Последование молебных пений на праздники

Последование молебных пений на Новый год

Сентября 1-го

Диакону рекшу: Благослови, владыко.

Возглашает предстоятель:

Благословенно Царство:

Чтец: Аминь. Слава Тебе, Боже наш, слава Тебе.

Певцы: Царю Небесный:

Чтец: Трисвятое.

По Отче наш:

Предстоятель: Яко Твое есть Царство:

Чтец: Аминь. Господи, помилуй (12).

Слава, и ныне. Приидите поклонимся: (трижды).

Зри: Если молебное пение совершается непосредственно по окончании какой-либо службы: вечерней, утрени, часов, литургии, – тогда обычное начало опускается, и по возгласе предстоятеля чтец глаголет: Аминь, и Приидите поклонимся:

И псалом избранный благодарственный:

Благо есть исповедатися Господеви, пети имени Твоему, Вышний, возвещати заутра милость Твою (91/2–3). Коль многое множество благости Твоея, Господи, юже скрыл еси боящимся Тебе (30/20). Радуйтеся Богу, Помощнику нашему, воскликните Богу Иаковлю (80/2). Исповемся Тебе, Господи, всем сердцем моим, повем вся чудеса Твоя, возвеселюся и возрадуюся о Тебе, пою имени Твоему, Вышний (9/2–3); возрадуюся и возвеселюся о милости Твоей (30/8), яко Ты, Боже, услышал еси молитвы моя (60/6). Да исполнятся уста моя хваления, яко да воспою славу Твою (70/8); возрадуется сердце мое, воспою Господеви, благодеявшему мне и пою имени Господа Вышняго (12/7). Не нам, Господи, не нам, но имени Твоему даждь славу о милости Твоей (113/9). Благослови, душе моя, Господа, и вся внутренняя моя имя святое Его. Благослови души моя, Господа, и не забывай всех воздаяний Его, венчающаго тя милостию и щедротами, исполняющего во благих желания твоя (102/1–2, 4–5). Хвалу Господню возглаголют уста моя (144/21). Принесите Господеви славу и честь, принесите Господеви славу имени Его (95/7–8); воспойте и радуйтеся и пойте: Пойте Господеви в гуслях, в гуслях и гласе псаломском (97/4–5). Исповедайтеся Господеви яко благ, яко в век милость Его (135/1).

Слава, и ныне. Аллилуия, аллилуия, аллилуия, слава Тебе, Боже (трижды).

Ектения великая:

Миром Господу помолимся.

О свышнем мире:

О мире всего мира:

О святем храме сем:

О Святейшем Патриархе нашем:

О стране нашей и о спасении ея:

О великом царствующем граде Москве, граде сем и всяком граде:

О еже милостивно нынешнее благодарение за все благодеяния, в минувшем году нам явленные, и мольбу нас недостойных рабов Своих в пренебесный Свой жертвенник прияти и по благосердию помиловати нас, Господу помолимся.

О еже благоприятным быти молениям нашим, и простити нам и всем людям Своим все согрешения вольныя и невольныя, в мимошедшем году зле нами содеянныя, Господу помолимся.

О еже благословите начало и провождение наступающаго года благодатию человеколюбия Своего; времена же мирныя, благорастворенныя воздухи и безгрешное нам во здравии с довольством житие даровати, Господу помолимся.

О еже отвратити от нас весь гнев Свой, праведно на нас грехов ради наших движимый, Господу помолимся.

О еже отгнати от нас все душетленныя страсти и растленные обычаи, страх же божественный всадити в сердца наши ко исполнению заповедей Его, Господу помолимся.

О еже обновити дух правый в сердцах наших и укрепити нас в православной вере ревностными к деланию добрых дел и исполнение всех заповедей Его сотворити, Господу помолимся.

О еже низложити все ереси и отступства, и насадити всюду правоверие и благочестие, и обратити всех отступльших от правой веры к познанию истины, и соединить их Святой Своей Православной Церкви, Господу помолимся.

О еже избавити Церковь Святую Свою и всех нас от всякой скроби, беды, гнева и нужды и от всех врагов видимых и невидимых, здравием же, долгоденствием и миром, и Ангелов Своих ополчением верных Своих всегда оградити, Господу помолимся.

Заступи, спаси:

Пресвятую, Пречистую:

Возглас: Яко подобает Тебе:

На Бог Господь тропарь, глас 4:

Благодарни суще недостойнии раби Твои, Господи, /о Твоих великих благодеяниях на нас бывших, /славяще Тя хвалим, благословим, благодарим, поем и величаем Твое благосердие,/ и рабски любовию вопием Ти:/ Благодетелю, Спасе наш, слава Тебе! (дважды).

Слава, глас 2:

Всея твари Содетелю, времена и лета во Своей власти положивый,/ благослови начинающийся год благости Твоея, Господи,/ сохраняя в мире Церковь Православную,/ землю нашу и верных людей Твоих,/ молитвами Богородицы и спаси нас.

И ныне, глас 1:

Спаси, Господи, людей Твоих,/ и благослови достояние Твое,/ победы православным христианам/ на сопротивных даруя/ и Твое сохраняя/ Крестом Твоим жительство.

Псалом избранный на новолетие:

Велий Господь наш и велия крепость Его и разума Его несть числа (146/5). Возвеселимся о Нем, Владычествующем силою Своею веком (65/6–7). Будет имя Его благословенно во веки, и прежде солнца пребывает имя Его (71/17). О Бозе похвалимся весь день, и о имени Твоем исповемыся во век (43/9). В началех Ты, Господи, землю основал еси, и дела рук Твоих суть небеса. Та погибнут, Ты же пребываеши, и вся яко риза обветшают, и яко одежду свиеши их, и изменятся. Ты же тойже еси и лета Твоя не оскудеют (101/26–28). Яко тысяща лет пред очами Твоим, Господи, яко день вчерашний, иже мимоиде (89/5). Твой есть день и Твоя есть нощь; Ты совершил еси зарю и солнце; Ты сотворил еси вся пределы земли; жатву и весну Ты создал еси (73/16–17). Царство Твое, Царство всех веков, и владычество Твое во всяком роде и роде (144/13). Вся земля да поклонится Тебе и поет Тебе, да поет же имени Твоему, Вышний (65/4). Вознесу Тя, Боже мой, Царю мой, и благословлю имя Твое в век и век века. Великий Господь и хвален зело, и величию Его несть конца. Род и род восхваляет дела Твоя и силу Твою возвестят; великолепие славы святыни Твоея возглаголют и чудеса Твоя поведят и силу страшных Твоих рекут и величие Твое поведят; память множества благости Твоея отрыгнут и правдою Твоею возрадуются (144/1–7). Хвали, душе моя, Господа; восхвалю Господа в жизни моей, пою Богу моему Дóндеже есмь (145/1–2). Се не воздремлет и не уснет храняй Израиля (120/4). Благословиши венец лета благости Твоея, и поля Твоя исполнятся тука. Разботеют красныя пустыни, и радостию холми препояшутся (64/12–13). Буди слава Господня во веки (103/31). Благослови, душе моя, Господа (103/35).

По псалме же поем канон на Новый год, глас 1. Поем же его без ирмосов.

Песнь 1

Ирмос: Поим вси людие:

Припев: Слава Тебе, Боже Всещедрый.

Воспоим вси Христу, рождшуся из Безначального Бога Отца, Ипостасному Слову, Имже все сотворено и премудро устроено, песнь победную, яко прославися.

Слава Тебе, Боже Всещедрый.

Христу, Отчим благоволением явльшемуся из Девы, нам на избавление, и проповедавшему времена Господни приятныя, воспоим вси песнь победную, яко прославися.

Слава. В Назарет пришед Податель Закона, в день субботный учаше, возвещая евреем тайну пришествия Своего неизреченнаго: имже яко Милостив спасает род наш.

И ныне. Богородичен: Воспоем вси вернии предивную Отроковицу, возсиявшую вселенной Христа, Жизнь присносущую, и радости всяческая исполнившую, присно восхваляюще, яко прославися.

Песнь 3

Ирмос: Утверди мене, Христе:

Слава Тебе, Боже Всещедрый.

Утверди, Блаже, егоже насади любовию на земли десница Твоя плодовит виноград, сохраняя Твою Церковь, Всесильне.

Слава Тебе, Боже Всещедрый.

Делами духовными богокрасными красящихся в сем начавшемся году сохрани, Владыко Господи, верою Тя песнословящих, Боже всяческих.

Слава. Тихий мне, Христе, круг года даруй, Щедре, и насыти мя словес Божественных Твоих, ихже и на земле явився глаголал еси иудеем в субботах.

И ныне. Богородичен: Яко Едину, преестественно паче человека благодать, во Твою утробу приемшую, и чисто рождшую Христа Бога нашего, присно Тя славим.

Катавасия: Слава Тебе, Творче и Промыслителю наш Господи, за все милости Твои, в мимошедшие дни жизни нашей на нас излиянныя, за нихже благодарение приносяще, Тя яко Владыку нашего Всемилостиваго, благословити начала наступающего года просим.

Ектения сугубая:

Помилуй нас, Боже:

Еще молимся о Святейшем Патриархе нашем:

Еще молимся о стране нашей:

Благодаряще со страхом и трепетом, яко раби недостойнии, Твоему благосердию, Спасе и Владыко наш господи, о Твоих благодеяниях, ихже в мимошедшие дни жизни нашей излиял еси изобильно на нас, и припадаем, и славословие Тебе яко Богу приносим, и умильно вопием: избави нас и на будущее время от всех бед, и всегда яко Милостив исполни ко благу желания наша, прилежно молимся Тебе, услыши и помилуй.

О еже благословити весь круг наступающего года благостию Своею и утолити в нас все вражды, нестроения и междуусобныя брани, подати же мир, твердую и нелицемерную любовь, благочинное и добродетельное житие, молимся Тебе, Всеблагий Господи, услыши и помилуй.

О еже не помянути бесчисленных беззаконий и лукавых наших деяний, в мимошедшем году бывших, и не воздати нам по делам нашим, но в милости и щедротах помянути нас, молимся Тебе, Милосердый Господи, услыши и помилуй.

О еже подати дожди благовременны, ранны же и поздны, росу плодоносну, ветры мерные и благорастворенные и теплоту солнечную возсияти, молимся Тебе, Всещедрый Господи, услыши и помилуй.

О еже помянуть Церковь Святую Свою, и укрепити, и утвердити, расширити и умирити сию, и невредиму адовыми вратами и всеми наветами видимых и невидимых врагов непребориму во веки соблюсти, молимся Тебе, Вседержавный Владыко, услыши и помилуй.

О еже искоренити и угасити все богохульное агарянское нечестие и царство их скоро разрушити и правоверным предати, молимся Тебе, Всесильный Господи, услыши и помилуй.

Еще молимся о всех зде предстоящих и молящихся, за всю братию и за всех христиан.

Возглас: Яко милостив:

Седален, глас 8:

Времена плодоносные и должди с небесе подаяй сущим на земле, и ныне приими мольбы рабов Твоих, от всякой беды избави землю нашу и всех, верующих в Тя, щедроты бо Твои на всех творениях Твоих. Темже входы наши благослови и исходы, дела рук наших исправи, и согрешений прощение даруй нам, Боже. Ты бо из несущих вся в бытие, яко силен, привел еси.

Песнь 4

Ирмос: Разумех, Всесильне:

Слава Тебе, Боже Всещедрый.

Начало года Тебе людие Твои приносят, ангельскими песньми славословяще Тя, Спасе.

Слава Тебе, Боже Всещедрый.

Яко Человеколюбец, сподоби наченшим год сей и скончати его во благоугождении Тебе, Христе.

Слава. Вседержителю, Едине Господи, в начавшемся году мир миру Твоему даруй.

И ныне. Богородичен: Яко пристанище душ наших, и тверду надежду, Богородицу ныне вси воспоим.

Песнь 5

Ирмос: От нощи утренеюще:

Слава Тебе, Боже Всещедрый.

Исполняяй всяческая благости, Христе, Ты благорастворением и благоплодием и Твоим благословением увенчай наступающий год к славе имени Твоего, на пользу рабам Твоим. (Дважды).

Слава. На землю пришел еси, Собезначальне Отцу, пленникам отпущение, слепым же прозрение от Отца возвещая, и время приятно.

И ныне. Богородичен: Наши надежды, Богородице Чистая, и наше желание на Тя возлагаем, милостива соделай, Дево, егоже родила еси.

Песнь 6

Ирмос: Пророка спасл еси:

Слава Тебе,Боже Всещедрый.

С началом года и житие начати благоугодно Тебе, Владыко, нас сподоби. (Дважды).

Слава. Дней духовных, в поучение закона Твоего, покажи исполненными поющих Тя, щедрый Спасе.

И ныне. Богородичен: Рождшая Господа, Богородице Всенепорочная, избави от бед верою поющих Тя, Пречистая.

Катавасия: Слава Тебе, Творче и Промыслителю наш, Господи, за все милости Твои, в мимошедшие дни жизни нашей на нас излиянныя, за нихже благодарение приносяще, Тя яко Владыку нашего Всемилостиваго, благословити начало наступающего года просим.

Ектения малая.

Возглас: Ты бо еси Царь мира:

Кондак, глас 2:

В вышних живый, Христе Царю, всего видимаго и невидимаго Творче и Зиждителю, дни и нощи, времена и лета сотворивый, благослови ныне начинающийся год, соблюди и сохрани в мире Православную Церковь, землю нашу и людей Твоих, Многомилостиве.

Прокимен, глас 4:

Воспою Господеви, благодеявшему мне и пою имени Господа Вышняго.

Стих: Возрадуется сердце мое о спасении Твоем.

Всякое дыхание да хвалит Господа.

Стих: Хвалите Господа с небес, хвалите Его в вышних.

Евангелие от Луки, зачало 13 (4, 16–22).

Во время оно, прииде Иисус в Назарет, идеже бе воспитан: и вниде по обычаю Своему в день субботный в сонмище, и воста чести. И даша Ему книгу Исаии пророка, и разгнув книгу, обрете место, идеже бе написано: Дух Господень на мне, егоже ради помаза мя благовестити нищим, посла мя исцелити сокрушенныя сердцем: проповедати плененным отпущение, и слепым прозрение: отпустити сокрушенныя во отраду. Проповедати лето Господне приятно. И согнув книгу, отдав слузе, седе: и всем в сонмище очи беху зряще Нань. И начат глаголати к ним: яко днесь сбыстся писание сие во ушию вашею. И вси свидетельствоваху Ему. И дивляхуся о словесех благодати, исходящих из уст Его.

Певцы: Слава Тебе, Господи, слава Тебе.

Слава. Отче, Слове и Душе, Троице Святая, очисти множество согрешений наших.

И ныне. Молитвами Богородицы, Милостиве, очисти множество согрешений наших.

Помилуй мя, Боже, по велицей милости Твоей и по множеству щедрот Твоих очисти беззаконие мое.

Стихира индикту, глас 4:

Царство Твое, Христе Боже, Царство всех веков, и владычество Твое во всяком роде и роде: вся бо мудростию сотворил еси, времена и лета нам предложив. Темже, благодаряще о всех и за вся, вопием: благослови наступающий год благости Твоей, и сподоби нас неосужденно пети Тебе: Господи, слава Тебе.

Посем глаголет диакон:

Спаси, Боже, людей Твоих и благослови достояние Твое, посети мир Твой милостию и щедротами; укрепи, утверди, умири и расшири Церковь Твою Святую, ереси же и вся отступства и языческое возношение скоро низложи; людем православным мир и взаимную любовь подаждь; заблудших от правой веры к познанию Твоей истины обрати, и святому и избранному стаду соедини; наступающий год и все прочие дни жизни нашей в мире, покаянии, во всяком благочестии и честности христиански препроводити человеколюбно сподоби и ниспосли на нас милости Твои богатые, молитвами Всепречистыя Владычицы нашея Богородицы и Приснодевы Марии; силою Честнаго и Животворящаго Креста, предстательством честных Небесных Сил бесплотных; честнаго, славнаго пророка, Предтечи и Крестителя Иоанна; святаго славнаго апостола Андрея Первозваннаго и прочих святых славных и всехвальных апостолов; святаго славнаго пророка Илии; иже во святых отец наших и вселенских великих учителей и святителей Василия Великого, Григория Богослова и Иоанна Златоустаго; иже во святых отца нашего Николая, архиепископа Мир Ликийских, чудотворца; святых равноапостольных Мефодия и Кирилла, учителей Словенских; святых равноапостолов Русских благовернаго великаго князя Владимира и благоверной великой княгини Ольги; иже во святых отец наших всея России чудотворцев Михаила, митрополита Киевского, Петра, Алексия, Ионы, Филиппа и священномученика Ермогена, святителей Московских; Никиты, Иоанна, Иоаны и Евфимия Новгородских; Леонтия, Исаии, Игнатия, Иакова и Димитрия Ростовских; Арсения Тверскаго, Стефана Великопермскаго; Гурия и Варсонофия Казанских, Митрофана и Тихона Воронежских; Иннокентия Иркутскаго, Феодосия Черниговскаго и Иосафа Белгородскаго; преподобных и богоносных отцев наших Антония и Феодосия и прочих преподобных Киево-Печерских; Сергия и Никона Радонежских, Саввы Старожевскаго и Иосифа Волоколамскаго, Московских; Антония Римлянина, Варлаама Хутынскаго, Михаила Клопскаго, Саввы Вишерскаго, Ефрема Перекомскаго, Кирилла Белоезерскаго, Кирилла Новоезерскаго и Нила Сорскаго, Новгородских: Никандра пустынножителя и Корнилия преподобномученика, Псковских; Сергия и Германа Валаамских, Зосимы и Савватия Соловецких, Трифона Печенгскаго и Александра Свирскаго; Антония Сийскаго, Димитрия Прилуцкаго, Феодосия Тотемскаго, Дионисия Глушицкаго, Григория Пельшемскаго, Макария Унженскаго, Тихона Лужскаго; Евфимия Суздальскаго, Никиты Столпника Переяславскаго, Аврамия Ростовскаго, Макария Калязинскаго, Нила Столобенскаго, Ефрема Новоторжскаго; Аврамия Смоленскаго, Иова Почаевскаго, Пафнутия Боровскаго, Тихона Калужскаго и Серафима Саровскаго; святых благоверных князей и страстотерпцев: Бориса и Глеба, Григория Владимирскаго, Михаила Тверскаго, Михаила Черниговскаго и болярина его Феодора; святых мучеников Иоанна варяга и сына его Феодора, Меркурия Смоленскаго, Антония, Иоанна и Евстафия Литовских; преподобных и благоверных великаго князя Александра Невскаго, Владимирскаго и Новгородскаго, и князей Даниила Московскаго, Петра и Февронии и Константина и чад его Михаила и Феодора, Муромских, Всеволода Псковскаго; Феодора Смоленскаго и чад его Давида и Константина Ярославских, и Димитрия царевича, Угличскаго; преподобных и благоверных княгинь Евфросинии Полоцкой, Евфросинии Суздальской, Евдокии Московской и Анны Кашинской, святых блаженных и Христа ради юродивых Василия и Максима Московских, Прокопия и Иоанна Великоустюжских и Исидора Ростовскаго; святых праведных Иакова Боровицкаго, Симеона Верхотурскаго и Иулиании милостивой Муромской, и всех прочих святых, в земле Русской просиявших; святых славных и добропобедных мучеников; святых и праведных Богоотцев Иоакима и Анны; преподобнаго отца нашего Симеона Столпника и архимандрита, и матери его Марфы, и святаго мученика Аифала, и святых мучениц четыредесяти дев и святаго Аммуна диакона учителя их; и святых мученик Каллисты и братий ея Евода и Ермогена; и праведнаго Иисуса сына Навина, и всех святых; молим Тя, Многомилостиве Господи, услыши нас грешных, молящихся Тебе, и помилуй нас.

Певцы: Господи, помилуй (12).

Возглас: Милостию и щедротами:

Песнь 7

Ирмос: Отроцы благочестию совоспитани:

Слава Тебе, Боже Всещедрый.

Начинающии новый год, и песней начаток сотворяем Христу, царствующему Царством бесконечным, православнии людие, благочестно поюще: отцев Боже, благословен еси. (Дважды).

