Службы шестой седмицы по Пасхе

 СредаЧетвергПятница 

Четверг

В четверто́к на У́трени

На Бо́г Госпо́дь: тропа́рь пра́здника: Возне́слся еси́ во сла́ве: три́жды.

По 1-м стихосло́вии седа́лен, гла́с 1.

Подо́бен: Ка́мени запеча́тану:

А́нгелом дивя́щымся восхо́да стра́нному, и ученико́м ужаса́ющымся стра́шному взы́тия, возше́л еси́ со сла́вою я́ко Бо́г, и врата́ Тебе́ взя́шася Спа́се. Сего́ ра́ди си́лы небе́сныя дивля́хуся вопию́ще: сла́ва снизхожде́нию твоему́ Спа́се, сла́ва ца́рствию Твоему́, сла́ва Вознесе́нию Твоему́, Еди́не Человеколю́бче. [Два́жды.]

По 2-м стихосло́вии седа́лен, гла́с 3:

Подо́бен: Красоте́ де́вства:

Преве́чный Бо́г и безнача́льный, е́же восприя́т естество́ челове́ческое, обоготвори́в та́йно дне́сь Вознесе́. А́нгели предтеку́ще апо́столом пока́зоваху Сего́ иду́ща на небеса́ сла́вою мно́гою, Тому́же поклони́вшеся глаго́лаху: сла́ва Бо́гу Возне́сшемуся. [Два́жды.]

По полиеле́и седа́лен, гла́с 5. Подо́бен: Собезнача́льное сло́во:

Соше́дый с небесе́ на земна́я, и до́лу лежа́щий во а́дове стра́жи, совоскреси́вый я́ко Бо́г Ада́мов зра́к, Вознесе́нием Твои́м Христе́ на небеса́ возве́д, престо́лу Оте́ческому Твоему́ соседи́теля соде́лал еси́, я́ко ми́лостив и Человеколю́бец. [Два́жды.]

И чте́ние пра́зднику: Похва́льная словеса́, творе́ние ки́р Андре́а, или́ про́чих. Степе́нна, а антифо́н 4-го гла́са. Проки́мен. гла́с 4: Взы́де Бо́г в воскликнове́нии, Госпо́дь во гла́се тру́бне. Сти́х: Вси́ язы́цы восплещи́те рука́ми: Вся́кое дыха́ние: Ева́нглие от Ма́рка, зача́ло 71: Воскре́с Иису́с зау́тра в пе́рвую суббо́ту: Воскре́сние Христо́во: еди́ножды. Псало́м 50. Сла́ва: гла́с 2: Моли́твами апо́столов: И ны́не: Моли́твами богоро́дицы: Та́же, сти́х: Поми́луй мя́ Бо́же, по вели́цей ми́лости Твое́й: И пое́м настоя́щий самогла́сен, гла́с 6:

Дне́сь на небесе́х го́рния си́лы на́ше естество́ зря́ще, дивя́щеся стра́ннаго о́браза восхо́ду, недоумева́хуся дру́г ко дру́гу глаго́люще: кто́ Се́й прише́дый? Ви́дяще же своего́ Влады́ку, небе́сная врата́ взя́ти повелева́ху: с ни́миже непреста́нно воспои́м с пло́тию отону́ду па́ки Гряду́щаго, я́ко Судию́ все́х и Бо́га всеси́льна.

Каноны:

гла́с пя́тый, со ирмосы́ на 8: и четве́ртый, на 6.

Кано́н, творе́ние Иоа́нна мона́ха. Гла́с 5.

Пе́снь 1.

Ирмо́с: Спаси́телю Бо́гу в мо́ри лю́ди немо́крыми нога́ми наста́вльшему, и фарао́на со всево́инством пото́пльшему, Тому́ Еди́ному пои́м: я́ко просла́вися.

Воспои́м вси́ лю́дие, на ра́мех херуви́мских Возне́сшуся со сла́вою Христу́, и спосади́вшему на́с одесну́ю Отца́, пе́снь побе́дную: я́ко просла́вися.

Хода́тая Бо́гу и челове́ком Христа́, ли́цы а́нгельстии ви́девше, с пло́тию в вы́шних удивля́хуся, согла́сно же воспева́ху пе́снь побе́дную: я́ко просла́вися.

Я́вльшемуся Бо́гу на горе́ Сина́йстей, и зако́н да́вшему богови́дцу Моисе́ю, от горы́ Елео́нския Возне́сшемуся пло́тию, Тому́ вси́ воспои́м: я́ко просла́вися.

Богоро́дичен:

Пречи́стая Ма́ти Бо́жия, Воплоще́ннаго от Тебе́, и от не́др Роди́теля неотсту́пльшаго Бо́га непреста́нно моли́, от вся́каго обстоя́ния спасти́, я́же созда́.

Други́й кано́н господи́на Ио́сифа,

его́же краестро́чие по алфави́ту. Во осмо́й же, и девя́той пе́сни: Оди́ Ио́сиф. Е́же е́сть, пе́снь Ио́сифова, гла́с 4.

Пе́снь 1.

Ирмо́с: Отве́рзу уста́ моя́:

Воскре́сл еси́ тридне́вен, по естеству́ безсме́ртный, и яви́лся еси́ единона́десятим, и все́м ученико́м, и восте́кл еси́ Христе́ ко Отцу́, о́блаком носи́мь все́х Тво́рче.

