Азбука веры Православная библиотека Жития святых Житие и подвиги благоверной великой княгини Анны Кашинской
Распечатать

Житие и подвиги преподобной благоверной великой княгини инокини Анны Кашинской, новой чудотворицы

Содержание

О явлении преподобной матери нашей благоверной великой княгини Анны, и чудо о пономаре, именем Герасиме О обретении честных мощей преподобной и благоверной великой княгини Анны Месяца июня, в 12 день. Слово о пренесении мощей святой преподобной благоверной великой княгини Анны в соборную церковь Воскресения Христова из древяные церкви Успения Пресвятой Богородицы, идеже обретены быша святыя мощи ея  

 

Господу Богу и Спасу нашему Иисусу Христу, прежде вольныя и спасительныя Своея страсти и воскресения, сеющу слово спасения живущим на земле, и часто не токмо единем божественным своим учеником и апостолом беседоваше, но и ко всем народом учение свое простирая и подвизая ученики своя на проповедь, сице глаголаше: «Се Аз посылаю вас, яко овцы, посреде волков. Предадят бо вы на сонмы и на соборищи, и пред цари и владыки ведени будете имени Моего ради. И не убойтеся от убивающим тело, души же не могущих коснутися». И такового пресладкого и небесного и спасеного учения мнози явишася, яко звезды небесныя множеством, мученицы и исповедницы, и подобницы божественным и спасительным Его страстем показашася. Всяких виде учения доблественно претерпеша и победители врагу до конца явишася. Иногда же и народом беседоваше: «Возьмите иго Мое на себе и научитеся от Мене, яко кроток есмь и смирен сердцем, и обрящете покой душам вашим, иго бо Мое благо и бремя Мое легко есть». И паки: «Аще кто оставит отца или матерь, или жену, или чада, и села, и имения имени Моего ради, стократицею приимет и живот вечный наследит. И аще кто не возьмет креста своего и вслед Мене грядет, сей несть Мне ученик». И не просто учаше, но яко Бог и Владыка всех, ведый помышления человеческа и испытая сердца и утробы, яко не от слышания точию спасение бывает, но аще кто сотворит пречистую волю Его, сей спасен будет: «Аще кто слово Мое соблюдет, жив будет во веки». Такового евангельского проповедания приемше слово спасеное и развергше бразды сердец своих, вземше крест последоваша Христу, в пустынях скитающеся, и в горах, и в вертепах, и в пропастех земных живуще, отбегающе от прелести мира сего, и яко небо парнии орли приемше крила легкостию смысла своего возлетеша на небо. Понеже всем сердцем возлюбиша Господа Бога и Тому невозвратным путем шествоваша, и ничто же паче любве Его предпочтоша. Якоже и сия блаженная и великая княгиня Анна, о ней же нам ныне слово предлежит, от юности своея возлюбила божественныя и спасительныя заповеди Его и Тому невозвратным путем шествова, якоже напреди слово явит о сем.

Сея убо преподобныя отечество град Кашин. Дщи бяше благородных и благочестивых родителей от славных боляр. И добре има воспитана бывши во страсе Господни и наказана Того пресвятыя заповеди творити; научена же бывши и божественному писанию. И добре поучашеся страху Господню и от того поучения возгарашеся на любовь Божию. Не взираше бо на красоту века сего, яко прелесть бе; ниже уклоняшеся к сладости пищи и покоя, но пища бе ей молитва непрестанная, и желание ненасытно к Богу; ниже честь и слава возбрани когда ей от любве Божия; но присно прилежаше благим делом, како бы угодити Богу, и на Того пресвятую волю полагаше упование свое. И весьма поучашеся в законе Господни. И яко древо происходящих вод напояемо бяше божественных словес поучением; и от того навыче духовного веселия. Моляшеся часто Господеви, яко да не лишит ю небесного Своего чертога, но да сотворит о ней, якоже волит пресвятая воля Его. Нищим же и убогим довольну подаваше милостыню. И присно цветущи ей благими делы, в таковой юности и чести и славе и во всяком покои подвизающуся на божественную ревность.

Егда же прииде в совершенный возраст, подобна на сочетание брака, обручиша ю великому князю Михаилу Ярославичу, иже тогда ему господствующу во граде Твери. Такоже и той благоверный князь Михаил вельми благочестив и боголюбезен смирением и кротостию, и благотворением к нищим и к странным попремногу преспевая, иже последи скончася мученическим подвигом и венцом увязеся мучения от вседержительныя руки, якоже напреди пошед слово явить о сем. Живущима же има во благочестии и в законе Господни, поучающеся день и нощь, и преспевающе красотою делания своего, еже к нищим и ко убогим нищепитательством, и к странным, и к больным, якоже и древле Авраам праведный, и, по Иову терпеливому, всем всяка быста: нога хромым и око слепым. Вельми же любяста священнический чин, яко Божия слуги, и яко слово воздати хотяще ο данней им благодати. И попремногу почитаста иноков, яко присных Божиих заповедей делателей. Не зряще бо на красоту века сего суетного, яко прелесть бе и скоро преходит, и яко сень мимо течет. Ниже возвеличастася благородием и величеством господства своего, или гордостию превзимастася, якоже нецыи творят, взимают бо ся величеством благородства своего, и яко безсмертии творятся, дмением и кичением, тщеславием же и высокоумием, и гордостию превзимающеся еже друг на друга, не ведуще, яко гордости ради, иже иногда бывый денница, отпаде славы Божия, и вместо света тьма бысть, и диавол преименовася. И хотящим в смирении жити, вельми супостат душ наших запинает и в преисподняя с собою сводит. Сице и Адама праотца нашего высокоумия ради из породы изгна. И сице вспоминаста в себе благоверный и благочестивый великий князь Михаил со благоверною и великою княгинею своею Анною, вельми смирение любяста и любовь равну ко всем держаста. Ведуще от божественного писания, яко любви ради Сын Божий преклоне небеса и сниде с небес и воплотився нашего ради спасения от преблагословенныя Владычицы нашея Богородицы и Приснодевы Марии, и бысть совершен Бог и совершен человек, и толико смирив Себе, Творец и Зиждитель всея твари, и быв послушлив даже до креста и смерти, якоже апостол глаголет, да нас примирит Богу и Отцу Своему. И вся сия пострадав безгрешный, да нас свободит от клятвы законныя и наследники ны сотворит царства Своего небесного. Сия помышляеста в себе блаженная, како от толикия высоты сведе себе и премногия ради благости быв подобен нам, кроме греха, и яко не имеяше, где главы подклонити. Не паче ли нама глаголаше: смертныма сущима и тленныма, подобает Его ради смирятися и любити всех, не токмо своих и единоплеменных, но и врагов наших по евангельскому гласу. И сице видев Бог наше смирение, отпустит нам согрешения наши и наследники нас сотворит небесного своего царства. И еще рассуждал в себе блаженный и благочестивый князь Михаил с супружницею своею, великою княгинею Анною, присно поучающеся во псалмех и пениих, и песнех духовных, Богови молястася, о еже сохранитися отечеству и всей державе их от нашествия иноверных язык. И сице блаженныма цветущима благими делы, беззлобием и кроτοстию, и смирением, и благотворением во всей велицей России, яко некая два светила великая, озаряющи всюду своим житием и ничим же лишена быста Авраама, и Иова, и Давида, но во всем последоваста сродником своим, иже в России бывшим светилом: великому князю Михаилу Черниговскому и деду своему великому князю Александру Невскому. По сем же родистася има четыре сыны: первый князь Дмитрий, вторый князь Александр, третий князь Василий, четвертый князь Константин. И добре их воспитаста и наказаста в страсе Господни и боятися Бога и Того пресвятую волю творити.

Что же по сих видев враг и супостат душ наших блаженного и великого князя Михаила в таковей славе и чести, и яко царь почитаем, и ничим же от него побежден бывает, но присно побеждается, и в конец разрушися неприязненная его сила, и весьма попираем, яко птица худая, испрошает на него от Бога, яко же древле и на праведного Иова, изущает на него злыми своими ухищрении, своих има единоплеменных во плоти сродник. И коварствует льстивый диавол на великого по истинне во блаженных князя Михаила, хотя его доброму течению спону сотворити и великой княгини Анне. Ho он пояху: «Господь нам помощник и не убоимся; что сотворит нама смертный человек, аще бо и воздвизает диавол на святых брань, но по мале на его главу болезнь возвратится». Тогда многа зависть и крамола на блаженных воста, и многа брань от своих ему на его державу приидоша. Но Господь, видя своего угодника и непорочное житие, дарова ему победу велию на супостаты его, и на совостающая на него единородных ему братию.

