сост. Г. И. Катышев

Чин литии, совершаемой после вечерни в воскресные дни Святой Четыредесятницы и во иное время

Предстоятель возглашает: Благословен Бог наш...

Чтец: Аминь.

И обычное начало: Царю Небесный... Трисвятое. Пресвятая Троице... Отче наш...

Возглас: Яко Твое есть Царство...

Чтец: Аминь.

Господи, помилуй (12 раз).

Слава, и ныне... Приидите, поклонимся... (трижды). 149Зри:

Псалом 142

Господи, услыши молитву мою, внуши моление мое во истине Твоей, услыши мя в правде Твоей; и не вниди в суд с рабом Твоим, яко не оправдится пред Тобою всяк живый. Яко погна враг душу мою; смирил есть в землю живот мой; посадил мя есть в темных, яко мертвыя века. И уны во мне дух мой, во мне смятеся сердце мое. Помянух дни древния, поучихся во всех делех Твоих, в творениих руку Твоею поучахся. Воздех к Тебе руце мои; душа моя яко земля безводная Тебе. Скоро услыши мя, Господи, изчезе дух мой; не отврати лица Твоего от Мене, и уподоблюся низходящим в ров. Слышану сотвори мне заутра милость Твою, яко на Тя уповах; скажи мне, Господи, путь, воньже пойду, яко к Тебе взях душу мою. Изми мя от враг моих, Господи, к Тебе прибегох. Научи мя творити волю Твою, яко Ты еси Бог мой; Дух Твой Благий наставит мя на землю праву. Имене Твоего ради, Господи, живиши мя, правдою Твоею изведеши от печали душу мою; и милостию Твоею потребиши враги моя и погубиши вся стужающия души моей, яко аз раб Твой есмь.

Слава, и ныне: Аллилуиа (трижды).

Бог Господь во глас 6, с обычными стихами.

Тропари, глас 6:

Помилуй нас, Господи, помилуй нас; /всякаго бо ответа недоумеюще,/ сию Ти молитву яко Владыце/ грешнии приносим: помилуй нас.

Слава: Господи, помилуй нас,/ на Тя бо уповахом,/ не прогневайся на ны зело,/ ниже помяни беззаконий наших,/ но призри и ныне яко Благоутробен,/ и избави ны от враг наших;/ Ты бо еси Бог наш,/ и мы людие Твои,/ вси дела руку Твоею,/ и имя Твое призываем.

И ныне, Богородичен: Милосердия двери отверзи нам;/ благословенная Богородице,/ надеющиеся на Тя да не погибнем,/ но да избавимся Тобою от бед;/ Ты бо еси спасение рода христианского.

Посем начинаем стихословити псалмы со сладкопением, во глас 6.

Первее поем тропарь, глас 6:

1-й лик: Благосерде, Долготерпеливе и всещедрый Господи, низпосли милость Твою на люди Твоя.

2-й лик: Благосерде, Долготерпеливе и всещедрый Господи, низпосли милость Твою на люди Твоя.

Посем канонарх поет по стихам псалом 6 или сам предстоятель возглашает их. Певцы же к каждому стиху припевают тойже тропарь.

Господи, да не яростию Твоею обличиши мене, ниже гневом Твоим накажеши мене.

1-й лик: Благосерде, Долготерпеливе и всещедрый Господи, низпосли милость Твою на люди Твоя.

Помилуй мя, Господи, яко немощен есмь; исцели мя, Господи, яко смятошася кости моя.

2-й лик: Благосерде, Долготерпеливе и всещедрый Господи, низпосли милость Твою на люди Твоя.

И душа моя смятеся зело и Ты, Господи, доколе.

1-й лик: Благосерде, Долготерпеливе и всещедрый Господи, низпосли милость Твою на люди Твоя.

Обратися, Господи, избави душу мою, спаси мя ради милости Твоея.

2-й лик: Благосерде, Долготерпеливе и всещедрый Господи, низпосли милость Твою на люди Твоя.

Яко несть в смерти поминаяй Тебе, во аде же кто исповестся Тебе.

1-й лик: Благосерде, Долготерпеливе и всещедрый Господи, низпосли милость Твою на люди Твоя.

Утрудихся воздыханием моим, измыю на всяку нощь ложе мое, слезами моими постелю мою омочу.

2-й лик: Благосерде, Долготерпеливе и всещедрый Господи, низпосли милость Твою на люди Твоя.

Смятеся от ярости око мое, обетшах во всех вразех моих.

1-й лик: Благосерде, Долготерпеливе и всещедрый Господи, низпосли милость Твою на люди Твоя.

Отступите от Мене вси делающие беззаконие, яко услыша Господь глас плача моего.

2-й лик: Благосерде, Долготерпеливе и всещедрый Господи, низпосли милость Твою на люди Твоя.

Услыша Господь моление мое, Господь молитву мою прият.

1-й лик: Благосерде, Долготерпеливе и всещедрый Господи, низпосли милость Твою на люди Твоя.

Да постыдятся и смятутся вси врази мои, да возвратятся, и устыдятся зело вскоре.

2-й лик: Благосерде, Долготерпеливе и всещедрый Господи, низпосли милость Твою на люди Твоя.

1-й лик: Слава: Яко щедрый Господи, умилосердися на люди Твоя, яко Долготерпелив, примирися, и помилуй нас.

2-й лик: И ныне, Богородичен: Пресвятая Владычице, всепетая, благословенная, яко благолюбивая, утеши и помилуй нас.

Посем возглашает диакон:

Паки и паки, преклонше колена, Господу помолимся.

Певцы: Господи, помилуй (трижды).

И всем колена преклоншим чтет предстоятель молитву:

Господи, едине в милости богатый и по милосердию Своему преклоняяйся к молениям нас, грешных и недостойных рабов Твоих, наказуяй, и паки исцеляяй, и наказание простираяй благостне же и человеколюбне, не во еже погубити создание рук Твоих, но паче еже к начальной доброте паки привести. Сам, Владыко Вседержителю, призри на нас, и вонми молениям нас, грешных; множество бо беззаконий наших недерзновенными нас сотвори, и не смеем отнюд просити прощения о прегрешениих. Но ведуще Твое человеколюбие, милосердие, многую милость, долготерпение, беззлобие и премногую благость, дерзающе на глубину сих и на пучину благости Твоея, припадаем и прилежно вопием Тебе: согрешихом, беззаконовахом, нечествовахом, забыхом заповеди Твоя и вслед мысли нашея лукавыя ходихом, и недостойно званию и Евангелию Христа Твоего жительствовахом. Священницы и людие Твои изступихом, вкупе вси уклонихомся, непотребнии быхом; несть творяй суд и правду, несть до единаго, затворихом щедроты Твоя и человеколюбие Твое, злобы ради нашея и лукавства начинаний, с нимиже пожихом. Ты Благ еси, но мы беззаконновахом; Ты Долготерпелив, но мы язв достойни. Вемы Твою благость, аще и неразумны есмы; мало бо о нихже согрешихом, биени быхом. Ты страшен еси, и кто противостанет Тебе? Мы согрешихом, Ты же разгневался еси, сего ради быхом поношение соседям нашим; отвратил еси лице Твое и нечестия исполнихомся. Но престани, Господи, от гнева, ослаби, Господи, умилостивися, Господи, и не предаждь нас до конца беззаконий ради наших и нашими ранами да не накажеши иных. Мы бо людие Твои и жезл наследия Твоего. Сего ради накажи нас, обаче в благости, а не яростию Твоею, да не умаленных нас сотвориши, и паче всех живущих на земли во уничижение будем; милость бо Твоя неизреченна, и человеколюбие Твое непобедимо, и богатство благости Твоея неизследимо, на нихже и дерзающе молимся и умилостивляем Тя, преклоняюще колена сердец наших; престани от сечи гнева Твоего, молим прилежно, якоже при Давиде древле, аще и неподобное покаяние показуем, но яко Преблагий отложи гнев Твой, укроти ярость Твою праведную и даждь страждущим здравие, немощствующим крепость, здравых же соблюди, всяк недуг и всякую язву отжени от людей Твоих; всех сохраняй вседержительною Твоею рукою. Аще же и не обращаемся от лукавств наших, но Ты Сам избави от лукавыя совести всех нас и даждь во всяком благодеянии благоугодити Тебе; молитвами неискусомужно Тебе рождшия, чистыя Богоматери Приснодевы Марии; предстательством святых и боговидных Ангелов и всех святых, яко Ты еси милости Источник и милосердия неизследимая Пучина, и Тебе славу возсылаем со Безначальным Твоим Отцем и с Пресвятым и Благим, и Животворящим Твоим Духом, ныне и присно, и во веки веков, аминь.

По молитве диакон глаголет:

Заступи, спаси, помилуй и сохрани нас, Боже, Твоею благодатию.

Пресвятую, Пречистую...

Возглас: Яко Твоя держава...

Начинаем вторую статию литии и поем ин тропарь, глас тойже.

1-й лик: Милостиве, помилуй, помилуй, помилуй нас, Господи.

По тому же чину поет канонарх или возглашает предстоятель псалом 101 по два стиха за един. Певцы же припевают к ним тропарь.

Господи, услыши молитву мою, и вопль мой к Тебе да приидет.

2-й лик: Милостиве, помилуй, помилуй, помилуй нас, Господи.

Не отврати лица Твоего от Мене, воньже аще день скорблю, приклони ко мне ухо Твое; воньже аще день призову Тя, скоро услыши мя.

1-й лик: Милостиве, помилуй, помилуй, помилуй нас, Господи.

Яко исчезоша яко дым дние мои, и кости моя яко сушило сосхошася, уязвен бых яко трава, и изсше сердце мое, яко забых снести хлеб мой.

2-й лик: Милостиве, помилуй, помилуй, помилуй нас, Господи.

От гласа воздыхания моего прильпе кость моя плоти моей. Уподобихся неясыти пустынней, бых яко нощный вран на нырищи.

1-й лик: Милостиве, помилуй, помилуй, помилуй нас, Господи.

Бдех и бых яко птица особящаяся на зде. Весь день поношаху ми врази мои, и хвалящии мя мною кленяхуся.

2-й лик: Милостиве, помилуй, помилуй, помилуй нас, Господи.

Зане пепел яко хлеб ядях, и питие мое с плачем растворях. От лица гнева Твоего и ярости Твоея, яко вознес низвергл мя еси.

1-й лик: Милостиве, помилуй, помилуй, помилуй нас, Господи.

Дние мои яко сень уклонишася, и аз яко сено изсхох. Ты же, Господи, вовек пребываеши, и память Твоя в род и род.

2-й лик: Милостиве, помилуй, помилуй, помилуй нас, Господи.

Ты воскрес ущедриши Сиона, яко время ущедрити его, яко прииде время. Яко благоволиша раби Твои камение его и персть его ущедрят.

1-й лик: Милостиве, помилуй, помилуй, помилуй нас, Господи.

И убоятся язы́цы имене Господня, и вси царие земстии славы Твоея. Яко созиждет Господь Сиона и явится во славе Своей.

2-й лик: Милостиве, помилуй, помилуй, помилуй нас, Господи.

Призре на молитву смиренных, и не уничижи моления их, да напишется сие в род ин, и людие зиждемии восхвалят Господа.

1-й лик: Милостиве, помилуй, помилуй, помилуй нас, Господи.

Яко приниче с высоты святыя Своея, Господь с небесе на землю призре, услышати воздыхание окованных, разрешити сыны умерщвленных.

2-й лик: Милостиве, помилуй, помилуй, помилуй нас Господи.

Возвестити в Сионе имя Господне, и хвалу Его в Иерусалиме. Внегда собратися людем вкупе, и царем еже работати Господеви.

1-й лик: Милостиве, помилуй, помилуй, помилуй нас, Господи.

Отвеща Ему на пути крепости Его; умаление дней моих возвести ми. Не возведи мене во преполовение дней моих; в роде родов лета Твоя.

2-й лик: Милостиве, помилуй, помилуй, помилуй нас, Господи.

В началех Ты, Господи, землю основал еси, и дела руку Твоею суть небеса. Та погибнут, Ты же пребываеши; и вся яко риза обетшают, и яко одежду свиеши я и изменятся.

1-й лик: Милостиве, помилуй, помилуй, помилуй нас, Господи.

Ты же Тойже еси, и лета Твоя не оскудеют. Сынове раб Твоих вселятся, и семя их вовек исправится.

2-й лик: Милостиве, помилуй, помилуй, помилуй нас, Господи.

1-й лик: Слава: Яко щедрый, Господи, умилосердися на люди Твоя, яко Долготерпелив, примирися и помилуй нас.

2-й лик: И ныне, Богородичен: Пресвятая Владычице Всепетая, Благословенная, яко благолюбивая, утеши и помилуй нас.

Диакон возглашает:

Ко Пресвятей Госпоже Владычице нашей Деве Богородице, преклонше колена, помолимся.

Певцы: Пресвятая Богородице, спаси нас.

