Акафисты преподобному Иосифу Исихасту в двух редакциях

Русская редакция составлена Свято-Никольским Черноостровским женским монастырем. Греческая редакция составлена монастырем Филофей на святой горе Афон (перевод с новогреческого: Родионов О.А.). Издается по благословению митрополита Афанасия Лимассольского (Кипрская православная церковь)

Содержание

Редакция первая Кондак 1 Икос 1 Кондак 2 Икос 2 Кондак 3 Икос 3 Кондак 4 Икос 4 Кондак 5 Икос 5 Кондак 6 Икос 6 Кондак 7 Икос 7 Кондак 8 Икос 8 Кондак 9 Икос 9 Кондак 10 Икос 10 Кондак 11 Икос 11 Кондак 12 Икос 12 Кондак 13 Икос 1 Кондак 1 Молитва Преподобному Иосифу Исихасту Величание Тропарь, глас 1 Кондак, глас 8 Редакция вторая, перевод с греческого Кондак 1 Икос 1 Кондак 2 Икос 2 Кондак 3 Икос 3 Кондак 4 Икос 4 Кондак 5 Икос 5 Кондак 6 Икос 6 Кондак 7 Икос 7 Кондак 8 Икос 8 Кондак 9 Икос 9 Кондак 10 Икос 10 Кондак 11 Икос 11 Кондак 12 Икос 12 Кондак 13 Икос 1 Кондак 1 Молитва преподобному и богоносному отцу нашему Иосифу Исихасту. Тропарь преподобномуИосифу Исихасту, глас 5 Кондак преподобномуИосифу Исихасту, глас 8 Тропарь иной, глас 1 Кондак иной, глас 8  

 

Редакция первая

Кондак 1

Избранный Богом в последняя лета, Иосифе, безмолвниче дивный и преподобный отче, явился еси яко светильник, сего ради не под спудом, но на свещнице постави тя Господь, возсия бо тобою звездосиятельная пустыня внове, ты же великим отцем уподобивыйся, учитель послушания и молитвы пришел еси, и якоже Авраама паче звезд небесных умножил есть Бог, тако и тя родоначальника подвижников последних дней яви, сего ради похвальная вопием ти:

Радуйся, Святый Отче Иосифе, великий Исихасте!

Икос 1

Ангел послан бысть от Всевышняго к благочестивей матере твоей, отче наш Иосифе, взяти тя, младенцу ти бывшу, рек: «Се приговор», и тако уразуме, яко сие есть знамение с Небесе, да будеши работати Господеви вся дни живота твоего, сего ради поем ти:

Радуйся, от младенчества Богом избранный; радуйся, вся чаяния Господня исполнивый.

Радуйся, яко Ангели удивляются смотрению Божию о тебе; радуйся, яко человецы вкушают плоды учения твоего.

Радуйся, бескровный мучениче воистину явивыйся; радуйся, блаженства подвижническаго в полноте вкусивый.

Радуйся, благоуханный цвете добродетелей; радуйся, прозябение Афонской Горы.

Радуйся, вся суетная мира сего презревый; радуйся, драгоценную Жемчужину обретый.

Радуйся, потоками слез плоть свою иссушивый; радуйся, ветхаго человека в себе умертвивый.

Радуйся, Святый Отче Иосифе, великий Исихасте!

Кондак 2

Узрел еси чуден дворец в видении Боже- ственнем, яко сотника два сретоста и повлекоста тя во светлии чертози, глаголюща: «такова бо воля Царя», послежде облекоста тя в велелепнии ризы и реста ти: «Отныне зде место служения твоего». Ты же сие дивное видение видев, вострепета сердцем твоим, много благодаря Господа, темже и мы вопием с тобою:

Аллилуиа.

Икос 2

Уразумев глубину учения святых, восхотел еси уединитися на Святей горе Афонской, и тако молитвенно вопрошал еси: «Како Богови угодити мощно?» Сего ради отлучися ум твой от попечений мира сего, и уготовися душа твоя вся скорби претерпети, якоже велиции пустынницы, сего ради и мы поем ти похвальная:

Радуйся, древним безмолвником уподобивыйся; радуйся, последним монахом печать и правило явился еси.

Радуйся, кременю устремления ко Христу; радуйся, орле зоркий, возлетевый к Небеси.

Радуйся, весь огнь быв ревностное начало положивый; радуйся, блаженною кончиною многия венцы обретый.

Радуйся, кровь самоотвержения мужественне отдавый; радуйся, Духа Святаго трепетно приявый.

Радуйся, елене жаждай, обретый Источник Живоносный; радуйся, крине сельный, облекийся в белы ризы добродетелей.

Радуйся, тонкий фимиаме, ревностною бранию воскуренный; радуйся, свеще златосветная, выну Господеви горящая.

Радуйся, Святый Отче Иосифе, великий Исихасте!

Кондак 3

Сила Божественная осени тя и оставил еси земная, возлетел же еси в небесная. Обретшу ти некоего Афонскаго монаха, преселися в пещеры Святыя Горы взыскати подвижник, подобных древним, сего ради прият Бог устремление твое и введе тя Пресвятая Богородица в вертоград Свой, да израстит из тебе плод мног, мы же питающеся от гроздей сих, поем Богови:

Аллилуиа.

Икос 3

Яко пещь пылающая ревности Божественыя, отвратил еси очеса твоя от соблазн жития суетнаго, безмолвие же возлюбил еси, сего ради дарова ти Бог еже царствовати в сердце твоем миру Его. Возжада душа твоя Христа и предаде ся умрети в подвизех, темже упои тя любовию Своею Христос Бог, и мы радостно поем ти:

Радуйся, светосиянным лучем Божественныя Благодати призванный; радуйся, похотения души своея умертвивый.

