Глава 37. Месяцосло́в с Бо́гом святы́м, всего́ ле́та
Ме́сяц септе́мврий
1. [а] Нача́ло инди́кта, си́речь но́ваго ле́та. И па́мять преподо́бнаго отца́ на́шего Симео́на Сто́лпника, и ма́тере его́ Ма́рфы. И собо́р Пресвяты́я Богоро́дицы, и́же в Миаси́нех. И свята́го му́ченика Аифала́. И святы́х му́чениц, 40 же́н, и Амму́на диа́кона и учи́теля и́х. И святы́х му́ченик, Калли́сты, Ево́да и Ермоге́на, Самобра́тий. И па́мять пра́веднаго Иису́са, сы́на Нави́на. Пра́здник, и разреше́ние вина́ и еле́а.
2. [з] Свята́го му́ченика Ма́манта. И преподо́бнаго отца́ на́шего Иоа́нна По́стника, патриа́рха Царягра́да.
3. [з] Свята́го священному́ченика Анфи́ма, епи́скопа Никомиди́йскаго. И преподо́бнаго Феокти́ста, спо́стника Вели́каго Евфи́миа.
4. [е] Свята́го священному́ченика Вави́лы епи́скопа вели́кия Антиохи́и. И свята́го проро́ка и богови́дца Моисе́а.
5. [д] Свята́го проро́ка Заха́рии, отца́ честна́го Иоа́нна Предте́чи. И святы́я пра́ведныя Елисаве́ты.
6. [г] Воспомина́ние бы́вшаго чудесе́ в Колосса́ех, е́же е́сть в Хо́нех, от Архистрати́га Михаи́ла. И свята́го му́ченика Евдокси́а, и с ни́м пострада́вших 1104 г. И преподо́бнаго отца́ на́шего Архи́ппа.
Разреше́ние вина́ и еле́а.
7. [в] Предпра́зднство Рождества́ Пресвяты́я Богоро́дицы. И свята́го му́ченика Созо́нта. И па́мять и́же во святы́х отца́ на́шего Иоа́нна архиепи́скопа, Новгоро́дскаго чудотво́рца.
8. [а] Рождество́ Пресвяты́я Влады́чицы на́шея Богоро́дицы и Присноде́вы Мари́и.
Пра́здник и разреше́ние ры́бы.
9. [з] Святы́х и пра́ведных богооте́ц Иоаки́ма и А́нны. И свята́го му́ченика Севириа́на.
Разреше́ние вина́ и еле́а.
В то́йже де́нь преподо́бнаго отца́ на́шего Ио́сифа, Волоцка́го чудотво́рца. И во святы́х отца́ на́шего Феодо́сиа, архиепи́скопа Черни́говскаго.
10. [з] Святы́х му́чениц, Минодо́ры, Митродо́ры и Нимфодо́ры.
11. [е] Преподо́бныя ма́тере на́шея Феодо́ры Александри́йския. И пренесе́ние моще́й преподо́бных оте́ц, Се́ргиа и Ге́рмана Валаа́мских чудотво́рцов из Нова́града обра́тно на Валаа́м во оби́тель и́х.
12. [д] Свята́го священному́ченика Автоно́ма. В се́й же де́нь отдае́тся пра́здник Рождества́ Богоро́дицы. Слу́жба пое́тся вся́ пра́здника.
13. [г] Па́мять обновле́ний хра́ма свята́го, Христа́ и Бо́га на́шего, Воскресе́ния. И предпра́зднство Воздви́жения Честна́го и Животворя́щаго Креста́. И свята́го священному́ченика Корни́лиа Со́тника.
Разреше́ние вина́ и еле́а.
14. [в] Всеми́рное воздви́жение Честна́го и Животворя́щаго Креста́. И успе́ние во святы́х отца́ на́шего Иоа́нна, архиепи́скопа Константи́ня гра́да, Златоу́стаго.
Пра́здник, и по́ст.
15. [а] Свята́го великому́ченика Ники́ты.
16. [з] Святы́я великому́ченицы Евфи́мии Всехва́льныя.
17. [з] Святы́я му́ченицы Софи́и, и тре́х ея́ дще́рей: Ве́ры, Наде́жды и Любве́.
18. [е] Преподо́бнаго отца́ на́шего Евме́ниа епи́скопа Горти́нскаго, чудотво́рца.
19. [д] Святы́х му́ченик, Трофи́ма, Савва́тиа и Доримедо́нта. И преставле́ние благове́рнаго кня́зя Фео́дора, и ча́д его́, благове́рных князе́й Дави́да и Константи́на, Смоле́нских и Яросла́вских чудотво́рцев.
20. [г] Свята́го великому́ченика Евста́фиа, и и́же с ни́м.
Разреше́ние вина́ и еле́а.
И святы́х му́ченик и испове́дник, вели́каго кня́зя Михаи́ла, и боля́рина его́ Фео́дора, Черни́говских чудотво́рцов.
21. [в] Свята́го Апо́стола Кодра́та, и́же в Магниси́и. В то́йже де́нь па́мять во святы́х отца́ на́шего Дими́триа, митрополи́та Росто́вскаго.
В се́й же де́нь отдае́тся пра́здник Честна́го Креста́.
22. [а] Свята́го священному́ченика Фо́ки, епи́скопа Синопи́йскаго. И свята́го проро́ка Ио́ны. И преподо́бнаго Ио́ны пресви́тера, отца́ Феофа́на, творца́ кано́нов. И Фео́дора Начерта́ннаго.
23. [з] Зача́тие честна́го сла́внаго Проро́ка, Предте́чи и Крести́теля Иоа́нна.
Разреше́ние вина́ и еле́а.
24. [з] Святы́я первому́ченицы и равноапо́стольныя Фе́клы. В то́йже де́нь па́мять преподо́бнаго отца́ на́шего Ника́ндра Пустынножи́теля, Псковска́го чудотво́рца.
25. [е] Преподо́бныя ма́тере на́шея Евфроси́нии. И преставле́ние преподо́бнаго отца́ на́шего игу́мена Се́ргиа Чудотво́рца.
26. [д] Преставле́ние свята́го апо́стола и евангели́ста Иоа́нна Богосло́ва.
Пра́здник, и разреше́ние вина́ и еле́а.
27. [г] Свята́го му́ченика Каллистра́та, и дружи́ны его́. И преподо́бнаго отца́ на́шего Савва́тиа, Солове́цкаго чудотво́рца.
28. [в] Преподо́бнаго отца́ на́шего и испове́дника Харито́на.
29. [а] Преподо́бнаго отца́ на́шего Кириа́ка Отше́льника.
30. [з] Свята́го священному́ченика Григо́риа, вели́кия Арме́нии. И преподо́бнаго отца́ на́шего Григо́риа, и́же на Пе́льшме реце́. И во святы́х отца́ на́шего Михаи́ла, пе́рваго митрополи́та Ки́евскаго и всея́ Росси́и, чудотво́рца.
Ме́сяц окто́врий
1. [з] Покро́в Пресвяты́я Богоро́дицы. И свята́го апо́стола Ана́нии, еди́наго от 70. И преподо́бнаго отца́ Рома́на Сладкопе́вца. И преподо́бнаго отца́ на́шего Са́ввы, Ви́шерскаго чудотво́рца.
2. [е] Свята́го священному́ченика Киприа́на, и святы́я му́ченицы Иусти́ны. И свята́го и блаже́ннаго Андре́а, Христа́ ра́ди юро́диваго.
3. [д] Свята́го священному́ченика Диони́сиа Ареопаги́та.
4. [г] Свята́го священному́ченика Иерофе́а, епи́скопа Афи́нскаго. И обре́тение честны́х моще́й, и́же во святы́х оте́ц на́ших Гу́риа и Варсоно́фиа, Каза́нских.
5. [в] Святы́я му́ченицы Харити́ны. И святы́х святи́телей Петра́, Алекси́а, Ио́ны и Фили́ппа, митрополи́тов Моско́вских, и всея́ Росси́и чудотво́рцов.
6. [а] Свята́го и сла́внаго апо́стола Фомы́.
Разреше́ние вина́ и еле́а.
7. [з] Святы́х му́ченик, Се́ргиа и Ва́кха.
8. [з] Преподо́бныя ма́тере на́шея Пелаги́и.
9. [е] Свята́го апо́стола Иа́кова Алфе́ова. И преподо́бнаго отца́ на́шего Андрони́ка, и жены́ его́ Афана́сии.
Разреше́ние вина́ и еле́а.
10. [д] Святы́х му́ченик, Евла́мпиа и Евлампи́и.
