Чи́нъ бж҃е́ственныѧ лїтꙋргі́и преждеѡсщ҃е́нныхъ

Во ст҃ꙋ́ю и҆ вели́кꙋю четыредесѧ́тницꙋ, є҆гда̀ и҆́мать сщ҃е́нникъ сотвори́ти преждеѡсщ҃е́ннꙋю, въ проскомі́дїи въ недѣ́лю твори́тъ, ꙗ҆́коже ѡ҆бы́чно, и҆ по є҆́же рѣ́зати пе́рвый хлѣ́бъ, и҆ жре́ти, и҆ пробода́ти, рѣ́жетъ и҆ дрꙋгі̑ѧ хлѣ́бы, глаго́лѧ на є҆ди́номъ ко́емждо сїѧ̑:

Въ воспомина́нїе: Ꙗ҆́кѡ ѻ҆вча̀: И҆: Жре́тсѧ: И҆: Є҆ди́нъ ѿ вѡ́инъ:

Та́же влива́етъ во ст҃ꙋ́ю ча́шꙋ вїно̀ и҆ во́дꙋ, глаго́лѧ ѡ҆бы̑чнаѧ, и҆ покрыва́етъ ѧ҆̀ сщ҃е́нными покро́вцы, и҆ кади́тъ, глаго́лѧ мл҃твꙋ предложе́нїѧ. И҆ та́кѡ начина́етъ бж҃е́ственнꙋю лїтꙋргі́ю, и҆ и҆сполнѧ́етъ ю҆̀, ꙗ҆́кѡ ѡ҆бы́чно.

Є҆гда́ же и҆́мать назна́менати хлѣ́бы: по призыва́нїи дх҃а ст҃а́гѡ, глаго́летъ: Хлѣ́бъ се́й: є҆ди́нственнѣ, ꙗ҆́кѡ є҆ди́нъ є҆́сть хрⷭ҇то́съ: а҆ хлѣ́бы сїѧ̑, мно́жественнымъ число́мъ не глаго́лати. И҆ є҆гда̀ и҆́мать вознестѝ, возноша́етъ всѧ̑ вкꙋ́пѣ, и҆ раздроблѧ́етъ приноси́мый пе́рвый хлѣ́бъ, и҆ полага́етъ ча́стицꙋ во ст҃ꙋ́ю ча́шꙋ, и҆ влива́етъ и҆ теплотꙋ̀, ꙗ҆́кѡ ѡ҆бы́чай.

Та́же взе́мъ ст҃ꙋ́ю лжи́цꙋ десно́ю рꙋко́ю, ѡ҆моча́етъ ю҆̀ во ст҃ѣ́й кро́ви. Лѣ́вою же рꙋко́ю є҆́млетъ кі́йждо хлѣ́бъ, и҆ нано́ситъ ст҃ꙋ́ю лжи́цꙋ, со ст҃о́ю кро́вїю, ѡ҆моче́ннꙋю, и҆ прикаса́етсѧ є҆́ю ст҃о́мꙋ хлѣ́бꙋ крⷭ҇тоѡбра́знѡ, во странꙋ̀, на не́йже начерта́сѧ кре́стъ под̾ мѧ́гкостїю, и҆ полага́етъ и҆̀ въ хлѣбоно́сецъ. Та́же є҆́млетъ и҆ дрꙋгі̑ѧ, и҆ твори́тъ та́кожде на є҆ди́номъ ко́емждо, и҆ спрѧ́товаетъ и҆̀хъ всѣ́хъ въ хлѣбоно́сецъ. Та́же сщ҃е́нникъ мо́литсѧ, ꙗ҆́кѡ ѡ҆бы́чно, и҆ причаща́етсѧ, ꙗ҆́кѡ ѡ҆бы́чно, и҆ и҆сполнѧ́етъ бж҃е́ственное сщ҃еннодѣ́йствїе по ᲂу҆чине́нномꙋ.

Є҆гда́ же и҆́мать сщ҃еннодѣ́йствовати преждеѡсщ҃е́ннꙋю, вше́дъ во ст҃и́лище ѡ҆блачи́тсѧ во сщ҃е́нническꙋю ѡ҆де́ждꙋ, назна́менꙋѧй и҆ цѣлꙋ́ѧй то́кмѡ, ничто́же приглаго́лѧ, ра́звѣ: Гдⷭ҇ꙋ помо́лимсѧ, над̾ є҆ди́ною ко́еюждо ѡ҆де́ждею.

И҆ взе́мъ дїа́конъ вре́мѧ, и҆схо́дитъ, и҆ ста́въ на ѡ҆бы́чнѣмъ мѣ́стѣ, возглаша́етъ:

Бл҃гословѝ, влады́ко.

Сщ҃е́нникъ же возглаша́етъ:

Бл҃гослове́но црⷭ҇тво ѻ҆ц҃а̀ и҆ сн҃а и҆ ст҃а́гѡ дх҃а, ны́нѣ и҆ при́снѡ и҆ во вѣ́ки вѣкѡ́въ.

