Отче, даждь ми достойную часть имения (Лк. 15).
Словеса суть блудного сына, ко отцу глаголанная, от Христа Господа в притче нынешней изреченная, от божественного же евангелиста Луки, во главе 15, в зачале 79, положенная.
Искуснейший нравоучитель, Иисус, сын Сирахов, сицево родителем о воспитании чад в своих премудрейших писаниях остави увещание, слушатели православные: конь неучен свиреп идет, и сын самовольный блудник будет (Сир. 30). Накажи чадо, и удивит тя: не играй с ним, да не сотворит ти печали. Не смейся с ним, да не поболиши о нем, и напоследок сотнеши си зубы. Не даждь ему власти в юности: сокруши ребра его, дóндеже млад есть, еда како ожестев, не покоритися. Еже слово всячески есть праведно, и образом притчи нынешние от Христа Господа оправдано. Се бо сын юнший, в сластех и самовольстве воспитанный, аки конь довольно утучненный, ничесомуже наученный, рассвирепе и разгордеся, не восхоте под властию и правительством отца си жити: изуздан же возжелев бесчинствовати, отцу своему глаголаше: отче, даждь ми достойную часть имения. Отец же, не сокрушив ребр ему, даде власть в юности, отдаде ему часть имения, да правит и строит, якоже весть и хощет. И бысть, якоже корабль без кормчия искусного на море свирепое отпущенный, скоро разбивается, и вся сокровища, носимая с собою, погубляет: тако он отпущен быв, и плавав по житейстем мори самовольно, ветры страстей и похотей носим, а не кормилом ума правим, нападе на камень соблазни и претыкания, впаде на месте прудная, между пияницы, блудники, блудницы, и костыри, и ту сокрушися корабль целомудрия его, и погуби все имение си от отца данное: расточи имение свое живый блудно. Емуже подобнии сынове занеже и днесь у многих родителей в странах наших обретаются, виною ненаказания родителей, бесчинству вдающиеся, и многу печаль со скорбию им приносящии, аз о достодолжном воспитании чад, беседу к вашему благочестию имели во уме предложив, Отца небесного молю о слово наставления полезного: вашу же любовь о прилежное глаголов моих внушение.
Велия добродетель есть любы, слушатели православные, толико, даже саму веру и надежду превосходити ей, по словеси богомудрого Павла: ныне же пребывают вера, надежда, любы, три сия: больши же сих любы (1Кор.13). Паче же всех сущих величайшая есть любы, ибо Бог любы есть (1Ин. 4), по свидетельству Иоанна Богослова. Есть же зело добродетелеродная (1Кор.13), якоже повествут сосуд Христов избранный: любы долготерпит, милосердствует; любы не завидит; любы не превозносится, не гордится, не бесчинствует, не ищет своя си, не раздражается, не мыслит зла, не радуется о неправде, радуетжеся о истине: вся любит, всему миру веру емлет, вся уповает, вся терпит: любы николиже отпадает. Но вся сия истинна суть о любви духовной. Иная же изводства имать любовь плотская, ибо та ослепляет стяжатели си, по словеси гражданствующих, иже глаголют: слепая любы, емуже в сердце ся влепит, того охромит или ослепит. Еже слово неложно быти, самем искусом дел и различными образы в различных санех утверждается и показуется. Та и в супружестве, аще бесчинно вкоренится излишеством, всячески на уме и мудрые ослепляет. Кто в царех рода израильска, паче же всего мира, мудрей Соломона обретеся (2Цар. 11)? А того жены иноязычные отвратиша от Бога истинного ко лжебогом, от света ко тме, ко идолом, к демоном. Коль же велия крепость есть царска? Обаче и цари любовь плотская женам порабощает: и излиха срамно, якоже юноша царя Дария повествует: И ныне веруйте мне, не велик ли есть царь во власти своей, не все ли страны не смеют осязати его (2Ездр. 3)? Видех бо Апаминь, дщерь Вартака дивного, наложницу цареву, седящу близь царя одесную, и отъемлющу диадему от главы его, и наставляющу на себе. И по ланите бияше царя от левой руки, и свыше того, отворенными устами зряше на ню, и аще посмеется пред ним, смеется и он: аще же разгневана будет нань, утешает ю, дóндеже глаголет с ним! Оле любве плоти, крепкие связующие! Оле бесстудия, умы мудрых ослепляющего! Кто под солнцем креплей Сампсона обретен бысть? А того единой жены любовь связа и ослепи, первее на уме, таже и плотскими очима. Тысящи филинистов того над ним содеяти не могоша, что едина успе блудница: егоже не связаша верви и ужи, того любы плоти пленника содея. Точне вредоносна есть любы и родителей ко чадом, аще излишествует. И якоже вино, мерно употребляемое, веселит и здравит: безмерне паки пиемое разума лишает, и болезни бывает виновно: тако любы родителей к чадом, аще есть по достойному, полезна есть и рождшима и рожденным. Аще же выше меры, и тема вред творит, и овым: овы в развращение попущает, тема же печаль и болезнь о развращении овех содевает.