Всем преклоншим колена предстоятель чтет молитву:

О Пресвятая Госпоже Владычице Богородице, высши еси всех Ангел и Архангел и всея твари честнейши, Помощница еси обидимых, ненадеющихся Надеяние, убогих Заступница, печальных Утешение, алчущих Кормительница! Нагих Одеяние, больных Исцеление, грешных Спасение, христиан всех Поможение и Заступление. О всемилостивая Госпоже, Дево Богородице Владычице, милостию Твоею спаси и помилуй рабов Твоих, святейших патриархов православных, великаго господина и отца нашего Святейшего Патриарха Алексия, преосвященных митрополитов, архиепископов и епископов, и весь священнический и иноческий чин, и всех православных христиан ризою Твоею честною защити и умоли, Госпоже, из Тебе без семени воплотившагося Христа Бога нашего, да препояшет нас силою Своею свыше на невидимыя и видимыя враги наша. О всемилостивая Госпоже Владычице Богородице, воздвигни нас из глубины греховныя и избави нас от глада и губительства, от земли трясения и потопа, от огня и меча, от нахождения иноплеменных, и междоусобныя брани, от внезапныя смерти, от нападения вражия, от тлетворных ветров, от смертоносныя язвы и от всякого зла. Подаждь, Господи, мир и здравие рабам Твоим всем православным христианам и просвети им ум и очи сердечныя, еже ко спасению; и сподоби нас, грешных рабов Твоих, Царствия Сына Твоего, Христа Бога нашего, яко держава Его благословенна и препрославлена, со Безначальным Его Отцем и с Пресвятым и Благим и Животворящим Его Духом, ныне и присно, и во веки веков, аминь.

По молитве ектения малая.

Диакон глаголет: Заступи, спаси, помилуй...

Пресвятую, Пречистую...

Возглас: Яко Благ и Человеколюбец...

И начинаем по тому же чину третию статию.

1-й лик: поет тропарь, глас 6:

Яко щедрый, Господи, умилосердися на люди Твоя, яко Долготерпелив, примирися и помилуй нас.

2-й лик: Яко щедрый Господи, умилосердися на люди Твоя, яко Долготерпелив примирися, и помилуй нас.

Канонарх поет или возглашает иерей псалом 129, по стиху:

Из глубины воззвах к Тебе, Господи, Господи, услыши глас мой.

1-й лик: Яко щедрый, Господи, умилосердися на люди Твоя, яко Долготерпелив, примирися и помилуй нас.

Да будут уши Твои внемлюще гласу моления моего.

2-й лик: Яко щедрый, Господи, умилосердися на люди Твоя, яко Долготерпелив, примирися, и помилуй нас.

Аще беззакония назриши Господи, Господи, кто постоит? Яко у тебе очищение есть.

1-й лик: Яко щедрый, Господи, умилосердися на люди Твоя, яко Долготерпелив, примирися и помилуй нас.

Имене ради Твоего потерпех Тя, Господи, потерпе душа моя в слово Твое; упова душа моя на Господа.

2-й лик: Яко щедрый, Господи, умилосердися на люди Твоя, яко Долготерпелив, примирися и помилуй нас.

От стражи утренния до нощи, от стражи утренния, да уповает Израиль на Господа.

1-й лик: Яко щедрый, Господи, умилосердися на люди Твоя, яко Долготерпелив, примирися и помилуй нас.

Яко у Господа милость, и многое у Него избавление; и Той избавит Израиля от всех беззаконий его.

2-й лик: Яко щедрый, Господи, умилосердися на люди Твоя, яко Долготерпелив, примирися и помилуй нас.

1-й лик: Слава: Яко щедрый, Господи, умилосердися на люди Твоя, яко Долготерпелив, примирися и помилуй нас.

2-й лик: И ныне: Богородичен: Пресвятая Владычице, Всепетая, Благословенная, яко Благолюбивая, утеши и помилуй нас.

Посем священницы, певцы и вси люди поем псалом 50, во глас 6:

Помилуй мя, Боже,/ по велицей милости Твоей,/ и по множеству щедрот Твоих/ очисти беззаконие мое./ Наипаче омый мя от беззакония моего,/ и от греха моего очисти мя./ Яко беззаконие мое аз знаю,/ и грех мой предо мною есть выну./ Тебе Единому согреших/ и лукавое пред Тобою сотвоих;/ яко да оправдишися во словесех Твоих,/ и победиши внегда судити Ти./ Се бо в беззакониих зачат есмь,/ и во гресех роди мя мати моя./ Се бо истину возлюбил еси,/ безвестная и тайная премудрости Твоея явил ми еси./ Окропиши мя иссопом, и очищуся,/ омыеши мя, и паче снега убелюся./ Слуху моему даси радость и веселие,/ возрадуются кости смиренныя./ Отврати лице Твое от грех моих/ и вся беззакония моя очисти./ Сердце чисто созижди во мне, Боже,/ и дух прав обнови во утробе моей./ Не отвержи мене от лица Твоего,/ и Духа Твоего Святаго не отъими от Мене./ Воздаждь ми радость спасения Твоего,/ и Духом владычним утверди мя./ Научу беззаконныя путем Твоим,/ и нечестивии к Тебе обратятся./ Избави мя от кровей, Боже,/ Боже спасения моего,;/ возрадуется язык мой правде Твоей./ Господи, устне мои отверзеши,/ и уста моя возвестят хвалу Твою./ Яко аще бы восхотел еси жертвы,/ дал бых убо:/ всесожжения не благоволиши./ Жертва Богу дух сокрушен:/ сердце сокрушенно и смиренно Бог не уничижит./ Ублажи, Господи, благоволением Твоим Сиона,/ и да созиждутся стены Иерусалимския./ Тогда благоволиши жертву правды,/ возношение и всесожегаемая:/ тогда возложат на олтарь Твой тельцы.

Посем поем канон храма или в честь местночтимых святынь, или святаго, в тот день празднуемаго. Во святую же великую Четыредесятницу поем:

В Неделю 1-ю: канон покаянный ко Господу нашему Иисусу Христу.

В Неделю 2-ю: канон молебный ко Пресвятой Богородице, именуемый параклисис великий: Скорбных наведение...

В Неделю 3-ю: канон Честному и Животворящему Кресту.

В Неделю 4-ю: канон Всем святым русским.

В Неделю 5-ю: канон молебный ко Пресвятой Богородице, именуемый параклисис малый: Многими содержим напастьми...

На канонах припевы поют певцы, тропари читают священники, пременяющеся, катавасии же поют вкупе священники и певцы.

По 6-й песни чтется Евангелие.

По Евангелии и стихире глаголет диакон:

Спаси, Боже, людей Твоих и благослови достояние Твое, посети милостию и щедротами Твоими землю Русскую; утверди в ней веру истинную; расшири, умножи, умири и непоколебиму адовыми вратами вовеки сохрани Церковь Святую; умудри архипастырей и пастырей наших право правити слово Твоея истины; разори и вскоре испраздни всякое разделение и ересей восстание; соблюди в мире паству православную; возвыси ревнителей веры отеческой и ниспосли на нас и на всех верных рабов Твоих милости Твоя богатыя, молитвами Всепречистыя Владычицы нашея Богородицы и Приснодевы Марии; силою Честнаго и Животворящаго Креста и покровом честныя и многоцелебныя ризы Своея; предстательством честных Небесных Сил бесплотных; честнаго славнаго Пророка, Предтечи и Крестителя Иоанна; святаго славнаго и всехвальнаго апостола Андрея Первозваннаго и всех святых славных и всехвальных апостолов; святаго славнаго пророка Илии; иже во святых отцев наших и вселенских великих учителей и святителей Василия Великаго, Григория Богослова и Иоанна Златоустаго; иже во святых отца нашего Николая, архиепископа Мир Ликийских, Чудотворца; святых равноапостольных Мефодия и Кирилла, учителей Словенских; святых равноапостолов русских благовернаго великого князя Владимира и благоверной великой княгини Ольги; иже во святых отцев наших всея России чудотворцев Михаила, митрополита Киевского, Петра, Алексия, Ионы, Филиппа и священномученика Ермогена, святителей Московских; Никиты и Иоанна Новгородских; Леонтия и Димитрия Ростовских; святых благоверных князей и страстотерпцев Бориса и Глеба; преподобных и богоносных отцев наших Антония и Феодосия Киево-Печерских, Сергия и Никона Радонежских, Антония Римлянина и Варлаама Хутынскаго Новгородских, Зосимы и Савватия Соловецких и Серафима Саровскаго и всех прочих чудотворцев в земле Русской просиявших, святых славных и добропобедных мучеников, преподобных и богоносных отцев наших, святых праведных Богоотец Иоакима и Анны и всех святых, молим Тя, Многомилостиве Господи, услыши нас, грешных, молящихся Тебе, и помилуй нас.

Лик: Господи, помилуй (12 раз).

Возглас: Милостию и щедротами...

По 9-й песни: Достойно есть...

Посем: Трисвятое. По Отче наш...

Тропарь, глас 8:

Якоже плод красный Твоего спасительнаго сеяния/ земля Российская приносит Ти, Господи, вся святыя, в той просиявшия,/ тех молитвами в мире глубоце/ Церковь и страну нашу Богородицею соблюди, Многомилостиве.

Слава, и ныне, глас тойже:

С вышних призирая, убогия приемля,/ посети нас, грехов ради наших скорби терпящих, Владыко Всемилостиве,/ молитвами Богородицы и всех святых Русских/даруй земле нашей велию милость.

Ектения сугубая, юже глаголет диакон с кадилом:

Помилуй нас, Боже, по велицей милости Твоей, молимся Тебе: услыши и помилуй.

Лик: Господи, помилуй (трижды).

Еще молимся Господу Богу нашему, еже услышати Ему глас молитвы нашея и милостиву и долготерпеливу и умилену быти и тиху Человеколюбцу Богу о грехах наших и помиловати нас, и отвратити гнев Свой праведный на нас, и избавити нас от належащаго и праведнаго Своего прещения, и сохранити великий царствующий град Москву, град сей (или весь сию) и вся грады и веси наша и всю землю Русскую от глада, губительства, земли трясения и потопа, огня и меча, мора, нашествия иноплеменных и междоусобной брани, и избавити нас от належащих бед сих, и дати рабам Своим тихое и мирное время, и утешити скорбящих людей Своих, вопием вси со умилением, Господи Святый, услыши и помилуй.

Лик: Господи, помилуй (40 раз).

Еще молимся о еже услышати Господу Богу глас моления нас, грешных, и помиловати нас.

Лик: Господи, помилуй (трижды).

Возглас: Услыши ны, Боже, Спасителю наш...

Посем возглашает диакон:

Ко всем святым земли Русской, преклонше колена, помолимся.

Лик: Вси святии земли Русской, молите Бога о нас.

И всем колена преклоншим чтет предстоятель молитву сию:

О всеблаженнии и богомудрии угодницы Божии, подвигами своими землю Русскую освятившие и телеса свои, яко семя веры в ней оставившие, душами же своими Престолу Божию предстоящии и непрестанно о ней молящиися! Се ныне мы, грешнии, меньшие братия ваши, дерзаем приносити вам сие хвалебное пение: величаем ваши великие подвиги, духовные воины Христовы, терпением и мужеством до конца врага низложившие и нас от прелести и козни его избавляющие; ублажаем ваше святое житие, светильницы божественныя, светом веры и добродетелей светящие и наши умы и сердца богомудренно озаряющие; прославляем ваши великие чудеса, цветы райские, в стране нашей северной прекрасне процветшии и ароматами дарований и чудес повсюду благоухающие; восхваляем вашу богоподражательную любовь, предстатели наши и покровители, и уповающе на помощь вашу, припадаем к вам и вопием: равноапостольные просветители наши! Споспешествуйте людям Русской земли преданную вами веру православную твердо содержати, да спасительное семя, вами всеянное, не изсушено будет зноем неверия, но дождем Божия поспешения напоенное, плод изобильный да принесет. Святители Христовы! Молитвами вашими утвердите Церковь Русскую, ереси, расколы и нестроения в ней потребите, расточенныя овцы воедино соберите и от всяких волков во одежде овчей, в стадо Христово входящих, оградите. Преподобные отцы! Сохраните нас от прелестей мира сего лукаваго, да отвергшеся себе и вземше крест свой последуем Христу, распинающе плоть свою со страстьми и похотьми, носяще тяготы друг друга. Благоверные князие! Воззрите милостивно на земное Отечество ваше и вся нечестия и соблазны, в нем ныне сущия, оружием молитв ваших потребите, да якоже древле, тако и ныне и в грядущее время прославляется на Святой Руси имя Господне. Страстотерпцы Российские преславные! Укрепите нас в мужественном стоянии даже до крови за веру православную и обычаи отеческие, да ни скорбь, ни теснота, ни гонения, ни глад, ни нагота, ни беда, ни меч не возмогут нас разлучити от любви Божией, яже о Христе Иисусе. Блаженные, Христа ради юродивые и праведные! Посрамите мудрость века сего, возносящуюся на разум Божий, нам же помозите, спасительным буйством Креста Христова утвердившеся, соблазнами мудрости мирской непозыблемым быти, горнее присно, а не земное помышляти. Богомудрыя жены! В немощном естестве подвиги велии явившии, молитеся, да дух вашей любве ко Господу и ревность о угождении Ему и о своем и ближняго спасении не оскудевает в нас. Вси святии сродницы наши, от лет древних просиявшие и в последние дни подвизавшиеся, явленные и неявленные, ведомые и неведомые! Помяните нашу немощь и уничижение и молитвами вашими испросите у Христа Бога нашего, да и мы, безбедно преплывше житейскую пучину и невредимо соблюдше сокровище веры, в пристанище вечнаго спасения достигнем и в блаженных обителях Горняго Отечества вкупе с вами и со всеми угодившими от века святыми водворимся, благодатию и человеколюбием Спасителя нашего Господа Иисуса Христа, Емуже со Превечным Отцем и Пресвятым Духом подобает непрестанное славословие и поклонение от всех тварей во веки веков.

