Пятница

В пято́к 3-я седми́цы по Па́сце на у́трени,

на Бог Госпо́дь: тропа́рь пра́здника.

По 1-й кафи́сме седа́лен, глас 2:

Пречи́стому о́бразу Твоему́ покланя́емся Благи́й, прося́ще проще́ния прегреше́ний на́ших Христе́ Бо́же: во́лею бо благоволи́л еси́ пло́тию взы́ти на Кре́ст, да изба́виши, я́же созда́л еси́, от рабо́ты вра́жия. Тем благода́рственно вопие́м Ти́: ра́дости испо́лнил еси́ вся́ Спа́се наш, прише́дый спасти́ мир.

Стих: Испове́мся Тебе́ Го́споди:

Ка́мень гро́бный запеча́тати не возбрани́в, ка́мень ве́ры воскресы́й по́дал еси́ всем, Го́споди сла́ва Тебе́.

Стих: Ди́вен Бог во святы́х Свои́х:

Му́ченичен: Егда́ во страда́льчествех подвиза́шася Госпо́дни му́ченицы, тогда́ де́рзость помрача́шеся нечести́вых ве́рою. Егда́ же ле́сть и́долов боже́ственно упраздни́ша, тогда́ венцы́ побе́ды восприя́ша свы́ше, и мо́лятся о душа́х на́ших.

Сла́ва, и ны́не: Крестобогоро́дичен:

Де́ва и Ма́ти Твоя́ Христе́, на Дре́ве ви́дящи Тя́ ме́ртва просте́рта, пла́чущи го́рько, Сы́не Мой, глаго́лаше: что́ стра́шное сие́ та́инство, всем да́руяй жи́знь ве́чную, во́лею на Кресте́ ка́ко стра́ждеши сме́рть поно́сную?

По 2-м стихосло́вии седа́лен, глас 2.

Подо́бен: Вы́шних ищя́:

Ми́ра те́пле гро́бу прино́сят жены́ Спа́се, а́нгела све́тлостию ду́шы веселя́ху, и Бо́га Тя́ всех пропове́даху, и ученико́м вопия́ху: вои́стинну воскре́се из гро́ба всех Живо́т.

Сла́ва, и ны́не: то́йже.

Воскресе́ние Христо́во: Псало́м 50: Кано́н пра́здника, со ирмосы́ на 8: и Мине́и на 4. Конда́к, и ексапостила́рий пра́здника.

На хвали́тех поста́вим стихи́ 4, и пое́м настоя́щыя стихи́ры, глас 2:

Креста́ Твоего́ дре́ву покланя́емся Христе́ Бо́же, дре́во живота́ показа́л еси́ нам ве́рующым в Тя́: и тем упраздни́в держа́ву иму́щаго сме́рти, оживотвори́л еси́ ны умерщвле́нныя грехо́м. Те́мже вопие́м Тебе́: Благоде́телю всех Го́споди, сла́ва Тебе́. [Два́жды.]

Вся́кое дыха́ние, и вся́ тва́рь Тя́ сла́вит Го́споди, я́ко Кресто́м сме́рть упраздни́л еси́, да пока́жеши лю́дем, е́же из ме́ртвых Твое́ Воскресе́ние, я́ко еди́н Человеколю́бец.

Му́ченичен:

За Христа́ пострада́вше да́же до сме́рти, о страстоте́рпцы му́ченицы, ду́шы у́бо и́мате на небесе́х в руце́ Бо́жией, и по всему́ ми́ру почита́ются мо́щи ва́шя: свяще́нницы и ца́рие кла́няются, и лю́дие вси́ веселя́тся, и мы́ обы́чно вопие́м: сон честны́й пред Го́сподем сме́рть преподо́бных Его́.

Сла́ва, и ны́не: глас 1:

Мироно́сицы жены́ ко гро́бу что́ приидо́сте? что́ и́щете жива́го в ме́ртвых? Воскре́се Госпо́дь, дерза́йте, вопие́т а́нгел.

