Службы второй седмицы по Пасхе

Неде́ля антипа́схи

Е́же е́сть осяза́ние свята́го сла́внаго апо́стола Фомы́. Ве́дати подоба́ет, я́ко в се́й свято́й второ́й Неде́ли Антипа́схи не пою́тся воскре́сная, но вся́ пра́здника.

В суббо́ту ве́чера

кле́плет параекклисиа́рх, и собра́вшеся в притво́р, благослови́вшу иере́ю, глаго́лем: Христо́с воскре́се: три́жды. И обы́чный 9-й ча́с трипса́лмный, я́коже на вся́к де́нь. И глаго́лем тропа́рь: С высоты́ снизше́л еси́ благоутро́бне: И конда́к: А́ще и во гро́б снизше́л еси́ безсме́ртне:

На Ма́лей вече́рни,

благослови́вшу иере́ю, глаго́лем: Христо́с воскре́се: три́жды. Та́же псало́м: Благослови́ душе́ моя́ Го́спода:

На Го́споди воззва́х: стихи́ры на 4. Гла́с 1.

Подо́бен: Небе́сных чино́в:

Терпи́т Христо́с человеколю́бно и осяза́ния, я́коже и Кре́ст пре́жде сего́, и непра́ведное убие́ние, из гро́ба тридне́вно воскресы́й, печа́ти не разруши́, и две́рем заключе́нным, ученико́м предста́в я́ко всеси́лен. [Два́жды].

Фомино́ неве́рствие, мироспаси́тельное Богочелове́ка Сло́ва, е́же из а́дских преиспо́дних воста́ние уверя́ет, я́звы ру́к и но́г де́рзостнее осяза́вшее ко увере́нию мирско́му, десни́цею любопы́тною.

Собра́нным стра́хом, и́же от стра́сти Твоея́, апо́столом Сло́ве, и две́рем заключе́нным внеза́пу совше́л еси́ посреде́ и́х, ми́р да́руя, и Фоме́ протяза́я осяза́ти честны́я ре́бр Твои́х я́звы.

Сла́ва, и ны́не: гла́с 2:

По воста́нии Твое́м Го́споди, собра́нным ученико́м Твои́м, и две́рем заключе́нным, посреде́ ста́л еси́, ми́р подая́ и́м. Уве́рився же и Фома́, виде́нием руку́ и ре́бр Твои́х, Го́спода и Бо́га Тя́ испове́да, спаса́ющаго упова́ющыя на Тя́ Человеколю́бче.

Све́те ти́хий: Проки́мен: Госпо́дь воцари́ся:

На стихо́вне стихи́ры, гла́с 2. Подо́бен: До́ме Евфра́фов:

Устна́ми чи́стыми по́йте со а́нгелы челове́цы Воскре́сшаго тридне́вно из гро́ба, и ми́р совоздви́гшаго.

Сти́х: Похвали́ Иерусали́ме Го́спода, хвали́ Бо́га твоего́ Сио́не.

Яви́лся еси́ свяще́нным Твои́м Спа́се апо́столом, две́рем заключе́нным, те́ми обновля́я на́м боже́ственный Тво́й Ду́х.

Сти́х: Я́ко укрепи́ вереи́ вра́т твои́х, и благослови́ сы́ны твоя́ в тебе́.

Ны́не Тя́ Всецарю́, ви́девше не очи́ма, но серде́чною любо́вию, Бо́га ве́ровавше, в пе́ниих велича́ем.

Сла́ва, и ны́не: гла́с и подо́бен то́йжде:

Дае́ши, о Изба́вителю, ми́р лю́дем Твои́м, и долго́в разреше́ние, моли́твами Всечи́стыя, и еди́ныя Богома́тере.

Та́же: Ны́не отпуща́еши: Трисвято́е. По О́тче на́ш:

Тропа́рь, гла́с 7:

Запеча́тану гро́бу, живо́т от гро́ба возсия́л еси́ Христе́ Бо́же, и две́рем заключе́нным, ученико́м предста́л еси́, все́х Воскресе́ние: Ду́х Пра́вый те́ми обновля́я на́м, по вели́цей Твое́й ми́лости.

[зри́] Подоба́ет ве́дати: А́ще ли где́ не́сть бде́ния в Неде́лю: в суббо́ту ве́чера на Повече́рии по Трисвято́м конда́к Трио́ди пра́здника: Сла́ва, и ны́не: Па́схи: А́ще и во гро́б: Си́це же глаго́лем и до отда́ния Па́схи.

Великая вечерня

повнегда́ благослови́ти иере́ю. Христо́с воскре́се: три́жды. И а́бие пое́м предначина́тельный псало́м: Благослови́ душе́ моя́ Го́спода: с пе́нием, я́коже е́сть обы́чай: И по исполне́нии сего́, стихосло́вим: Блаже́н му́ж: Кафи́сму 1-ю всю́. Го́споди воззва́х: пое́м во гла́с 1, поста́вим стихо́в, 10. И пое́м стихи́ры самогла́сны, но́выя неде́ли. Гла́с 1. Иоа́нна мона́ха:

Две́рем заключе́нным, ученико́м собра́нным, вше́л еси́ внеза́пу всеси́льне Иису́се Бо́же на́ш, и ста́в посреде́ и́х ми́р да́в, испо́лнил еси́ Свята́го Ду́ха: жда́ти же повеле́л еси́, и ника́коже разлуча́тися от Иерусали́ма, до́ндеже облеку́тся е́же с высоты́ си́лою. Те́мже вопие́м Ти́: просвеще́ние и Воскресе́ние и ми́ре на́ш, сла́ва тебе́. [Два́жды].

По дне́х осми́х воста́ния Твоего́ Го́споди, яви́лся еси́ ученико́м Твои́м на ме́сте, иде́же бя́ху со́брани, и возгласи́в и́м: ми́р ва́м, неве́рующему ученику́ ру́це показа́л еси́, и пречи́стое ребро́. Он же ве́ровав вопия́ше Тебе́: Госпо́дь мо́й и Бо́г мо́й, сла́ва Тебе́. [Два́жды].