Пиитове утвориша баснь о солнце, нарекоша его отца сыну Фаэтону, и глаголют: яко Фаэтон, видя отца си любве к себе безмерную горячесть, дерзнул есть просити его, да даст ему на своей огненной колеснице и на быстротекущих конех, чрез един день токмо, еждением утешитися. Отец, безмерием любве обдержимый, не отрече сыну просимого. Но внегда всед Фаэтон на колесницу, не седе коней правительствовати, тогда в мале небесе и земли не сожже огнем отчим, за что Дий, небесе владетель, уби его молнииною стрелою, и труп с небесе низвергл есть. Баснь се есть пиитическая, но родителям в наставление полезна, да не по всякому чад прошению соизволение творит, и да не попущают им на конех самовольства, на колеснице богатств си без управитель еждения деяти, да не неискусна суще правления свирепых коней воли своея, огнем похотей и ярости на смертную казнь себя заслужат, или у града или у Бога (1Цар. 2). Тако погибоста Офни и Финеес, сына великого архиерея Илиа: ибо пущена бывша от отца самовольно жити, много зла пред Богом твористи (1Цар. 4): но во един день Богу отмщающу, мечем враг погибоста. И отец же, яко к словесем увещания не прилагаше им жезла казни, не без отмщения скончася: ибо паде со седалища своего взнак, и сокрушися хребет его, и умре тако. Се изводство ненаказания чад, и отцу и чадом смертная погибель. Но откуду честных родителей чада злонравие стяжут? Повем вам истину, ради исправления: от матерня ласкательства, от отчия ненаказания, от обою же пространновоспитания. Блажит мати малого сына малу злобу, а злоба в сердце, аки терние, корение си утверждает, и сыну растущу, сорастет злоба паче. Егда же возрастет сын в количество непреклонное, совозрастет злоба в нрав неискоренимый: и тогда исполнится оная притча: юноша по пути своему, аще и состареет, не отступит от него, ибо якоже сосуд глинян, аще в новости, пекла напиется, никогдаже измыется: тако человек, сосуд сый скуделен, в юности нрав восприятый хранит до смерти. Тем же и Господь люди израильские обличаше чрез Иеремиа пророка сице: аще может применити ефиоплянин кожу свою, или рысь пестроты своя, и вы можете благотворити, понеже научистеся злу? Подобне трудно есть злых родителей чадом изменити злый нрав и добрая глаголати: яко от пелен родительма научаются злонравию и злословити. Не удобно трезвенным им быти, занеже от детства упиватися попущают. Невозможно чистым соблюстися: ибо в младенстве си и видят, и слышат, и творят нечистоту невозбранно. Оле злонравия! Оле богомерзских налогов! Ктоже за сия суд приемет? Ей, якоже насадителем сада, вина приписуется кривины древес, яко не исправляху в юности их: и яко художником нелепие причитается вещей, неискусно ими содеянных: тако родителям приписуется вина злонравия чад их: и суд приимут, яко в детстве научиша, или попустиша им злобе навыкати. Вы, православные люди, да не приимите суда о злонравии чад ваших, тщитеся воспитывати я добре, храняще сия вещи, нуждные благовоспитанию.