To же видев враг, яко ничтоже усие сотворити великому князю, и яко попрана бысть неприязненная его сила, паки подвизает на него брань лютейши первого: взущает на него ординского царя Озбяка и советника его, паче же своего угодника беззаконного Колгу. Благочестивый же и великий князь Михаил, слышав беззаконного царя, яко хощет пленити его державу и пролити кровь христианскую неповинных сущих, вельми душею скорбя и плакася, глаголаше к супружнице своей великой княгини: «О, госпоже, яко слышу повеление злочестивого царя и востаящую на наю зависть, и яко хощет многа брань сотворитися между нами и кровь пролиятися стада Христова. Но аз хощу, аще Богу волящу, итти сам в орду к беззаконному царю и собою ответ сотворити и душу мою положити за овцы стада Христова по Христову словеси». Сие слышавши, блаженная и великая княгиня Анна оскорбевся душею и в себе глаголаше: «Что ми, благоверный мой князь, яко хощу итти в орду к нечестивому царю и душу свою положити за овцы стада Христова? Будет ли се истина, яко хощет за имя Христово пострадати?» И сице глаголаше к нему: «О, драгий мой, любимый, великий княже Михаиле! Почто боишеся злочестивого царя и его беззаконного повеления, аки немощен трепещеши? Еда не имаши бранных и сильных оруженосцев у себе, или тьмы тем окружающих тя храбрых воинов. Еда не можеши с толикою силою ратных людей, паче же с Божиею помощию сопротив стати беззаконного царя. Не ты ли приял еси искус Божия помощи пред малыми сими деньми, егда прииде на тя с ратию брат твой, великий князь Юрий, со окаянным Кавгадыем, варваром? И колико тогда побил еси пришедших на тя от их воинства, и самого варвара в руки твоя предал тебе Бог! И ныне ли, благочестивый мой княже, боишися злочестивого царя и хощеши предати себе самовольно, яко агнец злохищному волку!» Он же глагола к ней: «Аз, госпоже, от многа времени желаю пострадати за имя Христово и душу мою положити за порученное мне стадо: но не сущу такову времени. Ныне же, аще Бог восхощет, готов есмь пострадати за иже мене ради пострадавша. И мню, яко лучше есть мне единому умрети за стадо Христово, нежели мене ради мнозей крови христианстей от мучителя пролиятися». Сия слышавши по истине блаженная княгиня Анна, и яко истинно хощет пострадати за имя Господа Иисуса, и рече к нему с тихостию: «О, господи мой, благочестивый княже? Весть убо Господь наш Иисус Христос, яко несть неправды нашея пред беззаконным царем. Но понеже велегласный учитель вселенныя, божественный апостол Павел, пиша к Тимофею, глаголет, яко вси хотящи жити благочестно о Христе гоними будут, лукавии же человеци предуспеют на горшее. И Сам, беседуя, Сын Божий ко учеником своим глаголаше: «Аще бысте от мира были, мир убо своя любил бы. Но Аз избрах вы от мира, сего ради и мир вас ненавидит». Паки к иудеом глаголаше: «Сего ради ищете мя убити, яко слово Moe не вмещается в вас». И по сему Христову словеси, господи мой, аще быхом были мы подобни их житию и ласкание бы к ним творили, не бы убо на нас такова зависть когда возстала, или на нашу державу от братий твоих кто позавиде, но понеже Спас ко учеником своим глаголаше: «яко хощете, рече, скорбь имети, но дерзайте, яко Аз победих мира и прелесть его. И не убойтеся от убивающих тело, души же не могущих убити. Но паче подобает боятися могущего по убиении тело и душу воврещи в дебрь огненную. И смотри, благочестивый и драгий мой княже, яко сродницы твои, благовернии князи Борис и Глеб, от брата своего Святополка зависти ради убиена быста, и сего ради от Бога венчана быста. Такоже и благоверный и великий князь Михаил Черниговский с болярином своим Феодором, колико пострадаста за веру Христову от злочестивого Батыя и никакоже покористася беззаконному велению, но кровь свою излияша за Христа: сего ради и венцем мучения от вседержительныя руки венчастася и мученицы Христови нарекошася. И аще сице, господи мой, благоверный княже, пойдеши во орду к беззаконному царю, и самовольно хощещи пострадати за имя Господа Иисуса, никому же тя понуждающу, поистине тогда блажен будеши во вся роды, и память твоя во веки будет, токмо потщися усердно во звании своем стояти, и Господь тебе помощник будет». Блаженный же и великий князь Михаил рече к ней: «Что бо мне сладчайши сего или краснейши, еже за имя Господа моего Иисуса Христа пострадати! И уповаю на щедроты его, яко исполнит, желание сердца моего». Тогда блаженная к нему глагола: «Молю тя, господи мой, благоверный княже! Егда предстанеши нечестивому царю, яко добр воин Христов, и егда нанесут тебе злоковарныя своя муки, хотяще покорити тя своему умышлению, тогда, господи мой, никако да не убоишися от грядущих на тя зол, ниже огнь или колеса, или мечи, или сечива устрашать тя. Но буди терпеливно во звании своем, в неже еси хощеши самовольно итти. Ниже доброму твоему помышлению возбранит ти величество державы твоея; ниже ино что от земных и тлеемых да препнет самовольному твоему званию: вся бо она мимо ходят. Ниже терпения твоего ослабят друг твоих ласкания, и ниже да украдут твоея яже во Христа веры некоторыми лестными словесы и начинании. Отнюд ненавиди тех нечестивых советы, но токмо возлюби, господи мой, единого Господа Иисуса Христа, возлюбившего тя от младых ноготь и предавшего Себе за тя. Тогда аз буду блаженна тебе и ради во всех русских женах». Сия глаголаше блаженная и великая княгиня Анна супругу своему, благочестивому и великому князю Михаилу, бояшеся, да не како отбегнет доброго подвига, еже о Христове имени страдания.

Он же яко слышавши таковые глаголы, вельми дивляшеся премудрости словес ея и премудрому совету, и Бога похваляя, яко извещение приим Божия помощи, еже к подвигу желаемого ему пути, яко женою ему подаде таковый совет. Видите, братие, и почудитеся блаженныя и великия княгини Анны премудрому совету! Не восхоте бо супруга своего в мале времени славима быти, но во веки блажима и похваляема и от Бога прославляема доброго ради исповедания. И, не яко Ева советова Адаму древа вкушеним в раи, но, яко Ревекка советова о благословении сыну своему Иакову. Таже рече к ней обрадованным некако лицем: «О, госпоже моя, супружнице Анно! Мне бо еже жити Христос, и еже умрети приобретение жизни Его. И что ми сладчайши сего возжеленнейши, яко умрети за имя Господа моего Иисуса Христа». И сия рек умолче. Та же призвав дети своя, и поучив их страху Господню, и по всему наказоваше подобитися своему благому житию. «И матери, рече, своей покаряйтеся, и на ню взирайте, и непорочному деланию, и многим добродетелем ея последуйте». Конечное же прорек: «Якоже видесте, рече, наю творяща, сице и вы творите, и Бог мира да будет с вами». И разделив им наследие достояния своего, подав им благословение комуждо своя грады, и приим благословение у епископа своего, блаженного Варсонофия, и отъиде во орду, точию поим единого сына своего, князя Димитрия, да видит страдание его, много же плачущим всему народу, мужем, и женам, и детем. Хотяй иже уведети о сем, да прочтет житие и страдание блаженного и великого князя Михаила, како подвизався добрым своим самовольным званием, еже о имени Господа нашего Иисуса Христа, и колико от беззаконного и нечестивого царя и его боляр, паче же от треклятого и зверообразного варвара Кавгадыя приять поношения и уничижения, биения, и досады, и различных томлении, и озлоблении, последи же блаженную кончину приять: мечем усекновен бысть, и тако мучения венцем увязеся, добрым подвигом подвизався, течение скончав и веру соблюде в лето 6827-е, месяца ноембрия в 22 день. Тело же его пресвятое принесено бысть изо орды сыном его князем Димитрием в славный град Тверь и положено бысть честно со псалмы и песньми, и пеньми духовными, и с многими слезами от всего народа в соборней и апостольстей церкви, идеже и доныне безчисленныя чудеса источает с верою приходящим к пресвятому гробу его и прикасающимся многоцелебным мощем его.

Благоверная же и благочестивая и великая княгиня Aннa радовашеся душею и вельми Бога благодарствовавши, яко сподобил супружника ея, великого князя Михаила, пострадати за имя Его пресвятое и страшное и в добром исповедании блаженную кончину прияти. И нападши на перси его духовными слезами, яко к живу, сице глаголаше: «Блажен ecи, господи мой, великий княже, и по истинне во вся роды блажен будеши, яко пострадал еси по пострадавшем по нас, и се ныне отшел еси к возлюбившему тя Христу. И тамо божественную и неизреченную Его славу зриши и вкупе со ангелы воспеваеши Пресвятую и Живоначальную и Нераздельную Троицу. И ныне молю тя, ο, страдальче Христов! Да не оставиши мя погружену прелестьми жития сего, но помяни мя у престола Вседержителя Христа Бога нашего, яко да достойна и аз буду небесного чертога с мудрыми девами, и яко да не угаснет светильник души моея от доброго подвига. Тебе бо ныне стяжах о мне ходатая к Богу и молитвенника крепка». И сице довольно помолившися и целовавши любезно пресвятое тело его и, вместо многоразличных аромат, многими слезами облиявши тело его, отъиде в дом свой, славящи и благодарящи Христа Бога нашего и Его рождшую Деву, Владычицу нашу, Богородицу и Приснодеву Марию.

Что же по сем, благоверная княгиня Анна пребываше в дому своем с сыном своим благоверным князем Константином Михайловичем; тому бо юнейшему сыну его той славный град Тверь, отча достояния, в наследие достася. Яко горлица чадолюбавая вдовствующи, молитвами частыма и многим молением выну Бога молящи, яко, да и ту не лишит достояния святых лику и наследия небесного царствия. И многому посту и воздержанию себе вдавши, кротостию же и смирением украшашеся. Нищих питая, и странных и убогих повелеваше в дом свой вводити, и пищу им и одежду довольну подаваше, и сирот и вдовиц заступая, и насилующим возбраняше, наказуя и уча их не обидети нищих и сирот. И сице глаголаше, яко сиротам есть и вдовицам, и убогим Отец Небесный помощник и заступник, якоже и пророк глаголет: «Терпение убогих не погибнет до конца». И паки: «Сиру и убогу ты буди помощник». И всяку неправду ненавидя и всяко нечестие потребляя, учаше же и сына своего возлюбленного, благоверного князя Константина, еже любити Господа Бога всем сердцем и всею душею, и всею мыслию и Того выну пред собою имети, и святыя заповеди Его хранити, и суд праведен творити, и ласкания и лукавых словес от вельмож ненавидети, и любовь ко всем равну имети, и от насилующих сирот и убогих изымати. И таковыми благочестивая и великая княгиня Анна тогда плоды добродетелей цветяше и Богу угождающи, якоже и древнии святии. Помышляю же, како бы отврещися мира и единому Богу в молчании работати, и Toго доброты выну ненасытне насыщатися, понеже рече: «Уязвленна есмь Того любовию; и вслед Твоего человеколюбия потеку», глаголаше к Богу: «Прими мя, женише небесный, Иисусе Христе, Твоею любовию, и сопричти мя мудрым девам». И сице моляшеся Богу и исповедовашеся. Таже по сем блаженная, разсуждая в себе, глаголаше: «Аще пребуду аз в дому своем в таковей чести и славе и в покои, паче же в молве и суетии, яве отлучат мя от Божия любве и никогда же попустит мя в безмолвии единому Богу молитвою беседовати. И кая польза будет, аще человек и весь мир приобрящет, душу же свою отщетит. Ибо и Моисей, он Боговидец, никогда же бы сподобился славы Божия видети и в купине на горе Синайстей закон прияти, аще бы токмо не отлучился чести и покоя, и еже нарицатися сын дщери фараоновы. Сего ради подобает работающему Богу от всего усердия и на высоту добродетелей взыти, всякого покоя и славы мира сего бегати, и в дому Божии приметатися и без молвы Богу работати, се бо и Господь наш Иисус Христос учит нас глаголя: «Аще кто не отвержется себе, сиречь пристрастия земнаго, и не возьмет креста своего и в след мене грядет, не может мой быть ученик». Сему гласу святии отцы последоваша и святыя жены поревноваша, в пустынях вселишася и в горах, и в вертепах, и в пропастех земных, и еже чудо, яко и дневныя виши лишаемы бяху, и озлоблями от бесов; якоже и божественный апостол Павел глаголет: «Их же недостоин весь мир. Сего ради и Бог их воспрослави, понеже возлюбили Господа Бога всем сердцем». Что же успеет и мне мир сей, и слава его, богатство же и красоте века сего, и многая молва и мятеж бывающии! Невозможно бо единем оком зрети на небо, а другим на землю; невозможнейши же и весьма неудобно во многой молве от всего сердца Богу единому работати, понеже прелесть века сего помрачает очи душевныя и ослепляет мысли умныя и работающим Богу запинает во всякой добродетели. Что же пользова и рай праотца нашего Адама и Евы, егда бо видеста красоту древа, от него же заповедь прияста не вкусити. И что сотвориста, еда ли не прельстистася Ева очима ко древу, еда ли не поползеся Адам и не токмо испадение из рая пострадаста, но и от Бога отлучистася и смертию осудистася; еда ли аз крепчайшии онех буду, в таковей чести сый. И пред очима моима всяка честь и слава господства сего, и яко царица почитаема от боляр и от всех людей. И како могу аз избыти ловления и сети диаволи; понеже мнози от многих начаша в мире добродетели проходити, и малии обретошася сохрании. Сего ради девственный сосуд, возлюбленный ученик Христов Иоаин Богослов глаголет: «Не любите мира и яже в нем. Вся бо сущая видимаго сего мира похоть плотская, и похоть очная, и гордыня житейская». И сице разсуждая в себе блаженная, и поистине благочестивая великая княгиня Анна, вскоре и делу касается: весть бо, яко медление раскаяние обаче творити. Тогда блаженная оставляет мир и сраспинается Христу, оставляет дом, и господство века сего и изволи приметатися в дому Божии, паче и с понесшими тяготу и вар дневный водворитися, нежели жити в царских палатах, имети славу и господство мимотекущего, и яко сень преходящаго века сего. Се бо и Моисей Боговидец изволил страдати с людьми Божьими и имети поношение Христово, нежели имети временного греха сладость и жити в дому фараонове. Приходит убо в монастырь девичь, нарицаемый Софийский, в нем же храм Премудрости Слова Божия, и тамо поклоняется Богови, радостными слезами обливаяся, и на мног час Богу исповедовашеся, пометает же себе с великим смирением на нозе сущим тамо постницам и молит с кротостию, яко да и она от них тамо сочетана будет в лик. Оне же необычному пременению и великому смирению блаженныя дивляхуся. И яко раба моляше их, а госпожа всем сыи; сего ради бояхуся и ужасахуся

