Глас 7

Суббота

В суббо́ту ве́чера, на ма́лей вече́рни

на Го́споди, воззва́х, поста́вим стихо́в 4: и пое́м 3 воскре́сны, повторя́юще 1-й. Стихи́ры воскре́сны, гла́с 7:

Сти́х: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Прииди́те, возра́дуемся Го́сподеви, сокруши́вшему сме́рти держа́ву, и просвети́вшему челове́ческий ро́д, со безпло́тными зову́ще: Соде́телю и Cпа́се на́ш, сла́ва Тебе́.

Кре́ст претерпе́л еси́, Спа́се, и погребе́ние на́с ра́ди, сме́ртию же, я́ко Бо́г сме́рть умертви́л еси́. Те́мже покланя́емся тридне́вному воскресе́нию Твоему́: Го́споди, сла́ва Тебе́.

Апо́столи ви́девше воскресе́ние Соде́теля, чудя́хуся, пою́ще хвалу́ А́нгельскую: сия́ сла́ва е́сть церко́вная, сие́ бога́тство Ца́рствия, пострада́вый на́с ра́ди, Го́споди, сла́ва Тебе́.

Сла́ва, и ны́не, Богоро́дичен, догма́тик, гла́с 7:

Стра́шно и неизрече́нно вои́стинну, е́же о Тебе́ соде́янное та́инство, Нескве́рная: Сло́во бо все́х вино́вное, па́че вины́ и сло́ва, Святы́м Ду́хом вопло́щшееся родила́ еси́, из себе́ пло́ть прии́мша, Своего́ естества́ непрело́жно пребы́вша. Соше́дшымся бо обои́м самобы́тне, по ипоста́си еди́нственной, сугу́б естество́м происхо́дит: ве́сь Бо́г, и ве́сь Челове́к, во обои́х соверше́нствиих, действи́тельными сво́йствы изъявля́я: пострада́в бо на Кресте́ пло́тию, безстра́стный то́йже пребы́сть Боже́ственне: я́ко челове́к умры́й, па́ки оживе́ я́ко Бо́г тридне́вен, держа́ву сме́ртную низложи́в, из истле́ния изба́вль челове́чество. Того́ я́ко изба́вителя и Спа́са Ро́да на́шего, Богома́ти, моли́, низпосла́ти на́м щедро́т его́ Ве́лию Ми́лость.

Та́же, Све́те ти́хий: Посе́м проки́мен: Госпо́дь воцари́ся, три́жды. Сти́х: Облече́ся Госпо́дь в си́лу, и препоя́сася.

Та́же, Сподо́би, Го́споди, в ве́чер се́й: Иере́й же ектении́ не глаго́лет, но пое́м на стихо́вне стихи́ру воскре́сну, гла́с 7:

Воскре́сен еси́ из гро́ба Спа́се ми́ра, и совоздви́гл еси́ челове́ки с пло́тию Твое́ю: Го́споди, сла́ва Тебе́.

И́ны стихи́ры Пресвяте́й Богоро́дице, гла́с 7:

Подо́бен: Неради́вше о вре́менных:

Сти́х: Помяну́ и́мя Твое́ во вся́ком ро́де и ро́де.

Восто́к Со́лнца мы́сленнаго Де́во была́ еси́, на за́падех е́же по на́м бы́вшаго естества́: но я́ко иму́щи дерзнове́ние, Того́ моли́, Богоро́дице Всепе́тая, от безме́рных прегреше́ний свободи́ти ду́шы на́шя.

Сти́х: Слы́ши, Дщи́, и ви́ждь, и приклони́ у́хо Твое́.

Же́зл из ко́рене Иессе́ева, Де́во, я́ве прозябла́ еси́, насажде́ния пре́лести из ко́рене Потре́бльшаго: но я́ко иму́щи дерзнове́ние, непреста́нно моли́, искорени́ти, Всепе́тая, се́рдца моего́ стра́сти, и Того́ всади́ти стра́х, и спасти́ мя.

Сти́х: Лицу́ Твоему́ помо́лятся бога́тии лю́дстии.

Врата́ Бо́жия, Пресвята́я, от вра́т а́довых изба́ви мя́, и пу́ть покая́ния покажи́ ми, и́мже обря́щу врата́ к жи́зни вводя́щая: заблу́ждших Наста́внице, ро́д ве́рных челове́к соблюда́й, и спаса́й ду́шы на́шя.

Сла́ва, и ны́не, Богоро́дичен: Из Тебе́, Всесвята́я Богоро́дице Де́во, неизрече́нно роди́ся Христо́с Бо́г на́ш, вои́стинну сы́й Бо́г Преве́чный, и Челове́к но́в. О́во у́бо Сы́й, присносу́щен: о́во же на́с ра́ди бы́в: спаса́ет бо Собо́ю, коего́ждо естества́ сво́йство, о́вем у́бо сия́я чудесы́, о́вем же уверя́я страстьми́, те́мже Еди́н и То́йже, и умира́ет я́ко Челове́к, и я́ко Бо́г востае́т. Его́же моли́, Чи́стая, Неискусобра́чная, спасти́ся душа́м на́шым.

Та́же, Ны́не отпуща́еши: Трисвято́е, и по О́тче на́ш: Тропа́рь воскре́сен. Сла́ва, и ны́не, Богоро́дичен его́, и отпу́ст.

В суббо́ту на вели́цей вече́рни

на Го́споди, воззва́х, поста́вим стихо́в 10: и пое́м стихи́ры воскре́сны, гла́с 7. Творе́ние Иоа́нна Дамаски́на.

Сти́х: Изведи́ из темни́цы ду́шу мою́, испове́датися и́мени Твоему́.

Прииди́те, возра́дуемся Го́сподеви, сокруши́вшему сме́рти держа́ву, и просвети́вшему челове́ческий ро́д, со безпло́тными зову́ще: Соде́телю и Cпа́се на́ш, сла́ва Тебе́.

Сти́х: Мене́ жду́т пра́ведницы, до́ндеже возда́си мне́.

Кре́ст претерпе́л еси́, Спа́се, и погребе́ние на́с ра́ди, сме́ртию же я́ко Бо́г сме́рть умертви́л еси́. Те́мже покланя́емся тридне́вному Воскресе́нию Твоему́: Го́споди, сла́ва Тебе́.

Сти́х: Из глубины́ воззва́х к Тебе́, Го́споди, Го́споди, услы́ши гла́с мо́й.

Апо́столи ви́девше Воскресе́ние Соде́теля, чудя́хуся, пою́ще хвалу́ а́нгельскую: сия́ сла́ва е́сть церко́вная, сие́ бога́тство Ца́рствия: пострада́вый на́с ра́ди, Го́споди, сла́ва Тебе́.

И́ны стихи́ры Анато́лиевы, гла́с то́йже.

Сти́х: Да бу́дут у́ши Твои́ вне́млюще гла́су моле́ния моего́.

А́ще и я́т бы́л еси́, Христе́, от беззако́нных муже́й: но Ты́ ми еси́ Бо́г, и не постыжду́ся: бие́н бы́л еси́ по плеще́ма, не отмета́юся: на Кресте́ пригвожде́н бы́л еси́, и не таю́: воста́нием Твои́м хвалю́ся: сме́рть бо Твоя́ живо́т мо́й, Всеси́льне и Человеколю́бче Го́споди, сла́ва Тебе́.

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

Дави́дское проро́чество исполня́я Христо́с, вели́чествие в Сио́не Свое́ ученико́м откры́л е́сть, хвали́ма показу́я Себе́, и сла́вима при́сно, со Отце́м же и Ду́хом Святы́м: пе́рвее у́бо безпло́тна, я́ко Сло́ва, последи́ же на́с ра́ди воплоще́на, и умерщвле́на я́ко Челове́ка, и воскре́сша со вла́стию, я́ко Человеколю́бца.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Соше́л еси́ во а́д Христе́, я́коже восхоте́л еси́: испрове́ргл еси́ сме́рть, я́ко Бо́г и Влады́ка: и воскре́сл еси́ тридне́вен, совоскреси́в Ада́ма от а́довых у́з и тле́ния, зову́ща и глаго́люща: сла́ва Воскресе́нию Твоему́, еди́не Человеколю́бче.

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Во гро́бе положе́н бы́л еси́ я́ко спя́, Го́споди: и воскре́сл еси́ тридне́вен, я́ко си́лен в кре́пости, совоскреси́в Ада́ма от тли́ сме́ртныя, я́ко Всеси́лен.

И́ны стихи́ры Богоро́дице, Па́вла Аморре́йскаго, гла́с 2.

Подо́бен: Егда́ от дре́ва:

Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.

Ты́ еси́ А́нгелов Ра́дость, Ты́ еси́ челове́ков Сла́ва, Ты́ ве́рных Наде́жда, Влады́чице Всепе́тая, Предста́тельница на́ша: и к Тебе́ прибега́ем во вся́кой ну́жди, я́ко да мольба́ми Твои́ми, от стре́л вра́жиих па́губы душетле́нныя, и вся́ких скорбе́й изба́вимся вси́ воспева́ющии Тя́, Богоневе́стная.

Сти́х: Хвали́те Го́спода вси́ язы́цы, похвали́те Его́ вси́ лю́дие.

Ты́ ми, Богоро́дице, Упова́ние, Ты́ ми Предста́тельница и стена́ и прибе́жище, Влады́чице Препе́тая, Я́же Бо́га пло́тию неискусому́жно ро́ждши ми́ру Спаси́теля: Ты́ мольба́ми Твои́ми от одержа́щих на́с изба́ви искуше́ний, и бе́д и обстоя́ний, Еди́на христиа́н Прибе́жище.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Укроти́ пло́ти моея́ стремле́ния, угаси́ пла́мень страсте́й мои́х, отими́ от мене́, Богоро́дице, зно́й лука́вый жела́ния моего́, и непрекло́нный мо́й обы́чай возврати́, Де́во, от вся́каго бесо́вскаго стремле́ния: я́ко да в тишине́ се́рдца, и в безстра́стии души́ моея́, песносло́влю Тя́, Всепе́тую.

Сла́ва, и ны́не, Богоро́дичен: Ма́ти у́бо позна́лася еси́, па́че естества́, Богоро́дице, пребыла́ же еси́ Де́ва, па́че сло́ва и ра́зума: и чудесе́ рождества́ Твоего́ сказа́ти язы́к не мо́жет. Пресла́вну бо су́щу зача́тию, Чи́стая, непости́жен е́сть о́браз рожде́ния: иде́же бо хо́щет Бо́г, побежда́ется естества́ чи́н. Те́мже Тя́ вси́, Ма́терь Бо́жию ве́дуще, мо́лим Ти ся приле́жно, моли́ спасти́ся душа́м на́шым.

Та́же, Све́те ти́хий: Проки́мен дне́: Госпо́дь воцари́ся: И про́чее по обы́чаю.

На стихо́вне стихи́ры воскре́сны, гла́с 7:

Воскре́сл еси́ из гро́ба, Спа́се ми́ра, и совоздви́гл еси́ челове́ки с пло́тию Твое́ю: Го́споди, сла́ва Тебе́.

И́ны стихи́ры по алфави́ту.

Сти́х: Госпо́дь воцари́ся, в ле́поту облече́ся.

Воскре́сшему из ме́ртвых, и просвети́вшему вся́, прииди́те поклони́мся: от а́дова бо мучи́тельства на́с свободи́л е́сть, свои́м тридне́вным Воскресе́нием живо́т на́м дарова́вый, и ве́лию ми́лость.

Сти́х: И́бо утверди́ вселе́нную, я́же не подви́жится.

Во а́д соше́д, Христе́, сме́рть плени́л еси́, и тридне́вен воскре́с, на́с совоскреси́л еси́, сла́вящих Твое́ всеси́льное воста́ние, Го́споди Человеколю́бче.

Сти́х: До́му Твоему́ подоба́ет святы́ня, Го́споди, в долготу́ дни́й.

Стра́шен яви́лся еси́, Го́споди, во гро́бе лежя́ я́ко спя́: воскре́с же тридне́вен я́ко си́лен, Ада́ма совоскреси́л еси́ зову́ща: сла́ва Воскресе́нию Твоему́, Еди́не Человеколю́бче.

Сла́ва, и ны́не, Богоро́дичен: Под кро́в Тво́й, Влады́чице, вси́ земноро́днии прибега́юще, вопие́м Ти́: Богоро́дице, упова́ние на́ше, изба́ви ны́ от безме́рных прегреше́ний, и спаси́ ду́шы на́шя.

Та́же, Ны́не отпуща́еши: Трисвято́е, и по О́тче на́ш:

Глаго́лем тропа́рь воскре́сен, гла́с 7:

Разруши́л еси́ Кресто́м Твои́м сме́рть, отве́рзл еси́ разбо́йнику ра́й: мироно́сицам пла́чь преложи́л еси́, и апо́столом пропове́дати повеле́л еси́: я́ко воскре́сл еси́, Христе́ Бо́же, да́руяй ми́рови ве́лию ми́лость.

Сла́ва, и ны́не, Богоро́дичен: Я́ко на́шего воскресе́ния сокро́вище, на Тя́ наде́ющыяся, Всепе́тая, от ро́ва и глубины́ прегреше́ний возведи́: Ты́ бо пови́нныя греху́ спасла́ еси́, ро́ждши Спасе́ние на́ше: я́же пре́жде рождества́ Де́ва, и в рождестве́ Де́ва, и по рождестве́ па́ки пребыва́еши Де́ва.

Та́же и отпу́ст.

В суббо́ту на повече́рии

кано́н Пресвяте́й Богоро́дице. Гла́с 7:

Пе́снь 1

Ирмо́с: Сокруши́вшему бра́ни мы́шцею Свое́ю, и вса́дники триста́ты погрузи́вшему, пои́м Ему́, я́ко Изба́вителю на́шему Бо́гу: Я́ко просла́вися.

Припе́в: Пресвята́я Богоро́дице, спаси́ на́с.

Я́ко украше́ние пе́нием, и пе́снь Богоподо́бну благодаре́ния Ти́ да́ры прино́сим: е́же ра́дуйся ны́не, Чи́стая, я́ко от печа́ли ра́дость на́м подала́ еси́.

Ми́лости Твоея́ благода́ть, и покро́ва кре́пость, не премолчи́м, Де́во Пречи́стая: я́ко от бе́д лю́тых на́с спасла́ еси́.

Сла́ва: От разли́чных изба́вльшеся искуше́ний и скорбе́й, Ма́терними Твои́ми моли́твами, Пречи́стая, согла́сно и те́пле благодаре́ния Тебе́ вси́ гла́сы пои́м.

И ны́не: Ря́снами испещре́на я́ко златы́ми доброде́тельми, и Ду́ха благода́тьми, Пречи́стая, я́ко Неве́ста О́тча украси́вшися, вои́стинну яви́лася еси́ Ма́ти Бо́гу.

Пе́снь 3

Ирмо́с: В нача́ле небеса́ всеси́льным Сло́вом Твои́м утвержде́й, Го́споди Спа́се, и вседе́тельным и Бо́жиим Ду́хом, всю́ си́лу и́х, на недви́жимем мя́ ка́мени испове́дания Твоего́ утверди́.

Ра́дости Боже́ственныя вели́чие, я́ко от нача́ла на́м весе́лию, благодаре́ния гла́сы прино́сим приле́жно, почита́юще Ю я́ко предста́тельницу на́шу.

И́же Тобо́ю изба́вльшеся от бе́д, и Тебе́ ра́ди ра́дость получи́вше, Ма́ти Безневе́стная, я́ко пода́тельницу благу́ю, и засту́пницу благохва́льну вси́ прославля́ем.

Сла́ва: Измене́ние прегреше́ний и напа́стей, Боже́ственною Твое́ю моли́твою прие́млюще, Ма́ти Христа́ Бо́га, я́ко вину́ благи́х воспева́ем Тя́ ве́рно благода́рными гла́сы.

И ны́не: Я́же ра́дости исто́чник безсме́ртныя, то́чит струи́ при́сно, и спаса́ет все́х Сама́: я́ко присножи́зненное на́м благодая́ние, Ма́ти Христа́ Бо́га.

Пе́снь 4

Ирмо́с: Покры́ла е́сть небеса́, Христе́ Бо́же, смотре́нием Твои́м, доброде́тель неизрече́нныя му́дрости Твоея́, Человеколю́бче.

Досто́йну Ти́ пе́снь ра́дования, Чи́стая Де́во, веселя́щеся прино́сим, изба́вльшеся от бе́д Твои́ми моли́твами.

Благода́рственно Тебе́, Де́во Чи́стая, душе́вныма рука́ма вно́сим пе́ние, Боже́ственными пе́сньми игра́юще, от печа́ли изба́вльшеся мно́гия.

Сла́ва: Воздвиго́ша на ны́ беды́ мно́ги страстни́и греси́: но Боже́ственным Твои́м покро́вом, Чи́стая, на́с изба́ви.

И ны́не: Блаже́ни вои́стинну чту́щии Тя́, Богоро́дице Пречи́стая, я́ко Тобо́ю греха́ и печа́ли изба́вихомся.

Пе́снь 5

Ирмо́с: Но́щь несветла́ неве́рным, Христе́, ве́рным же просвеще́ние в сла́дости слове́с Твои́х: сего́ ра́ди к Тебе́ у́тренюю, и воспева́ю Твое́ Божество́.

Греха́ потреби́теля Христа́ Де́во родила́ еси́, И́мже от напа́стей и боле́зней спасе́ся ми́р: те́мже ра́дуйся, и мы́ вопие́м Ти́, изба́вльшиися печа́лей.

Объе́мшеся разли́чными напа́стьми, Чи́стая Влады́чице, и печа́лию и ско́рбию, и лю́тым обстоя́нием, отча́явшеся мы́ весе́лия, наде́жду Тя́ обрето́хом.

Сла́ва: Я́ко спасе́ния храни́лище на́м рабо́м Твои́м, Чи́стая, отгоня́еши напа́сти, и соблюда́еши невреди́мы. Те́мже прича́стницы мно́гих Твои́х бла́г, благодари́м Тя́ пе́сньми.

И ны́не: Благодари́м Тя́ изба́вльшеся Тобо́ю грехо́в мно́гих, и не́мощей и боле́зней и неду́г лю́тых, Пречи́стая Влады́чице: наде́жда бо еси́ тверда́ Твои́м ве́рным рабо́м.

Пе́снь 6

Ирмо́с: Во глубину́ грехо́вную впа́дся, Бла́же, я́ко Ио́на от ки́та вопию́ Ти: возведи́ от тли́ живо́т мо́й, и спаси́ мя, Человеколю́бче.

А́нгельстии язы́цы досто́йно Твоя́ хвалы́ воспе́ти не мо́гут, Чи́стая: мы́ же ны́не ра́бски взе́мшеся, ра́дование Гаврии́лово прино́сим Ти́.

Во глубину́ печа́ли и обстоя́ния грехи́ на́шими впа́дше, изба́вихомся Тобо́ю от ну́жды и напа́стей, Де́во Богоро́дице Чи́стая.

Сла́ва: Под до́лгом соде́лася ве́сь ми́р, Чи́стая, благодари́ти, и хвали́ти, и сла́вити благода́ть Твою́ благоче́стно: Тобо́ю бо бе́д и печа́лей изба́влени бы́хом.

И ны́не: В нощи́ и во дни́, я́ве и вта́й, под Тво́й прибега́ем покро́в, Пречи́стая Де́во, и́же Тя́ ве́рно славосло́вящии.

Го́споди, поми́луй, три́жды. Сла́ва, и ны́не:

Седа́лен, гла́с 7.

Го́споди, мы́ есмы́ лю́дие Твои́, и о́вцы па́жити Твоея́, заблу́ждших я́ко па́стырь обрати́ на́с, тле́ю расточе́ных собери́ на́с: поми́луй ста́до Твое́, умилосе́рдися на лю́ди Твоя́, моли́твами Богоро́дицы, Еди́не безгре́шный.

Пе́снь 7

Ирмо́с: В пе́щь о́гненную вве́ржени преподо́бнии о́троцы, о́гнь в ро́су преложи́ша, воспева́нием си́це вопию́ще: благослове́н еси́, Го́споди, Бо́же оте́ц на́ших.

Ра́дование благода́рственное Тебе́ прино́сим, Ма́ти Бо́жия: я́ко вои́стинну Тобо́ю изба́влени вся́каго зла́го начина́ния, и согла́сно Тебе́ пое́м: Благослове́нна еси́.

Водвори́хомся в ве́чер в пла́чи печа́лей, и ча́янии злы́х: но Твои́м Боголе́пным Кро́вом, Де́во, обоже́ни бы́вше, обрето́хом ра́дость зау́тра: Ты́ бо спасла́ еси́ на́с.

Сла́ва: Я́ко Боже́ственное прибе́жище, мы́ покро́в Тво́й вси́ стяжа́вше к Бо́гу, в напа́стех и гоне́ниих и гресе́х, к Тебе́ прибега́ем, и Тобо́ю измене́ние прие́млем, Пречи́стая.

И ны́не: Благода́ть моли́твы Твоея́, Чи́стая, пропове́дуем усты́ и ду́хом, Сла́вная: я́ко Тебе́ ра́ди, напа́сти и бу́ри, и тя́жких печа́лей, и греха́ страсте́й вси́ избавля́емся.

Пе́снь 8

Ирмо́с: Стра́шнаго Херуви́мом, и чу́днаго Серафи́мом, и ми́ру Творца́, свяще́нницы и раби́, и ду́си пра́ведных, по́йте, благослови́те и превозноси́те Его́ во ве́ки.

Я́ко изба́вльшеся бу́ри грехо́вныя и страсте́й, и напа́стей Твои́ми моли́твами, Богоро́дице Блага́я, благода́рственным гла́сом, ра́дуйся, вопие́м Ти́: я́ко Тобо́ю от печа́ли в ра́дость преше́дше.

В боле́знех и напа́стех одержи́мыя не пре́зри, Блага́я, но мольбу́ худу́ю услы́шавши, свободи́ на́с от скорбе́й вели́ких: да ве́рно Твою́ моли́тву, Чи́стая, воспева́ем.

Сла́ва: Прегреше́ний разруше́нию вина́, ны́не возста́ви на́с от печа́лей, напа́стей и страсте́й челове́к, и искуше́ния неподо́бна: Твои́ми же, Богоро́дице, Боже́ственными мольба́ми, изба́ви на́с от ни́х пресла́вно.

И ны́не: Щедро́ты Твоя́ на все́х всегда́ низпосыла́ются, Христе́, благода́тию вои́стинну и мольба́ми ро́ждшия Тя́: от Тебе́ бо прие́млем христиа́не ми́лость Твою́, Спа́се Ми́лостиве.

Пе́снь 9

Ирмо́с: Па́че естества́ Ма́терь, и по естеству́ Де́ву, Еди́ну в жена́х благослове́нную, пе́сньми ве́рнии Богоро́дицу велича́ем.

Ра́дование по достоя́нию, со гла́сом восклица́ния Тебе́, Де́во, ны́не прино́сим со а́нгелом Гаврии́лом, изба́вльшеся от разли́чных искуше́ний, Богоро́дице, моли́твами Твои́ми.

Ра́дость и весе́лие, и ра́дование Боже́ственное, Де́во неискусому́жная, на́м умно́жися Бо́жие: се́ бо пла́чущиися лю́те, ра́дуемся моли́твами Твои́ми.

Сла́ва: Же́ртву хвале́ния пожру́, и язы́ком и гла́сом, пе́снь благода́рственную воздаю́ Ти приле́жно, Де́во: я́ко да Тебе́ моля́ся, в де́нь печа́ли Тобо́ю изба́влюся.

И ны́не: Сра́дуемся, Пречи́стая, Боже́ственному Твоему́ Рождеству́ благоче́стно: ра́дость бо на́м источи́ла еси́ от напа́стей и печа́лей. Те́мже Ти́ благода́рно и мы́ пе́снь соверша́ем, ве́рно воспева́юще Тя́.

Та́же, Досто́йно е́сть: Трисвято́е. По О́тче на́ш: тропари́, и про́чее по обы́чаю, и отпу́ст.

Неделя

В неде́лю у́тра на полу́нощнице

кано́н Пресвяте́й и Живонача́льней Тро́ице, [его́же краестро́чие: Хвалю́ Тро́ице Тя́, Единонача́льное Естество́.] Творе́ние Митрофа́ново. Гла́с 7:

Пе́снь 1

Ирмо́с: Ма́нием Твои́м на земны́й о́браз преложи́ся, пре́жде удоборазлива́емое водно́е естество́, Го́споди: те́мже немо́кренно пешеше́ствовав Изра́иль, пое́т Тебе́ пе́снь побе́дную.

Припе́в: Пресвята́я Тро́ице, Бо́же на́ш, сла́ва Тебе́.

Отве́рзи ми́ уста́ у́мная се́рдца, и устне́ веще́ственныя ко хвале́ Твое́й, Трисве́тлое Еди́но Божество́ все́х, пе́ти Тебе́ пе́снь, Светоде́телю, благода́рственную.

Да преизли́шнее Твоея́ бла́гости пока́жеши, создала́ еси́ челове́ка Тро́ице безмерноси́льная: то́кмо о́браз бре́нный Твоего́ нача́льнаго соде́телю, Госпо́дьства.

Ум безнача́льный, Сло́во соприсносу́щное роди́вый, и Ду́ха собезнача́льнаго просия́вый, сподо́би еди́ному Бо́гу по существу́ сообра́зну на́с покланя́тися Триипоста́сному.

Богоро́дичен: Яви́лся еси́ при купине́ Моисе́ю Бо́жий Сло́ве, я́ко о́гнь чисти́тельный, не опаля́я же отню́д, е́же от Де́вы прообразу́я твое́ воплоще́ние, и́мже челове́ки вообрази́л еси́.

Пе́снь 3

Ирмо́с: В нача́ле небеса́, всеси́льным Сло́вом Твои́м утвержде́й, Го́споди Спа́се, и вседе́тельным и Бо́жиим Ду́хом всю́ си́лу и́х: на недви́жимем мя́ ка́мени испове́дания Твоего́ утверди́.

И́же Еди́нственнаго и Трисия́ннаго, и вседе́тельнаго Тя́ Влады́ку воспева́юще, грехо́в и искуше́ний про́сим избавле́ния, безмерноси́льный Бо́же: да не у́бо пре́зриши, ве́рою Твою́ бла́гость сла́вящих.

О́трасль яви́ся от Отца́, я́ко от ко́рене безнача́льна Бо́г Сло́во, и равномо́щен со сра́сленым и Боже́ственным ду́хом: и сего́ ра́ди ве́рнии, тро́ичное ли́цы еди́но Госпо́дьство сла́вим.

Равносла́вно и сра́слено, триипоста́сное естество́ неразде́льне и разде́льне, и единонача́льную Тро́ицу вси́ Тя славосло́вим ве́рнии: и покланя́ющеся про́сим согреше́ний проще́ния.

Богоро́дичен: Неизме́нно челове́ком уподо́блься по всему́ Бо́жий Сло́ве, от Чи́стыя Отрокови́цы проше́л еси́ я́ве: и все́м показа́л еси́ Богонача́лие Трисия́нное, и еди́нственное Существо́м неизме́нных Ипоста́сей.

Го́споди, поми́луй, три́жды.

Седа́лен, гла́с 7. Подо́бен: И́же мене́ ра́ди:

Согреши́вшыя поми́луй, Тро́ице Свята́я, рабы́ Твоя́: и приими́ ка́ющыяся Тебе́ благоутро́бне, и проще́ния сподо́би.

Сла́ва, и ны́не, Богоро́дичен: Озло́бленныя ду́шы на́шя грехми́, ублажи́, Всечи́стая Богоро́дице, и изба́ви от прегреше́ний Тебе́ пою́щыя Богоневе́сто.

Пе́снь 4

Ирмо́с: О́тча не́дра не оста́вль, и соше́д на зе́млю, Христе́ Бо́же, та́йну услы́шах смотре́ния Твоего́, и просла́вих Тя́, Еди́не Человеколю́бче.

Содержи́тельная Трисве́тлая Еди́нице, Богонача́льная и спаси́тельная все́х, Твоя́ певцы́ ны́не огради́, и спаси́ от ско́рби, и страсте́й, и вся́каго озлобле́ния.

Назна́менательных рече́ний, Твоего́ непостижи́маго Трисве́тлаго Божества́, недоумева́юще воспева́ем Тя́, Человеколю́бче Го́споди, и прославля́ем Твою́ си́лу.

На земли́ я́ко на небесе́х со безпло́тными ли́ки, Еди́нице и Тро́ице, неразде́льно Тя́ разделя́ем, и любо́вию сла́вим, я́ко су́щими все́ми влады́чествующую.

Богоро́дичен: Оте́ческия сла́вы не отсту́пль, к на́шей ху́дости снизше́л еси́ во́лею, вопло́щься Пресу́щественный: и возне́сл еси́ к Боже́ственней сла́ве, я́ко благоутро́бен.

Пе́снь 5

Ирмо́с: Но́щь несветла́ неве́рным, Христе́, ве́рным же просвеще́ние в сла́дости слове́с Твои́х: сего́ ра́ди к Тебе́ у́тренюю, и воспева́ю Твое́ Божество́.

Светонача́льное Естество́ Тро́ице начерта́ньми, и Еди́нице в Сове́те и Сла́ве и Че́сти, утверди́ на́с в Твое́й любви́.

Ум, и Сло́во, и Ду́х, еди́но Богонача́льное и трисо́лнечное естество́ сла́вяще, про́сим изба́витися искуше́ний, и вся́ких скорбе́й.

Богоро́дичен: Вообра́жься Бо́жий Сло́ве, в естество́ челове́ческое, от Святы́я Де́вы, Тро́ицу во Еди́нице научи́л еси́ пе́ти, сообра́зну и сопресто́льну.

Пе́снь 6

Ирмо́с: Пла́вающаго в молве́ жите́йских попече́ний, с корабле́м потопля́ема грехи́, и душетле́нному зве́рю примета́ема, я́ко Ио́на, Христе́, вопию́ Ти: из смертоно́сныя глубины́ возведи́ мя.

Единосла́вную держа́ву, и единонача́льное богонача́лие, треми́ ипоста́сьми су́щее, непреме́нне с дру́г дру́гом сла́вим, разли́чие иму́ще то́кмо, бытие́м ко́йждо сво́йства.

У́мнии Тя́ чи́нове а́нгельских красо́т хва́лят, трисо́лнечное Богонача́лие: с ни́миже и мы́ бре́нными усты́, я́ко твори́тельну все́х, еди́ну песносло́вим, и ве́рно сла́вим.

Богоро́дичен: Недоуме́нным сло́вом, Сло́во ро́ждшееся от Со́лнца Отца́, и́но со́лнце, пре́жде ве́к, от Де́вы напосле́док возсия́: и еди́нственнаго треми́ ли́цы, недомы́слимаго Бо́га пропове́да.

Седа́лен, гла́с 7:

Подо́бен: Огня́ светле́йши:

Тро́ице Единосу́щная, Еди́нице все́х Триипоста́сная, поми́луй, я́же создала́ еси́, Безсме́ртная: попаля́ющи зло́бы прегреша́ющих, и просвеща́ющи сердца́ пою́щих благоутро́бие Твое́, Бо́же на́ш, сла́ва Тебе́.

Сла́ва, и ны́не, Богоро́дичен: Огня́ светле́йши, све́та де́йственнейши ми́лость благода́ти Твоея́, Влады́чице, попаля́ющи грехи́ челове́ков, и ороша́ющи мы́сли хва́лящих вели́чия Твоя́, Богоро́дице Пренепоро́чная.

Пе́снь 7

Ирмо́с: В пе́щь о́гненную вве́ржени преподо́бнии о́троцы, о́гнь в ро́су преложи́ша, воспева́нием си́це вопию́ще: благослове́н еси́, Го́споди, Бо́же оте́ц на́ших.

Светолу́чными блиста́нии при́сно сия́я, трисве́те Бо́же, Еди́нице непристу́пная и пресу́щная спаси́, и́же в Тя́, Влады́ко, ве́рующыя благоче́стно, и покланя́ющыяся Тебе́.

Рече́нием Боже́ственных проро́к повину́ющеся, еди́наго тя́ то́чию Бо́га все́х сла́вим в трие́х начерта́ниих, си́це вопию́ще: благослове́н еси́, Го́споди, Бо́же оте́ц на́ших.

Пе́рстными устна́ми мы́ с невеще́ственными чи́нми, пе́сньми Тро́ице Свята́я, Тя́ пое́м во еди́нстве существа́, вопию́ще: благослове́н еси́, Го́споди, Бо́же Оте́ц на́ших.

Богоро́дичен: Да и́же созда́вый Ада́ма, возсози́ждет па́ки, Всечи́стая, из Тебе́ я́ве вочелове́чися, челове́ки обожи́в си́це вопию́щыя: благослове́н, Пречи́стая, пло́д Твоего́ чре́ва.

Пе́снь 8

Ирмо́с: Неопа́льная огню́ в Сина́и прича́щшаяся купина́, Бо́га яви́ медленоязы́чному и гугни́вому Моисе́ови, и о́троки ре́вность Бо́жия три́ непребори́мыя во огни́ певцы́ показа́: вся́ дела́ Госпо́дня Го́спода по́йте, и превозноси́те во вся́ ве́ки.

Со́лнца луча́ми трисия́ннаго озари́тися светоде́тельными сподо́би, сердца́м певце́в Твои́х: и ны́не зре́ти добро́ту Твою́ Тро́ице, Еди́нице, я́ко мо́щно да́руй всегда́, все́м ве́рою подо́бною, Твое́ вели́чие песносло́вящым во вся́ ве́ки.

Держи́ши вся́ческая, тро́ичное и еди́нственное Господонача́лие безнача́льное, и управля́еши не́бо и зе́млю. Те́мже мя́ любо́вию Твое́ю привлачи́ма при́сно, сохрани́ пе́ти Тебе́: вся́ дела́ Госпо́дня Го́спода по́йте, и превозноси́те во вся́ ве́ки.

Хра́м мя́ Твоея́ трисве́тныя сотвори́ зари́, Благоде́телю Человеколю́бче: и прича́стия и приобще́ния непристу́пна враго́м неви́димым, и плотски́м страсте́м, Влады́ко, покажи́, единонача́льный Бо́же мо́й и Го́споди сла́вы, песносло́вити Тя́ во вся́ ве́ки.

Богоро́дичен: Све́т Богонача́льный от чре́ва Твоего́ возсия́вый, Богома́ти Пречи́стая, ве́сь ми́р трисо́лнечным све́том озари́, и зе́млю я́коже друго́е не́бо показа́, пою́щу: вся́ дела́ Госпо́дня Го́спода по́йте, и превозноси́те во вся́ ве́ки.

Пе́снь 9

Ирмо́с: Ма́ти Бо́жия и Де́ва, ро́ждшая и де́вствующая па́ки, не естества́ де́ло, но Бо́жия снизхожде́ния: те́м я́ко Еди́ну Бо́жиих чуде́с сподо́бльшуюся, Тя́ при́сно велича́ем.

Высокосло́вити и пе́ти Тя́ досто́йно, Его́же в вы́шних непреста́нно Серафи́ми воспева́ют, не возмога́ем бре́ннии: оба́че я́ко Влады́ку все́х дерза́юще, и человеколю́бнейшаго Бо́га велича́ем.

Теле́сныя боле́зни изба́ви, и душе́внаго пристра́стия певцы́ Твоя́, еди́нственная Тро́ице неразде́льная, и сохрани́тися неврежде́нным от все́х жите́йских искуше́ний сподо́би.

Равноси́льная, Богонача́льная, Трисве́тная, Всеси́льная Держа́во, неизме́нная Добро́то су́щественныя Бла́гости, да́ждь прегреше́ний разреше́ние Твои́м рабо́м, и искуше́ний, и страсте́й изба́ви.

Богоро́дичен: Ум и ду́шу, и плотско́е смеше́ние прие́м, Богоро́дице, от Твои́х ложе́сн пречи́стых, Бо́г Сло́во пои́стинне челове́к яви́ся: и Боже́ственнаго существа́ о́бщника челове́ка я́ве показа́л е́сть.

Посе́м, припе́вы Григо́риа Синаи́та: Досто́йно е́сть: И про́чее полу́нощницы, пи́сано в конце́ кни́ги сея́.

На у́трени по шестопса́лмии:

Бо́г Госпо́дь, и яви́ся на́м: на гла́с 7. И глаго́лем тропа́рь воскре́сен: Разруши́л еси́ Кресто́м Твои́м сме́рть: Два́жды. Сла́ва, и ны́не, Богоро́дичен: Я́ко на́шего воскресе́ния сокро́вище:

Та́же, обы́чное стихосло́вие псалти́ра.

По 1-м стихосло́вии седа́льны воскре́сны, гла́с 7:

Жи́знь во гро́бе возлежа́ше, и печа́ть на ка́мени надлежа́ше, я́ко Царя́ спя́ща во́ини стрежа́ху Христа́: и а́нгели сла́вляху я́ко Бо́га безсме́ртна, жены́ же взыва́ху: воскре́се Госпо́дь, подая́ ми́рови ве́лию ми́лость.

Сти́х: Воскресни́, Го́споди Бо́же мо́й, да вознесе́тся рука́ Твоя́, не забу́ди убо́гих Твои́х до конца́.

Тридне́вным погребе́нием Твои́м плени́вый сме́рть, и истле́вша челове́ка живоно́сным воста́нием Твои́м воскреси́вый, Христе́ Бо́же, я́ко Человеколю́бец, сла́ва Тебе́.

Сла́ва, и ны́не, Богоро́дичен: Распе́ншагося на́с ра́ди, и воскре́сшаго Христа́ Бо́га на́шего, и низложи́вшаго сме́рти держа́ву, непреста́нно моли́, Богоро́дице Де́во: да спасе́т ду́шы на́шя.

По 2-м стихосло́вии, седа́льны воскре́сны, гла́с 7:

Запеча́тану гро́бу, живо́т от гро́ба возсия́л еси́, Христе́ Бо́же: и две́рем заключе́нным, ученико́м предста́л еси́ все́х Воскресе́ние, Ду́х Пра́вый те́ми обновля́я на́м, по вели́цей Твое́й ми́лости.

Сти́х: Испове́мся Тебе́, Го́споди, все́м се́рдцем мои́м, пове́м вся́ чудеса́ Твоя́.

На гро́б теча́ху жены́, со слеза́ми Ми́ра Нося́щя: и во́ином стрегу́щым Тя́ все́х Царя́, глаго́лаху к себе́: кто́ отвали́т на́м ка́мень? Воскре́се вели́ка Сове́та А́нгел, попра́вый сме́рть: всеси́льне Го́споди, сла́ва Тебе́.

Сла́ва, и ны́не, Богоро́дичен: Ра́дуйся, благода́тная Богоро́дице Де́во, приста́нище и предста́тельство ро́да челове́ческаго, из Тебе́ бо воплоти́ся Изба́витель ми́ра: еди́на бо еси́ Ма́ти и Де́ва, при́сно благослове́на и препросла́влена. Моли́ Христа́ Бо́га ми́р дарова́ти все́й вселе́нней.

Ипакои́, гла́с 7:

И́же на́ш зра́к восприе́мый, и претерпе́вый Кре́ст пло́тски, спаси́ мя воскресе́нием Твои́м, Христе́ Бо́же, я́ко Человеколю́бец.

Степе́нна, гла́с 7. Антифо́н 1, и́хже стихи́ повторя́юще пое́м:

Пле́н Сио́нь от ле́сти обрати́в, и мене́, Спа́се, оживи́, изъима́я рабо́тныя стра́сти.

В ю́г се́яй ско́рби по́стныя со сле́зами, се́й ра́достныя по́жнет рукоя́ти присноживопита́ния.

Сла́ва: Святы́м Ду́хом исто́чник Боже́ственных сокро́вищ, от Него́же прему́дрость, ра́зум, стра́х: Тому́ хвала́ и сла́ва, че́сть и держа́ва.

И ны́не, то́йже.

Антифо́н 2:

А́ще не Госпо́дь сози́ждет до́м душе́вный, всу́е тружда́емся: ра́зве бо того́ ни дея́ние, ни сло́во соверша́ется.

Плода́ чре́вна, святи́и духодви́жно прозяба́ют оте́ческая преда́ния, сыноположе́ния.

Сла́ва: Святы́м Ду́хом, вся́ческая е́же бы́ти и́мут: пре́жде бо все́х Бо́г, все́х Госпо́дьство, Све́т непристу́пен, Живо́т все́х.

И ны́не, то́йже.

Антифо́н 3:

Боя́щиися Го́спода, пути́ живота́ обре́тше, ны́не и при́сно ублажа́ются сла́вою нетле́нною.

О́крест трапе́зы Твоея́, я́ко сте́блие ви́дя исча́дия Твоя́, ра́дуйся и весели́ся, приводя́ сия́ Христо́ви Пастыренача́льнику (пастыренача́льниче).

