Библиотеке требуются волонтёры

Среда

В сре́ду тре́тия неде́ли по па́сце на у́трени,

на Бог Госпо́дь: тропа́рь пра́здника. По 1-м стихосло́вии, седа́лен, глас 2:

Спасе́ние соде́лал еси́ посреде́ земли́ Христе́ Бо́же, на кресте́ пречи́стеи ру́це Твои́ просте́рл еси́, собира́я вся́ язы́ки зову́щыя: Го́споди сла́ва Тебе́.

Стих: Воскресни́ Го́споди Бо́же мой:

Воскре́с из гро́ба, и у́зы растерза́л еси́ а́да, разруши́л еси́ осужде́ние сме́рти Го́споди, вся́ от сете́й врага́ изба́вивый: яви́вый же Себе́ апо́столом Твои́м, посла́л еси́ я́ на про́поведь, и те́ми мир Твой по́дал еси́ всей вселе́нней, еди́не Многоми́лостиве.

Стих: Ди́вен Бог во святы́х Свои́х, Бог Изра́илев.

Му́ченичен: Страстоте́рпцы Госпо́дни, блаже́нна земля́ напи́вшаяся кровьми́ ва́шими, и свя́та селе́ния прие́мшая телеса́ ва́шя: в по́двизе бо врага́ победи́сте, и Христа́ со дерзнове́нием пропове́дасте. Того́ я́ко Бла́га моли́те, спасти́ся, мо́лимся душа́м на́шым.

Сла́ва и ны́не: Крестобогоро́дичен:

Предстоя́щи Кресту́ Твоему́ безсе́менно Ро́ждшая Тя́, и не терпя́щи ви́дети непра́ведно стра́ждуща, рыда́ше с пла́чем, и вопия́ше Тебе́: ка́ко стра́ждеши естество́м безстра́стный, сладча́йший Сы́не? Воспева́ю Твою́ кра́йнюю благосты́ню.

По 2-м стихосло́вии, седа́лен, глас 2:

Подо́бен: Благоутро́бия:

Ко гро́бу Твоему́ Спа́се, честны́я мироно́сицы прише́дшя, Влады́ку пома́завшыя ми́ры, я́ко Челове́ка Тя́ мня́ху: а́нгел же им ра́дость возвести́, воскре́се Госпо́дь. Тем и пропове́дите апо́столом, из гро́ба вои́стинну стра́шное Его́ Воскресе́ние.

Сла́ва, и ны́не: то́йже.

Воскресе́ние Христо́во: и псало́м 50. Кано́н пра́здника, со ирмосы́ на 8, и Мине́и на 4: конда́к, и ексапостила́рий пра́здника.

На хвали́тех поста́вим стихи́ 4. и пое́м настоя́щыя стихи́ры, глас 2.

Во́лею обнища́в нището́ю Ада́млею Христе́ Бо́же, прише́л еси́ на зе́млю от Де́вы вопло́щся, и Кре́ст восприя́л еси́, да нас свободи́ши от рабо́ты вра́жия: Го́споди сла́ва Тебе́. [Два́жды.]

Ра́дуйтеся лю́дие и весели́теся, а́нгел седя́й на ка́мени гро́бнем, той нам благовести́, рек: Христо́с воскре́се из ме́ртвых, Спас ми́ра, и испо́лни вся́ческая благоуха́ния: ра́дуйтеся лю́дие и весели́теся.

Му́ченичен:

Святы́х Твои́х мно́жества мо́лят Тя́ Христе́, поми́луй нас я́ко Человеколю́бец.

Сла́ва, и ны́не: глас 1:

Со стра́хом приидо́ша жены́ на гроб, арома́ты те́ло Твое́ пома́зати тща́щеся, и сие́ не обре́тше, недоумева́хуся друга́ ко друзе́й, не ве́дуще Воскресе́ния, но предста́ им а́нгел, и рече́: воскре́се Христо́с, да́руяй нам ве́лию ми́лость.

На стихо́вне стихи́ры, глас 2.

Подо́бен: Егда́ от Дре́ва:

У́бо в ме́ртвых ли Изба́витель? рыда́ньми мироно́сицы вопия́ху, Христо́вы учени́цы. Со́лнце же преве́лие да́же и до дне́сь под земле́ю ли, или́ воскре́се, я́коже рече́? и си́це пла́чущым, от гро́ба а́нгел Боже́ственную вои́стинну ра́дость рече́: Христо́с воскре́се, тецы́те, пропове́дите всем, Его́ из гро́ба Боже́ственное Воскресе́ние.

Стих: Благоволи́л еси́ Го́споди зе́млю Твою́:

Ми́ра угото́ваша честна́я, еще́ тме́ су́щей во еди́ну от суббо́т, приидо́ша на гроб Твой мироно́сицы Христе́, е́же пома́зати пречи́стое и Боже́ственное Твое́ те́ло. Те́мже Воскресе́ние уве́девшя Твое́, потща́хуся возвести́ти и таи́нником: и́хже предсре́т из гро́ба, ра́дуйтеся, возопи́л еси́ человеколю́бнейше.

