла́ва: Я́ко ми́лости бе́здну ро́ждшая Сло́ва Бо́жия, поми́луй, Блага́я, все́х ду́ши под кро́в Тво́й прибега́ющих: Тя́ бо к Бо́гу вси́ стяжа́хом Предста́тельницу непосты́дну.

И ны́не: Очище́ние и оставле́ние прегреше́ний испроси́ на́м, и все́х ну́ждных премене́ние, и жития́ исправле́ние ны́не чи́сто и светови́дно: да прославля́ем, Богома́ти, мно́гую Твою́ бла́гость.

Та́же, Досто́йно е́сть: И покло́н. Та́же Трисвято́е по О́тче на́ш: тропа́рь, и про́чее обы́чное, и отпу́ст.

По 1-м стихосло́вии, седа́льны покая́нны, гла́с 5:

Судии́ седя́щу, и а́нгелом предстоя́щим, трубе́ глася́щей и пла́мени горя́щу, что́ сотвори́ши, душе́ моя́, ведо́ма на су́д? Тогда́ бо лю́тая тебе́ предста́нут, и та́йная твоя́ облича́тся согреше́ния. Те́мже пре́жде конца́ возопи́й Судии́: Бо́же, очи́сти мя́ и спаси́ мя.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Вси́ побди́м, и Христа́ усря́щим со мно́жеством еле́я, и свеща́ми све́тлыми, я́ко да черто́га вну́трь сподо́бимся. И́же бо вне́ двере́й пости́гнувый, безде́льно Бо́гу воззове́т: поми́луй мя́.

Сла́ва, и ны́не: Богоро́дичен: Стра́нное Де́вы та́инство, ми́рови яви́ся спасе́ние: из Нея́ бо роди́ся без се́мене, и пло́тию яви́ся без истле́ния. Все́х ра́досте, Го́споди, сла́ва Тебе́.

По 2-м стихосло́вии, седа́льны, гла́с 5:

Егда́ откры́ются дела́ Твоя́, о душе́ моя́, тьма́м а́нгелом предстоя́щим Судии́, кото́рый отве́т студу́ обря́щеши? А́ще не пре́жде конца́ возопие́ши слезя́щи: согреши́х, благи́й Го́споди, поми́луй мя́!

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

На одре́ слежу́ согреше́ний мно́гих, окрада́емь е́смь в наде́жди спасе́ния моего́, и́бо со́н ле́ности моея́ хода́тайствует души́ мое́й му́ку. Но Ты́, Бо́же, рожде́йся от Де́вы, воздви́гни мя́ к Твоему́ пе́нию, да сла́влю Тя́.

Сти́х: Ди́вен Бо́г во святы́х Свои́х, Бо́г Изра́илев.

Му́ченичен: Чудеса́ святы́х Твои́х му́ченик, сте́ну неразори́му на́м дарова́л еси́, Христе́ Бо́же. Те́х моли́твами ве́рныя лю́ди Твоя́ утверди́, я́ко Еди́н Бла́г и Человеколю́бец.

Сла́ва, и ны́не: Богоро́дичен: Ско́рый Тво́й покро́в, и по́мощь, и ми́лость, покажи́ на рабе́ Твое́м: и во́лны, Чи́стая, укроти́ су́етных помышле́ний, и па́дшую ду́шу мою́ воздви́гни, Богоро́дице: ве́м бо, ве́м, Де́во, я́ко мо́жеши, ели́ка хо́щеши.

По 3-м стихосло́вии, седа́льны, гла́с 5:

Подо́бен: Собезнача́льное Сло́во:

Во глубину́ мя греха́ попо́лзшася, треволне́ние обурева́ет отча́яния: но предвари́, Христе́, я́ко Всеси́лен, Упра́вителю все́х, и ко приста́нищу ти́хому устреми́ безстра́стия, моли́твами Твоего́ Предте́чи, за милосе́рдие, Спа́се, и спаси́ мя.

Елисаве́т непло́дствия свободи́ся, Де́ва же па́ки Де́вою пребы́сть, егда́ гла́сом Гаврии́ловым во чре́ве зача́т. Но предвзыграва́ет во утро́бе, и́же во чре́ве деви́честем Бо́га прови́дя и Влады́ку, Предте́ча Иоа́нн, во спасе́ние на́ше воплоща́емаго.

Сла́ва, и ны́не: Богоро́дичен: Я́же цве́т Боже́ственный от ко́рене прозя́бший, ковче́же и свети́льниче, ру́чко всезлата́я, свята́я трапе́зо, живота́ хле́б нося́щи я́ко Сы́на Твоего́ и Бо́га, моли́ Его́ со святы́м Предте́чею, уще́дрити и спасти́, Богоро́дицу испове́дающих Тя́.

Кано́н, [его́же краегране́сие си́це: Очище́ние на́м, Христе́, прегреше́нием дава́й.] Творе́ние Ио́сифово. гла́с 5

Пе́снь 1

Ирмо́с: Зе́млю, на ню́же не возсия́, ни ви́де со́лнце когда́, бе́здну, и́же не ви́де на́гу широта́ небе́сная, Изра́иль про́йде невла́жно, Го́споди, и вве́л еси́ его́ в го́ру святы́ни Твоея́, хва́ляща и пою́ща побе́дную пе́снь.

Очище́ние ми́ да́руй соде́янных мно́ю, Спа́се, и осла́би ми́ пре́жде да́же отсю́ду отыти́ ми, очи́сти мно́гаго гное́ния, Го́споди, очи́стивый прокаже́нныя, и сподо́би мя́ без поро́ка предста́ти Тебе́, приити́ хотя́щему суди́ти живы́м и ме́ртвым.

Гное́ние, е́же лежи́т на очесе́х души́ моея́, возбраня́ющее ми́ зре́ти лучи́ Твоя́, я́же я́влься на земли́ просте́рл еси́, Со́лнце Незаходи́мое. Сие́ очи́сти, Спа́се, и дава́й созерца́ти, Го́споди Благоутро́бне, благода́тей Твои́х све́т.

Му́ченичен: Бо́дри бы́вше повеле́ний Христо́вых храни́телие, успи́сте вра́жию всю́ зло́бу, страда́льцы блаже́ннии. Те́мже отягча́ема сно́м грехо́вным, к покая́ния, молю́ся, Боже́ственней бо́дрости и мене́ воздви́гните.

Му́ченичен: Пло́тию сплета́еми бори́телю врагу́, му́ченицы, победи́сте того́ ору́жием Креста́, и крове́й тече́нием потопи́сте: и венцы́ побе́дныя от Бо́га прия́сте, воспева́юще и пою́ще побе́дную пе́снь.

Богоро́дичен: Изба́ви мя́ обы́чая зла́го, Чи́стая Де́во, утверди́ на ка́мени за́поведей, коле́блема козньми́, Влады́чице, ве́тхаго запина́теля. И сподо́би мене́ Христу́ угоди́ти, до́бре воспева́юща и пою́ща побе́дную пе́снь.

Други́й кано́н Иоа́нну Предте́чи, творе́ние Ио́сифово, [его́же краегране́сие: Крести́телю, сию́ мольбу́ приими́.] Гла́с 5

Пе́снь 1

Ирмо́с: Коня́ и вса́дника в мо́ре Чермно́е, сокруша́яй бра́ни, мы́шцею высо́кою Христо́с истрясе́, Изра́иля же спасе́, побе́дную пе́снь пою́ща.

Житие́ очище́но, жи́знь же невеще́ственну, показа́л еси́, Предте́че, в веще́ственнем телеси́: те́мже мо́лим Тя́, подража́телей себе́ соде́лай ве́рою Тя́ блажа́щих.

Бе́здну погрузи́вый благоутро́бия, Христа́, в ре́чных струя́х, Того́ моли́, Предте́че, изсуши́ти бе́здну зо́л мои́х, молю́ся и просвети́ти мо́й смы́сл.

Предте́че Спа́сов, покая́ния ми́ вины́ хода́тайствуя, испроси́ умиле́нию да́тися ми́, тиме́ния отмыва́ющее смра́да грехо́внаго, моли́ Человеколю́бца, молю́ся Ти́.

Богоро́дичен: Родила́ еси́ неизрече́нно кроме́ боле́зни, Его́же Оте́ц пре́жде ве́к нетле́нно роди́, Всепе́тая Влады́чице. Его́же моли́ спасти́ вся́каго вре́да к Тебе́ прибега́ющих.

Пе́снь 3

Ирмо́с: Дви́жимое се́рдце мое́, Го́споди, волна́ми жите́йскими, утверди́, в приста́нище ти́хое наставля́я я́ко Бо́г.

Пока́ятися Тебе́ Бо́гу обещава́юся, и па́ки согреша́я, что́ бу́ду? Ка́ко явлю́ся, внегда́ су́диши земли́?

Моле́ния Го́сподеви принесе́м, воздохне́м, сле́зы пролие́м чисти́тельныя скве́рнам, я́ко да изба́вимся та́мо.

Му́ченичен: Умерщвле́нною мы́слию законопресту́пницы, жи́знь лю́бящии, ураня́ху победоно́сныя му́ченики, испове́дающия Христа́.

Му́ченичен: Ли́цы му́ченичестии, лико́м сопричта́шася у́мных а́нгел, и равноа́нгельнии бы́вше, благода́тию Боже́ственнаго Ду́ха.

Богоро́дичен: Покая́ния врата́ ны́не ми́ отве́рзи, врата́ све́та, Де́во – вхо́ды же страсте́й затвори́ смире́нныя моея́ души́.

И́н. Ирмо́с: Водрузи́вый на ничесо́мже зе́млю повеле́нием Твои́м, и пове́сивый неодержи́мо тяготе́ющую, на недви́жимем, Христе́, ка́мени за́поведей твои́х, Це́рковь Твою́ утверди́, Еди́не Бла́же и Человеколю́бче.

Исцеле́ния приступа́ющим ве́рою к хра́му твоему́, чу́дный Предте́че, источа́я всегда́, исцели́ стра́сти моего́ се́рдца, молю́ Тя, я́же всеокая́нне совозра́стшия ми́ от невнима́ния, всебога́те.

Воздыха́ю, и рыда́ньми содержи́мь е́смь всегда́, помышля́я Суди́ще Твое́ неумы́тное, Еди́не Пра́веднейший Судие́. В не́мже мя́, мольба́ми Крести́теля Твоего́, неосужде́нна, Го́споди Бо́же мо́й, соблюди́.

Но́ваго и ве́тхаго хода́тай бы́в, хода́тайствы боже́ственными, сла́вный Предте́че, обетша́вшаго мя́ грехи́ мно́гими, вопию́ Ти, покая́нием обнови́, я́ко да во хвале́нии Тя́ почита́ю.

Богоро́дичен: Свята́я Де́во Ма́ти, еди́на Всенепоро́чная, прегреше́ний поро́ка на́с измени́: просвети́ на́ше помышле́ние, сердца́ освяти́, и ве́чнаго на́с изба́ви все́х осужде́ния, мо́лимся.

Пе́снь 4

Ирмо́с: Услы́шах, Го́споди, слу́х Тво́й, и убоя́хся, разуме́х смотре́ние Твое́, и просла́вих Тя́, Еди́не Человеколю́бче.

Глаго́л Твои́х, Го́споди, небре́г просвеща́ющих, те́мная сотвори́х дела́, и бою́ся та́мошняго Стра́шнаго Твоего́ Суди́ща.

Ве́трилом Боже́ственнаго стра́ха впери́м душе́вный кора́бль, и к приста́нищем покая́ния дости́гнем, злы́х убежа́вше треволне́ния.

Му́ченичен: Ка́плющия, му́ченицы, сла́дости, яви́стеся боже́ственныя го́ры, и ра́й богонасажде́нный, Жи́зни Дре́во иму́щий – Го́спода.

Му́ченичен: Стреля́ньми, святи́и, терпе́ния и пожда́ния, постреля́сте бори́телей бесо́в, и венцы́ сла́вы восприя́сте.

Богоро́дичен: Пречи́стая Влады́чица, согреша́ющим Предста́тельница, па́дающим боже́ственное исправле́ние, я́ко Бо́га ро́ждшая, сла́вится.

И́н. Ирмо́с: Боже́ственное Твое́ разуме́в истоща́ние, прозорли́во Авваку́м, Христе́, со тре́петом вопия́ше Тебе́: во спасе́ние люде́й Твои́х, спасти́ пома́занныя Твоя́ прише́л еси́.

В Вы́шнее всели́лся еси́ Ца́рство, я́ко во́ин и́стинен Царя́ Христа́, Крести́телю: Того́ моли́ непреста́нно, лю́ди уще́дрити чту́щия Тя́.

Освяти́ из ложе́сн тя́ Госпо́дь, прови́дяй благода́рство твоего́ се́рдца, блаже́нне: Того́ моли́ все́х на́с освяти́ти, мо́лимся.

Ме́ртвым благовести́л еси́ прише́ствие умерщвле́наго на́с ра́ди: Того́ моли́, Предте́че, умерщвле́наго и мене́ грехми́ оживи́ти, и спасти́ мя.

Богоро́дичен: Поми́луй мя́, еди́на Пренепоро́чная, Я́же ми́лостиваго Бо́га премно́гою бла́гостию несказа́нно ро́ждшая, и изба́ви ве́чныя му́ки.

Пе́снь 5

Ирмо́с: Окая́нную ду́шу мою́, нощеборю́щуюся со тьмо́ю страсте́й, предвари́в уще́дри, и возсия́й, мы́сленное Со́лнце, дне све́тлыя звезды́ во мне́, во е́же раздели́ти но́щь от све́та.

От де́л не́сть мне́ спасе́ния, мно́го бо на земли́ окая́нный согреши́х, и трепе́щу Стра́шнаго Суди́ща Твоего́, егда́ осуди́ти хо́щеши, Бо́же, престу́пники Твои́х за́поведей.

Ка́ко безу́мен бы́х? Ка́ко омрачи́хся творя́ дела́ зла́я? Ка́ко не разуме́х стра́ха Твоего́, Христе́? В зе́млю понико́х, и уподо́бихся ското́м безслове́сным: но обрати́ мя, Бо́же вся́ческих.

Му́ченичен: О́блак му́ченик разгна́ о́блаки го́рьких му́к, и озари́ша де́нь и́стиннаго ра́зума, и многобо́жия мглу́ разруши́ша, и к Незаходи́мому Све́ту достиго́ша.

Му́ченичен: Освяти́ у́м мо́й мольба́ми святы́х му́ченик Твои́х, Христе́, молю́ся, и покажи́ просвеще́ния испо́лнена, и ве́чней сла́ве прича́стника, да сла́вя пою́ Тя, Спа́се.

Богоро́дичен: Бо́га неизрече́нным сло́вом, Де́во Ма́ти, родила́ еси́ на́м, все́м покая́ние даю́ща многосогреши́вшим, хода́тайством Твои́м благи́м, прибе́жище ве́рным и приста́нище.

И́н. Ирмо́с: Одея́йся све́том я́ко ри́зою, к Тебе́ у́тренюю, и Тебе́ зову́: ду́шу мою́ просвети́ омраче́нную, Христе́, я́ко Еди́н Благоутро́бен.

Породи́ непло́дная утро́ба тя́, Предте́че, непло́дная от до́брых дея́ний сердца́, благоча́дная показу́ющая, благопло́дными твои́ми словесы́: те́мже тя́ ублажа́ем.

Процве́л еси́ я́ко благоуха́нный кри́н, присноблаже́нне, в пусты́нях. Те́мже вопию́ ти: души́ моея́, Предте́че, вся́ко злосмра́дие зло́бы отжени́.

Зако́на посреде́ ста́л еси́, прему́дре, и благода́ти. Те́мже взыва́ю: побежда́ема мя́ грехо́вным, Предте́че, зако́ном уще́дри, окая́нне бе́дствующаго.

Богоро́дичен: Врата́ Непроходи́мая Сла́вы, Пречи́стая, отве́рзи ми́ врата́ покая́ния, хода́тайствующая ми́ Боже́ственныя вхо́ды, и та́мошняго поко́ища.

Пе́снь 6

Ирмо́с: Я́коже проро́ка от зве́ря изба́вил еси́, Го́споди, и мене́ из глубины́ несодержи́мых страсте́й возведи́, молю́ся, да приложу́ призре́ти ми́ к хра́му свято́му Твоему́.

Се́ вре́мя обраще́ния, и а́з низлежу́ взна́к при́сно, нечу́вствием мно́гим всегда́ содержи́мь: омраче́ние се́рдца моего́, Сло́ве, разреши́в уще́дри мя́.

Стеня́ща мя́, я́коже иногда́ мытаря́ уще́дри, благоутро́бне Христе́. И я́коже блудни́цу те́пле слези́ти сподо́би, да отмы́ю и а́з тиме́ние мно́гих мои́х прегреше́ний.

Му́ченичен: Великому́ченицы Христо́вы, вельми́ согреши́вшаго, вели́каго пла́мене и́же в гее́нне, та́мо ожида́ющаго мя́ исхити́те, да вельми́ и а́з ва́шу па́мять сла́влю всегда́.

Му́ченичен: Подвиза́вшеся до́бре, све́тло венча́шася Твои́ страда́льцы, живонача́льною десни́цею Твое́ю, Бо́же и Го́споди. Си́х честны́ми мольба́ми спаси́ вся́ лю́ди Твоя́.

Богоро́дичен: Богора́дованная Се́не освяще́ния, честны́й Ковче́же, Свети́льниче Боже́ственнаго Све́та, Хле́ба Живо́тнаго Трапе́зо, Сло́ва Пала́то одушевле́нная, хра́м мя́ ду́ху покажи́.

И́н. Ирмо́с: Неи́стовствующееся бу́рею душетле́нною, Влады́ко Христе́, страсте́й мо́ре укроти́, и от тли́ возведи́ мя, я́ко Благоутро́бен.

Неизрече́нными луча́ми сия́я, Предте́че Христо́в, де́тельною моли́твою Твое́ю озаря́й сердца́, благоче́стно хва́лящих Тя́.

Ле́ностным сно́м одержи́ма мя́, Предте́че Христо́в, озари́в благода́тию, воздви́гни усе́рдно Боже́ственная твори́ти хоте́ния.

От вся́кия ско́рби сопроти́вныя изба́ви на́с, предста́теля боже́ственнаго Тя́ стяжа́вших и моли́твенника ко Влады́це, блаже́нне.

Богоро́дичен: Бу́ря смуща́ет мя́ грехо́вная, Богоро́дице Пречи́стая, потщи́ся изба́вити мя́, вводя́щи к приста́нищу покая́ния, Всенепоро́чная.

Пе́снь 7

Ирмо́с: Огня́ гаси́лище – отроко́в моли́тва, ороша́ющая пе́щь пропове́дница чудесе́, не опаля́ющи, ниже́ сожига́ющи песносло́вцы Бо́га оте́ц на́ших.

Беззако́ния моя́ и непра́вды моя́, безчи́сленная согреше́ния, Христе́, прости́, и бу́дущия изба́ви мя́ му́ки, за мно́жество Твои́х щедро́т, Бо́же.

Я́ко блу́дный ны́не ижди́х бога́тство, е́же прия́х, и гла́дом та́ю, Боже́ственнаго бра́шна лиша́емь: ка́ющася, Спа́се, приими́, и спаси́ мя.

Му́ченичен: Ме́ртва соде́ласте борю́щаго врага́, удесы́ умерщвля́еми мно́гими му́ками, досточу́днии Госпо́дни му́ченицы. Те́мже, ве́рнии, благоче́стно воспева́ем ва́с.

Му́ченичен: Бесо́вския полки́, мучи́телей все́ мно́жество, стреля́ньми, му́ченицы, ура́нисте, терпе́нием же и до́блестию, и к животу́ и́стинному ны́не преложи́стеся.

Богоро́дичен: Приста́нище спаси́тельное показа́ся все́м, Чи́стая, страсте́й бу́рю утиша́ющи, и к тишине́ все́х приводя́щи, Богороди́тельнице Чи́стая, и́же на земли́ смире́нныя.

И́н. Ирмо́с: Превозноси́мый отце́в Госпо́дь, пла́мень угаси́, о́троки ороси́, согла́сно пою́щия: Бо́же, благослове́н еси́.

Словесы́ мо́лим тя́, и́же Сло́ва Предте́чу, о́тчий я́коже разреши́л еси́ гла́с в рожде́нии, разреши́ се́тей на́ших прегреше́ния.

Со́лнце многосве́тлое, возсия́й покая́ния ми́ спаси́тельное сия́ние, и тьмы́ мя́ изба́ви страсте́й, смуща́ющих помраче́нное мое́ се́рдце.

Непло́дну ду́шу стяжа́х, и се́рдце безча́дно, непло́дове боже́ственное прозябе́ние, плоды́ покая́ния прозяба́ти ми́, Крести́телю Христо́в, моли́ непреста́нно.

Троичен: Ра́вна Роди́телю Сы́на сла́вим, и Ду́ха Свята́го, Тро́ицу неразде́льну боже́ственне пою́ще: Бо́же, благослове́н еси́.

Богоро́дичен: Мла́до родила́ еси́ Отроча́, Всенепоро́чная, Христа́, обновле́ние на́ше соде́ловающаго, обетша́вших дре́вним преступле́нием.

Пе́снь 8

Ирмо́с: А́нгелов со́нм, челове́ков собо́р, Царя́ и Зижди́теля все́х, свяще́нницы, по́йте; благослови́те, леви́ти; лю́дие, превозноси́те во вся́ ве́ки.

Се́ возсмерде́ша и согни́ша души́ моея́ ра́ны, Христе́, и пострада́х и смири́хся отню́д: лечьба́ми покая́ния, Спа́се, уврачу́й мя́.

Льсти́вно зми́й мя́ лука́внейший подукра́д, зо́л испо́лни, и воздыха́я зову́: не отри́ни мене́, Сло́ве, осужде́ннаго и смире́ннаго.

Му́ченичен: Не уклони́стеся лу́чшаго стоя́ния, кре́стныя же враги́, всехва́льнии, я́ко запя́ти ва́м непщева́вшия, низложи́сте, и до конца́, прему́дрии, побе́ждше.

Му́ченичен: Ва́с, прехва́льнии Госпо́дни му́ченицы, ни о́гнь, ни ме́ч, ни зве́рие, ни гла́д, ни коле́с раздробле́ние, ниже́ му́ка и́на возмо́же разлучи́ти от Христа́ Человеколю́бца.

Богоро́дичен: А́нгелов похвала́, и челове́ков спасе́ние, и спору́чница бу́ди ми́, Ма́ти Бо́жия. Я́ко да обращу́ся, и прииму́ разреше́ние пре́жде согреше́нных, в ве́дении и не в ве́дении.

И́н. Ирмо́с: Тебе́, Вседе́телю, в пещи́ о́троцы всеми́рный ли́к спле́тше поя́ху: дела́ вся́кая, Го́спода по́йте, и превозноси́те во вся́ ве́ки.

Собо́р люде́й струя́ми Иорда́нскими измыва́еши, пропове́дуя покая́ние, вели́кий Предте́че. Те́мже вопию́ ти: страсте́й мои́х струю́ изсуши́, исто́чники ми́ сле́з посыла́я.

Трепе́щущи бу́ди вся́, помышля́ющи, душе́, Суди́ще Вседержи́телево, вопия́: Ще́дре, Крести́теля Твоего́ ра́ди, уще́дри и спаси́ мя, и му́к изба́ви.

Устне́ нечи́сты и оскверни́вшийся язы́к дви́жу ти́ на моле́ние, свя́те Предте́че: потщи́ся вско́ре, помози́ ми́, вся́кими прило́ги лестца́ непреста́нно коле́блему.

Тро́ичен: Одожди́ на́м О́тче, и Сы́не, и Ду́ше, Тро́ице Единосу́щная, согреше́ний оставле́ние, я́ко да получи́вше соверше́нное спасе́ние, Тя́ превозно́сим во вся́ ве́ки.

Богоро́дичен: Вознесла́ еси́ на́с высо́ким Твои́м Рождество́м, от ро́ва паде́ний, Богора́дованная: те́мже Тя́ гла́сы благода́рными, ве́рою, Отрокови́це, воспева́ем во вся́ ве́ки.

Та́же, пое́м пе́снь Богоро́дицы: Вели́чит душа́ моя́ Го́спода: И покло́ны.

Пе́снь 9

Ирмо́с: Я́ко сотвори́ Тебе́ вели́чия Си́льный, Де́ву я́вль Тя́ чи́сту по Рождестве́, я́ко ро́ждшую без се́мене своего́ Творца́: те́м Тя́, Богоро́дице, велича́ем.

Да Твое́ велича́ю долготерпе́ние, Иису́се, долготерпи́ и еще́ на мне́, и не посецы́ мене́ я́коже непло́дную смоко́вницу, взыва́ю Ти́, я́ко да покая́ния плоды́ принесу́ Тебе́.

Ко́ль стра́шен еси́, Еди́не Держа́вный и Си́льный? И кто́ проти́ву постои́т Твоему́ стра́шному преще́нию, егда́ хо́щеши на Суде́ са́м седе́ти? В не́мже мя́ соблюди́ неосужде́нна.

Му́ченичен: Теле́сныя боле́зни боле́зньми боже́ственными ва́шими изыма́ете, Госпо́дни страда́льцы. Те́мже исцели́те души́ моея́ стра́сти люте́йшыя, я́ко су́ще вра́чеве иску́снейшии.

Му́ченичен: Со́лнечных лу́ч блиста́ет мно́жае, ва́ших ра́ка моще́й, зари́ Боже́ственныя благода́ти, и просвеща́ет сердца́, и озаря́ет ду́ши, ве́рою, страстоте́рпцы, восхваля́ющих ва́с.

Богоро́дичен: Светови́дный о́блак, предводя́щий но́выя лю́ди к земли́ обетова́ния, вои́стинну, Богоблагода́тная, яви́лася еси́, и врата́ вводя́щая к жи́зни. Те́мже Тя́, Богоро́дице, велича́ем.

И́н. Ирмо́с: Иса́ие лику́й, Де́ва име́ во чре́ве, и роди́ Сы́на Емману́ила, Бо́га же и Челове́ка, Восто́к и́мя Ему́. Его́же велича́юще, Де́ву ублажа́ем.