На стихо́вне стихи́ры пра́здника, глас 2.

Подо́бен: Егда́ от Дре́ва:

Ра́дуются учени́цы Христо́вы, от а́нгела глаго́лы слы́шавшя: отону́дуже Воскресе́ние нас ра́ди в ме́ртвых вмени́вшагося навыка́ют. а́ще и пре́жде мироно́сицы гро́бу предста́ша, и рыда́юще о Христе́, ка́мень узре́вше внеза́пу отвале́н, его́же недоумева́хуся преложе́нию.

Стих: Благоволи́л еси́ Го́споди:

Непрестаю́щую и боже́ственную ра́дость подаю́щя, боже́ственным и свяще́нным ученико́м яви́шася учени́цы мироно́сицы Христо́вы, испо́лнившя повеле́ние Боже́ственнаго а́нгела, его́же ужасо́шася белоно́сныя оде́жды, глаго́лющя: плене́н бы́сть ад всеспаси́тельным Воскресе́нием нас ра́ди уме́ршаго Царя́.

Стих: Ми́лость и и́стина срето́стеся:

Струи́ от сле́знаго исто́чника, рыда́ние испусти́вшя, боже́ственныя Христо́вы учени́цы, глаго́лы ра́достныя приноша́ют ны́не самови́дцем благода́ти, возвеща́юще сим Сло́ва воста́ние, и я́же из гро́ба ра́дость. Те́мже вме́сто печа́ли ше́дшя слы́шаху глас, пресла́вно сим, е́же ра́дуйтеся, повелева́ющ.

Сла́ва, и ны́не: глас 1:

Со стра́хом приидо́ша жены́ на гроб, арома́ты те́ло Твое́ пома́зати тща́щыяся, и сие́ не обре́тше, недоумева́хуся друга́ ко друзе́й, не ве́дуще Воскресе́ния: но предста́ им а́нгел, и рече́: воскре́се Христо́с, да́руяй нам ве́лию ми́лость.

Та́же тропари́. И отпу́ст. И час 1.

В пято́к тре́тия седми́цы, ве́чера,

обы́чная кафи́сма. На Го́споди воззва́х: стихи́ры самогла́сны мироно́сиц. Глас 2:

Мироно́сицы жены́, у́тру глубоку́, арома́ты взе́мшя, Госпо́дня гро́ба достиго́ша. Я́же не наде́яхуся обре́тшя, помышля́ху благогове́ющя ка́менному отвале́нию, и друга́ ко друзе́й глаго́лаху: где́ су́ть печа́ти гро́ба? где́ е́сть Пила́това кустоди́а, и опа́сное утвержде́ние? бы́сть же возвести́тель неразумева́ющым жена́м, блиста́яйся а́нгел, и глаго́ляй к ним: что́ с рыда́нием и́щете жива́го, и оживотвори́вшаго род челове́ческий? воста́ Христо́с Бог наш из ме́ртвых я́ко всеси́лен, подая́й всем нам нетле́ние и жи́знь, просвеще́ние и ве́лию ми́лость.

Почто́ ми́ра со слеза́ми, о учени́цы, растворя́ете? ка́мень отвали́ся, гроб истощи́ся: ви́дите тлю́ живото́м попра́ную, печа́ти свиде́тельствующя я́вственно, спя́щыя лю́те стра́жники непокори́вых, сме́ртное спасе́ся пло́тию Бо́жиею, ад рыда́ет, те́кше ра́достию рцы́те апо́столом: умертви́вый Христо́с сме́рть, перворожде́н из ме́ртвых, вас предваря́ет в Галиле́и.

Мироно́сицы ра́но бы́вшя, и гроб Твой со тща́нием дости́гшя, иска́ху Тебе́ Христе́, во е́же пома́зати пречи́стое те́ло Твое́. И а́нгеловыми глаго́лы огласи́вшеся, радостотво́рныя о́бразы апо́столом пропове́даху: я́ко воскре́сл е́сть Нача́льник спасе́ния на́шего, плени́вый сме́рть, ми́рови же да́руяй живо́т ве́чный, и ве́лию ми́лость.

