[глⷡ҇а д҃] Мл҃тва на ржⷭ҇тво̀ хрⷭ҇то́во, сынѡ́мъ дꙋхѡ́внымъ.

Влⷣко гдⷭ҇и бж҃е вседержи́телю, є҆гда̀ роди́лсѧ є҆сѝ ѿ дв҃ы марі́и въ виѳлее́мѣ і҆ꙋдѣ́йстѣмъ, тре́петнѡ тва́рь просвѣти́сѧ, и҆ въ мі́ръ возра́довасѧ ржⷭ҇твꙋ̀ твоемꙋ̀: сотвори́вый человѣ́ка по ѡ҆́бразꙋ твоемꙋ̀ и҆ по подо́бїю, и҆ да́вый є҆мꙋ̀ кр҃ще́нїе въ покаѧ́нїе. введы́й рабы̑ твоѧ̑ въ пречестны̑ѧ дни̑ сїѧ̑, къ воздержа́нїю страстє́мъ, къ наде́ждѣ воскрⷭ҇нїѧ: наставлѧ́ѧ и҆̀хъ на и҆́стинꙋ твоегѡ̀ бж҃ества̀, ѿве́рзи и҆̀мъ се́рдце и҆ ᲂу҆́мъ, зна́ти тѧ̀ сн҃а бж҃їѧ, взе́млющаго грѣхѝ всегѡ̀ мі́ра. ты̀ и҆ ны́нѣ влⷣко чл҃вѣколю́бче прїимѝ рабы̑ твоѧ̑ и҆́мⷬ҇къ, ꙗ҆́коже прїѧ́лъ є҆сѝ петра̀ ᲂу҆топа́юща въ мо́ри, и҆ ѿве́ргшагосѧ тебѐ три́жды, и҆ пла́кавшагосѧ го́рькѡ, и҆ па́ки прїѧ́та тобо́ю: прїимѝ и҆ ны́нѣ влⷣко, сле́зы и҆ воздыха́нїе и҆ покаѧ́нїе рабѡ́въ твои́хъ, ꙗ҆́коже прїѧ́тъ мытаре́во воздыха́нїе, и҆ блꙋдни́цꙋ пла́кавшꙋюсѧ, и҆ слеза́ми ѡ҆мочи́вшꙋю но́зѣ твоѝ, и҆ власы̀ свои́ми ѡ҆те́ршꙋю, млⷭ҇ти ра́ди. прїе́мый разбо́йника съ собо́ю, на крⷭ҇тѣ̀ вопїю́ща къ тебѣ̀: помѧни́ мѧ гдⷭ҇и, є҆гда̀ прїи́деши во црⷭ҇твїи твое́мъ. и҆ рекі́й є҆мꙋ̀: дне́сь со мно́ю бꙋ́деши въ раѝ. слы́шахомъ гла́съ глаго́лющїй, и҆ волхвѡ́мъ кла́нѧющымсѧ съ да́ры, па́стырємъ свирѧ́ющымъ, и҆ а҆́гг҃лѡмъ воспѣва́ющымъ: сла́ва въ вы́шнихъ бг҃ꙋ, и҆ на землѝ ми́ръ, въ человѣ́цѣхъ бл҃говоле́нїе, и҆ и҆́рѡдъ мѧтѧ́шесѧ, ꙗ҆́кѡ бг҃ъ пло́тїю ꙗ҆ви́сѧ на сп҃се́нїе ро́дꙋ человѣ́ческомꙋ. тѧ̀ ны́нѣ влⷣко человѣколю́бче, всѧ̀ тва́рь воспѣва́етъ глаго́лющи: хрⷭ҇то́съ ражда́етсѧ, сла́вите: хрⷭ҇то́съ съ нб҃сѐ, срѧ́щите: хрⷭ҇то́съ на землѝ, возноси́тесѧ. ны́нѣ а҆́гг҃льстїи собо́ри ра́дꙋютсѧ, и҆ мч҃нчестїи ли́цы веселѧ́тсѧ, ви́дѣвше сла́вное и҆ чⷭ҇тно́е ржⷭ҇тво̀, да всѝ досто́йнѡ похва́лимъ се́рдцемъ и҆ ᲂу҆стна́ми. и҆ ны́нѣ бл҃гі́й чл҃вѣколю́бче гдⷭ҇и, прїимѝ рабы̑ твоѧ̑ сїѧ̑ и҆́мⷬ҇къ, ка́ющыѧсѧ грѣхѡ́въ свои́хъ, вѣ́домыхъ и҆ невѣ́домыхъ, во́льныхъ и҆ нево́льныхъ: и҆ ѻ҆бы́чнымъ чл҃вѣколю́бїемъ твои́мъ, прїимѝ колѣ́нное поклоне́нїе и҆ по́стъ рабѡ́въ твои́хъ и҆́мⷬ҇къ, да сконча́вше за́пѡвѣди твоѧ̑, и҆ дости́гше ны́нѣ ст҃а́гѡ и҆ чⷭ҇тна́гѡ ржⷭ҇тва̀ твоегѡ̀, чи́сти и҆ без̾ поро́ка бꙋ́дꙋтъ прича̑стницы пречⷭ҇тагѡ тѣ́ла и҆ чⷭ҇тны́ѧ кро́ве твоеѧ̀: ꙗ҆́кѡ тебѣ̀ подоба́етъ сла́ва со ѻ҆ц҃е́мъ и҆ со ст҃ы́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.


Комментарии для сайта Cackle