Суббота

На Го́споди воззва́х, поста́вим стихо́в 10 и пое́м осмогла́сен два́жды, и му́ченичны Окто́иха прилучи́вшагося гла́са: и мине́и 4. Сла́ва, свята́го, а́ще е́сть: а́ще ли ни́; Сла́ва, ме́ртвен Дамаски́новых Окто́иха. И ны́не, Богоро́дичен 1-й гла́са.

Самогла́сен, гла́с 4:

Ны́не вре́мя благоприя́тное, ны́не де́нь спасе́ния, во мно́жестве ми́лости Твоея́ посети́ мою́ ду́шу, и бре́мя беззако́ний мои́х осла́би, еди́не Человеколю́бче.

Проки́мен, псало́м 39. Гла́с 4: Ми́лость твоя́ и и́стина Твоя́, вы́ну да засту́пите мя́. Сти́х: Терпя́ потерпе́х Го́спода, и вня́т ми́.

Бытия́ чте́ние. [Быт. 5:32, 6:1–8]

Бе́ Но́е ле́т пяти́ со́т, и роди́ сы́ны три́, Си́ма, Ха́ма, Иа́фефа. И бы́сть егда́ нача́ша челове́цы мно́зи быва́ти на земли́, и дще́ри роди́шася и́м: Ви́девше же сы́нове Бо́жии дще́ри челове́чи, я́ко добры́ су́ть, поя́ша себе́ жены́ от все́х, я́же избра́ша. И рече́ Госпо́дь Бо́г: не и́мать Ду́х Мо́й пребыва́ти в челове́цех си́х во ве́к, зане́ су́ть пло́ть: бу́дут же дни́е и́х ле́т сто́ два́десять. Исполи́ни же бя́ху на земли́ во дни́ о́ны: и пото́м, егда́ вхожда́ху сы́нове Бо́жии к дще́рем челове́ческим, и рожда́ху себе́, ти́и бя́ху исполи́ни, и́же от ве́ка челове́цы имени́тии. Ви́дев же Госпо́дь Бо́г, я́ко умно́жишася зло́бы челове́ков на земли́, и вся́к помышля́ет в се́рдце свое́м приле́жно на зла́я во вся́ дни́ И помы́сли Бо́г, я́ко сотвори́ челове́ка на земли́, и размы́сли. И рече́ Бо́г: потреблю́ челове́ка, его́же сотвори́х от лица́ земли́, от челове́ка да́же до скота́, и от га́д да́же до пти́ц небе́сных, зане́ размы́слих, я́ко сотвори́х я́. Но́е же обре́те благода́ть пред Го́сподем Бо́гом.

Проки́мен: псало́м 40, гла́с 6: А́з ре́х: Го́споди, поми́луй мя́, исцели́ ду́шу мою́. Сти́х: Блаже́н разумева́яй на ни́ща и убо́га:

При́тчей чте́ние. [Притч. 6:20–35, 7:1.]