11. [г] Свята́го апо́стола Фили́ппа, еди́наго от седми́ диа́кон. И преподо́бнаго отца́ на́шего Феофа́на Начерта́ннаго и творца́ кано́нов, епи́скопа Ники́йскаго.
12. [в] Святы́х му́ченик, Про́ва, Тара́ха и Андрони́ка. И преподо́бнаго отца́ на́шего Космы́ Святогра́дца и творца́ кано́нов, епи́скопа Маиу́мскаго.
В то́йже де́нь пра́зднование свято́му Иоа́нну Крести́телю Госпо́дню, на па́мять пренесе́ния из Ма́льты во гра́д Га́тчину креста́ из ча́сти дре́ва Животворя́щаго Креста́ Госпо́дня, чудотво́рнаго о́браза Бо́жия Ма́тере, пи́саннаго святы́м евангели́стом Луко́ю, и десны́я руки́ моще́й свята́го Иоа́нна Крести́теля.
13. [а] Святы́х му́ченик, Ка́рпа и Папи́лы.
14. [з] Святы́х му́ченик Наза́риа, Герва́сиа, Прота́сиа и Келси́а. И преподо́бныя ма́тере на́шея Параске́ви. И преподо́бнаго Нико́лы Свято́ши, кня́зя Черни́говскаго.
15. [з] Преподо́бнаго отца́ на́шего Евфи́миа Но́ваго. И свята́го преподо́бному́ченика Лукиа́на, пресви́тера Вели́кия Антиохи́и.
16. [е] Свята́го му́ченика Ло́ггина со́тника.
17. [д] Свята́го проро́ка Оси́и. И преподо́бному́ченика Андре́а Кри́тскаго.
18. [г] Свята́го апо́стола и евангели́ста Луки́.
Пра́здник, и разреше́ние вина́ и еле́а.
19. [в] Свята́го проро́ка Ио́иля. И свята́го му́ченика Уа́ра. И преподо́бнаго отца́ на́шего Иоа́нна Ры́льскаго.
20. [а] Свята́го великому́ченика Арте́миа.
21. [з] Преподо́бнаго отца́ на́шего Иларио́на Вели́каго. И пренесе́ние моще́й преподо́бнаго отца́ на́шего Иларио́на, епи́скопа Мегли́нскаго.
22. [з] Свята́го равноапо́стольнаго Аве́ркиа, епи́скопа Иерапо́льскаго, чудотво́рца. И святы́х седми́ отроко́в, и́же во Ефе́се.
В то́йже де́нь пра́зднуем Пресвяте́й Богоро́дице, чудотво́рныя ико́ны Каза́нския.
23. [е] Свята́го апо́стола Иа́кова, по пло́ти бра́та Госпо́дня.
Разреше́ние вина́ и еле́а.
В то́йже де́нь пренесе́ние моще́й свята́го Иа́кова Борови́чскаго, Новгоро́дскаго чудотво́рца.
24. [д] Свята́го му́ченика Аре́фы, и и́же с ни́м. И преподо́бнаго Аре́фы Пече́рскаго.
25. [г] Святы́х му́ченик и нотари́й Маркиа́на и Марти́риа.
26. [в] Свята́го и сла́внаго великому́ченика, Дими́триа Мирото́чца. И воспомина́ние вели́каго стра́шнаго трясе́ния.
Пра́здник, и разреше́ние вина́ и еле́а.
27. [а] Свята́го му́ченика Не́стора. И преподо́бнаго Не́стора, летопи́сца Пече́рскаго.
28. [з] Святы́х му́ченик Тере́нтиа и Неони́лы. И преподо́бнаго отца́ на́шего Стефа́на Савваи́та, и творца́ кано́нов. И во святы́х отца́ на́шего Арсе́ниа, архиепи́скопа Се́рбскаго. И святы́я му́ченицы Параске́вы, нарече́нныя Пя́тницы.
29. [з] Святы́я преподо́бному́ченицы Анастаси́и Ри́мляныни. И преподо́бнаго отца́ на́шего Авра́миа, затво́рника Пече́рскаго. И преставле́ние преподо́бнаго отца́ на́шего Авра́миа архимандри́та, Росто́вскаго чудотво́рца.
30. [е] Святы́х му́ченик Зино́виа и Зинови́и.
31. [д] Святы́х апо́стол: Стахи́а, Ампли́а, и и́же с ни́ми. И свята́го му́ченика Епима́ха. И преподо́бных пече́рских Спиридо́на и Никоди́ма.
Ме́сяц ное́мврий.
1. [г] Святы́х и чудотво́рцев, безсре́бреников Космы́ и Дамиа́на, и́же от Аси́и.
Разреше́ние вина́ и еле́а.
2. [в] Святы́х му́ченик: Акинди́на, Пига́сиа, Аффо́ниа, Елпидифо́ра и Анемподи́ста.
3. [а] Святы́х му́ченик: Акепси́мы епи́скопа, Ио́сифа пресви́тера, и Аифала́ диа́кона. И обновле́ние хра́ма свята́го великому́ченика Гео́ргиа, и́же в Ли́де, иде́же положено́ е́сть честно́е те́ло его́.
4. [з] Преподо́бнаго отца́ на́шего Иоанни́киа Вели́каго. И свята́го му́ченика, Ника́ндра, епи́скопа Ми́рскаго. И Ерме́а пресви́тера.
е. [з] Святы́х му́ченик, Галактио́на и Еписти́мии. И преставле́ние и́же во святы́х отца́ на́шего Ио́ны архиепи́скопа, Новгоро́дскаго чудотво́рца.
6. [е] И́же во святы́х отца́ на́шего Па́вла Испове́дника, архиепи́скопа Царягра́да. И преподо́бнаго и богоно́снаго отца́ на́шего Варлаа́ма Ху́тынскаго, Новгоро́дскаго чудотво́рца.
7. [д] Святы́х му́ченик 33, и́же в Мелити́не. И преподо́бнаго отца́ на́шего и чудотво́рца Ла́заря, в Галиси́йстей горе́ пости́вшагося.
8. [г] Собо́р архистрати́га Михаи́ла и про́чих безпло́тных си́л.
Пра́здник, и разреше́ние вина́ и еле́а.
9. [в] Святы́х му́ченик Ониси́фора и Порфи́риа. И преподо́бныя ма́тере на́шея Матро́ны. И преподо́бныя Феокти́сты, я́же от Ле́звы.
10. [а] Святы́х апо́стол: Ера́ста, Оли́мпа, Родио́на, и и́же с ни́ми.
11. [з] Святы́х му́ченик: Ми́ны, Ви́ктора и Вике́нтиа. И святы́я му́ченицы Стефани́ды. И преподо́бнаго отца́ на́шего и испове́дника Фео́дора Студи́та. И преставле́ние свята́го и блаже́ннаго Макси́ма, Христа́ ра́ди юро́диваго, Моско́вскаго чудотво́рца.
12. [з] И́же во святы́х отца́ на́шего Иоа́нна Ми́лостиваго. И преподо́бнаго отца́ на́шего Ни́ла.
13. [е] И́же во святы́х отца́ на́шего Иоа́нна, архиепи́скопа Константи́ня гра́да, Златоу́стаго.
Пра́здник, и разреше́ние вина́ и еле́а.
14. [д] Свята́го и всехва́льнаго апо́стола Фили́ппа.
Пра́здник, и ры́бы разреше́ние.
15. [г] Святы́х му́ченик и испове́дник: Гу́риа, Само́на и Ави́ва.
16. [в] Свята́го апо́стола и евангели́ста Матфе́а.
Разреше́ние вина́ и еле́а.
17. [а] И́же во святы́х отца́ на́шего Григо́риа Чудотво́рца. И преподо́бнаго отца́ на́шего Ни́кона, игу́мена честны́я оби́тели Живонача́льныя Тро́ицы, ученика́ Се́ргиа Чудотво́рца.
18. [з] Святы́х му́ченик Плато́на и Рома́на.
19. [з] Свята́го проро́ка Авди́а. И свята́го му́ченика Варлаа́ма. И преподо́бных оте́ц на́ших, Варлаа́ма и Иоаса́фа царе́вича Вели́кия Инди́и. И преподо́бнаго Варлаа́ма игу́мена Пече́рскаго.
20. [е] Предпра́зднство во хра́м вхо́да Пресвяты́я Богоро́дицы. И преподо́бнаго отца́ на́шего Григо́риа Декаполи́та. И и́же во святы́х отца́ на́шего Про́кла, архиепи́скопа Царягра́да.
21. [д] Вхо́д Пресвяты́я Влады́чицы на́шея Богоро́дицы и Присноде́вы Мари́и во хра́м.
Пра́здник, и ры́бы разреше́ние.
