Сырная седмица (с понедельника по пяток)
Въ недѣ́лю ве́чера,
на Гдⷭ҇и воззва́хъ, пое́мъ, ꙗ҆́кѡ ѡ҆бы́чно, стїхи̑ры ѻ҆смогла́сника г҃: и҆ мине́и дневна́гѡ ст҃а́гѡ г҃. Сла́ва, и҆ ны́нѣ, бг҃оро́диченъ.
На стїхо́внѣ же ѡ҆ставлѧ́етсѧ ѻ҆смогла́сникъ, и҆ пое́мъ самогла́сенъ днѐ, ѻ҆́ба ли̑ка вкꙋ́пѣ. Гла́съ и҃:
Сластолю́бствовавше, пе́рвꙋю прїѧ́хомъ наготꙋ̀, побѣди́вшесѧ го́рькимъ вкꙋше́нїемъ, и҆ ѿ бг҃а и҆згна́ни бы́хомъ. но взы́демъ къ покаѧ́нїю, и҆ чꙋ̑вства ѡ҆чи́стимъ ѿ тѣ́хъ, къ ни̑мже бра́нь, вхо́дъ поста̀ творѧ́ще, наде́ждою бл҃года́ти сердца̀ ᲂу҆твержда́юще, а҆ не бра́шны, въ ни́хже ходи́вшїи не прїѧ́ша по́льзы. и҆ пода́стсѧ на́мъ въ снѣ́дь а҆́гнецъ бж҃їй, во сщ҃е́ннѣй и҆ свѣтоно́снѣй но́щи воскрⷭ҇нїѧ, на́съ ра́ди приведе́нное заколе́нїе, ᲂу҆ч҃нкѡ́мъ прїѻбще́нное въ ве́черъ та́инства, и҆ тьмꙋ̀ невѣ́дѣнїѧ разорѧ́ющее свѣ́томъ є҆гѡ̀ воскрⷭ҇нїѧ.
Сті́хъ: Къ тебѣ̀ возведо́хъ ѻ҆́чи моѝ, живꙋ́щемꙋ на нб҃сѝ. сѐ ꙗ҆́кѡ ѻ҆́чи ра̑бъ въ рꙋкꙋ̀ госпо́дїй свои́хъ, ꙗ҆́кѡ ѻ҆́чи рабы́ни въ рꙋкꙋ̀ госпожѝ своеѧ̀: та́кѡ ѻ҆́чи на́ши ко гдⷭ҇ꙋ бг҃ꙋ на́шемꙋ, до́ндеже ᲂу҆ще́дритъ ны̀.
И҆ па́ки то́йже самогла́сенъ: Сладколю́бствовавше:
Сті́хъ в҃: Поми́лꙋй на́съ, гдⷭ҇и, поми́лꙋй на́съ, ꙗ҆́кѡ по мно́гꙋ и҆спо́лнихомсѧ ᲂу҆ничиже́нїѧ: наипа́че напо́лнисѧ дꙋша̀ на́ша поноше́нїѧ надме́нныхъ и҆ ᲂу҆ничиже́нїѧ го́рдыхъ.
И҆ пое́мъ мч҃нченъ въ то́йже гла́съ:
Мч҃нцы гдⷭ҇ни, всѧ́ко мѣ́сто ѡ҆сщ҃а́ете, и҆ всѧ́къ недꙋ́гъ врачꙋ́ете: и҆ ны́нѣ моли́те, и҆зба́витисѧ ѿ сѣте́й вра́жїихъ дꙋша́мъ на́шымъ, мо́лимсѧ.
Сла́ва, и҆ ны́нѣ, бг҃оро́диченъ, гла́съ то́йже:
Нбⷭ҇ныѧ си̑лы пою́тъ тѧ̀, бл҃года́тнаѧ мт҃и безневѣ́стнаѧ: и҆ мы̀ славосло́вимъ неизслѣ́димое твоѐ ржⷭ҇тво̀. бцⷣе, молѝ сп҃сти́сѧ дꙋша́мъ на́шымъ.
Во вто́рникъ ве́чера.
Ѿ нача́ла вече́рни начина́емъ покло́ны.
На гдⷭ҇и воззва́хъ, стїхи̑ры ꙗ҆́кѡ ѡ҆бы́чно.
На стїхо́внѣ самогла́сенъ, гла́съ а҃:
Ра́достнѡ прїи́мемъ, вѣ́рнїи, бг҃одохнове́нное возвѣще́нїе ѡ҆ постѣ̀, ꙗ҆́коже дре́вле ненеѵі́тѧне, и҆ па́ки ꙗ҆́коже блꙋдни̑цы и҆ мытарѝ покаѧ́нїѧ про́повѣдь ѿ і҆ѡа́нна. воздержа́нїемъ ᲂу҆гото́вимсѧ ко прича́стїю влⷣчнѧгѡ въ сїѡ́нѣ сщ҃еннодѣ́йства. слеза́ми пред̾ѡчи́стимсѧ къ бж҃е́ственномꙋ въ не́мъ ᲂу҆мове́нїю. помо́лимсѧ ви́дѣти ѡ҆бра́зныѧ здѣ̀ па́схи соверше́нїе и҆ и҆́стинныѧ ꙗ҆вле́нїе. ᲂу҆гото́вимсѧ на поклоне́нїе крⷭ҇тꙋ̀ и҆ воста́нїю хрⷭ҇та̀ бг҃а, вопїю́ще къ немꙋ̀: не посрамѝ на́съ ѿ ча́ѧнїѧ на́шегѡ, чл҃вѣколю́бче.
Сті́хъ: Къ тебѣ̀ возведо́хъ ѻ҆́чи моѝ:
И҆ па́ки тꙋ́же стїхи́рꙋ.
Сті́хъ: Поми́лꙋй на́съ, гдⷭ҇и, поми́лꙋй на́съ:
Мч҃нченъ: Ѽ до́брыѧ кꙋ́пли ва́шеѧ, ст҃і́и! ꙗ҆́кѡ крѡ́ви да́сте, и҆ нб҃са̀ наслѣ́довасте: и҆ вре́меннѡ и҆скꙋси́вшесѧ, вѣ́чнѡ ра́дꙋетесѧ. вои́стиннꙋ добра̀ ва́ша кꙋ́плѧ: тлѣ̑ннаѧ бо ѡ҆ста́вльше, нетлѣ̑ннаѧ воспрїѧ́сте и҆ со а҆́гг҃лы ликꙋ́юще, пое́те непреста́ннѡ трⷪ҇цꙋ є҆диносꙋ́щнꙋю.
Сла́ва, и҆ ны́нѣ, крⷭ҇тобг҃оро́диченъ:
Подо́бенъ: Прехва́льнїи мч҃нцы:
Дв҃а нескве́рнаѧ, на дре́вѣ нѣ́когда ви́дѣвши, є҆го́же родѝ и҆з̾ безсѣ́менныѧ ᲂу҆тро́бы, не терпѧ́щи серде́чнагѡ ᲂу҆ѧзвле́нїѧ, терза́ющисѧ глаго́лаше: ма́нїемъ содержа́й тва́рь всю̀, ка́кѡ ꙗ҆́кѡ ѡ҆сꙋжде́нный на крⷭ҇тъ вознесе́нъ є҆сѝ, всѧ́кѡ хотѧ́й сп҃стѝ человѣ́чество;
Ны́нѣ ѿпꙋща́еши: По трист҃о́мъ, тропа́рь: Бцⷣе дв҃о, ра́дꙋйсѧ: [Покло́нъ а҃.] Сла́ва: Крⷭ҇ти́телю хрⷭ҇то́въ: [Покло́нъ а҃.] И҆ ны́нѣ: Моли́те за ны̀: [Покло́нъ а҃.] Под̾ твоѐ бл҃госе́рдїе прибѣга́емъ, бцⷣе: [без̾ покло́на.] Гдⷭ҇и, поми́лꙋй, м҃. Сла́ва, и҆ ны́нѣ: Чтⷭ҇нѣ́йшꙋю херꙋві̑мъ: И҆́менемъ гдⷭ҇нимъ блгⷭ҇вѝ, ѻ҆́тче. І҆ере́й: Сы́й блгⷭ҇ве́нъ хрⷭ҇то́съ бг҃ъ на́шъ: И҆ мы̀ глаго́лемъ моли́твꙋ: Нбⷭ҇ный цр҃ю̀: и҆ покло́ны трѝ вели̑кїѧ съ моли́твою ст҃а́гѡ є҆фре́ма: Гдⷭ҇и и҆ влⷣко живота̀ моегѡ̀: и҆ про́чихъ в҃і. Па́ки сконча́вше покло́ны, глаго́лемъ моли́твꙋ вышепи́саннꙋю: Гдⷭ҇и и҆ влⷣко живота̀ моегѡ̀: и҆ покло́нъ є҆ди́нъ вели́кїй. Трист҃о́е. По Ѻ҆́ч҃е на́шъ: Гдⷭ҇и, поми́лꙋй, в҃і. Сла́ва, и҆ ны́нѣ: Гдⷭ҇и, поми́лꙋй, три́жды. Бл҃гословѝ: И҆ ѿпꙋ́стъ.
Повече́рїе пое́мъ вели́кое съ поклѡ́ны. По Досто́йно є҆́сть, тропарѝ дневны̑ѧ и҆ хра́мꙋ. И҆ ѿпꙋ́стъ ме́ньшїй.
Та́кожде и҆ проти́вꙋ пѧтка̀ твори́мъ.
Въ сре́дꙋ сы́рнꙋю.
Полꙋ́нощница, съ поклѡ́ны є҆ѧ̀.
На ᲂу҆́трени:
Пое́мъ А҆ллилꙋ́їа въ настоѧ́щїй гла́съ ѻ҆ктѡ́иха, и҆ трⷪ҇чны [Зри] гла́са, и҆ ѡ҆бы̑чныѧ каѳі̑смы двѣ̀. Вѣ́домо бꙋ́ди, ꙗ҆́кѡ въ сре́дꙋ и҆ въ пѧто́къ седми́цы сы́рныѧ пое́мъ А҆ллилꙋ́їа сотворѧ́емъ и҆ покло́ны ве́черъ и҆ ᲂу҆́трѡ, ꙗ҆́коже вы́ше рече́сѧ: и҆ по́стъ соверша́емъ по чи́нꙋ, а҆́ще и҆ ко́егѡлибо прилꙋчи́тсѧ ст҃а́гѡ, и҆ тропа́рь и҆мѣ́ѧй бꙋ́детъ. Междоча́сїѧ же не пое́мъ.
А҆́ще же пра́здникъ срѣ́тенїѧ гдⷭ҇нѧ, и҆лѝ хра́мъ ко́егѡ ст҃а́гѡ, пое́мъ тропа́рь и҆ покло́нѡвъ не твори́мъ, то́чїю по трѝ покло́ны вели́кихъ.
По а҃-мъ стїхосло́вїи сѣда́льны ѻ҆смогла́сника крⷭ҇тны.
По в҃-мъ же стїхосло́вїи сѣда́ленъ трїѡ́ди. Гла́съ в҃.
Подо́бенъ: Милосе́рдїѧ сꙋ́щи:
Съ ми́ромъ прейтѝ на́мъ смирє́ннымъ пред̾ѡчище́нїе постѡ́въ бл҃говолѝ, неизрече́ннымъ чл҃вѣколю́бїемъ твои́мъ, хрⷭ҇тѐ бж҃е: низложѝ вра̑жїѧ кова̑рствїѧ, и҆ крⷭ҇то́мъ твои́мъ всѧ̑ сп҃сѝ, є҆ди́не вѣ́дый сердє́чнаѧ.
Сла́ва, то́йже. И҆ ны́нѣ, крⷭ҇тобг҃оро́диченъ. Подо́бенъ:
Предстоѧ́щи крⷭ҇тꙋ̀ твоемꙋ̀ безсѣ́меннѡ ро́ждшаѧ тѧ̀, и҆ не терпѧ́щи зрѣ́ти непра́веднѡ стра́ждꙋща, рыда́ше съ пла́чемъ, и҆ вопїѧ́ше тѝ: ка́кѡ стра́ждеши є҆стество́мъ безстра́стный, сладча́йшїй сн҃е; пою̀ твою̀ кра́йнюю бл҃госты́ню.
Здѣ̀ чте́мъ сло́во ѡ҆ постѣ̀, вели́кагѡ васі́лїа, є҆гѡ́же нача́ло:
Оу҆тѣша́йте, ᲂу҆тѣша́йте: и҆ ѱало́мъ н҃.
Канѡ́нъ во ѻ҆ктѡ́ихѣ крⷭ҇тꙋ̀, со і҆рмосо́мъ на ѕ҃: и҆ въ мине́и ст҃а́гѡ на д҃: и҆ въ трїѡ́ди на д҃. Въ ко́ихъ же пѣ́снехъ приспѣ́етъ трипѣ́снецъ, пое́мъ канѡ́нъ трїѡ́ди со і҆рмосо́мъ на ѕ҃: и҆ трипѣ́снецъ на и҃: и҆ послѣдѝ і҆рмо́съ трипѣ́снца. Въ си́хъ же пѣ́снехъ ѡ҆ставлѧ́етсѧ канѡ́нъ ѻ҆ктѡ́иха и҆ мине́и. И҆ пое́мъ мине́и въ вы́шнихъ пѣ́снехъ си́це: а҃ пѣ́снь канѡ́на ѻ҆ктѡ́иха, со і҆рмосо́мъ на д҃: и҆ въ мине́и ст҃а́гѡ, а҃-ю и҆ г҃-ю пѣ́снь, на ѕ҃: и҆ въ трїѡ́ди на д҃. Подо́бнѣ пое́мъ ѻ҆смꙋ́ю съ шесто́ю, и҆ девѧ́тꙋю съ седмо́ю пѣ́сньми. Канѡ́нъ трїѡ́ди. Гла́съ д҃. Творе́нїе господи́на а҆ндре́а кри́тскагѡ.
Пѣ́снь а҃.
І҆рмо́съ: Воспою̀ тебѣ̀, гдⷭ҇и бж҃е мо́й, ꙗ҆́кѡ и҆зве́лъ є҆сѝ лю́ди и҆з̾ рабо́ты є҆гѵ́петскїѧ: покры́лъ же є҆сѝ колесни̑цы фараѡ́нѡвы и҆ си́лꙋ.
Постѧ́сѧ гдⷭ҇ь человѣ́чески, на́мъ къ подража́нїю, побѣжда́етъ и҆скꙋси́телѧ, показꙋ́ѧ на́ше и҆ предѣ́лы подписꙋ́ѧ на́мъ.
Мѡѷсе́й бж҃е́ственный на сїна́и бг҃ꙋ лице́мъ къ лицꙋ̀ глаго́лати сподо́бисѧ воздержа́нїемъ: томꙋ̀ вѣ́рнїи поревнꙋ́имъ.
Млⷭ҇тивъ бꙋ́ди, гдⷭ҇и, лю́демъ твои̑мъ, и҆ призрѣ́въ ꙗ҆́кѡ бг҃ъ млⷭ҇тивымъ твои́мъ ѻ҆́комъ, посѣтѝ всѣ́хъ мно́жествомъ млⷭ҇ти твоеѧ̀.
Бг҃оро́диченъ: Къ тебѣ̀ всѝ притека́емъ, бцⷣе, ꙗ҆́кѡ побо́рницѣ тве́рдѣй, на мл҃твꙋ дви́жꙋще тѧ̀, и҆зба́витисѧ ста́дꙋ твоемꙋ̀ ѿ всѧ́кагѡ ѡ҆бстоѧ́нїѧ.
Пѣ́снь г҃.
І҆рмо́съ: Въ гдⷭ҇ѣ бз҃ѣ мое́мъ се́рдце моѐ ᲂу҆тверди́сѧ: тѣ́мъ немощствꙋ́ющїи препоѧ́сашасѧ си́лою.
Чꙋ́дный є҆нѡ́хъ воздержа́нїемъ преложи́сѧ ѿ землѝ: томꙋ̀ ревнꙋ́юще, преложи́мсѧ ѿ тлѣ́нїѧ къ жи́зни.
Мл҃твами и҆ поще́ньми и҆зба́вителѧ ᲂу҆мо́лимъ: сра́дꙋетсѧ бо созда́тель покаѧ́нїю созда́нїй свои́хъ.
Гото́висѧ, ѽ дꙋшѐ, и҆ пред̾ѡчи́стисѧ пре́жде стрⷭ҇ти хрⷭ҇то́вы, да въ воскрⷭ҇нїе дꙋхо́внѡ пра́зднꙋеши съ ни́мъ.
Бг҃оро́диченъ: Ꙗ҆́кѡ ро́ждшаѧ бг҃а, ѡ҆ на́съ непреста́ннѡ моли́сѧ: къ тебѣ́ бо, бцⷣе, грѣ́шнїи прибѣга́емъ.
