Сельский требный сборник

Содержание

Последование малого освящения воды Молитва иная над водою Молитва на освящение всякия вещи Чин обхождения полей насеянных Чин совершения крестнаго хода в поли Чин благословения при начале сеяния Молитва над гумном Молитва о приносящих начатки овощей Молитва над всяким плодом Молитва в насаждение винограда Молитва на обимание винограда Молитва в причащении гроздия в 6-й день августа Молитва на благословение вина Молитва, еже освятити какое либо благовонное зелие Чин благословения соли Молитва над солию Чин благословения пчел Благословение роев пчелиных, во улия нова всажденных Чин благословения новаго меда Чин благословения колива, Чин благословения стад овчих, или иных скотов Чин молитвенный на копание кладязя, и обретение воды Чин благословения новаго кладяза, или источника Последование над пещию Чин благословити новый корабль, или лодию Молитва от еже благословити мрежи Молитва на основание дома Чин благословения новаго дома Молитва, егда кто имать в дом нов Молитва, во еже благословити брашна, мяса, во святую и великую неделю Пасхи Молитва, еже благословити сыр и яйца Чин, бываемый на нивах, или винограде, или вертограде, аще случится вредитися от гадов, или иных видов Чин молитвенный во время губительнаго мора скотов Чин бываемый, аще случится чесом скверному яковулюбо впасти в кладязь водный Молитва над пшеницею оскверншеюся, или мукою, или видом некиим Чин бываемый, аще случится чесому скверному или нечистому ново впасти в сосуд вина, или елеа, или меда, или иного чесого Молитва над сосудом оскверншимся Последование молебнаго пения, певаемого во время бездождия Последование молебнаго пения ко Господу Богу нашему Иисусу Христу, певаемаго во время безведрия, егда дождь многий безгодно идет Молебное пение во время губительнаго поветрия и смертоносныя заразы Последование молебнаго пения от наводнения Чин молебнаго пения во дни губительных бедствий и техногенных катастроф Чин краткаго молебнаго пения о сохранении творения Божия

 

Последование малого освящения воды

Поставляется столец посреди Церкви, паволокою покровенный, на обычном месте и вода в сосуде: священник же взем епитрахиль и фелонь, держа в руках честный крест с василки (кропилом), предыдоша ему диаконом с кадильницей и двумя свеченосцами с свечами. Пришед же пред столец, полагает на нем крест и, взяв кадильницу, кадит воду крестообразно и начинает обычно.

Господи, услыши молитву мою, внуши молению моему в истине Твоей, услыши меня в правде Твоей: и не вниди в суд с рабом Твоим, яко не оправдится пред Тобою всяк живый. Яко погна враг душу мою, смирил есть в землю живот мой: посадил мя есть в темных, яко мертвыя века. И уны во мне дух мой, во мне смятеся сердце мое. Помянух дни древния, поучихся во всех делех Твоих, в творениях руку Твоею поучахся. Воздех к тебе руце мои: душа моя яко земля безводная Тебе. Скоро услыши меня, Господи, исчезе дух мой: не отврати лица Твоего от меня, и не уподоблюся низходящим в ров. Слышану сотвори мне заутра милость Твою, яко на Тя уповах: скажи мне, Господи, путь, воньже пойду, яко к Тебе взях душу мою. Изми мя от враг моих, Господи, к Тебе прибегох. Научи мя творити волю Твою, яко Ты еси Бог мой: дух Твой Благий наставит мя на землю праву. Имени Твоего ради, Господи, живиши мя: правдою Твоею изведеши от печали душу мою: и милостию Твоею потребиши враги моя и погубиши вся стужающия души моей, яко аз раб Твой есмь.

Диакон

Бог Господь, и явися нам, благословен Грядый во Имя Господне

Во глас 4

Стих 1: Исповедайтеся Госповеди, яко Благ, яко во веки милость Его.

Стих 2: Обышедше обыдоша мя, и именем Гсподним противляхся им.

Стих 3: Не умру, но жив буду, и повем дела Господни.

Стих 4: Камень, егоже небрегоша зиждушие, сей бысть во главу угла: о Господе быть сей, и есть дивен во очесах наших.

Лик же поет на глас 4: Бог Господь, к коемуждо стих

И настоящие тропари, глас 4:

К Богородице прилежно ныне притецем, грешнии и смирении, и припадем, в покаянии зовуще из глубины души: Владычице, помози, на ны милосердовавши, потщися, погибаем от множества прегрешений, не отврати Твоя рабы тци, Тя бо и Едину надежду имамы. (дважды)

Не умолчим никогда, Богородице, силы Твоя глаголати недостойнии: аще бо Ты не бы предстояла молящи, кто бы нас избавил от толиких бед; кто же бы сохранил до ныне свободны; не отступим, Владычице, от Тебе: Твоя бо рабы спасаеши присно от всяких лютых.

Таже (после) псалом 50

Помилуй мя, Боже, по велицей милости Твоей, и по множеству щедрот Твоих очисти беззаконие мое. Наипаче омый мя от беззакония моего, и от греха моего очисти мя. Яко беззаконие мое аз знаю, и грех мой предо мною есть выну. Тебе Единому согреших, и лукавое пред Тобою сотворих: яко да оправдишися во словесех Твоих, и победиши, внегда судити Ти. Се бо в беззакониих зачат есмь, и во гресех роди мя мати моя. Се бо истину возлюбил еси, безвестная и тайная премудрости Твоея явил ми еси. Окропиши мя иссопом, и очищуся: омыеши мя, и паче снега убелюся. Слуху моему даси радость и веселие: возрадуются кости смиренныя. Отврати лице Твое от грех моих, и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи мене от лица Твоего, и Духа Твоего Святаго не отыми от мене. Воздаждь ми радость спасения Твоего, и Духом Владычним утверди мя. Научу беззаконные путем твоим, и нечестивые к Тебе обратятся. Избави мя от кровей, Боже, Боже спасения моего: возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо: всесожжения не благоволиши. Жертва Богу дух сокрушен: сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимские. Тогда благоволиши жертвы правды, возношение и всесожегаемая: тогда возложат на алтарь Твой тельцы.

Таже поем тропари сия, глас 6:

Еже радуйся Ангелом приемшая и рождшая Зиждителя Твоего, Дево, спасай Тя величающия.

Глаголи первый тропарь дважды.

Воспеваем Сына Твоего, Богородице, и вопием: Пречистая Владычице, всякия беды избави рабы Твоя.

Царем, пророком и Апостолам, и мученикам Ты еси похвала, и представтельница мира, Всенепорочная.

Язык всяк православных похваляет, и блажит, и славит Пречестное Рождество Твое, Марие Богоневестная.

Даждь, Христе мой, и мне недостойному долгов оставление, молюся, Тя рождия молитвами, яко Благоутробен.

На Тя моя упования возложих, Богородице, спаси мя молитвами Твоими, даруй ми прегрешений оставление.

Оживи мя, Рождшая Жизнодавца и Спаса, спаси молитвами Твоими, Благословенная надеждо душ наших.

Зиждителя всех во утробе Твоей заченшая, Дево Всенепорочная, молитвами Твоими спаси души наша.

Богородице, Рождшая Словом паче Слова, Слово, Всепетея, Того моли спасти души наша.

Милостива мне Судию же и Сына Твоего прегрешившем паче всякаго человека, Твоими молитвами соделай, Владычице.

По долгу вопием Ти: радуйся, Богородице Чистая Приснодево, молящеся молитвами Твоими спастися.

Избави мя огня вечнаго, и мук предлежащих мне, Богородительнице, яко да ублажаю Тя.

Не презри моления Твоих рабов, молимся, Владычице Всепетая, яко да избавимся всякого обстояния.

Недугов, и всяких болезней, и бед нас свободи, к священному Твоему покрову прибегающих.

Странное чудо, еже в Тебе, Богородительнице: нас бо ради по нам родися всех Зиждитель из Тебе, и Бог наш.

Храм Твой, Богородице, показася врачество недугов безвозмездное, и оскорбляемых душ утешение.

Пречистая Богородице, Рождшая Спаса, в беде спаси, и всякие иные нужды рабы Твоя.

Избави от всякаго прегрешения находящего рабы Твоя, Пречистая Владычице, и всякаго вреда душевнаго же и телеснаго.

Спаси всех молитвами Твоими, Дево Богородице, к Тебе притекающих, и избави всякия нужды и скорби.

Кто притекай в храм Твой, Богородице, не приемлет скоро исцеления, душевного вкупе и телеснаго, Пречистая;

О всех умоляем, Щедре, святых и горних чинов, очисти мя Рождшею Тя.

Пощиди, Спасе, души умерших братий наших, в надежде жизни: и ослаби, остави им согрешения.

Радуйся, мира Очистилище Дево, радуйся, Ручко и Свешнице Всезлатый, Божественныя манны и света, Богоневесто.

Поем Тя Бога Единаго в Троице, вопиюще глас Трисвятый, молящеся спасение получити.

Слава: Дево, Рождшая Спаса и Владыку мира и Господа, Того моли спасти души наша.

И ныне: Радуйся, Горо, радуйся, Купина, радуйся, Врата, радуйся, Лествице, радуйся, Божественная трапеза, радуйся, всех помоще Владычице.

Молитвами, Милостиве, Матере Твоея Пречистыя, и всех святых Твоих, Твоя милости людем Твоим даруй.

Молитвами славных Архангел, и Ангел, и горних чинов, рабы Твоя, Спасе, добре сохрани.

Молитвами Честнаго и Славнаго Крестителя Твоего, Пророка, Предтечи, Христе Спасе мой, рабы Твоя сохрани.

Молитвами славных Апостолов и мучеников, и всех святых Твоих, Твоя милости людем Твоим даруй.

Молитвами славных безсребников, Богородице, рабы Твоя сохрани, яко предстательство мира и утверждение.

Слава: Отца, и Сына славословим, и Духа Святаго, глаголюще: Троице Святая, спаси души наша.

И ныне: Неизреченно в последняя Заченшая, и Рождая Создателя Твоего, Дево, спасай Тя величающая.

Таже: Милосердия двери отверзи нам, Благословенная Богородице, надеющиеся на Тя да не погибнем, но да избавимся Тобою от бед: Ты бо еси спасение рода христианского.

Диакон: Господу помолимся.

Лик: Господи, помилуй.

Священник: Яко Свят еси, Боже наш, и Тебе славу возсылаем, Отцу, и Сыну, и Святому Духу, ныне и присно, и во веки веков.

Лик: Аминь.

Таже настоящие тропари, глас 6:

Ныне наста время всех освящающее, и Праведный нас ждет Судия, но обратися, душе, к покаянию, яко блудница зовуще со слезами: Господи, помилуй мя.

Водами одождивый, Христе, источник исцелений, во всечестном храме Девы днесь, Твоего благословения окроплением, отгоняеши недуги немощствующих, Врач душ и телес наших.

Дева родила еси неискусобрачная, и Дева пребыла еси, Мати Безневестная, Богородице Марие, Христа Бога нашего моли спастися нам.

Пречистая Богородице Дево, рук наших дела исправи, и прощение прегрешений наших испроси, внегда пети нам ангельское пение:

Святый Боже, Святый Крепкий, Святый Безсмертный, помилуй нас.

Опевше же по обычаю, и по Трисвятом, диакон глаголет:

Вонмем.

Священик: Мир всем.

Лик: И духови твоему.

Диакон: Премудрость.

Чтец: Ко Евреям послание святого Апостола Павла чтение.

Диакон: Вонмем.

Апостол ко Евреям (зачало 306)

Братие, Святяй и освящаемии от Единаго вси: еяже ради вины не стыдится братию нарицати их, глаголя: возвещу имя Твое братии Моей, посреде Церкве воспою Тя. И паки: Аз буду надеяся Нань. И паки: се Аз и дети, яже Ми дал есть Бог. Понеже убо дети приобщишася плоти и крови, и Той приискренне приобщися техже, да смертию упразднит имущаго державу смерти, сиречь диавола: И избавит сих, елицы страхом смерти чрез все житие повинни беша работе. Не от Ангел убо когда приемлет, но от семене Авраамова приемлет. Отнюдуже должен бе по всему подобитися братии, да милостив будет и верен Первосвященник в тех, яже к Богу, во еже очистити грехи людския. В немже бо пострада, Сам искушен быв, может и искушаемым помощи.

Священник: Мир ти.

Чтец: И духови твоему.

Аллилуия, глас 6.

Стих 1: Отрыгну сердце мое слово благо.

Стих 2: Глаголю аз дела моя цареви.

 

Диакон: Премудрость, прости, услышим святаго Евангелия.

Священник: Мир всем.

Лик: И духови твоему.

Священник: От Иоанна святаго Евангелия чтение.

Лик: Слава Тебе, Господи, слава Тебе.

Диакон: Вонмем.

Евангелие от Иоанна (зачало 14)

Во время оно, взыде Иисус во Иерусалим. Есть же во Иерусалимех на овчей купели, яже глаголется еврейски Вифесда, пять притвор имущи. В тех слежаше множество болящих, слепых, хромых, сухих, чающих движения воды. Ангел бо Господень на всяко лето схождаше в купель и возмущаше воду, и иже первее влазяше по возмущении воды, здрав бываше, яцем же недугом одержим бываше.

Лик: Слава Тебе, Господи, слава Тебе.

Таже диакон ектению:

Миром Господу помолимся.

Лик: Господи, помилуй.

О свышнем мире и спасении душ наших, Господу помолимся.

Лик: Господи, помилуй.

О мире всего мира, благостоянии святых Божиих церквей и соединении всех, Господу помолимся.

Лик: Господи, помилуй.

О святем храме сем и с верою, благоговением и страхом Божиим входящих вонь, Господу помолимся.

Лик: Господи, помилуй.

О Великом Господине и отце нашем Святейшем Патриархе Кирилле, и о господине нашем высокопреосвященнейшем митрополите (или архиепископе, или преосвященнейшем епископе (имярек), честнем пресвитерстве, во Христе диаконстве, о всем причте и людех, Господу помолимся.

Лик: Господи, помилуй.

О Богохранимей стране нашей, властех и воинстве ея, Господу помолимся.

Лик: Господи, помилуй.

О граде сем (или о веси сей, или о святей обители сей), всяком граде, стране и верою живущих в них, Господу помолимся.

Лик: Господи, помилуй.

О благорастворении воздухов, о изобилии плодов земных и временех мирных, Господу помолимся.

Лик: Господи, помилуй.

О плавающих, путешествующих, недугующих, страждущих, плененных и о спасении их, Господу помолимся.

Лик: Господи, помилуй.

О еже освятитися водам сим силою и действием, и наитием Святаго Духа, Господу помолимся.

Лик: Господи, помилуй.

О еже снизходити на воды сия очистительному Пресущныя Троицы действу, Господу помолимся.

Лик: Господи, помилуй.

О еже быти воде сей целительной душ и телес, и всякия сопротивныя силы отгнательней, Господу помолимся.

Лик: Господи, помилуй.

О еже низпослати Господу Богу благословение Иорданово и освятити воды сия, Господу помолимся.

Лик: Господи, помилуй.

О всех требующих от Бога помощи и заступления, Господу помолимся.

Лик: Господи, помилуй.

О еже просветитися нам просвещением разума, Единосущною Троицею, Господу помолимся.

Лик: Господи, помилуй.

Яко да Господь Бог наш покажет ны сыны и наследники Царствия Своего, воды сея причащением же и кроплением, Господу помолимся.

Лик: Господи, помилуй.

О избавитися нам от всякия скорби, гнева и нужды, Господу помолимся.

Лик: Господи, помилуй.

Заступи, спаси, помилуй и сохрани нас, Боже, Твоею благодатию.

Лик: Господи, помилуй.

Пресвятую, Пречистую, Преблагословенную, Славную Владычицу нашу Богородицу и Приснодеву Марию со всеми святыми помянувше, сами себе и друг друга, и весь живот наш Христу Богу предадим.

Лик: Тебе, Господи.

Возглас:

Яко подобает Тебе всякая слава, честь и поклонение, Отцу, и Сыну, и Святому Духу, ныне и присно, и во веки веков.

Лик: Аминь.

Диакон: Господу помолимся.

Лик: Господи, помилуй.

Таже священник молитву сию:

Господи Боже наш, Великий в совете и дивный в делех, всея твари Содетелю, храняй завет Твой и милость Твою любящим Тя и соблюдающим повеления Твоя, всех в нуждах умиленныя приемляй слезы, сего бо ради пришел еси в рабии зраце, не привидении нас устрашая, но здравие телу истинное подаваяй и глаголяй: се здрав был еси, ктому не согрешай, но и от брения здравы очи соделал еси и, умытися повелев, свету вселитися сотворил еси словом, сопротивных страстей волны смущаяй, и жития сего сланое море изсушаяй, и тяжелоносныя сластей укрощаяй волны; Сам, Человеколюбче Царю, давый нам снегосветлою одеятися одеждею, от воды же и Духа, и причастием же воды сея, и окроплением Твое благословение нам низпосли, скверну страстей омывающее. Ей, молимся, посети нашу, Блаже, немощь и исцели наша недуги душевныя же и телесныя, милостию Твоею: молитвами Всепречистыя, Преблагословенныя Владычицы нашея Богородицы и Приснодевы Марии: силою Честнаго и Животворящаго Креста, предстательствы честных Небесных сил безплотных, честнаго, славнаго Пророка, Предтечи и Крестителя Иоанна: святых славных и всехвальных Апостол, преподобных и Богоносных отец наших: иже во святых отец наших, великих иерархов и вселенских учителей: Василия Великаго, Григория Богослова и Иоанна Златоустаго: иже во святых отец наших Афанасия и Кирилла, патриархов Александрийских: иже во святых отца нашего Спиридона, Тримифунтскаго чудотворца; иже во святых отца нашего Николая, архиепископа Мирликийскаго, чудотворца; иже во святых отец наших Мефодия и Кирилла, учителей словенских; святаго равноапостольнаго великаго князя Владимира: иже во святых отец наших, святителя Михаила, перваго митрополита Киевскаго: первосвятителей Московских всея Руси, Петра, Алексия, Ионы, Филиппа, Иова Ермогена и Тихона: митрополитов Московских Филарета и Иннокентия: святителей имярек (епарихальных): святого и славнаго великомученика Георгия Победоносца; святаго и славнаго великомученика Димитрия Мироточиваго; святых и добропобедных мучеников: святых и праведных Богоотец Иоакима и Анны; святых славных чудотворцев и безсребренников Космы и Дамиана, Кира и Иоанна, Пантелеимона и Ермолая, Сампсона и Диомида, Мокия и Аникиты, Фалалея и Трифона; и святаго, имярек, егоже и память совершаем, и всех святых Твоих.

Спаси, Господи, и помилуй Великаго Господина и отца нашего Кирилла, Святейшаго Патриарха Московскаго и всея Руси, и высоко преосвященнейшаго (имярек), митрополита (или архиепископа, или преосвященейшего имярек епископа (егоже есть область)), даруй им душевное и телесное здравие, и работному Тебе сему христианскому жительству во всем милостив буди. Помяни, Господи, всякое епископство православных, право правящих слово Твоея истины, и весь священнический и монашеский чин, и спасение их. Помяни, Господи, ненавидящих и любящих нас, служащих братий наших, предстоящих, и благословною виною отшедших и заповедавших нам, недостойным, молитися о них. Помяни, Господи, в пленении и скорбех сущих братий наших и помилуй их по велицей милости Твоей, всякия нужды избавляяй: яко Ты еси источник исцелений, Христе Боже наш, и Тебе славу возсылаем со Безначальным Твоим Отцем, и с Пресвятым, и Благим, и Животворящим Твоим Духом, ныне и присно, и во веки веков.

Лик: Аминь.

Священник: Мир всем.

Лик: И духови твоему.

Диакон: Главы ваша Господеви приклоните.

Лик: Тебе Господи.

Священник же молитву тайно:

Приклони, Господи, ухо Твое и услыши ны, Иже во Иордане креститися изволивый и освятивый воды, и благослови всех нас, иже преклонением своея выи назнаменающих работное воображение, и сподоби нас исполнитися освящения Твоего, воды сея причащением, и да будет нам, Господи, во здравие души и тела.

Возглас: Ты бо еси освящение наше, и Тебе славу и благодарение, и поклонение возсылаем, со Безначальным Твоим Отцем, и Всесвятым, и Благим, и Животворящим Твоим Духом, ныне и присно, и во веки веков.

Лик: Аминь.

Таже взем честный Крест, благословляет священник воды трижды, крестообразно нижводя и возводя и право, и поя настоящий тропарь,

Глас 1 трижды:

Спаси, Господи, люди Твоя и благослови достояние Твое, победы на сопротивныя даруя и Твое сохраняя Крестом Твоим жительство.

И посем поют тропарь сей, глас 2:

Твоих даров достойны нас сотвори, Богородице Дево, презирающи согрешения наша, и подающи исцеления верою приемлющим благословение Твое, Пречистая.

Таже лобзает иерей честный Крест, такожде и вси людие, и кропит всех священною водою, олтарь и церковь всю.

Люди же поют настоящий тропарь,

глас 4:

Источник исцелений имуще, святии безсребреницы, исцеления подаваете всем требующим, яко превелиих дарований сподобльшиися от приснотекущаго Источника Спаса нашего, глаголет бо к вам Господь, яко единоревнителем апостольским: се дах вам власть на духи нечистыя, якоже тех изгонити, и целити всякий недуг и всякую язю. Темже в повелениих Его добре жительствовавше, туне приясте, туне подаваете, исцеляюще страсти душ и телес наших.

Призри на моления Твоих раб, Всенепорочная, утоляющи лютая на ны восстания, всякия скорби нас изменяющи: Тя бо едину твердое и известное утверждение имамы, и Твое предстательство стяжахом, да не постыдимся, Владычице, Тя призывающии. Потщися на умоление Тебе верно вопиющих: радуйся, Владычице, всех помоще, радосте и покрове, и спасение душ наших.

Владычице, приими молитвы рабов Твоих, и избави нас от всякия нужды и печали.

По кроплении же глаголет диакон ектению:

Помилуй нас, Боже, по велицей милости Твоей, молим Ти ся, услыши и помилуй.

Лик: Господи, помилуй, трижды.

Еще молимся, о еже сохранитися граду сему (или веси сей, или святой обители сей), и всякому граду и стране от глада, губительства, труса, потопа, огня, меча, нашествия иноплеменников и междоусобныя брани: о еже милостиву и благоуветливу быти Благому и Человеколюбивому Богу нашему, отвратити всякий гнев на ны движимый, и избавити ны от належащаго и праведнаго Своего прещения, и помиловати ны.

Лик: Господи, помилуй, сорок.

Священник же возглашает:

Услыши ны, Боже, Спасителю наш, упование всех концев земли и сущих в мори далече, и милостив, милостив буди, Владыко, о гресех наших, и помилуй ны. Милостив бо и человеколюбец Бог еси, и Тебе славу возсылаем, Отцу, и Сыну, и Святому Духу, ныне и присно, и во веки веков.

Лик: Аминь.

Священник: Мир всем.

Лик: И духови твоему.

Диакон: Главы наша Господеви приклоним.

Лик: Тебе Господи.

Священник молитву сию велегласно:

Владыко многомилостиве, Господи Иисусе Христе Боже наш, молитвами всепречистыя Владычицы нашея Богородицы и Приснодевы Марии, силою Честнаго и Животворящаго Креста, предстательствы честных Небесных сил безплотных: честнаго, славнаго Пророка, Предтечи и Крестителя Иоанна: святых славных и всехвальных апостол, святых славных и добропобедных мученик, преподобных и богоносных отец наших: иже во святых отец наших и вселенских великих учителей и святителей: Василия Великаго, Григория Богослова и Иоанна Златоустаго; иже во святых отца нашего Николая, архиепископа Мирликийскаго, чудотворца; иже во святых отец наших Мефодия и Кирилла, учителей Словенских; святаго равноапостольнаго великаго князя Владимира: иже во святых отец наших, святителя Михаила, перваго митрополита Киевскаго: первосвятителей Московских и всея Руси, Петра, Алексия, Ионы, Макария, Филиппа, Иова, Ермогена и Тихона: митрополитов Московских Филарета и Иннокентия; святителей имярек (епархиальных): святых и праведных Богоотец Иоакима и Анны; святаго (имярек, егоже есть храм, и егоже есть день), и всех святых Твоих, благоприятну сотвори молитву нашу, даруй нам оставление прегрешений наших: покрый нас кровом крилу Твоею, отжени от нас всякаго врага и супостата: умири нашу жизнь, Господи, помилуй нас, и мир Твой, и спаси души наша, яко благ и человеколюбец.

Лик: Аминь.

Диакон: Премудрость.

Священник: Пресвятая Богородице, спаси нас.

Лик: Честнейшую Херувим, и Славнейшую без сравнения Серафим, без истления Бога Слова рождшую, сущую Богородицу, Тя величаем.

Священник: Слава Тебе, Христе Боже, упование наше, слава Тебе.

Лик: Слава, и ныне: Господи, помилуй, трижды. Благослови.

Священник творит обычный отпуст.

 

Молитва иная над водою

Господу помолимся. Господи, помилуй.

Боже великоименитый, Отче Господа нашего Иисуса Христа, творяй чудеса Един, имже несть числа: Егоже глас на водах многих, Егоже видевше воды убояшася, и смятошася бездны и множество шума вод: Егоже путие в мори, и стези в водах многих, и стопы Твоя не познаются: Иже крещением Единороднаго Сына Твоего воплощеннаго и снитием Нань Пресвятаго Духа в видении голубя, и Твоим Отеческим гласом Иорданския струи освятил еси. Тебе ныне смиренно недостойнии раби Твои молим и мили ся деем, посли благодать Пресвятаго Духа на воду сию, и небесным Твоим благословением благослови, очисти и освяти ю, и даруй ей благодать и благословение Иорданово, и силу вся скверны очищающую, и всяк недуг исцеляющую, и бесов и всех наветов, и козней их прогонительную. И яви ю силою, действом и благодатию Пресвятаго Духа, быти всем от нея с верою пиющим, приемлющим же и кропящимся рабом Твоим, грехов оставление, изменение страстем, прогнание всякаго зла, умножение добродетелей, болезнем исцеление, домовом же и всякому месту освящение и благословение, губительных и всяких злотворных воздухов отгнание, и благодати Твоея присвоение.

Яко Ты еси благословляяй и освящаяй всяческая, Боже наш, и Тебе славу возсылаем со Единородным Твоим Сыном, и с Пресвятым, и Благим, и Животворящим Твоим Духом, ныне и присно, и во веки веков. Аминь.

Молитва на освящение всякия вещи

Господу помолимся. Господи, помилуй.

Создателю и Содетелю человеческаго рода, Дателю благодати духовныя, Подателю вечнаго спасения: Сам, Господи, посли Духа Твоего Святаго с вышним благословением на вещь сию, яко да вооружена силою небеснаго заступления, хотящим ю употребляти, помощна будет к телесному спасению и заступлению и помощи, о Христе Иисусе Господе нашем. Аминь. Таже кропит вещь священною водою трижды, и глаголет обычный отпуст .

Чин обхождения полей насеянных

Первее в церкви зачинается обычно молебен. Егда эе зачнется канон, исходят людие из церкви, и грядут в поля. Таже священник с певцы на первой статии к востоку ставше, глаголет:

Псалом 84

Благоволил еси, Господи, землю Твою, возвратил еси пленных Иаковль. Оставил еси беззакония людей Твоих, покрыл еси вся грехи их. Укротил еси весь гнев Твой, возвратился еси от гнева ярости Твоея. Возврати нас, Боже спасений наших, и отврати ярость Твою от нас. Еда во веки прогневаешися на ны; Или простреши гнев Твой от рода в род; Боже, Ты обращься оживиши ны, и людие Твои возвеселятся о Тебе. Яви нам, Господи, милость Твою, и спасение Твое даждь нам. Услышу, что речет о мне Господь Бог: яко речет мир на люди Своя, и на преподобныя Своя, и на обращающыя сердца к Нему. Обаче близ боящихся Его спасение Его, вселити славу в землю нашу. Милость и истина сретостеся, правда и мир облобызастася. Истина от земли возсияя и правда с Небесе приниче. Ибо Господь даст благость, и земля наша даст плод свой. Правда пред Ним предыдет, и положит в путь стопы своя.

Слава, и ныне:

Священник: Господу помолимся.

Лик: Господи, помилуй.

Священник глаголет молитву:

Всемогущий, Превечный Боже, Отче милосердия, призри молим Ти ся на наша повседневныя требования, и жатву довольную нашему житию изобильне даруй. Возвеличи над нами Имя Твое Святое, и на поля, винограды, вертограды наша, излий преизобильное Твое благословение, да вся труды рабов Твоих, древа, и насаждения наша, полно плодоносят. Отврати, Милосерде Боже, от кончин наших небеса неприязненна, студени, волны, грады, дожди вредящие, множества вод, и вся зла, яже могут человеческая вредити требованиям. Яко Ты еси Бог наш, и Тебе славу возсылаем, Отцу, и Сыну, и Святому Духу, ныне и присно, и во веки веков.

Лик: Аминь.

Священник: Премудрость, прости, услышим Святаго Евангелия. Мир всем.

Лик: И духови твоему.

Священник: От Матфея Святаго Евангелия чтение.

Лик: Слава Тебе, Господи, слава Тебе.

Священник: Вонмем.

Евангелие от Матфея (зачало 44)

Во время Оно, иде Иисус в субботы сквозе сеяния: ученицы же Его взалкашася, и начаша востерзати класы, и ясти. Фарисее же видевше, рекша Ему: се ученицы Твои творят, егоже не достоит творити в субботу. Он же рече им: несте ли чли, что сотвори Давид, егда взалка сам и сущии с ним; Како вниде в храм Божий, и злебы предложения сниде, ихже не достойно бе ему ясти, ни сущим с ним, токмо иереем единым; Или несте чли в законе, яко в субботы священницы в церкви субботы сквернят, и неповинни суть; Глаголю же вам, яко церкве боле есть зде. Аще ли бысте ведали что есть, милости хощу, а не жертвы: николиже убо бысте осуждали неповинных. Где бо есть и субботы Сын человеческий.

Лик: Слава Тебе, Господи, слава Тебе.

Священник: Господу помолимся.

Лик: Господи, помилуй.

Священник глаголет молитву:

Всемогущий Боже, милосердие Твое призываем, да сия семена, иже воздухом идождем воспитати благоволил еси, благословением Твоим возлиеши. Подаждь, Владыко, людем Твоим, Тебе всегда о Твоих благодарити дарованиих, от неплодствия же земли души алчущих отврати, да нищ и богат, недужный и крепкий, славят Имя Твое, Отца, и Сына, и Святаго Духа, ныне и присно, и во веки веков.

Лик: Аминь.

Таже благословит священник семена, глаголет:

Да благословит ны Бог, Бог наш, и земли нашей всеплодие подаст, и сторицею растити творит плоды ея, да пришедше с радостию, рукояти наша с благодарением соберем о Христе Иисусе Господе нашем, Емуже подобает всякая слава, честь и поклонение, со Безначальным Его Отцем, и Пресвятым, и Благим, и Животворящим Духом, ныне и присно, и во веки веков. Аминь.

Посем священник кропит водою священною поля, и грядет с людьми далее, поюще канон молебный. Таже на второй статии к югу ставше глаголет:

Псалом 125

Внегда возвратити Господу плен Сионь, быхом яко утешени. Тогда исполнишася радости уста наша, и язык наш веселия: тогда рекут во языцех: возвеличил есть Господь сотворити с ними. Возвелчил есть Господь сотворити с нами: быхом веселящеся. Возврати, Господи, пленение наше, яко потоки югом. Сеющии слезами радостию пожнут. Ходящии хождаху и плакахуся, метающе семена своя: грядуще же приидут радостию, вземлюще рукояти своя.

Слава, и ныне:

Священник: Господу помолимся.

Лик: Господи, помилуй.

Священник глаголет молитву:

Владыко Святый, Отче Всемогущий, Превечный Боже, молим ти ся усердно, да мановением милосердия Твоего, дати нам изволиши жатвы множество, плодов изобилие, древес овощей, и прибытки всяких вещей, и от всех сиих волнения небес губительная, студени и грады отврати. Яко подобает Тебе всякая слава, честь и поклонение, Отцу, и Сыну, и Святому Духу, ныне и присно, и во веки веков.

Лик: Аминь.

Священник: Премудрость, прости, услышим Святаго Евангелия. Мир всем.

Лик: И духови твоему.

Священник: От Марка Святаго Евангелия чтение:

Лик: Слава Тебе, Господи, слава Тебе.

Священник: Вонмем.

Евангелие от Марка (зачало 17)

Во время оно, рече Иисус учеником Своим: тако есть (и) Царствие Божие, якоже человек вметает семя в землю, и спит, и востает нощию, и днию, и семя прозябает и растет, якоже не весть он. В себе бо земля плодит прежде траву, потом клас. Егда же созреет плод, абие послет серп, яко наста жатва. И глаголаше: чесом уподобим Царствие Божие; или коей притчи пложим Е; яко зерно горчишно, еже егда всеяно будет в земли, менее всех семен есть земных. И егда веяно будет, возрастет, и будет боле всех зелий, и сотворит ветви велия, яко мощи под сению его птицам небесным витати.

Лик: Слава Тебе, Господи, слава Тебе.

Священник: Господу помолимся.

Лик: Господи, помилуй.

Священник глаголет молитву:

Умножи, молим Ти ся, Владыко, на ны милосердие Твое, да на сии семена снидет вожделеннаго благословения изобилие, от еже нам исполненным требований, Имя Святое славы Твоея всегда величати. Яко Ты еси Бог наш, и Тебе славу возсылаем, Отцу, и Сыну, и Святому Духу, ныне и присно, и во веки веков.

Лик: Аминь.

Таже священник глаголет:

Благослови, Господи, землю сию, да даст плод благ во время свое, ни кийже дух волнений вредити ю возможет, над неюже призвано есть Имя Твое Святое. Аминь.

Посем грядут далее, поюще канон молебный. Священник же грядый кропит поля водою священною. Таже на третией статии, к западу став, глаголет:

Псалом 146

Хвалите Господа, яко благ псалом: Богови нашему да усладится хваление. Зиждай Иерусалима Господь, разсеяния Израилева соберет: Исцеляяй сокрушенныя сердцем, и обязуяй сокрушения их: Исчитаяй множество звзд, и всем им имена нарицаяй. Велий Господь наш, и велия крепость Его, и разума Его несть числа. Приемляй кроткия Господь, смиряяй же грешники до земли. Ничните Господеви во исповедании, пойте Богови нашему в гуслех: Одевающему небо облаки, уготовляющему земли дождь: прозябающему на горах траву, и злак на службу человеком: Дающему скотом пищу их, и птенцем врановым призывающим Его. Не в силе констей восхощет, ниже в лыстех мужеских благоволит: Благоволит Господь в боящихся Его, и во уповающих на милость Его.

Слава, и ныне:

Священник: Господу помолимся.

Лик: Господи, помилуй.

Священник глаголет молитву:

Владыко, Иисусе Христе, Сыне Бога Живаго, низпосли Святаго Ангела Твоего с небес, да сохранит житвы, семена и плоды наша, от дождей волненных, от молний, от вреждения птиц, от съядения мышей, от червий угрызения, и от всех напастей диавольских: да сохранит хранилом Своим движения наша, и будет стена огненна окрест них. Благословением Своим ангельским да благословит и умножит семена наша, да благословим Имя Твое Святое, Отца, и Сына, и Святаго Духа, ныне и присно, и во веки веков.

Лик: Аминь.

Священник: Премудрость, прости, услышим Святаго Евангелия. Мир всем.

Лик: И духови твоему.

Священник: От Луки Святаго Евангелия чтение.

Лик: Слава Тебе, Господи, слава Тебе.

Священник: Вонмем.

Евангелие от Луки (зачало 34)

Во время оно, разумевающу же народу многу, и от всех градов рядушим к Нему, рече притчу: Изыде сеяй сеяти семене своего; и егда сеяше, ово паде при пути, и попрано бысть, и птицы небесныя позобаша е. А другое паде на камени, и прозяб усше, зане не имеяше влаги. И другое паде посреде терния: и возрасте терние и подави е. Другое же паде на земли блязе, и прозяб сотвори плод строицею. Сия глаголя возгласи: имеяй уши слышати, да слышит.

Лик: Слава Тебе, Господи, слава Тебе.

Священник: Господу помолимся.

Лик: Господи, помилуй.

Священник глаголет молитву:

Всемогущий, Превечный Боже, от ничегоже мир сотворенный висящ содержай, и в житие рода человеческаго поля делати повелеваяй: усердно прибегаем к милосердию Твоему, да еже на сих полех и виноградех здраваго семени всеянно или насажденно есть, воззрением благоутробия Твоего благословиши, и воздуха мерность подаси, и искоренивше волчков и терния нечистоту, семена плодовита покажеши, по мере же часа совершенне дорасти даси, да мы раби Твои дарами Твоими созрелыми насыщени, Тебе достойныя славы возсылати возможем, всегда, ныне и присно, и во веки веков.

Лик: Аминь.

Таже священник глаголет:

Да благословит вы семена, Бог Отец, да благословит вы Бог Сын, да благословит вы Бог Дух Святый, растите, и множитеся, и исполняйте житницы и храмы наша, в честь Всемогущаго Бога, и всех Святых. Аминь.