и в трепете велици послушаху словес ея, великия княгини Анны. Видяще же и сына ея, благоверного князя Константина, и всех боляр, и всего народа плачущихся, и дивляхуся, како толик плач не возможе блаженную отторгнути от любве Божия. Та же повелевает себе пострищи во святый ангельский образ. И сему бывшу, и приведе себе Богу жертву непорочну, и яко юница нескверная принесеся на всеплодие Вышнему Архиерею, Господу нашему Иисусу Христу. И исторжеся мирския прелести, яко птица от пругла и яко серна от тенета. И весьма радовашеся о Господе Бозе своем, яко получи желание сердца своего. От юности бо своея непрестанною молитвою Бога моляше, дабы сподобил благий свой ярем понести и того единого доброты выну наслаждатися. И тако благодатию Христовою нача подвизатися: постом и молитвами, и бдением всенощным, и слезы многия изливая, и непрестанно томляше себе алчбою и жаждою. Глаголаше бо, яко подобает плоть презирати, прилежати же паче о души вещи безсмертней, ведяше бо, яко мног труд иноческого жития и многими труды подобает внити в царство небесное. Нужно бо есть царство небесное, и нужницы восхищают е. Смирение же и кротость вельми любяше, ведяше бо, яко смирения ради вся коварства вражия растлеваются. Послушание же ко всем равно имеяше и всем постницам покоряшеся о Господе. Кто бо тоя слезы исповесть или труд, смирение же и кротость, и послушание, и терпение, и бдение, всенощное стояние, и любовь, яже к Богу? Како бо возможно словом постигнути или писанию предати. Выну бо пояше: «Прильпе душа моя по Тебе, Христе Боже, и возжада душа моя к Богу крепкому и живому. Когда прииду и явлюся лицу Божию». И тако помощию всесильного Бога, в мале времени превзыде добродетельми всех сущих тамо постниц. Егда же прихождаше ко преподобней сын ея, благоверный князь Константин, благословения ради и поучения с вельможами своими, она же учаше его, како Бога боятися и Тому угодная творити и ничто же от видимых, паче любве Его, предпочитати и на Того уповати. «Той бо есть, рече, царь царствующим и Господь господствующим; тем бо цари царствуют и сильнии держат землю, и ему же хощет подает царство. Той бо есть мертвит и живит, и низводит во ад, и возводит, убожит и богатит, смиряет и высит, возставляет от земля убога, и от гноища возносит нища, и посаждает с могущими людии, и престол земного царства подает ему. И несть кому мощно противитися величеству славы Его. Воли бо Его кто противитися может? Якоже и пророк Давид глаголет: «Ты страшен еси, и кто противустанет Ти. Яко Бог велий Господь и Царь велий по всей земли, яко в руце Его вси концы землении, и высоты гор того суть». Сего ради воспоминаше ему, да не величеством господства своего возгордится когда, но быти смирену и кротку и ненавидети неправду, поминати же смертный час и во всем последовати отцу своему великому князю Михаилу. И сице учаше его преподобная, отпущаше в дом свой. К прочим же никакоже беседоваше великая, но в молчании пребываше и единому Богу в молитве упражняшеся, поя Господеви в сердце своем: «Господь помощник мой и защититель мой, на Того упова сердце мое, и поможе ми, и процвете плоть моя, и волею моею исповемся Ему. И день от дне восхождение полагая в сердце своем, и душу свою просвещая божественным светопролитием, и ума зрительное очищая, и яко безплотна во плоти подвизаяся, и безплотных ликостоянию тщащися усердно постигнути, и разума духовного неспрестанно боговидения и разсуждения прияти. Имяше же во уме память смертную и сего часа поминаше, плакаше вельми, како по исхождении от тела испытание душам бывает на воздусе от лукавых бесов. И люто по истине тогда бывает душам, иже не имевшим тогда плода благих дел и во временней сей жизни не подвизавшимся, како бы угодити Богу и избыти вечного осуждения. Сего ради и божественный апостол Павел, уча нас, глаголет: «облецетеся, рече, во вся оружия Божия, яко возмощи вам стати противу кознем диавольским, яко несть наша брань к крови и плоти, но к началом, и ко властем, и к миродержителем тьмы века сего, к духовом злобы поднебесным. Сего ради возьмете вся оружия Божия, да возможете противитися в день лют, и вся содеявши стати. И якоже алчущему невозможно без хлеба быти, сице и хотящему спастися невозможно есть, аще не имать памяти смертныя».

Таже по неколицех летех, сыну ея, благоверному князю Константину, отшедшу ко Господу, тогда приходит во Тверь вторый сын ея из Кашина града, благоверный князь Василий Михайлович, но реклом Кашин, и молит матерь свою, преподобную и благочестивую и великую княгиню Анну, яко да прейдет от Твери града в господствущий его град Кашин и яко да посетит отечество свое, яко да он тамо выну зрит святое, ангелоподобное лице ея и сладкого учения присно да наслаждается. И сице моляше ю: «Елма убо, мати моя, преподобная и благоверная великая княгиня Анно! Сице Богу изволившу судьбами своими, яко скончавшуся брату моему, твоим пресладким учением присно наставляем, аще мне тогда и скорбно бе и весьма неутешно, яко лишен тогда сладкого твоего и частого учения, но не восхотех оскорбити брата моего и тебе молити, дабы пришла жити во град мой. Ныне же не могу терпети, еже быти ми от тебе в дальнем разстоянии и еже не насыщатися твоего божественного учения. И что живот мой и слава моя, и княжение мое, еже быти ми лишену твоего ангелоподобного зрения?» Преподобная же мати его отвеща к нему и рече: «Чадо мое возлюбленное, странно наше иноческое житие, и ложно никако ко Христу обещание, еже до последнего издыхания на единем месте, на нем же обещахомся, терпети всяку скорбь Христа ради, аще не времени некоему позывающу ли гонения ради, или частых наносимых ради скорбей бывающих, Христа ради понесшим тяготу и вар дневный; но и се подобает преобидети любве ради Божия. Или паки смотрения ради некоего подобает бегати в другое место, по Христову словеси: «аще гонят вы из града, бегайте в другий град». Ныне же помощию всесильного Бога, несть во граде сем ни гонения, ни иных скорбей находящих, якоже в прежнее время было при отце твоем, великом князе Михаиле Ярославиче, от поганых нашествия и своих сродник крамолы и зависти. И аще оставлю град сей и в твой град преселюся, буду подобна ищущим славы мира сего. «Никто же, рече Сын Божий, возложь руку на рало, зря вспять, управлен будет во царство небесное». He бо и Авраам, праотец наш, повелен бы был от Бога оставити отечество свое и преселитися в чужу землю, аще не бы возбранило ему отеческое издолобесие от Божия любве и познания. И како могу оставити град сей, в нем же дарова всещедрый Бог страстотерпца своего и моего супружника великого князя Михаила, его же в заступление и помощь имеет и к Богу ходатая весь град сей; и аз имею пред очима моима пресвятое и страстотерпческое тело его и, зря нань, усердно теку в добром сем подвизе; его же молитвами, аки некими крилы, вперяюся умом к Богу. Ни, чадо мое, ни, престани понуждати мя преселитися во град свой, и прочее нестужай ми». Он же со слезами моляше блаженную и не хотяше восклонитися от святою ногу ея. Паки рече к ней: «Веси, мати моя преподобная, яко от младых ноготь твоей любви привязан и тобою паче прочих братий моих любим бех, и никогда же бо твоего повеления преслушахся, и никогда же бо хотел отлучитеся твоего сопребывания. Но Божиих судеб несть кому возможно постигнути: зане по жребию и благословению святого отца моего и твоим достася мне в наследие град той. И есть ми любезен ради покорения и послушания боляр моих, и вельмож, и всего народа. И аще бы хотел оставити град той и преселитися семо по смерти брата моего, и твоего выну слышати медоточного языка учения, и зрения ангеловидного насыщатися, но никако же оставят мя вельможи мои и весь град, ради любве моея еже к ним, оттоле к тебе преселитися. Сего ради, по совету боляр моих и вельмож и всего града, приидох молити тя, весь бо град желает видети ангелоподобный твой зрак и в себе имети. И сице глаголют, яко да посетит преподобная и благоверная княгиня Анна отечество свое и да в нем пребывает. Того бо града, рекоша, таковая благочестивая и святая отрасль израсте от благоверну родителю, и есть нам печаль не мала належит, яко лишихомся пресладкого учения и святого лица ея зрения. Иди, благочестивый княже, во град Тверь и моли матерь свою, яко да преселится во град своего отечества, яко да будет граду нашему Кашину и всей области его вечная похвала тоя пришествием. Граду бо Твери дарова Бог молитвенника тепла и заступника скора, страстотерпца своего, отца твоего благоверного великого князя Михаила Ярославича, нашему же граду всяко дарует всещедрый Бог преподобную матерь твою, благоверную и великую княгиню Анну, в помощь и заступление во вся роды до века. Токмо потщися усердно дойти во град Тверь и умолити матерь свою, и Бог благий исполнит желание сердца твоего. Cегo ради, о святая и блаженная мати моя, да не остави мя тща, ради своего еже к нам преселения, да не презриши моления всего града, паче же мене возлюбленного сына своего, да не печалию снеден буду, еже лишену быти мне твоего медоточного языка учения; и лучше ми есть зде умрети, нежели возвратитися тщу во свой град». Таковые глаголы благоверный князь Василий ко преподобней матери своей со многими слезами изрече и в себе Бога моляше, яко да получит желание сердца своего. Блаженная же и преподобная княгиня Анна таковое моление от сына своего слышаше и веру его видевши, не без Божия промысла, разсуди, сему быти, но яко от Бога послан бысть к ней, преклоняется на моление и обещавается преселитися во свое отечество и тамо пребыти до дне исхода своего еже к Богу. И сице рече к нему: «Буди, сыну мой возлюбленный, по твоему молению и якоже Богу годе, тако и будет». Благоверный же князь, сын ея, слышав таковые глаголы, радости многи исполняшеся и всесильного Бога прославляше, яко не презре моления его. Тогда преподобная и великая княгиня Анна созва к себе постницы, иже в монастыре том, и поведает им свое еже от них отшествие. Оне же яко услышавше от преподобныя сицевые глаголы, слез исполнившеся, глаголаша к ней: «Камо грядеши, госпоже наше, и что ради разлучение твое от нас хощет быти? Еда в чем прогневахом тя, или неправдовахом пред тобою, или скорбь какую наведохом твоему непобедимому и терпеливому смиренномудрию? Еда граждане гонят тя от нашего сопребывания? Повеждь нам, госпоже преподобная мати, вину отшествия своего». Она же: «Не плачите, рече, сестры мои, видите, яко сын мой прииде из Кашина града, благоверный князь Василий, и той понуждает мя и молит со многими слезами еже преселятися отсюду во свой ему град. Аз же много отрицахся, дабы не отлучитимися от вашего постнического пребывания. Он же непрестанно моля мя, дабы пойти ми в Кашин град. Аз же разсудила в себе: не без Божия промысла сему быти, но яко от Бога послан прииде ко мне и моля мое смирение, дабы преселитимися отсюду, и Богу хотящу, и молитвам вашим поспешествующим мне во благое, хощу итти во град Кашин, к сыну моему, благоверному князю Василию. Вы же, сестры мои, оставайтеся зде с Богом и в молитвах своих поминайте мое смирение». Оне же реша к ней: «Аще, госпоже наша, отходиши от нас, на кого воззрим и кто нам путь смирения и кротости и безмолвия покажет? Кто же ли нам без тебе учение прострет, да яко возможем ловления диавола прейти?» Блаженная же рече и ним: «Бог благий благодатию своею да сохранит вы от многоплетенных сетей вражиих. Токмо молю вас, яко да имеете попечение о душах своих и красоту девства вашего храните без всякого вреда и свещу вашего течения доброго соблюдите неугасиму, дóндеже приидет небесный Жених, Христос Бог наш. И аще обрящет ны в первем нашем воздержании и добром течении иноческого жительства, тогда введет ны на браки своего небесного царства со всеми святыми. Аще ли не таковых нас обрящет, всяко и нам возглаголет, яко и буим девам: «Отыдите от Мене, яко не веде вас». И тогда плакати имамы во веки веком, яко погубихом труд чернечества нашего. Но подобает нам со всяким смиренномудрием и кротостию духа молити человеколюбивого Бога Господа нашего Иисуса Христа, дабы сподобил нас с мудрыми девами небесного своего чертога наследницами быти, и дабы доброе течение соблюл по своей ему благости цело и непорочно, яко Тому подобает всяка слава во веки, аминь». Оне же слышавше учение ея, вельми дивляхуся безмерному смирению и реша к ней: «О, госпоже наша, преподобная мати! Кто убо виде безмерное твое смирение и любовь, послушание же в терпение, кротость и незлобие, и милосердие ко всем, успех своему житию не приимаше и всемилостивого Бога не прославляше. Мы, видевше твое постническое житие, пост и воздержание, и непрестанную любовь, яже к Богу, зело успех своему житию приимахом. Ныне же, госпоже, отходиши от нас, како не сетование нам будет твое разлучение, и како нам не плакати: еже дарова Бог, сего лишаемся. Но молим тя, госпоже, не оставляй нас сирых, но пребуди с нами». И сицевыми словесы хотяще удержати неудержимую, мняще, аще послушает тех, паки пребудет с ними. Но блаженная и преподобная мати утешаше их сладкими учении: «Не скорбите, рече, сестры мои и госпожи, аще отхожу от вас, но и тамо вы со мною есте, и аз с вами буду духом. И аще всеблагий Бог союзом духовныя любве совокупил нас, кое тех разлучение или разстояние приимет?» И мир дав им, и лобза коюждо святым целованием, отходит в соборную церковь, и тамо на мног час Богу моляшеся, покрыти ю своим человеколюбием, идеже аще изволит ей быти. Паки же припадает со многими слезами и ко гробу супруга своего, страстотерпца Христова, благоверного и великого князя Михаила, яко да и тамо помогает ей молитвами своими. «Понеже, рече, велика стяжах тебе к Богу ходатая и молитвенника». И сице помольшися и приимши благословение от епископа, пути касается, всем людем плачущимся о отшествии преподобныя, яко мнети им тогда и глаголати, яко прогневася на нас Бог тоя ради отшествия и, аще не бы согрешихом пред Богом, не бы попустил когда отъити преподобней от града нашего. Благоверный же князь Василий многу милостыню подав сущим тамо постницам, и пищею удоволив, и всем нищим и убогим, яже во граде, такоже многу милостыню подав, и благословение приим от епископа, отходит во свой град, поим с собою и матерь свою, преподобную и благочестивую княгиню Анну, вельми прославляше в сердцы своем всемилостивого Бога и Пречистую Богородицу, яко получил желание своего благого хотения.