Радуйся, яко оставив малая, взыскал еси великая; радуйся, яко уничижив излишняя и бесчестная, обрел еси честная.

Радуйся, нижняя презревый и вышняя достигнувый; радуйся, день и нощь ко Христу взывавый.

Радуйся, постническим житием Божественному Предтечи подобниче; радуйся, любомудрием преподобному Исааку Сирианину ревнителю.

Радуйся, ревностный воине Царя Небеснаго; радуйся, кроткий послушниче Пресвятыя Богородицы.

Радуйся, звездо вечерняя, светом Божественныя Любве горящая; радуйся, столпе огненный, пламенную молитву к Небеси возносяй.

Радуйся, Святый Отче Иосифе, великий Исихасте!

Кондак 4

Егда прилучи ти быти в праздник Преображения на верху Горы Афонской, нашел еси, святе Иосифе, сотаинника и соподвижника блаженнаго и любомудраго Арсения, темже едине стремящеся уединитися безмолвия ради, о Иосифе, вопросил еси слова богомудраго Даниила Катунакиота, како безстрастие стяжати. Тако и мы обучаемся вопрошати отцев наших и волю свою отсекати, благодарственно поюще Богови:

Аллилуиа.

Икос 4

Положил еси основанием житию твоему добросоветие духоноснаго Даниила яко обрести старца и подчинитися ему, зане доброе дело должно утвердити печатию послушания, темже взывал еси, преподобне Иосифе, чрез все житие твое: «Велико, поистине, таинство послушания», яко несть ины стези добропобеднаго жития, разве сицевыя, уведевшесие хвалим тя тако:

Радуйся, послушания истинный ревнителю; радуйся, устава в малом и великом хранителю.

Радуйся, проповедниче, яко един есть путь иноцем послушание; радуйся, паламитскаго учения наследниче.

Радуйся, возвестителю, яко молитва последует послушанию; радуйся, исповедания помыслов добросоветниче.

Радуйся, благочестивых мирян к молитве призывавый; радуйся, ревностных монахов к отсечению воли побуждавый.

Радуйся, мудрование души отцем подчинивый; радуйся, небесную свободу ценою послушания купивый.

Радуйся, волю свою доблественне презревый; радуйся, пакибытие древняго монашества.

Радуйся, Святый Отче Иосифе, великий Исихасте!

Кондак 5

Яко звезду от Евфрафа пред собою имевый благословение преподобнаго Даниила, пришел еси, чудне Иосифе, с соподвижником твоим Арсением к незлобивому старцу Ефрему во ученицы, зде же сподоби тя Господь, яко Авраама в дубраве Мамвре, явления Пресвятыя Троицы во образе Триех Отроцев, благословивых твое ревностное тщание к Свету светов Христу, Ему же поем:

Аллилуиа.

Икос 5

Уведев, преподобне Иосифе, яко преумножи Бог благодать последи дивнаго сего видения, возжелавшу ти затворити чувства безмолвием, взыскал еси иноваго благотихаго места, да с большею ревностию сотвориши подвизи выну имя Христово в сердце носити, мы же тебе вопием:

Радуйся, Троическим Светом озаренный; радуйся, плотская отринувый и сего ради Духом Святым утешенный.

Радуйся, в чудный вертоград смирения многими скорбьми вшедый; радуйся, от мятежа страстей упокоивыйся.

Радуйся, телеснаго благочиния поборниче; радуйся, внутренняго безмолвия ковчеже.

Радуйся, благодати покаяния вместилище; радуйся, радостотворнаго плача приятелище.

Радуйся, пустыни житель любобезмолвный; радуйся, духодвижимая трубо сладковещанная.

Радуйся, яко помыслы трезвением управил еси; радуйся, яко звезда смирения всему миру возсиял еси.

Радуйся, Святый Отче Иосифе, великий Исихасте!

Кондак 6

Отшедшу же старцу Ефрему ко Господу, водвори тя Господь, богомудре, с блаженным Арсением во скит святаго Василия. И исполнився ратнаго духа, святе Иосифе, и яко луце напряжени и сабли изострени, имеяй выну молитву и слезы покаяния, поражал еси бесовстии полцы, осаждаяй крепость страстей, Иисусу Навину подобен быв, и тако паде гордыня, яко стены Иерихонстии, мы же славяще Бога поем:

Аллилуиа.

Икос 6

Сурово постяйся и во бдениих пребываяй зельне, яко всехраборник многочудный, явился еси добрая розга Господеви, пребывый на Истинней Лозе, отреби же тя Христос Бог, да множайший плод принесеши Ему, христоподобно творяй ратоборство. Мы же, дивящеся доблести духа твоего, глаголем ти:

Радуйся, велехвальнаго змия низложивый; радуйся, смиренномудрие жестоцыми болезньми стяжавый.

Радуйся, чистое злато, Божим Горнилом испытанное; радуйся, сквозе огнь искушений прошед, ржу и тлю из души своея изринувый.

Радуйся, розго плодоносная, Виноградарем очищенная; радуйся, цветец мироблагоуханный, вонями покаяния благоцветый.

Радуйся, Мадиамския шатры ячменным хлебом опровергнувый; радуйся, посты, плачи и подвизи своими плоть утончивый и видений Божественных удостоивыйся.

Радуйся, цветоносный саде безмолвия, водами покаяния орошенный; радуйся, кошнице премирная, плодами молитвы исполненная.

Радуйся, неиждеваемаго богатства Отчих щедрот приемниче; радуйся, богопобеднаго целомудрия стяжателю.

Радуйся, Святый Отче Иосифе, великий Исихасте!