Посем грядут далее, поюще канон молебный. Священник же грядый кропит поля водою священною. Таже на четвертой статии, к северу став, глаголет:

Псалом 147

Похвали, Иерусалиме, Господа, хвали Бога Твоего, Сионе: Яко укрепи вереи врат твоих, лагослови сыны твоя в тебе. Полагаяй пределы твоя мир, и тука пшенична насыщаяй тя. Посылаяй слово Свое земли, до скорости течет слово Его, Дающаго снег Свой яко волну, мглу яко пепел посывающаго, Метающаго голоть Свой яко хлебы: противу лица мраза Его кро постоит; Послет слово Свое, и истает я: дхнет Дух Его, и потекут воды. Возвещаяй слово Свое Иакову, оправдания и судьбы Своя Израилеви. Не сотвори тако всякому языку, и судьбы Своя не яви им.

Слава, и ныне:

Священник: Господу помолимся.

Лик: Господи, помилуй.

Священник глаголет молитву:

Творче всех Боже, иже Моисею рабу Твоему рекий: глаголи сыном Израилевым: егда внидете в землю, юже Аз дам вам, и пожнете жатву ея, и принесете новии снопы жатвы вашея ко жрецу, и он принесет сноп пред Господем приятен вам: просим неизмеримую благость Твою, да сия семена, зелия, злаки благословити, сохранити и к дорастлости привести изволиши: да первенства их Тебе, Твоим же иереем, и нищим дати, пищу же, нам и скотом нашим потребную, от сих миети возможем Тобою, питателем нашим: Емуже подобает всякая слава, честь и поклонение, со Отцем Безначальным, и с Пресвятым, Благим и Животворящим Духом, ныне и присно, и во веки веков.

Лик: Аминь.

Священник: Премудрость, прости, услышим Святаго Евангелия. Мир всем.

Лик: И духови твоему.

Священник: От Иоанна Святаго Евангелия чтение.

Лик: Слава Тебе, Господи, слава Тебе.

Священник: Вонмем.

Евангелие от Иоанна (зачало 12)

Во время оно, рече Господь ко учеником Своим: не вы ли глаголете, яко еще четыре месяцы суть, и жатва приидет; се глаголю вам: возведите очи ваши, и видите нивы, яко плавы суть к жатве уже. И жняй мзду приемлет, и собирает плод в живот вечный: да сеяй вкупе радуется и жняй. О сем бо слово есть истиное, яко ин есть сеяй, и ин есть жняй. Аз послах вы жати, идеже вы не трудистеся: инии трудишася, и вы в труд их внидосте.

Лик: Слава Тебе, Господи, слава Тебе.

Священник: Господу помолимся.

Лик: Господи, помилуй.

Священник глаголет молитву:

Владыко Святый Отче, ибо создавый и землю, и непрестанно има владеяй, и Своим прозрением сохраняяй: смиренно Тя просим, и молим Ти ся, да Твоею несравненною благостию, сия поля, древа, семена и пустыны благословити и им плодоношение подати изволиши, от еже нам, рабом и рабыням Твоим, к живопитанию, и утешению телес, и духовной пище луш оттоле жительствовати и верно служити Тебе, Отцу, и Сыну, и Святому Духу, ныне и присно, и во веки веков.

Лик: Аминь.

Таже возвращаются к церкви, прочее молебна поюще. Вшедше же в церковь, чтется ектения великая, по ектении же отпуст обычный.

Чин совершения крестнаго хода в поли

Егда исходим в понедельник Светлыя седьмицы, или во иныя праздничныя дни, в поле, нивы или винограды, ради моления, и прошения милости Божией, или же благодарения ради за полученная благодеяния.

Лития бывает сице: по заамвонней политве, свещеносцы, рипидоносцы, предходящу им Кресту с церковными хоругвами, исходят из храма, за ними певцы, поюще стихиру праздника: Воскресение Твое, Христе Спасе: или тропарь праздника; таже катавасию и канон праздника поют, таже диакони со свяшенники идут, носяще Крест, Евангелие и икону храма или праздника; и обходят церковь трижды, и отходят темже порядком в поле, нивы или винограды.

Пришедше на место, обратятся лицем на восток.

И возглашает диакон:

И о сподобитися нам слышанию Святаго Евангелия, Господа Бога молим.

Лик: Господи, помилуй. Трижды

Диакон: Премудрость, прости, услышим Святаго Евангелия.

Священник: Мир всем.

Лик: И духови твоему.

Священник: От Матфея Святаго Евангелия чтение.

Лик: Слава Тебе, Господи, слава Тебе.

Диакон: Вонмем.

Священник чтет Евангелие от Матфея (зачало 20, от полу)

Рече Господь: просите и дастся вам: ищите и обрящете: толцыте и отверзется вам. Всяк бо просяй приемлет, и ищяй обретает, и толкущему отверзется. Или кто есть от вас человек, егоже аще воспросит сын его хлеба, еда камень подаст ему; Или аще рыбы просит, еда змию подаст ему; Аще убо вы, лукави суще, умеете даяния блага даяти чадом вашим: кольми паче Отец ваш Небесный даст блага просящим у Него.

Лик: Слава Тебе, Господи, слава Тебе.

Посем глаголет диакон ектению:

Помилуй нас, Боже, по велицей милости Твоей, молим Ти ся, услыши и помилуй.

Лик: Господи, помилуй, трижды.

Еще молимся о великом господине и отце нашем святейшем Патриархе Кирилле, и о господине нашем высокопреосвященнейшем митрополите (или: архиепископе, или: преосвященнейшем епископе) имярек, и всей во Христе братии нашей.

Лик: Господи, помилуй, трижды.

Еще молимся о богохранимей стране нашей, властех и воинствах ея, да тихое и безмолвное житие поживем во всяком благочестии и чистоте.

Лик: Господи, помилуй, трижды.

Еще молимся о милости, жизни, мире, здравии, спасении, посещении, прощении и оставлении грехов рабов Божиих, братии святаго храма сего (аще во обители: святыя обители сея).

Лик: Господи, помилуй, трижды.

Еще молимся, о еже сохранитися граду сему (или: веси сей), и святому храму сему (или: святой обители сей), и всякому граду, и стране, от глада, губительства, труса, потопа, огня, меча, нашествия иноплеменников, и междоусобныя брани: о еже милостиву и благоуветливу быти Благому и Человеколюбивому Богу нашему, отвратити всякий гнев на ны движимый, и избавити ны от належащаго и праведнаго Своего прещения, и помиловати ны.

Лик: Господи, помилуй, трижды.

Аще хощеши, приложи и сие:

Еще молимся Тебе, Господу Богу нашему, еже услышатися гласу моления нашего, и молитве, и помиловати рабы Твоя (или: раба Твоего, или: рабу Твою) имярек, благодатию и щедротами Твоими, и исполнити вся прошения их, и простити им вся согрешения вольная и невольная: благоприятным же быти мольбам и милостыням их пред престолом величества Твоего, и покрыти их от враг видимых и невидимых, от всякия напасти, беды и скорби, и недугов избавити, и подати здравие с долгоденствием рцем вси, Господи, услыши и помилуй.

Лик: Господи, помилуй, трижды.

Призри, Владыко Человеколюбче, милостивным Твоим оком на рабы Твоя (или: раба Твоего, или: рабу Твою) имярек, и услыши моления наша с верою приносимая, яко сам рекл еси: вся елика молящеся просите, веруйте, яко приимете, и будет вам, и паки: просите и дастся вас: сего ради и мы, аще и недостойнии, уповающе на милость Твою, просим: подаждь благость Твою, рабом Твоим (или: рабу Твоего, или: рабе Твою) имярек, и исполни благая желания их (или: его, или: ея), мирно же и тихо в здравии, и долгоденствии вся дни их (или: его, или: ея) соблюди: рцем вси, скоро услыши и милостивно помилуй.

Лик: Господи, помилуй, трижды.

Еще молимся Господу Богу нашему, о еже услышати глас моления нас грешных, и помиловати рабы Твоя (или: раба Твоего, или: рабу Твою) имярек, и покрыти их от всякия скорби, беды, гнева и нужды, и от всякия болезни душевныя и телесныя, даровати же им здравие с долгоденствием, рцем вси: скоро услыши и милостивно помилуй.

Лик: Господи, помилуй, трижды.

Еще молимся, и о еже услышати Господу Богу глас моления нас грешных, и помиловати нас.

Лик: Господи, помилуй, трижды.

Священник воглас:

Услыши ны, еже Спасителю наш, упование всех концев земли и сущих в море далече: и милостив, милостив буди, Владыко, о гресех наших, и помилуй ны. Милостив бо и Человеколюбец Бог еси, и Тебе славу возсылаем, Отцу, и Сыну, и Святому Духу, ныне и присно, и во веки веков.

Лик: Аминь.

Ведомо буди, яко аще во время бездождия поется молебен, прилагаются прошения из молебного пения, певаемого во время бездождия (зри страницу 281), аще ли же во время безведрия, прилагаются прошения из молебного пения, певаемого во время безведрия (зри страницу 278).

По возгласе глаголет диакон:

Паки и паки, приклоньше колена, Господу помолимся.

Лик: Господи, помилуй, трижды.

Священник чтет сию молитву:

Господи Боже, Отче, Сыне и Святый Душе, Троице Святая, Единосущная и Неразделимая, Создателю, Спасителю, Освятителю и Промыслителю всего сущаго во вселенней, приими, Милосерде, усердная моления нас грешных рабов Твоих, призывающих Тя, с верою, любовию и надеждею. Сам, Владыко Вседержителю, призри на ны, лишенныя первозданная красоты, и прости нам вся прегрешения наша, великия ради Твоея благости и человеколюбия. Мы согрешихом, беззаконновахом, нечествовахом, забыхом заповеди Твоя, и в след скверных наших пожеланий ходихом, недостойно званию и Евангелию Господа Иисуса Христа жительствовахом. Священницы и людие вкупе согрешающе, язв достойни сотворихомся. Обаче милость Твоя неизреченна, человеколюбие Твое непобедимо, и богатство щедрот Твоих неизследимо, на няже дерзающе молимтися и милися деем, умилосердися на ны кающиямя и просящия заступление Пречистых страстей Сына Твоего Господа нашего Иисуса Христа. Призри с небесе Всеблагим взором Своим на рабы Твоя, благослови их всяцем благословением, освяти их всеосвящающею Своею благодатию, Ангела мирна коемуждо пристави стрегуща, соблюдающа, сохраняюща, просвещающа и наставляюща нас на всякое дело благое. Услони сердца наша от злых помышлений, болящия уврачуй, здравыя сохрани и укрепи, всяк недуг и всякую язву отжени от людей Твоих, плодородие земли даруй, благорастворение воздуха содержи, ветры укроти, благовременный дождь земли низпосли, любве единомыслие в людех всади, веры истину возвыси, Твоего благочестия путь нам благоуправи, пастыри огради, пасомыя защити, подаждь клиру благонравие, монахом воздержание, сущим в девстве чистоту, в честном браце пребывающим благое и согласное житие, кающимся прощение, богатым милосердие, бедным помощь и терпение, нищия напитай, старцы препояши, юныя уцеломудри, неверующия просвети и обрати в истинную святую веру, раздоры умири, ересей востания разори. Молимся ти, Всещедре Царю, сохрани нас вседержительною десницею Своею невредимыя от всякаго зла, лютаго озлобления и губительнаго сокрушения. Еще припадаем Ти и повием: о Преблагий Отче, небесе и земли Творче, соблюди нас, избави нас, вразуми, укрепи, возвесели сердца наша истощенная печалию и волнением, сохрани нас от всякаго дела лукаваго, всякому же благому делу сочетай. О Господи, Боже наш, огради нас силою Креста Твоего, помилуй, заступлением Пречистыя Твоеся Богоматере и Приснодевы Марии, предстательством безплотных сил и молитвами святаго имярек (егоже есть день), и всех святых Твоих.

Яко Ты еси милости источник и благоутробия неизследимая пучина, и Тебе славу возсылаем, со Безначальным Твоим Отцем, и с Пресвятым, и Благим, и Животворящим Твоим Духом, ныне и присно, и во веки веков.

Лик: Аминь.

Посем взем священную воду, кропит ею нивы, зря на восток и глаголя:

Спаси, Боже, люди Твоя, и благослови нивы сия.

Лик: Аминь.

Таже на запад обратився, кропит и тожде глаголет:

Спаси, Боже, люди Твоя, и благослови нивы сия.

Лик: Аминь.

Посем на север кропя, глаголет:

Посети, Господи, землю сию, и упой ю, и умножи обогатити ю: бразды ея упой, и умножи жита ея.

Лик: Аминь.

На конец обратився на южную страну и кропя, глаголет:

Благословение Твое, Господи, да снидет на нивы сия, и да прозябнут, и сотворят плод мног, во имя Отца, и Сына, Святаго Духа.

Лик: Аминь.

(Аще же в винограде, глаголет: Благословение Господне да снидет и пребудет на винограде сем, окроплением воды сея священныя, во имя Отца, и Сына, и Святаго Духа. Аминь.)

Чин благословения при начале сеяния

Взем священник с собою священную воду с кропилцем и пшеницу, благословенную на всенощнем бдении, приходит к нивам, идеже сеяние имать быти, и возлож на ся епитрахиль, став лицем к востоку и над семенем начинает обычно:

Благословен Бог наш, всегда, ныне и присно, и во веки веков. Аминь.

Таже: Слава Тебе, Боже наш, слава Тебе.

Царю небесный, Утешителю, Душе истины, иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.

Святый Боже, Святый Крепкий, Святый Безсмертный, помилуй нас. Трижды.

Слава, и ныне:

Отче наш, иже еси на небесех, да святится Имя Твое, да приидет Царствие Твое: да будет воля Твоя, яко на небеси, и на земли. Хлеб наш насущный даждь нам днесь, и остави нам долги наша, якоже и мы оставляем должником нашим: и не введи нас во искушение, но избави нас от лукаваго.

Возглас: Яко Твое есть царство, и сила, и слава, Отца, и Сына, и Святаго Духа, ныне и присно, и во веки веков. Аминь.

Господи, помилуй, 12 (раз).

Слава, и ныне:

Приидите, поклонимся Цареви нашему Богу.

Приидите, поклонимся и припадем Христу, Цареви нашему Богу.

Приидите, поклонимся и припадем самому Христу, Цареви и Богу нашему.

И псалом 64

Тебе подобает песнь, Боже, в Сионе, и Тебе воздастся молитва во Иерусалиме. Услыши молитву мою: к Тебе всяка плоть приидет. Словеса беззаконник премогоша нас: и нечестия наша ты очистиши. Блажен, Егоже избрал еси и приял, вселится во дворех Твоих. Исполнимся во благих дому Твоего: свят храм Твой, Дивен в правде. Услыши ны, Боже Спасителю наш, упование всех концей земли и сущих в море далече. Уготовляяй горя крепостию Своею, препоясан силою. Смущаяй глубину морскую, шуму волн Его кто постоит; смятутся языцы. И убоятся живущии в концах от знамений Твоих: исходы утра и вечера украсиши. Посетил еси землю и упоил еси ю, умножил еси обогатити ю: река Божия наполнися вод: уготовал еси пищу им, яко тако (есть) уготование. Бразды ея упой, умножи жита ея: в каплях ея возвеселится возсияющи1. Благословиши венец лета благости Твоея, и поля Твоя исполнятся тука. Разботеют красная пустыни, и радостию холми препояшутся. Одеяшася овни овчии, и удолия умножит пшеницу: воззовут, ибо воспоют.

Слава, и ныне:

Аллилуия, аллилуия, аллилуия, слава Тебе, Боже. Трижды

Таже молитву:

Господу помолимся. Господи, помилуй.

Господи Боже наш, о пречистыя и пребогатыя длани Твоея, предлежащее пред очима Твоима семен подаяние принесохом, Владыко, и сему Тебе вручитися молимся: не смеяхом бо в бездушных земли недрах заключити сия, аще не воззрим на повеление Твоего величества, повелевающее родити, и прозябати земли, и дати семена сеющему, и хлеба в снедь. И ныне молимся Тебе, Боже наш, услыши ны молящияся Тебе, и отверзи нам сокровище Твое великое, и Благое, и небесное, и излей благословение Твое, донельже удовлимся по неложным Твоим обещанием: и отжени от нас вся снедающая плод наш земный, и всякое наказание праведно наводимое на ны, грех ради наших: и богатыя Твоя щедроты низпосли на вся люди Твоя, благодатию и человеколюбием Единороднаго Твоего Сына, с нимже благословен еси, и с Пресвятым, и Благим, и Животворящим Твоим Духом, и ныне и присно, и во веки веков. Аминь.

И взем священник благословенную пшеницу, всыпает ю в семена, глаголя:

Благослови, Господи, венец лета благостию Твоею, и поля Твоя да насытятся тука, и удолия умножит пшеницу.

Посем прием святую воду, кропит ею семена, глаголя:

Благословение Твое, Господи, даснидет на семена сия, и да прорастут, и сотворят плод мног, во имя Отца, и Сына, и Святаго Духа. Аминь.

И абие кропит и землю, на нейже сеяти имут, глаголя:

Посети, Господи, землю сию, и упой ю, и обогати: бразды ея ублажи, и умножи жита ея. Ты бо еси Бог наш, и Тебе славу возсылаем, Отцу, и Сыну, и Святому Духу, ныне и присно, и во веки веков. Аминь.

По сих приемлет священник в руку семена и мещет я трижды на ниву, глаголя:

Во имя Отца, и Сына, и Святаго Духа. Аминь.

И сею водою, с солию растворенною, окропляются нивы, поля, вергограды, винограды, и прочая.

Таже отпуст.

Молитва над гумном

Господу помолимся. Господи, помилуй.

Господи Боже наш, источниче благих, повелевый земли извести плод, благоутробия ради Твоего и благости, благослови и умножи и гумно сие, и плодоношение рабов Твоих: исполни сокровища их всякаго благаго плода, пшеницы, вина и елеа, и сохрани их от всякаго искушения, со всеми сущими у них, и просвети их в познании Твоем: да благоугодни Тебе бывше, сподобятся вечных Твоих благ.

Яко благословися Твое имя, Отца, и Сына, и Святаго Духа, ныне и присно, и во веки веков. Аминь.

Молитва о приносящих начатки овощей

Господу помолимся. Господи, помилуй.

Владыко Господи Боже наш, Твоя от Твоих приносити Тебе по предложeнию комyждо повелевый, и вечных Твоих благ воздаяние сим дaруяй, иже вдовы по силе приношeние благоугодно приeмый, приими и ныне принесенная от раба Твоего (или: рабы Твоея) имярек, и в вечных Твоих сокровищах возложитися сим сподоби. Дaруй ему (или: ей) и мирских Твоих благ обильное восприятие, со всеми полeзными ему.

Яко благословися Твое имя, и прославися Твое Царство, Отца, и Сына, и Святаго Духа, ныне и присно, и во веки веков. Аминь.

Молитва над всяким плодом

Господу помолимся. Господи, помилуй.

Господи Боже наш, положивый верующим в Тя пользование творении Твоими, Сам благослови предлежащия плоды сия Словом Твоим, молимся Тебе, милостию и человеколюбием Единороднаго Сына Твоего, с Нимже благословен еси, со Пресвятым, и Благим, и Животворящим Твоим Духом, ныне и присно, и во веки веков. Аминь.

Молитва в насаждение винограда

Господу помолимся. Господи, помилуй.

Господи Иисусе Христе, Иже лоза сый истинная, и Отец Твой делатель, Ты и Апостолы нарекл еси рождиями: Ты Израиля ради изгнал языки, и насадил еси его: тако и ныне, Владыко, прииди на лозу сию, и насади, воглуби милость Твою на ню. Даждь ей Хранителя, помощь Твою, огради входы и исходы ея Твоим Промыслом: избави ю от всякаго обстояния ея, от града же, снега, мраза, и голоти нужно носимыя, от грозныя зимы и ветров сожжения, от бури и демонов: и просто рещи, от всякаго нахождения, видимых же и невидимых врагов. Призри и посети виноград сей, егоже насади десница Твоя, да воздаст во время плоды своя; и да сподобимся и мы Твоею благодатию обимати его, и принести Тебе от него, во еже претворитися в кровь Пречистаго Тела Твоего. Тебе бо подобает всякая слава, честь и поклонение, со Безначальным Твоим Отцем, и с Пресвятым, и Благим, и Животворящим Твоим Духом, ныне и присно, и во веки веков. Аминь.

Молитва на обимание винограда

Боже Спасителю наш, благоволивый лозою нарещися Единородному Твоему Сыну, Господу нашему Иисусу Христу, и плод ея безсмертныя виновен показавый, Духа Твоего благодатию: Сам и ныне, Владыко, и сей лозный плод благослови, и даждь всем причащающимся от него освящение, и преспеяние души: создавшаго же нас истинныя лозы причастника сотвори выну, и невредимь живот его сохрани, вечными Твоими и неотъемлемыми дарми украшаяй, благодатию и человеколюбием Единороднаго Твоего Сына, с нимже благословен еси, и с Псвятым, и Благим, и Животворящим Твоим Духом, ныне и присно, и во веки веков. Аминь.

Молитва в причащении гроздия в 6-й день августа

Господу помолимся. Господи, помилуй.

Благослови, Господи, плод сей лозный новый, иже благорастворением воздушным, и каплями дождевными, и тишиною временною в сей зрелейший приити час благоволивый: да будет в нас, от того рождения лознаго причащающихся, в веселие, и приносити Тебе дар во очищение грехов, Священным и Святым телом Христа Твоего: с нимже благословен еси, со Пречистым, и Благим, и Животворящим Твоим Духом, ныне и присно, и во веки веков. Аминь.

Ведомо же буди, яко сия молитва глаголется над гроздием, идеже винограды, и приносятся на благословение во храм в сей шестый день аугуста.

Зде же в велицей России, идеже не обретаются винограды, приносятся в сей день ко храму яблока, и глаголется молитва о приносящих начатки овощей, ейже начало:

Владыко Господи Боже наш: (зри страницу 77).

Такожде и ино овощие да приносится коеждо во свое время ко храму на благословение, и молитва глаголется над ними та же.

Молитва на благословение вина

Господу помолимся. Господи, помилуй.

Господи Боже наш, Благий и Человеколюбивый, призри на вино сие и на причащающияся от него, и благослови е, якоже благословил еси студенец Иаковлевль, и купель Силоамскую, и чашу святых Твоих Апостолов: пришедый в Кану Галилейскую, благословивый шесть водоносов, и воду в вино преложивый, и славу Твою явивый святым Твоим учеником и Апостолом, Сам и ныне низпосли, Господи, Святаго Твоего Духа на вино сие, и благослови е во имя Твое Святое.

Яко Ты еси благословляяй, и освящаяй, и умножай всяческая, Христе Боже наш, и Тебе славу возсылаем со Отцем и Святым Духом, ныне и присно, и во веки веков. Аминь.

Молитва, еже освятити какое либо благовонное зелие

Господу помолимся. Господи, помилуй.

Господи Боже Вседержителю, Словом Твоим всяческая исполнивый, и возрастити повелевый земли вся плоды, во своя времена, и даяти я в радость и в живот человеком: Ты Сам, Всеблагий Владыко, и семена сия, с различными зелиями принесенныя во святой храм сий, благослови и освяти Духом Твоим Святым, и рабов Твоих сих, приемлющих зелия сия с семенами, от всякия скверны очисти, и домы их всякагоо благовония исполни, во еже быти сим и всем верою хранящим я, и кадящимся ими в соблюдение и избаву от всех вражиих прилогов и во отгнание всякаго мечтания, от действа диавола находящаго, дневнаго и нощнаго, на благословение же душам и телесем, верным Твоим людем и скотом, домовом же и местом. Яко да вси, приемлющии сия зелия, восприимут себе покров души и тела, и да будет нашему спасению врачевство Твоея благодати таинство: да в коем либо месте возложится, или на коем употребляемо будет, во еже получити благословение, вся (противной силе оттуду прогнанней) десница Твоя да покрыет, во славу Пресвятаго, Великолепаго и Всепокланяемаго Имене Твоего.

Емуже подобает всякая слава, честь и поклонение, со Отцем и Святым Духом, ныне и присно, и во веки веков. Аминь.

Чин благословения соли

Взем священник епитрахиль на себя, начинает обычно:

Благоловен Бог наш, всегда, ныне и присно, и во веки веков. Аминь

Таже: Слава Тебе, Боже наш, слава Тебе.

Царю небесный, Утешителю, Душе истины, иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.

Святый Боже, Святый Крепкий, Святый Безсмертный, помилуй нас. Трижды.

Слава, и ныне:

Пресвятая Троице, помилуй нас: Господи очисти грехи наша; Владыко, прости беззакония наша; Святый, посети и исцели немощи наша, имене Твоего ради.

Господи, помилуй. Трижды

Слава, и ныне:

Отче наш, иже еси на небесех, да святится Имя Твое, да приидет Царствие Твое: да будет воля Твоя, яко на небеси, и на земли. Хлеб наш насущный даждь нам днесь, и остави нам долги наша, якоже и мы оставляем должником нашим: и не введи нас во искушение, но избави нас от лукаваго.

Возглас: Яко Твое есть царство, и сила, и слава, Отца, и Сына, и Святаго Духа, ныне и присно, и во веки веков. Аминь.

И тропари сия:

Древле верою соманитяныни дарует молитва, егоже умерша, Творче, воздвигл еси пророком Елисеем славным и священнодивным: солию же паки воды безгадныя яве претворил еси в сладость, благодатию вседетельною Твоего Духа, Боже, юже и нам ныне богатно подаждь, да Тя славим во веки.

Слава, и ныне, Богородичен:

Молитвами Богородицы и всех святых Твоих, Христе Боже, благодать Святаго Твоего Духа низпосли нам, и велию милость, и помилуй нас, яко Един Щедре и Человеколюбче.

Священник: Господу помолимся.

Клир: Господи, помилуй.

Священник глаголет молитву:

Господи Боже, Спасителю наш, в ветсем завете всякую жертву солию осолити повелевый, и в Иерихоне при Елиссеи пророце вредныя воды солию исцеливый, Сам и ныне, Владыко Пресвятый, смиренно молим Тя, посли небесное Твое благословение на соль сию, и благослови ю, и всех вкушающих от нея, Твоего духовнаго благословения исполни, и здравие им душевное и телесное подаждь. Ты бо еси благословляяй и освящаяй всяческая, и Тебе славу возсылаем, Отцу, и Сыну, и Святому Духу, ныне и присно, и во веки веков. Аминь.

Клир: Аминь.

Священник же кропит соль священною водою, глаголя:

Благословляется соль сия окроплением воды сея священные, во имя Отца, и Сына, и Святаго Духа, ныне и присно, и во веки веков. Аминь.

И абие творит обычный дневный отпуст.

Молитва над солию

Господу помолимся. Господи, помилуй.

Боже Спасителю наш, пришедый во Иерихон при Елиссеи пророце, и вредныя воды солию исцеливый: Сам благослови и соль сию, и преложи ю в жертву радования. Ты бо еси Бог наш, и тебе славу возсылаем, Отцу, и Сыну, и Святому Духу, ныне и присно, и во веки веков. Аминь.

Чин благословения пчел

Пришед священник на место, идеже стоят пчелы, начинает:

Благословен Бог наш, всегда, ныне и присно, и во веки веков.

Чтец: Аминь. Слава Тебе, Боже наш, слава Тебе.

Царю небесный, Утешителю, Душе истины, иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.

Святый Боже, Святый Крепкий, Святый Безсмертный, помилуй нас. Трижды.

Слава, и ныне:

Пресвятая Троице, помилуй нас: Господи очисти грехи наша; Владыко, прости беззакония наша; Святый, посети и исцели немощи наша, имене Твоего ради.

Господи, помилуй. Трижды

Слава, и ныне:

Отче наш, иже еси на небесех, да святится Имя Твое, да приидет Царствие Твое: да будет воля Твоя, яко на небеси, и на земли. Хлеб наш насущный даждь нам днесь, и остави нам долги наша, якоже и мы оставляем должником нашим: и не введи нас во искушение, но избави нас от лукаваго.

Священник возглас: Яко Твое есть царство, и сила, и слава, Отца, и Сына, и Святаго Духа, ныне и присно, и во веки веков.

Чтец: Аминь.

Господи, помилуй, 12 (раз).

Слава, и ныне:

Приидите, поклонимся Цареви нашему Богу.

Приидите, поклонимся и припадем Христу, Цареви нашему Богу.

Приидите, поклонимся и припадем самому Христу, Цареви и Богу нашему.

И псалмы

Читаемым же псалмом, окропляет священник места пчел вся, глаголя и сам псалом 8-й тайно: Помилуй мя, Боже:

Псалом 50

Помилуй мя, Боже, по велицей милости Твоей, и по множеству щедрот Твоих очисти беззаконие мое. Наипаче омый мя от беззакония моего, и от греха моего очисти мя. Яко беззаконие мое аз знаю, и грех мой предо мною есть выну. Тебе Единому согреших, и лукавое пред Тобою сотворих: яко да оправдишися во словесех Твоих, и победиши, внегда судити Ти. Се бо в беззакониих зачат есмь, и во гресех роди мя мати моя. Се бо истину возлюбил еси, безвестная и тайная премудрости Твоея явил ми еси. Окропиши мя иссопом, и очищуся: омыеши мя, и паче снега убелюся. Слуху моему даси радость и веселие: возрадуются кости смиренныя. Отврати лице Твое от грех моих, и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи мене от лица Твоего, и Духа Твоего Святаго не отыми от мене. Воздаждь ми радость спасения Твоего, и Духом Владычним утверди мя. Научу беззаконные путем твоим, и нечестивые к Тебе обратятся. Избави мя от кровей, Боже, Боже спасения моего: возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо: всесожжения не благоволиши. Жертва Богу дух сокрушен: сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимские. Тогда благоволиши жертвы правды, возношение и всесожегаемая: тогда возложат на олтарь Твой тельцы.

Псалом 84

Благоволил еси, Господи, землю Твою, возвратил еси пленных Иаковль. Оставил еси беззакония людей Твоих, покрыл еси вся грехи их. Укротил еси весь гнев Твой, возвратился еси от гнева ярости Твоея. Возврати нас, Боже спасений наших, и отврати ярость Твою от нас. Еда во веки прогневаешися на ны; Или простреши гнев Твой от рода в род; Боже, Ты обращься оживиши ны, и людие Твои возвеселятся о Тебе. Яви нам, Господи, милость Твою, и спасение Твое даждь нам. Услышу, что речет о мне Господь Бог: яко речет мир на люди Своя, и на преподобныя Своя, и на обращающыя сердца к Нему. Обаче близ боящихся Его спасение Его, вселити славу в землю нашу. Милость и истина сретостеся, правда и мир облобызастася. Истина от земли возсияя и правда с Небесе приниче. Ибо Господь даст благость, и земля наша даст плод свой. Правда пред Ним предыдет, и положит в путь стопы своя.

Псалом 122

К Тебе возведох очи мои, Живущему на небеси. Се, яко очи раб в руку господий своих, яко очи рабыни в руку госпожи своея: тако очи наши ко Господу Богу нашему, дондеже ущедрит ны. Помилуй нас, Господи, помилуй нас, яко по многу исполнихомся уничижения: Наипаче наполнися душа наша поношения гобзующих и уничижения гордых.

Слава, и ныне:

Аллилуия, аллилуия, аллилуия, слава Тебе, Боже. Трижды

Священник: Господу помолимся.

Чтец: Господи, помилуй.

Священник глаголет молитвы сия:

Создателю всех Боже, семена благословляяй и умножаяй, и к употреблению нашему сия благопотребна творяй: ходатайством Предтечи и Крестителя Иоанна, милостивно внемля молитвам нашим, пчелы сия благослови и освятити Своим благоутробием балгоизволи, да обильные плоды Своя приносят, во еже ко храму Твоему и святых олтарей Твоих лепоте и украшению, купно же и к нашему употреблению быти им, о Христе Иисусе Господе нашем, емуже честь и слава, во веки веков. Аминь.

Священник: Господу помолимся.

Чтец: Господи, помилуй.

Священник:

Боже, трудом человеческим и безсловесным животными благодействовати Ведый, и неизреченным милосердием Твоим самих пчел плоды и дела к нуждам нашим употребляти научивый, смиренно молимся Величествию Твоему: пчелы сия благословити изволи, и к приобретению человеческому роду умножи я, снабдевая их, и препитавая: да киеждо на Величество Твое и безмерные щедроты Твоя уповаяй, в хранении же сих животных труждаяйся, трудов своих обильныя плоды сподобится восприти, и небеснаго благословения исполнится, о Христе Иисусе Господе нашем, Емуже честь и слава во веки веков. Аминь.

И паки окропляет место пчел, и чтет Евангелие.

Евангелие от Луки (зачало 114)

Во время оно, воскрес Иисус от мертвых, ста посреде ученик Своих, и глагола им: мир вам. Убоявшеся же и пристрашни бывше, мнях дух видяше. И рече им: что смущени есте; и почто помышления входят в сердца Ваша; Видите руце Мои, и нозе Мои, яко Сам Аз есмь. Осяжите Мя и видите, яко дух плоти и кости не имать, якоже Мене видите имуща. И сие рек, показа им руце и нозе. Еще же не верующим им от радости, и чудящимся, рече им: имате ли что снедно зде; они же даша Ему рыбы печены часть, и от пчел сот. И взем, пред ними яле. Рече же им: сия суть словеса, яже глаголах к вам, еще сый с вами, яко подобает скончатися всем написанным в законе Моисеов и пророцех и псалмех о Мне.

По Евангелии же глаголет сие:

Сими Евангельскими словесы да очистятся грехи наша, и разорятся и погибнут вся вся обаяния, аще кая суть на месте сем: да снидет же на не благословение Всемогущаго Бога, Отца и Сына, и Святаго Духа. Аминь.

И паки кропит место пчел.

И бывает отпуст.

Благословение роев пчелиных, во улия нова всажденных

Священник начинает обычно:

Благословен Бог наш, всегда, ныне и присно, и во веки веков.

Чтец: Аминь. Слава Тебе, Боже наш, слава Тебе.

Царю небесный, Утешителю, Душе истины, иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.

Святый Боже, Святый Крепкий, Святый Безсмертный, помилуй нас. Трижды.

Слава, и ныне:

Пресвятая Троице, помилуй нас: Господи очисти грехи наша; Владыко, прости беззакония наша; Святый, посети и исцели немощи наша, имене Твоего ради.

Господи, помилуй. Трижды

Слава, и ныне:

Отче наш, иже еси на небесех, да святится Имя Твое, да приидет Царствие Твое: да будет воля Твоя, яко на небеси, и на земли. Хлеб наш насущный даждь нам днесь, и остави нам долги наша, якоже и мы оставляем должником нашим: и не введи нас во искушение, но избави нас от лукаваго.

Священник возглас: Яко Твое есть царство, и сила, и слава, Отца, и Сына, и Святаго Духа, ныне и присно, и во веки веков.

Чтец: Аминь.

Господи, помилуй, 12 (раз).

Слава, и ныне:

Приидите, поклонимся Цареви нашему Богу.

Приидите, поклонимся и припадем Христу, Цареви нашему Богу.

Приидите, поклонимся и припадем самому Христу, Цареви и Богу нашему.

И псалом 50

Помилуй мя, Боже, по велицей милости Твоей, и по множеству щедрот Твоих очисти беззаконие мое. Наипаче омый мя от беззакония моего, и от греха моего очисти мя. Яко беззаконие мое аз знаю, и грех мой предо мною есть выну. Тебе Единому согреших, и лукавое пред Тобою сотворих: яко да оправдишися во словесех Твоих, и победиши, внегда судити Ти. Се бо в беззакониих зачат есмь, и во гресех роди мя мати моя. Се бо истину возлюбил еси, безвестная и тайная премудрости Твоея явил ми еси. Окропиши мя иссопом, и очищуся: омыеши мя, и паче снега убелюся. Слуху моему даси радость и веселие: возрадуются кости смиренныя. Отврати лице Твое от грех моих, и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи мене от лица Твоего, и Духа Твоего Святаго не отыми от мене. Воздаждь ми радость спасения Твоего, и Духом Владычним утверди мя. Научу беззаконные путем твоим, и нечестивые к Тебе обратятся. Избави мя от кровей, Боже, Боже спасения моего: возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо: всесожжения не благоволиши. Жертва Богу дух сокрушен: сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимские. Тогда благоволиши жертвы правды, возношение и всесожегаемая: тогда возложат на олтарь Твой тельцы.

Псалом 84

Благоволил еси, Господи, землю Твою, возвратил еси пленных Иаковль. Оставил еси беззакония людей Твоих, покрыл еси вся грехи их. Укротил еси весь гнев Твой, возвратился еси от гнева ярости Твоея. Возврати нас, Боже спасений наших, и отврати ярость Твою от нас. Еда во веки прогневаешися на ны; Или простреши гнев Твой от рода в род; Боже, Ты обращься оживиши ны, и людие Твои возвеселятся о Тебе. Яви нам, Господи, милость Твою, и спасение Твое даждь нам. Услышу, что речет о мне Господь Бог: яко речет мир на люди Своя, и на преподобныя Своя, и на обращающыя сердца к Нему. Обаче близ боящихся Его спасение Его, вселити славу в землю нашу. Милость и истина сретостеся, правда и мир облобызастася. Истина от земли возсияя и правда с Небесе приниче. Ибо Господь даст благость, и земля наша даст плод свой. Правда пред Ним предыдет, и положит в путь стопы своя.