Се́ благоле́пие твоего́ хра́ма, я́ко Не́бо познава́ется на земли́, Предте́че Христо́в, во́ньже приходя́ заря́ми Боже́ственными освеща́еши, по вся́ дни́ тя́ ны́не в не́м блажа́щия.

Я́ко сы́й и́скренний Влады́це дру́г, Крести́телю, люби́ти ми́ Его́ пра́вым нра́вом неукло́нно, всеблаже́нне, укрепи́, и страсте́й тлетво́рных возгнуша́тися порева́ющих мя́ к поги́бели.

Ты́ не бы́л еси́ тро́сть, проти́вными ве́тры, прему́дре, коле́блема, но на́ше Боже́ственное утвержде́ние, и непоколе́блемо Це́ркве укрепле́ние. Ю́же твои́ми моли́твами соблюда́й непрекло́нну, утоля́я вся́кий собла́зн.

Зижди́телево при две́рех прише́ствие. Что́ у́бо не пла́чеши себе́, окая́нная душе́, живу́щи в небреже́нии? Возни́кни и возопи́й Го́сподеви: пощади́ мя, Спа́се, мольба́ми Предте́чи, я́ко Человеколю́бец.

Богоро́дичен: Светоно́сная колесни́ца Со́лнца яви́лася еси́ вои́стинну, возсия́вшаго от Твое́ю, Всенепоро́чная, чи́стая боку́, и разру́шшаго пре́лести лю́тую тьму́. Те́мже по до́лгу Тя́ ве́рою ублажа́ем.

Та́же, Досто́йно е́сть: И покло́ны, и ектения́ ма́лая. Та́же свети́лен, и псалмы́ обы́чныя.

На стихо́вне стихи́ры покая́нны, гла́с 5:

Мно́жества прегреше́ний мои́х пре́зри, Го́споди, И́же от Де́вы рожде́йся, и вся́ очи́сти беззако́ния моя́, мы́сль ми́ подая́й обраще́ния, я́ко Еди́н Человеколю́бец, молю́ся, и поми́луй мя́.

Сти́х: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся: во вся́ дни́ на́ша возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я, и при́зри на рабы́ Твоя́, и на дела́ Твоя́, и наста́ви сы́ны и́х.

Увы́ мне́, кому́ уподо́бихся а́з? Непло́дней смоко́внице. И бою́ся прокля́тия с посече́нием. Но, Небе́сный Де́лателю, Христе́ Бо́же, олядене́вшую мою́ ду́шу плодоно́сну покажи́, и я́ко блу́днаго сы́на приими́ мя, и поми́луй мя́.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Страстоте́рпцы Твои́, Го́споди, чино́м а́нгельским подража́телие, я́ко безпло́тнии, му́ки претерпе́ша, и единомы́сленно упова́ние иму́ще, обеща́нных бла́г наслажде́ние. Моли́твами и́х, Христе́ Бо́же, ми́р ми́рови Твоему́ да́руй, и душа́м на́шим ве́лию ми́лость.

Сла́ва, и ны́не: Богоро́дичен: Обра́дованная, хода́тайствуй Твои́ми моли́твами, и испроси́ душа́м на́шим мно́жество щедро́т, и очище́ние мно́гих прегреше́ний, мо́лимся.

Та́же, Бла́го е́сть испове́датися Го́сподеви: Трисвято́е по О́тче на́ш: Тропа́рь. Та́же ектения́, и ча́с 1-й, и псалмы́ обы́чныя, и про́чее, и отпу́ст.

Разбо́йник на Кресте́ Бо́га Тя́ бы́ти ве́ровав, Христе́, испове́да Тя́ чи́сте от се́рдца: помяни́ мя, Го́споди, вопия́, во Ца́рствии Твое́м.

Сти́х: Блаже́ни изгна́ни пра́вды ра́ди, я́ко те́х е́сть Ца́рство Небе́сное.

Я́коже оправда́л еси́, Христе́, блудни́цу, пла́кавшуюся от всея́ души́: та́кожде и мене́, Влады́ко, отча́явшагося от вся́каго исхити́, Бла́же, муче́ния, молю́ся.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л, на вы́ лжу́ще Мене́ ра́ди.

Предте́кшаго Христу́, и угото́вавшаго пути́ благи́я, да ублажи́м Иоа́нна согла́сно, я́ко да того́ боже́ственными моли́твами от прегреше́ний изба́вимся.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

Му́ченичен: И́же ча́шу Христо́ву испи́вше, му́ченицы, усе́рдною душе́ю, му́тных на́с грехо́в и неду́гов, одожде́ньми боже́ственных моли́тв изба́вите, святи́и.

Сла́ва: тро́ичен: Непостижи́мый Бо́же, всеси́льная Тро́ице и Еди́нице, моли́твами Предте́чи Твоего́ спаси́ мя, избавля́ющи тьмы́, и пла́мене предлежа́щаго ми́.

И ны́не: Богоро́дичен: Всегда́ лука́выми, Де́во, дея́ньми оскверня́емь, Тя́ нескве́рную Влады́ки Ма́терь молю́: скве́рны мя́ вся́кия очи́сти, Влады́чице.

На Го́споди, воззва́х: стихи́ры кре́стны, гла́с 5.

Подо́бен: Ра́дуйся:

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

Воздви́жеся я́коже а́гнец на Кресте́, и возноше́ния льсти́ваго низве́ргл еси́. Закла́в же ся, Кро́вию Твое́ю всю́ освяти́л еси́ зе́млю. И прободе́н копие́м, пла́менному мне́, Христе́, ору́жию плещи́ да́ти а́бие повеле́л еси́, и Рая́ вмести́ти вхо́д, и Дре́ва мя́ наслажда́тися Живо́тнаго небоя́зненно. Те́мже спасе́н бы́в Стра́стию Твое́ю, зову́ ра́дуяся: сла́ва Боже́ственному Кресту́ Твоему́, и́мже кля́твы изба́вихомся дре́вния, и благослове́ние от Дре́ва объе́млем, и ве́лию ми́лость.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Уста́вити боле́зни хотя́ челове́ком и поноше́ния, преблаги́й Го́споди Спа́се мо́й, распя́тие терпи́ши поно́сное, и же́лчи вкуша́еши, Незло́биве, на́шу го́ресть отъе́мля зло́бную, уязви́вся Сло́ве, ребра́ прободе́нием, я́звы на́ша я́ко Влады́ка исцеля́еши. Те́мже и воспева́ем Твое́ сла́вное хоте́ние, и покланя́ющеся чти́м копие́, и гу́бу, и тро́сть, и́миже дарова́л еси́ ми́ру Твоему́ ми́р и ве́лию ми́лость.

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Хотя́ рукоположе́ние Ада́ма первозда́ннаго отъя́ти до конца́ всеболе́зненное, Человеколю́бче, я́ко Созда́тель Ада́мов, гвоздьми́ пригвозди́ся, безгре́шне Христе́, и копие́м Боже́ственная Твоя́ ре́бра уязви́в на́с ра́ди, возбраня́еши, Сло́ве, ору́жию пла́менному, не брани́ти на́м вхо́да Твои́м рабо́м. Те́м же славосло́вяще Тя́, пое́м держа́ву Твою́, и Кре́ст Тво́й чти́м, и воспева́ем, Человеколю́бче, и́мже вся́ко естество́ обре́те неболе́зненное достоя́ние и ве́лию ми́лость.

И́ны стихи́ры Богоро́дице, гла́с то́йже:

Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.

Ка́ко Тя́, Иису́се, евре́йское мно́жество беззако́нное на Кресте́ распя́ти осуди́, не уще́дрив Тебе́, Ще́драго? Де́ва пла́чущи веща́ше иногда́, егда́ узре́ на Кресте́ воздви́жена, Его́же из утро́бы нестра́стно породи́. Что́ Ти соде́я беззако́нное собо́рище, Ча́до Мое́ вожделе́нное, Сы́не Мо́й превозлю́бленнейший? Потщи́ся и спаси́, ве́рою Твое́ сла́вящих распя́тие, и Мене́, я́коже обеща́л еси́ велича́ющих, я́ко Еди́н Всепреблаги́й.

Сти́х: Хвали́те Го́спода вси́ язы́цы, похвали́те Его́ вси́ лю́дие.

А́гнца Своего́ А́гница иногда́ зря́щи к заколе́нию тща́щася, усе́рдно после́доваше, сия́ вопию́щи Ему́: ка́мо гряде́ши, Ча́до мое́ сладча́йшее Христе́? Чесо́ ра́ди тече́нием си́м тече́ши, Долготерпели́ве, без ле́ности, Иису́се превозжеле́нне? Безгре́шный и многоми́лостиве Го́споди, да́ждь Ми́ сло́во Рабе́ Твое́й, Сы́не Мо́й вселюбе́зный. Не пре́зри Мя́, Ще́дре, молча́, стра́нно ро́ждшую Тя́, Бо́же Живода́вче, да́руяй ми́рови ве́лию ми́лость.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Престо́л Херуви́мский вои́стинну, я́ко превы́шши тва́рей бы́сть: в Тя́ бо Боже́ственное Сло́во, на́ш зра́к обнови́ти хотя́, всели́ся, Чи́стая, и из Тебе́ проше́д Плотоно́сец, я́ко Благоутро́бен, Кре́ст и Стра́сть на́с ра́ди прия́т, и Воскресе́ние я́ко Бо́г дарова́. Те́мже я́ко примири́вшую на́ше осужде́нное естество́, Зижди́телю благодаря́ще, к Нему́ и Тебе́ зове́м: пода́ждь на́м оставле́ние прегреше́ний, и ми́лость Твои́ми моли́твами.

Сла́ва, и ны́не: Крестобогоро́дичен: Избавле́ние на́с ра́ди, и це́ну вели́кую, пречи́стую Кро́вь Твою́ изво́лил еси́ да́ти, безгре́шне Христе́ мо́й, все́м хотя́ спасе́ние получи́ти. Те́мже тя́ зря́щи пригвожде́на Ма́ти Твоя́, рыда́ющи власы́ терза́ше Своя́, глаго́лющи: Ча́до, А́гнче Всенепоро́чный, ми́р хотя́ изба́вити честно́ю Твое́ю Кро́вию, от о́чию мое́ю ка́ко заше́л еси́, Спа́се, Незаходи́мое Со́лнце? И́же все́м подая́й просвеще́ние, и ми́р, и ве́лию ми́лость.

Та́же, Све́те ти́хий: Проки́мен дне́: Сподо́би, Го́споди, в ве́чер се́й:

На стихо́вне стихи́ры кре́стны, гла́с 5:

Го́споди, при Моисе́и иногда́ проро́це, то́чию о́браз Креста́ Твоего́ явля́емь, побежда́ше враги́ Твоя́. Ны́не же са́мый Кре́ст Тво́й иму́ще, по́мощи про́сим: укрепи́ Це́рковь Твою́, мно́гия ра́ди ми́лости, Человеколю́бче.

Сти́х: К Тебе́ возведо́х о́чи мои́ живу́щему на Небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дрит ны́.

Кре́ст Тво́й, Христе́, а́ще и дре́во ви́димо е́сть существо́м, но Боже́ственною оде́яно е́сть си́лою, и чу́вственне ми́рови явля́емь, у́мно на́ше чудотвори́т спасе́ние, ему́же кла́няющеся сла́вим Тя́, Спа́се, поми́луй на́с.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих, и уничиже́ния го́рдых.

Му́ченичен: Моли́те за ны́, святи́и му́ченицы, да изба́вимся от беззако́ний на́ших: ва́м бо дана́ е́сть благода́ть моли́тися за ны́.

Сла́ва, и ны́не: Крестобогоро́дичен:

Подо́бен: Преподо́бне О́тче:

Ве́сь восприи́м мо́й зра́к, Созда́тель и Бо́г облече́ся, вообрази́ти и́же пре́жде па́дший зра́к Ада́мов восхоте́вый, на Кре́ст вознесе́ся во́лею я́ко пови́нен, и ру́це распросте́р ны́не, исцеля́я ру́це я́же дре́вле осла́бленныя к дре́ву сне́дному. Его́же Всечи́стая ви́дящи восклица́ше: что́ сие́ Твое́, Сы́не Мо́й, неизрече́нное долготерпе́ние? Не терплю́ на Кресте́ воздви́жена зря́щи Тя́, го́рстию содержа́ща всея́ земли́ концы́.

Та́же, Ны́не отпуща́еши раба́ Твоего́, Влады́ко: Трисвято́е по О́тче на́ш: тропа́рь свято́му. Сла́ва, и ны́не: Крестобогоро́дичен во гла́с тропаря́. Та́же, ектения́, и отпу́ст.

Кано́н Пресвяте́й Богоро́дице. Гла́с 5.

Пе́снь 1

Ирмо́с: Коня́ и вса́дника в мо́ре Чермно́е, сокруша́яй бра́ни мы́шцею высо́кою, Христо́с истрясе́, Изра́иля же спасе́, побе́дную пе́снь пою́ща.

Твои́х ра́б из глубины́ се́рдца моли́твы ве́рно приноси́мыя Ти́, Богоро́дице, прие́мли, и сия́ принося́щи Сы́ну Твоему́, пода́ждь прегреше́ний оставле́ние.

Я́ко вои́стинну Благода́тельница су́щи, богатя́щи земноро́дных, и спасе́ния Две́ре к жи́зни вводя́щи, Де́во Богома́ти, предстоя́щи всегда́ не преста́й, о моля́щих Тя́.

Сла́ва: Ны́не прекло́ншися певе́ц Твои́х мольба́ми, я́ко держа́вна ко спасе́нию су́щи по́мощь, от бе́д моли́твами Твои́ми изъе́мши, Влады́чице, це́лы сохрани́ почита́ющия Тя́.

И ны́не: Предвари́вши вско́ре и предстоя́щи те́пле, Пресвята́я Де́во, зело́ одержи́мых на́с лю́тыми обстоя́нии умили́вшися изба́ви, и от печа́ли свободи́.

Пе́снь 3

Ирмо́с: Водрузи́вый на ничесо́мже зе́млю повеле́нием Твои́м, и пове́сивый неодержи́мо тяготе́ющую, на недви́жимем, Христе́, ка́мени за́поведей Твои́х, Це́рковь Твою́ утверди́, Еди́не Бла́же и Человеколю́бче.

Све́та Твоего́ бо́дренною Боже́ственною мольбо́ю те́мный о́блак се́рдца моего́, Ма́ти Бо́жия, озари́вши, сы́на дне́ покажи́ мя доброде́тельми просвеще́на, Световоди́тельнице душа́м на́шим.

Пе́ти Тя́ по достоя́нию жела́юще при́сно, оба́че недоуме́юще, хвалу́ от усте́н прино́сим худы́х, ю́же благопреме́нно приими́, и мольба́м послу́шница бу́ди, ве́рно моля́щимся Ти́.

Сла́ва: Добропло́дны непло́дныя ду́ши показу́ющи, и олядене́вшее очища́ющи Твое́ю моли́твою, и мою́ ду́шу пло́д даю́щую ве́ру и житие́ нескве́рно, Ты́ Богороди́тельнице, покажи́.

И ны́не: И́же всея́ земли́ го́рстию содержа́й концы́, ка́ко ма́терними не́драми объе́млется? Млеко́м же пита́ется от сосе́ц, насыща́я вся́ко живо́тно благоволе́ния, и бога́тый излия́нием обнищава́ет воплоща́емь.

Пе́снь 4

Ирмо́с: Боже́ственное Твое́ разуме́в истоща́ние, прозорли́во Авваку́м, Христе́, со тре́петом вопия́ше Тебе́: во спасе́ние люде́й Твои́х спасти́ пома́занныя Твоя́ прише́л еси́.

Я́ко еди́ну Тя́ к Бо́гу хода́таицу ве́дуще, согреше́ний до́лги разреша́ющую пови́нным, Пречи́стая, хвала́ми и пе́сньми почита́ем.

Це́рковь освяще́нную Тя́ показа́, все́лься в Тя́ Бо́г, Де́во Пренепоро́чная: Его́же при́сно моли́ соблюсти́ невре́дны рабы́ Твоя́.

Сла́ва: Мольбу́ ни́щих услы́ши упова́ющих на Тя́, Богоро́дице, и ускори́ от бе́д изба́вити на́с ма́терними твои́ми дерзнове́нии.

И ны́не: В ско́рбех сла́дкое утеше́ние, и в напа́стех по́мощь, и в беда́х предста́тельницу Тя́, Ма́ти Бо́жия, стяжа́вше, озлобле́ний вся́ких избавля́емся.

Пе́снь 5

Ирмо́с: Одея́йся све́том, я́ко ри́зою, к Тебе́ у́тренюю, и Тебе́ зову́: ду́шу мою́ просвети́ омраче́нную, Христе́, я́ко Еди́н Благоутро́бен.

И́же Первонача́льнаго в ле́то поро́ждши, во опи́санней пло́ти, вои́стинну естество́м Неопи́саннаго. Того́ моли́ непреста́нно о рабе́х Твои́х.

Ты́ приближа́ешися вско́ре су́щим в ну́ждах, при́сно помога́ющи, и управля́ющи призыва́ющия Тя́ во искуше́ниих ко спасе́нию, Пречи́стая.

Сла́ва: Ми́лостива естество́м, милосе́рдаго Бо́га моли́твами показа́вши, пода́ждь Твои́м рабо́м ми́рну жи́знь, и прегреше́ний избавле́ние, Пренепоро́чная.

И ны́не: Угль ро́ждшая, Его́же узре́ Иса́ия, попали́ ми ве́щи, Всенепоро́чная, согреше́ний, и просвети́ мя, молю́ся.

Пе́снь 6

Ирмо́с: Неи́стовствующееся бу́рею душетле́нною, Влады́ко Христе́, страсте́й мо́ре укроти́, и от тли́ возведи́ мя, я́ко Благоутро́бен.

Умерщвле́ных на́с страстьми́ греха́, Влады́чице, возста́вивши оживи́ моли́твами Твои́ми, я́ко тли́ Потреби́теля ро́ждшая.

Неле́стно упова́ние Тя́, и необори́му сте́ну на враги́, и тве́рду иму́ще по́мощь, на ны́ наве́тов не убои́мся.

Сла́ва: Земноро́дным предста́ни в боле́знех при́сно, Чи́стая, и лю́тых увяда́ющих Твоя́ служи́тели не вре́дны сохрани́.

И ны́не: Ду́шу мою́ просвети́ омрачи́вшуюся, о́блаком помышле́ний находя́щих ми́, Богоневе́сто, наве́том человекоуби́йцы бе́са.

Та́же: Го́споди, поми́луй, три́жды. Сла́ва, и ны́не:

Седа́лен, гла́с 5:

Кресто́м Сы́на Твоего́, Богоблагода́тная, и́дольская пре́лесть вся́ упраздни́ся, и де́монская кре́пость попра́ся. Сего́ ра́ди ве́рнии по до́лгу Тя́ при́сно пое́м и благослови́м, и Богоро́дицу вои́стинну испове́дающе Тя́ велича́ем.

Пе́снь 7

Ирмо́с: Превозноси́мый отце́в Го́сподь, пла́мень угаси́, о́троки ороси́, согла́сно пою́щия: Бо́же, благослове́н еси́.

Приими́, Влады́чице, ве́рных Твои́х проше́ния ра́б, напа́стей изыма́ющи, и от скорбе́й спаса́ющи ве́рно пою́щих: Бо́же, благослове́н еси́.

И́же благи́х Де́лателя Бо́га на́м ро́ждшая, Того́ умоли́ ма́терними мольба́ми, Чи́стая, уще́дрити о Тебе́ хва́лящихся.

Сла́ва: Предста́тельницу непобеди́мую, и основа́ние непоколе́блемо Тя́ стяжа́вше, и Твои́м оде́явшеся заступле́нием, Влады́чице, побежда́ем стрельца́ я́же на ны́ кова́рствия.

И ны́не: Ви́ждь смире́ние Твоего́ раба́, Влады́чице, и ве́чнаго огня́ свободи́ мя непреста́нно пою́щаго: Бо́же, благослове́н еси́.

Пе́снь 8

Ирмо́с: Тебе́, Вседе́телю, в пещи́ о́троцы, всеми́рный ли́к спле́тше, поя́ху: дела́ вся́кая, Го́спода по́йте, и превозноси́те во вся́ ве́ки.

Глаго́лы вку́пе и мы́сльми хвалу́, Де́во, Тебе́ плету́ще, ве́рнии взыва́ем: Го́спода по́йте, и превозноси́те Его́ во ве́ки.

Всю́ Тебе́ добро́ту Соломо́н Бли́жнюю Бо́гу преднаписа́, я́ко ближа́йшу су́щую Сему́, ма́терним, Деви́це, дерзнове́нием, су́щих в ми́ре избавля́ющи.

Сла́ва: Тя́ по Бо́зе упова́ние спасе́ния в напа́стех иму́ще ве́рнии взыва́ем: вся́ дела́ Госпо́дня, Го́спода по́йте, и превозноси́те Его́ во ве́ки.

И ны́не: Приими́ пе́снь от худы́х усте́н, Де́во Всепе́тая, вопию́щих Ти́: ра́дуйся, боля́щим тело́м врачевство́, и отча́янным душа́м спасе́ние.

Пе́снь 9

Ирмо́с: Иса́ие лику́й, Де́ва име́ во чре́ве, и роди́ Сы́на Емману́ила, Бо́га же и Челове́ка, Восто́к и́мя Ему́. Его́же велича́юще, Де́ву ублажа́ем.

К Тебе́ пролива́ем, ю́же от боле́зни моли́тву на́шу: поми́луй на́с гре́шных, да не посрами́мся в де́нь искуше́ния, Тя́ Всемилосе́рдую Богоро́дицу призыва́ющии.

Пе́рстное сро́дство не пре́зри, Влады́чице Чи́стая, но бу́ди помо́щница покрыва́ющи, в печа́лех укрепля́ющи, и избавля́ющи все́х неду́жных: на Тя́ бо упова́ем гото́вую, во е́же спасти́ на́с.

Сла́ва: Бо́же, услы́ши люде́й Твои́х моли́тву ны́не, и изба́ви на́с вре́да вра́жия: се́ Тебе́ приво́дим и́стинное Очище́ние – Тебе́ Ро́ждшую, Ю́же любо́вию ублажа́ем.

И ны́не: Под держа́ву кре́пости Твоея́, Влады́чице, притека́ем то́щно вси́ земноро́днии, прося́ще ми́лости и щедро́ты Твоя́ ми́лостивыя, я́же пролия́вши все́х на́с освяти́.

Та́же, Досто́йно е́сть: И покло́н. Та́же Трисвято́е по О́тче на́ш: тропа́рь, и про́чее обы́чное, и отпу́ст.

По 1-м стихосло́вии, седа́льны кре́стны. Гла́с 5:

Ме́сто Ло́бное Ра́й бы́сть, то́чию бо водрузи́ся Дре́во Кре́стное, а́бие израсти́ Гро́зд Диво́тный, в на́ше весе́лие, Тебе́, Спа́се: сла́ва Тебе́.

Сти́х: Возноси́те Го́спода Бо́га на́шего, и покланя́йтеся подно́жию но́гу Его́, я́ко свя́то е́сть.

Распе́ншагося Спа́са и Изба́вителя на́шего во́лею, я́коже ве́сть, и я́коже благоизво́ли, воспои́м ве́рнии, и просла́вим: я́ко пригвозди́ на Кресте́ грехи́ челове́ков: избавля́я от пре́лести ро́д челове́ческий, и Ца́рствию сподо́бил е́сть.

Сла́ва, и ны́не: Крестобогоро́дичен: Возвы́шена на Дре́ве я́ко узре́ Роди́вшая Тя́ боле́зней кроме́, рыда́ше с пла́чем и взыва́ше: увы́ Мне́, сладча́йший Сы́не, уязвля́юся душе́ю, на Кресте́ зря́щи Тя́ пригвожде́на, посреде́ двою́ злоде́ю, я́коже злоде́я пригвожде́на.

По 2-м стихосло́вии седа́льны, гла́с 5.

Распя́тие претерпе́вый Свое́ю во́лею, и от истле́ния челове́ки свободи́в, Спа́се, воспева́ем ве́рнии, и покланя́емся Ти́, я́ко просвети́л еси́ на́с си́лою кре́стною: и стра́хом сла́вим Тя́, Человеколю́бче ще́дрый, я́ко Жизнода́вца и Го́спода.

Сти́х: Бо́г же Ца́рь на́ш пре́жде ве́ка, соде́ла спасе́ние посреде́ земли́.

Дре́во Креста́ Твоего́, Спа́се на́ш, ми́рови яви́ся спасе́ние: на то́м бо пригвозди́лся еси́ во́лею, и от кля́твы изба́вил еси́ земноро́дныя. Все́х ра́досте, Го́споди, сла́ва Тебе́.

Сти́х: Ди́вен Бо́г во святы́х Свои́х, Бо́г Изра́илев.

Му́ченичен: Го́споди, ча́ше Страсте́й Твои́х страстоте́рпцы Твои́ поревнова́вше, оста́виша жите́йская красне́йшая, и бы́ша а́нгелом соприча́стницы: те́х мольба́ми пода́ждь душа́м на́шим ми́р, Христе́, и ве́лию ми́лость.

Сла́ва, и ны́не: Крестобогоро́дичен: Кресто́м Сы́на Твоего́, Богоблагода́тная, и́дольская пре́лесть вся́ упраздни́ся, и де́монская кре́пость попра́ся, сего́ ра́ди ве́рнии, по до́лгу Тя́ при́сно пое́м, и благослови́м, и Богоро́дицу вои́стинну испове́дающе Тя́ велича́ем.

По 3-м стихосло́вии, седа́льны, гла́с 5.

Подо́бен: Собезнача́льное Сло́во:

Проро́ческая прорече́ния уже́ испо́лнишася, дре́вний Сове́т Тво́й коне́ц прия́т: Ты́ бо во́лею, все́х Царю́, пло́тию оубо́жал еси́, Христе́, и прия́л еси́ на́с ра́ди взы́ти на Кре́ст, и сме́рть претерпе́ти. Те́мже сла́вим, Сло́ве, е́же па́че ума́ Твое́ схожде́ние.