Слава. Сый прежде век, на век же и еще, Господь, воспевающим Тя, Христе, Источник сый благости, благих Твоих даров год сей исполни: отцев Боже, благословен еси.

И ныне. Богородичен: Яко раби Владыце на молитву Чистую Матерь Твою Тебе предлагаем, Христе, от всякаго обстояния избавити людей Твоих, Блаже, поющих: отцев Боже, благословен.

Песнь 8

Ирмос: Песнословцы в пещи:

Слава Тебе, Боже Всещедрый.

Яко начальнику спасения, Христе, начаток года Тебе приносит честная Церковь, зовущи пойте и превозносите Христа во веки.

Слава Тебе, Боже Всещедрый.

Из несущих всяческая мудре обновившаго Создателя и по воле Своей производящего времен обращения, пойте и превозносите Его во веки.

Слава. Изволяющему всяческая Богу и времена изменяющему на многообразное человеков управление поем: хвалите и превозносите Христа во веки.

И ныне. Богородичен: Богоматерь Деву Чистую, во все времена православно человеческие соборы поем Тя, яко Богородицу и всех спасение.

Хвалим, благословим, поклоняемся Господеви, поюще и превозносяще Его во веки.

Ирмос: Песнословцы в пещи спасшаго дети, и громопламенную преложшаго на росу, Христа Бога пойте и превозносите во вся веки.

Песнь 9

Ирмос: Образ чистаго рождества Твоего огнепалимая купина показа неопальная, и ныне на нас напастей свирепеющую угасити молимся пещь: да Тя, Богородице, непрестанно величаем.

Слава Тебе, Боже Всещедрый.

Слово Божие, и сила, истинная мудрость и ипостасная, всесодержащая и правящая всяческая мудре, и ныне, наставшее время даруй рабам Твоим в тишине и спокойствии проводити.

Слава Тебе, Боже Всещедрый.

Все творения Твои, Господи: небеса, земля, свет и море, воды и все источницы, солнце же, луна, и тьма, звезды, огнь, человецы и скоти, со Ангелами восхваляют Тя.

Слава. Един еси Превечный яко Творец веков, и царствующее Триипостасное Едино Божество Нераздельное! Мольбами Чистой Богоматери времена плодоносныя наследию Твоему даруй.

И ныне. Богородичен: Спасе всего и Строителю, и Зиждителю, и Вседержителю твари, мольбами безсеменно Рождшей Тя, мир миру Твоему подаждь, соблюдая Церковь всегда непоколебиму.

Достойно есть, яко воистину:

Трисвятое. По Отче наш:

Возглас: Яко Твое есть Царство:

Тропарь новолетию, глас 2: Всея твари Содетелю:

Слава, и ныне. Кондак, глас тойже: В вышних живый:

Ектения сугубая:

Помилуй нас, Боже:

Еще молимся Тебе, Господу Богу нашему, еже услышати глас молитвы нашей и милостиву, долготерпеливу, тиху и благоуветливу и человеколюбиву быти о гресех наших, и помиловати нас, и отвратити весь гнев Свой, праведно движимый на нас, и избавити нас от праведнаго Своего прещения, и сохранити град сей(или весь сию), всю Русскую землю и все грады и страны христианския и верою живущих в них от глада, губительства, земли трясения, потопа, огня, меча, различных болезней и внезапной смерти, от нашествия иноплеменных, вражияго нападения и междоусобной брани, и избавити нас от заслуженных по грехам нашим бед, и даровати рабам Своим тихое и мирное время; благорастворенные воздухи подати и умножити плоды земные; и всех за грехи свои скорби терпящих и от злобы людской страждущих благодатию Своею утешити и всех нас, недостойных рабов Своих, милостию и щедротами Своими помиловати, рцем вси со слезами: Господи Милостивый, услыши и скоро помилуй.

Певцы: Господи, помилуй (40).

Еще молимся и о еже услышати Гоподу Богу глас моления нас грешных и помиловати нас.

Певцы: Господи, помилуй (трижды).

Возглас: Услыши нас, Боже, Спасителю наш:

Диакон: Паки и паки со умилением колена душ и телес наших преклоньша, Господу помолимся.

Зри: Если новолетие случится в воскресный день, когда коленопреклонения отменяются, тогда диакон возглашает: Паки и паки со умилением сердец, Господу помолимся.

Лик: Господи, помилуй (трижды).

Предстоятель читает молитву

(составлена по благословению Святейшаго Патриарха Тихона в 1917 году):

Господи Боже наш, Царю Предвечный и Творче всяческих, времена и лета со Своей власти положивый! Царство Твое, Царство всех веков, и владычество Твое во всяком роде и роде. Ты словом от небытия всю тварь составивый и премудрым и всеблагим Промыслом вся устроивый, в последняя времена Единороднаго Сына Твоего послал еси, да спасет падшее и заблуждшее естество человеков. Благодарим Тя о великих благодеяниях во вся дни жизни нашей бывших, наипаче же в мимошедшем году всем нам явленных. Молим Тя, Всещедрый Господь, не помяни грехов и беззаконий наших, имиже раздражихом Твое человеколюбие. Благослови весь круг наступающаго года благостию Твоею. Избави град сей (весь сию), страну нашу и все грады и страны христианские от глада, губительства, земли трясения, потопа, огня, меча, нашествия иноплеменников и междоусобной брани, и от всякой скорби. Даруй нам благорастворение воздухов, земли плодоносие, времена мирные и безмятежные. Утоли вся шатания и раздоры в земле нашей и даждь нам все ко спасению полезное и благопотребное, да в мире и благочестии зде поживше, сподобимся и Царства Твоего вечнаго, молитвами Пречистой Владычицы нашей Богородицы, святых чудотворцев Русских и всех святых от века Тебе благоугодивших. Яко Ты еси Бог милости и человеколюбия, и Тебе славу возсылаем, Отцу и Сыну и Святому Духу, ныне и присно и во веки веков.

Лик: Аминь

И поется песнь святаго Амвросия:

Тебе Бога хвалим, Тебе Господа исповедуем, Тебе превечнаго Отца вся земля величает; Тебе вси Ангели, Тебе небеса и вся Силы, Тебе Херувими и Серафими непрестанными гласы взывают: Свят, Свят, Свят Господь Бог Саваоф, полны суть небеса и земля величества славы Твоея. Тебе преславный апостольский лик, Тебе пророческое хвалебное число, Тебе хвалит пресветлое мученическое воинство. Тебе по всей вселенней исповедует Святая Церковь, Отца непостижимаго величества, покланяемаго Твоего истиннаго и Единороднаго Сына и Святаго Утешителя Духа. Ты Царю Славы Христе, Ты Отца присносущный Сын еси: Ты, ко избавлению приемля человека, не возгнушался еси девическаго чрева; Ты, одолев смерти жало, отверзл еси верующим Царство Небесное; Ты одесную Бога седиши во славе Отчей, Судия приити веришися. Тебе убо просим: помози рабом Твоим, ихже честною Кровию искупил еси. Сподоби со святыми Твоими в вечней славе Твоей царствовати. Спаси люди Твоя, Господи, и благослови достояние Твое, исправи их и вознеси их во веки: во вся дни благословим Тебе и восхвалим имя Твое во век, и во век века. Сподоби, Господи, в день сей без греха сохранитися нам. Помилуй нас, Господи, помилуй нас: буди милость Твоя, Господи, на нас, якоже уповахом на Тя. На Тя, Господи, уповахом, да не постыдимся во веки. Аминь.

Отпуст:

Нашего ради спасения пришедший на землю проповедати времена Господни благоприятные, Христос истинный Бог наш, молитвами Пречистой Своея Матери и всех святых помилует и спасет нас, яко Благ и Человеколюбец.

По отпусте поет диакон многолетия:

1 Святейшим патриархам православным Константинопольскому, Александрийскому, Антиохийскому, Иерусалимскому, Грузинскому, Сербскому, Румынскому, Болгарскому и всех прочих Автокефальных Церквей предстоятелям, подаждь, Господи, здравие и спасение и в служении Церкви Православной поспешение, и сохрани их на многая лета.

2 Патриарху Всероссийскому и епархиальному архиерею…

3 Преосвященным митрополитам, архиепископам и епископам и всему освященному причту, многая лета.

4 Веры истинной ревнителям, Церкви Святой поборникам и защитникам, людям православным и всем народам земли подаждь, Господи, тишину и благоденствие и изобилие плодов земных, и многая лета.

И поется величание:

Величаем Тя, Живодавче Христе, нас ради на земле во плоти явльшагося проповедати времена Господни благоприятные.

Иное последование молебного пения на Новый год без канона

По обычном начале псалом избранный: Велий Господь наш и велия крепость Его:

Слава, и ныне. Аллилуия (трижды).

Ектения великая с ея прошениями.

По возгласе абие Бог Господь на глас 4:

Тропарь, глас 4: Благодарни суще:

Слава, глас 2: Всея твари Содетелю:

И ныне, глас 1: Спаси Господи людей Твоих:

Посем прокимен, глас 4: Воспою Господеви, благодеявшему мне, и пою имени Господа Вышняго.

Стих: Возрадуется сердце мое о спасении Твоем.

Апостол к Тимофею, зачало 282 (1Тим. 2, 1–6; 1, 17).

Чадо Тимофее, молю прежде всех творити молитвы, моления, прошения, благодарения, за вся человеки, за царя, и за всех, иже во власти суть, да тихое и безмолвное житие поживем во всяком благочестии и чистоте. Сие бо добро и приятно пред Спасителем нашим Богом, Иже всем человеком хощет спастися и в разум истины приити. Един бо есть Бог, и Един ходатай Бога и человеков, человек Христос Иисус, давый Себе избавление за всех: Емуже честь и слава во веки веков. Аминь.

Аллилуия, глас 1:

Стих: Буди имя Господне благословенно от ныне и до века.

Стих: Прежде солнца пребывает имя Его.

Евангелие от Луки, зачало 13 (4, 16–22):

Во время оно прииде Иисус в Назарет:

Ектения сугубая:

Помилуй нас, Боже:

Еще молимся о Великом Господине нашем:

Еще молимся о стране нашей:

Благодаряще со страхом:

О еже благословити:

О еже не помянути:

О еже избавитися нам:

Еще молимся о всех, зде предстоящих:

Возглас: Услыши ны, Боже:

Молитва, отпуст, многолетия и величание.

Псалом избранный, ектенийные прошения, тропари, Евангелие, молитву, отпуст, многолетие и величание см. выше.

Иное последование молебного пения на Новый год с обхождением вокруг храма (по требнику Петра Могилы)

Диакону рекшу: Благослови, владыко.

Возглашает предстоятель: Благословенно Царство:

Обычное начало.

Псалом избранный новолетию: Велий Господь наш: см. выше.

Слава, и ныне.Аллилуия (трижды).

Ектения великая, см. выше.

Бог Господь. Тропарь: Благодарни суще:(дважды). Слава, и ныне. Всея твари Содетелю:

Егда начнут пети Бог Господь, исходим из храма со крестами и иконами и хоругвями, и идем по чину яко обычно – вокруг храма, начиная от южной страны. Дошедше до северныя страны, все останавливаются. Несущие святыню становятся вдоль стены храма, – священнослужители становятся по чину, предстоятель и люди становится лицем к храму.

Диакон глаголет ектению с кадилом: Помилуй нас Боже:

Еще молимся о Святейшем Патриархе нашем (имя рек) и о преосвященнейшем епископе (или архиепископе) нашем (имя рек), о еже Господу Богу нашему даровати их Святей Своей Церкви в мире, здравых, долгоденствующих право правящих слово Своея истины; избавити их и весь причет церковный и всех христиан православных от всякой скорби, беды, гнева и нужды и от всякой болезни душевной и телесной и простити им всякое прегрешение вольное и невольное, рцем вси, Господи, услыши и помилуй.

Лик: Господи, помилуй (3).

Предстоятель возглас: Яко милостив:

Посем диакон, став пред предстоятелем с кадилом, возглашает:

Господу помолимся, рцем вси.

Певцы поют: Господи, помилуй (3).

Предстоятель осеняет крестом на юг, посем на север, и на восток и на запад, диакону то же возглашающу.

По осенении идут вси вокруг храма, идуще же поют, повторя многажды, доколе не дойдут до восточной страны тропарь сей глас 7:

Господи, Господи, призри с небесе и виждь и посети виноград сей и соверши его, егоже насади десница Твоя; святителей же наших и священников со всем клиром на многая лета в мире сохрани.

Пришедше на восточную страну, встанут все по тому же чину (предстоятель и люди лицем ко храму).

Диакон глаголет ектению с кадилом:

Помилуй нас, Боже:

Еще молимся Господу Богу нашему, о еже избавити Церковь Святую Свою от всякаго злаго обстояния, и сопротивнаго навета языческаго, еретическаго и отступническаго и от всех врагов видимых и невидимых, и миром и благостоянием совершенным оградити; все ереси и отступничества и богоборное агарянское нечестие искоренити, всех же людей Своих благословити и в православной вере крепких и непозыблемых в здравии, и в душевном и телесном благополучии соблюсти, рцем вси, Господи, услыши и помилуй.

Лик: Господи, помилуй (3).

Возглас: Твое бо есть еже миловати и спасати:

И осенение от предстоятеля святым крестом на четыре страны.

По осенении идут вокруг храма до южныя страны, поюще тропарь глас 1:

Спаси, Господи, люди Твоя:

Пришедше на южную страну паки станут по чину. И глаголет диакон ектению с кадилом:

Помилуй нас, Боже:

Еще молимся о стране нашей и о спасении ея и о еже возглаголати в сердцах правителей наших благая и мирная о Церкви Своей Святей и о всех нас, да тихое и безмолвное житие поживем в правоверии и во всяком благочестии и честности.

Возглас: Яко благ и человеколюбец Бог еси…

И бывает осенение от предстоятеля святым крестом на четыре страны.

По осенении идут вокруг храма до западной страны. Идуще же поют тропарь глас 4:

Спаси от бед Церковь Твою, Отче и Сыне и Святый Душе, и сохрани оную в мире совершенном; ереси же все и отступства искорени и от всяких бед верных людей Твоих сохрани яко мы с верою к Тебе прибегаем, к милостивому Избавителю, Единому в Троице славимому Богу.

Пришедше же на западную страну, станут пред входом церковным.

Диакон глаголет ектению с кадилом:

Помилуй нас, Боже:

Еще молимся о устроении всей вселенной, благостоянии Святых Божиих Церквей и о соединении всех; о еже Господу Богу нашему раздирание Церквей утишити, языческая возношения угасити, и ересей и отступств всех восстание разорити и скоро сатану и все козни его под ноги верных рабов Своих сокрушити, рцем вси, Господи, услыши и помилуй.

Лик: Господи, помилуй (3).

Яко Ты еси Бог наш, Бог миловати и спасати:

И паки осенение от предстоятеля святым крестом на четыре страны.

По осенении входим в храм, поюще тропарь глас 1:

Премудрости и благости Источник сый, Господи, начавшийся год мирно провести сподоби рабов Твоих и Церкви мир и утверждение яко Благ даруй, молитвами Богородицы и всех святых Твоих.

Вшедше же в церковь поем канон новому лету и все прочее последование молебнаго пения на Новый год, см. выше.

Святого славного и всехвального апостола и евангелиста Иоанна Богослова

Сентября 26-го

Молебное пение святому апостолу с присоединением моления об умножении любви.

По обычном начале псалом 132:

Се что добро, или что красно, но еже жити братии вкупе. Яко миро на главе, сходящее на браду, браду Аароню, сходящее на ометы одежды его: яко роса Аермонская, сходящая на горы Сионския: яко тамо заповеда Господь благословение и живот до века.

Слава, и ныне. Аллилуия (трижды).

Ектения великая:

Миром Господу помолимся.

О свышнем мире:

О мире всего мира:

О еже очистити нас от грехов и беззаконий наших, изсушающих в нас любовь к Богу и к ближним, водрузити же оную и вкоренити в сердца всех нас, прилежно Господу помолимся.

О еже всеяти в нас и благодатию Пресвятаго Духа вкоренити новую Своего Новаго Завета заповедь любити друг друга и не себе угождати, но о славе Божией и о созидании ближняго всегда ревновати, Господу помолимся.

О еже искоренити в нас ненависть, зависть, злобу и все прочия страсти, братолюбие разрушающие, и нелицемерную любовь всеяти, усердно Господу помолимся.

О еже теплую любовь к Богу и к ближним в нас благодатию Пресвятаго Своего Духа распалити, и тою все страсти душ и телес наших изкорене сожещи, Господу помолимся.

О еже искоренити в нас страсть самолюбия, добродетель же братолюбия силою Пресвятаго Своего Духа вкоренити, сердцем сокрушенным Господу помолимся.

О еже не любити нам мира и всего еже в мире, но истинною любовию Бога и славу Его, и пользу и спасение ближних возлюбити, и на небеси уготованная благая присно зрети, и искати сих вседушно, Господу помолимся.

О еже понудити нас не точию друзей и братий наших, но и врагов истинно любити, и ненавидящим нас благотворити, о них молитися, и о спасении их тщание имети, Господу помолимся.

О еже себе всегда внимати, себя окаявати и своя согрешения всегда зрети, себя пред Богом и пред всеми смиряти, брата никогда же осуждати, но яко самого себя того любити, Господу помолимся.

О еже поревновати нам древних христиан к Богу и к братиям горящей любви, и наследниками и преемниками тех быти, не образом точию, но детельною истиною, Господу помолимся.

О еже в правоверии непозыблемых, в мире и союзе любви горящих, и во всех добродетелях преспевающих нас всегда сохранити и от всех душетленных страстей невредимыми соблюсти, Господу помолимся.

О избавитися нам:

Заступи, спаси:

Пресвятую, Пречистую:

Возглас: Яко подобает:

На Бог Господь, тропарь, глас 4.

Союзом любве апостолы Твоя связавый, Христе, и нас Твоих верных рабов к Себе тем крепко связав, творити заповеди Твоя и друг друга любити нелицемерно сотвори, молитвами Богородицы, Едине Человеколюбче. (Дважды).

Слава. Тропарь апостолу, глас 2:

Апостоле Христу Богу возлюбленне, ускори избавити люди безответны. Приемлет тя припадающа, Иже падша на перси приемый, егоже моли, Богослове, и належащую мглу языков разгнати, прося нам мира и велия милости.

И ныне. Союзом любви:

Псалом избранный апостола:

Возлюблю Тя, Господи, крепосте моя (17/2). Готово сердце мое, Боже, готово сердце мое (56/8). Возжада Тебе душа моя (62/2). Прильпе душе моя по Тебе, мене же прият десница Твоя (62/9). Исчезе сердце мое и плоть моя, Боже сердца моего, и часть моя, Боже, во век (72/26). Искусил еси сердце мое, искусил мя еси, и не обретеся во мне неправда (16/3). Сердце чисто созижди во мне, Боже, (50/12). Безвестная и тайная премудрости Твоея явил ми еси (50/8). Согреяся сердце мое во мне, и в поучении моем разгорится огнь (38/4). Глас даша облацы, глас грома Твоего; осветиша молния Твоя вселенную (76/18, 19). Возвестите во языцех славу Его, во всех людях чудеса Его (95/3). Услышите сия вси язы́цы, внушите вси живущии по вселенней (48/2). Во всю землю изыде вещание их, и в концы вселенныя глаголы их (18/5). Долготою дней исполню его и явлю ему спасение Мое (90/16).

И поем канон святому апостолу из Минеи, глас 2, на нем же припев:

Святый апостоле и евангелисте Иоанне Богослове, моли Бога о нас.

По 3-й песни катавасия:

Моли Бога о нас, святый апостоле и евангелисте Иоанне Богослове, яко мы усердно к тебе прибегаем, скорому помощнику и молитвеннику о душах наших.

Ектения сугубая:

Помилуй нас Боже:

Господи Боже наш, милостивно яко Благ, призри на изсохшую в любви землю сердца нашего, тернием ненависти, самолюбия и неисчетных беззаконий люте оляденевшую, и каплю благодати Пресвятаго Твоего Духа испустив, богатно ороси сию, да будет плодоносна и возрастит от горящей к Тебе любви корень всех добродетелей, страх Твой, и о спасении ближняго неленостное попечение, всех же страстей и многообразных лукавств и лицемерия искоренение прилежно, яко всех благ Дателя, молим, скоро услыши и человеколюбно помилуй.