Та́же трипѣ́снецъ і҆ѡ́сифа, гла́съ в҃:
Пѣ́снь г҃.
І҆рмо́съ: На ка́мени мѧ̀ вѣ́ры:
Просте́рлъ є҆сѝ дла̑ни на крⷭ҇тѣ̀ твое́мъ, ᲂу҆мертви́лъ є҆сѝ ᲂу҆мерщвле́нїемъ твои́мъ клѧ́твꙋ, ѡ҆живи́лъ є҆сѝ стрⷭ҇тїю твое́ю человѣ́ки. тѣ́мже пое́мъ твоѐ бж҃е́ственное распѧ́тїе, і҆и҃се чл҃вѣколю́бче бж҃е на́шъ.
Снѣ́дїю дре́ва ᲂу҆мертви́вшесѧ, дре́вомъ крⷭ҇та̀ твоегѡ̀ ѡ҆жи́хомъ. того̀ ᲂу҆̀бо прино́симъ тебѣ̀ въ мл҃твꙋ: бл҃года́ть и҆ млⷭ҇ть на́мъ низпослѝ, бл҃годѣ́телю влⷣко многомлⷭ҇тиве.
ѿверзо́шасѧ преддвє́рїѧ поще́нїѧ, приближа́етсѧ по́прище воздержа́нїѧ: горѧ́щимъ ᲂу҆се́рдїемъ воста́немъ, да прїи́мемъ да́ръ бг҃ода́нный, ᲂу҆толѧ́ющїй зно́й прегрѣше́нїй.
Вре́мѧ бл҃же́нное поста̀, и҆спꙋща́ющее лꙋчы̀ покаѧ́нїѧ, возсїѧ̀: пристꙋ́пимъ любоче́стнѡ, ѿгонѧ́юще тьмꙋ̀ глꙋбоча́йшꙋю лѣ́ности, всѝ веселѧ́щесѧ.
По́стъ ѡ҆ст҃и́мъ любомꙋ́дреннѡ, проповѣ́даимъ воздержа́нїе страсте́й, возопїи́мъ во слеза́хъ влⷣцѣ: да́ждь на́мъ бл҃года́ть, содѣ́йствꙋющꙋю во твоѧ̑ хотѣ̑нїѧ, гдⷭ҇и многомлⷭ҇тиве.
Прїи́мше дарова́нїе поста̀, просла́вимъ да́вшаго во сп҃се́нїе, и҆ сїѐ содѣ́лаимъ трꙋдолю́бнѡ, да ѡ҆ставле́нїе согрѣше́нїй на́шихъ воспрїи́мемъ ѿ рꙋкѝ сотво́ршагѡ.
Бг҃оро́диченъ: Оу҆толѝ смꙋще́нїе страсте́й мои́хъ, и҆сцѣлѝ ꙗ҆́звы дꙋшѝ моеѧ̀, воздви́гни мѧ̀ ѿ сна̀ лѣ́ности хода́тайствомъ твои́мъ и҆ предста́тельствомъ, прест҃а́ѧ влⷣчце мт҃и дв҃о.
И҆́ный, гла́съ то́йже.
І҆рмо́съ: Непло́дный мо́й ᲂу҆́мъ:
Возне́сшꙋсѧ тѝ, сп҃се, во́лею на крⷭ҇тъ, всѧ̀ тва́рь земна́ѧ подви́жесѧ, и҆ раздра́сѧ церко́внаѧ завѣ́са.
Оу҆ѧ́звленъ бы́лъ є҆сѝ на крⷭ҇тѣ̀, і҆и҃се мо́й, менє̀ ра́ди, и҆ прободе́нъ въ ре́бра, бл҃же: ѿню́дꙋже вѣ́рою покланѧ́юсѧ бж҃е́ственнѣй держа́вѣ твое́й.
Сла́ва, трⷪ҇ченъ: Прекло́нь колѣ̑на на зе́млю, ѻ҆ц҃ꙋ̀ покланѧ́юсѧ, сн҃а сла́влю, и҆ дх҃а воспѣва́ю, є҆диново́льное нача́ло и҆ трїѷпоста́сное.
Бг҃оро́диченъ: Непостижи́мо є҆́сть та́инство твоегѡ̀ рожде́нїѧ, чтⷭ҇аѧ: ражда́еши бо, мр҃і́е, неискꙋсомꙋ́жнѡ бг҃а, и҆ пребыва́еши нетлѣ́нна.
Сла́ва тебѣ̀, бж҃е на́шъ, сла́ва тебѣ̀.
По́стное вре́мѧ си́лою твое́ю, хрⷭ҇тѐ, ѡ҆ст҃и́въ, сп҃сѝ ѿ сѣте́й вра́жїихъ всѧ̑ ны̀, покланѧ́ющыѧсѧ тебѣ̀.
І҆рмо́съ: Непло́дный мо́й ᲂу҆́мъ плодоно́сенъ покажи́ ми, бж҃е, дѣ́лателю до́брыхъ, насади́телю бл҃ги́хъ, бл҃госе́рдїемъ твои́мъ.
Сѣда́ленъ мине́и ст҃о́мꙋ. Сла́ва, и҆ ны́нѣ, крⷭ҇тобг҃оро́диченъ.
Пѣ́снь д҃.
І҆рмо́съ: Оу҆слы́шахъ слꙋ́хъ тво́й, и҆ ᲂу҆боѧ́хсѧ, разꙋмѣ́хъ дѣла̀ твоѧ̑, и҆ ᲂу҆жасо́хсѧ, гдⷭ҇и.
А҆враа́мъ добродѣ́телїю и҆ страннолю́бїемъ трⷪ҇цꙋ прїѧ́тъ а҆́гг҃льски прише́дшꙋю.
да́ръ воздержа́нїѧ є҆́сть бога́тство некра́домое: и҆ си́мъ ѡ҆богати́выйсѧ, ѡ҆богати́тсѧ бж҃ество́мъ.
Сла́ва: Прїиди́те, воспла́чимъ вкꙋ́пѣ сло́вомъ, вѣ́рою вопїю́ще: бж҃е, млⷭ҇тивъ бꙋ́ди къ на́мъ мно́гѡ согрѣ́шшымъ.
Бг҃оро́диченъ: Мт҃и непоро́чнаѧ, бл҃гослове́ннаѧ, чтⷭ҇аѧ дв҃о, сн҃ꙋ твоемꙋ̀ и҆ бг҃ꙋ на́шемꙋ ѡ҆ мі́рѣ моли́сѧ.
Пѣ́снь є҃.
І҆рмо́съ: Возсїѧ́вый свѣ́тъ, и҆ просвѣти́вый ᲂу҆́тро, и҆ показа́вый де́нь: сла́ва тебѣ̀, сла́ва тебѣ̀, і҆и҃се сн҃е бж҃їй.
Пости́всѧ дре́вле мѡѷсе́й на горѣ̀ сїна́йстѣй, бг҃ови́децъ ꙗ҆ви́сѧ: и҆ и҆лїа̀ на ѻ҆́гненнѣй колесни́цѣ возноша́шесѧ.
Пости́всѧ нѣ́когда мꙋ́дрый и҆са́їа, ᲂу҆́глѧ ѻ҆́нагѡ клеще́ю вкꙋша́етъ, є҆гда̀ ко ᲂу҆стна́мъ є҆гѡ̀ прикоснꙋ́сѧ.
Сла́ва: Пости́всѧ дре́вле данїи́лъ, и҆ трїѐ ѻ҆́троцы вкꙋ́пѣ, чє́люсти львѡ́въ сокрꙋши́вше, горѧ́щїй пла́мень попра́ша.
Бг҃оро́диченъ: Бг҃ороди́тельнице чтⷭ҇аѧ, бг҃а во чре́вѣ твое́мъ носи́вшаѧ нетлѣ́ннѡ, сохранѝ ста́до твоѐ, и҆ соблюдѝ невреди́мо.
Пѣ́снь ѕ҃.
І҆рмо́съ: Ꙗ҆́коже прⷪ҇ро́ка і҆ѡ́нꙋ ѿ ки́та и҆зба́вилъ є҆сѝ, хрⷭ҇тѐ бж҃е: и҆ менѐ и҆з̾ глꙋбины̀ прегрѣше́нїй возведѝ, и҆ сп҃си́ мѧ, є҆ди́не чл҃вѣколю́бче.
І҆ѡ́нꙋ въ ки́тѣ честно́е поще́нїе нѣ́когда спасло̀ є҆́сть: пости́мсѧ ᲂу҆̀бо ѿ се́рдца, и҆ ᲂу҆бѣжи́мъ ѻ҆́нагѡ въ гее́ннѣ тлѣ́нїѧ.
Ненеѵі́тѧне же па́ки гнѣ́въ бж҃їй претвори́ша те́плымъ покаѧ́нїемъ и҆ любо́вїю: тѣ̑мъ ны́нѣ любе́знѡ всѝ поревнꙋ́имъ.
Сла́ва: Предстоѧ́й по́стъ созыва́етъ на́съ на покаѧ́нїе: притеце́мъ ᲂу҆̀бо съ любо́вїю, и҆ ᲂу҆разꙋмѣ́имъ, что́ є҆сть да́ръ воздержа́нїѧ.
Бг҃оро́диченъ: Несказа́ннѡ ро́ждшаѧ сп҃са мі́рꙋ хрⷭ҇та̀ бг҃а на́шего, того̀ молѧ́щи не преста́й, сп҃стѝ ве́сь ро́дъ воспѣва́ющихъ тѧ̀.
Конда́къ ст҃а́гѡ: а҆́ще ст҃ы́й не и҆́мать кондака̀, глаго́лемъ мч҃нченъ гла́са, и҆́же и҆ сѣда́ленъ.
Пѣ́снь з҃.
І҆рмо́съ: Ѻ҆тє́цъ на́шихъ бж҃е, не посрамѝ на́съ, но да́рꙋй на́мъ со дерзнове́нїемъ вопи́ти тебѣ̀: бл҃гослове́нъ є҆сѝ, бж҃е ѻ҆тє́цъ на́шихъ.
Бꙋ́демъ и҆ мы̀ ꙗ҆́кѡ данїи́лъ ѻ҆́ный, львы̀ нѣ́когда посто́мъ ᲂу҆кроти́вый въ ро́вѣ рыка́ющыѧ.
Ю҆́ношамъ тре́мъ поревнꙋ́имъ со стра́хомъ, да ᲂу҆бѣ́гнемъ ѻ҆гнѧ̀ гее́нскагѡ, ꙗ҆́коже сі́и вавѷлѡ́нскїѧ пе́щи.
Сла́ва: Пости́мсѧ и҆ мы̀ чи́стымъ се́рдцемъ, и҆ ѡ҆чи́стимъ тѣ́ло, и҆ ве́сь дꙋ́хъ всѧ́кѡ бг҃ꙋ посвѧти́мъ.
Бг҃оро́диченъ: Дв҃о мт҃и чтⷭ҇аѧ, и҆з̾ тебє̀ воплоще́ннаго превѣ́чнаго сло́ва молѧ́щи не преста́й, сп҃сти́сѧ дꙋша́мъ на́шымъ.
Пѣ́снь и҃.
І҆рмо́съ: Цр҃ѧ̀ хрⷭ҇та̀ и҆сповѣ́даша плѣне́ннїи ѻ҆́троцы, въ пещѝ глаго́люще ве́лїимъ гла́сомъ: всѧ̑ дѣла̀, по́йте гдⷭ҇а.
Пости́всѧ дре́вле і҆ѡ́сифъ, и҆збѣжѐ смѣше́нїѧ беззако́нныѧ жены̀, и҆ ца́рство ᲂу҆лꙋчѝ: тѣ́мже и҆ мы̀ поще́нїемъ ᲂу҆гаси́мъ разжжє́нныѧ стрѣ́лы врага̀ велїа́ра.
Поще́нїемъ дв҃дъ побѣ́дꙋ поста́ви на и҆ноплеме́нника, и҆ ца́рство ѡ҆брѣ́те: тѣ́мже и҆ мы̀ прїи́мемъ воздержа́нїемъ побѣ́дꙋ на врагѝ, и҆ во гдⷭ҇ѣ вѣнча́ни бꙋ́демъ.
Сохрани́мъ и҆ мы̀ добродѣ́тєли си́хъ: і҆́ѡвлево мꙋ́жество, і҆а́кѡвле неѕло́бїе, вѣ́рꙋ а҆враа́мовꙋ, цѣломꙋ́дрїе і҆ѡ́сифово и҆ дв҃довꙋ до́блесть.
Бг҃оро́диченъ: Цр҃ѧ̀ хрⷭ҇та̀, є҆го́же родѝ на́мъ дв҃а мр҃і́а, и҆ по ржⷭ҇твѣ̀ пребы́сть дв҃а чтⷭ҇аѧ, всѧ̑ дѣла̀, по́йте гдⷭ҇а.
Та́же трипѣ́снецъ.
І҆рмо́съ: Въ пе́щь ѻ҆́гненнꙋю:
Крⷭ҇тоѡбра́знѡ мѡѷсе́й дла̑ни возводѧ̀ на горѣ̀, врагѝ побѣжда́ше: ты́ же, сп҃се, на крⷭ҇тѣ̀ рꙋ́цѣ просте́ръ, ᲂу҆мертви́лъ є҆сѝ всепа́гꙋбное а҆́да мꙋчи́тельство.
Гвоздьмѝ прибїе́нъ на крⷭ҇тѣ̀, и҆ въ ре́бра прободе́нъ, хрⷭ҇тѐ сп҃се мо́й, ѿ клѧ́твы и҆зба́вилъ є҆сѝ земноро́дныѧ, и҆ ра́дости несконча́емыѧ ѻ҆́бщники показа́лъ є҆сѝ: тѣ́мже бл҃гословлѧ́емъ чл҃вѣколю́бїе твоѐ.
Возсїѧ́вшее вре́мѧ воздержа́нїѧ мы́сленнѡ просвѣща́етъ дꙋшє́внаѧ чꙋ̑вства, и҆ страсте́й мглꙋ̀ ѿгонѧ́етъ: тѣ́мже ѡ҆блобыза́имъ сїѐ ѿ се́рдца, хрⷭ҇та превозносѧ́ще во вѣ́ки.
Стра̑сти всегꙋби́тєльныѧ дꙋшє́вныѧ, сла̑сти смертонѡ́сныѧ по́стъ ᲂу҆мерщвлѧ́етъ, и҆ и҆́стиннѡ въ постоѧ́нїи твори́тъ сердє́чнаѧ ᲂу҆стремлє́нїѧ и҆ движє́нїѧ: се́й ᲂу҆́бо вѣ́рою воспрїи́мемъ любе́знѡ.
Настоѧ́щїй ст҃ы́й де́нь, вѣ́рнїи, чи́стымъ помышле́нїемъ почти́мъ, не поста̀ нача́ло се́й вѣ́дꙋще, но вхо́дъ глаго́люще, и҆ прише́ствїе ко преддве́рїю поста̀.
добрѣ́йшїй по́стъ преддве́рїемъ пред̾ѡчисти́тельныхъ по́честей, а҆́ки степе́ньми и҆ лѣ́ствицею, бл҃гопрїѧ́тнѡ прїе́млетъ бг҃олюби́вꙋю дꙋ́шꙋ, къ се́й приложи́въ ны́нѣшнїй де́нь.
Бг҃оро́диченъ: Ѿве́рзи толкꙋ́щымъ на́мъ и҆ млⷭ҇ть твою̀ призыва́ющымъ, дв҃о, ско́рое человѣ́кѡмъ прибѣ́жище и҆ тве́рдаѧ во всѣ́хъ по́моще, и҆ сꙋ́щымъ въ нꙋ́ждахъ и҆звѣ́стное, застꙋ́пленїе.
И҆́ный.
І҆рмо́съ: Въ кꙋпинѣ̀ на сїна́йстѣй горѣ̀:
Вознесе́нъ на крⷭ҇тъ, влⷣко всѧ́ческихъ, а҆да́ма со є҆́ѵою па́ки воззва́лъ є҆сѝ, и҆ въ ра́й, хрⷭ҇тѐ сп҃се, вве́лъ є҆сѝ, тѧ̀ воспѣва́ющыѧ во всѧ̑ вѣ́ки.
Тебѣ̀ возне́сшꙋсѧ, хрⷭ҇тѐ, на крⷭ҇тъ во́лею, лꙋчы̀ со́лнєчныѧ стра́хомъ помрачи́шасѧ, и҆ за́йде де́нь. сегѡ̀ ра́ди разбо́йникъ бг҃а тѧ̀ и҆сповѣ́да во всѧ̑ вѣ́ки.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Трⷪ҇ченъ: Ра́вна ѻ҆ц҃ꙋ̀ сн҃а и҆ ст҃а́го дх҃а вѣ́ровахомъ бы́ти, ст҃ꙋ́ю трⷪ҇цꙋ въ бж҃ествѣ̀ є҆ди́номъ: є҆́йже вѣ́рою покланѧ́емсѧ, а҆́рїево ᲂу҆че́нїе при́снѡ попира́юще.
