Службы третьей седмицы по Пасхе

Четверг

В четверто́к 3-я неде́ли по Па́сце, на у́трени,

на Бог Госпо́дь: тропари́ пра́здника.

По 1-м стихосло́вии седа́лен, глас 2.

Подо́бен: Преблагослове́нна:

Ми́ра погребе́ния Твоего́ жены́ нося́щя, тай ко гро́бу приидо́ша ура́нше, иуде́йския боя́щеся де́рзости, и во́инов предзря́ще утвержде́ние: но естество́ немощно́е му́жество победи́, я́ко наме́рение ми́лостивное Бо́гу угоди́. Прили́чно у́бо взыва́ху: воскресни́ Го́споди, помози́ нам, и изба́ви нас сла́вы ра́ди и́мене Твоего́.

Стих: Во всю́ зе́млю изы́де веща́ние их:

Умудри́вый па́че ри́тор ловцы́, и посла́вый я́коже пропове́дники по всей земли́, неизглаго́ланным человеколю́бием Твои́м Христе́ Бо́же, те́ми утверди́ Це́рковь Твою́, и ве́рным низпосли́ благослове́ние Твое́, еди́не Ми́лостиве и Человеколю́бче.

Стих: Ди́вен Бог во святы́х Свои́х, Бог Изра́илев.

Му́ченичен: Апо́столи, му́ченицы и проро́цы, святи́телие, преподо́бнии и пра́веднии, до́бре по́двиг соверши́вшии, и ве́ру соблю́дшии, дерзнове́ние иму́ще ко Спа́су, о нас Того́ моли́те спасти́ся, мо́лимся, душа́м на́шым.

Сла́ва, и ны́не: Богоро́дичен:

Боже́ственнаго бы́хом о́бщницы естества́, Тобо́ю Богоро́дице Присноде́во: Бо́га бо нам воплоти́вшагося родила́ еси́. Те́мже по до́лгу тя́ вси́ благоче́стно велича́ем.

По 2-м стихосло́вии, седа́лен, глас 2:

Подо́бен: Вы́шних ищя́:

Ми́ра Спа́се жены́ принося́ще, иска́ху тща́нием пома́зати Тя́ Человеколю́бче, от гро́ба же а́нгел к ним вопия́ше: воста́ Жизнода́вец и Госпо́дь, попра́в ад и сме́рть.

Сла́ва, и ны́не: то́йже.

Воскресе́ние Христо́во: Псало́м 50. Кано́н пра́здника, и про́чее после́дование, я́коже предписа́ся.

На хвали́тех поста́вим стихи́ 4, и пое́м настоя́щыя стихи́ры, глас 2:

А́нгел у́бо е́же ра́дуйся, пре́жде Твоего́ зача́тия Го́споди, благода́тней принесе́: а́нгел же ка́мень сла́внаго Твоего́ гро́ба в Твое́ Воскре́сние отвали́: ов у́бо в печа́ли ме́сто, весе́лия о́бразы возвеща́я: сей же в сме́рти ме́сто, Влады́ку Жизнода́вца пропове́дуя нам, те́мже вопие́м Ти́: Благоде́телю всех, Го́споди сла́ва Тебе́. [Два́жды.]

От непра́ведных дея́ний всегда́ бори́ми, и к Тебе́ прибега́юще вои́стинну Су́щему Бо́гу, глас Твои́х учени́к прино́сим Ти́, глаго́люще: спаси́ ны Наста́вниче, погиба́ем. Покажи́ и ны́не враго́м на́шым, мо́лимся, я́ко покрыва́еши лю́ди, и спаса́еши от бед, моли́твами апо́стол, презря́ грехи́, за мно́гую благосты́ню Го́споди.

Му́ченичен:

Вся́кий град и страна́ почита́ют мо́щи ва́шя, о страстоте́рпцы му́ченицы! Вы́ бо зако́нно пострада́вше, вене́ц небе́сный прия́сте, и сего́ ра́ди свяще́нников есте́ похвала́, царе́й побе́да, Церкве́й благоле́пие.

Сла́ва, и ны́не: глас 2:

Мироно́сицы жены́, у́тру глубоку́, арома́ты взе́мшя, Госпо́дня гро́ба достиго́ша, я́же не наде́яхуся обре́тшя, помышля́ху благогове́юще ка́менному отвале́нию, и друга́ ко друзе́й глаго́лаху: где́ су́ть печа́ти гро́ба? где́ е́сть Пила́това кустоди́а, и опа́сное утвержде́ние? Бы́сть же возвести́тель неве́дущым жена́м, блиста́яйся а́нгел, и глаго́ляй к ним: что́ с рыда́нием и́щете жива́го, и оживотвори́вшаго род челове́ческий? Воста́ Христо́с Бог наш из ме́ртвых, я́ко всеси́лен, подая́й всем нам нетле́ние и жи́знь, просвеще́ние и ве́лию ми́лость.

На стихо́вне стихи́ры, глас 2.

Подо́бен: Егда́ от Дре́ва:

Егда́ воскре́сл еси́ я́ко Бог, тогда́ ра́доватися дал еси́ Сло́ве, мироно́сицам рек: не у́ взыдо́х ко Отцу́ Моему́, и про́чее не прикаса́йтеся Мне́, иди́те то́кмо рцы́те друго́м Мои́м: се́ предваря́ет вас. Те́мже по сих ви́ден был еси́, и дунове́нием сим дал еси́ Спа́се Ду́ха Свята́го.