Кондак 7

Хотящу тебе всею душею работати Господеви, узрел еси чудное видение, яко ты, достодивне Иосифе, ста супротив свирепому эфиопу в первейший ряд, занеже перволучший воин Христа Бога еси, яко божественный Давид прямо Голиафу, исторгнув меч веры, обезглави его, и тако облече тя Господь в доспехи терпения, отъят поношение от души твоея, нам же оставил еси сие изрядное искусство. Мы убо радующеся сему, поем Богови:

Аллилуиа.

Икос 7

Новую звезду показа тя Христос, преподобне Иосифе, смотрение премудро имеяй о человецех, наипаче же о изшедых взыскати Его, темже посылая истинным чадом Своим в скорбех пребывати, перстовидне зрит на терпящих страсти Его ради. Ты же, святе, якоже божественный Иаков, боряйся со Ангелом, приял еси Божественное благословение подвизи твоими, узрев же духом Бога лицем к лицу чрез страдания твоя, возшел еси на лествицу смиренномудрия. Мы же дивящеся сему поем ти:

Радуйся, воеводо воинства Христова; радуйся, Божественной Победы завоевателю.

Радуйся, ум свой бдением истончивый; радуйся, крепкий ратоборче, землю учении и подвизи твоими осоливый.

Радуйся, в горниле искушений и клевет обожженный; радуйся, в божественней купели покаяния омывыйся.

Радуйся, вся плотская бдением и слезами низринувый; радуйся, полынную горечь страстей медом любострадания усладивый.

Радуйся, яко Иов многострадальный вся скорби от Бога приявый; радуйся, вся степени брани с духи злобы поднебесныя прошедый.

Радуйся, звездо, возшедшая в последняя времена; радуйся, славо монашествующих и отрадо мирян.

Радуйся, Святый Отче Иосифе, великий Исихасте!

Кондак 8

Изнемогшу ти в брани, странное видение виде: яко неции птицы божественнии летаху хоровидно, дивно поюще Божественнии гимни, нецый же старец вложи ти в руце трие частицы хлеба, аки антидор, знаменуя тем велие утешение от Господа. Зане не веда, идеже был еси – на небе ли, или на земли, возликова душа твоя от умиления, мы же с тобою Богови поем:

Аллилуиа.

Икос 8

Послежде ужесточи Бог брань, и явися ти явно злосмрадный шелудивый, тебе же, схватившу его яростно, оставление страсти последова. И подобен быв Антонию дивному, узре духовными очесы,яко злыя сети вражия поткнуты всюду и яко монаси уловлени в них бываше: овый за руце, овый за нозе, овый за иныя части, ты же, любомудре Иосифе, зря сие, образ брани изъяснил еси нам, мы же благодарственно вопием ти:

Радуйся, дивный стратилате невидимыя брани; радуйся, мудрый наставниче сердечнаго трезвения.

Радуйся, покаяния реко приснотекущая; радуйся, пламеню молитвы неугасимый.

Радуйся, сокровеннаго таинства собеседниче; радуйся, вышняго наследия наследниче.

Радуйся, полчищ бесовских прогонителю; радуйся, бдения в помыслех рачителю.

Радуйся, послушания суровый учителю; радуйся, немощи душевныя уврачевателю.

Радуйся, Иосифе, житием твоим свидетельствовавый, яко Христос есть Той же ныне и во веки веков; радуйся, последняго монашества сушу одождивый.

Радуйся, Святый Отче Иосифе, великий Исихасте!

Кондак 9

Не преклонися ум твой от колеблющих тя, доблественне противяйся искушением, прилози бесовстии, ратующие на тя, мужественне отражал еси. Ты же, Богоблаженне святе Иосифе, со именем Господним приял еси подвиг противу искушений бесовстих, да именем Иисусовым необинуяся избиеши вся супостаты, и тако обрел еси безстрастие, мы же Богови, победившему естества чин, радующеся поем:

Аллилуиа.

Икос 9

Отвергшу ти мир и тело презрев, не побежден быв от искушений лютейших, обышедших тя, победил еси их мужественне. Учение же твое, преподобне Иосифе, соблюдеся повелением Божиим к нашему научению и укреплению, да премудри будем и уразумеем стези Господни, и мы, чада твоя, ублажаем тя:

Радуйся, узкими враты во Святая Святых вшедый; радуйся, плоть свою духови покоривый.

Радуйся, всенощными бдении сетей вражиих избежавый; радуйся, безмолвием помыслов суровый нрав укротивый.

Радуйся покаянием страсти иссушивый; радуйся, водою живою словес твоих весь мир напоивый.

Радуйся, лишения и скорби любве ради Христовы претерпевый; радуйся, слез медоточный поток обретый покаянием и молитвою.

Радуйся, яко беси трепещут поучения твоего; радуйся, яко Ангели ликуют, зряще любострадание твое.

Радуйся, семя тли в себе иссушивый; радуйся, пристанища спасения достигнувый.

Радуйся, Святый Отче Иосифе, великий Исихасте!

Кондак 10

Быша очеса твоя, аки источник воды, непрестанно слезящ день и нощь, возжада душа твоя, отче Иосифе, причаститися Пречистых Таин Христовых, и возскорбе не имущи Я, Бог же милостивно призираяй на истинных чад Своих, посла ти Ангела, да причастит тя, ты же радуяся, плач смесив со сладостию благодати медовнею, воспел еси благодарственная Господеви:

Аллилуиа.

Икос 10

Познал еси велие поистине таинство, изшедшу уму твоему из темницы мира сего, и тако вшел еси в землю обетования, яже есть образ совершенства, и душа твоя обновися и Дух Святый откры ти Небесная, сердце же твое, яко кивот драгоценный, вмести Невместимаго и исполнися Любве благоуханием, о нас убо Господа моли, хвалящих тя тако:

Радуйся, дара благодати Святаго Духа обручниче; радуйся, Святых Таин десницею Ангельскою причастниче.

