Службы пятой седмицы Великого поста

Понедельник Вторник Среда

Вторник

Последование утрени

Та́же стихологису́ем кафи́сму 11-ю, 12-ю, 13-ю. По 1-м стихосло́вии глаго́лем седа́льны умили́тельныя Осмогла́сника 2, с Богоро́дичным.

По 2-м же стихосло́вии седа́лен господи́на Ио́сифа, гла́с 3.

Подо́бен: Боже́ственныя ве́ры:

Теплото́ю ве́ры, воздержа́нием стра́сти попали́м невоздержа́ния, и про́пасти греха́ убежи́м, и сле́зными то́ки погаси́м ве́чнующий пла́мень, зову́ще: преблаги́й, согреши́хом Ти́, очи́сти, и да́руй на́м ве́лию ми́лость. [Два́жды.]

Богоро́дичен. Подо́бен:

Боже́ственная была́ еси́ ски́ния Сло́ва, еди́на Всечи́стая Де́во Ма́ти, чистото́ю А́нгелы превозше́дшая, мене́ па́че все́х пе́рсть бы́вша оскверне́на плотски́ми согреше́ньми очи́сти моли́твами Твои́ми, Боже́ственною водо́ю, подаю́щи Чи́стая, ве́лию ми́лость.

По 3-м стихосло́вии, седа́лен господи́на Фео́дора, гла́с 2.

Подо́бен: Преблагослове́нна еси́:

Препросла́вленная благода́ть всечестна́го поста́, и́мже Илиа́ проро́к обрета́ет колесни́цу о́гненную, и Моисе́й скрижа́ли прие́млет, Дании́л же чу́дный бы́сть, Елиссе́й ме́ртваго воздви́же, о́троцы же о́гнь угаси́ша, и вся́к кто́ к Бо́гу присво́ися. Те́м пита́ющеся возопии́м: благослове́н Христо́с Бог на́ш, та́ко благоволи́вый, сла́ва Тебе́. [Два́жды.]

Сла́ва, и ны́не, Богоро́дичен:

Подо́бен: Пречи́стому:

Необори́мую моли́тву Твою́ стяжа́в в лю́тых, избавля́юся от оскорбля́ющих мя́ па́че наде́жды чу́дно, о Ма́ти Бо́жия! Ускоря́еши бо всегда́ прося́щым Тя́ ве́рно, и разреша́еши содержи́мая искуше́ния. Те́м благода́рственно вопию́ Ти: приими́ Влады́чице кра́ткая благода́рственная, вме́сто и́х еси́ мне́ во все́х Де́во по́моще.

Кано́н в мине́и, и настоя́щий трипе́снец, господи́на Ио́сифа.

И стихосло́вится пе́снь. Гла́с 3.

Пе́снь 2.

Ирмо́с: Вонми́ земле́ и не́бо, и внуши́ глаго́лы моя́, возглаго́лю бо на земли́ Бо́жия чудеса́.

Непреста́нными моли́твами, и воздержа́нием и виде́нием впери́м ду́шы к боже́ственному жела́нию.

Невоздержа́ния стремни́ны убежа́вше, уясни́мся вси́ воздержа́ния све́том в боже́ственном Ду́се.

Со́лию боже́ственных доброде́телей, гное́ние грехо́вное отложи́вши душе́, Бо́гу прилепи́ся.

Богоро́дичен: Упоко́ися Христо́с в Тебе́ еди́ной Благослове́нной, и пло́ть Свою́ от Тебе́ понесе́.

И́ный, гла́с 2.

Ирмо́с: Внемли́те лю́дие зна́мением де́л Боже́ственныя Моея́ си́лы, и о се́м уразуме́йте, я́ко еди́н А́з Бог е́смь все́х.

Поще́ние чи́стое, моли́твы, сле́зы, поуче́ние Боже́ственных и вся́кую ину́ю доброде́тель совокупи́вше, Влады́це Христу́ ны́не принесе́м.