На Кресте́ Тя пригвожде́на и усну́вша а́нгельстии чи́нове ви́девше, устраши́шася, Иису́се Всецарю́, и побего́ша а́бие бесо́встии полцы́, и сокруши́шася вереи́ а́довы, и сме́рти мучи́тельство низложи́ся: и и́же во гробе́х ме́ртвии воскресо́ша.

Сла́ва, и ны́не: Крестобогоро́дичен: На Кресте́ зря́щи Тя́, Христе́, Ма́ти Твоя́, во́лею посреде́ разбо́йнику ви́сяща, растерза́ющися утро́бою ма́терски глаго́лаше: безгре́шный Сы́не, ка́ко непра́ведно на Кресте́, я́коже злоде́й пригвожде́н еси́? И́же челове́ческий ро́д хотя́ оживи́ти, я́ко Благоутро́бен.

Кано́н Кресту́, [его́же краегране́сие си́це: Ми́р вознося́й, Христе́, возне́слся еси́ на Дре́во.] Творе́ние Ио́сифово, гла́с 5

Пе́снь 1

Ирмо́с: Коня́ и вса́дника в мо́ре Чермно́е, сокруша́яй бра́ни мы́шцею высо́кою, Христо́с истрясе́, Изра́иля же спасе́, побе́дную пе́снь пою́ща.

И́же непостиже́нием разумева́емаго воплоще́нна, и ми́ру я́вльшася пло́тию, на Дре́ве воздви́же дре́вле восхоте́вшаго, евре́йский собо́р законопресту́пный.

Егда́ Плодоно́сна Виногра́да Тебе́, Христе́, на Дре́во Кре́стное евре́и возбеси́вшеся воздвиго́ша, тогда́ вино́ иска́пал еси́ весе́лия, Сло́ве, вся́ко пия́нство злы́х отъе́млющее.

Му́ченичен: Зако́ном не подпа́дает похва́льным, му́ченицы, ва́ше терпе́ние: па́че бо естества́ вся́каго челове́ческаго боле́зни претерпе́сте, и ко упокое́нию неболе́зненному всели́стеся веселя́щеся.

Му́ченичен: Во́лны му́к преплы́вше окормле́нием Сло́ва, всехва́льнии Христо́вы страда́льцы, во приста́нища достиго́сте Небе́сная, Боже́ственныя тишины́ ны́не наслажда́ющеся.

Богоро́дичен: Егда́ из чре́ва Твоего́ рожде́ннаго Го́спода, усмотри́вши на Дре́во без пра́вды возвыша́ема, Де́во, прослези́лася еси́, и Того́ воспе́ла еси́ неизрече́нное вои́стинну снизхожде́ние.

Други́й кано́н Богоро́дице, [его́же краегране́сие: Пя́тое быва́ет пе́ние ны́не Де́ве] Гла́с 5

Ирмо́с то́йже.

Две́ри Боже́ственныя Сла́вы, отве́рзшая ра́йския две́ри, покая́ния две́ри и мне́ отве́рзи, молю́ся, и у́м мо́й просвети́ воспева́ти Тя́, Богора́дованная.

Уста́вила еси́ сме́ртное устремле́ние, ро́ждшая живото́м и сме́ртию облада́ющаго, Всенепоро́чная: Того́ у́бо моли́, умерщвля́ющая прегреше́ния, ду́шу мою́ уста́вити, и спасти́ мя.

Еди́ну от родо́в Тя́ добро́ту Иа́ковлю, избра́ Сло́во Отцу́ Собезнача́льное, и от Твои́х воплоти́ся крове́й: Влады́чице, спаси́ мя хода́тайствы Твои́ми.

Я́коже на руно́ До́ждь Небе́сный на Тя́ сше́дший, подъя́ла еси́, Всечи́стая: те́мже одожде́ния страсте́й мои́х изсуши́, молю́ Тя, Ма́ти Де́во.

Пе́снь 3

Ирмо́с: Водрузи́вый на ничесо́мже зе́млю повеле́нием Твои́м, и пове́сивый неодержи́мо тяготе́ющую, на недви́жимем, Христе́, ка́мени за́поведей Твои́х, Це́рковь Твою́ утверди́, Еди́не Бла́же и Человеколю́бче.

Распина́ешися, и Ра́й па́ки отверза́ется, и разбо́йник пре́жде все́х ра́дуяся вхо́дит; и умира́еши, Иису́се мо́й, и вра́г льсте́ц умерщвля́ется, умерщвле́нный же Ада́м оживля́ется: сла́ва мно́гому Твоему́ милосе́рдию.

Увяда́еши грехо́вный пла́мень, распина́емь, Иису́се, на Дре́ве за бла́гость; реши́ши пре́лесть связу́емь; обнаже́н бы́в одева́еши оде́ждею сла́вы челове́ка: сла́ва мно́гому благоутро́бию Твоему́.

Му́ченичен: Явле́й при́сно сия́ющия зве́зды, му́ченики, нече́стия тьму́ прогоня́ющия, те́х мольба́ми, Христе́, но́щь зо́л мои́х отжени́, и просвети́ омраче́нное мое́ се́рдце.

Му́ченичен: Зако́нно благосла́внии пострада́вше му́ченицы, и зако́нною ве́рою венцы́ венча́ни бы́ша, и беззако́ннующих сове́ты уклони́ша му́дре, и пи́щу Боже́ственную прия́ша, и ра́йское вселе́ние.

Богоро́дичен: Пою́т а́нгельстии ли́цы Тя́, Всепе́тая, без разсужде́ния си́х преиму́щую: Бо́га бо родила́ еси́ пло́тию, от дре́ва кля́тву Дре́вом погу́бльшаго, и благослове́ние источи́вшаго.

И́н. Ирмо́с то́йже.

Стрела́ми грехо́вными уя́звленнаго мя́, в Тебе́ лечбо́ю всего́ исцели́, Чи́стая. И от содержа́щих мя́ измени́ боле́зней, я́же боле́зней премени́вшая ро́д челове́ческий Рождество́м Твои́м.

Я́же всу́е смире́нное се́рдце мое́ оскорбля́ющия и и́щущия умертви́ти мя́ неви́димыя враги́, Влады́чице, Твои́м низложи́ заступле́нием, да пребу́дут безде́льни, студа́ исполня́еми.

Во́д животво́рных мя́ испо́лни, Влады́чице, Я́же Боже́ственную Во́ду ми́рови источи́вшая; беззако́ний мои́х лю́тыя изсуши́ пото́ки, и се́рдца моего́ во́лны Боже́ственною Твое́ю тишино́ю укроти́.

Пре́йде се́нь, Зако́ну сконча́ему: Законода́вца бо Христа́ родила́ еси́, благода́ть очище́ния и просвеще́ния на́м законополага́юща, и кля́твы изыма́юща, Пречи́стая Де́во, Всенепоро́чная.

Пе́снь 4

Ирмо́с: Боже́ственное Твое́ разуме́в истоща́ние, прозорли́во Авваку́м, Христе́, со тре́петом вопия́ше Тебе́: во спасе́ние люде́й Твои́х, спасти́ пома́занныя Твоя́ прише́л еси́.

Душа́м всеконе́чное избавле́ние сотворя́я, Христе́, в ру́це Отцу́ пре́дал еси́ Пресвяту́ю Ду́шу Твою́, на Дре́ве во́лею ви́симь.

Непра́ведный судия́ осуди́ Тя, Пра́веднаго Судию́, Иису́се, умре́ти на Дре́ве ви́симу, я́ко да оправди́ши на́с, непра́ведно врагу́ подкло́ншияся.

Му́ченичен: Ви́дети сподо́бистеся, му́ченицы, я́же от ве́ка блага́я, беда́м мно́гим и ско́рбем, и неизче́тным му́кам на земли́ явле́нно причасти́вшеся.

Му́ченичен: Зи́му искуше́ний преидо́сте, и к весне́ воздая́ния Небе́снаго достиго́сте, и лико́м а́нгельским, честни́и, сочета́стеся, му́ченицы.

Богоро́дичен: Ору́жие Боже́ственных Страсте́й про́йде Твою́, Благослове́нная, ду́шу, внегда́ ви́дела еси́ распина́ема Твоего́ Сы́на, и в ру́це О́тчи ду́шу преда́вша.

И́н. Ирмо́с то́йже.

От де́л спасе́ния не́сть ми́, те́мже под кро́в Тво́й с наде́ждею прибега́ю, Де́во Bсенепоро́чная, отча́яннаго мя́ спаси́ моли́твами Твои́ми.

Све́та чи́стое прия́телище, Со́лнца носи́ло честно́е, омраче́ное се́рдце мое́ лю́тых мра́ком, озари́ и спаси́ мя, молю́ся, Влады́чице.

Истка́вшая оде́жду от крове́й Твои́х де́вственных, не́бо о́блаки, Отрокови́це, одева́ющему, оде́ждею нетле́ния облецы́, пре́лестию обнаже́ннаго мя́.

От удо́лий жите́йских, я́ко кри́н восприя́т Тя́ Зижди́тель; из Тебе́ ми́рови вдохну́ духо́вное благоуха́ние, Де́во Пресвята́я, Богоневе́сто.

Пе́снь 5

Ирмо́с: Одея́йся све́том я́ко ри́зою, к Тебе́ у́тренюю и Тебе́ зову́: ду́шу мою́ просвети́ омраче́нную, Христе́, я́ко Еди́н Благоутро́бен.

Стоя́л еси́ суди́мь, Пра́ведный Судие́, Христе́, и осужда́я пло́тию вражду́, тро́стию бие́мь, и свобожде́ние соверше́нное подпису́я мне́.

Тебе́ я́ко ви́де пло́тию ви́сима, Христе́, на Дре́ве, со́лнце све́т во тьму́ преложи́, и земля́ поколеба́ся, и ка́мение распаде́ся.

Му́ченичен: Земли́ концы́ освяти́ли есте́, я́ко испо́лнителие бо Зако́на Боже́ственнаго, всехва́льнии му́ченицы, стра́ждуще, святы́ню насле́довасте.

Му́ченичен: Предо́брейшии и богоза́рнейшии, и́же Боже́ственною сла́вою оде́яни, и обнажи́вше вра́жию зло́бу, му́ченицы да почита́ются.

Богоро́дичен: Тебе́ Всенепоро́чную Бо́жию Роди́тельницу ублажа́ем. Ея́же ра́ди кля́тва непло́дна бы́сть, и избавле́ние и благослове́ние даде́ся.

И́н. Ирмо́с то́йже.

Да обря́щу Тя́ по́мощь, Де́во, изыма́ющую мя́ в Ча́с Су́дный осужде́ния, егда́ суди́щу из Тебе́ Ро́ждшагося предста́ну.

Зако́ном мя́ побежда́ема грехо́вным, Чи́стая, и пре́лестьми чужда́го ча́сто прельща́ема, и в бре́ги прегреше́ний низре́ема обрати́.

Угль ро́ждшая, Его́же узре́ Иса́ия, попали́ ве́щь, Всенепоро́чная, мои́х согреше́ний, и просвети́ мя, молю́ся.

Пло́ть от крове́й Твои́х Христу́ взаи́м да́вши, плотски́я моя́, Де́во, стра́сти отню́д очи́сти, и безстра́стия стезю́ покажи́ ми.

Пе́снь 6

Ирмо́с: Неи́стовствующееся бу́рею душетле́нною, Влады́ко Христе́, страсте́й мо́ре укроти́, и от тли́ возведи́ мя, я́ко Благоутро́бен.

Воздви́жеся, Долготерпели́ве, на Дре́во, вся́ вра́жия возвыше́ния низложи́л еси́, и спа́сл еси́ па́дшаго, мно́гия ра́ди Твоея́ бла́гости.

Ду́ши пра́ведных, на Дре́ве дре́вле ду́шу Тя́ предаю́ща, Влады́ко, я́ко ощути́ша, ве́чных у́з, Сло́ве, отпуща́еми быва́ху.

Му́ченичен: Я́коже тве́рдии адама́нти, му́к вся́ко разжже́ние терпели́вым нра́вом претерпе́сте, и врага́ смири́вшеся низложи́сте.

Му́ченичен: Подо́бницы Христо́вым Страсте́м бы́вше, подъя́сте вся́ко муче́ние, страстоте́рпцы Госпо́дни – сего́ ра́ди Небе́сных красо́т сподо́бистеся.

Богоро́дичен: Ди́вно Рождество́ Твое́, е́же ве́лия чудеса́ творя́щее, и во святы́х прославля́емо, Богоро́дице, Еди́на Всечу́дная Влады́чице.

И́н. Ирмо́с то́йже.

Да не пожре́т мене́, Влады́чице, уны́ния глубина́, и грехо́вная волна́ да не покры́ет мене́: но Твое́ю моли́твою да спасе́н бу́ду, Еди́на Чи́стая.

Зако́на све́щник прообража́ше Тя́ ро́ждшую Све́т, Просвети́вшаго, Пречи́стая, вся́ческая. Те́мже вопию́ Ти: омраче́ннаго мя́ просвети́.

Блага́го ро́ждшая, Благоде́теля и Соде́теля, Всечи́стая Влады́чице, и Благолюби́вая, ду́шу мою́ озло́бленную ублажи́.

Вину́ спасе́ния Жизнода́вца родила́ еси́ на́м, ве́чное избавле́ние да́рующа вои́стинну, Тя́ Богоро́дицу пропове́дающим.

Пе́снь 7

Ирмо́с: Превозноси́мый отце́в Госпо́дь, пла́мень угаси́, о́троки ороси́ согла́сно пою́щия: Бо́же, благослове́н еси́.

Венча́ те́рнием Тя́, Царю́ Безсме́ртне, собо́р законопресту́пный, из ко́рене изсеца́юща преле́стное те́рние: Бо́же, благослове́н еси́.

Да облече́ши мя́ оде́ждею, Сло́ве, нетле́ния, обнажи́лся еси́ во́лею: и терпи́ши оплева́ния, и распя́тие, и стра́сть, Безстра́стен сы́й по существу́.

Му́ченичен: Сообра́зни бы́вше Страсте́м, святи́и, все́ми Влады́чествующему, вои́стинну есте́ сы́нове и насле́дницы Ца́рствия непоколеби́маго.

Му́ченичен: Древесе́м безслове́снейшим не принесо́сте че́сти, на Дре́ве просте́ршаго ру́це чту́ще, я́ко все́х Царя́ и Влады́ку.

Богоро́дичен: Стра́нно е́сть Рождество́ Твое́, Всенепоро́чная: Бо́га бо родила́ еси́, Дре́вом увяди́вшаго пла́мень пре́лести, и просвети́вшаго ми́р.

И́н. Ирмо́с то́йже.

Пою́ Тя, Всепе́тая, Бо́га бо Препе́таго без се́мене родила́ еси́, Де́во Всесвята́я, обожа́ющаго пою́щих: Бо́же, благослове́н еси́.

Умертви́ стра́сти моя́, Жи́знь ро́ждшая, воздви́гни мя́ лежа́ща от гро́ба нечу́вствия, да любо́вию сла́влю Тя́, Богоневе́сто.

При́зри на моле́ния рабо́в Твои́х, Влады́чице, от бе́д избавля́ющи, и от скорбе́й спаса́ющи, ве́рою пою́щия: Бо́же, благослове́н еси́.

Неисчетноси́льнаго, на́шу не́мощь поне́сшаго, родила́ еси́, Чи́стая: Его́же моли́, исцели́ти ду́шу мою́, лю́те изнемо́гшую.

Пе́снь 8

Ирмо́с: Тебе́, Вседе́телю, в пещи́ о́троцы, всеми́рный ли́к спле́тше, поя́ху: дела́ вся́кая, Го́спода по́йте, и превозноси́те во вся́ ве́ки.

Вы́шний Бо́же, на Кре́ст воздви́глся еси́, же́лчи напоя́емь, сла́досте жи́зненная; копие́м пробода́ешися, закала́я зми́я, в Раи́ Ада́ма низложи́вшаго.

Разреша́еши мя́ от у́з грехо́вных, С сло́ве, хоте́нием связу́емь, и ве́чными у́зами связу́я, Спа́се, врага́ отсту́пника. Те́мже Твоя́ сла́влю Стра́сти во ве́ки.

Му́ченичен: Яви́стеся прича́стницы Све́та Невеще́ственнаго, све́ти су́ще втори́и, святи́и му́ченицы, тьму́ пре́лести отъе́млюще, и все́х ве́рных сердца́ просвеща́юще боже́ственне.

Му́ченичен: Иерусали́ма Вы́шняго свобо́днаго сы́нове бы́сте, му́ченицы, просвеща́юще перворо́дных Це́рковь, и превознося́ще Христа́ во ве́ки.

Богоро́дичен: Стоя́ла еси́ у Креста́ смотря́ющи, Отрокови́це, пригвожде́на Христа́, Его́же родила́ еси́, Влады́чице. Те́мже вопия́ше: не безча́дну мя́ яви́, Безнача́льне, безнача́льнаго Отца́ Сы́не и Сло́ве.

И́н. Ирмо́с то́йже.

Я́же предо́брая и богозра́чная Де́во, до́брых мя́ виде́нием удобри́вши просвети́, я́ко да зову́: Го́спода по́йте, и превозноси́те Его́ во ве́ки.

Врата́ Све́та, покая́ния ми́ врата́ светоза́рная отве́рзи, показу́ющи вся́кий пра́вый пу́ть пра́вды, приводя́щий к Боже́ственнаго хоте́ния вхо́ду.

Свято́е, Чи́стая, Сло́во, ве́рныя освяща́ющее, неизглаго́ланно родила́ еси́: Того́ моли́, Пресвята́я, смире́нную ду́шу мою́ ны́не освяти́ти, зло́бою оскверне́ную.

Струя́ све́тлая и исто́чник безсме́ртия, свята́я Влады́чице, из Тебе́ произы́де, И́же все́х Госпо́дь. Те́мже вопию́ Ти, Чи́стая: струи́ зо́л мои́х изсуши́ ту́чами Твои́х моли́тв.

Та́же, пое́м пе́снь Богоро́дице: Вели́чит душа́ моя́ Го́спода: покло́ны.

Пе́снь 9

Ирмо́с: Иса́ие лику́й, Де́ва име́ во чре́ве, и роди́ Сы́на Емману́ила, Бо́га же и челове́ка, Восто́к и́мя ему́. Его́же велича́юще, Де́ву ублажа́ем.

Я́ко а́гнец воздви́глся еси́ на Дре́во, Влады́ко Христе́, че́люсти сокруша́я во́лка мы́сленнаго, и от у́ст его́ исхища́я Твоя́ слове́сныя о́вцы, и приводя́, Влады́ко, Роди́телю.

Венце́м терно́вым увя́злся еси́, я́коже Ца́рь Ца́рствующих, Христе́, лука́ваго потребля́я ца́рствия, и из ко́рене изсеца́я пре́лести те́рние: те́мже ве́рою Тя́, Бла́же, сла́вим.

Му́ченичен: Облиста́ я́коже со́лнце тве́рдое стоя́тельное сопротивле́ние ва́ше, и всю́ разруши́ вра́жию мглу́, му́ченицы непобеди́мии, просвети́телие все́х ве́рных, столпи́ непрекло́ннии благоче́стия, достосла́внии.

Му́ченичен: По́лк богосо́бран, во́инство Небе́сное, собо́р избра́нный, свята́я се́нь яви́стеся, вы́ всехва́льнии му́ченицы Спа́са, лука́ваго гра́ды разруша́юще Боже́ственною благода́тию.

Богоро́дичен: Садоде́теля родила́ еси́, благоче́стия Сади́теля, всажда́юща на земли́ ра́зум и́стинный, и прозя́бшую, от сада́ разоря́юща кля́тву, Его́же велича́юще, Тебе́ Де́ву ублажа́ем.

И́н. Ирмо́с то́йже.

Основа́ние непоколеби́мо, Спа́са родила́ еси́, Чи́стая, на вода́х зе́млю Боже́ственным повеле́нием основа́вшаго. Его́же моли́ на́с утверди́ти, чи́сто Тебе́ блажа́щих.

В пу́ть смире́ния повеле́ний Боже́ственных, незаблу́дно ше́ствовати, и непреле́стно сотвори́ мя, Чи́стая, бесо́вский мяте́ж, и страсте́й нахожде́ния отгоня́ющи, и тишину́ подаю́щи ми́.

Дрема́нием одержи́ма нераде́ния, ви́дя вра́г нахо́дит неосла́бно, сно́м сла́стным наде́яся укра́сти мя́: но сама́ мя сохрани́, Чи́стая, неусы́пною Твое́ю моли́твою, Ма́ти Де́во.

Я́ко самоосужде́н, помышля́ю мои́х грехо́в мно́жество, и Стра́шное Суди́ще Судии́, на не́мже хощу́ суди́тися: но я́же Судию́ ро́ждшая Бо́га, тогда́ мя соблюди́, Богоро́дице, неосужде́на.

Та́же, Досто́йно е́сть: И покло́н. Та́же, ектения́ ма́лая, свети́лен, и псалмы́ обы́чныя.

На стихо́вне стихи́ры кре́стны, гла́с 5:

То́чию водрузи́ся Дре́во, Христе́, Креста́ Твоего́, пре́лесть прогна́на бы́сть и́дольская, и благода́ть процвете́: не бо́ ктому́ осужде́ния е́сть мучи́тельство, но побе́да яви́ся на́с спасе́ния. Кре́ст бо на́м е́сть похвала́, Кре́ст на́м утвержде́ние, Кре́ст на́м ра́дование.

Сти́х: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся: во вся́ дни́ на́ша возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я, и при́зри на рабы́ Твоя́ и на дела́ Твоя́, и наста́ви сы́ны и́х.

Веде́н бы́л еси́ на́с ра́ди на же́ртву, Христе́, я́ко овча́, и я́ко А́гнец незло́бив Емману́ил, на заколе́ние во́льное, с беззако́нники вмене́н бы́л еси́. Прииди́те, воспо́йте оте́чествия язы́к, и поклони́теся на Кресте́ пове́шеному Животу́ Безконе́чному.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Святи́и му́ченицы на земли́ подви́гшеся, мра́з претерпе́ша, огню́ преда́шася, вода́ и́х прия́т, те́х е́сть гла́с: проидо́хом сквозе́ о́гнь и во́ду, и изведе́ ны в поко́й. Моли́твами и́х, Христе́ Бо́же, поми́луй на́с.

Сла́ва, и ны́не: Крестобогоро́дичен: Зря́щи дре́вле А́гнца и Сы́на Своего́, Де́ва Ма́ти и Всеблаже́нная Отрокови́ца, на Кре́ст воздви́жена, вопия́ше слезя́щи: увы́ Мне́, Сы́не Мо́й, ка́ко умира́еши, Бо́г естество́м сы́й безсме́ртен?

Та́же, Бла́го е́сть испове́датися Го́сподеви: Трисвято́е по О́тче на́ш: Тропа́рь свято́му. Ектения́. Та́же, ча́с пе́рвый, псалмы́ обы́чныя, и про́чая поря́ду, и отпу́ст.

Разбо́йник на Кресте́ Бо́га Тя́ бы́ти ве́ровав, Христе́, испове́да Тя́ чи́сте от се́рдца, помяни́ мя, Го́споди, вопия́, во Ца́рствии Твое́м.

Сти́х: Блаже́ни изгна́ни пра́вды ра́ди, я́ко те́х е́сть Ца́рство Небе́сное.

Прободе́н бы́в в ре́бра, пото́ки оставле́ния источи́л еси́, Христе́; пригвозди́в же свои́ на Кресте́ ру́це, ве́сь разоря́я стра́стный челове́ком ра́зум.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л, на вы́ лжу́ще Мене́ ра́ди.

Возше́д на Кре́ст, все́ поколеба́л еси́ бесо́вское мно́жество, и низве́ргл еси́ па́губную держа́ву мучи́теля, Влады́ко Христе́, и спа́сл еси́ челове́чество.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

Подо́бницы Христо́вым Страсте́м, блаже́ннии, бы́вше, подъя́сте вся́ко муче́ние, страстоте́рпцы Госпо́дни – сего́ ра́ди Небе́сных красо́т сподо́бистеся.

Сла́ва: На Кресте́, и́же Отцу́ и Боже́ственному Ду́ху неразде́льный, во́льную претерпе́л еси́ Стра́сть, Христе́, стра́сти вся́ тлетво́рныя на́ша оте́мля.

И ны́не: Предстоя́щи у Креста́ Богора́дованная, и Сы́на Своего́ ви́дящи уя́звлена, душе́ю уязвля́шеся, воспева́ше Того́ мно́гое вои́стинну смотре́ние.

На Го́споди, воззва́х: стихи́ры святы́м апо́столом, гла́с 5:

Подо́бен: Ра́дуйся по́стником:

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

Всю́ проше́дше зе́млю, все́ясте Боже́ственная уче́ния, сло́во то́чию я́ко све́щник и бога́тство все́, ученицы́ Госпо́дни, нося́ще, и́мже цари́ же и мучи́тели посрами́сте, и любомудреце́м и вити́ям лю́тость я́ко паучи́нная раздра́сте плете́ния, все́х к ра́зуму призыва́юще Зижди́теля, и су́етная служе́ния бесо́вская отъе́млюще. Те́мже молю́, безслове́сных изба́вити мя́ страсте́й моли́твами ва́шими.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Мяте́жа искуше́ний, и лю́тыя лжи́ безче́стных ересе́й, бесо́вскаго злосове́тия, и челове́к го́рькаго сообще́ния и бу́ри, всеблаже́ннии, огня́ несвети́маго, и ве́чнующаго че́рвия, скре́жета зубна́го, и вся́кия ины́я му́ки, к Бо́гу мольба́ми изба́вите все́х на́с, и Сего́ умоли́те, воздержа́ния ра́ди и трудо́в, доброде́телей воздая́ний получи́ти, насле́дия же Небе́снаго Ца́рствия, и ве́лию ми́лость.