Фома́, глаго́лемый Близне́ц, не бе́ с ни́ми, егда́ вше́л еси́, Христе́, заключе́нным две́рем: те́мже и не ве́роваше рече́нным ему́, от неве́рия в ве́ру известву́я. Не несподо́бил же еси́ Бла́же, показа́ти ему́ пречи́стое ребро́ Твое́, и руку́ и ногу́ я́звы: о́н же осяза́в и ви́дев, испове́да Тебе́ бы́ти Бо́га не на́га, и Челове́ка не про́ста, и вопия́ше: Госпо́дь мо́й и Бо́г мо́й, сла́ва Тебе́. [Два́жды].

Ученико́м сомня́щымся, во осмы́й де́нь предста́ Спа́с, иде́же бя́ху со́брани, и ми́р да́в, Фоме́ возопи́: прииди́ апо́столе, осяжи́ дла́ни, в ни́хже гво́здия вонзо́ша. О до́брое неве́рие Фомино́, ве́рных сердца́ в позна́ние приведе́, и со стра́хом возопи́: Госпо́дь мо́й и Бо́г мо́й, сла́ва Тебе́. [Два́жды].

Гла́с 2:

По воста́нии Твое́м Го́споди, собра́нным ученико́м Твои́м, и две́рем заключе́нным, посреде́ ста́л еси́, ми́р подая́ и́м. Ве́ровав же и Фома́ зре́нием руку́ и ре́бр Твои́х, Го́спода и Бо́га Тя́ испове́да, спаса́ющаго упова́ющыя на Тя́ Человеколю́бче. [Еди́ножды].

Две́рем заключе́нным, предста́в Иису́с ученико́м, безстра́шие и ми́р дая́ше, та́же глаго́лет Фоме́: почто́ Мне́ не ве́руеши, я́ко воскресо́х из ме́ртвых? принеси́ се́мо ру́ку твою́, и вложи́ в ре́бра Моя́, и ви́ждь. Тебе́ бо неве́рующу, вси́ навыко́ша стра́сти и Воскресе́ние Мое́ зва́ти с тобо́ю: Госпо́дь мо́й и Бо́г мо́й, сла́ва Тебе́. [Еди́ножды].

Сла́ва, и ны́не: гла́с 6. Иоа́нна мона́ха:

Две́рем заключе́нным, прише́л еси́ Христе́ ко ученико́м, тогда́ Фома́ смотри́тельно не обре́теся с ни́ми. Глаго́лаше бо: не иму́ ве́ры, а́ще не уви́жду и а́з влады́ки. Уви́жду ребро́, отону́дуже изы́де кро́вь, вода́, креще́ние. уви́жду я́зву, от нея́же исцеле́ вели́кий стру́п челове́ческий. Уви́жду, ка́ко не бе́, я́коже ду́х, но пло́ть и ко́сти. Сме́рть попра́вый, и Фому́ уве́ривый, Го́споди сла́ва Тебе́.

Вхо́д. Све́те ти́хий: Проки́мен дне́: Госпо́дь воцари́ся:

На лити́и стихи́ры. Гла́с 4:

Го́споди, нестерпи́мым Твоего́ Божества́ блиста́нием, две́рем прише́л еси́ заключе́нным су́щым, и ста́в посреде́ ученико́в. Ребро́ обнажи́л еси́, и я́зв Твое́ю руку́ и ногу́ стру́пы явля́я: печа́ль же и ско́рбь разреша́я, я́ве возгласи́л еси́: и́мже о́бразом во Мне́ ви́дите, о дру́зи, пло́ти прия́тие, не ду́ха ношу́ естество́. Сомня́щемуся же ученику́, повелева́л еси́ осяза́ти тре́петно, ре́к: испыта́в вся́, гряди́, про́чее не сумни́ся. Он же ощуща́я руко́ю Твое́ сугу́бое существо́, со стра́хом вопия́ше ве́рно, ве́рою влеко́мь: Госпо́дь мо́й и Бо́г мо́й, сла́ва Тебе́.

Гла́с 8: Прикосни́ся Фомо́ ребру́ руко́ю, глаго́лет Христо́с, и о́бразы гвозде́й прииди́ осяжи́, ве́рою испыта́й, и бу́ди Ми́ ве́рен, и не бу́ди неве́рен. Фома́ же пе́рстом я́ко прикосну́ся Влады́це, вельми́ возопи́: Ты́ Бо́г мо́й и Госпо́дь, благоутро́бне сла́ва Тебе́.

Сла́ва, и ны́не: гла́с 8. Анато́лиа:

Две́рем заключе́нным, ученико́м собра́нным, предста́ Спа́с, иде́же бя́ху со́брани, и ста́в посреде́ и́х, глаго́лет Фоме́: прииди́ осяжи́, и ви́ждь о́бразы гвозде́й, простри́ ру́ку твою́, и косни́ся ребру́ Моему́, и не бу́ди неве́рен: но ве́рою пропове́ждь, е́же из ме́ртвых Мое́ Воскресе́ние.

На стихо́вне стихи́ры самогла́сны, гла́с 4:

О пресла́внаго чудесе́! неве́рие ве́ру изве́стную роди́. Ре́к бо Фома́: а́ще не ви́жду, не иму́ ве́ры. Осяза́в же ре́бра, богосло́вит воплоти́вшагося, Того́жде Сы́на Бо́жия позна́, я́ко пострада́вша пло́тию, пропове́да воскре́сшаго Бо́га, и возопи́ све́тлым гла́сом: Госпо́дь мо́й и Бо́г мо́й, сла́ва Тебе́.

Сти́х: Похвали́ Иерусали́ме Го́спода хвали́ Бо́га твоего́ Сио́не.

