Вторник

На Го́споди воззва́х, стихи́ры подо́бны, гла́с 8:

Подо́бен: Что́ ва́с нарече́м:

В сре́дних дне́х воздержа́ния, преходя́ще дне́сь си́лою Кре́стною, на се́м возне́сшагося посреде́ земли́, Спа́са и Бо́га славосло́вим, вопию́ще: зри́тели на́с покажи́ страсте́м Твои́м Влады́ко, и честна́го Воскресе́ния, да́руя на́м очище́ние, и ве́лию ми́лость.

Подо́бен:

Стра́сти смири́м теле́сныя, бра́шен отложе́нием, и сласте́й отвраще́нием, и дре́во Креста́ облобыза́им ве́рно: зри́тся бо я́ве покланя́емое, и вся́ освяща́ет Боже́ственною благода́тию, и Го́сподеви возопии́м: благодари́м Тя́ Благоутро́бне, спаса́ющаго си́м ду́ши на́ша.

И́на, гла́с то́йже.

Подо́бен: Богоро́дицу:

Ны́не Кресту́ покланя́ющеся, вси́ воззове́м: ра́дуйся, Дре́во жи́зни. Ра́дуйся, ски́птре святы́й Христо́в. Ра́дуйся, челове́ков сла́ва небе́сная. Ра́дуйся, ве́рных похвало́. Ра́дуйся, держа́во ве́ры. Ра́дуйся, ору́жие непобеди́мое. Ра́дуйся, враго́в отгна́ние. Ра́дуйся, сия́ние све́тлое, спаси́тельное ми́ру. Ра́дуйся, му́чеников ве́лия сла́во. Ра́дуйся, си́ло пра́ведных. Ра́дуйся, а́нгелов све́тлосте. Ра́дуйся, всече́стне.

И в Мине́и 3. Сла́ва, и ны́не, Богоро́дичен.

Проки́мен, псало́м 63, гла́с 6: Услы́ши, Бо́же гла́с мо́й, внегда́ моли́ти ми ся к Тебе́. Сти́х: От стра́ха вра́жия изми́ ду́шу мою́.

Бытия́ чте́ние. [Быт. 8:21–22, 9:1–7.]

Рече́ Госпо́дь Бо́г: размы́слив, не приложу́ ктому́ прокля́ти зе́млю за дела́ челове́ческая: зане́ прилежи́т помышле́ние челове́ку приле́жно на зла́я от ю́ности его́. Не приложу́ у́бо ктому́ порази́ти вся́кую пло́ть живу́щую, я́коже сотвори́х. Во вся́ дни́ земли́ се́ятва и жа́тва, зима́ и зно́й, ле́то и весна́, де́нь и но́щь не преста́нут. И благослови́ Бо́г Но́а, и сы́ны его́, и рече́ и́м: расти́теся, и мно́житеся, и напо́лните зе́млю, и облада́йте е́ю. И стра́х и тре́пет ва́ш бу́дет на все́х звере́х земны́х [и на все́х скоте́х земны́х,] на все́х пти́цах небе́сных, и на все́х дви́жущихся по земли́, и на все́х ры́бах морски́х: в ру́це ва́ши вда́х [я́]. И вся́кое дви́жущееся, е́же е́сть жи́во, ва́м бу́дет в сне́дь: я́ко зе́лие травно́е да́х ва́м все́. То́чию мя́са в кро́ви души́ да не сне́сте. Кро́ви бо ва́шей, ду́ш ва́ших, от руки́ вся́каго зве́ря изыщу́ [ея́] и от руки́ челове́ка бра́та изыщу́ ея́. Пролива́яй кро́вь челове́чу в ея́ ме́сто его́ пролие́тся: я́ко во о́браз Бо́жий сотвори́х челове́ка. Вы́ же расти́теся и мно́житеся, и напо́лните зе́млю, и умно́житеся на не́й.