Е́ва плене́на бы́сть плодо́м: ви́ждь ты́ душе́ моя́, не прельща́йся, а́ще приложи́т тебе́ зми́й когда́ совеща́яй, я́сти тебе́ сла́стныя плоды́.

Тро́ичен: Три́ еди́наго зра́ка Ли́ца сла́влю, Отца́, Сы́на и Ду́ха, еди́ну держа́ву Божества́, Ца́рство все́х, и Божество́.

Богоро́дичен: Рождество́ Твое́ Чи́стая стра́шно бы́сть: Бог бо е́сть вочелове́чивыйся безнача́льно от Отца́ рожде́йся, и из Тебе́ в после́дняя без му́жа роди́выйся.

Сла́ва Тебе́ Бо́же на́ш, сла́ва Тебе́.

Кровоточи́вую, осяза́нием оме́т Твои́х исцели́л еси́ Христе́ мо́й, и мене́ ве́рою ми́лости Твоея́ прикаса́ющагося, здра́ва от страсте́й учини́.

Ирмо́с: Внемли́те лю́дие зна́мением де́л Боже́ственныя Моея́ си́лы, и о се́м уразуме́йте, я́ко еди́н А́з Бог е́смь все́х.

Пе́снь 8.

Ирмо́с: Ангельми немо́лчно в вы́шних сла́вимаго Бога, небеса небес, земля, и го́ры, и хо́лми, и глубина, и весь ро́д челове́ческий, пе́сньми Того я́ко Созда́теля, и Изба́вителя благослови́те, и превозноси́те во вся ве́ки.

В та́йне ловя́ по вся́ дни́ вселука́вый, и́щет мя́ поя́ти и сне́дь сотвори́ти: того́ мя́ зло́бы изба́ви Спа́се, спасы́й Ио́ну от ки́та.

Поще́нием очи́стившеся, на го́ру доброде́телей взы́дем, и услы́шим я́сно, что́ возглаго́лет в на́с Бо́г: возглаго́лет бо ми́р и просвеще́ние, и исцеле́ние душе́вных сокруше́ний.

Грехо́вным омраче́нием всегда́ ослепля́емь, не могу́ разуме́ти чудеса́ Твоя́ Го́споди: те́мже мои́ серде́чныя о́чи отве́рзи, Иису́се Светода́вче.

Богоро́дичен: Щедро́т Твои́х окропле́ньми, Присноде́во Нескве́рная, оскверне́ния стра́стная се́рдца моего́ отмы́й, сле́з то́ки, чистоты́ мне́ пода́тельныя очище́ния душе́внаго, да́рующи.

И́ный.

Ирмо́с: Дре́вле ороси́вшаго, евре́йския о́троки в пла́мени, и опали́вшаго Господа халде́и пресла́вно в не́м, воспое́м глаго́люще: благослови́те и превозноси́те Его во ве́ки.

О́гнь не угаса́ет, и че́рвь, рече́, не скончи́тся, убо́йся преще́ния, о душе́ моя́, угожда́ющи Христу́! Да обря́щеши наслажде́ние, иде́же все́м е́сть веселя́щымся жили́ще.

Опале́нием разжига́емую ду́шу мою́ похоте́ний, возста́ви Го́споди, молю́ся, осяза́нием Твои́м, я́коже Петро́ву те́щу, да обря́щется рабо́тати Тебе́ благоуго́дно, испове́дающися во вся́ ве́ки.

Благослови́м Отца́, и Сы́на, и Свята́го Ду́ха, Го́спода.

Тро́ичен: Присносу́щнаго безнача́льнаго Отца́ воспои́м ве́рнии, Сы́на же собезнача́льна, и ду́ха сопросия́вша из отца́, единосу́щна ли́ца, еди́наго су́ща всеси́льнаго нача́ла, и вла́сти.

Богоро́дичен: Мари́е богозва́нная, очище́ние вои́стинну ве́рных, из тебе́ бо оставле́ние подава́ется все́м бога́тно: Сы́на твоего́ и го́спода не преста́й умоля́ющи о пою́щих тя́.

Сла́ва Тебе́ Бо́же на́ш, сла́ва Тебе́.

