Глава 17. После́дование ме́ртвенное мирски́х те́л

Сконча́вшуся кому́ от правосла́вных, а́бие призыва́ют сро́дницы его́ свяще́нника, и́же прише́д в до́м, в не́мже мо́щи усо́пшаго лежа́т, и возложи́в епитрахи́ль, и вложи́в фимиа́м в кади́льницу, кади́т те́ло ме́ртваго, и предстоя́щих, и начина́ет обы́чно:

Благослове́н Бо́г на́ш:

И начина́ют сопредстоя́щии: Святы́й Бо́же: Пресвята́я Тро́ице: О́тче на́ш: Я́ко твое́ е́сть Ца́рство:

И а́бие пою́т тропари́ сия́. Гла́с 4:

Со ду́хи пра́ведных сконча́вшихся, ду́шу раба́ твоего́ спа́се упоко́й, сохраня́я ю́ во блаже́нной жи́зни, я́же у тебе́ человеколю́бче.

В поко́ищи твое́м Го́споди, иде́же вси́ святи́и твои́ упокоева́ются, упоко́й и ду́шу раба́ твоего́, я́ко еди́н еси́ человеколю́бец.

Сла́ва: Ты́ еси́ Бо́г соше́дый во а́д, и у́зы окова́нных разреши́вый, са́м и ду́шу раба́ твоего́ упоко́й.

И ны́не: Еди́на чи́стая и непоро́чная Де́во, Бо́га без се́мене ро́ждшая, моли́ спасти́ся души́ его́.

Диа́кон глаго́лет:

Поми́луй на́с Бо́же, по вели́цей ми́лости твое́й, мо́лим ти ся, услы́ши и поми́луй.

Го́споди поми́луй, три́жды.

Еще́ мо́лимся о упокое́нии души́ усо́пшаго раба́ Бо́жия, и́мярек, и о е́же прости́тися ему́ вся́кому прегреше́нию, во́льному же и нево́льному.

Го́споди поми́луй, три́жды.

Я́ко да Госпо́дь Бо́г учини́т ду́шу его́, иде́же пра́веднии упокоя́ются.

Го́споди поми́луй, три́жды.

Ми́лости Бо́жия, Ца́рства небе́снаго и оставле́ния грехо́в его́, у Христа́ безсме́ртнаго Царя́ и Бо́га на́шего про́сим.

Пода́й Го́споди.

Диа́кон: Го́споду помо́лимся:

Го́споди поми́луй.

Свяще́нник глаго́лет моли́тву сию́:

Бо́же духо́в, и вся́кия пло́ти, сме́рть попра́вый и диа́вола упраздни́вый, и живо́т ми́ру твоему́ дарова́вый: са́м Го́споди, упоко́й ду́шу усо́пшаго раба́ твоего́, и́мярек, в ме́сте све́тле, в ме́сте зла́чне, в ме́сте поко́йне: отню́дуже отбеже́ боле́знь, печа́ль и воздыха́ние. вся́кое согреше́ние, соде́янное и́м сло́вом, или́ де́лом, или́ помышле́нием, я́ко благи́й человеколю́бец Бо́г прости́, я́ко не́сть челове́к, и́же жи́в бу́дет, и не согреши́т: ты́ бо еди́н кроме́ греха́, пра́вда твоя́ пра́вда во ве́ки, и сло́во твое́ и́стина.

Возгла́с: Я́ко ты́ еси́ воскре́сние и живо́т, и поко́й усо́пшаго раба́ твоего́, и́мярек, Христе́ Бо́же на́ш, и тебе́ сла́ву возсыла́ем, со безнача́льным твои́м отце́м, и с пресвяты́м, и благи́м, и животворя́щим твои́м ду́хом, ны́не и при́сно, и во ве́ки веко́в, ами́нь.

Диа́кон: Прему́дрость.

Ли́к: Честне́йшую херуви́м: И про́чее.

И а́бие быва́ет от свяще́нника сицевы́й отпу́ст:

Живы́ми и ме́ртвыми облада́яй Христо́с и́стинный Бо́г на́ш, моли́твами пречи́стыя своея́ ма́тере, преподо́бных и богоно́сных оте́ц на́ших, и все́х святы́х свои́х, ду́шу от на́с преста́вльшагося раба́ своего́ и́мярек, в селе́ниих святы́х всели́т, и с пра́ведными причте́т, и на́с поми́лует, я́ко бла́г и человеколю́бец.

И а́ще у́бо гото́ва су́ть вся́, я́же ко исхо́ду, твори́т па́ки свяще́нник нача́ло: Благослове́н Бо́г на́ш.

И начина́ем пе́ти: Святы́й Бо́же: со стра́хом, и вся́ким умиле́нием.

И взе́мше мо́щи усо́пшаго, отхо́дим в хра́м, предъиду́щым свяще́нником со свеща́ми, диа́кону с кади́льницею.

Егда́ же прии́дут в хра́м, мо́щи у́бо полага́ются в па́перти, [или́ в хра́ме, я́коже зде́ в вели́цей Росси́и обы́че.]

И начина́ют:

Живы́й в по́мощи вы́шняго:

И посе́м вы́шшим гла́сом пою́т:

Благослове́н еси́ Го́споди, научи́ мя оправда́нием твои́м.

Непоро́чнии в пу́ть: Аллилу́иа.

И пое́тся пе́рвая статия́ непоро́чных, во гла́с 6: в концы́ же коего́ждо стиха́ пое́м: Аллилу́иа.

Блаже́ни непоро́чнии в пу́ть, ходя́щии в зако́не Госпо́дни: Аллилу́иа.

Блаже́ни испыта́ющии свиде́ния его́, все́м се́рдцем взы́щут его́. Аллилу́иа.