О пресла́внаго чудесе́! огню́ се́но косну́вшееся спасе́ся вложи́в бо Фома́ во о́гненная ре́бра ру́ку Иису́са Христа́ Бо́га, не опали́ся осяза́нием. Души́ бо злове́рство преложи́ на благове́рие, те́пле возопи́ от глубины́ душе́вныя: Влады́ка Ты́ еси́ и Бо́г мо́й, из ме́ртвых воскресы́й, сла́ва Тебе́.

Сти́х: Я́ко укрепи́ вереи́ вра́т твои́х, и благослови́ сы́ны твоя́ в тебе́.

О пресла́внаго чудесе́! Иоа́нн на пе́рси Сло́ва возлеже́, Фома́ же ре́бра осяза́ти сподо́бися: но о́в у́бо отону́ду стра́шно богосло́вия глубо́кое извлече́ смотре́ние: о́в же сподо́бися тайнонаучи́ти на́с. Представля́ет бо показа́ния я́сно воста́ния Его́, вопия́: Госпо́дь мо́й и Бо́г мо́й, сла́ва Тебе́.

Сла́ва и ны́не: гла́с 5:

Человеколю́бче, ве́лие и безприкла́дное мно́жество щедро́т Твои́х: я́ко долготерпе́л еси́, от иуде́й зауша́емь, от апо́стола осяза́емь, и от отмета́ющихся Тебе́ многоиспыту́емь, ка́ко воплоти́лся еси́? ка́ко распя́лся еси́ безгре́шне? но вразуми́ ны я́ко Фому́ вопи́ти Тебе́: Госпо́дь мо́й и Бо́г мо́й, сла́ва Тебе́.

Та́же: Ны́не отпуща́еши: Трисвято́е. И по О́тче на́ш: Тропа́рь, гла́с 7: Запеча́тану гро́бу: три́жды. Пи́сан на ма́лей вече́рни. И благослове́ние хле́бов. И чте́ние дея́ний святы́х апо́стол. Чту́тся же дея́ния от нача́ла: или́ бесе́ды златоу́стаго от нача́ла.

[зри́] [А́ще не́сть бде́ния, по Ны́не отпуща́еши: и по О́тче на́ш: Тропа́рь: Запеча́тану гро́бу: И отпу́ст. Во у́трии же пое́м полу́нощницу воскре́сную, на не́йже пое́м кано́н тро́ичный, окто́иха 1-го гла́са, пева́емый по полу́нощнице. По кано́не же Досто́йно е́сть: Тро́ичное. И про́чее. Трисвято́е. По О́тче на́ш: Тропа́рь: Запеча́тану гро́бу: Го́споди поми́луй. 40. Сла́ва и ны́не: Честне́йшую херуви́м: Сти́х: Бо́же уще́дри ны́: И моли́тва: Всемогу́щая и животворя́щая: И отпу́ст.]

По сконча́нии же чте́ния, глаго́лем шестопса́лмие. И по исполне́нии си́х ектениа́ вели́кая. И Бо́г Госпо́дь: пое́м во гла́с 7. Тропа́рь пра́здника, три́жды.

По 1-м стихосло́вии седа́лен, гла́с 1. Подо́бен: Ка́мени запеча́тану:

Стра́ха ра́ди иуде́йска, сокрове́нным ученико́м, и в Cио́не собра́нным, вше́л еси́ к ни́м Бла́же, и ста́л еси́ посреде́ и́х, две́рем заключе́нным радостотворя́й и показа́л еси́ и́м ру́це, и пречи́стых Твои́х ре́бр я́звы, глаго́ля неве́рующему ученику́: принеси́ ру́ку твою́ и испыта́й, я́ко Са́м Аз е́смь, тебе́ ра́ди пострада́вый.

Сла́ва, и ны́не: то́йже. И чте́ние пра́здника.

По 2-м стихосло́вии, седа́лен, гла́с 1.

Подо́бен: Гро́б Тво́й Спа́се:

Предста́л еси́ животе́, две́рем заключе́нным, Христе́, ученико́м, и ре́бра показа́в и ру́це Твои́ и но́зе Твои́, е́же от гро́ба Твое́ воста́ние предъуверя́я: но Фома́ не обре́теся, те́мже глаго́лаше: а́ще не узрю́ Его́, не ве́рую словесе́м ва́шым.

Сла́ва, и ны́не: то́йже. И чте́ние пра́здника. Та́же полиеле́й.

И седа́лен, гла́с 1. Подо́бен: Гро́б Тво́й Спа́се:

Ви́дя Моя́ ре́бра, и я́звы гвозде́й, Фомо́, что́ не ве́руеши Моему́ Воскресе́нию? Госпо́дь глаго́лаше, воскре́с от гро́ба, явля́яся апо́столом неизрече́нно. Близне́ц же ве́ровав, вопия́ше Созда́телю: Бо́г мо́й еси́ и Госпо́дь.

Сла́ва, и ны́не: то́йже. И чте́ние пра́здника:

Посе́м степе́нна, 1-й антифо́н 4-го гла́са. Проки́мен, гла́с 4: Похвали́ Иерусали́ме Го́спода, хвали́ Бо́га твоего́ Сио́не. Сти́х: Я́ко укрепи́ вереи́ вра́т твои́х. Вся́кое дыха́ние: Ева́нглие от Матфе́а, зача́ло 116, у́треннее воскре́сно, 1: Единиина́десять ученицы́: Та́же: Воскресе́ние Христо́во ви́девше: три́жды: Псало́м 50. И целова́ние Ева́нглиа. Та́же, Сла́ва: Моли́твами апо́стол, ми́лостиве: И ны́не: Моли́твами богоро́дицы: Посе́м стихи́ра: Воскре́с Иису́с от гро́ба, я́коже прорече́ даде́ на́м живо́т ве́чный, и ве́лию ми́лость. Та́же, Спаси́ Бо́же лю́ди Твоя́:

И а́бие кано́н пра́здника, творе́ние Иоа́нна мона́ха. Гла́с 1. Ирмо́с по два́жды, тропари́ же на 12.

