Глас 2
Пе́снь 1.
Ирмо́с: Во глубине́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный гре́х потреби́ло е́сть, препросла́вленный Госпо́дь, сла́вно бо просла́вися.
Му́жески стра́сти плотски́я, о́тче, порабо́тив, по́мыслом му́жества я́ко тезоимени́т, мучи́телей суровство́ пора́товал еси́ и зако́нно пострада́л еси́. Те́м тя́ согла́сно, ве́рою соше́дшеся, ублажа́ем.
Мы́сленно, я́ко у́гль, разже́гся теплото́ю Боже́ственнаго Ду́ха, ле́д страсте́й раста́ил еси́, пото́ки же кро́вными о́гнь погаси́л еси́ злоче́стия чу́ждий, велича́йше Андре́е, испове́дниче богоблаже́нне.
Связа́вся любо́вию Христа́, о́тче, от ю́ности кре́ст тво́й восприи́м, ра́дуяся, Тому́ после́довал еси́, отре́кся себе́ сама́го по́стничеством, и испове́данием, и соверше́ннейшим страда́нием.
Богоро́дичен: Уны́ния сно́м ду́шу всегда́ отягчева́я, к Твоему́, Де́во Ма́ти Пречи́стая, притека́ю заступле́нию: к бо́дрости покая́ния воздви́гни, ве́чнующаго тогда́ избавля́ющи мя́ муче́ния.
Пе́снь 3.
Ирмо́с: На ка́мени мя́ ве́ры утверди́в, разшири́л еси́ уста́ моя́ на враги́ моя́, возвесели́бося ду́х мо́й, внегда́ пе́ти: не́сть свя́т, я́коже Бо́г на́ш, и не́сть пра́веден, па́че Тебе́, Го́споди.
Утверди́в ра́зума твоего́ стопы́, о́тче, на ка́мени любве́ Христо́вы, отню́д дохнове́нии не поколеба́лся еси́ проти́вными, вопия́ Творцу́ твоему́: Ты́ еси́ Бо́г на́ш, и не́сть пра́веден, па́че Тебе́, Го́споди.
Исцеле́ния и пре́жде конца́ и по конце́ источа́я, помоществу́еши су́щим в не́мощех и ду́хи нечи́стыя отго́ниши, Андре́е преподо́бне, вопия́ Созда́телю твоему́: Ты́ еси́ Бо́г на́ш, и не́сть пра́веден, па́че Тебе́, Го́споди.
По́стничества слеза́ми омове́н, кро́вию му́ченическою удобри́лся еси́, и ве́сь красне́йш показа́вся, вопия́, восте́кл еси́ к жела́емому: Ты́ еси́ Бо́г на́ш, и не́сть пра́веден, па́че Тебе́, Го́споди.
Богоро́дичен: Пло́ти подо́бием бы́вшаго, Отцу́ Единосу́щна Бо́га Сло́ва родила́ еси́, Всенепоро́чная, па́че естества́ Де́ва пребы́вши и по рождестве́. Сего́ ра́ди ве́рою Тя́ ублажа́ем.
Седа́лен, гла́с 4.
В посте́ ди́внаго и страда́нии восхва́лим, ве́рнии, по до́лгу, я́ко благоче́стия пропове́дника и побо́рника кре́пкаго; се́й бо без стра́ха гноеиме́нному противля́яся, чествова́тися пропове́да Христо́ву о́бразу, я́ко по́стников все́х удобре́ние и му́чеников му́жества подо́бие.
Богоро́дичен: И́же на престо́ле херуви́мстем седя́й и в не́дрех О́тчих водворя́яся, я́ко на престо́ле святе́м седи́т Свое́м, Влады́чице, в не́дрех Твои́х; вопло́щся бо Бо́г вои́стинну, воцари́ся над все́ми язы́ки, и разу́мно ны́не пои́м Ему́, Его́же умоли́ спасти́ся рабо́м Твои́м.
Крестобогоро́дичен: Из Безнача́льнаго Отца́ рожде́ннаго, напосле́док Тя́ пло́тию Ро́ждшая, на Кресте́ ви́сяща, зря́щи, Христе́, — увы́ Мне́, любе́знейший Иису́се, — вопия́ше, — ка́ко сла́вимый я́ко Бо́г от а́нгел, от беззако́нных ны́не челове́к, Сы́не, хотя́ распина́ешися? Пою́ Тя, долготерпели́ве.
Пе́снь 4.
Ирмо́с: Прише́л еси́ от Де́вы не хода́тай, ни а́нгел, но Са́м Го́споди вопло́щся, и спа́сл еси́ всего́ мя челове́ка; те́м зову́ ти: сла́ва си́ле Твое́й, Го́споди.
Послушли́в бы́в Христо́вых за́поведей, Того́ подо́бию, о́тче, че́стно поклоня́лся еси́. Те́м пребеззако́нный тя́ многообра́зными ра́нами умертви́.
Миродохнове́н доброде́телей благово́нием бы́в, во гро́бе лежа́ благово́нствиши ли́ца призыва́ющих тя́ несомне́нным се́рдцем, о́тче преподо́бне.
