Вся елика аще молящеся просите, веруйте, яко приемлете, и будет вам (Мк.11:23)
Радуйтеся и веселитеся, христоименитые людие, ликуй и торжествуй, церковь Христова и православная Великороссийская держава! Се ныне время благополучно и благоприятно; уже бо лютая зима прейде, скорбное преста безведрие, буря свирепых ветров неприятельских утолися, облак темный и громогласный разгнася, стужа жестокая, печали и воздыхания мимо идоша: цветы же радостей и веселия явишася в земли нашей Великороссийской. Нива державы Российской угобзися, классы победные благополучно собраны: плевелы же нечестивых шведов люте пожаты, а иные в снопы сложены, а ины сожжены, процвете скипетр Державнейшего Государя и плод принесе не сторичный, но бесчисленный, коим всю свою державу насытил есть и вселенную всю бессмертною славою наполнил. Радуется убо Российская держава, яко такую Господь посла милость свою и победу Монарху нашему, каковой от начала мира не было; исполнил есть Господь во благих желание Царево, членовые льву шведскому сокрушил есть. Верен Господь во всех словесех своих, яко обеща нам, тако и сотвори, рече: просите и дается вам вся, елика аще молящеся просите (Мк.11:24). Сие исполни обещание: призре на моление церкви своей святей, стенание и воздыхание убогих услыша, яко хвалитесь ей с Давидом святым: растерзал еси вретище мое, и препоясал мя еси веселием, спасе мя от уст львовых (Пс.29:12). Лютый оный зверь лев, король шведский, рыкаше и зияше устами своими, хотя поглотити Россию; но прехрабрый Сампсон наш Государь, Царь заградил есть уста тому льву, паче же растерза льва шведского. Победил есть от колена Иудова победитель Христос чрез христа нашего Царя. Се большая сила орла царского, неже львова! Горняя сей мудрствует, а не земная. Орел царь есть воздушных, лев же земных; орел от вышних всех вышши возвышается, лев паки по земле ползает; орел светло очи своя и зеницы к солнцу всегда обращает, несмеженно на лучи солнечные смотрит; а наипаче к присносияющему солнцу, еже есть Христос: Аз есмь свет миру, лев по пустыням, по вертепам крыется. Яко орел, Господь наш покры гнездо свое – царство свое, церковь Христову, льва же растерза. Яряшеся лев сей, гордяшеся и хвалишеся церковь святую и государство наше поглотити, но Господь, гордым противящийся, сокруши челюсти его. Тии спяти быша и падоша, мы же восстахом и исправихомся (Пс.19:9).
Хваляшеся прегордый он Голиаф на нового Божия израиля и глаголюще: меч мой снесть мяса. Утну мечем моим, пообладает их рука моя: не возвращуся, дóндеже скончаются; но прехрабрый царь Петр, яко кроткий Давид, пращею Духа Святого и каменем Христом победил есть. Мечи их сломи, оружия сокруши, щиты сожже, иже имать меч, исходящей от уст своих Христос. Святый Иоанн Богослов глаголет: и видех из моря зверь исходящ, имущь глав седмь, и рогов десять, а на главах его имена хульна, и зверь, егоже видех, бе подобен рыси, и нозе его, яко медведя, и уста его яко уста львова: и даде ему змий силу свою, и видех едину от глав его, яко заколену в смерть (Апок.13).
Зверь из моря есть король шведский, имеяй глав седмь – главнейших генералов, который пройде Польшу, Литву, разорил домы Божия и обнажил, и дерзнул окаянный внити в державу Государеву: но Господь, сокрушая брани, лев от колена Иудова, победоносный орел сокруши главы морского зверя того, и самого уязви язвою смертоносную, еже пребудет неисцельна на веки.
Но и той с клевреты своими, который поклонився тому зверю, приимет казнь и погибель свою; сице глаголет писание: иже аще кто поклонится зверю, и иконе его, и приимет начертание на челе своем, или на руце своей, и той имать пити от вина ярости Божия, чвана нерастворена в чаши гнева его, и будет мучен огнем и жупелом пред ангелы святыми, и пред агнцем, и дым мучения их во веки веков восходити (Апок.13). Верно слово и всякого приятия, достойно, яко тако будет.
Зверь той, иже хотяше пожрети жену, то есть невесту Христову, церковь святую, ять будет. Скорейший орел, нежели зверь лев, постигнет их и поперет ногами, главы сокрушит гордые, роги сотрет. Святый пророк глаголет: видех нечестивого превозносящася и высящася, яко кедры ливанские, и мимо идох, и се не бе, и взысках его, и не обретеся место его (Пс.36:35).