Сла́ва: Святы́м Ду́хом глубина́ дарова́ний, бога́тство сла́вы, суде́б глубина́ ве́лия: единосла́вен Отцу́, и Сы́ну, служи́мь бо.

И ны́не, то́йже.

Проки́мен, гла́с 7: Воскресни́, Го́споди Бо́же мо́й, да вознесе́тся рука́ Твоя́, не забу́ди убо́гих Твои́х до конца́. Сти́х: Испове́мся Тебе́, Го́споди, все́м се́рдцем мои́м. Та́же, Вся́кое дыха́ние: Сти́х: Хвали́те Бо́га во святы́х его́. Ева́нгелие воскре́сно: Воскресе́ние Христо́во: псало́м 50: и про́чая поря́ду.

Кано́н воскре́сен, гла́с 7:

Пе́снь 1

Ирмо́с: Ма́нием Твои́м на земны́й о́браз преложи́ся, пре́жде удоборазлива́емое водно́е естество́, Го́споди: те́мже немо́кренно пешеше́ствовав Изра́иль, пое́т Тебе́ пе́снь побе́дную.

Припе́в: Сла́ва, Го́споди, свято́му воскресе́нию Твоему́.

Осуди́ся сме́ртное мучи́тельство Дре́вом, непра́ведною сме́ртию осужде́ну Ти́, Го́споди: отню́дуже кня́зь тьмы́ Тебе́ не одоле́в, пра́ведно изгна́н бы́сть.

А́д Тебе́ прибли́жися, и зубы́ не возмо́г сте́рти те́ло Твое́, челюстьми́ сокруши́ся. Отню́дуже Спа́се, боле́зни разру́ш сме́ртныя, воскре́сл еси́ тридне́вен.

Богоро́дичен: Разреши́шася боле́зни прама́тере Евы: боле́зни бо избежа́вше, неискусому́жно родила́ еси́. Отню́дуже я́ве Богоро́дицу, Пречи́стая, ве́дуще Тя́, вси́ сла́вим.

И́н кано́н кре́стовоскре́сен, гла́с 7:

Пе́снь 1

Ирмо́с: По́нтом покры́ фарао́на с колесни́цами:

Два́ исто́чника на́м на Кресте́ источи́ Спа́с Живоно́сная от Своего́ прободе́ннаго ребра́. Пои́м Ему́: я́ко просла́вися.

Во гро́б всели́вся, и воскре́с тридне́вен, нетле́ние подаде́, ча́яние Христо́с сме́ртным. Пои́м Ему́: я́ко просла́вися.

Богоро́дичен: Еди́на Де́ва и по рождестве́ показа́лася еси́: Зижди́теля бо ми́рови воплоще́нна родила́ еси́: те́мже ра́дуйся, Тебе́ вси́ зове́м.

И́н кано́н Пресвяте́й Богоро́дице, [его́же краегране́сие по алфави́ту.] Гла́с 7.

Ирмо́с: Ма́нием Твои́м на земны́й:

Бе́здну ро́ждшая благоутро́бия, Де́во, ду́шу мою́ озари́ светоно́сным Твои́м сия́нием, я́ко да досто́йно воспою́ Твои́х чуде́с бе́здну.

Стрело́ю грехо́вною уя́звлены на́с Сло́во ви́дев, я́ко Благоде́тель уще́дри: отню́дуже несказа́нно соедини́ся, Всечи́стая, пло́тию, и́же из Тебе́ (пло́ти я́же из тебе́) Пребоже́ственный.

Бы́сть сме́ртию я́то естество́, тле́нное же и ме́ртвенное челове́ческое, Влады́чице: Ты́ же жи́знь заче́нши, сие́ от истле́ния к животу́ возвела́ еси́.

Катава́сиа: Отве́рзу уста́ моя́:

Пе́снь 3

Ирмо́с: В нача́ле небеса́ всеси́льным Сло́вом Твои́м утвержде́й, Го́споди Спа́се, и вседе́тельным и Бо́жиим Ду́хом всю́ си́лу и́х, на недви́жимем мя́ ка́мени испове́дания Твоего́ утверди́.

Ты́ возше́д на Дре́во, о на́с боле́знуеши во́лею, благоутро́бне Спа́се, и терпи́ши я́зву, примире́ния хода́тайственну, и спасе́ния ве́рным: е́юже Твоему́, Ми́лостиве, вси́ примири́хомся Роди́телю.

Ты́ мя очи́стив от я́звы, душе́ю уя́звленнаго зми́евым угрызе́нием, Христе́, и показа́л еси́ све́т, во тьме́ дре́вле мне́ слежа́щу и во тле́нии: кресто́м бо во а́д соше́д, мене́ совоскреси́л еси́.

Богоро́дичен: Неискусому́жныя Твоея́ Ма́тере мольба́ми ми́р ми́рови пода́ждь, Спа́се, и несказа́нныя Твоея́ сла́вы славосло́вящыя Тя́ сподо́би.

И́н Ирмо́с: Небеса́ утверди́вый сло́вом:

И́же на Кресте́ стра́сти претерпе́вый, и разбо́йнику ра́й отве́рзый, я́ко благоде́тель и Бо́г, утверди́ мо́й у́м в во́лю Твою́, еди́не Человеколю́бче.

Воскресы́й тридне́вен из гро́ба, и живо́т ми́рови возсия́вый, я́ко Жизнода́вец и Бо́г, утверди́ мо́й у́м в во́лю Твою́, еди́не Человеколю́бче.

Богоро́дичен: Я́ко Бо́га безсе́менно заче́нши, и от кля́твы Е́ву изба́вльши, Де́во Ма́ти Мариа́м, моли́ от Тебе́ вопло́щшагося Бо́га, спасти́ ста́до Твое́.

И́н Ирмо́с: В нача́ле небеса́:

Зми́й поползы́й из Еде́ма, мене́ обоже́ния жела́нием прельсти́в, ве́рже в зе́млю: но И́же ми́лостив, и естество́м благоутро́бен, уще́дрив богосоде́ла, во чре́во твое́ все́лься, и подо́бен мне́ бы́в, Ма́ти Де́во.

Благослове́н пло́д Твоего́ чре́ва, Де́во Богоро́дице, все́х ра́досте, ра́дость бо всему́ ми́ру родила́ еси́, и весе́лие вои́стинну разгоня́ющее печа́ль грехо́вную, Богоневе́сто.

Жи́знь ве́чную, и све́т, Богороди́тельнице Де́во, и ми́р родила́ еси́ на́м, дре́вних челове́к бра́нь я́же ко Отцу́ и Бо́гу, укротева́ющий, ве́рою и испове́данием благода́ти.

Пе́снь 4

Ирмо́с: О́тча не́дра не оста́вль, и соше́д на зе́млю, Христе́ Бо́же, та́йну услы́шах смотре́ния Твоего́, и просла́вих Тя́, Еди́не Человеколю́бче.

Своя́ плещи́ да́в, и́же от Де́вы вопло́щься, на ра́ны, рабу́ прегреши́вшу, бие́н быва́ет Влады́ка непови́нен, разреша́я моя́ согреше́ния.

Предстоя́в суди́щу суди́й законопресту́пных, я́ко осуди́мый пови́нен быва́ет (истязу́ется), и зауша́ется бре́нною руко́ю, созда́вый челове́ка я́ко Бо́г, и судя́й пра́ведно земли́.

Богоро́дичен: Я́ко вои́стинну Ма́ти Бо́жия, Творца́ Твоего́ и Сы́на моли́, к спаси́тельному напра́вити мя́ приста́нищу, Всенепоро́чная, сла́внаго Его́ хоте́ния.

И́н Ирмо́с: Смотря́яй проро́к:

Не ве́дый греха́, и его́ ра́ди бы́в, Го́споди, е́же не бы́л еси́ вообража́ешися, прие́м чу́ждее, да спасе́ши ми́р, и убие́ши прельсти́в мучи́теля.

На кресте́ воздви́жен бы́л еси́, и пра́отца Ада́ма разреши́л еси́ гре́х [его́же ра́ди твою́ услы́шах си́лу:] я́ко вся́ спасти́ пома́занныя Твоя́ прише́л еси́.

Богоро́дичен: Ты́ рожде́йся от Де́вы, умира́еши, оживля́еши же Ада́ма мы́слию заблу́ждшаго: и́бо убоя́ся сме́рть кре́пости Твоея́, я́ко вся́ спасти́ растле́вшыяся прише́л еси́.

И́н Ирмо́с: О́тча не́дра не оста́вль:

Избра́нная вся́ и до́брая, я́вльшися Бо́гу пре́жде созда́ния све́тлостию, Всепе́тая, светоли́тием Твои́м (светоли́тия Твоего́) светоли́тия Твоего́ пою́щыя Тя́ просвети́.

Бо́га челове́ком родила́ еси́, Чи́стая, воплоще́нна от чи́стых крове́й Твои́х, избавля́юща согреше́ний мно́гих, любо́вию сла́вящыя и почита́ющыя Тя́, Ма́ти Де́во.

Священноде́йствует естество́ слове́сное, возсия́вшему из Тебе́, Всепе́тая, та́инству неизрече́нному рождества́ Твоего́ научи́вшееся ны́не, Преблаже́нная.

Пе́снь 5

Ирмо́с: Но́щь не светла́ неве́рным, Христе́, ве́рным же просвеще́ние в сла́дости слове́с Твои́х: Сего́ ра́ди к Тебе́ у́тренюю, и воспева́ю Твое́ Божество́.

За Твоя́ рабы́ продае́шися, Христе́, и по лани́те ударе́ние терпи́ши, свобо́де хода́тайственно пою́щым: к Тебе́ у́тренюю, и воспева́ю Твое́ Божество́.

Боже́ственною Твое́ю си́лою, Христе́, не́мощию плотско́ю кре́пкаго низложи́л еси́, и победи́теля мя́ сме́рти, Спа́се, воскресе́нием показа́л еси́.

Богоро́дичен: Бо́га родила́ еси́, Ма́ти Чи́стая, воплоще́ннаго из Тебе́ Боголе́пно, Всепе́тая: поне́же не позна́ла еси́ му́жеска по́ла, но от Свята́го ражда́еши Ду́ха.

И́н Ирмо́с: Го́споди Бо́же мо́й, от но́щи:

Егда́ со беззако́нными вмени́вся, возне́слся еси́ на ло́бнем, свети́ла сокрыва́хуся, и земля́ колеба́шеся, и церко́вная све́тлость раздра́ся, евре́йское явля́ющи отпаде́ние.

Тебе́ разруши́вшаго мучи́телеву всю́ си́лу кре́постию непостижи́маго Твоего́ Божества́, и ме́ртвыя Твои́м воскресе́нием воздви́гшаго пе́сньми сла́вим.

Богоро́дичен: Ма́ти Царя́ и Бо́га, Всепе́тая Богоро́дице, ве́рою и любо́вию Тя́ пе́сньми восхваля́ющым при́сно, очище́ние прегреше́ний Твои́ми мольба́ми низпосли́.

И́н Ирмо́с: Но́щь не светла́ неве́рным:

Ле́ствицу узре́в Иа́ков, к высоте́ утвержде́ну, о́бразу научи́ся, неискусобра́чная Тебе́: Тобо́ю бо Бо́г челове́ком приобщи́ся, Всечи́стая Влады́чице.

Избавле́ние ве́чное Тобо́ю, Де́во, ны́не обре́тше усе́рдно зове́м Ти́: е́же ра́дуйся, Богоневе́стная: и Твои́м све́том возра́довавшеся, Всепе́тая, пе́сньми Тя́ пое́м.

Еди́ну Тя́ Жени́х посреде́ те́рния кри́н, Де́во, обре́т, чистоты́ блиста́нием светя́щуся, и све́том де́вства, Всенепоро́чная, Неве́сту восприя́т.

Пе́снь 6

Ирмо́с: Пла́вающаго в молве́ жите́йских попече́ний, с корабле́м потопля́ема грехи́, и душетле́нному зве́рю примета́ема, я́ко Ио́на, Христе́, вопию́ Ти: из смертоно́сныя глубины́ возведи́ мя.

Воспомина́ху Тя́ заключе́нныя во а́де ду́шы, и оста́вльшыяся пра́ведных, и от Тебе́ спасе́ния моля́хуся: е́же кресто́м, Христе́, по́дал еси́ преиспо́дним, прише́д я́ко Благоутро́бен.

Ко одушевле́нному Твоему́ и нерукотворе́нному хра́му, разруше́ну бы́вшу страда́ньми, воззре́ти па́ки ли́к апо́стольский отча́яся: но па́че наде́жды покло́нься, воскре́сша повсю́ду пропове́да.

Богоро́дичен: Неизрече́ннаго рождества́ Твоего́ всенепоро́чнаго о́браз, Де́во Богоневе́стная, и́же на́с ра́ди, кто́ от челове́к сказа́ти возмо́жет? Я́ко Бо́г неопи́санне, Сло́во соедини́вся Тебе́, пло́ть из Тебе́ бы́сть.

И́н Ирмо́с: Ио́на из чре́ва:

На кресте́ возне́сся, Спа́се, во́лею, вра́жию плени́л еси́ держа́ву, на се́м пригвозди́в грехо́вное, Бла́же, рукописа́ние.

Из ме́ртвых воскре́с, Спа́се, вла́стию, совоздви́гл еси́ челове́ческий ро́д, живо́т и нетле́ние дарова́вый на́м, я́ко Человеколю́бец.

Богоро́дичен: Его́же родила́ еси́, Богоро́дице, несказа́нно Бо́га на́шего, моля́щи не преста́й, изба́витися от бе́д пою́щым Тя́, Чи́стая Присноде́во.

И́н Ирмо́с: Пла́вающаго в молве́:

Зако́ннии Тя́ о́бразы, и проро́ческая прорече́ния я́ве предвозвеща́ху, хотя́щую роди́ти благоде́теля, Чи́стая, всея́ тва́ри, многоча́стне и многообра́зне благоде́йствовавшаго ве́рно воспева́ющих Тя́.

Устра́ншагося дре́вле наве́том человекоуби́йцы, Ада́ма первозда́ннаго ра́йския Боже́ственныя сла́дости, Неискусобра́чная па́ки возвела́ еси́, ро́ждши и́же от преступле́ния на́с изба́вившаго.

И́же хоте́нием Боже́ственным, соде́тельною же си́лою все́ составле́й от не су́щих, из чре́ва Твоего́, Чи́стая, произы́де, и су́щыя во тьме́ сме́ртней, богонача́льнейшими мо́лниями осия́.

Конда́к, гла́с 7: Не ктому́ держа́ва сме́ртная возмо́жет держа́ти челове́ки: Христо́с бо сни́де сокруша́я и разоря́я си́лы ея́. Связу́емь быва́ет а́д, проро́цы согла́сно ра́дуются: предста́, глаго́люще, Спа́с су́щым в ве́ре, изыди́те ве́рнии в воскресе́ние.

И́кос: Вострепета́ша до́ле преиспо́дняя дне́сь, а́д и сме́рть Еди́наго от Тро́ицы: земля́ поколеба́ся, вра́тницы же а́довы ви́девше Тя́ ужасо́шася: вся́ же тва́рь со проро́ки ра́дующися пое́т Тебе́ побе́дную пе́снь, изба́вителю Бо́гу на́шему, разруши́вшему ны́не сме́ртную си́лу. Да воскли́кнем и возопии́м ко Ада́му, и к су́щым из Ада́ма: дре́во сего́ па́ки введе́. Изыди́те ве́рнии в воскресе́ние.

Пе́снь 7

Ирмо́с: Пе́щь о́троцы огнепа́льну дре́вле росоточа́щу показа́ша, Еди́наго Бо́га воспева́юще, и глаго́люще: превозноси́мый отце́в Бо́г, и препросла́влен.

Дре́вом умерщвля́ется Ада́м, во́лею преслуша́ние соде́лав: послуша́нием же Христо́вым па́ки обновля́емь е́сть. Мене́ бо ра́ди распина́ется Сы́н Бо́жий, препросла́вленный.

Тебе́ воскре́сшаго Христе́, из гро́ба, тва́рь вся́ воспе́: Ты́ бо жи́знь су́щым во а́де процве́л еси́, ме́ртвым воскресе́ние, и́же во тьме́, Све́т препросла́вленный.

Богоро́дичен: Ра́дуйся, Дщи́ Ада́ма тле́ннаго. Ра́дуйся, еди́на Богоневе́сто. Ра́дуйся, е́юже тля́ изгна́на бы́сть, я́же Бо́га ро́ждши: Его́же моли́, Чи́стая, спасти́ся все́м на́м.

И́н Ирмо́с: В пе́щь о́гненную вве́ржени:

И́же на дре́ве кре́стнем грехо́вное жа́ло притупи́в, и Ада́мова преступле́ния рукописа́ние разруши́в копие́м ребра́ Твоего́, благослове́н еси́, Го́споди Бо́же оте́ц на́ших.

И́же в ребро́ прободе́н бы́в, и кропле́ньми кро́ве Боже́ственныя зе́млю очи́стив, кровьми́ идолобе́сия оскверне́нную, благослове́н еси́, Го́споди Бо́же оте́ц на́ших.

Богоро́дичен: Е́же пре́жде со́лнца просвеще́ния, возсия́вши ми́рови Богороди́тельнице Христа́, от тьмы́ изба́вльшаго, и просвеща́юща вся́ богове́дением: благослове́н еси́ зову́щыя, Бо́же оте́ц на́ших.

И́н Ирмо́с: Пе́щь о́троцы:

Преиспещре́ну, позлаще́ну у́тварь Тя́ иму́щу возлюби́ Созда́тель Тво́й, Де́во, и Госпо́дь: превозноси́мый отце́в Бо́г и препросла́влен.

Очища́ется Отрокови́це, у́гль дре́вле Иса́иа прие́м: знамена́тельне Твое́ рождество́ ви́дев, превозноси́маго отце́в Бо́га, и препросла́влена.

О́бразы знамена́тельная дре́вле Боже́ственнаго Твоего́ рождества́, Боже́ственнии проро́цы зря́ще, ра́достно воспева́юще взыва́ху: превозноси́мый отце́в Бо́г, и препросла́влен.

Пе́снь 8

Ирмо́с: Неопа́льная огню́ в Сина́и прича́щшаяся Купина́, Бо́га яви́ медленоязы́чному и гугни́вому Моисе́ови, и о́троки ре́вность Бо́жия три́ непребори́мыя во огни́ певцы́ показа́: вся́ дела́ Госпо́дня Го́спода по́йте, и превозноси́те во вся́ ве́ки.

Пречи́стый А́гнец слове́сный за ми́р закла́н бы́в, преста́ви я́же по зако́ну приноси́мая, очи́стив сего́ кроме́ прегреше́ний я́ко Бо́г, при́сно зову́ща: вся́ дела́ Госпо́дня Го́спода по́йте, и превозноси́те во вся́ ве́ки.

Нетле́нна не су́щи пре́жде стра́сти, восприя́тая от Созда́теля пло́ть на́ша, по стра́сти и воскресе́нии неприкоснове́нна тле́нию устро́ися, и сме́ртныя обновля́ет, зову́щыя: вся́ дела́ Госпо́дня Го́спода по́йте, и превозноси́те во вся́ ве́ки.

Богоро́дичен: Твое́ чисто́тное и всенепоро́чное, Де́во, скве́рное и ме́рзское вселе́нныя очи́сти, и была́ еси́ на́шего примире́ния к Бо́гу вина́, Пречи́стая: те́мже Тя́, Де́во, вся́ дела́ благослови́м, и превозно́сим во вся́ ве́ки.

И́н Ирмо́с: Еди́наго безнача́льнаго Царя́:

Претерпе́вшаго стра́сти во́лею, и на кресте́ пригвожде́на хоте́нием, и разру́шшаго си́лы а́довы, по́йте свяще́нницы, лю́дие превозноси́те во вся́ ве́ки.

Упраздни́вшаго сме́рти держа́ву, и от гро́ба воскре́сшаго со сла́вою, и спа́сшаго челове́ческий ро́д, по́йте свяще́нницы, лю́дие превозноси́те во вся́ ве́ки.

Богоро́дичен: Еди́наго благоутро́бнаго, Преве́чнаго Сло́ва, напосле́док от Де́вы рожде́на, и разре́шшаго дре́внюю кля́тву, по́йте свяще́нницы, лю́дие превозноси́те во вся́ ве́ки.

И́н Ирмо́с: Неопа́льная огню́ в Сина́и:

Све́том рождества́ Твоего́, странноле́пно вселе́нную просвети́ла еси́, Богороди́тельнице, су́ща бо вои́стинну Бо́га на объя́тиях но́сиши Твои́х, просвеща́юща ве́рныя при́сно зову́щыя: вся́ дела́ Госпо́дня Го́спода по́йте, и превозноси́те во вся́ ве́ки.

Пое́м, Чи́стая, благоче́стно Твое́ чре́во, Бо́га вмести́вшее несказа́нно воплоща́ема, да́вшаго все́м ве́рным богоразу́мия просвеще́ние, при́сно зову́щым: вся́ дела́ Госпо́дня Го́спода по́йте, и превозноси́те во вся́ ве́ки.

Све́та Твоего́ блиста́ньми, Тебе́ пою́щыя светови́дны соде́лала еси́, Светороди́тельнице Богоро́дице Чи́стая: све́та бо яви́лася еси́ Селе́ние, уясня́ющи све́том зову́щыя: вся́ дела́ Госпо́дня Го́спода по́йте, и превозноси́те во вся́ ве́ки.

Та́же, пое́м пе́снь Богоро́дицы: Вели́чит душа́ моя́ Го́спода: с припе́вом: Честне́йшую Херуви́м:

Пе́снь 9

Ирмо́с: Нетле́ния искуше́нием ро́ждшая, и всехитрецу́ Сло́ву пло́ть взаимода́вшая, Ма́ти неискусому́жная Де́во Богоро́дице: Прия́телище Нестерпи́маго, Село́ Невмести́маго Зижди́теля Твоего́, Тя́ велича́ем.

И́же Божеству́ стра́сть прилага́ющии, заусти́теся вси́ чуждему́дреннии: Го́спода бо сла́вы пло́тию распя́та, не распя́та же естество́м Боже́ственным, я́ко во двою́ естеству́ Еди́наго велича́ем.

И́же телесе́м воста́нию неве́рующии, ко Христо́ву ше́дше гро́бу, научи́теся: я́ко умерщвле́на бы́сть, и воскре́се па́ки пло́ть Жизнода́вца, во увере́ние после́дняго воскресе́ния, на не́же упова́ем.

Тро́ичен: Не Боже́ств Тро́ицу, но Ипоста́сей, ниже́ еди́ницу Ли́ц, но Божества́ чту́ще, ссеца́ем же Сию́ деля́щих: слива́ем же па́ки, слия́ние дерза́ющих на Сию́, Ю́же велича́ем.

И́н Ирмо́с: Ма́ти Бо́жия и Де́ва:

Све́т от Све́та, О́тчее сия́ние сла́вы безле́тно осия́вый, я́коже во тьме́ челове́ческому житию́ Христо́с возсия́, и гоня́щую прогна́ тьму́: Его́же непреста́нно ве́рнии велича́ем.

Стра́сти плотски́я, и кре́пость Божества́, во Христе́ ви́дяще, му́дрствующии еди́но сло́жное естество́, да посра́мятся: то́й бо я́ко челове́к у́бо умира́ет, я́коже всего́ Соде́тель востае́т.

Ми́ро ме́ртвым, живо́му же пе́ние: сле́зы умира́ющым, животу́ же все́х пе́снь жены́ принеси́те, и́же воста́ния пропове́дник вопия́ше, благовеству́я Христо́во воскресе́ние.

Богоро́дичен: Бо́га ра́зве Тебе́ ино́го не зна́ю, Це́рковь вопие́т Ти́: от неве́рных мя́ язы́к неве́сту Свою́ избра́вый, да́ждь у́бо, Сло́ве, ве́рным спасе́ние, Ро́ждшия Тя́ моли́твами, я́ко благоутро́бен.

И́н Ирмо́с то́йже .

Ра́дости на́м ве́чныя хода́таица и весе́лия яви́лася еси́, Присноде́во Отрокови́це, Изба́вителя ро́ждши, и́стиною и Ду́хом Боже́ственным Того́ чту́щих, я́ко Бо́га избавля́ющаго.

Поя́ Дави́д, Тво́й пра́отец, Пречи́стая, Тя́ ковче́г имену́ет Святы́ни Боже́ственныя, преесте́ственне Бо́га вмести́вшую, во Оте́ческих Седя́щаго не́дрех, Его́же непреста́нно ве́рнии велича́ем.

Я́ко вои́стинну превы́шши еси́ всея́ тва́ри, Отрокови́це: Зижди́теля во все́х теле́сне на́м родила́ еси́. Те́мже я́ко Ма́ти еди́наго Влады́ки, но́сиши проти́ву все́х нача́льне побежде́ние.

По катава́сии, ектениа́ ма́лая. Та́же, Свя́т Госпо́дь Бо́г на́ш. Посе́м ексапостила́рий у́тренний.

На хвали́тех стихи́ры воскре́сны. Гла́с 7:

Сти́х: Сотвори́ти в ни́х су́д напи́сан: сла́ва сия́ бу́дет все́м преподо́бным Его́.

Воскре́се Христо́с из ме́ртвых, разру́ш сме́ртныя у́зы: благовести́ земле́, ра́дость ве́лию, по́йте Небеса́ Бо́жию сла́ву.

Сти́х: Хвали́те Бо́га во святы́х Его́, хвали́те Его́ во утверже́нии си́лы Его́.

Воскресе́ние Христо́во ви́девше, поклони́мся свято́му Го́споду Иису́су: еди́ному безгре́шному.

Сти́х: Хвали́те Его́ на си́лах Его́, хвали́те Его́ по мно́жеству вели́чествия Его́.

Христо́ву воскресе́нию кла́няющеся не преста́ем: то́й бо спа́сл е́сть на́с от беззако́ний на́ших, Святы́й Госпо́дь Иису́с, явле́й воскресе́ние.

Сти́х: Хвали́те Его́ во гла́се тру́бнем, хвали́те Его́ во псалти́ри и гу́слех.

Что́ возда́мы Го́сподеви о все́х, я́же воздаде́ на́м? На́с ра́ди Бо́г в челове́цех, за истле́вшее естество́ Сло́во пло́ть бы́сть, и всели́ся в ны́, к неблагода́рным, Благоде́тель: к пле́нником, Свободи́тель: ко и́же во тьме́ седя́щым, Со́лнце Пра́вды: на Кресте́, безстра́стный: во а́де, све́т: в сме́рти, живо́т: воскресе́ние, па́дших ра́ди. К Нему́же возопии́м: Бо́же на́ш, сла́ва Тебе́.

И́ны стихи́ры Анато́лиевы, гла́с то́йже.

Сти́х: Хвали́те Его́ в тимпа́не и ли́це, хвали́те Его́ во стру́нах и орга́не.

Врата́ а́дова сокруши́л еси́, Го́споди, и сме́ртную держа́ву упраздни́л еси́ кре́пкою си́лою Твое́ю, и совоздви́гл еси́ ме́ртвыя, и́же от ве́ка во тьме́ спя́щыя, Боже́ственным и сла́вным воскресе́нием Твои́м, я́ко Ца́рь все́х и Бо́г всеси́лен.

Сти́х: Хвали́те Его́ в кимва́лех доброгла́сных, хвали́те Его́ в кимва́лех восклица́ния: вся́кое дыха́ние да хва́лит Го́спода.

Прииди́те возра́дуемся Го́сподеви, и возвесели́мся о воскресе́нии Его́, я́ко совоздви́же ме́ртвыя от а́довых нереши́мых у́з: и дарова́ ми́рови я́ко Бо́г жи́знь ве́чную, и ве́лию ми́лость.

Сти́х: Воскресни́, Го́споди Бо́же мо́й, да вознесе́тся рука́ Твоя́, не забу́ди убо́гих Твои́х до конца́.

Блиста́яйся А́нгел, на ка́мени седя́ше живоприе́мнаго гро́ба, и жена́м мироно́сицам благовествова́ше, глаго́ля: воскре́се Госпо́дь, я́коже пре́жде рече́ ва́м, возвести́те ученико́м Его́, я́ко предваря́ет вы́ в Галиле́и: ми́рови же подае́т жи́знь ве́чную, и ве́лию ми́лость.

Сти́х: Испове́мся Тебе́, Го́споди, все́м се́рдцем мои́м, пове́м вся́ чудеса́ Твоя́.

Почто́ небрего́ма сотвори́сте ка́мене краеуго́льнаго, о пребеззако́ннии Иуде́и? Се́ то́й е́сть, Его́же положи́ Бо́г в Сио́не: И́же из ка́мене источи́вый в пусты́ни во́ду, и на́м источа́яй от ре́бр свои́х безсме́ртие. Се́й е́сть ка́мень, И́же от горы́ деви́ческия отсе́кся без хоте́ния му́жеска: Сы́н Челове́чь гряды́й на о́блацех небе́сных, к Ве́тхому Де́ньми, я́коже рече́ Дании́л, и ве́чно Его́ Ца́рство.

Сла́ва, стихи́ра ева́нгельская. И ны́не, Богоро́дичен: Преблагослове́нна еси́: Славосло́вие вели́кое. Та́же тропа́рь воскре́сен:

Дне́сь Спасе́ние ми́ру бы́сть, пое́м Воскре́сшему из гро́ба, и Нача́льнику жи́зни на́шея: разруши́в бо сме́ртию сме́рть, побе́ду даде́ на́м, и ве́лию ми́лость.

И ектении́, и отпу́ст.

На литурги́и блаже́нна, гла́с 7:

Красе́н бе́ и до́бр в сне́дь, и́же мене́ умертви́вый пло́д: Христо́с е́сть Дре́во Живо́тное, от Него́же яды́й не умира́ю, но вопию́ с разбо́йником: помяни́ мя, Го́споди, во Ца́рствии Твое́м.

Сти́х: Блаже́ни чи́стии се́рдцем, я́ко ти́и Бо́га у́зрят.

На Кре́ст возне́сся, Ще́дре, Ада́мово рукописа́ние дре́вняго греха́ загла́дил еси́, и спа́сл еси́ от пре́лести ве́сь ро́д челове́ческий. Те́мже воспева́ем Тя́, Благоде́телю Го́споди.

Сти́х: Блаже́ни миротво́рцы, я́ко ти́и сы́нове Бо́жии нареку́тся.

Пригвозди́л еси́ на Кресте́, Ще́дре, грехи́ на́шя, Христе́, и Твое́ю сме́ртию сме́рть умертви́л еси́ воздви́гнувый уме́ршыя из ме́ртвых: те́мже покланя́емся Твоему́ свято́му воскресе́нию.

Сти́х: Блаже́ни изгна́ни пра́вды ра́ди, я́ко те́х е́сть Ца́рство Небе́сное.

Излия́ я́д зми́й в слу́хи Е́вины иногда́: Христо́с же на Дре́ве кре́стнем источи́л е́сть ми́рови жи́зни сла́дость. Те́мже взыва́ем: помяни́ на́с, Го́споди, во Ца́рствии Твое́м.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л, на вы́ лжу́ще Мене́ ра́ди.

Во гро́бе я́ко сме́ртен положе́н бы́л еси́, Животе́ все́х Христе́: и вереи́ а́довы сломи́л еси́: и воскре́с во сла́ве тридне́вен я́ко си́лен, все́х просвети́л еси́: сла́ва Твоему́ воста́нию.

Сти́х: Ра́дуйтеся и весели́теся, я́ко мзда́ ва́ша мно́га на небесе́х.

Госпо́дь воскре́с тридне́вен из ме́ртвых, дарова́ ми́р Сво́й ученико́м, и си́х благослови́в посла́ ре́к: вся́ приведи́те во Ца́рствие Мое́.

Сла́ва, Тро́ичен: Све́т Оте́ц, све́т Сы́н и Сло́во, све́т Ду́х Святы́й: но еди́н Све́т три́, еди́н бо Бо́г в трие́х у́бо Ли́цех, еди́нем же естестве́ и нача́ле, несеко́м и неслия́н, Сы́й преве́чный.

И ны́не, Богоро́дичен: Родила́ еси́ Сы́на и Сло́во О́тчее, пло́тию на́с ра́ди, я́коже ве́сть, Богоро́дице, Са́м. Те́мже, Де́во Ма́ти, обоже́ни бы́вше Тобо́ю, ра́дуйся, Тебе́ зове́м, христиа́ном упова́ние.

Проки́мен, гла́с 7: Госпо́дь кре́пость лю́дем Свои́м да́ст: Госпо́дь благослови́т лю́ди Своя́ ми́ром: Сти́х: Принеси́те Го́сподеви Сы́нове Бо́жии, принеси́те Го́сподеви Сы́ны о́вни. Аллилу́иа: Бла́го е́сть испове́датися Го́сподеви, и пе́ти и́мени Твоему́, Вы́шний. Сти́х: Возвеща́ти зау́тра ми́лость Твою́, и и́стину Твою́ на вся́ку но́щь.

В неде́лю ве́чера

на Го́споди, воззва́х, стихи́ры покая́нны. Гла́с 7:

Подо́бен: Дне́сь бди́т Богоро́дица:

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

Возведи́ Твои́ о́чи, о душе́ моя́! И на Бо́жие воззри́ смотре́ние и благоутро́бие, ка́ко небеса́ преклони́в на зе́млю сни́де, да вознесе́т тебе́ от окая́нства твои́х страсте́й, и поста́вит тя́ на ка́мени ве́ры. О ди́вство стра́шнаго чудесе́! Сла́ва истоща́нию Твоему́, Человеколю́бче.

Сти́х: И́мене ра́ди Твоего́, потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Ви́ждь твоя́ пребеззако́нная дела́, о душе́ моя́! И почуди́ся, ка́ко тя́ земля́ но́сит? Ка́ко не разсе́деся? Ка́ко ди́вии зве́рие не снеда́ют тебе́? Ка́ко же и Со́лнце незаходи́мое сия́ти тебе́ не преста́? Воста́ни, пока́йся, и возопи́й ко Го́споду: согреши́х Ти́: согреши́х, поми́луй мя́.

Сти́х: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Иму́ще на Тя́ упова́ние Всеси́льне, Го́споди, Тебе́ мо́лим, вся́ких бе́д, страсте́й же и мяте́жа на́м изба́витися: я́ко да жи́знь на́шу ми́рно пре́йдем, и в чистоте́ пожи́вше обря́щем в Де́нь Су́дный, благопреме́нна Тебе́ Влады́ку и Ми́лостива.

Та́же мине́и стихи́ры свято́му. А́ще ли не́сть мине́и: и́ны стихи́ры безпло́тным святы́м А́нгелом, гла́с 7:

Подо́бен: Не ктому́ возбраня́еми:

Сти́х: Я́ко у Го́спода ми́лость, и мно́гое у него́ избавле́ние: и То́й изба́вит Изра́иля от все́х беззако́ний его́.

Заря́ми просвеща́еми Тро́ицы, и́же ве́рою ва́с пою́щыя, просвети́те, Арха́нгели.

Сти́х: Хвали́те Го́спода вси́ язы́цы, похвали́те его́ вси́ лю́дие.

Прича́стием све́ти втори́и, показу́еми све́ти соверше́нни, предста́ти на́м све́ту пе́рвому моли́теся.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Кро́вом кри́л ва́ших сохраня́йте ве́рныя вся́ от духо́в лука́вствия, тьму́ разоря́юще.

Сла́ва, и ны́не, Богоро́дичен: Вси́ пе́сньми со А́нгелы Богоро́дице возопии́м, я́ко Спа́са ми́ру родила́ е́сть, по рождестве́ же па́ки пребы́сть Де́ва, и ми́р изба́ви от пре́лести рождество́м Cвои́м, и пи́щу подаде́ на́м неиждива́емую, млеко́м пита́ющая Cвободи́теля ду́ш на́ших.

Та́же, Све́те ти́хий: Проки́мен дне́: и Сподо́би, Го́споди, в ве́чер се́й:

На стихо́вне стихи́ры покая́нны, гла́с 7:

Я́ко блу́дный сы́н приидо́х а́з, Ще́дре, приими́ мя припа́дающаго, я́ко еди́наго от нае́мник Твои́х, Бо́же, и поми́луй мя́, Человеколю́бче.

Сти́х: К тебе́ возведо́х о́чи мои́ живу́щему на Небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны́.

Я́ко впады́й в разбо́йники и уя́звлен: та́ко и а́з впадо́х от мно́гих грехо́в, и уя́звлена ми́ е́сть душа́. К кому́ прибе́гну пови́нный а́з? То́кмо к Тебе́ благоутро́бному душа́м врачу́: изле́й на мя́, Бо́же, вели́кую Твою́ ми́лость.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих и уничиже́ния го́рдых.

Му́ченичен: Сла́ва Тебе́, Христе́ Бо́же, Апо́столов похвало́, и му́чеников весе́лие: и́хже про́поведь Тро́ица единосу́щная.

Сла́ва, и ны́не, Богоро́дичен: Е́же ра́дуйся, Тебе́ зове́м со А́нгелом, Богоневе́сто, черто́г и две́рь, и престо́л о́гненный нарица́юще Тебе́, и несеко́мую го́ру, и купину́ неопали́мую.

Та́же, Ны́не отпуща́еши: Трисвято́е. По О́тче на́ш: тропари́, ектениа́, и отпу́ст.

В неде́лю на повече́рии

кано́н моле́бный Пресвяте́й Богоро́дице. Гла́с 7:

Пе́снь 1

Ирмо́с: Ма́нием Твои́м на земны́й о́браз преложи́ся, пре́жде удоборазлива́емое водно́е естество́, Го́споди: те́мже немо́кренно пешеше́ствовав Изра́иль, пое́т Тебе́ пе́снь побе́дную.

Чи́нове А́нгел я́ко вои́стинну и вресноту́ Ма́терь Тя́ Бо́га все́х чту́т, Пречи́стая: но и ны́не от бре́нных усте́н мои́х приими́ пе́снь моле́бную.

Умертви́ пло́ти моея́ и еще́ живу́щую зло́бу, Жи́знь и́стинную ро́ждшая, Пречи́стая: и страсте́й и прегреше́ний пода́ждь, Чи́стая, Твоему́ рабу́ избавле́ние.

Сла́ва: Со́лнце от Со́лнца, безле́тное Сло́во непости́жно возсия́вшее, во вре́мя возсия́. Его́же заря́ми просвети́, Де́во, ду́шы на́шя, и вразуми́.

И ны́не: Подоба́ет Тебе́, Богоро́дице, хвале́ния Сло́во всегда́ де́йствуемо: но мы́ мо́лим Тя́, Чи́стая, спаси́ от вся́кия жите́йския печа́ли, к Тебе́ прибега́ющих.

Пе́снь 3

Ирмо́с: В нача́ле небеса́ всеси́льным сло́вом Твои́м утвержде́й, Го́споди Спасе́, и вседе́тельным и Бо́жиим Ду́хом, всю́ си́лу и́х: на недви́жимем мя́ ка́мени испове́дания Твоего́ утверди́.

Отда́в до́лги раболе́пно благоразу́мне, Твои́х благода́тей, Влады́чице, те́пле воспева́ю Тя́, Пречи́стая, Ма́ти Сло́ва, и все́х Изба́вителя: но и ны́не изми́ мя от жите́йских настоя́ний.

Умерщвле́на Ада́ма от преступле́ния дре́вле, лу́чшия, Пречи́стая, жи́зни сподо́била еси́ я́ве, Живонача́льное, Влады́чице, ро́ждшая Сло́во: но и ны́не мя́ сме́ртнаго греха́ свободи́.

Сла́ва: Ожесте́в пло́ти страстны́й зако́н, и ны́не оскорбля́ет, духо́вный, и к люте́йшым похоте́м совокупля́ет у́м мо́й, Пречи́стая: но безстра́стия ми́р пода́ждь ми́ вско́ре Твои́ми моли́твами.

И ны́не: Несказа́нно во утро́бе, Пречи́стая, заче́нши Христа́ Содержи́теля все́х, земноро́дных существо́ разреши́ла еси́ от а́довых вере́й: но и ны́не многоплете́нныя плени́цы тле́ющыя мя́ расто́ргни.

Пе́снь 4

Ирмо́с: О́тча не́дра не оста́вль, и соше́д на зе́млю, Христе́ Бо́же, та́йну услы́шах смотре́ния Твоего́, и просла́вих Тя́, Еди́не Человеколю́бче.

Но́щию борю́ся со тьмо́ю лю́тых, омрачи́в по́мысл: Две́ри Све́та, Твои́ми луча́ми озари́ мя, и го́рести изми́ вско́ре, и печа́ли.

Грехо́в мно́жеством стя́гнут, и плени́цами напа́стей вельми́ свя́зан, Твою́, Влады́чице, ны́не по́мощь призыва́ю, да изба́влюся вся́кия му́ки.

