Вторник

Во вто́рник слепа́го, на У́трени

По 1-м стихосло́вии, седа́лен, гла́с 5:

Подо́бен: Собезнача́льное сло́во:

Го́споди, ме́ртв наре́клся еси́, Умертви́вый сме́рть: во гро́бе положи́лся еси́, Истощи́вый гро́бы: горе́ во́ини гро́б стрежа́ху, до́ле от ве́ка ме́ртвыя воскреси́л еси́. Всеси́льне и Непостижи́ме Го́споди сла́ва Тебе́.

Сти́х: Го́споди, да не я́ростию Твое́ю обличи́ши мене́:

Судии́ седя́щу, и а́нгелом предстоя́щым, трубе́ глася́щей, и пла́мени горя́щу, что́ сотвори́ши душе́ моя́, ведо́ма на су́д? Тогда́ бо лю́тая твоя́ предста́нут, и та́йная твоя́ облича́тся согреше́ния. Те́мже пре́жде конца́ возопи́й к Судии́: Бо́же очи́сти мя́, и спаси́ мя.

Сти́х: Ди́вен Бо́г во святы́х Свои́х, Бо́г Изра́илев.

Му́ченичен: Сия́ет дне́сь па́мять страстоте́рпцев, и́мать бо от небе́с озаре́ние: ли́к а́нгельский торжеству́ет, и челове́ческий ро́д спра́зднует. Те́мже мо́лятся Го́сподеви, поми́ловатися душа́м на́шым.

Сла́ва, и ны́не: Богоро́дичен:

Ма́ти Бо́жия Пресвята́я, Стено́ христиа́н, изба́ви лю́ди Твоя́ обы́чно, зову́щыя к Тебе́ приле́жно: сопроти́в ста́ни враго́в, и возвыша́ющихся мы́слей, да вопие́м ти́: ра́дуйся Благода́тная.

По 2-м стихосло́вии, седа́лен, гла́с 5.

Подо́бен: Собезнача́льное Сло́во:

Прозре́вый ви́дится слепы́й плюнове́нием, челове́ческое составле́ние пре́жде Созда́вшаго, не ви́дяй от рожде́ния вели́кое со́лнце. Те́мже и благодаре́ние Бо́гу возсыла́ет от души́, сего́ зря́ о́браз, по подо́бию созда́нный о́браз Созда́вшаго.

Сла́ва, и ны́не: то́йже.

Пое́м кано́н пра́здника, со ирмосы́ на 8: и мине́и на 4. Конда́к, и ексапостила́рий пра́здника.

На хвали́тех стихи́ры осмогла́сника, гла́с 5:

Го́споди, вереи́ ве́чныя сокруши́вый, и у́зы растерза́вый от гро́ба воскре́сл еси́, оста́вль Твоя́ погреба́льная, во свиде́тельство и́стиннаго тридне́внаго Твоего́ погребе́ния: и предвари́л еси́ в Галиле́и, в пеще́ре Стрего́мый. Ве́лия Твоя́ ми́лость, Непостижи́ме Спа́се поми́луй, и спаси́ на́с. [Два́жды].

Мно́жества прегреше́ний мои́х пре́зри Го́споди, от Де́вы Рожде́йся, и вся́ очи́сти беззако́ния моя́, по́мысл мне́ подая́й обраще́ния, я́ко еди́н Человеколю́бец, молю́ся, и поми́луй мя́.

Му́ченичен:

Страстоте́рпцы Твои́ Го́споди, чи́ны а́нгельския подража́вше, я́ко безпло́тнии му́ки претерпе́ша, единомы́сленное упова́ние иму́ще, обеща́нных бла́г наслажде́ние. Те́х моли́твами Христе́ Бо́же на́ш, ми́р да́руй ми́ру Твоему́ и душа́м на́шым ве́лию ми́лость.

Сла́ва, и ны́не: гла́с 8:

Кто́ возглаго́лет си́лы Твоя́ Христе́? или́ кто́ изочте́т чуде́с Твои́х мно́жества? Сугу́б бо я́ко ви́ден бы́л еси́ на земли́ за бла́гость, сугу́бы и цельбы́ неду́гующым подава́л еси́: не то́чию бо теле́сныя о́чи отве́рзл еси́, и́же от утро́бы слепо́му, но и душе́вныя. Те́мже Бо́га Тя́ испове́даше тая́щагося, и все́м подаю́ща ве́лию ми́лость.

На стихо́вне стихи́ры подо́бны, гла́с 5.