Вопие́т я́вственно поя́ Дави́д богодохнове́нный, взы́де Госпо́дь к небе́сным, в воскликнове́нии и трубы́ шу́ме, и к началосве́тному Отцу́ доспе́.

Сла́ва:

Состаре́вшийся, Го́споди, ми́р мно́гими грехми́, обнови́в стра́стию Твое́ю и воста́нием Твои́м, возше́л еси́ носи́мь о́блаком к пренебе́сным: сла́ва сла́ве Твое́й.

И ны́не: Богоро́дичен:

Влады́ку родила́ еси́ все́х, всенепоро́чная Влады́чице, стра́сть во́льную прии́мшаго, и возше́дша к Своему́ Отцу́, Его́же не оста́ви, а́ще и пло́ть взя́т.

Катава́сиа: Боже́ственным покрове́н, медленоязы́чный мра́ком, извити́йствова Богопи́санный зако́н: ти́ну бо оттря́с очесе́ у́мнаго, ви́дит Су́щаго, и науча́ется Ду́ха ра́зуму, хваля́ Боже́ственными пе́сньми.

Пе́снь 3.

Ирмо́с: Си́лою Креста́ Твоего́ Христе́, утверди́ мое́ помышле́ние, во е́же пе́ти и сла́вити спаси́тельное Твое́ Вознесе́ние.

Возше́л еси́ Жизнода́вче Христе́ ко Отцу́, и Возне́сл ро́д на́ш Человеколю́бче, неизрече́нным благоутро́бием Твои́м.

Чи́ни а́нгельстии Спа́се, челове́ческое естество́ ви́девше совосходя́щее Тебе́, непреста́нно удивля́еми воспева́ху Тя́.

Ужаса́хуся а́нгельстии ли́цы Христе́, зря́ще Тя́ с телесе́м Возне́сшася, и воспева́ху свято́е Твое́ Вознесе́ние.

Естество́ челове́ческое Христе́, тле́нием па́дшее возста́вил еси́, и восхо́дом Твои́м Возне́сл еси́, и с Собо́ю на́с просла́вил еси́.

Богоро́дичен:

Моли́ непреста́нно Чи́стая, Произше́дшаго от ложе́сн Твои́х, изба́витися пре́лести диа́воли, пою́щым Тя́ Ма́терь Бо́жию.

И́н. ирмо́с: Твоя́ песносло́вцы Богоро́дице:

Возми́те врата́ небе́сная, се́ прии́де Христо́с Ца́рь тва́ри, в те́ло обо́лкся земно́е, го́рнейшым глаго́лаху си́лам до́льнейшыя.

Взыска́в Христе́, прельще́ннаго пре́лестию змие́вою Ада́ма, я́ко в сего́ оболки́йся, возше́л еси́, и се́л еси́ одесну́ю, я́ко сопресто́лен Отцу́, пою́щым а́нгелом Тебе́.

Сла́ва:

Земля́ пра́зднует и лику́ет, ра́дуется и не́бо, Вознесе́нием дне́сь Творца́ тва́ри, предъявле́нно соедини́вшаго разстоя́щаяся хоте́нием.

И ны́не: Богоро́дичен:

Сме́рти роди́вши Разруши́теля, Еди́наго безсме́ртнаго Бо́га, Де́во Ма́ти Всечи́стая: Того́ при́сно умоли́, умерщвля́ющыя моя́ стра́сти умори́ти, и спасти́ мя.

Катава́сиа: Разве́рзе утро́бы неча́дствовавшия у́зы, доса́ду же неудоботерпи́му благоча́дствующия, еди́на моли́тва проро́чицы дре́вле А́нны нося́щия ду́х сокруше́н, к Си́льному, и Бо́гу ра́зумов.

Седа́лен, гла́с 8. Подо́бен: Прему́дрости:

Все́д на о́блаки небе́сныя, оста́вив ми́р су́щым на земли́, возше́л и се́л еси́ одесну́ю Отца́, я́ко Единосу́щен Сему́ сы́й и Ду́ху. А́ще бо и во пло́ти яви́лся еси́, но непрело́жен пребы́л еси́: те́мже ча́еши соверше́ния коне́ц, суди́ти гряды́й на зе́млю ми́ру всему́. Правосу́де Го́споди, пощади́ ду́шы на́шя, прегреше́ний оставле́ние да́руя, я́ко Бо́г ми́лостив, рабо́м Твои́м.

Сла́ва, и ны́не: то́йже. И чте́ние пра́здника.

Пе́снь 4.

Ирмо́с: Услы́шах слу́х си́лы Креста́, я́ко ра́й отве́рзеся и́м, и возопи́х: сла́ва си́ле Твое́й Го́споди.

Возне́слся еси́ во сла́ве, а́нгелов Царю́, Уте́шителя на́м от Отца́ посла́в. Те́мже вопие́м: сла́ва Христе́ Вознесе́нию Твоему́.

Я́ко взы́де Спа́с ко Отцу́ с пло́тию, удиви́шася а́нгельская во́инства, и возопи́ша: сла́ва Христе́ Вознесе́нию Твоему́.

А́нгельския си́лы го́рнейшым вопия́ху: врата́ возми́те, Христу́ на́шему Царю́, Его́же воспева́ем вку́пе со Отце́м и Ду́хом.

Богоро́дичен:

Де́ва роди́, и ма́терняя не позна́: но Ма́ти у́бо е́сть, Де́вою же пребы́сть, Ю́же воспева́юще, ра́дуйся Богоро́дице, взыва́ем.