Проки́мен, псало́м 64, гла́с 6: Услы́ши ны́ Бо́же Спаси́телю на́ш. Сти́х: Тебе́ подоба́ет пе́снь Бо́же в Сио́не.

При́тчей чте́ние. [Притч. 11:19–31, 12:1–6.]

Сы́н пра́ведный ражда́ется в живо́т: гоне́ние же нечести́ваго в сме́рть. Ме́рзость Го́сподеви путие́ развраще́нни: прия́тни же ему́ вси́ непоро́чнии в путе́х свои́х. В ру́ку ру́це вложи́в непра́ведно, не без му́ки бу́дет злы́х: се́яй же пра́вду, прии́мет мзду́ ве́рну: Я́коже усеря́зь златы́й в но́здрех свинии́, та́ко жене́ злоу́мней ле́пота. Жела́ние пра́ведных все́ благо́е: наде́жда же нечести́вых поги́бнет. Су́ть и́же своя́ се́юще, мно́жайшая творя́т: су́ть же и собира́юще чужда́я, умаля́ются. Душа́ благослове́нна вся́кая проста́я: му́ж я́рый неблагообра́зен. удержава́яй пшени́цу оста́вит ю́ язы́ком: продая́й пшени́цу ску́по от наро́да про́клят, благослове́ние же Госпо́дне на главе́ подава́ющаго. Творя́й блага́я, и́щет благода́ти добры́: и́щущаго же зла́я пости́гнут его́. Наде́яйся на бога́тство свое́, се́й паде́т: заступа́яй же пра́ведных, то́й возсия́ет. Не сматря́яй своего́ до́му, насле́дит ве́тры: порабо́тает же безу́мный разу́мному. От плода́ пра́вды дре́во жи́зни прозяба́ет: оте́млются же безвре́менно ду́ши беззако́нных. А́ще пра́ведный едва́ спаса́ется: нечести́вый же и гре́шный где́ яви́тся? любя́й наказа́ние, лю́бит чу́вство: ненави́дяй же обличе́ния, безу́мен. Лу́чше обреты́й благода́ть от Го́спода Бо́га: му́ж же законопресту́пник премолча́н бу́дет. Не испра́вится челове́к от беззако́ннаго: коре́ния же пра́ведных не оти́мутся. Жена́ му́жественная вене́ц му́жу своему́: я́коже в дре́ве че́рвь, та́ко му́жа погубля́ет жена́ злотво́рная. Мы́сли пра́ведных судьбы́: управля́ют же нечести́вии ле́сти. Словеса́ нечести́вых льсти́ва в кро́вь: уста́ же пра́вых изба́вят и́х.

На стихо́вне стихи́ра самогла́сна, гла́с 8. Два́жды.

Велере́чивый фарисе́й омерзи́ся похвали́вся, и мыта́рь смиренному́дрый молча́нием помоли́вся, оправда́ся: те́мже обою́ уве́девши разли́чие, душе́ моя́, смиренному́дрие приими́ и облобыза́й: Христо́с бо смире́нным обеща́ дая́ти благода́ть, я́ко Человеколю́бец.

Му́ченичен: Му́ченицы Госпо́дни, моли́те Бо́га на́шего, и испроси́те душа́м на́шим мно́жество щедро́т, и очище́ние мно́гих прегреше́ний, мо́лимся.

Сла́ва, и ны́не, Богоро́дичен. Гла́с то́йже: А́з, Де́во Свята́я Богоро́дице, к покро́ву Твоему́ прибега́ю, ве́м я́ко обря́щу Тобо́ю спасе́ние: мо́жеши бо Чи́стая, помощи́ мне́.

Тро́ичны. По 1-м стихосло́вии седа́льны умили́тельныя осмогла́сника.

По 2-м же стихосло́вии глаго́лем настоя́щий седа́лен, гла́с 8.