И сей лютый зверь, паче же бездельный превозносяшеся, яко кедры ливанские, и крепляшеся, аки дубы. Но противляяйся грдым, Господь низложи гордыню его, посече тыя гордые кедры, сломи, дуба, мнящагося быти крепка и непреодолена. Се исполнися Иоаново проречение: всякое древо, не творящее плода и пр. (Ин.15:2). Образ сего предивный зело и вельми страшный видел во сне Навуходоносор, царь вавилонский: видех бо, и се дуб среди земли, высота досязаше до небес, и корение его в концех всея земли, листвие его красно, и плод его мног, и пища всех в нем, и под ним веселяхуся вси зверие дивии, и в ветвех его живяху вся птицы небесные, и от него питашеся вся земля. Велие воистину и пречудное сие древо! Но егда токмо вознесеся, абие смирися, ибо виде ангела, вопиюща: посецыте плод его. Оле падения великого превысокого древа до небес! Что исполнилося на самем же Навуходоносоре (Ин.4).
Не тако ли и сей навуходоносор шведский гордяшеся, и возношашеся до небес; но секирою, о ней же Иоанн: се уже и секира при корени древа лежит и пр. (Мф.3:1), то есть силою Божию и победоносным оружием православного монарха посечен есть. Обиты ветви, то есть генералы и полководцы; обрушены и побиты листвия, то есть оружницы; рассыпаны плоды, побраны корысти, знамения, воинские потребы. Се коль великое дуба сего падение, нам же восстание! Тии спяти быша и падоша. Воспрощен быть некто от риторов: что Бог на небеси деет: отвещав, рече: играет с тварию своею, гордые смиряет, смиренные возвышает. Но не играет то Бог, о риторе! Но правдолюбец правду деет, о ней же Петр святый: Господь гордым противится, смиренным же дает благодать (1Пет. 5:5). Сице гордящегося Голиафа смири и погуби чрез Давида смиренна, который каменем победи: сице смири гордость филистинов чрез Сампсона, мадиама чрез Гедеона, гаваонита чрез Финееса и Иисуса Навина, который победи пять царей амморейских со многими тысящами. Славна та бысть победа, яко в то время на прошение и моление Иисуса Навина ста солнце, и месяц среди небеси, и пособствоваше сиянием своим победити пять оных царей: но славнейшая здесь победа над шведами! Тамо бессловесные светила повелением Божиим стали и помогали, здесь же мысленные светила: сам Христос Спаситель, иже есть солнце, и луна, пресвятая Дева Мария, стали и способствовали победити гордого сего; тамо только солнце и месяц стояли, а здесь и звезды, то есть, российские чудотворцы, и апостоли святи, и вси святи помогали. Благополучное убо сие есть время месяц июнь, в он же дарова победу Господь: в сем бо месяце солнце входит в знамение девицы. Солнце Христос вниде в знамение девицы, юже видел святый Иоанн во Апокалипсисе, знамение велие явися на небеси, жена облечена в солнце, и луна под ногами ее, и на главе ее венец от звезд двоюнадесяте. Сладко воспеваше со сверстницами своими сестра Моисеева Мария восклицающи с гусльми и тимпаны и иными мусикийскими органы, егда Моисей пройде море, и порузи в нем Фараона со всем воинством: несравнительно сладие ныне гимны Мария, Церковь святая и Россия, егда скипетродержавец наш погрузи, аки в мори, в их же крови, шведа, воспевают и славят, глаголя: славою и честию венчал еси, Господи, царя нашего и покорил еси под нозе его вся восстающие на ны, и будут величати и прославляти сицевую победу, сицевый подвиг донельже реки в море плыти будут.
Киими убо венцы похвальными венчаем тя, монархо наш Петре? – недоумеем. Се сам Царь небесный, венчавый тя за труды твоя толикие, бессмертное венчает тя славою и честию, глаголя: достоин еси прияти славу и честь, и силу. Побеждаяй не имать вредитися от смерти: побеждающему и соблюдающему дела Моя до конца дам ему власть над языки, и упасет я жезлом железным, и яко сосуды скудельничи сокрушаться; побеждающего сотворю столп, и дам сести со Мною на престоле Моем, якоже Аз победих и седох со Отцем Моим на престоле Его. И дам ему ясти от манны сокровнныя (Апок.2). О котором благополучии благодаряще мы сынове росийстии, Господа, Церковь святую долженствуем непрестанно молити, да сохранит тя Государя нашего, цела, и покорит всю силу вражию льва, расширит государство, и миром оградит на веки, аминь.