Сла́ва: Собо́рища злы́х и лю́тых, и зави́стных и лука́вых челове́к сове́ты разори́, Всепе́тая, и вся́кия мя́ изба́ви печа́ли жития́ и ско́рби.

И ны́не: Возвраще́ния слове́с лжи́вых и де́йств я́же на мя́, мече́м Твои́х моли́тв ссецы́, Влады́чице, и вско́ре разруши́, и вся́кия мя́ изба́ви печа́ли.

Пе́снь 5

Ирмо́с: Но́щь не светла́ неве́рным, Христе́, ве́рным же просвеще́ние в сла́дости слове́с Твои́х: сего́ ра́ди к Тебе́ у́тренюю, и воспева́ю Твое́ Божество́.

Непобеди́мая стена́ су́щи ве́рным, и покро́в бу́ди рабу́ Твоему́, Де́во, и от вся́кия ну́ждныя изба́ви печа́ли и озлобле́ния.

Неду́гую зело́, лю́те озло́бленный от обою́ страну́, Пречи́стая, душе́вную си́лу и теле́сную ю́же подъя́х, Твои́ми моли́твами исцели́.

Сла́ва: В пучи́ну, Де́во, щедро́т Твои́х ны́не прибега́ю ра́б Тво́й, от одержа́щаго мя́ сове́та непра́веднаго да изба́влюся, и озлобле́ния.

И ны́не: Превозноси́ма е́сть сла́ва Твои́х моли́тв всю́ду, Де́во Ма́ти Пречи́стая: и́миже ны́не мя́ вся́каго изба́ви жите́йскаго настоя́ния.

Пе́снь 6

Ирмо́с: Пла́вающаго в молве́ жите́йских попече́ний, с корабле́м потопля́ема грехи́, и душетле́нному зве́рю примета́ема, я́ко Ио́на, Христе́, вопию́ Ти: из смертоно́сныя глубины́ возведи́ мя.

Рече́ния и словеса́ все́х ве́рно восхваля́ют Тя́, Чи́стая, я́ко все́х челове́к до́лг Рождество́м Твои́м я́ве разруши́ся: но и ны́не певе́ц Твои́х мольбу́ приими́, и изба́ви искуше́ний и печа́лей.

Боля́ща мя́ и стра́стным грехо́вным те́рнием бодо́ма, и́щуща ю́же от Тебе́ цельбу́, Пречи́стая, от вся́кия боле́зни же и ско́рби изми́, и изба́ви от напа́стей и печа́лей.

Сла́ва: Земноро́дных естество́, на Не́бо Богоро́дице проявле́нно возвела́ еси́, бы́вши Пала́та Царя́ Сла́вы: те́мже мя́ от бе́здны мно́гих прегреше́ний, и напа́стей, и страсте́й возведи́.

И ны́не: Вопло́щшееся Сло́во па́че ума́ и сло́ва, Де́во Чи́стая, родила́ еси́, безслове́сия на́с изба́вльшаго: те́мже Тя́ словесы́ Боже́ственными непреста́нно воспева́ем, и ве́рно сла́вим.

Та́же, Го́споди, поми́луй: три́жды. Сла́ва, и ны́не:

Седа́лен, гла́с 7.

Влады́чице, прогне́вася Сы́н Тво́й на гре́шныя рабы́ Твоя́: Ще́драго бо на гне́в обрати́хом мы́, но на ми́лость претвори́ Его́, Чи́стая. Умилосе́рдися, Ма́ти Бо́жия, умоли́ Благоутро́бнаго мольба́ми самодви́жными, плене́ныя изба́ви.

Пе́снь 7

Ирмо́с: В пе́щь о́гненную вве́ржени преподо́бнии о́троцы, о́гнь в ро́су преложи́ша, воспева́нием си́це вопию́ще: благослове́н еси́, Го́споди Бо́же оте́ц на́ших.

Укра́шена ря́снами чистоты́, Пречи́стая Отрокови́це: ду́шу мою́ ны́не претвори́ от зло́бы скве́рныя к Боже́ственней добро́те, Благослове́нная Влады́чице, Предста́тельнице ро́да на́шего.

Свире́пеют ны́не зло́бы бесо́вския зело́, и о́гнь страсте́й мне́ возжига́ют, но па́че Твои́ми заря́ми, си́х до конца́ попали́ щедро́тами Твои́ми, Предста́тельнице ро́да на́шего.

Сла́ва: О на́с Твоего́ Сы́на моля́щи, Пречи́стая Ма́ти Бо́жия, не преста́й отню́д моли́твами Твои́ми, челове́ческих печа́лей и бе́д изъима́ющи рабы́ Твоя́.

И ны́не: Пресу́щный Сы́н от Тебе́, Де́во, пло́ть прия́т непрело́жно, и Челове́к бы́сть, да спасе́т пою́щыя: благослове́н, Пречи́стая, Пло́д Твоего́ чре́ва.

Пе́снь 8

Ирмо́с: О́троцы зовя́ху в пещи́ ороше́ни: тва́рь да благослови́т вся́ческая сло́вом Созда́вшаго, и превозно́сит Его́ во ве́ки.

Па́жити страстны́я, и многообра́зныя беды́ окружа́ют вои́стинну, Влады́чице, твоего́ раба́: но изба́ви мя́ те́х вся́каго искуше́ния.

Да прии́дет ны́не на ны́ держа́вная Твоя́ дла́нь, Влады́чице, и ча́емыя челове́ческия ско́рби да изба́вит на́с.

Сла́ва: Се́ти лука́вых и злосове́тных челове́к сокруши́, Чи́стая Богороди́тельнице: и Твоего́ раба́ изба́ви от вся́кия ну́жди.

И ны́не: Еди́но су́щее ве́рных приста́нище Боже́ственно, Де́во Чи́стая, молю́ Тя изба́вити мя́ су́щия в мо́ри жития́ бу́ри го́рькия.

Пе́снь 9

Ирмо́с: Ра́дуйся, Неве́сто Све́тлая, Ма́ти Светода́вца: ра́дуйся, вмести́вшая Невмести́маго во утро́бе Твое́й: ра́дуйся, саме́х херуви́мов че́стншая, ро́ждшая Спа́са ду́ш на́ших.

Отигра́ся, я́ко жребе́ц от за́поведей Влады́ки, брозда́ми Твои́х моли́тв да востя́гнуся, Пречи́стая, к пути́ ско́раго устрое́ния.

Низвлеко́мь е́смь зело́ поползнове́нием неразу́мным к дея́нию лука́ваго греха́ моего́: изба́ви мя́, Бо́же, преложе́ния го́ршаго.

Сла́ва: Исцеле́ние пе́рвое я́вльшися челове́ческаго существа́, исцели́ла сокруше́ние Ада́ма и Е́вы: исцели́ же и мене́, Богоро́дице, Твои́ми мольба́ми.

И ны́не: Целому́дрен у́м пода́ждь ми́, и чи́сто се́рдце, и ра́зум смотрели́в: да сохраню́, Влады́чице, Пречи́стыя за́поведи Бо́га моего́.

Та́же: Досто́йно е́сть: и покло́н. Трисвято́е. По О́тче на́ш: тропари́, и про́чее обы́чно, и отпу́ст.

Понедельник

В понеде́льник у́тра

по 1-м стихосло́вии седа́льны покая́нны, гла́с 7:

Иму́щи, душе́ моя́, врачевство́ покая́ния, приступи́ припа́дающи, и воздыха́нием зову́щи: Врачу́ ду́ш же и теле́с, Человеколю́бче, свободи́ мя от мно́гих мои́х согреше́ний: сопричти́ мя блудни́це, и разбо́йнику, и мытарю́, и да́руй ми́, Бо́же, беззако́ний мои́х проще́ние, и спаси́ мя.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

И́же Петро́во отверже́ние слеза́ми очи́стивый, и мытаре́ва согреше́ния воздыха́нием прости́вый, Человеколю́бче Го́споди, поми́луй мя́.

Сла́ва, и ны́не, Богоро́дичен: Превозшла́ еси́ си́лы небе́сныя, зане́ хра́м показа́лася еси́ Боже́ственный, благослове́нная Богоро́дице: я́ко ро́ждшая Христа́ Спа́са ду́ш на́ших.

По 2-м стихосло́вии седа́льны покая́нны, гла́с 7:

Мытаре́ву покая́нию не поревнова́х, и блудни́цы сле́з не стяжа́х: недоуме́юся бо от ослепле́ния такова́го исправле́ния. Но Твои́м благоутро́бием, Христе́ Бо́же, спаси́ мя, я́ко Человеколю́бец.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Пучи́на жите́йская обурева́ет мя́, Го́споди, волне́ния беззако́ний мои́х погружа́ют мя́, Влады́ко: но простри́ Твою́ ру́ку я́коже Петро́ви, и спаси́ мя, Человеколю́бче.

Сти́х: Ди́вен Бо́г во святы́х Свои́х, Бо́г Изра́илев.

Му́ченичен: Святи́и, моли́теся оставле́нию да́тися на́м прегреше́ний на́ших, и ча́емых лю́тых изба́витися на́м, и го́рькия сме́рти, мо́лимся.

Сла́ва, и ны́не, Богоро́дичен: Честне́йши сла́вных херуви́мов еси́ Пресвята́я Де́во, они́ бо Боже́ственныя не терпя́ще си́лы, кри́лы покрыва́юще ли́ца слу́жбу соверша́ют: Ты́ же воплоще́нно Сло́во самови́дно зря́щи но́сиши, Его́же непреста́нно моли́ о душа́х на́ших.

По 3-м стихосло́вии, седа́льны, гла́с 7:

Подо́бен: Пло́д чре́ва:

Разли́чных страсте́й, и согреше́ний мои́х бу́ря потопля́ет мя́ во глубину́ отча́яния: но моли́твами А́нгел Твои́х, Иису́се Многоми́лостиве, я́ко блу́днаго спаси́ мя.

Гото́вися душе́ моя́, в животе́ твое́м, проти́ву бу́дущей жи́зни не сумне́тися. Та́мо бо никто́же помога́яй, ни бога́тство, ни си́ла, ни дру́зи, ни кня́зи: но то́кмо показа́ние де́л и Бо́жие Человеколю́бие.

Сла́ва, и ны́не, Богоро́дичен: Богоро́дице Де́во нескве́рная, Сы́на Твоего́ моли́ с го́рними си́лами, проще́нию прегреше́ний на́м пре́жде конца́ дарова́тися, ве́рно Тя́ сла́вящым.

Кано́н покая́нен ко Го́споду на́шему Иису́су Христу́, и святы́м Его́ му́чеником. Творе́ние Ио́сифово. Гла́с 7:

Пе́снь 1

Ирмо́с: Поспе́шествовавшему Бо́гу во Еги́пте Моисе́ови, извести́ Изра́иля, тому́ еди́ному пои́м, я́ко просла́вися.

В пучи́ну лю́тых впа́д, вопию́ Ти: ру́ку ми́ простри́, Ще́дре, и спаси́ мя я́ко Петра́, Человеколю́бче.

Мене́ ка́ющагося, Христе́, я́коже блудни́цу от согреше́ний мно́гих омы́й манове́нием ми́лости Твоея́, да ве́рою сла́влю Тя́.

Му́ченичен: И́же святы́я Твоя́, Христе́, горни́лом просвети́вый многови́дных ра́н, те́х моле́нием от помраче́ния страсте́й изба́ви мя́.

Му́ченичен: Терпе́нием ра́н очи́стившеся, Со́лнца мно́жае облиста́ша святи́и му́ченицы, и пре́лесть помрачи́ша.

Богоро́дичен: Я́же предста́тельнице ве́рных, я́же согреша́ющих обраще́ние к Бо́гу, Де́во Всепе́тая, моли́твами Твои́ми спаси́ мя.

Други́й кано́н святы́м безпло́тным А́нгелом, [его́же краегране́сие: Безпло́тных похвалу́ седьму́ю ношу́.] Творе́ние Феофа́ново. Гла́с 7:

Ирмо́с: Истря́сшему Бо́гу фарао́на в мо́ри Чермне́м, пе́снь побе́дную пои́м, я́ко просла́вися.

Неисчетноси́льне Христе́, Твои́м све́том озари́в мо́й у́м, А́нгелы Твоя́ пе́ти вдохни́, я́ко всеси́лен. [Два́жды.]

Кре́пкую иму́ще све́тлость, из богонача́льнаго происходя́щу исто́чника, небе́снии ли́цы пе́сньми Христа́ почита́ют.

Богоро́дичен: Укра́шену Тя́, Чи́стая, Боже́ственными светлостьми́, ве́рнии ве́мы, я́ве ра́дуйся, Тебе́ вси́ зове́м.

Пе́снь 3

Ирмо́с: Утверди́ся се́рдце мое́ в Го́споде, вознесе́ся ро́г мо́й в Бо́зе мое́м: разшири́шася на враги́ моя́ уста́ моя́, возвесели́хся о спасе́нии Твое́м.

Но́щию безме́стными содержи́мь бы́х грехи́, све́том мя́ покая́ния ны́не озари́, светода́телю Человеколю́бче, да ве́рою сла́влю Тя́.

Путие́ вси́, по ни́хже ходи́х в житии́, в про́пасть сласте́й мя́ низри́нуша: Иису́се, покая́ния ми́ Боже́ственныя пути́ покажи́.

Му́ченичен: До́блественным нра́вом сконча́вше по́двиги, венце́в сподо́бистеся небе́сных, всесла́внии му́ченицы, о все́х моля́щеся.

Му́ченичен: Тьмы́ боле́зней претерпе́вше, страстоте́рпцы, тьма́ми благи́х сподо́бистеся, тьма́м совокупля́еми безпло́тных си́л.

Богоро́дичен: Бо́га ро́ждши небе́снаго Царя́, Де́во, во мне́ ца́рствующий гре́х низложи́, и уще́дривши спаси́ мя.

И́н Ирмо́с: Утверди́ся ве́рою Христо́ва Це́рковь, и́бо непреста́нно пе́сньми вопие́т пою́щи: свя́т еси́ Го́споди, и Тя́ пое́т ду́х мо́й.

Хода́тае бы́вше Боже́ственнаго явле́ния ли́цы а́нгельстии, и невеще́ственно зовете́ непреста́нно: свя́т еси́ Го́споди, спаса́я ду́шы на́шя.

Любо́вию зако́нною дру́г другу Боже́ственная сия́ния отдаю́ще, благочи́нно Христу́ поете́: свя́т еси́ Го́споди, Еди́не Многоми́лостиве.

Пе́рвей зари́ вторы́я све́тлости житию́ благоче́ствующии поревну́им, Христу́ пою́ще: свя́т еси́ Го́споди, спаса́я ду́шы на́шя.

Богоро́дичен: И́же от не су́щих вся́ приведы́й во́лею, от Тебе́ Де́во, пло́ть взае́млет Сло́во, челове́к бы́в, за милосе́рдие Человеколю́бец.

Пе́снь 4

Ирмо́с: Покры́ла е́сть Небеса́, Христе́ Бо́же, смотре́нием Твои́м, доброде́тель неизрече́нныя му́дрости Твоея́, Человеколю́бче.

Хотя́й все́м челове́ком, Ще́дре, спасти́ся, спаси́ мя преступи́вшаго Твоя́ повеле́ния, Сло́ве, и не уничижи́ мене́.

Подклони́хся безслове́сным страсте́м, и ското́м окая́нный уподо́бихся, Ще́дре Сло́ве Бо́жий, уще́дрив спаси́ мя.

Му́ченичен: Вя́жеми, и огне́м поджига́еми, попали́сте пре́лесть, воспаля́еми ре́вностию благоче́стия му́ченицы.

Му́ченичен: Ра́й мы́сленный яви́стеся, посреде́ иму́ще дре́во живо́тное блаже́ннии, Христа́ садоде́теля вся́ческих.

Богоро́дичен: Де́во Чи́стая богоблагода́тная, облагодати́вши у́м мо́й омраче́нный, неве́дения соверше́нно свободи́.

И́н Ирмо́с: Услы́шах слу́х Тво́й, и убоя́хся, разуме́х дела́ Твоя́, и ужасо́хся, Го́споди.

Исцели́ти ду́ши моея́ стру́пы, предстоя́ще Христу́ я́ко служи́тели избра́ннии, ли́цы а́нгельстии тому́ помоли́теся.

Во́инства безпло́тных, Влады́ко, Тво́й Престо́л благогове́йно обстоя́ще, я́сно при́сно вопию́т: сла́ва си́ле Твое́й, Го́споди.

Удиви́шася а́нгельстии чи́нове, зря́ще Тебе́, Христе́, с пло́тию на земли́ живу́ща со сме́ртными челове́ки.

Богоро́дичен: Всепе́тая, и Богома́ти Пречи́стая, ро́ждшая Бо́га несказа́нно пло́тию, Тебе́ мо́лимся, моли́ спасти́ся на́м.

Пе́снь 5

Ирмо́с: У́тренююще, Сло́ве, в сла́ву Твою́ и хвалу́, восхваля́ем непреста́нно о́браз Креста́ Твоего́, его́же да́л еси́ на́м ору́жие в по́мощь.

Ле́ностию житие́ ижди́х, и трепе́щу неизбе́жнаго Твоего́ суди́ща, на не́мже суди́тися хощу́ стра́стный а́з, уще́дри мя́, Го́споди.

И́же о́чи слепце́м просвети́вый, Сло́ве, души́ моея́ зе́ницы лю́те омраче́нныя отве́рзи, зре́ти све́т повеле́ний Твои́х.

Му́ченичен: Кре́пкою мы́слию Христа́ испове́дающе, претерпе́сте ра́ны вся́каго муче́ния, до́блественнии страда́льцы: те́мже блажи́ми есте́.

Му́ченичен: Преплы́вше все́х муче́ний треволне́ние, достиго́сте к приста́нищу вы́шняго Ца́рствия, тишины́ и́стинныя му́ченицы исполня́еми.

Богоро́дичен: И́же хоте́нием вся́ сотвори́вый Бо́г Сло́во, па́че сло́ва, Де́во, из Тебе́ воплоти́ся: Того́ у́бо приле́жно о все́х моли́.

И́н Ирмо́с: К Тебе́ у́тренюю, и Тебе́ вопию́, благоутро́бне Го́споди: омраче́нную грехми́ ду́шу мою́, све́том озари́в за́поведей Твои́х, наста́ви.

Свяще́ннейшими и многовеща́нными усты́ пою́т серафи́ми пребезнача́льное и Пребоже́ственное нача́ло, невеще́ственными светоли́тии просвеща́еми.

Свяще́нными и многосве́тлыми кри́лы покрыва́ются херуви́ми, к Боже́ственному сия́нию не сме́юще зре́ти, му́дрости Пребоже́ственныя приведе́ния.

Разу́мно Боже́ственнаго и всебога́тнаго, престо́ли сла́внии, красне́йшаго наслажда́ющеся блиста́ния, зри́тели неизрече́нных преми́рно явля́ются.

Богоро́дичен: Ум пребоже́ственный, челове́ческому, Пречи́стая, примеша́ется в пречи́стем и всесвяте́м Твое́м чре́ве, соедини́вся неслия́нно и неизме́нно по ипоста́си.

Пе́снь 6

Ирмо́с: Ио́на из чре́ва А́дова вопия́ше: возведи́ от тли́ живо́т мо́й. Мы́ же Тебе́ вопие́м: всеси́льне Спа́се, поми́луй на́с.

Обы́де мя́ бе́здна прегреше́ний, снидо́х во глубину́ поги́бели: возведи́ мя, Сло́ве, я́коже иногда́ Ио́ну от истле́ния к жи́зни.

Обурева́ет мя́ помышле́ний треволне́ние, ко приста́нищу и́стиннаго покая́ния испра́ви мя́, Ще́дре, в тишине́ соблюда́я се́рдце мое́.

Му́ченичен: Святи́и му́ченицы защити́вшеся ве́рою, ло́жнаго мучи́телей ласка́ния уклони́шася: и стрела́ми вра́жиими не уя́звлени бы́ша.

Му́ченичен: Возноша́еми к Бо́гу в любви́, и возненави́деша мирску́ю любо́вь му́ченицы, и дру́зи вся́ческих Творцу́ яви́шася.

Богоро́дичен: Пое́м Тя́, Препе́тая Отрокови́це, ро́ждшую пресвято́е Сло́во, Его́же вся́ си́лы небе́сныя воспева́ют немо́лчными гла́сы.

И́н Ирмо́с то́йже.

Ю́ношески светлостьми́ господонача́лия облиста́еми, и неизрече́нную сла́ву Того́ воспева́юще, госпо́дьствия при́сно явля́ются. [Два́жды.]

Любе́зно си́льне премогу́щую си́лу, взира́юще Боже́ственныя си́лы, в кре́пости пребыва́ют я́ве возмога́еми.

Богоро́дичен: От ца́рска коле́на произше́дши, Де́во, родила́ еси́ па́че естества́ сло́во все́х Царя́, и де́ва вои́стинну соверши́лася еси́.

Пе́снь 7

Ирмо́с: Пе́щь горя́щую ороси́л еси́, Спа́се, о́троки спа́сл еси́ пою́щыя и глаго́лющыя: благослове́н еси́ во ве́ки, Го́споди Бо́же оте́ц на́ших.

Пожри́ душе́, же́ртву хвале́ния Бо́гу, потщи́ся и пока́йся, до́ндеже то́рг е́сть жите́йский: ны́не ку́плю де́й до́брых придая́ний.

Приближа́ется душе́, сме́ртное посече́ние, плоды́ досто́йны сотвори́: да не я́ко непло́дное дре́во вве́ржешися во о́гнь гее́нский, и воспла́чешися неуте́шно.

Му́ченичен: Святи́и му́ченицы, пе́щь пре́лести угаси́вше кро́вными ту́чами, вопия́ху я́коже о́троцы: оте́ц на́ших Бо́же благослове́н еси́.

Му́ченичен: Сы́нове све́та бы́сте, све́ту жела́емому примеси́вшеся му́ченицы: и вся́ су́щая во тьме́ просвеща́ете, и пре́лести тьму́ отгоня́ете.

Богоро́дичен: Купина́ Тя́ прообража́ше, Чи́стая, неопали́мая, о́гнь бо родила́ еси́ непостоя́нный, Де́во. Те́мже вопию́ Ти: попали́ веще́ственныя моя́ стра́сти.

И́н Ирмо́с: В пе́щь о́гненную вве́ржени преподо́бнии о́троцы, о́гнь в ро́су преложи́ша, воспева́нием си́це вопию́ще: благослове́н еси́ Го́споди Бо́же оте́ц на́ших.

Славосло́вят неукло́нно, Тво́й престо́л, Христе́, я́ве окружа́юще, у́мне а́нгельская ликостоя́ния, благослове́н еси́, зову́ще, Бо́же оте́ц на́ших. [Два́жды.]

Отону́дными Тя́ нача́ла усе́рдии, о еди́ном нача́ле невеще́ственно обраща́еми, непреста́нными славословле́ньми зову́т: благослове́н еси́ Бо́же оте́ц на́ших.

Богоро́дичен: Еди́ну Ипоста́сь во двою́ существу́, Богороди́тельнице, Христа́ Еди́наго без се́мене родила́ еси́, стра́шное соверша́юща смотре́ние, Бо́га оте́ц на́ших.

Пе́снь 8

Ирмо́с: В пещи́ о́троки подража́юще, духо́вную ро́су прие́мшии, ве́рою зове́м: благослови́те дела́ Госпо́дня Го́спода.

Сло́во прия́х я́ко све́щник сия́ющ, но к безслове́сным преклони́хся окая́нный страсте́м, и во тьме́ зло́бней ше́ствую всегда́.

Госпо́дь бли́з, я́коже ве́руем: попецы́ся, душе́, и не уныва́й, побди́ и возопи́й бо́дренно: ще́дрый Человеколю́бче, спаси́ мя.

Му́ченичен: Вкуси́вше Боже́ственныя сла́дости, го́ресть боле́зненную претерпе́сте, и ны́не наслажда́етеся Боже́ственнейших сло́ва причаще́ний, му́ченицы.

Му́ченичен: Внидо́сте к Боже́ственному поко́ю, улучи́сте до́брых, и́хже наде́ястеся, всехва́льнии му́ченицы: сего́ ра́ди досто́йно ва́с ублажа́ем.

Богоро́дичен: Разреши́ся от кля́твы рождество́м Твои́м, Де́во, челове́ческое смеше́ние: и́бо Всеблагослове́ннаго, благослове́ньми вся́ украша́ющаго родила́ еси́.

И́н Ирмо́с: Еди́наго безнача́льнаго Царя́ сла́вы, его́же благословя́т небе́сныя си́лы, и трепе́щут чи́ни а́нгельстии, по́йте. свяще́нницы, лю́дие превозноси́те Его́ во ве́ки.

И́же все́ жела́ние к Бо́гу прело́жше, я́же отону́ду наслажда́ющеся заря́ми арха́нгели, ва́с воспева́ющым изба́витися напа́стей, Христа́ умоли́те все́х Царя́. [Два́жды.]

У́мове су́ще честне́йшии, вся́каго измене́ни веще́ственнаго пристра́стия, о А́нгели! Спаси́те все́х, любо́вию с ва́ми Христа́ превознося́щих во вся́ ве́ки.

Богоро́дичен: Све́т непристу́пный, Богоро́дице Де́во, во чре́ве Твое́м прие́мши неизрече́нно, просвети́ла еси́ су́щыя во тьме́ жития́, сла́вити благоче́стно Христа́ произше́дшаго из Тебе́ несказа́нно.

Та́же пое́м пе́снь Богоро́дицы: Вели́чит душа́ моя́ Го́спода: с припе́вом: Честне́йшую херуви́м: и покло́ны.

Пе́снь 9

Ирмо́с: Па́че естества́ Ма́терь, и по естеству́ Де́ву, еди́ну в жена́х благослове́нную пе́сньми ве́рнии Богоро́дицу велича́ем.

Се́ су́д приближа́ется, и осужде́нию дела́ име́я, са́м отчаява́юся: пра́ведный судие́ Христе́ Бо́же, не осуди́ мене́.

Я́коже ве́рная ханане́а, поми́луй мя́, вопию́ Ти́: я́коже погорбле́ную дре́вле испра́ви мя́, е́же ступа́ти пра́во к стезя́м Твои́м, Человеколю́бче.

Му́ченичен: Совлеко́стеся вся́кия с ри́зами зло́бы, и одея́ньми зе́льных муче́ний, сла́вы оде́жду себе́ страда́льцы исхода́таисте.

Му́ченичен: Боже́ственна страна́ живу́щих, Сио́н вы́шний гра́д, перворо́дныя ва́с прия́т, осиява́емых добро́тами по́двиг, страда́льцы.

Богоро́дичен: Просвети́тельными луча́ми возсия́вшаго сло́ва из Тебе́, Де́во Чи́стая, озари́ мя, грехо́в и страсте́й во тьме́ покрыва́ема.

И́н Ирмо́с: Всепе́тая небе́с превы́шшая, безнача́льное Сло́во безсе́менно заче́ншая, и воплоще́ннаго Бо́га ро́ждшая челове́ком: те́м Тя́ вси́ велича́ем.

Сия́ньми богонача́льнаго светоли́тия наслажда́ющеся вси́ ли́цы а́нгельстии, препросла́вленнаго Бо́га непреста́нно воспева́ют, и сла́вят при́сно велича́юще. [Два́жды.]

Изба́витися мне́ страсте́й обдержа́ния, о херуви́ми и серафи́ми, си́лы, вла́сти, а́нгели, арха́нгели, нача́ла же и престо́ли, и госпо́дьствия, Христа́ моли́те приле́жно.

Богоро́дичен: Я́ко Ма́ти ны́не к Сы́ну Твоему́, Богоро́дице, дерзнове́ние иму́щи, любо́вию пою́щих Тя́ изба́ви от прегреше́ний лю́тых, и неду́гов, и бе́д, Всесвята́я: да вси́ Тя при́сно велича́ем.

Та́же, досто́йно е́сть: и покло́н. Ектениа́, и свети́лен, и псалмы́ обы́чныя.

На стихо́вне стихи́ры покая́нны, гла́с 7:

Я́ко непло́дную смоко́вницу, не посецы́ мене́, Спа́се, гре́шнаго, но на мно́гая ле́та пожда́ние ми́ да́руй, напая́я ду́шу мою́ слеза́ми покая́ния, да пло́д принесу́ Ти́ ми́лостыни.

Сти́х: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся: во вся́ дни́ на́шя возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я. и при́зри на рабы́ Твоя́ и на дела́ Твоя́, и наста́ви сы́ны и́х.

Я́ко Со́лнце сы́й пра́ведное, просвети́ сердца́ пою́щих Тя́: Го́споди, сла́ва Тебе́.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Па́мять святы́х твои́х страстоте́рпец пра́зднующе, Тя́ пои́м: Го́споди, сла́ва Тебе́.

Сла́ва, и ны́не, Богоро́дичен: Умири́ моли́твами Богоро́дицы жи́знь на́шу, вопию́щих Ти́: ми́лостиве Го́споди, сла́ва Тебе́.

Та́же, Бла́го е́сть: Трисвято́е. По О́тче на́ш: тропари́. Ектениа́, и ча́с пе́рвый, и отпу́ст.

В понеде́льник блаже́нны, гла́с 7:

Красе́н бе́ и до́бр в сне́дь, и́же мене́ умертви́вый пло́д: Христо́с е́сть дре́во живо́тное, от Него́же яды́й не умира́ю, но вопию́ с разбо́йником: помяни́ мя́, Го́споди, во Ца́рствии Твое́м.

Сти́х: Блаже́ни и́згнани пра́вды ра́ди, я́ко те́х е́сть Ца́рство Небе́сное.

Я́ко ве́рная ханане́а зову́ в боле́зни се́рдца моего́: поми́луй мя́, Спа́се, я́ко бла́г: и́бо ду́шу и́мам бе́дствующую вся́кими козньми́ вра́жиими, и обурева́ему при́сно.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л на вы́ лжу́ще Мене́ ра́ди.

Херуви́ми, и серафи́ми, и престо́ли, нача́ла и си́лы, при́сно арха́нгели, а́нгелов во́инства, и госпо́дьствия, и прему́дрых власте́й собо́ри, Тебе́ сла́вят, благоде́телю Го́споди.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

Вра́жия лука́вая возноше́ния, к Бо́гу возвыша́еми низверго́ша соверше́нно страда́льцы: и победи́тели я́вльшеся, в ра́дости ны́не на небесе́х живу́т, сла́вою нетле́нною блиста́юще.

Сла́ва: Тро́ице Неразде́льная, Еди́ница Единоесте́ственно, Трили́чное существо́, покланя́емся Ти́ с вы́шними си́лами: О́тче, и Сы́не, и Ду́ше Святы́й, еди́ному Божеству́, Еди́ной Си́ле: Еди́н Бо́г, Тро́ица Единосу́щная.

И ны́не: Сластьми́ оскверни́хся жите́йскими, к Тебе́ нескве́рней прибего́х, Де́во: поро́ка вся́каго и согреше́ний изба́ви всеокая́нную мою́ ду́шу, я́ко да ублажа́ю Тя́ Присноблаже́нную.

В понеде́льник ве́чера

на Го́споди, воззва́х, стихи́ры покая́нны. Гла́с 7.

Подо́бен: Дне́сь бди́т Иу́да:

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

Влады́ко и Бо́же Всеще́дрый, и́миже ве́си судьба́ми, да́ждь ми́ в се́рдце Тво́й стра́х име́ти, да́ждь ми́ гнуша́тися дея́ний лука́ваго, да́ждь ми́ люби́ти Тя́ от всея́ души́ моея́, и твори́ти во́лю Твою́ спаси́тельную. Ты́ бо еси́ Бо́г на́ш, реки́й: проси́те, и прии́мете.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Бы́х у́бо бесо́м сме́х, челове́ком же уничиже́ние, пра́ведным рыда́ние, и А́нгелом пла́чь, скве́рна возду́ху, и земли́ и вода́м: те́ло бо окаля́х, ду́шу и у́м оскверни́х безчи́сленными дея́ньми, и вра́г Бо́жий бы́х. Увы́ мне́, Го́споди! Согреши́х Ти́, согреши́х, прости́ мя.

Сти́х: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Молю́ся Ти́, о мне́ непло́днем долготерпи́, Влады́ко: и не посецы́ мене́ я́ко непло́дное дре́во посече́нием сме́ртным, во о́гнь отсыла́я, но плодоно́сна мя́ сотвори́ти умоле́н бу́ди, вре́мя покая́ния ми́ дая́ я́ко Человеколю́бец: я́ко да отмы́ю, Спа́се мо́й Христе́, моя́ мно́ги грехи́.

Та́же мине́и стихи́ры, свято́му. Сла́ва, свято́му. И ны́не, Богоро́дичен гла́са. А́ще ли не́сть мине́и: и́ны стихи́ры свято́му и вели́кому проро́ку Иоа́нну Предте́чи, гла́с 7:

Сти́х: Я́ко у Го́спода ми́лость, и мно́гое у него́ избавле́ние, и то́й изба́вит Изра́иля от все́х беззако́ний его́.

В пусты́ни живы́й непоро́чно житие́, греха́ми опусте́вший у́м мо́й обнови́, Предте́че.

Сти́х: Хвали́те Го́спода вси́ язы́цы, похвали́те Его́ вси́ лю́дие.

Го́рлицу Тя́, Проро́че, красне́йшую разуме́вше сла́вим, провозвеща́ющу су́щым в ми́ре Боже́ственную ве́сну.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Предста́телю живота́ моего́, ду́ши моея́ храни́телю, Боже́ственный Предте́че, от челове́ческа язы́ка льсти́ва изба́ви мя́ раба́ Твоего́.

Сла́ва, и ны́не, Богоро́дичен: В мяте́жи обурева́ема мя́ ле́ности, в приста́нище благоути́шное спасе́ния напра́ви, Влады́чице.

Та́же, Све́те ти́хий: Проки́мен дне́. И Сподо́би, Го́споди, в ве́чер се́й:

На стихо́вне стихи́ры покая́нны, гла́с 7:

Я́ко блу́дный сы́н приидо́х а́з, Ще́дре, приими́ мя припа́дающаго, я́ко еди́наго от нае́мник Твои́х Бо́же, и поми́луй мя́, Человеколю́бче.

Сти́х: К Тебе́ возведо́х о́чи мои́ живу́щему на Небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны́.

Я́ко впады́й в разбо́йники и уя́звлен, та́ко и а́з впадо́х от мно́гих грехо́в, и уя́звлена ми́ е́сть душа́: к кому́ прибе́гну пови́нный а́з, то́кмо к Тебе́ благоутро́бному душа́м Врачу́? Изле́й на мя́, Бо́же, вели́кую Твою́ ми́лость.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих, и уничиже́ния го́рдых.

Му́ченичен: Святи́и му́ченицы и́же до́бре страда́вше и венча́вшеся, моли́теся ко Го́споду, спасти́ся душа́м на́шым.

Сла́ва, и ны́не, Богоро́дичен: Ра́дуйся, со́лнца о́блаче мы́сленнаго и неизрече́ннаго Влады́чице: ра́дуйся, всесве́тлая свеще́: ра́дуйся, све́щниче всезлаты́й: Тобо́ю, Пресвята́я, Е́ва изба́вися от кля́твы. Но я́ко иму́щи дерзнове́ние ко благопреме́нному Сы́ну Твоему́ и Бо́гу, ма́тернею Твое́ю моли́твою, не оскуде́й моли́тися, Пречи́стая.

Та́же, Ны́не отпуща́еши: Трисвято́е. По О́тче на́ш: тропа́рь, ектениа́, и отпу́ст.

В понеде́льник на повече́рии

кано́н моле́бный пресвяте́й Богоро́дице. Гла́с 7.

Пе́снь 1

Ирмо́с: Сокруши́вшему бра́ни мы́шцею Свое́ю, и вса́дники триста́ты погрузи́вшему, пои́м Ему́, я́ко Изба́вителю на́шему Бо́гу, я́ко просла́вися.

Тя́ вино́вну на́шего спасе́ния, и Боже́ственнаго избавле́ния мо́лим, Пречи́стая: моли́ся е́же спасти́ся на́м.

Ве́сь е́смь в лю́тых напа́стех, в беда́х и прегреше́ниих, вопию́ Ти, Пречи́стая: спаси́ мя, раба́ Твоего́.

Сла́ва: Тя́, Де́ву Чи́стую мо́лим, и Ма́терь Зижди́теля: от вся́каго озлобле́ния бесо́в изба́ви на́с.

И ны́не: Я́же Сло́во пло́тию ро́ждши па́че сло́ва, Нача́льника жи́зни Христа́ Бо́га на́шего, моли́ спасти́ся на́м.

Пе́снь 3

Ирмо́с: У тверди́ся ве́рою Христо́ва Це́рковь, и́бо непреста́нно пе́сньми вопие́т пою́щи: свя́т еси́ Го́споди, и Тя́ пое́т ду́х мо́й.

Всепа́губныя зло́бы ше́ствовав стезю́, не обрето́х пути́ спасе́ния моего́: к нему́же мя́ Ты́ наста́ви, Пренепоро́чная Влады́чице.

Кре́пость, и утвержде́ние, и по́мощь, и наде́жду Тя́ Еди́ну напису́ю, Всенепоро́чная: Ты́ ми бу́ди засту́пница в де́нь исхо́да.

Сла́ва: Всегда́ Тя, Пренепоро́чная, молю́: в ча́с сме́рти моея́ предста́ни, и му́ки изба́ви раба́ Твоего́.

И ны́не: Роди́лся еси́ от Де́вы несказа́нно, яви́лся еси́, я́коже изво́лил еси́ Спа́се на́ш, и ми́р обнови́л еси́, Го́споди.

Пе́снь 4

Ирмо́с: Услы́шах слу́х Тво́й, и убоя́хся, разуме́х дела́ Твоя́ и ужасо́хся, Го́споди.

Повеле́ния моего́ Влады́ки престу́пль, враго́м яви́хся удо́бь одержи́мь: Ты́ мя изба́ви, Влады́чице.

В ча́с сме́рти изба́ви, Пречи́стая, и спаси́ ду́шу мою́ стра́стную от бесо́в.

Сла́ва: Разреши́, Пречи́стая Влады́чице, соу́зы прегреше́ний мои́х, и к Животу́ ве́чному бу́ди ми́ хода́таица моли́твами Твои́ми.

И ны́не: Воспева́ем Тя́, по Рождестве́ па́ки Де́ву, и прославля́ем Тя́, Пречи́стая, я́ко Ма́терь Бо́га на́шего.

Пе́снь 5

Ирмо́с: У́тренююще, Сло́ве, в сла́ву Твою́ и хвалу́, восхваля́ем непреста́нно о́браз Креста́ Твоего́, его́же да́л еси́ на́м ору́жие в по́мощь.

Приста́нище в бу́ри лю́те смуща́емым, спасе́ния две́ри ве́рою спаса́емым, Де́во Блага́я, спаси́ мя раба́ Твоего́.

Мно́гия щедро́ты Твоя́, Де́во Богоро́дице, на мне́ рабе́ Твое́м яви́ бога́тно, избавля́ющи мя́ стра́шнаго и бу́дущаго суда́.

Сла́ва: Но́щь страсте́й непостоя́нна содержи́т ду́шу мою́, и к па́губней про́пасти отсыла́ет: све́том моли́твы Твоея́, Богоро́дице, спаси́ мя раба́ Твоего́.

И ны́не: Пресвята́я Де́во Обра́дованная, ро́ждшая Сло́во в ле́то па́че сло́ва, моли́ Его́ спасти́ ду́шы на́шя.

Пе́снь 6

Ирмо́с: Ио́на из чре́ва а́дова вопия́ше: возведи́ от тли́ живо́т мо́й. Мы́ же Тебе́ вопие́м: всеси́льне Спа́се: поми́луй на́с.

В напа́стех засту́пницу Тя́ и́мамы тве́рду, в ско́рбех кре́пкое спасе́ние, поко́й в печа́лех, в беда́х по́мощь, Присноде́во.

Ты́ ми храни́тельница жи́зни все́й яви́ся, Пречи́стая: Ты́ мя изба́ви от бесо́в в ча́с сме́рти, Ты́ и по сме́рти упоко́й.

Сла́ва: Добро́та честны́х святы́х а́нгел, ра́дование челове́ков все́х, Ты́ еси́, Богоро́дице Де́во: Ты́ мя к животу́ наста́ви.

И ны́не: Исцели́, Пренепоро́чная, окая́нную ду́шу мою́, неисце́льно боля́щую жите́йскими пре́лестьми, и мно́гих двере́й затворе́ньми.

