Понедельник

Последование утрени

Тро́ичны гла́са. По 1-м стихосло́вии глаго́лем седа́льны умили́тельныя осмогла́сника, случи́вшагося гла́са. По 2-м же стихосло́вии седа́лен господи́на Ио́сифа, гла́с 8.

Подо́бен: Повеле́нное та́йно:

Воздержа́ния огне́м попали́м вси́ хвра́стная страсте́й воста́ния, и пла́мень о́ный негаси́мый сле́зными ны́не угаси́м то́ки, вопию́ще суди́ти хотя́щему все́й земли́: Спа́се благоутро́бне Го́споди, неосужде́ны на́с соблюди́, подая́ на́м согреше́ний проще́ние. [Два́жды.]

Богоро́дичен. Подо́бен:

Богоблагода́тная Чи́стая Благослове́нная, за милосе́рдие щедро́т, из Тебе́ Рожде́ннаго, с вы́шними си́лами, и со арха́нгелы, и со все́ми безпло́тными, о на́с моли́те непреста́нно, да́ти на́м пре́жде конца́ проще́ние, и очище́ние грехо́в и жития́ исправле́ние, я́ко да обря́щем ми́лость.

По 3-м же стихосло́вии седа́лен, господи́на Фео́дора: Гла́с 8.

Подо́бен: Повеле́нное та́йно:

Тро́ице Свята́я, и Честна́я, по́ст в седми́цах трие́х соверша́ющыя, сохрани́ це́лы и неосужде́ны, сподо́би благотещи́ и к про́чым, и вся́ за́поведи Твоя́ соверши́ти: я́ко да си́це дости́гнем неосужде́нно ви́дети пресла́вное воскре́сние, пе́ние хвалу́ принося́ще. [Два́жды.]

Богоро́дичен, гла́с то́йже: Предста́тельство ве́рных богороди́тельнице, оскорбля́емых ра́досте, и се́тующих преве́лие утеше́ние, от чре́ва Твоего́ Де́во всесвята́го преесте́ственно Ро́ждшагося, непреста́нно о на́с со а́нгелы и нача́лы моли́, изба́витися на́м в ча́с испыта́ния, лю́таго осужде́ния.

Кано́н в Мине́и, и настоя́щий трипе́снец, господи́на Ио́сифа. И стихосло́вится пе́снь. Гла́с 8.

Пе́снь 1.

Ирмо́с: Пе́снь возсле́м лю́дие:

Име́яй я́ко Бо́г ми́лостивное, ка́ющася приими́ мя́, ижди́вшаго житие́ мое́ блу́дно, вопию́ Ти́: согреши́х, клеветнико́в не тре́бую, сту́д де́л мои́х принося́.

Сне́дь оста́вль а́нгельскую, уподо́бихся ското́м, внегда́ пита́тися скве́рною зло́бою: но у́бо обраща́ющася приими́ мя́, я́ко еди́наго от нае́мник Твои́х, Небе́сный О́тче.

Но́щь сласте́й от пи́щи прибыва́ющую вси́ ве́рнии оста́вивше, к све́ту и́стины тща́тельно присту́пим, да светоно́сныя трапе́зы сподо́бимся.

Богоро́дичен: Ра́дуйся пресвяты́й хра́ме, руно́ богоро́сное, запечатле́нный исто́чниче безсме́ртныя струи́: ста́до Твое́ Влады́чице сохраня́й от вся́ких ра́тников невоева́но.

И́ный господи́на Фео́дора. Гла́с то́йже.

Ирмо́с: Пои́м Бо́гу:

Ны́не в седми́цах трие́х, я́коже дре́вле тридне́вне Изра́иль, очи́стившеся бра́тие, в го́ру моли́тв дости́гнем, и отту́ду боже́ственный гла́с услы́шавше, Христа́ воспои́м.

Я́коже Сампсо́н посто́м укре́пльшеся, прииди́те, я́коже ина́го зве́ря порази́м лю́дие, чре́внаго бе́са, и не посмее́тся Дали́да страсте́й, прельща́ющая на́с.