Лик: Аминь.

И прочая по обычаю и отпуст:

Христос, Истинный Бог наш, молитвами Пречистыя Своея Матери, святаго равноапостольнаго благовернаго великаго князя Владимира и всех прочих чудотворцев, в земле Русской просиявших, и всех святых, помилует и спасет нас, яко Благ и Человеколюбец.

Лик: Господи, Помилуй (трижды).

Посем поем стихи сии:

Утверждение на Тя надеющихся,/ утверди, Господи, Церковь,/ юже стяжал еси,/ Честною Твоею Кровию.

Под Твою милость прибегаем, Богородице Дево,/ молений наших не презри в скорбях,/ но от бед избави нас,/ едина Чистая и Благословенная.

Пресвятая Богородице, спаси нас.

Вси святии земли Русской, молите Бога о нас.

В Неделю 1-ю Святыя Четыредесятницы

Поем на литии канон покаянный ко Господу нашему Иисусу Христу.

Поем его без ирмосов. Глас 6.

Песнь 1

Ирмос: Яко по суху пешешествовав Израиль...

1-й лик: Помилуй мя, Боже, помилуй мя.

Ныне приступих аз, грешный и обремененный, к Тебе, Владыце и Богу моему; не смею же взирати на небо, токмо молюся, глаголя: даждь ми, Господи, ум, да плачуся о делах моих горько.

2-й лик: Помилуй мя, Боже, помилуй мя.

О горе мне, грешному; паче всех человек окаянен есмь; покаяния несть во мне. Даждь ми, Господи, слезы, да плачуся о делах моих горько.

1-й лик: Слава: Безумне, окаянне человече, в лености время губиши; помысли житие твое, и обратися ко Господу Богу, и плачися о делах твоих горько.

2-й лик: И ныне: Мати Божия Пречистая, воззри на мя грешнаго, и от сети диаволи избави мя, и на путь покаяния настави мя, да плачуся о делах моих горько.

Катавасия по каждой песни: Избави от бед и скорбей рабов Твоих, Владыко Всемилостиве, яко мы усердно к Тебе прибегаем, к милостивому Избавителю, всех Владыце Господу Иисусу.

Песнь 3

Ирмос: Несть свят...

1-й лик: Помилуй мя, Боже, помилуй мя.

Внегда поставлени будут престоли на Судище Страшнем, тогда всех человек дела обличатся; горе тамо будет грешным, в муку отсылаемым, и то ведущи, душе моя, покайся от злых дел твоих.

2-й лик: Помилуй мя, Боже, помилуй мя.

Праведницы возрадуются, а грешнии восплачутся; тогда никтоже возможет помощи нам, но дела наша осудят нас. Темже прежде конца покайся от злых дел твоих.

1-й лик: Слава: Увы мне великогрешному, иже делы и мысльми осквернився, ни капли слез имею от жестосердия; ныне возникни от земли, душе моя, и покайся от злых дел твоих.

2-й лик: И ныне: Се взывает, Госпоже, Сын Твой, и поучает нас на доброе, аз же грешный добра всегда бегаю, но Ты, Милостивая, помилуй мя, да покаюся от злых дел моих.

Катавасия: Избави от бед и скорбей рабов Твоих, Владыко Всемилостиве, яко мы усердно к Тебе прибегаем, к милостивому Избавителю всех Владыце Господу Иисусу.

Ектения сугубая:

Помилуй нас, Боже...

Еще молимся о великом господине...

Еще молимся о стране нашей...

Еще молимся за всю братию и за вся христианы.

Возглас: Яко милостив...

Посем 1-й лик: поет седален, глас 6:

Помышляю день страшный/ и плачуся деяний моих лукавых;/ како отвещаю Бессмертному Царю?/ Или коим же дерзновением воззрю на Судию, блудный аз?/ Благоутробный Отче,/ Сыне Единородный/ и Душе Святый, помилуй мя.

2-й лик: Слава, и ныне. Богородичен: Связан многими ныне узами грехов/ и содержим лютыми страстями и бедами,/ к Тебе прибегаю, моему спасению, и вопию:/ помози мне, Дево Мати Божия.

Песнь 4

Ирмос: Христос моя сила...

1-й лик: Помилуй мя, Боже, помилуй мя.

Широк путь зде и угодный сласти творити, но горько будет в последний день, егда душа от тела разлучатися будет. Блюдися от сих, человече, Царствия ради Божия.

2-й лик: Помилуй мя, Боже, помилуй мя.

Почто убогаго обидиши? Мзду наемничу удерживаеши? Брата твоего не любиши? Блудом и гордостию согрешаеши? Остави убо сия, душе моя, и покайся Царствия ради Божия.

1-й лик: Слава: О безумный человече, доколе погрязаеши, яко пчела, собирающи богатство твое? Вскоре бо погибнет, яко прах и пепел; но более взыщи Царствия Божия.

2-й лик: И ныне: Госпоже Богородице, помилуй мя грешнаго, и в добродетели укрепи, и соблюди мя, да наглая смерть не похитит мя неготоваго, и доведи мя, Дево, Царствия Божия.

Катавасия: Избави от бед и скорбей рабов Твоих, Владыко Всемилостиве, яко мы усердно к Тебе прибегаем, к милостивому Избавителю всех Владыце Господу Иисусу.

Песнь 5

Ирмос: Божиим светом...

1-й лик: Помилуй мя, Боже, помилуй мя.

Воспомяни, окаянный человече, како лжам, клеветам, разбою, немощам и лютым зверям, грехов ради порабощен еси; душе моя грешная, того ли восхотела еси?

2-й лик: Помилуй мя, Боже, помилуй мя.

Трепещут все мои члены, всеми бо сотворих вину: очами взираяй, ушами слышай, языком злая глаголяй, всего себе геенне предаяй. Душе моя грешная, сего ли восхотела еси?

1-й лик: Слава: Блудника и разбойника кающася приял еси, Спасе; аз же един леностию греховною отягчихся, и злым делам поработихся. Душе моя грешная, сего ли восхотела еси?

2-й лик: И ныне: Дивная и скорая Помощнице всем человеком, Мати Божия, помози мне, недостойному. Душа бо моя грешная того восхоте.

Катавасия: Избави от бед и скорбей рабов Твоих, Владыко Всемилостиве, яко мы усердно к Тебе прибегаем, к милостивому Избавителю всех Владыце Господу Иисусу.

Песнь 6

Ирмос: Житейское море...

1-й лик: Помилуй мя, Боже, помилуй мя.

Житие на земли блудно пожих, и душу во тьму предах. Ныне убо молю Тя, Милостивый Владыко: свободи мя от сего работства врагу и даждь ми разум творити волю Твою.

2-й лик: Помилуй мя, Боже, помилуй мя.

Кто творит таковая, якоже аз? Якоже бо свиния лежит в калу, тако и аз греху служу, но Ты, Господи, исторгни мя от смрада сего и даждь мне сердце творити заповеди Твоя.

1-й лик: Слава: Воспряни, окаянный человече, к Богу, воспомянув своя согрешения, припадая ко Творцу, слезя и стеня; Той же, яко Милосерд, даст ти ум знати волю Свою.

2-й лик: И ныне: Богородице Дево, от видимого и невидимого зла сохрани мя, Пречистая, и приими молитвы моя, и донеси их Сыну Твоему, да даст ми ум творити волю Свою.

Катавасия: Избави от бед и скорбей рабов Твоих, Владыко Всемилостиве, яко мы усердно к Тебе прибегаем, к милостивому Избавителю всех Владыце Господу Иисусу.

Ектения малая.

Возглас: Ты бо ecи Царь мира...

Кондак, глас 8:

Душе моя, почто грехами богатееши? Почто волю диаволю твориши? В чесом надежду полагаеши? Престани от сих и обратися к Богу, с плачем зовущи: Милосерде Господи, помилуй мя, грешнаго.

Прокимен, глас 4: Даждь нам помощь от скорби.

Стих: О Бозе сотворим силу.

Евангелие от Марка, зач. 51 (11,23–26).

Рече Господь Своим учеником: имейте веру Божию. Аминь бо глаголю вам, яко иже аще речет горе сей: двигнися, и верзися в море; и не размыслит в сердце своем, но веру имет, яко еже глаголет, бывает: будет ему, еже аще речет. Сего ради глаголю вам: вся елика аще молящеся просите, веруйте, яко приемлете; и будет вам, и егда стоите молящеся, отпущайте, аще что имате на кого; да и Отец ваш, Иже есть на Небесех, отпустит вам согрешения ваша. Аще ли же вы не отпущаете, ни Отец ваш, Иже есть на Небесех, отпустит вам согрешений ваших.

Слава: Отче, Слове и Душе, Троице Святая, очисти множество согрешений наших.

И ныне: Молитвами Богородицы, Милостиве, очисти множество согрешений наших.

Помилуй мя, Боже, по велицей милости Твоей и по множеству щедрот Твоих очисти беззаконие мое.

Стихира, глас 6:

Небесный Царю Человеколюбче Господи,/ Долготерпеливе и Многомилостиве,/ призри от святаго жилища Твоего,/ виждь уничижение наше,/ виждь и обиды наша,/ и не яростию Твоею обличи нас/ и не гневом Твоим накажи нас;/ не предаждь нас в нашествие языком,/ ни в руки варваров,/ или в пропасть погибнути,/ да не когда рекут язы́цы:/ где есть Бог их?/ Мы же людие Твои/ и овцы пажити Твоея,/ и имя Твое призываем./ Имаши естественную благость Твою,/ покрый землю нашу./ Имаши Молитвенницу Богородицу,/ рождшую Тя, Слове,/ лик Ангелов и всех святых;/ приими моление их о людях,/ согрешивших и отчаявшихся,/ и спаси, Незлобиве, достояние Твое.

Посем глаголет диакон:

Спаси, Боже, людей Твоих и благослови достояние Твое, посети милостию и щедротами Твоими землю Русскую; утверди в ней веру истинную; разшири, умножи, умири и непоколебиму адовыми вратами вовеки сохрани Церковь Святую; умудри архипастырей и пастырей наших право правити слово Твоея истины; разори и вскоре испраздни всякое разделение и ересей восстание; соблюди в мире паству православную; возвыси ревнителей веры отеческой и ниспосли на нас и на всех верных рабов Твоих милости Твоя богатыя, молитвами Всепречистыя Владычицы нашея Богородицы и Приснодевы Марии; силою Честнаго и Животворящаго Креста и покровом честныя и многоцелебныя ризы Своея; предстательством честных Небесных Сил бесплотных; честнаго славнаго Пророка, Предтечи и Крестителя Иоанна; святаго славнаго и всехвальнаго апостола Андрея Первозваннаго и всех святых славных и всехвальных апостолов; святаго славнаго пророка Илии; иже во святых отцев наших и вселенских великих учителей и святителей Василия Великаго, Григория Богослова и Иоанна Златоустаго; иже во святых отца нашего Николая, архиепископа Мир Ликийских, Чудотворца; святых равноапостольных Мефодия и Кирилла, учителей Словенских; святых равноапостолов русских благовернаго великого князя Владимира и благоверной великой княгини Ольги; иже во святых отцев наших всея России чудотворцев Михаила, митрополита Киевского, Петра, Алексия, Ионы, Филиппа и священномученика Ермогена, святителей Московских; Никиты и Иоанна Новгородских; Леонтия и Димитрия Ростовских; святых благоверных князей и страстотерпцев Бориса и Глеба; преподобных и богоносных отцев наших Антония и Феодосия Киево-Печерских, Сергия и Никона Радонежских, Антония Римлянина и Варлаама Хутынскаго Новгородских, Зосимы и Савватия Соловецких и Серафима Саровскаго и всех прочих чудотворцев в земле Русской просиявших, святых славных и добропобедных мучеников, преподобных и богоносных отцев наших, святых праведных Богоотец Иоакима и Анны и всех святых, молим Тя, Многомилостиве Господи, услыши нас, грешных, молящихся Тебе, и помилуй нас.

Лик: Господи, помилуй (12 раз).

Возглас: Милостию и щедротами...

Песнь 7

Ирмос: Росодательну убо пещь...

1-й лик: Помилуй мя, Боже, помилуй мя.

Не надейся, душе моя, на тленное богатство, и на неправедное собрание, вся бо сия не веси кому оставиши, но возопий: помилуй мя, Христе Боже, недостойнаго.

