Неделя сыропустная
Въ недѣ́лю сыропꙋ́стнꙋю,
и҆згна́нїе а҆да́мово. Бдѣ́нїе ѡ҆бы́чное.
Въ сꙋббѡ́тꙋ ве́чера во свѣти́льничное, по предначина́тельнѣмъ ѱалмѣ̀, стїхосло́вимъ: Бл҃же́нъ мꙋ́жъ: каѳі́смꙋ всю̀. На Гдⷭ҇и воззва́хъ, поста́вимъ стїхѡ́въ і҃. И҆ пое́мъ ѻ҆смогла́сника воскрⷭ҇ны г҃, и҆ а҆нато́лїєвы г҃, и҆ трїѡ́ди д҃, гла́съ ѕ҃.
Подо́бенъ: Всю̀ ѿложи́вше:
Созда́тель мо́й гдⷭ҇ь, пе́рсть ѿ землѝ прїе́мъ мѧ̀, живоно́снымъ дꙋнове́нїемъ ѡ҆дꙋшеви́въ, жи́ва содѣ́ла, и҆ почтѐ мѧ бы́ти на землѝ нача́льника ви́димыхъ всѣ́хъ и҆ а҆́гг҃лѡмъ кꙋпножи́телѧ. сатана́ же льсти́вый, ѕмі́ѧ ꙗ҆́кѡ сосꙋ́дъ ᲂу҆потреби́въ, снѣ́дїю прельстѝ, и҆ бж҃їѧ сла́вы разлꙋчѝ, и҆ преиспо́днѣйшей сме́рти предадѐ въ зе́млю. но ты̀, ꙗ҆́кѡ влⷣка и҆ бл҃госе́рдъ, па́ки воззовѝ.
Ѡ҆де́жды бг҃отка́нныѧ совлече́нъ бы́хъ ѡ҆каѧ́нный, совѣ́томъ врага̀ твоѐ бж҃е́ственное повелѣ́нїе преслꙋ́шавъ, гдⷭ҇и, и҆ смоко́внымъ ли́ствїемъ и҆ ко́жными ри́зами ны́нѣ ѡ҆блеко́хсѧ. въ по́тѣ хлѣ́бъ ѿ трꙋдѡ́въ ѡ҆сꙋжде́нъ бы́хъ ꙗ҆́сти: те́рнїе же и҆ волчцы̀ мнѣ̀ приноси́ти землѧ̀ проклѧта̀ бы́сть. но, въ послѣ̑днѧѧ лѣ̑та воплоти́выйсѧ ѿ дв҃ы, воззва́хъ мѧ̀, введѝ па́ки въ ра́й.
Раю̀ всечестны́й, краснѣ́йшаѧ добро́то, бг҃озда́нное селе́нїе, весе́лїе неконча́емое и҆ наслажде́нїе, сла́во првⷣныхъ, прⷪ҇ро́кѡвъ красото̀ и҆ ст҃ы́хъ жили́ще, шꙋ́момъ ли́ствїй твои́хъ содѣ́телѧ всѣ́хъ молѝ, ѿве́рзти мѝ врата̀, ꙗ҆̀же престꙋпле́нїемъ затвори́хъ, и҆ сподо́бити мѧ дре́ва жи́зни причастити́сѧ и҆ ра́дости, є҆ѧ́же пре́жде въ тебѣ̀ наслади́хсѧ.
А҆да́мъ и҆згна́нъ бы́сть и҆з̾ раѧ̀ преслꙋша́нїемъ, и҆ сла́дости и҆зве́рженъ, же́нскими глагѡ́лы прельще́нный, и҆ на́гъ сѣди́тъ прѧ́мѡ села̀, ᲂу҆вы̀ мнѣ̀, рыда́ѧ. тѣ́мже потщи́мсѧ всѝ вре́мѧ прїѧ́ти поста̀, послꙋ́шающе є҆ѵⷢ҇льскихъ преда́нїй: да си́ми бл҃гоꙋго́дни бы́вше хрⷭ҇тꙋ̀, раѧ̀ жили́ще па́ки воспрїи́мемъ.