22. [г] Свята́го апо́стола Филимо́на, и и́же с ни́м. И убие́ние свята́го благове́рнаго вели́каго кня́зя Михаи́ла Тверска́го.
23. [в] И́же во святы́х оте́ц на́ших, Амфило́хиа, епи́скопа Икони́йскаго, и Григо́риа, епи́скопа Акраганти́йскаго. И преставле́ние свята́го благове́рнаго вели́каго кня́зя Алекса́ндра Не́вскаго, и всея́ Росси́и чудотво́рца. И па́мять преставле́ния святи́теля Митрофа́на, в схимона́сех Мака́риа, пе́рваго Воро́нежскаго епи́скопа.
24. [а] Святы́я великому́ченицы Екатери́ны, и свята́го великому́ченика Мерку́риа.
Пра́здник, и разреше́ние вина́ и еле́а.
И свята́го му́ченика Мерку́риа Смоле́нскаго.
25. [з] И́же во святы́х оте́ц на́ших, и священному́чеников: Кли́мента па́пы Ри́мскаго, и Петра́ Александри́йскаго.
В се́й де́нь отдае́тся пра́здник Вхо́да Пресвяты́я Богоро́дицы.
26. Преподо́бнаго отца́ на́шего Али́пиа Сто́лпника. И освяще́ние хра́ма свята́го великому́ченика Гео́ргиа, я́же в Ки́еве, пред враты́ святы́я Софи́и. И па́мять преставле́ния святи́теля Инноке́нтиа, пе́рваго епи́скопа Ирку́тскаго, чудотво́рца.
27. [е] Свята́го му́ченика Иа́кова Пе́рсянина. И преподо́бнаго отца́ на́шего Палла́диа.
И зна́мение Пресвяты́я Богоро́дицы, в вели́ком Нове́граде. И па́мять и́же во святы́х отца́ на́шего Иа́кова, епи́скопа Росто́вскаго, чудотво́рца.
28. [д] Свята́го преподо́бному́ченика Стефа́на Но́ваго. И свята́го му́ченика Ирина́рха.
29. [г] Свята́го му́ченика Парамо́на. И свята́го му́ченика Филуме́на. И преподо́бнаго Ака́киа, и́же в Ле́ствице свиде́тельствованнаго. И преподо́бнаго Некта́риа Пече́рскаго.
30. [в] Свята́го и всехва́льнаго апо́стола Андре́а Первозва́ннаго.
Пра́здник, и разреше́ние вина́ и еле́а.
Ме́сяц деке́мврий
1. [а] Свята́го проро́ка Нау́ма.
2. [з] Свята́го проро́ка Авваку́ма. И преподо́бнаго Афана́сиа Пече́рскаго затво́рника.
3. [з] Свята́го проро́ка Софо́нии. И преставле́ние преподо́бнаго отца́ на́шего Са́ввы Стороже́вскаго.
4. [е] Святы́я великому́ченицы Варва́ры. И преподо́бнаго отца́ на́шего Иоа́нна Ламаски́на.
Разреше́ние вина́ и еле́а.
5. [д] Преподо́бнаго и богоно́снаго отца́ на́шего Са́ввы Освяще́ннаго.
Пра́здник, и разреше́ние вина́ и еле́а.
6. [г] И́же во святы́х отца́ на́шего Никола́а архиепи́скопа Ми́р Лики́йских, чудотво́рца.
Пра́здник, и разреше́ние вина́ и еле́а.
7. [в] И́же во святы́х отца́ на́шего Амвро́сиа, епи́скопа Медиола́нскаго. И преподо́бнаго отца́ на́шего Анто́ниа, Си́йскаго чудотво́рца:
В то́йже де́нь преставле́ние преподо́бнаго отца́ на́шего Ни́ла, и́же на е́зере Селиге́ре, на о́строве зово́мом Столобно́е, Но́ваго чудотво́рца.
8. [а] Преподо́бнаго отца́ на́шего Пата́пиа.
9. [з] Зача́тие святы́я А́нны, егда́ зача́т Пресвяту́ю Богоро́дицу.
Пра́здник, и разреше́ние вина́ и еле́а.
10. [з] Святы́х му́ченик: Ми́ны, Ермоге́на и Евгра́фа.
11. [е] Преподо́бнаго отца́ на́шего Дании́ла Сто́лпника. И преподо́бнаго Ни́кона Пече́рскаго, Суха́го.
12. [д] Преподо́бнаго отца́ на́шего Спиридо́на чудотво́рца, епи́скопа Иримифи́йскаго.
Пра́здник, и разреше́ние вина́ и еле́а.
13. [г] Святы́х му́ченик: Евстра́тиа, Авксе́нтиа, Евге́ниа, Марда́риа и Оре́ста. И святы́я му́ченицы Луки́и де́вы.
Разреше́ние вина́ и еле́а.
[зри́] Неде́ля святы́х Пра́отец.
14. [в] Святы́х му́ченик: Фи́рса, Левки́а, Филимо́на, Аполло́ниа, Ариа́на и Каллини́ка.
15. [а] Свята́го священному́ченика Елевфе́риа. И преподо́бнаго отца́ на́шего Па́вла, и́же в Ла́тре:
И и́же во святы́х отца́ на́шего Стефа́на испове́дника, архиепи́скопа Суро́жскаго.
16. [з] Свята́го проро́ка Агге́а.
17. [з] Свята́го проро́ка Дании́ла. И святы́х трие́х отроко́в, Ана́нии, Аза́рии и Мисаи́ла.
Разреше́ние вина́ и еле́а.
[зри́] Неде́ля пред Рождество́м Христо́вым святы́х оте́ц.
18. [е] Свята́го му́ченика Севастиа́на, и дружи́ны его́.
19. [д] Свята́го му́ченика Вонифа́тиа.
20. [г] Предпра́зднство по пло́ти Рождества́ Го́спода Бо́га и Спа́са на́шего Иису́са Христа́. И свята́го священному́ченика Игна́тиа Богоно́сца.
21. [в] Предпра́зднство Христо́ва Рождества́. И святы́я му́ченицы Иулиани́и, я́же в Никомиди́и.
И преставле́ние и́же во святы́х отца́ на́шего Петра́, митрополи́та всея́ Росси́и, чудотво́рца.
22. [а] Предпра́зднство Христо́ва Рождества́. И святы́я великому́ченицы Анастаси́и Узореши́тельницы.
23. [з] Предпра́зднство Христо́ва Рождества́. И святы́х десяти́ му́ченик, и́же в Кри́те.
24. [з] Предпра́зднство Христо́ва Рождества́. И святы́я преподо́бному́ченицы Евге́нии.
25. [е] Е́же по пло́ти Рождество́ Го́спода Бо́га и Спа́са на́шего Иису́са Христа́.
И воспомина́ние избавле́ния Це́ркви и Держа́вы Росси́йския от наше́ствия га́ллов, и с ни́ми два́десяти язы́к.
Пра́здник тридне́вный, и разреше́ние на вся́, подо́бне и дванадесятодне́вное разреше́ние на вся́, и упраждне́ние междоча́сий.
26. [д] Собо́р Пресвяты́я Богоро́дицы. И па́мять свята́го священному́ченика Евфи́миа, епи́скопа Сарди́йскаго.
27. [г] Свята́го Апо́стола, первому́ченика и архидиа́кона Стефа́на. И преподо́бнаго отца́ на́шего и испове́дника Фео́дора Начерта́ннаго, бра́та Феофа́на творца́ канонов.
28. [в] Святы́х му́ченик дву́ тму́, в Никомиди́и сожже́нных.
29. [а] Святы́х Младе́нец 14 ты́сящ, за Христа́ избие́нных от И́рода в Вифлее́ме. И преподо́бнаго отца́ на́шего Марке́лла, игу́мена оби́тели Неусыпа́емых. И преподо́бных пече́рских Ма́рка, Фео́фила и Иоа́нна.
30. [з] Святы́я му́ченицы Ани́сии. И преподо́бнаго Зо́тика Сиротокорми́теля.
31. [з] Преподо́бныя ма́тере на́шея Мела́нии Ри́мляныни.
В се́й де́нь отдае́тся пра́здник Христо́ва Рождества́.
Ме́сяц ианнуа́рий
1. [е] Е́же по пло́ти обре́зание Го́спода Бо́га и Спа́са на́шего Иису́са Христа́. И и́же во святы́х отца́ на́шего Васи́лиа Вели́каго, архиепи́скопа Кесари́и Каппадоки́йския.
Пра́здник, и разреше́ние ры́бы.
2. [д] Предпра́зднство Просвеще́ния. И свята́го отца́ на́шего Силве́стра, па́пы Ри́мскаго. И па́мять преставле́ния преподо́бнаго отца́ на́шего Серафи́ма Саро́вскаго.