Егда же приближася ко граду, тогда изыдоша вси людие града Кашина, иереи и иноцы, мужи и жены, и старцы со юнотами, во сретение преподобныя и блаженныя Анны и, друг друга предваряюще, хотяще преподобную видети, и овии прикасахуся воскрилию риз ея, освящение приимаху, инии же зрением токмо ангелоподобного лица ея освящахуся и Бога прославляху и Того Пречистую Матерь Пресвятую Богородицу. И сице приглашаху: «Приими, славный граде Кашине, свою похвалу и славу неотъемлему и радость присноцветущую. Яже ты изведе от себе плод богоданен и ветвь благочестивую, паки преблагий Бог к тебе приведе, и радуйся радостию непобедимою во вся роды, и радости твоея никто же не отъимет от тебе». И тако Божиими судьбами и Того хотением преподобная и блаженная великая княгиня Aнна, супружница великого князя Михаила Тверского, преселися во свое отечество, в славный град Кашин, от града Твери. И начат ту подвизатися большими труды и подвиги, и пощении, и молитвою непрестанною вооружатися на невидимые враги, и стоянием всенощным победила бесовския брани. И толико истни себе блаженная постом и многим воздержанием, яко токмо познаватися составу человеческому, якоже глаголет пророк: «Прильпе кость моя плоти моей, и колена моя изнемогосте от поста и плоть моя изменися елея ради». И весьма плоть покорила духу, и жилище явися пресвято Пресвятыя и Единосущныя и Животворящия и Неразделимыя Троицы. Пришед бо Христос со Отцем и со Святым Духом, обитель сотворил себе в пресвятей души ея; и толико возлюбил красоту, благородие чистоты ея, яко и по смерти соблюде святое тело ея невредимо от тления, якоже и ныне всем видится воочию. Любляше же блаженная безмолвие и никому же беседование, но точию егда прихождаше к ней сын ея, благоверный князь Василий, и сего учаше и наказоваше, како любве ради Христовы видимая презирати и ни во что же красоту века сего вменяти, любити же и боятися и почитати страшного и славного всесвятого Бога, и того вечных благ искати милостынию и благотворением к нищим: «Ничто же бо, рече, тако просвещает человека и до престола душу доводит, якоже милостыня»; поминати же смертный час: «Понеже, рече, чадо мое возлюбленное, аще царь или князь, или богат, или нищ, раб или свободь, все смерти предаются, и никто же от них на земли во веки пребывает, но яко сень скоро преходит, и яко цвет скоро увядает, держати же ся правды, понеже правда же во веки пребывает». Праведный рече приточник: «От веры жив будет, вместо же его предается нечестивый». А еже смирену и кротку, и милостиву, и долготерпеливу, и «Аще, рече, тако поживеши, будеши долголетен на земли, и никто же на тя злое помыслить когда, и сопостатом твоим страшен будеши, и вечного блаженства от Господа нашего Иисуса Христа покой на небесех приимеши». И сими поученьми наказоваше сына своего, благоверного князя Василия, отпущаше его в дом свой. Сама же единому Богу беседоваше молитвою непрестанною и прочими богодухновенными делы просвещаше душу свою. Благоверный же князь Василий, таковыми ученьми от преподобныя матере своея наставляем и наказуем, яко древо при исходящих вод напаяемо, возращая сторичен плод, и никогда же преступаше наказания богоблаженныя, но тщашеся усердно последовати стопам ея. Поживе же преподобная княгиня Анна, по прешествии от Твери в Кашин, неколико лет во мнозех трудех и пощениих, и воздержании, и в молитвах.

Таже, уведавши свое отшествие к Богу, призывает к себе сына своего, благоверного князя Василия, и много поучив его о вере и о милостини, по сем же некако сказует ему и отшествие свое к Богу. Он же, яко услышав, вельми восплакася и рече ко блаженней: «О, мати моя преподобная! Кому нас оставляеши, и от кого по твоем отшествии учение восприиму, что же ли живот мой, кроме твоего пресладкого учения и наказания? Уне ми с тобою умрети, нежели по отшествии твоем лишену быти ми ангелоподобного твоего зрения». Великая же рече к нему: «Не плачи, чадо мое возлюбленное, и не скорби о сем: предаю бо тебе и весь град сей в руце всемилостивому Богу и Пречистей Богородицы. Той да наставит вас на всяку истину и исправит стопы ваша к деланию божественных заповедей Его. Токмо, чадо мое возлюбленное, держися, яже научен еси, и в их же пребываеши, и имей к Богу веру несумненну, и Бог мира да будет с тобою. И молитва отца твоего, великого князя и страстотерпца Христова Михаила, и мое благословение во веки на тебе пребудут». Тако же наказавши и вельмож его, како всем сердцем Бога боятися и угодная пред ним творити, и Того пресвятыя заповеди безленостно соблюдати, и послушание и покорение во всем имети к сыну своему, благоверному князю Василию, и суд в правду судити, и не насиловати немощным, воспоминати же им евангельских шесть заповедей, «Их же, рече, истязани будете от Бога. И аще тако сотворите, и того ради сподобитеся от Бога милости и небесного царствия наследия».

И сице поучив блаженная и преподобная и великая княгиня Анна и помолився за них и о всем граде, таже возлеже на одре и опрятавшися велелепие, и сице рече: «Владыко, Господи, Иисусе Христе мой, ненадеющимся надежда, источниче благоутробия, Тебе света пресладкого возжелех и Тебе душу мою предаю, приими ю и покой со всеми святыми». И тако предаде честную свою и ангелом говейную душу в руце Господеви, Его же возлюби от юности своея и непрестанно вслед Toго человеколюбия течаше, в лето 6846-е, месяца октоврия в 2-й день (т. е. 2 октября 1337 г).

Благоверный же князь Василий, сын ея, видев матери своея преподобныя и блаженныя и великия княгини Анны отшествие к Богу, и напад на перси ея, со слезами вопияше: «О, мати моя преподобная и преблаженная, свете очию моею, учительнице и наказательнице моего ума! Аще и скончала eси свою жизнь и прешла eси от временных на безконечная, и от многих трудов на вечный покой, но духом не отступай от нас, чад своих, и молися Христу Богу нашему о сохранении державы моея и о спасении всего града, в нем же изволила еси жити и душу свою предати Господеви, и избавитися нам от всех находящих нам видимых и невидимых враг и спастися душам нашим». Слышано же бысть по всему граду преставление преподобныя, скоро притекоша мужи и жены и со младенцы, нищии и убозии. Вельможи плачущеся, яко истинная им бе учительница и окормление животу их, нищие же и убозии, сироты и вдовицы рыдаху, яко питательницы своея и крепкия помощницы, и непобедимыя заступницы лишишася. И тако положиша на одре честное и трудолюбезное тело блаженныя и великия княгини Анны, понесоша честно со псалмы и песньми, и пеньми духовными сын ея и с вельможами своими в соборную церковь Пресвятыя Владычицы нашея

Богородицы честного и славного ея Успения, и отпеше надгробная пения, и погребоша тело преподобныя под соборною церковию со псалмы и песньми, и пеньми духовными; отдаша персть персти, много плачущеся и сетующе, яко лишишася добрыя учительницы и крепкия заступницы, обаче надеющеся, и по отшествии ея иже к Богу, незабвенно в молитвах своих память имети о отечествии своем. И тако разыдошася кождо в домы своя, славяще и благодаряще Бога.