2-й лик: Помилуй мя, Боже, помилуй мя.

Не уповай, душе моя, на телесное здравие и на скоромимоходящую красоту; видиши бо, яко сильнии и младии умирают, но возопий: помилуй мя, Христе Боже, недостойнаго.

1-й лик: Слава: Воспомяни, душе моя, вечное житие, Царство Небесное, уготованное святым, и тьму кромешную и гнев Божий злым, и возопий: помилуй мя, Христе Боже, недостойнаго.

2-й лик: И ныне: Припади, душе моя, к Божией Матере, и помолися Той, есть бо скорая Помощница кающимся, умолит Сына Христа Бога и помилует мя, недостойнаго.

Катавасия: Избави от бед и скорбей рабов Твоих, Владыко Всемилостиве, яко мы усердно к Тебе прибегаем, к милостивому Избавителю всех Владыце Господу Иисусу.

Песнь 8

Ирмос: Из пламене преподобным...

1-й лик: Помилуй мя, Боже, помилуй мя.

Како не имам плакатися, егда помышляю смерть? Видех бо во гробе лежаща брата моего, бесславна и безобразна. Что убо чаю? И на что надеюся? Токмо даждь ми, Господи, прежде конца покаяние.

2-й лик: Помилуй мя, Боже, помилуй мя.

Како не имам плакатися, егда помышляю смерть? Видех бо во гробе лежаща брата моего, бесславна и безобразна. Что убо чаю? И на что надеюся? Токмо даждь ми, Господи, прежде конца покаяние.

1-й лик: Слава: Верую, яко приидеши судити живых и мертвых, и вси во своем чину станут, старии и младии, владыки и князи, девы и священницы; где обрящуся аз? Сего ради вопию: даждь ми, Господи прежде конца покаяние.

2-й лик: И ныне: Пречистая Богородице, приими недостойную молитву мою и сохрани мя от наглыя смерти, и даруй ми прежде конца покаяние.

1-й лик: Хвалим, благословим, поклоняемся Господеви, поюще и превозносяще Его во веки.

Ирмос: Из пламени преподобным росу источил еси, и праведнаго жертву водою попалил еси. Вся бо твориши, Христе, единым хотением. Тя превозносим вовся веки.

Песнь 9

Ирмос: Бога человеком невозможно видети, на Негоже не смеют чини ангельские взирати. Тобою же, Всечистая, явися человеком Слово воплощенно, егоже величающе с Небесными вои Тя ублажаем.

2-й лик: Помилуй мя, Боже, помилуй мя.

Ныне к вам прибегаю, Ангелы, Архангелы и вся Небесныя Силы, у Престола Божия стоящии, молитеся ко Творцу своему, да избавит душу мою от муки вечныя.

1-й лик: Помилуй мя, Боже, помилуй мя.

Ныне плачуся к вам, святии патриархи, царие и пророцы, апостоли и святители и вси избраннии Христовы; помозите мне на суде, да спасет душу мою от силы вражия.

2-й лик: Слава: Ныне к вам воздежу руце, святии мученицы, пустынницы, девственницы, праведницы и вси святии, молящиися ко Господу за весь мир, да помилует мя в час смерти моея.

1-й лик: И ныне: Мати Божия, помози ми, на Тя сильне надеющемуся, умоли Сына Своего, да поставит мя недостойнаго одесную Себе, егда сядет судяй живых и мертвых. Аминь.

2-й лик: Достойно есть...

В Неделю 2-ю Святыя Четыредесятницы

Поем на литии канон молебный ко Пресвятой Богородице изрядный, параклисис великий.

Поем его без ирмосов. Глас 8.

Песнь 1

Ирмос: Колесницегонителя фараона...

1-й лик: Пресвятая Богородице, спаси нас.

Скорбных наведения обуревают смиренную мою душу, и напастей облацы мое покрывают сердце, Богоневестная; но Свет рождшая Божественный и Превечный, возсияй мне свет радостный.

2-й лик: Пресвятая Богородице, спаси нас.

От безмерных нуждей и скорбей, и от врагов лютых, и напастей житейских избавлься, Всепречистая, крепкою силою Твоею, воспеваю, величаю безмерную Твою милость и еже ко мне Твое утешение.

1-й лик: Слава: Ныне надеяся, к Твоему прибегох заступлению крепкому и к Твоему покрову вседушно притекох, и колена преклоняю, Владычице, и плачу и стеню, не презри мене, окаяннаго, христианом Прибежище.

2-й лик: И ныне: Не умолчу вопити яснейше величия Твоя; аще бо не Ты, Отроковице, всегда предстояла еси, о мне молящи Сына Твоего, кто бы от толикия бури и лютых бед избавил мя?

Катавасия: Спаси от бед рабы Твоя, Богородице, яко вси по Бозе к Тебе прибегаем, яко к нерушимой стене и предстательству.

Призри благосердием, Всепетая Богородице, на мое лютое телесе озлобление и исцели души моея болезнь.

Песнь 3

Ирмос: Небеснаго круга...

1-й лик: Пресвятая Богородице, спаси нас.

Недоумевый от всех, болезненно зову Ти: предвари теплое предстательство и Твою помощь даждь ми, рабу Твоему, смиренному и окаянному, Твоего заступления ищущему тепле.

2-й лик: Пресвятая Богородице, спаси нас.

Удивила еси воистину ныне на мне, Владычице, благодеяния Твоя, Отроковице, и милости Твоя. Темже славлю Тя и воспеваю и почитаю многое и безмерное смотрение Твое.

1-й лик: Слава: Буря мя обуревает напастей, Владычице, и скорбные треволнения погружают; но предваривши, руку ми даждь помощи, теплое заступление и предстательство Твое.

2-й лик: И ныне: Истинную Богородицу исповедую, Владычице, Тя, смерти державу потребившую; яко бо оживляющая, от уз адовых к жизни возвела еси мя, в землю текшаго.

Катавасия: Спаси от бед рабы Твоя, Богородице, яко вси по Бозе к Тебе прибегаем, яко к нерушимой стене и предстательству.

Призри благосердием, Всепетая Богородице, на мое лютое телесе озлобление и исцели души моея болезнь.

Ектения сугубая:

Помилуй нас, Боже...

Еще молимся о великом господине...

Еще молимся о стране нашей...

Еще молимся за всю братию...

Возглас: Яко милостив...

Тропарь, глас 2:

Моление теплое и стена необоримая, милости источниче, мирови прибежище, прилежно вопием Ти: Богородице Владычице, предвари и от бед избави нас, едина вскоре предстательствующая.

Песнь 4

Ирмос: Ты моя крепость, Господи...

1-й лик: Пресвятая Богородице, спаси нас.

И где прочее иное обрящу заступление? Камо прибегну? Где же и спасуся? Кую теплую возъимам помощницу, скорбьми житейскими и бурями, увы мне, колеблему? На Тя едину уповаю, и дерзаю, и хвалюся, и притекаю к покрову Твоему, спаси мя.

2-й лик: Пресвятая Богородице, спаси нас.

Реку сладкую милости Твоея, богатыми дарами оросившую всеокаянную и смиренную душу мою, Всечистая, напастей и скорбей пещию сожженную, величаю, проповедую и притекаю к покрову Твоему, спаси мя.

1-й лик: Слава: Тя Чистую, Тя Деву и нескверную, едину имам стену необоримую, прибежище, покров крепкий, оружие спасения, не презри мене блуднаго, надеждо ненадеемых, немощствующих помоще, оскорбляемых радосте и заступление.

2-й лик: И ныне: Како изрещи Твоя по достоинству возмогу безмерныя щедроты, о Владычице! Яже мою всегда душу люте оскорбляемую, яко воды обышедшия? Но, о Твоего промысла и благодеяния, егоже безумно окаянный погубих!

Катавасия: Спаси от бед рабы Твоя, Богородице, яко вси по Бозе к Тебе прибегаем, яко к нерушимой стене и предстательству.

Призри благосердием, Всепетая Богородице, на мое лютое телесе озлобление и исцели души моея болезнь.

Песнь 5

Ирмос: Вскую мя отринул ecи...

1-й лик: Пресвятая Богородице, спаси нас.

Благодарно вопию Ти: радуйся, Мати Дево, радуйся, Богоневесто, радуйся, Божественный Покрове, радуйся, оружие и стено нерушимая. Радуйся, предстательство и помоще, и спасение, иже к Тебе притекающим верою.

2-й лик: Пресвятая Богородице, спаси нас.

Благодарно вопию Ти: радуйся, Мати Дево, радуйся, Богоневесто, радуйся, Божественный Покрове, радуйся, оружие и стено нерушимая. Радуйся, предстательство и помоще, и спасение, иже к Тебе притекающим верою.

1-й лик: Слава: Ненавидящие мя всуе, стрелы и мечи, и ров уготовиша, и ищут всеокаяннаго моего тела исторгнути, и низвести в землю желают, но от сих, Чистая, предваривши, спаси мя.

2-й лик: И ныне: Кий Тебе дар благодарения принесу за Твои дарования, ихже насладихся, и за Твою безмерную благостыню? Темже убо славлю, песнословлю и величаю Твою неизреченную ко мне милость.

Катавасия: Спаси от бед рабы Твоя, Богородице, яко вси по Бозе к Тебе прибегаем, яко к нерушимой стене, и предстательству.

Призри благосердием, Всепетая Богородице, на мое лютое телесе озлобление и исцели души моея болезнь.

Песнь 6

Ирмос: Молитву пролию...

1-й лик: Пресвятая Богородице, спаси нас.

Облацы скорбных покрыша окаянную мою душу и сердце, и помрачение вводят мне, Отроковице; но рождшая Свет Неприступный, изжени сия далече, дохновением Божественныя молитвы Твоея.

2-й лик: Пресвятая Богородице, спаси нас.

Утешение в скорбех вем, и недугов врача Тя знаю, и всесовершенное сокрушение смерти, и реку жизни неисчерпаемую, и всех сущих в напастех скорое и быстрое заступление.

1-й лик: Слава: Не скрываю глубины Твоея милости, и ток безмерных чудес, и источник приснотекущий воистину, яже ко мне милости Твоея, Владычице; но всем исповедую, и вопию, и проповедую, и вещаю.

2-й лик: И ныне: Обыдоша мя житейские бури, яко пчелы сот, Дево, и мое содержащия сердце уязвляют стрелы скорбей; но да обрящу Тя помощницу, и спутницу, и избавительницу, Всепречистая.

Катавасия: Спаси от бед рабы Твоя, Богородице, яко вси по Бозе к Тебе прибегаем, яко к нерушимой стене и предстательству.

Призри благосердием, Всепетая Богородице, на мое лютое телесе озлобление и исцели души моея болезнь.

Ектения малая.

Возглас: Ты бо ecu Царь мира...

Кондак, глас 6:

Предстательство христиан непостыдное, ходатайство ко Творцу непреложное, не презри грешных молений гласы, но предвари, яко Благая, на помощь нас, верно зовущих Ти: ускори на молитву и потщися на умоление, предстательствующи присно, Богородице, чтущих Тя.

Прокимен, глас 4: Помяну имя Твое во всяком роде и роде.

Стих: Слыши, Дщи, и виждь, и приклони ухо Твое.

Евангелие от Луки, зач. 4 (1, 39–49, 56).

Во дни оны, воставши Мариам иде в Горняя со тщанием, во град Иудов. И вниде в дом Захариин и целова Елисавет и бысть, яко услыша Елисавет целование Мариино, взыграся младенец во чреве ея; и исполнися Духа Свята Елисавет. И возопи гласом велиим, и рече: благословенна Ты в женах, и благословен Плод чрева Твоего. И откуду мне сие, да прииде Мати Господа моего ко мне; се бо яко бысть глас целования Твоего во ушию моею, взыграся младенец радощами во чреве моем. И блаженна Веровавшая, яко будет совершение глаголанным Ей от Господа. И рече Мариам: величит душа Моя Господа, и возрадовася дух Мой о Бозе Спасе Моем. Яко призре на смирение Рабы Своея; се бо отныне ублажат Мя вси роди. Яко сотвори Мне величие Сильный, и свято имя Его. Пребысть же Мариам с нею, яко три месяцы, и возвратися в дом Свой.

Слава: Молитвами Богородицы, Милостиве, очисти множество согрешений наших.

И ныне: Молитвами Богородицы, Милостиве, очисти множество согрешений наших.

Помилуй мя, Боже, по велицей милости Твоей, и по множеству щедрот Твоих очисти беззаконие мое.

Стихира, глас 6:

Не ввери мя человеческому предстательству, Пресвятая Владычице, но приими моление раба Твоего, скорбь бо обдержит мя; терпети не могу демонскаго стреляния, покрова не имам, ниже где прибегну, окаянный, всегда побеждаемь и утешения не имам, разве Тебе, Владычице мира, упование и предстательство верных, не презри моление мое, полезно сотвори.