3. [г] Предпра́зднство Просвеще́ния. И свята́го проро́ка Малахи́и. И свята́го му́ченика Горди́а.
4. [в] Предпра́зднство Просвеще́ния. И собо́р святы́х седми́десяти Апо́столов. И преподо́бнаго отца́ на́шего Феокти́ста игу́мена, и́же в Куку́ме Сикили́йстем.
5. [а] Предпра́зднство Просвеще́ния. И святы́х му́ченик, Феопе́мпта и Фео́ны. И преподо́бныя Синклитики́и.
Разреше́ние вина́ и еле́а.
6. [з] Свято́е Богоявле́ние Го́спода Бо́га и Спа́са на́шего Иису́са Христа́.
Пра́здник, и разреше́ние на все́.
7. [з] Собо́р свята́го сла́внаго Проро́ка, Предте́чи и Крести́теля Госпо́дня Иоа́нна.
Пра́здник, и разреше́ние ры́бы.
8. [е] Преподо́бных оте́ц на́ших Гео́ргиа Хозеви́та, и Емилиа́на испове́дника. И преподо́бныя ма́тере на́шея Домни́ки. И преподо́бнаго Григо́риа Пече́рскаго.
9. [д] Свята́го му́ченика Полие́вкта.
И и́же во святы́х отца́ на́шего Фили́ппа, митрополи́та Моско́вскаго и всея́ Росси́и, чудотво́рца.
10. [г] И́же во святы́х отца́ на́шего Григо́риа, епи́скопа Нисси́йскаго. И преподо́бнаго Дометиа́на, епи́скопа Мелити́йскаго. И преподо́бнаго Маркиа́на, пресви́тера и иконо́ма Вели́кия це́ркве. И преподо́бнаго отца́ на́шего Па́вла Коме́льскаго, и́же на Обно́ре реце́.
11. [в] Преподо́бнаго отца́ на́шего Феодо́сиа, о́бщих жи́тий нача́льника.
Разреше́ние вина́ и еле́а.
И преподо́бнаго отца́ на́шего Михаи́ла Кло́пскаго.
12. [а] Святы́я му́ченицы Татиа́ны. И и́же во святы́х отца́ на́шего Са́ввы Се́рбскаго.
13. [з] Святы́х му́чеников Ерми́ла и Стратони́ка.
14. [з] Преподо́бных оте́ц на́ших, в Сина́и и Раи́фе избие́нных. И па́мять преставле́ния святы́я равноапо́стольныя Ни́ны. И отда́ние пра́здника Богоявле́ния.
15. [е] Преподо́бных оте́ц на́ших Па́вла Фиве́йскаго и Иоа́нна Ку́щника.
16. [д] Поклоне́ние честны́х вери́г свята́го и всехва́льнаго апо́стола Петра́.
Разреше́ние вина́ и еле́а.
17. [г] Преподо́бнаго и богоно́снаго отца́ на́шего Анто́ниа Вели́каго.
Пра́здник, и разреше́ние вина́ и еле́а.
18. [в] И́же во святы́х оте́ц на́ших, архиепи́скопов Александри́йских Афана́сиа и Кири́лла.
Пра́здник, и разреше́ние вина́ и еле́а.
19. [а] Преподо́бнаго отца́ на́шего Мака́риа Еги́птянина. И обре́тение честны́х моще́й преподо́бнаго Са́ввы Стороже́вскаго.
20. [з] Преподо́бнаго и богоно́снаго отца́ на́шего Евфи́миа Вели́каго.
Пра́здник, и разреше́ние вина́ и еле́а.
21. [з] Преподо́бнаго отца́ на́шего Макси́ма Испове́дника. И свята́го му́ченика Неофи́та. И святы́х му́чеников: Евге́ниа, Кани́диа, Уалериа́на и Аки́лы.
22. [е] Свята́го Апо́стола Тимофе́а. И свята́го преподо́бному́ченика Анаста́сиа Пе́рсскаго.
Разреше́ние вина́ и еле́а.
23. [д] Свята́го священному́ченика Кли́мента, епи́скопа Анки́рскаго. И свята́го му́ченика Агафагге́ла.
24. [г] Преподо́бныя ма́тере на́шея Ксе́нии Ри́мляныни.
25. [в] И́же во святы́х отца́ на́шего Григо́риа, архиепи́скопа Константи́ня гра́да, Богосло́ва.
Пра́здник, и разреше́ние вина́ и еле́а.
26. [а] Преподо́бнаго отца́ на́шего Ксенофо́нта, и дружи́ны его́ Мари́и.
27. [з] Пренесе́ние честны́х моще́й, и́же во святы́х отца́ на́шего Иоа́нна Златоу́стаго.
Пра́здник, и разреше́ние вина́ и еле́а.
28. [з] Преподо́бнаго отца́ на́шего Ефре́ма Си́рина. И преподо́бнаго отца́ на́шего Ефре́ма Пече́рскаго. В то́йже де́нь па́мять преподо́бнаго отца́ на́шего Феодо́сиа То́темскаго, Спасосумо́рина монастыря́ нача́льника и основа́теля, Новоявле́ннаго чудотво́рца.
29. [е] Пренесе́ние моще́й свята́го священному́ченика Игна́тиа Богоно́сца. И преподо́бнаго Лавре́нтиа Пече́рскаго.
30. [д] Свята́го священному́ченика Ипполи́та, па́пы Ри́мскаго.
И святы́х трие́х святи́телей вели́ких и архиере́ев: Васи́лиа Вели́каго, Григо́риа Богосло́ва и Иоа́нна Златоу́стаго.
Пра́здник, и разреше́ние вина́ и еле́а.
31. [г] Святы́х чудотво́рцев и безсре́бреников, Ки́ра и Иоа́нна. И и́же во святы́х отца́ на́шего Ники́ты, епи́скопа Новгоро́дскаго, чудотво́рца.
Ме́сяц февруа́рий
1. [в] Предпра́зднство Сре́тения Го́спода Бо́га и Спа́са на́шего Иису́са Христа́. И свята́го му́ченика Три́фона.
2. [а] Сре́тение Го́спода Бо́га и Спа́са на́шего Иису́са Христа́.
Пра́здник, и разреше́ние ры́бы, кроме́ святы́я Четыредеся́тницы, а́ще случи́тся.
3. [з] Свята́го и пра́веднаго Симео́на Богоприи́мца, и А́нны проро́чицы.
4. [з] Преподо́бнаго отца́ на́шего Иси́дора Пилусио́тскаго. И свята́го благове́рнаго вели́каго кня́зя Гео́ргиа. И преподо́бнаго отца́ на́шего Кири́лла, Новоезе́рскаго чудотво́рца.
5. [е] Святы́я му́ченицы Ага́фии. И па́мять преставле́ния во святы́х отца́ на́шего Феодо́сиа архиепи́скопа Черни́говскаго.
6. [д] Преподо́бнаго отца́ на́шего Вуко́ла, епи́скопа Сми́рнскаго.
7. [г] Преподо́бнаго отца́ на́шего Парфе́ниа, епи́скопа Лампсаки́йскаго. И преподо́бнаго отца́ на́шего Луки́.
8. [в] Свята́го великому́ченика Фео́дора Стратила́та. И свята́го проро́ка Заха́рии Серпови́дца.
Разреше́ние вина́ и еле́а.
9. [а] Свята́го му́ченика Ники́фора.
В се́й де́нь отдае́тся пра́здник Сре́тения.
10. [з] Свята́го му́ченика Харала́мпиа. И преподо́бнаго Про́хора Пече́рскаго.
11. [з] Свята́го священному́ченика Вла́сиа, епи́скопа Севасти́йскаго.
Разреше́ние вина́ и еле́а.
И преподо́бнаго Дими́триа, Во́логодскаго чудотво́рца. И преставле́ние свята́го благове́рнаго вели́каго кня́зя Все́волода Псковска́го, нарече́ннаго во свято́м креще́нии Гаврии́ла.
12. [е] И́же во святы́х отца́ на́шего Меле́тиа, архиепи́скопа Антиохи́йскаго:
В то́йже де́нь преставле́ние и́же во святы́х отца́ на́шего Алекси́а митрополи́та всея́ Росси́и, чудотво́рца.
13. [д] Преподо́бнаго отца́ на́шего Мартиниа́на.
14. [г] Преподо́бнаго отца́ на́шего Авксе́нтиа.
И преставле́ние преподо́бнаго отца́ на́шего Кири́лла Филосо́фа, учи́теля язы́ка слове́нскаго. И преподо́бнаго Исаа́киа Пече́рскаго.
15. [в] Свята́го Апо́стола Они́сима.
16. [а] Святы́х му́ченик Памфи́ла и Порфи́риа, и дружи́ны и́х.