Заповедь Твою любити друг друга давый Твоим ученикам, Владыко, обнови сию благодатию Пресвятаго Твоего Духа действительно в душах и в сердцах наших, да николиже о своей точию пользе, но всегда о благоугождении Тебе и о спасении и пользе ближних наших попечение творити потщимся, молимся Тебе, Благодателю Милостивый, услыши и помилуй.

Первую и большую заповедь, любити Тебя, Бога и Творца нашего, от всея души, от всея мысли и крепости нашей, и вторую, подобную ей, – любити ближних наших, яко самих себя даровавый нам, Владыко, Сам подвигни нас делом сия исполняти, да Тебе Спасу нашему угождающе и о спасении ближних наших ревнующе, обетованная Твоя получим благая, яко Владыце и Спасу нашему, прилежно припадающе, молимся, скоро услыши и помилуй.

Да совершени в любви к Тебе, Боже наш, будем, к ближним нелицемерную любови иметь подвигни нас Твоего Духа благодатию, Владыко. К Тебе бо любовь имети мняйся, брата же своего ненавидяй – ложь есть и во тьме ходит. Темже, Милостиве, любовию к Тебе и к братии распали души и сердца наши, молимся Тебе, яко Милостив скоро услыши и яко Щедр помилуй.

Возглас: Яко милостив:

Кондак апостола, глас 2:

Величия твоя, девственниче, кто повесть? Точиши бо чудеса и изливаеши исцеления и молишися о душах наших, яко Богослов и друг Христов.

По 6-й песни и катавасии ектения малая.

Возглас: Ты бо еси Царь мира:

Кондак, глас 5:

Пламенем любви к Тебе распали сердца наши, Христе Боже, да тою разжигаеми, сердцем, мыслею же и душею, и всею крепостию нашею возлюбим Тя, и ближних наших яко себя, и повеления Твоя храняще, славим Тя, всех благ Дателя.

Прокимен, глас 7:

Возлюблю Тя, Господи, Крепосте моя, Господь утверждение мое.

Стих: Бог мой, Помощник мой и уповаю на Него.

Прокимен апостола, глас 4:

Во всю землю изыде вещание их, и в концы вселенныя глаголы их.

Стих: Небеса поведают славу Божию, творение же руку Его возвещает твердь.

Евангелие от Иоанна из зач. 46 и 51 (13, 34–35; 15, 12–14).

Рече Господь Своим учеником: заповедь новую даю вам, да любите друг друга: якоже возлюбих вы, да и вы любите себе. О сем разумеют вси, яко Мои ученицы есте, аще любовь имате между собою. Сия есть заповедь Моя, да любите друг друга, якоже возлюбих вы. Больши сея любве никтоже имат, да кто душу свою положит за други своя. Вы друзи Мои есте, аще творите, елика Аз заповедаю вам.

И апостолу Евангелие от Иоанна, зач. 6 (21, 15–25).

Слава: Молитвами апостола, Милостиве, очисти множество согрешений наших.

И ныне: Молитвами Богородицы:

Помилуй мя Боже:

Стихира, глас 2:

Богослове девственниче, учениче возлюбленный Спасов, молим тя, молитвами твоими нас спасай от всякаго вреда, яко твое есмы стадо.

Посем глаголет диакон:

Спаси, Боже, людей Твоих и благослови достояние Твое, посети мир Твой милостию и щедротами, возвыси рог христиан православных и ниспосли на нас милости Твоя богатыя, молитвами Всепречистыя Владычицы нашея Богородицы и Приснодевы Марии; силою Честнаго и Животворящего Креста; предстательством честных Небесных Сил бесплотных; честнаго славнаго пророка, Предтечи и Крестителя Иоанна; святаго славнаго и всехвальнаго апостола и евангелиста Иоанна Богослова и всех прочих святых славных и всехвальных апостолов; святых славных и добропобедных мучеников; преподобных и богоносных отцев наших; святаго благовернаго равноапостольнаго великаго князя Владимира и всех прочих святых, в земле Русской просиявших; святых праведных Богоотцев Иоакима и Анны, и всех святых, молим Тя, Многомилостиве Господи, услыши нас грешных, молящихся Тебе, и помилуй нас.

Певцы: Господи, помилуй (12).

Возглас: Милостию и щедротами:

По 9-й песни: Достойно есть:

Трисвятое: Отче наш:

Возглас: Яко Твое есть Царство:

Тропарь, глас 3: Союзом любви:

И тропарь апостола, глас 2: Апостоле, Христу Богу возлюбленне:

Слава. Кондак апостола, глас 2: Величия твоя, девственниче:

И ныне. Кондак, глас 5: Пламенем любви:

Ектения сугубая:

Помилуй нас, Боже:

Сице в нас Твою любовь силою благодати Пресвятаго Твоего Духа, всели, Всещедрый Господи, да не точию братию и друзей, но и врагов наших по Твоему Божественному повелению истинно любити и ненавидящим нас благотворити будем, и о спасении их искренно тщатися, молимся Тебе, благости источниче и человеколюбия пучина, скоро услыши и яко Благосерд помилуй.

Еще молимся и о еже услышати:

Возглас: Услыши ны, Боже:

Диакон: Господу помолимся.

Певцы: Господи, помилуй.

Предстоятель чтет молитву:

Господи Иисусе Христе Боже наш, давый ученика Твоим заповедь новую любити друг друга, приими молитву сию во оставление грехов всех нас, правоверных рабов Твоих, и иссякшую в нас к Тебе и к братиям любовь Духом Твоим Святым обнови и крепко сию водрузи в сердца наши, да тою заповеди Твои исполняюще, не своей пользы на земле искати, но о Твоей славе и о созидании и спасении ближних ревновати будем, да тако в любви и мире со всеми в веке сем поживше, сподобимся, вкупе с угодившими Тебе, в горних обителях славити Тя и Безначального Твоего Отца и Святаго Духа в бесконечные веки веков.

Диакон: Ко святому апостолу и евангелисту Иоанну Богослову помолимся.

Лик: Святый апостоле и евангелисте Иоанне Богослове, моли Бога о нас.

Предстоятель чтет молитву апостолу:

О великий апостоле, евангелисте громогласный, Богослове изящнейший, тайновидче неизреченных откровений, девственниче и возлюбленный наперстниче Христов Иоанне! Приими нас грешных, под твое сильное заступление прибегающих. Испроси у всещедраго Человеколюбца Христа Бога нашего, Иже пред очами твоими кровь Свою за нас непотребных рабов Своих излиял есть, да не помянет беззаконий наших, но да помилует нас и сотворит с нами по милости Своей: да дарует нам здравие душевное и телесное, всякое благоденствие и изобилие, наставляя нас обращать оные во славу Его, Творца, Спасителя и Бога нашего: по кончине же временной жизни нашей, от немилосердных истязателей на воздушных мытарствах да избавит нас, и тако да достигнем, тобою водимии и покрываемии, горняго онаго Иерусалима, егоже славу ты во откровении зрел еси, ныне же в нем нескончаемой радости наслаждаешися. О великий Иоанне! Сохрани вся грады и страны христианския от глада, губительства, земли трясения и потопа, огня и меча, нашествия иноплеменных и междоусобной брани: избави нас от всякия беды и напасти, и молитвами твоими отврати от нас праведный гнев Божий, и Его милосердие к нам испроси, да вкупе с тобою сподобимся прославляти в невечернем дне пресвятое имя Отца и Сына и Святаго Духа во веки веков.

Отпуст:

Христос истинный Бог наш, молитвами Пречистыя Своея Матери, святаго славнаго и всехвальнаго апостола и евангелиста Иоанна Богослова и всех святых помилует и спасет нас, яко Благ и Человеколюбец.

По отпусте лобызаем икону святаго апостола, поюще величание:

Величаем тя, апостоле и евангелисте Иоанне Богослове, любви преисполненнаго и Христом возлюбленнаго, неизглаголанной премудрости учения возгремевшаго вселенной.

Всемирное воздвижение Честнаго и Животворящего Креста Господня

Сентября 14-го

На каноне припев: Слава, Господи, Кресту Твоему честному.

Катавасия:

Слава, Господи, Кресту Твоему честному, егоже Ты кровию Твоею обагрил еси и верным людям во освящение и на прогнание всякаго супостата даровал еси.

Иная катавасия:

Слава Тебе, Господи Иисусе Христе Боже наш, на Кресте спасение наше совершившему и знамение крестное людям Твоим во освящение и на прогнание всякаго супостата даровавшему.

Обновление во Иерусалиме храма Святого воскресения Христа и Бога нашего

Сентября 13-го

На молебне канон из Октоиха рядового гласа; два тропаряь воскресных с припевом: Слава, Господи, святому воскресению Твоему.

Слава, тропарь крестовоскресен. И ныне, Богородичен.

Катавасия:

Слава Тебе, Господи Иисусе Христе Спасителю наш, волею нас ради пострадавшему и во гробе погребенному, тридневно воскресшему и с Собою всех воскресившему.

Святой мученицы Анастасии Узорешительницы

Декабря 22-го

Молебное пение святой мученице с присоединением молений о сущих в узах и заточении.

По обычном начале псалом 141:

Гласом моим ко Господу воззвах, гласом моим ко Господу помолихся. Пролию пред Ним моление мое, печаль мою пред Ним возвещу. Внегда исчезати от Мене духу моему: и Ты познал еси стези моя: на пути сем, по немуже хождах, скрыша сеть мне. Смотрях одесную и возглядах, и не бе знаяй мене: погибе бегство от Мене, и несть взыскаяй душу мою. Воззвах к Тебе, Господи, рех: Ты еси упование мое, часть моя еси на земли живых. Вонми молению моему, яко смирихся зело: избави мя от гонящих мя, яко укрепишася пача мене. Изведи из темницы душу мою, исповедатися имени Твоему: Мене ждут праведницы, Дóндеже воздаси мне.

Слава, и ныне. Аллилуиа (трижды).

Ектения великая.

Миром Господу помолимся.

О свышнем мире:

О мире всего мира:

О еже простити рабам Своим, во узилищах сущим, все согрешения их и милостиву и благоуветливу быти им, Господу помолимся.

О еже вскоре услышати глас моления нашего, и от уз и темницы милостивно свободити их, Господу помолимся.

О еже якоже иногда прилежную Церкви Своей о Петре молитву, и нашу ныне милостивно услышати и от уз свободити рабов Своих, Господу помолимся.

О еже по многим щедротам и милости Своей от всякаго злаго обстояния избавити и свободити рабов Своих, Господу помолимся.

О еже сотворити милость с рабами Своими, и от всех бед и нужды и от узилища, якоже древле Иосифа во Египте, силою Своею скоро свободити их, Господу помолимся.

О избавитися:

Заступи, спаси:

Пресвятую, Пречистую:

Возглас: Яко подобает:

На Бог Господь, тропарь, глас 2:

Манассию от уз и горькаго заточения молитв ради свободивый, Всещедрый Боже, и рабов Твоих, в темницах сущих, от уз и заточения свободи, и от всякаго злаго обстояния избави, яко Един Человеколюбец. (Дважды.)

Слава. Тропарь мученице, глас 4:

Агница Твоя, Иисусе, Анастасия зовет велиим гласом: Тебе, Женище, мой люблю, и Тебе ищущи страдальчествую, и сраспинаюся и спогребаюся крещению Твоему, и стражду Тебе ради, яко да царствую в Тебе, и умираю за Тя, да и живу с Тобою, но яко жертву непорочную приими мя, с любовию пожершуюся Тебе. Тоя молитвами яко Милостив, спаси души наши.

И ныне. Тропарь предпразднства, глас тойже:

Готовися Вифлееме, отверзися всем Едеме, красуйся Евфрафо, яко Древо жизни в вертепе процвете от Девы: чрево бо Оныя явися яко мысленный рай, в немже Божественное Древо, от Негоже ядше, живи будем, не якоже Адам умрем. Христос раждается, прежде падший возставити образ.

Псалом избранный:

Бог нам Прибежище и Сила, Помощник в скорбях обретших ны зело (45/2). Скорбь и болезнь обретох, и имя Господне призвах: о Господи, избави душу мою (114/3–4). Не удали щедрот Твоих от Мене, яко одержаша мя злая, имже несть числа (39/12–13). Господи, услыши молитву мою и вопль мой к Тебе да приидет. Не отврати лица Твоего от Мене; воньже аще день скорблю, приклони ко мне ухо Твое; воньже аще день призову Тя, скоро услыши мя. Яко исчезоша яко дым дние мои, и кости мои яко сушило сосхошася. Уязвен бых яко трава, и изсше сердце мое, яко забых снести хлеб мой. От гласа воздыхания моего прильпе кость моя плоти моей (101/2–6). Благоволи, Господи, избавити мя, во еже помощи ми вонми (39/14). Услыши, Боже, моление мое, вонми молитве моей. К Тебе воззвах, внегда уны сердца мое (60/2–3). Внуши, Боже, молитву мою и не презри моления моего, вонми ми и услыши мя; возскорбех во искушении моем и смятохся. Сердце мое смятеся во мне и боязнь смерти нападе на мя, страх и трепет прииде на мя и покры мя тьма. И рех: кто даст ми крыле, яко голубине и полещу и почию (54/2–3, 5–7). Очи мои изнемогосте от нищеты, воззвах к Тебе, Господи, весь день, воздех к Тебе руце мои (87/10). В день скорби моея воззвах к Тебе (85/7). Господи Боже сил, доколе гневаешися на молитву рабов Твоих? Напитаеши нас хлебом слезным, и напоиши нас слезами в меру (79/5–6). Душ убогих Твоих не забуди до конца (73/19). Не остави мене, Господи Боже мой не отступи от Мене, вонми в помощь мою, Господи спасения моего (37/22–23). Сотвори со мною знамение во благо, да видят ненавидящии мя и постыдятся, яко Ты, Господи, помогл ми и утешил мя еси (85/17).

И поем канон мученице из Минеи, глас 8, на нем же припев:

Святая великомученица Анастасия, моли Бога о нас.

По 3-й песни катавасия:

Моли Бога о нас, святая мученица Анастасия, яко мы усердно к тебе прибегаем, скорой помощнице и молитвеннице о душах наших.

Ектения сугубая:

Помилуй нас, Боже:

Петра от уз и темницы изведый и невредима Церкви Твоей представивый, Христе, и рабов Твоих, в заточении сущих, яко Милосерд помилуй, и от уз свободи, молимся Тебе, Всемилостивый Спасе, услыши и помилуй.

Избавляяй нища от сильна, и убога, емуже несть помощника, в беде и заточении и в узах сущих, яко Щедр, милостивно свободи, прилежно молимся Тебе, скоро услыши и яко Щедр помилуй.

Возглас: Яко милостив:

Кондак мученице, глас 2:

Во искушениях и скорбях сущии, к тебе притекающии, приемлют честныя дарования от живущей в тебе Божественой благодати, Анастасия; ты бо присно миру источаеши исцеления.

По 6-й песни катавасия и ектения малая.

Возглас: Ты бо еси Царь мира:

Кондак, глас 5:

Яко милосердия источник и благости пучина, Христе Боже, не презри в скорбях и бедах сущих, Тебе верою призывающих, но яко Щедр помилуй и от уз скоро свободи, да поем Тебе: Аллилуия.

Прокимен, глас 7:

Изведи из темницы душу мою, исповедатися имени Твоему.

Стих: Вонми молитве моея, яко смирихся зело.

Прокимен мученице, глас 4:

Дивен Бог во святых Своих, Бог Израилев.

Стих: В церквах благословите Бога, Господа от источник Израилевых.

Евангелие от Иоанна, зач. 31 (8, 31–36).

Рече Господь к веровавшим к Нему иудеем: аще вы пребудете во словеси Моем, воистину ученицы Мои будете. И уразумеете истину, и истина свободит вы. Отвещаша и реша Ему: семя Авраамле есмы, и никомуже работахом николиже: како Ты глаголеши, яко свободни будете? Отвеща им Иисус: аминь аминь глаголю вам, яко всяк творяй грех, раб есть греха. Раб же не пребывает в дому во век: сын пребывает во век. Аще убо Сын вы свободит, воистину свободни будете.

Евангелие мученицы от Матфея, зач. 62 (15, 21–28).

По Евангелии:

Слава. Молитвами мученицы, Милостиве, очисти множество согрешений наших.

И ныне. Молитвами Богородицы:

Помилуй мя, Боже:

Стихира, глас 8:

Мира утехи пренебрегши, и плоти твоея не пощадивши, честная, всю вдала еси себе самую служити боголепно святым, страдания за Христа терпевшим, гной оных отирающи и к мужеству мудрейше словами мудрыми укрепляющи. Моли убо, Анастасие, Христе Бога, спастися душам нашим.

Посем глаголет диакон:

Спаси, Боже, людей Твоих и благослови достояние Твое, посети мир Твой милостию и щедротами, возвыси рог христиан православных и ниспосли на нас милости Твоя богатыя, молитвами Всепречистыя Владычицы нашея Богородицы и Приснодевы Марии, силою Честнаго и Животворящаго Креста; предстательством святых Ангелов Хранителей наших; святых славных и всехвальных первоверховных апостолов Петра3 и Павла4 и прочих святых славных и всехвальных апостолов; святаго праведнаго Иосифа Прекраснаго5, святой великомученицы Анастасии Узорешительницы6, святаго священномученика Ермогена, патриарха Московскаго7, преподобнаго и благовернаго князя Иоанна Угличскаго, во иноцех Игнатия, Вологодскаго чудотворца8, святых славных и добропобедных мучеников, святых праведных богоотцев Иоакима и Анны и всех святых, молим Тя, Многомилостиве Господи, услыши нас грешных, молящихся Тебе, и помилуй нас.

Певцы: Господи, помилуй (12).

Возглас: Милостию и щедротами:

По 9-й песни:

Достойно есть: Трисвятое: Отче наш:

По возгласе тропарь, глас 2: Манасию от уз:

И тропарь мученице: Агница Твоя:

Посем кондак, глас 5: Яко милосердия:

Слава. Кондак мученицы: Во искушениях:

И ныне. Кондак предпразднства, глас 3:

Дева днесь грядет Превечное Слово в вертепе родити неизреченно. Ликуй, вселенная, услышавши, прослави со Ангелами и пастырями хотящего явитися Отроча Младо, Превечнаго Бога.

Ектения сугубая:

Помилуй нас Боже:

Иосифа в темнице древле во Египте заключеннаго преславно свободивый, и ныне рабов Твоих, в заточении сущих, от уз и горькия беды избави, молимся Тебе, Избавителю милостивый, услыши и скоро помилуй.

Еще молимся и о еже услышати Господу Богу:

Возглас: Услыши ны, Боже:

Диакон: Господу помолимся.

Певцы: Господи, помилуй.

Предстоятель чтет молитву:

Господи, Иисусе Христе Боже наш, святаго апостола Петра от уз и темницы без всякаго вреда свободивый, смиренно молим Тя: приими милостивно моление наше об оставлении грехов рабов Твоих, в темницу всажденных, и молитвами апостола Твоего и всех святых, яко Человеколюбец, всесильною Твоею десницею от всякаго злаго обстояния избави и на свободу изведи. Да благодарно славят Тя и Безначальнаго Твоего Отца и Святаго Духа во веки веков.

Диакон: Ко святей великомученице Анастасии помолимся.

Певцы: Святая великомученица Анастасие, моли Бога о нас.

И предстоятель чтет молитву мученице:

О многострадальная и премудрая великомученице Христова Анастасие! Ты душею на небеси у Престола Господня предстоиши, на земле же, данною тебе благодатию, различная совершаеши исцеления. Призри убо милостивно на молящихся тебе и просящих твоея помощи: простри ко Господу святыя молитвы твои о нас, и испроси нам оставление согрешений наших, недужным исцеление, скорбящим и бедствующим помощь, во узах и различных обстояниях сущим терпение и скорое от обдержащих их бед избавление. Паче же умоли Господа, да подаст всем нам христанскую кончину и добрый ответ на Сташнем Суде Своем, да сподобимся и мы купно с тобою славити Отца и Сына и Святаго Духа во веки веков.