Посем глаголет диакон:

Спаси, Боже, людей Твоих и благослови достояние Твое, посети милостию и щедротами Твоими землю Русскую; утверди в ней веру истинную; расшири, умножи, умири и непоколебиму адовыми вратами вовеки сохрани Церковь Святую; умудри архипастырей и пастырей наших право правити слово Твоея истины; разори и вскоре испраздни всякое разделение и ересей восстание; соблюди в мире паству православную; возвыси ревнителей веры отеческой и ниспосли на нас и на всех верных рабов Твоих милости Твоя богатыя, молитвами Всепречистыя Владычицы нашея Богородицы и Приснодевы Марии; силою Честнаго и Животворящаго Креста и покровом честныя и многоцелебныя ризы Своея; предстательством честных Небесных Сил бесплотных; честнаго славнаго Пророка, Предтечи и Крестителя Иоанна; святаго славнаго и всехвальнаго апостола Андрея Первозваннаго и всех святых, славных и всехвальных апостолов; святаго славнаго пророка Илии; иже во святых отцев наших и вселенских великих учителей и святителей Василия Великаго, Григория Богослова и Иоанна Златоустаго; иже во святых отца нашего Николая, архиепископа Мир Ликийских, Чудотворца; святых равноапостольных Мефодия и Кирилла, учителей Словенских; святых равноапостолов русских благовернаго великого князя Владимира и благоверной великой княгини Ольги; иже во святых отцев наших всея России чудотворцев Михаила, митрополита Киевского, Петра, Алексия, Ионы, Филиппа и священномученика Ермогена, святителей Московских; Никиты и Иоанна Новгородских; Леонтия и Димитрия Ростовских; святых благоверных князей и страстотерпцев Бориса и Глеба; преподобных и богоносных отцев наших Антония и Феодосия Киево-Печерских, Сергия и Никона Радонежских, Антония Римлянина и Варлаама Хутынскаго Новгородских, Зосимы и Савватия Соловецких и Серафима Саровскаго и всех прочих чудотворцев в земле Русской просиявших, святых славных и добропобедных мучеников, преподобных и богоносных отцев наших, святых праведных Богоотцев Иоакима и Анны и всех святых, молим Тя, Многомилостиве Господи, услыши нас, грешных, молящихся Тебе, и помилуй нас.

Лик: Господи, помилуй (12 раз).

Возглас: Милостию и щедротами...

Песнь 7

Ирмос: Отроцы еврейстии в пещи...

1-й лик: Пресвятая Богородице, спаси нас.

Свет рождшая, Богородице, помрачена мя нощию грехов просвети; Ты, Света сущи приятелище чистое и непорочное; да любовию Тя славлю.

2-й лик: Пресвятая Богородице, спаси нас.

Покров буди и предстательство и заступление и похвала, Дево, обнажену мне ныне всякия помощи, беспомощных сило и надеждо ненадеемых.

1-й лик: Слава: Всею душею и мыслию, и сердцем, и устнами Тя славлю, насладився Твоих великих дарований; но, о Твоея благостыни и безмерных Твоих чудес!

2-й лик: И ныне: Виждь милостивым оком Твоим и посети озлобление еже имам, и лютых напастей, и вреда, и бед, и от искушений мя избави безмерною милостию Твоею.

Катавасия: Спаси от бед рабы Твоя, Богородице, яко вси по Бозе к Тебе прибегаем, яко к нерушимой стене и предстательству.

Призри благосердием, Всепетая Богородице, на мое лютое телесе озлобление и исцели души моея болезнь.

Песнь 8

Ирмос: На горе святей прославльшася...

1-й лик: Пресвятая Богородице, спаси нас.

Благоутробия ради милости Твоея, Дево, не презри, Чистая, потопляемаго мене бурею житейских волн; но даждь мне руку помощи, утесняему озлобленьми житейскими.

2-й лик: Пресвятая Богородице, спаси нас.

Обстояния и скорби и нужды обретоша мя, Чистая, и напасти житейския, и искушения отвсюду мя обыдоша; но предстани мне, и заступи мя крепким Твоим покровом.

1-й лик: Слава: В бурях да обрящу Тя пристанище, в печалех радость и веселие, и в недугах скорую помощь, и в бедах избавительницу и предстательницу во искушениях.

2-й лик: И ныне: Радуйся, престоле огнеобразный Господень. Радуйся Божественная и манноприемная стамно. Радуся, златый светильниче, свеще неугасима. Радуйся, девам славо и матерем украшение и похвало.

1-й лик: Хвалим, благословим, поклоняемся Господеви, поюще и превозносяще Его вовеки.

Ирмос: На горе святей прославльшася и в купине огнем Приснодевы Моисеови тайну явльшаго, Господа пойте и превозносите во вся веки.

Песнь 9

Ирмос: Ужасеся о сем небо, и земли удивишася концы, яко Бог явися человеком плотски, и чрево Твое бысть пространнейшее небес. Тем Тя Богородицу Ангелов и человек чиноначалия величают.

1-й лик: Пресвятая Богородице, спаси нас.

К кому прибегну иному, Чистая? Где притеку прочее и спасуся? Камо иду? Кое же обрящу прибежище? Кое теплое заступление? Кую в скорбех помощницу? На Тя едину уповаю и о Тебе единей хвалюся, и на Тя, дерзая, прибегох.

2-й лик: Пресвятая Богородице, спаси нас.

Несть исчислити возможно величия Твоя, Богоневесто, и изрещи глубину неизмеримую, паче ума чудес Твоих, совершаемых всегда, любовию Тя чтущим и верою поклоняющимся, яко воистину Бога рождшей.

1-й лик: Слава: В песнех благодарных славословлю и почитаю безмерную милость, и многую силу Твою всем исповедую, и благодеяния Твоя, яже истощила еси на мя, проповедую, величаю душею же и сердцем, и мыслию, и языком всегда.

2-й лик: И ныне: Моление мое приими убогое, и плача моего не презри, и слез, и стенания; но заступи мя яко Благая, и прошения исполни; можеши бо вся, яко Всемощнаго Владыки Бога Мати, аще токмо призриши моему окаянному смирению.

1-й лик: Достойно есть...

В Неделю 3-Ю Святыя Четыредесятницы

Поем на литии канон Честному Кресту, положенный в Триоди на утрени в среду средния седмицы.

Поем его без ирмосов. Глас 4.

Песнь 1

Ирмос: Отверзу уста моя...

1-й лик: Слава, Господи, Кресту Твоему Честному.

Древу святому, на немже Христос простре длани, побеждаяй сопротивныя начала, поклонимся, постом просвещени, во славу и хвалу Вседержителя.

2-й лик: Слава, Господи, Кресту Твоему Честному.

Видится предлежащий Крест спасительный, освящение подаваяй; к сему приступим, очистивше и тело и сердце, и почерпем благодать спасительную.

1-й лик: Слава Отцу и Сыну и Святому Духу.

Огнем заповедей Твоих очисти мя, Человеколюбче, и Твоя спасительныя страсти подаждь мне ныне видети, и любовию поклонитися, Крестом ограждаему и соблюдаему.

2-й лик: И ныне и присно и во веки веков. Аминь.

Пригвождение Твое на Кресте зрящи Рождшая Тя, Человеколюбче, рыдаше зовущи: како осужден бысть хотяй всем судити, како видится висяй – славы Господь?

Катавасия, по каждой песни: Избави от бед и скорбей рабов Твоих, Владыко Всемилостиве, яко мы усердно к Тебе прибегаем, к милостивому Избавителю, на Кресте распеншемуся Господу Иисусу.

Песнь 3

Ирмос: Твоя песнословцы...

1-й лик: Слава, Господи, Кресту Твоему Честному.

Поста водою сердца омывше, древо Крестное верно объимем, на немже Христос распинаем, воду оставления нам, яко Благодетель, источи.

2-й лик: Слава, Господи, Кресту Твоему Честному.

Крестным ветрилом окрилившеся, плавание спасительное поста се преполовляем, имже, Мессия Иисусе Боже, нас ко пристанищу страсти Твоея направи.

1-й лик: Слава Отцу и Сыну и Святому Духу.

Образоваше Моисей на горе тя, Кресте, на сокрушение иноплеменников. Мы же воображаем тя сердцем, и зряще тя и покланяющеся, побеждаем врагов безплотных силою твоею.

2-й лик: И ныне и присно и во веки веков. Аминь.

По воле Твоей человеком был еси, Бог сый и всех Творец, и ныне на Кресте Тя висяща зрю, и сердцем уязвляюсь, Сыне Мой Христе, – Тя рождшая глаголаше.

Катавасия: Избави от бед и скорбей рабов Твоих, Владыко Всемилостиве, яко мы усердно к Тебе прибегаем, к милостивому Избавителю, на Кресте распеншемуся Господу Иисусу.

Ектения сугубая:

Помилуй нас, Боже...

Еще молимся о Великом Господине и отце нашем...

Еще молимся о стране нашей...

Еще молимся за всю братию...

Возглас: Яко милостив...

Седален, глас 6:

Крест Твой, Господи, освятися, в нем бо бывают исцеления немощствующим грехами, имже Тебе припадаем, помилуй нас.

Слава, и ныне, ин седален, глас тойже:

Токмо водрузися древо Креста Твоего, Христе, основания смерти поколебашася, Господи; егоже бо поглоти желанием ад, отпусти с трепетом. Явил еси нам спасение Твое, Святый, и славословим Тя: Сыне Божий, помилуй нас.

Песнь 4

Ирмос: Седяй в славе...

1-й лик: Слава, Господи, Кресту Твоему Честному.

Изображая знамение креста, руце простираше пременяя Иаков славный, внучата древле благословляя, и знаменуя спасительное благословение, на всех нас приходящее.

2-й лик: Слава, Господи, Кресту Твоему Честному.

Соблюдаеми печатию Креста и предлежащий той с радостию духа целующе, ко спасительным страстем идем, губительныя страсти плотския умертвивше.

1-й лик: Слава Отцу и Сыну и Святому Духу.

Спасительное тя оружие, непобедимую победу, радости знамение, имже смерть умертвися, объемлем, украшающеся славою на тебе Пригвожденнаго, Кресте всечестный.

2-й лик: И ныне и присно и во веки веков. Аминь.

Ангелом Неприступный, видим Мне явился еси, Иисусе, Сыне Мой; плоть от Мене заимовавый; и ныне зрящи Тя на древе пригвождена, рыдаю, – Христова Мати глаголаше.

Катавасия: Избави от бед и скорбей рабов Твоих, Владыко Всемилостиве, яко мы усердно к Тебе прибегаем, к милостивому Избавителю, на Кресте распеншемуся Господу Иисусу.

Песнь 5

Ирмос: Ужасошася всяческая...

1-й лик: Слава, Господи, Кресту Твоему Честному.

Мертв был еси на Кресте пригвождаемь, всем Сый жизнь и спасение; сей убо даруй, Спасе, очищенною душею нам объяти, и Твоя страсти спасительныя видети радующимся.

2-й лик: Слава, Господи, Кресту Твоему честному.

Предстоят тебе чинове бесплотных трепещуще, древо жизнодательное; на тебе бо честную Кровь Свою Христос излия, осквернение отьемля греховное, бесами приносимое на пагубу создания.

1-й лик: Слава Отцу и Сыну и Святому Духу.

Оружием вражиим уязвленнаго исцели мя Кровию Твоею, Слове, и копием, вопию Тебе, и грехов моих рукописание вскоре раздери, Спасе, написуя мя в книги спасенных, яко Благосерд.

2-й лик: И ныне и присно и во веки веков. Аминь.

Грозде зрелый, како на древе висиши? Солнце славы, како воздвижен был еси, сияние солнца омрачая страстию Твоею, Спасе? – Рождшая Тя Агница, древле вопияше Тебе, матерски восклицающи.

Катавасия: Избави от бед и скорбей рабов Твоих, Владыко Всемилостиве, яко мы усердно к Тебе прибегаем, к милостивому Избавителю, на Кресте распеншемуся Господу Иисусу.

Песнь 6

Ирмос: Возопи прообразуя...

1-й лик: Слава, Господи, Кресту Твоему Честному.

Стрясл еси водружаем адово жилище, верным же непоколебимое утверждение и твердый покров был еси, Господень Кресте Всечестный.

2-й лик: Слава, Господи, Кресту Твоему Честному.

Плодоносни добродетельми явльшеся, пожнем божественнаго древа живоносныя плоды, ихже произрасти прострыйся на сем Иисус, плодовитая Лоза.

1-й лик: Слава Отцу и Сыну и Святому Духу.

Воспеваем Твою, Иисусе, многую благость, покланяющеся Кресту Твоему, копию, трости; теми бо разрушил еси, Щедре, вражды преграду.

2-й лик: И ныне и присно и во веки веков. Аминь.

Вод животворных реку роди Тя Дево, яко источника нашего обновления, на Кресте простершагося и капли спасения источившаго.

Катавасия: Избави от бед и скорбей рабов Твоих, Владыко Всемилостиве, яко мы усердно к Тебе прибегаем, к милостивому Избавителю, на Кресте распеншемуся Господу Иисусу.

Ектения малая.

Возглас: Ты eси Царь мира...

Кондак, глас 7:

Не ктому пламенное оружие хранит врат едемских, на тыя бо найде преславный соуз, древо крестное, смертное жало и адова победа прогнася. Предстал бо еси, Спасе мой, вопия сущим во аде: внидите паки в рай.

