[глⷡ҇а к҃в] Чи́нъ быва́емый на ни́вахъ, и҆лѝ вїногра́дѣ, и҆лѝ вертогра́дѣ, а҆́ще слꙋчи́тсѧ вреди́тисѧ ѿ гадѡ́въ, и҆лѝ и҆ны́хъ ви́дѡвъ.
Подоба́етъ бы́ти лїтꙋргі́и, и҆ вжига́ти канди́ло ст҃а́гѡ трѵ́фѡна, и҆лѝ ст҃а́гѡ є҆ѵста́ѳїа, и҆лѝ ст҃а́гѡ і҆ꙋлїа́на лѷві́йскагѡ, и҆лѝ ѻ҆бои́хъ. По бж҃е́ственнѣй лїтꙋргі́и взѧ́ти є҆ле́й ѿ канди́лъ, и҆ во́дꙋ ст҃ы́хъ бг҃оѧвле́нїй, и҆ кроплѧ́ѧй крⷭ҇тови́днѡ сщ҃е́нникъ. на ни́вꙋ, и҆лѝ вїногра́дъ, и҆лѝ вертогра́дъ, глаго́летъ мл҃твы сїѧ̑.
Гдⷭ҇ꙋ помо́лимсѧ.
Гдⷭ҇и бж҃е на́шъ, въ нача́лѣ созда́нїѧ твоегѡ̀ сотвори́вый нб҃о и҆ зе́млю: и҆ нб҃о ᲂу҆́бѡ ᲂу҆краси́вый вели́кими свѣти́лы, є҆́же просвѣща́ти на землѝ, и҆ чꙋди́тисѧ тѣ́ми тебѣ̀ є҆ди́номꙋ содѣ́телю и҆ влⷣцѣ тва́ри: зе́млю же ᲂу҆краси́вый ѕла́комъ и҆ траво́ю, и҆ разли́чїемъ сѣ́менъ сѣ́емыхъ по ро́дꙋ, и҆ всю̀ цвѣ́ты воѡбрази́въ въ бл҃гоꙋкраше́нїе, бл҃гослови́лъ є҆сѝ ю҆̀: са́мъ и҆ ны́нѣ влⷣко, при́зри ѿ ст҃а́гѡ жили́ща твоегѡ̀ на стѧжа́нїе сїѐ: и҆ бл҃гословѝ є҆̀. сохранѝ є҆̀ неврежде́нно ѿ всѧ́кагѡ чарова́нїѧ и҆ ѡ҆баѧ́нїѧ, и҆ всѧ́кагѡ ѕла̀, ѡ҆пла́знства же лꙋка́вагѡ, и҆ кова́рства лꙋка́выхъ человѣ̑къ: и҆ да́ждь є҆мꙋ̀ приноси́ти плоды̀ во вре́мѧ, и҆спо́лнены бл҃гослове́нїѧ твоегѡ̀, и҆ всѧ́кагѡ ѕвѣ́рїѧ и҆ га́да, че́рвь же и҆ мꙋ̑хи, и҆ ржꙋ̀, зно́й и҆ ва́ръ, и҆ безгѡ́дныѧ вѣ́тры, вре́дъ наносѧ́щыѧ, ѿженѝ ѿ негѡ̀.
Ꙗ҆́кѡ ѡ҆ст҃и́сѧ и҆ просла́висѧ пречⷭ҇тно́е и҆ великолѣ́пое и҆́мѧ твоѐ, ѻ҆ц҃а̀ и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.
Заклина́нїе ст҃а́гѡ мч҃нка трѵ́фѡна.
Вѣ́ждь же, ѽ і҆ере́ю, ꙗ҆́кѡ не всѧ̑ живѡ́тнаѧ здѣ̀ и҆менѡва́ннаѧ прочестѝ досто́итъ, но то́чїю тогда̀ врежда́ющыѧ.