17. [з] Свята́го великому́ченика Фео́дора Ти́рона.
Разреше́ние вина́ и еле́а.
18. [з] И́же во святы́х отца́ на́шего Льва́, па́пы Ри́мскаго.
19. [е] Свята́го апо́стола Архи́ппа.
20. [д] Преподо́бнаго отца́ на́шего Льва́, епи́скопа Ката́нскаго.
21. [г] Преподо́бнаго отца́ на́шего Тимофе́а, и́же в Симво́лех. И и́же во святы́х отца́ на́шего Евста́фиа, Вели́кия Антиохи́и.
22. [в] Обре́тение честны́х моще́й святы́х му́ченик, и́же во Евге́нии.
23. [а] Свята́го священному́ченика Полика́рпа, епи́скопа Сми́рнскаго.
24. [з] Пе́рвое и второ́е обре́тение честны́я главы́ свята́го сла́внаго Проро́ка, Предте́чи и Крести́теля Госпо́дня Иоа́нна. И преподо́бнаго Ера́зма, чернори́зца Пече́рскаго.
Разреше́ние вина́ и еле́а.
25. [з] И́же во святы́х отца́ на́шего Тара́сиа, архиепи́скопа Константи́ня гра́да.
26. [е] И́же во святы́х отца́ на́шего Порфи́риа, архиепи́скопа Га́зскаго.
27. [д] Преподо́бнаго отца́ на́шего и испове́дника Проко́пиа Декаполи́та. И преподо́бнаго Ти́та Пече́рскаго.
28. [г] Преподо́бнаго отца́ на́шего и испове́дника Васи́лиа, спо́стника Проко́пиева.
29. [в] Преподо́бнаго отца́ на́шего Кассиа́на Ри́млянина.
Ме́сяц ма́рт
1. [г] Святы́я преподо́бному́ченицы Евдоки́и.
2. [в] Свята́го священному́ченика Феодо́та, епи́скопа Кирини́йскаго. И преставле́ние и́же во святы́х отца́ на́шего Арсе́ниа, епи́скопа Тверска́го.
3. [а] Святы́х му́ченик: Евтро́пиа, Клеони́ка и Васили́ска.
4. [з] Преподо́бнаго отца́ на́шего Гера́сима, и́же на Иорда́не.
5. [з] Свята́го му́ченика Ко́нона Градаря́.
6. [е] Святы́х му́ченик четы́редесяти дву́, и́же во Аммори́и.
7. [д] Святы́х священному́ченик, в Херсо́не епи́скпствовавших: Васи́лиа, Ефре́ма, Евге́ниа, Капи́тона, Ефе́риа, и про́чих.
8. [г] Преподо́бнаго отца́ на́шего и испове́дника Феофила́кта, епи́скопа Никомиди́йскаго.
9. [в] Святы́х четы́редесяти му́ченик в Севасти́йстем е́зере му́чившихся.
Пра́здник, и разреше́ние вина́ и еле́а.
10. [а] Свята́го му́ченика Кодра́та, и и́же с ни́м.
11. [з] И́же во святы́х отца́ на́шего Софро́ниа, патриа́рха Иерусали́мскаго. И и́же во святы́х отца́ на́шего Евфи́миа, архиепи́скопа Новгоро́дскаго, чудотво́рца.
12. [з] Преподо́бнаго отца́ на́шего и испове́дника Феофа́на Сигриа́нскаго.
13. [е] Пренесе́ние моще́й и́же во святы́х отца́ на́шего Ники́фора, патриа́рха Царягра́да.
14. [д] Преподо́бнаго отца́ на́шего Венеди́кта.
15. [г] Свята́го му́ченика Ага́пиа, и с ни́м шести́ му́ченик.
16. [в] Святы́х му́ченик Сави́на и Па́пы.
17. [а] Преподо́бнаго Алекси́а, челове́ка Бо́жия. И преподо́бнаго отца́ на́шего игу́мена Мака́риа, Коля́зинскаго чудотво́рца.
18. [з] И́же во святы́х отца́ на́шего Кири́лла, архиепи́скопа Иерусали́мскаго.
19. [з] Святы́х му́ченик Хриса́нфа и Да́рии.
20. [е] Преподо́бных оте́ц на́ших, во оби́тели свята́го Са́ввы избие́нных от срацы́н.
21. [д] Преподо́бнаго отца́ на́шего и испове́дника Иа́кова епи́скопа.
22. [г] Свята́го священному́ченика Васи́лиа, пресви́тера Анки́рскаго.
23. [в] Свята́го преподо́бному́ченика Ни́кона, и дву́ сту́ учени́к его́. И преподо́бнаго Ни́кона Пече́рскаго.
24. [а] Предпра́зднство благове́щения Пресвяты́я Богоро́дицы. И преподо́бнаго отца́ на́шего Заха́рии. И и́же во святы́х отца́ на́шего Арте́миа, епи́скопа Фессалони́тскаго.
25. [з] Благове́щение Пресвяты́я Влады́чицы на́шея Богоро́дицы, и Присноде́вы Мари́и.
Пра́здник, и разреше́ние ры́бы, а́ще случи́тся кроме́ вели́кия седми́цы.
26. [з] Собо́р арха́нгела Гаврии́ла.
Разреше́ние вина́ и еле́а.
27. [е] Святы́я ма́тере на́шея Матро́ны, я́же в Солу́не.
28. [д] Преподо́бнаго отца́ на́шего Иларио́на Но́ваго. И свята́го Стефа́на чудотво́рца. И преподо́бному́ченика Евстра́тиа Пече́рскаго.
29. [г] Преподо́бнаго отца́ на́шего Ма́рка, епи́скопа Арефуси́йскаго, и Кири́лла диа́кона, и ины́х при Иулиа́не мучи́теле пострада́вших.
30. [в] Преподо́бнаго отца́ на́шего Иоа́нна, списа́теля Ле́ствицы.
31. [а] Преподо́бнаго отца́ на́шего Ипа́тиа, епи́скопа Га́ггрскаго.
Ме́сяц апри́ллий
1. [з] Преподо́бныя ма́тере на́шея Мари́и Еги́птяныни. И преподо́бнаго отца́ на́шего Евфи́миа, Су́здальскаго чудотво́рца.
2. [з] Преподо́бнаго отца́ на́шего Ти́та Чудотво́рца.
3. [е] Преподо́бнаго отца́ на́шего и испове́дника Ники́ты, игу́мена Мидики́йскаго.
4. [д] Преподо́бнаго отца́ на́шего Ио́сифа Песнопи́сца. И Гео́ргиа, и́же в Мале́и.
5. [г] Святы́х му́ченик: Феоду́ла и Агафопо́да, и и́же с ни́ми.
6. [в] И́же во святы́х отца́ на́шего Евтихи́а, патриа́рха Царягра́да.
Преставле́ние преподо́бнаго отца́ на́шего Мефо́диа, учи́теля слове́ном, архиепи́скопа Мора́вскаго.
7. [а] Преподо́бнаго отца́ на́шего Гео́ргиа епи́скопа Мелити́йскаго.
8. [з] Святы́х апо́стол: Иродио́на, Ага́ва, Ру́фа, Асигкри́та, Фле́гонта и Е́рма, и и́же с ни́ми. И преподо́бнаго отца́ на́шего Ни́фонта, епи́скопа Новгоро́дскаго, чудотво́рца Пече́рскаго.
9. [з] Свята́го му́ченика Евпси́хиа.
10. [е] Святы́х му́ченик: Тере́нтиа, Помпии́а, и и́же с ни́ми.
11. [д] Свята́го священному́ченика Анти́пы, епи́скопа Перга́ма Аси́йскаго.
12. [г] Преподо́бнаго отца́ на́шего и испове́дника Васи́лиа, епи́скопа Пари́йскаго.
13. [в] Свята́го священному́ченика Арте́мона, и и́же с ни́м.
14. [а] И́же во святы́х отца́ на́шего Марти́на испове́дника, па́пы Ри́мскаго. Святы́х Ви́ленских му́чеников: Анто́ниа, Иоа́нна и Евста́фиа.
15. [з] Святы́х апо́стол: Ариста́рха, Пу́да и Трофи́ма.
16. [з] Святы́х му́чениц де́в: Ага́пии, Ири́ны и Хиони́и.
17. [е] Преподо́бнаго отца́ на́шего Симео́на, и́же в Перси́де. И преподо́бнаго Ака́киа, епи́скопа Мелити́йскаго. И преподо́бнаго Зоси́мы, игу́мена Солове́цкаго.
18. [д] Преподо́бнаго отца́ на́шего Иоа́нна, ученика́ свята́го Григо́риа Декаполи́та.