Прокимен, глас 4: Господи, услыши молитву мою, и вопль мой к Тебе да приидет.

Стих: Воньже аще день скорблю, приклони ко мне ухо Твое.

Евангелие от Луки, зач. 88 (18, 2–8).

Рече Господь притчу сию: судия бе некий в некоем граде, Бога не бояся и человек не срамляяся. Вдова же некая бе во граде том, и прихождаше к нему, глаголющи: отмсти мене от соперника моего. И не хотяше на долзе времени; последи же рече в себе: аще и Бога не боюся, и человек не срамляюся, но зане творит ми труды вдовица сия, да отмщу ея; да не до конца приходящи застоит мене. Рече же Господь: слышите, что судия неправды глаголет? Бог же не имать ли сотворити отмщение избранных Своих, вопиющих к Нему день и нощь и долготерпя о них; глаголю вам, яко сотворит отмщение их вскоре.

Слава: Отче, Слове и Душе, Троице Святая, очисти множество согрешений наших.

И ныне: Молитвами Богородицы, Милостиве, очисти множество согрешений наших.

Помилуй мя, Боже, по велицей милости Твоей и по множеству щедрот Твоих очисти беззаконие мое.

Стихира, глас 6:

Небесный Царю Человеколюбче Господи,/ Долготерпеливе и Многомилостиве,/ призри от святаго жилища Твоего,/ виждь уничижение наше,/ виждь и обиды наши,/ и не яростию Твоею обличи нас,/ и не гневом Твоим накажи нас;/ не предаждь нас в нашествие языком,/ ни в руки варваров,/ или в пропасть погибнути,/ да не когда рекут язы́цы:/ где есть Бог их?/ Мы же, людие Твои/ и овцы пажити Твоея,/ и имя Твое призываем./ Имаши естественную благость Твою,/ покрый землю нашу./ Имаши Молитвенницу Богородицу,/ рождшую Тя, Слове,/ лик Ангелов и всех святых;/ приими моление их о людях,/ согрешивших и отчаявшихся,/ и спаси, Незлобиве, достояние Твое.

Посем глаголет диакон:

Спаси, Боже, людей Твоих и благослови достояние Твое, посети милостию и щедротами Твоими землю Русскую; утверди в ней веру истинную; расшири, умножи, умири и непоколебиму адовыми вратами во веки сохрани Церковь Святую; умудри архипастырей и пастырей наших право правити слово Твоея истины; разори и вскоре испраздни всякое разделение и ересей восстание; соблюди в мире паству православную; возвыси ревнителей веры отеческой и ниспосли на нас и на всех верных рабов Твоих милости Твоя богатыя, молитвами Всепречистыя Владычицы нашея Богородицы и Приснодевы Марии; силою Честнаго и Животворящаго Креста и покровом честныя и многоцелебныя ризы Своея; предстательством честных Небесных Сил бесплотных; честнаго славнаго Пророка, Предтечи и Крестителя Иоанна; святаго славнаго и всехвальнаго апостола Андрея Первозваннаго и всех святых славных и всехвальных апостолов; святого славного пророка Илии; иже во святых отцев наших и вселенских великих учителей и святителей Василия Великаго, Григория Богослова и Иоанна Златоустаго; иже во святых отца нашего Николая, архиепископа Мир Ликийских, Чудотворца; святых равноапостольных Мефодия и Кирилла, учителей Словенских; святых равноапостолов русских благовернаго великого князя Владимира и благоверной великой княгини Ольги; иже во святых отцев наших всея России чудотворцев Михаила, митрополита Киевского, Петра, Алексия, Ионы, Филиппа и священномученика Ермогена, святителей Московских; Никиты и Иоанна Новгородских; Леонтия и Димитрия Ростовских; святых благоверных князей и страстотерпцев Бориса и Глеба; преподобных и богоносных отцев наших Антония и Феодосия Киево-Печерских, Сергия и Никона Радонежских, Антония Римлянина и Варлаама Хутынскаго Новгородских, Зосимы и Савватия Соловецких и Серафима Саровскаго и всех прочих чудотворцев, в земле Русской просиявших, святых славных и добропобедных мучеников, преподобных и богоносных отцев наших, святых праведных Богоотец Иоакима и Анны и всех святых, молим Тя, Многомилостиве Господи, услыши нас, грешных, молящихся Тебе, и помилуй нас.

Лик: Господи, помилуй (12 раз).

Возглас: Милостию и щедротами...

Песнь 7

Ирмос: Не послужиша твари, богомудрии...

1-й лик: Слава, Господи, Кресту Твоему Честному.

Секира, юже Елисей взят от Иордана, Христе, Крест являше, имже из глубины суеты извлекл еси народы воспевающия: отцев Господи и Боже, благословен еси.

2-й лик: Слава, Господи, Кресту Твоему Честному.

Радуются с землею сущии на небеси поклонению твоему, Кресте; тобою бо Ангелов и человеков соединение бысть, всесильне, вопиющих: Господи и Боже, благословен еси.

1-й лик: Слава Отцу и Сыну и Святому Духу.

Яко кипарис милосердие, яко кедр благовонный веру, яко певк истинную любовь приносяще, Господню Кресту поклонимся, Избавителя славяще, на нем пригвожденнаго.

2-й лик: И ныне и присно и во веки веков. Аминь.

Не поколебав небесных, во утробу Твою Бог вселися, граде Божий избранный. На Кресте же вися, тварь поколеба. егоже моли, на недвижимом Его камени мне соблюстися.

Катавасия: Избави от бед и скорбей рабов Твоих, Владыко Всемилостиве, яко мы усердно к Тебе прибегаем, к милостивому Избавителю, на Кресте распеншемуся Господу Иисусу.

Песнь 8

Ирмос: Отроки благочестивыя...

1-й лик: Слава, Господи, Кресту Твоему Честному.

Простерл еси руце на древе, руки невоздержныя разрешая грех; копием же прободен был еси, сим врага уязвляя, Господи; желчи же вкусил еси, сластную злобу изымая; оцтом напоен был еси, всех веселие.

2-й лик: Слава, Господи, Кресту Твоему Честному.

Умом чистым и совестию светло приступивше поклонимся; предлежит древо честное и святое, имже Христос бесчестную подъят смерть, честию облек высочайшею обесчестившихся люте преступлением.

1-й лик: Слава Отцу и Сыну и Святому Духу.

Древом греха умерщвлен бых, и вкушением сластным погребен бых. Оживи мя, Господи, воздвигни мя лежащаго, яви поклонника страстей Твоих и причастника востания Божественнаго и сонаследника возлюбившим Тя.

2-й лик: И ныне и присно и во веки веков. Аминь.

Возносима зрю Тя, не имуща ни доброты, ни вида в страдании, егоже воплощаема видех прекраснейша паче сынов человеческих, Единородный Сыне, – вопияше Пречистая Дево. – Покажи Твою славу, Спасе всех.

1-й лик: Хвалим, благословим, поклоняемся Господеви, поюще и превозносяще Его вовеки.

Ирмос: Отроки благочестивыя в пещи рождество Богородичо спасло есть; тогда убо образуемое, ныне же действуемое, вселенную всю воздвизает пети Тебе: Господа пойте дела и превозносите Его во вся веки.

Песнь 9

Ирмос: Всяк земнородный да взыграется, Духом просвещаемь, да торжествует же бесплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево.

1-й лик: Слава, Господи, Кресту Твоему Честному.

Копием во Твое ребро прободен был еси, изливая мне источники оставления, и на древе пригвожден был еси посреде земли, осуждение за древо отьемля, Человеколюбче. Сие мы в преполовение поста ныне облобызаем, воспевающе Твою благостыню.

2-й лик: Слава, Господи, Кресту Твоему Честному.

Горы сладость, холмы радование любовию искапайте, древа же полевыя, ливанские кедры, ликуйте днесь поклонению Живоноснаго Креста; пророцы, мученицы, апостоли и праведных дуси взыграйте.

1-й лик: Слава Отцу и Сыну и Святому Духу.

Призри на людей и достояние Твое, Господи, со страхом поющих Тя, ихже ради смерть вольную претерпел еси, да не победит Твоего благосердия безмерное множество зол наших; но спаси всех нас, Преблагий, Крестом Твоим, яко Человеколюбец.

2-й лик: И ныне и присно и во веки веков. Аминь.

Распинаемый, мановением Твоим колеблеши видимый мир, пребываеши же повешен, Христе, страстная умышления первозданнаго пригвоздити хотя, и исцелити того сокрушение благостию, – Богородица плачущи глаголаше.

1-й лик: Достойно есть...

В Неделю 4-Ю Святыя Четыредесятницы

Поем на литии канон Всем святым, в земле Русской просиявшим.

Поем его без ирмосов. Глас 8.

Песнь 1

Ирмос: Воду прошед...

1-й лик: Вси святии земли Русской, молите Бога о нас.

Многими содержими напастьми, к вам прибегаем, спасения ищуще, о святии сродницы наши, от лютых бед и нужд спасите нас.

2-й лик: Вси святии земли Русской, молите Бога о нас.

Страстей прилози и многия печали и беды обуревают нас; утешение нам подайте, святии, к Богу вашими молитвами.

1-й лик: Слава Отцу и Сыну и Святому Духу.

Спаса Христа молите, Российские чудотворцы, избавитися нам от бед и скорбей, земли же нашей от варварскаго нахождения вашим теплым предстательством.

2-й лик: И ныне и присно и во веки веков. Аминь.

В скорби нас и в бедах сущих посещения Божественнаго и промышления от Тебе сподоби, о Богомати Владычице.

Катавасия по каждой песни: Молите Бога о нас, вси святии земли Русской, яко мы усердно к вам прибегаем, к скорым помощникам и молитвенникам о душах наших.

Песнь 3

Ирмос: Небеснаго круга...

1-й лик: Вси святии земли Русской, молите Бога о нас.

Заступницы и покровители земли нашей вы есте, Божии угодницы, направите нас ко пристанищу спасения, вы бо есте верным ограждение.

2-й лик: Вси святии земли Русской, молите Бога о нас.

Молим вас, блаженнии: душевное смущение и печали бурю разорити и тишину нам подати начальника тишины Христа умолите.

1-й лик: Слава Отцу и Сыну и Святому Духу.

Святым древним подражавшии и от Бога благодатию обогатившиеся, помогайте нам, чадам вашим, присно восхваляющим вас, яко Божиих угодников.

2-й лик: И ныне и присно и во веки веков. Аминь.

Лютыми недугами и страстьми греховными обуреваемым и варварскими нападениями истязуемым и в ров погибели впадающим, Ты нам помози, Богородице Дево.

Катавасия: Молите Бога о нас, вси святии земли Русской, яко мы усердно к вам прибегаем, скорым помощникам и молитвенникам о душах наших.

Ектения сугубая:

Помилуй нас, Боже...

Еще молимся о великом господине...

Еще молимся о стране нашей...

Еще молимся за всю братию...

Возглас: Яко милостив...

По возгласе 1-й лик поет:

Седален, глас 2.

Моление теплое принесите, прехвальнии, к милости источнику Господу, о Святой Руси молящеся, Богородицу Владычицу вкупе с собою подвигните на молитву и от бед избавите нас, всем вскоре предстательствующии.

Песнь 4

Ирмос: Услышах, Господи...

1-й лик: Вси святии земли Русской, молите Бога о нас.

Страстей наших смущение и многих бед бурю предстательством вашим ко Господу утолити потщитеся, святии.

2-й лик: Вси святии земли Русской, молите Бога о нас.

Милосердия бездну прострите нам, блаженнии, призывающим вас на помощь; вы бо у Милосердаго Бога дерзновение велие стяжали есте.

1-й лик: Слава Отцу и Сыну и Святому Духу.

Надежду имуще вас, славнии, и яко стену недвижиму, к Богу ваши молитвы стяжавше, зол и всех бед избавляемся.

2-й лик: И ныне и присно и во веки веков. Аминь.

Исцели, Чистая, душевныя наши немощи и страсти телесныя, поспеши, Госпоже, здравие подати, Врача всем рождшая Христа.

Катавасия: Молите Бога о нас, вси святии земли Русской, яко мы усердно к вам прибегаем, скорым помощникам и молитвенникам о душах наших.

Песнь 5

Ирмос: Просвети нас повелении Твоими...

1-й лик: Вси святии земли Русской, молите Бога о нас. Исполните веселия жизнь нашу, избавляюще нас от варварскаго нахождения и междоусобныя брани.

2-й лик: Вси святии земли Русской, молите Бога о нас.

Избавите нас от бед, яко предстатели теплые и молитвенники о душах наших.

1-й лик: Слава Отцу и Сыну и Святому Духу.

Разрушите мглу прегрешений наших просвещением вашея светлости, светильницы божественнии и пресветлии.

2-й лик: И ныне и присно и во веки веков. Аминь.

Избави нас от бед, Богородице Чистая, вечное рождши избавление и мир, всяк ум превосходящий.

Катавасия: Молите Бога о нас, вси святии земли Русской, яко мы усердно к вам прибегаем, скорым помощникам и молитвенникам о душах наших.