Радуйся, любве ради Христовы страстем распеншийся; радуйся, на мысленный Фавор возшедый.

Радуйся, утеснения и скорби возлюбивый; радуйся, непреложныя радосте монашества вкусивый.

Радуйся, естества своего немощь познавый; радуйся, полноты Божественных благ сподобивыйся.

Радуйся, Отеческия любве таинниче; радуйся, чина сыноположения достигнувый.

Радуйся, Божественная дарования восприемый; радуйся, талант благодати, стократицею преумножив, Благораздаятелю воздавай.

Радуйся, Святый Отче Иосифе, великий Исихасте!

Кондак 11

Якоже остави праведный Иаков целомудренному Иосифу едину часть наследия своего, юже взял есть от Амореев мечем и луком, тако и ты чадом твоим, блаженне Иосифе, даде слово, еже от деяний твоих глаголемо, сие же есть хранилище надежды. Мы же, приимше в дар словеса твоя, хвалебно Богови поем:

Аллилуиа.

Икос 11

С ветозарнею свещею богомудрия, святе Иосифе, возгорелся еси, свиваяй любосмирение оба полы сего времени, созвал еси монашествующих множества на трапезу и снедь нетленныя жизни. Ученицы же твоя, яко птицы небесныя, понесоша крылами послушания амброзию наследия твоего во вся концы земныя, мы же, питающеся от сладкосластныя снеди сея, благодарственно вопием ти:

Радуйся, органе, послушания велегласный проповедниче; радуйся, зерно горушично, с велиею силою возрастшее и многия птицы препитавшее.

Радуйся, искусства из искусств художниче; радуйся, духовнаго рассуждения столпе.

Радуйся, дремлющую душу последняго монашества возбудивый; радуйся, матери послушанию чад своих подчинивый.

Радуйся, монахов златословесный огласителю; радуйся, умнаго безмолвия священноповествователю.

Радуйся, земле плодовитая, Небесным Пахарем возделанная; радуйся, ниво златосеянная, зрелыя пшеницы исполненная.

Радуйся, яко слезы и поты твоими драгоценные плоды созерцания собрал еси; радуйся, душеспасительную трапезу последнему монашеству уготовил еси.

Радуйся, Святый Отче Иосифе, великий Исихасте!

Кондак 12

Привлекши тя, чудне Иосифе, Хранительница Афонской Горы в вертоград Свой, и бывши Покровом ти во вся дни, занеже много возлюби Ю, и тако взят тя в день честнаго Успения Своего, якоже и обеща ти Пречистая, ты же, узрев Ю, возрадовася духом, остави земная, достойно вшел еси в Небеснии Чертози, рек Господеви:

Аллилуиа.

Икос 12

Возликова Афонская Гора, от неяже изшел еси монашества прозябение ты, Иосифе чудный, великий безмолвниче и светоименный, чину ангельскому подражателю и преподобных отцев ревнителю. Темже убо положил еси, Иосифе преподобне, ногу твою в шествие новаго века, да тернистою стезею приведеши и нас в совершенство сыноположения, мы же зовем ти:

Радуйся, всех искушений победителю; радуйся, в радость Господа твоего возшедый.

Радуйся, христоподражательнаго послушания священнохранителю; радуйся, присноцветущая ветвь добродетели.

Радуйся, кандило светозарное, светом Божественныя Благодати возсиявшее; радуйся, свещнице Богосветлая, искусством спасения приоблиставшая.

Радуйся, панагиаре драгоценный, выну Пречистую в своем сердце храняй; радуйся, ароматнице безлетная, вонями чистоты гобзующая.

Радуйся, скуделе, исполненный мира, Великим Архиереем освященный; радуйся, почерпало многотрудное, нектаром подвигов твоих нас препитавый.

Радуйся, мирнице целебная, в лютех бранех елеем помазующая; радуйся, алавастре мировонный, необименнаго Христа Бога объявый.

Радуйся, Святый Отче Иосифе, великий Исихасте!

Кондак 13

О, священная главо Богодухновенне отче наш Иосифе, приими ныне наша недостойная моления! Мы же, любомудрие твое познавше, оставим суетное житие, сердце покаянием очистим и, ум возведше горе, по глаголу твоему, всеблаженным послушанием стезю в Небесное Отечество обрящем. Молим ти ся, претерпети нам вся скорби века сего и внити в невечернее Царствие Господа нашего, Ему же поем:

Аллилуиа!

Этот кондак читается трижды, затем икос 1-й и кондак 1-й, затем молитва.

Икос 1

Ангел послан бысть от Всевышняго к благочестивей матере твоей, отче наш Иосифе, взяти тя, младенцу ти бывшу, рек: «Се приговор», и тако уразуме, яко сие есть знамение с Небесе, да будеши работати Господеви вся дни живота твоего, сего ради поем ти:

Радуйся, от младенчества Богом избранный; радуйся, вся чаяния Господня исполнивый.

Радуйся, яко Ангели удивляются смотрению Божию о тебе; радуйся, яко человецы вкушают плоды учения твоего.

Радуйся, бескровный мучениче воистину явивыйся; радуйся, блаженства подвижническаго в полноте вкусивый.

Радуйся, благоуханный цвете добродетелей; радуйся, прозябение Афонской Горы.

Радуйся, вся суетная мира сего презревый; радуйся, драгоценную Жемчужину обретый.

Радуйся, потоками слез плоть свою иссушивый; радуйся, ветхаго человека в себе умертвивый.

Радуйся, Святый Отче Иосифе, великий Исихасте!