Тро́ичен: Три́ пою́ херуви́мски, Свято́е Тебе́ Божество́: Све́ты и Све́т, и Живо́т и Животы́, Бо́га ро́ждшаго, Бо́га рожде́ннаго, Бо́га от Отца́ исходя́щаго, Ду́ха Жива́го.

Богоро́дичен: Ра́дуйся Е́вы ра́досте, и́бо о́ныя печа́ль Рождество́м Твои́м преста́ Чи́стая. Ра́дуйся, незаходи́маго Све́та све́тлый о́блаче, из него́же возсия́ Христо́с Бо́г.

Сла́ва Тебе́ Бо́же на́ш, сла́ва Тебе́.

Ве́рою я́коже Дави́д, и мы смиренному́дрием вооружи́вшеся, я́ко ина́го голиа́фа го́рдаго ума́ низложи́вше, посеце́м ку́пно и тьмы́ страсте́й.

Ирмо́с: Пои́м Бо́гу, о го́рькия рабо́ты фарао́новы изба́вльшему Изра́иля, и о́гненным столпо́м и све́тлым о́блаком наста́вльшему, я́ко просла́вися.

Пе́снь 8.

Ирмо́с: Богоглаго́ливии:

Ижди́в бога́тство оте́ческое со блудни́цами, изгна́н бы́х от преддве́рий благода́ти окая́нный: но приими́ мя́ о́тче, за безчи́сленную ми́лость.

Во светле́йшем поста́ светозаре́нии моли́тв просвети́вшеся, светови́дни бу́дем, я́ко да грехо́вныя тьмы́ избе́гнем.

Мо́лит Тя́ ли́к безпло́тных, херуви́ми мо́лят, и святы́х чи́нове, ду́шы на́шя спаси́ Христе́, Многоми́лостиве.

Богоро́дичен: Неде́ланный гро́зд заче́ншая, омраче́нна мя́ пия́нством греха́ уцелому́дри Богоро́дице Де́во, наде́ждо ду́ш на́ших.

И́ный. Ирмо́с: Покрыва́яй вода́ми:

Оте́ческаго сокро́вища, име́ния чу́днаго, ма́тере все́х послужи́вших Влады́це Христу́, прииди́те наслади́мся бра́тие поста́: и́бо се́й укрепля́ет те́ло, и просвеща́ет у́м и се́рдце.

Гедео́на чу́днаго подража́ющи душе́, доброде́тели нося́щи, ве́ру, наде́жду и любо́вь Христо́ву, изы́ди убива́ющи иноплеме́нныя стра́сти, я́коже о́ный с треми́ сты́, Мадиа́мский язы́к потребля́я.

Тро́ичен: И Тро́ицу сла́влю Тя́, и я́ко Еди́ницу пою́ Тя́, Божество́ еди́но, О́тче Вседержи́телю, и Единонача́льне Сы́не, Ду́ше Святы́й, и Всевлады́чняя держа́во, еди́но Естество́, еди́но Ца́рство, в трие́х начерта́ниих же покланя́емое.

Богоро́дичен: Я́же в рождестве́ убеже́ боле́зни преесте́ственно, в Твое́й честне́й стра́сти позна́ Ро́ждшая Тя́, и боле́зноваше зря́щи на Кресте́ Тя́ пригвожде́на во́лею от иуде́ев, на вода́х зе́млю основа́вшаго.

Сла́ва тебе́ Бо́же на́ш, сла́ва Тебе́.

Егда́ прии́деши во сла́ве Твое́й суди́ти все́й земли́, с ты́сящами и тьма́ми си́л Твои́х: тогда́ мя́ Го́споди пощади́, осла́би, и изба́ви осужде́ния, не посрами́ мене́, ниже́ осуди́ огню́ ве́чному.

Хва́лим, благослови́м, покланя́емся Го́сподеви, пою́ще и превознося́ще во вся́ ве́ки.

Ирмо́с: Покрыва́яй вода́ми превы́спренняя Своя́, полага́яй мо́рю преде́л песо́к, и содержа́й вся́, Тя́ пое́т со́лнце, Тя́ сла́вит луна́, Тебе́ прино́сит пе́снь вся́ тва́рь, я́ко Соде́телю все́х во ве́ки.