И про́чее псалма́. Сла́ва: Аллилу́иа. И ны́не: Аллилу́иа.

Диа́кон: Па́ки и па́ки ми́ром Го́споду помо́лимся.

Еще́ мо́лимся о упокое́нии души́ усо́пшаго раба́ Бо́жия, и́мярек, и о е́же прости́тися ему́ вся́кому прегреше́нию, во́льному же и нево́льному.

Я́ко да Госпо́дь Бо́г учини́т ду́шу его́, иде́же пра́веднии упокоя́ются.

Ми́лости Бо́жия, Ца́рства небе́снаго, и оставле́ния грехо́в его́, у Христа́ безсме́тнаго Царя́ и Бо́га на́шего про́сим.

Пода́й Го́споди.

Диа́кон: Го́споду помо́лимся.

Го́споди поми́луй.

Свяще́нник глаго́лет моли́тву сию́: Бо́же духо́в, и вся́кия пло́ти, сме́рть попра́вый и диа́вола упраздни́вый, и живо́т ми́ру твоему́ дарова́вый: са́м Го́споди, упоко́й ду́шу усо́пшаго раба́ твоего́, и́мярек, в ме́сте све́тле, в ме́сте зла́чне, в ме́сте поко́йне: отню́дуже отбеже́ боле́знь, печа́ль и воздыха́ние. вся́кое согреше́ние, соде́янное и́м сло́вом, или́ де́лом, или́ помышле́нием, я́ко благи́й человеколю́бец Бо́г прости́, я́ко не́сть челове́к, и́же жи́в бу́дет, и не согреши́т: ты́ бо еди́н кроме́ греха́, пра́вда твоя́ пра́вда во ве́ки, и сло́во твое́ и́стина.

И посе́м начина́ем втору́ю статию́ на гла́с 5: на ко́емждо же конце́ стиха́ глаго́лем: Поми́луй раба́ твоего́.

Ли́к начина́ет: За́поведи твоя́:

Поми́луй раба́ твоего́:

Па́ки то́йже ли́к: Руце́ твои́ сотвори́сте мя́: и созда́сте мя́, вразуми́ мя, и научу́ся за́поведем твои́м.

Поми́луй раба́ твоего́.

Боя́щиися тебе́ у́зрят мя́: и возвеселя́тся, я́ко на словеса́ твоя́ упова́х.

Поми́луй раба́ твоего́.

И про́чее псалма́, и по конце́,

Сла́ва: Поми́луй раба́ твоего́.

И ны́не: Поми́луй раба́ твоего́.

Диа́кон: Па́ки и па́ки:

И па́ки начина́ем тре́тию статию́ на гла́с тре́тий:

И́мя твое́: Аллилу́иа.

Па́ки то́йже ли́к пое́т:

При́зри на мя́, и поми́луй мя́, по суду́ лю́бящих и́мя твое́. Аллилу́иа.

Стопы́ моя́ напра́ви по словеси́ твоему́, и да не облада́ет мно́ю вся́кое беззако́ние: Аллилу́иа.

И про́чее.

И по конце́ а́бие: Благослове́н еси́ Го́споди, научи́ мя оправда́нием твои́м.

Святы́х ли́к обре́те исто́чник жи́зни, и две́рь ра́йскую: да обря́щу и а́з пу́ть покая́нием, поги́бшее овча́ а́з е́смь, воззови́ мя спа́се, и спаси́ мя.

Благослове́н еси́ Го́споди:

А́гнца Бо́жия пропове́давше, и закла́ни бы́вше я́коже а́гнцы. и к жи́зни нестаре́емей, святи́и, и присносу́щней преста́вльшеся, того́ приле́жно му́ченицы моли́те, долго́в разреше́ние на́м дарова́ти.

Благослове́н еси́ Го́споди:

В пу́ть у́зкий хо́ждшии приско́рбный, вси́ в житии́ кре́ст я́ко яре́м взе́мшии, и мне́ после́довавшии ве́рою, прииди́те наслади́теся, и́хже угото́вах ва́м по́честей, и венцо́в небе́сных.

Благослове́н еси́ Го́споди:

О́браз е́смь неизрече́нныя твоея́ сла́вы, а́ще и я́звы ношу́ прегреше́ний: уще́дри твое́ созда́ние Влады́ко, и очи́сти твои́м благоутро́бием, и возжеле́нное оте́чество пода́ждь ми́, рая́ па́ки жи́теля мя́ сотворя́я.

Благослове́н еси́ Го́споди:

Дре́вле у́бо от не су́щих созда́вый мя́, и о́бразом твои́м Боже́ственным почты́й, преступле́нием же за́поведи, па́ки мя́ возврати́вый в зе́млю, от нея́же взя́т бы́х, на е́же по подо́бию возведи́, дре́внею добро́тою возъобрази́тися.

Благослове́н еси́ Го́споди:

Упоко́й Бо́же раба́ твоего́, и учини́ его́ в раи́, иде́же ли́цы святы́х Го́споди, и пра́ведницы сия́ют я́ко свети́ла, усо́пшаго раба́ твоего́ упоко́й, презира́я его́ вся́ согреше́ния.

Сла́ва: Трисия́тельное еди́наго Божества́, благоче́стно пое́м вопию́ще: свя́т еси́ о́тче безнача́льный, собезнача́льный Сы́не, и Боже́ственный ду́ше, просвети́ на́с ве́рою тебе́ слу́жащих, и ве́чнаго огня́ исхити́.

И ны́не: Ра́дуйся чи́стая, Бо́га пло́тию ро́ждшая во спасе́ние все́х, е́юже ро́д челове́ческий обре́те спасе́ние, тобо́ю да обря́щем ра́й, Богоро́дице чи́стая благослове́нная.