Сицево житие преподобныя, таково иже во плоти равноангельное блаженныя и великия княгини Анны на земли пребывание, иже от младых ноготь нача Богу работати благими делы, всем сердцем любити. И ничто же от видимых сущих на земли, яже прелесть мира сего, хотящим Богу работати помрачает очи, паче любве Божия предпочте, и до конца гнушашеся славы века сего суетного, и якоже преже сопряжения добродетелей прилежа, тако и в сопряжении и наипаче божественным заповедем вседушно прилежа. И по скончании супруга своего, великого князя Михаила, чистоту своего благородия нескверну соблюде, и в постничестем тризнищи, иноческом пребывании добрым подвигом подвизася.

И ничто же возможе отлучити ю от любве Божия: ни слава мира сего, ни красота века сего, ни честь, ниже величество, но вся сия от юности преобидети нача, тако и сконча; и во уметы положи и до конца оплева, токмо единого Христа да приобрящет, и Того доброты выну и славы божественныя да насладится. Сице и Христос Сын Божий возлюби ю и венча святый верх главы ея светлым венцем правды, и достойну сотворил ю небесного своего чертога, и с мудрыми девами причте ю в царствии своем небеснем. Сын же ея, благоверный и великий князь Василий, такоже и той житие свое благочестно и мирно препроводил, и с миром ко Господу отъиде того же лета, месяца июля в 24 день. Бе бо смиренномудр и кроток, и милостив до конца, и во всем, ревнование житию родителема своима. О всем мире молятся и ходатайствуют о отечествии своем.

Сия тебе моих словес плетения, о преподобная мати и богоблаженная великая княгиня Анно, приими е, яко дар любочестен, и аще точно твоему равноангельному иже во плоти житию буди благодарение Богу, того бо есть дар и от еговых велелепному Божества славы Его вся сия приносим, якоже и оная вдовица убогая, иже две цать принесый Богу в дар и свидетельствована бывши паче множества принесших. Аще ли что и недостаточно явися твоему богоугодному пребыванию, обаче по силе принесохом тебе, елико подаде благодать Святаго Духа. Кто бо может по достоинству изрещи ваше иже во плоти ангельское пребывание и еже многие труды и поты, пощение и воздержание, и слезы непрестанныя, смирение же и кротость, и любовь нелицемерную, еже и сами ангели удивишася невещественному вашему житию! Ты же молися, преподобная и богоблаженная великая княгиня Анно, о мне недостойнем ко Христу Богу, и достойна мя сотвори небесныя породы наследника быти и избавитися вечного осуждения, и твоими молитвами в настоящем сим житии сохранену быти от многоплетенного коварства вражия. Благодатию и человеколюбием Господа нашего Иисуса Христа, с Ним же Отцу купно и Пресвятому и Животворящему Его Духу всяка слава и держава от всея твари, честь и поклонение, ныне и присно, и во веки веком. Аминь.

О явлении преподобной матери нашей благоверной великой княгини Анны, и чудо о пономаре, именем Герасиме

Прешедшим убо многим летом по успении блаженныя и великия княгини Анны, яко двесте и четыредесять и три лета, в неже время всещедрый Бог благостию своею явил нам источник неисчерпаемый, гроб знаменоносныя матере и великия княгини Анны. И по явлении том неведом бе и небрегом святый гроб ея, зане сущу времени тогда в Российском господарстве нестройну бывшу, от нашествия богомерзких, латинския ереси восприемников, литовских людей, якоже летописныя книги повествуют.

Царствующу бо тогда в Московском государстве и скиостры Российского царства правящу царю Василию, тогда убо окрест Московского царства безчисленное воинство бяше литовских людей, на взятие царствующего града готовляхуся, прочие же грады окаяннии пленующе и пожигающе, и в запустение полагающе. И многия святыя места, и честные монастыри разориша, и крови христианския окаяннии множество пролияше: от Москвы даже и до Великаго Нова-Града и окрест окияна моря протече необузданное их воинство. Богу тако попущающу за грехи наша, яко да накажемся человеколюбие Его не гневати, и яко да научимся пресвятыя заповеди Его не преобидети, но да всегда пред Ним угодная навыкнем творити. Той бо сам глаголет пророком своим: «Аще Мене послушаете, благая земли снесте; аще ли не послушаете, оружие вы пояст». И яко же речено бысть, яко злохищенныи волци, литовстии людие нещадно погубляюще овцы стада Христова, и несть кто возбраняя им или сопротивляяйся. Понеже царю Василию и самому тогда сущу в велице утеснении, бывшу елико от литовского воинства, паче же от своих присных мятежи и нестроения бяху.

Единою же нападше окаяннии литовстии людие изгоном на град Кашин внезапу, людем же града Кашина о приходе ко граду неведущим и нестрегущимся, и острогу около града в то время не было. И елице незапно во граде обретоша, многих посекоша, иных, раниша и многие домы разграбиша, и вскоре от града отъидоша. По отшествии же их, литовских людей, града Кашина граждане собравшеся и поставиша по осипи острог и начаша стрещися. И егда поставиша острог, последи же приразишася окаяннии литовстии людие ко граду Кашину не токмо единою, но и дважды и трижды, но ничтоже возмогоша успети или зла сотворити, Богу его соблюдающу ради молитв благоверныя княгини Анны. Людие же, сущи тогда во граде, бяху ратнии и простии, видевше милость Божию, иже от нашествия латинския ереси восприемников невредим пребывает град, и paзyмевше, яко не от своея им силы соблюдается, обаче не ведаху, яко кто бе по них поборает и избавляет их от пленения сопротивных, понеже все грады плещи своя вдаша воюющим. Тогда убо премилостивый Бог восхоте показати рабу свою и явити людем своим целебный источник и сущую помощницу во граде, преподобную и благоверную великую княгиню Анну, сим образом.

По отшествии убо преподобныя к Богу, погребено пресвятое тело ея под соборною церковию Пресвятыя Богородицы честного и славного ея Успения, и многими леты пришедши той церкви в ветхость, якоже и помосту церковному обвалившуся до самыя земли и разрушуся. Тогда гроб великия княгини Анны обретеся на верху земли, и людие же воиньстии, иже во граде том учинении бяху на сохранение града, приходяще во храм Пресвятыя Богородицы помолитися и от неведения полагаху шапки свои на гроб блаженныя, инии же неразумнии и саждахуся, мняше быти гробу просту, и никакоже помышляху, кого нетлению причастна быти в нем и сущую во граде заступницу. Господу Богу изволившу в то время явити угодницу свою людем своим, яко да не к тому преобидима бывает благодать Его, юже дарова угодником своим, но да прочее яко светило сияет на подсвещнице.

В то время, о дивна дела Твоя Господи! В неже тьма богомерзких и треклятых литовских людей повсюду обношашеся, и крови христианския проливахуся, и людие в велицей скорби и печали суще, и страхом сердца их сокрушахуся, тогда убо Господь наш Иисус Христос изволил рабу свою явити. Является преподобная и богоблаженная и великая княгиня Анна, в велицем иночестем образе одеяна, пономарю церкве Пресвятыя Богородицы, именем Герасиму, ему же тогда в велице болезни бывшу и весьма ко вратом смертным приближающуся и отнюд не начаему живу быти. И явлением своим исцеление ему подаде и здрава его сотворила. Та же поведает ему о себе, кто бе. Потом, поношая им о неразумии их, сице глаголет: «И почто, рече, гроб мой ни во что же вменяете, и мене презираете, и яко просту помышляете гробу быти? Не видете ли людей приходящих и шапки свои пометающих на гроб мой и садящихся, понеже от вас невозбраняеми бывают, и отнюд небрегома бе от вас и преобидима, и несть разумевающаго в вас? И доколе тако быти ми от вас попираеме ногами. Или не весте, яко аз молю всемилостивого Бога и Того рождьшую Матерь Пресвятую Богородицу, дабы не предан был град сей в руки враг ваших, и многих пакостей, находящих на вы, соблюдаю вас? И понеже се в неведении твористе. Обаче ныне не мози, человече, ослушатися моих словес, да не горша сих постражеши. Но иди ко презвитеру сея церкви и ко всему причту, и повеждь им вся сия реченная от Мене, яко дабы отселе гроб мой честне имели и приходящим бы возбраняли садитися нань, и шапки класть не велели, и свещу бы есте возжегли на гробе моем пред Нерукотворенным образом Господа Бога и Спаса нашего Иисуса Христа». Той же пономарь от видения в себе быв и скорому пременению еже от болезни здрава себе видев, вельми дивляшеся и Бога прославляше, яко безчисленное богатство благости своея открыл есть и от врат смертных возведе, и великую княгиню Анну немолчными усты похваляше.

Таже нимало замедлив, бояся прещения, но скоро приходит ко презвитеру и с ним всему причту тоя церкви поведает вся реченная от преподобныя, и яко здрава его сотворила от недуга и неисцельныя болезни, и отнюд к смерти приблажающася посещением явления своего от смертных врат возведе. Они же слышавше таковая и онаго ведяху вельми болезненна бывша и не начаема, видевше исцеление получивша, благодарственными песньми всесильного Бога и Пречистую Богородицу воспрославиша, яко неистощимое богатство и небесное сокровище, и крепкую помощницу явил им, и блаженную и великую княгиню Анну прославляюще, таже и всем людем поведаша. И оттоле вси людие града Кашина, яко стяжавше крепкую по граде поборательницу и непобедимую во бранех помощницу, никако же не имеяху скорби еже от нашествия безбожных и латинския ереси восприемников, скверных и преокаянных литовских людей, ведуще, яко не оставит преподобная отечества своего в руце нечестивых предану быти. Таже по повелению преподобныя на гробе ея пред нерукотворенным образом Господа Бога и Спаса нашего Иисуса Христа свещу неугасимую возжгоша, и мнози приходяще с верою помолитися Пресвятей Богородице и гробу богоблаженныя честне и велелепне, яко же подобает святым, поклоняхуся и почитаху. И вси, иже многоразличными болезньми содержимии, прикасахуся честному гробу ея и неоскудную благодать от преподобныя почерпающе, отхождаху в домы своя здравы, славяше и благодаряще Христа Бога нашего и Того рождьшую Матерь Пресвятую Богородицу, и благодать велию исповедающе благоверныя и великия княгини Анны, яко молитвами ея здрави бываху. Но тогда аще и многим чудесем, бывающим от гроба преподобныя, и мнозей благодати, изливающейся от живоприемного гроба, обаче в простоте ума своего, или Богу тако изволившу судьбами своими, не подтщашася таковый светильник, иже под спудом сокрытый, пресвятое и нетленное тело богоблаженныя и великия княгини Анны, на свещнице поставити, сиречь яве быти мощем, дабы видим был таковый источник неисчерпаемый всем приходящим, якоже подобает святым и другом Божиим и творящим волю Его. По еже отшествии их к Богу, церкви Божия прият воспевати псалмы и песньми, и пеньми духовными прославльших Господа своим божественным житием. Бог же и се творит смотрения ради некоего, яко да покажет всем яве таковое неистощимое богатство, древния своея благости источник неисчерпаемый во свое время, когда он весть судьбами своими. И от того времени, в неже явлен бысть гроб преподобныя, тако почитаем бе и покланяем честне и велелепне.