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Всю́ све́тлость я́сно восприе́млюще, Тро́ичный све́т вторы́й неизрече́ннаго смотре́ния, я́ко мо́щно вои́стинну челове́ческому естеству́, всехва́льная десяти́ца со дво́ицею, показа́ся соверше́нне водя́щи единоревни́тельный собо́р, седми́десятих и дву́ иму́щи с ни́ми, и вся́ просвеща́юще ми́ра концы́, омрача́ющияся тьмо́ю злому́дренных ересе́й, Христа́ моля́ще, подаю́щаго ми́рови ве́лию ми́лость.

И́ны стихи́ры, и́же во святы́х отцу́ на́шему Никола́ю Чудотво́рцу, гла́с 5. Подо́бен то́йже.

Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.

Ра́дуйся, свяще́нная главо́, чи́стое доброде́телей оби́телище, Боже́ственное непоро́чнаго свяще́нства пра́вило, па́стырю вели́кий я́вственный, све́тлое побе́ды нося́ и́мя, моля́щимся ми́лостивный приклони́телю, преклоня́яся к немощны́х мольба́м, изба́витель гото́вый, прибе́жище спаси́тельное все́м, ве́рою чту́щим при́сно сла́вную твою́ па́мять, Христа́ моли́, низпосла́ти на́м ве́лию ми́лость.

Сти́х: Хвали́те Го́спода вси́ язы́цы, похвали́те его́ вси́ лю́дие.

Ра́дуйся, свяще́ннейший у́ме, Тро́ицы чи́стое жили́ще, сто́лпе церко́вный, ве́рных утвержде́ние, озло́бленным помо́щниче, звезда́ и́же блиста́ньми благоприя́тных моли́тв, разоря́я напа́сти же и ско́рби тьму́ всегда́, святи́телю Нико́лае; приста́нище ти́хое, в не́же прибега́юще треволне́нии жития́ напа́ствуемии спаса́ются. Христа́ моли́, низпосла́ти душа́м на́шим ве́лию ми́лость.

Сти́х: Я́ко утверди́ся ми́лость Его́ на на́с и и́стина Госпо́дня пребыва́ет во ве́к.

Ра́дуйся, во святи́телех пра́вило, Боже́ственных чуде́с неисчерпа́емая пучи́но, красото́ церко́вная, све́тлая звездо́, свяще́нными твои́ми, блаже́нне, блиста́ньми, на́с озаря́я коего́ждо святе́йший, пресве́тлыми мо́лниями просвеща́емь; сто́лпе необори́мый, степе́ню ве́ры, честну́ю твою́ па́мять любо́вию соверша́ющим, Христа́ моли́, душа́м на́шим дарова́ти ве́лию ми́лость.

Сла́ва, и ны́не: Богоро́дичен: Ра́дуйся, проро́ческая печа́те, и богогла́сных апо́стол пропове́дание: Бо́га бо вои́стинну су́щаго воплоще́нна, па́че ума́ и сло́ва родила́ еси́, Чи́стая. И́мже пе́рвое восприи́мше благоро́дие, и ра́йския пи́щи наслажда́ющеся, Тебе́ хода́таицу таковы́я све́тлости, и моли́твенницу благоприя́тну, пе́сньми почита́ем. Тобо́ю, Пречи́стая, обогати́вшеся, присносу́щныя сподобля́емся жи́зни Сы́на Твоего́, подаю́щаго бога́тно ве́лию ми́лость.

Та́же, Све́те ти́хий: Проки́мен дне́. Та́же, Сподо́би, Го́споди, в ве́чер се́й:

На стихо́вне стихи́ры апо́столом, гла́с 5:

Ученицы́ Спа́совы, та́ин самови́дцы бы́вше, Неви́димаго и нача́ла не иму́щаго пропове́дасте, глаго́люще: в нача́ле бе́ Сло́во. Не со́здани бы́сте пре́жде а́нгел, ни научи́стеся от челове́к, но от Вы́шния Прему́дрости. Те́мже дерзнове́ние иму́ще, моли́теся о душа́х на́ших.

Сти́х: К Тебе́ возведо́х о́чи мои́, живу́щему на Небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дрит ны́.

Апо́столы Госпо́дни согла́сно пе́сньми похва́лим, обле́кшеся бо в Кре́стное ору́жие, и́дольскую пре́лесть упраздни́ша, и победоно́снии яви́шася вене́чницы: и́хже моли́твами и все́х святы́х, Бо́же, поми́луй на́с.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих, и уничиже́ния го́рдых.

Му́ченичен: Несы́тною любо́вию души́, Христа́ не отверго́стеся, святи́и му́ченицы, и́же разли́чныя ра́ны страсте́й претерпе́вше, мучи́телей де́рзость низложи́сте, непрекло́нну и невреди́му ве́ру сохра́ньше, на Небеса́ преста́вистеся. Те́мже и дерзнове́ние иму́ще к Нему́, проси́те дарова́ти на́м ве́лию ми́лость.

Сла́ва, и ны́не: Богоро́дичен: Блажи́м Тя́, Богоро́дице Де́во, и сла́вим Тя́ ве́рнии по до́лгу, гра́д непоколеби́мый, сте́ну необори́мую, тве́рдую Предста́тельницу, и прибе́жище ду́ш на́ших.

Та́же, Ны́не отпуща́еши раба́ Твоего́, Влады́ко: Трисвято́е по О́тче на́ш: Иере́й: Я́ко Твое́ е́сть Ца́рство: Посе́м тропа́рь, ектения́, и отпу́ст.

Кано́н Пресвяте́й Богоро́дице, гла́с 5.

Пе́снь 1

Ирмо́с: Спаси́телю Бо́гу, в мо́ри лю́ди немо́крыми нога́ми наста́вльшему и фарао́на со всево́инством пото́пльшему, Тому́ Еди́ному пои́м, я́ко просла́вися.

Запе́в: Пресвята́я Богоро́дице, спаси́ на́с.

Светоно́сная Ски́ние Царя́ Христа́, озари́ мою́ мы́сль омраче́нную ле́стию борца́, и тьмо́ю ослепле́нную прегреше́ний мои́х.

Помышле́ний лука́вых смире́нную мою́ ду́шу, Богороди́тельнице, свободи́, и жили́ще Бо́гу сию́ соде́лай, да по до́лгу Тя́ сла́влю всегда́.

Сла́ва: Егда́ повеле́нием Бо́жиим, от вре́менныя жи́зни отыти́ хощу́, Пречи́стая, бесо́вския руки́ покажи́ мя вы́шша, а́нгелы подаю́щи спу́тники мне́.

И ны́не: Вску́ю, о душе́, во уны́нии мно́зе все́ житие́ ижди́ла еси́? Потщи́ся у́бо про́чее, и возопи́й Госпо́дни Ма́тери: очи́сти и спаси́ мя, Богороди́тельнице.

Пе́снь 3

Ирмо́с: Си́лою Креста́ Твоего́, Христе́, утверди́ мое́ помышле́ние, во е́же пе́ти и сла́вити Тридне́вное Твое́ Воскресе́ние.

Из ро́ва страсте́й и муче́ний возведи́ мя, несумне́нно пою́ща Тя́, Богоро́дице Всеблаже́нная.

Вре́тище мое́ расто́ргни безме́рных прегреше́ний мои́х, и весе́лием опоя́ши доброде́телей, Богоблагода́тная.

Сла́ва: Ка́плю ми́, Чи́стая, сле́з пода́ждь, я́ко да отжену́ се́рдца моего́ недоуме́ние, и приле́жно воспою́ Тя.

И ны́не: Низложи́, Пренепоро́чная, вра́г безпло́тных шата́ние, и те́х томле́ния вско́ре свободи́ мя.

Пе́снь 4

Ирмо́с: Услы́шах слу́х си́лы Креста́, я́ко Ра́й отве́рзеся и́м, и возопи́х: сла́ва си́ле Твое́й, Го́споди.

Вску́ю уподо́билася еси́, душе́, непло́дней смоко́внице, ника́коже боя́щися посече́ния и пла́мене ве́чнаго? Ускори́ у́бо пре́жде конца́, и возни́кни.

Ки́й язы́к изрече́т соде́янных мои́х зо́л безме́рное мо́ре, и глубину́ прегреше́ний? Спаси́ мя, Де́во Пренепоро́чная, отча́яннаго.

Сла́ва: Себе́ пла́чу, егда́ во у́м прииду́ мно́гих мои́х прегреше́ний, и огня́ негаси́маго, и молю́ Тя, да́ти ми́ вре́мя покая́ния, Чи́стая.

И ны́не: Да не восхи́тит я́ко ле́в стропти́вый вра́г окая́нную мою́ ду́шу: но Твое́ю си́лою душетле́нныя сокруши́ зу́бы его́, Блага́я.

Пе́снь 5

Ирмо́с: У́тренююще вопие́м Ти́, Го́споди, спаси́ ны: Ты́ бо еси́ Бо́г на́ш, ра́зве бо Тебе́ ино́го не зна́ем.

При́зри и услы́ши, Влады́чице, гла́с мо́й, и изба́ви мя́, молю́ся, ве́чнаго осужде́ния.

Уязви́хся греха́ стрела́ми, и вопию́ Ти: уврачу́й, Пречи́стая, се́рдца моего́ я́звы.

Сла́ва: Поми́луй мя́, Еди́не Человеколю́бче Ще́дрый, моли́твами Ро́ждшия Тя́: Ты́ бо ми́ еси́ Бо́г и Госпо́дь.

И ны́не: Поми́луй мя́, Еди́на Всепе́тая, молю́ Твою́ бла́гость, и ми́лости сподо́би.

Пе́снь 6

Ирмо́с: Обы́де мя́ бе́здна, гро́б мне́ ки́т бы́сть, а́з же возопи́х к Тебе́ Человеколю́бцу, и спасе́ мя десни́ца Твоя́, Го́споди.

Я́ко ле́в рыка́я льсти́вый и́щет мя́ расто́ргнути, и показа́ти сне́дь свое́й зло́бе, Чи́стая: но сего́ вре́да свободи́ мя.

Очи́сти, Человеколю́бче, моли́твами чи́сто Ро́ждшия Тя́, и изба́ви ми́р Тво́й от вся́кия ско́рби, и ве́чныя сла́вы сподо́би.

Сла́ва: Обы́де мя́ бе́здна прегреше́ний, во глубину́ низве́дши отча́яния, молю́ся, Чи́стая, возведи́ от преиспо́дняго а́да, Тебе́ сла́вящаго.

И ны́не: Житие́ мое́ испо́лнися прегреше́ний, и вся́кия ле́ности: те́мже к покая́нию пре́жде кончи́ны моея́, Чи́стая, обрати́, и спаси́ мя, Препе́тая.

Та́же, Го́споди, поми́луй, три́жды. Сла́ва и ны́не:

Седа́лен, гла́с 5:

Подо́бен: Собезнача́льное Сло́во:

Ра́дуйся, стено́ тве́рдая Богопобе́дная, ра́дуйся, паде́ние ва́рваров всевоева́нное, ра́дуйся, возведе́ние ве́рных правосла́вных люде́й, Богоро́дице, вои́стинну упова́ющих на Тя́, моли́твами твои́ми избавля́ющи на́с от бе́д вся́ческих, и от безбо́жных вра́г.

Пе́снь 7

Ирмо́с: В пещи́ о́гненней песносло́вцы спасы́й о́троки, благослове́н Бо́г оте́ц на́ших.

Нево́льных зо́л и во́льных, проще́ние Твое́ю бла́гостию, Влады́чице, пода́ждь ми́.

Изнемога́ет мо́й у́м, прило́ги нече́стия лука́вых по́мысл: помози́ ми, Блага́я.

Сла́ва: Душе́вных мои́х страсте́й ра́ны, Богоро́дице, Твои́х моли́тв лечба́ми ны́не исцели́.

И ны́не: Сокруше́нну ду́шу, и по́мысл смире́н, пода́ждь ми́, Блага́я: я́ко да сла́влю Тя́.

Пе́снь 8

Ирмо́с: Из Отца́ пре́жде ве́к рожде́ннаго Сы́на и Бо́га, и в после́дняя ле́та воплоще́ннаго от Де́вы Ма́тере, свяще́нницы по́йте, лю́дие превозноси́те во вся́ ве́ки.

В ле́ности житие́ сконча́в окая́нный, и прибли́жився к концу́ живота́ моего́, взыва́ю Ти́, Богоро́дице: сопроти́вных исхити́ сете́й смире́нную мою́ ду́шу.

Теле́сных боле́зней, ра́н лю́тых душе́вных, и страсте́й настоя́ния истязу́ему, Твоего́ Ца́рствия си́лу ми́ пода́ждь, я́ко Еди́на Ми́лостива.

Сла́ва: В пучи́не жития́ обурева́ема, и бесо́вскими волна́ми погружа́ема, спаси́, Чи́стая, и Боже́ственному устремле́нию, к благоуго́дному житию́ введи́ мя, Отрокови́це.

И ны́не: Я́ко в неве́стный черто́г входя́ Де́во, Гаврии́л по́слан, ра́дуйся, возопи́, глаго́ля, пресла́вная Пала́то все́х Царя́ Христа́, в Ню́же все́лься, земны́я вся́ обожи́.

Пе́снь 9

Ирмо́с: Тя́ па́че ума́ и словесе́ Ма́терь Бо́жию, в ле́то Безле́тнаго неизрече́нно ро́ждшую, ве́рнии единому́дренно велича́ем.

Тя́ Ю́же Бо́га несказа́нно ро́ждшую, засту́пницу стяжа́хом, и сте́ну недви́жиму, и душа́м спасе́ние, и чудесе́м исто́чник.

Ми́лостив бу́ди ми́, Сло́ве и́стиннаго Бо́га, в де́нь суда́, мольба́ми Ро́ждшия Тя́, и су́щим одесну́ю Тебе́ сочета́й.

Сла́ва: Изба́ви мя́, Чи́стая, огня́ ве́чнующаго, и неусыпа́ющаго че́рвия, и вся́кия му́ки, на Тя́ наде́жду возло́жшаго.

И ны́не: Егда́ хо́щет душа́ моя́ разлучи́тися от окая́ннаго моего́ телесе́, неви́димых вра́г томи́тельства изба́ви мя́, Богоневе́стная.

Та́же, Досто́йно е́сть: И покло́н. Посе́м, Трисвято́е по О́тче на́ш: тропари́, и про́чее обы́чное, и отпу́ст.

По 1-м стихосло́вии, седа́льны апо́столом, гла́с 5:

Я́ко самови́дцы и слуги́ Сло́ва, прему́дрыя апо́столы похва́лим, пе́сньми духо́вными и пе́ньми вси́ земни́и: ти́и бо Христа́ приле́жно мо́лят о на́с, пою́щих свяще́нную и́х па́мять, и кла́няющихся моще́м и́х.

Сти́х: Во всю́ зе́млю изы́де веща́ние и́х, и в концы́ вселе́нныя глаго́лы и́х.

Апо́столы согла́сно восхва́лим, я́ко самови́дцы Сло́ва, и Боже́ственныя пропове́дники, и язы́ков духо́вныя улови́тели, я́ко я́ве приведо́ша на́с к позна́нию Христа́, изба́вльше от пре́лести ро́д челове́ческий, и Ца́рствия сподо́биша.

Сла́ва, и ны́не: Богоро́дичен: Осужде́н е́смь судо́м со́вести, и пре́жде Суда́ су́д помышля́я, трепе́щу окая́нный, помина́я зо́л мои́х мно́жество. Но к Тебе́ необори́мей умиле́нием вопию́, и Предста́тельнице, и покро́ву: о́наго студа́ изба́ви мя́, и спаси́ моли́твами Твои́ми.

По 2-м стихосло́вии седа́льны, гла́с 5:

Апо́столы согла́сно похва́лим, я́ко пропове́даша все́м правосла́вное Госпо́дне уче́ние, и прогна́вшия ерети́ческую мглу́, и просвеще́ние духо́вно возсия́вшия в ми́ре, благода́ти уче́нием: и мо́лятся спасти́ся на́м.

Сти́х: Небеса́ пове́дают сла́ву Бо́жию, творе́ние же руку́ Его́ возвеща́ет тве́рдь.

И па́ки глаго́ли то́йже седа́лен.

Сти́х: Ди́вен Бо́г во святы́х Свои́х, Бо́г Изра́илев.

Му́ченичен: Святы́х му́ченик исправле́нием Небе́сныя Си́лы преудиви́шася, ка́ко в те́ле ме́ртвеннем до́бре подви́гшеся, безпло́тнаго врага́ си́лою Кре́стною неви́димо победи́ша, и мо́лятся Го́сподеви, поми́ловатися душа́м на́шим.

Сла́ва, и ны́не: Богоро́дичен: Тя́ приста́нище, и сте́ну, и прибе́жище, и наде́жду, и покро́в, и заступле́ние те́плое обре́тше ве́рнии, к Тебе́ притека́ем, и вопие́м приле́жно, и зове́м ве́рно: поми́луй, Богоро́дице, упова́ющих на Тя́, и от прегреше́ний изба́ви.

По 3-м стихосло́вии седа́льны, гла́с 5:

Подо́бен: Собезнача́льное Сло́во:

Ученицы́ Cпа́совы, Боже́ственнии апо́столи, и́же сло́во спаси́тельное все́явше в концы́ земли́, и озари́вше во тьме́ и се́ни седя́щия, мою́ просвети́те ду́шу омраче́нную страсте́й че́рностию, мольба́ми ва́шими, всехва́льнии.

Го́споди, неизрече́нное та́инство Твоего́ воплоще́ния пропове́давше нему́дрии, филосо́фов посрами́ша, ри́торов ры́барие заусти́ша, и бы́ша язы́ков прему́дрии учи́телие, просвети́вше концы́ све́том Боже́ственнаго ра́зума: те́ми пода́ждь на́м ве́лию ми́лость.

Сла́ва, и ны́не: Богоро́дичен: И́же упова́ние на Тя́, Де́во Пречи́стая, непоткнове́нное иму́щим, покро́в су́щи от разли́чных напа́стей и обстоя́ний, и бе́д лю́тых свободи́ на́с , моля́щи Сы́на Твоего́, со апо́столы Его́, и спаси́ все́х воспева́ющих Тя́.

Кано́н святы́м апо́столом, творе́ние Феофа́на, епи́скопа Ники́йскаго, гла́с 5

Пе́снь 1

Ирмо́с: Коня́ и вса́дника в мо́ре Чермно́е, сокруша́яй бра́ни мы́шцею высо́кою, Христо́с истрясе́, Изра́иля же спасе́, побе́дную пе́снь пою́ща.

Сия́нием первода́тнаго светода́ния, пло́тию бесе́довати челове́ком сподо́бившагося, обогати́вшеся сла́внии, души́ моея́ разруши́те вся́к мра́к, боже́ственнии апо́столи. [Два́жды.]

Напря́г Боже́ственный лу́к, я́коже стре́лы ва́с в ве́сь ми́р посла́, апо́столи, стре́лы сокруша́ющия злоко́зненнаго вся́, и исцеля́ющия ве́рных я́звы.

Иму́ще прему́дрость са́мую Учи́теля, умудри́сте, апо́столи, вся́ концы́. Те́мже мя́ умудри́те, вра́жие вся́ко злоде́йство отгоня́ти.

Богоро́дичен: Еди́на благослове́нная, Богора́дованная, благослове́ньми челове́ческий ро́д обра́довавши, Христа́ моли́ с боже́ственными, Пречи́стая, апо́столы, поми́ловатися на́м.

Други́й кано́н, и́же во святы́х отцу́ на́шему Никола́ю Чудотво́рцу. Творе́ние Ио́сифово, [его́же краегране́сие: Пя́тое принесу́ тебе́, Нико́лае, пе́ние.] Гла́с 5

Ирмо́с то́йже.

Ве́рою и любо́вию, о́тче, присво́ився Бо́гови, всесвята́я Сего́ испо́лнил еси́ хоте́ния. И́мже по всему́ свя́т бы́л еси́, святи́телю му́дре Нико́лае.

Иму́ще тя́ предста́теля к Ще́дрому, и́же напа́стьми и печа́льми одержи́мии, к тебе́ прибега́ем: да́руй ру́ку спаса́ющую на́с от вся́кия тесноты́.

Ми́ряном святи́теля Христо́с пома́за тя́, благово́нием чуде́с на́с облагоуха́юща. Те́мже мо́лим тя́, Нико́лае, злово́ния грехо́внаго изба́вити на́с.

Богоро́дичен: Дре́вле проро́ческий Тя́ ли́к пронарече́ го́ру боже́ственную, Де́во, и две́рь непроходи́мую. Те́мже мо́лимся Ти́: покая́ния две́ри боже́ственныя, Отрокови́це, отве́рзи на́м.

Пе́снь 3

Ирмо́с: Водрузи́вый на ничесо́мже зе́млю повеле́нием Твои́м, и пове́сивый неодержи́мо тяготе́ющую, на недви́жимем, Христе́, ка́мени за́поведей Твои́х, Це́рковь Твою́ утверди́, Еди́не Бла́же и Человеколю́бче.

И́же пло́тию обнища́вый, премно́гий бла́гостию, Его́ ра́ди обнища́вшия, обогати́ ва́с, сла́внии апо́столи, дарова́ньми вся́кими, обогаща́юща концы́ боже́ственными и честны́ми ра́зумы. [Два́жды.]

Уязви́хся ядови́тым зми́я угрызе́нием, уя́звено се́рдце стяжа́х. Те́мже Ти́ вопию́, Христе́, мене́ ра́ди уязви́вшемуся: апо́стол Твои́х мольба́ми исцели́, и спаси́ мя, молю́ся.

Мре́жею моли́тв ва́ших, всеблаже́ннии, от глубины́ зло́бныя бори́теля, и от треволне́ния помышле́ний, и от страсте́й смертоно́сных возве́дше мя́, приведи́те Бо́гу все́х спаса́ема.

Богоро́дичен: Я́же До́ждь прие́мшая Небе́сный, со апо́столы Того́ моли́, уста́вити пото́ки мои́х страсте́й, пучи́ну изсуша́ющи греха́ моего́, и спасти́ мя, чи́сто Тебе́ сла́вящаго.

И́н. Ирмо́с то́йже.

Стре́лы лука́ваго притупи́л еси́, преподо́бне, противле́нием боже́ственных твои́х трудо́в, но твои́ми моли́твами, прему́дре, от того́ злоде́йствия и наси́лия соблюди́ неврежде́нны, тебе́ воспева́ющия, вели́кий Нико́лае.

Житие́ а́нгельское на земли́ показа́в, ны́не со а́нгелы при́сно предстои́ши престо́лу Тро́ическому, свяще́нне, на́ших согреше́ний и напа́стей разреше́ния прося́, о́тче первосвяти́телю Нико́лае.

Ума́ моего́ омраче́ние все́ отжени́, Нико́лае, твои́ми светоно́сными моли́твами, ути́ши бу́рю страсте́й, упра́ви мя́, о́тче, к безстра́стия приста́нищу, молю́ся, я́ко да во хвале́нии сла́влю тя́.

Богоро́дичен: Предстоя́щи одесну́ю Христа́, я́ко Цари́ца, ря́сны златы́ми, Богообра́дованная, оде́яна вои́стинну, на́м Ца́рствие Небе́сное моли́твами Твои́ми, Отрокови́це, исхода́тай, Всенепоро́чная.

Пе́снь 4

Ирмо́с: Боже́ственное Твое́ разуме́в истоща́ние, прозорли́во Авваку́м, Христе́, со тре́петом вопия́ше Тебе́: во спасе́ние люде́й Твои́х спасти́ пома́занныя Твоя́ прише́л еси́.

Две́рь сы́й Иису́с, Бо́г на́ш и Госпо́дь, отве́рзл свое́ апо́столом позна́ние, все́м язы́ком две́рь отве́рзе те́х уче́ньми. [Два́жды.]

Сы́не Бо́жий, сы́ны по прича́стию Небе́снаго Отца́ Твоего́ апо́столы яви́л еси́: моле́нием и́х сы́ны све́та все́х на́с сотвори́.

И́же на престо́лех двоюна́десятих, с Судие́ю и Царе́м хотя́ще пресла́вно се́сти, стра́шнаго и ужа́снаго мя́, апо́столи, изба́вите суда́.

Богоро́дичен: Боже́ственнаго свяще́ния ковче́же, освяти́ мою́ ду́шу, помышле́ние просвети́, всегда́ моля́щи Христа́ со апо́столы, да спасе́т мя́.

И́н. Ирмо́с то́йже.

Мимотеку́щими измени́л еси́ бу́дущая, и́хже прича́стники и на́с святы́ми твои́ми моли́твами сотвори́, Нико́лае, и искуше́ния вся́каго избавля́я жите́йскаго.

Ми́ряном первопресто́льник бы́в, Нико́лае, вся́ чу́вствия се́рдца моего́ ми́ром облагоуха́й, свя́те, и стра́сти злосмра́дныя от сего́, моли́твами твои́ми отгоня́й всегда́.

Сокруши́ вра́жия ко́зни ви́димыя, и неви́димыя, Нико́лае, всегда́ борю́щия ны́ на́ша враги́ в безконе́чную па́губу посли́.

Богоро́дичен: Свята́я Богоро́дице, помози́ ми, сла́достьми вы́ну потопля́ему теле́сными, и на одре́ уны́ния при́сно слежа́щу и стеня́щу.

Пе́снь 5

Ирмо́с: Одея́йся све́том я́ко ри́зою, к Тебе́ у́тренюю, и Тебе́ зову́: ду́шу мою́ просвети́ омраче́нную, Христе́, я́ко Еди́н Благоутро́бен.

Духо́внии вити́и, честни́и апо́столи, на го́рнице, во о́гненне ви́де Ду́ха Свята́го к ни́м прише́дша, стра́шно прия́ша. [Два́жды.]

Сокруша́юще нече́стия, сокруше́ную прегреше́ньми мою́ мы́сль, росо́ю исцеле́ния, апо́столи, исцели́те.

Стре́лы избра́нныя ва́с Христо́с посла́, апо́столи, сокруша́ющия стре́лы лука́вствия: те́мже мя́ исцели́те уя́звеннаго вра́жиими стрела́ми.