Сы́не, храни́ зако́ны отца́ твоего́, и не отри́ни наказа́ния ма́тере твоея́: Навяжи́ же я́ на твою́ ду́шу при́сно, и обяжи́ и́х о твое́й вы́и. Егда́ хо́диши, води́ ю́, и с тобо́ю да бу́дет: егда́ же спи́ши, да храни́т тя́, да востаю́щу ти́ глаго́лет с тобо́ю. зане́ свети́льник за́поведь зако́на, и све́т, и пу́ть жи́зни, и обличе́ние, и наказа́ние: Е́же сохрани́ти тя́ от жены́ мужа́ты, и от наважде́ния язы́ка чужда́го. Сы́не, да не победи́т тя́ добро́ты по́хоть, ниже́ уловле́н бу́ди твои́ма очи́ма, ниже́ да совосхи́тишися ве́ждами ея́: Цена́ бо блудни́цы, ели́ка еди́наго хле́ба: жена́ же муже́й честны́я ду́шы уловля́ет. Ввя́жет ли кто́ о́гнь в не́дра, ри́з же [свои́х] не сожже́т ли; Или́ ходи́ти кто́ бу́дет на у́глиях о́гненных, но́г же не сожже́т ли; Та́ко вше́дый к жене́ мужа́тей не без вины́ бу́дет, ниже́ вся́к прикаса́яйся е́й. Не ди́вно, а́ще кто́ я́т бу́дет кра́дый: кра́дет бо, да насы́тит ду́шу свою́ а́лчущую: А́ще же я́т бу́дет, возда́ст седмери́цею, и вся́ име́ния своя́ да́в изба́вит себе́. Прелюбоде́й же за ску́дость ума́ поги́бель души́ свое́й содева́ет. Боле́зни же и безче́стие понесе́т: поноше́ние же его́ не загла́дится во ве́к. Испо́лнена бо ре́вности я́рость му́жа ея́: не пощади́т в де́нь суда́. Не измени́т ни еди́ною цено́ю вражды́, ниже́ разреши́тся мно́гими дарми́. Сы́не, храни́ моя́ словеса́, моя́ же за́поведи скры́й у себе́: сы́не, чти́ Го́спода, и укрепи́шися: кроме́ же Его́ не бо́йся ино́го.

И про́чее после́дование преждеосвяще́нных.

Аллилу́иа, и тропари́, гла́с 2:

Апо́столи, му́ченицы и проро́цы, святи́телие, преподо́бнии и пра́веднии, до́бре по́двиг соверши́вшии, и ве́ру соблю́дшии, дерзнове́ние иму́щии ко Спа́су, о на́с Того́ я́ко Бла́га моли́те спасти́ся, мо́лимся, душа́м на́шым. [Два́жды.]

Сла́ва, ме́ртвен: Помяни́ Го́споди я́ко Бла́г рабы́ Твоя́, и ели́ка в житии́ согреши́ша прости́: никто́же бо безгре́шен, то́кмо Ты́ моги́й и преста́вленным да́ти поко́й.

И ны́не, Богоро́дичен: Ма́ти Свята́я неизрече́ннаго Све́та, а́нгельскими Тя́ пе́сньми почита́юще, благоче́стно велича́ем.

И стихосло́вим еди́ну кафи́сму: Рече́ Госпо́дь Го́сподеви моему́:

Та́же седа́льны му́ченичны Окто́иха три́, и ме́ртвен, и Богоро́дичен. И чте́ние в Шестодне́вце.

Та́же, Блаже́ни непоро́чнии: пое́м на две́ статии́: и помина́ет свяще́нник усо́пшыя, я́коже обы́чно. В коне́ц же кафи́смы пое́м: Благослове́н еси́ Го́споди: Святы́х ли́к: и про́чая. Во Сла́ву же и ны́не: ектениа́ о усо́пших: Моли́тву: Бо́же духо́в и вся́кия пло́ти:

И а́бие седа́лен, гла́с 5: Поко́й, Спа́се на́ш, с пра́ведными рабы́ Твоя́, и сия́ всели́ во дворы́ твоя́, я́коже е́сть пи́сано, презира́я я́ко Бла́г прегреше́ния и́х, во́льная, и нево́льная, и вся́ я́же в ве́дении и не в ве́дении Человеколю́бче.

Сла́ва, коне́ц.

И ны́не, Богоро́дичен: От Де́вы возсия́вый ми́ру Христе́ Бо́же, сы́ны све́та То́ю показа́вый, поми́луй на́с.