У́ши отве́рзи души́ моея́ огло́хнувшыя Христе́, и язы́к мо́й уясни́, я́коже дре́вле гугни́ваго и глуха́го: да внуша́я Твои́м гласово́м пою́, и язы́ком хвалю́ Тя во ве́ки.

Хва́лим, благослови́м, покланя́емся Го́споди, пою́ще и превознося́ще во вся́ ве́ки.

Ирмо́с: Дре́вле ороси́вшаго евре́йския о́троки в пла́мени, и опали́вшаго Го́спода халде́и пресла́вно в не́м, воспои́м глаго́люще: благослови́те и превозноси́те Его́ во ве́ки.

Пе́снь 9.

Ирмо́с: Тебе́ неопали́мую купину́, и Святу́ю Де́ву, Ма́терь Све́та, и Богоро́дицу, наде́жду все́х на́с велича́ем.

Пла́мень огня́ негаси́маго во уме́ стяжа́вше, те́плою мы́слию, покая́ния огню́ ны́не присту́пим, стра́сти опаля́юще.

У́ст постя́щихся дре́вле, разжига́емое сло́во, изше́дшее ревни́тельне, преклоня́ет соста́вы: сему́ ревну́й душе́, и до́бре поживи́.

Суди́ще стра́шное помышля́ющи, всеокая́нная душе́ моя́, ше́ствия твоя́ при́сно, ко исполне́нию хоте́ний Изба́вителя уготовля́й.

Богоро́дичен: Омраче́нную ду́шу мою́ сласте́й очерне́нием, просвети́ Чи́стая, Све́т ро́ждшая: да любо́вию и ве́рою при́сно велича́ю Тя́.

И́ный.

Ирмо́с: Преесте́ственно пло́тию заче́ншую во чре́ве, от Отца́ безле́тно предвозсия́вшее Сло́во, в пе́снех немо́лчных велича́ем ве́рнии.

Уд ве́сь пло́ти на́шея предста́ви Христу́, ору́жия пра́вды: ру́це, рече́, возде́вше преподо́бныя без гне́ва и размышле́ний.

Ты́ иногда́ ученико́м в корабли́ предста́в, уста́вил еси́ Христе́ мо́й неи́стовствующееся мо́ре, и моя́ треволне́ния утиши́ помышле́ний.

Тро́ичен: Еди́ному Естеству́ покланя́юся, три́ Ли́ца пою́, еди́наго Бо́га все́х, Отца́, и Сы́на, и Свята́го Ду́ха, присносу́щное нача́ло.

Богоро́дичен: Чи́стая детотвори́ши, Де́ва млеко́м пита́еши, ка́ко в то́мже обоя́ де́вствуеши ражда́ющи? Бог е́сть сотвори́вый, не вопроша́й Мене́, ка́ко.

Сла́ва Тебе́ Бо́же на́ш, сла́ва Тебе́.

От разбо́йнических мя́ страсте́й оскверне́на душе́ю, исцели́ Христе́ мо́й, излива́я Твою́ ми́лость, я́коже впа́дшему в ру́це разбо́йников.

Ирмо́с: Преесте́ственно пло́тию заче́ншую во чре́ве, от Отца́ безле́тно предвозсия́вшее Сло́во, в пе́снех немо́лчных велича́ем ве́рнии.

Свети́лен гла́са.

На стихо́вне самогла́сен дне́, два́жды, гла́с 7:

Уя́звенную мою́ ду́шу, и смире́нную посети́ Го́споди, врачу́ боля́щих и отча́янных, приста́нище необурева́емое: Ты́ бо еси́ прише́дый Изба́витель ми́ра, е́же воздви́гнути из тли́ па́дшаго: и мене́ припа́дающа возста́ви, за вели́кую Твою́ ми́лость.

Му́ченичен: Посреде́ суди́ща законопресту́пных, ра́дующеся вопия́ху страстоте́рпцы: Го́споди сла́ва Тебе́.