Богоро́дичен: Не осуди́ мене́, ни отве́ржи мене́ от лица́ Твоего́, Многоми́лостиве – мо́лит Тя́ чи́сто Ро́ждшая, и апо́стольский собо́р.

И́н. Ирмо́с то́йже.

Куми́ры сокруши́л еси́ и́дольския, свя́те, и сове́ты безде́льны ерети́чествующих показа́л еси́, Нико́лае, и ведо́мыя на сме́рть изба́вил еси́.

У́треневав ко Го́споду измла́да, преподо́бне, и та́мо су́щими светоли́тии ве́сь просвети́лся еси́. Те́мже молю́ся: души́ моея́ о́блаки разжени́.

Тебе́ мо́лим, о́тче Нико́лае, в ча́с се́й посреде́ бу́ди все́х призыва́ющих тя́, и я́же ко спасе́нию даруй на́м проше́ния.

Богоро́дичен: Непости́жимый умо́м, Богоблагода́тная, обдержа́ние Тя́, плотоно́сец бы́в, прия́т челове́ки, избавля́я от одержа́щих скорбе́й.

Пе́снь 6

Ирмо́с: Неи́стовствующееся бу́рею душетле́нною, Влады́ко Христе́, страсте́й мо́ре укроти́, и от тли́ возведи́ мя, я́ко Благоутро́бен.

Распространя́ющееся уста́вил еси́ зло́бы согни́тие, язы́ков ду́ши, Человеколю́бче, со́лию уче́ния свяще́нных учени́к Твои́х. [Два́жды.]

Глубину́ ве́си зо́л мои́х, Влады́ко Христе́, да́ждь ми́ ру́ку, и спаси́ мя, Человеколю́бче, мольба́ми свяще́нных апо́стол Твои́х.

Судие́ пра́веднейший, в де́нь Суда́ Стра́шнаго, тре́петнаго мя́ изба́ви осужде́ния, благосла́вных апо́стол Твои́х мольба́ми.

Богоро́дичен: Отча́яннаго мя́ от мно́жества беззако́ний, спасе́ния Го́споди сподо́би, учени́к и Ма́тере Твоея́ мольба́ми.

И́н. Ирмо́с то́йже.

Ми́лостива соде́лай Влады́ку, твои́ми моли́твами, все́м чту́щим тя́, Нико́лае, я́ко да на́ших прегреше́ний разреше́ние да́рует.

Неду́г изба́ви и собла́зн жите́йских, напа́стей же и скорбе́й, Нико́лае, тя́ моли́твенника ко Го́споду стяжа́вших.

Врача́ тя́ изя́щна Влады́ка показа́ Христо́с: те́мже неду́ги исцели́, благоче́стно к тебе́ приступа́ющих, Нико́лае.

Богоро́дичен: Роди́тельница безму́жная, Богома́ти была́ еси́, Чи́стая. Сего́ ра́ди ве́рою молю́ Тя́: души́ моея́ уны́ния разжени́.

Пе́снь 7

Ирмо́с: Превозноси́мый отце́в Госпо́дь, пла́мень угаси́, о́троки ороси́ согла́сно пою́щия: Бо́же, благослове́н еси́.

Превозноси́мый отце́в Госпо́дь, ва́с превознесе́, всю́ низве́рже вра́жию си́лу, ученицы́ Христо́вы, богови́дцы.

Скве́рну се́рдца моего́ струя́ми умиле́ния, ва́шими мольба́ми, апо́столи, омы́йте, уча́ще взыва́ти: Бо́же, благослове́н еси́.

Огне́м Боже́ственнаго Ду́ха ве́щь попали́сте вся́каго су́етства: те́мже паля́щия мя́ изба́вите гее́нны, ученицы́ Бо́га Сло́ва.

Богоро́дичен: Я́же паде́ния Ада́мова исправле́ние, воздви́гни па́дшаго мя́ в про́пасть зло́бную, моли́твами Твои́ми, Де́во, и боже́ственных апо́стол.

И́н. Ирмо́с то́йже.

Ве́сь возложи́вся Бо́гу, Нико́лае, всего́ мя спаси́, жите́йскими страстьми́ окая́нно всегда́ впа́дающа, богому́дре.

Свети́ло Богоза́рнейшее, ума́ моего́ озари́, страсте́й мра́ком при́сно помрача́ема, и дава́й благообра́зно ходи́ти в житии́.

Вся́кая отверза́емая на мя́, Нико́лае, уста́ лука́вая, твои́ми моли́твами загради́, и изба́ви мя́ ви́димых вра́г и неви́димых.

Богоро́дичен: Из Тебе́ на́м возсия́ Невече́рнее Со́лнце, о́блаче всесве́тлый, Христо́с Бо́г на́ш, просвеща́я и́же во тьме́ неве́дения, Богоро́дице.

Пе́снь 8

Ирмо́с: Тебе́, Вседе́телю, в пещи́ о́троцы, всеми́рный ли́к спле́тше поя́ху: дела́ вся́кая, Го́спода по́йте и превозноси́те во вся́ ве́ки.

Ты́ мы́сленныя о́блаки, апо́столы сло́ве распросте́рл еси́, кропя́щыя на ны́ до́ждь прему́дрых и Боже́ственных уче́ний, и напоя́ющыя на́с во вся́ ве́ки.

Преудо́бреннии столпи́ церко́внии, и́же сию́ держа́щии ве́ры уче́ньми, согни́вшуюся души́ моея́ хра́мину, Боже́ственным хитроде́йствием утверди́те, Богови́дцы.

Стени́, душе́, и сле́з пото́ки от всего́ се́рдца принеси́ Го́сподеви, зову́щи: Еди́не Ще́дрый, спаси́ и очи́сти мя́, всесла́вных апо́стол моли́твами благоприя́тными.

Богоро́дичен: Сио́не избра́нный, Ца́рский гра́де, Вы́шняго мя́ Гра́да граждани́на сотвори́, с боже́ственными ученики́ моля́щи, Пречи́стая Де́во, безле́тнаго Сы́на Твоего́.

И́н. Ирмо́с то́йже.

В Ми́рех первосвяти́тель бы́в вели́кий, души́ моея́, Нико́лае, чу́вствия ми́ром облагоуха́й, я́ко да избе́гну страсте́й злово́ния, и Уте́шителеву прииму́ благода́ть.

Уста́вил еси́, прему́дре, твоего́ свята́го язы́ка струя́ми, струи́ А́риевы ху́льныя. Те́мже вопию́ ти: то́ки страсте́й мои́х изсуши́ моли́твами твои́ми, Нико́лае всеблаже́нне.

Изба́ви на́с согреше́ний моли́твами твои́ми, де́монскаго озлобле́ния, язы́ческаго плене́ния, и все́х челове́к лука́внейшаго зла́го вре́да, да тя́ я́ко изба́вителя на́шего восхваля́ем.

Тро́ичен: И́же тро́ически единонача́лие непреста́нно ве́рою сла́вяще, возопии́м: О́тче, и Сло́ве, и Всесвяты́й Ду́ше, песносло́вим Тя́ во вся́ ве́ки

Богоро́дичен: В пло́ть на́с ра́ди из Тебе́ Бо́г обле́кся, Чи́стую Тебе́ Всенепоро́чную, всему́ ро́ду на́шему боже́ственную показа,́ Де́во, предста́тельницу. Те́мже Тя́ ве́рнии велегла́сно воспева́ем.

Та́же пое́м пе́снь Богоро́дицы: Вели́чит душа́ моя́ Го́спода: И покло́ны.

Пе́снь 9

Ирмо́с: Иса́ие лику́й, Де́ва име́ во чре́ве, и роди́ Сы́на Емману́ила, Бо́га же и Челове́ка, Восто́к и́мя Ему́. Его́же велича́юще, Де́ву ублажа́ем.

Небеса́ узве́здены светлостьми́ Боже́ственных доброде́телей у́мно яви́стеся, посреде́, Христа́, я́ко со́лнце иму́ще, и земны́я концы́, прему́дрии, обнови́сте – сего́ ра́ди блажи́ми есте́.

Христо́вы я́звы на боже́ственнем телеси́ ва́шем, я́ко у́тварь всеблаголе́пну нося́ще, прему́дрии, уя́звленую мою́ ду́шу де́монскими стрела́ми, я́же ко Го́споду хода́тайствы исцели́те.

В ро́ве преиспо́днем мя́ греха́ слежа́ща, Христе́, и ле́ности лю́тыя сно́м ду́шу отягчи́вшаго, Твои́ми, Сло́ве, ученики́, я́коже Ла́заря воздви́гнувый, спаси́, Го́споди.

Богоро́дичен: Души́ моея́ напра́ви ше́ствия, Сло́ве Бо́жий, к стезя́м за́поведей Твои́х незаблу́дных, име́я моля́щуюся ро́ждшую Тя́ Пречи́стую Де́ву, и прему́дрыя апо́столы Твоя́, Многоми́лостиве.

И́н. Ирмо́с то́йже.

Святи́тель Боже́ствен бы́в, вся́ за́поведи сохрани́л еси́ Xристо́вы. Те́мже ве́рным храни́тель Боже́ственный бы́л еси́, о́тче Нико́лае, соблюда́й те́х от вся́ких напа́стей и озлобле́ния.

Я́коже иногда́ препита́л еси́ гра́д тво́й изнемога́ющ гла́дом, я́ко до́бр па́стырь, преподо́бне, та́кожде и ны́не препита́й ду́шу мою́ хле́бом разу́мным, о́тче Нико́лае, тя́ засту́пника бла́га стяжа́вшаго.

Тя́ вели́кое со́лнце, на высоте́ лежа́щее при́сно Це́ркве Христо́вы, преподо́бне па́стырю, ве́рно мо́лим тя́: светоно́сными блиста́ньми све́та, глубо́кую тьму́ отжени́ греха́ ду́ш на́ших.

Прибли́жися, я́коже пи́шется, Де́нь Стра́шный прише́ствия Христо́ва. Подви́гнися, душе́, отри́ни ле́ность, и усе́рдно Христу́ возопи́й: спаси́ мя, Го́споди, Никола́я Твоего́ моле́нием.

Богоро́дичен: Све́тел Тя́ све́щник проро́к прови́дяше, Пречи́стая, свещу́ разу́мную, нося́щую Христа́, И́мже просвети́хомся, и́же во тьме́ лежа́щии и страсте́х, Тя́ ублажа́ем, Богоро́дице Присноде́во.

Та́же, Досто́йно е́сть: и покло́н. Та́же, ектения́ ма́лая, свети́лен, и псалмы́ обы́чныя.

На стихо́вне стихи́ры апо́столом, гла́с 5:

Ученицы́ Спа́совы, та́йным самови́дцы бы́вше, Неви́димаго и нача́ла не иму́щаго пропове́дасте, глаго́люще: в нача́ле бе́ Сло́во. Не со́здани бы́сте пре́жде а́нгел, ниже́ научи́стеся от челове́к, но от Вы́шния Прему́дрости. Те́мже дерзнове́ние иму́ще, моли́те о душа́х на́ших.

Сти́х: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся: во вся́ дни́ на́ша возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я. и при́зри на рабы́ Твоя́, и на дела́ Твоя́, и наста́ви сы́ны и́х.

Апо́столы Госпо́дни согла́сно в пе́снех похва́лим, обо́лкшеся бо в кре́стное всеору́жие, и́дольскую ле́сть упраздни́ша, и победоно́снии яви́шася вене́чницы: и́хже моли́твами и все́х святы́х, Бо́же, поми́луй на́с.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: В му́ках су́ще святи́и, ра́дующеся, вопия́ху: ку́пля на́м су́ть сия́ ко Влады́це! Вме́сто бо быва́ющих ра́н на телесе́х – све́тло одея́ние в воскресе́ние процвете́т на́м. Вме́сто безче́стия – венцы́. За у́зы темни́чныя – Ра́й. И за е́же со злоде́и осужде́ние – со а́нгелы житие́. И́хже моли́твами, Го́споди, спаси́ ду́ши на́ша.

Сла́ва, и ны́не: Богоро́дичен: Блажи́м Тя́, Богоро́дице Де́во, я́ко из Тебе́ возсия́ Со́лнце Пра́ведное – Христо́с, име́яй ве́лию ми́лость.

Та́же, Бла́го е́сть испове́датися Го́сподеви: Трисвято́е по О́тче на́ш: тропа́рь свято́му, а́ще и́мать. Та́же ектения́, и ча́с 1-й: псалмы́ обы́чныя, и про́чая поря́ду, и отпу́ст.

Разбо́йник на Кресте́ Бо́га Тя́ бы́ти ве́ровав, Христе́, испове́да Тя́ чи́сте от се́рдца: помяни́ мя, Го́споди, вопия́, во Ца́рствии Твое́м.

Сти́х: Блаже́ни миротво́рцы, я́ко ти́и сы́нове Бо́жии нареку́тся.

Я́коже о́блацы све́тлии зе́млю проидо́сте, боже́ственнии ученицы́, во́ду живо́тную окропля́юще, и сердца́ иста́явшая прегреше́нии бога́тно напоя́ете.

Сти́х: Блаже́ни изгна́ни пра́вды ра́ди, я́ко те́х е́сть Ца́рство Небе́сное.

Я́коже лучи́ та́йныя, Со́лнца возсия́вшаго от Де́вы Чи́стыя, просвети́ли есте́ су́щия во тьме́ неве́дения седя́щия, боже́ственнии ученицы́ Христа́ Бо́га на́шего.

Сти́х: Блаже́ни есте́, егда́ поно́сят ва́м, и изжену́т и реку́т вся́к зо́л глаго́л, на вы́ лжу́ще Мене́ ра́ди.

Му́ченичен: Разжже́ния лю́тых муче́ний, прему́дрии, претерпе́вше усе́рдною душе́ю, попали́сте и́дольскую ле́сть, и к Боже́ственному утеше́нию преидо́сте, святи́и.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

Да дра́хму во глубине́ прегреше́ния погребе́ную, Христе́, взе́м ко Отцу́ принесе́ши, апо́столы пропове́дники сотвори́л еси́ Боже́ственным Ду́хом.

Сла́ва: тро́ичен: Пребоже́ственная Тро́ице, О́тче пребезнача́льне, собезнача́льне Сы́не, и Ду́ше Святы́й: Еди́но Божество́, все́х пропове́дник моли́твами Це́рковь Твою́ сохрани́.

И ны́не: Богоро́дичен: Апо́столов удобре́ние, Богообра́дованная, су́щи, омраче́на мя́ сластьми́ жите́йскими, покая́ния просвети́, заря́ми, я́ко да велича́ю Тя́.

на Го́споди, воззва́х: стихи́ры кре́стны, гла́с 5:

Подо́бен: Преподо́бне о́тче:

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

Вся́ древа́ дубра́вная да возра́дуются, Дре́во ви́дяще Всечестно́е, Стра́стию Влады́чнею обра́дованно, благода́ть облистава́ющее я́ко пла́мень огня́, источа́ющее я́коже во́ды дарова́ния все́м, ду́ши просвеща́ющее и помышле́ния, неду́ги очища́ющее и стра́сти отгоня́ющее неви́димыя, язы́ки иноплеме́нныя побежда́ющее я́ве, побе́ды подаю́щее всегда́ ве́рным, благослове́ние и ве́лию ми́лость.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Ме́сту, иде́же стоя́сте но́зе Госпо́дни, ве́рою покланя́ющеся, я́коже проро́к рече́, Христа́ славосло́вим распе́ншагося и сраспе́нша прегреше́ния на́ша, ю́же от дре́ва разори́вшаго кля́тву, и примири́вша Отцу́ отстоя́щия отню́д помышле́ньми. Ручны́я же Его́ и ножны́я гво́здия, копие́ и тро́сть, гу́бу и вене́ц облобыза́юще, досажде́ния и наруга́ния, и и́на ели́ка подъя́т, че́стне почита́ем, и́миже спасо́хомся.

Сти́х: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Вся́ у́ды Христу́ сраспне́м, и ми́рови умертви́мся, и Мироде́ржцу Христу́ по стопа́м ходи́ти вожделе́вше, Того́же на ра́мех Боже́ственный Кре́ст но́сим, отверже́нием плотска́го взыгра́ния, и похоте́й злы́х, я́же ду́шу влеку́т ко греху́, Тому́ мня́ще предста́ти, и зре́ти Того́ на Кресте́ пригвожде́на, и ду́шу свою́ в ру́це Роди́телю со издыха́нием преда́вша, я́ко да всегда́ с Ни́м бу́дем неразлу́чни.

И́ны стихи́ры Богоро́дице, гла́с и подо́бен то́йже.

Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.

Егда́ Гро́зд ненасажде́н су́щ, я́ко Лоза́ отрасти́ла еси́, узре́вши на Дре́ве пове́шена, прободе́на же копие́м в Боже́ственныя ре́бра, что́ сие́, глаго́лаше, Сы́не и Бо́же мо́й? Ка́ко И́же неду́ги вся́ и стра́сти исцеля́яй, Стра́сти терпи́ши, Безстра́стен сы́й по естеству́ Боже́ственному? Что́ Ти безблагода́тнии лю́дие Благода́телю, сия́ возда́ша вме́сто благодея́ний? – вопия́ше Пречи́стая. Но Того́ Страстьми́, страсте́й мя́ свободи́ти моли́ непреста́нно, я́ко да сла́влю Тя́.

Сти́х: Хвали́те Го́спода вси́ язы́цы, похвали́те Его́ вси́ лю́дие.

Пла́чем вси́, и ру́це распростре́м, и бие́м в пе́рси, те́пле слезя́ще и прекло́ньше коле́на, лице́м бию́ще в зе́млю приле́жно, и воздыха́ния возпу́стим к высоте́, и́же безме́стными де́лы прогне́вавшии Бо́га, за́поведей Его́ отверже́нием, изба́вити зову́ще в бу́дущем Суде́ вся́каго муче́ния, и́же Тебе́ опеча́лившия, и обраща́ющияся, мольба́ми Ма́тере Твоея́. За ни́хже Кре́ст претерпе́л еси́ вопло́щся, и Твоего́ Ца́рствия прича́стники сотвори́.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Кому́ уподо́билася еси́, душе́, успева́ющи в го́рших всегда́, и прилага́ющи безу́мно Твои́м я́звам стру́пы мно́жайшия, я́ко всетеле́сней бы́ти я́зве? Не помышля́ющи, я́ко Судия́ приближа́ется, Ему́же предста́неши восприя́ти по дея́нием, вины́ и томле́ния. Но обра́щшися припади́ к Де́ве зову́щи: Влады́чице, не пре́зри мя́ прогне́вавшаго Бо́га Благоми́лостиваго, из Тебе́ на спасе́ние челове́ков ро́ждшагося, и распе́ншагося пло́тию.

Сла́ва, и ны́не: Крестобогоро́дичен. Подо́бен: Ра́дуйся:

Избавле́ние на́с ра́ди, и це́ну вели́кую, Пречи́стую Кро́вь Твою́ изво́лил еси́ да́ти, безгре́шне Христе́ мо́й, все́м хотя́й спасе́ние получи́ти. Те́мже Тя́ зря́щи пригвожде́на Ма́ти Твоя́, рыда́ющи власы́ терза́ше Своя́, глаго́лющи: Ча́до, А́гнче Всенепоро́чный, ми́р хотя́ изба́вити Честно́ю Твое́ю Кро́вию, от о́чию Мое́ю ка́ко заше́л еси́, Спа́се, Незаходи́мое Со́лнце, все́м подая́й просвеще́ние, и ми́р, и ве́лию ми́лость.

Та́же, Све́те ти́хий: Проки́мен дню́, и Сподо́би, Го́споди, в ве́чер се́й:

На стихо́вне стихи́ры, гла́с 5:

Го́споди, при Моисе́и иногда́ проро́це, то́чию о́браз Креста́ Твоего́ явля́емь, побежда́ше враги́ Твоя́. Ны́не же са́мый Кре́ст Тво́й иму́ще, по́мощи про́сим: укрепи́ Це́рковь Твою́, мно́гия ра́ди ми́лости, Человеколю́бче.

Сти́х: К Тебе́ возведо́х о́чи мои́ живу́щему на Небеси́. Се́ я́ко о́чи ра́б в руку́ Госпо́дий свои́х, я́ко о́чи рабы́ни в руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дрит ны́.

Кре́ст Тво́й, Христе́, а́ще и дре́во ви́димо е́сть существо́м, но Боже́ственною оде́яно е́сть си́лою, и чу́вственно ми́рови явля́яся, мы́сленно на́ше чудотвори́т спасе́ние. Ему́же покланя́ющеся, сла́вим Тя́, Спа́се, поми́луй на́с.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния, наипа́че напо́лнися душа́ на́ша поноше́ния гобзу́ющих, и уничиже́ния го́рдых.

Му́ченичен: О земны́х все́х неради́вше, и на му́ки му́жески дерзну́вше, блаже́нных наде́жд не погреши́сте, но Небе́сному Ца́рствию насле́дницы бы́сте, прехва́льнии му́ченицы, иму́ще дерзнове́ние к человеколюби́вому Бо́гу, ми́ру умире́ние испроси́те, и душа́м на́шим ве́лию ми́лость.

Сла́ва, и ны́не: Крестобогоро́дичен: Зря́щи дре́вле А́гнца и Сы́на Своего́ Де́ва Ма́ти и Всеблаже́нная Отрокови́ца, на Кресте́ возвы́шена, вопия́ше слезя́щи: увы́ Мне́, Сы́не Мо́й, ка́ко умира́еши, Бо́г естество́м сы́й Безсме́ртен?

Та́же, Ны́не отпуща́еши раба́ Твоего́, Влады́ко: Трисвято́е по О́тче на́ш: тропа́рь свято́му. Та́же ектения́, и отпу́ст.

Кано́н Пресвяте́й Богоро́дице, гла́с 5.

Пе́снь 1

Ирмо́с: Коня́ и вса́дника в мо́ре Чермно́е, сокруша́яй бра́ни, мы́шцею высо́кою Христо́с истрясе́, Изра́иля же спасе́, побе́дную пе́снь пою́ща.

Други́й ра́й зна́ем Тя́ мы́сленный без сравне́ния, Де́во Богоневе́сто, одолева́ющий и́же во Еде́ме раю́, Богома́ти: Ты́ бо нетле́ние челове́ком прозябла́ еси́.

Дре́во Жи́зни объя́ти в Раи́ Ада́м возбране́н бы́сть, от дре́ва причасти́вся разу́мнаго – безсме́ртие же подаде́, пло́ть от Тебе́, Де́во, Прие́мый.

Сла́ва: Пе́рвее от земли́ со́здан бы́сть Ада́м, пречи́стыма рука́ма Вседержи́теля – от Тебе́ же, Богоро́дице Де́во, роди́ся без се́мене но́вый Ада́м, Зижди́тель челове́чества.

И ны́не: Бе́здна после́дняя обы́де мя́ безме́рных прегреше́ний, и во глубину́ низво́дит мя́ лю́таго отча́яния: Ро́ждшая Бе́здну милосе́рдия, ускори́, и спаси́ мя.

Пе́снь 3

Ирмо́с: Водрузи́вый на ничесо́мже зе́млю повеле́нием Твои́м, и пове́сивый неодержи́мо тяготе́ющую, на недви́жимем, Христе́, ка́мени за́поведей Твои́х, Це́рковь Твою́ утверди́, Еди́не Бла́же и Человеколю́бче.

И́же живо́тным садо́м зе́млю сотвори́вый роди́тельницу, не су́щим на не́й пе́рвее, от Неискусому́жныя Жены́ а́бие я́ко от земли́, безсе́менный воплоща́емь прише́л еси́, Сло́ве Бо́жий неизме́нный.

Ты́ еси́ земноро́дных наде́жда и по́мощь, и ра́дость, и покро́в, и прибе́жище, Влады́чице Ма́ти Живота́. Те́мже мо́лим: Твою́ по́мощь низпосли́ все́м пою́щим Тя́.

Сла́ва: Неду́гующии напа́стьми лю́тыми одержи́ми, Вседе́телю Ще́дре, И́же вся́ческих Бо́же, Трисвяту́ю Твою́ Ски́нию приво́дим Ти́ вси́ в моли́тву, и вопие́м Ти́: разреши́ обдержа́ния ра́б Твои́х.

И ны́не: Смуща́ет мя́ лю́те грехо́вная волна́, во глубину́ прегреше́ний низвлеча́, Пречи́стая, и бу́ря сопроти́вных помышле́ний обурева́ет ду́шу мою́: Окорми́теля ро́ждшая, ускори́ изъя́ти раба́ Твоего́.

Пе́снь 4

Ирмо́с: Боже́ственное Твое́ разуме́в истоща́ние, прозорли́во Авваку́м, Христе́, со тре́петом вопия́ше Тебе́: во спасе́ние люде́й Твои́х, спасти́ пома́занныя Твоя́ прише́л еси́.

Е́ва повину́вшися зми́ю, роди́ печа́ль жена́м – Ты́ же, Де́во, ве́ровавши Бо́жиим веща́нием, всему́ ми́ру ра́дость процвела́ еси́.

Пе́рвее от ре́бр Ада́мовых рожде́на Е́ва – ны́не же Бо́г от Ма́тере Богоневе́сты, Его́же воплоще́нна Де́ва без отца́ родила́ е́сть.

Сла́ва: Е́ва ра́дуется, дре́вняго бо прама́терня осужде́ния свобожде́ну Отрокови́ца показа́, Я́же Судию́ заче́ншая нетле́нно, и ро́ждшая Милосе́рдаго.

И ны́не: Житие́ мое́ прегреше́ний испо́лнися, по́мысл же стра́стен, и душа́ моя́ осужде́на – те́мже Твои́м благоутро́бием поми́луй, и спаси́ мя, Влады́чице.

Пе́снь 5

Ирмо́с: Одея́йся све́том я́ко ри́зою, к Тебе́ у́тренюю, и Тебе́ зову́: ду́шу мою́ просвети́ омраче́нную, Христе́, я́ко Еди́н Благоутро́бен.

Сто́лп и о́блак све́та Тя́ обре́тше, Де́во Ма́ти, Светода́вца, и́же по пусты́ни ле́стней ходя́щии от лю́т избега́ем.