Кано́н мине́и со ирмосо́м на 6: и свята́го оби́тели на 4: глаго́лется бо ирмо́с и тропа́рь без стихо́в, и держи́м стихи́ от Тогда́ потща́шася влады́ки: Не стихосло́вим бо пе́сней от нача́ла до 6-я пе́сни, во все́х суббо́тах святы́я Четыредеся́тницы, до ака́фиста: от шесты́я же пе́сни начина́ются трипе́снцы, и пое́тся Мине́и по дню́ свята́го, и трипе́снцы: стихосло́вятся же и пе́сни. Четверопе́снец господи́на Ио́сифа, его́же краегране́сие: Пе́ние сие́ Ио́сифово. Гла́с 8.

Пе́снь 6.

Ирмо́с: Моли́тву пролию́ ко Го́споду:

Святи́и мно́жайшими му́ками, мно́гия враго́в тьмы́ низложи́ти сподо́бишася Спа́се, и мно́гих бла́г Твои́х улучи́ша: моли́твами и́х я́ко Бла́г, мно́гая моя́ очи́сти прегреше́ния.

Воспои́м Христо́вы страстоте́рпцы, и возопии́м к ни́м единому́дренно: Влады́чним подо́бницы страсте́м, ду́ш на́ших стра́сти исцели́те, пости́тися же от зла́го обы́чая на́с укрепи́те.

Преложи́л еси́ сме́рть на со́н, боле́зненно во гро́бе поспа́л еси́, и ме́ртвым живо́т дарова́л еси́: преста́вльшыяся у́бо Спа́се сподо́би стоя́ния избра́нных, страстоте́рпец святы́х мольба́ми.

Богоро́дичен: Пости́тися ми́, и отступи́ти от вся́каго греха́ укрепи́, Отрокови́це, си́льнаго и безгре́шнаго Сло́ва, воплоще́нна неизрече́нно ро́ждшая, и да́ждь ми́ чисти́тельную оскверне́ний, Всенепоро́чная, сле́зу.

И́ный господи́на Фео́дора. Гла́с 3.

Ирмо́с: Глубина́ страсте́й:

Му́чеников па́мять соверша́ем боже́ственно мучениколю́бцы, прииди́те возра́дуемся, пе́сньми ты́я венча́юще, подвигополо́жника Христа́ благослови́м.

Ра́н пе́рвее иску́с прие́мше, пото́м же ка́мением побие́ни бы́вше, претре́ни бы́вше, звере́м на сне́дь да́ни бы́сте, и закла́ни бы́сте я́ко а́гнцы Христо́вы: но живе́те при́сно страстоте́рпцы.

Сла́ва, тро́ичен: Три́ еди́ным Естество́м совокупля́я, еди́но же треми́ разсека́я Ли́цы, я́же Божество́ е́сть: Саве́ллиа же и А́риа, равноме́рныя стремни́ны отбега́ю.

И ны́не, Богоро́дичен: Де́ва яви́лася еси́ и по рождестве́, чисто́тствуеши во обою́, и ражда́еши: странноле́пное виде́ние, глаго́лемое и разумева́емое, соде́янное в Тебе́ Богома́ти.

Сла́ва Тебе́ Бо́же на́ш, сла́ва Тебе́.

Или́ сти́х: Ди́вен Бо́г во святы́х Свои́х:

Му́ченичен: Кро́вь ва́шего терпе́ния, Го́споду мо́лится непреста́нно о на́с, му́ченицы: те́мже и ны́не помоли́теся пости́тися на́м от страсте́й безче́стия.

Сти́х: Ду́шы и́х во благи́х водворя́тся.

Поко́ин: Всему́ хотя́й суди́ти ми́ру, предстоя́щым тьма́м а́нгелов, неосужде́нно тогда́ предста́ти Тебе́ сподо́би усо́пшыя, ве́рно Всеще́дрый.

Ирмо́с: Глубина́ страсте́й воста́ на мя́, и бу́ря проти́вных ве́тров: но предвари́в мя́ Ты спаси́ Спа́се, и изба́ви от тли́, я́ко спа́сл еси́ от зве́ря проро́ка.

Конда́к: Со святы́ми упоко́й: И́кос: Са́м еди́н еси́ безсме́ртный:

Пе́снь 7.