Отпуст:

Христос истинный Бог наш молитвами Пречистыя Своея Матери, святыя великомученицы Анастасии Узорешительницы и всех святых, помилует и спасет нас яко Благ и Человеколюбец.

По отпусте лобызаем икону мученицы, поюще величание:

Величаем тя, святая великомученице Анастасие, узников и страдальцев утешительнице, и чтим честныя страдания твои, ихже последи и сама за Христа претерпела еси.

Рождество во плоти Господа и Бога и Спаса нашего Иисуса Христа

Декабря 25-го

На каноне припев: Слава, Господи, святому Рождеству Твоему.

Катавасия: Слава Тебе, Господе Иисусе Христе Боже наш, на землю спасения нашего ради пришедшему и от Безневестной и Пречистой Девы Марии плотию рождшемуся.

Святого апостола, первомученика и архидиакона Стефана

Декабря 27-го

Молебное пение первомученику с присоединением моления о врагах.

По обычном начале псалом 12:

Доколе, Господи, забудеши мя до конца? Доколе отвращаеши лице Твое от Мене? Доколе положу советы в души моей, болезни в сердце моем день и нощь? Доколе вознесется враг мой на мя? Призри, услыши мя, Господи Боже мой, просвети очи мои, да не когда усну в смерть. да не когда речет враг мой: укрепихся на него. Стужающии ми возрадуются, аще подвижуся. Аз же на милость Твою уповах: возрадуется сердце мое о спасении Твоем: воспою Господеви, благодеявшему мне, и пою имени Господа Вышняго.

Слава, и ныне. Аллилуия (трижды).

Ектения великая:

Миром Господу помолимся.

О свышнем мире:

О мире всего мира:

О еже простити нам все согрешения наши и милостивно избавити нас от обстояния врагов наших, Господу помолимся.

О еже не воздати врагам нашим по делам их, ни по лукавству начиная их, но обратити их от злаго их расположения ко благотворению и любви, Господу помолимся.

О еже неверных к правоверию обратити, верных же к благочестию, всех же вражду и ненависть в братолюбие, мир и совершенную любовь претворити, Господу помолимся.

О еже не оставити ни единаго из врагов наших нас ради погибнути, ни нас тех ради, но всех уклонятися от зла и творити благое научати и благодатию Своею спасти, Господу помолимся.

О еже вражды, ненависти же и все злые дела во всех нас искоренити, любовь же нелицемерную и мирное и добродетельное житие в преспеянии веры вкоренити, Господу помолимся.

О еже умягчити сердца злых людей, беспричинно злобствующих на нас, обезвредить злобу их, злые замыслы их разрушить, злые их начиная во благо нам обратить, и тако их, врагов наших, соделать невольными нашими благодетелями и чрез сие и их помиловать, Господу помолимся.

О еже возглаголати в сердцах всех окружающих нас, наипаче же начальствующих над нами благое и мирное о нас, за зло, причиняемое нам, простить их, не ведят бо, что творят, а за добро, хотя бы и в малом, оказываемое нам, воздать сторицею, добрых в добре укрепить, злых от зла к добру обратить и всех подвигнуть творить добро ради добра, Господу помолимся.

Заступи, спаси:

Пресвятую, Пречистую:

Возглас: Яко подобает:

На Бог Господь, тропарь, глас 4:

О распеньших Тя моливыйся, любодушне Господи, о рабом Твоим о врагах молитися повелевый, ненавидящих и обидящих нас прости, и от всякаго зла и лукавства к братолюбному и добродетельному настави жительству, смиренно мольбу Тебе приносим, да в согласном единомыслии славим Тя, Единаго Человеколюбца. (Дважды.)

Слава. Тропарь первомученику, глас 4:

Подвигом добрым подвизался еси, первомучениче Христов и апостоле, и мучителей обличил еси нечестие, камением бо побиен от рук беззаконных, венец от Вышней десницы приял еси, и к Богу взывал еси, вопия: Господи, не постави им греха сего.

И ныне. Тропарь праздника, глас 4:

Рождество Твое, Христе Боже наш, возсия мирови свет разума, в нем бо звездам служащии звездою учахуся Тебе кланятися Солнцу правды и Тебе ведети с высоты Востока. Господи, слава Тебе.

Псалом избранный:

Господи, почто умножаются стужащие мне? Мнози восстают на мя, мнози глаголют душе моей: несть спасения ему в Бозе его. Ты же, Господи, Заступник мой еси, слава моя и возносяй главу мою (3/2–4). К Тебе, Господи, воздвигох душу мою, Боже мой, на Тя уповах, да не постыжуся во век и да не посмеются о мне врази мои (24/1). Господи Боже мой, на Тя уповах, спаси мя от всех гонящих мя и избави мя (7/2). Избавит мя от врагов моих сильных и от ненавидящих мя (17/18). Виждь смирение мое и труд мой и остави все грехи мои. Виждь врагов моих, яко умножишися и ненавидением неправедным возненавидеша мя (24/18–19). Во множестве милости Твоея услыши мя. Спаси мя, да избавлюся от ненавидящих мя. Услыши мя, Господи, яко блага милость Твоя, по множеству щедрот Твоих призри на мя. Не отврати лица Твоего от отрока Твоего, яко скорблю, скоро услыши мя. Вонми душе моей и избави оную; врагов моих ради избави мя. Ты бо веси поношение мое и студ мой и срамоту мою, пред Тобою все оскорбляющие мя (68/14, 15, 17–20). Суди, Господи, обидящия мя, побори борющия мя. Приими оружие и щит и востани в помощь мою. Рцы душе моей: спасение твое есмь Аз. Востани, Господи, и вонми суду моему, Боже мой и Господи. Суди ми, Господи, по правде Твоей, Господи Боже мой (34/1–2, 3, 23, 24). Буди ми в Бога Защитителя и в место крепко спасти мя; яко утверждение мое и прибежище мое еси Ты. Боже мой, избави мя от руки обидящего (70/3–4). Помилуй мя, Господи, яко скорблю, смятеся яростию око мое, душа моя и утроба моя, яко исчезе в болезни живот мой и лета моя в воздыханиях. Изнеможе нищетою крепость моя и кости мои смятошася. От всех врагов моих бых поношение. Аз же на Тя, Господи, уповах, рех: Ты еси Бог мой. В руках Твоих жребии мои: избави мя из руки враг моих (30/10–12, 15–16). Боже, и от восстающих на мя избви мя, яко Ты, Боже, заступник мой еси. Бог мой, милость Его предварит мя. Аз же воспою силу Твою и возрадуюся заутра о милости Твоей, яко был еси заступник мой и прибежище мое в день скорби моея. Помощник мой еси, Тебе пою: яко Бог заступник мой еси, Бог мой, милость моя (58/2, 10–11, 17–18). На Тя, Господи, уповах, да не постыжуся в век (70/1).

И поем канон первомученику из Минеи, глас 5, на немже припев:

Первомучениче и архидиаконе Стефане, моли Бога о нас.

По 3-й песни катавасия:

Моли Бога о нас первомучениче и архидиаконе Стефане, яко мы усердно к тебе прибегаем, скорому помощнику и молитвеннику о душах наших.

Ектения сугубая:

Помилуй нас, Боже:

Заповедь Твою, Спасе, любити врагов наших и благотворити ненавидящим нас, по силе исполняюще, прилежно молим: обрати яко Милостив всех врагов наших лукавое на нас и на Церковь Твою намерение к любви и примирению и ко всякой благостыни, да не в злобах своих погибнут, молимся Тебе, Всемилостивый Господи, услыши и помилуй.

О распенших Тя моливыйся, Человеколюбче Владыко, и нас озлобляющих врагов от злоб к добродетельному жительству обрати, яко да не един нас ради погибнет, но все в покаянии да спасемся, молимся Тебе, Любодушне Владыко, услыши и помилуй.

Неверных врагов наших к правоверию и благочестию, верных же к примирению и братолюбию обратитися принуди, Всещедрый Господи, да в любви и согласии заповеди Твои исполняюще, Тебя славим всех благ Дателя, молимся Тебе, услыши и помилуй.

Возглас: Яко милостив:

Кондак первомученика, глас 3:

Владыка вчера к нам плотию прихождаше и раб днесь от плоти исхождаше; вчера Царствующий над плотию родися, днесь раб камением побивается; Того ради скончавается первомученик и божественный Стефан.

По 6-й песни катавасия, ектения малая.

Возглас: Ты бо еси Царь мира:

Кондак, глас 5:

Якоже первомученик Твой Стефан о убивающих его моляше Тя, Господи, и мы припадающе молим: ненавидящих всех и обидящих нас прости, да ни един от них нас ради погибнет, но да вси спасутся благодатию Твоею, Боже Всещедрый.

Прокимен, глас 4:

Изми мя от врагов моих, Боже, и от востающих на мя избави мя.

Стих: На Бога уповах, не убоюся, что сотворит мне человек?

Прокимен первомученика, глас 8:

Во всю землю изыде вещание их и в концы вселенныя глаголы их.

Стих: Небеса поведают славу Божию, творение же руку Его возвещает твердь.

Евангелие от Матфея, зач. 15 (5, 42–48).

Рече Господь: просящему у тебе дай: и хотящего от Тебе заяти, не отврати. Слышасте, яко речено есть: возлюбиши искренняго твоего, и возненавидиши врага твоего. Аз же глаголю вам: любите враги ваша, благословите кленущия вы, добро творите ненавидящим вас, и молитеся за творящих вам напасть, и изгоняющия вы: яко да будете сынове Отца вашего, Иже есть на Небесех: яко солнце Свое сияет на злыя и благия, и дождит на праведныя и на неправедныя. Аще бо любите любящих вас, кую мзду имате? Не и мытари ли тожде творят? И аще целуете други ваша токмо, что лишше творите? не и язычницы ли такожде творят? Будите убо вы совершени, якоже Отец ваш Небесный совершен есть.

Евангелие от Матфея, зач. 87 (21, 33–42).

Слава. Молитвами первомученика, Милостиве, очисти множество согрешений наших.

И ныне. Молитвами Богородицы:

Помилуй мя Боже:

Стихира первомученику, /Киприяново/ глас 5:

Первомучениче апостоле, и архидиаконе, дверь мучеников и слава праведных, апостолов похвало: ты небеса видел еси отверста на судищи стоя и Сына Божия одесную стояща Невидимаго Отца. Темже яко Ангел возсияв лицем, в радости взывал еси о погибающих тя камением: не постави им греха сего. И ныне испроси от любве хвалящим тя очищение грехов и велию милость.

Посем глаголет диакон:

Спаси, Боже, людей Твоих и благослови достояние Твое, посети мир Твой милостию и щедротами, возвыси рог христиан православных и ниспосли на нас милости Твои богатые; молитвами Всепречистыя Владычицы нашея Богородицы и Приснодевы Марии, силою Честнаго и Животворящаго Креста; предстательством честных Небесных Сил бесплотных; честнаго славнаго пророка, Предтечи и Крестителя Иоанна; святых славных и всехвальных апостолов; святаго апостола, первомученика и архидиакона Стефана; святых славных и добропобедных мучеников; святых благоверных князей и страстотерпцев Бориса и Глеба; святых праведных Богоотцев Иоакима и Анны и всех святых, молим Тя, Многомилостиве Господи, услыши нас грешных молящихся Тебе и помилуй.

Певцы: Господи, помилуй (12).

Возглас: Милостию и щедротами:

По 9-й песни: Достойно есть: Трисвятое: Отче наш:

По возгласе тропари: О распенших Тя: и первомученика: Подвигом добрым:

Кондаки: Якоже первомученик:

Слава, первомученика: Владыка вчера:

И ныне, праздника, глас 3: Дева днесь:

Ектения сугубая:

Помилуй нас Боже:

Со святым Стефаном вопием к Тебе, Боже отмщений Господи, не постави греха врагам, ненавидящим и обидящим нас, но по великой милости Твоей к покаянию обрати и помилуй их, нас же от всякаго злаго их обстояния, советы лукавые и коварства их разорив, всесильною Твоею десницею изми и избави, молимся Тебе, Вседержавный Царю, скоро услыши и милостивно помилуй.

Певцы: Господи, помилуй (12).

Еще молимся и о еже услышати:

Возглас: Услыши ны, Боже:

Диакон: Господу помолимся.

Предстоятель чтет молитву:

Господи Иисусе Христе Боже наш, приими от нас, недостойных рабов Твоих молитву сию и простив нам все согрешения наша, помяни всех врагов наших, ненавидящих и обидящих нас и не воздаждь им по делам их, но по великой милости Твоей обрати их: неверных к правоверию и благочестию, верных же уклонятися от зла и творити благое, яко да ни един от них погибнет нас ради недостойных. Нас же и Церковь Твою Святую всесильною Твоею крепостию от всякаго злаго обстояния милостивно избави, да все славим Тя и Безначальнаго Твоего Отца и Святаго Духа, ныне и присно и во веки веков.

Певцы: Аминь.

Отпуст:

В вертепе родивыйся и в яслех возлегий нашего ради спасения, Христос истинный Бог наш, молитвами Пречистыя Своея Матери, святаго первомученика и архидиакона Стефана и всех святых, помилует и спасет нас яко Благ и Человеколюбец.

По отпусте лобызаем икону первомученика, поюще величание:

Величаем тя, апостоле Христов и архидиаконе Стефане, и чтим честныя страдания твои, ихже ты первый за Христа претерпел еси.

Святого апостола, первомученика и архдиакона Стефана (другое)

Августа 2-го

Молебное пение первомученику с присоединением молений о врагах, по чину, указанному 27 декабря.

На Бог Господь тропарь, глас 4: О распенших Тя: (Дважды.)

Слава. Первомученика, глас 4:

Царским венцем венчался твой верх от страданий, яже претерпел еси по Христе Бозе, мучеников первострадальче Стефане: ты бо иудейское обличивый неистовство, видел еси твоего Спаса одесную Отца: Того убо моли о душах наших.

И ныне. О распенших Тя:

По 3-й песни кондак первомученика, глас 6:

Первый сеялся еси на земли Небесным Делателем, всехвальне Стефане, первый на земле за Христа кровь излиял еси, блаженне; первый от Него победы венцем увенчался еси на небесах, страдальцев начало, венценосче, мучеников первострадальче.

По Евангелии стихира, глас 5: Первомучениче, апостоле и перводиаконе:

По Отче наш: тропари: О распенших Тя: и первомученика: Царским венцем:

Слава. Кондак первомученика: Первый сеялся еси:

И ныне. Якоже первомученик:

По плоти обрезание Господа и Бога и Спаса нашего Иисуса Христа

Января 1-го

На каноне припев: Слава Тебе, Боже наш, слава Тебе!

Катавасия: Слава Тебе, Господи Иисусе Христе Боже наш, на земле спасения нашего ради являвшемуся и во уверение неложнаго воплощения во осьмый день плотию обрезание приявшему.

Святое богоявление Господа и Бога и Спаса нашего Иисуса Христа

Января 6-го

На каноне припев: Слава Тебе, Боже наш, слава Тебе!

Катавасия: Слава Тебе, Господи Иисусе Христе Боже наш, на земле спасения нашего ради являвшемуся и от Иоанна во струях Иорданских плотию крестившемуся.

Поклонение честным веригам святого и всехвального апостола Петра

Января 16-го

Молебное пение святому апостолу с присоединением молений о сущих в узах и заточении по чину, указанному 22-го декабря (см. выше).

На Бог Господь тропарь глас 2: Манассию от уз: (Дважды.)

Слава. Тропарь апостолу, глас 4:

Узы твои, ихже за Христа претерпел еси, лобызающе, и честным веригам, ихже яко злодей носил еси, поклоняющеся, тебе, первоверховне апостоле Петре, спросим, да твоими молитвами от уз греховных свободившеся, получим от Бога велию милость.

И ныне. Манассию от уз:

Канон, глас 4, на немже припев: Святый апостоле Петре, моли Бога о нас.

По 3-й песни катавасия:

Моли Бога о нас, святый первоверховный апостоле Петре, яко мы усердно к тебе прибегаем, скорому помощнику и молитвеннику о душах наших.

Ектения сугубая.

Кондак апостола, глас 2:

Верховнаго и перваго от апостолов, истины божественнаго ученика, Петра великаго восхвалим, и того вериги любовию почитающе, просим молитвами его прияти прегрешений разрешение.

По 6-й песни и катавасии ектения малая.

Кондак, глас 5: Яко милосердия Источника:

Прокимен: Изведи из темницы душу мою, исповедатися имени Твоему.

Стих: Вонми молитве моей, яко смирихся зело.

И прокимен апостола: Во всю землю изыде вещание их и в концы вселенныя глаголы их.

Стих: Небеса поведают славу Божию, творение же руку Его возвещает твердь.

Евангелие от Иоанна, зач. 31 (8, 31–36) и апостолу Евангелие от Иоанна, зач. 67 (21,15–25).

По Евангелии:

Слава. Молитвами апостола, Милостиве, очисти множество согрешений наших.

И ныне. Молитвами Богородицы:

Помилуй мя, Боже:

И стихира апостола, глас 6:

Паки нас теплый предстатель совоздвизает к духовной трапезе, Петр, камень веры, честныя своя вериги предложив нам якоже снедь многоценну, недугов во врачевание, скорбящим во утешение, в пристанище обуреваемых. Приидите вси, сия почитающе, того Прославльшаго умолим: молитвами апостола Твоего Христе, спаси души наша.

Спаси, Боже, людей Твоих (см. выше):

По Отче наш: Тропари: Манассию от уз:

И апостола: Узы твоя:

Слава. Кондак апостола: Верховнаго и перваго:

И ныне. Кондак, глас 5:

Яко милосердия источник и благости пучина, Христе Боже, не презри в скорбях и бедах сущих, Тебе верою призывающих, но яко Щедр помилуй и от уз скоро освободи, да поем Тебе: Аллилуия.

Диакон: Господу помолимся.

Певцы: Господи, помилуй.

Предстоятель чтет молитву: Господи Иисусе Христе Боже наш: (см. выше).

Отпуст:

Христос истинный Бог наш, молитвами Пречистыя Своея Матери: святаго славнаго и всехвальнаго первоверховнаго апостола Петра и прочих святых славных и всехвальных апостолов и всех святых помилует и спасет нас яко Благ и Человеколюбец.

По отпусте величание:

Величаем тя, святый апостоле Петре и чтим вериги твои, имиже яко злодей за Христа связан был еси.

Сретение Господа и Бога и Спаса нашего Иисуса Христа

Февраля 2-го

На каноне припевы:

Слава Тебе, Боже наш, слава Тебе!

Пресвятая Богородице, спаси нас!

Катавасии:

Слава Тебе Господи Иисусе Христе Боже наш, Пречистою Материю Твоею по закону во храм принесенному и на руках старца Симеона носитися изволившему.

Спаси от бед рабы Твоя, Богородице Дево: (обычная Богородицы).

Святого священномученика Ермогена, патриаха московского и всея Руси

Февраля 17-го

Молебное пение священномученику Ермогену с присоединением молений о сущих в узах, по чину, указанному 22-го декабря (см. выше).

На Бог Господь тропарь, глас 2: Манассию от уз: (Дважды.)

Слава. Тропарь священномученику, глас 4:

Российския земли первопрестольниче и неусыпный о ней Богу молитвенниче: за веру Христову и паству твою душу свою положив, державу Российскую утвердил еси и страну нашу от нечестия избавил еси. Темже вопием ти: спасай молитвами твоими, священномучениче Ермогене, отче наш.

И ныне. Манассию от уз:

Канон, глас 8.

На каноне припев: Священномучениче Ермогене, моли Бога о нас.

По 3-й песни катавасия:

Моли Бога о нас, священномучениче Ермогене, яко мы усердно к тебе прибегаем, скорому помощнику и молитвеннику о душах наших.

Ектения сугубая и кондак священномученику, глас 6:

Темницею и гладом изнуряем, даже до смерти верен пребыл еси, блаженне Ермогене, малодушие от сердец людей твоих отгоняя и на общий подвиг всех призывая, темже и нечестивых мятеж низложил еси и страну нашу утвердил еси, да вси зовем тебе: Радуйся заступниче Русския земли.