Ра́дуйся, Ро́ждшая Бо́га пло́тию, пре́жде ве́к рожде́ннаго от Отца́ безпло́тне, яви́тися же а́бие на́м изво́лившаго.

Сла́ва: Со́лнце победи́ся Твое́ю све́тлостию, Мари́е: Ты́ бо свети́лы не́бо Украси́вшаго рука́ма объя́ла еси́, и от Твое́ю сосцу́ пита́ла еси́.

И ны́не:Д а не осу́диши мене́ во о́гнь негаси́мый, Христе́ Спа́се мо́й, мольба́ми Чи́стыя, ро́ждшия Тя́.

Пе́снь 6

Ирмо́с: Неи́стовствующееся бу́рею душетле́нною, Влады́ко Христе́, страсте́й мо́ре укроти́, и от тли́ возведи́ мя, я́ко Благоутро́бен.

И́же в ки́те спа́сшаго проро́ка дре́вле Ио́ну, невре́дно носи́ла еси́ во утро́бе Твое́й чу́днаго Бо́га, Чи́стая Присноде́во.

Держа́щаго Го́спода моря́, Пречи́стая Де́во, Бо́га небу́рно, я́коже си́лы нося́щи, сла́ное возмуще́ния льсти́ успи́ла еси́.

Сла́ва: Вся́ческих тишину́ ро́ждши, Пречи́стая, Христа́, Я́же к Нему́ благоукроти́ моли́твами Твои́ми, ю́же на мя́ страсте́й непостоя́нную бу́рю.

И ны́не: В де́нь печа́ли, егда́ хощу́ теле́сных соу́з разреши́тися, предста́ни ми́, и обдержа́ния бесо́вскаго исхити́.

Та́же, Го́споди, поми́луй, три́жды. Сла́ва, и ны́не:

Седа́лен, гла́с 5:

На Кресте́ зря́щи Тя́, Христе́, Ма́ти Твоя́ во́лею посреде́ разбо́йнику ви́сяща, растерза́ющися ма́терски утро́бою, глаго́лаше: безгре́шне Сы́не, ка́ко непра́ведно на Кресте́ я́коже злоде́й распя́тся, И́же челове́ческий оживи́ти хотя́ ро́д, я́ко Преблаги́й?

Пе́снь 7

Ирмо́с: Превозноси́мый отце́в Го́сподь, пла́мень угаси́, о́троки ороси́ согла́сно пою́щия: Бо́же, благослове́н еси́.

И́же к пра́отцу Авраа́му прише́ствие Бо́г соверши́, Сы́н Тво́й бы́в, и се́мя его́ во язы́ки благослови́, Благослове́нная.

Ты́ Ле́ствица еси́ Иа́ковля нескве́рная: Ма́терь бо Еди́ну Тя́ Бо́г написа́, Ея́же ра́ди Бо́г совокупи́ о́наго исча́дия.

Сла́ва: Превозноси́мый со Отце́м и Ду́хом Сы́н, избра́в Тебе́, Чи́стая, зело́ возлюби́ в жили́ще Себе́ воплоща́емь.

И ны́не: Бо́га, Его́же родила́ еси́, всегда́ моли́, отча́яннаго мя́ спасти́, и улучи́ти просты́ню, ве́рою вопию́щему: Бо́же, благослове́н еси́.

Пе́снь 8

Ирмо́с: Тебе́, Вседе́телю, в пещи́ о́троцы, всеми́рный ли́к спле́тше, поя́ху: дела́ вся́кая, Го́спода по́йте, и превозноси́те во вся́ ве́ки.

Испыта́ния Твое́ убега́ет Рождество́, Де́во, ве́рою же явля́ется вопию́щим: вся́ дела́ Госпо́дня, Го́спода по́йте, и превозноси́те Его́ во ве́ки.

Вся́ко деви́ческия не отпа́дши сла́вы, ма́терскою обогати́лася еси́ че́стию, Безневе́стная; ве́сть И́же сия́ я́ве чудоде́йствовавый, Его́же превозно́сим во ве́ки.

Сла́ва: Ви́ждь, Блага́я Пречи́стая, смире́нныя моея́ души́ озлобле́ние, и боле́знь премени́ вско́ре: да Тя́ сла́влю во ве́ки.

И ны́не: Приими́ ми́лостивно Твою́ Ма́терь, Сло́ве, моля́щуюся спасти́ Твоя́ лю́ди, Бла́же, я́же стяжа́л еси́ Честно́ю Твое́ю Кро́вию, да Тебе́ благослови́м во вся́ ве́ки.

Пе́снь 9

Ирмо́с: Иса́ие лику́й, Де́ва име́ во чре́ве, и роди́ Сы́на Емману́ила: Бо́га же и Челове́ка, Восто́к и́мя Ему́. Его́же велича́юще, Де́ву ублажа́ем.

Богоро́дице Влады́чице, умоли́ покланя́емую Тро́ицу, от Нея́же безстра́стно Еди́наго пло́тию на́м родила́ еси́, умири́ти су́щия на земли́, и разреше́нию прегреше́ний пою́щим Тя́ дарова́тися.

А́ще и Еди́н разуме́ется Лице́м Емману́ил, но Естество́м сугу́б: се́ бо две́ возвеща́я во́ли, я́же в Не́м и де́йства, Его́же Роди́тельницу Богоро́дицу испове́дуем.

Сла́ва: Себе́ рыда́ю помышля́я мои́х грехо́в мно́жество, и страсте́й возше́ствия, души́ моея́ уны́ния, и ума́ моего́ изступле́ния, отча́яннаго мя́ спасе́ния сподо́би.

И ны́не: Врази́ мои́ наше́дше, Го́споди, я́коже разбо́йницы, вы́шнюю све́тлую и светови́дную оде́жду совле́кше, и ра́ны ми́ наложи́ша мно́ги: Ты́ предста́вши е́ле жи́ва возста́ви.

Та́же, Досто́йно е́сть: И покло́н. Та́же, Трисвято́е по О́тче на́ш: тропари́, и про́чее обы́чно, и отпу́ст.

По 1-м стихосло́вии седа́льны кре́стны, гла́с 5:

Ме́сто Ло́бное ра́й бы́сть: то́чию бо водрузи́ся Дре́во Кре́стное, а́бие израсти́ Гро́зд Живо́тный – Тебе́, Спа́се, в на́ше весе́лие, сла́ва Тебе́.

Сти́х: Возноси́те Го́спода Бо́га на́шего, и покланя́йтеся подно́жию но́гу Его́, я́ко свя́то е́сть.

Распе́ншагося Спа́са и Изба́вителя на́шего во́лею я́ко ве́сть, и я́коже благоизво́ли, воспои́м, ве́рнии, и просла́вим. Я́ко пригвозди́ на Кресте́ грехи́ челове́ков, избавля́я от ле́сти ро́д челове́ческий, и Ца́рствия сподо́бил е́сть.

Сла́ва, и ны́не: Крестобогоро́дичен: На Кресте́ Тя, Христе́, зря́щи Ма́ти Твоя́, во́лею посреде́ разбо́йнику ви́сяща, растерза́ющися ма́терски утро́бою, глаго́лаше: безгре́шный Сы́не, ка́ко без пра́вды на Кресте́ я́ко злоде́й пригвозди́лся еси́, ро́д челове́ческий оживи́ти хотя́ я́ко Преблаги́й?

По 2-м стихосло́вии седа́льны кре́стны, гла́с 5:

Распя́тие претерпе́в Твое́ю во́лею, и от тли́ челове́ки свободи́л еси́, Спа́се! Воспева́ем ве́рнии, и покланя́емся Ти́, я́ко просвети́л еси́ на́с си́лою Кре́стною, и вси́ прославля́ем Тя́, Человеколю́бче ще́дрый, я́ко Жизнода́вца и Го́спода.

Сти́х: Бо́г же Ца́рь на́ш пре́жде ве́ка, соде́ла спасе́ние посреде́ земли́.

Во́лею, Ще́дре, Кре́ст претерпе́л еси́, и дре́внюю кля́тву я́же ра́ди сне́ди, я́ко всеси́льный Бо́г, Ты́ потреби́л еси́. Те́мже Боже́ственныя и Честны́я Стра́сти Твоя́, Влады́ко Христе́, пое́м и покланя́емся славосло́вяще непреста́нно, е́же па́че сло́ва смотре́ние Твое́.

Сти́х: Ди́вен Бо́г во святы́х Свои́х, Бо́г Изра́илев.

Му́ченичен: Сия́ет дне́сь па́мять страстоте́рпец, и́мать бо и от Небе́с зарю́: ли́к а́нгельский торжеству́ет, и челове́ческий ро́д спра́зднует. Те́мже мо́лятся Го́сподеви, поми́ловатися душа́м на́шим.

Сла́ва, и ны́не: Крестобогоро́дичен: Кресто́м Сы́на Твоего́, Богоблагода́тная, и́дольская пре́лесть вся́ упраздни́ся, и де́монская кре́пость попра́ся. Сего́ ра́ди ве́рнии по до́лгу Тя́ при́сно пое́м, и благослови́м, и Богоро́дицу вои́стинну испове́дающе Тя́ велича́ем.

По 3-м стихосло́вии седа́льны, гла́с 5.

Подо́бен: Собезнача́льное Сло́во:

На Кресте́ Тя пригвожде́на, и усну́вша, а́нгельстии чи́нове ви́девше, ужасо́шася, Иису́се, все́х Царю́: и побежде́ни быва́ху а́бие бесо́вствии полцы́, и сокруши́шася вереи́ а́довы, и сме́ртное мучи́тельство низложи́ся, и су́щии во гробе́х ме́ртвии воскресо́ша.

От Дре́ва го́ресть Ада́м объя́т, к тле́нию попо́лзся за́вистию змии́ною: Тебе́ же пригвожде́ну бы́вшу, Иису́се, живота́ наслади́ся, и Дре́ва ра́ди Кре́стнаго па́ки вселя́емь быва́ет на Небесе́х. И упраздни́ся зми́й, и тля́ поже́рта бы́сть, и вси́ сла́ву Ти́ прино́сим.

Сла́ва, и ны́не: Крестобогоро́дичен: Вознесе́на на Дре́во я́ко ви́де, ро́ждшая Тя́, Спа́се, боле́зней кроме́, рыда́ше с пла́чем, и взыва́ше: увы́ мне́, Сладча́йший Сы́не, уязвля́юся душе́ю, на Кресте́ зря́щи Тя́ пригвожде́на посреде́ двою́ злоде́ю, судо́м злоде́йственным.

Кано́н честно́му и животворя́щему Кресту́, творе́ние ки́р Ио́сифа, [его́же краегране́сие: Страсте́й мя́ спаса́еши Стра́стию Твое́ю, Христе́ мо́й.] Гла́с 5

Пе́снь 1

Ирмо́с: Спаси́телю Бо́гу, в мо́ри лю́ди немо́крыми нога́ми наста́вльшему, и фарао́на со всево́инством пото́пльшему, Тому́ Еди́ному пои́м, я́ко просла́вися.

Страстоуби́йственную, Христе́, хоте́нием Твои́м претерпе́л еси́ Стра́сть, и уби́л еси́ в Раи́ дре́вле на́с уби́вшаго. Те́мже Твою́ сла́вим благосты́ню.

Воздви́глся еси́ на Кре́ст, и низпаде́ся вра́г, и па́дшии воздвиго́хомся, и ра́йстии жи́тели, Христе́, бы́хом, держа́ву сла́вяще Ца́рствия Твоего́.

Му́ченичен: Щито́м Кре́стным вооружи́вшеся до́бре, к боре́нию вся́кому бесо́вскому ополчи́стеся, прему́дрии великому́ченицы, и того́ победи́вше, сла́ву получи́сте.

Му́ченичен: Я́ко а́гнцы честни́и, на́с ра́ди, страда́льцы, А́гнцу пожре́ному принесо́стеся, нечи́стыя же́ртвы я́ве уста́вльше: те́мже ублажа́ем ва́с, всехва́льнии.

Богоро́дичен: Но́во отроча́ на́м Ве́тхаго Де́ньми, Чи́стая Де́во, родила́ еси́, обетша́вшее естество́ челове́ческое обновля́юща, Всенепоро́чная, Боже́ственною Стра́стию Свое́ю.

Други́й кано́н Пресвяте́й Богоро́дице, ирмо́с то́йже.

Благоутро́бия исто́чник, и Предста́тельницу те́плую ве́м Тя́, Всенепоро́чная, Де́во Ма́ти Мари́е, и взыва́ю Ти́: поми́луй и уще́дри смире́нную мою́ ду́шу.

В не́дрех Твои́х Сы́н Бо́жий, Чи́стая, всели́вся, и восприя́т челове́ческое существо́ я́ко Преблаги́й, все́х изба́ви от тли́ зми́евы.

Просвеще́ние ми́ бу́ди, и спасе́нию наде́жда, Богороди́тельнице Всенепоро́чная, прегреше́ний разреша́ющи плени́цы, и избавля́ющи мя́ бу́дущия му́ки и осужде́ния.

Помышле́ний лука́вых смире́нную мою́ ду́шу свободи́, Богороди́тельнице, и жили́ще Бо́жие ту́ соде́лай, да по до́лгу Тя́ сла́влю всегда́.

Пе́снь 3

Ирмо́с: Си́лою Креста́ Твоего́, Христе́, утверди́ мое́ помышле́ние, во е́же пе́ти и сла́вити спаси́тельное Твое́ вознесе́ние.

Увяда́еши плода́ тлю́, на Дре́во, Спа́се, воздвиза́емь, и нетле́ния исто́чники на́м от ре́бр источа́еши, Влады́ко.

Закла́ся на Кресте́ я́коже а́гнец, пра́ги назна́менуя ду́ш на́ших Боже́ственною Твое́ю Кро́вию, Влады́ко: те́мже Тя́ со стра́хом сла́вим.

Му́ченичен: Вя́жеми, Христо́вы страда́льцы, и многообра́зне ураня́еми, и звере́м помета́еми, непрело́жни пребы́сте.

Му́ченичен: Я́коже гро́здие виногра́да живо́тнаго, муче́ния вино́ источи́ша, ве́рных сердца́ веселя́щее, Бо́га на́шего му́ченицы.

Богоро́дичен: Жи́зни на́м хода́тай, Чи́стая, умира́я на Дре́ве яви́ся Тво́й Сы́н же и Госпо́дь, прославля́яй пою́щия Тя́.

И́н. Ирмо́с то́йже.

В ро́в поги́бельный лю́тых согреше́ний впа́дша мя́, Богороди́тельнице, изведи́ благоутро́бною Твое́ю бла́гостию.

К ве́черу жития́ прише́д, и недоуме́нием одержи́мь е́смь, вопию́ Ти, Всепе́тая: Ты́ Помо́щница ми́ яви́ся.

Свята́я Богоро́дице Чи́стая, пода́ждь разреше́ние прегреше́ний мои́х, и спасе́ние ми́ испроси́, и ра́дование ве́чное.

Ка́плю ми́ сле́з, Чи́стая, пода́ждь, я́ко да от се́рдца моего́ отжену́ недоуме́ние, и и́скренно воспою́ Тя.

Пе́снь 4

Ирмо́с: Услы́шах слу́х си́лы Креста́, я́ко Ра́й отве́рзеся и́м, и возопи́х: сла́ва си́ле Твое́й, Го́споди.

Егда́ заше́л еси́ на Кресте́, Пра́вды Со́лнце, Христе́, Све́т Невече́рний возсия́л еси́ на́м, пою́щим Твое́, Сло́ве, стра́шное смотре́ние.

Стоя́щу Ти́, Судие́, иногда́ пред суди́щем, Христе́, осуди́л еси́ непра́веднаго врага́, и распя́лся еси́ посреде́ непра́ведных, на́с оправда́я.

Му́ченичен: Венча́еми победи́тельно, Госпо́дни страда́льцы, неви́димаго посрами́ша врага́, и взыва́ху: сла́ва си́ле Твое́й, Го́споди.

Му́ченичен: Неувяда́емыя цве́ты мы́сленнаго рая́, многоце́нныя сосу́ды, Христо́вы страстоте́рпцы, ве́рою сше́дшеся да почти́м.

Богоро́дичен: Егда́ узре́ла на Кресте́ Христа́, Его́же родила́ еси́, Чи́стая, диви́лася еси́ неизрече́нному Его́ долготерпе́нию: те́мже Тя́ с ни́м прославля́ем.

И́н. Ирмо́с то́йже.

О соде́яниих мои́х лука́вых, и прегреше́ниих мно́гих, кто́ возмо́жет умоли́ти Судию́, а́ще не Ты́, Чи́стая, еди́на согреша́ющих Засту́пнице?

Мно́гими мя́ па́дша прегреше́нии, и грехи́ поработи́вша мою́ ду́шу, воздви́гни си́лою твое́ю, Пречи́стая, и разреши́ мя моли́твою от рабо́ты.

Я́ко ро́ждшая Творца́ и Царя́ вся́ческих, Богоро́дице Всенепоро́чная Чи́стая, Ты́ мя изба́ви вся́каго скве́рнаго согреше́ния.

Себе́ сама́го пла́чу, егда́ в помышле́ние прииду́ мно́гих мои́х прегреше́ний, и огня́ негаси́маго: молю́ся, да́ждь ми́ вре́мя покая́ния, Пречистая.

Пе́снь 5

Ирмо́с: У́тренююще вопие́м Ти́, Го́споди, спаси́ ны: Ты́ бо еси́ Бо́г на́ш, ра́зве во Тебе́ ино́го не зна́ем.

Ка́мение Тя́ на ка́мени ощути́вше, Христе́, воздви́жена, распадо́шася, и земли́ потрясо́шася основа́ния.

Отложи́ све́тлость со́лнце, воздви́жену Тебе́ на Дре́во, Со́лнце Пра́ведное, Долготерпели́ве.

Му́ченичен: Чуде́с блиста́ете, святи́и, све́тлостию, тьму́ отгоня́юще боле́зней ду́хом.

Му́ченичен: Разсека́ема бе́ша телеса́ ва́ша мечи́, ду́х же Боже́ственныя любве́ не отсека́емь име́сте, му́ченицы.

Богоро́дичен: Ви́девши на Кре́ст воздви́жена Спа́са, рыда́ющи восклица́ше, Де́во Ма́ти Всенепоро́чная.

И́н. Ирмо́с то́йже.

Всетеле́сную ми́ я́зву прие́мшу греха́, бы́лием уврачу́й милосе́рдия Твоего́, Влады́чице.

Тече́ние тле́нию дре́вле уста́вила еси́ Боже́ственным Рождество́м: и ны́не прегреше́ний мои́х уста́ви тече́ние, Пренепоро́чная.

Поми́луй и уще́дри, Влады́чице, ду́шу мою́, и изба́ви осужде́ния, и ве́чныя му́ки.

При́зри и услы́ши, Влады́чице, гла́с мо́й, и молю́ся, изба́ви мя́ ве́чнаго муче́ния.

Пе́снь 6

Ирмо́с: Обы́де мя́ бе́здна, гро́б мне́ ки́т бы́сть, а́з же возопи́х к Тебе́ Человеколю́бцу, и спасе́ мя десни́ца Твоя́, Го́споди.

Кре́ст на земли́ водружа́шеся, и паде́ние бесо́м быва́ше, и ве́ра утвержде́ния нача́ло приима́ше, и зло́ба от среды́ отгони́ма быва́ше.

Со́лнце угасе́, Пло́ть Твою́ я́коже свещу́ возже́гшу Ти́ на Дре́ве, Го́споди; дра́хма же обрета́шеся погребе́ная мра́чными страстьми́.

Му́ченичен: Воздви́жену Ти́, Человеколю́бче, на Дре́во, ли́к му́ченик после́дующ стопа́м Твои́м име́л еси́, Стра́сти Твое́й подо́бящся, безстра́стию хода́таице.

Му́ченичен: Пото́ки изсуши́ли есте́ преле́стныя кро́вным тече́нием, и о́гнь угаси́сте чу́ждий бесо́в Боже́ственною росо́ю, венцено́сцы му́ченицы.

Богоро́дичен: Ору́жие про́йде се́рдце Твое́, Де́во Всенепоро́чная, егда́ распина́ема Зижди́теля ви́дела еси́, и копие́м Боже́ственная ре́бра ископава́ема.

И́н. Ирмо́с то́йже.

Обы́де мя́ бе́здна прегреше́ний, и глубина́ содержи́т мя́ грехо́вная, и ко отча́янию прино́сит поги́бельному: свята́я Влады́чице, Ты́ мя ны́не спаси́.

Воздви́гни мя́ лежа́ща на одре́ согреше́ний, Пресвята́я Влады́чице: и да́ждь ми́ осия́ние спаси́тельное покая́нием.

Очи́сти, Человеколю́бче, моли́твами чи́сто Ро́ждшия Тя́, и изба́ви ми́р Тво́й от вся́кия ско́рби, и ве́чныя сла́вы сподо́би.

При́сно обещава́юся де́л злы́х отступи́ти, но всегда́ лгу́, и оскорбля́ю Влады́ку моего́: Пречи́стая Влады́чице, Ты́ ми да́ждь исправле́ние.

Пе́снь 7

Ирмо́с: В пещи́ о́гненней песносло́вцы спасы́й о́троки, благослове́н Бо́г Оте́ц на́ших.

Да изба́вимся мы́ сла́стнаго греха́, же́лчи вкуси́л еси́, Христе́, сла́досте жи́зненная.

Тебе́ на Дре́ве, Христе́, уя́звену, исцеле́ша я́звы Ада́мовы многоле́тныя.

Му́ченичен: Свои́ми во́льными устремле́ньми отлучи́шася ко страда́нию, страстоте́рпцы, и победи́телие яви́шася.

Му́ченичен: Поче́тше Бо́га боле́зненным безче́стием, и вы́шнюю по́честь получи́сте, страда́льцы.

Богоро́дичен: По Рождестве́, Чи́стая, я́коже и пре́жде Рождества́ пребыва́еши: Бо́г бо бе́ рожде́йся, да обожи́т челове́ки.

И́н. Ирмо́с то́йже.

Б огороди́тельнице Чи́стая, не пре́зри мене́, ве́рою под кро́в Тво́й при́сно прибега́ющаго.

Страсте́й мои́х па́жить изсуша́ющи, пода́ждь точи́ти сле́з ка́пли, Богороди́тельнице.

Связу́ема мя́ вери́гами грехо́вными, Твои́ми моли́твами разреши́, Пренепоро́чная, всепе́таго Бо́га ро́ждшая.

К Тебе́ прибега́ю ве́рно, и Тебе́, Чи́стая, призыва́ю: изба́ви мя́, Де́во, огня́ ве́чнаго.

Пе́снь 8

Ирмо́с: Из Отца́ пре́жде ве́к рожде́ннаго Сы́на и Бо́га, и в после́дняя ле́та воплоще́ннаго от Де́вы Ма́тере, свяще́нницы по́йте, лю́дие превозноси́те во вся́ ве́ки.

И́же кля́тву дре́ва Дре́вом исцели́вый, и благослове́ние источи́вый челове́ком, Преблаги́й, Тебе́, Спа́се, пое́м, и Тебе́ славосло́вим во ве́ки.

Превозвыша́емаго зми́я Кресто́м Твои́м смири́л еси́, и лю́те па́дшагося смиря́емь возне́сл еси́ – Тебе́, Спа́се, пое́м, и превозно́сим во вся́ ве́ки.

Му́ченичен: Потреби́тели пре́лести, и побо́рники Боже́ственныя ве́ры, церко́вныя столпы́, и тве́рдыя вои́стинну адама́нты, Христо́вы ору́жники, ве́рою страстоно́сцы да почти́м в пе́снех.

Му́ченичен: Сла́внии страстоте́рпцы, я́коже со́лнце возсия́ша, боле́зней о́блаки разгна́вше благода́тию, и нече́стия мра́к разори́ша ве́рою Тро́ическою.

Богоро́дичен: Невестоводи́тель Тебе́ Де́во, Гаврии́л по́слан бы́сть: ра́дуйся – вопия́ше Ти́ глаго́ля: светле́йшая пала́то все́х Царя́ Христа́, в ню́же всели́вся, обожи́ вся́ челове́ки.

И́н. Ирмо́с то́йже.

В недоуме́нии сы́й, и се́рдцем, и мы́слию, преще́ния гее́нскаго не боя́ся, согреша́ю при́сно: но Ты́, Де́во, недоуме́ние мое́ разреши́, и огня́ изба́ви мя́.

Сластьми́ пло́ти моея́ ча́сто привлачи́мь е́смь, и я́ко плене́н продае́мь е́смь, Бо́га прогневля́ю при́сно: Богоро́дице, еди́на наде́жда ненаде́жных, сама́ поми́луй мя́.

Я́ко непосты́дна е́сть моли́тва Твоя́, Всенепоро́чная, ели́ка бо хо́щеши подае́ши, моля́щи Твоего́ Сы́на и Бо́га. Те́мже молю́ся Ти́, поми́луй и спаси́ смире́нную ду́шу мою́.

Теле́сными боле́зньми, и страстны́ми воздвиже́ньми, и душе́вными ра́нами лю́те истязу́емь е́смь: Ро́ждшая Еди́наго Благода́теля, Твои́ми мольба́ми здра́ва сотвори́ мя.

Та́же пе́снь Богоро́дицы: Вели́чит душа́ моя́ Го́спода: И покло́ны.

Пе́снь 9

Ирмо́с: Тя́ па́че ума́ и словесе́ Ма́терь Бо́жию, в ле́то Безле́тнаго неизрече́нно ро́ждшую, ве́рнии единому́дренно велича́ем.

Кре́пость вра́жия и держа́ва отъя́та бы́сть, держа́вный еди́не Го́споди, на Кре́ст вознесе́ну Ти́, и пе́рсты на не́м окровави́вшу.

Ископа́ша, Христе́ мо́й, ру́це и но́зе Твои́, и ко́сти Твоя́ изочто́ша распе́ншии беззако́нницы, и же́лчи со о́цтом Тебе́ напои́ша.

Му́ченичен: Усты́ све́тлыми Бо́га пропове́дасте бы́вшаго челове́ка, пред мучи́тели, страстоте́рпцы, и сла́ву насле́довасте.