Аллилу́иа, три́жды.

Та́же диа́кон: Па́ки и па́ки:

И по возгла́се пое́м настоя́щыя тропари́, гла́с 5:

Поко́й спа́се на́ш с пра́ведными раба́ твоего́, и сего́ всели́ во дворы́ твоя́, я́коже е́сть пи́сано, презира́я я́ко бла́г прегреше́ния его́, во́льная и нево́льная, и вся́ я́же в ве́дении и не в ве́дении, человеколю́бче.

Сла́ва, коне́ц: И вся́ я́же в ве́дении, и не в ве́дении, человеколю́бче.

И ны́не, богоро́дичен: От Де́вы возсия́вый ми́ру Христе́ Бо́же, сы́ны све́та то́ю показа́вый, поми́луй на́с.

Та́же псало́м 50. И кано́н, его́же краестро́чие: Шесту́ю припева́ю отше́дшему пе́снь. Феофа́ново. Гла́с 6.

Пе́снь 1.

Ирмо́с: Я́ко по су́ху пешеше́ствовав изра́иль, по бе́здне стопа́ми. гони́теля фарао́на ви́дя потопля́ема Бо́гу побе́дную пе́снь пои́м, вопия́ше.

В небе́сных черто́зех всегда́ до́блии му́ченицы мо́лят тя́ Христе́, его́же от земли́ преста́вил еси́ ве́рнаго, ве́чных бла́г получи́ти сподо́би.

Украше́й вся́ческая, живо́тное смеше́нное, посреде́ мя́ челове́ка, смире́ния вку́пе и вели́чества, созда́л еси́, те́мже раба́ твоего́ ду́шу спа́се, упоко́й.

Сла́ва: Рая́ жи́теля, и земледе́лателя в нача́ле мя́ учини́л еси́, престу́пльша же твою́ за́поведь изгна́л еси́. те́мже раба́ твоего́ ду́шу спасе́, упоко́й.

И ны́не, богоро́дичен: И́же от ребра́ созда́вый е́ву пре́жде на́шу прама́терь, из пречи́стаго твоего́ чре́ва в пло́ть одева́ется, е́юже сме́рти кре́пость, чи́стая, разруши́.

Пе́снь 3.

Ирмо́с: Не́сть свя́т я́коже ты́ Го́споди Бо́же мо́й, вознесы́й ро́г ве́рных твои́х бла́же, и утверди́вый на́с на ка́мени испове́дания твоего́.

Зако́нно пострада́ша твои́ му́ченицы жизнода́вче, и венце́м побе́ды украси́вшеся, приле́жно преста́вльшемуся ве́рному ве́чное избавле́ние подаю́т.

Наказа́в пе́рвее мно́гими чудесы́ и зна́меньми мене́ заблу́дшаго, напосле́док самаго́ себе́ истощи́л еси́, я́ко сострада́тель, и поиска́в обре́л и спа́сл еси́.

Сла́ва: От теку́щих непостоя́тельныя тли́, к тебе́ преше́дшаго, в селе́ниих ве́чных жи́ти ра́достно сподо́би бла́же, оправда́в ве́рою же и благода́тию.

И ны́не, богоро́дичен: Не́сть непоро́чна, я́коже ты́ пречи́стая богома́ти, еди́на бо от ве́ка Бо́га и́стиннаго зачала́ еси́ во чре́ве, сме́рти разруши́вшаго си́лу.

Диа́кон: Па́ки и па́ки:

Седа́лен, гла́с 6: Вои́стинну суета́ вся́ческая, житие́ же се́нь, и со́ние: и́бо всу́е мяте́тся вся́к земноро́дный, я́коже рече́ писа́ние: егда́ ми́р приобря́щем. тогда́ во гро́б всели́мся, иде́же вку́пе ца́рие и ни́щии. те́мже Христе́ Бо́же, преста́вльшагося раба́ твоего́ упоко́й, я́ко человеколю́бец.

Сла́ва, и ны́не, богоро́дичен: Всесвята́я Богоро́дице, во вре́мя живота́ моего́ не оста́ви мене́, челове́ческому предста́тельству не вве́ри мя́: но сама́ заступи́, и поми́луй мя́.

Пе́снь 4.

Ирмо́с: Христо́с моя́ си́ла, Бо́г и Госпо́дь, честна́я це́рковь боголе́пно пое́т взыва́ющи, от смы́сла чи́ста о Го́споде пра́зднующи.

Прему́дрости бо́льшее явля́я позна́ние, и е́же о да́рех, многосоверше́нныя Влады́ко благосты́ни, му́ченическия ли́ки а́нгелов сочета́л еси́.

Неизрече́нныя сла́вы твоея́ получи́ти сподо́би к тебе́ преста́вльшагося, иде́же Христе́ веселя́щихся е́сть жили́ще, и гла́с чи́стаго ра́дования.

Сла́ва: Пою́ща приими́ Боже́ственную держа́ву твою́, его́же от земли́ прия́л еси́, ча́до све́та сего́ соде́ловая, грехо́вную мглу́ очища́я многоми́лостиве.

И ны́не, богоро́дичен: Прия́телище пречи́стое, хра́м всенепоро́чный, ковче́г всесвяты́й, Де́вственное ме́сто свяще́ния, тебе́ добро́ту Иа́ковлю Влады́ка избра́л е́сть.

Пе́снь 5.

Ирмо́с: Бо́жиим све́том твои́м бла́же, у́тренюющих ти́ ду́шы любо́вию озари́, молю́ся, тя́ ве́дети сло́ве Бо́жий, и́стиннаго Бо́га, от мра́ка грехо́внаго взыва́юща.

Я́ко всепло́дие свяще́нное, и я́ко нача́ток челове́ческаго естества́, му́ченицы, просла́вленному прине́сшеся бо́гови, на́м спасе́ние при́сно хода́тайствуют.