И́н. Ирмо́с: Седя́й во Сла́ве:

Иису́с Жизнода́вец прии́м, и́хже возлюби́, на Елео́нскую го́ру восхо́дит, и си́х благослови́, и о́блаком носи́мь О́тчая не́дра доспе́, я́же ника́коже бе́ оста́вил.

Ми́р ве́сь пра́зднует ви́димый и неви́димый: в ра́дости а́нгели лику́ют, и челове́цы славосло́вяще непреста́нно Вознесе́ние, пло́тию Соедини́вшагося на́м бла́гостию.

Сла́ва:

Разруши́вый держа́ву сме́рти я́ко безсме́ртный Го́споди, безсме́ртие все́м дарова́л еси́ Человеколю́бче, и Возне́слся еси́ во сла́ве, зря́щым Тя́ честны́м ученико́м Иису́се всеси́льне.

И ны́не: Богоро́дичен:

Блаже́нно чре́во Твое́ Всенепоро́чная бы́сть: чре́во бо а́дово пресла́вно истощи́вшаго, несказа́нно вмести́ти сподо́билася еси́: Его́же моли́ спасти́ на́с пою́щих Тя́.

Катава́сиа: Царю́ царе́й, Яковы́й от Якова́го еди́н Сло́ве произше́дый, от Отца́ безвино́внаго, равномо́щнаго Твоего́ Ду́ха апо́столом и́стинно посла́л еси́, я́ко Благоде́теля пою́щым: сла́ва держа́ве Твое́й Го́споди.

Пе́снь 5.

Ирмо́с: У́тренююще вопие́м Ти́ Го́споди, спаси́ ны: Ты́ бо еси́ Бо́г на́ш, ра́зве бо тебе́ ино́го не зна́ем.

Испо́лнив весе́лия вся́ческая Ми́лостиве, к го́рним си́лам с пло́тию прише́л еси́.

А́нгельския си́лы взе́млема Тебе́ ви́девше, врата́, взыва́ху Царю́ на́шему, возми́те.

Апо́столи ви́девше возвыша́ема Спа́са, с тре́петом взыва́ху Царю́ на́шему: сла́ва Тебе́.

Богоро́дичен:

Де́ву по рождестве́ пое́м Тя́ Богоро́дице, Ты́ бо Бо́га Сло́ва пло́тию ми́рови родила́ еси́.

И́н. Ирмо́с: Ужасо́шася вся́ческая:

Умертви́в сме́рть Твое́ю сме́ртию Го́споди, взе́м и́хже возлюби́л еси́, возше́л еси́ на Ма́сличную го́ру святу́ю, и отту́ду восте́кл еси́ Христе́ к Твоему́ Роди́телю, о́блаком носи́мь.

Стра́нно Твое́ рождество́, стра́нно Твое́ воскресе́ние, стра́нно и стра́шно Твое́ Жизнода́вче, е́же от горы́ Боже́ственное Вознесе́ние, е́же изъобразу́я Илиа́ четвероко́нный восхожда́ше, воспева́я Тя́ Человеколю́бче.

Сла́ва:

Зря́щым апо́столом веща́ху а́нгели: му́жие галиле́йстии, что́ чудите́ся Вознесе́нию Жизнода́вца Христа́: Се́й прии́дет па́ки на зе́млю суди́ти ми́ру всему́, я́ко Судия́ пра́веднейший.

И ны́не: Богоро́дичен:

Де́ву сохрани́в Тя́ по рождестве́ нетле́нну, восхо́дит Христо́с ко Отцу́ Богороди́тельнице, Его́же не оста́ви, а́ще и пло́ть прия́т из Тебе́, мы́сленную же и одушевле́нную, за ми́лость неизрече́нную.

Катава́сиа: Реши́тельное очище́ние грехо́в, огнедохнове́нную приими́те Ду́ха ро́су, о ча́да светообра́зная церко́вная. Ны́не от Сио́на бо изы́де зако́н, языкоогнеобра́зная Ду́ха благода́ть.

Пе́снь 6.

Ирмо́с: Обы́де мя́ бе́здна, гро́б мне́ ки́т бы́сть, а́з же возопи́х к Тебе́ Человеколю́бцу, и спасе́ мя десни́ца Твоя́ Го́споди.

Взыгра́шася апо́столи, зря́ще на высоту́ дне́сь Зижди́теля взе́млема, упова́нием Ду́ха, и стра́хом зовя́ху: сла́ва восхо́ду Твоему́.

Предста́ша а́нгели, вопию́ще Христе́ ученико́м Твои́м: и́мже о́бразом ви́десте Христа́ восходя́ща с пло́тию, па́ки прии́дет Пра́ведный все́х Судия́.

Я́ко ви́деша Тя́ Спа́се на́ш небе́сныя си́лы, на высоту́ взе́млема с те́лом, взыва́ху, глаго́люще: вели́ко Влады́ко, человеколю́бие Твое́.

Богоро́дичен:

Купину́ Тя неопали́мую, и го́ру, и ле́ствицу одушевле́нную, и две́рь небе́сную досто́йно сла́вим Мари́е сла́вная, правосла́вных похвало́.

И́н. Ирмо́с: Боже́ственное сие́ и всечестно́е:

Да ка́плют на́м свы́ше о́блацы весе́лие ве́чное, Христо́с бо, о́блаком я́ко херуви́мы носи́мый, к Своему́ Отцу́ восхо́дит дне́сь.