Бг҃оро́диченъ: Ка́кѡ тѧ̀ воспою̀, ꙗ҆́коже подоба́етъ, бцⷣе дв҃о, смра́дными грѣхмѝ а҆́зъ ны́нѣ помраче́нный; но ᲂу҆̀бо, прест҃а́ѧ, простѝ ми дерзнове́нїе ᲂу҆бо́гагѡ моегѡ̀ пѣ́нїѧ.
Сла́ва тебѣ̀, бж҃е на́шъ, сла́ва тебѣ̀.
Крⷭ҇те, вѣ́рныхъ ᲂу҆пова́нїе, царе́й ѡ҆рꙋ́жїе, сщ҃е́нникѡвъ сла́во, мона́шествꙋющихъ крѣ́посте, твое́ю си́лою всѧ̑ тѧ̀ славосло́вѧщыѧ сп҃са́й во вѣ́ки.
Хва́лимъ, бл҃гослови́мъ, покланѧ́емсѧ гдⷭ҇еви:
І҆рмо́съ: Въ кꙋпинѣ̀ на сїна́йстѣй горѣ̀, мѡѷсе́ю чꙋ́до дв҃ы дре́вле проѡбрази́вшаго, по́йте, бл҃гослови́те и҆ превозноси́те во всѧ̑ вѣ́ки.
И҆ стїхосло́витсѧ Чтⷭ҇нѣ́йшꙋю:
Пѣ́снь ѳ҃.
І҆рмо́съ: Велича́емъ всѝ чл҃вѣколю́бїе твоѐ, хрⷭ҇тѐ сп҃се на́шъ, сла́во ра̑бъ твои́хъ и҆ вѣ́нче вѣ́рныхъ, возвели́чивый па́мѧть ро́ждшїѧ тѧ̀.
Мѡѷсе́й во є҆гѵ́птѣ мо́ре раздѣлѝ, и҆ лю́ди преведѐ, и҆ сїѧ̑ препита̀ въ пꙋсты́ни непрохо́днѣй, посто́мъ творѧ̀ чꙋдеса̀.
І҆исꙋ́съ наѵи́нъ воздержа́нїемъ лю́ди ѡ҆ст҃ѝ, и҆ наслѣ́дствова зе́млю ѡ҆бѣтова́ннꙋю, і҆орда́нъ преше́дъ пре́жде.
Гедеѡ́нъ ѻ҆́ный, то́кмѡ съ тремѝ сты̀ мꙋже́й хлепта́вшими побѣжда́етъ и҆ноплеме́нники воздержа́нїемъ и҆ мл҃твою: томꙋ̀ ревнꙋ́юще и҆ мы̀ подража́имъ.
Бг҃оро́диченъ: Ра́дꙋйсѧ, всечⷭ҇тна́ѧ чтⷭ҇аѧ мр҃і́е, дѣ́вства похвало̀, а҆́гг҃лѡмъ ᲂу҆твержде́нїе, человѣ́кѡмъ по́моще, мі́рꙋ ра́досте, и҆ мт҃и и҆ рабо̀ бг҃а на́шегѡ.
Та́же трипѣ́снецъ.
І҆рмо́съ: Ѿ бг҃а бг҃а сло́ва:
На крⷭ҇тѣ̀ просте́ръ бж҃е́ственныѧ дла̑ни, совокꙋпи́лъ є҆сѝ пре́жде разстоѧ̑щаѧсѧ, и҆зба́вителю: и҆ хода́тайствовавъ, ꙗ҆́кѡ да́ръ ѻ҆ц҃ꙋ̀ прине́слъ є҆сѝ ѡ҆сꙋжде́нное сꙋщество̀ сме́ртныхъ: сегѡ̀ ра́ди пое́мъ пречⷭ҇тое твоѐ распѧ́тїе.
Ст҃а́гѡ поста̀ возсїѧ́вшаѧ бл҃года́ть лꙋчы̀ и҆спꙋща́етъ на́мъ, пред̾ѡчища́ющыѧ колеба́нїе помышле́нїй и҆ тьмꙋ̀ пресыще́нїѧ ѿгонѧ́ющыѧ: сегѡ̀ ра́ди, вѣ́рнїи, ᲂу҆се́рднѡ се́й воспрїи́мемъ.
Свѣтоно́сное поще́нїе, дарова́нїй бж҃е́ственныхъ ча́шꙋ раство́ршее на́мъ дне́сь всѣ̑мъ пред̾ѧвлѧ́етъ: хотѧ́щїи сеѧ̀ причасти́тисѧ на по́льзꙋ дꙋшѝ, помо́лимсѧ всѣ́хъ влⷣцѣ содѣ́йствовати на́мъ.
Гвоздьмѝ бж҃е́ственныхъ твои́хъ рꙋ́къ пригвозди́лъ є҆сѝ, ще́дре, на́шѧ грѣхѝ на крⷭ҇тѣ̀: копїе́мъ же ре́бръ твои́хъ растерза́лъ є҆сѝ лꙋка́вое писа́нїе согрѣше́нїй и҆ паде́нїй лю́тыхъ. сегѡ̀ ра́ди пое́мъ пречⷭ҇тое твоѐ распѧ́тїе.
Добродѣ́телей добрѣ́йшаѧ ѿверза́етсѧ стезѧ̀, по́прище бж҃е́ственныхъ поще́нїй сѐ всѣ̑мъ ᲂу҆готовлѧ́етсѧ: подвиза́тисѧ зако́ннѡ хотѧ́щїи, проси́те хрⷭ҇та̀, ми́рное вре́мѧ на́мъ ѿ высоты̀ дарова́ти.
Бг҃оро́диченъ: Скорѣ́йшею мл҃твою, неꙋсы́пнымъ твои́мъ покро́вомъ, держа́вною твое́ю по́мощїю, влⷣчце чтⷭ҇аѧ, ны́нѣ соблюдѝ вѣ̑рныѧ твоѧ̑ рабы̑ ѿ всѧ́кагѡ сопроти́внагѡ прило́га, и҆ ѿ страсте́й и҆ прегрѣше́нїй и҆ напа́стей сп҃сѝ.
И҆́ный.
І҆рмо́съ: Преесте́ственнѡ пло́тїю:
На дре́вѣ крⷭ҇тнѣмъ во́лею пригво́ждьсѧ, всѣ́хъ на́съ свободи́лъ є҆сѝ ѿ клѧ́твы зако́нныѧ: тѣ́мъ тѧ̀ по до́лгꙋ велича́емъ, хрⷭ҇тѐ.
Всѝ покланѧ́емсѧ стрⷭ҇те́мъ твои̑мъ, сп҃се, ꙗ҆̀же во́лею воспрїѧ́лъ є҆сѝ, да свободи́ши ро́дъ человѣ́ческїй ѿ рабо́ты вра́гꙋ.
Трⷪ҇ченъ: Присносꙋ́щнѡ и҆ нетлѣ́ннѡ сн҃а родѝ ѻ҆ц҃ъ, и҆ дх҃ъ є҆́сть є҆диносꙋ́щенъ ѻ҆ц҃ꙋ́ и҆ сн҃ови, нераздѣ́льнаѧ трⷪ҇ца.
Бг҃оро́диченъ: Да́ти на́мъ грѣ̑шнымъ прощє́нїе прегрѣше́нїй моли ѿ тебє̀ вопло́щшагосѧ сп҃са, мр҃і́е пребл҃гослове́ннаѧ.
Сла́ва тебѣ̀, бж҃е на́шъ, сла́ва тебѣ̀.
Лобыза́ющыѧ тѧ̀, крⷭ҇те, сподо́би си́лою твое́ю по́стное вре́мѧ прейтѝ въ ми́рѣ, и҆ и҆зба́ви ѿ рабо́ты вра́гꙋ.
І҆рмо́съ: Преесте́ственнѡ пло́тїю заче́ншꙋю во чре́вѣ сло́во, ѿ ѻ҆ц҃а̀ безлѣ́тнѡ предвозсїѧ́вшее, въ пѣ́снехъ немо́лчныхъ велича́емъ вѣ́рнїи.
Свѣти́ленъ во ѻ҆ктѡ́ихѣ гла́са, три́жды: трⷪ҇ченъ.
На стїхо́внѣ самогла́сенъ днѐ, гла́съ а҃:
Ѿ бра́шенъ постѧ́щисѧ, дꙋшѐ моѧ̀, и҆ ѿ страсте́й не ѡ҆чища́ющисѧ, всꙋ́е ра́дꙋешисѧ неѧде́нїю: а҆́ще бо не бꙋ́детъ тѝ стремле́нїе ко и҆справле́нїю, ꙗ҆́кѡ лжи́ваѧ возненави́дѣна бꙋ́деши ѿ бг҃а, и҆ ѕлы̑мъ де́монѡмъ ᲂу҆подо́бишисѧ, николи́же ꙗ҆дꙋ́щымъ. да не ᲂу҆́бо согрѣша́ющи, по́стъ непотре́бенъ сотвори́ши. но неподви́жима ко стремле́нїємъ безмѣ̑стнымъ пребыва́й, мнѧ́щи предстоѧ́ти распѧ́томꙋ сп҃сꙋ, па́че же сраспѧ́тисѧ тебє̀ ра́ди распе́ншемꙋсѧ, вопїю́щи къ немꙋ̀: помѧни́ мѧ, гдⷭ҇и, є҆гда̀ прїи́деши во црⷭ҇твїи твое́мъ.
Глаго́лемъ се́й два́жды.
Та́же мч҃нченъ: Ва́съ, прехва́льнїи мч҃нцы, ни ско́рбь, ни тѣснота̀, ни гла́дъ, ни гоне́нїе, ни бѣда̀, ни ꙗ҆́рость ѕвѣре́й ни ме́чь, нижѐ ѻ҆́гнь претѧ́й разлꙋчи́ти ѿ бг҃а возмого́ша: любо́вїю же па́че къ немꙋ̀, ꙗ҆́кѡ въ чꙋжди́хъ подвиза́вшесѧ тѣлесѣ́хъ, є҆стество̀ забы́сте, сме́рть презрѣ́вше. тѣ́мже и҆ по достоѧ́нїю болѣ́зней ва́шихъ мздꙋ̀ прїѧ́сте, нбⷭ҇нагѡ црⷭ҇твїѧ наслѣ̑дницы бы́сте: моли́тесѧ ѡ҆ дꙋша́хъ на́шихъ.
Сла́ва, и҆ ны́нѣ, крⷭ҇тобг҃оро́диченъ.
Подо́бенъ: Нбⷭ҇ныхъ чинѡ́въ:
Вознесе́на ꙗ҆́кѡ ви́дѣ на крⷭ҇тѣ̀ а҆́гнца, непоро́чнаѧ дв҃а пла́чꙋщи вопїѧ́ше: сладча́йшее моѐ ча́до, что̀ сїѐ но́вое и҆ стра́нное видѣ́нїе; ка́кѡ держа́й всѧ̑ дла́нїю на дре́вѣ пригвожде́нъ є҆сѝ пло́тїю;
Та́же, Бл҃го є҆́сть: Трист҃о́е. И҆ Ѻ҆́ч҃е на́шъ: И҆ тропа́рь: Въ хра́мѣ стоѧ́ще сла́вы твоеѧ̀: Гдⷭ҇и, поми́лꙋй, м҃. Сла́ва, и҆ ны́нѣ: Чтⷭ҇нѣ́йшꙋю херꙋві̑мъ: И҆́менемъ гдⷭ҇нимъ бл҃гословѝ, ѻ҆́тче. І҆ере́й: Сы́й бл҃гослове́нъ хрⷭ҇то́съ бг҃ъ на́шъ, всегда̀, ны́нѣ и҆ при́снѡ и҆ во вѣ́ки вѣкѡ́въ, а҆ми́нь. Та́же, Нбⷭ҇ный цр҃ю̀: И҆ твори́мъ г҃ покло́ны вели̑кїѧ, съ мл҃твою ст҃а́гѡ є҆фре́ма: Гдⷭ҇и и҆ влⷣко живота̀ моегѡ̀: И҆ про́чихъ покло́нѡвъ в҃і и҆злегка̀, ᲂу҆томле́нїѧ ра́ди, глаго́люще себѣ̀ вта́й на кі́йждо покло́нъ: Бж҃е, млⷭ҇тивъ бꙋ́ди мнѣ̀ грѣ́шномꙋ. И҆ па́ки сконча́вше покло́ны, глаго́лемъ мл҃твꙋ всю̀ вышепи́саннꙋю: Гдⷭ҇и и҆ влⷣко живота̀ моегѡ̀: И҆ покло́нъ є҆ди́нъ вели́кїй.
Присовокꙋплѧ́емъ же и҆ а҃-й ча́съ. Начина́етъ и҆гꙋ́менъ, и҆лѝ є҆кклисїа́рхъ, и҆лѝ предстоѧ́щїй мона́хъ: Прїиди́те, поклони́мсѧ: три́жды. Покло́ны г҃, и҆ ча́съ а҃-й, во́ньже чте́мъ и҆ ѡ҆глашє́нїѧ стꙋді́тѡва. На а҃-мъ часѣ̀, тропа́рь: Заꙋ́тра ᲂу҆слы́ши гла́съ мо́й: ско́рѡ, без̾ пѣ́нїѧ. Стѡпы̀ моѧ̑ напра́ви: и҆ Да и҆спо́лнѧтсѧ ᲂу҆ста̀: По трист҃о́мъ, тропа́рь: Ско́рѡ предварѝ: Гдⷭ҇и, поми́лꙋй, м҃. И҆ мл҃твꙋ: И҆́же на всѧ́кое вре́мѧ: Гдⷭ҇и, поми́лꙋй, три́жды. Сла́ва, и҆ ны́нѣ: Чтⷭ҇нѣ́йшꙋю херꙋві̑мъ: И҆́менемъ гдⷭ҇нимъ: И҆ ѡ҆бы̑чныѧ покло́ны. Трист҃о́е. Гдⷭ҇и, поми́лꙋй, в҃і. Хрⷭ҇тѐ свѣ́те: И҆ ѿпꙋ́стъ.
И҆ и҆схожде́нїе въ притво́ръ. И҆ лїті́а за ᲂу҆поко́й.
Въ тꙋ́южде сре́дꙋ сы́рнꙋю пое́мъ часы̀ г҃-й и҆ ѕ҃-й, съ поклѡ́ны и҆ тропари̑ по́стными: на часѣ́хъ въ кампа́нъ не ᲂу҆дарѧ́ютъ.
На ѕ҃-мъ часѣ̀,
тропа́рь прⷪ҇ро́чества, гла́съ г҃:
Цр҃ю̀ ст҃ы́й всеси́льне, є҆гѡ́же боѧ́тсѧ и҆ трепе́щꙋтъ всѧ́чєскаѧ, сп҃сѝ на́съ: мо́жеши бо проща́ти грѣхѝ, ꙗ҆́кѡ бл҃госе́рдъ.
Сла́ва, и҆ ны́нѣ, то́йже.
Прокі́менъ, гла́съ ѕ҃, ѱало́мъ к҃з: Сп҃сѝ, гдⷭ҇и, лю́ди твоѧ̑ и҆ бл҃гословѝ достоѧ́нїе твоѐ. Сті́хъ: Къ тебѣ̀, гдⷭ҇и, воззовꙋ̀:
Прⷪ҇ро́чества і҆ѡи́лева чте́нїе. [Глава̀ в҃, ст. в҃і-к҃ѕ].