Сла́ва, и ны́не, Богоро́дичен: Пое́м Тя́ Пречи́стая Богоро́дице, и сла́вим Его́же родила́ еси́ Бо́га Сло́ва, зову́ще: сла́ва Тебе́.

На 1-м часе́, стихологису́ем кафи́сму 14-ю. На 3-м часе́, 15-ю. На 6-м часе́ 16-ю.

На 6-м же часе́, тропа́рь проро́чества, гла́с 3.

Засту́пник на́ш Бог Иа́ковль, и Защи́титель е́сть в де́нь печа́ли.

Проки́мен, псало́м 87, гла́с 6: Ни́щ е́смь а́з, и в труде́х от ю́ности моея́.

Сти́х: Го́споди Бо́же спасе́ния моего́, во дни́ воззва́х, и в нощи́ пред Тобо́ю.

Проро́чества Иса́иина чте́ние. [Ис.40:18–31.]

Та́ко глаго́лет Госпо́дь: кому́ уподо́бисте Го́спода, и ко́ему подо́бию уподо́бисте Его́? Еда́ о́браз сотвори́ древоде́латель, или́ зла́тарь слия́в зла́то позлати́ его́, или́ подо́бием сотвори́ его́? Дре́во бо негнию́щее избира́ет древоде́латель, и му́дре и́щет, ка́ко поста́вит о́браз его́, и да не поколе́блется. Не разуме́сте ли, не слы́шасте ли? не возвести́ся ли ва́м испе́рва? не разуме́сте ли основа́ния земли́, Содержа́й кру́г земли́, и живу́щыя на не́й а́ки пру́ги: поста́вивый не́бо я́ко кама́ру, и просте́р е́, я́ко ски́нию обита́ти. Дая́й кня́зи, а́ки ничто́же, владе́ти, и зе́млю, а́ки ничто́же сотвори́. Не насадя́т бо, ниже́ насе́ют, и не вкорени́тся в земли́ коре́ние и́х: дхне́ на ни́х ве́тр, и изсхо́ша, и бу́ря а́ки сте́блие во́змет и́х. Ны́не у́бо кому́ Мя́ уподо́бисте, и вознесу́ся, рече́ Святы́й? Воззри́те на высоту́ очи́ма ва́шима, и ви́дите, Кто́ сотвори́ сия́ вся́? нося́й по числу́ у́тварь Свою́, и вся́ по и́мени прозове́т от мно́гия сла́вы, и в держа́ве кре́пости Своея́ ничто́же утаи́ся от тебе́. Еда́ бо рече́ши Иа́кове, и что́ глаго́лал еси́ Изра́илю? утаи́ся пу́ть мо́й от Бо́га, и Бог мо́й су́д отя́ и отступи́. И ны́не не уразуме́л ли еси́? ни ли́ слы́шал еси́? Бог ве́чный, Бог устро́ивый концы́ земли́, не вза́лчет, ниже́ утруди́тся, ниже́ е́сть изъобре́тение прему́дрости Его́. Дая́й а́лчущым кре́пость, и неболе́зненным печа́ль. Вза́лчут бо юне́йшии, и утрудя́тся ю́ноты, и избра́ннии не кре́пцы бу́дут: Терпя́щии же Го́спода изменя́т кре́пость.

Проки́мен, псало́м 88, гла́с 6: Блаже́ни лю́дие ве́дущии воскликнове́ние.

Сти́х: Го́споди, во све́те лица́ твоего́ по́йдем.

На 9-м часе́ кафи́сму 18.

Последование вечерни

стихосло́вим, вме́сто Ко Го́споду, кафи́сму 19-ю. На Го́споди воззва́х: поста́вим стихо́в 6: и пое́м стихи́ры подо́бны трипе́снца 3. И в Мине́и 3.

Подо́бны господи́на Ио́сифа, гла́с 8:

Подо́бен: Что́ вы нарече́м:

Бра́шно любо́вь творя́ще, воздержа́нием стра́сти удержи́м ве́рнии, и бо́гу на́с ра́ди возне́сшемуся на Кресте́, и копие́м пробо́дшемуся в ре́бра, пожи́ти благоуго́дно веде́мся, да пи́щи наслади́мся ве́чныя и лу́чшия, сла́вяще Спа́са ду́ш на́ших.