Пло́ти яви́вся подо́бием, пре́жде разстоя́щаяся собра́л еси́ во еди́но Человеколю́бче, и Возне́слся еси́ Ще́дре в небе́сная, зря́щым Тя́ ученико́м Твои́м.

Сла́ва: Что́ червле́ны ри́зы пло́ти соедини́вшагося дебельству́? Святи́и а́нгели Христа́ зря́ще веща́ху, стра́сти честны́я Боже́ственныя нося́ща о́бразы.

И ны́не: Богоро́дичен:

Пое́м отрокови́це зача́тие, пое́м Твое́ неизрече́нное рождество́, и́мже изба́вихомся Чи́стая тли́ и озлобле́ния, и мра́чнаго а́дова затворе́ния.

Катава́сиа: Очище́ние на́м Христе́ и спасе́ние Влады́ко, возсия́л еси́ от Де́вы, да я́ко проро́ка от зве́ря морска́го пе́рсей Ио́ну, от тли́ исхити́ши всего́ Ада́ма всеро́дна па́дшаго.

Конда́к самогла́сен, гла́с 6:

Е́же о на́с испо́лнив смотре́ние, и я́же на земли́ соедини́в Небе́сным, Возне́слся еси́ во сла́ве Христе́ Бо́же на́ш, ника́коже отлуча́яся, но пребыва́я неотсту́пный, и вопия́ лю́бящым Тя́: Аз е́смь с ва́ми, и никто́же на вы́.

И́кос:

Я́же земли́ на земли́ оста́вившии, я́же пе́пельная пе́рсти уступа́ющии, прииди́те воспря́нем, и на высоту́ возведе́м о́чи и мы́сли, впери́м ви́ды, вку́пе чу́вства, на небе́сная врата́ сме́ртнии, непщу́им бы́ти в Ма́сличной горе́, и взира́ти на Избавля́ющаго на о́блацех носи́ма. Отону́ду бо Госпо́дь на небеса́ востече́, и та́мо даролюбе́зны да́ры раздая́ апо́столом Свои́м, уте́шив я́ я́ко Оте́ц, и утверди́в я́, наста́вив я́ко сыно́в, и рече́ к ни́м: не разлуча́юся ва́с, Аз е́смь с ва́ми, и никто́же на вы́.

Синакса́рь на Вознесе́ние Го́спода Бо́га и Спа́са на́шего Иису́са Христа́.

Стихи́: Одесну́ю се́л еси́ Отца́ Сло́ве:

Ве́ру ученико́м изве́стншую показа́вый.

В то́йже де́нь, в четверто́к шесты́я неде́ли по Па́сце, Вознесе́ние пра́зднуем Го́спода Бо́га и Спа́са на́шего Иису́са Христа́. Поне́же бо со ученики́ пре́жде стра́сти пребыва́я, Всесвята́го Ду́ха обеща́ прише́ствие, ре́к: поле́зно е́сть, да Аз иду́: а́ще бо Аз не иду́, Уте́шитель не прии́дет. И па́ки: егда́ же прии́дет Он, научи́т ва́с на всю́ и́стину. По воскресе́нии же из ме́ртвых, во дне́х четы́редесятих явля́яся и́м, не вку́пе, но особопребыва́нием яды́й с ни́ми и пия́, изве́стнейшее воскресе́ние представля́я. Коне́чнее мно́га о Ца́рствии Бо́жии обетова́в, запове́даше си́м от Иерусали́ма не отлуча́тися, но та́мо пребыва́ти, Пресвята́го Ду́ха прише́ствия жда́ти, и Те́м креща́емым: водо́ю бо бя́ше и еди́ною пре́жде креще́ние от Иоа́нна, а́ще и по́слежде Епифа́ний Ки́прский повествова́: я́ко Богосло́в у́бо Иоа́нн Богоро́дицу крести́, Пе́тр же и то́й и про́чыя апо́столы. Запове́да же и́м пребыва́ти во Иерусали́ме, да та́мо пре́жде про́поведь Ева́нглиа извести́тся, да не ка́ко в чужда́я отше́дше места́, удо́бно обо́лгани бу́дут, и я́ко до́лжно бя́ше, я́ко во́ином не́ким отсю́ду угото́витися ору́жием Ду́ха, и та́ко на бра́нь поити́ вра́г Христо́вых. Но поне́же вре́мя наста́ Вознесе́ния, возво́дит у́бо и́х на го́ру Елео́нскую: нарица́ется же си́це, зане́ мно́жайшими ма́слинами насажде́на бе́. И глаго́лав и́м о е́же в конце́ сего́ пропове́дания: еще́ же и о непостижи́мом Свое́м Ца́рствии в бу́дущем, поне́же и о́нех не искуша́ти Его́ хотя́щих зря́ще, су́щей та́мо и Пречи́стей Его́ Ма́тери, приставля́ет а́нгелы и́м, на небеса́ восхожде́ние показу́ющыя. И зря́щым у́бо взя́тся от среды́ и́х, о́блаку О́наго подъи́мшу, и та́ко от а́нгел предсыла́емь, повелева́ющих дру́г дру́гу небе́сных двере́й взя́тие, и дивя́щихся е́же от крове́й пло́ти Его́ червле́нному, взы́де и се́де одесну́ю Отца́, обожи́в пло́ть и дерзну́ глаго́лати, сотвори́в сию́ ку́пно боже́ственную, е́юже мы́ примири́хомся, дре́вней вражде́ разруши́вшейся. Апо́столом у́бо а́нгели в ви́де муже́й предста́ша глаго́люще: му́жие галиле́йстии, что́ стоите́ дивя́щеся, и на не́бо взира́юще? Се́й Его́же ви́дите с пло́тию Бо́га Иису́са, Се́й прии́дет па́ки с пло́тию я́ве: оба́че не я́коже пе́рвее, убо́зе же и молчали́вне, но со сла́вою вели́кою, я́коже ны́не зрите́ от а́нгел провожда́ема. Тогда́ апо́столи е́же взира́ти оста́вльше, возврати́шася от горы́ Елео́н: бли́з же сия́ е́сть от Иерусали́ма две́ ты́сящи и четы́редесять ножны́х сто́п, разстоя́щи е́й: се́ бо е́сть суббо́те пу́ть. Си́це же узако́нено бы́сть Моисе́ем на толи́ко сто́п в суббо́ту ходи́ти, зане́же и се́нь свиде́ния, толи́цеми стопа́ми но́гу бя́ше отстоя́щи от иуде́йскаго полка́. Возмо́жно бо бе́ не́ким та́мо в суббо́ту ходи́ти поклони́тися, и не вя́щшее ше́ствие протяза́ти, сего́ ра́ди нарече́ся и суббо́ты пу́ть. Мни́тся же не́ким отсю́ду, я́ко и Христо́во Вознесе́ние в суббо́ту бы́сть, оба́че погреши́ша. Возвра́щшеся же апо́столи внидо́ша в го́рницу, в не́йже бе́ша соше́дшеся с мироно́сицами жена́ми, и Ма́терию Сло́ва, посто́м и моли́твами, и моле́нием упражня́ющеся, и наше́ствия Всесвята́го Ду́ха ожида́юще, я́коже бе́ обеща́ние. Вознесы́йся во сла́ве Христе́ Бо́же, поми́луй на́с. Ами́нь.