Заклина́ю ва́съ многови́днїи ѕвѣ́рїе, че́рвїе, гꙋ́сєницы, хрꙋщѝ и҆ прꙋ́зи, мы́ши, щꙋ́ры и҆ кри̑тицы, и҆ разли̑чныѧ ро́ды мꙋ́хъ, и҆ мꙋ́шицъ, и҆ мо́лїй, и҆ мра̑вїй, ѻ҆́вадѡвъ же и҆ ѻ҆́съ, и҆ многоно́жицъ, и҆ многоѡбра́зныѧ ро́ды по́лзающихъ по землѝ живо́тныхъ, и҆ лета́ющихъ пти́цъ, вре́дъ и҆ тщетꙋ̀ ни́вамъ, вїногра́дѡмъ, садѡ́мъ же и҆ вертогра́дѡмъ наносѧ́щыѧ, бг҃омъ ѻ҆ц҃е́мъ безнача́льнымъ, и҆ сн҃омъ є҆гѡ̀ собезнача́льнымъ и҆ є҆диносꙋ́щнымъ, и҆ дх҃омъ є҆гѡ̀ прест҃ы́мъ, ѻ҆ц҃ꙋ̀ и҆ сн҃ꙋ є҆диносꙋ́щнымъ, и҆ животворѧ́щимъ. Заклина́ю ва́съ вочл҃вѣ́ченїемъ є҆диноро́днагѡ сн҃а бж҃їѧ, гдⷭ҇а на́шегѡ і҆и҃са хрⷭ҇та̀, и҆ пожи́тїемъ є҆гѡ̀ на землѝ съ человѣ́ки, стра́стїю же є҆гѡ̀ сп҃си́тельною, и҆ животворѧ́щею є҆гѡ̀ сме́ртїю, и҆ тридне́внымъ є҆гѡ̀ воскрⷭ҇нїемъ, и҆ на нб҃са̀ вознесе́нїемъ, и҆ всѣ́мъ є҆гѡ̀ бж҃е́ственнымъ сп҃си́тельнымъ смотре́нїемъ. Заклина́ю ва́съ и҆ ст҃ы́ми многоѻчи́тыми херꙋві́мы, шестокрила́тыми серафі́мы лета́ющими ѻ҆́крестъ прⷭ҇то́ла, и҆ зовꙋ́щими: ст҃ъ, ст҃ъ, ст҃ъ, гдⷭ҇ь саваѡ́ѳъ. Заклина́ю ва́съ ст҃ы́ми а҆́гг҃лы, и҆ все́ю си́лою, и҆ ты́сѧщами ты́сѧщъ, и҆ тьма́ми тє́мъ, стра́хомъ мно́гимъ стоѧ́щими пред̾ сла́вою гдⷭ҇нею, да не ѡ҆би́дите вїногра́дъ, нижѐ ни́вꙋ, нижѐ вертогра́дъ, древе́съ же и҆ ѕе́лїй раба̀ бж҃їѧ (и҆́мⷬ҇къ), но ѿиди́те на ди̑вїѧ го́ры, на неплѡ́днаѧ древеса̀, на ни́хже дарова́лъ є҆́сть бг҃ъ ва́мъ повседне́внꙋю пи́щꙋ. Заклина́ю ва́съ и҆ чⷭ҇тны́мъ тѣ́ломъ и҆ кро́вїю гдⷭ҇а на́шегѡ і҆и҃са хрⷭ҇та̀, и҆́стиннагѡ бг҃а и҆ сп҃са на́шегѡ, и҆́мже и҆ сп҃се́нїе даде́сѧ на́мъ и҆ и҆збавле́нїе, за є҆гѡ́же и҆́мѧ и҆́мамы ᲂу҆мре́ти, да не ѡ҆би́дите нижѐ ни́вꙋ, нижѐ вїногра́дъ, нижѐ вертогра́дъ, нижѐ всѧ́кое дре́во плодови́тое, и҆ безпло́дное: и҆ нижѐ ли́стъ ѕе́лїй да не ѡ҆би́дите ѿ ѡ҆крꙋже́нїѧ предѣ́ла, и҆ мѣ́ста раба̀ бж҃їѧ (и҆́мⷬ҇къ). А҆́ще же преслꙋша́ете менѐ, и҆ престꙋпитѐ клѧ́твꙋ, є҆́юже заклина́хъ ва́съ, не и҆́мате ко мнѣ̀ смире́нномꙋ и҆ малѣ́йшемꙋ трѵ́фѡнꙋ, но къ бг҃ꙋ а҆враа́ма, и҆ і҆саа́ка, и҆ і҆а́кѡва, грѧдꙋ́щемꙋ сꙋди́ти живы̑мъ и҆ мє́ртвымъ: тѣ́мже ꙗ҆́коже