Ирмо́с: О́троцы евре́йстии в пещи́:

Ту́чами крове́й угаси́сте пресла́внии пла́мень пре́лести: огня́ у́бо бу́дущаго на́с моли́твами я́же ко Христу́ изба́вите, Госпо́дни страстоте́рпцы.

Уста́ загради́вше льво́в, му́к же опале́ния претерпе́вше страстоте́рпцы, сла́дость лу́чшую насле́довасте: ея́же улучи́ти моли́теся, и на́м во ве́ки.

Все́м све́том просвети́вшеся Ду́ха до́блии страстоте́рпцы, преста́вльшымся ве́рным осла́бу проси́те, и рая́ вхо́д, и жи́зни прича́стие.

Богоро́дичен: Пе́снь приношу́ Ти́ Де́во, не пре́зри мене́ злы́ми одержи́маго, но да́ждь Чи́стая исправле́ние соверше́нное посто́м, и все́м житие́м благонра́вным.

И́ный. Ирмо́с: Пла́мень ороси́вый пе́щный:

О́гнь, и ме́чь, и зве́ри, страстоте́рпцы, я́ко сла́дость вмени́вше, внегда́ страда́ти удиви́сте уби́йцы ва́шя, воспева́юще Бо́га оте́ц на́ших.

На у́ды разсека́еми, и опаля́еми, Бо́гу принесо́стеся же́ртва благово́нная, Христо́вы му́ченицы: но Того́ о на́с при́сно моли́те.

Тро́ичен: В Тро́ице еди́наго Бо́га сла́влю, Отца́, Сы́на и Ду́ха: Еди́ницу про́стую, Тро́ицу честну́ю, нача́ло преднача́льное и единосу́щное.

Богоро́дичен: Всесвята́я влады́чице Богоро́дице, моли́твы рабо́в Твои́х прие́млющи, принеси́ все́х Бо́гу, да спасе́т на́с от вся́каго искуше́ния.

Сти́х: Святы́м, и́же су́ть на земли́ Его́, удиви́ Госпо́дь вся́ хоте́ния Своя́ в ни́х.

Му́ченичен: Му́чеников собо́ри, с небесе́ предста́вше, ва́с воспева́ющыя благослови́те, освяти́те, усе́рдно посто́в вре́мя сконча́ти.

Сти́х: Блаже́ни, я́же избра́л, и прия́л еси́ Го́споди.

Ме́ртвен: Ве́рою к Тебе́ преста́вльшыяся, ве́дый дела́ челове́ков, во́льная и нево́льная прегреше́ния проща́я, упоко́й я́ко Бо́г.

Ирмо́с: Пла́мень ороси́вый пе́щный и о́троки неопали́мы спасы́й, благослове́н еси́ во ве́ки, Го́споди Бо́же оте́ц на́ших.

Пе́снь 8.

Ирмо́с: Победи́тели мучи́теля:

Му́к ви́ды не́мощию те́ла претерпе́вше, вра́чеве боля́щым страстоте́рпцы яви́стеся. Те́мже зову́: мою́ неду́гующую ду́шу исцели́те, во вре́мя поста́ покая́нием.

Увы́ мне́, ка́ко преидо́ша вси́ дни́е мои́ в ле́ности! и се́ коне́ц приближа́ется, вари́т несоверше́нна до́брыми де́лы прия́ти мя́: до́бре сконча́вшии тече́ние му́ченицы, да ми́ коне́ц благи́й бу́дет, моли́теся.

Ка́плями крове́й запале́ния безбо́жия угаси́сте, боже́ственнии страстоте́рпцы, и отше́дшым от сего́ жития́ испроси́те вои́стинну Боже́ственный поко́й, и соде́янных разреше́ние во ве́ки.