Пе́снь 9.

Ирмо́с: Проявле́нное:

От Твоея́ удали́вшася О́тче любве́, и во́льными стремле́ньми сласте́й порабоще́на, обраща́ющася я́ко блу́днаго приими́: еди́н бо еси́ Многоми́лостив.

Непло́дная яви́хся смоко́вница, еди́ну то́кмо зло́бу де́лая окая́нный, о́гнь мне́ исхода́таившую: Ты́ у́бо Го́споди плодоно́сна мя́ покажи́, дея́ния блага́я плодонося́ща Тебе́.

Пости́ся душе́ моя́ зло́бы и лука́вства, удержи́ся гне́ва и я́рости, и вся́каго греха́: Иису́с бо такова́го хо́щет поста́, Человеколю́бец Бо́г на́ш.

Богоро́дичен: Ты́ еси́ Богоро́дице ору́жие на́ше, и стена́, Ты́ еси́ заступле́ние к Тебе́ прибега́ющих: Тя́ и ны́не на моли́тву дви́жем, да изба́вимся от враго́в на́ших.

И́ный. Ирмо́с: Велича́ем Тя́:

Чи́стый по́ст, злы́х отложе́ние принесе́м, я́ко да́ры благоприя́тны, Христу́ Бо́гу на́шему.

Елиссе́й дре́вле ка́ко пита́ше проро́ки, уве́девши душе́, любе́зно пита́йся, благодаря́щи Христа́.

Тро́ичен: Триипоста́сное еди́но Тя́ Божество́ воспева́ю, Ли́цы зра́к, Отца́ безнача́льнаго, и Сы́на, и Ду́ха Жива́го.

Богоро́дичен: Богома́ти Отрокови́це, черто́же Небе́снаго Царя́ Христа́, спаси́ моли́твами твои́ми, любо́вию пою́щыя Тя́.

Сла́ва Тебе́ Бо́же на́ш, сла́ва Тебе́.

Дании́л в ро́ве зве́ри укроти́, воздержа́ния броздо́ю, и мы́ постя́щеся стра́сти удручи́м.

Ирмо́с: Велича́ем Тя́ всенепоро́чную Ма́терь Христа́ Бо́га на́шего, Ю́же осени́ Ду́х Святы́й.

Свети́лен гла́са.

На стихо́вне самогла́сен дне́, два́жды, гла́с 4:

В лю́тую прегреше́ний мои́х скве́рну облеко́хся, и ра́дости черто́га изгна́н бы́х, уще́дри мя́ неизглаго́ланным Твои́м благоутро́бием, я́ко блу́днаго сы́на, Бо́же, и поми́луй мя́.

Му́ченичен: Кто́ не диви́тся зря́, святи́и му́ченицы, по́двиг до́брый, и́мже подвиза́стеся? Ка́ко бо в телеси́ су́ще, безпло́тнаго врага́ победи́сте, Христа́ испове́давше, и Кресто́м вооружи́вшеся? Те́мже досто́йно яви́стеся де́монов прогони́тели, и ва́рваров бори́тели, непреста́нно моли́те, спасти́ся душа́м на́шым.

Сла́ва, и ны́не, Богоро́дичен, гла́с то́йже: Свеще́ неугаси́мая, престо́ле пра́ведный, Пречи́стая Влады́чице, моли́ спасти́ся душа́м на́шым.

На 6-м часе́ тропа́рь проро́чества, гла́с 4:

Я́ко не́мощни есмы́, и разсла́блени грехми́, исцели́ сокруше́ния на́ша, Врачу́ ду́ш на́ших, све́дый у́м челове́чь, Человеколю́бче.