Катава́сиа: Воскре́сния де́нь: о́ба ли́ка вку́пе.

От дне́сь начина́ем глаго́лати: Пои́м Го́сподеви: во всю́ Пятдеся́тницу.

Пе́снь 1.

Ирмо́с: Пои́м вси́ лю́дие, от го́ркия рабо́ты фарао́ни Изра́иля изме́ншему, и во глубине́ морсте́й нога́ми немо́крыми наста́вльшему, пе́снь побе́дную: я́ко просла́вися.

Дне́сь весна́ душа́м, зане́ Христо́с от гро́ба я́коже со́лнце возсия́в тридне́вный, мра́чную бу́рю отгна́ греха́ на́шего. Того́ воспои́м, я́ко просла́вися.

Цари́ца време́н, светоно́сному дню́, дне́й же царю́ я́вственнейши даронося́, кра́сит избра́нныя лю́ди церко́вныя, непреста́нно поя́ воскре́сшаго Христа́.

Врата́ сме́рти Христе́, ниже́ гро́бныя печа́ти, ниже́ ключи́ двере́й Тебе́ проти́вишася: но воскре́с предста́л еси́ друго́м Твои́м Влады́ко, ми́р да́руяй, вся́к у́м преиму́щ.

Пе́снь 3.

Ирмо́с: Утверди́ мене́ Христе́, на недви́жимом ка́мени за́поведей Твои́х, и просвети́ мя све́том лица́ твоего́: не́сть бо свя́т па́че Тебе́ Человеколю́бче.

Но́выя вме́сто ве́тхих, вме́сто же тле́нных нетле́нныя, Кресто́м Твои́м Христе́ соверши́в на́с, во обновле́нии жи́зни жи́тельствовати досто́йно повеле́л еси́.

Во гро́бе заключе́н опи́санною пло́тию Твое́ю, неопи́санный Христе́ воскре́сл еси́: две́рем же заключе́нным, предста́л еси́ Твои́м ученико́м Всеси́льне.

Я́звы Твоя́ Христе́, я́же во́лею претерпе́л еси́ за на́с, ученико́м Твои́м сохрани́в, свиде́тельство показа́л еси́ Твоего́ сла́внаго Воскресе́ния.

Ипакои́, гла́с 6:

Я́ко посреде́ ученико́в Твои́х прише́л еси́ Спа́се, ми́р дая́ и́м: прииди́ и к на́м и спаси́ на́с.

И чте́ние в Богосло́ве, его́же нача́ло: Обновле́нием чти́тися:

Пе́снь 4.

Ирмо́с: Ве́лия та́йна Твоего́ Христе́, смотре́ния: сию́ бо свы́ше прови́дя, богозри́тельно Авваку́м, изше́л еси́, вопия́ше Тебе́, во спасе́ние люде́й Твои́х Человеколю́бче.

Же́лчи у́бо вкуси́, дре́внее вкуше́ние исцеля́я, ны́не же с со́том ме́да, просвеще́ние подая́ Христо́с пра́отцу, и Свое́ сла́дкое прича́стие.

Ра́дуешися испыта́емь: те́мже Человеколю́бче на сие́ повелева́еши Фоме́, простира́я неве́рующу ре́бра, ми́рови уверя́я Твое́ Христе́, тридне́вное воста́ние.

Бога́тство поче́рп от сокро́вища некра́домаго Боже́ственнаго, Благоде́телю, копие́м прободе́ннаго Твоего́ ребра́, прему́дрости и ра́зума наполня́ет ми́р Близне́ц.

Тво́й всеблаже́нный хва́лится язы́к, о Бли́знче! Пе́рвый бо благоче́стно пропове́дует Жизнода́вца Иису́са, Бо́га же и Го́спода, от осяза́ния испо́лнься благода́ти.

Пе́снь 5.

Ирмо́с: От но́щи у́тренююще пое́м Тя́ Христе́, Отцу́ собезнача́льна, и Спа́са ду́ш на́ших: ми́р ми́рови пода́ждь Человеколю́бче.

Предста́в друго́м скорбя́щым Спа́с, прише́ствием всю́ оте́млет ско́рбь, и игра́ти воздвиза́ет Свои́м Воскре́снием.

О вои́стинну похваля́емаго Фомы́ стра́шнаго начина́ния! Де́рзостно бо осяза́ ре́бра, Боже́ственным огне́м блиста́ющая.

Неве́рие Фомино́, ве́ры роди́тельное на́м показа́л еси́: Ты́ бо вся́ прему́дростию Твое́ю промышля́еши поле́зно Христе́, я́ко Человеколю́бец.

Пе́снь 6.

Ирмо́с: Проро́ка спа́сл еси́ от ки́та Человеколю́бче, и мене́ из глубины́ прегреше́ний возведи́, молю́ся.

Фомы́ не оста́вил еси́ Влады́ко, погружа́ема глубино́ю неве́рия, дла́ни просте́р на испыта́ние.

Спа́с на́ш глаго́лаше: осяза́вше Мя́ ви́дите ко́сти пло́ть нося́ща, Аз не премени́хся.

Ре́бра осяза́, и ве́ровав позна́ Фома́, не сы́й в пе́рвом вхо́де Твое́м, Спа́се на́ш.

Конда́к, гла́с 8:

Любопы́тною десни́цею, жизнопода́тельная Твоя́ ре́бра Фома́ испыта́ Христе́ Бо́же: созаключе́нным бо две́рем я́ко вше́л еси́, с про́чими апо́столы вопия́ше Тебе́: Госпо́дь еси́ и Бо́г мо́й.

