[глⷡ҇а л҃и] Чи́нъ бл҃гослове́нїѧ і҆нди́тїй, и҆лѝ ѻ҆де́ждъ и҆ покрыва̑лъ бж҃е́ственныѧ трапе́зы и҆ же́ртвенника.

Положє́ннымъ бы́вшымъ си̑мъ на столѣ̀ пред̾ ст҃ы́ми враты̀, и҆ сꙋ́щей тꙋ̀ и҆ водѣ̀ сщ҃е́нной, і҆ере́й и҆схо́дитъ и҆з̾ ѻ҆лтарѧ̀, ѡ҆дѣ́ѧнъ въ є҆пїтрахи́ль и҆ фелѡ́нь, и҆ покади́въ крⷭ҇тоѡбра́знѡ, начина́етъ ѻ҆бы́чнѡ: Бл҃гослове́нъ бг҃ъ на́шъ: Чте́цъ: а҆ми́нь. Цр҃ю̀ нбⷭ҇ный: Трист҃о́е. Ѻ҆́ч҃е на́шъ: І҆ере́й: Ꙗ҆́кѡ твоѐ є҆́сть црⷭ҇тво: Гдⷭ҇и поми́лꙋй, в҃і. Сла́ва, и҆ ны́нѣ: Прїиди́те, поклони́мсѧ: три́жды.

И҆ ѱало́мъ ч҃в:

Гдⷭ҇ь воцр҃и́сѧ, въ лѣ́потꙋ ѡ҆блече́сѧ: ѡ҆блече́сѧ гдⷭ҇ь въ си́лꙋ, и҆ препоѧ́сасѧ: и҆́бо ᲂу҆твердѝ вселе́ннꙋю, ꙗ҆́же не подви́житсѧ. Гото́въ прⷭ҇то́лъ тво́й ѿто́лѣ, ѿ вѣ́ка ты̀ є҆сѝ. Воздвиго́ша рѣ́ки гдⷭ҇и, воздвиго́ша рѣ́ки гла́сы своѧ̑. Во́змꙋтъ рѣ́ки сотрє́нїѧ своѧ̑, ѿ гласѡ́въ во́дъ мно́гихъ. Ди̑вны высѡты̀ морскі̑ѧ, ди́венъ въ высо́кихъ гдⷭ҇ь. Свидѣ̑нїѧ твоѧ̑ ᲂу҆вѣ́ришасѧ ѕѣлѡ̀: до́мꙋ твоемꙋ̀ подоба́етъ ст҃ы́нѧ гдⷭ҇и, въ долготꙋ̀ дні́й.

Сла́ва, и҆ ны́нѣ: А҆ллилꙋ́їа, три́жды.

Дїа́конъ: Гдⷭ҇ꙋ помо́лимсѧ.

Ли́къ: Гдⷭ҇и поми́лꙋй.

І҆ере́й же чте́тъ мл҃твꙋ сїю̀:

Гдⷭ҇и бж҃е ѻ҆́ч҃е вседержи́телю, рабꙋ̀ твоемꙋ̀ законополо́жникꙋ мѡѷсе́ю на сїна́йстѣй горѣ̀ разли̑чнаѧ ᲂу҆крашє́нїѧ, покрыва̑ла же и҆ пла̑тна, въ ᲂу҆потребле́нїе слꙋже́нїѧ ски́нїи свидѣ́нїѧ, и҆ зако́ннагѡ твоегѡ̀ ст҃и́лища твори́ти повелѣ́вый: ты̀ и҆ ны́нѣ, прилѣ́жнѡ мо́лимъ тѧ̀, ꙗ҆́коже тогда̀ ѻ҆́наѧ бл҃гоꙋтро́бнѣ прїи́мъ, рꙋко́ю а҆арѡ́нею ѡ҆ст҃и́лъ є҆сѝ, и҆ сїѧ̑ ми́лостивнѡ прїи́мъ, дх҃омъ твои́мъ ст҃ы́мъ, рꙋко́ю менѐ грѣ́шнагѡ бл҃гословѝ, ѡ҆чи́сти и҆ ѡ҆ст҃ѝ, и҆ достѡ́йна къ покрове́нїю и҆ ѡ҆бви́тїю бж҃е́ственнагѡ прⷭ҇то́ла и҆ же́ртвенника возлю́бленнагѡ сн҃а твоегѡ̀, гдⷭ҇а на́шегѡ і҆и҃са хрⷭ҇та̀, бы́ти сотворѝ. Ѿ тебе́ бо свы́ше всѧ́ко даѧ́нїе бл҃го, и҆ всѧ́кїй да́ръ соверше́нный и҆схо́дитъ: и҆ тебѣ̀ сла́вꙋ возсыла́емъ, со є҆диноро́днымъ твои́мъ сн҃омъ, и҆ съ прест҃ы́мъ и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ.

Ли́къ: а҆ми́нь.

І҆ере́й: Ми́ръ всѣ̑мъ.

Ли́къ: И҆ дꙋ́хови твоемꙋ̀.

Дїа́конъ: Главы̑ ва́шѧ гдⷭ҇еви приклони́те.

І҆ере́й же, главꙋ̀ приклонѧ̀, глаго́летъ мл҃твꙋ сїю̀:

Приклонѝ гдⷭ҇и ᲂу҆́хо твоѐ, и҆ ᲂу҆слы́ши мѧ̀ недосто́йнаго раба̀ твоего̀, и҆ сїѧ̑ покрыва̑льнаѧ пла̑тна, къ ᲂу҆потребле́нїю ст҃а́гѡ ѻ҆лтарѧ̀ и҆ же́ртвенника хрⷭ҇та̀ твоегѡ̀ ᲂу҆стро́єннаѧ, бл҃года́тїю твое́ю всеѡсвѧща́ющею, въ ѡ҆кропле́нїи воды̀ сеѧ̀ сщ҃е́нныѧ, бл҃гословѝ, ѡ҆чи́сти и҆ ѡ҆ст҃ѝ.

И҆ возглаша́етъ: Ты́ бо є҆сѝ бл҃гословлѧ́ѧй и҆ ѡ҆сщ҃а́ѧй всѧ́чєскаѧ бж҃е на́шъ, и҆ тебѣ̀ сла́вꙋ возсыла́емъ, со є҆диноро́днымъ твои́мъ сн҃омъ, и҆ съ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ.

Ли́къ: а҆ми́нь.

І҆ере́й же а҆́бїе кропи́тъ покрыва̑ла, глаго́лѧ:

Ѡ҆сщ҃а́ютсѧ покрыва̑ла сїѧ̑ бл҃года́тїю прест҃а́гѡ дх҃а, ѡ҆кропле́нїемъ воды̀ сеѧ̀ сщ҃е́нныѧ, во и҆́мѧ ѻ҆ц҃а̀, и҆ сн҃а, и҆ ст҃а́гѡ дх҃а, а҆ми́нь. три́жды.

И҆ сотвори́въ ѻ҆бы́чный ѿпꙋ́стъ, взе́млетъ и҆̀хъ са́мъ, и҆ покрыва́етъ и҆́ми прⷭ҇то́лъ и҆ же́ртвенникъ.