И Мине́и, 3. Сла́ва: глас 6:

Мироно́сицы жены́, гро́ба Твоего́ дости́гшя, и печа́ти гро́бныя ви́девшя, не обре́тшя же пречи́стаго те́ла Твоего́, рыда́ющя со тща́нием приидо́ша, глаго́лющя: кто́ укра́де на́ше упова́ние? кто́ взят ме́ртва на́га сми́рною пома́занна, Ма́тери еди́но утеше́ние? О ка́ко ме́ртвыя оживи́вый умертви́ся? а́да плени́вый, ка́ко погребе́ся? но воскресни́ Спа́се самовла́стно, я́коже ре́кл еси́, тридне́вен, спаса́я ду́шы на́шя.

И ны́не: богоро́дичен, глас 2: Пре́йде се́нь зако́нная: Ли́ст 62. Та́же, Све́те ти́хий:

На стихо́вне настоя́щыя стихи́ры воскре́сны. Глас 2:

Пре́жде век от Отца́ ро́ждшемуся Бо́жию Сло́ву, вопло́щшемуся от Де́вы Мари́и, прииди́те поклони́мся: Кре́ст бо претерпе́в, погребе́нию предаде́ся, я́ко Сам восхоте́: и воскре́с из ме́ртвых, спасе́ мя заблужда́ющаго челове́ка.

Стих: Госпо́дь воцари́ся, в ле́поту облече́ся.

Христо́с Спас наш, е́же на ны́ рукописа́ние пригвозди́в на Кресте́ загла́ди, и сме́ртную держа́ву упраздни́: покланя́емся Его́ тридне́вному Воскре́снию.

Стих: И́бо утверди́ вселе́нную, я́же не подви́жится.

Со арха́нгелы воспои́м Христо́во Воскре́сние: Той бо е́сть Изба́витель и Спас душ на́ших, и в сла́ве стра́шней и кре́пцей си́ле, па́ки гряде́т суди́ти ми́ру, его́же созда́.

Стих: До́му Твоему́ подоба́ет:

Воскре́сние Твое́ Христе́ Спа́се, всю́ просвети́ вселе́нную и призва́л еси́ Твое́ созда́ние: всеси́льне Го́споди сла́ва Тебе́.

Сла́ва, и ны́не, глас 5:

Тебе́ оде́ющагося све́том я́ко ри́зою снем Ио́сиф с Дре́ва с Никоди́мом, и ви́дев ме́ртва на́га непогребе́на, благосе́рдный пла́чь восприи́м, рыда́я глаго́лаше: увы́ мне́ сладча́йший Иису́се, Его́же вма́ле со́лнце на Кресте́ ви́сима узре́вшее мра́ком облага́шеся, и земля́ стра́хом колеба́шеся, и раздира́шеся церко́вная заве́са: но се́ ны́не ви́жу Тя́, мене́ ра́ди во́лею подъе́мша сме́рть. Ка́ко погребу́ Тя Бо́же мой, или́ како́ю плащани́цею обвию́? ко́има ли рука́ма прикосну́ся нетле́нному Твоему́ те́лу? или́ ки́я пе́сни воспою́ Твоему́ исхо́ду ще́дре, велича́ю стра́сти Твоя́, песносло́влю и погребе́ние Твое́ со Воскре́снием, зовы́й: Го́споди сла́ва Тебе́.

Ны́не отпуща́еши: Трисвято́е. Тропа́рь: Благообра́зный Ио́сиф: Сла́ва: Егда́ снизше́л еси́: И ны́не: Мироно́сицам жена́м: Ектениа́, и отпу́ст.

Си́це слу́жба быва́ет и во всех пятка́х Пятдеся́тницы.

Комментарии для сайта Cackle