19. [г] Преподо́бнаго отца́ на́шего Иоа́нна, Ветхопеще́рника.
20. [в] Преподо́бнаго отца́ на́шего Фео́дора Трихи́ны.
21. [а] Свята́го священному́ченика Ианнуа́риа, и и́же с ни́м. И свята́го священному́ченика Фео́дора, и́же в Перги́и. И святы́я му́ченицы цари́цы Алекса́ндры.
22. [з] Преподо́бнаго отца́ на́шего Фео́дора Сикео́та. И пренесе́ние моще́й свята́го благове́рнаго вели́каго кня́зя Все́волода, нарече́ннаго во свято́м креще́нии Гаврии́ла.
23. [з] Свята́го сла́внаго великому́ченика, победоно́сца и чудотво́рца Гео́ргиа.
Пра́здник, и разреше́ние вина́ и еле́а.
24. [е]Свята́го му́ченика Са́ввы Стратила́та.
25. [д] Свята́го апо́стола и евангели́ста Ма́рка.
Пра́здник, и разреше́ние вина́ и еле́а.
26. [г] Свята́го священному́ченика Васи́лиа, епи́скопа Амаси́йскаго. И па́мять и́же во святы́х отца́ на́шего Стефа́на, епи́скопа Пе́рмскаго.
27. [в] Свята́го священному́ченика Симео́на, епи́скопа Иерусали́мскаго, сро́дника Госпо́дня по пло́ти.
28. [а] Святы́х Апо́стол, Иа́сона и Сосипа́тра. И святы́х му́ченик, Да́ды, Макси́ма и Кинтилиа́на.
29. [з] Святы́х му́ченик девяти́, и́же в Ки́зице. И преподо́бнаго Ме́мнона Чудотво́рца.
30. [з] Свята́го апо́стола Иа́кова, бра́та свята́го Иоа́нна Богосло́ва.
Разреше́ние вина́ и еле́а.
Ме́сяц ма́ий
1. [е] Свята́го проро́ка Иереми́и. И преставле́ние преподо́бнаго отца́ на́шего Пафну́тиа, Бо́ровскаго чудотво́рца.
2. [д] И́же во святы́х отца́ на́шего Афана́сиа Вели́каго.
Разреше́ние вина́ и еле́а.
3. [г] Святы́х му́ченик Тимофе́а и Ма́вры. И преподо́бнаго отца́ на́шего Петра́ Чудотво́рца. И преставле́ние преподо́бнаго отца́ на́шего Феодо́сиа, игу́мена монастыря́ Пече́рскаго и нача́льника в Росси́йстей земли́ о́бщаго мона́шескаго жития́.
4. [в] Святы́я му́ченицы Пелаги́и.
5. [а] Святы́я и сла́вныя му́ченицы Ири́ны.
6. [з] Свята́го и пра́веднаго и многострада́льнаго И́ова.
7. [з] Воспомина́ние на небеси́ я́вльшагося зна́мения Честна́го и Животворя́щаго Креста́, во свято́м гра́де Иерусали́ме, в 3-й ча́с дне́, при царе́ Конста́нтии. И па́мять свята́го му́ченика Ака́киа.
8. [е] Свята́го Апо́стола и евангели́ста Иоа́нна Богосло́ва. И преподо́бнаго отца́ на́шего Арсе́ниа Вели́каго.
Пра́здник, и разреше́ние вина́ и еле́а.
9. [д] Свята́го проро́ка Иса́ии. И свята́го му́ченика Христофо́ра. И пренесе́ние честны́х моще́й, и́же во святы́х отца́ на́шего Никола́а Чудотво́рца, от Ми́р в Ба́р гра́д.
10. [г] Свята́го апо́стола Си́мона Зило́та. И преподо́бнаго Си́мона, чудотво́рца Пече́рскаго, епи́скопа Су́здальскаго.
11. [в] Обновле́ние Царягра́да. И свята́го священному́ченика Моки́а. И святы́х равноапо́стольных Мефо́диа и Кири́лла, учи́телей слове́нских.
12. [а] И́же во святы́х оте́ц на́ших, Епифа́ниа, епи́скопа Ки́прскаго, и Ге́рмана, патриа́рха Константи́ня гра́да.
13. [з] Святы́я му́ченицы Глике́рии.
14. [з] Свята́го му́ченика Иси́дора. И свята́го Иси́дора, Христа́ ра́ди юро́диваго, Росто́вскаго чудотво́рца. И преподо́бнаго Ники́ты Затво́рника Пече́рскаго.
15. [з] Преподо́бнаго отца́ на́шего Пахо́миа Вели́каго.
Разреше́ние вина́ и еле́а.
И и́же во святы́х отца́ на́шего Иса́ии епи́скопа Росто́вскаго, чудотво́рца. В то́йже де́нь убие́ние свята́го благове́рнаго Царе́вича кня́зя Дими́триа, Моско́вскаго и всея́ Росси́и чудотво́рца.
16. [д] Преподо́бнаго отца́ на́шего Фео́дора Освяще́ннаго, ученика́ свята́го Пахо́миа. И преподо́бнаго отца́ на́шего Ефре́ма Переко́мскаго, Новгоро́дскаго чудотво́рца.
17. [г] Свята́го апо́стола Андрони́ка, и и́же с ни́м.
18. [в] Свята́го му́ченика Феодо́та, и́же во Агки́ре. И святы́х му́ченик, Петра́, Диони́сиа, и и́же с ни́ми. И святы́х седми́ де́в.
19. [а] Свята́го священному́ченика Патрики́а, епи́скопа Пру́сскаго, и и́же с ни́м. И преподо́бнаго отца́ на́шего Корни́лиа, чудотво́рца Коме́льскаго.
20. [з] Свята́го му́ченика Фалале́а.
И обре́тение честны́х моще́й, и́же во святы́х отца́ на́шего Алекси́а митрополи́та Моско́вскаго и всея́ Росси́и, чудотво́рца.
21. [з] Святы́х вели́ких Царе́й и равноапо́столов, Константи́на и Еле́ны.
Пра́здник, и разреше́ние вина́ и еле́а.
В то́йже де́нь сре́тение Пресвяты́я Богоро́дицы чудотво́рныя ико́ны Влади́мирския.
И па́мять свята́го благове́рнаго кня́зя Константи́на, и ча́д его́, Михаи́ла и Фео́дора, Му́ромских чудотво́рцов.
22. [е] Свята́го му́ченика Васили́ска.
23. [д] Преподо́бнаго отца́ на́шего и испове́дника Михаи́ла, епи́скопа Сина́дскаго. И обре́тение честны́х моще́й, и́же во святы́х отца́ на́шего Лео́нтиа, епи́скопа Росто́вскаго, чудотво́рца. И преподо́бныя Евфроси́нии По́лоцкия.
24. [г] Преподо́бнаго отца́ на́шего Симео́на, и́же на Ди́вней го́ре.
Разреше́ние вина́ и еле́а.
И преподо́бнаго Ники́ты Сто́лпника, Переясла́вскаго чудотво́рца.
25. [в] Тре́тие обре́тение честны́я главы́ свята́го сла́внаго Проро́ка, Предте́чи и Крести́теля Госпо́дня Иоа́нна.
Разреше́ние вина́ и еле́а.
26. [а] Свята́го апо́стола Ка́рпа, еди́наго от 70. И свята́го великому́ченика Гео́ргиа Но́ваго, пострада́вшаго от царя́ Сели́ма Ту́рскаго.
27. [з] Свята́го священному́ченика Ферапо́нта. И обре́тение моще́й преподо́бнаго отца́ на́шего Ни́ла, и́же на е́зере Селиге́ре, на о́строве зово́мом Столобно́е, Но́ваго чудотво́рца.
28. [з] Преподо́бнаго отца́ на́шего Ники́ты, епи́скопа Халкидо́нскаго. И и́же во святы́х отца́ на́шего Игна́тиа, епи́скопа Росто́вскаго, чудотво́рца.
29. [е] Святы́я преподо́бному́ченицы Феодо́сии. И преставле́ние свята́го и блаже́ннаго Иоа́нна, Христа́ ра́ди юро́диваго, У́стюжскаго чудотво́рца.
30. [д] Преподо́бнаго отца́ на́шего Исаа́киа Далма́тскаго.
31. [г] Свята́го Апо́стола Ерми́а. И свята́го му́ченика Ерме́а.
Ме́сяц иу́ний
1. [в] Свята́го му́ченика Иусти́на Филосо́фа, и друга́го му́ченика Иусти́на, и и́же с ни́ми. И па́мять преподо́бнаго отца́ на́шего Диони́сиа, Глуши́цкаго чудотво́рца. И свята́го блаже́ннаго Ага́пита Пече́рскаго, безме́зднаго врача́.