По 6-й песни и ектении, кондак: Яко милосердия Источник:

Прокимен: Изведи из темницы душу мою, исповедатися имени Твоему.

И священномученика: Возвеселится праведник о Господе и уповает на Него.

Стих: Услыши, Боже, глас мой, внегда молитимися к Тебе.

Евангелие от Иоанна, зач. 31 и святителю Евангелие от Иоанна, зач. 25.

После молитвы о сущих в узах молитва священномученику.

Отпуст:

Христос истинный Бог наш, молитвами Пречистыя Своея Матери, святаго священномученика Ермогена, патриарха Московскаго и всея России, и всех святых помилует и спасет нас яко Благ и Человеколюбец.

По отпусте величание:

Величаем тя, священномучениче Ермогене и чтим труды и узы твои, и мученическую кончину, ихже за православие и за Русь Святую и годину смуты претерпел еси.

Святого славного и всехвального апостала и евангелиста Иоана Богослова

Мая 8-го

Молебное пение святому апостолу с присоединением молений об умножении любви по чину, указанному 26-го сентября.

Преподобного и благоверного князя Иоанна Углического, во иноцех Игнатия, Вологодского чудотворца

Мая 19-го

Молебное пение преподобному с присоединением молений о сущих в узах и заточении по чину, указанному 22 декабря.

На Бог Господь тропарь: Манассию от уз: (Дважды.)

Слава. Преподобному, глас 8:

В тебе, отче, известно спасеся еже по образу, приим бо крест, последовал еси Христу и дея учил еси презирати убо плоть, преходит бо, прилежати же о души, вещи безсмертней. Темже и со Ангелы срадуется, преподобне и благоверне княже Иоанне, дух твой.

И ныне. Праздника Триоди или: Манассию от уз:

На каноне припевы:

Преподобне и благоверне княже Иоанне, моли Бога о нас.

По 3-й песни катавасия:

Моли Бога о нас, преподобне и благоверне княже Иоанне, яко мы усердно к тебе прибегаем, в терпеливом несении креста скорбей помощнику и молитвеннику о душах наших.

Ектения сугубая.

Кондак преподобному, глас 2:

Чистотою душевною божественно вооружившися, и непрестанныя молитвы, яко копие прием в руки крепко, пробол еси бесовские опочения, преподобне и благоверне княже Иоанне. Моли убо непрестанно о всех нас.

По 6-й песни ектения малая.

Кондак: Яко милосердия:

Прокимен. Изведи из темницы душу мою, исповедатися имени Твоему.

Стих: Вонми молению моему, яко смирихся зело.

И преподобнаго: Честна пред Господем смерть преподобных Его.

Стих: Что воздам Господеви о всех, яже воздаде ми?

Евангелие от Иоанна, зач. 31 (8, 31–36) и преподобнаго Евангелие от Матфея, зач. 43 (11, 27–30).

По Евангелии:

Слава. Молитвами преподобнаго и благовернаго князя, Милостиве, очисти:

И ныне. Молитвами Богородицы:

Помилуй мя Боже:

Стихира преподобнаго, глас 6:

Преподобне и благоверне княже Иоанне, во всю землю Русскую изыде вещание о терпении твоем; тем на небесах обрел еси мзду трудов твоих, демонския погубил еси полки, и ангельския достигнул чины, ихже житию непорочно поревновал еси. Дерзновение имея ко Христу Богу, мир испроси душам нашим.

По Отче наш: тропари: Манассию от уз: и преподобнаго.

Кондак: Яко милосердия:

Слава. Преподобнаго. И ныне. Праздника.

Молитва о сущих в узах.

Отпуст:

Христос истинный Бог наш, молитвами Пречистыя Своея Матери, преподобнаго и благовернаго князя Иоанна Угличского, во иноцех Игнатия, Вологодскаго чудотворца, и всех святых, помилует и спасает нас яко Благ и Человеколюбец.

По отпусте величание:

Ублажаем тя, преподобне и благоверне княже Иоанне, злострадания и терпения образ, монашеских подвигов ревнителя и Ангелов собеседника.

Положение честной и многоцельной ризы Господа и Бога и Спаса нашего Иисуса Христа в царствующем граде Москве

Июля 10-го

На каноне припев: Слава Тебе, Боже наш, слава Тебе.

Катавасия:

Слава Тебе, Господи Иисусе Христе Боже наш, ризу Твою многоцелебную в благословение и покров Русской земле даровавшему.

Празднество всемилостивого Спаса

Августа 1-го

На каноне припев: Всемилостиве Спасе, помилуй нас.

Катавасия:

Помилуй нас, Всемилостиве Спасе, яко мы усердно к Тебе прибегаем, к Милостивому Спасителю нашему, всех Владыке Господу Иисусу.

Преображение Господа Бога и Спаса нашего Иисуса Христа

Августа 6-го

На каноне припев: Слава, Господи, святому Преображению Твоему.

Катавасия: Слава Тебе, Господи Иисусе Христе Боже наш, на земле во плоти спасения нашего ради Являвшемуся и на горе Фаворской славу Божества Твоего показавшему.

Пренесение в Константин град нерукотворенного образа Господа Бога и Спаса нашего Иисуса Христа

Августа 16-го

На каноне припев: Слава Тебе, Боже наш, слава Тебе.

Катавасия: Слава Тебе, Господи Иисусе Христе Боже наш, пречистаго лика Твоего нерукотворное изображение, яко прекрасное украшение Церкви Твоей и яко знамение спасительное людям даровавшему.

Неделя мясопустная. Воспоминание страшного суда

Неделя мясопустная в Древней Руси отмечалась совершением в кафедральных соборах торжественного и умилительного «Действа Страшнаго Суда», на котором пелись стихиры и канон Недели мясопустной и по пасхальному чину читалось по статиям архиереем и продиаконом Евангелие о Страшном Суде. С упразднением при Петре Iпатриаршества это «Действо» было забыто. Но потребность отметить особенным молением день, в который воспоминается Страшный Суд, всегда чувствовалась церковными людьми. Поэтому было бы соответственным восстановить для кафедральных соборов древний чин «Действа Страшнаго Суда», разумеется, проредактировав его и, где нужно, исправив и дополнив, а для всех храмов, на основании того же «Действа» составить последование молебнаго пения с каноном, подобно тому, как по «Чину Православия» составлено «Последование молебнаго пения об обращении заблудших» для совершения его во всех храмах в Неделю Православия.

В нашей Русской Церкви установился добрый обычай в воскресные дни Великаго поста после вечерни к понедельнику совершать торжественные молебные пения, нередко с чтением акафиста Иисусу Сладчайшему, Страстям Господним или местными святынями. Было бы соответственным и в Неделю мясопустную после вечерни совершать молебствие по ниже изложенному чину.

Последование молебного пения в неделю мясопустную

Предстоятель: Благословен Бог наш:

Чтец: Аминь.

Приидите, поклонимся: (Трижды.)

Псалом избранный:

Бог богов Господь глагола и призва землю от восток солнца до запад (49/1). Бог яве приидет, Бог наш, и не премолчит. Огнь пред Ним возгорится и окрест Его буря зельна. Призовет небо свыше, и землю разсудити людей Своих (49/3–4). Небеса поведают славу Божию (18/1), и возвестят небеса правду Его, яко Бог Судия есть (49/6). Господь во век пребывает, уготова на суд Престол Свой, и Той судити имать вселенней в правду, судити имать людем в правоте (9/8–9). Господь воцарися, да трепещут людие, седяй на Херувимах, да подвижится земля (98/1). Бог седит на Престоле святем Своем (46/9). Тамо седоша престоли на суд (121/5). И подвижеся и трепетна бысть земля, и основания гор смятошася и подвигошася, яко прогневася на них Бог. Взыде дым гневом Его, и огнь от лица Его воспламенится, углие возгореся от Него. И приклони небеса, и сниде, и мрак под ногами Его. И взыде на Херувимы, и лете, лете на крыльях ветра (17/8–11). От облистания пред Ним облацы проидоша, град и углие огненное. И возгреме с небесе Господь, и Вышний даде глас Свой. Ниспосла стрелы, и разгна их, и молнии умножи, и смяте их (17/13–15). В началех Ты, Господи, землю основал еси, и дела рук Твоих суть небеса. Та погибнут, Ты же пребываеши, и вся яко риза обетшают и яко одежду свиеши их, и изменятся. Ты же тойжде еси, и летаТвоя не оскудеют (101/26–28). Велия верху небес милость Твоя и до облак истина Твоя (107/5). Милости Твоея, Господи, исполнь земля (118/64). Пойте Богу нашему, пойте, пойте Цареви нашему пойте, яко Царь всея земли Бог, пойте разумно. Воцарися Бог над язычниками, Бог седит на Престоле святем Своем (46/7–9). Бог Судия есть (49/6). Земля убояся и умолча, внегда востати на суд Богу, спасти всех кротких земли (75/9–10). Да воскреснет Бог и расточатся врази Его и да бежат от лица Его ненавидящии Его. Яко исчезает дым, да исчезнут; яко тает воск от лица огня, тако да погибнут грешницы от лица Божия, а праведницы да возвеселятся, да возрадуются пред Богом, да насладятся в веселии. Воспойте Богу, пойте имени Его. Той даст силу и державу людем Своим, благословен Бог (67/2–5, 36).

Слава, и ныне. Аллилуия (трижды).

Бог Господь со стихами во глас 6:

Тропари

Помилуй нас, Господи, помилуй нас,/ всякаго бо ответа недоумеюще,/ сию Ти молитву, яко Владыце,/ грешнии приносим:/ помилуй нас.

Слава. Господи помилуй нас,/ на Тя бо уповахом,/ не прогневайся на нас зело,/ и не помяни беззаконий наших,/ но призри и ныне яко Благоутробен,/ и избави нас от врагов наших,/ Ты бо еси Бог наш,/ и мы людие Твои,вси дела руку Твоею/ и имя Твое призываем.

И ныне. Милосердия двери отверзи нам,/ благословенная Богородице,/ надеющиися на Тя да не погибнем,/ но да избавимся Тобою от бед./ Ты бо еси спасение рода христианскаго.

Посем священнослужители, певцы и вси людие поют псалом 50 на глас 6.

По псалме поем канон, глас 6, из напечатанной в Псалтири Следованной в главе 33 «Службы общей по вся дни ко Господу нашему Иисусу Христу». Поем же канон сей без ирмосов, припевы, поют певцы, тропари чтут священники, применяяся, катавасии же по каждой песни поют вкупе священники и певцы.

Псалом 50.

И поем канон, глас 6:

Песнь 1

Ирмос: Помощник и Покровитель:

Припев: Милостиве Господи, помилуй нас в день суда Твоего.

Егда приидеши, Боже, во тьмах и тысящах ангельских небесных начал, и мене окаяннаго сподоби срести Тя, Христе, на облацех.

Милостиве Господи, помилуй нас в день суда Твоего.

Не вниди со мною в суд, носяй моя деяния, словеса изыскуяй и исправляяй стремления, но в щедротах Твоих презирая моя лютая, спаси мя, Всесильне.

Слава: Ужасает мя и страшит огнь негасимый геенский, червь горький, скрежет зубов; но ослаби ми, остави, Христе, и стояния со избранными Твоими сподоби.

И ныне: Преклонен множеством искушений и лютыми деяниями, выю душевную и телесную преклоняю Тебе, Чистая, и вопию Тебе прилежно: Ты мя исправи.

Катавасия: Избави от огня геенскаго и мук вечных рабов Твоих, Владыко наш Господи, яко мы усердно к Тебе прибегаем, к Судии Праведнейшему, Человеколюбивому и Многомилостивому.

Песнь 3

Ирмос: Утверди, Господи:

Милостиве Господи, помилуй нас в день суда Твоего.

Господь грядет и кто стерпит страх Его? Кто явится лицу Его? Но готова буди, о душе, ко сретению.

Милостиве Господи, помилуй нас в день суда Твоего.

Нестерпимый гнев суда Твоего, Господи, како стерплю, преслушав Твое повеление? Но пощади, пощади мя в час суда.

Слава: Помилуй, Господи, помилуй мя, вопию Тебе, егда приидеши со Ангелами Твоими воздати всем по достоянию деяний.

И ныне: Дверь Благодатная, отверзшая верным двери небесныя, покаяния двери светозарныя отверзи мне, Владычице, и от врат смертных свободи.

Катавасия: Избави от огня геенскаго и мук вечных рабов Твоих, Владыко наш Господи, яко мы усердно к Тебе прибегаем, к Судии Праведнейшему, Человеколюбивому и Многомилостивому.

Ектения сугубая:

Помилуй нас, Боже:

Еще молимся о Великом Господине:

Еще молимся о стране нашей:

Еще молимся за всю братию и за вся христианы.

Возглас: Яко милостив:

Седален, глас 6:

Помышляю о дне страшном/ и плачу о деяниях моих лукавых:/ како отвещати буду Безсмертному Царю?/ Коим же дерзновением воззрю на Судию блудный аз?/ Благосердый Отче,/ Сыне Единородный и Душе Святый, помилуй мя.

Слава. Во юдоли плача,/ на месте, егоже предназначил еси,/ егда сядеши, Милостиве, сотворити праведный суд,/ не объяви моя тайная,/ и не посрами мене пред Ангелами;/ но пощади мя, Боже, и помилуй мя.

И ныне. Упование мира, благая Богородице Дево,/ Твое и единое сильное предстательство молю:/ умилосердися на многоутеняемых людей,/ умоли Милостиваго Бога,/ избавитися нам от всякаго прещения,/ едина Благодатная.

Песнь 4

Ирмос: Услыша пророк:

Милостиве Господи, помилуй нас в день суда Твоего.

Наста день, уже при дверех суд; душе, бодрствуй. Тамо царие вкупе и князи, богатии и убозии собираются; и восприимет кийждо от человек по достоянию содеянных.

Милостиве Господи, помилуй нас в день суда Твоего.

Нелицеприятен суд Твой, непогрешимо Твое судище; несть бо тамо искусства защитников, хитрословиями сокрывающих истину; несть показания свидетелей, отрицающих правду; Тебе бо Богу все сокровенное открыто.

Слава. Да не прииду в землю плача, да не вижу места тьмы, Христе мой Слове, и да не имам связанными руки и ноги, вне чертога Твоего изверженный, одежду нетления имея оскверненной, всеокаянный.

И ныне. Крепосте моя, Пречистая, прибежище, необоримая стена и к Богу Молитвенница сущая, вечнаго пламене и геенны свободи мя.

Катавасия: Избави от огня геенскаго и мук вечных рабов Твоих, Владыко наш Господи, яко мы усердно к Тебе прибегаем, к Судии Праведнейшему, Человеколюбивому и Многомилостивому.

Песнь 5

Ирмос: От ночи утреннююще:

Милостиве Господи, помилуй нас в день суда Твоего.

Трепет неизреченный и страх тамо; приидет бо Господь и дело с Ним коегождо от человек, и сего ради кто тогда о себе не восплачет?

Милостиве Господи, помилуй нас в день суда Твоего.

Пощади, пощади, Господи, создание Твое; согреших, ослаби ми, яко естеством чист Ты еси един, и иный кроме Тебе никтоже есть без скверны.

Слава. Ослаби, остави, Господи, и прости, елико Ти согреших, и не покажи мя тамо пред Ангелами во осуждении огня и студа некончаемаго.

И ныне. Осквернен помыслами и окалян многими паденьми, Мати Божия, Тя молю, едина Нескверная: ущедри и спаси мя ходатайством Твоим.

Катавасия: Избави от огня геенскаго и мук вечных рабов Твоих, Владыко наш Господи, яко мы усердно к Тебе прибегаем, к Судии Праведнейшему, Человеколюбивому и Многомилостивому.

Песнь 6

Ирмос: Возопих всем сердцем:

Милостиве Господи, помилуй нас в день суда Твоего.

В Страшное Пришествие Твое, Христе, егда явишися с небесе, и поставятся престоли, и книги разгнутся, пощади, пощади тогда, Спасе, создание Твое.

Милостиве Господи, помилуй нас в день суда Твоего.

Тамо ничтоже помощи может, Богу сущу Судии: ни тщание, ни козни, ни слава, ни дружба; токмо от дел крепость твоя, о душе моя.

Слава. Да не услышу, Господи, отсылаемь от Тебе: «Возьми твое, и пойди во огнь проклятый», но да услышу возжеленный глас, призывающий праведных.

И ныне. Ходатаицу имамы всегда у Бога Тя, Пренепорочная; темже испроси, Пречистая, от тамо сущих мучений страшных избавити всех, Богородицу воистину исповедающих Тя.

Катавасия: Избави от огня геенскаго и мук вечных рабов Твоих, Владыко наш Господи, яко мы усердно к Тебе прибегаем, к Судии Праведнейшему, Человеколюбивому и Многомилостивому.

Ектения малая.

Возглас: Ты бо еси Царь мира:

Кондак, глас 1:

Егда приидеши, Боже, на землю со со славою/ и трепещут всяческая;/ река же огненная пред судищем течет,/ и книги разгибаются, и тайная являются;/ тогда избави мя от огня неугасимаго,/ и сподоби мя одесную Тебе стати,/ Судие Праведнейший.

Прокимен, глас 3:

Велий Господь наш и велия крепость Его и разума Его несть числа.

Стих: Хвалите Господа, яко благ псалом, Богови нашему да усладится хваление.

Господу помолимся.

Яко Свят еси:

Всякое дыхание:

И о сподобитися:

От Матфея Святаго Евангелия чтение.

Евангелие от Матфея, зачало 106 (25, 31–46).

Рече Господь: егда приидет Сын Человеческий в славе Своей, и вси святии Ангели с Ним, тогда сядет на престоле славы Своея. И соберутся пред ним вси язы́цы, и разлучит их друг от друга, якоже пастырь разлучает овцы от козлищ. И поставит овцы одесную Себе, а козлища ошуюю. Тогда речет Царь сущим одесную Его: приидите благословеннии Отца Моего, наследуйте уготованное вам Царствие от сложения мира. Взалкахся бо, и дасте Ми ясти; возжадахся, и напоисте Мя; странен бех, и введосте Мене; наг, и одеясте Мя; болен, и посетисте Мене; в темнице бех, и приидосте ко Мне. Тогда отвещают Ему праведницы, глаголюще: Господи, когда Тя видехом алчуща, и напитахом; или жаждуща, и напоихом; когда же Тя видехом странна, и введохом; или нага, и одеяхом; когда же Тя видехом боляща, или в темнице, и приидoxoм к Тебе? И отвещав Царь речет им: аминь глаголю вам, понеже сотвористе единому сих братий Моих меньших, Мне сотвористе. Тогда речет и сущим ошуюю Его: идите от Мене проклятии во огнь вечный, уготованный диаволу и аггелом его. Взалкахся бо, и не дасте Ми ясте; возжадахся, и не напоисте Мене; странен бех, и не введосте Мене; наг, и не одеясте Мене; болен, и в темнице, и не посетисте Мене. Тогда отвещают Ему и тии, глаголюще: Господи, когда Тя видехом алчуща, или жаждуща, или странна, или нага, или больна, или в темнице, и не послужихом Тебе? Тогда отвещает им, глаголя: аминь глаголю вам, понеже не сотвористе единому сих меньших, ни Мне сотвористе. И идут сии в муку вечную, праведницы же в живот вечный.

Слава. Отче, Слове и Душе, Троице Святая, очисти множество согрешений наших.

И ныне. Молитвами Богородицы, Милостиве очисти множество согрешений наших.

Помилуй мя, Боже, по велицей милости Твоей и по множеству щедрот Твоих, очисти беззакония моя.

Стихира, глас 6:

Егда приидеши суд праведный сотворити,/ Судие Праведнейший,/ на престоле славы Твоея седяй,/ река же огненная пред Твоим судилищем всех ужасающи потечет,/ предстоящим Тебе Небесным Силам,/ человекам же судимым во страхе,/ якоже кийждо содела,/ тогда нас пощади, Христе,/ и части спасаемых сподоби, яко Благосерд,/ верою молим Тя.