Стих: Благоволи́л еси́ Го́споди зе́млю Твою́:

Рече́нием мироно́сиц жен, от ме́ртвых пропове́дающым Христо́во Воскресе́ние, таи́нницы не ве́ровавше, потща́шася гроб ви́дети: и синдо́н и суда́рь зри́тся во гро́бе, Сам же иско́мый не ви́дится. Те́мже Воскресе́ние позна́вше, пропове́дницы зря́тся в ми́ре, сие́ и язы́ком возвеща́юще.

Стих: Ми́лость и и́стина срето́стеся:

Яви́ся свет непристу́пный нам, сия́я от гро́ба кра́сный Христо́с Госпо́дь. Ад плени́ся, сатана́ исчезе́: ра́дуются ми́ра концы́, лику́ет тва́рь, пое́т пра́зднующи Це́рковь Христо́ва па́мять Ио́сифа всему́драго, и мироно́сиц с ним жен почита́ет торжество́.

Сла́ва, и ны́не: глас 2:

Почто́ ми́ра со слеза́ми, о учени́цы, растворя́ете? ка́мень отвали́ся, гроб истощи́ся: ви́дите тлю́ живото́м попра́ную, печа́ти свиде́тельствующя я́вственно, спя́щыя лю́те стра́жники непокори́вых, сме́ртное спасе́ся пло́тию Бо́жиею, ад рыда́ет. Те́кшя ра́достию рцы́те апо́столом: умертви́вый Христо́с сме́рть, перворожде́н из ме́ртвых, вас предваря́ет в Галиле́и.

Та́же тропа́рь, и час 1. И отпу́ст.

В четверто́к ве́чера,

на Го́споди воззва́х: поста́вим стихо́в 6: и пое́м стихи́ры пра́здника 3, и Мине́и 3.

Стихи́ры пра́здника, глас 8.

Подо́бен: О пресла́внаго чудесе́!:

Христа́ я́вльшагося стопа́м после́дующе честни́и, и Тому́ служа́ще, нра́вом усе́рдным мироно́сицы пра́востию, ниже́ уме́рша Сего́ оста́висте: но ше́дше ми́ра со слеза́ми принесо́сте, ми́лостивно дви́жущеся. Те́мже ва́шу па́мять всесвяще́нную торжеству́ем.

Боже́ственных жен сосло́вие, ви́дети жела́юще Жи́знь умерщвле́нную во гро́бе, но́щию прии́де, и а́нгела слы́ша, я́коже прорече́ Христо́с: воста́, тща́нием Сего́ ученико́м рцы́те, и уны́ние от души́ отри́ните, вме́сто пла́ча ра́дость неизглаго́ланную восприе́мше.

Дне́сь ве́рнии лику́им в па́мяти ва́шей мироно́сицы, сла́вяще вас просла́вившаго преблага́го Го́спода: Его́же моли́те непреста́нно всечестни́и, ве́чнующую сла́ву получи́ти нам, и све́тлость святы́х, иму́ще к Нему́ дерзнове́ние всегда́, богоблаже́ннии.

Сла́ва, и ны́не: глас 2:

Мироно́сицы ра́но бы́вшя, и гроб Твой со тща́нием дости́гшя, иска́ху Тебе́ Христе́ во е́же пома́зати пречи́стое те́ло Твое́. И а́нгеловыми глаго́лы огласи́вшеся, радостотво́рныя о́бразы апо́столом пропове́даху: я́ко воскре́сл е́сть Нача́льник спасе́ния на́шего, плени́вый сме́рть, ми́рови же да́руяй живо́т ве́чный, и ве́лию ми́лость.

Та́же, Све́те ти́хий:

На стихо́вне стихи́ры, глас 2:

Кре́стная: Да ра́спнется, вопия́ху, и́же Твои́х дарова́ний при́сно наслажда́ющиися, и злоде́я вме́сто Благоде́теля проси́ша прия́ти, пра́ведных уби́йцы: молча́л же еси́ Христе́, терпя́ их суровство́, пострада́ти хотя́ и спасти́ нас, я́ко Человеколю́бец.

Стих: К тебе́ возведо́х о́чи мои́:

Воскре́сен: Пре́жде век от Отца́ ро́ждшемуся Бо́жию Сло́ву, вопло́щшемуся от Де́вы Мари́и, прииди́те поклони́мся: Кре́ст бо претерпе́в, погребе́нию предаде́ся, я́ко Сам восхоте́: и воскре́с из ме́ртвых, спасе́ мя заблужда́ющаго челове́ка.

Стих: Поми́луй нас Го́споди, поми́луй нас:

Земны́я сла́дости не возлю́бльше страстоте́рпцы, небе́сных благ сподо́бишася, и а́нгелом согра́ждане бы́ша: Го́споди, моли́твами их поми́луй, и спаси́ нас.

Сла́ва, и ны́не: глас 6:

Проси́ Ио́сиф те́ло Иису́сово, и положи́ е́ в но́вом свое́м гро́бе: подоба́ше бо Ему́ из гро́ба, я́ко от черто́га проити́. Сокруши́вый держа́ву сме́рти, и отве́рзый врата́ ра́йская челове́ком, Го́споди сла́ва Тебе́.

Та́же, Ны́не отпуща́еши: Трисвято́е. Тропари́. И отпу́ст.


Комментарии для сайта Cackle