Кондак 1

Избранный Богом в последняя лета, Иосифе, безмолвниче дивный и преподобный отче, явился еси яко светильник, сего ради не под спудом, но на свещнице постави тя Господь, возсия бо тобою звездосиятельная пустыня внове, ты же великим отцем уподобивыйся, учитель послушания и молитвы пришел еси, и якоже Авраама паче звезд небесных умножил есть Бог, тако и тя родоначальника подвижников последних дней яви, сего ради похвальная вопием ти:

Радуйся, Святый Отче Иосифе, великий Исихасте!

Молитва Преподобному Иосифу Исихасту

Преподобне отче наш Иосифе, звездо Афонская, возсиявшая вечеру времен, последних иноцев укрепление и безмолвия возродителю, волю Божию исполнивый и всего себе отдавый Творцу и Создателю нашему, помози ми, грешному и унылому, прямо ити путем веры, да не воззрю вспять, яко Лотова жена, на смрадный Содом мира сего, помози ми смертною памятию возжжещи радость во уме моем, очистити сердце мое зловонное от гнева и похотей, да приимет в ся Любовь необыменну, ставшу источнику источающу сладость.

Молю тя, святе Иосифе, не отрини мя ради злосмрадия души моея, но умоли Владыку и Господа небоязненно проити ми узкою стезею кротости и послушания, священным безмолвием отсещи главу гордаго змия, во мне гнездящагося, обжещися в горниле искушений, храбро испити живоносную чашу обличений и скорбей, и тою возрасти в меру возраста Христова.

Моли Милостиваго Бога о нас, грешных (имена), да укрепит сердца наша в вере и подаст силы мужественне претерпети вся скорби последняго времени и не устрашитися козней лукаваго супостата, дабы всем православным христианом обонявати новый воздух дивный Горняго Иерусалима и узрети, радующеся, славу Господа и Бога нашего Иисуса Христа, Ему же слава подобает всегда, ныне и в нескончаемыя веки веков. Аминь.

Величание

Ублажаем тя, преподобне отче Иосифе, и чтим святую память твою, наставниче монахов и собеседниче ангелов.

Тропарь, глас 1

Пустыни Афонской цвете благоуханный, древним единонравный подвижниче, пламенный ревнителю молитвы непрестанной, благодати истинный послушниче, Господа всем сердцем возлюбивый, Иосифе преподобне, монахов наставниче, моли Христа Бога Спасителя душ наших от сна лености воздвигнуть нас к покаянию.

Кондак, глас 8

Вышния добродетели Богом наученный, образ был еси учеником твоим, воздержанию, смирению, наипаче же послушанию тех наставляя, и, яко пастырь, стаду своему предходя, добре шествовати путем жестоким пустыннаго жития научил еси. Темже ублажаем тя, Иосифе преподобне, моли Христа Бога прощение даровати чтущим любовию святую память твою.

Редакция вторая, перевод с греческого

Кондак 1

Богоматере цвет и миро благовонное, смирения крин сладкоуханный, Иосифа Исихаста восхвалим: Иисусовы молитвы славий благоглаголив сый, трисвятую песнь той воспеваше, темже зовем ему:

Радуйся, преподобне отче Иосифе!

Икос 1

Ангели невидимо удивишася, зряще пачеестественныя подвиги твоя, явился бо еси на Горе Пресвятыя Богородицы умныя молитвы ради приятелище божественнаго света, темже воспеваем ти:

Радуйся, преподобный Иосифе, подвижниче афонский; радуйся, святаго Григория Паламы в молитве подражателю.

Радуйся, пустынный жителю и Горы Святыя украшение; радуйся, чертога небеснаго славное удобрение.

Радуйся, на Горе Афонской просиявый земный ангеле; радуйся, умныя молитвы божественный учителю.

Радуйся, безмолвников цвете и благоухание; радуйся, Афона честнаго божественное благословение.

Радуйся, Иосифе, благодатнаго просвещения сподобивыйся; радуйся, сосуде Утешителева божественнаго света.

Радуйся, светильниче молитвы и видения; радуйся, радосте душевная и утешение.

Радуйся, преподобне отче Иосифе!

Кондак 2

Жития святых мучеников и преподобных пустынных исполниша душу твою рачения божественнаго, и божественное видение узрев, во ангельский образ облеклся еси, темже о тебе Богови достойне вопием: Аллилуиа.

Икос 2

Сладчайшаго меда гласа и неизглаголанныя радости и благоухания исполнился еси, отче Иосифе, егда явися лобызающи тя Пресвятая, имущи Богомладенца во объятиих Своих, блистающи же яко солнце. Темже поем ти сицевая:

Радуйся, безмолвниче, нетварным светом облеченный; радуйся, богословия учителю и просвещения.

Радуйся, сияние благодати Иисусовы; радуйся, души очищение и избавление.

Радуйся, просиявый в подвизе яко свеща; радуйся, причастниче благодати Христовы и света божественнаго приятелище.

Радуйся, светильниче пустынный; радуйся, тишино душевная.

Радуйся, божественный учителю молитвы; радуйся, миро молитвенное и слезо теплая.

Радуйся, помыслов губителю; радуйся, свете, во тьме сияяй.

Радуйся, преподобне Иосифе Исихасте!

Кондак 3

Силою Крестною и твоея молитвы умныя, яко иный Моисей, воду из камене извел еси, старче Иосифе. Темже и мы, зряще чудеса твоя, вопием Богови сицевая: Аллилуиа.

Икос 3

Посреде скорби и болезни узрел еси Господа, на Кресте распятаго и исполненна божественнаго Света, и глагола ти: «Се, елика претерпех любве ради Твоея!» Темже вопием ти таковая:

Радуйся, Иосифе Безмолвниче, пламеню, помыслы пожигаяй; радуйся, Иосифе Безмолвниче, монашествующим ревность возжигаяй.