Стих: Ми́лость и и́стина срето́стеся:

Вы́шняго Бо́га на земли́ погребе́на, я́ко ме́ртва пома́зати тща́тся Его́ учени́цы, арома́ты честны́ми: и во гро́бе седя́ща но́ва ю́ношу, ви́девшя в блиста́ющем зра́це, ужасо́шася. Те́мже Сло́ва из гро́ба воста́ние тридне́вное уве́девшя, и апо́столом возвеща́ху.

Сла́ва, и ны́не, глас 5:

Тебе́, оде́ющагося све́том я́ко ри́зою, снем Ио́сиф с Дре́ва с Никоди́мом, и ви́дев ме́ртва, на́га, непогребе́на, благосе́рдный пла́чь восприи́м, рыда́я глаго́лаше: увы́ мне́ сладча́йший Иису́се, Его́же вма́ле со́лнце на Кресте́ ви́сима узре́вшее мра́ком облага́шеся, и земля́ стра́хом колеба́шеся, и раздира́шеся церко́вная заве́са: но се́ ны́не ви́жу Тя́, мене́ ра́ди во́лею подъе́мша сме́рть. Ка́ко погребу́ Тя Бо́же мой, или́ како́ю плащани́цею обвию́? ко́има ли рука́ма прикосну́ся нетле́нному Твоему́ те́лу? или́ ки́я пе́сни воспою́ Твоему́ исхо́ду Ще́дре, велича́ю стра́сти Твоя́, песносло́влю и погребе́ние Твое́ со Воскресе́нием, зовы́й: Го́споди сла́ва Тебе́.

Та́же тропари́ пра́здника. Час 1. И отпу́ст.

В сре́ду 3-я неде́ли ве́чера,

на Го́споди воззва́х: поста́вим стихо́в 6: пра́здника 3, и Мине́и 3.

Стихи́ры пра́здника, глас 2. Подо́бен: Егда́ от дре́ва:

Глаго́лы услы́шавшя ра́дости, от ю́нош приседя́щих гро́бу Сло́ва, тече́ние показа́ша тщали́вейшаго устремле́ния: и чин оста́вльше пре́жняго мироноше́ния, я́ко благове́стницы яви́шася, воста́ние от преиспо́дних а́да благовеству́юще таи́нником, о нас вочелове́чшагося.

У́тро предвари́вшя глубо́кое, стра́хом мироно́сицы жены́ гро́бу предста́ша, ми́ра принося́ще Жизнода́вцу Христу́, в ме́ртвых вменя́юще, ад умертви́вшаго. Но боже́ственный а́нгел предста́ тем вопия́: что́ Живоно́снаго и Жива́го с ме́ртвыми и́щете? иди́те воста́ние пропове́дающе.

Несе́ши на ра́му херуви́мскую почива́ющаго, блаже́нне Ио́сифе, я́ко ино́е носи́ло на ра́му твое́ю, воплоще́нна пре́жде, и ны́не умерщвле́нна, и́же оживотвори́ нас умерщвле́нных: Его́же Воскресе́ние зря́, ра́дуешися с честны́ми мироно́сицами, а́ще и предрыда́сте сего́ умерщвле́ние.

Сла́ва и ны́не: глас 1:

Приидо́ша на гроб Магдали́на и друга́я Мари́а, и́щуще Го́спода, и а́нгела ви́деша я́ко мо́лнию седя́ща на ка́мени, и глаго́люща им: что́ и́щете жива́го с ме́ртвыми? воскре́се, я́коже рече́, в Галиле́и Его́ обря́щете. К Нему́же возопии́м: воскресы́й из ме́ртвых, Го́споди сла́ва тебе́.

Та́же, Све́те ти́хий:

На стихо́вне стихи́ра воскре́сна, глас 2:

Воскресе́ние Твое́ Христе́ Спа́се, всю́ просвети́ вселе́нную и призва́л еси́ Твое́ созда́ние: всеси́льне Го́споди сла́ва Тебе́.

Стих: В Тебе́ возведо́х о́чи мои́:

Апо́столом: Возвели́чил еси́ Спа́се во вселе́нней, верхо́вных апо́стол имена́: навыко́ша небе́сным неизрече́нным, да́ша су́щым на земли́ исцеле́ния, и се́ни их са́мыя стра́сти уврачева́ху. И́же от ры́барей чудотворя́ше, и и́же от иуде́й, богосло́вяше благода́ти уче́ния: и́миже Благоутро́бне, да́ждь нам вели́кую Твою́ ми́лость.

Стих: Поми́луй нас Го́споди, поми́луй нас:

Му́ченичен: Ве́лия сла́ва, ю́же стяжа́сте святи́и ве́рою: не то́кмо бо внегда́ пострада́ти, врага́ победи́сте, но и по сме́рти ду́хи прогоня́ете, неду́жныя исцеля́ете, душ и теле́с вра́чеве, моли́теся ко Го́споду, поми́ловатися душа́м на́шым.

Сла́ва, и ны́не: глас 2:

Возлия́ша ми́ра со слеза́ми на гроб Твой жены́, и испо́лнишася ра́дости уста́ их, внегда́ глаго́лати: воскре́се Госпо́дь.

Та́же, Ны́не отпуща́еши: Трисвято́е. Тропа́рь, и отпу́ст.

Комментарии для сайта Cackle