И́кос:

Кто́ сохрани́ учени́чу дла́нь тогда́ неопали́му, егда́ ко о́гненным ре́бром приступи́ Госпо́дним? Кто́ даде́ е́й де́рзость, и возмо́же осяза́ти пла́менную ко́сть, вся́ко неосяжи́мую? А́ще бо не бы́ ребро́ си́лу по́дало бре́нней десни́це, ка́ко можа́ше осяза́ти, страда́ньми поколеба́вшая я́же вы́ше, и я́же ни́зу? Cия́ благода́ть Фоме́ даде́ся, е́же сия́ осяза́ти, Христо́ви же вопи́ти: Госпо́дь еси́ и Бо́г мо́й.

Синакса́рь в Неде́лю Фомину́.

Стихи́: А́ще а́да или́ из гро́ба клю́чь не возбраня́ет,

Твое́ Спа́се стремле́ние, клю́чь двере́й ка́ко возбрани́т?

В си́й де́нь, в Неде́лю втору́ю по Па́сце, обновле́ния пра́зднуем Христо́ва Воскре́сния, и свята́го апо́стола Фомы́ осяза́ние. Обновле́нием у́бо обы́чай бе́ дре́вний быва́ти, на не́которое от наро́читых: ле́ту бо окружа́ющу и то́й де́нь, во́ньже тогда́ соде́яно бы́сть наве́дшу ве́щи о́ноя, па́мять творя́ху ле́тнюю, да не в забве́ние вели́кая бы дела́ бы́ли. Отсю́ду евре́и пе́рвее Па́сху в Галга́лех сотвори́ша, Чермна́го мо́ря прехожде́ние обновля́юще. Отсю́ду се́нь свиде́ния и́м обновля́ется, и многосла́вно. Отсю́ду ца́рство Дави́дово, и ина́я, да не по коему́ждо глаго́лю: елма́ у́бо все́х я́же в житии́ веще́й изря́днее бо́льше, и па́че вся́кия мы́сли де́ло, Госпо́дне Воскресе́ние: не то́чию на ко́еждо ле́то сие́ пра́зднуем и обновля́ем, но при́сно и по осмо́м дни́. Пе́рвое у́бо сего́ обновле́ние, настоя́щая Неде́ля, я́же глаго́лалася бы вои́стинну и осма́я и пе́рвая. Осма́я у́бо, я́ко от Па́схи: пе́рвая же, я́ко нача́ло други́х. И осма́я па́ки: я́ко во о́браз вчиня́ется безконе́чнаго о́наго дне́, и́же в бу́дущем ве́це, и́же пе́рвый, и еди́н бу́дет вся́ко, ни но́щию разсека́емь. Сия́ у́бо о обновле́ниих: а я́же о Фоме́, си́це бы́сть: Христу́ во́ньже де́нь воскре́се, по́зде ученико́м я́вльшуся, не бя́ше Фома́, не у с про́чими совоку́плься, стра́ха ра́ди иуде́йска. Та́же пома́ле наше́д, уве́да Христо́во прише́ствие, не ве́рова, не ученико́м то́кмо, я́ко Того́ ви́деша воскре́сша, но я́ко ниже́ отню́д воскре́се Госпо́дь, и се́й еди́н сы́й от двоюна́десятих. Благохи́тростный же Бо́г, и о еди́ном у́бо си́це пеки́йся, ку́пно же и смотре́нием не́ким бо́льшим, да и па́че Воскресе́ние и по си́х бу́дущым уве́рится, оста́вль дни́й о́смь: да о́наго любо́вь коне́чную поостри́т, и па́че неве́ровавый все́м ве́ру изве́стншую пода́ст Воскресе́ния, па́ки прихо́дит, и две́рем заключе́нным, я́коже пре́жде, су́щу же и Фоме́, вхо́дит и ми́р обы́чно пода́в, посе́м к Фоме́ простира́ется, и глаго́лет: принеси́ пе́рст тво́й се́мо, и ви́ждь ру́це Мои́, и принеси́ ру́ку твою́, и вложи́ в ре́бра Моя́, и не бу́ди неве́рен, но ве́рен. Поне́же бо не то́чию виде́нием уве́ритися име́л еси́ за привиде́ние, но ско́р сы́й, и осяза́ния помяну́л еси́. Показа́ же си́м, я́ко внегда́ сия́ глаго́лаше ко ученико́м, бя́ше слы́ша: вложи́ ру́ку твою́ в ре́бра Моя́. Явля́ет же, я́ко и широка́ бя́ше я́же на ре́брех я́зва, я́ко и ру́ку вну́трь вмеща́ти. Фома́ же опа́сно испыта́в, и ве́ру прии́м осяже́нием, попуща́емь бо бе́ сия́ зре́ти и твори́ти о́ная, а́ще и в нетле́нном и обоже́нном коне́чно телеси́, за извеще́ние взыва́ше: Госпо́дь мо́й и Бо́г мо́й. О́во у́бо пло́ти ра́ди, о́во же Божества́ ра́ди. И Христо́с к нему́ глаго́лет: я́ко ви́дев Мя́ ве́ровал еси́, блаже́ни не ви́девшии и ве́ровавшии. Близне́ц же глаго́лется Фома́, или́ зане́ с други́м роди́ся, или́ за е́же усумне́тися о Воскресе́нии, или́ зане́ си́це от естества́ сле́плена бе́ста ему́ два́ пе́рста руки́ десны́я, си́есть сре́дний, и и́же пред о́нем, глаго́лемый указа́тельный: не́гли ре́кл бы кто́, я́ко усумне́тися имя́ше, и с си́ми осяза́ти. Ини́и же глаго́лют, е́же и изве́стнейшее, я́ко е́же Фома́, близне́ц толку́ется. Второ́е сие́ явле́ние Христо́во. Тре́тие же бы́сть на мо́ри Тивериа́дстем в ловле́нии ры́б, егда́ и пи́щи причасти́ся, боже́ственным огне́м сне́дшейся, я́коже ве́сть Са́м, изве́стнейшее Воскресе́ние представля́я. Та́же во Еммау́се явля́ется. Пя́тое в Галиле́и, и единона́десятищи, я́коже глаго́лют, явля́ется, до́ндеже вознесе́ся, мно́гая и преесте́ственная зна́мения творя́, пред ученики́ по Воскресе́нии: не бо́ мно́гим сия́ пока́зоваше. Оста́виша же сия́ вся́ Евангели́сти написа́ти, зане́ не бе́ возмо́жно сия́ мно́гим, и в ми́ре живу́щым челове́ком слы́шати, я́ко преесте́ственна су́ща зело́. Твоего́ апо́стола Фомы́ моли́твами, Христе́ Бо́же на́ш поми́луй на́с. Ами́нь.