Му́ченичен: Боле́знь прия́ша уязви́вшии врази́ ра́нами, и разли́чными му́ками бию́ще ва́с, всечестни́и вра́чеве боле́зней, Боже́ственнии му́ченицы.

Богоро́дичен: Све́т на́м, Чи́стая, из Тебе́ возсия́ Иису́с, и просвети́ тва́рь всю́ распя́тием, и бесо́вскую тьму́ прогна́л е́сть.

И́н. Ирмо́с то́йже.

Сле́зы ми́ пода́ждь покая́ния, Пречи́стая, да пла́чуся де́л мои́х лю́тых и непра́ведных, пре́жде приспе́яния конца́ жития́ моего́.

Вску́ю, душе́, оскорбля́еши Влады́ку Твоего́, непра́ведная де́ющи, и не возни́чеши? Пре́жде конца́ у́бо потща́вшися пока́йся.

Изба́ви мя́ от злы́х прегреше́ний и скорбе́й; пода́ждь ми́ ми́лость, Де́во Всечи́стая, и живота́ нетле́ннаго Боже́ственное прича́стие.

Тебе́, Бо́га неизрече́нно ро́ждшую предста́тельницу стяжа́хом, и сте́ну необори́мую, и душа́м спасе́ние, и чуде́с исто́чник.

Та́же, Досто́йно е́сть: и покло́н. Та́же ектения́ ма́лая, и свети́лен, посе́м псалмы́ обы́чныя.

На стихо́вне стихи́ры кре́стны, гла́с 5:

То́чию водрузи́ся Дре́во, Христе́, Креста́ Твоего́, пре́лесть прогна́на бы́сть, и благода́ть процвете́: уже́ бо ктому́ не́сть осужде́ния мучи́тельство, но побе́да яви́ся на́м спасе́ния. Кре́ст бо на́м е́сть похвала́, Кре́ст на́м утвержде́ние, Кре́ст на́м ра́дование.

Сти́х: Испо́лнихомся зау́тра ми́лости Твоея́, и возра́довахомся и возвесели́хомся: во вся́ дни́ на́ша возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я. И при́зри на рабы́ Твоя́, и на дела́ Твоя́, и наста́ви сы́ны и́х.

Веде́н бы́л еси́ на́с ра́ди на же́ртву, Христе́, я́ко овча́, и я́ко А́гнец незло́бив Емману́ил на заколе́ние во́льное, со беззако́нники вмене́н бы́л еси́. Прииди́те, воспо́йте оте́чествия язы́к, и поклони́теся на Кресте́ пове́шенному, Животу́ Безконе́чному.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Благослове́но во́инство Небе́снаго Царя́: а́ще бо и земноро́дни бе́ша страстоте́рпцы, но а́нгельское достоя́ние потща́шася дости́гнути, о телесе́х небре́гше, и страсте́й ра́ди Безпло́тных сподо́бишася че́сти, моли́твами и́х, Го́споди, спаси́ ду́ши на́ша.

Сла́ва, и ны́не: Крестобогоро́дичен: Ста́вши у Креста́, Иису́се, Тебе́ ро́ждшая пла́чущися рыда́ше, вопию́щи: не терплю́ сия́, пригвожде́на зря́щи Тя́ на Дре́ве, Его́же породи́х Аз, и избего́х боле́зни я́ко безму́жна, и ка́ко ны́не боле́знию содержи́ма е́смь, и уязвля́юся се́рдцем? Ны́не бо испо́лнися глаго́л, и́же рече́ Симео́н: се́рдце Твое́, Непоро́чная, ору́жие про́йдет. Но ны́не, о Сы́не мо́й, воскресни́, и спаси́ пою́щия Тя́!

Та́же, Бла́го е́сть испове́датися Го́сподеви: Посе́м, Трисвято́е по О́тче на́ш: тропа́рь, ектения́. Та́же ча́с пе́рвый, и псалмы́ обы́чны, и про́чая по ря́ду, и отпу́ст.

Разбо́йник на Кресте́ Бо́га Тя́ бы́ти ве́ровав, Христе́, испове́да Тя́, Чи́сте, от се́рдца: помяни́ мя, Го́споди, вопия́, во Ца́рствии Твое́м.

Сти́х: Блаже́ни изгна́ни пра́вды ра́ди, я́ко те́х е́сть Ца́рство Небе́сное.

Умертви́вся на Кресте́, сне́ди ра́ди уме́ршаго Ада́ма, его́же оживи́л еси́, Жизнода́вче ще́дрый, и жи́теля па́ки, Бла́же, Рая́ показа́л еси́.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л, на вы́ лжу́ще Мене́ ра́ди.

Пригвозди́лся еси́ на Кресте́, Христе́, лоза́ и́стинная, и источи́л еси́ питие́ спасе́ния, напая́я все́х ве́рных сердца́ благода́тию.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

Му́ченичен: Бие́ми, му́дрии, и на удеса́ разсека́еми вообрази́сте заколе́ние Влады́чнее – сего́ ра́ди, му́ченицы Христо́вы, при́сно ублажа́еми есте́.

Сла́ва: тро́ичен: Покланя́емся Ти́ ве́рно, в трие́х ли́цах еди́ному Бо́гу, неразде́льну, и пребоже́ственному естеству́, вопию́ще Ти́: сла́ва Тебе́, Тро́ице, Еди́нице, Бо́же на́ш.

И ны́не: Крестобогоро́дичен:: Пла́чем бия́ше Себе́, Влады́чице, ви́дящи на Дре́ве Кре́стнем Живота́ на́шего, во́лею уме́рша: те́мже вси́ боже́ственными гла́сы Тя́ при́сно ублажа́ем.

На Го́споди, воззва́х: стихи́ры святы́м му́чеником, и святи́телем и преподо́бным, гла́с 5. Подо́бен: Ра́дуйся:

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

Пла́мень нече́стия лю́таго страстоте́рпцы угаси́ша крове́й свои́х тече́ньми, благоче́стия све́тлость в ми́ре все́м возже́гше му́ченицы, бо́ги же лжеимени́тыя, и те́х злово́ния, и хра́мы до конца́ попали́ша; све́т возсия́ша су́щим на земли́ чисте́йший, и́мже и просвеща́еми, тьмы́ избега́ем безбо́жия, и пре́лести и́дольския уклоня́емся, Христу́ покланя́ющеся, подаю́щему ми́рови ве́лию ми́лость.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Словеса́ ерети́к злочести́вых, и ловле́ния удо́бь разруши́вше, ору́жницы Отца́ безнача́льнаго, Сы́на собезнача́льнаго, и Свята́го Ду́ха бы́сте, в трие́х ли́цех еди́нству Божества́, благочестному́дренне ве́рных науча́юще и утвержда́юще правосла́вную про́поведь. Те́мже и блажи́ми есте́, па́стырие всесвяще́ннии, я́ко на па́житех живоно́сных Христо́во ста́до упасо́сте, за него́же вся́ боле́зни и напа́сти многообра́зныя претерпе́сте.

Сти́х: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Стра́сти плотски́я удо́бь до конца́ попра́, подви́гшееся преподо́бных сосло́вие, властели́на ума́ дея́нием доброде́телей прие́мше И́мже бесо́вския вся́ ко́зни победи́ша до́блественне, и а́нгелом собесе́дницы яви́шася, я́ко безпло́тнии пожи́вше. И́мже и ны́не сра́дуются в вы́шних оби́телех, све́тло живу́ще, и Христу́ предстоя́т, от него́ прося́ще душа́м на́шим дарова́ти ве́лию ми́лость.

И́ны стихи́ры му́чеником, гла́с то́йже.

Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.

Щито́м ве́ры обо́лкшеся, и зна́мением Кре́стным себе́ укре́пльше, к му́кам му́жески вда́шася, и диа́волю горды́ню и ле́сть упраздни́ша святи́и Твои́, Го́споди. Те́х моли́твами я́ко всеси́льный Бо́г, ми́ру ми́р низпосли́, и душа́м на́шим ве́лию ми́лость.

Сти́х: Хвали́те Го́спода вси́ язы́цы, похвали́те Его́ вси́ лю́дие.

И па́ки глаго́ли: Щито́м ве́ры:

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

О земны́х все́х небре́гше, и на му́ки му́жески дерзну́вше, блаже́нных наде́жд не погреши́сте, но Небе́сному Ца́рствию насле́дницы бы́сте, прехва́льнии му́ченицы. Иму́ще дерзнове́ние к Человеколю́бцу Бо́гу, ми́ру ми́р проси́те, и душа́м на́шим ве́лию ми́лость.

Сла́ва, и ны́не: Богоро́дичен: В Чермне́м мо́ри, Неискусобра́чныя Неве́сты о́браз написа́ся иногда́. Та́мо Моисе́й, раздели́тель воды́ – зде́ же Гаврии́л, служи́тель чудесе́. Тогда́ глубину́ ше́ствова немо́кренно Изра́иль – ны́не же Христа́ роди́ безсе́менно Де́ва. Мо́ре по проше́ствии Изра́илеве пребы́сть непрохо́дно – Непоро́чная по рождестве́ Емману́илеве пребы́сть нетле́нна. Сы́й, и пре́жде сы́й, явле́йся я́ко челове́к, Бо́же, поми́луй на́с.

Та́же, Све́те ти́хий: Проки́мен дне́. Посе́м: Сподо́би, Го́споди, в ве́чер се́й:

На стихо́вне стихи́ры, гла́с 5:

Моли́те за ны́, святи́и му́ченицы, да изба́вимся от беззако́ний на́ших: ва́м бо дана́ бы́сть благода́ть моли́тися о на́с.

Несы́тною любо́вию души́, Христа́ не отверго́стеся, святи́и му́ченицы: лю́тыя и разли́чныя ра́ны страсте́й претерпе́сте, мучи́телей горды́ню низложи́сте, непрекло́нну и невреди́му ве́ру сохра́ньше, на Небеса́ преста́вистеся. Те́мже и дерзнове́ние иму́ще к Нему́, проси́те дарова́ти на́м ве́лию ми́лость.

Ме́ртвен: Помяну́х проро́к вопию́ща: а́з е́смь земля́ и пе́пел, и па́ки разсмотри́х во гробе́х, и ви́дех ко́сти обнаже́нныя, и ре́х у́бо: кто́ е́сть ца́рь, или́ во́ин, или́ бога́т, или́ ни́щ, или́ пра́ведник, или́ гре́шник? Но упоко́й, Го́споди, с пра́ведными рабы́ Твоя́, я́ко Человеколю́бец.

Сла́ва, и ны́не: Богоро́дичен: Обра́дованная, хода́тайствуй Твои́ми моли́твами, и испроси́ душа́м на́шим мно́жество щедро́т, и очище́ние мно́гих прегреше́ний мо́лимся.

Та́же, Ны́не отпуща́еши: Трисвято́е по О́тче на́ш: И отпу́ст.

Кано́н моле́бный Пресвяте́й Богоро́дице. Гла́с 5:

Пе́снь 1

Ирмо́с: Коня́ и вса́дника в мо́ре Чермно́е, сокруша́яй бра́ни, мы́шцею высо́кою, Христо́с истрясе́, Изра́иля же спасе́, побе́дную пе́снь пою́ща.

Вси́ Тя челове́честии ро́ди хва́лят, я́ко дре́вле, Де́во, проро́чески прорекла́ еси́: и мене́ у́бо приими́ пою́ща Тя́, Влады́чице, и просвети́, и вразуми́.

Притупи́ла еси́ сме́рти жа́ло, и мирски́й гре́х, Де́во, и́стинную ро́ждши Жи́знь, Ея́же ра́ди, Влады́чице, притупи́ страсте́й мои́х о́стрыя стре́лы вско́ре.

Сла́ва: Еди́на испещре́на деви́ческими ря́снами от ве́ка я́вльшися, смоко́вную ри́зу Ада́мову Ты́ расто́ргнула еси́: те́мже мя́ ны́не облецы́ целому́дрия оде́ждею моли́твами Твои́ми.

И ны́не: Бога́тство и Боже́ственную сла́ву стяжа́ша у́бо мно́ги дще́ри пре́жде я́ве, но без сравне́ния, Влады́чице, Ты́ все́х превозшла́ еси́. Те́мже мя́ ны́не обогати́ Небе́сными и Боже́ственными благода́тьми.

Пе́снь 3

Ирмо́с: Водрузи́вый на ничесо́мже зе́млю повеле́нием Твои́м, и пове́сивый неодержи́мо тяготе́ющую, на недви́жимем, Христе́, ка́мени за́поведей Твои́х, Це́рковь Твою́, утверди́, Еди́не Бла́же и Человеколю́бче.

Глубина́ и высота́ в Тебе́ познава́шеся, Де́во Пречи́стая, Бо́жией Му́дрости непостижи́мей, от Твои́х ложе́сн ро́ждшейся: е́юже глубины́ се́рдце мое́ изба́ви мудрова́ний змии́ных.

И́же пре́жде перна́тыя, и га́ды, от воды́ соста́вил еси́ сло́вом, не су́щия пре́жде, Ты́ а́бие, Христе́, от кро́ве Чи́стыя Де́вы, Боже́ственнаго Твоего́ воплоще́ния оде́жду стра́нну устро́ил еси́.

Сла́ва: Ты́ Еди́на очище́ние яви́лася еси́ естеству́, Пречи́стая, в Ню́же О́гнь Боже́ственный неопа́льно все́лься, сие́ очи́сти я́ве – Ты́ у́бо согреше́ний и страсте́й мои́х скве́рну очи́сти, и Твои́ми моли́твами просвети́ мя.

И ны́не: Ча́шу но́ваго виногра́да ро́ждия, напоя́ющую я́ве ве́рныя во оставле́ние согреше́ний, Тя́, Пречи́стая, ве́дый, молю́: испуще́нием Боже́ственныя Воды́ напо́й се́рдце мое́.

Пе́снь 4

Ирмо́с: Боже́ственное Твое́ разуме́в истоща́ние, прозорли́во Авваку́м, Христе́, со тре́петом вопия́ше Тебе́: во спасе́ние люде́й Твои́х, спасти́ пома́занныя Твоя́ прише́л еси́.

Неора́на Ты́ яви́лася еси́ бразда́, несе́янный Боже́ственный прозя́бшая Кла́с, И́мже а́лчуща мя́ накорми́ Боже́ственными дарова́ньми же и благода́тьми.

Боля́ща мя́ и́скренно сме́ртне, и душе́вных страсте́й огне́м содержи́ма, Влады́чице, моли́тв Твои́х водо́ю напои́вши, вско́ре возста́ви.

Сла́ва: Я́ко су́щий Бо́жий Гра́д одушевле́н, его́же ре́ки мы́сленныя веселя́т стремле́ния, моли́тв Твои́х столпо́м души́ моея́ хра́мину утверди́.

И ны́не: О́блак Тя́ ве́дый, одожди́вший Пра́вду и́стинную, молю́, Пречи́стая Влады́чице, от все́х оби́дящих мя́ изба́вити раба́ Твоего́ вско́ре.

Пе́снь 5

Ирмо́с: Одея́йся све́том я́ко ри́зою, к Тебе́ у́тренюю, и Тебе́ зову́: ду́шу мою́ просвети́ омраче́нную, Христе́, я́ко Еди́н Благоутро́бен.

Возмуще́ние и во́лну греха́, и страсте́й мои́х, Де́во Влады́чице, до конца́ утиши́, безстра́стия ро́ждши Вино́внаго.

Поста́в сы́й свы́ше Христо́в яви́ся, благоле́пия оде́жды Боже́ственныя, доброде́телей оде́ждею, Чи́стая, обнаже́нную ду́шу мою́ облецы́.

Сла́ва: Очище́ние ми́ да́руй согреше́ний, Твои́ми мольба́ми, Чи́стая Де́во, Я́же Очище́ние Боже́ственное ро́ждшая на́м – Христа́ и Го́спода.

И ны́не: Стру́пы, я́звы и гное́ния грехо́вная, рукоде́йствия, моли́твами потреби́ ми, Де́во, и си́лу рабу́ Твоему́ пода́ждь.

Пе́снь 6

Ирмо́с: Неи́стовствующееся бу́рею душетле́нною, Влады́ко Христе́, страсте́й мо́ре укроти́, и от тли́ возведи́ мя́, я́ко Благоутро́бен.

Я́же Све́т ро́ждшая свети́лам твори́тельный, ду́шу мою́ ны́не просвети́, и изба́ви от страсте́й омраче́ния, Всесве́тлая.

Ме́рры услади́вшаго во́ды пре́жде, Богоро́дице, Твоего́ Сы́на моли́, изба́вити мя́ стра́сти лю́тыя, и го́рести вско́ре.

Сла́ва: Возмуща́ет пото́к страсте́й ду́шу мою́, Пречи́стая, но сего́ изсуши́ моли́твами Твои́ми, и по́мыслы лука́выя потреби́.

И ны́не: Христо́с избавля́я челове́ки прии́де от Сио́на, из чре́ва Твоего́, Влады́чице Пренепоро́чная. И́мже и мене́ от напа́стей изба́ви и скорбе́й.

Та́же, Го́споди, поми́луй, три́жды. Сла́ва, и ны́не:

Седа́лен, гла́с 5:

Вску́ю уныва́ющи душе́ стра́стная, забы́ла еси́ Бо́га Твоего́ ми́лующаго тя́? И повеле́ния Его́ преоби́девши, в блуде́ житие́ скончава́еши умовре́дно. Отступи́ от зло́бы, Богоро́дице вопию́щи: отча́янную ду́шу мою́ поми́луй.

Пе́снь 7

Ирмо́с: Превозноси́мый отце́в Госпо́дь пла́мень угаси́, о́троки ороси́, согла́сно пою́щия: Бо́же, благослове́н еси́.

Ужаса́ются и трепе́щут Твоего́ призыва́ния, Пречи́стая, бесо́встии полцы́: от ни́хже избавля́ющи мя́ спаси́, и соблюди́, покрыва́ющи от вся́каго вре́да.

Неизглаго́ланная сла́ва Твоя́, Де́во: Сла́вы бо Го́спода родила́ еси́. Те́мже мя́ сподо́би сла́вы Сы́на Твоего́ и Бо́га моего́, Твои́ми моли́твами.

Сла́ва: Преклони́ся к мольба́м Твоего́ раба́, Влады́чице, и изба́ви мя́ вско́ре бе́д и скорбе́й, и вся́ких искуше́ний, ви́димых и неви́димых.

И ны́не: Всего́ мя́ страстьми́ студа́, Пречи́стая, окаля́вшася и оскверни́вшася, чистото́ю омы́й, и уясни́, Де́во, моли́твами Твои́х окропле́ний.

Пе́снь 8

Ирмо́с: Тебе́, Вседе́телю в пещи́ о́троцы, всеми́рный ли́к спле́тше, поя́ху: дела́ вся́кая, Го́спода по́йте, и превозноси́те во вся́ ве́ки.

Вода́ непло́дствия стра́стна, души́ моея́ ложесна́ непло́дна сотвори́, и изсуши́ – одожди́ ми, Ле́гкий О́блаче, Боже́ственную ро́су, я́ко да возращу́ плоды́ покая́ния.

Во́лну помышле́ний стра́стных и бу́рю утиши́, Пречи́стая, Твои́ми моли́твами; напра́ви же мя́ к тече́нию безстра́стия, да Тя́ сла́влю те́пле во ве́ки вся́.

Сла́ва: Две́ре мы́сленная, и затворе́ная врата́, и́миже Еди́н про́йде Бо́г, две́ри загради́ и заключи́ страсте́й мои́х, и упова́ния отве́рзи ми́ врата́.

И ны́не: Возми́ от мене́ прегреше́ний бре́мя, Ма́ти Де́во, Я́же Еди́на взе́млющаго ми́ра всего́ ве́сь гре́х, ро́ждшая неска́занно А́гнца Бо́жия и Сло́ва.

Пе́снь 9

Ирмо́с: Иса́ие лику́й, Де́ва име́ во чре́ве, и роди́ Сы́на Емману́ила, Бо́га же и Челове́ка, Восто́к и́мя Ему́. Его́же велича́юще, Де́ву ублажа́ем.

Оскверни́в я́ко челове́к ду́шу мою́ прегреше́ньми мно́гими, и страстьми́ плотски́ми окаля́вся, Тя́ молю́ ны́не приле́жно, и ми́л ся́ де́ю: очи́сти мя́, Чи́стая, Твои́ми моли́твами от вся́кия зло́бы.

В оли́теля ми́лости родила́ еси́, щедро́т Человеколю́бца Бо́га, еди́наго блага́го, долготерпели́ваго и благоутро́бнаго: Его́же благопреме́нна покажи́ ми, Чи́стая, Твои́ми мольба́ми, и согреше́ний разреше́ние пода́ждь.

Сла́ва: Дрема́нием одержи́ма уны́ния, и сластьми́ спя́ща мя́ ны́не, Влады́чице, раба́ Твоего́ воздви́гни к доброде́телем дея́ний благи́х, неусы́пными Твои́ми ма́терними моли́твами.

И ны́не: Благословя́ благословлю́ Тя, Пречи́стая, и велича́ю те́пле – благослови́ мя у́бо Твоего́ певца́, и вся́ческих ну́ждных и печа́льных изба́ви, и сохрани́ Твои́ма дла́ньма непобеди́ма.

Та́же, Досто́йно е́сть: Покло́н. И Трисвято́е по О́тче на́ш: тропари́ и про́чее обы́чно, и отпу́ст.

По 1-м стихосло́вии седа́льны му́ченичны, гла́с 5:

Сия́ет дне́сь па́мять страстоте́рпец, и́мать бо и от небе́с зарю́: ли́к а́нгельский торжеству́ет, и ро́д челове́ческий спра́зднует. Те́мже мо́лятся Го́сподеви, поми́ловатися душа́м на́шим.

Сти́х: Ди́вен Бо́г во святы́х Свои́х, Бо́г Изра́илев.

Чудеса́ святы́х Твои́х му́ченик сте́ну неразори́му на́м дарова́л еси́, Христе́ Бо́же. Те́х моли́твами ве́рныя лю́ди Твоя́ утверди́, я́ко Еди́н Бла́г и Человеколю́бец.

Сла́ва, и ны́не: Богоро́дичен: Ра́дуйся, две́ре Госпо́дня непроходи́мая; ра́дуйся, стено́ и покро́ве притека́ющих к Тебе́; ра́дуйся, необурева́емое приста́нище, и Неискусобра́чная, ро́ждшая пло́тию Творца́ Твоего́ и Бо́га; моля́щи не оскудева́й о воспева́ющих, и кла́няющихся Рождеству́ Твоему́.

По 2-м стихосло́вии седа́льны, му́ченичны, гла́с 5:

Го́споди, ча́ше Страсте́й Твои́х страстоте́рпцы Твои́ поревнова́вше, оста́виша жите́йскую красоту́, и бы́ша а́нгелом соприча́стницы: те́х мольба́ми пода́ждь душа́м на́шим ми́р, Христе́ Бо́же, и ве́лию ми́лость.

Сти́х: Ди́вен Бо́г во святы́х Свои́х, Бо́г Изра́илев.

Святы́х му́ченик исправле́нием Небе́сныя Си́лы преудиви́шася, ка́ко в те́ле ме́ртвеннем подви́гшеся до́бре, безпло́тнаго врага́ си́лою Кре́стною победи́ша неви́димо. И мо́лятся Го́сподеви, поми́ловатися душа́м на́шим.

Сти́х: Блаже́ни, я́же избра́л и прия́л еси́, Го́споди, и па́мять и́х в ро́д и ро́д.

Та́же седа́лен, поко́ин:

Поко́й, Спа́се на́ш, с пра́ведными рабы́ Твоя́, и те́х всели́ во дворы́ Твоя́, я́коже пи́сано е́сть, презира́я вся́ согреше́ния и́х, я́ко Бла́г, во́льная и нево́льная, и вся́ я́же в ве́дении и не в ве́дении, Человеколю́бче.

Сла́ва, и ны́не: Богоро́дичен: От Де́вы возсия́вый ми́ру, Христе́ Бо́же, сы́ны све́та То́ю показа́вый, поми́луй на́с.

Кано́н святы́м му́чеником, и святи́телем, и преподо́бным, и усо́пшим. Творе́ние Ио́сифово, [его́же краестро́чие: Твои́м, Христе́, рабо́м сия́ пе́сни приношу́.] Гла́с 5

Пе́снь 1

Ирмо́с: Зе́млю, на ню́же не возсия́, ни ви́де со́лнце когда́; бе́здну, ю́же не ви́де на́гу широта́ небе́сная, Изра́иль про́йде невла́жно, Го́споди. И вве́л еси́ его́ в го́ру святы́ни Твоея́, хва́ляща и пою́ща побе́дную пе́снь.

Му́ченичен: Телеса́ предаю́ще некро́тким судия́м, претерпе́сте нестерпи́мыя ра́ны, до́блии страда́льцы, ча́юще прия́ти по́чести свы́ше, и введе́ ва́с Христо́с в ве́чныя оби́тели, ра́дующихся и пою́щих побе́дную пе́снь.

Святи́телем: Преподо́бнии и пра́веднии, и святи́телие, благосла́внии соверши́вше повеле́ния Бо́жия, упасо́ша лю́ди, и до́бре наста́виша к воде́ ра́зума, и пото́ки сла́дости досто́йно восприя́ша, источа́юще благода́тию исцеле́ний ре́ки.

Напра́ви мя́, Го́споди, к приста́нищем живота́, моли́твами проро́к пресла́вных, прему́дрых первосвяти́телей, и свяще́нных же́н пострада́вших кре́пко, и посто́м врага́ попра́вших, му́жеским умо́м, Боже́ственною Тебе́ благода́тию я́вльшагося на земли́.

Сла́ва, поко́ин: Тебе́ мо́лим благопреме́ннаго Бо́га: упоко́й в не́дрех Авраа́мовых рабы́ Твоя́, Христе́, я́же к Тебе́ преста́вил еси́ от жите́йскаго мяте́жа, и сподо́би и́х све́та ве́чнаго, те́х согреше́ния презира́я я́ко Бла́г.