Та́кѡ глаго́летъ гдⷭ҇ь: ѡ҆брати́тесѧ ко мнѣ̀ всѣ́мъ се́рдцемъ ва́шимъ въ постѣ̀ и҆ въ пла́чи и҆ въ рыда́нїи, и҆ расто́ргните сердца̀ ва̑ша, а҆ не ри̑зы ва́шѧ, и҆ ѡ҆брати́тесѧ ко гдⷭ҇ꙋ бг҃ꙋ ва́шемꙋ: ꙗ҆́кѡ млⷭ҇тивъ и҆ ще́дръ є҆́сть, долготерпѣли́въ и҆ многомлⷭ҇тивъ, и҆ раскаѧва́ѧйсѧ ѡ҆ ѕло́бахъ. Кто̀ вѣ́сть, ѡ҆брати́тсѧ ли, и҆ раска́етсѧ, и҆ ѡ҆ста́витъ за собо́ю бл҃гослове́нїе и҆ же́ртвꙋ и҆ возлїѧ́нїе гдⷭ҇ꙋ бг҃ꙋ ва́шемꙋ; Вострꙋби́те трꙋбо́ю въ сїѡ́нѣ, ѡ҆ст҃и́те по́стъ, проповѣ́дите цѣльбꙋ̀, собери́те лю́ди, ѡ҆ст҃и́те цр҃ковь, и҆збери́те старѣ̑йшины, совокꙋпи́те младе́нцы ссꙋ́щыѧ сосцы̀: да и҆зы́детъ жени́хъ ѿ ло́жа своегѡ̀, и҆ невѣ́ста ѿ черто́га своегѡ̀. Междꙋ̀ степе́ньми же́ртвенника воспла́чꙋтсѧ жерцы̀ слꙋжа́щїи гдⷭ҇ꙋ, и҆ рекꙋ́тъ: пощадѝ, гдⷭ҇и, лю́ди твоѧ̑, и҆ не да́ждь достоѧ́нїѧ твоегѡ̀ на ᲂу҆кори́знꙋ, да не ѡ҆блада́ютъ и҆́ми ꙗ҆зы́цы, да не рекꙋ́тъ во ꙗ҆зы́цѣхъ: гдѣ̀ є҆́сть бг҃ъ и҆́хъ; И҆ возревнова̀ гдⷭ҇ь ѡ҆ землѝ свое́й, и҆ пощадѣ̀ лю́ди своѧ̑. И҆ ѿвѣща̀ гдⷭ҇ь лю́демъ свои̑мъ, и҆ речѐ: сѐ а҆́зъ ва́мъ послю̀ пшени́цꙋ, и҆ вїно̀, и҆ ма́сло древѧ́ное, и҆ насы́титесѧ и҆́хъ, и҆ не да́мъ ва́съ ксемꙋ̀ на порꙋга́нїе во ꙗ҆зы́цѣхъ. И҆ сꙋ́щаго ѿ сѣ́вера ѿженꙋ̀ ѿ ва́съ, и҆ ѿри́нꙋ є҆го̀ на зе́млю безво́днꙋю, и҆ погꙋблю̀ лицѐ є҆гѡ̀ въ мо́ри пе́рвѣмъ, и҆ за̑днѧѧ є҆гѡ̀ въ мо́ри послѣ́днемъ: и҆ взы́детъ гни́лость є҆гѡ̀: и҆ взы́детъ смра́дъ є҆гѡ̀, ꙗ҆́кѡ возвели́чи дѣла̀ своѧ̑. Дерза́й, землѐ, ра́дꙋйсѧ и҆ весели́сѧ, ꙗ҆́кѡ возвели́чи гдⷭ҇ь, є҆́же сотвори́ти. Дерза́йте, ско́ти польсті́и, ꙗ҆́кѡ прозѧ́бнꙋша полѧ̀ пꙋсты́ни, ꙗ҆́кѡ дре́во принесѐ пло́дъ сво́й, вїногра́дъ и҆ смѡ́кви да́ша си́лꙋ свою̀. И҆ ча̑да сїѡ̑нѧ, ра́дꙋйтесѧ и҆ весели́тесѧ ѡ҆ гдⷭ҇ѣ бз҃ѣ ва́шемъ, ꙗ҆́кѡ дадѐ ва́мъ пи́щꙋ въ пра́вдꙋ, и҆ ѡ҆дожди́тъ ва́мъ до́ждь ра́ннїй и҆ по́здный, ꙗ҆́коже и҆ пре́жде: и҆ напо́лнѧтсѧ гꙋ́мна ва̑ша пшени́цы, и҆ преизлїю́тсѧ точи̑ла вїно́мъ и҆ є҆ле́емъ. И҆ возда́мъ ва́мъ вмѣ́стѡ лѣ́тъ, въ нѧ́же поѧдо́ша прꙋ́зи, и҆ мши́ца, и҆ си́плеве, и҆ гꙋ́сєницы, си́ла моѧ̀ вели́каѧ, ю҆́же посла́хъ на вы̀. И҆ снѣ́сте ꙗ҆дꙋ́ще, и҆ насы́титесѧ, и҆ похва́лите и҆́мѧ гдⷭ҇а бг҃а ва́шегѡ, ꙗ҆̀же сотворѝ съ ва́ми чꙋдеса̀: и҆ не посра́мѧтсѧ лю́дїе моѝ во вѣ́къ.
Прокі́менъ, гла́съ з҃, ѱало́мъ к҃и: Гдⷭ҇ь крѣ́пость лю́демъ свои̑мъ да́стъ, гдⷭ҇ь бл҃гослови́тъ лю́ди своѧ̑ ми́ромъ. Сті́хъ: Принеси́те гдⷭ҇еви, сн҃ове бж҃їи.
Та́же, Ско́рѡ да предварѧ́тъ: Трист҃о́е. И҆ прѡ́чаѧ по ѡ҆бы́чаю поста̀. И҆ мл҃тва: Бж҃е и҆ гдⷭ҇и си́лъ: Вкꙋ́пѣ же пое́мъ и҆ ѳ҃-й ча́съ, и҆ мл҃твꙋ: Влⷣко гдⷭ҇и і҆и҃се хрⷭ҇тѐ бж҃е на́шъ: Посе́мъ, и҆з̾ѡбрази́тєльнаѧ, и҆ бл҃жє́нны: Во црⷭ҇твїи твое́мъ: ско́рѡ, без̾ пѣ́нїѧ. Сла́ва, и҆ ны́нѣ: Помѧнѝ на́съ, гдⷭ҇и: и҆ покло́ны трѝ. Ли́къ нбⷭ҇ный: И҆ прѡ́чаѧ. И҆ по Ѻ҆́ч҃е на́шъ: Кондакѝ хра́ма, и҆ ст҃о́мꙋ. Сла́ва, конда́къ: Со ст҃ы́ми ᲂу҆поко́й: И҆ ны́нѣ, конда́къ: Предста́тельство хрⷭ҇тїа́нъ: Гдⷭ҇и, поми́лꙋй, м҃. Сла́ва, и҆ ны́нѣ: Чтⷭ҇нѣ́йшꙋю херꙋві̑мъ: Покло́ны трѝ вели̑кїѧ, и҆ про́чихъ в҃і.
Посе́мъ дрꙋгі́й ли́къ начина́етъ вече́рню: Прїиди́те, поклони́мсѧ: три́жды, и҆ ѱало́мъ: Бл҃гословѝ, дꙋшѐ моѧ̀, гдⷭ҇а: И҆ прѡ́чаѧ.
Въ сре́дꙋ ве́чера.
На гдⷭ҇и воззва́хъ, стїхи̑ры, ꙗ҆́кѡ ѡ҆бы́чно.
Сла́ва, и҆ ны́нѣ, бг҃оро́диченъ.
Прокі́менъ, гла́съ є҃, ѱало́мъ н҃г: Бж҃е, во и҆́мѧ твоѐ сп҃си́ мѧ, и҆ въ си́лѣ твое́й сꙋди́ ми. Сті́хъ: Бж҃е, ᲂу҆слы́ши мл҃твꙋ мою̀, внꙋшѝ глаго́лы ᲂу҆́стъ мои́хъ.
Прⷪ҇ро́чества і҆ѡи́лева чте́нїе. [Глава̀ г҃, ст. в҃і-к҃а].
Та́кѡ глаго́летъ гдⷭ҇ь: да воста́нꙋтъ и҆ взы́дꙋтъ всѝ ꙗ҆зы́цы на ю҆до́ль і҆ѡсафа́товꙋ, ꙗ҆́кѡ та́мѡ сѧ́дꙋ разсꙋди́ти всѧ̑ ꙗ҆зы́ки ꙗ҆́же ѡ҆́крестъ. И҆спꙋсти́те серпы̀, ꙗ҆́кѡ предстои́тъ ѡ҆б̾има́нїе вїногра́да: вни́дите, топчи́те, ꙗ҆́кѡ и҆спо́лнь точи́ло, и҆злива́ютсѧ подточи̑лїѧ, ꙗ҆́кѡ ᲂу҆мно́жишасѧ ѕлѡ́бы и҆́хъ. Гла́си прогласи́шасѧ на по́ли сꙋде́бнѣмъ, ꙗ҆́кѡ бли́зъ де́нь гдⷭ҇нь на ю҆до́ли сꙋде́бнѣй. Со́лнце и҆ лꙋна̀ поме́ркнꙋтъ, и҆ ѕвѣ́зды скры́ютъ свѣ́тъ сво́й. Гдⷭ҇ь же ѿ сїѡ́на воззове́тъ, и҆ ѿ і҆ерⷭ҇ли́ма да́стъ гла́съ сво́й, и҆ потрѧсе́тсѧ нб҃о и҆ землѧ̀: гдⷭ҇ь же пощади́тъ лю́ди своѧ̑, и҆ ᲂу҆крѣпи́тъ [гдⷭ҇ь] сы́ны і҆и҃лєвы. И҆ ᲂу҆вѣ́сте, ꙗ҆́кѡ а҆́зъ гдⷭ҇ь бг҃ъ ва́шъ, вселѧ́ѧсѧ въ сїѡ́нѣ въ горѣ̀ мое́й ст҃ѣ́й: и҆ бꙋ́детъ і҆ерⷭ҇ли́мъ ст҃ъ, и҆ и҆ноплемє́нницы не про́йдꙋтъ сквозѣ̀ є҆гѡ̀ ктомꙋ̀. И҆ бꙋ́детъ въ то́й де́нь, и҆ска́плютъ го́ры сла́дость, и҆ хо́лми и҆сточа́тъ млеко̀, и҆ всѝ и҆сто́чницы і҆ꙋ̑дины и҆сточа́тъ во́ды: и҆ и҆сто́чникъ ѿ до́мꙋ гдⷭ҇нѧ и҆зы́детъ, и҆ напои́тъ водоте́чь ꙾си́тїѧ꙾. Є҆гѵ́петъ въ поги́бель бꙋ́детъ, и҆ і҆дꙋме́а въ по́ле поги́бели бꙋ́детъ за ѡ҆ѕлобле́нїе сынѡ́въ і҆ꙋ́диныхъ: поне́же пролїѧ́ша кро́вь пра́веднꙋю на землѝ свое́й. І҆ꙋде́а же во вѣ́ки насели́тсѧ, и҆ і҆ерⷭ҇ли́мъ въ ро́ды родѡ́въ. И҆ взыщꙋ̀ кро́ви и҆́хъ, и҆ не ѡ҆безвиню̀: и҆ гдⷭ҇ь всели́тсѧ въ сїѡ́нѣ.
Прокі́менъ, гла́съ ѕ҃, ѱало́мъ р҃л: Да ᲂу҆пова́етъ і҆и҃ль на гдⷭ҇а ѿны́нѣ и҆ до вѣ́ка. Сті́хъ: Гдⷭ҇и, не вознесе́сѧ се́рдце моѐ, нижѐ вознесо́стѣсѧ ѻ҆́чи моѝ. И҆ Сподо́би, гдⷭ҇и, въ ве́черъ се́й:
На стїхо́внѣ самогла́сенъ днѐ, гла́съ г҃:
Возсїѧ̀ весна̀ по́стнаѧ и҆ цвѣ́тъ покаѧ́нїѧ. ѡ҆чи́стимъ ᲂу҆̀бо себѐ, бра́тїе, ѿ всѧ́кїѧ скве́рны: свѣтода́вцꙋ пою́ще рце́мъ: сла́ва тебѣ̀, є҆ди́не чл҃вѣколю́бче.
Сті́хъ же глаго́лемъ: Къ тебѣ̀ возведо́хъ: И҆ повторѧ́емъ самогла́сенъ. Та́же сті́хъ: Поми́лꙋй на́съ, гдⷭ҇и: и҆ мч҃нченъ:
Мч҃нцы твоѝ, гдⷭ҇и, вѣ́рою ᲂу҆тведи́вшесѧ, ᲂу҆пова́нїемъ ᲂу҆крѣпи́вшесѧ, любо́вїю крⷭ҇та̀ твоегѡ̀ дꙋше́внѡ соедини́вшесѧ, вра́жїе мꙋчи́тельство разрꙋши́ша, и҆ ᲂу҆лꙋчи́вше вѣнцы̀, со безпло́тными мо́лѧтсѧ ѡ҆ дꙋша́хъ на́шихъ.
Сла́ва, и҆ ны́нѣ, бг҃оро́диченъ: Первост҃а́ѧ, чтⷭ҇аѧ влⷣчце, похвала̀ сꙋ́щи нбⷭ҇ныхъ чинѡ́въ, а҆пⷭ҇лѡвъ пѣ́нїе, прⷪ҇ро́кѡвъ сбытїѐ, прїимѝ и҆ на̑шѧ молє́нїѧ.
Ны́нѣ ѿпꙋща́еши: По трист҃о́мъ, тропа́рь ст҃о́мꙋ. Сла́ва, и҆ ны́нѣ, бг҃оро́диченъ є҆гѡ̀. А҆́ще нѣ́сть, тогда̀ тропа́рь днѐ. Сла́ва, и҆ ны́нѣ, бг҃оро́диченъ, по гла́сꙋ тропарѧ̀. Є҆ктенїа̀: Поми́лꙋй на́съ, бж҃е: Покло́ны г҃ вели̑кїѧ. Бꙋ́ди и҆́мѧ гдⷭ҇не: Бл҃гословлю̀ гдⷭ҇а: Досто́йно є҆́сть: И҆ ѿпꙋ́стъ. И҆ и҆схожде́нїе въ притво́ръ. И҆ быва́етъ ѡ҆бы́чнаѧ лїті́а ѡ҆ ᲂу҆со́пшихъ.
[Зрѝ] Разꙋ́мно же да бꙋ́детъ, ꙗ҆́кѡ въ палесті́нѣ, є҆́же є҆́сть во і҆ерⷭ҇ли́мской странѣ̀, не прїѧ́хомъ ѿ ст҃ы́хъ ѻ҆тє́цъ сотворѧ́ти соверше́нныѧ лїтꙋргі́и въ сре́дꙋ и҆ въ пѧто́къ сы́рныѧ седми́цы, нижѐ преждесщ҃е́нныѧ: въ та̑ бо два̀ дни̑ пое́мъ а҆ллилꙋ́їа съ поклѡ́ны, ве́черъ и҆ ᲂу҆́трѡ, ꙗ҆́коже вы́ше рече́сѧ.
По вече́рни же, въ си́хъ двꙋ̀ дне́хъ, ꙗ҆ди́мъ сы́ръ и҆ ꙗ҆́ица, соблюда́юще и҆ пра́вило во ст҃ы́хъ ѻ҆тца̀ на́шегѡ нїки́фора, патрїа́рха кѡнстантїнопо́льскагѡ, и҆сповѣ́дника, глаго́люща: Подоба́етъ пости́тисѧ мона́хѡмъ въ сре́дꙋ и҆ пѧто́къ сыроѧ́стный. Ѿвраща́етъ же сїѐ пра́вило преда́нїе і҆акѡви́тское и҆ тетраді́тскꙋю є҆́ресь.
[Зрѝ] Въ сре́дꙋ сы́рнꙋю ве́черъ, повече́рїе пое́мъ ма́лое. И҆ пое́мъ канѡ́нъ, и҆́же въ мине́и на рѧдꙋ̀, въ сꙋббѡ́тꙋ хотѧ́щагѡ прилꙋчи́тисѧ ст҃а́гѡ.
Въ четверто́къ на ᲂу҆́трени.
По а҃-мъ стїхосло́вїи сѣда́льны ѻ҆смогла́сника, а҆пⷭ҇льскїѧ.
По в҃-мъ стїхосло́вїи сѣда́ленъ трїѡ́ди, гла́съ є҃
Подо́бенъ: Собезнача́льное сло́во:
Четыредесѧ́тницꙋ и҆ пред̾ѡчисти́тельницꙋ а҆пⷭ҇ли всѝ дне́сь вѣнча́ютъ, и҆ по́стное вре́мѧ ѡ҆сщ҃а́ютъ ᲂу҆ хрⷭ҇та̀ и҆зба́вителѧ, и҆ воскрⷭ҇нїе є҆гѡ̀ предвозвѣща́ютъ всѣ̑мъ, и҆ мо́лѧтсѧ гдⷭ҇ви, поми́ловатисѧ дꙋша́мъ на́шымъ.
Сла́ва, то́йже. И҆ ны́нѣ, бг҃оро́диченъ, Подо́бенъ:
На тѧ̀, дв҃о чтⷭ҇аѧ, надє́жды несꙋмнѣ́ннѡ и҆мꙋ́щымъ покро́въ сꙋ́щи, свободѝ ѧ҆̀ ѿ разли́чныхъ и҆скꙋше́нїй и҆ ѡ҆бстоѧ́нїй и҆ бѣ́дъ лю́тыхъ, молѧ́щи сн҃а твоего̀ со а҆пⷭ҇лы є҆гѡ̀, и҆ сп҃сѝ всѧ̑ воспѣва́ющыѧ тѧ̀.