Та́же, Го́споди, поми́луй, три́жды. Сла́ва, и ны́не:

Седа́лен, гла́с 7:

За милосе́рдие ми́лости Твоея́, Христе́ Бо́же, от Де́вы Святы́я воплоти́тися изво́лил еси́: Ея́же ра́ди соблюди́ жи́знь на́шу, я́ко Человеколю́бец.

Пе́снь 7

Ирмо́с: Пе́щь горя́щую ороси́л еси́, Спа́се, о́троки спа́сл еси́ пою́щыя и глаго́лющыя: благослове́н еси́ во ве́ки, Го́споди Бо́же оте́ц на́ших.

Мно́жество прегреше́ний мои́х прие́мля во у́м, во отча́янии быва́ю, Де́во Пренепоро́чная. Те́мже Ти́ зову́: помози́ ми, да не до конца́ поги́бну.

Жи́зни су́щую Ма́терь Тя́, Чи́стая, ве́дый, зову́ Ти: сме́рти душе́вныя изба́ви мя́, и ве́чныя жи́зни сподо́би.

Сла́ва: Изба́ви, Пренепоро́чная, от бе́д, и страсте́й, и боле́зней, и озлобле́ния, и жития́ согреше́ний, и от ве́чнаго огня́ негаси́маго, ве́рно чту́щыя Тя́ пе́сньми.

И ны́не: Вся́к язы́к сла́вит Тя́, Чи́стая, сла́ву су́щую и похвалу́ ро́да на́шего, и наста́вницу заблу́ждших, Богоро́дице Препе́тая.

Пе́снь 8

Ирмо́с: Стра́шнаго херуви́мом, и Чу́днаго серафи́мом, и ми́ру Творца́, свяще́нницы и раби́, и ду́си пра́ведных по́йте, благослови́те и превозноси́те Его́ во ве́ки.

Все́ житие́ мое́ ижди́х в ле́ности а́з преокая́нный, и ны́не недоуме́юся, и к концу́ прибли́жихся, помози́ ми, Влады́чице.

Гре́шников прибе́жище, низве́рженных исправле́ние, Ты́ еси́, Влады́чице: сего́ ра́ди притека́ю к покро́ву Твоему́, спаси́ мя.

Сла́ва: Неусы́пну моли́тву я́ко иму́щи, Всенепоро́чная Влады́чице ми́ра, суда́ изба́ви бу́дущаго, ве́рою чту́щыя о́браз Тво́й.

И ны́не: Пое́т Тя́ вся́к язы́к сла́вяй, Бо́га бо Препе́таго родила́ еси́, Де́во Богоневе́сто: Его́же моли́ непреста́нно спасти́ ду́шы пою́щих Тя́.

Пе́снь 9

Ирмо́с: Па́че естества́ Ма́терь, и естеству́ Де́ву, Еди́ну в жена́х благослове́нную, пе́сньми ве́рнии Богоро́дицу велича́ем.

Под Твое́ милосе́рдие прибега́ющии ве́рою избавля́ются ско́рбных бе́д жития́. Те́мже и а́з к Твоему́ покро́ву прибего́х, Богоро́дице.

Кре́пкая засту́пнице, непобеди́мая стено́ печа́льных, Чи́стая, спаси́ мя от страсте́й грехо́в, и огня́ ве́чнующаго.

Сла́ва: Све́тлыми сия́ньми возсия́вшаго Сло́ва от Тебе́, Де́во Чи́стая, озари́ мя, и спаси́ я́ко Блага́я, и от му́к исхити́.

И ны́не: Но́сиши Нося́щаго вся́ческая святы́ми рука́ми Твои́ми: Его́же моли́, Чи́стая, чужда́го злоде́йства неодержи́мых на́с спасти́.

Та́же, Досто́йно е́сть: и покло́н. Трисвято́е. По О́тче на́ш: тропари́, и про́чее обы́чно, и отпу́ст.

Вторник

Во вто́рник у́тра

по 1-м стихосло́вии седа́льны покая́нны, гла́с 7:

Иму́щи, душе́ моя́, врачевство́ покая́ния, приступи́ припа́дающи и воздыха́нием вопию́щи: Врачу́ ду́ш же и теле́с, свободи́ мя, Человеколю́бче, от мно́гих мои́х согреше́ний, сопричти́ мя блудни́це и разбо́йнику, и мытарю́: и да́руй ми́, Бо́же, беззако́ний мои́х проще́ние и спаси́ мя.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

И́же Петро́во отверже́ние слеза́ми очи́стив, и мытаре́ва согреше́ния воздыха́нием прости́в, Человеколю́бче Го́споди, поми́луй мя́.

Сла́ва, и ны́не, Богоро́дичен: Ра́дуйся, невмести́маго в Небесе́х, вмести́вшая во утро́бе Твое́й: ра́дуйся, Де́во, проро́ков пропове́дание, е́юже возсия́ Емману́ил: ра́дуйся, Ма́ти Христа́ Бо́га.

По 2-м стихосло́вии, седа́льны, гла́с 7:

Мытаре́ву покая́нию не поревнова́х, и блудни́цы сле́з не стяжа́х: отчаява́юся бо от недоуме́ния такова́го исправле́ния. Но Твои́м благоутро́бием спаси́ мя, Бо́же, я́ко Человеколю́бец.

Сти́х: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

И́же блудни́цы сле́зы, и Петра́ прие́мый, и мытаря́ оправда́вый из глубины́ воздохну́вша: и мене́ отча́яннаго от де́л уще́дри, Спа́се, и спаси́ мя.

Сти́х: Ди́вен Бо́г во святы́х Свои́х, Бо́г Изра́илев.

Му́ченичен: Святи́и Твои́, Го́споди, на земли́ подви́гшеся, врага́ попра́ша, и ле́сть и́дольскую упраздни́ша: те́мже и венцы́ от Тебе́ прия́ша человеколю́бца Влады́ки и ми́лостиваго Бо́га, подаю́щаго ми́рови ве́лию ми́лость.

Сла́ва, и ны́не, Богоро́дичен: Превозшла́ еси́ си́лы небе́сныя, зане́ хра́м показа́лася еси́ Боже́ственный, благослове́нная Богоро́дице, я́ко ро́ждшая Христа́ Спа́са ду́ш на́ших.

По 3-м стихосло́вии седа́лен, гла́с 7:

Подо́бен: Пло́д чре́ва Твоего́:

Я́ко блудни́ца припа́даю Ти́, Человеколю́бче, а́ще и слеза́ми ве́сь недоуме́юся ко умиле́нию: моли́твами Предте́чи я́ко о́ну умили́ ми́лостиве, и спаси́ мя.

Го́споди, скве́рну ду́ши моея́, ми́лости Твоея́ иссо́пом, уми́лостивлься я́ко бла́г омы́й, Спа́се, и очи́стив от скве́рны тиме́ния страсте́й, поми́луй мя́, Влады́ко, спаси́ созда́ние Твое́ мольба́ми Предте́чи Твоего́, Еди́не Многоми́лостиве.

Сла́ва, и ны́не, Богоро́дичен: Предста́тельнице те́плая и засту́пнице христиа́н еси́, Богоро́дице Всепе́тая: те́мже с Предте́чею, Сы́на Твоего́ моли́ обрести́ на́м ми́лость.

Кано́н покая́нен ко Го́споду на́шему Иису́су Христу́, и святы́м Его́ му́чеником. Творе́ние Ио́сифово, гла́с 7:

Пе́снь 1

Ирмо́с: Сокруши́вшему бра́ни мы́шцею Свое́ю, и вса́дники триста́ты погрузи́вшему, пои́м Ему́, я́ко Изба́вителю на́шему Бо́гу, я́ко просла́вися.

Всегда́ согреша́ю, и не бою́ся, Тебе́, Христе́, долготерпе́нием и́щущаго моего́ покая́ния: да́ждь ми́ по́мысл обраще́ния я́ко бла́г, и не пре́зри мене́.

Грехи́ ко грехо́м прилага́яй, Христе́, при́сно ника́коже престаю́ а́з окая́нный, Еди́не Бла́же безгре́шне, уще́дри и спаси́ мя.

Му́ченичен: Де́рзостне до́блии приглаша́ху страда́льцы: сие́ три́знище испо́лнено по́двигов: теце́м, председи́т Христо́с подвигополо́жник, венчава́я победи́тели врага́.

Му́ченичен: Совлеко́стеся те́ла многообра́зными ра́нами, и нетле́ния ри́зою оде́ястеся му́ченицы му́дрии и Отца́ щедро́т сы́нове бы́сте.

Богоро́дичен: Мно́гими грехи́ озло́бленную ду́шу мою́, Богороди́тельнице Де́во, исцели́: я́ко да во гла́сех благодаре́ния, приле́жно всегда́ сла́влю Тя́.

Други́й кано́н честно́му и вели́кому Проро́ку Иоа́нну Предте́чи. Творе́ние Ио́сифово. Гла́с 7:

Ирмо́с: Ма́нием Твои́м на земны́й о́браз преложи́ся, пре́жде удоборазлива́емое водно́е естество́, Го́споди: те́мже немо́кренно пешеше́ствовав Изра́иль, пое́т Тебе́ пе́снь побе́дную.

Красота́ церко́вная, укра́шен яви́лся еси́ блаже́нне Предте́че: ю́же всегда́ моли́твами твои́ми спаса́й от вся́кия бу́ри ерети́чествующих, кре́пку и непоколеби́му.

Непоро́чная свяще́нная же́ртва Творцу́ прине́слся еси́, закла́н бы́л еси́ Боже́ственный Предте́че, я́ко а́гнец незло́бив. Те́мже ве́рою тя́ молю́: вся́кия мя́ зло́бы вра́жия изба́ви.

Исцели́ теле́сныя и душе́вныя на́шя боле́зни, присносла́вный Предте́че, моля́ всегда́ Сло́ва, все́х неду́ги и боле́зни благоутро́бне взе́мшаго.

Богоро́дичен: Родила́ еси́ Всесвята́я непостижи́мое Сло́во, пло́тию по ипоста́си на́м приобщи́вшагося: Того́ всегда́ моли́, спасти́ ве́рою Тебе́ при́сно блажа́щыя.

Пе́снь 3

Ирмо́с: Небеса́ утверди́вый сло́вом, и земно́е основа́ние укрепи́вый на вода́х мно́гих, утверди́ мо́й у́м, в во́лю Твою́, Человеколю́бче.

И́же презира́яй челове́ков грехи́, мно́гаго ра́ди, Христе́, человеколю́бия, пре́зри, Еди́не Спа́се, мно́гая моя́ зла́я: да Тя́ сла́влю, Преблага́го.

Да плотска́я хоте́ния сотворю́, Твоя́ хоте́ния, Христе́, презре́в безсо́вестный, и бою́ся пла́меннаго томле́ния, Сло́ве, от него́же мя́ изба́ви.

Му́ченичен: Теле́сным боле́знем приобща́ющеся страда́льцы, на неболе́зненную взира́ху жи́знь и осла́бу: ю́же улучи́вше в ра́дости, ве́рным боле́зни при́сно облегча́ют.

Му́ченичен: Заря́ми по́двигов страстоно́сцы пре́лести лю́тую но́щь разруши́сте, и к невече́рнему све́ту преидо́сте, на́ших боле́зней тьму́ при́сно оте́млюще.

Богоро́дичен: Две́рь Бо́жию прови́де Тя́ проро́к, е́юже са́м про́йде еди́н, я́коже ве́сть, Де́во Пречи́стая. Те́мже молю́ся Ти́, покая́ния две́ри Сама́ ми отве́рзи.

И́н Ирмо́с: В нача́ле небеса́, всеси́льным Сло́вом Твои́м утвержде́й, Го́споди Спа́се, и вседе́тельным и Бо́жиим Ду́хом, всю́ си́лу и́х, на недви́жимем мя́ ка́мени испове́дания Твоего́ утверди́.

Солнцелу́чными мо́лниями всю́ просвеща́еши тва́рь: со́лнца бо у́мнаго звезда́ све́тлая яви́лся еси́, Предте́че. Его́же моли́ приле́жно страсте́й тьму́ отгна́ти от всеболе́зненных серде́ц на́ших.

Зако́на и благода́ти посреде́ стоя́ Боже́ственный проро́че, объявля́еши все́м я́ве, о́вому у́бо преста́тие, о́вей же просия́ние быва́ющее чи́сто: обновле́ние совершенно обетша́вшым грехи́.

Бесо́вскаго наше́ствия, от собла́зн жите́йских, и от вся́кия ско́рби на́с изба́ви, вопие́м, Христо́в Крести́телю, моля́ Преблага́го, и в де́нь су́дный муче́ний свободи́.

Богоро́дичен: Благослове́нная я́же Бо́га неска́занно ро́ждши, с Боже́ственным его́ Крести́телем, моли́, Чи́стая, непреста́нно, Влады́чице, о на́с, в напа́сти впа́дающих жите́йския, и содержи́мых грехи́.

Пе́снь 4

Ирмо́с: Плотско́е прише́ствие Твое́, Христе́, уверя́я проро́к Авваку́м взыва́ше: сла́ва си́ле Твое́й, Го́споди.

Устрани́хся от пути́, к жи́зни веду́щаго мя́, и в ро́в злы́х впадо́х: Спа́се, не пре́зри мене́.

Сле́зныя ми́ то́ки низпосли́, Влады́ко Сло́ве Бо́жий: да отмы́ю мно́гих согреше́ний мои́х тиме́ния.

Му́ченичен: Приводи́ми я́ко А́гнцы к заколе́нию му́ченицы, бори́теля врага́ закала́ху, сла́вы сподобля́еми.

Му́ченичен: Излива́емыя крове́й то́ки прехва́льнии, пото́ки сла́достныя угото́ваша все́м восприя́тие, Боже́ственнии му́ченицы.

Богоро́дичен: Воплоти́ся от крове́й Твои́х чи́стых Госпо́дь, покая́ние челове́ком да́руя все́м, Отрокови́це, хода́тайством твои́м.

И́н Ирмо́с: О́тча не́дра не оста́вль, и соше́д на зе́млю, Христе́ Бо́же, та́йну услы́шах смотре́ния Твоего́, и просла́вих Тя́, Еди́не Человеколю́бче.

Низложи́в по́лк вражде́бных, и до́блествовав на ни́х све́тлостию Крести́телю, во мне́ ца́рствующий гре́х низложи́, молю́ся Ти́, моли́твами Твои́ми.

Свети́льник я́влься блаже́нне мы́сленный, показа́л еси́ челове́ком Иису́са, пра́ведное вели́кое Со́лнце, и́мже озари́тися сердца́м все́х, моли́ся.

В беззако́ниих заче́нся и роди́вся, жи́ву в ле́ности, и бою́ся та́мошних муче́ний: от ни́хже мя́ исхити́, Крести́телю, Бо́га умоли́в.

Моле́ния о на́с тебе́ чту́щих, Крести́телю, Бо́гу принеси́: я́ко да изба́вит на́с вся́каго лю́таго обстоя́ния, и бесо́вскаго вре́да, мо́лимся.

Богоро́дичен: Зако́на се́ни, Тебе́ многови́дно прояви́ша ро́ждшую Бо́га: его́же моли́, Всенепоро́чная, вся́каго мя́ беззако́ния и страсте́й теле́сных изба́вити.

Пе́снь 5

Ирмо́с: Разгна́вый но́щь стра́стную, возсия́й ми́ све́т у́мный, началоро́дную тьму́ отгна́в бе́здны, и первозда́нный све́т возсия́вый ми́ру, Соде́телю все́х.

Изба́ви мя́, Сло́ве, пра́веднаго Твоего́ гне́ва, егда́ су́диши земли́: и от мно́гих согреше́ний покая́нием очи́щ, хра́м мя́ покажи́ Твоея́ бла́гости, Еди́не Соде́телю все́х.

От зе́льныя мглы́ страсте́й ослепи́хся умо́м, и не ве́м, что́ де́лаю, онечу́вствився се́рдцем: обрати́ мя, Христе́, и покая́ние ми́ да́руй чисти́тельное скве́рн.

Му́ченичен: Три́знище испо́лнено по́тов, страда́льцы те́кше ю́ношески, к небе́сней све́тлости достиго́сте, побе́дныя по́чести от живонача́льныя руки́ прие́мше: те́мже ра́дуетеся ны́не.

Му́ченичен: Кре́пкими жи́лами свяще́нных боле́зней ва́ших, страда́льцы, удави́сте вои́стинну началозло́бнаго зми́я, и ра́йския сла́дости сподо́бистеся: те́мже восхваля́ем ва́с.

Богоро́дичен: Я́же со́лнца о́блаче све́тлый, возсия́й ми́ све́т мы́сленный и́стиннаго покая́ния, и отжени́ тьму́ лука́вых помышле́ний: да ве́рою пою́ Тя, я́ко спасе́ние ве́рных.

И́н Ирмо́с: Го́споди Бо́же мо́й, от но́щи у́треневав Тебе́ молю́ся: пода́ждь ми́ оставле́ние прегреше́ний мои́х, и к све́ту Твои́х повеле́ний пути́ моя́ напра́ви, молю́ся.

Прозя́бл еси́ гла́с вопию́щаго в пусты́х, Прему́дре, по́мыслех Бо́жия позна́ния. Те́мже молю́ Тя́: ду́шу мою́ опусте́вшую вся́кими преступле́ньми, обнови́.

Честны́й Влады́ки сосу́д показа́лся еси́ Боже́ственный Проро́че, нечи́стых дея́ний изба́ви мя́ моли́твами твои́ми: и че́сти получи́ти ве́чныя благоде́теля умоли́.

Прибли́жишася беззако́ния на мя́ вхо́дом ле́ности: о́бразы покая́ния мя́, блаже́нне Предте́че, лу́чша сотвори́, я́ко да усе́рдно пути́ Госпо́дни ше́ствую.

Богоро́дичен: Умертви́ пло́ти моея́ земна́я мудрова́ния, Богоро́дице, жи́знь ро́ждшая, сме́ртию сме́рть до конца́ Боже́ственною си́лою, Пресвята́я Чи́стая, потре́бльшую.

Пе́снь 6

Ирмо́с: Во глубину́ грехо́вную впа́дся, Бла́же, я́ко Ио́на от ки́та вопию́ Ти: возведи́ от тли́ живо́т мо́й, и спаси́ мя, Человеколю́бче.

Но́в блудни́к яви́хся, скве́рно жи́в на земли́, и сластны́м стремле́нием подклони́хся: обрати́ мя, Христе́ Бо́же мо́й, и спаси́ мя я́ко Человеколю́бец.

Возстени́, о душе́ моя́, да изба́вишися стена́ния: прослези́ся, я́ко да сле́з непреста́нных не прии́меши иску́са та́мо в боле́зни, ни еди́ныя же иму́щих по́льзы.

Му́ченичен: Яви́стеся я́коже ка́мение, в венце́ я́ве Христо́вы це́ркве водруже́ны: и украше́ние тоя́ ле́потное бы́сте, честни́и великому́ченицы.

Му́ченичен: Кончи́ны в Бо́зе досто́йныя улучи́вше, прему́дрии, безконе́чная насле́дствуете мздовоздая́ния. Те́мже кончи́нам на́шым в покая́нии бы́ти, му́ченицы, моли́теся.

Богоро́дичен: Из глубины́ мя ле́ности безме́рных зо́л возведи́, Блага́я, я́же бе́здну благоутро́бия ро́ждши, исто́чник ми́ сле́з, Присноде́во, да́руй.

И́н Ирмо́с: Ио́на из чре́ва а́дова вопия́ше: возведи́ от тли́ живо́т мо́й. Мы́ же Тебе́ вопие́м: всеси́льне Спа́се, поми́луй на́с.

Луча́ми доброде́телей я́ве облиста́я, и светоза́рным муче́нием сия́я, просвеща́еши всю́ тва́рь, у́мнаго Восто́ка дру́же бли́жний.

Прозя́бл еси́ от ста́рицы непло́дныя, блаже́нне: те́мже вопию́ Ти: греха́ми мно́гими мя́ состаре́вшагося, покая́ния добро́тами обнови́, моли́твами Твои́ми.

Свети́льниче све́та невече́рняго Боже́ственный Проро́че, свети́льник се́рдца моего́ уга́сший возжзи́ моли́твами Твои́ми, и све́та прича́стника мя́ Боже́ственнаго сотвори́.

Богоро́дичен: Я́ко до́ждь во чре́во Твое́ Сло́во сни́де: его́же моли́, Пречи́стая Де́во, тече́ния изсуши́ти безме́рных мои́х зо́л, молю́ся Ти́.

Пе́снь 7

Ирмо́с: Су́щым в пещи́ отроко́м Твои́м, Спасе́, не прикосну́ся, ниже́ стужи́ о́гнь. Тогда́ трие́ я́ко еди́неми усты́ поя́ху, и благословля́ху глаго́люще: благослове́н еси́ Бо́же оте́ц на́ших.

В стра́сти безче́стия впадо́х, ското́м, Спа́се, уподо́бихся, и омрачи́вся не ви́жду жда́ния Твоего́ сло́ве, долготерпели́внаго: обраще́ния ми вре́мя да́руй. И спаси́ мя.

В ле́ности житие́ мое́ сконча́х, де́я я́же не ле́ть е́сть твори́ти, и се́ ны́не про́чее ко врато́м приближа́юся а́довым, не прие́мля чу́вства: не пре́зри мя́, Христе́, и́же еди́н сы́й бла́г.

Му́ченичен: Вожделе́вше жи́зни ве́чныя ми́рови умертви́стеся, прему́дрии: и врага́ умертви́вше коне́чне, к небесе́м возлете́сте, о на́с страда́льцы при́сно моля́щеся.

Му́ченичен: Разреши́вшеся от ну́жд теле́сных, разреши́сте пре́лести у́зы, и ко Христу́ кре́пкою любо́вию му́ченицы ду́шы привяза́сте, связа́вшемуся пло́тию, и разруши́вшему кля́тву.

Богоро́дичен: Сви́ток но́в проро́к Тебе́ предви́дев, в не́мже написа́ся сло́во О́тчее. Те́мже, Чи́стая, молю́ся: в кни́зе мне́ живы́х написа́тися моли́, мно́гих мои́х зо́л разоря́ющи написа́ние.

И́н Ирмо́с: Пе́щь о́троцы огнепа́льну дре́вле росоточа́щу показа́ша, еди́наго Бо́га воспева́юще и глаго́люще: превозноси́мый отце́в Бо́г и препросла́влен.

Да́руй ми́ ту́чи сле́з моли́твами Твои́ми: и́же благоутро́бия бе́здну ре́чными струя́ми измы́вый, Предте́че, и всего́ мя очи́сти скве́рны, пло́ти же и ду́ха.

Мольбу́ принеси́, блаже́нне, над все́ми Бо́гу на́шему, я́ко да и мене́ поми́лует я́ко благоутро́бен, мно́го согреша́ющаго, и возникнове́ния ны́не не иму́щаго.

Непло́дная душе́, потщи́ся пока́ятися, да не я́ко смоко́вницу Тя́ непло́дную Боже́ственный су́д посече́т из ко́рене, Влады́це возопи́й: Бо́же, очи́стив спаси́ мя.

Умерщвле́ну ду́шу мою́ име́яй злы́ми преступле́ньми, Тя́ умертви́вшую а́д рождество́м Твои́м, молю́ Влады́чице, покая́ния мя́ о́бразы оживи́.

Пе́снь 8

Ирмо́с: А́нгельми немо́лчно в вы́шних сла́вимаго Бо́га, небеса́ небе́с, земля́ и го́ры и хо́лми, и глубина́, и ве́сь ро́д челове́ческий, пе́сньми того́ я́ко Созда́теля и Изба́вителя благослови́те.

Преизъоби́льно наслади́вся вредя́щих сласте́й, умовре́дно несмы́сленный а́з, преидо́х вся́каго гре́шника: име́яй благоутро́бия премно́жество, пода́ждь ми́ очище́ние прегреше́ний.

Ны́не при две́рех Жени́х, свещу́ украси́, душе́, еле́ем напоя́ющи сию́ милосе́рдия, и вся́кими до́брыми де́лы: пре́жде да́же не затвори́тся две́рь, потщи́ся со Христо́м вни́ти в ра́дости неизрече́нней.

Му́ченичен: Не боя́щеся му́к, до́блии вопия́ху страда́льцы: се́ благоприя́тно вре́мя, ста́нем вси́ тве́рдым умо́м: стя́жим ма́лыми боле́зньми жи́знь неболе́зненную, и сла́дость нестаре́ющуюся.

Му́ченичен: Вода́ми Боже́ственными страстоте́рпцы Спа́совы наводня́еми при́сно, напоя́ете всю́ зе́млю подража́нием по́двигов ва́ших: и плодоно́сну сию́ доброде́тельми соде́ловаете о Христе́ во ве́ки.

Богоро́дичен: Богоро́дице, изве́стное предста́тельство, и наде́жда христиа́н, в де́нь стра́шный предста́ни ми́ прегреши́вшему мно́го: и изба́ви гее́нны стра́шныя, овца́м мя́ десны́м сочетава́ющи.

И́н Ирмо́с: Еди́наго безнача́льнаго Царя́ Сла́вы, его́же благословя́т небе́сныя си́лы, и трепе́щут чи́ни а́нгельстии, по́йте свяще́нницы, лю́дие превозноси́те его́ во ве́ки.

Уз разреши́ти ми ся мно́гих мои́х прегреше́ний, свя́зана бы́вша, и свя́занным разреше́ние пода́вшаго, моля́, Проро́че, Еди́наго Изба́вителя, да не престае́ши во ве́ки, при́сно Тя́ сла́вящаго.

Уязви́хся, Предте́че, сласте́й ору́жием, и в боле́зни се́рдца тебе́ взыва́ю: уврачу́й души́ моея́ боле́зни, Христа́ моля́, еди́наго Врача́ ду́ш же и теле́с.

Руко́ю Твое́ю, Предте́че, Его́же крести́л еси́ Сло́ва, не оскуде́й моли́ти непреста́нно, изба́вити мя́ от руки́ грехо́вныя, согреши́вшаго мно́го, и смире́ннаго и осужде́ннаго.

Я́ко погребо́х в земли́ безу́мно тала́нт, и́же ми́ от Бо́га вве́рен бы́сть, ожида́ю го́рькаго томле́ния: от него́же, Крести́телю, исхити́ мя моли́твами Твои́ми, ве́рно молю́ Тя́.

Богоро́дичен: Пребыла́ еси́ неопали́ма, прие́мши во утро́бе о́гнь нестерпи́мый, Де́во: те́мже исхити́ мя от огня́ негаси́маго, ороша́ющи мя́ ны́не, при́снаго покая́ния предо́брыми о́бразы.

Та́же, пе́снь Богоро́дицы: Вели́чит душа́ моя́ Го́спода: покло́ны.

Пе́снь 9

Ирмо́с: Безсе́меннаго Рождества́ зача́тие кто́ ска́жет от челове́к? нетле́ннаго Рождества́ рожде́нию кто́ не почуди́тся от земноро́дных? те́м Тя́ племена́ земна́я, Богоро́дице, велича́ем.

Да насле́дим бу́дущая блага́я, воспла́чем, воздохне́м, умо́лим Христа́, до́ндеже вре́мя и́мамы ве́рнии, покая́ния и моле́ния.

Я́ко ханане́а зову́ Ти: поми́луй мя́, Христе́, я́коже дре́вле нича́щую испра́ви мя́, Иису́се: и спаси́ мя, Спа́се, я́ко Петра́, грехи́ погружа́емаго.

Му́ченичен: Стесня́еми скорбьми́, темни́цами же и муче́ньми, страстоно́сцы му́ченицы, к простра́нству утеше́ния преидо́ша, от тесноты́ и от прегреше́ний на́с избавля́ют.

Му́ченичен: Земля́ у́бо покры́ ва́ша телеса́ ны́не, не́бо же держи́т святы́я ду́хи: при́сно престо́лу предстоя́ще сла́вы, со А́нгелы ра́дуются.

Богоро́дичен: Обле́кся в мя́ Госпо́дь, из Тебе́ про́йде, Пречи́стая: Того́ у́бо моли́, оде́ждею мя́ просвети́ти све́та, Де́во, совле́кшаго мя́ ны́не страсте́й вре́тища тяжча́йшаго.

И́н Ирмо́с: Нетле́ния искуше́нием ро́ждшая, и всехитрецу́ сло́ву пло́ть взаимода́вшая, Ма́ти неискусому́жная Де́во Богоро́дице: прия́телище нестерпи́маго. Село́ невмести́маго Зижди́теля Твоего́, Тя́ велича́ем.

От свяще́ннаго ко́рене, Проро́че, прозя́бл еси́, и зло́бное коре́ние все́ исто́ргл еси́, и́миже сподавля́ема и непотре́бна быва́ема посети́ мя, блаже́нне, и Боже́ственнаго покая́ния прозяба́ти плоды́ упра́ви мя́.

Красне́йшую го́рлицу, и сла́вия Тя́ це́рковь познава́ет, вели́кий Предте́че: покая́ния бо провозгласи́л еси́ пе́снь душа́м запусте́вшым, и злы́ми олядене́вшым. Те́мже ве́рою тя́ ублажа́ем.

Ты́ пути́ веду́щыя ко спаси́тельным вхо́дом все́м показа́л еси́, сла́вный Предте́че: и́миже ходи́ти мя́ укрепи́, все́ми жития́ безпу́тии блудя́щаго, пре́лестию же зло́бу соде́лавшаго.

Стра́шный при две́рех де́нь прибли́жися, и осужде́ния дела́ имы́й, рыда́ю: Го́споди, Го́споди, Еди́не Ми́лостиве, моли́твами Твоего́ Предте́чи, и все́х святы́х, неосужде́нна тогда́ покажи́ мя.

Богоро́дичен: Све́т ро́ждшая Боже́ственный богоблагода́тная, омраче́нную преступле́ньми ду́шу мою́ просвети́, молю́ся, и тьмы́ ве́чныя свобо́дна мя́ покажи́: я́ко да велича́ю Тя́ и сла́влю Присноблаже́нную.

Та́же, Досто́йно е́сть: и покло́н. Ектениа́, и свети́лен, и псалмы́ обы́чныя.

На стихо́вне стихи́ры покая́нны, гла́с 7:

Я́ко непло́дную смоко́вницу не посецы́ мене́, Спа́се, гре́шнаго: но на мно́га ле́та проще́ние ми́ да́руй, напая́я ду́шу мою́ слеза́ми покая́ния, да пло́д принесу́ Ти ми́лостыни.

Сти́х: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся: во вся́ дни́ на́шя возвесели́хомся: за дни́, в ня́же смири́л ны́ еси́, ле́та, в ня́же ви́дехом зла́я. И при́зри на рабы́ Твоя́, и на дела́ Твоя́, и наста́ви сы́ны и́х.

Я́ко со́лнце сы́й пра́ведное, просвети́ сердца́ пою́щих Тя́: Го́споди, сла́ва Тебе́.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Посреде́ суди́ща законопресту́пных ра́дующеся вопия́ху страстоно́сцы Твои́: Го́споди, сла́ва Тебе́.

Сла́ва, и ны́не, Богоро́дичен: Све́т, Христе́, прозя́бл еси́ от Де́вы, и просвети́л еси́ ро́д челове́ческий: Го́споди, сла́ва Тебе́.

Та́же, Бла́го е́сть: Трисвято́е. По О́тче на́ш: тропа́рь, ектениа́, и ча́с 1-й, и отпу́ст.

Во вто́рник блаже́нны, гла́с 7:

Красе́н бе́ и до́бр в сне́дь, и́же мене́ умертви́вый пло́д: Христо́с е́сть дре́во живо́тное, от него́же яды́й не умира́ю, но вопию́ с разбо́йником: помяни́ мя, Го́споди, во Ца́рствии Твое́м.

Сти́х: Блаже́ни и́згнани пра́вды ра́ди, я́ко те́х е́сть Ца́рство Небе́сное.

Стру́пы моего́ се́рдца неисце́льныя, Го́споди, уврачу́й, я́ко Еди́н Вра́чь ду́ш же и теле́с: и ступа́ти ми́ пра́во всегда́ поспе́й во спаси́тельныя пути́.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л, на вы́ лжу́ще Мене́ ра́ди.

Предтеки́й пра́ведному со́лнцу, Христо́в Крести́телю, свети́льник души́ моея́ угаше́ный мно́гою зло́бою, возжзи́ Боже́ственными моли́твами твои́ми, я́ко да ублажа́ю Тя́ всегда́ спаса́емь.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

Му́ченичен: Страда́вше и венча́ни бы́вше, врага́ посрами́ли есте́, и ны́не жи́тельствуете на Небесе́х, све́та непристу́пнаго исполня́еми прему́дрии му́ченицы, моля́щеся о душа́х на́ших.

Сла́ва: Уврачу́й души́ моея́ стра́сти неисце́льныя, Боже́ственная Тро́ице: и исхити́ мя гее́нны, и искуше́ний, я́же во еди́ном Божестве́ сла́вимая благоче́стно: и ве́чнующее ми́ Ца́рство да́руй.

И ны́не: Вмести́ла еси́ нетесноме́стно во чре́ве невмести́маго: его́же всегда́ моли́, Ма́ти Чи́стая, тесноты́ вся́кия и страсте́й наведе́ния изба́вити рабы́ Твоя́, любо́вию Тя́ сла́вящыя.

Во вто́рник ве́чера

на Го́споди, воззва́х, стихи́ры кре́стны. Гла́с 7:

Подо́бен: Не ктому́ возбраня́еми есмы́:

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

Дре́во изгна́ мя дре́вле из рая́, ны́не же дре́во к раю́ возведе́, Тебе́ распе́ншуся, Христе́.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Чу́до стра́шно, созда́нию ка́ко созда́тель предстоя́, осужда́емь е́сть, и распина́емь, на спасе́ние челове́ков!

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Кре́сте Христо́в, А́нгел святы́х чу́до, диа́волу же и бесо́м вели́кая я́зва, спаса́й рабы́ Твоя́.

Та́же мине́и стихи́ры свято́му. Сла́ва, свято́му, а́ще и́мать: И ны́не, крестоБогоро́дичен гла́са. А́ще ли не́сть мине́и, и́ны стихи́ры Богоро́дицы, гла́с 7: Подо́бен: Дне́с бди́т Иу́да:

Сти́х: Я́ко у Го́спода ми́лость, и мно́гое у него́ избавле́ние, и то́й изба́вит Изра́иля от все́х беззако́ний его́.

Ви́дящи просте́рта на дре́ве А́гнца, нескве́рная А́гница и Де́ва, посреде́ двою́ разбо́йнику, увы́ мне́, вопия́ше, сладча́йшее Мое́ Ча́до! Что́ стра́нное сие́, и пресла́вное та́инство? Ка́ко Тя́ беззако́нный собо́р на Кре́ст воздви́же, и же́лчию напои́, ма́нны насы́тившаго челове́ки?

Сти́х: Хвали́те Го́спода вси́ язы́цы, похвали́те Его́ вси́ лю́дие.

Егда́ Тя на Кресте́ пригвожде́на Де́ва и Ма́ти Твоя́ узре́, Христе́ мо́й, судо́м законопресту́пным, от иуде́й на ме́сте ло́бнем: увы́ Мне́, вопия́ше, Сы́не Мо́й любе́знейший! Что́ стра́нное виде́ние се́? Ка́ко Тя́ ко Кресту́ пригвожда́ют де́ти неразу́мныя евре́йския, все́х Го́спода?

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Еди́ну Тя́, Всесвята́я Влады́чице, по рождестве́ позна́хом вси́ Де́ву я́вльшуюся, и Его́же без се́мене ро́ждши, на дре́ве ви́дящи ру́це свои́ во́лею пригвозди́вшаго, Пречи́стая пла́чущи взыва́ше: во́лею, Долготерпели́ве, умира́еши, избавля́я все́х от сме́рти пою́щих Тя́.

Сла́ва, и ны́не, КрестоБогоро́дичен: Влады́чице всесвята́я Де́во, ро́ждшая Го́спода, за милосе́рдие на Кресте́ пригвозди́вшагося, и жи́зни струи́ источи́вшаго ми́ру, Того́ умоли́ спасти́ся душа́м на́шым. Тебе́ бо еди́ну и́мамы ве́рнии прибе́жище, сте́ну и заступле́ние: те́мже и притека́ем к покро́ву Твоему́.

Та́же, Све́те ти́хий: Проки́мен дне́. И Сподо́би, Го́споди, в ве́чер се́й:

На стихо́вне стихи́ры кре́стны, гла́с 7:

Не ктому́ возбраня́еми есмы́ дре́ва живо́тнаго, упова́ние иму́ще Кре́ст Тво́й, Го́споди, сла́ва Тебе́.

Сти́х: К Тебе́ возведо́х о́чи мои́ живу́щему на Небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны́.

Пове́шен бы́в на Дре́ве, Безсме́ртне, разруши́л еси́ се́ти диа́воли, Го́споди, сла́ва Тебе́.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих, и уничиже́ния го́рдых.

Му́ченичен: Неради́вше о все́х земны́х, святи́и му́ченицы, и на суди́щи Христа́ му́жески пропове́давше, возме́здия о му́ках от него́ прия́сте: но я́ко иму́ще дерзнове́ние, Того́ умоли́те, я́ко всеси́льнаго Бо́га, ду́шы на́шя спасти́, притека́ющих к ва́м, мо́лимся.

Сла́ва, и ны́не, КрестоБогоро́дичен: Своего́ Сы́на на Дре́ве ви́дящи дре́вле, се́рдце Твое́ ору́жием печа́ли уязвля́ше, Пречи́стая.

Та́же, Ны́не отпуща́еши: Трисвято́е. По О́тче на́ш: тропа́рь, ектениа́ и отпу́ст.

Во вто́рник на повече́рии

кано́н Пресвяте́й Богоро́дице. Гла́с 7:

Пе́снь 1

Ирмо́с: Ма́нием Твои́м на земны́й о́браз преложи́ся, пре́жде удоборазлива́емое водно́е естество́, Го́споди: те́мже немо́кренно пешеше́ствовав Изра́иль, пое́т Тебе́ пе́снь побе́дную.

Уста́ви бу́рю сласте́й, и страсте́й мои́х, тишино́ю Боже́ственныя Твоея́ мольбы́, Пренепоро́чная: я́ко да ти́хим се́рдцем Твое́ славосло́влю неизглаго́ланное Рождество́.

Все́ жела́ние и сла́дость спасе́ния Рождество́м Твои́м бы́сть, Богоро́дице Влады́чице: вся́ку го́ресть отгоня́й, е́же от страсте́й прегреше́ний, рабо́м Твои́м.

Сла́ва: Изба́ви мя́, Пречи́стая, бесо́вския пре́лести, озлобле́ния же и вре́да, и искуше́ния: да ве́рою Тя́ сла́влю, су́щую по Бо́зе засту́пницу и покро́в мо́й.

И ны́не: Яви́лся еси́ при купине́ Моисе́ю, Бо́жий Сло́ве, я́ко о́гнь попаля́я, и не опаля́я же отню́д, е́же от Де́вы Рождество́ Твое́ вообража́я: Ея́же ра́ди челове́ка вообрази́л еси́.

Пе́снь 3

Ирмо́с: В нача́ле небеса́ всеси́льным Сло́вом Твои́м утвержде́й, Го́споди Спа́се, и вседе́тельным и Бо́жиим Ду́хом, всю́ си́лу и́х: на недви́жимем мя́ ка́мени испове́дания Твоего́ утверди́

Возне́сшагося на Кре́ст, и низло́жшаго а́да, Богоро́дице, Сего́ приле́жно моли́ о ве́рно пою́щих Тя́ всегда́ гла́сы и пе́сньми свяще́нными, наде́жде ми́ра, и ве́рных заступле́ние.

Вы́шшая небе́с, и сла́внейшая херуви́м, заче́нши родила́ еси́ Бо́га: те́мже моли́ Его́, прегреше́ний изба́вити мя́, и осужде́ния стра́шнаго, Твое́ю милосе́рдою мольбо́ю, и па́че сло́ва си́лою Твое́ю.

Сла́ва: Измени́вшая челове́ки от тли́ сме́рти, Рождество́м Твои́м, Влады́чице, тле́ния мя́ страсте́й и неду́г изба́ви, и прегреше́ний лю́тых: и живо́т нестаре́ющийся да́руй ми́, Боже́ственным хода́тайством Твои́м.

И ны́не: Неизме́нно челове́ком уподо́блься по всему́, Бо́жий Сло́ве, от Де́вы Чи́стыя проше́л еси́ я́ве, и все́м яви́л еси́ Богонача́лие Трисве́тлое, в неразли́чне Существе́, неизме́нных Ипоста́сех.

Пе́снь 4

Ирмо́с: О́тча не́дра не оста́вль, и соше́д на зе́млю, Христе́ Бо́же, та́йну услы́шах смотре́ния Твоего́, и просла́вих Тя́, Еди́не Человеколю́бче.