Пе́снь 7.

Ирмо́с: В пещи́ о́гненней песносло́вцы спасы́й о́троки, благослове́н Бо́г оте́ц на́ших.

На о́блацех све́та Вознесы́йся, и спасы́й ми́р, благослове́н Бо́г оте́ц на́ших.

На ра́му Спа́се, заблу́ждшее взе́м естество́, Возне́сся, Бо́гу и Отцу́ приве́л еси́.

Возше́дый во пло́ти к безпло́тному Отцу́, благослове́н Бо́г оте́ц на́ших.

Умерщвле́ное на́ше грехо́м естество́ взе́м, Твоему́ сво́йственному Отцу́ Спа́се приве́л еси́.

Богоро́дичен:

От Де́вы ро́ждся, Ю́же Богоро́дицу соде́лал еси́, благослове́н Бо́г оте́ц на́ших.

И́н. Ирмо́с: Не послужи́ша тва́ри:

Све́тлый Тя́ Све́т су́ща, подъя́т о́блак Го́споди, от земли́ па́че ума́ восприе́млема и небе́снии собо́ри восхвали́ша со апо́столы, глаго́люще: Бо́же благослове́н еси́.

Рука́ма вси́ ра́дующеся воспле́щим, Вознесе́нием христо́вым, и воскли́кнем: взы́де Бо́г во гла́се тру́бне, и се́де одесну́ю, я́ко сопресто́лен Отцу́ во ве́ки.

Сла́ва:

Поя́ дре́вле Моисе́й вели́кий, взыва́ше: да покло́нятся восходя́щу Христу́ небе́снии а́нгели, я́ко все́х Царю́, ему́же зове́м: отце́в Го́споди и Бо́же благослове́н еси́.

И ны́не: Богоро́дичен:

О чуде́с пресла́вных! Ка́ко вмести́ла еси́ Бо́га невмести́маго богора́дованная, пло́тию обнища́вшаго, со сла́вою мно́гою в небе́сная Возне́сшагося дне́сь, и оживи́вшаго челове́ки?

Катава́сиа: Согла́сная возшуме́ орга́нская пе́снь, почита́ти златосотворе́нный безду́шный истука́н: Уте́шителева же светоно́сная благода́ть почеству́ет, е́же вопи́ти: Тро́ице Еди́ная, равноси́льная, безнача́льная, благослове́на еси́.

Пе́снь 8.

Ирмо́с: Из отца́ пре́жде ве́к рожде́ннаго Сы́на, и Бо́га, и в после́дняя ле́та воплоще́ннаго от Де́вы Ма́тере, свяще́нницы по́йте, лю́дие превозноси́те во вся́ ве́ки.

Во двою́ существу́ возлете́вшаго Жизнода́вца Христа́ на небеса́ со сла́вою, и Отцу́ соседя́щаго, свяще́нницы по́йте, лю́дие превозноси́те во вся́ ве́ки.

От рабо́ты и́дольския тва́рь изба́вившаго, и предста́вившаго ту́ свобо́дну Твоему́ Отцу́, Тебе́ Спа́се пое́м, и Тебе́ превозно́сим во вся́ ве́ки.

Свои́м схожде́нием низложи́вшаго супоста́та, и Свои́м возше́ствием Возне́сшаго челове́ки, свяще́нницы по́йте, лю́дие превозноси́те во вся́ ве́ки.

Богоро́дичен:

Херуви́мов превы́шшая яви́лася еси́ Богоро́дице Чи́стая, во чре́ве Твое́м си́ми Носи́маго носи́вшая: Его́же со безпло́тными, челове́цы славосло́вим во вся́ ве́ки.