Песнь 6

Ирмос: Молитву пролию...

1-й лик: Вси святии земли Русской, молите Бога о нас.

Молитвами вашими, блаженнии, утешение нам в скорби сущим испросите, страну нашу падшую восставите и людей расточенных соберите, в скорби яко Иона вопиющих: от бед, Боже, избави нас.

2-й лик: Вси святии земли Русской, молите Бога о нас.

Заступников вас вемы, отцы приснопамятные, и твердых хранителей земли нашей; темже к вам прибегающе, милость приемлем и бед различных избавляемся.

1-й лик: Слава Отцу и Сыну и Святому Духу.

Яко стену и пристанище стяжахом вас, святии, облегчение в скорбех, в бедах и напастех помощь, в болезнех исцеление и спасение душам нашим.

2-й лик: И ныне и присно и во веки веков. Аминь.

Заступницу Тя жизни вемы и твердую хранительницу, Дево, и искушений тучи рассеявающую и бесов нападение отгоняющую; и молимся всегда: от гибельных страстей наших избави нас.

Катавасия: Молите Бога о нас, вси святии земли Русской, яко мы усердно к вам прибегаем, скорым помощникам и молитвенникам о душах наших.

Ектения малая.

Кондак, глас 6:

Предстателие страны нашея неусыпнии, ходатаи о нас ко Творцу непрестанные, не презрите молений наших, но предваряюще на помощь, яко сродницы наши, ускорите на молитву и потщитеся на умоление, предстательствующе присно о чтущих вас.

Прокимен, глас 4: Мне же зело честни быша друзи Твои, Боже.

Стих: Изочту их, и паче песка умножатся.

Евангелие от Иоанна, зач. 51 (15, 12–20).

Рече Господь Своим учеником: сия есть заповедь Моя, да любите друг друга, якоже возлюбих вы. Больши сея любве никтоже имать, да кто душу свою положит за други своя. Вы друзи Мои есте, аще творите, елика Аз заповедаю вам. Не ктому вас глаголю рабы, яко раб не весть, что творит господь его; вас же рекох други, яко вся, яже слышах от Отца Моего, сказах вам. Не вы Мене избрасте, но Аз избрах вас и положих, да вы идете и плод принесете, и плод ваш пребудет; да, егоже аще просите от Отца во имя Мое, даст вам. Сия заповедаю вам, да любите друг друга. Аще мир вас ненавидит, ведите, яко Мене прежде вас возненавиде. Аще от мира бысте были, мир убо свое любил бы; якоже от мира несте, но Аз избрах вы от мира, сего ради ненавидит вас мир. Поминайте слово, еже Аз Рех вам: несть раб болий господа своего. Аще Мене изгнаша, и вас изжену; аще слово Мое соблюдоша, и ваше соблюдут.

Лик: Слава Тебе, Господи, слава Тебе.

Слава: Молитвами всех святых русских, Милостиве, очисти множество согрешений наших.

И ныне: Молитвами Богородицы, Милостиве, очисти множество согрешений наших.

Помилуй мя, Боже, по велицей милости Твоей и по множеству щедрот Твоих очисти беззаконие мое.

Стихира, глас 6:

Не вверите нас человеческому предстательству, святии сродницы, но приимите моления наша, скорбь бо обдержит нас, терпети не можем вражеских озлоблений, помощи не имамы, или к кому от человек прибегнем и утешения на земли не имамы. Моление наше не презрите, небеснии предстателие наши, утешение нам подайте и вся полезная от Бога испросите.

Посем глаголет диакон:

Спаси, Боже, людей Твоих и благослови достояние Твое, посети милостию и щедротами Твоими землю Русскую; утверди в ней веру истинную; расшири, умножи, умири и непоколебиму адовыми вратами вовеки сохрани Церковь Святую; умудри архипастырей и пастырей наших право правити слово Твоея истины; разори и вскоре испраздни всякое разделение и ересей восстание; соблюди в мире паству православную; возвыси ревнителей веры отеческой и ниспосли на нас и на всех верных рабов Твоих милости Твоя богатыя, молитвами Всепречистыя Владычицы нашея Богородицы и Приснодевы Марии; силою Честнаго и Животворящаго Креста и покровом честныя и многоцелебныя ризы Своея; предстательством честных Небесных Сил бесплотных; честнаго славнаго Пророка, Предтечи и Крестителя Иоанна; святаго славнаго и всехвальнаго апостола Андрея Первозваннаго и всех святых славных и всехвальных апостолов; святого славного пророка Илии; иже во святых отцев наших и вселенских великих учителей и святителей Василия Великаго, Григория Богослова и Иоанна Златоустаго; иже во святых отца нашего Николая, архиепископа Мир Ликийских, Чудотворца; святых равноапостольных Мефодия и Кирилла, учителей Словенских; святых равноапостолов русских благовернаго великого князя Владимира и благоверной великой княгини Ольги; иже во святых отцев наших всея России чудотворцев Михаила, митрополита Киевского, Петра, Алексия, Ионы, Филиппа и священномученика Ермогена, святителей Московских; Никиты и Иоанна Новгородских; Леонтия и Димитрия Ростовских; святых благоверных князей и страстотерпцев Бориса и Глеба; преподобных и богоносных отцев наших Антония и Феодосия Киево-Печерских, Сергия и Никона Радонежских, Антония Римлянина и Варлаама Хутынскаго Новгородских, Зосимы и Савватия Соловецких и Серафима Саровскаго, и всех прочих чудотворцев, в земле Русской просиявших, святых славных и добропобедных мучеников, преподобных и богоносных отцев наших, святых праведных Богоотец Иоакима и Анны и всех святых, молим Тя, Многомилостиве Господи, услыши нас, грешных, молящихся Тебе, и помилуй нас.

Лик: Господи, помилуй (12 раз).

Возглас: Милостию и щедротами...

Песнь 7

Ирмос: От Иудее дошедше, отроцы...

1-й лик: Вси святии земли Русской, молите Бога о нас.

Наше спасение, якоже восхотел еси, Спасе, устроити, прославляеши святых сродников наших чудесами, имиже ко благочестию наставляеми, поем: отцев наших Боже, благословен еси.

2-й лик: Вси святии земли Русской, молите Бога о нас.

Милостиваго умолите, святии, избавитися от прегрешений и душевных скверн, верою зовущим: отцев наших Боже, благословен еси.

1-й лик: Слава Отцу и Сыну и Святому Духу.

Сокровище спасения вы есте, Божии угодницы и наставницы покаяния, вопиющим: отцев наших Боже, благословен еси.

2-й лик: И ныне и присно и во веки веков. Аминь.

Телесныя слабости и душевныя недуги, Богородительнице, любовию приступающих к Тебе, Дево, исцелити сподоби, Спаса Христа нам рождшая.

Катавасия: Молите Бога о нас, вси святии земли Русской, яко мы усердно к вам прибегаем, скорым помощникам и молитвенникам о душах наших.

Песнь 8

Ирмос: Царя Небеснаго...

1-й лик: Вси святии земли Русской, молите Бога о нас.

Помощи вашея требующих не презрите, блаженнии, поющих и превозносящих Христа вовеки.

2-й лик: Вси святии земли Русской, молите Бога о нас.

Неможение душ наших исцеляете и от телесных болезней восставляете превозносящих Христа вовеки.

1-й лик: Слава Отцу и Сыну и Святому Духу.

Исцеление источаете, Божии угодницы, всем к вам притекающим любовию и Христа превозносящим вовеки.

2-й лик: И ныне и присно и во веки веков. Аминь.

Напастей Ты прилоги отгоняеши и страстей нападения, Дево, темже Тя поем во вся веки.

1-й лик: Хвалим, благословим, поклоняемся Господеви, поюще и превозносяще Его вовеки.

Ирмос: Царя Небеснаго, егоже поют вои ангельские, хвалите и превозносите во вся веки.

Песнь 9

Ирмос: Воистину Богородицу Тя исповедуем, спасенные Тобою, Дево Чистая, с бесплотными лики Тя величающе.

1-й лик: Вси святии земли Русской, молите Бога о нас.

Моление наше услышавше, честнии, нечестие в земле Русской потребите, нас же всех во Православии укрепите.

2-й лик: Вси святии земли Русской, молите Бога о нас.

Радости сердца наша исполните, радости неизреченныя наслаждающиеся, нашу греховную печаль потребляюще.

1-й лик: Слава Отцу и Сыну и Святому Духу.

Во дни скорбных обстояний не оставите нас, предстатели наши и хранители, но помощь скорую нам явите.

2-й лик: И ныне и присно и во веки веков. Аминь.

Пристанище и предстательство к Тебе прибегающих буди, Дево, и стена нерушимая, прибежище же и покров и веселие.

1-й лик: Достойно есть...

В Неделю 5-ю Святыя Четыредесятницы

Поем на литии канон Пресвятой Богородице, параклисис малый.

Поем его без ирмосов. Глас 8.

Песнь 1

Ирмос: Воду прошед, яко сушу...

1-й лик: Пресвятая Богородице, спаси нас.

Многими содержим напастьми, к Тебе прибегаю, спасения иский; о Мати Слова и Дево, от тяжких и лютых мя спаси!

2-й лик: Пресвятая Богородице, спаси нас.

Страстей мя смущают прилози, многаго уныния исполнити мою душу; умири, Отроковице, тишиною Сына и Бога Твоего, Всенепорочная.

1-й лик: Слава Отцу и Сыну и Святому Духу.

Спаса рождшую Тя и Бога, молю, Дево, да избавлюся от лютых; к Тебе бо ныне прибегая, простираю и душу и помышление.

2-й лик: И ныне и присно и во веки веков. Аминь.

Недугующа телом и душею, посещения Божественнаго и промышления от Тебе сподоби, едина Богомати, яко Благая, Благаго же Родительница.

Катавасия: Спаси от бед рабы Твоя, Богородице, яко вси по Бозе к Тебе прибегаем, яко к нерушимой стене и предстательству.

Призри благосердием, Всепетая Богородице, на мое лютое телесе озлобление и исцели души моея болезнь.

Песнь 3

Ирмос: Небеснаго круга...

1-й лик: Пресвятая Богородице, спаси нас.

Предстательство и покров жизни моея полагаю Тя, Богородительнице Дево, Ты мя управи ко пристанищу Твоему, благих виновна, верных утверждение, едина Всепетая.

2-й лик: Пресвятая Богородице, спаси нас.

Молю, Дево, душевное смущение и печали моея бурю разорити; Ты бо, Богоневестная, начальника тишины Христа родила еси, едина Пречистая.

1-й лик: Слава Отцу и Сыну и Святому Духу.

Благодетеля рождши, добрых виновнаго, благодеяния богатство всем источи; вся бо можеши, яко сильнаго в крепости Христа рождши, Богоблаженная.

2-й лик: И ныне и присно и во веки веков. Аминь.

Лютыми недугами и болезненными страстьми истязаему, Дево, Ты мне помози; Тя бо, Пренепорочная, почитаю, яко исцелений сокровище неоскудное и неиждиваемое.

Катавасия: Спаси от бед рабы Твоя, Богородице, яко вси по Бозе к Тебе прибегаем, яко к нерушимой стене и предстательству.

Призри благосердием, Всепетая Богородице, на мое лютое телесе озлобление и исцели души моея болезнь.

Ектения сугубая:

Помилуй нас, Боже...

Еще молимся о великом господине...

Еще молимся о стране нашей...

Еще молимся за всю братию...

Возглас: Яко милостив...

Седален, глас .

Моление теплое и стена необоримая, милости источниче, ми- рови прибежище, прилежно вопием Ти: Богородице Владычице, предвари и от бед избави нас, едина Чистая и Благословенная.

Песнь 4

Ирмос: Услышах, Господи...

1-й лик: Пресвятая Богородице, спаси нас.

Страстей моих смущение и бурю моих прегрешений утиши, Богоневестная, Кормчаго рождшая Господа.

2-й лик: Пресвятая Богородице, спаси нас.

Милосердия Твоего бездну призывающу, подаждь мне, Благосердаго рождшая и Спаса всех поющих Тя.

1-й лик: Слава Отцу и Сыну и Святому Духу.

Наслаждающеся, Пречистая, Твоих дарований, благодарственное воспеваем пение, ведуще Тя, Богоматерь.

2-й лик: И ныне и присно и во веки веков. Аминь.

На одре болезни моея и немощи низлежащу мне, яко благолюбива, помози, Богородице, едина Приснодево.

Катавасия: Спаси от бед рабы Твоя, Богородице, яко вси по Бозе к Тебе прибегаем, яко к нерушимой стене и предстательству.

Призри благосердием, Всепетая Богородице, на мое лютое телесе озлобление и исцели души моея болезнь.

Песнь 5

Ирмос: Просвети нас повелении...

1-й лик: Пресвятая Богородице, спаси нас.

Исполни, Чистая, веселия сердце мое, Твою нетленную дающи радость, веселия рождшая виновнаго.

2-й лик: Пресвятая Богородице, спаси нас.

Избави нас от бед, Богородице Чистая, вечное рождши избавление и мир, всяк ум превосходящий.