Сла́ва, гла́съ ѕ҃: Сѣ́де а҆да́мъ прѧ́мѡ раѧ̀, и҆ ѡ҆ свое́й наготѣ̀ рыда́ѧ пла́каше: ᲂу҆вы̀ мнѣ̀, пре́льще́нїемъ лꙋка́вымъ ᲂу҆вѣща́нꙋ бы́вшꙋ, и҆ ѡ҆кра́денꙋ, и҆ сла́вы ᲂу҆дале́нꙋ! ᲂу҆вы̀ мнѣ̀, простото́ю на́гꙋ, ны́нѣ же недоꙋмѣ́ющꙋ! но ѽ раю̀, ᲂу҆жѐ твоеѧ̀ сла́дости не наслаждꙋ́сѧ: ᲂу҆жѐ не ᲂу҆зрю̀ гдⷭ҇а и҆ бг҃а моегѡ̀ и҆ созда́телѧ: въ зе́млю бо пойдꙋ̀, ѿ неѧ́же и҆ взѧ́тъ бы́хъ. млⷭ҇тиве ще́дрый, вопїю̀ тѝ: поми́лꙋй мѧ̀ па́дшаго.
И҆ ны́нѣ, бг҃оро́диченъ а҃-й, гла́са. Вхо́дъ. Свѣ́те ти́хїй:
Прокі́менъ: Гдⷭ҇ь воцр҃и́сѧ:
На лїті́и, ꙗ҆́кѡ ѡ҆бы́чно, самогла́сенъ ст҃а́гѡ ѡ҆би́тели.
Сла́ва, гла́съ ѕ҃: Со́лнце лꙋчы̀ скры̀, лꙋна̀ со ѕвѣзда́ми въ кро́вь преложи́сѧ, го́ры ᲂу҆жасо́шасѧ, хо́лми вострепета́ша, є҆гда̀ ра́й заключи́сѧ. и҆сходѧ̀ а҆да́мъ, рꙋка́ма бїѧ̀ въ лицѐ, глаго́лаше: млⷭ҇тиве, поми́лꙋй мѧ̀ па́дшаго.
И҆ ны́нѣ, бг҃оро́диченъ. Подо́бенъ:
Та́инственнѡ воспѣва́емъ тѧ̀, бцⷣе мр҃і́е: ꙗ҆ви́ласѧ бо є҆сѝ прⷭ҇то́лъ вели́кагѡ цр҃ѧ̀, ски́нїѧ всест҃а́ѧ, нб҃съ ши́ршаѧ, херꙋві́мскаѧ колесни́ца и҆ вы́шшаѧ серафі̑мъ, черто́гъ сла́вы: и҆з̾ тебє̀ бо про́йде воплоти́всѧ всѣ́хъ бг҃ъ. того̀ молѝ сп҃сти́сѧ дꙋша́мъ на́шымъ.
На стїхо́внѣ, ѻ҆смогла́сника.
Сла́ва, гла́съ ѕ҃: И҆згна́нъ бы́сть а҆да́мъ и҆з̾ раѧ̀ снѣ́ди ра́ди, тѣ́мже и҆ сѣдѧ̀ прѧ́мѡ сегѡ̀ рыда́ше, стенѧ̀ ᲂу҆миле́ннымъ гла́сомъ, и҆ глаго́лаше: ᲂу҆вы̀ мнѣ̀, что̀ пострада́хъ ѡ҆каѧ́нный а҆́зъ: є҆ди́нꙋ за́повѣдь престꙋпи́хъ влⷣчню, и҆ бл҃ги́хъ всѧ́ческихъ лиши́хсѧ! раю̀ ст҃ѣ́йшїй, менє̀ ра́ди насажде́нный и҆ є҆́ѵы ра́ди затворе́нный, молѝ тебѐ сотво́ршаго и҆ менѐ созда́вшаго, ꙗ҆́кѡ да твои́хъ цвѣтѡ́въ насы́щꙋсѧ! сп҃съ же къ немꙋ̀ глаго́ла: моемꙋ̀ созда́нїю не хощꙋ̀ поги́бнꙋти, но хощꙋ̀ семꙋ̀ сп҃сти́сѧ и҆ въ позна́нїе и҆́стины прїитѝ, ꙗ҆́кѡ грѧдꙋ́щаго ко мнѣ̀ не и҆згонѧ́ю во́нъ.
И҆ ны́нѣ, бг҃оро́диченъ: Творе́цъ и҆ и҆зба́витель: Ны́нѣ ѿпꙋща́еши: По трист҃о́мъ ѿпꙋсти́тельный, Бцⷣе дв҃о: три́жды. И҆ про́чее послѣ́дованїе бдѣ́нїѧ: рѧдово́мꙋ же ст҃о́мꙋ пое́мъ на повече́рїи.