Неду́говавша Мамо́на всезле́йшаго, преподо́бне, окая́нно е́ресию, со дерзнове́нием обличи́л еси́, побо́рник бы́в правосла́вных, Андре́е досточу́дне.
Богоро́дичен: Я́ко Благопло́дная возрасти́ла еси́ благода́тный Кла́с, пита́ющий вся́, правосла́вно почита́ющия Тя́, Влады́чице Всепе́тая, и из Тебе́ вопло́щшагося Сло́ва, Всечи́стая.
Пе́снь 5.
Ирмо́с: Просвеще́ние во тме́ лежа́щих, спасе́ние отча́янных, Христе́ Спа́се мо́й, к Тебе́ у́тренюю, Царю́ ми́ра, просвети́ мя сия́нием Твои́м, ино́го бо ра́зве Тебе́ Бо́га не зна́ю.
Омраче́ние возненави́дев, о́тче, греха́, ве́сь блиста́нием безстра́стия све́т яви́лся еси́, и просвеща́еши ве́рныя, приходя́щия боже́ственному твоему́ гро́бу, целе́ний заря́ми, Бо́жиею благода́тию.
Ве́сь Бо́жие прия́телище яви́лся еси́, до́бре пожи́в и доблему́дренно пострада́в, о́тче, и ны́не, во гро́бе лежа́, пребыва́еши це́л, блаже́нне, и неразруши́мь, все́х ве́рных разреша́я стра́сти.
Ю́ношески до́блествовав, всеблаже́нне, на де́моны и на челове́ки ерети́чествующия, ве́чнующаго сподо́бился еси́ благосла́вия и венце́в, Андре́е преподо́бне, те́м ве́рнии тя́ при́сно ублажа́ем.
Богоро́дичен: Но́сиши Христа́ на объя́тиях, неизрече́нно роди́вши, объе́млющаго зло́бе прекло́ншияся и лука́вому окая́нно порабоще́нныя, Отрокови́це Всенепоро́чная, те́м Тя́ ве́рнии при́сно ублажа́ем.
Пе́снь 6.
Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же мя́ возведи́.
В темни́цу тя́ беззако́нный вве́рже, Влады́кою, Андре́е, сохраня́ема и Того́ соблюда́юща непреме́нно Боже́ственное хоте́ние.
Растерза́емо те́ло небре́гл еси́ и раздробля́емо ра́нами, блаже́нне, но я́коже ино́му стра́ждущу терпе́л еси́, Боже́ственно укрепля́емь.
Я́ко многоце́нное бога́тство кры́емое, о́тче, явля́ешися, предлежа́ лице́м благочести́вых, и чудесы́ вся́ обогаща́еши, почита́ющия тя́.
Богоро́дичен: Разу́мный Тя́ све́щник прозря́ше дре́вле проро́к, Боже́ственную Свещу́ — Христа́, Чи́стая, нося́щу, И́мже вси́ мы́ просвети́хомся.
Конда́к, гла́с 3:
Пра́зднует дне́сь Ца́рствующий гра́д пра́здник пресве́тлый светоно́сныя Твоея́ па́мяти, вся́кий призыва́я гра́д и страну́, ра́дуется бо, я́ко име́я сокро́вище ве́лие, многострада́льное твое́ те́ло, Андре́е му́чениче, Правосла́вия свети́льниче.
И́кос:
А́нгел и́стины от Кри́та яви́лся еси́, обличи́в злоче́стия, о́тче, и с богосло́вным гла́сом, ра́нима тя́ зря́, всему́дре, ужаса́юся стра́сти, зовя́ и вопия́ ти́ сицева́я: ра́дуйся, Бо́жий кре́пкий ору́жниче; ра́дуйся, Госпо́день ве́рный уго́дниче; ра́дуйся, ху́льных враго́в сопротивобо́рниче; ра́дуйся, злоглаго́ливых челове́ков обузда́ние; ра́дуйся, я́ко пострада́л еси́ за о́браз Христо́в; ра́дуйся, я́ко восхласти́л еси́ сла́сти плотски́я; ра́дуйся, я́ко поще́нием нача́ла тмы́ победи́л еси́; ра́дуйся, я́ко страда́нием Копрони́му сопроти́вился еси́; ра́дуйся, исто́чниче чуде́с приснотеку́щий; ра́дуйся, зе́млю уясни́вый страда́ньми твои́ми; ра́дуйся, ве́рных жили́ще, о́тче; ра́дуйся, на́ш предста́телю и изба́вителю; ра́дуйся, о́тче приснопа́мятне.
Пе́снь 7.
Ирмо́с: Богопроти́вное веле́ние беззако́ннующаго мучи́теля высо́к пла́мень вознесло́ е́сть: Христо́с же простре́ Богочести́вым отроко́м ро́су духо́вную, Сы́й Благослове́н и Препросла́влен.
Возвыша́емая волне́ния лука́вствия твоего́ ума́ не поколеба́ша, Андре́е сла́вне, на ка́мени зна́ния Христо́ва стоя́ща. Те́м небу́рное приста́нище я́ве обурева́емым бы́л еси́.