Первая вещь есть жезл, егоже потребу сам Бог всемогущий образно показал есть: егда бо даде перворожденному сыну си Израилю в пустыни манну, и повеле сосуд полный хранити ее в ковчезе завета, в память вечную того благодеяния: таможте благоволи храненну быти жезлу Ааронову и скрижалем завета, якоже воспоминает учитель языков: по второй же завесе, скиния, глаголемая святая святых, злату имущая кадильницу (Евр.8), и ковчег завета, всюду окован златом, в нем же стамна злата, имущая манну, и жезл Ааронов прозябший, и скрижали завета. Имже триех сих вещей купно положением научает вся родители чадопитанию: чрез манну убо еже чадом пищу и вся нуждная промышляти отечески. Чрез скрижали, еже учити закону Божию. Чрез жезл, еже непослушные наказания достойного не лишати. Что само и приточник завещает, глаголя (Пр. 23): не отрей младенца наказовати, аще бо жезлом биеши его, не умрет от него, ты же убо бия его жезлом, душу его избавиши от злой смерти. И паки: иже щадит жезл свой, ненавидит сына своего. А любяй прилежно наказует.
Вторая вещь есть, еже детем злого возбраняти общества, с лукавыми дружитеся не попущати: ибо и Ева прамати, яко с лукавым змием беседоваше, его проклятой научися гордости, и восхоте равенство с Богом в раи, якоже он иногда в небеси. Но яко той с небесе низвержеся; тако Ева со Адамом, соизволившим ее совету, изгнася из рая. Того деля Бог всемогущий множицею увещаше люди израильские, еже потребити иноплеменники, и общения не имати с язычники, во еже бо им языческим не приложитися беззаконным деянием и богомерзским обычаем. Их же словес Господних яко не послушаша людие, заблудиша от Отца небесного к мучителю геенскому: забыша дел божественных, и научишася демонских, якоже плачася пророк извествует: не потребиша язык, яже рече Господь им (Ес. 104): и смесишася во языцех, и навыкоша делом их, и поработаша истуканным их, и бысть им в соблазн. Се и солнце, зело полезно мирови сущее, егда со злым планетою или знамением случится на небеси, велию тщету в мире деет. Источник аще и вельми часть сущ, егда с тинным случается блатом, обыче блатен быти, и типы смрад издати. Тем же пророк глаголет: со строптивым развратишися, и Иисус Сирахов повествует; касаяся пекле очернится, и общаяся гордому точен ему будет (Сир. 13). Глаголет же пророк и сие (Пс.16): с преподобным преподобен будеши, и со избранным избран будеши. Но увы нам, не толь удобне с добрыми добримся, якоже с лукавыми лукавимся. Им же убо образом недуг вредоносный ближние повреждает, а здравие от друга ко другу не приходит: тако злые нравы тляд други, добрые паки не удобь ко другом преходят, се же за преклонность нашу к злобе. Обаче с добрыми общение да будет чад ваших: ибо яко вшедшие в мироварницу, и тамо время некое пребывшие, исполняются аромат благовонием, и с собою ту благую воню износят: тако общающиеся благим, благостыни обучаются, или ноне зла творити не навыкают. И собеседующие мудрым умудряются, по глаголу приточника (Пр. 13): ходяй с премудрым премудр будет. Третия вещь есть, еже злого по себе образа не являти чадом: ибо якоже пифик, что видит человеки творящие, абие то тщится деяти: подобне чада, дела родителей своих видяще, подражатели им бывают. Блажени убо суть родители, ихже житие добродетельное есть чадом образ благонравия, зерцало исправления и правило деяний благих. Окаянные же суть рождшие, иже злобным си житием чада си соблазняют: чадоубийцы паче суть сии человецы, нежели родители: ибо худшее раждают, а лучшее убивают же бессмертную, егда соблазняют чада си, и греха их виновницы бывающе, лишают я живота душ, яже есть благодать Божия. Горе человеку тому, имже соблазн приходит, глаголет Христос Господь (Мф.18). И паки: иже аще соблазнит единого от малых сих, верующих в Мя, уне ему есть, да обесится жернов оселский на выи его, и потонет в пучине морстей. Аще тако горе чуждым, много паче родителем: ибо елико родителие суть ближайшие кровию чадом, толико соблазна их лютшая и вредная паче: и грех соблазни их больше есть. Блюдитеся убо от родителие, да не будете душгубцы