Та́же чте́мъ сло́во ст҃а́гѡ а҆наста́сїа, и҆гꙋ́мена сїна́йскїѧ горы̀, и҆ ѱало́мъ н҃. Канѡ́ны же пое́мъ ѻ҆смогла́сника и҆ мине́и. А҆ въ ни́хже пѣ́снехъ пое́мъ трипѣ́снцы, ѡ҆ставлѧ́емъ таковы̑ѧ пѣ̑сни ѻ҆смогла́сника.
Трипѣ́снецъ. Творе́нїе господи́на і҆ѡ́сифа, гла́съ д҃.
Пѣ́снь д҃.
І҆рмо́съ: Оу҆слы́ша прⷪ҇ро́къ прише́ствїе твоѐ, гдⷭ҇и, и҆ ᲂу҆боѧ́сѧ: разꙋмѣ̀ дѣла̀ твоѧ̑, и ᲂу҆жасе́сѧ. сла́ва, хрⷭ҇тѐ, си́лѣ твое́й: сла́ва снисхожде́нїю твоемꙋ̀.
Просїѧ́ша въ мі́рѣ зарю̀ бг҃оразꙋ́мїѧ ᲂу҆ч҃нцы̀ твоѝ, гдⷭ҇и, и҆ пре́лесть помрачи́ша, разо́рше ѡ҆мраче́нїе прельще́нїѧ. тѣ́хъ мл҃твами, ще́дре, сп҃сѝ пою́щыѧ тѧ̀.
Преддвє́рїѧ поста̀, подвигѡ́въ бл҃гоплѡ́дїи вѣнча̑ннаѧ, прїе́млютъ притека́ющихъ тре́звеннѡ, пѣ́сньми и҆ пѣ̑нїи та́инственными: ᲂу҆се́рднѡ вѣ́рнїи всѝ стеце́мсѧ.
Оу҆мерщвле́нїѧ ри̑зы прїе́мъ, въ де́рзость невоздержа́нїѧ ѡ҆блеко́хсѧ ѡ҆каѧ́нный: но ты́ мѧ ѡ҆блецы̀, сн҃е бж҃їй, ѡ҆де́ждою свѣ́тлою возрожде́нїѧ.
Житїѐ моѐ въ лꙋка́вствѣ и҆ всѧ́кой нечистотѣ̀ сконча́сѧ: но къ тебѣ̀ всеще́дромꙋ прибѣга́ю. предвари́въ ᲂу҆̀бо сп҃си́ мѧ, хрⷭ҇тѐ бж҃е, твое́ю бл҃гостїю.
Бг҃оро́диченъ: Зачала̀ є҆сѝ па́че сло́ва, и҆ родила̀ є҆сѝ па́че є҆стества̀, бг҃ороди́тельнице,влады́чествꙋющаго тва́рїю: є҆го́же непреста́ннѡ молѝ, и҆зба́витисѧ на́мъ ѿ всѧ́кагѡ гнѣ́ва, тебѐ ᲂу҆бл҃жа́ющымъ.
И҆́ный. Гла́съ в҃.
І҆рмо́съ: Прише́лъ є҆сѝ ѿ дв҃ы:
Разсѣ́ѧвше мглꙋ̀ невоздержа́нїѧ сїѧ́ньми ᲂу҆че́нїй ва́шихъ, а҆пⷭ҇ли, просвѣти́сте воздержа́нїемъ всѧ̑ грѣ̑шныѧ и҆ првⷣныѧ, ꙗ҆́кѡ всехва́льнїи.
Ꙗ҆́коже ꙗ҆́снїи би́серїе сло́ва, всѧ̑ концы̀ ᲂу҆краси́сте воздержа́нїемъ, а҆пⷭ҇ли, и҆ вои́стиннꙋ ᲂу҆добри́сте ны́нѣ дꙋ́шъ на́шихъ бл҃горо́дїе.
Пе́щь страсте́й росо́ю поста̀ ᲂу҆вѧди́вше, а҆пⷭ҇ли, всѧ̑ человѣ́ки наꙋчи́сте и҆мѣ́ти є҆го̀, ꙗ҆́кѡ гра́дъ без̾ѡпа́сный и҆ жили́ще ѡ҆сщ҃е́нїѧ.
Сла́ва: Согрѣши́хъ, ѡ҆каѧ́нный, па́че всѣ́хъ человѣ̑къ, и҆ не пока́ѧхсѧ: ꙗ҆́кѡ манассі́а согрѣши́хъ. нра́вы покаѧ́нїѧ мѝ сотворѝ, гдⷭ҇и, пре́жде да́же не разрѣши́тъ мѧ̀ сме́рть.
Бг҃оро́диченъ: Тебѐ приста́нище сп҃се́нїѧ и҆ стѣ́нꙋ нерꙋши́мꙋ, бцⷣе влⷣчце, всѝ вѣ́рнїи вѣ́мы: ты́ бо мл҃твами твои́ми ѿ бѣ́дъ свобожда́еши дꙋ́шы на́шѧ.
Та́же, і҆рмо́съ: Прише́лъ є҆сѝ ѿ дв҃ы не хода́тай, ни а҆́гг҃лъ, но са́мъ гдⷭ҇ь вопло́щьсѧ, и҆ сп҃слъ є҆сѝ всего́ мѧ человѣ́ка. тѣ́мъ зовꙋ́ ти: сла́ва си́лѣ твое́й, гдⷭ҇и.
Пѣ́снь и҃.
І҆рмо́съ: Всѧ́чєскаѧ, влⷣко, премꙋ́дростїю твое́ю соста́вилъ є҆сѝ, земли́ же па́ки ᲂу҆тверди́лъ є҆сѝ, ꙗ҆́коже вѣ́си, дно̀, ѡ҆снова́нїемъ водрꙋзи́вый на вода́хъ безмѣ́рныхъ. тѣ́мъ всѝ вопїе́мъ воспѣва́юще: бл҃гослови́те, дѣла̀ гдⷭ҇нѧ, непреста́ннѡ гдⷭ҇а.
Землѧ̀ всѧ̀, гдⷭ҇и, и҆спо́лнисѧ твоегѡ̀ хвале́нїѧ: всю́ бо ѡ҆бтечѐ бж҃е́ственныхъ ᲂу҆ч҃нкъ твои́хъ вѣща́нїе бж҃е́ственное, и҆з̾ глꙋбины̀ невѣ́дѣнїѧ ѡ҆браща́ющее къ ра́зꙋмꙋ, пою́щꙋю: бл҃гослови́те, дѣла̀ гдⷭ҇нѧ, гдⷭ҇а.
Бл҃года́ть бж҃е́ственнаѧ покаѧ́нїѧ ꙗ҆ви́сѧ, сп҃се́нїе приносѧ́щи сеѧ̀ наслажда́ющымсѧ, стѧза̑нїѧ и҆ по́двизи по́тѡвъ и҆ трꙋдѡ́въ: тѣ́мже тецы̀, дꙋшѐ моѧ̀, ко влⷣцѣ твоемꙋ̀, мно́гихъ твои́хъ прегрѣше́нїй и҆́щꙋщи прїѧ́ти проще́нїе.
По́прище ѿве́рзесѧ бг҃ода́ннагѡ воздержа́нїѧ, свѣ́тлѡ ᲂу҆срѧ́щимъ тре́бꙋющїи млⷭ҇ти: жа́ждетъ бо бл҃госе́рдый на́шегѡ сп҃се́нїѧ, и҆ простира́етсѧ да́ти проще́нїе и҆́щꙋщымъ є҆гѡ̀ ᲂу҆се́рднѡ и҆ любо́вїю рабо́тающымъ.
Посто́мъ и҆з̾ѻщри́сѧ, ми́рствꙋющею мы́слїю, дꙋшѐ, напита́й же гдⷭ҇а бл҃годѣланїемъ, приносѧ́щи семꙋ̀ добродѣ́тели бра̑шна, ꙗ҆́кѡ бл҃говѡ́нныѧ жє́ртвы, и҆ взыва́ющи: дѣла̀, бл҃гослови́те непреста́ннѡ гдⷭ҇а.
Бг҃оро́диченъ: Всѣ́ми влады́чествꙋющаѧ, ст҃а́ѧ бцⷣе, мѡльбы̀ прїе́млющи ра̑бъ твои́хъ, влⷣчце, и҆зба́ви мѧ ѿ тьмы́ и҆ ѻ҆гнѧ̀ негаси́магѡ, ѕѡ́лъ мои́хъ мно́жєства ѡ҆чища́ющи твои́мъ хода́тайствомъ и҆ є҆ди́ною бж҃е́ственною твое́ю мл҃твою.
И҆́ный.
І҆рмо́съ: Оу҆страши́сѧ соѡбра́знагѡ дꙋшѝ:
Ва́съ, а҆пⷭ҇лы, хрⷭ҇то́съ, ꙗ҆́коже свѣ́тъ, въ концы̀ всеѧ̀ вселе́нныѧ даѧ̀, речѐ: ше́дше наꙋчи́те во ꙗ҆зы́цѣхъ: да во пло́ти мѧ̀ сꙋ́ща ᲂу҆ви́дите воздержа́нїемъ живꙋ́ща, и҆ вра́жїю всю̀ си́лꙋ попира́юща, и҆ пꙋ́ть человѣ́кѡмъ ꙗ҆влѧ́юща пра́вый.
Ꙗ҆ви́лъ є҆сѝ, хрⷭ҇тѐ, грѧдꙋ́щее воздержа́нїе во ѡ҆чище́нїе человѣ́кѡмъ и҆ во ѿлꙋче́нїе страсте́й: си́мъ бо твоѝ а҆пⷭ҇ли бл҃гоꙋгоди́ша, и҆ свѣ́тлїи свѣти́льницы на землѝ ꙗ҆ви́шасѧ, проповѣ́дающе гдⷭ҇а въ тре́хъ ли́цѣхъ, во є҆ди́нѣмъ же сꙋществѣ̀, всѣ̑мъ воспѣва́ющымъ є҆го̀.
Ꙗ҆зы́кѡмъ проповѣ̑дницы вы̀ по́слани бы́сте ѿ ᲂу҆ч҃тлѧ хрⷭ҇та̀, ѽ ᲂу҆ч҃нцы̀, ᲂу҆че́ньми бж҃е́ственными просвѣща́ти и҆́хъ помышлє́нїѧ, ѿ страсте́й и҆ бра́шенъ да ᲂу҆держава́ютсѧ, жела́ютъ же воздержа́нїѧ, и҆ гдⷭ҇а зна́ютъ сего̀, и҆ созда́телѧ, и҆ творца̀ всѣ́хъ, и҆ бл҃годѣ́телѧ.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Ꙗ҆́коже нѣ́когда ка́їнъ ᲂу҆бі́йца, не принесо́хъ же́ртвꙋ непоро́чнꙋ дꙋшѝ моеѧ̀, хрⷭ҇тѐ, нечи́стымъ ра́зꙋмомъ содержи́мь: не возгнꙋша́йсѧ ᲂу҆́бо менє̀ приходѧ́ща къ тебѣ̀ посто́мъ, сп҃се пребл҃гі́й, но при́зри на да́ры, ꙗ҆̀же любо́вїю несꙋ̀ тебѣ̀, бж҃е мо́й, во вре́мѧ поще́нїѧ.
Бг҃оро́диченъ: Бл҃же́но бы́сть чре́во бг҃омт҃ре, ꙗ҆́кѡ прїи́мшее сло́во, дебельство́мъ пло́ти ѿ неѧ̀ смѣси́вшеесѧ человѣ́ческомꙋ зра́кꙋ, по ѵ҆поста́си: и҆ ꙗ҆ви́сѧ гра́дъ бж҃їй, въ не́мже жи́ти вы́шнїй и҆ гдⷭ҇ь бг҃ъ бл҃говолѝ. тѣ́мже вопїе́мъ є҆́й̀: ра́дꙋйсѧ, бл҃года́тнаѧ, чтⷭ҇аѧ бцⷣе.
Хва́лимъ, бл҃гослови́мъ, покланѧ́емсѧ гдⷭ҇еви:
І҆рмо́съ: Оу҆страши́сѧ соѡбра́знагѡ дꙋшѝ, нескве́рнагѡ тѣ́ла ѻ҆трокѡ́въ бл҃гочести́выхъ, и҆ ᲂу҆страни́сѧ воспита́нный въ безмѣ́рнѣмъ веществѣ̀, непреста́нный ѻ҆́гнь. и҆з̾ꙋвѧ́дшꙋ же пла́мени, вѣ́чнꙋющаѧ пѣ́снь присноживꙋ́щемꙋ воспѣва́шесѧ: всѧ̑ дѣла̀, гдⷭ҇а по́йте, и҆ превозноси́те во всѧ̑ вѣ́ки.
И҆ стїхосло́витсѧ Чтⷭ҇нѣ́йшꙋю:
Пѣ́снь ѳ҃.
І҆рмо́съ: Ꙗ҆́кѡ сотворѝ мнѣ̀ вели̑чїѧ си́льный, и҆ ст҃о и҆́мѧ є҆гѡ̀, и҆ млⷭ҇ть є҆гѡ̀ въ ро́дъ и҆ ро́дъ боѧ́щымсѧ є҆гѡ̀.
Ꙗ҆́кѡ свѣти̑ла нелѡ́жнаѧ мі́рꙋ по́слани бы́сте, и҆збавлѧ́юще ѿ глꙋбины̀ грѣхѡ́вныѧ: воспѣва́емъ ра́достнѡ ᲂу҆крѣпи́вшаго ва́съ, ꙗ҆́кѡ а҆пⷭ҇лы своѧ̑.
Ꙗ҆́кѡ ва́съ, мꙋ́дрїи, дре́вле хрⷭ҇то́съ ꙗ҆́кѡ со́ль посла̀ мі́рꙋ ѡ҆б̾юродѣ́вшꙋ, вразꙋмлѧ́ющыѧ є҆го̀ къ позна́нїю своемꙋ̀, восхвалѧ́емъ вѣ́рнѡ.
Ꙗ҆́кѡ мно́жество прегрѣше́нїй лю́тыхъ ѡ҆бдержи́тъ мѧ̀, со слеза́ми припа́даю тѝ, хрⷭ҇тѐ, просѧ̀ проще́нїе вины̀ пода́ти мѝ во вре́мѧ поста̀.
Ꙗ҆́кѡ вери́гами нерѣши́мыми свѧ́занъ мои́хъ страсте́й, стеню̀ и҆ взыва́ю тѝ, сп҃се: свободи́ и҆ менѐ, ꙗ҆́кѡ да пою̀ прера́дованнѡ бл҃госе́рдїе твоѐ.
Бг҃оро́диченъ: Ꙗ҆́кѡ показа́ тѧ бг҃ъ, дв҃о чтⷭ҇аѧ, по́мощь ро́дꙋ человѣ́ческомꙋ, не преста́й прилѣ́жнѡ молѧ́щи є҆го̀ ѡ҆ на́съ вѣ́рныхъ.
И҆́ный.
І҆рмо́съ: Невмѣсти́маго бг҃а:
А҆пⷭ҇льскїй ли́къ посто́мъ показа̀сѧ вселе́ннѣй все́й сїѧ́ѧй свѣ́тлостїю бж҃е́ственною и҆ просвѣща́ѧй мі́ръ.
Оу҆ч҃нкъ твои́хъ ли́къ, і҆и҃се чл҃вѣколю́бче, ꙗ҆зы́чєскїѧ ро́ды наꙋчѝ сокро́виществовати бога́тство воздержа́нїѧ.
Дванадесѧтострꙋ́нное вѣща́нїе, ᲂу҆ч҃нкъ твои́хъ собо́ръ, воздержа́нїѧ бога́тство да́рствꙋетъ человѣ́кѡмъ и҆ и҆сто́чникъ сп҃се́нїѧ.
Сла́ва: Блꙋ́днагѡ гла́сомъ взыва́ю тѝ, гдⷭ҇и: ѻ҆́ч҃е, согрѣши́хъ, сп҃сѝ: ще́дре, да не ѿлꙋчи́ши менѐ ѿ сла́вы твоеѧ̀.
Бг҃оро́диченъ: Во чре́вѣ твое́мъ бг҃а ꙗ҆́кѡ чл҃вѣ́ка носи́вшаѧ, и҆ жи́знь мі́рꙋ и҆сточи́вшаѧ, тѧ̀ воспѣва́емъ, всест҃а́ѧ дв҃о.
І҆рмо́съ: Невмѣсти́маго бг҃а во чре́вѣ вмѣсти́вшаѧ, и҆ ра́дость мі́рꙋ роди́вшаѧ, тѧ̀ воспѣва́емъ, всест҃а́ѧ дв҃о.