1-й лик: Слава Отцу и Сыну и Святому Духу.

Разреши мглу прегрешений моих, Богоневесто, просвещением Твоея светлости, Свет рождшая Божественный и Превечный.

2-й лик: И ныне и присно и во веки веков. Аминь.

Исцели, Чистая, души моея неможение, посещения Твоего сподобльшая, и здравие молитвами Твоими подаждь мне.

Катавасия: Спаси от бед рабы Твоя, Богородице, яко вси по Бозе к Тебе прибегаем, яко к нерушимой стене и предстательству.

Призри благосердием, Всепетая Богородице, на мое лютое телесе озлобление и исцели души моея болезнь.

Песнь 6

Ирмос: Молитву пролию ко Господу...

1-й лик: Пресвятая Богородице, спаси нас.

Господа и Сына Твоего, Своею вольною смертию спасшаго от тления и смерти мое естество, объято бывшее тлением и смертию, моли, Дево, да от злодейства врагов избавит мя.

2-й лик: Пресвятая Богородице, спаси нас.

Предстательницу Тя жизни вем и хранительницу тверду, Дево, и волнения искушений рассеявающую и нападения бесов отгоняющую, и молюся всегда: от растлевающих страстей моих избавити мя.

1-й лик: Слава Отцу и Сыну и Святому Духу.

Яко стену прибежища стяжахом и душ всесовершенное спасение, и утешение в скорбях, Отроковице, и просвещением Твоим присно радуемся. О Владычице, и ныне нас от страстей и бед спаси.

2-й лик: И ныне и присно и во веки веков. Аминь.

На одре ныне немоществуя лежу, и несть исцеления плоти моей; но Бога и Спаса миру и избавителя недугов рождшая, Тебе молюся, Благой: от растлевающих недугов восстави мя.

Катавасия: Спаси от бед рабы Твоя, Богородице, яко вси по Бозе к Тебе прибегаем, яко к нерушимой стене и предстательству.

Призри благосердием, Всепетая Богородице, на мое лютое телесе озлобление и исцели души моея болезнь.

Ектения малая.

Возглас: Ты бо еси Царь мира...

Кондак, глас 6:

Предстательство христиан непостыдное,/ ходатайство ко Творцу непреложное,/ не презри грешных молений гласы,/ но предвари, яко Благая,/ на помощь нас, верно зовущих Ти:/ ускори на молитву/ и потщися на умоление,/ предстательствующи присно, Богородице, чтущих Тя.

Прокимен, глас 4: Помяну имя Твое во всяком роде и роде.

Стих: Слыши, Дщи, и виждь, и приклони ухо Твое.

Евангелие от Луки, зач. 4 (1, 39–49, 56).

Во дни оны, воставши Мариам, иде в Горняя со тщанием, во град Иудов. И вниде в дом Захариин и целова Елисавет и бысть, яко услыша Елисавет целование Мариино, взыграся младенец во чреве ея; и исполнися Духа Свята Елисавет. И возопи гласом велиим, и рече: благословена Ты в женах, и благословен Плод чрева Твоего. И откуду мне сие, да прииде Мати Господа моего ко мне; се бо яко бысть глас целования Твоего во ушию моею, взыграся младенец радощами во чреве моем. И блаженна Веровавшая, яко будет совершение глаголанным Ей от Господа. И рече Мариам: величит душа Моя Господа, и возрадовася дух Мой о Бозе Спасе Моем. Яко призре на смирение Рабы Своея; се бо отныне ублажат Мя вси роди. Яко сотвори Мне величие Сильный, и свято имя Его. Пребысть же Мариам с нею, яко три месяцы, и возвратися в дом Свой.

Слава: Молитвами Богородицы, Милостиве, очисти множество согрешений наших.

И ныне: Молитвами Богородицы, Милостиве, очисти множество согрешений наших.

Стихира, глас 6:

Не ввери мя человеческому предстательству, Пресвятая Владычице, но приими моление раба Твоего; скорбь бо обдержит мя; терпети не могу демонскаго стреляния, покрова не имам, ниже где прибегну, окаянный, всегда побеждаемь и утешения не имам, разве Тебе, Владычице мира, упование и предстательство верных, не презри моление мое, полезно сотвори.

Посем глаголет диакон:

Спаси, Боже, людей Твоих и благослови достояние Твое, посети милостию и щедротами Твоими землю Русскую; утверди в ней веру истинную; расшири, умножи, умири и непоколебиму адовыми вратами во веки сохрани Церковь Святую; умудри архипастырей и пастырей наших право правити слово Твоея истины; разори и вскоре испраздни всякое разделение и ересей восстание; соблюди в мире паству православную; возвыси ревнителей веры отеческой и ниспосли на нас и на всех верных рабов Твоих милости Твоя богатыя, молитвами Всепречистыя Владычицы нашея Богородицы и Приснодевы Марии; силою Честнаго и Животворящаго Креста и покровом честныя и многоцелебныя ризы Своея; предстательством честных Небесных Сил бесплотных; честнаго славнаго Пророка, Предтечи и Крестителя Иоанна; святаго славнаго и всехвальнаго апостола Андрея Первозваннаго и всех святых славных и всехвальных апостолов; святаго славнаго пророка Илии; иже во святых отцев наших и вселенских великих учителей и святителей Василия Великаго, Григория Богослова и Иоанна Златоустаго; иже во святых отца нашего Николая, архиепископа Мир Ликийских, Чудотворца; святых равноапостольных Мефодия и Кирилла, учителей Словенских; святых равноапостолов русских благовернаго великого князя Владимира и благоверной великой княгини Ольги; иже во святых отцев наших всея России чудотворцев Михаила, митрополита Киевского, Петра, Алексия, Ионы, Филиппа и священномученика Ермогена, святителей Московских; Никиты и Иоанна Новгородских; Леонтия и Димитрия Ростовских; святых благоверных князей и страстотерпцев Бориса и Глеба; преподобных и богоносных отцев наших Антония и Феодосия Киево-Печерских, Сергия и Никона Радонежских, Антония Римлянина и Варлаама Хутынскаго Новгородских, Зосимы и Савватия Соловецких и Серафима Саровскаго, и всех прочих чудотворцев, в земле Русской просиявших, святых славных и добропобедных мучеников, преподобных и богоносных отцев наших, святых праведных Богоотец Иоакима и Анны, и всех святых, молим Тя, Многомилостиве Господи, услыши нас, грешных, молящихся Тебе, и помилуй нас.

Лик: Господи, помилуй (12 раз).

Возглас: Милостию и щедротами:

Песнь 7

Ирмос: От Иудеи дошедше, отроцы:

1-й лик: Пресвятая Богородице, спаси нас.

Наше спасение якоже восхотел еси, Спасе, устроити, во утробу Девы вселился еси, и Сию миру Предстательницу показал еси; отцев наших Боже, благословен еси.

2-й лик: Пресвятая Богородице, спаси нас.

Подателя милости, егоже родила еси, Мати Чистая, умоли избавитися от прегрешений и душевных скверн, верою зовущим: отцев наших Боже, благословен еси.

1-й лик: Слава Отцу и Сыну и Святому Духу.

Сокровище спасения и источник нетления Тя рождшую, и столп утверждения, и дверь покаяния показал еси зовущим: отцев наших Боже, благословен еси.

2-й лик: И ныне и присно и во веки веков. Аминь.

Телесныя слабости и душевныя недуги, Богородительнице, любовию приступающих к крову Твоему, Дево, исцелите сподоби, Спаса Христа нам рождшая.

Катавасия: Спаси от бед рабы Твоя, Богородице, яко вси по Бозе к Тебе прибегаем, яко к нерушимой стене и предстательству.

Призри благосердием, Всепетая Богородице, на мое лютое телесе озлобление и исцели души моея болезнь.

Песнь 8

Ирмос: Царя Небеснаго...

2-й лик: Пресвятая Богородице, спаси нас.

Помощи от Тебе требующих не презри, Дево, поющих и превозносящих Тя вовеки.

1-й лик: Пресвятая Богородице, спаси нас.

Неможение души моея исцеляеши и телесныя болезни, Дево, да Тя прославлю, Чистая, вовеки.

2-й лик: Слава Отцу и Сыну и Святому Духу.

Исцелений богатство изливаеши верно поющим Тя, Дево, и превозносящим неизреченное Твое рождество.

1-й лик: И ныне и присно и во веки веков. Аминь.

Напастей Ты прилоги отгоняеши и страстей нападения, Дево, темже Тя поем во вся веки.

2-й лик: Хвалим, благословим, поклоняемся Господеви, поюще и превозносяще во вся веки.

Ирмос: Царя Небеснаго, егоже поют вои ангельские, хвалите, и превозносите во вся веки.

Песнь 9

Ирмос: Воистину Богородицу Тя исповедуем, спасенные Тобою, Дево Чистая, с бесплотными лики Тя величающе.

2-й лик: Пресвятая Богородице, спаси нас.

Тока слез моих не отвратися, от всякаго лица всяку слезу отъемшаго, Дево, Христа рождшая.

1-й лик: Пресвятая Богородице, спаси нас.

Радости мое сердце исполни, Дево, радости приемшая исполнение, греховную печаль потребляющи.

2-й лик: Слава Отцу и Сыну и Святому Духу.

Света Твоего зарями просвети, Дево, мрак неведения отгоняющи, благоверно Богородицу Тя исповедающих.

1-й лик: И ныне и присно и во веки веков. Аминь.

На месте озлобления немощи смирившагося, Дево, исцели, из нездравия во здравие претворяющи.

2-й лик: Достойно есть...

Суббота 5-й седмицы Святой Четыредесятницы. Похвала Пресвятой Богородицы

Катавасия: Спаси от бед рабы Твоя, Богородице, яко вси по Бозе к Тебе прибегаем, яко к нерушимой стене и предстательству.

Призри благосердием, Всепетая Богородице, на мое лютое телесе озлобление и исцели души моея болезнь.

Молитва

(Опыт исправления и сокращения молитвы первой,

помещенной в иерейском молитвослове,

после акафиста Пресвятой Богородице)

Нескверная, Неблазная, Нетленная, Пречистая Богородице, Пренепорочная Владычице, Небесная Царица, Мати Царя Вышних Сил, Творца неба и земли, едина радости Ходатаица, рождшая Господа нашего Иисуса Христа, земным всем Спасителя! Приими сие благодарственное пение от недостойных рабов Твоих и не презри моления нашего, Всенепорочная Царице. Кто бо притекаяй к Тебе, посрамлен бысть, или кто, призываяй Тя, неуслышан от Тебе отыде? Кто паки, надежду возложивый на Тя, погибе? Точию отметающиеся поклонитися образу Твоему написанному, егоже все Силы Небесныя чтут, пред ним же вси роди христиан православных, благочестно поклоняющеся, честь Тебе Самой воздают. Темже и мы, на Твой пречистый образ взирающе, яко истинную самую Тя зряще Богородицу, верою сердечною и любовию от души припадаем и поклоняемся Тебе со Превечным, на руках Твоих держимым Младенцем, Господом нашим Иисусом Христом, и вопием Тебе: помилуй нас, Мати Божия, и покажи на нас убогих древния милости Твои. Ты древле спасла еси царствующий град Твой от скифскаго воеводы онаго прегордаго Кагана, рассвирепевшим морем тмочисленное воинство его потопивше. И паки огненным дождем с небесе тмы кораблей, нападающих на град Твой, в мори воскипевшим, рассеяла еси. Темже Твою помощь проповедуем велегласно и онаго Твоего великаго заступления дивное воеводство воспоминающе, Тебе, Взбранной Воеводе, победныя песни воспеваем раби Твои, Богородице, и молебное сие акафистово приносим благодарение. Приими его милостиво и яко всегда едина и таяже суще, яви и на нас человеколюбное Твое заступление. Твоим предстательством к Сыну Твоему и Богу нашему, и Твоим милосердием, и Твоею помощию не остави нас. Победи невидимые полки сатанинские, душевный наш град окружающие. Утеши нас в скорбях наших, в трудах наших нам помоги, душевныя страсти и болезни телесныя исцели, от врагов видимых и невидимых защити, весь путь маловременнаго сего жития добре и непреткновенно совершити пособствуй. И в день судный не забуди и нашего недостойнаго моления, и веру нашу в Твою помощь, и упование наше, на Тя возложенное, и любовь нашу к Тебе воспомянувши, Сына Твоего на милость к нам преклони и тако вечных оных благ и нас причастниками соделай, яко да и мы сподобимся славити Тя и благодарно воспевати Сына Твоего и Бога нашего, со Безначальным Его Отцем и Пресвятым Духом в безконечныя веки веков, аминь.

* * *

149

Зри: Если последование литии совершается непосредственно по окончании какой-либо службы – вечерни, утрени, часов, то тогда обычное начало опускается и по возгласе предстоятеля чтец глаголет: Аминь и абие Приидите, поклонимся...



Источник: Катышев Г.И. Славы Божия ревнитель: жизнеописание и труды исповедника епископа Афанасия (Сахарова). – М.: Издательство Сретенского монастыря, 2006. – 495 с.

Комментарии для сайта Cackle