И ны́не: Ра́дуйся, Тебе́ зове́м, ро́ждшей Ра́дость, Всепе́тая! Просвети́ на́ша умы́ и ду́ши, и к стезя́м ра́зума все́х напра́ви, и прегреше́ний все́м очище́ние да́ти моли́, Еди́на Богоневе́сто, Сы́на Твоего́ и Бо́га.

И́н кано́н усо́пшим, пое́мый на ряду́, иде́же не́сть Мине́и, [его́же краегране́сие: Феофа́нов пя́тый над ме́ртвыми кано́н.] Гла́с 5.

Пе́снь 1

Ирмо́с: Спаси́телю Бо́гу, в мо́ри лю́ди немо́крыми нога́ми наста́вльшему, и фарао́на со всево́инством пото́пльшему, Тому́ Еди́ному пои́м, я́ко просла́вися.

Припе́в: Ди́вен Бо́г во святы́х Свои́х, Бо́г Изра́илев.

Боже́ственною любо́вию страстоте́рпцы Христо́вы мучи́телей горды́ню попра́ша; преста́вленным же ве́рою ми́лостивное про́сят оставле́ние и поко́й.

Припе́в: Упоко́й, Го́споди, ду́ши ра́б Твои́х.

Во святы́х селе́ниих, во дво́рех Твои́х, Христе́, преста́вленныя всели́! И́же до́лг за ни́х пролия́вый Кро́вь Твою́, Влады́ко, пречестне́йшую.

Сла́ва: Прему́дрость Бо́жия, И́же изве́стно начерта́ние все́ нося́й Роди́телево, и́хже прия́т, Ще́дре, Са́м упоко́й, подава́я и́м присносу́щное блаже́нство.

И ны́не: Светоно́сная се́нь, златови́дный ковче́г, Боже́ственное Сло́во обдержа́щи воплоще́нное на́с ра́ди, и разори́вшее сме́ртную си́лу, яви́лася еси́, Всенепоро́чная.

Пе́снь 3

Ирмо́с: Дви́жимое се́рдце мое́, Го́споди, волна́ми жите́йскими, утверди́, в приста́нище ти́хое наставля́я я́ко Бо́г.

Па́лицами бие́мо не пощаде́сте те́ло, и мечи́ секо́мо, всехва́льнии ору́жницы, укрепля́еми наде́ждею, му́ченицы, ве́чных красо́т.

Святи́тельства оде́жду просвети́сте, ви́ды доброде́тельными упа́сше Христо́во ста́до на па́житех живо́тных.

Пло́ть умерщвля́юще воздержа́нием, преподо́бнии, жи́зни Боже́ственней причасти́шася – те́х, Христе́, свяще́нными моли́твами от бе́д изба́ви на́с.

Сла́ва: Усо́пшим та́мошний поко́й, Человеколю́бче, пода́ждь, я́же соде́яша на земли́, до́лги отпуща́я я́ко Бла́г.

И ны́не: Благослове́нную в жена́х Тя́ я́ко ви́де, сосло́вие же́нское пострада́, и Твоему́ Сы́ну, Де́во Ма́ти, приведе́ся.

И́н. Ирмо́с: Утверди́ ны́, Бо́же Спа́се, Твое́ю си́лою, и воздви́гни ро́г Твоея́ Це́ркве, правове́рно хва́лящих Тя́.

Му́жески подви́гшеся страда́льцы, мучи́тельским стремле́нием проти́ву ста́ша, и мо́лятся о усо́пших Христу́.

Зако́ны Твои́ми воспита́вшихся, преста́вльшихся, Преблаги́й, в све́тлых Твои́х селе́ниих прие́мь, упоко́й.

Сла́ва: Ми́лостивый Еди́не Бо́же, я́же избра́л еси́, сподо́би святы́х све́тлостей, презира́я те́х согреше́ния.

И ны́не: Пое́м Твое́ Рождество́, Чи́стая, И́мже пе́рваго осужде́ния и кля́твы изба́вихомся, и от сме́рти свободи́хомся.

Пе́снь 4

Ирмо́с: Услы́шах, Го́споди, слу́х Тво́й, и убоя́хся, разуме́х смотре́ние Твое́, и просла́вих Тя́, Еди́не Человеколю́бче.

Си́лою Твое́ю, Го́споди, страстоте́рпцы вра́жию си́лу попра́ша, и кре́пость бы́ша ве́рным, и вели́кое утвержде́ние.

Преподо́бнии вси́ ра́достию ра́дуются, и одева́ются свяще́нницы боже́ственнии в пра́вду, я́коже в ри́зу.

Воспои́м вси́ богоглаго́ливыя Бо́жия проро́ки, и почти́м же́н сосло́вие, я́же до́бре тече́ние сконча́вшыя.

Сла́ва: К приста́нищу твоего́ Ца́рствия, Влады́ко, устреми́в, упоко́й, и́хже преста́вил еси́ от мяте́жа и бу́ри настоя́щаго жития́.

И ны́не: Безле́тный бы́сть ны́не под ле́том из Тебе́, Де́во: Того́ моли́ разруши́ти вся́ души́ моея́ ле́тная прегреше́ния.

И́н. Ирмо́с: Услы́шах, Го́споди, из гро́ба Твое́ Воста́ние, и просла́вих Твою́ непобеди́мую си́лу.

Соприсносу́щна Тя́ Отцу́ испове́давше благоче́стно му́ченицы, Христе́, убие́ни бы́ша, и вопию́т Ти́: изба́ви и́хже прия́л еси́ рабы́ Твоя́.

И́же в мертвеце́х бы́вый еди́н свобо́дь мертве́ц, Христе́, и мертвеце́м жи́знь ве́чную да́руя, поко́й да́ждь ны́не преста́вленым рабо́м Твои́м.

Сла́ва: Прише́дый во е́же спасти́ заблу́ждшия, Христе́, ра́йскаго сподо́би вселе́ния, я́же преста́вил еси́ в ве́ре, оправда́вый благода́тию.

И ны́не: Осени́ Тя Вы́шняго, Отрокови́це, си́ла, в Тебе́ ра́й соде́ла живо́тный, дре́во иму́щий посреде́ – Хода́тая и Го́спода.

Пе́снь 5

Ирмо́с: Окая́нную ду́шу мою́, нощеборю́щуюся со тьмо́ю страсте́й, предвари́в уще́дри, и возсия́й мы́сленное со́лнце днесве́тлыя звезды́ во мне́, во е́же раздели́ти но́щь от све́та.

Исцеле́ние неду́гующим источа́ют ко́сти му́ченик: не сокруши́вшеся бо зло́бою, и на́ша обновля́ют сокруше́ния; вся́ же ко́сти злоче́стия я́ко пра́х истни́ша.

Зако́ны Твоя́ соблюда́юще святи́телие упасо́ша лю́ди, и наста́виша, Ще́дре, к животу́ бу́дущему; преподо́бнии же умертви́ша страсте́й мучи́тельство соверше́нным умо́м.

Да почту́тся проро́цы, и с ни́ми вси́ пра́ведницы ве́рою; и да похва́лятся преподо́бно пожи́вшия, и му́ками просвети́вшияся на земли́ боже́ственныя жены́, я́ко рабы́ Христо́вы.

Сла́ва, поко́ин: Я́же от земли́ прия́т, в Небе́сных учини́ селе́ниих ве́рныя рабы́ Твоя́, те́х презира́я прегреше́ния, за премно́гую бла́гость, Христе́, воплоще́йся на́с ра́ди земны́х.

И ны́не: Богоро́дичен: Пое́м Тя́, Де́во, Ея́же ра́ди яви́ся Бо́г су́щим на земли́, Челове́к бы́в, вопию́ще: ра́дуйся, земле́ благоплодови́тая, плодонося́щая Кла́с та́йны, пита́ющ вся́кое дыха́ние.

И́н. Ирмо́с: У́тренююще вопие́м Ти́, Го́споди, спаси́ ны, Ты́ бо еси́ Бо́г на́ш, ра́зве бо Тебе́ ино́го не зна́ем.

Му́ченик прие́м, Го́споди, моле́ния, ду́ши, я́же преста́вил еси́, со избра́нными Ти́ причти́.

Предре́кл еси́, не узре́ти сме́рти ве́рующим в Тя́: те́мже, Влады́ко, усо́пшия упоко́й.

Сла́ва: Красоты́ до́му Твоего́, Го́споди, Твоя́ рабы́ улучи́ти сподо́би, и сла́дкаго прича́стия.

И ны́не: Сло́во, Е́же Отцу́ соприсносу́щное, от Де́вы вопло́щся, умертви́ сме́ртию сме́рть.

Пе́снь 6

Ирмо́с: Я́коже проро́ка от зве́ря изба́вил еси́, Го́споди, и мене́ из глубины́ несодержи́мых страсте́й возведи́, молю́ся: да приложу́ призре́ти ми́ к Хра́му свято́му Твоему́.

Телеса́ преда́вше на ра́ны, Боже́ственнии му́ченицы, мучи́телей рука́м, веселя́хуся душе́ю: Боже́ственное бо зря́ху вои́стинну, присносу́щное ра́дование и Боже́ственная воздая́ния.

Сла́ва прему́дрым святи́телем и преподо́бным Ты́ еси́, Христе́. Моли́твами и́х Твоя́ лю́ди уще́дри, и́хже Свое́ю Кро́вию стяжа́л еси́, я́ко Человеколю́бец.

От Тебе́, Го́споди, просвеща́ющеся умо́м проро́цы, проявля́ют я́сно да́льняя я́коже бли́з; жены́ же си́лою Твое́ю держа́ву вра́жию разруши́ша, страда́нием и посто́м.

Сла́ва: Преста́вленыя от на́с ве́рныя рабы́ Твоя́, лико́м избра́нных сопричта́в, Бла́же, упоко́й, Го́споди, вся́ те́х согреше́ния презира́я за милосе́рдие.

Богоро́дичен: Созда́вый в нача́тце Е́ву, Го́споди, Де́вы в ложесна́ вше́д, на́ше соде́ловаеши обновле́ние в ра́бий о́браз обо́лкся, и́же Влады́ка вся́ческих.

И́н. Ирмо́с: Обы́де мя́ бе́здна, гро́б мне́ ки́т бы́сть: а́з же возопи́х к Тебе́ Человеколю́бцу, и спасе́ мя десни́ца Твоя́, Го́споди.

Во́инство му́ченик Твои́х, Вы́шним Си́лам подо́бящеся, Христе́, мо́лят Тя́, пода́ждь Человеколю́бче, преста́вленым е́же от Тебе́ наслажде́ние.

В ме́стех прохлажде́ния, в ме́стех святы́х све́тлости, в ме́стех ослабле́ния, Христе́, я́ко Человеколю́бец, и́хже прия́л еси́, учини́ рабы́ Твоя́.

Сла́ва: Очи́сти рабы́ Твоя́, и те́м согреше́ний проще́ние пода́ждь, Человеколю́бче, и жи́зни сподо́би нетле́нней, и блаже́нному насле́дию.

Богоро́дичен: Зача́тия безсе́меннаго Твоего́, кто́ сло́вом изрещи́ мо́жет чудесе́, Всенепоро́чная? Бо́га во родила́ еси́, за милосе́рдие к на́м прише́дша.

Пе́снь 7

Ирмо́с: Огня́ гаси́лище отроко́в моли́тва, ороша́ющая пе́щь, пропове́дница чудесе́, не опаля́ющи, ниже́ сожига́ющи песносло́вцы Бо́га оте́ц на́ших.

Вы́ разжиза́еми лю́тых муче́ний огне́м, любле́ние тепле́йшее, му́ченицы сла́внии, показа́сте ко Го́споду, прохлажда́юще ва́с по́мыслом благочести́вым.

Прему́дростию Ду́ха украси́вшеся, прему́дрии, и све́тло пожи́сте, священноде́йствующе благода́ти Ева́нгелия, и я́ко Бо́жия служи́тели похваля́ем ва́с.

Вы́ умертви́вше пло́ть боле́зньми мно́гими, жи́зни сподо́бистеся бу́дущия, преподо́бнии, моля́щеся сию́ получи́ти на́м умерщвле́ным страсте́й приложе́ньми.

Блаже́нный ли́к Бо́жиих проро́к, и же́н собо́р, подви́гшияся посто́м, и страда́нием низложи́вшия врага́, да похва́лятся ве́рно.

Сла́ва: Ме́ртвым приобщи́вся все́х Жи́знь, Сло́ве, ны́не оста́вльших жития́ мяте́ж, ко приста́нищу Твоему́ Боже́ственному упра́ви, согреше́ния и́х презира́я, Бла́же.

И ны́не: И́же Богоро́дицу Тя́ му́дрствующии ра́зумом пра́вым, огня́ ве́чнаго и тьмы́ да изба́вимся хода́тайством Твои́м, Влады́чице, и неви́димых вра́г борю́щих на́с.

И́н. Ирмо́с: В пещи́ о́гненней песносло́вцы спасы́й о́троки, благослове́н Бо́г оте́ц на́ших.

Ны́не непристу́пнаго све́та насы́титися, пода́ждь, Спа́се, преста́вленым, мольба́ми страстоте́рпец Твои́х.

В Це́ркви пе́рвенец, Христе́, в ве́ре сконча́вшихся, Ще́дре, сопричти́.

Сла́ва: Укра́шены оде́ждами нетле́ния Твоя́ Рабы́, преста́вленыя к Тебе́, Спа́се, упоко́й.

И ны́не: То́к сме́ртнаго существа́ отсекла́ еси́, Пречи́стая, Жи́знь без се́мене заче́нши, Всенепоро́чная.

Пе́снь 8

Ирмо́с: А́нгелов со́нм, челове́ков собо́р, Царя́ и Зижди́теля все́х, свяще́нницы по́йте, благослови́те леви́ти, лю́дие превозноси́те во вся́ ве́ки.

Преплы́вше муче́ний пучи́ну окормле́нием Сло́ва, страда́льцы, крове́й тече́нием погрузи́сте вся́ полки́ льсти́ваго, и живете́ во ве́ки.

Прему́дрии бы́вше священноде́лателие, свяще́нно на воде́ правосла́вия ва́м вве́ренное ста́до препита́сте: вои́стинну сла́дости кра́сных пото́ков наслажда́етеся во ве́ки.

Свети́ла преподо́бнии ве́рным яви́стеся, я́ко соверши́вше дела́ све́та, и к Боже́ственней све́тлости преста́вистеся: тьмы́ на́с свободи́ти моли́теся Влады́це.

Весели́ся сосло́вие же́нское, по́честей исполне́ние вся́ких прие́мшее ра́нами, и ли́к ра́дуйся проро́ческий, и пра́ведных, угоди́вших Христу́ во ве́ки.

Сла́ва: Ору́жие обраща́ющееся ны́не, да́ждь, Влады́ко, невозбра́нно проити́, преста́вленым от жития́ рабо́м Твои́м: вну́трь Рая́ те́х вселя́я, я́ко еди́н Ми́лостив.

Богоро́дичен: Я́ко врата́ вводя́щая к Боже́ственному вхо́ду, я́ко добровосхо́дную ле́ствицу Бо́жию, я́ко спаса́ющимся незаблу́дную наста́вницу, обра́дованную воспои́м Де́ву Мари́ю.

И́н. Ирмо́с: Из Отца́ пре́жде ве́к рожде́ннаго Сы́на и Бо́га, и в после́дняя ле́та воплоще́ннаго от Де́вы Ма́тере, свяще́нницы по́йте, лю́дие превозноси́те во вся́ ве́ки.

И́же святы́х му́ченик по́двиги прие́мый, и те́х ра́ди упокоя́яй в ве́ре Твое́й усо́пшия, Тебе́, Спа́се, пое́м, и превозно́сим во вся́ ве́ки.

Преми́рныя Твоея́ сла́вы сия́нием озаря́тися, я́же от на́с преста́вленыя сподо́би, я́ко Благоутро́бен, Тебе́, Спа́се, пою́щия, и превознося́щия во вся́ ве́ки.

Сла́ва: С ли́ки святы́х, и́хже преста́вил еси́, учини́, и Авраа́му, в не́дрех с Ла́зарем причти́ Тебе́, Спа́се, пою́щих, и превознося́щих во вся́ ве́ки.

Богоро́дичен: Укра́шена добро́тою чистоты́, Де́во Ма́ти, добротво́рнаго благоле́пия жили́ще бы́вши. Те́мже Тя́ пое́м, и превозно́сим Чи́стую во вся́ ве́ки.

Та́же, пое́м пе́снь Богоро́дицы: Вели́чит душа́ моя́ Го́спода:

Пе́снь 9

Ирмо́с: Я́ко сотвори́ Тебе́ вели́чия Си́льный, Де́ву я́вль Тя́ чи́сту по Рождестве́, я́ко ро́ждшую без се́мене Своего́ Творца́: те́м Тя́ Богоро́дицу велича́ем.

Священноде́йственнии па́стырие, проро́к святы́х ли́к, пра́ведных неизче́тное мно́жество, му́чеников собо́р, свяще́нными пе́сньми да ублажа́ются, моля́щеся спасти́ся душа́м на́шим.

Я́ко чу́дный по́стничествовав преподо́бных собо́р прему́дренно, чуде́с показа́ньми мно́гими ны́не удиви́ся: те́х мольба́ми, ди́вный Го́споди, удиви́ на все́х ми́лости Твоя́.

Со священному́ченики сконча́вшими тече́ние до́бре, же́н безчи́сленное мно́жество пострада́вшее и пости́вшееся, любо́вию да ублажа́ется ве́рно, со а́нгельскими ли́ки пребыва́ющее.

Сла́ва: Святы́х все́х мно́жество мо́лит Тя́, Сло́ве: упоко́й мно́жества я́же в ве́ре от земли́ преста́вленыя, за мно́жество ми́лости, я́же соде́яная и́ми в житии́, презира́я согреше́ния.

Богоро́дичен: Умовре́дно грехи́ соде́ях мно́ги, Де́во, муче́ния ожида́ю про́чее, от него́же мя́ изба́ви, несумне́нным се́рдцем к Тебе́ приходя́щаго, и Боже́ственный покро́в Тво́й призыва́юща.

И́н. Ирмо́с: Тя́ па́че ума́ и словесе́ Ма́терь Бо́жию, в ле́то Безле́тнаго неизрече́нно ро́ждшую, ве́рнии единому́дренно велича́ем.

Страда́ний свяще́нных му́ченицы, воздая́ния прие́мше, дарова́ти Тя́ ны́не мо́лят, ве́рою преста́вленым, Спа́се, ослабле́ние.

Умерщвле́ние претерпе́л еси́, еди́не Спа́се безсме́ртне, И́же воскресе́ние ме́ртвым подая́ я́ко Благоутро́бен, и безсме́ртия све́тлость.

Сла́ва: Испра́вил еси́ на́с па́дших в сме́рть, и на живо́т ве́чный наде́ятися научи́л еси́, его́же улучи́ти Твои́м рабо́м, Спа́се, да́руй.

Богоро́дичен: Зако́на се́ни преидо́ша Рождество́м Твои́м, и́стина возсия́, благода́ть дарова́ся, Богоро́дице: те́мже Тя́ велича́ем.

Та́же, Досто́йно е́сть: И покло́н. Посе́м ектения́, и свети́лен, и псалмы́ обы́чны.

На хвали́тех стихи́ры му́ченичны, гла́с 5:

Благослове́но во́инство Небе́снаго Царя́: а́ще бо и земноро́дни бе́ша страстоте́рпцы, но а́нгельский са́н тща́хуся дости́гнути, о телесе́х неради́вше, и страсте́й ра́ди Безпло́тных сподо́бишася че́сти. Те́мже моли́твами и́х, Го́споди, спаси́ ду́ши на́ша.

Страстоно́сцы Твои́, Го́споди, чино́м а́нгельским уподо́бльшеся, я́ко безпло́тнии, му́ки претерпе́ша, и единомы́сленно упова́ние иму́ще, обеща́нных бла́г наслажде́ние. Моли́твами и́х, Христе́ Бо́же, поми́луй на́с.

Святи́и му́ченицы, на земли́ подви́гшеся, мра́з претерпе́ша, и огню́ преда́шася, вода́ и́х прия́т. Те́х е́сть гла́с: проидо́хом сквозе́ о́гнь и во́ду, и изведе́ ны́ в поко́й. Те́х моли́твами, Бо́же, поми́луй на́с.

В му́ках су́ще святи́и, ра́дующеся вопия́ху: ку́пля на́м су́ть сия́ ко Влады́це. Вме́сто быва́ющих ра́н на телесе́х, све́тлое одея́ние в воскресе́ние процвете́т на́м, за безче́стие – венцы́, за у́зы темни́чныя – Ра́й, и за е́же со злоде́и осужде́ние – е́же со а́нгелы житие́. Моли́твами и́х, Го́споди, спаси́ ду́ши на́ша.

Ты́ созда́вый мя́, Го́споди, и положи́ на мне́ ру́ку Твою́, и запове́дав ми́ ре́кл еси́: в зе́млю па́ки по́йдеши. Наста́ви мя́ на пра́вый пу́ть Тво́й, проща́я мне́ прегреше́ния, осла́би ми́, и спаси́ мя, молю́ся, я́ко Человеколю́бец.

Сла́ва, и ны́не: Богоро́дичен: Оле, окая́нная душе́! Ки́й отве́т и́маши рещи́ Судии́ во о́н ча́с, егда́ престо́ли поста́вятся на Суде́, и Судия́ прии́дет от Небе́с, соше́д со тьма́ми а́нгельскими? Егда́ ся́дет на Суди́щи, прю́ сотвори́ти с рабы́ непотре́бными, подо́бными мне́, что́ отвеща́ти и́маши? Что́же принести́ тогда́? Пои́стинне ничто́же. У́м и те́ло оскверни́вши Твое́. Те́мже припади́ к Де́ве, и зови́ непреста́нно, пода́ти тебе́ бога́тно грехо́в проще́ние.

На стихо́вне стихи́ры поко́йны, гла́с 5:

Подо́бен: Ра́дуйся:

Све́том лица́ Твоего́, Христе́, преста́вленыя я́ко Ще́др просвети́. Всели́ я́ в ме́сто зла́чно, при вода́х Твоего́ чи́стаго и Боже́ственнаго поко́я, в жела́емых не́дрех Авраа́ма пра́отца, иде́же све́т Тво́й чи́сте сия́ет, и пролива́ются исто́чницы благосты́ни; иде́же лику́ют я́сно веселя́щеся пра́ведных все́х собо́ри о Твое́й бла́гости. С ни́миже учини́ рабы́ Твоя́, подая́ и́м ве́лию ми́лость.

Сти́х: Блаже́ни, я́же избра́л и прия́л еси́, Го́споди.

Пе́ти всесоста́вными гла́сы, славосло́вити же Твою́ держа́ву, благоволи́, Ще́дре, преста́вльшияся от привре́менных к Тебе́ Влады́це все́х и Бо́гу на́шему, подая́ красото́ю Твое́ю освеща́тися, и сла́дкаго и кра́снаго прича́стия Твоего́, восприя́ти же и наслажда́тися чисте́йше, иде́же о́крест престо́ла Твоего́ лику́ют а́нгели, и святы́х ли́цы ра́достно обстоя́т. С ни́миже Твои́м рабо́м поко́й пода́ждь, и ве́лию ми́лость.

Сти́х: Ду́ши и́х во благи́х водворя́тся.

Иде́же проро́ков ли́к, апо́столов и му́чеников чи́нове, и вси́ и́же от ве́ка оправди́вшиися Твое́ю спаси́тельною Стра́стию и Кро́вию, е́юже искупи́л еси́ плене́наго челове́ка, та́мо ве́рою усо́пшия упоко́й, я́ко Человеколю́бец, проща́яй согреше́ния: Еди́н бо безгре́шен на земли́ пожи́л еси́ Свя́т вои́стинну, Еди́н во уме́рших свобо́дь. Те́мже Твои́м рабо́м поко́й пода́ждь, и ве́лию ми́лость.

Сла́ва, и ны́не: Богоро́дичен: Зако́ном грехо́вным на́с порабоще́нных свободи́ла еси́, Влады́чице, в ложесна́х Законода́вца и Царя́ Христа́ заче́нши, Еди́на Де́во Ма́ти, И́мже оправда́емся ту́не, и благода́тию. Его́же ны́не моли́, ду́ши ве́дущих Тя́ Богома́терь, написа́ти в Кни́зе Живо́тней, я́ко да хода́тайством Твои́м спа́сшеся, Всенепоро́чная, Сы́на Твоего́ любе́зное избавле́ние полу́чим, Тому́ покланя́ющеся, подаю́щему ми́рови ве́лию ми́лость.

Разбо́йник на Кресте́ Бо́га Тя́ бы́ти ве́ровав, Христе́, испове́да Тя́ чи́сте от се́рдца, помяни́ мя, Го́споди, вопия́, во Ца́рствии Твое́м.

Сти́х: Блаже́ни изгна́ни пра́вды ра́ди, я́ко те́х е́сть Ца́рство Небе́сное.

Началозло́бнаго врага́, уме́рше, му́ченицы, погуби́сте, и взыдо́сте к Вы́шним, венча́вшеся Боже́ственными побе́дами, и Царю́ все́х Бо́гу предста́сте.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л, на вы́ лжу́ще Мене́ ра́ди.

Свяще́нства све́том святи́телие просвеща́еми просла́вишася, и преподо́бных мно́жество присносу́щный получи́ша живо́т – те́мже ублажа́еми су́ть.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

С ли́ки избра́нных на ме́сте, Влады́ко, ослабле́ния, и́хже преста́вил еси́, всели́, Сло́ве, презре́в, Христе́, я́же на земли́ те́х согреше́ния.

Сла́ва: О, Тро́ице честна́я! Святи́телей и му́ченик честны́х по́двиги умоле́на бу́ди: ве́рою уме́рших душа́м спасе́ние да́руй, и ве́лию ми́лость.

И ны́не: Я́же Невмести́маго все́ми, Богора́дованная, вмести́ла еси́, и ро́ждши па́че естества́ и сло́ва, Того́ ми́лостива бы́ти все́м, Влады́чице, умоли́.

Коне́ц пя́тому гла́су.