Псалом 122

К Тебе возведох очи мои, Живущему на небеси. Се, яко очи раб в руку господий своих, яко очи рабыни в руку госпожи своея: тако очи наши ко Господу Богу нашему, дондеже ущедрит ны. Помилуй нас, Господи, помилуй нас, яко по многу исполнихомся уничижения: Наипаче наполнися душа наша поношения гобзующих и уничижения гордых.

Слава, и ныне:

Аллилуия, аллилуия, аллилуия, слава Тебе, Боже. Трижды

Священник: Господу помолимся.

Чтец: Господи, помилуй.

Священник глаголет молитву:

Боже Всемогий, Предвечный, содержай горстию всю тварь, обладаяй небом и земплю, и всем яже на них, всякому же созданию, еже на пользу быти щедро подаяй: умиленно молим Ти ся, Всеблаже, якоже древле израильтяном землю медом и млеком текущую даровати, в пустыни Иоанна Крестителя Твоего дивиим медом воспитати благоизволил еси: такожде ныне призрения Твоего благоволением к живопитанию нашему, сей пчельник и его улия благослови, умножая преумножи в нем пчелы, и благодатию Твоею я соблюдая, тучнаго нас меда исполни: да никако сей пчельник созданий Твоих пчельных лишен, но всегда преисполнен соты меда будет: и по премногой благостыни и непобедимей крепости Твоей, да явится неподвижим многими лукавствы, и непоколебим зазорными обаянии, но Твоею всесильною огражден державою, и остенен ополчением, от всякаго коварства волшебнаго сохранен, и всегда в Твоей, Христе, рукояти невредим пребудет. Твое бо есть, еже миловати и спасати ны, Христе Боже наш, и Тебе славу возсылаем, со Отцем и Святым Духом, во веки. Аминь.

И кропит священник пчел и улия водою священною, глаголя:

Во имя Отца, и Сына, и Святаго Духа. Аминь.

Посем обычный дневный отпуст.

Чин благословения новаго меда

Священник: Благословен Бог наш, всегда, ныне и присно, и во веки веков.

Чтец: Аминь. Слава Тебе, Боже наш, слава Тебе.

Царю небесный, Утешителю, Душе истины, иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.

Святый Боже, Святый Крепкий, Святый Безсмертный, помилуй нас. Трижды.

Слава, и ныне:

Пресвятая Троице, помилуй нас: Господи очисти грехи наша; Владыко, прости беззакония наша; Святый, посети и исцели немощи наша, имене Твоего ради.

Господи, помилуй. Трижды

Слава, и ныне:

Отче наш, иже еси на небесех, да святится Имя Твое, да приидет Царствие Твое: да будет воля Твоя, яко на небеси, и на земли. Хлеб наш насущный даждь нам днесь, и остави нам долги наша, якоже и мы оставляем должником нашим: и не введи нас во искушение, но избави нас от лукаваго.

Священник возглас: Яко Твое есть царство, и сила, и слава, Отца, и Сына, и Святаго Духа, ныне и присно, и во веки веков.

Чтец: Аминь.

Священник: Господу помолимся.

Чтец: Господи, помилуй.

Священник глаголет молитву сию:

Необименный в милости и Неизреченный в щедротах, Господи Иисусе Христе, Дивен сый во славе, и творяй чудеса: Ты действом Святаго Духа иногда благословивый Израиля, и его медом насытивый от камене, Сам и ныне призри свыше на создание Твое сие, и благословением Твоим небесным благослови и очисти соты пчел, и от них мед, и подаждь ему действенну благодать паче всех совершенну: да всяк от него вкушающий, приемлющий, и идущий обрящет благополучное здравие, и пищею сею насытится, и исполнится всякаго блага. Яко Ты еси подаяй всяческая благая, и Тебе славу возсылаем, со безначалльным Твоим Отцем, и Пресвятым, и Благим, и Животворящим Твоим Духом, ныне и присно, и во веки веков. Аминь.

И кропит священною водою.

Чин благословения колива,

Сиесть кутии, или вареныя пшеницы, с медом смешенныя и различными сладкими овощми украшенныя, и в честь и память Господских праздников, или святых Божиих, во церковь приносимыя.

Принесену бывшу коливу во церковь, аще на вечерни, по Ныне отпущаеши: Трисвятое. По Отче наш: тропарь. Слава, и ныне: Богородичен по гласу тропарь святаго. Аще же на литургии, по заамвоней молитве поется тропарь и кондак святаго.

Диакон, покадив, глаголет: Господу помолимся.

Лик: Господи, помилуй.

Священник, став над коливом, глаголет миолитву сию:

Вся совершивый словом Твоим, Господи, и повелевый земли многоразличныя прозябати плоды в наслаждение и пищу нашу, иже семенми три отроки и Даниила, сущия в Вавилоне, сластнопитанных светлшия показавый, Сам, Всеблагий Царю, и семена сия с различными плоды благослови, и от них вкушающия освятитти, яко во славу Твою и честь святаго имярек сия предложишася от Твоих рабов, и в память во благочестивей вере скончавшихся: подаждь же, Блаже, благоукрасившим сия и память совершающим, вся яже ко спасению прошения и вечных Твоих благ наслаждение, молитвами Пречистыя Владычицы нашея Богородицы и Приснодевы Марии, и святаго имярек, Егоже и память совершаем, и всех святых Твоих.

Яко Ты еси благословляяй и освящаяй всяческая, Боже наш, и Тебе славу возсылаем, безначальному Отцу, со Единородным Твоим Сыном, и Пресвятым, и Благим, и Животворящим Твоим Духом, ныне и присно, и во веки веков.

Лик: Аминь.

И аще на вечерни, диакон: Премудрость.

Лик: Благослови.

Священник: Сый благословен: и прочая до отпуста.

Аще же на литургии, поет лик: Буди имя Господне: трижды. И псалом: Благословлю Господа на всякое время:

Раздав же антидор, священник творит обычный отпуст литургии.

 

Чин благословения стад овчих, или иных скотов

Взем священник епитрахиль на себе, начинает:

Благословен Бог наш, всегда, ныне и присно, и во веки веков.

Чтец: Аминь. Слава Тебе, Боже наш, слава Тебе.

Царю небесный, Утешителю, Душе истины, иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.

Святый Боже, Святый Крепкий, Святый Безсмертный, помилуй нас. Трижды.

Слава, и ныне:

Пресвятая Троице, помилуй нас: Господи очисти грехи наша; Владыко, прости беззакония наша; Святый, посети и исцели немощи наша, имене Твоего ради.

Господи, помилуй. Трижды

Слава, и ныне:

Отче наш, иже еси на небесех, да святится Имя Твое, да приидет Царствие Твое: да будет воля Твоя, яко на небеси, и на земли. Хлеб наш насущный даждь нам днесь, и остави нам долги наша, якоже и мы оставляем должником нашим: и не введи нас во искушение, но избави нас от лукаваго.

Священник возглас: Яко Твое есть царство, и сила, и слава, Отца, и Сына, и Святаго Духа, ныне и присно, и во веки веков.

Чтец: Аминь.

Господи, помилуй, 12 (раз).

Слава, и ныне:

Приидите, поклонимся Цареви нашему Богу.

Приидите, поклонимся и припадем Христу, Цареви нашему Богу.

Приидите, поклонимся и припадем самому Христу, Цареви и Богу нашему.

Псалом 8

Господи Господь наш, яко чудно имя Твое по всей земли, яко взятся великолепие Твое превыше небес. Из уст младенец и сущих совершил еси хвалу, враг Твоих ради, еже разрушити врага и местника. Яко узрю небеса, дела перст Твоих, луну и звезды, яже Ты основал еси. Что есть человек, яко помниши его, или сын человечь, яко посещаеши его; умалил еси его малым чим от Ангел, славою и честию венчал еси его: и поставил еси Его над делы руку Твоею, вся покорил еси под нозе его: овцы и волы вся, еще же и скоты польския, птицы небесныя, и рыбы морския, преходящия стези морския. Господи Господь наш, яко чудно имя Твое по всей земли.

Слава, и ныне:

Аллилуия, аллилуия, аллилуия, слава Тебе, Боже. Трижды

Священник: Господу помолимся.

Чтец: Господи, помилуй.

Священник чтет молитву сию:

Владыко, Господи Боже наш, власть меяй всякия твари, Тебе молимся, и Тебе просим, якоже благословил и умножил еси стада патриарха Иакова, благослови и стадо овец (или: скотов) сих, раба Твоего имярек, и умножи, и укрепи, и сотвори е в тысящи, и избави е от насилия диавола, и от иноплеменническаго нашествия, и пленения, и от всякаго навета врагов, и воздуха смертнаго, и губительнаго недуга: огради е святыми Ангелы Твоими, всякую немощь, всякую зависть, и искушение, чаровства же и волшебства, от действа находящия диавольскаго, отгоняя от него. Яко Твое есть Царство, и сила, и слава, Отца, и Сына, и Святаго Духа, ныне и присно, и во веки веков.

Клир: Аминь.

И абие кропит стадо священною водою, глаголя:

Благослови, Господи, стадо сие, и избави е от всяческаго злаго обстояния видимых и невидимых врагов, и от губительные смерти, и всякаго недуга, и всех диавольских злодеяний, и умножи е о имени Твоем Святем, и в окроплении священныя сея воды, здравие тому даруй, во Имя Отца, и Сына, и Святаго Духа. Аминь.

И окропив все стадо, творит обычный дневный отпуст.

И поют, аще изволят:

Призри на моления Твоих раб, Всенепорочная, утоляющи лютая на ны востания, всякия скорби нас изменяющи: Тя бо едину твердое и известное утверждение имамы, и Твое предстательство стяжахом, да не постыдимся, Владычице, Тя призывающии. Потщися на умоление, Тебе верно вопиющих: радуйся, Владычице, всех помоще, радосте и покрове, и спасение дущ наших.

Владычице, приими молитвы рабов Твоих, и избави нас от всякия нужды и печали.

Чин молитвенный на копание кладязя, и обретение воды

Пришедшу священнику на место идеже кладязь ископин бытии мать, имый с собою священную воду и кропильце, вземлет на ся епитрахиль, и начинает обычно:

Благословен Бог наш, всегда, ныне и присно, и во веки веков. Аминь.

Таже: Слава Тебе, Боже наш, слава Тебе.

Царю небесный, Утешителю, Душе истины, иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.

Святый Боже, Святый Крепкий, Святый Безсмертный, помилуй нас. Трижды.

Слава, и ныне:

Пресвятая Троице, помилуй нас: Господи очисти грехи наша; Владыко, прости беззакония наша; Святый, посети и исцели немощи наша, имене Твоего ради.

Господи, помилуй. Трижды

Слава, и ныне:

Отче наш, иже еси на небесех, да святится Имя Твое, да приидет Царствие Твое: да будет воля Твоя, яко на небеси, и на земли. Хлеб наш насущный даждь нам днесь, и остави нам долги наша, якоже и мы оставляем должником нашим: и не введи нас во искушение, но избави нас от лукаваго.

Священник возглас: Яко Твое есть царство, и сила, и слава, Отца, и Сына, и Святаго Духа, ныне и присно, и во веки веков. Аминь.

Господи, помилуй, 12 (раз).

Слава, и ныне:

Приидите, поклонимся Цареви нашему Богу.

Приидите, поклонимся и припадем Христу, Цареви нашему Богу.

Приидите, поклонимся и припадем самому Христу, Цареви и Богу нашему.

И псалом 113

Во исходе Израилеве от Египта, дому Иаковля из людей варвар, Бысть Иудеа святыня Его, Израиль область Его. Море виде и побеже, Иордан возвратися вспять, горы взыграшася, яко овни, и холми, яко агнцы овчии. Что ти есть, море, яко побегло еси, и тебе, Иордане, яко возвратился еси вспять; Горы, яко взыграстеся, яко овни, и холми, яко агнцы овчии; От лица Господня подвижеся земля, от лица Бога Иаковля: обращшаго камень во езера водная и несекомый во источники водныя. Не нам, Господи, не нам, но имени Твоему даждь славу, о милости Твоей и истине Твоей: Да не когда рекут языцы: где есть Бог их; Бог же наш на небеси и на земли, вся елика восхоте, сотвори. Идоли язык сребро и злато, дела рук человеческих: Уста имут, и не возглаголют, очи имут и не узрят: уши имут, и не услышат, ноздри имут, и не обоняют: руце имут, и не осяжут, нозе имут, и не пойдут: не возгласят гортанем своим. Подобни им да будут творящии я, и вси надеющиися на ня. Дом Израилев упова на Господа: Помощник и Защититель им есть. Дом Ааронь упова на Господа: Помощник и Защититель им есть. Боящиися Господа уповаша на Господа: Помощник и Защититель им есть. Господь помянув ны благословил есть нас, благословил есть дом Израилев, благословил есть дом Ааронь. Благословил есть боящыяся Господа, малыя с великими. Да приложит Господь на вы, на вы и на сыны ваша. Благословени вы Господеви, сотворшему небо и землю. Небо небесе Господеви, землю же даде сыновом человеческим. Не мертвии восхвалят Тя, Господи, ниже вси низходящии во ад: Но мы, живии, благословим Господа от ныне и до века.

Слава, и ныне:

Аллилуия, аллилуия, аллилуия, слава Тебе, Боже. Трижды

Таже молитву сию:

Господу помолимся. Господи, помилуй.

Господи Боже наш, Вседержителю и Всесильне, творяй вся и претворяй хотением Своим точию: в непроходных и безводных местах проход и источники вод изобретаяй неизреченною и непостижимою Твоею премудростию: иже от сухаго камене водныя истещи сотворил еси потоки, и жаждущия люди Твоя напоил еси: Сам и ныне, Владыко всяческих, услыши моление нас недостойных рабов Твоих, и даруй нам воду на сем месте, сладкую же и вкусну, довольну убо их потребе, невредительну же к приятию: яко да и в сем славим Пресвятое и Великолепое Имя Твое, Отца, и Сына, и Святаго Духа, ныне и присно, и во веки веков.

Клир: Аминь.

Абие же священник взем мотыку, сам в первых начинает копати, и единощи копав, глаголет: Во имя Отца. Вторицею же глаголет: И Сына. Третицею: И Святаго Духа. Аминь. И взем священную воду кропит место и делателей, глаголя:

Благнословение Господне буди на место сие, и на всех вас.

И абие творит дневный отпуст,

и отходит во своя си.

 

Чин благословения новаго кладяза, или источника

Пришедшу священнику ко кладязю, со святою водою и кропилом, и вжегшу вещи три, вземлет на себя епитрахиль, и покадив кладязь, окрест, и став к востоком, начинает обычно:

Благословен Бог наш, всегда, ныне и присно, и во веки веков.

Чтец: Аминь. Слава Тебе, Боже наш, слава Тебе.

Царю небесный, Утешителю, Душе истины, иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.

Святый Боже, Святый Крепкий, Святый Безсмертный, помилуй нас. Трижды.

Слава, и ныне:

Пресвятая Троице, помилуй нас: Господи очисти грехи наша; Владыко, прости беззакония наша; Святый, посети и исцели немощи наша, имене Твоего ради.

Господи, помилуй. Трижды

Слава, и ныне:

Отче наш, иже еси на небесех, да святится Имя Твое, да приидет Царствие Твое: да будет воля Твоя, яко на небеси, и на земли. Хлеб наш насущный даждь нам днесь, и остави нам долги наша, якоже и мы оставляем должником нашим: и не введи нас во искушение, но избави нас от лукаваго.

Священник возглас: Яко Твое есть царство, и сила, и слава, Отца, и Сына, и Святаго Духа, ныне и присно, и во веки веков.

Чтец: Аминь.

Господи, помилуй, 12 (раз).

Слава, и ныне:

Приидите, поклонимся Цареви нашему Богу.

Приидите, поклонимся и припадем Христу, Цареви нашему Богу.

Приидите, поклонимся и припадем самому Христу, Цареви и Богу нашему.

И псалом 28

Принесите Господеви, сынове Божии, принесите Господеви сыны овни, принесите Господеви славу и честь. Принесите господеви славу имени Его: поклонитеся Господеви во дворе святем Его. Глас Господень на водах, Бог славы возгреме, Господь на водах многих. Глас Господень в крепости, глас Господень в великолепии. Глас Господа, сокрушающаго кедры: и истнит я яко тельца Ливанска: и возлюбленный яко сын единорожь. Глас Господа, стрясающаго пустыню: и страсет Господь пустыню Каддийскую. Глас Господень, свершающий елени, и открыет дубравы: и в храме Его всякий глаголет славу. Господь потоп населяет, и сядет Господь Царь в век. Господь крепость людем Своим даст, Господь благословит люди Своя миром.

Слава, и ныне:

Аллилуия, аллилуия, аллилуия, слава Тебе, Боже. Трижды

Таже священник: Господу помолимся.

Лик: Господи, помилуй.

Священник чтет над кладязем молитву сию:

Зиждителю и Творче всяческих, в начале сотворивый небо и землю и воды, ихже верху ношашеся Дух Божий: и Словом Своим собравый воды поднебесныя в совокупление едино: повылаяй источники в дебрех и посреде гор провождаяй воды, напаяющия вся звери сельныя: горькия воды при Моисеи в пустыни желом усладивый, и поразивый камень, и потекоша воды, и жаждущия люди Своя напоивый: при Елиссеи же пророце солию безчадныя воды исцеливый: Ты и ныне яко Благ и Человеколюбец, смиренно молим Ти ся, призри на молитву нас недостойных рабов Твоих, и низпосли благословение Твое небесное на воду сию, в студенце сем сущую, и божественною Твоею силою и крепкою десницею отжени от нея всякую сопротивную детель и действо диаволе: отъими от нея всякую горесть и сланость и безчадство, и благослови и очисти ю, услади же и благочадну сотвори: и всем приемлющим и пиющим от нея, и мыющимся ею, даждь быти во здравие, и изменение всякия страсти и недуга, и во исцеление всякия болезни, в славу Тебе Единаго в Троице славимаго Бога. Ты бо еси благословляяй и освящаяй всяческая, и Тебе славу возсылаем, Отцу, и Сыну, и Святому Духу, ныне и присно, и во веки веков.

Лик: Аминь.

Абие же взем священную воду, вливает ю трижды крестообразно в студенец, глаголя:

Благословляется и освящается студенец сей и вода в нем сущая, благодатию Святаго Духа излиянием воды сея священныя, во имя Отца, и Сына, и Святаго Духа. Аминь. Трижды.

И творит обычный дневный отпуст.

 

Последование над пещию

Творит священник освящение воды малое (зри страницу 7).

По освящении же глаголет молитвы:

Господу помолимся. Господи, помилуй.

Боже вечный, иже седмь седмерицею разженную пещь и пламень иже в Вавилоне на росу преложил еси, и вверженныя в ию от царя Навуходоносора святыя три отроки, Ананию, Азарию и Мисаила, целы сохранивый: Сам благослови и пещь сию великия ради Твоея милости, и благослови в ней дела рук рабов Твоих, и благопоспеши я благодеянием Твоим, и исправи я по множеству щедрот Твоих: молитвами Пречистыя Владычицы нашея Богородицы и Приснодевы Марии: силою Честнаго и Животворящаго Креста: предстательством превеликих чиноначальник Михаила и Гавриила, и всех небесных сил безплотных: Честнаго, Славнаго Пророка, Предтечи и Крестителя Иоанна: святых славных и всехвальных Апостол: святаго священномученика Куприана: иже во святых отца нашего Николая, архиепископа Мирликийскаго, Чудотворца, и всех святых.

Яко Ты еси благословляяй и освящаяй всяческая, Боже наш, и Тебе славу возсылаем, Отцу, и Сыну, и Святому Духу, ныне и присно, и во веки веков. Аминь.

Молитва иная:

Владыко Господи Боже наш, иже в высоких Живый, и на смиренныя призираяй, благословивый дом Лаванов входом Иаковлим, и дом Пентефриин входом Иосифовым, благословивый дом Давидов входом ковчега: иже вочеловечением Христа Твоего, спасение быв дому Закхеову: Сам благослови пещь сию, и действующия ю Твоим страхом соблюди, и невредимы их от сопротиволежащих сохрани, и Твое благословение с высоты жилища Твоего низпосли им, и благослови, и умножи дела рук их, да всегда благодарно славим Всесвятое Имя Твое, Отца, и Сына, и Святаго Духа, ныне и присно, и во веки веков. Аминь.

Таже глаголет прощение:

Помилуй нас, Боже, по велицей милости Твоей, молим Ти ся, услыши и помилуй.

Господи помилуй, трижды.

Еще молимся о милости, жизни, мире, здравии, спасении, посещении, прощении грехов рабов Твоих имярек, и о еже благословится и умножитися делом рук труждающихся от пещи сей, молим Ти ся, Господи, услыши и помилуй.

Господи помилуй, трижды.

Возглас: Услыши ны, Боже Спасителю наш, Упование всех концев земли и сущих в мори далече: и милостив, милостив буди, Владыко, от гресех наших, и помилуй ны. Милостив бо и Человеколюбец Бог еси, и Тебе славу возсылаем, Отцу, и Сыну, и Святому Духу, ныне и присно, и во веки веков. Аминь.

И окропляет пещь, и сущия тамо.

Таже творит отпуст.

 

Чин благословити новый корабль, или лодию

Взем священник епитрахиль на себе, творит обычное начало:

Благословен Бог наш, всегда, ныне и присно, и во веки веков.

Чтец: Аминь. Слава Тебе, Боже наш, слава Тебе.

Царю небесный, Утешителю, Душе истины, иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.

Святый Боже, Святый Крепкий, Святый Безсмертный, помилуй нас. Трижды.

Слава, и ныне:

Пресвятая Троице, помилуй нас: Господи очисти грехи наша; Владыко, прости беззакония наша; Святый, посети и исцели немощи наша, имене Твоего ради.

Господи, помилуй. Трижды

Слава, и ныне:

Отче наш, иже еси на небесех, да святится Имя Твое, да приидет Царствие Твое: да будет воля Твоя, яко на небеси, и на земли. Хлеб наш насущный даждь нам днесь, и остави нам долги наша, якоже и мы оставляем должником нашим: и не введи нас во искушение, но избави нас от лукаваго.

Священник возглас: Яко Твое есть царство, и сила, и слава, Отца, и Сына, и Святаго Духа, ныне и присно, и во веки веков.

Чтец: Аминь.

Господи, помилуй, 12 (раз).

Слава, и ныне:

Приидите, поклонимся Цареви нашему Богу.

Приидите, поклонимся и припадем Христу, Цареви нашему Богу.

Приидите, поклонимся и припадем самому Христу, Цареви и Богу нашему.

И псалом 106

Исповедайтеся Госповеди, яко Благ, яко в век милость Его. Да рекут избавленнии Господем, ихже избави из руки врага, И от страны собра их, от восток и запад, и севера и моря. Заблудиша в пустыни безводней, пути града обительнаго не обретоша. Алчуще и жаждуще, душа их в них исчезе. И воззваша ко Господу, внегда скорбети им, и от нужд их избави я: И настави я на путь прав, внити во град обительный. Да исповедятся Господеви милости Его, и чудеса Его сыновом человеческим: Яко насытил есть душу тщу, и душу алчущу исполни благ: Седящия во тьме и сени смертней, окованныя нищетою и железом, Яко преогорчиша словеса Божия, и совет Вышняго раздражиша. И смирися в трудех сердце их, и изнемогоша, и не бе помогаяй. И воззваша ко Господу, внегда скорбети им, и от нужд их спасе я. И изведе я из тьмы, и сени смертныя, и узы их растерза. Да исповедятся Господеви милости Его, и чудеса Его сыновом человеческим: Яко сокруши врата медная, и вереи железныя сломи. Восприят я от пути беззакония их: беззаконий бо ради своих смиришася. Всякаго брашна возгнушася душа их, и приближишася до врат смертных. И воззваша ко Господу, внегда скорбети им, и от нужд их спасе я: Посла слово Свое, и исцели я, и избави я от растлений их. Да исповедятся Господеви милости Его, и чудеса его сыновом человеческим. И да пожрут Ему жертву хвалы, и да возвестят дела Его в радости. Сходящии в море в кораблях, творящии делания в водах многих. Тии видеша дела Господня, и чудеса Его во глубине. Рече, и ста дух бурен, и вознесошася волны Его: Восходят до небес, и низходят до бездн: душа их в злых таяше. Смятошася, подвигошася яко пияный, и вся мудрость их поглощена бысть. И воззваша ко Господу, внегда скорбети им, и от нужд их изведе я. И повеле бури, и ста в тишину, и умолкоша волны Его. И возвеселишася, яко умолкоша, и настави я в пристанице хотения Своего. Да исповедятся Господеви милости Его, и чудеса Его сыновом человеческим. Да вознесут Его в церкви людстей, и на седалищи старец восхвалят Его. Положил есть реки в пустыню, и исходища водная в жажду, землю плодоносную в сланость, от злобы живущих на ней. Положил есть пустыню во езера водная, и землю безводную во исходища водная. И насели тамо алчущия, и составиша грады обительны. И насеяша села, и насадиша винограды, и сотвориша плод житен. И благослови я, и умножишася зело: и скоты их не умали. И умалишася, и озлобишася от скорби зело и болезни. Излияся уничижение на князи их, и облазни я по непроходней, а не по пути. И поможе убогу от нищеты, и положи яко овцы отечествия. Узрят правии и возвеселятся, и всякое базаконие заградит уста своя. Кто премудр и сохранит сия; и уразумеют милости Господни.

Слава, и ныне:

Аллилуия, аллилуия, аллилуия, слава Тебе, Боже. Трижды

Священник: Господу помолимся.

Лик: Господи, помилуй.

Священник чтет молитву сию:

Господи, Боже отец наших, заповeдавый Ною, рабу Твоему, устроити кивот ко спасению мира от многих древес, благоволивый ему едино древо быти и сочинитися: сам убо, Владыко всех, благоволивый бездушными древесы правити, и крепкою Твоею рукою род человеческий спасaяй, Сам и ныне, Владыко, и сей корабль соблюди, и даждь ему Ангела блaга, мирна, хотящыя плыти в нем сохрани, даждь им во своя отъити здравым, молитвами Пречистыя Владычицы нашея Богородицы, и Приснодевы Марии: силою Честнáго, и Животворящаго Креста: честных, небесных, умных Сил безплотных: святаго славнаго пророка, Предтечи и Крестителя Иоанна: святых славных, и всехвальных Апостол: и святаго имярек, и всех святых Твоих.

Яко Ты еси окормляяй и освящaяй всяческая, Боже наш, и Тебе славу, и благодарение, и поклонение возсылаем, Отцу, и Сыну, и Святому Духу, ныне и присно, и во веки веков.

Лик: Аминь.

Взем же священник священную воду, кроит ею корабль, или лодию, глаголя:

Благословляется корабль сей (или: лодия сия) окроплением воды сея священныя, во имя Отца, и Сына, и Святаго Духа. Аминь.

И абие поют стихиру, глас 4:

Призри на моления Твоих раб, всенепорочная, утоляющи лютая на ны востания, всякия скорби нас изменяющи: Тя бо едину твердое и известное утверждение имамы, и Твое предстательство стяжахом, да не постыдимся, Владычице, Тя призывающии. Потщися на умоление, Тебе верно вопиющих: радуйся, Владычице, всех помоще, радосте и покрове, и спасение душ наших.

И бывает обычный дневный отпуст.

Молитва от еже благословити мрежи

Господу помолимся. Господи, помилуй.

Господе Иисусе Христе Боже наш, от пяти хлебов и двою рыбу пять тысящ насытивый, и от избытков множество укрухов собрати устроивый, и мрежу учеников Твоих по воскресении божественным Твоим повелением множеством рыб наполнивый: Сам, Владыко Всесильный, и предлежащия мрежи благослови, и ловитве, Твоим божественным благословением, множеством рыб на пищу Твоим рабом всегда исполни, молитвами Преблагословенныя, Славныя Владычицы нашея Богородицы и Приснодевы Марии, и святых славных и всехвальных Апостол Петра Верховнаго, Домы, Наданаила, Иакова и Иоанна, и прочих рыбам ловцов бывших, и от рыб теми сетьми уловленных вкушающих, в мире и здравии душевном и телесном сохрани.

Яко Ты еси податель всех благих, и Тебе славу возсылаем, со безначальным Твоим Отцем, и Пресвятым, и Благим, и Животворящим Твоим Духом, ныне и присно, и во веки веков. Аминь.

Молитва на основание дома

Господу помолимся. Господи, помилуй.

Боже Вседержителю, сотворивый небеса разумом, и основавый землю на тверди ея, Создателю и Содетелю всех, призри на раба Твоего имярек, изволившаго в державе крепости Твоея воздвигнути дом в жилище и зданием его воздвигнути; утверди его на твердом камени и основай по Твоему Божественному евангельскому гласу, егоже ни ветр, ни вода, ни ино что повредити возможет; благоволи ему в конец привестися, и в нем жити хотящих от всякаго навета сопротивнаго свободи.

Яко Твоя держава, и Твое есть Царство и сила и слава, Отца, и Сына, и Святаго Духа, ныне и присно и во веки веков. Аминь.

Чин благословения новаго дома

Пришедшу священнику в дом, егоже благословити имать, подобает ему имети с собою священную в сосуде воду и кропильце, и елей в малом мосуде: к семуже на койждо от четырех стен, да будет кропит написан: взем же на себя епитрахиль, (аще хощет и фелонь), начинает.

Благословен Бог наш, всегда, ныне и присно, и во веки веков.

Лик: Аминь.

Диакон: Слава Тебе, Боже наш, слава Тебе.

И мы: Царю небесный, Утешителю, Душе истины, иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.

Таже чтец:

Святый Боже, Святый Крепкий, Святый Безсмертный, помилуй нас. Трижды.

Слава, и ныне:

Пресвятая Троице, помилуй нас: Господи очисти грехи наша; Владыко, прости беззакония наша; Святый, посети и исцели немощи наша, имене Твоего ради.

Господи, помилуй. Трижды

Слава, и ныне:

Отче наш, иже еси на небесех, да святится Имя Твое, да приидет Царствие Твое: да будет воля Твоя, яко на небеси, и на земли. Хлеб наш насущный даждь нам днесь, и остави нам долги наша, якоже и мы оставляем должником нашим: и не введи нас во искушение, но избави нас от лукаваго.

Священник возглас: Яко Твое есть царство, и сила, и слава, Отца, и Сына, и Святаго Духа, ныне и присно, и во веки веков.

Чтец: Аминь.

Господи, помилуй, 12 (раз).

Слава, и ныне:

Приидите, поклонимся Цареви нашему Богу.

Приидите, поклонимся и припадем Христу, Цареви нашему Богу.

Приидите, поклонимся и припадем самому Христу, Цареви и Богу нашему.

И псалом 90:

Живый в помощи Вышняго, в крове Бога небеснаго водворится. Речет Господеви: заступник мой еси и прибежище мое, Бог мой, и уповаю на Него. Яко Той избавит тя от сети ловчи, и от словесе мятежна, плещма Своима осенит тя, и под криле Его надеешися, оружием обыдет тя истина Его. Не убоишися от страха нощнаго, от стрелы летящия во дни, от вещи во тьме преходящия, от сряща и беса полуденнаго. Падет от страны твоей тысяща, и тьма одесную тебе, к тебе же не приближится, обаче очима твоима смотриши и воздаяние грешников узриши. Яко Ты, Господи, упование мое; Вышняго положил еси прибежище твое. Не приидет к тебе зло, и рана не приближится телеси твоему, яко Ангелом Своим заповесть о тебе, сохранити тя во всех путех твоих. На руках возмут тя, да не когда преткнеши о камень ногу твою; на аспида и василиска наступиши, и попереши льва и змия. Яко на Мя упова, и избавлю и; покрыю и, яко позна имя Мое. Воззовет ко Мне, и услышу его, с ним есмь в скорби, изму его и прославлю его, долготою дней исполню его и явлю ему спасение Мое.

По псалме же поют тропарь, глас 8:

Якоже Закхееву дому Твоим, Христе, входом спасение бысть, сице и ныне входом священных служителей Твоих, и с ними святых Ангел Твоих, мир Твой подаждь дому сему, и милостивно благослови его, спасая и просвещая всех <жити хотящих>2 в нем.

Сущей же трапезе убрусом покрытой, и кресту на ней, и свещам горящим, и воде священной и елею, став священник к востоку лицем, и рекшу диакону:

Господу помолимся.

И клиру: Господи, помилуй.

Чтет во услышание всех молитву сию:

Господи Иисусе Христе, Боже наш, изволивый под сень Закхеа мытаря внити, и спасение тому и всему дому его бывый; Сам и ныне зде жити восхотевшия, и нами недостойными мольбы Тебе и моления приносящия, от всякаго зла невредимы соблюди, благословляя их и обиталище сие, и ненаветен тех живот выну сохраняй, изобильно вся благая Твоя им Твоим благословением на пользу подаваяй.

Яко подобает Тебе всякая слава, честь и поклонение, со безначальным Твоим Отцем, и Пресвятым, и Благим, и Животворящим Твоим Духом, ныне и присно, и во веки веков.

Лик: Аминь.

Священник: Мир всем.

Лик: И духови твоему.

Диакон: Главы ваша Господеви приклоните.

Лик: Тебе, Господи.

И чтет священник тайно молитву сию:

Владыко Господи Боже наш, на высоких живый и на смиренныя призираяй, благословивый дом Лаванов при входе Иакова и дом Пентефреев приходом Иосифовым, благословивый дом Аведарин внесением кивота, и во дни пришествия по плоти Христа Бога нашего, спасение дому Закхеову даровавый: Сам благослови и дом сей, и в нем <жити хотящих>3 страхом Твоим огради, и невредимых от сопротивных сохрани, и благословение Твое с высоты жилища Твоего низпосли им, и благослови и умножи вся благая в доме сем.

Возглас: Твое бо есть, еже миловати и спасати ны, Боже наш, и Тебе славу возсылаем, Отцу, и Сыну, и Святому Духу, ныне и присно, и во веки веков.

Лик: Аминь.

Абие же посем знаменав трижды елей, глаголет:

Во имя Отца, и Сына, и Святаго Духа.

Аминь.

И чтет над ним молитву сию:

Господи Боже наш, призри ныне милостивно на молитву мене смиреннаго и недостойнаго раба Твоего, и низпосли благодать Пресвятаго Твоего Духа на елей сей, и освяти его, яко да будет во освящение месту сему и на нем сооруженну дому, и на прогнание всякия сопротивныя силы и сатанинских наветов. Ты бо еси благословляяй и освящаяй всяческая, Христе Боже наш, и Тебе славу возсылаем, Отцу, и Сыну, и Святому Духу, ныне и присно, и во веки веков.

Лик: Аминь.

По молитве же вземлет священную воду, и кропит ею вся стены дома окрест и вся клети его, глаголя:

Во имя Отца, и Сына, и Святаго Духа, окроплением воды сея священныя, в бегство да претворится всt лукавое бесовское действо. Аминь.

Окропив же все, взем елей, помазует им стены дома, идеже есть крест написан в средине его, начен от восточныя стены дома, посем и западную, и по сих северную, в конец же южную стену, над коемждо глаголет:

Благословляется дом сей помазанием святаго елеа сего, во имя Отца, и Сына, и Святаго Духа, аминь.

По совершении помазания елеем, возжигают свещи пред киимждо крестом, на коейждо стене. Сему же бывающу, певцы поют стихиру сию, глас 5:

Благослови, Господи, дом сей, и исполни его земных Твоих благ, и в нем благочестно <жити хотящих>4 от всякаго злаго обстояния неврежденных сохрани, и всякое изобилие небеснаго и земнаго Твоего благословения тем даруй, и яко щедр помилуй, по велицей Твоей милости.

Скончану же помазанию, станет священник к востоку, и аще хощет, может чести и Евангелие.

Диакон: Премудрость, прости, услышим святаго Евангелиа.

Священник: Мир всем.

Лик: И духови твоему.

Священник: От Луки Святаго Евангелия чтение.

Лик: Слава Тебе, Господи, слава Тебе.

Диакон: Вонмен.

И глаголет священник Евангелие от Луки (зачало 94)

Во время оно, прииде Иисус во Иерихон. И се муж нарицаемый Закхей: и сей бе старей мытарем, и той бе богат. И искаше видети Иисуса, кто есть: и не можаше от народа, яко возрастом мал бе. И предитек возлезе на ягодичину, да видит, яко туде хотяше минути: И яко прииде на место, воззрев Иисус, видев его, и рече к нему: Закхее, потщався слези, днесь бо в дому твоем подобает Ми быти. И потщався слезе, и прият Его радуяся. И видевше вси роптаху, глаголюще, яко ко грешну мужу вниде витати. Став же Закхей рече ко Господу: се пол имения моего, Господи, дам нищим: и аще кого чим обидех, возвращу четверицею. Рече же к нему Иисус, яко днесь спасение дому сему бысть: зане и сей сын Авраамль есть. Прииде бо Сын Человечь взыскати и спасти погибшаго.

Лик: Слава Тебе, Господи, слава Тебе.