Пе́снь 7.

Ирмо́с: О́бразу служи́ти мусики́йскому согла́сию созыва́ющу лю́ди, от пе́сней Сио́нских пою́ще оте́чески о́троцы Дави́довы, мучи́телево разори́ша злочести́вое веле́ние, и пла́мень в ро́су преложи́ша, пе́снь воспева́юще: превозноси́мый отце́в и на́ш Бо́же, благослове́н еси́.

Я́ко пе́рвый е́сть дне́й и госпо́дственный светоно́сный си́й, во́ньже ра́доватися досто́йно но́вым и боже́ственным лю́дем с тре́петом: прино́сит бо и ве́ка о́браз, я́ко осми́ца соверша́я бу́дущаго, превозноси́мый отце́в и на́ш Бо́же, благослове́н еси́.

Еди́н дерзну́вый, неве́рною же ве́рою облагоде́тельствовавый на́с Фома́ Близне́ц, реши́т у́бо мра́чное неве́дение все́х конце́в, ве́рным неве́рствием, себе́ же вене́ц плете́т я́ве глаго́ля. Ты́ еси́ Госпо́дь превозноси́мый отце́в и на́ш Бо́же, благослове́н еси́.

Не всу́е усумне́вся Фома́ о воста́нии Твое́м, не низложи́ся: но несумне́тельное тща́шеся показа́ти сие́ Христе́, все́м язы́ком. Отону́дуже неве́рием уве́рив, все́х научи́ глаго́лати: Ты́ еси́ Госпо́дь превозноси́мый отце́в и на́ш Бо́же, благослове́н еси́.

Со стра́хом ру́ку Фома́ в ре́бра Твоя́ живоно́сная, Христе́, вложи́в, тре́петен ощути́ де́йство Спа́се, сугу́бое двема́ естество́ма в Тебе́ соединя́емыма неслия́нно, и ве́рою взыва́ше глаго́ля: Ты́ еси́ Госпо́дь превозноси́мый отце́в и на́ш Бо́же, благослове́н еси́.

Пе́снь 8.

Ирмо́с: В пла́мени о́гненне горя́щия пе́щи сохра́ншаго де́ти, и во зра́це а́нгела снизше́дшаго к ни́м, по́йте Го́спода, и превозноси́те Его́ во ве́ки.

Возжеле́вый Твое́ ра́достное виде́ние, пре́жде не ве́роваше Фома́: сподо́блься же того́, Бо́га и Го́спода Тя́ нарица́ше Влады́ко, Его́же превозно́сим во вся́ ве́ки.

Претерпе́вшаго Фомино́ неве́рие, и показа́вшаго ре́бра, и того́ дла́нию осяза́нна бы́вша, по́йте Го́спода, и превозноси́те Его́ во вся́ ве́ки.

Твое́ неудо́бное сокро́вище, утае́ное на́м отве́рзе Фома́: богосло́вив бо язы́ком богоно́сным, по́йте Го́спода, глаго́лаше, и превозноси́те Его́ во вся́ ве́ки.

На 9-й пе́сни, Честне́йшую: не пое́м: но ирмо́с ки́йждо ли́к.

Пе́снь 9.

Ирмо́с: Тебе́ све́тлую свещу́, и Ма́терь Бо́жию, пречу́дную сла́ву, и вы́шшую все́х тва́рей, пе́сньми велича́ем.

Тво́й све́тлый де́нь и пресве́тлый Христе́, всесве́тлую благода́ть, во́ньже кра́сный добро́тою ученико́м Твои́м предста́л еси́, в пе́снех велича́ем.

Тебе́ бре́нною дла́нию осяза́ема в ре́бра, и не опали́вша сию́, огне́м невеще́ственнаго Боже́ственнаго существа́, в пе́снех велича́ем.

Тя́ я́ко Бо́га из гро́ба воскре́сша Христа́, не очи́ма ви́девше, но серде́чною любо́вию ве́ровавше, пе́сньми велича́ем.

Катава́сиа: Свети́ся, свети́ся: И покло́н.

Та́же, Свя́т Госпо́дь Бо́г на́ш: на гла́с 1, три́жды.

Ексапостила́рий, гла́с 1. Подо́бен: Не́бо звезда́ми:

Мои́х удо́в руко́ю Твое́ю испыта́вый я́звы, не не ве́руй Ми́ Фомо́, уя́звленному тебе́ ра́ди: со ученики́ единому́дрствуй, и живу́щаго пропове́дуй Бо́га. [Два́жды.]

Сла́ва, и ны́не:

Дне́сь весна́ благоуха́ет, и но́вая тва́рь лику́ет. Дне́сь взима́ются ключи́ двере́й, и неве́рия Фомы́ дру́га вопию́ща: Госпо́дь и Бо́г мо́й.

На хвали́тех стихи́ры, на 4, гла́с 1.

Подо́бен: Прехва́льнии му́ченицы:

По е́же из гро́ба Твое́м стра́шном, жизнода́вче, воста́нии, я́коже печа́тей не разруши́л еси́ Христе́ гро́бных, та́ко заключе́нным две́рем вше́л еси́ к пресла́вным апо́столом Твои́м, радостотворя́ и́х, и Пра́вый Тво́й Ду́х подая́ и́м, за безме́рную Твою́ ми́лость.