Свѣти́ленъ гла́са.
На стїхо́внѣ же пое́мъ самогла́сенъ днѐ, гла́съ г҃:
Возсїѧ̀ воздержа́нїѧ бл҃голѣ́пїе, бѣсо́вскꙋю мглꙋ̀ ѿгонѧ́щее: прїи́де поще́нїѧ чистота̀,дꙋше́вныхъ страсте́й и҆сцѣле́нїе носѧ́щаѧ. се́ю нѣ́когда̀ данїи́лъ и҆ ѻ҆́троцы въ вавѷлѡ́нѣ ѡ҆гради́вшесѧ, ѻ҆́въ ᲂу҆́бѡ ᲂу҆ста̀ львѡ́мъ ѡ҆бꙋзда̀, ѻ҆́ви же пла́мень пе́щный ᲂу҆гаси́ша. съ ни́миже и҆ на́съ то́южде сп҃сѝ, хрⷭ҇тѐ бж҃е, ꙗ҆́кѡ чл҃вѣколю́бецъ.
И҆ повторѧ́емъ се́й, со стїхо́мъ: И҆спо́лнихомсѧ заꙋ́тра:
Та́же сті́хъ: И҆ бꙋ́ди свѣ́тлость:
И҆ мч҃нченъ: Ꙗ҆́кѡ свѣти̑ла въ мі́рѣ сїѧ́ете и҆ по сме́рти, ст҃і́и мч҃нцы, по́двигомъ до́брымъ подвиза́вшесѧ: тѣ́мже и҆мꙋ́ще дерзнове́нїе, хрⷭ҇та̀ ᲂу҆моли́те, поми́ловатисѧ дꙋша́мъ на́шымъ.
Сла́ва, и҆ ны́нѣ, бг҃оро́диченъ: Въ жена́хъ ст҃а́ѧ, бцⷣе мт҃и безневѣ́стнаѧ, молѝ, є҆го́же родила̀ є҆сѝ, цр҃ѧ̀ и҆ бг҃а: да сп҃се́тъ на́съ ꙗ҆́кѡ чл҃вѣколю́бецъ.
Та́же, Бл҃го є҆́сть: Совокꙋплѧ́емъ же и҆ ча́съ а҃, ꙗ҆́кѡ ѡ҆бы́чно. И҆ ѿпꙋ́стъ.
Въ пѧто́къ сы́рный, на ᲂу҆́трени.
По шестоѱа́лмїи пое́мъ А҆ллилꙋ́їа, на гла́съ трⷪ҇чна гла́са.
По а҃-мъ стїхосло́вїи сѣда́льны крⷭ҇тныѧ ѻ҆смогла́сника.
По в҃-мъ стїхосло́вїи сѣда́ленъ трїѡ́ди, гла́съ з҃.
Подо́бенъ: Ꙗ҆́кѡ и҆мꙋ́щи:
Возвы́си цр҃кве́й ро́гъ, чтⷭ҇ны́й крⷭ҇те, низложѝ є҆реті́ческꙋю горды́ню си́лою твое́ю, и҆ возвеселѝ правосла́вныхъ ли́ки: сподо́би всѧ̑ ны̀ предвари́ти твоѐ прославле́нїе, и҆ поклони́тисѧ тебѣ̀ подно́жїю хрⷭ҇то́вꙋ: въ тебѣ́ бо хва́лимсѧ, дре́во бл҃гослове́нное.
Сла́ва, то́йже.
И҆ ны́нѣ, крⷭ҇тобг҃оро́диченъ: Ꙗ҆́кѡ и҆мꙋ́щи млⷭ҇ть ко смире́нїю на́шемꙋ и҆ зрѧ́щи на земны̑ѧ многоꙋтѣснѧ́ємыѧ лю́ди, ᲂу҆милосердисѧ, бл҃гослове́ннаѧ бцⷣе: пребꙋ́ди молѧ́щисѧ, да не поги́бнемъ лю́тѣ: молѝ, ꙗ҆́кѡ пречⷭ҇таѧ, бл҃гоꙋвѣ́тливаго бг҃а сп҃сти́сѧ дꙋша́мъ на́шымъ, прест҃а́ѧ дв҃о.
Та́же чте́мъ сло́во вели́кагѡ васі́лїа ѡ҆ постѣ̀, є҆гѡ́же нача́ло: Вострꙋби́те въ новомѣ́сѧчїи трꙋбо́ю: Та́же ѱало́мъ н҃.
И҆ канѡ́ны ѻ҆смогла́сника, мине́и и҆ трїѡ́ди. Въ ни́хже пѣ́снехъ пое́мъ трипѣ́снцы, ѡ҆ставлѧ́ютсѧ такѡвы̑ѧ пѣ̑сни ѻ҆смогла́сника и҆ мине́и: поне́же двоїрмо́сны сꙋ́ть трипѣ́снцы.
Канѡ́нъ трїѡ́ди. Творе́нїе господи́на і҆ѡ́сифа. Гла́съ и҃.
Пѣ́снь а҃.
І҆рмо́съ: Во́дꙋ проше́дъ:
Воздержа́нїѧ бж҃е́ственное вре́мѧ возсїѧ̀ всѣ̑мъ покаѧ́нїѧ просвѣще́нїе, ѿе́млющее тьмꙋ̀ прегрѣше́нїй: сїѐ ᲂу҆се́рднымъ се́рдцемъ прїи́мемъ.
Сѐ покаѧ́нїѧ добро́та дꙋ́шы преѡбразꙋ́етъ, поще́нїѧ приведе́нїемъ: въ сїѐ тре́звеннѡ вше́дше вѣ́рнїи прїи́мемъ и҆ прегрѣше́нїй разрѣше́нїе.
Сла́ва: Нача̑ла, вла̑сти, и҆ херꙋві́ми, и҆ всѧ̑ си̑лы, моли́тесѧ, вре́мѧ по́стное соверши́ти на́мъ въ покаѧ́нїи и҆ всѧ́кой чистотѣ̀.
Бг҃оро́диченъ: Ст҃а́ѧ дв҃о, вѣ́рныхъ застꙋпле́нїе є҆ди́на, мл҃твꙋ твою̀ споспѣ́шнꙋю во вре́мѧ поще́нїѧ всѣ̑мъ пода́ждь, бцⷣꙋ чтⷭ҇ꙋю тѧ̀ вѣ́дꙋщымъ.
І҆рмо́съ: Во́дꙋ проше́дъ, ꙗ҆́кѡ сꙋ́шꙋ, и҆ є҆гѵ́петскагѡ ѕла̀ и҆збѣжа́въ, і҆и҃льтѧнинъ вопїѧ́ше: и҆зба́вителю и҆ бг҃ꙋ на́шемꙋ пои́мъ.
Пѣ́снь г҃.
І҆рмо́съ: Нбⷭ҇нагѡ крꙋ́га:
Па́гꙋбныхъ страсте́й дꙋше́вныхъ ᲂу҆бѣжи́мъ под̾ѧ́тїемъ поста̀, и҆ ᲂу҆миле́нїѧ пока́жемъ плоды̀, пе́рвѣе грѣхмѝ бг҃а бл҃госе́рдаго преѡгорчи́вшїи.
Свѣщы̀ є҆ле́емъ бл҃ги́хъ дѣѧ́нїй вжещѝ всѝ ны́нѣ потщи́мсѧ ᲂусе́рднѡ, ꙗ҆́кѡ да вни́демъ съ мꙋ́дрыми дѣ́вами во свѣ́тлый черто́гъ ра́дꙋющесѧ.
Сла́ва: Бг҃оглаго́ливїи прⷪ҇ро́цы, бг҃ови́днїи мч҃нцы, и҆ бж҃е́ственнїи ᲂу҆ч҃нцы̀ сп҃сѡвы, того̀ моли́те, до́брѣ нача́ти и҆ бл҃гоꙋго́днѡ сконча́ти всѣ̑мъ поще́нїѧ по́прище, мо́лимсѧ.
Бг҃оро́диченъ: Ꙗ҆́кѡ винꙋ́ всѣ́хъ бл҃ги́хъ, влⷣчце, всѝ прилѣ́жнѡ тѧ мо́лимъ, є҆́же совни́ти на́мъ твои́мъ хода́тайствомъ въ по́стный по́двигъ, и҆ концꙋ̀ дарова́тисѧ сегѡ̀ сп҃си́тельномꙋ.
І҆рмо́съ: Нбⷭ҇нагѡ крꙋ́га ветхотво́рче гдⷭ҇и, и҆ цр҃кве зижди́телю, ты̀ менѐ ᲂу҆твердѝ въ любвѝ твое́й, жела́нїй кра́ю, вѣ́рныхъ ᲂу҆твержде́нїе, є҆ди́не чл҃вѣколю́бче.
Та́же сѣда́ленъ мине́и, и҆ крⷭ҇тобг҃оро́диченъ.
Пѣ́снь д҃.
І҆рмо́съ: Оу҆слы́шахъ, гдⷭ҇и:
Ꙗ҆́коже ᲂу҆́треница возни́кши, ны́нѣ поще́нїѧ бл҃года́ть предлага́етъ на́мъ покаѧ́нїѧ вре́мѧ,долгѡ́въ тьмꙋ̀ разрѣша́ющее.
Напита́имъ ни́щыѧ, млⷭ҇ть млⷭ҇тїю воспрїе́млюще, и҆ поще́нїѧ бж҃е́ственною водо́ю дꙋшє́вныѧ сквє́рны ѿмы́имъ.
Сла́ва: Нбⷭ҇нїи а҆́гг҃ли, бл҃года́вца ᲂу҆моли́те, ᲂу҆миле́нное на́ше покаѧ́нїе щедро́тами безмѣ́рными прїѧ́ти.
Бг҃оро́диченъ: Чи́стое ѡ҆чисти́лище согрѣша́ющихъ, ст҃а́ѧ влⷣчце, хода́тайствомъ твои́мъ раздерѝ согрѣше́нїй мои́хъ рꙋкописа́нїе.
І҆рмо́съ: Оу҆слы́шахъ, гдⷭ҇и, смотре́нїѧ твоегѡ̀ та́инство: разꙋмѣ́хъ дѣла̀ твоѧ̑, и҆ просла́вихъ твоѐ бж҃ество̀.
Пѣ́снь є҃.
І҆рмо́съ: Вскꙋ́ю мѧ̀ ѿри́нꙋлъ є҆сѝ ѿ лица̀ твоегѡ̀, свѣ́те незаходи́мый, и҆ покры́ла мѧ̀ є҆́сть чꙋжда́ѧ тьма̀ ѡ҆каѧ́ннаго; но ѡ҆брати́ мѧ, и҆ къ свѣ́тꙋ за́повѣдей твои́хъ пꙋти̑ моѧ̑ напра́ви, молю́сѧ.
Настоѧ́щїй де́нь творѧ́ще нача́токъ житїѧ̀ чи́стагѡ, ᲂу҆се́рднѡ къ подвигѡ́мъ вѣ́рнїи себѐ ᲂу҆гото́вимъ, плотскі̑ѧ трꙋды̀ и҆ дꙋше́вное бл҃гопло́дїе влⷣцѣ всѣ́хъ приносѧ́ще.
Мѡѷсе́а по́стъ показа̀ прича́стника бж҃е́ственнагѡ бг҃овидѣ́нїѧ: семꙋ̀ ᲂу҆́бо подража́ющи, дꙋшѐ моѧ̀, по́стомъ воспрїимѝ бж҃е́ствєннаѧ восхождє́нїѧ въ себѣ̀ расположи́ти, ꙗ҆́кѡ да ви́диши бж҃їю свѣ́тлость.
Сщ҃е́нныхъ а҆пⷭ҇лъ и҆ сщ҃енноимени́тыхъ мч҃нкъ мольба́ми сподо́би на́съ, і҆и҃се ще́дрый, поще́нїѧ вре́мѧ прейтѝ въ покаѧ́нїи и҆ всѧ́комъ ѿложе́нїи грѣха̀, мо́лимсѧ.
Бг҃оро́диченъ: Въ поще́нїѧ две́рь хотѧ́щїи вни́ти, мо́лимъ тѧ̀ бж҃їю две́рь, совни́ти рабѡ́мъ твои̑мъ, влⷣчце, и҆ разшири́ти всѧ́кѡ помышлє́нїѧ и҆ мы̑сли, твори́ти сп҃си́тєльнаѧ хотѣ̑нїѧ.
Та́же трипѣ́снецъ господи́на і҆ѡ́сифа. Гла́съ ѕ҃.
Пѣ́снь є҃.
І҆рмо́съ: Бж҃їимъ свѣ́томъ твои́мъ, бл҃же:
На крⷭ҇тѣ̀ рꙋ́ка́ма пригвожде́нъ бы́въ, чл҃вѣколю́бче, копїе́мъ въ ре́бра прободе́нъ, писа́нїе па́дшагѡ а҆да́ма раздра́лъ є҆сѝ: тѣ́мже тѧ̀, жизнода́вче, пѣ́сньми сла́вимъ.
Кова́рнѡ ѕмі́й лꙋка́вный стра̑сти наложи́въ мѝ дꙋшє́вныѧ, ѿ раѧ̀ и҆згна̀: ты́ же, сп҃се, дла̑ни на крⷭ҇тѣ̀ пригвозди́въ, къ высотѣ̀ нетлѣ́нїѧ привле́клъ є҆сѝ.
Поста̀ бж҃е́ственное вре́мѧ, стра̑сти ѡ҆чища́ющее дꙋшє́вныѧ, и҆ тѣлє́сныѧ ѡ҆мыва́ющее ꙗ҆́звы,прїи́де ны́нѣ, наста̀: вѣ́рнїи стеце́мсѧ, и҆ сїѐ любомꙋ́дреннѡ прїи́мемъ.
Вре́мѧ ꙗ҆ви́сѧ бл҃го́е, всѧ́кое лицѐ ѡ҆блача́ющее въ бж҃е́ственное дꙋшѝ весе́лїе: прїиди́те, ве́селѡ сїѐ прїи́мемъ, посто́мъ и҆ мл҃твою пред̾ѡчища́ющесѧ.
По́стъ, сле́зы, мл҃твꙋ, ѡ҆бы́чай смире́нный на́съ ра́ди смири́вшемꙋсѧ принесе́мъ: ꙗ҆́кѡ да въ де́нь воздержа́нїѧ проще́нїе пода́стъ прегрѣше́нїй на́шихъ.
Бг҃оро́диченъ: Свѣтолꙋ́чными твои́ми блиста́ньми, влⷣчце бл҃га́ѧ мі́ра, ѿженѝ тьмꙋ̀ дꙋшѝ моеѧ̀ и҆ но́щь грѣха̀ моегѡ̀, да ᲂу҆се́рднѡ пою̀ и҆ ᲂу҆бл҃жа́ю тѧ.
И҆́ный, гла́съ и҃.
І҆рмо́съ: Вскꙋ́ю мѧ̀ ѿри́нꙋлъ є҆сѝ:
Крⷭ҇тꙋ̀ твоемꙋ̀ покланѧ́юсѧ, гдⷭ҇и чл҃вѣколю́бче, и҆́мже мѧ̀ сп҃слъ є҆сѝ, и҆ пою̀ стрⷭ҇ти сп҃си́тєльныѧ и҆ бж҃е́ствєнныѧ, влⷣко, и҆́миже ѿ страсте́й мои́хъ болѣ́зненныхъ и҆зба́вихсѧ, сло́ве, въ жи́знь преходѧ̀ невреди́мꙋю.
На крⷭ҇тъ надѣ́ющесѧ, ле́сти проти́вныхъ ѿвраща́емсѧ: въ не́мъ водрꙋзи́вшесѧ вѣ́рнїи позна́ни бы́хомъ бг҃ꙋ, ꙗ҆́кѡ а҆́гнцы новорожде́ннїи и҆збра́ннїи, и҆ чи́стое млеко̀ и҆спи́хомъ.
Сла́ва, трⷪ҇ченъ: Ѻ҆ц҃а̀, и҆ сло́во, и҆ ст҃а́го дх҃а всѝ сла́вимъ во є҆ди́номъ є҆стествѣ̀, позна́нїе свѣ́тлое и҆злага́юще: покланѧ́ющесѧ ѻ҆бои́мъ, и҆ раздѣлѧ́юще ли̑цы, неслїѧ́ннѡ, непрело́жнѡ слꙋжа́ще.
Бг҃оро́диченъ: Оу҆пова́нїе концє́мъ, ра́дость рабѡ́мъ твои̑мъ ты̀ є҆сѝ, дв҃о чтⷭ҇аѧ: чтꙋ́щыѧ любо́вїю ѡ҆́бразъ тво́й сохранѧ́й, пречтⷭ҇аѧ: и҆ твои́ми мл҃твами всѣ́хъ на́съ ѿ чꙋжда́гѡ свободѝ, ꙗ҆́кѡ премилосе́рднѣйшаѧ.