Подо́бен: Непоколеби́мое утвержде́ние:

Воздержа́нием просвети́вше ду́ши на́шя, Кресту́ поклони́мся спаси́тельному, на не́мже Христо́с пригвозди́ся, и возопии́м ему́: ра́дуйся, постя́щихся сла́досте, и изве́стная по́моще. Ра́дуйся губи́телю страсте́й, бесо́м сопротивобо́рче. Ра́дуйся Дре́во блаже́нное.

Богоро́дичен. Подо́бен:

Непоколеби́мое утвержде́ние ве́ры, и честно́е дарова́ние ду́ш на́ших, Богоро́дицу в пе́снех велича́ем ве́рнии: ра́дуйся, ка́мень жи́зни во чре́ве Твое́м вмести́вшая. Ра́дуйся конце́в упова́ние, оскорбля́емых засту́пница. Ра́дуйся, Неве́сто Неневе́стная.

По 3-м же стихосло́вии седа́лен, гла́с то́йже:

Подо́бен: Я́ко нача́тки:

Я́коже жи́знь тва́ри, Тво́й Кре́ст предлежа́щий вселе́нная целу́ет, Го́споди, и покланя́ющися зове́т Ти́: того́ де́йством в ми́ре глубо́це пою́щия, и воспева́ющия Тя́ воздержа́нием соблюди́, Многоми́лостиве.

Богоро́дичен, гла́с то́йже: Ра́дуйся, а́нгелом ра́дость ми́ра прии́мшая. Ра́дуйся, ро́ждшая Творца́ Твоего́ и Го́спода. Ра́дуйся, сподо́бльшая бы́ти Ма́ти Бо́жия.

Кано́н Мине́и и настоя́щий трипе́снец, господи́на Ио́сифа.

И стихосло́вится пе́снь. Гла́с 8.

Пе́снь 2.

Ирмо́с: Ви́дите ви́дите, я́ко А́з е́смь Бо́г, дре́вле Изра́иля сквозе́ Чермно́е мо́ре проведы́й, и пита́вый, и спасы́й, и от го́рькия рабо́ты свободи́вый фарао́новы.

Среде́ тва́ри претерпе́л еси́ Кре́ст, Месси́а Сло́ве Бо́жий: ему́же поста́ дне́сь преполове́нием ве́рно покланя́емся, прося́ще ви́дети и Воскресе́ние Твое́.

Жезло́м си́лы, проображе́нным Моисе́ю, мо́ре страсте́й пресека́юще, дости́гнем к земли́ обетова́ния, и ма́нны мы́сленныя насы́тимся бога́тно.

Кто́ не возрыда́ет тя́? кто́ не воспла́чет тя́ душе́, жела́ющую лука́вая, и не взыска́ющую любо́вию благи́х, пра́веднаго Судию́ презира́ющую при́сно, долготерпя́щаго на тебе́?

Богоро́дичен: Пло́ть бы́вша непреме́нно, Христа́ Де́во ражда́еши: Его́же приле́жно моли́, плотски́х страсте́й измени́ти покланя́ющияся Кресту́, его́же пло́тию претерпе́.

И́ный, гла́с то́йже.

Ирмо́с: Ви́дите:

Ви́дите ви́дите, я́ко А́з е́смь Бо́г, вселе́нней Кре́ст Мо́й подая́й ору́жие спасе́ния, во е́же ны́не поклони́тися ему́: я́ко да целу́ющии его́ упражня́ют вра́жия кова́рства.

Ве́лий еси́ Го́споди, многоми́лостивый, я́ко да́л еси́ животворя́щему Твоему́ поклони́тися ны́не Кресту́, иде́же ру́це Твои́ и но́зе пригвозди́шася, на не́мже кро́вь излия́ся пречи́стаго Твоего́ ребра́, жи́знь источи́ на́м.

Тро́ичен: Пресоверше́нная Еди́нице, Пребоже́ственная, триипоста́сная, нерожде́нне О́тче, и Сы́не единоро́дне, Ду́ше от Отца́ исходя́й, Сы́ном же явля́яйся, Существо́ еди́но и Естество́, Госпо́дство, Ца́рство, спаси́ все́х на́с.