Небе́снаго пребыва́ния, раздая́ния дарова́ний сподо́би Го́споди, пре́жде усо́пшаго ве́рнаго раба́ твоего́, подая́ прегреше́ний избавле́ние.

Сла́ва: И́же еди́н естество́м животворе́ц, и́же бла́гости вои́стинну неизсле́димая пучи́на, сконча́вшагося, Ца́рствия твоего́ сподо́би ще́дре, еди́не безсме́ртне.

И ны́не, богоро́дичен: Кре́пость и пе́ние, из тебе́ Влады́чице ми́ру рожде́йся, и спасе́ние бы́в поги́бшым, и́же от а́довых вра́т избавля́яй, ве́рою тебе́ блажа́щыя.

Пе́снь 6.

Ирмо́с: Жите́йское мо́ре воздвиза́емое зря́ напа́стей бу́рею к ти́хому приста́нищу твоему́ прите́к вопию́ ти: возведи́ от тли́ живо́т мо́й многоми́лостиве.

На кресте́ пригвожда́емь, му́ченическия ли́ки к себе́ собра́л еси́, подража́ющыя стра́сть твою́ бла́же. те́мже мо́лимся ти́: к тебе́ преста́вльшагося ны́не упоко́й.

Неизрече́нною сла́вою твое́ю, егда́ прии́деши стра́шно суди́ти ми́ру всему́ на о́блацех, благоволи́ све́тло сре́сти тебе́ изба́вителю, его́же от земли́ прия́л еси́ ве́рнаго раба́ твоего́.

Сла́ва: Исто́чник жи́зни сы́й му́жеством Боже́ственным Влады́ко, окова́нная изводя́й, раба́ твоего́ к тебе́ ве́рно отше́дшаго в сла́дости ра́йстей всели́.

И ны́не, богоро́дичен: В зе́млю возврати́хомся, престу́пльше Бо́жию за́поведь Боже́ственную, тобо́ю же Де́во, на не́бо от земли́ вознесо́хомся, тлю́ сме́ртную оттря́сше.

Диа́кон: Па́ки и па́ки:

Конда́к, гла́с 8:

Со святы́ми упоко́й Христе́, ду́шу раба́ твоего́, иде́же не́сть боле́знь, ни печа́ль, ни воздыха́ние, но жи́знь безконе́чная.

И́кос: Са́м еди́н еси́ безсме́ртный, сотвори́вый и созда́вый челове́ка, земни́и у́бо от земли́ созда́хомся, и в зе́млю ту́южде по́йдем, я́коже повеле́л еси́ созда́вый мя́ и реки́й ми́: я́ко земля́ еси́ и в зе́млю оти́деши, а́може вси́ челове́цы по́йдем, надгро́бное рыда́ние творя́ще пе́снь: аллилу́иа.

И па́ки: Со святы́ми упоко́й Христе́:

Пе́снь 7.

Ирмо́с: Росода́тельну у́бо пе́щь соде́ла а́нгел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́ Бо́же оте́ц на́ших.

Изба́вльшиися твое́ю кро́вию му́ченицы пе́рваго преступле́ния, окропи́вшеся же свое́ю кро́вию, прообразу́ют я́ве твое́ заколе́ние: благослове́н еси́ Бо́же оте́ц на́ших.

Свире́пеющую сме́рть умертви́л еси́ сло́ве живонача́льнейший, в ве́ре же усо́пшаго приими́ ны́не воспева́ющаго, и глаго́лющаго: Христе́, благослове́н еси́ Бо́же оте́ц на́ших.

Сла́ва: Воодуши́вый мя́ челове́ка вдохнове́нием Боже́ственным богонача́льнейший Влады́ко, преста́вленнаго Ца́рствия твоего́ сподо́би, пе́ти тебе́ спа́се: благослове́н еси́ Бо́же оте́ц на́ших.

И ны́не, богоро́дичен: Превы́шши вся́кия тва́ри пренепоро́чная была́ еси́, заче́нши Бо́га, сокруши́вшаго сме́ртная врата́, и вереи́ сте́ршаго: те́мже тя́ чи́стая песносло́вим ве́рнии, я́ко богома́терь.

Пе́снь 8.

Ирмо́с: Из пла́мене преподо́бным ро́су источи́л еси́. и пра́веднаго же́ртву водо́ю попали́л еси́: вся́ бо твори́ши Христе́, то́кмо е́же хоте́ти, тя́ превозно́сим во вся́ ве́ки.

Кре́пко по́двиги показа́вше, побе́ды венце́м украси́стеся му́ченицы Христо́вы страстоте́рпцы, зову́ще: тя́ превозно́сим Христе́ во ве́ки.

Свяще́нне житие́ оста́вльшыя ве́рныя, и к тебе́ Влады́це преше́дшыя приими́, кро́тце упокоева́я, я́ко благоутро́бен, тя́ превознося́щыя во вся́ ве́ки.

Сла́ва: Ны́не в земли́ кро́тких вся́ водворя́тися пре́жде усо́пшыя, спа́се, благоизво́ли, ве́рою я́же в тя́ оправда́в и благода́тию, тя́ превознося́щыя во вся́ ве́ки.

И ны́не, богоро́дичен: Вси́ тя блажи́м всеблаже́нная, ро́ждшую сло́ва вои́стинну су́щаго блаже́ннаго, пло́ть на́с ра́ди бы́вшаго: его́же превозно́сим во вся́ ве́ки.

Пе́снь 9.

Ирмо́с: Бо́га челове́ком невозмо́жно ви́дети, на него́же не сме́ют чи́ни а́нгельстии взира́ти: тобо́ю же всечи́стая, яви́ся челове́ком сло́во воплоще́нно, его́же велича́юще, с небе́сными во́и, тя́ ублажа́ем.