О обретении честных мощей преподобной и благоверной великой княгини Анны

Во дни благоверного и христолюбивого царя и великого князя Алексея Михайловича, всея Руси самодержца, и при святейшем патриарсе Иосифе московском и всея Руси, благий и преблагий и всемилостивый Бог наш, иже неизреченного своего благоутробия пучину излия на нас богатно щедротами своими, даровав нам божественного своего сокровища неистощимое богатство, и открыл есть в последняя сия роды иже под спудом лежащий светильник, и подаде неисчерпаемый источник от приснотекущия своея благости, мощи преподобныя и благоверныя княгини инокини Анны, и толиким бо летом прешедшим по преставлении блаженныя и никако же тлению причастны показал. И яко же прежде царивше рехом неизследимыми судьбами Владыки всех и Бога, творящего преславная и непостижимыя чудотворения роду человеческому, явився гроб благоверныя княгини, инокини Анны, поверху земли, и многим преестественным чудесем от него изливающимся. И сие видивше презвитер тоя церкви и со иже с ним причет церковный, таже и прочий священнический чин и вси людие пресловущего града Кашина, како таковый неисчерпаемый источник повсегда истекает и никогда же оскудевает, и в себе помышляюще, яко Бог благодатию своею дарова граду нашему таковое сокровище неистощимое, и яко многу времени прешедшу по явлении гроба преподобныя, и никого преже нас бывших, глаголаше, подщавшихся, ведяху, еже бо мощи преподобныя яве сотворити. И се ныне пред нами воочию нашею всякому приходящему от всечестного гроба ея изливается благодать, спасительная всем человеком, и яве показующи нам преестественными чудесы, аще и нам молчащим, но многая чудеса яве творят данную благодать, иже от юности возлюбившей Христову смирению и Его легкое иго поносившей, благоверной и великой княгине Анне. И како таковый божественный сосуд, иже небесного мира полный во гробе лежащий, аки под спудом сокрытый и никим же ведом. И доколе супостат наш, враг и диавол, и сопротивник святых, таковым нашим нерадением и небрежением поносит нам. Той бо вся козни и лукавства и ухищрения, но Христову благодать оболкшеся, того пронырства до конца победиша, и яко худая птица попираем от них. По смерти же своей, вся наша страсти неисцельныя исцеляют и того козни нам творят. И сего ради лукавый сатана не хощет ни единым божественным мощем, их в видении быти всем человеком.

Якоже и в пренесении мощей явлено есть первомученика и первослужителя апостола архидиакона Стефана от Иерусалима в Царьград, како нечистии дуси на пути вопияху: «О, горе нам, яко первомученик Стефан идет мучити нас!» И аще не бы Божия десница тех стремления возбранила, не бы убо когда попустили лукавии беси мощем его явленным быти всем людем. Якоже и в прочих житиях святых написано есть вся козни и ухищрения лукавого сатаны, творимая от святых мощей. И таковая в себе помышляху, любовию вперяющеся, еже бы дойти в царствующий град Москву и поведати государю царю и великому князю Алексею Михайловичу, всея Руси самодержцу, о таковых и толиких многоразличных чудесех благоверныя и великия княгини Анны, дабы повелел государь царь таковому светилу из под спуда на свещнице поставитися и церкви Божия Матери свою красоту восприяти. И сему бывшу, вскоре делу касаются.

И царствующего матери градовом, богоспасаемого града Москвы, достизають и тамо государю царю и великому князю Алексею Михайловичу, всея Руси самодержцу, вкупе со святейшим Иосифом, патриархом московским всея Руси, таковый неисчерпаемый источник во своем граде, гроб благоверныя и великия княгини инокини Анны, супружницы благоверного и великого князя и страстотерпца Христова Михаила Тверского, на верху земли поведают, вкупе же и многия и различныя чудеса, бывающия от всечестного гроба ея молитвами преподобныя, яве извещают. И яко от лица церкви Божия Матери благочестивого царя молиша, сице глаголюще: «Даруй, царю благочестивый, мою красоту велелепную и утварь многоценную, и сокровище неистощимое, и светильник пресветлый, источник неисчерпаемый, сосуд божественного мира полный, гроздь истинныя лозы; повели открытися гробу моея дщери возлюбленныя и яве быти мощем Преподобныя всем приходящим. Доколе такому небесному сокровищу под спудом лежати? Не могу бо сея надолзе зрети во гробе затворену, понеже аки многим облаком, спокрывшим пресветлыя лучи чувственного солнца, сице и моея дщери во гробе затворенныя мощи доселе никем ведомы. И доколе в поношениих есмь от всех ради такового презрения? Cе бо и Жених мой небесный, иже предобручил мя Себе невестою, Сын Божий единородный и соприсносущный Отцу и Святому Духу, иже сый сияние славы Отча, вопиет во святем своем Евангелии, яко неподобно светильнику возженному под спудом быти, но на свещнице полагатися, яко да светит всем, иже во храмине суть. Аще ли откровено будет таковое пречистое селение, божественный сосуд, тогда буду от всех славима и ублажаема, восприимши в себе таковый источник, иже от многих лет сокровенный. Такова слава моя, таково украшение мое, таковою добротою и утварию украсив мя небесный мой Жених и твой Творец и владыка. Кроме же таковыя утвари, еже есть мощей святых и образов подобия их написанных, лишена бываю славы и яко горлица пустынная пребываю».

Сия слышав, благоверный и христолюбивый государь царь и великий князь Алексей Михайлович, всея Русии самодержец, вкупе с богомольцем своим и отцом, святейшим Иосифом, патриархом, радости многи наполнившеся и благодарственныя песни всемилостивому Богу возславше, яко таковое сокровище своея благости во дни благочестивыя державы его открыл есть, таже вскоре посылает своя царская писания во град Тверь к сущему тамо архиепископу Ионе, повелевает ему немедленно дойти во град Кашин, и мощи благоверныя и великия княгини инокини Анны со всяким благоговением открыти, и таковое небесное сокровище и источник приснотекущий не к тому покрывати или в земли положити, но яко свещник на свещнице возложити, яко да видевше чада церковная и Христова стада словесныя овцы мощи богоблаженныя великия княгини Анны, прославят Бога Отца и Единороднаго Сына Его, Господа нашего Иисуса Христа, и Пресвятого и Животворящего Его Духа. Принесену же бывшу таковому царскому писанию во град Тверь ко архиепископу Ионе, и прочет вскоре пути емлется, поим о собою весь клирос соборныя церкви.

И пришед во град в Кашин, молебная пения и благодарственныя песни ко Христу Богу и Пречистей Богородице принесе, таже и всенощному бдению и утреннему славословию бывшу во храме Пресвятыя Владычицы нашея Богородицы и Приснодевы Марии честного и славного ея Успения над гробом преподобныя и великия княгини инокини Анны. И после божественныя литургии, певша надгробныя пения богоблаженней со псалмы и пеньми, и песньми духовными, со всяким умилением и благоговением, и многому благодарению бывшу, людем же всем взывающим: «Господи, помилуй!» И абие преосвященный Иона, архиепископ, священныма своима дланьма со архимандриты и игумены, и cο множеством священнического чина всечестному ковчегу касается, и открывше приснотекущий источник мощи богоблаженныя и великия княгини и инокини Аннны и видевше яко крин во удолиих сияющ и яко финик цветущий. О, непостижимым судьбам Твоим, Владыко Христе Царю! Обретше мощи, его же не надеявшеся, целы и неразрушимы, и никако же тлению причастны быша, ни поне ризам ея: аще и некая часть к сродному сродное отдадеся. Но слава всемогущему Богу и Пресвятей Его Матери, Пресвятей Богородице, яко тако прославляют угодников своих. Таже благоухания неизреченного воздух наполнився от мощей преподобныя и всех услаждая и возвеселевая сердца, подвизая на благодарение и славословие, иже во святых чудодействующему Богу, таковая преславная чудеса творящему. Еже архиепископ Иона со всем священным собором многая благодарения Богу изрече, яко в последняя сия роды таковое небесное богатство, от многих лет сокровенное, нетленно явил людем своим. И «Слава Ти, Владыко мой, Иисусе Христе, глаголаше, яко сподобил мене недостойного видети приснотекущий источник, древняя своея благости сокровище, пречестныя мощи благоверныя великия княгини и инокини Анны. И что воздадим мы, недостойнии, Твоему непостижимому и человеколюбному благодеянию, иже твориши человеческому роду своим человеколюбием. Волий еси Господи, и чудна дела Твоя, и ни едино достойно слово к похвалению чудес Твоих». И такое благодарение воздав всесильному Богу, и целовав любезно святыя мощи преподобныя и богоблаженныя и великия княгини инокини Анны, и благословив когождо по единому, отъиде во свой град Тверь, славя и благодаря Христа Бога нашего и Того рождьшую Пречистую Матерь, Пресвятую Богородицу, и их угодницу преподобную и великую княгиню инокиню Анну. Таже и писанием возвещает государю царю и великому князю Алексею Михайловичу, всея Руси самодержцу. «Яко во дни, рече, твоея благочестивыя державы, благочестивый и христолюбивый царю, открыл есть Господь в последняя сия роды, ради боголюбивыя твоея веры, юже имаши ко святым Его угодникам, таковое безценное богатство и поистине дражайшее паче древняго кивота, мощи благоверныя и великия княгини инокини Анны. И мы, видевши, яко благодатию Христовою никако же тлению причастны явишася, ни поне ризам ея».

Благочестивый же и богомудрый государь царь, слышав таковая, великою радостию радуяся о обретении мощей благоверныя и великия княгини инокини Анны, и вельми Бога благодарствив и Пречистую Богородицу, яко посетил люди своя, их же стяжа пречистою кровию своею, таковым безценным сокровищем. Но кто может изрещи иже тогда благочестивого царя веру и любовь ко преподобней! Аще бы мощно ему взяти златыя крыле, по пророку богоотца Давида, и прелетети желанием богодуховным вскоре во град Кашин, якоже некогда Аввакум пророк в Вавилон обретеся, или, паче рещи, к богоприятному и пречестному селению божественного кивота Пресвятой Богородицы на Тоя успение апостоли снидошася на облацех в мгновении ока от конец земли, тако и он, благочестивый и Богом хранимый государь царь и великий князь Алексей Михайлович, всея России самодержец, толикою любовию божественною возгоревся, и желанием парим видети мощи благочестивого корени, пресловущего благоверного и великого князя Михаила Ярославича Тверского, супружницы его благоверныя и великия княгини инокини Анны, и целовати любезно пресвятое тело ея и поклонитися цельбоносному гробу ея. Аще бо тогда и отложил на время путное шествие ко граду Кашину, но обаче в приидущее лето веру свою боголюбивую делом совершил ю, якоже в пренесении честных и многоцелебных мощей преподобныя и богоблаженныя великия княгини Анны написася о сем.