2. [а] И́же во святы́х отца́ на́шего Ники́фора, Испове́дника. И свята́го великому́ченика Иоа́нна Но́ваго, му́ченаго в Беле́граде.
3. [з] Свята́го му́ченика Лукиллиа́на, и и́же с ни́м.
4. [з] И́же во святы́х отца́ на́шего Митрофа́на, патриа́рха Константиногра́дскаго.
5. [е] Свята́го священному́ченика Дорофе́а, епи́скопа Ти́рскаго. И преставле́ние свята́го благове́рнаго вели́каго кня́зя Фео́дора Яросла́вича.
6. [д] Преподо́бнаго отца́ на́шего Висарио́на Чудотво́рца. И преподо́бнаго Иларио́на Но́ваго.
7. [г] Свята́го священному́ченика Феодо́та, епи́скопа Анки́рскаго.
8. [в] Свята́го великому́ченика Фео́дора Стратила́та.
Разреше́ние вина́ и еле́а.
9. [а] И́же во святы́х отца́ на́шего Кири́лла, архиепи́скопа Александри́йскаго. И преподо́бнаго отца́ на́шего Кири́лла, Белоезе́рскаго чудотво́рца.
10. [з] Свята́го священному́ченика Тимофе́а, епи́скопа Пру́сскаго.
11. [з] Святы́х апо́стол, Варфоломе́а и Варна́вы.
Разреше́ние вина́ и еле́а.
12. [е] Преподо́бнаго отца́ на́шего Ону́фриа Вели́каго. И преподо́бнаго отца́ на́шего Петра́ Афо́нскаго. И па́мять преподо́бнаго отца́ на́шего Арсе́ниа, Коне́вскаго чудотво́рца.
13. [д] Святы́я му́ченицы Акили́ны. И и́же во святы́х отца́ на́шего Трифи́ллиа, епи́скопа Левкуси́и Ки́прския.
14. [г] Свята́го проро́ка Елиссе́а. И и́же во святы́х отца́ на́шего Мефо́диа, патриа́рха Константи́ня гра́да.
15. [в] Свята́го проро́ка Амо́са. И и́же во святы́х отца́ на́шего Ио́ны, митрополи́та Моско́вскаго и всея́ Росси́и, чудотво́рца.
16. [а] Свята́го и чудотво́рца Ти́хона Амафу́нтскаго.
17. [з] Святы́х му́ченик, Мануи́ла, Саве́ла и Исма́ила.
18. [з] Свята́го му́ченика Лео́нтиа.
19. [е] Свята́го апо́стола Иу́ды, бра́та Госпо́дня по пло́ти.
20. [д] Свята́го священному́ченика Мефо́диа, епи́скопа Пата́рскаго.
21. [г] Свята́го му́ченика Иулиа́на Тарси́йскаго.
22. [в] Свята́го священному́ченика Евсе́виа, епи́скопа Самоса́тскаго.
23. [а] Святы́я му́ченицы Агрипи́ны. В то́йже де́нь пра́зднуем Сре́тение Пречи́стыя Богоро́дицы чудотво́рныя ико́ны Влади́мирския.
24. [з] Рождество́ честна́го сла́внаго Проро́ка, Предте́чи и Крести́теля Иоа́нна.
Пра́здник, и разреше́ние ры́бы.
25. [з] Святы́я преподо́бному́ченицы Февро́нии. В то́йже де́нь святы́х чудотво́рцев Му́ромских: благове́рнаго кня́зя Петра́, нарече́ннаго во и́ноцех Дави́да, и благове́рныя княги́ни Февро́нии, нарече́нныя во и́нокинях Евфроси́нии.
26. [е] Преподо́бнаго отца́ на́шего Дави́да, и́же в Селу́не. И явле́ние ико́ны Пресвяты́я Влады́чицы на́шея Богоро́дицы и Присноде́вы Мари́и Ти́хвинския.
27. [д] Преподо́бнаго отца́ на́шего Сампсо́на Странноприи́мца. И пра́здник о побе́де Бо́гом дарова́нней всеросси́йскому самоде́ржцу Петру́ Вели́кому, над шве́дским короле́м Каро́лом вторымна́десять под Полта́вою, ле́та от воплоще́ния Госпо́дня 1709 г.
28. [г] Пренесе́ние моще́й святы́х безсре́бреник Ки́ра и Иоа́нна. И па́мять преподо́бных оте́ц, Се́ргиа и Ге́рмана, Валаа́мских чудотво́рцов.
29. [в] Святы́х сла́вных и всехва́льных верхо́вных апо́стол, Петра́ и Па́вла.
Пра́здник, и разреше́ние ры́бы.
30. [а] Собо́р святы́х сла́вных и всехва́льных двунаде́сяти апо́стол.
Пра́здник, и разреше́ние ры́бы.
Ме́сяц иу́лий
1. [з] Святы́х безсре́бреников и чудотво́рцев, Космы́ и Дамиа́на.
Разреше́ние вина́ и еле́а.
2. [з] Положе́ние честны́я ри́зы Пресвяты́я Влады́чицы на́шея Богоро́дицы, во Влахе́рне.
Разреше́ние вина́ и еле́а.
3. [е] Свята́го му́ченика Иаки́нфа. И пренесе́ние моще́й во святы́х отца́ на́шего Фили́ппа, митрополи́та Моско́вскаго и всея́ Росси́и, чудотво́рца. И преподо́бнаго Анато́лиа Пече́рскаго.
4. [д] И́же во святы́х отца́ на́шего Андре́а, архиепи́скопа Кри́тскаго, Иерусалими́та. И преподо́бныя Ма́рфы, ма́тере свята́го Симео́на Дивного́рца.
5. [г] Преподо́бнаго отца́ на́шего, Афана́сиа Афо́нскаго. И обре́тение честны́х моще́й преподо́бнаго отца́ на́шего, игу́мена Се́ргиа, Ра́донежскаго чудотво́рца.
6. [в] Преподо́бнаго отца́ на́шего Сисо́а Вели́каго. И обре́тение моще́й святы́я Иулиани́и деви́цы, в Киевопече́рстей Ла́вре почива́ющия.
7. [а] Преподо́бных оте́ц на́ших: Фомы́, и́же в Мале́и, и Ака́киа, и́же в Ле́ствице.
8. [з] Свята́го великому́ченика Проко́пиа.
Разреше́ние вина́ и еле́а.
В то́йже де́нь пра́зднуем явле́ние ико́ны Пресвяты́я Влады́чицы на́шея Богоро́дицы и Присноде́вы Мари́и, во гра́де Каза́ни. В то́йже де́нь воспомина́ние зна́мения, я́вльшагося от ико́ны Пресвяты́я Влады́чицы на́шея Богоро́дицы, честна́го и сла́внаго Ея́ Благове́щения, во гра́де вели́цем У́стюзе. И свята́го Проко́пиа, Христа́ ра́ди юро́диваго, У́стюжскаго чудотво́рца.
9. [з] Свята́го священному́ченика Пагкра́тиа, епи́скопа Тавромени́йскаго.
10. [е] Святы́х му́ченик 45, и́же в никопо́ли Арме́нстей.
В то́йже де́нь положе́ние честны́я ри́зы Го́спода на́шего Иису́са Христа́, я́же е́сть Хито́н, в ца́рствующем гра́де Москве́. И преподо́бнаго отца́ на́шего Анто́ниа Пече́рскаго Ки́евскаго. И пра́зднование пресвяте́й Богоро́дице, ра́ди чудотво́рныя Ея́ ико́ны в Коне́встей оби́тели.
11. [д] Святы́я му́ченицы и прехва́льныя Евфи́мии. И преставле́ние блаже́нныя О́льги, княги́ни росси́йския, во свято́м креще́нии нарече́нныя Еле́ны.
12. [г] Святы́х му́ченик Про́кла и Ила́риа. И преподо́бнаго отца́ на́шего Михаи́ла Малеина́.
13. [в] Собо́р свята́го Арха́нгела Гаврии́ла. И преподо́бнаго отца́ на́шего Стефа́на Савваи́та.
14. [а] Свята́го апо́стола Аки́лы.
15. [з] Святы́х му́ченик, Ки́рика и Иули́тты ма́тере его́.
И свята́го Равноапо́стола, вели́каго кня́зя Влади́мира, нарече́ннаго во святе́м креще́нии Васи́лиа.
Разреше́ние вина́ и еле́а.
16. [з] Свята́го священному́ченика Афиноге́на, и десяти́ учени́к его́.
17. [е] Святы́я великому́ченицы Мари́ны.
Разреше́ние вина́ и еле́а.