Ми́лость Твою́ и милосе́рдие на рабы́ Твоя́, Чи́стая, простри́, при́сно моля́щыя Тя́, стра́шныя му́ки избавля́ющи моли́твами Твои́ми.

Чи́стою моли́твою, и те́плою ве́рою, к Тебе́ прибега́ю, Пренепоро́чная: Ты́ бу́ди очисти́лище мно́гих прегреше́ний мои́х, избавля́ющи и спаса́ющи мя́.

Сла́ва: Ра́дости на́шея Хода́таица Пречи́стая, Твои́м Рождество́м яви́ся Влады́чице: Сего́ моли́, Пренепоро́чная, напа́стей изба́вити, и ве́чныя жи́зни сподо́бити мя́.

И ны́не: О́тческих не́др не отлу́чься, и от Де́вы вопло́щься, Христе́ Бо́же, сохрани́ ста́до Твое́, смотре́ния Твоего́ покланя́ющееся Боже́ственным образо́м.

Пе́снь 5

Ирмо́с: Но́щь несветла́ неве́рным, Христе́, ве́рным же просвеще́ние в сла́дости слове́с Твои́х. Сего́ ра́ди к Тебе́ у́треннюю, и воспева́ю Твое́ Божество́.

Тя́ молю́, Де́во Чи́стая, от мра́чнаго греха́ ду́шу мою́ изба́вити, и озари́ти Боже́ственною заре́ю покая́ния ми́лости Твоея́.

Су́щыя в пучи́не лю́тых напа́стей, и ну́жных страсте́й, Пресвята́я Чи́стая, Твои́ми моли́твами и мольба́ми изба́ви, и спаси́ хва́лящих Тя́.

Сла́ва: Я́же Бо́га заче́нши во утро́бе деви́честей, и ро́ждши, Богоро́дице Пресвята́я, Тя́ пою́щыя от вся́каго изба́ви ве́чнаго осужде́ния.

И ны́не: Ве́дуще Бо́жию Тя́ Ма́терь, Чи́стая, и засту́пницу на́шу, Тя́ хода́таицу предлага́ем спасе́ния на́шего ко Ще́дрому Го́споду.

Пе́снь 6

Ирмо́с: Возопи́х, Го́споди, внегда́ скорбе́ти ми́, к Тебе́, и возве́л еси́ живо́т мо́й, Многоми́лостиве.

Твоего́ Сы́на, Влады́чице, вознесе́ннаго на Кре́ст, и изба́вльшаго челове́ки от тли́, умоли́ спасти́ся на́м.

Пречи́стая Влады́чице, не оста́ви мене́, на Тя́ упова́ющаго: но Твою́ ускори́ по́мощь.

Сла́ва: От печа́ли изба́ви призыва́ющих Твое́ Боже́ственное и́мя, и стра́шныя свободи́ му́ки.

И ны́не: Пречи́стая Влады́чице, наде́ждо тве́рдая, любо́вию. пою́щыя Тя́, я́ко и́стинную Богоро́дицу, сохрани́.

Та́же, Го́споди, поми́луй. три́жды. Сла́ва, и ны́не:

Седа́лен, гла́с 7:

Распе́ншагося на́с ра́ди Христа́ Бо́га, и низло́жшаго сме́рти держа́ву, непреста́нно моли́, Богоро́дице Де́во, да спасе́т ду́шы на́шя.

Пе́снь 7

Ирмо́с: Пе́щь о́троцы огнепа́льну дре́вле росоточа́щу показа́ша, Еди́наго Бо́га воспева́юще, и глаго́люще: превозноси́мый отце́в Бо́г и препросла́влен.

В недове́дении и печа́ли сы́й, и в беда́х, Пречи́стая, Тя́ призыва́ю те́пле от се́рдца моего́: предвари́, и изба́ви мя́, и пода́ждь, Чи́стая, утеше́ние мне́.

Прегреше́ний мно́гих, и страсте́й треволне́ния обурева́ют мя́, и ко глубине́ поги́бели низво́дят: да́ждь мне́ ру́ку, Богоро́дице, и спаси́, и поми́луй мя́ си́лою Твое́ю.

Сла́ва: Твою́ Ма́терь привожду́ Ти в моли́тву, Спа́се Человеколю́бче: ю́же прие́м изба́ви мя́ прегреше́ний и бу́дущаго суда́, и ве́чнующаго изми́ муче́ния.

И ны́не: Умерщвле́ну ду́шу стяжа́в лю́тыми преступле́ньми, Тя́ молю́, Влады́чице, умори́вшую а́д Рождество́м Твои́м, покая́ния о́бразы оживи́ мя.

Пе́снь 8

Ирмо́с: Вои́стинну Су́щаго Бо́га, и все́х существа́ вино́внаго, Христа́ превозно́сим, и славосло́вим во вся́ ве́ки.

Спаси́ мя, Пречи́стая, от бе́д, и тли́, и страсте́й: к Тебе́ бо прибега́ю мое́й наде́жде, и Боже́ственному спасе́нию.

В ча́с коне́чный, от клеветни́к лю́тых изъе́мши, Влады́чице Де́во, к Боже́ственному жили́щу Сама́ наста́ви мя́.

Сла́ва: Возни́кни, о душе́, Богоро́дице припа́дающи возопи́й: Наде́жде и Спасе́ние все́х, огня́ ве́чнаго изба́ви мя́.

И ны́не: Еди́ну в жена́х Благослове́нную Де́ву воспои́м, Христа́ превозноша́юще и славосло́вяще во вся́ ве́ки.

Пе́снь 9

Ирмо́с: Ма́ти Бо́жия и Де́ва, ро́ждшая, и де́вствующая па́ки, не естества́ де́ло, но Бо́жия снизхожде́ния: те́м я́ко Еди́ну, Бо́жиих чуде́с сподо́бльшуюся, Тя́ при́сно велича́ем.

Богоро́дица прино́сит Ти́ мольбу́ о мне́, Влады́ко Христе́, ю́же прии́м, изба́ви мя́ от вся́кия му́ки.

Всегда́ молю́ Тя, Влады́чице: смире́нную изба́ви ду́шу мою́, бу́дущаго суда́ и му́ки.

Сла́ва: Творца́ моего́ и Зижди́теля моли́, Де́во, стра́шнаго изба́вити мя́ суда́, и жи́знь дарова́ти ми́.

И ны́не: Всенепоро́чная Ма́ти Де́во Чи́стая, душе́вных скве́рн изба́ви Твое́ ста́до, Тебе́ велича́ющее.

Та́же, Досто́йно е́сть: Трисвято́е. По О́тче на́ш: тропари́ и про́чее обы́чно, и отпу́ст.

Среда

В сре́ду у́тра

по 1-м стихосло́вии, седа́льны кре́стны, гла́с 7:

Це́рковь вопие́т Ти́, Христе́ Бо́же, в пе́вке, и ке́дре, и кипари́се покланя́ющися Тебе́: побе́ды ве́рным да́руй, Богоро́дицы ра́ди, и поми́луй на́с.

Сти́х: Возноси́те Го́спода Бо́га на́шего, и покланя́йтеся подно́жию но́гу Его́, я́ко свя́то е́сть.

И́же мене́ ра́ди претерпе́вый, е́же на Кресте́ пригвожде́ние, приими́ мое́ бо́дренное хвале́ние, Христе́ Бо́же, и спаси́ мя.

Сла́ва, и ны́не, КрестоБогоро́дичен: Распе́ншагося на́с ра́ди Христа́ Бо́га, и низложи́вшаго сме́рти держа́ву, непреста́нно моли́, Богоро́дице Де́во, да спасе́т ду́шы на́шя.

По 2-м стихосло́вии, седа́льны кре́стны, гла́с 7:

Огня́ светле́йшее, и пла́мене де́йственнейшее дре́во показа́л еси́, Христе́, Креста́ твоего́, попаля́ющее грехи́ челове́ков, и просвеща́ющее сердца́ пою́щих во́льное Твое́ распя́тие: Христе́ Бо́же, сла́ва Тебе́.

Сти́х: Бо́г же Ца́рь на́ш пре́жде ве́ка, соде́ла спасе́ние посреде́ земли́.

Облада́яй безпло́тными си́лами, и све́дый души́ моея́ ле́ностное, Кресто́м Твои́м спаси́ мя, Христе́ Бо́же, я́ко Человеколю́бец.

Сти́х: Ди́вен Бо́г во святы́х Свои́х, Бо́г Изра́илев.

Му́ченичен: Ра́дуйтеся пра́веднии, да веселя́тся небе́сная: на земли́ бо му́ченицы подвиза́вшеся, врага́ попра́ша: да игра́ет Це́рковь победи́тельная, пра́зднующи подвигополо́жнику еди́ному, и победотво́рцу Христу́ Бо́гу, подаю́щему ми́рови ве́лию ми́лость.

Сла́ва, и ны́не, КрестоБогоро́дичен: Егда́ зря́щи Тя́, Го́споди, Де́ва, распина́ема, пла́чущи вопия́ше Ти́: воспева́ю Твое́ неизрече́нное, о Сы́не Мо́й, долготерпе́ние, и е́же к челове́ком кра́йнее и Боже́ственное соше́ствие.

По 3-м стихосло́вии седа́льны, гла́с 7:

Распе́ншуся Ти́, Влады́ко Христе́, вра́г свя́зан бы́сть, и сме́рть умертви́ся: ду́шы, я́же во а́де в преиспо́дних содержи́мыя, от у́з разреша́хуся.

И́же на́с ра́ди во́льное прие́мый распя́тие, сокруши́ враги́ неве́дущыя Тя́ Бо́га и́стиннаго, и спаси́ на́с.

Сла́ва, и ны́не, КрестоБогоро́дичен: Кресто́м Сы́на Твоего́ при́сно соблюда́еми, Де́во, прило́г бесо́вских избега́ем: те́мже Тя́ по до́лгу воспева́юще сла́вим, Богоро́дице Всепе́тая.

Кано́н Честно́му и Животворя́щему Кресту́ Госпо́дню, [его́же краегране́сие: Кре́ст насажде́ный пре́лесть исто́ргий.] Творе́ние ки́р Ио́сифово. Гла́с 7:

Пе́снь 1

Ирмо́с: Ма́нием Твои́м на земны́й о́браз преложи́ся, пре́жде удоборазлива́емое водно́е естество́, Го́споди: те́мже немо́кренно пешеше́ствовав Изра́иль, пое́т Тебе́ пе́снь побе́дную.

Распя́тие Влады́ка поноша́емь терпи́т, челове́ков оте́мля поноше́ния, я́ко Человеколю́бец: копие́м в ре́бра пробода́ется, си́м закала́я врага́ бори́теля.

Я́коже лу́к напря́г Кре́ст Тво́й, Ми́лостиве, стрела́ми уязви́л еси́ гвозде́й сопротивобо́рца, Спа́се, и от него́ дре́вле уязвле́ныя челове́ки исцели́л еси́.

Му́ченичен: Кровьми́ святы́х, ме́рзкая крове́й преста́ша скверне́ния, и́долом приноси́мая: вся́ же земля́ освяти́ся, те́х хвала́ми при́сно ублажа́ющи.

Му́ченичен: Воспе́ша си́лы небе́сныя, земны́х зря́ще в телеси́ со безпло́тными борю́щихся: отню́дуже подвигополо́жник си́х венцы́ побе́ждших венча́.

Богоро́дичен: Раздра́ся рукописа́ние Ада́мово, вопия́ше Пречи́стая Влады́чица, копие́м Сы́не прободе́ну Ти́ бы́вшу: те́мже воспева́ю Твое́ страда́ние, все́м источи́вшее безстра́стие, Влады́ко. Други́й кано́н пресвяте́й Богоро́дице: творе́ние Ио́сифово. Гла́с 7:

Ирмо́с то́йже.

Пою́щыя, Богоро́дице, вели́чия Твоя́ любо́вию, Твоя́ снабди́ лю́ди, и от вре́да изба́ви: Ты́ бо все́х еси́ Предста́тельница и Наста́вница, Чи́стая, и утвержде́ние.

Во́ду безсме́ртия ро́ждши, Де́во, исцеле́ния во́ды на́м пода́ждь, вся́ смертоно́сныя стра́сти ду́ш на́ших и теле́с омыва́ющи.

Честно́е, Влады́чице Богора́дованная, селе́ние яви́лася еси́ поче́тшаго естество́ пра́отца: те́мже Тя́, Чи́стая, мо́лим, вся́каго безче́стия страсте́й изба́ви на́с.

Со́лнце пра́вды ро́ждши ми́рови, тьму́ отжени́ от воспева́ющих Тя́ ве́рою, Отрокови́це, во светоза́рнем Твое́м се́м и святе́м хра́ме, Всенепоро́чная.

Пе́снь 3

Ирмо́с: В нача́ле небеса́, всеси́льным Сло́вом Твои́м утвержде́й, Го́споди Спа́се, и вседе́тельным и Бо́жиим Ду́хом, всю́ си́лу и́х: на недви́жимем мя́ ка́мени испове́дания Твоего́ утверди́.

Пропны́й не́бо я́ко ко́жу, на дре́ве распросте́рл еси́ ру́це, Иису́се, руки́ неудержа́ние Ада́мова греха́ исцеля́я, я́ко ми́лостив, и исхища́я все́х от руки́ льсти́ваго борца́.

Тебе́ те́рнием, Царю́, лю́дие законопресту́пнии венчава́ют, сла́вою венча́вшаго челове́ки, и преслуша́ния Ада́мова те́рние искорени́вшаго, Христе́, и насади́вшаго все́м богоразу́мия прозябе́ние.

Му́ченичен: Естество́м су́ще сме́ртни, безсме́ртию в то́м поучи́тися изво́листе, прему́дрии: те́мже ра́ны и ско́рби, му́ченицы, гоне́ния же, бие́ния, и удо́в отсече́ния, вся́ ра́дующеся, претерпе́сте.

Му́ченичен: Тве́рдым по́мыслом, потреби́ти вся́ претя́щаго льсти́ваго врага́ вы́ страда́льцы смири́сте, смири́вшеся о Христе́, и вознесо́стеся держа́вою Боже́ственною, на того́ вооружи́вшеся.

Богоро́дичен: Во́лею закла́наго А́гнца на стра́сть прише́дша, зря́щи Ма́ти и А́гница, сле́з исто́чники пролива́еши, глаго́лющи: что́ сие́ Ча́до Свяще́нное, ка́ко умерщвля́ешися, оживи́ти вся́ уме́ршыя промышля́я?

И́н Ирмо́с то́йже.

Да́ждь рабо́м Твои́м, Чи́стая, спаси́тельная проше́ния, в Боже́ственнем Твое́м се́м хра́ме, в не́мже исто́чник чуде́с показа́ла еси́: источа́я при́сно наи́тием Боже́ственным, и ве́чнаго изба́ви муче́ния.

Ми́лостей бе́здну Христа́ па́че вины́ и сло́ва, да́теля все́х благи́х ро́ждши, Чи́стая, Боже́ственный хра́м Тво́й се́й показу́еши вои́стинну, осене́нием твои́м Боже́ственным, вся́ческих страсте́й очище́ние.

Благослове́н пло́д Твоего́ чре́ва, Де́во Богоро́дице, все́х ра́досте: ра́дость бо всему́ ми́ру родила́ еси́, и весе́лие вои́стинну, Человеколю́бца, разгна́вши печа́ль грехо́вную, Богоневе́сто.

Ковче́же мы́сленный, я́же нетле́нную ма́нну ро́ждшая ми́ру вои́стинну, посреде́ на́с, Де́во, прииди́ в ча́с се́й, и вся́кия на́с измени́ скве́рны, чи́сте Тебе́ ублажа́ющих.

Пе́снь 4

Ирмо́с: О́тча не́дра не оста́вль, и соше́д на зе́млю, Христе́ Бо́же, та́йну услы́шах смотре́ния Твоего́, и просла́вих Тя́, Еди́не Человеколю́бче.

На земли́ челове́к я́влься, небе́сныя челове́ки соверши́л еси́, вознесе́н бы́в на дре́во, Влады́ко, вся́ совозне́сл еси́ воспева́ющыя Твоя́ страда́ния.

За сме́ртных умира́еши, Животе́, за непра́ведныя, Иису́се мо́й пра́ведный, стра́сть терпи́ши поно́сную: пое́м, Долготерпели́ве, безме́рное благоутро́бие Твое́.

Му́ченичен: Звере́й устремле́ния, вре́ния о́гненная, ру́к же и но́г отсече́ния, исторга́ния удо́в, и вся́ческую ину́ю му́ку претерпе́сте му́ченицы, хода́тайствующую Боже́ственное наслажде́ние.

Му́ченичен: От теле́сных коне́ц страда́льцы, ко Христу́ все́х Бо́гу зову́ще, услы́шани бы́сте, и на ка́мень вознесо́стеся Боже́ственнаго ны́не соверше́ния.

Богоро́дичен: Мольбу́ о на́с к воплоще́нному из Тебе́, Богоро́дице, сотвори́, я́ко да обря́щем по́мощь во вре́мя напа́сти, и́же Того́ стра́сти сла́вящии.

И́н Ирмо́с то́йже.

Тя́ Авваку́м го́ру дре́вле возгласи́в, Пречи́стая Богоро́дице, доброде́тельми приосене́нную, все́х, Влады́чице, осеня́ющую, от опале́ния зло́бы нача́льнаго борца́.

Моле́ние Го́споду принеси́, воплоще́нному из Твои́х, Влады́чице, пречи́стых крове́й, спасти́ лю́ди Твоя́ вся́каго вре́да, Тебе́ по до́лгу блажа́щыя.

Твоя́ пресла́вная сия́ богоблагода́тная Це́рковь бы́сть во исцеле́ние ду́ш же и теле́с: уставля́ет бо вся́ку боле́знь, и очища́ет от страсте́й ве́рно Тебе́ блажа́щыя.

Посеще́нием Твои́м, Де́во, спаси́ те́плым и честны́м, все́х с любо́вию прибега́ющих, Влады́чице, к Твоему́ заступле́нию, посеща́й и дава́й я́же к жи́зни проше́ния.

Пе́снь 5

Ирмо́с: Го́споди, Бо́же мо́й, от но́щи у́треневав, Тебе́ молю́ся: пода́ждь ми́ оставле́ние прегреше́ний мои́х: и к све́ту Твои́х повеле́ний пути́ моя́ напра́ви, молю́ся.

Распя́тие прия́т во злы́х отя́тие, Бо́жий Сло́ве, же́лчи же вкуси́л еси́, сла́достнаго бра́шна го́рький вре́д потребля́я. Сла́ва мно́гому благоутро́бию Твоему́.

И́же на Кресте́ воздви́жением Твои́м, всю́ зе́млю поколеба́л еси́ Боже́ственною Твое́ю держа́вою, и исцеля́еши ея́, Влады́ко, сокруше́ния, и коле́блемая сердца́ к Твоему́ утвержда́еши позна́нию.

Му́ченичен: Распросте́р велиа́р всю́ду се́ти зло́бныя, но не объя́л е́сть Христо́вы му́ченики: криле́ бо прие́мше о́гненныя, ко оби́телем Боже́ственным достиго́ша.

Му́ченичен: Ма́нием неоску́дным от Бо́га обожа́еми страстоте́рпцы, боле́зненных муче́ний отню́д не устраши́стеся, я́коже ино́му стра́ждущу, си́це прему́дрии са́ми пребы́сте.

Богоро́дичен: Ки́има очи́ма воззрю́, О́ко изсуша́ющее вся́ бе́здны, Сы́не Мо́й, угаша́емое, на Кресте́ ви́сящу Ти́? Чи́стая Де́ва вопия́ше, рыда́ньми Себе́ смуща́ющи.

И́н Ирмо́с: Но́щь несветла́ неве́рным, Христе́, ве́рным же просвеще́ние в сла́дости слове́с Твои́х: сего́ ра́ди к Тебе́ у́тренюю, и воспева́ю твое́ Божество́.

Отягче́нных сно́м грехо́вным, Чи́стая, бо́дры творя́щи, оба́че же в пречестне́м хра́ме Твое́м, Твое́ю бо́дренною Боже́ственною моли́твою на́с уще́дри, Богоневе́сто.

Да́ждь, Чи́стая, все́м на́м ру́ку по́мощи к Тебе́ прибега́ющым, и отмы́й вся́кия зло́бы скве́рну, и боле́зни очи́сти моли́твами Твои́ми.

Я́же Бо́га заче́нши во утро́бе деви́честей, и ро́ждши, Богоро́дице Пречи́стая, Тя́ пою́щих изба́ви вся́каго ве́чнаго осужде́ния.

В хра́м Тво́й ве́рою приходя́щих ду́шы обновля́ются обетша́вшыя грехми́, и по до́лгу Тя́ вси́, Пренепоро́чная, сла́вят.

Пе́снь 6

Ирмо́с: Пла́вающаго в молве́ жите́йских попече́ний, с корабле́м потопля́ема грехи́, и душетле́нному зве́рю примета́ема, я́ко Ио́на, Христе́, вопию́ Ти: из смертоно́сныя глубины́ возведи́ мя.

Изба́вителю сы́й Еди́не, це́ну Твою́ вда́л еси́ спаси́тельную Кро́вь, и искупи́л еси́ плене́ныя ны́, Преблаги́й, и Твоему́ Роди́телю приве́л еси́, уби́в Кресто́м, Христе́, мучи́теля.

Невоздержа́нием дре́вле паде́ние лю́тое подъя́х, Христо́с же воздвиза́емь на дре́во, ру́це просте́р, па́дшаго мя́ воздви́же, и уязви́вся во́лею, вся́ моя́ я́звы я́ве исцели́.

Му́ченичен: Дрема́нием пре́лести отню́д не воздрема́вшеся, вся́ко устремле́ние успи́сте мучи́телей, му́ченицы: и и́же пра́ведным прили́чным сно́м у́спше блаже́ннии, бо́дреннии о все́х моли́твенницы бы́сте.

Му́ченичен: Утвержде́ни на ка́мени Боже́ственных Христо́вых повеле́ний, вра́жиими ко́зньми непревра́тни пребы́сте всесла́внии му́ченицы: и того́ нога́ми попра́сте богому́дренно, к Бо́гу боголе́пне ше́ствующе.

Богоро́дичен: Ю́но отроча́ ражда́еши, Богоро́дице, пре́жде ве́к безле́тно Отцу́ сразумева́емаго, обновля́ющаго Кресто́м челове́чество, обетша́вшее грехми́ злонача́льнаго сове́том, Пренепоро́чная.

И́н Ирмо́с: Ио́на из чре́ва а́дова вопия́ше: возведи́ от тли́ живо́т мо́й. Мы́ же Тебе́ вопие́м: Всеси́льне Спа́се, поми́луй на́с.

Еди́на на́м спасе́ния источи́ла еси́ во́ду, Еди́на Чи́стая, распале́ние пре́лести изсуши́вши, ороша́еши ра́зум и́стинный рабо́м Твои́м.

Одушевле́нный Бо́га на́шего гра́де, ста́до Твое́ от безбо́жных ва́рвар, тру́са же и ну́жди, и вся́ческаго искуше́ния свободи́.

Я́звы ду́ш на́ших, Богоро́дице, отжени́, моли́тв Твои́х окропле́нием, и теле́сныя неду́ги: да Боже́ственными гла́сы воспева́ем Тя́.

Я́же разреши́вшая от боле́зней, Де́во, Е́ву, Рождество́м Твои́м Пречи́стым, Отрокови́це, разреши́ ми боле́зни стра́стныя души́ же и телесе́.

Пе́снь 7

Ирмо́с: Пе́щь о́троцы огнепа́льну дре́вле росоточа́щу показа́ша, Еди́наго Бо́га воспева́юще, и глаго́люще: превозноси́мый отце́в Бо́г и препросла́влен.

Неболе́зненную обре́те жи́знь пра́отец, Тебе́ во́лею поболе́вшу на Кресте́ и ме́ртву бы́вшу, и зми́я умертви́вшу, Иису́се Христе́ Многоми́лостиве.

Зако́нныя кля́твы изба́вихомся вси́: Законода́вец бо воздви́жеся на Кре́ст, благослове́ние приснотеку́щее и благода́ть, и ми́лость, и тле́нию источи́в потребле́ние.

Му́ченичен: Во́льными устремле́ньми приступа́юще к муче́нием му́ченицы, во́лею пострада́вшаго вообража́ху: от него́же венча́вшеся, со А́нгелы ны́не ликовству́ют.

Му́ченичен: Те́ло преда́вше разли́чным му́кам, прехва́льнии му́ченицы, кро́вными пролия́нии безпло́тныя враги́ удави́сте, и исто́чники исцеле́ний источа́ете.

Богоро́дичен: Ка́ко не воспла́чуся, Сладча́йшее Ча́до, на Кресте́ зря́щи Тя́? ка́ко не возрыда́ю непра́ведно Тебе́ стра́ждуща, Судие́ Пра́веднейший? Де́ва Ма́ти веща́ше.

И́н Ирмо́с то́йже.

О́гнь ро́ждшая Боже́ственный, Де́во, хвра́стныя попали́ стра́сти воспева́ющих Тя́, Всепе́тая, и све́том озари́ покая́ния все́х, мо́лимся.

Нетле́нная Отрокови́це, от тли́ на́с изба́ви: Бо́жия пала́то одушевле́нная, хра́мы на́с покажи́ Боже́ственнаго ду́ха, в Це́ркви Твое́й непреста́нно ве́рою пою́щих Тя́.

Струи́ излива́еши исцеле́ний все́м, исто́чник бо жи́зни родила́ еси́: и те́плою, Богоро́дице, моли́твою Твое́ю, сие́ Твое́ ста́до очи́сти от скве́рны, Богоневе́сто.

О́бразы вси́ Боже́ственнаго Твоего́ Рождества́, Боже́ственнии проро́цы ви́девше, ра́достно воспева́ху, вопию́ще: препе́тый отце́в Бо́же благослове́н еси́.

Пе́снь 8

Ирмо́с: Неопа́льная огню́ в Сина́и прича́щшаяся Купина́, Бо́га яви́ медленоязы́чному и гугни́вому Моисе́ови, и о́троки ре́вность Бо́жия три́ непребори́мыя во огни́ певцы́ показа́: вся́ дела́ Госпо́дня Го́спода по́йте, и превозноси́те во вся́ ве́ки.

Кро́вь и вода́ исте́кшая из ре́бр Твои́х, Спа́се, ми́р ве́сь обнови́ша, и нетле́ние источи́ша: же́ртвы же ме́рзкия и проли́тие скве́рных крове́й преста́ша. Те́мже Тя́ вся́ дела́ я́ко Го́спода пое́м, и превозно́сим во вся́ ве́ки.

Венце́м терно́вым увя́злся еси́, Спа́се, о́цта и же́лчи вкуси́л еси́, и оплева́н бы́л еси́, и бие́н, воздви́глся еси́ на Кресте́, гво́здие прие́м, и́миже спасе́н бы́в а́з взыва́ю Ти́: вся́ дела́ Госпо́дня Го́спода по́йте, и превозноси́те Его́ во вся́ ве́ки.

Му́ченичен: От неистощи́мых сокро́вищ и́стины, пресве́тло обогати́вшеся страда́льцы, вся́ку нищету́ оплева́сте и́дольскую, и обогати́телие ни́щих яви́стеся, вопию́ще: вся́ дела́ Госпо́дня Го́спода по́йте, и превозноси́те Его́ во вся́ ве́ки.

Му́ченичен: Законоположе́ния злочести́вых небрегу́ще, я́коже о́троцы, му́ченицы, во о́гнь горя́щ вве́ржени бы́сте, в не́мже ро́су Бо́жию прохла́ждшую ва́с обрето́сте, вопию́ще: вся́ дела́ Госпо́дня Го́спода по́йте, и превозноси́те Его́ во вся́ ве́ки.

Богоро́дичен: Зако́нный дре́вле Тя́ ковче́г прообража́ше, Чи́стая, не скрижа́ли вну́трь нося́щ, но Христа́ Законода́вца, Его́же беззако́ннии лю́дие на Кресте́ пригвозди́ша, на́с вопию́щих спаса́юща: вся́ дела́ Госпо́дня Го́спода по́йте, и превозноси́те Его́ во вся́ ве́ки.

И́н Ирмо́с: Еди́наго Безнача́льнаго Царя́ сла́вы, Его́же благословя́т небе́сныя си́лы, и трепе́щут чи́ни а́нгельстии, по́йте, свяще́нницы, лю́дие превозноси́те Его́ во ве́ки.

Чуде́с бе́здну источа́ющи ми́ру, Всепе́тая, страсте́й на́ших струю́ изсуши́, и оставле́ния ро́су источи́ на́м, ве́рою несумне́нною почита́ющым Тя́, Де́во.

Из Тебе́ Со́лнце пра́ведное возсия́, во тьме́ страсте́й седя́щым, Тебе́ све́т соде́ла, Всепе́тая Чи́стая: те́мже Тя́ по до́лгу пои́м, Богоро́дице.

Це́рковь всесве́тлая Бо́жия бы́вши, собира́ющыяся во святе́м Хра́ме Твое́м рабы́ Твоя́, ду́ха жили́ща покажи́, Чи́стая, Тебе́ славосло́вящыя во вся́ ве́ки.

Све́том Твоего́ Рождества́ вселе́нную чудоле́пно просвети́ла еси́, Богоро́дице, и́стиннаго Бо́га на руку́ Твое́ю носи́вши, просвеща́ющаго при́сно ве́рою зову́щыя: вся́ дела́ Госпо́дня Го́спода по́йте, и превозноси́те Его́ во ве́ки.

Пе́снь 9

Ирмо́с: Ма́ти Бо́жия и Де́ва, ро́ждшая и де́вствующая па́ки, не естества́ де́ло, но Бо́жия снизхожде́ния: те́м я́ко еди́ну Бо́жиих чуде́с сподо́бльшуюся, Тя́ при́сно велича́ем.

Кре́пость вра́жия отню́д оскуде́, Тебе́ кре́пко на Дре́ве си́льне возопи́вшу к пребезнача́льному Отцу́ Твоему́, и созва́вшу расточе́нныя о́вцы Твоя́, Влады́ко Христе́, к Твоему́ позна́нию.

Я́коже А́гнец воздви́глся еси́, Влады́ко, на Кре́ст во́лею, исхища́я от во́лка слове́сныя, Спа́се, о́вцы Твоя́, и во огра́де Твои́х повеле́ний затворя́я сия́ воспева́ющыя Тя́.

Му́ченичен: Твои́х страсте́й подража́телие явля́еми благосла́внии страстоте́рпцы, многообра́зныя ви́ды му́к претерпе́ша, Человеколю́бче: отню́дуже венцы́ улучи́ша сла́вы, и Ца́рствия Твоего́, Христе́, сподо́бишася.

Му́ченичен: Со́лнечныя облистава́ют благода́ти, просвеща́юще ве́рныя, честны́х страстоте́рпец достохва́льное торжество́: отню́дуже и и́же сие́ при́сно соверша́ющии, тьмы́ прегреше́нии лю́тых избавля́емся.

Богоро́дичен: Све́т мы́сленный на Кресте́ облиста́, Тво́й, Пречи́стая, Сы́н, и нача́льники тьмы́ обличи́, Пренепоро́чная: со́лнечный помрачи́ све́т, и ве́рных исполне́ния, Чи́стая, просвети́л е́сть.

И́н Ирмо́с: Нетле́ния искуше́нием ро́ждшая, и Всехитрецу́ Сло́ву пло́ть взаимода́вшая, Ма́ти неискусому́жная, Де́во Богоро́дице, Прия́телище Нестерпи́маго. Село́ Невмести́маго Зижди́теля Твоего́, Тя́ велича́ем.

Свяще́ннейши вы́шних си́л яви́лася еси́, Творца́ бо все́х поро́ждши, Ма́ти Неискусому́жная свята́я Богоро́дице: те́мже Тя́ со А́нгелы сла́вим, непреста́нно воспева́юще вели́чия Твоя́.

Я́ко просвеща́емь заря́ми Боже́ственнаго Ду́ха, го́ру, Де́во, зри́т Тя́ дре́вле присе́нную свяще́ннейший проро́к, Богоро́дице. Те́мже Тя́ со А́нгелы земни́и ублажа́ем, я́коже прорекла́ еси́, Богоблаже́нная.

Ру́чка яви́лася еси́ ма́нну Боже́ственную нося́щи, ле́ствица ви́дена была́ еси́ челове́ки от земли́ возводя́щи, еди́на неискусому́жная Де́во Богоро́дице. Те́мже Тя́ соше́дшеся ве́рнии славосло́вим по до́лгу, Богора́дованная.

Бы́вшая Божества́ Отрокови́це селе́ние, бы́вша мя́ разбо́йников душетле́нных верте́п, и де́лателище вся́каго беззако́ния, ба́нею мя́ сле́з омы́вши, Боже́ственнаго Ду́ха жили́ще яви́.

Све́т ро́ждшая еди́на предве́чный, ве́чныя мя́ тьмы́ изба́ви, Влады́чице, и просвети́, Де́во, ду́шу мою́, страстьми́ жития́ всю́ омраче́нную, да любо́вию при́сно сла́влю Тя́.

Та́же, Досто́йно е́сть: и ектениа́, и свети́лен, и псалмы́ обы́чныя.

На стихо́вне стихи́ры кре́стны, гла́с 7:

Влады́ка сы́й Человеколю́бче Жизнода́вче, искупи́л еси́ Кресто́м Твои́м вселе́нную, Го́споди, сла́ва Тебе́.

Сти́х: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся: во вся́ дни́ на́шя возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я. И при́зри на рабы́ Твоя́, и на дела́ Твоя́, и наста́ви сы́ны и́х.

На Кресте́ пригвозди́ся лоза́ и́стинная, и объима́ша язы́цы ра́й с разбо́йником: сия́ сла́ва церко́вная, сие́ бога́тство Ца́рствия. Пострада́вый на́с ра́ди, Го́споди, сла́ва Тебе́.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Свети́ла яви́шася вселе́нней, всехва́льнии страстоте́рпцы Христо́вы, вопию́ще: Го́споди, сла́ва Тебе́.

Сла́ва, и ны́не, КрестоБогоро́дичен: На Дре́ве пригвожде́на Тя́ во́лею, я́ко Всенепоро́чная узре́ пла́чущи поя́ше держа́ву Твою́.

Та́же, Бла́го е́сть: Трисвято́е. По О́тче на́ш: тропа́рь, ектениа́, и ча́с пе́рвый, и про́чее, и отпу́ст.

В сре́ду блаже́нны, гла́с 7:

Красе́н бе́ и до́бр в сне́дь, и́же мене́ умертви́вый пло́д: Христо́с е́сть Дре́во живо́тное, от Него́же яды́й не умира́ю, но вопию́ с разбо́йником: помяни́ мя, Го́споди, во Ца́рствии Твое́м.

Сти́х: Блаже́ни изгна́ни пра́вды ра́ди, я́ко те́х е́сть Ца́рство Небе́сное.

Распросте́рл еси́ на Кресте́ дла́ни, просте́ртия руки́ Ада́мовы к Дре́ву сне́дному, исправля́я поползне́ние, Ще́дре, ра́ди бла́гости мно́гия: те́мже Тя́ сла́вим благоде́телю, Го́споди.

Сти́х: Блаже́ни есте́, егда́ поно́сят ва́м, и изжену́т и реку́т вся́к зо́л глаго́л, на вы́ лжу́ще Мене́ ра́ди.

На ме́сте Тя́ ло́бнем собо́р евре́йский, Христе́ Царю́, распя́, сокруша́юща лука́ваго губи́тельную главу́, и источа́юща на́м от ре́бр святы́х Твои́х ре́ки оставле́ния.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

Му́ченичен: Подо́бящеся Христо́вым страсте́м честны́м и спаси́тельным, му́ченицы прехва́льнии, претерпе́сте му́ки многови́дныя, и к безсме́ртию преидо́сте вку́пе: те́мже блажи́ми есте́.

Сла́ва: Соблюди́, о Тро́ице Свята́я! Пою́щыя Тя́ рабы́ Твоя́, укрепи́ си́лою Креста́, и к вы́шнему гра́ду ходи́ти напра́ви на́с: иде́же и бы́вше, обря́щем ми́лость.

И ны́не: Распина́ема из Тебе́ ро́ждшагося зря́щи, слезя́ще, утро́бою смуща́ющися, Ма́ти Чи́стая: ка́ко сия́ во́лею стра́ждеши, Сы́не, зову́щи, хотя́ челове́чество от страсте́й изба́вити?

В сре́ду ве́чера

на Го́споди, воззва́х, стихи́ры святы́м апо́столом, гла́с 7:

Подо́бен: Не ктому́ возбраня́еми есмы́:

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

Богоразу́мия сла́внии Апо́столи ра́лом возде́лавше зе́млю всю́, ве́рных мно́жество возрасти́сте.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Страсте́й мои́х разруши́те зи́му, и тишину́ ми возсия́йте, чи́стаго проли́тия, блаже́ннии апо́столи.

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Я́ко ученицы́ Сло́ва, от несмы́сльства приведо́сте к ра́зуму Бо́жию язы́ков собо́ры.

Та́же в мине́и стихи́ры свято́му. Сла́ва, свято́му, а́ще и́мать: И ны́не, Богоро́дичен гла́са. А́ще ли не́сть мине́и: и́ны стихи́ры свято́му и вели́кому чудотво́рцу Никола́ю, гла́с 7:

Сти́х: Я́ко у Го́спода ми́лость, и мно́гое у него́ избавле́ние: и то́й изба́вит Изра́иля от все́х беззако́ний его́.

Я́коже пре́жде изба́вил еси́, о́тче, воево́ды умре́ти иму́щыя, моли́твами твои́ми Нико́лае, та́кожде и ны́не на́с спаси́.

Сти́х: Хвали́те Го́спода вси́ язы́цы, похвали́те Его́ вси́ лю́дие.

И́же ве́рою и любо́вию вся́ призыва́ющыя, и пою́щыя тя́, всеблаже́нне святи́телю Нико́лае, изба́ви печа́лей.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Гла́да и губи́тельства, тру́са и скорбе́й, и вся́кия ну́жды свободи́ рабы́ Твоя́, святи́телю прему́дре Нико́лае.

Сла́ва, и ны́не, Богоро́дичен: Мольбу́ принеси́ Твои́х ра́б к Твоему́ Сы́ну, Всечи́стая, да спасе́т вся́, я́же созда́.

Та́же, Све́те ти́хий: Проки́мен дне́.

На стихо́вне стихи́ры апо́стольски, гла́с 7:

Апо́столи сла́внии, столпи́ церко́внии, и́стины пропове́дницы, свети́ла су́ще све́тлая, вы́ огне́м духо́вным вся́ку пре́лесть попали́сте, челове́ческий ро́д ве́рою просвети́сте. Те́мже мо́лим вы́: моли́те Спа́са и Бо́га на́шего, умири́ти ми́р, и спасти́ ду́шы на́шя.

Сти́х: К тебе́ возведо́х о́чи мои́ живу́щему на Небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дрит ны́.

Апо́столи Христо́вы, де́латели Спа́совы, Кре́ст у́бо я́коже ра́ло на ра́мех нося́ще, оляде́вшую зе́млю и́дольскою пре́лестию очи́стивше, и ве́ры сло́во все́ясте: досто́йно почита́еми есте́, святи́и Христо́вы Апо́столи.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих, и уничиже́ния го́рдых.

Му́ченичен: Всехва́льнии му́ченицы, овча́та духо́вная, всесожже́ния слове́сная. Же́ртвы прия́тны, благоуго́дны Бо́гови, ва́с ни земля́ сокры́, но не́бо прия́т. Вы́ А́нгелом соприча́стницы бы́сте. С ни́миже моли́те, мо́лим вы́, Спа́са и Бо́га на́шего, умири́ти ми́р, и спасти́ ду́шы на́шя.

Сла́ва, и ны́не, Богоро́дичен: Еди́ну по Рождестве́ Пречи́стую Де́ву воспои́м, я́ко Ма́терь Бо́га Сло́ва, глаго́люще: сла́ва Тебе́.

Та́же, Ны́не отпуща́еши: Трисвято́е. По О́тче на́ш: тропа́рь, ектениа́, и отпу́ст.

В сре́ду на повече́рии

кано́н Пресвяте́й Богоро́дице, гла́с 7:

Пе́снь 1

Ирмо́с: Ма́нием Твои́м на земны́й о́браз преложи́ся, пре́жде удоборазлива́емое водно́е естество́, Го́споди: Те́мже немо́кренно пешеше́ствовав Изра́иль, пое́т Тебе́ пе́снь побе́дную.

Вода́ми живото́чными, Де́во, напо́й иста́явшую ду́шу мою́ зно́ем грехо́вным, я́ко да кла́с плодоно́сен возращу́, Чи́стая, Боже́ственнаго умиле́ния.