Мы же, церковная чада, сошедшеся во обретение честных и святых мощей благоверныя и великия княгини инокини Анны, духовне празднуем, во псалмех и в пениих, и в песнех духовных восхваляюще Господа Бога и Творца своего, и приимшаго труды и подвиги угодницы своея благоверныя и великия княгини инокини Анны, и той верх пресвятый венчавшего божественною славою своею, и многими преестественными чудесы обогащьшаго, немолчными усты воспоем и восхвалим. И тако в таковом духовнем торжестве любовию вперившеся и на высоту божественного разума возшедшую похвалами воспоем, сице рекуще: «Радуйся, преподобная и богоблаженная великая княгиня Анна, иже от юности своея нача Богу работати и того пресвятыя заповеди усердно в сердцы своем прияла еси. Радуйся, духовная мати, иже возненавиде красоту и славу мира сего, токмо единого возжеле преславного света Иисуса Бога нашего доброты выну наслаждатися и Toго божественныя славы наследница быти. Радуйся, преподобная и преблаженная великая княгиня Анна, иже супругу своему, благоверному и великому князю Михаилу, подала еси совет благ к страданию мучения добрым подвигом еже за Христа кровь свою излияти. Радуйся, ластовице прекрасная и горлица чадолюбивая, иже по оного иже за Христа мучения, вдовствующи и чистоту девства своего сохранила еси, и к Богу выну беседовала еси молитвою и постом и воздержанием многим, якоже древле блаженная пророчица Анна, иже во евангелии свидетельствованная, в дому Божии присно соводверяющися. Радуйся, пречистое селение и жилище Святого Духа, иже всяку славу и честь и господство века сего оставила еси, и до конца оплевала еси, я и ни во что же яко уметы положила еси вся сущая в мире, и Христу единому последовала еси, и Его пресвятое иго на раме носила еси, и многими добродетельными делы угодила еси. Радуйся, преподобная мати Анно, иже невозвратным путем шествовала по заповедем владыки своего Христа, и ничто же паче любве Его предпочте, сего ради и Христос возлюби тя, яко невесту прекрасную, и с мудрыми девами в чертозе своем сочтал тя есть, и по успении твоем соблюде пресвятое тело твое нетленно, душу же твою святую в премирная селения вселил и многими чудесы обогатил тя есть. Радуйся, крепкая помощнице отечеству своему, граду Кашину, и всей области его великое утверждение. Радуйся, заступнице и всем скорбящим душею божественное утешение. Радуйтеся и веселитеся, супруга Христова, благоверный и великий княже Михаиле, вкупе с супругою своею великою княгинею Анною, и радости вашей никто же отъимет от вас. Радуйтеся, светила пресветлая, иже всю Русскую землю просветила еси божественными зарями чудес ваших. Радуйтеся и веселитися, угодника Христова, вы бо врача показалася еста всем приходящим с верою к цельбоносным мощем ваю и исцеляста страсти наша неисцельныя. Молитеся, святая, вкупе Христу Богу нашему даровати благоверному царю нашему на враги победу и одоление, и миру смирение, и всей Российской земле великое утверждение, яко да и мы молитвами ваю получим оставление грехов и житию исправление, и небесного царствия наследницы будем. Благодатию и человеколюбием Господа Бога и Спаса нашего Иисуса Христа, с ним же купно Отцу и Пресвятому и Животворящему Духу подобает всяка слава, честь и поклонение, ныне и и присно во веки веком. Аминь».

Месяца июня, в 12 день. Слово о пренесении мощей святой преподобной благоверной великой княгини Анны в соборную церковь Воскресения Христова из древяные церкви Успения Пресвятой Богородицы, идеже обретены быша святыя мощи ея

Многа убо и различна дарования Божия, и благодетельство неисповедимо к человеком, яже содея в наше спасение, своим божественным и неизреченным смотрением, якоже глаголет божественный апостол Павел: «Велия благочестия тайна, Бог явися во плоти». И како не велия тайна смотрения его, иже Отцу сопрестольный, собезначальный, и соприсносущный, прежде всех век от Отца рожденный, невидимый и не осязаемый, благоволением Отца изволил Сын Божий снити на землю и плоть прияти от святыя и преблагословенныя и Приснодевы Марии, и совершен явися повсему человек, и пребысть еже бе, и еже не бе прият, и бысть совершен Бог, и совершен человек. И восхоте, милосердия ради своего, падшего человека воставити, и страстию своею и воскресением истлевшего обновити. И пострада плотию яко человек, а не божеством, божество убо безстрастно пребысть. Умер же и воскрес, и человека с собою совоскресил, якоже глаголет велегласный апостол Павел: «О нем же имамы избавление кровию его, и оставление грехов, иже есть образ Бога невидимого; и Той есть глава телу церкви, иже есть начало, перворожден из мертвых. Яко в нем благоволи все исполнения вселитися и тем примирити всяческая к себе, умирив кровию распятия своего собою, аще земная, аще небесная. Сия тайна велия сокровенная, от век и от родов. Ныне же явися святым Его апостолом, им же восхоте Бог сказати, что богатство славы тайны сея во языцех. И Той есть дал, овы апостолы, овы же пророки, овы же благовестники, овы же пастыри и учители к совершению святых в дело служения, в совершение тела Христова». Сие благочестие корень злочестия искорени, сие мучащего нас диявола попрана всеми сотвори, по реченному Христову словеси: «Дах, рече, вам власть наступати на змия и на скорпию и на всю силу вражию». И кто есть наступаяй на оного змия? – токмо иже победивый мир сей, и, по святому апостолу, вся уметы вменив. И не толико небо украшается солнцем, и луною, и звездами, и земля, древесы, многоразличных видов цветы, елико церковь Божия святых и праведных мужей и жен подвиги и труды красится и прославляется, и святыми их мощами посвещается; понеже убо они Бога возлюбиша, и невозвратным путем Тому последоваша, и святыя Его заповеди сохраниша, и ни что же, паче Его любве, от видимых предпочтоша. Сего ради и Бог их воспрослави, не токмо в животе, но и по смерти святыя их телеса нетлением почте, ради крайния их чистоты, и многими чудесы и различными чудодействы, их ради молитв, всю землю исполнил, якоже и ныне поведаемая от нас святая и благоверная великая княгиня Анна, о ней же слово предлежит.

Бысть убо супружница великого князя и страстотерпца Христова Михаила Тверского. Како в толицей господской чести бывши, в величестве, и славе, и в богатстве, и яко царица почитаема бе, Богу угодила и ныне со всеми святыми Святей Троице предстоит, о всем мире молящеся: что бо ей в житии сем от видимых мира сего превяили возбрани от доброго течения и ненасытныя сладости прекрасного жениха Иисуса Сына Божия: еда господская честь и слава мира сего, но сия от младых ноготь презре, или супружество, и се ни како же кое убо возбранение будет тамо от соблюдения заповедей Божиих, идеже два во един дух живут. И бе в них сердце едино, и едина душа, и ревность к сохранению заповедей Божиих, непрестанное течение еже к Богу день от дне. Но сия быша. Святый благоверный князь Михаил и супружница его, святая благоверная княгиня Анна, всякими добродетельми украшены, и ничто же паче любве Христовы предпочтоша, и непрестанным еже к нему рачением, течаста в молитвах присно, и во бдениях, и слезах неисповедимых. Идеже бо труд не яве сеяшеся, по реченному, како возможно писанию предати. Но аще и в господстве бяху, но присно поминаху одр блаженного и великого во пророцех дарех богоотца Давида и пророка, и постелю его присно мочащую слезами, а не водою; и по всему быста милостынею ко убогим, и благотворением к нищим, якоже древле праведный Авраам и Иов: гордыню же и тщеславие отнюд возненавидеша. И конечное святая и благоверная княгиня Анна укрепляше супруга своего благоверного князя Михаила, егда ощутил злочестивого царя на свою державу гневающася, и от своих сродник клеветы сшиваемы, не хотяще на свою державу от злочестивых с ратию пришедших видети и неповинно кровь христианскую пролияти, сам пойде к злочестивому царю во орду, яко да за всех постраждет. И сице супружница его, благоверная княгиня Анна, укрепляше его на подвиг, и глаголаше к нему: «Да не будет тебе, господи мой, паче любве Христовы предпочести что: ни ласкание царево, ни господския чести обещание умягчит душу твою от подвига, ниже паки да устравиат тя прещения его различная, ни томления нужная, яко бы сотворити волю его скверную; стени бо подобна и сну таковая страшилища. Но буди во исповедании, яко добр воин Христов, и присно поминай велегласного апостола Павла, глаголюща: «Яκο ни скорбь, ни теснота, ни гонение, ни глад, ни нагота, ни беда, ни меч, ни ино что от лютых мира сего возможет нас разлучити от любве Божия». Но постражи за Пострадавшего нас ради и буди верен до смерти, и даст ти Господь венец жизни». И сице укрепляше блаженная супруга своего великого князя Михайла, яко и самому ему дивитися премудрому разуму ея, и доброму совету, и Бога прославляти, яко к подвигу его ревность подаде женою, a не якоже древле в раи Ева к Адаму. И сему тако бывшу, пострада убо блаженный, и мучения венцем увязеся. Блаженная же и великая княгиня Анна, по страдании супруга своего, поразуме, яко невозможно ей спастися, посреде плищев и всяких молв быти, аще не со отречением всякия славы мира сего, и господския чести возненавидевши, и вслед евангельского гласа итти, глаголющего: «Аще кто не оставит отца своего и матерь, и жену, и чада, и села, и имения, не может Мой быти ученик». И нимало замедли, но всю славу жития своего господского, и детей своих моления, еже быти с нима, презре, и вся во уметы вмени, и яко некую жертву себе Богови приведе, на тризнице подвиг исходит, и иноческому житию себе в обители делам сопривмещает, и бывает вся Христови, и едина единому последуя, в молитвах и молениях, присно поучаяся псалмом и прочим богодухновенным писанием, смирением же и кротостию украшаяся, молчание любя, и покорение ко всем имея, аще и госпожа сый всем бысть, но едино воспоминая, како Господь наш и Бог, иже всего мира Творец, обнища нас ради, якоже апостол глаголет, да нас богатством небесным обогатит, дая образ послушанию, иже и быв послушлив до креста и смерти, и не прииде к нам да послужат Ему, но да послужить и дати избаву за многих; нам подаде указ во всем, яко да по стопам Его ходяще, будем послушливи ко всем. И сице живяше блаженная, яко древо плодовитое приисходящих вод, сиречь евангельских источник. И день от дне восхождения по пророку Давиду в сердцы своем полагая, душу же и тело посвещая божественными поучениями, яко ни дне, ни часа не хотяше никогда от славословия Божия престати, но всю жизнь свою изнуряше Господеви, Его же возлюби и Ему же последова, и присно глаголаше в себе: «Не трудно ми тещи вслед Тебе, женише мой любимый, ибо любовь Твоя распали мя, и воследовати по Тебе научи мя. Воистину весь еси желание, весь еси сладость, и не насытимая радость, Слово Божие! Тебе, Господу Богу моему, и душу мою предаю, приими ю с миром и сочетай мя с мудрыми девами, яко да и аз с ними вниду в чертог Твой, и узрю свет лица Твоего, и просвещение Святыя и Единосущныя Живональныя и Нераздельныя Троицы. И всели мя во обителех Твоих, иже ecи уготовал любящим Тя, якоже святый Павел апостол глаголет». Сицево блаженныя житие, таково и пребывание, и исправление божественных ея добродетелей. И тако жизнь свою сконча, прейде ко оному блаженству, идеже чист глас празднующих, идеже ангельское непрестанное к Богу пение, идеже радость и веселие присное.