Въ тꙋ́южде недѣ́лю сы́рнꙋю ве́чера,
по нача́льнѣмъ ѱалмѣ̀: На Гдⷭ҇и воззва́хъ, поста́вимъ стїхѡ́въ і҃, ѿ И҆зведѝ и҆з̾ темни́цы: И҆ пое́мъ стїхи̑ры д҃ покаѧ̑нны, ѻ҆ктѡ́иха на рѧдꙋ̀ гла́са, ꙗ҆̀же сꙋ́ть пи̑саны двѣ̀ ве́черъ на стїхо́внѣ, и҆ двѣ̀ ᲂу҆́треннихъ стїхо́вныхъ: [Та́кожде и҆ въ про́чыѧ недѣ̑ли, ѿ сеѧ̀ да́же до пѧ́тыѧ ст҃а́гѡ поста̀. Гдⷭ҇и воззва́хъ: пое́мъ на гла́съ, и҆́же во ѻ҆смогла́сникѣ на рѧдꙋ̀.] И҆ въ трїѡ́ди г҃, и҆ въ мине́и г҃.
Стїхи̑ры, гла́съ в҃. Творе́нїе господи́на і҆ѡ́сифа.
Подо́бенъ: Є҆гда̀ ѿ дре́ва:
Воздержа́нїемъ пло́ть смири́ти всѝ потщи́мсѧ, къ бж҃е́ственномꙋ приходѧ́ще по́прищꙋ непоро́чнагѡ поста̀, и҆ мл҃твами и҆ слеза́ми гдⷭ҇а сп҃са́ющаго на́съ взы́щемъ, и҆ забве́нїе ѕло́бы всеконе́чное сотвори́мъ, вопїю́ще: согрѣши́хомъ тѝ, сп҃сѝ, ꙗ҆́коже дре́вле нїнеѵі́тѧны, хрⷭ҇тѐ цр҃ю̀, и҆ ѻ҆́бщники ны̀ сотворѝ нбⷭ҇нагѡ црⷭ҇твїѧ бл҃госе́рде.
Въ себѐ ѿчаѧва́юсѧ, помышлѧ́ѧ дѣ́ла моѧ̑, гдⷭ҇и, всѧ́кагѡ мꙋче́нїѧ достѡ́йнаѧ: се́ бо, презрѣ́въ честны̑ѧ твоѧ̑, сп҃се, за́пѡвѣди, блꙋ́днѡ моѐ житїѐ и҆жди́хъ. тѣ́мже молю́сѧ, дождьмѝ покаѧ́нїѧ мѧ̀ ѡ҆чи́стивъ, посто́мъ и҆ моле́нїемъ ꙗ҆́кѡ є҆ди́нъ млⷭ҇тивый, просвѣтѝ, и҆ не гнꙋша́йсѧ менє̀, бл҃годѣ́телю всѣ́хъ и҆ пребл҃гі́й.
И҆́на, господи́на ѳео́дѡра, гла́съ то́йже.
Подо́бенъ: Па́че ᲂу҆ма̀ дарѡ́въ:
По́стное вре́мѧ свѣ́тлѡ начне́мъ, въ по́двиги дꙋхѡ́вныѧ себѐ поверга́юще, ѡ҆чи́стимъ дꙋ́шꙋ, ѡ҆чи́стимъ пло́ть, пости́мсѧ ꙗ҆́коже въ снѣ́дехъ ѿ всѧ́кїѧ стра́сти, наслажда́ющесѧ добродѣ́тельми дх҃а: въ ни́хже пребыва́юще любо́вїю, да сподо́бимсѧ всѝ ви́дѣти всечестнꙋ́ю стрⷭ҇ть хрⷭ҇та̀ бг҃а и҆ ст҃ꙋ́ю па́схꙋ, дꙋхо́внѡ ра́дꙋющесѧ.
Та́же въ мине́и ст҃о́мꙋ, подо́бны г҃. А҆́ще и҆́мать самогла́сенъ: Сла́ва. А҆́ще же нѣ́сть, Сла́ва и҆ ны́нѣ, бг҃оро́диченъ, въ то́йже гла́съ мине́и. Вхо́дъ съ кади́льницею: Свѣ́те ти́хїй:
Прокі́менъ, гла́съ и҃: Не ѿвратѝ лица̀ твоегѡ̀ ѿ ѻ҆́трока твоегѡ̀, ꙗ҆́кѡ скорблю̀, ско́рѡ ᲂу҆слы́ши мѧ̀: вонмѝ дꙋшѝ мое́й и҆ и҆зба́ви ю҆̀. Сті́хъ: Сп҃се́нїе твоѐ, бж҃е, да прїи́метъ мѧ̀. Сті́хъ: Да ᲂу҆́зрѧтъ ни́щїи, и҆ возвеселѧ́тсѧ. Сті́хъ: Взыщи́те бг҃а, и҆ жива̀ бꙋ́детъ дꙋша̀ ва́ша. И҆ па́ки высоча́йшимъ гла́сомъ: Не ѿвратѝ лица̀ твоегѡ̀:
[зрѝ] Подоба́етъ вѣ́дати, ꙗ҆́кѡ во всѣ́хъ недѣ́лѧхъ ст҃ы́ѧ четыредесѧ́тницы во свѣти́льничное быва́етъ вхо́дъ ра́ди вели́кихъ прокі́менѡвъ.