Бу́ими взыска́ньми лукавому́дрый, умо́м омрача́емый, укра́сти окуша́шеся тя́, богосло́вия светлостьми́ удобря́ема, но яви́ся сме́ха досто́ин, му́дре, испо́лнився студа́ дерзнове́нием твои́м.
У́м тво́й манове́ньми Боже́ственнейшими украша́емь, Андре́е досточу́дне, звезда́ всесве́тлая все́м показа́ся, чудесы́ коего́ждо ве́рныя просвеща́я, хва́лящия тя́.
Богоро́дичен: Хра́м была́ еси́ Жива́го Бо́га, в не́мже жили́ще неизглаго́ланно сотвори́, Де́во Всепе́тая, на небесе́х обита́яй, и бла́гости ра́ди мно́гия Челове́к бы́ти изво́лив.
Пе́снь 8.
Ирмо́с: Пе́щь иногда́ о́гненная в Вавило́не де́йства разделя́ше, Бо́жиим веле́нием халде́и опаля́ющая, ве́рныя же ороша́ющая, пою́щия: благослови́те вся́ дела́ Госпо́дня Го́спода.
Стра́сти плотски́я, му́дре, предъумертви́в по́стническими по́двиги, пострада́л еси́, крепча́йше, Спа́сово подо́бие и Присноде́вы, преподо́бне, и святы́х чествова́тельно лобыза́я.
Я́ростно на Христа́ неи́стовствующе, я́ко зве́рие свире́пии, возложи́ша, о́тче, умертви́ти тя́. Те́м влеку́ще и бию́ще, вверго́ша в про́пасть, свиде́теля И́стины тебе́ я́вственно соде́ловающе.
Чудесы́ ве́рныя, я́ко вода́ми, напая́еши, и отго́ниши, всеблаже́нне, лука́вствия ду́хи, и очища́еши неду́ги, благода́ть врачева́ний свы́ше прие́м от Христа́ Бо́га на́шего.
Богоро́дичен: Яви́лася еси́ небе́с, Де́во, простра́ннейши, Бо́га во утро́бе Твое́й вмести́вшая, все́ми Невмести́маго, Его́же моли́ изба́вити утесне́ния, Чи́стая Влады́чице, душетле́ннаго благоче́стно воспева́ющия Тя́.
Пе́снь 9.
Ирмо́с: Безнача́льна Роди́теля Сы́н, Бо́г и Госпо́дь, вопло́щся от Де́вы, на́м яви́ся, омраче́нная просвети́ти, собра́ти расточе́нная, те́м Всепе́тую Богоро́дицу, велича́ем.
Се́, о́тче преподо́бне, тече́ние твое́ соверши́в, Правосла́вную ве́ру соблю́л еси́ непоро́чну, ея́же ра́ди пострада́в зако́нно, вене́ц же сугу́б прия́л еси́ свы́ше, я́ко му́ченик непобеди́мь и по́стник непобо́рен.
Я́ко кри́н сладково́нный и я́ко шипо́к, о́тче, процве́л еси́ в цве́тнице боже́ственнаго я́ве поще́ния, и благово́нствуеши, я́ко ке́др, му́ченически просвеще́н, Андре́е всехва́льне, мона́шествующих удобре́ние.
Зна́меньми и чудесы́ я́ве украша́емь, невреди́мь еси́ все́м на виде́ние лежа́, всеблаже́нне Андре́е, и ду́ши просвеща́я ве́рою те́плою приходя́щих тебе́, и всегда́ блажа́щих тя́.
Де́нь пра́зднствен и весе́лия испо́лнен, святу́ю твою́ па́мять творя́ще дне́сь, ве́рою вопие́м тебе́, о́тче: к Бо́гу святы́ми твои́ми моли́твами все́х на́с изба́ви жите́йских обстоя́ний.
Богоро́дичен: Све́та селе́ние утро́ба Твоя́ бы́сть, просве́щшаго ми́р заря́ми Божества́ и неве́дения тму́ от земли́, Всенепоро́чная Отрокови́це, соверше́нно отгна́вшаго, Того́ ра́ди Тя́ сла́вим.
Свети́лен.
Андре́я добропобе́дника похва́лим вси́, боже́ственно пра́зднующе честну́ю его́ па́мять, я́ко да изба́вимся от неду́г; се́й бо Спа́сова честна́я воображе́ния и святы́х все́х всеблагоче́стно чествова́ти пропове́да. Те́м, вене́ц на небесе́х прие́мь, со а́нгелы ра́дуется.
Богоро́дичен: Го́ру Бо́жию пресвяту́ю, и свети́льник, и ста́мну, и трапе́зу, и мо́ст, же́зл же, и свещу́, и Боже́ственный престо́л, и две́рь, и хра́м, и черто́г воспои́м, богому́дрии, Чи́стую и Де́ву, из Нея́же Бо́г, воплоти́вся невра́щно и па́че естества́, обожи́ прия́тие неизрече́нным едине́нием.