И абие чтет псалом 100

Милость и суд воспою Тебе, Господи: Пою и разумею в пути непорочне: когда приидеши ко мне; прехождах в незлобии сердца моего, посреде дому моего. Не предлагах пред очима моима вещь законопреступную: творящыя преступление возненавидех. Не прильпе мне сердце строптиво, уклоняющагося от мене лукаваго не познах. Оклеветающаго тай искренняго своего, сего изгонях: гордым оком, и несытым сердцем, с сим не ядях. Очи мои на верныя земли, посаждати я со мною: ходяй по пути непорочну, сей ми служаше. Не живяше посреде дому моего творяй гордыню: глаголяй неправедная, не исправляше пред очима моима. Воутрия избивах вся грешныя земли, еже потребити от града Господня вся делающыя беззаконие.

Священник же, глаголя псалом, кадит весь дом.

По сем глаголет диакон или священник ектению сию:

Помилуй нас, Боже, по велицей милости Твоей, молим Ти ся, услыши и помилуй.

Лик: Господи, помилуй. Трижды

Еще молимся о великом господине и отце нашем святейшем Патриархе Кирилле, и о господине нашем высокопреосвященнейшем митрополите (или: архиепископе, или: преосвященнейшем епископе) имярек, и всей во Христе братии нашей.

Лик: Господи, помилуй. Трижды

Прилагается и сия:

Еще молимся о еже низпослати благословение Свое на дом сей и на раба Своего [или: рабу Свою] имярек, и на всех в нем благочестно <жити хотящих>5, и послати им Ангела Своего милостива, соблюдающа и сохраняща их от всякаго зла, и наставляюща к деланию всех добродетелей, и ко исполнению святых Христовых заповедей, и о еже сохранити их от глада, губительства, труса, потопа, огня, меча и нашествия иноплеменник, и всякия смертоносныя раны, и даровати им здравие, и долгоденствием оградити их и во всем угобзити, рцем вси: Господи, услыши и помилуй.

Лик: Господи, помилуй. Трижды.

Еще молимся за всю братию и за вся христианы.

Лик: Господи, помилуй. Трижды.

Возглас: Услыши ны, Боже Спасителю наш, упование всех концев земли, и сущих в мори далече: и милостив, милостив буди, Владыко, о гресех наших, и помилуй ны. Милостив бо и Человеколюбец Бог еси, и Тебе славу возсылаем, Отцу, и Сыну, и Святому Духу, ныне и присно, и во веки веков.

Лик: Аминь.

Диакон: Премудрость.

Священник: Пресвятая Богородице, спаси нас.

Лик: Честнейшую Херувим, и Славнейшую без сравнения Серафим, без истления Бога Слова рождшую, сущую Богородицу, Тя величаем.

Священник: Слава Тебе, Христе Боже, упование наше, слава Тебе.

Лик: Слава, и ныне: Господи, помилуй, трижды. Благослови.

И творит священник обычный дневный отпуст.

Многолетствова же дому владыце, отходит во своя си, благодаря Бога.

Молитва, егда кто имать в дом нов

Господу помолимся. Господи, помилуй.

Боже Спасителю наш, изволивый под сень Закхееву внити, и спасение тому, и всему дому того бывый: Сам и ныне зде жити восхотевшия, и нами недостойными мольбы Тебе и моления приносящия, от всякаго вреда соблюди невредимы, благословляя тех зде жилище, и ненаветень тех живот сохраняяй.

Яко подобает Тебе всякая слава, честь и поклонение, со Безначальным Твоим Отцем, и с Пресвятым, и Благим, и Животворящим Духом, ныне и присно, и во веки веков. Аминь.

Молитва, во еже благословити брашна, мяса, во святую и великую неделю Пасхи

Творит священник:

Благословен Бог наш:

Христос воскресе: трижды

Таже:

Господу помолимся. Господи, помилуй.

Призри, Господи Иисусе Христе Боже наш, на брашна мяс, и освяти я, якоже освятил еси овна, егоже Тебе приведе верный Авраам, и агнца, егоже Тебе Авель во всеплодие принесе: подобне и тельца упитаннаго, егоже жрети повелел еси сынови Твоему заблуждшему и паки к Тебе возвращшемуся: да якоже той сподобися Твоея благости насладитися, сице и освященных от Тебе, и благословенных, насладимся в пищу всех нас. Ты бо еси истинная пища и податель благих, и Тебе славу возсылаем, со безначальным Твоим Отцом, и с Пресвятым, и Благим, и Животворящим Твоим Духом, ныне и присно, и во веки веком. Аминь.

Молитва, еже благословити сыр и яйца

Господу помолимся. Господи, помилуй.

Владыко Господи Боже наш, Зиждителю и Содетелю всех, благослови млеко огустевшее, с нимже и яйца, и нас соблюди во благости Твоей, яко да причащающеся их, Твоих независтноподательных даров исполнимся, и неизглаголанныя Твоея благости.

Яко Твоя держава, и Твое есть Царство, и сила, и слава, Отца и Сына, и Святаго Духа, ныне и присно, и во веки веков. Аминь.

Чин, бываемый на нивах, или винограде, или вертограде, аще случится вредитися от гадов, или иных видов

Подобает быти Литургии, и вжигати кандило святаго Трифона, или святаго Евстафия, или святаго Юлиана Ливийскаго. По Божественной Литургии взяти елей от кандил, и воду святых богоявлений, и кропляяй крестовидно священник на ниву, или виноград, или вертоград, глаголя молитвы сия.

Господу помолимся. Господи помилуй.

Господи Боже наш, в начале создания Твоего сотворивый небо и землю: и небо убо украсивый великими светилы, еже просвещати на земли, и чудитися теми Тебе Единому Содетелю и Владыце твари: землю же украсивый злаком и травою, и различием семен, сеемых по роду, и всю цветы вообразив в благоукрашение, благословил еси ю: Сам и ныне, Владыко, призри от Святаго жилища Твоего на стяжание сие, и благослови е. Сохрани е неврежденно от всякаго чаровання, и обаяния, и всякаго зла, оплазнства же лукаваго, и коварства лукавых человек: и даждь ему приносити плоды во время, исполнены благословения Твоего, и всякаго зверя, и гада, червь же и мухи, и ржу, зной и вар, и безгодныя ветры, вред наносящыя, отжени от него.

Яко освятися и прославися Пречестное и Великолепое Имя Твое, Отца, и Сына, и Святаго Духа, ныне и присно, и во веки веком.

Лик: Аминь.

Священник: Мир всем.

Лик: И духови твоему

Священник: Главы ваша Господеви приклоните.

Лик: Тебе, Господи.

Священник же чтет молитву сию:

Владыко Господи Боже наш, плотским Твоим смотрением благословивый Вифлеем, и Гефсиманию, и иногда дом Иаковль, иже и благословен быв Израиль преименовася: иже и дом Аведдариин и Давыдов благословивый, Сам благослови и стяжание сие, и сотвори е о благословении плодоносити: молитвами Пречистыя Владычицы нашея Богородицы, и Приснодевы Марии, силою Честнаго и Животворящаго Креста, Честнаго Славнаго Пророка. Предтечи и Крестителя Иоанна, святых славных и всехвальных апостол, святых добропобедных мученик, святых славных великомученик Трифона, Евстафия и Юлиана, и святаго имярек, егоже днесь память совершаем, и всех Твоих святых.

Яко Ты еси благословляяй, и освящаяй всяческая, и Тебе славу возсылаем со Безначальным Твоим Отцем, и с Пресвятым, и Благим, и Животворящим Твоим Духом, ныне и присно, и во веки веком.

Лик: Аминь.

Чин молитвенный во время губительнаго мора скотов

Священник пришед на место идеже скоты недужныя суть, вземлет на себе епитрахиль и начинает обычно:

Благословен Бог наш, всегда, ныне и присно, и во веки веков. Аминь.

Таже: Слава Тебе, Боже наш, слава Тебе.

Царю небесный, Утешителю, Душе истины, иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.

Святый Боже, Святый Крепкий, Святый Безсмертный, помилуй нас. Трижды.

Слава, и ныне:

Пресвятая Троице, помилуй нас: Господи очисти грехи наша; Владыко, прости беззакония наша; Святый, посети и исцели немощи наша, имене Твоего ради.

Господи, помилуй. Трижды

Слава, и ныне:

Отче наш, иже еси на небесех, да святится Имя Твое, да приидет Царствие Твое: да будет воля Твоя, яко на небеси, и на земли. Хлеб наш насущный даждь нам днесь, и остави нам долги наша, якоже и мы оставляем должником нашим: и не введи нас во искушение, но избави нас от лукаваго.

Возглас: Яко Твое есть царство, и сила, и слава, Отца, и Сына, и Святаго Духа, ныне и присно, и во веки веков. Аминь.

Господи, помилуй, 12 (раз).

Слава, и ныне:

Приидите, поклонимся Цареви нашему Богу.

Приидите, поклонимся и припадем Христу, Цареви нашему Богу.

Приидите, поклонимся и припадем самому Христу, Цареви и Богу нашему.

И псалом 69

Боже, в помощь мою вонми: Господи, помощи ми потщися. Да постыдятся и посрамятся ищущие душу мою, да возвратятся вспять и постыдятся хотящие ми злая. Да возвратятся абие стыдящеся глаголющии ми: благоже, благоже. Да возрадуются и возвеселятся о Тебе вси ищущии Тебе, Боже: и да глаголют выну, да возвеличится Господь, любящии спасение Твое. Аз же нищ есть и убог, Боже, помози ми: Помощник мой и Избавитель мой еси Ты, Господи, не закосни.

Посем, имея пред собою вся недужныя скоты и зря к востоком, глаголет:

Господу помолимся.

Клир: Господи, помилуй.

Священник чтет молитву сию:

Господи Боже наш, Боже сильный и крепкий, имеяй власть живота и смерти, и человеки и скоты спасаяй, и скоро послушая всех верою призывающих Тя, и прошения их милостивно исполняяй: Тебе мы недостойнии раби Твои припадающе верою смиренно в сердце сокрушенном молимся и мили ся деем: призри милостивно на скоты сия, тяжким недугом и лютою болезнию одержимыя, и силою Твоего благословения скоро сия исцели, и утоляя болезнь, воздуха злорастворение претвори: и все еже аще что в них, или от них есть от лукаваго бесовскаго действа, чародеянием, обаянием или иным коим волшебным злохитрием и насилием диавольским наносимое им зло, отжени: и даруй им живот и здравия врачевство, нищих ради верных же людей Твоих, нами к Тебе вопиющих, и милость от Твоея благости просящих: молитвами Пречистыя нашея Богородицы и Приснодевы Марии: силою Честнаго и Животворящего Креста: предстательством небесных сил безплотных: честнаго, славнаго пророка, Предтечи и Крестителя Иоанна: святых славных и всехвальных Апостол: святых безмездных врачев Космы и Дамиана, Кира и Иоанна, Пантелеимона и всех святых Твоих. Ты бо еси источник живота и жизни Податель, и человеки и скоты спасаяй, и Тебе славу возсылаем, Отцу, и Сыну, и Святому Духу, ныне и присно, и во веки веков.

Клир: Аминь.

Посем абие чтет псалом 13

Рече безумен в сердце своем: несть Бог. Растлеша и омерзишася в начинаниих: несть творяй благостыню. Господь с Небесе приниче на сыны человеческия, видети, аще есть разумеваяй или взыскаяй Бога. Вси уклонишася, вкупе неключими быша: несть творяй благостыню, несть до единаго. Ни ли уразумеют вси делающии беззаконие, снедающии люди моя в снедь хлеба; Господа не призваша. Тамо убояшася страха, идеже не бе страх, яко Господь в роде праведных. Совет нищаго посрамисте: Господь же упование его есть. Кто даст от Сиона спасение Израилево; Внегда возвратит Господь пленение людей Своих, возрадуется Иаков и возвеселится Израиль.

Таже взем благословенный фимиам, влагает его на огнь, сущий в чистом сосуде, и полагает его между скоты от ветра, еже всем скотом обоняти воню его, и чтет псалом 76:

Боже, ущедри ны и благослови ны, просвети лице Твое на ны и помилуй ны: Познати на земли путь Твой, во всех языцех спасение Твое. Да исповедятся Тебе людие, Боже, да исповедятся Тебе людие вси. Да возвеселятся и да возрадуются языцы: яко судиши людем правотою и языки на земли наставиши. Да исповедятся Тебе людие, Боже, да исповедятся Тебе людие вси. Земля даде плод свой: благослови ны, Боже, Боже наш. Благослови ны, Боже: и да убоятся Его вси концы земли.

Посем взем священник священную воду, кропит ею вся скоты, глаголя:

Да угаснет и прогонима будет всякая болезнь и недуг, и все лукавое бесовское действо от скотов сих, окроплением священныя сея воды, во имя Отца, и Сына, и Святаго Духа. Аминь.

И кропит все место, идеже скоты обитают, и сено еже ядят, поя Богородичен:

Призри на моления Твоих раб, Всенепорочная, утоляющи лютая на ны востания, всякия скорби нас изменяющи: Тя бо едину твердое и известное утверждение имамы, и Твое предстательство стяжахом, да не постыдимся, Владычице, Тя призывающии. Потщися на умоление, Тебе верно вопиющих: радуйся, Владычице, всех помоще, радосте и покрове, и спасение дущ наших.

Владычице, приими молитвы рабов Твоих, и избави нас от всякия нужды и печали.

И обычный дневный отпуст.

Подобает ведати, яко на всяк день сицевым скотом недужным, в воде егда напляют я, от воды священныя влияти потреба, и сено кропити, и соль благословенную подати.

 

Чин бываемый, аще случится чесом скверному яковулюбо впасти в кладязь водный

Подобает первее вычерпати из кладязя кадей 40, и излияти вонь. Таже возжег священник всещи, и взем кадильницу, кадит окрест кладязя. Таже влагает воду святых Богоявлений крестовидно, трижды. И тамо став к востоку молится, глаголя:

Господи Боже сил, иже вся добра зело сотворивый, очищаяй именем Твоим всякую скверну и нечистоту, и претворивый освящаяй вся, Сам и ныне, Владыко, прииди в настоящий час образом Креста Твоего, и очисти кладязь сей от обретшияся ему нечистоты, и от впадшаго вонь сквернаго или гада, снизходя несовершенней мысли нашей и немощи помышлений, и да не осудиши нас, добрых зело не вмещающия: но очисти нас от всякия скверны плоти и духа, и освяти воду сию Духом Твоим Святым.

Яко Ты еси освящение наше, и Тебе славу возсылаем, Отцу, и Сыну, и Святому Духу, ныне и присно, и во веки веков. Аминь.

Господу помолимся. Господи, помилуй.

Боже великий и дивный, неисповедимою Твоею благостию и богатым промыслом строяй человеческий живот, и мирская нам даровавый благая Твоя: иже горькую воду при Моисеи людем в сладость претворивый, и вредныя воды при Елиссеи солию исцеливый: иже апостолу Твоему Петру видением законоположивый ничтоже мнети скверно или нечисто: Сам, Владыко Человеколюбче, очисти воду сию знаменованием образа Креста Твоего, от всякия скверны, и очисти ю Духом Твоим Святым, во еже быти ей чистей причащающимся из нея.

Яко Ты еси Бог наш, благословляяй и освящаяй всяческая, и Тебе славу возсылаем, Отцу, и Сыну, и Святому Духу, ныне и присно, и во веки веков. Аминь.

И отпуст.

Молитва над пшеницею оскверншеюся, или мукою, или видом некиим

Господу помолимся. Господи, помилуй.

Господи Боже наш, иже в смотрении Твоем, еже по плоти, повелевый не входящим сквернити человека, но вся чиста быти чистым: иже сосудом избранным Павлом Твоим апостолом научивый нас веровати, вся Тобою созданна добра быти, божественным словом, и еже к Тебе молитвою освящаемая: Сам и ныне, Владыко, состраждаяй немощем нашим, благослови пшеницу сию Твоею благодатию и человеколюбием, благословением, и окроплением воды сея, о имени Твоем освященныя, и всякую скверну, или сумнение от впадшаго в ню нечистаго кознию диаволею, отжени от мысли рабов Твоих, и даждь им надеждею иже в Тя, и уверением Твоих щедрот, сея причаститися причастия, и во благодарение Святаго Твоего имене неосужденным сохранитися.

Яко Ты еси благословляяй и освящаяй всяческая, и Тебе славу возсылаем, со Безначальным Твоим Отцем, и Пресвятым, и Благим, и Животворящим Твоим Духом, ныне и присно, и во веки веков. Аминь.

Чин бываемый, аще случится чесому скверному или нечистому ново впасти в сосуд вина, или елеа, или меда, или иного чесого

Подобает впадшее нечистое абие взяти, и изврещи вон, и во ин сосуд вложити вино, или елей: истощенный же сосуд мыти отвнуть и отвне. Священнику же вземшу кадильницу, по еже кадити измовенный сосуд отвнутрь, и вложити вонь воду святых Богоявлений, творящу крестообразно, трижды: таже вложити вонь вино или елей, и покадив молится сице.

Господу помолимся. Господи, помилуй.

Святый Господи Боже наш, иже Твоим благоутробным пришествием всякую нечистоту вражию упразднивый, повелевый не входящим сквернити человека, но вся чиста быти чистым: иже сосудом изранным Твоим апостолом научивый нас, всем созданным Тобою добрым быти веровати, и ничтоже отметно мнети, божественным словом и молитвою к Тебе освящаемое: Сам благослови вино сие (или: елей, или: ино что аще будет, зде именуй) Твоею благодатию и лиянием святыя воды, всякую скверну, или сумнение от впадшаго вонь гада кознию лукаваго, отжени от мысли рабов Твоих, во еже быти всем употребляющим е в веселие, даяй всем, из него причащающимся, во освящение и чистой совести приступати к Пречистым Твоим Тайнам.

Яко Ты еси благословляяй и освящаяй всяческая, и Тебе славу возсылаем, со Безначальным Твоим Отцем, и Пресвятым, и Благим, и Животворящим Твоим Духом, ныне и присно, и во веки веков. Аминь.

Молитва над сосудом оскверншимся

Подобавет измыти, и влагаемей святей воде крестовидно, глаголати и молитву сию

Господу помолимся. Господи, помилуй.

Господи Боже наш, Едине Святе, очисти сосуд сей освятительным Твоим наитием, и очисти и, еже быти в службу рабов Твоих нескверну: и даждь нам всегда во святыни молитися во святых Твоих церквах, яко да Тобою всегда храними, славу и поклонение Тебе возсылаем, Отцу, и Сыну, и Святому Духу, ныне и присно, и во веки веков. Аминь.

Последование молебнаго пения, певаемого во время бездождия

Священник обычно начинает:

Благословен Бог наш, всегда, ныне и присно, и во веки веков.

Чтец: Аминь. Слава Тебе, Боже наш, слава Тебе.

Царю небесный, Утешителю, Душе истины, иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.

Святый Боже, Святый Крепкий, Святый Безсмертный, помилуй нас. Трижды.

Слава, и ныне:

Пресвятая Троице, помилуй нас: Господи очисти грехи наша; Владыко, прости беззакония наша; Святый, посети и исцели немощи наша, имене Твоего ради.

Господи, помилуй. Трижды

Слава, и ныне:

Отче наш, иже еси на небесех, да святится Имя Твое, да приидет Царствие Твое: да будет воля Твоя, яко на небеси, и на земли. Хлеб наш насущный даждь нам днесь, и остави нам долги наша, якоже и мы оставляем должником нашим: и не введи нас во искушение, но избави нас от лукаваго.

Священник возглас: Яко Твое есть царство, и сила, и слава, Отца, и Сына, и Святаго Духа, ныне и присно, и во веки веков.

Чтец: Аминь.

Господи, помилуй, 12 (раз).

Слава, и ныне:

Приидите, поклонимся Цареви нашему Богу.

Приидите, поклонимся и припадем Христу, Цареви нашему Богу.

Приидите, поклонимся и припадем самому Христу, Цареви и Богу нашему.

И псалом 64

Тебе подобает песнь, Боже, в Сионе, и Тебе воздастся молитва во Иерусалиме. Услыши молитву мою: к Тебе всяка плоть приидет. Словеса беззаконник премогоша нас: и нечестия наша ты очистиши. Блажен, Егоже избрал еси и приял, вселится во дворех Твоих. Исполнимся во благих дому Твоего: свят храм Твой, Дивен в правде. Услыши ны, Боже Спасителю наш, упование всех концей земли и сущих в море далече. Уготовляяй горя крепостию Своею, препоясан силою. Смущаяй глубину морскую, шуму волн Его кто постоит; смятутся языцы. И убоятся живущии в концах от знамений Твоих: исходы утра и вечера украсиши. Посетил еси землю и упоил еси ю, умножил еси обогатити ю: река Божия наполнися вод: уготовал еси пищу им, яко тако (есть) уготование. Бразды ея упой, умножи жита ея: в каплях ея возвеселится возсияющи. Благословиши венец лета благости Твоея, и поля Твоя исполнятся тука. Разботеют красная пустыни, и радостию холми препояшутся. Одеяшася овни овчии, и удолия умножит пшеницу: воззовут, ибо воспоют.

Слава, и ныне:

Аллилуия, аллилуия, аллилуия, слава Тебе, Боже. Трижды

Диакон же абие глаголет ектению великую:

Миром Господу помолимся.

Лик: Господи, помилуй.

О свышнем мире и спасении душ наших, Господу помолимся.

Лик: Господи, помилуй.

О мире всего мира, благостоянии святых Божиих церквей и соединении всех, Господу помолимся.

Лик: Господи, помилуй.

О святем храме сем и с верою, благоговением и страхом Божиим входящих вонь, Господу помолимся.

Лик: Господи, помилуй.

О Великом Господине и отце нашем Святейшем Патриархе Кирилле, и о господине нашем высокопреосвященнейшем митрополите (или архиепископе, или преосвященнейшем епископе (имярек), честнем пресвитерстве, во Христе диаконстве, о всем причте и людех, Господу помолимся.

Лик: Господи, помилуй.

О Богохранимей стране нашей, властех и воинстве ея, Господу помолимся.

Лик: Господи, помилуй.

О граде сем (или: о веси сей, или: о святей обители сей), всяком граде, стране и верою живущих в них, Господу помолимся.

Лик: Господи, помилуй.

О благорастворении воздухов, о изобилии плодов земных и временех мирных, Господу помолимся.

Лик: Господи, помилуй.

О плавающих, путешествующих, недугующих, страждущих, плененных и о спасении их, Господу помолимся.

Лик: Господи, помилуй.

Таже прилагается сия:

О еже не помянути беззаконий и неправд людей Своих, и обратити от нас весь гнев Свой, праведно движимый на ны, и не уморити нас гладом и жаждею, Господу помолимся.

Лик: Господи, помилуй.

О еже благорастворенныя воздухи, и дожди благовременныя к плодоношению милостивно послати земли и людем Своим, Господу помолимся.

Лик: Господи, помилуй.

О еже во гневе Своем не погубити людей Своих и скоты, но повелети облаком свыше дождити, и к плодоношению оросити землю, Господу помолимся.

Лик: Господи, помилуй.

О еже повелети земли прозябати плоды на веселие, и пищу людей Своих, и злак в службу человеком, траву же скотом, Господу помолимся.

Лик: Господи, помилуй.

О еже милостивно призрети на вопль, плач, стенания, и умиленныя молитвы старых и юных, младенцев же и всех людей Своих, и не погубити нас гладом грех ради наших, но пощадити от смерти души наша и препитати нас в гладе, Господу помолимся.

Лик: Господи, помилуй.

О еже благоприятным быти мольбам нашим, и якоже Илию иногда послушати нас дождем и благорастворенными воздухи, и помиловати нас, Господу помолимся.

Лик: Господи, помилуй.

О еже милостивно услышати глас молитвы нашея, и избавити нас от глада, губительства, труса, потопа, огня, града, меча, нашествия иноплеменник, междоусобныя брани и всякия смертоносныя язвы, Господу помолимся.

Лик: Господи, помилуй.

О избавитися нам от всякия скорби, гнева и нужды, Господу помолимся.

Лик: Господи, помилуй.

Заступи, спаси, помилуй и сохрани нас, Боже, Твоею благодатию.

Лик: Господи, помилуй.

Пресвятую, Пречистую, Преблагословенную, Славную Владычицу нашу Богородицу и Приснодеву Марию со всеми святыми помянувше, сами себе и друг друга, и весь живот наш Христу Богу предадим.

Лик: Тебе, Господи.

Священник возглас:

Яко подобает Тебе всякая слава, честь и поклонение, Отцу, и Сыну, и Святому Духу, ныне и присно, и во веки веков.

Лик: Аминь.

И абие диакон глаголет во глас 2:

Бог Господь, и явися нам, благословен Грядый во имя Господне.

Стих 1: Исповедайтеся Господеви, яко Благ, яко во веки милость Его.

Стих 2: Обышедше обыдоша мя, и именем Господним противляхся им.

Стих 3: Не умру, но жив буду, и повем дела Господня.

Стих 4: Камень, егоже небрегоша зиждущии, сей бысть во главу угла: от Господа бысть сей, и есть дивен во очесех наших.

Лик же поет: Бог Господь: к коемуждо стиху, во глас 2.

Таже тропарь, глас 2:

Воздуха растворение повелением Твоим пралагаяй, Господи, вольный дождь с благорастворенными воздухи даруй земли, еже приносити людем Твоим плоды изобильныя, и насыщати всякое животно Твоим благоволением, молитвами Богородицы и всех святых Твоих.

Слава, глас 6:

Всех Творца и Зиждителя, и благих Дателя Тя сведуще, Господи, к Тебе припадаем и прилежно молим: пощади, Милосерде, и прости яко благ беззакония наша, и настоящаго праведнаго гнева избави рабы Своя, подая яко Благ жаждущей земли благоплодныя дожди, яко Един многомилостив.

И ныне, Богородичен, глас тойже:

Предстательство христиан непостыдное, ходатайство ко Творцу непреложное, не приезри грешных молений гласы, но предвари яко Благая на помощь нас, верно зовущих Ти: ускори на молитву, и потщися на умоление, предстательствующи присно, Богородице, чтущих Тя.

Таже п салом 50

Помилуй мя, Боже, по велицей милости Твоей, и по множеству щедрот Твоих очисти беззаконие мое. Наипаче омый мя от беззакония моего, и от греха моего очисти мя. Яко беззаконие мое аз знаю, и грех мой предо мною есть выну. Тебе Единому согреших, и лукавое пред Тобою сотворих: яко да оправдишися во словесех Твоих, и победиши, внегда судити Ти. Се бо в беззакониих зачат есмь, и во гресех роди мя мати моя. Се бо истину возлюбил еси, безвестная и тайная премудрости Твоея явил ми еси. Окропиши мя иссопом, и очищуся: омыеши мя, и паче снега убелюся. Слуху моему даси радость и веселие: возрадуются кости смиренныя. Отврати лице Твое от грех моих, и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи мене от лица Твоего, и Духа Твоего Святаго не отыми от мене. Воздаждь ми радость спасения Твоего, и Духом Владычним утверди мя. Научу беззаконные путем твоим, и нечестивые к Тебе обратятся. Избави мя от кровей, Боже, Боже спасения моего: возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо: всесожжения не благоволиши. Жертва Богу дух сокрушен: сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимские. Тогда благоволиши жертвы правды, возношение и всесожегаемая: тогда возложат на олтарь Твой тельцы.

И поем канон молебен, без ирмосов, к Человеколюбцу Госопду в бездождие, егоже краестрочие:

Даждь дождь земли жаждущей, Спасе.

 

Песнь 1

Ирмос: Грядите людие:

Приими, Спасе моление от недостойных наших уст, и низпосли с небесе земли дожди плодоносны, Человеколюбец сый и многомилостив.

Очисти ныне, Господи, грехи наша, и гнев отврати, иже на ны, Спасе, наведен по правде, и подаждь с небесе дожди водныя земли.

Слава: Приидите, человецы, восплачем к Богу всех, во умилении зовуще: прости, Человеколюбче, наша прегрешения, и посли с небесе дожди жаждущей земли.

И ныне, Богородичен: Свет Тобою познахом Богородительнице: темже Тя молим и мили ся деем, молящи не престай Творца и Сына Твовего, послати земли дождь.

Катавасия по всякой песни:

Избави от бед рабы Твоя, Милостиве, яко мы усердно к Тебе прибегаем, к милостивому Избавителю, всех Владыце Господу Иисусу.

Спаси от бед рабы Твоя, Пресвятая Богородице Дево, яко мы вси по Бозе к Тебе прибегаем, яко к нерушимей стене и предстательнице.

 

Песнь 3

Ирмос: Утверди нас в Тебе, Господи:

Всю тварь дланию содержай Господи, услыши яко Щедр моления рабов Твоих, и низпосли воду на всю землю.

Сый Благ и Благопременитель, яко имый бездну благоутробия, не презри моления наша, но посли нам мирный дождь.

Слава: Богатство, еже нам дал еси, иждихом блудно, но яко имеяй, Господи, бездну благоутробия, и Отец Благ сый умилися, и дожди летныя подаждь земли.

И ныне, Богородичен: Яко имущая, Чистая, к Человеколюбцу Сыну Твоему благоприятное дерзновение, умоли датися земли дождем плодоносным, ходатайствы Твоими.

Катавасия:

Избави от бед рабы Твоя, Милостиве, яко мы усердно к Тебе прибегаем, к милостивому Избавителю, всех Владыце Господу Иисусу.

Спаси от бед рабы Твоя, Пресвятая Богородице Дево, яко мы вси по Бозе к Тебе прибегаем, яко к нерушимей стене и предстательнице.

 

Песнь 4

Ирмос: Пою Тя, слухом бо, Господи:

Свыше на ны призри, Блаже, согрешия, и даруй, Господи, милость Твою по всей земли, и низпосли, молимся, богатно милости Твоя, Человеколюбче.

Найде на ны, Человеколюбче, согрешившия гнев Твой, небеса заключи не дати дождев земли Твоей: темже молим Тя раби Твои, да не яростию Твоею, Слове, накажеши нас.

Слава: Растворение прелагаяй, Господи, воздуха, повелением Твоим, вольный даруй дождь нам, приносити плоды изобильныя посылаяй, Всякое животно насыщати благоволением Твоим.

И ныне, Богородичен: Ты Мати, Богородице, была еси Бога нашего, темже верою вси молим Тя, Владычице, яко имущую дерзновение: Того моли о всех нас, еже низпослати воду по всей земли.

Катавасия:

Избави от бед рабы Твоя, Милостиве, яко мы усердно к Тебе прибегаем, к милостивому Избавителю, всех Владыце Господу Иисусу.

Спаси от бед рабы Твоя, Пресвятая Богородице Дево, яко мы вси по Бозе к Тебе прибегаем, яко к нерушимей стене и предстательнице.

Песнь 5

Ирмос: Света подателю:

Молитвами, Спасе, безплотных, благосердно услыши всех нас, присно молящихся, и даждь дождь земли Твоей жаждущей, яко един Человеколюбец.

Двоенадесятице учеников, со страдальца к Богу молитву от нас творите, яко да избавит нас от всякия нужды, гнева же и скорби.

Слава: Буди нам благосердый во время искушений, Господи, и прещения належащаго спаси нас, и посли земли Твоей дождь волен.

И ныне, Богородичен: Вси ходатаицу Тя ныне к Богу земнороднии имамы, яко воистинну темже молимся: кровом Твоим, Чистая, град Твой спасай от всякаго пленения.

Катавасия:

Избави от бед рабы Твоя, Милостиве, яко мы усердно к Тебе прибегаем, к милостивому Избавителю, всех Владыце Господу Иисусу.

Спаси от бед рабы Твоя, Пресвятая Богородице Дево, яко мы вси по Бозе к Тебе прибегаем, яко к нерушимей стене и предстательнице.

Песнь 6

Ирмос: В бездне греховней:

Множество мучеников, молите, яко имущи ко Господу дерзновение многое, ныне дождь даровати, и плод изобилия по всей земли.

Молимся, молитвами Твоих ученик ослаби, остави, гОсподи, грехи наша, и гнев отврати от нас, и подаждь земли дождь.

Слава: Молим, Владыко Господи, Тебе, яко Благаго и Человеколюбца, любовию душевною: пощади нас, и даруй дожди плодоносны жаждущей земли.

И ныне, Богородичен: Молити не престай, молимся, Сына Твоего, Пречистая Богородительнице, о нас рабех Твоих, умирити и спасти от всякаго гнева.

Катавасия:

Избави от бед рабы Твоя, Милостиве, яко мы усердно к Тебе прибегаем, к милостивому Избавителю, всех Владыце Господу Иисусу.

Спаси от бед рабы Твоя, Пресвятая Богородице Дево, яко мы вси по Бозе к Тебе прибегаем, яко к нерушимей стене и предстательнице.

Песнь 7:

Ирмос: Телу златому премудрыя дети:

Душами, Блаже, Господьствующа всеми Тебе ведуще, молим: пощади, прости яко Благ и Человеколюбец, и настоящаго праведнаго прещения нас избави, и даруй яко Благ дожди жаждущей земли.

Якоже иногда Манассию, от животна меднаго, покаявшагося, Спасе, избавил еси, и спасл еси от смертоноснаго случая, Благоутробне, Щедре, подаждь и нам милости Твоя, и сохрани нас от губительства и труса.

Слава: Умилосердися ныне на ны, яко Благ и Милостив, ибо согрешихом, беззаконновахом и неправдовахом все. Темже молим Тя со страхом: не гневом Твоим, Человеколюбче, накажи причет и люди, но воду посли земли.

И ныне, Богородичен: Тебе вси человецы прибежище твердое и оружие необоримое, Богородительнице, вемы, и молим раби Твои: избави прещения варварскаго люди и град Твой, от глада же и губительства, труса и всякия тли.

Катавасия:

Избави от бед рабы Твоя, Милостиве, яко мы усердно к Тебе прибегаем, к милостивому Избавителю, всех Владыце Господу Иисусу.

Спаси от бед рабы Твоя, Пресвятая Богородице Дево, яко мы вси по Бозе к Тебе прибегаем, яко к нерушимей стене и предстательнице.

Песнь 8

Ирмос: В пещь огненную ко отроком:

Илия словом дождь держит на земли, и паки словом с небесе низводит. Темже молим Тя: Того молитвами, Щедре, посли дожди водныя земли с небесе.

С безплотных лики, Апостолов, пророков же и мученников, священников собор и преподобных множество, яко Создателя всех и Господа, Тебе молим спасти поющия Тя.

Слава: Якоже Иону от зверя и моря яко Бог избавил еси, Даниила от рова и зверей, Блаже: тако и ныне услыши рабы Твоя, и избави от всякия нужды люди Твоя.

И ныне, Богородичен: Тебе Рождщую, Иисусе, Богородицу на молитву ныне подвизаем, ущедрити и спасти согрешившия люди, и паки любовию к Тебе прибегающия и превозносящая во вся веки.

Катавасия:

Избави от бед рабы Твоя, Милостиве, яко мы усердно к Тебе прибегаем, к милостивому Избавителю, всех Владыце Господу Иисусу.

Спаси от бед рабы Твоя, Пресвятая Богородице Дево, яко мы вси по Бозе к Тебе прибегаем, яко к нерушимей стене и предстательнице.

Песнь 9

Ирмос: От Бога, Бога Слова:

Земли жаждущей, Щедре, и нам просящим Твоего человеколюбия, Блаже, милостив, Владыко, явися, яко Бог Вседержитель, и даруй нам яко Благ дожди плодоносны, и спаси души наша.

Помилуй, Милостиве, руку Твоею дело, прости нас яко Благ: не яростию Твоею обличи люди, но приклони ухо Твое, и вонми молитве нашей, и подаждь земли Твоей дожди водныя, Господи.

Слава: Избави от язык и варваров, и всякаго супостата град Твой и вся люди, и дожди нам даруй плодоносны, Щедре, во изобилие всех плодов, и спасение низпосли, Человеколюбче.

И ныне, Богородичен: Тебе прообразующе халдейская пещь, Богородице, отроки росою прохлаждаше, посреде пламене ликовствующия: ныне же и нас яко в пещи огненней горящих сушею, дождем прохлади, Владычице, и спаси рабы Твоя Твоими молитвами, Мати Бога Человеколюбца.

Катавасия:

Избави от бед рабы Твоя, Милостиве, яко мы усердно к Тебе прибегаем, к милостивому Избавителю, всех Владыце Господу Иисусу.

Спаси от бед рабы Твоя, Пресвятая Богородице Дево, яко мы вси по Бозе к Тебе прибегаем, яко к нерушимей стене и предстательнице.

Посем абие оба лика сошедшеся поют:

Достойно есть яко воистинну блажити Тя Богородицу, присноблаженную и пренепорочную, и Матерь Бога нашего. Честнейшую Херувим, и славнейшую без сравнения Серафим, без истления Бога Слова рождшую, сущую Богородицу Тя величаем.

Чтец: Трисвятое. Пресвятая Троице: Отче наш:

Священник: Яко Твое есть Царство, и сила, и слава, Отца, и Сына, и Святаго Духа, ныне и присно, и во веки веков.

Лик: Аминь.

Тропари, глас 6

Помилуй нас, Господи, помилуй нас: всякаго бо ответа недоумеюще, сию Ти молитву яко Владыце грешнии приносим: помилуй нас.

Слава: Господи, помилуй нас, на Тя бо уповахом: не прогневайся на ны зело, ниже помяни беззаконий наших, но призри и ныне яко благоутробен, и избави ны от враг наших: Ты бо еси Бог наш, и мы людие Твои, вси дела руку Твоею, и имся Твое призываем.