Подо́бен: Преподо́бне о́тче:

Сия́ние светоно́сное просия́вшее, зря́ще проявле́нно в суббо́ту, светоно́снаго слепца́, зако́нми моисе́а смуща́емии, нра́вом ослепля́ющеся зря́ще се́нь, осене́ния не разуме́юще покрыва́юща зако́ны, из него́же не ви́деша светоде́теля, и сло́вом суббо́ты соде́теля, воочи́вшаго слепа́го измове́нием, и плюнове́ния но́вым бренотворе́нием. с ни́мже смеша́еми бо́га того́ у́зрим, ослепле́ние фарисе́йское облича́юще зре́нием, е́же от лу́чшаго.

Сти́х: При́зри на мя́, и поми́луй мя́.

У́тро возсия́ во тме́ пребыва́ющему но́щи невиде́ния, многоболе́зненному слепо́му, во струя́х купе́ли Силоа́мстей измове́нному, све́т очесе́м боже́ственным повеле́нием. Те́мже светоно́сный нове́йший ви́дится, мра́к тмы́ нощетво́рных зако́нных изъоблича́я кни́жников, и помраче́нное си́х невиде́ние возсия́ньми просвеща́яй светоно́сными: из ни́хже ослепле́ние сено́вных пре́жде пи́смен вооча́ется, от Сло́ва на́м подае́мыми све́тлыми сия́ньми.

Сти́х: Стопы́ моя́ напра́ви по словеси́ Твоему́.

На высоту́ взы́де светоно́снаго восхожде́ния, све́том богоразу́мия просве́щся слепы́й, терпя́ теле́сное и у́мное омраче́ние, е́же от Сло́ва но́выми светоли́тии просве́щся ве́сь, а́ще и пе́рвее ослепи́ся во обои́х и Светода́вца познава́ет, и Светоде́теля возсия́вшаго из гро́ба тридне́вно, и зе́млю уясни́вшаго Свои́м воскресе́нием: из него́же возсия́ све́т возсозда́ния во тме́ держи́мым челове́ком, за благоутро́бие и ве́лию ми́лость.

Сла́ва, и ны́не: гла́с 8:

Пра́вды Со́лнце мы́сленное Христе́ Бо́же, из утро́бы све́та лише́ннаго, Твои́м пречи́стым прикоснове́нием просвети́вшее обою́ду, и на́ши о́чи душе́вныя озари́вшее, сы́ны дне́ покажи́, да ве́рою вопие́м Ти́ мно́гое Твое́ и неизрече́нное, е́же на на́с благоутро́бие, Человеколю́бче, сла́ва Тебе́.

Во вто́рник ве́чера отда́ние пра́здника Па́схи

По 9-м часе́ твори́т свяще́нник нача́ло с кади́лом и со свеще́ю, ца́рским две́рем отве́рзенным, и пое́т: Христо́с воскре́се: со стихи́. И по стисе́х псало́м: Благослови́ душе́ моя́ Го́спода: И ектениа́. Та́же кафи́сма обы́чная.

На Го́споди воззва́х: пое́м стихи́ры самогла́сны, слепа́го, на 6. Гла́с 2:

Слепы́й роди́выйся, в свое́м по́мысле глаго́лаше: еда́ а́з гре́х ра́ди роди́тельных роди́хся без о́чию? еда́ а́з за неве́рие язы́ков роди́хся во обличе́ние? Не домышля́юся вопроша́ти: когда́ но́щь, когда́ де́нь? Не терпи́та ми́ но́зе ка́меннаго претыка́ния, не ви́дех со́лнца сия́юща, ниже́ во о́бразе мене́ Созда́вшаго. Но молю́ ти ся Христе́ Бо́же, при́зри на мя́, и поми́луй мя́.

Мимоходя́ Иису́с от святи́лища, обре́те челове́ка сле́па от рожде́ния, и умилосе́рдився положи́ бре́ние на о́чию его́, и рече́ к нему́: иди́ умы́йся в Силоа́ме: и умы́вся прозре́, сла́ву возсыла́я Бо́гу. Сосе́ди же его́ глаго́лаху ему́: кто́ твои́ зе́ницы отве́рзе, и́хже никто́же зря́щих исцели́ти возмо́же? Он же возопи́в, рече́: Челове́к Иису́с глаго́лемый, Он ми́ рече́: умы́йся в Силоа́ме, и прозре́х. то́й е́сть вои́стинну, Его́же рече́ Моисе́й в зако́не, Христа́ Месси́ю: То́й е́сть Спа́с душа́м на́шым.

Гла́с 4: Все́ житие́ слепы́й но́щь помышля́я, возопи́ Тебе́: Го́споди, отве́рзи ми́ зе́ницы, Сы́не Дави́дов Спа́се на́ш, да со все́ми и а́з воспою́ Твою́ си́лу.