Радуйся, Иосифе Безмолвниче, святаго Антония ветве и цвете; радуйся, Иосифе Безмолвниче, свете спасительный во глубине сердечней.

Радуйся, путю монахом тесный и скорбный; радуйся, увенчание, подвижником веры уготованное.

Радуйся, упоение молитвы и радосте благодати; радуйся, ангеле света и Святаго Духа языче огненный и неугасимый.

Радуйся, подвижниче, во бдении просиявый; радуйся, венец от Троицы Святыя приемый.

Радуйся, рыбарю, обретый бисер божественный; радуйся, сердце чистое истиннаго таинника Благодати.

Радуйся, преподобне Иосифе Исихасте!

Кондак 4

Ревнителю богомудрый, старче Иосифе, облекийся во смирения светлость, посрамил еси ненавистника добра дерзость постом и непрестанною молитвою. Темже сплетше ти победный венец, Богови о тебе вопием: Аллилуиа.

Икос 4

Подвизався на горе Афонской в последняя времена, ангельскому жительству поревновал еси, и таинник быв сущым на Небеси, узрел еси Христа и Пресвятую Деву душевныма же и телесныма очима. Темже чистою совестию сия глаголем:

Радуйся, молитво, в сердце горящая, якоже лампада неугасимая; радуйся, молитво непрестанная, присно на устнах твоих носимая.

Радуйся, душу твою светильник молитвы соделавый; радуйся, иже от сердца твоего каждение молитвы возсылавый.

Радуйся, свеще неугасимая стопами Иисусовыми шествующим; радуйся, молитвою Иисусовою ум твой просветивый.

Радуйся, елеем молитвы умащаяй душу; радуйся, молитвою умною Господа в той стяжавый.

Радуйся, в любви и смирении молитву глаголавый; радуйся, его же молитва сердечная возношаше ко Господу.

Радуйся, «Господи Иисусе Христе» присно вдыхаяй; радуйся, «помилуй мя» денно и нощно выдыхавый.

Радуйся, преподобне Иосифе Исихасте!

Кондак 5

Богородицы Марии, и міра Госпожи, и Владычицы вселенныя зрак божественный видети сподобился еси, и слышал еси блаженнаго Тоя и медоточиваго и всякаго утешения превышшаго гласа, глаголюща ти: «Возверзи упование твое на Мя». Темже веселящеся Господеви возопиим: Аллилуиа.

Икос 5

Крепок во бранех показался еси силою Честнаго Креста и неустанныя молитвы умныя. Темже рыдая поражен бысть бесовский полк, мы же немолчно, отче Иосифе, вопием ти сицевая:

Радуйся, цвете молитвы, востекающия ко Христу; радуйся, молитвы непрестанныя каждение Богови.

Радуйся, пустыни цвет неувядаемый и Горы благоухание; радуйся, акафистное пение Пресвятой Богородице присно воспевавый.

Радуйся, молитвою Иисусовою от ада избавляяй; радуйся, тоюжде сущия во тьме просвещаяй.

Радуйся, пустынный жителю и во плоти ангеле; радуйся, Пресвятыя Богородицы молебниче и спасения провозвестителю.

Радуйся, Иосифе, егоже молитвою ангели нисходят; радуйся, егоже молитвою человецы ко Творцу восходят.

Радуйся, Иосифе Безмолвниче, молитва бо твоя сердца умягчает; радуйся, вся научивый, яко молитва Иисусова от греха избавляет.

Радуйся, преподобне Иосифе Исихасте!

Кондак 6

Чистоты, целомудрия, благости и любве заповедь Пресвятей Богородице, яко песнь благоуханную, душа твоя принесе. Темже и мы, поминающе святую душу твою, вопием Господеви: Аллилуиа.

Икос 6

Светильник неугасимый молитвы Иисусовы явился еси, преподобнейший отче Иосифе. Темже, твоею светлостию световодими, вопием:

Радуйся, Иосифе Безмолвниче, со слезами молитву твою Господеви приносивый; радуйся, иже благодатию Божиею Господа узревый.

Радуйся, Иосифе, егоже моление приемлет Богородица Пресвятая; радуйся, яко цвет благовонный бо есть молитва твоя святая.

Радуйся, образе подвижнический, святый и божественный; радуйся, душе очищенная постом и молитвою.

Радуйся, Иосифе, молитва бо твоя песнь есть Херувимская; радуйся, Иосифе, молитва бо твоя огнезрачна, яко Серафимская.

Радуйся, молитвою Жениха удержавый; радуйся, молитвою зверя страшнаго отгнавый.

Радуйся, постничеством божественным твоим страсти потребивый; радуйся, святым житием твоим глубины душевныя во цветник благоуханный обративый.

Радуйся, преподобне Иосифе Исихасте!

Кондак 7

Яблок чермноцветных Богоматере во время зимнее на вершине Горы Афонской вкусил еси, и со слезами пред образом возблагодарил еси Богородицу. Темже и мы, зряще чудеса твоя, зовем Богови таковая: Аллилуиа.

Икос 7

Молитвою умною, постом, бдением и всяцем злостраданием со слезами умиления страсти плотския умертвил еси, подражая вседушне отцы святыя, и ангел во плоти светоносен был еси, старче Иосифе Безмолвниче. Темже во умилении душевнем вопием ти сицевая:

Радуйся, на всяк день со грехом брань имевый; радуйся, николиже от пути святаго отступивый.

Радуйся, молитвы твоея николиже оставляяй; радуйся, в сердце твоем молитвою, яко божественная лампада, сияяй.

Радуйся, яко светильник бо в души твоей возсия молитва; радуйся, егоже слезы, за мір проливаемыя, паче ангельскаго гласа вопияху.