Фома́ и́же и Близне́ц не бе́ прише́л, егда́ Ты́ ученико́м яви́лся еси́ Го́споди. Те́мже не ве́рова твоему́ воскресе́нию, и ви́девшым Тя́ вопия́ше: а́ще не вложу́ пе́рста в ре́бра Его́ и гвозде́й я́звы, не ве́рую, я́ко воста́л е́сть.

Я́коже хо́щеши осяжи́, Христо́с Фоме́ вопия́ше: вложи́ ру́ку, и позна́й Мя́ ко́сти иму́ща и земно́е те́ло, и не бу́ди неве́рен, ра́вно же со ине́ми уве́рися. Он же возопи́: Бо́г мо́й и Госпо́дь Ты́ еси́, сла́ва воста́нию Твоему́.

Сла́ва: гла́с 6:

По дне́х осми́х воста́ния Твоего́ Иису́се Царю́, единоро́дный Сло́ве О́тчий яви́лся еси́ ученико́м Твои́м, заключе́нным две́рем, ми́р Тво́й подая́, и неве́рующему ученику́ зна́мения показа́л еси́: прииди́ и осяжи́ ру́це и но́зе, и нетле́нная Моя́ ре́бра. Он же ве́ровав, вопия́ше Тебе́: Госпо́дь мо́й и Бо́г мо́й, сла́ва Тебе́.

И ны́не: Преблагослове́нна еси́:

Славосло́вие вели́кое. И тропа́рь пра́здника. Ектении́, и отпу́ст. Начина́ются же от дне́сь лити́и, си́речь исхожде́ния в притво́р. Та́кожде и оглаше́ния преподо́бнаго отца́ на́шего Фео́дора Студи́та, в ни́хже пое́м: Сла́ва, и ны́не, стихи́ру ева́нгльскую, гла́с 1:

На го́ру ученико́м иду́щым, за земно́е Вознесе́ние, предста́ Госпо́дь: и поклони́вшеся Ему́, и да́нныя вла́сти везде́ научи́вшеся, в поднебе́сную посыла́хуся, пропове́дати е́же из ме́ртвых Воскресе́ние, и е́же на небеса́ возше́ствие. И́мже и во ве́ки спребыва́ти нело́жный обеща́ся Христо́с Бо́г, и Спа́с ду́ш на́ших.

[зри́] Внемли́, я́ко лити́и в притво́ре пре́жде пе́рваго часа́ быва́ют и оглаше́ния Студи́това. И ча́с 1. И про́чее обы́чное. И соверше́нный отпу́ст.

Ве́домо бу́ди, я́ко восле́дование случи́вшихся святы́х во все́х Неде́лях святы́я Пятдеся́тницы пое́м в Повече́риях.

Литурги́а быва́ет пора́ну труда́ ра́ди бде́ннаго. Часы́ пою́тся трипса́лмнии по Уста́ву в притво́ре, на ни́хже глаго́лем тропа́рь и конда́к пра́здника.

Ве́домо бу́ди, я́ко от Неде́ли Но́выя и до отда́ния пра́здника Па́схи, нача́ло Литурги́и си́це быва́ет:

По е́же рещи́ диа́кону: Благослови́ влады́ко: И иере́ю: Благослове́но ца́рство: Пое́т иере́й: Христо́с воскре́се: три́жды, ве́сь тропа́рь кроме́ стихо́в. Да воскре́снет бо́г: Та́же, ектениа́, и про́чая литурги́и.

Вме́сто же Досто́йно: пое́м:

А́нгел вопия́ше Благода́тней: Чи́стая Де́во ра́дуйся, и па́ки реку́, ра́дуйся: Тво́й Сы́н воскре́се тридне́вен от гро́ба, и ме́ртвыя воздви́гнувый: лю́дие весели́теся.

Та́же ирмо́с: Свети́ся, свети́ся:

Егда́ же рече́т иере́й: Со стра́хом Бо́жиим: И мы́: Благослове́н гряды́й во и́мя Госпо́дне, Бо́г Госпо́дь и яви́ся на́м. Иере́й: Спаси́ Бо́же лю́ди Твоя́: И мы́ вме́сто тропаря́: Ви́дехом све́т и́стинный: пое́м: Христо́с воскре́се: еди́ножды: и до отда́ния Па́схи. Быва́ет же и про́чее Литурги́и по обы́чаю. Во отпу́сте же егда́ рече́т: Сла́ва Тебе́ Христе́ Бо́же, упова́ние на́ше, сла́ва Тебе́. И мы́: Христо́с воскре́се: три́жды. Та́же отпу́ст Литурги́и по обы́чаю. На Литурги́и начина́ем изъобрази́тельная, и пое́м во блаже́ннах, от кано́на пра́здника, пе́снь 3 и 6. По вхо́де тропа́рь: Запеча́тану гро́бу: Сла́ва, и ны́не: конда́к: Любопы́тною десни́цею: Проки́мен апо́стола, гла́с 3: Ве́лий Госпо́дь на́ш, и ве́лия кре́пость Его́, и ра́зума Его́ не́сть числа́. Сти́х: Хвали́те Го́спода я́ко бла́г псало́м: Бо́гови на́шему да услади́тся хвале́ние. Апо́стол в дея́ниих, зача́ло 14: Рука́ми апо́стол: Аллилу́иа, гла́с 8. Прииди́те возра́дуемся Го́сподеви, воскли́кнем Бо́гу Спаси́телю на́шему. Сти́х: Я́ко Бо́г ве́лий Госпо́дь, и Ца́рь ве́лий по все́й земли́. Ева́нглие Иоа́нна, зача́ло 65: Су́щу по́зде в де́нь то́й. Прича́стный: Похвали́ Иерусали́ме Го́спода, хвали́ Бо́га твоего́ Сио́не. Аллилу́иа, три́жды. На трапе́зе быва́ет утеше́ние бра́тии ве́лие. И воста́вше, от трапе́зы, глаго́лем преждепи́санная вся́ в суббо́ту све́тлыя седми́цы.