И ныне: Милосердия двери отверзи нам, благословенная Богородице, надеющиеся на Тя да не погибнем, но да избавимся Тобою от бед: Ты бо еси спасение рода христианскаго.

Посем абие священник возглашает:

Яко Свят еси Боже наш, и во святых почиваеши, и Тебе славу возсылаем, Отцу, и Сыну, и Святому Духу, ныне и присно, и во веки веков.

Лик: Аминь.

А абие поет: Святый Боже, Святый Крепкий, Святый Безсмертный, помилуй нас. Трижды.

Слава, и ныне: Святый безсмертный, помилуй нас.

Святый Боже, Святый Крепкий, Святый Безсмертный, помилуй нас.

По окончании же трисвятаго пения, диакон глаголет: Вонмем.

Священник: Мир всем.

Чтец: И духови твоему.

Диакон: Премудрость, вонмем.

Чтец: Прокимен, глас 4: Бразды земныя упой, и умножи жита ея.

Стих: В каплях ея возвеселится возсияющи.

Диакон: Премудрость.

Чтец: Соборнаго послания Иаковля чтение.

Диакон: Вонмем.

Соборное послание Иаковле (зачала 56 и 57)

Братие, долготерпите до пришествия Господня: се земледелец ждет честнаго плода от земли, долготерпя о нем, дондеже приимет дождь ран и позден. Долготерпите убо и вы, утвердите сердца ваша, яко пришествие Господне приближися. Не воздыхайте друг на друга, братие, да не осуждени будете: се судия пред дверьми стоит. Илия человек бо подобострастен нем, и молитвою помолися, да не будет дождь: и не одожди по земли лета три и месяц шесть. И паки помолися, и небо дождь даде, и земля прозябе плод свой.

Священник: Мир ти.

Чтец: И духови твоему.

Диакон: Премудрость, вонмем.

Чтец: Аллилуия, глас 8.

Певцы же поют: Аллилуия.

Чтец же глаголет стихи:

Стих 1: Благословиши венец лета благости Твоея, Господи, и поля Твоя насытятся тука.

Стих 2: Разбогеют красная пустыни, и радостию холми препояшутся.

Диакон: Премудрость, прости, услышим Святаго Евангелия.

Священник: Мир всем.

Лик: И духови твоему.

Священник: От Матфея Святаго Евангелия чтение.

Лик: Слава Тебе, Господи, слава Тебе.

Диакон: Вонмем.

Священник же чтет Евангелие от Матфея

(зачало 65)

Во время оно, приступиша ко Иисусу фарисее и саддукее, искушающе вопросиша Его, знамение с небесе показати им. Он же отвещав рече им: вечеру бывшу, глаголете, ведро: чермнует бо ся небо. И утру, днесь зима: чермнует бо ся дряселуя небо. Лицемери, лице убо небесе умеете разсуждати, знамений же временом не можете искусити. Аминь глаголю вам, яко ни который пророк приятен есть по отечествии своем. Поистинне же глаголю вам: многи вдовицы беша во дни Илиины во Израили, егда заключися небо три лета и месяц шесть, яко бысть глад велик по всей земли. И ни ко единой их послан бысть Илиа, токмо в Сарепту Сидонскую, к жене вдовице. Реша же Ему: кое убо Ты твориши знамение, да видим и веру имем Тебе; что делаеши; Отцы наши ядоша манну в пустыни, якоже есть писано: хлеб с небесе даст им ясти. Рече убо им Иисус: аминь аминь глаголю вам, не Моисей даде вам хлеб с небесе: но Отец Мой даст вам хлеба истиннаго с небесе. Хлеб бо Божий есть сходяй с небесе и даяй живот миру.

Лик: Слава Тебе, Господи, слава Тебе.

Диакон же абие со всяким умилением, ничтоже борзяся, во услышание всем глаголет ектении сия:

Помилуй нас, Боже по велицей милости Твоей, молим Ти ся, услыши и помилуй.

Лик: Господи, помилуй. Трижды.

Не хотяй смерти грешнаго, но ожидаяй обращения и покаяния его, услыши нас, Тебе молящихся.

Лик: Господи, помилуй. Трижды.

Возводяй облаки от последних земли, повели тем подати дождь мирен на ню, молим Ти ся.

Лик: Господи, помилуй. Трижды.

Призываяй воду морскую и изливаяй ю на лице всея земли, низпосли благословение Твое на ны, молящияся Тебе.

Лик: Господи, помилуй. Трижды.

Одеваяй небо облаки, и уготовляяй земли дождь, низпосли нам милости Твоя, молящимся Тебе.

Лик: Господи, помилуй. Трижды.

Прозябаяй траву скотом и злак на службу человеком, спаси человеки со скоты, Тебе молящияся.

Лик: Господи, помилуй. Трижды.

Дождь волен и тучу мирную подаждь земли, и спаси всяческая, Человеколюбче, и нам, молящимся Тебе.

Лик: Господи, помилуй. Трижды.

Нижпосли дожди Твоя на требующая и просящая места, Человеколюбче, нам, молящимся Тебе.

Лик: Господи, помилуй. Трижды.

Щедре и милостиве, ущедри и возвесели нас, Человеколюбче, молящихся Тебе.

Лик: Господи, помилуй. Трижды.

Услыши ны, Боже, яко блага милость Твоя, и помилуй ны, Твоим благоутробием, молящихся Тебе.

Лик: Господи, помилуй. Трижды.

Священник возглас: Яко милостив и человеколюбец Бог еси, и Тебе славу возсылаем, Отцу, и Сыну, и Святому Духу, ныне и присно, и во веки веков.

Лик: Аминь.

Диакон: Еще молимся о еже сохранитися граду сему, и всякому граду и стране, от глада, губителства, труса, потопа, огня, меча, пруга, града, нашествия иноплеменников, и междоусобныя брани, и внезапныя смерти: и о еже милостиву, благоуветливу и благопременительну быти Благому и Человеколюбцу Богу о гресех наших, еже отвратити и расточити всякий гнев на ны движимый, и избавити нас от належащаго и праведнаго Своего прещения: и о еже низпослати нам дождь мирный, и одождити земли дождь благости, и помиловати нас, молящихся Ему.

Лик: Господи, помилуй. 40 (раз)

Священник возглас: Услыши ны, Боже Спасителю наш, упование всех концев земли и сущих в мори далече: и милостив, милостив буди, Владыко, о гресех наших, и помилуй ны. Милостив бо и Человеколюбец Бог еси, и Тебе славу возсылаем, Отцу, и Сыну, и Святому Духу, ныне и присно, и во веки веков.

Лик: Аминь.

Молитвы в бездождие

(творение Каллиста, патриарха Константинопольскаго)

Диакон: Господу помолимся.

Лик: Господи, помилуй.

Молитва первая

Владыко Господи Боже наш, послушавый Илию Фесвитянина ревности ради к Тебе, и во время посылаемому земли дождю удержатися повелевый, таже паки молитвою его дождь плодоносный ей даровавый: Сам, Владыко всех, от самаго Твоего благоутробия умоляем, дождь волен даждь наследию Твоему, и согрешенная нами презрев, дождьи Твоя низпосли на требующая и просящая места: возвесели лице земли, нищих ради людей Твоих, и младенцев, и скотов, и иных всех, зане к Тебе чают, еже дати пищу им во благо время. Ты бо еси Бог наш, Бог еже миловати и спасати, и Тебе славу возсылаем, Отцу, и Сыну, и Святому Духу, ныне и присно, и во веки веков.

Лик: Аминь.

Диакон: Господу помолимся.

Лик: Господи, помилуй.

Молитва вторая

Господи Боже Вседержителю, возводяй облаки от последних земли, молнии и дождь сотворивый, изводяй ветры от сокровищ Своих, призываяй воду морскую и проливаяй ю на лице всея земли, Тебе молимся, и Тебе мили ся деем, исповедающе грехи наша, и от Тебе богатыя милости просяще: заповеждь облаком еже одождити дождь, ущедри вся земная Твоя: умилосердися на старцы, и юноты, и младенцы ссущия сосцы, на рабы Твоя и на рабыни, сыны и дщери, и на вся скоты земли, да изведет нам хлеб в снедь, и злаки скотом. Приими моления всех людей Твоих , и не отрини воздыхания убогих, ниже яростию Твоею обличиши нас, ниже гневом Твоим накажеши нас, ниже да растлиши гладом и жаждею люди Твоя: всех бо очи на Тя уповают, прияти от Тебе пищу во благо вемя. На Тя надеемся, и разве Тебе иного не вемя, от Тебе богатыя милости ожидаем: яко Благ и Человеколюбец Бог еси и Тебе славу возсылаем, Отцу, и Сыну, и Святому Духу, ныне и присно, и во веки веков.

Лик: Аминь.

Диакон: Господу помолимся.

Лик: Господи, помилуй.

Молитва третья

Господи Боже наш, вемы, яко недостойни есмы Твоих щедрот, и несмы достойни возвести очи наши, и зрети на небо, и стати пред Тобою, и прошения наша глаголати к Тебе: кое бо добро сотворихом, да и прошения получим; ибо Твоея ради безмерныя благости, от небытия нас во еже быти привед, образом Твоим почел еси, и тварь всю нам покорил еси, но мы толико облагодетельствовани бывше, якоже врази представихомся, и Тебе Благодетеля заповеди презрехом, и житие порочно и мысль скверну и нечисту стяжахом: и не точию Твою любовь отвергохом, но и якоже зверие друг на друга носимся, и плоти друг друга снедаем лихоимстввеными образы, и неправедным произволением нашим: како убо достойни есмы Твоих благодетельств восприяти; Ты бо праведен, мы неправедни: Ты любиши, мы враждуем: Ты благоутробен, мы неблагоутробни: Ты Благодетель, мы хищницы. Кое общение к Тебе имамы, да и Твоих благих приобщимся; Исповедуем правду Твою, познаваем осуждение наше, проповедуем благодеяния Твоя, тьмами смертей повинни есмы. Се под Твоею действительною и вся содержащею рукою пребываем: удобно есть Твоей всесильной руце, яко по мгновении ока погубити нас: и елико от нашего намерения и жития, праведно есть нам пагубе предатися, праведнейший Судие, но Твоей непобедимей благости и неизреченней благостыни несть всяко достойно, человеколюбнейший Владыко. Сего ради на неизследимое Твое милосердие и непамятозлобную Твою утробу дерзающе, приступаем к Тебе Благодетелю, неразумнии и неблагодарнии: не предаждь нас грех ради наших в руце сухости, ниже беззаконий ради наших сокрушиши нас узами глада, но благости ради Твоея подаждь земли, юже определил еси, и наследию Твоему дождь волен, и исполни недра земная живородными Твоими водами: се бо предлежит сия, якоже мати, изсушены имущая сосцы: якоже бо оныя сосцы млека лишающеся, смерть приносят младенцу, сице и земля, бразды своя непричастны влажности имущи, увядение творит злаку, и растление рождением своим приносит, и губительство нам претительное и смерть, ибо от сухости зной, аки некая разжигающая огневица, прозябения увядивый, погибель провозвещает рождением ея: но милостию Твоею посети ю, и водными облаки воздух благораствори, и богатым Твоим дождем землю ороси, и прозябения ея оживи, и возвеянием добрейших ветров, плоды целы и полны сотвори, и умножи я благоутробием Твоим: теми бо определил еси телесный живот содержати. Аще бо не Ты вольными Твоими дожди даси благость, земля наша не даст плода своего, но множества ради щедрот Твоих услыши моление нас недостойных рабов Твоих. Ты бо еси источник милости и благих подателю, и Тебе славу возсылаем, Отцу, и Сыну, и Святому Духу, ныне и присно, и во веки веков.

Лик: Аминь.

Диакон: Господу помолимся.

Лик: Господи, помилуй.

Молитва четвертая

Господи, Господи, пророком Твоим Илиею разрешивый сухость, и течением дождев лице земли одождивый, и обилием плодов напитавый люди Твоя богатно: Сам и ныне естественною Твоею благостынею умоляем, даруй земли дожди мирны, во плодоносие летных плодов. Ты бо еси воды в места их устроивый, и землю, ими покрываемую, видиму сотворивый, Ты еси повелевый ей различыя изращати плоды в наслаждение наше. Ты еси греха ради иже при Нои человеков, источники бездн разверзый, и хляби отверзый небесныя, и лице земли наводнивый во истребление всякия плоти. Ты еси водами покрываяй превыспренняя Твоя: Ты еси облаки возвышаяй, и сим повелеваяй дождевныя испущати капли: Ты еси возводяй воду морскую, и изливаяй на лице земли. Ты еси дожди определивый, и дожди вольныя отлучивый, и реки вод наполняяй, и напояяй землю, и упоеваяй бразды ея, во умножение красных ея плодов. Ты еси разделивый море, и реку проходиму соделавый, и воду из камене источивый, и горесть водную в сладость преложивый. Весть водное естество своего Творца, знает своего Владыку, но не весть должное свое служение: аще узрит Тебе Владыку гневающагося на ны, или безмерно движимо, погибель соделовает, или спятаемо удержавается, и сухость вмещение емлет, и пламеновидный воздух бывает, и земная прозябения увядают, и мы в руце беды впадаем. Аще же паки видит Тебе Человеколюбца Бога благоуветлива и благопременительна, дожди уготовляет, и тучи на землю низносятся, и воздух благодышущий бывает, и земля Твое повеление услышавши, изобильныя плоды от своих боков прозябает. Тебе убо Творца и Создателя всех молим, глаголюще: помилуй нас, Господи, помилуй нас: помяни, яко дела руку Твоею есмы, вонми неможению естества нашего, яко Ты сотворил еси нас. Виждь птиц стенание, скотов вопиение, младенческий плачь, юнош вопль, старых окаянство, сирот лишение, вдовиц уединение, убогих недостаточество, и всех людей Твоих молебный глас, и посети землю, и упой ю тучными дожди: мокроты бо лишающися, своим убо прозябением увядение, человеком же и скотом пагубою претит. Водою пагубу навед иногда, помянул еси Ноя, носимаго в кочезе от безмерных вод оных: помянул же еси его, и птицы, и скоты, и звери и ползающая: навел еси дух на землю, и преста вода: и Ноа, и с ним животная, якоже семя, соблюл еси в бытие втораго мира. И ныне содержащею сухостию воздух, гладом прещаяй и смертию, помяни уповающия на Тя люди: помяни и птицы, помяни и скоты, и дух росы наведи, и сухость да престанет, и семена земли сотвори в воспитание человеков же и животных: и вся паки еже от Тебе промысла сподоби. Ты бо еси прозябаяй траву скотом, злак службе человеков: и Ты еси изводяй хлеб от земли, и вино источаяй, и елеем умащаяй человеческая лица: яко да подаваемым от Тебе благим во изобилии причащающеся, в веселии сердца прославим Твою благость, Отца, и Сына, и Святаго Духа, ныне и присно, и во веки веков.

Лик: Аминь.

Диакон: Господу помолимся.

Лик: Господи, помилуй.

Молитва пятая

Владыко Господи Иисусе Христе Боже наш, глаголом Своим все от небытия приведый, персть вземый от земли, и создавый человека, и душею словесною, и образом Твоим почтый того, и рекий: раститеся и множитеся, и наполняйте землю, даяй скотом пищу, и пренцем врановым. Иже и в велицем и спасительном плотию пришествии Твоем прежде убо седмию, потом же пятию хлебы, тысящи насытил еси многия: Сам, Всеблагий Владыко, и Твоя люди сия, призывающая Пресвятое Твое имя, Твоею вседетельною и великодарною десницею богатно препитай. Призри, Господи, на убогия люди Твоя, отверзаяй руку Твою, и насыщаяй всякое животно благоволения, ущедри всех нас милостивно: Ты бо, Владыко Человеколюбче, един еси Отец всех нас, и к Тебе единому очи возводим, яко одоеное на матерь свою. Твое есть слово, Преблагий Владыко: просите, и дастся вам, ищите, и обрящете. Подаждь убо просящим ныне, Владыко, с духовною пищею и нуждную плоти, и препитай алчущия Твоя люди, дожди временны, и благорастворение воздухов, и плодов различных изобилие земли даруй: в немощи, и губительстве, и огневице, и недузех различных бедствующих посети. Избави, Господи, имя Твое призывающий сей град (или: призывающую весь сию), и всякий град и страну, от глада, губительства, труса, потопа, огня, меча и убийства, даруяй нам милости Твоя, благодатию Безначального и Единосущнаго Твоего Отца, и Пресвятаго и Единочестнаго Твоего Духа: молитвами и моленьми Преблагословенныя Богородицы, благоглаголивых Твоих Апостолов и всех святых Твоих.

Лик: Аминь.

Диакон: Господу помолимся.

Лик: Господи, помилуй.

Молитва шестая, от бездождия

Господи Иисусе Христе Боже наш, иже нашего ради спасения изволивый плоть носити, да прославиши чудно словесное естество, неизреченным Твоим благоутробием и благостию: и иже во истинном познании обращающияся из глубины греховныя простити обещаяй: егда бо к Тебе воззрят рабиим образом, и истинныым исполнением Божественных Твоих заповедей, тогда и тии со дерзновением возмогут Тя Бога милостиваго и благосердаго имети. Ныне убо остави вся беззакония наша, и приклони к нам ухо Твое, и услыши ны, смиренныя и грешныя, якоже иногда фесвитянина Илию услышал еси, якоже глаголом единым связати небо, к целомудрию непокоривых оных людей: таже тем паки обычное человеколюбие употребивый, облаком повелевый, землю всю напоил еси водою благою: сице и ныне паки, моленьми того Твоего угодника и теплыми молитвами, презри беззакония наша и грехи, и приими молитвы наша: и услыши нас в час сей, тепле молящихся Ти ся, и разреши сухость сию земную, исповеданием и воплем людей Твоих, и низпосли на ны дождь благий, яко да насытимся воды, и земля наша даст плоды во время благопотребно в пищу нашу, и тех яве безсловесных животных. Ей, Господи Боже наш, услыши ны, грешныя и недостойныя рабы Твоя, и не презри моления наша, ниже да победит беззаконие наше милость Твою, но приклони, Господи ухо Твое, и услыши ны. Виждь сокрушение и умилосердися: виждь от святаго Твоего жилища, виждь воздыхание убогих: виждь незрелый возраст младенцев, зельнейшею жаждею изнуряемый: виждь незлобивых младенцев озлобление: виждь утробы матерни, виждь сосцы изсушаемыя убиенных младенцев: виждь состаревшияся, и юноши, якоже вериги в руки беззаконных изданныя: и презри убо согрешения наша, яже в ведении и не в ведении, яже во уме и помышлении, и не отрини нас до конца. Не бо воды единыя жаждею таем, но и тьмами иных зол, грех наших ради: и к Тебе зрим, да налиется на нас дождь зрелейший же и изобильнейший, да и праведный Твой гнев уставиши лютаго сего пленения. Обоя убо присим, и молимся Тебе, Человеколюбче, да кладязи и села наша полниши воды, и душевныя наша нивы в сытость напоиши, и исполниши Твоея благости: и кладязи, сиречь сердца наша, веселием и неизреченною радостию и радованием упоиши, и уставиши належащее на нас нестерпимое стремление злочестивых супостат. Ты бо еси Свободитель душ и телес наших, и Тебе славу возсылаем, Отцу, и Сыну, и Святому Духу, ныне и присно, и во веки веков.

Лик: Аминь.

Диакон: Господу помолимся.

Лик: Господи, помилуй.

Молитва седьмая,

о бездождии и изменении ветров

Благий Человеколюбче Господи, иже тварь единым словом соделавый и из нея человека создавый, последи же неизреченным человеколюбием падшаго сего, и раба греху бывша восприемый и освятивый, яко да не погибнет до конца дело руку Твоею, давый же сему и Своя заповеди в память Твоего пришествия, и Твоих повелений, и Божественнаго вочеловечения. Темже трудился еси, и подвизался еси, и взамлакл и вжадал еси, исполнивый вся нас ради яко лепо человеческая: вшедый же в корабль, и по морю ходивый, и волны дивия и зельности ветров обуздавый, и вся пострадати претерпевый, даже до креста и смерти: да в немже пострадал еси, и искусился еси, поможеши нам немощствующим. Сам и ныне, Царю Святый, иже наше неможение человеколюбно восприемый, умилосердися о нас, обуреваемых зело и <нужд>6 скудостию изнуряемых: подаждь нам Твою благость, упой землю нашу водою чистою, к плодоношению ея полезныя нам воздухи даруй. И якоже иногда ученики Твоя погружаемыя спасл еси от моря и зельности ветров, такоже и ныне спаси ны от содержащаго нас обстояния. <Устави>7 и ныне морское свирепство, укроти сопротивныя духи Твоим повелением Божественным: даждь нам тишину и упокоение от скорбных. Ей, Господи Иисусе Христе Боже наш, виждь и призри от святаго жилища Твоего на виноград сей, и соверши и, егоже насади десница Твоя, и даждь Духа праваго к пременению находящих на нас напастей, молитвами Рождшия Тя Матери, и всех святых Твоих.

Лик: Аминь

Диакон: Премудрость.

Священник: Пресвятая Богородице, спаси нас.

Лик: Честнейшую Херувим, и Славнейшую без сравнения Серафим, без истления Бога Слова рождшую, сущую Богородицу, Тя величаем.

Священник: Слава Тебе, Христе Боже, упование наше, слава Тебе.

Лик: Слава, и ныне: Господи, помилуй, трижды. Благослови.

Священник же, или архиерей, творит обычный отпуст.

Последование молебнаго пения ко Господу Богу нашему Иисусу Христу, певаемаго во время безведрия, егда дождь многий безгодно идет

Священник начинает обычно:

Благословен Бог наш, всегда, ныне и присно, и во веки веков.

Чтец: Аминь. Слава Тебе, Боже наш, слава Тебе.

Царю небесный, Утешителю, Душе истины, иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.

Святый Боже, Святый Крепкий, Святый Безсмертный, помилуй нас. Трижды.

Слава, и ныне:

Пресвятая Троице, помилуй нас: Господи очисти грехи наша; Владыко, прости беззакония наша; Святый, посети и исцели немощи наша, имене Твоего ради.

Господи, помилуй. Трижды

Слава, и ныне:

Отче наш, иже еси на небесех, да святится Имя Твое, да приидет Царствие Твое: да будет воля Твоя, яко на небеси, и на земли. Хлеб наш насущный даждь нам днесь, и остави нам долги наша, якоже и мы оставляем должником нашим: и не введи нас во искушение, но избави нас от лукаваго.

Священник возглас: Яко Твое есть царство, и сила, и слава, Отца, и Сына, и Святаго Духа, ныне и присно, и во веки веков.

Чтец: Аминь.

Господи, помилуй, 12 (раз).

Слава, и ныне:

Приидите, поклонимся Цареви нашему Богу.

Приидите, поклонимся и припадем Христу, Цареви нашему Богу.

Приидите, поклонимся и припадем самому Христу, Цареви и Богу нашему.

И псалом 68

Спаси, мя, Боже, яко внидоша воды до души моея. Углебох в тимении глубины, и несть постояния: приидох во глубины морския, и буря потопи мя. Утрудихся зовый, измолче гортань мой: исчезосте очи мои, от еже уповати ми на Бога моего. Умножишася паче влас главы моея ненавидящии мя туне: укрепишася врази мои, изгонящии мя неправедно: иже не восхищах, тогда воздаях. Боже, Ты уведел еси безумие мое, и прегрешения моя от Тебе не утаишася. Да не постыдятся о мне терпящии Тебе, Господи, Господи сил: ниже да посрамятся о мне ищущии Тебе, Боже Израилев. Яко Тебе ради претерпех поношение, покры срамота лице мое. Чуждь бых братии моей, и странен сыновом матepe моея. Яко ревность дому Твоего снеде мя, и поношения поносящих Ти нападоша на мя. И покрых постом душу мою, и бысть в поношение мне. И положих одеяние мое вретище, и бых им в притчу. О мне глумляхуся седящии во вратех, и о мне пояху пиющии вино. Аз же молитвою моею к Тебе, Боже: время благоволения, Боже: во множестве милости Твоея услыши мя, во истине спасения Твоего. Спаси мя от брения, да не углебну: да избавлюся от ненавидящих мя и от глубоких вод. Да не потопит мене буря водная, ниже да пожрет мене глубина, ниже сведет о мне ровенник уст своих. Услыши мя, Господи, яко блага милость Твоя: по множеству щедрот Твоих призри на мя. Не отврати лица Твоего от отрока Твоего, яко скорблю: скоро услыши мя. Вонми души моей, и избави ю: враг моих ради избави мя. Ты бо веси поношение мое, и студ мой, и срамоту мою: пред Тобою вси оскорбляющии мя. Поношение чаяше душа моя и страсть: и ждах соскорбящаго, и не бе, и утешающих, и не обретох. И даша в снедь мою желчь, и в жажду мою напоиша мя оцта. Да будет трапеза их пред ними в сеть, и в воздаяние, и в соблазн. Да помрачатся очи их, еже не видети, и хребет их выну сляцы. Пролий на ня гнев Твой, и ярость гнева Твоего да постигнет их. Да будет двор их пуст, и в жилищих их да не будет живый. Зане егоже Ты поразил еси, тии погнаша, и к болезни язв моих приложиша. Приложи беззаконие к беззаконию их, и да не внидут в правду Твою. Да потребятся от книги живых, и с праведными да не напишутся. Нищ и боляй есмь аз: спасение Твое, Боже, да приимет мя. Восхвалю имя Бога моего с песнию, возвеличу Его во хвалении. И угодно будет Богу паче тельца юна, роги износяща и пазнокти. Да узрят нищии и возвеселятся: взыщите Бога, и жива будет душа ваша. Яко услыша убогия Господь, и окованныя Своя не уничижи. Да восхвалят Его небеса и земля, море и вся живущая в нем. Яко Бог спасет Сиона, и созиждутся гради Иудейстии, и вселятся тамо, и наследят и. И семя рабов Твоих удержит и, и любящии имя Твое вселятся в нем.

Слава, и ныне:

Аллилуия, аллилуия, аллилуия, слава Тебе, Боже. Трижды

Посем диакон глаголет ектению великую

Миром Господу помолимся.

Лик: Господи, помилуй.

О свышнем мире, и спасении душ наших, Господу помолимся.

Лик: Господи, помилуй.

О мире всего мира, благостоянии святых Божиих церквей и соединении всех, Господу помолимся.

Лик: Господи, помилуй.

О святем храме сем, и с верою, благоговением и страхом Божиим входящих вонь, Господу помолимся.

Лик: Господи, помилуй.

О Великом Господине и отце нашем Святейшем Патриархе Кирилле, и о господине нашем высокопреосвященнейшем митрополите (или: архиепископе, или: преосвященнейшем епископе) имярек, честнем пресвитерстве, во Христе диаконстве, о всем причте и людех, Господу помолимся.

Лик: Господи, помилуй.

О Богохранимей стране нашей, властех и воинстве ея, Господу помолимся.

Лик: Господи, помилуй.

О граде сем (или: о веси сей, или: о святей обители сей), всяком граде, стране, и верою живущих в них, Господу помолимся.

Лик: Господи, помилуй.

О благорастворении воздухов, о изобилии плодов земных и временех мирных, Господу помолимся.

Лик: Господи, помилуй.

О плавающих, путешествующих, недугующих, страждущих, плененных и о спасении их, Господу помолимся.

Лик: Господи, помилуй.

И абие прилагает сия:

О еже не в гневе прещения Своего умалити нас грех ради и беззаконий наших, но милости и щедроты Своя от века сущия помянути, и помиловати нас, Господу помолимся.

Лик: Господи, помилуй.

О еже помянути Завет Свой, иже к Ною, и не растлити безгодною мокротою, и мрачным злорастворным возду́хом, и темною мглою землю и нищих людей Своих, но милостивно пощадити достояние Свое, и солнцу плодоносными лучами и мерною теплотою возсияти на земли повелети, Господу помолимся.

Лик: Господи, помилуй.

О еже повелети облаком престати от безгоднаго дождя и мраком разитися, светлости же солнечней возсияти, Господу помолимся.

Лик: Господи, помилуй.

О еже пощадити люди, и скоты, и всю землю сию, и не растлити ю безгодным дождевным лиянием, Господу помолимся.

Лик: Господи, помилуй.

О еже подати благорастворенное ведро достоянию Своему и умножити плоды земныя, Господу помолимся.

Лик: Господи, помилуй.

О еже не по грехом нашим воздати нам и казнити нас, но по велицей милости Своей и по многим щедротам Своим, явити на нас скорое Свое человеколюбие и благость, Господу помолимся.

Лик: Господи, помилуй.

О еже не растлити плоды и семена земная грех ради наших, безгодным дождевным лиянием, но вольным ведром пощадити и угобзити я нищих ради людей Своих, Господу помолимся.

Лик: Господи, помилуй.

О еже благоприятным быти молитвам нашим, и избавити нас от глада, губительства, труса, потопа, огня, града, меча, нашествия иноплеменник, междоусобныя брани и всякия смертоносныя язвы, Господу помолимся.

Лик: Господи, помилуй.

О избавитися нам от всякия скорби, гнева и нужды, Господу помолимся.

Лик: Господи, помилуй.

Заступи, спаси, помилуй и сохрани нас, Боже, Твоею благодатию.

Лик: Господи, помилуй.

Пресвятую, Пречистую, Преблагословенную, Славную Владычицу нашу Богородицу и Приснодеву Марию со всеми святыми помянувше, сами себе и друг друга, и весь живот наш Христу Богу предадим.

Лик: Тебе, Господи.

Священник возглас:

Яко подобает Тебе всякая слава, честь и поклонение, Отцу, и Сыну, и Святому Духу, ныне и присно, и во веки веков.

Лик: Аминь.

И абие диакон глаголет во глас 2:

Бог Господь, и явися нам, благословен Грядый во имя Господне.

Стих 1: Исповедайтеся Господеви, яко Благ, яко во веки милость Его.

Стих 2: Обышедше обыдоша мя, и именем Господним противляхся им.

Стих 3: Не умру, но жив буду, и повем дела Господня.

Стих 4: Камень, егоже небрегоша зиждущии, сей бысть во главу угла: от Господа бысть сей, и есть дивен во очесех наших.

Лик же поет: Бог Господь: к коемуждо стиху, во глас 2.

Таже тропарь, глас 2:

Призри милостивно, Боже, на люди согрешшия и не презри в покаянии к Тебе припадающих, но яко Благ помилуй, и вскоре праведнаго Твоего избави прещения, молитвами Богородицы, Едине Человеколюбче. Дважды.

Слава, и ныне, Богородичен:

Скорая миру Помощнице, Дево Богородице, Твоего предстательства и крепкаго заступления тощно просим: умилосердися на скорбящыя люди, и умоли Милостиваго Сына Твоего и Бога, от належащия нас избавити беды и праведнаго Своего прещения, Едина в женах Благословенная.

Таже п салом 50

Помилуй мя, Боже, по велицей милости Твоей, и по множеству щедрот Твоих очисти беззаконие мое. Наипаче омый мя от беззакония моего, и от греха моего очисти мя. Яко беззаконие мое аз знаю, и грех мой предо мною есть выну. Тебе Единому согреших, и лукавое пред Тобою сотворих: яко да оправдишися во словесех Твоих, и победиши, внегда судити Ти. Се бо в беззакониих зачат есмь, и во гресех роди мя мати моя. Се бо истину возлюбил еси, безвестная и тайная премудрости Твоея явил ми еси. Окропиши мя иссопом, и очищуся: омыеши мя, и паче снега убелюся. Слуху моему даси радость и веселие: возрадуются кости смиренныя. Отврати лице Твое от грех моих, и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи мене от лица Твоего, и Духа Твоего Святаго не отыми от мене. Воздаждь ми радость спасения Твоего, и Духом Владычним утверди мя. Научу беззаконные путем твоим, и нечестивые к Тебе обратятся. Избави мя от кровей, Боже, Боже спасения моего: возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо: всесожжения не благоволиши. Жертва Богу дух сокрушен: сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимские. Тогда благоволиши жертвы правды, возношение и всесожегаемая: тогда возложат на олтарь Твой тельцы.

По скончании же псалма,

абие певцы поют канон, без ирмосов,

глас 6

 

Песнь 1

Ирмос: Яко по сузу пешешествовав Израиль:

Припев: Помилуй ны, Господи, люди согрешшия.

Приидите, вернии, песнь нову воспоим Владыце Богу, глаголюще: умилосердися яко щедр, и помилуй безмерно согрешшия.

Слава: Приими молитвы и слезы, Христе Боже, молящихся Тебе ныне нас рабов Твоих, и подаждь времена ведренна к плодоношению земли.

И ныне, Богородичен: Ускори, Владычице Марие, пречистеи Свои руце милостивно воздети к Сыну Твоему и Богу, еже подати ведро, и пищу верным рабом Своим.

Катавасия по всякой песни:

Избави от бед рабы Твоя, Милостиве, яко мы уседно к Тебе прибегаем, к милостивому Избавителю, всех Владыце Господу Иисусу.

Спаси от бед рабы Твоя, Пресвятая Богородице Дево, яко мы вси по Бозе к Тебе прибегаем, яко к нерушимей стене и предстательнице.

 

Песнь 3

Ирмос: Несть свят:

Помилуй ны, Господи, люди согрешшия.

Не яростию Твоею обличи нас, Господи, якоже пророк вопиет, ни гневом Твоим накажи нас, но молитвами Пречистыя Твоея Матере, излей на ны обильно милости Твоя.

Слава: Новозванный язык со слезами вопиет Ти, Владыко: умилосердися яко щедр, и подаждь нам ведро и воздухи благорастворны, обилие же и велию милость.

И ныне, Богородичен: Не презри слез наших, Богородице Владычице, и не мерзко Ти буди воздыхание наше, но моли Сына Твоего прилежно, подати ведро земли, и людем Твоим велию милость.

Катавасия:

Избави от бед рабы Твоя, Милостиве, яко мы уседно к Тебе прибегаем, к милостивому Избавителю, всех Владыце Господу Иисусу.

Спаси от бед рабы Твоя, Пресвятая Богородице Дево, яко мы вси по Бозе к Тебе прибегаем, яко к нерушимей стене и предстательнице.

Диакон глаголет ектению:

Помилуй нас, Боже, по велицей милости Твоей, молим Ти ся, услыши и помилуй.

Лик: Господи, помилуй. Трижды

Достойная казнем сотворихом, и праведен суд Твой постиже нас, Господи: но пощади, пощади люди согрешшия, и отврати гнев Твой, праведно на ны движимый, в покаянии к Тебе припадаем, и смиренно молим Тя, услыши и помилуй.

Лик: Господи, помилуй. Трижды

Да не потопит нас, Господи, буря водная, и да не растлиши землю, и гладом умориши нас людей Твоих, но яко благ, устави водное лияние, и теплоте солнечной возсияти на земли яко силен повели, прилежно молим Ти ся, Царю Пресвятый, услыши и помилуй.

Лик: Господи, помилуй. Трижды

Нищих ради людей Твоих и скот, мрачному воздуху и темной мгле разитися и лучами солнечным возсияти повели, Всещедрый Господи, да не безгодно скончаемся, молим Ти ся, скоро услыши и помилуй.

Лик: Господи, помилуй. Трижды

Спаси нас от брения, Господи, и от тимения глубины, и от глубоких вод, да не исчезнут в суете дние наши, и лета наша в воздыханиих, но помяни завет Твой, иже к Ною, и сотвори с нами по милости Твоей, сокрушенным сердцем молим Ти ся, услыши и помилуй.

Лик: Господи, помилуй. Трижды

В скорби и печали нашей и смутной тузе, к Тебе Господу Богу нашему умиленно вопием: да приидет к Тебе молитва наша, и да изыдет из истления живот наш, да не безгодно исчезнет, милостивно услыши глас нищих людей Твоих, и человеколюбно помилуй.

Лик: Господи, помилуй. Трижды

Не на дугу, юже в знамение завета на облацех поставил еси, Господи, но на Твоя щедроты взираем, и Твою милость привлещи ищем, к Тебе богатому в милости и безмерному в щедротах, сердцем сокрушенным молим Ти ся: подаждь нам мерное и плодоносное ведро с благорастворенными воздухи, и скоро яко Щедр услыши и помилуй.

Лик: Господи, помилуй. Трижды

Священник возглас:

Услыши ны, Боже Спасителю наш, упование всех концев земли и сущих в мори далече: и милостив, милостив буди, Владыко, о гресех наших, и помилуй ны. Милостив бо и человеколюбец Бог еси, и Тебе славу возсылаем, Отцу, и Сыну, и Святому Духу, ныне и присно, и во веки веков.

Лик: Аминь.

Седален, глас 5:

К Тебе, Спасе наш Иисусе Превечный Боже, прибегаем грешнии раби Твои, и со слезами в покаянии припадающе, вопием Ти: пощади, пощади, Щедре, люди безответныя, и не растли нас безгодным дождевным лиянием и злорастворением воздушным, но подаждь ведро, и умножи плоды земныя, яко Человеколюбец.

Слава, и ныне, Богородичен:

Святейшую Херувимов и вышшую небес, Препетая Богородице, Тя воистинну исповедующе, имамы грешнии Заступницу, и обретаем во время спасения: тем не престай за ны молящи, Державо и Прибежице душам нашим.