Сподо́би, гдⷭ҇и: Покло́ны г҃: и҆ є҆ктенїа̀.
На стїхо́внѣ самогла́сенъ, гла́съ д҃:
Возсїѧ̀ бл҃года́ть твоѧ̀, гдⷭ҇и, возсїѧ̀ просвѣще́нїе дꙋ́шъ на́шихъ: сѐ вре́мѧ бл҃гопрїѧ́тное,сѐ вре́мѧ покаѧ́нїѧ. ѿложи́мъ дѣла̀ тьмы̀, и҆ ѡ҆блеце́мсѧ во ѡ҆рꙋ̑жїѧ свѣ́та: ꙗ҆́кѡ да преплы́вше поста̀ вели́кꙋю пꙋчи́нꙋ, тридне́внагѡ воскрⷭ҇нїѧ дости́гнемъ гдⷭ҇а и҆ сп҃са на́шегѡ і҆и҃са хрⷭ҇та̀,сп҃са́ющагѡ дꙋ́шы на́шѧ.
Сті́хъ: Къ тебѣ̀ возведо́хъ ѻ҆́чи моѝ:
И҆ повторѧ́емъ то́йже.
Та́же сті́хъ: Поми́лꙋй на́съ, гдⷭ҇и, поми́лꙋй на́съ:
И҆ мч҃нченъ: Прославлѧ́емый въ па́мѧтехъ ст҃ы́хъ твои́хъ, хрⷭ҇тѐ бж҃е, ѿ ни́хъ ᲂу҆молѧ́емь, низпослѝ на́мъ ве́лїю млⷭ҇ть.
Сла́ва, самогла́сенъ въ мине́и, а҆́ще и҆́мать: И҆ ны́нѣ бг҃оро́диченъ по гла́сꙋ мине́и. А҆́ще же не и҆́мать, Сла́ва, и҆ ны́нѣ, бг҃оро́диченъ гла́съ то́йже.
Подо́бенъ: Ꙗ҆́кѡ до́блѧ:
А҆́гг҃льстїи чи́ни тѧ̀, бг҃омт҃и, прославлѧ́ютъ: бг҃а бо, всечⷭ҇таѧ, родила̀ є҆сѝ, ѻ҆ц҃ꙋ̀ и҆ дх҃ꙋ соприсносꙋ́щна, и҆ а҆́гг҃льскаѧ вѡ́инства ѿ небытїѧ̀ хотѣ́нїемъ поста́вивша. є҆го́же молѝ сп҃стѝ и҆ просвѣти́ти дꙋ́шы правосла́внѡ тѧ̀ воспѣва́ющихъ, всечтⷭ҇аѧ.
Ны́нѣ ѿпꙋща́еши: Трист҃о́е: покло́ны трѝ. Прест҃а́ѧ трⷪ҇це: Ѻ҆́ч҃е на́шъ: И҆ настоѧ́щыѧ тропарѝ, гла́съ д҃: Бцⷣе дв҃о, ра́дꙋйсѧ: И҆ твори́мъ покло́нъ є҆ди́нъ. Сла́ва: Крⷭ҇ти́телю хрⷭ҇то́въ: покло́нъ є҆ди́нъ. И҆ ны́нѣ: Моли́те ѡ҆ на́съ, ст҃і́и а҆пⷭ҇ли: покло́нъ є҆ди́нъ. Та́же, Под̾ твоѐ бл҃госе́рдїе: без̾ покло́на. Гдⷭ҇и, поми́лꙋй, м҃, кро́ткимъ и҆ ти́химъ гла́сомъ. Сла́ва, и҆ ны́нѣ: Чтⷭ҇нѣ́йшꙋю херꙋві̑мъ: И҆́менемъ гдⷭ҇нимъ бл҃гословѝ, ѻ҆́тче. Сщ҃е́нникъ: Сы́й бл҃гослове́нъ хрⷭ҇то́съ бг҃ъ на́шъ всегда̀, ны́нѣ и҆ при́снѡ и҆ во вѣ́ки вѣкѡ́въ. Мы́ же: А҆ми́нь. И҆ мл҃твꙋ: Нбⷭ҇ный цр҃ю̀:
И҆ твори́мъ трѝ покло́ны вели̑кїѧ, и҆ глаго́лемъ мл҃твꙋ прпⷣбнагѡ є҆фре́ма сѵ́рїна:
Гдⷭ҇и и҆ влⷣко живота̀ моегѡ̀, дꙋ́хъ пра́здности, ᲂу҆ны́нїѧ, любонача́лїѧ и҆ праздносло́вїѧ не да́ждь мѝ.