И҆ а҆́бїе чте́цъ: Прїиди́те, поклони́мсѧ: три́жды. И҆ глаго́летъ предначина́тельный ѱало́мъ.

Сщ҃е́нникъ же глаго́летъ мл҃твы свѣти̑льничныѧ, си́рѣчь вечє́рнїѧ, съ четве́ртыѧ моли́твы, занѐ трѝ пє́рвыѧ по є҆ктенїа́хъ глаго́лютсѧ. По и҆сполне́нїи же ѱалма̀, глаго́летъ дїа́конъ є҆ктенїю̀.

И҆ по возгла́сѣ, стїхосло́витсѧ: Ко гдⷭ҇ꙋ внегда̀ скорбѣ́ти мѝ: быва́ємымъ и҆ покло́нѡмъ на А҆ллилꙋ́їа. На ко́емждо же а҆нтїфѡ́нѣ быва́етъ є҆ктенїа̀ ма́лаѧ ѿ дїа́кона, и҆ возгла́съ ѿ сщ҃е́нника. Наче́ншꙋсѧ же стїхосло́вїю, ѿхо́дитъ сщ҃е́нникъ во ст҃о́е предложе́нїе: и҆ взе́мъ преждеѡсщ҃е́нный хлѣ́бъ ѿ хлѣбоно́сца, полага́етъ и҆̀ со бл҃гоговѣ́нїемъ мно́гимъ во ст҃ы́й ді́скосъ, вложи́въ во ст҃ꙋ́ю ча́шꙋ вїно̀ и҆ во́дꙋ ѡ҆бы́чнѡ, ничто́же глаго́лѧ. И҆ взе́мъ кади́льницꙋ, кади́тъ ѕвѣзди́цꙋ и҆ покро́вы: и҆ покры́ваетъ ѧ҆̀, ничто́же ѿню́дъ глаго́лѧ, нижѐ мл҃твꙋ предложе́нїѧ, но то́кмѡ:

Мл҃твами ст҃ы́хъ ѻ҆тє́цъ на́шихъ, гдⷭ҇и і҆и҃се хрⷭ҇тѐ бж҃е на́шъ, поми́лꙋй на́съ.

Преждеѡсщ҃е́нна бо є҆́сть, и҆ соверше́нна сїѧ̀ же́ртва. По каѳі́смѣ же, Гдⷭ҇и, воззва́хъ: во гла́съ самогла́сна днѐ. Поста́вимъ стїхѡ́въ і҃, и҆ повторѧ́емъ самогла́сенъ. Та́же мч҃нченъ: и҆ трѝ подѡ́бны трїѡ́ди, и҆ трѝ мине́и, повторѧ́юще є҆ди́нъ. Сла́ва, и҆ ны́нѣ, бг҃оро́диченъ. Вхо́дъ без̾ є҆ѵⷢ҇лїа. Є҆гда́ же и҆́мать чести́сѧ є҆ѵⷢ҇лїе, въ пра́зднованїе хра́ма, и҆лѝ ст҃а́гѡ, тогда̀ вхо́дъ твори́тъ со є҆ѵⷢ҇лїемъ.

Дїа́конъ: Премꙋ́дрость, про́сти.

И҆ пою́тъ: Свѣ́те ти́хїй:

Дїа́конъ: Во́нмемъ.

Сщ҃е́нникъ: Ми́ръ всѣ̑мъ.

Дїа́конъ: Премꙋ́дрость.

Чте́цъ: прокі́менъ, и҆ бытїѐ. Вторы́й прокі́менъ.

И҆ посе́мъ возглаша́етъ дїа́конъ: Повели́те.

Сщ҃е́нникъ же, взе́мъ ѡ҆бѣ́ма рꙋка́ма кади́льницꙋ и҆ свѣ́щникъ со свѣще́ю, стои́тъ пред̾ ст҃о́ю трапе́зою, зрѧ̀ къ восто́кѡмъ, и҆ назна́менꙋѧ кре́стъ, глаго́летъ:

Премꙋ́дрость, про́сти.

Та́же ѡ҆бра́щьсѧ на за́падъ къ наро́дꙋ, глаго́летъ:

Свѣ́тъ хрⷭ҇то́въ просвѣща́етъ всѣ́хъ.

Чте́цъ: При́тчей чте́нїе.

Дїа́конъ: Во́нмемъ. И҆ при́тча.

И҆ по и҆сполне́нїи, глаго́летъ сщ҃е́нникъ: Ми́ръ тѝ. Дїа́конъ: Премꙋ́дрость.

Чте́цъ пое́тъ:

Да и҆спра́витсѧ мл҃тва моѧ̀, ꙗ҆́кѡ кади́ло пред̾ тобо́ю, воздѣѧ́нїе рꙋкꙋ̀ моє́ю же́ртва вече́рнѧѧ.