 

Песнь 4

Ирмос: Христос моя сила:

Помилуй ны, Господи, люди согрешшия.

В руку Твоею, Владыко Христе, содержиши превышше небесныя и поднебесныя воды и теплоту солнечную. Темже молим Тя: обое по мере требования даруй на пользу рабом Твоим.

Слава: Исповедающим Твое владычество, Строителю всея твари Христе, содержай скипетро небесное и окормляяй всю тварь, подаждь благорастворныя возлухи и обилие земли, молитвами Пречистыя Твоея Матере.

И ныне, Богородичен: Великое дерзновение имаши к Рождшемуся из Тебе, яко никтоже ин: тем, Владычице, молися о рабех Твоих, избавитися нам от глада и от нашествия иноплеменник.

Катавасия:

Избави от бед рабы Твоя, Милостиве, яко мы уседно к Тебе прибегаем, к милостивому Избавителю, всех Владыце Господу Иисусу.

Спаси от бед рабы Твоя, Пресвятая Богородице Дево, яко мы вси по Бозе к Тебе прибегаем, яко к нерушимей стене и предстательнице.

 

Песнь 5

Ирмос: Божиим светом Твоим:

Помилуй ны, Господи, люди согрешшия.

Плавающих пристанице и надеждо ненадежных, Христе, князей утверждение, и всех христиан в бедах скорый Послушателю: услыши и нас ныне, и подаждь ведро к плодоношению земли.

Слава: Врачу болящих и скорбящих Утешителю, небесный Царю Христе, призри с высоты святаго Твоего жилища, и услыши плачь и стенание рабов Твоих, и яко Щедр подаждь ведро к плодоношению земли.

И ныне, Богородичен: Скоро приими, Госпоже, молитву рабов Твоих, не поминающи наша безчисленная злая: и испроси нам, Дево, ведро на пользу, к плодоношению земли.

Катавасия:

Избави от бед рабы Твоя, Милостиве, яко мы уседно к Тебе прибегаем, к милостивому Избавителю, всех Владыце Господу Иисусу.

Спаси от бед рабы Твоя, Пресвятая Богородице Дево, яко мы вси по Бозе к Тебе прибегаем, яко к нерушимей стене и предстательнице.

Песнь 6

Ирмос: Житейское море:

Помилуй ны, Господи, люди согрешшия.

Молением пророка Твоего, Господи, затворил еси небеса три лета и месяцей шесть, к познанию и покаянию противных, егоже ныне о нас, Господя, не истязуй, но милостию Твоею ущедри ны.

Слава: Приимый разбойничо покаяние, Христе, и того единем часом спасый вопиюща: помяни мя, Спасе, во Царствии. И нас, ныне в покаянии Ти припадающих, пощади и помилуй.

И ныне, Богородичен: Помолися о нас, Владычице, к Сыну Твоему и Богу, да не якоже при Нои лиянием водным, грех ради наших растлит нас, но якоже ниневитяны покаявшияся помилует.

Катавасия:

Избави от бед рабы Твоя, Милостиве, яко мы уседно к Тебе прибегаем, к милостивому Избавителю, всех Владыце Господу Иисусу.

Спаси от бед рабы Твоя, Пресвятая Богородице Дево, яко мы вси по Бозе к Тебе прибегаем, яко к нерушимей стене и предстательнице.

Диакон глаголет ектению малую:

Паки и паки миром Господу помолимся.

Лик: Господи, помилуй.

Заступи, спаси, помилуй и сохрани нас, Боже, Твоею благодатию.

Лик: Господи, помилуй.

Пресвятую, Пречистую, Преблагословенную, Славную Владычицу нашу Богородицу и Приснодеву Марию, со всеми святыми помянувше, сами себе, и друг друга, и весь живот наш Христу Богу предадим.

Лик: Тебе, Господи.

Священник возглас:

Ты бо еси Царь мира и Спас душ наших: и Тебе славу возсылаем, Отцу, и Сыну, и Святому Духу, ныне и присно, и во веки веков.

Лик: Аминь.

И по возгласе кондак, глас 2:

Не отрини до конца согрешшия люди Твоя, Владыко, ниже остави милости и щедроты Твоя о нас, но яко бездна сый щедрот и милосердия пучина, приими мольбы наша, и избави нас от належащия беды и нужды, един бое си Благоуветливый.

Таже степенна, глас 6, антифон 1:

На небо очи мои возвожу к Тебе, Слове, ущедри мя, да живу Тебе.

Помилуй нас уничиженных, устрояя благопотребныя Твоя сосуды, Слове.

Святому Духу всякая всеспасительная вина: аще коему сей по достоянию дунет, скоро вземлет от земных, восперает, возращает, устрояет горе.

Таже:

Диакон: Вонмем, премудрость, вонмем.

Прокимен, глас 4: Спаси мя, Боже, яко внидоша воды до души моея.

Стих: Углебох в тимении глубины, и несть постояния.

Диакон: Господу помолимся.

Священник возглас: Яко свят еси, Боже наш, и во святых почиваеши, и Тебе славу славу возсылаем, Отцу, и Сыну, и Святому Духу, ныне и присно, и во веки веков.

Лик: Аминь.

Диакон: Всякое дыхание да хвалит Господа.

Стих: Хвалите Бога во святых Его, хвалите Его во утверждении силы Его.

И посем возглашает диакон:

И о сподобитися нам слышанию Святаго Евангелия Господа Бога молим.

Лик: Господи, помилуй. Трижды

Диакон: Премудрость, прости, услышим Святаго Евангелия.

Священник: Мир всем.

Лик: И духови твоему.

Священник: От Матфея Святаго Евангелия чтение.

Лик: Слава Тебе, Господи, слава Тебе.

Диакон: Вонмем.

Евангелие от Матфея (зачало 20, от полу)

Рече Господь: просите, и дастся вам: ищите, и обрящете: толцыте, и отверзется вам. Всяк бо просяй приемлет и ищай обретает, и толкущему отверзется. Или кто есть от вас человек, егоже аще воспросит сын его хлеба, еда камень подаст ему; Или аще рыбы просит, еда змию подаст ему; Аще убо вы, лукави суще, умеете даяния блага даяти чадом вашим: кольми паче Отец ваш Небесный даст блага просящим у Него.

Лик: Слава Тебе, Господи, слава Тебе.

Таже:

Слава: Отче, Слове и Душе, Троице Святая, очисти множества грехов наших.

И ныне: Молитвами Богородицы, Милостиве, очитси множества согрешений наших.

Помилуй мя, Боже, по велицей милости Твоей, и по множеству щедрот Твоих очисти беззаконие мое.

Таже поют стихиру сию, глас 6:

Страшен еси, Господи, и кто стерпит праведный Твой гнев; или кто Тебе умолит, Благий, о людех согрешших, и отчаявшихся; токмо небеснии Ангели, начала и власти, престоли и господьствия, Херувими и Серафими, непрестанно Тебе вопиющии: Свят, Свят, Свят еси, Господи, тем, Пресвятый Владыко, дела руку Твоею не презри, но за милосердие, Твоея милости, спаси люди Твоя и град погибающий.

Слава, и ныне, Богородичен:

Никтоже притекаяй к Тебе посрамлен от Тебе исходит, Чистая Дево Богородице, но просит благодати, и приемлет дарования, на пользу прошением.

Священник:

Спаси, Боже, люди Твоя и благослови достояние Твое, посети мир Твой милостию и щедротами, возвыси рог христиан православных и низпосли на ны милости Твоя богатыя: молитвами Всепречистыя Владычицы нашея Богородицы и Приснодевы Марии: силою Честнаго и Животворящего Креста: предстательствы честных и небесных сил безплотных: честнаго, славного пророка, Предтечи и Крестителя Иоанна: святых славных и всехвальных Апостол: иже во святых отец наших и вселенских великих учителей и святителей, Василия Великаго, Григория Богослова и Иоанна Златоустаго: иже во святых отце нашего Николая, архиепископа Мирликийскаго, Чудотворца: святых равноапостольных Мефодия и Кирилла, учителей словенских, святых равноапостольных великаго князя Владимира и великия княгини Ольги: иже во святых отец наших, святителя Михаила, перваго митрополита Киевскаго: первосвятителей Московских и всея Руси, Петра, Алексия, Ионы, Макария, Филиппа, Иова, Ермогена и Тихона: митрополитов Московских Филарета, Иннокентия и Макария: святителей имярек (епархиальных): святых славных и добропобедных мученников: новомученников и исповедников Церкве русския Владимира, митрополита Киевскаго: Вениамина, митрополита Петроградскаго: Петра, митрополита Крутицкаго: Илариона, архиепископа Верейскаго: святых царственных страстотерпцев: преподобномученниц великия княгини Елисаветы и инокини Варвары: преподобных и богоносных отец наших: преподобных отец старцев Оптинских: святых праведных Иоанна Кронштадтскаго и Алексия Московскаго: святых блаженных Ксении Петербуржския и Матроны Московския: святых и праведных богоотец Иоакима и Анны: и святаго имярек, (егоже есть храм, и егоже есть день) и всех святых: молим Тя, многомилостиве Господи, услыши нас грешных, молящихся Тебе, и помилуй нас.

Лик: Господи помилуй, 15 (раз)

Священник возглас:

Милостию и щедротами, и человеколюбием Единороднаго Твоего Сына, с нимже благословен еси, со Пресвятым, и Благим, и Животворящим Твоим Духом, ныне и присно, и во веки веков.

Лик: Аминь.

Песнь 7

Ирмос: Росодательну убо пещь:

Помилуй ны, Господи, люди согрешшия.

Никогдаже отлучайся нас, Спасе Щедрый, яко пастырь овец Своих, но присно с нами неотступно пребывая, от всяких бед свободи верно Ти от сердца вопиющих: благословен еси, Боже, и препрославленный.

Слава: Ты, Боже Всесильный и Царю Пресвятый, прострый небо, ябо кожу, и море песком оградивый, посли нам теплоту солнечную и благорастворенны воздухи, верно Ти вопиющим: благословен еси, Боже, и препрославленный.

И ныне, Богородичен: Научи, Владычице, язык мой глаголати полезная, надежде всем концем земли, и молися Сыну Своему и Богу, подати ведро на земли, и ущедрити Христу вопиющих: благословен еси, Боже, и препрославленный.

Катавасия:

Избави от бед рабы Твоя, Милостиве, яко мы уседно к Тебе прибегаем, к милостивому Избавителю, всех Владыце Господу Иисусу.

Спаси от бед рабы Твоя, Пресвятая Богородице Дево, яко мы вси по Бозе к Тебе прибегаем, яко к нерушимей стене и предстательнице.

Песнь 8

Ирмос: Из пламене преподобным:

Помилуй ны, Господи, люди согрешшия.

Чии раби и создание есмы; не Твои ли, Превечный Боже, услыши убо наша молитвы худыя, и испусти ведро на земли, и росу полезную, да Тя превозносим во вся веки.

Слава: Рекл еси, милостивый Владыко, назакуя нас к покаянию: ищите, и обрящете: толцыте, и отверзется вам: просите, и приимете. Темже к Тебе припадаем и прилежно молим: пощади нас, Милостиве, превозносящих Тя во вся веки.

И ныне, Богородичен: Чистая Владычице Богородице, избави молитвами Своими люди Своя от страсти и брани всякия, подающи обильныя милости и плоды на пищу чтущим Тя, и превозносящим во вся веки.

Катавасия:

Избави от бед рабы Твоя, Милостиве, яко мы уседно к Тебе прибегаем, к милостивому Избавителю, всех Владыце Господу Иисусу.

Спаси от бед рабы Твоя, Пресвятая Богородице Дево, яко мы вси по Бозе к Тебе прибегаем, яко к нерушимей стене и предстательнице.

 

Песнь 9

Ирмос: Бога человеком:

Помилуй ны, Господи, люди согрешшия.

Павел покаявся от гонительства, сосуд избранен бысть Тебе Владыце и Богу всех: и мы грешнии, надеющеся Твоему милосердию, в покаянии Тебе вопием: прости вся согрешения наша, и посли ведро земли, и росу благую и полезную, молитвами Пречистыя Твоея Матере.

Слава: Верховный ученик Твой Петр трижды отвергся Тебе, плачем горьким обрете у Тебе, Милосерде Христе, прощение. И мы того ревнующе покаянию, Тебе во умилении со слезами вопием: согрешихом, прости, Милосерде, и избави нас от всякаго зла, молитвами Пречистыя Твоея Матери.

И ныне, Богородичен: Избави ны, Пречистая, от всякаго злаго обстояния, и от безгоднаго лияния дождевнаго, нашедшаго ныне на ны, и испроси свыше у Сына Твоего и Бога, подати благовременное ведро рабом Своим, и изобильный плод земный на пищу людем, да Тя непрестанно величаем.

Катавасия:

Избави от бед рабы Твоя, Милостиве, яко мы уседно к Тебе прибегаем, к милостивому Избавителю, всех Владыце Господу Иисусу.

Спаси от бед рабы Твоя, Пресвятая Богородице Дево, яко мы вси по Бозе к Тебе прибегаем, яко к нерушимей стене и предстательнице.

Таже:

Достойно есть яко воистинну блажити Тя Богородицу, присноблаженную и пренепорочную, и Матерь Бога нашего. Честнейшую Херувим, и славнейшую без сравнения Серафим, без истления Бога Слова рождшую, сущую Богородицу Тя величаем.

Чтец: Трисвятое. Пресвятая Троице: Отче наш:

Священник: Яко Твое есть Царство, и сила, и слава, Отца, и Сына, и Святаго Духа, ныне и присно, и во веки веков.

Лик: Аминь.

И настоящия тропари сия, глас 6:

Помилуй нас, Господи, помилуй нас: всякаго бо ответа недоумеюще, сию Ти молитву яко Владыце грешнии приносим: помилуй нас.

Слава: Господи, помилуй нас, на Тя бо уповахом: не прогневайся на ны зело, ниже помяни беззаконий наших, но призри и ныне яко благоутробен, и избави ны от враг наших: Ты бо еси Бог наш, и мы людие Твои, вси дела руку Твоею, и имся Твое призываем.

И ныне: Милосердия двери отверзи нам, благословенная Богородице, надеющиеся на Тя да не погибнем, но да избавимся Тобою от бед: Ты бо еси спасение рода христианскаго.

По сих же диакон глаголет ектению сию:

Помилуй нас, Боже, по велицей милости Твоей, молим Ти ся, услыши и помилуй.

Лик: Господи, помилуй, трижды.

Еще молимся о великом господине и отце нашем святейшем Патриархе Кирилле, и о господине нашем высокопреосвященнейшем митрополите (или: архиепископе, или: преосвященнейшем епископе) имярек, и всей во Христе братии нашей.

Лик: Господи, помилуй, трижды.

Еще молимся о богохранимей стране нашей, властех и воинствах ея, да тихое и безмолвное житие поживем во всяком благочестии и чистоте.

Лик: Господи, помилуй, трижды.

Прилагает и сия:

Еще молимся о еже отвратити от нас всяк гнев Свой, праведно движимый на ны, и простити нам всякое согрешение, вольное же и невольное, и помиловати нас, недостойных рабов Своих, в сердце сокрушенном рцем вси: Господи, услыши и помилуй.

Лик: Господи, помилуй, трижды.

Еще молимся о еже услышати Господу Богу глас молитвы нашея, и помиловати нас, и послати благовременное ведро на земли, и утешити нас, скорбных рабов Своих, рцем вси со слезами: услыши, Милостиве, и помилуй.

Лик: Господи, помилуй, трижды.

Собирай воды во облацех от конец земных, повелением Твоим удержи я и пусти ведро на земли, со умилением молим Ти ся, Всещедрый Владыко, услыши и милостивно помилуй.

Лик: Господи, помилуй, трижды.

Призываяй воду морскую, и сию паки всемогущею силою Твоею удержати могий, и просветити поднебесную, в покаянии молим Ти ся, Всемилостиве Господи, услыши и человеколюбно помилуй.

Лик: Господи, помилуй, трижды.

Ведро вольное пусти, Господи, на земли, и от истления скоро избави нас, болезненным сердцем молим Ти ся, услыши и щедротно помилуй.

Лик: Господи, помилуй, трижды.

Посещаяй землю и умножаяй жита ея, прозябаяй же пажить скотом и траву на службу человеком, помилуй человеки и скоты, и запрети безгодному дождевному лиянию, солнцу же благовременно возсияти на земли и умножити плоды ея повели, молим Ти ся, Благоутробне Господи, услыши и яко Благ помилуй.

Лик: Господи, помилуй, трижды.

Яко очи раб в руку господий своих, тако ичи наши к Тебе, Боже наш, верою взирают, дондеже ущердриши ны. Темже не погуби нас безмерною мокротою, но милостивно призри на ны ведром и щедротно помилуй.

Лик: Господи, помилуй, трижды.

Осияваяй солнце на злыя и благия, и подаваяй ведро, и росу благоплодоносну, и благорастворныя воздухи на пользу созданию Твоему, не яростию Твоею накажи нас, но милостивно умножи семена земная и плоды ея, в покаянии молим Ти ся, Человеколюбче Господи, услыши и яко Щедр помилуй.

Лик: Господи, помилуй, трижды.

Одеяйся светом, яко ризою, возсияй свет солнечный на земли нашей, и изсуши излишнюю мокроту ея ко изобильному плодоношению, моли Ти ся, услыши и милостивно помилуй.

Лик: Господи, помилуй, трижды.

Не помяни беззаконий наших, Владыко, аще бо беззакония назриши, никтоже постоит пред Тобою, но скоро да предварят ны щедроты Твоя, Господи, яко обнищахом зело: да не растлит нас безведрие, и до конца да не погубит, молим Ти ся, скоро услыши и милостивно помилуй.

Лик: Господи, помилуй, трижды.

Упование и спасение православно в Тя верующих, Господи, избави град сей (аще в монастыре: обитель сию, аще же на селе: весь сию), и всяк град и страну, от глада, губительства, труса, потопа, огня, меча, нашествия иноплеменных, и междоусобныя брани, и всякия сметроносныя язвы, и милостив, и тих, и благоуветлив буди, Человеколюбче, о гресех наших, и помилуй нас: и отврати весь гнев Твой, праведно движимый на ны, и избави нас належащаго праведнаго прещения Твоего, и просвети благодатию Твоею всю поднебесную к плодоношению земли и ко окомрмлению жития нашего, рцем вси со слезами: Господи Святый, скоро услыши и милостивно помилуй.

И поют вси: Господи, помилуй, трижды.

Священник же не возгласившу, диакон глаголет:

Со умилением вси колена преклоньше, Господу помолимся.

И отпевше трижды, Господи, помилуй, преклоняют колена.

Священник же чтет молитву сию велегласно:

Владыко Господи Боже наш, древле ревнителя Илии пророка Твоего мольбу послушавый, и еже на время дождь удержати изволивый: и ныне, человеколюбивый Творче и милостивый Господи, призри и на нас смиренных и недостойных рабов Твоих смиренныя мольбы, и яко щедр презри наша прегрешения, и умолен быв от самаго Твоего человеколюбия, подаждь ведро достоянию Твоему, и солнце просвети на требующия и просящия от Тебе милости. Возвесели лице земли, нищих ради людей Твоих, младенцев же и скотов, и иных всех животных, ихже насыщаеши Твоим благоволением, и даеши пищу им во благо время. Ей, Господи Боже наш, не отрини вотще мольбу нашу, ниже посрами нас от чаяния нашего, но пощади нас по милости Твоей, и посети щедротами Твоими, исчезают бо всуе дние наши, и оскудевает в болезни живот наш. Не погуби убо нас беззаконий ради наших, имиже негодование и ярость Твою на себе привлекохом, но сотвори с нами по тихости Твоей, и по множеству милости Твоея. Се бо душею сокрушенною и духом смиренным пред Тобою припадаем, и яко раби непотребнии, паче же большия казни достойни, в покаянии умиленно Тебе вопием: согрешихом и беззаконновахом, и прегрешихом во всем, заповеди Твоя преступающе, и сего ради вся, яже наводиши на ны, истиною и судом наводиши, но не до конца тлению, гладу же и погибели предаждь нас, ниже да потопит нас буря водная, но во гневе милости помяни, и туне щедрот Твоих ради умилостивися, и Твое создание и дело рук Твоих яко Благ помилуй, и от всякаго зла скоро избави.

Твое бо есть еже миловати и спасати нас, Боже наш, и Тебе славу возсылаем, Отцу, и Сыну, и Святому Духу, ныне и присно, и во веки веков.

Лик: Аминь.

Диакон: Премудрость.

Священник: Пресвятая Богородице, спаси нас.

Лик: Честнейшую Херувим, и Славнейшую без сравнения Серафим, без истления Бога Слова рождшую, сущую Богородицу, Тя величаем.

Священник: Слава Тебе, Христе Боже, упование наше, слава Тебе.

Лик: Слава, и ныне: Господи, помилуй, трижды. Благослови.

Священник же, или архиерей, творит отпуст обычный дне, или праздника.

Молебное пение во время губительнаго поветрия и смертоносныя заразы

Благословен Бог наш, всегда, ныне и присно, и во веки веков.

Лик: Аминь.

Диакон: Слава Тебе, Боже наш, слава Тебе.

Клир поет: Царю небесный, Утешителю, Душе истины, иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.

Таже чтец:

Святый Боже, Святый Крепкий, Святый Безсмертный, помилуй нас. Трижды.

Слава, и ныне:

Пресвятая Троице, помилуй нас: Господи очисти грехи наша; Владыко, прости беззакония наша; Святый, посети и исцели немощи наша, имене Твоего ради.

Господи, помилуй. Трижды

Слава, и ныне:

Отче наш, иже еси на небесех, да святится Имя Твое, да приидет Царствие Твое: да будет воля Твоя, яко на небеси, и на земли. Хлеб наш насущный даждь нам днесь, и остави нам долги наша, якоже и мы оставляем должником нашим: и не введи нас во искушение, но избави нас от лукаваго.

Священник возглас: Яко Твое есть царство, и сила, и слава, Отца, и Сына, и Святаго Духа, ныне и присно, и во веки веков.

Чтец: Аминь.

Господи, помилуй, 12 (раз).

Слава, и ныне:

Приидите, поклонимся Цареви нашему Богу.

Приидите, поклонимся и припадем Христу, Цареви нашему Богу.

Приидите, поклонимся и припадем самому Христу, Цареви и Богу нашему.

И псалом 37

Господи, да не яростию Твоею обличиши мене, ниже гневом Твоим накажеши мене. Яко стрелы Твоя унзоша во мне, и утвердил еси на мне руку Твою. Несть исцеления в плоти моей от лица гнева Твоего, несть мира в костех моих от лица грех моих. Яко беззакония моя превзыдоша главу мою, яко бремя тяжкое отяготеша на мне. Возсмердеша и согниша раны моя от лица безумия моего. Пострадах и слякохся до конца, весь день сетуя хождах. Яко лядвия моя наполнишася поруганий, и несть исцеления в плоти моей. Озлоблен бых и смирихся до зела, рыках от воздыхания сердца моего. Господи, пред Тобою все желание мое, и воздыхание мое от Тебе не утаися. Сердце мое смятеся, остави мя сила моя, и свет очию моею, и той несть со мною. Друзи мои и искреннии мои прямо мне приближишася, и сташа. И ближнии мои отдалече мене сташа, и нуждахуся ищущии душу мою: и ищущии злая мне глаголаху суетная, и льстивным весь день поучахуся. Аз же яко глух не слышах, и яко нем не отверзаяй уст своих, И бых яко человек не слышай, и не имый во устех своих обличения. Яко на Тя, Господи, уповах, Ты услышиши, Господи Боже мой. Яко рех: да не когда порадуют ми ся врази мои: и внегда подвижатися ногам моим, на мя велеречеваша. Яко аз на раны готов, и болезнь моя предо мною есть выну. Яко беззаконие мое аз возвещу, и попекуся о гресе моем. Врази же мои живут, и укрепишася паче мене, и умножишася ненавидящии мя без правды. Воздающии ми злая воз благая оболгаху мя, зане гонях благостыню. Не остави мене, Господи Боже мой, не отступи от мене. Вонми в помощь мою, Господи спасения моего.

(Или псалом 90

Живый в помощи Вышняго, в крове Бога Небеснаго водворится, Речет Господеви: Заступник мой еси и Прибежище мое, Бог мой, и уповаю на Него. Яко Той избавит тя от сети ловчи и от словесе мятежна: Плещма Своима осенит тя, и под криле Его надеешися: оружием обыдет тя истина Его. Не убоишися от страха нощнаго, от стрелы летящия во дни, от вещи во тьме преходящия, от сряща и беса полуденнаго. Падет от страны твоея тысяща, и тьма одесную тебе, к тебе же не приближится: Обаче очима твоима смотриши, и воздаяние грешников узриши. Яко Ты, Господи, упование мое: Вышняго положил еси прибежище твое. Не приидет к тебе зло, и рана не приближится телеси твоему: Яко Ангелом Своим заповесть о тебе, сохранити тя во всех путех твоих. На руках возмут тя, да не когда преткнеши о камень ногу твою: На аспида и василиска наступиши, и попереши льва и змия. Яко на Мя упова и избавлю и: покрыю и, яко позна имя Мое. Воззовет ко Мне, и услышу его: с ним есмь в скорби, изму его, и прославлю его: Долготою дней исполню его и явлю ему спасение Мое.)

Слава, и ныне:

Аллилуия, аллилуия, аллилуия, слава Тебе, Боже. Трижды

Посем диакон глаголет ектению великую:

Миром Господу помолимся.

Лик: Господи, помилуй.

О свышнем мире, и спасении душ наших, Господу помолимся.

Лик: Господи, помилуй.

О мире всего мира, благостоянии святых Божиих церквей и соединении всех, Господу помолимся.

Лик: Господи, помилуй.

О святем храме сем и с верою, благоговением и страхом Божиим входящих вонь, Господу помолимся.

Лик: Господи, помилуй.

О Великом Господине и отце нашем Святейшем Патриархе Кирилле, и о господине нашем высокопреосвященнейшем митрополите (или: архиепископе, или: преосвященнейшем епископе) имярек, честнем пресвитерстве, во Христе диаконстве, о всем причте и людех, Господу помолимся.

Лик: Господи, помилуй.

О Богохранимей стране нашей, властех и воинстве ея, Господу помолимся.

Лик: Господи, помилуй.

О граде сем (или: о веси сей, или о святей обители сей), всяком граде, стране и верою живущих в них, Господу помолимся.

Лик: Господи, помилуй.

О благорастворении воздухов, о изобилии плодов земных и временех мирных, Господу помолимся.

Лик: Господи, помилуй.

О плавающих, путешествующих, недугующих, страждущих, плененных и о спасении их, Господу помолимся.

Лик: Господи, помилуй.

И абие прилагается сия:

О еже не помянути беззаконий и соблазнов нас, грешных и недостойных рабов Своих, но милостивно очистити грехи наша, и отвратити гнев Свой, праведно движимый на ны, Господу помолимся.

Лик: Господи, помилуй.

О еже не яростию Своею обличити, ниже гневом наказати нас, но помянути, яко плоть есмы, дух ходяй и не обращаяйся, и милостивно пощадити от смерти души наша, Господу помолимся.

Лик: Господи, помилуй.

О еже не внити в суд с рабы Своими, и не назрити беззакония наша, но очистити я, и милостиву быти, и пощадити люди согрешшия, Господу помолимся.

Лик: Господи, помилуй.

О еже помянути щедроты и милости Своя, яко от века суть, грехов же юности и неведения нашего не помянути, и помиловати нас, Господу помолимся.

Лик: Господи, помилуй.

О еже услышати от храма Святаго Своего глас наш, и исцелити болезни смертныя, одержащия нас, и потоки беззакония, смутившия нас, изсушити, Господу помолимся.

Лик: Господи, помилуй.

О еже вскоре изъяти нас от сетей смертных, и от болезней адовых избавити, Господу помолимся.

Лик: Господи, помилуй.

О еже милостивно продолжити рабом Своим покаяния время, и не безгодно, яко неплодную смоковницу, посещи, но благосердием окопати, и милосердия росою напоити, плодов покаяния и обращения нашего человеколюбно еще ожидая, Господу помолимся.

Лик: Господи, помилуй.

О еже вознести нас от врат смертных, и меч изъятый, и лук Свой напряженный, и в нем сосуды смертныя, на ны праведно уготованныя со стрелами горящими, милостивно (да не погибнем) от нас отвратити, Господу помолимся.

Лик: Господи, помилуй.

О еже услышати молитву нашу, и моление наше внушити, и слез наших не премолчати, но ослабити нам, да почием прежде даже не отъидем, и ктому не будем, Господу помолимся.

Лик: Господи, помилуй.

О избавитися нам от всякия скорби, гнева и нужды, Господу помолимся.

Лик: Господи, помилуй.

Заступи, спаси, помилуй и сохрани нас, Боже, Твоею благодатию.

Лик: Господи, помилуй.

Пресвятую, Пречистую, Преблагословенную, Славную Владычицу нашу Богородицу и Приснодеву Марию со всеми святыми помянувше, сами себе и друг друга, и весь живот наш Христу Богу предадим.

Лик: Тебе, Господи.

Священник возглас:

Яко подобает Тебе всякая слава, честь и поклонение, Отцу, и Сыну, и Святому Духу, ныне и присно, и во веки веков.

Лик: Аминь.

И абие диакон глаголет во глас 2:

Бог Господь, и явися нам, благословен Грядый во имя Господне.

Стих 1: Исповедайтеся Господеви, яко Благ, яко во веки милость Его.

Стих 2: Обышедше обыдоша мя, и именем Господним противляхся им.

Стих 3: Не умру, но жив буду, и повем дела Господня.

Стих 4: Камень, егоже небрегоша зиждущии, сей бысть во главу угла: от Господа бысть сей, и есть дивен во очесех наших.

Лик же поет: Бог Господь: к коемуждо стиху, во глас 2.

Таже тропарь, глас 2::

Во гневе Твоем, Боже, помяни щедроты Твоя, прах бо и пепел есмы, дух ходяй и не обращаяйся, и не яростию Твоею обличи нас, да не погибнем до конца, но пощади души наша, яко един Милосерд. Дважды.

Слава, и ныне, Богородичен, глас 4:

Заступнице усердная, Мати Господа Вышняго, за всех молиши Сына Твоего Христа Бога нашего, и всем твориши спастися, в державный Твой покров прибегающим. Всех нас заступи, о Госпоже Царице и Владычице, иже в напастех и в скорбех и в болезнех обремененных грехи многими, предстоящих и молящихся Тебе умиленною душею и сокрушенным сердцем пред пречистым Твоим образом со слезами, и невозвратно надежду имущих на Тя, избавления всех зол, всем полезная даруй и вся спаси, Богородице Дево: Ты бо еси Божественный покров рабом Твоим.

Таже п салом 50

Помилуй мя, Боже, по велицей милости Твоей, и по множеству щедрот Твоих очисти беззаконие мое. Наипаче омый мя от беззакония моего, и от греха моего очисти мя. Яко беззаконие мое аз знаю, и грех мой предо мною есть выну. Тебе Единому согреших, и лукавое пред Тобою сотворих: яко да оправдишися во словесех Твоих, и победиши, внегда судити Ти. Се бо в беззакониих зачат есмь, и во гресех роди мя мати моя. Се бо истину возлюбил еси, безвестная и тайная премудрости Твоея явил ми еси. Окропиши мя иссопом, и очищуся: омыеши мя, и паче снега убелюся. Слуху моему даси радость и веселие: возрадуются кости смиренныя. Отврати лице Твое от грех моих, и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи мене от лица Твоего, и Духа Твоего Святаго не отыми от мене. Воздаждь ми радость спасения Твоего, и Духом Владычним утверди мя. Научу беззаконные путем твоим, и нечестивые к Тебе обратятся. Избави мя от кровей, Боже, Боже спасения моего: возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо: всесожжения не благоволиши. Жертва Богу дух сокрушен: сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимские. Тогда благоволиши жертвы правды, возношение и всесожегаемая: тогда возложат на олтарь Твой тельцы.

Канон Пречистей и Единосущней и Животворящей, неразделимей Троице, и ко всем святым , без ирмосов. Глас 8

Песнь 1

Ирмос: Колесницегонителя фараоня:

Вседетельная, и Срасленая, и Сопрестольная, и Единосильная, и Трисветлая Славо, Отче Непостижиме, Сыне и Душе Святый, лютыя болезни рабы Твоя свободи, яко да благодарственно Тя славим.

Грехов буря изрину мя в глубину немощи, и частыя болезни, якоже треволнение мя обуревают окаяннаго: Единосильная Державо, Троице Святая, умилосердися, и спаси мя люте погибающа.

Слава: О содержащаго греза избави, Троице нераздельная, нас Твоя рабы, росою милости Твоея угашающи зной лютых моих болезней, и здравие подающи, яко да православно воспеваем Тя.

И ныне, Богородичен: Избавителя и Вседетеля и Господа во чреве носившая, наша недуги, Всечистая, понесшаго: Того убо моли лютыя немощи Твоя рабы избавити, едина человеков Помоще.

Песнь 3

Ирмос: Небеснаго круга Верхотворче Господи:

Небеснии умове, ангельския чины, Престоли, и Начала, и Силы, и Господьства, молят Тя, Благаго и Спаса: губительнаго свободи недуга рабы Твоя.

Да человеколюбия на мнозе, Владыко, Твоего покажеши бездну, Всесильне, недуга свободи смертоноснаго, и болезней лютых рабы Твоя, Едине Долготерпеливе.

Слава: Яко Божии предстоятели, служебнии дуси, Ангелы и Архангелы, Сего молите, утолити недуг, разорити печаль, смертоносныя же части избавити.

И ныне: Исцелений источника Тя благих показа, бездна из Тебе прошедшая, Христос Господь, Отроковице Пренепорочная, темже рабы Твоя избави, немощи бурею потопляемых.

Таже:

Избави от бед рабы Твоя, Многомилостиве, яко мы усердно к Тебе прибегаем, к милостивому Избавителю, всех Владыце, в Троице славимому Богу.

Посем ектения сугубая:

Помилуй нас, Боже, по велицей милости Твоей, молим Ти ся, услыши и помилуй.

Лик: Господи, помилуй,. трижды

Еще молимся о великом господине и отце нашем святейшем Патриархе Кирилле, и о господине нашем высокопреосвященнейшем митрополите (или: архиепископе, или: преосвященнейшем епископе) имярек, и всей во Христе братии нашей.

Лик: Господи, помилуй, трижды.

Еще молимся о богохранимей стране нашей, властех и воинствах ея, да тихое и безмолвное житие поживем во всяком благочестии и чистоте.

Лик: Господи, помилуй, трижды.

Еще молимся за всю братию и за вся христианы.

Лик: Господи, помилуй, трижды.

Священник возглас:

Яко милостив и Человеколюбец Бог еси, и Тебе славу возсылаев, Отцу, и Сыну, и Святому Духу, ныне и присно, и во веки веков.

Лик: Аминь.

Таже седален, глас 2:

Не отрини до конца согрешшия люди Твоя, Владыко, ниже остави милости и щедроты Твоя о нас, но яко бездна сый щедрот и милосердия пучина, приими мольбы наша, и избави нас от належащия беды и нужды, Един бо еси благоуветливый.

Песнь 4:

Ирмос: Ты моя крепость, Господи:

Ныне сень воистинну смертная обыде, и ко адовым вратом приближи, но Ты, Спасе, яко силен, нас возставивый, удиви милости Твоя, спасаяй в вере несумненной вопиющих: сле Твоей слава, Человеколюбче.

Христовы таинницы, самовидцы и проповедницы, приимшии дар исцеления, и врачеве суще душевнии, о нужде мя, Апостоли, изведите содержащаго недуга, Иисуса моляще Владыку, и Избавителя, и Господа.

Слава: Грехов буря ныне нас постиже, немощи волны обуревают, болезни погружают частыя: скорби бо и болезни нас окаянных обретоша. Апостоли Господни, вашими мольбами, помощи руку подайте.

И ныне, Богородичен: Болезньми лютыми и частыми ударяеми, Дево, вси Тебе припадаем: державным покровом Твоим, Чистая, спаси нас всех, ущедри, Богоневестная, избави мора, и лютыя немощи, и болезни исцели, Владычице.

Песнь 5

Ирмос: Вскую мя отринул еси:

Моря прелести, медоточными вашими моленьми, священнии пророцы потопивше, ныне преложите горесть всю губительныя нынешния немощи, на божественную благомощия сладость.

Пронзени быхом стрелами немощи, повелением Твоим, Господи, и утвердися на нас рука Твоя, Всесильне: яко Бог Щедрый, ущедри всех Твоею милостию, молитвами святых мучеников Твоих.

Слава: Сына якоже древле сына вдовича возставил еси, Твоим повелением, умерщвлена, Слове, лютыя немощи рабы Твоя, яко един Благ и Милостив, избавивый, оживотвори, едине Человеколюбче.

И ныне, Богородичен: В нощи житейстей буря постиже всякаго озлобления, покрыло мя, Дево, немощи омрачение, но возсияй ми прохлаждения, Пречистая, свет, и к свету благомощия настави.

Песнь 6

Ирмос: Очисти мя, Спасе:

В пучине пропасти и немощей облежим, губительныя напасти обуревают волны, Правителю Господи, помощи руку простер ныне, спаси.