Наде́жда му́чеников ли́ки укрепи́, и к твое́й любви́ распале́нне впери́, бу́дущих си́м предвообрази́вши непоколеби́мый вои́стинну поко́й: ему́же преста́вльшагося бла́же ве́рнаго сподо́би получи́ти.

Све́тлаго и Боже́ственнаго получи́ти сия́ния твоего́ Христе́, ве́рою преста́вльшагося благоволи́ в не́дрех Авраа́мовых упокое́ние, я́ко еди́н ми́лостив сему́ да́руяй, и ве́чнаго сподобля́яй блаже́нства.

Сла́ва: Сы́й естество́м бла́г и благоутро́бен, и воли́тель ми́лости, и благоутро́бия бе́здна: его́же от ме́ста сего́ озлобле́ния и се́ни сме́ртныя спа́се преста́вил еси́, иде́же сия́ет тво́й све́т, сего́ учини́.

И ны́не, богоро́дичен: Се́нь святу́ю чи́стая разуме́ем, и ковче́г, и скрижа́ль тя́ зако́на и благода́ти: тобо́ю бо оставле́ние дарова́ся, оправда́нным кро́вию воплоще́ннаго из твоего́ чре́ва, всенепоро́чная.

Диа́кон: Па́ки и па́ки ми́ром Го́споду помо́лимся.

Начина́ем самогла́сны Иоа́нна мона́ха.

Гла́с 1: Ка́я жите́йская сла́дость пребыва́ет печа́ли неприча́стна? ка́я ли сла́ва стои́т на земли́ непрело́жна? вся́ се́ни немощне́йша, вся́ со́ний преле́стнейша: еди́нем мгнове́нием, и вся́ сия́ сме́рть прие́млет. но во све́те Христе́ лица́ твоего́, и в наслажде́нии твоея́ красоты́, его́же избра́л еси́, упоко́й, я́ко человеколю́бец.

Гла́с 2: Увы́ мне́, яковы́й по́двиг и́мать душа́ разлуча́ющися от телесе́! увы́, тогда́ коли́ко слези́т, и не́сть поми́луяй ю́! ко а́нгелом о́чи возводя́щи, безде́льно мо́лится: к челове́ком ру́це простира́ющи, не и́мать помога́ющаго. те́мже возлю́бленнии мои́ бра́тие, помы́сливше на́шу кра́ткую жи́знь, преста́вленному упокое́ния от Христа́ про́сим, и душа́м на́шым ве́лию ми́лость.

Гла́с 3: Вся́ суета́ челове́ческая, ели́ка не пребыва́ет по сме́рти: не пребыва́ет бога́тство, ни сше́ствует сла́ва: прише́дшей бо сме́рти, сия́ вся́ потреби́шася. те́мже Христу́ безсме́ртному возопии́м: преста́вленнаго от на́с упоко́й, иде́же все́х е́сть веселя́щихся жили́ще.

Гла́с 4: Где́ есть мирско́е пристра́стие? где́ есть привре́менных мечта́ние? где́ есть зла́то и сребро́? где́ есть рабо́в мно́жество и молва́? вся́ пе́рсть, вся́ пе́пел, вся́ се́нь. но прииди́те возопии́м безсме́ртному Царю́: Го́споди ве́чных твои́х бла́г сподо́би преста́вльшагося от на́с, упокоя́я его́ в нестаре́ющемся блаже́нстве твое́м.

Гла́с 5: Помяну́х проро́ка вопию́ща: а́з е́смь земля́ и пе́пел. и па́ки разсмотри́х во гробе́х, и ви́дех ко́сти обнаже́ны, и ре́х: у́бо кто́ е́сть ца́рь, или́ во́ин, или́ бога́т, или́ убо́г, или́ пра́ведник, или́ гре́шник? но упоко́й Го́споди, с пра́ведными раба́ твоего́.

Гла́с 6: Нача́ток мне́ и соста́в зижди́тельное твое́ бы́сть повеле́ние: восхоте́в бо от неви́димаго же и ви́димаго жи́ва мя́ соста́вити естества́. от земли́ те́ло мое́ созда́л еси́, да́л же ми́ еси́ ду́шу Боже́ственным твои́м и животворя́щим вдохнове́нием. те́мже Христе́ раба́ твоего́ во стране́ живу́щих, и в селе́ниих пра́ведных упоко́й.

Гла́с 7: По о́бразу твоему́ и по подо́бию созда́вый в нача́ле челове́ка, в раи́ поста́вил еси́ владе́ти твои́ми тва́рьми: за́вистию же диа́волею прельсти́вся, сне́ди причасти́ся, за́поведей твои́х престу́пник бы́в. те́мже па́ки в зе́млю, от нея́же взя́т бы́сть, осуди́л еси́ возврати́тися Го́споди, и испроси́ти упокое́ние.

Гла́с 8: Пла́чу и рыда́ю, егда́ помышля́ю сме́рть, и ви́жду во гробе́х лежа́щую, по о́бразу Бо́жию созда́нную на́шу красоту́, безъобра́зну, безсла́вну, не иму́щую ви́да. о чудесе́! что́ сие́ е́же о на́с бы́сть та́инство? ка́ко преда́хомся тле́нию? ка́ко сопряго́хомся сме́рти? вои́стинну Бо́га повеле́нием. я́коже пи́сано е́сть, подаю́щаго преста́вльшемуся упокое́ние.

Блаже́нна, гла́с 6.

Во Ца́рствии твое́м, егда́ прии́деши помяни́ на́с Го́споди.

Блаже́ни ни́щии ду́хом, я́ко те́х е́сть Ца́рство небе́сное.