Богоро́дичен: Иезеки́иль тя́ две́рь непроходи́мую чи́стая прови́де, покая́ния врата́ все́м отверза́ющую отча́янным. те́мже молю́ тя́: стези́ мне́ отве́рзи, ко о́ным веду́щыя упокое́нием.

И́ный. Ирмо́с: Из безнача́льна Отца́:

Многострада́льныя ра́ны разли́чно претерпе́вше, о́вии у́бо сгоре́вше, друзи́и сожже́ни бы́вше, ини́и же посека́еми, веселите́ся страда́льцы воспева́юще Христу́: по́йте, благослови́те и превозноси́те во вся́ ве́ки.

Кровьми́ ва́шими освяща́ете концы́, ма́лыми кропле́ньми, струи́ исцеле́ний все́м источа́юще, всехва́льнии му́ченицы. те́мже вопиете́ при́сно: по́йте, благослови́те и превозноси́те во вся́ ве́ки.

Благослови́м Отца́ и Сы́на, и Свята́го Ду́ха, Го́спода.

Триипоста́сная Еди́нице, О́тче, Сы́не и Ду́ше Живы́й, еди́но Божество́, еди́но Ца́рство: Тебе́ хва́лят незаходи́маго Све́та а́нгельская во́инства, и мы́ су́щии на земли́ пое́м, благослови́м и превозно́сим во вся́ ве́ки.

Богоро́дичен: Се́ вси́ ро́ди блажи́м Тя́ Пречи́стая, вели́чия Твоя́ зря́ще: Ты́ бо ражда́еши преесте́ственно все́х Творца́, Бо́га су́ща и Челове́ка. Те́мже Тя́ благослови́м, и превозно́сим во вся́ ве́ки.

Сти́х: Ди́вен Бо́г во святы́х свои́х:

Страстоте́рпцев ли́че, моли́теся ко Спа́су спасти́ ны, моли́твы и ны́не творя́ще, служи́ти чи́сте воздержа́нием Ему́: по́йте, благослови́те и превозноси́те во вся́ ве́ки.

Сти́х: Ду́шы и́х во благи́х водворя́тся.

Усо́пшыя благоче́стно наде́ждею воскре́сния, к ве́чной жи́зни воста́ти Го́споди сподо́би, хвали́ти Тя́ чи́сте, и сла́вити псало́мски: по́йте, благослови́те, и превозноси́те во вся́ ве́ки.

Хва́лим, благослови́м, покланя́емся Го́сподеви:

Ирмо́с: Из безнача́льнаго Отца́ рожде́ннаго пре́жде ве́к Бо́га, и в после́дняя от Богоро́дицы в пло́ть обле́кшася, я́ко соверше́нна Челове́ка и Бо́га и́стинна, по́йте, благослови́те и превозноси́те во вся́ ве́ки.

Пе́снь 9.

Ирмо́с: Уста́вы прешла́ еси́:

Яви́стеся боже́ственнии я́ко у́глие, вещество́ лука́вое безбо́жие попали́вше, и мече́м бесо́вския полки́ посе́кше, до́блии страстоте́рпцы, светово́дцы серде́ц на́ших.

Тьму́ муче́ний проидо́сте, и к све́ту мы́сленному пресели́стеся, до́блии страстоте́рпцы: те́мже просвети́те смире́нную ду́шу мою́, омраче́нную согреше́ньми.

Поболе́ша боле́зни пренося́ще пресла́внии страстоте́рпцы телесе́, и ны́не преста́вльшымся ве́рным, неболе́зненный поко́й про́сят, и рая́ наслажде́ние.

Богоро́дичен: Яви́ся Чи́стая Влады́чице Боже́ственная помо́щница, непотре́бным рабо́м Твои́м, во вре́мя воздержа́ния, моли́твы на́шя принося́щи Го́сподеви, ве́ки ца́рствующему.