Подо́бен:

Дре́вом дре́вле сме́рть обрето́хом, ны́не же па́ки жи́знь Дре́вом кре́стным: страсте́й у́бо стремле́ния умертви́м ве́рнии, и дости́гнути спаси́тельное Воскресе́ние все́х Благоде́теля мо́лим, дея́ньми боже́ственными сия́юще, и доброде́тельми украша́еми, сла́вяще Спа́са ду́ш на́ших.

И́на стихи́ра подо́бна, господи́на Фео́дора, гла́с 2.

Подо́бен: Па́че ума́ благи́х:

Живоно́сный Тво́й Кре́ст похваля́ем Го́споди, и на́с ра́ди свяще́нная пло́ти Твоея́ страда́ния: копие́ же, заколе́ния, посмея́ния, оплева́ния, бие́ния и зауше́ния с багряни́цею, и вене́ц терноплете́нный, и́миже от кля́твы вся́ изба́вив спа́сл еси́ ны́. Те́мже мо́лим Тя́, посто́в вре́мя ми́рно сконча́ти пода́ждь на́м.

Проки́мен, псало́м 89, гла́с 4: Го́споди, прибе́жище бы́л еси́ на́м в ро́д и ро́д.

Сти́х: Пре́жде да́же гора́м не бы́ти, и созда́тися земли́, и вселе́нней:

Бытия́ чте́ние. [Быт.15:1–15.]

Бы́сть сло́во Госпо́дне ко Авра́му в виде́нии но́щию, глаго́ля: не бо́йся Авра́ме: Аз защища́ю тя́, мзда́ твоя́ мно́га бу́дет зело́. Глаго́ла же Авра́м: Влады́ко Го́споди, что́ ми да́си? а́з же отпуща́юся безча́ден: сы́н же масе́к домоча́дицы моея́, се́й Дама́ск Елие́зер. И рече́ Авра́м: поне́же мне́ не да́л еси́ се́мене, домоча́дец же мо́й насле́дник мо́й бу́дет. И а́бие гла́с Госпо́день бы́сть к нему́, глаго́лющий: не бу́дет се́й насле́дник тво́й, но и́же изы́дет из тебе́, то́й бу́дет насле́дник тебе́. Изведе́ же его́ во́н, и рече́ ему́: воззри́ на не́бо, и изочти́ зве́зды, а́ще возмо́жеши исчести́ я́. и рече́: та́ко бу́дет се́мя твое́. И ве́рова Авра́м Бо́гу, и вмени́ся ему́ в пра́вду. Рече́ же к нему́: Аз [е́смь] Бог изведы́й тя́ от страны́ Халде́йския, я́ко да́ти тебе́ зе́млю сию́ насле́дствовати. И рече́: Влады́ко Го́споди, по чесому́ уразуме́ю, я́ко насле́дити ю́ и́мам? Рече́ же к нему́: возми́ мне́ Ю́ницу триле́тну, и ко́зу триле́тну, и овна́ триле́тна, и го́рлицу, и го́лубя. Взя́ же о́н вся́ сия́, и раздели́ я́ на по́лы, и положи́ я́ противоли́чна еди́на к друго́му, пти́ц же не раздели́. Слете́ша же пти́цы на телеса́ расте́саная и́х: и се́де бли́зу и́х Авра́м. Заходя́щу же со́лнцу, у́жас нападе́ на Авра́ма, и се́ стра́х те́мен ве́лий нападе́ на́нь. И рече́но бы́сть ко Авра́му: ве́дый уве́си, я́ко пресе́льно бу́дет се́мя твое́ в земли́ не свое́й, и порабо́тят я́, и озло́бят я́, и смиря́т я́ ле́т четы́реста. Язы́ку же, ему́же порабо́тают, сужду́ Аз: по си́х же изы́дут се́мо со име́нием мно́гим. Ты́ же оти́деши ко отце́м твои́м в ми́ре, препита́н в ста́рости до́брей.