Блаже́ни пла́чущии, я́ко ти́и уте́шатся.

Блаже́ни кро́тцыи, я́ко ти́и насле́дят зе́млю.

Блаже́ни а́лчущии, и жа́ждущии пра́вды, я́ко ти́и насы́тятся.

Блаже́ни ми́лостивии, я́ко ти́и поми́ловани бу́дут.

Разбо́йника рая́ Христе́ жи́теля, на кресте́ тебе́ возопи́вша, помяни́ мя, предсоде́ял еси́ покая́нием его́, и мене́ сподо́би недосто́йнаго.

Блаже́ни чи́стии се́рдцем, я́ко ти́и Бо́га у́зрят.

Живото́м Госпо́дствуяй и сме́ртию, во дво́рех святы́х упоко́й, его́же прия́л еси́ от привре́менных: и помяни́ мя, егда́ прии́деши во Ца́рствии твое́м.

Блаже́ни миротво́рцы, я́ко ти́и сы́нове Бо́жии нареку́тся.

Душа́ми влады́чествуяй и телеса́ми, его́же в руце́ дыха́ние на́ше, оскорбля́емых утеше́ние, упоко́й во стране́ пра́ведных, его́же преста́вил еси́ раба́ твоего́.

Блаже́ни изгна́ни пра́вды ра́ди:

Христо́с тя́ упоко́ит во стране́ живу́щих, и врата́ ра́йская да отве́рзет ти́, и Ца́рствия пока́жет жи́теля, и оставле́ние тебе́ да́ст, о ни́хже согреши́л еси́ в житии́, Христолю́бче.

Блаже́ни есте́, егда́ поно́сят ва́м:

Изы́дем и у́зрим во гробе́х, я́ко на́ги ко́сти челове́к, черве́й сне́дь, и смра́д, и позна́ем что́ бога́тство, добро́та, кре́пость, благоле́пие?

Ра́дуйтеся и весели́теся:

Услы́шим, что́ зове́т вседержи́тель: увы́ и́щущым зре́ти стра́шный де́нь Госпо́день! се́й бо е́сть тьма́: огне́м бо искуша́ются вся́ческая.

Сла́ва: Безнача́льным и рожде́нием же и происхожде́нием, отцу́ покланя́юся роди́вшему, Сы́на сла́влю рожде́ннаго, пою́ сопросия́вшаго отцу́ же и Сы́ну, ду́ха свята́го.

И ны́не, богоро́дичен: Ка́ко от сосцу́ твое́ю млеко́ то́чиши Де́во, ка́ко пита́еши пита́теля тва́ри? я́коже ве́сть, источи́вый во́ду от ка́мене, жи́лы во́дныя жа́ждущым лю́дем, я́коже писа́ся.

Посе́м диа́кон глаго́лет: Во́нмем.

Свяще́нник: Ми́р все́м.

Ли́к пое́т проки́мен, гла́с 6:

Блаже́н пу́ть, во́ньже и́деши дне́сь душе́, я́ко угото́вася тебе́ ме́сто упокое́ния.

Сти́х: К тебе́ Го́споди воззову́:

Диа́кон: Прему́дрость.

Чте́ц: Апо́стол к солу́няном, зача́ло 270.

Бра́тие, не хощу́ ва́с не ве́дети о уме́рших, да не скорбите́, я́коже и про́чии не иму́щии упова́ния. А́ще бо ве́руем, я́ко Иису́с у́мре и воскре́се, та́ко и Бо́г уме́ршыя о Иису́се, приведе́т с ни́м. Сие́ бо ва́м глаго́лем сло́вом Госпо́дним, я́ко мы́ живу́щии оста́вшии в прише́ствие Госпо́дне, не и́мамы предвари́ти уме́рших. Я́ко са́м Госпо́дь в повеле́нии во гла́се арха́нгелове, и в трубе́ Бо́жии сни́дет с небесе́, и ме́ртвии о Христе́ воскре́снут пе́рвее. Пото́м же мы́ живу́щии оста́вшии, ку́пно с ни́ми восхище́ни бу́дем на о́блацех, в сре́тение Госпо́дне на возду́се, и та́ко всегда́ с Го́сподем бу́дем.

Свяще́нник: Ми́р ти́. Аллилу́иа.

Гла́с 6: Блаже́н, его́же избра́л и прия́л еси́, Го́споди.

Ева́нглие от Иоа́нна, зача́ло 16.

Рече́ Госпо́дь ко прише́дшым к нему́ иуде́ем: ами́нь ами́нь глаго́лю ва́м, я́ко слу́шаяй словесе́ моего́ и ве́руяй посла́вшему мя́, и́мать живо́т ве́чный, и на су́д не прии́дет: но пре́йдет от сме́рти в живо́т. Ами́нь ами́нь глаго́лю ва́м: я́ко гряде́т ча́с, и ны́не е́сть, егда́ ме́ртвии услы́шат гла́с Сы́на Бо́жия, и услы́шавше оживу́т. Я́коже бо оте́ц и́мать живо́т в себе́, та́ко да́ст и Сы́нови живо́т име́ти в себе́: И о́бласть да́ст ему́ и су́д твори́ти, я́ко Сы́н челове́чь е́сть, не диви́теся сему́. Я́ко гряде́т ча́с во́ньже вси́ су́щии во гробе́х услы́шат гла́с Сы́на Бо́жия: И изы́дут сотво́ршии блага́я в воскреше́ние живота́, а сотво́ршии зла́я в воскреше́ние суда́. Не могу́ а́з о себе́ твори́ти ничесо́же. Я́коже слы́шу, сужду́: и су́д мо́й пра́веден е́сть: я́ко не ищу́ во́ли моея́, но во́ли посла́вшаго мя́ отца́.