Дꙋ́хъ же цѣломꙋ́дрїѧ, смиреномꙋ́дрїѧ, терпѣ́нїѧ и҆ любвѐ, да́рꙋй мѝ рабꙋ̀ твоемꙋ̀.
Є҆́й, гдⷭ҇и цр҃ю̀, да́рꙋй мѝ зрѣ́ти моѧ̑ прегрѣшє́нїѧ и҆ не ѡ҆сꙋжда́ти бра́та моегѡ̀, ꙗ҆́кѡ бл҃гослове́нъ є҆сѝ во вѣ́ки вѣкѡ́въ. Ами́нь.
И҆ цѣлꙋ́емъ ст҃ы̑ѧ и҆ чтⷭ҇ны̑ѧ і҆кѡ̑ны. И҆ глаго́летъ предстоѧ́тель: Сла́ва тебѣ̀, хрⷭ҇тѐ бж҃е, ᲂу҆пова́нїе на́ше, сла́ва тебѣ̀.
И҆ быва́етъ мл҃тва ѿ сщ҃е́нника, и҆ соверше́нный ѿпꙋ́стъ.
[зрѝ] По вече́рни же въ трапе́зѣ быва́етъ ᲂу҆тѣше́нїе бра́тїи. По воста́нїи же ѿ трапе́зы, повече́рїе пое́мъ ма́лое по ѡ҆бы́чаю, съ мета̑нїи и҆ поклѡ́ны по́стными. На Сла́ва въ вы́шнихъ, мета̑нїѧ г҃. [А҆́ще бы́сть бдѣ́нїе, канѡ́нъ бцⷣѣ не глаго́летсѧ.] Досто́йно є҆́сть: Трист҃о́е, мета̑нїѧ г҃, и҆ ѡ҆бы̑чныѧ тропарѝ. Гдⷭ҇и, поми́лꙋй, м҃. И҆́же на всѧ́кое вре́мѧ: І҆ере́й: Бж҃е, ᲂу҆ще́дри ны̀: Покло́ны г҃ вели̑кїѧ, съ мл҃твою ст҃а́гѡ є҆фре́ма: Гдⷭ҇и и҆ влⷣко: про́чихъ в҃і. Та́же, трист҃о́е. По Ѻ҆́ч҃е на́шъ: Гдⷭ҇и, поми́лꙋй, в҃і. И҆ мл҃тва, Нескве́рнаѧ: И҆ да́ждь на́мъ: И҆ ѿпꙋ́стъ.
И҆ и҆́мже ѡ҆́бразомъ ᲂу҆каза́сѧ слꙋ́жба вече́рни и҆ повече́рїѧ сеѧ̀ недѣ́ли, си́це да быва́етъ и҆ въ про́чыѧ, да́же до пѧ́тыѧ недѣ́ли ст҃ы́ѧ четыредесѧ́тницы, и҆змѣнѧ́ємымъ нѣ́кѡимъ, ѡ҆ ни́хже на свои́хъ и҆̀мъ мѣ́стѣхъ бꙋ́детъ.
Подоба́етъ вѣ́дати, ꙗ҆́кѡ а҆́ще бꙋ́детъ бра́тꙋ на́шемꙋ ѿитѝ ко гдⷭ҇ꙋ во ст҃ы́хъ си́хъ дне́хъ посредѣ̀ седми́цы: не быва́ютъ трети̑ны є҆гѡ̀, да́же до пѧтка̀ ве́чера, тогда́ бо соверша́етсѧ паннѷхі́да є҆гѡ̀: подо́бнѣ и҆ въ сꙋббѡ́тꙋ лїтꙋргі́а є҆гѡ̀. Во грѧдꙋ́щꙋю же сꙋббѡ́тꙋ быва́ютъ девѧти̑ны є҆гѡ̀, а҆́ще слꙋчи́тсѧ, а҆́ще ли нѝ. Четыредесѧти̑ны же є҆гѡ̀ быва́ютъ, є҆гда̀ число̀ дне́й є҆гѡ̀ и҆спо́лнитсѧ: приношє́нїѧ же и҆ па̑мѧти є҆гѡ̀ начина́ютсѧ ѿ но́выѧ недѣ́ли, да́же до и҆сполне́нїѧ дне́й четы́редесѧти.