Спаси, Боже, людей Твоих и благослови достояние Твое, посети милостию и щедротами Твоими землю Русскую; утверди в ней веру истинную; разшири, умножи, умири и непоколебиму адовыми вратами во веки сохрани Церковь Святую; умудри архипастырей и пастырей наших право правити слово Твоея истины; разори и вскоре испраздни всякое разделение и ересей возстание; соблюди в мире паству православную; возвыси ревнителей веры отеческой и ниспосли на нас и на всех верных рабов Твоих милости Твои богатыя, молитвами Всепречистыя Владычицы нашея Богородицы и Приснодевы Марии; силою Честнаго и Животворящаго Креста и покровом честныя и многоцелебныя ризы Своея; предстательством честных Небесных Сил безплотных; честнаго славнаго пророка, Предтечи и Крестителя Иоанна; святаго славнаго и всехвальнаго апостола Андрея Первозваннаго и всех святых славных и всехвальных апостолов; святаго славнаго пророка Илии; иже во святых отцев наших и вселенских великих учителей и святителей Василия Великаго, Григория Богослова и Иоанна Златоустаго; иже во святых отца нашего Николая, архиепископа Мир Ликийских, чудотворца; святых равноапостольных Мефодия и Кирилла, учителей Словенских; святых равноапостолов Русских благовернаго великаго князя Владимира и благоверной великой княгини Ольги, иже во святых отцев наших всея России чудотворцев Михаила, митрополита Киевскаго, Петра, Алексия, Ионы, Филиппа и священномученика Ермогена, святителей Московских; Никиты и Иоанна Новгородских; Леонтия и Димитрия Ростовских; святых благоверных князей и страстотерпцев Бориса и Глеба; преподобных и богоносных отцев наших Антония и Феодосия Киево-Печерских, Сергия и Никона. Радонежских, Антония Римлянина и Варлаама Хутынскаго, Новгородских, Зосимы и Савватия Соловецких и Серафима Саровскаго и всех прочих чудотворцев, в земле Русской просиявших, святых славных и добропобедных мучеников, преподобных и богоносных отцев наших, святых праведных Богоотцев Иакима и Анны и всех святых, молим Тя, Многомилостиве Господи, услыши нас грешных молящихся Тебе и помилуй нас.

Лик: Господи, помилуй (12).

Возглас: Милостию и щедротами:

Песнь 7

Ирмос: Согрешихом, беззаконновахом:

Милостиве Господи, помилуй нас в день суда Твоего.

Припадем и восплачим прежде суда онаго, вернии, егда небеса погибнут, звезды спадут и вся земля поколеблется, да милостива обрящем в конец отцев Бога.

Милостиве Господи, помилуй нас в день суда Твоего.

Неподкупно тамо испытание, страшен есть суд, идеже Судия непогрешимь есть, идеже несть лицеприятия даров ради; тогда пощади мя, Владыко, и избави от всякаго гнева Твоего страшнаго.

Слава. Господь грядет судити! Кто стерпит видение Его? Вострепещи, душе моя окаянная, вострепещи и уготови исходищу дела Твоя, да милостива и благосерда обрящеши Его, отцев Бога.

И ныне. Егда в нощи Жених приидет судити земли, тогда во сретение Его со светлою свещею благоволи изыти мне, Пречистая, и поклонитися Того пришествию.

Катавасия: Избави от огня геенскаго и мук вечных рабов Твоих, Владыко наш Господи, яко мы усердно к Тебе прибегаем, к Судии Праведнейшему, Человеколюбивому и Многомилостивому.

Песнь 8

Ирмос: егоже воинства небесная:

Милостиве Господи, помилуй нас в день суда Твоего.

Страшнаго Втораго Твоего, Господи, Пришествия помышляя сретение, трепещу прещения Твоего, боюся гнева Твоего и зову: от сего часа спаси мя во веки.

Милостиве Господи, помилуй нас в день суда Твоего.

Всех Судие, Боже мой и Господи, да услышу тогда глас Твой вожделенный, да увижу свет Твой великий, да узрю селения Твои, да узрю славу Твою, радуяся во веки.

Слава. Егда сядеши, Судие, яко Благосерд и покажеши страшную славу Твою, Христе. О кий страх тогда, пещи горящей и всем боящимся нестерпимаго судища Твоего.

И ныне. В день суда явися, Владычице, и предстани мне от муки и огня свобождающи, да спасен быв Тобою, воспою Твою необоримою благодать.

Хвалим, благословим, поклоняемся Господеви, поюще и превозносяще Его во веки.

Ирмос: егоже воинства небесная славят, и трепещут Херувими и Серафими, всяко дыхание тварь, пойте, благословите и превозносите во вся веки.

Песнь 9

Ирмос: Безсеменнаго зачатия рождество несказанное, Матере безмужныя нетленен Плод, Божие бо рождение обновляет естества; темже Тя вси роди, яко Богоневестную Матерь, православно величаем.

Милостиве Господи, помилуй нас в день суда Твоего.

Господь грядет грешных предати мукам, праведных же спасти. Вострепещим и возрыдаим, и приимем чувство онаго дне, воньже безвестная и тайная открыв, человекам воздаст по достоянию.

Милостиве Господи, помилуй нас в день суда Твоего.

Даниил убояся часа испытания, аз же окаянный, что постражду, Господи, в той пришед страшный день? Но даждь мне прежде конца благоугодно Тебе послужити и получити Царствие Твое.

Слава. Огнь готовится и червь устрояется; веселие, слава, ослабление, свет невечерний, радость праведным. И кто блажен явится, избегнув мучения первых и наследовав вторая.

И ныне. Страстей волнение смущает мя, и сластьми погружает, Дево Пренепорочная, Кормчаго Христа рождшая, руку мне помощи простри и спаси мя, Едина спасение верою блажащих Тя.

Достойно есть: Трисвятое. Отче наш:

Тропари, глас 6:

Помилуй нас, Господи, помилуй нас,/ всякаго бо ответа недоумеюще,/ сию Ти молитву, яко Владыце,/ грешнии приносим:/ помилуй нас.

Слава. Господи помилуй нас,/ на Тя бо уповахом,/ не прогневайся на нас зело,/ и не помяни беззаконий наших,/ но призри и ныне яко Благоутробен,/ и избави нас от врагов наших,/ Ты бо еси Бог наш,/ и мы людие Твои,вси дела руку Твоею/ и имя Твое призываем.

И ныне. Милосердия двери отверзи нам,/ благословенная Богородице,/ надеющиися на Тя да не погибнем,/ но да избавимся Тобою от бед./ Ты бо еси спасение рода христианскаго.

Ектения сугубая:

Помилуй нас Боже:

Еще молимся о еже сохранитися граду:

Еще молимся за всю братию:

Возглас: Услыши ны, Боже:

И отпуст.

Ектения сугубая, юже глаголет диакон с кадилом:

Помилуй нас, Боже, во велицей милости Твоей, молимся Тебе, услыши и помилуй.

Лик: Господи, помилуй (трижды).

Еще молимся Господу Богу нашему, еже услышати Ему глас молитвы нашея и милостиву и долготерпеливу и умилену быти и тиху Человеколюбцу Богу о гресех наших и помиловати нас, и отвратити гнев Свой праведный от нас, и избавити нас от належащаго и праведнаго его прещения, и сохранити великий царствующей град Москву, град сей (или весь сию) и вся грады и веси наши и всю землю Русскую от глада, губительства, земли трясения и потопа, огня и меча, мора, нашествия иноплеменных и междоусобной брани, и избавити нас от належащих бед сих, и дати рабам Своим тихое и мирное время, и утешити скорбных людей Своих, вопием вси со умилением: Господи Святый, услыши и помилуй.

Лик: Господи, помилуй (40).

Еще молимся о еже услышати Господу Богу глас моления нас грешных и помиловати нас.

Возглас: Услыши ны, Боже, Спасителю наш:

Посем диакон возглашает: Паки и паки, преклонше колена Господу помолимся.

Лик: Господи, помилуй (трижды).

И всем колена преклоншим чтет предстоятель молитву сию:

Господи Боже, Спасителю наш, просветивый сиянием пришествия Твоего мира концы и сопризвавый нас в Церковь Твою Святую со обетованием наследия нетленных и вечных благ! Призри милостивно на нас, недостойных рабов Твоих и не помяни беззаконий наших, но по безмерному благосердию Твоему прости нам вся прегрешения наша. Аще бо святую волю Твою и преступихом, но не отметаемся Тебе, Бога и Спаса нашего; Тебе единому согрешаем, но и Тебе единому служим, в Тя единаго веруем, к Тебе единому прибегаем и Твои точию раби быти хощем. Помяни немощь естества нашего и обдержащия повсюду искушения врага, и прельщения и соблазны мира, ихже ради без Тебе, якоже рекл еси, не можем творити ничесоже. Сам очисти и спаси нас; Сам умы наша просвети, да непоколебимо будем веровати в Тя, единаго Спаса и Избавителя нашего; Сам сердца наша подвигни всецело любити Тя, единаго Бога и Творца нашего; Сам направи стопы наша непреткновенно ходити во свете заповедей Твоих. Ей Господи, Спасителю наш! Яви нам великую и богатую милость Твою, сподоби, да в покаянии и исполнении заповедей Твоих остающиеся дни жизни нашея поживем и тако сподобимся во оный страшный день, во Второе и славное Пришествие Твое услышати от Тебе милостивое призывание во Царствие Небесное, егоже и получити сподоби нас, грешных и недостойных рабов Твоих и в наслаждении неизреченныя райския красоты славити Тя вкупе со Безначальным Твоим Отцем и Пресвятым и Благим и Животворящим Твоим Духом в безконечные веки веков.

Певцы: Аминь.

И обычный отпуст.

Суббота пятой седмицы святой четыредесятницы. Похвала пресвятой Богородицы

Катавасия на молебне:

Спаси от бед рабов Твоих Богородице, яко вси по Бозе к Тебе прибегаем, яко к нерушимой стене и предстательству.

Призри благосердием, Всепетая Богородице, на мои лютыя скорби телесныя, и исцели души моея болезнь.

Молитва

(Опыт исправления и сокращения Молитвы первой, помещенной в Иерейском Молитвослове, после акафиста Пресвятой Богородице).

Нескверная, Неблазная, Нетленная, Пречистая Богородице, Пренепорочная Владычице, Небесная Царица, Мати Царя Вышних Сил, Творца неба и земли, едина радости Ходатаица, рождшая Господа нашего Иисуса Христа, земным всем Спасителя! Приими сие благодарственное пение от недостойных рабов Твоих и не презри моления нашего, Всенепорочная Царице. Кто бо притекаяй к Тебе, посрамлен бысть, или кто, призываяй Тя, неуслышан от Тебе отыде? Кто паки, надежду возложивый на Тя, погибе? Точию отметающиеся поклонитися образу Твоему написанному, егоже все Силы Небесныя чтут, пред ним же вси роди христиан православных, благочестно поклоняющеся, честь Тебе Самой воздают. Темже и мы, на Твой пречистый образ взирающе, яко истинную самую Тя зряще Богородицу, верою сердечною и любовию от души припадаем и поклоняемся Тебе со Превечным, на руках Твоих держимым Младенцем, Господом нашим Иисусом Христом, и вопием Тебе: помилуй нас, Мати Божия, и покажи на нас убогих древния милости Твои. Ты древле спасла еси царствующий град Твой от скифскаго воеводы онаго прегордаго Кагана, разсвирепевшим морем тмочисленное воинство его потопивше. И паки огненным дождем с небесе тмы кораблей, нападающих на град Твой, в мори воскипевшим, разсеяла еси. Темже Твою помощь проповедуем велегласно и онаго Твоего великаго заступления дивное воеводство воспоминающе, Тебе, Взбранной Воеводе, победныя песни воспеваем раби Твои, Богородице, и молебное сие акафистово приносим благодарение. Приими его милостиво и яко всегда едина и таяже суще, яви и на нас человеколюбное Твое заступление. Твоим предстательством к Сыну Твоему и Богу нашему, и Твоим милосердием, и Твоею помощию не остави нас. Победи невидимые полки сатанинские, душевный наш град окружающие. Утеши нас в скорбях наших, в трудах наших нам помоги, душевныя страсти и болезни телесныя исцели, от врагов видимых и невидимых защити, весь путь маловременнаго сего жития добре и непреткновенно совершити пособствуй. И в день судный не забуди и нашего недостойнаго моления, и веру нашу в Твою помощь, и упование наше, на Тя возложенное, и любовь нашу к Тебе воспомянувши, Сына Твоего на милость к нам преклони и тако вечных оных благ и нас причастниками соделай, яко да и мы сподобимся славити Тя и благодарно воспевати Сына Твоего и Бога нашего, со Безначальным Его Отцем и Пресвятым Духом в безконечныя веки веков. Аминь.

Неделя шестая святой четыредесятницы. Вход Господень в Иерусалим

На каноне припев: Слава Тебе, Боже наш, слава Тебе!

Катавасия: Слава Тебе, Господи Иисусе Христе Боже наш, спасения нашего ради в смиренном образе раба на земле явившемуся, во Иерусалим же прежде страданий Твоих со славою вшедшему и от уст детей хвалу приявшему.

Неделя святой Пасхи. Тридневное Воскресение Господа Бога и Спаса нашего Иисуса Христа

В Неделю Пасхи во всю Светлую седмицу на молебне канон Пасхи: ирмосы по дважды, тропари на четыре с припевом: Христос воскресе из мертвых.

Катавасия по каждой песни – ирмос канона.

Неделя первая по Пасхе. Уверение святого апостола Фомы

На каноне праздника припев: Слава Тебе, Боже наш, слава Тебе!

Катавасия: Слава Тебе, Господи Иисусе Христе Боже наш, дверем заключенным ко учеником пришедшему и чрез Фому во истине воскресения Твоего нас уверившаго.

В храмах Воскресенских в сию Неделю и во всех храмах от Недели Фомы до Отдания Пасхи, и в воскресные дни всего года на молебнах Тридневно Воскресшему Господу – канон из Октоиха рядового гласа (в Неделю Фомину – перваго гласа) по два тропаря воскресных с припевом: Слава Господи, святому воскресению Твоему. Слава, тропарь Крестовоскресен. И ныне, Богородичен.

Катавасия в Неделю и седмицу Фомину:

Слава Тебе, Господи Иисусе Христе Спасе наш, нас ради во ад сшедшему и Собою все воскресившему.

В последующие седмицы попразднства Пасхи и воскресные дни всего года катавасия: Слава Тебе, Господи Иисусе Христе Спасе наш, тридневно со славою воскресшему и Собою всех воскресившему.

Четверток шестой седмицы по Пасхе. Вознесение Господа и Бога нашего Иисуса Христа

На каноне припев: Слава, Господи, святому вознесению Твоему.

Катавасия: Слава Тебе, Господи Иисусе Христе Боже наш, на земле все спасения нашего ради совершившему и паки на небеса с плотию вознесшемуся.

Неделя седьмая по Пасхе. Святая пятидесятница

На каноне припев: Пресвятая Троице, Боже наш, слава Тебе!

Катавасия: СлаваТебе, Всеблагий Владыка наш Господи, Отче, Слове и Душе, в Троице славимый и покланяемый Боже.

Во ино время на молебнах Святой Троице просительный припев:

Пресвятая Троице, помилуй нас.

Катавасия: Избави от бед и скорбей рабов Твоих, Владыко Всемилостивый, яко мы усердно к Тебе прибегаем, ко Отцу и Сыну и Святому Духу, в Троице Святой славимому Богу.

В понедельник Святого Духа

На каноне припев: Утешителю Благий, слава Тебе!

Катавасия: Слава Тебе, Утешителю Благий, Святый Душе, от Отца исходяй и в Сыне почиваяй, яко Тобою благодать и жизнь всем творениям подаются.

Евангелие от Иоанна, зачало 52–53 (15, 26–27; 16, 7–15).

Неделя вторая по пятидесятнице. Всех святых в земле Русской просиявших. Последование молебного пения всем святым, в земле русской просиявшим

Благословившу предстоятелю, канонарх глаголет: Приидите, поклонимся.Трижды.

И поем на оба лика псалом избранный.

1-й лик: Господи, Господь наш, яко чудно имя Твое по всей земли.

2-й лик: Вся земля да поклонится Тебе и поет Тебе, да поет же имени Твоему, Вышний.

1-й лик: Кто Бог велий, яко Бог наш? Ты еси Бог, творяй чудеса.

2-й лик: Кто возглаголет силы Господни, слышаны сотворит вся хвалы Его?

1-й лик: Помянух дни древния, поучихся во всех делех Твоих.

2-й лик: Приидите, видите дела Божия, яже положи чудеса на земли.

1-й лик: Исповедайтеся Господеви и призывайте имя Его, возвестите во языцех дела Его.

2-й лик: Воспойте Ему и пойте Ему, поведите вся чудеса Его.

1-й лик: Хвалитеся о имени святом Его, да возвеселится сердце ищущих Господа.

2-й лик: Взыщите Господа и утвердитеся, взыщите лица Его.

1-й лик: Помяните чудеса Его, яже сотвори.

2-й лик: Той Господь Бог наш, по всей земле судьбы Его.

1-й лик: Помяни нас, Господи, во благоволении людей Твоих, посети нас спасением Твоим.

2 лик: Воскресни, Господи, помози нам и избави нас имене ради Твоего.

1-й лик: Доколе, Господи, прогневаешися до конца?

2-й лик: Не помяни наших беззаконий первых.

1-й лик: Скоро да предварят нас щедроты Твои, Господи, яко обнищахом зело.

2-й лик: Помози нам, Боже, Спасителю наш, славы ради имене Твоего.

1-й лик: Господи, избави нас и очисти грехи наши имене ради Твоего.

2-й лик: Да внидет пред Тя воздыхание окованных.

1-й лик: Яви, Господи, милость Твою и спасение Твое даждь нам.

2-й лик: Ты, Господи, сохраниши нас и соблюдеши нас от рода сего и во век.

1-й лик: Дадите славу Богу.

2-й лик: Буди имя Господне благословенно от ныне и до века.

1-й лик: Слава Отцу и Сыну и Святому Духу.

2-й лик: И ныне, и присно, и во веки веков. Аминь.

1-й лик: Аллилуиа, аллилуиа, аллилуиа, слава Тебе, Боже.

2-й лик: Аллилуиа, аллилуиа, аллилуиа, слава Тебе, Боже.

1-й лик: Аллилуиа, аллилуиа, аллилуиа, слава Тебе, Боже.

Посем канонарх возглашает и сам поет на глас греческим распевом:

Глас четвертый. Бог Господь и явися нам, благословен грядый во имя Господне.

Канонарх поет во глас стих 2-й:

Обышедше обыдоша мя и именем Господним противляхся им.

2-й лик: Бог Господь и явися нам, благословен грядый во имя Господне.

Канонарх поет стих 3-й:

Не умру, но жив буду и повем дела Господня.

1-й лик: Бог Господь и явися нам, благословен грядый во имя Господне.

Канонарх поет стих 4-й:

Камень, егоже небрегоша зиждущии, сей бысть во главу угла, от Господа бысть сей и есть дивен во очесех наших.

2-й лик: Бог Господь и явися нам, благословен грядый во имя Господне.

Таже 1-й лик поет:

Тропарь, глас 4:

Иерусалима Вышняго граждан,/ от земли нашея возсиявших/ и Богу во всяком чине/ и всяким подвигом угодивших,/ приидите, воспоим, вернии:/ о всеблаженнии земли Русской заступницы,/ молитеся ко Господу,/ да помилует сию от гнева Своего,/ исцеляя сокрушение ея,/ и верных людей Своих утешит.

2-й лик: поет тойже тропарь.

1-й лик: Слава, и ныне, Богородичен, глас тойже:

К Заступнице страны нашей,/ Приснодеве Богородице, притецем/ и к первописанной иконе Ея ныне припадем,/ с верою зовуще из глубины души:/ о Мати Божия, спаси землю Русскую,/ исцели сокрушение ея/ и верных людей утеши.

Посем поем на оба лика иной псалом избранный:

1-й лик: Исповедайтеся Господеви, яко Благ, яко в век милость Его.

2-й лик: Бог нам прибежище и сила.

1-й лик: Помощник в скорбях, обретших ны зело.

2-й лик: Многи скорби праведным.

1-й лик: Сеющии слезами радостию пожнут.