Проки́мен, псало́м 90, гла́с 4: Живы́й в по́мощи вы́шняго, в кро́ве Бо́га небе́снаго водвори́тся.

Сти́х: Рече́т го́сподеви: засту́пник мо́й еси́.

При́тчей чте́ние. [Притч. 15:7–19]

Устне́ му́дрых связу́ются чу́вством: сердца́ же безу́мных не тве́рда. Же́ртвы нечести́вых ме́рзость Го́сподеви: обе́ты же правоходя́щих прия́тны Ему́. Ме́рзость Го́сподеви путие́ нечести́вых: гоня́щыя же пра́вду лю́бит. Наказа́ние незло́биваго познава́ется от мимоходя́щих: ненави́дящии же обличе́ния скончава́ются сра́мно. А́д, и па́губа я́вна пред Го́сподем: ка́ко не и сердца́ челове́ков? Не возлю́бит ненака́занный облича́ющих его́, с му́дрыми же не побесе́дует. Се́рдцу веселя́щуся, лице́ цвете́т: в печа́лех же су́щу, се́тует. Се́рдце пра́во и́щет чу́вства: уста́ же ненака́занных уразуме́ют зла́я. На вся́ко вре́мя о́чи злы́х прие́млют зла́я: до́брии же безмо́лвствуют при́сно. Лу́чше части́ца ма́лая со стра́хом Госпо́дним, не́жели сокро́вища ве́лия без боя́зни. Лу́чше учрежде́ние от зе́лий с любо́вию и благода́тию, не́жели представле́ние тельце́в со враждо́ю. Му́ж я́рый устроя́ет бра́ни: долготерпели́вый же и бу́дущую укроща́ет. терпели́вый му́ж угаси́т суды́: нечести́вый же воздвиза́ет па́че. Путие́ пра́здных по́стлани те́рнием: му́жественных же угла́ждени.

На стихо́вне самогла́сны, гла́с 5, еди́ножды:

Поползну́вся от пра́ваго пути́ Твоего́, от страсте́й окая́нный низпадо́хся в ро́в, леви́т же со свяще́нником ви́девше мя́, претеко́ша. Ты́ же Христе́ поми́ловал еси́ мя́, и ору́жием Креста́ грехо́вное рукописа́ние растерза́в, безстра́стием уясни́л еси́, и Отцу́ соседа́теля сотвори́л еси́. Те́мже зову́ Тебе́: непостижи́ме Го́споди сла́ва Тебе́.

И́на стихи́ра, гла́с 8, еди́ножды:

Из Иерусали́ма снидо́х поползну́вся, от напи́санных в не́м язы́ком за́поведей Твои́х: во Иерихо́н же иды́й подража́тельным стремле́нием, в не́м дре́вле ра́ди зло́бы от Тебе́, ко уби́йству изда́вшихся лю́дем Твои́м преслуша́нием, душетле́нным прилучи́хся страсте́м, я́коже разбо́йником. от ни́х уя́звена и́сполу умерщвле́на, гвоздьми́ и копие́м пло́тию уязви́выйся во́лею, греха́ ра́ди челове́ча, и о́бщее соверши́вый Ересто́м спасе́ние во Иерусали́ме, исцели́ мя Го́споди, и спаси́ мя.

Му́ченичен: Му́ченицы Твои́ Го́споди, забы́вше су́щая в житии́, неради́вше и о му́ках бу́дущия ра́ди жи́зни, и сея́ насле́дницы яви́шася: те́мже и со А́нгелы ра́дуются, те́х моли́твами да́руй лю́дем Твои́м ве́лию ми́лость.

Сла́ва, и ны́не, крестобогоро́дичен: Го́споди, егда́ тя́ со́лнце ви́де на Дре́ве ви́сима Со́лнца пра́вды, лучы́ сокры́, и луна́ све́т во тьму́ преложи́: Всенепоро́чная же Ма́ти Твоя́ утро́бою уязвля́шеся.


Понедельник Вторник Среда