Расслабленнаго якоже древле стягнул еси, Божественным манием от недуга болезненнаго, и одра озлобления, и от недуга тяжчайшаго, ущедрив даждь здравие, Многомилостиве.

Слава: Пророческий лик, Апостолов собрание, полк страдальцев ныне молит Тя, едине Многомилостиве, о людех Твоих, Блаже, сих ущедри.

И ныне, Богородичен: Марие, чистое девства Сокровище, Ты очисти нас, и недугов, и скорбей, и содержащия ныне немощи избави, да верою Тя прославим.

Таже:

Избави от бед рабы Твоя, Многомилостиве, яко мы усердно к Тебе прибегаем, к милостивому Избавителю, всех Владыце, в Троице славимому Богу.

Диакон глаголет ектению малую:

Паки и паки миром Господу помолимся.

Лик: Господи, помилуй.

Заступи, спаси, помилуй и сохрани нас, Боже, Твоею благодатию.

Лик: Господи, помилуй.

Пресвятую, Пречистую, Преблагословенную, Славную Владычицу нашу Богородицу и Приснодеву Марию со всеми святыми помянувше, сами себе и друг друга, и весь живот наш Христу Богу предадим.

Лик: Тебе, Господи.

Священник возглас:

Ты бо еси Царь мира, и Спас дущ наших: и Тебе славу возсылаем, Отцу, и Сыну, и Святому Духу, ныне и присно, и во веки веков.

Лик: Аминь.

И по возгласе кондак, глас 6:

Болезни адовы обыдоша нас, и прикры ны сень смертная, и яко воск от огня, дние наши тают от лица гнева Твоего, Господи, но яко Щедр во гневе милости помяни, и пощади люди Твоя, да живи суще, в покаянии славим Тя единаго Человеколюбца.

Диакон: Вонмем, Премудрость, вонмем.

Чтец: Прокимен, глас 4: Господи, да не яростию Твоею обличиши мене, ниже гневом Твоим накажеши мене.

Стих: Яко стрелы Твоя унзоша во мне, и утвердил еси на мне руку Твою.

Диакон: Премудрость.

Чтец: Ко Евреем постания святаго Апостала Павла чтение.

Диакон: Вонмем.

Апостол ко Евреем (зачало 331 от полу)

Братие, егоже любит Господь, наказует: биет же всякаго сына, егоже приемлет. Аще наказание терпите, якоже сыновом обретается вам Бог. Который бо есть сын, егоже не наказует отец; Аще же без наказания есте, емуже причастницы быша вси, убо прелюбодейчищи есте, а не сынове. К сим, плоти нашей отца имехом наказатели, и срамляхомся: не много ли паче повинемся Отцу духовом, и живи будем; Они бо в мало дней, якоже годе им бе, наказоваху нас, а Сей на пользу, да причастимся святыни Его. Всякое бо наказание в настоящее время не мнится радость быти, но печаль: последи же плод мирен наученым тем воздает правды. Темже ослабленныя руки, и ослабленная колена исправите. И стези правы сотворите ногами вашими: да не хромое совратится, но паче да исцелеет.

Священник: Мир ти.

Чтец: И духови твоему.

Аллилуия, гласа

Стих 1: Одержаша мя болезни смертныя, и потоцы беззакония смятоша мя.

Стих 2: Болезни адовы обыдоша мя, предвариша мя сети смертныя.

Диакон: И о сподобитися нам слышанию Святаго Евангелия, Господа Бога молим.

Лик: Господи, помилуй, трижды.

Диакон: Премудрость, прости, услышим Святаго Евангелия.

Священник: Мир всем.

Лик: И духови твоему.

Священник: От Луки Святаго Евангелия чтение.

Лик: Слава Тебе, Господи, слава Тебе.

Диакон: Вонмем.

Евангелие от Луки (зачало 16)

Во время оно, вниде Иисус в дом Симонов, теща же Симонова бе одержима огнем велиим, и молиша Его о ней. И став над нею, запрети огню, и остави ю: абие же воставши служаше им. Заходящу же солнцу, вси елицы имеяху болящия недуги различными, привождаху их к Нему: Он же на едином коегождо их руце возлож, исцеляше их. Исхождаху же и беси от многих, вопиюще и глаголюще: яко Ты еси Христос Сын Божий. И запрещая не даяше им глаголати, яко ведяху Христа Самого суща. Бывшу же дни изшед иде в пусто место: и народи искаху Его, и приидоша до Него, и держахуся Его, да не бы отшел от них. Он же рече к ним: яко и другим градовом благовестити Ми подобает Царствие Божие, яко на се послан есмь. И бе проповедая на сонмищах Галилейских.

Лик: Слава Тебе, Господи, слава Тебе.

Песнь 7

Ирмос: Божия снизхождения:

Опаляет пещь безмерных болезней, и сжигает мя огневицы губительныя пламень непрестанно безстуднейший, но росою милости Твоея, Спасе, прохлади поюща: благословен Бог отец наших.

Пророцы, Апостоли, мучеников собори, божественнии учителие, болезни недугующих нас мольбами укротите, и здравие даруйте поющим: благословен Бог отец наших.

Слава: Словом Лазаря воскресивый, ныне яко из гроба нас лютыя немощи возставивый, оживи, Господи, да вопием песнь благодарственную: благословен Бог отец наших.

И ныне, Богородичен: Щедра сущая, и Мати Всещедраго, ущедривши избави Твоя люди, призывающия милости Твоя, Дево, и поющия: благословен Бог отец наших.

Песнь 8

Ирмос: Седмерицею пещь:

Болезненно стенем, от одра болезни нашея, и от губительныя немощи, вопием к Тебе Человеколюбцу, сердечныя очи ныне простирающе, здравия просим. Посети нас, Спасе, и возстави пети: людие, превозносите во вся веки.

В нашу немощь милостивне облекийся, и уподобитися человеком изволивый, молитвами преподобных Твоих, отчаянных спаси нас, воздвигни из гроба отчаяния пети: отроцы, благословите, священницы, пойте, людие, превозносите во вся веки.

Слава: Содетелю естества, Подателю исцеления, утробы щедрот и благоутробия пучину яко имеяй, Долготерпеливе, посещением посети от губительныя немощи люди Твоя и оживи вопити: священницы, воспойте, людие, превозносите во вся веки.

И ныне, Богородичен: Крепкая Помоще и известное Заступление, отчаявшихся Надежде, Пренепорочная, посети страждущия болезненно рабы Твоя, облегчи тяжесть горькия немощи, отжени недуг губительныя нужди, и спаси рабы Твоя, Дево Богородице.

Песнь 9

Ирмос: Ужасеся о сем небо:

Чудеса велия, ихже несть числа, сотворивый Безсмертне, на рабы Твоя милости Твоя, Боже, яко Милостив покажи, и содержащия нас ныне свободи болезни, моленьми рождшия Тя, и лика страстотерпцев Твоих.

Ангелов, Архангелов и пророков, Апостолов, мучеников, преподобных же, иерархов, священномучеников Твоих молитвами, плач рабов Твоих обрати, Всесильне, в радость: исцели болезнь, облегчи недуги, и здравие нам даруй.

Слава: Душ же и телес Врача, в милости богатаго Господа Тебе молю: исцели страсти моя многия, болезней измени и скорбных мя, яко Благ и един Благодетель, и спасай верою чистою Тя величающих.

И ныне, Богородичен: Щедраго рождшая и Милостиваго, и Владыку, и Создателя, и Господа, и ныне на мне покажи Твоя обычно щедроты, и лютаго мя избави недуга, изнуряющего душу мою, Дево Богородице, и подаждь ми здравие, яко да непрестанно величаю Тя.

Таже:

Достойно есть яко воистинну блажити Тя Богородицу, присноблаженную и пренепорочную, и Матерь Бога нашего. Честнейшую Херувим, и славнейшую без сравнения Серафим, без истления Бога Слова рождшую, сущую Богородицу Тя величаем.

Чтец: Трисвятое. Пресвятая Троице: Отче наш:

Священник: Яко Твое есть Царство, и сила, и слава, Отца, и Сына, и Святаго Духа, ныне и присно, и во веки веков.

Лик: Аминь.

И по возгласе, тропари, глас 6

Помилуй нас, Господи, помилуй нас: всякаго бо ответа недоумеюще, сию Ти молитву яко Владыце грешнии приносим: помилуй нас.

Слава: Господи, помилуй нас, на Тя бо уповахом: не прогневайся на ны зело, ниже помяни беззаконий наших, но призри и ныне яко благоутробен, и избави ны от враг наших: Ты бо еси Бог наш, и мы людие Твои, вси дела руку Твоею, и имся Твое призываем.

И ныне: Милосердия двери отверзи нам, благословенная Богородице, надеющиеся на Тя да не погибнем, но да избавимся Тобою от бед: Ты бо еси спасение рода христианскаго.

По сих же диакон глаголет ектению сию:

Помилуй нас, Боже, по велицей милости Твоей, молим Ти ся, услыши и помилуй.

Лик: Господи, помилуй, трижды.

Еще молимся о великом господине и отце нашем святейшем Патриархе Кирилле, и о господине нашем высокопреосвященнейшем митрополите (или: архиепископе, или: преосвященнейшем епископе) имярек, и всей во Христе братии нашей.

Лик: Господи, помилуй, трижды.

Еще молимся о богохранимей стране нашей, властех и воинствах ея, да тихое и безмолвное житие поживем во всяком благочестии и чистоте.

Лик: Господи, помилуй, трижды.

Прилагает и сия:

Согрешихом и беззаконновахом, сего ради праведный Твой гнев постиже нас, Господи Боже наш, и сень смертная обыде нас, и ко адовым вратом приближихомся, но к Тебе Богу нашему в болезни нашей умильно вопием: пощади, пощади люди Твоя, и не погуби до конца, смиренно молим Ти ся, услыши и помилуй.

Лик: Господи, помилуй, трижды.

Животом и смертию владычествуяй Господи, не затвори в смерти души рабов Твоих, но престани от гнева, и остави ярость, зане исчезают яко дым дние наши, и изсше крепость наша, и погибаем до конца грех ради наших. Милостив буди рабом Твоим, в покаянии со слезами молим Ти ся, услыши и помилуй.

Лик: Господи, помилуй, трижды.

Помяни, яко плоть есмы, Господи, дух ходяй и не обращаяйся, и и милостивно отврати гнев Твой, праведно на ны движимый, имже яко мечем безгодно посецаеши нас: устави болезнь, и утоли язву напрасно губящую нас. Не мертвии бо восхвалят Тя, ниже вси низходящии во ад, но мы живии хвалим Тя, и в болезни сердца стеняще молим Ти ся, услыши и помилуй.

Лик: Господи, помилуй, трижды.

Паче всех согрешихом Тебе, и беззаконновахом, Владыко, и аще покаяния не стяжахом, предложение наше вместо покаяния приими, и на милость преложися, смертоноснаго недуга и болезней лютых яко Всесилен свободи рабы Твоя, болезненно стеняще молим Ти ся, скоро услыши и помилуй.

Лик: Господи, помилуй, трижды.

Не помяни беззаконий и неправд людей Твоих, и не вниди в суд с рабы Твоими, ниже уклонися гневом от рабов Твоих. Аще беззакония назриши Господи, кто постоит; прах бо и пепел есмы, и состав наш яко ничтоже пред Тобою, но яко Щедр и Человеколюбец умилосердися, и не погуби нас во гневе Твоем со беззаконьми нашими, молим Ти ся, Боже Преблагий, услыши и помилуй.

Лик: Господи, помилуй, трижды.

Не хотяй смерти грешных, но еже обратитися и живым быти им, яко живота источник, оживотвори нас праведным Твоим судом смерти достойных: Бог бо еси, живыми и мертвыми обладаяй, и не погуби нас во гневе прещения Твоего, воплем крепким в горести сердца со слезами молим Ти ся, услыши и помилуй.

Лик: Господи, помилуй, трижды.

Милостивно призри, Господи, на озлобление людей Твоих, и умилосердися, и повели Ангелу, простершему руку свою еже погубити всех нас, якоже иногда при Давиде повелел еси, еже доплети ныне и удержати руку свою, да не до конца нас погубит. И мы бо, в покаянии Тебе исповедающеся, яко Давид, вопием: согрешихом и беззаконновахом, и несмы достойны Твоего милосердия, но Ты сам яко Щедр, единаго ради благосердия Твоего умолен быв, покажи милости Твоя древния, и пощади люди, и овцы пажити Твоея, молим Ти ся, скоро услыши и помилуй.

Лик: Господи, помилуй, трижды.

Священник возглас:

Услыши ны, Боже Спасителю наш, упование всех концев земли и сущих в мори далече: и милостив, милостив буди, Владыко, о гресех наших, и помилуй ны. Милостив бо и Человеколюбец Бог еси, и Тебе славу возсылаем, Отцу, и Сыну, и Святому Духу, ныне и присно, и во веки веков.

Лик: Аминь.

Диакон глаголет:

Со умилением паки и паки преклоньше колена, Господу помолимся.

Лик: Господи, помилуй, трижды.

Священник же чтет молитву сию велегласно:

Господи Боже наш, призри с высоты святыя Твоея на молитву нас грешных и недостойных рабов Твоих, беззаконьми нашими Твою благость прогневавших, и благоутробие Твое раздраживших, и не вниди в суд с рабы Твоими, но отврати страшный гнев Твой, праведно на ны движимый, утоли губительное прещение, устави грозный Твой меч, невидимо безгодно секущий нас, и пощади нищих и убогих рабов Твоих, и не затвори в смерти души наша, в покаянии сокрушенных сердцем и со слезами к Тебе Милосердому, Благоуветливому, и Благопременительному Богу нашему припадающих.

Твое бо есть, еже миловати и спасати ны, Боже наш, и Тебе славу возсылаем, Отцу, и Сыну, и Святому Духу, ныне и присно, и во веки веков.

Лик: Аминь.

Диакон: Премудрость.

Священник: Пресвятая Богородице, спаси нас.

Лик: Честнейшую Херувим, и Славнейшую без сравнения Серафим, без истления Бога Слова рождшую, сущую Богородицу, Тя величаем.

Священник: Слава Тебе, Христе Боже, упование наше, слава Тебе.

Лик: Слава, и ныне: Господи, помилуй, трижды. Благослови.

Священник же, или архиерей, творит отпуст обычный дне, или праздника.

 

 

Последование молебнаго пения от наводнения

По окончании Божественной литургии, начало сице:

Диакон: Благослови, владыко.

Благословен Бог наш, всегда, ныне и присно, и во веки веков.

Лик: Аминь.

Диакон: Слава Тебе, Боже наш, слава Тебе.

И мы: Царю небесный, Утешителю, Душе истины, иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.

Таже чтец:

Святый Боже, Святый Крепкий, Святый Безсмертный, помилуй нас. Трижды.

Слава, и ныне:

Пресвятая Троице, помилуй нас: Господи очисти грехи наша; Владыко, прости беззакония наша; Святый, посети и исцели немощи наша, имене Твоего ради.

Господи, помилуй. Трижды

Слава, и ныне:

Отче наш, иже еси на небесех, да святится Имя Твое, да приидет Царствие Твое: да будет воля Твоя, яко на небеси, и на земли. Хлеб наш насущный даждь нам днесь, и остави нам долги наша, якоже и мы оставляем должником нашим: и не введи нас во искушение, но избави нас от лукаваго.

Священник возглас: Яко Твое есть царство, и сила, и слава, Отца, и Сына, и Святаго Духа, ныне и присно, и во веки веков.

Чтец: Аминь.

Господи, помилуй, 12 (раз).

Слава, и ныне:

Приидите, поклонимся Цареви нашему Богу.

Приидите, поклонимся и припадем Христу, Цареви нашему Богу.

Приидите, поклонимся и припадем самому Христу, Цареви и Богу нашему.

Псалом 142

Господи, услыши молитву мою, внуши моление мое во истине Твоей, услыши мя в правде Твоей: И не вниди в суд с рабом Твоим, яко не оправдится пред Тобою всяк живый. Яко погна враг душу мою: смирил есть в землю живот мой: посадил мя есть в темных, яко мертвыя века. И уны во мне дух мой, во мне смятеся сердце мое. Помянух дни древния, поучихся во всех делех Твоих, в творениих руку Твоею поучахся. Воздех к Тебе руце мои: душа моя яко земля безводная Тебе. Скоро услыши мя, Господи, исчезе дух мой: не отврати лица Твоего от мене, и уподоблюся низходящим в ров. Слышану сотвори мне заутра милость Твою, яко на Тя уповах: скажи мне, Господи, путь, воньже пойду, яко к Тебе взях душу мою. Изми мя от враг моих, Господи, к Тебе прибегох. Научи мя творити волю Твою, яко Ты еси Бог мой: дух Твой Благий наставит мя на землю праву. Имене Твоего ради, Господи, живиши мя правдою Твоею: изведеши от печали душу мою: И милостию Твоею потребиши враги моя и погубиши вся стужающия души моей: яко аз раб Твой есмь. Дух Твой Благий наставит мя на землю праву.

Слава, и ныне:

Аллилуия, аллилуия, аллилуия, слава Тебе, Боже. Трижды

Диакон глаголет ектению:

Миром Господу помолимся.

Лик: Господи, помилуй.

О свышнем мире и спасении душ наших, Господу помолимся.

Лик: Господи, помилуй.

О мире всего мира, благостоянии святых Божиих церквей и соединении всех, Господу помолимся.

Лик: Господи, помилуй.

О святем храме сем и с верою, благоговением и страхом Божиим входящих вонь, Господу помолимся.

Лик: Господи, помилуй.

О Великом Господине и отце нашем Святейшем Патриархе Кирилле, и о господине нашем высокопреосвященнейшем митрополите (или: архиепископе, или: преосвященнейшем епископе (имярек), честнем пресвитерстве, во Христе диаконстве, о всем причте и людех, Господу помолимся.

Лик: Господи, помилуй.

О Богохранимей стране нашей, властех и воинстве ея, Господу помолимся.

Лик: Господи, помилуй.

О граде сем (или: о веси сей, или: о святей обители сей), всяком граде, стране и верою живущих в них, Господу помолимся.

Лик: Господи, помилуй.

О благорастворении воздухов, о изобилии плодов земных и временех мирных, Господу помолимся.

Лик: Господи, помилуй.

О плавающих, путешествующих, недугующих, страждущих, плененных и о спасении их, Господу помолимся.

Лик: Господи, помилуй.

И абие прилагает сия:

О еже не в гневе прещения Своего погубити нас грех ради и беззаконий наших, но милости и щедроты Своя от века сущыя помянути, и помиловати нас, Господу помолимся.

Лик: Господи, помилуй.

О еже не по грехом нашим воздати нам, ни по беззаконием нашим наказовати нас, но по велицей милости Своей и по многим щедротам Своим, явити на нас скорое Свое человеколюбие и благость, Господу помолимся.

Лик: Господи, помилуй.

О еже помянути Завет Свой, иже к Ною, и не погубити нас безгодною влагою, и бурным ветров дыханием, но милостивно пощадити достояние Свое и належащую бурю (морскую), и смятение воздуха укротити, и ветром дати временное и мирное дыхание, Господу помолимся.

Лик: Господи, помилуй.

О еже милостивно услышати глас молитвы нашея, и избавити нас от глада, губительства, труса, потопа, огня, града, меча, нашествия иноплеменник, междоусобныя брани, и всякие смертоносныя язвы, Господу помолимся.

Лик: Господи, помилуй.

О избавитися нам от всякия скорби, гнева и нужды, Господу помолимся.

Лик: Господи, помилуй.

Заступи, спаси, помилуй и сохрани нас, Боже, Твоею благодатию.

Лик: Господи, помилуй.

Пресвятую, Пречистую, Преблагословенную, Славную Владычицу нашу Богородицу и Приснодеву Марию со всеми святыми помянувше, сами себе и друг друга, и весь живот наш Христу Богу предадим.

Лик: Тебе, Господи.

Священник возглас:

Яко подобает Тебе всякая слава, честь и поклонение, Отцу, и Сыну, и Святому Духу, ныне и присно, и во веки веков.

Лик: Аминь.

Посем диакон глаголет во глас 6:

Бог Господь, и явися нам, благословен Грядый во имя Господне.

Стих 1: Исповедайтеся Господеви, яко Благ, яко во веки милость Его.

Стих 2: Обышедше обыдоша мя, и именем Господним противляхся им.

Стих 3: Не умру, но жив буду, и повем дела Господня.

Стих 4: Камень, егоже небрегоша зиждущии, сей бысть во главу угла: от Господа бысть сей, и есть дивен во очесех наших.

Лик же поет: Бог Господь: к коемуждо стиху, во глас 6.

И тропари сия, глас 6:

Помилуй нас, Господи, помилуй нас: всякаго бо ответа недоумеюще, сию Ти молитву яко Владыце грешнии приносим: помилуй нас.

Слава: Господи, помилуй нас, на Тя бо уповахом: не прогневайся на ны зело, ниже помяни беззаконий наших, но призри и ныне яко благоутробен, и избави ны от враг наших: Ты бо еси Бог наш, и мы людие Твои, вси дела руку Твоею, и имся Твое призываем.

И ныне: Милосердия двери отверзи нам, благословенная Богородице, надеющиеся на Тя да не погибнем, но да избавимся Тобою от бед: Ты бо еси спасение рода христианскаго.

Таже псалми со сладкопением, во глас 6, поюще по стихом, и тропарь припевающе к коемуждо стиху.

Псалом 6:

Господи, да не яростию Твоею обличиши мене, ниже гневом Твоим накажеши мене.

Тропарь, глас 6: Благоутробне, долготерпеливе и Всещедрый Господи, низпосли милость Твою на люди Твоя.

Помилуй мя, Господи, яко немощен есмь: исцели мя, Господи, яко смятошася кости моя.

Тропарь: Благоутробне, долготерпеливе:  и душа моя смятеся зело: и Ты, Господи, доколе;

Тропарь: Благоутробне, долготерпеливе:

Обратися, Господи, избави душу мою, спаси мя ади милости Твоея.

Тропарь: Благоутробне, долготерпеливе:

Яко несть в смерти поминаяй Тебе, во аде же кто исповестся Тебе;

Тропарь: Благоутробне, долготерпеливе:

Утрудихся воздыханием моим, измыю на всяку нощь ложе мое, слезами моими постелю мою омочу.

Тропарь: Благоутробне, долготерпеливе:

Смятеся от ярости око мое, обетших во всех вразех моих.

Тропарь: Благоутробне, долготерпеливе:

Отступите от мене, вси делающии беззаконие, яко услыша Господь глас плача моего.

Тропарь, глас 6: Благоутробне, долготерпеливе и Всещедрый Господи, низпосли милость Твою на люди Твоя.

Услыша Господь моление мое, Господь молитву мою прият.

Тропарь: Благоутробне, долготерпеливе:

Да постыдятся и смятутся вси врази мои, да возвратятся и устыдятся зело вскоре.

Тропарь: Благоутробне, долготерпеливе:

Слава:

Яко Щедрый, Господи, умилосердися на люди Твоя, и яко долготерпелив презри прегрешения наша, и помилуй ны.

И ныне, Богородичен:

Пресвятая Владычице, Всепетая, Благословенная, яко Благолюбивая заступи, и помилуй ны.

Диакон глаголет малую ектению:

Паки и паки миром Господу помолимся.

Лик: Господи, помилуй.

Заступи, спаси, помилуй и сохрани нас, Боже, Твоею благодатию.

Лик: Господи, помилуй.

Пресвятую, Пречистую, Преблагословенную, Славную Владычицу нашу Богородицу и Приснодеву Марию, со всеми святыми помянувше, сами себе, и друг друга, и весь живот наш Христу Богу предадим.

Лик: Тебе, Господи.

Священник возглас:

Яко Твоя держава, и Твое есть Царство, и сила, и слава, Отца, и Сына, и Святаго Духа, ныне и присно, и во веки веков.

Лик: Аминь.

И псалом 101, по стихом, припевающе тропарь к коемуждо стиху:

Господи, услыши молитву мою, и вопль мой к Тебе да приидет.

Тропарь, глас 6: Милостиве, помилуй, помилуй, помилуй нас, Господи.

Не отврати лица Твоего от мене: воньже аще день скорблю, приклони ко мне ухо Твое: воньже аще день призову Тя, скоро услыши мя.

Тропарь: Милостиве, помилуй:

Яко исчезоша яко дым дние мои, и кости моя яко сушило сосхошася.

Тропарь: Милостиве, помилуй:

Уязвен бых яко трава, и изсше сердце мое, яко забых снести хлеб мой.

Тропарь: Милостиве, помилуй:

От гласа воздыхания моего прильпе кость моя плоти моей.

Тропарь: Милостиве, помилуй:

Уподобихся неясыти пустынней, бых яко нощный вран <на нырищи>8.

Тропарь: Милостиве, помилуй:

Бдех, и бых яко птица особящаяся <на зде>9.

Тропарь: Милостиве, помилуй:

Весь день поношаху ми врази мои, и хвалящии мя мною кленяхуся.

Тропарь: Милостиве, помилуй:

Зане пепел яко хлеб ядях, и питие мое с плачем растворях,

Тропарь: Милостиве, помилуй:

От лица гнева Твоего и ярости Твоея: яко вознес низвергл мя еси.

Тропарь: Милостиве, помилуй:

Дние мои яко сень уклонишася, и аз яко сено изсхох.

Тропарь: Милостиве, помилуй:

Ты же, Господи, во век пребываеши, и память Твоя в род и род.

Тропарь: Милостиве, помилуй:

Ты воскрес ущедриши Сиона: яко время ущедрити его, яко прииде время.

Тропарь: Милостиве, помилуй:

Яко благоволиша раби Твои камение его, и персть его ущедрят.

Тропарь, глас 6: Милостиве, помилуй, помилуй, помилуй нас, Господи.

И убоятся языцы имене Господня, и вси щарие земстии славы Твоея.

Тропарь: Милостиве, помилуй:

Яко созиждет Господь Сиона, и явится во славе Своей.

Тропарь: Милостиве, помилуй:

Призри на молитву смиренных, и не уничижи моления их.

Тропарь: Милостиве, помилуй:

Да напишется сие в род ин, и людие зиждемии восхвалят Господа.

Тропарь: Милостиве, помилуй:

Яко приниче с высоты святыя Своея, Господь с небесе на землю призре.

Тропарь: Милостиве, помилуй:

Услышати воздыхание окованных, разрешити сыны умерщвленных.

Тропарь: Милостиве, помилуй:

Возвестити в Сионе имя Господне, и хвалу Его во Иерусалиме.

Тропарь: Милостиве, помилуй:

Внегда собратися людем вкупе и царем, еже работати Господеви.

Тропарь: Милостиве, помилуй:

Отвеща Ему на пути крепости Его: умаление дней моих возвести ми.

Тропарь: Милостиве, помилуй:

Не возведи мене во преполовение дней моих: в род родов лета Твоя.

Тропарь: Милостиве, помилуй:

В началех Ты, Господи, землю основал еси, и дела руку Твоею суть небеса.

Тропарь: Милостиве, помилуй:

Та погибнут, Ты же пребываеши: и вся яко риза обетшают, и яко одежду свиеши я, и изменятся.

Тропарь: Милостиве, помилуй:

Ты же тойжде еси, и лета Твоя не оскудеют.

Тропарь: Милостиве, помилуй:

Сынове раб Твоих вселятся, и семя их во век исправится

Тропарь, глас 6: Милостиве, помилуй, помилуй, помилуй нас, Господи.

Слава:

Яко Щедрый, Господи, умилосердися на люди Твоя, и яко долготерпелив презри прегрешения наша, и помилуй ны.

И ныне, Богородичен:

Пресвятая Владычице, Всепетая, Благословенная, яко Благолюбивая заступи, и помилуй ны.

Диакон глаголет малую ектению:

Паки и паки миром Господу помолимся.

Лик: Господи, помилуй.

Заступи, спаси, помилуй и сохрани нас, Боже, Твоею благодатию.

Лик: Господи, помилуй.

Пресвятую, Пречистую, Преблагословенную, Славную Владычицу нашу Богородицу и Приснодеву Марию, со всеми святыми помянувше, сами себе, и друг друга, и весь живот наш Христу Богу предадим.

Лик: Тебе, Господи.

Священник возглас:

Яко Твоя держава, и Твое есть Царство, и сила, и слава, Отца, и Сына, и Святаго Духа, ныне и присно, и во веки веков.

Лик: Аминь.

И псалом 129, такожде по стихом:

Из глубины воззвах к Тебе, Господи: Господи, услыши глас мой.

Тропарь, глас 6: Яко щедрый, Господи, умилосердися на люди Твоя, и яко долготерпелив презри прегрешения наша, и помилуй ны.

Да будут уши Твои внмлюще гласу моления моего.

Тропарь: Яко щедрый, Господи:

Аще беззакония назриши, Господи, Господи, кто постоит; яко у Тебе очищение есть.

Тропарь: Яко щедрый, Господи:

Имене ради Твоего потерпех Тя, Господи, потерпе душа моя в слово Твое: упова душа моя на Господа.

Тропарь: Яко щедрый, Господи, умилосердися на люди Твоя, и яко долготерпелив презри прегрешения наша, и помилуй ны.

О стражи утренния до нощи, от стражи утренния да уповает Израиль на Господа.

Тропарь: Яко щедрый, Господи:

Яко у Господа милость, и многое у Него избавление: и Той избавит Израиля от всех беззаконий его.

Тропарь: Яко щедрый, Господи:

Слава:

Яко щедрый, Господи, умилосердися на люди Твоя, и яко долготерпелив презри прегрешения наша, и помилуй ны.

И ныне, Богородичен:

Пресвятая Владычице, Всепетая, Благословенная, яко Благолюбивая, помози предстательством Твоим, и помилуй ны.

Посем чтец глаголет псалом 50:

Помилуй мя, Боже, по велицей милости Твоей, и по множеству щедрот Твоих очисти беззаконие мое. Наипаче омый мя от беззакония моего, и от греха моего очисти мя. Яко беззаконие мое аз знаю, и грех мой предо мною есть выну. Тебе Единому согреших, и лукавое пред Тобою сотворих: яко да оправдишися во словесех Твоих, и победиши, внегда судити Ти. Се бо в беззакониих зачат есмь, и во гресех роди мя мати моя. Се бо истину возлюбил еси, безвестная и тайная премудрости Твоея явил ми еси. Окропиши мя иссопом, и очищуся: омыеши мя, и паче снега убелюся. Слуху моему даси радость и веселие: возрадуются кости смиренныя. Отврати лице Твое от грех моих, и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи мене от лица Твоего, и Духа Твоего Святаго не отыми от мене. Воздаждь ми радость спасения Твоего, и Духом Владычним утверди мя. Научу беззаконные путем твоим, и нечестивые к Тебе обратятся. Избави мя от кровей, Боже, Боже спасения моего: возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо: всесожжения не благоволиши. Жертва Богу дух сокрушен: сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимские. Тогда благоволиши жертвы правды, возношение и всесожегаемая: тогда возложат на олтарь Твой тельцы.

Канон покаянный ко Господу нашему Иисусу Христу. Глас 6

Песнь 1

Ирмос: Помощник и покровитель бысть мне во спасение, сей мой Бог, и прославлю Его: Бог отца моего, и вознесу Его: славно бо прославися.

Припев: Помилуй мя, Боже, помилуй мя.

Избавителю мой Иисусе, якоже очистил еси от многих прегрешений блудницу, иногда покаявшуюся сокрушенне: молюся Ти, и мене очисти от безчисленных зол моих, яко милостив.

Помилуй мя, Боже, помилуй мя.

Плавая в суетнем помышлении жития, Иисусе, в лютей сей пучине, во истопления впадох многая, от нихже избавив, спаси мя.

Слава: Разреши мя, Слове, от союз безчисленных моих зол, да свободне шествую в покаянии праведныя стези Твоя, в божественное наставляющия покоище вечных радостей.

И ныне: Покаяния ми, Дево, покажи пути, и на отводящия мя от греха возврати стези: да Тя пою многопетую Божию Родительницу.

Песнь 3

Ирмос: Утверди, Господи, на камени заповещей Твоих, подвигшееся сердце мое, яко един Свят еси и Господь.

Помилуй мя, Боже, помилуй мя.

Милостивным Твоим оком призри мя, егда хощу пред Тобою предстати и судитися, едине Благопременителю Господи.

Помилуй мя, Боже, помилуй мя.

Воздыхающа мя приими, якоже мытаря из глубины душевныя, и покаяние ми даруй, Спасе, греха всякаго мя избавляющее.

Слава: Скверны злобные омыв моего сердца, и явитися ми непорочну пред Тобою в день Страшный сподоби, Христе мой, яко Преблагий.

И ныне: Низпадшим исправление, Богородице, падшаго мя воздвигни из рова зол моих, и утверди, Владычице, на камени заповедей Божиих.

Катавасия: Избави от бед рабы Твоя, Милостиве, яко мы усердно к Тебе прибегаем, к милостивому Избавителю, всех Владыце Господу Иисусу.

Диакон:

Помилуй нас, Боже, по велицей милости Твоей, молим Ти ся, услыши и помилуй.

Лик: Господи, помилуй. Трижды

Еще молимся о великом господине и отце нашем святейшем Патриархе Кирилле, и о господине нашем высокопреосвященнейшем митрополите (или: архиепископе, или: преосвященнейшем епископе) имярек, и всей во Христе братии нашей.

Лик: Господи, помилуй, трижды.

Еще молимся о богохранимей стране нашей, властех и воинствах ея, да тихое и безмолвное житие поживем во всяком благочестии и чистоте.

Лик: Господи, помилуй, трижды.

Еще молимся о блаженных и приснопамятных создателех святаго храма сего, и о всех преждепочивших отцех и братиях, зде лежащих и повсюду, православных.

Лик: Господи, помилуй, трижды.

Еще молимся о милости, жизни, мире, здравии, спасении, посещении, прощении и оставлении грехов рабов Божиих.

Лик: Господи, помилуй, трижды.

Еще молимся о плодоносящих и доброделающих во святем и всечестнем храме сем, труждающихся, поющих и предстоящих людех, ожидающих от Тебе великия и богатыя милости.

Лик: Господи, помилуй, трижды.

Священник возглас:

Яко милостив и человеколюбец Бог еси, и Тебе славу возсылаем, Отцу, и Сыну, и Святому Духу, ныне и присно, и во веки веков.

Лик: Аминь.

Песнь 4

Ирмос: Услыша пророк пришествие Твое, Господи, и убояся, яко хощеши от Девы родитися, и человеком явитися, и глаголаше: услышах слух Твой, и убояхся: слава силе Твоей, Господи.

Помилуй мя, Боже, помилуй мя.

Токи слех даждь ми, изсушающия страстей моих источники, и греха всякаго тимения омывающия, Щедре, Многомилостиве, и угашающия огня геенскаго вечнующий пламень неугасимый.

Помилуй мя, Боже, помилуй мя.

Непрестанно чешу струпы души моея сластолюбием, и пребываю неисцелен, в чувство сам приити не хотя, кто буду; и что сотвори; Христе щедрый, исцелив спаси мя.

Слава: Прельсти мя вкушением греховным враг льстец, и от Тебе, Блаже, далече удали, и зубом своим снедь содела мя: едине Спасе, потщися изъяти мя.

И ныне: Всепетая Владычице, влегласно воспевающаго Ти исполни всякия радости мою мысль, подающи ми плач неутешный, и покаяния сладость и разум спасения.

Песнь 5

Ирмос: От нощи утренююща, Человеколюбче, просвети, молюся, и настави и мене на повеления Твоя, и научи мя, Спасе, творити волю Твою.

Помилуй мя, Боже, помилуй мя.

Се иже талант Твой сокрывый, Христе, ленивый раб Твой, и упразднивыйся лукавыми страстей деянии, предстою Тебе каяйся: темже не посли мене во огнь.

Помилуй мя, Боже, помилуй мя.

Твой сын быв благодатю, благоутробне Христе, поработихся врагу, и от Тебе удалихся жив блудно: темже обратив мя спаси.

Слава: Иже блудницу очистивый, и прокаженныя Твоим повелением, Содетелю всяческих, сквернаго греха смиренную душу мою очисти, и одеждами блистающими красну соделай, Владыко, молюся.

И ныне: Врата непроходимая, отверзи ми врата, молюся, покаяния истиннаго, и покажи ми стезю покаяния, Чистая, всех Наставнице.

Песнь 6

Ирмос: Возопих всем сердцем моим к щедрому Богу, и услыша мя от ада преисподняго, и возведе от тли живот мой.

Помилуй мя, Боже, помилуй мя.

Не покажи мене бесом обрадование в день Страшный, Христе Иисусе, да не услышу тогда гласа отсылающаго во огнь геенский.

Помилуй мя, Боже, помилуй мя.

Погрузи мя во глубине прегрешений, иже праведных враг, но к щедрот Твоих притекаю пучине, Иисусе: к пристанищу жизни ныне направи мя.

Слава: Яко мытарь воздыхаю, якоже блудница слезю, яко Петр вопию, многими погружаемь прегрешении, Христе: помощи ми руку даждь и спаси мя.

И ныне: Святая Богородице, яже Святое Слово рождшая плотию, Единаго освящающаго всех святых, освяти мой ум, в лукавых делех присно пребывающий.

Катавасия: Избави от бед рабы Твоя, Милостиве, яко мы усердно к Тебе прибегаем, к милостивому Избавителю, всех Владыце Господу Иисусу.