Проки́мен, псало́м 41, гла́с 4: Моли́тва Бо́гу живота́ моего́, реку́ Бо́гу: Засту́пник мо́й еси́. Сти́х: И́мже о́бразом жела́ет еле́нь на исто́чники водны́я:

Проро́чества Иса́иина чте́ние. [Ис. 8:13–22, 9:1–7]

Го́спода си́л, Того́ освяти́те, и То́й бу́дет тебе́ в стра́х. И а́ще бу́деши упова́я на Него́, бу́дет тебе́ во освяще́ние, а не я́коже о ка́мень претыка́ния преткне́шися, ниже́ я́ко о ка́мень паде́ния: до́мове же Иа́ковли в пру́гле, и в раздо́лии седя́щии во Иерусали́ме. Сего́ ра́ди изнемо́гут в ни́х мно́зи, и паду́т, и сокруша́тся, и прибли́жатся, и я́ти бу́дут челове́цы в тверды́ни су́ще. Тогда́ явле́ни бу́дут печатле́ющии зако́н, е́же не учи́тися. И рече́т: пожду́ Бо́га отвра́щшаго лице́ Свое́ от до́му Иа́ковля, и упова́я бу́ду На́нь. Се́ а́з, и де́ти, я́же ми́ даде́ Бо́г: и бу́дут зна́мения, и чудеса́ в дому́ Изра́илеве от Го́спода Савао́фа, Иже обита́ет на горе́ Сио́н. И а́ще реку́т к ва́м: изыщи́те чревоволше́бников, и от земли́ возглаша́ющих, тщесло́вующих, и́же от чре́ва глаша́ют: не язы́к ли к бо́гу своему́ взы́щет, что́ испыту́ют ме́ртвыя о живы́х? Зако́н бо в по́мощь даде́, да реку́т не я́коже сло́во сие́, за́нь же не ле́ть да́ры дая́ти. И прии́дет на вы́ жесто́к гла́д, и бу́дет, егда́ вза́лчете, ско́рбни бу́дете, и зло́ рече́те кня́зю, и оте́честву. И воззря́т на не́бо горе́, и на зе́млю ни́зу при́зрят, и се́ ску́дость те́сна, и тьма́, ско́рбь и теснота́ и тьма́, я́коже не ви́дети: и не оскуде́ет в тесноте́ сы́й да́же до вре́мене. Сие́ пре́жде испи́й, ско́ро твори́ страно́ Завуло́ня, и земле́ Неффали́мля, и про́чии при мо́ри живу́щии, и объону́ страну́ Иорда́на. Галиле́а язы́ков, лю́дие ходя́щии во тьме́, ви́деша све́т ве́лий: живу́щии во стране́ и се́ни сме́ртней, све́т возсия́ет на вы́. Мно́жайшыя лю́ди, я́же изве́л еси́ в весе́лии Твое́м: и возвеселя́тся пред Тобо́ю, я́коже веселя́щиися в жа́тву, и я́коже веселя́тся деля́щии коры́сти. зане́ отя́тся яре́м лежа́й на ни́х, и же́зл, и́же на вы́и и́х: же́зл бо истязу́ющих разсы́па Госпо́дь, я́коже в де́нь, и́же на Мадиа́ма. Я́ко вся́кую оде́жду со́бранну ле́стию, и ри́зу с примире́нием отдаду́т, и восхотя́т, да бы́ша огне́м сожже́ни бы́ли. Я́ко Отроча́ роди́ся на́м, Сы́н, и даде́ся на́м. Его́же нача́льство бы́сть на ра́ме его́: и нарица́ется и́мя его́, вели́ка сове́та А́нгел: Чу́ден, Сове́тник, Бо́г Кре́пкий, Властели́н, Кня́зь ми́ра, Оте́ц бу́дущаго ве́ка: приведу́ бо ми́р на кня́зи, ми́р и здра́вие Ему́. И ве́лие нача́льство Его́, и ми́ра Его́ не́сть преде́ла на престо́ле Дави́дове, и на Ца́рстве Его́, испра́вити е́, и заступи́ти его́ в суде́ и пра́вде, от ны́не и до ве́ка: ре́вность Го́спода Савао́фа сотвори́т сия́.

Проки́мен, псало́м 42, гла́с 6: Спасе́ние лица́ моего́ и Бо́г мо́й. Сти́х: Суди́ ми́ Бо́же, и разсуди́ прю́ мою́.

Последование вечерни

На Го́споди воззва́х поста́вим стихо́в 6, и пое́м настоя́щыя подо́бны трипе́снца: и Мине́и 3.

