Молитва Святому Благоверному Князю Михаилу Тверскому Чудотворцу

Дивный во страдальцех Святый Благоверный Великий Княже Михаиле! Велия подвиги и труды Твоя, яже за правоверие, за церковь Божию и за отечество Твое град Тферь положил еси. Ты, возжелав вышних, оставил еси тленную славу земную, и ревнуя подвижником Христовым, доблественно противустал еси ярости царя нечестивого и прещению зломышленного его воеводы. Ты, прием неправеднос суждение и заколение, восприял еси Небесное Царствие, и кровными каплями, яко пречудным каменем, украсив на главе своей венец, предстоиши ныне на небесех престолу всех Владыки с лики Ангел и со всеми Святыми Его. Сего ради притекающе к раце мощей Твоих, лобызаем оныя сердечными устнами, и умильно к Тебе взываем: О тезоимените Небесному Воеводе вышних Сил, Великий Княже Михаиле! молися непрестанно Христу Богу за град Твой, за люди и за все православныя христианы: буди споборник крепок на врагов православия Благочестивейшему, Самодержавнейшему, Великому Государю Нашему ИМПЕРАТОРУ АЛЕКСАНДРУ НИКОЛАЕВИЧУ всея России, и Супруге ЕГО, Благочестивейшей Государыне ИМПЕРАТРИЦЕ МАРИИ АЛЕКСАНДРОВНЕ, Наследнику ЕГО, Благоверному Государю Цесаревичу и Великому Князю НИКОЛАЮ АЛЕКСАНДРОВИЧУ, и всему ЦАРСТВУЮЩЕМУ ДОМУ; испроси ИМ предстательством Твоим мир, здравие, долгоденствие и во всем благопоспешество; буди и нам помощник улучити вся к пользе нашей и ко спасению благопотребная, охраняй нас от искушений и напастей, приходящих во временней жизни, и не лиши нас ходатайства Твоего ко Христу Богу, во еже получити нам прегрешений прощение, и сподобитися небесного селения со избранными Его, яко да и в сем славится пречестное и великолепое имя Его во веки. Аминь.