Одожди́ ми, Чи́стая, ка́пли умиле́ния щедро́тными ка́плями, и́миже отмы́ю, Отрокови́це, всю́ душе́вную скве́рну, от невня́тия е́й прибы́вшую.

Сла́ва: Ты́, Соде́теля Твоего́ во утро́бе прие́мши, без тли́ родила́ еси́, Младе́нца Бо́га су́ща бы́вшаго, стра́нно чу́до, Рабо́ и Ма́ти еси́, Влады́чице безневе́стная.

И ны́не: Изба́вителя челове́ческому ро́ду, и Свободи́теля и Спа́са, Христа́ на́м родила́ еси́, Де́во Ма́ти Пречи́стая: те́мже я́ве Тя́ зна́юще, Хода́таицу жи́зни ве́чныя сла́вим.

Пе́снь 3

Ирмо́с: В нача́ле небеса́ всеси́льным сло́вом Твои́м утвержде́й, Го́споди Спа́се, и вседе́тельным и Бо́жиим Ду́хом всю́ си́лу и́х, на недви́жимем мя́ ка́мени испове́дания Твоего́ утверди́.

Теле́сную багряни́цу от Твои́х Пречи́стых крове́й обагри́в Ца́рь все́х, и сию́ носи́в кроме́ тле́ния естество́м, Бо́г же и Челове́к, от Тебе́ про́йде, Де́во, име́я Ца́рство неизме́нно.

Я́ко сокро́вище благи́х, и неизрече́нных, Де́во, да́нное все́м от Бо́га, подае́ши на́м незави́стное благода́ти, чуде́сныя да́ры, в напа́стех и беда́х и в не́мощех, моля́щымся Ти́.

Сла́ва: Тя́ Дании́л чу́дный прови́дя го́ру, Чи́стая, от нея́же ка́мень отсече́ся Христо́с, сокруши́ бесо́вския истука́ны. Те́мже я́ко все́х до́брых песносло́вим вину́, изба́влени Рождество́м Твои́м.

И ны́не: Богогла́сный Тя́ не́когда прови́де сви́ток, в не́мже Сло́во написа́ся, Чи́стая, пе́рстом О́тчим. Те́мже моли́ся в кни́зе написа́ти мя́ жи́зни, лука́вое писа́ние грехо́в мои́х растерза́вши.

Пе́снь 4

Ирмо́с: О́тча не́дра не оста́вль, и соше́д на зе́млю, Христе́ Бо́же, та́йну услы́шах смотре́ния Твоего́, и просла́вих Тя́, Еди́не Человеколю́бче.

Моли́тву к Ро́ждшемуся из Тебе́, Богоро́дице, сотвори́, я́ко да обря́щем по́мощь во вре́мя обстоя́ния, и́же стра́сти Того́ сла́вящии.

Ми́ро из Тебе́, Пресвята́я Чи́стая, излия́вшееся, Соде́тель естества́, благово́ния испо́лни вся́ческая Боже́ственными разуме́ньми, и смра́дную ле́сть прогна́.

Сла́ва: Я́ко мы́сленную ле́ствицу, Чи́стая, поставле́й Тя́ су́щым на земли́ Христо́с Бо́г, Тобо́ю к Небе́сным Боже́ственным дея́нием ве́рныя возво́дит, я́ко Милосе́рд.

И ны́не: Отягче́н вре́менем мно́гим грехо́вным, Блага́я, зову́ Ти: очище́ние ми́ яви́ся, Бо́га ро́ждшая, ми́ра Взе́млющаго прегреше́ния.

Пе́снь 5

Ирмо́с: Го́споди Бо́же мо́й, от но́щи у́треневав, Тебе́ молю́ся: пода́ждь ми́ оставле́ние прегреше́ний мои́х, и к све́ту Твои́х повеле́ний пути́ моя́ напра́ви, молю́ся.

Ма́ти Человеколю́бца и Бо́га, Препе́тая Богоро́дице, ве́рою Тя́ и любо́вию пе́сньми восхваля́ющему при́сно, очище́ние Твои́ми мольба́ми прегреше́ний мои́х низпосли́ мне́.

Пречи́стая Богоро́дице, прия́телище су́щи неизме́ннаго Све́та, и хра́м Боже́ственныя Зари́, мою́ ду́шу омраче́нную, све́том Твои́м просвети́, молю́ся.

Сла́ва: Го́споди Бо́же мо́й, И́же бы́ти Челове́к изво́ливый, молю́ся Ти́: благоволи́ спасти́ мя́ блу́днаго, ра́ди чи́сто ро́ждшия Тя́ Де́вы, и Чи́стыя Отрокови́цы.

И ны́не: Влады́чице Богома́ти, мои́х прегреше́ний пода́ждь проще́ние, Я́же Жи́знь ипоста́сную ми́рови ро́ждшая, Пренепоро́чная.

Пе́снь 6

Ирмо́с: Пла́вающаго в молве́ жите́йских попече́ний, с корабле́м потопля́ема грехи́, и душетле́нному зве́рю примета́ема, я́ко Ио́на, Христе́, вопию́ Ти́: из смертоно́сныя глубины́ возведи́ мя.

От тли́ сме́рти, и е́же от Ада́ма греха́, Твои́м изба́вихомся, Богоро́дице, безсе́менным Рождество́м: Бо́г бо вку́пе и челове́к Еди́ный, То́йже и Сы́н Сы́й, избавле́ние согреше́ний ве́рным да́руя.

Мои́х прегреше́ний, Влады́чице, раздери́ рукописа́ние, в кни́зе мя́ спасе́нных написа́вши, Боже́ственными моли́твами Твои́ми: я́ко да во хвале́нии Тя́ пою́, святе́йшую херуви́м су́щую.

Сла́ва: Отринове́нныя дре́вле, пра́ведным Твои́м судо́м, Христе́, от Твоего́ лица́, призва́л еси́ плотски́м прише́ствием, я́ко Милосе́рд. И ны́не, Бла́же, согре́шшыя ны́ приими́, и от зо́л премени́.

И ны́не: Очище́ние ро́ждшую, и гре́шников Благода́теля, Де́во Пречи́стая, молю́ Тя́: вины́ безме́рных прегреше́ний мои́х разреши́ Ма́тернею Твое́ю моли́твою: и́маши бо я́ко Ма́ти к Сы́ну, е́же мощи́.

Та́же, Го́споди, поми́луй, три́жды. Сла́ва, и ны́не:

Седа́лен, гла́с 7:

Под кро́в Тво́й вси́ земноро́днии прибега́ем, изба́ви ве́чнующаго огня́ ду́шы на́шя, Блага́я.

Пе́снь 7

Ирмо́с: Пе́щь о́троцы огнепа́льну дре́вле росоточа́щу показа́ша, Еди́наго Бо́га воспева́юще, и глаго́люще: превозноси́мый Отце́в Бо́г и препросла́влен.

Отягче́нный у́м мо́й сно́м, Всенепоро́чная, ко благи́м де́ланием воздви́гни: я́ко да ублажа́ю Тя́, Честне́йшую вся́кия тва́ри.

Ю́нии трие́ о́троцы посреде́ пе́щи Твое́ прообража́ху Рождество́: не опали́ся у́бо, о́гнь ро́ждши, Чи́стая. Те́мже ве́щныя ми́ стра́сти се́рдца попали́.

Сла́ва: В жена́х Тя́ кра́сну и добру́ Прекра́сный Госпо́дь уразуме́в, из Тебе́ воплоти́ся. Того́ у́бо моли́, Пресвята́я Отрокови́це, спасти́ мя.

И ны́не: Боже́ственная Роса́ из Тебе́ проше́дши, иста́явшыя зно́ем грехо́вным, ороша́ет, Пренепоро́чная. Те́мже Тя́ молю́, иста́явшую ду́шу мою́ ороси́.

Пе́снь 8

Ирмо́с: Неопа́льная огню́ в Сина́и прича́щшаяся купина́ Бо́га яви́, медленоязы́чному и гугни́вому Моисе́ови, и о́троки ре́вность Бо́жия три́ непребори́мыя во огни́ певцы́ показа́, вся́ дела́ Госпо́дня, Го́спода по́йте, и превозноси́те во вся́ ве́ки.

Неопа́льна огне́м в Сина́и бесе́довавши купина́, Твое́ показу́я стра́нно Рождество́ Богови́дцу Моисе́ю. Те́мже уди́влься стра́нному Рождеству́ Твоему́, Чи́стая, ра́дуяся вопия́ше: вся́ дела́ Госпо́дня Го́спода по́йте, и превозноси́те Его́ во ве́ки.

Умерщвле́ный мо́й у́м грехо́м, Я́же живо́т ро́ждшая, Чи́стая Де́во, оживотвори́, и спаси́ к Бо́гу премене́нии Твои́ми Ма́терними, при́сно мя́ пою́ща: вся́ дела́ Госпо́дня Го́спода по́йте, и превозноси́те Его́ во ве́ки.

Сла́ва: Име́ю Тя́, Чи́стая, в нощи́ и во дни́ храни́тельницу неотсту́пну, от мы́сленных и ви́димых вра́г, ника́коже наве́та зла́ и лука́ва ужаса́юся, поя́ Христу́: вся́ дела́ Госпо́дня Го́спода по́йте, и превозноси́те Его́ во вся́ ве́ки.

И ны́не: От Своего́ Человеколю́бия, Сы́н Тво́й, Богоро́дице, я́ко Бла́г преклоня́емь, Тя́ подаде́ по́мощь на враги́, и цельбу́ страсте́й ве́рою зову́щым: вся́ дела́ Госпо́дня Го́спода по́йте, и превозноси́те Его́ во вся́ ве́ки.

Пе́снь 9

Ирмо́с: Нетле́ния искуше́нием ро́ждшая, и Всехитрецу́ Сло́ву пло́ть взаимода́вшая, Ма́ти неискусому́жная Де́во Богоро́дице: прия́телище Нестерпи́маго, село́ Невмести́маго Зижди́теля Твоего́, Тя́ велича́ем.

Неокра́домое бога́тство де́вства Твоего́, Ма́ти пло́тию яви́лася еси́ Вседержи́теля, Неве́сто Неискусому́жная, Де́во Богоро́дице, воспита́вши, я́ко Младе́нца, Пита́ющаго я́ко Зижди́теля ве́сь ми́р, и Освяща́юща.

Человеколю́бнейшее Сло́во ро́ждши, Де́во, грехи́ ми́ра взе́млющее, Сего́ моли́, на́м низпосла́ти грехо́в разреше́ние, ве́рою несумне́нною по до́лгу Тя́ блажа́щым.

Сла́ва: Грехолюби́в сы́й, трепе́щу и бою́ся, да не внеза́пу коне́ц жития́ дости́гнет мя́, Чи́стая Влады́чице, все́х оби́димых предста́тельнице, и о́бразы мя́ покая́ния укрепи́ти ны́не умоле́на бу́ди.

И ны́не: Да не во о́гнь по́слеши мя́, угото́ванный мне́, мо́лит Тя́ Де́ва, ро́ждшая Тя́, и Боже́ственный безпло́тный ли́к, апо́столи, проро́цы, му́ченицы и священнонача́льницы, и ду́си пра́ведных, Всеще́дрый и Многоми́лостиве.

Та́же, Досто́йно е́сть: и покло́н. Трисвято́е. По О́тче на́ш: тропа́рь, и про́чее по обы́чаю, и отпу́ст.

Четверг

В четверто́к у́тра

по 1-м стихосло́вии, седа́льны апо́стольски, гла́с 7:

Де́латели селу́ Твоему́ яви́л еси́ Апо́столы Твоя́, Сло́ве, посека́ющыя и́долы: те́мже Тя́, Влады́ку, во язы́цех пропове́давше, благоче́стно возвели́чиша.

Сти́х: Во всю́ зе́млю изы́де веща́ние и́х, и в концы́ вселе́нныя глаго́лы и́х.

Земны́я на земли́ сла́вы не возлюби́сте, сла́внии, Бо́га Небе́снаго челове́ком пропове́давше, тому́ все́х приведо́сте.

Сла́ва, и ны́не, Богоро́дичен: А́ще и Ма́терь Тя́ тва́рь позна́, но Де́ву Тя́ Зижди́тель показа́л е́сть: родила́ бо еси́ пло́тию Христа́ Бо́га, спаса́ющаго ду́шы на́шя.

По 2-м стихосло́вии, седа́льны, гла́с 7:

Я́ко на́шего спасе́ния окорми́тели прему́дрыя апо́столи Христа́ Бо́га, пе́ньми и пе́сньми по до́лгу почти́м: ти́и бо пре́лести нече́стие отгна́вше, ми́р спасо́ша, я́ко самови́дцы Сло́ва, и слуги́, и дру́зи, и бра́тия бы́вше.

Сти́х: Небеса́ пове́дают сла́ву Бо́жию, творе́ние же руку́ Его́ возвеща́ет тве́рдь.

Проро́цы пропове́даша, апо́столи научи́ша, му́ченицы испове́даша, и мы́ ве́ровахом: я́ко Ты́ еси́ Христо́с сы́н Бо́жий, Изба́витель ми́ра.

Сти́х: Ди́вен Бо́г во святы́х Свои́х, Бо́г Изра́илев.

Му́ченичен: Му́ченицы Твои́, Го́споди, врага́ победи́ша, и пре́лесть и́дольскую посрами́ша, вооружи́вшеся Креста́ Твоего́ си́лою: те́мже и со А́нгелы воспева́юще Тя́, вопию́т побе́дную пе́снь, славосло́вяще Тя́, Христе́. Те́х моли́твами пода́ждь душа́м на́шым очище́ние и ве́лию ми́лость.

Сла́ва, и ны́не, Богоро́дичен: Ра́дуйся, из Нея́же непрело́жно Сло́во пло́ть бы́сть, и всели́ся в ны́: ра́дуйся, Чи́стая, Апо́столов и му́чеников ра́дование, и на́с ве́рных спасе́ние: ра́дуйся, Ма́ти Христа́ Бо́га.

По 3-м стихосло́вии седа́льны, гла́с 7:

Подо́бен: Пло́д чре́ва:

Ученицы́ Госпо́дни всехва́льнии, и́же подсо́лнечную всю́ я́ко свети́ла озари́вше, во тьме́ страсте́й мя́ и прегреше́ний су́ща, просвети́тися ми́, моли́те.

Свети́ла вы́ су́ще ми́ру, Госпо́дни Апо́столи, облистава́ете при́сно сло́во ве́рным, отгоня́юще зе́льне пре́лести мглу́. Те́мже и просвеща́ете язы́ки креще́нием, я́ко пропове́дницы Тро́ицы су́ще, при́сно почита́емии.

Сла́ва, и ны́не, Богоро́дичен: Я́же ми́ру ра́досте, Де́во, Твоего́ Сы́на непреста́нно со Апо́столы моли́, проще́ние дарова́ти на́ших прегреше́ний, и жития́ исправле́ние.

Кано́н святы́м сла́вным и всехва́льным апо́столом. Творе́ние Феофа́ново. Гла́с 7:

Пе́снь 1

Ирмо́с: Ма́нием Твои́м на земны́й о́браз преложи́ся, пре́жде удоборазлива́емое водно́е естество́, Го́споди: те́мже немо́кренно пешеше́ствовав Изра́иль, пое́т Тебе́ пе́снь побе́дную.

Ма́нием к Боже́ственному богови́дни бы́вше, бо́ги сокруши́сте безбо́жных, и к Боже́ственней все́х воздвиго́сте любви́, ве́ровавших Бо́гу, всечестни́и. [Два́жды.]

Со́ль я́коже бы́вше всея́ земли́, богоглаго́ливии Госпо́дни Апо́столи, согни́тие все́ уста́вите се́рдца моего́, и обуя́вшее лю́те исцели́те.

Все́х Судия́ Пра́веднейший, егда́ хо́щет во второ́е прише́ствие с ва́ми се́сти Боже́ственнии Апо́столи, тогда́ вся́каго осужде́ния на́с изба́вите.

Богоро́дичен: Пречи́стая Богоро́дице, со безпло́тными А́нгелы, и проро́ки, и му́ченики и Апо́столы моли́: я́ко да оставле́ние прегреше́ний прии́мем, Де́во, и бога́тую ми́лость.

Други́й кано́н свято́му и вели́кому чудотво́рцу Никола́ю. [его́же краегране́сие: Приими́ моле́ние седмо́е, Нико́лае.] Творе́ние Ио́сифово. Гла́с 7:

Ирмо́с: Поспе́шествовавшему Бо́гу во Еги́пте Моисе́ови, извести́ Изра́иля, Тому́ Еди́ному пои́м, я́ко просла́вися.

Просла́влено на земли́ преше́д житие́, тебе́ сла́вящыя, Нико́лае, прича́стники та́мо су́щия сла́вы сотвори́.

В пучи́не лю́тых пла́вающе, жите́йских искуше́ний волна́ми, Всеблаже́нне, окружа́еми есмы́: от ни́хже на́с спаси́.

Ру́ку ми́ ны́не пода́тельную по́мощи пода́ждь, о́тче Нико́лае, от вра́г ви́димых и неви́димых изба́ви мя́.

Богоро́дичен: И́же невеще́ственныя слуги́ сотвори́в, из Тебе́, Богоро́дице, роди́ся за ми́лость неизрече́нную, челове́ки ви́димь бы́сть.

Пе́снь 3

Ирмо́с: В нача́ле Небеса́ всеси́льным Сло́вом Твои́м утвержде́й, Го́споди Спа́се, и вседе́тельным и Бо́жиим Ду́хом, всю́ си́лу и́х: на недви́жимем мя́ ка́мени испове́дания Твоего́ утверди́.

Я́ко небеса́ сла́ву Бо́жию, я́коже рече́ проро́к, пове́дуете Боже́ственнии ученицы́, уясня́юще его́ Боже́ственное воплоще́ние, и страда́ния я́ве му́дрии: и́миже страсте́й и сме́рти все́х, и тли́ изба́вите.

Стре́лы Христа́ си́льнаго изъощре́ны яви́стеся, от стре́л мя́ лука́ваго, му́дрии ученицы́ Госпо́дни, изба́вите: и уязвле́ное лю́те грехо́вным ору́жием мое́ се́рдце исцели́те.

Прельще́ннаго мя́ лю́те и оде́жды обнаже́на Боже́ственныя, Боже́ственными оде́ждами, Христо́вы ученицы́, просвети́ти потщи́теся: и́же вра́жия кова́рства обнажи́вше вся́, и того́ в сту́д облеко́сте.

Богоро́дичен: Си́лы небе́сныя составле́й сло́вом, и́же проро́ком благода́ть пода́вый, и ученико́м, и все́м му́чеником: те́х моли́твами, Бо́же, и Пречи́стыя Ма́тере Твоея́, спаси́ все́х, и уще́дри я́ко милосе́рд.

И́н Ирмо́с: Небеса́ утверди́вый сло́вом, и земно́е основа́ние укрепи́вый на вода́х мно́гих, утверди́ мо́й у́м в во́лю Твою́, Человеколю́бче.

О вселе́нней принося́ моле́ния, от вся́кия ну́жды и скорбе́й безчи́сленных спаси́ на́с, свя́те Нико́лае.

Свя́занных неизбе́жно из темни́цы я́коже изба́вил еси́: соу́зы растерза́в зо́л мои́х, моли́твами твои́ми, примири́ Бо́гу, свя́те Нико́лае.

В нощи́ и во дни́ засту́пника тя́ нарица́ем, на́шя моли́твы принеси́ Го́сподеви, сохраня́я на́с при́сно, свя́те Нико́лае.

Богоро́дичен: Клеще́ я́же Боже́ственный у́гль прие́мши в Боже́ственней утро́бе Твое́й, ника́коже опали́вшися, попали́, Пречи́стая, на́ша прегреше́ния.

Пе́снь 4

Ирмо́с: О́тча не́дра не оста́вль, и соше́д на зе́млю, Христе́ Бо́же, та́йну услы́шах смотре́ния Твоего́, и просла́вих Тя́, Еди́не Человеколю́бче.

И́же Отцу́ сопресто́льный Сы́н, на земли́ вопло́щься я́ко челове́к, избра́ ва́с ученики́, Его́ Божество́ пропове́дати все́м язы́ком. [Два́жды.]

К созида́телем все́х страсте́й впа́дся умовре́дно окая́нный а́з, се́рдцем уязви́хся. Те́мже молю́ся, исцели́те мя́ вра́чеве боля́щих, Апо́столи.

От страсте́й изба́вите на́с, и от бе́д лю́тых, и скорбе́й, апо́столи сла́внии, и от вся́кия напа́сти, и всеболе́зненныя му́ки.

Богоро́дичен: Я́же Бо́гу Ма́ти избра́нныя, со Апо́столы свяще́нными, и му́ченики, и проро́ки моли́ся, бе́д и скорбе́й и прегреше́ний изба́витися на́м.

И́н Ирмо́с: Покры́ла е́сть Небеса́, Христе́ Бо́же, смотре́нием Твои́м, доброде́тель неизрече́нныя му́дрости Твоея́, Человеколю́бче.

Прему́дростию твое́ю очерни́в А́риев у́м е́ресию помраче́нный, и от того́ прельща́емыя, Нико́лае, просвети́л еси́.

Уврачу́й моя́ мно́гия стру́пы богоприя́тными твои́ми моли́твами, богоблаже́нне о́тче Нико́лае, и се́рдце мое́ просвети́.

Умертви́в стра́стныя взыгра́ния, от ни́хже мя́ умерщвле́наго, моли́твами твои́ми, всеблаже́нне, оживи́в, но́ва сотвори́.

Богоро́дичен: Родила́ еси́ пло́тию Безле́тнаго: Его́же моли́ многоле́тных зо́л на́с изба́вити, пою́щих Тя́, Всенепоро́чная.

Пе́снь 5

Ирмо́с: Го́споди Бо́же мо́й, от но́щи у́треневав Тебе́ молю́ся: пода́ждь ми́ оставле́ние прегреше́ний мои́х, и к све́ту Твои́х повеле́ний пути́ моя́ напра́ви, молю́ся.

Го́споди Бо́же мо́й, Апо́столом Твои́м ми́р дре́вле дарова́вый, те́х моли́твами ми́р да́руй все́м, и прегреше́ний проще́ние. [Два́жды.]

Го́споди Бо́же мо́й, све́дый согреше́ния души́ моея́, и неиспра́вленный нра́в се́рдца моего́, ту́не мя́ уще́дрив спаси́, Апо́стол мольба́ми.

Го́споди Бо́же мо́й, разбо́йника, и блудни́цу согреши́вшую, мно́гия ра́ди спа́сл еси́ бла́гости: и моли́твами Твои́х Апо́стол, и мене́ блу́днаго уще́дри.

Богоро́дичен: Го́споди Бо́же мо́й, рожде́йся от Де́вы неискусобра́чныя, Тоя́ моли́твами и Апо́стол Твои́х очище́ние согреше́ний ми́ да́руй, и бу́дущия изба́ви му́ки.

И́н Ирмо́с: У́тренюет ду́х мо́й к Тебе́, Бо́же, зане́ Све́т еси́, и Твоя́ повеле́ния бы́ша исцеле́ния рабо́м Твои́м, Человеколю́бче.

Сове́ты О́тче, подвиза́емыя при́сно на ны́, ненака́занных челове́к Твои́ми моли́твами, Нико́лае, безде́льны сотвори́.

Соу́зы зо́л на́ших расто́ргни твои́ми моли́твами, связа́вый зло́бу душетле́ннаго зми́я, всесвяты́й Нико́лае.

Ра́зумом при́сно согреша́юще, и мно́жеством лю́тых содержи́ми, о́тче, предста́теля тя́, Нико́лае, те́пла призыва́ем.

Богоро́дичен: Мари́е, Госпоже́ всея́ тва́ри, от врага́ безсту́дно облада́ти и́щуща смире́нное се́рдце мое́, Богороди́тельнице, до конца́ свободи́.

Пе́снь 6

Ирмо́с: Пла́вающаго в молве́ жите́йских попече́ний, с корабле́м потопля́ема грехи́, и душетле́нному зве́рю, примета́ема я́ко Ио́на, Христе́, вопию́ Ти: из смертоно́сныя глубины́ возведи́ мя.

Са́мыя му́дрости Боже́ственнии ученицы́ бы́вше, е́ллинскую обуи́ша прему́дрость, и мудреца́ зло́бы погуби́ша: и в неве́дении блудя́щыя, све́том благоче́стия прему́дрии просвети́ша. [Два́жды.]

И́же Петро́во дре́вле слеза́ми прегреше́ние очи́стив, того́ моли́твами души́ моея́ неисче́тная согреше́ния очи́сти, безме́рнаго ра́ди Твоего́ благоутро́бия и премно́гия, Христе́, благосты́ни.

И́же ниневи́тяны дре́вле пока́явшыяся уще́дрив, и мене́ обы́чным Твои́м милосе́рдием поми́луй, Апо́стол Твои́х ра́ди: и да не за мно́жество прегреше́ний, Изба́вителю, мно́жество приложи́ши муче́ния.

Богоро́дичен: Я́же Све́т Ро́ждшая, просвети́ ду́шу мою́ омраче́нную страстьми́: и моли́ со Апо́столы, с проро́ки же и му́ченики, от вся́каго греха́, вся́каго вре́да, вся́кия зло́бы вра́жия изба́вити мя́.

И́н Ирмо́с: Ио́на из чре́ва а́дова вопия́ше: возведи́ от тли́ живо́т мо́й. Мы́ же Тебе́ вопие́м: Всеси́льне Спа́се, поми́луй на́с.

Разори́л еси́ сме́рти непра́ведный су́д, и спа́сл еси́ ми́лостию твое́ю, о́тче Нико́лае, хотя́щыя умре́ти, я́ко те́плый помо́щник призыва́ющым тя́.

Неду́ги ду́ш на́ших утиши́: и уста́ отверза́ющаяся всу́е на лю́бящих тя́, свяще́ннейший па́стырю, загради́.

Па́жить го́рькую злоче́стия а́риева потреби́л еси́, Нико́лае, растворе́нием слове́с твои́х, священнотаи́нниче, правосла́вным утвержде́ние ты́ бы́л еси́.

Богоро́дичен: Уврачу́й, Всенепоро́чная, неисце́льно боля́щую, окая́нную ду́шу мою́ жите́йскими пре́лестьми, и мно́гих грехо́в обстоя́нии.

Пе́снь 7

Ирмо́с: Пе́щь о́троцы огнепа́льну дре́вле росоточа́щу показа́ша, Еди́наго Бо́га воспева́юще, и глаго́люще: превозноси́мый отце́в Бо́г, и препросла́влен.

Пе́щь дре́вле го́рькаго безбо́жия, росо́ю Боже́ственнаго пропове́дания угаси́сте, сла́внии апо́столи, зову́ще: превозноси́мый отце́в Бо́г и препросла́влен. [Два́жды.]

Лю́таго мя́, Христе́, греха́, и во а́де муче́ния, и в гее́нне боле́зней исхити́: и спаси́ мя, молю́ся, мольба́ми, Сло́ве, Апо́стол Твои́х.

Сло́ва мре́жею из глубины́ неве́дения челове́ки улови́вше, и потопля́ема мя́ безме́рными прегреше́нии, и обурева́ема, ученицы́ Христо́вы, спаси́те.

Богоро́дичен: Со А́нгелы, с му́ченики и Апо́столы, Всенепоро́чная, Твоего́ Сы́на моли́ и Го́спода, спасти́ся рабо́м Твои́м от напа́стей вся́ческих и скорбе́й.

И́н Ирмо́с: Пе́щь горя́щую ороси́л еси́, Спа́се, о́троки спа́сл еси́ пою́щыя и глаго́лющыя: благослове́н еси́ во ве́ки, Го́споди Бо́же оте́ц на́ших.

Красота́ церко́вная бы́в, му́дре Нико́лае, вся́кия мя́ некрасоты́ страсте́й безче́стных изба́ви, благода́теля всего́ ми́ра моля́, святи́телю, при́сно.

Ту́чами моли́тв твои́х, Нико́лае му́дре, все́х на́с напо́й сердца́: я́ко да принесе́м плоды́ досто́йны покая́ния, святи́телю Нико́лае.

Просвети́ твои́ми моли́твами на́ша помышле́ния, ве́рою у́тренюющих, и Бо́га сла́вящих, разори́вый мольба́ми твои́ми артеми́ды ка́пища.

Богоро́дичен: Вся́к язы́к ве́рою сла́вит Тя́, Чи́стая, сла́ву су́щую и похвалу́ ро́да на́шего, и наста́вницу заблу́ждших, Богоро́дице Преблаже́нная.

Пе́снь 8

Ирмо́с: Неопа́льная огню́ в Сина́и прича́щшаяся купина́ Бо́га яви́, медленоязы́чному и гугни́вому Моисе́ови, и о́троки ре́вность Бо́жия три́ непребори́мыя во огни́ певцы́ показа́: вся́ дела́ Госпо́дня, Го́спода по́йте, и превозноси́те во вся́ ве́ки.

У́глие огне́м разу́мным разже́гшеся, я́коже тро́стие всю́ и́дольскую ле́сть попали́ша, Христо́вы ученицы́, и просвети́ша ве́рных ду́шы, взыва́ющыя: вся́ дела́ Госпо́дня Го́спода по́йте, и превозноси́те во вся́ ве́ки. [Два́жды.]

Омраче́нную ду́шу мою́ грехо́м, и омраче́нное страстьми́ безче́стия ны́не просвети́те се́рдце мое́, све́ту присносу́щному прича́стницы Христо́вы Апо́столи, я́ко да непреста́нно зову́: вся́ дела́ Госпо́дня Го́спода по́йте, и превозноси́те во вся́ ве́ки.

Уя́звленную ду́шу мою́ ядови́тыми го́рдаго угрызе́ньми, и́же я́звы пло́тию прие́мый, исцели́ моли́твами свяще́нных Твои́х ученико́в, и спаси́ пою́щыя: вся́ дела́ Госпо́дня, Го́спода по́йте, и превозноси́те во вся́ ве́ки.

Богоро́дичен: Неопа́льно ро́ждши о́гнь, сохрани́лася еси́, Де́ва Пречи́стая: те́мже моли́, Его́же родила́ еси́, со безпло́тными ли́ки и Апо́столы, спасти́ся ве́рою пою́щым: вся́ дела́ Госпо́дня, Го́спода по́йте, и превозноси́те во вся́ ве́ки.

И́н Ирмо́с: В пещи́ о́троки подража́юще, духо́вную ро́су прие́мшии: ве́рою зове́м: благослови́те дела́ Госпо́дня, Го́спода.

В Ми́рех мироуха́нное те́ло твое́, всесвя́те Нико́лае, лежа́щее, ми́ро притека́ющым источа́ет, и уставля́ет неду́ги челове́ком.

Ми́ру тя́ засту́пника показа́ ми́ра Творе́ц и Госпо́дь: те́мже призыва́ющым тя́ в ну́ждах ны́не, Нико́лае, обрета́ешися изба́витель гото́вейший.

Не́сть, и́же призва́вый тя́ в ско́рбех, и ско́ро не обря́щет утеше́ния. Те́мже тебе́ мо́лимся: вся́ боле́зни на́шя, Нико́лае, облегчи́.

Богоро́дичен: Пое́т вся́к язы́к и сла́вит Тя́, Де́во Богоневе́сто, Бо́га бо препе́таго родила́ еси́: Его́же моли́ непреста́нно, спасти́ся душа́м на́шым.

Та́же, пое́м пе́снь Богоро́дицы: Вели́чит душа́ моя́ Го́спода: с покло́ны.

Пе́снь 9

Ирмо́с: Нетле́ния искуше́нием ро́ждшая, и Всехитрецу́ Сло́ву пло́ть взаимода́вшая, Ма́ти неискусому́жная Де́во Богоро́дице: прия́телище Нестерпи́маго, село́ Невмести́маго Зижди́теля Твоего́, Тя́ велича́ем.

Сы́ны све́та и дне́ ва́с яви́л е́сть, Бо́га отца́ Сло́во: сего́ возлюби́вше Боже́ственнии Апо́столи свети́ла вселе́нныя, бесо́в потреби́телие, наста́вницы заблу́ждших, Це́ркве тве́рдая основа́ния яви́стеся. [Два́жды.]

Ра́ла словесе́, и́же на вы́ях легча́йшее сего́ и́го носи́вшии, обнови́те ны́не олядене́вшую страстьми́ ду́шу мою́, и покая́ния се́менем плодоно́сну сию́ соде́лайте.

О законоположе́ниих мя́ Боже́ственных неради́вша, и бы́вшаго мя́ бесо́в жили́ще, и де́лателище вся́каго греха́ уще́дри мя́, Сло́ве, моли́твами сла́вных Апо́стол Твои́х, я́ко Человеколю́бец.

Земля́ Боже́ственными освяща́ется мощьми́ благосла́вных Апо́стол, Боже́ственным ду́хом: перворожде́нных же вы́шняя Це́рковь духа́ми си́х светле́ется безпреста́нно: и́хже ра́ди, Спа́се, все́х уще́дри.

Богоро́дичен: Да мя́ во о́гнь не по́слеши угото́ванный мне́, мо́лит Тя́ Де́ва Тебе́ ро́ждшая, и Боже́ственнии безпло́тнии ли́цы, Апо́столи, проро́цы и му́ченицы, святи́телие, и ду́си пра́ведных, Всеще́дре Многоми́лостиве.

И́н Ирмо́с: Па́че естества́ Ма́терь, и по естеству́ Де́ву, Еди́ну в жена́х благослове́нную, пе́сньми, ве́рнии, Богоро́дицу велича́ем.

После́довав нра́вом свяще́нных Апо́стол, и седа́лища те́х насле́довал еси́, я́ко святи́тель чи́стен, достосла́вный Нико́лае.

Я́ко ревни́теля тя́ Боже́ственнаго, и помо́щника по всему́ тебе́ призыва́ющым те́пле, во все́м ми́ре блаже́нне, Творе́ц превели́ка показа́.

Сокруше́нным се́рдцем вопие́м ти́, о́тче: утеше́ние на́м бу́ди в ско́рбех, печа́ли разгоня́я всегда́ от ду́ш на́ших, Нико́лае.

Сме́ртное посече́ние, я́коже секи́ра Дре́ву предлежи́т ти́, о душе́, не лени́ся у́бо, покая́ния плоды́ Бо́гу показа́ти усе́рдствуй.

Богоро́дичен: Но́сиши Нося́щаго вся́ческая святы́ми Твои́ми рука́ми: Его́же моли́, Чи́стая, от чужда́го злоде́йства невре́дным на́м спасти́ся.

Та́же, Досто́йно е́сть: И покло́н. Ектениа́, и свети́лен, и псалмы́ обы́чныя.

На стихо́вне стихи́ры апо́стольски, гла́с 7:

Апо́столи сла́внии, столпи́ церко́внии, и́стины пропове́дницы, свети́ла су́ще све́тлая, вы́ огне́м духо́вным вся́ку пре́лесть попали́сте, челове́ческий же ро́д просвети́сте. Те́мже мо́лим вы́: моли́те Спа́са и Бо́га на́шего, умири́ти ми́р, и спасти́ ду́шы на́шя.

Сти́х: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся: во вся́ дни́ на́шя возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я, и при́зри на рабы́ Твоя́, и на дела́ Твоя́, и наста́ви сы́ны и́х.

Апо́столи Христо́вы, де́латели Спа́совы, Кре́ст бо я́ко ра́ло на ра́мех нося́ще, оляде́вшую зе́млю от и́дольския ле́сти очи́стивше, и ве́ры сло́во все́ясте: вои́стинну досто́йно нарица́етеся, святи́и Христо́вы Апо́столи.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Му́ченичен: Еди́но ды́шуще, и на еди́но взира́юще страстоте́рпцы му́ченицы, еди́н пу́ть живота́ обре́тше, е́же за Христа́ сме́рть ревну́юще дру́г дру́га кончи́не: Оле чудесе́! я́ко сокро́вища му́ки предвосхища́юще, дру́г ко дру́гу глаго́лаху: я́ко а́ще не ны́не у́мрем, у́мрем же вся́ко, и бытию́ до́лжная послу́жим: сотвори́м ну́жду любоче́стием, о́бщее свое́ да вмени́м, сме́ртию живо́т ку́пим. Моли́твами и́х, Бо́же, поми́луй на́с.

Сла́ва, и ны́не, Богоро́дичен: Роди́лся еси́ от Де́вы несказа́нно, Христе́, и просвети́л еси́ су́щыя во тьме́, вопию́щыя: Го́споди, сла́ва Тебе́.

Та́же, Бла́го е́сть: Трисвято́е. По О́тче на́ш: тропари́, ектениа́, и ча́с пе́рвый, и отпу́ст.

В четверто́к блаже́нны, гла́с 7.

Красе́н бе́ и до́бр в сне́дь, и́же мене́ умертви́вый пло́д: Христо́с е́сть дре́во живо́тное, от Него́же яды́й не умира́ю, но вопию́ с разбо́йником: помяни́ мя́, Го́споди, во Ца́рствии Твое́м.

Сти́х: Блаже́ни изгна́ни пра́вды ра́ди, я́ко те́х е́сть Ца́рство Небе́сное.

Из глубины́ злове́рия язы́к стада́ привлеко́сте, прему́дрии, к ве́ре богокра́сней, и к мы́сленней трапе́зе обро́к многоце́нный си́х приведо́сте, сла́внии Апо́столи.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л, на вы́ лжу́ще Мене́ ра́ди.

Омраче́ние лю́тыя пре́лести све́том пропове́дания отгна́вше, Апо́столи Госпо́дни, сердца́ благочести́вых просвети́ли есте́ я́ве: те́мже ва́с пе́сньми Боже́ственными ублажа́ем.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

Му́ченичен: Ссеца́еми на удеса́ мече́м страда́льцы Боже́ственнии, не отсе́чени пребы́сте любве́ Изба́вителя: к Нему́же востеко́сте: ны́не живете́ в ра́дости, вси́ небе́сною сла́вою облистава́еми.

Сла́ва: Зло́бнейший и тли́тель ро́да челове́ческаго обдержи́т мя́, моли́твами пропове́дник Твои́х, всеси́льная Тро́ице, исхити́ мя от горта́ни Его́: да велича́ю Твою́ безме́рную ми́лость.

И ны́не: Сопресто́льна Отцу́ Сы́на, Чи́стая Де́во, от чи́стых Твои́х крове́й произвела́ еси́ нося́щаго пло́ть ме́ртвенную, я́ко да обезсме́ртит существо́ челове́ческое: те́мже по до́лгу Тя́ вси́ ублажа́ем.

В четверто́к ве́чера

на Го́споди, воззва́х, стихи́ры кре́стны. Гла́с 7:

Подо́бен: Не ктому́ возбраня́еми есмы́:

Сти́х: А́ще беззако́ния на́зриши, Го́споди, Го́споди, кто́ постои́т? Я́ко у тебе́ очище́ние е́сть.

Да челове́ка Бо́га соде́лаеши, челове́к бы́л еси́ преблаги́й Христе́, и распя́лся еси́: сла́ва си́ле Твое́й.

Сти́х: И́мене ра́ди Твоего́, потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Егда́ на Кре́ст Тя́, Иису́се, со́нм евре́йский осуди́, земля́ тряса́шеся, и со́лнца све́т скрыва́шеся.

Сти́х: От стра́жи у́тренния до но́щи, от стра́жи у́тренния да упова́ет Изра́иль на Го́спода.

Те́рнием Тя́ безсме́ртне, венча́ собо́р беззако́нный, пре́лести те́рние из ко́рене секу́ща, Царю́ Святы́й.

Та́же, в мине́и стихи́ры свято́му. Сла́ва, свято́му, а́ще и́мать: И ны́не, крестоБогоро́дичен гла́са. А́ще ли не́сть мине́и, и́ны стихи́ры Пресвяте́й Богоро́дице, гла́с 7:

Подо́бен: Дне́сь бди́т Иу́да:

Сти́х: Я́ко у Го́спода ми́лость, и мно́гое у него́ избавле́ние, и то́й изба́вит Изра́иля от все́х беззако́ний его́.

Ви́дящи просте́рта на дре́ве А́гнца, нескве́рная А́гница и Де́ва, посреде́ двою́ разбо́йнику, увы́ мне́, вопия́ше, Сладча́йшее Мое́ Ча́до! Что́ стра́нное сие́ и пресла́вное та́инство? Ка́ко Тя́ беззако́нный со́нм на Кре́ст воздви́же, и же́лчи напои́, ма́нны насы́щшаго челове́ки?

Сти́х: Хвали́те Го́спода вси́ язы́цы, похвали́те Его́ вси́ лю́дие.