Радуйся, Иосифе Безмолвниче, сосуде утешителев; радуйся, Иосифе Безмолвниче, вертограде пустынный.

Радуйся, твоими ученики Афон просветивый; радуйся, Богоматере цвете благовонный.

Радуйся, острова Паросскаго похвало и светильниче послушания; радуйся, свете смирения и почесте терпения.

Радуйся, преподобне Иосифе Исихасте!

Кондак 8

Устранився от страстей твердым твоим подвижничеством, старче Иосифе, умней молитве, яко другий Григорий Палама, научил еси. Темже гласы преподобными вси в веселии сия Богови вопием: Аллилуиа.

Икос 8

Весь исполнь сый божественнаго света в пустыни Афонской, яко елень, жажду твоея души утолил еси. Темже радостне ти вопием:

Радуйся, Иосифе, нескверный Афонский пещерниче; радуйся, Илии Фесвитянина преемниче и божественный светодавче.

Радуйся, делателю винограда Пресвятыя Богородицы и служителю благочестия; радуйся, Симеона Новаго Богослова в видении преемниче.

Радуйся, птице, особящаяся в винограде Богородицы; радуйся, земледелателю, луг афонский духовный благоплоден сотворяяй.

Радуйся, старче Иосифе, святому Обручнику тезоименный; радуйся, земный ангеле, постником единодушный.

Радуйся, святаго Никодима новый согражданине; радуйся, последних времен столпниче афонский.

Радуйся, Пресвятыя цветособрание и Серафимов удивление; радуйся, Духа древо плодовитое и Херувимов похваление.

Радуйся, преподобне Иосифе Исихасте!

Кондак 9

Храни плотския твоими трудами деннонощными укротил еси, подвиги же терпения и молитвы, и струями слез твоих и потов безмерных страстей пламень угасил еси. Темже Богови вопием о тебе: Аллилуиа.

Икос 9

Потоком мироточивых слез, о имени Пресвятыя Богородицы проливаемых, омыл еси твою душу, утешаему любовию, надеждею и верою. Темже возсылаем ти сицевая:

Радуйся, в житии твоем трезвеннем премного потрудивыйся; радуйся, егоже жительство честное дивно есть и ангелом.

Радуйся, сокровище великое мира райскаго; радуйся, Афонское озарение и слез молитвенных стяжание.

Радуйся, свеще Пресвятыя и весно грядущая, посреде зимы греховныя; радуйся, солнце Афонское, снег порока истаявающее.

Радуйся, яко даже до крове в молитве умней подвизался еси; радуйся, цвете неувядаемый плача сокрушеннаго.

Радуйся, Божественныя Благодати цвете благоуханный; радуйся, благословение Пречистыя Афону преподавый.

Радуйся, Малаго Скита Святыя Анны цветущая отрасле; радуйся, вертограда Богоматере духовный плоде.

Радуйся, преподобне Иосифе Исихасте!

Кондак 10

«Прости мя, Мати моя, егда в неведении моем печалю Тя! Владычице моя, не остави мене!» – сице со слезами вопиял еси Пресвятей Богородице, и – о преславнаго чудесе! – простре руце Свои и даде ти сладчайшаго Иисуса, Иже, яко младенец, коснуся главы твоея. Темже и мы непрестанне к Богу и Пречистей Его Матери песни ангельския поем: Аллилуиа.

Икос 10

Ангельскаго Божественнаго жительства возжелел еси, сего ради яко фимиам, отче Иосифе, подвизи твои ко Святей Троице возношахуся. Темже во смирении сердечнем поем ти сице:

Радуйся, орле, гнездо твое сотворивый на вершине горы Афонской; радуйся, Матере Божия кампане звоногласный.

Радуйся, велий учителю присныя молитвы; радуйся, древо, напояемое от Матере Живота.

Радуйся, лозо, ветве молитвы простирающая; радуйся, плоде веры, яко земли приношение.

Радуйся, смирения светильниче возжженный; радуйся, разсуждения источниче благодатный.

Радуйся, блаженне Иосифе, слезною молитвою твоею Иисуса стяжавый; радуйся, слезами твоими изливая милость повсюду.

Радуйся, Иосифе, яко молитва твоя бесовския облаки расточает; радуйся, Иосифе, яко молитва твоя духи темныя погубляет.

Радуйся, преподобне Иосифе Исихасте!

Кондак 11

Терпение, молчание, смирение, послушание, пути добродетелей богоугодне во святей Горе совершил еси, и плодами умныя твоея и непрестанныя молитвы нас напитал еси. Темже мы величаем тя, поюще радостне Богови: Аллилуиа.

Икос 11

Сохранил бо еси тело и ум непорочны от скверных помысл Божественною Благодатию, подвигов твоих ради востекаше святая молитва твоя, яко благоуханный фимиам, на Небеса. Темже величаем тя, вопиюще ти сицевая:

Радуйся, Иосифе, нетварным Светом облеченный; радуйся, вертограда Богоматере духовный плоде.

Радуйся, плодоносну соделавый неплодную пустыню; радуйся, неплодное души моея во благоплодие претворяяй.

Радуйся, Лествицы Иоанновы животочный плоде; радуйся, потоков веры всезлатая реко.

Радуйся, всем концем земли ведомый цвет Пресвятыя; радуйся, душе добродетельная, земле обетованная.

Радуйся, яко чада молитвы твоея прият Пренепорочная; радуйся, яко от Афона настави Та ко странствию далече.

Радуйся, блаженне Иосифе, помазанный святости миром; радуйся, Богоматере благовоннейший крине.

Радуйся, преподобне Иосифе Исихасте!

Кондак 12

Яко немолчный гласе Благодати Иисусовы, омыл бо еси душу твою в купели покаяния. Темже, чтуще житие твое, приносим Богови с любовию песнь ангельскую: Аллилуиа.