И́н. Ирмо́с: О́троки благочести́выя:

Яви́шася у́мове апо́столом в Вознесе́нии, и веща́ху: что́ взира́юще стоите́ дивя́щеся? Се́й восходя́й в небе́сная, прии́дет и па́ки суди́ти и́же на земли́ челове́ком, Судия́ сы́й Еди́н.

Дади́м Бо́гу вели́чие, хвалы́ согла́сие воскли́кнем, воспои́м, лику́им, рука́ми же воспле́щим: взы́де Бо́г на́ш на небеса́ от земли́, а́нгелом, арха́нгелом пою́щым Сего́, я́ко Влады́ку и Творца́ все́х.

Благослови́м Отца́, и Сы́на, и Свята́го Ду́ха, Го́спода.

Взя́тся превы́ше а́нгел естество́ на́ше, дре́вле отпа́дшее, и на престо́ле посажде́но бы́сть Боже́ственне, па́че смы́сла: прииди́те торжеству́им и воззове́м: Го́спода по́йте дела́, и превозноси́те во вся́ ве́ки.

И ны́не:

Се́ Сы́н Тво́й Богоро́дице, плени́в Кресто́м Cвои́м сме́рть, воскре́се тридне́вен, и ученико́м Cвои́м я́влься, востече́ к небе́сным: с ни́миже Тебе́ покланя́ющеся пое́м и славосло́вим во вся́ ве́ки.

Та́же, Хва́лим, благослови́м, покланя́емся:

Катава́сиа: Разреша́ет у́зы, и ороша́ет пла́мень, трисве́тлый Богонача́лия О́браз: пою́т о́троцы, благослови́т же Еди́наго Спа́са и Вседе́теля, я́ко Благоде́теля сотворе́нная вся́ческая тва́рь.

Честне́йшую: не пое́м, но пое́м припе́в:

Велича́й душе́ моя́, Возне́сшагося от земли́ на не́бо, христа́ жизнода́вца.

Пе́снь 9.

Ирмо́с: Тя́ па́че ума́ и словесе́ Ма́терь Бо́жию, в ле́то Безле́тнаго неизрече́нно ро́ждшую ве́рнии единому́дренно велича́ем.

Тебе́ изба́вителя ми́ра Христа́ Бо́га, апо́столи ви́дяще Боже́ственно возвыша́ема, со стра́хом игра́юще велича́ху.

Твою́ обожи́вшуюся пло́ть зря́ще Христе́, на высоте́ а́нгели, дру́г ко дру́гу глаго́лаху: вои́стинну Се́й е́сть Бо́г на́ш.

Тебе́ безпло́тных чи́нове Христе́ Бо́же, на о́блацех взе́млема ви́дяще, взыва́ху: сла́вы Царю́, врата́ возми́те.

Тебе́ соше́дшаго да́же до после́дних земли́, и челове́ка спа́сшаго, и восхожде́нием Твои́м возвы́сившаго, сего́ велича́ем.

Богоро́дичен:

Ра́дуйся Богоро́дице Ма́ти Христа́ Бо́га: Его́же родила́ еси́, дне́сь от земли́ возноси́ма со апо́столы зря́щи, возвелича́ла еси́.

Вторы́й припе́в:

А́нгели восхожде́ние Влады́ки зря́ще ужаса́хуся, ка́ко со сла́вою взя́тся от земли́ на го́рняя.

И́н. Ирмо́с: Вся́к земноро́дный:

О даро́в па́че постиже́ния! О та́инства стра́шнаго! Все́ми бо влады́чествуяй, от земли́ отходя́ к небе́сным, ученико́м посла́ Ду́ха Свята́го, просвети́вшаго си́х смы́сл, и о́гненны сотвори́вшаго благода́тию.

Полцы́ учени́честии, Госпо́дь рече́, вы́ седи́те во Иерусали́ме: и Аз низпослю́ ва́м уте́шителя друга́го, Отцу́ сопресто́льна и Мне́ равноче́стна, Его́же ви́дите взима́ема, и о́блаком све́тлым носи́ма.

Взя́тся я́ве великоле́пие вы́ше небе́с, пло́тию обнища́вшаго, и соседе́нием Отца́ почте́ся естество́ на́ше отпа́дшее: торжеству́им, и согла́сно вси́ воскли́кнем, воспле́щим рука́ми ра́дующеся.

Богоро́дичен:

Све́т от Све́та возсия́вый Всенепоро́чная, из Тебе́ возсия́, и че́рность безбо́жия всю́ разруши́, и в нощи́ спя́щих просвети́. Сего́ ра́ди вси́ по до́лгу Тя́ во ве́ки при́сно ублажа́ем.

Катава́сиа: Ра́дуйся Цари́це, Ма́тероде́вственная сла́во: вся́ка бо удобообраща́тельная благоглаго́ливая уста́ вити́йствовати не мо́гут, Тебе́ пе́ти досто́йно: низумева́ет же у́м вся́к, Твое́ Рождество́ разуме́ти. Те́мже Тя́ согла́сно сла́вим.

Ексапостила́рий самогла́сен:

Ученико́м зря́щым Тя́, Возне́слся еси́ Христе́ ко Отцу́ соседя́, а́нгели предтеку́ще зовя́ху: возми́те врата́, возми́те, Ца́рь бо взы́де к нача́льному Све́ту сла́вы. [Три́жды.]