Егда́ Тя на Кресте́ пригвожде́на Де́ва и Ма́ти Твоя́ узре́, Христе́ мо́й, судо́м законопресту́пным от иуде́й на ме́сте ло́бнем, увы́ мне́, вопия́ше, Сы́не Мо́й любе́знейший! Что́ стра́нное виде́ние сие́? Ка́ко Тя́ ко Кресту́ пригвожда́ют де́ти неразу́мнии евре́йстии, все́х Го́спода?

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Еди́ну Тя́, Всесвята́я Влады́чице, по Рождестве́ позна́хом вси́ Де́ву я́вльшуюся, Его́же без се́мене родила́ еси́, на Дре́ве ви́дящи ру́це Свои́ во́лею пригвозди́вша, Пречи́стая пла́чущи взыва́ше: во́лею, Долготерпели́ве, умира́еши, избавля́я от сме́рти вся́ пою́щыя Тя́.

Сла́ва, и ны́не, КрестоБогоро́дичен: Влады́чице Всесвята́я Де́во, ро́ждшая Го́спода, за благоутро́бие на Кресте́ пригвозди́вшагося, и жи́зни струи́ источи́вша ми́ру, Того́ умоли́ спасти́ся душа́м на́шым: Тебе́ бо еди́ну и́мамы ве́рнии прибе́жище, и сте́ну, и заступле́ние. Те́мже и притека́ем к покро́ву Твоему́.

Та́же, Све́те ти́хий: Проки́мен дне́. И Сподо́би, Го́споди, в ве́чер се́й

На стихо́вне стихи́ры кре́стны, гла́с 7: Подо́бен:

Не ктому́ возбраня́еми есмы́ Дре́ва живо́тнаго, упова́ние иму́ще Кре́ст Тво́й: Го́споди, сла́ва Тебе́.

Сти́х: К Тебе́ возведо́х о́чи мои́ живу́щему на Небеси́. Се́ я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны́.

Пове́шен бы́в безсме́ртне на Дре́ве, сокруши́л еси́ вся́ се́ти диа́воли: Го́споди, сла́ва Тебе́.

Сти́х: Поми́луй на́с, Го́споди, поми́луй на́с, я́ко по мно́гу испо́лнихомся уничиже́ния, наипа́че напо́лнися душа́ на́ша поноше́ния гобзу́ющих, и уничиже́ния го́рдых.

Му́ченичен: Сла́ва Тебе́, Христе́ Бо́же, апо́столов похвала́, и му́чеников весе́лие: и́хже про́поведь Тро́ица Единосу́щная.

Сла́ва, и ны́не, КрестоБогоро́дичен: На дре́ве пригвожде́нна Тя́ во́лею Всенепоро́чная я́ко ви́де, пла́чущи поя́ще держа́ву Твою́.

Та́же, Ны́не отпуща́еши: Трисвято́е. По О́тче на́ш: тропа́рь, ектениа́, и отпу́ст.

В четверто́к на повече́рии,

кано́н Пресвяте́й Богоро́дице, гла́с 7:

Пе́снь 1

Ирмо́с: Истря́сшему Бо́гу фарао́на в мо́ри Чермне́м, пе́снь побе́дную пои́м, я́ко просла́вися.

Живота́ моего́ прозря́ наста́вший коне́ц, Влады́чице, вопию́: Ты́ ми да́ждь очище́ние согреше́ний, Богоневе́сто.

В пучи́не благосты́ни Твоея́ прите́к, вопию́: Влады́чице Блага́я, изба́ви мя́ вся́каго муче́ния.

Сла́ва: Влады́це, приими́ на́с ве́рою прибега́ющих к Тебе́, и пода́ждь напа́стей и скорбе́й избавле́ние.

И ны́не: Ты́ па́дшую Ада́мову ски́нию проро́чески возста́вила еси́, Спа́са и Бо́га, Пречи́стая, во чре́ве носи́вши.

Пе́снь 3

Ирмо́с: Утверди́ся ве́рою Христо́ва Це́рковь, и́бо непреста́нно пе́сньми вопие́т пою́щи: свя́т еси́, Го́споди, и Тя́ пое́т ду́х мо́й.

Я́же Бо́га и Влады́ку неизрече́нно заче́ншая, обдержи́ма мя́ бу́рею греха́, Ты́ от си́х изба́ви, и спаси́ мя, Пречи́стая.

Согреше́ний неподо́бных но́щию мя́ одержи́ма, покая́ния луча́ми озари́, Отрокови́це, де́лати ми́ пода́вши све́та дела́ всегда́.

Сла́ва: Я́же Небе́сный Хле́б ро́ждши, Богоро́дице, пита́ющи все́х ве́рных сердца́, насы́ти а́лчущую ду́шу мою́ стра́стную.

И ны́не: Утверди́хся, Боже́ственное Твое́ Рождество́ разуме́в, и заступле́нием Де́во, обогаща́юся, зовы́й: свя́т еси́, Го́споди, спаса́я ду́шы на́шя.

Пе́снь 4

Ирмо́с: Услы́шах слу́х Тво́й, и убоя́хся: разуме́х дела́ Твоя́, и ужасо́хся, Го́споди.

Стеню́ща пред Тобо́ю, Влады́чице, и вопию́ща приле́жно от ума́ моего́, да не пре́зриши мене́, ниже́ посрами́ши.

Попали́ у́нзший те́рн окая́нныя моея́ души́, сласте́й плотски́х, Я́же Огнь Боже́ственный, Влады́чице, ро́ждшая.

Сла́ва: Пода́ждь ми́ согреше́ний оставле́ние, всеблагослове́нная Чи́стая, и изба́ви ве́чнаго и ужа́снаго муче́ния.

И ны́не: Сло́во в Тя́ все́льшееся, Пречи́стая, существо́ мое́ возъобрази́, па́дшее преступле́ньми.

Пе́снь 5

Ирмо́с: У́тренюет ду́х мо́й к Тебе́, Бо́же, зане́ Све́т еси́, и Твоя́ повеле́ния бы́ша исцеле́ния рабо́м Твои́м, Человеколю́бче.

Уподо́бихся безслове́сным ското́м преокая́нный, страстьми́ безслове́сными окая́нней мое́й пло́ти рабо́тая: Ты́, Богоро́дице, пода́ждь ми́ воспрянове́ние.

Поми́луй мя́ па́че все́х челове́к согреши́вшаго, и к Твоему́ покро́ву прибега́юща те́плому, Богоро́дице Де́во, и муче́ний исхити́.

Сла́ва: И́же Богоро́дицу испове́дающии Тя́, Ма́ти Де́во, непреиду́щаго Ца́рствия и пи́щи, Тобо́ю, Богома́ти, улучи́ти да сподо́бятся.

И ны́не: Благослове́нная и Препросла́вленная Ма́ти неискусому́жная, умерщвле́ную греха́ми ду́шу мою́, и страстьми́ погорбле́ную неодержа́нными, оживотвори́.

Пе́снь 6

Ирмо́с: Ио́на из чре́ва а́дова вопия́ше: возведи́ от тли́ живо́т мо́й. Мы́ же Тебе́ вопие́м: всеси́льне Спа́се, поми́луй на́с.

Содержи́т мя́ бу́ря грехо́вная, Де́во, и ко тли́ отча́яния веде́т: но простри́ ми ру́ку по́мощи тве́рдую и всемо́щную.

Еле́й, е́же в Тебе́ те́плаго милосе́рдия, возле́й на мя́, Влады́чице, и изба́ви согреше́ний, исхити́ огня́ ве́чнующаго.

Сла́ва: Я́же разреши́вшая от боле́зни, Де́во, Е́ву, Рождество́м Твои́м Пречи́стым, разреши́ ми, Отрокови́це, боле́зни страстны́я моея́ души́ и телесе́.

И ны́не: Песносло́виши из Тебе́ воплоще́ннаго Бо́га, и рыда́еши на Кресте́ вознесе́на, Того́ смотря́ющи, Ма́ти Де́во Чи́стая и Пренепоро́чная.

Та́же, Го́споди, поми́луй, три́жды. Сла́ва, и ны́не:

Седа́лен, гла́с 7:

Пло́д чре́ва Твоего́, Чи́стая, Кре́ст водрузи́ в концы́, и тли́ ми́р изба́ви: те́мже Тя́ я́ко Пресла́вную велича́ем.

Пе́снь 7

Ирмо́с: В пе́щь о́гненную вве́ржени преподо́бнии о́троцы, о́гнь в ро́су преложи́ша, воспева́нием си́це вопию́ще: благослове́н еси́, Го́споди Бо́же оте́ц на́ших.

Прегреше́ний мои́х умно́жися преще́ние, суда́ досто́йно, Чи́стая, припа́даю и зову́ Ти: пре́жде конца́ пода́ждь ми́ очище́ние, и умиле́ния сле́зы, и нра́вом исправле́ние.

Неду́говавша мя́ лю́те скве́рными прегреше́нии, Чи́стая, и ко отча́яния иду́ща гро́бу, я́ко ро́ждши Жи́знь вся́ческих, Пречи́стая, Боже́ственными дея́нии оживи́.

Сла́ва: Богороди́тельнице Блага́я, ве́рою призыва́ющих Твою́ благода́ть присноживу́щую, мы́сленныя сме́рти избавля́ющи, Ца́рствия сподо́би Пречи́стыми Твои́ми моли́твами.

И ны́не: Непости́жное Рождество́ Де́вы славосло́вим, и́мже сме́рти изба́вихомся: Его́же ра́ди ро́ждшеся в нетле́ние, благослове́н еси́, зове́м, Го́споди Бо́же оте́ц на́ших.

Пе́снь 8

Ирмо́с: Еди́наго безнача́льнаго Царя́ Сла́вы, Его́же благословя́т Небе́сныя си́лы, и трепе́щут чи́ни а́нгельстии, по́йте свяще́нницы, лю́дие превозноси́те Его́ во ве́ки.

Страсте́й мя́ пе́щь попаля́ет, Де́во, и огне́м сласте́й пояда́ет, предвари́вши, ми́лостивною Твое́ю росо́ю угаси́ ю́, даю́щи души́ мое́й устуже́ние кре́пко.

Ду́шу оскверни́х, и растли́х пло́ть сластьми́, валя́яся в си́х, и бы́х поруга́ние челове́ком, и сме́х враго́м: Влады́чице Богоро́дице, помо́щница мне́ бу́ди.

Сла́ва: Бо́га, Его́же родила́ еси́, Де́во, умоли́ низпосла́ти спасе́ние ве́рно чту́щым Тя́, и бе́д разруше́ние, и неду́гов лю́тых премене́ние ско́рое, и благода́ть ве́чную.

И ны́не: Созда́вшаго Ада́ма по о́бразу, и от смеше́ния его́ проше́дша, и разре́шша пе́рвую кля́тву, по́йте свяще́нницы, Го́спода, и превозноси́те Его́ во ве́ки.

Пе́снь 9

Ирмо́с: Всепе́тая небе́с превы́шшая, Безнача́льное Сло́во безсе́менно заче́ншая, и воплоще́ннаго Бо́га ро́ждшая челове́ком: те́м Тя́ вси́ велича́ем.

Всесве́тлая Де́во Ма́ти Богоро́дице, окая́нную ду́шу мою́, лю́те омраче́нную страстьми́ плотски́ми, све́том моли́тв Твои́х в стра́х Бо́жий све́тло наста́ви.

Отча́явся от мно́жества согреше́ний моего́ спасе́ния, и недоуме́нен яви́хся, Влады́чице Всесвята́я: Твое́ благодея́ние, и ми́лость Твою́ низпосли́ мне́.

Сла́ва: Рождество́ Твое́, Богоро́дице, е́же па́че естества́, удивля́ет а́нгелы, ужаса́ет же челове́ки: все́м бо несказа́нно е́сть и непостижи́мо. Сие́ же пою́ще благоче́стно Тя́ сла́вим.

И ны́не: Умерщвле́ния и тле́ния ри́зы совлецы́ ми, Де́во, Я́же спасе́ния Ри́зу воплоще́ннаго Сло́ва, ро́ждши челове́ком: те́мже вси́ Тя при́сно велича́ем.

Та́же, Досто́йно е́сть: и покло́ны. Трисвято́е. По О́тче на́ш: тропари́, и про́чее, и отпу́ст.

Пятница

В пято́к у́тра

по 1-м стихосло́вии седа́льны кре́стны. Гла́с 7:

Це́рковь вопие́т Ти́, Христе́ Бо́же, в пе́вке и ке́дре и кипари́се, покланя́ющися Тебе́: побе́ды ве́рным да́руй, Богоро́дицы ра́ди, и поми́луй на́с.

Сти́х: Возноси́те Го́спода Бо́га на́шего, и покланя́йтеся подно́жию но́гу Его́, я́ко свя́то е́сть.

И́же мене́ ра́ди претерпе́вый на Кресте́ пригвожде́ние, приими́ и мое́ бо́дренное хвале́ние, Христе́ Бо́же, я́ко Человеколю́бец.

Сла́ва, и ны́не, КрестоБогоро́дичен: Кресто́м Сы́на Твоего́ храни́ми, Де́во, прило́г бесо́вских избега́ем: те́мже Тя́, Богоро́дице Безневе́стная, по до́лгу воспева́юще сла́вим.

По 2-м стихосло́вии седа́льны, гла́с 7:

Огня́ светле́йшее, и пла́мене де́йственнейшее дре́во показа́л еси́, Христе́, Креста́ твоего́, попаля́ющее грехи́ челове́ков, и просвеща́ющее сердца́ пою́щих во́льное твое́ распя́тие: Христе́ Бо́же, сла́ва Тебе́.

Сти́х: Бо́г же Ца́рь на́ш пре́жде ве́ка, соде́ла спасе́ние посреде́ земли́.

Го́споди, Твоего́ Креста́ зря́ще возвыша́ема всегда́, приступа́ем ве́рно пе́ньми и пе́сньми, облобыза́юще того́ стра́хом и ра́достию: освяти́ рабы́ Твоя́, и умири́ ми́р Тво́й сего́ явле́нием, еди́не Многоми́лостиве.

Сти́х: Ди́вен Бо́г во святы́х свои́х, Бо́г Изра́илев.

Святи́и му́ченицы, моли́те оставле́ние да́ти на́м прегреше́ний на́ших, и ча́емых му́к изба́витися на́м, и го́рькия сме́рти, мо́лимся.

Сла́ва, и ны́не, КрестоБогоро́дичен: Богоро́дице Чи́стая Присноде́во, на Кресте́ зря́щи Сы́на Твоего́ ви́сяща, я́ко Ма́ти пла́чущи Того́ велича́ше стра́шное снизхожде́ние, Неискусобра́чная Влады́чице.

По 3-м стихосло́вии, седа́льны, гла́с 7:

Кре́ст Тво́й, Христе́, Честны́й, ми́ра ору́жие е́сть, и непобеди́мая побе́да: и́мже и неви́димыя враги́ низлага́юще, благода́рно воспева́ем Тя́.

И́же Ада́мово осужде́ние Дре́вом Креста́ исцели́вый, исцели́ на́ша сокруше́ния серде́чная, и спаси́ на́с.

Сла́ва, и ны́не, КрестоБогоро́дичен: Пло́д чре́ва Твоего́, Пречи́стая, Кре́ст насади́ в конце́х и от тли́ ми́р изба́вил е́сть: те́мже Тя́, Пресла́вная, велича́ем.

Кано́н честно́му и животворя́щему Кресту́ Госпо́дню, [его́же краегране́сие: Христо́с на Дре́ве, уста́вил е́сть дре́вний вре́д.] Творе́ние Ио́сифово. Гла́с 7:

Пе́снь 1

Ирмо́с: Истря́сшему Бо́гу фарао́на в мо́ри Чермне́м, пе́снь побе́дную пои́м, я́ко просла́вися.

Христо́с возноси́мь на Кре́ст, к Себе́ вся́ привлече́ челове́ки, и низве́рже врага́, все́х низве́ргшаго.

Во́ду животу́ моему́, Иису́се, от живоно́сных ре́бр источи́л еси́, и умертви́л еси́ врага́, Влады́ко, бы́в ме́ртв.

Му́ченичен: Моли́тву Христу́ за на́с, страстоте́рпцы, приле́жную принеси́те, стра́шнаго суда́ все́м на́м изба́витися.

Му́ченичен: Смири́вшеся вы́ Христа́ ра́ди, прему́дрии му́ченицы, го́рдаго врага́ низложи́сте Боже́ственною благода́тию.

Богоро́дичен: Возсия́вшаго из Тебе́, превели́ким благоутро́бием, Влады́чице, на Кресте́ зря́щи пла́кала еси́, того́ сла́вящи.

Други́й кано́н Пресвяте́й Богоро́дице. Гла́с 7:

Ирмо́с то́йже.

Впа́дшаго в тле́ние преслуша́ния пра́деда Ада́ма обнови́ла еси́, Бо́га, Пречи́стая, пло́тию ро́ждши.

С весе́лием гла́с Гаврии́лов взыва́ем Ти́, Чи́стая: ра́дуйся, все́х Наде́жде Пречи́стая, ра́дуйся, Богоневе́сто.

Умерщвле́нный мо́й у́м оживи́ живо́тным де́йствием из Тебе́ ро́ждшимся вои́стинну, Пречи́стая Де́во.

Благословя́щии Тя́ ве́рно от Бо́га благословля́ются я́ве: благослове́ния во исто́чник родила́ еси́, Еди́на Всепе́тая.

Пе́снь 3

Ирмо́с: Утверди́ся ве́рою Христо́ва Це́рковь, и́бо непреста́нно пе́сньми вопие́т пою́щи: свя́т еси́, Го́споди, и Тя́ пое́т ду́х мо́й.

Безстра́стный по существу́, ка́ко стра́сть терпи́ши, живо́т мне́ вдыха́яй? Ка́ко умира́еши на дре́ве? Ве́лия Твоя́ ми́лость и долготерпе́ние, Спа́се.

На Кресте́ посреде́ разбо́йников, Сло́ве, непра́ведно воздви́глся еси́, и оправда́л еси́ ве́рою позна́вшаго Тебе́ Зижди́теля всея́ тва́ри, во́лею стра́ждуща.

Му́ченичен: Строга́ния пло́ти терпя́ще, ру́к же отя́тие, и но́г, и все́х удо́в страстоте́рпцы, сла́вы сподо́бишася, о на́с моля́щеся.

Му́ченичен: Премно́гими му́ками о Бо́зе просвети́вшеся, премно́гую сла́ву му́дрии ны́не насле́довасте, всегда́ моля́щеся о душа́х на́ших.

Богоро́дичен: Разреше́ние долго́в на́ших, Чи́стая Де́во, пода́ждь ма́терними Твои́ми моли́твами, на Кресте́ пригвожде́ннаго челове́ка бы́вша, Бо́га Сло́ва ро́ждшая.

И́н Ирмо́с то́йже.

Тебе́ Де́ву, обра́зно се́нь всесвяту́ю, Законополо́жнику на горе́ Бо́г предсказа́ше: селе́ние бо бы́сть все́х освяща́ющаго.

Зе́млю Тя́ святу́ю, Де́во, разуме́хом вси́, на́м без се́мене возрасти́вшую кра́сный кла́с, Иису́са Христа́, пита́ющ ве́рою Тя́ и любо́вию блажа́щих.

Ви́дена бы́ша ше́ствия Бо́га вы́шняго, в Тебе́, Де́во, неизрече́нно тому́ вопло́щшуся: Ма́ти бо Ты́ была́ еси́ все́ми ца́рствующаго.

Утверди́хся, Боже́ственное Твое́ Рождество́ разуме́в, и заступле́нием Твои́м, Де́во, обога́щься, зовы́й: свя́т еси́ Го́споди, спаса́яй ду́шы на́шя.

Пе́снь 4

Ирмо́с: Услы́шах слу́х Тво́й, и убоя́хся: разуме́х дела́ твоя́, и ужасо́хся Го́споди.

Я́коже красне́йший гро́зд на Кресте́ воздви́глся еси́, Влады́ко, весе́лия вино́ иска́пал еси́ Человеколю́бче.

Многоболе́зненныя челове́ков стра́сти утиши́л еси́ вои́стинну, стра́сти Влады́ко, во́лею на пло́ти Твое́й прие́м.

Му́ченичен: Острупи́ша острупля́еми страстоте́рпцы борца́: и яви́шася вра́чеве ду́ш на́ших.

Му́ченичен: Ополчи́шася к мучи́телем страстоно́сцы, и победи́вше, венча́ни бы́ша побе́дными венцы́.

Богоро́дичен: Родила́ еси́ без се́мене Де́во Сло́ва, на Кресте́ погуби́вшаго тле́ние бла́гостию.

И́н Ирмо́с то́йже.

Услы́шал е́сть Авваку́м Тя́, Пречи́стая, го́ру, духо́вными осене́ньми просвеща́ему: из Тебе́ бо Бо́г яви́ся воплоща́емь.

Исправля́ется правосла́вных собо́р, Тебе́ Всесвяту́ю поя́ я́ко Богома́терь, со Арха́нгелом, ра́дуйся, зовы́й Тебе́.

Бие́тся несто́риа лице́, не восхоте́вшаго му́дрствовати Тебе́ Богоро́дицу Чи́стую: Бо́га бо вои́стинну, Пречи́стая, родила́ еси́.

Кра́сную Тя́ и све́тлую добро́тами Жени́х обре́т, в Тя́ всели́ся, и Богоро́дицу Всечи́стая соде́ла.

Пе́снь 5

Ирмо́с: У́тренюет ду́х мо́й к Тебе́, Бо́же: зане́ Све́т еси́, и Твоя́ повеле́ния бы́ша исцеле́ния рабо́м Твои́м, Человеколю́бче.

Воздви́жемь, Влады́ко, на Дре́во пло́тию, тва́рь всю́ из ро́ва лю́тых неразу́мия извле́кл еси́, к ра́зуму Твоему́, Человеколю́бче.

На ло́бнем Тя́ ме́сте испроси́ша лю́дие беззако́ннии распя́ти Иису́се, главу́ па́губную зми́еву сокруша́ющаго.

Му́ченичен: Уста́висте злоче́стия тече́ние, Христо́вы му́ченицы, Боже́ственными кровьми́ ва́шими, и фарао́на мучи́теля в си́х потопи́сте.

Му́ченичен: Ноготьми́ неща́дно стру́жеми, растерза́сте обличе́ньми, страда́льцы, сердца́ суему́дренная, и победи́телие бы́сте.

Богоро́дичен: Освяти́л е́сть Бо́г утро́бу Твою́, Свята́я Чи́стая, и всели́ся в ню́: и на Кре́ст воздви́жемь, тва́рь совоздви́гл е́сть.

И́н Ирмо́с то́йже.

Боголе́пную Твою́, Госпоже́, и кра́сную, и сладча́йшую и благу́ю добро́ту возлюби́в Влады́ка, в Тя́, Де́во, всели́ся.

Всесвята́я и светоно́сная две́ре благода́ти, вселе́нную светле́йшим Твои́м све́том озари́вши, Отрокови́це, Тебе́ пою́щыя просвети́.

Богоро́дицу испове́дающии Тя́, Ма́ти Де́во, непреиду́щаго Ца́рствия и пи́щи Тобо́ю, Богома́ти, улучи́ти да сподо́бятся.

Хра́м яви́лася еси́ Всеви́дца и Вседержи́теля: Твою́ бо утро́бу чисте́йшую небе́с обре́т водвори́ся, Богороди́тельнице Всечи́стая.

Пе́снь 6

Ирмо́с: Ио́на из чре́ва а́дова вопия́ше: возведи́ от тли́ живо́т мо́й. Мы́ же Тебе́ вопие́м: всеси́льне Спа́се, поми́луй на́с.

Неду́говавшее челове́ческое естество́, я́влься за милосе́рдие ми́лости, врачу́ неду́гующих, исцели́л еси́ Кресто́м и стра́стию Твое́ю.

Дре́вом дре́вле Ада́м осуди́ся: Дре́вом же ны́не кре́стным оправда́ся, вхожде́ние прие́м в ра́й, и сла́дости восприя́тие.

Пое́м Тя́ пло́тию распе́ншагося, сла́вим те́рнием венча́вшагося, и сла́вою венча́вшаго челове́ки, Царю́ преблаги́й.

Му́ченичен: Губи́тельный ны́не отри́нувше вре́д страда́льцы идолобе́сия, му́кам причасти́шася: и уме́рше со Христо́м ца́рствуют.

Му́ченичен: Ни гоне́ние, ни гла́д, ни нагота́, ни беды́, ниже́ сме́рть, отню́д Боже́ственныя страстоте́рпцы, от любве́ Христо́вы разлучи́ша.

Богоро́дичен: Славосло́виши из Тебе́ вопло́щшагося, и пла́чеши на Кресте́ воздви́женаго, того́ смотря́ющи, Де́во Ма́ти Свята́я Всенепоро́чная.

И́н Ирмо́с то́йже.

Богому́жно в челове́цех пожи́вшаго родила́ еси́, Богоро́дице Де́во, еди́наго благоде́теля, е́же бы́ти челове́ком да́рующаго.

Емману́ила, Богоро́дице, сугу́ба по существу́ родила́ еси́, пре́жде соверше́нно сло́во, Бо́га воплоще́нна, избавле́ние на́м подава́ющаго.

Ковче́г прие́мый зако́на скрижа́ли, преднаписа́ Тебе́, Богоро́дице, Сло́во Бо́жие, я́ко прие́мшую во чре́ве Свое́м на́с ра́ди воплоща́ема.

А́нгельския язы́ки испо́лнены, Твоя́ похвалы́ пропове́дати не мо́гут, Чи́стая: мы́ же ны́не ра́бски прие́мше, е́же ра́дуйся, Гаврии́лово прино́сим.

Пе́снь 7

Ирмо́с: Пе́щь о́троцы огнепа́льну дре́вле росоточа́щу показа́ша, еди́наго Бо́га воспева́юще, и глаго́люще: превозноси́мый отце́в Бо́г, и препросла́влен.

Тяготу́ облегча́я беззако́ний мои́х, посреде́ беззако́нных воздви́глся еси́ на Кре́ст, преблаги́й Го́споди, превозноси́мый отце́в Госпо́дь, и Бо́г благослове́н еси́.

Копие́м пробо́дься в Боже́ственная ре́бра Твоя́, и ре́бренное поползне́ние испра́вил еси́, Спа́се, пла́менному же ору́жию дава́ти ми́ вхо́д рая́ повелева́еши всегда́.

Му́ченичен: Зве́зды на высоте́ основа́нныя це́ркве му́ченицы бы́вше, тва́рь озаря́ете страда́ний све́тлостию, и исцеле́ний сия́нием.

Му́ченичен: Кни́га прино́сит при́сно напи́санных живы́х Госпо́дних му́ченик, напи́саная Бо́жия оправда́ния усе́рдно сохрани́вших, и пострада́вших кре́пко.

Богоро́дичен: Всесвята́я, пресвято́е Сло́во, е́же от нея́ возсия́вшее, на святе́м Кресте́ воздви́жено, и освяща́ющо земны́я, зря́щи рыда́ше.

И́н Ирмо́с то́йже.

Я́же в пещи́ о́гненней, Твое́ Рождество́ спасло́ е́сть у́бо Дре́вле: ны́не же на́с, Всенепоро́чная, спаси́, Его́ прише́ствию е́же па́че сло́ва зову́щих: благослове́н еси́ Бо́же оте́ц на́ших.

Богооте́ц у́бо Дави́д Твою́ сла́ву напису́ет, Де́во, и Тебе́ тва́рей Цари́цу явле́нно проро́чествует, предстоя́щую одесну́ю, Всенепоро́чная, Бо́га оте́ц на́ших.

Обнови́ла еси́, Чи́стая, земны́х естество́, обновле́нием Рождества́ Твоего́. Те́мже Ти́ вопие́м: благослове́н е́сть во ве́ки вся́, Госпоже́, Пло́д Твоего́ чре́ва.

Осужде́ннаго бы́вша Ада́ма, и сме́ртию держи́ма, Ада́м вторы́й, Пречи́стая, Тобо́ю поми́ловав призва́, благослове́н еси́ зову́ща, рожде́йся, и обновле́й мя́.

Пе́снь 8

Ирмо́с: Еди́наго безнача́льнаго Царя́ Сла́вы, Его́же благословя́т Небе́сныя си́лы, и трепе́щут чи́ни а́нгельстии, по́йте, свяще́нницы, лю́дие превозноси́те Его́ во ве́ки.

Ме́ртва мя́ показа́ дре́во ра́зума, Ты́ же, Христе́ мо́й, умертви́вся на дре́ве оживи́л еси́, и просвети́л еси́ пе́ти: по́йте, свяще́нницы, лю́дие превозноси́те во вся́ ве́ки.

Те́рнием венча́ законопресту́пный со́нм Тя́, Царю́, преслуша́ния искоренева́юща те́рние Ада́ма первозда́ннаго, и воздви́же на Кре́ст, вся́ из глубины́ пре́лести извле́кшаго.

Му́ченичен: Ра́зумом просте́ршаго Небеса́, Тебе́ простира́ют на Дре́ве лю́дие неразу́мнии, исцеля́юща на́шя стра́сти стра́стию Твое́ю, Спа́се, и уставля́юща боле́зни, я́же от гвозде́й боле́зньми.

Му́ченичен: Му́ченик мо́щи благоуха́ния испуща́ют чуде́с приходя́щым несумне́нным се́рдцем, и страсте́й злово́ние прогоня́ют при́сно, и все́м здра́вие о Бо́зе подава́ют.

Богоро́дичен: Святы́х чи́нове мо́лятся, Де́во, из утро́бы Твоея́ проше́дшему Влады́це, показа́вшему на Кресте́ си́м пу́ть страда́ния, Чи́стая, и славосло́вят Тя́ я́ко все́х Цари́цу.

И́н Ирмо́с то́йже.

Непостижи́мый Влады́ка все́х, Его́же не вмеща́ют Небеса́, Богороди́тельнице, вмеща́ется во Твою́ утро́бу, Де́во. Те́мже Тя́ ве́рнии любо́вию превозно́сим во ве́ки.

Ума́ превы́шшаго всея́ тва́ри, Отрокови́це, Его́же не возмога́ет рожде́нное зре́ти естество́, носи́ла еси́ на Свое́ю Пречи́стою руку́. Те́мже ве́рнии любо́вию превозно́сим во вся́ ве́ки.

Бо́га, Его́же родила́ еси́, умоли́, Де́во, низпосла́ти спасе́ние ве́рно чту́щым Тя́, и бе́д разруше́ние, и неду́гов лю́тых премене́ние ско́рое, и благода́ть ве́чную.

Украше́н Тя́ доброде́тельми разли́чными, и просвеще́н хра́м Вы́шняго, уве́девше, Всесвята́я Де́во, пое́м благоче́стно Тя́, и славосло́вим во вся́ ве́ки.

Та́же пое́м пе́снь Богоро́дицы: Вели́чит душа́ моя́ Го́спода:

Пе́снь 9

Ирмо́с: Всепе́тая небе́с превы́шшая, Безнача́льное Сло́во безсе́менно заче́ншая, и воплоще́ннаго Бо́га ро́ждшая челове́ком: те́м Тя́ вси́ велича́ем.

На Кресте́ Тя возвы́шена, Царю́ веко́в, я́ко ви́де со́лнце омрачи́ся, и земля́ потрясе́ся, и це́ркве раздра́ся заве́са све́тлости, Иису́се Всеси́льне.

Ископа́ша ру́це и но́зе твои́ беззако́нницы, и ре́бра живоно́сная прободо́ша копие́м, и же́лчи со о́цтом напои́ша Тя́, Христе́ мо́й, все́х сла́дость, и Бо́га и́стинна.

Му́ченичен: Сокруши́ша началозло́бнаго се́ти, сокруша́еми вся́кими ви́ды муче́ния, и венцено́сцы побе́дою бы́вше, до́блии страда́льцы ублажа́ются.

Му́ченичен: Освяти́ша положе́нием моще́й всю́ зе́млю страстоте́рпцы, и угаси́ша сква́ры идоложе́ртвенныя, огню́ примеша́ющеся, и в не́м та́йно всесожига́еми.

Богоро́дичен: Благолюби́вая, херуви́м святе́йшая, я́же Бо́жие Сло́во Бо́га пло́тию ро́ждшая, воздви́женнаго на Кресте́ хоте́нием, за все́х приле́жно тому́ моли́ся.

И́н Ирмо́с то́йже.

Всесоверше́но челове́чество прия́то бы́сть из Тебе́, Пречи́стая Отрокови́це, сло́ву совоку́пльшуся пло́ти одушевле́нней, сло́вом души́ укра́шенней: те́мже вси́ ве́рнии Тя́ велича́ем.

Вити́йское у́бо буесло́вие да умолчи́т, апо́стольская же труба́ да возгласи́т, Тебе́ и́стинными гла́сы, Де́во, восхваля́ющи, Богоро́дицу и́стинную возвеща́ющи.

Поми́ловася Тебе́ ра́ди челове́чество, по ипоста́си вои́стинну Сло́ву соеди́ншееся, и воздая́нием Бо́г, Де́во, бы́вшее: те́мже Тя́ вси́ при́сно велича́ем.

Проразуме́ся проро́ческими быстрозре́нии та́инство, Отрокови́це, Твоего́ рождества́, я́ко воплоще́нна Бо́га ро́ждши челове́ком, избавля́ющаго на́с от напа́стей моли́твами Твои́ми.

Та́же, Досто́йно е́сть: И ектениа́, и свети́лен, и псалмы́ обы́чны.

На стихо́вне стихи́ры кре́стны, гла́с 7:

Влады́ко сы́й Человеколю́бче Жизнода́вче, искупи́л еси́ Кресто́м Твои́м вселе́нную, Го́споди, сла́ва Тебе́.

Сти́х: Испо́лнихомся зау́тра ми́лости Твоея́, Го́споди, и возра́довахомся, и возвесели́хомся: во вся́ дни́ на́шя возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я. И при́зри на рабы́ Твоя́, и на дела́ Твоя́, и наста́ви сы́ны и́х.

На Кресте́ пригвозди́ся Лоза́ и́стинная, объима́ша язы́цы ра́й с разбо́йником: сия́ сла́ва церко́вная, сие́ бога́тство Ца́рствия. Пострада́вый на́с ра́ди, Го́споди, сла́ва Тебе́.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Па́мять святы́х Твои́х страстоте́рпец пра́зднующе, Тебе́ пое́м, Христе́, вопию́ще, Го́споди, сла́ва Тебе́.

Сла́ва, и ны́не, КрестоБогоро́дичен: Своего́ Сы́на на Дре́ве ви́дящи дре́вле, се́рдце свое́ ору́жием печа́ли уязвля́ше, Пречи́стая.

Та́же, Бла́го е́сть: Трисвято́е. По О́тче на́ш: тропа́рь, и ектениа́, и ча́с пе́рвый, и отпу́ст.

В пято́к блаже́нны, гла́с 7:

Красе́н бе́ и до́бр в сне́дь, и́же мене́ умертви́вый пло́д, Христо́с е́сть Дре́во живо́тное, от Него́же яды́й не умира́ю, но вопию́ с разбо́йником: помяни́ мя, Го́споди, во Ца́рствии Твое́м.

Сти́х: Блаже́ни и́згнани пра́вды ра́ди, я́ко те́х е́сть Ца́рство Небе́сное.

Исцеля́я Ада́мову боле́знь, ю́же подъя́т вра́жиим сове́том, возне́сся на Дре́во все́х Царю́, и боле́зни претерпе́л еси́, рука́ма и нога́ма пригвожде́н: те́мже сла́вим Твое́, Сло́ве, долготерпе́ние.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л, на вы́ лжу́ще Мене́ ра́ди.

Посреде́ Тя беззако́нною со́нм евре́йский распя́т, еди́наго законода́вца и изба́вителя, вся́каго беззако́ния избавля́юща, Христе́, ро́д челове́ческий: те́мже воспева́ем Тя́.

Сти́х: Ра́дуйтеся и весели́теся, я́ко мзда́ ва́ша мно́га на Небесе́х.

Му́ченичен: Я́звы мно́гих му́к, я́ко кра́сная удобре́ния нося́ще, до́блественне страда́льцы, украше́ние церко́вное позна́ни бы́ша све́тлое, всегда́ моля́щеся о душа́х на́ших.

Сла́ва: О Тро́ице Свята́я! Ве́рныя рабы́ Твоя́ изба́ви му́к, в Тя́ ве́ровавшыя, во еди́ном Божестве́, непреста́нно сла́вимую благоче́стно, и ве́чное Твое́ Ца́рствие да́руй.

И ны́не: Не иму́ща ви́да, ниже́ добро́ты, зря́щи Тебе́, Христе́, пло́тию возвы́шена на Дре́ве Кре́стнем Всечи́стая Де́ва, взыва́ше боле́зненне: увы́ Мне́, ка́ко Тя́, Ча́до, беззако́ннии уязви́ша?

В пято́к ве́чера

на Го́споди, воззва́х, стихи́ры святы́м му́чеником, и святи́телем, и преподо́бным, гла́с 7:

Подо́бен: Не ктому́ возбраня́еми есмы́:

Сти́х: А́ще беззако́ния на́зриши, Го́споди, Го́споди, кто́ постои́т; я́ко у тебе́ очище́ние е́сть.

Му́ченицы тьму́ безбо́жия прогна́ша, все́м показа́вше челове́ком Богоразу́мия све́т.

Сти́х: И́мене ра́ди Твоего́ потерпе́х Тя́, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Уче́нии правосла́вными, Боже́ственными заря́ми осия́сте Госпо́дню Це́рковь, па́стырие всему́дрии.

Сти́х: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

Бесо́в сокруши́сте се́ти, водворя́еми в пусты́нях непрохо́дных при́сно, отцы́ преподо́бнии.

И́ны стихи́ры му́чеником, гла́с то́йже.

Сти́х: Я́ко у Го́спода ми́лость, и мно́гое у Него́ избавле́ние, и То́й изба́вит Изра́иля от все́х беззако́ний его́.

Спа́се, не постыди́ мене́, егда́ прии́деши суди́ти ми́ру всему́, сту́дная дела́ сотво́ршаго.

Сти́х: Хвали́те Го́спода вси́ язы́цы, похвали́те Его́ вси́ лю́дие.

Сла́ва Тебе́, Христе́ Бо́же, апо́столов похвало́: и му́чеников весе́лие: и́хже про́поведь, Тро́ица Единосу́щная.

Сти́х: Я́ко утверди́ся ми́лость Его́ на на́с, и и́стина Госпо́дня пребыва́ет во ве́к.

Святи́и му́ченицы, и́же до́бре страда́вше, и венча́вшеся, моли́теся ко Го́споду, спасти́ся душа́м на́шым.

Сла́ва, и ны́не, Богоро́дичен: Ма́ти у́бо позна́лася еси́, па́че естества́ Богоро́дице, пребыла́ же еси́ Де́ва, па́че сло́ва и ра́зума, и чудесе́ рождества́ Твоего́ сказа́ти язы́к не мо́жет. Пресла́вну бо су́щу зача́тию, Чи́стая, непости́жен е́сть о́браз рожде́ния: иде́же бо хо́щет Бо́г, побежда́ется естества́ чи́н. Те́мже Тя́ вси́ Ма́терь Бо́жию ве́дуще, мо́лим Ти ся приле́жно: моли́ спасти́ся душа́м на́шым.

Та́же, Све́те ти́хий: Проки́мен дне́.

На стихо́вне стихи́ры му́ченичны, гла́с 7:

Неради́вше о все́х земны́х, святи́и му́ченицы, и на суди́щи Христа́ му́жески пропове́давше, воздая́ние му́к от Него́ прия́сте: но я́ко иму́ще дерзнове́ние, Того́ умоли́те я́ко Бо́га Всеси́льна, ду́шы на́шя спасти́, прибега́ющыя к ва́м, мо́лимся.

Всехва́льнии му́ченицы, овча́та духо́вная, всесожже́ния слове́сная, же́ртва прия́тна благоуго́дна Бо́гу, ва́с ни земля́ потаи́ла е́сть, но Не́бо прия́т вы́, А́нгелом соприча́стницы бы́сте. С ни́миже моли́те, мо́лим вы́, Спа́са и Бо́га на́шего, умири́ти ми́р, и спасти́ ду́шы на́шя.

Ме́ртвен: По о́бразу Твоему́ и по подо́бию созда́вый, Го́споди, испе́рва челове́ка, и в раи́ поста́вил еси́ владе́ти Твои́ми творе́нии: за́вистию же диа́волею прельще́н бы́в, я́ди причасти́ся. За́поведей Твои́х престу́пник бы́в. Те́мже па́ки в зе́млю, от нея́же взя́т бы́сть, осуди́ его́ возврати́тися, Го́споди, и испроси́ти поко́й.

Ме́ртвен: Упоко́й, Спа́се на́ш, Жизнода́вче, я́же преста́вил еси́ бра́тию на́шу от вре́менных, зову́щыя: Го́споди, сла́ва Тебе́.