Диа́кон: Поми́луй на́с Бо́же, по вели́цей ми́лости твое́й, мо́лим ти ся услы́ши и поми́луй.

Го́споди поми́луй, три́жды.

Еще́ мо́лимся о упокое́нии души́ усо́пшаго раба́ Бо́жия, и́мярек, и о е́же прости́тися ему́ вся́кому прегреше́нию, во́льному же и нево́льному.

Го́споди поми́луй, три́жды.

Я́ко да Госпо́дь Бо́г учини́т ду́шу его́, иде́же пра́веднии упокоя́ются.

Го́споди поми́луй, три́жды.

Ми́лости Бо́жия, Ца́рства небе́снаго, и оставле́ния грехо́в его́, у Христа́ безсме́ртнаго Царя́ и Бо́га на́шего про́сим.

Пода́й Го́споди.

Диа́кон: Го́споду помо́лимся.

Го́споди поми́луй.

И по исполне́нии сего́ глаго́лет пе́рвый от свяще́нников, или́ архиере́й прилучи́вся, моли́тву:

Бо́же духо́в: велегла́сно, прише́д близ уме́ршаго. Та́кожде и настоя́щии свяще́нницы вси́.

Ве́домо же бу́ди, я́ко глаго́лему коему́ждо проше́нию от диа́кона, во ели́ко глаго́лется проше́ние от него́, глаго́лет вышерече́нную моли́тву ки́йждо свяще́нник, по чи́ну своему́ та́йно близ уме́ршаго, и возглаша́ет:

Я́ко ты́ еси́ воскре́сние:

Ны́не же от пе́рваго свяще́нника, или́ архиере́а, глаго́лется велегла́сно моли́тва:

Бо́же духо́в: я́коже вы́ше рече́ся.

По возгла́се же быва́ет целова́ние. И пое́м настоя́щыя стихи́ры подо́бны.

Егда́ от дре́ва:

Гла́с 2:

Прииди́те, после́днее целова́ние дади́м бра́тие уме́ршему, благодаря́ще Бо́га: се́й бо оскуде́ от сро́дства своего́, и ко гро́бу тщи́тся не ктому́ пеки́йся о су́етных, и о многостра́стной пло́ти. где́ ны́не сро́дницы же и дру́зи? се́ разлуча́емся. его́же упоко́ити, Го́споду помо́лимся.

Ко́е разлуче́ние, о бра́тие! ки́й пла́чь? ко́е рыда́ние в настоя́щем часе́? прииди́те у́бо целу́йте бы́вшаго вма́ле с на́ми: предае́тся бо гро́бу. ка́менем покрыва́ется, во тьму́ вселя́ется, с ме́ртвыми погреба́ется, и все́х сро́дников и друго́в ны́не разлуча́ется: его́же упоко́ити, Го́споду помо́лимся.

Ны́не жите́йское лука́вое разруша́ется торжество́ суеты́: ду́х бо оскуде́ от селе́ния, бре́ние очерни́ся, сосу́д раздра́ся, безгла́сен, нечу́ствен, ме́ртвен, недви́жимь. Его́же посыла́юще гро́бу, Го́споду помо́лимся, да́ти сему́ во ве́ки упокое́ние.

Яко́в живо́т на́ш е́сть? цве́т, и ды́м, и роса́ у́тренняя вои́стинну. прииди́те у́бо, у́зрим на гробе́х я́сно, где́ добро́та теле́сная? где́ ю́ность? где́ су́ть очеса́, и зра́к плотски́й: вся́ увядо́ша я́ко трава́, вся́ потреби́шася. прииди́те ко Христу́ припаде́м со слеза́ми.

Ве́лий пла́чь и рыда́ние, ве́лие воздыха́ние, и ну́жда, разлуче́ние души́, а́д и поги́бель, привре́менный живо́т, се́нь непостоя́нная, со́н преле́стный: безвременномечта́нен тру́д жития́ земна́го. дале́че отбежи́м мирска́го вся́каго греха́, да небе́сная насле́дим.

Ви́дяще предлежа́ща ме́ртва, о́браз восприи́мем вси́ коне́чнаго часа́: се́й бо отхо́дит я́ко ды́м от земли́, я́ко цве́т отцвете́, я́ко трава́ посече́ся, вре́тищем повива́емь, земле́ю покрыва́емь. его́же неви́дима оста́вивше, Христу́ помо́лимся, да́ти сему́ во ве́ки упокое́ние.

Прииди́те вну́цы Ада́мовы, уви́дим на земли́ пове́рженнаго, по о́бразу на́шему все́ благоле́пие отлага́юща, разруше́на во гро́бе гно́ем, червьми́, тьмо́ю иждива́ема, земле́ю покрыва́ема. его́же неви́дима оста́вльше, Христу́ помо́лимся, да́ти во ве́ки сему́ упокое́ние.

Егда́ душа́ от те́ла и́мать ну́ждею восхи́титися стра́шными а́нгелы, все́х забыва́ет сро́дников и зна́емых, и пече́тся о бу́дущих суди́лищей стоя́нии, я́же суеты́, и многотру́дныя пло́ти разреше́нии: тогда́ судию́ моля́ще, вси́ помо́лимся, да прости́т Госпо́дь, я́же соде́ла.

Прииди́те бра́тие, во гро́бе у́зрим пе́пел и пе́рсть, из нея́же созда́хомся. ка́мо ны́не и́дем? что́ же бы́хом, ки́й убо́г или́ бога́т? или́ ки́й Влады́ка? ки́й же свобо́дь? и не вси́ ли пе́пел? добро́та лица́ согни́, и ю́ности ве́сь цве́т увяди́ сме́рть.