И́ный. Ирмо́с: Тебе́ безсме́ртный исто́чник:

Я́коже о́гнь вложе́ни бы́вше от Бо́га в зе́млю, попали́сте вся́кую ле́сть и́дольскую, вже́гше свети́ло в концы́ благоче́стия страстоте́рпцы Христо́вы.

Ва́с ни пла́мень, ни заколе́ние, ни коле́са, ни стягну́тия, ни опале́ния, ни ина́я му́ка го́рькая, разлучи́ от любви́ Христо́вы, страстоте́рпцы.

Тро́ичен: Еди́но и три́ воспева́ю благоче́стно божество́ зра́ком, ли́цы совокупля́я и разделя́я: Оте́ц, Сы́н, и Святы́й Ду́х, Сия́ еди́но су́ть.

Богоро́дичен: Тя́ от ко́рене Иессе́ова, и Дави́да пра́отца прозя́бший же́зл, Всепречи́стая Чи́стая велича́ем, я́ко спаса́еши ду́шы на́шя.

Сти́х: Святы́м, и́же су́ть на земли́ Его́:

Мно́жество му́ченик честно́е, Христа́ моли́те, в ми́ре исполня́ющым на́м тече́ние посто́в, ви́дети и поклони́тися и страсте́м Его́.

Сти́х: Блаже́ни, я́же избра́л, и прия́л еси́ Го́споди.

Ме́ртвых и живы́х я́ко Бо́г, умертви́вый сме́рть, и жи́знь воста́нием Твои́м все́м подая́й Христе́, упоко́й и рабы́ Твоя́, я́же преста́вил еси́.

Ирмо́с: Тебе́ безсме́ртный исто́чник, и святы́х исцеле́ния челове́чу ро́ду подаю́ща, при́сно велича́ем, я́ко спаса́еши ду́шы на́шя.

Ексапостила́рий: Не́бо звезда́ми украси́вый я́ко Бо́г, и Твои́ми святы́ми всю́ зе́млю просвети́вый, Соде́телю все́х пою́щыя Тя́ спаса́й.

Сла́ва: Живы́ми и ме́ртвыми облада́яй я́ко Бо́г, упоко́й Твоя́ рабы́ в селе́ниих избра́нных а́ще бо и согреши́ша Спа́се, но не отступи́ша от Тебе́.

И ны́не: Сла́дость а́нгелов, скорбя́щих ра́дость, христиа́н предста́тельнице, Де́во Ма́ти Госпо́дня, заступи́ на́с, и изба́ви ве́чных му́к.

На хвали́тех му́ченичны гла́са. Сла́ва, самогла́сен за упоко́й. И ны́не, Богоро́дичен.

На стихо́вне ме́ртвены стихи́ры господи́на Феофа́на, прилучи́вшагося гла́са. Сла́ва, и ны́не, Богоро́дичен.

На литурги́и блаже́нны гла́са, на 6. По вхо́де тропари́: Апо́столи, му́ченицы: Помяни́ Го́споди: Сла́ва: Со святы́ми упоко́й: И ны́не, Тебе́ и сте́ну: Проки́мен, Весели́теся о Го́споде: Сти́х: Блаже́ни, и́хже оста́вишася беззако́ния: Други́й: Ду́шы и́х во благи́х водворя́тся.

Апо́стол дне́, зача́ло 309. И ме́ртвен, к солу́няном зача́ло 270. Аллилу́иа: Воззва́ша пра́веднии: Сти́х: Блаже́ни, я́же избра́л: Ева́нглие от Ма́рка, зача́ло 6. И от Иоа́нна, зача́ло 16.

Прича́стен: Ра́дуйтеся пра́веднии о Го́споде: Други́й: Блаже́ни, я́же избра́л и прия́л еси́ Го́споди.

Си́це у́бо быва́ет слу́жба за упоко́й, в три́ суббо́ты свята́го и Вели́каго поста́, егда́ ни еди́н е́сть пра́здник от трие́х: Предте́чев: святы́х четы́редесяти му́чеников: или́ Благове́щения.