Стихи́ры подо́бны господи́на Ио́сифа. Гла́с 1.

Подо́бен: Всехва́льнии му́ченицы:

По́ст возлю́бим, души́ стра́сти люте́йшыя де́йством Ду́ха увяда́ющий, и Боже́ственная дея́ния де́яти укрепля́ющий, и у́м на не́бо возсыла́ющий, и проще́ние хода́тайствующий, о ни́хже согреши́хом, да́руемое от Бо́га Ще́драго.

Подо́бен:

Все́ житие́ мое́ сту́дно ижди́в Го́споди, со блудни́цами окая́нный, я́коже блу́дный умиле́нием зову́: О́тче Небе́сный, согреши́х, очи́сти и спаси́ мя, и не отри́ни мене́ самого́ от Тебе́ удали́вшася, и Боже́ственными де́лы ны́не обнища́вшаго.

И́на стихи́ра подо́бна господи́на Фео́дора, гла́с 3:

Подобен: Прииди́те вси́:

Прииди́те вси́ в кимва́лех псало́мских, честно́е воздержа́ние целу́юще, возгласи́м: в не́м бо мы́сленно зми́я злонача́льнаго расто́ргнем. те́мже со дерзнове́нием возопии́м Христу́: пода́ждь Спа́се неосужде́нно всесвяты́й Тво́й Кре́ст ви́дети, и поклони́тися, во псалме́х и пе́ниих пра́здновати све́тло.

И мине́и 3. Сла́ва и ны́не, Богоро́дичен:

Проки́мен, псало́м 43, гла́с 4: О Бо́зе похва́лимся ве́сь де́нь, и о и́мени Твое́м испове́мыся во ве́к. Сти́х: Бо́же, уши́ма на́шима услы́шахом:

Бытия́ чте́ние. [Быт. 6:9–22.]

Но́е челове́к пра́веден, соверше́н сы́й в ро́де свое́м, Бо́гу угоди́ Но́е. Роди́ же Но́е три́ сы́ны, Си́ма, Ха́ма, Иа́фефа. Растле́ся же земля́ пред Бо́гом, и напо́лнися земля́ непра́вды. И ви́де Госпо́дь Бо́г зе́млю, и бе́ растле́нна: я́ко растли́ вся́ка пло́ть пу́ть сво́й на земли́: И рече́ Госпо́дь Бо́г Но́ю: вре́мя вся́каго челове́ка прии́де пред Мя́, я́ко испо́лнися земля́ непра́вды от ни́х: и се́ А́з погублю́ и́х и зе́млю. Сотвори́ у́бо себе́ ковче́г от дре́в [негнию́щих] четвероуго́льных: гне́зда сотвори́ши в ковче́зе, и посмоли́ши его́ внутрьу́ду и внеу́ду смоло́ю. И та́ко сотвори́ши ковче́г: тре́х со́т лакте́й долгота́ ковче́га, и пяти́десяти лакте́й широта́, и три́десяти лакте́й высота́ его́. Собира́я сво́дом сотвори́ши ковче́г, и в ла́коть сверши́ши его́ свы́ше: две́рь же ковче́га сотвори́ши от страны́: обита́лища двокро́вна и трекро́вна сотвори́ши в не́м. А́з же се́ наведу́ пото́п, во́ду на зе́млю, погуби́ти вся́ку пло́ть, в не́йже е́сть ду́х жи́зни под небесе́м: и ели́ка су́ть на земли́, сконча́ются. И поста́влю заве́т Мо́й с тобо́ю: вни́деши же в ковче́г ты́, и сы́нове твои́, и жена́ твоя́ и жены́ сыно́в твои́х с тобо́ю. И от все́х ското́в, и от все́х га́д, и от все́х звере́й, и от вся́кия пло́ти, два́ два́ от все́х введе́ши в ковче́г, да пита́еши с собо́ю: му́жеский по́л и же́нский бу́дут. От все́х пти́ц перна́тых по ро́ду, и от все́х ското́в по ро́ду, и от все́х гадо́в по́лзающих по земли́ по ро́ду и́х, два́ два́ от все́х вни́дут к тебе́, пита́тися с тобо́ю, му́жеский по́л и же́нский. Ты́ же возми́ себе́ от все́х бра́шен, я́же и́мате я́сти, и собере́ши к себе́, и бу́дут тебе́ и о́ным бра́шно. И сотвори́ но́е вся́, ели́ка запове́да ему́ Госпо́дь Бо́г, та́ко сотвори́.