Вои́стинну суета́ и тле́ние, вся́ жите́йская, ви́ды, и безсла́вная: вси́ бо исчеза́ем, вси́ у́мрем, ца́рие же и кня́зи, судии́ и наси́льницы, бога́тии и убо́зии, и все́ естество́ челове́ческое: ны́не бо, и́же иногда́ в житии́, во гро́бы верга́ются, и́хже да упоко́ит Госпо́дь, помо́лимся.

Вси́ теле́снии ны́не орга́ны пра́здни зря́тся, и́же пре́жде ма́ла дви́жими бя́ху, вси́ недействи́тельни, ме́ртви, нечу́вственни: о́чи бо заидо́ша, связа́стеся но́зе, ру́це безмо́лвствуете, и слу́х с ни́ми: язы́к молча́нием заключи́ся, гро́бу предае́тся. Вои́стинну суета́ вся́ челове́ческая.

Спаса́й наде́ющыяся на тя́, ма́ти незаходи́маго со́лнца богороди́тельнице: умоли́ моли́твами твои́ми преблага́го Бо́га, упоко́ити, мо́лимся, ны́не преста́вльшагося, иде́же упокоева́ются пра́ведных ду́си: Боже́ственных бла́г насле́дника покажи́, во дво́рех пра́ведных, в па́мять, всенепоро́чная, ве́чную.

Сла́ва, гла́с 6:

Зря́ще мя́ безгла́сна, и бездыха́нна предлежа́ща, воспла́чите о мне́ бра́тие и дру́зи, сро́дницы и зна́емии: вчера́шний бо де́нь бесе́довах с ва́ми, и внеза́пу на́йде на мя́ стра́шный ча́с сме́ртный: но прииди́те вси́ лю́бящии мя́, и целу́йте мя́ после́дним целова́нием: не ктому́ бо с ва́ми похожду́, или́ собесе́дую про́чее. к судии́ бо отхожду́, иде́же не́сть лицеприя́тия: ра́б бо и влады́ка вку́пе предстоя́т, ца́рь и во́ин, бога́тый и убо́гий в ра́внем досто́инстве: ки́йждо бо от свои́х де́л, или́ просла́вится, или́ постыди́тся. но прошу́ все́х и молю́, непреста́нно о мне́ моли́теся Христу́ Бо́гу, да не низведе́н бу́ду по грехо́м мои́м, на ме́сто муче́ния: но да вчини́т мя́, иде́же све́т живо́тный.

И ны́не, богоро́дичен, гла́с то́йже:

Моли́твами ро́ждшия тя́ Христе́, и предте́чи твоего́, апо́столов, проро́ков, иера́рхов, преподо́бных, и пра́ведных, и все́х святы́х, усо́пшаго раба́ твоего́ упоко́й.

Та́же, Трисвято́е. Пресвята́я Тро́ице: О́тче на́ш:

Свяще́нник: Я́ко твое́ е́сть Ца́рство:

Та́же, Со ду́хи пра́ведных: И про́чее.

Проше́ние от диа́кона: Поми́луй на́с Бо́же, по вели́цей ми́лости твое́й: По возгла́се же,

Сла́ва, и ны́не:

И отпу́ст:

Воскресы́й из ме́ртвых, Христо́с и́стинный Бо́г на́ш, моли́твами пречи́стыя своея́ ма́тере, святы́х сла́вных и всехва́льных апо́стол, преподо́бных и богоно́сных оте́ц на́ших, и все́х святы́х, ду́шу от на́с преста́вльшагося раба́ своего́, и́мярек, в селе́ниих пра́ведных учини́т, в не́дрех Авраа́ма упоко́ит, и с пра́ведными сопричте́т, и на́с поми́лует, я́ко бла́г и человеколю́бец. Ами́нь.

Архиере́й же или́ нача́льствуяй иере́й са́м глаго́лет три́жды сие́:

Ве́чная твоя́ па́мять, достоблаже́нне и приснопа́мятне бра́те на́ш. Три́жды.

Та́же певцы́ пою́т три́жды:

Ве́чная па́мять.

А́бие же архиере́й, а́ще приключи́тся та́мо бы́ти, или́ иере́й чте́т моли́тву проща́льную велегла́сно:

Госпо́дь Иису́с Христо́с Бо́г на́ш, и́же Боже́ственная за́поведи святы́м свои́м ученико́м и апо́столом да́вый, во е́же вяза́ти и реши́ти па́дших грехи́, и от о́ных па́ки мы́ прие́мше вины́ то́йже твори́ти: да прости́т тебе́, ча́до духо́вное, а́ще что́ соде́лал еси́ в ны́нешнем ве́це во́льное или́ нево́льное, ны́не и́. при́сно, и во ве́ки веко́в, ами́нь.

И та́ко взе́мше мо́щи отхо́дим ко гро́бу после́дующым все́м лю́дем, предъиду́щым же свяще́нником, и пою́щым: Святы́й Бо́же: Пресвята́я Тро́ице: О́тче на́ш: И про́чая.

И полага́ются мо́щи во гро́б: архиере́й же, или́ свяще́нник, взе́м пе́рсть лопа́тою, крестови́дно ме́щет верху́ моще́й, глаго́ля:

Госпо́дня земля́, и исполне́ние ея́ вселе́нная, и вси́ живу́щии на не́й.

И посе́м налива́ет верху́ еле́й от канди́ла, или́ сы́плют пе́пел от кади́льницы, и та́ко покрыва́ют я́ко обы́чно гро́б, приглаго́лемым тропаре́м: Со ду́хи пра́ведных: и про́чым все́м.

И отпу́ст.


Источник: Тексты приводятся по изданию: Тре́бник. В дву́х частя́х. — Москва́. Синода́льная типогра́фия. 1906.

Комментарии для сайта Cackle