На хвали́тех, Вся́кое дыха́ние: поста́вим стихи́ 4 и пое́м стихи́ры, гла́с 1. Подо́бен: Небе́сных чино́в:

А́нгельски и́же в ми́ре торжеству́им, на престо́ле сла́вы Бо́гу носи́мому, взыва́юще пе́ние: Свя́т еси́ О́тче небе́сный, Сприсносу́щный Сло́ве, Свя́т еси́ и Ду́ше Всесвяты́й.

Нача́льницы а́нгелов смотря́юще, Спа́се, восхожде́ния стра́нное, недоумева́хуся дру́г ко дру́гу: что́ виде́ние сие́? Челове́к у́бо зра́ком ви́димый, я́коже Бо́г, превы́ше небе́с с пло́тию восхо́дит.

Галиле́ане зря́ще Тя́ Вознесе́нна, от Ма́сличныя горы́ с те́лом Сло́ве, слы́шаху а́нгелов вопию́щих и́м: что́ стоите́ зря́ще? Се́й прии́дет па́ки с пло́тию, и́мже о́бразом ви́десте.

Повторя́юще 1-ю.

Сла́ва, и ны́не, гла́с 2:

Роди́лся еси́ я́ко Са́м восхоте́л еси́, яви́лся еси́ я́ко Са́м изво́лил еси́: пострада́л еси́ пло́тию Бо́же на́ш, из ме́ртвых воскре́сл еси́ попра́в сме́рть. Возне́слся еси́ во сла́ве, вся́ческая исполня́яй, и посла́л еси́ на́м Ду́ха Боже́ственнаго, е́же воспева́ти и сла́вити Твое́ Божество́.

Славосло́вие вели́кое. Дае́тся и святы́й еле́й бра́тии. И поуче́ние Студи́тово. И ча́с 1-й в притво́ре. И соверше́нный отпу́ст.

На литурги́и пое́м настоя́щыя антифо́ны, псало́м 46, гла́с 2: Вси́ язы́цы восплещи́те рука́ми, воскли́кните Бо́гу гла́сом ра́дования. Моли́твами Богоро́дицы Спа́се спаси́ на́с. Сти́х 2: Я́ко Госпо́дь Вы́шний стра́шен, Ца́рь ве́лий по все́й земли́. Моли́твами Богоро́дицы: Сти́х 3: Покори́ лю́ди на́м и язы́ки под но́ги на́шя. Моли́твами Богоро́дицы: Сти́х 4: Взы́де Бо́г в воскликнове́нии, Госпо́дь во гла́се тру́бне. Моли́твами Богоро́дицы Спа́се спаси́ на́с. Сла́ва, и ны́не: Моли́твами Богоро́дицы Спа́се спаси́ на́с.

Антифо́н 2, псало́м 47, гла́с 2. Сти́х 1: Ве́лий Госпо́дь и хва́лен зело́, во гра́де Бо́га на́шего в горе́ святе́й Его́. Спаси́ на́с Сы́не Бо́жий, Вознесы́йся во сла́ве, пою́щыя Ти́: Аллилу́иа. Сти́х 2: Го́ры Сио́нския, ре́бра Се́верова, гра́д Царя́ вели́каго. Спаси́ на́с Сы́не Бо́жий: Сти́х 3: Бо́г в тя́жестех Его́ зна́емь е́сть, егда́ заступа́ет и́. Спаси́ на́с Сы́не Бо́жий, Вознесы́йся: Сти́х 4: Я́ко се́ ца́рие зе́мстии собра́шася, снидо́шася вку́пе: Спаси́ на́с Сы́не Бо́жий, Вознесы́йся: Сла́ва, и ны́не: Единоро́дный Сы́не:

Антифо́н 3, псало́м 48, гла́с 4. Сти́х 1. услы́шите сия́ вси́ язы́цы, внуши́те вси́ живу́щии по вселе́нней. Тропа́рь, гла́с 4: Возне́слся еси́ во сла́ве Христе́ Бо́же на́ш: Сти́х 2: Земноро́днии же и сы́нове челове́честии, вку́пе бога́т и убо́г. Тропа́рь: Возне́слся еси́ во сла́ве: Сти́х 3: уста́ моя́ возглаго́лют прему́дрость, и поуче́ние се́рдца моего́ ра́зум. Тропа́рь: Возне́слся еси́ во сла́ве: Сти́х 4: Приклоню́ в при́тчу у́хо мое́, отве́рзу во псалти́ри гана́ние мое́. Тропа́рь: Возне́слся еси́: Вхо́дный: Взы́де Бо́г в воскликнове́нии, Госпо́дь во гла́се тру́бне. Тропа́рь: Возне́слся еси́: Сла́ва, и ны́не: конда́к: Е́же о на́с испо́лнив: Та́же трисвято́е. Проки́мен, гла́с 7: Вознеси́ся на небеса́ Бо́же, и по все́й земли́ сла́ва твоя́. Сти́х: Гото́во се́рдце мое́ Бо́же, гото́во се́рдце мое́: воспою́ и пою́ во сла́ве мое́й.

Апо́стол в дея́ниих, зача́ло 1: Пе́рвое у́бо сло́во сотвори́х: Аллилу́иа, гла́с 2: Взы́де Бо́г в воскликнове́нии, госпо́дь во гла́се тру́бне. Сти́х: Вси́ язы́цы восплещи́те рука́ми, воскли́кните Бо́гу гла́сом ра́дования.