2-й лик: Воззваша ко Господу, внегда скорбети им, и от нужд их спасе их.

1-й лик: Воззваша праведнии, и Господь услыша их.

2-й лик: Святым, иже суть на земле Его, удиви Господь вся хотения Своя в них.

1-й лик: Праведницы наследят землю и вселятся в век века на ней.

2-й лик: Веселитеся о Господе и радуйтеся, праведнии.

1-й лик: Веселитеся, праведнии, о Господе и уповайте на Него.

2-й лик: Праведник, яко финикс, процветет и, яко кедр, иже в Ливане, умножится.

1-й лик: Блажени живущии в дому Твоем, в веки веков восхвалят Тя.

2-й лик: Дивен Бог во святых Своих, Бог Израилев.

1-й лик: Хранит Господь души преподобных Своих.

2-й лик: Блажени вси боящиися Господа, ходящии в путех Его.

1-й лик: Соберите Ему преподобных Его.

2-й лик: Милость Господня от века и до века на боящихся Его.

1-й лик: Весть Господь путь непорочных, и достояние их в век будет.

2-й лик: Господь воцарися, да радуется земля.

1-й лик: Возвестите во языцех славу Его, во всех людех чудеса Его.

2-й лик: Воцарися Бог над языки.

1-й лик: Спаси нас, Господи Боже наш, и собери нас от язык исповедатися имене Твоему святому.

2-й лик: От восток солнца до запад хвально имя Господне.

По окончании псалма начинаем пети канон святым, глас 8. Поем же его без ирмосов на 4.

Песнь 1

Ирмос: Воду прошед:

1-й лик: Все святые земли Русской, молите Бога о нас.

Многими содержими напастьми,/ к вам прибегаем, спасения ищуще,/ о святые сродницы наши,/ от лютых бед и нужд спасите нас.

2-й лик: Все святые земли Русской, молите Бога о нас.

Страстей прилоги и многия печали/ и беды обуревают нас,/ утешение нам подайте, святые,/ к Богу вашими молитвами.

1-й лик: Слава Отцу и Сыну и Святому Духу.

Спаса Христа молите, Российские чудотворцы,/ избавитися нам от бед и скорбей,/ земли же нашей от варварскаго нахождения/ вашим теплым предстательством.

2-й лик: И ныне и присно и во веки веков. Аминь.

В скорби нас и бедах сущих/ посещения Божественнаго/ и промышления от Тебе сподоби,/ о Богомати Владычице.

Священницы и оба лика вкупе поют катавасию:

Молите Бога о нас,/ все святые земли Русской,/ яко мы усердно/ к вам прибегаем,/ скорым помощникам и молитвенникам о душах наших.

Сию катавасию поем по каждой песне.

Песнь 3

Ирмос: Небеснаго круга:

1-й лик: Все святые земли Русской, молите Бога о нас.

Заступники и покровители земли нашея вы есте,/ Божии угодницы,/ направите нас ко пристанищу спасения,/ вы бо есте верным ограждение.

2-й лик: Все святые земли Русской, молите Бога о нас.

Молим вас, блаженнии:/ душевное смущение и печали бурю разорите/ и тишину нам подати,/ Начальника тишины Христа умолите.

1-й лик: Слава Отцу и Сыну и Святому Духу.

Святым древним подражавшие/ и от Бога благодатию обогатившиеся,/ помогайте нам, чадам вашим,/ присно восхваляющим вас,/ яко Божиих угодников.

2-й лик: И ныне и присно и во веки веков. Аминь.

Лютыми недугами и страстьми греховными обуреваемым,/ и варварскими нападениями истязуемым,/ и в ров погибели впадающим,/ Ты нам помози, Богородице Дево.

Катавасия: Молите Бога о нас,/ все святые земли Русской,/ яко мы усердно/ к вам прибегаем,/ скорым помощникам и молитвенникам о душах наших.

Ектения сугубая:

Помилуй нас, Боже, по велицей милости Твоей, молимся Тебе, услыши и помилуй.

Лик: Господи, помилуй. (Трижды.)

Еще молимся о Великом Господине и отце нашем Святейшем Патриархе Алексии, и о господине нашем преосвященнейшем епископе нашем (имя рек), и о всей во Христе братии нашей.

Лик: Господи, помилуй. (Трижды.)

Еще молимся о стране нашей и о спасении ея, и о еже возглаголати в сердцах правителей наших благая и мирная о Церкви Святей и о всех нас, да тихое и безмолвное житие поживем во всяком благочестии и чистоте.

Лик: Господи, помилуй. (Трижды.)

Еще молимся о милости, жизни, мире, здравии, спасении, посещении, прощении и благопоспешении рабов Божиих, архипастырей и пастырей и всех православных людей земли Русской и о еже умножити им лета жития их, избавити их от всякия болезни душевныя и телесныя и простити им всякое прегрешение, вольное и невольное.

Лик: Господи, помилуй. (12 раз.)

Еще молимся за всю братию и за вся христианы.

Лик: Господи, помилуй. (Трижды.)

Возглас: Яко милостив:

По возгласе 1 лик поет:

Седален, глас 2:

Моление теплое/ принесите, прехвальнии,/ к милости источнику, Господу,/ о Святой Руси молящеся,/ Богородицу Владычицу вкупе с собою подвигните на молитву/ и от бед избавите нас,/ всем вскоре предстательствующии.

Слава, и ныне, Богородичен, глас тойже:

Моление теплое и стена необоримая,/ милости источниче, мирови прибежище,/ прилежно вопием Тебе:/ Богородице Владычице, предвари/ и от бед избави нас,/ едина вскоре предстательствующая.

Катавасия: Молите Бога о нас,/ все святые земли Русской, / яко мы усердно/ к вам прибегаем,/ скорым помощникам и молитвенникам о душах наших.

Песнь 4

Ирмос: Услышах, Господи:

2-й лик: Все святые земли Русской, молите Бога о нас.

Страстей наших смущение/ и многих бед бурю/ предстательством вашим ко Господу/ утолити потщитеся, святые.

1-й лик: Все святые земли Русской, молите Бога о нас.

Милосердия бездну прострите нам, блаженнии,/ призывающим вас на помощь,/ вы бо у Милосердаго Бога/ дерзновение велие стяжали есте.

2-й лик: Слава Отцу и Сыну и Святому Духу.

Надежду имуще вас, славнии,/ и яко стену недвижиму,/ к Богу ваши молитвы стяжавше,/ зол и всех бед избавляемся.

1-й лик: И ныне и присно и во веки веков. Аминь.

Исцели, Чистая, душевныя наши немощи/ и страсти телесныя,/ поспеши, Госпоже, здравие подати,/ Врача всем рождшая, Христа.

Катавасия: Молите Бога о нас,/ вcи святые земли Русской,/ яко мы усердно/ к вам прибегаем,/ скорым помощникам и молитвенникам о душах наших.

Песнь 5

Ирмос: Просвети нас повелении Твоими:

1-й лик: Все святые земли Русской, молите Бога о нас.

Исполните веселия жизнь нашу,/ избавляюще нас от варварскаго нахождения/ и междоусобной брани.

2-й лик: Все святые земли Русской, молите Бога о нас.

Избавите нас от бед,/ яко предстатели теплые/ и молитвенники о душах наших.

1-й лик: Слава Отцу и Сыну и Святому Духу.

Разрушите мглу прегрешений наших/ просвещением вашея светлости,/ светильницы Божественнии и пресветлии.

2-й лик: И ныне и присно и во веки веков. Аминь.

Избави нас от бед, Богородице Чистая,/ вечное рождши Избавление/ и мир, всяк ум превосходящий.

Катавасия: Молите Бога о нас,/ все святые земли Русской,/ яко мы усердно/ к вам прибегаем,/ скорым помощникам и молитвенникам о душах наших.

Песнь 6

Ирмос: Молитву пролию:

2-й лик: Все святые земли Русской, молите Бога о нас.

Молитвами вашими, блаженнии,/ утешение нам, в скорби сущим, испросите,/ и страну нашу падшую возставите/ и людей расточенных соберите,/ в скорби, яко Иона, вопиющих:/ от бед наших, Боже, избави нас.

1-й лик: Все святые земли Русской, молите Бога о нас.

Заступников вас вемы,/ отцы приснопамятные,/ и твердых хранителей земли нашей./ Темже к вам прибегающе,/ милость приемлем/ и бед различных избавление.

2-й лик: Слава Отцу и Сыну и Святому Духу.

Яко стену и пристанище/ стяжахом вас, святые,/ облегчение в скорбях,/ в бедах и напастях помощь,/ в болезнях исцеление/ и спасение душам нашим.

1-й лик: И ныне и присно и во веки веков. Аминь.

Заступницу Тя жизни вемы/ и твердую Хранительницу, Дево,/ и искушений тучи разсеявающую,/ и бесов нападения отгоняющую,/ и молимся всегда:/ от гибельных страстей наших избави нас.

Катавасия: Молите Бога о нас,/ все святые земли Русской,/яко мы усердно/ к вам прибегаем,/ скорым помощникам и молитвенникам о душах наших.

Ектения малая.

Кондак, глас 6:

Предстателие страны нашея неусыпные,/ ходатаи о нас ко Творцу непрестанные,/ не презрите молений наших,/ но, предваряюще на помощь, яко сродницы наши,/ ускорите на молитву/ и потщитеся на умоление,/ предстательствующе присно о чтущих вас.

Посем глаголет диакон:

Вонмем. Премудрость.

Канонарх же возглашает и сам поет прокимен на глас:

Прокимен, глас четвертый. Мне же зело честни быша/ друзи Твои, Боже.

1-й лик: Мне же зело честни быша/ друзи Твои, Боже.

Канонарх поет на глас стих:

Изочту их, и паче песка умножатся.

2-й лик: Мне же зело честни быша/ друзи Твои, Боже.

Канонарх поет:

Мне же зело честни быша…

1-й лик: Друзи Твои, Боже.

Диакон: Господу помолимся.

2-й лик: Господи, помилуй.

Предстоятель возглашает: Яко Свят еси, Боже наш…

2-й лик: Аминь.

Канонарх поет на глас 4: Всякое дыхание да хвалит Господа.

1-й лик: Всякое дыхание да хвалит Господа.

Канонарх поет стих:

Хвалите Господа с небес, хвалите Его в вышних.

2-й лик: Всякое дыхание да хвалит Господа.

Канонарх поет: Всякое дыхание.

1-й лик: Да хвалит Господа.

Диакон: И о сподобитися нам слышанию Святаго Евангелия Господа Бога молим.

2-й лик: Господи, помилуй. (Трижды.)

Диакон: Премудрость, прости, услышим Святаго Евангелия.

Предстоятель: Мир всем.

2-й лик: И духови твоему.

Предстоятель: От Иоанна Святаго Евангелия чтение.

1-й лик: Слава Тебе, Господи, слава Тебе.

Диакон: Вонмем.

И чтет предстоятель Святое Евангелие от Иоанна, зачало 51 (Ин. 15, 12–20):

Рече Господь Своим учеником: сия есть заповедь Моя, да любите друг друга, якоже возлюбих вы. Больши сея любве никтоже имать, да кто душу свою положит за други своя. Вы друзи Мои есте, аще творите, елика Аз заповедаю вам. Не ктому вас глаголю рабы, яко раб не весть, что творит господь его; вас же рекох други, яко вся, яже слышах от Отца Моего, сказах вам. Не вы Мене избрасте, но Аз избрах вас и положих вас, да вы идете и плод принесете, и плод ваш пребудет, да егоже аще просите от Отца во имя Мое, даст вам. Сия заповедаю вам, да любите друг друга. Аще мир вас ненавидит, ведите, яко Мене прежде вас возненавиде. Аще от мира бысте были, мир убо свое любил бы; якоже от мира несте, но Аз избрах вы от мира, сего ради ненавидит вас мир. Поминайте слово, еже Аз Рех вам: несть раб болий господа своего. Аще Мене изгнаша, и вас изженут; аще слово Мое соблюдоша, и ваше соблюдут.

2-й лик: Слава Тебе, Господи, слава Тебе.

1-й лик: Слава Отцу и Сыну и Святому Духу.

Молитвами всех святых Русских,/ Милостиве, очисти/ множество согрешений наших.

2-й лик: И ныне и присно и во веки веков. Аминь.

Молитвами Богородицы,/ Милостиве, очисти/ множество согрешений наших.

1-й лик: Помилуй мя, Боже,/ по велицей милости Твоей/ и по множеству щедрот Твоих/ очисти беззаконие мое.

2-й лик:

Стихира, глас 6:

Не вверите нас человеческому предстательству,/ святые сродницы,/ но приимите моления наша,/ скорбь бо обдержит нас,/ терпети не можем вражеских озлоблений/ и утешения на земле не имамы./ Моление наше не презрите,/ Небесные предстателие наши,/ утешение нам подайте/ и вся полезная от Бога испросите.

Посем глаголет диакон:

Спаси, Боже, люди Твоя и благослови достояние Твое, посети милостию и щедротами Твоими землю Русскую, утверди в ней веру истинную; разшири, умножи, умири и непоколебиму от адовых врат во веки сохрани Церковь Святую; умудри архипастырей и пастырей наших право правити слово Твоея истины, разори и вскоре испраздни всякое разделение и ересей востание; соблюди в мире паству православную, возвыси ревнителей веры отеческой и ниспосли на нас и на всех верных рабов Твоих милости Твоя богатыя, молитвами Всепречистыя Владычицы нашея Богородицы и Приснодевы Марии; силою Честнаго и Животворящаго Креста и покровом честныя и многоцелебныя ризы Твоея; предстательством честных Небесных Сил бесплотных; честнаго славнаго пророка, Предтечи и Крестителя Иоанна; святаго славнаго и всехвальнаго апостола Андрея Первозваннаго и всех святых славных и всехвальных апостолов; святаго славнаго пророка Илии; иже во святых отцев наших и вселенских великих учителей и святителей: Василия Великаго, Григория Богослова и Иоанна Златоустаго; иже во святых отца нашего Николая, архиепископа Мир Ликийских, чудотворца; святых равноапостольных Мефодия и Кирилла, учителей Словенских; святых равноапостолов Русских благовернаго великаго князя Владимира и благоверной великой княгини Ольги; иже во святых отцев наших и всея России чудотворцев: Михаила, митрополита Киевскаго; Петра, Алексия, Ионы, Филиппа, священномученика Ермогена, святителей Московских; Никиты и Иоанна Новгородских; Леонтия и Димитрия Ростовских; святых благоверных князей и страстотерпцев Бориса и Глеба; преподобнаго и благовернаго великаго князя Александра Невскаго; преподобных и богоносных отцев наших: Антония и Феодосия Киево-Печерских; Сергия и Никона Радонежских; Антония Римлянина и Варлаама Хутынскаго, Новгородских; Зосимы и Савватия Соловецких; Серафима Саровскаго и всех святых, в земле Русской просиявших, ихже память совершаем ныне, святых славных и добропобедных мучеников, преподобных и богоносных отцев наших; святых и праведных Богоотцев Иоакима и Анны и всех святых, молим Тя, Многомилостиве Господи, услыши нас, грешных, молящихся Тебе, и помилуй нас.

Лик: Господи, помилуй. (12 раз.)

Возглас: Милостию и щедротами…

Песнь 7

Ирмос: От Иудеи дошедше:

1-й лик: Все святые земли Русской, молите Бога о нас.

Наше спасение якоже восхотел еси, Спасе, устроити,/ прославлявши святых сродников наших чудесами, имиже ко благочестию наставляеми, поем:/ отцев наших Боже, благословен еси.

2-й лик: Все святые земли Русской, молите Бога о нас.

Милостиваго умолите, святые,/ избавитися от прегрешений и душевных скверн/ верою зовущим:/ отцев наших Боже, благословен еси.

1-й лик: Слава Отцу и Сыну и Святому Духу.

Сокровище спасения/ вы есте, Божии угодницы,/ и наставницы покаяния вопиющим:/ отцев наших Боже, благословен еси.

2-й лик: И ныне и присно и во веки веков. Аминь.

Телесныя слабости и дущевныя недуги, Богородительнице,/ любовию приступающих к Тебе, Дево,/ исцелити сподоби,/ Спаса Христа нам рождшая.

Катавасия: Молите Бога о нас,/ все святые земли Русской,/ яко мы усердно к вам прибегаем,/ скорым помощникам и молитвенникам о душах наших.

Песнь 8

Ирмос: Царя Небеснаго:

2-й лик: Все святые земли Русской, молите Бога о нас.

Помощи вашей требующих/ не презрите, блаженнии,/ поющих и превозносящих Христа во веки.

1-й лик: Все святые земли Русской, молите Бога о нас.

Неможение душ наших исцеляете/ и от телесных болезней воставляете,/ превозносящих Христа во веки.

2-й лик: Слава Отцу и Сыну и Святому Духу.

Исцеления источаете, Божии угодницы,/ всем к вам притекающим с любовию/ и Христа превозносящим во веки.

1-й лик: И ныне и присно и во веки веков. Аминь.

Напастей Ты прилоги отгоняеши/ и страстей нападения, Дево,/ темже Тя поем во вся веки.

2-й лик: Хвалим, благословим,/ поклоняемся Господеви,/ поюще и превозносяще Его во веки.

Ирмос: Царя Небеснаго,/ егоже поют вои ангельскии, / хвалите и превозносите во вся веки.

Песнь 9

Ирмос: Воистину Богородицу Тя исповедуем,/ спасенные Тобою, Дево Чистая,/ с бесплотными лики Тя величающе.

2-й лик: Все святые земли Русской, молите Бога о нас.

Моление наше услышавше, честнии,/ нечестие в земле Русской потребите,/ нас же всех во Православии укрепите.

1-й лик: Все святые земли Русской, молите Бога о нас.

Радости сердца наши исполните,/ радости неизреченныя наслаждающиеся,/ нашу греховную печаль потребляюще.

2-й лик: Слава Отцу и Сыну и Святому Духу.

Во дни скорбных обстояний не оставите нас,/ предстателие наши и хранителие,/ но помощь скорую нам явите.

1-й лик: И ныне и присно и во веки веков. Аминь.

Пристанище и предстательство к Тебе прибегающих буди, Дево,/ и стена нерушимая,/ прибежище же и покров и веселие.

Тоже 2-й лик за Достойно поет стих сей, глас 8:

Владычице, приими молитвы рабов Твоих/ и избави нас от всякия нужды и печали./ Ты еси, Богородице, оружие наше и стена;/ Ты еси Заступница, и к Тебе прибегаем;/ Тя и ныне на молитву призываем,/ да избавиши нас от врагов наших./ Возвеличим Тя вси,/ Всенепорочную Матерь Христа Бога,/ Юже осени Дух Пресвятый.

Посем Трисвятое. По Отче наш:

Тропарь, глас 8:

Якоже плод красный Твоего спасительнаго сеяния,/ земля Российская приносит Ти, Господи, вся святыя, в той просиявшия./ Тех молитвами в мире глубоце/ Церковь и страну нашу Богородицею соблюди, Многомилостиве.

Слава и ныне, глас тойже:

С Вышних призираяй,/ посети нас, грехов ради наших скорби терпящих, Владыко Всемилостиве,/ молитвами Богородицы и всех святых Русских/ даруй земле нашей велию милость.

Ектения сугубая, юже глаголет диакон с кадилом:

Помилуй нас, Боже, по велицей милости Твоей, молимся Тебе, услыши и помилуй.

1-й лик: Господи, помилуй. (Трижды.)

Еще молимся Господу Богу нашему, еже услышати Ему глас молитвы нашея и милостиву и долготерпеливу и умилену быти и тиху Человеколюбцу Богу о гресех наших и помиловати нас, и отвратити гнев Свой праведный от нас, и избавити нас от належащаго и праведнаго Его прещения, и сохранити великий царствующий град Москву, град сей (или весь сию) и вся грады и веси и всю землю Русскую от глада, губительства, земли трясения и потопа, огня и меча, мора, нашествия иноплеменных и междуусобныя брани, и избавити нас от належащих бед сих, и дати рабом Своим тихое и мирное время, и утешити скорбящих людий Своих, вопием все со умилением: Господи Святый, услыши и помилуй.