Богоро́дичен: Неизглаго́ланное чу́до Твоего́ Рождества́ Ма́ти Де́во: ка́ко бо и ражда́еши, и чиста́ еси́ в то́мже? ка́ко Отроча́ ражда́еши, и не ве́си иску́са му́жеска отню́д? Я́коже ве́сть па́че естества́, от Мене́ новоле́пно Сло́во Бо́жие ро́ждшееся.

Сла́ва Тебе́ Бо́же на́ш, сла́ва Тебе́.

Тя́ Моисе́й вели́кий прообразова́ Кре́сте на́м, ру́це распросте́р, и победи́в Амали́ка. Тя́ изобража́юще в се́нех и возду́се, отвраща́ем и побежда́ем началозло́бнаго врага́, песносло́вяще Христа́.

Ирмо́с: Ви́дите ви́дите, я́ко А́з е́смь Бо́г ва́ш, пре́жде ве́к рожде́нный от Отца́, и от Де́вы в после́дняя без му́жа заче́ншийся, и разруши́вый гре́х пра́отца Ада́ма, я́ко Человеколю́бец.

Пе́снь 8.

Ирмо́с: Покрыва́яй вода́ми:

Соста́вивый основа́ния всея́ земли́, я́ко Бо́г возне́сся на Дре́во, недви́жимое все́м дарова́л еси́ ве́рным утвержде́ние Го́споди, спаси́тельное ору́жие Креста́ Твоего́: ему́же покланя́ющеся, Тя́ превозно́сим во вся́ ве́ки.

Облиста́емо зря́ще, па́че со́лнечныя зари́, Кре́стное дре́во, прииди́те посто́м облиста́еми, ны́не облобыза́им, почерпа́юще благода́ть светоно́сную, и тьму́ отгоня́ющую от превознося́щих Христа́ во ве́ки.

Вода́ жива́я неизме́нная, в ве́чную жи́знь, Ты́ су́щи Сло́ве, кро́вь и во́ду от ре́бр на Кресте́ источи́л еси́ Влады́ко, грехо́вныя пото́ки изсуша́я. Те́мже молю́ Тя: изсуши́ страсте́й мои́х лука́вная истица́ния.

Богоро́дичен: Я́ко освяще́ние у́мное, во святы́х Бо́га почива́ющаго ражда́еши, свята́я Богома́ти Чи́стая, вся́ концы́ освяща́ющаго, боже́ственным поклоне́нием дне́сь Де́во Дре́ва пресвята́го, на не́мже пло́тию пригвозди́ся.

И́ный. Ирмо́с: А́нгели и небеса́:

Прииди́те ви́дим лю́дие, живоно́сное Дре́во ны́не предлежа́щее, на не́мже пло́тию Христо́с водрузи́ся Бо́г на́ш, и со стра́хом пою́ще, сему́ покланя́емся во вся́ ве́ки.

Трисло́жный Кре́ст, я́ко Тро́ичный о́браз воспева́ем, и покланя́ющеся со стра́хом возопии́м, благословя́ще, пою́ще и превознося́ще Христа́ во ве́ки.

Благослови́м Отца́, и Сы́на, и Свята́го Ду́ха, Го́спода.

Еди́н Бо́г у́бо Тро́ица, ни Отцу́ изступи́вшу в сыновство́, ниже́ Сы́ну премени́вшуся во исхожде́ние: но сво́йственная, и обое́ Све́т, Бо́га, три́ сла́влю во ве́ки.

Богоро́дичен: Еди́на нетле́нно ражда́еши, еди́на дои́ши Младе́нца без бра́ка, еди́на Созда́теля Твоего́ ражда́еши и Влады́ку, а́ще и Ма́ти и Раба́: Тя́ Ма́ти Де́во, пое́м во ве́ки.

Сла́ва Тебе́ Бо́же на́ш, сла́ва Тебе́.