чад ваших, соблазнию жития вашего. Да весте же, яко отец должен есть быти в дому аки солнце, мати же аки луна, чада яко звезды. По оному видению Иосифову: Се видех сон, яко солнце, и месяц, и единадесять звезд поклоняхуся мне (Быт.37). Что знаменоваше, родители и чада, по домыслу Иакова патриарха, рекша: что есть сон сей, иже еси видел? Егда ли пришед аз и мати твоя с братиею твоею поклонимся тебе до земли? Убо отец имать быти яко солнце , мати якоже луна: ов яко светило большее, сия же яко светило меньшее, да благими образы жития осиявают, яко светом, звезды домов си, иже суть чада: да и они, яко звезды, светом жития святого сияют. Но увы нам, яко солнце сие и луна множицею лишение света страждут. Луна убо чрез междувложение земли, еже есть, жена чрез междувложение земных мудрований и страстей, влагающихся между ею и мужем. Солнце паки, чрез противоположение луны, сиречь, муж, егда ему жена сопротивляется и пререкает: и тако снона бывает, да свет ко звездам не приходит. Свет глаголю, доброобразия и благочестного жития не изливается на чада. Паче же тма помрачает я, егда домашняя разгласия зол прописуют образ: егда нрави родителей развратнии соблазн родят, чада же злобное житие родителей подражают. Ибо яко в дому, присно дымокурном, живущии удобь очерняются: тако злых родителей образом чада удобь развращаются. Храните убо себе родителие, от всякия злобы, да не будуте помрачителие звезд ваших, развратителие чад любезных, о нихже слово имати воздати общему всех Господу и Богу, и мзду по делом вашим восприяти.
Четвертая вещь и последняя есть, еже родителем, от младых ногтей, от сосцу матерню страху Божию обучати младенцы своя, да паче растут в добродетели, нежели в количество плоти. Чин же учения их буди сицев: первее – да учат прежде всех словес глаголати Господню молитву и архангельский глас Богородице. Второе – знати, яко Бог есть един существом в Троице ипостасней, и да учатся символу веры христианской. Третие, – еже заповеди Божия знати и хранити, наипаче десятословие. Четвертое, – еже в дом Божий на молитву учащати, изряднее же во дни святые к литургии божественней. Пятое, – наставляти, да тайною покаяния святого, чрез истинное исповедание грехов своих, часто очищают души свои. Шестое, – учити достоит, еже утро и в вечер, от сна восставше и на сон грядуще, молитеся Господу Богу, пресвятой Богородице, ангелу хранителю, и тезоименным защитником, и всем святым. О пришедших благодарствие Богу воссылати, о грядущих же прошение деяти. Седьмое, – хранити бережно отрочат от отроковиц соиграния, купноспания, да не диавольским наваждением впадут в искушение. Осмое, – да обучают дети своя или рукоделию некоему, или иному честному коему упражнению: да не, во празднестве живуще, приобыкнуть злобам: праздность бо есть питательница тым. Девятое, – да промышляют им о честном и душеспасенном сане жития временного, или духовного, или мирского. Десятое, – да и возрастшим завет им творят, якоже сотвори Товит старый сыну своему Товии юному, глаголя сице (Тов. 4): во вся дни живота твоего, в уме да имееши Бога, и стрежи, да не когда греху изволиши, и преступиши заповеди Бога нашего. От имения же твоего твори милостыню,и не отврати лица твоего ни от единого убогого. Аще се не сотвориши, то ни от тебе отвратится лице Господне. Елико можеши, толико буди милосерд. Аще же много тебе будет, изобильно воздавай. Аще мало тебе будет, и малое благовольно участити помысли: мзды бо благи себе сокровищуеши в день потребный: яко милостыня от всякого греха и от смерти избавит. И не оставит души ити во тму, и прочая. Сицевым образом аще воспитаете чада ваша, истиннии будете родителие их, не точию телесем, но и душам: ибо телесы рождше я в мир естественне, душами родите Богу нравно. Емуже родителие купно с чады вашими работайте усердно, чрез вся дни живота вашего со страхом, да мзду трудов ваших восприимете с радостию, в царствии Его небесном: тоя да не лишит вы Бог в Троице единой, от всея твари славимый, ныне и присно, и во веки веков, аминь.
(Обед душ., л. 540–547).