1-й лик: Господи, помилуй. (10 раз.)

2-й лик: Господи, помилуй. (10 раз.)

1-й лик: Господи, помилуй. (10 раз.)

2-й лик: Господи, помилуй. (10 раз.)

Еще молимся о еже услышати Господу Богу глас моления нас грешных и помиловати нас.

Лик: Господи, помилуй. (Трижды.)

Возглас: Услыши ны, Боже, Спасителю наш…

Посем возглашает диакон:

Ко всем святым земли Русской помолимся.

Лик: Все святые земли Русской, молите Бога о нас.

И чтет предстоятель молитву сию:

О всеблаженные и богомудрые угодницы Божии, подвигами своими землю Русскую освятившие и телеса свои, яко семя веры, в ней оставльшие, душами же своими Престолу Божию предстоящие и непрестанно о ней молящиеся! Се ныне, в день вашего общаго торжества, мы, грешнии, меньшии братия ваши, дерзаем приносити вам сие хвалебное пение. Величаем ваши великие подвиги, духовные воины Христовы, терпением и мужеством до конца врага низложившие и нас от прелести и козни его избавляющие. Ублажаем ваше святое житие, светильницы божественныя, светом веры и добродетелей светящиеся и наши умы и сердца богомудренно озаряющие. Прославляем ваши великие чудеса, цветы райские, в стране нашей северной прекрасне процветшие и ароматами дарований и чудес повсюду благоухающие. Восхваляем вашу богоподражательную любовь, предстатели наши и покровители, и, уповающе на помощь вашу, припадаем к вам и вопием: равноапостольные просветителие наши! Споспешествуйте людям Русской земли преданную вам веру православную твердо содержати, да спасительное семя, вами всеянное, не изсушено будет зноем неверия, но, дождем Божия поспешения напоенное, плод изобильный да принесет. Святителие Христовы! Молитвами вашими утвердите веру русскую, ереси, расколы и нестроения в ней потребите, расточенныя овцы во едино соберите и от всяких волков, во одежде овчей в стадо Христово входящих, оградите. Преподобные отцы! Сохраните нас от прелестей мира сего лукаваго, да, отвергшеся себе и вземше крест свой, последуем Христу, распинающе плоть свою со страстьми и похотьми, носяще тяготы друг друга. Благоверные князие! Воззрите милостивно на земное Отечество ваше и вся нечестия и соблазны, в нем ныне сущия, оружием молитв ваших потребите, да, якоже древле, тако и ныне и в грядущее время, прославляется на Святой Руси имя Господне. Страстотерпцы российские преславные! Укрепите нас в мужественном стоянии даже до крови за веру православную и обычаи отеческие, да ни скорбь, ни теснота, ни гонения, ни глад, ни нагота, ни меч не возмогут нас разлучити от любви Божией, яже о Христе Иисусе. Блаженные, Христа ради юродивые и праведные! Посрамите мудрость века сего, возносящуюся на разум Божий, нам же помозите, спасительным буйством Креста Христова утвердившеся, соблазнами мудрости мирской непозыблемым быти, горнее присно, а не земное помышляти. Богомудрыя жены, в немощнем естестве подвиги велии явившие! Молитеся, да дух вашей любве ко Господу и ревность о угождении Ему и о своем и ближняго спасении не оскудевает в нас. Все святые сродники наши, от лет древних просиявшие и в последние дни подвизавшиеся, явленные и неявленные, ведомые и неведомые! Помяните нашу немощь и уничижение и молитвами вашими испросите у Христа Бога нашего, да и мы, безбедно преплывше житейскую пучину и невредимо соблюдше сокровище веры, в пристанище вечнаго спасения достигнем и в блаженных обителях Горняго Отечества вкупе с вами и со всеми угодившими от века святыми водворимся благодатию и человеколюбием Спасителя нашего Господа Иисуса Христа, Емуже со Превечным Отцем и Пресвятым Духом подобает непрестанное славословие и поклонение от всех тварей во веки веков.

Лик: Аминь.

И прочая по обычаю и отпуст:

Христос, Истинный Бог наш, молитвами Пречистыя Своея Матере, святаго равноапостольнаго благовернаго великаго князя Владимира и всех святых, в земле Русской просиявших, помилует и спасет нас, яко Благ и Человеколюбец.

По отпусте поет диакон:

Спаси, Христе Боже, Великаго Господина и отца нашего Святейшаго Алексия Московскаго и всея России Патриарха с богохранимою его паствою, землю Русскую в мире сохрани и веру православную в ней утверди во веки веков. Аминь.

1-й лик: Спаси, Христе Боже. Спаси, Христе Боже. Спаси, Христе Боже.

2-й лик: Спаси, Христе Боже. Спаси, Христе Боже. Спаси, Христе Боже.

1-й лик: Спаси, Христе Боже. Спаси, Христе Боже. Спаси, Христе Боже.

Посем сошедшеся на исходе поем:

Утверждение на Тя надеющихся, утверди, Господи, Церковь, юже стяжал еси Честною Твоею Кровию.

Под Твою милость прибегаем, Богородице Дево! Молений наших не презри в скорбех, но от бед избави нас, Едина Чистая и Благословенная.

Пресвятая Богородице, спаси нас.

Все святые земли Русской, молите Бога о нас.

Последование общего молебна

Благословен Бог наш всегда, ныне и присно и во веки веков.

Лик: Аминь.

Царю Небесный: поется. Трисвятое. Отче наш: Псалом 142: Господи, услыши молитву мою: Слава, и ныне. Аллилуиа (трижды).

Ектения великая:

Миром Господу помолимся.

О свышнем мире:

Возглас: Яко подобает Тебе всякая слава:

Бог Господь и явися нам:

Стих: Исповедайтеся Господеви яко Благ, яко в век милость Его.

Стих:Обышедше обыдоша мя, и именем Господним противляхся им.

Стих:Не умру, но жив буду, и повем дела Господня.

Стиx: Камень, егожа небрегоша зиждущии, сей бысть во главу угла, от Господа бысть и есть дивен во очесех наших.

Тропарь, за ними псалом 50.

Канон.

По 3-й и 6-й песни катавасия:

Спаси от бед рабы Твоя, Богородице, яко вси по Бозе к Тебе прибегаем, яко нерушимей стене и предстательству.

Призри благосердием, Всепетая Богородице, на мое лютое телесе озлобление, и исцели души моея болезнь.

Ектения:

Помилуй нас, Боже, по велицей милости Твоей, молим Ти ся, услыши и помилуй.

Лик: Господи, помилуй (трижды).

Еще молимся о Великом Господине и отце нашем Святейшем Патриархе Алексии и о господине нашем высокопреосвященейшем архиепископе Онисиме и о всей во Христе братии нашей.

Еще молимся о богохранимей стране нашей, властех, и воинстве ея, да тихое и безмолвное житие поживем во всяком благочестии и чистоте.

Еще молимся о милости, жизни, мире, здравии, спасении, посещении и прощении и благопоспешении рабов Божиих (имя рек).

Еще молимся за всю братию, и за вся христианы.

Возглас: Яко милостив и Человеколюбец Бог еси, и Тебе славу возсылаем, Отцу и Сыну и Святому Духу, ныне и присно и во веки веков.

Лик: Аминь.

Тропарь, глас 2:

Моление теплое и стена необоримая, милости источнике, мирови прибежище, прилежно вопием Ти: Богородице Владычице, предвари и от бед избави нас, едина вскоре предстательствующая.

Канон, песни 4–6.

По 6-й песни: Спаси от бед:

Призри благосердием:

Ектения малая. Возглас.

По возгласе, кондак, глас 6:

Предстательство христиан непостыднoе, ходатайство ко Творцу непреложное, не презри грешных молений гласы, но предвари яко Благая на помощь нас, верно зовущих Ти: ускори на молитву, и потщися на умоление, предстательствующи присно Богородице, чтущих Тя.

Прокимен: Помяну имя Твое во всяком роде и роде.

Стих: Слыши Дщи и виждь, и приклони ухо Твое.

И о сподобитися нам слышанию Святаго Евангелия, Господа Бога молим.

Премудрость, прости, услышим Святаго Евангелия, мир всем.

От Луки Святаго Евангелия чтение:

По прочтении Евангелия, тропари водоосвящения: Еже радуйся: и т. д.

По водоосвящении 7, 8 и 9 песни канона.

Достойно есть, яко воистину:

Трисвятое. Отче наш: Тропарь.

Ектения:

Помилуй нас, Боже:

Еще молимся о Великом Господине и отце нашем Святейшем Патриархе Алексии и о господине нашем высокопреосвященнейшем архиепископе Онисиме и о всей во Христе братии нашей.

Еще молимся о богохранимей стране нашей, властех и воинстве ея, да тихое и безмолвное житие поживем во всяком благочестии и чистоте.

Еще молимся о милости жизни, мире, здравии, спасении, посещении, прощении, благопоспешении рабов Божии (имя рек) и о еже умножити им лета живота.

Возглас: Услыши ны, Боже, Спасителю наш:

Молитва.

Отпуст.

Последование молебного пения в праздник св. равноап. кн. Владимира. Воспоминания крещения Руси

Протодиакон: Благослови́ Влады́ко.

Предстоятель: Благослове́н Бог наш, всегда́, ны́не и при́сно и во ве́ки веко́в.

Хор: Ами́нь.

Протодиакон: Сла́ва Тебе́, Бо́же наш, сла́ва Тебе́.

ХорЦарю́ Небе́сный, Уте́шителю, Ду́ше и́стины, Иже́ везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Протодиакон: Бог Госпо́дь и яви́ся нам, благослове́н Гряды́й во и́мя Госпо́дне.

Стих: Испове́дайтеся Го́сподеви, я́ко Благ, я́ко в век ми́лость Его́.

Стих: Обыше́дше, обыдо́ша мя, и и́менем Госпо́дним противля́хся им.

Стих: Не умру́, но жив бу́ду и пове́м дела́ Госпо́дня.

Стих: Ка́мень, его́же небрего́ша зи́ждущии, сей бысть во главу́ у́гла: от Го́спода бысть сей и есть ди́вен во очеса́х на́ших.

ХорБог Господь: во глас 4‑й

Таже тропари: Живоначальной Троице, глас 8:

Благослове́н еси́, Христе́ Бо́же наш, / И́же прему́дры ловцы́ явле́й, / ниспосла́в им Ду́ха Свята́го, / и те́ми уловле́й вселе́нную, / Человеколю́бче сла́ва Тебе́.

Всем святым в земле Русской просиявшим, глас 8:

Я́коже пло́д кра́сный Твоего́ спаси́тельного се́яния, / земля́ Ру́сская прино́сит Ти, Го́споди, вся святы́я, в той просия́вшия. / Тех моли́твами в ми́ре глубо́це // Це́рковь и страну́ на́шу Богоро́дицею соблюди́, Многоми́лостиве.

Крещения Руси, глас 8:

Благослове́н еси́, Христе́ Бо́же наш, / зе́млю Ру́сскую Креще́нием просвети́вый, / лю́дем ея́ низпосла́в Ду́ха Свята́го, / и́хже и ко спасе́нию приведы́й, // Человеколю́бче, сла́ва Тебе́.

Равноап. кн. Владимиру, глас 4:

Уподо́бился еси́ купцу́ и́щущему до́браго би́сера, / славнодержа́вный Влади́мире, / на высоте́ стола́ седя́ ма́тере градо́в, / Богоспаса́емаго Ки́ева, / испыту́я же и посыла́я к Ца́рскому гра́ду / уве́дети правосла́вную ве́ру, / обре́л еси́ безце́нный би́сер, Христа́, / избра́вшаго тя, я́ко втора́го Па́вла, / и оттря́сшаго слепоту́ во святе́й купе́ли, душе́вную вку́пе и теле́сную. / Те́мже пра́зднуем твое́ успе́ние, лю́дие твои́ су́ще: // моли́ спасти́ся душа́м на́шим.

Запевы: Пресвята́я Тро́ице, Бо́же наш, сла́ва Тебе́.

Вси святи́и земли́ на́шея, моли́те Бо́га о нас.

Святы́й равноапо́стольный вели́кий кня́же Влади́мире, моли́ Бо́га о нас.

Прокимен гл 4: Вознесо́х избра́ннаго / от люде́й Мои́х.

Стих: И́бо десни́ца Моя́ засту́пит его́.

Протодиакон: И о сподо́битися нам слы́шанию свята́го Ева́нгелия, Го́спода Бо́га мо́лим.

Хор: Го́споди поми́луй (трижды)

Предстоятель: От Матфе́я свята́го Ева́нгелия чте́ние.

Евангелие от Матфея, 55 зачало.

Хор: Сла́ва Тебе́ Го́споди, сла́ва Тебе́.

По Евангелии запевы, затем:

Досто́йно есть, я́ко вои́стину, блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего, Честне́йшую херуви́м и Славне́йшую без сравне́ния серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Протодиакон: Поми́луй нас, Бо́же, по вели́цей ми́лости Твое́й, мо́лим Ти ся, услы́ши и поми́луй.

Хор (зде и далее): Го́споди поми́луй (трижды).

Еще́ мо́лимся о вели́ком Господи́не и Отце́ на́шем Святе́йшем Патриа́рхе (имярек) и о всей во Христе́ бра́тии на́шей.

Благодаря́ще со стра́хом и тре́петом, я́ко раби́ непотре́бнии, Твоему́ благоутро́бию, Спа́се и Влады́ко наш, Го́споди, о Твои́х благодая́ниих, я́же излия́л еси́ на Зе́млю на́шу от Креще́ния ея́ и до ны́не, и припа́даем, и славосло́вие Тебе́, я́ко Бо́гу, прино́сим, и умиле́нно вопие́м: изба́ви от всех бед лю́ди Твоя́ и всегда́, я́ко Ми́лостив, испо́лни во благи́х проше́ния на́ша, приле́жно мо́лимся Тебе́, услы́ши и поми́луй.

Еще́ мо́лимся Тебе́, Спаси́телю на́шему, чрез благове́рнаго кня́зя Влади́мира благоволи́вшему избра́ти род наш в насле́дие Свое́ и в купе́ли Креще́ния дарова́ти Ду́ха Свята́го, о е́же Це́рковь на́шу Святу́ю от раско́лов и нестрое́ний соблюсти́, и в единомы́слии ве́ры ея́ утверди́ти, и ми́ром огради́ти, услы́ши и поми́луй.

Еще́ мо́лимся Тебе́, Го́споди Вседержи́телю, о е́же призре́ти и утверди́ти виногра́д сей, его́же насади́ и сохрани́ от всех наве́тов вра́жиих десни́ца Твоя́; и в пре́дняя ле́та да́руй насле́дию Твоему́ мир и безмяте́жие, да не ума́лится и не поколе́блется Русь Свята́я, ю́же избра́л еси́ в жили́ще Себе́, да сла́вится Трисвято́е и́мя Твое́, услы́ши и поми́луй.

Да́вый за́поведь Твою́ нам, е́же люби́ти Тебе́, Бо́га на́шего, и бли́жняго своего́, сотвори́, да не́нависти, вражды́, оби́ды и про́чая беззако́ния прекратя́тся, и́стинная же любо́вь да ца́рствует в сердца́х на́ших, мо́лим Ти ся, Спаси́телю наш, услы́ши и ми́лостивно поми́луй.

Предстоятель: Услы́ши ны, Бо́же, Спаси́телю наш, упова́ние всех конце́в земли́ и су́щих в мо́ри дале́че, и ми́лостив, ми́лостив бу́ди, Влады́ко, о гресе́х на́ших, и поми́луй ны. Ми́лостив бо и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

ХорАминь.

Протодиакон: Го́споду помо́лимся.

Хор: Го́споди, поми́луй.

Предстоятель чтет молитву:

Триипоста́сный Бо́же, Отче́ Вседержи́телю, Сы́не Единоро́дный, Спаси́телю ми́ра, и Ду́ше Святы́й, просвеща́яй и освяща́яй племена́ и наро́ды! И́же и влады́ку Земли́ Ру́сския, кня́зя Влади́мира, к све́ту и́стинныя ве́ры наста́вивый, и тем всю страну́ на́шу Креще́нием просвети́вый, и со́нмом святы́х, я́ко пресве́тлым звездам, не́бо Це́ркве на́шея украси́вшим, возсия́ти дарова́вый! И нам, смире́нным и недосто́йным ча́дом их, ны́не предстоя́щим сла́ве Твое́й и благода́рственное моле́бное пе́ние принося́щим за вся благодея́ния, бы́вшая на Руси́ от лет дре́вних и до ны́не. При́зри на ни́ву Твою́, Це́рковь Святу́ю, на стра́ны и наро́ды, прее́мственно восприня́вшие ве́ру правосла́вную из еди́ной купе́ли Креще́ния в вода́х днепро́вских и ны́не принося́щих Тебе́, я́коже прекра́сный плод спаси́тельнаго се́яния Сло́ва Твоего́, ли́ки святы́х. Ти́и бо послужи́ша лю́дем свои́м ве́рою, наде́ждою и любо́вию, о́бразом сло́ва и жития́ указу́юще нам путь к соверше́нству по за́поведи Христо́вой: бу́дите у́бо соверше́ни, я́ко же и Оте́ц ваш Небе́сный соверше́н е́сть. Сохраня́юще сие́ свято́е насле́дие их, мо́лим Тя, Жизнода́вче: спаси́ и поми́луй нас, мир ми́ру Твоему́ да́руй и всему́ созда́нию Твоему́, его́же по грехо́м на́шим сы́ны ве́ка сего́ погуби́ти тща́тся. Ве́мы бо, я́ко не хо́щеши сме́рти гре́шников, но е́же обрати́тися и живы́м им бы́ти; при́зри на нас, во гресе́х пребыва́ющих, отврати́ гнев Твой, пра́ведно дви́жимый на ны, да́руй нам покая́ние и Твои́м неизрече́нным милосе́рдием поми́луй нас. Приими́ моли́твы и труды́ на́ша о умноже́нии любве́ среди́ всех люде́й ми́ра сего́. Зе́млю на́шу огради́, вла́сти умудри́, вся уте́ши и умири́, Це́рковь Твою́ возрасти́, достоя́ние Твое́ соблюди́, му́жи и же́ны, и младе́нцы благода́тию просвети́, и вся лю́ди Твоя́ в Правосла́вии и благоче́стии утверди́ моли́твами Пречи́стыя Твоея́ Ма́тере, си́лою Честна́го и Животворя́щаго Креста́ и Всех святы́х, в Земли́ на́шей просия́вших, да в едине́нии ве́ры и любве́ сла́вим Тя, Отца́ и Сы́на и Свята́го Ду́ха, во ве́ки веко́в.

ХорАминь.

Велича́ем тя, святы́й равноапо́стольный вели́кий кня́же Влади́мире, и чтим святу́ю па́мять твою́, и́долы попра́вшаго и всю зе́млю Ру́сскую Святы́м Креще́нием просвети́вшаго.

Протодиакон: Прему́дрость.

Священник: Пресвята́я Богоро́дице, спаси́ нас.

ХорЧестне́йшую херуви́м и сла́внейшую без сравне́ния серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Священник: Сла́ва Тебе́, Христе́ Бо́же, упова́ние на́ше, сла́ва Тебе́.

Предстоятель: Отпу́ст

Протодиакон: Вели́кому Господи́ну и Отцу́ на́шему Кири́ллу, Святе́йшему Патриа́рху Моско́вскому и всея́ Руси́ и Свя́то-Тро́ицкия Се́ргиевой Ла́вры свяще́нно-архимандри́ту, Богохрани́мей стране́ на́шей, власте́м, во́инству и наро́дам ея́, всему́ освяще́нному собо́ру, благоче́стия ревни́телем и учи́телем, и всем во Правосла́вии Земли́ на́шей подвиза́ющимся сло́вом, писа́нием, уче́нием и богоуго́дным житие́м, и всем правосла́вным христиа́ном – мно́гая ле́та.

Хор: Многая лета…

* * *

3

16 января, 29 июня.

4

29 июня.

5

Понедельник Страстной седмицы.

6

22 декабря.

7

17 февраля, 12 мая.

8

19 мая. В раннем детстве был заключен в темницу, в которой и скончался в глубокой старости.

Комментарии для сайта Cackle