предрѣ́хъ ва́мъ, и҆ди́те на ди̑вїѧ го́ры, на безплѡ́днаѧ древа̀. А҆́ще же не послꙋ́шаете менѐ, моли́ти и҆́мамъ чл҃вѣколю́бца бг҃а, є҆́же посла́ти а҆́гг҃ла своего̀, и҆́же над̾ ѕвѣрьмѝ, и҆ желѣ́зомъ и҆ свинцо́мъ свѧ́жетъ ва́съ, и҆ ᲂу҆бїе́тъ, занѐ клѧ́твъ и҆ мл҃твъ менѐ смире́ннагѡ ѿверго́стесѧ трѵ́фѡна: но и҆ пти̑цы посыла́ємыѧ мое́ю мл҃твою да снѣдѧ́тъ ва́съ. Є҆щѐ заклина́ю ва́съ вели́кимъ и҆́менемъ, на ка́мени напи́саннымъ, и҆ не носи́вшемъ, но разсѣ́дшемсѧ ꙗ҆́кѡ во́скъ ѿ лица̀ ѻ҆гнѧ̀: и҆зыди́те ѿ мѣ́стъ на́шихъ на мѣста̀, ꙗ҆̀же предрѣ́хъ ва́мъ, непроходи̑маѧ и҆ безвѡ́днаѧ, и҆ неплѡ́днаѧ, и҆зыди́те ѿ мѣ́ста и҆ ѻ҆́крестъ предѣ̑лъ рабѡ́въ бж҃їихъ, и҆ менѐ призыва́ющихъ въ по́мощь свою̀, и҆ застꙋпле́нїе и҆ сп҃се́нїе, да и҆ въ си́хъ сла́витсѧ прест҃о́е и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а, и҆ мл҃твы и҆ прошє́нїѧ, смире́ннагѡ трѵ́фѡна да и҆спо́лнѧтсѧ, ꙗ҆́кѡ бг҃ꙋ подоба́етъ сла́ва и҆ держа́ва во вѣ́ки вѣкѡ́въ, а҆ми́нь.
Сщ҃е́нникъ: Ми́ръ всѣ̑мъ.
Ли́къ: И҆ дꙋ́хови твоемꙋ̀.
Сщ҃е́нникъ: Главы̑ ва́шѧ гдⷭ҇еви приклони́те.
Ли́къ: Тебѣ̀ гдⷭ҇и.
Сщ҃е́нникъ же чте́тъ мл҃твꙋ сїю̀ велегла́снѡ:
Влⷣко гдⷭ҇и бж҃е на́шъ, плотски́мъ твои́мъ смотре́нїемъ бл҃гослови́вый виѳлее́мъ, и҆ геѳсїма́нїю, и҆ и҆ногда̀ до́мъ і҆а́кѡвль, и҆́же и҆ бл҃гослове́нъ бы́въ і҆и҃ль преименова́сѧ: и҆́же и҆ до́мъ а҆веда́рїинъ и҆ дв҃довъ бл҃гослови́вый, са́мъ бл҃гословѝ и҆ стѧжа́нїе сїѐ, и҆ сотворѝ є҆̀ ѡ҆ бл҃гослове́нїи плодоноси́ти: мл҃твами пречⷭ҇тыѧ влⷣчцы на́шеѧ бцⷣы, и҆ приснодв҃ы мр҃і́и. си́лою чⷭ҇тна́гѡ и҆ животворѧ́щагѡ крⷭ҇та̀: чⷭ҇тна́гѡ, сла́внагѡ прⷪ҇ро́ка, прⷣте́чи и҆ крⷭ҇ти́телѧ і҆ѡа́нна, ст҃ы́хъ сла́вныхъ и҆ всехва́льныхъ а҆пⷭ҇лъ: ст҃ы́хъ добропобѣ́дныхъ мч҃нкъ: ст҃ы́хъ сла́вныхъ великомч҃нкъ, трѵ́фѡна, є҆ѵста́ѳїа и҆ і҆ꙋлїа́на: и҆ ст҃а́гѡ (и҆́мⷬ҇къ), є҆гѡ́же дне́сь па́мѧть соверша́емъ, и҆ всѣ́хъ твои́хъ ст҃ы́хъ.
Ꙗ҆́кѡ ты̀ є҆сѝ бл҃гословлѧ́ѧй и҆ ѡ҆сщ҃а́ѧй всѧ́чєскаѧ, и҆ тебѣ̀ сла́вꙋ возсыла́емъ, со безнача́льнымъ твои́мъ ѻ҆ц҃е́мъ и҆ съ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ, а҆ми́нь.