Гла́с 5: Го́споди, мимоходя́ путе́м, обре́л еси́ челове́ка сле́па от рожде́ния, и удивле́ни бы́вше ученицы́, вопроша́ху Тя́ глаго́люще: Учи́телю, кто́ согреши́, се́й ли, или́ роди́тели его́, да сле́п роди́ся? Ты́ же Спа́се мо́й, возопи́л еси́ к ни́м: ни се́й согреши́, ни роди́тели его́, но да явя́тся дела́ Бо́жия на не́м. Мне́ подоба́ет де́лати дела́ Посла́вшаго Мя́, я́же никто́же мо́жет де́лати. И сия́ ре́к, плю́нув до́лу, бре́ние сотво́рь, пома́зал еси́ о́чи его́, ре́к к нему́: иди́ умы́йся в Силоа́мстей купе́ли. Он же умы́вся здра́в бы́сть, и вопия́ше к Тебе́: ве́рую Го́споди, и поклони́ся Тебе́. Те́мже вопие́м и мы́: поми́луй на́с.

Гла́с 8: Пра́вды Со́лнце мы́сленное Христе́ Бо́же, из утро́бы све́та лише́ннаго, Твои́м пречи́стым прикоснове́нием просвети́вшее обою́ду, и на́ши о́чи душе́вныя озари́вшее, сы́ны дне́ покажи́, да ве́рою вопие́м Ти́: мно́гое Твое́ и неизрече́нное, е́же на на́с благоутро́бие, Человеколю́бче сла́ва Тебе́.

За милосе́рдие ми́лости воплоти́выйся Христе́ Бо́же, све́та лише́ннаго от утро́бы, милосе́рдием неизрече́нных щедро́т сия́ния Боже́ственнаго сподо́бил еси́ сего́ зе́ницам пе́рстию созда́тельными пе́рсты Твои́ми прикосну́выйся: Са́м и ны́не Светода́телю, и на́шя озари́ душе́вная чу́вства, я́ко еди́н Независтнода́тель.

Сла́ва и ны́не: гла́с 8:

Кто́ возглаго́лет си́лы Твоя́ Христе́? или́ кто́ изочте́т чуде́с Твои́х мно́жества? Сугу́б бо я́ко ви́ден бы́л еси́ на земли́ за бла́гость, сугу́бы и цельбы́ неду́гующым подава́л еси́. Не то́чию бо теле́сныя о́чи отве́рзл еси́, и́же от утро́бы слепо́му, но и душе́вныя. Те́мже Бо́га Тя́ испове́даше тая́щагося, и все́м подаю́ща ве́лию ми́лость.

Проки́мен дне́.

На стихо́вне стихи́ра, гла́с 5:

Тебе́ воплоще́ннаго Спа́са Христа́, и небе́с не разлучи́вшася, во гла́сех пе́ний велича́ем: я́ко Кре́ст и сме́рть прия́л еси́ за ро́д на́ш, я́ко Человеколю́бец Госпо́дь, испрове́ргий а́дова врата́, тридне́вно воскре́сл еси́, спаса́я ду́шы на́шя.

Та́же: Да воскре́снет Бо́г, и расточа́тся врази́ Его́. И пое́м стихи́ры Па́схи с припе́вы и́х. Па́сха свяще́нная на́м дне́сь показа́ся: и про́чая. Сла́ва, и ны́не: Воскре́сния де́нь: И пото́м. Христо́с воскре́се: с пе́нием, еди́ножды. Та́же, Ны́не отпуща́еши: Трисвято́е. И по О́тче на́ш: Тропа́рь воскре́сн, гла́с 5: Собезнача́льное сло́во: Сла́ва, и ны́не: Богоро́дичен его́. И ектениа́: Поми́луй на́с Бо́же: И обы́чный отпу́ст глаго́лет иере́й без креста́: Воскресы́й из ме́ртвых: И свята́го дне́ помина́ет. И многоле́тны.

[зри́] На повече́рии по Досто́йно: и по трисвято́м, конда́к слепа́го: Сла́ва, и ны́не: Па́схи: А́ще и во гро́б:

[зри́] Полу́нощницу же пое́м по обы́чаю с кафи́смою. По 1-м трисвято́м, вме́сто: Се́ Жени́х гряде́т: глаго́лем тропа́рь воскре́сен: Собезнача́льное сло́во: Сла́ва, и ны́не: Богоро́дичен его́. По 2-м трисвято́м, вме́сто: Помяни́ го́споди я́ко бла́г: глаго́лем конда́к Па́схи: А́ще и во гро́б: Посе́м, Го́споди поми́луй. 12. И отпу́ст. Моли́твы же: Помяни́ го́споди, в наде́жди: не глаго́лем.

Комментарии для сайта Cackle