Сего ради и Бог ея не токмо в животе, но и по смерти дарова ей нетление, и исцеления дар присно изливающийся. И толико Божия благодать сохрани цело тело блаженныя, яко множае двою сот лет сокровено бысть в земли святое тело ея. И никакоже тлению причастны явишася, иже и ныне видимы всем предлежат честныя и святыя мощи ея, исцеления различная подают всем, приходящим с верою, Богу прославляющу, ея трудов ради многих и воздержания неослабного. Рече бо Господь: «Славящия Мя прославлю, и волю боящихся сотворю». Сего ради и мы, братие, воспрославим прославльшую Господом, и возвеличим во псалмех и пениих, и песнех духовных день пренесения честных ея мощей, и возвеселимся духовне, и помолимся ей, яко да милостива сотворит нам Бога в настоящем сем житии, и по отшествии отсюду да сподобит нас благая со избранными Его получити, и пресладкого гласа слышати: «Приидите, рече, благословении Отца Моего, наследуйте уготованное вам царствие от сложения мира». Что же прочее возглаголем или которыя похвалы достойныя преподобней принесем, паче же Богу, чудотворящему во святых своих, по реченному: «Дивен Бог во святых своих, Бог Израилев». Память бо святых – виша нашему веселию, по премудрому Соломону: «Похваляему бо, рече, праведнику возвеселятся людие», и «Память праведнаго с похвалою да бывает». Понеже и Бог похваляем бывает, и прославляем, и величаем, ради торжества угодник Его. Сам бо Господь наш Иисус Христос глаголет: «Тако да просветится свет ваш пред человеки, яко да видят ваша добрая дела, а прославят Отца вашего, иже на небесех» и паки: «Аще кто мне служит и последствует, и идеже есмь Аз, ту и слуга Мой будет». Не делы ли исполнилося сие Спасово слово? Не токмо мужи послужили, но и жены, якоже Лука евангелист глаголет о женах, иже послужили Господу от имений своих, якоже Мария Магдалыня, и Саломия, и ины. Тако и сия блаженная и великая княгиня Aнна, сим уподобився, и прочим женам преподобньм в посте просиявшим, и во всякой добродетели процветшей; и не единой остася от божественных добродетелей, еже бы преподобная в себе не имый. И сими всеми исправляеми Богу послужила в преподобии, и правде, и во всякой святыни. Такоже и от имений своих последовала Господу, в нищих утробы и вдовиц, и сирот, и странных, вся сокровища богатства своего сокры, яко да на небесех некрадомо богатство сокровенное от век и от родов обрящет, идеже ни тля тлит, ни тать подкопывает; их же уготова Бог любящим Его, якоже святый апостол Павел глаголет: «Их же око не виде, и ухо не слыша, и на сердце человеку не взыде». О, Отче святый небесный! Подаждь и нам, Христе, сотворив волю Твою, наследником быти тоя не изглаголанныя радости, и веселия святых.

Время же прочее и веру показати самого великого государя царя и великого князя Алексея Михайловича, всея великия и малыя в белыя Росии самодержца, колику веру показал ко преподобней, и колико тщание и усердие о пренесении мощей ея имел. Якоже некогда болгарский царь Иоанн о пренесении мощей преподобныя Параскевии в свой царствующий град, тако и сей благочестивый великий государь царь о преподобней благоверной княгине Анне, не яко от града во град, но из древянныя соборныя церкви, в соборную каменную церковь да пренесутся мощи ея, дóндеже на том месте, идеже обретено бысть святое тело ея, храм каменной прекрасен воздвигнется в похвалу Пречистей Божии Матери, и ея угоднице великой княгине Анне. И яко хотяше благочестивый царь веру свою делом показати ко преподобней, тако и делы веру свою исполняше.

И первее убо посылает царская своя писания во град Ростов к преосвященному Варламу, митрополиту ростовскому, яко да приидет скоро в славный град Кашин, на пренесение мощей святыя и благоверныя княгини Анны, понеже и сам хотяше благочестивый царь тамо быти. Преосвященный же Варлам, митрополит, приим царская писания, вскоре пути касается и достизает град Кашин. Потом прииде и великий Государь царь и великий князь Алексей Михайлович всея великия и малыя и белыя Росии самодержец с государынею царицею и великою княгинею Мариею Ильичною и с своими государевыми сестрами, и с своими государевыми чады, и с князи, и с боляры, и со всем своим царским сигклитом на пренесение мощей преподобныя и великия княгини Анны. И вечернему убо и утреннему славословию бывшу, и божественней службе совершившуся, и многия мольбы ко всещедрому Богу принесше, времени же приспевши, абие касается сам благочестивый великий государь царь гробу преподобныя, радостною душею и веселием божественным, с князи и боляры; и на раменах своих взложивше, яко некое пречестное сокровище, воистину сокровище божественное, паче древняго киота, тело драгое, тело честное, тело святое, в нем же обита Отец и Сын и Святый Дух, Святая Троица, и понесше в соборную церковь, разстояние же имый от древнего храма до соборныя церкви, яко единым стрелением; преосвященный же Варлам митрополит, со всем освященным собором последующе со псалмы и песньми, и пеньми духовными, со многими свещами и кандилы благовонными. Отвсюду же стекшимся множеству много народом, мужи, и жены, и старцы со юнотами, и бе видети дивный сей позор, от множества свещей блистания, яко второе небо звездами испещрено, горе – ангельская ликостояния Бога славословят, ради показавшего чудо сие рабом своим, доле же – человецы, яко от всех едино согласие Богу принешашеся, и еже «Господи помилуй» взываху. Воистину ту видети и благочестиваго царя веру, якоже иногда царь и пророк Давид, пред киотом Господним скакаше, играя, ради пришествия его, и пред ним идяше, пояше, тако и сей великий государь царь радовашеся душею и веселяшеся сердцем, яко изволил Бог в его благочестивое царство, от давних лет, таковое сокровище сокровенное открыти, и яко посетил Бог люди своя, и сподобил его послужити преподобней, яко и гроб ея с мощами на рамену свою понести. О, дивна дела твоя, Господи! Вся бо твориши елико хошещи, и несть кто противен твоей власти; воистину сташен еси, и кто против станет Ти. Паки прейдем на предняя. Но зде бысть честнее древнего киота: тамо святая святых, ручка и манна, и жезл, и скрыжали, вещи суть предивны, и в Божие имя сотворены, зде же предивнее, понеже сам Бог обетова, глаголя: «Яко вселюся, рече, в ня и похожу, и буду им в Бог, и тии будут Мне в люди». И паки: «Аз и Отец приидема, и обитель у него сотворима». Аще ли Божий храм человек и обитель Святей Троицы, то воистину сий гроб блаженныя и великия княгини Анны, в нем же положено бысть святое тело ея, многосугубно бысть святее и честнее древнего киота. И не якоже Озан он прикоснувыйся киоту Господню, ту и поражен бысть, но зде мнози прикасахуся всякого чина возраст мужи и жены, честному гробу блаженныя, и освящение приемляху, тако же и различными недуги и болезньми содержимии здравие получаху. Понеже в древнем законе всяк прокаженный изгоняшеся из града, и никто же не смеяше прикасатися им, дóндеже очистятся, пришедши же благодати, не к тому закон, что действовашеся: Сам Господь наш Иисус Христос исполнитель закона, егда десять прокаженных очистил и не возгнушася их: понеже сень прейде, и истина наста, аще и девять неблагодарных о благодателе явившеся, и се прообразование бысть иудейскому неблагодарному сонму, но един показася и дав славу Богу; сей иноплеменник прообразова иже от язык церковь. Ныне же благодатию Христовою, аще кто и прокажен телесно, или гноем обложен лютым и язвами, или разслаблен рукама и ногама, всех приемлет церковь, и несть возгнушания ни от кого, и наблюдания иудейского: вси бо един уд о Христе Иисусе быхом. О, преславных дел твоих Христе Царю! Вся бо немощи наша понесл еси, и за грехи наша поболел еси, и еже богопротивник от фарисей скверных слышася, иже Отцу соприсносущный и сопрестольный; и еже субботство наблюдаху окаяннии, Тебе иже субботе творца оклеветоваху неблагодарнии, яко субботы не хранит и несть от Бога. О, несмысленного сердца! О, скверного языка! Како от зависти потемнеша мысленныя очи, и не восхотеша разумети пришедшего Тебе на спасение им. Но даждь им, Господи, по делом их. Мы же Тебе исповедуем Христа Сына Божия и Бога, пришедшего на взыскание наше. Слава преблагому твоему милосердию! И якоже дойде великий государь царь и преосвященный митрополит с мощми преподобныя в пaперть соборныя церкви, и абие гроб блаженныя показася им отягчен, и не можаху прочее нести в церковь. И се Богу являющу, яко не в той церкви положенным быти мощем ея, но идеже изволил Господь вначале погребенным быти и обретенным мощем ея в дому Матере Своея, тамо и пребудут во веки веком. Великий же государь царь, видя сие и помышляше, яко не хощет преподобная в соборной церкви положена быти, и моляше Бога в себе, яко да изволит ей на время в той церкви положеной быти, дóндеже воздвижется храм прекрасен во имя Пресвятыя Богородицы и его угодницы преподобныя и великия княгини Анны. И абие подадеся им святая, яко да внесше в церковь положат мощи ея. И сему бывшу, внесше гроб блаженныя с мощми в соборную церковь Воскресения Христова и поставивше его на правой стране у столпа, и молебная пения Господу Богу, и Пресвятей Богородице, и его угоднице великой княгине Анне певше, и многая благодарения изрекше, яко изволил Господь сим преславным чудесем в его благочестивое царство быти. Положенным же бысть мощем преподобныя, многа исцеления бывают оттоле и доныне от святых мощей ея всякими недуги и болезньми содержимым, и здравие получаху, отхождаху в домы своя, много благодарение воздаваху Господу Богу, и Пресвятей Богородице, и преподобной благоверной великой княгине Анне. Царь же благочестивый повеле от царского своего сокровища священному причту многу милостыню подати, тако же и нищим, и маломощным, в память благоверныя княгини Анны, и пребыв неколико дней в Кашине, и заповедав церковь строити каменну, идеже обретено бысть тело блаженныя, сущему ту священноиерею церкве именем Василию, сам же отходит в царствующий град Москву, благодаря Бога и Пречистую Богородицу, яко сподобил его послужити преподобней, и преславных чудес Его видети. Такоже и преосвященный Варлам митрополит отходит в свой град Ростов, много благодарение воздая Господу Богу, и Пресвятей Богородицы, яко сподобил его видети преславных чудес Его. Священник же Василий тепл убо верою к преподобней, царское заповедание прием, вскоре делу касается и благодатию Христовою и молитвами преподобныя, не во мнозе времени прекрасну церковь каменну воздвиже во имя Пресвятые Богородицы честного и славного Ея Успения, присовокупи же и ину церковь об ову страну тоя церкве, во имя преподобныя и великия княгини Анны. До зде слово о пренесении честных ея и многоцелебных мощей совершися.


Источник: Житие благоверной великой княгини Анны Кашинской : По синодальной рукописи XVII-го века / С предисл. Ан. Титова. - Москва : Печ. А.И. Снегиревой, 1909. - 40 с. (Загл. обл.: Житие Анны Кашинской)

Комментарии для сайта Cackle