Ева́нглие Луки́, зача́ло 114: Воскре́с Иису́с от ме́ртвых, и ста́ посреде́ учени́к Свои́х: За Досто́йно, пое́м и до отда́ния ирмо́с: Тя́ па́че ума́: Прича́стный: Взы́де Бо́г в воскликнове́нии, Госпо́дь во гла́се тру́бне. Аллилу́иа, три́жды.

На трапе́зе ве́лие утеше́ние бра́тии.

В четверто́к ве́чера Вознесе́ния

кафи́смы не глаго́лем: а́ще ли где́ всено́щное не бы́сть, кафи́сму глаго́лем рядову́ю.

На Го́споди воззва́х: поста́вим стихо́в 6: и пое́м стихи́ры самогла́сны пра́здника 3. И Мине́и 3.

Пра́здника, гла́с 1:

Возше́д на небеса́, отону́дуже и соше́л еси́, не оста́ви на́с си́рых Го́споди: да прии́дет Тво́й Ду́х, нося́ ми́р ми́рови, покажи́ сыново́м челове́ческим дела́ си́лы Твоея́, Го́споди Человеколю́бче.

Возше́л еси́ Христе́ к Безнача́льному Отцу́ Твоему́, неопи́санных Его́ не́др не разлучи́выйся, и прило́г си́лы хвале́ния трисвята́го не прия́ша, но еди́наго Сы́на и по вочелове́чении позна́ша Тя́ Го́споди, Единоро́дна Отцу́: во мно́жестве щедро́т Твои́х поми́луй на́с.

А́нгели Твои́ Го́споди, апо́столом глаго́лаху: му́жие галиле́йстии, что́ стоите́, зря́ще на не́бо? Се́й е́сть Христо́с Бо́г, Вознесы́йся от ва́с на не́бо, то́й прии́дет па́ки, и́мже о́бразом ви́десте Его́ иду́ща на не́бо: послужи́те Ему́ в преподо́бии и пра́вде.

Сла́ва: свята́го, а́ще и́мать, а́ще же ни́:

Сла́ва, и ны́не: гла́с 2:

Роди́лся еси́ я́ко Са́м восхоте́л еси́, яви́лся еси́ я́ко Са́м изво́лил еси́: пострада́л еси́ пло́тию Бо́же на́ш, из ме́ртвых воскре́сл еси́ попра́в сме́рть: Возне́слся еси́ во сла́ве, вся́ческая исполня́яй, и посла́л еси́ на́м Ду́ха Боже́ственнаго, е́же воспева́ти и сла́вити Твое́ Божество́.

Вхо́д. Све́те ти́хий: Проки́мен вели́кий, гла́с 7: Бо́г на́ш на небеси́ и на земли́, вся́ ели́ка восхоте́ сотвори́. Сти́х: Во исхо́де Изра́илеве от Еги́пта, до́му Иа́ковля: Сти́х: Мо́ре ви́де и побеже́, Иорда́н возврати́ся вспя́ть. Сти́х: Что́ ти е́сть мо́ре, я́ко побе́гло еси́? И тебе́ Иорда́не, я́ко возврати́лся еси́ вспя́ть? И па́ки: Бо́г на́ш на небеси́ и на земли́: Ектении́: Рце́м вси́: Испо́лним вече́рнюю моли́тву:

На стихо́вне стихи́ры, гла́с 2.

Подо́бен: Егда́ от дре́ва:

Глаго́лет И́же вся́ческая Исполня́яй, ко ученико́м на го́ру Елео́нскую возше́д: прибли́жися, о дру́зи Мои́, восхожде́ния вре́мя, ше́дше научи́те язы́ки сло́ву, е́же слы́шасте от гла́са Моего́. Тогда́ Возне́слся еси́ во сла́ве я́коже на колесни́це: те́мже тре́петом апо́столи ужаса́хуся.

Сти́х: Вси́ язы́цы восплещи́те рука́ми:

Егда́ Ма́тери со ученики́ спутеше́ствующым дру́г дру́гу в Вифа́нию Христе́, Возне́сл еси́ ру́це Твои́, во благослове́ние и́х, и внегда́ благослови́ти и́х, о́блак све́та от оче́с и́х а́бие взя́т Тя́: тогда́ Возне́слся еси́ во сла́ве, и Десноседа́тель вои́стинну яви́лся еси́ Отцу́ спокланя́емь.

Сти́х: Взы́де Бо́г в воскликнове́нии:

Прииди́те, совзы́дем ве́рнии на высо́кую го́ру Елео́нскую, я́коже апо́столи совосходя́ще, и на высоту́ взе́мше сердца́, и мы́сли, у́зрим Го́спода ны́не носи́ма. Те́мже и мы́ благода́рно ра́дующеся возопии́м: сла́ва Вознесе́нию Твоему́ Многоми́лостиве.

Сла́ва и ны́не: гла́с 6:

На гора́х святы́х зря́ще Твое́ Вознесе́ние Христе́, Сия́ние сла́вы О́тчи, воспева́ем Тво́й светообра́зный лица́ зра́к, кла́няемся Страсте́м Твои́м, почита́ем Воскресе́ние, сла́вное Вознесе́ние сла́вяще: поми́луй на́с.

Тропа́рь пра́здника: Возне́слся еси́: И отпу́ст.

Слу́жбу Мине́и рядова́го свята́го, случи́вшагося в пра́здник Вознесе́ния, пое́м на повече́рии.


 СредаЧетвергПятница