Проки́мен, псало́м 44, гла́с 6: Помяну́ и́мя Твое́ во вся́ком ро́де и ро́де. Сти́х: Отры́гну се́рдце мое́ сло́во бла́го:

При́тчей чте́ние. [Притч. 8:1–21]

Сы́не, ты́ прему́дрость пропове́ждь, да ра́зум послу́шает тебе́. На высо́ких бо крае́х е́сть, посреде́ же сте́зь стои́т: При врате́х бо си́льных приседи́т, во вхо́дех же пое́тся. Ва́с о челове́цы, молю́, и вдаю́ мо́й гла́с сыно́м челове́ческим. уразуме́йте незло́бивии кова́рство, ненака́заннии же приложи́те се́рдце. Послу́шайте мене́: честна́я бо реку́, и изнесу́ от усте́н пра́вая. Я́ко и́стине поучи́тся горта́нь мо́й, ме́рзки же предо мно́ю устны́ лжи́выя. С пра́вдою вси́ глаго́лы у́ст мои́х, ничто́же в ни́х стро́потно, ниже́ развраще́нно: Вся́ пра́ва разумева́ющым, и пра́ва обрета́ющым ра́зум. Приими́те наказа́ние, а не сребро́, и ра́зум па́че зла́та искуше́на: избира́йте же ве́дение па́че зла́та чи́ста. Лу́чше бо прему́дрость ка́мений многоце́нных, вся́кое же честно́е недосто́йно ея́ е́сть. А́з прему́дрость всели́х сове́т и ра́зум, и смы́сл а́з призва́х. Стра́х Госпо́день ненави́дит непра́вды, досажде́ния же и горды́ни, и пути́ лука́вых: возненави́дех же а́з развраще́нныя пути́ злы́х. Мо́й сове́т и утвержде́ние, мо́й ра́зум, моя́ же кре́пость. Мно́ю ца́рие ца́рствуют, и си́льнии пи́шут пра́вду. Мно́ю вельмо́жи велича́ются, и власти́тели мно́ю держа́т зе́млю. А́з лю́бящыя мя́ люблю́, и́щущии же мене́ обря́щут благода́ть. Бога́тство и сла́ва моя́ е́сть, и стяжа́ние мно́гих и пра́вда. Лу́чше е́сть плоди́ти мене́ па́че зла́та и ка́мения дра́га: мои́ же плоды́ лу́чше сребра́ избра́нна. В путе́х пра́вды хожду́, и посреде́ сте́зь оправда́ния живу́: Да разделю́ лю́бящым мя́ име́ние, и сокро́вища и́х испо́лню благи́х.

На стихо́вне самогла́сен дне́, два́жды. Гла́с 2:

О́тче Благи́й, от все́х я́же да́л ми́ еси́, обнажи́ мя́ безу́мие мое́: удали́хся от Тебе́, и порабо́тах стра́нному граждани́ну, живо́тная ме́рзкая пасо́х, и ни те́х пи́щи насы́тихся. Те́мже притеко́х к Тебе́, ве́дый Твое́ благоутро́бие: покры́й мою́ наготу́ человеколю́бием Твои́м, и спаси́ мя́.

Му́ченичен: Святы́м му́чеником моля́щымся о на́с, и Христа́ пою́щым, вся́кая пре́лесть преста́, и челове́ческий ро́д ве́рою спаса́ется.

Сла́ва, и ны́не, богоро́дичен, гла́с то́йже: От ложе́сн Твои́х деви́ческих све́т ми́рови возсия́, сло́вом Сло́во: Того́ моли́ Чи́стая Всесвята́я Де́во, изба́витися душа́м на́шым от се́тей вра́жиих.

Комментарии для сайта Cackle