18. [д] Свята́го му́ченика Иаки́нфа, и́же во Амастри́де. И свята́го му́ченика Емилиа́на. И преподо́бнаго отца́ на́шего Многотерпели́ваго Иоа́нна, затво́рника Пече́рскаго, и́же в Ки́еве.
19. [к] Преподо́бныя ма́тере на́шея Макри́ны, сестры́ вели́каго Васи́лиа. И преподо́бнаго отца́ на́шего Ди́а. И обре́тение и пренесе́ние честны́х моще́й преподо́бнаго отца́ на́шего Серафи́ма Саро́вскаго.
20. [в] Свята́го сла́внаго проро́ка Илии́.
Пра́здник, и разреше́ние вина́ и еле́а.
21. [а] Преподо́бных оте́ц на́ших, Симео́на Христа́ ра́ди юро́диваго, и Иоа́нна спо́стника его́. И свята́го проро́ка Иезеки́иля. И преподо́бнаго Ону́фриа Молчали́ваго Пече́рскаго.
22. [з] Святы́я мироно́сицы и равноапо́стольныя Мари́и Магдали́ны. И возвраще́ние моще́й свята́го священному́ченика Фо́ки.
Разреше́ние вина́ и еле́а.
23. [з] Святы́х му́ченик, Трофи́ма и Фео́фила, и и́же с ни́ми.
24. [е] Святы́я великому́ченицы Христи́ны. И святы́х му́ченик Бори́са и Гле́ба, нарече́нных во святе́м креще́нии Рома́на и Дави́да. И преподо́бнаго отца́ на́шего Полика́рпа Пече́рскаго.
25. [д] успе́ние святы́я А́нны, ма́тере Пресвяты́я Богоро́дицы. И па́мять святы́х же́н Олимпиа́ды и Евпракси́и.
Разреше́ние вина́ и еле́а.
И преставле́ние преподо́бнаго отца́ на́шего Мака́риа Желтово́дскаго, чудотво́рца.
26. [г] Свята́го священному́ченика Ермола́а, и и́же с ни́м. И святы́я преподо́бному́ченицы Параске́вы. И преподо́бнаго отца́ на́шего многострада́льнаго Моисе́а У́грина, Пече́рскаго.
27. [в] Свята́го великому́ченика и цели́теля Пантелеи́мона.
Разреше́ние вина́ и еле́а.
28. [а] Святы́х апо́стол и диа́конов, Про́хора, Никано́ра, Ти́мона и Парме́на. В то́йже де́нь пра́зднуем явле́ние ико́ны Смоле́нския, Пресвяты́я Влады́чицы на́шея Богоро́дицы, Одиги́трии.
29. [з] Свята́го му́ченика Каллини́ка.
30. [з] Святы́х апо́стол, Си́лы и Силуа́на, и и́же с ни́ми.
31. [е] Предпра́зднство происхожде́ния Честна́го и Животворя́щаго Креста́ Госпо́дня. И свята́го и пра́веднаго Евдоки́ма.
Ме́сяц а́вгуст
1. [д] Происхожде́ние честны́х дре́в Честна́го и Животворя́щаго Креста́. И святы́х седми́ му́ченик Маккаве́й, и ма́тере и́х Соломони́и, и учи́теля и́х Елеаза́ра.
2. [г] Пренесе́ние моще́й свята́го первому́ченика и архидиа́кона Стефа́на. И свята́го Васи́лиа, Христа́ ра́ди юро́диваго, Моско́вскаго чудотво́рца.
3. [в] Преподо́бных оте́ц на́ших: Исаа́киа, Далма́та и Фа́вста. В то́йже де́нь преставле́ние преподо́бнаго отца́ на́шего Анто́ниа Ри́млянина, Новгоро́дскаго чудотво́рца.
4. [а] Святы́х седми́ о́трок, и́же во Ефе́се. И святы́я преподо́бному́ченицы Евдоки́и.
5. [з] Предпра́зднство Преображе́ния Го́спода на́шего Иису́са Христа́. И свята́го му́ченика Евсигни́а.
6. [з] Свято́е Преображе́ние Го́спода Бо́га и Спа́са на́шего Иису́са Христа́.
Пра́здник, и разреше́ние ры́бы.
7. [е] Свята́го преподо́бному́ченика Домети́а. И преподо́бнаго отца́ на́шего Пи́мена Пече́рскаго.
8. [д] Свята́го Емилиа́на Испове́дника, епи́скопа Кизи́ческаго. И преподо́бнаго Григо́риа, иконопи́сца Пече́рскаго.
9. [г] Свята́го апо́стола Матфи́а.
Разреше́ние вина́ и еле́а.
10. [в] Свята́го му́ченика и архидиа́кона Лавре́нтиа.
11. [а] Свята́го му́ченика и архидиа́кона Е́впла. И преподо́бному́чеников пече́рских Фео́дора и Васи́лиа.
12. [з] Святы́х му́ченик, Фо́тиа и Ники́ты.
13. [з] Преподо́бнаго отца́ на́шего Макси́ма Испове́дника. И и́же во святы́х отца́ на́шего Ти́хона Воро́нежскаго, Задо́нскаго чудотво́рца. В си́й де́нь отдае́тся пра́здник Преображе́ния.
14. [е] Предпра́зднство Успе́ния Пресвяты́я Богоро́дицы. И свята́го проро́ка Михе́а. И пренесе́ние честны́х моще́й преподо́бнаго отца́ на́шего Феодо́сиа, игу́мена Пече́рскаго.
15. [д] Успе́ние Пресвяты́я Влады́чицы на́шея Богоро́дицы, и Присноде́вы Мари́и.
Пра́здник, и разреше́ние ры́бы.
16. [г] От Еде́са пренесе́ние в Константи́нь гра́д Нерукотворе́ннаго О́браза Го́спода Бо́га и Спа́са на́шего Иису́са Христа́. И свята́го му́ченика Диоми́да.
17. [в] Свята́го му́ченика Ми́рона. И преподо́бнаго отца́ на́шего Али́пиа, иконопи́сца Пече́рскаго.
18. [а] Святы́х му́ченик Фло́ра и Ла́вра.
19. [з] Свята́го му́ченика Андре́а Стратила́та, и и́же с ни́м. В то́йже де́нь пра́зднуем Пресвяте́й Богоро́дице, бы́вшаго ра́ди милосе́рдия, от ико́ны Ея́ святы́я, нарица́емыя Донски́я.
20. [з] Свята́го проро́ка Самуи́ла.
21. [е] Свята́го Апо́стола Фадде́а. И святы́я му́ченицы Ва́ссы. И преставле́ние преподо́бнаго отца́ на́шего Авра́миа архимандри́та, Смоле́нскаго чудотво́рца.
22. [д] Свята́го му́ченика Агафони́ка, и и́же с ни́м.
23. [г] Свята́го му́ченика Лу́ппа. И отдае́тся пра́здник Успе́ния Пресвяты́я Богоро́дицы.
24. [в] Свята́го священному́ченика Евти́ха. И пренесе́ние честны́х моще́й, и́же во святы́х отца́ на́шего Петра́, митрополи́та Ки́евскаго и всея́ Росси́и, чудотво́рца.
25. [а] Возвраще́ние моще́й свята́го апо́стола Варфоломе́а. И па́мять свята́го апо́стола Ти́та.
26. [з] Святы́х му́ченик, Адриа́на и Ната́лии.
В се́й де́нь пра́зднуем возсле́дование похва́льно сре́тения чудотво́рныя ико́ны Влади́мирския, Пресвяты́я Влады́чицы на́шея Богоро́дицы и Присноде́вы Мари́и.
27. [з] Преподо́бнаго отца́ на́шего Пи́мена. И свята́го священному́ченика Ку́кши и Пи́мена По́стника, Пече́рских.
28. [е] Преподо́бнаго отца́ на́шего Моисе́а Му́рина.
29. [д] Усекнове́ние честны́я главы́ честна́го сла́внаго Проро́ка, Предте́чи и Крести́теля Госпо́дня Иоа́нна.
Пра́здник, и по́ст.
30. [г] И́же во святы́х оте́ц на́ших, патриа́рхов Константи́ня гра́да, Алекса́ндра, Иоа́нна и Па́вла Но́ваго. И пренесе́ние моще́й свята́го благове́рнаго вели́каго кня́зя Алекса́ндра Не́вскаго, из Влади́мира в Ца́рствующий гра́д свята́го Петра́. И преставле́ние преподо́бнаго отца́ на́шего Алекса́ндра Сви́рскаго, чудотво́рца.
31. [в] Положе́ние честна́го По́яса Пресвяты́я Влады́чицы на́шея Богоро́дицы.
Разреше́ние вина́ и еле́а.