Сла́ва, и ны́не, Богоро́дичен: Я́же невмести́маго прие́мши, и ро́ждши Бо́га Сло́ва воплоще́нна, моли́ спасти́ся душа́м на́шым.

В пято́к на повече́рии

кано́н Пресвяте́й Богоро́дице, гла́с 7:

Пе́снь 1

Ирмо́с: Ма́нием Твои́м на земны́й о́браз преложи́ся, пре́жде удоборазлива́емое водно́е естество́, Го́споди: те́мже немо́кренно пешеше́ствовав Изра́иль, пое́т Тебе́ пе́снь побе́дную.

Влады́чице Богоро́дице, и́же на Тя́ упова́ние иму́щыя, и к Тебе́ притека́ющыя, бе́д же и скорбе́й изба́ви, и паде́ния, и ве́чнаго пла́мене, и му́ки.

Росо́ю милосе́рдия Твоего́, Де́во Чи́стая, пла́мень погаси́ мои́х паде́ний, я́ко да не ко искуше́нию прииду́ вся́каго осужде́ния, и огня́ бу́дущаго.

Сла́ва: Одожди́ ми, Де́во, ка́пли Твоего́ милосе́рдия, сласте́й зно́ем всегда́ изсуша́ему: я́ко да непреста́нно сла́влю от Тебе́ ро́ждшагося Бо́га и Спа́са на́шего.

И ны́не: Водо́ю напо́й Твоея́ моли́твы, Де́во, ду́шу мою́ разгоре́вшуюся печа́льным зно́ем: я́ко да Боже́ственнаго весе́лия от Тебе́ ро́ждшемуся плоды́ принесу́.

Пе́снь 3

Ирмо́с: В нача́ле Небеса́, всеси́льным сло́вом Твои́м утвержде́й, Го́споди Спа́се, и вседе́тельным и Бо́жиим Ду́хом всю́ си́лу и́х: на недви́жимем мя́ ка́мени испове́дания Твоего́ утверди́.

Тя́ молю́, Де́во, спасе́ние души́ мое́й, и очище́ние пода́ждь, и благода́ть незави́стну, я́ко сильна́ и бла́га, и я́ко человеколюби́ва Отрокови́ца, и жи́зни нетле́нныя сподо́би.

Нело́жное спасе́ние и предста́тельнице ми́ра, ро́ждшая Зижди́теля, Чи́стая Де́во, от бе́д изба́ви воспева́ющих Тя́ ве́рно, и напа́стей жития́, и ве́чнаго осужде́ния.

Сла́ва: Мо́лимся приле́жно щедро́там Твои́м, Отрокови́це, не пре́зри рабы́ смире́нныя: но я́ко блага́я, ми́лостивным Твои́м о́ком при́зри, и томи́тельства нереши́маго диа́воля на́с изба́ви.

И ны́не: Ны́не зе́льством печа́ли объя́т е́смь, Де́во, кре́пость мою́ всю́ разсла́бив, и ве́сь на земли́ ни́ц лежу́. Но вопию́ Ти от души́: Ты́ воздви́гни мя́ па́ки, и утеше́нием Твои́м укрепи́.

Пе́снь 4

Ирмо́с: О́тча не́дра не оста́вль, и соше́д на зе́млю, Христе́ Бо́же, та́йну услы́шах смотре́ния Твоего́, и просла́вих Тя́, Еди́не Человеколю́бче.

Ма́ти Бо́жия, изба́ви мя́ от тли́, и льсти́ваго томи́теля зми́я, при́сно мя́ обходя́щаго, и запина́ющаго по Бо́зе стопы́ моя́.

Мы́сленныя две́ри жи́зни покая́ния ми́ две́ри отве́рзи: я́ко ны́не ко отча́янным две́рем прибли́жихся окая́нный, от мно́гих согреше́ний.

Сла́ва: Ка́л страсте́й и сласте́й оттря́сши до́бре милосе́рдием Твои́м, Пресвята́я, чи́ста покажи́, и оде́ждею облецы́ мя́ светови́дною благода́тию.

И ны́не: Скве́рну души́, и нечистоту́ телесе́ моего́ очи́стивши, Чи́стая, благоприя́тными мольба́ми Твои́ми, чи́ста предста́ви воспева́ти при́сно Тебе́ и сла́вити.

Пе́снь 5

Ирмо́с: Но́щь несветла́ неве́рным, Христе́, ве́рным же просвеще́ние в сла́дости слове́с Твои́х: сего́ ра́ди к Тебе́ у́тренюю, и воспева́ю Твое́ Божество́.

Преблага́го Сло́ва, Де́во Всенепоро́чная, моли́ спасти́ся на́м: и́бо засту́пницу Тя́ стажа́хом, и в ну́ждах по́мощь кре́пку.

Не преда́ждь враго́м мя́, Чи́стая, мою́ па́губу зело́ и́щущым грехо́в мои́х ра́ди: но милосе́рдием Твои́м от си́х вре́да исхити́.

Сла́ва: Ве́дуще Тя́ Бо́га все́х, Христе́, и все́х Творца́, на Тя́ Еди́наго возложи́хом спасе́ния упова́ние, на́с ра́ди вочелове́чшагося.

И ны́не: Ра́дуйся, о́блаче Чи́стая, во́ду живо́тну источа́ющий, ра́дуйся, Де́во, му́чеников утвержде́ние, и апо́столов, ра́дуйся, честно́е славосло́вие, Пренепоро́чная.

Пе́снь 6

Ирмо́с: Пла́вающаго в молве́ жите́йских попече́ний, с корабле́м потопля́ема грехи́, и душетле́нному зве́рю примета́ема, я́ко Ио́на, Христе́, вопию́ Ти: из смертоно́сныя глубины́ возведи́ мя.

Благоле́пия и красоты́ добро́ту, ю́же име́х Креще́нием, погуби́х, Влады́чице, де́я неподо́бная: Ты́ же те́плым Твои́м предста́тельством сию́ пода́ждь, ве́рно чту́щым Тя́.

Страда́ния и одержа́ния ну́жднаго, и печа́ли изба́ви мя́, Богоро́дице, утеше́ние ми́ Твое́ подаю́щи; ины́я бо не и́мам засту́пницы, ра́зве Тебе́, Всенепоро́чная, а́з ра́б Тво́й.

Сла́ва: Изба́вителя ро́ждшая, Благода́теля и Спа́са, кре́пость и́маши, и мо́жеши ели́ко хо́щеши твори́ти, Пренепоро́чная. Те́мже Тя́ мо́лим Твои́ раби́: изба́ви на́с страстны́я молвы́.

И ны́не: Тя́ о́блак лего́к дре́вле зри́т, просвеща́емь Ду́хом проро́к Иса́иа, на не́мже се́де сла́вы Госпо́дь, прии́де, и низложи́ еги́петския вся́ истука́нныя, Де́во Ма́ти Пречи́стая.

Та́же, Го́споди, поми́луй, три́жды. Сла́ва, и ны́не:

Седа́лен, гла́с 7:

Изба́ви огня́ ве́чнующаго покланя́ющихся Рождеству́ Твоему́: Тя́ бо Христо́с показа́ засту́пницу на́м пою́щым Тя́.

Пе́снь 7

Ирмо́с: Пе́щь о́троцы огнепа́льну дре́вле росоточа́щу показа́ша, Еди́наго Бо́га воспева́юще, и глаго́люще: превозноси́мый отце́в Бо́г и препросла́влен.

Грехо́в одержи́т мя́ мно́жество, и ко тле́нию низво́дит мя́ па́губы и отча́яния: Богоро́дице, предвари́, и пода́ждь ми́ по́мощь спаси́тельную.

Изба́ви мя́ вся́каго вра́жия злоде́йства, и искуше́ний и ско́рби, и в тишине́ и ми́ре сохрани́ ду́шу мою́, Пречи́стая: я́ко да ра́дуяся, пою́ си́лу Твою́.

Сла́ва: Осужде́ние прови́дя дело́м мои́м лука́вым, окая́нный, взыва́ю Ти́ из глубины́ се́рдца моего́, Пречи́стая: Ты́ ми́ бу́ди, Влады́чице, заступле́ние, и спаси́ мя.

И ны́не: С му́ченики, со а́нгелы и со апо́столы, Всенепоро́чная, Твоего́ Сы́на и Го́спода моли́ спасти́ рабы́ Твоя́ от напа́стей, и бе́д и печа́лей.

Пе́снь 8

Ирмо́с: В пещи́ о́троки подража́юще, духо́вную ро́су прие́мшии, ве́рою зове́м: благослови́те дела́ Госпо́дня Го́спода.

Бу́ди ми́ по́мощь, Де́во Пресвята́я, к Тебе́ прибега́ющему, и вопию́щему с ве́рою: поми́луй, Чи́стая, и пре́жде конца́ очище́ние согреше́ний да́ждь ми́: и в ча́с кончи́ны пода́ждь спасе́ние, и по кончи́не поко́й да́руй.

У́жас одержи́т мя́ лю́т, егда́ помышля́ю стра́шное испыта́ние, и Судию́ Неумоли́маго, соде́явшым лука́вая, якова́ же вои́стинну я́же а́з окая́нный соде́ях, и му́ки о́ныя конца́ не иму́щия: Влады́чице ми́ра, бу́ди ми́ спасе́ние.

Сла́ва: Я́же земноро́дных вино́вна спасе́нию, о ве́рных побо́рнице, гре́шников очище́ние! о исто́чниче всего́ добра́ и пода́телю благи́х, Богороди́тельнице Чи́стая! Ты́ ми душе́вная боле́зни исцели́, и источи́ благода́ть ве́чную, и сла́ву и весе́лие.

И ны́не: Да́р от на́с Я́же дана́ еси́ Влады́це, я́ко от нача́ла естества́, мольбы́ на́шя, Пречи́стая, приими́ да́ры красны́, воздаю́щи на́м Твою́ по́мощь: я́ко да непреста́нно из Тебе́ Ро́ждшагося пое́м, и превозно́сим во ве́ки.

Пе́снь 9

Ирмо́с: Ма́ти Бо́жия и Де́ва, ро́ждшая и де́вствующая па́ки, не естества́ де́ло, но Бо́жия снизхожде́ния: те́м я́ко Еди́ну Бо́жиих чуде́с сподо́бльшуюся, Тя́ при́сно велича́ем.

Под Тво́й кро́в, Де́во, ны́не прибего́х, от мно́жества прегреше́ний обурева́емаго, и погиба́ющаго спаси́ мя, Я́же Спа́са и Зижди́теля ро́ждши, и ве́чнаго изба́ви осужде́ния.

Творца́, и Бо́га и Го́спода, от Твои́х вопло́щшагося пречи́стых крове́й, о на́с, Чи́стая, моли́, уще́дрити милосе́рдием Твои́м лю́ди отча́янныя.

Сла́ва: Огня́ негаси́маго изба́ви мя́, и тьмы́ вне́шния, и пла́ча ве́чнаго, осужде́нию су́ща досто́йна, о Пресвята́я, Чи́стая Богоро́дице! Хода́тайством Твои́м те́плым к Бо́гу.

И ны́не: Под Твое́ю, Богоро́дице, благода́тию сохраня́емь, не снеде́н пребыва́ю прило́ги сопроти́вных вра́г: те́мже я́ко утвержде́ние Боже́ственно и степе́нь, воспева́ю и покланя́юся, и велича́ю Тя́.

Та́же. Досто́йно е́сть: Покло́н. Трисвято́е. И по О́тче на́ш: тропари́, и про́чее обы́чно, и отпу́ст.

Суббота

В суббо́ту у́тра

по 1-м стихосло́вии, седа́льны му́ченичны, гла́с 7:

Святи́и, моли́теся, оставле́ние да́ти на́м прегреше́ний на́ших, и ча́емых лю́тых изба́витися на́м, и го́рькия сме́рти, мо́лимся.

Сти́х: Ди́вен Бо́г во святы́х свои́х, Бо́г Изра́илев.

Святи́и Твои́, Го́споди, на земли́ подви́гшеся, врага́ попра́ша, и и́дольскую ле́сть упраздни́ша: те́мже и венцы́ от Тебе́ прия́ша, Человеколю́бца Влады́ки, и ми́лостиваго Бо́га, подаю́щаго ми́ру ве́лию ми́лость.

Сла́ва, и ны́не, Богоро́дичен: Я́ко на́шего воскресе́ния сокро́вище, на Тя́ наде́ющыяся, Всепе́тая, от ро́ва и глубины́ прегреше́ний возведи́: Ты́ бо пови́нныя греху́ спасла́ еси́, ро́ждшая Спасе́ние на́ше, я́же пре́жде Рождества́ Де́ва, и в рождестве́ Де́ва, и по рождестве́ па́ки пребыва́еши Де́ва.

По 2-м стихосло́вии седа́лен, гла́с 7:

Ра́дуйтеся, пра́веднии, и да веселя́тся небе́сная: на земли́ бо му́ченицы подви́гшеся, врага́ попра́ша, и ле́сть и́дольскую упраздни́ша: да взыгра́ется Це́рковь, победи́тельная пра́зднующи Подвигополо́жнику и Еди́ному Победотво́рцу Христу́ Бо́гу, подаю́щему ми́рови ве́лию ми́лость.

Сти́х: Ди́вен Бо́г во святы́х Свои́х, Бо́г Изра́илев.

Му́ченицы Твои́, Го́споди, врага́ победи́ша, и ле́сть и́дольскую посрами́ша, вооружи́вшеся креста́ Твоего́ си́лою: те́мже и со а́нгелы воспева́юще зову́т побе́дную пе́снь, славосло́вяще Тебе́, Христе́. Те́х моли́твами пода́ждь душа́м на́шым очище́ние и ве́лию ми́лость.

Сти́х: Мно́ги ско́рби пра́ведным, и от все́х и́х изба́вит я́ Госпо́дь.

Во стране́ живу́щих, Го́споди, и в селе́ниих пра́ведных Твои́х учини́ ду́хи, и́мже сотворя́ем па́мять, Человеколю́бче: и а́ще что́ согреши́ша в житии́ су́ще, я́ко ми́лостив, и благопремени́тель Бо́г, прости́, подая́ ми́рови ве́лию ми́лость.

Сла́ва, и ны́не, Богоро́дичен: Неискусобра́чная Отрокови́це Всенепоро́чная, от Твои́х крове́й воплоще́ннаго Бо́га на́шего, при́сно со проро́ки, и святи́тели, и му́ченики, моли́ спасти́ся душа́м на́шым.

Кано́н святы́м му́чеником, иера́рхом, и преподо́бным, и усо́пшым, [его́же краегране́сие сицево́: С ли́ки воспева́ю па́стырей и му́ченик, а́з Ио́сиф.] Гла́с 7:

Пе́снь 1

Ирмо́с: Поспе́шествовавшему Бо́гу во Еги́пте Моисе́ови, извести́ Изра́иля, Тому́ еди́ному пои́м, я́ко просла́вися.

Ли́к му́ченик нельсти́вых вся́ пре́лести победи́ борца́, лику́ет ра́дуяся пред лице́м созда́вшаго и́.

Святи́телие Христо́вы, и преподо́бнии вси́ подви́гшиися, пи́щи сподо́бишася ве́чныя благода́тию.

Изба́ви на́с, Христе́, от вся́кия я́рости моле́нием проро́к, и преподо́бных, и же́н свяще́нных, и спаси́ ду́шы на́шя.

Сла́ва: Созда́вый мя́ от земли́ Сло́ве, в зе́млю па́ки возврати́тися ми́ повеле́л еси́: упоко́й, я́же в ве́ре преста́вил еси́.

Богоро́дичен: Пречи́стая Ма́ти, я́же Бо́га Пресвято́е Сло́во ро́ждшая, освяти́ вся́ любо́вию Тя́ сла́вящыя.

Други́й кано́н усо́пшым, пое́м на ряду́, иде́же не́сть мине́и, [его́же краегране́сие: Пра́вило седьмо́е, изъображе́ние то́жде нося́щее. Творе́ние Феофа́ново.] Гла́с 7:

Ирмо́с: Ма́нием Твои́м на земны́й о́браз преложи́ся, пре́жде удоборазлива́емое водно́е естество́, Го́споди: те́мже немо́кренно пешеше́ствовав Изра́иль, пое́т Тебе́ пе́снь побе́дную.

Сти́х: Ди́вен Бо́г во святы́х Свои́х, Бо́г Изра́илев.

Добро́та украше́нная доброде́тельными о́бразы, и Боже́ственное возложе́ние разли́чными красота́ми, сия́юще благоче́стием, му́ченицы, Христу́ Бо́гу принесо́стеся.

Сти́х: Поко́й, Го́споди, ду́шы усо́пших ра́б Твои́х.

Зарю́ непристу́пнаго и трисо́лнечнаго сия́ния улучи́ти сподо́би преста́вльшыяся рабы́ Твоя́, многоми́лостиве Го́споди, отню́дуже отбеже́ вся́ка боле́знь, и печа́ль, и воздыха́ние.

Сла́ва: Умерщвле́нием осужде́ное естество́, Живо́т ипоста́сный, Жизнода́вче Са́м сы́й Христе́, воздви́гл еси́: те́мже я́ко еди́н ще́др, ве́рою к Тебе́ преста́вльшыяся упоко́й.

И ны́не: Испра́вила еси́, Пречи́стая, прама́тернее паде́ние, ро́ждши Го́спода Сло́ва, сию́ воскреси́вшаго, и су́щым во гробе́х вдохну́вша живо́т, вла́стию Боже́ственною.

Пе́снь 3

Ирмо́с: Небеса́ утверди́вый Сло́вом, и земно́е основа́ние укрепи́вый на вода́х мно́гих, утверди́ мо́й у́м в во́лю Твою́, Человеколю́бче.

Сокруша́еми ка́мением, и в ро́в вмета́еми, сокруши́сте всю́ льсти́ваго си́лу, и не сокруше́ни умо́м му́ченицы пребы́сте.

Заре́ю Боже́ственных уче́ний, и доброде́телей луча́ми, прему́дрии святи́телие, ве́рныя просвеща́юще, и ересе́й мглу́ всю́ отгна́сте.

Умертви́вшеся ми́ру преподо́бнии Твои́, Сло́ве, преми́рную вои́стинну жи́знь насле́доваша: и́хже ра́ди, Ще́дре, все́х на́с уще́дри.

Сла́ва, ме́ртвен: О преста́вльшихся в ве́ре и наде́жди мо́лимся вси́ благо́му Влады́це, поми́ловати и́х в ча́с суда́.

Богоро́дичен: Не истощи́в не́др О́тчих Сло́во, во не́дрех Твои́х, Пречи́стая, Младе́нец держи́мь яви́ся, нача́ло от Тебе́ прие́мь Безнача́льный.

И́н Ирмо́с: В нача́ле небеса́ всеси́льным Сло́вом Твои́м утвержде́й, Го́споди Спа́се, и вседе́тельным и Бо́жиим Ду́хом всю́ си́лу и́х: на недви́жимем мя́ ка́мени испове́дания Твоего́ утверди́.

Ю́ношеско и кре́пко терпе́ние, му́жественне показа́ша му́ченик ли́цы: ра́н бо устремле́ние подъя́ша, и муче́ний я́звы, нетле́нныя Твоея́ сла́вы, Спа́се, жела́юще, и красоты́.

В ве́чный Тво́й живо́т, я́же в наде́жди усо́пших, Ми́лостиве, приими́ ду́шы: и жела́емых и Боже́ственных, Влады́ко, не́др Боже́ственнаго Авраа́ма вну́трь всели́, и с Ла́зарем блаже́нным сопричти́.

Сла́ва: Соше́дый с Небе́с, во е́же спасти́ ро́д челове́ческий, Благоутро́бный Спа́се, невеще́ственнаго све́та, и Боже́ственныя сла́вы Твоея́ насыща́тися и ра́дости, благоче́стно преста́вленныя, Твои́м милосе́рдием сподо́би.

И ны́не: Зако́ни естества́ разреши́шася в Тебе́, Непостижи́мое Сло́во Заче́ншей, Чи́стая: и зако́н на́м Боже́ственный даде́ся, все́м оставле́ние подая́ отчаява́емым прегреше́ньми, благода́тию Боже́ственныя любве́.

Пе́снь 4

Ирмо́с: Плотско́е прише́ствие твое́, Христе́, уверя́я проро́к Авваку́м, взыва́ше: сла́ва си́ле твое́й, Го́споди.

Укрепля́еми е́же ко Го́споду любо́вию му́ченицы, обнемощи́ша вра́жию си́лу: те́мже ублажа́ются.

Я́ко овча́та па́стыря и а́гнцы, блаже́ннии иера́рси, слове́сному ста́ду предста́сте Боже́ственною благода́тию.

Многосве́тлыя я́ко зве́зды, доброде́тели све́тлостию, озари́сте ве́рных исполне́ние, преподо́бнии отцы́ на́ши.

Сла́ва: Еди́нственное торжество́ кре́пких же́н, и сосло́вие святы́х проро́к, улучи́ша небе́сныя бла́гости.

Богоро́дичен: Моли́, Его́же родила́ еси́ Сы́на, Всепе́тая, искуше́ний вся́ческих и скорбе́й изба́витися рабо́м Твои́м.

И́н Ирмо́с: О́тча не́дра не оста́вль, и соше́д на зе́млю, Христе́ Бо́же, та́йну услы́шах смотре́ния Твоего́, и просла́вих Тя́, Еди́не Человеколю́бче.

Страда́льческия боле́зни терпели́вно показа́вше, Христе́, му́ченицы, венцы́ увязо́шася пра́вды Твоея́, и сла́вят Твою́ си́лу.

Пачеесте́ственныя све́тлости Твоея́ преста́вленыя благоче́стно сподо́би, егда́ прии́деши во сла́ве Твое́й со А́нгелы Твои́ми, Всеще́дре и Многоми́лостиве.

Сла́ва: Трисве́тлыя зари́, Бла́же, и еди́нственнаго облиста́ния Божества́ наслади́тися сподо́би пре́жде отше́дшыя, и сла́вящыя Тя́, Человеколю́бче.

И ны́не: И́же О́тча не́дра не оста́вль, в Деви́ческих не́дрех Христо́с водвори́ся, и сме́рти изба́вил е́сть Тебе́ блажа́щыя, Богома́ти, Еди́на Всепе́тая.

Пе́снь 5

Ирмо́с: У́тренюет ду́х мо́й к тебе́, Бо́же, зане́ све́т еси́, и Твоя́ повеле́ния бы́ша исцеле́ния рабо́м Твои́м, Человеколю́бче.

О я́звах плотски́х неради́вше кре́пцыи страда́льцы, и я́звы все́х исцеля́ете и стра́сти, Боже́ственными ва́шими я́звами.

Прия́сте вла́сть реши́ти и вяза́ти на земли́, святи́телие Христо́вы: те́мже на́шя грехо́вныя плени́цы нереши́мыя разреши́те.

Умо́м чи́стым Бо́гу соедини́вшеся ли́цы по́стничестии, проро́к, и пра́ведных, и же́н честны́х лику́ют, ра́дующеся ликова́нием неразори́мым.

Сла́ва, ме́ртвен: Я́ко еди́н сы́й многоми́лостив, ве́рою, Христе́, преста́вленыя от жития́, рая́ сотвори́ жи́тели, Человеколю́бче.

Богоро́дичен: Черто́г неразори́мь я́вльшися Бо́гу, моли́ Того́, Всесвята́я Де́во, черто́га мя́ мы́сленнаго жи́теля соде́лати.

И́н Ирмо́с: Го́споди Бо́же мо́й, от но́щи у́треневав тебе́ молю́ся: пода́ждь ми́ оставле́ние прегреше́ний мои́х, и к све́ту Твои́х повеле́ний пути́ моя́ напра́ви, молю́ся.

Ме́ртвостию живоно́сною, истка́нною муче́ний ра́ди, всехва́льнии му́ченицы оде́яни све́тло, душа́м пре́жде усо́пшым Боже́ственный испроси́те поко́й.

От неизнури́мых сокро́вищ, пролива́яй благоутро́бие, Спа́се, ду́шы я́же преста́вил еси́, с перворо́дными Твои́ми в жили́щах Небе́сных благоволи́ водвори́тися.

Сла́ва: Тяготу́ отложи́вшыя, и от у́з разреши́вшыяся, и к Вы́шнему животу́ рабы́ Твоя́ преше́дшыя, Христе́, наслажда́тися Твои́х святы́х све́тлостей, Спа́се, благоизво́ли.

И ны́не: Влады́чице Богома́ти, мои́х согреше́ний разреше́ние пода́ждь, и да́руй ми́ проще́ние грехо́в мои́х, я́же Жи́знь Ипоста́сную ми́ру ро́ждши, Всенепоро́чная.

Пе́снь 6

Ирмо́с: Ио́на из чре́ва а́дова вопия́ше: возведи́ от тли́ живо́т мо́й. мы́ же тебе́ вопие́м: Всеси́льне Спа́се, поми́луй на́с.

Низложи́сте вра́жия возвыше́ния, возвыша́еми к Бо́гу в страда́ниих, всесла́внии ору́жницы, и гра́ждане небе́снии бы́сте.

Ересе́й зи́му отгоня́юще, Христо́вы и́стиннии святи́телие, к весне́ и́стинней мно́жество благочести́вых приведо́ша.

Кре́постию Твое́ю, Христе́, преподо́бных мно́жество, и проро́к, и же́н святы́х, оправда́шася, и незаходи́маго све́та наслажда́ются.

Сла́ва, ме́ртвен: Преста́вил еси́, Ще́дре, от вре́менных рабы́ Твоя́: но сия́ ве́чнаго весе́лия, и живота́ и́стиннаго прича́стники сподо́би.

Богоро́дичен: Освяти́, Всесвята́я Де́во, рабы́ Твоя́, Пресвято́е Сло́во пло́тию ро́ждшая, Его́же пое́т вся́кое дыха́ние, освяща́ющи.

И́н Ирмо́с: Пла́вающаго в молве́ жите́йских попече́ний, с корабле́м потопля́ема грехи́, и душетле́нному зве́рю примета́ема, я́ко Ио́на, Христе́, вопию́ Ти: из смертоно́сныя глубины́ возведи́ мя.

Ли́к му́ченический, неудо́бь носи́мыя боле́зни кре́пко претерпе́вший, неболе́зненныя сла́дости насле́дова, пра́вды венцы́ от живоно́сныя десни́цы прие́м. [Два́жды.]

Сла́ва: С пра́ведными, иде́же святы́х ли́цы, и иде́же све́тлость преподо́бных и ве́чныя жи́зни наслажде́ние, пре́жде усо́пшыя Твоя́ рабы́ учини́, Ми́лостиве, я́ко Бо́г Безсме́ртен.

И ны́не: И́же во́лею Боже́ственною, и соде́тельною си́лою, вся́ составле́й от небытия́, из утро́бы Твоея́, Чи́стая, произы́де, и су́щыя во тьме́ сме́ртней, Богонача́льными блиста́ньми просвети́ла е́сть.

Пе́снь 7

Ирмо́с: В пещи́ су́ще халде́йстей, Авраа́мстии о́троцы ликова́ху со а́нгелом, глаго́люще: оте́ц на́ших Бо́же, благослове́н еси́.

Тече́нии кро́вными страстоте́рпцы, нече́стия угаси́ша пла́мень, пою́ще: оте́ц на́ших Бо́же, благослове́н еси́.

Иера́рхи восхваля́ем, просвети́тели ми́ра бы́вшыя, пою́ще: оте́ц на́ших Бо́же, благослове́н еси́.

Пе́сньми да почту́тся проро́к и преподо́бных святы́й собо́р, пою́щих: оте́ц на́ших Бо́же, благослове́н еси́.

Сла́ва: Изба́ви гее́нны, я́же прия́л еси́, Христе́ ще́дрый, ве́рныя рабы́ Твоя́, вопию́щыя: Оте́ц на́ших Бо́же, благослове́н еси́.

Богоро́дичен: Я́ко А́нгел честне́йшую, Богоро́дицу песносло́вим, вопию́ще: Оте́ц на́ших Бо́же, благослове́н еси́.

И́н Ирмо́с: Пе́щь о́троцы огнепа́льну дре́вле росоточа́щу показа́ша, Еди́наго Бо́га воспева́юще, и глаго́люще: превозноси́мый отце́в Бо́г и препросла́влен.

Венцы́ нося́ще ли́цы му́ченик, Царя́ Христа́ я́сно обстоя́т мы́сленно, со а́нгельскими ликостоя́ньми, благослове́н еси́, зову́ще, Бо́же оте́ц на́ших.

Ты́ сме́рти и живота́ вла́сть име́яй, Ще́дре, пи́щи Боже́ственныя сподо́би я́же в ве́ре Твое́й, Спа́се, преложе́нныя, благослове́н еси́, зову́щыя, Бо́же оте́ц на́ших.

Сла́ва: Просвеща́я све́том невеще́ственнаго светоли́тия, Христе́, ду́шы, я́же преста́вил еси́, в селе́ниих Небе́сных всели́, славосло́вити Тя́ непреста́нно со уго́дники Твои́ми.

И ны́не: И́же пре́жде без ма́тере из Отца́, ны́не же без отца́ из Тебе́, Де́во, Христо́с неизрече́нно роди́ся, на́с ра́ди челове́к в пло́ть обо́лкся: благослове́н, Пречи́стая, Пло́д Твоего́ Чре́ва.

Пе́снь 8

Ирмо́с: В пещи́ о́троки подража́юще, духо́вную ро́су прие́мшии, ве́рою зове́м: благослови́те дела́ Госпо́дня Го́спода.

Хра́мы и́дольския разверго́сте, всесла́внии: и хра́мы созда́сте себе́ ду́ху, страстоте́рпцы, хра́брски тече́ние сконча́вше.

Яви́стеся я́ко цве́ти благоуха́ннии, святи́телие, ра́зумом ду́шы ве́рных веселя́ще благоче́стия: те́мже досто́йно блажи́ми есте́.

Зе́млю всю́ проше́дше преподо́бнии, и Бо́жии прише́льцы проро́цы бы́сте, вы́шнее соблюда́юще наслажде́ние, и сла́ву при́сно пребыва́ющую.

Сла́ва, поко́ин: Я́ко живы́х и ме́ртвых сло́ве Го́споди, и́же ве́рою усо́пшыя рабы́ Твоя́, лико́м сочета́й спаса́емых все́х, я́ко еди́н Человеколю́бец.

Богоро́дичен: Же́н все́х сосло́вие, посто́м и страда́нием взыска́вших Го́спода, мо́лится непреста́нно Боже́ственному лицу́ Твоему́, Пречи́стая.

И́н Ирмо́с: Еди́наго Безнача́льнаго Царя́ сла́вы, Его́же благословя́т Небе́сныя си́лы, и трепе́щут чи́ни а́нгельстии, по́йте свяще́нницы, лю́дие превозноси́те Его́ во ве́ки.

К Небе́сней зря́ще сла́ве му́ченицы, Христо́ва прише́ствия, о земне́й неради́ша сла́ве, пою́ще благоче́стно Того́ я́ко Царя́, во вся́ ве́ки.

И́же земну́ю разруши́вый хра́мину, е́же о наде́жди жи́зни усо́пшым Небе́сную хра́мину пода́ждь, в пра́ведных селе́ниих си́х упоко́й во вся́ ве́ки.

Сла́ва: Ме́ртвым Воскресе́ние, я́ко Бо́г подава́яй, и́же исто́чник жи́зни имы́й: Ты́ напо́й пи́щными пото́ки, я́ко Еди́н Бла́г, пре́жде усо́пшыя, во вся́ ве́ки.

И ны́не: Све́т Непристу́пный, Богоро́дице Де́во, во чре́ве Твое́м прие́мши неизрече́нно, просвети́ла еси́ су́щыя во тьме́ жития́, сла́вити благоче́стно Христа́, проше́дшаго из Тебе́ несказа́нно.

Та́же, пое́м пе́снь Богоро́дицы: Вели́чит душа́ моя́ Го́спода:

Пе́снь 9

Ирмо́с: Па́че естества́ Ма́терь, и по естеству́ Де́ву, еди́ну в жена́х благослове́нную, пе́сньми ве́рнии Богоро́дицу велича́ем.

Свяще́нных му́ченик, и проро́к, и пра́ведных, от ве́ка до́бре жи́вших, моли́твами и́х, Христе́, ду́шы на́шя поми́луй.

Я́ко служи́тели Влады́це, священнотаи́нницы я́вльшеся, совокупи́стеся слуга́м небе́сным: с ни́миже о на́с моле́ния принеси́те.

С жена́ми блаже́нное сконча́вшыя тече́ние, почти́м по́стническия ли́ки святы́я: я́ко да те́х моли́твами улучи́м свяще́ние.

Сла́ва, ме́ртвен: Ея́же сподо́бишася сла́вы, святы́х все́х ликостоя́ния, Христе́, преста́вленыя сподо́би причасти́тися, правосла́вно Тебе́ послужи́вшыя.

Богоро́дичен: Грехолюби́в сы́й, суди́ща стра́шнаго трепе́щу, ро́ждшагося из Тебе́, Чи́стая, в Не́мже мя́, я́ко Блага́я, неосужде́на соблюди́.

И́н Ирмо́с: Ма́ти Бо́жия и Де́ва, ро́ждшая и де́вствующая па́ки, не естества́ де́ло, но Бо́жия снизхожде́ния: те́м я́ко Еди́ну Бо́жиих чуде́с сподо́бльшуюся, Тя́ при́сно велича́ем.

Явле́нно до́блии му́ченицы просвеща́ют ми́р, ве́ры су́ще столпи́, це́рквам непоколеби́мая тверды́ня, и предгра́дия благоче́стия: те́х по достоя́нию ве́рнии ублажа́ем.

Изба́ви огня́ ве́чнаго, Влады́ко, от на́с преста́вльшыяся: ре́бр Твои́х копие́м грехо́вное рукописа́ние растерза́в си́х, я́ко Еди́н Человеколю́бец, и святы́х све́тлости сподо́би.

Сла́ва: Я́ко Бла́г Бо́г, и Человеколю́бец естество́м, я́ко Ми́лостив, и Ще́др, я́ко живота́ безсме́ртнаго Сы́й сокро́вище неистощи́мое, Спа́се, ве́рою пре́жде усо́пшыя нетле́нныя сла́дости Твоея́ сподо́би.

Богоро́дичен: Зако́на се́ни, и пре́ждняя гада́ния Твои́м Рождество́м преидо́ша, и́бо исполне́ние зако́на и проро́ков Христо́с бы́сть: Его́же во двою́ существу́ пою́ще, Тебе́ Присноде́ву Чи́стую ублажа́ем.

Та́же, Досто́йно е́сть: Ектениа́, свети́лен, и псалмы́ обы́чныя.

На хвали́тех стихи́ры му́ченичны, гла́с 7:

Па́мять святы́х Твои́х страстоте́рпец пра́зднующе, Тебе́ пое́м, Христе́, вопию́ще: Го́споди, сла́ва Тебе́.

Посреде́ суди́ща законопресту́пных, ра́дующеся, вопия́ху, Христе́, страстоте́рпцы: Го́споди, сла́ва Тебе́.

Еди́но ды́шуще, и ко Еди́ному взира́юще страстоте́рпцы му́ченицы, еди́н пу́ть живота́ обре́тше, е́же за Христа́ сме́рть, ревну́юще дру́г дру́га кончи́не. Оле чудесе́, я́ко сокро́вища му́ки предвосхища́ху! дру́г ко дру́гу глаго́лаху, я́ко а́ще не ны́не у́мрем, у́мрем же вся́ко, и бытию́ до́лжная послу́жим, сотвори́м ну́жду любоче́стием, о́бщее свое́ изво́ливше, сме́ртию живо́т ку́пим: моли́твами и́х, Бо́же, поми́луй на́с.

Ме́ртвен: Во стране́ пра́ведных Твои́х, Ми́лостиве, ве́рою к Тебе́ преста́вленныя от вре́менных, учини́, Человеколю́бче.

Сла́ва, и ны́не, Богоро́дичен: Моли́, Де́во, со апо́столы и му́ченики, обрести́ на суде́ преста́вльшымся ве́лию ми́лость.

На стихо́вне стихи́ры ме́ртвены, гла́с 7:

Подо́бен: Неради́вше:

Умерщвле́н ви́ден бы́л еси́ на Кресте́, Еди́не Безсме́ртне, и во гро́бе, я́ко ме́ртв, положе́н бы́л еси́, умерщвле́ния и тли́ сме́ртныя челове́ки избавля́я. Но я́ко пучи́на милосе́рдия сы́й неистощи́мая, и исто́чник благосты́ни, ду́шы Твои́х ра́б, от на́с преста́вленых, упоко́й.

Сти́х: Блаже́ни, я́же избра́л и прия́л еси́, Го́споди.

Ме́ртвен: Нетле́нною Твое́ю добро́тою, и сла́достию красоты́ и Боже́ственнаго Твоего́ све́та луча́ми просвеща́тися сподо́би, к Тебе́ преста́вльшыяся, Бла́же, в невеще́ственнем светоли́тии светоявле́ния Твоего́, со А́нгелы ликовству́ющыя о́крест Тебе́ Влады́ки, и Царя́ Сла́вы, и Го́спода.

Сти́х: Ду́шы и́х во благи́х водворя́тся.

Ме́ртвен: Я́ко неиждива́емое име́я даро́в великоле́пие, я́ко сокро́вище неоску́дное бога́тыя благосты́ни, к Тебе́ преста́вльшыяся, я́ко Бо́г всели́ в страна́х избра́нных Твои́х, на ме́сте ослабле́ния, в дому́ сла́вы Твоея́, в пи́щи ра́йстей, в де́вственнем черто́зе, я́ко Милосе́рд.

Сла́ва, и ны́не, Богоро́дичен: Зако́на исполне́ние родила́ еси́, изба́вителя пло́тию бы́вшаго: не бо бы́сть су́щым пре́жде в зако́не оправда́ние: Христо́с же на́с ра́ди распя́тся и оправда́. Я́ко у́бо иму́щая дерзнове́ние, я́ко Ма́ти, моли́ Сы́на Твоего́ благоутро́бнаго, ду́шы упокои́ти благоче́стно от на́с преста́вленных, Всепе́тая.

Та́же, Бла́го е́сть: и Трисвято́е. По О́тче на́ш: тропа́рь, ектениа́, и ча́с пе́рвый, и отпу́ст.

В суббо́ту блаже́нны, гла́с 7:

Красе́н бе́ и до́бр в сне́дь, и́же мене́ умертви́вый пло́д: Христо́с е́сть дре́во живо́тное, от Него́же яды́й не умира́ю, но вопию́ с разбо́йником: помяни́ мя, Го́споди, во Ца́рствии Твое́м.

Сти́х: Блаже́ни и́згнани пра́вды ра́ди, я́ко те́х е́сть Ца́рство Небе́сное.

Сконча́вше до́брый по́двиг, и ве́ру соблю́дше, венцы́ нетле́нныя от Бо́га прия́ли есте́: и сла́вы Его́ сподо́бистеся, му́ченицы всехва́льнии, А́нгелом сожи́телие.

Сти́х: Блаже́ни есте́, егда́ поно́сят ва́м, и изжену́т, и реку́т вся́к зо́л глаго́л, на вы́ лжу́ще мене́ ра́ди.

Священноде́йственных и преподо́бных собо́ри, и проро́к, и честны́х же́н сосло́вие да почти́тся свяще́нно, во хра́мех перворо́дных ны́не живу́ще в ра́дости, и соводворя́ющеся со безпло́тными чи́нми.

Сти́х: Ра́дуйтеся и весели́теся, я́ко мзда́ ва́ша мно́га на небесе́х.

Учини́ в хра́мех святы́х, я́же преста́вил еси́ от на́с, Сло́ве Бо́жий, те́х презре́в душе́вная согреше́ния, в ве́дении и неве́дении соде́яная на земли́, и уще́дри рабы́ Твоя́.

Сла́ва: Раби́ Твои́, о Тро́ице Свята́я, умира́ющии к Тебе́ прихо́дят, изба́витися от стра́шных о́нех му́к, и улучи́ти про́сят благи́х сла́вы святы́я Твоея́, в ча́с су́дный.

И ны́не: Всели́ся в Твое́й утро́бе, Всесвята́я Чи́стая, Отчее сия́ние, и прельще́ныя вра́жиим злы́м сове́том, и впа́дшыя во тлю́, па́ки обнови́л е́сть.

Коне́ц седьмо́му гла́су.


Источник: Свято-Успенский Псково-Печерский монастырь. Издательский отдел Московского Патриархата малой вечерни, великой вечерни, бденной, полиелейной, шестеричной служб, утрени без бдения. Найти можно в Типиконе. Кни́га моле́бна с Бо́гом святы́м осмогла́сника, содержа́щая в себе́ подоба́ющее возсле́дование воскре́сныя слу́жбы осми́ гласо́в с шестию́ дне́й

Комментарии для сайта Cackle