Икос 12

Поюще твоих трудов множество на святоименней Горе, яко инаго Илию воспеваем тя, и яко земнаго ангела чтуще, сице вопием:

Радуйся, облаче божественный на вершине Афонской; радуйся, Богоматере моление святое на земли чуждей.

Радуйся, Иосифе, житием твоим Предтече подражавый; радуйся, монахом путь крестный указавый.

Радуйся, высото неудобозримая поста и бдения; радуйся, рачителю смирения и молитвы божественныя.

Радуйся, око неусыпное, Господа взыскующее; радуйся, сердца чистаго молитва непрестанная.

Радуйся, слез поточе, о благодати Пресвятыя проливаемый; радуйся, твоими бо слезами мір весь благоухает.

Радуйся, славию святыя молитвы Иисусовы; радуйся, орудие спасительное Божественнаго смотрения.

Радуйся, преподобне Иосифе Исихасте!

Кондак 13

О, преподобне отче Иосифе Исихасте, ангелов удивление, монахов светлосте, приими наша молитвы и молися присно о душах наших, Богови взывая: Аллилуиа.

Этот кондак читается трижды, затем икос 1-й и кондак 1-й, затем молитва.

Икос 1

Ангели невидимо удивишася, зряще пачеестественныя подвиги твоя, явился бо еси на Горе Пресвятыя Богородицы умныя молитвы ради приятелище божественнаго света, темже воспеваем ти:

Радуйся, преподобный Иосифе, подвижниче афонский; радуйся, святаго Григория Паламы в молитве подражателю.

Радуйся, пустынный жителю и Горы Святыя украшение; чертога небеснаго славное удобрение.

Радуйся, на Горе Афонской просиявый земный ангеле; радуйся, умныя молитвы божественный учителю.

Радуйся, безмолвников цвете и благоухание; радуйся, Афона честнаго божественное благословение.

Радуйся, Иосифе, благодатнаго просвещения сподобивыйся; радуйся, сосуде Утешителева божественнаго света.

Радуйся, светильниче молитвы и видения; радуйся, радосте душевная и утешение.

Радуйся, преподобне отче Иосифе!

Кондак 1

Богоматере цвет и миро благовонное, смирения крин сладкоуханный, Иосифа Исихаста восхвалим: Иисусовы молитвы славий благоглаголив сый, трисвятую песнь той воспеваше, темже зовем ему:

Радуйся, преподобне отче Иосифе!

Молитва преподобному и богоносному отцу нашему Иосифу Исихасту.

О священная и богомудрая главо, умнаго делния поборниче, преподобне отче наш Иосифе! Ты от юности твоея в гору Афонскую вселился еси, и в пещерах и вертепах ея, Бога взыскати потом и кровию потщался еси. Оттудуже и демонов таящихся именем Страшным изгнал еси, иже многажды тебе пакости сотвориша. Обаче яко же гора непоколебим пребыл еси, и вся неистовства демонская с шумом поразил еси, и в тихую пристань безмолвия вшел еси. Идеже умною молитвою Христа, яко драгоценный Бисер приял еси. Темже убо, отче, яко пастырь сый богоподражательный, палицею молитв и сладкогласною свирелию поучений своих, стада монашествующих добре упасл еси, и на злачныя поля отеческаго предания привел еси. Помози и нам, нерадивым, ревностию твоею вжилитися и стопам твоим последовати. Научи нас, умною молитвою козни демонския побеждати, и божественныя благодати действа, в сердце своем взыскати. Да совлекши с сердец своих покрывало тьмы, сынами Света, по молитвам твоим соделаемся. И тако во свете твоих божественных деяний ходяще, прославим Светотворную и Единосущную и Нераздельную Троицу, Отца и Сына и Святаго Духа во веки веков.

Тропарь преподобномуИосифу Исихасту, глас 5

Преподобне отче Иосифе, Господу и Богородице свято послужив, в Богом обетованную в Рай новую землю под Небом новым возшел еси, и нам, недостойным вселения в сих, письмены твоими и молитвами спастися помози.

Кондак преподобномуИосифу Исихасту, глас 8

Избранный Господом Иисусом в подобныя древним ученики, Духом Животворящим Святым осолился еси, ещеже и братию самоотверженную и смиренномудрую возрастив, деланию молитвенному непрестанному обучил еси, и ради обретения ими совершенных даров, даже до смерти пощением, бдением и трезвением подвизался еси, ныне же о Господе утешаешися, со Ангелы и святыми блаженствуеши и слышиши: Радуйся, Исихасте Великий Иосифе, новый Афонский пустынниче и монахов наставниче.

Тропарь иной, глас 1

Пустыни Афонской цвете благоуханный, древним единонравный подвижниче, пламенный ревнителю молитвы непрестанной, благодати истинный послушниче, Господа всем сердцем возлюбивый, Иосифе преподобне, монахов наставниче, моли Христа Бога Спасителя душ наших от сна лености воздвигнуть нас к покаянию.

Кондак иной, глас 8

Вышния добродетели Богом наученный, образ был еси учеником твоим, воздержанию, смирению, наипаче же послушанию тех наставляя, и, яко пастырь, стаду своему предходя, добре шествовати путем жестоким пустыннаго жития научил еси. Темже ублажаем тя, Иосифе преподобне, моли Христа Бога прощение даровати чтущим любовию святую память твою.


Источник: Акафист преподобному и богоносному отцу нашему старцу Иосифу Исихасту: в двух редакциях с кратким житием / пер. с новогр. Родионов О.А. – Москва: Паломнический центр «Благословенный Афон», 2020. – 69 с. ISBN 978–5–6042753

Комментарии для сайта Cackle