Последование вечерни

Благослови́вшу иере́ю, глаго́лем: Христо́с воскре́се: три́жды. Та́же, Трисвято́е. По О́тче на́ш: Го́споди поми́луй. 12. Сла́ва, и ны́не: Прииди́те поклони́мся: три́жды. И глаго́лем 9-й ча́с обы́чный трипса́лмный: тропа́рь и конда́к пра́здника, Та́же пое́м вече́рню без кафи́смы. Го́споди воззва́х: пое́м во гла́с 1.

Стихи́ры на 6. пра́здника 3, гла́с 1.

Подо́бен: Прехва́льнии му́ченицы:

По е́же из гро́ба Твое́м стра́шном Жизнода́вче воста́нии я́коже печа́тей не разруши́л еси́ Христе́, гро́бных, та́ко заключе́нным две́рем вше́д еси́ к пресла́вным апо́столом Твои́м, радостотворя́ и́х, и Пра́вый Тво́й Ду́х подая́ и́м, за безме́рную Твою́ ми́лость.

Фома́ и́же и Близне́ц не бе́ прише́л, егда́ Ты́ ученико́м яви́лся еси́ Го́споди. Те́мже не ве́рова Твоему́ Воскре́снию и ви́девшым Тя́ вопия́ше: а́ще не вложу́ пе́рста в ре́бра Его́, и гвозде́й я́звы, не ве́рую я́ко воста́л е́сть.

Я́коже хо́щеши осяжи́, Христо́с Фоме́ вопия́ше: вложи́ ру́ку, и позна́й Мя́ ко́сти иму́ща, и земно́е те́ло, и не бу́ди неве́рен, ра́вно же со ине́ми уве́рися. Он же возопи́: Бо́г мо́й и Госпо́дь Ты́ еси́, сла́ва воста́нию Твоему́.

И свята́го Мине́и подо́бны 3. Сла́ва: свята́го.

А́ще ли ни́: Сла́ва, и ны́не: пра́здника, гла́с 1:

Две́рем заключе́нным, ученико́м собра́нным, вше́л еси́ внеза́пу всеси́льне Иису́се Бо́же на́ш: и ста́в посреде́ и́х, ми́р да́в, испо́лнил еси́ Свята́го Ду́ха: жда́ти же повеле́л еси́, и ника́коже разлуча́тися от Иерусали́ма, до́ндеже облеку́тся, е́же с высоты́ си́лою. Те́мже вопие́м Ти́: просвеще́ние, и воскре́сние, и ми́ре на́ш, сла́ва Тебе́.

Вхо́д: Све́те ти́хий: Проки́мен вели́кий, гла́с 7: Кто́ бо́г ве́лий, я́ко Бо́г на́ш? Ты́ еси́ Бо́г творя́й чудеса́. Сти́х: Сказа́л еси́ в лю́дех си́лу Твою́. Сти́х: И ре́х: ны́не нача́х, сия́ изме́на десни́цы Вы́шняго. Сти́х: Помяну́х дела́ Госпо́дня. И па́ки: Кто́ бо́г ве́лий, я́ко Бо́г на́ш? Ты́ еси́ бо́г творя́й чудеса́. Та́же ектениа́: Рце́м вси́: и Сподо́би Го́споди в ве́чер се́й: и ектениа́: Испо́лним вече́рнюю моли́тву на́шу Го́сподеви.

На стихо́вне стихи́ра воскре́сна Осмогла́сника, гла́с 1:

Вече́рния на́шя моли́твы приими́ Святы́й Го́споди, и пода́ждь на́м оставле́ние грехо́в: я́ко еди́н еси́ явле́й в ми́ре Воскресе́ние.

Сти́х: К тебе́ возведо́х о́чи мои́:

Умили́тельный: Я́ко пучи́на ве́лия прегреше́ний мои́х Спа́се, и лю́те погружа́юся согреше́ньми мои́ми, да́ждь ми́ ру́ку я́ко Петро́ви, спаси́ мя Бо́же, и поми́луй мя́.

Сти́х: Поми́луй на́с Го́споди, поми́луй на́с:

Му́ченичен: Моли́твами Го́споди, все́х святы́х, и Богоро́дицы, Тво́й ми́р да́ждь на́м, и поми́луй ны́, я́ко еди́н Ще́др.

Сла́ва, и ны́не, гла́с 1:

По дне́х осми́х воста́ния Твоего́ Го́споди, яви́лся еси́ ученико́м Твои́м на ме́сте, иде́же бя́ху со́брани, и возгласи́в и́м: ми́р ва́м, неве́рующему ученику́ ру́це показа́л еси́, и пречи́стое ребро́. Он же ве́ровав вопия́ше Тебе́: Госпо́дь мо́й и Бо́г мо́й, сла́ва Тебе́.

По трисвято́м, тропа́рь пра́здника. А́ще ли тропа́рь свята́го, рцы́ его́ пре́жде. Пото́м, Сла́ва, и ны́не: пра́зднику: Запеча́тану гро́бу: И отпу́ст.

Си́це у́бо быва́ет восле́дование Вече́рням во вся́ Неде́ли святы́я Пентико́стии.

[зри́] От дне́сь глаго́лем Повече́рие ма́лое. И пое́м кано́н моле́бный Пресвяты́я Богоро́дицы, во Окто́ихе. И трипе́снцы Трио́ди дне́, творе́ние господи́на Ио́сифа. Иде́же глаго́лем трипе́сно, Богоро́дицы пе́снь кано́на оставля́ется. По Досто́йно: и по О́тче на́ш: глаго́лем конда́к пра́здника, во всю́ Пятдеся́тницу. В Литурги́ах же пое́тся на блаже́ннах, от кано́на пра́здника Неде́ли, пе́снь рядова́я на ки́йждо де́нь, со ирмосо́м на 6, си́це: В понеде́льник, 1. Во вто́рник, 4. В сре́ду, 5. В четверто́к, 7. В пято́к, 8. В суббо́ту, 9.


Комментарии для сайта Cackle