Слепа́го от рождества́ воочи́л еси́ сло́вом, ослепле́нныя мои́ серде́чныя о́чи па́ки отве́рзи, да узрю́ све́т повеле́ний Твои́х Христе́ во ве́ки.

Хва́лим, благослови́м, покланя́емся Го́сподеви:

Ирмо́с: А́нгели и небеса́ на престо́ле сла́вы седя́щаго, и я́ко Бо́га непреста́нно сла́вимаго, благослови́те, по́йте и превозноси́те Его́ во ве́ки.

Пе́снь 9.

Ирмо́с: Благослове́н Госпо́дь Бо́г:

Благослове́н Госпо́дь Бо́г Изра́илев, Кресто́м Свои́м разруши́вый дре́внюю кля́тву, и сего́ на́м дарова́вый держа́ву, и прибе́жище и тве́рдое основа́ние, и́мже враги́ на́шя ны́не рога́ми избоде́м.

Я́ко плени́цами стя́гнут е́смь, безме́рными зло́бами, и стези́ Твоя́ спаси́тельныя Христе́, во́лею разуме́ти не хощу́: Твои́м мя́ обрати́ Кресто́м, омраче́ние мое́ разреша́я, за неизрече́нную ми́лость благоутро́бия Твоего́.

Фарисе́ево возноше́ние подража́в зле́, низведо́хся паде́нием лю́тым и боле́зненным, и лежу́ враго́м в попра́ние: но уще́дри и спаси́ мя Христе́, щедро́т ра́ди смири́вый Себе́ вы́шний Царю́ сла́вы.

Богоро́дичен: Ро́дове Тя́ вси́ блажа́т, Чи́стая: Иису́с бо еди́н рожде́йся от Твоея́ утро́бы, То́й я́ко ве́сть, сотвори́ Отрокови́це Де́во, с Тобо́ю вели́чия: Его́же моли́ спасти́ся ста́ду, и лю́дем Твои́м.

И́ный. Ирмо́с то́йже.

Благослове́н Госпо́дь Бо́г Изра́илев, Кресто́м Свои́м разруши́вый дре́внюю кля́тву, и сего́ предложи́вый на́м в поклоне́ние. того́ целу́юще ве́рно, того́ и воспева́юще, Твою́ вели́кую ми́лость пое́м непреста́нно.

Це́ркви похвала́ ты́ еси́ честны́й Кре́сте, царе́й ору́жие и ми́ру всему́ ми́ра по́честь богоде́ланная, Кре́сте, правосла́вных ра́досте, вселе́нныя храни́телю, сохрани́, освяти́ тебе́ покланя́ющияся.

Сла́ва: Тро́ице свята́я, сла́ва Тебе́, единоче́стная Еди́нице, Боже́ственное Естество́, еди́но Ца́рство стра́шное, О́тче, Сы́не, со Ду́хом, све́те непристу́пный все́м, безнача́льное Божество́, спаси́ служа́щия Тебе́, все́х Созда́телю.

Богоро́дичен: У Креста́ я́ко стоя́ше А́гница Твоя́ Иису́се, Па́стыря и Влады́ку Своего́ зря́щи, го́рько рыда́ше, и утро́бу дви́жущи о Тебе́ Христе́ взыва́ше: что́ стра́нное виде́ние? Жи́зне, ка́ко умира́еши?

Сла́ва Тебе́ Бо́же на́ш, сла́ва Тебе́.

Манасси́ю я́ко спа́сл еси́ пока́явшася Бо́же, спаси́ и мене́, слеза́ми ка́ющася го́рце, и не отврати́ раба́ Твоего́: уклони́х бо мою́ ду́шу, я́ко дре́вле Изра́иль о́ный, вся́ дни́ моя́ живы́й в блуде́.

Ирмо́с: Благослове́н Госпо́дь Бо́г Изра́илев, воздви́гнувый ро́г спасе́ния на́м, в дому́ Дави́дове о́трока Своего́: в ни́хже посети́ на́с Восто́к с высоты́, и напра́вил ны́ е́сть на пу́ть ми́ра.