Сла́ва тебѣ̀, бж҃е на́шъ, сла́ва тебѣ̀.
На пра́вый пꙋ́ть тво́й, гдⷭ҇и, напра́ви всѧ̑ рабы̑ твоѧ̑ чтꙋ́щыѧ любо́вїю: поста̀ по́прище ᲂу҆твердѝ, и҆ приведе́ньми на лꙋ́чшее сподо́би на́съ ст҃а́гѡ твоегѡ̀ црⷭ҇твїѧ.
І҆рмо́съ: Вскꙋ́ю мѧ̀ ѿри́нꙋлъ є҆сѝ:
Пѣ́снь ѕ҃.
І҆рмо́съ: Ѡ҆чи́сти мѧ̀, сп҃се:
Пости́всѧ и҆зба́витель, настоѧ́щее вре́мѧ на́мъ ѡ҆предѣлѝ дꙋше́вныхъ скве́рнъ ѡ҆чисти́тельное: те́плымъ се́рдцемъ вѣ́рнїи пристꙋ́пимъ, ꙗ҆́кѡ да прїи́мемъ проще́нїе.
Мытаре́во воздыха́нїе и҆ блꙋдни́цы пла́чь, ѿ дꙋшѝ приноси́мый, прїе́мъ, хрⷭ҇тѐ, прїимѝ ꙗ҆́кѡ чл҃вѣколю́бецъ, на́шѧ мѡльбы̀, ѡ҆чище́нїе на́мъ да́рꙋѧ.
Сла́ва: Проповѣ̑дникъ и҆ прⷪ҇рѡ́къ, мч҃нкъ и҆ а҆пⷭ҇лъ твои́хъ, прпⷣбныхъ и҆ ст҃и́телей, и҆ всѣ́хъ првⷣныхъ твои́хъ ᲂу҆моле́ньми, хрⷭ҇тѐ, ѡ҆чище́нїе прегрѣше́нїй дꙋша́мъ на́шымъ низпослѝ.
Бг҃оро́диченъ: Є҆ди́на немощно́е человѣ́ческагѡ є҆стества̀, бж҃е́ственнымъ твои́мъ ржⷭ҇тво́мъ ᲂу҆тверди́вшаѧ, чтⷭ҇аѧ, поспѣ́шница мнѣ̀ ꙗ҆ви́сѧ, входѧ́щꙋ къ бж҃е́ственномꙋ по́прищꙋ поста̀.
І҆рмо́съ: Ѡ҆чи́сти мѧ̀, сп҃се, мно́га бо беззакѡ́нїѧ моѧ̑, и҆ и҆з̾ глꙋбины̀ ѕѡ́лъ возведѝ, молю́сѧ: къ тебѣ́ бо возопи́хъ, и҆ ᲂу҆слы́ши мѧ̀, бж҃е сп҃се́нїѧ моегѡ̀.
Конда́къ ст҃а́гѡ.
А҆́ще ст҃ы́й не и҆́мать кондака̀, глаго́лемъ мч҃нченъ гла́са.
Пѣ́снь з҃.
І҆рмо́съ: Ѻ҆́троцы є҆вре́йстїи въ пещѝ:
Дре́вле на колесни́цѣ ѻ҆́гненнѣй вознесе́сѧ и҆лїа̀, посто́мъ просвѣти́всѧ. ѽ дꙋшѐ! семꙋ̀ подража́ющи, плотскі̑ѧ по́хѡти ᲂу҆мертвѝ воздержа́нїемъ.
Сѐ вре́мѧ воздержа́нїѧ, ꙗ҆влѧ́ющее тебѣ̀ свѣ́тъ сп҃се́нїѧ. не небрезѝ, дꙋшѐ, бг҃ꙋ долготерпѧ́щꙋ, но ᲂу҆се́рднѡ возопі́й: бл҃же, ᲂу҆ще́дри мѧ̀.
Сла́ва: По́стъ, ѻ҆́троки и҆з̾ѻщри́въ, соблюдѐ ѿ ѻ҆гнѧ̀ неѡпали̑мы: і҆и҃се, тѣ́хъ мл҃твами, ѿ ѻ҆гнѧ́ вѣ́чнагѡ и҆зба́ви мѧ мно́гимъ твои́мъ бл҃госердїемъ.
Бг҃оро́диченъ: Є҆ди́на по́мощь человѣ́кѡмъ, помо́щница на́мъ рабѡ́мъ твои̑мъ бꙋ́ди во вре́мѧ воздержа́нїѧ, ꙗ҆́кѡ да покаѧ́нїемъ бл҃гоꙋгожда́юще, прїи́мемъ нбⷭ҇ное црⷭ҇тво.
І҆рмо́съ: Ѻ҆́троцы є҆вре́йстїи въ пещѝ попра́ша пла́мень дерзнове́ннѡ, и҆ на ро́сꙋ ѻ҆́гнь преложи́ша, вопїю́ще: бл҃гослове́нъ є҆сѝ, гдⷭ҇и бж҃е, во вѣ́ки.
Пѣ́снь и҃.
І҆рмо́съ: Седмери́цею пе́щь халде́йскїй мꙋчи́тель бг҃очести̑вымъ неи́стовнѡ разжжѐ. си́лою же лꙋ́чшею сп҃сє́ны сїѧ̑ ви́дѣвъ, творцꙋ̀ и҆ и҆зба́вителю вопїѧ́ше: ѻ҆́троцы бл҃гослови́те,сщ҃е́нницы воспо́йте, лю́дїе превозноси́те во всѧ̑ вѣ́ки.
Покаѧ́нїѧ пе́щь ᲂу҆се́рднѡ возжже́мъ, и҆ сла̑сти въ не́й попали́мъ всѧ̑ тѣлє́сныѧ: и҆ ѻ҆гнѧ̀ бꙋ́дꙋщагѡ и҆скꙋ́съ не прїѧ́ти, бога́таго въ млⷭ҇ти про́симъ, вопїю́ще: сщ҃е́нницы бл҃гослови́те,лю́дїе превозноси́те во всѧ̑ вѣ́ки.
Вхо́дное вре́мѧ поста̀ да бꙋ́детъ на́мъ ѿложе́нїѧ всѧ́кагѡ грѣха̀ вино́вно: да не преклони́мсѧ ᲂу҆́бо до́лꙋ, нижѐ ᲂу҆ны́лѡ теце́мъ, ꙗ҆́кѡ да въ кра́ткихъ и҆ ма́лыхъ дне́хъ мнѡ́гїѧ сквє́рны ᲂу҆миле́нїемъ се́рдца и҆змы́емъ, є҆ди́наго бг҃а на́шего пою́ще.
А҆́гг҃льстїи чи́ни, мч҃нкъ собра́нїе, бж҃е́ственныхъ а҆пⷭ҇лъ ли́къ ст҃ы́й, прпⷣбныхъ со́нмъ,ст҃и́телей же и҆ прⷪ҇ро́кѡвъ, тебѣ̀ мо́лѧтсѧ, бл҃гі́й чл҃вѣколю́бче: покаѧ́нїе и҆́стинное твои̑мъ рабѡ́мъ пода́ждь во вре́мѧ воздержа́нїѧ, ны́нѣ приходѧ́щагѡ.
Бг҃оро́диченъ: Бг҃ороди́тельнице всечтⷭ҇аѧ, къ тебѣ̀ прибѣга́емъ: ᲂу҆ще́дри на́съ бл҃го́ю твое́ю мл҃твою, и҆ да́ждь бл҃гопримири́тельна твоего̀ сн҃а и҆ гдⷭ҇а всѣ̑мъ на́мъ во вре́мѧ поще́нїѧ, ны́нѣ приходѧ́щагѡ, во сп҃се́нїе вѣ́рныхъ, тебѐ пѣсносло́вѧщихъ во всѧ̑ вѣ́ки.
Трипѣ́снецъ.
І҆рмо́съ: За зако́ны ѻ҆те́чєскїѧ:
Наслѣ́дїѧ ѻ҆те́ческагѡ не сохрани́вше, зако́нꙋ грѣха̀ порабо́тихомсѧ: но просте́ръ дла̑ни твоѧ̑ на крⷭ҇тѣ̀ бж҃е́ственнѣмъ, свобо́дꙋ всѣ̑мъ дарова́лъ є҆сѝ и҆́мъ. є҆го́же тѝ вѣ́рою приво́димъ во дне́хъ ст҃ы́хъ: поми́лꙋй ны̀, млⷭ҇тиве, тебѐ превозносѧ́щыѧ во всѧ̑ вѣ́ки.
Крⷭ҇то́мъ твои́мъ разстоѧ́нїе и҆ средостѣ́нїе ѡ҆гра́ды разори́вый, и҆ ми́ръ бога́тый въ концѣ́хъ ѡ҆бнови́вый, хрⷭ҇тѐ, въ ми́рствꙋющемъ состоѧ́нїи да́рꙋй на́мъ прейтѝ бꙋ́дꙋщее поще́нїе, гдⷭ҇а непреста́ннѡ пою́щымъ и҆ превозносѧ́щымъ во всѧ̑ вѣ́ки.
Поста̀ бл҃года́ть дне́сь со́лнєчныѧ лꙋчы̀ всѣ̑мъ предлага́етъ, пред̾ѡчища́ющи мра́къ грѣхо́вный: содержи́ми страстьмѝ разли́чными, въ ра́дости прише́дше, прїи́мемъ да́ръ, любомꙋ́дреннѡ вопїю́ще: гдⷭ҇а по́йте и҆ превозноси́те во всѧ̑ вѣ́ки.
Го́рькѡ вкꙋси́въ дре́вле въ раѝ снѣ́дь прельсти́тельнꙋю, первозда́нный ѿве́ржесѧ, и҆ ѡ҆сꙋжде́нный ѿ сла́дости и҆згна́нъ бы́сть: ты́ же, на дре́вѣ гвоздьмѝ пригвожде́нъ, лꙋка́вное писа́нїе грѣха̀ є҆гѡ̀ пригвозди́лъ є҆сѝ. тѣ́мже твоѐ мно́гое бл҃госе́рдїе воспѣва́емъ во всѧ̑ вѣ́ки.
Зако́нъ поста̀ ѿри́нꙋвше, въ прѡ́пасти грѣха̀ поползо́хомсѧ, и҆ поста̀ востре́бовахомъ, ны́нѣ приходѧ́щагѡ: є҆го́же провожда́ющымъ на́мъ, бл҃года́ть съ нб҃сѐ низпослѝ, ще́дре, и҆ ми́ръ бога́тый, вопїю́щымъ: гдⷭ҇а по́йте и҆ превозноси́те во всѧ̑ вѣ́ки.
Бг҃оро́диченъ: Па́дающихъ и҆справле́нїе, грѣ́шникѡвъ хода́таице, стра́нныхъ прохлажде́нїе,ско́рбныхъ ᲂу҆тѣше́нїе, прест҃а́ѧ дв҃о, дꙋшѝ моеѧ̀ печа́ль разорѝ, чтⷭ҇аѧ, и҆ моли́сѧ, да ᲂу҆тѣше́нїе свы́ше ѿ бг҃а пода́стсѧ мѝ пою́щꙋ ᲂу҆се́рднѡ, тѧ̀ превозносѧ́щꙋ во всѧ̑ вѣ́ки.
И҆́ный.
І҆рмо́съ: А҆́гг҃ли и҆ нб҃са̀:
Пригвожда́ема пло́тїю на крⷭ҇тѣ̀ ви́дѣвъ тѧ̀, ще́дре, тва́рей є҆стество̀ премѣнѧ́шесѧ, свѣ́тъ днѐ во тьмꙋ̀, дви́жашесѧ землѧ̀, и҆ всѧ̑ колеба́хꙋсѧ.
На высотꙋ̀ крⷭ҇та̀ человѣ́ческое є҆стество̀ совозвы́силъ є҆сѝ, сп҃се, и҆ ѿ ре́бръ твои́хъ бж҃е́ственныхъ бога́тство и҆сточи́лъ є҆сѝ сп҃се́нїѧ, вѣ́рою покланѧ́ющымсѧ пречⷭ҇тѣй стрⷭ҇ти твое́й.
Бл҃гослови́мъ ѻ҆ц҃а̀, и҆ сн҃а, и҆ ст҃а́го дх҃а, гдⷭ҇а.
Трⷪ҇ченъ: Є҆ди́нъ бг҃ъ ᲂу҆́бо трⷪ҇ца, ни ѻ҆ц҃ꙋ̀ и҆зстꙋпи́вшꙋ въ сыновство̀, нижѐ сн҃ꙋ премѣни́вшꙋсѧ во и҆схожде́нїе: но сво́йствєннаѧ и҆ ѻ҆боѐ, свѣ́тъ, бг҃а, трѝ сла́влю во вѣ́ки.
Бг҃оро́диченъ: Ка́кѡ родила̀ є҆сѝ, рцы̀, ѿ ѻ҆ц҃а̀ безлѣ́тнѡ предпросїѧ́вша и҆ со ст҃ы́мъ дх҃омъ воспѣва́ема; и҆лѝ ꙗ҆́коже вѣ́сть є҆ди́нъ, бл҃говоли́вый роди́тисѧ и҆з̾ тебє̀ во вѣ́ки.
Сла́ва тебѣ̀, бж҃е на́шъ, сла́ва тебѣ̀.
Покаѧ́нїе на́ше, ꙗ҆́кѡ бл҃гі́й є҆стество́мъ, прїе́мъ, ѿ вра́жїихъ сѣте́й и҆зба́ви, гдⷭ҇и, да вѣ́рою и҆ любо́вїю ны́нѣ воспое́мъ твоѐ ст҃о́е влⷣчество.
Хва́лимъ, бл҃гослови́мъ, покланѧ́емсѧ гдⷭ҇еви:
І҆рмо́съ: А҆́гг҃ли и҆ нб҃са̀, на прⷭ҇то́лѣ сла́вы сѣдѧ́щаго, и҆ ꙗ҆́кѡ бг҃а непреста́ннѡ сла́вимаго, бл҃гослови́те, по́йте и҆ превозноси́те во всѧ̑ вѣ́ки.
И҆ стїхосло́витсѧ Чтⷭ҇нѣ́йшꙋю:
Пѣ́снь ѳ҃.
І҆рмо́съ: Оу҆жасе́сѧ ѡ҆ се́мъ нб҃о, и҆ землѝ ᲂу҆диви́шасѧ концы̀, ꙗ҆́кѡ бг҃ъ ꙗ҆ви́сѧ человѣ́кѡмъ пло́тски, и҆ чре́во твоѐ бы́сть простра́ннѣйшее нб҃съ: тѣ́мъ тѧ̀ бцⷣꙋ а҆́гг҃лѡвъ и҆ человѣ̑къ чинонача̑лїѧ велича́ютъ.
Сѐ свѣтоно́сное прїи́де вре́мѧ, ст҃ы́й де́нь просїѧ̀. мра́чныхъ страсте́й твои́хъ ѿбѣ́гни, ѽ дꙋшѐ, и҆ воспрїимѝ зари̑ наставлѧ́ющыѧ тѧ̀ къ свѣ́тꙋ: ᲂу҆миле́нїе ꙗ҆́кѡ вїно̀ пїю́щи весели́сѧ, и҆ сласте́й пїѧ́нство возненави́ждь.
Вои́стиннꙋ пребл҃го є҆́сть вре́мѧ поще́нїѧ, хрⷭ҇тѐ, є҆́же да́лъ є҆сѝ всѣ̑мъ вѣ̑рнымъ на побѣжде́нїе грѣхѡ́въ, и҆ ѡ҆чище́нїе сп҃си́тельное, и҆ дарова́нїй прїѧ́телище. въ не́мже тѧ̀ мо́лимъ: прича́стники, сп҃се, бл҃гъ твои́хъ всѧ̑ ны̀ сотворѝ.
Ѡ҆бы́чнѡ млⷭ҇ти твоѧ̑ бога̑тыѧ на на́съ и҆злива́ѧй, ще́дре, сле́зы, ѡ҆чища́ющыѧ сквє́рны, да́ждь на́мъ, и҆ помышлє́нїѧ лю̑бѧщаѧ тѧ̀, вѣ́рꙋ и҆ любо́вь чи́стꙋю, покаѧ́нїе бога́тное, присвое́нїе соверше́нное къ тебѣ̀ є҆ди́номꙋ многомлⷭ҇тивомꙋ.
Всѣ́хъ а҆́гг҃лѡвъ бж҃е́ственное мно́жество, и҆ ст҃ы́хъ ли́цы достохва́льнїи, бл҃га́го ны́нѣ моли́те прилѣ́жнѡ: ꙗ҆́кѡ да настоѧ́щее сїѐ поще́нїѧ бж҃е́ственное по́прище тещѝ непреткнове́ннѡ ны̀ ᲂу҆крѣпи́тъ, и҆ побѣдоно́сцы содѣ́лаетъ.