И҆ по пѣ́нїи чтеца̀, ли́къ пое́тъ то́же.

Та́же, чте́цъ:

Сті́хъ а҃: Гдⷭ҇и, воззва́хъ къ тебѣ̀, ᲂу҆слы́ши мѧ̀, вонмѝ гла́сꙋ моле́нїѧ моегѡ̀, внегда̀ воззва́ти мѝ къ тебѣ̀.

Ли́къ: Да и҆спра́витсѧ:

Чте́цъ, сті́хъ в҃: Положѝ, гдⷭ҇и, хране́нїе ᲂу҆стѡ́мъ мои̑мъ, и҆ две́рь ѡ҆гражде́нїѧ ѡ҆ ᲂу҆стна́хъ мои́хъ.

Ли́къ: Да и҆спра́витсѧ:

Чте́цъ, сті́хъ г҃: Не ᲂу҆клонѝ се́рдце моѐ въ словеса̀ лꙋка́вствїѧ, непщева́ти вины̀ ѡ҆ грѣсѣ́хъ.

Ли́къ: Да и҆спра́витсѧ:

И҆ па́ки чте́цъ пое́тъ: Да и҆спра́витсѧ мл҃тва моѧ̀, ꙗ҆́кѡ кади́ло пред̾ тобо́ю.

И҆ ли́къ пое́тъ: Воздѣѧ́нїе рꙋкꙋ̀ моє́ю:

Подоба́етъ вѣ́дати, є҆гда̀ чте́цъ пое́тъ: Да и҆спра́витсѧ мл҃тва моѧ̀, ꙗ҆́кѡ кади́ло пред̾ тобо́ю: всѝ лю́дїе, сꙋ́щїи во хра́мѣ и҆ во ѻ҆лтарѝ, стоѧ́тъ на колѣ́нѣхъ, молѧ́щесѧ. Є҆гда́ же на́чнетъ: Воздѣѧ́нїе рꙋкꙋ̀ моє́ю: востаю́тъ. На про́чихъ же стїсѣ́хъ, при пѣ́нїи Да и҆спра́витсѧ, є҆гда̀ кото́рый ли́къ пое́тъ, и҆ всѧ̀ страна̀ стои́тъ: вторы́й же ли́къ и҆ страна̀ наро́да кѡлѣ́на приклонѧ́ютъ. І҆ере́й же стоѧ̀ во ѻ҆лтарѝ пред̾ ст҃о́ю трапе́зою, прїе́мъ кади́льницꙋ съ ѳѷмїа́момъ, кади́тъ. Є҆гда́ же чте́цъ пое́тъ послѣ́днее Да и҆спра́витсѧ, тогда и҆ са́мъ і҆ере́й, ѿда́въ кади́льницꙋ дїа́конꙋ, прикланѧ́етъ кѡлѣ́на, молѧ́сѧ. И҆ по и҆сполне́нїи твори́мъ покло́ны трѝ.

Та́же дїа́конъ глаго́летъ є҆ктенїю̀: И҆ прѡ́чаѧ.

Въ вели́кїй же вхо́дъ: Ны́нѣ си́лы нбⷭ҇ныѧ:

Мл҃тва херꙋві́мскаѧ не глаго́летсѧ: Но кадѧ̀ сщ҃е́нникъ, глаго́летъ пѧтдесѧ́тный ѱало́мъ. И҆ по происхожде́нїи ст҃ы́хъ дарѡ́въ, и҆сполнѧ́емꙋ: Ны́нѣ си̑лы нбⷭ҇ныѧ: полага́емъ покло́ны трѝ ѿкрове́ни сꙋ́ще. Взе́млетъ же сщ҃е́нникъ покро́вы ѿ ст҃ы́хъ дарѡ́въ, и҆ покрыва́етъ ѧ҆̀ воздꙋ́хомъ. Є҆гда́ же и҆́мать вознестѝ ст҃ы́й хлѣ́бъ, не ѿкрыва́етъ ст҃а̑ѧ: но є҆щѐ покровє́ннымъ сꙋ́щымъ бж҃е́ствєннымъ дарѡ́мъ, вно́ситъ сщ҃е́нникъ рꙋ́кꙋ свою̀, со стра́хомъ мно́гимъ, и҆ прикаса́етсѧ бж҃е́ственномꙋ хлѣ́бꙋ со бл҃гоговѣ́нїемъ и҆ стра́хомъ. Глаго́лющꙋ дїа́конꙋ: Во́нмемъ. Возглаша́етъ сщ҃е́нникъ:

Преждеѡсщ҃є́ннаѧ ст҃а̑ѧ ст҃ы̑мъ.

И҆ прѡ́чаѧ по чи́нꙋ, соверша́етъ ст҃ꙋ́ю лїтꙋргі́ю, ꙗ҆́кѡ на рѧдꙋ̀ ᲂу҆ка́зано.

Коне́цъ.