Свети́лен гла́са.

На стихо́вне самогла́сен дне́, два́жды, гла́с 8:

Велехва́льнаго фарисе́а, от возноше́ния помышля́ющи душе́ моя́ осужде́ние, и смиренному́драго мытаря́ испове́данием прегреше́ний позна́вши оправда́ние, о́ваго у́бо отложи́ти потщи́ся о доброде́тели дерзнове́ние: о́ваго же прия́ти, я́же согреши́ла еси́, испове́дание. воздви́гнися несмири́тельную себе́ припложа́ющи, меростра́стием высоту́, от Христа́ иму́щаго ве́лию ми́лость.

Му́ченичен: Вельми́ подвиза́стеся святи́и, му́ки от беззако́нных претерпе́вше до́блественно, Христа́ испове́дающе пред царьми́: и па́ки преста́вившеся от жития́, си́лы де́йствуете в ми́ре, и неду́жныя от страсте́й и́х исцеля́ете святи́и, моли́те спасти́ся душа́м на́шим.

Сла́ва, и ны́не, Богоро́дичен, гла́с то́йже: Кро́в Тво́й Богоро́дице Де́во, врачевство́ е́сть духо́вное: во́нь бо прибега́юще, душе́вных боле́зней избавля́емся.

На 6-м часе́ тропа́рь проро́чества, гла́с 6:

Кресту́ Твоему́ покланя́емся Влады́ко, и свято́е Воскресе́ние Твое́ сла́вим.

Проки́мен, псало́м 65, гла́с 6: Благослове́н Бо́г, И́же не отста́ви моли́тву мою́, и ми́лость Свою́ от Мене́. Сти́х: Благослови́те язы́цы Бо́га на́шего.

Проро́чества Иса́иина чте́ние. [Ис. 25:1–9.]

Го́споди Бо́же мо́й, просла́влю Тя́, воспою́ и́мя Твое́, я́ко сотвори́л еси́ чу́дная дела́, сове́т дре́вний и́стинный: да бу́дет, Го́споди. Я́ко положи́л еси́ гра́ды в пе́рсть, гра́ды тве́рдыя, е́же па́сти основа́ниям и́х, нечести́вых гра́д да не сози́ждется в ве́к. Сего́ ра́ди благословя́т Тя́ лю́дие ни́щии, и гра́ди челове́ков оби́димых возблагословя́т Тя́. Бы́л бо еси́ вся́кому гра́ду смире́нному помо́щник, и изнемога́ющим за оскуде́ние покро́в, от челове́к злы́х изба́виши и́х: покро́в жа́ждущих, и ду́х челове́ков оби́димых. А́ки челове́цы малоду́шнии жа́ждущии в Сио́не, я́ко изба́виши и́х от челове́к нечести́вых, и́мже на́с пре́дал еси́. И сотвори́т Госпо́дь Савао́ф все́м язы́ком: на горе́ се́й испию́т ра́дость, испию́т вино́. Пома́жутся ми́ром на горе́ се́й: преда́ждь сия́ вся́ язы́ком: то́й бо сове́т на вся́ язы́ки. Пожре́ сме́рть возмо́гши, и па́ки отъя́т Госпо́дь Бо́г вся́кую сле́зу от вся́каго лица́: поноше́ние люде́й отъя́т от всея́ земли́, уста́ бо Госпо́дня глаго́лаша [сия́]. И реку́т в де́нь о́ный: се́ Бо́г на́ш, На́ньже упова́хом, и спасе́т на́с: Се́й Госпо́дь, потерпе́хом Его́, и возра́довахомся, и возвесели́хомся о спасе́нии на́шем.

Проки́мен, псало́м 66, гла́с 6: Благослови́ ны Бо́же, Бо́же на́ш, благослови́ ны Бо́же. Сти́х: Бо́же, уще́дри ны́ и благослови́ ны.