Бг҃оро́диченъ: Бл҃голюби́ваѧ дв҃о, бл҃га́го ро́ждшаѧ сп҃са, ᲂу҆бл҃жѝ всѧ̑ ны̀, влⷣчце, страстьмѝ безмѣ́рными и҆ помышле́ньми ѡ҆ѕло́блєнныѧ и҆ ѡ҆тѧгчє́нныѧ грѣхѡ́въ бре́меньми неꙋдобоно́сными: ꙗ҆́кѡ да тѧ̀ по до́лгꙋ, ꙗ҆́кѡ бцⷣꙋ, велича́емъ.
И҆́ный.
І҆рмо́съ: Недоꙋмѣ́етъ всѧ́къ:
Недоꙋмѣ́етъ всѧ́кое є҆стество̀ а҆́гг҃лѡвъ и҆ человѣ́кѡвъ твоѐ бл҃госе́рдїе бл҃годари́ти,бл҃годѣ́телю: ꙗ҆́кѡ пло́ть прїе́мъ, на́съ ра́ди ѡ҆бнища́лъ є҆сѝ, и҆ на дре́вѣ за ны распросте́рлсѧ є҆сѝ, клѧ́тва бы́въ, да ѿи́меши дре́внюю клѧ́твꙋ человѣ́чества.
Свѣ́тлый де́нь воздержа́нїѧ наста̀: прїиди́, дꙋшѐ моѧ̀, свѣ́тлымъ лице́мъ ᲂу҆срѧ́щимъ влⷣкꙋ, бл҃года́ти низпосла́тисѧ свы́ше на́мъ просѧ́ще, и҆ мно́гихъ прегрѣше́нїй и҆справле́нїе ѡ҆брѣстѝ: ꙗ҆́кѡ да стра́шнѣйшею гее́нною не и҆скꙋси́мсѧ та́мѡ.
Во тьмѣ̀ грѣхѡ́въ содержи̑мымъ сщ҃е́ннїи вхо́ды покаѧ́нїѧ ны́нѣ наста́ша, всѣ́хъ дꙋ́шы просвѣща́ющїи. тѣ́мже, дꙋшѐ моѧ̀, ᲂу҆клони́сѧ ѡ҆мраче́нїѧ сы́тости страсте́й: потщи́сѧ, да сла́дости вѣ́чныѧ наслади́шисѧ та́мѡ.
На дре́вѣ рꙋ́цѣ во́лею распросте́ръ, разстоѧ̑щаѧсѧ всѧ̑ собра́лъ є҆сѝ, жизнода́вче: копїе́мъ же твоѧ̑ ре́бра ѿве́рзъ, долготерпѣли́ве, побѣжде́нїе на́ше ѿ ре́бра прозѧ́бшее и҆спра́вилъ є҆сѝ.тѣ́мже бл҃годарѧ́ще пое́мъ бл҃госе́рдїе твоѐ.
Бг҃оро́диченъ: Предста́тельство всѣ́хъ на тѧ̀ надѣ́ющихсѧ, бцⷣе, въ бѣда́хъ бо́драѧ сꙋ́щи предста́тельница, и҆зба́ви на́съ ѿ вѣ́чнꙋющїѧ гее́нны и҆ ѿ належа́щихъ мꙋ́къ го́рькихъ: ꙗ҆́кѡ да до́лжнѡ пое́мъ вели̑чїѧ твоѧ̑.
И҆́ный.
І҆рмо́съ: Чꙋ́жде ма́теремъ дѣ́вство:
Ꙗ҆́звамъ твои̑мъ покланѧ́емсѧ, жизнода́вче, и҆́миже грѣхо́вныхъ страсте́й и҆зба́вльшесѧ, чтⷭ҇ны́мъ крⷭ҇то́мъ твои́мъ позна́хомсѧ запеча́тствовани, во сп҃се́нїе и҆ застꙋпле́нїе ѿ всѧ́кагѡ прило́га вра́жїѧ.
На крⷭ҇тѣ̀ распны́йсѧ во́лею за сп҃се́нїе всѣ́хъ, ѡ҆зарѝ крⷭ҇та̀ твоегѡ̀ сїѧ́ньми дꙋ́шы пою́щихъ стрⷭ҇ти твоѧ̑, всемлⷭ҇тиве: и҆ на стезю̀ пра́вꙋю жи́знь на́шꙋ наста́ви.
Согрѣши́хомъ престꙋпи́вше за́пѡвѣди твоѧ̑, сп҃се, и ѿ пꙋтѝ бж҃е́ственныхъ ᲂу҆чине́нїй твои́хъ ᲂу҆клони́хомсѧ дале́че, чл҃вѣколю́бче, нерадѣ́нїемъ: но, ще́дрый, воззовѝ ѿ ле́сти дꙋ́шы на́шѧ.
Сла́ва, трⷪ҇ченъ: Хвала̀, че́сть трⷪ҇цѣ подоба́етъ, и҆ сла́ва ꙗ҆́кѡ є҆ди́номꙋ гдⷭ҇ствꙋ и҆ є҆ди́номꙋ црⷭ҇твꙋ, несли́тнѡ, несѣко́мѡ, є҆ди́ницѣ бж҃ество́мъ покланѧ́емѣй, несѣко́мѣй є҆стество́мъ, непреста́ннѡ велича́емѣй.
Бг҃оро́диченъ: Оу҆ми́лостивисѧ мл҃твами всечⷭ҇тыѧ мт҃ре твоеѧ̀, всеще́дре, всецр҃ю̀ сла́вы, є҆гда̀ прїи́деши сꙋди́ти рабы̑ твоѧ̑, ꙗ҆́кѡ млⷭ҇тивъ: въ тѧ́ бо всѝ вѣ́ровахомъ, и҆ тѧ̀ бг҃а зна́емъ.
Сла́ва тебѣ̀, бж҃е на́шъ, сла́ва тебѣ̀.
Свѣтоно́сный ны́нѣ приходѧ́й по́стъ прїе́млетъ, трапе́зꙋ подвигѡ́въ предлага́ѧ: сегѡ̀ ра́ди сеѧ̀ честнꙋ́ю ча́шꙋ чисти́тельныхъ сле́зъ тре́звеннѡ всѝ воспрїи́мемъ вѣ́рнїи, да неисцѣ́льными слеза́ми не и҆скꙋси́мсѧ та́мѡ.
Катава́сїа: Чꙋ́жде ма́теремъ дѣ́вство, и҆ стра́нно дѣ́вамъ дѣторожде́нїе: на тебѣ̀, бцⷣе, ѻ҆боѧ̑ ᲂу҆стро́ишасѧ. тѣ́мъ тѧ̀ всѧ̑ племена̀ земна̑ѧ непреста́ннѡ велича́емъ.
Свѣти́ленъ трⷪ҇чный гла́са, три́жды. И҆ про́чее.
На стїхо́внѣ пое́мъ самогла́сенъ днѐ.
Гла́съ ѕ҃:
Пре́жде сп҃си́тельнагѡ крⷭ҇та̀ грѣхꙋ̀ ца́рствꙋющꙋ, нече́стїю ѡ҆блада́ющꙋ, ѿ человѣ̑къ ᲂу҆блажа́шесѧ сла́дость тѣле́снаѧ, и҆ немно́зи ѡ҆ плотски́хъ жела́нїихъ небрежа́хꙋ: а҆ ѿне́лѣже крⷭ҇тное та́инство содѣ́ѧсѧ, и҆ де́монское мꙋчи́тельство ᲂу҆гасѐ бг҃опозна́нїемъ, нбⷭ҇наѧ на землѝ добродѣ́тель жи́тельствꙋетъ. тѣ́мже по́стъ почита́етсѧ, воздержа́нїе сїѧ́етъ, мл҃тва и҆справлѧ́етсѧ, и҆ свидѣ́тель вре́мѧ настоѧ́щее, да́нное на́мъ ѿ распе́ншагѡсѧ хрⷭ҇та̀ бг҃а, во сп҃се́нїе дꙋ́шъ на́шихъ.
И҆ глаго́лемъ стїхѝ.
Сті́хъ: И҆спо́лнихомсѧ заꙋ́тра млⷭ҇ти твоеѧ̀, гдⷭ҇и:
И҆ повторѧ́емъ самогла́сенъ.
Сті́хъ: И҆ бꙋ́ди свѣ́тлость гдⷭ҇а бг҃а на́шегѡ:
И҆ мч҃нченъ: Гдⷭ҇и, въ па́мѧти ст҃ы́хъ твои́хъ, всѧ̀ тва́рь пра́зднꙋетъ, небеса̀ ра́дꙋютсѧ со а҆́гг҃лы, и҆ землѧ̀ весели́тсѧ съ человѣ̑ки: тѣ́хъ мл҃твами поми́лꙋй на́съ.
Сла́ва, и҆ ны́нѣ, крⷭ҇тобг҃оро́диченъ:
Є҆гда̀ ви́дѣ всечⷭ҇таѧ тебѐ на крⷭ҇тѣ̀ повѣ́шена, пла́чꙋщи вопїѧ́ше мт҃рски: сн҃е мо́й и҆ бж҃е мо́й, сладча́йшее моѐ ча́до, ка́кѡ терпи́ши стра́сть поноси́тельнꙋю;
Та́же, Бл҃го є҆́сть: И҆ трист҃о́е.Тропа́рь: Въ хра́мѣ стоѧ́ще:
Гдⷭ҇и, поми́лꙋй, м҃.
И҆ глаго́летсѧ сті́хъ ѿ сщ҃е́нника:
Сы́й бл҃гослове́нъ хрⷭ҇то́съ бг҃ъ на́шъ, всегда̀, ны́нѣ и҆ при́снѡ и҆ во вѣ́ки вѣкѡ́въ, а҆ми́нь.
Нбⷭ҇ный цр҃ю̀:
И҆ твори́мъ трѝ покло́ны вели̑кїѧ, и҆ глаго́лемъ та́йнѡ мл҃твꙋ прпⷣбнагѡ ѻ҆тца̀ на́шегѡ є҆фре́ма сѵ́рина: Гдⷭ҇и и҆ влⷣко живота̀ моегѡ̀: И҆ про́чее.
И҆ твори́мъ и҆ про́чыѧ покло́ны. Совокꙋплѧ́емъ же и҆ пе́рвый ча́съ, ꙗ҆́кѡ ѡ҆бы́чно: по ѡ҆бы́чныхъ же покло́нѣхъ чте́мъ ѡ҆глашє́нїѧ прпⷣбнагѡ ѻ҆тца̀ на́шегѡ ѳео́дѡра стꙋді́та.
Та́же, ѿпꙋ́стъ.
Въ то́йже пѧто́къ сы́рный
пое́мъ часы̀ съ поклѡ́ны, ꙗ҆́коже и҆ въ сре́дꙋ ꙗ҆вле́но є҆́сть.
На ѕ҃-мъ часѣ̀ пое́мъ тропа́рь прⷪ҇ро́чества, гла́съ и҃:
Да́ждь на́мъ по́мощь ѿ печа́ли, гдⷭ҇и, и҆ сп҃си́ ны, рожде́йсѧ ѿ дв҃ы, чл҃вѣколю́бче.
Повторѧ́юще то́йже.
Прокі́менъ, гла́съ а҃, ѱало́мъ л҃в: Бꙋ́ди, гдⷭ҇и, млⷭ҇ть твоѧ̀ на на́съ, ꙗ҆́коже ᲂу҆пова́хомъ на тѧ̀. Сті́хъ: Ра́дꙋйтесѧ, првⷣнїи, ѡ҆ гдⷭ҇ѣ, пра̑вымъ подоба́етъ похвала̀.
Прⷭ҇ро́чества заха́рїина чте́нїе. [Глава̀ и҃, ст. з҃-з҃і].
Си́це глаго́летъ гдⷭ҇ь вседержи́тель: сѐ а҆́зъ сп҃сꙋ̀ лю́ди моѧ̑ ѿ землѝ восто́чныѧ и҆ ѿ землѝ за́падныѧ. И҆ введꙋ̀ и҆̀хъ [въ зе́млю и҆́хъ], и҆ вселю́сѧ посредѣ̀ і҆ерⷭ҇ли́ма, и҆ бꙋ́дꙋтъ мѝ въ лю́ди, и҆ а҆́зъ бꙋ́дꙋ и҆̀мъ въ бг҃а во и҆́стинѣ и҆ въ пра́вдѣ. Си́це глаго́летъ гдⷭ҇ь вседержи́тель: да ᲂу҆крѣпѧ́тсѧ рꙋ́цѣ ва́съ слы́шащихъ во дне́хъ си́хъ словеса̀ сїѧ̑ ѿ ᲂу҆́стъ прⷪ҇ро́ческихъ, ѿ негѡ́же днѐ ѡ҆снова́сѧ хра́мъ гдⷭ҇а вседержи́телѧ, и҆ це́рковь ѿне́лѣже созда́сѧ. Занѐ пре́жде дне́й ѻ҆́нѣхъ мзда̀ человѣ́кѡмъ не бѣ̀ во ᲂу҆спѣ́хъ, и҆ мзда̀ скотѡ́мъ не бѧ́ше, и҆ и҆сходѧ́щемꙋ и҆ входѧ́щемꙋ не бѣ̀ ми́ра ѿ печа́ли. И҆ послю̀ всѧ̑ человѣ́ки, коего́ждо на и҆́скреннѧго своего̀. И҆ ны́нѣ не по днє́мъ ѻ҆́нѣмъ прє́жнимъ а҆́зъ сотворю̀ ѡ҆ста́нкꙋ люде́й си́хъ, глаго́летъ гдⷭ҇ь вседержи́тель. Но покажꙋ̀ ми́ръ: вїногра́дъ да́стъ пло́дъ сво́й, и҆ землѧ̀ да́стъ жи̑та своѧ̑, и҆ не́бо да́стъ ро́сꙋ свою̀, и҆ наслѣ́дити сотворю̀ ѡ҆ста́нкѡмъ люде́й мои́хъ си́хъ всѧ̑ сїѧ̑. И҆ бꙋ́детъ, ꙗ҆́кѡ бѣ́сте въ клѧ́твѣ во ꙗ҆зы́цѣхъ, до́ме і҆ꙋ́довъ и҆ до́ме і҆и҃левъ, та́кѡ сп҃сꙋ̀ вы̀, и҆ бꙋ́дете въ бл҃гослове́нїи: дерза́йте и҆ ᲂу҆крѣплѧ́йтесѧ рꙋка́ми ва́шими. Занѐ си́це глаго́летъ гдⷭ҇ь вседержи́тель: ꙗ҆́коже помы́слихъ ѡ҆ѕло́бити вы̀, внегда̀ прогнѣ́ваша мѧ̀ ѻ҆тцы̀ ва́ши, глаго́летъ гдⷭ҇ь вседержи́тель, и҆ не раска́ѧхсѧ: та́кѡ ᲂу҆ста́вихъ, и҆ ᲂу҆мы́слихъ бо дни̑ сїѧ̑ добро̀ сотвори́ти і҆ерⷭ҇ли́мꙋ и҆ до́мꙋ і҆ꙋ́довꙋ: дерза́йте. Сїѧ̑ словеса̀, ꙗ҆̀же сотворитѐ: глаго́лите и҆́стинꙋ кі́йждо и҆́скреннемꙋ своемꙋ̀, и҆́стинꙋ и҆ сꙋ́дъ ми́ренъ сꙋди́те во вратѣ́хъ ва́шихъ. И҆ кі́йждо ѕло́бы и҆́скреннѧгѡ своегѡ̀ не помышлѧ́йте въ сердца́хъ ва́шихъ, и҆ клѧ́твы лжи́выѧ не люби́те: занѐ всѧ̑ сїѧ̑ возненави́дѣхъ, глаго́летъ гдⷭ҇ь вседержи́тель.
Прокі́менъ, гла́съ г҃, ѱало́мъ м҃ѕ: По́йте бг҃ꙋ на́шемꙋ, по́йте: по́йте цр҃е́ви на́шемꙋ, по́йте.Сті́хъ: Всѝ ꙗ҆зы́цы, восплещи́те рꙋка́ми:
И҆ про́чее всѐ, ꙗ҆́коже въ сре́дꙋ сы́рнꙋю ᲂу҆каза́сѧ.
Подоба́етъ вѣ́дати, ꙗ҆́кѡ въ сꙋббѡ́тꙋ и҆ недѣ́лю сы́рнꙋю мине́а не пое́тсѧ, но послѣ́дованїе слꙋча́ющихсѧ ст҃ы́хъ пое́тсѧ на повече́рїихъ, и҆лѝ є҆гда̀ церквонача́льникъ хо́щетъ.