Диакон глаголет ектению малую:

Паки и паки миром Господу помолимся.

Лик: Господи, помилуй.

Заступи, спаси, помилуй и сохрани нас, Боже, Твоею благодатию.

Лик: Господи, помилуй.

Пресвятую, Пречистую, Преблагословенную, Славную Владычицу нашу Богородицу и Приснодеву Марию, со всеми святыми помянувше, сами себе, и друг друга, и весь живот наш Христу Богу предадим.

Лик: Тебе, Господи.

Священник возглас:

Яко Твоя держава, и Твое есть Царство и сила и слава, Отца, и Сына, и Святаго Духа, ныне и присно и во веки веков.

Лик: Аминь.

Диакон: Вонмем.

Священник: Мир всем.

Чтец: И духови твоему.

Диакон: Премудрость, вонмем.

Чтец: Прокимен, глас 8: Господи, да не яростию Твоею обличиши мене, ниже гневом Твоим накажеши мене.

Стих: Не отврати лица Твоего от отрока Твоего.

Лик припевает по чину:

Диакон: Премудрость.

Чтец: Ко Евреем послания святаго Апостола Павла чтение.

Диакон: Вонмем.

Апостол к Евреем (зачало 331, от полу)

Братие, егоже любит Господь, наказует: биет же всякаго сына, егоже приемлет. Аще наказание терпите, якоже сыновом обретается вам Бог. Который бо есть сын, егоже не наказует отец; аще же без наказания есте, емуже причастницы быша вси, убо прелюбодейчищи есте, а не сынове. К сим, плоти нашей отцы имехом наказатели, и срамляхомся: не много ли паче повинемся отцу духовом, и живи будем; Они бо в мало дней, якоже годе им бе, наказоваху нас, а Сей на пользу, да причастимся святыни Его. Всякое бо наказание в настоящее время не мнится радость быти, но печаль: последи же плод мирен наученым тем воздает правды. Темже ослабленныя руки, и ослабленная колена исправите. И стези правы сотворите ногами вашими: да не хромое совратится, но паче да исцелеет.

Священник: Мир ти.

Чтец: И духови твоему.

Диакон: Премудрость.

Аллилуиа

Стих: Боже, отринул ны еси, и низложил еси нас, разгневался еси, и ущедрил еси нас.

Диакон:

И о сподобитися нам слышанию Святаго Евангелия Господа Бога молим.

Лик: Господи, помилуй, трижды.

Диакон: Премудрость, прости, услышим Святаго Евангелия.

Священник: Мир всем.

Лик: И духови твоему.

Священник: От Матфея Святаго Евангелия чтение.

Лик: Слава Тебе, Господи, слава Тебе.

Диакон: Вонмем.

Евангелие от Матфея (зачало 27)

Во время оно, влезшу Иисус в корабль, по нем идоша ученицы Его. И се трус велик бысть в мори, якоже кораблю покрыватися волнами: Той же спаше. И пришедше ученицы Его, возбудиша Его, глаголюще: Господи, спаси ны, погибаем. И глагола им: что страшливи есте, маловери; тогда востав запрети ветром и молю, и бысть тишина велия. Человецы же чудишася, глаглюще: Кто есть Сей, яко и ветри и море послушают Его;

Лик: Слава Тебе, Господи, слава Тебе.

Песнь 7

Ирмос: Согрешихом, беззаконовахом, неправдовахом пред Тобою, ниже соблюдохом, ниже сотворихом, якоже заповедал еси нам: но не предаждь нас до конца, отцев Боже.

Помилуй мя, Боже, помилуй мя.

Взираю на милость Твою безмерную, безмерно согрешивый, вем Твое милосердие, вем долготерпение и незлобие: покаяния ми даруй плоды, щедрый Христе, и спаси мя.

Помилуй мя, Боже, помилуй мя.

Уврачуй, Щедре, сердца моего неисцельныя страсти, даруй отпущение долгов моих, тяжкое бремя облегчи, да во умилении Тя славлю присно отцев Бога.

Слава: В беззакониих зачат и родихся окаянный, и согреших паче всех человек, но обращения ми подаждь время, исправляющее мя.

И ныне: Емуже предстоят с трепетом небеснии чини, Того родила еси, Чистая, примирившагося человеком за благость: Егоже прилежно моли ущедрити рабы Твоя.

Песнь 8

Ирмос: Егоже воинства небесная славят, и трепещут Херувими и Серафими, всяко дыхание и тварь, пойте, благословите, и превозносите во вся веки.

Помилуй мя, Боже, помилуй мя.

Взираю на великое богатство щедрот Твоих, Христе, и якоже Давид, согрешив паче онаго, зову со онем: Едине Милостиве, помилуй мя вскоре.

Помилуй мя, Боже, помилуй мя.

Конец благ быти ми, молюся, положити же предел лукавым деянием, егда же конец не усердствую, ожесточенное имея мое сердце, Сам обрати мя, Божий Слове.

Слава: Руце всякими осквернила еси злодеяньми, душе моя: и како те воздеваеши на высоту беседующи Богу; нозе блазненне сотворила еси, на дела ходящи студная: како не обращаешися ходити покаянием в пути спасительныя;

И ныне: Волнуема мя бурею греховною, вопию Ти, Владычице Чистая, Твоим ходатайством направи мя ко спасительному покаянию, и ко всеутишному пристанищу, яко да увижу свет спасения, омрачаемый присно леностию.

Песнь 9

Ирмос: Безсеменнаго зачатия рождество несказанное, Матери безмужныя нетленен Плод: Божие бо рождение обновляет естества. Темже Тя вси роди, яко Богоневестную Матерь, православно величаем.

Помилуй мя, Боже, помилуй мя.

Иисусе Человеколюбче, Едине немощь нашу вéдый, в сию бо облеклся еси милосердия ради, хотя сию подкрепити: темже утверди нас на пути спасения, и скверны лукавыя, и гноения зол моих очисти, и спаси мя.

Помилуй мя, Боже, помилуй мя.

Яко блудница, слезы вместо дел приношу Ти, Человеколюбче: яко мытарь, стеня покаянием взываю Ти: якоже Хананея со смирением вопию: и якоже Петр покаявшийся, прощения умоляю.

Слава: Да и аз спасаемь благодарственно Тебе, Христе, величаю, призри на мя, многи раны от душевреднаго врага на плещу приемшаго и исцели яко в разбойники впадшаго, вино на них и елей возливая Твоего, Спасе, благоутробия.

И ныне: Просветительными молениями, Всенепорочная, к рожденному от Тебе Сыну Божию верою поющыя Тя просвети ти: и тьмы нас кромешныя, и вечныя муки изми Твоим предстательством.

Таже лик:

Достойно есть яко воистинну блажити Тя Богородицу, присноблаженную и пренепорочную, и Матерь Бога нашего. Честнейшую Херувим, и славнейшую без сравнения Серафим, без истления Бога Слова рождшую, сущую Богородицу Тя величаем.

Чтец: Трисвятое. Пресвятая Троице: Отче наш:

Священник: Яко Твое есть Царство, и сила, и слава, Отца, и Сына, и Святаго Духа, ныне и присно, и во веки веков.

Лик: Аминь.

И поет тропарь Богородице, глас 4:

Заступнице Усердная, Мати Господа Вышняго, за всех молиши Сына Твоего, Христа Бога нашего, и всем твориши спастися, в державный Твой покров прибегающим. Всех нас заступи, о Госпоже Царице и Владычице, иже в напастех и скорбех, и в болезнех обремененных грехи многими, предстоящих и молящихся Тебе умиленною душею, и сокрушенным сердцем, пред Пречистым Твоим образом со слезами, и непостыдну надежду имущих на Тя, избавления всех зол, всем полезная даруй, и вся спаси, Богородице Дево: Ты бое си Божественный покров рабом Твоим.

Диакон:

Помилуй нас, Боже, по велицей милости Твоей молим Ти ся, услыши и помилуй.

Лик: Господи, помилуй, трижды.

Достойная казнем сотворихом, и праведный суд Твой постиже нас, Господи: но пощади, пощади люди согрешшия, и отврати гнев Твой праведно на ны движимый, в покаянии к Тебе припадаем и смиренно молим Тя, услыши и помилуй.

Лик: Господи, помилуй, трижды.

Да не потопит нас, Господи, буря водная, и да не растлиши землю, и гладом умориши нас людей Твоих, но яко Благ устави водное стремление, и мерному онаго течению с благорастворенными воздухи быти яко Силен повели, к Тебе Богатому в милости и Безмерному в щедротах, сердцем сокрушенным молим Ти ся, услыши и помилуй.

Лик: Господи, помилуй, трижды.

Еще молимся о еже сохранитися царствующему граду сему и всякому граду и стране от глада, губительства, труса, потопа, огня, меча, нашествия иноплеменников и междоусобныя брани: о еже милостиву и благоуветливу быти Благому и Человеколюбивому Богу нашему, отврати всякий гнев на ны движимый, и избавити ны от належащаго и праведнаго Своего прещения и помиловати ны.

Лик: Господи, помилуй, трижды.

Еще молимся, и о еже услышати Господу Богу глас моления нас грешных, и помиловати нас.

Лик: Господи, помилуй, трижды.

Священник возглас:

Услыши ны, Боже Спасителю наш, упование всех концев земли и сущих в мори далече: и милостив, милостив буди, Владыко, о гресех наших, и помилуй ны. Милостив бо и Человеколюбец Бог еси, и Тебе славу возсылаем, Отцу, и Сыну, и Святому Духу, ныне и присно, и во веки веков.

Лик: Аминь.

Диакон: Вонмем, и во умилении сердца, колена душ и телес наших преклоньше, Господу помолимся.

Священник преклонь колена, со всяким вниманием и умилением сердца, глаголет молитву сию велегласно:

Господи, Едине в милости Богатый, и утробами благости приклоняяйся к молением нас грешных и недостойных раб Твоих: вся наша полезно строяй, и премудрым Твоим промыслом житие наше исправляяй, и всяким образом спасения нашего желаяй, естеством долготерпелив сый и многомилостив, наказуяй, и паки милуяй, и наказание во благо нам обращаяй, не во еже погубити создание рук Твоих, но паче еже к начальной доброте паки привести, и всем образы смотряяй, еже паки спастися, и падшее от падежа возставити. Сам, Владыко Вседержителю, призри на ны, и вонми молением нас грешных: аще бо множество беззаконий наших недерзновенны нас сотвори, и ниже смети отнюд просити прощения о прегрешениих: но ведуще Твое человеколюбие, благоутробие, многую милость, долготерпение, беззлобие, и премногую благость, дерзающе на множество сих и на богатство благости Твоея, воздеем руце, и прилежно вопием Ти: согрешихом, беззаконновахом, нечествовахом, забыхом заповеди Твоя, и в след мысли нашея лукавыя ходихом, и яко недостойно званию и Евангелию Христа Твоего, жительствовахом, ниже святым Его страстем, и еже о нас истощанию последовахом, яко быхом поношение имени христианскому и Церкви: вси вкупе уклонихомся, непотребни быхом, несть творяй благостыню, суд и правду, несть до единаго. Темже затворихом щедроты Твоя, и человеколюбие Твое, и утробы милости Бога нашего, злобы ради нашея и лукавства начинаний: Ты благ еси, но мы люте беззаконновахом: Ты долготерпелив, но мы нераскаянни пребыхом: вемы же Твою благость, аще и неразумиви есмы: ныне исповедуем, яко мало, о нихже согрешихом, биени быхом, веруем, яко Ты страшен еси, и кто противостанет Ти; трепет приимут от Тебе горы, и величеству мышцы Твоея кто противоречет; аще заключиши небо, кто отверзет; и аще отверзеши хляби Твоя, кто отвратит; легко есть пред очима Твоима оскудити и обогатити, оживити и умертвити, поразити и исцелити: но мы всякия казни достойни сотворихомся: мы согрешихом, Ты же праведно разгневался еси, но престани, Господи, от гнева, ослаби, Господи, умилостивися, Господи, и не предаждь нас до конца беззаконий ради наших, милость бо Твоя неизреченна, и человеколюбие Твое непобедимо, и богатство благости Твоея неистощимо и неоскудеемо, на няже и дерзающе, молимся и мили ся деем, преклоняюще колена сердец наших: укроти ярость Твою праведную, и даждь алчущым пищу, нагим одеяние, сиротам пристанище, страждущым здравие, немощствующым крепость, всяк недуг, и всякую язю, и всяку нужду и скорбь отжени от людей Твоих: всех же от напасти свободи, соблюдаяй безнаветны по бывшей скорби, и сохраняяй вседержительною Твоею рукою всегда неприкосновенны от лютаго сего озлобления и губительнаго сокрушения. Аще же обратимся на беззакония, Ты Сам направи от лукавыя совести всех нас к покаянию, и даждь во всяком благодеянии благоугодити Тебе: молитвами неискусомужно Тебе рождшия Пречистыя Богоматере, Приснодевы Марии, предстательствы святых и хранителей наших Ангел.

Яко Ты еси милости Источник и благоутробия неизследимая пучина, и Тебе славу возсылаем, со Безначальным Твоим Отцем и с Пресвятым, и Благим, и Животворящим Твоим Духом, ныне и присно, и во веки веков. Аминь

Лик: Аминь.

Диакон: Премудрость.

Священник: Пресвятая Богородице, спаси нас.

Лик: Честнейшую Херувим, и Славнейшую без сравнения Серафим, без истления Бога Слова рождшую, сущую Богородицу, Тя величаем.

Священник: Слава Тебе, Христе Боже, упование наше, слава Тебе.

Лик: Слава, и ныне: Господи, помилуй, трижды. Благослови.

Священник творит отпуст.

Чин молебнаго пения во дни губительных бедствий и техногенных катастроф

 

Диакон: Благослови, владыко.

Священник: Благословен Бог наш, всегда, ныне и присно, и во веки веков.

Лик: Аминь.

Диакон: Слава Тебе, Боже наш, слава Тебе.

И мы: Царю небесный, Утешителю, Душе истины, иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.

Таже чтец:

Святый Боже, Святый Крепкий, Святый Безсмертный, помилуй нас. Трижды.

Слава, и ныне:

Пресвятая Троице, помилуй нас: Господи очисти грехи наша; Владыко, прости беззакония наша; Святый, посети и исцели немощи наша, имене Твоего ради.

Господи, помилуй. Трижды

Слава, и ныне:

Отче наш, иже еси на небесех, да святится Имя Твое, да приидет Царствие Твое: да будет воля Твоя, яко на небеси, и на земли. Хлеб наш насущный даждь нам днесь, и остави нам долги наша, якоже и мы оставляем должником нашим: и не введи нас во искушение, но избави нас от лукаваго.

Священник возглас: Яко Твое есть царство, и сила, и слава, Отца, и Сына, и Святаго Духа, ныне и присно, и во веки веков.

Чтец: Аминь.

Господи, помилуй, 12 (раз).

Слава, и ныне:

Приидите, поклонимся Цареви нашему Богу.

Приидите, поклонимся и припадем Христу, Цареви нашему Богу.

Приидите, поклонимся и припадем самому Христу, Цареви и Богу нашему.

Псалом 50

Помилуй мя, Боже, по велицей милости Твоей, и по множеству щедрот Твоих очисти беззаконие мое. Наипаче омый мя от беззакония моего, и от греха моего очисти мя. Яко беззаконие мое аз знаю, и грех мой предо мною есть выну. Тебе Единому согреших, и лукавое пред Тобою сотворих: яко да оправдишися во словесех Твоих, и победиши, внегда судити Ти. Се бо в беззакониих зачат есмь, и во гресех роди мя мати моя. Се бо истину возлюбил еси, безвестная и тайная премудрости Твоея явил ми еси. Окропиши мя иссопом, и очищуся: омыеши мя, и паче снега убелюся. Слуху моему даси радость и веселие: возрадуются кости смиренныя. Отврати лице Твое от грех моих, и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи мене от лица Твоего, и Духа Твоего Святаго не отыми от мене. Воздаждь ми радость спасения Твоего, и Духом Владычним утверди мя. Научу беззаконные путем твоим, и нечестивые к Тебе обратятся. Избави мя от кровей, Боже, Боже спасения моего: возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо: всесожжения не благоволиши. Жертва Богу дух сокрушен: сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимские. Тогда благоволиши жертвы правды, возношение и всесожегаемая: тогда возложат на олтарь Твой тельцы.

Слава, и ныне:

Аллилуия, аллилуия, аллилуия, слава Тебе, Боже. Трижды

И абие диакон глаголет во глас 8:

Бог Господь, и явися нам, благословен Грядый во имя Господне.

Стих 1: Исповедайтеся Господеви, яко Благ, яко во веки милость Его.

Стих 2: Обышедше обыдоша мя, и именем Господним противляхся им.

Стих 3: Не умру, но жив буду, и повем дела Господня.

Стих 4: Камень, егоже небрегоша зиждущии, сей бысть во главу угла: от Господа бысть сей, и есть дивен во очесех наших.

Лик же поет: Бог Господь: к коемуждо стиху, во глас 2.

Таже тропарь, глас 8:

Призираяй на землю и творяй ю трястися, <избави ны страшнаго прещения Твоего, Христе Боже наш>, и низпосли нам богатыя милости Твоя, молитвами Богородицы, и спаси ны.

Слава, глас 6:

Иже древле в Вавилоне гордыя языки поразивый, Господи, праведнаго Твоего прещения избави ны. Пощади грешныя люди Твоя, яже стяжал еси Твоею Кровию, не предаждь нас погибели от дел рук наших, иного бо разве Тебе Бога не вемы, и воззови погибающим: Аз есмь с вами, и никтоже на вы.

И ныне, глас тойже:

Милосердия двери отверзи нам, Благословенная Богородице, надеющиися на Тя да не погибнем, но да избавимся Тобою от бед, Ты бо еси спасение рода христианскаго.

Диакон: Вонмем, премудрость, вонмем.

Чтец: Прокимен, глас 4: Буди, Господи, милость Твоя на нас, якоже уповахом на Тя.

Стих: Услышит тя Господь в день печали.

Диакон: Премудрость.

Чтец: Ко Евреем послание святаго Апостола Павла чтение.

Диакон: Вонмем.

Апостол ко Евреем (зачало 331 от полу)

Братие, егоже любит Господь, наказует: биет же всякаго сына, егоже приемлет. Аще наказание терпите, якоже сыновом обретается вам Бог. Который бо есть сын, егоже не наказует отец; Аще же без наказания есте, емуже причастницы быша вси, убо прелюбодейчищи есте, а не сынове. К сим, плоти нашей отца имехом наказатели, и срамляхомся: не много ли паче повинемся Отцу духовом, и живи будем; Они бо в мало дней, якоже годе им бе, наказоваху нас, а Сей на пользу, да причастимся святыни Его. Всякое бо наказание в настоящее время не мнится радость быти, но печаль: последи же плод мирен наученым тем воздает правды. Темже ослабленныя руки, и ослабленная колена исправите. И стези правы сотворите ногами вашими: да не хромое совратится, но паче да исцелеет.

Священник: Мир ти.

Чтец: И духови твоему.

Аллилуия, глас 4:

Боже, отринул ны еси и низложил еси нас.

Стих: Господи, да не яростию Твоею обличиши мене, ниже гневом Твоим накажеши мене.

Диакон: Премудрость, прости, услышим Святаго Евангелия.

Священник: Мир всем.

Лик: И духови твоему.

Священник: От Матфея Святаго Евангелия чтение.

Лик: Слава Тебе, Господи, слава Тебе.

Диакон: Вонмем.

Евангелие от Матфея (зачало 27)

Во время оно, влезшу Иисус в корабль, по нем идоша ученицы Его. И се трус велик бысть в мори, якоже кораблю покрыватися волнами: Той же спаше. И пришедше ученицы Его, возбудиша Его, глаголюще: Господи, спаси ны, погибаем. И глагола им: что страшливи есте, маловери; тогда востав запрети ветром и молю, и бысть тишина велия. Человецы же чудишася, глаглюще: Кто есть Сей, яко и ветри и море послушают Его;

Лик: Слава Тебе, Господи, слава Тебе.

Диакон глаголет ектению:

Помилуй нас, Боже, по велицей милости Твоей, молим Ти ся, услыши и помилуй.

Лик: Господи, помилуй, трижды.

Еще молимся о великом господине и отце нашем святейшем Патриархе Кирилле, и о господине нашем высокопреосвященнейшем митрополите (или: архиепископе, или: преосвященнейшем епископе) имярек, и всей во Христе братии нашей.

Лик: Господи, помилуй, трижды.

Еще молимся о богохранимей стране нашей, властех и воинствах ея, да тихое и безмолвное житие поживем во всяком благочестии и чистоте.

Лик: Господи, помилуй, трижды.

Прилагается и сия:

Иже от бури морския спасый ученики Твоя, Господи, запрети бури и ветром, утверди основания земли, молим Ти ся, услыши и милостивно помилуй.

Лик: Господи, помилуй, трижды.

Сотворивый мир и вся, яже в нем, Господи, приими покаяние наше и во время потребно посли земли дождь и благорастворение воздухов, умири стихии, да грех наших ради не мучается и страждет тварь, молим Ти ся, услыши и милостивно помилуй.

Лик: Господи, помилуй, трижды.

Делом гордых противящийся, Господи, дела рук наших исправи, да не обратятся на главы наша и не погубят ны, но призри на смирение наше и низпосли благодать и мир, молим Ти ся услыши и милостивно помилуй.

Лик: Господи, помилуй, трижды.

Священник возглас

Услыши ны, Боже Спасителю наш, упование всех концев земли и сущих в мори далече: и милостив, милостив буди, Владыко, о гресех наших, и помилуй ны. Милостив бо и Человеколюбец Бог еси, и Тебе славу возсылаем, Отцу, и Сыну, и Святому Духу, ныне и присно, и во веки веков.

Лик: Аминь.

Диакон: Господу помолимся.

Лик: Господи, помилуй.

Священник же чтет молитву сию:

Владыко Многомилостиве, Господи Иисусе Христе Боже наш, молитвами Всепречистыя Владычицы нашея Богородицы и Приснодевы Марии: силою Честнаго и Животворящаго Креста: предстательствы честных небесных сил безплотных, честнаго, славнаго пророка Предтечи и Крестителя Иоанна: святых славных и всехвальных апостол: святых славных и добропобедных мучеников: преподобных и богоносных отец наших, и всех святых: благоприятну сотвори молитву нашу, даруй нам оставление прегрешений наших, покрый нас кровом крилу Твоею, избави нас от глада, губительства, труса, потопа, огня, и всякаго прочияго бедствия: умири нашу жизнь, Господи: помилуй нас и мир Твой, и спаси души наша, яко Благ и Человеколюбец.

Лик: Аминь.

Диакон: Премудрость.

Священник: Пресвятая Богородице, спаси нас.

Лик: Честнейшую Херувим, и Славнейшую без сравнения Серафим, без истления Бога Слова рождшую, сущую Богородицу, Тя величаем.

Священник: Слава Тебе, Христе Боже, упование наше, слава Тебе.

Лик: Слава, и ныне: Господи, помилуй, трижды. Благослови.

Священник отпуст:

Христос истинный Бог наш, молитвами Пречистыя Своея Матери, преподобных и богоносных отец наших, и всех святых, помилует и спасет нас, яко благ и Человеколюбец.

Лик: Господи, помилуй, трижды.

 

Чин краткаго молебнаго пения о сохранении творения Божия

Диакон: Благослови, владыко.

Священник: Благословен Бог наш, всегда, ныне и присно, и во веки веков.

Лик: Аминь.

Диакон: Слава Тебе, Боже наш, слава Тебе.

И мы: Царю небесный, Утешителю, Душе истины, иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша.

Таже чтец:

Святый Боже, Святый Крепкий, Святый Безсмертный, помилуй нас. Трижды.

Слава, и ныне:

Пресвятая Троице, помилуй нас: Господи очисти грехи наша; Владыко, прости беззакония наша; Святый, посети и исцели немощи наша, имене Твоего ради.

Господи, помилуй. Трижды

Слава, и ныне:

Отче наш, иже еси на небесех, да святится Имя Твое, да приидет Царствие Твое: да будет воля Твоя, яко на небеси, и на земли. Хлеб наш насущный даждь нам днесь, и остави нам долги наша, якоже и мы оставляем должником нашим: и не введи нас во искушение, но избави нас от лукаваго.

Священник возглас: Яко Твое есть царство, и сила, и слава, Отца, и Сына, и Святаго Духа, ныне и присно, и во веки веков.

Чтец: Аминь.

Господи, помилуй, 12 (раз).

Слава, и ныне:

Приидите, поклонимся Цареви нашему Богу.

Приидите, поклонимся и припадем Христу, Цареви нашему Богу.

Приидите, поклонимся и припадем самому Христу, Цареви и Богу нашему.

Псалом 103

Благослови, душе моя, Господа. Господи Боже мой, возвеличился еси зело: во исповедание и в велелепоту облеклся еси: одеяйся светом яко ризою, простираяй небо яко кожу: покрываяй водами превыспрeнняя Своя, полагаяй облаки на восхождеиие Свое, ходяй на крилу ветрeню: творяй ангелы Своя духи, и слуги Своя пламень oгненный: основаяй землю на тверди eя; не преклонится в век века. Бездна яко риза одеяние eя, на горах станут воды: от запрещения Твоего побегнут, от гласа грома Твоего убоятся. Восходят горы, и низходят поля, в место eже основал еси им. Предел положил еси, егоже не прейдут, ниже обратятся покрыти землю. Посылаяй источники в дебрех, посреде гор пройдут воды. Напаяют вся звери сeльныя, ждут oнагри в жажду свою. На тых птицы небeсныя привитают: от среды камения дадят глас. Напаяяй горы от превыспренних своих: от плода дел твоих насытится земля. Прозябаяй траву скотом, и злак на службу человеком, извести хлеб от земли: и вино веселит сердце человека, умастити лице eлеем: и хлеб сердце человека укрепит. Насытятся древа польская, кедри ливанстии, ихже еси насадил: тамо птицы вогнездятся, eродиево жилище предводителствует ими. Горы высокия eленeм, камень прибежище заяцeм. Сотворил eсть луну во времена: солнце позна запад свой. Положил еси тьму, и бысть нощь, в нейже пройдут вси звериие дубравнии, скимни рыкающии восхитити и взыскати от Бога пищу себе. Возсия солнце, и собрашася, и в ложах своих лягут. Изыдет человек на дело свое и на делание свое до вечера. Яко возвеличишася дела Твоя, Господи: вся премудростию сотворил еси: исполнися земля твари Твоея. Сие море великое и пространное: тамо гади, ихже несть числа, животная малая с великими: тамо корабли преплавают, змий сей, егоже создал еси ругатися ему. Вся к Тебе чают, дати пищу им во благо время. Давшу Тебе им, соберут: отверзшу Тебе руку, всячeская исполнятся благости: отвращшу же Тебе лице, возмятутся: отъимеши дух их, и изчезнут, и в персть свою возвратятся: послеши духа Твоего, и созиждутся, и обновиши лице земли. Буди слава Господня во веки: возвеселится Господь о делех Своих: призираяй на землю и творяй ю трястися: прикасаяйся горам, и дымятся. Воспою Господеви в животе моем, пою Богу моему, дондеже eсмь: да усладится ему беседа моя, аз же возвеселюся о Господе. Да изчезнут грешницы от земли, и беззаконницы, якоже не быти им. Благослови, душе моя, Господа. Солнце позна запад свой. Положил еси тьму и бысть нощь. Яко возвеличишася дела Твоя, Господи: вся премудростию сотворил еси.

Слава, и ныне:

Аллилуия, аллилуия, аллилуия, слава Тебе, Боже. Трижды

И абие диакон глаголет во глас 6:

Бог Господь, и явися нам, благословен Грядый во имя Господне.

Стих 1: Исповедайтеся Господеви, яко Благ, яко во веки милость Его.

Стих 2: Обышедше обыдоша мя, и именем Господним противляхся им.

Стих 3: Не умру, но жив буду, и повем дела Господня.

Стих 4: Камень, егоже небрегоша зиждущии, сей бысть во главу угла: от Господа бысть сей, и есть дивен во очесех наших.

Лик же поет: Бог Господь: к коемуждо стиху, во глас 6.

Таже тропарь, глас 6:

Помилуй нас, Господи, помилуй нас: всякаго бо ответа недоумеюще, сию Ти молитву, яко Владыце, грешнии, приносим, помилуй нас.

Слава: Иже древле в Вавилоне гордыя языки поразивый, Господи, праведнаго Твоего прещения избави ны, пощади грешныя люди Твоя, яже стяжал еси Твоею Кровию, не предаждь нас погибели от дел рук наших, иного бо разве Тебе Бога не вемы, и воззови погибающим: Аз есмь с вами, и никтоже на вы.

И ныне: Милосердия двери отверзи нам, Благословенная Богородице, надеющиися на Тя да не погибнем, но да избавимся Тобою от бед, Ты бо еси спасение рода христианскаго.

Диакон: Вонмем, премудрость, вонмем.

Чтец: Прокимен, глас 1 : Буди, Господи, милость Твоя на нас, якоже уповахом на Тя.

Стих: Господи, услыши молитву мою, и вопль мой.

Лик припевает по чину

Диакон: Премудрость.

Чтец: К Римляном послания святаго паостола Павла чтение.

Диакон: Вонмем.

Апостол к Римляном (зачало 98)

Братие, вемы, яко вся тварь с нами совоздыхает, и сболезнует даже до ныне: Не точию же, но и сами начаток Духа имуще, и мы сами в себе воздыхаем, всыновления чающе, избаления телу нашему. Упованием бо спасохомся. Упование же видимое, несть упование: еже бо видит кто, что и уповает; Аще ли Егоже не видим, надеемсяЮ терпением ждем. Сице же и Дух способствует нам в немощех наших: о чесом бо помолимся, якоже подобает, не вемы: но сам Дух ходатайствует о нас воздыхании неизглаголанными. Испытаяй же сердца, весть, что есть мудрование Духа, яко по Богу приповедует о святых.

Священник: Мир ти.

Чтец: И духови твоему.

Аллилуиа, глас 4:

Стих 1: Боже, ущедри ны и благослови ны.

Стих 2: Просвети лице Твое на ны, и помилуй ны.

Диакон:

Премудрость, прости, услышим Святаго Евангелия.

Священник: Мир всем.

Лик: И духови твоему.

Священник: От Матфея Святаго Евангелия чтение.

Лик: Слава Тебе, Господи, слава Тебе.

Диакон: Вонмем.

Евангелие от Матфея (зачало 100)

Рече Господь Своим учеником: якоже молния исходит от востока и является до запад: тако будет пришествие Сына Человеческаго. Идеже бо аще будет труп, там соберутся орли. Абие же по скорби дний тех солнце померкнет, и луна не даст света своего, и звезды спаднут с небесе, и силы небесныя подвигнутся. И тогда явится знамение Сына Человеческаго на небеси: и тогда восплачутся вся колена земная, и узрят Сына Человеческаго, грядуща на облацех небесных с силою и славою многою. И послет Ангелы Своя с трубным гласом велиим, и соберутся избранныя Его от четырех ветр, от конец небес до конец их. От смоковницы же научитеся притчи: егда уже веия ея будут млада и листвие прозябнет, ведите, яко близ есть жатва. Тако и вы, егда видите сия вся, ведите, яко блих есть при дверех.

Лик: Слава Тебе, Господи, слава Тебе.

Диакон глаголет ектению:

Помилуй нас, Боже, по велицей милости Твоей, молим Ти ся, услыши и помилуй.

Лик: Господи, помилуй, трижды.

Еще молимся о великом господине и отце нашем святейшем Патриархе Кирилле, и о господине нашем высокопреосвященнейшем митрополите (или: архиепископе, или: преосвященнейшем епископе) имярек, и всей во Христе братии нашей.

Лик: Господи, помилуй, трижды.

Еще молимся о богохранимей стране нашей, властех и воинствах ея, да тихое и безмолвное житие поживем во всяком благочестии и чистоте.

Лик: Господи, помилуй, трижды.

Прилагает и сия:

Сотворивый мир и вся, яже в нем, Господи, приими покаяние наше и во время потребно посли земли дождь и благорастворение воздухов, умири стихии, да грех наших ради не мучается и страждет тварь, молим Ти ся, услыши и милостивно помилуй.

Лик: Господи, помилуй, трижды.

Делом гордых противящийся, Господи, дела рук наших исправи, да не обратятся на главы наша и не погубят ны, но призри на смирение наше и низпосли благодать и мир, молим Ти ся услыши и милостивно помилуй.

Лик: Господи, помилуй, трижды.

Да не страждет лихоимств и беззаконий ради наших творение Твое, Господи, но да сохранится неврежденно от всех навет вражиих, молим Ти ся, услыши и милостивно помилуй.

Лик: Господи, помилуй, трижды.

Еще молимся о еже не помянути беззаконий и неправд людей Своих, и отвратити от нас весь гнев Свой, праведно на ны движимый, и не погубити мир сей гладом, жаждею и иными бедами, но сохранити его, и нас пощадити, молим Ти ся, услыши и милостивно помилуй.

Лик: Господи, помилуй, трижды.

Священник возглас:

Услыши ны, Боже Спасителю наш, упование всех концев земли и сущих в море далече: и милостив, милостив буди, Владыко, о гресех наших, и помилуй ны. Милостив бо и Человеколюбец Бог еси, и Тебе славу возсылаем, Отцу, и Сыну, и Святому Духу, ныне и присно, и во веки веков.

Лик: Аминь.

Диакон: Господу помолимся.

Лик: Господи, помилуй.

Священник же чтет молитву сию о благостоянии мира

Благословен еси, Господи, Боже Вседержителю, сотворивый небо и землю со всею лепотою их, просветивый день светом солнечным и нощь уяснивый зарями огненными, всякия твари Творче, создавый от земли человека, отпавшаго же и предавшаго Тя наздавый паки Честною Кровию Единороднаго Сына Твоего. Призри с Небесе, Боже, и виждь, яко сетует земля, и древеса и былие изчезают, зверие и скоти, и птицы небесныя погибают за нечестие живущих на ней. Сего ради в покаянии припадаем и вопием Ти, да не погубиши мир Твой и нас со беззаконьми нашими, но даруй обращение безумным сыном человеческим и спасение им и твари, им покоренной. Благословен еси, Господи, потопом омывый при Ное грех человеческий. Даруй нам потоки слезныя и омовение скверн наших, да обратимся от злых дел, хищений и неправд наших, во еже хранити достояние Твое. Благословен еси, Господи, Боже Вседержителю, при Лоте попаливый мерзости Содомския и Гоморрския и очистивый Землю Обетованную от скверн их. Даруй исправление извращенным и стропотным умом и сердцам человеческим, да познают путь Твой. Благословен еси, Господи Боже Вседержителю, Иже пришествием Возлюбленнаго Сына Твоего обновивый и очистивый всю тварь. Даруй, да уверуют людие всем сердцем и прославят Тя, и Единороднаго Сына Твоего, и Утешителя Духа Святаго, да человеки и стихиями и всею тварию славится пречестное и великолепое Имя Святыя Троицы во веки веков.

Лик: Аминь.

Диакон: Господу помолимся.

Лик: Господи, помилуй.

Священник глаголет ину молитву

Господи Боже Вседержителю, Содетелю и Творче всяческих, покрываяй водами превыспренняя Своя, всю землю древесы многовидными и животными различными наполнивый, и животворяяй ю, да вся тварь благодарит Тя, Изряднохудожника. Ты еси Иже и человека сотворивый по образу и подобию Твоему, и в мире сем поставивый, во еже возделывати и хранити его. Не отврати лица Твоего и ныне, Господи Человеколюбче, зря мир Твой расхищаемь от беззаконий и страстей наших. Яко сетует земля, древеса и былие исчезают, зверие и скоти, и птицы небесныя погибают за нечестие сынов человеческих. Молимся Ти, Всемилосердый Боже, помилуй ны, исполни сердца наша светом Твоего богоразумия и приими покаяние наше, да возделываем мир Твой во благо душам и телесем нашим и во славу Пресвятаго Имени Твоего.

Тебе бо подобает всякая слава, честь и поклонение, Отцу, и Сыну, и Святому Духу, ныне и присно, и во веки веков.

Лик: Аминь.

Диакон: Премудрость.

Священник: Пресвятая Богородице, спаси нас.

Лик: Честнейшую Херувим, и Славнейшую без сравнения Серафим, без истления Бога Слова рождшую, сущую Богородицу, Тя величаем.

Священник: Слава Тебе, Христе Боже, упование наше, слава Тебе.

Лик: Слава, и ныне: Господи, помилуй, трижды. Благослови.

Священник отпуст

Воскресый из мертвых, Христос истинный Бог наш, молитвами Пречистыя Своея Матери, преподобных и богоносных отец наших, и всех святых, помилует и спасет нас, яко Благ и Человеколюбец.

Лик: Господи, помилуй, трижды.

Благодарение о получении прошения и о всяком благодеянии Божии

* * *

1

Прозябающи, прорастающи

2

живущих

3

живущих

4

живущих

5

живущих

6

потребных

7

утоли

8

<на развалине>

9

<на кровле>



Источник: Сельский требный сборник. - М.: Издательство С 29 во Московской Патриархии Русской Православной Церкви, 2016. - 432 с. ISBN 978-5-88017-515-4

Требуется программист